﻿ITANTA-NAKARI.
49.
Ari ikaimakiri Jacob maaroni itomi-payi, ikantakiri: “¡Notomí! Pimpoka-jiiti okaakiini, tima nonkaman-tatyiimiro onkarati awishimo-timiri apaata. 
¡Itomi-payi Jacob! Pimpoka-jiiti okaakiini pinkiman-tyaari. Pinkimisantiri asitamiri Israel. 
Awiroka Rubén, nojiwari notomi, Nosintsinka nowimi, tima awirokataki jiwatapain-tsiri, Awiroka itakaro ipinkathai-tzimi, otzimimo-tzimi piñaapironka. 
Ari okaratapaaki piriipirotzi, tima pikimi-tapiinta-witaro osinchaatzi nijaa. Okantakaaro piwinka-tharyaa-kinaro nomaa-minto, piman-takanaro notsipatari. 
Awiroka Simeón aajatzi Leví, pirintzi piwawakaa-jiita, Tima piwamaa-minto piwayitajiro pichakopiti. 
Airo notsipa-taami tsika papato-tapiinta. Tima oshiki otyaanakami pairani pimasirinka, piwamaaki oshiki atziri. Oshiki pisamasiryaakari, pikaraa-kitzi-yitanakiri ipira. 
Kowiinka okantanaka piyatsimanka, Tima omaapiro pikisanaka. Naaka oiwaraa-jimini, pinampi-tajyaaro tsika aakotajiro iwairo Jacob, Tima nonasiyi-tajyaari pincharini-tajyaari anta tsika impaitaitiro Israel. 
Irooma awiroka Judá, kantakaapiro iwajimi pirintzi-payi. Pairika-kintsiyi-tajiri inkarati kisaniin-timini. Ipinkatha-yitajimi pirintzi-tajyaari. 
Awiroka notomi, Judá, pikimityaari yanini kashikari inkara-takiro iwari yatsikani. Inaryaa-waita kipatsiki, yoiyoota ikimi-takotari antari kashikari. ¿Ipaitama matironi iñaasirinkajiri? 
¡Notomí! ¡Judá! Ari intzimaji pincharini-tajyaari, irasi iwiro impinkatha-riwintanti, Tikatsi aapitha-tajirini iwinkatha-riminto yairikakiri, Irojatzi impokan-tajyaari asipiro-tyaaroni iwinkatha-riminto, Iriitaki inkimisan-tawajiri nasiyitachari ishininka-tawakaa. 
Iriitaki oosotako-tirini ipira anta oponkitziki pankirintsi imiritaitari, Ikiwantyaaro iithaari imiritaitari, tima oshiki-piro-tatzii chochoki. 
Tima kamiithaaki ikantaka, anaanakiro ochiinkaatzi imiritaitari. Kitamaaro okantayita iraiki anaanakiro okitamaarotzi oyaaki thomitsi. 
Iriima Zabulón inampi-tajyaaro inkaari-thapyaaki, Tsika aatapiintaji amaatako-mintotsi. Tsika anta owiraa-thapi-tajyaa Simaaki. 
Iriima Isacar inkimi-tajyaari sintsiri ipiraitari ikyaakai-tziri, Iriitaki otyiirowa-piintachani ikyaapiintaitzi airo inintzi yaniitaji. 
Ikanta iñaawakiro kamiitha okantanaka nampitsi, kamiitha imakoryaa-waitaitzi, Oiyootanaka yanatakaitiri. Tima mairi ikantaka ikimi-takai-takari ompirataari. 
Iriima Dan iwakowin-tajiri ishininka, Ikimitaakiro pasini-payi ipinkatha-riwin-tajiri ishininka-payi Israel-iiti. 
Inkimi-tajyaari Dan maranki isaiki awotsi-nampi, Iriitaki atsika-kitairini ikyaakoitari, Iwaryaa-maityaari kyaakotariri. 
¡Pawá! Nawintaami awiroka piwawisaako-tajina. 
Yoka Gad, oshiki imaimani-tajiri owayiri-payi. Iro kantacha, aritaki pipiya-takyaari. 
Yoka Aser, oshiki-tzimo-tajiri iwankiri iwajyaari, Iroopirori owaritintsi onatyii, onkimi-tajyaaro iwariti pinkatha-ripirori. 
Yoka Neftalí, inkimi-tajyaari maniro tikatsi asitako-waitirini, Owaniinka ikantayitya iwaiyani. 
Yoka José, ikimitaro pankirintsi oshooka-thapyaa-tziro nijaa. Oshiki okithonitzi, Ithonka atiiyi-takiro otanto nampitsi. 
Oshiki ikisaniin-tajiri asiwinthatarori piyaamini, Imanatantaro chakopi, Yasi iwiro iñaasirinkai-tziri. 
Tima yoka José sintsishimpa ikantaka irirori, Oisokiro iwakiro ipyaamini. Ikamintha Iwawani Jacob Sintsi-pirori, Okamintha iwairo aamaakowin-tantaniri, kisakowin-tariri Israel. 
Inkamintha Iwawani piri, iriitaki nisironka-tajimini. Iriitaki Pawa Sintsi-pirori, tasonka-wintajimini. Opoñaaro itasonka-wintani jinoki inkitiki. Opoñaaro itasonka-wintani inthopoyaaki inkaariki. Opoñaaro itasonka-wintani owaaki thomitsiki aajatzi yamaarin-tsiki. 
Tima okaratzi iyomitaanajamiri piri intasonka-wintantai-tyaamiri, Anaanakiro okaratzi iyomitaakinari asitanari naaka. Airo othonkaa, irojatzi apaata ompyaan-tajyaari otzisi. Osiyawai-takaro osaika-patziito-tantyaarimi José iroka-payi yomitaantsi, Tima iriitaki iyoshitaikiri ikarajiitaki iririntzi-payi, iriitaki iriipiro-taatsini. 
Yoka Benjamín, inkimi-tajyaari atsikan-taniri. Yananinka iwawai-tamanaja yatsikani, Okanta oshiityaaki yanti-tawakaari tzimaaran-tapaintsiri.” 
Iriitaki itomi-payi Israel, tsika impoñiiyaa inkarati 12 nasitachani ishininka-tawakaa-jiita. Irootaki iroka ñaantsi-payi ikaminaa-kiriri iriri intasonka-wintaitan-tyaariri aparo-payi ikarajiitakira. 
Ikantakiri itomi-payi: “Kapichiini-tapaaki nonkaman-tyaari. Nonintzi nontsipa-tajyaari nocharinini, pinki-tataina anta impiritanakiki iwaniki Efrón ishininka Tharowan-taari-nisatzi. 
Ipaitai-tziro anta Apitinaki, yaminakoi-tziri isitowa-piintzi ooryaatsiri, anta Yiinkantomasi Owintiniki. Tima irootaki yamanan-takiri pairani acharinini Abraham itsipataakiro iwani Efrón, aajatzi irasi Tharowan-taari-satzi tsika okitataaja iina. 
Tima ari ikitai-takiri nocharinini Abraham itsipataaro iinani Sara, aajatzi nirini Isaac itsipataaro asitanarini Rebeca. Aritaki noki-tatairori aajatzi naaka noinani Lea. 
Tima ironta kipatsi aajatzi omoronaki anta, iriitaki ishininka Tharowan-taari-satzi piman-taki-niriri pairani acharinini.” 
Ikanta ithonkakiro Jacob iyomiyi-tanajiri itomi-payi, onaryaanaka, kamanaki. Jataki itsipa-siri-tapaajari icharinipayi. 
