﻿Men Korint II.
2.
IET me pein wai kileledier, i jolar men pwar won komail ni ai injenjued. 
Pwe ma i kainjenjuedi komail, ij me pan kak kainjenemau ia la? Ma kaidin i eta, me kainjenjuedelar re i. 
Mepukat i intin won komail er, pwe i ender injenjuede kin irail, me i en peren kida, ni ai pan pwara won komail. A i kamelele komail karoj, me ai peren pil pan omail karoj. 
Pwe ni lokolok o majak en nan monion i me lapalap, me i intin kilan janejan, kaidin pwen kamauki komail, a pwe komail en ajada, duen ai limpok on komail kaualapia. 
A ma meamen wiada kainjenjued eu, kaidin nai eta, me a kainjenjuedi, pwe i ender non kapun on, a ele komail karoj. 
A kalokolok jan ren me toto itar on i. 
Mak eta komail en maki on I o kamaitala, pwe a de lodi on injenjued laud. 
I ari panaui komail, komail en kajale on i omail limpok. 
I karepen ai intin won komail, pwe i en aja, ma komail me pun o peiki on ni meakaroj. 
A ma komail pan makeki ow meamen meakot, nai pil pan maki on i. A ma i makeki on amen meakot, i makekier pweki komail wilianti Krijtuj. 
Pwe Jatan ender kotaue kitail, pwe kitail ajaer duen a lamelam. 
A ni ai pwaralawer Troaj, pwen padaki ronamau en Krijtuj, o wanim eu me ritida mo i on Kaun O, 
I jota injenemaula, ni nen i, pweki ai jota diar ri ai Tituj. I ap kamurimur on irail daulul won Majetonien. 
A danke on Kot, me kotin kaloe kitail di pan Krijtuj, ap kajanjaleki kitail pomau en a erpit waja karoj. 
Pwe kit me pomau en Krijtuj on Kot ren me pan dorela o ren me pan lokidokila kan. 
On iet akan po en mela on kamela, a on me tei kan po en maur on kamaurela. A ij me kon on mepukat? 
Pwe kit jo dueta me toto, me kin liliajojaki majan en Kot; a at padak me melel, o a pwili jan Kot, o kin wiaui mon Kot pan Krijtuj. 
