﻿Hebreo.
1.
Tagnaꞌ tiꞌ Empuꞌ nengampang dut mengeꞌ keupuꞌupuan tyu pebiyaꞌ dut mengeꞌ tarus ye dut iba-ibang timpu bekeꞌ iba-ibang pepebiyanan. 
Segwaꞌ itueng emuring eldew ya nampang pebiyaꞌ dut kenyeng yegang na si Jesus. Ya piniliꞌ et Empuꞌ na memusakaꞌ et ginsan neng ginis. Sampay negmendyari Empuꞌ et sengkelungsuran pebiyaꞌ ating yegang ye. 
Ating Yegang et Empuꞌ binyar et ketaasan et Empuꞌ bekeꞌ lulus na kebuneyagan et kenyeng pegmendyaring Empuꞌ. Ating Yegang et Empuꞌ negpeteteg et ginsan ginis pebiyaꞌ dut kenyeng bebresen na mekepengyedian. Pegketbes ye na mebuwat pasal pegugad et salaꞌ tyu, ya narung ne dut tampaꞌ kewanan et Empuꞌ Amaꞌ neng metaas dut langit. 
Ating Yegang et Empuꞌ negmendyaring metaas banar dut mengeꞌ dereakan, angkansa ating ketaasan neng nepusakaꞌ ating Yegang et Empuꞌ negmendyaring lebing metaas nega set kedyeng ketaasan. 
Sabab kaya sinugid et Empuꞌ misan ingyan dut mengeꞌ dereakan ye na kwan, “Ikew yegang ku. Tiban negmendyaring Amaꞌ mu aku.” Etawa kaya sinugid et Empuꞌ dut sebarang dereakan ye, kwan, “Aku Amaꞌ mu, indyari ikew negmendyaring Yegang ku.” 
Megdemikian ganang pinesurung ye ne dut sengkelungsuran kenyeng bugtung ne Yegang, kwan ye, “Ya pengempuen et ginsaʼt dereakan.” 
Pasal gasi dut mengeꞌ dereakan, sinugid ye, “Binwat mengeꞌ dereakan Ku samat deres, daken tetehagen samat deleg et apuy.” 
Segwaꞌ pasal dut kenyeng yegang, kwantin penugid ye, “U, Empuꞌ, dimung Kemilikan kaya seskeran bekeꞌ ketignaan megmendyaring kepengyedian et dimung pengmilikan. 
Pegmerganen mu pasal ketignaan bekeꞌ pegisgan mu sebarang mengeꞌ mereraat. Angkansa Aku, misan dimung Empuꞌ, nemadlis ke dut lebing metaas neng gerar kasga ginsan neng sebayaꞌ mu, sampay binggey Ku dimu enep.” 
Megdemikian sinugid ye gasi, “Dut sengkepunan, u Begerar, binwat mu ating dunya, bekeꞌ ating langit keremut negpendyari. 
Segwaꞌ dye mepapas, temed ikew dumaran. Mantang dye samat repanan mebukluꞌ. 
Lulunen mu dye samat kumut. Samat repanan neng sembian. Segwaꞌ ikew dumaran, bekeꞌ diki ke matey misan ingyan.” 
Kengyan masa kaya sinugid et Empuꞌ dut misan sinung dereakan, “Marung ke dut tampaꞌ ku seked buwaten kuʼt tungtungan et tiked mu sebarang mengeꞌ kebanta mu.” 
Diki be ginsaʼt mengeꞌ dereakan atin mengeꞌ dinaak supaya tumabang dut sebarang memusakaꞌ et kepuwasan? 
