﻿Ezekiel.
27.
Es vatt fumm Hah is zu miah kumma un hott ksawt: 
“Mensha-kind, mach en leicht-leet veyyich Tyrus. 
Sawk zu Tyrus, di shtatt es draus im say shtayt, un es es doah is fa feel leit vo handla am say noch, sawk zu iahra, dess is vass da Awlmechtich Hah sawkt: ‘Du sawksht, oh Tyrus, “Ich binn da alli-shensht.” 
Dei haymet is draus im say; selli es dich gebaut henn, henn dich gebaut vi's alli-shensht shiff. 
Si henn dei blanka gmacht mitt fir-hols funn Senir; Si henn cedar-hols funn Lebanon grikt fa dei maest-pohl macha. 
Si henn aycha-hols grikt funn Basan fa dei paeddels macha; si henn dei benk un deck gmacht funn box-hols aus Cyprus, un henn's hols eiksetzt mitt ivory. 
Dei sail voah fei ausgnayt linnen funn Egypta, fa ksenna sei funn veit ab. Dei sunn-dichah voahra bloh un purpel funn di islands funn Elisa. 
Di leit funn Sidon un Arvad voahra dei boat paeddel-gnechta. Di glanda mennah funn Tyrus voahra dei shtiah-leit. 
Glandi shaff-leit funn Gebal voahra bei diah fa dei rissa halda funn rinna. Awl di shiffah uf em say un iahra shaff-leit sinn zu diah kumma fa kawfa un fakawfa. 
Mennah funn Persia, Lud un Lybia voahra dei greeks-leit. Si henn iahra shields un greeks-heet uf dei vanda kanka, un dess hott diah grohsi eah gevva. 
Di mennah funn Arvad un dei greeks-gnechta voahra uf dei vanda gans rumm. Di mennah funn Gammad voahra in dei tavvahs. Si henn iahra shields uf dei vanda kanka, un henn dich so shay gmacht. 
Tharsis hott kandeld mitt diah veil du so reich voahsht mitt sach. Si henn kandeld mitt silvah, eisa, tin un lead fa dei sacha. 
Javan, Thubal un Mesech henn aw kandeld mitt diah; si henn bunds-gnechta, un sach gmacht funn bronze gebrocht fa handla mitt diah. 
Mennah funn Thogarma henn shaff-geil, greeks-geil un aysla gebrocht fa handla mitt diah. 
Di mennah funn Dedan henn kandeld mitt diah, du hosht fakawft zu feel leit am say nohch. Si henn dich betzawld mitt ivory tusks un ebony-hols. 
Syria hott kandeld mitt diah veil du so feel sach katt hosht. Si henn emerald-shtay, purpel duch, ausgnayt duch, fei linnen duch, coral un rubies kandeld fa dei sacha. 
Juda un Israel henn aw kandeld mitt diah. Si henn vaytza funn Minnith, kucha, hunnich, ayl funn ayl-baym un shmiah fa di granka gebrocht fa handla mitt diah. 
Damascus hott kandeld mitt diah veil du so feel sach katt hosht, un reich voahsht mitt alli sadda shtoft. Si henn kandeld mitt vei funn Helbon un mitt veisi vull. 
Di Daniddah un Javaniddah henn dei sach gekawft funn Usal; si henn sheinich eisa, un kassia un balsam shpeis kandeld fa dei sach. 
Dedan hott saddel blankets kandeld fa dei sach. 
Arabia un awl di feddahshti funn Kedar henn kandeld mitt diah mitt lemmah, shohf-bekk un gays. 
Di kawf-leit funn Saba un Ragma henn kandeld mitt diah. Si henn betzawld fa dei sacha mitt di beshta shpeises, keshtlichi shtay un gold. 
Haran, Kanne, Eden un di kawf-leit funn Seba, Assur un Kilmad henn kandeld mitt diah. 
Si henn kandeld mitt shayni glaydah, bloh un ausgnayt duch, kfeahbdi keahbets un shtrikk es goot gmacht voahra. 
Di shiffah funn Tharsis henn awl dei sach gedrawwa. Du voahsht nunnah-glawda mitt feel shay sach, draus in di mitt fumm say. 
Dei boat paeddel-gnechta henn dich naus in da say gezowwa. Avvah da east vind hott dich in shtikkah fabrocha, draus in di mitt fumm say. 
Dei reichheit, kawf-sach un fakawf-sach dei shiff-leit, dei shtiah-leit, dei zimmah-leit, dei kawf-leit, awl dei greeks-leit un awl selli es uf em shiff sinn zayla unnah gay im say, uf em dawk es du falsht. 
Di lendah am say nohch shidla vann di shtiah-leit naus greisha. 
Awl di boat paeddel-gnechta falossa iahra shiffa; di shiff-leit un shtiah-leit zayla uf em land nohch shtay. 
Si zayla laut greisha un biddahlich heila ivvah dich; si shmeisa shtawb uf iahra kebb, un rolla in di esh. 
Si shayfa iahra kebb fa dich, un doon sekk-glaydah oh. Si heila mitt angsht in iahra sayl, un doon biddahlich veina. 
Vi si heila un veina ivvah dich, dann singa si dess leicht-leet: “Veah is vi Tyrus draus im say, dee shtatt es shtill gmacht is?” 
Vo dei kawf-sach naus uf da say ganga is, hosht du feel leit satt gmacht; mitt awl dei reichheit un kawf-sach, hosht du di kaynicha uf di eaht reich gmacht. 
Nau bisht du fabrocha beim say, un bisht drunna im vassah; awl dei kawf-sach un dei gnechta, sinn unnah ganga mitt diah. 
Awl selli am say nohch, sinn fashtaund ivvah dich; iahra kaynicha sinn yammahlich fagelshtaht, un furcht is uf iahra ksichtah. 
Di kawf-leit in di lendah peifa ivvah dich in shpott; veil du zu en shreklich end kumma bisht, un zaylsht nee nimmi sei.’” 
