﻿Hohches Leet.
6.
Vo is dei beleebdah anna ganga, du shenshti unnich veibsleit? Vellah vayk is eah ganga, so es miah helfa kenna gukka fa een? 
Mei beleebdah is nunnah an sei goahra ganga, zu di blumma-goahra funn balsam fa sei shohf vayda im goahra un fa lilya-blumma geddahra. 
Ich binn mei beleebdah seini un mei beleebdah is mei; eah vayt sei shohf unnich di lilya-blumma. 
Du bisht so shay es di shtatt Thirza, mei beleebdi, so leeblich es Jerusalem un shreklich vi en drubb greeks-gnechta. 
Dray dei awwa vekk funn miah, fa si halda mich kfanga. Dei hoah sinn vi en drubb gays es am nunnah gay sinn fumm Berg Gilead. 
Dei zay sinn vi en drubb shohf es yusht gvesha voahra. Yaydah hott zvilling lemmah kens funna is laynich. 
Dei bakka zvishich dei hoah-zebba sinn vi halvi grannat-ebbel. 
Es mechta sechtzich kaynich-veivah sei un achtzich nayva-veivah, un feel mayt unni nambah, 
avvah di aynsisht unni faylah in sich is mei daub, see is iahra maemm iahra aynsisht maydel, un is di leebsht es see geboahra hott. Di yunga mayt sayna see un haysa see ksaykend, un di kaynich-veivah un di nayva-veivah lohva see. 
Veah is dess es gukt vi's meiya-roht, shay es da moon, un hell vi di sunn, un heilich vi di shtanna am rumm gay? 
Ich binn nunnah an da niss bamgoahra ganga fa di neiya blansa sayna im deich, fa sayna eb di vei-shtekk kshpraut henn un eb di grannat-ebbel am bleeya sinn. 
Eb ich's gvist habb, hott mei sayl mich zu di kaynich-veyya funn mei leit gnumma. 
Kumm zrikk, kumm zrikk, oh Shulamiddah, kumm zrikk, kumm zrikk, so es miah dich vatsha kenna! Favass vellet diah see vatsha es vann see dansa dayt zvishich zvay roiya greeks-leit. 
