﻿ዋሐንሳ ቆንጭꬅ.
1.
ኤለራ ይአደስ የዘ ባዝ ፋ አሩንꬃና ቤሳደ ፋና ጾዚ የሱስ ክርስቶሳስ እንግደ ቆንጭꬅታ Ꮉኖ። የሱሳ ፋ ኪታንቾ ኪቲ፥ ፋ አርዘ ዋሐንሳስ ቆንጭꬅቶ ቤዝዳ። 
ዋሐንሳ ጾዘ ቃላን፥ የሱስ ክርስቶሳ ማርካትꬅ ብእዳኖን ኦችዳኖ ኡባ ማርክꬍዳ። 
Ꮉና ኡባ ይአደስ ዎደ ኡክደ ግሾ Ꮉና ትንቢተ ቃልቶ ናባብዘ ኦደን አንጅንትዳያ፤ ማህ Ꮉና ቃልቶ ስእዙንꬅን ጻፍንትደ ቃልቶ ናግዘ ኡቡንꬅ አንጅንትዱንꬃና። 
Ꮉይ ዳብዳብዛ፥ ዋሐንሳፓ፥ እስያ ሳአ የዘ ላፑን ዎሳ ኬꬁንስስ ጻፍንትዳ። ዛጋን፥ Ꮉተን የዘ፥ ቲኖስን ዮኦደስ የዘ ጾዛፓ፥ ማህ ኤ አራትዘ ቲንተ የዘ ላፑን አያኑꬃፓ፥ ይኒ ፋና፥ Ꮉይቆፓ ደንዶራ ቲኖ ማቅደፓ፥ ሳአ ካቱንꬃና አህዘ አማንꬅዘ ማርካ ማቅደ የሱስ ክርስቶሳፓ፥ አꬎ ኬሃትꬅን ሳሮትꬅ ይንትስ ማቀ። የሱሳ ኑና ሲቃነ፥ ማህ ፋ ሱꬅትራ ናጋራ አሮትꬃፓ ኑና ዋሎ ከስዳ። 
ኑኒ ጾዘ ኤ አዳይስ ኦቾደ ጋር ኑና ካእቱምተ ካህኑንꬃና ማህዳ። ኤስ መꬍናፓ መዽና የሎደስ ቦንቾን ዎልቃን ማቀ። አምንኤ። 
ይኬ፥ የሱሳ ꬎነራ ዮኦዳ። አስ ኡቡንꬅ መለ አቶ የዝን፥ ኤዛ ጫድደ አሱንꬅ ኡባ ኤዛ በኦዳ። ሳአ የዘ አስ ኡባ ኤ ግሾ ዬኮዳ። ይና ቱሮ Ꮉኖዳ! አምንኤ። 
ዛጋን፥ Ꮉተን የዛይ፥ ቲኖስን የኦደ ላꬄ፥ ኡባፓ ዳማ ጾዚ፥ «አልፋን ኦመጋ ታና» ያጋነ ላꬂ ጾዘ። 
ታኒ፥ ዋሐንሳ፥ ይን እሻይ፥ ይንታራ ዎላ የሱሳራ ማꬋ፥ ኤ ካእቱምቶን ኤ ዳንዳእቶ ብእዳ። ታኒ ጾዘ ቃላ ግሾን የሱሳ ባዝ ማርክꬍደ ግሾ ፋጥሞ ጋዘ Ꮉꬃራ ተቅንትደ ሳአ የነ። 
ላꬄ ቃማ ታ ጌሽ አያናራ ማቂ የነ፤ ታፓ ሱባራ ሞይዘ ኦለ ፋና ዳማ ኦꬅ ስእዳ። 
የ ኦꬅዘ ታና፥ «ነ በኤዛኖ ማጻፍተ ጻፊ፥ እስያ የዘ ላፑን ዎሳ ኬꬁንስስ፥ ኤፈሶነ፥ ሰምርኔሰ፥ ጰርጋሞነ፥ ትያትሮነ፥ ሳርዴሰ፥ ፍላደልፍያን ሎዶቅያ ዳኮ» ያጋይዳ። 
ታኒ ታስ ኦህዘ ኦꬅቶ በአደስ ሱብ ማቂ ጾምፐ ጋድዘ ላፑን ዎርቃ ጾምፐ ጋድዘ በስቶ ብእዳ። 
የንꬅ ጾምፐ ጋድዘ በሱንꬅ ግዳ አስ ናአ አዝዛያ ብእዳ። ኤ ጳርጎ አፉላ ፋ ቶህቶ የልꬅ ማእዳ፥ ዎርቃ ዳንጮራ ፋ ዳዳብቶ አጭዳ። 
ኤ ኦምታን ኤ ኦማ እስንꬅታ ቦꬅ ዱሮ እስን ፋናን ሻች ፋና ቦꬅ፤ ኤ አፉንꬂ ታማ ሎጸ አዛነ። 
ኤ ቶህታ ታማ ቴሊ ዞቅደ ናሰ መቆ አዛነ፤ ኤ ኦꬅታ ዳማ ሶሶ Ꮉꬅ ግርሰ ፋና። 
ኤ ፋ ምዛቅ ኩሽትራ ላፑን ጾልንቶ አይክዳ። ኤ ዶንትፓ ላምእ ዛላራ ሌፍንትደ ማሻ ከዛነ። ኤ ስንታ አዋራ ፎእዘ አዋ ኣፈ አዛነ። 
ታ ኤዛ በእዘ ዎደ Ꮉይቂደ አስ ፋና ዪእ ኤ ቶህት ካለ ጎልእዳ። ኤ ፋ ምዛቅ ኩሽቶ ታላ አፋ ጋዲ፥ «ዣሽትፐ፤ ቲንዘን ፎልዘ ታና። 
ታኒ ደኦ የነ፤ ታኒ Ꮉይቂዳ፥ የዝን Ꮉይቼ መꬊ መꬍናስ ደኦ የነ። Ꮉይቆን ስኦለ ቁልፈ ታ ኩሽተ የነ። 
ይኬ፥ Ꮉተ Ꮉንዳኖን ቲኖፓ ይአደባዝ ነ ብእዳኖ ጻፎ። 
ኔኒ ታ ምዛቅ ኩሽተ ብእደ ላፑን ጾልንቱንꬃናን ላፑን ዎርቃ ጾምፐ ጋድዘ በስቲ ብልꬅታን Ꮉኖ፦ ላፑን ጾልንቱንꬅ ላፑን ዎሳ ኬꬁንꬅ ኪታንቹንꬃና፤ ላፑን ዎርቃ ጾምፐ በሱንꬅ ላፑን ዎሳ ኬꬁንꬃና።» 
