﻿ዋሐንሳ ጻፍደ Ꮉይꬕንꬃ ኪታ.
1.
ታኒ ዎሳ ኬꬅ ጭምዘ፥ ቱሮ ካዽዘ ጋዮሳስ ኪትደ ኪታ። 
ታ ሲቅዛዮ፥ ነ የስታ ኡባ ጊጎደ ፋና፥ ቆነ የሳደ ፋናን አያና ሸምፖ ነ ደንጎደ ፋና ዎሳነ። 
ፈቲ ፈቲ አማንዘ አሱንꬅ ይእ፥ ኡባ ዎደ ነ ቱርስ አማንንቲ የዛኖን ነ ቱርባዝ ማርክꬍደ ዎደ ታኒ ጋማ ኡፋይትዳ። 
ታ ናኡንꬅ ቱረትꬃራ የዛኖ ስእዛንፓ አꬍዘ፥ ታና ኡፋይስዘ ባዝ ባያ። 
ታ ሲቅዛዮ፥ ኡን ኔስ ዛቆ ማቅኮን፥ ነ አማንዘ አሱንꬅስ አማንንተ ኦቻ ኦቻነ። 
ኡን ነ ሲቅትባዝ ዎሳ ኬꬃ ማርክꬋነ። Ꮉተን ኡን Ꮉንግዘ ኦግተ ጾዚ ካꬍዛን ፋና ኦቺ ኡንታና ማድኮ ሎኦ ኦቻነ። 
ኡን ክርስቶሳስ ኦቾደስ ከዝተራ፥ አማኖሰ አሱንꬃፓ አኮን ኤክካያ። 
ኑኒ ቱሪ ኦቻ ኡንታራ ዎላ ኦቾደስ Ꮉንꬅ ፋና የዘ አሱንꬃና ማዶደስ ቤዛነ። 
ታኒ ዎሳ ኬꬅትስ ኪታ ጻፍዳ፥ የዝን ዎሳ ኬꬅስ ጭማ ማቆደስ ኮይዘ ድዮትራፊሳ ኑ ጋዛኖ ኤኮስ። 
ይኒ ግሾ፥ ታኒ እዘ Ꮉንግዘ ዎደ ኤ ኑላ አፋ ኦህደ ኢታ ኦህቶን ኤ ኦችደ ኦችቶ ኡባ ኦሆዳ። ኤ ይኖ ኤርዳ ጋእ፥ ኑ እሹንꬅ የእዘ ዎደ ሞኮስ። መለ አቶ የዝን፥ ኡንታና ሞኮደስ ኮይዙንꬃና ካይ ዎሳ ኬꬃፓ ከሳነ። 
ታ ሲቅዛዮ፥ ሎኦ ባዝ አዞፕ አትን ኢታ ባዝ አዝፐ። ሎኦ ባዝ ኦችዘ ኦንን ጾዘ አስ፥ የዝን ኢታ ባዝ ኦችዘ ኦንን ጾዛ ብእካያ። 
ድሜጥሮሳ ሎኦ አስ ማቅዳኖ አስ ኡባ ማርክꬋነ። ቱርታ ፋ ኦምተ ኤ ባዝ ማርክꬋነ፤ ኑንን ኤ ባዝ ማርክꬋነ፤ ኑ ማርካትꬅታን ቱሮ ማቅዛኖ ይን ኤራነ። 
ታኒ ኔስ ጻፎደስ ኮይደ ጋማ ባዝ የነ፥ የዝን ቃላመር ዋርቃተላ ጻፎደስ ኮዮስ። 
የዝን ታኒ ኡከራ ኔራ የልንቶደስ ኮያነ፤ የ ዎደ ኔራ ኦህንቶዳ። 
ሳሮ ኔስ ማቀ። ነ ላጉንꬅ ነና ሳሮ ጋነ። ኑ ላጉንꬃና ኡባ ኡን ሱንꬅቶ ሱንꬅቶ ጼጊ ታና «ሳሮ ጋይዳ» ጋኦ። 
