﻿ጳዉሎሳ ጢሞትዮሳስ ጻፍደ ቲኖ ኪታ.
1.
ኑና አሽዘ ጾዘ ኑ ኡፋይት ናግዘ ክርስቶሳ የሱስ ኪታ፥ የሱስ ክርስቶሳ ሐዋረ ማቅደ፥ ጳዉሎሳፓ፥ 
አማኖራ ታስ ቱሪ ናአ ማቅደ ጢሞትዮሳስ። ጾዘፓ ኑ አዳይፓን፥ ኑ ላꬄ የሱስ ክርስቶሳፓ አꬎ ኬሃትꬅ፥ ማሮትꬅን ሳሮትꬅ ኔስ ማቀ። 
ታኒ መቀዶንያ Ꮉንግተራ ነና Ꮉዳርዳን ፋና፥ ፈቲ ፈቲ አሱንꬅ ዎርዶ ትምርተ ታማርስዛኖ ካዮደስ ነ ኤፈሶነ ጋምኦደ ጋር ኮይዳ። 
ኡን ማደ ባይዘ ቶሴ ኦሄን ፋ ኮች ፋይደ አሾደ ፋና ኦሆ። ይኒ ፋና የዘ ባዝ ላለ መꬋነ ፋትን አማኖራ ኦችንትዘ ጾዘ ኦቻ ማዶስ። 
Ꮉይ ኪትዘስ ኣፈ ቆፍታ ጌሽ ዎዝናፓን፥ ሎኦ ቆፋፓ ቱሪ አማኖፓ በንትዘ ሲቆ። 
ፈቲ ፈቲ አሱንꬅ Ꮉኖ አሺ፥ ፋꬆሰ ላለጎ ማቅዳ። 
ኡን ጾዘ ህገ አስታማረ ማቆደስ ኮያነ። የዝን ኡን አኮ ኦህዛኮ ዎይ ቱርታ አኮ የዛኮን ኤሮስ። 
አስ ቤዝዘ ፋና ህግተ ማድንትኮ ህገ ሎኦ ማቅዛኖ ኤራነ። 
ፈቲ ባዝ ቆፖደስ ቤዛና ህገ ሎኦ አሱንꬅስ መꬍንትካያ። የዝን ህገ፥ ህገ መንꬅዙንꬃና፥ ጾዛ ጎይኖሱንꬅስ፥ ሸምፖ ዎꬍዙንꬃና፥ ናጋራንቹንꬃና፥ ጌሻትꬅ ባይዙንꬃና፥ ቱኑንꬃና፥ መለ አቶ የዝን ፋ እንቶ ዎይ አዳያ ዎꬍዙንꬃና፥ 
ኦላለ Ꮉንትዙንꬃና፥ ꬊራꬅ ꬊራꬃራ ኦላለ Ꮉንትዙንꬃና፥ አስ ባይዝዙንꬃና፥ ዎርዶ ኦህዙንꬃና፥ ዎርዶራ ጫቂዙንꬃና፥ ዎይ ቱሪ ትምርተራ የልንቶሰ አኮ ኦቻን ኦችዙንꬅስ። 
ቱሪ ትምርተ በንትዘ ቦንቾን አንጅንትደ ጾዛ ታኒ አዋጆደ ጋር ታስ Ꮉዳራ እንግደ ዎንገለ ግዳ የነ። 
ታኒ ኦችዘ ኦችተ ታስ ዎልቃ እንግደ ኑ ላꬄ ክርስቶሳ የሱሳ ጋላታነ። ታና ፋ ኦችትስ ሹሚ ይና ኦችትስ ቤዛነ ጋእ ፋይድደ ግሾ ኤዛ ጋላታነ። 
ታኒ Ꮉንፓ ቲኖ ኤዛ ጫዥዛ፥ ኤዛ ካልዙንꬃና ባይእዛያን ዋይꬅዛ ማቅኮን ታኒ ይኖ ኤርካይዛራን አማንካይዛራ ኦችደ ግሾ ጾዚ ታና ማርዳ። 
ኑ ላꬄ ፋ አꬎ ኬሃትꬅቶ ታላ አፋ ጉሲ፥ ይና አꬎ ኬሃትꬅቶ አማኖራን ሲቆራ ክርስቶሳ የሱሳ ባጋራ ታስ እንግዳ። 
«ክርስቶሳ የሱሳ ናጋራንቹንꬃና አሾደስ Ꮉና አላምተ ይእዳ» ጋዘ ቃልታ አማንንታነ አስ ኡባ ኤኮደስ ቤዛነ። ኡባፓ አꬍደ ናጋራንችዘ ታና። 
የዝን መዽና ደኦ ኤኮደስ ኤዛ አማንዘ አሱንꬅስ ታኒ አዝዘ ማቃደ ጋር የሱስ ክርስቶሳ ጋማ ዳንዳእዳ። ታኒ ኡባፓ አꬍደ ናጋራንችዘስ ጾዚ ፋ ማሮትꬅቶ ጋንꬅዳ። 
ኣፈር በንቶሰስ፥ ፈቲ ጾዘስ፥ Ꮉይቆሰስ፥ መዽና ካትዘስ፥ መꬍናፓ መዽና የሎደስ ጋላታን ቦንቾን ማቀ። አምንኤ። 
ጢሞትዮሳ፥ ታ ናአዮ፥ ዛጋ ነባዝ ናቡንꬅ ኦህደ ቃልትላ አፋ ኤቅደ Ꮉና ኪታ Ꮉዳርቶ ኔስ እንጋነ። ነ ይና ቃልቶ ካልኮ ሎኦ ኦላ ኦልንቶዳ። 
አማኖን ሎኦ ቆፋ ኔስ የዞ። ፈቱንꬅ ፈቱንꬅ ፋ ዎዝንቶ ꬋብሲ ማርካበ እዥዘ ባይꬅ ꬋብዛን ፋና አማኖፓ ꬋብዳ። 
ይኖ Ꮉንዱንꬅ ግዳ ሄመነዮሳን እስክንድረ የነ። ኡን ታማሪ ጾዛ ጫዥዛኖ አሾደ ፋና ታኒ ጻላሄስ ኡንታና አꬂ እንግዳ። 
