﻿ጳዉሎሳ ጋላትያ አሱንꬅስ ጻፍደ ኪታ.
1.
አሳፓ ዎይ አስ ባጋራ ማቅካይዝን የሱስ ክርስቶሳፓን ኤዛ Ꮉይቆፓ ደንꬅደ ጾዘ አደፓ ሐዋረ ማቃደ ጋር ኪትንትደ ታ ጳዉሎሳ፥ 
ታራ የዘ አማንዘ እሹንꬅ ኡባ፥ ጋላትያ የዘ ዎሳ ኬꬁንꬅስ። 
ጾዘ ኑ አዳይን ኑ ላꬄ የሱስ ክርስቶሳፓ ይንትስ አꬎ ኬሃትꬅን ሳሮትꬅ ማቀ። 
Ꮉና ኢታ ዎድትፓ ኑና አሾደስ፥ ኑ ላꬄን፥ ኑ አዳይ ቆፋ ፋና ክርስቶሳ ኑ ናጋርት ግሾ ፋና አꬂ እንግዳ። 
ጾዝስ መꬍናፓ መዽና የሎደስ ቦንቾ ማቀ። አምንኤ። 
ክርስቶሳ አꬎ ኬሃትꬅተ ይንታና ጼግደ ጾዛ አሺ፥ መለ ዎንገለጎ፥ ይን ኤልሲ፥ ዋይዝ ማቀዛኮ ታና ጋማ ቆፍዛነ። 
ኤ ፋ ኦምተ መለ ዎንገለ ባያ። ይንታና ባልꬆደስን ክርስቶሳ ዎንገለ ዎቢሳደስ ኮይዘ ኤራꬅ አሱንꬅ የነ ፋትን ቱሪ ዎንገለ ፈቶ። 
የዝን ኑና ማቅን ዎይ ሳሎ ኪታንቾ ማቅን ኑ ይንትስ ቲኖ ኦህደ ዎንገለፓ ዱሙዽዘ ዎንገለ ይንትስ ኦህዘ ባዝ ማቅኮ፥ ኤ ባድንትዳ ማቀ። 
Ꮉንፓ ዛጋ ኑ ጋይዳንጋራ Ꮉተን ማህ ጋነ፤ ይን ኤክደ ዎንገለፓ ዱሙዽዘ ዎንገለ ኦደን ይንትስ ኦህኮ የ አꬄ ባድንትዳያ ማቀ። 
ዬዝን፥ ታና አስ ዎይ ጾዚ ናሾደ ፋና ኮያነነ? ዎይ ታ አስ ኡፋይሶደስ ኮያነ? ታ አስ ኡፋይሶደስ ኮይዘ ባዝ ማቅኮ፥ ክርስቶሳ አሮ ማቆስ። 
ታ እሹንꬆ፥ ታ ይንትስ ኦህዘ ዎንገልታ አሳፓ ማቆሳኖ ይን ኤሮደ ፋና ታ ኮያነ። 
ታስ Ꮉይ ዎንገልዛ የሱስ ክርስቶሳ ቆንጭዝዳ ፋትን አሳፓ ኤክካያ ዎይ አስ ታና ታማርስካያ። 
ታ ዛጋ አይሁደ አማኖ የዘ ዎደ ዋይዝ የዘዛኮ፥ ታኒ አማንዙንꬃና ይቅስሞ ባይꬅ ባይአደስን ꬋብሶደስ ቡቱንትዳኖ ይን ስእዳ። 
አይሁደ አማኖ ናጎራ፥ ታ ዎደ የዘ አይሁደ እሹንሳፓ አꬋነ። ኑ አዱንꬅ ዎግትስን አꬊ ይቅስንታነ። 
የዝን ታ Ꮉጋ ታ እንቲ ሳዝተ የዝን ጾዚ ታና ዶርዳ፤ ፋ አꬎ ኬሃትꬅተ ታና ጼግዳ። 
አይሁደ ማቆሰ አሱንꬅስ ዎንገለ ኦሆደ ጋር ጾዚ ፋ ናአያ ታስ ቆንጭዝደ ዎደ ታ ኦደራን ዞርንትካያ። 
ዎይ ታፓ ቲኖ ሐዋረ ማቅዱንꬃራ የልንቶደስ የሩሳላመ Ꮉንግካያ። የዝን ታ ቲንꬊ አራበ ጋደ ቅትዳ፤ ይንፓ ማቂ ዳማስቆ ካታማ ይእዳ። 
Ꮉይꬕ በረፓ ሱባ፥ ጴጥሮሳራ የልንቶደስ የሩሳላመ Ꮉንግ ኤራ ታጶ እችን ቃማ ጋምእዳ። 
የዝን ላꬄ እሸ ያይቆባ ፋትን Ꮉንኮ ሐዋሩንꬃፓ ኦናን ታ ብእካያ። 
ታ ይንትስ ጻፍዳና ዎርዶ ማቆሳኖ ጾዘ ቲኖ ይንትስ ማርክꬋነ። 
ይንፓ ሱባ፥ ታኒ ሶርያን ክልቅያ ጋደ ቅትዳ። 
ይሁዳ የዘ ዎሳ ኬꬅ አሱንꬅ ታና ኤርካያ። 
የዝን ኡን፥ «ዛጋ ኑና ባይእዘ አꬄ፥ Ꮉተ ይና ኤ ꬋብሶደስ ኮይዘ አማንቶ ሳባካነ» ያጋዛኖ ስእዳ። 
ስእዱንꬅ ኡባ ታ ግሾ ጾዛ ጋላትዳ። 
