﻿2 ቆሮንቶሳ.
12.
ጬቅንተ ፋꬆሳኖ ታ ኤራነ። የዝን ጬቅንቶደስ ኮሽኮ፥ ላꬃፓ ኤክደ ቆንጭꬅተ ጬቆዳ። 
ታጶ ኦይዲ በረፓ ቲኖ፥ ክርስቶሳ አማንዘ ፈቲ አꬄ Ꮉይꬓንꬆ ሳሎ ኤክንትዳኖ ታ ኤራነ። የ አꬄ አሾራ ዎይ አሾ ባይꬅ ቅተዛኮ ታ ኤሮስ፤ ጾዚ ኤራነ። 
የ አꬄ ኤክንትዳኖ ኤራነ። የዝን ኤ አሾራ ዎይ አሾ ባይꬅ ኤክንተዛኮ ታ ኤሮስ፤ ጾዚ ኤራነ። 
የ አꬄ ጋናተ ኤክንቲ አስ ቆንጭሳደስን አስ ኦሆደስ ዳንዳኦሰ ባዝ ስእዳ። 
ታኒ የ አꬄራ ጬቅንቶዳ፥ ፋትን ታኒ ታ ላብꬅቶ ፋትን ታ ግዳ ጬቅንትዘ ባዝ ባያ። 
ታኒ ቱርቶ ኦህንትዛን ግሾ ጬቅንቶደስ ኮይኮን ኤያ ባያ። የዝን አስ ታ ኦችዛኖ በእዛንፓን ስእዛንፓ አꬂ ቆፓመ ጋር ጋእ ጬቅንተ አሻነ። 
ታስ ቆንጭደ ዳማ ቆንጭꬅተ ታ ኡቱርታመ ጋር ታና ዋይሶደስ ታ አሽቶ ዡልትዘ ጻላሄ ኪታንቾ ታስ እንግንትዳ። 
Ꮉይ ዋይꬅዛያ ታፓ Ꮉሶደ ጋር ታኒ ላꬃ Ꮉይꬕ ቶሄ ዎስዳ። 
የዝን ላꬂ፥ «ታ ዎልቅታ ነ ላብꬅትራ ቆንጭዘ ግሾ ታ አꬎ ከሃትꬅታ ኔስ ማቃዳ» ጋይዳ። ክርስቶሳ ዎልቅታ ታ ግዳ ቆንጮደ ጋር ታ ላብꬅተ ኡፋይትተራ ጬቅንታነ። 
ታኒ ክርስቶሳ ግሾ ላቢዘ ዎደ፥ ጫዥንትዘ ዎደ፥ ዋይንትዘ ዎደ፥ ባይእንትዘ ዎደ፥ ማꬍንትዘ ዎደ ታ ላብꬅተ ኡፋይታነ። አኮስ ጋይኮ፥ ታ ላቢዘ ዎደ የ ዎደ ምንጋነ። 
ታኒ ኤያ አስ ፋና ጬቅንትዳ። ይኒ ጋራ ታ ጬቅንቶደ ፋና ኦችደ ይንታና። ታ፥ ታ ኦምተ ኤርንቶሰ አስ ማቅኮን፥ «ዳማ ሐዋሩንꬃና» ጋእንትዙንꬃፓ ኤሮስ። ይኖ ታስ ማርክꬋደስ ቤዘ ይንታና የሻ። 
ታ ይን ግዳ የዝተራ ዳንዳአራ ኦችደ ማላ ባዝታን ክለ ባዝታ ታ ቱሪ ሐዋረ ማቅዳኖ ቤዛነ። 
ታ ይንትስ ቶፎ ማቅካይዛራ አትዳንፓ መለ ዎሳ ኬꬃፓ ይን አኮራ ኤርዶ? ይና ባላ ማቅኮ ታና ማሮተ። 
ታኒ ይንታጎ Ꮉማደስ ጊግንቶደራ Ꮉና ታስ Ꮉይꬓንꬃ። ታ ይንታና ፋትን ይንትስ የዘ ባዝ ኮዮሰ ግሾ ይንታና ዋይꬆደስ ኮዮስ። የልዱንꬅ ፋ ናኡንꬅስ ቆሎ ምንጃነ ፋትን ናኡንꬅ ፋና የልዱንꬅስ ቆሎ ምንጆስ። 
ታ ይን ግሾ ታስ የዘባዝቶን ታናን አꬂ እንግኮን ታና ኡፋይሳነ። ዬዝን፥ ታኒ ይንታና ይኒ ጋራ አꬂ ሲቅዘ ዎደ ይን ታና ኤራꬅ ሲቃነ? 
ማቅኮን፥ ታ ይንትስ ቶፎ ማቅካያ፤ ዋይꬅካያ፤ የዝን ይንታና ጭመራን ገነራን አይክደባዝ ይንትስ አዝካይዛራ አታማ። 
መለ አቶ የዝን፥ ታ ይንታጎ ኪትደ አሱንꬃፓ ይንታና ጭምደ አስ የነ? 
ትቶ ይንታጎ ቅቶደ ጋር ታኒ ዎስዳ፤ ማህ አማንዘ እሻ ኤራ ዳክዳ። ዬዝን፥ ትቶ ይንታና ጭምዳ? ኑኒ ኑ ኦችቶ ፈቲ አያናራ ኦችካነ? ማህ ኑ Ꮉንታን ፈቶ ባነ? 
ኑ ኡባ ዎደ ይን ቲኖ ኑና ጽልሳደስ ሞትንቶደባዝ ይንትስ አዛነ? ኑ ክርስቶሳ ግዳ የዚ ጾዘ ቲኖ Ꮉኖ የሎደስ ኦህነ። ኑ ሲቆ እሹንꬆ፥ ኑ Ꮉኖ ኡባ ኦችዛና ይንታና ድቾደስ። 
ታ ይንታጎ Ꮉንግዘ ዎደ ኦደ ኤርደ ይን ታ ኮይዛንጋራ ይአንጽኮ፥ ማህ ታንን ይን ኮይዛንጋራ ይእ የልንታንጽኮ ጋእ ዣሽታነ። ማህ ኦደ ኤርደ ይን ግዳ ላለ፥ ቃናተ፥ ዥሎ፥ ፋና ካ፥ ዝግርስ፥ አስ ሱንꬅ ኢሰ፥ ኡቱራን ካችን የዛንጽ አታማ ጋእ ዣሽታነ። 
ታኒ ላምእንꬃ ይንታጎ Ꮉንግዘ ዎደ ጾዚ ይን ቲኖ ታና ዬልሳዳ ጋእ ዣሽታነ። ዛጋ ናጋርቶ ኦቺ ይና ፋ ኦችደ ቱናትꬃፓ፥ ኦላለ Ꮉንታፋን ዬልዘ ኦቻፓ ማቅካይዘ አሱንꬃና ብእ አዛንካይዛራ አሾስ ጋእ ዣሽታነ። 
