﻿ጳዉሎሳ ቆሮንቶሳ አሱንꬅስ ጻፍደ ላምእንꬃ ኪታ.
1.
ጾዘ ቆፋራ የሱስ ክርስቶሳ ሐዋረ ማቅደ ጳዉሎሳን፥ ኑ እሸ ጢሞትዮሳ፥ ቆሮንቶሳ ግዳ የዘ ጾዘ ዎሳ ኬꬅትስን አካያ ጋደ የዘ ጾዘ አስ ኡቡንꬅስ ጻፍደ ኪታ። 
ጾዘ ኑ አደፓን ላꬄ የሱስ ክርስቶሳፓ፥ አꬎ ኬሃትꬅን ሳሮትꬅ ይንትስ ማቀ። 
ማሮትꬅ አደስ፥ ኡባ ዎደ ኑና ምንꬅꬅዘ ጾዘስ፥ ኑ ላꬄ የሱስ ክርስቶሳ አደስ ጋላታ ማቀ። 
ጾዚ ኑስ እንግደ ምንꬅꬅተ፥ ማꬋ የዙንꬃና ኑ ምንꬅꬆደ ፋና ጾዚ ኑና ኑ ማꬍተ ኡባ ምንꬅꬃነ። 
ኑኒ ክርስቶሳራ ጋማ ማꬍተ ሻክንትዳን ጋራ ማህ ኑኒ ኤ ጋማ ምንꬅꬅተ ምንጎዳ። 
ኑኒ ማꬋ ኤክኮ ይና ይንታና ምንꬅꬆደስን ይንታና አሾደስ። ማህ ኑኒ ሚንግኮ ኑኒ ገንጭደ ማꬍት ፋና ይንትን ገንጭ፥ ጾዚ ይንትስ እንግዘ ምንꬅꬅተ ምንጎዳ። 
ይን ኑ ኤክደ ማꬍት ጋር ኤኪ፥ ኑ ምንꬅꬅተ ሻክንቶዳኖ ኑ ኤርዘ ግሾ ኑ ኡፋይስታ ይን ግዳ ምንꬅ። 
ኑ እሹንꬆ፥ እስያ ጋደ ኑና የልደ ማꬍቶ ይን ኤሮደ ጋር ኮያነ። ይና ኑና የልደ ማꬍታ ኑ ዎልቂትፓ ዴጽን፥ Ꮉይቂካይዛራ አቶስ ጋእ ኡፋይስ ጋችዳ የሻ። 
ኑኒ ኑላ Ꮉይቆ ፍርዳ ፍርድንትደ ፋና ቆፕዳ። የዝን ኑኒ ኑ ኦምተ ማቅካይዝን፥ Ꮉይቂዱንꬃና ደንꬅዘ ጾዘላ አማንንቶደ ጋር ይና ይእዳ። 
ጾዚ ይኒ ጋር ኢታ Ꮉይቆፓ ኑና አሽዳ፤ Ꮉተን አሾዳ፤ ቲኖስን ኤ ኑና አሾዳ ጋእ ኤ ግዳ ኡፋይስ ጋዳነ። 
ዎሳራ ኑና ማዶተ። ጋማ ዎሳ ባጋራ ጾዘ ማደ ኑ ደንግዘ ዎደ ጋማ አሱንꬅ ኑ ግሾ ጾዝ ጋላታነ። 
ኑኒ ኑ ጌሽ ዎዝንተ ጬቅንታነ። ኑኒ Ꮉና አላምተ የዝደ የስተ አꬂ ኑ የዝደ የስተ ቱረትꬃራን ሱረትꬃራ ይንታራ የዝዳ። ይናን፥ Ꮉና አላመ ጭንጫትꬅተ ማቅካይዝን ጾዘ አꬎ ኬሃትꬅተ። 
ኑ ይንትስ ጻፍደ ዳብዳብዛ ይን ናባቦደስን ቆፖደስ ዳንዳእዘባዝ ፋትን መለ ባያ። ይን ኤዛ ቆፖደስ ዳንዳእዛኖ ታ አማናነ። 
Ꮉተ ይን ኑ ባዝ ኤራꬃር ኤራነ፥ የዝን ቲኖስ ሎይꬂ ኤሮዳኖ ታ አማንንታነ። ኑ ላꬄ የሱሳ ማቅዘ ዎደ ኑኒ ይን ግዳ ጬቅንትዳን ፋና ይንትን ኑ ግዳ ጬቅንቶዳ። 
ይኖ ታኒ ሎይꬂ ኤርደ ግሾ ይን ላምእንꬃ ማድንቶደ ጋር ቲንꬊ ይንታጎ Ꮉማደስ ቆፋ አጭዳ። 
ታኒ መቀዶንያ Ꮉንግ የይጋፓ ማቂ ይንታና በአዳ። ታኒ የይጋፓ ይሁዳ Ꮉንግዘ ዎደ ይን ታና ሞይዞዳ ጋእ ቆፕዳ። 
ታኒ ይኖ ጋእተ አኮ ኦቾደስ ቤዛኮ ኤሮሰ አስ አዛነ? ዎይ ታኒ ታ ቆፍቶ አጭዘ ዎደ አስ ቆፋ ጋር፥ ፈቲ ቶሄ «ዬ» ማህ ፈቲ ቶሄ «አደ» ጋዘ አስ አዛነነ? 
የዝን ጾዚ አማንንትዛያ ማቅደ ግሾ ኑ ይንትስ ኦህዘ ቃልታ «ዬ» ዎይ «አደ» ጋዛኖ ባያ። 
ታንን፥ ስላሰን ጢሞትዮሳን ይንትስ ማርክꬍደ ጾዘ ናእ፥ የሱስ ክርስቶሳ ኡባ ዎደ «ዬ» ፋትን «ዬ» ራን «አደራ» ባያ። 
ጾዚ እንጎዳ ጋይደ ኡባ ክርስቶሳ ባጋራ «ዬ» ማቃነ። ኑኒ ክርስቶሳ ባጋራ ጾዛ ቦንቾዳ፥ «አምንኤ» ጋዛና ይኒ ግሾ። 
ኑንን ይን ክርስቶሳ ግዳ ሚንግ ኤቆደ ጋር ፋ ኦችትስ ዶርደ ጾዚ። 
ኑኒ ኤ ባዝ ማቅዳኖ ኤርሶደስ ፋ ማህታምቶ ኑላ ጋድዳ፤ ማህ ፋ ጌሽ አያና ቃብደ ማህ ኑ ዎዝንተ ጋድዳ። 
ታኒ ቆሮንቶሳ Ꮉንግካይዛራ አትዳና ይን አዛንካይዛራ አታመ ግሾስ፤ ይና ዎርዶ ማቅኮ ጾዚ ታ ሸምፕቶ ታፓ ኤኮ። 
ይን፥ ይን አማንተ ሚንግ የዘ ግሾ ኑ ይንታና ኡፋይሶደስ ይንታራ ዎላ ኦችዙንꬃና ፋትን ይንታና ዎልቃራ አማንꬅዙንꬃና ባያ። 
