﻿ጳዉሎሳ ሮመ አሱንꬅስ ጻፍደ ኪታ.
1.
የሱስ ክርስቶሳ አሮ ማቅደ፥ ሐዋረ ማቃደ ጋራ ጼግንትደፓን ጾዘ ዎንገለ ሳባኮደ ጋራ ዶርንትደ ጳዉሎሳ ኪትደ ኪታ። 
ጾዚ ጋማ ዎደፓ ቲኖ ፋ ናቡንꬅ ባጋራ እንጎዳ ያጋይደ ጾዘ ጌሽ ማጻፍተ ጻፍንትዳ። 
Ꮉይ ዎንገልዘ አሾራ ዳዉተ ኮቻፓ የልንትደ፥ ጾዘ ናአ፥ ኑ ላꬄ የሱስ ክርስቶሳስ። 
ማህ ኤ ፋ ጌሽ አያናራ Ꮉይቆፓ ደንዲ፥ ጾዘ ናአ ማቅዳኖ ዳማ ዎልቃራ ቤዝዳ። 
ኤ ባጋራ አይሁደ ማቆሰ አሱንꬅ ኡባ፥ አማኒ ኪትንቶደ ጋር ክርስቶሳ ሱንꬅት ግሾ ጾዘ አꬎ ኬሃትꬅን ሐዋረትꬅ አደትꬅ ዎልቃ ኑ ኤክዳ። 
የሱሳ ክርስቶሳስ ማቃደ ፋና ጼግንትደ አሱንꬃፓ ባጉንꬅ ይንታና። 
ሮመ የዘ፥ ጾዚ ይቅስንትዙንꬃና ኤስ ጌሽ ዎርዣ ማቃደ ፋና ዶርዱንꬅስ። ጾዘ ኑ አደፓን ላꬄ የሱስ ክርስቶሳፓ አꬎ ኬሃትꬅን ሳሮትꬅ ይንትስ ማቀ። 
ኡባፓ ቲኒ፥ ይን አማንታ ሳአ ኡባ ስንትደ ግሾ የሱስ ክርስቶሳ ባጋራ ይን ግሾ ታ ጾዛ ጋላታነ። 
ታኒ ኤ ናአይ ዎንገለባዝ ኩሙꬅ ዎዝንተ ኦህዘ ጾዘ፥ ታኒ ታ ዎስተ ኡባ ዎደ ይንታና ቆፕዛንስ ኤ ማርካ። 
ዉርሱꬅተ፥ ጾዘ ቆፋ ማቅኮ፥ ታኒ ይንታጎ Ꮉንጎደስ ኦገ ታስ ጊጎደ ፋና ኡባ ዎደ ዎሳነ። 
ታኒ ይንትስ አያና አንጆ ሻኮደስን ይንታና በአደስ አሙꬋነ። 
ይናን፥ ታኒ ይን አማንተን፥ ማህ ይን ታ አማንተ ምንጎደ ፋናስ። 
ታ እሹንꬆ፥ ታኒ አይሁደ ማቆሰ አሱንꬃፓ ኣፈ ደንግዳን ፋና፥ ይንታፓን ኣፈ ደንጎደስ ይንታጎ Ꮉንጎደስ ቆፕዳ፥ የዝን ካይንትዳ። 
ግርኬ አሱንꬅስን ግርኬ ማቆሰ አሱንꬅስ ማህ ጭንጩንስስን ቦዙንꬅስ ታስ ጋለ የነ። 
ይኒ ግሾ፥ ሮመ የዘ ይንትስን ዎንገለ ኦሆደስ አሙꬋነ። 
ቲንꬊ አይሁዱንꬃና፥ ማህ አይሁደ ማቆሱንꬃናን አማንዘ ኡቡꬃና አሾደስ ዎንገለ ጾዘ ዎልቃ ማቅደ ግሾ ታ ዎንገለራ ዬልꬎኦስ። 
ጽሎ አማኖራ ደኦ የሳዳ ጋእንት ጌሽ ማጻፍተ ጻፍንትዳ። ዎንገለ ጾዘ ጽሎትꬅቶ ቆንጭዝዳ፤ ቲኖፓ ዉርሱꬅ የሎደስ አስ ጽልꬍዘ አማኖራ። 
ቱርታ ኤርንታመ ፋና ፋ ኢታ ኦቻራ ካምዘ አሱንꬃላ አፋ ናጋራ ኡባላ አፋ፥ ጾዘ Ꮉንቆ ሳሎፓ ዎꬎዳ። 
ጾዚ ኡንትስ ቆንጭሳደስ ቤዘባዝ ቆንጭዝደ ግሾ ኡን ጾዘ ባዝ ኤራነ። 
አላመ መꬍንትደፓ ደንꬂ፥ አስስ በንቶሰ ጾዘ Ꮉኖ፥ ይናን ኤ መዽና ዎልቃን ጾዘትꬅ ኤ መትꬅተ ቆንጪ የዘ ግሾ አሱንꬅ ፋ ኢታትꬅትስ ምክናተ ማቅዘ ባዝ ባያ። 
ኡን ጾዛ ኤርተራ፥ ኤዛ ቦንችካያን ጋላትካያ። ኡን ቆፍታ ማዶሰ ባዝ ማቅዳ፤ ኡን ቆፖሰ ዎዝንታ ꬉምዳ። 
ኡን ፋና ጭንጩንꬃና ጋነ፥ የዝን ቦዙንꬃና። 
ኡን Ꮉይቆሰ ጾዛ ጎይኖዳኖ አሺ፥ Ꮉይቅዘ አስ መꬎን፥ ላንዳን፥ ጾꬅን ሳዛራ ጎቹንትዘ ባዝ አዝዝ መꬍደ ምስለ ጎይናነ። 
ይኒ ግሾ፥ ኡን ፈታይ ፈታይራ ኢታ ባዝ ኦቺ፥ ፋ ጋልቶ ካዉሾደ ጋር ጾዚ ኡን ዎዝንቶ አሙꬍዘ ቱና ኦቻስ ኡንታና ኦልዳ። 
ይና Ꮉንዳና ኡን ጾዘ ቱርቶ ዎርዶ ላምደ ግሾን መꬍደ ጾዛ አሺ፥ መꬍንትደ ባዝ ጎይንደ ግሾ። ጾዚ መዽናስ ጋላትንትዳ። አምንኤ። 
ይኒ ግሾ፥ ጾዚ ኡንታና ቱና አሞትꬅስ አꬂ እንግዳ። ኡን ማቹንꬅ ፋስ ቤዝዘ ꬊራꬃራ የልንትዛኖ አሺ፥ ቤዞሰ ባዝ Ꮉኒ ማቻ ማችራ የልንታነ። 
ይኒ ጋር፥ ꬊራꬅ ፋስ ቤዝዘ ማችራ የልንትዛኖ አሺ፥ ꬊራꬅ ꬊራꬃራ የልንታነ። ꬊራꬁንꬂ ፈታይ ፈታይራ አሞትꬃራ ኤጽንቲ፥ ዬልዘ ባዝ ኦችዳ። ፋ ኦችደ ባላ ኦችትስ ቤዝዘ ፍርዳ ኤክዳ። 
ኡን ጾዛ ኤርተራ፥ መለ አቶ የዝን ኤ ባዝ ቆፖደስ ኮያንጽ እጽደ ግሾ ቤዞሰ ባዝ ኦቾደ ጋር ጾዚ ኡንታና ማዶሰ ቆፋስ አꬂ እንግዳ። 
ኡን ቆሄራ፥ ኢታትꬃራ፥ ዥምባራራ፥ ገነራ፥ ቅናተራ፥ ሸምፖ ዎራ፥ ላለራ፥ ጭሞራን ኢታ አሞራ ኩምዳ። ኡን ዝግርዙንꬃና፥ 
አስ ሱንꬅ ኢስዙንꬃና፥ ጾዝ እጽዙንꬃና፥ ጫዥዙንꬃና፥ ኡትርዙንꬃና፥ ጬቅዙንꬃና፥ ኢታ ባዝ ኦቾደስ ኮይዙንꬃና ፋ አዳይስን እንትስን ኪትንቶሱንꬃና፥ 
ቲሮሱንꬃና፥ ቃላ ላምዙንꬃና፥ ሲቆ ባይዙንꬃና፥ ይቅስሞ ባይዙንꬃና። 
Ꮉንስ ፋና ኦችዙንꬅስ Ꮉይቆ ቤዛነ ጋዘ ጾዘ ህገ ኤርተራ፥ Ꮉኖ ኦቻነ። ኡን ፋ ፋስ ኦችዛኖ ጻላላ ማቅካይዝን ኦችዘ መሉንꬃናን ልከ ጋእ ናሻነ። 
