﻿ማቶሳ ጻፍደ የሱስ ክርስቶሳ ዎንገለ.
1.
Ꮉንፓ ካሊ ጻፍንትደ ዳዉተ ናአ አብራሃማ ናአ ማቅደ የሱስ ክርስቶሳ የልንቶ። 
አብራሃማ ይሳቃ የልዳ፤ ይሳቃ ያይቆባ የልዳ፤ ያይቆባ ይሁዳን ኤ እሹንꬃና የልዳ፤ 
ይሁዳ ትእማርፓ ፋረሰነን ዛራን የልዳ፤ ፋረሳ አስሮመ የልዳ፤ አስሮመ ራመ የልዳ፤ 
ራመ አምናዳበ የልዳ፤ አምናዳበ ናአሶና የልዳ፤ ናአሶና ሳልሞነ የልዳ፤ 
ሳልሞነ ረአብፓ ቦኤዛ የልዳ፤ ቦኤዛ ኡሩትፓ እዮቤደ የልዳ፤ እዮቤደ እሰይ የልዳ፤ 
እሰየን ካት ዳዉተ የልዳ፤ ዳዉተ ኦርዮ ማችትፓ ሶሎሞነ የልዳ፤ 
ሶሎሞነ ሮብአማ የልዳ፤ ሮብአማ አብያ የልዳ፤ አብያ አሳፋ የልዳ፤ 
አሳፋ እዮሳፍጠ የልዳ፤ እዮሳፍጠ እዮራመ የልዳ፤ እዮራመ ኦዝያነ የልዳ፤ 
ኦዝያነ እዮአታማ የልዳ፤ እዮአታማ አካዛ የልዳ፤ አካዛ ሕዝቅያሳ የልዳ፤ 
ሕዝቅያሳ ምናሰ የልዳ፤ ምናሰ አሞና የልዳ፤ አሞና እዮስያሳ የልዳ፤ 
እስራኤለ አሱንꬅ ድእንት ባብሎነ ጋዘ ሳአ Ꮉንግደ ዎደ እዮስያሳ እኮንያናን ኤ እሹንꬃና የልዳ። 
ባብሎነ ሳአ እስራኤለ አሱንꬅ ድእንቲ Ꮉንግደፓ ማቂ እኮንያና ሳላትያለ የልዳ። ሳላትያለ ዘሩባቤላ የልዳ፤ 
ዘሩባቤላ አብድዩ የልዳ፤ አብድዩ ኤልያቀመ የልዳ፤ ኤልያቀመ አዛራ የልዳ፤ 
አዛራ ሳዶቀ የልዳ፤ ሳዶቀ አክመ የልዳ፤ አክመ ኤልዩዳ የልዳ፤ 
ኤልዩዳ አላዛረ የልዳ፤ አላዛረ ማታነ የልዳ፤ ማታነ ያይቆባ የልዳ፤ 
ያይቆባ ዮሰፋ የልዳ፤ ዮሰፋ ክርስቶሳ ጋዘ የሱሳ የልደ ማይራም አዝኒ። 
ይኬ፥ የልንታ አብራሃመፓ ዳዉተ የሎደስ ታጶ ኦይዲ። ዳዉተፓ Ꮉንግ ባብሎነ ድኤ የሎደስ ታጶ ኦይዲ። ባብሎነ ድኤፓ Ꮉንግ ክርስቶሳ የሎደስ ታጶ ኦይዲ የልንተ ማቃነ። 
የሱስ ክርስቶሳ የልንታ ታሪከ Ꮉንፓ ካልዛኖ። ኤ እንታ ማይራማ ዮሰፋስ ኦጭንት የዝተ ዮሰፋ ኤክካይዝን ጌሽ አያናፓ ዎዳጽዳ። 
ዮሰፋ ጽሎ አስ ማቅደ ግሾ እዞ አስ ግዳ ኬሶደስ ኮይካያ። ይኒ ግሾ አቺ እዞ አሾደስ ቆፕዳ። 
ኤ ይና ቆፍተ የዝን ጾዘ ኪታንቾ አቡኮራ ቆንጪ፥ «ዳዉተ ናአይ፥ ዮሰፋ፥ ነ ኦጭደ ማይራማ ዎዳጽደ ጌሽ አያናፓ ማቅደ ግሾ እዞ ኤኮደስ ዣሽትፐ» ያጋይዳ። 
እዛ ꬊራꬅ ናአ የሎዳ፥ ኤ ፋ ዎርዥቶ ኡን ናጋርትፓ አሽዘ ግሾ ኤ ሱንꬅቶ ነ የሱሳ ጋእ ጼጎዳ። 
ላꬄ ናበ ኢሳያሳ ዶና። 
«ይኬ ዉዱርታ ዎዳጾዳ፤ ꬊራꬅ ናአን የሎዳ፤ ኤ ሱንꬅታ አማኑኤላ ጋእንቶዳ» ጋእንትዳና ፎልንቶደ ፋና Ꮉና ኡባና Ꮉንዳ። አማኑኤላ ጋዛንስ ብልꬅታ «ጾዚ ኑራ የነ» ጋኤ። 
ዮሰፋ ገንቶፓ ባርክ ላꬄ ኪታንቹንꬅ ኪትዳን ፋና ማይራሞ ፋ ካራ ካንግዳ። 
የዝን ፋ አንግስ ናአያ የሎደ ዎንꬅስ እዞ ግርምካያ፤ የልንትደ ናአያ የሱሳ ጋእ ጼግዳ። 
