MAT 1:1 Eto Iesu Keriso, embomeni ta orekari embo amita ohihi amo David ra eto David ta ohihi amo Abraham ra amita ke re erevira.
MAT 1:2 Eto Abraham ta meni amo Isaac ra eto Isaac ta meni amo Jacobra, eto Jacob ta meniundi amo Judah te amita eambopo te
MAT 1:3 Eto Judah ta meni amo Perez te Zerah te ra eto enana ta e amo evohu Tamar ra. Eto Perez ta meni amo Hezron te Hezron ta meni amo Ram ra,
MAT 1:4 Eto Ram ta meni amo Amminadab te Amminadab ta meni amo Nahshon te Nahshon ta meni amo Salmon ra.
MAT 1:5 Eto Salmon ta ae Rahab na meni Boaz ingena te Boaz ta ae Ruth na meni Obed ingena te Obed ta meni amo Jesse ra.
MAT 1:6 Eto Jesse ta meni amo King David ra. Eto David na embo Uriah ta ae humbuto ve ikenu meni Solomon ingena.
MAT 1:7 Eto Solomon ta meni amo Rehoboam te Rehoboam ta meni amo Abijah, te Abijah ta meni amo Asa ra.
MAT 1:8 Eto Asa ta meni amo Jehoshaphat ra Jehoshaphat ta meni amo Joram ra, Joram ta meni amo Uzziah ra.
MAT 1:9 Eto Uzziah ta meni amo Jotham ra, Jotham ta meni amo Ahaz ra, Ahaz ta meni amo Hezekiah ra.
MAT 1:10 Eto Hezekiah ta meni amo Manasseh ra Manasseh ta meni amo Amon ra, Amon ta meni amo Josiah ra.
MAT 1:11 Eto Josiah ta meniundi amo Jechoniah te amita eambopo te ra. Eto iji aramiko te enda Babylon embomeni na Israel embo ga isoro eto embomeni humbuto enana ta enda Babylon ta ere pambuhahera.
MAT 1:12 Eto humbuto pambua amita ambota embo Jechoniah ta ae na meni Shealtiel ingena eto Shealtiel ta meni amo Zerubbabel ra.
MAT 1:13 Eto Zerubbabel ta meni amo Abiud ra, Abiud ta meni amo Eliakim te Eliakim ta meni amo Azor ra.
MAT 1:14 Eto Azor ta meni amo Zadok te Zadok ta meni amo Akim ra, Akim ta meni amo Eliud ra.
MAT 1:15 Eto Eliud ta meni amo Eleazar ra, Eleazar ta meni amo Matthan te Matthan ta meni amo Jacob ra.
MAT 1:16 Eto Jacob ta meni amo Joseph ra. Eto Iesu amita javo Keriso ke eagora amita e Mary avo Joseph na jimbuna (eto javo ‘Keriso’ ta be amo ari sasapura oreketo humbari embo).
MAT 1:17 Avo eto embo Abraham eto pambuto David na kane ena mamone te meniundi te amo tapa 14 ra. Eto embo David eto pambuto enda Babylon ta pambari iji te amo mamone te meniundi te tapa 14 nei emina kane ena eto Babylon ta pambari eto pambuto Keriso ta iji te amo mamone te meni undi te tapa 14 nei emina kane ena.
MAT 1:18 Eto Iesu Keriso ta ingari amo eingera, Joseph na Iesu ta e Mary ga jimbuna rate vahaita ae Ahihi Otohu na enu Mary urete ena.
MAT 1:19 Eto Mary ta ivu Joseph na Mary urete ena avo kito mana mana eto embo javotoho amina Mary meni humbuto me kiaguja uje ae ue jimbari avo ojikari na toasi uje ena.
MAT 1:20 Eto ainge hotembihinu Bada ta Anera na ehure ta amita degi puvuto ke einge ena, “Joseph David ta ahije Mary no ae ra amiga irari joru aojo amo Ahihi Otohu na ikehei urete ehija.
MAT 1:21 Eto meni singa ingasuja amina umo eonga amita embomeni ta ari sasapura avoeto orekau datoho iresora avoeto amita javo ‘Iesu’ ikejo” ainge Anera na ena.
MAT 1:22 Eto ari erevi tapa amo Bada na mahu peroveta ta degi ari kajari einge mihia,
MAT 1:23 “Eto kakara na teho urete eto meni singa humbau amita javo Immanuel aisora” eto Immanuel ta be amo “God dago te iraguja”
MAT 1:24 Eto Joseph na ehure ta kito ereto Bada ta Anera na ke ena avo agi eto Mary humbuto amita bande ta ikena.
MAT 1:25 Eto enana besi oenga oenga evio meni singa ingenu Joseph na meni ta javo Iesu ikena.
MAT 2:1 Eto da Bethlehem Judea enda ta King Herod na tihi jigina iji aramite Iesu e Mary na ingena. Eto iji aramina kuro ta hajire kiari embopo na enda nei Judea ihane hena ta eto da Jerusalem ta puvuto embomeni ta degi einge eto ingia.
MAT 2:2 “Judea embomeni ta King eha ingehija amo daingere? Amita kuro vihei kito meni amita degi humotepain aisi puvera.” ainge ijio ingia.
MAT 2:3 Eto King Herod na ingito Jerusalem da embomeni te tapa osaga kia.
MAT 2:4 Avo eto King Herod na Judea embomeni priests pepeni te ke pepeni kiari embopo te ainge jage enu vahaita puvuo Judea embomeni ta hondate ari embo Keriso degi dainge ingasuja avo eto inginu
MAT 2:5 Ke mine einge ea “Amina da Bethlehem enda Judea ai ta ingasuja amita ke avo peroveta na einge kajena,
MAT 2:6 ‘eto da Bethlehem enda Judea ta jo ta umo da isapa rate embomeni na umo javo ambu ke mane aisora, amita be amo no jo ta eto tihi jigari embo be puvuresuja amina nau Israel embomeni unduresuja’ ainge peroveta na kajena.”
MAT 2:7 Eto ainge eo Herod na ingito ojikari na ke ikenu kuro kiari embopo puvuo meni ta kuro iji deina vihina avo eto inginu vihina iji avo harikeo enana ta degi einge ena.
MAT 2:8 “Ungo da Bethlehem ta pambuto meni eto kogo eto jombure eto hambuto egerembeto puvuto nau degi ta evujo ingito pambuto meni avo jakeka ane.” Eto ainge enu
MAT 2:9 Enana king ta ke ingito amita da toto pahue kuro mahu vihinu kia avo ehako kito eheheto pahuo kuro na pambuto meni ingari ju ai hetena.
MAT 2:10 Eto enana kuro avo kito tunga javotoho be ue,
MAT 2:11 bande jo ta horeto meni avo e Mary ga mihinu kogue paunge teteri eto veto meni jakeka ea. Eto meni ta hande ikasi humbuto puvua avo hiriketo hande ikea amo ‘gold’ te ji iki mune te jeune ainge amite ji mu mune te javo myrrh ainge ikea.
MAT 2:12 Rate enana egerembeto Herod ta degi mane pambasora avo God na ehure ta enu ingia avoeto degi nei ta tiumbeto enana ta enda ta pambua.
MAT 2:13 Eto kuro kiari embomeni pahuo Bada ta Anera na Joseph ta degi ehure ta puvuto ke einge ena, “Umo ereto meni te tohota e te humbuto Egypt enda ta sau sau pambuto nau ke simba ejo. Herod na meni erevi jombure eto tau pehara uje ere ua” ainge Anera na enu,
MAT 2:14 Joseph ingito ereto meni te tohota e te humbuto mume te Egypt enda ta pambua.
MAT 2:16 Eto Herod na enana kuro kiari embomeni ta ke sokova kito tumo pajire be eto enu da Bethlehem eto da nei nei amita engihita meni isasaraho teo pepehekea amo kuro kiari embopo na Herod ta degi kuro iji deina vihina avo hotembeto enu meni isasaraho singa perekari amita pajirari jua heriso eto amita hu ta avo pe te teo pepehekea.
MAT 2:17 Eto ari erevi ae kihi be kihi ta peroveta Jeremiah na ke einge kajena,
MAT 2:18 “Enda Ramah ai ta embomeni na si ijie ui ai ijio ingia amo Rachel na amita meniundi avoeto si eria, eto tapa irae pambari avo eto tunga osaga irae ari ta ke mane ingesuja.” ainge Jeremiah na kajena.
MAT 2:19 Eto Joseph te Mary te meni Iesu te ainge enda Egypt ta mihio Herod pehenu Bada ta Anera na ehure ta Joseph ta degi puvuto ke einge ena.
MAT 2:20 “Meni taro pehaja uje uera mahu pepehekehera avoeto ereto meni te tohota e te humbuto enda ta pambujo,” ainge Anera na ehure ta ena. Ke avo ari amita kihi ta Bada na peroveta ta degi enu einge kajena. “na nau Meni Egypt enda ta eto jage ehena,” ainge kajena.
MAT 2:21 Eto Joseph na Anera ta ke ehure ta ingito ereto meni te tohota e te humbuto Israel enda ta egerembeto pambua.
MAT 2:22 Eto Israel enda ta puvuto Herod ta meni Archelaus na mamo ta besi humbuto Judea enda King ena duru avo ingito ai irari joru ena. Eto God ta ke ehure ta ingina avo eto pahina ta pambuto umo enda tutumo javo Galilee
MAT 2:23 Amita da vahai javo Nazareth ai mihahija amita ke avo peroveta na Nazareth embo einge kajea “Amina Nazareth embo aisuja.”
MAT 3:1 Eto Iesu da Nazareth ta pajito mihinu John bapataito ari embo na Judea enda ojagatambu ai ke einge ijie oje kahena,
MAT 3:2 “God ta tihi jigari iji puvuto erehua avo eto ungota ari sasapura avoeto osaga kogue ungota jo aherekevu” ainge ena
MAT 3:3 Amo peroveta Isaiah na einge kajena, “Embo na ojaga tambu ta jage einge eria ‘Bada ta puvurari nununga evu. Amita puvurari degi evu tambu ai’.”
MAT 3:4 Eto John ta bo asukari amo o camel hu na ihirari avo asuketo pupuri o hoga na ari tigito amita indari amo iruha te o boruga te indiahija.
MAT 3:5 Eto enda Judea embomeni te Judea ta da peni Jerusalem amita embomeni te embomeni umo Jordan engihita mihahera
MAT 3:6 Amiga tapa John ta degi puvutuhore enana ta ari sasapura harikihore John na umo Jordan ai ta bapataito ere uahija.
MAT 3:7 Rate embomeni nei uhoho Pharisee embomeni te Sadducees embomeni te John na bapataito aja puvuo John na kito enana ta degi ke einge ena.
MAT 3:8 “Ungo o koso o ra. Eto God na tumo eto ungota ari sasapura ta hajire au kesova avo amuna ehei ingito puveve? Ungota ari sasapura hariketo toasi puveva avoeto pambuto ji be javotoho eaguja aingeko evujo
MAT 3:9 Eto ke erena avo ingito ‘Abraham amo dagota mama ra avoeto dago inonora’ ainge avojo, ungota degi erena be ingivujo. Eto God na au koro erevi sariketo Abraham ta meni undi asora amo inonora.
MAT 3:10 Eto hogoro ji susu ta ikehei mihia eto ji be javotoho ae kito jeto gosukau evekasuja.
MAT 3:11 Eto na ungo umo na bapataito ere ona amo ungo jo aherekari ta ahe kihira ere ona. Rate embo nau ambota puvuresuja amo dombo be sovera te rate na sovera ambu ra. Na amita utu goru houketo humbuto pambari inono aera. Embo amina ungo Ahihi Otohu te ji vevere te na bapataito aisuja.
MAT 3:12 Eto javotoho davore sapura davore sirikasi nununga ere ua. Javotoho avo siriketo amita harau ta ikasuja eto sapura siriketo ji ta ikau evekasuja, ji amita seikari amo iraera.” ainge John na ena.
MAT 3:13 Eto Iesu amo John na umo Jordan ai ta bapataito aja Galilee ta eto puvunu
MAT 3:14 John na bapataito ari uje ae ue amita degi ke einge ena, “Na inena bapataito aehea rate umo do eto nane bapataito ana puve?”
MAT 3:15 Rate Iesu na ke mine einge ena, “God na uje do aisuja avo tapa agi aisora avo eto na bapataito aisoa” ke ainge enu John na jo ahereketo Iesu bapataito enu
MAT 3:16 Vihito umo hora ta hetenu uhu pe hirikihinu God ta Ahihi di dipo ainge Iesu ta hamo ta venu kina.
MAT 3:17 Eto uhu ta ke einge ingia “Emo osa ari Meni nau na kito tunga javotoho ere ona.”
MAT 4:1 Eto Iesu amo Satan na engekaja Ahihi Otohu na enu ojagatambu ta vihina
MAT 4:2 Eto iji te mume te tapa 40 ainge indari indae avo eto beuje kogunu
MAT 4:3 Satan na puvuto Iesu einge engekena. “Umo God ta Meni be kito koro erevi e bread sarikai.” ainge enu
MAT 4:4 Iesu na ke mine einge ena, “Eto embo na mane indari pere indie iresuja rate ke tapa God ta pe ta eto puvuja amina iresuja,” ainge ena.
MAT 4:5 Eto Satan na Iesu ga Judea embomeni ta da Otohu Jerusalem ai pambuto horeo Satan na enu Iesu temple ene i be i ta pambuto hetenu
MAT 4:6 Satan na ke einge ena, “Umo God ta Meni be kito kekehuna eto ve. God ta ke einge mihia, ‘God na amita Anera au umo ingeni na humbuto orereto veasora avoeto umo koro ta utu mane tasoa’.” ainge enu
MAT 4:7 Iesu na ke mine einge ena, “God ta ke nei einge mihia ‘Umo Bada God no mane engekasoa’.” ainge enu.
MAT 4:8 Satan na Iesu ga tiri koso vahai ai ta vihito pahue enda tapa eto amita sago kiari donda te avo Satan na enu ehure ta kiarako enu
MAT 4:9 Satan na ke einge ena, “Inena paunge teteri eto na jakeka ijiro na donda erevi tapa inena simba ao ikasona,” ainge enu
MAT 4:10 Iesu na ke einge ena, “God ta ke einge mihia ‘Umo no Bada God oenga jakeka ue agi aisoa’ avoeto, Satan, na toto pambu!” ainge enu
MAT 4:11 Satan na toto pahunu God ta Anera na puvuto Iesu undua.
MAT 4:12 Eto John ikeo tipura ta horenu Iesu na duru ingito enda javo Galilee ta pambuna
MAT 4:13 Eto da Nazareth toto da Capernaum amo Judea embomeni te ohihi heriso javo Zebulon te Naphtali ta meni undi ta enda ra.
MAT 4:14 Avo eto Peroveta Isaiah na ke einge kajena amo ke be ra,
MAT 4:15 “Zebulon ta enda eto Naphtali ta enda umo Jordan ovitiho ta eva ta pambuora degi ai ta enda nei nei embomeni na puvuto iragora.
MAT 4:16 Eto ai ta embomeni mume ta mihahera amo usasa peni vahai kia. Enana pepehekari embomeni ta enda ta irarako ere uahera avo iho vujarako ena,” ainge peroveta Isaiah na kihi kajarira.
MAT 4:17 Eto Galilee ta pambuna iji aramite Iesu na ke einge hande ere uahija, “God na tohota embomeni siriketo humbuto tihi jigesuja avo iji auvehija avoeto ungota ari sasapura toto jo aherekevu,” ainge Iesu na ena.
MAT 4:18 Eto Galilee hora ta isa ue Iesu na umo o parari embo heriso Simon te amita namei Andrew te avo kina. Eto enana o humbari bonga umo ta gosukeo vovunu
MAT 4:19 Iesu na kito enana ta degi ke einge ena, “Ungo na ambo ambo ue have! Ungo o ere pariheva avo aingeto embo paravo avo ano kesova,”
MAT 4:20 Ainge enu enana nei do ae bonga toto Iesu ambo ambo ea.
MAT 4:21 Eto hora ta pahue Iesu na embo Zebedee te amita meni heriso James te John te e nga jo ta arumbeto bonga perarari avo ihirihie mihio kito jage enu
MAT 4:22 Enana ta mamo te e nga te toto Iesu ambo ambo ea.
MAT 4:23 Eto Iesu na Galilee enda ta hembuhe Judea embomeni ta ke kasari bande tapa horihe God na daingeto embomeni humbuto tihi jigesuja amita duru javotoho hande ereuahija eto ambure embomeni uei kokondikihahera.
MAT 4:24 Eto ainge pere uei Syria embomeni te tapa na duru ingihe enana ta ambure nei te nei te humbari embomeni humbuto Iesu ta degi puvua. Eto ambure embomeni amo nei ambure jo memenga ari nei utu ingeni meni amburari nei ahihi sasapura na horari te tapa humbuto puvutohore uoi kokondikihahera.
MAT 4:25 Eto embomeni isapamane da tapa ten umo ovitiho amita embomeni te Galilee embomeni te Jerusalem embomeni te enda Judea embomeni te umo Jordan ovitiho ta mihahera embomeni te tapa Iesu ambo ambo ere uahera.
MAT 5:1 Eto embomeni isapamane kito Iesu na vihito tiri ta arumbenu amita ambotani puvuo
MAT 5:2 ihiketo ahe poekihe ke einge ena,
MAT 5:3 “Eto embo amuna amita ahihi ta sovera inono ae kito God na hondate aja penunu eagora embo avo God na tihi jigihirou uhu ta vasiri te iresuja eto amita tunga javotoho be aisuja.
MAT 5:4 Eto embo amuna ari sasapura avo eto si aisuja avo God na au osaga irae au tunga javotoho aisuja.
MAT 5:5 Eto embo amuna ‘Na na’ ainge mane eaguja rate God humota eaguja amina enda tapa hoteto humbasuja avoeto tunga javotoho aisuja.
MAT 5:6 Eto embo amuna ari javotoho pere kesi uje peni vahai ere ua embo amita uje avo God na au kesuja avo eto tunga javotoho ere ua.
MAT 5:7 Eto embo amuna embo ta osaga kito jo eaguja avo God na kito jo au hondate aisuja avo eto tunga javotoho ere ua.
MAT 5:8 Eto embo amuna jo vahai eto God agi eagora amina God kesora avo eto tunga javotoho ere ora.
MAT 5:9 Eto isoro peiketo peka humbari embomeni avo God ta meniundi ke aisora avo eto tunga javotoho ere ora.
MAT 5:10 Eto embo amuna ari javotoho ere ua avo eto embomeni na ari nei te nei te na mahainge haekagora embo avo God na tihi jigihoi iraguja avoeto tunga javotoho ere ua.
MAT 5:11 Eto ungo na ke be eagova avo eto embomeni na no javo aro sapura ururou ke sokova nei te nei te ijie ungota degi ta osaga ikasora avo kito tunga osaga avojo.
MAT 5:12 Enana na ainge dombo God ta peroveta tapa ta degi ere uahera eto iji kombu te ungo na ari jajavotoho isapamane hoteto humbasova avoeto tunga javotoho be javotoho evujo.
MAT 5:13 Ungo enda tapa ta irirari haso ainge gamo te ra rate haso ta peture veau irae aisuja amo daingeto ehako peture au? Amita pure irae avoeto enda ta kehiore utu na haito jaevekagora.
MAT 5:14 Eto ungo enda tapa ta usasa ra. Eto embo na tiri bende ta da kogombasora amita titiha ari iraera embo tapa na kesora.
MAT 5:15 Eto embo na usasa unduketo mane ovu ho ta iketo gogovo aisuja rate i ta ekau usasa ururou embo tapa kesora.
MAT 5:16 Ainge dombo ungota usasa evu embo tapa kiore eto ungota ari jajavotoho avo embomeni na kogue God Mamo uhu ta iraguja avo jakeka aisora.”
MAT 5:17 Eto Iesu na ke nei einge ena, “Na Moses ta ke pepeni te Peroveta ta ke kajari te ano irae aja puvuone hotembarako avojo. Na avoeto puvuraera te ke amita be avo ano peni be au ungo ingova puvena.
MAT 5:18 Na ungo ta degi ke peni be avo erena ingivujo! Eto iji kombu puvurae enda te uhu te mihirou God ta ke tapa Moses ta ikenu kajena avo pere iresuja ke nei vahai mane nei aisuja rate mahu kajari ainge inono ta irirou God na amita uje tapa au irae au iji kombu ta puvuresuja.
MAT 5:19 Avo eto embo amuna God ta ke pepeni isapa vahai be poekasuja rete nei embo nei ke pepeni ano poekaja engekasuja God ta tihi jigari degi ai ta embo avo meni isapa ainge dombo ambu aisuja rate embo amuna God ta ke pepeni tapa jigama ue embo nei jigama ara ahe poekaguja embo amina God ta tihi jigari ai ta embo pajire be aisuja.
MAT 5:20 Eto na ungota degi erena Moses ta ke pepeni simba ari embomeni javo Pharisee te ahe poekari embomeni te ta ari jajavotoho eagora avo dembeto evujo. Eto enana ta ari jajavotoho avo dembeto ae amo God ta simba ari degi ai ta mane be mane horasova.”
MAT 5:21 “Ungo mahainge ingagova amo Moses na ohihi ta degi ke einge ena. ‘Ungo mane embo tavo pehasora eto ainge aisova amo koto ta ganoka aisora’ ke ainge mahu ohihi na arira
MAT 5:22 rate ungota degi erena embo amuna namei ta degi tumo aisuja embo amo koto ta ganoka aisora. Eto embo amuna namei ta degi ‘Uha koan irae’ ke aisuja embo avo council na ganoka aisuja. Eto embo amuna viso toro ke ijie amita namei amo embo sapura ke aisuja embo amina ari amita mine avo donda sasapura gosukari degi ai ta ji vevere ta evekasi hombekasuja.
MAT 5:23 Avo eto inena no hande God ta degi humbuto puvuto pene gaga ta tembasi ue no namei na no degi ta tumo ehija avo hotembeto
MAT 5:24 God ta hande avo pene gaga engihi enda ta iketo pambuto namei ga peka kihi ejo, eto puvuto God ta hande humbuto pene gaga ta tembejo.
MAT 5:25 Eto embo na umo koto ta ganoka aisi ue ke au ingito mane koto simba aisoa rate sau sau pambuto aja to ijie peka ejo eto peka ae amo koto eto embo amina umo judge ta ingeni ta ikau eto judge na humbuto police ta ingeni ta ikau eto police na umo tipura ta gosukaro horeto
MAT 5:26 mihie no sapura ta mine amo isapa te peni te ikihe iresoa.”
MAT 5:27 “Eto ke nei Moses ta kajari ai ta kogova, amo ‘tiha paiha mane aisova’ ainge eagora
MAT 5:28 rate na ungo ta degi erena embo amuna evohu kakara kito amita jo ta uje ue hotembaguja amo jo ta tiha eaguja amo ari sapura eaguja
MAT 5:29 avo eto no tihi be hena na au umo sapura aisoa amo kuruketo gosukejo pambai. Amo javotohora no hamo tapa hamo memenga kiari degi ta mane pambasuja rate donda vahai avo kihi ao iraesuja.
MAT 5:30 Eto no ingeni be na au ari sapura aisoa kito ingeni avo tiuketo gosukejo pambai amita be amo ingeni amina au no hamo tapa amo memenga kiari degi ta pambasuja avo eto javotoho amo donda avo kihi gosukejo.”
MAT 5:31 “Eto ke nei Moses ta kajari ai ta kogova amo ‘Embo amuna ae toasi uje ue kito amo ahari ta ari tapa avo kaeto ae ta ingeni ta iketo toasuja’ ke ainge ijiore ingagova
MAT 5:32 rate na ungota degi erena. Eto embo amuna amita ae amo tiha paiha ae rate teho sio toau pambuto embo nei jimbasuja evohu amite ivu eha amite tiha eto eagora eto ivu mahu amina ae toaguja avo eto sapura amo amitara.
MAT 5:33 Eto ke nei ohihi na ijiore ingagova amo embo amuna ari do asi ke be na Bada ta javo ta aisuja avo mane toasuja rate aisuja amo Bada ta javo jigama ehija avo eto.
MAT 5:34 Rate ungota degi erena, eto inena ke be pere aisi uje aisoa amo mane God ta javo jigama ue aisoa rate javo no pere avo jigama eto aisoa. Eto nei uhu ta javo ta mane ke be aisoa amo God ta irari degi avo embo.
MAT 5:35 Eto mane enda ta javo ta ke peni aisoa amo God ta utu tembari avo eto. Eto da Jerusalem ta javo mane jigama ue ke peni aisoa amo God mamo uhu ta king ta da ra. Eto amo da no mane ra.
MAT 5:36 Eto nei amo no siro hu ta javo mane jigama ue ke peni aisoa, amita be amo ke peni retemo isapa do aisoa amina no siro hu ta ove mane au parara rete mo mume aisuja.
MAT 5:37 Eto inena teho ‘Aravora’ aisona ainge rete ‘Mane aisona’ ke ainge pere ijie eto javo no pere avo jigama ejo. Eto javo nei ta ke peni do aisoa ke ainge amo Satan ta degi puvuja,” ainge Iesu na ena.
MAT 5:38 Eto Iesu na ke nei einge ena “Eto ke nei Moses ta kajari ta eto ingagova amo ‘Eto embo na tihi teto kurukasuja amo mine teto kurukasuja. Eto ti teto poekasuja amo mine teto poekasuja’
MAT 5:39 rate na ungota degi erena, eto embo na no degi ta sapura do aisuja amo mine asi mane hotembasoa. Eto embo na no ovo be hena ta tasuja aherekejo ovo anga hena ta tai.
MAT 5:40 Eto embo na no ombari asari humbasuja embo amita degi no pohuketo evari te tapa ikejo.
MAT 5:41 Eto Rome ta isoro embo vahai na au umo amita ango donda humbuto pambasoa kito degi isapa koso dembeto pambujo.
MAT 5:42 Eto embo amuna no donda humbasi penunu au ingito amita ikejo. Eto nei teho jigama aisi uje aisuja ikejo jigama ai.” ke ainge Iesu na ena.
MAT 5:43 Eto Iesu na ke nei einge ena “Ohihi na eagore ingagova ‘ungo ta namei kamei avo osa ue kitoho embo avo tumo evujo.’ ainge ijiahera
MAT 5:44 rate na ungota degi ke einge erena, ungota kitoho embo osa evujo eto hini kambari embomeni avoembo pari evujo.
MAT 5:45 Eto ainge ue God Mamo uhu ta iraguja amita meniundi be aisova. Amita be amo God na ari ainge eoi iji na embo sasapura te jajavotoho te tapa hondate eaguja. Eto God na eoi ga na embo sasapura te jajavotoho te ta degi veaguja.
MAT 5:46 Eto ungo osa eagora embomeni avo pere osa ururovo God na ungota hande javotoho ikaja ke mane hotembasova. Ungo tax humbari embomeni uje ae eagova rate enana te tapa osa mine ara ari avo kiarira.
MAT 5:47 Eto ungo na ungota namei kamei pere pekagova amo ari javotoho manera. Enana God kiae embomeni amite tapa ari ainge amo eagora.
MAT 5:48 No mama God uhu ta iraguja amina ari javotoho pere eaguja avo eto ainge dombo ari javotoho pere ue irivujo.”
MAT 6:1 Eto Iesu na ke einge ena, “Ungo ari jajavotoho embo na ungo jakeka ara enana ta tihi ta koto mane aisova. Eto ungo ari jajavotoho embo na kiora araha tambuta aisova amo ungota God Mamo uhu ta iraguja na no ari ta mine javotoho mane ikasuja.
MAT 6:2 Amo enana God jakeka pe na eagora te jo te tapa ae embomeni donda ambu embo ta degi hande ikasi ue kito ‘church’ jo ta da arahata huin huinhe ikagora ainge avojo. Eto ari ainge ta mine amo embomeni na koto jakeka ara uje eagora. Eto ungota degi ke be na erena enana ta ari jajavotoho ta mine mahu umbere irae ehija God na hande nei mane ikau humbasora.
MAT 6:3 Rate ungo hande ikasi ue kito embo nei avo kioro ojikari na ikevujo
MAT 6:4 eto ainge amo no hande do ojikari na ikasoa eto no ari javotoho do ojikari na ere oa amo no Mama God na kito no ari ta mine javotoho ikasuja.” ainge Iesu na ahe poekena.
MAT 6:5 Eto Iesu na ke einge ena “Eto ungo pari asi ue kito embo pari hamo na eagora aingeko avojo. Enana amo embomeni na kito jakeka ara God ta jakeka ari bande jo ta eto degi peka ta araha tambuta ereto heteto pari eagora eto ari ta mine amo embo na kito jakeka eagora avoeto ungota degi erena, enana ta ari ta mine mahu umbere irae ehija.
MAT 6:6 Rate ungo God ta degi pari aisi uje aisova kito ojikari na ungota bande jo ta horeto bokiri ahureketo ungota mama God ta degi penunu evujo eto ungota Mama na ojikari na do aisova avo kito mine javotoho ikasuja.
MAT 6:7 Eto enana God kiae embomeni na God be ingoja ke sio sao koso vahai be ijie pari eagora
MAT 6:8 ainge avojo. Amita be amo ungo penunu ae pekota ereva amo ungota osaga deire ungota Mama God na mahu kiarira
MAT 6:9 avoeto pari ta ke einge ijie evujo: Mama dagota,
MAT 6:10 uhu ta iragoa javo no otohu aisora uhu ta tihi jigihoe uje no eagora ainge dombo enda ta ikejo puvuroi.
MAT 6:11 Dagota indari ikejo iji hekeri ta
MAT 6:12 eto embomeni na dagota degi ta do sasapura eagora avo hotembeto toagora ainge dombo dagota ari sasapura inena hotembeto tojo.
MAT 6:13 Engekari ta dago kihi humbaojo, eto sapura ta dago oreke (Eto no jekahoka te sovera te usasa te datoho iresora Amen.)
MAT 6:14 Eto ari sasapura hotembeto toari amita be amo eingera, eto ungo na embo ta ari sasapura hotembeto toasova ainge dombo ungota Mama God uhu ta iraguja amina ungota ari sasapura hotembeto toasuja.
MAT 6:15 Rate ungo na embo ta ari sasapura hotembeto toae amo ungota Mama na ungota ari sasapura mane hotembeto toasuja.” ainge Iesu na ahe poekena.
MAT 6:16 Eto Iesu na ke nei einge ena “Enana hamo na pere God humotepain ari embomeni na indari ajireketo tombu amisa na kuheto umo kuhae teho iragora amo embo na kito jakeka ara eagora avoeto ungota degi erena enana ta ari javotoho ta mine mahu umbere irae ehija eto nei mane God na ikau humbasora ari ainge avojo
MAT 6:17 rate ungona indari ajirekasi uje eto kito amo umo kuhihe siro tuvari ue evujo.
MAT 6:18 Eto ungota Mama God vahai ungoga iji tapa iraguja amina ungota ajirekari avo ojikari na kito ungota hande javotoho ikasuja.” ainge Iesu na ahe poekena.
MAT 6:19 “Ungo enda ta donda hamo ta hamo ta humbavojo amita be amo ungota hajae vajae avo soan na kahumbaguja ain timbasuja, eto pegene embo na bande pejeto humbasora.
MAT 6:20 Rate God ta degi ta avo soan irae, ain irae pegene embo irae avoeto God ta irari degi ai ta hajae vajae nununga evujo.
MAT 6:21 Eto no donda irari degi ai ta no jo te hotembari te tapa iresuja.”
MAT 6:22 “Eto no tihi amo no hamo ta usasara. Avo eto no tihi javotoho na au no hamo tapa amo usasa pere aisuja.
MAT 6:23 Rate tihi javotoho ae amo hamo tapa amo mume pere aisuja eto jo te tapa mume kambujoro aisuja.”
MAT 6:24 “Eto embo vahai amina embo heriso ta ke agi ari haite manera. Amina vahai osa ue nei tumo aisuja eto embo nei amita ke agi ue nei amita ke uje ae aisuja eto ainge dombo inena iji vahai amina God ta ke te koro ta ke te agi ari haite manera.” ainge Iesu na ke ena.
MAT 6:25 Eto Iesu na ke einge ena, “Avo eto na ungota degi erena. Ungo do indito iresova eto do asuketo iresova avo hotembu hotembu avojo, eto no irari amo indari pere mane eto no hamo amo asukari pere manera.
MAT 6:26 Di i ta pambuora avo kivujo. Enana donda ve koveto tureto humbuto harau ta mane ikagora rate ungota Mama uhu ta iraguja amina enana ta indari ikeoi indagora. Rate embo avo God ta degi peni bera eto di avo peni be manera.
MAT 6:27 Eto embo na hotembari isapamane na au amita enda ta irari iji koso mane aisuja.
MAT 6:28 Ungo bo daingeto asukaeheve avo eto mane osaga kesova rate ji vuji ove nei te nei te mihera avo kogue hotembevujo. Enana pure ae eto bo kembae
MAT 6:29 rate donda embo be King Solomon amita bo asukari amo ji vuji emita kiari sago javotoho ainge manera.
MAT 6:30 Rate God na ji vuji ta degi bo asukari javotoho ikaguja eto iji nei amo karaun eto enda ta veaguja, rate ungo ji vuji mane ungo embo avo eto God na ungota degi asukari mane ikaute? Rate ungo God humo ta be ae eagova.
MAT 6:31 Avo eto osaga kogue ‘Do asukaro’ ainge avojo.
MAT 6:32 Ke ainge amo God ke be ae embomeni na pere eagora rate ungo donda ainge jigama eagova amo ungota Mama God mahu kiarira
MAT 6:33 avo eto kihi be kihi amo God ta javotoho ari tihi jigari avo jombure evujo eto amina ungota indari donda te irari donda te unduresuja.
MAT 6:34 Iji vahai vahai amita osaga amo inono ra avo eto evito osaga do puvuresuja avo mane hotembasova. Do puvuresuja avo evito kito aro tambu aisuja.”
MAT 7:1 Iesu na ke einge ena, “Umo embo nei ta ari sapura mane urumbasoa
MAT 7:2 eto ainge aisoa amo ainge dombo God na no degi ta aisuja. Eto embo nei ta ari urumbasoa amo God na ari no avo no urumbari ta hajire avo au kesoa.
MAT 7:3 Eto ungota namei ta ari sapura isapa ji sirivo ainge tihi ta mihia avo ere kogova rate ungota ari sapura peni amo ji uhu ainge tihi ta mihia avo do eto kiae ere ove?
MAT 7:4 Eto namei ta degi ‘no tihi ta ji sirivo mihia kondikano?’ ke ainge ijie ungota tihi ji uhu na peikehija avo eto daingeto avo?
MAT 7:5 Ungo ari sapura ojiketo ke sokova ari embomeni eto ungo ta ari sapura ji uhu ainge tihi ta mihia avo kihi umbavo irae au javotoho na kon kon eto kogue namei ta sapura isapa ji sirivo ainge tihi ta mihia avo kojikevu.
MAT 7:6 Eto God ta ke amo Otohu avo eto God ta ke ingito ke be ae embomeni ta ikavojo enana ino o ainge hotembari irae avoeto enda ta hatikaro sapura ururou jandireketo ikari embo kambuto hevasuja.”
MAT 7:7 Eto Iesu na ke ijie einge ena, “Penunu ijiro ikau humbasoa, jombure ururo ikau kesoa, vahihiri ururo God na pe umo embo hirikasuja.
MAT 7:8 Amita be amo embo amuna penunu aisuja amita degi God na ikasuja eto jombure aisuja embo amina hambasuja eto embo amuna vahihiri aisuja God na pe hirikau embo amo horasuja.
MAT 7:9 Ungo nei nei meni hatira te ra. Eto no meni na no degi ta bread penunu aisuja amo koro amita degi mane ikasoa
MAT 7:10 eto umo o penunu aisuja amo o koso o mane ikasoa.
MAT 7:11 Ungo embo sasapura rate daingeto ungota meniundi ta degi hande javotoho ikasova avo ungo kiarira. Eto ungota mama uhu ta iraguja amo hande embo be avo eto embo na amita degi penunu au javotoho pere ikasuja.
MAT 7:12 Eto Moses ta ke pepeni tapa te peroveta ta ahe poekari tapa te amita ke susu be amo erevira. ‘Eto inena embo na ari javotoho do ao kesi uje ere ua avo pere amita degi ejo kioi’.”
MAT 7:13 “Eto ari sapura embomeni ta evekari degi amita pambari degi ai ta embomeni isapamane pahuore mimiseko eaguja ai ta pambavojo
MAT 7:14 rate degi pe isapa orare pe timbari avo jombure eto kito aita jeneki honeki ue pambuvujo. Amita tutumota irari datoho hambasova.
MAT 7:15 Eto embo nei nei na God ta ke hande ue ahe poekari sokova aisora avo eto be kogue irivujo. Ungo God ta undurari o ‘Sheep’ aingera eto enana o sheep ta hamo asuketo puvuresora rate enana ta jota amo isoro o ra.
MAT 7:16 Avo eto enana amunure avo enana ta ari na harikau kesova ke amita be amo eingera. Esi egama ai ta hombare be mane humbagora eto nei ji koririva ai ta oga mane imbagora.
MAT 7:17 Ji javotoho na be javotoho eaguja eto ji sapura na be sapura eaguja.
MAT 7:18 Eto nei indari ji ta indahu mane puvuresuja eto indahu ji ta indari javotoho mane puvuresuja
MAT 7:19 rate indahu ji kito tapa andage eto jaro veto evekasuja.
MAT 7:20 Eto ainge dombo enana God ta ke sokova tirari embomeni ta ari na harikau enana amunure avo ungo be kesova.
MAT 7:21 Eto nau degi ta ‘Bada, Bada’ ijirari embomeni nei uhoho na God ta simba ari degi ta mane horasora rate God Mama uhu ta iraguja amita ke agi eagora embomeni amina pere horasora.
MAT 7:22 Eto ari sirikari iji puvurou embo isapamane na nau degi ta ke einge aisora, ‘Bada, Bada dago javo no ta God ta ke hande eagora, eto ahihi sasapura ohimbagora eto sovera no na ari nei te nei te ere ovora.’ ke ainge aro ingito
MAT 7:23 ke mine enana ta degi einge aisona, ‘Na ungo kiaera. Ungo ari sasapura embomeni avo eto ke nau agi ae ere ovova toto veto pambuvu,’ ke ainge aisona.
MAT 7:24 Avo eto embo amuna ke nau ingito agi aisuja embo amo kiari embo bera eto embo amina bande karu hamo ta gerikenu
MAT 7:25 ga veto umo vuenga puvutuhunu pisara pajire puvuto bande tena rate vurereketo veae amita be amo koro hamo ta avo eto.
MAT 7:26 Eto ke nau ingito agi ae embo amo embo amita hotembari irae bande hora ta gerikenu
MAT 7:27 ga veto umo vuenga puvutuhunu pisara pajire puvuto bande koheketo venu umo na humbuto pambuna.” ainge Iesu na ahe poekena.
MAT 7:28 “Eto ke erevi tapa enu irae enu embomeni tapa tiri ta areto mihia amina ke avo ingito vani vini ea.
MAT 7:29 Amita be amo Iesu ta ahe poekari amo enana ta ke pepeni kiari embomeni ta ke ainge mane kiari embo be na ahe poekihia ainge ea.
MAT 8:1 Eto Iesu tiri ta eto vovunu embo na ambo ta oroviketo vea.
MAT 8:2 Eto embo vahai huika na andirari avo eto osaga kogue mihahija amina puvuto paunge teteri eto Iesu ta degi ke einge ena, “Bada, umo uje eto kito ejo hamo nau javotoho ai.” ainge enu Iesu na, “Na ainge uje ere ona.”
MAT 8:3 eto amita ingeni jujuruketo hame ue ke einge ena, “Umo javotoho e.” ainge enu embo ta hamo javotoho enu
MAT 8:4 Iesu na ke einge ena, “Inge! Embomeni ta degi mane ao ingesora, rate tihi tambu eto pambuto priest ta degi ejo no hamo javotoho kito embo tapa au ingore eto Moses ta ke pepeni agi ue God ta hande pene gaga ta ikejo.”
MAT 8:5 Eto Iesu na da Capernaum ta pahunu Rome ta isoro tihi jigari embo vahai avo hambunu penunu einge ena,
MAT 8:6 “Bada, nau pure embo vahai na ambure humbuto isari irae bande jo ta hereketo memenga te osaga kogue mihia.” ainge enu
MAT 8:7 Iesu na ingito ke einge ena, “Aravora, na pambuto embo avo ano kojasuja,” ainge enu,
MAT 8:8 “Bada, ainge manera,” ena, “Na embo sapura avo eto nau bande ta mane horasoa rate ai mihie pe na ejo nau pure embo kojai. Amo eingera.
MAT 8:9 Namo te tapa nau embo okose ta sovera jigama ue pure eagona avo eto na nau isoro embo ta degi pambu aisona pambasuja eto nei ta degi hae aisona huresuja eto nau pure embo ta degi einge e aisona aisuja avo eto ainge dombo ejo kojai.”
MAT 8:10 ke ainge enu Iesu ingito mana mana eto embomeni amita ambota ere puvutuhua ta degi ke einge ena, “Na ungota degi erena, embo emina na humota be ere ua. Na Israel enda ta Israel embo eingeko hambaera
MAT 8:11 eto ungota degi ke be erena God ta degi ta pondo iji puvurou sohe embo ihane embo na puvuto Abraham te Isaac te Jacob te ga pondo aisora.
MAT 8:12 Rate enana Israel embomeni avo God ga irora javero ikena rate humbari uje ae eagora avoembo God na gosukau araha ta pambuto mume ta mihie si ijie ti kakambuketo kiroro kiroro ijie iresora”
MAT 8:13 ke ainge Iesu na embomeni ta degi eto isoro tihi jigari embo ta einge ena, “Umo pambujo. Umo do humota ere oa avo ano kesoa.” ainge enu embo amita pure embo na iji amina kojena.
MAT 8:14 Eto Iesu na Peter ta bande ta pambuto Peter ta umbohi ambure hamo vevere unu besi ta hereketo mihinu kito
MAT 8:15 ingeni ta hame enu hamo vevere irae enu ereto Iesu indari undunu indina.
MAT 8:16 Eto mume sihukihinu embomeni na ahihi sasapura na horari embomeni isapamane humbuto Iesu ta degi puvua. Eto Iesu na amita ke na ahihi sasapura ohimbenu pahuo ambure be avo enu irae enu kokojekea.
MAT 8:17 Eto ari ainge aisuja amo Peroveta Isaiah na mahu kihi ta einge kajena, “Amina dagota memenga osaga ambure tapa humbuto pambasuja.” ainge Isaiah na kajena.
MAT 8:18 Eto Iesu na embo isapamane areto mihio kito umo jiroromba oiho ta pambasi uje eto ambotani ta degi ke enu e nga nununga eto pambasi uo
MAT 8:19 Judea embo ta ke pepeni ahe poekari embo na Iesu ta degi ke einge ena, “Ahe poekari embo. Umo dainge pambasi ere oe avo na umote pambasi nununga ere ona.” ainge enu
MAT 8:20 Iesu na ke mine einge ena, “O koropu na enda koveto ho ta iraguja eto di na nga iketo iraguja rate Embo ta Meni hereketo evari degi iraera,” ainge ena.
MAT 8:21 Embo nei amo Iesu ta ambotani vahai amina ke einge Iesu ta degi ena. “Bada, na pambasona te kihi pambuto nau mama pehehija avo koveto ungote pambane.” ainge enu
MAT 8:22 Iesu na, “Na ambo ambo ue hae, ahihi amburari embo na ungo oenga hamo amburari embo kovasora.”
MAT 8:23 Eto Iesu na amita ambotani ga e nga ta vihito pahuo
MAT 8:24 pisara pajire be puvuto umo ta tenu piri peni vahai puvuto e nga jo ta overekenu huhurumbeto veasi unu Iesu e nga jo ta evo unu
MAT 8:25 amita ambotani pambuto ujeo erenu, “Bada, dago sari ara ere ua, dago hondate e!” ainge eo
MAT 8:26 Iesu na, “Ungo do joru ere ove? Ungo na be humota ae avo eto joru ere ova.” Ke ainge eto ereto pisara te eva piri te ta degi jamo ara ke enu eva jamo eto visi visi ena.
MAT 8:27 Eto embomeni na kito vani vini eto “Embo emo do aingere? Pisara te eva te na amita ke agi eto jamo ehera,” ke ainge ea.
MAT 8:28 Eto umo oiho ta pambuto degi javo Gadara ai ta puvuto Iesu na embo heriso ahihi sasapura na andirari avo eto embo ikari sari ari panga pe ai ta mihahera avo hambuna. Eto isoro embo avo eto embomeni na degi aita isa pambae joru ere uahera.
MAT 8:29 Eto ahihi sasapura na Iesu kito gagaha ijie einge ea, “God ta Meni umo dagota degi do ao? Dago iji kombu te memenga kesora iji avo puvurae kihi ta dago ta hajire ikaote?” ke ainge
MAT 8:30 eto enana ta engihita o ohu isapamane mihio kito
MAT 8:31 Iesu ta degi penunu einge ea, “Eto umo dago ohimbasi uje eto kito ohimbejo o ohu oromita jo ta pambare,” ainge eo
MAT 8:32 Iesu na, “Ungo pambuvu” ainge enu o ohu ta jo ta pambuo o tapa na heti i ta eto umo joremba ta veto umo ta indito sasari ea.
MAT 8:33 Eto o ohu ta simba ari embopo na ari avo kito huheveto da ta pambuto ahihi sasapura na andirari embopo ta degi vasiri do puvuna avo tirio ingia,
MAT 8:34 eto da embomeni tapa na Iesu kesi uje eto pambua. Eto pambuto kito Iesu enana ta degi avo toto pambaja ke ea.
MAT 9:1 Eto Iesu na e nga ta vihito umo oiho ta pambuto amita da ta puvuna.
MAT 9:2 Eto embo vahai utu meni-pehari avo eto besi ta herekari mihahija avo embomeni na humbuto Iesu ta degi puvuo enana be humota ere ua avo Iesu na kito utu meni-pehari embo ta degi ke einge ena, “No ari sasapura avo hotembeto ere toruhona avo eto tunga javotoho e.” ainge enu,
MAT 9:3 Judea embomeni ta ke pepeni kiari embopo na amita ke ingito ungo oenga ke mine ara ea,
MAT 9:4 eto enana ta hotembari do ere puvutohua avo Iesu na kito enana ta degi ke einge ena. “Ungota jo ta hotembari sapura do eto ere puvutohoi?
MAT 9:5 Ari haiteko davore? Eto embo na no ari sasapura ere toruhona aisuja amo ari ngahia retemo embo na umo kojeto ereto pambu aisuja amo ari ngahia re?
MAT 9:6 Ungo ke be ae ere ova avo eto God na Embo ta Meni ta degi sovera ikari amina enda ta embomeni ta ari sasapura hotembeto toaguja avo ungo ke be ava ari erevi aisona,” ainge enana ta degi eto hapereketo utu meni-pehari embo ta degi einge ena, “Ereto no besi siriketo humbuto bande ta pambujo,” ainge enu,
MAT 9:7 ereto bande ta pahunu
MAT 9:8 embomeni na kito joru ue God na embo ta degi sovera isapamane ikena avo hotembeto God jakeka ea.
MAT 9:9 Eto Iesu na degi avo toto pahue embo ta tax sirikari embo javo Matthew avo pure ari besi ta arumbeto mihinu kito ambo ambo aja ke enu Matthew ereto Iesu ambo ambo ena.
MAT 9:10 Eto Iesu na Matthew ta bande ta indie mihinu tax sirikari embopo te Moses ta ke pepeni poekari embopo te na puvuto Iesu te amita ambotani te ga arumbeto indie mihio,
MAT 9:11 enana Pharisees embomeni na ari avo kito Iesu ta ambotani ta degi einge eto ingia, “Ungota ahe poekari embo na do eto embo sasapura ga ere indei?”
MAT 9:12 ke avo ijio Iesu na ingito mine einge ena, “Doctor na ambure umbae embomeni ta degi mane pambaguja rate ambure humbari embomeni ta degi pere pambaguja.
MAT 9:13 Eto God ta ke kajari ta einge mihia, ‘ungota o teto pene gaga ta tembari avo na uje ae rate ungo embomeni kito jo ururou osa ava uje ere ona.’ ke amita be avo deire pambuto ungo oenga siriketo kivujo. Na puvuto embo jajavotoho mane rate sasapura avo ano kokonjeketo God ta degi puvurora oru ue ere ona.”
MAT 9:14 Eto John bapataito ari embo ta ambotani nei uhoho na Iesu ta degi puvuto einge eto ingia, “Enana Pharisee embomeni te dago te ungotenau ari mahu avo eto mahainge donda ajireketo eagora rate do eto ambotani no na donda ajirekae teho iragore?” ainge eo
MAT 9:15 Iesu na ke mine einge ena, “Eto embo na kakara jimbuto pondo aisuja amo amita namei kamei na ajirekari hotembae tunga javotoho na indagora rate embo pambasuja amo namei kamei na osaga kogue indari ajirekasora ainge dombo na irae asona iji puvuto ere hua amikote enana osaga kogue indari ajirekasora.
MAT 9:16 Eto ari mamahu ta ari amo bande sisi ainge pasarira. Eto embo na sisi eha ojeto kaeto hirasuja amo iji na kajau giroro eto tohekasuja, ehako ga veasuja.
MAT 9:17 Eto nei amo kae harau gogore na jasari ai ta kae tureto mane ikagora vurereketo veasuja avo eto harau eha geriketo tureto ai ta ikasuja amo javotoho na iresuja.”
MAT 9:18 Eto Iesu na ke ainge ijie mihinu Judea ta embo okose vahai na amita degi puvuto paunge teteri eto ke einge ena, “Nau iae eha pehihei umo pambuto ingeni tembao vasiri te eraja ere puvutuhona.” ainge enu
MAT 9:19 Iesu te amita ambotani te amiga pambua.
MAT 9:20 Eto degi ta pahuo evohu vahai amo jua tapa 12 amita jo ta orosa ere vovuahija amina Iesu kito
MAT 9:21 einge hotembena, “Na amita bo hame aisona amo kojasona,” ainge hotembihe kuta puvuto amita bo pekihi ta hame unu
MAT 9:22 Iesu egerembeto kito ke einge ena, “Nau iae tunga javotoho ejo. Umo na humota be ere oa avo eto kojasoa,” ainge ijinu amikote evohu amo kojena.
MAT 9:23 Eto Iesu na Judea ta embo okose ta bande ta puvuto horenu bijapuri ari embomeni puvuto sisi sasi ijie mihio kito
MAT 9:24 “Ungo araha ta pambuvu! Kakara emo pehaera teho evo ere ua,” ainge enu enana ke avo ingito kege ganini eo.
MAT 9:25 Iesu na enu arahata pahuo kakara hereketo mihina ai ta horeto amita ingeni ta jiginu vasiri te erena
MAT 9:26 eto ari ainge ena amita duru avo enda embomeni tapa ingia.
MAT 9:27 Eto Iesu na degi avo toto pahunu tihi kuru ari embo heriso na duru ingito ihiketo Iesu ambo ambo eto gagaha ijie ke einge ea, “David ta Meni, dago ta osaga kito jo e!” ainge ijio
MAT 9:28 Iesu bande jo ta horenu tihi kuru ari embopo ambota horeo, Iesu na enana ta degi einge eto ingina, “Eto ungo hotembiheva amo na ungota tihi hirikari haite avo hotembihevete.” ainge enu “Bada, dago ainge ere hotembihera” ke ainge eo
MAT 9:29 Iesu na enana ta tihi ta hame ue ke einge ena, “Ungo ke be do ereva ainge puvuresuja,” ainge ijinu
MAT 9:30 tihi hirikenu kia. Eto Iesu na enana ta degi ke ngahia na einge ena, “ari erevi embo nei ta degi mane avo ingesora,” ainge ena.
MAT 9:31 Rate enana Iesu ta ke agi ae eto pambuto enana ta embomeni tapa ta degi eo ingia.
MAT 9:32 Eto tihi kuru ari embo ta tihi hirikenu pahuo embo vahai ahihi sapura na horari avoeto ke ambu mihahija avo embomeni na humbuto puvuo
MAT 9:33 Iesu na ahihi sapura ohimbenu pahuo embo amo ihiketo ke enu embomeni na kito vani vini eto ke einge ea, “Dago ari einge Israel enda ta kiae pekota ari erevi ere kogora.” ainge ea
MAT 9:34 rate enana Pharisee embomeni na kito ungo oenga ari ainge avo asi ue Iesu ta degi hini kambari ue ke einge ea, “Amo ahihi sasapura ta okose na amita sovera ikaguja avoeto ahihi sasapura ere ohimbihia.”
MAT 9:35 Eto Iesu na da tapa ta hembuhe Judea embomeni ta giu ari bande amita duru javotoho avo hande ue embomeni ta memenga ambure enu irae ena.
MAT 9:36 Eto embomeni hamo mine umbae ue osaga neite neite kogue mihahera avo Iesu na kina rate hondate ari irae o sheep simba eagora embo aingeko irae kito jo ena.
MAT 9:37 Avoeto amita ambotani ta degi ke einge ena, “Ve na pupusumbeto sari ere ua rate ondeto humbari embo isapamane mane
MAT 9:38 avoeto ji ve Mamo ta degi penunu evujo pure embo nei ikau ve ondare.” ainge Iesu na ena.
MAT 10:1 Eto Iesu na amita ambotani 12 jage enu vahai ta puvuo enana ahihi sasapura ohimbara ambure nei te neite aro irae aja sovera ikenu umbua.
MAT 10:2 Apostel 12 amita javo amo erevira: kihi amo Simon Peter te amita namei Andrew te ra, nei amo embo Zebedee ta meni heriso James te John te ra,
MAT 10:3 eto nei amo Philip te Bartholomew, eto nei amo Thomas amite mahu tax humbari embo, javo Matthew amite ra, eto nei amo Alphaeus ta meni James amite Thaddaeus te ra eto
MAT 10:4 nei Simon ra (embo amita jo vahai embomeni na Rome ta gavamani isoro na haekasi uje ea.) eto embo nei amo Judas da Kerioth embo te amina Iesu humbuto isoro embomeni ta ingeni ta ikena.
MAT 10:5 Eto apostel 12 avo Iesu na ikenu pambasi uo oje kahari ke einge ena, “Ungo enda nei embo ta enda ta mane pambasova eto Samaria embomeni ta da ta mane pambasova
MAT 10:6 rate Israel embomeni o sheep na vaine pambarako ere ora amita degi pambuto
MAT 10:7 ke erevi hande evujo. ‘God na tohota embomeni siriketo humbuto tihi jigesuja iji puvuto ere hua’ ainge ijie
MAT 10:8 ambure humbari embomeni evujo kokojekare eto pehari amite tapa evujo vasiri te erare eto hamo ta ambure nei te nei te tapa avo evujo hamo javotoho are eto ahihi sasapura ohimbevujo pambare. Eto ungo sovera umbeva amo koro ikae teho umbeva aingeto koro humbari mane hotembasova rate embo hondate ari javotoho evujo.
MAT 10:9 Ungo koro tapa mane juruketo humbuto pambasova
MAT 10:10 eto nei ombari asari te utu goru nei te ehi savo te tapa mane humbuto pambasova, amita be amo ungo pure javotoho aisova avoeto embomeni na ungo unduresora.
MAT 10:11 Eto ere pambuhuma da ta puvuto horavo embo javotoho amuna ungo peketo unduresi aisuja amita bande ta horeto mihima pure irae au pambasova.
MAT 10:12 Eto bande ta horeto “Peka ungota degi iroi” ainge evujo.
MAT 10:13 Eto bande amita embomeni na ungo osa ue pekasora amo javotoho ari enana ta degi iresuja rate enana ungo mine pekae asora amo ungota javotoho ari enana ta degi ikeheva avo haekevujo
MAT 10:14 eto da damina ungo pekae osa ae aisora eto ungota ke ingari uje ae aisora amo ungota utu oniho jaevekevujo veau toto pambuvujo.
MAT 10:15 Na ungota degi ke be erena, iji kombu ari sirikari iji te da ungo pekae aisora amita embomeni ta degi God na hajire ngahia be ngahia na ikau da Sodom te Gomorrah te ta embomeni na isapa kesora aingeko mane kesora.
MAT 10:16 Ingivujo! Ungo ikari embo nanena ungo o sheep humbuto kitoho o ta ikarako ere ona avoeto ungota pambari degi jireki poeki eto kogue siro jigama ue ari sasapura tapa hotembae pambuvujo.
MAT 10:17 Eto be kivujo. Embomeni na ungo andito humbuto ikaro koto ta hetasova nei Judea ta giu ari bande ai ta ungo esi na ejembaro memenga kesova.
MAT 10:18 Eto na avoembo embo na ungo kings te enda tihi jigari embopo te ta tihi ta ganoka ae ikaro heteto ke nau tapa avo avo ingesora.
MAT 10:19 Eto ungo koto asora iji te ke do aisova eto ke daingeto aisova avo hotembavojo. Iji amina ke do aisova amo God na ikau aisova
MAT 10:20 eto ke hande aisova amo ungota mane aisuja rate ungota Mama God ta Ahihi na ijirou pe no ta eto puvuresuja.
MAT 10:21 Eto iji puvuresuja amikote embo na namei kitoho embo na taro pehara enana ta ingeni ta iketo toasora ainge dombo mamone na meniundi ta degi aisora. Eto meniundi na ereto emone mamone kitoho embo na taro pehara iketo toasora.
MAT 10:22 Eto ungo nau javo vahai avoeto embo tapa na ungo ta degi hini kambari aisora rate sovera eto irirovo tutumota God na ungo orekasuja.
MAT 10:23 Rate da vahai na au memenga kesova da avo toto joru huheveto pambuto da nei ta irivujo eto emore ke be na erena ungota ke hande ari pure Israel enda ta da tapa mane avo iraesuja rate Embo ta Meni kihi puvuresuja.
MAT 10:24 Ahe poekari embo avo dombora kiari jombure ari meni avo isapara eto nei tihi jigari embo amo okosera te amita pure embomeni amo isapa ra.
MAT 10:25 Avoeto ahepoekari embo ta ari do aingere ke aisora avo kiari jombure ari meni ta ari ainge dombo ke aisora. Eto nei tihijigari embo ta ari amo sapura ke aisora amo pure embomeni te tapa ari sapura ke aisora. Ke amita be amo embomeni na na Satan ke eagora avoeto ungota ari kito urumbihe Satan ta pure ari embomeni ke aisora.
MAT 10:26 Avo eto ungo joru avojo. God ta ke mahu ahurekari tapa hirikano kesova.
MAT 10:27 Eto mumete te kumumu ke na erena ungo iji te da arahata isara na aisova.
MAT 10:28 Eto ainge ijie embo mane joru aisova. Embo amo tari pehari haite ra te embo ta ahihi tari inono aera. Rate God amo embo ta hamo te ahihi te tapa tau pehau ari sapura embo ta hajire humbari degi ai ta memenga ari kiari haitera avo eto God vahai joru evujo.
MAT 10:29 Eto di siripeta ta mine amo peni mane ra heriso avo 2 toea na ombuto humbahera aingera rate di siripeta vahai na sio mane enda ta veto pehasuja rate amita pehari iji puvurou ungota Mama God na aravora ijie kogurou veasuja.
MAT 10:30 Eto nei amo ungota uha ta siro hu doingere mahu God na eheketo kiarira
MAT 10:31 avoeto embomeni na ungota degi do aisora avo joru avojo. Ungo dombora. Ungo di siripeta aingeko manera.
MAT 10:32 Eto embo amuna “Na Keriso ke be ijie ambo ambo ere ona avo eto na amita tohora” ke ainge embomeni ta degi aisuja amo embo avo naura ainge uhu ta nau Mama ta degi aisona,
MAT 10:33 rate embo amuna embomeni ta tihi ta na ke be ae aisuja amo uhu ta God ta degi embo avo naura ke mane aisona.
MAT 10:34 Na enda embo ta peka humbuto puvurari hotembavojo, na peka humbari embo mane rate isoro humbari embora.
MAT 10:35 Na puvuto ere ona amo meni na ereto mamo ga jujune aisuja, iae na ereto e ga jujune aisuja eto nei amo imi na ereto umbohi ga jujune aisuja.
MAT 10:36 Eto ke nau avoembo embo ta kitoho embo be amo amita javo vahai na aisora.
MAT 10:37 Eto embo amuna amita e te mamo te osa ue na osa ae aisora amo ambotani nau ari haite manera. Eto nei amo embo amuna amita meni te iae osa ue na osa ae aisuja amo ambotani nau ari haite manera.
MAT 10:38 Eto embo amuna amita ji atahu humbuto na hatiresona hain ai ta haito pambari uje ae aisuja amo ambotani nau ari haite manera.
MAT 10:39 Eto embo amuna vasiri oenga ue uje amita ta pere pambasuja amita vasiri avo veto pambau irae aisuja. Rate embo amuna namo avoembo amita uje tapa jene ambu eto iresuja embo amina vasiri be avo hambasuja.
MAT 10:40 “Eto ke nau ijie pahurovo embo amuna ungo kito javo kahihe besi tiresuja amo na ungo ta ikari embo avoeto nau degi ta arako aisuja eto Mama God amo ikari embo nau avoeto amita degi ta arako aisuja.
MAT 10:41 Eto God ta ke hande ari embo na God ta degi mine humbasuja ainge dombo God ta ke hande ari embo avoeto peketo omena aisuja embo amite tapa God na hande ikau humbasuja. Eto embo javotoho avo embo na kito peketo omena aisuja embo amiga tapa God ta degi hande humbasuja.
MAT 10:42 Eto ke be erena amo embo amuna nau ambotani vahai kito ambotani nau avoeto umo jamo ikau indesuja embo amo God na hande ikau humbasuja.”
MAT 11:1 Eto Iesu na amita ambotani 12 ainge ke erevi ahe poekenu irae enu da nei nei da amita engihita embomeni ahe poekasi eto God ta ke hande asi da avo toto pambuna.
MAT 11:2 Eto John bapataito ari embo tipura ta mihie Keriso na ari tapa do do ena avo duru ingito amita ke agi ari embo ikenu Iesu ta degi pambuto einge eto ingia,
MAT 11:3 “John na embo puvuresi unu duru ikena amo umo rete mo o embo amo ambota puvurou avo ejo ingore,”
MAT 11:4 ke ainge eo Iesu na enana ta degi ke mine einge ena, “Eto do ere kogova eto do ere ingiheva avo pambuto John ta evujo ingoi. Ari amo erevira,
MAT 11:5 tihi vahaikari embomeni tihi hirikehei ere kogora, popora embomeni hae ere ora, hamo sapura embomeni hamo javotoho ere ua, oje susujukari embomeni oje hirikehere ere ingihera pehari embomeni vasiri te ere kokojikihera, eto hoivo embomeni ta degi duru javotoho ke hande ere ore ingihera.
MAT 11:6 Eto na humota ue ke be ijie embomeni na tunga javotoho be ere ora, ainge pambuto
MAT 11:7 John ta evujo ingoi” ainge enu John ta ke agi ari embomeni pambasi uo Iesu na embomeni ta degi ke einge ena, “Eto John ojagatambuta mihina ai ta ungo do kesi pambuheve? Sasaha pisara na kajeoi ujiji eaguja avo kesi pambuhevete?
MAT 11:8 Nei kiari bo ove javotoho asuketo eaguja avo kesi pambuhevete? Bo ainge amo king ta bande ta pambuto kiaeheva.
MAT 11:9 Rate evujo ingone, amo peroveta vahai kesi pambuhevete? Amo peroveta be avo pambuto kogueva
MAT 11:10 amita be amo erevira. Peroveta mahu amina God ta ke einge kajari mihia ‘God na amita pure meni ta einge eria, Na nau duru hande ari embo kihi ikano pambuto no pambari degi nununga aisuja’ ke kajari ainge mihia amo John puvuresuja amita ke ra,
MAT 11:11 Avo eto ungota degi erena, embo dombo be dombo ae pekota amo John na ena. Eto God na tohota embomeni siriketo humbuto tihi jigari iji puvuresuja amita duru avo John na hande uija avo eto John amo dombokora rate embo amuna God ta tihi jigari ta horasuja embo amo John dembeto dombo be aisuja.
MAT 11:12 Rate John ta ke hande ari iji te eto puvuto eha oroho emite embomeni na God ta tihi jigari ta horasi uje ue sunumbo sunumbo ue putuhore embo sasapura na ai ta horasi embo nei mima mama ue ere puvutuhora.
MAT 11:13 Eto John ta iji kihi ta amo peroveta tapa eto Moses ta ke pepeni amite tapa na God ta tihi jigari ta ke ere ijiahera amo peroveta Elijah ehako puvuresuja ainge ea
MAT 11:14 avoeto ungo enana ta ke avo ke be ari haite kito John ta ari amo Elijah ta ari inono ra ainge kiaeheva.
MAT 11:15 Eto ungota oje irirou kito ke erevi ingivujo.
MAT 11:16 Eto embomeni eha mihera amita ari mo do aingekore? Amo meni isasaraho na da arahata arumbeto boru jumbarako ere ora nei uhoho na ereto
MAT 11:17 ‘Dago jimbari ta sesena asi ue ja tivasi uje ehera rate ungo ja tivari uje ae, nei embo pehehija avo sesena ue si asi uje ehera rate ungo si ari uje ae’ ari aingeko ove
MAT 11:18 John puvuhija, eto amina indari ajirekihaja nei wine indae uija avo embomeni na kito ‘Ahihi sapura na horihaja avoeto ere ua’ ainge ijiera.
MAT 11:19 Eto Embo ta Meni puvija amina indari te wine te tapa indaguja avoeto embomeni na kito ‘Embo erevi kivu, amo okope undurari embora eto jai indari embora amina tax koro humbari embomeni amite embo sasapura nei te nei te ga namei eaguja’ ainge eagora rate God ta ari be avo kito ke be aisora” ainge Iesu na ena.
MAT 11:20 Eto da nei nei ai ta Iesu na ari sovera nei te nei te ena avo embomeni na kito ari sasapura toto egerembae avoeto da amita embomeni avo Iesu na ke ngahia na einge ena,
MAT 11:21 “Ajao da Chorazin te da Bethsaida te ta embomeni ungota degi osaga pajire be puvuresuja. Eto ari sovera nei te nei te ungo keheva avo da Tyre te Sidon te ta jo ta ari ainge ahena amo amita embomeni na ari sasapura mahu toasi bo baiki na kajari avo asuketo amisa na kuhaehera rate ungo na ari sasapura toari uje aera.
MAT 11:22 Na ungota degi ke be na erena, God na ari siriketo hajire ikari iji te ungo na hajire ngahia be avo kesova da Tyre te da Sidon te da embomeni na osaga kesora aingeko mane kesova.
MAT 11:23 Eto ungo da Capernaum embomeni ungo oenga sovera ungota na ereto God ta degi vihesi ere ovete? Avo God na kito humbuto gosukau Satan ta degi veasova. Eto ari sovera nei te nei te ungota da ta uena avo da Sodom ta ahena amo da Sodom embomeni na kito ke be ahera avoeto mane evekaehija.
MAT 11:24 Avoeto God na ari sirikari iji te ungota ari sasapura avoeto osaga peni vahai ikau kesova eto da Sodom embomeni na isapa kesora aingeko mane.” ainge Iesu na ena.
MAT 11:25 Eto iji amikote Iesu na ke be ijie God ta degi einge ena, “Mama God, uhu te enda te ta Bada, kiari no erevi avo ojikehei siro peni embomeni na kiaera rate kiari irae embomeni ta degi hirikehe ere kogora avoeto na umo jakeka erena,
MAT 11:26 Mama uje no re javotohora!”
MAT 11:27 Ainge eto embomeni ta degi ke einge ena, “Nau Mama God na amita pure tapa ingeni nau ta ikena. Eto God Mamo vahai na amita Meni ta ari be kiarira eto Meni vahai amina Mamo God ta ari tapa kiaguja eto embo Meni sirikasuja amina pere kesora.
MAT 11:28 Avo eto ungo donda bouka humbari avo eto pegogo embomeni nau degi ta have jangu indari ikane.
MAT 11:29 Eto namo ga kaju evujo eto vahaita ue ungo ahe poekane. Na ngahia ari embo mane avo eto ungota ahihi mine humbuto sovera aisuja
MAT 11:30 eto ungotena pure vahaita ue bouka humbuto osaga mane kesova.”
MAT 12:1 Eto iji isapa amita ambota God ta jangu indari iji amina Iesu te amita ambotani te na degi amo embo ta rice pure jo ta avo eto pahue Iesu ta ambotani na beuje unu rice isapa pojeto humbuto india.
MAT 12:2 Ari avo Pharisee embomeni na kito Iesu ta degi ta ke einge ea, “Amo God ta jangu indari iji rate do eto no ambotani na dagota ke pepeni poeketo pure ere ore!” ainge eo
MAT 12:3 Iesu na ke mine einge ena, “Ungota ohihi David na ari ainge dombo ena avo ungo ke eheketo kiaere? Iji vahai amina amite amita embomeni te na beuje unu indari nei hambae
MAT 12:4 eto God ta bande ta horeto bread mahu God ta degi hande ikari avo humbuto india. Eto bread amo ke pepeni avo eto Priests na pere indagora rate beuje avo eto bread humbuto india.
MAT 12:5 Eto nei amo Moses ta ke pepeni kajari ai ta ke vahai mihia avo priests na temple jo ta God ta jangu indari iji te pure eagora amo ke pepeni poekagora rate amo enana ta pure avo eto eagora avo eto amita sapura irae.
MAT 12:6 Na ungota degi erena, Temple ta ari avo ari eha nau degi ta eto puvuja amina dembihia
MAT 12:7 amita be amo God ta ke ta einge kajarira. ‘Amo ungota o teto heveto pene ikari mane rate jo ari avo uje ere ona.’ ainge God na eria eto ke emita be kiaeheva amo ungo na ari sapura ae embomeni erevi avo mane pehumba aheva
MAT 12:8 ke be amo Embo ta Meni amo God ta jangu indari iji amita simba ari embora.” ainge Iesu na ahe poekena.
MAT 12:9 Eto Iesu na degi avo toto God ta pari ari bande ta horena.
MAT 12:10 Eto ai ta embo ingeni meni-pehari mihina avo eto embomeni na Iesu koto ta pehumba asi pambuto einge eto ingia, “Eto embo na God ta jangu indari iji te embo au kojasuja amo dagota ke pepeni poekaute?” ke ainge eo,
MAT 12:11 Iesu na ke mine einge ena, “Eto ungo embo vahai ta o sheep na hoto hu be ta veasuja amo o mamo na veto ohikau vihoute? Aisuja,
MAT 12:12 eto o sheep ta mine amo embo ta mine ainge mane, isapara, avo eto embo na God ta jangu indari iji te embo nei hondate aisuja amina ungotenau ke pepeni mane poekasuja” ke ainge Iesu na embomeni ta degi ijie
MAT 12:13 ingeni meni-pehari embo ta degi ke einge ena, “No ingeni jujuruke” ainge enu ingeni jujurukenu ingeni nei javotoho amiga inono ena.
MAT 12:14 Ari avo Pharisee embomeni na kito tumo eto degi amo toto pambuto daingeto Iesu taro pehasuja avo ihiketo ke kasea.
MAT 12:15 Eto Pharisee embomeni na Iesu taro pehaja ke kasea avo kito degi avo toto pahunu embomeni isapamane ambo ambo ue pambua. Eto ambure embomeni avo Iesu na kito enu kokojekeo
MAT 12:16 tapa do ena avo ke hande eagore amita javo peni eaguja haekena.
MAT 12:17 Eto ke ainge ena amita be amo God na peroveta Isaiah ta degi ke einge enu kajena avo puvuroja ena,
MAT 12:18 “Nau pure ari Meni siriketo humbena amo erevira. Na embo erevi osa ere ona eto amita ari tapa kogue tunga javotoho ere ona. Na amita degi Ahihi nau ikano veto horau embo tapa ta ari siriketo hajire ikasona amita duru avo enda tapa ta hande aisuja.
MAT 12:19 Eto amina gagaha eto boru jumbari ke mane aisuja. Eto da arahata heteto ke isara na mane aisuja.
MAT 12:20 Rate amina ivo ambu embomeni orero orero eto simba ue hondate ara uje eagora embomeni avo jo au pure ngahia au irae au ari jajavotoho pere hetasuja.
MAT 12:21 Eto enda tapa na nau pure ari meni kogue ari javotoho puvuresuja avo hotembihe tunga javotoho aisora.” ainge enu Peroveta Isaiah na kajena.
MAT 12:22 Eto embo vahai ahihi sapura na horari avo eto pe vahaikari eto tihi vahaikari avo embo na Iesu ta degi humbuto puvuo Iesu na enu tihi te pe te hirikenu kogue ke ena.
MAT 12:23 Eto Iesu ta ari avo embomeni na kito vani vini ue ke einge mine ara ea. “Embo emo ungotenau hondate ari embo David ta Meni eha puveite?”
MAT 12:24 eto Pharisee embo na ke avo ingito tumo ue ke mine einge ea, “Ahihi sasapura ta tihi jigari javo Beelzebul amina sovera embo emita degi ikihioi amina ahihi sasapura ohimbaguja.” ke ainge eo
MAT 12:25 Iesu na enana ta jo kito ke einge ena. “Ungo do ere hotembiheve? Eto enda vahai na ereto kaheketo oenga viha eto isoro aisora enda amo ivo ambu eto iji koso mane iresuja. Eto da retemo javo vahai na kaheketo isoro aisora amo sapura be eto irae aisuja,
MAT 12:26 eto ainge dombo Satan ta pure ari embomeni na ungo oenga kaheketo oenga viha eto isoro ahera amo mahu irae ahera.
MAT 12:27 Eto na ahihi sasapura Beelzebul ta sovera na ohimbari ke ereva rate ungota ambotani na ahihi sasapura ohimbagora amo sovera amuta na ere ore? Eto ungota ambotani na ahihi sasapura ohimbagora avoeto enana na ungota ari avo mahu siriketo kito sapura ke erera.
MAT 12:28 Amo Beelzebul ta sovera na ae rate God ta Ahihi na sovera ikihioi ahihi sasapura ohimbagona. Eto ari nau avo kogue God ta tihi jigari iji ungota degi puvija avo ke be evujo.
MAT 12:29 Eto nei amo embo na vuvure embo ta bande pejeto kihi andiresuja kito amita bande pejeto donda pegene aisuja. Kihi andirae amo mane pegene aisuja.
MAT 12:30 Eto ke be amo embo amuna namoga kajuae aisuja amo nau kitoho aisuja eto nei o togo jigari embo namoga pure aisora rate namoga pure ae embomeni amo kitoho eto o ujekari embomeni pere ra.
MAT 12:31 Avo eto ungota degi erena embo na ari sapura tapa do aisuja pe na eto ari na amo God na hotembeto toari haitera, rate embo amuna God ta Ahihi Otohu ta degi ke sapura aisuja. Ungo na ere ova avo God na mane hotembeto toasuja.
MAT 12:32 Eto embo amuna Embo ta Meni ta degi ke sapura aisuja amo God na hotembeto toari haite ra. Rate embo na Ahihi Otohu ta degi ke sapura do aisuja ke avo God na mahu te eha te eto ambota mane hotembeto toasuja.”
MAT 12:33 “Eto ji javotoho amita be amo javotohora eto ji sapura ta be amo sapurara. Eto ji javotoho retemo sapura re amo ji be na kito heka eagora.
MAT 12:34 Ungo o koso o ta meni undira, ungo embomeni sasapura avo eto ke javotoho ari inono ae ra. Eto jo enetasuja amo pe ta puvuresuja.
MAT 12:35 Eto embo javotoho na ke hande asi jo ta jombure aisuja amo javotoho hambuto hande ikasuja, rate embo sapura na ke hande aisi jo ta jombure aisuja amo ke sapura pere hambuto hande aisuja.
MAT 12:36 Eto ungota degi erena God na embo ta ari sirikasuja iji te embo na enda ta mihie ke sapura vahai do ijija avo mane teto hatiresuja rate tapa harikari perekari aisuja.
MAT 12:37 Eto ke do ere ovova amina God na ungo siriketo ungo embo javotoho retemo sapura ke aisuja.”
MAT 12:38 Eto ke pepeni ahe poekari embopo te Pharisee embomeni nei uhoho na ereto ke einge ea, “Ahe poekari embo, God ta sovera humbuto ari vahai e kiore.” ainge eo.
MAT 12:39 Iesu na ke einge ena, “Ungo God kiae ari sasapura na enetari embopo, na God ta hajire kesi uje ere ova rate mane kesova be! God ta hajire vahai be ano kesova amo Peroveta Jonah amita ari avo ano kesova.
MAT 12:40 Eto Jonah na iji 3 ainge eva o peni amita hini jo ta evina ainge dombo Embo ta Meni na iji 3 ainge eva jo ta iresuja.
MAT 12:41 Eto embo Jonah na ereto da Nineveh embomeni oje kahenu enana ingito ari sasapura toto God ta degi puvua avoeto sirikari iji te God na au da Nineveh embomeni na ereto ungo pehumba aisora. Eto be ingivujo. Jonah ta ari amo isapara rate ari eha humbuto ere hona amo peni vahai be ra.
MAT 12:42 Eto enda Sheba ta Queen na degi hoi be ta eto puvuto King Solomon ta oje kahari ke inginu jo haperekena avoeto God na ke sirikari iji te Sheba ta Queen na ereto ungo nau ke ingae eagova embomeni avo pehumba aisuja. Solomon ta ahe poekari amo isapa rate nau amo peni be ra.”
MAT 12:43 “Eto ungo embo sasapura eha miheva ungo ta degi do puvuresuja avo oje kahasona ingivujo. Ahihi sapura na embo toto ere pahua rate irari nei jombure ere umakara ojaga tambu pere
MAT 12:44 avoeto irari mahu ta egerembeto puvuresuja eto bande gajiketo egeto ari avo kito tunga javotoho
MAT 12:45 eto pambuto namei kamei tapa 7 ungo sasapura pere amiga iresi humbuto puvuresuja. Eto embo amita sapura kihi amo isapara rate jo be egae hamo avo egehija avoeto amita sapura amo hamo ta hamo ta ere ua ainge dombo ungo na ere ova.”
MAT 12:46 Eto Iesu na embomeni ta degi ke ijie mihinu amita e te namei kamei te Iesu ta degi ke asi araha tambuta simba mihio,
MAT 12:47 embo vahai na kito Iesu ta degi ke einge ena, “Ki, no aja te namei kamei te no degi ta ke asi puvuto araha ta umo simba mihera,” ainge enu
MAT 12:48 Iesu na ke mine einge ena, “Nau aja amunure eto nau namei kamei amunure?” ainge eto
MAT 12:49 amita ambotani ta degi ingeni na kihito einge ena, “Embo amuna nau Mama uhu ta iraguja amita ke agi eaguja amo nau namei kamei te du emone te aja mane te ra avoeto nau namei kamei be eto aja be amo erevira” ainge Iesu na ena.
MAT 13:1 Eto iji amikote Iesu na bande toto umo tiuka hora ai ta pambuto arumbeto embomeni ahe poekena
MAT 13:2 eto embo isapamane puvuto hora ta arumbeo degi inono enu Iesu vihito e nga ta arumbeto
MAT 13:3 timu hatirari ke na ke nei te nei te ahe poekihe einge ena, “Iji vahai embo na ‘rice’ ve urasi pambuto
MAT 13:4 ihajara enu nei degi tambu ta vena avo di na kito veto irae indina
MAT 13:5 eto ve nei vena amo enda ngijiri ta avoeto amo ope ena
MAT 13:6 rate susu terae avoeto iji na kajenu giroro ena.
MAT 13:7 Eto ve nei ji humbura ta vena amo erena rate vasa na andinu sapura ena.
MAT 13:8 Eto ve nei amo enda javotoho ta veto ereto be isapamane ikena amo be nei 100 nei 60 nei 30 ainge ikena.
MAT 13:9 Eto ungota oje irirou kito ke erena erevi ingivujo,” ainge Iesu na ena.
MAT 13:10 Eto Iesu ta ambotani na Iesu ta degi puvuto ke einge eto ingia, “Umo do eto timu hatirari ke na embomeni ahe ere poekihe?” ainge eo
MAT 13:11 Iesu na mine einge ena. “God na tohota embomeni siriketo humbuto tihi jigesuja amita ke amo ungota degi araha tambuta ikari rate enana ta degi ta amo ojikari na ikari ra.
MAT 13:12 Ungo God ke be ereva embomeni ta degi kiari isapa mihia avoeto amita hamo ta nei God na ikau inono aisuja. Rate enana God ke be ae embomeni ta kiari isapa avo God na humbau irae aisuja.
MAT 13:13 Eto enana ta degi timu hatirari ke na ahe ere poekihena amo enana tihi te ra rate kiae eto oje te ra rate ingae
MAT 13:14 avoeto peroveta Isaiah na enana ta ari amo einge kajena, ‘God na ke einge eria, Embomeni emina ingito eagora rate be mane ingesora eto kon kon eagora rate be mane kesora.
MAT 13:15 Eto amita be amo enana ingaesira ue oje susundukehera eto tihi vavahaikehera. Eto ainge ae amo tihi na kiaehera eto oje na ingaehera eto jo na be hotembaehera. Eto egerembeto nau degi ta puvuraehera amo humbuto ano kojaehera,’ ainge God na enu Isaiah na kajena.
MAT 13:16 Rate ungo amo tihi na ere kogova eto oje na ere ingiheva avoeto javotoho ungota degi puvija.
MAT 13:17 Eto ungota degi erena, ke javotoho ehene ere ingiheva eto ere kogova avo peroveta te God ta embomeni mamahu na kesi uje ea eto ingesi uje ea rate ae ra.”
MAT 13:18 “Na ungota degi ve urari ta be harikasona ingivujo.
MAT 13:19 Enana God ta tihi jigari ta ke avo ingito ingae sira aisora amo embo degi tambuta mihie ji be puvaguja aingekora. Ke gamo poekari embo na puvuto be oreto humbasuja.
MAT 13:20 Eto embo nei enda ngijiri ta mihie be puvaguja.
MAT 13:21 Amo embomeni nei God ta ke ingito tunga javotoho eagora rate ke avo jo ta veae avoeto God ke be ae embomeni na enana ta degi ngahia aisora amo enana osaga kito toagora aingeko dombora.
MAT 13:22 Eto ve nei ji humbura ta veari amo embo God ta ke ingarira rate enda ta vasiri amita osaga eto daingeto koro mamo aehija amita osaga na andiaguja avoeto be ekari inono ae aingeko dombora.
MAT 13:23 Eto ve nei enda javotoho ta veaguja amo embo ai mihie God ta ke ingito ke be eaguja aingeko dombo amina be isapamane eketo be 100 nei 60 nei 30 ekaguja aingera.” ainge Iesu na ena.
MAT 13:24 Eto Iesu na timu hatirari ke nei einge ena, “God na embomeni toho amita siriketo humbuto tihi jigesuja amo eingekora. Embo vahai na ‘rice’ ve javotoho amita pure ta urihinu
MAT 13:25 mume sihukenu embomeni evopo uo kitoho embo vahai na puvuto pure jo ta vive eraja vive ta ve ihajara ena.
MAT 13:26 Eto rice ereto be ekihinu vive na ereto bohukenu
MAT 13:27 pure mamo ta degi pure embo na puvuto ke einge ea, ‘Bada, umo donda ve perekari uriha rate vive amo dainge eto erehei?’ ainge eo,
MAT 13:28 ‘Kitoho embo vahai na vive ta ve humbuto puvuto ihajara uija avoeto erehija,’ ainge enu pure ari embopo na, ‘Dago pambuto vive ara uje ere oete?’ ainge eo
MAT 13:29 pure mamo na ‘Mane, vive asoa rate rice ga jigito usasova avoeto vive mane aisova te
MAT 13:30 ‘rice’ vive ga mihie gasa au avo pure embopo na vive ga uketo vive punduto ji ta ikaro evikihirou rice avo nau harau ta ikasora’.” ainge ena.
MAT 13:31 Eto Iesu na timu hatirari ke nei einge ena, “Eto God na embomeni amita toho siriketo ere uhua amo eingera. Ji javo mustard amita ve amo isapa be avo ungo kiarira.
MAT 13:32 Rate embo na ve vahai humbuto amita pure ta urau ereto pajito pure ta donda tapa dembeto ji ainge eaguja. Eto di na puvuto amita hatu ta arihe araha eagora, aingekora.”
MAT 13:33 Eto Iesu na timu hatirari ke einge ena, “Eto God na embomeni toho amita humbuto tihi jigesuja amo flour ta pajirari sivo aingekora. Eto evohu na bread ingasi ue isapa humbuto flour baiki vahai ga tavasuja amo pajito pajire be aisuja, aingekora.”
MAT 13:34 eto Iesu na da embomeni ta degi ke be na harikae rate timu hatirari ke nei te nei te na ahe ere poekihahija.
MAT 13:35 Eto timu hatirari ke na ahe poekasuja avoeto peroveta vahai na mahu einge kajena, “eto uhu te enda te ari iji te eto puvuto eha oroho emikote nau ke peni erevi ae embomeni ingae avo eto timu hatirari ke na ano ingesora.” ke ainge God na ijinu peroveta na kajena.
MAT 13:36 Eto Iesu na embomeni toto bande jo ta horenu amita ambotani na puvuto amita degi eto ingia, “Vive pure ta erari amita ke be avo dago ejo ingore,” ainge eo
MAT 13:37 Iesu na timu hatirari ke amita be harikena. “Ve javotoho urari embo amo Embo ta Meni ra
MAT 13:38 eto enda tapa amo amita pure ra eto ve javotoho amo embomeni God ta toho siriketo humbari ra. Eto vive erari amo embo sapura ta embomeni ra
MAT 13:39 eto kitoho embo puvuto vive eraja ihajara ena amo Satan ra. Eto be pojari iji amo iji kombu te ra eto be pojari embo amo God ta Anera.
MAT 13:40 Vive uketo pupunduketo ikehere evekehija ainge dombo iji emita tutumota ari ainge amo puvuresuja.
MAT 13:41 Amo Embo ta Meni na amita Anera ikau enda ta puvuto ari sasapura ara engekari embomeni te embo sasapura tapa amite humbuto hajire humbari degi ta gosukaro veto
MAT 13:42 vevere kogue sisi sasi ijie ti kakambuketo kiroro kiroro ijie iresora.
MAT 13:43 Eto God ta embomeni na God ta irari degi ta pambuto iji ta usasa aingeko eto iresora. Ungo oje irirou kito ingivujo.” ainge Iesu na harikena.
MAT 13:44 “Eto God na embomeni siriketo humbuto tihi jigesi ere ua amita ke be amo koro te donda jajavotoho te ainge enda ta koveto ahurekari avo embo nei na koveto hambasuja amo ehako ahureketo osa osa ue pambuto amita donda tapa siriketo humbuto pambuto enda mamo ta degi donda koveto ahurekari enda avo ombuto humbasuja aingekora.
MAT 13:45 Eto nei amo embo na God ta tihi jigari ta horasuja amo eingera, embo na daremo javotoho be humbasi jombure ere ua
MAT 13:46 eto vahai hambasuja amo sago javotoho be avo eto ombuto humbasi amita donda tapa avo ombuto koro humbuto koro amina daremo avo humbasuja aingera.
MAT 13:47 Eto God na embomeni siriketo humbuto tihi jigesuja amo eingera. Umo o parari embo na amo joremba peni ai ta veto bonga umo ta gosukeore umo o nei te nei te na
MAT 13:48 horeto pevihioi humbuto gorukeore hora ta vihioi indari o siriketo humbuhe indahu o gosukeore sari eaguja aingekora.
MAT 13:49 Eto ainge dombo iji kombu ta Anera na veto enda tapa ta pahue embo jajavotoho siriketo humbuhe
MAT 13:50 embo sasapura ji peri ta gosukaro veto evikihie ti kiroro kiroro ue sisi sasi aisora.
MAT 13:51 Eto ke erena ere ingihevete?” ainge Iesu na ambotani ta enu, “Dago ere ingihera” ainge ea
MAT 13:52 avoeto Iesu na einge ena, “Avoeto ungo God ta ke kiari humbari embomeni amuna God ta tihi jigari ta horeto ambo ambo aisova amina kiari mamahu te kiari ehaha jajavotoho te avo hande aisova, pondo embo na amita oho i ta vihito donda nei te nei te hande eaguja ainge dombora.”
MAT 13:53 Eto Iesu na timu hatirari ke erevi enu irae enu degi avo toto
MAT 13:54 tohota pajirari da ta pambuna. Eto pambuto giu ari bande ta horeto ke ahe poekihinu embomeni ingito vani vini eto ke einge ea, “Embo emina kiari te sovera te daingeto humbuto puvei? Eto ari nei te nei te erevi daingeto ere oi?
MAT 13:55 Amita mamo amo bande gerikari embo ra, eto amita e Mary te amita namei kamei James te Joseph te Simon te Judas te
MAT 13:56 du emone te tapa ei mihera te kiari erevi daingeto humbuto puvei?”
MAT 13:57 ke ainge ijie Iesu ta ke ingari uje ae ea. Avoeto Iesu na enana ta degi ke einge ena, “Na ke be na erena amo Peroveta ta ke amo degi tapa be tapa na ingesora rate da amita be eto amita javo vahai embomeni na mane ingesora.” ainge ena.
MAT 13:58 Eto enana Iesu humota be ae avoeto Iesu na enana kiora ari nei te nei te ae rate isapa be enu kia.
MAT 14:1 Eto iji amite Galilee Province ta gavana Herod na Iesu na ari nei te nei te tapa do ena amita duru ingito amita
MAT 14:2 simba ari embomeni ta degi ke einge ena, “Embo amina sovera isapamane jigama ue ari nei te nei te ere ua amita be amo embo amo John bapataito ari embo avo pehari ta eto ereto ere ua,” ainge Herod na ena
MAT 14:3 amita be amo John bapataito embo pehae mihie Herod ta namei Philip isembihe ke einge ena, “Umo ke pepeni poeketo no hovahu Herodias jimbuto mihea,” ke ainge pere ere ijiahija avo Herodias na ke avo haekasi uje eto Herod ta enu John avo andito chain na punduto tipura ta gosukena.
MAT 14:5 Eto Herod na John tau pehaja uje ena. Rate embomeni na John amo peroveta ke ea avoeto amita degi mine do aisora avo hotembeto tona.
MAT 14:6 Eto Herod e na ingena amita iji puvunu pondo uo Herodias ta iae na ja tivenu Herod na kito tunga javotoho
MAT 14:7 eto Herodias ta iae ta degi amita do humbasi uje aisuja avo hande ikasi oje enu pambuto e ta degi enu
MAT 14:8 e na ke einge ena, “Na uje ere ona avo John bapataito embo ta tunga avo tiuketo heva ei ta siro tembeto humbuto puvujo.” ainge enu
MAT 14:9 Herod na tunga osaga kina rate amina pondo ta horukea embomeni amita degi ke mahu ikena avoeto toasuja inono ae avo eto osaga kogue amita pure embomeni ta enu
MAT 14:10 pambuto John tipura ta mihina ai pambuto John ta tunga tiuketo
MAT 14:11 heva ta tembeto humbuto umoro ue mihia ai ta puvuto Herodias ta iae ta ikeo humbuto pambuto e ta ikena.
MAT 14:12 Eto John ta ambotani na John ta hamo humbuto pambuto koveto ahureketo toto pambuto Iesu ta degi John ta tunga tiuketo umbua amita hihi avo tirio ingina.
MAT 14:13 Eto John bapataito ari embo ta tunga avo Herod na tiukena amita duru avo Iesu ingito oenga iresi e nga ta vihito embo irae degi ai pahunu embomeni kito enana ta da toto Iesu ambo ambo ue utu na pahuo umo ireremba hora ta jorembeto
MAT 14:14 Iesu puvuto hora ta vihito embomeni utu na puvua enana ta ambure nei te nei te avo kito jo ena avo eto enu kokojekea.
MAT 14:15 Eto hure vovunu Iesu ta ambotani na puvuto Iesu ta degi ke einge ea, “Iji irae ere ua eto degi hoi ra avoeto ejo embomeni da ta egerembeto pambuto indari koro na ombuto humbuto indito evore.” ainge eo
MAT 14:16 Iesu na ke mine einge ena, “Aravora, tovu iriroro ungo na indari ikevu indore,” ainge enu
MAT 14:17 enana “Dago ta degi indari irae rate bread tapa isasaraho pere eto umo o isasaraho 2 ainge avo pere mihia,” eo
MAT 14:18 Iesu na, “Aravora indari aravo humbuto havu,” ainge ena.
MAT 14:19 Ke ainge eto enu embomeni tapa enda ta areo bread 5 te umo o 2 amite humbuto tihi i ta eto God peketo osa enu irae enu bread periketo ambotani ta ikenu humbuto pambuto embomeni undua.
MAT 14:20 Eto embomeni tapa indio inono enu indari ihehe siriketo umbua amo handija tapa 12 ainge ai ta jureo pevihina.
MAT 14:21 Eto embo perekari tapa 5,000 ainge amina airi te meni hatira te tapa india.
MAT 14:22 Eto embomeni indari indio irae enu Iesu na amita ambotani kihi ikenu e nga ta vihito umo oiho ta pahuo Iesu oenga mihimihe enu embomeni sisiketo pahuo
MAT 14:23 pari asi umo oenga heti i ta vihito pambuna. Eto mume sihukihinu oenga mihinu
MAT 14:24 e nga kihi pambuna avo pisara peni vahai te eva piri pajire te tihi buju ta eto puvuna avoeto pambari haiteko mane unu
MAT 14:25 iho unga ihiketo vivihinu enana ta degi Iesu na eva hamo ta haito puvutuhunu
MAT 14:26 amita ambotani na kito joru ue hori gagaha ijie “embahe puvija” ainge ijio
MAT 14:27 Iesu na ke mine sausau eto einge ena, “Ke ainge tovu amo namora, joru avojo,” ainge enu
MAT 14:28 Peter na ke einge ena, “Bada, umo re te, ejo ingito umo hamo ta haito iesina,” ainge enu
MAT 14:29 Iesu na, “Aravora, veto hae,” enu Peter na e nga toto eva hamo ta haito Iesu ta degi imihe
MAT 14:30 pisara ta sovera kito joru eto eva ta huhurumbeto vovue jage eto ena. “Bada na hondate e,” ainge enu.
MAT 14:31 Iesu na ingeni sau sau jujuruketo Peter jigito ke einge ena, “Umo ke be ae embo, umo do eto na humota ae re?” Ainge eto
MAT 14:32 e nga jo ta vivihio pisara jamo ena.
MAT 14:33 Eto embo tapa nga jo ta Iesu ta degi humotepain ue jakeka einge ea, “Umo God ta Meni be ra,” ke ea.
MAT 14:34 Eto umo oiho ta pambuto enda Gennesaret ta puvuna
MAT 14:35 amita duru avo ikeo Gennesaret da tapa ingito ambure embopo humbuto Iesu ta degi puvuto
MAT 14:36 enana amita bo pekihi ta jigito kokojekasi penunu eo, aravora, ainge enu, embo tapa Iesu ta bo hame eto kokojekea.
MAT 15:1 Eto Pharisee embomeni te Judea ta ke pepeni ahe poekari embomeni aingeto da Jerusalem ta eto Iesu ta degi puvuto
MAT 15:2 Ke einge Iesu ta degi eto ingia, “No ambotani na do eto ungotena Judea embomeni ta ke pepeni agi ae ue ingeni egae teho indari jigito indiore?” ainge eo
MAT 15:3 Iesu na mine einge eto ingina, “Eto ungo do eto God ta ke pepeni poekihe ungota ahe poekari ambo ambo ereove? Amita be amo
MAT 15:4 God na einge ena, ‘No aja mama ta ke agi ue hondate ejo’. Eto nei amo embo amuna aja mama ta degi ke sapura aisuja amina God ta ke pepeni ere poekihia eto ari ere ua amita mine amo embo na tau pehasuja. Eto God ta ke pepeni ainge mihia rate ungo ari sapura einge ahe poekihe ere ova.
MAT 15:5 Embo amita donda mihia amo e mamo hondate ari haiteko rate donda emo God ta ra ijie e mamo hondate ae eaguja amo aravora ijie ungo na ahe ere poekiheva
MAT 15:6 eto ainge pere ue God ta ke pepeni be avo poekihe ungota ari avo ambo ambo ere ova.
MAT 15:7 Ungo tunga heriso embopora peroveta Isaiah na ungo ta ari kogue ke be na einge kajena,
MAT 15:8 ‘God na einge eria, ‘Embomeni erevi pe na Na jakeka erera rate enana ta jo amo hoi ta ra.
MAT 15:9 Enana ta ahe poekari amo enda ta vasiri pere avo erera avoeto enana ta jakeka ari amo be mane ra’.’ ainge God na enu Isaiah na kajena.”
MAT 15:10 Eto Iesu na embomeni tapa amita ke ingora jajage enu puvuto auveto ingesi jamopo eo Iesu na ke einge ena, “Ke nau ingihe be kivujo,
MAT 15:11 donda deina embo ta pe ta horeto veasuja amina mane God ta tihi ta au embo ta jo tongopa aisuja rate pe ta do puvuresuja amina au embo ta jo tongopa aisuja,” ke ainge Iesu na enu
MAT 15:12 amita ambotani na puvuto kumumu ke na einge ea, “Ke eha ehea avo Pharisee embomeni na ingito hini kambari ere ora amo ere kogoete?” ainge eo
MAT 15:13 Iesu na ke mine einge ena, “Ke be erena, ji ve tapa nau Mama uhu ta iraguja amina urae oenga erari avo usasora
MAT 15:14 avoeto ungo enana Pharisee embomeni tovujo enana tihi kuru ari embopo na tihi kuru ari embomeni tihi jigihera, eto tihi kuru ari embo amina tihi kuru ari embo nei avo kihi humbuto pambuto enana pe te hoto ta veto memenga kesora.” ainge enu.
MAT 15:15 Peter na ke einge ena, “Ke erea avo be harikejo ingore.” ainge enu
MAT 15:16 Iesu na “Ungo enana ainge dombo be ingae re?
MAT 15:17 Eto donda pe ta horeto hini ta veasuja amo ehako araha ta puvuto irae asuja,
MAT 15:18 rate deina pe ta puvuresuja amo embo ta jo ta eto puvaguja eto donda amina eoi God ta tihi ta tongopa eaguja
MAT 15:19 amita be amo embo tari pehari tiha ari eto nei pegene ari ke sokova ari embo nei ta javo eagore sapura eaguja, hotembari sasapura ainge amo embo ta jo ta eto puvuto eoi embo avo God ta tihi ta tongopa te eaguja.
MAT 15:20 Rate ungo ingeni egeto indova ehera rate ari amina mane au embo tongopa ambu aisuja.” ke ainge Iesu na oje kahena.
MAT 15:21 Eto Iesu na degi avo toto da Tyre te da Sidon te mihia amita enda ta pahunu
MAT 15:22 evohu vahai amo Judea evohu manerate Canaan evohu amina Iesu ta degi puvuto jage eto einge ena, “Bada nau, David ta Meni, iae nau ahihi sapura na horari avoeto memenga osaga kogue mihovona, osaga nau kito na jo e,” ke ainge ena
MAT 15:23 te Iesu na ke ingina amo mine ae enu amita ambotani na puvuto amita degi penunu einge ea, “Evohu emina ambota ue ke esosa eria avoeto ejo toto pambai,” ainge eo
MAT 15:24 Iesu na, “God na Israel embomeni, amita o sheep vaine pambari amita perekari na ikehei puvena” ainge enu
MAT 15:25 evohu avo puvuto Iesu ta utu ta veto gogovo eto ena, “Bada, na hondate e,” ainge penunu enu
MAT 15:26 Iesu na ke mine einge ena, “Amo javotohorami meni ta indari humbuto ino ta gosukarote?” ainge enu
MAT 15:27 evohu amina “Bada amo ke be rate ino mamo ta indari ihe gaga suvu ta veasuja avo ino na indesora amo tehora,” ainge enu
MAT 15:28 Iesu na, “Evohu, umo na humota be ere oa avoeto umo do uje ere oa avo aisona.” ke ainge enu iji vahai amina evohu ta iae kojena.
MAT 15:29 Eto Iesu na enda avo toto umo tiuka javo Galilee hora ai ta pambuto heti vahai vihito arumbeto mihinu
MAT 15:30 embomeni isapamane na enana ta popora ari embomeni te tihi kuru ari embomeni te tunga vahikari embomeni te tapa humbuto Iesu ta utu ta ikerekeo seserekeo Iesu na enu kokojekea.
MAT 15:31 Eto popora embomeni ihiketo hae ea tihi kuru ari tihi hirikea tunga tatahimbari ihiketo ke ea ari avo embomeni na kito vani vini ue Israel ta God jakeka ea.
MAT 15:32 Eto Iesu na amita ambotani jage enu puvuo enana ta degi ke einge ena, “Embomeni erevi nau degi ta puvuto mihie iji heriso nei vahai tohora amina indari irae ehija avoeto na jo ere ua. Eto ikano da ta pambasora amo degi ugorota beuje na ivo ambupu aisora,” ainge enu
MAT 15:33 amita ambotani na ke einge eto ingia, “Dago ojaga tambu ei ta daingeto indari hambuto embo isapamane erevi unduroro?” ainge eo,
MAT 15:34 “Ungota degi bread tapa doinge mihei?” ainge Iesu na enu, “Dago ta degi bread tapa 7 ainge emite umo o heriso be emite ainge avo mihia.” ainge eo
MAT 15:35 Iesu na enu embo tapa enda ta areo
MAT 15:36 bread te o te humbuto God ta degi osari iketo bread periketo amita ambotani ta ikenu humbuto pambuto embomeni undua.
MAT 15:37 Eto embomeni tapa indio inono enu Iesu ta ambotani na indari ihehe siriketo umbua amo handija tapa seven ainge avo jureo eo pevihina.
MAT 15:38 Eto embomeni india amo embo perekari tapa 4,000 ainge amina airi te meniundi te tapa india.
MAT 15:39 Eto indio irae enu Iesu na embomeni ikenu pahuo e nga ta vihito pambuto degi javo Magadan ta puvuna.
MAT 16:1 Eto enana Pharisee embomeni te Sadducees embomeni te na puvuto Iesu ta ke be kesi uje eto amina au God na uhu ta eto hajire au kesi eto ingio,
MAT 16:2 Iesu na ke mine einge ena, “Eto iji vovuoi ungo uhu pinono kogue evito iji javotoho aisuja ainge eagova
MAT 16:3 eto nei iho vujau kuma terou kogue ga veasuja ainge eagova. Ungo uhu ta hajire kiagova avo kito ke be ereva rate iji eha emita hajire nei te nei te ikari amo ungo ere kogova te kiaesira ere ova.
MAT 16:4 Ungo God hotembae ari sasapura embomeni eha miheva ungo God ta hajire kesi penunu ereva avo mane kesova rate Jonah na ena hajire vahai avo kesova.” ke ainge eto enana toto pambuna.
MAT 16:5 Eto Iesu ta ambotani na indari tapa umbae jenambueto toto umo tiuka oiho ta puvua
MAT 16:6 eto Iesu na enana ta degi oje kahari ke einge ena, “Enana Pharisee te Sadducee embomeni ta bread pajirari sivo sapura ra avoeto indovojo,” ainge enu
MAT 16:7 enana ke mine ara eto einge ea, “Dago bread toto puvera avoeto eria.” ainge ijie mihio
MAT 16:8 Iesu na ingito ke einge ena, “Ungo indari humbuto puvurae eheva amita ke do eto ere kasiheve?
MAT 16:9 Ungo ari nau mo kiae ue erevete? Embo tapa 5,000 na bread tapa 5 indio inono enu indari ihehe handija isapamane ueva avo hotembae ue erevete?
MAT 16:10 Eto embo tapa 4,000 na bread tapa 7 indio inono enu indari ihehe handija isapamane ueva avo hotembae ue erevete?
MAT 16:11 Na ke eha erena amo bread toto puveva amita ke aera te ke erena amita be amo ungo kiaere? Eto erena amo enana Pharisee te Sadducee embomeni ta bread pajirari sivo be kivujo amo sapurara.” ainge enu
MAT 16:12 amita ambotani kia amo bread pajirari sivo be mane rate Pharisee te Sadducee embomeni ta ahe poekari avo be kito toara ue ke amore ena.
MAT 16:13 Eto Iesu na da Caesarea Philippi amita enda engihita ijimihe pambuna. Eto ai mihie amita ambotani ta degi ke einge eto ingina, “Na Embo ta Meni rate na amunure ke eagore?” ainge enu
MAT 16:14 enana ke mine einge ea, “Embo nei uhoho na amo umo John bapataito ari embo ke eagora eto nei uhoho na umo Peroveta Elijah ke eagora eto nei amo Peroveta Jeremiah eto Peroveta nei nei ainge ke eagora” ainge eo
MAT 16:15 “Eto ungona amo na do ke eagove?” ainge enu,
MAT 16:16 Simon Peter na ke mine einge ena, “Judea embo ta hondate ari embo, umo Kerisora. God vasiri te amita Meni avo vahai enda ta puvurarira,” ainge enu,
MAT 16:17 Iesu na, “John ta meni Simon Peter umo ke be na erea avoeto umo tunga javotoho ejo. Ke emo embo visi te na no degi ta ae ingae rate nau Mama uhu ta iraguja amina no degi ta harikehei erea
MAT 16:18 avoeto Peter, no degi ta erena, no javo be amo koro ra eto embomeni nau siriketo humbuto nau church koro emita hamo ta gerikasona eto amita degi ahihi pehari embo na isoro aisuja rate mane dembasuja.
MAT 16:19 Eto God na uhu ta tihi jigaguja degi amita bokiri ta key no ingeni ta ikasona eto key amina enda ta bokiri ahurekasi uje aisoa amo God na uhu ta kito aravora aisuja eto enda ta bokiri hirikasi uje aisoa amo God na uhu ta kito aravora aisuja.”
MAT 16:20 ke ainge Iesu na iketo Judea embomeni ta hondate ari embo eha puvurari avo Iesu ra ainge ijie ke mane hande ara ke ena.
MAT 16:21 Eto iji amina Iesu na ihiketo araha ta ke be na pere amita ambotani ta harikena, “Na da Jerusalem ta pambuto embo okokose te priests pepeni te ke pepeni ahe poekari embomeni te ta ingeni ta osaga isapamane kesona. Eto enana na Na taro pehasora rate iji 3 amita ambota na vasiri te erasona.” ainge enu
MAT 16:22 Peter na Iesu humbuto degi nei ta saeto pambuto ke ngahia na eto einge ena, “Bada, ari ainge no degi ta mane puvuresuja te God na haekasuja,” ainge enu
MAT 16:23 Iesu na egerembeto Peter ta degi ke einge ena, “Satan, na toto pambu. Ke no erea amo God ta degi ta eto puvuraera te embo ta degi ta eto ere puvutuhua. Umo nau degi mane peikasoa.” ainge eto
MAT 16:24 ambotani tapa ta degi ke einge ena, “Eto amuna ambo ambo aisi uje aisuja amina amita hamo ta uje tapa toto amita ji atahu koho ta iketo humbuto na ambo ambo aisuja.
MAT 16:25 Ke be amo embo amuna amita vasiri oenga simba aisi uje aisuja amo amita vasiri iraesuja rate embo amuna na avoembo amita vasiri toasuja embo amina vasiri be hambasuja.
MAT 16:26 Eto embo na enda ta donda tapa humbasuja rate vasiri amita irae aisuja amo amita degi javotoho puveite? Javotoho puvurae be ra. Amita be amo donda no ombuto vasiri ehako humbari iraera.
MAT 16:27 Eto Embo ta Meni na amita Mamo ta usasa te kiari te amina amita Anera isapamane amiga tapa puvuresi ere ua eto puvuto embo ta ari do do ere ora amita mine ikasuja.
MAT 16:28 Eto ungota degi erena embo nei nei ei ta mihera na pehari mane kesora rate Embo ta Meni na kihi puvuto King eto tihi jigesuja avo kesora.”
MAT 17:1 Eto iji 6 amita ambota Iesu na Peter te James ta namei John te humbuto tiri koso vahai ai vihito pambua.
MAT 17:2 Eto ai oenga mihie Iesu ta tombu avo enana ta tihi ta iji ta usasa na arako gain eto usasa ena eto amita bo asukari parara be enu
MAT 17:3 Moses te Peroveta Elijah te mahu pehari avo sariketo puvuto Iesu ga ke mine ara ijio ambotani tiri ta vihia amina kia.
MAT 17:4 Eto kogue Peter na Iesu ta degi ke einge ena, “Bada, dago umo te puvuto mihera avoeto tunga javotoho ere ona. Eto umo uje ere oa amo horoma einge aisona, vahai umo avoeto nei Moses ta avoeto nei Elijah avo eto ainge aisona.”
MAT 17:5 “Eto ke ainge ijie mihinu johi vahai usasa te amina puvuto enana tapa ahurekihinu johi jo ta eto ke einge ingia.” “Emo nau osari Meni ra amita ari tapa kogue tunga javotoho ere ona, amita ke tapa ingivujo.”
MAT 17:6 ke ainge ijinu ingihe Iesu ta ambotani joru ue enda ta veto gogombukihio
MAT 17:7 Iesu enana ta degi puvuto hame ue, “Ungo joru ere ova avo toto erevu.” ainge enu
MAT 17:8 ereto hangeto Iesu pere kia.
MAT 17:9 Eto tiri i ta eto vovue enana do kia avo mane ke hande ara einge ena, “Eto Embo ta Meni peheto vasiri te irae peko ta tapa do keheva eto ingeva avo embomeni ta degi mane hande aisova,” ainge enu
MAT 17:10 amita ambotani na amita degi einge eto ingia. “Umo embo ta hondate ari embo mahu puvurari rate do eto enana ke pepeni ahe poekari embopo na Elijah kihi puvuresuja ke eagore?” ainge eo
MAT 17:11 Iesu na “Amo ke be ra Elijah kihi puvuto degi sirikau tambu au Embo ta Meni puvuresuja.
MAT 17:12 Rate na ungota degi erena, Elijah mahu puvija rate enana kito kiarako ue enana ta uje sapura nei te nei te avo amita degi uera. Eto ainge dombo Embo ta Meni na enana ta ingeni ta memenga kesuja.” ainge enu
MAT 17:13 Elijah mahu puvija ena avo enana kia amo John bapataito ari embo avo kito ke be hotembea.
MAT 17:14 Eto Iesu na puvuto embomeni horuketo mihia ai puvuo embo vahai amina ereto Iesu ta degi paunge teteri eto einge ena,
MAT 17:15 “Embo okose, meni nau ta osaga kito jo e, hariga vihioi pipi-konene sapura be eto iji tapa ji ta veto evekaguja nei umo ta veaguja
MAT 17:16 avoeto no ambotani ta humbuto pambene ari kojari inono ae ehera,” ainge enu
MAT 17:17 Iesu na ingito tunga osaga kito “Ungo God ke be ae eto ari eha umbae uha ngahia embomeni ra, na ungo te iji doinge irono? Eto ungo ta uha ngahia avo iji doinge kiono? Aravora, meni avo nau degi ta humbuto hae.” ainge enu
MAT 17:18 humbuto puvuo Iesu na ahihi sapura meni ta jo ta mihina amita degi ke ngahia enu irae pahunu iji amikote meni kojena.
MAT 17:19 Eto amita ambota Iesu oenga mihinu ambotani na Iesu ta degi puvuto ke einge eto ingia, “Dago do eto ahihi sapura avo ohimbari inono ae ehere?” ainge eo,
MAT 17:20 “Ungo God humota be ae avoeto. Na ungo ta degi erena humota ari hingi jo ta ve isapa ainge ungota degi mihirou amo tiri emita degi ke avo oenga vihito degi nei ta pambaehija amo ari ainge aheva. Eto humota ari isapa amina pure tapa ungota degi ngahia mane aehija.”
MAT 17:22 Eto iji vahai Iesu te amita ambotani te Galilee degi ai ta vahaita horukeo Iesu enana ta degi ke einge ena, “Embo ta Meni avo embo ta ingeni ta ikaro
MAT 17:23 humbuto taro peheto mihima iji 3 irae au vasiri te erasuja.” ainge harikenu enana tunga osaga peni vahai kia.
MAT 17:24 Eto Iesu te amita ambotani da Capernaum ta puvuo temple ta tax humbari embo na Peter ta degi puvuto einge eto ingina, “No tihi jigari embo na temple ta tax ikagoite?” ainge enu
MAT 17:25 “Ikaguja” ainge eto bande jo ta eha horihinu Iesu na ke na sunumbeto Peter ta degi einge eto ingina “Simon Peter umo do hotembihe. Enda ta Kings na enda nei embo puvuto iragora enana ta degi tax koro peni umbagore te mo enda asa embomeni ta degi tax koro peni umbagore?”
MAT 17:26 “Amo enda nei embomeni puvuto iragora amina tax koro peni ikagora.” ke mine ainge Peter na enu. Iesu na, “Avo eto enda asa embomeni na mane ikagora.
MAT 17:27 Rate ungotena enana ta degi osaga mane ikasora avoeto no umo o timbari esi humbuto umo tiuka ta pambuto umo o timbujo. Eto o kihi timbasoa amita pe jigito handeketo pe hota koro humbasoa amina humbuto pambuto tax umote namo te tapa ikejo.” ainge Iesu na ena.
MAT 18:1 Eto iji amite Iesu ta ambotani na puvuto Iesu ta degi ke einge eto ingia, “Eto God na tohota embomeni hondate eto gavamani eha ihiketo King asi ere ua ai ta embo amuna embo peni au?” ainge eo,
MAT 18:2 Iesu na ingito meni isapa avo enu amita jo ta inu humbuto enana ta tihi buju ta ikenu hetenu
MAT 18:3 ke einge ena, “Na ungota degi ke be na erena, eto ungo jo hapereketo meni isasaraho sira ae amo God ta tihi jigari degi ta mane horasova be,
MAT 18:4 avo eto embo amuna embo peni asi hotembae ue meni isapa einge na arako aisuja embo amina God na tihi jigaguja degi ai ta embo peni be aisuja.
MAT 18:5 Eto embo amuna meni isapa eingeko javo nau ta peketo osa aisuja amo na osa ue pekarako ere ua.
MAT 18:6 rate embo amuna na humota ari meni eingeko avo engekau vasiri sapura ta veasuja engekari amita mine pajire be puvuresuja avoeto amo javotoho eto engekae kihi ta embo amita tunga ta koro pajire avo gatahiketo tigito eva ta gosukau veto pehasuja.
MAT 18:7 O ve! Embo ari javotoho asi uore engekari isapamane na puvuto peikaguja eto engekari puvuresuja rate ngahia be amo engekari embopo ta degi ambota puvuresuja.
MAT 18:8 Eto no ingeni na utu na au ari sapura ta veasi ue kito amo no ingeni utu avo jirembeto gosukejo irae ai. Umo popora ue vasiri eha humbasoa amo javotoho rate utu heriso ingeni heriso amiga ji daroho evekaguja ai ta veasoa amo sapura bera,
MAT 18:9 nei amo no tihi vahai na au ari sapura ta veasi ue kito tihi avo kuruketo gosukejo irae ai. Eto umo tihi vahai na vasiri eha ta horasoa amo javotohora te tihi heriso na ji daroho evekaguja ai ta veasoa amo sapura be ra.”
MAT 18:10 “Ungota degi erena meni vahai einge dombo ambu ke avojo. Enana ta Anera isapamane uhu i ta nau mama God ta tombu ta iragora avoeto enana dombo be ra.
MAT 18:12 Na kivu, embo vahai ta o sheep tapa 100 ainge iragora rate vahai kiae pambau 99 ainge asa heti ta toto vahai pambasuja avo pambuto jombure eto umbaute mo mane jombure eto humbau?
MAT 18:13 Toasi mane hotembasuja rate jombure eto humbuto tunga javotoho aisuja. Eto o 99 teho mihera avo kito tunga isapa javotoho aisuja rate o sheep vahai pambasuja avo humbasuja amo tunga javotoho be javotoho eto osa aisuja.
MAT 18:14 Eto ainge dombo ungota Mama uhu ta iraguja amina meni isapa eingeko ari sapura ta mane veagora uje ere ua.” ainge Iesu na ena.
MAT 18:15 Eto Iesu na ke einge ena, “Eto no namei vahai na no degi ta ari sapura aisuja amita degi umo oenga pambuto ari sapura deire avo ejo ingoi. Eto ao ingito tunga hapereketo egerembau ehako inena no namei aisoa
MAT 18:16 rate no ke ingae au kito egerembeto ari sapura kiari embomeni heriso, o heriso nei vahai ainge humbuto pambuto namei sapura ehija amita degi ke ehako ejo, eto embo heriso nei vahai amina no ke ingito ke be are.
MAT 18:17 Eto ke ingae be au kito pambuto ekalesia ta ejo ingore. Eto embo amina ekalesia ta ke te tapa ingari uje ae au amo toaro pambau ungo ga ekalesia ta hatu mane aisuja rate kitoho embo aisuja.
MAT 18:18 Eto ungota degi ke be na erena ungo enda ta ke peni ainge do aisova avo God uhu ta mihie ke peni ke aisuja, eto enda ta ke peni do toasova God amo ainge uhu ta toasuja.
MAT 18:19 Eto ke nei erena amo ungo enda embo heriso na tunga vahai ue God ta degi do penunu aisova amo God uhu ta iraguja amina ikasuja.
MAT 18:20 Eto ke amita be amo ungo embo heriso o heriso nei vahai ainge nau javo ta horasova amo na ungote iresona.” ainge Iesu na ena.
MAT 18:21 Eto Peter na Iesu ta degi pambuto ke einge ena, “Bada, nau namei na nau degi ta ari sapura ururou iji tapa doinge hotembeto toano? 7 ainge hotembeto toanote?” ainge enu,
MAT 18:22 Iesu na ke mine einge ena, “Iji tapa 7 mane rate 77 ainge no namei ta ari sasapura hotembeto tojo.” ainge Iesu na ena.
MAT 18:23 Eto Peter ta eto ingari ke avoeto Iesu na timu hatirari ke einge ena, “God na tihi jigaguja degi amo eingera. King vahai amina amita pure ari embomeni ta degi eo ikenu india avo mine ikara amita koro simba ari embomeni ta degi ke ikenu
MAT 18:24 pambuto king ta pure ari embo vahai humbuto puvuo embo amina 7 million kina ikari indari avo ikaja enu
MAT 18:25 ikari inono ae enu king na embo amite ae te meniundi te tapa ikau embo nei na humbuhe koro ikaro humbasi ke enu
MAT 18:26 pure embo amo ingito tunga osaga eto veto king ta jo ai ta paunge teteri eto ke einge ena, ‘Na jo eto kito iji isapa tojo mihie no koro tapa jombureto humbuhe ikasona.’ ainge enu
MAT 18:27 king amina amita ke ingito jo enu koro 7 million indina tapa avo toruhue enu tunga javotoho ue pambuna.
MAT 18:28 Rate embo amina arahata puvuto amita koro 12 kina amita pure vahai embo amina enu ikena avo kito embo avo tunga ta jigito jaheveto ‘Nau koro inena ehe ikihana avo ike.’ ainge enu
MAT 18:29 embo amina veto paunge teteri ue. ‘Ikasona te iji isapa ikejo mihie no koro hambuto ikane.’ ainge ena
MAT 18:30 rate jo ae humbuto pambuto ikenu tipura ta horena, ‘Tipura ta mihie nau koro avo ikejo.’ ainge ena.
MAT 18:31 Ari ainge ena avo pure embopo na kito tunga osaga kito pambuto King ta degi harikeo
MAT 18:32 ingito tumo eto enu embo koro 7 million indari embo avo puvunu amita degi ke einge ena, ‘Umo embo sapura bera nau koro isapamane no degi ta ikari avo hotembeto toana ehea avoeto hotembeto tohena.
MAT 18:33 Na no ke ingihene jo uija ainge dombo inena no namei ta degi ae ehea,’ ainge
MAT 18:34 eto hini kambari pajire be eto ikenu tipura ta mihie koro tapa 7 million avo ikaja ke ena,” ainge Iesu na tirito amita ambotani ta degi einge ena.
MAT 18:35 “Eto ungo na ungota namei kamei ta ari sasapura jo tapa na hotembeto toae eagova amo King na amita pure embo ta degi ena ainge dombo nau Mama uhu ta iraguja amina ungota degi ngahia aisuja.”
MAT 19:1 Eto Iesu na ke avo enu irae enu Galilee enda toto Judea ta enda tumo umo Jordan oiho ihane ta pambunu
MAT 19:2 embomeni isapamane amita degi puvuto amita ambure nei te nei te avo eo enu kokojekea.
MAT 19:3 Eto ai ta mihinu Pharisee embomeni nei uhoho na Iesu ke sokova aute eto kesi amita degi ke einge eto ingia, “Ungotenau ke pepeni ta amo do ainge mihei? Eto embo na teho uje na ae toasuja aravorete? Avo ejo ingore.” ainge eo Iesu na
MAT 19:4 “Iji eha be eha ta God na embo te evohu te ena amikote God na ke einge ena,
MAT 19:5 ‘na embo te evohu te ena avoeto embo na e mamo toto ae ga kaju eto oenga ra mane aisora te visi vahai aisora’ ainge God na eto amita ke ta kajena avo ungo kiaere?
MAT 19:6 Avoeto enana heriso mane rate vahai eagora ari avo God na eaguja eto God na kaju eto vahai aisuja avo embo na mane kaheketo ehako oengara aisuja.”
MAT 19:7 Ke ainge Iesu na enu enana Pharisee embomeni na ke einge eto ingia, “Rate embo na ae toasi uje ue kito ke avo embo tapa kiora ahari ta kaeto ikau kioro toto pambasuja, ari ainge avo Moses na do eto ara enu?” ainge eo Iesu na
MAT 19:8 “Eto Moses na ungo ae toari ta ke kajena amita be amo ungo ari javotoho ahe poekari avo ngahia be ra. Rate iji eha be eha ta embo te evohu te ari iji te ari ainge irae bera.
MAT 19:9 Avoeto nanena ungota degi erena. Embo amuna amita ae amo javotoho tiha mane eaguja rate embo amina evohu amo toto evohu nei jimbasuja embo amina evohu eha jimbasuja avoeto amina tiha aisuja,” ainge Iesu na enu Pharisee embomeni pahuo
MAT 19:10 amita ambotani ke einge ea. “Eto embo te evohu te tiha eagora avoeto amo javotohorami singa na kakara mane jimbau?”
MAT 19:11 amita ke mine re Iesu na einge ena, “Eto embo aka te ae iragora amo embo tapa ari mane vahai vahai na eagora.
MAT 19:12 Nei amo e na ingari ta eto bau ambura eto nei amo embo ta ingeni na bau kurukari avoeto mane aka te eagora. Eto embo nei amo God ta pure pere asi hotembihe akate mane eagora avoeto embo amuna ari ainge ari haite kito toau aisuja” ke ainge Iesu na ena.
MAT 19:13 Eto embomeni na Iesu na ingeni hamo ta tembihie pari aja enana ta meni undi humbuto puvuo amita ambotani na kito haekihe embomeni ta degi ke ngahia eo
MAT 19:14 Iesu na kito einge ena, “Tovujo meni isasaraho nau degi ta puvurore amita be amo God na tihi jigaguja degi amo meni isasaraho ta ari aingeko embomeni ta tohora.” ke ainge
MAT 19:15 eto amita ingeni siro ta tembenu irae enu ereto pambuna.
MAT 19:16 Iji vahai embo vahai amina puvuto Iesu ta degi ke einge eto ingina, “Ahe poekari embo, na irari datoho ta iresi ari javotoho do ano?” ainge enu
MAT 19:17 Iesu na, “Umo do eto nau degi ta ari javotoho jombure ue eto ere ingihe God vahai amo javotohora avoeto umo irari datoho ta iresi uje eto kito God ta ke tapa agi ejo.” ainge enu
MAT 19:18 “God ta ke deire agi ano” ainge enu
MAT 19:19 Iesu na mine einge ena, “Umo embo mane tao pehasuja, tiha paiha mane aisoa, pegene mane aisoa, embo nei ta ari ke be na perekari harikasoa, aja mama amo dombo ke ijie enana ta ke agi aisoa no hamo osa ere oa ainge dombo embo nei osa ejo.” ainge enu,
MAT 19:20 embo amina, “Na God ta ke erevi tapa agi eagona avoeto ari nei do ano?” ainge enu
MAT 19:21 Iesu na, “Eto umo embo javotoho asi uje ere oa avo no donda tapa ombuto koro humbuto donda ambu embomeni ta degi hande ao God na uhu ta hajae vajae no amo nununga aisuja. Ari ainge eto egerembeto na ambo ambo e,” ainge enu
MAT 19:22 embo eha amina ingito amita hajae vajae isapamane avoeto tunga osaga kogue Iesu toto pambuna.
MAT 19:23 Eto Iesu na amita ambotani ta degi ke einge ena, “Na ungota degi ke be erena, haja vajae embomeni na tunga osaga peni vahai kogue God na tihi jigaguja degi ai ta horasora.
MAT 19:24 Eto ke avo ehako erena, O javo camel amo peni vahai avoeto poma ho ta horeto pambari ngahia be ra te hajae vajae embo na God ta meni asi aisuja amo ngahia be ngahia ra.” ainge enu
MAT 19:25 amita ambotani na ingito mana mana ue ke be kesi einge eto ingia, “Eto hajae vajae embo na God ta meni ari inono ae kito embo amuna God ta meni au?” ainge eo
MAT 19:26 Iesu na enana tihi na jaseto kogue ke einge ena, “Embo amo ungo oenga God ta meni ari inono ae be ra te God na aisuja amo ari inono be ra.” ainge enu
MAT 19:27 Peter na ereto einge ena, “Kijo, dago donda tapa toto umo ambo ambo ere ora amo mine do umbaro?” ainge enu
MAT 19:28 Iesu na enana ta degi ke einge ena, “Na ungota degi ke be erena, enda eha uhu eha aisuja iji amina na Embo ta Meni na nau avo arumba peni usasa te ai urumbeto mihirono ungo nau apostel 12 na avo arumba tapa 12 ai ta arumbeto mihie Israel embomeni javo vahai tapa 12 avo tihi jigesova.
MAT 19:29 Eto tapa amuna bande te du te aja mama te meniundi te hajae vajae te tapa na embo toasuja amina donda ainge pere isapamane humbuto irari datoho iresuja.
MAT 19:30 Rate embo peni na ai ta embo teho aisora eto embo teho na ai ta embo peni aisora.”
MAT 20:1 Eto Iesu na ke ijie pambuto timu hatirari ke einge ena, “God na tohota embomeni siriketo humbuto uhu ta tihi jigesuja ari amo einge ra. Embo vahai amo grape pure ari embo peni amina iho be te pambuto pure ari embo humbuto puvuto amita grape avo ururou pambuto
MAT 20:2 hure veau hurete 3 kina umbara enu aravora eto pambuto pure ihiketo ea.
MAT 20:3 Eto ehako iho 9 o'clock amo pambuto market besi ta embo nei teho mihia avo kito
MAT 20:4 ke einge ena, ‘Ungo pambuto nau grape pure ururovo hure vovurou mine inono ikano humbasova,’
MAT 20:5 ainge enu ingito pambuto pure ea. Eto iji ugorota 12 o'clock amo pambuto pure embo nei umbuna eto tureto 3 o'clock amo pambuto pure embo nei umbuna.
MAT 20:6 Eto hure be te 5 o'clock auvihinu embo amo ehako pambuto market besi ai embo teho mihia avo kito ke einge ena, ‘Ungo do eto iji aijaja ue teho miheve?’ Ainge enu
MAT 20:7 enana, ‘Dago pure umbae avoeto teho mihera,’ eo ‘Aravora ungo pambuto nau grape pure aisova,’ ainge enu ingito pambuto pure isapa uo,
MAT 20:8 mume sihukihinu embo amina amita pure simba ari embo ta degi ke einge ena, ‘Pure embopo jage e puvuroro mine ike.
MAT 20:9 Eto hure be te umbera amita mine ikihe pambuto iho be te umbera avo ambota ikejo.’ ainge enu ingito jage enu puvuo pure embo hure 5 o'clock iji tutumota umbua amita mine amo 3 kina ikenu uhuo kito
MAT 20:10 ihote humbunu pure ea embomeni amina iji koso pure ea avoembo mine peni humbasi ke ea rate enana inono ainge 3 kina pere humbuto
MAT 20:11 hini kambari ue pure mamo ta degi ke einge ea.
MAT 20:12 ‘Embo hurete umbea amo pure iji isapa ehera te dago avo ihote eto pambuto hure vehija eto iji vevere te tapa pure ehera rate mine umbera amo enana ga inono ta umbera.’ ainge eo.
MAT 20:13 Pure mamo na embo vahai ta degi einge ena, ‘Namei ingijo. Na ungota degi sapura ae, rate ihote ungota degi 3 kina umbava ke ehene aravora eheva
MAT 20:14 avoeto ikehena humbuto da ta pambuvujo. Eto embo hure be te humbena amita mine amo nau hande na ungo ga inono ta ikehene umbera.
MAT 20:15 Koro amo toho nau avoeto uje nau aisona amo tehora. Na hande ikehena amita eto tumo ere ovete?’”
MAT 20:16 ke avo Iesu na tirinu irae enu tutumota ke einge ena, “Avoeto ambota amo kihi puvuresora eto enana kihi asi uje ere ora amo ambota puvuresora.”
MAT 20:17 Eto Iesu na da peni Jerusalem ta vivihe embo nei ingihirae ae rate amita ambotani 12 amita perekari ke einge ijie pambuna,
MAT 20:18 “Ungo be ingivujo, ungotena da Jerusalem ta ere vivihera. Eto Jerusalem ta puvuroro Embo ta Meni avo Priests pepeni te ke pepeni ahe poekari embopo te ta ingeni ta ikaro humbuto court eto taro pehaja ke
MAT 20:19 eto enda nei, God ke be ae embomeni, ta ingeni ta iketo toaro pe na urumbasora esi na ejembasora eto ji atahu ta taro peheto mihima iji 3 irae au ehako vasiri te erasuja.”
MAT 20:20 Eto embo Zebedee ta ae na amita meni heriso James te John te avoembo enana ta uje ea avo Iesu ta degi eto ingesi puvuto humote pain unu
MAT 20:21 Iesu na, “Umo do uje ere oe.” ainge enu amina, “Umo King ururo nau meni heriso erevi avo no ingeni be ta eto no ingeni anga ta arumbeto tihi jigora ejo.” ainge enu
MAT 20:22 Iesu na meni heriso amita degi ke einge ena, “Ungo do humbasi uje eheva avo be kiae ue ere ova. Na ango bouka humbuto memenga kogue pambasona avo ungo humbari inono re?” ainge enu, “Dago inono ra,” ainge eo.
MAT 20:23 “Ke be ra, ungo ango bouka avo humbasova rate embo amuna nau ingeni anga ta eto ingeni be ta arumbasuja amo na mane sirikasona rate nau Mama na embo sirikasuja amitara,” ainge Iesu na enu,
MAT 20:24 James te John te na embo pepeni asi ea amita ke avo ambotani nei 10 ainge amina ingito enana heriso amita degi tumo eo
MAT 20:25 Iesu na enana tapa jage enu puvuo ke einge ena, “Enana God kiae embo na embomeni tihi jigihe enana ta sovera jigama uore embomeni na embo pepeni avo joru ue enana ta ke agi eagora.
MAT 20:26 Rate embomeni na ari ainge ungota degi mane kesora. Eto inena vahai ungota okose asi uje eto kito amina nei tapa ta ke agi ue pure aisuja.
MAT 20:27 Eto inena vahai kihi asi uje eto kito amina tohota uje hotembae ue nei tapa unduresuja.
MAT 20:28 Eto ainge dombo na Embo ta Meni avo embo na undurora puvurae ra te na embomeni hondate asi ue vasiri nau avo iketo embomeni isapamane ombasi puvena.” ke ainge Iesu na ena.
MAT 20:29 Eto Iesu te amita ambotani te na da Jericho toto pahuo embomeni isapamane degi ta ambo ambo ue pambua.
MAT 20:30 Eto tihi kuru ari embo heriso degi ahone ta arumbeto mihie Iesu puvurari ke ingito ihiketo jajage ijie einge ea “David ta Meni, dagota Bada, dago kito jo e,” ainge ijie mihio,
MAT 20:31 embomeni na embo heriso amita ke ingari uje ae ue isembeto ke jamo ara ke ea, rate enana heriso na hori gagaha eto, “David ta Meni dagota Bada dago kito jo e,” ainge eo
MAT 20:32 Iesu heteto jage enu puvuo “Na ungota degi do ana uje ere ove?” ainge enu,
MAT 20:33 “Bada dago ta tihi ejo hirikau kiore,” ainge eo
MAT 20:34 Iesu ingito jo enu tihi ta hame enu enana ta tihi hirikenu kogue Iesu ambo ambo ea.
MAT 21:1 Eto Iesu te amita ambotani te da Jerusalem ta puvuto auviho da Bethphage tiri olives hemba ta puvuto heteto Iesu na ambotani heriso ikau kihi pambara ue
MAT 21:2 ke einge ena, “Ungo heriso pambuto o donkey huega meni te da pe ai handukehere mihia avo kito bujeketo humbuto have.
MAT 21:3 Eto embo na ke do aro ingito, ‘Bada na jigama asi uje ere ua’ ainge ao mane haekasora te toau humbuto puvuresova.”
MAT 21:4 ke ainge Iesu na ena amore peroveta na Iesu enda ta puvurae iji te einge kajena
MAT 21:5 “Jerusalem embomeni ta degi ke einge evujo, kivu ungota King peka humbari embo avo embo ta ke agi ari o donkey hamo ta arumbeto ere puvutuhua.” ainge peroveta na kajena.
MAT 21:6 Avoeto ambotani heriso avo Iesu ta ke agi eto pambuto
MAT 21:7 o donkey te amita meni te bujeketo humbuto puvuto bo houketo o hamo ta besi tirio Iesu arumbeto pahunu.
MAT 21:8 Embo isapamane bo houketo enda ta tirio bo hamota haito pahunu embomeni nei na ji hatu kahumbeto degi ta tiria.
MAT 21:9 Eto embomeni kihi pahua amite ambota ere puvutuhua amite tapa ihiketo jakeka ijie jajage eto einge ea, “David ta Meni dombo be sovera te Bada ta javo ta puvuto ere hua God hondate e. God amo peni be ra.” ainge ijie pahuo
MAT 21:10 Iesu da Jerusalem jo ta horena. Eto da Jerusalem embomeni tapa na o a ijie embomeni Iesu ga puvua amita degi einge eto ingia, “Embo puvija amo amunure?” ainge eo,
MAT 21:11 “Amo enda Galilee da Nazareth embo amo peroveta javo Iesu ra.” ainge ea.
MAT 21:12 Eto Iesu na temple jo ta horeto embomeni di o ai ta ombuto koro uhuo kito tumo eto ohimbenu pahuo koro ehekari embomeni ta gaga te di dirogu ombuto humbari embomeni ta gaga te tapa jigito hapereketo
MAT 21:13 enana ta degi ke einge ena, “God ta ke ta kajari mihia amo, ‘bande emo nau pari ari bande ra’ rate ungo na pegene embo ta bande ere ova!” ainge ena.
MAT 21:14 Eto Iesu temple jo ta mihinu popora embomeni te tihi kuru ari embomeni te temple jo ta mihahera avo Iesu ta degi jo enu kokojekeo
MAT 21:15 enana priests pepeni te ke pepeni ahe poekari embopo te na ari javotoho avo kito hini kambari uo enana meni isasaraho na jajage eto, “David ta Meni jakeka erera.” ainge ijie mihia avo ingito tumo eto
MAT 21:16 Iesu ta degi ke einge ea, “Enana meni isasaraho na umo jakeka erera avo umo ingae re?” ainge eo, Iesu na enana ta degi ke einge ena, “Na javotoho ere ingihena te ‘God na ehei meni isasaraho ta pe ta eto jakeka ari javotoho puvaguja’ ainge God ta ke ta kajari mihia avo ungo eheketo kiae ra?”
MAT 21:17 ke ainge eto toto da Bethany ta pambuto mume vahai ai evina.
MAT 21:18 Eto iho vujenu Iesu ereto da Jerusalem ta egerembeto pahunu beuje enu
MAT 21:19 ji junga degi ahone ta kito imihe be irae iki pere kito ji ta degi ke einge ena, “Umo ambota be ehako mane aisoa,” ainge enu ji jaise enu
MAT 21:20 amita ambotani na kito mana mana eto ke einge ea. “Umo daingeto ehe ji sau be jaise ehei?” ainge eo
MAT 21:21 Iesu na einge ena, “Na ungota degi ke be erena, eto ungo jo tapa na ke be hotembihe na ne ji junga ta ehena ainge dombo aisova. Eto avo pere mane rate heti emita degi umo ereto jaruketo eva ta pambuto ve.” ainge aisova amo aisuja
MAT 21:22 eto ke be ijie pari ta ari pepeni tapa do avo eto ingesova amo ungota degi puvuresuja.
MAT 21:23 Eto Iesu temple ta ehako pambuto embomeni ahe poekihinu priests pepeni te Judea ta okokose te aingeto puvuto einge eto ingia, “Embo amuna ke ei ingihe pure erevi ere oe? Enda embo ta ke retemo amuta ke re?” ainge eo Iesu na ke mine einge ena,
MAT 21:24 “na ungota degi eto ingari ke vahai erevi aisona, eto ungo ke mine avo ingito embo amuta ke ingihe ere ona avo ano ingesova
MAT 21:25 amo erevira, John na embo amuta ke ingihe embo bapataito enu? God ta ke retemo embo ta ke re?” ainge enu enana ungo oenga ihiketo ke taimbihie ke mine ara ijie einge ea, “Dago ke mine do aro? Eto dago John na God ta degi ta sovera umbuna ke aisora amo embo emina, ‘avoeto ungo do eto John ke be ae ueve?’ ke aisuja
MAT 21:26 rate dago embo ta degi ta sovera umbuna ke aisora amo embomeni na John amo God ta peroveta be ke eagora avoeto embomeni na dagota degi do aisora avo joru ere ora.” ainge eto
MAT 21:27 priests pepeni na ke be teto haito, “Dago be kiaera.” ke ainge eo, Iesu na enana ta degi, “Aravora ungo ke mine ari inono ae avoeto embo amuna ke ei ingihe pure erevi ere ona avo mane ano ingesova.” ainge ena.
MAT 21:28 Eto Iesu na Judea ta okokose ta degi ke einge ena, “Ungo ke nau ingito siro pure evu. Embo vahai meni heriso te amina bugo ta degi pambuto ‘Nau meni pambuto nau grape pure ejo,’ ainge enu
MAT 21:29 uje ae ue, ‘Na mane pambasona’ ena rate ambota jo aherekenu pambuto grape pure ena.
MAT 21:30 Ehako meni ambo ta degi pambuto, ‘Nau meni umo pambuto nau grape pure ejo,’ ainge enu, ‘Aravora, Mama, pambuto pure aisona.’ ainge ena te pambuto pure ae ena,
MAT 21:31 avoeto ungota degi erena, meni damina mamo ta ke agi enu?” ainge Iesu na enu embo okokose na, “Bugo na mamo ta ke agi ena,” ainge eo Iesu na enana ta degi ke einge ena. “Avoeto ungota degi erena, tax koro humbari embopo te tiha paiha evohu te na ungo dembeto God ta tihi jigari degi ta horasora.
MAT 21:32 Amita be amo John bapataito ari embo na ungo irari javotoho degi daingeto pambasova avo harikena rate ungo ingito ke be ae ueva rate tax koro humbari embopo te tiha paiha evohu te na ingito ke be ijiera. Rate ungona enana ta ari javotoho kogueva rate ambota jo ahereketo John ke be ae ueva.”
MAT 21:33 Eto Iesu na Judea ta okokose ta ke ijie einge ena, “Na timu hatirari ke nei aisona ingivujo. Iji vahai enda mamo vahai na pure andage eto ‘grape’ ve koveto huga tiginu irae enu ‘grape’ be haito saheto mu humbasora amita hoto kovenu irae enu pegene eagora simba ue iresora amita gaga i ta eto ‘grape’ pure ara embo humbunu pure uo toto enda nei ta pambuna.
MAT 21:34 Eto ‘grape’ sari ari iji puvunu amita ke agi ari embopo amita ‘grape’ be huna avo amita umbara ikenu pahuo
MAT 21:35 ‘grape’ pure ari embopo na ‘grape’ be ikari uje ae eto embo vahai ahapa tea, nei teo pehena nei karu na humbuto gosuketo tea
MAT 21:36 avo enda mamo na kito amita ke agi ari embopo isapamane ikenu pahuo ‘grape’ pure ari embopo na ehako teo,
MAT 21:37 kito enda mamo na amita meni be avo ikasi ue ke einge ena, ‘Embo dombo kito mane tasora te otohu aisora.’ ainge ijie ikenu pahunu
MAT 21:38 ‘grape’ pure embopo na meni avo kito ke einge ea, ‘Enda mamo ta meni ere puvutuhua kivu. Ungote pambuto taro pehau enda erevi umbaro ungotenau be aja na.’
MAT 21:39 ainge eto meni avo andito humbuto huga ohio ta gosukeo venu enana huga jaruketo veto teo pehena.” ke ainge Iesu na embo okokose ga tirito
MAT 21:40 enana ta degi ke einge eto ingina. “Ungo do ere hotembiheve? Enda mamo na puvuto ‘grape’ pure ari embopo ta degi do au?” ainge enu
MAT 21:41 enana mine einge ea, “Amina puvuto embo sasapura avo tau peharo ‘grape’ pure embopo nei jajavotoho pere humbasuja eto enana enda mamo ta degi ‘grape’ sari ari iji te ari javotoho ue donda toho amita ikasora.” ainge eo
MAT 21:42 Iesu na ke einge ena, “Ungo God ta ke ta kajari einge eheketo kiaere? ‘Bande gerikari embopo na tutuvi be enu kiari javotoho be ena.’ God ta ke kajari ta ainge mihia
MAT 21:43 avoeto ungota degi erena, God na ungo tohota embomeni ke ijie simba eaguja avo haeketo ve ureto sari ikari embomeni be avo siriketo humbuto tihi jigesuja.” ainge enu,
MAT 21:45 enana priests pepeni te Pharisee embomeni te na Iesu ta timu hatirari ke ikena amo enana ta degi ikena
MAT 21:46 avo be kito Iesu humbuto koto asi uje ea rate embomeni na enana ta degi do asora avo hotembihe joru ea. Amita be amo embomeni na Iesu jakeka ijie amo peroveta be ke ea avoeto.
MAT 22:1 Eto Iesu na timu hatirari ke ehako embomeni ta degi einge ena,
MAT 22:2 “Eto God na embomeni amita toho siriketo humbuto tihi jigesuja amita ari amo einge ra. Iji vahai king na amita meni na kakara jimbasi unu pondo nununga
MAT 22:3 eto amita ke agi ari embopo na embo puvuto pondo indora ikenu pondo ta duru mahu ingari embomeni avo pambuto oru ea te embomeni puvurari uje ae eo
MAT 22:4 king na amita pure embomeni nei ikenu pambuto ke hande ue einge ea. ‘King na jimbari ta pondo nununga eto amina o cow meni seha te visi te avo teto heheveketo nununga ehija avo indesi pambuvujo.’ ainge eo
MAT 22:5 oru ea embomeni na ingito ingarako ue totohota uje ea. Vahai amo pure andage asi pahunu nei amita store simba asi horihinu
MAT 22:6 nei uhoho na oru puvua embo avo urumbihe andito teo pehea.
MAT 22:7 Avo kito king na hini kambari eto amita isoro embopo ikenu pambuto pondo ta pambari uje ae eto embo teo pehea embomeni avo teo pepehekihio enana ta da avo undukeo evekena.
MAT 22:8 Eto king na amita pure ari embomeni jage enu puvuo ke einge ena, ‘Nau meni ta jimbari pondo mahu nununga ehena te oru ehena embomeni enana ta ujena puvurae ehera amo sapura be ehera
MAT 22:9 avoeto ungo pambuto degi ugorota isa ari embomeni doinge kesova avo evujo puvuto nau pondo indore,’ ainge enu
MAT 22:10 pambuto degi ugorota isa embo javotoho te sapura te tapa oru eo puvuto pondo bande ta horeto enete enete ea.
MAT 22:11 Rate King na embomeni puvua avo kesi bande ta horeto poeto kogue pambuto embo vahai jimbari ta bo avo asukae bo nei asuketo puvuna avo kito
MAT 22:12 ke einge ena, ‘Embo umo do eto jimbari ta bo asuketo puvurae bo nei avo asuketo puvuto horete?’ ainge enu ke mine ae enu
MAT 22:13 King na amita pure embopo ta degi einge ena. ‘Embo erevi amita utu te ingeni te gatahiketo tigito araha mume hoi ta gosukevujo pambuto veau embomeni tapa ai ta pambuto si ijie ti kiroro kiroro aisora’.” ainge ena. Eto Iesu na ke avo enu irae enu
MAT 22:14 tutumota ke einge ena. “Na ungota degi ke be na erena. God na embo tapa oru aisuja te heriso be siriketo humbasuja.” ainge ena.
MAT 22:15 Eto enana Pharisee embomeni na oenga pambuto vahaita eto daingeto eto ingari ke ngahia na aro Iesu ke sokova na harikau humbuto tasora avo ke kaseto
MAT 22:16 enana Pharisee meni ehaha amite King Herod ta tunga humbari embopo te aingeto humbuto ikeo Iesu ta degi pambuto ke gamo na poeketo einge eto ingia. “Ahe poekari embo, umo ke be ari embo avo dago kiarira eto umo embo ta hajae vajae retemo kiari retemo hotembari ke vahai erevi eto ingesi uje ere ora.
MAT 22:17 Dago Rome ta gavana ta degi tax koro ere ikihera rate tax ikihe ungotena Judea embomeni ta ke pepeni avo poekihere te poekaere avo ao ingesi uje ere ora.” ainge eo
MAT 22:18 Iesu na enana ta hotembari sapura kaseto puvua amo mahu kina avoeto ke mine einge ena, “Ungo jo heriso embopora na eto kesi puvuto erevete?
MAT 22:19 Avo ungota tax ikagova koro avo vahai ikevu kione.” ainge enu koro vahai ikeo humbuto kito,
MAT 22:20 “Koro emita hamo ta javo kikiva eto tombu ove eto ari amo amutare avo evu ingone.” ainge enu
MAT 22:21 “Amo Rome ta gavana ta tombu hajire ra,” ainge eo, “Rome ta hajire mihia avoeto Rome ta donda amo Rome ta ikasova eto God ta hajire kito God ta ikasova.” ainge Iesu na enu,
MAT 22:22 ingito mana mana ue Iesu toto pambua.
MAT 22:23 Eto iji amina Judea nei uhoho javo Sadducees amina embomeni peheto vasiri te mane erasora avo be hotembihe eto ingari ke ngahia hotembeto puvuto Iesu ta degi eto ingia.
MAT 22:24 “Ahe Poekari embo ingijo. Peroveta Moses na ke einge ena, ‘eto namei na ae jimbuto humbuto ere uma meni puvurae sari aisuja amita doru amo namei nei amina jimbuto ere uma meni puvuresuja amo namei mahu sari ena amita meni ke aisuja.’ ainge Moses na ena.
MAT 22:25 Rate kijo, namei kamei tapa 7 ainge ei ta mihahera. Eto namei bugo na ae jimbuto ere uahija meni puvurae enu pehena amita doru avo bugo amita kane na jimbuto ere uahija
MAT 22:26 meni puvurae enu pehenu ainge pere ue pambuto namei tapa 7 ainge evohu vahai avo jimbuto pepehekeo
MAT 22:27 evohu amo ambo ta pehena
MAT 22:28 avoeto enana tapa vasiri te erasora iji te evohu amo namei amuta ae au?” ainge Iesu ta degi eto ingio
MAT 22:29 mine einge ena, “Ungo God ta ke kajari te God ta sovera te tapa kiae eagova amita ue ereva.
MAT 22:30 Eto embo pehari ta eto erasora amo God ta Anera uhu ta iragora ainge dombo ue mane jimbuto iresora eto nei amo ungo embo peheto ehako vasiri te erasuja avo ke be ae eagova
MAT 22:31 rate God ta ke kajari ta einge mihia amo ungo eheketo kiaere? God na ke einge ena.
MAT 22:32 ‘Na Abraham ta God eto Isaac ta God eto Jacob ta God ra.’ ainge ena avo eto God amo embo pehari ta God mane rate embo vasiri te amiga mihera amita God avo ungotena kiarira.” ainge Iesu na enu
MAT 22:33 embomeni na amita ahe poekari avo kito ungo ari haiteko mane kito mana mana ea.
MAT 22:34 Eto Iesu na Sadducees embomeni ta eto ingari Iesu ta degi ikea avo ke be harikenu ingito ke mine ari inono ae ea avo Pharisee embomeni na kito vahaita horuketo
MAT 22:35 enana ta ke pepeni ahe poekari embo vahai na Iesu ke sapura aja ke einge engekena
MAT 22:36 “Ahe poekari embo, ke asona avo be harikejo ingone. Moses ta ke kajena ai ta ke vahai dombo be amo deire?”
MAT 22:37 ainge enu Iesu na ke be einge harikena.
MAT 22:38 “Ke vahai dombo be amo erevira, ‘no Bada God jo tapa na ari Tapa na eto hotembari tapa na osa ejo,’
MAT 22:39 eto ke nei dombo be amo erevira, ‘umo oenga hamo no simba ue osa eagoa ainge dombo no namei kamei tapa osa ejo’
MAT 22:40 eto God ta ke pepeni ikenu Moses na kajena amita Peroveta na kajea tapa amita ke susu be amo erena erevira.” ainge Iesu na ena.
MAT 22:41 Eto enana Pharisees embomeni vahaita uo Iesu enana ta degi ke einge ena,
MAT 22:42 “Ungo do ere hotembiheve? Ungotenau orekari embo amo amuta ahije re?” ainge enu “Amo King David ta ahije ra.” ainge Pharisee embomeni na eo,
MAT 22:43 Iesu na, “Eto amo David ta ahije kito Ahihi Otohu na do eto David ta degi enu, ‘Amo nau Bada ra’ ijie kajenu,
MAT 22:44 ‘Bada God na nau Bada ta degi ke einge ena ‘Nau ingeni be ei ta arumbeto iriro nane no kitoho teto ikano inena utu na hatiresoa’,’ ke ainge ijie David na kajena.
MAT 22:45 Eto David na ‘Nau Bada ra’ ke ena avoeto ungo do eto ungotenau orekari embo amo David ta ahije ke eagove?” ainge Iesu na enu
MAT 22:46 embomeni amuna ke mine ae be ea eto iji amikote eto iji tapa amita ambota enana me kogue Iesu ta degi eto ingari ke mine ae ere uahera.
MAT 23:1 Eto Iesu na amita ambotani te embo tapa ta degi ke einge ena.
MAT 23:2 “Enana ke pepeni ahe poekari embomeni te Pharisee embomeni te na Moses ta besi humbuto Moses ta ke pepeni simba ue mihera.
MAT 23:3 Avoeto enana ari do ava aisora avo evujo. Rate enana ta ke avo agi ae eagora avoeto enana ta ari avo humbavojo,
MAT 23:4 enana eagora amo eingera. Enana ta ahe poekari na donda bouka be humbari haite mane avo embo ta koho ta ango eagora rate ungo oenga hondate eto humbuto pambari uje ae ue
MAT 23:5 ari do eagora amo embo tapa na kito embo peni ke ara eagora. Enana God ta ke paper koso vahai be ai ta kaeto ingeni ta eto beo ta vavahaikagora avo kivujo nei bo uhu ta esi umbuka-eto handuketo bo ta tigito tore veaguja amo embo na kito God osa ari embo ke ara eagora
MAT 23:6 eto pondo ue embo peni amita arumbari asa ta arumbagora eto ke kasari bande ta embo peni ke ijie tihi buju ta arumbagora
MAT 23:7 nei market ari besi ta puvuto ‘embo emo ahe poekari embora’ ainge ara eagora.
MAT 23:8 Rate ungo embo tapa vahai vahai na, “Ahe poekari embo,” embo ke ijie jigama avojo. Ungo namei kamei eto ungota ahepoekari embo vahai be mihia
MAT 23:9 eto nei amo enda ta mihie embo vahai ta javo jigo vivihirou, ‘Nau Mamo’ ke mane sio aisoa amita be amo no Mamo vahai be uhu ta iraguja.
MAT 23:10 Eto nei amo embo na no degi ta ‘Tihi jigari embo’ ke aisuja avo haekejo ungota tihi jigari embo vahai be amo ungota orekari embo God na ikena avoeto.
MAT 23:11 Eto embo amuna embo peni asi uje aisuja amina ungo unduhe simba aisuja.
MAT 23:12 Eto embo amuna umo oenga eto peni aisuja avo God na au embo peni mane aisuja rate embo amuna embo teho ke ijie embo nei unduresuja avo God na au embo peni aisuja.”
MAT 23:13 Eto Iesu na Judea ta ke pepeni ahe poekari embomeni te Pharisee embomeni te ta degi einge ena, “Jove jove, ungo hotembari heriso embopo ungo God na tihi jigaguja degi ai ta horari uje ae ue amita bokiri embomeni ta tihi ta ahurekihova eto ai ta horasi uje ere ora embomeni ere haekihova.
MAT 23:15 Jove jove ungo ke pepeni ahe poekari embomeni te Pharisee embomeni te na hotembari heriso na embo vahai be ungota ke ambo ambo aja hoi be hoi eva oiho ta eto enda nei ta pambuto ungo ta ke hande eagova rate embo vahai ungota ke ingito ambo ambo aisuja amo ungota ahe poekari na avo amita jo tongopa au ungo ga tapa peheto Satan ta degi pambasuja.
MAT 23:16 Jove jove ungo hotembari heriso embomeni ungo tihi kuru ari na embomeni degi avo kiora arako ereova. Ungo ke sokova avo einge ahe poekihe ere ova, ‘Eto embo na temple ta javo jigama ue ke ikasuja amo ivo ambu avoeto ke amo toasuja amo tehora rate embo na temple ta gold javo jigama ue ke ikasuja amo sovera mihia avo eto mane toasuja,’ ke ainge amo ungo sarika embo tihi kuru ari na kiae kiae ue eagova.
MAT 23:17 Rate ungota degi erena, ‘Temple amo otohu avoeto amina au temple ta gold otohu aisuja avoeto donda dombo amo gold retemo temple re?’
MAT 23:18 Eto ke nei einge eagova, ‘Eto embo na God ta pene ikari gaga ta javo humbuhe ke aisuja amo ivo ambu avoeto toasuja amo tehora. Rate gaga hamota hande mihia amita javo humbuhe ke aisuja amo sovera te avoeto mane toasuja.’
MAT 23:19 ainge tihi kuru ari embo na arako kiae kiae eagova. Rate erena amo pene gaga na eoi hande otohu eaguja avoeto donda dombo amo davore?
MAT 23:20 Avoeto embo na God ta pene gaga ta javo humbuhe ke aisuja amo pene gaga ta javo pere mane rate amita hamo ta do mihia amita javo humbuhe eaguja.
MAT 23:21 Eto nei embo na temple ta javo humbuhe ke aisuja amo God ai iraguja avoeto temple te God te amita javo humbuhe ke eaguja.
MAT 23:22 Eto embo na uhu i ta javo humbuhe ke ikasuja amo God ai ta tihi jigihe arumbeto mihia avoeto amita javo humbuhe eaguja. Avoeto erena amo javo humbuhe ke eagora amo ahe poekari sapura be avo eagova.
MAT 23:23 Jove, jove. Ungo ke pepeni ahe poekari embopo te Pharisee embopo te tunga heriso na God ta degi hande ikasi ue donda isasaraho mune jeune hambuga ainge kaheke eto tapa 10 ainge iketo vahai amo God ta ra eagova rate God ta ke pepeni avo teto haito eagova amo embo nei ta irari javotoho na irora simba ari embo ta osaga kito jo hambari eto ke be ari eto ke dombo emite tapa aheva
MAT 23:24 ungo tihi kuru ari na arako o teonda umo ta veasuja avo umo ga indagona humbuto gosukihe o camel pajire be avo pe te ungekihe ere ova.
MAT 23:25 Jove jove, ungo ke pepeni ahepoekari embomeni te Pharisee embomeni te hotembari heriso na ungota heva aguhu hamo pere egihie jo egae toagova rate ai ta amo donda ambu embo hotembae ue, ‘Na na’ ijie donda egimbeto ere humbuhava amo aguhu jo ai ta mihia.
MAT 23:26 Ungo tihi kuru ari Pharisee embomeni eto aguhu jo egasoa amo hamo te tapa javotoho aisuja.
MAT 23:27 Jove jove. Ungo ke pepeni ahe poekari embopo te Pharisee embopo te na hotembari heriso hotembihe eagova. Ungo embo ta hamo kovari use aingekora gajiketo koro na jorereto iketo ji vuji na kogombeore use hamo kiari javotoho eaguja rate jo ta amo masa kakesa iraguja
MAT 23:28 ainge dombo ungota hamo avo embomeni na kogue kiari javotoho ke eagora rate jo ta amo ke sokova te ari sapura te na enetari.”
MAT 23:29 “Jove jove. Ungo ke pepeni ahe poekari embomeni te Pharisee embomeni te hotembari heriso ue peroveta ta irari javotoho embomeni mahu pehari ta use javotoho iketo donda kiari javotoho na kogombeto
MAT 23:30 ke einge eagova, ‘Nau mamahamane na embo erevi teo pehena iji amikote na ari ainge mane ahena,’ ainge eagova
MAT 23:31 eto ke ainge ijie amo ungo God ta ke hande ari embo avo tari pehari amita ahihije te ari vahai embopo ra
MAT 23:32 avo eto pure avo ungota ohihi na ihikari avo evujo irae ai.
MAT 23:33 Ungo embo sasapura koso o ta meni undi ainge ra. Ungo ta ari sasapura ta bouka amita memenga Satan ta memenga kiari degi ai ta kesoa amo daingeto toto pambavo?
MAT 23:34 Na ungota degi erena, na peroveta te kiari embopo te ahe poekari embopo te ikano ungota degi puvuto ke aisora te ungo na nei tavo pehasora, nei ji atahu ta tasova nei God ta ke hande ari bande ta esi na ejembasova eto da nei ta nei ta mihera amo ohimbasova.
MAT 23:35 Eto embo jajavotoho teo pepehekari amita meni amo ungo na ikasova ohihi embo Abel ta eto puvuto embo Berachiah ta meni Zechariah amo ungo na temple jo eto pene gaga amita ugorota tave pehena
MAT 23:36 eto sio pepehekea tapa amita bouka amo ungo eha miheva ungo na humbasova avo erena ingivujo.”
MAT 23:37 “Jerusalem, Jerusalem aja to be erena. Peroveta ta ke hande ari embomeni God na ikena amite tapa amo ungo na koro na tave pepehekea. Eto di ohora meni na pambuto e ta gati ta horeto gombuto iragora ainge dombo Jerusalem ta embomeni simba aisi uje eagona rate na simba ana ungo uje ae eagova
MAT 23:38 avoeto ungota temple ai ta embo irae teho iresuja
MAT 23:39 eto ungota degi erena iji eha eto ambota na ehako mane kesova rate ungo, ‘Bada ta javo ta puvuto ere hua God hondate e.’ ke ainge aisova iji amikote na ehako kesova.” ainge Iesu na ena.
MAT 24:1 Eto Iesu na temple jo ta eto araha ta puvutuhunu amita ambotani puvuto temple gerikari javotoho avo Iesu kioja ke eo Iesu na einge ena.
MAT 24:2 “Bande erevi ungona javotoho ere kogova te ungota degi erena, koro vahai na nei amita hamo ta mane tembeto iresuja rate tapa araraeto veto sio sao aisuja.” ainge Iesu na harikena.
MAT 24:3 Eto Iesu tiri olives ta arumbeto mihinu amita ambotani ungo oenga puvuto einge eto ingia. “Temple amo iji deina arara eto veau? Eto nei iji emita tutumota umo puvuresoa amita hajire do aingere avo tapa ejo ingore,” ainge eo
MAT 24:4 Iesu na mine einge ena, “Embomeni ke sokova hande aisora avoeto be kogue irivujo,
MAT 24:5 embo nei nei na javo nau jigama ue ke sokova na ijie puvuto “Ungo orekasi puvena” ainge ijirou ingihe embo isapamane enana ta ke sokova avo ambo ambo aisora
MAT 24:6 eto ungona isoro hombekari ta aisora amita asavi ingesova eto hoi ta asora amo duru ingihe osaga avojo. Ari ainge puvuresuja rate iji kombu ta auvehija ainge mane hotembasova.
MAT 24:7 Enda nei na ereto enda nei ga isoro aisora eto King vahai na ereto King nei tasuja. Nei beuje iji peni vahai puvutuhurou enda tapa ta titira puvuresuja.
MAT 24:8 Eto ari erena tapa erevi amo evohu na meni ingasi ue memenga kiaguja ainge dombo ra.
MAT 24:9 Eto ungo amo embomeni na andito humbuto embo nei ta ingeni ta ikaro humbuto aro memenga kesova eto taro pehasova. Eto ungo embomeni nau avoeto embo tapa na ungota degi hini kambari mahainge aisora.
MAT 24:10 Iji amikote nau embomeni nei nei na tunga hapereketo na ke be ae ue hini kambari mine ara ue namei ungota kitoho embo ta ingeni ta ikasora.
MAT 24:11 Eto peroveta sokova amina puvuto ke sokova ijiroro ingihe ambo ambo aisora
MAT 24:12 eto ari hotembari sasapura na pajito enda eneteto au namei kamei ta osari jamopo aisuja
MAT 24:13 rate embo amuna sove sove eto na ke be ijie irirou iji kombu ta embo amo God na oreketo humbasuja.
MAT 24:14 Eto God na tohota embomeni tihi jigesi siriketo ere uhua ke javotoho avo Judea embomeni te enda tapa embomeni te ta degi ke hande aro embo tapa ingesora eto amita engihita iji kombu ta puvuresuja.
MAT 24:15 Eto Peroveta Daniel na Donda Sapura be Sapura amita ke mahu kajena avo humbuto puvuto Degi Otohu ta ikaro hetasuja (ke erevi ehekari embo be ingijo)
MAT 24:16 kito ungo Judea ei ta miheva embomeni joru tiri ta pambuvu.
MAT 24:17 Eto embo bande i ta mihia amo veto amita donda mane sirikasuja.
MAT 24:18 Eto embo pure ta mihia amo mane egerembeto amita asukari humbasuja te tihi tambueto pambuvu.
MAT 24:19 Eto iji amite evohu urete te eto evohu meni isapa emi ta amita degi huhevari ngahia avoeto aja to erena!
MAT 24:20 Eto ungo joru pambasova iji avo ga iji te mane puvuresuja eto jangu indari iji te mane puvuresuja pari ta ainge evujo
MAT 24:21 amita be amo uhu te enda te eha ari iji te eto puvuna iji amite memenga osaga ainge puvurae be ra eto amita ambota ari ainge ehako mane puvuresuja.
MAT 24:22 Eto osaga kiari iji avo ugorota haekae aisora amo embo tapa vasiri te mane iresora rate God ta embomeni siriketo humbari avoembo God na iji avo ugorota haekasuja.
MAT 24:23 Eto embo na no degi ta “Kijo, ungotenau Orekari Embo puvija erevira.” eto iji nei “Hoi ta ere puvutuhua,” ainge aisuja ingito ke avo be hotembavojo
MAT 24:24 amita be amo orekari embomeni sokova eto peroveta embo sokova na ereto hajire nei te nei te aro embomeni kito mana mana ue ke be hotembasora. Eto God na siriketo humbari embomeni te tapa na enana ta ari kito ke be ke ijie ambo ambo asi hotembasora,
MAT 24:25 avoeto ari avo puvuresuja avoeto kihi ere harikihena ingivujo.
MAT 24:26 Eto embo na ungota degi “Kivu ungotenau orekari embo puvija avo ojagatambu aita mihia,” ke ainge ijirou ai ta pambavojo eto ke nei amo, “Kivu orekari embo puvuto degi nei ojikari ta mihia,” aisora ke avo ingovojo
MAT 24:27 amita be amo pipiri na ihane ta sariage eto pambuto sohe ta veaguja ainge dombo Embo ta Meni amo puvurou embo tapa kesora.
MAT 24:28 Eto o sari ta di asiko na veaguja aingeko dombo puvuresuja.
MAT 24:29 Eto osaga kiari iji avo irae au iji amo mume ururou hariga na usasa isapa aisuja eto uhu ta sovera na jahevau kuro soheto veasora,
MAT 24:30 eto iji amikote Embo ta Meni ta hajire avo uhu ta puvurou enda embo tapa na kito sinena ue jenge tasora, eto Embo ta Meni avo sovera te usasa te uhu ta johi hamo ta heteto veto ere hua avo embo tapa na kesora eto amina toho embomeni mahu siriketo humbari avo vahaita puvurora
MAT 24:31 huin husau asavi peni vahai au amita Anera isapamane ikau enda tapa kaina pahina ihane eto sohe ta pambuto umbaro puvuresora.
MAT 24:32 Na ji junga ta timu hatirari ke aisona ingivujo. Eto ji avo huvira oi kito iji ta iji ere puvutuhua ke eagora.
MAT 24:33 Eto ainge dombo ari erevi erena amo puvurou kesova amo Embo ta Meni na jo ta horasi bokiri pe ta auveto heteto mihia.
MAT 24:34 Na ungota degi ke be erena ungo eha miheva embomeni tapa mane sasari aisora rate huna mihirovo ari erena erevi puvurou kesova.
MAT 24:35 Eto ke peni be amo uhu te enda te avo irae aisuja rate nau ke avo mane irae aisuja te daroho iresuja,
MAT 24:36 rate ari erena amita puvurari iji amo embo tapa kiae be eto Anera te God ta Meni te tapa kiae, Mama God na vahai kiarira.
MAT 24:37 Eto embomeni Noah ta iji te mihahera ainge dombo mihiroro Embo ta Meni puvuresuja.
MAT 24:38 Amita be amo embomeni indie umbuhe evohu jijimbukihe mihio Noah e nga jo ta horihinu
MAT 24:39 do puvuresuja amo embomeni nei do hotembae ue mihio umo na irerembeto humbunu sasari ea, ainge dombo mihiroro Embo ta Meni puvuresuja,
MAT 24:40 eto iji amite embo heriso pure ue mihiroro puvuto embo vahai humbuto pahue vahai toasuja,
MAT 24:41 eto evohu heriso ambe pure ue mihiroro puvuto vahai humbuhe nei toasuja.
MAT 24:42 Avoeto jo te hotembari te tapa simba be eto kogo ue irivujo. Ungota Bada ta puvurari iji amo ungo kiae avoeto.
MAT 24:43 Eto ungo kiarira amo pegene embo ta puvurari iji amo bande mamona mahu kogua avoeto evae simba ue mihirou pegene embo puvuto kito mane bande pejeto horeto pegene aisuja.
MAT 24:44 Ainge dombo Embo ta Meni avo eha mane puvuresuja ainge hotembihe irirovo amo hepureketo puvuresuja avoeto mahu nununga eto irivujo.
MAT 24:45 Eto embo peni na amita pure embo vahai ta indari ageto undurari javotoho avo bande mamo na kito au bande ta indari tapa amo amina simba aja ke aisuja.
MAT 24:46 Eto pure avo eto kogoeto ururou embo peni bande ta puvuto pure embo avo kito tunga javotoho
MAT 24:47 eto ke au pure embo na amita donda tapa simba ue osa asuja avo erena,
MAT 24:48 rate pure embo nei amo ke sokova ari embo amina, ‘Bande mamo eha mane puvuresuja,’ ijie
MAT 24:49 ihiketo amita pure vahai ari embomeni torue embo sasapura ga umo sapura indito pipi konene ue bande mamo puvurari hotembae ue mihirou
MAT 24:50 iji ikae teho puvuto pure embo sapura avo kito ikau pambuto enana hotembari heriso embomeni amiga osaga inono kesuja.
MAT 24:51 Eto ai ta embo sasapura na memenga kogue sisisasi ijie ti kiroro kiroro aisora.” ke ainge Iesu na ena.
MAT 25:1 Eto Iesu na ke einge ena, “Embo ta Meni puvuresuja iji amite God na tohota embomeni siriketo humbasuja amita ari amo einge ra. Iji vahai kakara tapa ten amo jao ta jimbari pondo ta pambuto hovahu kesi usasa oenga oenga humbuto unduduketo pambua.
MAT 25:2 Eto kakara tapa 5 ainge amo kerosene irae au jojekasora avo hotembeto humbuto pambua
MAT 25:4 te nei 5 amo sarika ue humbuto pambae toto pambua.
MAT 25:5 Eto hovahu sau puvurae unu bande ahone ta simba ue iji koso kaso be mihio evora enu hereketo evia.
MAT 25:6 Eto humba ugorota embo na ‘Jimbari embo ere puvutuhua pambuto ope ope karihe humbuto puvujo’ jage eto ainge eo,
MAT 25:7 kakara 10 avo ereto usasa jigio perimbenu
MAT 25:8 kakara tapa 5 teho pambua amina nei kerosene humbuto pambua, amita degi einge ea, ‘Dagota usasa irae aisi ere ua rate dago kerosene isapa hondate avote?’ ainge eo,
MAT 25:9 ‘Aja to be erera, dago jigama aisora avo inonotara ungo pambuto nei ombuto puvuvujo.’ ainge eo
MAT 25:10 pahuo jimbari embo puvunu enana mahu nununga ea amina amite tapa jo ta horeo bokiri ahurekena.
MAT 25:11 Eto enana pambuto kerosene humbuto puvuto bokiri mahu ahurekari avo kito ke einge ea, ‘Hovahu, hovahu, dago bokiri hirikejo horare.’ ainge eo
MAT 25:12 jimbari embo na ke einge ena, ‘Na ungo be kiae ere ona pambuvujo.’ ainge ena.
MAT 25:13 Avoeto ungo mane evesova rate teho mihie simba evujo. Amita puvurari iji amo ungo kiae avoeto.” ke ainge Iesu na ena.
MAT 25:14 “Eto God na tohota embomeni siriketo humbasuja amita ari amo eingera. Embo peni amo degi nei ta pambasi ue amita pure embo 3 ainge avo jage enu puvuo amita koro kaheke kaheke eto enana simba ara ikena.
MAT 25:15 Vahai amo pure pajire ari haite kito amita 5,000 kina ikena nei amo pure isapa peni ari haite kito 2,000 kina ikena eto nei embo pure isapa be ari haite kito 1,000 kina iketo toto degi nei ta pambunu,
MAT 25:16 embo 5,000 kina umbuna amina pure sausau ihiketo pure ue 5,000 kina nei hambuna,
MAT 25:17 nei 2,000 kina umbuna amina pure ue 2,000 kina nei hambuna
MAT 25:18 rate 1,000 kina umbuna embo avo teho hoto koveto amita tihi jigari ta koro avo hoto jo ta iketo ahurekena.
MAT 25:19 Eto iji koso be amita ambota tihi jigari embo ehako egerembeto puvuto koro ikena avo do do ea avo kesi ke enu
MAT 25:20 5,000 kina umbuna embo amina puvuto ke einge ena. ‘Bada inena nau degi ta 5,000 kina ikiha amo pure eto 5,000 nei hambuhana erevira,’ ainge enu
MAT 25:21 amita tihi jigari embo na, ‘Umo pure ari embo javotohora, na no degi ta isapa ikihane javotoho na jigama ehea avoeto na umo humota ue isapamane inena simba ae ikasona. Hae! Umo namoga mihie tunga javotoho ae.’
MAT 25:22 Ainge eto 2,000 kina umbuna amina puvuto ke einge ena, ‘Bada, nau degi ta 2,000 kina ikiha amina 2,000 nei humbuhana erevira.’ ainge enu
MAT 25:23 kito ‘Umo pure ari embo javotohora, na no degi ta isapa ikihane javotoho na jigama ehea avoeto na umo humota ue isapamane inena simba ae ikasona. Hae! Umo namoga mihie tunga javotoho ae.’ ainge enu
MAT 25:24 1,000 kina umbuna amina ambota puvuto ke einge ena, ‘Bada, na kogona amo umo embo ngahia ra, embo nei na pure uore donda humbagoa avoeto nau ikiha avo veto pambaguja
MAT 25:25 joru eto pambuto hoto koveto koro ikiha avo ahurekihane mihei umo puvea avoeto ahiketo humbuto puvuto no ikari avoeto no ere ikihena, umba.’ ainge enu
MAT 25:26 ingito ke einge ena, ‘Umo kupi pegogo embora. Eto na embo nei ta pure ta donda humbuto indagona avo umo kiari ke erea
MAT 25:27 avoeto do eto nau koro bank ta ikae re? Eto ainge aehea amo puvuto koro nau ikari amite koro nei amita hamo ta ikaro umbaehena.’
MAT 25:28 ke ainge eto amita pure embomeni ta degi ke einge ena. ‘Aravora embo emita 1,000 kina avo humbuto embo 5,000 kina ikihana amita degi ikevujo.
MAT 25:29 Amita be amo embo donda mihia amita degi donda nei hamota ikasona, eto embo donda irae amita degi do mihia avo umbano donda ambu embo be aisuja.
MAT 25:30 Eto kupi pegogo embo erevi humbuto ari sasapura embomeni memenga kogue iragora degi ai gosukevu veto mume ta mihie si ijie ti kiroro kiroro ijie iroi’,” ainge Iesu na ena.
MAT 25:31 Eto Iesu na ke einge ena, “Eto Embo ta Meni na usasa kiari javotohote puvutuhurou Anera tapa na gara pekihita jigiriketo ope ope karihe humbuto puvuto ikaro amita avo arumba peni usasa te ai ta arumbasuja.
MAT 25:32 Eto enda tapa embomeni na puvuto vahaita ururoro o simba ari embo na o sheep te o goat te siriketo oenga oenga ikaguja
MAT 25:33 aingeko amina o sheep sirikau ingeni be ta vihesora eto o goat sirikau ingeni anga ta vihesora.
MAT 25:34 Eto King amina embomeni amita ingeni be ta ke einge aisuja, ‘Ungo ari jajavotoho ari embomeni ra,
MAT 25:35 na beuje oi ungona indari te umo te ikihave indimahana, eto degi nei ta eto puvutohone ungo na pekeheve tunga javotoho uena. Eto bo ambu one ungo na bo ikihave humbuto asukihana.
MAT 25:36 Eto ambure one ungo na hondate ueva eto tipura ta mihene na kesi pahava avoeto nau mama na osa ue ungo hondate aisuja. Amina enda eha ta ari iji te ungota irari degi javotoho ena ai ta horeto ungota enda hoteto humbuto mihirovo nane ungo simba aisona, have.’ ke ainge au
MAT 25:37 embomeni jajavotoho na ingito ke mine einge aisora. ‘Bada, dago iji deina umo kito beuje te puvutohoe indari te umo te ikehere indimaha?
MAT 25:38 Eto umo iji deina enda nei ta eto puve pekihare, bo ambu kito ikehere asukehe,
MAT 25:39 ambure oe kito hondate uere eto tipura dainge mihe pambuto umoro uere?’ ainge aro
MAT 25:40 King amina einge aisuja. ‘Ari emo nau namei vahai donda ambu teho mihahija amita degi ae rate nau degita ueva.’ ke ainge
MAT 25:41 eto amita ingeni anga ta mihera embomeni amita degi ke einge aisuja.
MAT 25:42 ‘Na beuje na pehihena te ungo na nau degi ta indari te umo te ikae.
MAT 25:43 Eto enda nei ta eto puvuhena rate ungo na pekae eto bo ambu uena te ungo na bo ikae asukae eto tipura ta mihie ambure uena rate ungo puvuto na hondate ae avoeto na toto pambuto Satan te amita Anera te datoho ta evikihie iragora Mamo God na ji nununga ari ai pambuto ungota ari sasapura ta mine umbuvujo’ ainge au
MAT 25:44 enana mine einge aisora, ‘Bada, inena beuje te ujeje te enda nei ta eto puvurari eto bo ambu eto tipura ta ambure te tapa dainge oe kito hondate ae uere?’ ainge aro
MAT 25:45 amina ke mine einge aisuja. ‘Na ungo ta degi ke be erena. Ungo namei vahai beuje te ujeje te puvuna avo kito hondate ae ueva amo namora te kito hondate ae ueva.’ ke ainge au
MAT 25:46 enana pambuto datoho ta osaga kogue iresora te enana jajavotoho na tunga javotoho ue irari datoho ta iresora.”
MAT 26:1 Eto Iesu na ke tapa do asi uje ena avo enu irae enu amita ambotani ta degi ke einge ena.
MAT 26:2 “Ungo kogova amo iji tapa 2 irae au jarukari pondo aisora. Eto iji amite Embo ta Meni avo kitoho embo ta ingeni ta ikaro ji atahu ta tasora,” ainge ena.
MAT 26:3 Eto Priests pepeni te embo okokose te na priest ta tihi jigari embo javo Caiaphas ta bande peni ai ta horuketo
MAT 26:4 ke sokova na daingeto Iesu humbuto taro pehasuja ke avo kasea.
MAT 26:5 Eto ke nei einge ea, “Eto eha aisora amo embomeni pondo ta puvuresora amina kito ereto jujune ue mine tara mane tara aisora avo eto ambota aisora,” ke ainge ea.
MAT 26:6 Eto Iesu amo da Bethany ai embo Simon amo ambure sapura javo leprosy humbari ra te mahu kojari amita bande ta mihinu,
MAT 26:7 evohu vahai na Iesu osa ue amita degi puvuto bottle isapa ai ta oil mune javotoho te amita mine amo koro pajire be avo humbuto puvuto Iesu gaga ta arumbeto mihinu ohoruta jojekenu,
MAT 26:8 amita ambotani na kito tumo ue ke einge ea, “Donda javotoho amo do eto aijaja ere oi?
MAT 26:9 Donda avo ombuto koro humbuto donda ambu embo ta hande ikae.” ainge ijio
MAT 26:10 Iesu ingito ke einge ena, “Evohu emita degi do eto ngahia ere ove? Amina nau degi ta ehija amo ari javotoho be ra.
MAT 26:11 amita be amo donda ambu embo amo ungote mahainge iresora rate namo ungote iji koso mane iresona,
MAT 26:12 eto na kovasora avoeto hamo nau nununga ana amita ujena oil na kuhihia.
MAT 26:13 Eto na ungota degi erena, God ta ke javotoho enda nei ta nei ta hande asora amo evohu erevi hotembihe ari do ehija emiga tapa hande aisora.”
MAT 26:14 Eto ambotani tapa 12 rate vahai Judas Iscariot amina pambuto
MAT 26:15 priests okokose ta degi ke einge ena, “Eto na Iesu ungota degi ta ikasona te nau koro doinge ikavo?” ainge enu,
MAT 26:16 “Koro tapa 30 kina ainge ikasora.” ainge eo Judas na pambuto iji deina Iesu humbuto enana ta ingeni ta ikasuja avo iji javotoho ihiketo jombure ena.
MAT 26:17 Eto bread pajirari sivo ikae avoeto tevoko ari amita pondo iji puvunu ambotani na Iesu ta degi puvuto ke einge ea. “Umo ‘Jarukari’ ta pondo indesoa avo degi dainge nununga ara uje ere oe?” ainge eo,
MAT 26:18 Iesu na, “Embo vahai da peni amita jo ta iraguja amita degi pambuto ke einge evujo. ‘Bada ta iji auvehei jarukari ta pondo amita ambotani ga no bande ta indesi ehija,’ pambuto ainge evujo.” ke ainge enu
MAT 26:19 pambuto jarukari ta pondo nununga ea.
MAT 26:20 Eto pondo iji puvunu hure vovunu Iesu amita ambotani ga gaga ta arumbeto
MAT 26:21 indie mihio Iesu na enana ta degi ke einge ena, “Na ungota degi erena ungo namote ereova embo vahai amina na humbuto embo nei ta ingeni ta ikasi ere ua.” ke ainge enu
MAT 26:22 ingito tunga osaga ue enana vahai vahai Iesu ta degi einge eto ingia. “Bada amo namorami ere te?” ainge ijio
MAT 26:23 Iesu na “Embo indari humbasi namote heva ta ingeni jujurukehija amina na harikau humbasora.
MAT 26:24 Eto God ta ke mahu kajari ta amo Embo ta Meni pehasuja avoeto pehasora rate harikari embo ta degi osaga isapamane puvuresuja javotoho amo amita e na ingae toaehija kito amo osaga mane kiaehija.”
MAT 26:25 Eto Judas harikasuja embo amite tapa ke einge ena, “Ahe poekari embo, amo namorami ere te?” ainge enu Iesu na, “Ke emo inena ehea.” ainge ena.
MAT 26:26 Eto enana vahaita indie mihio Iesu na bread humbuto pari eto pereto ambotani ta degi ikihe ke einge ena, “Emo hamo naura humbuto indavu.” ainge enu indio
MAT 26:27 aguhu humbuto God ta degi osa eto ambotani ta ikihe ke einge ena,
MAT 26:28 “Emo orosa naura humbuto indavu. Eto God na embo isapamane ta ari sasapura hotembeto toaja orosa erevi pene eha ta ke ikari avo overekehena indavu.
MAT 26:29 Eto na ungota degi erena wine ajireketo mihirono ungo Mama ta tihi jigari degi ai ta horasova iji aramite ungo ga wine eha avo indesona.” ainge Iesu na enu
MAT 26:30 haveni eo irae enu da toto tiri javo olives ta pambua.
MAT 26:31 Eto tiri olives ta pahue Iesu na enana ta degi ke einge ena, “God ta ke ta einge kajari mihia ‘nane o simba ari embo tasona eto o irae joru sio sao pambasora’ ke amita be amo mume eha eremite ungo tapa na humota ae ue toto pambasova.
MAT 26:32 Eto na peheto vasiri te ereto kihi Galilee ta pahurono ungo ambota pambasova.” ainge enu,
MAT 26:33 Peter na ingito ke einge ena, “Enana tapa umo toto pambarote asora te nane umo mane humota ae aisona.” ainge enu
MAT 26:34 Iesu na, “Na no degi ta erena umo mume emita jo ta na kiae ke 3 ainge ijiro ohora javone aisuja” ainge enu
MAT 26:35 Peter na Iesu ta degi ke einge ena, “Ainge manera te umo pehasi asoa amo namote tapa pehasoa te nane mane umo kiae ke aisona.” ainge enu ambotani tapa na ke vahai ainge pere ea.
MAT 26:36 Eto Iesu na amita ambotani ga degi javo Gethsemane ta puvuto amita ambotani ta degi ke einge ena, “Ungo ei ta irirovo na oi ta pambuto pari aisona.” ainge eto
MAT 26:37 Peter te embo Zebedee ta meni heriso aingeto humbuto pambuna. Eto Iesu ta degi tunga osaga pajire be puvunu
MAT 26:38 enana ta degi einge harikena. “Nau jo osaga na enetihia avoeto ungo ei ta na avoembo evo avojo.” ke ainge eto
MAT 26:39 toto vajireketo imihe enda ta veto gogovo eto pari einge ena. “Nau Mama, ari nei irirou kito osaga nau degi ta puvuresuja avo ejo na seriketo pambai rate uje nau mane rate uje no tapa avo ere ona.” pari ainge eto
MAT 26:40 ereto pambuto ambotani 3 avo evopo uo kito ke einge Peter ta degi ena, “Umo iji isapa namote pari ae do eto ivo ambu eto ere eve?
MAT 26:41 Ungo pari eto sovera ari humbuto na kiae ke mane aisovami ere evevete? Embo ta jo na uje eaguja rate visi amo ivo ambu eaguja.” ke ainge eto
MAT 26:42 ehako toto vajireketo imihe pari einge ena. “Nau Mama, eto osaga erevi na seriketo pambari inono ae kito aravora na no uje tapa avo aisona,” pari ainge eto
MAT 26:43 pambuto enana tapa pegogo ue evopo uo
MAT 26:44 kito egerembeto pambuto pari mahu ena vahai ainge dombo enu irae enu
MAT 26:45 ereto pambuto ambotani ujihie ke einge ena. “Ungo jangu indie ere evevete? Ereto kivu Embo ta Meni ari sasapura embomeni ta ingeni ta ikari iji puvija
MAT 26:46 na harikari embo puvuto ere hua erevu ungote pambuto degi ta hambare!”
MAT 26:47 ainge ijie mihinu, Embo puvua amo priests pepeni te embo okokose te na ikeo ki te emite humbuto ambotani vahai Judas Iscariot amiga puvua.
MAT 26:48 Eto harikari embo amina kihi ea “Na pambuto embo vahai andito mune aisona aravora umbuvujo” ainge mahu ena,
MAT 26:49 avoeto Iesu ta degi tihi tambueto pambuto, “Ahe poekari Embo, na umo ere pekihena.” ainge eto andito mune unu
MAT 26:50 Iesu na, “Nau namei umo do asi puvea avo ejo.” ainge enu enana tutu tatu puvuto Iesu andito humbuho
MAT 26:51 ambotani vahai na amita asivo goruketo humbuto priest peni ta pure embo vahai jasi iketo araseketo oje jeto tiukena.
MAT 26:52 Rate Iesu na kito ke einge ena, “No asivo goru ta juruke. Embo amuna asivo goruketo humbaguja embo amo asivo na kajeoi pehaguja.
MAT 26:53 Eto na hondate ari uje eto Mama ta degi pari ahena amo Anera 70,000 ainge. Ikau puvuraehija avo umo hotembae ere oe?
MAT 26:54 Rate einge ere ora amo God ta ke ta mahu kajari avoeto ere ora.” ke ainge ambotani ta degi
MAT 26:55 eto isoro puvua embopo tapa amita degi ke einge ena, “Na pegene embo isoro embo kogue ki te emi te humbuto na andito humbasi puvevete? Eto na iji vahai vahai temple ta arumbeto embomeni ahe poekihe ere ovona iji amikote do eto na andito umbae?
MAT 26:56 Eto ari tapa ere ova amo peroveta na mahu ari kajari avo eto ere ova.” ke ainge ena. Eto iji amikote ambotani tapa na joru Iesu toto pambua.
MAT 26:57 Eto enana ke pepeni kiari embopo te embo okokose tapa vahaita horukihio Iesu andio embomeni na Iesu humbuto pambuto priest okose javo Caiaphas ta degi ikeo hetena.
MAT 26:58 Eto Peter na Iesu humbuto puvuto priest okose ta bande peni ai ta ke do ijiroro ingesi ambota ambota ue puvuto bande simba ari embo araha ta mihia amiga arumbena.
MAT 26:59 Eto priests pepeni te Sanhedrin horukari embomeni tapa avo Iesu na ke te ari te tapa do ena avo au ingihe amita ari sapura avo eto tari pehari haite avo jombure ue popoja ke na ganoka ea
MAT 26:60 eto embo nei nei ainge Iesu ta sapura harikasi ereto ke sokova na ea, rate Iesu ta ari sapura hambae be ea.
MAT 26:61 Eto tutumota embo heriso na ereto ke einge ea. “Embo emina God ta temple avo aimbeto veau iji 3 amita jo ta gerikasona ainge ijinu ingia.” ainge eo,
MAT 26:62 priest okose na ereto ke einge ena, “Enana ke ganoka erera amo mine mane ao?” ainge enu
MAT 26:63 Iesu ke mine ae enu Priest okose na einge ena, “Umo God vasiri te ta javo ta ke ejo. Umo God ta Meni be dago ta orekari embo Keriso re?” ainge enu,
MAT 26:64 Iesu na ke mine einge ena, “Ke inena erea aravora rate ungota degi erena, iji eha eto ambota Embo ta Meni na God sovera te ta ingeni be ta arumbeto mihima uhu i ta eto johi hamo ta arumbeto puvuresuja avo ungo tapa kesova.” ainge enu,
MAT 26:65 Priest okose na ingito ke sokova ari ke ijie jo memenga enu bo amita avo jigito perara eto ke einge ena, “Aravora, harikari embo nei na mane aro ingesora. Ke sapura amo God ta degi ei ungo tapa ere ingiheva
MAT 26:66 avoeto do asi ere hotembiheve?” ainge enu enana tapa na “Sapura ere ua avoeto taro pehasuja.” ainge hotembari vahai eto ke ainge
MAT 26:67 eto ingeni na torue tombu ta isuva ea. Eto embo nei nei na Iesu torue
MAT 26:68 ke einge ea, “Orekari Embo, umo peroveta kito umo amuna toroi avo kito harike ingore!” ainge ea.
MAT 26:69 Eto Iesu jo ta koto ue mihinu Peter araha ta arumbeto mihinu pure kakara vahai amina amita degi puvuto einge ena. “Umo Iesu Galilee embo amiga eagoa,” ainge enu
MAT 26:70 Peter na embo tapa ingiho kakara ta degi ke einge ena, “Umo do erea amo na kiae be ra.” ainge eto
MAT 26:71 ereto pambuto degi pe ta hehetihinu pure kakara nei na Peter kito embo tapa ta einge ena. “Embo emina Iesu Nazareth embo ga isa ere uahija.” ainge enu
MAT 26:72 Peter na ke ngahia na einge ena. “Ungo embo ereva amo na kiae be ra.” ke ainge pere ijie mihimihe
MAT 26:73 embomeni puvuto Peter ta degi einge ea, “Umo Iesu ta embomeni ta ke hajire vahai avoeto ungo vahai ra.” ainge eo
MAT 26:74 Peter ke sasapura nei te nei te ijie einge ena, “Embo amo na kiae be ra.” ainge ijinu di ohora ihiketo javone ijinu
MAT 26:75 Peter ingito Iesu na ke mahu enu ingina avo hotembena, “Inena na kiae ke 3 ainge ijiro di ohora javone aisuja.” ke ena avo hotembeto araha ta pambuto osaga hambuto si pajire be ena.
MAT 27:1 Eto iho vujenu enana priests pepeni te embomeni ta okose vahaita horuketo Iesu daingeto taro pehasuja avo ke kaseo irae enu
MAT 27:2 ingeni ta jigito humbuto pambuto enana ta gavana javo Pilate ta ingeni ta ikea.
MAT 27:3 Eto Judas, Iesu taro pehasuja ke avo ingito osaga peni vahai humbuto koro tapa 30 kina ohue ikeo umbuna avo priest pepeni te embo okokose te ta degi egerembeto ikasi pambuto
MAT 27:4 ke einge ena, “Embo amo ari sapura nei do ae rate nanena ari sapura peni be eto sio harikehena” ainge enu enana “Osaga amo dagota mane, nora,” ainge eo,
MAT 27:5 koro temple jo ta gosuketo pambuto esi humbuto ihive ta timbuto pehena.
MAT 27:6 Eto priests pepeni na koro 30 kina gosukena avo siriketo humbuto ke einge ea, “Koro emo orosa koro ra avoeto temple ta koro amiga vahaita mane ikasora.” ainge eto
MAT 27:7 koro amina do aisora avo ke kaseo irae enu enda nei embo puvuto peharo kovasora amita use enda avo koro amina ombasi pambuto enda na ovu ari embo amita degi enda ombua.
MAT 27:8 Eto eha oroho enda amita javo orosa enda ra eagora.
MAT 27:9 Eto ainge dombo Peroveta Jeremiah ta ke kajari ta amo einge mihia. “Israel ta meniundi na embo amita mine 30 kina ra ehera
MAT 27:10 eto koro amina ovu enda na eaguja embo ta degi enda umbera, ainge Bada na ana ehija” ke ainge ijie Jeremiah na kajena.
MAT 27:11 Eto Iesu avo gavana ta tihi ta ikeo hetenu gavana Pilate na amita degi ke einge ena, “Umo Judea embomeni ta king re?” ainge enu Iesu na, “Erea aravora,” enu
MAT 27:12 Priests pepeni te embo okokose ta na ke nei te nei te ijie ganoka ijio Iesu ke mine ae enu
MAT 27:13 Pilate na amita degi einge ena, “Enana ke nei te nei te ijie umo ganoka erera amo umo ingae re?” ainge enu
MAT 27:14 Iesu enana ta degi ke mine ari uje ae enu gavana na kito mana mana ena.
MAT 27:15 rate Pilate na Judea embomeni ta pondo ari iji te tipura embo vahai avo embomeni na arahata puvuroja uje eto eagore Pilate na eoi araha ta pambuhahera ari ainge pere uahija
MAT 27:16 avoeto tipura embo vahai javo Barabbas amo embo sapura be avo embo tapa na kia avoeto embomeni isapamane vahaita puvuo
MAT 27:17 Pilate na enana ta degi ke einge ena, “Na do ana uje ere ove?” ke ainge
MAT 27:18 Eto gavana na kina amo embomeni na hini kambari ue jo memenga ari na Iesu tasi uje eto humbuto puvua
MAT 27:19 eto embomeni ke mine do aisora avo simba ue amita avo arumba peni ai ta arumbeto mihinu Pilate ta ae na ke einge ikenu puvuna. “Ari sapura ae embo avo na ehure ta kehena avoeto osaga kogue mihena. Avoeto embo avo tojo pambai.” ainge ena
MAT 27:20 rate Priests pepeni te embo okokose te na embomeni na ke einge ara, “Barabbas avo au araha ta pahurou Iesu taro pehasuja,” ainge jo kajeo,
MAT 27:21 gavana enana ta degi, “Ungo embo amunure araha ta pambaja uje ere ove?” ainge enu enana, “Barabbas araha ta pambasuja,” ainge eo
MAT 27:22 gavana na ke einge ena, “Eto ainge ue Iesu ungota orekari embo ke eagora amo do ano?” ainge enu, “ejo ji atahu ta taro pehai,” ke ainge eo
MAT 27:23 Pilate na “Do eto? Embo emita sapura deire?” enu, ke mine ae ue aruketo einge ea, “Ejo ji atahu ta tare” ainge pere ijio
MAT 27:24 Pilate na nei do aisuja avo hotembae eto embomeni ungo oenga mine tara aisora avo joru eto umo isapa heva ta timbuto embo tapa ta tihi ta ingeni egihie ke einge ena, “Embo ari sapura irae embo ta orosa avo ingeni nau ta mane iresuja, ari ungo oenga evu.” ainge enu
MAT 27:25 embomeni tapa tunga vahai na ke mine einge ea, “Embo amita orosa amo dagota eto dagota meni undi ta hamo ta iresuja, tehora.” ainge eo
MAT 27:26 Pilate na enu Barabbas araha ta pahunu Iesu avo esi na ejembeto humbuto pambuto ji atahu ta tara ke ena.
MAT 27:27 Eto gavana ta isoro embopo na Iesu humbuto gavana ta bande peni ta horeto isoro embopo tapa avo jage eo vahaita puvuo
MAT 27:28 amita bo ujuketo bo pangari avo king ta asukari ke ijie ikeo asukenu
MAT 27:29 king ta siro kope ke ijie esi pepe te jigito egoveketo siro ta ikeo asukenu inoha uhu ingeni ta ikeo jiginu urumbihe paunge teteri eto mihie ke einge ea, “Judea embomeni ta King umo ere pekihera.” ainge ijie
MAT 27:30 isuva eto inoha uhu egimbeto humbuto uha ta tea.
MAT 27:31 Eto Iesu urumbeo irae enu bo pangari ikeo asukena avo houketo humbuhe bo amita avo ikeo asukenu humbuto ji atahu ta tasi pambua.
MAT 27:32 Eto degi ta pahue enda Cyrene embo javo Simon avo degi ta hambuto eo Iesu hondate eto amita ji atahu humbuto pambuna.
MAT 27:33 Eto degi javo Golgotha (Golgotha amita be amo embo pepehekari ta uha vehu)
MAT 27:34 ai ta puvuto Iesu ta degi wine te sogaga te ombuto ombuto ari avo indoja ikeo humbuto isapa indinu sogaga enu kito tona.
MAT 27:35 Eto Iesu ta bo houketo ji atahu ta teto vahaiketo amita bo avo amuna humbasuja avo kesi ituha koso te tuho te jigio koso humbunu
MAT 27:36 embo amina bo amo umbuna enana arumbeto Iesu pehaja simba ea.
MAT 27:37 Eto ari sapura ta ke kaeto vahaikagora besi ai ta ke einge kaeto amita siro kombu ta tea, “Embo emo Iesu, Judea embomeni ta king ra.” ke ainge kaeto tea.
MAT 27:38 Eto iji amina donda pegene ari embopo heriso avo ji atahu ta teto vahai ingeni be ta eto nei ingeni angata hurukea.
MAT 27:39 Eto embomeni puvuto Iesu kogue vani vani ue ke einge ijie urumbea,
MAT 27:40 “Umo temple aimbeto iji 3 amita jo ta gerikasi ijiea rate umo oenga hondate ari inono ae re” “Umo God ta Meni kito ji atahu toto veto pambu.”
MAT 27:41 eto priests pepeni te ke pepeni kiari embopo te embo okokose te tapa na Iesu urumbihe ke einge ea.
MAT 27:42 “Embo nei nei avo hondate uija rate umo oenga hondate ari inono aera. Eto emo Israel ta King be kito ji atahu ta eketo mihia avo toto veau dago kito ke be aisona.
MAT 27:43 Embo emo God humota ue God ta meni ke eaguja avoeto God na uje eto kito au veto pambai.” ainge ijie urumbea.
MAT 27:44 Eto pegene embopo Iesu ga ji atahu ta tea amina ke vahai ainge ijie Iesu urumbea.
MAT 27:45 Eto 12 o’ clock eto pambuto hure 3 o’ clock amita jo ta enda tapa mume sihukena,
MAT 27:46 eto hure 3 o’ clock ainge Iesu na jage eto einge ena, “Eli Eli, lama sabachthani?” ke ainge ena amita be amo “Nau God, Nau God umo do eto na toto pambe?”
MAT 27:47 ainge ijinu enana heteto mihimihe ingito ke einge ea, “Elijah jage eria” eo
MAT 27:48 embo vahai na Iesu umo uje ari ke eto huheveto pambuto soi humbuto inoha uhu tutumota egeto eto wine ta hatito humbuto pambuto Iesu na indoja ikihinu
MAT 27:49 embomeni na kito haeketo ke einge ea. “Hete, Elijah jage eria avo puvuto hondate aute avo kesira.” ainge eo
MAT 27:50 Iesu na ehako jajage ijie amita hen jamo ena.
MAT 27:51 Eto Iesu pehihinu amikote temple jo ta degi peikari bo avo oenga i ta eto horereketo veto enda ta unu enda titira unu koro pajire be oenga haukihinu
MAT 27:52 embo kovari panga amo pe hirikihinu embo ototohu mahu pepehekari amo vasiri te ereto
MAT 27:53 Iesu vasiri te erena amita ambota arahata puvuto da otohu javo Jerusalem ta pambuo embo nei nei na kia.
MAT 27:54 Eto enda titira unu vasiri nei te nei te tapa amo Rome ta isoro embo peni te amita isoro embopo te Iesu simba ea amina kito joru pajire be ue ke einge ea, “Ke be emo God ta Meni be ra.”
MAT 27:55 eto evohu isapamane hoi ta heteto kogue mihia amo Galilee ta eto Iesu ambo ambo ue puvuto Iesu unduhe simba ea.
MAT 27:56 Eto evohu nei nei amo Mary Magdalene te Mary nei amo James te Joseph ta e te Zebedee ta meniundi James te John te amita e te aingeto heteto kogue mihia.
MAT 27:57 Eto hure sosososo unu da Arimathea embo vahai javo Joseph amo haja vaja embo Iesu ta ke ambo ambo ena
MAT 27:58 amina puvuto Pilate ta degi Iesu ta hamo penunu enu
MAT 27:59 Pilate na embo amita degi ikara enu ikeo
MAT 27:60 humbuto amita hamo avo bo eha na togeto amita embo kovari panga orina ho eha kovari ai ta ikenu herekenu koro peni vahai amina aherekenu pambuto pe peikena
MAT 27:61 eto Mary Magdalene te Mary nei amite panga pe ai ta arumbeto mihia.
MAT 27:62 Eto evito jarukari pondo nununga eo irae enu enana priests pepeni te Pharisee embomeni te aingeto pambuto Pilate ta degi ke einge ea,
MAT 27:63 “Embo okose, embo ke sokova embo amina eha irari iji te ‘na iji 3 amita ambota vasiri te erasona’ ijija
MAT 27:64 avoeto ke ikejo no isoro embopo pambuto panga ho iji 3 amita jo ta simba are. Amita be amo amita ambotani na puvuto amita hamo humbuto mahu vasiri te erari ke embomeni ta degi aisora. Eto ke sokova ainge amo mahu uera te eha ainge aisora amo sapura be aisuja,” ainge eo
MAT 27:65 Pilate na ingito ke einge ena. “Aravora simba ari embomeni humbuto pambuto use pe javotoho eto vahaiketo simba evujo.” ainge enu
MAT 27:66 pambuto koro peni ai ta tahimbeo vahaikenu isoro embopo ikeo simba ea.
MAT 28:1 Eto jangu indari iji irae enu Sunday iho unga vivihinu Mary Magdalene te Mary nei amite Iesu kovea use avo kesi pahuo
MAT 28:2 Bada ta Anera uhu ta eto veto koro jigito aherekihinu enda titira unu koro ahone ta pambunu hamo ta arumbena.
MAT 28:3 Anera ta tombu amo pipiri ainge bo asukari parara be
MAT 28:4 avo Rome ta simba ari embopo na kito tututu eto tatara gaseto enda ta veto peharako uo
MAT 28:5 Anera na evohu ta degi ke einge ena, “Ungo joru avojo. Iesu ji atahu ta tehere pehehija avo jombure ere ova avo ere kogona te ei ta irae ra.
MAT 28:6 Amina mahu vasiri te erasi ue ijija avoeto vasiri te erehija, ungo einge huma amita panga jo ta herekari besi kito
MAT 28:7 sau sau egerembeto pambuto amita ambotani ta degi ke einge evujo ingore. ‘Iesu pehehija amo ehako vasiri te ereto Galilee pahua ungo ai pambuto kivujo.’ aravora na ke avo ano ingova puvena.” ainge eto pahunu
MAT 28:8 evohu heriso amo tunga javotoho ue joru te tapa use toto amita ambotani aro ingora huheveto pambua.
MAT 28:9 Enana degi ta pahuo Iesu puvuto hambuto, “Ungo ere pekihena.” ainge enu ingito auveto veto gogovo eto Iesu ta utu singi ta jigio
MAT 28:10 Iesu na ke einge ena, “Ungo joru avo toto pambuto nau namei kamei avo evujo pambuto na Galilee ai hambare.” ainge enu pambua.
MAT 28:11 Eto evohu heriso degi ta pahuo enana use simba ari Roman embo uhoho na da jo ta pambuto priests pepeni ta degi use jo ta do puvuna avo eo ingia.
MAT 28:12 Eto enana priests pepeni na embo okokose ga ke kaseo irae enu koro peni vahai humbuto Iesu ta use simba ari embopo ta degi do kia avo harikeora koro na ombua.
MAT 28:13 Eto ke sokova na einge ara ea. “Dago mumete evo ore amita ambotani na puvuto Iesu ta hamo pegene eto humbuto pambera. Ainge evujo
MAT 28:14 eto gavana na ingesuja kito dago na amita degi ke aro ungota degi mane au osaga kesova.” ainge eo
MAT 28:15 use simba ea embopo na koro avo humbuto priests pepeni ta ke agi ere uahera avoeto Iesu erena iji eto puvuto oroho emikote Judea embomeni na Iesu ta hamo pegene ari ke avo jigama ue iragora.
MAT 28:16 Eto Iesu ta ambotani tapa 11 na Galilee ta ijimihe pambuto Iesu na tiri vahai ai hambara ke ena ai pambuhumihe
MAT 28:17 Iesu kito mana mana eto nei ke be ijie veto gombuto jakeka ea nei be hotembae ea te ambota kito jakeka ea.
MAT 28:18 Eto Iesu na enana kito puvuto auveto ke einge ena. “Uhu te enda te ta sovera tapa amo nau degi ta ikehija
MAT 28:19 avoeto enda tapa ta pahue ke nau hande evujo ingito ambo ambo ururoro Mamo te Meni te Ahihi Otohu te ta javo ta bapataito evujo.
MAT 28:20 Eto ari tapa do ahe poekehene kogueva avo evujo ingito are. Eto be hotembevu iji eha emikote eto pambuto iji tutumota na ungote iresona.”
MAR 1:1 Ke emo Iesu Keriso, God ta Meni amita ke jajavotoho te ari jajavotoho te tapa,
MAR 1:2 eto Iesu puvurae kihi ta Peroveta Isaiah na ke einge kaeto pehena God na ke einge eria “na nau ke hande ari embo No tombu ta ikano puvuto no embere sirikasuja.
MAR 1:3 Embo amo ojagatambu ta jage eto ke einge aisuja. ‘Bada ta puvurari degi sirikevu, amita embere evu tambu ai’.” Ke ainge peroveta na kajena.
MAR 1:4 Eto John bapataito ari embo na ojagatambu ta mihie God na embomeni ta ari sasapura hotembeto toaja tunga hapereketo ari sasapura toari amite bapataito ari amite oje kahena.
MAR 1:5 Eto enda Judea jo ta da nei te nei te embomeni te eto da Jerusalem embomeni te aingeto John ta degi pambuto enana ta ari sasapura toasi harikihore John na ingihe umo Jordan ta bapataito ere uahija.
MAR 1:6 Eto John ta bo amo o ‘Camel’ ta hamo hu avo asuketo pupuri amo o hoga na ari avo tigito amita indari amo o boruga te iruha te ere indiahija.
MAR 1:7 Eto ke amo einge hande ere uahija, “Eto nau ambota embo, na eingeko mane, sovera te puvuto ere hua amo na amita utu goru houkari haite aera.
MAR 1:8 Na ungo umo na bapataito ere ovona te Embo Dombo amina ungo Ahihi Otohu na bapataito aisuja.” Ke ainge John na hande ena.
MAR 1:9 Eto iji amikote Iesu na Galilee da javo Nazareth ta eto puvunu John na Iesu umo Jordan ta bapataito ena.
MAR 1:10 Eto Iesu umo ta eto erihinu uhu pe hirikenu Ahihi Otohu di dipo ainge uhu ta eto veto amita degi ta puvunu
MAR 1:11 uhu ta eto ke einge puvuna “Umo osa ari Meni nau, na umo kogue tunga javotoho ere ona.” Eto ke ainge enu irae enu.
MAR 1:12 God ta Ahihi na Iesu ojagatambu ta
MAR 1:13 Satan na engeka aja enu pambuto iji 40 mume 40 ai mihina. Eto ojaga tambu ai ahoe di o ga mihinu God ta Anera na simba ea.
MAR 1:14 Eto John avo humbuto tipura ta ikeo mihinu Iesu na enda Galilee ta pambuto God ta ke javotoho hande ue
MAR 1:15 ke einge ena “God na embomeni amita toho siriketo humbuto tihi jigesuja amita iji puvuto erehua avoeto tunga hapereketo ari sasapura toto God ta ke javotoho humota evujo.”
MAR 1:16 eto ke ainge hande ue umo ireremba Galilee hora ta pahue o parari embo heriso Simon te amita namei Andrew te o bonga gosukihe uo
MAR 1:17 Iesu na hambuto ke einge ena, “ungo na ambo ambo ue havu. Ungo o timbagova aingeto nane ano embo timbasova” ainge enu
MAR 1:18 o humbari bonga toto Iesu ambo ambo ea.
MAR 1:19 Eto degi isapa imihe Iesu na embo Zebedee ta meni heriso James te John te avo e nga ta arumbeto bonga perarari avo ihirihie mihio
MAR 1:20 kito jage enu embo heriso na mamo pure embo ga e nga ta mihina avo toto Iesu ambo ambo ea.
MAR 1:21 Eto enana da Capernaum ta pahuo jangu indari iji puvunu Iesu na Judea embomeni ta ke kasari bande ta horeto embomeni ahe poekena.
MAR 1:22 Eto enana na amita ahe poekari ke avo ingito ke amo enana ta ke kajari embopo ainge mane ra te amo kiari embo na eria ainge eto haha puha ea.
MAR 1:23 Eto Iesu ke ijie mihinu embo ahihi sapura na jo ta horari amina gagaha eto ke einge ena
MAR 1:24 “Iesu Nazareth embo umo dagota degi do asi puve? Umo ivohana eto dago irae ara puvea. Eto umo amunure na kiarira. Umo God ta Meni Otohura.” ainge enu
MAR 1:25 Iesu na ke ngahia eto einge ena “Ke ambu eto embo ta jo ta eto puvuto pambu.” ainge enu
MAR 1:26 ahihi sapura na enu embo amo veto tihi te pe te haro haro gatari gatari enu gagaha ijie tambuta puvuto pambuna.
MAR 1:27 Vasiri avo embomeni na kito vani vini eto ke mine ara eto einge ea “ari emo ari eha retemo deire? Amita kiari na ke eoi ahihi sasapura te tapa amita ke agi eagora” ainge ea.
MAR 1:28 Eto Iesu na Judea embomeni ta ke kasari bande toto pahunu ari do ena amita duru na Galilee enda enetena.
MAR 1:29 Eto Iesu te James te John te aingeto Simon te Andrew te ta bande ta horeto
MAR 1:30 Simon ta umbohi avo ambure ue hoga vevere te tapa hereketo mihinu amita ke avo Iesu ta degi enu ingito pambuto
MAR 1:31 ingeni ta jiginu erihinu amita hoga vevere jamo enu embo indari unduna.
MAR 1:32 Eto mume sihukihinu da embomeni tapa na ambure embomeni te ahihi sasapura na horari embomeni te aingeto humbuto Iesu na kokojekaja puvuto
MAR 1:33 bande pe ta areo Iesu na ambure nei te nei te kokojikihe ahihi sasapura ohimbena.
MAR 1:34 Eto ahihi sasapura na Iesu mahu kiari avoeto enu ke ambupu ea.
MAR 1:35 Eto iho unga haunkihinu Iesu ereto pambuto embo irae degi ta oenga pari ue mihinu
MAR 1:36 Simon te embo nei uhoho te Iesu pambuna avo hain ta eheheto pambuto
MAR 1:37 Iesu hambuto ke einge ea, “Embo tapa umo jombure ere ora” ainge eo
MAR 1:38 Iesu na einge ena, “Ungotena da nei nei ta pambuto ke hande aisona, avoeto na da toto puvena.” ainge enu
MAR 1:39 Galilee da tapa ta isa ue Judea embomeni ta ke kasari bande ta ke hande ue ahihi sasapura embo ta jo ta horari avo ohimbena.
MAR 1:40 Eto embo vahai ambure na hamo sapura ari amina Iesu ta degi puvuto paunge teteri eto penunu ijie einge ena. “Umo asi uje eto kito na e kojane.” ke ainge enu
MAR 1:41 Iesu na ingito jo enu, ingeni jujuruketo hame ue “Na aisona, eto umo javotoho e.” ainge enu
MAR 1:42 embo ta ambure irae enu javotoho ena.
MAR 1:43 Eto Iesu na ke vasiri na embo ta degi einge ena, “Ari erevi embo ta degi mane ao ingesora te pambuto priest ta degi ejo no hamo kiore, eto Moses ta ke pepeni agi ue no hamo ta mine avo hande ikejo embo tapa kito no ambure irae avo kogue ke be are.” ke ainge eto enu pambuna.
MAR 1:45 Rate embo amina ke ingito ingarako ue pambuto ke hande enu da tapa ingia avoeto Iesu da ta horari inono ae enu da sahu ta mihinu enda embomeni tapa amita degi puvua.
MAR 2:1 Eto iji heriso amita ambota da Capernaum ta pambuto mihinu embomeni na duru ingito puvuto
MAR 2:2 amita irari bande jo ta horeto enete eo embo nei horari inono ae enu Iesu na God ta ke embo ta degi hande ena.
MAR 2:3 Eto embo vahai ingeni te utu te meni pehari avo embo nei heriso nei heriso na gaga eto humbuto puvuto
MAR 2:4 embo isapamane avoeto horeto Iesu kiari inono ae enu bande ene perara eto popora embo amo gaga ga tapa otoho ta ikeo vena.
MAR 2:5 Eto Iesu na enana ta humota ari kito popora embo ta degi “Nau meni no ari sasapura avo hotembeto ere toruhona” ainge ena.
MAR 2:6 Eto God ta ke pepeni ahe poekari embopo na Iesu ta ke ingito jo ta hotembari ke na einge ea
MAR 2:7 “Embo emo do eto ke einge erei? God vahai amina embo ta ari sasapura hotembeto toaguja te embo emina God ta javo ere urumbihia.” ainge hotembiho
MAR 2:8 Iesu na kito “ungo do eto ke amo ere hotembiheve.
MAR 2:9 Eto na popora embo ta degi ‘no ari sasapura hotembeto ere toruhona’ ke ainge asona ano ‘ereto no evari gaga humbuto pambu’ ainge asona amo davo ejeha re davo ngaiha re?
MAR 2:10 Eto Embo ta Meni na sovera ari humbuto enda ta mihie embo ta ari sasapura hotembeto toasuja avo ungo ke be ava ari erevi asona” ainge eto popora embo ta degi
MAR 2:11 “no gaga humbuto
MAR 2:12 ereto no da ta pambu” ainge enu ereto amita gaga humbuto enana ta tombu ta koguo pahunu, embomeni na kito vani vini ue God jakeka ijie ke einge ea “Ari emo mahu einge kiae pekota ere kogora.” ainge ea.
MAR 2:13 Eto Iesu na bande toto tambuta puvuto umo ireremba hora ta mihinu embo isapamane amita degi puvuo ahe poekena.
MAR 2:14 Eto ahe poekenu irae enu isa pahue Alphaeus ta meni Levi tax humbari gaga ta arumbeto mihinu kito “na ambo ambo e” ainge enu ereto Iesu ta ambota pambuna.
MAR 2:15 Eto Iesu te amita ambotani te na pambuto Levi ta bande ta indio tax humbari embomeni te ari sasapura embomeni na Iesu ambo ambo ea avoeto enana ga tapa Iesu ta bande ta arumbea.
MAR 2:16 Ari avo Pharisee embomeni ta ke pepeni simba ari embopo na kito Iesu ta ambotani ta degi ke einge ea “Iesu do eto ari sasapura embopo te tax humbari embopo te aingeto ere indei?” ainge ijio
MAR 2:17 Iesu na ingito ke mine einge ena, “Embo javotoho amo sivo ta mane pambuora te ambure embopo na sivo ta pambuora, avoeto na embo javotoho avoembo puvurae rate embo sapura avoeto puvena.”
MAR 2:18 Eto iji otohu puvunu John bapataito ari embo ta ambotani te Pharisee embomeni te aingeto indari ajirekeo embomeni na Iesu ta degi puvuto ke einge ea “Do eto John ta ambotani te Pharisee embomeni te aingeto indari ajirekehera te ambotani no mo do eto indari ajirekaere?” Ainge eo
MAR 2:19 Iesu na ke mine einge ena, “Jimbari ta pondo avo ajirekari irae.
MAR 2:20 Rate iji puvuresuja amo jimbari embo jigito goruketo humbuto pambasora iji amikote ajirekasora.
MAR 2:21 Eto bo mahu perarari avo bo eha na tiuketo ihirasuja amo egau umba kaumba eto tohekau ho ehako peni aisuja avoeto ari ainge amo mane eagora.
MAR 2:22 Eto embo na o hoga umo higi iteko ari mahu ai ta wine eha overekasora amo wine na horo vivihe pajito o hoga amo perarasuja eto wine te o hoga te tapa irae aisuja te o hoga eha ta wine overekasora amo mane perarasuja.”
MAR 2:23 Eto jangu indari iji puvunu Iesu te amita ambotani te embo ta pure degi ta pahue Iesu ta ambotani na ‘wheat’ be avo indesi jigito juketo umbuo
MAR 2:24 Pharisee embomeni na kito Iesu ta degi ke einge ea “Kijo, do eto no ambotani na jangu indari iji te ke pepeni poekihe pure einge emo mo ere ore?” ainge eo
MAR 2:25 Iesu na ke mine einge ena “Eto David te amita embomeni te na beuje kito ari do ea amita ke amo ungo eheketo kiaerete?
MAR 2:26 Eto amina Priest Abiathar ta iji te God ta bande otohu ta horeto bread mahu God ta tihi ta hande ikari amo priest na pere jigama eagora avo David na horeto bread avo humbuto indie amita embomeni ta hande enu india,
MAR 2:27 eto ungota degi erena, God na jangu indari iji avoeto embo ove ae rate embo ta ujeje avoeto jangu indari iji ikena.
MAR 2:28 Eto Embo ta Meni amo jangu indari iji amita simba ari embo dombo ra.”
MAR 3:1 Eto Iesu na Judea embomeni ta ke kasari bande ai horeto embo ingeni meni pehari ai mihina ano kina.
MAR 3:2 Eto jangu indari iji te embo avo Iesu na au kojasuja avo Iesu uje ae embomeni na pehumba asi kon kon uo,
MAR 3:3 Iesu na embo ingeni meni pehari amita degi “Einge huma embo ta tihi ta hete” ainge enu ereto puvunu
MAR 3:4 embomeni ta degi ke einge eto ingina “jangu indari iji te embo na God ta ke pepeni agi ue embo ta degi sapura autemo javotoho au? Eto nei amo embo au kojaute mo tau pehau?” ainge enu embomeni na ke mine ae ke ambupu eo.
MAR 3:5 Iesu na jireki poeki eto embomeni kina amo embo nei jo ari embo mane avo kogue tumo ue osaga kito embo ingeni meni pehari amita degi “no ingeni jujuruke” enu jujurukenu ingeni javotoho ena.
MAR 3:6 Avo Pharisee embomeni na kito arahata pambuto Herod ta ke ambo ambo ari embomeni ga vahaita eto Iesu daingeto humbuto taro pehasuja amita ke avo kasea.
MAR 3:7 Eto Iesu te amita ambotani te aingeto umo ireremba javo Galilee hora ta pahuo Galilee embo isapamane Iesu ambo ambo ue pahuo Judea embo te
MAR 3:8 da Jerusalem embo te da Idumea embo te umo Jordan oiho ta da embomeni te da Tyre te Sidon te ta embomeni te aingeto Iesu na ari tapa do ena amita duru ingito Iesu ta degi puvua.
MAR 3:9 Eto Iesu na embo isapamane enu kokojekea avoeto ambure embomeni na Iesu hame asi joeketo vahaike vahaike uo Iesu na ambotani ta degi e nga nununga ara ke ena.
MAR 3:11 Eto ahihi sasapura na Iesu kito Iesu ta utu ta vurereketo vovue gagaha ijie ke einge ea “Umo God ta meni be ra” ainge ijio
MAR 3:12 Iesu na ke ngahia na eto ke avo mane hande ara ena.
MAR 3:13 Eto Iesu na tiri ta vihito embo mahu sirikena avo puvurora jage enu puvuo
MAR 3:14 embo tapa 12 siriketo amiga pure asi humbuto apostero ikena amina ke hande ue
MAR 3:15 sovera humbuto ahihi sasapura ohimbara.
MAR 3:16 Eto embo 12 umbuna amo embo Simon amo Iesu na javo eha ikena amo Peter ikena,
MAR 3:17 eto Zebedee ta meni James te amita eambo John te enana ta ke hajire amo uhu pipiri ta hajire ainge avoeto Iesu na enana ta javo Pipiri ta meniundi ke ena.
MAR 3:18 Eto nei Andrew te Philip te Bartholomew te Matthew te Thomas te Alphaeus ta meni James amite embo nei Thaddaeus te Canaan embo Simon te
MAR 3:19 Judas Iscariot amo isoro embo ta ingeni ta ikari embo amite aingeto Iesu na siriketo humbuto amita da ta pambuna.
MAR 3:20 Eto Iesu da ta pahunu embomeni isapamane horukeo pure peni vahai enu Iesu te amita pure embopo te aingeto indari indae ea.
MAR 3:21 Eto Iesu ta jekahoka na Iesu do ena ke avo ingito uha sapura ari ke ijie humbuto haekasi puvua.
MAR 3:22 Eto Judea embomeni ta ke kakajekari embopo na da Jerusalem ta eto puvuto embomeni ta degi ke einge ea. “Ahihi sasapura ta okose javo Beelzebul na Iesu ta jo ta horeto sovera ikihioi ahihi sasapura ere ohimbihia,” ainge ijio
MAR 3:23 Iesu na ingito timu hatirari ke na enana ta degi ke einge ena. “Daingeto Satan na Satan ohimbaja ereve?
MAR 3:24 Eto enda vahai na kaheketo oenga oenga heteto isoro aisuja amo enda amina mane hetasuja.
MAR 3:25 Eto bande vahai embomeni na ereto mine tara asora amo bande amo mane iresuja.
MAR 3:26 Eto Satan na ereto ahihi sasapura ga isoro aisuja amo Satan ta sovera irae aisuja.
MAR 3:27 Eto embo na vuvure embo ta donda pegene aisi uje aisuja amo kihi vuvure embo andito pundurou donda amo humbasuja.
MAR 3:28 Na ungota degi ke be erena embomeni na God ta degi ari sasapura eto urumbagora amo hotembeto toari inono ra
MAR 3:29 te embo amuna Ahihi Otohu urumbasuja amo mane irae aisuja eto hotembeto toari inono aera.”
MAR 3:30 ke ainge ena amita be amo Iesu ta jo ta ahihi sapura na horari ke ea avoeto.
MAR 3:31 Eto Iesu ta e te namei kamei te aingeto puvuto bande pe ta heteto ke ikeo
MAR 3:32 embomeni Iesu ga bande jo ta mihia amina “no aja te namei kamei te puvuto arahata mihie umo uje ere ora” ainge eo
MAR 3:33 Iesu na ke mine einge ena. “Nau aja te namei kamei te amo amunure?”
MAR 3:34 eto Iesu na embomeni tapa bande jo ta mihia avo poeto kito ke einge ena “Nau namei kamei te aja te amo erevira.
MAR 3:35 Embo amuna God ta ke agi aisuja amo nau aja te namei kamei te du emone te ra.” ke ainge Iesu na ena.
MAR 4:1 Eto Iesu embo ahe poekasi umo ireremba hora ta pambuto mihinu, embomeni isapamane puvuto eneteo Iesu heteto ke aisuja inono ae enu e nga ta vihito umo jo ta isapa imihe heteto embomeni tapa hora ta mihia avo
MAR 4:2 timu hatirari ke neite neite na einge ena
MAR 4:3 “Ingivujo, ve urari embo na pure ta pambuto ve ihajara enu
MAR 4:4 ve nei amo degi ta venu di na veto india,
MAR 4:5 ve nei amo enda ngijiri ta veto erena te enda peni mane avoeto susu be terae
MAR 4:6 avoeto iji na giroro eto jaise ena.
MAR 4:7 Eto ve nei amo vive ta orohuta vena avoeto vive na andinu ve ae ena.
MAR 4:8 Eto ve nei amo enda javotoho ta veto ereto ve nei 30 nei 60 nei 100 ainge ve ikena.
MAR 4:9 Eto embo amuna ungota oje mihirou kito ke erevi ingivujo,” ke ainge Iesu na ena.
MAR 4:10 Eto Iesu pambuto oenga mihinu amita ambotani te ambotani nei uhoho te aingeto timu hatirari ke ta be avo Iesu ta degi eto ingio
MAR 4:11 Iesu na ambotani ta degi ke einge ena “Eto God na embo amita toho siriketo humbuto tihi jigesuja amita ke be amo ungota degi ikari rate embo tapa arahata mihera amita degi amo na ke timu hatirari na pere eagona.
MAR 4:12 Amita be amo Peroveta Isaiah na einge kajena ‘enana kito kiaesira ingito ingaesira eagora te ingito kito enana ta jo haperekau amo God na enana ta sapura hotembeto toaehija.’ ainge Isaiah na kajena.”
MAR 4:13 Eto Iesu na ke nei einge ena “Na ke timu hatirari na ehena amo ungo ingae rete? Na timu hatirari ke neite neite aisona amo ungo daingeto ingovo?
MAR 4:14 Eto ve urari embo amo God ta ke ere urihia.
MAR 4:15 Eto ve nei degi tambuta veaguja amo embo na God ta ke avo ingesuja rate ke jo ta urari avo Satan na puvuto egimbeto humbaguja.
MAR 4:16 Eto ve nei enda ngijiri ta urari amita ke be amo erevira. God ta ke avo embo na ingito tunga javotoho aisuja te
MAR 4:17 ke avo jo ta mane be veto pesisa eto susu kambasuja eto teho mihirou embo nei na amita degi God ta ke jigama ari ke eto ngahia au toau irae aisuja.
MAR 4:18 Eto ve nei vive ta jo ta veari amita ke be amo erevira. Embo na God ta ke uje eaguja
MAR 4:19 te enda ta ari te ujeje neite neite amite eto amita haja vaja amina God ta ke amo andioi ve mane eaguja.
MAR 4:20 Rate ve nei enda javotoho ta veto eraguja amita ke be amo erevira. Embo na God ta ke avo ingito, God humota ue eto God ke be eaguja amo ve nei 30 nei 60 nei 100 aingeko eaguja.”
MAR 4:21 Eto Iesu na enana ta degi ke nei einge ena, “Eto embo na kerivo ijimbeto humbuto mane gaga suvu ta ikasuja eto ovu jo ta mane ikasuja te i araha ta tembau bande jo usasa aisuja.
MAR 4:22 Eto ke tapa ojikari avo humbuto araha ta puvuto ahurekari avo hirikaro keisora.
MAR 4:23 Eto embo ta oje mihirou kito avo ingesora.”
MAR 4:24 Eto Iesu na ke nei einge ena, “ungo ke do ere ingiheva avo oje jevito ingivujo, eto umo doinge ikasoa avo God ta kiari inono ta humbuto nei hamo ta humbasoa.
MAR 4:25 Amita be amo embo amuta degi kiari javotoho mihirou kito amo God na kiari nei ikasuja rate embo ta degi God ta ke kiari irae kito God na embo amita degi kiari do mihia avo God na humbau iraesuja.”
MAR 4:26 Eto Iesu na ke einge ena, “God na embo amita toho siriketo humbuto tihi jigesuja amita ke be amo eingera. Embo amuna ji ve ureto
MAR 4:27 toto pambuto evosa ururou amo oenga ope vihito pajiresuja amo embo kiae pajiresuja
MAR 4:28 amo enda na simba ururou pajito hatu kaheto ve aisuja.
MAR 4:29 Eto ve sari au urari embo na egerembeto puvuto tiuketo humbasuja.”
MAR 4:30 Eto Iesu na ke nei amo einge ena, “God na embo amita toho siriketo humbuto tihi jigesuja amo do aingekore? Eto timu hatirari ke daingeto ke be mo harikaro?
MAR 4:31 Eto ji javo ‘mustard’ ta ve amo isapa be ji nei nei ta ve aingeko mane.
MAR 4:32 Rate ‘mustard’ ta ve vahai enda ta urasora amo pajito hatu kaheto peni vahai au di na puvuto nga iketo ai uhumo ta iresora.”
MAR 4:33 eto God ta ke amo timu hatirari na ke nei te nei te enu ingia.
MAR 4:34 Eto embomeni ta degi ke tapa amo timu hatirari ke na pere ena te amita ambotani ta degi amo ke be na pere harikena.
MAR 4:35 Eto iji aramite mume sihukihinu Iesu na amita ambotani ta degi einge ena “ungote umo oiho ta pambasira.” ainge eto
MAR 4:36 embomeni toto amita ambotani ga e nga ta pahuo e nga nei uhoho amo Iesu ta e nga ga tapa pambua.
MAR 4:37 Eto pahuo pisara peni vahai be unu umo piri peni be puvuto e nga ta torue umo na ihiketo pe vihinu
MAR 4:38 ambotani joru ue Iesu e nga avo gaga ta evinu ujeto einge ea “Ahe poekari embo, dago sari asi ere ora emo umo hotembae ere oete?” Ainge eo
MAR 4:39 Iesu ereto pisara te umo te “jamo evu” ainge ke vasiri na enu pisara irae unu umo visi visi ena.
MAR 4:40 Eto Iesu na amita ambotani ta degi ke einge ena, “Ungo do eto joru ere ove. Eto ungo, na humota ae re?” ainge enu
MAR 4:41 embomeni na Iesu ta ari avo kito joru ue vani vini eto ke mine ara eto einge ea “Embo emo amunure? Pisara te umo te embo emita ke agi eto jamo ehera.”
MAR 5:1 Eto umo ireremba oiho ta pambuto enda javo Gerasenes ta puvuto
MAR 5:2 Iesu e nga toto enda ta veto embo vahai ahihi sapura na jo ta horari
MAR 5:3 amo embo ikeore sari ere uahera panga ho ai mihahija avo puvuto hambuna. Eto embo amo embomeni na andito chain na ingeni te utu te pundua
MAR 5:4 te embo ivo peni vahai avoeto chain na pundua amo tahuekenu andirari inono ae enu
MAR 5:5 tiri hamo ta eto use jo ta iji tapa isa ue karu humbuto hamo gajukihie hori gagaha ijie ere uahija.
MAR 5:6 Avo Iesu pahunu hoi ta kito huheveto pambuto Iesu humotepain enu
MAR 5:7 Iesu na ahihi sapura ta degi “Embo ta jo avo toto puvuto pambu” ainge enu embo na gagaha ijie ke einge ena, “Iesu, God sovera isapa mane te ta Meni, nau degi ta do ao. Na God ta javo ta penunu erena nau degi ta memenga ikaojo.” ke ainge enu
MAR 5:9 Iesu na “no javo deire” ainge enu embo amina, “Dago isapamane avoeto nau javo ‘Legion’ ra” ainge
MAR 5:10 eto Iesu na ohimbeoi enda nei ta pambagona penunu eto
MAR 5:11 o ohu isapamane heti oiho ta indie mihio kito
MAR 5:12 ke einge penunu eto ea “Dago o ohu ta jo ta ohimbejo toruere” eto ainge eo
MAR 5:13 Iesu na “aravora ainge aisona” eto ohimbenu ahihi sasapura na tambuta puvuto pambuto o ta jo ta horeo o tapa 2,000 ainge umo ta kekehunaeto veto umo indito pepehekeo,
MAR 5:14 o simba ari embopo na huheveto ke hande ue pambuto da ta puvuo embo tapa kesi
MAR 5:15 Iesu ta degi puvuto embo ahihi isapamane na horari rate bo asukari te uha javotoho te avo mihinu kito joru ea.
MAR 5:16 Eto embo Iesu na ahihi sasapura ta degi eto o ohu ta degi do ena tapa avo embo mahu kia amina embo ehaha kiae amita degi hihi tirio
MAR 5:17 ingito pambuto Iesu enana ta enda avo toto pambaja ke ngahia na eo
MAR 5:18 Iesu pambasi e nga ta vivihinu embo mahu ahihi sasapura na horari amina Iesu ga pambasi penunu enu
MAR 5:19 Iesu na “Namoga mane pambasoate Bada na umo kito jo ehei no degi ta tapa do ehija avo no da ta pambuto no namei kamei ta ejo ingore.” ainge enu
MAR 5:20 amina amita da tapa ten ai ta pambuto embomeni ta degi Iesu na do enu kina tapa avo hihi tirinu embomeni ingito vani vini ea.
MAR 5:21 Eto Iesu e nga ta vihito umo oiho ta pambuto hora ta veto mihinu embo isapamane Iesu kesi puvua.
MAR 5:22 Eto Judea ta ke kasari bande ta tihi jigari embo vahai javo Jairus amina puvuto Iesu ta utu ta veto paunge teteri eto humotepain ue
MAR 5:23 penunu einge ena “Huma nau kakara isapa avo pehasi ere ua inena no ingeni avo hamo ta tembejo kojai” ainge enu
MAR 5:24 Iesu ingito Jairus ga pahunu embo isapamane Iesu ga oroviketo pahuo
MAR 5:25 evohu vahai amo jua tapa 12 amita jo ta orosa vovuoi
MAR 5:26 sivo embopo ta degi pahue koro na sivo jigama ere uahija koro irae enu amita kojari avora ae eto sapura be ue mihinu
MAR 5:27 Iesu na ari tapa do ena avo duru ingito embo kaheketo Iesu kiae ku ta puvuto Iesu ta bo hame ue
MAR 5:28 ke einge hotembena, “Na amita bo hame eto kojasona,” ainge hotembihe
MAR 5:29 hame enu orosa irae enu amita hamo tapa javotoho ena.
MAR 5:30 Eto Iesu na amita sovera isapa veto pambuna avo kito overeketo embomeni poeto kogue ke einge ena. “Nau bo ta amuna hame ehei?” ainge enu
MAR 5:31 ambotani na “embo isapamane vahaike vahaike ere ora te embo amuna umo hame ore ere?” ainge eo
MAR 5:32 Iesu na hame ena embo avo kesi jombure unu
MAR 5:33 evohu kojena amina gatari gatari ue joru te tapa puvuto Iesu ta utu ta veto gombuto ke tapa Iesu ta degi harikenu
MAR 5:34 Iesu na ke mine einge ena “Nau iae no humota ari na eto kojehea. Tunga jamo jamo te pambuto javotoho na irijo.”
MAR 5:35 Eto Iesu ke ainge ijie mihinu embo na Jairus ta bande ta eto puvuto Jairus ta degi ke einge ea “No iae mahu pehehija avoeto ahe poekari embo mane jigesoa te tojo pambai,” ainge ijio
MAR 5:36 Iesu ingina rate ingito ingarako ue eto ke kasari bande tihi jigari embo ta degi, “Umo osaga mane kesoa te na humota ejo,” ainge eto embo tapa enu mihio
MAR 5:37 Peter te James te amita namei John te aingeto amiga pambara enu
MAR 5:38 pambuto Jairus ta bande ta horeto embomeni jo ta sisi sasi ijie mihio
MAR 5:39 enana ta degi “Ungo do eto sisi sasi ijie miheve? Kakara emo pehae teho evo ere ua,” ke ainge enu
MAR 5:40 embomeni ingito ganini ijio enu arahata pahuo e te mamo te eto embo Iesu ga puvua amite aingeto kakara mihina ai horeto
MAR 5:41 ingeni ta jigito “Talitha cumi” ke ainge ena amita be amo “Kakara isapa no degi ta erena, ere.” ainge enu
MAR 5:42 kakara ereto isa ena. Eto kakara amita pajirari jua amo tapa 12 ra. Eto kakara avo kojenu embomeni kito ti kakambukea.
MAR 5:43 Eto Iesu na kakara kojena avo duru hande eagora haeketo “indari humbuto kakara ta ikevu indoi” ainge enu indari ikeo indina.
MAR 6:1 Eto Iesu na enda avo toto tohota da ta ereto pahunu amita ambotani na ereto avo ambo ambo ue pahuo
MAR 6:2 jangu indari iji puvunu Judea embomeni ta ke kasari bande ta horeto embomeni oje kahihinu embomeni na ingito vani vini eto ke einge ea “Embo emita kiari dainge humbuto ke te ari te emomo ere oi?
MAR 6:3 Embo emita mamo amo teho bande gerikari embo ra eto amita e Mary te namei kamei James te Joses te Judas te Simon te amita du emone te tapa ei mihera. Amo dago amita da vahai embora.” ke ainge ijie ke ingari uje ae ea
MAR 6:4 avoeto Iesu na enana ta degi ke einge ena “God ta ke hande ari embo amo embo tapa na jakeka eagora te amita enda vahai embomeni eto jeka hoka vahai na ke embo teho ari ke ijie ke ingae eagora.” ainge
MAR 6:5 eto Iesu na amita da ta pure peni ae rate embo heriso avo enu kojea.
MAR 6:6 Eto Iesu ta namei kamei da vahai embomeni na Iesu ta ari tapa do ena avo humota ae uo Iesu osaga kito da nei ta pahue embo ahe poekena.
MAR 6:7 eto Iesu na amita ambotani 12 jage enu puvuo ahihi sasapura ohimbara sovera ari ikenu umbuo embo heriso heriso ainge hande au pambara
MAR 6:8 oje kahihe ke einge ena “Ungo donda nei ehi te bread te eto koro pupuri ta mane huvakasoa te hetu vahai avo jigito pambuvujo.
MAR 6:9 Eto utu goru avo asukasova te bo heriso mane asukasova te vahai asuketo pambuvujo.
MAR 6:10 Eto pambuto da ta puvuto amo bande nei ta nei ta mane evesova te bande vahai ta evie pure avo irae au da nei ta pambuvujo.
MAR 6:11 Eto da damina ungo kito pekari uje ae eto ungota ke ingari uje ae aro kito amo God na enana ta degi tumo ere ua avoeto ungota utu oniho avo torovikevujo veau embomeni tapa koguroro toto pambuvujo.” ainge ijie oje kahenu irae enu
MAR 6:12 ikenu pambuto embomeni ta ari sasapura avo toto jo aherekau God ta ke agi ara oje kahihe
MAR 6:13 ahihi sasapura embo ta jo ta horari avo ohimbeo puvuto pahuo ambure embomeni avo ‘oil’ na overeketo hamo ta kuhiho kokonjekea.
MAR 6:14 Eto Iesu ta javo peni vahai enu amita duru avo Israel ta Gavana okose javo Herod na ingina. Eto embo nei uhoho na Iesu kiae avoeto ke einge ea, “John bapataito ari embo avo God na ehei vasiri te ereto Iesu na amita sovera na pure erevi ere ua” ainge ijio
MAR 6:15 embo nei na “Amo peroveta Elijah na ere ua.” ainge ijio embo nei na “ungotenau peroveta mahu ta ari vahai avo ere ua.” ke ainge ea
MAR 6:16 eto Herod na Iesu ta duru ingito ke einge ena “Nane ehene tunga tiukihera amina vasiri te erihija” ainge ere ijiahija.
MAR 6:17 Eto Herod na John ta tunga tiukena amita ke amo erevira. Eto Herod na amita eambo ta ae javo Herodias avo pegene jimbunu John bapataito ari embo na kito Herod ta degi ke einge ena, “Umo God ta ke peni poeketo no eambo ta ae jimbea” ainge enu evohu herodias na ke avo ingito tumo eto John tau pehaja ke ena. Rate John amo embo javotoho eto embo otohu avo Herod na kito John ta ke ijioi ingihe tunga osaga ere koguahija rate Herodias na teoi pehaguja joru eto John andito punduto tipura ta gosukenu mihinu Herodias na tasuja avo inono ae ena.
MAR 6:21 Rate iji vahai Herod ta humbari iji puvunu amina gavana ta okokose te isoro embopo te enda ta embo pepeni te aingeto oru enu puvuo pondo peni vahai
MAR 6:22 unu Herodias ta iae na puvuto ja javotoho tivihinu Herod na embo tapa ta tihi ta kakara ta degi ke einge ena “Umo do humbasi uje eto kito ejo ingito ikane, eto na enda simba ari embora umo uje ao kito kaheketo huna no ikasona,” ainge ke isara na enu
MAR 6:24 kakara amo ingito arahata pambuto e ta degi “na do umbano?” ainge enu e na “pambuto ejo John bapataito ari embo ta siro avo tiukaro umbujo” ainge enu
MAR 6:25 kakara na pambuto Herod ta degi “na John bapataito ari embo ta siro avo tiuketo heva ta iketo ikao umbasona,” ainge enu
MAR 6:26 Herod na osaga peni vahai kito embo ta tihi ta ke vasiri na ena avoeto toari inono ae enu kakara ta ke agi eto
MAR 6:27 tipura simba ari embo vahai ikenu pambuto John tipura ta mihinu tunga tiuketo
MAR 6:28 siro heva ta iketo humbuto puvuto kakara ta ikenu humbuto pambuto e ta ikena.
MAR 6:29 Eto John ta ambotani na ke avo ingito puvuto John ta hamo humbuto pambuto kovea.
MAR 6:30 Eto Iesu na ambotani heriso heriso hande enu pambua avo ehako egerembeto puvuto pure do ea avo Iesu ta degi eo ingina.
MAR 6:31 Eto embo isapamane purahango parahango ere ora avoeto arumbeto indari inono ae avoeto Iesu na kito ambotani ta degi ke einge ena, “ungote pambuto ojagatambu ai ta embo irae degi jangu indesira havu,” Ainge enu e nga ta vihito pahuo
MAR 6:33 embomeni na enana ere pahua avo kito da nei ta nei ta amina utu na huheveto pambuto Iesu ere puvutuhuna degi ai seriketo puvuto mihio
MAR 6:34 Iesu hora ta puvuto veto embomeni isapamane o sheep ta simba ari embo irae iteko kito jo enu ihiketo ke ahe poekihinu
MAR 6:35 pambuto hure vovunu amita ambotani na puvuto Iesu ta degi ke einge ea “degi emo da te embo te irae avoeto iji irae ere ua, ejo embomeni egerembeto da ta pambuto indari koro na ombuto humbuto indore.” ainge enu
MAR 6:37 Iesu na einge ena, “Ungo na indari ikevu indore” ainge enu ambotani na “Dago 200 kina na donda humbuto embo undurorote? Eto 200 kina hambuto embo unduraehera amo mane inono aehija.” ainge eo
MAR 6:38 Iesu na “Ungota degi bread tapa doinge mihei pambuto kivu” ainge enu pambuto kito puvuto Iesu ta degi “bread tapa 5 eto umo o heriso ainge mihia” ainge eo
MAR 6:39 Iesu na ingito enu embomeni tapa kaheketo 100 oenga 50 oenga ainge eto eo samara ta arumbeo
MAR 6:41 Iesu na bread 5 eto umo o heriso amite aingeto humbuto tihi i ta eto jigito God peketo bread jigito pereto embomeni ta ikaro indora ambotani ta degi ikenu
MAR 6:42 embo ta ikeo indio hini pevihinu
MAR 6:43 ambotani na bread sirivo te umo o heriso amita sirivo te ainge eto sirikeo handija tapa 12 amo pevihina.
MAR 6:44 Eto embo tapa 5,000 eto airi te meni undi te tapa amina india.
MAR 6:45 Eto Iesu na amita ambotani da Bethsaida ta kihi pambara enu e nga ta vihito pahuo embomeni tapa avo enu sisiketo pahuo
MAR 6:46 Iesu tiri ta pari asi vihina.
MAR 6:47 Eto mume sihukihinu pisara pambari hena ta puvuna avoeto ambotani e nga tavihe ere pahua
MAR 6:48 te e nga ivo eto pambae unu Iesu tiri ta oenga mihie ambotani do ere ora avo kina. Eto iho serege vihito hunu kito Iesu umo hamo ta haito puvuto ere humihe e nga serikasi unu
MAR 6:49 ambotani na Iesu umo hamo ta haito ere puvutuhuna avo kito joru ue embahe ke ijie jajavone ijio
MAR 6:50 Iesu na kito ke einge ena “Joru mane aisova te ivo evu. Namora.” Ke ainge
MAR 6:51 eto e nga ta vihinu pisara jamo enu ambotani kito ti kakambuketo haha puha ea.
MAR 6:52 Amita be amo enana ta hotembari ngahia eto Iesu na embo isapamane bread na unduna amite tapa amo enana be hotembae ea.
MAR 6:53 Eto Iesu te amita ambotani te aingeto e nga ta puvuto umo oiho enda javo Gennesaret ta puvuto
MAR 6:54 hora ta beo embo amunure avo embomeni na kito
MAR 6:55 huheveto pambuto embomeni eo ingito ambure embomeni gaga ta ikeo arumbeo humbuto Iesu ta degi puvua.
MAR 6:56 Eto Iesu na isa da peni ta rete da isapa ta rete degi ta rete market ari degi ta rete pambasuja amo embomeni na ambure embomeni humbuto puvutuhore ere kokojekihahija eto nei amo embo na Iesu ta bo hame ue kokojekea.
MAR 7:1 Eto Judea embomeni ta ke pepeni ahe poekari embopo da Jerusalem ta eto puvuto Pharisee embomeni ga vahaita eto Iesu ta degi puvua.
MAR 7:2 Eto Iesu ta ambotani na Judea embo ta ke pepeni amo ungo ingari rate ingito ingarako ue ingeni tongopa te tapa indari indio embomeni puvua amina kito ujeae ea.
MAR 7:3 (amita be amo Judea ta Pharisee ari embomeni te Judea embomeni tapa te aingeto indari teho mane indagora te enana ta ohihi ta ari avoeto ingeni egeto donda indagora.
MAR 7:4 Eto enana market ta pambuto puvuto amo enana ta hamo egeto otohu eto indari indagora eto ainge dombo age te aguhu te heva te tapa amo egeto otohu eagora.)
MAR 7:5 Eto Judea ta ke pepeni ahe poekari embopo te Pharisee embopo te aingeto Iesu ta degi ke einge ea, “Eto no ambotani na do eto ungotenau ohihi ta ke pepeni poeketo ingeni tongopa te ere indere?” Ainge eo
MAR 7:6 Iesu na ke mine einge ena, “Ungo hotembari heriso embomeni, Peroveta Isaiah na kajena amo ungota ari avo einge kajena, ‘Embo einge emo hamo na na jakeka eagora te enana ta jo avo tumo nau degi ta eagora,
MAR 7:7 eto enana teho sio na jakeka ue emo God ta ke ijie embo ta hotembari na embo ahe poekagora,’ ainge Isaiah na kajena
MAR 7:8 eto ungo na God ta oje kahari ke avo toto ungota ohihi ta ari avo jigama eagova.
MAR 7:9 Eto ungo God ta ke tiumbeto ungota ari avo jigama eagova amo ungo kiari peni vahai embopora.
MAR 7:10 Eto amita be amo erevira, Moses na kaeto einge ena ‘No aja te mama te otohu ejo, eto embo amuna aja mama ta javo sapura ke aisuja embo avo taro pehasuja’ ainge Moses na kajena
MAR 7:11 te ungo na ari einge eagova. Eto donda tapa mahu God ta degi hande ikari ke ijie e mamo ta degi hande ikae God ta ke tiumbeto ungo ta ujeje avo eagova.
MAR 7:12 Eto ari nei te nei te ainge amina God ta ke amo teho ke ijie ungota ari mahu avo jigama ue ungota meniundi ta ahe poekagova.” ke ainge Iesu na Judea embo okokose ta degi.
MAR 7:14 Eto embo tapa jage enu puvuo ke einge ena “Na ke aisona ingivujo.
MAR 7:15 Eto embo na indari nei te nei te indesuja amina au embo ari sapura mane aisuja
MAR 7:16 te hotembari sapura hotembeto ke aisuja amina ari sapura aisuja avoeto ungo ta oje mihirou kito ke erena ingivujo.” ke ainge
MAR 7:17 eto embomeni toto Iesu na ambotani ga bande ta horeto Iesu na ke ena amita ke avo au ingesi eo
MAR 7:18 Iesu na “Ungo te tapa kiae embopore? Eto donda deina embo ta hini ta horasuja amo au embo ta ahihi sapura mane aisuja.
MAR 7:19 Indari donda amina embo ta hotembari jo ta mane pambasuja te hini ta veto pambau irae aisuja avoeto indari tapa amo javotohora
MAR 7:20 rate embo ta hotembari jo ta eto pe ta puvaguja amina sapura puvaguja.
MAR 7:21 Eto embo na amita jo ta siriketo ari einge eaguja: tiha paiha ari, pegene ari, embo tari pehari,
MAR 7:22 embo nei ta donda javotoho kito humbasi jo ta sirikari, tumo ari, ke sokova ari, hoviro ari, embo nei ta javo ari, sapura ari, ke sapura ari, me kiari, kiari embo ke eria, hajae vajae na viso ari, sarika ari,
MAR 7:23 aingeto embo ta hotembari jo ta eto pe ta puvuto pambaguja.” ainge ijie Iesu na ambotani ta degi harikenu ingia.
MAR 7:24 Eto Iesu na ereto enda avo toto pambuto da Tyre te Sidon te amita engihi ta embomeni kiae ojiketo bande vahai ta iresi uje ena te inono ae enu embomeni na hambua.
MAR 7:25 Eto enda Syrophoenicia evohu Greek ke kiari amina amita iae isapa ahihi sapura na jo ta veari avo Iesu ta ari tapa do ena avo duru ingito puvuto
MAR 7:26 Iesu ta utu ta veto gombuto Iesu na iae ta jo ta ahihi sapura avo ohimbaja penunu enu,
MAR 7:27 Iesu na timu hatirari ke na einge ena, “Meni isasaraho ta indari humbuto ino ta gosukasora amo sapura avoeto meni isasaraho na kihi indesora,” ainge Iesu na ena amita be amo Judea embomeni avo kihi hondate aisuja eto ambota enda nei embomeni hondate aisi timu hatirari ke na enu
MAR 7:28 evohu amina ke mine einge ena, “en, Bada, ino gaga suvu ta mihera amina meni isasaraho ta indari sirivo indagora.” ainge enu
MAR 7:29 Iesu na “Umo ke be erea avoeto umo no bande ta pambujo. No iae ta jo ta ahihi sapura amo mahu toto pambija.” ainge enu
MAR 7:30 evohu amo pambuto bande ta horeto amita iae ahihi sapura mahu pambunu hereketo mihina avo kina.
MAR 7:31 Eto Iesu na da Tyre toto enda Sidon te enda Decapolis te amita orohuta tiuketo pambuto umo Galilee ta puvunu
MAR 7:32 embo na embo vahai pe vavahaikari eto oje sundurari avo Iesu na ingeni hamo ta tembaja humbuto puvuo.
MAR 7:33 Iesu na embo tapa toto embo vahai avo humbuto oenga imihe ingeni singi heriso oje ho heriso ai ta iketo ingeni ta isuva eto embo amita ivivi ta kaimbeto jo unu usiha pagihe
MAR 7:34 uhu i arerembeto kogue ke einge ena “epatha” ainge ena amita be amo “ejo hirikare” ainge enu
MAR 7:35 oje hirikihinu pe haunkihinu ainge enu embo amina ke javotoho enu
MAR 7:36 Iesu na ari avo ke hande eagora haekihe enu ingia
MAR 7:37 te ingito ingaesira eto ke hande ea. Eto embomeni na ti kakambuketo haha puha ijie ke einge ea “eto Iesu na ari jajavotoho oje susujukari ta pe vavahaikari te tapa oi javotoho ere ora.” ainge ea.
MAR 8:1 Eto iji amite embomeni isapamane puvuto Iesu ta ke ingihe mihio Iesu na embomeni amita indari irae avo kito amita ambotani jage enu puvuo
MAR 8:2 ke einge ena, “Na embomeni erevi iji amita jo ta indari indae teho mihera avo kogone jo ereua.
MAR 8:3 Embo nei da hoi ta eto puvera avoeto ikaro beuje te da ta pambasora amo degi ta pahue tihivi na pehasora” ke ainge enu
MAR 8:4 ambotani na ke mine einge ea “Eto degi emo ojagatambu ra te daingeto indari humbuto embo isapamane emomo unduroro?” ainge eo
MAR 8:5 Iesu na “Ungota degi bread tapa doingere” ainge enu eto enana na ea “7” ainge eo,
MAR 8:6 eto Iesu na embomeni enda ta arumbara enu arumbeo bread humbuto God ta degi peketo ingeketo amita ambotani ta ikenu humbuto embomeni ta ikea.
MAR 8:7 Eto umo o heriso memeni amite aingeto humbuto God peketo embomeni ta ikaro indora ambotani ta ikena.
MAR 8:8 Eto indio inono enu ambotani na indari sirivo siriketo handija tapa pevihina.
MAR 8:9 Eto india amo embo tapa 4,000 ainge amina indio. Iesu na enu embomeni sisiketo pahuo
MAR 8:10 Iesu e nga humbuto ambotani ga pambuto enda Dalmanutha ta puvua.
MAR 8:11 Eto Pharisee embomeni na Iesu engekasi puvuto Iesu ga pe na jujune ue uhu ta hajire au kesi eo,
MAR 8:12 Iesu na jo memenga unu ke einge ena “ungo eha vasiri te irari embomeni na uhu ta hajire kesi erevete? Nanena erena ungo embo eha miheva amina uhu ta hajire mane be mane kesova” ainge eto
MAR 8:13 enana toto e nga humbuto umo oiho ta pahue.
MAR 8:14 Iesu na embo sasapura ta ari avo mane jigama ara ambotani ta degi ke einge ena, “Ungo be kivujo. Pharisee embomeni te Herod te amita bread pajirari sivo avo be kon kon eto kivujo.” ainge timu hatirari ke na ena avo ambotani na indari peni umbae bread vahai humbuto e nga ta ere pahua avo Iesu na kito ari ke eo,
MAR 8:17 Iesu na ingito ke einge ena “Ungo do eto bread umbae ari ke ereve? Ungota jo ngahia avoeto ke erena emo ingae ue erevete?
MAR 8:18 Ungo tihi mihia te kiae eto oje mihia te ingae, iji tapa ungo hotembae ereova.
MAR 8:19 Eto na bread 5 amina pereto embo tapa 5,000 undihena eto ungo na bread sirivo tapa handija doinge ueve?” Eto enana “12” ainge ea.
MAR 8:20 Eto Iesu na ehako ena, “Eto bread tapa 7 amina periketo embomeni 4,000 undihena amita sirivo handija tapa doinge ueve?” ainge enu “7” ainge ea.
MAR 8:21 Eto Iesu na “ungo ari erevi kogueva te kiaesira ue ereva.” ainge ena.
MAR 8:22 Eto aingeto da Bethsaida ta puvuo embomeni na embo tihi vahaikari avo
MAR 8:23 Iesu na tihi ta hame aja humbuto puvuo Iesu na tihi vahaikari embo amita ingeni jigito gosuketo da ahone ta humbuto pambuto tihi ta isuva eto hame ue ke einge ena “Umo no tihi na kon kon eto kogoete?” ainge enu
MAR 8:24 embo amina tihi hangeambu eto kito ke einge ena. “na embo re ere kogona te ji uhu na pahuore kiarako ere ona,” ainge enu
MAR 8:25 ehako Iesu na ingeni tihi ta hame enu embo amina kon kon eto kiari javotoho na kogunu
MAR 8:26 Iesu na da ta ikenu pambasi unu ke einge ena, “Umo da ta pambuto ari erevi ke hande aojo.” ainge eto ikenu da ta pambuna.
MAR 8:27 Eto Iesu na amita ambotani ga da nei nei Caesarea Philippi degi ta pahue ke einge ambotani ta degi ena, “namo mo amunure ke eagore?” ainge enu
MAR 8:28 enana ke mine einge ea, “Eto embo nei na John bapataito ari embo ke eagora, eto embo nei na Elijah ke eagora eto nei amo peroveta vahai ke eagora” ainge eo
MAR 8:29 Iesu na ke einge ena. “Eto nei ungo na na amunure ke eagove?” ainge enu Peter na “Umo Iesu Keriso God na Judea embo hondate ae enda ta ikenu puvura.” ainge enu
MAR 8:30 Iesu na ke avo embomeni ta hande eagora ke ngahia na eto haekena.
MAR 8:31 Eto Embo ta Meni na osaga te memenga te kesuja amita be amo Judea embo pepeni te priest pepeni te eto Judea ta ke pepeni simba ari embopo te aingeto Iesu amo Judea ta hondate ari embo manera ainge ijie taro pehasuja eto iji 3 ehako vasiri te erasuja ke ainge Iesu na amita ambotani ta ihiketo oje kahena.
MAR 8:32 Eto Iesu na ke emo timu hatirari ke na ae rate ke be na pere harikena avo Peter na ingito einge ena “Ke avo to. Ari avo no degi ta mane puvuresuja” ainge enu
MAR 8:33 Iesu na overeketo amita ambotani kogue Peter ta degi ke einge ena “Satan, Umo nau ku ta pambu. Eto umo God ta hotembari avo ae rate embo ta hotembari avo erea.” ainge Iesu na ena.
MAR 8:34 Eto Iesu na amita ambotani te embo tapa jage enu puvuo timu hatirari ke einge oje kahena. “embo amuna na ambo ambo asi uje aisuja amo amita ujeje tapa toto amita ji atahu bouka avo koho ta tembeto na ambo ambo aisuja.
MAR 8:35 Eto embo amuna daroho iresi amita vasiri te ari te jigesuja amo embo amita vasiri iraesuja rate embo amina tohota ujeje te ari te toto namote nau ke te avo humota aisuja amo daroho iresuja.
MAR 8:36 Eto embo na ahihi amita datoho irari avo hotembae ue enda ta donda nei te nei te humbasuja eto pehasuja amo amita ahihi mahu pehari avoeto irari datoho mane humbasuja.
MAR 8:37 Eto embo amina amita donda neite neite tapa amina ombuto amita ahihi avo humbari haite mane be ra.
MAR 8:38 Embomeni eha mihera amo ari sasapura embopo eto God uje ae embomeni ra te embo amuna Namote nau ke te avo kito me kogue hande ae aisuja amo Embo ta Meni usasa te Anera Otohu ga iji kombu te puvuto embo avo kogue me kesuja.
MAR 9:1 Na ungota degi ke be erena. Ungo embomeni eha ei miheva amo embo nei nei amo mane pehasova te mihirovo God na embo amita siriketo humbuto tihi jigesuja amita iji avo sovera te puvurou keisova,” ainge Iesu na ena.
MAR 9:2 Eto iji 6 irae enu Iesu na embo tapa toto Peter te John te James te humbuto tiri peni vahai ai ta vihito mihio Iesu ta hamo amo usasa pere unu
MAR 9:3 eto amita bo na usasa peni vahai amo enda embo na bo parara ainge ari haite mane avo unu
MAR 9:4 peroveta mahu Elijah te Moses te aingeto irerembeto Iesu ga heteto ke ijie mihio
MAR 9:5 Peter na joru ue ke do ano ijie einge ena, “Ahepoekari embo, dago ungote mihera emo javotoho avoeto horoma no vahai Elijah vahai eto Moses ta vahai ainge gerikarote?”
MAR 9:6 ainge Peter na ijinu
MAR 9:7 johi na puvuto uhumo enu johi jo ta ke einge puvuna, “Nau osari meni ra. Amita ke ingivujo.” ainge ijinu
MAR 9:8 enana jireki poeki eto embo nei kiae Iesu oenga mihinu kia.
MAR 9:9 Eto enana tiri ta eto vovue Iesu na peheto vasiri te erae avoeto ambotani na ari tapa do kia avo hande eagora haekena
MAR 9:10 avoeto enana ke hande ae toa te Iesu na peheto ehako vasiri te erari ta ke ena avo enana hotembu hotembu ea.
MAR 9:11 Eto ambotani na Iesu ta degi ke einge eto ingia, “Eto ungotenau ke pepeni simba ari embopo na do avoembo peroveta Elijah kihi puvurou ungotenau hondate ari embo ambota puvuresuja ke eagore?” Ainge eo
MAR 9:12 Iesu na ke mine einge ena, “Eto Elijah na puvuto au tapa javotoho asora ke ainge eagora te ke nei mahu kajari amo, Embo ta Meni na osaga nei te nei te kogurou urumbasora. Rate na ungota degi erena Elijah mahu puvuhija te enana amita ke agi ae ungota ujeje avo uera.” ainge ijinu ingiho.
MAR 9:14 Iesu te Peter te James te John te aingeto egerembeto ambotani toto pambua amita degi puvua. Eto Judea ta ke pepeni simba ari embopo na puvuto ambotani ga boru juho
MAR 9:15 eto embomeni isapamane puvuto joeketo kogue mihio Iesu, Peter te John te James te aingeto puvuto kina. Eto embomeni na Iesu kito huheveto pambuto Iesu pekihe ingeni ta jigito humbuto puvuo,
MAR 9:16 Iesu na ke einge eto ingina “Ungo ke do ijie miheve?” ainge enu
MAR 9:17 embo vahai na ke mine einge ena. “Ahe poekari embo, nau meni avo ahihi sapura na pe vahaikari ke mane eaguja avo eto no degi ta humbuto puvena.
MAR 9:18 Amo ahihi sapura na andioi ingeni te utu te tatain eto veto pehihe ti kambuto kiroro kiroro ue pe pejigi garaviketo veaguja avoembo no ambotani ta degi humbuto puvena te ahihi sapura ohimbari inono ae ehere kito no degi ta erena,” ainge enu
MAR 9:19 Iesu na osaga kito embo tapata degi ke einge ena, “Ungo humota ae embomeni ra. Eto ungo kiari umbava ungote iji doinge irono. Eto no meni avo nau degi ta humbuto have,” ainge enu
MAR 9:20 embo na meni avo humbuto Iesu ta degi io, ahihi sapura jo ta amina Iesu kito meni avo andinu enda ta veto ahero ahero ue pehihenu pejigi horo garaviketo vovunu
MAR 9:21 Iesu na “No meni na iji doinge ari einge emomo eoi?” ainge enu mamo na einge ena, “Meni isapa ta ihikari avo ere ova.
MAR 9:22 Eto meni emo pehaja uei iji nei ji ta veto evekaguja eto nei amo umo ta veto umo indaguja avoeto umo ari inono kito avo dago jo au ejo kojai.” ainge enu
MAR 9:23 Iesu na embo amita degi ke einge ena “Umo do eto na inono kito ano kojaja ere? Eto embo amuna God humota aisuja amo ari tapa amo amita degi inonora aisuja,” ainge Iesu na enu
MAR 9:24 meni ta mamo na ke vasiri na eto einge ena, “Na umo humota ere ona te na hondate ejo umo be humota ane.” ainge enu,
MAR 9:25 embomeni na ingihe joekeo ahihi sapura ta degi ke einge ena “Umo jo ta toto veto hae, mane ehako egerembasoa” ke ngahia na ainge enu.
MAR 9:26 Ahihi sapura na gagaha ijinu meni amo veto gatari gatari ue veto pehihenu ahihi sapura amo puvuto pambuna. Eto embomeni na meni enda ta hereketo mihina avo pehari ke ijio
MAR 9:27 Iesu na meni amita ingeni ta jiginu erenu
MAR 9:28 toto bande jo ta ambotani ga horeto mihio ambotani na Iesu ta degi ke einge ea. “Dago do eto ahihi sapura ohimbari inono ae ehere?” Ainge eo
MAR 9:29 Iesu na einge ena, “Ahihi sasapura nei eingeko amo teho mane ohimbagora te God ta degi pari ue ohimbagora,” ke ainge Iesu na ena.
MAR 9:30 Eto Iesu na amita ambotani ga enda Galilee jo ta pahue embomeni tapa na Iesu kiora uje ae ena. Amita be amo amita ambotani pere avo ahe poekasi uje ena.
MAR 9:31 Eto pahue ambotani ta degi ke einge ena. “Embo ta Meni avo embo ta ingeni ta ikaro taro pehasuja te iji 3 ehako vasiri te erasuja.” ke ainge ijie ahe poekena
MAR 9:32 avo ambotani na ke be ingae ue eto ingesi uje ea te joru eto toa.
MAR 9:33 Eto Iesu ambotani ga da Capernaum ta puvuto bande ta horeto mihio Iesu na ambotani ta degi ke einge ena, “ungote degi ta puvutohore ungo ke do mine ara ijie eheve?” ainge Iesu na enu
MAR 9:34 ambotani ke ambupu ea. Amita ke be amo degi ta puvutohue enana vahai amuna embo okose asuja amita ke avo tumo te tapa ke mine ara ea.
MAR 9:35 Avoeto ke ambupu eo Iesu na ambotani enu puvuto vahaita arumbeo enana ta degi ke einge oje kahena, “Eto embo amuna meni isapasira eto embo unduresuja amina embo peni aisuja.” ainge ijie
MAR 9:36 Iesu na meni isapa kito pambuto ingeni ta jigito humbuto puvuto oviribeto jo ta ikenu arumbenu
MAR 9:37 ke einge ena. “Eto embo amuna javo nau ta meni isapa eingeko osa kageni aisuja amo namote tapa osa kageni aisuja eto na pere mane rate God, na ikari embo amite tapa osa aisuja.” ainge enu.
MAR 9:38 John na ke einge ena. “Ahe poekari embo, embo vahai na ahihi sasapura javo no ta ohimbihaja avo kito ungotena vahai manera ainge eto haekihara” ainge enu
MAR 9:39 Iesu na ke einge ena. “ari ainge amo mane haekasoa.
MAR 9:40 Embo amuna nau javo ta ari javotoho aisuja amina ereto sausau nau javo mane au sapura aisuja. Embo amo ungotenau kitoho mane rate ungotenau tohora
MAR 9:41 te ungota degi erena embo amuna umo Keriso ta toho kito umo jamo timbuto no degi ta ikau indesoa embo amina hotari humbasuja.
MAR 9:42 eto embo amuna na humota ari meni isapa jo nau ta arumbeto mihia aingeko avo engekau sapura aisuja amo nanena embo amita degi mine ikano memenga peni vahai kesuja eto embo na amita tungata esi tigito koro peni vahai handuketo eva ta kihi gosukahija amo memenga ainge mane kiaehija.
MAR 9:43 Eto no ingeni vahai amina au umo sapura aisoa amo no ingeni avo jirembejo irae ai.
MAR 9:44 Eto umo ingeni jirembari amiga hotari degi ta horasoa amo javotoho rate ingeni heriso te memenga kiari degi ta horeto ji vevere kesoa amo sapura be ra. Eto degi ai ta amo vevere seikari inono aera.
MAR 9:45 Eto no utu vahai na au umo sapura aisoa kito jeto tiuketo popora eto mihima hotari degi ta horasoa amo javotohora
MAR 9:46 rate utu heriso te memenga kiari degi ta horasoa amo sapurara.
MAR 9:47 Eto no tihi na au umo ari sapura asoa amo no tihi jigito kurukejo. Eto tihi vahai te God ta irari degi ai horasoa amo javotoho rate tihi heriso te memenga degi ai ta horasoa amo sapura bera. Eto degi ai ta amo ji vevere seikari inono ae
MAR 9:48 eto embo ta visi sari uoi kakesa na indie daroho iraguja.
MAR 9:49 Rate ji vevere amo haso ainge embo ta hamo ta kaimbau haso ta gamo ainge kesuja.
MAR 9:50 Eto haso ta gamo irae aisuja amo ehako ikari inono aera, avoeto haso ta gamo kambari inono ta mihie peka mine ara evujo.
MAR 10:1 Eto Iesu na enda avo toto enda Judea umo Jordan oiho ta pambuto mihinu embomeni isapamane puvutuhore oje ere kahihahija.
MAR 10:2 Eto Pharisee embomeni na Iesu ke sapura au ingesi puvuto engikihie ke einge ea, “Eto embo na amita ae toasuja amo Moses ta ke pepeni poekaute?” ainge eo
MAR 10:3 Iesu na, “Eto Moses na ke do enu?” ainge enu
MAR 10:4 pharisee embomeni ke einge ea “Eto embo na amita ae uje ae ue kito amo ke kaeto ikau humbau toasuja amo aravora ke ainge Moses na ena.” ainge eo
MAR 10:5 Iesu na ke mine einge ena. “Moses na ke ainge kajena amo ungota jo ngahia avoeto kajena
MAR 10:6 rate God na uhu te enda te ari iji te embo te evohu te ena avoeto embo na e mamo toto ae ga kaju asuja
MAR 10:8 amo enana vahai aisora te embo na kaheketo oenga oenga mane aisora te vahai eto iresora.
MAR 10:9 Eto God na do kaju aisuja amo embo na mane kahekasora.” ainge Iesu na Pharisee embopo ta degi eto
MAR 10:10 toto bande ta horenu ambotani na ae toari ta ke avo Iesu ta degi ke be au ingesi ehako eto ingio
MAR 10:11 Iesu na ke einge ena “Eto embo na ae toto evohu nei jimbasuja embo amo tiha embora
MAR 10:12 eto ae mahu toari amo embo nei jimbasuja amo tiha evohu ra.” ainge Iesu na ena.
MAR 10:13 Eto embomeni na meniundi humbuto Iesu na ingeni hamo ta tembaja humbuto puvuo ambotani na kito haekeo
MAR 10:14 Iesu na tumo eto ambotani isembihe ke einge ena, “Meni isasaraho mane haekasova te evu nau degi ta hurore. Meni isasaraho amo na humota eagora eto embo amuna ainge dombo na humota aisuja amo God na embo amo simba aisuja.
MAR 10:15 Na ungota degi erena embo amuna meni isasaraho ainge na humota eagora aingeko ae aisuja amo God na mane tihi jigesuja.” ainge Iesu na ijie
MAR 10:16 meni isasaraho oviribeto humbuto ingeni siro ta tembeto javotoho ari ikena.
MAR 10:17 Eto Iesu enda nei ta pambasi unu embo vahai na kito huheveto puvuto humotepain ue paunge teteri eto ke einge ena, “Ahepoekari embo javotoho, na ari do ue irari daroho hoteto umbano avo inena ejo ingone,” ainge enu Iesu na ke einge ena,
MAR 10:18 “Umo do eto na javotoho ke ere? Eto embo tapa amo jajavotoho manera te God vahai avo javotohora.
MAR 10:19 Eto God ta ke pepeni amo umo kiarira: Embo mane tao pehasora, tiha mane aisoa, pegene mane aisoa, embo nei ta ke be na au ingito jandireketo sokova na mane aisoa, ke sokova ijie embo nei ta donda mane humbasoa, eto aja te mama te otohu aisoa,” ainge Iesu na enu
MAR 10:20 embo amina ke einge ena, “Ahe poekari embo, na meni isapa ta ihiketo ari tapa avo javotoho pere ue ere puvuhovona,” ainge enu
MAR 10:21 Iesu na embo avo kogue osa ue ke einge ena “Ari vahai avo ae ereova, avoeto pambuto no donda tapa avo ombuto koro humbuto donda ambu embopo ta iketo na ambo ambo asi hae. Eto God ta irari degi ta no donda isapamane mihia avo hoteto humbasoa.” ainge enu
MAR 10:22 embo amina ingito amita hajae vajae peni vahai avoeto osaga kogue pahunu,
MAR 10:23 Iesu na overeketo ambotani kogue ke einge ena, “Hajae vajae embo na daingeto God ta degi horau, amo ngahia be ra.” ainge enu
MAR 10:24 Iesu ta ambotani na ke avo ingito vani vini eo Iesu na ke ehako einge ena, “Nau meniundi, God ta degi ta horari ngahia be ra.
MAR 10:25 Eto o camel na poma ho ta horeto pambari ngahia ra aingeko hajae vajae embo na God ta tihi jigari degi ai ta horari ngahia be ngahia ra.” ainge Iesu na enu
MAR 10:26 ambotani na ke ainge mahu ingae avoeto “embo amunure God na ari sapura ta oreketo humbau?” Ainge eo
MAR 10:27 Iesu na enana kogue ke einge ena “embo na ari inono aera te God ta degi ari tapa amo inono ra.” ainge
MAR 10:28 enu Peter na Iesu ta degi ke einge ena. “Kijo, dagota donda tapa toto umo ambo ambo ere ora.” ainge enu
MAR 10:29 Iesu na einge ena “Na ungota degi ke be erena, embo amuna namote nau ke javotoho te avoembo bande te namei kamei te du emone te e mamo te meni undi te hajae vajae te amita enda te tapa toasuja
MAR 10:30 amina pehae mihie namei kamei te du emone te e mamo te meniundite hajae vajae isapamane enda te tapa humbasuja amo embomeni na Iesu ta ambotani ra ainge eto taro memenga kesuja te mihima peheto God ta degi horeto vasiri daroho hoteto humbasuja
MAR 10:31 rate embo peni amina kihi asi uje aisuja amo ambota aisuja eto embo ambota amina kihi aisuja.” ainge Iesu na ena.
MAR 10:32 Eto da Jerusalem degi ta Iesu kihi pahunu ambotani 12 amo mana mana ue pahuo ambotani nei uhoho amo joru te tapa ambota puvuo Iesu na ambotani 12 humbuto amita degi do puvuresuja avo harikena.
MAR 10:33 “Kivujo, ungotena da Jerusalem ta pambasora amo embo na Embo ta Meni avo Priests pepeni te Judea embo ta ke pepeni embopo te ta ingeni ta ikau humbuto pehumba eto taro pehaja humbuto Rome embo ta ingeni ta ikasora.
MAR 10:34 Eto Rome embo na urumbihe hamo ta isuva ue esi na ejembeto tasora eto taro peheto iji 3 ehako vasiri te erasuja.” ainge ena.
MAR 10:35 Eto degi ta pahue Zebedee ta meni heriso James te John te na Iesu da Jerusalem ta do aisuja amo hotembae ue Iesu ta degi ke einge ea, “Ahe poekari embo, dago do asi uje ere ora avo inena ao arote,” ainge eo
MAR 10:36 Iesu na ke einge ena “Na ungo ta degi do ana uje ere ove avo evujo ingone.” ainge enu
MAR 10:37 enana ke einge ea, “Umo heteto tihi jigari iji te ao dago nei no ingeni anga ta eto no ingeni be ta aingeto arumbeto embomeni simba arote” ainge eo
MAR 10:38 Iesu na ke mine einge ena. “ungo ke do asi ereva amo ungo be kiaera. Eto na aguhu ta indesona amo ungo indari inono rete? Eto na deina bapataito aisora amo ungo amina bapataito ari inono rete? Amita ke be amo na pehasi ue memenga kesona amo ungo memenga kiari inono rete?” ainge enu
MAR 10:39 enana na “Dago inonora” ke eo Iesu na ke einge ena. “Ke be ra, na aguhu ta indesona amo ungo aguhu ta indesova eto na bapataito aisona amo ungo bapataito aisova
MAR 10:40 rate embo amuna nau ingeni anga ta eto be ta arumbasuja amo nanena mane aisona te God na mahu kito sirikari ra.” ainge Iesu na ena
MAR 10:41 te ambotani nei uhoho na John te James te amita ke avo ingito enana ta degi tumo ea.
MAR 10:42 Avoeto Iesu na ambotani jage enu puvuo oje kahari ke einge ena, “Ungo kogova amo enda nei embomeni na embo pepeni eto tihi jigihore embomeni ta degi osaga memenga ikagora,
MAR 10:43 rate ungo ainge mane aisova te ungo embo vahai na embo peni aisuja amina ungo tapa hondate ue ungota ujeje avo unduresuja.
MAR 10:44 Eto embo amuna ungota tihi jigari embo asi uje aisuja amina ungo tapa ta ke agi aisuja.
MAR 10:45 Eto Embo ta Meni na embo peni eto enda embo tihi jigesi puvurae rate amita vasiri na embomeni te ari sasapura avoembo ombuto humbasi puvena.” ainge Iesu na ke eto.
MAR 10:46 Ere pambuhumihe da Jericho jo ta puvuto Iesu te ambotani te aingeto pahunu embomeni na kesi ambota puvua. Eto Timaeus ta meni Bartimeus tihi vahaikari amo da sahu ta arumbeto mihie koro penunu ere ijiahija
MAR 10:47 avo Iesu Nazareth embo puvuto ere hua ainge eo ingito jajage eto ke einge ena, “David ta Meni Iesu na jo au kito hondate e.” ainge enu
MAR 10:48 embomeni na ke toaja isembea rate embo amina ehako ke hori gagaha eto “David ta Meni na jo au kito na hondate e.” ainge enu
MAR 10:49 Iesu na ingito heteto “Embo avo evujo huroi” ainge enu embo na tihi vahaikari embo avo jage eto “Iesu na umo jage eria avo eto tunga javotoho ue ere.” ainge eo
MAR 10:50 embo amina soueto ereto heteto amita bo pohukari amo pirouketo gosuketo eto Iesu ta degi pambunu,
MAR 10:51 Iesu na “Umo do ana uje ue ere?” ainge enu embo amina “Bada, nau tihi ejo javotoho au kione” ainge enu
MAR 10:52 Iesu na amita degi ke einge ena, “Umo na humota ere oa avo no tihi javotoho ehija avoeto degi kogue pambujo” ainge enu tihi hirikenu Iesu ta ambota pambuna.
MAR 11:1 Eto Iesu te amita ambotani te aingeto da Jerusalem auveto da Bethphage te da Bethany te ta tiri olives engihita puvuto ambotani heriso humbuto ikenu pambasi uo
MAR 11:2 ke einge ena “Ungo pambuto da degi oiho amita pe ta o donkey meni handukehere mihia amo meni avoeto ai ta isa mane eagora avo bujeketo humbuto puvuvujo.
MAR 11:3 Eto embo na ‘Ungo do eto donkey meni humbuto pambasi ere ove’ ke ainge aro ungo na einge evujo, ‘Bada na jigama eto ikau egerembasuja,’ ainge eto humbuto puvuvujo” ainge
MAR 11:4 enu enana ambotani heriso pambuto o donkey meni embo ta da pe ta uhundukeo mihina avo kito bujeketo humbasi uo
MAR 11:5 embomeni ai heteto mihia amina “ungo do eto o meni humbasi ere ove” ainge eo,
MAR 11:6 Iesu na ke do ara ena avo eo ingito aravora ainge eo
MAR 11:7 humbuto Iesu ta degi pambuto enana ta bo humbuto o hamo ta tirio Iesu vihito arumbena.
MAR 11:8 Eto embo nei uhoho na bo hoheto degi ta besi tirihio nei uhoho na embo ta pure ta ji iki kahumbeto degi ta tirihio
MAR 11:9 ai haito pahunu embo nei kihi eo embo nei uhoho ambota eto pahue jajage eto ke einge ea, “Oro, oro, Bada ta javota puvuto ere hua avo God na javotoho ari ikai.
MAR 11:10 Ungotenau ohihi king David ta simba ari javotoho aingeko avo ehako puvuto erehua avo God au javotoho ai. God i be ta avo jakeka erera” ainge embo na ijio
MAR 11:11 pambuto da Jerusalem ta horeto Iesu temple jo ta horeto donda tapa poeto kito hure vovunu ambotani 12 ga da Bethany ta pambuna.
MAR 11:12 Eto evito iho vujenu da Bethany toto ambotani ga degi ta puvuto ere humihe Iesu na beuje unu
MAR 11:13 ji junga avo hoi ta kito be miheite ijie pambuto kina rate amita be ari iji amo jua ta avoeto be irae iki pere kito
MAR 11:14 Iesu na ji amita degi ke einge ena, “embo na no be ambota mane indesora” ke ainge ena amo ambotani tapa na ingia.
MAR 11:15 Eto da Jerusalem ta puvuto temple jo ta horeto embo isapamane na di dipo te eto donda neite neite avo temple jo ta ombuto koro humbuhe mihio Iesu na kito tumo eto gaga jigito haperekihe
MAR 11:17 ke einge ena “Donda humbuto temple jo ta mane horasova te na ke aisona ingivujo. God ta ke kajari ta mihia amo Bande nau emo embo tapa eto enda tapa ta pari ari bande ra ainge mihia te ungo na eheve pegene embo ta bande ere ua.” ainge Iesu na enu
MAR 11:18 enana priests pepeni te Judea ta ke pepeni simba ari embopo te na ingito daingeto Iesu taro pehasuja avo jombure ea. Amita be amo embomeni tapa na Iesu ta ke ingito haha puha ea avoeto Judea ta embo pepeni na Iesu joru ea.
MAR 11:19 Eto hure vovunu da toto ambotani ga pambuto evito.
MAR 11:20 Iho vujenu egerembeto ambotani ga degi ta puvuto ji junga avo jaise eto mihinu kia.
MAR 11:21 Eto Peter na Iesu na ke mahu enu ingina avo hotembeto Iesu ta degi einge ena “Bada ki, ji junga emita degi ke ehea amo jaise ehija,” ainge enu
MAR 11:22 Iesu na ke einge ena “God humota evujo.
MAR 11:23 Ungota degi ke be erena, embo amuna tiri emita degi ‘umo uketo pambuto eva ta vejo’ ainge jeneki ae God humota ue aisuja amo God na aisuja, avoeto erena.
MAR 11:24 Eto ungo God na do ikau humbasi uje eto pari ue ke be ijirovo amo ikau humbasova.
MAR 11:25 Eto embo amuna ereto pari ue embo nei na no degi ta sapura do ari re avo hotemebeto toasoa eto ainge dombo no Mama uhu ta iraguja amina no ari sapura hotembeto toasuja rate inena embo nei ta ari sapura hotembeto toae aisoa amo Mamo God uhu ta iraguja amina no ari sapura mane hotembeto toasuja.”
MAR 11:26 Eto degi ta ke ainge ijie da Jerusalem ta puvuto temple jo ta horeto isa unu priests pepeni te Judea embo ta ke pepeni simba ari embopo te Judea embopo pepeni te aingeto Iesu ta degi puvuto ke einge ea “embo amuna no degi ta sovera ari ikehei humbuto ari emomo ere oe?” ainge eo
MAR 11:29 Iesu na ke mine einge ena. “Ungona nau degi ta ke be avo ingito avo na amuna sovera ari ikihei humbuto ere ona avo ano ingesova.
MAR 11:30 Na ungota degi eto ingari ke aisona amo erevira. John na sovera ari humbuto embo bapataito ere uahija amomo God ta degi eto humbunute mo embo ta degi humbunu?” Ainge eto inginu
MAR 11:31 embo pepeni na ke mine do asora avo ungo oenga jujune ke ijie einge mine ara eto ea, “Eto dago John na sovera ari God ta degi humbari ke aisora amo Iesu na aravorate ungo do eto John ke be ae ereove ke ainge aisuja
MAR 11:32 rate dago sovera ari embo ta degi humbari ke asora amo embomeni ei mihera amina dago ta degi isoro aisora amita be amo John amo God ta peroveta be ke eagora avoeto.” eto ke mine ari inono ae enu
MAR 11:33 enana na Iesu ta degi “Dago be kiae avoeto mane aisora” ainge eo Iesu na “aravora namote tapa amuta degi sovera humbuto ere ona avo mane ano ingesova.” ainge ena.
MAR 12:1 Eto Iesu na timu hatirari ke avo einge ihiketo ena, “Eto embo na grape ve urasi andage eto huga tigito joeketo orohuta grape be ta mu sahasi hoto koveto grape be mu huna pure mamo ta degi ikasuja eto arumbeto grape simba aisora gaga geriketo tapa embo ta ingeni ta iketo enda nei ta pambuna.
MAR 12:2 Eto ‘grape’ sari ari iji puvunu ‘grape’ be sari umbaja pure mamo na amita pure embo vahai ikenu pahunu
MAR 12:3 ‘grape’ simba ari embo na kito teo peheto donda umbae teho mamo ta degi pambuna.
MAR 12:4 Eto ‘grape’ ta mamo na amita pure embo nei ikenu pambunu ‘grape’ simba ari embomeni na urumbihe teo peheto mamo ta degi pambuna.
MAR 12:5 Eto mamo na pure embo nei ikena amo teo peheto sari enu pure embo nei nei ikena amo hamo ta torue nei nei avo be teo pepehekea.
MAR 12:6 Eto ainge pere ere umihe tutumo dombo ta amo amita osari meni avo ikasi ue ke einge ena. “Emo osari meni nau avo kito otohu ue mane tasora.” ainge eto
MAR 12:7 ikenu pahunu grape be simba ari embomeni na kito ke einge sirikea. ‘Eto ‘grape’ mamo na meni ikehei puvija avo ungote teto ‘grape’ pure evi ungotenanena oreto umbasira,’ ke ainge
MAR 12:8 eto meni avo teo pehenu humbuto huga hokaka ta gosukeo veto sari ena.
MAR 12:9 Eto ‘grape’ mamo na puvuto do au? Amina grape simba ari embomeni tau pepehekaro ‘grape’ pure amo humbuto embo nei ta ingeni ta ikasuja.
MAR 12:10 Eto God ta ke amo einge kajari mihia, “Bande gerikari embopo na tutuvi vahai sapura ke ijie toa avo Bada God na humbuto enu bande ta tutuvi be ena.
MAR 12:11 Eto Bada ta ari avo kito kiari javotoho ke eagora.” ainge mihia amo ungo eheketo kiaerete,” ainge Iesu ke enu irae enu
MAR 12:12 Judea embo pepeni na ungo avoembo Iesu na hihi tirina avo ingito Iesu andito tipura ta ikasi uje ea rate embomeni tapa na enana ta degi memenga ikasora avo hotembeto joru ue toto pambuto.
MAR 12:13 Pharisee embo te Herod ta ke agi ari embopo te aingeto Iesu ta degi pambuto engeka ururoro Iesu na ke mine sapura do au ingito pambuto
MAR 12:14 ke einge ea. “Ahe poekari embo, umo ke be na pere embo ta ke te ari te avo hotembae ue God ta ke avo javotoho na ahe poekagoa avo dago kiarira te dago ke vahai erevi no degi ta asi uje ereora, ke amo erevira, ungotena Judea ta ke pepeni joru ue tax koro Rome ta gavana Caesar ta ikarote mane ikaro? Eto ikarote mane ikaro avo ejo ingore.” ainge eo
MAR 12:15 Iesu na enana ta jo ta hotembari heriso avo kito ke einge ena. “ungo do eto na kaeto kesi uje ere ove? Rate ungota koro vahai humbuto ikevu kione.” ainge enu
MAR 12:16 humbuto ikeo Iesu na humbuto koro hamota ove avo kito einge ena, “Koro hamota embo ta tombu emo amutare” ainge enu, “Caesar ta ra” eo
MAR 12:17 Iesu na ke einge ena, “Aravora, Caesar ta donda kito amo Caesar ta ikevu eto God ta donda kito amo God ta ikevu,” ainge Iesu na enu ingito haha puha ea.
MAR 12:18 Eto Sadducees embomeni na vasiri te erari avo ke be ae ue ere ijiahera avo Iesu ta degi puvuto ke einge eto ingia.
MAR 12:19 “Eto Moses na ke amo einge kajena. Embo ta ae meni umbae mihirou ivu pehasuja eto namei na namei hondate eto jimbuto ve ikasuja ainge Moses na kajena.
MAR 12:20 Eto embo tapa 7 amo jo vahai ta amina meni bugo na jimbuna eto ae meni umbae mihinu ivu pehenu bugo ta kane amina jimbuna amo meni umbae mihinu ivu pehena eto ainge pere ue pambuto gasi meni amina jimbuna amo ainge meni umbae pehena eto ambo be ta amo evohu amina pehena.
MAR 12:23 Eto enana tapa 7 avo vasiri te erasora amo evohu amo embo amuta ae au?” ainge eo
MAR 12:24 Iesu na ke mine einge ena. “Eto ungo hotembari nei sokova ereva amo God ta ke te sovera te avo kiae avoeto ereva.
MAR 12:25 Eto ke be amo embo pehari ehako vasiri te erasora amo Anera uhu ta jimbae iragora ainge dombo mane jimbasora te teho iresora.
MAR 12:26 Eto ke nei amo vasiri te erari amita ke be amo Moses na ke kajena ai ta einge mihia te ungo kiae ue erevete? Eto Moses na ji vasa peri na evikihina amita jo ta ke einge ingina ‘na Abraham ta God, Isaac ta God, Jacob ta God ra’ ainge ijinu ingina,
MAR 12:27 amo embo pehari ta God mane rate embo vasiri te amita God avo ijinu ingina te ungo ke nei ereva.” ainge Iesu na enu.
MAR 12:28 Judea ta ke pepeni simba ari embo na enana ke avo boru jumbarako uo ingito puvuto Iesu ta ke javotoho enu ingito ke einge ena “Moses na God ta ke 10 ta kajena amita ke peni mo davore?” Ainge enu
MAR 12:29 Iesu na ke mine einge ena, “Israel embomeni ke nau ingivujo. Ungotenau Bada God amo vahai
MAR 12:30 avoeto no jo te hotembari te ahihi te sovera te tapa na God osa evujo. Eto ke amo peni be ra
MAR 12:31 eto ke nei amita engihi ta amo eingera, ‘Umo oenga hamo no simba ue osa eagoa ainge dombo no namei kamei tapa osa ejo,’ eto God ta ke 10 ta jo ta ke heriso erevi peni be ra.” ainge enu
MAR 12:32 ke pepeni simba ari embo na ke einge ena, “Ahe poekari embo umo ke be erea, God vahai ra eto God nei iraera
MAR 12:33 te embo na jo te hotembari te sovera te tapa na God osa aisuja eto ungotenau hamo osa eagora ainge dombo ungotenau namei osa aisora ke amo peni be ra pene gaga ta ji ikeore evikihoi o ingagora aingeko manera” ainge enu
MAR 12:34 Iesu na embo amita ke javotoho be enu ingito amita degi ke einge ena. “Umo God ta irari degi ai ta horari haite ere kogona” ainge Iesu na enu embo nei nei amo eto ingari ke ae me enu toa.
MAR 12:35 Eto Iesu na temple jo ta horeto ke einge ahe poekena. “Eto Judea embota ke pepeni simba ari embopo na Judea ta hondate ari embo Keriso amo King David ta ahije ke eagora.
MAR 12:36 Rate God ta Ahihi Otohu na ke einge enu David na kajena, ‘God na Na David nau Bada ta degi ke einge ena. Nau Ingeni be ei ta arumbeto iriro nane no kitoho teto ikano inena utu na hatiresoa’ ke ainge ijinu David na kajena.
MAR 12:37 Eto David na Judea ta hondate ari embo Keriso amo nau Bada ra ena avoeto Judea ta ke pepeni simba ari embo na do eto David ta ahije ke eagore?” ainge enu embomeni na amita ke ingito tunga javotoho ea.
MAR 12:38 Eto Iesu na embomeni oje kahihe ke einge ena, “Eto ungo Judea ta ke pepeni simba ari embopo ta ari avo kogue irivujo, eto enana amo bo jajavotoho kokoso avo aseto ‘market’ ari degi ta ururoro kito osa ue pekara eagora.
MAR 12:39 Eto nei amo ke kasari bande ta horeto embo pepeni ta avo arumba ai ta arumbagora eto pondo iji te embomeni na kito otohu ara tihi ta arumbagora.
MAR 12:40 Eto nei amo evohu doru ta donda avo sio humbagora eto embomeni amita pari amo jo na aera te toho hamo na pari kokoso kakoso eto sinenekagora. Avoeto God na enana ta hajire siriketo hana kiari ikau kesora.” ke ainge Iesu na eto.
MAR 12:41 Pambuto hande ikari gaga engihita arumbeto mihinu hajae vajae embomeni na koro pepeni papeni be humbuto puvuto ikihoi Iesu kogue mihinu
MAR 12:42 evohu doru amita donda irae avoeto koro toea heriso avo humbuto puvuto jujurukihinu
MAR 12:43 Iesu na kito amita ambotani jage enu puvuo ke einge ena. “na ungota degi ke be erena. Evohu doru amina hande ere ikihia amo peni be ra hajae vajae embo na ere ikihera ainge mane ra. Eto enana ta donda isapamane avoeto huna ikihore huna mihia rate evohu amita hande amo tapa pe te ere ikihia avora.”
MAR 13:1 Eto Iesu na temple jo ta eto arahata puvutuhunu amita ambotani vahai na ke einge ena, “Ahe poekari embo, ki! Temple emo koro pepeni jajavotoho na gerikari ra,” ainge enu,
MAR 13:2 Iesu na ke mine einge ena “Bande erevi ungo na javotoho ere kogova te ungota degi erena, koro nei na koro nei ta hamo ta mane tembeto iresuja te tapa arara eto veasuja,” ke ainge Iesu na hariketo.
MAR 13:3 pambuto tiri Olives ai ta vihito arumbeto Temple kogue mihinu Peter te James te John te Andrew te aingeto pambuto Iesu ta degi ke einge ea “Eto inena ke ehea amita be amo iji deina puvurou eto hajire do kioro avo ejo ingore.” ke ainge eo
MAR 13:5 Iesu na ke ihiketo einge ena, “Embomeni ke sokova na hande aisora avo eto be kogue irivujo.
MAR 13:6 Eto embo neite neite na javo nau ta humbuto ke sokova ijie ‘na ungota orekari embora’ ainge ijiroro embomeni na ke avo ingito ambo ambo aisora.
MAR 13:7 Eto ungo isoro ta duru hoi ta eto asa ta ingesova avo ungo joru avojo eto iji kombu puvurae amikote isoro avo einge aisora.
MAR 13:8 Enda nei na ereto enda nei ga isoro aisora eto ‘king’ nei na ereto ‘king’ nei taisuja. Eto enda nei nei ta titira te beuje te puvurou kesora amo memenga te osaga te kesora amita ihikarira te ungo be kogue irivujo.
MAR 13:9 Eto embo na ungo andito humbuto council ta ingeni ta ikaro humbuto Judea ta ke kasari bande ta ungo ikaro hetavo pehumba ue tasora. Eto ungona gavana ta eto king ta tihi ta heteto ke nau hande avo ingesora
MAR 13:10 eto iji kombu puvurae kihi ta ke nau avo enda embo tapa ta hande aro ingesora.
MAR 13:11 Te enana ungo andito humbuto pehumba aisora iji te amo ke do aisova avo hotembihe osaga mane kesova te Ahihi Otohu na ungota degi ke do ava aisuja avo pere evujo.
MAR 13:12 Eto namei na namei humbuto ikau embo na taro pehasuja eto mamo na meni humbuto ikau taro pehasuja eto meni na ereto e mamo humbuto ikau taro pehasuja.
MAR 13:13 Eto ungo na javo nau ta pure ururovo embomeni na ungota degi tumo aisora te embo amuna na avoembo sovera ere uma amita sari ari iji puvuresuja amo God na oreto humbasuja.”
MAR 13:14 “Eto peroveta Daniel na Donda Sapura be Sapura amita ke mahu kajena avo humbuto puvuto Degi Otohu ta ikaro hetasuja (ke erevi ehekari embo be ingijo). Kito ungo Judea ei ta miheva embomeni joru tiri ta pambuvu
MAR 13:15 eto embo bande ji ta mihia amo veto bande jo ta horeto donda mane siriketo humbasuja te teho pambasuja.
MAR 13:16 Eto embo pure ta mihia amina mane amita bo humbasuja te teho pambasuja.
MAR 13:17 Eto evohu urete te amite meni eha ingeto emi kajaguja amita degi aja to erena, enana ta degi osaga puvuresuja.
MAR 13:18 Eto ari erevi jajemo iji te mane puvuroja pari evujo.
MAR 13:19 Eto iji amikote osaga memenga kesora amo God na uhu te enda te ena amikote ere puvuhahija puvija erevira amo osaga ainge amo kiae avoeto kesora te ambota aingeko amo mane kesora.
MAR 13:20 Eto Bada God na au iji avo tuho aisuja te ainge ae amo embo tapa na peheto sasari aisora te God na embo amita toho avoembo au iji tuho aisuja.
MAR 13:21 Eto iji amikote embo amuna ‘Kivu, Keriso puvija erevira’ o nei ‘Ungotenau hondate ari embo puvija’ ainge au ungo ke avo ke be ke avojo.
MAR 13:22 Eto keriso sokova na peroveta sokova na ereto ue ari te vasiri neite neite ururoro ke be ke ijie ambo ambo ururoro eto kito aro God ta embomeni te tapa asora.
MAR 13:23 Rate be kivujo ke erevi ae peko ta ungota degi erena.”
MAR 13:24 “Ungota memenga osaga kiari iji tutumota amo iji mume au hariga na usasa mane aisuja
MAR 13:25 eto uhu ta sovera na jahevau kuro soheto veasora.
MAR 13:26 Eto Embo ta Meni avo uhu i ta eto sovera te usasa te tapa johi jo ta johi ga vahai veto hururou embomeni na kesora.
MAR 13:27 Eto amina tohota embomeni mahu siriketo humbari avo vahaita puvurora amita Anera isapamane ikau uhu tapa te enda tapa kaina, pahina, ihane eto sohe ta pambuto siriketo umbaro puvuresora.”
MAR 13:28 “Eto ungo ji junga ta ari do eaguja avo ungo kito be hotembevu. Eto amita hatu ta ope eto iki vujekaguja amo amita be ari iji auvaguja
MAR 13:29 ainge iteko ari erena amo tapa puvurou kesova amo Embo ta Meni puvurari iji auvehija ke ainge evujo.
MAR 13:30 Eto ungota degi ke be erena. Ungo mane sari aisova te ari emo puvurou kesova.
MAR 13:31 Eto uhu te enda te avo irae aisuja te ke nau avo mane irae aisuja.”
MAR 13:32 “Rate Embo ta Meni ta puvurari iji amo Anera uhu ta iragora amo kiae eto God ta Meni na kiae rate God Mamo na vahai kiarira
MAR 13:33 avoeto ungo be kogue irivujo iji doite puvurou amo ungo kiaera.
MAR 13:34 Eto ari amo eingera, eto embo amina amita pure ari embo ta degi pure amita be iketo eto bande simba ari embo bande simba aja iketo enda nei ta pambasuja.
MAR 13:35 Eto pambuto ehako egerembeto puvurari iji amo hurete rete humba te rete ohora javone ijirou rete ihote rete avo eto ungo mane evesova te ungota degi eto embo tapa ta degi erena ‘Be kogue irivujo’.”
MAR 14:1 Eto jarukari ta Pondo te bread sivo ikae pajirae amita pondo te puvurae iji heriso amita kihi ta Judea ta priests pepeni te ke pepeni simba ari embopo te aingeto Iesu daingeto kiae ojikari na humbuto tasora avo ke kasihe
MAR 14:2 einge ea, “Ungote pondo iji te aisora amo embo na ereto jujune aisora avoeto pondo irae au isimba ta aisora.” ainge ea.
MAR 14:3 Eto Iesu amo da Bethany ai embo Simon amo kini umbuna te mahu kojari amita bande ta arumbeto indie mihinu evohu vahai amina oil mune te javo Nard bottle isapa ta avo humbuto puvuto teto pejeto Iesu ta siro ta kuhena.
MAR 14:4 Eto oil amita koro amo pajire be avo eto embomeni na kito tumo ue ke einge ea,
MAR 14:5 “Pamone emina oil na ombuto koro tapa 900 kina humbuto donda ambu embo ta ikaehija avo aijaja ere ua” ainge ijie isembeo
MAR 14:6 Iesu na ke einge ena, “aravora tovu, do eto amita degi tunga osaga ere ikeheve? Amina ari javotoho nau degi ta ehija.
MAR 14:7 Eto donda ambu embopo na iji tapa ungo ga mihiroro ari javotoho aisova te na ungoga iji tuho iresona.
MAR 14:8 Eto na kovasora avoeto hamo nau nununga ana amita uje na amita degi nei do irae avoeto oil na ere kuhihia.
MAR 14:9 Eto na ungota degi erena, God ta ke javotoho enda nei ta nei ta hande aisora amo evohu erevi hotembihe ari do ehija emiga tapa hande aisora.” ainge Iesu na ena.
MAR 14:10 Eto Judas Iscariot amo ambotani 12 rate vahai amina pambuto priest pepeni ta degi Iesu umbara harikasuja ke enu
MAR 14:11 ingito tunga javotoho eto amita degi koro ikasi ke eo, Judas na pambuto Iesu isoro embo ta degi harikasuja avo sija ena.
MAR 14:12 Eto bread sivo ikae pajirae amita pondo te Jarukari pondo te iji puvunu o sheep meni teto heveto pene gaga ta ikea iji amikote ambotani na puvuto Iesu ta degi ke einge ea. “Umo Jarukari pondo indesoa amo degi dainge nununga ara uje ere oe?” ainge eo,
MAR 14:13 Iesu na ambotani humbuto ke einge ena, “Ungo embo heriso pambuto da jo ta embo vahai umo higi jigito puvutuhurou hambuto embo avo ambo ambo ue pambuto
MAR 14:14 bande dainge horasuja ai ta amiga horeto bande mamo ta degi ke einge evujo, ‘Ahe poekari embo na ambotani ga bande jo dainge horeto Jarukari pondo indoro?’ ainge avo embo amina bande jo peni vahai i ta gaga te avo arumba te tapa mihera ai Jarukari pondo evujo nununga are.” ainge enu,
MAR 14:16 ambotani heriso na da ta pambuto Iesu na donda do do ena avo inono ta kito Jarukari pondo nununga ea.
MAR 14:17 Eto mume sihukihinu Iesu na amita ambotani 12 ga pambuto
MAR 14:18 gaga ta arumbeto indie mihio Iesu na ke einge ena, “Na ke be erena, ungo namote tapa indie miheva embo vahai na na humbuto kitoho embo ta ingeni ta ikasuja” ainge Iesu na enu
MAR 14:19 ambotani na osaga kito embo vahai vahai na “Namo rete?” embo nei na “Namo rete?” ainge eo
MAR 14:20 Iesu na “Ungo ambotani 12 rate vahai na namote bread humbuto su heva jo ta kaimbeto ere india amina harikasuja.
MAR 14:21 Rate God ta ke ta kajari amo Embo ta Meni na pehasuja ainge ena avoeto pehasora te aja to erena, harikari embo avo e na ingae toaehija amo osaga memenga mane kiaehija.” Ke ainge Iesu na enu.
MAR 14:22 Embomeni indie mihio Iesu na bread humbuto God ta degi pekihe ingeketo ambotani ta hande ue ke einge ena, “Hamo nau erevi humbuto indavu,” ainge
MAR 14:23 eto aguhu humbuto God peketo ikenu indio
MAR 14:24 ke einge ena, “Emo orosa nau embo isapamane avoembo noma kajari ta orosa overekehena.
MAR 14:25 Eto ungota degi ke be erena. Na esi be ta mu mane indesona te God ta tihi jigari degi ta horeto esi mu eha indesona,” Iesu na ke ainge enu irae enu
MAR 14:26 haveni eto tiri Olives ta pambua.
MAR 14:27 Eto tiri Olives ta mihio Iesu na ambotani ta degi ke einge ena, “God ta ke avo kajari einge mihia ‘Na o sheep simba ari embo tano pehau o sheep sio sao pambasora’ amita ke be amo na kogue me ururou sio sao pambasova
MAR 14:28 rate God na au vasiri te ereto Galilee pahurono ungo ambota pambasova,” ainge enu
MAR 14:29 Peter na ke einge ena, “Eto ambotani nei nei avo umo toto pambasora te na vahai avo umo mane toto pambasona,” ainge enu
MAR 14:30 Iesu na Peter ta degi ke einge ena. “Na no degi ta erena iho vujae mihirou mume orohuta inena na kiae ke tapa 3 ainge ijiro ohora javone heriso aisuja” ainge enu
MAR 14:31 Peter na ke vasiri te tapa einge ena, “Na umote tapa pehasora te nanena umo kiae ke ana erea!” Ainge Peter na ijinu ambotani tapa na Iesu mane egikasi ke ea.
MAR 14:32 Ainge eto enana na degi javotoho dagogotambu javo Gethsemane ta pahue Iesu na ke einge ambotani ta degi ena. “Ungo ei arumbevu, na pari asina” ainge
MAR 14:33 eto Peter te James te John te aingeto humbuto pahue osaga peni vahai kogue
MAR 14:34 enana ta degi ke einge ena, “Jo nau ta osaga peni vahai mihia amina oi ambure arako ere ona avoeto ungo ei ta mihie na simba evujo,”
MAR 14:35 ainge eto isapa imihe enda ta veto sapura amita degi ere puvutuhua avo tiumbeto pambaja
MAR 14:36 Mamo ta degi pari einge ena, “Ajao Mama, umo ari tapa amo inono avoeto aguhu erevi mane indona ke ao ingito toane, eto uje nau avo irae rate uje no avo aisona.” ainge Iesu na pari
MAR 14:37 eto ereto imihe ambotani ere evia avo kito Peter ta degi ke einge ena. “Simon, umo iji isapa simba ari uje ae ue ere evete?
MAR 14:38 Ungo simba ue pari evu. Eto ainge ae amo ungo Satan na engekasuja te ungota ahihi jo ta na aisi uje ere ua te hamo avo ivo ambu ere ua.” ainge eto
MAR 14:39 veto imihe pari mahu ena avo ehako pari
MAR 14:40 eto veto imihe ambotani jenetiuketo ere evio ujena te ke mine ari inono ae kito
MAR 14:41 egerembeto pari ehako enu irae enu veto ambotani ta degi ke einge ena. “Ungo jangu indie ere evevete? Aravora inono eheva, te Embo ta Meni embo sasapura ta ingeni ta ikari iji puvija,
MAR 14:42 erevu! Na harika embo puvuto ere hua.” Ainge Iesu na ijinu.
MAR 14:43 Judas amo Iesu ta ambotani 12 rate vahai amite Judea ta priest pepeni te embo pepeni te ke pepeni simba ari embopo te aingeto embomeni ikeo asivo te kepata te humbuto Judas ga Iesu humbasi puvua.
MAR 14:44 Eto harikari embo amina “Na pambuto embo vahai andito mune aisona aravora humbuto pambuvujo” ainge mahu ena
MAR 14:45 avoeto puvuto Iesu ta degi tihi tambueto pambuto, “Ahe poekari embo” ijie andito mune unu
MAR 14:46 isoro embopo na puvuto Iesu andito jigito humbuho
MAR 14:47 embo vahai na amita asivo kororo eto humbuto priest peni ta pure embo vahai amita oje jeto tiukenu
MAR 14:48 Iesu na enana ta degi ke einge ena “Na pegene embo mane rate asivo te kepata te jigito na humbasi ere puvuhova
MAR 14:49 te na iji tapa temple jo ta embomeni ahe poekehena amikote na humbaeheva ta God ta ke mahu kajena avoeto ere ova,” ainge ijinu
MAR 14:50 ambotani na joru Iesu toto pahuo
MAR 14:51 meni singa vahai amina bo nei irae vahai amina pohuketo ambota pahunu
MAR 14:52 kito bo ta jigio bo houketo teho hamo na pere huheveto pambuna.
MAR 14:53 Eto priests pepeni te embo pepeni te ke pepeni simba ari embopo te aingeto vahaita horuketo mihio isoro embopo na Iesu humbuto pambuto ikeo hetena.
MAR 14:54 Eto Peter na ambota tunga te jaheki ue pambuto priest peni ta ke kasari bande huga jo ta horeto bande simba ari embopo ga ji erihe mihinu
MAR 14:55 priests pepeni te Judea embomeni ta council te aingeto bande jo ta Iesu ta sapura deire avo eto ingito taro pehaja ganoka eto ingia,
MAR 14:56 eto embo isapamane na ke hotembari nei te nei te sokova na eto Iesu ta sapura hambasi ea rate hambae ea.
MAR 14:57 Eto embo nei nei na ereto ke sokova na einge ea
MAR 14:58 “Embo emina ke einge eoi ingiora, ‘Temple ingeni na gerikari avo nanena ano karaun eto veau iji 3 ehako embo ta ingeni na ae avo nane aisona’ ainge eoi ingiora” ainge ea
MAR 14:59 amo tunga hotembari vahai na ae ra.
MAR 14:60 Eto Priest peni na ereto embo ta orohuta heteto Iesu ta degi ke einge ena “Embo isapamane na umo ganoka ere ora emo ke mine aote?” ainge enu
MAR 14:61 Iesu ke mine ae enu ehako Priest peni na ke einge ena, “Umo God jakeka eagora amita Meni Keriso rete?” ainge enu
MAR 14:62 Iesu na ke mine einge ena. “En, erea amo namora te ungo na Embo ta Meni God Sovera te amita ingeni be ta arumbeto uhu i ta johi ga puvurou kesova.” ainge enu
MAR 14:63 priest peni na ingito tumo ue amita bo jigito osesekihie
MAR 14:64 ke einge ena, “Aravora embo emita pehumba ke irae ehija rate ke sapura be eria amo God ta javo ere uhua avoeto ungo council te embomeni te ungota ke deire avo evujo,” ainge enu enana jo vahai eto taro pehaja ke ijie
MAR 14:65 embo nei nei na urumbihe hamo ta isuva ue tombu togeto ke einge ea “Peroveta, amuna umo ere toroi?” ainge ijie torue humbuto isoro embo ta ingeni ta ikeo humbuto ingeni na tea.
MAR 14:66 Eto Peter priest peni ta bande huga jo ta ji erihe mihinu Priest peni ta pure ari kakara na Peter kito ke einge ena, “Umo Iesu, Nazareth embo amita toho ra” ainge enu
MAR 14:68 Peter na “Umo ke do erea amo na kiae ra,” Ke ainge eto pambuto huga degi pe ta heteto mihinu pure ari kakara amina ehako embomeni areto mihia amita degi, “Embo emo Iesu ta ambotani ra” ainge
MAR 14:70 enu Peter na ingito “Ke amo ke be manera” ainge ena. Eto iji isapa mihimihe embomeni na “Ke be ra umo Galilee embo avoeto ungo vahaira” ainge eo
MAR 14:71 Peter na ke einge ena “Ungo ke ereva embo amo na kiaera te ke erena emo God ta tihi ta erena ungo be ingivujo” Ke ainge ijinu
MAR 14:72 di o hora javone heriso enu Iesu na ke mahu einge enu, “Umo na kiae ke ijiro di ohora javone iji heriso aisuja” ainge ena avo Peter na hotembeto osaga pajire be kito si ena.
MAR 15:1 Eto iho vujenu priests pepeni te embo pepeni te ke pepeni simba ari embopo te council embomeni te aingeto ke kaseo irae enu Iesu punduto humbuto pambuto Rome ta gavana Pilate ta ingeni ta ikeo hetenu
MAR 15:2 Pilate na Iesu ta degi ke einge ena, “Umo Judea embo ta king rete?” ainge enu Iesu na “Inena erea aravora” ainge enu
MAR 15:3 Priests pepeni na ke nei te nei te na Iesu ta degi pehumba eo
MAR 15:4 Gavana Pilate na ingito Iesu ta degi ke einge ena. “Eto embo isapamane na no degi ta ke neite neite erera amo ke mine aotemo mane ao?” Ainge enu
MAR 15:5 Iesu na ke mine ae unu Pilate na kito mana mana ena.
MAR 15:6 Eto pondo iji te amo tipura embo vahai avo embomeni na tambu ta pambaja uje uo Pilate na ingito ikenu tipura toto arahata pambuna.
MAR 15:7 Eto pondo iji te amo Pilate na ainge pere ere uahija avoeto embomeni Pilate ta degi pambuto embo vahai tipura toto arahata pambaja penunu ea. Eto embomeni na Iesu jakeka ere ijiahera avo Priests pepeni na kito tumo eto Pilate ta ingeni ta ikea avo Pilate na kito embomeni ta degi ke einge ena, “Judea ta King erevi avo arahata pambaja uje ere ovete?” ainge ena. Rate tipura embo vahai javo Barabbas amo gavana ta degi isoro eto embo isapamane tenu pepehekea avoeto ikeo tipura eto mihahija
MAR 15:11 avo Priests pepeni na jo vahai eto eo embo tapa na arahata pambaja ke eo,
MAR 15:12 Pilate na embomeni ta degi ke einge ena “Rate embo erevi ungota King ke eagova amita degi do ano?” ainge enu
MAR 15:13 embo tapa jo vahai eto ke einge ea “Ji atahu ta tejo pehai!” ainge eo
MAR 15:14 Pilate na “Amita sapura deire” ainge enu embo tapa na gagaha eto “Ji Atahu ta tejo pehai” ainge eo
MAR 15:15 Pilate na embo ta uje ea avo ara Barabbas tipura ta mihina avo enu arahata puvuto pahunu Iesu avo esi na ejembeto torue ji atahu ta tara Rome isoro embopo ta ingeni ta ikenu.
MAR 15:16 Humbuto gavana ta bande peni ta horeto isoro embo tapa jage enu vahaita puvuo
MAR 15:17 bo pangari avo Iesu ta hamo ta humbuto asukea eto king ta siro kope ke ijie esi pepe te avo horoveto uha ta asukea
MAR 15:18 eto humotepain ue “Oro, Judea embo ta King” ainge ijie urumbihe
MAR 15:19 inoha uhu na humbuto siro ta torue isuva ue paunge teteri eto humo te pain ue urumbea.
MAR 15:20 Eto urumbeo irae enu bo pangari asukena avo houketo humbuto bo amita avo ikeo asukenu ji atahu ta tasi humbuto pambua.
MAR 15:21 Eto humbuto degi ta pahuo enda Cyrene embo javo Simon amo Rufus te Alexander te ta mamo avo amita pure ta eto puvutuhunu isoro embopo na kito “Umo huma embo emita ji atahu humbuto pambu” ainge eo Simon ke agi eto Iesu hondate eto humbuto pambuna.
MAR 15:22 Eto Rome ta isoro embopo na Iesu humbuto pambuto degi javo Golgotha ta eagora amita be amo ‘Embo ta uha vehu’ ai ta humbuto pambua.
MAR 15:23 Eto Iesu ta degi wine te sivo javo myrrh te taveto ikea te Iesu na indari uje ae eto tona.
MAR 15:24 Eto iho 9:00 unu Iesu ji atahu ta teto amita bo avo embo amuna humbau avo eto ituha koso te tuho te jigito siriketo bo umbua.
MAR 15:26 Eto embo ta sapura deire avo kiora kajari degi ai ta ke einge kajea JUDEA EMBO TA KING ainge kajea.
MAR 15:27 Eto pegene embo heriso amo nei ingeni be ta nei ingeni anga ta aingeto ji atahu ta tea
MAR 15:28 eto ari ainge amo God ta ke ta mahu ainge ara kajari avo eto ea “Amo ke pepeni poekari embopo amiga inono ra” ke ainge mihia.
MAR 15:29 Eto embomeni puvuto Iesu kogue vani vani ue ke einge ijie urumbea. “Umo temple aimbeto iji 3 amita jo ta gerikasi ijiea avoeto umo oenga eto kito ji atahu toto veto pambu.”
MAR 15:31 eto priests pepeni te ke pepeni simba ari embopo te aingeto Iesu urumbihe ke ehako einge ea “Embo nei avo hondate uija te umo oenga hondate ari inono ae ra.
MAR 15:32 Eto umo Keriso be eto Israel ta King kito avo ji atahu toto veao dago umo kito ke be aisora.” ainge ijio pegene embopo heriso Iesu ga ji atahu ta tea amite tapa Iesu urumbea.
MAR 15:33 Eto iji 12 eto pambuto hure iji 3 ainge amita orohuta enda tapa mume sihukihinu hure 3 ainge
MAR 15:34 Iesu na gagaha eto einge ena “Eloi, Eloi lama sabachthani” ke emita be amo “God Nau, God nau, do eto na tohoe?” ainge ijinu
MAR 15:35 embomeni mihia amina ingito ke einge ea “Ingavu, Elijah jage eria.” ainge eo
MAR 15:36 embo vahai na huheveto pambuto soi humbuto inoha uhu tumo ta egeto ‘Wine’ ta hatito humbuto puvuto Iesu na indoja ikihe ke einge ena, “Aravora Elijah jage eria avo puvuto humbuto ikau veaute avo kesira,” ainge enu
MAR 15:37 Iesu na ehako jajage ijie amita hen jamo ena.
MAR 15:38 Eto Iesu pehihenu temple jo ta bo peni vahai be i ta eto veto enda ta eto degi peikari amo oenga i ta eto horereketo veto enda ta ena.
MAR 15:39 Eto Rome ta isoro embo peni amina Iesu kogue mihinu Iesu ta hoenge irae enu kito ke einge ena, “Ke be embo emo God ta Meni be ra” ainge ena.
MAR 15:40 Eto evohu javo Salome te da Magdala evohu javo Mary te eto singa James te Joses ta e Mary te aingeto evohu nei nei ga hoi ta heteto Iesu kogue mihia
MAR 15:41 evohu amo Galilee ta Iesu ambo ambo ue Iesu ta indari ikihore indiahija evohu amite evohu nei nei te aingeto Iesu ga da Jerusalem ta puvua.
MAR 15:42 Eto evito amo jangu indari iji avoeto indari nununga uo mume sihukihinu.
MAR 15:43 Da Arimathea embo javo Joseph amo council ta embo peni rate God ta iji puvurou God na tihi jigesuja avo simba ere uahija amina joru ae sovera eto pambuto Pilate ta degi Iesu ta hamo humbuto kovasi penunu enu,
MAR 15:44 Pilate na Iesu mahu pehari ke enu ingito tututu eto be kesi isoro embo peni avo jage enu puvunu “Iesu peheheite” ainge enu
MAR 15:45 “Mahu pehehija” ainge enu ingito Joseph na Iesu ta hamo umbaja ke enu
MAR 15:46 Joseph na bo parara koso avo koro na ombuto humbuto puvuto ji atahu ta humbuto ikenu venu hamo bo na togeto humbuto pambuto use koro ho ta kovari ai ikenu herekenu koro nei na aherekenu puvuto use pe peikenu
MAR 15:47 da Magdala evohu javo Mary te evohu Mary nei amo Joses ta e amite na Iesu degi dainge kovea avo kia.
MAR 16:1 Eto jangu indari iji irae enu da Magdala evohu javo Mary te eto James ta e Mary te evohu Salome te aingeto jeune mune te koro na ombuto humbuto Iesu ta hamo ta kuhasi Sunday iho vujenu ihote Iesu ta use ta pahue
MAR 16:3 ke mine ara ijie einge ea, “Use pe ta koro peni vahai ra mo amuna hirikaro ungotena jo ta horaro?” ainge ijie
MAR 16:4 puvuto hange ambu eto koro use pe ahurekari avo hirikari mihinu kito
MAR 16:5 use jo ta horeto meni singa bo parara koso asukari ingeni be hena ta arumbeto mihinu kito mana mana uo,
MAR 16:6 singa amina ke einge ena. “Ungo joru avojo, Iesu Nazareth embo ji atahu ta toruera amo vasiri te ereto pambija. Kivu, amita ikari herekari besi teho erevira!
MAR 16:7 Te ke mahu Iesu na ehei ingera avoeto Galilee ta ere pahua ungo pambuto Peter te amita ambotani te evujo ingito Galilee pambuto Iesu hambare.”
MAR 16:8 ke ainge enu joru ue tata tita ue huheveto use toto pambua. Eto joru ue embomeni ta degi ke hande ae teho pambua.
MAR 16:9 Eto Sunday iho vujenu Iesu vasiri te ereto pahunu da Magdala evohu javo Mary amo ohihi sasapura tapa 7 ainge na jo ta horari avo Iesu na mahu enu kojena
MAR 16:10 amina Iesu pambunu kito evohu amina pambuto ambotani sisisasi ijie mihio ke einge ena, “Iesu mahu vasiri te erehei kehena,” ainge enu ambotani na evohu amita ke avo ingito ke be ae ea.
MAR 16:12 Eto iji nei ambotani heriso na degi ta isa uo Iesu puvunu amita tombu hajire nei kito
MAR 16:13 pambuto ambotani nei uhoho ta degi eo ingito ke be ae ea.
MAR 16:14 Eto iji nei ambotani 11 na arumbeto indie mihio Iesu puvuto ambotani isembena amita be amo Iesu vasiri te erena avo embo nei na kito ea te enana na jo ngahia ue Iesu ke be ae ea.
MAR 16:15 Eto Iesu na ke einge ena, “Ungo enda tapa ta pambuto embo tapa ta degi God ta ke hande evujo ingore.
MAR 16:16 Eto embo amuna God ta ke avo ke be eto bapataito aisuja amo God na oreketo humbasuja, rate embo amuna God ke be ae aisuja amo toavo pambuto osaga kesuja.
MAR 16:17 Eto ke be ari embomeni na hajire einge aro kesora, javo nau ta ahihi sasapura ohimbasora, eto ke ehaha nei te aisora
MAR 16:18 eto o koso o javo jihuri ainge amo ingeni na humbasora eto indahu donda indito mane pehasora eto ambure embomeni ta hamo ta ingeni tembaro kojasora.”
MAR 16:19 Eto ke ainge tapa enu irae enu God na Bada Iesu humbuto uhu ta pambuto ikenu Mamo ta ingeni be ta arumbena.
MAR 16:20 Eto ambotani na enda tapa ta pambuto ke hande uo Bada na enana hondate unu hajire neite neite uo embomeni na kito ke be ea.
LUK 1:1 Ajao nau embo okose, Theophilus, eto Iesu kiari embopo eto ke agi embopo na tapa do uoi ere koguahera eto ere ingihahera avo hihi tirihore embo nei nei na ingihe etokito kakajekeagora eto ahe poekagora.
LUK 1:3 Avoeto nanena eha rate ihikena ai ta eto puvuto eha oroho ei ta ari do uija eto ke do ijija avo tapa sirikehene tambu ehei no degi ta ere kajihena.
LUK 1:4 Avoeto mahu ahe poekihe ari ingari avo ei ta eheketo humota ari haite kito ke be aisoa.
LUK 1:5 Eto enda Judea ta King Herod ta iji te priest vahai javo Zechariah amo Abijah ta javo ta priest pure ere uahija amite amita ae javo Elizabeth amo priest mahu javo Aaron ta ahijera, amina
LUK 1:6 Bada God ta ke pepeni te ari te tapa agi ere uahera avoeto God ta tihi ta ae te ivu te jajavotohora
LUK 1:7 te enana meni ingae mihahera evovo ari iji auvena.
LUK 1:8 Eto priest ta ari avo Zechariah ta priest pure ari embopo ta pure iji puvunu amuna priest pure aisuja avo ituha tuho te koso te jigio Zechariah na tuho kororo eto humbuto Bada ta temple ta horeto ji pangire mune te avo pene gaga ta iketo undukenu evikihie iposi God ta degi vihina.
LUK 1:10 Eto iposi vihari iji te Zechariah temple jo ta pure ue mihinu embomeni isapamane araha ta horuketo pari ue mihio
LUK 1:11 Bada ta Anera na pene gaga ingeni be hena ta irerembeto mihinu
LUK 1:12 Zechariah na kito tututu ue joru unu
LUK 1:13 Anera na amita degi ke einge ena. “Zechariah, joru aojo. No pari eagoa avo God na ingito au no ae Elizabeth na meni ingau meni amita javo John ikejo.
LUK 1:14 Eto meni ingasuja avoeto ungo te embomeni tapa te tunga javotoho ue osa aisova.
LUK 1:15 Amita be amo amina Bada ta tihi ta embo dombo aisuja eto ‘wine’ te ‘gin’ te umo ainge amo mane indesuja te e ta hini ta eto Ahihi Otohu na jo enetasuja.
LUK 1:16 Eto amina au Israel ta meniundi na jo ahereketo enana ta Bada God ta degi egerembasora.
LUK 1:17 Eto peroveta Elijah avo Ahihi Otohu na sovera ikena ainge dombo amita degi sovera ikau Bada ta tihi ta pure ue embo amuna Bada ta toho aisora avo siriketo nununga ururou mamone na ehako meniundi osa aisora eto God ta ke agi ae embomeni na embo jajavotoho ta kiari avo uje aisora.” ainge Anera na enu,
LUK 1:18 Zechariah na amita degi ke einge ena, “Namo te nau ae te dago evovo ere ora avoeto ke erea avo ke be rete amo daingeto kione?”
LUK 1:19 ainge enu, Anera na ke mine einge ena, “Na Gabriel God ta tihi ta heteto iragona avo no degi ta duru javotoho erevi ana ikehei puvena.
LUK 1:20 Avoeto ke nau ingijo, umo ke nau ingito ke be ae ehea avo eto pe no vahaikano ke ambu eto ere uma ke erena avo puvurou kito ke ehako aisoa.”
LUK 1:21 ainge Anera na ijinu ingihe mihinu embomeni araha ta simba mihia amina Zechariah do ue iji koso ena avo hotembea.
LUK 1:22 Eto Zechariah araha ta puvuto ke ari inono ae enu ingeni na ahe ahe enu embo kito einge hotembea ‘Temple jo ta ehure ainge kito puvuto ere ua’ ainge hotembea.
LUK 1:23 Eto amita pure unu iji irae enu tohota da ta pambuna.
LUK 1:24 Eto amita ambota ae Elizabeth na urete eto ke einge ena, “Na meni ingae mihie amo embo na koguore me kiagona te God na na kito ehei nau me irae ehija,” ke ainge eto hariga 5 amita jo ta amo bande jo ta pere mihahija.
LUK 1:26 eto Elizabeth urete ena amo hariga 6 irae enu Anera Gabriel avo God na ikenu veto enda Galilee ta da vahai Nazareth ai ta pambuto
LUK 1:27 kakara vahai javo Mary avo King David ta ahije vahai Joseph na jimbaja e mamo na kerea rate jimbae mihinu Anera amita degi
LUK 1:28 puvuto ke einge ena, “Oro, God ta osari kakara, Bada umo te iraguja,” ainge enu
LUK 1:29 Mary na ingito pekari amita be amo deire avo osaga te tapa hotembu hotembu unu
LUK 1:30 Anera na amita degi ke einge ena, “Mary, umo joru aojo. God na umo osa ereua
LUK 1:31 eto ki, inena urete eto meni ingeto amita javo Iesu ikasoa
LUK 1:32 eto amina pajito embo peni au God i be i ta amita Meni ra ainge aisora. Eto Bada God na au amina amita umbovo David ta honda eto
LUK 1:33 heteto Jacob ta jeka hoka simba aisuja. Eto amita tihi jigari amo mane irae aisuja rate datoho ta iresuja,” ainge enu
LUK 1:34 Mary na Anera ta degi ke einge ena, “Ari ainge amo daingeto ano, na ivu jimbaera,” ainge enu
LUK 1:35 Anera na einge ena, “Ahihi Otohu na no degi ta veau God ta sovera isapamane na umo uhumo aisuja, avoeto meni ingasoa amo God ta Meni Otohu ke aisora.
LUK 1:36 Eto kijo, no jao vahai Elizabeth, amo meni ingari inono ae ainge embomeni na eagora te eha evovo ue meni ingehija amo hariga 6 irae ereua
LUK 1:37 amita be amo God ta degi ari tapa amo inonora,” ainge enu
LUK 1:38 Mary na ke einge ena, “Aravora, na Bada ta pure ari kakara avoeto ke do erea avo God na ikau puvurou kesona,” ainge enu Anera toto pambuna.
LUK 1:39 eto iji amite Mary na ereto enda Judah ta tiri ta da vahai ai sau be pambuto
LUK 1:40 embo Zechariah ta bande ta horeto amita ae Elizabeth pekenu
LUK 1:41 ingito meni jo ta kundu kandu unu Elizabeth avo Ahihi Otohu na jo enetihinu
LUK 1:42 ke isara na einge ena, “Evohu isapamane rate God na umo vahai avo osa ere ua te no hini ta ve amite tapa.
LUK 1:43 Umo nau Bada ta aja aisoa avoeto na kesi puvea avoeto mana mana ue tunga javotoho ere ona.
LUK 1:44 Eto na no pekari avo nau oje ta puvei ingihene meni nau hini ta tunga javotoho ue kundu kandu ehija.
LUK 1:45 Eto Bada na no degi ta ke do ehei ingea avo puvuroja humota ereoa avoeto tunga javotoho ereoa,” ainge Elizabeth na enu.
LUK 1:46 Mary na ke einge ena, “Na jo nau tapa na Bada jakeka erena
LUK 1:47 eto God nau orekari embo avoeto ahihi nau tunga javotoho ereua.
LUK 1:48 Amita be amo amita meni kakara amina meni isapa sira eto pure eaguja avo kito au embo te evohu tapa be tapa puvuresora amina na hotembeto jakeka aisora.
LUK 1:49 Amo God sovera isapamane te na ari dombo be nau degi ta ehija avoeto amita javo otohu aisora.
LUK 1:50 Eto meni mahu ingerekari amite eto puvuto eha ingerekihera amite tapa amuna God joru eagora avo God na kogue jo uoi hondate eaguja
LUK 1:51 eto na embo peni ra ijie jo ta hotembagora embomeni avo God na amita ingeni sovera te amina teoi pojembeto pambuora.
LUK 1:52 Eto tihi jigari embo pepeni avo God na eoi enana ta tihi jigari avo tore embo teho avo humbuto ikeoi tihi jigagora
LUK 1:53 eto indari irae embopo avo unduoi indari javotoho na indiore hini pevihaguja te haja vaja embomeni avo ikeoi indari indae teho pambuora.
LUK 1:54 Eto God na Abraham te amita meniundi te ungotenau mamahamane tapa ta degi ke ena avo hotembeto amita jo ari jenambu ae ue amita Israel pure ari meniundi mahainge hondate uija.”
LUK 1:56 eto ke ainge Mary na enu irae enu Elizabeth ta bande ta hariga 3 amita jo ta mihimihe tohota da ta pambuna.
LUK 1:57 Eto Elizabeth ta meni ingari iji puvunu meni singa ingena.
LUK 1:58 Eto Bada na Elizabeth meni ingae mihoi ere koguahija avo jo enu meni ikenu ingeto osa unu amita da vahai embomeni te tapa osa ea.
LUK 1:59 Eto Elizabeth meni ingenu iji 8 irae unu Judea embopo ta ari ainge avoeto meni ta vi hamo tiukasi puvuto ue meni ta javo mamo Zechariah saso asi uje ea te
LUK 1:60 e na, “Meni ta javo John ikasora,” ainge enu
LUK 1:61 enana ke einge ea, “Rate ungota ohihi ta javo John amo iraera,”
LUK 1:62 ainge eto mamo Zechariah na javo do ikaja ingeni na ahe ahe eo paper ikara ahe ahe enu
LUK 1:63 ikeo ke einge kajena, “Meni emita javo John ra,” ainge ijie kajenu
LUK 1:64 embomeni kito mana mana uo Zechariah ihiketo pe handeketo ke ijie God jakeka ena.
LUK 1:65 Eto da embomeni tapa na ari avo kito mana mana eto amita ke enda Judea ta da tapa tiri hena ta tirio
LUK 1:66 ingito tunga javotoho ue meni avoeto Bada na amita ingeni na John hondate unu pajina kito, “Pure pajire do aisuja,” avo hotembea.
LUK 1:67 Eto be John amita mamo Zechariah avo Ahihi Otohu na jo enetenu ari do puvuresuja avo ke einge harikena.
LUK 1:68 “Israel ta Bada God amo javotohora. Eto amina ungotena uje ae ue kitoho ari embomeni ta ingeni ta eto orekasi ke amita peroveta ototohu mamahu ta degi enu ingito hande ere uahera. Avoeto amita embomeni hondate asi puvuto amita pure ari meni David ta jeka hoka vahai avo amina au ereto sovera te na ungotena orekasuja.
LUK 1:72 Eto ainge amo noma kaeto ke otohu ena avo jeneambu ae ue ungotenau ohihi hotembihe hondate ere ua.
LUK 1:73 Eto noma kajihe ungotenau mama Abraham ta degi ke ena amo ungotena God ta degi otohu ta mihie joru ae ue jo javotoho ari na iji tapa mahainge God jakeka ara ungotenau kitoho embo ta ingeni ta eto orekasuja.
LUK 1:76 Eto meni nau, umo God i be i ta amita peroveta ke ijiroro Bada ta puvurari degi sirikihe ke ijiro embomeni avo
LUK 1:77 Bada God ta jo ari na daingeto ari sasapura toasi harikaro ingito hotembeto toau amita embomeni be aisora.
LUK 1:78 Eto God ta irari degi ta eto iho vujihirou pehari joru ue mume ta iragora embomeni amita degi usasa au peka ta pambari degi avo kogue pambasora.” ainge Zechariah na ena.
LUK 1:80 Eto be John avo papajihinu amita ahihi sovera ari puvutuhunu ojagatambu ta pambuto mihimihe enda Israel embomeni ta degi ke ihiketo hande ena.
LUK 2:1 Eto John meni isapa ta irari iji te embo peni Caesar Augustus na enda embo tapa census ue javo humbasi ke ikenu pambuna.
LUK 2:2 Eto census umbae peko ta enda Syria ta gavana Querinius hetari iji te census aravo ihiketo ea.
LUK 2:3 Avoeto embo tapa na pambuto tohota ohihi ta da be ai ta javo kajara ke ena.
LUK 2:4 Eto embo Joseph amo King David mahu mihahija amita ahije vahai avoeto da Nazareth enda Galilee jo ai ta mihimihe toto David ta da Bethlehem Judea enda ai ta pambasi ue
LUK 2:5 Mary amo amita mahu kerari avoeto humbuto pambau census ta javo vahaita kajara humbuto pambuna.
LUK 2:6 Eto Mary amo mahu urete ari avoeto da Bethlehem ai pahunu meni ingari iji puvunu
LUK 2:7 amita kihi ta meni singa ingeto bo na togeto o ta indari ikari besi ai ta jurukenu evina, (bande tapa amo embo na enetari avoeto).
LUK 2:8 Eto enda ai ta o ‘sheep’ simba ari embopo na ehe tambuta o ‘sheep’ simba ere uahera amita degi
LUK 2:9 Bada ta Anera na sariketo puvunu Bada ta usasa peni vahai na puvuto daha daha ue joekenu enana tututu ue joru uo
LUK 2:10 Bada ta Anera na enana ta degi ke einge ena, “Joru mane aisova te kivujo, tunga javotoho ari isapamane embo tapa ta degi puvuto ere hua amita duru avo humbuto ere puvuhona.
LUK 2:11 Amo Bada Keriso ungota orekari embo avo eha David ta da ai ta ungo avoembo e na eha ingehija.
LUK 2:12 Ungo amita hajire kesova amo meni avo bo na togeto o ta indari ikari besi ai ikehere mihia,”
LUK 2:13 eto ke ainge enu uhu ta Anera isapamane amina sasariketo puvuto God jakeka ijie haveni einge ea,
LUK 2:14 “God i ta amita degi osa jakeka erera eto enda ei ta God osari embomeni ta degi peka iroi,”
LUK 2:15 ainge eto irae eto uhu i ta pahuo o simba ari embopo na ke mine ara einge ea, “Bada na ke ikehei puvuto ehere ingera avo ungote da Bethlehem ta pambuto kesora,”
LUK 2:16 ainge eto ereto sausau pambuto meni o ta indari ikari besi ai ta jurukeo hereketo mihina amite Mary te Joseph te ainge hambuto
LUK 2:17 kito meni amita ke Anera na enu ingia tapa avo hande eo
LUK 2:18 embomeni na o simba ari embopo ta ke ingito mana mana ea.
LUK 2:19 Rate o simba ari embopo na ke ea tapa avo Mary na ingito amita jo ta hotembari isapamane ena.
LUK 2:20 Eto o simba ari embopo na pambuto Anera na do ea tapa avo ainge inono ta kia avoeto God osa jakeka ue egerembeto pambua.
LUK 2:21 Eto meni ingenu iji 8 irae enu Judea ta ke pepeni avoeto vi hamo tiukea. Eto Mary urete ae mihinu Anera na javo Iesu ikara ke ena avoeto meni ta javo Iesu ikea.
LUK 2:22 Eto meni humbuto doru eto mihina amita iji irae aja Moses ta ke pepeni avo agi eto da Jerusalem ta pambuto God ta degi hande pene gaga ta ikihe Iesu Bada God ta toho aja hande ikasi humbuto pambua.
LUK 2:23 (amita be amo God ta ke pepeni ke kajari ai ta ke einge mihia, evohu na meni singa bugo ingasuja amo God ta ke agi ue otohu aja
LUK 2:24 di dipo heriso ikarotemo di dirogu meni heriso ikaro avo Bada God ta ke pepeni avo agi eto Iesu humbuto pambua.)
LUK 2:25 eto embo vahai javo Simeon da Jerusalem ta mihahija amo embo javotoho eto God ta ke agi ari embo amina God na Israel embomeni hondate aisuja iji avo simba ere uahija eto Ahihi Otohu na amita jo enetihahija
LUK 2:26 avoeto amo mane pehasuja te kihi Bada God ta hondate ari Meni Keriso avo kito pehasuja avo Ahihi Otohu na harikenu ingina.
LUK 2:27 Eto Simeon na Ahihi Otohu ta ke agi eto temple jo ta horenu Mary te Joseph te na ke pepeni agi ue meni Iesu God ta toho aja humbuto horeo
LUK 2:28 Simeon na kito meni humbuto vinduketo God jakeka ijie ke einge ena,
LUK 2:29 “Bada God, inena embomeni no siriketo humbasi embo tapa ta tihi ta ereoa avo tihi nau na ere kogona amo enda nei embomeni na God ta usasa kesora eto embo tapa na Israel jakeka aisora, avoeto no ke ehei ingihana avo ejo no pure ari embo peka ta pambai,” ke ainge Simeon
LUK 2:33 na Iesu avoembo ijinu amita e te mamo te ingito mana mana eo
LUK 2:34 Simeon na e te mamo te javotoho ari iketo e Mary ta degi ke einge ena, “Kijo, God na au meni eremina Israel embo nei vihesuja nei veasuja. Eto meni emo God ta hajire avoeto embo isapamane na kito urumbasora.
LUK 2:35 Eto meni amina au embo ta hotembari jo ta ojikari avo arahata puvurou kesora. Eto jo no ta memenga osaga isapamane kesoa,” ainge Simeon na ena.
LUK 2:36 Eto evohu peroveta vahai javo Anna amo embo Phanuel ta iae eto amita ohihi javo amo Asher ra amo kakara ta embo jimbuto jua 7 ainge ena rate amita ivu pehenu
LUK 2:37 doru eto mihie amita jua tapa 84 avo humbuhunu evovo ena. Eto temple jo toto araha ta pambae asa jo ta mihie indari ajireketo God jakeka ijie ijite mumete pari ue mihahija.
LUK 2:38 Eto meni Iesu humbuto temple jo ta puvua iji amikote evohu Anna na puvuto meni avo kito God jakeka eto da Jerusalem avo God na oreto humbasuja iji simba ere uahera embopo amita degi Iesu ingari ta duru avo hande ena.
LUK 2:39 Eto Mary te Joseph te Bada God ta ke pepeni agi ue temple jo ta tapa eo irae enu tohota da Nazareth enda Galilee jo ai pambua.
LUK 2:40 Eto meni Iesu aravo pajito sovera ari te kiari te humbunu God na kito osa ue javotoho ari ere ikihahija.
LUK 2:41 Eto jarukari ta pondo iji puvutohoi Iesu ta e te mamo te jua mahainge da Jerusalem ta pambuhahera.
LUK 2:42 Eto Iesu ingea avo jua 12 humbuhunu enana ta ari ainge avoeto pambae peko ta
LUK 2:43 pambuto pondo eo irae enu egerembeto puvutuhue meni singa Iesu amo asata mihinu e te mamo te na hotembae toto ere puvutohumihe
LUK 2:44 embo isapamane ere puvutuhora avoeto embo ga puvurari ke ijie toto pahuo iji irae enu Iesu kiae eto amita toho uho nei amiga irari ke ijie jombure ea rate
LUK 2:45 hambae eto egerembeto Jerusalem ta pambuto jombure ea.
LUK 2:46 Eto jombure uo iji 3 irae enu Iesu temple jo ta ahe poekari embo ga arumbeto mihie ke ijio ingihe ke mine ara ijie mihio hambua
LUK 2:47 eto embomeni na meni amita kiari te ke mine ari te avo kogue ingihe mana mana eto uje peni vahai ea.
LUK 2:48 Eto amita e te mamo te na kito mana mana ue e Mary na ke einge ena, “Nau meni, umo do eto dagota degi osaga ikehe? Namo te no mama te na umo hotembu hotembu ue iji koso umo jombure ehera.” ainge enu,
LUK 2:49 amina ke mine einge ena, “Ungo do eto na degi nei nei ta jombure eheve? Na degi neita iraerate nau Mama ta bande ta mihena avo ungo kiae ue jombure eheve?” ainge enu
LUK 2:50 ingito amita be avo deire avo hotembae ea.
LUK 2:51 Eto amina enana ga pambuto da Nazareth ai mihie e ta mamo ta ke tapa agi ena rate amita e na amita ari tapa avo jo ta ere hotembihahija
LUK 2:52 eto Iesu pajito kiari javotoho humbunu God te embo te na kito osa ea.
LUK 3:1 Eto Caesar javo Tiberius na heteto jua tapa 15 ainge simba unu God ta ke avo Zechariah ta meni John ta degi ojaga tambu ta puvuna. Eto iji amikote Pontius Pilate amo enda Judea ta gavana ra, Herod amo enda Galilee ta embo peni ra, eto Herod ta namei Philip amo enda Iturea eto enda Trachonitis te amita embo peni ra, eto Lysanias amo enda Abilene ta embo peni ra eto Judea ta priests pepeni amo Annas te Caiaphas te ra ainge eto John ta pure ihikari iji te embo einge emina tihi ere jigihahera.
LUK 3:3 Eto John na umo Jordan engihita da tapa avo hembuhe embo na tunga ahereketo ari sasapura toari ta bapataito avo ara oje ere kahihahija
LUK 3:4 eto ainge ere uahija amo Peroveta Isaiah na mahu kihi ta einge kajena, “Embo na ojagatambu ta jage eto einge eria, ‘Bada ta puvurari degi siriketo evu tambu ai.
LUK 3:5 Ohono tapa korinekasuja tiri te heti te tapa veto visi visi aisuja. Degi joro joro ari avo tambu aisuja eto hotoko patoko ari degi amo visi visi aisuja. Eto God na embo tapa oreketo humbasuja
LUK 3:6 avo embo tapa na kesora’.” ainge Isaiah na kajena.
LUK 3:7 Eto embomeni isapamane John ta degi bapataito aja puvuo, John na kito ke einge ena, “Ungo o koso o ta meniundi ra. Ungo ta degi embo amuna memenga osaga puvuresuja avo tiumbeto pambava ehei puvevete?
LUK 3:8 Ungo tunga ahereketo iresi uje ere ova avoeto ji be kiari javotoho kiagova ainge dombo ungo vasiri javotoho evujo. Eto ke erena avo ingito ‘Abraham amo dagota mama ra avoeto dago inonora,’ ainge avojo, ungota degi erena be ingivujo. Eto God na au koro erevi sariketo Abraham ta meniundi asora amo inonora.
LUK 3:9 Eto hogoro ji susu ta ikehei mihia eto ji be javotoho ae kito jeto gosukau evekasuja.” ainge enu,
LUK 3:10 embomeni tapa na ke einge eto ingia, “Eto God na dago ari javotoho do ara uje ere oi?” ainge eo
LUK 3:11 John na ke mine einge ena, “Eto asukari heriso kito embo asukari irae amita degi vahai ikasoa eto indari indie kito indari irae embo ta degi ikasoa.” ke ainge ena.
LUK 3:12 Eto ‘Tax’ humbari embopo na puvuto bapataito aja ue einge eto ingia, “Ahe poekari embo, dago God na do ara uje ere oi?” eo
LUK 3:13 John na einge ena, “Eto ungo ‘Tax’ koro umbava mahu heka ari ai ta inono ta avo pere humbasova rate nei hamo ta mane humbasova,” ainge ena.
LUK 3:14 Eto isoro embopo na puvuto einge eto ingia, “Eto dagomo do aro?” ainge eo amina “Embo ta degi jujune ue ke sokova ijie embo ta koro mane pegene aisova te ungota pure ta mine avo inonora ijie irivujo,” ainge ena.
LUK 3:15 Eto embomeni na John ta ke ingihe iji peni puvurari ke ijie enana ta jo ta einge hotembea, “John emo Judea embo ta hondate ari embo Keriso puvija erevi rete,” ainge eo
LUK 3:16 John na ke mine einge ena, “Eto na ungo umo na bapataito ere ona te embo nau ambota puvuresuja amo dombo be sovera te rate na sovera ambura. Na amita utu goru vujekari haite manera. Embo amina ungo Ahihi Otohu te ji vevere te na bapataito aisuja.
LUK 3:17 Eto javotoho davore sapura davore sirikasi nununga ere ua. Javotoho avo siriketo amita harau ta ikasuja eto sapura siriketo ji ta ikau evekasuja ji amita seikari amo irae ra,” ainge eto
LUK 3:18 ke neite neite amina embomeni oje kahihe God ta duru javotoho hande ena.
LUK 3:19 Eto tihijigari embo peni javo Herod amo ari sasapura neite neite ari embo amina namei ta ae pegene eto humbunu John na kito isembena
LUK 3:20 eto ari sapura nei Herod na eto John humbuto tipura ta ikena.
LUK 3:21 Eto John na embomeni bapataito eto irae eto Iesu bapataito enu pari ue mihinu uhu pe hirikenu
LUK 3:22 Ahihi Otohu di dipo ainge eto veto Iesu ta hamo ta arumbihinu uhu ta eto ke einge puvuna, “Umo osari Meni naura avoeto na umo kogue osa ere ona,” ke ainge puvuna.
LUK 3:23 Eto Iesu ingari jua tapa 30 humbuhunu amita ahe poekari pure ihikena.
LUK 3:24 Eto Iesu amo embo Joseph ta meni ke ere ijiahera. Eto Joseph ta mamo amo Heli, eto Heli ta mamo amo Matthat, Matthat ta mamo amo Levi, Levi ta mamo amo Melchi, Melchi ta mamo amo Jannai, Jannai ta mamo amo Joseph,
LUK 3:25 Joseph ta mamo amo Mattathias, Mattathias ta mamo amo Amos, Amos ta mamo amo Nahum, Nahum ta mamo amo Esli, Esli ta mamo amo Naggai,
LUK 3:26 Naggai ta mamo amo Maath, Maath ta mamo amo Mattathias, Mattathias ta mamo amo Semein, Semein ta mamo amo Josech, Josech ta mamo amo Joda
LUK 3:27 Joda ta mamo amo Joanan, Joanan ta mamo amo Rhesa, Rhesa ta mamo amo Zerubbabel, Zerubbabel ta mamo amo Shealtiel, Shealtiel ta mamo amo Neri,
LUK 3:28 Neri ta mamo amo Melchi, Melchi ta mamo amo Addi, Addi ta mamo amo Cosam, Cosam ta mamo amo Elmadam, Elmadam ta mamo amo Er. Er ta mamo amo Joshua, Joshua ta mamo amo Joshua,
LUK 3:29 Joshua ta mamo amo Eliezar, Eliezar ta mamo amo Jorim, Jorim ta mamo amo Matthat, Matthat ta mamo amo Levi
LUK 3:30 Levi ta mamo amo Symeon, Symeon ta mamo amo Judah, Judah ta mamo amo Joseph, Joseph ta mamo amo Jonam, Jonam ta mamo amo Eliakim,
LUK 3:31 Eliakim ta mamo amo Melea, Melea ta mamo amo Menna, Menna ta mamo amo Mattatha, mattatha ta mamo amo Nathan, Nathan ta mamo amo David
LUK 3:32 David ta mamo amo Jesse, Jesse ta mamo amo Obed, Obed ta mamo amo Boaz, Boaz ta mamo amo Sala, Sala ta mamo amo Nashon
LUK 3:33 Nashon ta mamo amo Amminadab, Amminadab ta mamo amo Admin, Admin ta mamo amo Arni, Arni ta mamo amo Hezron, Hezron ta mamo amo Perez, Perez ta mamo amo Judah
LUK 3:34 Judah ta mamo amo Jacob, Jacob ta mamo amo Isaac, Isaac ta mamo amo Abraham, Abraham ta mamo amo Terah, Terah ta mamo amo Nahor,
LUK 3:35 Nahor ta mamo amo Serug, Serug ta mamo amo Reu, Reu ta mamo amo Peleg, Peleg ta mamo amo Ebner, Ebner ta mamo amo Shelah
LUK 3:36 Shelah ta mamo amo Canaan, Canaan ta mamo amo Arphaxad, Arphaxad ta mamo Shem, Shem ta mamo amo Noah, Noah ta mamo amo Lamech
LUK 3:37 Lamech ta mamo amo Methuselah, Methuselah ta mamo amo Enoch, Enoch ta mamo amo Jared, Jared ta mamo Mahalaleel, Mahalaleel ta mamo amo Canaan
LUK 3:38 Canaan ta mamo amo Enos, Enos ta mamo amo Seth, Seth ta mamo amo Adam, Eto Adam ta mamo amo God ra.
LUK 4:1 Eto Iesu avo Ahihi Otohu na jo eneteto kihi humbuto umo Jordan toto
LUK 4:2 ojagatambu ai pambuto iji 40 amita jo ta mihinu Satan na puvuto engekena. Eto indari indae mihinu iji 40 irae unu beuje puvunu
LUK 4:3 Satan na amita degi ke einge ena, “Umo God ta Meni be kito koro erevi e bread sarikai,” ainge enu
LUK 4:4 Iesu na ke mine einge ena, “Eto embo na mane bread pere indie iresuja,” ainge enu
LUK 4:5 Satan na Iesu humbuto degi i be i ai pambuto heteto enu enda neite neite tapa be kina.
LUK 4:6 Eto kogue mihinu Satan na Iesu ta degi ke einge ena, “Enda tapa ere kogoa amo nau ikari avoeto embo ta degi hande ikasona amo tehora
LUK 4:7 avoeto na humotepain asoa amo nane umo embo peni ikano enda erevi tapa tihijigihe hajae vajae embo aisoa,” ainge enu,
LUK 4:8 Iesu na ke mine einge ena, “God ta ke kajari einge mihia, ‘Umo Bada God no vahai avo humotepain ue agi asoa’,” ainge enu,
LUK 4:9 Satan na Iesu humbuto da Jerusalem ta pambuto enu Iesu temple ene i be i ta pambuto hetenu ke einge ena, “Umo God ta Meni be kito kekehuna eto ve.
LUK 4:10 God ta ke einge kajari mihia, ‘God na amita Anera ikau umo simba aisora
LUK 4:11 eto umo ingeni na humbuto orereto veasora avoeto umo koro ta utu mane tasoa,’” ainge Satan na enu,
LUK 4:12 Iesu na ke mine einge ena, “God ta ke nei einge mihia, ‘Umo Bada God no mane engekasoa,’” ainge enu,
LUK 4:13 Satan na engekari tapa avo enu irae enu pambuto iji nei ambota aisuja avo simba ena.
LUK 4:14 Eto Iesu Ahihi Otohu ta sovera na egerembeto enda Galilee ta pahunu amita duru avo embo tapa na embu eo sigeto peni vahai ena.
LUK 4:15 Eto amina enda Galilee ta ke kasari bande tapa ta horihe ahe poekihinu ingihe tunga javotoho ue Iesu jakeka ea.
LUK 4:16 Eto amo pajirari da Nazareth ai ta puvuto amita ari ainge eaguja avoeto jangu indari iji te ke kasari bande ta horeto embomeni ta degi ke ehekasi ue embo ta tombu ta hetenu
LUK 4:17 peroveta Isaiah na ke kajari avo ikeo humbuto hiriketo ke kajari einge avo hambuto embo ta degi ehekenu ingia,
LUK 4:18 “Eto Bada God ta Ahihi na sovera ikau humbuto osaga embopo ta degi duru javotoho hande aisona, eto isoro ta humbari embomeni ano arahata pambasora, tihi vavahaikari ano tihi kujasora, eto hoivo embomeni avo kitoho ta ingeni ta eto umbasona.
LUK 4:19 Bada na embo hondate ari iji puvija ainge hande aisona,” Ke erevi ehekenu irae enu
LUK 4:20 book ahureketo hondate ari embo ta degi iketo arumbenu, embo tapa jo ta mihia amina Iesu be kon eto kio
LUK 4:21 Iesu na ihiketo ke einge enana degi ena, “Ke mahu Isaiah na kajari ehene ingeva amita be amo puvija erevira,” ainge ijinu
LUK 4:22 embomeni na ingito kore eto amita ke ikari amo javotohora ainge ijie ke einge ea, “Emo embo peni ta meni manera teho Joseph ta menira,” ainge ijio
LUK 4:23 Iesu na enana ta hotembari avo kito einge harikena, “Ungo nau degi ta ke einge aisi hotembihevete ‘Sivo embo umo oenga hondate e,’ ainge eto nei ‘Da Capernaum ta ari ehe duru ingera avo ehako da no ei ta e kiore’ ke ainge nau degi ta asi ere hotembihevete?
LUK 4:24 Ungo ta degi ke be erena. ‘Peroveta na embo amita be amita degi ke hande aisuja rate mane ingesora.’
LUK 4:25 rate ke be amo peroveta Elijah irari iji te evohu dodoru isapamane Israel enda ta mihahera. Rate God na enu jua tapa 3 eto hariga tapa 6 amita jo ta ga veae mihahei enda tapa avo beuje iji puvunu,
LUK 4:26 God na Elijah avo ikenu Israel enda ta evohu dodoru ta degi pambae rate enda Sidon jo ta da vahai javo Zarepath amita evohu doru vahai amita degi pambuna.
LUK 4:27 Eto peroveta Elisha ta irari iji te Israel enda ta kini humbari embopo isapamane mihahera rate enana avo God na ae kojae rate enda Syria embo vahai javo Naaman avo enu amita kini irae ena,” ke ainge enu,
LUK 4:28 embomeni ke kasari bande jo ta mihia amina ingito tumo pajire be eto
LUK 4:29 enana ta da heti bende ta kogombari avoeto Iesu humbuto da sahu ta pambuto heti ta gosukaro veaja ke ea rate
LUK 4:30 Iesu na embo ta ugorota hiketo pambuna.
LUK 4:31 Eto Iesu na Galilee da Capernaum ta pambuto jangu indari iji te embomeni ahe poekihe
LUK 4:32 ke ere ijina avo ingito kiari embo be na eria ainge ijie haha puha ea.
LUK 4:33 Eto ke kasari bande jo ai ta embo vahai ahihi sapura na horari amina gagaha eto ke einge ena,
LUK 4:34 “O ve. Iesu Nazareth embo umo dagota degi do asi puve? Umo ao dago irae ara puvete? Eto umo amunure na kiarira. Umo God ta Embo Otohu ra.” ainge enu,
LUK 4:35 Iesu na ke ngahia eto einge ena, “Ke ambu eto embo ta jo ta eto puvuto pambu.” ainge enu, ahihi sapura na embo humbuto gosukenu embo ta ugorota veto pehihenu ahihi sapura avo arahata puvuto pahunu embo javotoho ena.
LUK 4:36 Vasiri avo embomeni na kito vani vini eto ke mine ara eto einge ea, “Ari eha emo deire? Amina amita kiari sovera te na ke eoi ahihi sasapura na ke agi eto arahata puvuto pambuora,” ainge ea.
LUK 4:37 Eto Iesu na do ena amita duru avo sigeto peni enu Galilee embo tapa ingia.
LUK 4:38 Eto Iesu ereto ke kasari bande toto embo Simon ta bande ta pahunu Simon ta umbohi ambure hamo vevere te avo ue mihinu Iesu ta degi eo pambuto
LUK 4:39 engihi ta heteto hamo vevere ere una amita degi ke ngahia enu irae enu ereto embo unduna.
LUK 4:40 Eto mume sihukihinu embomeni ambure neite neite humbari avo humbuto Iesu ta degi puvuo amita ingeni embo tapa ta hamo ta tetembihe enu kokojekea.
LUK 4:41 Eto ahihi sasapura tapa amina embo ta jo ta eto puvuto pahue, “Umo God ta Meni ra,” ainge gagaha eto ijio Iesu na ke ambupu ara ke ngahia na ena amita be amo Iesu amo Judea ta hondate ari embo Keriso avo enana mahu kiari avoeto haekena.
LUK 4:42 eto iho vujenu Iesu ereto embomeni toto embo irae degi ta pahunu embomeni na Iesu jombure ue pambuto hambuto da nei ta pambaja uje ae eto haekeo
LUK 4:43 enana ta degi ke einge ena, “Eto God na amita embomeni siriketo humbuto tihi jigesuja amita duru javotoho avo da ari na ue hande ana ikehei puvena,” ainge eto,
LUK 4:44 da tapa ta pahue Judea ta ke kasari bande ta ke hande ena.
LUK 5:1 Eto Iesu umo ireremba javo Gennesaret hora ai ta heteto mihinu embomeni isapamane na God ta ke ingesi ue asuso pasuso ue puvuto Iesu eneteo
LUK 5:2 o parari embo na e nga heriso umo ahone ta iketo bonga egihie mihio Iesu na avo kito
LUK 5:3 Simon ta e nga ta vihito isapa tihin aja ke enu iarako eto hetenu arumbeto embomeni ahe poekena.
LUK 5:4 Eto ke enu irae enu Simon ta degi ke einge ena, “Umo ukomo ta pambuto bonga gosukejo o ombai,” ainge enu,
LUK 5:5 Simon na ke einge ena, “Bada, dago mumete ere ore iho vujehija amo o timbae rate no uje ere oa avo aisora.”
LUK 5:6 ainge eto umo ugorota pambuto bonga ikeo venu umo o isapamane be horenu humbuto vivihio bonga perara unu
LUK 5:7 namei kamei e nga nei ta ere ua amina puvuto hondate ara ingeni na uvari uvari eo puvuto hondate eo umo o isapamane avoeto e nga heriso pevihito e nga huhurumbeto veasi enu,
LUK 5:8 Simon te amita pure vahai embopo Zebedee ta meni heriso James te John te embo nei uhoho te na umo o isapamane kito vani vini uo Simon Peter na Iesu ta utu ta veto gombuto ke einge ena, “Bada, na embo sapura avoeto na toto pambu.” ainge enu
LUK 5:10 Iesu na Simon ta degi ke einge ena, “Umo joru aojo. Umo eha ihiketo embo timbasoa.” ainge enu,
LUK 5:11 ombo ta pambuto e nga te tapa toto Iesu ambo ambo ea.
LUK 5:12 Eto Iesu da vahai ta pambuto mihinu embo vahai kini na hamo ahurekari amina Iesu kito amita utu ta veto gombuto penunu einge ena, “Bada, umo asi eto kito hamo nau ejo javotoho ai,” ainge enu,
LUK 5:13 ingeni jujuruketo hame ue, “Na aisona, javotoho e,” ainge ijinu kini irae enu javotoho enu.
LUK 5:14 Iesu na ke einge ena, “Eto nau ari erevi mane hande aisoa rate pambuto no hamo avo priest ta degi ejo kioi eto embomeni kito ke be ara Moses ta ke pepeni agi ue no hamo javotoho ehija amita hande pene gaga ta tembejo,” ke ainge Iesu na ena,
LUK 5:15 rate ari amita ke avo embomeni na embu eo peni enu ingito embo isapa mane na amita ke ingito au kokojekasi puvua.
LUK 5:16 Eto Iesu na iji nei nei ainge embomeni toto ojagatambu ta pambuto pari ere uahija.
LUK 5:17 Eto iji vahai Pharisee ari embomeni te Judea ta ke pepeni ahe poekari embopo te da Jerusalem te enda Galilee ta da tapa te enda Judea ta da tapa te vahai ta puvuto Iesu ta ke ingihe mihio, Iesu na Bada God ta sovera na ambure embomeni enu kojea.
LUK 5:18 Eto embomeni na popora embo vahai amo ingeni te utu te meni pehari avoeto gaga ta humbuto puvuto bande jo ta horaro Iesu kioja uje ea.
LUK 5:19 Rate embo na bande jo enetea avoeto horari pe jombure eto bande ene i ta vihito otoho pauketo gaga ga tapa ikeo vena.
LUK 5:20 Eto Iesu na enana ta humota ari kito popora embo ta degi, “Nau meni no ari sasapura avo hotembeto ere toruhona,” ainge ijinu,
LUK 5:21 enana Pharisee ari embomeni ta ke pepeni ahepoekari embopo te na ingito ungo oenga ke mine ara ijie eto einge ea, “Embo emo do eto ke ainge emo erei? God vahai amina embo ta ari sasapura hotembeto toaguja te embo emina God ta javo ere urumbihia,”
LUK 5:22 ainge ijio Iesu na ingito ke einge ena, “Ungo do eto ke ainge amo ereve?
LUK 5:23 Eto na popora embo ta degi, No ari sasapura hotembeto ere toruhona ainge aisona ano ereto pambu ainge asona ke amo davo ejeha re davo ngaiha re?
LUK 5:24 Eto Embo ta Meni na sovera ari humbuto enda ta mihie embo ta ari sasapura hotembeto toasuja avo ungo ke be ava ari erevi aisona,” ainge eto popora embo ta degi, “Nane erena, umo ereto no evari gaga humbuto no da ta pambujo,” ainge enu
LUK 5:25 embo ta tihi ta ereto amita evari gaga humbuto God jakeka ijie tohota da ta pambuna.
LUK 5:26 Eto embomeni na kito vani vini ue God jakeka ijie ke einge ea, “Ari emo mahu einge kiae pekota ere kogora,” ainge ea.
LUK 5:27 Eto amita ambota Iesu na arahata pambuto ‘Tax’ koro humbari embo vahai javo Levi amita pure ari bande jo ai arumbeto mihinu Iesu na kito, “Na ambo ambo e,” enu
LUK 5:28 ke agi eto amita donda tapa toto ereto Iesu ta ambota pambuna.
LUK 5:29 Eto embo Levi na Iesu ta pondo peni vahai amita bande ta unu ‘Tax’ humbari embopo isapamane te embo nei uhoho te ainge arumbeto indie mihio
LUK 5:30 enana Pharisee ari embopo te enana ta ke pepeni ahe poekari embopo te na hini kambari eto Iesu ta ambotani ta degi ke einge ea, “Ungo do eto ‘Tax’ humbari embopo te ari sasapura embomeni te ga vahaita ere indeve?” ainge eo,
LUK 5:31 Iesu na enana ta degi ke mine einge ena, “Embo javotoho amo sivo ikari embo ta degi mane pambuora te ambure embopo na sivo ikari embo ta degi pambuora,
LUK 5:32 avoeto na embo jajavotoho avoembo puvurae rate ari sasapura embopo ta degi ke ijirono tunga haperekara puvena,” ainge enu.
LUK 5:33 Enana ke einge ea, “Eto John ta ambotani te Pharisee ari embomeni te na donda mahainge ajireketo pari eagora te ambotani no amo donda ajirekae sio indagora,” ainge eo
LUK 5:34 Iesu einge ena, “Jimbari ta pondo avo ajirekari irae
LUK 5:35 rate iji puvuresuja amo jimbari embo jigito goruketo humbuto pambasora iji amikote ajirekasora,” ainge eto
LUK 5:36 timu hatirari ke nei einge ena, “Eto embo na bo mahu perarari avo bo eha na tiuketo ihirasuja amo bo eha sapura ururou bo mahu ai ta ihirari amo kiari sapura kesora. Avoeto ari ainge amo mane eagora.
LUK 5:37 Eto embo na o hamo umo higi iteko ari mahu ai ta ‘wine’ eha overekasora amo ‘wine’ na horo vivihe pajito o hamo amo perarasuja eto ‘wine’ te o hamo te tapa irae aisuja
LUK 5:38 te o hamo eha ta ‘wine’ eha overekasora amo mane perarasuja.
LUK 5:39 Eto embo ‘wine’ mahu avo indito gamo kito javotoho ke ijie ‘wine’ eha amo uje ae aisuja.”
LUK 6:1 Eto jangu indari iji te Iesu te amita ambotani te na embo ta pure degi ta pahue Iesu ta ambotani na ‘wheat’ ve avo indesi humbuto jaeveto indio
LUK 6:2 Pharisee embomeni na kito ke einge ea, “Ungo do eto ke pepeni poekihe jangu indari iji te pure emomo ere ove?”
LUK 6:3 ainge eo Iesu na ke mine einge ena, “Eto David te amita embomeni te na beuje kito ari do ea amita ke amo ungo eheketo kiaerete?
LUK 6:4 Eto amina God ta Bande otohu ta horeto ‘Bread’ mahu God ta tihi ta hande ikari amo priest na pere jigama eagora avo David na horeto ‘Bread’ avo humbuto indie amita embomeni ta hande enu india
LUK 6:5 eto ungota degi erena, Embo ta Meni amo jangu indari iji amita simba ari embo dombo ra,” ainge ena.
LUK 6:6 Eto jangu indari iji nei amo Iesu na ke kasari bande ta horeto embomeni ahe poekena. Eto embo vahai ingeni meni pehari mihina
LUK 6:7 avo Iesu na jangu indari iji te au kojaute avo Pharisee ari embomeni te ke pepeni ahe poekari embopo te na Iesu pehumbasi ehehea.
LUK 6:8 Rate Iesu na enana ta hotembari avo kito embo ingeni meni pehari amita degi, “Umo huma ei hete,” ainge enu ereto imihe hetenu
LUK 6:9 Iesu na enana ta degi ke einge eto ingina, “Jangu indari iji te embo na ke pepeni agi ue embo ta degi sapura autemo javotoho au? Eto nei amo embo au kojautemo tau pehau?”
LUK 6:10 ainge ijie embo tapa poeto kito embo amita degi, “Ingeni jujuruke” ainge enu jujurukihinu javotoho enu
LUK 6:11 embomeni na kito hini kambari peni vahai ue Iesu ta degi do asora avo ke kasea.
LUK 6:12 Eto iji amite Iesu na heti i ta pambuto God ta degi pari unu pambuto
LUK 6:13 iho vujihinu amita ambotani jage enu puvuo tapa 12 siriketo humbuto amita javo ‘Apostero’ ikena
LUK 6:14 eto embo siriketo umbuna amita javo amo embo Simon amo ehako Peter ke ena eto Peter ta namei Andrew eto James te John te Philip te Bartholomew te ra.
LUK 6:15 Eto nei amo Matthew te Thomas te Alphaeus ta meni James te Zeolot ta embo vahai javo Simon ra (Zealot ari embomeni amina Rome na tihi jigora uje ae ea)
LUK 6:16 eto nei amo James ta meni Judas eto nei Judas Iscariot amo Iesu humbuto isoro embo ta ingeni ta ikari embo ra. Eto ainge avo siriketo humbunu irae enu.
LUK 6:17 Egerembeto veto enda veukari ta heteto mihio amita ambotani tapa te embomeni isapamane te puvua amo enda Judea ta da tapa amita embomeni te da Jerusalem embomeni te eva da Tyre te Sidon te amita embomeni te tapa aingeto puvuto Iesu ta ke ingihe ambure embomeni au kojara humbuto puvua.
LUK 6:18 Eto ahihi sasapura na totorekari embomeni avo enu kojea.
LUK 6:19 Eto Iesu ta sovera avo amita hamo ta eto puvunu enana kokojekea avoeto embo tapa na Iesu ta hamo hame asi uje ea.
LUK 6:20 Eto Iesu na amita ambotani tapa jireki poeki eto kogue ke einge ena, “Ungo donda ambu embopo avo God na tihi jigihirou tunga javotoho ue iresova.
LUK 6:21 Ungo beuje embopo na indari inono aisova, ungo si ari embopo na tunga javotoho ue osa osa aisova.
LUK 6:22 Eto embo na umo Embo ta Meni ta ambotani kito umo embo sapura ke ijie tumo ue umo uje ae ue urumbasora avo kito tunga javotoho
LUK 6:23 ue hana hana ejo. Ari sapura ainge amo ungota mamahamane na peroveta ta degi mahu arira eto ungota asora amo ungo na hotari pajire be uhu ta humbasova kivujo.
LUK 6:24 Rate ungo hajae vajae embomeni ta degi aja to erena amo ungo na ungota tunga osa osa ari mahu umbeve irae ehija.
LUK 6:25 Eto ungo indari humbari embopo ungota degi ta aja to erena ungo beuje kesova avoeto. Eto aja to erena, ungo kege ganini embopo na osaga kogue si aisova
LUK 6:26 eto enda embomeni na ungo kogue jakeka aisora avo no degi ta aja to erena ainge dombo amo embo mamahu na ke sokova na peroveta ra ijie ke ijiore ungota mamahamane na ingihe jakeka ere uahera.
LUK 6:27 Rate ungo ke ingiheva embomeni ta degi erena, ungota kitoho embomeni osa evujo eto ungo uje ae eagora embomeni ta degi ari jajavotoho evujo.
LUK 6:28 Eto ungota degi saruka eagora embomeni ta degi God na javotoho ari ikaja evujo. Eto ungo urumbagora embomeni avoembo pari evujo
LUK 6:29 eto embo na no ovo be hena ta tasuja aherekejo ovo anga hena ta tai. Eto embo na no ombari asari humbasuja embo amita degi no pohuketo evari ga tapa ikejo.
LUK 6:30 Eto embo amuna no donda humbasi penunu au ingito amita ikau humbau egerembeto ikaja mane hotembasoa
LUK 6:31 eto embomeni na no degi ta ara uje ere oa ainge dombo enana ta degi ejo.
LUK 6:32 Eto embo umo tunga umbua avo pere orereto osa asoa avo embomeni na kito umo jakeka arote? ainge manera, ari sasapura embomeni te tapa na enana osa eagora embopo avo osa mine ara ari haitera.
LUK 6:33 Eto nei amo no degi ta ari javotoho eagora embomeni amita degi ari javotoho asoa amo embomeni na kito umo jakeka aro? Avo manera. Ari sasapura embomeni te tapa na ari ainge ari haitera.
LUK 6:34 Eto umo mine puvuresuja avo hotembihe donda ikasoa amo embomeni na kito jakeka arote? Ari sasapura embopo na mine puvuresuja hotembihe embo ta degi ikagora.
LUK 6:35 Rate no kitoho embomeni osa ue ari javotoho ue donda ikasoa avo mine ikaja mane hotembasoa eto God i ta amina ungo amita meniundi ke ijie hotari pajire be ikau humbasoa. Amita be amo amite tapa na hande ambu tigaho ari embomeni ta degi javotoho eaguja.
LUK 6:36 Eto ungota Mama God na embo ta osaga kogue jo eaguja ainge dombo jo evujo.
LUK 6:37 Eto embo pehumba aojo eto God na umo mane pehumba aisuja. Embo sapura ke mane aisoa eto God na umo sapura ke mane aisuja rate embo ta ari sapura hotembeto toasoa amo God na no ari sapura hotembeto toasuja.
LUK 6:38 Eto embo ta degi hande aisoa amo God na no degi ta hande mine ikasuja. Eto umo ikasoa ainge inono ta mane ikasuja te pajire be overekau gavineketo vovurou ikau humbasoa. Eto umo hande embo eto ikasoa God amo hande embo eto no degi ta ikasuja,”
LUK 6:39 eto Iesu na ke ainge ijie timu hatirari ke einge ena, “Eto tihi kuru ari embo na tihi kuru ari embo nei daingeto kihi humbuto pambau? Enana ere pambuhuma pe te hoto ta veasora
LUK 6:40 eto kiari jojombu ari embo na ahepoekari embo mane dembasuja te ahepoekau kiari humbuto amita ahe poekari embo amiga inono aisuja.
LUK 6:41 Eto umo do eto no namei ta tihi ta ji sirivo mihia avo kogoe no tihi ta ji uhu mihia avo hotembae ere oe?
LUK 6:42 Eto namei ta degi, ‘No tihi ta sirivo mihia kondikano?’ ke ainge ijie ungota tihi ji uhu na peikehija avoeto daingeto avo? Ungo ari sapura ojiketo ke sokova ari embomeni eto ungota ari sapura ji uhu ainge tihi ta mihia avo kihi umbavo irae au javotoho na kon kon eto kogue namei ta sapura isapa ji sirivo ainge tihi ta mihia avo kojikevu.
LUK 6:43 Ke be amo ji javotoho indagora ai ta ji be indahu mane ekasuja eto ji nei sapura ai ta ji be indari mane ekasuja
LUK 6:44 rate ji tapa amita be hajire oenga oenga ra avoeto junga be amo ji isuga ta mane humbagora eto grape be amo esi hombare ta mane ekeoi humbagora.
LUK 6:45 Eto embo javotoho ta jo ta amo ari javotoho mihia avoeto ari javotoho eaguja rate embo sapura ta jo ta sapura pere mihia avoeto sapura eaguja. Eto embo ta jo ta do ainge mihia avo ainge inono ta amita pe ta puvuto pambasuja.
LUK 6:46 Ungo do eto na ke Bada, Bada, ijie ke nau agi ae ere ove?
LUK 6:47 Eto embo amuna nau degi ta puvuto ke nau ingito agi aisuja amo do aingere avo ano ingesova.
LUK 6:48 Eto embo na bande gerikasi enda javotoho ta hoto koveto veto karu hamo ta tutuvi hurukasuja amo umo vuenga na puvuto tasuja te mane kohekasuja tutuvi koro hamo ta hurukari avoeto.
LUK 6:49 Rate embo nei nau ke ingito agi ae aisuja amo embo na teho enda hamo ta tutuvi tetembeto bande gerikasuja eto umo vuenga na puvuto tau koheketo veau aimbeto humbuto pambasuja.”
LUK 7:1 Eto Iesu embo ta degi ke enu irae enu da Capernaum ta pambuna.
LUK 7:2 Eto da ai ta Rome ta isoro embo peni ta pure embo vahai pehasi ue mihinu
LUK 7:3 Iesu na pure do ena amita duru avo ingito isoro embo na amita pure embo osa eto Iesu humbau puvuto amita pure embo au kojaja Judea ta okokose ikenu Iesu humbasi
LUK 7:4 pambuto amita degi ke sovera eto penunu einge ea, “Embo amina ungotenau enda osa ue ke kasari bande geriketo ungotenau ikehija avoeto amo javotoho na hondate mine aisoa,”
LUK 7:6 ainge eto Iesu enana ga pambuto bande auviho isoro embo peni na ke ikenu amita namei kamei na humbuto pambuto Iesu ta degi einge ea, “Bada, umo osaga aojo. Na embo sapura avoeto nau bande ta mane horasoa.
LUK 7:7 Eto na sapura avoeto no degi ta puvurae eagona rate teho no ke na ejo nau pure embo kojai
LUK 7:8 amo eingera, namo te tapa nau embo okose ta sovera jigama ue na nau isoro embo ta degi pambu aisona pambasuja eto nei ta degi hae aisona huresuja eto nau pure embo ta degi einge e aisona aisuja eagona ainge dombo no okose ta sovera na ejo kojai.”
LUK 7:9 ainge eo Iesu na ingito mana mana eto egerembeto embomeni amita ambo ambo ue puvua amita degi ke einge ena, “Na ungota degi erena, embo amina na humota be ere ua. Na Israel enda ta Israel embo aingeko hambaera.” ainge eto
LUK 7:10 embomeni puvua avo ikenu egerembeto bande ta pambuto ambure embo amo mahu kojeto mihinu kia.
LUK 7:11 Eto amita ambota Iesu na da javo Nain ta pahunu amita ambotani te embo tapa amiga
LUK 7:12 pambuto da pe auviho evohu doru ta meni avo vahai avo pehenu kovasi embomeni isapamane gaga ta iketo humbuto oroviketo pahuo
LUK 7:13 Iesu na evohu doru avo kito jo enu, “Umo si aojo,” ainge ijie
LUK 7:14 pambuto gaga ta jiginu gaga humbuto pahua embo amo heteo Iesu na ke einge ena, “Nau meni, ere,” ainge enu
LUK 7:15 embo mahu pehari amo ereto gaga ta arumbeto ihiketo ke ijinu Iesu na e ta ingeni ta tona
LUK 7:16 eto ari avo embo tapa na kito joru ue God jakeka ue ke einge ea, “Peroveta dombo be ungotenau degi puvija,” eto nei “God na amita embomeni ta degi puvija,”
LUK 7:17 eto Iesu na do ena amita duru avo sigeto pambunu Judea enda tapa amite eto enda nei nei Judea ta engihita amite tapa ingia.
LUK 7:18 Eto John bapataito ari embo ta ambotani na duru avo ingito John ta degi tirio ingito
LUK 7:19 amita ambotani heriso humbuto Bada ta degi, “Embo God na ikau puvuresuja amo umo retemo embo nei re,” ainge eto ingora ikenu pambuto
LUK 7:20 Iesu ta degi puvuto ke einge ea, “John bapataito ari embo na dago heriso ke erevi umo eto ingora ehei puvera. Embo God na ikau puvuresuja amo umo retemo embo nei re?” ainge eo
LUK 7:21 iji amikote Iesu na embo ta ambure osaga neite neite enu kokojekenu irae enu ahihi sasapura ohimbena tihi kuru ari enu tihi kukunjekea avoeto
LUK 7:22 John ta ambotani heriso ta degi ke mine einge ena, “Pambuto John ta degi do ere kogova ere ingiheva avo John ta degi einge evujo ingoi, ‘Tihi kuru ari embo tihi hirikehei ere kogora popora embo ereto isa ere ora kini humbari embopo ta kini irae ehija oje susujukari embopo na oje hirikehei ke ere ingihera, embo pepehekari vasiri te ereto ere ora eto hoivo embomeni ta degi duru javotoho ere ingihera
LUK 7:23 eto embo amuna na ke be ae ke mane eaguja amina tunga javotoho ere ua’.” ke ainge ara enu John ta degi pahuo
LUK 7:24 Iesu na embo tapa ta degi John avoembo ke einge ena, “Ungo ari do kesi ojaga tambu ta pambuheve? Sasaha pisara na kajeoi ujiji eaguja avo kesi pambuhevete?
LUK 7:25 Eto ainge mane amo do kesi pambuheve? Nei kiari bo ove javotoho asuketo eaguja avo kesi pambuhevete? Bo aingeko asuketo eagora embomeni amo king ta bande ta pambuto kiaeheva
LUK 7:26 rate evujo ingone, amo peroveta vahai kesi pambuhevete? Ungota degi erena amo peroveta be avo pambuto kogueva
LUK 7:27 eto God ta ke mahu kajari ai ta mihia amo John do aisuja amita ke avo einge mihia, ‘Kijo, na nau ke hande ari embo ikano kihi pahue no degi siriketo au tambu aisuja,’ ainge kajari mihia avoeto
LUK 7:28 ungota degi erena embo dombo be dombo ae pekota amo John na ena rate God na eha oroho ihiketo embo siriketo humbuto tihi jigesuja avoeto embo amuna God ta tihi jigari degi ta horeto embo teho asuja amina John dembeto embo dombo be aisuja,”
LUK 7:29 ke ainge Iesu na enu ingia (Eto ‘Tax’ siriketo humbari embopo te embo nei uhoho te amina John ta ke ingio bapataito ena avoeto Iesu ta ke ingihe God javotoho ke ea
LUK 7:30 rate enana Pharisee ari embopo te ke pepeni kiari embopo te na John ke be mane ke ijie bapataito ae toa avoeto God ta hondate ari avo umbae ra.)
LUK 7:31 eto Iesu na embomeni ta degi ke einge ena, “Eto embomeni eha mihera amita ari mo do aingekore?
LUK 7:32 Amo meni isasaraho na da tambuta arumbeto boru jumbarako ere ora nei uhoho na ereto dago huin husehera rate ungo ja tivae, nei si ijie sesena asi uje ehera te ungo si ae
LUK 7:33 ari aingeko amo ungo na ere ova amo eingera, Eto John puvuto indari te umo te ajirekena avo ungo na kito ‘Ahihi sapura na horihaja avoeto ere ua,’ ainge ijieva.
LUK 7:34 Eto Embo ta Meni na puvuto ‘wine’ te indari te tapa indaguja avo ungo na kogue, ‘Embo erevi kivu, amo okope undurari embora eto jai indari embora amina ‘tax’ koro humbari embomeni amite embo sasapura neite neite ga namei eaguja,’ ke ainge eagova
LUK 7:35 rate God ta kiari humbari meniundi na ari javotoho kito ke be aisora.” ainge Iesu na enu irae enu.
LUK 7:36 Pharisee ari embo vahai na Iesu amiga indoja oru enu amita bande ta pambuto arumbenu
LUK 7:37 da amita evohu vahai amo evohu sapura be amina Iesu Pharisee embo ta bande ta arumbeto indinu ke avo ingito ‘Oil’ mune javotoho te higi isapa ta avo humbuto Pharisee ari embo ta bande ta horeto
LUK 7:38 Iesu ta ku hena ta heteto ihiketo si ijie amita tihi sisivu na Iesu ta utu kuheto siro ta tuheto utu mune tavo eto ‘Oil’ mune te amina kuhena.
LUK 7:39 Eto Pharisee embo Iesu amita bande ta indoja oru ena amina ari avo kito einge hotembena, “Ari sapura evohu eremina Iesu hame ere ua. Eto Iesu peroveta be kito evohu sapura erevi do aingere amo mahu kiaehija,” ainge hotembihinu
LUK 7:40 Iesu na kito ke einge ena, “Simon, na no degi ta ke vahai asi ere ona amo aravorete?” ainge enu. “Aravora, Ahe poekari Embo, no ke deirami asi uje ere oa avo ejo,” ainge enu.
LUK 7:41 Iesu na ke einge ena, “Hajae vajae embo vahai na embo vahai amita 500 kina iketo embo nei amita 50 kina ikena
LUK 7:42 eto embo heriso amina mine ikari inono ae kito toruhija aravora te embo amuna hajae vajae embo osa peni vahai au?” ainge enu.
LUK 7:43 Embo Simon na ke mine einge ena, “Koro pajire be humbari embo amina hajae vajae embo osa pajire be aisuja,” ainge enu Iesu na, “Ke be erea,” ainge eto
LUK 7:44 ahereketo evohu kogue Simon ta degi ke einge ena, “Pamone erevi kogoe? Na no bande ta puvena te umo nau utu egae rate evohu emina amita tihi sisivu na nau utu egeto amita siro hu na tuhehija
LUK 7:45 eto inena na mune tavo ae rate amina na puvena iji te nau utu mune tavo ere ua
LUK 7:46 eto inena nau siro ‘Oil’ kuhaera te amina nau utu ‘Oil’ mune te amina kuhehija
LUK 7:47 avoeto no degi ta erena amita osari pajire be avoeto amita ari sapura isapamane avo nanena hotembeto ere toruhona, rate embo amuta ari sasapura heriso be hotembeto toari amina osa peni mane aisuja,” ainge
LUK 7:48 eto evohu ta degi, “No ari sasapura hotembeto ere toruhona,” ainge enu,
LUK 7:49 embomeni gaga ta areto mihia amina ke mine ara eto einge ea, “Embo ari sasapura hotembeto ere toruhua emo amunure?” ainge ijio
LUK 7:50 Iesu na evohu ta degi, “No humota ari na umo orekehija avoeto peka ta pambujo.” ainge ena.
LUK 8:1 Eto iji isapa amita ambota Iesu na da ari na eto hembuhe God na embomeni tihi jigesi sirikasuja amita duru javotoho avo hande ena. Eto amita apostero 12 amite
LUK 8:2 evohu nei nei ahihi sasapura na jo ta horari ohimbena amite evohu nei nei amo ambure ari avo kojena amiga pambua. Eto evohu amo da Magdala evohu javo Mary amita jo ta amo ahihi sasapura tapa 7 ohimbena
LUK 8:3 eto nei amo Herod ta pure embo vahai javo Chuza amita ae Joanna amite evohu Susanna amite evohu nei nei aingeto Iesu unduresora avoeto enana ga pambua.
LUK 8:4 Eto da tapa embomeni Iesu ambo ambo puvua amina vahaita horukeo Iesu na timu hatirari ke enana ta degi einge ena,
LUK 8:5 “Ve urari embo vahai na pure ta pambuto ve ihajara enu ve nei amo degi ta venu embomeni na haito jaevekiho di na veto india
LUK 8:6 ve nei amo karu hamo ta vena avoeto ereto jaise ena umo irae avoeto
LUK 8:7 eto ve nei amo ma ta vena avoeto erihinu esi na andinu sapura ena.
LUK 8:8 Eto ve nei amo enda javotoho ta vena avoeto ereto ve 100 ainge ikena,” eto ke ainge Iesu na ijie isara na eto, “Ungo amuta oje mihirou kito ke erena erevi ingivujo,” ainge ena.
LUK 8:9 Eto amita ambotani na timu hatirari amita ke be avo deire avo au ingesi eo
LUK 8:10 Iesu na ke einge ena, “Eto God na embo amita toho siriketo humbuto tihi jigesuja amita ke be amo ungota degi ikarira te embo tapa arahata mihera amita degi amo timu hatirari na ikano kito kiaesira asora eto ingito ingaesira aisora.
LUK 8:11 eto timu hatirari na ehena amita ke be amo erevira, ve urari amita be amo God ta ke ra.
LUK 8:12 Eto ve nei degi tambu ta veaguja amo embo na God ta ke avo ingesuja rate ke jo ta urari avo Satan na puvuto egimbau God ta ke avo ke be ae ijirou mane oreketo humbasuja.
LUK 8:13 Eto ve nei karu hamo ta veari amita ke be amo erevira, God ta ke avo ingito tunga javotoho aisuja te ke avo jo ta mane be veto pesisa eto susu kambasuja eto teho mihirou engekari puvurou toasuja.
LUK 8:14 Eto ve nei ma ta veari amita ke be amo erevira, embo na God ta ke uje eaguja te enda ta ari te ujeje neite neite amite eto amita haja vaja amina God ta ke amo andioi ve mane ekaguja
LUK 8:15 eto ve nei enda javotoho ta veari amita ke be amo embo na God ta ke avo ingito amita jo ta ke be ari na be jigito simba javotoho uore be eketo pajiraguja.
LUK 8:16 Eto embo na kerivo ijimbeto humbuto ovu ho ta iketo mane ahurekasora eto gaga suvu ta mane ikasora te araha ta tembau embo bande jo ta horasi puvuto kesora.
LUK 8:17 Eto ainge dombo ke tapa ahurekari avo harikaro tapa ingesora eto ojikari avo humbuto araha ta ikaro kesora.
LUK 8:18 Avoeto God ta ke eto kogoeto ingivujo eto embo ta degi kiari isapa irirou kito nei amita hamo ta ikau humbasuja rate amita kiari isapa irari ke asuja embo amita kiari do mihia avo humbau irae aisuja.” Iesu na ke ainge ijinu.
LUK 8:19 Amita e te namei kamei te aingeto Iesu ta degi puvua te embomeni isapamane avoeto Iesu ta degi pambari inono ae enu
LUK 8:20 embo na Iesu ta degi ke einge ea, “No e te namei kamei te umo kesi uje eto puvuto araha ta mihera,” ainge eo
LUK 8:21 Iesu na einge ena, “Embo te evohu te amuna God ta ke ingihe agi aisora amo nau aja eto namei kamei ra,” ainge ena.
LUK 8:22 Eto iji vahai Iesu na amita ambotaniga e nga ta vihito ungote umo oiho ta pambasira ainge enu pahue
LUK 8:23 Iesu hereketo evo unu pisara peni vahai puvuto umo na teto mimisenu e nga jo ta veto pe vivihinu e nga ihiketo huhurumbeto vovunu
LUK 8:24 ambotani na pambuto Iesu ujihie, “Bada, Bada, ungotena sari ari embopora,” ainge ijio ereto pisara te umo te ta degi ke ngahia na enu jamo eto visi visi enu.
LUK 8:25 Iesu na enana ta degi, “Ungo na humota ae re,” ainge enu joru eto mana mana ue ke mine ara eto einge ea, “Embo emo do aingere? Ke ehei umo te pisara te amita ke agi eto jamo ehera,” ainge eto pambuto.
LUK 8:26 Enda Galilee umo oiho enda javo Gerasenes ai ta puvuto
LUK 8:27 veto da amita embo vahai ahihi sasapura na horari avo hora ai ta hambua. Embo amo iji koso amita bo irae eto bande irae embo ikeore sari eagora panga ho ai ta mihahija.
LUK 8:28 Rate embomeni na embo avo ‘Chain’ na punduo ahihi sasapura na embo andirari avoeto ivo peni vahai eto ‘Chain’ jigito usuketo embo humbuto ojaga hambuto pambuna avo Iesu na kito, “Embo ta jo avo toto puvuto pambu,” ainge enu embo amina Iesu kito gagaha ijie pambuto Iesu ta utu ta veto pehihe ke isara na einge ena, “Iesu, God sovera isapamane te ta Meni nau degi ta do ao? Na penunu erena, nau degi ta memenga ikaojo.”
LUK 8:30 ainge enu Iesu na, “No javo deire,” ainge enu embo amina, “Dago isapamane avoeto nau javo ‘Legion’ ra,” ainge eto
LUK 8:31 Iesu na ohimbeoi memenga kiari degi ta pambari uje ae eto
LUK 8:32 o ohu isapamane heti oiho ta indie mihio kito amita jo ta au pambasi penunu enu aravora enu
LUK 8:33 ahihi sasapura na embo ta jo toto pambuto o ohu ta jo ta horeo huheveto pambuto heti ta eheruva eto veto umo indito pehiho
LUK 8:34 o simba ari embopo na joru pambuto da pepeni te memeni te tapa amita embomeni ta degi hihi tirio
LUK 8:35 ingito embomeni kesi Iesu ta degi pambuto embo ahihi sasapura na horari avo uha javotoho enu bo asuketo Iesu ta utu ta arumbeto mihinu kito joru uo
LUK 8:36 embo ahihi sasapura na horari avo kojihinu kia embopo amina hihi tirio
LUK 8:37 ingito enda Gerasenes embomeni tapa amina joru pajire be eto Iesu enda avo toto pambaja eo e nga ta vihito egerembeto pambasi uo
LUK 8:38 embo mahu ahihi sasapura na horari amina Iesu ga pambasi penunu enu Iesu na
LUK 8:39 “Namoga mane pambasoate God na umo kito jo ehei no degi ta tapa do ehija avo no da ta pambuto ejo ingore,” ainge enu amina tohota da ta pambuto embo tapa ta degi Iesu na do enu kina avo hihi tirinu ingia.
LUK 8:40 Eto Iesu egerembeto pahunu embomeni tapa simba ere ua amina Iesu kito tunga javotoho ue pekea.
LUK 8:41 Eto Judea ta ke kasari bande ta tihi jigari embo vahai javo Jairus amita iae avo vahai amita ingari jua tapa 12 avo pehasi unu pambuto Iesu ta utu ta veto paunge teteri eto Iesu amita bande ta pambaja penunu enu ingito Iesu Jairus ga pahunu embo isapamane Iesu ga oroviketo pahuo
LUK 8:43 evohu vahai amo jua tapa 12 amita jo ta orosa vovuoi embo na ari kojari inono ae uore mihahija
LUK 8:44 amina Iesu ta ke ta puvuto amita bo pekihi hame unu amita orosa irae enu.
LUK 8:45 Iesu na, “Na amuna hame ere oi,” enu embomeni tapa na dago hame aera ainge eo Peter na ke einge ena, “Embo isapamane avoeto umo vahaike vahaike ere ora,” ainge enu
LUK 8:46 Iesu na ke einge ena, “Nau sovera isapa veto ere pahua avo mine umbuhe hame ari ke erena,” ainge enu
LUK 8:47 evohu amo ojikari irae kito gatari gatari ue joru te tapa puvuto Iesu ta utu ta veto gombuto daingeto Iesu hame eto kojena amita be avo embo tapa ta tihi ta harikenu
LUK 8:48 Iesu na ke einge ena, “Nau iae, umo na humota eto kojehea avoeto peka ta pambujo.”
LUK 8:49 ainge ijinu embo na Jairus ta bande ta eto puvuto Jairus ta degi ke einge ena, “No iae mahu pehehija avoeto ahe poekari embo mane jigesoa te tojo pambae,” ainge enu
LUK 8:50 Iesu na ingito ke einge ena, “Umo osaga mane kesoa te na humota ejo no iae ano kojasuja,” ainge eto
LUK 8:51 bande ta pambuto embomeni araha ta irora enu mihio Peter te John te James te e te mamo te avo enu horeo
LUK 8:52 embomeni sisisasi ijie mihia amita degi ke einge ena, “Ungo si mane aisova. Kakara amo pehaera te teho evo ere ua,” ainge enu
LUK 8:53 kakara mahu pehari avoeto Iesu na evo ari ke ena avo ganini ijio
LUK 8:54 Iesu na kakara isapa amita ingeni ta jigito, “Ka, umo ere,” ainge enu
LUK 8:55 amita ahihi egerembenu erenu Iesu na ka amita degi indari ikaro indoja ena.
LUK 8:56 Eto amita e te mamo te mana mana uo ari do ena amita ke avo hande eagora ke ngahia ena.
LUK 9:1 Eto Iesu na amita ambotani 12 jage enu puvuo ahihi sasapura ohimbihie embomeni aro kojara sovera ari iketo
LUK 9:2 God na embomeni siriketo humbuto tihi jigesuja amita ke hande ue embomeni aro kojara ikenu pambasi uo
LUK 9:3 enana ta degi ke einge ena, “Ungo donda nei hetu te ehi savo te ‘bread’ te koro te bo heriso te mane humbuto pambasova te
LUK 9:4 da vahai vahai ta pahue bande ari na ue mane evesova te bande vahai ai ta evie pure avo irae au pambuvujo
LUK 9:5 eto da damina ungo pekae aro kito toto pambasi ue ungota utu oniho avo torovikavo vovurou embomeni tapa koguroro pambuvujo,” ainge enu irae enu
LUK 9:6 enana da ari na ue pahue embomeni ta degi duru javotoho hande ue embomeni eo kokojekea.
LUK 9:7 Eto Iesu na tapa do ena amita duru avo Israel ta gavana okose javo Herod na ingito be hotembae ena amita be amo embo nei na John vasiri te ereto ere ua ainge ijio
LUK 9:8 embo nei na peroveta Elijah na sariketo puvuto ere ua ainge ijio embo nei na peroveta nei mahu amina vasiri te ereto ere ua ainge ijio Herod na ingito
LUK 9:9 be hotembae ue ke einge ena, “John mahu tunga tiukihena te embo ari neite neite oi duru ere ingihona amo amuna oi ereve?” ainge eto embo avo kesi uje ena.
LUK 9:10 Eto apostero tapa egerembeto Iesu ta degi puvuto ari do ea tapa avo tirio irae enu Iesu na embo tapa toto amita apostero perekari humbuto da javo Bethsaida ta pahunu
LUK 9:11 enana avo dainge ere pahua avo embo na eo ingito embo tapa ambota pambuo Iesu na kito peketo God na embomeni daingeto tihi jigesuja amita ke hande ue ambure embomeni avo enu kokojekihio
LUK 9:12 iji vovunu Iesu ta ambotani 12 na amita degi puvuto ke einge ea, “Ungotena da peni mane da isapa ta mihera avoeto embomeni ikejo da ari na eto pambuto indari indito evore” ainge eo
LUK 9:13 Iesu na, “Ungona indari ikevu indore,” ainge enu enana ke einge ea, “Dagota degi ta amo ‘bread’ tapa 5 eto umo o heriso mihia te dago pambuto indari koro na humbuto embomeni erevi undurora ere?”
LUK 9:14 Ainge ea amita be amo embo tapa 5,000 mihera avoeto. Eto Iesu na embo tapa 50, 50 ainge kaheke kaheke ara ke enu
LUK 9:15 ambotani na kaheke kaheke eo arumbeo
LUK 9:16 Iesu na ‘bread’ 5 eto umo o heriso amite aingeto humbuto tihi i ta eto jigito God peketo ‘bread’ te o te jigito pereto embomeni ta ikaro indora ambotani ta degi ikenu embo ta ikeo indio
LUK 9:17 hini pevihinu ambotani na indari sirivo sirikeo handija tapa 12 amo pevihina.
LUK 9:18 Eto iji vahai Iesu embo tapa toto pambuto pari ue mihimihe amita ambotani ta degi ke einge eto ingina, “Embomeni na na amunure ke eagore?” ainge enu
LUK 9:19 enana ke einge ea, “Embo nei uhoho na amo umo John bapataito ari embo ke eagora eto nei uhoho na umo peroveta Elijah ke eagora eto nei amo peroveta mahu vahai na vasiri te erari amina ere ua ainge eagora,” ainge eo
LUK 9:20 Iesu na, “Rate ungo na na amunure ke eagove?” ainge enu Peter na, “Umo Judea ta hondate ari embo Keriso God na ikari puvurarira,” ainge enu.
LUK 9:21 Ingito ke avo embo ta degi mane hande ara haekihe
LUK 9:22 ke einge ena, “Embo ta Meni na osaga memenga kogurou Judea ta embo okokose te priests pepeni te ke pepeni kiari embopo te na uje ae eto taro peheto iji 3 toto ehako vasiri te erasuja,” ainge eto
LUK 9:23 embo tapa ta degi ke einge ena, “embo amuna na ambo ambo asi uje aisuja amo amita ujeje tapa toto amita ji atahu bouka avo koho ta tembeto iji mahainge na ambo ambo aisuja
LUK 9:24 eto embo amuna umo oenga amita vasiri oreketo humbasi uje aisuja amo amita vasiri iraesuja rate embo amuna na avoembo amita uje tapa toasuja embo amina amita vasiri oreketo humbasuja,
LUK 9:25 amita be amo embo na enda ta ari neite neite ue donda tapa ere humbuhuma pehasuja amo amita vasiri iraesuja eto javotoho mane hambasuja.
LUK 9:26 Eto embo amuna namote nau ke te avo kito me kogue ke nau hande ae aisuja amo Embo ta Meni na amita usasa ta eto Mamo ta usasa ta Anera ototohu ga iji kombu te puvuto embo avo me kesuja.
LUK 9:27 Rate ungota degi ke be erena ungo embomeni eha ei miheva amo embo nei nei amo mane pehasova te mihirovo God na embo amita siriketo humbuto tihi jigesuja iji avo puvurou keisova,” ainge Iesu na ena.
LUK 9:28 Eto ke ainge enu iji 8 ainge irae enu Iesu na pari asi Peter te James te John te ainge humbuto tiri ta vihito
LUK 9:29 pari ue mihinu Iesu ta hamo amo usasa pere unu eto amita bo na usasa peni vahai amo enda embo na bo parara ainge ari haite mane avo unu
LUK 9:30 peroveta heriso mamahu Moses te Elijah te
LUK 9:31 na usasa ta Iesu ga ke asi sariketo puvuto Iesu na Jerusalem ta pambuto pehasuja amita ke avo kasea
LUK 9:32 eto Peter te amita namei kamei te na evo tihivi ena te evae mihie Iesu usasa ena avo kogue embo heriso amiga heteto mihia avo kogue
LUK 9:33 embo heriso avo pambasi uo Peter na ke do ano ijie einge ena, “Bada, dago ungote mihera emo javotoho avoeto horoma no vahai Elijah vahai eto Moses ta vahai ainge gerikasora,” ainge Peter na ijinu
LUK 9:34 johi na puvuto ahurekihinu joru ue
LUK 9:35 johi jo ta ke einge ingia, “Emo nau tunga humbari Meni ra. Amita ke ingivujo,” ainge enu
LUK 9:36 irae enu Iesu oenga mihinu kia. Eto iji amikote amo ari do kia avo embomeni ta degi ke hande ae toa.
LUK 9:37 Eto evito tiri ta eto vovuo embomeni isapamane puvuto hambuo
LUK 9:38 embo vahai amina embomeni ta ugoro bagoro ta ereto jajage eto ke einge ena, “Ahe Poekari Embo, na no degi ta penunu erena, nau meni avo vahai amita osaga avo kijo,
LUK 9:39 ahihi sapura na andioi gagaha ijie veto pehihe ti kambuto kiroro kiroro ue pe pejigi garaviketo vovuoi ahihi sapura na meni ngahia na andito egikae iji koso jigito mihima toaguja avoeto
LUK 9:40 no ambotani na ohimbara penunu ehene ohimbehera rate inono ae ehei no degi ta humbuto puvena,” ainge enu
LUK 9:41 Iesu na osaga kito embo tapa ta degi ke einge ena, “Ungo humota ae embomeni ra. Eto ungo kiari umbava ungote iji doinge irono. Eto no meni avo nau degi ta humbuto hae,” ainge enu,
LUK 9:42 embo na meni avo humbuto Iesu ta degi inu, ahihi sapura jo ta amina meni andinu enda ta veto ahero ahero ue pehihenu Iesu na ahihi sapura isembeto ohimbenu toto pahunu meni javotoho enu humbuto mamo ta ikena.
LUK 9:43 Eto embo tapa na God ta sovera kito mana mana ea. Eto mana mana ue mihio Iesu na amita ambotani ta degi ke einge ena.
LUK 9:44 “Ungo oje jevito be ingivujo. Embo ta Meni avo humbuto embo sasapura ta ingeni ta ikasora,” ainge ena.
LUK 9:45 Te ke amita be amo God na amita ambotani ingora uje ae eto ojikenu ingae eto Iesu ta degi be eto ingesi uje ea rate joru ea.
LUK 9:46 Eto ambotani vahai amuna embo okose aisuja amita ke avo tumo te tapa ke mine ara ijio
LUK 9:47 Iesu na enana ta jo ta hotembari avo kito meni isapa humbuto amita engihita ikenu hetenu
LUK 9:48 enana ta degi ke einge ena, “Embo amuna javo nau ta meni isapa eingeko osa kageni aisuja amo namote tapa osa kageni aisuja eto na pere mane rate God Na ikari Embo amite tapa osa aisuja. Amita be amo ungo embo vahai amuna na embo tehora ke aisuja amina ungota embo okose aisuja.”
LUK 9:49 Ainge enu John na ke einge ena, “Bada, embo vahai na ahihi sasapura javo no ta ohimbihaja avo kito embo ungotenau mane embo nei ke ijie haekihera,” ainge enu
LUK 9:50 Iesu na amita degi ke einge ena, “Ari ainge amo mane haekasoa, embo nei amuna no degi ta kitoho ae amo embo no ra,” ainge ena.
LUK 9:51 Eto Iesu uhu ta vihari iji auvihinu da Jerusalem ta pambasi tunga ikena
LUK 9:52 avoeto pambuto hetihe pambasuja degi avo sirikara ke hande ari embopo ikenu pambuto enda Samaria ta da vahai ai ta horeto Iesu puvuresuja degi sirikara ke eo
LUK 9:53 Iesu da Jerusalem ta pambasuja amita duru ingito uje ae eto mane dago ta da ei ta puvuresuja ainge ijie haekeo
LUK 9:54 ingito egerembeto pambuto ambotani ta degi eo ingito James te John te na ingito Iesu ta degi ke einge ea, “Bada, dago ji penunu aro uhu ta eto veto da eveketo irae aja uje ere oete?” ainge eo
LUK 9:55 Iesu na, “Ainge mane aisova,” enu.
LUK 9:56 Ainge eto toto da nei ta pahue embo vahai degi ta hambuo ke einge Iesu ta degi ena, “Umo degi dainge dainge pambasoa amo na umo ambo ambo aisona,” ainge enu
LUK 9:58 Iesu na ke einge ena, “O koropu na enda koveto enda jo ta iraguja, di na nga iketo iraguja te Embo ta Meni amita jangu indari degi avo irae ra,” ainge eto
LUK 9:59 embo nei ta degi, “Na ambo ambo e,” enu ke mine einge ena, “Bada, na toao pambuto nau mama pehau avo koveto umo ambo ambo aisona,” ainge enu
LUK 9:60 Iesu na ke mine einge ena, “Embomeni pehari na irarako ere ora amina embo amo kovasora te umo avo pambuto God ta tihi jigari ta ke avo hande ejo,” ainge enu
LUK 9:61 embo nei na ke einge ena, “Bada na umo ambo ambo aisona te na toau kihi pambuto nau embomeni peketo puvuto umo ambo ambo aisona,” ainge enu
LUK 9:62 Iesu na ke einge ena, “Embo na ji jasi ue overo ahero ue jasuja amo God ta tihi jigari ai ta horari haite manera,” ainge ena.
LUK 10:1 Eto amita ambota Bada na embo tapa 72 ainge siriketo humbuto Iesu pambasuja degi ai ta embo heriso heriso ikenu da ari na ue kihi pambara
LUK 10:2 ke enu pambasi uo enana ta degi ke einge ena, “Ve na pupusumbeto veto mihie sari ere ua rate ondeto humbari embo isapamane mane avoeto ji be Mamo ta degi penunu evujo pure embo nei ikau be ondare.
LUK 10:3 Ungo pambuvujo. Na ungo o ‘sheep’ meniundi avo isoro ino ta ikarako ere ona
LUK 10:4 eto koro jurukari goru te ehi savo te utu goru te mane humbuto pambasova, eto degi ta pahue embo ga ke ijie pekihe iji aijaja mane aisova
LUK 10:5 eto embo ta bande ta horihe, ‘Peka ungota degi iroi’ ainge avo
LUK 10:6 pekari embo ai ta mihima kito no pekari avo amita degi iresuja te peka embo mane kito pekari avo no degi ta egerembasuja.
LUK 10:7 Eto bande ari na mane aisova rate bande vahai ai ta pere irivujo. Eto pure embo na mine humbasuja amo javotohora avoeto bande ai ta indari do ikasora amo ungota mine ra, indivujo.
LUK 10:8 Eto da dainge horavo ungo pekihe indari do ikasora tapa avo indito
LUK 10:9 embomeni avo kojihe, ‘God na tohota embomeni siriketo humbuto tihi jigesuja iji avo ungota degi puvuto ere hua,’ ainge evujo,
LUK 10:10 rate ungo da dainge horavo pekae ururoro kito amo da arahata pambuto embomeni ta degi ke einge evu ingore
LUK 10:11 ‘Ungota da ta oniho dagota utu ta vihari avo jaevekaro vovurou ungota degi hajire ikasuja. Rate kivujo God na embomeni tihi jigesuja iji avo auvehija,’ ainge evujo.
LUK 10:12 Eto ungota degi erena, iji kombu te ari sirikari iji te embomeni amita degi God na hajire ngahia be ngahia na ikau da Sodom ta embomeni na osaga isapa kesora aingeko mane kesora.
LUK 10:13 Ajao da Chorazin te da Bethsaida te ta embomeni ungota degi osaga pajire be puvuresuja. Eto ari sovera nei te nei te ungo keheva avo da Tyre te Sidon te ta jo ta ari ainge ahena amo amita embomeni na ari sasapura mahu toasi bo baiki na kajari avo asuketo amisa na kuhaehera rate ungo na ari sasapura toari uje aera
LUK 10:14 rate God na ari siriketo hajire ikari iji te ungo na hajire ngahia be avo kesova da Tyre te da Sidon te ta embomeni na osaga kesora aingeko mane kesova.
LUK 10:15 Ungo Capernaum embomeni na God ta degi vihesi ere ova te God na au Satan iresuja degi ai veto pambasova.
LUK 10:16 Eto embo amuna ke no ingesuja amo ke nau ingesuja eto ke no toasuja ainge ke nau toasuja eto na toasuja. Ainge eto amina God na ikari embo amite tapa toasuja,” ke ainge enu irae enu.
LUK 10:17 Embo tapa 72 amo pambuto pure tapa eo irae enu tunga javotoho te egerembeto puvutuhue ke einge ea, “Bada, ahihi sasapura amite ambure neite neite te tapa amina no javo ta ke ere agi ehera,” ainge eo,
LUK 10:18 Iesu ingito ke einge ena, “Pipiri uhu ta sariambu eto enda ta veaguja ainge dombo Satan na vovuoi kogovona
LUK 10:19 eto kivujo, na ungota degi sovera ikihana amo o jihuri hatiresova vuvusi hatiresova te memenga mane kesova eto ungotenau kitoho embo ta sovera amo sovera ungota nanena ikehena amina dembarira.
LUK 10:20 Rate ahihi sasapura na ungota ke agi ururoro ungo tunga javotoho mane aisova te ungota javo uhu i ta kajari mihia avoeto tunga javotoho evujo,” ke ainge enu.
LUK 10:21 Iji amikote Ahihi Otohu na tunga javotoho ari ikenu God ta degi pari einge eto ena, “Mama God uhu te enda te ta Bada, ari erevi tapa amo kiari hotembari embomeni ta degi ikae harikae rate kiari umbae embomeni ta degi ikehea, Mama amo no uje na ere oa avoeto osa ere ona.
LUK 10:22 Eto nau Mama na kiari tapa sovera tapa nau ingeni ta iketo toarira eto Mamo na vahai Meni kiarira eto Meni na vahai Mamo kiarira eto Meni na embo siriketo humbuto au Mamo kesora,” ke ainge eto
LUK 10:23 ahereketo ambotani ta pere ke einge ena, “Ungo tihi na ere kogova ari avo embo amuna kesuja amina tunga javotoho aisuja
LUK 10:24 ungota degi erena peroveta isapamane eto enda ta ‘King’ isapamane na ungo ari do ere kogova avo kesi uje isapamane ere uahera te kiae eto ungo ere ingiheva avo ingesi uje ere uahera te ingae,” ainge enu.
LUK 10:25 Ke pepeni kiari embo vahai na ereto heteto Iesu eto kesi ue ke einge ena, “Ahe poekari Embo, na ari do ue irari daroho hoteto umbano avo ejo ingone,” ainge enu
LUK 10:26 Iesu na ke mine einge ena, “God ta ke do ke pepeni ta kajari mihia avo umo eheketo kogoe?” ainge enu
LUK 10:27 embo amina ke einge ena, “God ta ke pepeni amo umo no Bada God avo no jo tapa na ahihi tapa na sovera tapa na eto hotembari tapa na osa ue no hamo simba ue osa eagoa ainge dombo no namei kamei tapa osa ejo,” ke ainge enu,
LUK 10:28 Iesu na einge ena, “Umo ke be erea. Umo ari ainge avo ue irari daroho ta iresoa,” ainge enu
LUK 10:29 embo amina amita hamo orekihie Iesu ta degi ke einge eto ingina, “Aravora te nau namei kamei amo amunure?” ainge enu,
LUK 10:30 Iesu na ke mine timu hatirari ke na einge ena, “Judea embo vahai amo Jerusalem eto da Jericho degi ta pahunu pegene embopo na puvuto embo avo teo veto degi ta pehihenu amita donda tapa oreto humbuto embo amo toto pambua
LUK 10:31 eto pahuo Judea ta priest vahai na degi ta puvutohumihe embo avo kito degi oiho ta embuto seriketo pahunu
LUK 10:32 Judea ta clan javo Levi embo vahai degi ta puvuto embo avo kito tiumbeto pahunu,
LUK 10:33 (Samaria embomeni amo Judea ta kitoho ra.) enda Samaria embo vahai amo puvutohumihe embo tea avo kito jo enu
LUK 10:34 ‘oil’ te ‘wine’ te amina orosa egeto bo na horereketo tigito oviribeto humbuto amita o ‘donkey’ hamo ta ikenu arumbenu humbuto pambuto isa pambuora embo ta evari bande ta horeto embo simba ue evinu
LUK 10:35 iho vujenu Samaria embo na koro heriso humbuto bande mamo ta ikihe ke einge ena, ‘Embo erevi simba ururo no bande ta mine doinge aisuja amo nane egerembeto puvuto no mine ikasona,’ ainge eto pambuna,” ke ainge Iesu na enu irae enu
LUK 10:36 ke pepeni kiari embo ta degi ke einge eto ingina, “Embo pegene embo na tea amita namei be amo amuna enu,” ainge enu
LUK 10:37 embo na, “Jo ari embo amo amita namei be ra,” ainge enu Iesu na, “Ari ainge dombo eto pambuto ejo,” ainge ena.
LUK 10:38 Eto Iesu te amita ambotani te aingeto degi ta pambuhumihe da vahai ai puvuto horeo evohu javo Martha amina amita bande ta indora oru enu horeo
LUK 10:39 amita jao Mary na Iesu ta utu ta arumbeto amita ahe poekari ke ingihe mihinu
LUK 10:40 Martha na embomeni unduresi donda agari jivari oenga ere umihe osaga kito Iesu ta degi pambuto ke einge ena, “Bada, na oenga agari jivari ngahia ere ona avoeto umo jo ari embo kito ejo nau jao ereto hondate ai,” ainge enu
LUK 10:41 Iesu na ke mine einge ena, “Martha, Martha, no osaga na no hini pe ere viviha rate
LUK 10:42 Mary ere ua vahai ainge aehea amina no osaga irae aehija te Mary na javotoho ere ue avo embo na mane haekasuja.”
LUK 11:1 Eto Iesu na degi vahai ai ta pari enu irae enu amita ambotani vahai na Iesu ta degi ke einge ena, “Bada, John na amita ambotani ta degi pari ahe poekena ainge dombo eto dago ta degi pari ahe poekejo,” ainge enu
LUK 11:2 Iesu na enana ta degi ke einge ena, “Ungo pari ta ke einge evujo, mama javo no amo otohu ra aisora. Umo embo tihi jigesoa iji avo ejo huroi
LUK 11:3 eto iji hekeri ta dagota indari ikejo umbare
LUK 11:4 eto embomeni na dagota degi ta sasapura eagora avo hotembeto toagora ainge dombo dagota ari sasapura, Mama God, inena hotembeto tojo, eto engekari ta dago kihi humbaojo,” ainge eto
LUK 11:5 ke nei enana ta degi einge ena, “Eto umo embo vahai amuna mume humba te namei ta degi pambuto
LUK 11:6 ke einge aisoa, ‘Namei, nau namei nei avo degi koso be puvija te do ikano indesuja avo mana mana eto inena ‘bread’ 3 ainge ikao pambuto ikano indoja puvena,’ ainge ao
LUK 11:7 amina bande jo ta mihie ke einge aisuja, ‘Na mane ujasoa te toto pambujo. Bokiri mahu ahurekehena eto na nau meniundi ga ere evena avoeto na mane ereto indari ikasona,’ ke ainge asuja.
LUK 11:8 Eto ungota degi erena amo no namei avoeto mane ereto donda ikasuja te inena kaiketo evo ujuja aisoa avoeto ereto no uje avo ikasuja.
LUK 11:9 Avoeto ainge dombo amo penunu ao God na ikasuja jombure ururo God na au kesoa eto vahihiri ao God na hirikau horasoa
LUK 11:10 eto erena amo penunu embopo na humbasora jombure ari embopo na kesora eto vahihiri ari embopo na horasora.
LUK 11:11 Ungo nei nei meni hatira te ra. Eto no meni na no degi ta umo o penunu aisuja amo inena o koso o mane ikasoa
LUK 11:12 eto di buju penunu aisuja amo o vuvusi mane ikasoa
LUK 11:13 eto ungo embo sasapura rate daingeto ungota meniundi ta degi hande jajavotoho ikasova avo ungo kiarira eto Mama uhu ta iraguja amo javotoho avoeto amita degi penunu aisoa amo amina Ahihi Otohu avo no degi ta ikasuja,” Iesu na ainge ijie ahe poekena.
LUK 11:14 eto embo vahai avo ahihi sapura na enu ke ae unu Iesu na kito ohimbenu pahunu ke ena avo embomeni na kito vani vini ea.
LUK 11:15 Rate embo nei uhoho na ke einge ea, “Ahihi sasapura ta embo okose javo Beelzebul amita sovera na ahihi sasapura ohimbaguja,” ainge eo
LUK 11:16 embo nei uhoho na Iesu eto kesi ue uhu ta hajire au kesi penunu ea.
LUK 11:17 Rate Iesu na enana ta hotembari jo ta avo kito enana ta degi ke einge ena, “Eto ungona Beelzebul ta sovera na ahihi sasapura ohimbari ke ereva te enda vahai embomeni na ereto ungo oenga isoro ururoro enda sapura aisuja. Eto bande vahai embomeni na ereto isoro aro sapura asuja ainge dombo ahihi sasapura na ereto ahihi sasapura ga isoro asora amo Satan ta irari degi sapura aisuja.
LUK 11:19 Eto na Beelzebul ta sovera na ohimbari ke ereva rate ungo Judea embo nei uhoho na amuta sovera jigama ue ahihi sasapura ohimbeove? Ungo ke ereva amo ungota ari na au ke be amo kesova.
LUK 11:20 Rate amo God ta sovera na ahihi sasapura ohimbihone kito God ta tihi jigari amo ungota degi mahu puvurarira.
LUK 11:21 Eto vuvure embo na amita ki emi humbuto amita bande simba ue irirou amita donda javotoho iresuja
LUK 11:22 rate embo nei vuvure embo ainge mane sovera pajire be amina puvuto isoro eto dembeto vuvure embo ta ki emi humota ere ua avo oreto humbuhe donda tapa humbuto pambuto amita namei kamei ga hande eto humbasuja
LUK 11:23 eto embo nau mane amo kitoho embora eto umo namote o andirari embo mane amo o ujekari embora.
LUK 11:24 Eto ahihi sapura na embo toto jangu indari degi jombure ue pahumakara ojaga tambu pere kito nau irari mahu ta egerembeto pambasona ke ijie
LUK 11:25 pambuto amita da mahu avo mahu gajiketo toreketo humbari pambari avo kito tunga javotoho ue
LUK 11:26 egerembeto pambuto amita namei kamei sasapura tapa 7 avo eto humbuto egerembeto puvuto embo ta jo ta horeto iresora. Eto embo amita sapura mahu amo isapa rate jo be egae hamo pere egena avoeto ahihi sasapura horari haite kito horeto aro sapura be aisuja.”
LUK 11:27 Ke ainge ijinu evohu vahai embo ta ugorota ta amina ke isara na einge ena, “No aja ta hini umo umbuhaja avo javotohora eto umo aja na emi kajihaja amo javotohora!” ainge enu
LUK 11:28 Iesu na ke mine einge ena, “Umo erea aravorate javotoho be amo embo amuna God ta ke ingito agi aisuja,” ainge ena.
LUK 11:29 Eto embomeni isapamane be vahaita puvuto horukeo Iesu na ihiketo ke einge ena, “Ungo embo eha miheva amo ari sasapura embomenira. Ungo God ta hajire kesi uje ere ova avo mane au kesova rate Jonah na ena avo au kesova (Eto Jonah amo umo o peni amita hini jo ta iji 3 irae enu hora ta puvuto pere ga hukenu hora ta venu da Nineveh embomeni na kia.)
LUK 11:30 eto Jonah na da Nineveh embomeni ta degi do enu kia avo Embo ta Meni na ungo eha miheva amita degi au kesova.
LUK 11:31 Eto enda kaina ta tihi jigari evohu na enda tutumota eto puvunu King Solomon ta kiari avo enu ingina eto king Solomon amo isapa rate ungota degi puvija amo peni be rate amita ke ingae ere ova avoeto iji kombu ari sirikari iji te enda kainata tihi jigari evohu na ereto ungo pehumba aisuja.
LUK 11:32 Eto nei amo da Nineveh embomeni na Jonah ta ke ingihe jo hapereketo ari sasapura toa rate Jonah amo isapa ra eto ungota degi puvija amo peni be avoeto iji kombu ta ari sirikari iji te da Nineveh embomeni na ungota degi ereto pehumba aisora.
LUK 11:33 Eto embo na kerivo ijimbeto humbuto mane gaga suvu ta ikasuja eto ovu jo ta mane ikasuja te i araha ta tembau embomeni horeto usasa kesora.
LUK 11:34 Eto no tihi amo hamo ta usasa ra. Tihi javotoho iresuja amo no hamo tapa usasa na enetasuja te tihi sapura asuja amo hamo tapa mume aisuja
LUK 11:35 eto no hamo ta usasa seiketo mume aisuja avoeto simba eto kogoejo.
LUK 11:36 Eto no hamo na usasa ue jo tapa enetasuja amo piri piri au no hamo ta usasa na jo te tapa enetihirou usasa nei na kajau usasa pere aisuja.”
LUK 11:37 Ke ainge ijie mihinu Pharisee ari embo vahai na amita bande ta indoja oru enu pambuto arumbenu
LUK 11:38 Pharisee embo na Iesu ta ingeni egae avo kito uje ae unu
LUK 11:39 Iesu na amita degi ke einge ena, “Ungo Pharisee ari embomeni na aguhu te heva te hamo pere egihie jo ta amo haja vaja uje isapamane te ari sasapura neite neite amina tongopa arira.
LUK 11:40 Ungo kiae kiae embopo, ungo ove ari embo na ungota hamo te jo te aere?
LUK 11:41 Eto ungota jo ta do mihia avo God ta degi pene ikaeheva amo jo te hamo te tapa avo egaehija.
LUK 11:42 Jove jove, Pharisee embomeni ungo God ta degi hande ikasi ue donda isasaraho mune jeune hambuga ainge kaheke kaheke eto tapa 10 ainge iketo vahai amo God ta ra eagova rate God osa ari te embo ta degi javotoho ari amite tapa avo ae toagova.
LUK 11:43 Jove, jove, ungo Pharisee embomeni. Ungo ke kasari bande ta horeto embo pepeni ta avo arumba ai ta arumbagova eto market ari degi ta isa ururovo kogue jakeka ara eagova
LUK 11:44 jove, jove, ungota degi erena. Ungo use aingeko rate hajire koro na jorereto ikae avoeto embomeni na kiae ue hamota haito pambuora rate jo ta amo masa kakesa mihia,” ke ainge enu,
LUK 11:45 ke pepeni kiari embopo na ke einge ea, “Ahe Poekari Embo, umo ke ainge ijie dago te tapa isembiha,” ainge eo
LUK 11:46 Iesu na enana ta degi ke einge ena, “Jove, jove ungo ke pepeni kiari embopo. Ungo embomeni ta degi bouka ikagova amo humbuto pambari inono aera te ungo na bouka aravo ingeni singi na hame ae ra.
LUK 11:47 Jove, jove erena peroveta ototohu mamahu amo ungota mamahamane na teo pepehekeo use amo ungo na gajika toreka ue simba eagova.
LUK 11:48 Rate amo ungota mamahamane ta ari sasapura avo kogue javotoho ke ijie use gajika toreka eagova
LUK 11:49 eto God na amita kiari na ke einge eria, Na nau peroveta te apostero te ikano enana ta degi pambasora te taro pehasora eto nei taro memenga kesora.
LUK 11:50 Eto enda ehara ta ikena iji te eto puvuto eha oroho emikote amo peroveta tapa ta orosa amo enana ta ingeni ta avoeto enana ta meniundi na hajire kesora
LUK 11:51 amo Abel ta orosa ta eto pambuto peroveta Zechariah amo temple jo ta pene gaga ugoro ai teo pehena amita orosa tapa ta mine amo ungona ikihe hajire kesova.
LUK 11:52 Jove, jove, ungo ke pepeni kiari embopo embomeni na kiari humbahera te ungo na kiari humbari ta bokiri tahimbeto oreto humbuto ojikarira. Amo ungota kiari humbari amite embo nei ta kiari humbari te tapa avo ungo na haekagova,” ke ainge enu irae enu
LUK 11:53 degi avo toto pambuna. Eto ke pepeni kiari embopo te Pharisee ari embopo te aingeto Iesu ke nei nei ijie ke sapura vahai au ingesi kaiketo engekea.
LUK 12:1 Eto ari ainge uo embomeni ‘thousand’ doitoko vahaita puvuto utu ta mine hatira ue mihio Iesu na kihi amita ambotani ta degi ke einge ena, “Enana Pharisee ari embomeni na ari javotoho avo ke be na ae ahe kihira eagora ‘bread’ ta pajirari sivo na pajito enetaguja ainge dombo eaguja avoeto be kogue irivujo.
LUK 12:2 Rate enana ta ari tapa ahurekari avo God na hirikau kesora eto ojikari avo araha ta puvurou kesora
LUK 12:3 eto ke mumete eagora avo iji te ijirou ingesora eto bande jo ta kemasa na eagora avo araha ta gagaha eto ijirou ingesora.”
LUK 12:4 “Nau namei kamei, ungota degi erena, tari pehari amina ari nei ari haite manera avoeto tari pehari embo avo joru mane aisova te
LUK 12:5 joru aisova embo amina teto humbuto gosukau memenga kiari degi ta veto osaga kesova. Ungota degi erena, ari einge aisuja embo God avo joru evujo.
LUK 12:6 Eto di siripeta ta mine amo peni mane ra. Di 5 avo 2 toea na ombuto humbahera rate God na di siripeta vahai avo mane jene ambuaisuja.
LUK 12:7 Avoeto joru aojo, di amo dombo manera, rate ungo amo dombo bera. Ungota siro hu tapa doingere amite tapa God na kiarira.
LUK 12:8 Eto ungota degi erena, embo amuna, ‘Na Keriso ke be ijie ambo ambo ere ona avoeto na amita tohora,’ ke ainge embomeni ta degi aisuja amo embo avo naura ainge uhu ta God ta Anera ototohu ta degi aisona.
LUK 12:9 Rate embo amuna embomeni ta tihi ta na ke be ae aisuja amo uhu ta God ta Anera ta degi embo avo naura ke mane aisona.
LUK 12:10 Eto embo amuna Embo ta Meni ta degi ari sapura eto urumbasuja amo hotembeto toari inono ra te embo amuna Ahihi Otohu urumbasuja amo hotembeto toari inono aera.
LUK 12:11 Eto ungota kitoho na ungo ganoka asi humbuto ikaro ke kasari bande ta hetasova tihi jigari embopo eto embo pepeni ta tombu ta heteto ke do aisova eto daingeto aisova avo hotembavojo
LUK 12:12 iji amina ke do aisova amo Ahihi Otohu na au ingihe aisova,” ke ainge avo oje kahenu irae enu.
LUK 12:13 Embo vahai amina embo ta ugorota heteto ke einge ena, “Ahe Poekari Embo, nau mama pehehija amita donda hoteto umbera avo nau namei ta ejo na kaheketo huna ikae,” ainge enu
LUK 12:14 Iesu na ke mine einge ena, “Na amuna ehei ungota ari sirikari donda kaheketo ikari simba ari embo ehene,” ke ainge eto
LUK 12:15 embo tapa ta degi ke einge ena, “Be kivujo, donda humbari uje isapamane amo sapurara. Embo ta vasiri te irari ta hajire amo haja vaja humbari ai ta manera.” ke ainge
LUK 12:16 eto timu hatirari na ke einge ena, “Haja vaja embo amita enda na be isapamane ikenu
LUK 12:17 kito ke einge hotembena, ‘Enda ta be isapamane ehija harau dainge ikano irou?
LUK 12:18 Na einge aisona, harau mamahu avo aimbeto eha pepeni pere iketo ai ta nau pure ta be te haja vaja tapa jo ai ta ikano mihirou
LUK 12:19 nau jo ta einge hotembasona, donda isapamane be mihia avoeto jua koso vahai be indari mahu erevi jigama ue nau ahihi ta jangu indari koso kaso be ue tunga javotoho be ue iresona,’ ke ainge jo ta hotembihinu
LUK 12:20 God na kito amita degi ke einge ena, ‘Umo kiae kiae ere oa. No ahihi mume eha oroho umbano irae aisuja avoeto no donda nununga ehea avo embo amuna humbau?’ ainge ena
LUK 12:21 avoeto ungota degi erena, embo amuta donda hamota hamota iresuja amo God ta tihi ta amo haja vaja embo manera,” ke ainge eto.
LUK 12:22 Amita ambotani ta degi ke einge ena, “Avoeto na ungota degi erena. Ungo do indito iresova eto do asuketo iresova avo hotembu hotembu avojo.
LUK 12:23 Eto no irari amo indari pere mane eto no hamo amo asukari pere manera
LUK 12:24 di oga kiagova amina donda ve koveto tureto humbuto harau ta mane ikaguja rate God na amita indari ikeoi indaguja.
LUK 12:25 Rate embo amita hotembari isapamane amina au amita enda ta irari iji koso mane aisuja.
LUK 12:26 Ungo ari vahai avo ari inono ae avoeto ari neite neite avo hotembu hotembu avojo.
LUK 12:27 Ji vuji ove neite neite mihera avo kogue hotembevujo. Enana pure ae eto bo kembae rate donda embo be King Solomon amita bo asukari amo ji vuji emita kiari sago javotoho ainge manera.
LUK 12:28 Rate God na ji vuji ta degi bo asukari javotoho ikaguja eto iji nei amo karaun eto enda ta veoi embo na toreketo humbuto ji ta ikagora evekaguja te ji vuji amo isapa ra te embo avo peni avoeto God na ungota degi asukari mane ikaute? Rate ungo God humota be ae eagova
LUK 12:29 ungo hotembari isapamane ue indari do indesova avo hotembu hotembu avojo
LUK 12:30 enda tapa ta embomeni na indari pure eagora eto ungota hamo ta ujeje vahai amo indari avo ungota Mama God na mahu kiarira
LUK 12:31 avoeto indari te asukari te mane hotembasova te God ta tihi jigari avo jombure evujo eto amina ungota indari te ombari te avo unduresuja.
LUK 12:32 Embomeni heriso nau ke erevi joru avojo. Ungota Mama na amiga heteto tihi jigova uje ere ua.
LUK 12:33 Ungota donda ombuto koro humbuto donda ambu embopo ta degi hande ikavo mine God na ikasuja avo mane irae aisuja avoeto ungota haja vaja avo God iraguja degi aita nununga evujo amo pegene embo na mane humbasuja o soan na mane kahumbasuja rate teho daroho iresuja
LUK 12:34 amita be amo no donda mihia degi ai ta no jo te hotembari te tapa amo mihia.
LUK 12:35 Bande mamo na pondo ta pambija aravo egerembeto puvuto bande ta horasi vahihiri aisuja avoeto ungo bande ta pure embopo na kerivo unduketo bo asuketo nununga eto simba evujo
LUK 12:37 eto ungota degi erena bande mamo na humba te retemo iho unga te rete puvuto pure embo nununga eto mihiroro horeto kogue ke einge aisuja, “Ungo pure embo jajavotohora,” ainge eto pondo humbuto puvuresuja avo hande au indesora.
LUK 12:39 Erevi be kivujo. Eto bande mamo na pegene embo iji deina pegene aisuja amo duru ingaehija amo simba ururou pegene embo na puvuto bande pejeto horihirou amo mahu haekau pambaehija.
LUK 12:40 Avoeto nununga eto irivujo. Embo ta Meni iji deina puvuresuja amo ungo kiaera.” ke ainge enu.
LUK 12:41 Peter na ke einge eto ingina, “Bada, umo timu hatirari ke emo dago ta degi eretemo embo tapa ta degi ere?” ainge enu,
LUK 12:42 Bada na ke mine einge ena, “Bande jota pure embopo ta tihi jigari avo bande mamo na amita ari javotoho avo kito humota ue pure embopo ta indari hande au indie amita ari ainge dombo evujo
LUK 12:43 eto tihi jigari na ainge ururou bande mamo na egerembeto puvuto kito tunga javotoho aisuja
LUK 12:44 avoeto erena, bande mamo na au amita haja vaja tapa simba aisuja.
LUK 12:45 Rate tihi jigari embo na bande mamo iji nei na puvuresuja avo hotembihe pure embopo te kakara te torue indari te umo te indito kava ururou
LUK 12:46 bande mamo na heun ta puvuto kito humota ari ujeae eto hajire peni amo jeto hevasuja
LUK 12:47 eto pure embo na pure mamo ta ke agi ari uje ae ue kupi kupi aisuja hajire peni vahai ikau kogurou tasuja
LUK 12:48 rate pure mamo na pure embo ta degi pure do aisuja amita ke ikae ingae avoeto pure sapura aisuja avoeto hajire isapa ikau kogurou tasuja. Eto embo na embo ta degi pure pajire ikasuja amo irae au kesi uje aisuja. Eto God na embo ta degi kiari pajire ikau humbau pure pajire aja uje aisuja.”
LUK 12:49 “Na puvena amo enda undukano evekaja puvena. Avoeto ihiketo undukasi uje ereona
LUK 12:50 te kihi amo embo na umo na bapataito eagora ainge iteko na memenga na osaga na bapataito aisuja avo hotembu hotembu ue osaga memenga kogue mihena.
LUK 12:51 Na enda ta peka humbari embo avo puvene ere hotembiheve? Ainge manera. Na puvena avoeto embomeni na kaheketo isoro mine ara aisora.
LUK 12:52 Amo bande vahai ai ta embo tapa 5 mihima kaheketo 3 amina ereto 2 amita degi tumo aisora eto 2 amina ereto 3 amita degi tumo aisora
LUK 12:53 amo meni na mamo ta degi tumo aisuja eto mamona meni ta degi tumo aisuja, eto e na iae ta degi tumo aisuja eto iae na e ta degi tumo aisuja, eto tahe na meni ae ta degi tumo aisuja eto meni ae na tahe ta degi tumo aisuja.”
LUK 12:54 Ke ainge eto embo tapa ta degi ke einge ena, “Ungo johi sohe hena ta puvutohuoi kogue ‘Ga puvuto ere hua’ ainge ijiove ga puvuto veaguja
LUK 12:55 nei ungo pisara kaina ta puvutohuoi kogue ‘Iji vevere puvuto ere hua,’ ainge ijiove puvaguja.
LUK 12:56 Ungo hotembari heriso embopora. Ungo uhu te enda te ta hajire avo kogue do puvuresuja amo ungo kiarira te iji eha emite ari do puvija avo ungo kito kiarako ere ova.
LUK 12:57 Ungo ari javotoho do aisova amo do eto siriketo ari uje ae ere ove?
LUK 12:58 Ungo koto ari degi ta pahue ungo ganoka aisuja Embo ga ke ijie peka evujo. Eto ainge ae amo amina ungo humbuto pambuto koto ta ke sirikari embo amita ingeni ta ikau humbuto tipura simba ari embo ta ingeni ta ikau humbuto tipura ta gosukasuja.
LUK 12:59 Eto ungo ai ta mihie ungota ari sasapura ta mine isapa te peni te humbasova,” ainge Iesu na ena.
LUK 13:1 Eto iji amite embo nei uhoho na Iesu ta degi puvuto amita degi ke erevi harikea, “Galilee embopo na God ta degi hande ikasi ue o torore governor Pilate na puvuto embo avo tehei pehehere enana ta orosa o ta orosa ga vahaita veto jijinga ehija” ke ainge ijie hihi tirio
LUK 13:2 ingito enana ta degi ke einge ena, “Enana Galilee embo nei uhoho ainge mane ari sasapura embopo avoeto hajire ikari ke erevete?
LUK 13:3 Ainge manera avoeto nane erena, eto ungo tunga haperekae aisova amo ungo te tapa sasari aisova.
LUK 13:4 Eto nei ainge amo Siloam ta bande koso vahai na vurereketo veto Jerusalem embo tapa 18 tehei pehehera amo Jerusalem embo nei nei ainge mane embo sasapura avoeto tehei pehehera avo ere hotembiheve?
LUK 13:5 Ainge manera. Ungota degi erena, eto ungo tunga haperekae aisova amo ungo te tapa sasari aisova.” ainge eto.
LUK 13:6 Timu hatirari ke einge ena, “Embo na amita pure ta pambuto ji junga urari avo be kesi pambuna rate amita be irae
LUK 13:7 avoeto amita pure simba ari embo ta degi ke einge ena, ‘Kijo na ei ta puvuto jua tapa 3 ehena amita jo ta ji junga amita be jombure ere ovona rate hambae avoeto enda erevi mane aijaja aisona avoeto jejo irae ai’ ke ainge enu
LUK 13:8 pure embo na ke mine einge ena, ‘Jua vahai emita jo ta tojo iroi, na amita susu ta enda koveto jere ikasona.
LUK 13:9 Eto jua nei amita jo ta be ekau kito amo toasoa te be ekae kito jasoa.’” ke ainge Iesu na ena.
LUK 13:10 Eto jangu indari iji vahai Iesu na ke kasari bande ta ke ahe poekihe mihinu
LUK 13:11 evohu vahai avo ahihi sapura na horenu ku okokombari jua tapa 18 amita jo ta ambure humbuto mihahija
LUK 13:12 avo Iesu na kito jage enu ereto inu ke einge ena, “No ambure na pundurari avo ere sijekihena” ainge ijie
LUK 13:13 ingeni hamo ta tembihinu tambu eto heteto God jakeka ena.
LUK 13:14 Rate ke kasari bande ta tihi jigari embo na Iesu na jangu indari iji te embo enu kojena avo kito tumo ue embomeni ta degi ke einge ena, “Pure ari iji amo tapa 6 mihia amita jo ta ungo kojaja puvuvujo rate jangu indari iji te mane kojaja puvuresova,” ainge ijinu
LUK 13:15 Bada na ingito ke einge ena, “Ungo jo heriso ari embopo. Ungota o ‘donkey’ retemo ‘cow’ re handukari mihia avo jangu indari iji te bujeketo humbuto pambavo umo mane indoro?
LUK 13:16 Rate Abraham ta iae erevi Satan na jua tapa 18 amita jo ta pundurari avo jangu indari iji te mane sijekano?” Ke ainge ijinu
LUK 13:17 Iesu ta kitoho na me pajire be kia. Eto embomeni na Iesu ta ari nei te nei te ena avo kito tunga javotoho ea.
LUK 13:18 Eto Iesu na embomeni ta degi ke nei einge ena, “God na embo amita toho siriketo humbuto tihi jigesuja amo do aingekore? Eto timu hatirari ke daingeto ke be mo harikaro?
LUK 13:19 Eto ji javo ‘Mustard’ amita ve isapa vahai avo embo na humbuto amita pure ta urenu pajito hatu kaheto peni vahai enu di na puvuto amita hatu ta nga ikea, aingekora.” ainge eto.
LUK 13:20 Ke nei einge ena “Eto God na tohota embomeni siriketo humbuto tihi jigesuja amo do aingekore?
LUK 13:21 Eto evohu na bread ingasi ue pajirari sivo isapa jojeto ‘Flour baiki’ vahai ainge sivo ga tapa tavenu pajito peni vahai ena, aingekora.” ke ainge Iesu na ena.
LUK 13:22 Eto Jerusalem pambasi degi ta pahue da ari na eto horihe embomeni ahe poekena.
LUK 13:23 Eto embo vahai amina Iesu ta degi eto ingina “Bada, eto God na embo heriso oreketo umbautemo isapamane humbau?” ainge enu
LUK 13:24 embo tapa ta degi ke einge ena “Embo isapamane na etokito horasora rate horari haite mane aisuja avoeto ungota degi erena, pe isapa paukari ai ta kihon kahon eto pambuvujo.
LUK 13:25 Amo bande mamo na bokiri ahurekau puvuto ahone ta heteto vahihiri ue ‘Bada hirikejo horare’ ainge ijirovo bande mamo na ‘Ungo davo embore amo na kiaera’ ainge ijirou,
LUK 13:26 ungo na ke mine einge aisova, ‘Inena dagota da arahata ahe poekihoe ungote indari vahaita indaehera aravora,’ ainge ijirovo
LUK 13:27 amina ke einge aisuja, ‘Ungo dainge eto puveva amo na kiae avoeto erena ungo ari sasapura embopo na toto pambuvu’ ainge ijirou peroveta mamahu tapa amite Abraham te Isaac te Jacob te aingeto God ta tihi jigari degi ta mahu horari iragora avo kogue ungo araha ta gosukari avoeto
LUK 13:28 sisi sasi ijie ti kambuto kiroro kiroro aisova.
LUK 13:29 Eto embo na ihane ta sohe ta kaina ta pahina ta eto puvuto God ta tihi jigari ta horeto gaga ta arumbeto pondo indesora.
LUK 13:30 Eto kivu, embomeni na ‘Na na’ ijie kihi ere pahora amo ambota horasora eto ambota ere pahora amo kihi horasora” ainge ena.
LUK 13:31 Eto iji amite Pharisee ari embopo nei uhoho na Iesu ta degi puvuto ke einge, ea, “Embo Herod na umo tau pehara uje ere ua avoeto degi erevi toto pambu” ainge eo
LUK 13:32 ke mine einge ena, “Ahoe ino amita degi pambuto ke einge evu ingoi ‘Na iji heriso amina amo ahihi sasapura ohimbasona ambure embopo kokojekasona eto iji nei vahai amina pure nau tapa ano irae aisuja’
LUK 13:33 aravorate da Jerusalem ta pahurono iji 3 irae aisuja. Eto peroveta tapa amo da Jerusalem ta sasari eagora te peroveta vahai amo enda nei ta sari aja ereite?
LUK 13:34 Jove jove, da Jerusalem. No embomeni na peroveta tapa no degi ta ikari avo koro na gosuketo toruove pepehekihahera. Rate na ungota meniundi avo di ohora ta gati na kakareketo humbarako asi ere ovona te ungo na uje ae ere ova.
LUK 13:35 Ungota irari da avo God na ungota ingeni ta ere toruhua avoeto erena, ungona na mane kesova te ‘Bada God ta javo ta puvuto ere hua amo embo javotohora’ ijie na kesova.”
LUK 14:1 Eto jangu indari iji vahai Iesu na Pharisee ari embo peni amita bande ta pondo indesi pambuto mihinu embomeni areto Iesu kogue mihio
LUK 14:2 embo vahai amo ingeni te utu te buru karu ari avo mihinu kito
LUK 14:3 ke pepeni kiari embopo te Pharisee ari embopo te ta degi ke einge ena, “Eto embo na jangu indari iji te embo kojasuja amo ke pepeni poekaute mo mane poekau?” ainge enu
LUK 14:4 embomeni ke mine ae eo kito embo amita utu ingeni buru karu ari avo enu isikenu, ikenu veto pahunu
LUK 14:5 embomeni mihia amita degi ke einge eto ingina, “Eto ungo embo amita meni retemo o cow rete avo umo timbari hoto ta veasuja ungo embo amuna jangu indari iji te amo jigito gorukau vihou?” ainge eto inginu
LUK 14:6 enana ke mine ari inono ae ea.
LUK 14:7 Eto pondo indora oru ea embomeni na bande jo ta horeto embo peni ta arumbari besi avo kito arumbihio Iesu na kito embomeni ta degi timu hatirari ke einge ena,
LUK 14:8 “Ungo pondo ta puvuto na embo peni ra ainge ijie embo peni ta avo arumba ai ta arumbavojo. Eto ainge aisoa amo embo peni be avo puvutohururou
LUK 14:9 pondo mamo na kito no avo arumba avo amita degi ta ikasi ue umo au ereto ku ta pambuto arumbihe me kesoa.
LUK 14:10 Rate umo pondo indoa oru aro pambuto kito pondo bande ta horeto ku hena ta arumbejo eto pondo mamo na puvuto umo kito au umo embo ta tihi buju ta arumbihirou embomeni na kito jakeka aisora.
LUK 14:11 Eto amita be amo embo amuna na araha embora ainge ijie puvuresuja amo au maevo aisuja rate embo amuna na embo mane maevo ra ijie puvuresuja amina araha embo aisuja.” ainge ijie
LUK 14:12 Iesu na pondo mamo ta degi ke einge ena, “No pondo amo peni retemo isaparami no namei kamei te no da vahai embomeni te javo vahai embomeni te haja vaja embopo te oru mane aisoa, amo no pondo mine ikaro iraesuja avoeto.
LUK 14:13 Rate pondo asi uje eto kito amo popora embo hoivo embo tihi kuru ari embo kini humbari embo pondo mine ikari haite mane embo avo oru ao puvuto no pondo indesora
LUK 14:14 eto ambota embo jajavotoho vasiri te erasora iji no pondo ta mine humbuhe tunga javotoho aisoa” ainge ijinu.
LUK 14:15 Embo vahai gaga ta arumbeto mihina amina ingito ke einge ena, “Eto embo amuna God ta tihi jigari degi ta horeto pondo indesuja amina tunga javotoho be aisuja,” ainge enu
LUK 14:16 Iesu na amita degi hihi einge tirina, “Embo vahai na pondo pajire be humbuto embo isapamane oru ena
LUK 14:17 eto pondo iji puvunu pondo mamo na pure embo vahai ikenu pambuto oru ari embo ta degi ke einge ena, ‘Pondo mahu nununga ehija indesi have’ ainge enu
LUK 14:18 enana pondo indari uje ae ue degi serikari ke ijie embo vahai amina ke nei einge ena, ‘Ajato erena na enda vahai avo koro na ombuto humbuto pambuto kesi uje ere ona avoeto mane pambasona’ ainge enu
LUK 14:19 embo nei na einge ena, ‘Aja to erena rate na nau pure ta enda kovari o cow tapa 10 ainge koro na ombuto humbuto pambuto kesi uje ere ona avoeto mane pambasona,’ ainge enu
LUK 14:20 embo nei na ke einge ena, ‘Aja to erena rate na kakara eha jimbena avoeto mane pambasona.’ ke ainge pere eo
LUK 14:21 ingito egerembeto pambuto pondo mamo ta degi enu ingito tumo ue amita pure embo ta degi ke einge ena, ‘Aravora te degi ari na ue hoivo embopo te kini humbari embopo te popora embopo te tihi kuru ari embopo te tapa ejo pondo ta hurore,’ ainge enu
LUK 14:22 pambuto egerembeto puvuto pondo mamo ta degi ke einge ena, ‘Ke ehea avo tapa ehene irae ehija rate pondo pajire be avoeto pe nei mihia’ ainge enu
LUK 14:23 ke einge ena ‘Na nau bande avo embo na enetaja uje ere ona avoeto pure degi tapa ta pahue ke sovera na eto ejo puvurore
LUK 14:24 eto erena ingijo, embomeni tapa mahu oru uena amina nau pondo ta seha gamo mane indito kesora’.” ainge ena.
LUK 14:25 Eto embomeni isapamane Iesu ga degi ta pahuo Iesu na ahereketo embomeni ta degi ke einge ena,
LUK 14:26 “Eto embo amuna na ambo ambo asi uje aisuja rate amita mama te aja te meniundi te namei kamei te du emone te amita vasiri te tapa toari inono ae aisuja amo ambotani nau ari haite manera.
LUK 14:27 Eto embo amuna amita ji atahu bouka koho ta humbuto na ambo ambo ari uje ae aisuja amo nau ambotani mane aisuja.
LUK 14:28 Ari amo eingera, Eto embo na bande pajire be ihiketo gerikasi ue amita koro heka eto inonora ijie gerikasuja.
LUK 14:29 Eto kihi koro heka ae sio gerikasuja amo tutuvi hurukasuja te koro irae au toau irirou embo na kogue urumbihe
LUK 14:30 ke einge aisora, ‘Embo na bande peni ikasi tutuvi hurehija rate ari inono ae ra.’
LUK 14:31 Eto ke nei amo king emita isoro embopo tapa 10,000 amina king nei amita isoro embopo tapa 20,000 amiga isoro sio mane aisuja te kihi amita kiari embopo ga hihi tirito kito inono eto isoro aisuja,
LUK 14:32 rate hihi tirihie dembari inono ae kito peka humbari embopo ikau pambuto king nei ga peka humbari ta hihi tiresora.
LUK 14:33 Avoeto erena amo embo vahai amuna amita donda te vasiri te tapa toari uje ae aisuja amo nau ambotani ari inono manera.
LUK 14:34 Ungo kiarira, haso ta gamo irae sigeto veto pambasuja amo haso ta gamo egerembeto puvurari inono aera.
LUK 14:35 Eto mu veto pambasuja amita soka amo enda ta gamo ikari inono ae ra eto se hoto ta sivo ari inono ae avoeto gosukagora. Ungo ojete kito ingivujo” ainge ena.
LUK 15:1 Eto iji amikote tax humbari embopo te ari sasapura embopo te aingeto Iesu ta ke ingesi auveo
LUK 15:2 enana Pharisee ari embopo te ke pepeni simba ari embopo te na kito ujeae ue ke einge ea “Embo emina ari sasapura embopo ga umoro ue indari indaguja” ainge ijio
LUK 15:3 Iesu na ingito timu hatirari ke na einge ena,
LUK 15:4 “O simba ari embo ta o sheep tapa 100 rate vahai kiae sein eto pambasuja amo o mamo na o tapa 99 avo au ojaga tambu ta iriroro o vahai avo jombure ere uma
LUK 15:5 hambuto oviribeto koho ta iketo humbuto tunga javotoho ue
LUK 15:6 amita da ta pambuto amita da embomeni te amita namei kamei te avo au puvuroro ke einge aisuja ‘Nau o sheep vahai sein eto pambija amo mahu humbena avoeto tunga javotoho evujo.’ ainge aisuja
LUK 15:7 avoeto erena amo uhu i ta amo ainge dombo eaguja. Eto ari sapura embo vahai amina amita jo ahereketo God ta degi egerembasuja amo uhu ta irari embomeni amina tunga javotoho be eagora rate embo isapamane na ‘Na javotoho ra’ aisora amo God na ke be mane hotembasuja.
LUK 15:8 Eto nei amo evohu vahai amita koro ho te amo tapa 10 rate vahai avo veto pambasuja amo kerivo ijimbeto bande suvu avo gajikihie jombure ere uma
LUK 15:9 koro hambuto amita jao tahe au huroro ke einge aisuja, ‘Nau koro ho te vahai ehene veto pambija avo hambena erevira tunga javotoho evujo.’ ainge aisuja
LUK 15:10 eto ke erena ainge dombo amo ari sapura embo vahai na God tunga humbuto tunga hapereketo God ta degi huresuja amo God ta Anera na kito tunga javotoho be eagora.” ke ainge Iesu na.
LUK 15:11 Eto ke nei einge ena, “Embo vahai mihahija amita meni heriso
LUK 15:12 rate meni ambo amina mamo ta degi penunu einge ena, ‘Mama, na no donda hotari umbasona avo mahu kaheketo ikejo umbane,’ ainge enu mamo ta haja vaja avo kaheketo ikenu humbuto
LUK 15:13 iji heriso amita ambota meni amina donda tapa avo ombuto koro humbuto enda hoi ta pambuto koro aravo amita uje nei te nei te ai ta sio sao jigama ue
LUK 15:14 koro irae ena. Eto enda ai ta beuje iji pajire be puvunu meni amina ihiketo indari jombure ue
LUK 15:15 enda amita embo vahai amita degi ta pure asi penunu enu ikenu pambuto o ohu simba ere uahija
LUK 15:16 rate embo na u soka o ta humbuto puvuto ikeore indioi amite tapa indesi uje eaguja rate meni amita ingeni ta ikae.
LUK 15:17 Eto meni amina mihahija amo do aingere avo kito ke einge ena ‘Na nau mama ta meni rate mama ta bande pure embopo na indari ere indera te deo deo ta ere ua te na enda nei ta puvuto mihie beuje na ere pehihovona
LUK 15:18 avoeto na ereto pambuto nau mama ta degi ke einge aisona, ‘Mama na no degi ta eto God ta degi ta ari sapura be uena
LUK 15:19 avoeto na no meni mane avoeto ejo no pure embo ane’ ’ ke ainge aisi hotembeto
LUK 15:20 ereto mamo ta degi pahunu mamo na hoi be ta kito ereto huheveto puvuto andito mune tavo unu
LUK 15:21 meni amina ke einge ena, “Mama, na no degi ta eto God ta degi ta ari sapura be uena avoeto inena mane nau meni ke aisoa,” ainge ijinu
LUK 15:22 mamo na amita pure embo ta degi ke einge ena, ‘Pambuto bo javotoho vahai humbuto ingeni pupuri humbuto utu goru humbuto puvuto ikao asukihirou
LUK 15:23 pambuto o cow meni seha te teto hevejo ungote nau meni ta pondo are.
LUK 15:24 Nau meni sein eto pambari avo sari ari ke eagona vasiri te puvei hambena erevira avoeto ungote pondo are.’ ainge eto pondo uo
LUK 15:25 meni bugo pure ta pambuto egerembeto puvuto da auvihie haveni te ino te ingito amita be amo deire kesi uje eto
LUK 15:26 pure embo vahai enu inu ‘Ja ere tivihera amita be deire?’ ainge enu
LUK 15:27 ke mine einge ena, ‘No eambo sari ari ke eagora avo puvei kito no mama na o cow meni javotoho seha te teto heveto amita pondo ere ua’ ainge enu
LUK 15:28 ingito tumo eto pondo ta pambae mihinu mamo na puvuto pondo ta pambaja hihine enu
LUK 15:29 mamo ta degi ke einge ena, ‘Na jua koso kaso be no pure ue ke tapa agi ereovona te inena o goat meni teto ikae heveto nau namei kamei ga pondo ae mihovona te
LUK 15:30 no meni nei avo no haja vaja humbuto pambuto tiha paiha ue irae ihi mahi eto puvija amita degi cow meni javotoho teto heveto pondo ere oe?’ ainge enu mamo
LUK 15:31 na ke mine einge ena, ‘Nau meni umo namote tapa iragoa avoeto donda nau tapa amo nora
LUK 15:32 te no eambo sein eto pambari avo sari ari ke eagona avo vasiri te puvei hambena avoeto tunga javotoho ue ere ona te amita pondo mane toasona’.”
LUK 16:1 Eto Iesu na amita ambotani ta degi ke einge ena, “Eto haja vaja embo vahai na koro kaheketo pure kiari embo ta degi ikenu humbuto pure ena rate pure ta pere koro ikae ue sio aija unu embomeni na kito pambuto koro ikena embo amita degi harikeo ingito
LUK 16:2 enu puvunu ke einge ena, ‘Embomeni na puvuto nau degi ta umo pure sapura oe ehera avoeto pure mane aisoa avoeto ere haekihena koro amina pure do do ue ke kakajekagoa tapa avo ike kione,’ ainge enu
LUK 16:3 pure embo amo pambuto umo oenga ke einge hotembena, ‘Koro ikena embo amina pure nau ere haekihia avoeto na do ano? Iji vevere ta heteto pure ari uje ae ereona eto degi arahata arumbeto koro penunu ahena te me kiagona uje ae ereona,
LUK 16:4 aravora, pure nau irae ehija avoeto embomeni na na kito pekihe hondate ara ari erevi aisona’. Ke ainge eto
LUK 16:5 donda mamo amita degi koro ambota ikasi ke ijie donda penunu eto humbari embopo avo jage enu puvuo embo kihi puvuna amita degi ke einge eto ingina, ‘Nau tihi jigari embo ta degi donda doinge mine ikae teho umbuhae?’ ainge
LUK 16:6 enu ‘Nau ‘oil drum’ tapa 10 ainge humbuhana’ ke ainge enu ‘Aravora te no paper avo ikejo jaeveketo gosukihe ‘oil drum’ 5 ainge humbari ke ijie kaeto ikano humbuto pambuto ao kesuja’ ainge ijie kaeto iketo
LUK 16:7 embo nei amita degi ke einge ena, ‘Nau tihi jigari embo ta degi donda doinge mine ikae teho umbuhae?’ ainge enu ‘Nau ‘rice’ baiki tapa 100 ainge humbuhana’ enu ‘Aravorate no paper avo ikejo jaeveketo gosukihe ‘rice’ baiki tapa 80 ainge humbari ke ijie kaeto ikano humbuto pambuto ao kesuja’ ari sokova ainge ena
LUK 16:8 avo donda mamo na kito embo avo jakeka ena amita hamo simba ue pure sokova ena avoeto. Eto enda embomeni na enda ta javotoho na irari hotembari pure isapamane eagora rate God ta usasa ta irari embomeni na hotembae ue pure nei do ae eagora
LUK 16:9 avoeto erena amo koro amo enda ta donda sapura ra avoeto donda avo koro irae embopo ta hande ue namei kamei evujo eto koro avo irae aisuja iji te God na umo humbau amita tihi jigari ta iresoa.
LUK 16:10 Embo amuna pure isapa ikaro aisuja amo embo pure avo humota ari haite kito ehako pure pajire ikau pure javotoho aisuja. Eto embo amuna koro isapa humbuto pure sokova aisuja ainge eto ehako koro peni humbuto pure sokova aisuja.
LUK 16:11 Eto umo enda ta donda avo humbuto ari sio sao ururo kito amo umo humota be ae avoeto haja vaja be avo mane ikasuja.
LUK 16:12 Eto embo nei ta donda humbuto sio aisoa amo God na donda no be avo mane ikasuja.
LUK 16:13 Eto pure embo vahai amina tihi jigari embo heriso ta ke agi ari haite mane ra. Eto tihi jigari heriso hetaro pure embo vahai amina embo nei amita ke agi ue nei amita ke peive aisuja. Eto embo vahai osa ue nei uje ae aisuja. Eto ainge dombo iji vahai amina koro ta ke te God ta ke te agi ari haite mane ra.” ke erevi Iesu na ainge ijie ahe poekihinu.
LUK 16:14 Enana Pharisee ari embomeni amo koro osa ari embopo avoeto Iesu urumbihio
LUK 16:15 enana ta degi ke einge ena, “Ungo embo ta tihi ta na embo javotoho ra ainge ijie ere ova te God na ungota jo kogue eto embo na kogue jakeka erera te God na ere kogua avo sapura bera.
LUK 16:16 Eto ke pepeni ta ke kajari amite peroveta ta ke te avo ere puvutohumihe John ta iji te irae ehei God na embomeni amita siriketo humbuto tihi jigesuja amita ke avo ihiketo hande ere ovora eto God ta tihi jigari ai ta embomeni na horasi sunumbo sunumbo ere ora.
LUK 16:17 Uhu te enda te irae aisuja rate God ta ke pepeni tapa amita jo ta ke vahai mane irae aisuja.
LUK 16:18 Eto embo amuna amita ae toto nei jimbasuja amo tiha eaguja eto ae mahu toari avo embo amuna jimbasuja amo tiha aisuja.”
LUK 16:19 “Eto enda ta haja vaja embo vahai amita bo kembari javotoho ove pangari avo asuketo ue eto iji tapa amina indari javotoho neite neite ere indiahija.
LUK 16:20 Amita bande huga na joekari pe ai ta hoivo embo javo Lazarus amita hamo uhu tapa amo mahu na togari amina hereketo embomeni ta degi koro penunu ijie mihahija
LUK 16:21 embo amina donda embo amita indari sirivo gaga suvu ta veaguja avo indesi uje ere uahija rate ikae indae teho mihoi ino na puvuto amita mahu avo aniheto ere indaehera.
LUK 16:22 Eto pehihenu God ta Anera na amita ahihi humbuto pambuto Abraham peheto pambuto mihina degi vahai ai ta ikena. Eto haja vaja embo pehenu koveo
LUK 16:23 amita ahihi amo memenga osaga kiari degi ai ta pambuto mihie arerembeto Abraham avo hoi be ta kogue eto Lazarus amo engihita arumbeto mihina avo kogue jage
LUK 16:24 eto ke einge ena, ‘Mama, Abraham, na ere kogoa amo jo ere oite? Ji peri ta veto mihene evikihoi memenga pajire be ere kogona avoeto Lazarus avo ejo amita ingeni singi vahai avo umo ta hatito puvuto nau ivivi ta kaimbau vevere jamo ai’ ainge enu
LUK 16:25 Abraham ingito ke einge ena, ‘Nau meni, umo hotembae ere oete? Umo enda ta vasiri te irari iji te inena no indari humbari jajavotoho avo jigama ere uahea te Lazarus amina donda sasapura pere jigama ere uahija eto puvuto tunga jamo jamo ari degi ta jangu indie mihei umo avo osaga ere kogoa
LUK 16:26 eto nei amo umo mihea dago mihera orohu ai ta amo hoto pajire be eto koso vahai kovari mihia ai ta mane mine emba eagora ke ari ra’. Ainge enu
LUK 16:27 haja vaja embo amina ke einge ena, ‘Aravorate Mama no degi ta penunu erena, Nau mama ta bande ta nau eambopo tapa 5 mihera avoeto Lazarus ikejo pambuto au ingito memenga kiari degi ei ta mane puvuresora’, ainge enu
LUK 16:29 Abraham na ke mine einge ena, ‘Moses ta ke kajari amite peroveta mamahu tapa amita ke kajari enana ta degi mihia avo mane kioro?’ ainge enu
LUK 16:30 ‘Mama, mane kesora avoeto embo pehari na egerembeto pambuto au ingihe avo jo ahereketo ari sasapura toasora’ ainge enu
LUK 16:31 amita degi ke einge ena, ‘Enana Moses ta ke te peroveta ta ke te avo ingari uje ae eagora avoeto embo na vasiri te ereto ke aisuja amite tapa mane ingesora’.” Ainge ena.
LUK 17:1 Eto Iesu na amita ambotani ta degi ke einge ena, “Engekari puvuresuja rate engekasuja embo amita degi avo hajire be ikau kesuja.
LUK 17:2 Eto embo amuna na humota ari embo erevi avo engekau sapura aisuja amo nanena embo amita degi mine ikano memenga peni vahai kesuja. Eto embo na engekasuja embo ta tunga ta esi tigito koro peni vahai handuketo eva ta kihi gosukasuja amo memenga God na au kesuja aingeko avo mane kesuja.
LUK 17:3 Be kogue irivujo. Eto no namei na ari sapura au kito oje kahari ke na isembejo jo hapereketo aja to ai. Eto aja to ijirou ingito hotembeto tojo.
LUK 17:4 Eto embo vahai na no degi ta ari sapura tapa 7 ainge iji vahai amita jo ta eto ahereketo iji vahai amina aja to tapa 7 ainge ijirou ingihe hotembeto tojo”. Ainge ijie ahe poekena.
LUK 17:5 Eto Iesu ta apostero na amita degi ke einge ea, “Ejo dago umo humota be aisora”, ainge eo,
LUK 17:6 Bada na ke einge ena “Ji ‘Mustard’ ta ve isapa be ainge dombo na humota aheva amo ji peni eremita degi ‘Umo oenga uketo pambuto eva ta veto huruke’ ainge aheva amo ke agi eto ainge aehija.”
LUK 17:7 Eto ungo embo vahai amita pure embo na pure andage ere puvuroutemo o simba ere uma puvutohoi ke einge eagovete? Nau pure embo umo ei huma arumbeto indari indijo”, ainge mane eagova te
LUK 17:8 ke einge eagova, “Umo kuheto indari nau ageto ikao indono umo ambota indesoa” ke ainge ao
LUK 17:9 agi aisuja amo osari ke mane ikasoa amo teho pure amita avo ere ua
LUK 17:10 avoeto ungo God na pure do ava eria avo ue ke mine ara ijie einge evujo, “Dago teho pure embopo avoeto dago pure nei do mane, pure dagota avo ere ora,” ainge evujo.
LUK 17:11 Eto Jerusalem ta pambasi degi ta pahue enda Samaria eto Galilee amita hane ai ta pahue
LUK 17:12 da isapa vahai ai horenu kini humbari embopo tapa 10 amina Iesu puvutuhunu kito hoi ta heteto
LUK 17:13 jage eto ke einge ea, “Iesu, Bada, dago jo e.” ainge eo
LUK 17:14 kogue ke einge ena, “Ungo pambuto priests ta degi evujo ungota hamo kiore,” ainge ijinu enana ta kini tapa irae eo javotoho ea.
LUK 17:15 Eto kini humbari embo vahai amo enda Samaria embo amita hamo avo javotoho enu kito egerembeto gagaha eto God jakeka ijie puvuto
LUK 17:16 Iesu ta utu ta veto gogovo ue osa enu,
LUK 17:17 Iesu na kito ke einge ena “Embo tapa 10 rate embo 9 amo daingere?
LUK 17:18 Da nei embo vahai emina pere God jakeka asi puvei?”
LUK 17:19 eto embo ta degi einge ena, “Ereto pambujo. No humota ari na no ahihi te hamo te orekehija,” ainge ena.
LUK 17:20 Eto iji vahai Pharisee ari embomeni na God ta tihi jigari iji avo iji deina puvurou avo Iesu ta degi eo ingito ke mine einge ena, “Eto God na embomeni tihi jigari ta hajire avo tihi na mane kesora.
LUK 17:21 Embo na ‘Erevira kijo’ au mane kesoa eto ‘Orovira kijo’ au mane kesoa rate ingivujo, God na embomeni tihi jigesuja amo ungota jo ta ra”. Ainge eto
LUK 17:22 amita ambotani ta degi ke einge ena, “Iji puvuto ere hua amikote ungo na Embo ta Meni ta tihi jigari iji vahai be avo kesi uje be aisova rate mane kesova.
LUK 17:23 Iji amikote embo na ereto ‘Iesu puvija orovira kivujo’ ijirou embo nei na ‘Iesu puvija erevira, huma, kivu.’ ainge ijiroro ambo ambo avojo.
LUK 17:24 Eto pipiri sohe hena ta sariambu eto vihito pambuto ihane ta eaguja ainge dombo Embo ta Meni amita puvurari iji na amo ainge aisuja.
LUK 17:25 Rate kihi amo embo eha mihera amina Embo ta Meni uje ae ue aro memenga osaga kesuja.
LUK 17:26 Eto Noah ta iji te embomeni na ari do do ea ainge dombo Embo ta Meni amita puvurari iji te amo ainge aisora.
LUK 17:27 Enana indari indie a dorovu ue vi dorovu ue mihio Noah na e nga jo ta vivihinu ga veto irerembenu tapa sasari ea
LUK 17:28 eto ainge dombo embo Lot ta iji te embomeni na indari indie donda ombuto humbuhe ve kokovikihe bande gerikihie mihio
LUK 17:29 iji vahai Lot da Sodom toto pahunu koro vevere te ji evekari te uhu i ta eto veto tapa tenu sasari ea
LUK 17:30 eto Embo ta Meni irerembeto puvuresuja iji te embomeni na ari ainge kesora
LUK 17:31 eto iji amikote embo bande i ta mihia amina veto donda mane siriketo humbuto pambasuja eto embo pure ta mihia amina mane egerembasuja.
LUK 17:32 Lot ta ae na do ena avo hotembevujo.
LUK 17:33 Eto embo amuna amita vasiri avo orekasi uje aisuja amita vasiri avo irae veto pambasuja rate embo amuna amita vasiri teho ke ijie toasuja amina vasiri te iresuja.
LUK 17:34 Eto ungota degi erena, mume amikote embo heriso bande vahai ta eviroro Anera na veto vahai humbuto pahue nei toau iresuja.
LUK 17:35 Eto evohu heriso u gajikihiroro Anera na veto vahai humbuto pahue nei toau iresuja.
LUK 17:36 Eto embo heriso pure ta iriroro Anera na veto vahai humbuto pahue nei toau iresuja.” ainge enu
LUK 17:37 enana na “Vasiri amo degi dainge dainge eto kioro?” ainge eto ingio Iesu na ke einge ena, “O sari ue mihoi di oga na tihi peinga veto areto indagora, aingekora”. Ainge ena.
LUK 18:1 Eto enana pari ta pegogo eagora kaiketo pari ara Iesu na ambotani ta degi timu hatirari ke na einge ena,
LUK 18:2 “Eto da vahai ai ta koto ta ke ingito sirikari embo okose amo God hotembae eaguja eto embo tunga humbae eaguja embo avo mihinu
LUK 18:3 da amita evohu doru vahai amina amita degi kaiketo puvutohue penunu einge ere ijiahija, ‘Na hondate eto embo nau degi ta kitoho ere ova avo ke siriketo ejo tambu ai,’ penunu ainge pere ijioi
LUK 18:4 ingito ingarako ue mihahija umo oenga einge hotembena, ‘Na God hotembae ue embo tunga humbae ue iragona
LUK 18:5 te evohu doru emina kaiketo penunu ijioi ingihovona tohene oje memenga ehija avoeto amita ngahia deire avo ano tambu aisuja.’
LUK 18:6 ke ainge ena, amo koto ta ke sirikari embo sapura amina ena avoeto
LUK 18:7 God javotoho amita embomeni na iji te mume te mahainge amita degi penunu ijiroro amo iji koso be ingito ingarako ue iroute?
LUK 18:8 Na ungota degi erena amo God na amita embomeni mahu sausau hondate aisuja. Rate Embo ta Meni puvuresuja amina God humota ari embo enda ei ta hambautemo mane hambau?” ainge eto.
LUK 18:9 Iesu na embomeni nei uhoho amina na javotohora ijie embo nei sapurara ke ainge ari embomeni amita degi timu hatirari ke einge ena
LUK 18:10 “Embo heriso pari asi temple ta pambua vahai amo Pharisee ari embo eto vahai amo tax koro humbari embo aingeto horeo
LUK 18:11 Pharisee ari embo amina heteto pari einge ena, ‘Embo nei ke sokova ijie koro pegene eagora nei ke pepeni poekagora nei tiha paiha eagora nei amo tax humbari embo puvija erevira ainge ari sapura neite neite eagora te na ainge mane avoeto God, na umo osa ere ona.
LUK 18:12 Na hura tapa amita jo ta iji heriso heriso donda ajirekagona eto nau donda tapa avo kaheke kaheke eto tapa 10 ainge iketo vahai humbuto temple ta ikagona,’ pari ainge pere ijinu
LUK 18:13 tax humbari embo amo hoi ta heteto amita ari sapura avo hotembihe humo kouketo mihie jenge torue pari einge ena, ‘God, na ari sapura embo rate jo e’ pari ainge ijinu
LUK 18:14 God na ingito tunga javotoho ue hotembeto toruhunu ereto amita bande ta pambuna, Pharisee ari embo aingeko manera. Eto embo amuna umo oenga jakeka aisuja embo amo au isapa aisuja rate meni isapa sira eto aisuja embo avo au embo peni aisuja.”
LUK 18:15 Eto iji amikote embomeni na meni isasaraho avo Iesu na ingeni hamo ta tembaja humbuto puvuo, ambotani na kito haekihe isembea
LUK 18:16 rate Iesu na kito meni isasaraho amita degi hurora jage eto ke einge ena, “Meni isasaraho mane haekasova te evu nau degi ta hurore. Meni isasaraho amo na humota eagora eto embo amuna ainge dombo na humota aisuja amina God ta tihi jigari ta horasuja.
LUK 18:17 Na ke be na ungota degi erena embo amuna meni isapasira eto hurae aisuja amina mane God ta tihi jigari ta horasuja.” ainge enu.
LUK 18:18 Embo vahai peni amina Iesu ta degi ke einge eto ingena, “Ahe poekari embo javotoho, ari do ue irari daroho hoteto umbano avo inena ejo ingone” ainge enu
LUK 18:19 Iesu na ke mine einge ena “Umo do eto na javotoho ke ere? Eto embo tapa amo jajavotoho manera te God vahai avo javotohora.
LUK 18:20 Eto God ta ke pepeni amo umo kiarira: Tiha mane aisoa, embo mane tao pehasora, pegene mane aisoa, embo nei ta ke be na au ingito jandireketo sokova na mane aisoa, eto aja te mama te otohu aisoa,” ke ainge enu
LUK 18:21 embo amina einge ena, “Na meni isapa ta ihiketo ari tapa avo javotoho pere ue ere puvuhovona,” ainge enu
LUK 18:22 Iesu na ingito ke einge ena, “Ari vahai avo ae ere ova, avoeto pambuto no donda tapa avo ombuto koro humbuto donda ambu embopo ta iketo na ambo ambo asi hae. Eto God ta irari degi ta no donda isapamane mihia avo humbasoa,” ainge enu
LUK 18:23 ingito amita haja vaja peni vahai avoeto osaga kogunu
LUK 18:24 Iesu na embo avo kogue ke einge ena, “Haja vaja embo na daingeto God ta degi horau, amo ngahia be ra,
LUK 18:25 eto o camel na poma ho ta horeto pambari amo ngahia ra aingeko haja vaja embo na God ta tihi jigari degi ai ta horari ngahia be ngahia ra.” ainge enu
LUK 18:26 embomeni na ingito ke einge ea, “Embo amunure God na ari sapura ta oreketo humbau?” ainge eo
LUK 18:27 Iesu na ke mine einge ena, “Embo na ari inono aera te God ta degi ari tapa amo inono ra” ainge enu
LUK 18:28 Peter na Iesu ta degi ke einge ena, “Kijo, dagota donda tapa toto umo ambo ambo ere ora”, ainge enu
LUK 18:29 Iesu na einge ena “Na ungota degi ke be erena, embo amuna God na embomeni tihi jigoja amita bande te ae te namei kamei te emamo te meniundi te tapa toasuja
LUK 18:30 embo amina pehae mihie donda tohija vahai ainge dombo avo isapamane be humbasuja eto iji kombu te daroho irari humbasuja” ainge ena.
LUK 18:31 eto Iesu na amita apostero 12 avo humbuto oenga iketo ke einge ena, “Kivujo, ungotena da Jerusalem ta pambuhuma. Embo ta Meni ta degi ari do puvuresuja peroveta na mahu kakajekarira avo puvuresuja
LUK 18:32 amo Embo ta Meni avo humbuto enda nei embomeni ta ingeni ta ikaro humbuto urumbihe ari sapura nei te nei te ue hamo ta isuva ue
LUK 18:33 esi na ejembeto taro peheto iji 3 irae au ehako vasiri te erasuja,” Iesu na ainge ijie harikenu
LUK 18:34 ingito ingarako ea amo enana na ingiora ojikari avoeto ingae ea.
LUK 18:35 Eto da Jericho auviho tihi kuru ari embo vahai degi ahone ta arumbeto koro penunu ijie mihina
LUK 18:36 amina embomeni isapamane puvuto pahuo asavi ingito asavi amita be amo deire eto inginu
LUK 18:37 “Iesu Nazareth embo amina puvuto ere pahua” ainge eo
LUK 18:38 ingito jage eto einge ena “David ta Meni Iesu, na jo au kito hondate e,” ainge enu
LUK 18:39 embo amita tihi buju ta mihia amina “Embo, umo ke ambu e” ainge ijio isara na jage eto einge ena, “David ta meni Iesu, na kito jo au hondate e” ainge pere ijinu
LUK 18:40 Iesu heteto embo avo humbuto hurora ke enu humbuto imihe auviho
LUK 18:41 Iesu na “Na no degi ta do ana uje ere oe” ainge enu “Bada, ejo tihi hirikau kione,” ainge enu
LUK 18:42 Iesu na “Umo na humota ere oa avoeto no tihi na kijo” ainge enu,
LUK 18:43 tihi javotoho enu God jakeka ijie Iesu ambo ambo ena. Eto embo tapa na ari avo kito God jakeka ea.
LUK 19:1 Eto Iesu da Jericho jo ta horeto pahunu
LUK 19:2 tax humbari embopo ta okose javo Zacchaeus amo donda embo
LUK 19:3 amina Iesu do aingere avo kesi uje ena rate embo avo tuhoaupa avoeto embo isapamane na titiha eo jaheto kiari inono ae enu
LUK 19:4 Iesu pambasuja degi ai ta kihi huheveto pambuto ji boro i ta vihito mihinu
LUK 19:5 Iesu na puvuto arerembeto kogue ke einge ena “Zacchaeus, umo veto hae. Na mume eha emo no bande ta evesona.” ainge enu
LUK 19:6 Zacchaeus sausau veto tunga javotoho ue Iesu humbuto amita bande ta pahunu
LUK 19:7 embomeni na kito ujeae ue ke einge ea, “Iesu do eto ari sapura embo amita bande ta evesi ere oi?” ainge ea.
LUK 19:8 Eto Zacchaeus na ereto heteto Bada ta degi ke einge ena “Bada kijo, na nau donda tapa avo heriso kaheketo vahai avo donda ambu embopo ta degi hande ikasona. Eto embo ta koro ke sokova na ijie pegene humbuhana amo einge ue ikasona. 1 kina humbuhana amo 4 kina ikano egerembasuja 2 kina humbuhana amo 8 kina egerembasuja 10 kina humbuhana amo 40 kina egerembasuja” ainge enu
LUK 19:9 iesu na ingito ke einge ena, “Embo ta Meni na God ta embomeni vaine pambari avo jombure eto humbasuja avoeto Abraham ta ahije eremite bande vahai eremita embomeni amite avo God na oreketo ere uhua.” ainge ijinu.
LUK 19:11 Ingihe einge hotembea Iesu avo Jerusalem auvehija amo pambau God ta tihi jigari avo sausau puvuresuja avo hotembiho
LUK 19:12 Iesu na kito timu hatirari ke na einge ena, “Eto embo vahai peni amina amita enda ta king asi sovera ari humbasi enda nei ta pambasi ue
LUK 19:13 amita pure embopo tapa 10 ainge jage enu puvuo embo vahai vahai amita degi koro tapa 100 ainge ikereketo ke einge ena, ‘Na pahurono ungo koro emina pure eto koro nei hambuhurovo puvuresona,’ ainge eto pahunu,
LUK 19:14 tohota da vahai embomeni na embo avo enana tihi jigoja uje ae ue embomeni nei uhoho na embo aravo haekara ikeo ambota pambua.
LUK 19:15 Rate embo amo king aisuja amita sovera humbuto egerembeto puvuto enda tihi jigiha amita pure ara koro ikena embopo jage enu puvuo ‘Koro hamota doinge umbeve?’ ainge enu
LUK 19:16 pure embo vahai amina embo ta tihi ta imihe heteto ke einge ena, ‘Bada, no koro 100 amina pure ehena amita hamo ta amo 1,000 hambena erevira,’ ainge enu
LUK 19:17 amita degi einge ena, ‘Umo pure embo javotohora. Umo koro isapa amina pure javotoho ehea avoeto avo da pepeni tapa 10 simba aisoa.’ ainge ijinu
LUK 19:18 embo nei puvuto ke einge ena, ‘Bada no koro 100 amina pure ehena amita hamo ta amo 500 hambena erevira,’ ainge enu
LUK 19:19 ‘javotohora, umo da pepeni tapa 5 ainge avo ano simba aisoa’ ainge
LUK 19:20 eto embo nei puvuto ke einge ena, ‘Bada umo embo ngahiara, umo mine ikae teho mine vahai humbagoa, eto umo ve urae rate teho kahumbagoa avoeto umo joru ue no koro 100 ikiha amo pure ae teho togeto ojikihane iraguja erevira umbujo’ ainge enu
LUK 19:22 ke mine einge ena ‘Umo pure embo sapura avoeto pe no na umo oenga pehumba ere oa. Eto na embo ngahia avoeto mine ikae mine vahai umbagona ve urae rate teho kahumbagona ke erea amo mahu kiari kito amo nau koro avo humbuto bank ta ikao nau koro nei hamo ta ikaro irirou puvuto umbaehena’ ainge eto
LUK 19:24 embo nei engihita heteto mihina amita degi ke einge ena ‘Embo emita koro tapa 100 ikihane pure ae toari iraguja avo humbuto embo nei pure eto koro 100 umbuhaja amita degi ikejo.’ ainge enu
LUK 19:25 ‘Bada, embo amita degi koro peni vahai 1,000 ainge mihia’, ainge eo
LUK 19:26 ke mine einge ena, ‘Ungota degi erena, embo amita degi ari javotoho ta mine mihirou kito amo God na mine nei hamota ikasuja rate embo ta degi ari javotoho irae kito God na embo amita degi do mihia avo humbau irae aisuja rate
LUK 19:27 na enana ta king eagona uje ae ehera embo amo nau kitoho avoeto humbuto huma nau tihi ta tevujo pehare’,” ainge ena.
LUK 19:28 Eto ke ainge enu irae enu Jerusalem pambasi degi ta vivihe
LUK 19:29 da heriso Bethphage te Bethany amo tiri javo olives temo ta kogombari avo auvihie amita ambotani heriso avo ikau pambuto o donkey meni umbara ikasi ue
LUK 19:30 ke einge ena, “Ungo pambuto da degi oiho amita pe ta o donkey meni handukehere mihia amo meni avoeto ai ta isa mane eagora avo bujeketo humbuto puvuvujo.
LUK 19:31 Eto embo na ‘Ungo do eto donkey meni ere vujekiheve?’ ke ainge aro ingito ungo na einge evujo, ‘Bada na jigama asi uje ere ua’,” ke ainge ara enu
LUK 19:32 pambuto Iesu na o donkey meni ke ena avo hambuto
LUK 19:33 vujekasi uo o mamone na kito “Ungo do eto dagota o vujekasi ere ove?” ainge eo
LUK 19:34 “Bada na jigama asi uje ere ua” ainge eto humbuto
LUK 19:35 Iesu ta degi puvuto enana ta bo hamo ta asari avo houketo o hamo ta besi tirito Iesu oviribeto humbuto o hamo ta ikeo arumbeto
LUK 19:36 degi ta pahunu embomeni na bo nei nei hamo ta pohukari avo hoheto degi ta besi tirio haito pambuna.
LUK 19:37 Eto tiri Olives vihito oiho ta veto da auviho Iesu ta ambotani tapa na ihiketo osa osa ue God jakeka ue Iesu na ari do ere uahija avo jajage eto
LUK 19:38 einge ea, “Ungotenau king Bada ta javo ta puvuto ere hua avo God na javotoho ari ikau uhu i ta peka te usasa te iroi!” ainge ijio
LUK 19:39 Pharisee ari embopo embo ta ugoro ta mihia amina “Ahe poekari embo, ejo no ambotani ke erera avo toare” ainge eo
LUK 19:40 ke mine einge ena, “Eto enana ke toasora amo koro tapa ei mihera amina ke gagaha eto aisora” ainge ena.
LUK 19:41 Eto Jerusalem jota horasi ue Iesu na da kogue si ijie
LUK 19:42 da amita embomeni avoembo ke einge ena. “Peka humbari avo eha kiagova uje ere ona te peka humbari avo ungota tihi ta ojikarira te
LUK 19:43 God na ungo puvuto kesi iji ikari avo puvija te ungo na kito kiarako eheve seriketo ere pahua avoeto iji puvuresuja amikote no kitoho na degi tapa ta eto puvuto umo joeketo humbuto da te da ta meniundi te tapa avo taro iraesuja. Eto koro nei na koro nei amita hamo ta mane tembasuja te tapa jaseto veasuja.” ainge ena.
LUK 19:45 Eto Iesu na temple jo ta horeto donda na ombuto koro ere uhua embopo avo ohimbenu pahuo
LUK 19:46 ke einge ena, “Ke kajari ta amo nau bande erevi pari ari bande aisuja, ainge mihia rate ungo na eheve pegene embo ta bande ere ua,” ainge eto
LUK 19:47 Iesu na iji vahai vahai ainge temple jo ta horeto embomeni ahe poekena rate priests pepeni te ke pepeni kiari embopo te embo ta okokose te na Iesu daingeto humbuto tasora avo hotembea
LUK 19:48 rate embomeni isapamane be Iesu ta ke ingesi oje popoga ture eto ingihe mihia avoeto Iesu humbari inono ae ena.
LUK 20:1 Eto iji vahai Iesu na temple jo ta mihie God ta duru javotoho avo embomeni ta degi hande unu ingihe mihio priests pepeni te Judea embo ta ke pepeni simba ari embopo te Judea embo pepeni te aingeto Iesu ta degi puvuto
LUK 20:2 ke einge ea, “Embo amuna no degi ta sovera ari ikehei humbuto ari emomo ere oe?” ainge eo
LUK 20:3 Iesu na ke mine einge ena “Na ainge dombo ungota degi eto ingari ke erena evu ingone.
LUK 20:4 John na sovera ari humbuto embo bapataito ere uahija amomo God ta degi eto umbunutemo embo ta degi humbunu?” ainge eto inginu
LUK 20:5 ungo oenga ke mine ara eto einge ea “Eto dago John na sovera ari God ta degi humbari ke aisora amo Iesu na aravorate ungo do eto John ke be ae ueve ke ainge aisuja
LUK 20:6 rate dago sovera ari embo ta degi humbari ke asora amo embomeni ei mihera amina dago koro na taro pehasora amita be amo John amo God ta peroveta be ke eagora,” ainge ijie
LUK 20:7 ke mine ari inono ae enu enana Iesu ta degi “Dago be kiaera” ainge eo
LUK 20:8 Iesu na “Aravora namote tapa amuta degi sovera humbuto ere ona avo mane ano ingesova” ainge eto.
LUK 20:9 Embo tapa ta degi timu hatirari ke einge ena, “Eto embo vahai amina ‘grape’ ve pure ta ureto embo nei na simba ara iketo toto enda nei ta iresi pambuna.
LUK 20:10 Eto ‘grape’ sari ari iji puvunu ‘grape’ be sari huna umbaja pure mamo na amita pure embo vahai ikenu pahunu, ‘grape’ simba ari embopo kito teto ohimbeo ‘grape’ sari umbae toto egerembeto pambuna,
LUK 20:11 Eto amita pure embo nei ikenu pambunu ‘grape’ simba ari embomeni na urumbihe teto ohimbeo ‘grape’ be sari umbae toto pambuna.
LUK 20:12 Eto nei ikena amo teo orosa kuhihinu humbuto pure aka ta gosukeo vena.
LUK 20:13 Avoeto pure mamo na ke einge ena. ‘Na ari einge aisona, osa ari meni nau avo ikano pambau kito otohu ue mane tasora,’ ainge eto ikenu pahunu ‘grape’ simba ari embomeni na kito
LUK 20:14 ke einge sirikea ‘Eto ‘grape’ pure hoteto humbasuja embo puvija erevira avo ungote taro pehau ‘grape’ pure evi ungotenane na oreto umbasira,’ ke ainge
LUK 20:15 eto meni avo andito humbuto pambuto huga hokaka ta gosuketo eo venu teo pehena.
LUK 20:16 Eto ‘grape’ mamo na puvuto do au? Amina ‘grape’ simba ari embomeni tau pepehekaro ‘grape’ pure amo humbuto embo nei ta ingeni ta ikasuja.” ainge enu enana ingito “Ajae, ejo toai!” ainge eo,
LUK 20:17 Iesu na enana be kon eto kito ke einge ena “Rate God ta ke amo einge kajari mihia, ‘Bande gerikari embopo na tutuvi vahai sapura ke ijie toa avo Bada God na humbuto enu bande ta tutuvi be ena’. Ke ainge ena amita be amo ungo do eagove?
LUK 20:18 Eto embo amuna tutuvi amita hamo ta veto tasuja amo pejeto memeni aisuja. Eto tutuvi amina embo ta hamo ta veasuja amo embo teto pehekasuja” ainge Iesu na enu irae enu.
LUK 20:19 Judea ta ke pepeni simba ari embopo te priests pepeni te na ungo avoembo Iesu na hihi tirina avo ingito iji amikote Iesu andito humbasi uje ea rate embomeni tapa na enana ta degi memenga ikasora avo hotembeto joru ue
LUK 20:20 iji nei simba ea. Eto Iesu ke sapura do au ingito humbuto Rome ta gavana okose amita ingeni ta ikasi uje eto kito harika embopo ikeo pambuto Iesu ta hihi avo ingesi keko ijie
LUK 20:21 pambuto Iesu ta degi ke einge ea, “Ahe poekari embo, umo ke be na pere embo ta ke te ari te avo hotembae ue God ta ke avo javotoho na ahe poekagoa avo dago kiarira
LUK 20:22 avoeto no degi ta eto ere ingihera, ungotena Judea ta ke pepeni joru ue tax koro Rome ta gavana Caesar ta ikarote mane ikaro?” Ainge eo
LUK 20:23 Iesu na enana ta jo ta hotembari heriso avo kito
LUK 20:24 ke einge ena, “Ungota koro vahai humbuto ikevu kione,” ainge enu ikeo humbuto einge ena, “Koro hamota embo ta tombu kikiva ari emite javo kajari te amo amutare?” ainge enu
LUK 20:25 “Caesar ta ra” eo Iesu na ke einge ena, “Aravora Caesar ta donda kito amo Caesar ta ikevu eto God ta donda kito amo God ta ikevu,” ainge enu
LUK 20:26 ingito Iesu na ke sapura nei do ae rate ke javotoho ena avo ingito haha puha eto ke ambupu ea.
LUK 20:27 Eto Sadducees embomeni na vasiri te erari avo ke be ae ue ere ijiahera avo Iesu ta degi puvuto
LUK 20:28 ke einge eto ingia, “Ahe poekari embo. Eto Moses na ke amo einge kajena. ‘Embo ta ae meni umbae mihirou ivu pehasuja, eto namei na namei hondate eto jimbuto ve ikasuja’ ainge Moses na kajena
LUK 20:29 eto embo tapa 7 amo jo vahai ta amina meni bugo na jimbuna eto ae meni umbae mihinu ivu pehenu
LUK 20:30 bugo ta kane amina jimbuna amo meni umbae mihinu ivu pehena
LUK 20:31 eto ainge pere ue pambuto gasi meni amina jimbuna amo ainge meni umbae pehena
LUK 20:32 eto ambo be ta amo evohu amina pehena.
LUK 20:33 Eto enana tapa 7 avo vasiri te erasora amo evohu amo embo amuta ae au?” ainge eo
LUK 20:34 Iesu na ke mine einge ena, “Embomeni eha mihera amina jimbagora
LUK 20:35 te vasiri te erari iji puvurou God na embo siriketo au erasora rate mane jimbasora
LUK 20:36 amita be amo embo na vasiri te erari avo hoteto humbuto ehako mane pehasuja te Anera ga inono ue God ta meniundi aisora. Eto vasiri te erari amita ke be amo Moses na ke kajena.
LUK 20:37 Eto Moses na ji vasa evikihina amita jo ta ke einge ingina ‘Na Abraham ta God, Isaac ta God, eto Jacob ta God ra,’ ainge ijinu ingina avoeto kajena.
LUK 20:38 Avoeto God amo embo pehari ta God manera te embo vasiri te iragora amita God. Eto embo tapa amo God ta degi vasiri te ra,” ainge enu
LUK 20:39 ke pepeni simba ari embopo nei uhoho na “Ahe poekari embo no ke javotoho ehea” ainge eo
LUK 20:40 embo tapa na eto ingari ke nei ae joru ue toa.
LUK 20:41 Rate Iesu na enana ta degi ke einge ena, “Embomeni na do eto Judea ta hondate embo Keriso amo King David ta ahije ke eagore?
LUK 20:42 Eto King David amina book javo ‘Psalms’ ai ta ke einge kajena, “God na na David nau Bada ta degi ke einge ena, ‘Nau ingeni be ei ta arumbeto iriro
LUK 20:43 nane no kitoho teto ikano inena utu na hatiresoa,’ ke ainge David na kajena.
LUK 20:44 Eto David na Judea ta hondate ari embo Keriso amo nau Bada ra ena avoeto amo daingeto amita ahije au?” ke ainge eto.
LUK 20:45 Embo tapa ingiho amita ambotani ta degi ke einge ena,
LUK 20:46 “Eto ungo Judea ta ke pepeni simba ari embopo ta ari avo kogue irivujo, eto enana bo jajavotoho kokoso avo aseto market ari degi ta ururoro kito osa ue pekara eagora. Eto nei amo ke kasari bande ta horeto embo pepeni ta avo arumba ai ta arumbagora eto pondo iji te embomeni kito otohu ara tihi ta arumbagora.
LUK 20:47 Eto nei amo evohu dodoru ta donda avo sio humbagora eto embomeni amita pari amo jo na ae rate toho hamo na pari kokoso kakoso eto sinenekagora, avoeto God na enana ta hajire siriketo memenga pajire ikau kesora.”
LUK 21:1 Eto haja vaja embopo na temple ta hande koro ikihoi Iesu na arerembeto kogue mihinu
LUK 21:2 evohu doru vahai amina amita degi koro peni irae avoeto toea heriso jujurukihinu
LUK 21:3 Iesu na kito ke einge ena “Na ke be na ungota degi erena, evohu doru omina hande ere ikihia amo peni be ra haja vaja embo na ere ikihera ainge mane ra.
LUK 21:4 Eto enana ta donda isapamane avoeto ikihe huna jigera te evohu doru emita donda irae avoeto pe te ere ikihia erevira” ainge ena.
LUK 21:5 Eto Iesu ta ambotani na temple avo koro orina na gerikari amite donda kiari jajavotoho temple ta hande ikari amite avo kiora ke eo
LUK 21:6 Iesu na ingito ke einge ena, “Ungo donda ere kogova rate iji puvutohururou kitoho na puvuto taro koro nei na koro nei ta hamo ta mane tembeto iresuja te tapa arara eto veasuja” ainge enu.
LUK 21:7 Enana ingito ke einge eto ingia, “Ahe poekari embo ari erevi iji deina puvurou, eto puvuresuja amita hajire amo do kioro?” ainge eo
LUK 21:8 Iesu na ke einge ena, “Eto embo nei nei na ke sokova ijiroro ingihe ambo ambo avojo amo embo nei na ‘Na ungota orekari embora’ ainge ijiroro embo nei na ‘Iji puvuto ere hua’ ainge ijiroro ingihe ambo ambo mane aisova.
LUK 21:9 Eto ungo isoro ta duru hoi ta eto asa ta ingesova avo ungo joru avojo eto iji kombu puvurae iresuja amikote isoro avo einge aisora.
LUK 21:10 Enda nei na ereto enda nei ga isoro aisora eto king nei na ereto king nei taisuja.
LUK 21:11 Eto titira pajire be te beuje te ambure iji te enda nei ta puvurou uhu ta hajire nei kogue joru pajire be aisora.
LUK 21:12 Rate ari erevi puvurae kihi ta amo embomeni na ungo andito humbuto aro osaga kogurovo humbuto ke kasari bande ta iketo ganoka eto humbuto tipura ta ikasora. Eto namo avoembo ungo humbuto gavana ta eto king ta tihi ta ikaro hetasova,
LUK 21:13 iji amikote ke nau hande evu ingore.
LUK 21:14 Eto ke ae kihi ta ke do aisova avo kihi ungo oenga mane sirikasova
LUK 21:15 te ungo hetari iji te nanena ungota jo ta ke te kiari te ikano ijirovo ungota kitoho na ingito ke mine ari inono ae aisora.
LUK 21:16 Eto ungota emone mamone te namei kamei te du e te da vahai embomeni te na ungo humbuto kitoho embo ta ingeni ta ikaro ungo nei nei amo taro pehasova.
LUK 21:17 Eto ungo javo nau avoeto embomeni tapa na ungo uje ae aisora
LUK 21:18 rate no siro hu vahai amina mane irae aisuja te
LUK 21:19 ungo ngahia eto mihima vasiri be avo humbasova.
LUK 21:20 Rate da Jerusalem ta kitoho embomeni na isoro asi joeketo mihima Jerusalem taro irae aisuja amita iji puvuto ere hua avo kesova.
LUK 21:21 Eto ainge kito evujo Judea ei ta mihera embomeni joru tiri ta pahuroro da jo ta mihera avo toto pahuroro eto da engihita mihera avo da jo ta mane horare.
LUK 21:22 Iji amo God na Israel ta degi hajire ikasuja iji avo mahu kajari mihia
LUK 21:23 eto evohu urete te amita degi eto meni eha ingeto emi kajihia amita degi aja to erena. Iji amikote God na Judea embomeni ta degi tumo ue hajire au koguroro Judea enda embomeni tapa na osaga kesora.
LUK 21:24 Enana avo asivo na kakajekaro pehihiroro embo nei andito humbuto enda tapa ta pambasora. Eto enda nei na Jerusalem torue God na enda nei ta degi iji ikari avo irae ururou toasora.
LUK 21:25 Eto iji ta hariga ta eto kuro ta kiari hajire nei kogue eva ta vasiri peni vahai ururou hindu pajire be avo enda tapa na ingihe mana mana ue joru aisora.
LUK 21:26 Eto uhu ta donda iraguja amina jahevihirou embo na kito enda ta do ere puvutuhua avo hotembu hotembu ue joru ururoro tihivina humbuto gosukau veasuja.
LUK 21:27 Eto embomeni na Embo ta Meni avo johi jo ta sovera te usasa isapamane te puvutuhurou kesora
LUK 21:28 avoeto ari erena avo ihiketo puvutohururou arerembeto kogue irivujo, ungota orekari iji puvuto ere hua avoeto.” ke ainge eto.
LUK 21:29 Enana ta degi timu hatirari ke na einge ena, “Ji junga te ji nei uhoho amite tapa kogue hotembevujo.
LUK 21:30 Eto amita hatu ta ope eto iki vujekaguja amo amita be ari iji auvaguja
LUK 21:31 ainge iteko ari erena amo tapa puvutuhurou kogue amo God na enda tihi jigesuja iji amo auvehija ke evujo.
LUK 21:32 Na ungota degi ke be na erena embomeni tapa mane sasari aisora te ari emo puvurou kesora.
LUK 21:33 Eto uhu te enda te avo irae aisuja te ke nau avo eho mane irae aisuja.
LUK 21:34 Rate enda ta gamo osaga neite neite amina hini pe vihou tihivi ururou irirovo amo vage ta o teaguja aingeko dombo iji kombu puvuto vage ta o tarako aisuja avoeto be kogue irivujo,
LUK 21:35 amo enda tapa embomeni ta degi puvuresuja
LUK 21:36 ari tapa erevi puvuto ere hua avo tiumbeto pambuto Embo ta Meni ta tihi ta hetasova avo ngahia ra avoeto God ta degi sovera ari kaiketo penunu ijie kogue irivujo,” ainge Iesu na ena.
LUK 21:37 Eto iji tapa amo Iesu na temple jo ta embomeni ahe ere poekihoi iji vouvoi pambuto da vahai tiri javo olives engihita kogombari ai ere eviahija.
LUK 21:38 Eto iho be te embomeni tapa na Iesu ta ke ingesi temple jo ta ere horihahera.
LUK 22:1 Eto jarukari ta pondo te bread sivo ikae pajirae amita pondo te iji auvihinu
LUK 22:2 enana priests pepeni te ke pepeni simba ari embopo te na Iesu humbuto taro pehaja uje ea rate embomeni isapamane na Iesu ta ke ingihe mihia avo joru ue humbari degi jombure ea.
LUK 22:3 Eto Iesu ta ambotani tapa 12 rate vahai amita javo amo Judas Iscariot amo Satan na jo enetenu
LUK 22:4 pambuto priests pepeni te temple simba ari embopo te amiga Iesu daingeto harikau humbasora avo pambuto hihi avo tirio
LUK 22:5 ingito tunga javotoho ue koro doinge ikaro humbasuja avo siriketo
LUK 22:6 heka uo Judas pambuto embo isapamane irae amikote Iesu humbuto enana ta ingeni ta ikasi simba ena.
LUK 22:7 Eto bread sivo ikae pajirae amita pondo te jarukari pondo te iji puvunu o meni vahai teto heveto pene gaga ta tembari iji avo puvunu
LUK 22:8 Iesu na Peter te John te humbuto ke einge ena, “Ungo heriso pambuto jarukari pondo avo nununga evu indore,” ainge enu
LUK 22:9 “Dago degi dainge nununga ara uje ere oe?” ainge eo
LUK 22:10 “Ingivujo, ungo pambuto da jo ta embo vahai umo higi jigito puvutuhurou hambuto embo avo ambo ambo ue pambuto bande dainge horasuja aita ungo horeto
LUK 22:11 bande mamo ta degi ke einge evujo, ‘Ahe Poekari Embo na no degi ta ke erevi aro ingoa ehija Na nau ambotani ga umoro embo ta bande jo dainge horeto arumbeto jarukari ta pondo indoro?’ Ainge avo
LUK 22:12 ingito bande jo peni i ta mihia ai ta indari tembari degi te arumbeto indari degi te tapa inono ta mihia avo embo amina au kito pondo ai nununga evujo.” ainge enu
LUK 22:13 pambuto Iesu na ke ena ainge inono ta kito pondo nununga eo irae enu.
LUK 22:14 Pondo iji puvunu Iesu na amita apostero ga tapa areto indesi mihie
LUK 22:15 Iesu na enana ta degi ke einge ena, “Na pambuto memenga osaga kesona avoeto nau jo tapa na jarukari pondo erevi ungo ga kihi indesi uje ereona,
LUK 22:16 eto ungota degi erena, God ta tihi jigari iji be puvuto ere hua avo ahe kihira ue jarukari pondo tutumota ere indena erevira,”
LUK 22:17 ainge eto aguhu humbuto God peketo ke einge ena, “Aguhu erevi humbuto isapa isapa indavu
LUK 22:18 eto kivujo, na esi be ta mu ehako mane indesona te God ta tihi jigari iji puvurou ehako indesona,” ainge eto
LUK 22:19 bread humbuto God peketo periketo enana ta degi ikihe ke einge ena, “Hamo nau erevi ungo embo ikarira humbuto indie na hotembu hotembu evujo.” ainge eto
LUK 22:20 indio irae enu Iesu na ke einge ena “Aguhu ei ta amo orosa nau noma eha ta kajari ta orosa avo ungo embo overekehena.
LUK 22:21 Rate kivujo, na isoro embo ta ingeni ta ikasuja embo amita ingeni amo ingeni nau ga tapa gaga ta tembeto mihia
LUK 22:22 eto God na ke mahu ari avoeto Embo ta Meni pehasuja te aja to erena, harikari embo avo osaga memenga isapamane kesuja.” ainge enu
LUK 22:23 enana vahai amuna harikau avo mine ara ijie ajire engeka ea.
LUK 22:24 Eto enana embo vahai amuna dembeto peni aisuja avo hini kambari ue ke mine ara eo
LUK 22:25 Iesu na ke einge ena, “Enda embomeni tapa amita kings na tihi jigihore osaga kiora te ehako hande embo ke ara eagora.
LUK 22:26 Rate ungo na ainge mane aisova te umo embo peni asi uje ue kito embo teho ejo, eto embo tihi jigesi uje eto kito embo ta pure embo ke ijie ke agi ejo.
LUK 22:27 Embo peni amo davore? Indari embo retemo undurari embo re? Amo indari embo rate na ungo unduresi puvena.
LUK 22:28 Rate ungo na na egikae na osaga kogue uone namote tapa mihovova.
LUK 22:29 Avoeto nau Mama na au na embomeni tihi jigona aisuja ainge dombo
LUK 22:30 nane ano ungo nau tihi jigari degi ta horeto gaga nau ta arumbeto indito avo arumba peni ai ta arumbeto Israel ta ohihi javo tapa 12 ainge mihera avo ungona ganoka ijie pehumba aisova.
LUK 22:31 Ajae Simon! Satan na penunu ngahia na eto ungo tapa humbuto eto kesi ue rice ve jahevarako arote?
LUK 22:32 Rate Simon umo God toae humota mahainge iresoa avo pari ere ona avoeto umo pambuto mihiro jo aherekau no namei kamei hondate ejo sovera umbare.” ainge enu
LUK 22:33 Simon na ke einge ena, “Bada, na umo te pambuto tipura ta horasona eto pehasora avo nununga ereona,” ainge enu
LUK 22:34 ke einge ena, “Peter, na no degi ta erena, iho vujae mihirou mume orohuta inena na kiae ke tapa 3 ainge ijiro ohora javone aisuja” ainge eto.
LUK 22:35 Enana tapa ta degi ke einge ena, “Eto na ungo ikano pambava ue utu goru te ehi savo te koro te toto pambava ue ehene pahava amikote osaga koguevete?” ainge enu “Osaga kiae tapa inono ta uera” ainge eo
LUK 22:36 Iesu na ke einge ena, “Rate oroho amo no koro te ehi savo te tapa umbuvujo, eto no isoro asivo irae kito no ombari asukari amina ombuto umbujo.
LUK 22:37 Amita be amo ari nau degi ta do puvuresuja avo God ta ke ta mahu kajari einge mihia, ‘Embo amo ari sapura embo ra ke aisora’ ainge mihia avoeto na pehari iji puvija” ainge enu
LUK 22:38 enana “Bada kijo, isoro ari asivo heriso mihia erevira,” ainge eo “Aravora, ke inonora tovu”, ainge eto.
LUK 22:39 Bande toto veto ari ainge avoeto tiri ‘Olives’ ta vihesi amita ambotani ga pambuto
LUK 22:40 tiri ta puvuto enana ta degi ke einge ena “Satan na ungo engeka aisuja avoeto pari evujo,” ainge eto
LUK 22:41 enana toto embo na karu gosukeore pambuto veaguja kane ainge ta pambuto paunge teteri eto
LUK 22:42 pari einge ena, “Mama, ari tapa inena ari avoeto aguhu erevi mane indonote avo ke ao ingito toane eto uje nau mane rate uje no avo aisona,” ainge enu
LUK 22:43 Anera vahai na uhu ta eto puvuto sovera ari ikena,
LUK 22:44 eto osaga pajire be kogue jo tapa iketo pari unu amita ivori na orosa aingeto sinini eto enda ta vena.
LUK 22:45 Eto pari enu irae enu ereto pambuto amita ambotani osaga kogue evio avo kito ujeto
LUK 22:46 ke einge ena “Ungo do eto evopo ere ove? Ereto ungo engekari ta veasova avoeto pari evujo” ainge ijinu.
LUK 22:47 Amita ambotani 12 rate vahai Judas na embopo kihi humbuto puvuto Iesu ta degi auveto mune tavo aisi unu
LUK 22:48 Iesu na kito ke einge ena, “Judas, umo Embo ta Meni avo mune tavo ari na harikasi ere oete?” ainge enu
LUK 22:49 embomeni Iesu ga puvua amina ari do puvuresuja avo kito ke einge ea “Bada dago ta asivo na embomeni taro?” ke ainge ijie
LUK 22:50 embo vahai na Priest peni ta pure embo amita oje be hena avo jeto tiukenu vena avo
LUK 22:51 Iesu na haekihe “Ainge ere ova avo tovu” ijie isoro embota oje avo humbuto ikenu kambuto arinako ena.
LUK 22:52 Eto Iesu na priests pepeni te temple ta isoro embopo te Judea ta embo pepeni te isoro amita degi puvutuho ke einge ena, “Na pegene embo mane rate asivo te kepata te jigito na humbasi ere puvutuhovete?
LUK 22:53 Na iji tapa temple jo ta embomeni ahe ere poekihovona amikote na humbaeheva amo toagova te ungota iji ikari re eremita Satan ta sovera ari na mumete puveva erevira” ainge enu.
LUK 22:54 Iesu andito humbuto priest peni ta bande ta pahuo Peter na tunga te jaheki ue ambota pambuna.
LUK 22:55 Eto Peter na pambuto priest peni ta bande huga jo orohuta embomeni ji ikeo evekihinu mihia ai pambuto arumbenu ji peri vivihinu
LUK 22:56 kakara vahai amina Peter ta tombu usasa ta ijuketo kito ke einge ena “Embo Iesu ga mihei koguenare erevira” ainge ijinu
LUK 22:57 Peter na ingito “Kakara, embo amo na kiaera”
LUK 22:58 ainge eto isapa mihinu embo nei amina kito “Umo enana emiga eagoa” ainge enu Peter na “Embo, ainge manera” enu
LUK 22:59 isapa mihimihe embo nei na Galilee embo hajire be kito “Amo ke be ra embo emo Galilee embo hajire kogona avoeto enana vahaira,” ainge enu
LUK 22:60 Peter na “Embo umo ke do erea amo na be kiae ere ona” ke ainge ijinu di ohora javone ijinu
LUK 22:61 Iesu egerembeto Peter kogunu Bada na “Peter umo na kiae ke 3 ijiro di ohora ke aisuja” ainge ena avo hotembeto
LUK 22:62 osaga kogue arahata pambuto si ijie sisivu kuhena.
LUK 22:63 Eto embomeni Iesu umbua amina urumbihe teto
LUK 22:64 tihi bo na togeto ke einge ea “Peroveta, amuna umo ere toroi” ainge eto
LUK 22:65 ke neite neite ijie Iesu urumbea.
LUK 22:66 Eto iho vujenu Iesu pehumba asi Judea embomeni ta embo okokose amo priests pepeni te ke pepeni simba ari embopo te amina horukeo Iesu humbuto pambuto ikeo hetenu ke einge ijie ganoka ea,
LUK 22:67 “Umo Judea embopo ta hondate ari embo Keriso?” ainge eo “Na ungo ta degi aisona te ungo ke be mane hotembasova,
LUK 22:68 eto na ungota degi eto ingesona te ungo ke be mane harikasova,
LUK 22:69 rate eha ihikihera emo Embo ta Meni na God sovera isapamane te ta ingeni be ta arumbeto daroho iresuja”, ainge enu
LUK 22:70 enana tapa na ke einge ea “Avoeto umo God ta Meni re?” ainge eo “Ke ereva amo namora” ainge enu
LUK 22:71 enana ingito ke mine ara eto einge ea “Embo nei na harika mane au ingesora te amita pe na God urumbihe eria aravora.”
LUK 23:1 Ainge eto Judea ta council tapa ereto Iesu humbuto pambuto Pilate ta tombu ta ikeo hetenu,
LUK 23:2 pehumba einge ea, “Embo eremina dago ta enda ta embomeni ereto isoro ara jo kajaguja eto dago Caesar ta degi tax koro mane ikara ke ijie ‘Na Keriso ungota king ra’ ainge eaguja embo avo hambera”, ainge eo
LUK 23:3 Pilate na Iesu ta degi einge eto ingina, “Umo Judea embomeni ta king re?” ainge enu “Ke amo no avo erea” ainge enu
LUK 23:4 Pilate na priests pepeni te embomeni tapa te ta degi, “Na embo emita ari sapura hambae be ereona,” ainge enu
LUK 23:5 embomeni na ereto ke ngahia na eto einge ea, “Embo aramina amita enda Galilee ta eto puvuto Judea enda erei ta da ari na ue amita ahe poekari na embomeni jo kajihe Jerusalem ta puvija” ainge eo.
LUK 23:6 Pilate na ingito “Embo emo Galilee embore” ainge enu “Galilee embora” eo
LUK 23:7 ingito Iesu ta enda vahai Galilee ta simba ari embo okose Herod da Jerusalem ta umoro puvuto mihina avoeto ikenu Iesu humbuto pambuto Herod ta degi ikea
LUK 23:8 eto Herod na Iesu do ere uahija amita duru amo mahu ingari avoeto Iesu ta sovera vahai avo au kesi uje eto simba iji koso ena avo eto Iesu puvunu kito tunga javotoho ena
LUK 23:9 eto Herod na Iesu iji koso ganoka ena rate ke mine ae unu
LUK 23:10 enana priests pepeni te ke pepeni simba ari embopo te na ke isara na eto Iesu pehumba ea.
LUK 23:11 Eto Herod te amita isoro embopo te na Iesu isembeto urumbihe king ke ijie kiari bo ikenu asukenu Pilate ta degi ikenu egerembena.
LUK 23:12 Eto Pilate te Herod te amo kitoho ue oenga ira eagorate iji amikote amo peka ue ihiketo namei ea.
LUK 23:13 Eto Pilate na priests pepeni te embomeni ta embo okokose te jage enu vahaita puvuo
LUK 23:14 ke einge ena, “Ungo embo eremina embomeni na ereto Rome ta degi isoro ara jo kajaguja ke ijie nau degi ta humbuto puveva avoeto ungo ta tihi ta ganoka ehena te, kivujo, ungo pehumba eheva amo embo emina ari sapura nei do ae avoeto hambae ehena,
LUK 23:15 eto Herod te tapa na amita ari sapura hambae eto ikehei egerembehija avoeto, kivujo, Iesu na ari sapura avo tari pehari haite manera,
LUK 23:16 avoeto na esi na ejembeto ikano arahata pambasuja” ainge ena.
LUK 23:17 Eto Pilate ta ari amo jarukari pondo iji puvutuhoi tipura embo vahai vahai ikeoi arahata puvuto avo embomeni na hotembihe
LUK 23:18 jage einge eto ea, “Embo erevi humbuto pahue Barabbas tipura ta iraguja avo ejo arahata puvuto pambai” ainge ea.
LUK 23:19 Eto Barabbas tipura ta mihina amita be amo embo jo kajenu ereto tihi jigari ga jujune ea eto embo tenu pehena avoeto.
LUK 23:20 Eto Pilate na Iesu tambu ta pambaute avo embomeni ta degi enu
LUK 23:21 ke gagaha eto “Ji atahu ta tejo pehai, ji atahu ta tejo pehai,” ainge ijio
LUK 23:22 Pilate na ehako enana ta degi ke einge ena, “Do eto taro pehau? Amina ari sapura do ehei? Iesu na ari sapura avo tari pehari haite aera, avoeto na esi na ejembeto teto ano arahata pambasuja” ainge enu
LUK 23:23 embomeni na jajage eto “Ji atahu ta te” ainge ke ngahia be eo
LUK 23:24 Pilate na “Aravora, ungota uje ere ova avo aisora,” ke ainge eto
LUK 23:25 embo Barabbas amo embo ta jo kajenu isoro ea eto embo tenu pehena avoeto tipura ta ikari avo embomeni na uje ea avoeto enu arahata pahunu Iesu avo Judea embopo ta uje avoeto humbuto tara ikenu amita isoro embopo na goruketo humbuto pambua.
LUK 23:26 Eto humbuto pahuo da Cyrene embo javo Simon avo da isapa ta mihimihe puvutuhunu kito haeketo Iesu ta ji atahu avo Simon na hondate eto umbaja humbuto koho ta tembeo humbuto Iesu ta ambota pambuna.
LUK 23:27 Eto embomeni isapamane Iesu ta ambota pahuo evohu isapamane na Iesu kito sinena ue jenge torue sisi sasi ea.
LUK 23:28 Rate Iesu na egerembeto enana ta degi ke einge ena, “Da Jerusalem ta iariri, namo avoeto si mane aisova rate ungote ungota meniundi te avoeto si evujo.
LUK 23:29 Eto kivujo, iji puvuto ere hua amikote ke einge aisora, ‘meni irae evohu te hini ta ve irae amo tunga javotoho ere ora,’ ainge eto
LUK 23:30 memenga jamo aja tiri ta degi, ‘Koheketo veto dago kikira e,’ eto heti ta degi ‘Veto dago ahureke’ ainge aisora
LUK 23:31 na ji eha avoeto nau degi ta do ereora avo kivujo rate ungo ji jaise avoeto ungota degi ari sapura be do ainge aro?” ainge Iesu na ena.
LUK 23:32 Eto ari sasapura embopo heriso avo Iesu ga tapa taro pehaja humbuto pambua.
LUK 23:33 Eto pambuto degi javo Uha Vehu ta puvuto Iesu ji atahu ta teto ari sasapura embopo amiga tapa teto vahai amita ingeni be hena ta eto vahai amita ingeni anga ta ainge eto hurukeo mihie
LUK 23:34 Iesu na ke einge ena, “Mama ari emo enana be kiae avoeto ere ora avoeto hotembeto tojo,” ainge ijinu enana ituha tuho te koso te jigio koso kororoeto umbuna amina dembeto Iesu ta bo umbuna.
LUK 23:35 Eto embomeni areto kogue mihio enana embo okokose na arureto ke einge ea, “Embo nei nei hondate eagoija te amo Judea embomeni ta hondate ari embo Keriso avo God na siriketo ikari puvurari kito umo oenga enda ta veasuja,” ainge ijio
LUK 23:36 isoro embopo na Iesu urumbihe ‘Vinegar’ sogaga te humbuto Iesu na indoja imihe heteto ikihe
LUK 23:37 ke einge ea, “Umo Judea ta King be kito umo oenga hondate e,” ainge ea.
LUK 23:38 Eto ‘Judea Embomeni ta King’ ijie kaeto amita siro kombu ta tea.
LUK 23:39 Eto ari sapura embo vahai Iesu ga tapa tea amina ke einge ena, “Umo Keriso be kito umo te dago ta tapa hondate e, ji atahu toto veare,” ainge ijie urumbihinu
LUK 23:40 ari sapura embo nei tea amina ke avo haekihe ke einge ena, “Umo te namo te amo hajire kiora tehere pehasi ere ora amo umo God joru ae re?
LUK 23:41 Eto umo te namote tehera amo ari sapura ungotenau avoeto tehera te embo emita ari sapura amo iraera te teho sio tehera,” ainge eto
LUK 23:42 Iesu ta degi ke einge ena, “Iesu, no King ari degi ai ta horeto sovera ari humbuto na hotembejo,” ainge ijinu
LUK 23:43 Iesu na ke mine einge ena, “Na no degi ta ke be erena, umo namo te tapa eha oroho ‘Paradise’ ta horasoa,” ainge ena.
LUK 23:44 Eto iji vihito ugorota hetihinu enda tapa mume sihukarako enu hure veto iji 3 ena.
LUK 23:45 Eto iji ta usasa irae unu temple jo ta degi peikari bo avo i ta horereketo veto pambuto hu ta osekena.
LUK 23:46 Eto Iesu na ke isara na eto ke einge ena, “Mama, na nau ahihi ingeni no ta iketo toruhona,” ainge ijie hen jamo ena.
LUK 23:47 Eto isoro kihi humbari embo vahai amina hajire tapa do ena avo kito God jakeka ijie ke einge ena, “Ke be ra. Embo erevi ari sapura embo manera.”
LUK 23:48 eto embomeni isapamane embopo ji atahu ta toruroro kesi puvua amina hajire tapa avo kito sinena ue jenge torue egerembeto da ta pambua.
LUK 23:49 Eto Iesu ta namei kamei te evohu nei uhoho te Galilee ta eto ambo ambo ue puvua amina tihin eto heteto Iesu ta degi do ea tapa avo kia.
LUK 23:50 Eto enda Judea ta da Arimathea embo vahai javo Joseph amo Council ta hetari amina Iesu ta degi do asi ea amo amina haekena. Embo amo javotoho avoeto God ta tihi jigari simba ena
LUK 23:52 amina Pilate ta degi pambuto Iesu ta hamo penunu enu aravora enu
LUK 23:53 ji atahu ta eto humbuto ikenu venu bo javotoho koso vahai amina togeto humbuto pambuto embo kovari panga mahu koro jo ta kovari ai ta embo kihi ikae sari ae aita ikenu herekena.
LUK 23:54 Eto ari tapa erevi eo irae enu jangu indari iji ihikena.
LUK 23:55 Eto evohu nei uhoho enda Galilee ta eto Iesu ambo ambo ue puvua amina Iesu ta hamo daingeto use jo ta ikeo herekena avo kito
LUK 23:56 pambuto jeune te ‘Oil’ mune te amite aingeto Iesu ta hamo ta vuresi nununga eto evito God ta ke agi ue jangu india.
LUK 24:1 Eto jangu indari iji irae eto iho vujenu evohu na Iesu ta hamo vuresi donda mune te mahu nununga ea avo humbuto use ta pambuto
LUK 24:2 use pe karu na ahurekena avo hirikari mihina avo kito
LUK 24:3 horeto Iesu ta hamo avo use jo ai ta irae kito
LUK 24:4 mana mana ue mihio embo heriso bo parara be asukari amina irerembeto puvuto heteo daha daha unu
LUK 24:5 arerembeto kito joru ue humo kouketo mihio ke einge ea, “Ungo do eto embo vasiri te avo embo pehari kovari use ai jombure ere ove?
LUK 24:6 Enda Galilee ta mihie ungota degi ke do ijija avo hotembevu, amo eingera, ‘Embo ta Meni avo humbuto embo sasapura ta ingeni ta ikaro humbuto ji atahu ta taro peheto iji 3 irae au vasiri ta erasuja’ ainge ungota degi ijija,” ainge eo,
LUK 24:8 enana Iesu ta ke mahu ari avo hotembeto
LUK 24:9 use toto egerembeto pambuto ambotani 11 amite eto embo nei uhoho amita degi ke ea.
LUK 24:10 Eto evohu ta javo amo Mary da Magdala evohu amite Joanna amite James ta e Mary te evohu nei uhoho amite tapa ke avo eo
LUK 24:11 ingito teho ke be mane hihi tirihie erera ainge ijie ke be ae ea.
LUK 24:12 Rate Peter na ereto huheveto pambuto use jo ta anembeto Iesu togari bo avo pere mihinu kito ari do ena avo hotembu hotembu eto egerembeto bande ta pambuna.
LUK 24:13 Eto iji amite Iesu ta ambotani heriso amina da Jerusalem ai ereto da Emmaeus pambua amo degi 11 ‘Kilometres’ koso ai ta pahue
LUK 24:14 ari tapa do puvuna avo ke mine ara ijie pahuo
LUK 24:15 Iesu na hae eto puvuto hambuto inono ta ere pahuna
LUK 24:16 rate enana Iesu mane kiora tihi johi na ahurekarako enu
LUK 24:17 Iesu na enana ta degi ke einge ena, “Ungo puvutuhue ke deirami mine ara ereve?” ainge enu enana osaga kogue mihio
LUK 24:18 embo vahai Cleopas na ke mine einge ena, “Da Jerusalem ta ari do ehera tapa amo umoro embo tapa ingera te umo vahai avo ingaere,” ainge enu
LUK 24:19 “Arimo do ehere, ejo ingone,” ainge enu ke einge ea, “Iesu Nazareth embo amo peroveta peni be eto amo God ta sovera te amina ari te ke te neite neite embomeni ta tihi ta eaguja te
LUK 24:20 dagota priests pepeni te embo okokose te na embo aravo taro pehaja humbuto Rome ta ingeni ta ikehere humbuto ji atahu ta tehere peheto
LUK 24:21 iji 3 irae ere ua erevira. Rate embo aravo Israel embo orekaja God na ikari avo hotembehera.
LUK 24:22 Eto nei amo dagota evohu nei uhoho na iho be te use ta pambera
LUK 24:23 te amita hamo avo use jo ta irae kogue ore Anera na keko ehereija amo Iesu vasiri te mahu erari ke ehere ingito puvuto dagota degi ehere ingito
LUK 24:24 ke be kesi dago ta embo nei uhoho na use ta pambuto Iesu hambae evohu na ke ehera avo inono ta kito puvera,” ainge eo
LUK 24:25 Iesu na ke einge ena, “Ungo kiae kiae embopo, ungo do eto peroveta mamahu ta ke avo ke be ari pegogo ere ove?
LUK 24:26 Eto Judea ta orekari embo Keriso na amita usasa ta horasuja rate kihi amo memenga osaga kioja ke ari amo ungo kiaere?” ke ainge
LUK 24:27 eto ari tapa amita degi do puvuresuja avo mahu Moses ta ke kajari iji te eto pambuto peroveta tapa te amita iji te kajari avo harikenu ingihe
LUK 24:28 puvuto da auvihie embo vahai embo heriso amiga ere puvutuhuna avo da nei ta pambaute avo hotembeto
LUK 24:29 ke einge ena, “Mume ere sihukihia avoeto umo nangote hetaote?” ainge eto enana ga pambuto bande jo ta horeo
LUK 24:30 enana ga arumbeto ‘Bread’ humbuto God peketo ingeketo ikihinu
LUK 24:31 enana ta tihi hirikenu Iesu be koguo saiveto pahunu
LUK 24:32 ke mine ara ijie einge ea, “Embo amina degi ta puvutuhue God ta ke hirikehei ingihere jenge haperekehei puvera,” ainge eto
LUK 24:33 mume amikote sau sau ereto Jerusalem ta egerembeto pambuto Iesu ta ambotani 11 amite nei uhoho amite tapa horuketo mihia ai ta horeto
LUK 24:34 “Bada vasiri te ereto Simon ta degi puvei kehija,” ainge embo heriso amita degi eo
LUK 24:35 enana degi ta do enu kogue ingihe pambuhumihe bande ta horeto ‘Bread’ ingekena ai ta be kia.
LUK 24:36 Avo eo ingihe mihio Iesu enana ta jo ta puvuto heteto, “Peka ungota degi iroi,” ainge ijinu
LUK 24:37 enana kito embahe ke ijie joru uo
LUK 24:38 kogue ke einge ena, “Ungo do eto joru ove ungota jo ta eto ingari ke isapamane mihei?
LUK 24:39 Namora. Nau ingeni te utu te kogue na hame evujo. Eto embo pehari ta ahihi amo visi irae vetu irae rate namo amo visi te vetu te ra.” ainge eto
LUK 24:40 amita ingeni te utu te avo enu
LUK 24:41 kito osa pajire be ue mana mana uo, “Ungota degi indari miheite,” ainge enu
LUK 24:42 umo o ingari avo ikeo
LUK 24:43 enana ta tihi ta indito
LUK 24:44 ke einge ena, “One ere kogova amo ungote iragona iji amikote tapa ehene ingeva amore Moses ta ke kajari te peroveta mamahu ta ke kajari te ‘Psalms’ ta ke kajari te ai ta ke kajari mihera amita bere puvija erevira,” ainge eto
LUK 24:45 enana ta uha hirikenu God ta ke kajari tapa avo be kon eto koguo
LUK 24:46 Iesu na ke einge ena, “Avoeto ke mahu kajari ta mihia amo Keriso amina memenga kogue peheto iji 3 amina vasiri te erasuja
LUK 24:47 eto ari sasapura toto jo aherekari amite ari sapura hotembeto toari amite amita ke avo Keriso ta javo ta da Jerusalem ei ta eto enda tapa ta pahue hande evujo.
LUK 24:48 Eto ari erevi tapa amo ungo tihi na kiari avoeto ke hande ari embopora
LUK 24:49 avoeto kivujo, ungo da ei ta mihirovo nau Mama na ikasi ke ena avo pambuto ikano uhu ta sovera na ungota jo enetasuja,” ainge enu irae enu.
LUK 24:50 Enana urumbeto humbuto da Bethany ta pambuto ingeni i ta jigito
LUK 24:51 ambotani ta javotoho ari ikihinu Mamo na humbuto uhu i ta pambuna.
LUK 24:52 Eto enana tunga javotoho ue God jakeka ijie egerembeto da Jerusalem ta pambuto
LUK 24:53 temple jo ta horeto mihie God jakeka ere ijiahera.
JOH 1:1 Enda irae kihi be kihi ta amo Ke ra eto Ke amo God ga mihahija. Eto Ke amo God ra.
JOH 1:2 Eto Ke amina God ga daroho mihahija.
JOH 1:3 Eto Ke amina God na donda tapa ena. Eto donda tapa amo oenga irerembae rate ke amina enu irerembena.
JOH 1:4 Eto Ke amita degi vasiri daroho mihahija eto vasiri amina enu embo ta degi usasa puvuna
JOH 1:5 eto usasa amina mume ta pangena te mume amina usasa dembari inono aera.
JOH 1:6 Eto embo vahai javo John amo usasa ta ke avo harikau embomeni ingito ke be ara God na ikenu puvuna.
JOH 1:8 Eto embo John amo usasa mane rate usasa avo embo ta degi harikaja ikenu puvuna.
JOH 1:9 Eto ke amo usasa be embo usasa ta irora enda ta puvuna.
JOH 1:10 Eto enda ta puvuna amita ingeni na hajire ikari aita puvuna te embo na kito kiaesira ea.
JOH 1:11 Eto tohota da be amina kogombena ai ta puvuna te amita embomeni na kito peketo umbae ea.
JOH 1:12 Rate embo nei nei amuna kito peketo ke be ijio amita degi sovera ari ikenu humbuto God ta meniundi be ea.
JOH 1:13 Amo enda ta meniundi mane visi ta uje ta meniundi mane eto embo ta ve ikari ta meniundi mane rate amo God ta meniundi be amina umo oenga iharira.
JOH 1:14 Eto ke amina puvuto besi humbuto dagote mihahei amita usasa avo kia, Mamo ta Meni avoeto amita usasa amo ke be te hondate ari te na enetarira.
JOH 1:15 Eto John na amita ke avo einge hande ena, “Embo nau ambota puvuresuja, ainge eagona amo nau aja na na ingae iji te kihi ta mihouva avoeto embo amo peni ra eto na isapara. Eto embo amo puvija erevira,” ainge John na ena.
JOH 1:16 Eto Iesu Keriso amo hondate ari embo avoeto hondate ari hamota hamota eto humbagora
JOH 1:17 eto ke pepeni Moses ta eto puvurari rate ke be te hondate ari te amo Iesu Keriso ta degi eto humbagora.
JOH 1:18 Embo na God mane kiora te God ta Meni avo vahai God ga inono amina eoi God kiora.
JOH 1:19 Eto Judea ta embo okokose da Jerusalem ta mihia amina priests te ke pepeni kiari embopo te ainge eto ikeo John ta degi pambuto, “Umo embo amunure?” ainge eo
JOH 1:20 John na ke mine ojikae hariketo einge ena, “Ungo Keriso simba ere ovova na avo manera,” ainge enu
JOH 1:21 ehako “Umo Elijah rete?” ainge eo “Na avo manera” ainge enu, “Umo peroveta simba ereovora aravorete?” “Na avo manera.” ainge enu
JOH 1:22 “Eto dago ikehere puvera embopo ta degi pambuto ke do aro? Eto umo amunure eto embo umo ke do eoe?” ainge eo.
JOH 1:23 Eto peroveta Isaiah na ke mahu kajena avo John na humbuto einge ena, “Embo ojagatambu ta mihie jage eto ke einge aisuja, ‘Bada ta puvurari degi evu tambu ai’ ainge ena embo amo namora,” ainge enu
JOH 1:24 Pharisee embomeni nei nei Jerusalem eto puvua amina John ganoka eto
JOH 1:25 einge ea, “Umo Keriso mane, eto Elijah mane eto Peroveta simba ereovora avo manera te do eto embomeni bapataito ere oe?” ainge eo,
JOH 1:26 John na ke mine einge ena, “Na umo na bapataito ere ona te embo vahai amo ungota orohuta heteto mihia amita duru avo ungo mahu ingae ra te
JOH 1:27 nau ambota puvuto ere hua amita utu goru nanena aruseto houkari inono aera.” ainge ena.
JOH 1:28 Eto John na umo Jordan ta oiho da Bethany ta embomeni bapataito unu ari erevi ea.
JOH 1:29 Eto iji nei Iesu na John ta degi puvutohunu kito ke einge ena, “Kivu. God ta O ‘sheep’ Meni embo ta ari sasapura ombuto humbasi puvuto ere hua.
JOH 1:30 Na embo erevi avoeto ke einge ijiena. ‘Eto embo nau ambota puvuresuja amo na irae iji te mihahija avoeto na isapa eto embo amo penira’ ainge ijiena
JOH 1:31 eto namote tapa embo amo mahu na kiae rate Israel embomeni ta degi harikasi puvuto umo na bapataito ereona.” ainge eto.
JOH 1:32 Ke nei einge harikena, “Ahihi Otohu di dipo ainge uhu i ta eto amita degi puvei kehena,
JOH 1:33 eto embo amo mane kiaehena te na embo bapataito ana ikari Embo emina nau degi ta kihi ke einge ijija. ‘Eto embo amuta degi Ahihi Otohu veto iresuja embo amina embomeni Ahihi Otohu na bapataito aisuja.’ ainge ehei ingito
JOH 1:34 ari avo kito embo erevi God ta Meni be avoeto ungota degi ere harikihena.” ainge John na ena.
JOH 1:35 Eto evito iji nei John te ambotani heriso te aingeto degi ai ta heteto mihio
JOH 1:36 Iesu puvuto pahunu John na kon eto kito ke einge ena, “Kivu, God ta o ‘Sheep’ Meni ra,” ainge enu
JOH 1:37 John ta ambotani heriso amina ingito Iesu ambo ambo ue pahuo,
JOH 1:38 Iesu na overeketo kito ke einge ena, “Ungo amunami uje ere ove,” ainge enu enana na, “Ahe poekari embo, umo dainge iragoe?” ainge eo
JOH 1:39 Iesu na “Huma kivujo.” ke ainge enu enana hure 4:00 o'clock ainge amiga pambuto amita irari degi kito amiga mihio hure vena.
JOH 1:40 Enana heriso John ta ke ingito Iesu ambo ambo ea vahai amo Simon Peter ta eambo Andrew ra.
JOH 1:41 Eto iho vujenu Andrew na amita namei hambuto ke einge ena. “Israel embo ta hondate ari embo Keriso avo hambera.” ainge eto
JOH 1:42 Simon humbuto Iesu ta degi pambuo Iesu na Simon kon kon eto kito ke einge ena, “Umo John ta meni Simon rate nanena no javo ere ikihena amo ‘Cephas’ ra. (‘Cephas’ ta be amo Koro ra.)” ainge Iesu na ena.
JOH 1:43 Eto iji nei Iesu na enda Galilee ta pambasi ue embo Philip hambuto, “Na ambo ambo ejo.” ainge ena.
JOH 1:44 Eto Philip amo Andrew te Peter te amita da vahai Bethsaida avo embora.
JOH 1:45 Eto Philip na embo Nathanael hambuto ke einge ena, “Eto Moses te peroveta te aingeto enana ta ke kajihe embo vahai puvuresuja ainge ijie kajea avo hambera amo da Nazareth embo Joseph amita meni Iesu avo hambera,” ainge enu,
JOH 1:46 Nathanael na, “Da Nazareth amo sapura rate do eto ari javotoho amo puvurou?” ainge enu Philip na, “Huma, ki.” ainge enu Iesu ta degi pahuo.
JOH 1:47 Iesu na Nathanael puvuto ere hua avo kito ke einge ena, “Embo puvuto ere hua amo Israel embo be ra eto amita ke sokova irae.” ainge enu,
JOH 1:48 Nathanael na ingito, “Ahe poekari embo umo dainge eto na kiarire?” ainge enu Iesu na einge ena, “Eto Philip na umo jage ae kihi ta umo ji junga susu uhumota mihe kehena,” ainge enu,
JOH 1:49 Nathanael na ke einge ena, “Ahe Poekari Embo, umo God ta Meni be Israel embo ta King ra.” ainge enu,
JOH 1:50 Iesu na, “Nanena umo ji junga susu uhumota mihe kehena avo ehene ingea avoeto na ke be ijie amomo erete? Eto avo pere mane rate ari sovera neite neite kesoa,” ainge,
JOH 1:51 eto ke nei enana ta degi einge ena, “Na ungota degi ke be na erena, uhu pe hirikau God ta Anera na Embo ta Meni ta degi vearako viharako, ainge ue pahurou kesova.” ainge ena.
JOH 2:1 Eto iji three amita ambota da Cana enda Galilee amita jo ta jimbari ta pondo asi uo Iesu ta e na pondo ta pambuna.
JOH 2:2 Eto Iesu te amita ambotani te avo oru eo pambuto mihio,
JOH 2:3 pondo ta ‘Wine’ avo embomeni na indio irae enu Iesu ta e na meni ta degi puvuto, “Wine irae ehija.” ainge enu,
JOH 2:4 Iesu na, “Pamone, umo do eto nau degi ta ke ere? Nau pure ari iji puvuraera,” ainge enu,
JOH 2:5 amita e na pondo simba ari embopo ta degi ke einge ena, “Ungo amita ke tapa do aisuja avo agi evu,” ainge ena.
JOH 2:6 Eto Judea ta utu te ingeni te egerekari ovu pepeni tapa 7 koro na ari amo heka 100 litres vahai vahai ainge mihinu,
JOH 2:7 Iesu na kito pondo simba ari embopo ta degi ke einge ena, “Ovu pepeni ei ta umo overekevu pevihore,” ainge enu umo timbuto ovu jo ta overekeo pe inono enu,
JOH 2:8 Iesu na, “Umo avo timbuto humbuto pambuto pondo mamo ta ikevu,” ainge enu,
JOH 2:9 umo avo timbuto pambuto pondo mamo ta ikeo umo amo ‘Wine’ enu humbuto indina. Eto ‘Wine’ amo dainge eto puvuna amo pure embopo na kia te pondo mamo na kiae avoeto pambuto jimbari singa ta degi ke einge ena,
JOH 2:10 “Pondo iji te amo ‘Wine’ javotoho avo kihi indiore inono eoi ambota ‘Wine’ sapura amo indagora te inena ‘Wine’ javotoho ambota ikehe ere indera erevira.” ainge ena.
JOH 2:11 Eto ari emo Iesu ta vasiri te sovera te amo ihikari ta da Cana enda Galilee jo ta ena. Eto ari aravo Iesu na harikenu amita ambotani na Iesu ta sovera do aingere avo kito ke be ea.
JOH 2:12 Eto amita ambota Iesu na amita e te namei kamei te ga da Capernaum ta pambuto iji heriso mihia.
JOH 2:13 Eto Judea ta jarukari pondo auvihinu Iesu na da Jerusalem ta pambuto
JOH 2:14 temple jo ta horeto embo na o ‘Cow’ te o ‘Sheep’ te di dipo te aingeto pure ari gaga ta tetembeto koro na mine omba ue mihio puvuto kito,
JOH 2:15 esi era erari amina ena amina humbuto ohimbenu o ‘Cow’ te o ‘Sheep’ te tapa joru temple toto pahuo koro ombari embopo ta koro avo teto osirikenu enda ta venu gaga jigito haperekenu,
JOH 2:16 di dipo ombari embopo ta degi ke einge ena, “Donda erevi tapa umbavu pambai. Nau Mama ta bande erevi ungo na mine ombuto humbari bande mane aisova.” Ainge enu,
JOH 2:17 Iesu ta ambotani na ke mahu kajari avo hotembea, ke amo erevira, “Na no bande osa asona amina jo nau enetasuja.”
JOH 2:18 eto Judea embomeni na haekasi ke einge ea, “Umo embo amuta sovera na ke agi ue embo ere ohimbihe, avo amita hajire ejo kiore.” Ainge eo,
JOH 2:19 Iesu na ke mine einge ena, “Aravorate erevi aisona, temple erevi aimbavo nanena iji 3 ehako jigono erasuja.” ainge enu,
JOH 2:20 Judea embomeni na ke einge ea, “Temple erevi gerikihiore jua tapa 46 irae ere ova te inena iji 3 amita jo ta gerikaote?”
JOH 2:21 ainge ea te Iesu na amita hamo avo temple ke ena.
JOH 2:22 Eto Iesu na peheto vasiri te erasuja amita ke te tapa ena avo ambotani na hotembeto God ta ke kajari amite tapa ke be ea.
JOH 2:23 Eto Iesu na jarukari pondo iji te da Jerusalem ta mihie ari neite neite unu embo isapamane na kito Iesu ta javo ke be ea.
JOH 2:24 Rate Iesu na embo ta jo mahu kina avoeto humota be ae.
JOH 2:25 Eto Iesu na embo ta jo ta hotembari do aingere amo embo nei ta degi eto ingaera amita be amo umo mahu ere kogua avoeto.
JOH 3:1 Eto Pharisee ari embo vahai Judea ta embo okose javo Nicodemus
JOH 3:2 amina mumete puvuto Iesu ta degi ke einge ena, “Ahe Poekari Embo, umo ari neite neite ere oa amo embo na oenga mane ahera te God na hondate uei eagoa avo eto umo ahe poekari embo God na ikenu puvura.” ainge enu,
JOH 3:3 Iesu na ke einge ena, “Na no degi ta ke be erena, embo God na au e na eha ingarako aisuja, te ainge ae amo God ta tihi jigari degi amo mane kesuja.” ainge enu,
JOH 3:4 Nicodemus na ke mine einge ena, “Embo peni amo amita e na daingeto ingau? Amo e ta hini ta ehako horau ingaute?” ainge enu,
JOH 3:5 Iesu na einge ena, “Eto embo na umo te Ahihi te na e ta hini ta eha vearako aisuja te ainge ae amo God ta tihi jigari degi ai ta mane horasuja.
JOH 3:6 Eto visi na ingesora amo visi aisuja eto ahihi na ingesora amo ahihi aisuja.
JOH 3:7 Avoeto ke erena avo umo God na au meni isapa sira ao eha ingarako asora avo umo ingito jeneki honeki mane asoa. Ari amo einge ra.
JOH 3:8 Pisara amo dainge puvuto ere hoi eto dainge ere pambuhoi amo umo kiae rate asavi avo ere ingihea ainge dombo eto embo ahihi na ingasuja amo ainge aisuja,” ainge enu,
JOH 3:9 Nicodemus na, “Ari emo daingeto ari re?” enu
JOH 3:10 Iesu na ke einge ena, “Umo Israel ta ahe poekari embo rate ari emo ereona emo umo kiae rete?
JOH 3:11 Na no degi ta ke be erena, dagota kiari avo ungota degi ere harikihera eto dagota tihi na do kiora avo ungota degi ere harikihera te ungo na dagota ke ingari uje ae ra.
JOH 3:12 Eto na enda ta ari ke erena amo ungo ingae avoeto uhu ta ari ijirono ungo mane ingesova.
JOH 3:13 Eto embo nei amuna uhu i ta pambae rate Embo ta Meni uhu i ta iraguja amina enda ta puvija
JOH 3:14 eto Moses na ojaga tambu ta mihie o koso o ji atahu ta teto jiginu vihinu embomeni na kito ke be ea ainge dombo Embo ta Meni jigoro vihou embomeni na kito
JOH 3:15 ke be eto vasiri daroho humbasuja.
JOH 3:16 Eto God na enda osa peni vahai eto amita Meni avo vahai ikenu enda ta puvuna, avo embo amuna ke be aisuja amo mane pehasuja te vasiri te daroho iresuja.
JOH 3:17 Eto God na amita Meni enda ta ari sasapura avoeto tau irae aja ikae rate amina enda orekaja ikena.
JOH 3:18 Eto embo amuna God ta Meni ke be aisuja embo amo God na au amita ari sapura ta mine hajire mane ikau kesuja. Eto embo amuna God ta Meni ta javo ke be ae aisuja amo God na amita ari sapura ta hajire mahu ikau kesuja.
JOH 3:19 Eto God na hajire ikau kesuja amita ke be amo erevira. God ta usasa mahu enda ta puvuto mihia avo embo na uje ae ue enana ta ari sasapura avoeto mume ta iresi uje ere ora.
JOH 3:20 Eto ke erena emo embo amuna ari sapura ue usasa joru ue tiumbeto pambasuja amita be amo amita ari sapura avo usasa na harikaguja eto
JOH 3:21 embo amuna ke be ijie iraguja amo God ta hondateari na ari tapa eaguja avo embo ta tihina kiora usasa ta pambaguja.”
JOH 3:22 Eto amita ambota Iesu na ambotani ga enda Judea jo ta isa ue embomeni bapataito unu
JOH 3:23 John na da Aenon da Salim engihi umo isapamane ai ta embomeni bapataito ena
JOH 3:24 amo John tipura ta ikae kihi ta ena.
JOH 3:25 Eto John ta ambotani te Judea embo vahai te aingeto donda egari eto hamo te ingeni te egagora amita otohu ari ta ke avo kaseo irae enu,
JOH 3:26 pambuto John ta degi ke einge ea, “Ahe Poekari Embo, embo vahai umo Jordan oiho ta umo te mihei harikehe kogora amina embomeni bapataito oi embo isapamane amita degi ere pahora.” ainge eo
JOH 3:27 John na ke einge ena, “Embo ta uje na mane humbuto eagora te God na uhu ta ikeoi humbuto eagora.
JOH 3:28 Eto ungo ke mahu ijione ingagova amo na Judea ta hondate ari embo Keriso manera te na amita embere kahari embora.
JOH 3:29 Kakara amo singa amita jimbari be ra eto amita namei na jimbari embo ta ke ingito tunga javotoho eaguja ainge dombo na ke avo ingito tunga javotoho be ere ona.
JOH 3:30 Eto embo amina peni aisuja eto na isapa aisona.
JOH 3:31 Eto embo uhu ta eto puvurari amo embo tapa dembari ra. Eto embo enda ta ingari amo enda ta ari eto enda ta ke avo eaguja.
JOH 3:32 Eto embo uhu ta eto puvurari amita ke te ari te do ingari eto do kiari avo hande eaguja te embo isapamane na mane ingiora.
JOH 3:33 Rate embo amuna amita ke ingaguja amo God ta ari avo ke be eaguja
JOH 3:34 eto God na Embo amita ikari puvurari amita degi Ahihi Otohu ikeoi jo eneteoi God ta ke be avo hande eaguja.
JOH 3:35 Eto God Mamo na amita Meni osa eaguja avoeto ari tapa Meni ta ingeni ta iketo toaguja.
JOH 3:36 Eto embo amuna Meni ke be aisuja amo vasiri daroho humbuto iresuja te embo amuna Meni ke be ae aisuja amo vasiri daroho mane humbasuja te God ta tumo avo amita hamo ta daroho iresuja.”
JOH 4:1 Eto embo isapamane Iesu ambo ambo uo bapataito eo John ta ambotani dembena avo Pharisee embomeni na ingia
JOH 4:2 (rate Iesu na bapataito ae rate ambotani na bapataito ea.) Eto Pharisee embomeni na Iesu ta ambotani isapamane ea amita duru avo ingia avo Iesu na kito
JOH 4:3 enda Judea toto enda Galilee ta pambuna.
JOH 4:4 Eto enda Galilee ta pambasi pambuto enda Samaria orohuta pambuto
JOH 4:5 da Sychar Jacob na meni Joseph ta enda ikena amita engihi
JOH 4:6 Jacob ta umo timbari hoto ai puvuna, eto iji 12 o'clock unu degi koso avoeto jangu indesi umo timbari hoto engihita arumbeto mihinu
JOH 4:7 amita ambotani indari humbasi da jo ta pahuo enda Samaria evohu vahai amo umo timbasi puvunu Iesu na kito evohu ta degi, “Na umo timbuto ike indone,” ainge enu,
JOH 4:9 evohu amina ke mine einge ena, “Ke umo do ere. Judea embomeni na dago Samaria embomeni mane umoro eagora te inena nane umo timbuto ikana ke ere?” ainge enu,
JOH 4:10 Iesu na ke einge ena, “Eto inena God ta hande te eto embo amuna no degi ta umo indesi penunu eria avo kiaehea amo inena daroho irari umo avo penunu eto umbaehea,” ainge enu,
JOH 4:11 evohu amina ke mine einge ena, “Embo, no umo timbari ovu irae eto hoto emo hu be ta avoeto daingeto inena daroho umo timbuto nau ikao?
JOH 4:12 Dagota mama Jacob te amita meniundi te o te aingeto indito umo hoto emo dagota ikarira te umo dagota mama Jacob dembari rete?” ainge enu
JOH 4:13 Iesu na ke einge ena, “Eto embo amuna umo erevi indesuja amo ehako umo ujeje aisuja,
JOH 4:14 rate umo nanena ikasona amo indou ambota ehako umo ujeje mane aisuja te amita jo ta kuru vivihe vasiri te daroho iresuja.” ainge enu
JOH 4:15 evohu amina, “Embo, umo erea avo ikao indono umo ujeje mane ai, eto na umo ujeje ururou ehako ei umo timbasi mane puvuresona.” ainge enu,
JOH 4:16 Iesu na, “Pambuto no ivu jage ejo puvuroi,” ainge enu
JOH 4:17 evohu amina, “Ivu nau irae,” ainge enu Iesu na, “Ke be erea no ipone mahu tapa 5 rate vahai eha umoga mihia amo ivu no manera avoeto ivu no irae ke erea amo ke be ra.” Ainge enu
JOH 4:19 evohu amina, “Embo, nane umo ere kogona amo perovetara,
JOH 4:20 te dagota mamahamane na tiri ei ta God jakeka ere ijiahera te ungo na da Jerusalem ai ta God jakeka ara ke eagova.” Ainge enu,
JOH 4:21 Iesu na ke einge ena, “Evohu, umo ke nau avo ke be ejo. Iji puvuto ere hua emo tiri ei eto da Jerusalem ai ta God Mamo avo mane jakeka aisora te amo eingera.
JOH 4:22 Ungo Samaria embomeni amo God kiae rate teho jakeka eagova te dago Judea embomeni na God kogue jakeka eagora eto God na Judea enda ta eto embo tapa orekasuja
JOH 4:23 eto iji mahu puvuto mihia emikote embomeni na jo te ahihi te ke be te na Mamo God jakeka aisora amo God na jakeka be aravo ingito osa aisuja.
JOH 4:24 Eto God amo Ahihi avoeto embo na ke be te ahihi te na jakeka ara uje ere ua.” Ainge enu,
JOH 4:25 evohu amina ke einge ena, “Na kogona amo Keriso, ungotenau hondate ari embo amo puvuto ke tapa au ingesora,” ainge enu,
JOH 4:26 Iesu na, “Embo puvuresuja ke erea embo amo umo te ke eria, embo amo namora,” ainge ena.
JOH 4:27 Eto ke ainge ijinu Iesu ta ambotani na egerembeto puvuto Iesu evohu amiga ke ijie mihinu kito ti kakambukea te do uje eto evohu amiga ke ere ijina avo eto ingae toa.
JOH 4:28 Eto evohu amina amita umo timbari ovu tonu venu da ta huheveto pambuto amita embomeni ta degi ke einge ena,
JOH 4:29 “Embo vahai puvuto mihia emina ari nau tapa do eagona avo harikehei ingena avo Keriso rete pambuto kivu.” Ainge enu,
JOH 4:30 embomeni na da ta eto kesi pahuo,
JOH 4:31 ambotani na Iesu indoja uje eto ke einge ea, “Ahe Poekari Embo, umo indari erevi humbuto inda,” ainge eo
JOH 4:32 Iesu na einge ena, “Indari nau degi ta mihia amo ungo kiaera,” ainge enu,
JOH 4:33 ambotani na ke ungo oenga mine ara eto einge ea, “Embo amuna indari ikehere indei?” Ainge eo,
JOH 4:34 Iesu na ke einge ena, “Indari nau amo na ikari embo amita pure ana uje eto ikena avo ano irae aisuja.
JOH 4:35 Eto ungo ke eagova amo ‘Hariga 4 irae au donda be gasa aisuja avo kahumbeto be humbasora’ ainge eagova te ungota degi erena, ungo pure poeto kivu, mahu gasa eto giroro eto kahumbari inono ehija.
JOH 4:36 Eto be humbari embo na amita mine mahu humbuhe harau ta ikihe vasiri te daroho iresuja. Avoeto ve urari embo te eto humbari embo te ainge eto tunga javotoho ere ora.
JOH 4:37 Eto timu hatirari ke erena amo ke be ra, embo nei ve uraguja eto embo nei amo be kahumbaguja,
JOH 4:38 eto na ungo embo nei ta pure ta ikehene be ere kahumbihova. Amo embo nei na pure ngahia ena te ungo na pure ta mine avo ere uhova.”
JOH 4:39 eto enda Samaria da ai ta mihahera amina evohu amita ari tapa avo Iesu na harikenu evohu amina ingina avo enu embomeni na ingito Iesu ke be
JOH 4:40 eto puvuto Iesu avo embomeni amiga iroja uje eto penunu eo iji heriso Iesu na da ai mihie ke ijinu
JOH 4:41 embomeni isapamane na Iesu ke be ea.
JOH 4:42 Eto embomeni na evohu amita degi ke einge ea, “Dago ke no ehe ingera avo pere mane rate amita pe ta ke ei ingito amo enda ta orekari embo be ra ainge ijie ke be erera.”
JOH 4:43 Eto Iesu na iji heriso irae enu enda Galilee ta pambuna.
JOH 4:44 Eto Iesu na ke erevi mahu ena, “Da vahai embo na God ta peroveta asuja amo da vahai embomeni amita na mane osa aisora.” ainge ena,
JOH 4:45 rate Galilee ta puvunu Jerusalem pondo ta ari neite neite enu avo embomeni na kito puvuto mihio Iesu puvunu kito pekea.
JOH 4:46 Eto Iesu na da Cana enda Galilee ai ta umo enu ‘Wine’ ena da ai ta ehako puvuto mihinu
JOH 4:47 koto humbari embo okose na amita meni avo da Capernaum ta mihie ambure sapura be humbuto pehari ahumpa be unu puvuto (Iesu da ta puvurari ke ingito puvuto) Iesu ta degi meni kojaja penunu enu
JOH 4:48 Iesu na ke einge ena, “Umo teho na ke be mane asoa te vasiri te ari neite neite avo kihi kesi uje ere oete?” ainge enu,
JOH 4:49 embo okose amina, “Embo, nau meni pehasi ere ua avoeto sausau ungote pambasira,” ainge enu,
JOH 4:50 Iesu na, “Umo oenga pambu, no meni mahu erehija,” ainge enu,
JOH 4:51 embo amina Iesu ta ke avo humota ue degi ta pahunu amita bande ta pure embo vahai na puvuto degi ta hambuto, “No meni mahu erehija,” ainge enu
JOH 4:52 ingito ke einge ena, “Iji deina erehei.” ainge enu, “Iji mahu amita hure 1 o’ clock amina hamo vevere jamo ehija,” ainge enu
JOH 4:53 embo amina Iesu na amita meni eraja ke ena amo iji 1 o’ clock unu ke ena avo hotembeto embo amite eto amita bande vahai embomeni te aingeto Iesu ke be ea.
JOH 4:54 Eto Iesu na enda Judea ta eto pambuto Galilee eto orohuta hajire nei ena eto nei erevi ena.
JOH 5:1 Eto amita ambota Judea ta pondo iji nei Iesu na da Jerusalem ta aumihe pambuna.
JOH 5:2 Eto da Jerusalem ai ta o ‘sheep’ ta horari huga pe amita engihi ta embo ta umo ireremba amo Judea ta ke na Bethzatha ke eagora amo arara tapa 5 amina umo amo joekari
JOH 5:3 eto popora embo tihi vahaikari eto utu ihirari eto ingeni meni pehari amina arara ai ta mihie umo simba ere uahera.
JOH 5:4 Avo God ta Anera na veto umo enu vasiri unu popora embo vahai amina kihi umo ai ta sorueto veto kuheto kojena
JOH 5:5 eto embo vahai ai hereketo mihina amita ambure umbuna amita jua tapa 38
JOH 5:6 avo Iesu na amita ambure iji koso mihahija avo kito, “Umo kojasi uje ere oete?” Ainge enu, embo amina ke mine einge ena,
JOH 5:7 “Embo, na humbuto umo ta ikari embo irae avoeto umo ta pahuore embo nei na na seriketo umo ta veaguja,” ainge enu,
JOH 5:8 Iesu na einge ena, “Umo ereto no evari besi humbuto pambu.” ainge enu
JOH 5:9 embo amina kojeto amita evari besi humbuto pambuna. Rate jangu indari iji te ari erevi ena,
JOH 5:10 avoeto Judea embomeni na embo kojena amita degi ke einge ea, “Umo jangu indari iji te no evari besi humbuto ere pahoa amo ke pepeni ere poekihea,” ainge eo,
JOH 5:11 embo amina ke mine einge ena, “Ke be rate na ehei kojehena embo amina ehei evari besi humbuto ere pambuhona,” ainge enu,
JOH 5:12 enana na, “Embo amuna ehei humbuto ere pambuhoe?” ainge ijio,
JOH 5:13 Iesu na embo isapamane ta orohuta pahunu popora embo kojena amo kiae ena.
JOH 5:14 Eto ambota Iesu na popora embo kojena avo temple jo ta kito ke einge ena, “Umo kojehea te no ari sapura tapa avo tojo. Eto no ari sasapura tapa toae amo hajire ngahia be no degi ta puvuresuja,” ainge enu,
JOH 5:15 embo amina egerembeto pambuto Judea embomeni ta degi, “Na Iesu na ehei kojehena,” ainge ena.
JOH 5:16 Eto Iesu na jangu indari iji te ari neite neite ena avo eto Judea embomeni na Iesu ta degi pambuto ke ngahia eo,
JOH 5:17 Iesu na ke mine einge ena, “Nau Mama na iji tapa pure eaguja avoeto na ainge ereona.” ainge enu,
JOH 5:18 Judea embomeni na jangu indari iji te ke pepeni poekena avo pere mane rate Iesu na God amo amita Mamo eto Mamo ga inono ke ena avoeto daingeto taro pehasuja avo degi jombure ea.
JOH 5:19 Eto Iesu na enana ta pehumba ta ke mine avo einge ena, “Na ungota degi ke be erena, Meni na oenga mane eaguja te Mamo na do eaguja avo Meni na kito eaguja avoeto Mamo na do eaguja amo Meni te tapa eaguja.
JOH 5:20 Eto Mamo na Meni osa ue amita ari tapa amo eoi kiaguja. Eto au Meni na vasiri sovera te aisuja amo ari eha ere ona eingeko mane avo ungo na kito haha puha aisova.
JOH 5:21 Amita be amo embo pepehekari Mama na au vasiri te erasora ainge dombo meni na amita uje na siriketo au vasiri te erasora
JOH 5:22 eto Mamo na embo ta ari sasapura siriketo hajire mane ikaguja te embomeni na God Mamo amo Otohu ke eagora ainge dombo God ta Meni Otohu ke ara God na eoi Meni na ari sasapura ta hajire siriketo ikaguja.
JOH 5:23 Rate embo amina Meni otohu ae eagora ainge dombo Meni ikari Mamo avo otohu ae eagora.
JOH 5:24 Eto na ungota degi ke be erena. Embo amuna nau ke ingito na ikari embo avo ke be ijie humota ere ua amo irari daroho mahu humbuto iresuja amo pehari ta eto ereto amita ari sasapura ta hajire mane kesuja te tiumbehei vasiri te daroho mihia.
JOH 5:25 Eto ungota degi ke be erena, iji puvija amo mahu puvija amo embo pepehekari na God Meni ta ke avo ingito be ingesora amo vasiri te erasora
JOH 5:26 amita be amo Mamo amo vasiri ta susu avoeto Meni amo ehei vasiri ta susu ere ua.
JOH 5:27 Eto amo Embo ta Meni avoeto ehei ari sirikari ta embo peni ehija.
JOH 5:28 Eto ungo ke erevi ingihe jopapa mane aisova te embo pehari na Embo amita ke ingihe use toto ereto
JOH 5:29 ari jajavotoho embomeni na vasiri te daroho iresora te ari sasapura embo avo hajire ikau kesora.
JOH 5:30 Rate na oenga ari inono aera te ari erevi daingeto sirikasona avo eoi ingito eagona te nau uje na mane eagona te na ikari embo ta uje avo pere eagona avoeto embo ta ari sirikasona amo ke be na pere aisona.
JOH 5:31 Eto ari nau deire avo na oenga harikasona amo ke be mane ra.
JOH 5:32 Te ari nau harika ari Embo nei mihia amina harikasuja eto na kogona amo Embo amita harikari amo ke be ra.
JOH 5:33 Eto ungo na John ta ke ingora ikeheve pambuto amita ke avo be pere ingihera.
JOH 5:34 Rate embo na na orekari ta ke avo ae rate ungo God na orekasuja amita ke avo erena.
JOH 5:35 Eto John amo ungota kerivo ijimbeto usasa ikari embo avoeto ungo usasa iji isapa kito tunga javotoho eagova
JOH 5:36 te ke nau amo peni John ta ke amo isapa ra. Nau Mama na nane pure ana ikena avo ururono embomeni na kesora avoeto na ikari Embo amo nau Mama avo embo na be kesora.
JOH 5:37 Eto nei amo nau Mama, na ikari Embo, amina na amunure avo ungota degi eoi mane ingagova eto amita ke avo ungo ingagova te amita hamo avo do aingere amo ungo kiae ra.
JOH 5:38 Eto God na amita Meni ikehei puvija avo ungo ke be ae avoeto amita ke avo ungota jo ta irari uje aera.
JOH 5:39 Eto ungo God ta ke kajari avo iji tapa eheketo kogue vasiri daroho ai ta humbasi eagova te God ta ke kajari amina na amunure avo harikaguja,
JOH 5:40 rate ungo vasiri daroho humbasi nau degi ta puvurae eagova.
JOH 5:41 Na embo peni ke ijie ungo na na osa ana ke aera
JOH 5:42 eto na ungota jo amo na kogona ungo God osa ae embopora.
JOH 5:43 Eto na nau Mama ta javota puvena te ungo na na pekaera eto embo nei na tohota javo ta puvuraehija amo ungo na pekaeheva.
JOH 5:44 Eto God vahai amina ungo javotoho retemo sapura re avo ere kogua te amo ungo be hotembae ue embo nei na ungo jakeka ara uje isapamane eagova avoeto ungo daingeto God ke be avo.
JOH 5:45 Ungo nane God Mamo ta tombu ta pehumba eagona mane hotembasova te ungota embo vahai Moses avo ungo humota eagova embo amina ungo Mamo ta tihi ta pehumba aisuja.
JOH 5:46 Eto Moses na ke kajena amo namo avoembo kajena te ungo Moses humota ue namo te tapa humota aheva
JOH 5:47 rate ungo Moses ta ke kajari avo ke be ae eagova avoeto ke nau ungo daingeto ke be avo?” ke ainge Iesu na oje kahena.
JOH 6:1 Eto emita ambota Iesu na umo javo Galilee (amita javo nei Tiberias) avo embuto oiho ta pambuto mihie ari neite neite ue embo kokojekena
JOH 6:2 avo kesi embomeni isapamane na ambo ambo ue puvuo
JOH 6:3 Iesu na heti i ta amita ambotani ga vihito arumbena.
JOH 6:4 Eto Iesu na ari erevi ena amo Judea ta jarukari pondo ari iji puvuto auvihinu ena.
JOH 6:5 Eto Iesu na arerembeto embo isapamane puvutohuo kito Philip ta degi ke einge ena, “Ungote indari dainge koro na ombuto humbuto embo isapamane emo unduroro?” ke ainge ena
JOH 6:6 amo Iesu na do aisuja amo mahu kina te teho Philip ta degi au Philip na ke do au ingesi avo eto ingina
JOH 6:7 eto Philip na ke mine einge ena, “Ungote koro peni vahai na bread humbahera amo embo vahai vahai na pereto indoro inono mane aisuja.” Ainge enu.
JOH 6:8 Ambotani nei Simon Peter ta namei Andrew na einge ena,
JOH 6:9 “Meni isapa emina bread 5 umo o heriso, ainge humbuto puvuto mihia te inono manera,” ainge enu
JOH 6:10 Iesu na einge ena, “Aravora te evu embomeni tapa arumbare.” ainge enu embo tapa 5,000 te evohu te meni isasaraho te tapa enena ta arumbeo
JOH 6:11 Iesu na bread tapa 5 humbuto God ta degi peketo embo arumbea amita degi ikena. Eto umo o heriso amite tapa ikenu embomeni tapa indio inono enu
JOH 6:12 amita ambotani ta degi einge ena, “Indari indera amita ihehe avo aija mane asova te tapa siriketo umbuvujo.” ainge enu,
JOH 6:13 ihehe siriketo umbua bread amo tapa 5 rate handija tapa 12 amo ihehe na pevihina.
JOH 6:14 Eto Iesu na ari erevi enu embomeni na kito ke einge ea, “Peroveta enda ta puvuresuja ainge ijiore simba ere ovora amore erevira,” ainge ea.
JOH 6:15 Eto embomeni na Iesu ta degi ke vasiri na eto aro enana ta king aja ke asora avo Iesu na kito umo oenga veto tiri ta pambuna.
JOH 6:16 Eto hure vovunu ambotani na da Capernaum umo oiho ai ta pambasi umo hora ta veto
JOH 6:17 e nga ta vihia eto Iesu tiri ta pambuna amo puvurae enu mume sihukihinu
JOH 6:18 e nga ta pahuo pisara peni vahai be puvuto umo piri unu
JOH 6:19 e nga tavihe 6 o 7 kilometre ainge pahuo Iesu na umo hamo ta haito puvutuhunu kito joru uo
JOH 6:20 Iesu na kito ke einge ena, “Namora, ungo joru avojo.” ainge enu
JOH 6:21 Iesu e nga ta vihoja uje ea te degi pambasi uje ea avo mahu puvua.
JOH 6:22 Eto embomeni asa umo oiho ta toa amina iho vujenu e nga vahai be avo mihina ai ta ambotani na pere vihito pahuo Iesu avo e nga ta vihae
JOH 6:23 kito bread india degi amita engihi ta da javo Tiberias ai ta e nga nenei puvua avo Iesu te ambotani te puverete avo kesi pambua
JOH 6:24 rate kiae eto e nga nei ai vihito Iesu jombure asi da Capernaum ta pambua.
JOH 6:25 Eto pambuto Iesu hambuto ke einge ea, “Ahe poekari embo, umo dainge eto puve?” ainge eo
JOH 6:26 Iesu na ke mine einge ena, “Na ungota degi ke be erena, ungo God ta ari neite neite keheva avo ae rate indari peni vahai be indeva avo eto na jombure ere ova.
JOH 6:27 Te indari amo sari aisuja avo eto ungo indari ta pure avojo, indari nei vasiri te daroho iraguja amita pure avo evujo. Eto indari avo Embo ta Meni na hande ikasi ere ua, eto God Mamo na Embo ta Meni javotoho ke eria,” ainge Iesu na enu
JOH 6:28 embomeni na ke einge ea, “Eto God na dago pure do ara uje ere oi?” ainge eo
JOH 6:29 Iesu na ke mine einge ena, “God ta pure amo erevira: God na Embo ikehei puvija avo ke be ijie humota evujo,” ainge enu,
JOH 6:30 mine einge ea, “God ta ke mahu kajari ai ta ke einge mihia. ‘Amina bread uhu i ta ikenu embomeni na india,’ ke ainge kajari mihia amo dagota mamahamane na ojagatambu ta mihie uhu i ta bread avo india te inena pure do ao no hajire avo kito ke be aro?” ainge eo,
JOH 6:32 Iesu na ke einge ena, “Na ungota degi ke be erena, uhu i ta bread avo Moses na ikae rate nau Mama na uhu i ta bread be avo ikaguja
JOH 6:33 eto God ta bread be avo uhu ta eto veto embo tapa ta degi vasiri ikaguja,” ainge enu
JOH 6:34 “Embo, bread avo dagota degi mahainge ikejo indore,” ainge eo,
JOH 6:35 Iesu na ke einge ena, “Vasiri te irari bread amo namora. Eto embo amuna nau degi ta huresuja amo veaguja mane kesuja. Eto na humota aisuja embo na mane umo ujeje kesuja
JOH 6:36 eto na ungota degi mahu ijiena te ungona na tihi na ere kogova te na humota ae ere ova.
JOH 6:37 Te God na embo nau degi ta ikasuja amo nau degi ta hururoro na mane toasona te umbasona
JOH 6:38 eto na uhu ta eto puvena amo uje nau avo aisi puvuraera te na ikehei puvena Embo amita uje avo pere aisona.
JOH 6:39 Eto embo na ikehei puvena amita uje amo embo tapa nau ikehija amo nei vahai mane veto pambasuja te iji kombu te ano tapa erasora.
JOH 6:40 Erena amo nau Mama ta uje amo embo amuna God ta Meni kito humota eto vasiri daroho humbasuja amo iji kombu te ano vasiri te erasuja,” ke ainge Iesu na ijinu
JOH 6:41 Judea embomeni na ‘Na bread uhu ta veari ra’ ke ainge Iesu na ena avo ingito isoro ke ungo oenga ijie
JOH 6:42 einge ea, “Embo emita mamo Joseph ra eto amita e mamo amo ungotena kiarira te doeto uhu ta eto veari ke erei?” ainge eo
JOH 6:43 Iesu na ingito, “Ungo isoro ke ungo oenga ereva avo tovu.
JOH 6:44 Eto embo na oenga nau degi ta mane huresuja te God na jigito gorukau huresuja embo amo na iji kombu te ano erasuja.
JOH 6:45 Eto peroveta na ke einge kajea, ‘Embo tapa avo God na ahe poekasuja’ ke ainge kajari mihia avoeto embo amuna God ta ke ingito kiari humbuhe nau degi ta puvaguja.
JOH 6:46 Rate embo na God ta tombu kiaera te embo God ta degi eto puvurari amina God kiarira
JOH 6:47 te na ke be erena embo amuna ke be ijie humota aisuja amo vasiri daroho humbasuja.
JOH 6:48 Eto na vasiri daroho ta bread ra,
JOH 6:49 te ungota mamahamane na ojagatambu ta mihie bread uhu ta eto veari avo india te irae pepehekea
JOH 6:50 te bread uhu ta eto veari erena emo indito mane pehasora,
JOH 6:51 te bread vasiri te uhu ta eto puvija ke erena amo namora eto embo amuna indesuja amo vasiri te daroho iresuja. Eto bread ikasona amo nau visi avo enda ta embomeni vasiri te irora ikasona,” ke ainge Iesu na enu,
JOH 6:52 Judea embomeni na tumo ue ke ungo oenga eto einge ea, “Do eto embo emita visi ikau ungotenane indoro?” ainge eo,
JOH 6:53 Iesu na ke mine einge ena, “Eto ungo ta degi ke be erena. Embo ta Meni ta visi te orosa te indae aisova amo ungota degi vasiri mane iresuja,
JOH 6:54 te embo amuna nau visi te orosa te indesuja amo embo amita degi vasiri te daroho iresuja avoeto iji kombu ta jigono erasuja.
JOH 6:55 Amo nau visi te nau orosa te amo indari be avoeto,
JOH 6:56 embo amuna nau visi te orosa te indesuja amo na embo amita jo ta iresona eto embo amo jo nau ta iresuja
JOH 6:57 ke amo erevira, nau Mama vasiri te na na ikehei puvuto amita degi vasiri ere humbuhona ainge dombo embo amuna na indito nau degi ta vasiri humbasuja.
JOH 6:58 Eto bread uhu ta eto veari erena amo ungotenau mamahamane na indito pepehekea ainge mane rate bread erevi indesuja amo vasiri te daroho iresuja.”
JOH 6:59 ke ainge da Capernaum kasari bande ta enu.
JOH 6:60 ingito amita ambotani nei uhoho na einge ea, “Ke emo sapura be avo ere ingihera avoeto embo na daingeto ke erevi ambo ambo aro?” ainge
JOH 6:61 tumo te tapa ea avo Iesu na kito ke einge ena, “Eto ungo ke erena avo ingito hini kambari ere ovete?
JOH 6:62 Embo ta Meni na veari degi ta vivihirou ungo kito do hotembavo?
JOH 6:63 Eto visi na nei do mane ikaguja te Ahihi na vasiri ikaguja avoeto na ke erena amo ahihi te vasiri te amita ke avo erena.
JOH 6:64 Rate ungo nei uhoho na ke be ae eagova.” Ainge Iesu na ena amita be amo Iesu ke be ae embopo eto embo nei Iesu ta jenge indesuja embo amo Iesu na mahu ihikari ta kina.
JOH 6:65 Eto ke nei einge ena. “Avoeto ungota degi ke mahu ijiena amo embo na mane nau degi ta huresuja te God na au huresuja ainge ijiena.”
JOH 6:66 eto ke ainge ena amikote ambotani nei uhoho na Iesu ambo ambo ae toto ungota uje ta pambua.
JOH 6:67 Eto Iesu na ambotani 12 ta degi ke einge eto ingina, “Eto ungote tapa pambasi uje ere ovete?” ainge enu
JOH 6:68 Simon Peter na einge ena, “Bada dago umo toto amuta degi pambaro? Vasiri daroho irari ta ke avo inena hande oe
JOH 6:69 ke be erera eto umo God ta Embo Otohu be avo dago ere kogora,” ainge enu
JOH 6:70 Iesu na ke einge ena, “Nanena ungo 12 avo siriketo humbuhana te ungo vahai avo Satan ta tohora.” Ainge ena
JOH 6:71 amo embo Simon Iscariot ta meni Judas amo ambotani 12 ra te Judas amina isoro embo ta harikasuja avo eto ena.
JOH 7:1 Eto iji amita ambota enda Judea embomeni na Iesu taro pehaja ke eo Iesu na kito enda Galilee ta isa ena.
JOH 7:2 Eto Judea ta pondo javo Horoma Pondo auvihinu
JOH 7:3 Iesu ta ambo jimbi na Iesu ta degi ke einge ea, “Inena degi erevi toto Judea enda ta pambuto no ari neite neite avo ao no ambotani na kiorote?
JOH 7:4 Eto embo amuna dombo aisi uje aisuja amo mane ojikari na aehija avoeto embo tapa ta tihi ta ari no avo ao sigeto peni vahai ururou tihi na koguroro embo peni aisoa,” ainge ea
JOH 7:5 amo Iesu ta ambo jimbi na Iesu humota ae avoeto ke emo eo,
JOH 7:6 Iesu na ke mine einge ena, “Iji nau amo puvuraera te ungota iji amo inono be ra.
JOH 7:7 Eto enda embomeni na ungota degi tumo ae rate nanena enana ta ari sasapura harikagona avoeto nau degi ta tumo eagora.
JOH 7:8 Avoeto ungo pondo ta pambuvujo, eto nau iji puvurae avoeto na eha pondo ta mane pambasona.” ainge enu.
JOH 7:9 namei kamei pahuo enda Galilee ta mihimihe embo na kiora ojiketo titiha ta kiae pondo ta pambuna.
JOH 7:11 Eto pondo ue Judea embomeni na Iesu puveite puvuraere avo kesi jombure ea.
JOH 7:12 Eto embomeni na oenga oenga horuketo embo nei na kumumu ke na, “Embo amo javotohora,” ke ijio embo nei na, “Embo amina embo sio humbei ere pahora” ainge ea
JOH 7:13 amo Judea ta embo okokose joru ue ke araha ta ae ojikari na ea.
JOH 7:14 Eto Iesu na pondo orohuta puvuto temple jo ta horeto embomeni oje kahihinu
JOH 7:15 Judea embomeni na kito haha puha ijie ke einge ea, “Embo emo school kiae rate daingeto book ere ehekihei,” ainge eo
JOH 7:16 Iesu na kito ke mine einge ena, “Ahe Poekari nau emo na ikenu puvua Embo amita ahe poekari ra te nau hotembari na aera,
JOH 7:17 te embo amuna God ta uje avo aisuja embo amina ahe poekari nau amo God ta degi eto puvurari rete nau degi ta eto puvurari re avo be kesuja.
JOH 7:18 Eto embo amuna amita hotembari na embomeni ahe poekasuja amo embomeni na kito embo peni ke ijie jakeka ara aisuja rate embo amuna ikari embo avo embomeni na jakeka ara ke hande aisuja amo ke sokova na mane hande aisuja te ke be na pere aisuja.
JOH 7:19 Eto Moses na ke pepeni ikenute ikae re? Eto ikena te ungo tapa na poekagova te do eto na tavo pehana uje ere ove?” ainge enu
JOH 7:20 embomeni na, “Umo ahihi sapura na jo ta horari ra. Embo amuna umo taisi erere?” ainge eo
JOH 7:21 Iesu na ke einge ena, “Na ari vahai jangu indari iji te ehena avo ungona kito ke isapamane ereva te erevi hotembevujo
JOH 7:22 eto Moses na hamo kakamba ava ena (ari amo amina ihikae rate ungota ohihi mamahu na ihikari ra) Eto ari amo ungo na jangu indari iji te eagova.
JOH 7:23 Eto na ke erena amo ungona Moses ta ke pepeni agi ue jangu indari iji te embo ta hamo kakamba eagova ainge dombo na jangu indari iji te embo ta hamo javotoho uena avoeto ungo do eto nau degi ta tumo ere ove?
JOH 7:24 Eto ungo embo ta ari javotoho rete sapura re avo tihi na kogue pe pekihi emina ke re eagova te jo na aera,” ainge Iesu na ena.
JOH 7:25 Eto iji amikote da Jerusalem embomeni na ke mine ara eto einge ea. “Eto embo tasi uje ere ora emo erevi rete o erevi manere?
JOH 7:26 Eto embo emina ke eria te haekae eto nei do ae rate embo okokose na embo erevi Keriso be ere hotembiherete?
JOH 7:27 Eto embo emita puvurari degi amo ungotena kiarira te Keriso be simba ere ovora avo puvuraehija amo ungotena amita puvurari degi avo mane kiaehera.” Ke ainge embomeni na ea.
JOH 7:28 Eto Iesu na temple jo ta embomeni ta degi ahe poekihe ke vasiri na eto einge ena, “Eto ungo na kiarira eto na daingeto puvena amo ungo kiarira eto na uje nau oenga na puvurae rate Embo vahai na ikehei puvena amo ke be rate Embo amo ungo kiaera te
JOH 7:29 Embo amina na ikehei puvena avoeto Embo amo na kiarira,” ainge enu,
JOH 7:30 embomeni na ingito andito humbasi ea te amita iji puvurae avoeto God na haekenu toa.
JOH 7:31 Te embomeni nei uhoho ai ta mihia amina Iesu ke be ijie ke einge ea, “Eto Keriso na puvuto ari neite neite aisuja ke eagora amo Keriso erevira.” Ainge ijio.
JOH 7:32 ke peni vahai be enu Pharisee embomeni na ingito temple ta police na Iesu humbuto tipura ta ikara eo pambua.
JOH 7:33 Eto Iesu na ke einge ena, “Na ungote iji isapa mihima na ikena Embo ta degi ehako egerembeto pambasona
JOH 7:34 eto ungo na jombure eto hambae asova amo na pambasona degi amo ungo mane pambasova.” Ainge enu,
JOH 7:35 Judea embomeni na ingito ke mine ara ijie einge ea, “Embo emina pambuto mihirou mane hambara ke eria degi mo davorami erei? Eto Judea embomeni Greek enda nei nei ta pambuto iragora ai pambuto ahe poekasi ereite?
JOH 7:36 Eto ‘Na pambasona amo ungo na jombure eto mane hambasova eto na pambasona degi amo ungo mane pambasova’ ainge eria amita ke be mo deirami erei?” ainge ea.
JOH 7:37 Eto pondo iji tutumota pondo iji peni puvunu Iesu na ereto heteto ke vasiri na eto einge ena, “Eto embo amuna umo ujeje ururou kito evujo nau degi ta huroi.
JOH 7:38 Eto embo amuna na humota ere oi avo evujo hurou umo ikano indoi. Eto God ta ke kajari ta einge mihia. ‘Amita jo ta umo kuru na viharako eto vasiri te daroho iresuja.’” ke ainge ena
JOH 7:39 amita ke be amo Iesu na pambuto Mamo ta usasa ta horeto Ahihi Otohu ikau puvuto Iesu ke be ea embomeni amita jo ta horasuja amita ke avo ena.
JOH 7:40 Eto embomeni nei uhoho na ke avo ingito einge ea, “Eto embo emo peroveta simba ere ovora vahai avora.” ainge ijio
JOH 7:41 embo nei na, “Embo emo Kerisora.” ainge ijio embo nei na, “Keriso simba ere ovora amo Galilee embo na mane aisuja
JOH 7:42 te David ta ahije vahai David ta da Bethlehem embo na Keriso aisuja ainge God ta ke kajari ta mihia” ainge ea
JOH 7:43 amo embomeni tapa amita hotembari vahai na ae rate hotembari tunga oenga oenga na ea
JOH 7:44 eto embo nei uhoho na Iesu humbuto tipura ta ikasi uje ea te enana ta ingeni amo Iesu ta hamo ta ingeni jujurukae.
JOH 7:45 Eto temple ta police na egerembeto priests pepeni te Pharisee embopo ta degi pambuo ke einge eto ingia, “Ungo do eto Iesu humbuto puvurae eheve?” ainge eo
JOH 7:46 police na ke mine einge ea, “Eto embo amina ke ainge ae ingae pekota ke javotoho eria.” ainge eo,
JOH 7:47 Pharisee embo na ingito ke einge ea, “Eto ungote tapa embo amita ke ingihe ere pahove?
JOH 7:48 Eto ungo kogova amo kiari embo pepeni te Pharisee embo te na embo avo ke be aera.
JOH 7:49 Eto tumo sosou embopo amina embo amita ke ingihe mihera amina Moses ta ke pepeni avo kiae ue ere pahora amo God na hana kiari ikasuja.” ainge eo,
JOH 7:50 embo vahai Nicodemus Iesu ta degi kihi pambuna amina ke einge ena.
JOH 7:51 “Eto embo ta sapura deire avo ganoka eto ingae teho sio humbasora amo ungotenau ke pepeni Moses na kajena amo ainge rete?” ainge enu,
JOH 7:52 Pharisee embomeni na ke mine einge ea, “Umo te tapa Galilee embo rete? Umo oenga eheketo ki. God ta peroveta tapa amo da Galilee ta eto mane puvagora,” ke ainge
JOH 7:53 eto embomeni sisiketo pambua.
JOH 8:1 Eto Iesu na tiri javo Olives ta pambuto evinu
JOH 8:2 iho vujenu egerembeto temple ta pambunu embomeni amita degi puvuo arumbeto ahe poekihinu
JOH 8:3 enana ke pepeni kiari embopo te Pharisee embomeni te aingeto evohu vahai avo tiha unu kito humbuto embo tapa ta tihi ta embo tapa kiora ikeo hetenu
JOH 8:4 Iesu ta degi ke einge ea, “Ahe Poekari Embo, evohu erevi tiha oi kito haekehera
JOH 8:5 eto Moses ta ke pepeni ta amo koro na tiha evohu taro pehaja ena te hotembari no avo ejo ingore.” ainge ea
JOH 8:6 amita be amo Iesu ta degi popoja ke asi humbuto puvua. Rate Iesu na aruse eto veto ingeni na enda ta ahari ue mihinu
JOH 8:7 embomeni na eto ingari ke kaiketo ijio Iesu na hange ambu eto ke einge ena, “Ungo embo puveva amo embo vahai amuna ari sapura irae embo amina karu humbuto kihi taisuja.”
JOH 8:8 ke ainge eto tihi hu ta eto enda ta ahari unu.
JOH 8:9 Embomeni na ingito sisiketo embo evovo amina oenga pahunu eto embo nei nei amo vahai pamba uo evohu oenga Iesu ga heteto mihinu
JOH 8:10 Iesu na hange ambu eto evohu amita degi ke einge ena, “Pamone, embo daingere, eto embo vahai amuna umo pehumba aerete?
JOH 8:11 Aravora, te nane umo mane pehumba asona te umo pambuto no ari sapura toto irari javotoho na irijo,” ainge Iesu na ena.
JOH 8:12 Eto Iesu na embomeni ta degi ihiketo ke einge ena, “Na enda ta usasara. Eto embo amuna na ambo ambo aisuja embo amo mume ta isa mane aisuja te vasiri daroho ta usasa amo amita degi iresuja.” ainge enu
JOH 8:13 Pharisee embomeni na ingito ke mine einge ea, “No harika ari embo irae umo oenga erea amo ke be mane asora.” Ainge eo
JOH 8:14 Iesu na ke einge ena, “Ari nau avo na oenga harikihena amo ke be ra. Na puvurari degi eto na pambari degi amo na kiarira te na puvurari degi eto pambari degi amo ungo kiaera.
JOH 8:15 Eto ari javotoho davore sapura davore amo ungota enda ta ari avo ungo embo na eagova nanena embo kogue embo emo sapurara eto embo emo javotohora ainge mane eagona
JOH 8:16 te ke aisona amo ke be na pere aisona amita be amo na ikari embo amo namote mihia amina ijioi eagona.
JOH 8:17 Eto ungota ke pepeni ta kajari mihia amo eto embo heriso na jo vahai eto ke vahai aisora amo ke be ra.
JOH 8:18 Avoeto ke nau erena amo na ikari Embo Mama nau amiga ke emo erena avoeto dago heriso na ke emo harikihera.” Iesu na ainge enu,
JOH 8:19 Pharisee embomeni na, “Mamo no davore?” ainge ena, “Ungona na kiae ere ova ainge Mama nau ungo kiae ere ova te ungona na kiaeheva ainge Mama nau amo ungo kiaeheva.” Ke ainge ena amo
JOH 8:20 temple jo ta God ta hande ikari degi ai ta ke emo ena. Amo Iesu ta iji puvurae avoeto andito umbae toa.
JOH 8:21 Eto Iesu na ke nei einge ena, “Eto na pambasona amo ungona na jombure ue ungota ari sasapura avoeto ungo pehasova. Eto na pambasona ai ta ungo pambari inono ae aisova.” Ainge enu
JOH 8:22 Judea embomeni na ke mine ara eto einge ea, “Na pambasona ai ta ungo mane pambasova ainge eria amo umo oenga teto pehasi ereite?” ainge eo,
JOH 8:23 Iesu na einge ena, “Ungo enda embopora eto na uhu embo ra. Eto ungo enda erevi tohora te na enda emita toho manera.
JOH 8:24 Eto na ungota degi ke mahu ehene ingeva amo ungota ari sasapura avoeto pehasova. Eto kivu, na amunure avo ke erena amo ungo ingito ke be ae ere ova amo ungota ari sasapura avoeto pehasova” ainge Iesu na enu,
JOH 8:25 “Umo amunure?” ke ainge eo Iesu na ke mine einge ena, “mahu kihi ungota degi ijiena amo namora.
JOH 8:26 Eto na ungo embo ke isapamane ahena eto ungota ari sasapura isapamane harikaehena te na ikari Embo amita ke amo ke be perera avoeto amita ke avo nau degi ta enu ingia avo enda embo ta degi hande ere ona.” ainge ena amo
JOH 8:27 Iesu na amita Mamo God avo ke ena te embomeni na ingae uo,
JOH 8:28 Iesu na ke einge ena, “Eto kiari amo nau mane rate nau Mama ta kiari nau degi ta ikena avo ungota degi hande eagona avo eto Embo ta Meni i ta tavo mihirou ungona na amunure ke eagona avo kito ke be aisova.
JOH 8:29 Eto na iji tapa na ikari Embo ta uje tapa avo eagona avoeto na egikae namote tapa mihia.” Ke ainge
JOH 8:30 ijinu embo isapamane na Iesu ta ke avo ingito ke be ea.
JOH 8:31 Eto Judea embomeni Iesu ke be ea amita degi Iesu na ke einge ena, “Eto ungo ke nau avo be jigesova amo ambotani nau be ururovo
JOH 8:32 nau ke be avo ano ingihirovo ke be amina ungo ari sasapura na andirari avo vujekasuja” Ainge enu
JOH 8:33 ingito ke mine einge ea, “Dago ta Ohihi Abraham ta degi eto puvurari eto embo nei na dago pundurae mihovora erevira te umo do eto dago vujekasi ke ere?” ainge eo,
JOH 8:34 Iesu na ke einge ena, “Na ungota degi ke be erena, Embo amuna ari sapura aisuja amo ari sapura na pundurari avoeto ari sapura ta pure ari embora.
JOH 8:35 Eto pure ari embo na bande ta daroho mane iresuja te meni be amina bande ta iresuja.
JOH 8:36 Eto ungo ari sasapura na pundurari avoeto God ta Meni na ungo vujekaehija amo ungo na jeneambueto daroho iraeheva.
JOH 8:37 Eto ungo Abraham ta meniundi amo na kiari rate ungota ohihi Abraham hotembae ue ke tapa do erena avo ungota jo ta horae avoeto na taisi ere ova.
JOH 8:38 Rate namo avo nau Mama ta degi do kiagona avo ke hande ere ona te ungo avo kogue ambo ambo ere ova.” ainge Iesu na enu,
JOH 8:39 embomeni na, “Dago ta Mama Abraham ra.” ainge eo, Iesu na, “Ungo Abraham ta meniundi kito amo Abraham na ena ainge dombo aheva.
JOH 8:40 Amo na God ta ke be avo ingihe ungota degi erena te ungona na taisi ere ova te Abraham na ari ainge amo ae ra.
JOH 8:41 Rate ungo eagova amo ungota mama na eaguja vahai avo eagova.” ainge Iesu na enu embomeni na ingito ke mine einge ea, “Dago suhita ari na ingae rate dagota mama amo God eto dago amita meniundi ra.” ainge eo.
JOH 8:42 Iesu na ke einge ena, “Eto God amo ungota Mamo kito amo na osa aheva amo na God ta degi puvuto mihena amo uje nau na puvurae rate na amina ikenu puvua,
JOH 8:43 te ke erena emo ungo ingito mana mana ue ingari inono ae avoeto ere ova.
JOH 8:44 Te ungota mamo amo Satan avoeto amita pure avo asi uje ere ova amo iji kihi ta amo embo tari embo eto embo amita ke be irae ke sokova avo pere iraguja. Avoeto embo amo ke sokova ta mamora eto embo amo ke ijie amo amita jo ta hotembari ke sokova avo puvaguja.
JOH 8:45 Rate nanena ke be eagona avoeto ungona na ke be ae eagova.
JOH 8:46 Te ungo embo vahai na nau ari sapura vahai do eagone kiagove avo harikevu ingone. Eto na iji tapa ke be pere eagona te ungo do eto na ke be ae eagove?
JOH 8:47 Eto God ta Meni na God ta ke ingaguja te ungo God ta ke ingae eagova amo ungo God ta meniundi mane avoeto.” Ainge Iesu na enu.
JOH 8:48 Judea embomeni na ke mine einge ea, “Dago kogora amo umo enda Samaria embo ahihi sapura na jo ta horari avoeto erea.” ainge eo
JOH 8:49 Iesu na ke einge ena, “Na ahihi sapura na horae rate na nau Mama Otohu eagona te ungona na otohu ae ere ova.
JOH 8:50 Amo nanena ae rate embo ta ari siriketo hajire ikari Embo amina javo nau otohu ara uje ere ua avoeto hajire amina ikasuja.
JOH 8:51 Eto ungota degi ke be erena, embo amuna ke nau ingito agi aisuja embo amina mane pehasuja.” ainge enu,
JOH 8:52 Judea embomeni na ingito ke einge ea, “Eto umo ahihi sapura na horari ke erera amo ke be perera.
JOH 8:53 Eto Abraham pehena eto peroveta tapa pepehekea te inena ‘embo amuna ke nau agi aisuja amo mane pehasuja,’ ke ainge erea amo dagota mama Abraham te peroveta tapa pepehekea amo inena dembari rete? Eto umo embo amunurami ke ere?” ainge eo
JOH 8:54 Iesu na ke mine einge ena, “Eto na oenga peni asi ahena amo ke be mane aehija te Mama nau ungo na ‘Dagota God ra’ ainge eagova amina au embo peni aisona.
JOH 8:55 Te, ungo amo God kiae ere ova te nanena God kiagona. Eto nanena God kiae ke ahena amo ungo ainge ke sokova embo ahena te na God kogue ke amita tapa avo ingihe agi eagona.
JOH 8:56 Eto ungota mamo Abraham na na puvuresona avo hotembu hotembu ue tunga javotoho ena.” ainge Iesu na enu,
JOH 8:57 Judea embomeni na ke einge ea, “Eto no humbari jua amo 50 mane rate Abraham inena kiari ke erea,” ainge eo
JOH 8:58 Iesu na, “Na ungota degi ke be erena, eto Abraham e na ingae pekota amo nanena mihahena,” ainge ena.
JOH 8:59 Eto Judea embomeni na ingito Iesu tasi koro siriketo humbuho Iesu na kito kiae ojikari na temple toto pambuna.
JOH 9:1 Eto Iesu isa pahue embo e na tihi tahimbari ingena avo kogunu
JOH 9:2 amita ambotani na ke einge ea, “Ahe Poekari Embo, embo emo e ta mamo ta ari sapura na enutemo amita ari sapura na e ta hini ta eto tihi tahimbenu avo dago be kesi uje ere ora.” ainge eo,
JOH 9:3 Iesu na einge ena, “Amo e ta mamo ta ari sapura mane eto amita sapura mane rate God ta sovera avo embo tapa na kiora enu e ta hini ta eto tihi tahimbena.
JOH 9:4 Eto iji veae mihirou na ikari Embo ta pure aisona te mume sihukari ahumpa ere ua emo embo na pure ari inono aera.
JOH 9:5 Eto na enda ta iragona amo na enda ta usasa avo eagona eto aisona.” ainge eto,
JOH 9:6 enda ta isuva eto tavenu pegara enu humbuto tihi tahimbari embo emita tihi ta kuheto,
JOH 9:7 ke einge ena, “Umo pambuto umo ireremba javo Siloam (Javo amita be amo ‘Ikari pambari’) ai ta no tihi egejo.” ainge enu tihi tahimbari embo amo pambuto umo ai ta tihi egenu javotoho enu pambuna.
JOH 9:8 Eto amita da vahai embomeni te eto embo nenei te aingeto koro penunu ijioi ere koguahera amina embo avo kito ke einge ea, “Eto embo arumbeto mihie koro penunu eaguja embo amo erevirete?” ainge ijio,
JOH 9:9 embo nei na, “En, embo aravora,” ainge ijio embo nei na, “Embo nei, rate tombu hajire vahaira,” ainge ijio, embo kojena amina, “Na embo aravora,” ainge enu,
JOH 9:10 embomeni na, “Aravorate no tihi daingeto javotoho ehei?” ainge eo,
JOH 9:11 embo amina, “Embo javo Iesu na enda ta isuva eto tavehei pegara ehei humbuto tihi ta kuheto ke einge ehija, ‘Umo pambuto umo Siloam ta kuhe’ ainge ehei pambuto umo kuhehene tihi javotoho ehija.” ainge enu,
JOH 9:12 “Embo amo daingere,” ainge eo. “Embo amo na kiaera,” ainge enu.
JOH 9:13 Embomeni na tihi tahimbari embo kojena avo humbuto Pharisee embomeni ta degi pambuo
JOH 9:14 Pharisee embomeni na embo amita tihi daingeto javotoho enu ere koguna avo eto ingio tihi tahimbari embo kojena amina ke einge ena, “Embo Iesu na pegara humbuto nau tihi ta ikehei kuhehene javotoho ehei ere kogona,” ainge enu Iesu na jangu indari iji te pegara humbuto embo ta tihi ta kuhenu javotoho ena,
JOH 9:16 avoeto Pharisee embomeni nei uhoho na ke einge ea, “Embo emo jangu indari iji ta ke pepeni ambo ambo ae ere ua embo emo God ta degi puvuraera,” ainge eo Pharisee embo nei nei amina, “Embo ari sasapura embo na ari javotoho einge amo mane aehija,” ainge ijio,
JOH 9:17 Pharisee embo nei uhoho na ereto isoro ke eto kuru embo kojena amita degi ke ehako einge eto ingia, “Aravorate embo amina no tihi ehei javotoho ehija te no hotembari avo deire ejo ingore.” Ainge eo embo amina, “Embo amo Peroveta ra,” ainge ena.
JOH 9:18 Eto Judea embomeni na embo tihi tahimbari javotoho ena avo ke be ae ue ke be eto ingesi amita e te mamo te avo eo puvuo
JOH 9:19 ke einge ea, “Embo emo no meni rete avo hini ta eto tihi vahaikari puvunute avo daingeto tihi javotoho ehei ere kogoi?” ainge eo,
JOH 9:20 amita e te mamo te na ke mine einge ea, “Ke be, amo dagota meni hini ta eto tihi tahimbari puvuna te
JOH 9:21 embo amuna ehei tihi javotoho ehei ere kogua amo dago kiaerate dago ta meni amo embo peni ra amita degi eto ingavu,” ke ainge ea
JOH 9:22 amita be amo Judea embomeni na embo amina Iesu amo Keriso be ra ainge aisuja amo kaheketo oenga iresora ke ainge mahu ari ingari avo hotembeto joru eto
JOH 9:23 ungo oenga meni ta degi eto ingora ke ea.
JOH 9:24 Avoeto Judea embomeni na embo avo eo puvunu ke einge ea, “God vahai avo jakeka ejo, eto dago na Iesu avo sapura embo ke eagora.” ainge eo,
JOH 9:25 embo amina ke mine einge ena, “Embo amo sapura embo rete avo na kiaera te nau tihi sapura ari avo ehei ere kogona,” ainge enu
JOH 9:26 Judea embomeni na ke einge ea, “Eto embo amina no degi ta do ehei eto no tihi javotoho ehei?” ainge eo,
JOH 9:27 ke mine einge ena, “Na ke mahu ehena amo ungo ingae eto ehako ano ingito amita ambotani aisi uje ere ovete?” ainge enu,
JOH 9:28 Judea embomeni na tumo eto embo avo ke einge ijie isembea, “Eto umo avo amita ambotani ejo. Dago avo Moses ta ambotani ra.
JOH 9:29 Eto God na Moses ta degi ke ena avo dago kiari rate embo avo daingeto puvuna avo dago kiaera.” ainge eo,
JOH 9:30 embo amina ke mine einge ena, “Eto ke ungo na ereva amo na manamana ere ona te embo amina nau tihi hirikehija avo ungona daingeto puvurari ke ereva,
JOH 9:31 te ungotena ere kogora amo God na sapura embo ta ke amo mane ingaguja te embo javotoho God ta pure ari embo amita ke avo ingaguja.
JOH 9:32 Eto iji mahu ta eto puvuto eha emite amo embo na e na ingari iji te tihi tahimbari amo embo nei na ae javotoho aera.
JOH 9:33 Eto embo erevi God ta degi puvurae amo ari emo mane aehija,” ainge enu,
JOH 9:34 enana tumo ue ke einge ea, “Umo ari sapura ue ingari amina dago ahe poekasi erete?” ainge ijie ohimbeo ke kasari bande toto pambuna.
JOH 9:35 Avo Iesu na ingito jombure pambuto embo avo hambuto ke einge ena, “Umo Embo ta Meni avo ke be ijie ere oete?” ainge enu
JOH 9:36 embo amina ke mine einge ena. “Embo, Embo ta Meni mo amunure avo ejo na kito ke be ane.” ainge enu,
JOH 9:37 Iesu na ke mine einge ena, “Inena embo avo kogoe embo amina umote ke eria, embo re aravora,” ainge enu,
JOH 9:38 embo amina, “Bada, na umo ke be erena,” ainge eto Iesu jakeka ena.
JOH 9:39 Eto Iesu na ke einge ena, “Na embo ta ari sirikihe embo tihi tahimbari embomeni avo ano tihi javotoho ururou eto embo nenei tihi na kito kiaesira eagora avo ano tihi tahimbasuja avoeto enda ta puvena.” ke ainge enu,
JOH 9:40 Pharisee embomeni ai ta mihia amina ingito ke einge ea, “Eto dago mo tihi tahimbari ke ere?” ainge eo,
JOH 9:41 Iesu na ke mine einge ena, “Ungo tihi tahimbari embopo amo na mane pehumba ahena te ungo na ‘Dago kiarira’ ainge ereva avoeto ungona ari sapura ta hajire kesova.” ainge Iesu na ena.
JOH 10:1 Eto Iesu na ke einge ena, “Na ungota degi ke be erena, pegene embo na amo o ‘sheep’ ta huga peta mane horeuja te huga jaruketo jo ta veaguja
JOH 10:2 te o ‘sheep’ simba ari mamo na amo huga pe ta horasi uei
JOH 10:3 huga pe simba ari embo na o ta mamo kito pe hirikeoi horeto amita o ‘sheep’ vahai vahai javo ijie jage ijioi o amita pere na mamo ta ke hajire ingihe mamo ambo ambo ue arahata pambagora.
JOH 10:4 Eto arahata puvuto o mamo kihi pambuhoi ambota oroviketo ke hajire ingihe pambagora.
JOH 10:5 Te embo nei ta ke hajire ingihe amo mane ambo ambo eagora te joru toto pambagora.”
JOH 10:6 eto ke ainge Iesu na timu hatirari ke na ena te embomeni na ke be hotembae eo.
JOH 10:7 Iesu na ke ehako einge ena, “Na ungota degi ke be erena, na o ‘sheep’ ta huga pe ra.
JOH 10:8 Eto embo nei nei mahu kihi puvua amo pegene embopora avoeto o ‘sheep’ na ke hajire ingae ue toa.
JOH 10:9 Te huga pe amo namo avoeto embo na nau degi ta horeto osaga mane kesuja te puvuto pambuto ue samara eto enena javotoho kito indesuja.
JOH 10:10 Eto pegene embo amo pegene eto tau pehara puvaguja te na puvena amo embo ta vasiri ikano humbuto ve isapamane eto irora puvena.
JOH 10:11 Na o ‘sheep’ simba ari embo javotoho ra te o ‘sheep’ simba ari embo amo o ‘sheep’ orekasi amita hamo na ombuto taro sari aisuja.
JOH 10:12 Rate ‘sheep’ simba ari embo eto ‘sheep’ ta mamo mane avoeto isoro o ‘wolf’ na o ‘sheep’ kambasi puvutuhurou kito embo amo o ‘sheep’ toto joru pahurou o ‘sheep’ amo joru sepuriri eto pambasora.
JOH 10:13 Amita be amo koro pure ari embo na o ‘sheep’ hotembae eaguja te
JOH 10:14 Namo avo o ‘sheep’ simba ari embo javotohora te nanena nau jekahoka kiagona eto ungona na kiora.
JOH 10:15 Ainge dombo nau Mama na na kiaguja eto nanena nau Mama kiagona. Eto nau o ‘sheep’ irora namo avo vasiri te pehasora.
JOH 10:16 Eto nau o ‘sheep’ nenei mihera amo huga jo ei ta irae rate amite tapa nanena tatapeketo humbuto vahai ta ikasona. Eto enana te tapa nau ke hajire ingihe tatapeketo iriroro na enana ta simba ari embo ainge aisona.
JOH 10:17 Eto nau vasiri toasona eto ehako umbasona avo nau Mama na na osa ere ua.
JOH 10:18 Eto uje nau na nau vasiri toasona amo embo nei na mane egimbeto humbasuja. Eto na sovera humbuto pehasora eto sovera amina au nau vasiri ehako umbasona ari avo ainge ana nau Mama na nau degi ta ke ena,” ke ainge Iesu na enu,
JOH 10:19 Judea embomeni na tumo ue ke sio sao ijie ke einge ea,
JOH 10:20 embo nei nei na, “Embo emo ahihi sasapura na jo ta horari amita uha sapura oi eria avoeto ungotena amita ke mane ingesora,” ainge ijio
JOH 10:21 embo nei uhoho na ke einge ea, “Embo ahihi sapura na jo ta horari amo embo tihi tahimbari mane kojaehija te embo emo ke be ra,” ainge ea.
JOH 10:22 Eto huvira iji te da Jerusalem ta otohu ari pondo ta
JOH 10:23 Iesu na temple jo ta degi javo Solomon ta arara ai ta horeto heto unu
JOH 10:24 Judea embomeni na kito puvuto Iesu joeketo ke einge ea, “Umo Keriso rete mo amunure? Avo ke be na pere ejo. Dago iji koso mana mana ue mihera.” ainge eo.
JOH 10:25 “Na ke amo mahu eagone ingagova te ungona na ke be ae eagova. Eto nanena nau Mama ta javo ta ari neite neite eagone amina harikaguja aravora te
JOH 10:26 ungona na ke be ae eagova. Amita be amo ungo o ‘Sheep’ nau manera.
JOH 10:27 Eto o ‘Sheep’ nau be amina ke nau ingihe na ambo ambo uore nanena enana kiagona.
JOH 10:28 Eto nau o ‘Sheep’ amo vaine mane pambagora eto embo nei na mane puvuto ingeni nauta egimbeto humbagora te nanena enana ta degi vasiri daroho ikagona.
JOH 10:29 Eto o ‘Sheep’ amo nau Mama na nau ikarira eto nau Mama amo embo tapa dembari avoeto embo nei na nau Mama ta ingeni ta egimbeto humbari inono aera.
JOH 10:30 Nau Mama te namo te amo vahaira.” Ainge enu.
JOH 10:31 Judea embomeni na ingito Iesu tasi koro siriketo humbuho
JOH 10:32 Iesu na ke einge ena, “Nau Mama na ari neite neite jajavotoho amo nau degi ta eoi eagone kiagova te ari emita vahai mo deire ehene kito na taisi ere ove?” Ainge enu,
JOH 10:33 Judea embomeni na ke mine einge ea, “Dago no ari neite neite jajavotoho ere oa avoeto umo taisi ae rate inena umo embo rate God ke erea amo sapura be avo erea amita hamota umo taisi ere ora.” ainge eo,
JOH 10:34 Iesu na ke einge ena, “Eto ungota ke pepeni ta ke kajari amo einge mihia, ‘Ungo amo ke kaiha ari embomeni dombo be ra’ ke ainge amo God na ke humbari embomeni ta degi ena avo ungo eheketo kiaere?
JOH 10:35 Eto God ta ke amo eho mane irae aisuja eto aita amo enana embo ke kaiha ari embomeni dombo be avoeto
JOH 10:36 namo avo God Mamo na enda ta ikenu puvua avoeto nanena, ‘Na God ta Meni ra,’ ainge ene ingito ungona nanena God urumbari ke ereva.
JOH 10:37 Eto nanena nau Mama ta pure avo ahena amo ungona ke be mane aheva te
JOH 10:38 nanena pure avo ururono ungo na kogue na ke be mane aisova te pure avo kogue ke be ijie na Mama ta jo ta mihena eto Mama jo nau ta mihia avo kogue hotembevujo.” ainge enu.
JOH 10:39 Judea embomeni na andito humbasi eo Iesu na tiumbeto pambuto
JOH 10:40 umo Jordan oiho John na embomeni bapataito ena degi ai pambuto mihinu
JOH 10:41 embomeni na kito puvuto ke einge ea, “John na ari neite neite einge ae rate embo eremita ke avo ere ijiahija tapa amo ke be ra.”
JOH 10:42 ke ainge ijie embo isapamane na Iesu ke be ea.
JOH 11:1 Eto embo javo Lazarus amo da Bethany ai ta amita du kakara heriso Mary te Martha te amiga mihahija avo ambure umbuna
JOH 11:2 (eto kakara vahai oil mune te amina Iesu ta utu ta kuheto amita siro hu na tuhenoija amo Lazarus ta du ta javo Mary ra.)
JOH 11:3 eto Lazarus ta du emone heriso amina Iesu ta degi ke einge ikeo pambuna, “Bada, no tunga humbari namei avo ambure ue mihia,” ainge ijie ke ikeo pambunu
JOH 11:4 Iesu na ingito ke einge ena. “Eto ambure humbuto mane sari aisuja te embomeni na Mama God ta usasa kito eto Meni ta usasa kiora ere ua.” ainge Iesu na ena.
JOH 11:5 Eto Iesu na Martha te amita jao Mary te du Lazarus te avo osa ena
JOH 11:6 te Lazarus ambure ari ke ingina te sausau pambae iji heriso mihimihe
JOH 11:7 amita ambotani ta degi, “Ungote enda Judea ta pambasora,” ainge enu,
JOH 11:8 ambotani na ke einge ea, “Ahe Poekari Embo, umo Judea embomeni na koro na tasi ehere puvea te porere ae ehako egerembao?” ainge eo,
JOH 11:9 Iesu na ke mine einge ena, “Eto iji vihiuja amo amita jo ta amo 12 hours amina usasa eaguja amo embo na teto kokain eto mane veagora amita be amo iji usasa mihia avoeto,
JOH 11:10 rate mume te amo teto kokain eto veagora amita be amo usasa irae”, avoeto ke ainge,
JOH 11:11 eto ke nei einge ena, “Aravorate ungote pambuto ungotenau namei Lazarus ere evia avo ujaro eraja na.” ainge enu,
JOH 11:12 ingito einge ea, “Bada, amo jangu indie ere evia avoeto kojasuja,” ainge ijie
JOH 11:13 teho evo ari ke hotembea te Iesu na mahu pehena aravo evo ari ke ena
JOH 11:14 avo Iesu na kito ke hariketo einge ena, “Lazarus pehehija te ungona na ke be ava mihena avoeto na tunga javotoho ere ona te ungote Lazarus kesi pambasira,” ainge enu,
JOH 11:16 ambotani vahai Thomas eto amita javo nei Didymus na ambotani nei uhoho ta degi ke einge ena, “Aravora te ungote Iesu ga tapa pambuto sari aisora,” ainge ena.
JOH 11:17 Eto pambuto Lazarus pehenu use ta ikea amo iji tapa 4 irae enu Iesu puvuna.
JOH 11:18 Eto Lazarus ta da Bethany amo da Jerusalem engihi ta 3 kilometres ainge pambagora
JOH 11:19 avoeto Judea embomeni na Lazarus ta du kakara Martha te Mary te aingeto Lazarus pehena avo bijapuri asi pambuto mihio
JOH 11:20 Iesu puvurari duru ingito Mary da ta mihinu Martha na Iesu hambasi degi ta pambuto Iesu hambuto
JOH 11:21 Iesu ta degi ke einge ena, “Bada, umo ei ta iraehea amo nau du mane pehaehija
JOH 11:22 te umo do uje eto penunu aisoa amo God na ikasuja avo na ere kogona.” Ke ainge Martha na enu,
JOH 11:23 Iesu na einge ena, “No du amo vasiri te erasuja,” ainge enu
JOH 11:24 Martha na Iesu ta degi einge ena, “Na kogona amo iji kombu te erasuja,” ainge enu,
JOH 11:25 Iesu na einge ena, “Eto vasiri te erari amo namora. Eto embo amuna na ke be aisuja embo amina pehau irae mane aisuja te ehako vasiri te erasuja.
JOH 11:26 Eto embo amuna vasiri te mihie na ke be ijie mane pehasuja te vasiri te daroho iresuja. Ke ainge erena amo umo kogoete?” Ainge enu,
JOH 11:27 Martha na, “Bada, umo God ta Meni Keriso avo simba ere ovora avo enda ta puvea erevira,” ke ainge.
JOH 11:28 eto pambuto amita jao Mary jage eto, “Ahe Poekari Embo puvuto umo kesi eria,” ainge enu
JOH 11:29 Mary na ingito sau ereto pambuto Iesu da jo ta horae da sahu ta Martha hambuna degi ai mihinu Mary pahunu
JOH 11:31 Judea embomeni Mary ga bande jo ta bijapuri ijie mihia amina Mary sau ereto Lazarus ta use ta si asi pambari ke hotembeto embomeni na Mary ta ambota pahuo,
JOH 11:32 Mary na Iesu ta degi puvuto Iesu kito utu ta veto gombuto ke einge ena, “Bada, umo mahu puvuraehea amo nau du mane pehaehija,” ke ainge si te tapa ijinu
JOH 11:33 Iesu na Mary ta tihi sisivu te eto Judea embomeni ta si te avo kito Iesu osaga peni vahai be enu
JOH 11:34 ke einge ena, “Koveheva use daingetare?” ainge enu embomeni na, “Bada, orovira, pambuto ki,” ainge eto pahuo
JOH 11:35 Iesu si ijinu
JOH 11:36 Judea embomeni na kito, “Kivu, osa peni vahai eaguja avoeto pehehei si eria,” ainge ijio
JOH 11:37 embo nei uhoho na ke einge ea, “Embo emina tihi tahimbari ehei javotoho ehija te embo emita pehari emo haekari inono ae avoeto pehehei?” ainge embomeni na ijio.
JOH 11:38 Iesu osaga peni vahai kogue use ta puvuto koro peni amina use pe ahurekea avo kito
JOH 11:39 “Koro evi umbavu pambai,” ainge enu embo pehena amita du Martha na ke einge ena, “Bada, pehehei kovehere iji 4 irae ehei sari ue kimu masa ere ua.” ainge enu,
JOH 11:40 Iesu na ke einge ena, “Na no degi ta umo God ke be ijie God ta usasa no degi ta ikau kesoa, ke ainge ehenete?” ke ainge enu,
JOH 11:41 koro umbuo pahunu Iesu na tihi i ta eto “Mama umo ke nau ingagoa eto ere ingihea avoeto umo osa ere ona.
JOH 11:42 Eto namo avoembo ae rate embomeni ei mihera avo inena na ikae puvua avo ano kito ke be ara erena,” ainge eto
JOH 11:43 hori gagaha eto einge ena, “Lazarus umo hambuto puvura,” ainge enu,
JOH 11:44 pehari embo bo oseseto utu te ingeni te pupundukea eto tombu togea amite tapa hambuto puvuto hetenu Iesu na embomeni ta degi ke einge ena, “Bo togari avo bujeketo tovu pambai,” ainge ena.
JOH 11:45 Eto Judea embomeni nenei Mary ga puvua amina Iesu na Lazarus pehenu kovea avo enu vasiri te erena avo kito Iesu ke be ijie humota ea.
JOH 11:46 Eto Judea embomeni nenei na pambuto Pharisee embomeni ta degi Iesu na ari do ena avo eo,
JOH 11:47 ingito priests pepeni te Pharisee embomeni te aingeto vahaita horuketo ke kaseto einge ea, “Embo emina ari sovera neite neite ere ua emo ungote embo emo do aro?
JOH 11:48 Eto toasora amo embomeni tapa embo avo ke be ijiroro Rome embo na puvuto isoro ue embo torue temple otohu taro irae aisuja.” ainge ijio
JOH 11:49 jua amita priest peni javo Caiaphas amina ke einge ena, “Ari emo puvija te ungo be kiae ere ova.
JOH 11:50 Rate ungo embo tapa pehasova amo sapurara te ungo embo tapa amita javota embo vahai pehasuja avo javotohora,” Ke ainge Caiaphas na ena.
JOH 11:51 Amo amita hotembari na ae rate Judea ta priest peni ue Iesu na Judea embomeni tapa avoeto pehasuja avo harikena
JOH 11:52 te amo Judea embo avo pere mane rate God ta meniundi enda tapa ta mihera avo namei kamei vahai ara pehasuja.
JOH 11:53 Eto ke ainge ea iji amikote Iesu daingeto humbuto taro pehasuja avo degi jombure ea.
JOH 11:54 Avoeto Iesu na Judea embomeni ga umoro ae toto amita ambotani ga degi ojagatambu amita engihita da javo Ephraim ai pambuto mihahera.
JOH 11:55 Eto Judea ta Jarukari Pondo ari iji auvihinu Judea da isasaraho embomeni na Jerusalem ta pambuto enana ta ari ainge avoeto hamo egaro otohu au pondo asi horuketo temple jo ta isa ue ke einge ea, “Ungo do ere hotembeheve? Iesu eha pondo ta puvuroute mane puvurou?” ainge ea.
JOH 11:57 Eto priests pepeni te Pharisee embomeni te aingeto ke mahainge ea, “Embo amuna Iesu kito avo puvuto dago ta evujo dago na embo avo andito umbare,” ainge ea.
JOH 12:1 Eto Jarukari pondo ari ta iji 6 irae ae mihinu Iesu na da Bethany ta puvuto embo Lazarus pehenu enu vasiri te erena
JOH 12:2 amita bande ta indari indesi pambuo Martha na indari ikenu Iesu te Lazarus te eto umoro embo nenei te aingeto gaga ta arumbeto indie mihio
JOH 12:3 Mary na oil javo ‘Nard’ higi isapa amita mine amo pajire bera te amina humbuto Iesu ta utu ta overeketo kuheto amita siro hu na tuhenu bande jo amo mune na ohugara unu
JOH 12:4 ambotani tapa 12 rate ambotani vahai javo Judas Iscariot Iesu jenge indesuja embo amina ke einge ena,
JOH 12:5 “Oil mune te emo koro pajire be ombuto koro humbuto donda ambu embopo ta ikahera avo teho aijaja ere ua,”
JOH 12:6 ke ainge ena amo donda ambu embopo amo be hotembae rate ambotani ta koro tapa avo amina simba aja ke eo koro goru simba ue iji hekeri ta pegene humbaguja avoeto ena.
JOH 12:7 Iesu na embo amita degi ke einge ena, “Aravorate to, na pehano kovasora amo oil mune te emina hamo nau jigesuja avoeto simba ere ua,
JOH 12:8 te donda ambu embopo amo iji koso ungote iresora te na ungote iji koso mane iresona,” ke ainge Iesu na ena.
JOH 12:9 Eto Judea embomeni isapamane Iesu ta duru ingito kesi pambua amo Iesu pere mane rate embo Lazarus pehenu Iesu na enu vasiri te erena amite tapa kesi pambuto
JOH 12:10 Lazarus kito Judea ta ari avo toto Iesu ke be ijio priests pepeni na ke avo ingito Lazarus te tapa taro pehaja ke ea.
JOH 12:12 Eto iho nei embomeni pondo ta puvua amina Iesu Jerusalem ta puvutuhunu duru ingito
JOH 12:13 koropa iki kahumbeto humbuto Iesu hambasi degi ta pahue ke jajage eto einge ea, “Hosanna, Israel embo ta ‘King’ Bada ta javota puvuto ere hua. Javotoho ari amita degi iroi.” ainge ijie puvutohuo
JOH 12:14 Iesu na o ‘Donkey’ meni hambuto humbuto o hamo ta arumbeto pambuna amita ke avo God ta ke mahu kajari ai ta einge mihia,
JOH 12:15 “Israel embomeni ungo joru avojo ungo ta ‘King’ o ‘Donkey’ meni ta hamo ta arumbeto puvuto ere hua.” Ke ainge mihia
JOH 12:16 amo iji amikote Iesu ta ambotani na hotembae rate Iesu vasiri te ereto uhu usasa ta pahunu amita ambotani na God ta ke mahu kajari amite Israel embomeni na pekea amite avo hotembeto ke be ea.
JOH 12:17 Ainge eto degi ta pahue Lazarus Iesu na jage enu use ta eto erenu kia embomeni amina embo tapa ta degi ke hande eo ingihe degi ta pambua.
JOH 12:18 Eto hajire avo Iesu na enu embo isapamane na duru ingito Iesu kesi degi ta puvua
JOH 12:19 eto Pharisee embomeni na kogue ke einge ea, “Kivu, ari emo haekari inono aera te enda embomeni tapa na embo emita ambota ere orovikihera.”
JOH 12:20 Eto God jakeka ari embo nenei pondo ta pambua amo enda Greek embopo
JOH 12:21 amina pambuto embo Philip amo enda Galilee amita da Bethsaida embo amita degi ke einge ea, “Dago Iesu kesi uje ere ora,” ainge eo
JOH 12:22 Philip na pambuto Andrew eto amiga pambuto Iesu ta degi eo ingito
JOH 12:23 Iesu na ke mine einge ena, “Embo ta Meni na amita Usasa ta horasuja iji puvija erevira,
JOH 12:24 na ungota degi ke be erena. Eto ‘wheat’ ve vahai enda ta veto mane pehasuja amo ve vahai aisuja te enda ta veto pehasuja amo be isapamane aisuja.
JOH 12:25 Eto embo amuna enda ta ari amita uje ue iresuja amita vasiri amo veto pambau irae aisuja eto embo nei amuna enda ta ari avo uje ae aisuja amo amita vasiri amo daroho iresuja.
JOH 12:26 Eto embo amuna ke nau agi ue amo na ambo ambo aisuja. Eto na dainge iragona ai ta nau agi ari embo te tapa iresuja. Eto embo amuna ke nau agi aisuja embo amo nau Mama na otohu aisuja.
JOH 12:27 Rate eha oroho nau jo ta osaga ere kogona te na ke do ano? ‘Mama, nau iji puvija erevi peiketo na hondate e’ ainge anote, ke ainge mane aisona te ari erevi asi puvua avoeto ari emita iji puvija erevira avoeto
JOH 12:28 Mama, javo no avo ejo peni ai.” ainge ijinu uhu i ta ke einge puvuna, “Javo nau avo ijione peni ereouva avo ehako ano peni aisuja.” ke ainge puvutuhunu,
JOH 12:29 embomeni areto mihia amina ingito ke einge ea, “Uhu ta tururu eria” ainge ijio embo nei na, “Uhu ta Anera na ke eria,” ainge eo
JOH 12:30 Iesu na ke einge ena, “Ke puvuto ere hua amo namo avoembo ae rate ungo avoembo eria.
JOH 12:31 Eto enda ta ari tapa do aingere amo God na mahu siriketo hajire ikasi ere ua eto enda ta tihi jigari embo amo God na ohimbau pambasuja.
JOH 12:32 Eto namo avo jigoro vivihe embo tapa amo nau degi ta puvuresora,”
JOH 12:33 ke ainge Iesu na ena amo ahe ivo do eto taisora avo harikena. Eto ke ainge Iesu na enu
JOH 12:34 embomeni ai ta mihia amina ingito ke einge ea, “Dago Moses na ke kajena avo eheketo kiora amo Keriso puvuresuja amo nangote daroho iresuja ke avo eheketo kiora te inena Embo ta Meni jigoro vihito pehasuja ainge erea amo Embo ta Meni mo davore?” ainge eo,
JOH 12:35 Iesu na ke mine einge ena, “Usasa amo ungote iji isapa mihima irae aisuja
JOH 12:36 te usasa mihia emikote ungo isa evujo eto isa ari embo na mume sihukasuja amo sio pambasuja avoeto usasa ungota degi irirou usasa ke be ijie usasa ta meniundi evujo,” ke ainge Iesu na eto embomeni kiae toto pambuto ojikena.
JOH 12:37 Eto Iesu na ari neite neite ena amo Judea embomeni na kia te ke be ae ea
JOH 12:38 amita ke avo Peroveta Isaiah na mahu einge kajena, “Bada, dagota ke mo embo amuna ingito ke be erei? Eto God ta sovera neite neite mo embo amuna kito ke be erei?” Ke ainge amo mahu kajari mihia.
JOH 12:39 Eto embomeni na ke avo ingito ke be ari haite mane avo God na enu Isaiah na ke einge kajena,
JOH 12:40 “Eto embomeni nau degi ta puvuore eagone kojagora avo tihi ano tahimbau mane kesora eto embo ta jo ano ngahia au mane hotembasora,” ke ainge kajena
JOH 12:41 amo Isaiah na Iesu ta usasa kogue Iesu avoembo kajena.
JOH 12:42 Eto Judea ta embo pepeni nenei amo Iesu ke be ea amo Pharisee embomeni na kahekeore oenga iragona joru ue ojikari na Iesu ke be ea.
JOH 12:43 Amo God na embomeni avo osa aisuja amo hotembae ue embomeni na kito osa ara uje ea.
JOH 12:44 Eto Iesu na embomeni tapa ingora ke peni vahai be eto einge ena, “Eto embo amuna na ke be eaguja amo na pere mane rate na ikari Embo amite tapa ke be eaguja,
JOH 12:45 eto embo amuna na kiaguja amo na ikari Embo amite tapa kiaguja
JOH 12:46 eto na usasa avo puvuto enda ta mihirono embo amuna na ke be ijie mume ta mane iresuja
JOH 12:47 eto na enda ta pehumba asi puvurae rate enda oreketo humbasi puvena avoeto embo amuna ke nau agi ae aisuja amo nanena mane pehumba aisona te
JOH 12:48 na uje ae ue ke nau agi ae ere ora embopo amita pehumba ari embo mihia amo ke nau tapa erevona amina iji kombu te pehumba aisuja
JOH 12:49 eto ke amita be amo erevira. Ke nau amo nau degi ta puvurae rate nau Mama na ikari Embo amina ana ijioi eagona
JOH 12:50 eto na kogona amo amita ke ikari ai ta amo vasiri daroho mihia avoeto nau Mama na ke do nau degi ta eaguja avo pere eagona,” ainge Iesu na ena.
JOH 13:1 Eto Iesu na enda toto Mamo ta degi pambasuja amita iji puvuna amo jarukari pondo asora amita mume amina Iesu na kina. Eto Iesu na enda ta mihie amita embomeni osa ena amo doaingere avo au kiora ari einge ena.
JOH 13:2 Eto Iesu na amita ambotani ga indari indie mihinu Satan na Simon ta meni Judas Iscariot ta degi Iesu harikau umbara enu ingina.
JOH 13:3 Eto God na amita pure tapa Iesu ta ingeni ta iketo tona amite eto Iesu God ta degi eto puvuna avoeto ehako egerembeto pambasuja amite tapa Iesu na kina.
JOH 13:4 Eto indio irae enu Iesu na ereto heteto amita bo hamo ta avo houketo hamo tuhari soi humbuto uhu ta tigito
JOH 13:5 umo heva ta timbuto overeketo ambotani vahai vahai ta utu egeto soi uhu ta tigina amina tuhihe
JOH 13:6 puvuto Simon Peter ta degi puvunu Iesu ta degi ke einge ena, “Bada, umo utu nau egasi ere oe?” ainge enu,
JOH 13:7 Iesu na ke mine einge ena, “Na do ere ona ungo eha emo kiae ereova te ambota kesova,” ainge enu,
JOH 13:8 Peter na, “Uhu nau avo mane egasoa,” ainge enu Iesu na ke mine einge ena, “Eto na utu na egae amo namo te vahaita mane aisoa,” ainge enu,
JOH 13:9 Peter na, “Bada aravora, te nau utu pere mane egasoa te ingeni te siro te tapa egasoa,” ainge enu,
JOH 13:10 Iesu na einge ena, “Eto embo na umo kuhasuja amo tongopa irae avoeto ehako hamo mane egasuja. Eto umo tongopa ambu rate embo nei ei ta amo ainge manera,”
JOH 13:11 ke ainge ena amita be amo jenge indesuja embo amita jo avo Iesu na kogue ke “Embo nei ei ta amo ainge manera,” ainge ena.
JOH 13:12 Eto Iesu na ambotani ta utu egenu irae enu amita bo asuketo pambuto gaga ta arumbeto
JOH 13:13 ke einge ena, “Eto na ungota degi ahe kihira ehena emo ungo ere kogovete? Amita be amo erevira, ungona na ungota bada ke eagova eto ungota ahepoekari embo ke eagova amo ke be ra te
JOH 13:14 na ungota bada eto ahepoekari embo na ungota utu egehena ainge dombo ungo oenga utu mine ega evujo.
JOH 13:15 Eto ungona kito ainge ava ahe kihira ehena.
JOH 13:16 Na ungota degi ke be erena, pure ikari embo amo embo penira eto pure ari embo amo isapara eto nei amo ke ari embo amo embo peni ra eto ke hande ari embo amo embo isapa ra
JOH 13:17 eto ari erena avo hotembeto agi ue tunga javotoho te iresova.
JOH 13:18 Eto na ungo siriketo humbena amita jo amo na ere kogona avoeto ke erena emo ungo tapa ta degi aera. Te God ta ke mahu kajari einge mihia, ‘Embo vahai namo te arumbeto ere india amo nau degi ta kitoho ereua,’ kajari ainge mihia avo au inono aisuja,
JOH 13:19 eto ari emo puvurae peko ta ene ere ingiheva amita be amo puvurou kito ungona na ke be aisova.
JOH 13:20 Na ungota degi ke be erena, eto embo amuna nane ikano pambasuja embo avo pekasuja amo namote tapa pekasuja. Eto na pekasuja amo na ikari Embo te tapa pekasuja.”
JOH 13:21 Eto Iesu na ke ainge eto jo ta osaga peni vahai be kito ke einge ena, “Na ungota degi ke be erena, ungo vahai na kitoho embo ta degi harikavo na humbasora,” ainge enu,
JOH 13:22 ambotani na mine kia ue ke eria amita be mo deire ainge ijio
JOH 13:23 ambotani vahai Iesu na osa ena embo amo Iesu ta engihi ta hereketo mihina amita degi
JOH 13:24 Simon Peter na ingeni na ahe ahe ue amunurami erei eto inga ainge ijinu
JOH 13:25 Iesu ta jenge ta siro na tembeto, “Bada, amunure,” ainge enu
JOH 13:26 Iesu na ke einge ena, “Na bread humbuto su heva jo ta kaimbeto ikano indesuja embo re aravora,” ainge eto bread humbuto kaimbeto Simon Iscariot ta meni Judas ta ikenu
JOH 13:27 humbunu Satan na amita jo ta horenu Iesu na Judas ta degi ke einge ena, “Umo do uje ere oe avo sausau pambuto ejo.” ainge enu
JOH 13:28 ambotani nei uhoho na ke be ingae
JOH 13:29 avoeto einge hotembea, Judas amo ambotani ta koro simba ari embo avoeto pambuto pondo asora amita indari umbaja ereite mo donda ambu embopo ta hande ikaja ereite avo hotembiho,
JOH 13:30 Judas na bread humbuto ereto araha mume ta pambuna.
JOH 13:31 Eto pahunu Iesu na ke einge ena, “Eto iji nau puvija eto God ta usasa na Embo ta Meni joekau embo na God ta usasa kesora
JOH 13:32 eto God na nau usasa ikau usasa ta horasona amita iji ahumpa ehija
JOH 13:33 te ajao nau meniundi, na ungote iji koso mane iresona te ke mahu Judea embomeni ta ehene ingera avo ungota degi erena ungo na jombure eto amo na pambasona degi ai ungo mane pambasova.
JOH 13:34 Eto na ungota degi ke peni be avo eha ere ikihena amo osa mine ara evujo. Eto na ungo osa eagona ainge dombo ungo osa mine ara evujo.
JOH 13:35 Eto ungo na osa mine ara ururovo embo tapa na kito amo Iesu ta ambotanira asora,” ainge enu.
JOH 13:36 Simon Peter na ke einge ena, “Bada, umo dainge pambao?” ainge enu Iesu na einge ena, “Umo na eha pahurono mane pambasoa te ambota pambasoa,” ainge enu
JOH 13:37 Peter na ke einge ena, “Na do eto umo pambasoa degi ai ta mane pambana ere? Na umo embo sari asi hotembihena.” ainge enu,
JOH 13:38 Iesu na ke mine einge ena, “Umo na embo sari asi ke ere? Na no degi ta ke be erena, umo iji 3 na kiae ke ijiro ohora javone aisuja,” ainge Iesu na ena.
JOH 14:1 Eto Iesu na ambotani ta degi ke einge eto ena, “Ungo osaga kiovojo, eto ungo God humota evujo, eto na humota evujo
JOH 14:2 eto nau Mama ta bande ta jo kaneke kaneke ari isapamane be mihia te bande jo neite neite ainge irae amo ungota degi ke mahu ano ingaeheva. Avoeto na pambuto ungota irari besi siriketo,
JOH 14:3 nununga eto ehako egerembeto puvuto ungo humbuto ungote tapa na iragona degi ai pambuto iresora.
JOH 14:4 Eto na pambagona degi amo ungo kiarira.” ainge Iesu na enu,
JOH 14:5 Thomas na ke mine einge ena, “Bada umo pambasoa degi amo dago kiaera te no pambari degi amo dago na kiari ke erea,” ainge enu,
JOH 14:6 Iesu na ke einge ena, “Eto na amo pambari degi te ke be te vasiri te avoeto embo na na tiumbeto Mama ta degi mane pambagora,
JOH 14:7 eto ungo na na ere kogova amo nau Mama te tapa ere kogova. Eto ungo na iji tapa kiagova eto eha oroho emo ere kogova,” ke ainge enu,
JOH 14:8 Philip na ke einge ena, “Bada, ejo dago Mama kito inono are,” ainge enu,
JOH 14:9 Iesu na ke mine einge ena, “Philip, na ungote iji koso mihovona te inena na kiae ke erea. Eto ungo na ere kogova amo Mama ainge dombo ere kogova rate inena Mama ano be kesi ke ere?
JOH 14:10 Eto na Mama ta jo ta mihena eto Mama jo nau ta mihia te umo ke be ae ue erete? Eto na ke tapa erena amo na oenga aera te nau Mama jo nau ta mihia amina pure amita avo eaguja.
JOH 14:11 Eto na Mama ta jo ta Mamo jo nau ta avo kogue ke be evujo. Eto avo ke be ae ue kito sinderi neite neite uore kiagova aita na ke be evujo.
JOH 14:12 Eto na ungota degi ke be erena, eto embo amuna na ke be aisuja amo nanena eagona ainge dombo ari neite neite aisuja. Eto na Mama ta degi pahurono embo amuna na ke be eaguja embo amina ari na eagona amo dembeto aisuja.
JOH 14:13 Eto nanena ano Mama ta javo peni aja ungo na javo nau ta penunu aisova amo ikasona.
JOH 14:14 Eto ungo javo nau ta do uje eto penunu aisova amo ikasona.
JOH 14:15 Eto ungona na osa ue kito amo ke nau tapa avo agi evujo.
JOH 14:16 Eto na Mama ta degi ano ungota hondate ari embo ikau puvuto ungote daroho iresuja
JOH 14:17 amo ke be ari ta Ahihi avo enda embomeni teho kiae na mane humbasora te ungo ta degi puvuto jo ungota ta iresuja avoeto ungo na kesova.
JOH 14:18 Eto ungo hojo meni toarako mane aisona te na ehako puvuresona.
JOH 14:19 Amo iji isapa eto enda embomeni na na mane kesora te ungo na na kesova. Eto na vasiri te mihena ainge dombo ungona vasiri te iresova,
JOH 14:20 eto na Mama ta jo ta eto ungo jo nau ta eto na ungota jo ta avoeto iji puvuresuja amo ungona ari avo kito ke be aisova.
JOH 14:21 Eto embo amuna ke nau ingito agi aisuja embo amina na osa aisuja. Eto na osa aisuja embo amo nau Mama na osa ururou nanena embo avo kito osa ue ano na be kesuja,” ainge Iesu na enu,
JOH 14:22 embo Judas Iscariot mane rate Judas nei amina ke einge ena, “Bada, ke erea amita be mo deire? Eto enda embo tapa mane kiora dago pere ao kiora erete?” eto ke ainge enu
JOH 14:23 Iesu na ke mine einge ena, “Eto embo amuna na osa ue ke nau agi aisuja amo nau Mama na embo avo osa ururou dago na puvuto amita jo ta iresora.
JOH 14:24 Eto embo amuna na osa ae eaguja amina ke nau agi mane eaguja. Eto ke amo nau mane rate na ikari Embo ta ke ra.
JOH 14:25 Eto na ungote mihie ke erevi ungota degi erena
JOH 14:26 te ungota hondate ari embo Ahihi Otohu avo nau Mama na nau javo ta ikau puvuto ke tapa do erena amo harikau ungo na ehako hotembasova.
JOH 14:27 Eto ungota degi hande ere ikihena amo nau peka avo ungota degi iketo pambasona. Eto peka amo enda embo na mane ikahera te nanena ungota degi hande ere ikihena avoeto ungo joru ue osaga neite neite avojo.
JOH 14:28 Eto na pambuto egerembasi ke ehene ingeva amo Mama nau amo na aingeko mane embo peni be amita degi ere pambuhona, avoeto ungo na na osa ue amo tunga javotoho evujo
JOH 14:29 eto ari erevi puvurae kihi ta puvurou kito ungo na ke be ava erena.
JOH 14:30 Rate na ungota degi ke koso mane aisona te enda ta tihi jigari embo sapura puvuto ere hua amita ivo na na dembari inono aera,
JOH 14:31 te na Mama osa ere ona amo enda embo tapa kiora Mama ta uje tapa avo pere inono ta ere ona, te have ungote pambare,” ainge Iesu na ena.
JOH 15:1 Eto Iesu na ke einge ena, “Namo esi uhu be ra eto nau Mama amo Pure Mamora
JOH 15:2 eto esi hatu vahai be ae aisuja amo sapura avoeto gisiketo gosukau iraesuja eto hatu nei be eaguja avo kito kombu poekau be isapamane aisuja
JOH 15:3 eto ungo nau ke eagone ingagova avoeto hatu ta kombu poekari avoeto nau jo ta iresova eto na ungota jo ta iresona.
JOH 15:4 Eto hatu na be oenga mane eaguja te uhu mihia avoeto hatu ta be eaguja, ainge dombo ungo namote irae amo ungota be mane aisuja
JOH 15:5 eto namo esi uhu ra eto ungo esi hatu ra eto ungo namote iresova eto na ungote iresona amo be isapamane aisuja rate tiukasora amo be mane aisuja
JOH 15:6 eto embo amuna na toto pambasuja amo hatu tiukeore jaise eaguja ainge au humbuto ji ta ikaro evekasuja.
JOH 15:7 Eto umo namote mihiro nau ke avo no jo ta irirou umo do uje eto penunu aisoa amo ikano humbasoa.
JOH 15:8 Eto ungo na be isapamane ururovo amo embomeni na nau Mama ta usasa javotoho koguroro ungo nau ambotani be aisova.
JOH 15:9 Eto nau Mama na na osa eaguja ainge dombo nanena ungo osa ere ona avoeto ungo nau osa ari ta irivujo
JOH 15:10 eto nau Mama ta ke agi ue nau Mama ta osa ari ta iragona ainge dombo ungo ke nau tapa agi aisi uje eto kito osa ari nau ta irivujo.
JOH 15:11 Eto osa ari nau na ungota jo enetau tunga javotoho be ava ehene ere ingiheva.
JOH 15:12 Avo ari vahai erevi ava erena, eto na ungo osa ere ona ainge dombo ungo na osa mine ara evujo.
JOH 15:13 Eto embo na amita namei kamei osa ue oreketo pehasuja amo osa eagora amo dembasuja.
JOH 15:14 Eto ungo ke nau tapa avo agi ue amo namei kamei nau be aisova
JOH 15:15 eto na ungo pure embopo ke ijiena te avo toto ungo nau namei kamei ke aisona amita be amo pure embo na pure mamo ta ari tapa avo mane kiaguja rate na Mama ta ari tapa amo kiagona avoeto ungota degi eagone ingagova avoeto ungo nau namei kamei ra.
JOH 15:16 Eto ungona na uje ae rate nanena ungo uje eto siriketo humbuhana amo ungo be ava ikehene pahava eto be amo mane sari aisuja te daroho iresuja. Eto ungo na nau javo ta do uje eto penunu aisova amo nau Mama na ikau humbasova.
JOH 15:17 Eto na ungota degi ke peni be amo ari vahai erevi ava erena. Ungona osa mine ara evujo.
JOH 15:18 Eto enda embo na ungo uje ae ururoro kito amo ke erevi hotembevujo, ari amita kihi ta amo na uje ae ere uahera
JOH 15:19 eto ungo enda embo ta toho aheva amo enda embo na ungo osa ahera te ungo nanena enda ta eto umbua avoeto ungo enda embo mane avoeto enda embo na ungo osa ae eagora.
JOH 15:20 Eto ke mahu nanena ea avo hotembevujo, eto pure embo amo isapa eto pure mamo amo peni ra. Avoeto nau degi ta memenga ikasora ainge dombo ungota degi ta memenga ikaro keisova. Eto ke nau agi aisora amo ungota ke te tapa agi aisora.
JOH 15:21 Amo na ikari embo avo kiae na vahai kiora avoeto aisora.
JOH 15:22 Eto na puvuto enana ta degi ke avo ae toaehena amo na enana ta degi pehumba mane ahena te na puvuto ke mahu ijiena avoeto enana ta ari tapa amo teto haito ari inono aera.
JOH 15:23 Eto embo amuna na tumo eaguja amo nau Mama te tapa tumo eaguja
JOH 15:24 eto embo nei na puvuto ari neite neite ae kiae rate nanena puvuto ari neite neite ehene kehera. Eto ainge ae kiae amo enana ta degi pehumba mane ahena te enana ari tapa ehene kera te namote nau mama te avo uje ae ere ora.
JOH 15:25 Amita ke avo God ta ke kajari ta einge kajari mihia, ‘Enana ke amita susu irae rate teho sio tumo sosou nau degi ta ere uahera.’ ke ainge kajari mihia avo eto ehera.
JOH 15:26 Eto na Mama ta degi pambuto ungota hondate ari embo ikano puvuresuja amo ke be ari ta Ahihi Mama ta degi puvaguja avo puvuto nau harika embo aisuja.
JOH 15:27 Eto ungo te tapa ihikari ta namo te tapa mihovova avoeto ungote tapa harika ari embopo nau aisova.”
JOH 16:1 “Eto ungo na humota ae eagova avoeto haekihe erena
JOH 16:2 eto Judea embomeni na ungo kahekaro oenga iresova, avo pere mane rate iji puvuto ere hua amo embo na God ta pure otohu asi ke ijie ungo taro pehasova
JOH 16:3 amo enana na Mama te namo te avo be kiae avoeto ari ainge aisora
JOH 16:4 amo na ungote mihovona avoeto ke erevi mahu ungota degi ae ingae rate iji puvurou hotembava eha erena.”
JOH 16:5 “Eto na ikari puvurari embo ta degi pambasi ere ona te ungo embo vahai na, ‘Umo degi dainge pambasi ere,’ ke ainge amo nau degi ta eto ingae ra
JOH 16:6 te ke erena avo ungo ingihe tunga osaga ere kogova
JOH 16:7 te ungota degi ke be pere aisona amo ungota irari javotoho avoembo na ere pambuhona. Eto na pambae amo ungota hondate ari embo Ahihi Otohu na mane puvuresuja te nanena pambuto ikano ungota degi puvuresuja
JOH 16:8 eto puvuto enda embomeni ta ari sasapura do aingere avo harikau be kesora. Eto ke be ari embo javotoho te eto embo ta ari siriketo hajire ikari be amo do aingere avo Ahihi Otohu na ke pejau be kesora.
JOH 16:9 Eto embomeni amo na kito ke be ae avoeto embomeni amo ari sasapura embopora.
JOH 16:10 Eto na ungo toto Mama ta degi pambuto ungo kiae iresona amo Ahihi Otohu na au kito embo emo ke be embora ainge embomeni na aisora.
JOH 16:11 Eto enda ta tihi jigari embo sapura amita pehumba mahu ingito haekasona avo eto Ahihi Otohu na au kito embo emo ari sirikari embo be ra ainge aisora.
JOH 16:12 Eto na ke neite neite eha aisona te ke ngahia be ungo ingari haiteko mane
JOH 16:13 avoeto toano ke be ari ta Ahihi na puvuto ke te ari tapa te avo au ungo na kesova eto amita hotembari ke avo mane au ingesova te God na amita degi ke do enu ingina avo au ingesova amo iji ambota do puvuresuja amita ke te tapa au ingesova
JOH 16:14 eto ke au ingesova amo kiari nau avo au ingihirovo javo nau avo peni aisuja.
JOH 16:15 Eto kiari nau au ingesova erena amo nau Mama ta kiari te donda tapa te amo nau iketo tona avoeto erena.”
JOH 16:16 “Eto iji isapa na ungona mane Kesova eto iji nei isapa ungo na na kesova” ke ainge Iesu na enu
JOH 16:17 ambotani nei uhoho na ke mine ara eto einge ea, “Eto iji isapa na mane kesova eto iji nei isapa na kesova eto na Mama ta degi pambasona ainge eria amita be mo deire?
JOH 16:18 Eto ke nei iji tuhaupa ke ena amita be amo deire?” ainge ijio
JOH 16:19 Iesu na eto ingari ke ere ijia avo Iesu na kito ke einge ena, “Eto ‘Ungo iji isapa na mane kesova eto iji nei isapa na kesova’, ke ainge ehena avoeto ungo ke ungo oenga mine ara ijie ereve?
JOH 16:20 Na ungota degi ke be erena. Enda embomeni na tunga javotoho te ururoro ungona sisivu kuhihe sisisasi te ururovo ungota jo aherekau tunga javotoho aisova
JOH 16:21 eto evohu na meni humbari iji puvuoi memenga koguoi eto meni singa enda ta puvuoi kito tunga javotoho ue memenga jenambueaguja
JOH 16:22 ainge dombo ungo osaga ere kogova te na ungo ehako kogurono ungo tunga javotoho be ururou embo nei na ungota tunga javotoho avo mane peikasuja.
JOH 16:23 Eto iji amite ungo na nau degi ta do mane eto ingesova te na ungota degi ke be erena, ungo na do uje eto nau javota penunu aisova amo Mama na ikau humbasova
JOH 16:24 rate ungona ihikari ta eto puvuto eha emikote amo nau javo ta ungona penunu ae avoeto penunu eto umbuvujo ungo tunga javotoho be ai.
JOH 16:25 Eto ke erena amo timu hatirari ke na erena te iji puvuresuja amikote amo timu hatirari ke na mane aisona te ke be na pere Mama ta ari mo do aingere avo ano ingesova.
JOH 16:26 Eto iji amikote amo ungo na nau javota penunu aisova te nanena ungo embo Mama ta degi ta penunu aisi ke mane aisona
JOH 16:27 amita be amo ungona na Mama ta degi puvurari ke ijie na osa ere ovova avoeto Mama na ungo osa ere ua.
JOH 16:28 Na Mama ta degi eto enda ta puvena avoeto ehako enda toto Mama ta degi egerembasi ere ona,” ainge Iesu na enu,
JOH 16:29 amita ambotani na ke einge ea, “Jove, na sesena, eto ke umo erea amo timu hatirari ke na ae rate ke be na pere erea.
JOH 16:30 Eto ari tapa umo kioa avoeto embo ta jo ta hotembari deire amo umo ere kogoa avoeto ke tapa erea te dago oroho be ere kogora amo umo God ta degi puvurari avoeto dago ke be erera,” ainge eo.
JOH 16:31 Iesu na ke mine einge ena, “Ungo eha iji tutumota na ke be ereva amo ke ungotara.
JOH 16:32 Te kivu, iji puvija amo mahu puvija te ungona na egiketo pusi hanana eto vahai pamba ururovo na oenga mane iresona te nau Mama ga iresona
JOH 16:33 te ungo nau degi ta peka umbava ke erevi ungota degi erena. Nanena enda ta ari avo isoro eto dembehena avoeto ungo enda ta osaga neite neite kogue joru avojo,” ke ainge Iesu na ena.
JOH 17:1 Eto Iesu na tihi i ta eto pari einge ena, “Mama, nau iji puvija avoeto sovera no avo nau degi ta ikejo usasa ururou embomeni na kiore. Eto, Mama, nanena ano usasa no avo peni ururou embomeni kito javo no avo aro peni ai.
JOH 17:2 Eto Mama, inena embomeni tapa avo no Meni ta ingeni ta ika avoeto inena embomeni nau toho ikari amita degi ejo vasiri daroho irari ikane
JOH 17:3 eto embo na umo oenga God ra ainge ijie inena Iesu Keriso enda ta ikae puvuna ainge ijie vasiri te daroho iresuja.
JOH 17:4 Eto inena pure nane ana ika avo ehene irae ehei no javo enda ta peni ehija.
JOH 17:5 Eto Mama, na no usasa ta horari iji puvija amo enda ae kihi ta no usasa ta ungote mihahena avo eto inena javo nau ejo peni ai.
JOH 17:6 Eto enda embo inena siriketo humbuto nau ikae nanena ehene umo ere kogora. Eto embomeni no nau ika amina ke no agi ere ovora
JOH 17:7 eto eha oroho emite amo nau ke te ari te amo no degi ta eto puvurari avo be ere kogora
JOH 17:8 eto amita be amo inena ahe poekari no nau degi ta ikari avo enana ta degi hande one ingihe inena na ikae puvua avo enana na ke be erera.
JOH 17:9 Eto na embo tapa avoeto pari ae rate embo no nau ika amo embo no avoeto pari ereona.
JOH 17:10 Eto tapa nau amo toho nora eto tapa no amo toho naura. Eto enana na ore javo nau peni ere ua,
JOH 17:11 eto na enda ta mane iresona te na no degi ta pahurono enana na enda ta iresora avoeto, Mama Otohu, no javo sinderi te amina enana simba ejo. Eto dago vahai ainge dombo enana vahai are.
JOH 17:12 Eto na enana ga mihie sovera no nau degi ta ikari amina enana simba one javotoho mihera te no ke mahu kajari ta mihia avoeto jenge indari embo na umo toto pambija avoeto hana kesuja.
JOH 17:13 Eto na no degi ta pambasona avoeto enda erei mihie enana nau tunga javotoho ari avo umbara no degi ta ke erevi erena
JOH 17:14 eto enana amo enda ta toho mane, na iteko, avoeto ke no avo ene ingihera avoeto enda embomeni na tumo ere ora.
JOH 17:15 Amo na enana enda ta eto umbae penunu aerate engekari embo avo peikihe enana simba ae erena
JOH 17:16 te na enda ta toho mane ainge dombo enana amo enda ta toho manera,
JOH 17:17 te no ke amo ke be avoeto no ke be ari na enana ejo otohu are.
JOH 17:18 Eto na inena enda ta ika ainge dombo nanena enana enda ta ere ikihena
JOH 17:19 eto enana ke be ijie otohu ara nanena enana avoembo otohu aisona.
JOH 17:20 Eto na enana avoembo pari ae rate enda embomeni na enana ta ke ingihe na ke be aisora avoeto pari ere ona.
JOH 17:21 Eto enana ejo tunga vahai eto jo vahai are. Eto Mama, na jo no ta mihena eto umo jo nau ta mihea ainge dombo enana ejo ungotenau jo ta irore. Eto ari avo enda embomeni na kito na inena ikari avo hotembihe ke be aisora.
JOH 17:22 Eto ungotena vahai ainge dombo enana vahai ara inena no usasa nau degi ta ika avo nanena enana ta degi ikehena.
JOH 17:23 Amo na enana ta jo ta eto umo jo nau ta ra. Eto inena ejo enana ta jo vahai ari inono au enda embomeni na kogue na inena ikari avo ke be aisora eto inena na osa eagoa ainge dombo enana osa eagoa avo hotembasora.
JOH 17:24 Mama, embomeni inena nau ikari avo na pambuto iresona degi ai ta pambuto irora uje ere ona. Eto mihie enda irae kihi ta inena na osa ue usasa nau degi ta ika avo kiora uje ere ona.
JOH 17:25 Mama, umo ari javotoho ari embo, avo enda embomeni na umo kiae rate nanena umo kiagona eto embomeni nau emina na inena ikae puvua avo ere kogora.
JOH 17:26 Nanena javo no avo enana ta degi harikehene ingera eto ehako kaiketo ano ingihiroro inena na osa ere oa eto osari avo enana ta jo enetihirou na enana ta jo ta iresona,” ainge Iesu na pari ena.
JOH 18:1 Eto Iesu na pari enu irae enu ambotani humbuto umo Kidron embuto pambuto degi dagogotambu ai ta horea.
JOH 18:2 Eto degi amo Iesu na ambotani ga iji nei nei ainge aroro uoi Judas, Iesu jenge indari embo, amina ere koguahija
JOH 18:3 avoeto pambuto priests pepeni te Pharisee embomeni te amita isoro ari embopo te eto embo okokose nenei te avo kihi humbuto kerivo ijimbeto ki emi jigito degi ai ta pahuo
JOH 18:4 Iesu ta degi do ere puvutuhuna amo mahu kito Iesu na pambuto isoro embo ta tihi ta heteto ke einge ena, “Ungo embo amunurami jombure ere ove?” ainge enu,
JOH 18:5 ke mine einge ea, “Dago Iesu, Nazareth embo avo jombure ere ora,” ainge eo, “Namora,” ainge ena. (Eto embo Judas amo Iesu harikasi embo ta orohuta heteto mihina.)
JOH 18:6 eto Iesu na, “Namora,” ainge ijinu, Isoro embomeni na ingito ku na ahuna pambuto enda ta vea.
JOH 18:7 Eto Iesu na ke ehako, “Ungo amunurami jombure ere ove?” ainge enu enana na ehako, “Dago Iesu Nazareth embo avo jombure ere ora,” ainge eo,
JOH 18:8 Iesu na ke einge ena, “Ke mahu ehene ingeva amo namora te embomeni namoga mihera erevi evu tapa pambare,”
JOH 18:9 Ke ainge ena amo Iesu na pari ta ke mahu einge ena, “Inena embo nau ika avo vahai veto mane pambasuja,” ainge pari ta ena avoeto embo tapa pambara ena.
JOH 18:10 Eto Simon Peter amo amita asivo mihina avo kororoeto humbuto priest peni amita pure embo javo Malchus ta oje jeto havekenu
JOH 18:11 Iesu na Peter ta degi ke einge ena, “No asivo goru ta juruke. Na Mama na aguhu erevi indona siriketo ikena amo mane indonote?” ke ainge Iesu na ena.
JOH 18:12 Eto isoro embopo te eto tihi jigari embopo te embo okokose te na Iesu jigito ingeni punduto
JOH 18:13 humbuto pambuto embo javo Annas ta jo ta ikeo hetena. Eto iji amikote embo Caiaphas amo priest okose ena eto embo Annas amo Caiaphas ta imi avoeto Annas ta degi kihi pambuto ikeo hetena
JOH 18:14 eto Caiaphas na Judea embomeni ta degi ke mahu einge ena, “Embo tapa mane pehasora te embo tapa avoeto embo vahai pehasuja,” ke ainge Caiaphas na ena.
JOH 18:15 Eto Simon Peter te ambotani nei vahai amite aingeto Iesu humbuto pahuo ambota pambuto ambotani vahai amo priest peni na mahu kiari avoeto Iesu ga priest peni amita bande jo ta horenu Peter avo bande bokiri pe araha ta heteto mihinu
JOH 18:16 ambotani nei vahai priest peni mahu kiari avoeto jo ta horena amina bokiri simba ari evohu amita degi enu puvuto Peter enu jo ta horenu
JOH 18:17 bokiri simba ari kakara nei amina einge ena, “Embo emita ambotani nei amo umorete?” ainge enu Peter na, “Na avo manera,” ainge ena.
JOH 18:18 Eto jajemo unu bande pure embopo te bande simba ari embopo te aingeto ji buju evikihina ai ta heteto erihe mihio Peter pambuto enana ga heteto ji erihinu.
JOH 18:19 eto priest peni na Iesu na ke do ahe poekihinu ingihe ambo ambo ea avo enu
JOH 18:20 Iesu na ke mine einge ena, “Eto ahe poekari nau amo ojikari na ae rate araha arahata eagone embo tapa na ingiora amo ke kasari bande ta eto temple jo ta eto Judea embomeni horukagora amita degi eagone ingiora amo ke nei do ojikae
JOH 18:21 avoeto umo nau degi ta eto mane ingesoa te na ke do tapa eagone ingiora amita degi eto ingijo,” ke ainge Iesu na enu,
JOH 18:22 isoro embo vahai Iesu ta engihi ta heteto mihina amina, “Umo do eto priest okose ta degi ke sapura ere?” ainge ijie Iesu ta tombu ta tenu
JOH 18:23 Iesu na ke mine einge ena, “Na ke sapura do ehene ingea avo ejo ingone. Eto na ke sapura ae rate na sio tehea,” ainge enu,
JOH 18:24 Annas na Iesu ta ingeni pundua amite tapa ikenu priest okose javo Caiaphas amita degi pambuna.
JOH 18:25 Eto Simon Peter ji erihe mihinu embomeni na, “Umo te tapa amita ambotani rete?” ainge eo, Peter na, “Na avo manera,” ainge enu,
JOH 18:26 Priest peni ta pure embo vahai amo Peter na embo oje jeto havekena amita javo vahai amina Peter ta degi ke einge ena, “Na umo te tapa embo amiga dagogo tambu ta kehenete?” ainge enu.
JOH 18:27 Peter pero ue, “Na avo manera,” ainge ijinu ohora javone ena.
JOH 18:28 Eto ihote Caiaphas ta bande toto Iesu humbuto Rome embo ta koto ari oro ta pambua. Eto jarukari pondo indari iji puvuna avoeto ungo hahara ue ungo Rome ta oro ta horae pambae toa
JOH 18:29 eto Pilate na araha ta puvuto heteto ke einge ena, “Embo emita sapura deire, avo evujo ingone,” ainge enu,
JOH 18:30 embomeni na, “Embo emina ari sapura ae amo mane no ingeni ta ikahera,” ainge eo
JOH 18:31 Pilate na ke mine einge ena, “Ungota ke pepeni na embo evi ganoka eto ingivu,” ainge enu, Judea embomeni na ke einge ea, “Embo tari pehari amo dagota degi ta haekarira,” ainge ea.
JOH 18:32 (eto Iesu daingeto taro pehasuja amita ke Iesu na mahu harikena. Eto embere einge emina enu Iesu ta ke ga inono ena.)
JOH 18:33 eto Pilate na koto oro ta horeto Iesu jage enu puvunu, “Umo Judea embo ta king rete?” ainge enu.
JOH 18:34 Iesu na ke mine einge ena, “Ke umo erea amomo embo nei na ehere ingito erete mo no hotembari na erete?” ainge enu,
JOH 18:35 Pilate na ke mine einge ena, “Na Judea embo manera te priests pepeni no eto embomeni no amina umo humbuto nau ingeni ta ikehera, amo ari sapura no mo deire?” ainge enu,
JOH 18:36 Iesu na ke mine einge ena, “Na embo tihi jigesona te enda ta ari avo mane aisona. Eto na enda ta ‘King’ ahena amo embomeni nau na ereto isoro eto Judea embomeni ta ari emo haekaehera te na ‘King’ ainge manera,” ainge enu,
JOH 18:37 Pilate na, “Aravorate umo king rete,” ainge enu, Iesu na ke einge ena, “En, ke umo erea amo ke be. Na king ra te na avo ana nau aja na ingena. Eto na enda ta puvena amo ke be ano embomeni ingora puvena amo embo ke be ingari haite amina ke nau ingesuja,” ainge enu.
JOH 18:38 Pilate na, “Ke be mo deire,” ainge ijie araha arahata pambuto Judea embomeni ta degi ke einge ena, “Eto na embo emita sapura hambae ehena.
JOH 18:39 avoeto ungo Judea embo ta jarukari pondo iji te amo tipura embo eagone arahata pambagora avoeto ungo Judea embo ta king erevi ano arahata pambaute?” ainge enu,
JOH 18:40 embo tapa na gagaha eto ke einge ea, “Embo avo mane arahata pambasuja te embo Barabbas avo ejo arahata pambai,” ainge ea te Barabbas amo pegene embora.
JOH 19:1 Eto Pilate na enu Iesu humbuto pambuto esi gamba na ejembeto teo irae enu
JOH 19:2 Rome ta isoro embopo na esi pepe te avo humbuto horoveto siro ta asuketo bo pangari ikeo uhu ta evinu
JOH 19:3 puvuto amita degi ke einge ijie urumbea, “Oro, Judea embo ta king,” ainge ijie tombu ta tea.
JOH 19:4 Eto Pilate na arahata puvuto Judea embomeni ta degi ke einge ena, “Kivu, na embo erevi pehumba ehena te amita sapura do hambae avoeto ungo na kiagova humbuto hambuto puvena,” ainge enu
JOH 19:5 Iesu na bo pangari te siro kope pepete asukena amite tapa araha ta puvuto hetenu Pilate na ke einge ena, “Embore erevira, kivu,” ainge ijinu
JOH 19:6 Judea ta priests pepeni te embo pepeni te na kito, “Cross ta te, Cross ta te,” ainge gagaha eto eo Pilate na, “Na pehumba ehena te amita sapura hambae ehena avoeto ungo oenga humbuto cross ta tevu,” ainge enu,
JOH 19:7 Judea embomeni na, “Dagota ke pepeni mihia amo eingera, ‘Na God ta Meni ra,’ ainge eagora amo dago na teore pehagora avoeto taro pehasuja,” ainge eo,
JOH 19:8 Pilate na ingito joru peni vahai be ue,
JOH 19:9 koto ari oro ta horeto Iesu ta degi ke einge ena, “Umo dainge eto puvurari re?” ainge enu Iesu na ke mine ae enu
JOH 19:10 Pilate na ke ehako einge ena, “Umo nau degi ta ke mine mane aote? Eto ari nau amo eingera, umo ano cross ta tasora eto ano arahata pambasoa amo na inonora te umo kiaerate?” ainge enu,
JOH 19:11 Iesu na ke mine einge ena, “Eto God na no degi ta sovera ikae amo nau degi ta ari neite neite mane aehea, te embo na humbuto ingeni no ta ikehija embo amita ari sapura amo no ainge mane rate pajire be ra,” ainge Iesu na ena.
JOH 19:12 Eto Pilate na Iesu ta ke avo ingito au hambuto pambaja uje ena te Judea embomeni na hori gagaha ijie ke einge ea, “Embo emina king ke ijie Caesar ere urumbihia avoeto inena embo erevi ao hambuto pambasuja amo umo Caesar ta toho manera,” ainge eo,
JOH 19:13 Pilate na ingito Iesu humbuto embo okose arumbeto pehumba ari degi amita javo, ‘Koro veukari’ ai Iesu enu arumbena (Judea embomeni ta ke na ‘Gabbatha’ eagora)
JOH 19:14 eto jarukari pondo evito asora avoeto nununga ari iji 12 o'clock unu ari ainge amo ea. Eto Pilate na Judea embomeni ta degi, “Ungota king re erevira,” ainge enu,
JOH 19:15 mine einge ea, “Umbuto pambu! Umbuto pambu! Cross ta te pehai!” ainge eo Pilate na, “Na ungota king avo cross ta tana erevete?” ainge enu priests pepeni na einge ea, “Dago ta king nei irae Caesar vahaira,” ainge ijie ngahia uo
JOH 19:16 Pilate na cross ta tara enana ta ingeni ta iketo tona.
JOH 19:17 Eto isoro embopo na Iesu umbuto Cross ikeo humbuto da ta eto pambuto degi javo, ‘Uha Vehu’ amo Judea embo ta ke na ‘Golgotha’ ke eagora ai pambuto
JOH 19:18 Iesu orohuta teto embo nei ingeni anga ta teto embo nei ingeni be ta aingeto cross oenga oenga ta tea
JOH 19:19 eto Pilate na ke einge kaeto cross ta tena amo, “Judea embo ta king emo da Nazareth embo Iesu ra.”
JOH 19:20 eto Pilate na ke kajena amo Judea ke na eto Rome ta ke na eto Greek ke na kajena amo da hoita mane avoeto Judea embomeni isapamane na eheketo kito
JOH 19:21 Judea embo ta priests pepeni na Pilate ta degi pambuto ke einge ea, “Inena ‘Judea embo ta king’ kaehea avo toto ‘Amina na Judea embo ta king ra ainge ena’ avo kajae ehea,” ainge eo,
JOH 19:22 Pilate na ke einge ena, “Nanena kaehena avo iresuja,” ainge ena.
JOH 19:23 Eto Iesu cross ta teo irae enu isoro embo tapa 4 amina Iesu ta bo asukari avo kaheketo vahai vahai umbua eto bo nei vahai jo ta asukari tunga ta eto veto utu ta ari amo ihirae rate jorereto kajari avo ungo oenga ke mine ara eto einge ea.
JOH 19:24 “Ungote mane osesekasora te ituha koso te tuho te jigoro embo amuna ituha koso avo humbasuja amo embo amina bo avo humbasuja,” ke ainge amo mahu kajari mihia amo einge ra, “Embo amuna bo nau amo kaheketo ituha koso te tuho te jigito goruketo humbasuja embo amina humbasuja,” ainge mahu kajari mihia, avoeto inono ta isoro embo na ea.
JOH 19:25 Eto Iesu cross ta teo cross engihi ta amita e te amita e ta jao javo Mary amo embo Clopas ta ae amite da magdala evohu Mary te aingeto heteto mihio
JOH 19:26 Iesu na amita e kito amita tunga humbari ambotani vahai amiga mihinu kito e ta degi ke einge ena, “Evohu, no meni erevira,
JOH 19:27 eto embo no aja erevira,” ainge enu ambotani vahai amina ingito Iesu ta e avo humbuto amita bande ta pambuto simba ere uahija.
JOH 19:28 Eto ari tapa do puvuresuja amo irae ere ua erevira ainge Iesu na kito God ta ke mahu kajari ta mihia avo au inono aja ke einge ena, “Na umo ujeje ere ua,” ainge enu,
JOH 19:29 enana na ingito wine tigegerite te ovu jo ta pevihari mihina avo ukaru koru ainge javo ‘Hyssop’ amina wine ta hatito Iesu ta pe ta jigio
JOH 19:30 indito ke einge ena, “Aravora, irae ehija,” ainge ijie amita siro joreinge unu hoenge irae enu pehena.
JOH 19:31 Eto evito amo Judea embomeni ta jarukari pondo indesora iji amo jangu indari iji dombo avoeto embo 3 amita hamo cross ta toaro iresora avo aravora ae eto Judea embomeni na Pilate ta degi, “Embo utu teto popojeketo humbuto pambarote,” ainge eo,
JOH 19:32 Pilate na amita isoro embomeni ikenu pambuto embo heriso Iesu ga cross ta tea avo teto utu poeketo pambuto embo nei teto utu poeketo pambuto
JOH 19:33 Iesu kia amo mahu pehenu kito utu poekae rate
JOH 19:34 isoro embo vahai na pahiha ta ki na kajenu orosa te umo te vena.
JOH 19:35 Eto na tihi nau na kia embo amina erena avoeto ke nau amo ke be perera eto ungo tapa na kito ke be ava erena
JOH 19:36 ari emo God ta ke mahu kajari ta mihia avoeto inono ta ehija. “Eto amita vehu tapa amo nei mane taro poekasuja” ainge kajari mihia
JOH 19:37 eto nei amo “Embo pahiha ta kajea avo embomeni na kogue iresora.” ke ainge mahu kajari mihia.
JOH 19:38 Eto embo Joseph da Arimathea embo amo Iesu ta ambotani rate Judea embo joru ue ojikari na Iesu ambo ambo ena, embo amina pambuto Pilate ta degi Iesu ta hamo humbasi penunu enu Pilate na aravora ainge enu humbuto pambuna
JOH 19:39 eto embo Nicodemus amo mahu mumete Iesu ta degi puvuna amite tapa jeune mune te (javo ‘myrrh’ te ‘aloes’ te) avo humbuto Iesu ta hamo jigesi puvuna amita bouka ta heka amo 50 kilos ainge avo humbuto puvuna.
JOH 19:40 Eto Iesu ta hamo humbuto jeune mune te amiga tapa bo koso vahai ai ta iketo togea amo Judea embomeni ta ari ainge eagora avoeto ea
JOH 19:41 eto Iesu cross ta teo pehena amita degi engihi amo ji vuji jajavotoho irari degi amita jo ta panga ho eha kovea amo embo kovae kihi ta Iesu ikeo herekena
JOH 19:42 eto evito amo Judea embomeni ta pondo indesora sirika burika ari iji te Iesu humbuto hoi ta pambari inono ae avoeto asa ta kovea.
JOH 20:1 Eto jangu indari iji irae enu iho ungate da Magdala evohu javo Mary na Iesu ta panga use ta pambuto koro na pe ahurekea avo hiriketo pambari kito
JOH 20:2 huheveto pambuto Simon Peter te eto ambotani nei Iesu na osa ena amita degi ke einge ena, “Bada ta hamo amo use ta iraera te humbuto pambuto dainge ikehere avo dago kiaera,” ke ainge enu,
JOH 20:3 Peter te ambotani nei amite aingeto use kesi
JOH 20:4 huheveto pahue ambotani nei amina Peter seriketo huheveto use ta kihi pambuto
JOH 20:5 panga jo ta anembeto bo ‘Linen’ na ari amina hamo togea avo enda ta veto mihinu kina te jo ta horaera,
JOH 20:6 te Simon Peter na ambota puvuto use panga jo ta horeto bo enda ta veto mihina avo kina
JOH 20:7 eto bo nei Iesu ta siro togea amo oenga egoveketo degi nei ta ikeo mihina avo kina.
JOH 20:8 Eto ambotani nei kihi use ta pambuna amite tapa horeto kito ke be ena.
JOH 20:9 (rate Iesu vasiri te erasuja amita ke God ta ke ta kajari avo amikote amo hotembae ea.)
JOH 20:10 eto ambotani heriso amo egeremebeto bande ta pambua.
JOH 20:11 Eto Mary na use pe araha ta heteto si ijie mihimihe use ta anembeto
JOH 20:12 Anera heriso bo parara asukari amo Iesu ikeo herekena ai ta embo nei siro hena ta arumbena eto embo nei utu hena ta arumbena aingeto mihio kogunu
JOH 20:13 Anera heriso amina evohu amita degi ke einge ea, “Pamone umo do eto si ere?” ainge eo evohu amina, “Nau Bada humbuto dainge ikehere avo na kiae ra,” ke ainge ijie
JOH 20:14 ahereketo Iesu heteto mihinu kina amo Iesu rate be ijuketo kiae unu
JOH 20:15 Iesu na amita degi ke einge ena, “Evohu, umo si ijie amunurami jombure ere oe?” ke ainge enu Mary na embo avo ji vuji simba ari embo ke ijie ke einge ena, “Embo, inena Iesu ta hamo amo humbuto pambuto dainge iketo kito avo ejo umbane,” ainge enu,
JOH 20:16 Iesu na, “Mary,” ke ainge enu Mary na ahereketo kon eto kito, “Rabboni,” amo Hebrew ta ke na, “Ahe Poekari embo,” avo eto enu,
JOH 20:17 Iesu na, “Na Mama ta degi pambae avoeto na mane jigesoa, te pambuto nau namei kamei ta degi Mama nau eto enana ta Mama eto God nau eto enana ta God amita degi egerembeto pambasi ere ona avo ejo ingore,” ainge enu,
JOH 20:18 Mary na egerembeto pambuto Bada kina eto amina ke tapa do enu ingina avo ambotani ta degi enu ingia.
JOH 20:19 Eto Sunday hure mume unu Iesu ta ambotani na Judea embo okokose joru ue bande bokiri iketo jo ta mihio Iesu na enana ta orohuta irerembeto puvuto, “Peka ungota degi iresuja,” ke ainge eto
JOH 20:20 amita ingeni te pahiha te avo enu kito enana ta Bada avo kito tunga javotoho ue osa pajire be ea.
JOH 20:21 Eto Iesu na, “Peka ungota degi iresuja, eto na Mama na ikehei puvena ainge dombo nanena ungo ikano enda tapa ta pambasova,” ainge ijie
JOH 20:22 enana ta hamo ta pe hoenge hukihe ke einge ena, “Ungota jo ta Ahihi Otohu umbuvujo
JOH 20:23 eto ungona embo ta ari sasapura hotembeto toasova amo God na ainge hotembeto toasuja, te ungo na embo ta sasapura hotembeto toae asova amo ainge God na mane hotembeto toasuja.”
JOH 20:24 Eto Iesu ta ambotani 12 rate vahai javo Thomas amita javo nei Didimus amo Iesu puvuna amikote amo enana ga irae avo eto
JOH 20:25 ambotani na, “Dago Bada kehera,” ainge eo Thomas na, “Na amita ingeni ta ikoko na tehera amita pupuho avo tihi na kogue ingeni nau na hame eto pahiha ta amo hame aisona, te ainge ae amo na ke be mane aisona,” ainge enu
JOH 20:26 hura vahai irae enu Thomas ambotani nei uhoho ga bande jo ta bokiri iketo mihio Iesu enana ta jo ta irerembeto heteto, “Peka ungota degi iresuja,” ainge eto,
JOH 20:27 Thomas ta degi ke einge ena, “Nau ingeni pupuho kogue hame eto no ingeni jujuruketo nau pahiha hame eto umo ke be ae ere oa avo toto na ke be ejo,” ainge enu,
JOH 20:28 Thomas na, “Umo nau Bada eto nau God ra,” ainge enu,
JOH 20:29 Iesu na ke einge ena, “Umo na kogue ke be erea te embo na na tihi na kiae rate na ke be aisuja embo amina tunga javotoho aisuja.”
JOH 20:30 Eto Iesu na God ta sovera avo humbuto ari neite neite enu ambotani na kia amo book emita jo ta amo kajaera,
JOH 20:31 te ke erevi ere kajihera amo ungotenau orekari embo God ta Meni be Keriso amo embo nei mane rate Iesu avo ungo kito ke be ava ere kajihera amo ungo Iesu kito ke be ijie vasiri be humbasova.
JOH 21:1 Eto amita ambota Iesu na umo ireremba javo Tiberias amita hora ta Iesu puvuna ambotani na kia amo eingera,
JOH 21:2 eto Simon Peter te Thomas amita javo nei Didimus amite Galilee enda ta da Cana embo javo Nathanael te Zebedee ta meni heriso amite eto ambotani nei heriso amite aingeto vahaita mihio
JOH 21:3 Simon Peter na, “Na umo o timbasi pambasona,” ainge enu ambotani amiga mihia amina, “Dago umote pambasora,” ainge eto mumete pambua te o umbae uo
JOH 21:4 iho vujihinu Iesu na puvuto umo hora ta hetena te embo nei ke ijie uo,
JOH 21:5 Iesu na jage eto, “Nau namei kamei ungo o umbevete?” ainge enu, “Dago o umbae ra,”
JOH 21:6 ainge eo Iesu na, “Ungota bonga avo e nga be hena ta ikevujo veau o umbuvujo,” ainge enu ikeo venu o isapamane ombunu jigia te vihari inono ae enu,
JOH 21:7 ambotani vahai Iesu na osa ena amina, “Embo emo Bada ra,” ainge Simon Peter ta degi enu, Peter bo ujuketo mihina avo bo humbuto asuketo umo ta eheruva eto vovunu,
JOH 21:8 ambotani nei uhoho amo e nga tavihe bonga o na pevihina avoeto jigito goruketo humbuto hora ta pambua amo degi koso mane ‘100 meters’ ainge ai ta pambua.
JOH 21:9 Eto enana hora ta vihito bread te o ingari amo ji ingohu evikihina amita hamo ta mihinu koguo
JOH 21:10 Iesu na ke einge ena, “Ungo umo o umbeva avo heriso humbuto have,” ainge enu,
JOH 21:11 Simon Peter na e nga ta vihito bonga gorukenu hora ta vihinu o pepeni papeni tapa 153 umbua avo kina eto o isapamane rate bonga perarae ena.
JOH 21:12 Eto Iesu na, “Ungo huma iho donda indavu,” ainge ena. Eto ambotani na Iesu amo mahu kia te ehako umo amunure ainge eto ingesi uje ea te me enu toa.
JOH 21:13 Eto Iesu na ji amisa ai ta imihe o ingari te bread te humbuto ambotani ta ikenu india.
JOH 21:14 Eto Iesu na peheto vasiri te ereto ambotani ta degi puvunu kia eto ehako puvunu kia eto ehako puvuna emina nei heriso nei vahai ena.
JOH 21:15 Eto enana indio irae enu Iesu na Peter ta degi ke einge eto ingina, “Enanana na osa isapa ere ora te inena na osa peni vahai ere oete,” ainge enu, Peter na, “Bada, na umo osa ere ona amo umo kiarira,” ainge enu Iesu na, “Aravora te umo nau o ‘Sheep’ meni avo simba ejo,” ke ainge eto ehako eto ingina
JOH 21:16 “John ta meni Simon, umo na osa ere oe?” ainge enu, Peter na, “Bada na umo osa ere ona amo umo kiari ra,” ainge enu Iesu na, “Umo nau o ‘Sheep’ simba ejo,” ainge eto
JOH 21:17 ehako, “John ta meni Simon umo na osa ere oe?” ainge enu ke vahai avo nei heriso nei vahai ainge ena avo Peter na ingito tumo ue ke einge ena, “Bada, ari te ke te tapa amo umo kiari avoeto na umo osa ere ona amo umo kiarira,” ainge enu Iesu na amita degi ke einge ena, “Aravora, umo nau o ‘Sheep’ undujo.
JOH 21:18 Eto na no degi ta ke be erena. Umo meni isapa ta amo uhu ta pupuri umo oenga tigito uje no ue ere pambuhahea te evovo ue no ingeni jujurukihiro amo embo nei na no pupuri uhu ta tigito umo pambari uje ae asoa degi ai ta umo jigito humbuto pambasora,”
JOH 21:19 (ke amita be amo Peter na daingeto pehihirou God ta degi usasa pambasuja avo Iesu na harikena.) ke ainge eto Iesu na, “Umo na ambo ambo e,” ainge ena.
JOH 21:20 Eto Iesu te Peter te pambuhumihe Peter na overeketo ambotani vahai ambota puvutuhunu kina amo Iesu na osa ena embo amina pondo tutumota indie mihio Iesu ta bindi ta siro tembeto, “Bada umo embo amuna harikau isoro embo na umbaro.”
JOH 21:21 ainge ena embo avo Peter na kito, “Bada embo emita degi do puvurou?” ainge enu,
JOH 21:22 Iesu na ke mine einge ena, “Embo amo teho mihirou na pambuto ehako egerembasona te amo osaga no manera te umo na ambo ambo ejo,” ke ainge ena
JOH 21:23 amo sigeto pambunu ambotani tapa ingito, “Ambotani vahai amo mane sari aisuja,” ainge hotembea te Iesu na Peter ta degi, “Ambotani amo mane sari aisuja,” ke ainge ae ra te, “Teho mihirou puvuresona,” ke ainge ena.
JOH 21:24 Ambotani embo amina ke tapa erevi hande ere umihe book eremita jo ta kajena. Eto dago kogora ke amo ke be pere ra.
JOH 21:25 Eto Iesu na ari neite neite tapa ere uahija avo siriketo tapa kajahera amo books amina enda tapa eneta aheite aehija.
ACT 1:1 Ajao Theophilus, ahari kihi kajihena amo Bada Iesu ta vasiri te ahe poekari te kajihena.
ACT 1:2 Eto Iesu na amita ambotani siriketo humbuto God ta Ahihi Otohu ta sovera na ahe poekari ke nei nei iketo God ta degi ta vihito pambuhija amita ke kihi kajihena.
ACT 1:3 Eto Bada Iesu ji atahu ta teo pehena ehako vasiri te erena iji tapa 40 amita jo ta iji nei nei Iesu na amita apostel ga arumbeto hihi tirina. Eto enana Iesu kito amita ke ingito ke einge ea, “Ke be, God ta Meni Bada Iesu vasiri te erehija” ainge ea. Eto Iesu na enana ta degi God na embomeni daingeto amita toho humbuto enana ta King asuja amita ke avo ahe poekena.
ACT 1:4 Eto iji vahai, amina ke einge ena, “Ungo Jerusalem jo ta eto mane pambasova rate nau Mama ta hande noma kajena avo simba evujo.
ACT 1:5 Na mahu ke ijiena amita be amo John na umo na bapataito uija rate iji isapa eto God na amita hande ikau ungo Ahihi Otohu na bapataito aisuja.” ke ainge Iesu na ena.
ACT 1:6 Eto iji nei enana vahaita pahue enana Iesu ta degi ke einge eto ingia, “Bada, inena oroho Roman embopo ta simba ari haeketo dago oenga independance ikaote?” ainge eo
ACT 1:7 Iesu na ke mine einge ena, “Nau Mama na iji ikarira te ungo mane kiagova,
ACT 1:8 rate Ahihi Otohu ungo ta hamo ta puvurou ungo sovera peni vahai humbuto nau pehari te ehako vasiri te erari amita ke sovera eto Jerusalem jo ta eto Judea ta, eto Samaria ta, eto enda tapa ta eto ke hande asova.”
ACT 1:9 eto ke ainge enu irae unu Bada Iesu na vihito uhu ta pahunu amita ambotani arerembeto koguo johi na ahurekena.
ACT 1:10 Eto enana kogue Bada Iesu ehako kesi ue mihio embo heriso asukari parara te enana ta jo ta irerembeto puvuto
ACT 1:11 ke einge ea “Galilee embopo ungo do ue arerembeto uhu kogue miheve? Iesu na Mamo ta degi pambija ehako ainge dombo ambota puvuresuja.”
ACT 1:12 Eto tiri Olives amo Jerusalem engihita erevi ea. Eto enana tiri ta eto
ACT 1:13 Jerusalem utu na puvuto irari bande jo i ta vihito vahaita pari ea, embo ta javo amo Peter, te John te James te Andrew te Philip te Thomas te Bartholemew te Matthew te James, amo embo Alphaeus ta meni te, Simon amo Roman embopo tihi jigari uje ae ena, eto embo nei Judas amo embo James ta meni te Iesu ta namei kamei te evohu nei nei, eto evohu vahai amo Iesu ta e ra.
ACT 1:15 Eto iji tapa pari ere uahera amita jo ta iji vahai embomeni tapa 120 pari ue mihio
ACT 1:16 Peter na ereto ke einge ena, “Nau namei kamei iji mahu be mahu Ahihi Otohu na King David ta degi ke enu kajena amo Judas na Bada Iesu humbuto kitoho embopo ta ingeni ta iketo amita pure toasuja avo eto tona, amita ke amo King David na Psalms ta kajari einge mihia amo ‘Irari da amita embo na mane horasora rate amo teho iresuja,’ eto ke nei amo, ‘Amita pure embo nei na asa humbuto pure asuja’ ainge King David na kajena.
ACT 1:17 Eto Judas amo Iesu na siriketo umbuna avoembo dago apostel vahaira.
ACT 1:18 Eto isoro embopo na Judas ta koro ikeo humbuto pambuto enda umbuna eto amita jo ta pambuto tiambueto veto hini kaeto perara enu se arahata ijejembeto puvuna,
ACT 1:19 avo eto amita duru embo tapa na sau sau ingito enda javo orosa enda ikihara.
ACT 1:21 Avoembo oroho ungotena Judas ta asa ta embo nei siriketo humbasora eto amina Iesu ta irari amita ke be avo ungotenamote vahaita eto hande asuja.
ACT 1:22 Embo amo Bada Iesu ta bapataito ari iji te eto pambuto amita uhu ta vihari iji te dago ga vahaita uija avo orereto humbasora.” Ainge enu
ACT 1:23 embo tapa na embo heriso ahe kihira ea, embo heriso amita javo Joseph Justus te Matthias te ra. Joseph Justus ta javo nei amo Barsabbas ra.
ACT 1:24 Eto ahe kihira eo, enana embo javotoho sirikasi uje eto God na hondate aja pari einge ea, “Bada, embo Judas na amita ari sapura ta hajire humbuto toho ta da ta pambija,
ACT 1:25 eto inena embo tapa ta jo kiarira avoeto no uje ejo ingore, no pure embo be siriketo umbare” ainge pari eo
ACT 1:26 ituha tuho te koso te jigio Mathias inono ena avo eto amina ihiketo ambotani 11 ga pure ena.
ACT 2:1 Eto Iesu ta pehari vasiri te erena hura tapa 7 amita ambota Judea embopo ta pondo iji javo Pentecost puvuna. Amita iji te Iesu ta ambotani vahaita mihio
ACT 2:2 asavi peni vahai be pisara ainge puvuto bande ta horeto bande jo enetena.
ACT 2:3 Eto ji peri ta kiari ainge perimbeto puvuto embo vahai vahai ta siro ta hetena.
ACT 2:4 Avoeto embo vahai vahai embo da nei nei ta ke jigama ea amita be amo Ahihi Otohu na embo vahai vahai ta jo ta horeto siro hirikenu enda nei nei ta ke avo jigama ere uahera.
ACT 2:5 Eto Judea embopo God osa ere uahera Pentecost pondo asi enda tapa ke nei te nei te jigama ue puvuto Jerusalem mihahera.
ACT 2:6 Eto mihie asavi ingito Iesu ta ambotani ta bande ta asavi ta be kesi pambua.
ACT 2:7 Eto enana ta ke oenga oenga Iesu ta ambotani ta pe ta ijio ingito ti kakambuketo vani vini eto einge ea, “Amita be amo deire?
ACT 2:8 Enana Galilee embopora rate enana dago enda nei nei ta ke na erera.
ACT 2:9 Dago Parthia embopo te Mede te Elamites te Mesopotamia enda ta embopo ra te Judea embopo te Capadocia te Pontus te Asia te
ACT 2:10 Phrygia te Pamphylia te Egypt te Cyrene ke nei nei enda Libya jo ta ra te
ACT 2:11 Rome enda ta eto amo Judea embopo be ra te ke nei embopo amo Judea ekalesia embopo ambo ambo ere ora te Crete embopo te Arabia embopo te tapa aingeto mihia rate dago God ta ari nei te nei te amita ke dago ta ke oenga oenga embo vahai vahai na ere ingihera.” ainge eo
ACT 2:12 ti kakambuketo vani vini ue “Amita be amo deire” avo mine ara eto ea.
ACT 2:13 Rate embomeni nei nei na ganini ari ke ijie eto einge ea “Enana wine indera avoembo tihivi oi ere ora,” ainge ea.
ACT 2:14 Eto Peter bande jo ta ambotani 11 ga ereto heteto embo tapa bande ahone ta mihia amita degi ke einge ena, “Nau Judea embomeni da nei nei ta pambuto mihovova egerembeto puveva amite Jerusalem embopo te oje kahasona ingivujo.
ACT 2:15 Ungo embo nei nei na embo evohu erevi tihivi ari ke ereva. Amo ke sokova ra. Emo ihotera eto embomeni ihote mane tihivi eaguja.
ACT 2:16 Ainge mane ra. Ungo iho emo ere kogova amo God na ke eremita amita peroveta Joel ta ikenu einge kajena,
ACT 2:17 ‘God na einge ena, iji ambota na nau Ahihi Otohu embo tapa ta hamo ta overekasona eto ungota meniundi na iji ambota ke asora eto ungo ta singapora na God ta ke be ehure ta kesora eto ungo ta evovo embopo na ehure asora.
ACT 2:18 Eto Ahihi Otohu nau hondate ari embo evohu ta degi ambo ta ke ikau asora.
ACT 2:19 Eto na ari sovera uhu te enda te aisona amo orosa te ji iposi te ainge aisona.
ACT 2:20 Eto iji seikano mume aisuja. Eto hariga na gaieto orosa ainge asuja. Eto amita ambota iji dombo be javo Bada ta Iji puvuresuja
ACT 2:21 rate iji aramite embo amuna God ta degi jage au God na hondate eto humbasuja.’ Ainge God na enu peroveta Joel na kajena.
ACT 2:22 Israel embomeni ungo ke ingivujo, God na Iesu Nazareth Embo ta degi sovera ari ikenu humbuto ungota orohuta heteto vasiri neite neite ena amo God na embomeni ta degi amo amita pure ari embo be kiora ena aravo ungo mahu kiarira.
ACT 2:23 Be amo God na amita uje ari ke mahu ena avo eto uija amo ungo na Iesu humbuto Roman embopo ta ingeni ta ikeheve humbuto ji atahu ta tehere pehena, amo ungo ta ingeni na eheva.
ACT 2:24 Rate God na enu vasiri te erihija amita be amo embo amita sovera isapamane avo eto God na use aherekenu vasiri te erihija.
ACT 2:25 Emita ke amo David na einge ena, ‘Ke be avo Bada namote iraguja eto hondate eaguja eto God ta sovera na jigei mihena
ACT 2:26 avoeto na tunga javotoho ere ona. Nau ivivi na osa ari ke God ta degi erena.
ACT 2:27 Eto na peheto pahue osaga mane kesona. Umo nau ahihi embo pepehekari degi ta mane toasoa eto no pure ari embo ta hamo mane sari aisuja
ACT 2:28 rate nau hoenge inena humbuto nau degi ta ikao egerembasuja. Eto na no degi ta pambuto tunga javotoho asona.’ ainge King David na ena.
ACT 2:29 Nau namei kamei ungo be hotembevujo, eto na King David na embo ta ke do kajihena avo ano ingesova amo ke be eto David na pehenu panga ho ta ikeo mihie sari ena, eto panga amo da ei ungotenamote mihia.
ACT 2:30 Rate David amo perovetara eto God ta noma kajena amo amina ingina. God ta noma kajena amo David ta ambo be ta amita ahije vahai na embo hondate eto David ta noma jigesuja.
ACT 2:31 Avoembo David ta ke be kajena amo David na amita ahije amo embo ta hondate embo hoita kito amita ke kajena. Ke kajena amo embo ta hondate embo ta ahihi na pehari embo ga mane iresuja eto amita hamo mane sari asuja.
ACT 2:32 Embo ta hondate embo amo Bada Iesu peheto ehako vasiri te erena avo ungotena kiarira.
ACT 2:33 Eto amina God ta degi pambuto God ta engihita arumbeto pure ere ua. Eto ke mahu ikena avoembo Iesu na Ahihi Otohu ikehei veto puvija. Eto amita vasiri amo ungo ere ingiheva eto ere kogova.
ACT 2:34 Be amo King David uhu ta vihae rate ke nei einge kajena, ‘God na nau hondate embo ta degi ke einge ena,
ACT 2:35 ‘Umo degi dombo be nau ingeni be ta arumbeto mihima eto na no isoro embopo andirono jamopo asora’.’ ainge enu David na kajena.
ACT 2:36 Avoeto na ungo Israel embomeni tapa ta degi ke tambueto ano ingivujo. Embo Iesu ungo na ji atahu ta teheva amo ungotenau hondate embo aravo God ta Meni Bada Iesu.” Peter na ke ainge enu
ACT 2:37 embomeni tapa na jo peni vahai be eto Peter te ambotani tapa ta degi ke einge ea, “Namei kamei, dago do aro?” ainge enu
ACT 2:38 Peter na enana ta degi ke einge ena, “Ungo embo vahai vahai na ungota ari sasapura toto God ta degi egerembeto Iesu ta javo ta bapataito aisova eto God na ungota ari sasapura jenambu asuja eto God na amita Ahihi Otohu ungota degi hande aisuja.
ACT 2:39 God na ungote ungo ta meniundi te enda embomeni tapa avoembo ke ena. Tapa amuna God na jage aisuja amo ke amita ra.”
ACT 2:40 Ainge eto Peter na ke neite neite ena, “Ungo ari sasapura embomeni avo toto ungo oenga orekevu,” avo ena.
ACT 2:41 Eto embomeni tapa 3,000 ainge Peter ta ke agi eto vahaita eto bapataito ea.
ACT 2:42 Eto enana na God ta ambotani ta ahe poekari ke avo ingito agi eto vahaita God hotembihe indie pari ere uahera.
ACT 2:43 Eto ari javotoho neite neite avo God ta ambotani na uo embomeni na joru ue ke mine ari irae ea.
ACT 2:44 Eto God ta ambotani tapa na enana ta hajae vajae humbuto vahaita iketo inono inono humbuto mihahera
ACT 2:45 eto donda nei ombuto koro humbuto donda ambu embopo ta ikea.
ACT 2:46 Eto enana jo vahai eto iji tapa Temple ta horukihahera rate bande jo oenga oenga ai indito osa osa te hande te indari mine inda ere uahera.
ACT 2:47 Eto God jakeka ijiore embo tapa na enana ta ari kogue tunga javotoho ea. Eto iji vahai vahai God na embo oreketo enana vahaita ikerekena.
ACT 3:1 Eto hure nei 3 o’ clock pari ari iji amikote Peter te John te Temple ta pahuo
ACT 3:2 popora embo avo da pe ai ikagora amo e na ingari ta eto popora ena avo embo na humbuto da pe javo ‘Kiari javotoho’ ai koro penunu aja ikeo mihinu
ACT 3:3 Peter te John te temple jo ta horasi pahuo kito koro penunu ena.
ACT 3:4 Eto Peter te John te tihi iketo kito Peter na ke einge ena, “Tambueto dago ki,” ainge enu
ACT 3:5 koro umbaja ari ke hotembeto arerembeto kogunu
ACT 3:6 Peter na einge ena, “Nau degi ta gold te silver te irae rate nau degi ta do mihia avo ikasona, Iesu Keriso Nazareth embo amita javo ta ereto hete,”
ACT 3:7 ainge eto Peter na amita ingeni be ta jigito gorukenu hetenu amita utu te utu ahuma te arinako eto ivo ena.
ACT 3:8 Mahu popora embo amo osa osa eto jaruki jaruki eto enana ga temple jo ta pambuto God jakeka ena.
ACT 3:9 Popora embo amo mahu amina da ‘Kiari javotoho’ ai penunu ere ijiahija eha kojeto God jakeka ena avo embomeni na kito vani vini eto popora embo kojena amita be avo enana mine umbae ea.
ACT 3:11 Eto embomeni tapa huheveto kege ganini te aruketo Solomon ta arara ta puvuo embo eha kojari amina Peter te John te osa osa ue jigito mihinu
ACT 3:12 Peter na embomeni ta degi ke einge ena, “Ungo do eto arukihe puvuto dago kon kon ere ove? Ungo hotembiheva amo dagota ivo o dagota kiari na embo kojehija avo hotembihevete?
ACT 3:13 Ungo Israel embomeni ra, eto amo Abraham ta Isaac ta Jacob ta God amo ungo ta mamahamane mahu sasari ari amita God na amita pure ari Meni Iesu ta degi sovera ari te otohu te ikihija. Embo nei mane Iesu avo ungo na Pilate ta ingeni ta iketo toheva amo Pilate na arahata pambaja ke ijija
ACT 3:14 rate ungo na uje ae ueva amo embo javotoho embo otohu avo ungo arahata pambaja uje ae eto ungo embo tenu pehena embo avo arahata pambaja penunu ijieva.
ACT 3:15 Amo vasiri ikari embo avo ungo na teheve pehehija rate God na ehei amina vasiri te erehija avo dagota tihi na kehera.
ACT 3:16 Amo nei mane Iesu ta javo hotembeto embo popora avo ungo mahu kiari eha ehei be kojehija.
ACT 3:17 Nau namei kamei ungo te ungo ta tihijigari embopo te mahu do ueva avo ungo be kiae ueva.
ACT 3:18 God na ke mahu ena amita peroveta na Iesu osaga humbasuja avo harikena eto osaga kogua.
ACT 3:19 Avoeto ungona ajato ari ke eto God ta degi egerembavo ungo ta ari sasapura God na tuhau irae
ACT 3:20 au iji jamo jamo na Bada ta degi ta eto puvuresuja. Eto amita ambota God na Iesu Keriso ungota hondate ari embo mahu ikari avo ikau puvuresuja.
ACT 3:21 Rate eha amo Iesu na uhu i ta God ta ingeni ta mihima God na enda eha asuja iji peroveta na ke mahu harikena avo iji puvuresuja.
ACT 3:22 Eto Moses na Iesu ta puvurari ke avo einge kajena, ‘God na peroveta vahai namo ainge ungo ta namei kamei ta eto ikau ke asuja amita ke avo ungo be ingivujo.
ACT 3:23 Embo amuna amita ke mane ingaguja amo God na kahekau oenga iresuja,’ ainge ena,
ACT 3:24 eto ke be amo peroveta tapa Moses eto pambuto iji eha ere ora Iesu ta puvurari avo harikihahera.
ACT 3:25 Peroveta ke ere ijiahera amo ungoembo ere ijiahera eto God na ke do ena amo ungota ra. Ke avo Abraham ta degi einge ena, ‘Amo ungota meniundi ta eto enda tapa embomeni na javotoho iresora.’
ACT 3:26 Eto God na amita Pure Ari Meni ungotena Judea embomeni avoembo kihi ikihija eto amina au ungota ari sapura toto egerembasova, eto javotoho amina ere ua.”
ACT 4:1 Eto Peter te John te embomeni ta degi ke ijio Temple ta simba ari embo okose te priests pepeni te enana Sadduceeste na enana ta degi puvua.
ACT 4:2 Enana jo memenga te tapa puvua amita be amo Peter te John te na Bada Iesu na vasiri te erena ke avo ijie embo na vasiri te erari ke avo ahe poekihio enana ke aravo ingari uje ae eto haekea.
ACT 4:3 Eto iji vovunu humbuto tipura ta evora ikea.
ACT 4:4 Rate embomeni isapamane Peter te John te ta ke ingito jo haperekenu ambotani mahu amiga vahaita kaju eo ambotani tapa 5,000 ena.
ACT 4:5 Eto evito enana Judea embomeni ta tihi jigari embopo te embo nei pepeni te Judea ta ke pepeni harikari embomeni pepeni te na ke kasasi Jerusalem ta puvuto torukea.
ACT 4:6 Eto Priest okose javo Annas te Caiaphas te John te Alexander te enana ta javo vahai embomeni te na enana ga horukea.
ACT 4:7 Eto Peter te John te jage eo orohuta puvuto heteo ke einge eto ingia, “Ungo sovera amuta na eto javo amuta na ari emo eheve?” ainge eto ingio
ACT 4:8 eto Ahihi Otohu na sovera Peter ta ikenu humbuto ke mine ngahia eto einge ena, “Embomeni ta tihi jigari te embo pepeni te,
ACT 4:9 dago popora embo ta osaga humbuto ehere kojehija avoeto ungo dagota degi eto ere ingihevete?
ACT 4:10 Ke be avo ungota degi tambueto ano ingesova. Amo Iesu Nazareth embo avo ungo na ji atahu ta torueva eto God na ehei vasiri te erehija amita javo eto javo nei mane amina ehei kojeto ungo ta tihita eha heteto mihia.
ACT 4:11 Iesu amo bande gerikari koro avo embo na toari avo ehako bande ta atahu peni ehija.
ACT 4:12 Amo embo javo neite neite mihera rate embo na javo nei mane hotembasora, Iesu vahai amita javota hondate ari mihia.”
ACT 4:13 Eto embo okokose na Peter te John te ta sovera kito vani vini ea amita be amo Peter te John te school ta pambuto kiari umbae rate Iesu ga umoro ue sovera ari umbua avo embo okokose na kia.
ACT 4:14 Eto popora embo eo kojena avo amo ari be manera ainge eto embo okokose na ke asi uje ea rate popora embo kojena avo enana ga heteto mihinu kito ke toa.
ACT 4:15 Avoeto enana Peter te John te ke kasari bande ta eto ikeo arahata pahuo ke ungo oenga kasea.
ACT 4:16 Eto kaseto ke mine ara eto einge ea, “Embo emiga do aro, ari javotoho be ehera avo Jerusalem embomeni tapa na kehera avo eto enana na ari sapura ari ke avo mane aro embo tapa ingesora.
ACT 4:17 Rate Peter te John te ta ke hande ere ora avo eto kito haekasora avo eto enana Iesu ta ke hande ehako asora amo ngahia be aro kesora.” Ke ainge avo enana ta degi asora amo kasari ta ainge
ACT 4:18 eto jage eo puvuo enana ta ke te ahe poekari te Bada Iesu ta javo jigama ari te tapa toara ke eo
ACT 4:19 Peter te John te ke mine einge ea, “Dago God ta ke agi arote, o ungota ke agi aro avo ungo oenga sirikevu.
ACT 4:20 Dago do kehera eto do ingera avo ke hande asora rate toari ke avo mane asora,” ainge eo
ACT 4:21 enana okokose na ke ehako ngahia na eto eo arahata pambua. Eto enana okokose na enana ta degi do asora avo mana mana ea amita be amo embomeni tapa na ari avo kito be hotembeto God jakeka ea.
ACT 4:22 Eto popora embo kojena amita jua 40 mahu dembarira.
ACT 4:23 Eto Peter te John te arahata pambuto embomeni totoho ga embo okokose na ke do ea avo eo
ACT 4:24 ingito embo tapa hotembari vahai eto God ta degi pari einge ea, “Mamo God sovera isapamane te uhu te enda te eva te donda tapa avo inena a,
ACT 4:25 eto inena no Ahihi Otohu na dagota mama David no pure ari embo ta degi no ke avo ae einge kajena, ‘Eto enda embomeni tapa do eto God ta degi jujune asi ke kaseo,
ACT 4:26 enda ta kings te tihi jigari embomeni te aingeto God te amita Meni avo vahai amita degi isoro eagora,’ ainge David na kajena.
ACT 4:27 Eto eha amo ke be eto Herod te Pontius Pilate te Israel embomeni te enda nei embomeni te aingeto enana ta Hondate Ari Embo no Meni Iesu avo sapura rate enana tapa do uera avo inena hoi ta kito ke a,
ACT 4:29 avo eto, Bada, enana ke do ehera avo hotembeto no pure ari embomeni ta degi sovera ari ikejo hamo ngahia au no ke hande are.
ACT 4:30 Eto no ingeni jujurukejo no pure ari Meni Iesu ta javo Otohu ta aro embo kokojekihe ari javotoho te sovera te ururoro embomeni no ke avo be hotembare”
ACT 4:31 pari ainge ijio enana ta ke kasari bande avo vasiri ena. Eto Ahihi Otohu na embo tapa ta jo enetenu God ta ke sovera eto ea.
ACT 4:32 Eto jo vahai eto hotembari vahai eto donda oenga ira ae rate vahaita iketo humbuto hande mine ikara ea.
ACT 4:33 Eto enana apostel 12 na Bada Iesu ta vasiri te erari ke avo sovera eto ere ijiahera eto enana ta degi God ta hondate ari datoho mihahija.
ACT 4:34 Eto enana ta degi donda ambu embo irae amita be amo iji nei nei ainge donda embo na bande retemo enda retemo avo ombuto koro humbuto
ACT 4:35 apostel 12 ta ikeo humbuto hande donda ambu embo ta degi ikihahera.
ACT 4:36 Eto iji vahai Cyprus tiuka ta embo vahai javo Joseph Levi avo ambotani 12 na javo Barnabas ikea (javo amita be amo ‘Ke hande ari meni’)
ACT 4:37 amina enda amita avo ombuto koro humbuto ambotani 12 ta ikena.
ACT 5:1 Rate embo Ananias te amita ae Saphira te aingeto enana ta enda ombuto koro humbuto
ACT 5:2 huna jigito huna ikasora avo ke sokova asora avo ke kasea eto ivu na humbuto pambuto apostel ta ikihe koro nei irae ke ijie ahe ahe unu
ACT 5:3 Peter na amita ke sokova tapa kito ke einge ena, “Ananias, Satan na no jo enetehei koro tapa ikari ke sokova Ahihi Otohu ta degi erea.
ACT 5:4 Ke be amo enda nora ombuto koro humbasoa eto toasoa amo umo tohora, rate enda ombuto koro humbuto tapa ikasoa eto huna ikasoa amo umo tohora, rate umo do eto God ta degi ke sokova na koro tapa ikari ke ere? Umo ehea amo embo ta degi ae rate God ta degi ke sokova erea.”
ACT 5:5 ainge enu Ananias na ke avo ingito vurereketo veto pehihenu embo tapa kito joru ea.
ACT 5:6 Eto singapora na bo humbuto horeto Ananias ta hamo togeto humbuto pambuto kovea.
ACT 5:7 Eto three hours amita ambota ivu do ena amo ae na kiae puvunu
ACT 5:8 Peter na evohu amita degi einge eto ingina, “Ungo na enda ombuto koro umbeva emo tapa erevirete? Avo ejo ingone.” ainge enu “En, tapa aravora” ke mine enu
ACT 5:9 Peter na einge ena, “Ungo do eto God ta Ahihi Otohu eto kesi uje eheve? Umo singapora ta utu uruhu ta asavi bande apupu ta ere ingihete? Amita be amo ivu humbuto pambuto kovehera, ehako umo humbuto pambuto kovasora” ainge ijinu
ACT 5:10 evohu avo vurereketo veto pehenu singa bande jo ta horeto evohu pehenu kito humbuto pambuto ivu kovea engihi ai ta kovea.
ACT 5:11 Eto ekalesia te embomeni tapa te ke avo ingito joru peni vahai be ea.
ACT 5:12 Eto enana apostel 12 na embomeni ta tihi ta vasiri javotoho neite neite ere uahera. Eto ekalesia embomeni na jo vahai eto vahaita ‘Solomon ta Porch’ ta horukihahera,
ACT 5:13 eto osa ari embomeni avo embo nei nei ere koguahera rate enana ga vahaita horukari uje ae ue joru ere uahera,
ACT 5:14 rate embo nei nei na Iesu ke be ijie kaju uore ambotani peni vahai be ere uahija.
ACT 5:15 Ainge eto embo tapa na ambure embo humbuto degi ta besi tirito ikihahera amo Peter ta aririvo na ahurekau kojara ere ikihahera.
ACT 5:16 Embo isapamane da neite neite Jerusalem da engihita ambure embopo te ahihi sasapura na horari embo te tapa avo humbuto uore kokondikihahera.
ACT 5:17 Eto Priest Peni te amita pure vahai embomeni tapa Sadducees ta javo ta pure ere uahera na Iesu ta ambotani ta pure ere uahera avo ari haiteko mane avo eto osaga kito
ACT 5:18 Iesu ta ambotani humbuto tipura ta ikea.
ACT 5:19 Eto mumete tipura ta mihio God ta Anera na puvuto tipura ta bande bokiri hiriketo embo humbuto arahata iketo
ACT 5:20 ke einge ena, “Ungo temple pe ta pambuto heteto Vasiri Eha Iesu ta degi putuhua amita ke tapa embomeni ta degi hande evujo,” ainge ena.
ACT 5:21 Eto Anera ta ke agi eto iho vujenu temple jo ta horeto embomeni ahe poekea. Eto Priest Peni te amita pure vahai embomeni te tapa Judea embomeni ta horukari javo Sanhedrin ta pure ere uahera eto jage eo Israel embo pepeni tapa vahai ta puvuo tipura embo umbara ikeo police na pambuto embo tipura ta ikari
ACT 5:22 avo pambuto kiae eto egerembeto puvuto ke einge ea,
ACT 5:23 “Dago pambuto tipura ta bande bokiri vahaikari mihia eto tipura ta bokiri simba ari embo mihia rate pe hiriketo jo ta horeto tipura embo irae mahu pambari kito puvera” ainge eo
ACT 5:24 ingito temple ta simba ari embo te Priest peni te na duru avo ingito amita be avo deire avo eto mine umbae uo
ACT 5:25 embo nei na puvuto duru nei avo einge enu ingia, “Ungo embo tipura ta ikeheva amo eha temple jo ta heteto embomeni ta degi ke ijie mihera,”
ACT 5:26 ainge enu ingito temple ta simba ari embo na amita pure embomeni ga pambuto Iesu ta ambotani humbuto puvua. Eto umbua amo andito pundurae teho humbuto puvua amita be amo embomeni na koro na teora joru eto teho humbuto puvua.
ACT 5:27 Eto humbuto puvuto Sanhedrin horukari embomeni ta tihi ta ikeo heteo Priest Peni na ke ngahia eto einge ena,
ACT 5:28 “Eto ungo na embo amita javo ta mane ahe poekasova aingeto ke ngahia na eto ijiera rate ungota ahe poekari na Jerusalem be enetehija eto ungo na embomeni ta degi embo avo dago na mahu tari ke ijie dago mine tasi ke ereva.” Ainge eo
ACT 5:29 Peter te ambotani nei na ke mine einge ea, “Dago embo ta ke avo mane agi asora te God ta ke avo agi asora.
ACT 5:30 eto embo amo ungona ji atahu ta teheve pehena amo ungotenau mamahamane ta God na Iesu pehena avo enu vasiri te erena.
ACT 5:31 Eto God na humbuto amita ingeni be ta ikehei arumbehei ungotena tihi jigihe orekaja ikehija eto iji eha emikote ungotena Israel embomeni na ari sapura avo Iesu ta degi aja to ijiroro Iesu na humbuto au irae asuja.
ACT 5:32 Ke emo, Ahihi Otohu avo God na amita agiari embomeni ta degi hande ikaguja amite nangote tapa ke erevi ere kogora.”
ACT 5:33 ke ainge eo ingito tumo peni vahai be eto embo taro pehaja ke ea
ACT 5:34 rate Pharisee embo vahai javo Gamaliel amo God ta ke pepeni ahe poekari embo eto embo tapa ta tunga humbari embo amina Sanhedrin horukari ta ereto Iesu ta ambotani arahata pambara ke enu pahuo
ACT 5:35 ke einge ena, “Israel embomeni ungo enana ta degi do asi uje ere ove avo be hotembevu, amo eingera.
ACT 5:36 Embo Theudas na ereto heteto na embo penira ainge eto amita ambotani tapa 400 umbuna rate teo pehenu amita ambotani amo sio sao nei do ae pambuo irae ena,
ACT 5:37 eto nei Judas Galilee embo amo embomeni ta heka humbari iji te amina ereto heteto amita ambotani umbuna rate teo pehenu amita ambotani sio sao pambua.
ACT 5:38 Avo eto ke erena embo evi tovujo pambare, eto enana ta ke ijiroro avo ungo haekaeheva
ACT 5:39 rate God ta ke avo ijiroro ungo na haekari inono ae ra amita be amo God ta degi isoro asova.” Ainge enu ingito ke be hotembeto
ACT 5:40 ambotani jage eo puvuo ituha na torue ehako Iesu ta javo mane ahe poekasova ainge eto ikeo pambua.
ACT 5:41 Eto Iesu ta ambotani na Sanhedrin toto tunga javotoho ue God jakeka ijie pambua, amita be amo enana Iesu ta javo sovera eto jigama uo God na enana ta sovera inono kito memenga ikena.
ACT 5:42 Eto iji tapa enana temple jo ta eto bande pe vahai vahai ta pahue Iesu amo God ta Meni amita duru hande ere uahera.
ACT 6:1 Eto iji amikote ambotani isapamane ue ambotani nei nei na tumo ea amo Judea embomeni nei Greek ta ke humbari amita evohu dodoru na iji nei nei indari umbae ari ke ijie Judea embo nei ta degi tumo ea.
ACT 6:2 Avo eto apostel 12 na ekalesia embo tapa jage eo puvuo einge ea, “Dago God ta ke hande ari avo toto beuje avo eto indari hande asora amo sapurara
ACT 6:3 rate ungo hande ari embo eto Ahihi Otohu na enetari embo tapa 7 avo umbuvujo eto indari hande ari ta pure emo enana na ara ikasora.
ACT 6:4 Eto pari ari te ahe poekari te God ta ke hande ari te avo dago na kaiketo asora,” ke ainge eo
ACT 6:5 ke javotoho ingito embo tapa 7 umbua amita javo Steven amo God tunga humbari embo Ahihi Otohu na jo enetari nei Philip nei Prochorus nei Nicanor nei Timon nei Pormenas nei Nicolaus Antioch embo amo enda nei embo rate Judea embo ta ke agi ere uahija ehako Iesu ta ambotani ena.
ACT 6:6 Eto enana tapa 7 avo embomeni na apostel 12 ta tihi ta ikeo apostel na ingeni ohoru ta tembeto pari ea.
ACT 6:7 Eto God ta ke da hoi ta pambuto hande ue ambotani nei ehaha Jerusalem jo ta ere umbuhahera. Eto Judea embo ta Priests nei nei amo jo aherekenu ambotani ga puvua.
ACT 6:8 Eto embo Steven avo God na amita kiari javotoho hande ikihahija avo eto amina Ahihi Otohu ta ivo na ari neite neite Iesu ta ari ena ainge dombo ena.
ACT 6:9 Rate Judea embomeni nei javo ‘Free man’ avo vahaita horukihahera eto da javo Cyrene eto Egypt ta da peni Alexandria te Turkey ta Province Cilicia te Asia te tapa Judea embomeni aingeto horuketo Steven ta ke ingito tumo eto Steven ga ke ngahia mine ara ea.
ACT 6:10 Rate Steven ta kiari te sovera te God na ikena avo eto ke mine ari inono ae
ACT 6:11 eto embopo nei amo Steven ta ke sokova avo embo tapa ta degi ke ara koro na ombuto umbuo ke einge ea, “Embo Steven na God ta ke te Moses ta ke te amo sokova ke avo ehei ingihera” eto ainge eo
ACT 6:12 ingito enana embo pepeni te ke pepeni ahe poekari embomeni te embomeni tapa na hini kambari eto Steven andito humbuto Sanhedrin ta ikeo hetenu
ACT 6:13 ke sokova ari embomeni ehako umbuo ke einge ea, “Eto embo emina God ta ke pepeni Moses ta ikena amo sokova eto God ta Bande Otohu amo sapura ke kaikari eaguja.
ACT 6:14 Eto ke nei ijioi ingiora amo Iesu Nazareth embo na God ta Bande Otohu aimbasuja. Eto nei amo ungotenau ari mahu Moses ta eto puvuna avo Iesu na au irae au ari nei humbasora.” Ainge eo
ACT 6:15 Sanhedrin horukari embomeni na Steven ta tombu kon kon eto kia amo Anera ta tombu inono avo kia.
ACT 7:1 Eto Priest Peni na Steven ta degi einge eto ingina, “Ke erera amo ke be rete?” ainge enu
ACT 7:2 ke mine einge ena, “Mamahamane te apahamane te ke nau ingivujo. Ungotenau ohihi Abraham enda Haran ta pambae enda Mesopotamia ta mihinu God usasa te puvuto
ACT 7:3 Abraham ta degi ke einge ena, ‘No embomeni te enda te avo toto enda nei avo ano kito ai pambujo’ ainge God na enu
ACT 7:4 ingito enda Chaldea toto Haran ta pambuto mihinu Abraham mamo pehenu ‘Ungota enda ei ta egerembeto puvujo’ ainge God na enu puvuna.
ACT 7:5 Rate God na enda amita ei ta peni te isapa te ikae avo eto Abraham ta meni irae rate emita meniundi na enda erevi umbara ke ena.
ACT 7:6 Eto God na amita degi ke ehako einge ena, ‘No meniundi na enda nei ta pambuto iresora eto jua 400 amita jo ta no meniundi na enda nei embo ta degi pure eto hamo memenga kesora,
ACT 7:7 rate amita ambota na no pure ta memenga ikari embomeni ta degi osaga ikasona. Eto no meniundi na enda avo toto enda ei ta puvuto na jakeka asora,’ ainge eto
ACT 7:8 God na Abraham ta degi asivo na kakamba ari ikena amo amita ke mahu ari ingari amita hajire avo ikena. Eto Abraham ta ae na meni Isaac ingenu iji eight irae enu asivo na hamo kakamba ena eto Isaac pajito amita meni Jacob ta hamo kakamba ena eto Jacob na amita meniundi 12 avo kakamba ena, amo ungotenau ohihi ra.
ACT 7:9 Rate Jacob ta meniundi 11 na enana ta namei Joseph amo embo javotoho avo eto tumo eto irae aja uje eto ombuto koro humbuto ikeo Egypt ta pambuna. Eto God na Joseph ga mihie
ACT 7:10 Joseph ta osaga kito hotembari te kiari te ikenu Egypt ta King Pharoah na Joseph amo siro meni kiari meni avo kito osa eto amita bande peni te enda te avo tihi jigoja ikena.
ACT 7:11 Eto ga veae enu beuje iji peni vahai be Egypt enda ta Canaan enda ta puvunu mamahamane indae tumbae eo embo tapa osaga peni vahai be kia.
ACT 7:12 Eto Jacob na Egypt enda ta indari mihinu duru ingito amita meniundi ungotenau mamahamane avo ikenu Egypt enda ta pambuto indari humbuto puvuto indio irae enu
ACT 7:13 ehako pambuo Joseph na, ‘Na ungota namei Joseph ra’ ainge eto harikena, eto Joseph na amita namei kamei avo Pharoah ta degi enu kina.
ACT 7:14 Eto amita ambota Joseph na ke enu amita mamo te namei kamei te eto amita embomeni tapa 75 ainge Egypt enda ta puvua.
ACT 7:15 Eto puvuto Jacob te ungotenau ohihi te Egypt enda ta pepehekeo
ACT 7:16 hamo humbuto pambasi nununga ea amo enda Shechem amita panga ho avo Abraham na embo Hamor ta meniundi ta degi koro na ombuto humbari ai ikaro sari ara nununga ea.
ACT 7:17 Eto Egypt ta iji koso be mihahera God na Abraham ta meniundi ta enda ikasuja avo iji puvutuhunu ungotenau Judea embomeni Egypt enda ta peni vahai ea.
ACT 7:18 Eto Egypt enda ta King nei amo Joseph kiae puvuto Egypt tihi jigina.
ACT 7:19 Eto amina embomeni ta degi ari sapura be ue meni eha ingihiore ke ijioi humbuto ere gosukihahera.
ACT 7:20 Eto amita iji te Moses meni be avo e na ingeto mamo ta bande ta simba unu hariga 3 irae enu Pharoah na eoi gosukeagona arahata pambuto ojikenu
ACT 7:21 Pharoah ta iae na hambuto kito humbuto ‘Meni nau asuja’ ainge eto simba enu
ACT 7:22 pajito Egypt enda ta school ta pambuto kiari peni humbuto pure embo eto ke embo ena.
ACT 7:23 Eto Moses ta pajirari jua tapa 40 irae enu amita Israel embomeni Egypt embomeni ta pure ere uahera avo Moses na kogue umoro unu
ACT 7:24 Egypt embo na Israel embo torunu kito Moses ta jo memenga enu mine Egypt embo vahai tenu pehena.
ACT 7:25 Moses avo God ta hondate ari meni avo amita Israel embomeni hondate aja ikena avo enana mahu kiari ke ena rate enana kiae.
ACT 7:26 Eto evito Israel embo heriso mine tara uo Moses na oje kahari ke einge ena, ‘Embomeni ungo namei kamei ra do eto mine tara ere ove?’ Ainge enu
ACT 7:27 jujune embo vahai amina Moses mimiketo ke mine einge ena, ‘Embo amuna umo dagota embo okose eto tihi jigoa ke ehei,
ACT 7:28 iji nei umo Egypt embo vahai tehe pehehija eto na tao pehanote?’ ainge enu
ACT 7:29 Moses na ingito joru enda nei Midian ta pambuto mihimihe akate eto ve heriso ikena.
ACT 7:30 Eto jua nei tapa 40 irae enu Moses na tiri javo Sinai amita engihi ojagatambu ta pahunu ji perimbeto vihina
ACT 7:31 avo kesi auveto amita jo ta Anera kito mana mana enu Bada na amita degi ke einge ena
ACT 7:32 ‘Na no mamahamane ta God eto Abraham ta Isaac ta eto Jacob ta God ra’ ainge enu Moses na joru ue tatatata ue kiari uje ae eto tombu togena
ACT 7:33 eto Bada na amita degi ke ehako einge ena, ‘Umo enda otohu ta heteto mihea, no utu goru houke.
ACT 7:34 Eto nau embomeni Egypt enda ta osaga ere humbuhora avo ere kogona eto enana memenga kogue jajavone ere ingihena avo eto ano arahata pambasora. Aravora Egypt ta ikano pambaerena hae.’ ainge God na ena.
ACT 7:35 Eto embo nei mane Moses avo amita embomeni na kito uje ae eto ke einge ea, ‘Umo amuna dago tihi jigoa ikehei?’ ainge ea. Rate God na Moses na embomeni tihi jigoja ikena ke avo Anera na ji peri jo ta puvuto God na embomeni humbuto arahata pambaja ke ena avo ena.
ACT 7:36 Eto amina Egypt ta eto kihi humbuto pambuna eto Egypt jo ta eva javo pangari eto ojagatambu jua tapa 40 amita jo ta ari neite neite uoi embomeni kito vani vini ere uahera.
ACT 7:37 Embo nei mane Moses avo amita Israel embomeni ta einge ena, ‘Rate ungota meniundi ta eto embo
ACT 7:38 vahai, avo peroveta na ainge dombo God na ikau puvuresuja,’ ainge ena. Eto ojagatambu ta Israel embomeni ungotenau mamahamane ga mihio God ta ke otohu vasiri te daroho irari avo Anera na Moses ta degi puvuto ikenu avo eha jigama ere ora.
ACT 7:39 Rate ungotenau mamahamane na Moses ta ke agi ae eto enda Egypt jo enu egerembeto pambasi uje ea,
ACT 7:40 avoeto Moses ta namei Aaron ta degi penunu einge ea. ‘Moses dainge pambei, avo dago kiaera avo eto dagota gods nei ejo dago kihi humbuto pambare’,
ACT 7:41 eto enana o cow meni ingeni na ove eto amita degi pondo ue pene ikea.
ACT 7:42 Eto God na kito uje ae eto tonu hariga te kuro te avo jakeka ere ijiahera. Ke amo peroveta na mahu book ta einge kajari ra. ‘Israel embomeni, ungo jua tapa 40 ojagatambuta o teto nau degi ta pene avete?
ACT 7:43 Ainge ae ungo na ungota god Moloch ta jakeka ari horoma geriketo humbuto ere pambuhaheva eto ungota god Rephan ta kuro ove eto jakeka ere ijiaeheva avo eto ungo enda Babylon oiho ta ikano pambuto iresova,’ ke emo God na enu peroveta na kajena.
ACT 7:44 God na Moses ta degi amita irari temple daingeto aro avo enu ingito bo na gerikea
ACT 7:45 avo ungotenau mamahamane na humbuto ojagatambuta ere pambuhahera eto ambota Joshua na temple avo humbuto ungotenau mamahamane te kihi humbuto enda ta ere uahija enda asa embomeni avo God na enana ta tihi ta ohimbena. Eto temple amo enda ai ta David ta iji te mihahija.
ACT 7:46 Eto David amo God ta tunga humbari meni eto amita mamo Jacob ta God amita Temple be koro na ari ikasi uje eto God ta degi penunu ena,
ACT 7:47 rate amita meni Solomon na God ta Temple gerikena,
ACT 7:48 rate God Sovera te amina bande embo ta ingeni na ari ai mane iraguja te God ta ke amo peroveta na einge kajena,
ACT 7:49 ‘Eto uhu i amo nau arumbari eto enda amo nau utu tembari avo eto nau irari bande daingeto avo, eto nau jangu indari arara dainge avo
ACT 7:50 uhu ta enda ta donda tapa amo nau ingeni na ari rete o ae re?’ Ke avo God na enu peroveta na kajena.
ACT 7:51 Eto ungo eha miheva sarika embomeni, ungo ta jo tongopa te oje susujukari te ra eto ungota mamahamane na Ahihi Otohu agi ae ere uahera eto ainge dombo ungo na ere ova.
ACT 7:52 Ungota mamahamane na peroveta tapa ta degi ngahia uore osaga ere koguahera eto peroveta nei nei na javotoho ari embo puvuresuja ainge ijiore ungota mamahamane na peroveta toruore pepehekihahera avo eto ungo na javotoho ari embo hariketo teheve pehehija.
ACT 7:53 Eto God ta ke pepeni otohu amo Anera na ungota degi ikena rate ungo na agi ae ra.”
ACT 7:54 Steven na ke ainge enu Sanhedrin horukari embomeni na ingito ti kambuo kiroro kiroro ena,
ACT 7:55 rate Steven Ahihi Otohu na enetenu tihi i ta eto God usasa te Iesu God ta ingeni be ta heteto mihinu kito ke einge ena,
ACT 7:56 “Kivujo uhu pe hirikehei Embo ta Meni, God ta ingeni be ta heteto mihia.” ainge enu
ACT 7:57 embomeni na ke avo ingari uje ae eto oje susujuketo jajavone peni vahai eto pambuto
ACT 7:58 Steven jigito goruketo da arahata humbuto puvuto koro na tea. Eto torue enana ta bo houketo embo Saul ta utu ta tembea.
ACT 7:59 Eto enana avo ere torua avo Steven na God ta degi pari einge ena, “Bada Iesu nau ahihi umbujo” ainge ijie
ACT 7:60 paunge na veto teteri eto javone einge ena, “Bada, enana ta ari sapura evi hotembeto tojo” ainge ijie veto pehena.
ACT 8:1 Rate Saul na embomeni na Steven tea avo kito tunga javotoho be ena. Eto Steven ta sari ari iji te Jerusalem embo na ari sapura uo ekalesia embomeni osaga peni vahai be kito Jerusalem da toto enda Judea jo ta da nei nei aita pambua eto nei Samaria enda ta pambua rate Iesu ta apostel 12 amina pambae Jerusalem da ta mihahera.
ACT 8:2 Eto God ta tunga humbari embo na Steven pehenu si ijie kovea.
ACT 8:3 Rate Saul na ekalesia irae aja bande vahai vahai ta horeto embo te evohu te humbuto goruketo puvuto tipura ta ere ikihahija.
ACT 8:4 Eto ekalesia embomeni da neita neita pahue God ta ke hande ere uahera.
ACT 8:5 Eto Philip na pambuto da vahai Samaria amita jo ta Iesu Keriso ta puvurari ta duru hande enu
ACT 8:6 embomeni isapamane na Philip ta ari neite neite ena avo kogue oje jevito amita ke ingia.
ACT 8:7 Eto Philip na embo ta jo ta ahihi sasapura avo enu jajavone te arahata puvuto pambua eto popora embo tapa avo kokojekena
ACT 8:8 avoeto da amita embomeni tapa tunga javotoho be ea.
ACT 8:9 Eto embo vahai javo Simon amo Samaria da ta mihie saruka ere uahija amita saruka neite neite ue “Na ivo embora” ainge ijinu
ACT 8:10 embomeni tapa na amita ari kito vani vini ue ke agi eto einge ere ijiahera, “Embo emita sovera amo God ta sovera inono avoeto amita javo ‘Sovera embora’”
ACT 8:11 ainge ijie amita saruka kito ke be ijie ambo ambo ere uahera.
ACT 8:12 Rate Philip na ke einge ena, “Iesu Keriso amo ungotenau hondate ari embo mahu puvija eto God na amita embomeni ere uhua eto Iesu Keriso na enana ta King asuja.” ainge ijinu ingito embo te evohu te tapa ke be hotembeto bapataito ere uahera
ACT 8:13 eto Simon na ke avo be hotembeto bapataito ena eto Philip ta ambo ambo eto pambuto amita ari jajavotoho avo kito vani vani ena.
ACT 8:14 Eto Samaria embo na God ta ke ingito uje ea avo apostel nei Jerusalem jo ta enana ingito Peter te John te Samaria enda ta ikeo pambua.
ACT 8:15 Eto pambuto embomeni nei Bada Iesu ta javo ta bapataito ea
ACT 8:16 rate Ahihi Otohu umbae avo kito Ahihi Otohu na enana ta jo ta veaja
ACT 8:17 Peter te John te na pari ue enana ta hamo ta ingeni tembeo Ahihi Otohu umbua.
ACT 8:18 Avo apostel na ingeni hamo ta tembeo Ahihi Otohu umbua avo Simon na kito koro na humbasi
ACT 8:19 ke einge ena, “Eto ari avo nau degi ta ikevu eto na nau ingeni na embo ta hamo ta tembano Ahihi Otohu umbare” ainge enu
ACT 8:20 Peter na ke mine einge ena, “Umo God ta hande koro na humbasi hotembihea avo no koro ga sari ejo
ACT 8:21 eto God ta tihi ta no jo amo javotoho mane ra avo eto ari emo no mane asuja.
ACT 8:22 No ari sapura avo aja to ijie pari ururoro eto no jo ta hotembari sapura avo God na hotembeto toasuja
ACT 8:23 eto no jo ngahia amo ari sapura na andirari avo ere kogona” ainge enu
ACT 8:24 Simon na einge ena, “Ungo nau degi ta ngahia eheva avo mane puvuresuja avo God ta degi pari evujo,” ainge ena.
ACT 8:25 Eto Iesu ta ari te ke te tapa do ena avo Peter te John te ahe poeketo egerembeto Jerusalem degi ta pahue Samaria da vahai vahai ta heteto Iesu ta duru javotoho hande ue pambua.
ACT 8:26 God ta Anera vahai na puvuto Philip ta degi ke einge ena, “Degi Jerusalem eto enda Gaza ojagatambu kaina hena ai pambujo,” ainge enu
ACT 8:27 ingito degi ta ihiketo pambuhumihe Ethiopia embo okose vahai hambuna amo Ethiopia ta Queen Candace ta koro simba ari embo okose avo Jerusalem ta God jakeka asi pambuto puvutuhunu hambuna.
ACT 8:28 Eto Ethiopia embo amo amita pambari nga javo ‘Chariot’ ai ta arumbeto amita da ta pambuhumihe peroveta Isaiah ta ke kajari avo ehekena.
ACT 8:29 Eto God ta Ahihi na
ACT 8:30 Philip ta degi einge ena, “Chariot ai ta auvejo,” ainge enu Philip na huheveto pambuto nga ta auvenu peroveta Isaiah ta ke kajari avo ehekihinu ingito ke einge ena, “Umo ke ehekihea amo be ere ingihete,” ainge Philip na enu
ACT 8:31 ke mine einge ena, “Na daingeto ingono, ke be harikari embo irae,” ainge eto Philip vihito amiga arumbaja ena.
ACT 8:32 Eto ke ehekena amo erevira: ‘O sheep amo humbuto pambuto hevagora amo mane ke eaguja. Eto o sheep ta meni embo na humbuto pambuto hamo hu tiukagora mane ke eaguja eto embo amina ainge dombo ke ae.
ACT 8:33 Eto amina me kiaguja rate embo na hondate ae. Eto enana na tehere embo ta vasiri enda ta irae ehija. Avo eto amita meniundi irae.’ ainge Isaiah na kajena
ACT 8:34 avo Ethiopia embo na eheketo Philip ta degi einge eto ingina, “Ke emo peroveta ta ari avo kajenute mo embo nei ta ari avo kajenu avo e ingone,” ainge enu
ACT 8:35 Philip na Isaiah ta ke kajena amo Bada Iesu puvuresuja eto puvuto tapa do ehija avo Philip na Ethiopia embo ta harikenu ingina.
ACT 8:36 Eto degi ta pambuhumihe umo kito Ethiopia embo na einge ena, “Aravora, na bapataito ejo.”
ACT 8:38 ainge eto Chariot hetenu enana umo ta veto heteto Philip na bapataito
ACT 8:39 eto vihio God ta Ahihi Otohu na Philip humbuto da Azotus ta pambuna. Eto Ethiopia embo na Philip ehako kiae eto degi ta pahue tunga javotoho ena.
ACT 8:40 Eto Philip na da javo Azotus ai God ta ke ahe poekena eto degi ta pahue da vahai vahai ta Iesu ta ke avo hande ue pambuhahija da javo Caesarea ta puvuna.
ACT 9:1 Eto Saul na Iesu ta ambotani tau pehara ke ngahia kaikari ijie Priest ta embo okose amita degi ahari penunu eto humbuto pambuna.
ACT 9:2 Eto amina embo te evohu te Iesu ambo ambo ere uahera avo humbuto Jerusalem tipura ta ikasi Damascus Judea embomeni ta God jakeka ari bande tapa amita embomeni ta degi ahari avo ikasi degi ta pambuto
ACT 9:3 da auvihinu usasa peni vahai be uhu ta eto tanini eto puvuto Saul ta hamo ta kajenu
ACT 9:4 Saul na vurereketo enda ta veto ke einge ingina, “Saul, Saul, umo do eto nau degi ta memenga kaikari ere ikihe?” ainge enu
ACT 9:5 ingito ke mine einge ena, “Bada umo amunure” ainge enu, “Na Iesu ra umo nau degi ta memenga kaikari ere ikihea.
ACT 9:6 Ereto heteto da ta pambuto na ke do asona avo ingesi simba ejo.”
ACT 9:7 eto embo Paul ga pambua amo ke avo ingia te embo ta tombu avo kiae avoeto ke ae teho mihio
ACT 9:8 Paul ereto hetenu tihi hirikena te be kiae unu embona ingenita jigito humbuto pambuto da Damascus ta puvua.
ACT 9:9 Eto Paul tihi sapura enu be kiae ue indari te umote indae mihinu iji 3 irae ena.
ACT 9:10 Eto da Damascus embo amo Bada ta ambotani ta degi God na ehure ta ke einge ena, “Ananias” ainge enu, “Bada do ere?” ainge enu
ACT 9:11 Bada na, “Degi javo ‘Jihukari’ Judas ta bande ai pambuto embo vahai amina nau degi ta penunu eria
ACT 9:12 amita javo Saul da Tarsus embo na ehure ta embo javo Ananias na ingeni hamo ta tembihei tihi mume avo javotoho oi kehija avo eto ai pambuto embo avo jombure eto kijo,” ainge enu
ACT 9:13 Ananias na ke mine einge ena, “Bada embo amina Jerusalem Ekalesia embomeni ta degi ari sapura peni vahai eaguja avo duru ingena.
ACT 9:14 Eto amina priest okose ta degi ke humbuto embomeni tapa na Iesu ta javo ta penunu eagora avo humbuto tipura ta ikasi ehija,” ainge enu
ACT 9:15 Bada na ke mine jandireketo einge ena, “Umo pambu, embo amo nau hondate ari embora eto nau javo humbuto enda ta embomeni tapa kings te Israel embomeni te ta degi ke hande asuja
ACT 9:16 eto embo amo nau javo humbuto hande ururou embo na taro memenga kesuja eto do ainge amo ano kesuja,” ainge ena.
ACT 9:17 Eto Ananias na Judas ta bande ta pambuto horeto Saul ta hamo ta ingeni tembeto ke einge ena. “Nau namei Saul umo ei ta puvutohoe Bada Iesu na degi nau ta puvija eto amina na ikehei puvuto no tihi ano javotoho ururou Ahihi Otohu na no jo enetasuja.” eto ainge enu
ACT 9:18 umo o ta hamo ain ainge tihi ta venu usasa kogue ereto hetenu bapataito
ACT 9:19 eto indari indie sovera ari umbuna. Eto Saul na iji tuho Damascus jo ta Iesu ta ambotani ga mihahija
ACT 9:20 eto amina sau sau ihiketo Judea embomeni ta God jakeka ari bande tapa amita embomeni ta degi Iesu amo God ta Meni be ra ainge ijie ke hande ere uahija.
ACT 9:21 Eto embo tapa amita ke ingito ke mine ara einge eto ingia, “Embo amo mahu Jerusalem jo ta Iesu ta javo jigama ari embo ta degi sapura uija aravo rete? Eto amina embo andito priest okokose ta degi ikasi puveija amo ke be rete?” ainge
ACT 9:22 eo Saul na ke ngahia na Iesu Keriso puvija amo ke be ra ainge Damascus ta Judea embomeni ta enu ke mine ari inono ae ea.
ACT 9:23 Eto amita ambota Judea embo na Saul taro pehaja uje ea
ACT 9:24 ke avo Saul na ingina eto enana da amita degi pe tapa ai ta Saul tasi iji te mume te simba ere uahera
ACT 9:25 rate Iesu ta ambotani na Saul handija ta juruketo mumete huga otoho ta ikeo oiho ta veto pambuna.
ACT 9:26 Eto Saul na Jerusalem jo ta pambuto Iesu ta ambotani mamahu amiga vahaita asi uje ena rate Saul amo ambotani mane ke eto joru eto uje ae ea.
ACT 9:27 Rate Barnabas na Saul humbuto apostel ta degi pambuto Bada Iesu na Damascus degi ta puvuto Saul ta degi ke enu ingito Damascus jo ta Iesu ta ke sovera eto hande ena avo ambotani ta degi enu ingia
ACT 9:28 eto Saul na ambotani ga mihie Jerusalem jo ta ihiketo pambuto joru ae ke sovera eto Iesu ta javo ta enu ingia
ACT 9:29 eto amina enda Greece ta Judea embomeni ga ke mine ara ijinu Saul taro pehaja uje ea,
ACT 9:30 avo amita namei kamei na ingito Saul humbuto Caesarea ta pambuto ikeo Tarsus ta pambuna.
ACT 9:31 Eto amita ambota enda Judea te Samaria te Galilee te amita ekalesia na iji jamo jamo te kogue mihahera. Eto Ahihi Otohu na enana ta degi ikerekenu sovera ari te tunga javotoho te mihie God joru ue ekalesia peni vahai ea.
ACT 9:32 Eto Peter na enda tapa isa ue pambuto da Lydda ta ekalesia embomeni kesi pambuto
ACT 9:33 popora embo javo Aeneas amo jua tapa 8 herekari ovohina mihahija avo kito,
ACT 9:34 “Aeneas umo Iesu Keriso na ere kojihia ereto no donda sirikejo” ainge enu Aeneas erena.
ACT 9:35 Eto da Lydda te da Sharon te ta embomeni tapa avo kito Iesu Keriso ta ambota ambota ea.
ACT 9:36 Eto ambotani evohu vahai javo Tabitha eto javo nei Dorcas amina da javo Joppa ta mihie donda ambu embo ta degi ari javotoho ue hondate ere uahija,
ACT 9:37 eto evohu amo ambure humbuto pehenu amita hamo egeto bande jo i ta ikeo herekena.
ACT 9:38 Eto Peter amo da Lydda Joppa ta engihita puvuto mihinu Joppa ta ambotani na duru ingito embo heriso ikeo puvuto Peter jage eto, “Umo sau sau hae.” ainge eo
ACT 9:39 Peter na enana ga pambuto bande i ta vihito jo ta horenu evohu dodoru na joeketo si ijie mihimihe donda ambu embo ta degi hande ikasi Dorcas na bo kembari avo ikeo kito
ACT 9:40 Peter na enu arahata pahuo paunge teteri eto pari eto jandireketo evohu pehari amita degi einge ena, “Tabitha umo ere,” ainge enu tihi hiriketo Peter kito ereto arumbenu
ACT 9:41 Peter na ingeni ta jiginu ereto utu na hetenu ambotani te evohu dodoru te avo jage enu jo ta puvuto evohu pehari vasiri te erena avo kia.
ACT 9:42 Eto da Joppa embomeni tapa na duru avo ingito God ke be hotembea.
ACT 9:43 Eto Peter na da Joppa embo o hamo pure ari embo javo Simon amiga iji koso mihahija.
ACT 10:1 Roman embo ta army Captain vahai javo Cornelius amina Caesarea ta amita ae te meniundi te amita bande ta irari embomeni aingeto mihie
ACT 10:2 God jakeka ijie Judea embo donda ambupu avo hondate ue pari ere uahera.
ACT 10:3 Eto iji vahai hure 3 o’ clock God ta Anera na Cornelius ta degi puvuto ehure ta, “Cornelius” ainge enu,
ACT 10:4 Cornelius na kogue joru ue, “Bada umo do ere?” ainge enu Anera na, “No pari te no donda ambu embo ta degi hande ikari te avo God na jene ae ere kogua
ACT 10:5 avo eto no embo ikejo pambuto embo javo Simon Peter umbare.
ACT 10:6 Embo amina Simon o hamo pure ari embo eva tihi ta amiga mihia.” ainge eto
ACT 10:7 Anera pahunu Cornelius na amita pure embo heriso eto amita army pure embo vahai aingeto jage enu puvuo
ACT 10:8 ehure ta do kina avo hihi tirinu ingio ikenu Simon Peter humbasi da Joppa ta pambua.
ACT 10:9 Eto iji nei enana puvutohumihe da Joppa auviho iji orohuta Peter na bande ita vihito pari ere umihe
ACT 10:10 beuje enu indari agihio ehure ta kina
ACT 10:11 amo uhu pe hirikenu bo peni vahai avo pekihi ta jigito humbuto vea.
ACT 10:12 Eto bo amita jo ta o neite neite o koso o te di te tapa kogunu
ACT 10:13 God na, “Peter ereto o teto heveto indijo.” ainge enu
ACT 10:14 Peter na “Bada, na o sasapura, indahu o avo mane indagona,” ainge ena.
ACT 10:15 Eto God na ehako einge ena, “Eto nanena do ano javotoho asuja avo inena sapura ke mane asoa,” ainge
ACT 10:16 eto ke vahai avo iji nei heriso nei vahai enu bo peni amo ehako uhu ta vihito pambuna.
ACT 10:17 Eto Peter na ehure ta do kina avo hotembihe mihinu Cornelius ta embo ikena amo puvuto Simon o hamo pure ari embo amita bande daingere avo eto ingito pambuto bande pe ta heteto,
ACT 10:18 “Simon Peter ei miheite?” ainge eto ingia.
ACT 10:19 Eto Peter hotembihe mihinu God ta Ahihi na puvuto ke einge ena, “Simon, embo 3 na umo kesi puvera,
ACT 10:20 veto kito mane nei do asoa te enana ga pambujo amo nanena ikehene puvera,” ainge enu,
ACT 10:21 Peter na veto embo ta degi, “Ungo do uje eto puvuto na jombure ere ove?” ainge enu
ACT 10:22 embo na, “Dago Captain Cornelius na ikehei puvera. Embo amo embo javotoho eto God joru eaguja avo Judea embomeni na embo avo osa eagora eto Anera Otohu na amita degi puvuto umo amita bande ta pambuto ke ao ingesi ehei puvera,” ainge eo
ACT 10:23 Peter na ingito enu bande ta vihito arumbeo umoro umihe
ACT 10:24 evito iho vujenu Peter te Joppa ekalesia embomeni te enana ga egerembeto puvuto
ACT 10:25 degi ta evito ereto puvutohuo Cornelius na amita javo vahai embomeni te namei kamei te embo simba ara enu vahaita puvuto simba mihio enana puvua. Eto Peter na bande jo ta horenu Cornelius na Peter ta utu ta humotepain ue venu
ACT 10:26 Peter na, “Umo ereto hete, na embo tehora,” ainge enu ereto hetena,
ACT 10:27 eto Peter ga ke mine ara ijie jo ta horeto embo isapamane vahaita arumbeto mihia avo kito
ACT 10:28 enana ta degi ke einge ena, “Ungo kiagova amo dago Judea embomeni ta ke pepeni amo enda nei embo ga mane umoro eagora avo ungo kiarira rate God na embo tongopa te sapura ke mane aisora rate embo tapa inono inono ara ehei ingena
ACT 10:29 avoeto na jage eheve ke nei do ae teho tambueto puvena rate ungo do eto na jage eheve puvena amita ke be avo ingesi uje ere ona.” ainge enu,
ACT 10:30 Cornelius na ke mine einge ena, “Iji 4 amita kihi ta iji 3 o'clock hurete nau bande ta pari ue mihene embo bo usasa te amina nau tihi ta heteto
ACT 10:31 ke einge ehija, ‘Cornelius, God na no pari ere ingihia eto donda ambu embopo ta degi hondate ere oa avo ere kogua
ACT 10:32 eto embo Simon Peter da Joppa embo Simon o hamo pure ari embo eva engihita iraguja amiga mihia avo jage ejo puvuroi.’ ainge Anera na ehei
ACT 10:33 ingito embo ikehene pambuto umo ehere ingito sau sau nau degi ta puvea amo javotohora. Avo eto dago jo vahai eto God ta tihita puvuto mihera rate God na no degi ta ke do au ingito ejo ingore.”
ACT 10:34 Ainge enu Peter na ihiketo amita ke ena, “Na ere kogona amo Judea embomeni vahai avo pere mane God na osa eaguja
ACT 10:35 rate enda tapa ta embomeni vahai vahai na God joru eto humotepain ururoro God na kito osa asuja.
ACT 10:36 Eto Iesu Keriso, embo tapa ta Bada ta degi pekari te tunga humbari mihia amita ke avo God na Judea embomeni ta degi ikihija.
ACT 10:37 Eto ke amita ikari iji te John na Galilee enda ta ihiketo embo bapataito ari ke hande uija eto amita ambota Israel enda ta ari tapa do uija avo ungo kiarira.
ACT 10:38 Eto God na Iesu Nazareth embo amita degi Ahihi Otohu te sovera te ikihei popora embo kojihe Satan ta sovera na jo andirari avo hondate uija amita be amo God amiga mihia avo eto.
ACT 10:39 Eto amina Judea embomeni ta enda ta eto Jerusalem jo ta do uija tapa amo dago kiarira. Eto enanana ji atahu ta tehere pehena
ACT 10:40 rate iji 3 irae ehei God na ehei vasiri te erihija
ACT 10:41 eto embomeni tapa na Iesu kiae rate God na embo ke hande ara sirikihaja amina koguera. Eto amiga indie mihere
ACT 10:42 dago do asora amina ke tapa ehei ingihera amo embomeni tapa ta degi ke hande asora amo God na Iesu ta degi embo pehari te vasiri te amita ari siriketo hajire ikau kesora
ACT 10:43 rate peroveta na ke kajena amo embo amuna Iesu be hotembeto amita jo aherekasuja amita ari sasapura Iesu na hotembeto toasuja.”
ACT 10:44 Ke ainge Peter na ijinu ingito embo tapa ta degi Ahihi Otohu na puvuna.
ACT 10:45 Eto God na amita Ahihi Otohu enda nei embomeni ta ikenu ke neite neite ijie God jakeka ijio Judea embomeni Peter ga puvua amina vani vini ea. Eto Peter na einge ena,
ACT 10:47 “Embo emo umo na bapataito asora amo amuna haekau? Enana dago ainge dombo Ahihi Otohu umbera.”
ACT 10:48 ainge eto amina Iesu Keriso ta javo ta bapataito ea, eto Peter na enana ga iji isapa umoro ena.
ACT 11:1 Eto enda nei embomeni na God ta ke avo ingito ke be hotembea avo apostles te ambotani te Judea enda ta mihie duru ingia.
ACT 11:2 Eto iji nei Peter na Jerusalem da ta pambunu enana na Peter ta degi ke ngahia na eto ingia,
ACT 11:3 “Umo do eto Judea embomeni ta ke pepeni poeketo enda nei embo ta bande ta pambuto enana ga inde?” ainge eo
ACT 11:4 Peter na tapa do ena avo harikena.
ACT 11:5 “Na da Joppa ta mihie pari ue ehure ta einge kogona. Uhu pe hirikehei bo peni vahai avo pekihi ta jigito humbuto nau degi ta vovuoi koguena,
ACT 11:6 bo amita jo ta o nei te nei te o koso o te di te tapa koguena
ACT 11:7 amo God na nau degi ta ke einge ehei ingihana, ‘Peter, ereto o teto heveto indijo’ ainge ehei
ACT 11:8 mine einge ijiena, ‘Bada, na o sapura indahu o amo te mane indagona amo dago ta ke pepeni mihia avo eto mane indagora.’ ainge ehene
ACT 11:9 ke uhu ta eto ehako einge ijija. ‘Eto God na do au javotoho asuja avo inena sapura ke mane asoa’ ainge ijija
ACT 11:10 eto ke vahai avo iji nei heriso nei vahai eto bo peni amo ehako uhu ta vihito pahunu
ACT 11:11 embo 3 ainge Caesarea ta eto puvuto nau evari bande pe ta heteto na jombure uo
ACT 11:12 Ahihi Otohu na ‘Do mane hotembasoa te tehora enana ga pambasoa’ ainge ijija. Eto namei kamei 6 ainge namote pambuto Captain Cornelius ta bande jo ta horihare
ACT 11:13 Anera vahai na Cornelius ta degi ke do ijija avo hihi tirei ingihera amo einge ijija, ‘Da Joppa ta ke ikejo pambau Simon Peter puvuto
ACT 11:14 umote no embomeni te ke au ingito amita ke agi ururovo ungo orekasuja.’ ainge Anera na ijija avo tirei ingihana.
ACT 11:15 Eto na ihiketo ke ijio Ahihi Otohu na dago Judea embomeni Iesu ambo ambo ere uahera ta degi puvuna ainge dombo enana ta degi Ahihi Otohu ihiketo puvuhija.
ACT 11:16 Eto avo kito Bada Iesu ta ke avo hotembihena eto John na embo umo na bapataito ena rate dago na Ahihi Otohu na bapataito asora avo hotembihena
ACT 11:17 eto dago Iesu Keriso ke be hotembeto amita Ahihi Otohu hande eto humbuhora eto enda nei embomeni na eha ere humbuhora avo eto na God ta ari avo haekari inono re te?” ainge enu
ACT 11:18 embomeni na ke avo ingito ke nei ae God jakeka ijie ke mine ara einge ea, “Aravora amo ke be eto God na eha enda nei embomeni ta degi hande ere ua amo enana ta ari sasapura avo eto ajato ijiroro God na enana ta irari datoho ikasuja.”
ACT 11:19 Eto Steven teo pehena eto Judea embomeni na Iesu ta ambotani ta degi ari sasapura neite neite eo osaga kito enda nei nei Phonecia ta Cyprus ta Antioch ta pambuto Judea embomeni ta perekari Iesu ta ke hande ere uahera.
ACT 11:20 Rate ambotani nei da Cyprus embo te Cyrene embo te aingeto da Antioch ta pambuto Bada Iesu ta duru javotoho avo Greek embomeni ta degi hande ere uahera.
ACT 11:21 Eto enana Bada ta sovera na ke hande eo enda nei embomeni isapamane jo haperekenu Iesu ambo ambo ea.
ACT 11:22 Eto Jerusalem ta ekalesia embomeni na duru avo ingito embo Barnabas be kioja ikeo Antioch ta pambuna.
ACT 11:23 Eto pambuto God na enda nei embomeni ta degi ari javotoho ena avo kina.
ACT 11:24 Eto Barnabas amo embo javotoho Ahihi Otohu na enetari eto God ta sovera humbari embo avoeto amina kito tunga javotoho eto embomeni na jo tapa na God ke be eto hotembeto iresora avo oje kahena. Eto embo isapamane na puvuto ambotani ga vahaita ea.
ACT 11:25 Eto Barnabas na Saul jombure ue Saul tohota da Tarsus ai ta mihinu
ACT 11:26 pambuto Saul hambuto humbuto ehako Antioch ta puvuna. Eto enana heriso iji koso be jua vahai amita jo ta embomeni isapamane Antioch ta ekalesia ahepoekea. Eto Antioch ta embomeni na Iesu ta ambotani ta javo ‘Christian’ ikea.
ACT 11:27 Eto amita ijite peroveta na Jerusalem ta eto Antioch ta puvua.
ACT 11:28 Eto peroveta vahai javo Agabus ta degi Ahihi Otohu na ke ikenu ereto enda tapa ta beuje iji peni vahai be puvuresuja avo ereto harikena. Eto Rome ta King Claudius ta iji te beuje avo puvuna
ACT 11:29 eto Antioch ta ekalesia embomeni na Judea ta Christian embomeni hondate eto hande ikasi uje eo embo vahai vahai na donda heka humbuto nei peni ikena nei isapa ikena.
ACT 11:30 Eto tapa humbuto ikeo Paul te Barnabas te aingeto hande avo humbuto pambuto Jerusalem ekalesia ta okokose ta ikea.
ACT 12:1 Eto iji amite King Herod nei na ekalesia embo nei nei ta degi sapura asi humbuto tipura ta ikena.
ACT 12:2 Eto apostel vahai John ta namei James avo asivo na tunga tiukenu
ACT 12:3 Judea embomeni kito tunga javotoho uo Herod na kito Peter andito humbuto tipura ta ikena
ACT 12:4 amita iji te Judea embomeni na bread tevokoari na pondo ea pondo amita be amo sivo ikae avo eto bread pajirae amina pondo ere uahera eto Peter tipura ta iketo tipura simba ari embo tapa 16 ainge ikenu iji vahai vahai embo 4 simba ere uahera amita be amo Peter arahata pambaguja eto pondo javo ‘Pass-over’ avo indito Peter humbuto embo tapa ta tihi ta pehumbasi ena.
ACT 12:5 Eto ekalesia embo tapa na Peter tipura ta mihina avo eto pari peni vahai God ta degi ikea.
ACT 12:6 Eto Peter iho vujau court asuja amita mume amina tipura simba ari embo heriso amiga arumbeto ingeni nei amo embo amita ingeni ta punduna eto ingeni nei amo embo nei ta ingeni ta punduna aingeto Peter orohuta evinu eto simba ari embo nei heriso amo pe araha ta heteto mihio
ACT 12:7 mume orohuta God ta Anera usasa te tapa orohuta irerembeto puvuto Peter ta koho ta jigito jahevenu erenu,
ACT 12:8 “Umo sau sau ereto hete,” ainge enu amita ingeni ta pundurari amo oenga houketo venu Anera na, “No pupuri tigito utu goru asuketo no bo na pohuketo nau ambota hae,” ainge enu
ACT 12:9 Peter na Anera ta ke agi eto ambo ambo ena, rate ke avo be mane ehure ari ke avo hotembena.
ACT 12:10 Eto simba ari embo nei serikea pambuto nei serikea pahuo huga bokiri peni amo oenga hirikenu arahata pambua. Eto pambuto degi tutumota Anera saivenu
ACT 12:11 Peter na ke be kito, “Na ehure mane God na amita Anera ikehei puvuto Herod ta ingeni ta na humbija amo Judea embomeni ta uje avo God na haekehija,”
ACT 12:12 ainge eto pambuto John Mark amita e Mary ta bande ta ekalesia embomeni peni vahai be Peter avoembo pari ue mihio
ACT 12:13 peheto kito huga pe ta vahihiri unu bande ta pure ari kakara javo Rhoda amina puvuto
ACT 12:14 Peter ta ke hajire ingito tunga javotoho eto huga pe hirikae toto egerembeto huheveto pambuto embomeni ta degi einge ena, “Peter huga pe ta heteto mihia,” ainge enu
ACT 12:15 embomeni na, “Umo kava kakarara” ainge eo kakara na, “Na ke be erena” ainge enu embomeni na, “Amo Anera Peter ta tombu vahai avo puvuto miheite?” ainge ijio
ACT 12:16 Peter na vahihiri kaiketo unu pambuto pe hiriketo Peter kito vani vini eto ke taimbea.
ACT 12:17 Eto Peter na embo tapa ke ambu ara ingeni na ahe ahe eto Bada na Peter tipura ta daingeto umbuna amita hihi avo tirinu irae enu ke einge ena, “Iesu ta namei James te ungotenau namei kamei ta degi ke evi evu ingore,” ainge eto degi nei ta pambuna.
ACT 12:18 Eto iho vujenu tipura simba ari embo na kiae eto ke peni vahai be ea. Eto Herod na amita pure embomeni ikenu degi tapa jombure ea rate hambae ea,
ACT 12:19 eto tipura simba ari embopo ganoka ena rate ke mine ae eo Herod na enu tunga tiukea. Ainge eto Herod na da Judea toto Caesarea ta pambuto mihie
ACT 12:20 da Tyre te Sidon te ta embomeni ta degi tumo ere uahija. Eto Tyre te Sidon ta embomeni na vahaita puvuto Herod ta bande simba ari embo javo Blastus amita degi ke eo ingito osaga kito tapa Herod ta degi pambuto peka humbari ta ke avo Blastus na Herod ta degi ena amita be amo Tyre te Sidon embomeni na enana ta indari Herod ta enda ta eto ere umbuhahera.
ACT 12:21 Eto Herod na ke ari iji ikenu puvunu amita bo asukari javotoho humbuto asuketo amita avo arumba peni ai ta arumbeto embo ta degi ke ijinu
ACT 12:22 embomeni na jajage eto, “Amo embo na ae rate God na eria,” ainge ea. Eto Herod na, “Na God ke avojo,” ainge ae avoeto God ke eo ingito osa enu
ACT 12:23 God ta Anera na enu hamo ta kakesa na pagenu pehena.
ACT 12:24 Eto God ta ke na enda neita neita ikeo pambuna.
ACT 12:25 Eto Barnabas te Saul te Jerusalem ta pambuto Antioch ekalesia ta hande iketo John Mark humbuto egerembeto puvua.
ACT 13:1 Eto da Antioch ta ekalesia ta peroveta te ahe poekari embo te pure ere uahera enana ta javo amo erevira. Barnabas te Simeon amo mume embo te Lucius amo da Cyrene embo te Saul te Manaen amo Herod ta e mamo na unduo Herod ga pajina.
ACT 13:2 Eto enana God ta pure ue indari iji isapa ajirekeo God ta Ahihi Otohu na da Antioch ta ekalesia ta peroveta te ahe poekari embo te ta degi einge ena, “Barnabas te Saul te nau pure asora oenga ikevu,” ainge enu
ACT 13:3 ingito indari indae ingeni Barnabas te Saul te ta siro ta tetembeto pari eto ikeo pambua.
ACT 13:4 Eto Barnabas te Saul te avo Ahihi Otohu na ikenu pambuto da Seleucia ai e nga humbuto tiuka javo Cyprus ta pambua.
ACT 13:5 Eto Cyprus ta da peni javo Salamis ta puvuto Judea embomeni ta God jakeka ari bande tapa ta God ta ke hande ea. Eto pure amo John Mark na enana hondate asi pambuna.
ACT 13:6 Eto tiuka Cyprus amita da tapa ta ke ijie pambuto da Paphos ta puvua ai embo javo Bar-Iesu amo Judea embomeni ta peroveta ke ijie ke gamo sokova ari ere uahija avo hambua.
ACT 13:7 Eto Bar-Iesu amina tiuka ta governor javo Sergius Paulus amo siro embo amiga mihahija. Eto iji vahai Sergius Paulus na God te ke ingesi uje eto Barnabas te Saul te aingeto jage enu
ACT 13:8 puvuto ke ijio ke gamo embo amita javo Greek ke na eagora amo Elymas amina enana ta degi ngahia eto governor ta degi Iesu ta ke avo ke be manera ainge ena
ACT 13:9 rate Saul amita javo nei Paul na ke gamo embo tihi na jaseto kito Ahihi Otohu ta sovera ari humbuto ke gamo embo ta degi ke ngahia eto einge ena,
ACT 13:10 “Umo Satan ta meni, ari sasapura na enetari eto iji tapa God ta ke be avo humbuto ojiketo ke sokova na eagoa.
ACT 13:11 Avo God ta ingeni na no hamo ta ikehei erevovua eto no tihi vahaikau iji isapa eto usasa mane kesoa.” ainge enu johi jo ta embo kiarako enu pambuto amita tihi ta mume sihukihinu aho aho ue embo amuna amita ingeni ta humbuto gorukasuja avo jombure ena.
ACT 13:12 Eto governor Sergius Paulus na ari tapa kito ahe poekea avo ingito ke javotoho ra ijinu jo haperekenu God ke be ena.
ACT 13:13 Eto Paul te amita namei kamei te Paphos toto e nga humbuto eva oiho ai da Perga enda Pamphylia ta puvua. Rate John Mark na enana toto Jerusalem ta pambuna.
ACT 13:14 Eto enana Pisidia Province ta da Antioch ta pambuto mihio Giu ari iji puvunu Judea embomeni ta God jakeka ari bande ai horeto arumbeo
ACT 13:15 Judea embo ta ahe poekari embo na God ta ke pepeni te peroveta ta ke te ehekenu ingio Judea embo peni na ke einge enana puvua amita degi ikena, “Namei kamei, ungota ke embo ta sovera humbari avo ungota degi miheite avo evujo ingore.” ainge enu
ACT 13:16 Paul na ereto embomeni ke jamo ara ingeni na ahe ahe eto ke einge ena, “Israel embomeni te enda nei embomeni ungo God jakeka eagova avo oje nau degi ta iketo na ke asona avo ingivujo.
ACT 13:17 Ungotena Israel embomeni ta God na ungotenau ohihi siriketo ikenu Egypt enda ta mihie meni ikerekeo sirerembeto peni vahai ena. Eto God na amita sovera na Egypt enda ta eto humbuto
ACT 13:18 degi ojagatambuta jua tapa 40 amita jo ta enana ta ari sapura kina rate embomeni toae simba ere uahija.
ACT 13:19 Eto God na enda Canaan ai ta isoro eto enda tapa 7 amita embomeni avo irae teto enana ta enda humbuto amita embomeni ta ikenu hotea
ACT 13:20 avo jua tapa 450 amita jo ta ere uahija. Eto iji amikote eto pambuto peroveta Samuel ta iji te God na embomeni ta isoro kihi humbari embopo ikena
ACT 13:21 rate embomeni na King humbasi uje eto God ta degi eo Benjamin ta jeka hoka embo Kish ta meni Saul avo ikena. Eto amina King eto jua tapa 40 amita jo ta embo tihi ere jigihahija,
ACT 13:22 rate God na Saul avo toto David avo King iketo ke einge ena, ‘Eto embo Jesse ta meni David amo nau tunga humbari meni avo hambena avo eto na uje do asona avo asuja,’ ainge God na David kito ena.
ACT 13:23 Eto God na amita ke mahu ikena avoeto amina David ta jeka hoka ta eto Israel ta orekari embo humbuto ikihija. Embo amo Iesu ra.
ACT 13:24 Rate Iesu puvurae amita kihi ta John na puvuto Israel embomeni ari sasapura avo toto jo haperekau bapataito ara puvuna.
ACT 13:25 Eto John pure irae ari iji auvihinu ke einge ena, ‘Ungo hotembiheva na amunure, na embo ungo na simba ere ova avo manera rate embo amo ambota ere puvutuhua amo na javotohorami aruse eto amita utu goru houkano.’ ainge ena.
ACT 13:26 Avo eto nau namei kamei ungotena Abraham ta meniundi eto enda nei embopo God joru eagova avo ungotenau degi ta orekari ke puvija
ACT 13:27 amo Jerusalem embomeni te enana ta tihi jigari embo te aingeto Iesu avo enana ta orekari embo mane embo nei ke eto humbuto pehumba eto teo pehenu peroveta na ke mahu kajari avo giu ari iji puvuoi kaiketo ehekagora avo enana kiae uera. Eto Iesu ta sapura deire avo hambae eto sio Pilate na tau pehaja penunu ea.
ACT 13:28 Eto Iesu ta degi tapa do asora avo peroveta na kajea avoeto uera.
ACT 13:29 Eto Iesu ta ambotani na amita hamo ji atahu ta humbuto panga ho ta ikea.
ACT 13:30 Rate God na enu vasiri te ereto
ACT 13:31 iji nei nei embopo amiga Galilee ta eto Jerusalem ta pambua enana ta degi pambunu kia. Eto enana na ungotenau ke hande ere ora.
ACT 13:32 Eto ungota degi ke javotoho avo humbuto ere hora. Ungotenau Ohihi ta degi God na ke kihi ikena
ACT 13:33 rate ungotena enana ta meniundi susu be ta iji te God na Iesu embo ta King ikena avo eto ungotena God ta ke be eha ere kogora amo David na God ta ke avo haveni na einge ena, ‘Umo nau Meni eto na no Mama eha ehena,’ ainge ena.
ACT 13:34 Eto God na enu vasiri te ereto ehako mane sari aisuja avo einge kajena, ‘Na ari Otohu te javotoho te David ta ikana ena avo eha no ikasona,’ ainge eto
ACT 13:35 David na ke nei kajena amo, ‘No Otohu ari embo ao mane sari aisuja.’
ACT 13:36 amita be amo David na amita iji te God ta pure tapa avo enu irae enu pehenu amita ohihi kovari degi vahai ai ta koveo sari ena.
ACT 13:37 Rate God na embo enu vasiri te erena embo amita hamo sari ae
ACT 13:38 avo eto nau namei kamei ke erena erevi be ingivujo. Ungota ari sasapura hotembeto toari amo Bada Iesu ta eto puvaguja. Ungo kiari amo embo na ungotena Judea embomeni ta ke pepeni Moses ta eto puvurari avo jigama aisuja amo God na embo amita ari sasapura mane hotembeto toasuja amo embo na tapa agi ari inono ae
ACT 13:39 avo eto, rate embo amuna Iesu amo ke be hotembasuja amita ari sasapura ta hajire mane kesuja rate God na embo javotoho ke asuja.
ACT 13:40 Avo eto be kon kon eto kogue eto peroveta na do kajea avo ungota degi ta mane puvuresuja.
ACT 13:41 Eto peroveta na einge ea ‘Na ungo ta iji te do asona avo embo na au ingito ke be mane asora. Avoeto ungo ke be ingito uje ae eagova embomeni jireki poeki eto kito vani vani eto sari evujo.’ ainge peroveta na kajea.”
ACT 13:42 Eto Paul ta ke irae enu Barnabas te Paul te arahata pahuo embomeni na enana ta degi puvuto giu ari iji nei na ke avo ehako aro ingesi ke ea.
ACT 13:43 Eto embomeni sisiketo irae pahuo Judea embomeni nei uhoho te enda nei embo uhoho Judea ga kaju ari amina Paul te Barnabas te ambo ambo uo Paul te Barnabas te na, “God na amita Meni ta ke embo ta degi hande ikasi ere ua avo mane toasova te umbuvujo,” ke ainge ea.
ACT 13:44 Eto Giu ari iji puvunu God ta ke ingesi da embomeni tapa vahaita horukea.
ACT 13:45 Eto horukari avo Judea embomeni na kito jo ngahia enu uje ae eto Paul ta degi hini kambari ke ijie Paul ta ke ena avo ke be mane sokova ke eo
ACT 13:46 Paul te Barnabas te na ke sovera eto einge ea, “Ke javotoho erevi God na ungo Judea embomeni ta degi kihi aro ingova uje ere ua rate ungo na ke sokova ke ereva avoeto ungota ujekari na ungo datoho irari humbari haiteko mane avo eto dago enda nei embomeni ta pambuto ke hande asora
ACT 13:47 amo dago Bada na einge ara ijija. ‘na ungo enda nei embomeni ta Usasa ikehena eto orekari avo ungo na enda tapa ta ikasova.’” ainge enu
ACT 13:48 enda nei embomeni na Paul ta ke ingito tunga javotoho eto tapa amuna God na mahu sirikena amina God ta ke be hotembeto datoho irari umbuna.
ACT 13:49 Eto ainge dombo God ta ke na enda amo enete ena.
ACT 13:50 Rate Judea embo na enda nei evohu okokose avo Judea ga kaju ea te da ta embo okokose tapa jo kajeo haperekenu Paul te Barnabas te ohimbeo
ACT 13:51 utu endasa jaevekeo vovunu da nei javo Iconium ta pambua.
ACT 13:52 Eto Iesu ta ambotani tapa da Antioch ta mihahera amo Ahihi Otohu te tunga javotoho ari te na jo enetena.
ACT 14:1 Eto mahu ea ainge dombo Paul te Barnabas te na da Iconium ta Judea embomeni ta giu ari bande ta horeto ke hande eo Judea embomeni te enda nei embomeni te aingeto ke avo ingito ke be hotembeto ambo ambo ea.
ACT 14:2 Rate Judea embo nei nei na ke avo uje ae eto da nei embo ta jo kajeo ereto ambotani ta degi tumo ea.
ACT 14:3 Eto ambotani ai iji koso mihie Bada ta ke ngahia na hande ea eto God na amita Meni na embo orekasuja amita ke amo God ta degi ta eto puvurari avo kiora ambotani ta degi God na sovera ikenu ari neite neite eo kia.
ACT 14:4 Eto da embomeni amo kaheketo Judea embomeni tunga umbua eto nei kaheketo ambotani tunga umbua
ACT 14:5 avo eto enda nei embomeni te Judea embomeni te enana ta tihi jigari embo te na ambotani ta degi tumo eto koro na taro pehaja ari ke eo
ACT 14:6 ingito Paul te Barnabas te na da javo Lystra te Derbe te amita enda Lycaonia ta pambuto
ACT 14:7 God ta ke hande ea.
ACT 14:8 Eto da Lystra ta embo amo e ta hini ta eto popora ari vena avo eto isa ari kiae herekari pere
ACT 14:9 ovohina mihie Paul na embomeni ta degi ke ijinu ingina. Eto Paul na embo avo God ke be ari embo avoeto kojari inono kito embo avo kon eto kito
ACT 14:10 gagaha eto ke einge ena, “Umo ereto utu na hete,” ainge enu ereto joro ue isa ena.
ACT 14:11 Eto embomeni na Paul na do ena avo da Lycaonia ta ke na einge ea, “Ahihi na embo ta hamo asuketo uhu ta eto irerembeto puvera,” ke ainge
ACT 14:12 eto Barnabas amo javo Zeus ikea eto Paul amo ke ari embo avo eto javo Hermes ikea. (Eto Lycaonia embomeni ta God ingeni na ari amo javo Zeus te Hermes te avo ikea. Eto Hermes amo ke ari embo avo ea.)
ACT 14:13 eto ahihi javo Zeus ta priest okose na Zeus ta pene ikari bande da engihi ai ta o cow siaja heriso te ji vuji te aingeto humbuto da pe ta puvuto hetena, amita be amo amite amita embomeni tapa na ambotani heriso jakeka ue pene ikasi o teto puvua.
ACT 14:14 Eto Paul te Barnabas te duru avo ingito enana ta bo jigito oseseketo embo ta ugoro ta gagaha ijie pambuto ke einge ea,
ACT 14:15 “Embo tapa ungo do ere ove, dago ungo ainge dombo embora, eto dago puvera amita be amo God ta ke javotoho ungota degi ta aro donda ari sasapura erevi toto vasiri te God ta degi puvuresova eto uhu te eva te enda ta donda tapa emo God na ari ra.
ACT 14:16 Eto iji mahu embomeni na enana ta uje na degi oenga oenga ere pambuhahera avo God na haekae
ACT 14:17 rate God ke be te mihia eto embomeni na kiora hande jajavotoho ikerekeuja amo erevira, uhu ta ga iji inono ta veaguja eto donda ve eraguja eto embomeni na humbuto indito tunga javotoho eagora.”
ACT 14:18 ke ainge eo embomeni na pene ikasi ea amo toari uje ae rate toa.
ACT 14:19 Eto Judea embomeni da Antioch ta eto da Iconium ta eto puvuto embomeni ta degi ke eo jo haperekenu koro na humbuto Paul teo pehena avo be pehari ke eto jigito goruketo humbuto pambuto da sahu ta ikea.
ACT 14:20 Rate ambotani nei nei na joeketo mihio ereto da asa ai evito Barnabas ga da Derbe ta pambuna.
ACT 14:21 Eto Paul te Barnabas te na God ta ke javotoho da Derbe ta hande eo ingito embomeni isapamane ke be ingito ambotani ea. Eto egerembeto da Lystra eto da Iconium eto da Antioch, Pisidia ta pahue
ACT 14:22 ambotani ehaha ta sovera ari iketo enana Iesu ta ke be humota ara ke einge ea, “Ungotena osaga neite neite kogue mihima God ta degi hotari humbuto amita tombu ta iresora eto amina ungotenau King asuja.” ainge ijie ahe ere poekihahera.
ACT 14:23 Eto Paul te Barnabas te na ekalesia vahai vahai ta tihi jigari embo humbuto ikerekea. Eto God ta degi pari ue indari ajireketo Iesu ta ke be ari embomeni humbuto Bada na simba aja amita ingeni ta iketo toa.
ACT 14:24 Eto enda Pisidia toto enda Pamphilia ta pambuto
ACT 14:25 da Perga ai God ta ke hande eto
ACT 14:26 da Attalia ta pambuto e nga humbuto da Antioch enda Syria ai ta pambua.
ACT 14:27 Amo ai da Antioch ekalesia embomeni na Paul te Barnabas te God ta pure javotoho ara pari eto God ta ingeni ta iketo toto enda nei ta pambua avoeto enana Antioch ta ehako puvuto ekalesia embomeni jage eo vahai ta puvuo God na tapa do ena eto enda nei embomeni na God ta ke javotoho ingito ke be ijio God na embomeni avo amita toho be umbuna avo hihi tirio ingia.
ACT 14:28 Eto ai ambotani nei ga iji koso be mihahera.
ACT 15:1 Eto embo nei Judea ta eto Antioch ta puvuto namei kamei ahe poekihe ke einge ea, “Eto enda nei embomeni na Moses ta ke pepeni mahu kajari mihia avo ambo ambo eto hamo kakamba asora. Eto kakamba ae amo God na enana mane orekasuja,” ainge eo
ACT 15:2 Paul te Barnabas te tumo eto enana ga jujune ke peni vahai mine ara ea. Avoeto Antioch ta ekalesia na Paul te Barnabas te embo nei uhoho te aingeto da Jerusalem ta ekalesia ta embo okokose te apostle te na ke do aro avo kesi ikeo pambua.
ACT 15:3 Eto ekalesia na Jerusalem degi ta pekasi humbuto pambuto peketo toto Barnabas te Paul te pambuhumihe da Phoenicia te Samaria te amita ekalesia ta degi ke asi hetea. Eto heteto enda nei embomeni God ta ke ingito jo haperekenu God ta ke ambo ambo ea avo eo ingito tunga javotoho ea.
ACT 15:4 Eto toto Jerusalem ta pahuo apostels te ekalesia ta okokose te na kito tunga javotoho uo Paul te Barnabas te na God na enda nei ta do ena avo hihi tirio ingia.
ACT 15:5 Eto ambotani nei uhoho javo Pharisees na ke avo ingito ereto ke mine einge ea, “Enana enda nei embomeni na hamo kakamba eto Moses ta ke pepeni be avo agi ara aro ingesora.” Ainge eo
ACT 15:6 apostles te embo okokose te na ke peni avo vahaita horukihio
ACT 15:7 iji koso be ke kaseo Peter na ereto ke einge ena, “Nau namei kamei ungo kiarira God na na kihi enda nei embomeni ta degi amita ke javotoho hande ana ungota degi ta eto humbuto ikena avo eto ene ingihe ihiketo ambo ambo ea.
ACT 15:8 Eto God embo ta jo kiari embo na enda nei embo amo javotoho kito amita degi hande eto Ahihi Otohu ikena dago ainge. Eto dago Judea embomeni na kiora ainge ena. Avoeto God na enda nei embo ere uhua avo dago ere kogora eto God na enana nei dago nei ke ae
ACT 15:9 rate enana God ta ke amo ke be hotembihera avo eto enana ta jo egehei javotoho ehera God na enda nei embo hamo kakamba ara ke aera
ACT 15:10 avo eto ungo do eto God ta degi eto kiari ikihe ambotani ehaha ta degi hamo bouka ere ikeheve? Eto bouka amo dagota Ohihi humbari inono ae eto dago humbari inono ae.
ACT 15:11 be kivujo, dago enana ainge God ta ke avo be hotembihe Bada Iesu ta hande na orekasuja,”
ACT 15:12 ainge enu embomeni na ingito ke jamo eto oje jevito Barnabas te Paul te ta ke ingia. Eto God na ari sovera neite neite enda nei embomeni na kito ke be ara Paul te Barnabas te ta ingeni na ena avo ke eo ingia.
ACT 15:13 Eto ke irae enu James na ereto ke einge ena, “Nau namei kamei nau ke ingivu,
ACT 15:14 eto embo Simon Peter na ke ehei ingera amo God na enda nei embomeni amita toho aja unduresi ihiketo umbuna avo ehei ingera
ACT 15:15 ari aingeko amo peroveta na God ta ke kajari avo einge mihia.
ACT 15:16 ‘Bada God na einge erea, Na amita ambota ehako egerembeto puvuto David ta bande aimbeto veto sio sao ari avo puvuto siriketo ehako gerikasona.
ACT 15:17 Eto embo nei na na jombure aisora amo enda nei embo avo jage ano puvuto toho nau asora.’
ACT 15:18 Ainge Bada God na eria amo mahu be ingito kajea.”
ACT 15:19 eto James na ke nei einge ena, “Hotembari nau amo enda nei embo God ta degi ere hora avo ungote bouka mane ikasora
ACT 15:20 te enana ta degi ahari kajaro kesora amo indari enda ta God ingeni na eto pene ikari amo sapura avo eto mane indesora. Eto nei amo embo na mane tiha asora. Nei amo o orosa te mane indesora. Eto nei amo orosa be avo mane indesora.
ACT 15:21 Eto amita be amo iji koso be Moses ta ke pepeni avo giu ari iji te enda tapa ta Judea embomeni ta God jakeka ari bande ta ehekeore ingiora eto Moses ta ke amo da tapa ta eagore ingiora.” ainge James na ena.
ACT 15:22 Eto apostles te embo okokose te ekalesia embomeni tapa na jo vahai eto embo siriketo Paul te Barnabas te ga da Antioch ta pambara ikea. Eto enana ta javo amo Judas Barsabbas te Silas te amo ambotani ta embo okokose heriso avo siriketo umbua.
ACT 15:23 Eto ekalesia ta ahari kaeto ikeo humbuto pambua amo erevira, “Ungo enda nei embomeni da Antioch te Syria te Cilicia te amita jo ta miheva avo dago apostle te embo okokose te eto ungota namei kamei na ere pekihera.
ACT 15:24 Eto dago duru ingera amo dagota embomeni na ungota degi pambuto bouka peni vahai ikehere osaga ere kogova amo dago na ae rate enana ta uje na ehera,
ACT 15:25 avoeto dago vahaita horuketo embo ungota degi ikaro pambara siriketo umbera.
ACT 15:26 Eto umbera amo ungotenau tunga humbari embo Paul te Barnabas te amo ungotenau Bada Iesu Keriso ta ke agi ue sari ari joru ae eagora amiga pambasora
ACT 15:27 avo eto embo Judas te Silas te ikaro pambuto ungota degi ahari ta ke ere kajihera amita ke inono avo ungota degi aro ingesova.
ACT 15:28 Eto ke emo Ahihi Otohu te dago te jo vahai eto ungota degi ke pepeni bouka mane ikasora te ke erevi aro ingito agi ava erera.
ACT 15:29 Indari enda ta God ingeni na eto pene ikari mane indesova, nei orosa mane indesova nei o orosa te mane indesova eto nei tiha mane asova. Eto ungo ke erevi agi ue irivujo, orere re.”
ACT 15:30 Eto Jerusalem ta ekalesia na duru ikari embo ikeo da Antioch ta pambuto ambotani eo vahaita puvuo ahari ikeo
ACT 15:31 humbuto eheketo ke javotoho kito tunga javotoho ea.
ACT 15:32 Eto Judas te Silas te amo peroveta avoeto namei kamei ta degi iji koso ahe poekeo hamo ngahia te sovera ari umbua.
ACT 15:33 Eto umbuhe mihahera namei kamei na Judas te Silas te peketo ikeo da tohota ta egerembeto pambua.
ACT 15:35 Eto Paul te Barnabas te da Antioch ta iji koso mihie embo isapamane ga God ta ke ahe ere poekihahera.
ACT 15:36 Eto iji nei Paul na Barnabas ta degi ke einge ena, “Ungote da mahu pambuto God ta ke hande uera avo namei kamei daingeto mihere avo ungote pambuto kesora,” ainge enu
ACT 15:37 Barnabas na John Mark humbuto pambasi uje ena,
ACT 15:38 rate Paul na John Mark humbuto pambari uje ae ena amita be amo enana ga mahu pambuna amo da tapa ta pambari uje ae eto da Pamphilia ta eto toto egerembena avo eto uje ae enu
ACT 15:39 Barnabas te Paul te jujune eto degi oenga pambua. Eto Barnabas na Mark ga e nga ta tiuka Cyprus ta pambua.
ACT 15:40 Eto Paul na Silas humbuto pambasi unu amita namei kamei na Bada na simba ururou pambara pari eo pambua.
ACT 15:41 Eto amina Syria te Celicia degi ta pambuto ekalesia ta sovera ari ikerekenu umbua.
ACT 16:1 Eto ainge dombo Paul na da Derbe ta eto da Lystra ta pambuna eto ambotani vahai javo Timothy ai mihahija. Eto Timothy ta e amo Judea evohu rate Iesu ta ke ambo ambo ere uahija eto Timothy ta mamo amo enda Greek embo.
ACT 16:2 Eto da Lystra te da Iconium te amita namei kamei na Timothy osa ue embo javotoho ke ere ijiahera
ACT 16:3 avo eto Paul na Timothy humbuto pambasi uje eto amita hamo kakamba ena amita be amo Judea embo na Timothy ga umoro ari uje ae asora eto amita mamo amo Greek embo mahu kiari avoeto hamo kakamba
ACT 16:4 eto pambuhumihe da vahai vahai ta ekalesia ta ke pepeni Jerusalem embo okokose te Iesu ta ambotani te aingeto mahu ikari avo eo ingio agi ara ke ea.
ACT 16:5 Eto ekalesia na sovera ari humbuto Iesu humota be ea eto embo nei nei na kaju eo embo peni vahai ena.
ACT 16:6 Eto enana enda javo Galatia amita tutumo javo Phrygia amita orohuta pambuto Asia Province ta puvua te Ahihi Otohu na ke hande ari avo haekena
ACT 16:7 avoeto teho pambuto enda Mysia ta hane ta puvuto Bithynia Province ta pambasi uje ea rate Bada Iesu ta Ahihi na haekena
ACT 16:8 avoeto toto Mysia enda orohuta pambuto da Troas eva hora ta puvua.
ACT 16:9 Eto ai evie Paul na ehure ta enda Macedonia embo na puvuto heteto mihie penunu einge ena avo kina, “Puvuto dago Macedonia embo hondate e,” ainge enu
ACT 16:10 ingito ereto God ta ke javotoho enda Macedonia embomeni ta degi dago na ke hande ara avo God na uje ena avo hotembeto Macedonia ta pambasi nununga ea.
ACT 16:11 Eto dago nununga eto e nga humbuto da Troas toto tambueto puvuto tiuka nei Samothrace ta evito pambuto da Neapolis ta pambuto
ACT 16:12 e nga toto enda ta pambuto Macedonia ta Province vahai da okose javo Philippi ai ta Roman embomeni na puvuto kogombeto mihahera ai ta puvua.
ACT 16:13 Eto iji isapa mihimihe giu ari iji puvunu da ahone umo ti ta Judea embo ta pari ari degi irari ke hotembeto jombure ue pambuhumihe evohu ai horuketo mihio puvuto hambuto evohu ga arumbeto ke eo
ACT 16:14 da Thyatira evohu vahai javo Lydia amo enda nei evohu amina ke avo ingina. Eto evohu amo bo pangari ove javotoho ombari evohu amo God jakeka ere ijiahija amina Bada na amita hotembari ikenu Paul ta ke be ingina.
ACT 16:15 Eto amite amita da pe vahai embomeni te vahaita bapataito eo amina dagota degi ke einge ena, “Ungo, na Bada ta ambotani be hotembiheva avo nau bande ta have ungote irore,” ainge ke sovera eto enu dagota jo haperekenu amiga pambua.
ACT 16:16 Eto iji vahai dago pari ari degi ta pahuo embo ta pure ari kakara ahihi sapura na jo ta horeto sovera ikenu ambota do puvuresuja avo harikena. Eto embo na ambota do puvuroja ke ena avo ingesi uje eto kakara simba ari embopo ta degi koro ikeo kakara na ke avo harikenu simba ari embopo na koro peni vahai be ere umbuhahera.
ACT 16:17 Eto kakara amina Paul te nangote kihi pahuo amina ambota puvutohunu amita ahihi sapura na enu ingito jage einge ena, “God Sinderi te i be ta amita ke hande ari embo God na ungo dainge eto orekasuja avo ke ijie ere ora.”
ACT 16:18 eto iji isapamane ainge jage kaiketo ijinu Paul na tumo eto overeketo kakara amita ahihi ta degi ke einge ena, “Iesu Keriso ta javo ta erena umo arahata puvura.” ainge enu ahihi na arahata puvuto pambunu
ACT 16:19 kakara amita simba ari embo na koro humbari degi irae enu hotembeto
ACT 16:20 Paul te Silas te humbuto goruketo embo okokose da orohuta mihia ai humbuto pambuto Roman tihi jigari embo ta degi iketo ke einge ea,
ACT 16:21 “Judea embo emina ungotenau da embomeni isoro ara jo kajihere ingito humbuto ere puvutohora amita be amo enana dago Roman embo na dagota ke pepeni avo poeketo enda nei ta ari avo umbara ke erera.” ainge eo
ACT 16:22 embomeni tapa na jo vahai eto toruo Roman ta tihi jigari embo okose na Paul te Silas te ta bo houketo
ACT 16:23 esi ngahia na tara ikeo sapura be na tea. Eto embo okose na tipura simba ari embo ta degi iketo be vahaikaja ke ena.
ACT 16:24 Eto tipura ta simba ari embo na ke aro ingito humbuto tipura ta bande jo be ta gosuketo ji tevo pepeni pere heriso na utu ta kikira ena.
ACT 16:25 Ainge eto mume orohuta Paul te Silas te God jakeka ue haveni ijio tipura embo nei uhoho na ingihe mihio
ACT 16:26 enda titira peni vahai enu tipura ta bande tiroki tiroki enu bande bokiri tapa hirikenu embomeni ta chain na embomeni ta ingeni ta utu ta tigia amo karaun eto vena.
ACT 16:27 Eto tipura simba ari embo na evimihe ereto bokiri tapa hirikari kito embo jo ta tapa mahu pambari ke hotembeto asivo kororo eto humbuto umo oenga kaeto pehasi unu
ACT 16:28 Paul na kito jage peni vahai eto, “Umo ainge to. Dago tapa mihera,” ainge enu
ACT 16:29 tipura simba ari embo na usasa jage enu humbuto puvunu sau sau jo ta horeto tatatata ue Paul te Silas te heteto mihio utu ta sinena ue veto ereto
ACT 16:30 embo humbuto arahata pahue ke einge eto ingina, “Na do ano embo na na orekaro?” ainge enu
ACT 16:31 Paul na ke einge ena, “Umo Bada Iesu be humota asoa umo te no da pe vahai embomeni avo orekasuja,”
ACT 16:32 ainge eto amite amita bande vahai embomeni ta degi Bada ta ke hande uo
ACT 16:33 enana ta hamo ta mahu momono avo egihio tipura simba ari embo te amita da pe vahai embomeni te bapataito ena.
ACT 16:34 Eto mume vahai Paul te Silas te humbuto bande ta vihio donda ikeo india. Eto amite amita javo vahai embomeni te God ke be ijie tunga javotoho ere uahera.
ACT 16:35 Eto iho vujenu Roman embo okokose na police embopo ikeo pambuto ke einge ea, “Embo evi ikejo arahata pambare,” ainge eo
ACT 16:36 tipura simba ari embo na Paul ta degi ke einge ena, “Enana okokose na umo te Silas te arahata pambava ke ikehere puvija avoeto tunga jamo jamo te arahata pambuvujo,” ainge enu
ACT 16:37 Paul na police embopo ta degi ke einge ena, “Rome embomeni ta ke pepeni amo embo na Rome ta citizen avo mane tasora eto nei amo court eto ari sapura hambae amo Rome ta citizen avo tipura ta mane gosukasora, rate dago Rome ta citizen eto dagota ari sapura hambae sio tipura ta gosukehera te enana na dago kiae ojiketo pambara ererete? Dago mane pambasora te enana Roman embo okokose na puvuto bokiri hirikaro pambasora,” ainge enu
ACT 16:38 police embopo na Paul ta ke avo Roman embo okokose ta ke eo ingito joru eto
ACT 16:39 pambuto me kogue aja to eto ingeni humbuto arahata puvuto, “Ungo dagota da toto pambuvujo,” ainge jokeka ke na ea.
ACT 16:40 Eto Paul te Silas te tipura toto evohu Lydia ta bande ta pambuto namei kamei ta degi oje kahari ke ikeo sovera ari umbuo toto pambua.
ACT 17:1 Eto pambuto da Amphipolis toto pambuto da Apollonia toto pambuto da Thessalonica ta puvuto Judea embo ta giu ari bande ai mihie
ACT 17:2 Paul na ari amita mahu ainge ere uahija avo giu ari iji tapa 3 ainge God ta ke embo ta degi ahe poekihoi
ACT 17:3 amita be amo deire avo mine ara eto sirikihahera. Eto Paul na ke einge ena, “Ke mahu peroveta na kajari avo ungota orekari embo na puvuto hamo ta memenga kito pehasuja eto ehako vasiri te erasuja eto embo amo mahu puvija amo embo nei mane Iesu avo ungota orekari embo avo ungota degi erena,” ainge enu.
ACT 17:4 Judea embo nei uhoho na Paul ta ke avo be hotembeto Paul te Silas te ga kaju ea. Eto Greek embomeni isapamane God jakeka ere ijiahera amite da ta embo okokose ta airi te aingeto kaju ea.
ACT 17:5 Rate Judea embomeni nei da Thessalonica ta mihahera na tumo eto embo sasapura degi ta kito umbuo puvuto da embo tapa ta jo kajeo ereto Jason ta bande ta horeto Paul te Silas te humbuto court asi jombure ea,
ACT 17:6 rate hambae eto Jason te amita namei kamei te avo humbuto goruketo pambuto da ta embo okokose ta degi iketo ke ngahia na eto einge ea, “Embomeni emo enda tapa ta ari sapura eagora avo da ungotenau ta puvere
ACT 17:7 Jason na humbuto amita bande ta ojikehei mihere humbuto puvera. Eto enana na Rome ta king amita ke pepeni avo ke be ae ue Iesu avo king nei ke erera,” ainge eo
ACT 17:8 da ta embo okokose te embomeni tapa na ingito jo memenga enu ke peni vahai eto o a ea. Eto enana okokose na “Ainge mane asova” ainge eo
ACT 17:9 Jason te amita namei kamei te na koro na ombuto pambua.
ACT 17:10 Eto mume sihukihinu amita namei kamei na Paul te Silas te ikeo da Berea ta pambuto Judea embomeni ta giu ari bande ta horeto ke ijio
ACT 17:11 da Thessolonica ta embomeni ainge mane rate oje hiriketo ke ingesi uje be eo iji vahai vahai Paul na oje kahihinu embomeni na Paul ta ke amo be rete sokova re avo God ta ke kajari avo kesi jombure ere uahera.
ACT 17:12 Avo eto da Berea ta Judea embomeni isapamane te Greek embomeni te Greek hajae vajae evohu isapamane te aingeto Iesu ke be ere ijiahera.
ACT 17:13 Eto da Thessolonica ta Judea embomeni na Paul da Berea ta pambuto God ta ke hande ari ke ingito puvuto embomeni ta jo kajeo ereto tumo uo
ACT 17:14 amita namei kamei na Paul ikeo eva ta e nga humbasi pambuna. Rate Timothy te Silas te da Berea toto pambae ai mihahera.
ACT 17:15 Eto embo nei e nga ta Paul humbuto da Athens ta pambua enana ta degi Paul na Timothy te Silas te sau sau Paul ta degi Athens ta pambara ke enu Athens toto egerembeto da Berea ta puvuto ke ea.
ACT 17:16 Eto Paul na da Athens ai Timothy te Silas te puvurora simba mihie da ai ta enda ta god ingeni na ari isapamane kito Paul ta jo memenga enu
ACT 17:17 Judea embomeni ta giu ari bande ai pambuto Judea embomeni te Greek embomeni te aingeto ke ngahia mine ara ere ijiahera. Eto Paul na iji vahai vahai da orohuta heteto mihinu embomeni na isa uore ke hande ere uahija.
ACT 17:18 Eto enda Greek ta ahepoekari embo nei javo Epicurean te nei javo Stoic te na Paul ta degi puvuto ke kaseto embo nei uhoho na Paul ta ke ingito ke einge ere ijiahera. “Embo amina amita siro isapa kiari irae na eria,” ainge eto embo nei na Paul ta ke Bada Iesu peheto ehako vasiri te erena avo enu ingito “Enda nei ta God avo eria” ainge eto
ACT 17:19 Paul humbuto pambuto Council javo Areopagus ta ikeo hetenu amita degi einge ea,
ACT 17:20 “Umo ke erea amo ingari nei avo eto no ke amita susu be avo ejo dago be ingore” ainge ea
ACT 17:21 (eto ke amita be amo da Athens embomeni te enda nei embomeni te enana ga mihahera amina pambuto pure peni ae umoro ue mihie ke eha gamo avo ingesi uje ea.)
ACT 17:22 eto Paul na ai heteto Areopagus council ta degi ke einge ena, “Athens embomeni ungota ke asona ingivujo. Na ungota da ta puvuto isa ue humotepain ari bande isapamane kehena.
ACT 17:23 Eto pene ikari gaga vahai ai ta kehena amo ke einge kajarira, ‘God kiae amita degi ra,’ ainge kehena amo ungo God kiae jakeka ereva amita ke amo eha ano ingesova.
ACT 17:24 Amo God na enda te enda ta donda tapa emo amita ingeni na ena avoeto amo enda te uhu te amita embo dombo avoeto embo ta ingeni na bande ari ai mane iraguja
ACT 17:25 rate God na embo ta degi hondate ari ta penunu mane eaguja te God na mine vahai embo ta degi vasiri te hoenge te donda tapa ikerekeuja.
ACT 17:26 Eto God na embo vahai ove ena amita be na enda tapa enetehija amo enda dainge dainge iresora
ACT 17:27 amo God na mahu kihi siriketo embo na pambuto mihie jireki poeki eto God jombure eto kiora ena, amita be amo God hoita irae eto ma ta irae araha hambuto mihia.
ACT 17:28 Eto ungota ke ari embo vahai na ke einge mahu kajena, ‘Eto ungotena God ta jo ta vasiri ue mihera,’ ainge ena eto ungota embo nei na einge ena ‘Dago amita meniundi ra,’ ainge ena.
ACT 17:29 Eto ungotena amita meniundi avo eto embo ta ingeni na gold na silver na koro na ove ari avo ke be mane hotembasora.
ACT 17:30 Eto embo mahu God kiae amo God na hotembeto toasuja
ACT 17:31 rate iji puvuresuja avo embo sirikehija amina embo tapa ta vasiri avo eto amita ke be na hajire ikasuja avoeto embomeni amina ungota ari sasapura toara God na eria. Eto embo sirikehija avo God na embomeni kito ke be ara enu vasiri te ehako erena.”
ACT 17:32 eto Paul na ke ainge enu embo nei nei na ehako vasiri te erari ke avo ingito ganini ke ea eto embo nei nei na, “No ke avo iji nei ainge ejo ingore,” ainge eo
ACT 17:33 Paul na horukari toto pambuna.
ACT 17:34 Eto Areopagus Council ta member vahai javo Dionysius te evohu vahai javo Damaris te embo nei nei te aingeto Paul ta ke avo ke be ijie Iesu ambo ambo ea.
ACT 18:1 Eto amita ambota iji isapa Athens ta mihimihe da Corinth ta pambuto
ACT 18:2 Judea embo vahai javo Aquila hambuna, embo amo enda Pontus embo rate Rome ta pambuto mihahija avo Roman ta King Claudius na Judea embo tapa uje ae eto ohimbenu pahuo Aquila te amita ae Priscilla te aingeto da Corinth ta pambuto
ACT 18:3 Paul amita pure vahai avo hambuto horoma ari bo avo ere kakajekihie Paul enana ga pure ue mihahera.
ACT 18:4 Eto Paul na giu ari iji vahai vahai Judea embomeni ta God jakeka ari bande ta horeto Judea embomeni te Greek embomeni te na Iesu avo ke be hotembara ere ijiahija.
ACT 18:5 Eto Silas te Timothy te Macedonia ta eto puvuo Paul na pure nei do ae iji tapa Judea embomeni ta orekari embo simba ereuahera amo embo nei mane Iesu avo Judea embomeni ta degi ke hande ereuahija
ACT 18:6 rate embo nei uhoho na ke be mane ke eto Paul ta degi ke sapura eo Paul na bo ta oniho teterenu venu ke einge ena. “Eto ungo God uje ae eto vaine pahurovo amo hajire ikau kesova amo ujekari nau mane avoeto na ungo da Corinth ta Judea embomeni toto enda nei embomeni da Corinth ei ta mihera amita degi ke asona.”
ACT 18:7 ainge eto toto da nei embo javo Titius Justus God jakeka ere ijiahija amita bande Judea embomeni ta God jakeka ari bande amita engihi ai ta mihahera.
ACT 18:8 Eto Judea ta jakeka bande ta tihi jigari embo javo Crispus te amita jo vahai ta veari embomeni te ainge eto Bada ke be ere ijiahera. Eto da Corinth embo isapamane na God ta ke ingito be hotembeto bapataito ere uahera.
ACT 18:9 Eto mume vahai Bada na puvuto ehure ta Paul ta degi ke einge ena, “Na umote iresona avo eto umo mane joru asoa eto mane pure toasoa te embomeni ta degi ke ejo ingore.
ACT 18:10 Eto da Corinth ei ta nau embomeni isapamane mihera avoeto embo nei na no hamo ta memenga mane ikasora.” ainge enu
ACT 18:11 Paul na jua vahai eto huna ainge da ai ta God ta ke embomeni ta degi ahe ere poekihahija.
ACT 18:12 Eto Rome gavana na embo Gallio enda Greek tihi jigoja ikeo hetenu Judea embomeni na vahaita eto Paul humbuto pambuto court ta ikeo Gallio ta tihi ta hetenu
ACT 18:13 ke einge ea, “Embo emina dagota ke pepeni agi ae God nei avo jakeka ara ahe ere poekihia.” ainge eo
ACT 18:14 Paul na ke ihiketo asi unu Gallio na Judea embomeni ta degi ke einge ena, “Embo amina Roman embo ta ke pepeni poekahija avo na ungo ta ke uje eto oje jevito ingaehena,
ACT 18:15 rate amo ungo Judea embo ta ke pepeni avo eto ungo ta ke sio sao ereva avo na mane ingesona te ungo oenga sirikevu,”
ACT 18:16 ke ainge eto court toto ohimbenu arahata puvuto
ACT 18:17 embo Sosthenes amo Judea ta God jakeka ari bande ta tihi jigari embo avo Greek embomeni na humbuto tea rate Gallio ta jo ta nei do ae tona.
ACT 18:18 Eto Paul na amita namei kamei ga da Corinth ai iji koso pure ue mihahija God ta degi ke sovera eto ajireketo siro tona. Eto amite embo Aquila te amita ae Priscilla te aingeto e nga humbuto Syria ta pambasi ue da Cenchreae hora ta Paul na amita ajirekari iji irae enu siro tiukena,
ACT 18:19 eto da Ephesus ta puvuto Aquila te Priscilla te toto Judea embomeni ta giu ari bande ta pambuto enana ga ke mine ara ena.
ACT 18:20 Eto Judea embomeni na Paul iroja ke eo Paul na iresuja avo avora ae
ACT 18:21 eto ke einge ena, “God na uje au kito avo egerembeto puvuresona,” ainge eto da Ephesus toto e nga humbuto
ACT 18:22 da Caesarea ta pambuna eto Caesarea toto da Jerusalem pambuto ekalesia peketo da Antioch ta pambuto
ACT 18:23 iji isapa mihimihe enda Galatia te Phrygia te ai pambuto Iesu ta ambotani ehaha ta degi ke enu sovera ari umbua.
ACT 18:24 Eto da Alexandria ta Judea embo vahai javo Apollos amo ke embo eto God ta ke kajari avo kiari embo be avoeto pambuto da Ephesus ta ke hande ena.
ACT 18:25 Eto God na embomeni ta irari do aingeko iresora amite eto God ta ke tapa te eto Iesu ta ke te amo tapa Apollos na kiari avoeto ke tapa do kiari avo tambueto embomeni ta degi sovera eto ke ena. Rate Apollos na embo John na umo na bapataito ena avo kina rate Ahihi Otohu na bapataito ari avo kiae
ACT 18:26 avo eto Judea embomeni ta giu ari bande ta ke avo enu ingito Aquila te amita ae Priscilla te na Apollos humbuto bande ta pambuto God ta ke nei Apollos ingae avo eo ingina.
ACT 18:27 Eto Apollos na enda Greece ta pambasi unu da Ephesus ta ambotani na enda Greece ta namei kamei na hondate ari pekari ara ahari enana ta degi kajea. Eto ahari humbuto Greece enda ta puvuna eto ai God na embo ta degi hande te hotembari te ikenu ambotani ea amita degi Apollos na hondate ari javotoho ena.
ACT 18:28 Eto Apollos na God ta ke kajari avo kito Judea embomeni ta degi Iesu amo ungota omena ari embo avo simba ere ova ainge embo tapa ta tihi ta enu Judea embomeni ta ke mine ari irae ena.
ACT 19:1 Eto Apollos da Corinth ta mihinu Paul na enda orohuta pambuto da Ephesus ta puvuto ambotani hambuto
ACT 19:2 enana ta degi ke einge eto ingina, “Ungo God ke be eheve Ahihi Otohu na ungo ta degi puveite?” ainge enu enana na, “Dago Ahihi Otohu kiaera,” ainge eo
ACT 19:3 Paul na, “Ungo bapataito eheva amita be amo deire?” ainge enu ke mine einge ea, “John ta bapataito ta ahe poekari avo agi ue bapataito uera,” ainge eo
ACT 19:4 Paul na einge ena, “John na bapataito ena amita be amo Israel embomeni na ari sasapura toto embo ambota puvuresuja avo ke be hotembara bapataito ena. Eto embo amo Bada Iesu ra.” Eto ainge enu
ACT 19:5 ingito embomeni tapa Bada Iesu ta toho asi bapataito ea,
ACT 19:6 eto Paul na enana ta hamo ta ingeni tembenu Ahihi Otohu na enana ta degi puvunu ke ingari nei te nei te na God ta ke hande ea,
ACT 19:7 embo amo 12 aingera.
ACT 19:8 Eto Paul na Judea embomeni ta giu ari bande ta hariga tapa 3 ainge horeto ke ngahia na embomeni ta degi ke einge ena, “God na amita embomeni toho be ere uhua avoeto Iesu enana ta king ikehija.” ainge enu ke avo mine ara ea
ACT 19:9 rate embo nei nei na ke ingae tumo eto vahineto mihie Iesu ta irari degi avo embo tapa ta tihi ta ke sapura na ea. Eto ainge eo Paul na toto ambotani humbuto embo javo Tyrannus ta ke kasari bande ta pambuto iji vahai vahai ke hande eo ke avo embomeni na kasea.
ACT 19:10 Eto jua heriso amita jo ta ke hande uo Judea embomeni te enda nei embomeni te aingeto enda Asia ta mihie God ta ke ingia.
ACT 19:11 Eto God na sovera ikihioi Paul na ari nei te nei te uoi embo kokojekagora.
ACT 19:12 Eto God na ainge pere unu embo na Paul ta asukari be rete tuhari bo avo humbuto pehari embo ta ikeore embo kokojekihahera eto embo ta jo ta ahihi sasapura toto pambuhahera.
ACT 19:13 Eto Judea embo ta ahihi sasapura ohimbari embo nei nei na degi tapa ta pahue eto kito Bada Iesu ta javo humbuto ahihi sasapura ohimbari eto ahihi sasapura ta degi ke einge ea, “Paul na Bada Iesu ke eaguja amita javo ta toto pambuvu,” ainge pere ere ijiahera.
ACT 19:14 Eto Judea Priest okose javo Sceva ta meni undi tapa seven amina ari ainge ere uahera. Eto iji vahai ke ainge eo
ACT 19:15 ahihi sapura na ke mine einge ena, “Iesu amo na kiarira eto Paul amo na kiarira te ungo God ta sovera umbae embopora ungo amunure?” ainge eto
ACT 19:16 embo ahihi sapura na horari embo amina isoro peni vahai be eto Sceva ta meniundi ta bo jigito perara enu hamo teho memenga hambuhe amita bande toto pambua.
ACT 19:17 Eto Judea embomeni te enda nei embomeni te aingeto da Ephesus ta mihie duru avo ingito joru peni vahai eto Bada Iesu ta javo amo dombo be ainge ijie jakeka ea.
ACT 19:18 Eto ke be ari embo isapamane na embo tapa ta degi enana ta saruka ari harikea.
ACT 19:19 Eto embo nei nei ta saruka ari books avo embo tapa ta tihi ta undukeo evekena. Eto books amita mine amo koro silver na ari tapa 50,000 ainge avo evekena.
ACT 19:20 Eto ari ainge pere uo Bada ta ke na pajito enda enetena.
ACT 19:21 Eto jua heriso enda ai ta mihahija Paul na Ahihi Otohu na uje enu enda Macedonia te Greece te amita orohuta pambuto Jerusalem pambasi uje ena, “Eto ai mihima egerembeto pambuto da Rome kesona,” Paul na ke ainge
ACT 19:22 eto amita hondate ari embo heriso Timothy te Erastus te aingeto ikenu da Macedonia ta pahuo iji isapa Paul na Asia Province ta da Ephesus ai pure ena.
ACT 19:23 Eto iji aramite Bada Iesu ta ke ahe poekari avoeto da Ephesus embomeni na ereto jujune peni vahai ea
ACT 19:24 amita be amo embo Demetrius na ingeni na temple isasaraho amo enda ta god evohu javo Artemis ta jakeka ari bande ainge avo silver na ove ena. Eto bande isasaraho avo embo Demetrius te amita pure ari embomeni te na ombuto koro isapa mane be ere humbuhahera,
ACT 19:25 eto embo amina amita pure vahai embomeni jage enu puvuo einge ena, “Nau namei kamei ungo kogova ungotena pure eremina koro ere humbuhora
ACT 19:26 te embo Paul na god ingeni na ove ari amo god be mane ke avo da Ephesus te Asia Province ta embomeni tapa jo kajehei ahereketo embo isapamane na Paul ta ke avo ke be erera.
ACT 19:27 Avoeto ungotenau pure avo au sapura asuja eto pure pere mane ungotenau god evohu Artemis amo Asia embomeni te enda tapa embomeni na jakeka eagora amo amita temple teho asuja eto ungotenau god ta javo irae aisuja.” ainge enu
ACT 19:28 ke avo ingito embomeni na gagaha te puvuto ke einge ea, “Da Ephesus ta god Artemis amo peni be ra.” ainge eo
ACT 19:29 da tapa embomeni na ingito jajage te puvuto da Macedonia embo heriso Paul ga pahue ke hande ari embo javo Gaius te Aristarchus te kito andito goruketo humbuto enana ta ke kasari degi ai pambua.
ACT 19:30 Eto Paul na ke kasari degi ta pambuto embomeni ta degi ke asi uje ena rate ambotani nei uhoho na haekea.
ACT 19:31 Eto Province ta embo okokose na Paul tunga humbuto ke kasari ta mane horasuja ainge eto ke ikeo puvuna.
ACT 19:32 Eto embo tapa jajage hohori te o a te puvua rate ke ingari embo irae amo jajage ea amite ke be amo deire amo kiae teho puvua.
ACT 19:33 Eto Judea embomeni na embo Alexander mimikeo arahata puvuna embomeni na Alexander na ari sapura ari ke eo Alexander na ke jamo ara ingeni na ahe ahe eto amina ari sapura do ae avo eto embo ta degi ke asi unu
ACT 19:34 embomeni na Alexander Judea embo kito gagaha peni vahai be 2 hours amita jo ta ke einge ea, “Da Ephesus ta God Artemis amo peni be ra,” ainge ea.
ACT 19:35 Eto da ta ke hande ari embo okose na puvuto embo ke ere ijiea avo enu jamo eo ke einge ena, “Ephesus embomeni nau ke ingivujo. God Artemis amo peni be eto amita temple ta koro otohu uhu ta veari amo Artemis ove ari avo da Ephesus na simba eaguja amo embo tapa na kiarira
ACT 19:36 eto embo nei na ke do mane asuja avoeto ungo jamo eto nei do mane asova eto ari sio sao avojo.
ACT 19:37 Eto ungo na embo erevi humbuto puveva amo dagota temple ta donda pegene ae eto dagota god evohu amo sapura ke ae.
ACT 19:38 Rate embo Demetrius te amita pure ari embopo te na embo ta pehumba asi uje asora amo court humbari embo mihia avoeto court ari iji te puvuto pehumba mine ara aisora.
ACT 19:39 Eto ungo do uje asova amita ke amo iji mahu ikari mihia ai horukasova.
ACT 19:40 Eto ungo eha isoro asi ere ova amita be amo irae avo eto ungotenau embo okokose na ke aro ke mine do avo, ke mine ari irae,”
ACT 19:41 ainge enu sisiketo pambua.
ACT 20:1 Eto da Ephesus embomeni jamopo eo iji isapa mihimihe Paul na ambotani enu vahaita puvuo hamo ngahia humbari ta ke eto irae enu peketo da Macedonia ta pambuna.
ACT 20:2 Eto Macedonia Province ta puvuto degi ta pahue da nei nei ta heteto ekalesia embomeni ta degi ke neite neite ikenu sovera ari umbua.
ACT 20:3 Eto Greece ta puvuto hariga nei heriso nei vahai ai mihahija eto e nga humbuto Syria ta pambasi nununga unu Judea embo na avo tasi ari ke ingito enda ta tiumbeto Macedonia ta pambuna.
ACT 20:4 Eto embo Paul ga da Philippi ta pambua amita javo amo erevira, da Berea ta Pyrhus ta meni Sopater te da Thessolonica ta embo heriso Aristarchus te Secundus te da Derbe ta embo Gaius, te Asia ta embo heriso Tychicus te Trophimus te embo Timothy te
ACT 20:5 aingeto kihi Troas ta pambua.
ACT 20:6 Eto dago te Paul te pondo iji puvuna avo bread, yeast ikae pajirae amita pondo iji irae enu da Philippi toto e nga ta pambuto pahuo iji 5 irae unu da Troas ta puvuto hura vahai ea.
ACT 20:7 Eto Paul na evito da nei ta pambasuja avo hotembeto Saturday mume sihukihinu dago vahaita 3 story bande ta umoro ue indie Paul na ke hihi koso be tirihinu
ACT 20:8 mume humba orohuta usasa isapamane unduketo bande jo i be ta tetekea amo ai umoro asora avoeto ikea.
ACT 20:9 Eto Paul na hihi koso be tirihinu singa javo Eutychus amo bande otoho ta arumbeto mihie evoja evoja unu tihi vahaiketo jene tiuketo evimihe vurereketo otoho i be ta eto veto teto pehenu embo na enda ta veto oviribeto humbuto kia amo pehenu kia.
ACT 20:10 Eto Paul na enda ta veto singa ta hamo ta veto andito ke einge ena, “Ungo mane osaga asova, singa emo amita vasiri ehako puvija,”
ACT 20:11 ainge eto Paul na bande ta vihito bread pereto ikenu indio hihi koso be ijinu iho vujenu toto pahunu
ACT 20:12 embomeni na singa pehena amo ehako vasiri te amiga amita bande ta pambuto tunga javotoho ea.
ACT 20:13 Eto Paul na dago kihi e nga humbuto tiumbeto da Assos ta pambuto avo hambara ke enu pahuo Paul ambota utu na pambuna.
ACT 20:14 Eto da Assos ai Paul hambuto e nga ta humbuto puvuto da Mitylene ta puvuto ai hetea.
ACT 20:15 Eto toto eva jo ta evito puvuto tiuka Chios seriketo puvuto iji nei tiuka Samos ta puvua eto iji nei Miletus ta puvuto
ACT 20:16 Paul na da Ephesus ta pambasuja amo embomeni na haeketo iji koso iroja ke asora avo eto Paul na iji koso irari uje ae avoeto da Ephesus toto kito tambueto Jerusalem ta pambuto Judea embomeni ta pondo javo ‘Pentecost’ ta iji auvena avo Jerusalem ta asi uje eto sau sau pambuna.
ACT 20:17 Eto Paul na da Jerusalem ta pahue da Miletus ta heteto mihie da Ephesus ta ekalesia embo okokose kesi uje eto ke ikenu pambunu
ACT 20:18 ingito puvuo Paul na ke einge ena, “Nau embo pepeni, na kihi Asia Province ta puvuto nane tapa do ere uahena amo ungo kiarira,
ACT 20:19 eto nanena na na ae sisire ae Bada ta pure avo uena. Eto Judea embo ta jo ngahia avo eto osaga peni vahai kogue sisivu kuhihe pure ere uahena,
ACT 20:20 rate ungo kogova na ke nei do tapa ojikae rate ungo hondate ari ta ke tapa avo da araha ta eto bande jo ta ehene ingihava.
ACT 20:21 Na Judea embomeni te enda nei embomeni te ari sasapura avoeto God ta degi aja to ijie Bada Iesu be humo ta ara ke sovera na ijiena.
ACT 20:22 Eto eha amo na uje nei mane asona rate Ahihi Otohu ta uje avo eto Jerusalem ta pambuhona. Eto ai ta do puvuresuja amo na kiaera
ACT 20:23 te na ere kogona amo da vahai vahai ta Ahihi Otohu ke hande oi kogona amo tipura te osaga te amo na simba mihera
ACT 20:24 te na pehanote teho vasiri te irono amo tehora te Bada Iesu na pure nau ikena avo God na embo ta irari javotoho avo hande ikasi uje ere ua avo ke hande ano pure irae aisuja.
ACT 20:25 Na ungota degi pahue ke hande uena amo God na tihi jigihirou irari javotoho na iresova amita ke avo hande uena. Eto na ere kogona emo ungona na ehako mane kesova
ACT 20:26 avoeto iji eha eremite ungota degi ke be na erena ungo nei nei na ke be ae eto sio sao ue vaine ue ahihi datoho irari avo aijaja asova amo ujekari nau mane ujekari ungota
ACT 20:27 amita be amo God ta ke tapa ungota degi arahata ijiena
ACT 20:28 eto ungote ungota embomeni te avo simba ava Ahihi Otohu na ikena avo eto simba evujo. Eto God na amita Meni pehena avoeto ekalesia amita toho umbuna avo unduvujo.
ACT 20:29 Eto nei kogona amo na pahurono isoro o na puvuto undurari o kambasuja,
ACT 20:30 eto iji nei ungota toho uho na ke gamo ijiroro ambotani nei nei na ambo ambo asora.
ACT 20:31 Avoeto be kogue irivujo. Eto na mumete iji te sisivu kuhihe jua nei heriso nei vahai amita jo ta ungo vahai vahai ahe poekihena. Avoeto nau pure ngahia ari avo kogue hotembu hotembu evujo.
ACT 20:32 Na ungo God na simba aja tohena eto amita hondate ari ta ke na ungo simba aisuja rate amina ungo au sovera aisova eto ungote amita toho uho tapa te ta hotari avo nununga ere ua.
ACT 20:33 Na ungote mihie embo nei ta koro te bo te avo uje eto umbae
ACT 20:34 rate ungo kogova uje nau te nau pure vahai embomeni te ainge eto nau ingeni na pure ue undihena
ACT 20:35 avo eto na ungo ahe poekihena te donda ambu embomeni avo pure ngahia na hondate evu. Eto Bada Iesu ta ke avo hotembevujo amo, ‘Hande humbari amo aravora rate God na hande ikari embo kito osa eaguja avoeto hande embo na tunga javotoho asuja.’”
ACT 20:36 eto Paul ta ke irae enu enana tapa paunge teteri eto pari eo irae enu
ACT 20:37 sisi sasi ijie andito mune mine ara eto peketo orerere ea.
ACT 20:38 Eto Paul ta ke avo ehako puvurou enana ehako mane kesora avo hotembihe osaga peni vahai kogue e nga humbasi enana tapa amiga hora ta vea.
ACT 21:1 Eto dago peketo toto e nga ta tihi tambueto da Cos ta puvuto ai hetea eto pambuto iji nei da Rhodes ta puvuto heteto toto da Patara ai
ACT 21:2 e nga nei enda Phonecia ta pambasi unu kito ai pambua.
ACT 21:3 Eto pambuhumihe enda tiuka javo Cyprus ta kaina hena ta jorembeto puvuto enda javo Syria ta da vahai Tyre ta heteo donda umbaro veaja uo
ACT 21:4 dago ai veto ambotani hambuto enana ga hura vahai ai mihio enana ambotani ta jo ta Ahihi Otohu na ke enu enana joru eto Paul ta degi, “Umo mane Jerusalem pambasoa.” ainge ea.
ACT 21:5 Eto iji irae unu dago pambasi uo enana airi te meniundi te tapa da ahone ta pambuto eva hora ta paunge teteri eto dago tapa pari ea.
ACT 21:6 Eto dago pari eo irae enu mine peka eto enana egerembeto da ta pahuo dago e nga ta vihia.
ACT 21:7 Eto da Tyre toto e nga ta pambuto da Ptolemais ta puvuto namei kamei ga umoro
ACT 21:8 eto evito da Caesarea ta pambuto evangelist javo Philip hambuto amita bande ta pambuto evia. Eto Jerusalem ekalesia na embo tapa seven umbuo deacon eto Philip ga tapa pure ea.
ACT 21:9 Eto Philip ta iariri tapa nei heriso nei heriso amina jimbae teho mihie God ta peroveta eto God ta ke avo hande ere uahera.
ACT 21:10 Eto dago ai iji isapa mihio peroveta vahai javo Agabus na Judea enda ta eto puvuto
ACT 21:11 Paul ta pupuri bujeketo humbuto amita utu te ingeni te aingeto vahaiketo punduto ke einge ena, “Ahihi Otohu na einge eria, ‘Judea embomeni Jerusalem jo ta pupuri emita mamo einge eto tigito enda nei embo ta ingeni ta ikasora,’” ainge enu
ACT 21:12 dago ingito Paul mane Jerusalem pambaja enana te dago te tapa vahaita eto haekeo
ACT 21:13 Paul na ke mine einge ena, “Ungo do eto sisi sasi ijie nau jo ere kajiheve? Na nau hamo mahu ngahia ehija avo eto Jerusalem ta pambuto Bada Iesu avoembo punduto tipura ta ikaro horasona amo tehora o taro pehasora amo nau degi ta tehora.” ainge enu
ACT 21:14 dago amita jo ari haperekari inono ae enu ke einge ea, “Bada na amita uje do aisuja avo Bada na aisuja.”
ACT 21:15 Eto iji amita ambota amo Jerusalem ta pambasi nununga eto
ACT 21:16 pahue da Caesarea ta ekalesia embo nei uhoho amina dago humbuto embo Mnason amo ambotani mahu enda Cyprus embo avoeto amita bandeta evesi pambua.
ACT 21:17 Eto dago na Jerusalem ta puvuo namei kamei na dago osa osa ue pekea.
ACT 21:18 Eto evito Paul na dago ga James kesi pahunu ekalesia ta okokose tapa vahaita uo kito
ACT 21:19 Paul na peketo enana ta degi God na sovera Paul ta ikenu enda nei embomeni ta degi ari nei te nei te tapa do ena avo enu
ACT 21:20 ingito God jakeka eto Paul ta degi einge ea, “Namei kijo, Judea embomeni tapa thousands ainge amina Bada Iesu ta ke avo ke be ijie ambo ambo ere ora eto Judea embomeni ta ke pepeni mamahu mahu avo sapura ae javotoho na agi eagora,
ACT 21:21 rate enana duru ingera amo inena Judea embomeni enda nei nei ta iragora amita degi pambuto Moses ta ke pepeni avo Judea embo ta meni isasaraho ta hamo kakamba mane ara ehea eto Judea embo ta ari tapa avo mane ara ehea
ACT 21:22 amita duru avo ingito mihere umo puvea, avo enana ke ingito umo tasora
ACT 21:23 avo eto umo dainge eto hondate asora avo dagota ke asora avo agi ejo. Eto embo tapa nei heriso nei heriso amina God ta degi hae kaeto mihera
ACT 21:24 amiga pambuto hande ikejo tongopa irae ai. Eto o heveto hande ikasova amita mine amo koro no amina umote embo heriso nei heriso avoeto ombujo. Eto ainge ao enana na Moses ta ke agi ue siro tiukasora ari amo embomeni na kito duru mahu ingera avo sokova ke asora eto inena Moses ta ke pepeni avo jigama ari ke asora.
ACT 21:25 Eto enda nei embomeni na Iesu ke be ijie ambo ambo ue ke pepeni do agi asora avo dago na ke kaseto ahari ta kajihera amo indari enda ta God ingeni na eto pene ikari amo sapura avoeto mane indesora, eto nei amo orosa be avo mane indesora. Nei amo o orosa te mane indesora eto nei amo embo na mane tiha asora.” Eto ke avo eo irae enu
ACT 21:26 iji nei Paul na embo nei heriso nei heriso ainge humbuto pambuto Judea embomeni ta ari avo tongopa irae eto temple jo ta horeto enana ta ajirekari iji heka ena amo ajirekari iji tutumota o ingaro evekasuja avo Priest ta degi ke ena.
ACT 21:27 Eto ajirekari iji 7 tutumo asusumbihinu Judea embomeni enda Asia ta eto puvurari amina Paul temple jo ta kito peiketo humbuto embo tapa ta jo ta ke gagaha eto einge ea,
ACT 21:28 “Eto Israel embomeni, ungo hondate evu. Embo emina enda nei ta pahue Moses ta ke pepeni te ungotena Israel embomeni te ungotenau temple avo sokova ke eaguja, eto amina enda nei embo humbuto temple otohu ei ta horeto ehei sapura ehija,”
ACT 21:29 ke ainge ea amita be amo Paul na embo Trophimus da Ephesus embo amiga Jerusalem jo ta isa unu kia avo humbuto temple jo ta horari ke ainge eo
ACT 21:30 da embomeni tapa na tumo eto temple jo ta huheveto pambuto Paul jigito goruketo hambuto puvuto temple bokiri pe ahurekea.
ACT 21:31 Eto embomeni na Paul taro pehaja uo Roman isoro embo ta tihi jigari embo na Jerusalem embomeni na sio sao ari ke avo ingito
ACT 21:32 amita isoro embo te isoro kihi humbari embo te veto humbuto huheveto puvua. Eto embo na Paul toruo isoro embo puvutohuo kito toa.
ACT 21:33 Eto isoro ta tihi jigari embo na Paul andito chain heriso na pundurora ke embomeni ta degi ke eto einge eto ingina, “Embo amo amunure eto amita ari sapura deire?” ainge ijinu
ACT 21:34 embo na ke peni vahai ijie o a ijio embo okose amina Paul ta sapura avo eto ingari inono ae enu amita isoro embo ta enu Paul humbuto amita bande peni ai ta vihesi uo
ACT 21:35 embomeni na sio sao tasi uo Roman isoro embomeni na Paul oviribeto humbuto indiri ta vihio
ACT 21:36 embo isapamane na, “Paul tevujo pehai.” ainge ea.
ACT 21:37 Eto enana Roman isoro embomeni na Paul humbuto enana ta irari bande peni ta horasi uo Paul na isoro tihi jigari embo ta degi ke einge ena, “Na no degi ta ke asona amo aravorete?” ainge enu embo peni amina ke mine einge ena. “Ajae, umo Greek ke ingari ra
ACT 21:38 te Egypt embo vahai na amita tunga tiukari embo tapa 4,000 ainge humbuto gavana ta degi isoro asi degi ojagatambu ta pambuna umo embo aravo hotembehena rate umo Greek embomeni ta ke ingari rate umo embo avo manera.” ainge enu
ACT 21:39 Paul na ke einge ena. “Na Judea embora. Na nau aja na enda Celicia ta da Tarsus ai ingena avo eto na da okose amita embora. Avoeto na embomeni ta degi ke asona amo aravorete?” ainge enu
ACT 21:40 isoro embo peni na aravora enu Paul na indiri ta heteto ingeni na ahe ahe enu embomeni jamopo eo Paul na Judea embomeni ta ke na enana ta degi einge ena.
ACT 22:1 “Nau mamahamane te nau namei kamei te nau embomeni tapa nau ke ingivujo, eto na amunure avo ungota degi ke asona,” ke ainge ihiketo enu
ACT 22:2 embomeni na amita ke hajire ingito amo Judea embo ke hotembeto ke jamo jamo eo
ACT 22:3 Paul na ke einge ena, “Na Judea embora eto enda Celicia ta da Tarsus ai ta nau aja na na umbuna rate na da Jerusalem ei ta pajio embo Gamaliel na na ahe poekihaja eto ungotenau ohihi ta ke pepeni tapa Moses na kajena avo ahe poekena eto na ungo eagova ainge inono God osa ue ke agi uena.
ACT 22:4 Eto nanena embomeni Iesu ambo ambo ari degi ta pahuo osaga ikihe teo pepehekea. Eto nanena embo te evohu te humbuto tipura ta ere gosukihahena.
ACT 22:5 Eto na ke erena emo Priest okose te council embomeni na aro ungo ingari haitekora amo enana ta ahari da Damascus ta Judea embomeni ta degi Iesu ta ambotani chain na punduto humbuto pambuto Jerusalem ta ikano tara nanena ahari humbuto pambua.
ACT 22:6 Eto na degi ta pambuhumihe da Damascus auviho iji orohuta usasa pipiri ainge sariambu enu
ACT 22:7 enda ta veto gombuto ke einge ingia, ‘Saul, Saul, umo do eto nau degi ta osaga ikaroe?’
ACT 22:8 ‘Bada umo amunure?’ ainge ene, ‘Na Iesu Nazareth embo nau degi ta osaga ikihe ere kogona,’ ainge enu
ACT 22:9 na ke einge eto ingia, ‘Bada na do ano?’ ainge ene Bada na, ‘Umo ereto da Damascus ta pambuto umo tapa do asoa avo God na mahu sirikehija avo au ingesoa.’ ke ainge ingia amo embo namote degi ta puvua amina ke do ena avo ingae rate usasa avo kia.
ACT 22:11 Eto na pambasi ereo usasa na tihi ta kajenu sapura enu nau namei kamei na ingeni ta jigito humbuto da ta pambua.
ACT 22:12 Eto embo vahai javo Ananias amo da Damascus ai ta mihie God jakeka ijie ungotenau ke pepeni avo agi uoi Judea embomeni na embo avo jakeka ere ijiahera.
ACT 22:13 Eto embo amo puvuto engihi ta heteto, ‘Namei, Saul ehako ki,’ ainge enu nau tihi hirikenu embo avo kon eto kia.
ACT 22:14 Eto embo amina nau degi ta ke einge ena, ‘Ungotenau ohihi ta God na amita uje tapa avo kioa umo humbija eto amina ehei inena amita pure ari embo javotoho Iesu kia eto ke hajire ingia.
ACT 22:15 Eto tapa do ehei kia eto ingea avo embomeni tapa ta degi ke hande asoa.
ACT 22:16 Avoeto umo mane simba asoa te ereto bapataito eto Bada ta javo ta jage ao amina no ari sasapura au irae aisuja.’ Ainge embo Ananias na enu ingito tapa agi ea.”
ACT 22:17 “Eto ai iji isapa mihimihe na Jerusalem ta egerembeto pambuto temple ta horeto pari ue mihie
ACT 22:18 bada ehure ta kiarako uo amina, ‘Umo sausau Jerusalem toto pambu. Inena nau ke eha ingea amina jo haperekehei ke hande ere oa amo embomeni na ingito tumo eto ke be mane asora avo eto umo pambu,’ ainge enu,
ACT 22:19 ‘Bada, ainge mane, na Judea embomeni ta God jakeka ari bande tapa ta horeto no ambotani andito humbuto toruena amo enana na kito osa eagora.
ACT 22:20 Eto no ke hande ari embo Steven tari iji te nanena Steven tari embomeni ta bo avo simba ue teo pehena amo javotoho ke ere ijiaehena,’ ke ainge eo
ACT 22:21 Bada na, ‘Umo enda hoi embomeni ta degi ikasona avoeto ikihena pambu’,” ainge ena.
ACT 22:22 Eto Paul enda nei embomeni ta pambari ke avo enu ingito embomeni na tumo peni vahai ue gagaha ijie, “Embo evi humbuto pambuto be tevu pehai,”
ACT 22:23 ainge gagaha ijie bo houketo jihihie oniho timbuto ji ta gosukeo ihajara enu embomeni na gagaha peni vahai be ijio
ACT 22:24 Roman ta isoro tihi jigari embo na ke enu Paul humbuto amita bande peni ta ikeo tihi jigari embo na Paul na amita ari sapura harikae ari ke hotembeto amita isoro embo na Paul esi na tara ke ena.
ACT 22:25 Eto puvuto ikeo mihie Paul na isoro embo vahai ta degi ke einge ena, “Ungo Roman embo esi na tasi ere ova amo court ta pehumba eto sapura hambae peiketo esi na tasi ere ova amo Roman embo ta ke pepeni rete?” ainge enu
ACT 22:26 isoro embo amo ingito joru eto amita tihi jigari embo ta degi pambuto ke einge ena, “Umo do asi hotembihe, embo amo Roman embora,” ainge enu
ACT 22:27 tihi jigari embo na joru eto pambuto Paul ta degi einge eto ingina, “Umo Rome ta citizen rete avo ke be na ejo ingone,” ainge enu Paul na, “En, na Roman embora,” ainge enu,
ACT 22:28 “Eto namote tapa enda nei embo rate koro peni vahai na ombuto Roman ta citizen ehena,” ainge enu Paul na, “Na aja na ingari ta eto Roman embo ehena.” ainge enu
ACT 22:29 isoro embomeni na ke avo ingito nei eto ingae toa. Eto tihi jigari embo na Paul amo Roman ta citizen avo chain na pundua avo eto joru ea.
ACT 22:30 Eto iji nei Roman ta isoro tihi jigari embo na Paul ta degi Judea embomeni na pehumba ea amita be avo kesi ke enu Priest okokose te Council te vahaita arumbeo Paul chain na pundua avo bujeketo humbuto pambuto ikenu hetena.
ACT 23:1 Eto Paul na council kon kon ue ke einge ena, “Nau namei kamei na do eagona eto ari tapa do eagona amo God ta tombu ta pere eagona avo eto nau jo ta memenga irae,” ainge enu
ACT 23:2 Priest okose javo Ananias na embo nei Paul ta engihita heteto mihia amita degi Paul pe ta tara ke enu
ACT 23:3 Paul na ke mine einge ena, “Umo te tapa jo no kakesa te avoembo God na umo tasuja. Umo ai arumbeto mihie ungotenau ke pepeni ere poekihea.” ainge enu
ACT 23:4 embo Paul ta engihita mihia amina ke einge ea, “Umo God ta Priest okose isembihete?” ainge eo
ACT 23:5 Paul na ke mine einge ena, “Nau namei kamei Priest okose avo na kiae avo eto ke ehena te God ta ke na mahu kajari amo,’ ‘Embo na mane amita tihi jigari embo avo sapura ke mane asora’.”
ACT 23:6 Eto Paul na Council embomeni amo Sadducees te Pharisees embomeni te aingeto arumbeto mihio kito ke einge ena, “Nau namei kamei na Pharisee embora eto nau epehemane amo Pharisee embopora eto nau sapura amo embomeni pehari ehako vasiri te erari ke ijie simba eagona avo eto na humbuto ganoka ere ova,” ainge enu
ACT 23:7 ingito Pharisee embomeni te Sadducee embomeni te aingeto kaheke kaheke eto jujune ke ea.
ACT 23:8 Amita be amo Sadducees embo na embo pehari ehako vasiri te erari te Anera te ahihi te avo sokova ke eagora rate enana Pharisees embo na ke tapa amo ke be eagora avoeto jujune ea.
ACT 23:9 Eto ke peni be eo asavi peni vahai enu Pharisee ta ke pepeni ahe poekari embomeni na ereto embo tapa ta degi ke ngahia na eto einge ea, “Embo emita sapura irae rate Anera rete ahihi re amina ke amita degi ikena,” ainge eo
ACT 23:10 embomeni na jujune be ihiketo uo isoro ta tihi jigari embo na Paul jigito saukeora joru eto amita isoro embo enu embo orohuta veto Paul humbuto bande peni amita jo ta vihito ikea.
ACT 23:11 Eto mume sihukihinu Bada na puvuto Paul ta engihita heteto, “Umo hamo ngahia ejo. Eto nau ke Jerusalem da ta ehea ainge dombo da Rome ta pambuto nau ke avo ehako aisoa.” ainge ena.
ACT 23:12 Eto iho vujenu Judea embomeni na vahaita horuketo ke ngahia na, “Eto ungote indari mane indesora te kihi Paul taro pehau indari indesora,”
ACT 23:13 ainge eto embo tapa 40 eto nei uhoho
ACT 23:14 amina pambuto Priest te embo pepeni ta degi ke einge ea, “Dago indari mane indesora te kihi Paul teto indari ambota indesora
ACT 23:15 avoeto ungote Council embomeni te aingeto ke ikavo isoro tihi jigari embo ta degi pambau ingito ungo Paul ehako eto ingesova ke amina hotembeto ikau puvutuhurou degi ta ojiketo mihima taro pehasuja,” ainge ea.
ACT 23:16 Eto Paul ta du ta meni na ke avo ingito puvuto isoro embo ta bande peni ta horeto Paul ta degi harikenu
ACT 23:17 ingito isoro embo vahai jage enu puvunu embo amita degi, “Singa erevi humbuto tihi jigari embo ta degi pambujo amina ke do asi uje ere ua avo ai,” ainge enu
ACT 23:18 humbuto pambuto tihi jigari embo ta degi puvuto isoro embo vahai amina einge ena, “Tipura embo Paul na na jage ehei pambene singa erevi ikehei humbuto puvena avo amina ke no degi ta au ingesoa,” ainge enu
ACT 23:19 tihi jigari embo na singa amo ingeni ta jigito pambuto oenga arumbenu, “Umo nau degi ta ke do asi uje ere oe avo ejo ingone,” ainge enu
ACT 23:20 singa amina, “Judea ta tihi jigari embopo na vahaita eto ke kasehera amo inena evito Paul humbuto pambao amita ke nei avo au ingesi eto ke ikaro puvuresuja
ACT 23:21 amo umo mane ingesoa. Embo tapa 40 ainge degi ta ojiketo mihiroro Paul pahurou taro pehau indari ambota indesi ke ehere ingito puvena. Eto enana tapa nununga eto umo Paul ikaote o mane ikao avo simba mihera.” ainge enu
ACT 23:22 isoro ta tihi jigari embo na singa ta degi ke einge ena, “Ke emo embo nei ta mane ao ingesora,” ainge eto embo amina singa ikenu pambuna.
ACT 23:23 Eto isoro ta tihi jigari embo na isoro embo heriso jage enu puvuo ke einge ena, “Ungo da Caesarea ikano pambasova avo eto isoro embo tapa 200 humbuto horse ta pambari embo tapa 70 humbuto ki gosukari embo tapa 200 humbuto
ACT 23:24 Paul ta horse heriso humbuto aingeto sau sau nununga evujo ungo mume eha 9 o’ clock pambasova, amo Judea isoro embo na Paul mane tasora teho governor Felix ta pambasova,” ainge eto
ACT 23:25 isoro tihi jigari embo na Governor Felix ta degi ahari einge kajena.
ACT 23:26 “Oio nau Governor okose Felix na Claudias Lysias nau jo tapa na umo ere pekihena.
ACT 23:27 Eto embo erevi Judea embomeni na tasi ore Roman embo avo eto nanena nau isoro embo ikehene pambuto peiketo umbera.
ACT 23:28 Eto enana embo emita pehumba erera avo be kesi enana ta Council ta degi humbuto pambena.
ACT 23:29 Eto embo amita sapura eto tari pehari eto tipura ari amo irae kehena te Judea embo ta ke pepeni avo poekari ke eto pehumba ehera.
ACT 23:30 Eto Judea embomeni na teho sio taro pehaja ke ehere ingito no degi ta ikehene ere pahua aravora. Judea embomeni ta degi ke asona amo pambuto no tihi ta embo avo pehumba asora,” ainge isoro tihi jigari embona ahari ta kajena.
ACT 23:31 Eto isoro ta tihi jigari embo na ke do ena avo amita isoro embopo na ea. Eto isoro embomeni na Paul humbuto pambuto da Antipatris ta evito
ACT 23:32 isoro embomeni utu na pambua avo egerembeto enana ta da Jerusalem ta puvutohuo
ACT 23:33 o hamo ta pambari embo na Paul humbuto da Caesarea ta pambuto Paul te ahari kajea amite Governor ta ingeni ta iketo egerembeto puvua.
ACT 23:34 Eto governor Felix na ahari eheketo kito Paul ta enda deire avo eto inginu Paul na, “Da nau Celicia.” ainge enu ingito
ACT 23:35 ke einge ena, “Aravora, no pehumba ari embo puvuroro ano pehumba aro ingesona,” ainge eto ke ikenu embo amo puvuto Paul humbuto pambuto bande peni Herod na mahu toari ai ta iketo simba ea.
ACT 24:1 Eto Paul na Caesarea ta mihinu iji 5 irae enu Priest okose Ananias na embo okose te eto amita ke pepeni kiari embo javo Tertullus te aingeto humbuto da Caesarea ta Governor Felix ta degi Paul pehumba asi pambuo Governor Felix na enu Paul ereto hetenu
ACT 24:2 ke pepeni kiari embo Tertullus na Paul ta sapura deire avo einge ena, “Nau embo okose, no omena ari javotoho na tunga jamo jamo te iji koso be mihera eto no ari eha eto ke eha na ungotenau enda javotoho mihia
ACT 24:3 avo eto ungotenau enda tapa eto iji tapa avo kogue umo osa ere ora
ACT 24:4 rate na no iji koso mane jigesona te dagota ke isapa asora avo inena ingijo jo ai.
ACT 24:5 Eto embo sapura amo Nazarene ta embo okose amina enda tapa ta pambuto Judea embomeni ta jo kajeoi ereto isoro eagora.
ACT 24:6 Eto embo amina dagota temple au sapura aja oi peiketo humbuto dagona dagota ke pepeni na pehumba asi ore
ACT 24:7 isoro ta tihi jigari embo Lysias na ivohana te tapa puvuto humbuto
ACT 24:8 no degi ta pehumba ara ke ehija. Avoeto inena embo emita pehumba ta ke tapa do erera avo inena embo amita ke avo ingito dagona ke tapa erera avo au ingito ke be asoa.”
ACT 24:9 eto ke ainge enu Judea embomeni na jo vahai eto ke be ra ea.
ACT 24:10 Eto Governor na Paul ke aja ingeni na ahe ahe enu ereto ke ena, “Eto umo iji koso enda emita ari tapa avo ke kasehea avo eto na tunga javotoho ere ona avo eto nau ari tapa avo no degi ta ke asona.
ACT 24:11 Umo ke be asoa amo na iji 12 Jerusalem ta God jakeka asi pambuhena avo embomeni na ke be ra ainge no degi ta asora.
ACT 24:12 Eto na Judea embomeni ta God jakeka ari bande ta eto temple ta eto da jo ta isoro ke ijirae embo na na hambae.
ACT 24:13 Eto enana na eha pehumba erera amo harikari embo irae avo eto ke be manera
ACT 24:14 te na no degi ta ke vahai erevi asona eto na embomeni Iesu ta degi ta vasiri eha ere humbuhora amiga kaju eto dagota mamahamane ta God avo jakeka eagona te Judea embomeni na Iesu ta ke avo ke be mane ke eagora te na ke amite Moses ta ke pepeni amite peroveta na ke mahu kajari amite aingeto ke be eagona.
ACT 24:15 Eto namote enana Judea embomeni te aingeto hotembari vahai eto God na embo sapura te javotoho te au vasiri te iresora avo dago ke be ijie simba mihera.
ACT 24:16 Eto na iji tapa ari tapa eagona avo embo ta eto God ta tombu ta eagona avoeto jo nau ta memenga irae.
ACT 24:17 Eto na Jerusalem ta pambena amo jua koso enda nei ta mihana nau embomeni ta osaga avoeto koro ikihe God pekasi Jerusalem ta pambuto
ACT 24:18 mihimihe temple ta horeto jo ta tongopa irae aja pene ikehene irae ehei mihene puvuto na hambera. Eto embomeni na temple jo ta isapamane irae eto jujune aera
ACT 24:19 Eto Judea embomeni Asia enda ta eto puvurari amina na temple jo ta hambera, enana ta ke irirou no degi ta puvuto ke ahera
ACT 24:20 rate embo mihera emo na council ta heteto ke vahai ijiena avo no degi ta harikari uje ae
ACT 24:21 ore, na ke vahai erevi jage eto council ta degi einge ijiena, ‘Embo pehari ehako vasiri te erasuja avo ke be eagona avo eto na pehumba ere ova.’” ainge enu
ACT 24:22 Felix na Iesu ta ke tapa mahu ingari avoeto ke mine ari irae enu toto embomeni ta degi ke einge ena, “Isoro ta tihi jigari embo Lysias puvurou amiga ke sirikasona,”
ACT 24:23 ainge eto isoro embo vahai enu puvunu ke einge ena, “Embo erevi humbuto pambuto mane punduresoa rate indari ikaro indie isa ururou namei kamei na simba aisora.”
ACT 24:24 Eto iji nei ainge Felix te amita ae Drusilla amo Judea evohu te aingeto puvuto Paul jage eo puvuto Iesu Keriso humota aisora avo ke enu ingiho
ACT 24:25 embo ta degi javotoho ari ta ke te ke gamo ingito ai ta mane pambari ta ke te iji kombu puvurou embo sirikari ta ke avo enu ingito joru eto, “Aravora umo pambu. Ambota umo ano puvuto ke ehako asoa,” ainge ena.
ACT 24:26 Rate Felix ta hotembari be amo Paul na iji nei puvuto Felix ta koro ojikari na ombuto arahata pambaja uje ena avo hotembeto iji nei nei ainge Paul jage enu puvuto ke ena rate koro ikae.
ACT 24:27 Eto jua heriso irae enu embo Porcius Festus na Governor eto Felix ta asa ta arumbena rate Felix na Judea embomeni tunga umbuhe Paul asa tipura ta tona.
ACT 25:1 Eto embo Festus na Caesarea ta puvuto mihinu iji 3 irae enu da Jerusalem ta pambunu
ACT 25:2 priests okokose te Judea ta tihi jigari embopo te na Paul pehumba eto Festus
ACT 25:3 na Paul ikau Jerusalem ta pambaja penunu ea amita be amo enana degi ta ojiketo mihiroro Paul degi ta puvutuhurou tasi uje eto eo
ACT 25:4 Festus na ke mine einge ena, “Paul Caesarea tipura ta mihia eto na ei iji isapa eto pambasi ere ona.
ACT 25:5 Avo eto ungota tihi jigari embo ikevu namote pambuto Paul ta degi pehumba eto amita sapura mihei o irae avo ai ta kesora.” ainge ena.
ACT 25:6 Eto Festus na iji 8 eto 10 ainge ai mihimihe pambuto da Caesarea aita mume vahai evito amita court humbari bande ta arumbeto enu
ACT 25:7 Paul humbuto puvuto amita tihi ta ikeo hetenu Judea embomeni Jerusalem ta eto puvua amina jorereto heheteto ke ngahia be eto Paul ta degi pehumba ea amita ke be amo harikari embo irae ke sokova ea.
ACT 25:8 Eto Paul ta do ari tapa avo harikena, “Na Judea embomeni ta ke pepeni sapura ae eto temple sapura ae eto Rome ta ke pepeni avo poekae,” ainge enu
ACT 25:9 Festus na Judea embomeni na Festus osa ara, Paul ta degi ke einge ena. “Umo pehumba ehera amo ehako namote pambuto Jerusalem ta pehumba asora amo aravorete?” ainge enu
ACT 25:10 Paul na ke einge ena, “Umo na kogoa amo Judea embo ta degi sapura nei do ae rate Rome ta court bande ta heteto mihena amo inonora.
ACT 25:11 Na ke peni poekaehena amo mane joru pambaehena tao pehaehena. Eto enana eha pehumba erera amo ke be mane avoeto na enana ta ingeni ta ikasoa avo iraera. Avo eto na ike Rome ta okose ta degi pambane.” ke einge enu
ACT 25:12 Festus na ingito amita ke pepeni kiari embopo ga ke kaseto ke einge ena. “Umo Rome ta embo okose ta degi ta pambuto court ai asi ehea avoeto pambasoa,” ainge enu ke irae ena.
ACT 25:13 Eto iji nei King Agrippa te amita du Bernice te aingeto Festus pekasi da Caesarea ta puvuto iji isapa mihio
ACT 25:14 Festus na Paul ta ke avo einge enu ingina, “Embo vahai mihia amo Governor Felix na amita iji te tipura ta tona avo mihia.
ACT 25:15 Eto na Jerusalem ta pambene Judea ta priests okokose te embo okokose te na pehumba eto nanena embo avo tano pehaja ke ehera
ACT 25:16 avoeto enana ta degi ke ijiena amo dago Roman embomeni na court ue embo ta tihi ta eagore amita ke mine avo eoi ingiora te teho sio mane embo amita pehumba ari embomeni ta ingeni ta ikagora ke ainge eto na puvuto mihene
ACT 25:17 enana puvuto evere na nei do ae pehumba asi puvuto arumbeto ehene embo humbuto puvuto ikehere hetihaja. Eto na embo amita sapura peni vahai ari ke hotembihena
ACT 25:18 rate enana ta pehumba amo erena erevi mane
ACT 25:19 enana God daingeto jakeka eagora te embo Iesu pehena rate Paul na Iesu ehako vasiri te erari ke ijija ke avo ingito jujune mine ara uera.
ACT 25:20 Eto na ke avo be kiae eto mana mana eto Jerusalem ta ikano pambuto court umbaja ehena
ACT 25:21 rate Paul na uje ae eto Rome ta embo okose ta pambuto court humbasi ehija avo eto tipura ta ikehene embo na simba ere ora ambota ikano Rome ta pambasuja,” ainge Festus na enu
ACT 25:22 Agrippa na, “Aravora na embo amita ke ingesi uje ere ona,” ainge enu Festus na, “Umo evito embo amita ke ingesoa,” ainge ena.
ACT 25:23 Eto evito embomeni tapa na hahaveni te osa osa te ja tivihe ue King Agrippa te Bernice te eto enana ta isoro kihi humbari embopo te eto da ta tihi jigari embo okokose te aingeto ke kasari bande ta horea eto
ACT 25:24 Festus na ke enu Paul humbuto bande ta ikeo hetenu Festus na ke einge ena, “Oio King Agrippa te embomeni tapa nau ke asona ingivujo, embo emo Judea embo ei ta eto Jerusalem da ta embomeni te aingeto hotembari vahai eto nau degi ta ke vasiri na eto embo emo teho iroja uje ae ue taro pehaja ke eagora
ACT 25:25 rate tari pehari ta ari sapura amo na amita degi ta hambae rate amina Rome ta embo okose ta pambuto court asi uje uija avo eto ikano pambasuja
ACT 25:26 rate amita ari sapura ahari ta do kajano avo na kiae avo eto ungo ta degi ta ere ikihena ungona amita ari sapura avo eto ingesova eto King Agrippa umo kioa ere ikihena amita be amo inena amita ke ingito na ke do ahari ta kajano avo ao ingesona.
ACT 25:27 Eto na tipura embo ta ari sapura deire avo kajae teho ikano pambasuja na ari avo uje ae avo eto erena.”
ACT 26:1 Eto ke ainge Festus na enu Agrippa na Paul ta degi ke einge ena, “Umo no ke tapa avo ejo ingone,” ainge enu Paul na ingeni na ahe ahe eto ke einge ena,
ACT 26:2 “Oio nau King Agrippa na Judea embomeni na nau degi ta pehumba ere ora amita ke be avo no degi ta aisona
ACT 26:3 avoeto na tunga javotoho be ere ona amita be amo inena Judea embomeni ta ari te ke te amo mahu kiari avoeto na ke asona avo oje jevito ingijo.
ACT 26:4 Eto na singa ta eto puvuto iji eha vasiri nau tapa avo Judea embomeni tapa na kiarira. Eto na enda nau ta eto Jerusalem ta daingeto mihahena avo enana kiarira
ACT 26:5 eto na Judea embo nei uhoho javo Pharisees ga kaju ue God jakeka kaikari eagona ke avo enana kiarira te ke avo ke be asi uje ue amo mahu ahera.
ACT 26:6 Eto na eha ei heteto court ere ona amita be amo God na dagota ohihi ta degi ke ena avo simba mihena
ACT 26:7 ke avo ungotena Judea ta ohihi javo tapa 12 ta meniundi tapa na iji te mume te God ta ke ena avo simba ue God jakeka eagora. Eto nau king, ke be erena, eto ke avo namote tapa simba mihena avo embo Judea embomeni na na pehumba ere ora.
ACT 26:8 Ungo Judea embopo ta degi erena, ke God na ungotenau ohihi ta degi ikena amo pehari embo ta degi vasiri ikaguja avo do eto ungo ke be ae eagove?
ACT 26:9 Eto nanena Nazareth embo Iesu ta degi sapura be uena
ACT 26:10 eto Jerusalem ta pambuto sapura be uena. Na priests okokose ta degi ke humbuto Iesu ta embomeni andito tipura ta gosukihena eto teo pepehekea amo nanena aravora ijiena.
ACT 26:11 Eto iji isapamane God ta jakeka ari bande ta horeto Iesu ta ambotani toruena amo enana na Iesu amo ke be mane ara toruena. Na enana ta degi tumo peni vahai be ue enda nei nei ta pambuto Iesu ta ambotani jombure eto humbuhe ere toruahena.
ACT 26:12 Ajao nau okose, na pure avo pere asi priests okokose ta degi ta ahari humbuto da Damascus ta pambuhone
ACT 26:13 degi orohuta iji 12 oi usasa iji ta usasa ainge mane amina joeketo kajenu
ACT 26:14 dago tapa enda ta veto gombuto nanena Israel embo ta ke hajire avo einge ingia, ‘Saul, Saul umo do eto nau degi ta osaga ere ikihe, umo o cow ainge no mama ta ituha kojiketo memenga ere kogoa,’ ainge enu ingito,
ACT 26:15 ‘Bada, umo amunure?’ ainge eo, ‘Na Iesu ra, umo nau degi ta osaga ere ikihea
ACT 26:16 te ereto hete. Eto na puvuto nau hondate ari embo ere humbuhona eto inena eha ere kogoa eto ambota do ano kesoa amite tapa ke hande asoa
ACT 26:17 eto umo Israel embomeni ta eto enda nei embomeni ta degi ikano pambasoa amo enana ta ingeni ta eto oreto umbasona.
ACT 26:18 Eto inena enana ta tihi hirikao mume ere kogora avo ahereketo usasa kesora eto Satan ta sovera toto God ta sovera jigama ue eto enana na be hotembihiroro enana ta ari sasapura hotembeto toto ano God ta toho aisora.’ ainge Iesu na nau degi ta enu ingia.
ACT 26:19 Avoeto nau King Agrippa uhu ta do puvunu kia avo ke agi ue
ACT 26:20 Damascus ta eto Jerusalem ta eto Judea ta enda tapa eto enda nei embo ta enda ta ke hande ere uahena amo enana ta ari sasapura ajato eto God ta degi egerembeto jo haperekau enanata irari nei ururoro embo nei na kito ke be eto tunga haperekari ke asora.
ACT 26:21 Eto na temple jo ta mihie ke avo hande uena eto Judea embo na ke avo ingari uje ae ue na humbuto taro pehana uje ea
ACT 26:22 rate God na iji tapa na hondate eaguja avoeto iji eha emite ungo embo te eto embo pepeni ungota degi ta ke erena. Eto na ke hande eagona amo peroveta te Moses te na mahu ere ijiahera
ACT 26:23 avo Judea embomeni ta Hondate Ari Embo na memenga kito peheto ehako vasiri te kihi erasuja eto ainge dombo Judea embomeni te enda nei embomeni ta degi amita oreketo humbari ke au usasa kesora,”
ACT 26:24 ke ainge Paul na enu embo Festus na gagaha eto, “Paul, umo pipi-konene embo avo eto no kiari peni vahai be na ehei umo pipi-konene ere oa.” ainge enu
ACT 26:25 Paul na ke mine einge ena, “Nau embo okose, na pipi-konene ae rate ke peni be avo ehena
ACT 26:26 eto King Agrippa, na ke ehena amo umo kiarira avo eto na joru ae no degi ta ke erena eto ke emo ojikari ke mane avo ehene oje hiriketo ingea avo erena.
ACT 26:27 King Agrippa inena peroveta ke be eagoete? Avo na kogona.” ainge enu
ACT 26:28 King Agrippa na ke mine einge ena, “Paul, inena na iji isapa Christian aote?” ainge enu
ACT 26:29 Paul na, “Iji tuho retemo koso re amo na God ta degi pari eagona amo umo te ungo tapa ke nau ere ingiheva amo na iteko Iesu ta humota ari embopo asova rate chains na pundurari aingeko manera.” ainge enu
ACT 26:30 King Agrippa te Governor Festus te evohu Bernice te embomeni tapa na ereto pahue
ACT 26:31 ke einge mine ara ea, “Eto embo emita sapura nei do irae avoeto tipura ta ikari eto tari pehari avo irae ra,” ainge eo
ACT 26:32 King Agrippa na Festus ta degi ke einge ena, “Embo emo Rome ta embo okose ta degi pambasi ke aehija amo mahu ikaro arahata pambaehija.” ainge ena.
ACT 27:1 Eto Paul te tipura embomeni nei uhoho te aingeto Rome ta ikara ke eo na Luke enana ga pambasi uo tipura embo tapa avo Rome ta isoro embo javo Julius amo Rome ta embo okose ta isoro kihi humbari embo vahai amita ingeni ta ikea.
ACT 27:2 Eto e nga da Andramyttium ta eto puvuto Asia Province da nei nei ai ta pambasi unu kito vihito pambua. Eto enda Macedonia ta da Thessolonica ta embo vahai javo Aristarchus na dago ga pambuna.
ACT 27:3 Eto eva ta pahuo iho vujenu da Sidon ta puvuo embo Julius na Paul kito osaga eto enu arahata pambuto amita namei kamei kogue amita uje tapa avo ena.
ACT 27:4 Eto da Sidon toto e nga ta pambuhumihe pisara peni vahai be kito tiuka Cyprus tiumbeto jamo ta pambuto
ACT 27:5 province Cilicia seriketo pambuto province Pamphyllia seriketo pambuto da Myrna province Lycia eva tihi ta hetea.
ACT 27:6 Eto ai e nga vahai da Alexandria ta eto puvuto da Rome ta enda Italy ta pambasi unu dago simba ari embo na kito enu dago ai vea.
ACT 27:7 Dago iji heriso pahue pisara peni vahai avoeto osaga kogue pambuto da Cnidus avo auviho pisara tihi hena ta puvutuhunu e nga bende jandireketo pambuto tiuka javo Crete amita tutumo Salmone jamo ai kito tiumbeto
ACT 27:8 kaina hena tiuka hora ta pahue pisara avo eto pambari ngahia ue umo joremba jamo jamo ari javo ‘Safe Harbor’ da Lasea engihi ai horea.
ACT 27:9 Eto iji koso be mihie iji javo Atonement mahu irae eto ga iji ihikenu pisara te eva vasiri peni vahai unu pambari ngahia be enu
ACT 27:10 Paul na hotembeto ke einge ena, “Na ere kogona mo ungotena pambasora amo embo sasari ururoro e nga te donda tapa amo sapura asuja avo na ere kogona,” ainge ena
ACT 27:11 rate isoro embo dago tihi jigina amina Paul ta ke agi ae eto e nga ta mamo te tari jigari embo te ta ke agi ena
ACT 27:12 amo eva vasiri ari iji te ai irari sapura avo eto embo isapamane na joremba javo Phoenix tiuka Crete ta pambasi uje ea. Eto joremba Phoenix amo ihane hena ai eva vasiri ari iji te irari javotoho mihahera.
ACT 27:13 Eto pisara isapa kaina hena ta puvunu embomeni na kito tunga javotoho eto pambasi ke eto e nga jigari avo jigio vihinu Crete ahone hora ta ihiketo pahuo
ACT 27:14 pisara ivo peni vahai javo humburu ombo ta eto puvuto eva ta veto puvunu
ACT 27:15 embo na e nga jigito bende na pambari inono ae enu sio degi nei ta pambuna.
ACT 27:16 Eto pambuto tiuka isapa javo Cauda kaina hena ai eva ivo isapa unu kito e nga isapa avota handukari avo pure ngahia be ue humbuto gaga ta iketo tigia.
ACT 27:17 Eto e nga esi peni na punduto pambuhumihe enda Libya ta hora ai e nga teto pejeuja joru eto bo jigio venu e nga sio degi nei ta pambuna.
ACT 27:18 Eto pambuto evito pisara te eva te vasiri jamo ae enu e nga jo ta donda humbuto eva ta gosukea
ACT 27:19 eto iji nei e nga jigari donda huna avo humbuto eva ta gosukea.
ACT 27:20 Eto pisara peni vahai jamo ae enu iji isapamane amita jo ta kuro te hunjara te iji te kiae avoeto eheheto pambari inono ae enu dago sari asora avo hotembea.
ACT 27:21 Eto embomeni na iji koso donda indae uo Paul na ereto ke einge ena, “Ungo ke nau agi eto Crete toto pambaheva amo ungo sari aheva te ungo ke nau be ingito hamo ngahia evujo ungo mane sari asova
ACT 27:22 te e nga avo pejasuja amita be amo na God ta toho eto na God jakeka eagona
ACT 27:23 amita Anera na mumete nau degi ta ke einge ehei ingena.
ACT 27:24 ‘Paul, umo joru aojo umo Rome ta embo okose ta tihi ta hetasoa. Eto embomeni umo te mihera avo God javotoho na au mane sari asora.’ ainge Anera na ehei ingena
ACT 27:25 avoeto embomeni hamo ngahia evu God ta ari amo na kiarira avo eto ke ehija ainge dombo asuja
ACT 27:26 avoeto ungotenau e nga tiuka nei amita hora ta pambuto tasuja,” ainge Paul na ena.
ACT 27:27 Eto dago mume tapa 14 ainge eva Mediterranean ta hamo ta vihito veto tiroki koheki ue siosao pambuhumihe mume orohuta e nga tari jigari embo ombo ta puvurari ke hotembeto
ACT 27:28 esi na donda bouka avo handuketo eva ta gosukeo vena amita heka tapa 40 meters avo kito amita ambota heka nei amo 30 meters avo kia.
ACT 27:29 Eto enana e nga koro ta teaguja hotembeto e nga jigioi hetaguja “Anchor” tapa 4 ainge avo e nga ta handuketo ikeo venu iho sausau vujaja hihine ijio
ACT 27:30 e nga tari jigari embo na oenga pambasi e nga isapa avo bujeketo ikeo venu e nga ta jigari bende ta avo handukasi ke eto ahe kihira uo
ACT 27:31 Paul na kito isoro embopo te enana ta tihi jigari embo ta degi ke einge ena. “En nga tari simba ari embo pahuroro ungo tapa sasari asova,” ainge enu
ACT 27:32 isoro embo na e nga isapa amita esi avo tiukeo veto oenga pambuna.
ACT 27:33 Eto iho unga vihito hunu Paul na enana indari indora ke einge ena, “Ungo mume tapa 14 indari indae miheva
ACT 27:34 avo indivujo eto ungo mane sari aisova eto ungo mane memenga kogue osaga humbasova,”
ACT 27:35 ainge eto Paul na bread humbuto God ta degi peketo bread periketo indinu
ACT 27:36 embo tapa kito hamo ngahia enu bread humbuto india.
ACT 27:37 Eto dago embo tapa 276 e nga jo ta mihia amina indari indio inono enu
ACT 27:38 e nga ejeha aja indari huna eva ta gosukea.
ACT 27:39 Eto iho vujenu e nga tari jigari embo na ombo amo mahu kiae avo eto ombo avo kito mana mana ea. Eto eva joremba hora javotoho kito ai eto kito aro e nga hora ta vihito hetaja hotembeto
ACT 27:40 e nga jigari amo tiuketo eva ta kororo eto venu tari ta esi amo tiukeo gogora enu bo e nga bende ta jigio vihinu pisara na puvuto tihi hena ta kajenu pambuhumihe
ACT 27:41 eva orohuta hora vihari ai ta e nga bende na hora ta vahaikenu eva piri peni vahai puvuto e nga avo tenu pepejekihinu
ACT 27:42 isoro embopo na tipura embo veto daveto pambari ke hotembeto tipura embo taro pepehekara
ACT 27:43 ke eo isoro ta tihi jigari embo na Paul tunga humbuto teagora hotembeto haekena. Eto tihi jigari
ACT 27:44 embo na ke enu umo davari embo amo umo daveto pahuo embo nei umo davari kiae amo ji tutuho e nga pejena avo humbuto ji ta jigito hora ta pambua. Eto dago tapa memenga osaga kiae teho hora ta pambua.
ACT 28:1 Eto dago embo tapa hora ta puvuo tiuka amita javo Malta avo eo ingia.
ACT 28:2 Eto Malta embomeni na dago peketo hondate uo ga ihiketo venu dago jajemo unu ji undukeo evekihinu
ACT 28:3 Paul na ituha jirembeto sundurari vahai ai o koso o jihuri ainge na jo ta horeto mihina avo humbuto ji ta ikenu evikihie vevere enu serimbeto puvuto Paul ta ingeni ta kambuto vahaikenu
ACT 28:4 da asa embomeni na kito ke mine ara eto ke einge ea, “Embo emo embo tari embo rate eva piri na tae pehae puvei koso o na kambei pehasi ere ua.” ainge eo
ACT 28:5 Paul na ingeni ihovekenu o koso o na ji ta veto evekenu memenga kiae eto nei do ae unu
ACT 28:6 embo na Paul ingeni pajirou veto pehasuja avo hotembea eto iji koso simba ea Paul pehae enu kito ke einge ea, “Embo emo ahihi ra,” ainge ea.
ACT 28:7 Eto tiuka amita embo tihi jigari amita javo Publius amita da amo hoi ta mane avoeto ai pambuo dago kito pekari osa ari undurari javotoho unu amiga ai iji 3 mihie
ACT 28:8 Publius ta mamo amita ambure sapura hamo vevere te se sapura te unu Paul na amita evari bande jo ta horeto pari ue ingeni hamo ta tembenu kojena.
ACT 28:9 Eto embomeni na ari avo kito ambure embomeni humbuto puvutuhore Paul na pari uoi kokojikihahera.
ACT 28:10 Eto embomeni dago jakeka ue hande ikihahera eto dago pambasi uo dagota indari te o te umo te ikeo humbuto e nga jo ta ikea.
ACT 28:11 Eto dago hariga tapa 3 tiuka Malta ta mihahera da Alexandria ta e nga vahai javo Ahihi Heriso amo pisara te jajemo iji avo eto mihahija amina pambasi unu kito e nga ai pambua.
ACT 28:12 Eto pambuto da Syracuse ta iji 3 irae enu
ACT 28:13 pambuto da Rhegium ta evio pisara kaina hena ta ihiketo puvutuhunu pahuo iji heriso irae unu da Puteoli Rome enda ta puvuto e nga toa.
ACT 28:14 Eto ai dagota namei kamei Iesu ta ambotani hambuo amiga irora ke eo ai hura vahai mihimihe ereto pahuo
ACT 28:15 dago ta namei kamei Rome ta iragora amina dago puvurari ke ingito puvuto market besi javo Appius ai namei kamei nei huna na puvuto hambuo amiga pambuhumihe namei kamei nei huna amo degi javo ‘Three Inns’ ai hambuto Paul na namei kamei kito tunga javotoho ue God jakeka ijie sovera ari humbuto Rome ta puvua.
ACT 28:16 Eto da Rome ta puvuo isoro ta tihi jigari embo na isoro embo vahai ikenu Paul bande nei ta humbuto simba ue mihahija.
ACT 28:17 Eto iji 3 irae enu da Rome ta Judea embomeni okokose jage enu puvuto vahai ta horukeo Paul na ke einge ena, “Nau namei kamei na ungotenau ari mahu ungotenau ohihi ta eto puvurari eto ungotenau embomeni ta degi sapura ae rate Jerusalem da ta na humbuto Roman embo ta ingeni ta ikehere tipura ta ikehera.
ACT 28:18 Eto Roman embo na na taro pehana eto nau sapura jombure eto hambae eto arahata pambana uje ehera te Judea embo na jo ngahia ehere kito
ACT 28:19 Rome embo okose ta degi pambasona ainge eto puvena rate na nau embomeni Rome embo okose ta tihi ta pehumba asi puvurae,
ACT 28:20 rate ungotena Judea embomeni na oreka embo vahai simba eagora avoeto na chain na ingeni ta pundurari avoeto ungota degi ke asi uje ehena.” ainge enu
ACT 28:21 enana na amita degi ke einge ea, “Eto dago ahari Israel ta eto umbae eto nei Israel enda ta namei kamei na duru humbuto puvuto ae ingae eto nei no degi ta sapura ari ke ae ingae
ACT 28:22 rate embomeni tapa na no pure embomeni vahai ta degi sapura ari ke eagora avo eto dago no ke be avo ao ingesi uje ere ora.”
ACT 28:23 ainge eto iji ikena avo puvunu embo isapamane puvuto Paul ta bande ta horuketo Paul ta ke ingia eto ihote eto mumete God na embomeni amita toho siriketo humbuto enana ta King asuja amita ke avo harikena.
ACT 28:24 Ainge Paul na ijinu embo nei uhoho na Paul ta ke avo ke be ijio embo nei uhoho na ke sokova ke ea.
ACT 28:25 Eto Paul na Moses ta ke pepeni te peroveta ta ke avo ehekihe Iesu amo embo ta orekari embo be avo puvuna
ACT 28:26 eto Paul na ke nei einge ena, “Eto peroveta Isaiah na ungota Ohihi ta jo ngahia avoeto enana ta degi Ahihi Otohu ta ke be avo einge ena, ‘Nau embomeni ta degi pambuto ke einge ejo. Eto ungo ingito ingito mane ingesova. Eto ungo kito kito mane kesova
ACT 28:27 amita be amo ungo oje sundurari eto tihi vahaikari eto uha sapura ari ra. Eto ainge ae amo tihi na kito oje na ingito uha na hotembeto nau degi ta puvutohururoro na ungo hondate ahena.’ ainge ungota ohihi avoembo God na enu peroveta Isaiah na kajena
ACT 28:28 eto ungo ainge iteko kogona,” ainge Paul na eto ke tutumota amo einge ena, “Ungo kogova amo God na embo oreketo humbasuja ke amo enda nei embomeni ta degi hande ore ere ingihera.” ainge enu
ACT 28:29 tapa sisiketo pahue jujune ke peni vahai be mine ara ijie pambua.
ACT 28:30 Eto jua heriso amita jo ta Paul na bande koro na ombuto humbuto mihinu embo na umoro puvutohuo Paul na pekari javotoho ue
ACT 28:31 God na embomeni amita toho humbuto enana ta King asuja amita ke te Bada Iesu Keriso ta ke avo joru ae ke tapa araha ta ahe poekihahija. (Eto Iesu ta ambotani ta ke ereita irae ua.)
ROM 1:1 Na Paul na Iesu Keriso ta pure ari embo apostel eto God ta duru javotoho embo ta degi hande ana jage eto umbuna avoeto nanena ungo Rome ekalesia ta degi ahari erevi ere kajihena.
ROM 1:2 Eto duru javotoho puvuresuja avo God na embo ta degi oje ena avo peroveta na ke ototohu avo mahu kakajekea
ROM 1:3 amo God ta Meni ungotenau Bada Iesu Keriso amina enda ta veto visi asuja amita ke avo kakajekea amo erevira, Iesu Keriso amo King David ta degi eto puvurarira
ROM 1:4 eto amina peheto Ahihi Otohu ta sovera peni be amina vasiri te erena avo kogue God ta Meni be ra ainge erera.
ROM 1:5 Avoeto amita javo avo enda embomeni tapa na ke be ijie avo ambo ambo ara God na na apostel ikena avoeto God ta hondate ari na enda tapa ta pahue ke hande ere ona
ROM 1:6 avoeto ungote tapa Iesu Keriso ta toho ava God na umbuna.
ROM 1:7 Avoeto ungo tapa God na osa ue amita toho ava siriketo humbunu Rome enda ta miheva amita degi ahari erevi ere kajihena amo ungota hondate ari te peka te avo God Mamota degi eto Bada Iesu Keriso ta degi ta eto puvuroi.
ROM 1:8 Eto ke kihi ta amo na Iesu Keriso ta javo ta God ta degi osa ari ere ikihena amo ungo God humota ere ova amita ke amo enda tapa ta sigeto ere pahua.
ROM 1:9 Eto na God ta ke agi ue amita Meni ta duru javotoho hande eagona avoeto na ungo hotembihe iji tapa pari eagona amo God na kiarira eto God na uje eto kito pambari degi hirikau pambuto ungo kesi pari ere ovona.
ROM 1:11 Amo Ahihi Otohu ta hondate ari avo hande eto humbuto sovera ava pambuto ungo kesi uje ere ona
ROM 1:12 eto erena amo na God humota eagona ainge ungo God humota eagova avo eto ungote tombu mine kia ue sovera ari mine umba asora.
ROM 1:13 Eto na enda nei nei embo ta degi pambuto pure ue pure ta ve avo umbagona ainge dombo ungota degi pambuto humbasi uje ere ona te nau namei kamei ungo be kivujo, ari neite neite na peikihei mihena.
ROM 1:14 Eto pure nau amo God na enda nei embomeni “School” kiari te “School” kiae embomeni te amita degi pambana ikena
ROM 1:15 avoeto ungo Rome ta miheva embomeni ta degi pambuto duru javotoho hande asi tunga ere ikihena.
ROM 1:16 Avoeto Keriso ta duru javotoho hande ururono ingito ke be aisuja embo amo God ta sovera na pehari sapura amita avo oreketo humbuhurono ke hande ue me mane kesona. Eto duru emo nau Judea embomeni ta mahu hande ea avo enda nei embomeni ta degi hande ere ona
ROM 1:17 eto duru amita ke susu amo God na embo ta degi ari javotoho erevi asi ere harikihia, amo embo na God humota ururou kito God na embo javotoho ke aisuja, amita ke amo God ta ke ta mahu kajari mihia amo erevira, “Humota ari embo amina vasiri hambasuja”.
ROM 1:18 Eto embomeni na enana ta ari sasapura neite neite amina God ta ke be avo teto hatihe eagora avoeto God ta tumo na uhu i ta eto veto embo tapa ta hamo ta veaguja avo God na harikeoi kiagora
ROM 1:19 amo God na uhu te enda te ena iji te eto puvuto eha emite amo God ta daroho irari ta sovera te eto amita ari tapa amo embo ta tihi na mane kiagora te amita ari avo ingeni hajire araha arahata kiagora avoeto God ta tumo avo tiumbeto pambari degi avo irae bera.
ROM 1:21 Eto enana God kia te God amo enana ta God mane ke ijie humota ae, osa kageni ae, hotembari sasapura ta pahuo jo mume enu
ROM 1:22 enana ungo oenga kiari embopo ke ijie hotembari jajavotoho toto
ROM 1:23 God usasa te daroho iraguja avo kuho sindeto ungota ingeni na embo ta tombu ta di ta o ta o koso o ta tombu avo ove eto God ke ere ijiahera.
ROM 1:24 Avoeto God na enana tonu hamo ta ujeje sasapura aita pahue me kiari, hamota tongopa mine ara ere ora.
ROM 1:25 Eto ari amina God ta ke be avo toto ke sokova ta pahue donda ingeni na ari avo humota ue donda tapa ari God avo ere toruhora. Eto God jakeka ari avo daroho iroi, amen.
ROM 1:26 Eto ari ainge avoeto God na enana tonu me kiari ta vasiri avo ujeje neite neite ue ere pahora amo enana ta airi te tapa na ivu jimbari toho avo toto pambuto evohu nei ga sesena eagora
ROM 1:27 eto ainge dombo embo na amita ae jimbari toho avo toto pambuto embo nei ga sesena asi uje isapamane eagora avoeto ari sasapura ta hajire amo mahu ue ere kogora.
ROM 1:28 Eto God ta kiari avo enana hotembae uo God na tonu enana ta uha sapura enu ari sasapura mane ara ena aita ere pahora.
ROM 1:29 Amo ujeje sasapura te ari sasapura neite neite eagora amo erevira, embo nei ta donda kito uje ari, embo nei tari pehari, boru jumbari, ke sokova ari, viso ari, embo nei hihi tirari,
ROM 1:30 embo nei ta javo sapura ari, eto God uje ae ari, na na ijie umo oenga jakeka ari, namei ta degi hoviro ari, eto ainge ue sapura nei avo asi jombure ue emamo ta degi agi ae ke peive eagora
ROM 1:31 eto hotembari irae, humota ae, jo ari irae osa ari irae embomeni
ROM 1:32 amina God na enana ta ari sasapura ta hajire ikau kogue pehasora amo enana mahu kiari rate toae ue embo nei nei kihi humbuto ue jakeka eagora.
ROM 2:1 Eto umo embo peni retemo isapa re amo inena God ta ari sirikari amo mane tiumbeto pambasoa te embo nei ta ari siriketo pehumba ere oa amo ari no te tapa umo oenga pehumba ereoa.
ROM 2:2 Eto ungotena kiari amo God na embo ta ari sasapura siriketo ke be na hajire ikasuja
ROM 2:3 te umo embo teho na embo ta ari avo sirikaroa te umo te tapa ari sapura vahai avo ereoa avoeto God na ari sapura ta hajire ikasuja amo daingeto tiumbeto pambao?
ROM 2:4 Eto God na no ari sapura ta hajire mahu ikau kiaehea te inena jo haperekau aja to aote mane ao avo God na iji koso be jo oi umo simba ere ua te God ta hondate ari avo uje ae ereoete?
ROM 2:5 Amo no jo ngahia amina jo haperekae mihiro God na ke be ta ari sirikari iji te amo God na no degi ta tumo pajire be aisi simba ere ua,
ROM 2:6 iji amite God na embo ta ari siriketo mine inono ta ikau kesora
ROM 2:7 amo embo amuna God ta usasa ta iresi jombure ue God ta uje avo pere ue sovera te iresuja embo amita degi God na vasiri ikau daroho iresuja
ROM 2:8 te embomeni tapa amuna ungota uje ta pahue God ta ke ga jujune ue ari sasapura ta pambasora amo God ta tumo na ikau memenga osaga keisora amo Judea embomeni na kihi kesora eto enda nei embomeni amo ambota kesora
ROM 2:10 eto ari jajavotoho embopo amo God na au usasa te peka te na otohu ta iresora amo Judea embomeni na kihi peka humbasora te enda nei embomeni ambota peka humbuto iresora
ROM 2:11 amo God ta tihi ta embomeni tapa inono be ra.
ROM 2:12 Eto God na degi nei ta ari sasapura rete javotoho hambasuja amo hajire inonota ikau kesora amo God ta ke pepeni Moses ta degi enu kajena amo enda nei embomeni na eheketo kiae rate enana ta jo ta God ta ke mihia amina ari sasapura davore javotoho davore avo harikeoi kiagora avoeto ari sapura aisora amo God na hajire ikau keisora. Rate God ta ke pepeni kajari amo Judea embomeni na eheketo kiagora te ke avo ambo ambo ae eagora avoeto God na hajire ikau kesora. Avo embo God na ke ingari embo avo javotoho ke mane eaguja te ke agi ari embo avo javotoho ke eaguja.
ROM 2:16 Eto ari einge ere ona amo God ta iji ke kahari puvuresuja amikote Bada Iesu Keriso na embo ta hotembari jo ta ojikari tapa amo siriketo hajire ikau kesora amita ke amo God ta ke hande eagona aita mihia.
ROM 2:17 Eto ungo Judea embomeni ta degi avo ikenu God na amita ke peni humbuto humota ue iragova eto God ta tunga humbari embomeni ke ijie na na ereva amite eto ungo meni isapa ta eto God ta ke ingito humbari irae ari avoeto sapura davore javotoho davore amo ungo ahepoekari kiari te God ta uje amite avo ungo kiari embopo avoeto tihi kuru ari embopo kihi humbuto pambari embopo eto mume ta irari embopo ta usasa ikari embopo eto
ROM 2:20 kiari umbae embomeni ahepoekari embopo eto meni isasaraho ta ahe poekari embopo amo ungo na eagova te do eto ungo oenga ainge ae eagove?
ROM 2:21 Eto pegene eagora ahe poekagova amo ungo mane pegene eagove?
ROM 2:22 Eto tiha pahia eagora ahe poekagova amo ungo mane tiha pahia eagove? Eto ungo God ingeni na ari uje ae embopo ungona enana ta jakeka ari bande ta pegene mane eagovete?
ROM 2:23 Eto ungo God ta ke peni humbari embo avoeto ungo embo peni ke ereva te God ta ke peni avo poekihe God ta javo eagove sapura eaguja eto God ta ke kajari mihia amina harikihia amo erevira “Ungo Judea embomeni ta ari avo enda nei embomeni na kogue God ta javo ere urumbihera.”
ROM 2:25 eto ungo Judea embomeni na dago God ta toho ke ijie hamo kakamba eagova te God ta ke peni avo poekasova amo hamo kakamba eagova amita ke avo irae asuja
ROM 2:26 rate enda nei embomeni na God ta ke pepeni avo agi ue hamo kakamba ae rate God na kito embo nau be ra aisuja avoeto ungo Judea embomeni amo hamo kakamba ue God ta ke pepeni poekagova
ROM 2:27 te enda nei embomeni hamo kakamba ae amina God ta ke agi eagora amina ungota degi pehumba aisora.
ROM 2:28 Ke erena amita be amo erevira Umo Judea embo tombu kiari amina mane eagoa te no jo te hotembari te tapa amina eagoa ainge dombo God ta ke kajari avo kogue hamo kakamba ari amina God ta toho mane asoa te no jo te ahihi te tapa na asoa amo God ta toho aisoa amo embo na ungota hamo kogue pehumba eaguja te no jo avo God na kito osa eaguja.
ROM 3:1 Eto ungo Judea embo avoeto hamo kakamba ari avoeto tunga javotoho avo?
ROM 3:2 Ungo tunga javotoho evujo. Eto God ta ke amo embo nei ta ikae rate ungota degi ikena
ROM 3:3 ke be amo ungona God ta ke ambo ambo asi oje ava te ungo nei uhoho na toruheva te God na ungota degi oje ena amo toaute?
ROM 3:4 Mane toasuja te embo tapa na ke sokova eagora te God amo ke sokova embo mane ra te amita ke amo God ta ke ta einge kajari mihia “Eto embo na God ta degi eto kesi ke asora te God na ke be pere aisuja”.
ROM 3:5 Rate enda embo ta hotembari sokova na ke einge eagora amo ungotena enda embo ta ari sasapura neite neite amina God ombuto umbagore God amo embo peni eaguja
ROM 3:6 amo ungotena ari sasapura amina eoi God ta degi usasa puvaguja do avoembo God na ungotenau ari sasapura ta hajire ikau memenga kioro?
ROM 3:7 Amita ke be avo kito enda embomeni ta ari sasapura ta hajire mane ikaehija amo amita degi usasa ere puvutuhua avoeto embo ta ari sasapura kito tunga javotoho aehija,
ROM 3:8 ke ere kogova erevi ke be mane rate sokova einge amo nanena ahepoekari ke ijie embo nei na ke sokova na eagora amo erevira “Ungo ari sapura neite neite evujo God ta javo peni ai” ke ainge amo nanena ari ke eagora te ke ainge hande ari embo amo God na osaga memenga ikau kesora amo ungo tohora.
ROM 3:9 Avoeto ungotena ke do aro? Ungotena Judea embo javotoho eto enda nei embo amo sapura ke arote? Ainge manerate, na ke mahu ehene ingeva amo Judea embomeni te enda nei embomeni te tapa ari sasapura embopo avoeto inono inonora te
ROM 3:10 God ta ke ta mahu einge kajari mihia erevira, “Ari jajavotoho ari embo irae be iraera.
ROM 3:11 Eto ke ingari embo irae eto God jombure ari embo irae.
ROM 3:12 Embo tapa na God kuho sindeto degi sapura ta ere pahora avoeto ari javotoho embo irae be irae.
ROM 3:13 Embo tapa ta pe ta amo embo ta kovari use ahikeore masa puvaguja aingeko eto ivivi na ke sokova eagora amo o jihuri ta saruka pe pekihi ta iraguja aingekora.
ROM 3:14 Eto enana ta pe amo hoviro javiro na enetarira.
ROM 3:15 Eto embo ta orosa veaja tiukasi huhevagora
ROM 3:16 eto enana peka umbae avoeto enana ta pambari degi amo osaga te sosou purisa te mihia
ROM 3:18 eto enana amo God jakeka ari hotembae be ra,” ke ainge kajari mihia.
ROM 3:19 Eto God ta ke pepeni amo Judea embomeni ta degi ikena amo enanana be ingora ikenu umbua te enda embomeni tapa na na ari sapura embo manera ke ainge avo mane asora te God na enana ta ari sapura ta hajire ikasuja avo kito ke mine mane ara ena.
ROM 3:20 Avoeto embo amuna God ta ke pepeni avo ambo ambo ururou God na kito embo erevi javotohora ainge mane aisuja te embo ta ari sapura amo God ta ke pepeni mahu kajari mihia amina humbuto ikau araha ta puvurou embo amina amita ari sapura do aingere amo be kesuja.
ROM 3:21 Rate embomeni na daingeto God ta tihi ta javotoho asora degi amo God na peroveta mamahu ta degi enu kakajekea avo ungotena eha ere kogora amo God ta ke pepeni agi ari amina ae rate Bada Iesu ke be ijie humota ururo God na kito embo javotoho ke aisuja amo Judea embo retemo enda nei embo re
ROM 3:23 eto embo tapa amo ari sasapura inono inono avoeto God ta usasa ta horari haite mane
ROM 3:24 rate ungotena embo jajavotoho ara God na ungotenau hande erevi ikena amo Iesu Keriso ta orosa na ungotena ombuna avoeto embo amuna orosa avo humota ururou God na kito embo javotoho ke aisuja.
ROM 3:25 Eto Iesu Keriso ungotenau hondate ari embo avo puvurae pekota God na ikenu puvuna amo embomeni na ari sasapura ere uahera amo God na kito tumo pajire be ere uahija amo tau pehaehera te Iesu ikau enda ta veto ari sasapura avoeto pehasuja avo hotembihe ari sasapura ta hajire avo sausau ikae tona, te mane jene ambu aisuja avo embo tapa kiagora ungotenau irari iji te Iesu Keriso ikenu puvuto enana ta eto ungotenau ari sasapura avoembo pehena avoeto embo amuna Iesu humota ururou amita ari sasapura ta hajire mane ikau kesuja te God ta tumo avo peiketo embo avo humbasuja.
ROM 3:27 Avoeto embo ta ari jajavotoho na God ta tumo ombuto uhurou kogue embo javotoho ke aute? Ainge manera. Ungotena ari jajavotoho ari embopo ke ijie iresora amo God na kito be mane hotembasuja te Iesu humota ururoro God na kito embo jajavotoho ke aisuja.
ROM 3:28 Avoeto embo na God ta ke pepeni etokito agi aisora te God na mane orekasuja te Iesu humota ururoro amina ungotena orekasuja avo ere kogora.
ROM 3:29 Eto God mo Judea embomeni ta God rete? Ainge mane rate enda embomeni tapa ta God ra,
ROM 3:30 rate God nei irae vahai amina dago Judea avoeto hamo kakamba ari embomeni Keriso humota ururoro kito embo jajavotoho ra ainge aisuja ainge dombo enda nei embomeni hamo kakamba ae amina Keriso humota ururoro embo jajavotoho ke aisuja.
ROM 3:31 Amo humota ari amina orekihirou God ta ke pepeni amo toarote? Ainge mane rate ungotena God humota ari amina amita ke pepeni amo agi eagora.
ROM 4:1 Eto dagota Ohihi Abraham avo ungote keisira, amita ari jajavotoho amina God ta tombu ta embo javotoho enute mo amita humota ari na embo javotoho enu?
ROM 4:2 Eto Abraham na amita ari jajavotoho na God ta tombuta embo javotoho aehija amo embo na kito jakeka ahera te God na Abraham ta ari jajavotoho kito embo javotoho ke mane aehija
ROM 4:3 te God ta ke ta einge kajari mihia amo “Abraham na God ke be ena avo God na kito embo javotoho ke ena”, ke ainge kajari mihia
ROM 4:4 avoeto erena amo embona pure eto mine humbaguja amo teho hande umbae rate amita pure ta mine avo humbaguja
ROM 4:5 rate embo na amita ari jajavotoho God ombae rate ari sasapura embomeni na Keriso humota ururoro God na hande mine vahai oreketo
ROM 4:6 humbau God ta tombuta embo amo ari sapura embo mane avoeto tunga javotoho be aisuja amita ke amo King David na einge kajena.
ROM 4:7 “Eto embo amuta ari sasapura amo God na hotembeto toto ahurekau irae au embo amo tunga javotoho ururou God na ehako mane hotembasuja”.
ROM 4:9 Eto tunga javotoho ari emo Judea embomeni avoeto hamo kakamba ari embomeni na pere kiorotemo hamo kakamba ae embomeni te tapa kioro? Eto ke mahu ehena amo Abraham na God ke be ijie humota unu God na embo javotoho ke ena
ROM 4:10 amo humota ari amita kihi ta hamo kakamba enute ambota enu? Eto amita ke be amo ungotena kiari amo Abraham na kihi God humota ue humota ari amita hajire avo God na enu hamo kakamba ena
ROM 4:11 avoeto hamo kakamba ae mihahija amikote amo God na kito embo javotoho ke ena avoeto Abraham amo ungo hamo kakamba ue humota eagova embomeni amita mamo pere mane
ROM 4:12 rate hamo kakamba ae embomeni God humota eagora amita mamora.
ROM 4:13 Eto God na Abraham ta eto meniundi ta degi enda tapa avo ikasi oje ena amo Abraham na God ta ke pepeni agi ere uahija avoeto ikasi oje ae rate Abraham na God ke be ena avoeto Abraham embo javotoho ra ijie oje ena.
ROM 4:14 Te ungo ereva amo God ta ke pepeni agi ari embopo na God ta hotari humbasora ainge ke be kito embo tapa na hotari mane humbasora eto God na oje ena amo be ambu aehija.
ROM 4:15 Eto ungotena ere kogora amo God ta ke pepeni irae amo mane poekahera te God ta ke amo mihia avoeto ungotena God ta hotari humbasi uje ue amo etokito ke pepeni avo agi eagora te ke pepeni avo kaikari poekagora avoeto God ta tumo vahai avo hambasora.
ROM 4:16 Avoeto hotari oje ena avo God humota ururoro Abraham ta meniundi tapa ta degi hande ikau humbasora amo ke pepeni umbae embopo te humbari embopo te tapa amuna Abraham na God humota ena ainge dombo ue Abraham ta meniundi eto humbasora.
ROM 4:17 Eto ungotena Abraham ta meniundi tapa amita ke amo einge kajari mihia, “Abraham, umo nanena enda tapa ta mamo ere ikihena” ke ainge God na ena avoeto Abraham na embo pehari ta vasiri ikari God avo ke be ena amo ungotenau mamahara te ari mahu puvurari te puvurae te amo God ta tohora.
ROM 4:18 Eto Abraham evovo ena te amita hamo visi amo hotembae ue God humota unu God na oje ena amo amita meni puvuto amita poru ta enda pajire be puvuroja oje ena
ROM 4:19 te Abraham ta pajirari jua 100 enu eto amita ae evovo enu hini vavekena te hotembu hotembu ae
ROM 4:20 rate sovera humbuto God humota ue jakeka ena.
ROM 4:21 Amo oje ena avo mane toasuja te sovera inono avoeto aisuja avo hotembeto ke be ena
ROM 4:22 eto Abraham ta hotembari avo God na kito embo javotoho ke ena
ROM 4:23 eto God na kito embo javotoho ke ena amo Abraham vahai mane rate
ROM 4:24 embo ta ari sasapura ombuto humbasi God na ungotenau Bada Iesu tonu pehenu ehako jiginu vasiri te erena avoeto embo amuna God ke be ijie humota aisuja embo amite tapa avo God na kito embo javotoho ke aisuja.
ROM 5:1 Rate Iesu Keriso na ungotena avoembo ena avoeto God humota ururoro God na kito Keriso ta hondate ari avoeto embomeni ta ari sasapura irae embomeni jajavotoho ke ijioi amita degi peka humbagora avoeto God ta usasa ta horasi tunga javotoho ue simba mihera.
ROM 5:3 Eto avo pere mane rate embomeni na uore osaga memenga kiagora amina hamo ta sovera ari humbuto ivo ue iresora avoeto tunga javotoho ereora.
ROM 5:4 Eto hamo ta sovera ari na Ahihi ta sovera ururou ari sapura ta sausau mane veasora te ungotenau vasiri avo Otohu ururou God humota ue iresora. Eto mihie God na ari javotoho avo ungotenau ikasuja avo simba ue sovera eto iresora.
ROM 5:5 Eto God na amita osa ari ungotenau jo ta overekena amo God na amita Ahihi Otohu avo ikenu veto puvuto ungotenau jo ta horeto mihie ke ijioi ingihe God ta ke avo ke be eagora.
ROM 5:6 Eto ungo kogova amo ungotena sovera humbari degi irae iji te Iesu na ari sasapura embomeni avoembo pehena.
ROM 5:7 Eto ke be amo enda embo na embo javotoho avoembo sari asi mane hotembaehija te iji nei nei ainge embo na embo nei javotoho be javotoho avoembo sari asi hotembagora
ROM 5:8 te God ta osa ari do aingere avo embo na kiagora ungotena ari sasapura te irari iji te ungotena avoembo Keriso ikenu puvuto pehena.
ROM 5:9 Avoeto ungotena ari sasapura embomeni avoembo Keriso na amita orosa overekenu vena amina embo jajavotoho ere ora avoeto God ta tumo avo Keriso na peikena.
ROM 5:10 Eto ke erena amo ungotena God ta degi kitoho ue mihahera amita Meni ikenu puvuto pehenu ungotena God ta degi peka humbuto Iesu ta vasiri na orekihirou irari javotoho hambasora
ROM 5:11 amo ungotenau Bada Iesu Keriso na ungotena avoembo pehena avoeto ungotena God ga namei ereora, avoeto osa ari na tunga javotoho ue mihera.
ROM 5:12 Eto ungo ke erevi hotembevujo, eto enda ta pehari amo irae rate embo Adam na ari sapura ena amina pehari hambuna. Eto ari sasapura amo enda tapa embomeni na eagora avoeto pehari amo enda tapa embomeni ta degi puvuna.
ROM 5:13 Eto God na amita ke pepeni Moses ta ikae puvurae kihi ta amo embomeni na ari sasapura ere uahera te God ta ke pepeni amo ikae puvurae avoeto God na ungo nau ke poekari embopo ke ainge ae
ROM 5:14 rate Adam na vahai God ta ke poekena avoeto Adam ta iji te eto pambuto Moses ta irari iji te embomeni na ari Adam na ena ainge mane rate ari sasapura neite neite ue ere pepehekihovora. Eto Keriso ambota puvuresuja amita ahe kihira avo Adam na ena.
ROM 5:15 Te Adam ta ari avo embo tapa ta degi ta amo pehari puvuna te ambota God ta hande javotoho be Iesu ta degi ta eto puvuna amo Adam na ena ainge mane, pajire be ra
ROM 5:16 amo eingera, eto embo vahai na ari sapura ena amo God na kito embo ta degi hajire ikau kogue pehasora te God ta hande amina ari sasapura isapamane ombunu irae ena avoeto hajire kiari irae.
ROM 5:17 Eto embo vahai ta ari sapura amina pehari irerembeto sigeto pahunu embo tapa pepehekagora te embo tapa amuna God ta hande javotoho avo humbuhe embo nei vahai Iesu Keriso amita degi vasiri eha humbuto God ta degi tunga humbuhe javotoho ari na Iesu Keriso ga heteto enda tapa tihi jigihe iresora.
ROM 5:18 Eto ke erena amo embo vahai na ari sapura ena avoeto embo tapa pepeheketo ari sasapura ta hajire kiaehera te embo nei Iesu na ari javotoho ena amina ari sasapura ta hajire kiari avo peikena avoeto embo tapa na vasiri eha humbuto irari haite ra.
ROM 5:19 Amo Adam na God ta ke peive eto embo tapa amita ari sapura ari embo ena te Keriso na God ta ke agi ena amina embo isapamane na embo jajavotoho aisora.
ROM 5:20 Eto God na amita ke pepeni avo Moses ta ikena amo ari sasapura pajirou embo tapa be kiagora ikena te ari sasapura papajihinu God ta hondate ari te tapa pajire be ena,
ROM 5:21 avoeto ari sasapura heteto pajire be eto embo ta degi pehari hande ena, te eha oroho amo God ta jo ari te hondate ari te avo tihi jigihe mihia avoeto ungotena God ta tombu ta embomeni jajavotoho eto Bada Iesu Keriso ta degi vasiri eha humbuto vasiri te daroho iresora.
ROM 6:1 Avoeto ungote God ta hondate ari mo daingeto simba aro? Eto ungotena God ta hondate ari peni vahai be aja ari sasapura kaikari arote?
ROM 6:2 Ainge mane aisora te ungotena Iesu Keriso ga kajueto ari sasapura avoembo pepehekea avoeto ereto ari sasapura mane ue iresora.
ROM 6:3 Amita ke be amo erevira, ungotena Iesu Keriso ga pehari avoeto ungotena bapataito eagora amita ahe kihira avo eagora.
ROM 6:4 Amo God Mamo na amita usasa sovera te na Iesu Keriso pehena avo jiginu vasiri te erena avoeto amiga vasiri eha humbuto irora pehenu kovea aita bapataito eagora.
ROM 6:5 Amo Iesu pehena amiga kaju eagora avoeto Iesu na vasiri te erena ainge dombo ungotenanena vasiri te erasora.
ROM 6:6 Eto ungotena ere kogora amo ari sapura embo pehasuja amo ari sapura ehako mane aisuja te irae aisuja avoeto ungotenau hamo ta ari sapura amita sovera avo irae aja Iesu ga cross ta teo pehea amo ari sapura ta ke agi mane aisi ue pehea.
ROM 6:8 Eto ungotena Keriso ga pehea avoeto Keriso ga iresora avo ke be hotembagora.
ROM 6:9 Eto ke nei be hotembagora amo Keriso peheto vasiri te erena amo ehako mane pehasuja te pehari amo Iesu na dembarira.
ROM 6:10 Eto Iesu na iji vahai enda ta ari sapura avoembo peheto vasiri te erena amo God ga iraguja
ROM 6:11 ainge dombo ungo Iesu Keriso avoembo peheto vasiri te ereto God te Iesu Keriso te ga kajueto vahaita miheva.
ROM 6:12 Eto ungo hamo te visi te miheva amikote amo ari sasapura na tihi jigihirou ungo amita ke agi avojo.
ROM 6:13 Eto umo peheto vasiri te erari avoeto no utu rate ingeni rete tihi rete hamo rete amo ari sapura ara mane ikasoa te ari jajavotoho ara pe te God ta degi hande ikejo.
ROM 6:14 Eto umo God ta ke pepeni na andirari embo mane rate God ta hande humbari embo avoeto ari sasapura na umo mane tihi jigesuja.
ROM 6:15 Eto ungotena God ta ke pepeni na andirae rate God ta degi vasiri hande ehei umbera amo ari sasapura aisora amo tehorete? Ainge manera te
ROM 6:16 umo embo amita pure tunga ikasoa amo embo amita ke avo pere agi asoa amo ari sasapura agi ue ere uma pehaote God ta ke agi ue ere uma amita tihi ta embo javotoho ao?
ROM 6:17 Eto ungo mahu amo ari sasapura ta ke agi ari embora te God ta ke hande ore ingihava avo be jigito miheva avoeto God osa ere ora.
ROM 6:18 Avoeto ungo ari sasapura na andirari avo bujeketo araha ta puvuto ke jajavotoho ta agi ari embopo ere ova.
ROM 6:19 Eto ke erena avo ungo be ingova timu hatirari ke na humbuto ere hona amo ari jajavotoho na tihi jigoute mo ari sasapura na tihi jigou? Eto iji mahu amo ungota hamo na ari sasapura isapamane be ere uaeheva avoeto jandireketo ari jajavotoho avo otohu ue amita ke agi ari embopo evujo.
ROM 6:20 Eto iji mahu amo ungo ari jajavotoho na tihi jigae rate ari sasapura na ungo tihi ere jigihahija, iji amikote amo ungota degi ari javotoho puvunute?
ROM 6:21 Na ere kogona amo ungota degi me kiari te pehari te avo puvuna.
ROM 6:22 Rate ungo ari sapura na andirari avo God na vujekehei amita pure embopo ere ova, amo amita pure ere uma Otohu ue vasiri te daroho iresova.
ROM 6:23 Eto ari sasapura ta mine amo pehasora te God ta hande amo Bada Iesu Keriso ta degi vasiri daroho humbuto iresora.
ROM 7:1 Eto nau namei kamei ungo God ta ke pepeni amo Moses ta iji te ikena avo ungo kiari embopora, eto ke pepeni amina ungo vasiri te iragova amo peikarirate pehasova amo ungo mane peikasuja avo ungo kiarira.
ROM 7:2 Eto ke erena amo eingera. Eto evohu na amita ivu vasiri te irirou amo mane toasuja te ivu pehau toasuja amo God ta ke pepeni amina mane peikasuja.
ROM 7:3 Rate ivu pehae mihirou evohu amina amita hamo embo nei ta ikasuja amo tiha evohu rate ivu pehau embo eha jimbasuja amo ke pepeni amina mane peikasuja.
ROM 7:4 Avoeto nau namei kamei ungotena God ta ke pepeni mamahu avo toasi Keriso ga kajueto pehea te God ta toho be eto pure amita be avo umbara God na jiginu Keriso ga vasiri te erea.
ROM 7:5 Amita be amo ungotena hamo ta ujeje sasapura agi ari iji te God ta ke pepeni na haekasi unu ari sasapura uje isapamane ere umihe pepehekeo.
ROM 7:6 Rate ungotena God ta ke pepeni na andirari amita degi pepehekeo vujekenu arahata pahue God ta Ahihi Otohu ta ke agi ue iragora amo ke pepeni kajari amina ae rate vasiri ehaha na eagora.
ROM 7:7 Avoeto ungotena ke do aro? God ta ke pepeni amo sapura ke aro? Ke ainge mane aisora te ari sasapura do aingere avo God ta ke pepeni na eoi kiagora amo erevira, embo nei ta donda humbasi jo ta sirikagora amo sapura rate teho amo mane kiaehera te God ta ke pepeni amina haekeoi kiagora.
ROM 7:8 Rate na God ta ke peni avo hotembihe nau jo ta kajeoi embo ta donda humbasi uje isapamane eagona avoeto God ta ke pepeni irae amo ari sasapura ta hajire mane kiaehena.
ROM 7:9 Eto mahu kihi ta amo na God ta ke pepeni avo kiae avoeto vasiri te mihahena te ihiketo kogue ari sasapura jo nau ta irerembenu nau Ahihi pehari avo kia, amo na God ta ke pepeni agi eto vasiri humbana God na ikena te ai ta amo pehari pere hambuhana.
ROM 7:11 Amo erevira, na daingeto iresona amita degi amo God ta ke pepeni amina degi ena te ari sapura degi ai ta pahue amina ke sokova ijinu ingiho God ta ke pepeni amina nau Ahihi amo teo pehena.
ROM 7:12 Rate ungotena ere kogora amo God ta ke pepeni amo sapura mane rate ke Otohu jajavotoho embo ta irari daingeto iresora avo God na ikena.
ROM 7:13 Rate donda jajavotoho amina ahihi nau avo tenu pehenute? Ainge mane rate nau ari sasapura amina tenu pehena, amo ungotenau ari sasapura amo sapura be sapura avo be kiagora God no amita ke pepeni avo ikena amita jo ta ari sasapura irerembeto amita sovera na ahihi nau tenu pehena.
ROM 7:14 Eto ungotena ere kogora amo God ta ke pepeni uhu ita puvurari rate namo enda embora te ari sasapura ta ke agi ue amita pure eagona
ROM 7:15 amo na uje eagona donda avo toto uje ae donda avo uje ue kaiketo ue na oenga embo nei ta ari ko ere one ainge ijie eagona.
ROM 7:16 Eto ari uje ae eagona avo ue God ta ke pepeni avo ke be eagona avo poeketo me kiagona,
ROM 7:17 avoeto ari sasapura amo hotembari na hotembeto ae rate jo ta irerembeto jo ta kajeoi eagona.
ROM 7:18 Amo ari jajavotoho asi uje eto tunga ere ikihena te ari avo inono ae avoeto nau jo ta amo ari jajavotoho irae rate ari sasapura avo pere mihia.
ROM 7:19 Eto na ari jajavotoho asi amo pe na eagona te ehako ari sasapura eagona
ROM 7:20 amo na ari sapura toasi eagona te toae eagona amo na embo nanena ae rate nau jo ta ari sapura amina eoi eagona.
ROM 7:21 Avoeto jo nau ta ari einge emo mihia, na ari jajavotoho asi uje eagona te ari sapura emo hoi ta irae rate namote mihia
ROM 7:22 eto nau jo ta amo God ta ke pepeni mihia avo osa eagona
ROM 7:23 te ari sasapura pepeni te tapa nau jo ta mihia avo eto enana heriso na isoro ue na ari sapura ta tipura embo arako ereona.
ROM 7:24 Ajao! Na sapura embo eto nau hamo na nau Ahihi kihi humbuto pehari degi ta ere pahua amo amuna oreketo humbau?
ROM 7:25 God na ke ijirou Bada Iesu Keriso na nau ahihi oreketo humbasuja avoeto na God osa mahainge eagona, te ke erena amo erevira, na jo nau na God ta ke pepeni agi eagona te hamo nau amo ari sasapura ta ke agi eaguja.
ROM 8:1 Eto ungotena Iesu Keriso ga kaju eto iresora amo ungotenau ari sasapura ta hajire mane ikau kesora,
ROM 8:2 amita be amo ungotena Iesu Keriso pehena amita Ahihi Otohu ta sovera na ungotena ari sasapura te pehari te na pundurari avo vujekena avoeto arahata ere pahora.
ROM 8:3 Amo ungotenau hamo ta uje sasapura isapamane avoeto God ta ke peni agi ue ungotena oenga sapura vujekari inono ae rate God na amita Meni ikenu puvuto embo sasapura ta hamo umbuna avo ungotena ari sasapura ta pene ikihe ari sasapura avoeto ungotena ombuto humbuto pehena.
ROM 8:4 Amo God ta ke pepeni avo agi eto amita hamo na ombuto pehena avoeto ungotena hamo ta uje amo ambo ambo ae Ahihi Otohu ta hondate ari amina God ta ke pepeni simba eagora embopo avo God na kogue Iesu ta pure avoembo embo jajavotoho ke eria.
ROM 8:5 Ari sasapura mahu neite neite ta pambari embomeni na hamo ta uje amita tunga ere ikihera te nei uhoho Ahihi ta pambari embomeni na uhu i ta ari amita tunga ere ikihera
ROM 8:6 irari mahu avo tunga ikasuja embo amo pehasuja te ahihi ta irari avo tunga ikasuja amo tunga jamo ari te peka te hambasuja.
ROM 8:7 Amita be amo vasiri mahu ta tunga humbari embo amo God ta kitoho amina God ta ke pepeni amo agi ue ambo ambo ari inono ae ra
ROM 8:8 eto ari mamahu agi ari embopo amita ari amo God na kito osa mane aisuja.
ROM 8:9 Rate ungo amo God ta Ahihi Otohu na ungota jo ta mihia avoeto ungo ari sasapura mamahu ta ke agi mane eagova te Ahihi ta ke agi eagova te embo amuna Keriso ta Ahihi jo amita ta umbae amo Keriso ta toho manera.
ROM 8:10 Eto no hamo avo sari aisuja te Keriso no jo ta iresuja avoeto no Ahihi amo God na javotoho ari avoeto vasiri te iresuja.
ROM 8:11 Eto no Ahihi na Iesu pehena amo jiginu vasiri te erena ainge dombo Ahihi no jo ta iresuja amo ainge hamo no jigou vasiri te erasuja amo amita Ahihi no jo ta mihia avoeto ainge aisuja.
ROM 8:12 Eto nau namei kamei ungotena hamo ta ujeje sasapura avo agi ue amo pehasora avoeto ari ainge avo mane aisora te Ahihi Otohu ta sovera na hamo ta ujeje tapa tau pehau vasiri te iresora.
ROM 8:14 Eto God ta Ahihi ambo ambo ari embopo amo God ta meniundira.
ROM 8:15 Eto ungo God na amita Ahihi ikehei umbua amo God joru ue pure avo ikae rate ungo God ta meniundi be avo Ahihi amita amo ikehei umbeva amo amita Ahihi ta sovera na “God nau Mama” ainge amo eagova
ROM 8:16 amo God ta Ahihi na ungotenau jo be ta “Ungo God ta meniundi ra” ainge ijioi ingihe eagora.
ROM 8:17 Eto ungotena amita meniundi avoeto Keriso na hotari humbija vahai avo ungotenane humbasora. Eto Keriso na osaga te memenga te kito God ta usasa ta horena ainge dombo ungotena Keriso na osaga te memenga te kina avo kogue amita usasa ta horasora.
ROM 8:18 Eto uhu ita usasa puvurou kogue tunga javotoho aisora eto na ere kogona amo ungotena enda ta osaga memenga tapa amo isapa rate God ta usasa kesora amina pajire be aisuja.
ROM 8:19 Eto iji ke kahari iji te uhu te enda te na God ta meniundi mo do aingere avo God na au puvuroro kesi simba ue mihera.
ROM 8:20 Eto donda tapa God ta ingeni na enu ari sapura ai ta puvutuhunu kito amita hamo ta saruka ena avo donda iji kombu te vujekasuja avo simba ere ua amo iji kombu te vujekau embo pehari te donda pepehekari ari te au irae au God ta meniundi ga usasa ta horeto tunga jamo jamo te iresora.
ROM 8:22 Eto ungotena ere kogora amo God ta donda tapa amina amo evohu na meni humbasi ue memenga kiagora ainge donda tapa amo memenga kogue mihovora.
ROM 8:23 Eto donda avo pere mane rate ungotena God ta Ahihi Otohu humbari embopo amina ungotenau jo ta sisisasi ijie daroho irari ta hamo eha ikau humbuto amita meniundi be asora avo simba mihovora.
ROM 8:24 Amo ungotena God humota ue amina donda javotoho avo ikasi oje ena avo simba ara ungotena oreketo umbuna. Eto donda avo mahu humbahera amo God humota mane ahera.
ROM 8:25 Te God na umbara oje ena amo eha umbae rate ambota humbasora avoeto God humota ue simba ue mihovora.
ROM 8:26 Eto ungotena ivo ambu embopo avoeto God ta Ahihi Otohu na hondate eto einge eaguja amo ungotena pari ari ta degi jombure eagora amo Ahihi Otohu na ungotenau jo ta pari amo ijiore ingihe si javotoho be na God ta degi eoi ingioi
ROM 8:27 God ta Ahihi Otohu na God ta uje tapa deire amo kogue embomeni ta pari avo God ta degi si na ijioi God embo ta jo kiari embo avoeto Ahihi Otohu ta hotembari tapa avo kiaguja.
ROM 8:28 Eto ungotena ere kogora amo tunga javotoho ari te tunga osaga ari te tapa ungotenau degi ta puvaguja amo God na amita tunga humbari embomeni amina sovera eto ari javotoho avo kiagora ikeoi puvaguja amo God ta ujena embomeni amita toho ara umbuna amita degi ikeoi puvaguja.
ROM 8:29 Eto God na enana mahu humbasi sirikena amo amita Meni Bugo ta hajire vahai avo humbuto amita ambo jimbi ara sirikena avoeto God na enana jage eto humbuto umo oenga enu embomeni jajavotoho ere ora avoeto God na au usasa amita ta horeto iresora.
ROM 8:31 Rate ungote ke mine amo do aro? Eto ungotena God na simba ere ua te embo amuna mane sovera eto dembasuja.
ROM 8:32 Eto God na amita Meni amo oreto umbae rate ungotenamo avoembo ikenu puvuto sari ena avoeto ungotena ere kogora amo donda nei pepeni te isasaraho te tapa amo mane orasuja te ungotenamo avoembo ikasuja.
ROM 8:33 Eto God na ungotena amita toho ara siriketo umbuna amo embo amuna pehumba au? Eto God na pehumba aute? Ainge manera te God na ungotenau ari sasapura egenu irae enu ungotena embo jajavotoho be ena
ROM 8:34 rate embo amuna ungotena pehumba au?, Iesu na pehumba aute? Ainge mane rate amina peheto vasiri te ereto God ta ingeni be ta arumbeto mihie ungotenamo avoembo God ta degi ke ijie mihia avoeto ungotena amina mane pehumba aisuja.
ROM 8:35 Eto Keriso na ungotena osa ere ua amo ari deina peikau? Osaga na memenga na beuje na iri bo irae amina boru jujune eto tari pehari na peikaute? Amina mane peikasuja
ROM 8:36 te ungotena osaga memenga ere kogora amo God ta ke ta einge kajari mihia, “Eto ungotena God ke be eagora avoeto iji tapa ungotenau pehari avo simba uore embopo na o sheep teto hevarako uore mihovora” ke ainge mihia amo ungotenau osaga memenga tapa amo Iesu Keriso ungotenau osa ari embo ta sovera na ari tapa erevi ungotenanena dembagora.
ROM 8:38 Eto ke amita be nanena ere kogona amo pehari rete vasiri rete Anera rete embo tihi jigari rete donda mahu irari rete ambota puvuroute sovera ari i ta rete enda ta rete tapa be tapa God na ari amina God ta osa ari ungotenau degi ta ikari amo Bada Iesu Keriso ta degi ere kogora avoeto peikari inono ae be ra.
ROM 9:1 Eto na ke sokova ae rate Keriso ta javota ke be erena amo Ahihi Otohu na nau jo ta ei ingihe erena
ROM 9:2 amo nau namei kamei Judea embomeni ta degi do puvuresuja avoembo osaga ere kogona.
ROM 9:3 Eto nau namei kamei Israel embomeni na Keriso ke be ara ari erevi ahena amo nanena ungo hondate ari embo ke eto God na ungo humbuhe namo avo tau pehaehena
ROM 9:4 te God na Israel embomeni amo amita meniundi avoeto humbuto amita sago kiari te usasa te eto ke kajari peni te isapa te eto daingeto God jakeka asora amite tapa iketo enana ta degi hotari ikasi oje ena.
ROM 9:5 Eto Israel embomeni ta mamone mamahu na God ta ke kihi umbua eto Keriso enana ta hondate ari embo puvuna amo enana ta jeka hoka ta orohuta puvuna amita javo amo i be ita, God ta peka ta daroho iresuja. Amen.
ROM 9:6 Eto God ta ke Israel embomeni ta degi ikihe oje ena amo God na toae rate enana ta ujena toa te amita be amo hamo na Israel embo rate ungota jo avo Israel embo mane.
ROM 9:7 Eto Abraham ta meniundi tapa amo Abraham ta meniundi be mane avoeto amita ke kajari erevi be hotembevujo “Eto no ahihije ta mamo be amo no meni Isaac na aisuja”.
ROM 9:8 Eto ke amita be amo God ta meniundi be amo hamo te visi te na ae rate God ta ke mahu ikari avo ingihe ke be ari embomeni amo God ta meniundi eto Abraham ta meniundi bera.
ROM 9:9 Eto God na Abraham ta ae na meni umbaja oje ue ke einge ena, “Eto na iji ikehena inonota puvuto mihirono no ae Sarah na meni humbasuja” ainge enu
ROM 9:10 meni Isaac humbunu pajito embo eto Rebecca jimbuto ve ikena.
ROM 9:11 Rebecca urete eto hini ta meni heriso irari iji te God na ke einge ena, “Meni ambo Jacob amina embo peni au meni bugo amo ambo meni amita pure embo aisuja”, eto ke ainge ena amo meni javotoho davore sapura davore avo kito ae rate God ta uje na ena
ROM 9:13 amita ke avo einge kajena “Na embo Jacob avo osa ere ona te embo Esau avo na uje ae ra”.
ROM 9:14 Ke ainge God na ena amo embo sirikari sapura ue enute? Ainge aera te
ROM 9:15 Moses ta degi ke einge ena avo kivujo “Na uje nau na embo kogurono jo aisuja amo embo kito hondate aisona”, ke ainge God na ena
ROM 9:16 amo embo kito hondate ari amo embo na oenga pure ngahia eto God ta hondate umbae rate God ta jo ari na hondate ari ikeoi embo ta degi puvaguja.
ROM 9:17 Amita be amo God na Pharoah ta degi ke einge ena, “Umo nanena humbuto ikehene embo peni ehea amo nanena no degi ta isoro ururono enda embomeni tapa na kogue nau javo te nau sovera te avo kogue ke be ara umo nanena ikehene hetehea”. Ke ainge ena
ROM 9:18 amita be amo God ta uje na embo nei kito jo eoi hondate eaguja eto embo nei amo kito toi jo ngahia eagora.
ROM 9:19 Te ungona nau degi ta ke einge ereva amo “Eto God na umo oenga embo ta jo eoi ngahia eagora amo God na daingeto embo amo pehumba au? Eto God na uje amita avo ururou embo na amita uje avo ari haite rete?” Ungo ke ainge ereva
ROM 9:20 te na ungota degi ke erevi erena amo ungo embo teho rate ke ainge ijie God ta degi pehumba ereova, amo erevira, ovu enda na ari amina ovu ari evohu ta degi ke einge aisuja “Umo do eto nau degi ta ari einge mo ehe?” Ainge aisuja ainge dombo ungo na ke amo ereva
ROM 9:21 amo ovu ari evohu na enda humbuto ovu heriso eto ovu nei kiari ovu eto ovu nei sio jigama aisora ovu amo teho uje amita na eaguja.
ROM 9:22 Eto ari ainge dombo amo God na embo ta degi ere ua amo God na embo ta ari sasapura avoembo amita tumo do aingere amite eto amita sovera te avo embo na kiagora ue embomeni sasapura tau pepehekihe hajire kiaehera te
ROM 9:23 avo toto simba ue mihie embo amita toho mahu siriketo umbuna avo amita usasa javotoho kiagora ue toto mihouva.
ROM 9:24 Eto embomeni amo ungotena Judea rete enda nei embomeni rete amo God na mahu siriketo umbuna amo ungotenamora.
ROM 9:25 Eto God na enda nei embomeni te tapa amita toho ara humbasuja avo peroveta Hosea na einge kajena, “Eto embomeni amo nau mane rate nane embomeni nau ke aisona eto enda amita embomeni amo na osa ae rate nanena nau tunga humbari embomeni ke aisona,
ROM 9:26 eto ungo enda aita mihaheva amo nanena ungo embomeni nau mane ke ijiena te embo nei na ungo enda ai ta miheva avo kogue God vasiri te amita meniundi ke aisora”. Ke ainge peroveta Hosea na kajena.
ROM 9:27 Eto Peroveta Isaiah na Israel embomeni kogue ke einge ena, “Eto Israel embomeni na eva hora aingeko embo isapamane arote aisora amo God na embo heriso kaheketo humbasuja.
ROM 9:28 Amo porere mane aisuja te sausau enda embomeni ta degi hajire ikau kesora,” Ke ainge Isaiah na eto ke nei einge ena, “Eto uhu te enda te ta Bada God sovera isapamane te na jo enu Israel embomeni heriso be amo tae tona te toaehija amo da Sodom te Gomorrah te na ea aingeko tapa tau pehaehera.”
ROM 9:30 eto ke erena emita tutumota ke peni mo do ano? Rate ke peni re erevira, enda nei embomeni na embo jajavotoho asi jombure ae rate God na oenga kito ehei embo jajavotoho ere ora amo embo amuna God humota ururou God na kito embo javotoho ke aisuja.
ROM 9:31 Eto Judea embomeni na God ta ke pepeni tapa avo agi asi tunga ikea te God na kito embo jajavotohora ainge aera
ROM 9:32 te do eto ke ainge aere? Amita be amo ungo ke be na God humota ae rate ari neite neite amina embo jajavotoho asi ere uahera, te enana na God ta Koro amo amita Meni Iesu Keriso amita hamota teto tin ambu eto vea
ROM 9:33 amita ke amo einge kajari mihia, “Ungo kivujo, da Jerusalem ta tiri Zion ai ta nau Koro ikano mihirou amo ungo teto tiambueto veasova te ungo na Koro avo kito ke be ijie amo me mane kesova”.
ROM 10:1 Eto nau namei kamei, nau jo tapa na Judea embomeni nau be avoeto God na oreketo umbaja jo tapa na pari eagona.
ROM 10:2 Eto enana ta jo tapa na God uje ue amita pure asi uje eagora amo na kiarira te God ta ke be amo enana be kiaera.
ROM 10:3 Te God na eoi embo jajavotoho eagora te enana na ari avo kito kiaesira ue God na ari javotoho ari avo toto ungo oenga eto javotoho asi eagora te
ROM 10:4 Keriso na vahai God ta ke pepeni tapa amo inono ta ehei irae ehija avoeto embo amuna humota ururou amo God na kito embo javotoho ke aisuja.
ROM 10:5 Eto Moses na ke einge kajena, “Embo amuna God ta ke pepeni avo tapa inono ta agi aisuja amo God na kito embo javotoho ke ijirou daroho irari ta vasiri hambasuja”.
ROM 10:6 Te God humota ururoro kito embo jajavotoho ke aisuja amita ke amo Moses na einge kajena, “Embo amuna uhu ita vihari inono re? Eto embo amuna embo pehari ta degi be ari inonore? Ke ainge jo no ta mane hotembasoa” ke ainge Moses na kajena te ke be amo ungotenau orekari embo Keriso mahu uhu ita eto puvuna eto mahu vasiri te erena.
ROM 10:8 Eto ke ainge mane aisova te God humota ari ta ke dago na hande eagora amo einge kajari mihia “Eto God ta ke amo hoi ta mane rate no ivivita mihia eto no jo ta mihia.”
ROM 10:9 ke amita be amo erevira, Iesu pehenu God na enu vasiri te erena avo embo amina jo te tapa ke be ijie ivivi na Iesu amo nau Bada ra ainge aisuja embo amo God na kito oreketo humbasuja
ROM 10:10 amo ungo na jo te tapa na ke be ereva avoeto God na kogue embo jajavotoho ke aisuja, eto ungota ivivi na ereva avoeto oreketo humbasuja.
ROM 10:11 Eto God ta ke kajari ta amo einge mihia “Embo amuna humota aisuja amo me mane kesuja” ke ainge mihia
ROM 10:12 te Judea rete enda nei rete amita javo ai ta irae rate enda tapa embo amuna Bada ta hondate ari humbasi penunu aro ikau umbaro inono aisuja, amo enda tapa amita Bada aisuja.
ROM 10:13 Avoeto enda tapa ta embomeni amuna Bada ta javo ta jage aisora amo Bada na oreketo humbasuja.
ROM 10:14 Eto enanana Bada ke be ae aisora amo daingeto Bada jage aro? Eto enana amita ke embo na ae ingae aisora amo daingeto ke be aro? Eto embo na pambuto ke hande ae ingae amo daingeto ingoro?
ROM 10:15 Eto embo na ke hande ari embo ikae pambae amo daingeto ke hande au? Avoeto ke einge kajari mihia “Ke javotoho hande ari embo ta utu uruhu amo ingari javotoho.”
ROM 10:16 ke ainge mihia te Israel embo nei nei na ke avo ere ingihera te ambo ambo ae avoeto amita ke amo Isaiah na einge kajena, “Bada, ungotenau ke hande ere ora te embo amuna ke be erei? Enana ingito ingarako ereora”.
ROM 10:17 Avoeto Keriso ta ke avo hande uore embo na ingihe ke be eagora
ROM 10:18 te embo na Keriso ta ke avo enana Israel embomeni ta degi hande uerete aere? Amita ke amo einge kajari mihia, “God ta ke amo enda susu ta ihiketo pambuto tutumo be ta irae arira” ainge mihia te
ROM 10:19 Israel embomeni na God ta ke ere ingihera te be ingae rete? Ainge manera te amita ke amo God na ijinu Moses na kajena amo eingera, “Eto nanena enda nei embomeni humbuhurono amo ungo Judea embo na kito dago umbae ereoi ainge ijie osaga kesova amo enana enda nei kiari irae ke eagova embomeni avo humbuhurono ungo tumo aisova” ke ainge kajena
ROM 10:20 avo Isaiah na ke erevi kajena amo ke be pere na kajena, “Enana enda nei embomeni na na jombure ae rate hambuhera, eto enana na jage ae rate teho nanena ehene na be ere kogora”,
ROM 10:21 te Israel ta ke amo einge kajena. “Eto iho vujari ta eto pambuto mume sihukarita amo nau Judea embomeni humbasi no degi ingeni ere jujurukihena te enana ta jo ngahia oi ke ingito puvurae ereora”. Ke ainge God na ijinu Isaiah na kajena.
ROM 11:1 Eto ke nei aisona amo God na amita embomeni egikenute? Ainge aera te namote tapa na Israel embo eto Ahihi nau amo Abraham eto embomeni nau amo Benjamin ra eto God na amita embomeni mahu kina amo God na egikaera. Te peroveta Elijah na Israel embomeni ta jo ngahia avo pehumba eto God ta degi hariketo ke ainge ena avo ungo be hotembevujo, “Bada God, Israel embomeni na no peroveta tapa tehere pepehekehera eto no pene gaga jigito aimbehera na oenga mihena te namote tapa taro pehana ere ora”, ainge enu
ROM 11:4 God na ke mine einge ena, “Ke ainge amo erea te embo tapa 7,000 ainge avo embo nau ara simba ereona amina god ingeni na ari javo Baal avo paunge teteri eto humote pain ae mihera” ke ainge ena
ROM 11:5 avoeto eha oroho emo God na embo amita toho avo uje amita na humbuto simba ere ua.
ROM 11:6 Amo embo ta ari jajavotoho amina God ombae rate God ta uje na embo humbaguja te embo ta ombari avo God na mane humbasuja te embo ta degi hande ere ikihia avoeto uje amita na embo humbaguja.
ROM 11:7 Te ke do aro? Eto Israel embomeni na God kesi jombure ere uahera te hambae ea te God na oenga kito siriketo humbija embomeni amina God ere hambuhora. Eto God na siriketo umbae tona embomeni avo ke be mane kiagora God na tihi ere peikiha
ROM 11:8 amita ke amo einge kajari mihia, “Eto God na enana ta siro ehei bouka ehei tihi na kiae eto oje na ingae amo God na ainge ena amikote puvuto eha emite ainge pere mihera”. Amita ke amo David na einge kajena, “Eto enana ta hajae vajae amo ihive aingeko kaiketo mihirou ai ta horaro timbau hajire kesora.
ROM 11:10 Eto tihi ta taro kuru au ari sasapura ta bouka humbuto ku okokombeto daroho iresora.” ke ainge David na Judea embopo God kiae avoembo kajena.
ROM 11:11 Eto eto ingari ke nei asona amo erevira, Israel embomeni na teto tiambueto veto mihera amo mane ereto pambarote? Ereto pambasora te enana ari sasapura eto veto mihera enda nei embomeni God na oreketo uhua avo kogue enana daingeto humbaehija avoeto tunga osaga kogue mihera.
ROM 11:12 Eto ke erevi be hotembevujo, Israel embomeni na God egiketo ari sasapura ta vea avoeto God na enda nei nei embomeni avo ere uhua avoeto enana ta degi ari javotoho puvija, eto Judea embomeni te tapa humbasuja amo ari javotoho be enda tapa ta ainge puvuresuja.
ROM 11:13 Eto ungo enda nei embomeni ta degi ke erena, amo ungota degi ke hande ana God na ikehija pure amo nau degi ta dombo be rate
ROM 11:14 pure erevi ereona amo ungo God ta degi javotoho ari ere uhova avo embomeni nau na kito humbasi uje ururoro God na kito oreketo umbaja pure erevi ereona.
ROM 11:15 Te God na Israel embo tona avoembo enda nei embomeni na God ga namei ere ora te Israel embomeni ehako humbasuja amo pehari ta eto eha erarako aisora.
ROM 11:16 Eto embo na pure ta indari be isapa humbuto God ta degi ikasuja eto pure ta indari tapa amo God ta toho ue otohu aisuja eto nei ji susu amo otohu ururou eto ji amita hatu iki tapa amo otohu aisuja.
ROM 11:17 Eto Israel embomeni ta ke amo ji ‘Olive’ da arahata iraguja amita ke ta humbuto puvuresona. Eto God na ji ‘Olive’ ta hatu sasapura amo jeto kahumbena eto ji ‘Olive’ ahoe ta amita hatu avo humbuto puvuto da ta ji ‘Olive’ amita ikenu kakambuketo ji susu ai ta indari javotoho te umo javotoho te ungo na indie ere papajikihova.
ROM 11:18 Te ungo ji hatu mahu kahumbari avo kogue sapura ke ijie ungo oenga na na avojo, eto ungo na ji susu amita degi indari ikae rate ji susu amo ke mahu God na Abraham ta degi ikari avoeto ungota degi indari ere ikihia.
ROM 11:19 Te ungo ke ereva amo ji hatu sasapura avo kahumbeto gosuketo dago avo ikehei kakambuketo mihera avoeto ungo na dago javotoho ke ereva
ROM 11:20 te kivujo enana amo God ke be ae avoeto kahumbena te ungo amo God ke be ijie humota eagova avoeto miheva te ungo ‘Na na’ avo, teho kogue irivujo,
ROM 11:21 eto hatu be amo tona avoeto ungo ahoe ‘Olive’ ta hatu na God toasova amo ungo te tapa toasuja.
ROM 11:22 Eto God amo osa ari embo eto memenga ikari embo avoeto ungo be hotembevujo, eto enana egikea amita degi memenga ikari embo rate ungo humota ururovo amo ungo simba aisuja te ungona toasova amo ungo tiukau irae aisova.
ROM 11:23 Eto Judea embomeni na jo haperekau God ke be ijie tunga humbuhuro amo God na humbuto ji hatu mahu kahumbena aita ikau kakambukasora, ari ainge amo God na ari inono be ra
ROM 11:24 amita be amo erevira, ungo enda nei embomeni amo ahoe ‘Olive’ avo humbuto da ‘Olive’ ta ikehei kambuheva amo uho ungota be mane ra te Judea embomeni amo da ‘Olive’ ta hatu be avoeto ehako humbuto ikau tohota uhu be aita kambasora.
ROM 11:25 Eto nau namei kamei, ke be vahai araha ta mane, ma ta ojikari avo nanena ano ingova uje ere ona amo ungo God na humbari ke ijie na na eagova avo eto ke erevi ano ingova erena, Israel embomeni huna amina God ta degi jo ngahia ue mihera avoeto enda nei embomeni God na humbau inono au
ROM 11:26 Israel embo nei huna God na oreketo humbasuja, amita ke amo einge kajari mihia, “Eto enana ta orekari embo amo tiri Zion ta eto puvuto Jacob ta embomeni na God ta degi tumo eagora avo au irae au
ROM 11:27 enana ta degi noma kaeto enana ta ari sasapura avo umbano irae aisuja” ke ainge God na ena.
ROM 11:28 Eto Judea embomeni na God ta duru javotoho avo ingari uje ae ue God ta degi kitoho ereora amo ungo enda nei embomeni avoembo ereora. Rate Judea embomeni ta ohihi mamahu amo God na kihi umbuna avoeto Judea embomeni amo embomeni amita ke ijie osa ere ua
ROM 11:29 amo mahu kihi hondate asi ke ijie humbuto noma kajena avoeto enana mane toasuja.
ROM 11:30 Eto ungo enda nei embomeni na God ta degi ari sasapura ere uaeheva ainge dombo Judea embomeni na eha oroho God ta degi ari sasapura ore ungona God ta jo ari avo kogue ere uhova.
ROM 11:31 Eto God na ungota degi jo ere ua avoembo iji ambota amo enana Judea embomeni God ta degi ari sasapura ereora avo God na jo au humbasuja.
ROM 11:32 Eto Judea embomeni te enda nei embomeni te tapa avo God na jo ururou hondate au kesora avoeto embomeni tapa na God ta degi ari sasapura ara tona.
ROM 11:33 Ajao, God ta javotoho ari te hotembari te kiari te, eva ta ukomo ainge peni vahai be eto God na embota ari sirikari amo embo na kiae ra eto God ta ari neite neite tapa amo embona kiari inono ae ra.
ROM 11:34 Eto embo amuna Bada ta hotembari kogue oje kahau? Embo na kogue ari inono ae ra.
ROM 11:35 Eto embo amuna God ta degi hande ikihirou hande mine ikau? Hande mine ikari inono ae ra.
ROM 11:36 Eto uhu ta donda te enda ta donda te tapa amo amita sovera te kiari te na umo oenga avoembo ena avoeto amita degi usasa daroho iresuja, amen.
ROM 12:1 Eto nau namei kamei ungo God jakeka ari be erevi ava erena. God na ungo jo ere ua avoeto ungota ari avo otohu ue vasiri ungota avo God ta degi pene ikihirovo God na kito tunga javotoho aisuja.
ROM 12:2 Eto ungo enda ta hajire avo mane aisova te ungota hotembari avo jandireketo hotembari eha humbuto God ta uje pere avo kogue ari javotoho davore God na kito osa aisuja ari avo pere ue irivujo.
ROM 12:3 Eto God na na osa eto amita pure nau degi ta ikena avoeto ungota degi oje ere kahihena amo ungo embo vahai vahai na ungo oenga embo peni ke mane aisova te ungo vahai vahai amita degi God na ungota humota ari do ikena avo pere kogue inono ta evujo.
ROM 12:4 Eto ungotenau hamo ta donda amo neite neite ra, bende rete tihi rete pe rete amita pure amo oenga oenga ra.
ROM 12:5 Eto ainge dombo ungotena tapa amo Keriso ta hamo avoeto ungotena hamo vahaira
ROM 12:6 te God na amita hondate ari na amita pure ara amita sovera ari amo oenga oenga ikaguja avoeto embo amina God ta ke harika aja sovera ari ikena avoeto amita humota ari na pure avo aisuja,
ROM 12:7 eto embo unduresi sovera ari umbuna embo amina pure avo ue embo unduresuja, eto ahe poekari ta sovera ari humbasuja embo amina ahe poekasuja,
ROM 12:8 eto oje kahari embo na God ta ke hande aisuja, eto hande ikari embo na hande aisuja, eto tihi jigari embo na embo simba ue iresuja, eto hondate ari embo amina osaga kiari embo avo osa osa ari na tunga javotoho ari na unduresuja.
ROM 12:9 Eto embo osa asova amo hamo na mane osa asova te ari sasapura uje ae ue ari jajavotoho avo ue jo tapa na osa evujo.
ROM 12:10 Eto namei kamei ari na embo nei amo otohu embo ke ijie osa mine ara evujo.
ROM 12:11 Eto Bada ta pure ue pegogo mane aisova te jo tapa na tunga vahai ta iketo pure evujo.
ROM 12:12 Eto ungo God ta degi hotari humbasova avo hotembihe tunga javotoho evujo. Eto osaga memenga puvuresuja amo mane toasova, javajava te pari ue irivujo.
ROM 12:13 Eto ungota namei kamei ekalesia ta ujeje deire avo mihirou kito amo hondate evujo, eto ekalesia embo damina puvuresora unduresova avo peni bera ainge ijie jireki poeki eto kito poeto kogue eto unduvujo.
ROM 12:14 Eto embo na ungota degi ta memenga ikau kito amo mane hoviro javiro asova te God na javotoho ari enana ta degi ikaja pari evujo.
ROM 12:15 Eto embomeni tunga javotoho ue mihera amiga tapa tunga javotoho evujo, eto embomeni osaga kogue si ijie mihera amiga tapa si evujo.
ROM 12:16 Eto embomeni ga peka ta irivujo, eto ungo embo pepeni ke ijie na na ijie umo oenga kiari embo mane asova te embomeni ga tapa umoro evujo.
ROM 12:17 Eto embo na ungota degi ta ari sapura au kito amo mine ari sapura mane aisova te embo tapa ta tihi ta ari javotoho davore avo eto kogoeto evujo.
ROM 12:18 Eto ari ungota avo jigito kogoeto embo tapa ga peka ta irivujo.
ROM 12:19 Eto nau namei kamei ungo na ari sasapura ta mine mane ikasova te God ta tumo avo hotembeto tovujo amita ke amo einge kajari mihia, “Eto ari sapura ta mine amo nanena ikasona”, ke ainge Bada God na eria
ROM 12:20 avoeto ari nei amo einge evujo. Eto ungota kitoho beuje ururou kito amo indari te umo te avo ikevujo indore. Eto ainge ururovo amo me kito havo havo ue pambasora.
ROM 12:21 Eto ari sasapura na ungo dembasuja avoeto simba ue ari jajavotoho na ari sasapura ta degi isoro eto serikevujo.
ROM 13:1 Eto ungo gavana ta ke agi evujo. Eto gavana ta sovera amo embo nei na ikae rate God na vahai ikaguja avoeto gavana ta pure ari embopo ta sovera ari God na ikeoi humbuto pure eagora.
ROM 13:2 Avoeto embo amuna gavana ta ke ingae aisuja amo God na gavana ta sovera ikari avoeto gavana na embo amita hajire ikau kesuja.
ROM 13:3 Eto ke agi ari embo na joru mane aisuja te gavana ta ke agi ae embo amina gavana joru ue iraguja avoeto embo amuna joru ae teho iresi uje eto kito amo gavana ta ke agi ururovo kito embo javotoho ke aisuja.
ROM 13:4 Eto gavana amo God ta pure ari embomeni avo ungo hondate ara God na ikena avoeto ungo na gavana ta ke ikari poekasova amo hana kesova avoeto joru ue irivujo, eto God na no degi ta tumo ere ua avoeto gavana na no degi ta memenga ikau kesova.
ROM 13:5 Eto ungo gavana ta ke agi ae asova amo ungota ari sasapura avoeto ungota jo ta hotembu hotembu ue iresova eto nei amo memenga ikaro kesova avo joru ue irivujo.
ROM 13:6 Eto gavana amo God ta pure ari embo eto ungo simba eagora avoeto enana ta mine avo tax koro ikevujo.
ROM 13:7 Eto tax koro rete haja vaja rete Otohu ari rete humote pain rete amo enana ta mine ikasora ainge ijie ikevujo.
ROM 13:8 Eto embo ta hondate ari mine avo mane ikasi ke asova te ikevujo humbau irae ai. Eto hondate ari vahai emore mane irae aisuja avoeto osa ari mine ara ue mahu ainge iresuja, eto ari ainge avo ue amo God ta ke pepeni avo inono ta aisova.
ROM 13:9 Eto ke erena amita be amo erevira, God ta ke pepeni amo umo tiha mane aisoa, embo mane tao pehasora, pegene mane aisoa embo nei ta donda kito humbasi jo ta mane sirikasoa eto ke nei nei amite tapa mihera ke amita susu be amo erevira, “Umo oenga osa ere oa ainge dombo no namei osa ejo”.
ROM 13:10 Eto namei osa ue amita degi sapura mane aisoa te osa ari amo God ta ke pepeni tapa amita susura.
ROM 13:11 Eto ungo ari ainge ue amo iji eha avo hotembihe ereto heteto irivujo, ungotena mahu amo God ke be ijio oreketo umbuna avoeto ungotena pambasora iji amo auvehija
ROM 13:12 amo Keriso puvuto ere hua amo mume irae ururou iho vujasuja avoeto mume ta ari avo toto usasa ta ki emi avo jigito heteto irivujo.
ROM 13:13 Eto mumete ari sasapura ue umo indie ke siosao ijie tiha paiha ue boru jujune ke ijie embo nei ta donda kito si ijie isoro eagora avo toto iji ta ari avo jigama evujo.
ROM 13:14 Eto hamo ta ujeje sasapura amita gamo ta mane huhevasova te Bada Iesu Keriso ta ari avo humbuto turereketo irivujo.
ROM 14:1 Eto embo nei na God humota ue amita osa ari avo ombasi ue ke pepeni neite neite jigama eaguja embo amiga mane boru jumbasova te pekihe umbuvujo.
ROM 14:2 Eto ungo ere kogova amo embo vahai amina nei do hotembae ue indari neite neite tapa avo indie iraguja eto embo nei amo God humota be ae avoeto o tapa God ta tihi ta indahu ke ijie ina pere indaguja.
ROM 14:3 Rate o indari embo amina o ajirekari embo ta degi ganini ijie embo sapura ke mane aisuja eto o ajirekari embo amina o indari embo avo pehumba mane aisuja eto o indagora amite eto mane indagora amite amo God na amo pure ari embo amita avoeto pekihe humbaguja
ROM 14:4 eto embo ainge eagora amo God ta ke avo ambo ambo asi uje ue eagora avoeto inena God ta pure ari embo ta degi mane pehumba asoa. Eto embo amina ari ainge ue amo hetautemo veau amo Bada na simba ere ua avoeto Bada ta sovera na jigou hetasuja.
ROM 14:5 Eto embo nei amo iji vahai vahai amo otohu iji ra eaguja rate embo nei amo iji tapa amo otohu ijira eaguja te ke peni be amo embo na amita jo ta do aisuja avo siriketo aisuja
ROM 14:6 eto embo nei na iji nei nei otohu iji ra eaguja amo Bada jakeka ijie otohu eaguja eto embo nei o indaguja amo God osa ue indaguja avoeto God jakeka eaguja, eto embo nei o ajirekaguja amo Bada otohu ue ajirekaguja avoeto amite tapa God jakeka ere ua.
ROM 14:7 Eto embo amo teho iroute mo pehau amo umo oenga ae rate teho iresuja amo Bada na oenga au iresuja eto pehasuja amo Bada na oenga au pehasuja amo embo pehari te vasiri te amita Bada aisi Keriso na peheto vasiri te erena avoeto ungotena teho iresora eto pehasora amo ungotena Bada ta meniundi ra.
ROM 14:10 Eto ungotena tapa amo Bada ta meniundi rate ungo nei uhoho amina namei ta ari nei avo kogue sapura ke ijiove nei uhoho na mine pehumba ereova amo sapura be avo ere ova te ke be amo ungotena tapa God ta tombu ta hetaro God na ungotenau ari sirikihirou ungotenanena God ta degi ke mine asora
ROM 14:11 amita ke amo einge kajari mihia, “Na vasiri te Bada nanena ke erevi erena, embo tapa na tombu nau ta heteto humotepain ue umo God ra ke aisora”. Ke ainge mihia.
ROM 14:12 Avoeto ungotenau ari tapa amita ke susu amo God ta degi harikaro ingesuja.
ROM 14:13 Eto ungotena pehumba mine ara mane aisora te ungotenau irari avo ungotena oenga kogue namei ta pambari degi avo mane peikaro teto tiambueto veaja simba aisora.
ROM 14:14 Eto Bada Iesu na ke ena amo na ere kogona amo indari nei sapura nei javotoho ra aera te embo nei na indari nei avo sapura ke ijie indesuja embo amo ari sapura aisuja aravora.
ROM 14:15 Eto indari emo no namei indahu avo namei hotembae ue inde kito amite tapa indie osaga ere kogua amo inena namei osa ae ue ereoa. Eto Keriso amo namei avoembo pehena te inena ari no amina namei ta degi ao ari sapura ta veasuja.
ROM 14:16 Eto ungota degi ari jajavotoho avo pambuto embo nei ta degi ta avo kito urumbaro simba evujo.
ROM 14:17 Eto God na embomeni amita toho siriketo humbuto tihi jigesuja amo indari amo ke peni mane rate embo ari javotoho ari te peka te tunga javotoho ari te avo Ahihi Otohu na hande eaguja avo ke peni bera.
ROM 14:18 Eto embo amuna ke avo be hotembihe Keriso ta pure ururou God na kito osa ururou embo na kogue ke be aisora
ROM 14:19 avoeto ari deina ue hondate mine ara ari amo aro ejeha au peka ta iroro avo ue hamo asora
ROM 14:20 eto God ta pure avo indari ta ke na mane avo sapura aisuja. Eto indari tapa amo javotoho rate namei na indari indirou namei na kito tiambueto veasuja amo sapura
ROM 14:21 avoeto namei na kito ari sapura aute avo hotembihe o rete mo wine rete mo donda deire avo be tovujo irae ai.
ROM 14:22 Eto umo indari ajirekari rete ari nei deire amo God te umo te aingeto ungo tohora te ke amo mane toasova ainge nei mane hande asova te umo oenga ke avo jigama ue amo no jo ta umo oenga pehumba mane asoa avoeto tunga javotoho ue iresoa.
ROM 14:23 Eto embo amita hotembari heriso avoeto indonote mane indono ainge eto na indesona ainge eto indesuja amo embo amita jo ta pehumba ere ua avoeto embo amo God ta tihi ta ari sapura ere ua.
ROM 15:1 Eto ungotena Keriso humota ue sovera humbari embopo na ungotenau ujeje ta mane pambasora te embo nei sovera peni umbae embopo avo hondate ue iresora,
ROM 15:2 eto ungotena embo vahai na ungotenau namei na Keriso ta degi sovera ari umbaja ungote degi jombure ue iresora.
ROM 15:3 Ke ainge avo Keriso te tapa amita hamo avo hotembae rate amita ke avo einge kajari mihia amo “Bada God, enana na Umo urumbagora te bouka amo koho nau ta ere viviha” ainge kajari mihia.
ROM 15:4 Eto God ta ke ijioi kakajikihovora amo ungotenanena God ta ke susu be avo kiagora kakajekea, eto ke ai ta sovera ari humbuto osaga memenga puvuresuja te mane joru asora te God na umbara oje ena avo simba ue iresora.
ROM 15:5 Eto na pari ere ona amo ungo na Iesu Keriso ambo ambo ururovo ungotenau oje kahihe sovera ikari embo God amina ungotena jo vahai ari avo ikau
ROM 15:6 humbuhe jo vahai eto pe vahai amina ungotenau Bada Iesu Keriso ta Mamo God avo jakeka ijiroro amita degi usasa puvuresuja.
ROM 15:7 Eto Keriso ta peka na ungo umbuhaja ainge dombo ungota peka mine ikara ururovo embo nei na kogue God jakeka aisora.
ROM 15:8 Eto erevi hotembevu, Iesu puvuna amo God na Judea ta ohihi hondate asi oje ena avoeto Iesu amo Judea embo hondate asi puvuna
ROM 15:9 eto enda nei embomeni na God ta jo ari avo enana na kito God jakeka ara puvuna amita ke amo einge kajari mihia “Eto ari no avoeto enda nei embomeni ta da ta enana ga umo jakeka ijie no javota haveni aisora” ke ainge eto
ROM 15:10 nei amo “Ungo Judea embomeni te enda nei embomeni te aingeto vahaita eto tunga javotoho evujo” eto ke nei amo
ROM 15:11 “Ungo enda nei embomeni Bada jakeka evujo eto ungo embo tapa Bada ta degi haveni evujo”.
ROM 15:12 Eto Isaiah na ke einge kajena “Eto embo Jesse ta meni King David amita ahije vahai amina ereto enda nei embomeni amita tihi jigari embo ururou kogue ke be ijiroro enana ta Bada aisuja”, ke ainge kajena.
ROM 15:13 Eto pari erena emo ungo God ke be ijirovo humota ari God amina ungota degi peka te tunga jamo ari te ikihirou humbuhe Ahihi Otohu ta sovera ari humbuto God na ambota ikau umbava oje ena avo simba ue tunga javotoho ue irivujo.
ROM 15:14 Eto nau namei kamei na ungo humota ae ue teho kajae rate ungo oenga ahe poekari mine ara eto oje kahari mine ara ue tunga iketo ere ova amo na ere kogona te
ROM 15:15 God na pure nau ikena avoeto ari neite neite tapa erevi be hotembava ke ngahia na ere kajihena.
ROM 15:16 Amo na Iesu Keriso ta pure ari embo enda nei embo avoembo ikari avoeto pure avo ue ungota degi God ta duru javotoho hande ere ona amo enda nei embomeni Ahihi Otohu na egau God na enana ta degi pene javotoho umbaja ere ona.
ROM 15:17 Avoeto na God ta pure avo Iesu Keriso ga vahaita ere ona avoeto tunga javotoho ereona
ROM 15:18 te na ke erena emo embo nei nei na Keriso ta pure ereora avo ae rate nanena Keriso ta hondate ari na pure one enda nei embomeni na ingihe God ta ke ihiketo agi ere ora
ROM 15:19 amo Ahihi Otohu ta sovera na ari neite neite one kogora amo da Jerusalem eto pambuto da Illyricum kane ainge eto Keriso ta duru javotoho avo hande one ere ingihera.
ROM 15:20 Eto uje nau amo na embo nei ta tutuvi hurukari aita mane bande gerikagona te na oenga tutuvi huruketo bande gerikasona ke ainge eto God ta ke ingae embomeni enda nei ta pambuto Keriso ta duru javotoho hande eagona.
ROM 15:21 Amo God ta ke einge kajari mihia avo kogue eagona, “Eto kiae embomeni na kesora eto mahu ingae embomeni na ingito ke be aisora”
ROM 15:22 eto na pure ainge ere ovona amina ungota degi sausau pambae amore ere ovona.
ROM 15:23 Eto na jua koso be ungo kiae enda nei nei eita pahue pure ere ovona avo pure ehene irae ehei
ROM 15:24 enda Spain ta pambasi pambuto degi ta heteto ungo te umoro isapa ue ungota pekari avo kito pambasona.
ROM 15:25 Rate na kihi amo ekalesia da Jerusalem ta mihera amita pure ta pambuto da Macedonia te da Achaia te ta ekalesia na koro siriketo enana da Jerusalem embo nei nei donda ambupu eto koro irae embomeni ta koro siriketo nanena ikana ijie hande ikehera avo ikasi pambasona.
ROM 15:27 Eto koro amo enana ta jo tapa na ikasi uje eto ikehera amo teho hande ae rate Bada ta ke avo Judea embo na enda nei embo ta degi hande ore ere ingihera avoeto hande mine haja vaja avo ikehera.
ROM 15:28 Avoeto na enana ta hande ikehera avo humbuto pambuto ungota ingeni ta iketo enda Spain ta pambasi pambuto ungote arumbeto umoro asona
ROM 15:29 eto na kogona amo ungote umoro ue Keriso ta osa ari avo mine kiara aisora.
ROM 15:30 Eto nau namei kamei Bada Iesu Keriso ta javota eto Ahihi Otohu ta osa ari na namo avoembo pari ururovo na degi ta pahue kitoho embo hambasona avo eto nau javota pari evujo.
ROM 15:31 Eto enda Judea jo ta Keriso kiae embomeni amina na tasora avoeto tiumbeto pambana eto Judea ekalesia na koro eremite tapa umbara amite tapa pari evujo.
ROM 15:32 Eto God na uje au kito amo na pambuto ungote jangu indie tunga javotoho asona
ROM 15:33 te God ta peka ungota degi iroi, amen.
ROM 16:1 Eto ungotenau du Phoebe amo da Cenchreae ekalesia evohu ta pure ari evohu avo ungota degi puvuresuja amo ungo Keriso ta embomeni be kito avo pekevujo. Eto evohu amina embo isapamane te eto namote tapa hondate eaguja avoeto puvuto amina donda do uje au kito hondate evujo.
ROM 16:3 Eto evohu Prisca te amita ivu Aquila te amo namote Iesu Keriso ta javota pure ere uahera avo ere pekihena,
ROM 16:4 eto enana ta vasiri na na orekihie enana sari ari haite ea amo nanena vahai osa ae rate enda nei ekalesia tapa na enana osa ereora.
ROM 16:5 Eto ekalesia tapa enana ta bande ta horukagora amite tapa ere pekihena. Eto nau namei Epaenetus amina enda Asia ai ta kihi jo haperekenu Keriso ambo ambo ena avo ere pekihena.
ROM 16:6 Eto nei amo Mary na ungo embo pure ngahia ena avo ere pekihena.
ROM 16:7 Eto apostel embo pepeni Andronicus te Junias te amo nau ke vahai embopo namote tapa tipura uera amina na Keriso ambo ambo ae kihita amo enana embo heriso amina Keriso ambo ambo uera avo ere pekihena.
ROM 16:8 Eto nau namei Ampliatus avo Bada ta javota osa ere ona avo ere pekihena.
ROM 16:9 Eto ungotena Keriso ta pure vahai embo Urbanus te nau namei be Stachys te avo ere pekihena.
ROM 16:10 Eto embo Apelles amo memenga kina te toae Keriso humota ere ova amite eto embo Aristobulus te amita bande vahai embomeni avo ere pekihena.
ROM 16:11 Eto nau da Judea embo vahai Herodion amite eto embo Narcissus ta bande vahai embomeni Bada ta javota mihera avo ere pekihena.
ROM 16:12 Eto evohu heriso Tryphaena te Tryphosa te avo Bada ta pure ngahia be na ere ora avo ere pekihena. Eto nau du Persis amite tapa Bada ta pure ngahia na ere ua avo ere pekihena.
ROM 16:13 Eto Bada ta meni Rufus amite amita e te na aja nau na arako uija avo ere pekihena.
ROM 16:14 Eto embo javo Asyncritus Phlegon te Hermes te Patrobas te Hermas te enana amita namei kamei tapa enana amiga horukagora avo ere pekihena.
ROM 16:15 Eto embo Philologus te amita ae Julia te embo Nereus te amita du te Olympas te Keriso ta embomeni enana ga tapa mihera avo ere pekihena.
ROM 16:16 Eto Bada ta ke ta mune tavo mine ara ari amina osa mine ara evujo. Eto Keriso ta ekalesia tapa eita mihera amina ungo ere pekihera.
ROM 16:17 Eto nau namei kamei ke erena amo embo ta hotembari sokova na Iesu ta ke ahe poikihiroro amo ungo teto tiambueto veasova avoeto ari avo toto be kogue irivujo.
ROM 16:18 Eto embomeni amo Iesu Keriso ta pure ari embomeni mane rate ujeje sasapura ta pure ari embo amina ke gamo na poekihe ijiore ke kiae embomeni na ambo ambo eagora.
ROM 16:19 Eto ungona God ta ke avo ambo ambo ere ova amo embo tapa na kiari avoeto na nau jo tapa na osa ere ona. Eto ungo ari jajavotoho kiari embopo ue ari sasapura avo mane kesova te toava uje ereona.
ROM 16:20 Eto ari ainge ururovo jo jamo jamo ari ta God Mamo amina Satan humbuto ungota tombuta tau karaun eto veasuja avoeto ungotenau Bada Iesu ta hondate ari avo ungota degi iresuja.
ROM 16:21 Eto nau pure vahai embo Timothy te nau da vahai embo Lucius te Jason te Sosipater te na ungo ere pekihera.
ROM 16:22 Eto na Tertius nanena Paul ta pe ta ke erevi ingito ungota degi ere kajihena amo Bada ta javo ta ungo ere pekihena.
ROM 16:23 Eto na Paul embo Gaius amina na undurari javotoho ere ua amite ekalesia amita bande ta horukihera amite tapa ungo ere pekihera. Eto da ta koro simba ari embo javo Erastus te ungotenau namei Quartus te na ungo ere pekihera.
ROM 16:25 Eto duru javotoho amo Iesu Keriso ta ke avo hande eagona avo ungo na ingihirovo God na ungo jigou hetasova. Eto ke emo mahu be rate ojikari iraguja
ROM 16:26 avo enda tapa ta embomeni na daroho irari God avo embomeni na ke be ijie ambo ambo ara God na ijinu peroveta na kakajekea ke avo araha tambu ta harikeore ingagova.
ROM 16:27 Eto Iesu Keriso avoembo God kiari embo vahai amita degi usasa puvuresuja, Amen.
1CO 1:1 Na Paul God ta apostel ana God na engerekena amo namote ungotenau namei Sosthenes te
1CO 1:2 aingeto Iesu Keriso ta embo ototohu God ta ekalesia da Corinth ta miheva amita degi ungo pekihe ahari erevi ere kajihera. Eto ungote namote eto enda tapa embomeni te amuna Bada Iesu Keriso ta javota pari eagora avo ingeni jageni kogumbeto otohu ara God na jage eria.
1CO 1:3 Eto ungotenau Mamo God te Bada Iesu Keriso te na ungota degi peka te hondate ari te ikasora.
1CO 1:4 Eto ungona Iesu Keriso ta degi hondate ari isapamane be umbeva avoeto na God ta degi osa mahainge eagona,
1CO 1:5 amo ungota degi God ta ke kiari te oje kahari javotoho te tapa inono eagova avoeto osa ere ona
1CO 1:6 eto Keriso ta ke hande ore tapa humbuheva
1CO 1:7 avoeto ungo Bada Iesu Keriso puvuresuja avo simba ue nei do toae Ahihi Otohu ta sovera ari tapa inono ta hande eto ere humbuhava
1CO 1:8 Eto amina jigou sovera eto mihirovo Bada Iesu Keriso ta iji puvuresuja amo ungota degi mane pehumba aisora
1CO 1:9 te God na ungo amita Meni Iesu Keriso ungotenau Bada amiga vahaita ava umbuna avoeto amina ungo mane toasuja te simba ue iresuja.
1CO 1:10 Eto nau namei kamei, nanena Bada Iesu Keriso ta javota erena, ungo kaheke kaheke eto boru mane jumbasova te jo vahai hotembari vahai eto irivujo.
1CO 1:11 Eto embo Chloe ta bande ta iragora embomeni na puvuto nau namei kamei ungo na boru jumbuhe irari ke ehere ingena
1CO 1:12 amo ‘Na Paul ta ke ambo ambo eagona,’ eto embo nei na, ‘Na Apollos ta ke ambo ambo eagona,’ eto embo nei na, ‘Na Cephas ta ke ambo ambo eagona,’ eto embo nei na, ‘Na Keriso ta ke ambo ambo eagona,’ ke ainge ijie miheve puvuto ehere ingena
1CO 1:13 te Keriso kaheke kaheke eto hande arote? Eto na Paul ungo embo na tehere sari uenete? Eto na Paul javo nau ta bapataito uevete? Ari aingeko avo irae bera
1CO 1:14 eto na ungo bapataito ae rate embo Crispus te Gaius te avo ingeni nau na bapataito uena avoeto na tunga javotoho ere ona
1CO 1:15 te ungona javo nau ta bapataito ari ke avo mane aisova
1CO 1:16 te embo Stephanas ta hatira ga tapa bapataito uena te nei uenete aere amo na kiaera.
1CO 1:17 Eto Keriso na na pambuto embo bapataito ana ke ae rate amita duru javotoho avo embo ta degi hande ana ikena. Eto enda embo ta kiari na ke avo hande ahena amo Keriso ta ji oreka amo sovera irae aehija.
1CO 1:18 Eto Keriso na ji oreka ta pehena amita ke avo pepehekari degi ta ere pahora amo sokova ke ijie urumbagora te ungotena God na umbuna embomeni amita degi amo God ta sovera ari ai ta humbagora.
1CO 1:19 Amita ke amo einge kajari mihia, “Eto na God nanena enda embo ta kiari amo haeketo humbuto gosukano irae aisuja,” ke ainge ena.
1CO 1:20 Amo enda ta kiari embo davore? Eto enda ta ke embo davore?
1CO 1:21 Eto enana ta ke tapa amo God na ehei ke be ambu ere ua. Amita be amo embomeni na God kesi ere uahera te God kiari inono ae eo God na amita kiari na Iesu ji oreka ta pehena amita ke avo hande eo embomeni nei uhoho na sokova ke ere nei uhoho na ingito God ke be ere, oreketo ere uhua.
1CO 1:22 Eto Judea embomeni sovera neite neite avo kihi kito ke be asi uje ere ora te enda nei embomeni na embo pepeni ta ke avo kihi ingito ke ta gamo avo kesi uje eagora
1CO 1:23 te ke hande ere ora amo Keriso ji oreka ta teo pehena amita ke avo ijiore Judea embomeni na ingihe sokova ke eagora eto enda nei embomeni na ingihe haha puha, eto urumbagora
1CO 1:24 rate God na siriketo ere uhua embomeni Judea embomeni te enda nei embomeni na God ta sovera te kiari te amo Keriso ta degi kiagora
1CO 1:25 amo Keriso na embo oreketo ji oreka ta pehena amo embo na sokova ke eagora te God ta kiari te sovera te amo embo ta kiari te sovera te aingeko mane rate pajire be ra.
1CO 1:26 Eto nau namei kamei, ungo God na siriketo umbuna iji te amo ungota irari mo do aingere avo be hotembevujo. Eto ungo embo heriso amo kiari embopo eto donda embopo eto embo pepeni ta meniundi eto ungo isapamane manera.
1CO 1:27 Te God na enda ta kiari embopo te sovera embopo te avo me kiagora kiae embopo ivo ambu embopo te avo siriketo ere uhua.
1CO 1:28 Amo enda ta donda, enda embomeni na kogue sapura ke eagora avo God na humbuto jigama asi uje ere ua, amo enda ta embo pepeni na be ambu ara ari ainge amo ere ua.
1CO 1:29 Avoeto enda embo tapa na God ta tihi ta heteto, “Na, na” ijie dago embo pepenira ke ainge avo ari irae be ra.
1CO 1:30 Te God na ungo humbuto Iesu Keriso ta jo ta ikehei miheve ungota kiari te javotoho ari te otohu ari te ari sapura ombari te amo amina ere ua.
1CO 1:31 Avoeto ke einge kajari mihia, “Eto ungo jakeka asi eto kito amo Bada vahai avo jakeka evujo.”
1CO 2:1 Eto nau namei kamei, eto na pambuto God ta ke ungota degi hande uena amo embo ta hotembari ke avo ae eto embo emo ke embo na eria ainge ara na ke ae
1CO 2:2 rate na ungote mihie amo Iesu Keriso ji oreka ta teo pehena amita ke avo pere ehene ingihava.
1CO 2:3 Amo na ivo embo ke ijie ke amo ae rate na embo teho avoeto joru te tapa ke amo ehene ingihava
1CO 2:4 eto ke hande ue oje kahihena amo ungo na ingihe embo ta hotembari javotohora ainge ijie sago kiagova ae rate Ahihi Otohu ta sovera na ke amo ene kogueva.
1CO 2:5 Amo embo ta hotembari avo humota ava ae rate God ta sovera avo ano kito humota ava ijiena.
1CO 2:6 Eto na God ta pure ari embo ototohu pepeni amita degi ke hande eagona amo kiari ke peni be avo eagona amo enda ta embo pepeni ta kiari amo enda ta irae aisuja avoeto amina
1CO 2:7 ae rate God ta ke peni ojikari avo enana ta degi hande eagona eto God na enda ae kihi ta amo ungotenanena ke avo ingiho God ta usasa ta toruera God na sirikena.
1CO 2:8 Eto ke avo enda ta tihi jigirikari embopo na ingito ingaesira ea te ke avo ingaehera amo Bada usasa te amo mane ji oreka ta taehera
1CO 2:9 ke ainge amo einge kajari mihia, “Eto God na God osari embomeni ta degi ari do asi sirikena amo tihi na kiae eto oje na ingae eto embo ta siro na hotembeto hambae,”
1CO 2:10 ke ainge avo mihia te eha oroho emo God ta Ahihi Otohu na eha oroho harikihoi ere kogora. Eto Ahihi Otohu amina jombure ue amo God ta ke hotembari peni ojikari amo ere kogua
1CO 2:11 eto ari amo erevira, embo ta hotembari jo ta amo embo nei na kiae rate ahihi amita oenga na tohota hotembari jo ta amo ere kogua ainge dombo embo na kiae rate God ta Ahihi na God ta hotembari jo ta amo ere kogua
1CO 2:12 eto embo ta ahihi avo ikae rate God ta Ahihi avo ungotenau jo ta ikehei horeto mihie God na ungotenau hande ikena amo amina harikeoi kiagora.
1CO 2:13 Avoeto ke hande eagora amo enda embo ta kiari manera te God ta Ahihi Otohu na uhu ta ke avo embo ta jo ta ijioi ingihe embo ta degi ke hande eagora.
1CO 2:14 Eto God ta Ahihi embo ta jo ta irae embo amina God ta ke avo ingito sokova ke ijie ganini eaguja amo uhu i ta ari avoeto embo amo ingari inono ae ra.
1CO 2:15 Eto embo Ahihi Otohu humbari embo amina ari tapa amo ingihe inono ta sirikaguja te embo Ahihi Otohu umbae embo amina embo nei ta ke ingeaguja amo ari haiteko mane avoeto tuha eto iraguja
1CO 2:16 amita ke amo einge kajari mihia, “Eto embo amuna Bada ta siro ta hotembari avo kiae avoeto Bada mane ahe poekahija,” ke ainge kajari mihia rate ungotenamo amo Keriso ta hotembari amo ungotenau jo ta mihia.
1CO 3:1 Eto nau namei kamei, na ungota degi pambuhena amo ungo God ta Ahihi humbari embopo ta degi God ta ke ngangahia avo ahena te ungo God ta kiari na pajirae rate Keriso ta degi meni isasaraho na arako ove kito toa.
1CO 3:2 Eto ungo indari be avo indari inono ae kito emi mu pere ikeo indieva te eha oroho emo ainge dombo indari be avo indari inono ae
1CO 3:3 enda ta ujeje ta ere pambuhova amo ungota degi boru jumbari isapamane be mihia avoeto erena.
1CO 3:4 Eto ungo na ‘Na Paul ta ambotani,’ eto ‘Na Apollos ta ambotani,’ ke ainge ereva amo enda embo ta ari avo ere ova.
1CO 3:5 Eto Apollos amunure? Eto Paul amunure? Embo amo teho Bada ta pure embo amita ke avo kaiha ururoro ungo na ingova siriketo ikena
1CO 3:6 eto na Paul na ji ve urari embo eto Apollos amo ji urea aita umo overekena te God na eoi ji amo pajiraguja
1CO 3:7 eto ji ve urari embo amo tehora eto umo overekari embo amo tehora te God na vahai au ji amo pajiresuja.
1CO 3:8 Eto ve urari embo te umo overekari embo te amo hotembari vahai na pure ere uma pure ta mine amo God na ikau humbasora
1CO 3:9 eto dago God ga tapa hevuketo pure amita avo ere ora avoeto ungo amo dagota pure mane rate God ta pure ra. Eto ungo amo God ta bande avoeto God na ere gerikihia.
1CO 3:10 Eto God na nau degi ta kiari javotoho ikena avoeto bande ta tutuvi hurukeo embo nei nei na tutuvi aita bande gerikihera avo be kogue gerikara uje ereona.
1CO 3:11 Amita be amo God na tutuvi ikena amo tutuvi nei irae rate Iesu Keriso vahai na heteto mihia.
1CO 3:12 Avoeto embo amuna tutuvi ai ta bande gerikasi uje aisuja amo ‘Gold’ retemo ‘Silver’ rete koro rete, ji rete, sasaha rete, ‘Rice’ vehu rete donda deina gerikasuja
1CO 3:13 amo Bada ta iji puvuresuja amo sapura rete javotoho re amo iji amikote kesuja amo sapura retemo javotohore amo ji vevere na au kesuja,
1CO 3:14 amo evekae iresuja embo amina amita pure ta mine amo humbasuja
1CO 3:15 te embo bande sapura gerikasuja amo evekau irae au teho iresuja, eto embo amo ji peri na joeketo evikihirou God na orekasuja te embo amo hamo pupuho te iresuja.
1CO 3:16 Eto God ta bande Otohu amo ungora te God ta Ahihi Otohu amo ungota degi ta iraguja te ungo kiaerete?
1CO 3:17 Eto embo na God ta bande Otohu avo teto aimbasuja embo amo God na tau irae aisuja. Eto God ta bande amo Otohu ra eto ungo amo bande Otohu ra.
1CO 3:18 Eto umo oenga jandireketo no degi ta ke sokova aojo. Eto umo kiari embo ke erea te kiae embo sira eto God ta degi kiari umbaehea.
1CO 3:19 Amita be amo God na enda embo tapa amita kiari avo kogue enana ta ke avo huti ke eria amita ke amo einge kajari mihia, “God na eoi enda ta kiari embopo ta ke amo vage ta tarako eaguja.” ainge
1CO 3:20 eto ke nei amo, “God na enda embopo ta kiari avo kogue kiari be mane ke eaguja,”
1CO 3:21 avoeto ungo embo ambo ambo ari embopo na kogue na na avojo
1CO 3:22 eto amita be amo Paul rete Apollos rete Cephas rete enda donda rete vasiri te pehari te ari mahu rete eha puvuroute tapa amo ungota pure ari donda ra
1CO 3:23 eto ungo amo Keriso ta toho eto Keriso amo God ta tohora.
1CO 4:1 Eto embona dago apostel ke asora amo Keriso ta pure ari embopo ke asora te God ta ke mahu ojikari avo simba ue hande are ikena.
1CO 4:2 Eto peni be amo dago ke simba ari embopo na Bada ta ke agi ue pure asora te
1CO 4:3 ungo rete eto pehumba embopo rete amite aingeto ari nau avo kogue na ganoka aisova amo na ke be mane asona eto ari amite namote tapa ari nau avo kogue ganoka mane eagona.
1CO 4:4 Rate nau jo na na oenga pehumba mane eagona te na pehumba embo rete pehumba embo mane re amo Bada na oenga pehumba eaguja.
1CO 4:5 Avoeto pure embo javotoho rete sapura re avo ungo na mane evivi javivi aisova te Bada na puvuto aisuja avo simba evujo. Eto Bada na ke tapa mume ta ojikari avo harikihe embo ta hotembari jo ta avo au araha ta kesora amo iji amikote embo ta ari avo God na kito jakeka aisuja.
1CO 4:6 Eto nau namei kamei, namote Apollos te ta javota ke ereva avoembo ere kajihena te ungona “Na na” ijie Bada ta ke ta hamota ungota hotembari ke ga kajue ere ova amo sapura be avoeto ungo na be kiagova ke erevi ere kajihena, amo ungona embo nei peni embo nei isapa ke ereva avoeto haekihe ere kajihena
1CO 4:7 te ungo amuna embo pepeni avo ke ehei? Eto ungota degi ta do mihia amo ungo oenga ehevete? Ainge ae rate God ta ari avo eto ungota degi ikehija avoeto ungo oenga, “Na, na” ijie avojo.
1CO 4:8 Eto ungona kiari umbeve inono ehei dago toto uhu ta horeto ‘Kings’ ere ovete? Eto ungo ke be aheva amo dagota tapa ‘Kings’ ahera avo nau jo tapa na uje ere ona,
1CO 4:9 te na ere kogona amo God na ehei embomeni kihi pambuhore dago apostel avo embomeni sasari asora embopo amiga ambota ere pahora. Eto dago pambuhore uhu te enda te ta iragora embomeni te tapa amina dago kogue mihera.
1CO 4:10 Eto ungo na Keriso ta kiari tapa amo umbeve irae ehei dago avo kiae embopo ke erevete? Eto ungo embo pepeni sovera humbari embopo ke ijie dago sovera umbae embopo ke erevete?
1CO 4:11 Eto ungo be kivujo, dago apostels na umo beuje te indari beuje te bo perarari asuketo embo ta degi memenga te osaga te humbuto hari tumbuto mihovora
1CO 4:12 eto dago ingeni dagota na pure ngahia ere ora te embo na urumbihore mine avo javotoho ari embo ta degi ere ikihera amo memenga osaga ikihore jamo eto kogue mihera.
1CO 4:13 Eto embo na dagota javo uore sapura uoi amo osa ari ta ke avo mine eagora, eto ari ainge amo eagora te ihikarita eto puvuto eha emo embota sirivo kandue sasapura amo dagora.
1CO 4:14 Eto nau osa ari meniundi, na ke erevi ere kajihena amo ungo na me kiagova kajae rate kivujo
1CO 4:15 Keriso ta ke ahe poekari embopo amo 1,000 ainge ungota degi mihera te Keriso ta duru ungota degi hande uena te ungota mamahamane nei irae na vahai amo ungota mama ra.
1CO 4:16 Avoeto nau ahe kihira avo ungo ambo ambo evujo
1CO 4:17 eto ungo be kiagova na osa ari meni Timothy amo Bada humota ari meni avo ikano ungota degi pambuto na Iesu Keriso ta jo ta mihie irari nau do ainge ere ona avo pambuto au ingivujo, eto ke vahai aravo enda tapa ekalesia ta degi hande eagona.
1CO 4:18 Eto na ungota degi pambae iji koso mihene ungo embo nei nei na embo pepeni ke ijie, “Na, na” ereva
1CO 4:19 te Bada na uje au kito ungota degi sausau pambuto ungo siro embopo ta ke sokova avo ingito avo ungota degi sovera miheite iraere avo be kesona
1CO 4:20 eto God ta tihi jigari aita amo ke pere mane rate sovera te tapa mihia,
1CO 4:21 avoeto ungo oenga ungota jo sirikevujo, na ituha jigito pambuto ungota degi hana kiari ikanote mo teho osa ari te tunga jamo ari te na pambano?
1CO 5:1 Eto embo na ijiore ingagona amo ungota degi ta ari sapura vahai mihia amo God kiae embomeni na ari sapura ainge amo mane ahera te ungo na ere ova amo embo vahai na mamo ta ae jimbuto mihia.
1CO 5:2 Eto ungo ari ainge avo kito osaga kiaeheva te ungona dago javotohora ke ainge ijie miheva te ungo do eto embo amo ohimbavo pambaja ae toheve mihei?
1CO 5:3 Eto hamo nau amo hoi ta mihia te ahihi nau avo ungote mihia avoeto pehumba eto embo amo ohimbehene mahu pambija.
1CO 5:4 Avoeto ungo Bada ta javota horukihirovo ahihi nau amo ungota degi iresuja avoeto Bada Iesu ta sovera na embo avo ohimbavo
1CO 5:5 Satan ta ingeni ta pambau amita hamo ta ujeje tapa avo tau irae au amita ahihi avo irirou God na Bada ta iji te oreketo humbasuja.
1CO 5:6 Eto ari sapura erevi ungota degi mihia te ungona dago javotohora ijie haekae miheva amo sapura bera eto ‘Bread’ pajirari sivo isapa ikeore pajito peni vahai eaguja aingeko ari sapura emina pajito peni vahai be aisuja
1CO 5:7 avoeto Judea embona jarukari pondo ta ‘Bread’ ta pajirari sivo ikae teho indagora ainge dombo ungona ari sapura erevi be tovujo irae ai. Eto ungotenau jarukari ta pondo indesora amita o ‘Lamb’ amo Keriso avo mahu tehere pehehija.
1CO 5:8 Avoeto ungotena pondo indesora te ‘Bread’ mahu pajirari sivo ikagora avo ari sasapura te humote toto ‘Bread’ sivo ikae avo tunga javotoho na jo jamo jamo ari te ke be te na indie iresora.
1CO 5:9 Eto na ahari mahu kajea aita, amo ungona tiha paiha embomeni ga umoro kamoro eagova avo kajea.
1CO 5:10 Rate God kiae embomeni na tiha paiha ue hamo ta ujeje sasapura ue pegene ue god ingeni na ove eto humotepain ari embopo avo ungo na toava ke ae ra te ungote enanate enda vahaita miheva avoeto ungona enana toto pambari inono ae ra
1CO 5:11 te ke kajea amo embo amuna, “Na Keriso ta toho,” ke ainge aisuja te embo amina tiha paiha rete uje sasapura rete god ingeni na ari avo humotepain eagoite embo ta javo ari sapura rete umo indito tihivi ari rete pegene ari rete embo aingeko avo be tovujo irae ai, eto embo aingeko amiga mane arumbeto indari indesova.
1CO 5:12 Eto ekalesia ae embomeni araha ta mihera amita ari amo na mane sirikagona te God na vahai sirikaguja te ungotena ekalesia embomeni tapa vahaita mihera amo ungotena oenga ari ungotenau avo sirikara einge kajari mihia, amo, “Ungota horukari ta embo sapura mihirou kito avo ohimbevu joru pambai,” ke ainge mihia avoeto evujo.
1CO 6:1 Eto ungo tapa amo Keriso ta embomeni rate ungota namei vahai amita degi pehumba ere ova te ungo na God kiae embomeni na koto ta sirikara ere harikiheva te do avoembo ungota ekalesia embomeni na ganoka ara enana ta degi pambuto ae re?
1CO 6:2 Eto ungo enda embomeni tapa ta ari avo sirikari ijite amo ungotena Keriso ta toho amina God kiae embomeni ta ari avo siriketo pehumba aisora amo ungo kiae ue ere ovete? Eto enda tapa ta ari amo ungona sirikasova te ungota jota ari, hotembari, puvaguja amo ungo oenga mane sirikavote?
1CO 6:3 Eto Anera te tapa amo ungotenanena sirikasora avoeto enda ta ari amo ungotena oenga sirikasora amo tehora
1CO 6:4 eto ke erena emo ungota degi ari do puvurou kito amo pambuto embo teho ungote mihia amita degi avo, amina sirikaehija amo tehora.
1CO 6:5 Eto ke erena amo ungona me kiagova erena, eto ungo Iesu ta embomeni amita degi osaga puvurou kito amo ungota kiari embo vahai amina sirikau tunga javotoho aisova, embo amo iraerete?
1CO 6:6 Eto ungo embo vahai na namei ta degi pehumba ere ova amo God kiae embomeni ta tihi ta ere ova.
1CO 6:7 Te ungota namei na ke sokova ijie ungota degi sapura ururou amo kito hotembeto toaeheva te ungona namei ta degi pehumba ue koto ta humbuto ere pambuhova
1CO 6:8 avo pere mane rate ungote tapa sapura ue namei ta degi ke sokova na ereva.
1CO 6:9 Eto ungo ke emo mahu ingari eto kiarira amo ari sasapura embomeni na God ta usasa ta horeto hotari mane humbasora amo embo ga sesena sasapura ari te tiha pahia neite neite ari embomeni te god ingeni na ove eto humotepain ari embomeni te
1CO 6:10 pegene embomeni te donda humbasi ujeje peni vahai be embomeni te jai indito pipi-konene embomeni te embo nei ta javo ari sapura ari embomeni te ke sokova ijie donda humbari embomeni te eto ari aingeko embomeni amina God ta usasa ta mane be mane horeto hotari humbasora.
1CO 6:11 Eto ari aingeko amo ungona ere uaeheva te Bada Iesu Keriso ta javo ta God ta Ahihi Otohu na egenu embo jajavotoho eto Otohu ere ova.
1CO 6:12 Eto ungona, “Dago ari tapa neite neite aisora amo God na haekaera,” ke ainge ereveija amo ke be rate ari neite neite aisova te nei nei amita he ta nei do javotoho mane puvuresuja. Eto ke be amo na ari tapa avo aisona te nau hamo na na tihi jigesuja avo na uje aera.
1CO 6:13 Eto indari amo hini avoembo ikarira te iji puvuresuja iji te amo donda heriso amo God na au iraesuja. Eto ungotenau hamo amo tiha paiha ara ikae rate Bada ta toho aja ikena amo ungotenau jo aita iresi uje ere ua.
1CO 6:14 Eto God na Bada Iesu jiginu vasiri te erena ainge dombo ungotena amita sovera na jigou vasiri te erasora.
1CO 6:15 Eto hamo ungotenau amo Iesu ta hamo vahaira te ungo kiae ue ere ovete? Eto Iesu ta hamo avo embo na tiha evohu ga kaju aisuja amo tehorete? Teho manera,
1CO 6:16 te embo amuna tiha evohu ga kaju aisuja amo amite tapa vahai aisuja amita ke amo einge kajari mihia, “Eto enana heriso rate visi vahai aisora,”
1CO 6:17 te embo amuna Bada ga kaju aisuja amo amiga ahihi vahai aisuja.
1CO 6:18 Avoeto sesena sasapura te tiha te avo kito joru toto pambuvujo. Eto ari sasapura neite neite amo embo ta hamo araha ta rate nei sesena sasapura te tiha te amo hamo te visi te na eoi sapura eagora.
1CO 6:19 Eto God na no degi ta Ahihi Otohu hande ikena amo no hamo jota iraguja amo amita bande otohura te ungo kiae rete? Eto ungota hamo amo ungota toho mane
1CO 6:20 rate God na ombuto umbuna avoeto God ta toho avoeto ungota hamona God otohu evujo.
1CO 7:1 Eto ungona ahari ta kaeto eto ingari ke eheva amita ke be amo erevira, eto embo na evohu jimbae iresuja amo javotoho
1CO 7:2 rate enda ta tiha paiha isapamane be mihia avoeto embo vahai na evohu jimbasuja eto evohu na embo jimbasuja amo javotoho be ra.
1CO 7:3 Eto ivuna amita hamo ae ta degi ikasuja eto ae na amita hamo ivu ta degi ikasuja
1CO 7:4 eto ae na amita hamo avo amita toho ke ijie mane orasuja eto ivu na hamo amita avo amita ke ijie mane orasuja te ae ta degi ikasuja
1CO 7:5 eto pari asi uje eto amo ungo heriso jo vahai eto iji isapa ajirekasora amo javotohora te Satan na ungota jo suruha kito engekasuja avoeto ungo egerembeto jo vahai evujo.
1CO 7:6 Eto ke emo ungona ava ae rate ainge aehevete avoeto erena.
1CO 7:7 Eto embo tapa na ari nanena eagona ainge ara uje ereona te embo nei nei na amo God ta degi hande oenga ara humbagora.
1CO 7:8 Eto singa te kakara te jijimbukae amite evohu dodoru amita degi ke erevi erena eto na aingeko jimbae iresora amo tehora
1CO 7:9 eto jimbari ta uje peni vahai eto kito jimbasora amo tehora eto ke amita be amo jimbari ta hotembari amo jo ta kuru kuru eto avuei avo eto mane toasora te jimbasora.
1CO 7:10 Eto jimbuto mihera amita ke asona amo ke nau mane rate Bada ta ke avo asona ingivujo. Eto evohu na ivu mane toasuja
1CO 7:11 te toasuja amo embo eha mane jimbasuja te javotoho be amo ehako egerembeto ivu ga jo vahai eto peka humbuto iresuja. Eto nei amo ivu na ae mane toau pambasuja.
1CO 7:12 Eto ke nei amo Bada ta ke mane rate ke nau avo asona ingivujo. Eto ungota namei ekalesia embo vahai amita ae amo God humota ae rate ivuga iresi uje aisuja amo ivuna mane toau pambasuja.
1CO 7:13 Eto ainge dombo ekalesia evohu vahai amita ivu amo God humota ae rate aega iresi uje aisuja amo ae mane toau pambasuja
1CO 7:14 te ae na God humota ere ua avoeto God na ae te ivu te tapa otohu ke aisuja eto ivuna God humota ere ua avoeto ae amo God humota ae rate God na ivu pere mane rate ivu te ae te tapa otohu ere ua. Eto ari ainge ae amo ungota meniundi amo tongopa te mane irae ahera, te enana te tapa otohu ra.
1CO 7:15 Eto embo evohu God kiae amina ivu rete ae na God humota eagora avoeto toto pambasi uje aisuja amo God ta ke pepeni amina enana pundurae avoeto toto pambasora amita be amo embomeni na jo ta osa ue peka ta irora God na jage eto umbuna.
1CO 7:16 Eto ivuna ae orekaute, ae na ivu orekaute avo sausau mane toasova te God ta uje avo be kivujo.
1CO 7:17 Eto Bada na ungota irari ta hajire avo hande eto humbuto irova ikena avo humbuto ambo ambo ue irivujo, eto ke erena emo ekalesia tapa ta degi hande eagona
1CO 7:18 eto God na jage eto umbuna iji te embomeni hamo kakamba ari embomeni amina mane ojikasora te teho iresora eto embo hamo kakamba ae hamo amo mane hamo kakamba aisora
1CO 7:19 amita be amo hamo kakamba ari amo tehorate God ta ke pepeni agi aisora avo peni bera
1CO 7:20 eto ungo God na jage eto umbuna iji te amo ungota ari aita irivujo.
1CO 7:21 Eto umo embo nei ta pure embo kito mane osaga humbasoa te no tihi jigari na aravora au ingito araha ta pambujo
1CO 7:22 eto embo ta pure ari embo amo Bada na jage au puvuresuja amo Bada ta tihi ta pundurari embo mane aisuja, eto embo nei ta tihi jigari embo amo embo ta tihi ta embo dombo rate Bada na jage au puvuto Bada ta pure ari embo aisuja
1CO 7:23 eto ungo tapa amo Bada na ombuto umbuna avoeto ungo embo nei ta toho ke avojo.
1CO 7:24 Eto nau namei kamei, ungotena God na jage eto humbari iji te amo ari amo do aingere aita iresora.
1CO 7:25 Eto kakara na do asora amo Bada na na ae ingae rate Bada ta jo ari na na hondate eaguja avo nau hotembari avo ano ingesova.
1CO 7:26 Eto iji ungotenau te emo iji ngahia be puvija avoeto ungo jimbae iresova amo tehora
1CO 7:27 te umo mahu jimbari kito amo mane toasoa eto jimbae amo mane jimbasi jombure asoa.
1CO 7:28 Rate ungo kivujo, ungo singa rete kakara rete ungo jimbasova amita sapura do irae rate jimbuto mihie osaga neite neite kesova avoeto erena.
1CO 7:29 Eto nau namei kamei, na ke erena amo osaga kiari iji ngahia be puvuto ere hua avoeto ungo akate rate sove sove eto irivujo.
1CO 7:30 Eto ungo si ereva avo toto osaga ambu sira eto irivujo. Eto ungo tunga javotoho te miheva avo tunga osaga iji avo hotembihe irivujo. Eto ungo donda ombuto humbari embopo avo donda ambu embo jindeto irivujo.
1CO 7:31 Eto ungo enda embomeni ga pure ereova avo enana ta ari avo kito hamo avojo. Eto ke erena amo enda ta ari irae ere ua avoeto erena.
1CO 7:32 Eto ungo hotembari neite neite hotembagova uje ae ere ona. Eto embo akate ae amo Bada ta uje avo pere ere ua
1CO 7:33 te embo ae te amo enda ta ari ae ta uje te Bada ta uje te avo ere ua.
1CO 7:34 Amo hotembari heriso avo pere ere ua. Eto kakara amo hamo te ahihi te tapa na Bada ta pure avo pere ere ua te evohu ivu te amo enda ta ari daingeto au ivu tunga javotoho aisuja avo pere eaguja.
1CO 7:35 Eto ke erena emo ungota degi bouka ikasi ue ke ae rate ari javotoho puvuroja erena, amo ari neite neite na ungo mane peika tika eaguja Bada ta uje pere avo ue ihari kambari irova erena.
1CO 7:36 Eto ke nei amo singa ta kerari kakara iji koso mihima hamo te visi te amita uje amo jimbari uje aisuja amo jimbasuja amo ari sapura iraera
1CO 7:37 te singa amita hamo ta ujeje toari inono kito amo hotembeto toto mane jimbasuja te teho iresuja ari ainge amo javotoho be ere ua.
1CO 7:38 Avoeto ke erena emo jimbasuja amo javotoho eto jimbae teho iresuja amo javotoho bera.
1CO 7:39 Eto ivu vasirite irirou amita ae amo ke peni na pundurari avoeto ivu mane toasuja te ivu pehau embo eha jimbasi uje aisuja amo tehorate embo God kiae embo amiga mane jimbasuja te embo God humota ari embo amiga jimbasuja
1CO 7:40 te hotembari nau amo God ta Ahihi Otohu na eoi ingagona amo evohu amina jimbae teho doru eto iresuja amo tunga javotoho te iresuja.
1CO 8:1 Eto god sokova amita degi indari ikagora amo ungotenanena indorote mane indoro amita ke amo aisona te ungo ke erevi kivujo, eto embo ta degi kiari te osa arite iresuja amo javotoho rate osa ari irae kiari pere amo ‘Na, na,’ aisuja.
1CO 8:2 Eto embo amina, “Na kiari embo ra,” ainge aisuja te ari tapa amo kiaera,
1CO 8:3 eto God osa aisuja embo amo God na ere kogua.
1CO 8:4 Ke avo hotembihe indari god sokova amita degi ikagora amo indorote mane indoro avo ano ingivujo, eto embo na god ingeni na ove eto god ke eagora amo be ambura te God vahai avo mihia
1CO 8:5 eto enda tapa embomeni enda ta god sokova javo neite neite avo ‘Bada’ ke ijie jakeka eagora, rate god aingeko uhuta eto enda ta iraehera
1CO 8:6 amo God vahai donda tapa amita Mamo avo ungotenane ke be ahera, eto donda tapa amita degi puvuna amo amita degi iragora. Eto ungotenau Bada Iesu Keriso vahai avo mihia eto donda tapa amo amita degi puvuna avoeto ungotena amita degi vasiri humbagora.
1CO 8:7 Eto ke erena emo embo neite neite na kiaera te enana na God sokova avo mahu hamo ari avoeto ekalesia ta horari mihera amina indari god sokova amita hande ikari avo indie enana ta jo ta jopapa ue joru eagora.
1CO 8:8 Eto indari amina au mane God ta degi huresora, avoeto indari avo indesora eto toasora amo sapura rete javotoho amo mane puvuresuja.
1CO 8:9 Eto ungo God ta ke erevi humbuto sovera ari embopo indari sio indie mihirovo ungo ke be ingito kogo ae avoeto sovera irae embopo amina kito jopapa te tapa indie sapura ta veasora avo ungo be kivujo.
1CO 8:10 Eto ke erena emo ungo Keriso ta ke ingari embopo avoeto indari sio indagova avoeto ungota embo vahai na god sokova ta bande ta horeto namei kamei ga indari indirou embo eha jo suruha embo amo ari no avo kito “Namote tapa indesona,” ainge eto indesuja amo sapura ta veasuja amo ari no amina au veasuja avoeto be kivujo.
1CO 8:11 Eto Keriso na umote no namei te tapa humbau amita toho aja pehena
1CO 8:12 rate no kiari amina ehe no namei sapura ere ua amo no namei pere mane rate Keriso ta degi ari sapura ere oa.
1CO 8:13 Avoeto nau namei na kito sapura ta veaguja amina do ajirekari avo mane indesona te ajireketo mihima sari aisona.
1CO 9:1 Na embo amuna peikaera. Na Keriso ta apostel ra eto na tihi nau na ungotenau Bada Iesu kia, eto na Bada ta pure eagona amita be amo ungona ere ova.
1CO 9:2 Eto embo nei na na kiagora amo apostel mane ke eagora te ungo miheva amo nau pure ta hajire ere kogova avoeto ungona na ere kogova amo apostel be ra.
1CO 9:3 Avoeto na pehumba ere ora embopo ta degi ke mine erena amo ungo avo kiagora erena.
1CO 9:4 Eto na Bada ta pure ue indari mane indesona ke ainge ererete?
1CO 9:5 Eto Bada ta eambopo te Peter te enana ta airi humbuto pahue pure ere ora amo dago na ari ainge amo mane ara ke ererete?
1CO 9:6 Eto Barnabas te namote tapa apostel be eto pure eagora te dagota ingeni vasiri eto pure ta mine umbarote?
1CO 9:7 Eto ke erena amo erevira, enda ta isoro embo ta koro pure nei irae rate gavana na ikeoi humbagora. Eto pure kovari embo na amita pure ta be avo humbaguja eto o ‘cow’ simba ari embona ‘cow’ ta emi mu avo indaguja.
1CO 9:8 Eto ke erena amo embo ta ke mane rate God ta ke pepeni kajari aita mihia amita ke avo erena
1CO 9:9 amo Moses na einge kajari mihia, “Eto o ‘cow’ na ‘wheat’ ve haito jasihirou amo ‘cow’ ta pe mane tigesova te tovujo indie pure ai.” Eto ke be amo God na o ‘cow’ rete embo re avo hotembihe enu?
1CO 9:10 Ke amo ungotena pure embopo avoembo ena, amo pure enda kovari embo te ve jukari embo te na enana ta pure amo indari pure amo eagora.
1CO 9:11 Eto ainge dombo dagona ahihi ta pure ue ungota degi donda ve urarako eagora te dagota pure ta mine ombari asari amo mane umbarote?
1CO 9:12 Eto embo nei nei na ungota degi pure ue mine ere humbuhora amo ungo ke nei do ae rate dago pure mahu ihikari embopo amo mine umbarote mane umbaro? Rate Keriso ta duru javotoho avo deina mane haekasuja avoeto mine humbari ta ke avo hotembeto ae toto beuje te tapa mihahera.
1CO 9:13 Eto temple ta pure ari embopo na temple jo ai ta pure ue indari humbuto indagora eto indari humbuto pene gaga ta iketo kaheketo humbuto indagora amo ungo kiagovete?
1CO 9:14 Eto God ta ke hande ari embopo na pure aita ue donda umbara Bada na ke ena.
1CO 9:15 Eto namote tapa nau pure ta mine umbaehena avo toto mihovona amo ungota jo haperekau avo mane erena te embona nau degi ta donda nei do ikae asora amo na tunga javotoho te mihima peheto mine God ta degi umbasona.
1CO 9:16 Eto na God ta pure eagona amo uje nau na ae rate God ta uje avo enu pure ereovona avoeto, “Na, na,” mane aisona. Eto Bada na nau degi ta hajire ikaguja avoeto na pure mane toasona.
1CO 9:17 Eto na uje nau na pure erevi ahena amo mine umbaehena te nanena pure erevi ana ena
1CO 9:18 avoeto nau pure ta mine amo deire avo ano ingesova, amo erevira. Eto na Keriso ta duru javotoho ungota degi hande eagona amo na mine mane umbagona te ungona hande mine vahai umbava eagona avoeto tunga javotoho ari nau degi ta puvaguja.
1CO 9:19 Eto na embo amuta pure ari embo mane rate ke hande ururono ingihe ambo ambo ara embo tapa ta pure embo eagona.
1CO 9:20 Eto Judea embomeni na ke ingihe ambo ambo ara namote tapa Judea embo eto mihena te na enana ta ke pepeni na pundurae rate enana pundurari embomeni na ke be ingora namote tapa pundurari iragona.
1CO 9:21 Eto enda nei embomeni Moses ta ke pepeni kiae embopo amina Keriso ta duru javotoho ingihe ambo ambo ara namote tapa Moses ta ke pepeni ingae na enana ga irarako eagona, eto God ta ke pepeni amo na ingae na irarako mane eagona eto Keriso ta ke agi ue iragona.
1CO 9:22 Eto God humota ue sovera umbae embomeni amiga na mihie sovera umbae uena amo embo nei uhoho na sovera umbara uena, eto embo ta ari tapa neite neite ngangahia tapa avo humbuto nei do hotembae enana ga mihie God ta ke hande uena.
1CO 9:23 Eto ari ainge eagona amita be amo embomeni na kito Keriso ta duru javotoho avo humbuhuro nanena ari jajavotoho neite neite humbasi eagona.
1CO 9:24 Eto embo isapamane huhevasora te embo vahai amina dembeto siro kope humbasuja ainge dombo ungote tapa siro kope humbasi hotembeto inono ta huhevevujo
1CO 9:25 eto embo na sesena asi ue teho mane pambagora te kihi huheveto sovera humbuto ngahia eoi hamo eto sesena be ta pambagora. Eto enda ta siro kope sapura aisuja avo humbasi ue huhevagora te ungotena daroho irari ta siro kope avo humbasi ue pure eagora
1CO 9:26 eto nanena teho ahe kihira ue ae rate siro kope humbasi ue pure ngahia be na eagona.
1CO 9:27 Eto na embo nei ta ke hande ari embo rate huhevari ta simba ari embo ungotenau Bada na na kito sovera inono ae avoeto toaute mane toau avoeto hamota sovera ari humbasi huhevari ngahia be na eagona.
1CO 10:1 Eto Israel embomeni ta ohihi na Moses ambo ambo ue degi ojagatambuta pahuo johi na ahurekenu pambuto eva ta puvuo eva eveketo kahetika eto degi enu pambua.
1CO 10:2 Eto enana ainge ea amo Moses ta ambotani ara johi te eva te na bapataito ena.
1CO 10:3 Eto enana amo uhu i ta indari te umo te avo indie ere pambuhahera.
1CO 10:4 Eto enana pahuo uhu ita koro peni amina ambo ambo ue pahunu koro aita umo puvuto vovunu kito india, eto koro peni amo Keriso ra.
1CO 10:5 Eto enana ari avo kito kiaesira uo God na kito tumo eto enana ta hamo avo teto enda ojagatambuta ihajara ena
1CO 10:6 eto enana ari sasapura ta ere pambuhahera avoeto ari ainge amo ena avoeto ungotenane na ari avo kito mane ara ena.
1CO 10:7 Eto god sokova ingeni na eto jakeka ere ijiahera ainge dombo ungona avojo, ke amo einge kajari mihia, “Enana arumbeto indari indito ereto god sokova avo jakeka ijie ja ere tivihahera,”
1CO 10:8 eto tiha paiha ue sesena sasapura avojo. Eto enana ainge uo God na embo tapa 23,000 ainge tenu pepehekea.
1CO 10:9 Eto ungona Bada God mane undupa aisova te enanana God ta degi undupa eo God na o koso o ikenu veto embo kakambukenu pepehekea.
1CO 10:10 Eto nei amo ungo evivi javivi avojo enana na evivi javivi uo God na embo tari Anera ikenu veto embo tenu pepehekea.
1CO 10:11 Eto ari ainge enana ta degi puvuna amo ungotena iji tutumota irari embomeni na kito ari aingeko mane ara kakajekea.
1CO 10:12 Embo amuna, “Na mane veasona te heteto iresona,” ainge aisuja te embo amina veona umo oenga simba aisuja. Avoeto ungo kogue irivujo.
1CO 10:13 Eto ari sapura ta engekari do puvuresuja amo nei mane rate embo tapa na kiagora vahai aravora te God na umo mane jeneambuaisuja te no sovera kito heka eto mane au sapura ta gamo na no sovera dembasuja rate God na sapura toto pambari degi siriketo au kesoa.
1CO 10:14 Aravorate nau namei kamei, god sokova tapa avo be pe te tovujo.
1CO 10:15 Eto ungo kiari embopo hotembari embopo amo na ere kogona te ke erevi erena ungo oenga be hotembeto kivujo
1CO 10:16 eto javotoho ari ta aguhu humbuto God ta degi peketo indagora amo ungotena Iesu Keriso ta orosa amina vahai eagora, eto ‘Bread’ humbuto periketo indagora amo Keriso ta hamo avo indie vahai eagora.
1CO 10:17 Eto ungotena embo isapamane rate ‘Bread’ vahai avo indie ungotena hamo vahai eagora.
1CO 10:18 Eto enana Israel embomeni ta ari avo be kivujo. Eto enana na pene gaga ta indari iketo ehako humbuto indie pene gaga ta God amiga vahai ere ora.
1CO 10:19 Eto ke erena amo ingeni na ove eto god ke eagora amite eto indari god sokova amita degi ikagora amite tapa amo ke be manera
1CO 10:20 te God kiae embomeni na indari amita degi ikagora amo God be amita degi hande ikae rate ahihi sasapura amita degi ikagora avoeto na ungo ahihi sasapura amiga vahaita eagova ere haekihena.
1CO 10:21 Amo ungona Bada ta aguhu ta indie ehako ahihi sasapura ta aguhu ta mane indesova eto Bada ta pene gaga ta indie ehako ahihi sasapura ta gaga ta mane indesova.
1CO 10:22 Eto ungo na Bada ta sovera avo dembari ke ijie Bada undupa ereova ke ijie amo Bada ta aguhu ta indiue Satan ta aguhu ta indiue ainge ere ova amo undupa ta ari ra.
1CO 10:23 Eto embo na ke einge eagora amo, “Na ke pepeni na pundurae avoeto ari tapa asona amo tehora” eto ke ainge amo ke be rate ari nei nei amita degi amo ari javotoho mane puvuresuja.
1CO 10:24 Eto embo amina amita ari avo pere mane hotembasuja te namei ta ari amite tapa hotembasuja.
1CO 10:25 Eto ari nei amo einge evujo, ungo ‘Market’ ta o humbasi pambuto kito amo mane eto ingari ke asova te teho umbuvujo amita be amo god sokova ta hande mahu ikari re te ungo segigi aisova.
1CO 10:26 Eto enda te enda ta donda tapa amo ungotenanena jigama ara Bada na ikena.
1CO 10:27 Eto embo nei God kiae na amita bande ta indova oru au pambuto amo ke nei do mane hotembasova te teho indivujo
1CO 10:28 eto embo nei na kito segigi ue, “O amo mahu god sokova ta hande ikari ra,” ainge au ingito amo harikasuja embo amita jo avo orekihie mane indesova.
1CO 10:29 Eto ungona indesova amo ungota jo ta osaga mane kesova te embo amita jo avo orekihie mane indesova
1CO 10:30 rate ungona ke einge hotembihevete ova “Na ke pepeni na pundurae embo rate doeto na embo nei ta jo kito orekihie mane indono? Eto na indari heva nau ta humbuto God peketo indagonate do avoembo embo na na pehumba aro?” ke ainge avo toto
1CO 10:31 indie gagihe embo nei na ungo kogue God osa ue jakeka ara evujo
1CO 10:32 eto Judea embo rete Greek emborete God ta ekalesia embo vahai amina ari no avo kito sapura ta veasuja avoeto ungona simba evujo.
1CO 10:33 Eto na ari nau amo meni isapa sira eto ururono embo nei na ari nau avo kito God ke be ijiroro God na kito oreketo umbaja eagona.
1CO 11:1 Eto Keriso amo nau ahe kihira avoeto ambo ambo eagona ainge dombo na ungota ahe kihira avoeto na ambo ambo evujo.
1CO 11:2 Eto na ungo ahe poekihone kogueva avo inono ta ambo ambo eagova avoeto na ungo osa ere ona te
1CO 11:3 na ke erevi amo ungo be ingova uje ere ona amo Keriso amo embo ta siro avoeto amita kihi humbari embo ra. Eto evohu ta siro amo embo, eto Keriso ta siro amo God.
1CO 11:4 Eto embo na God ta degi pari asi rete God ta ke hande asi ue amo siro pohuketo aisuja amo amita siro embo Keriso avo Otohu ae ue aisuja.
1CO 11:5 Eto evohu na pari asi rete God ta ke hande asi ue amo siro pohukae teho aisuja amo amita siro embo avo otohu ae ue aisuja amo siro ohiketo pomaki eoi arako ereua
1CO 11:6 eto evohu na siro pohukari uje ae au kito amo evujo siro ohikau pomaki ai. Eto evohu amo ari ainge eto me kiari uje ae au kito amo ejo amita siro avo pohukai.
1CO 11:7 Eto embo amo God ta kiari vahai eto God ta sago kiari vahai aravora avoeto embo ta siro amo mane pohukasuja te evohu amo embota tombu vahai eto sago kiari vahai aravora.
1CO 11:8 Eto ke be amo God na embo evohu ta tembure na ae rate evohu avo embo ta tembure na ena.
1CO 11:9 Eto God na embo amo evohu avoembo ae rate evohu amo embo avoembo ena.
1CO 11:10 Avoeto ke erena amo embo amo evohu ta tihi jigari embo avoeto God ta Anera na ari avo kiagora evohu na siro pohukasuja.
1CO 11:11 Eto Bada ta tihi ta embo oenga evohu oenga ara God na ikae rate embote evohu te hondate mine ara, ara God na ikena,
1CO 11:12 eto evohu amo embota jota puvuna te evohu ta jota embo puvagora. Eto embote evohu te amo God ta degi ta eto puvagora.
1CO 11:13 Eto ungo oenga siriketo kivujo, evohu na siro pohukari irae God ta degi pari aisuja amo tehorete?
1CO 11:14 Eto ungotena ere kogora amo God na evohu ta siro hu koso ikena amo evohu ta siro pohukaja ikena avoeto ungotenanena evohu ta siro koso vahai avo kogue osa eagora te embo ta siro hu koso vahai kiagora amo me eaguja, avoeto ungo be hotembevujo.
1CO 11:16 Eto ungo embomeni nei nei na ke erevi eheketo kito uje ae asova te dago te eto God ta ekalesia te na dagota ari erevi amo uje eagora.
1CO 11:17 Eto ke nei ano ingivujo, ungota ari nei vahai avo na kogue osa mane asona.
1CO 11:18 Eto ungo ekalesia ta horukari ta amo ari javotoho mane puvaguja eto na ijiore ingagona amo ungo ekalesia ta horukari ta amo kaheketo oenga ira ue boru jumbagova ke avo ehere ingena amo na ere hotembihena amo ke be ra.
1CO 11:19 Eto ungota embo nei uhoho amo degi javotoho ta pahora amo God na kito osa ere ua amo ungo embo ere kahekiheva amina kiagova ere ora.
1CO 11:20 Eto ke erena amo Bada ta Pondo horukari ta amo embo nei na indari egimbeto humbuto indaguja eto embo nei amo indari indae beuje na pehaguja eto embo nei amo umo indito tihivi eaguja ari ainge amo Bada ta Pondo manera
1CO 11:22 eto ungo beuje ururou indari te umo te indesova ungota bande amo iraerete? Eto ungona God ta ekalesia amo otohu manera ainge ijie donda ambu embopo na kiagora ari amo ere ovete? Eto ungota ari avo nanena kito jakeka ana ere ovete? Na ainge mane aisona te
1CO 11:23 na Bada ta degi humbuto ungota degi ahe poekihena ke amo erevira. Embo Judas na Bada Iesu isoro embo na umbara harikena amita mume amina
1CO 11:24 Bada Iesu na ‘Bread’ humbuto God peketo ingeketo ambotani ta ikihe ke einge ena, “Hamo nau erevi humbuto indavu, amo ungoembo ere ikihena, ungo erevi ue na hotembu hotembu evujo,” ainge enu indio irae enu
1CO 11:25 Iesu na aguhu humbuto enana ta degi ikihe ke einge ena, “Aguhu emo ke ikari eha ta orosa erevi humbuto indie na hotembu hotembu evujo,” ke ainge amo Bada na ena
1CO 11:26 avoeto eha oroho eto pambuto Bada ehako puvuresuja iji amita jota amo ‘Bread’ te aguhu te avo indie ungona Bada ta pehari avo hotembu hotembu ue ke be ereva.
1CO 11:27 Eto embo amuna amita jo sirikae rate Bada ta ‘Bread’ te aguhu te sio indesuja amo Bada ta hamo te orosa te amita degi urumbarako ere ua.
1CO 11:28 Eto embo amuna ‘Bread’ te aguhu te avo indesi ue amo amita jo avo siriketo indesuja te
1CO 11:29 embo amuna Bada ta hamo te orosa te avo hotembae ue sio humbuto indesuja amo God ta pehumba embo amita hamo ta puvuresuja.
1CO 11:30 Avoeto ungota degi embo ta ambure neite neite eto sovera ambu embopo eto embo nei pepehekagora.
1CO 11:31 Eto ungotenau ari sirikaehera amo God ta hana kiari ungotenanena mane kiaehera.
1CO 11:32 Eto Bada na ungotenau ari sapura ta hajire osaga iji isapa ikeoi kiagora amo enda embomeni na hana kiari peni vahai kesora avoeto tiumbeto pambara hana kiari isapa ikeoi kiagora.
1CO 11:33 Avoeto nau namei kamei ungo Bada ta pondo indesi vahaita eto ungo oenga ohare mamare evujo.
1CO 11:34 Eto God na pehumba aisuja avo hotembeto embo amuna beuje ururou kito amo amita bande ta indesuja. Eto ke nei nei amo na ungota degi pambuto ano ingesova.
1CO 12:1 Eto nau namei kamei, eto hande neite neite Ahihi Otohu na ikaguja amita ke be avo ungo na be kiagova uje ere ona.
1CO 12:2 Eto ungo God kiae irari iji te amo ungona god sokova ingeni na ove ari avo ke be ijie amita ambota ere pambuhaheva
1CO 12:3 avoeto ungo kogova amo embo amuna Iesu ta javo urumbasuja amo God ta Ahihi ta ke ingae embora eto embo na, “Iesu amo Bada God,” ke teho mane aisuja te God ta Ahihi Otohu na ijirou ingihe aisuja.
1CO 12:4 Eto God ta Ahihi Otohu amo vahai amina sovera ari neite neite hande ikerekeuja
1CO 12:5 eto Bada ta ke agi ue pure neite neite eagora te Bada amo vahai
1CO 12:6 rate God vahai amina embomeni ta jo ta pure uoi hajire oenga oenga kiagora.
1CO 12:7 Eto Ahihi Otohu na embo vahai vahai amita jota pure eaguja amo embo vahai vahai avoembo ae rate embo tapa avoembo eaguja
1CO 12:8 amita ari amo erevira, Ahihi Otohu na embo vahai ta sovera ari ikeoi humbuto God ta ke harikeoi kiagora eto embo nei amita degi sovera ari ikeoi embomeni ahe poekaguja
1CO 12:9 eto embo nei amita sovera ari ikeoi God humota eaguja eto embo nei ta sovera ari ikeoi humbuto embo kojaguja
1CO 12:10 eto embo nei ta sovera ari ikeoi humbuto ari tikambari neite neite uoi embomeni na kogue kore eagora eto nei amo oje kahaguja eto nei amina sovera ari ikeoi humbuto ahihi berete sokova re amo harikeoi embomeni na kiagora eto embo nei amo enda nei embomeni ta ke na ke hande eoi ingiora eto embo nei na enda nei embomeni ta ke ingito jandireketo hande eoi ingiora.
1CO 12:11 Eto sovera ari tapa erena erevi amo Ahihi Otohu vahai amina siriketo embo vahai vahai amita degi amita uje na hande ikaguja.
1CO 12:12 Eto ungotena embo ta hamo amo hatu singi neite neite amina ari rate hamo amo vahaira. Eto ainge dombo ungotena embo isapamane amo Keriso ta hamo vahai amo erevira.
1CO 12:13 Ungotena Judea rete enda nei rete ke agi ari embo rete ke ikari embo rete tapa amo Ahihi vahai amina bapataito ehei Keriso ta jo ta horeto Ahihi Otohu vahai humbuto hamo vahai ere ora.
1CO 12:14 Eto hamo ta hatu singi vahai avo peni ke mane aisora amo erevira
1CO 12:15 eto utu na ke einge mane eaguja, “Na ingeni mane avoeto na hamo ta hatu singi manera,” eto ke ainge ijie hamo toto oenga mane pambasuja
1CO 12:16 eto oje na, “Na tihi mane avoeto na hamo ta hatu singi manera,” ainge aisuja te oenga irari inono aera.
1CO 12:17 Eto no hamo amo tihi vahai iresuja amina daingeto asavi ingo? Eto no hamo amo oje vahai iresuja avoeto daingeto donda ta mune, mune hembao?
1CO 12:18 Eto hamo ta hatu singi amo God na enana ta degi ta ikerekena avoeto pure ungota avo eaguja.
1CO 12:19 Eto ingeni isapamane na hamo aehija amo embo ta hamo be mane aehija
1CO 12:20 te hamo vahai amo hatu singi hajire neite neite amina hamo vahai ari
1CO 12:21 avoeto tihi na ingeni ta degi, “Na inono avoeto umo toto pambu,” ke ainge mane aisuja eto siro na utu ta degi, “Na inono avoeto umo toto pambu,” ke ainge mane aisuja
1CO 12:22 eto nei amo hamo ta donda ivo ambupu amina hamo ta pure peni be eaguja
1CO 12:23 eto hamo ta me kiari donda amo otohu ke ijie bo na ahurekagora eto ari ainge amina donda nei aingeko mane avoeto simba javotoho eagora. Eto God na hamo ta hatu singi vahaita siriketo iketo hatu singi nei nei pepeni mane avo simba javotoho ara ena.
1CO 12:25 Eto hamo ta hatu singi na jujune ke mane aisora te tapa inono inono ke ijie hondate mine ara ue iresora.
1CO 12:26 Eto donda vahai amina memenga kesuja amo hatu singi tapa amiga memenga kesora eto donda vahai avo osa ue peni ke ijiroro amo donda nei nei amina kito osa aisora.
1CO 12:27 Eto ungo amo Keriso ta hamo eto ungo embo vahai vahai amo hamo ta hatu singi neite neite aingeko
1CO 12:28 amina ekalesia ta pure neite neite ere ovova. Kihi amo God na apostero siriketo umbuna eto amita engihita amo peroveta ikena eto amita engihita amo ahe poekari embopo umbuna eto nei amo ari tikambari ta ari neite neite aisora amita pure ikena eto nei amo embo kojara pure ikena eto nei amo embo hondate ari ta pure ikena eto nei amo embo tihi jigora pure ikena eto nei amita degi ke neite neite amita kiari ikena.
1CO 12:29 Avoeto embo tapa amo apostero mane, peroveta mane, eto ahe poekari embopo manera. Eto enana tapa na ari tikambari rete o kore ari ta ari neite neite mane eagora
1CO 12:30 ambure embo mane kojagora enda nei ta ke na ke mane eagora eto ke mane jandirekagora.
1CO 12:31 Rate Ahihi Otohu ta sovera ari dombo be avo humbasi uje jo tapa na ikihe evujo. Eto ari vahai dombo be erevi ano ingivujo.
1CO 13:1 Eto na ke ake embo be eto enda ta ke neite neite amite Anera ta ke te na ke hande ue embomeni osa ae ehena amo ajani teagora eto ji kevi ta teagora eto asavi pere eaguja aingeko ahena.
1CO 13:2 Eto na oje kahari ta sovera Ahihi Otohu ta degi umbaehena amo ke araha arahata eto ma ta ojikari te tapa embota degi oje kahaehena eto God humota peni vahai ue tiri ta degi ke amo degi nei ta kikiseto pambaehija te nau degita embo osa ari irae amo ari tapa ainge amo be ambu huti pere ahena.
1CO 13:3 Eto nau donda tapa humbuto vahai vahai donda ambu embo ta degi hande ikihe nau hamo te tapa ji ta ikano evekaja ikaehena te nau degita osa ari embota degi ae amo nau degita ari javotoho nei do mane puvuraehija.
1CO 13:4 Eto osa ari embo be amita ari amo eingera, iji koso embo simba eaguja, embo kito jo eaguja, embo nei ta donda kogue tumo mane eaguja, “Na, na,” ijie sarika mane eaguja, viso toro mane eaguja.
1CO 13:5 Namei otohu ae ke sapura mane eaguja, umo oenga mane hotembaguja, tumo sisire sausau mane eaguja, embo nei ta ari sasapura mane hotembaguja,
1CO 13:6 embo nei ta ari sapura kito tunga javotoho mane eaguja te ari javotoho be mo davore kito osa eaguja.
1CO 13:7 Eto osa ari embo na embo orekihe humota ue ari javotoho ambota puvuresuja ke ainge ijie mane toaguja te ngahia eto iraguja.
1CO 13:8 Eto osa ari amo eho mane irae aisuja te daroho iresuja. Eto embo ta oje kahari ke amo mihia rate irae aisi ere ua, eto ke neite neite kiari amo irae aisi ere ua, eto embo ta kiari isapamane amite tapa irae aisi ere ua.
1CO 13:9 Amita be amo ungotenau kiari te oje kahari te Ahihi Otohu ta degi humbagora te amo aemana umbae rate ambota
1CO 13:10 iji be avo inono ta puvuresuja kito amo ungotenane ke avo aemana kesora amo eingera.
1CO 13:11 Eto na meni isapa irari ijite nau ke te tunga te hotembari te amo meni isapa ta ari avo uena te na pajito embo ehena amo meni isapa ta ari amo mahu egikarira
1CO 13:12 eto ambota do puvuresuja amo umo jo ta aririvo kiarako ere ora te ambota iji be puvuresuja amo ungote tombu mine kia aisora. Eto na eha emo ke aemana kiae ra te ambota iji be puvuresuja amo God na nau jo ta do tapa ere kogua ainge dombo kiari nau amo inono au tapa aemana kiae ra te ambota iji be puvuresuja amo God na nau jo ta do tapa ere kogua ainge dombo kiari nau amo inono au tapa aemana kesona.
1CO 13:13 Eto ari tapa nei heriso nei vahai amo eho mane irae aisora te iresora, amo humota ari te ambota ari javotoho do puvuroja simba ari te osa ari te amo eho mane irae aisora. Eto donda nei heriso nei vahai rate dombo be amo osa arira.
1CO 14:1 Eto donda tapa amita hamo ta amo embo osa ari avo aisi uje ue Ahihi Otohu ta sovera ari neite neite hande ikaguja avo humbasi uje evujo. Eto dombo be amo sovera ari humbuto God ta ke na embomeni oje kahasi uje evujo.
1CO 14:2 Eto ivivi ta ke hajire Ahihi Otohu na embo ta degi hande ikaguja avo embo na humbuto ke aisuja te ke ainge amo embo ta degi ae rate God ta degi aisuja, amita be amo embo amuna ingae rate God na vahai ingaguja. Eto ke ainge amo Ahihi Otohu ta sovera na ahihi ta ke ojikari avo eagora.
1CO 14:3 Rate embo na God ta ke na embo oje kahasuja amo embo na arahata ingito sovera ari humbuto tunga javotoho ue iresuja.
1CO 14:4 Eto embo na Ahihi Otohu ta hondate ari na ivivi nei na ke eaguja amo umo oenga sovera ari humbaguja, eto oje kahasuja embo amina ekalesia tapa ta degi sovera ari ikaguja.
1CO 14:5 Eto ungo tapa ivivi ta ke hajire nei Ahihi Otohu ta degi umbava uje ere ona te dombo be amo embo oje kahevujo. Eto ivivi nei na asoa amo isapa rate oje kahari ke asoa amo peni be avoeto ke ai ta amo ekalesia na sovera humbari haitera. Eto ivivi nei na ke aisuja embo amina ke avo jandireketo au embomeni ingito sovera ari humbasora.
1CO 14:6 Eto nau namei kamei ungo ke erevi be hotembevujo. Eto na Ahihi Otohu ta degi ivivi ta ke nei humbari embo avoeto ungota degi pambuto kiari eha ae ingae eto ahe poekae eto oje kahae avoeto ivivi ta ke nei na asona amo ungo ke be mane ingesova avoeto ungota degi ari javotoho mane puvuresuja.
1CO 14:7 Amo erevira, eto embo na isepuri kambuhe tunga neite neite eagora te tunga vahai kambasora amo ingari sapurara.
1CO 14:8 Eto embona huin javotoho husae aisuja amo embona ingito isoro arote toaro avoeto mana mana aisora.
1CO 14:9 Eto ainge dombo ungota ke embo tapa na ingari haiteko mane avo aisova amo pisara ainge embo ta ku ta pambasuja.
1CO 14:10 Eto enda embomeni ta ke neite neite mihia amo enana tapa amita ke amo be ambu iraera
1CO 14:11 eto na enda nei amita ke ingae aisona amita be amo na enda nei amo enda nei avoeto
1CO 14:12 eto aingeko amo ungo na ere ovova avoeto ungo Ahihi Otohu ta degi sovera ari hande eto humbasi eto kito ari deina ekalesia embomeni tapa hondate aisuja avo uje eto umbuvujo.
1CO 14:13 Eto ari erena avoembo ivivi nei na ke aisuja embo amina ke avo jandireketo au ingora kiari humbasi pari aisuja.
1CO 14:14 Eto na pari ijie ivivi ta ke hajire nei na eagona amo nau ahihi na pari eaguja te hotembari nau amo be ambu eto iraguja.
1CO 14:15 Avoeto na do ano? Javotoho amo na ahihi na pari ue hotembari te tapa na pari aisona. Eto haveni aisona amo Ahihi na pere ae rate hotembari te tapa na aisona.
1CO 14:16 Eto nei amo ungo Ahihi na God jakeka ijirovo embo nei ungota ari kiae embo amina puvuto ungota osa ari avo ingito ari avo mahu kiae avoeto ke be mane aisuja.
1CO 14:17 Eto ke be amo ungo na God osa ue ereva te embo nei na ingito javotoho mane kesuja.
1CO 14:18 Eto Ahihi Otohu na nau degi ta ivivi ta ke hande ikena amo ungo na aheva aingeko mane, kaiketo jigama eagona avoeto God osa ere ona te
1CO 14:19 na ekalesia embomeni ta degi ke ivivi nei na ke isapamane aisona amo enana na mane ingito kogo aisora te ke heriso avo ke be na pere aisona amo ingari javotoho puvuresuja.
1CO 14:20 Eto nau namei kamei, ungo meni isasaraho ta hotembari avo avojo te ari jajavotoho na embo ta ari evujo. Rate meni isasaraho ta ari nei javotoho eagora ainge avo humbaeheva amo enana na ari sasapura isapamane kiagora.
1CO 14:21 Eto God ta ke mahu kajari aita amo einge mihia, “Eto na enda nei embomeni ta ke avo ivivi hajire nei na nau enda embomeni emita degi ke hande aisona amo ingito ingarako aisora, ke ainge Bada God na eria,” ke ainge kajari mihia.
1CO 14:22 Avoeto ungo kogova amo ivivi hajire ingari nei amo God na God ke be ari embopo avoembo ikae rate God ke be ae embopo avo be kiagora ikena te oje kahari ke be amo God ke be ari embopo na sovera ari umbara ikena
1CO 14:23 avoeto ari avo kiae embopo eto God ke be ae embopo amina ungo vahaita horukagova degi ai ta horeto ungo tapa ivivi hajire neite neite na ke ijirovo ingito ungo kava ue ereva ke ainge aisuja
1CO 14:24 te ungona ke be na oje kahihe mihirovo amo embo amina ungota ke ingihe ari amita amo do aingekore avo eto God ta embomeni ta ke ingito
1CO 14:25 amita hotembari jo ta ojikari avo be ingito me kogue veto gombuto God jakeka ijie God amo ungota degi mihia ke ainge aisuja.
1CO 14:26 Avoeto nau namei kamei, ungote ke tutumota mo do aro? Eto ungo vahaita horuketo amo ke deina embo tapa hondate eto avo ingoro avo ungo ke siriketo nununga evujo eto haveni rete ahe poekari ke rete oje kahari ke God na ikari humbari rete ivivi nei na ke hande eto ehako jandireketo ari ingari amite avo tapa nununga evujo.
1CO 14:27 Eto embo isapamane na ivivi ta ke amo mane aisora te embo heriso nei vahai amina ereto eue arumbihiroro ke jandirekari embo na ereto aro ingesora.
1CO 14:28 Eto ke amita jandirekari embo irae kito amo embo tapa ta degi ke amo mane aisuja te God ta degi aisuja.
1CO 14:29 Eto oje kahasora embopo tapa nei heriso rete nei heriso nei vahai ainge amina ke hande eue arumbihiroro embomeni na ingito kogo ara erena.
1CO 14:30 Eto ke hande ururou embo vahai amo arumbeto mihie ke ingihirou God ta degi hotembari amita degi puvurou ingihirou embo heteto ke eria avo toto arumbau embo amina ereto ke au ingesora.
1CO 14:31 Amita be amo oje kahari embopo tapa rate embo vahai vahai na ke hande ururoro embo tapa na ke eha avo ingihe sovera ari humbasora.
1CO 14:32 Eto oje kahari embo na ke sio mane eaguja te ahihi amita avo simba ue ke eaguja
1CO 14:33 eto God amo ke sio sao ijie o a ari ta God mane rate peka ta eto ari inono ta ari amita God ra. Eto God ta ekalesia embo ototohu amita horukari aita
1CO 14:34 amo evohu na ke mane aisora te jamopo eto iresora. Eto evohu ta ke ari aravora ae avoeto God ta ke kajari ta amo enana na do ara kajari mihia avo ara erena
1CO 14:35 eto enana ta eto ingari ke puvurou kito amo ungota bande ai ta ipone na ke be amo harikaro kesora. Eto erena amo ekalesia horuketo mihiroro evohu na ereto ke aisora amo aravora ae ra.
1CO 14:36 Eto God ta ke amo ungo Corinth embomeni ta degi ta eto puvurari ke mane hotembasova eto nei God ta ke amo ungo oenga umbae
1CO 14:37 avoeto embo amuna na God ta hande humbari embo avoeto oje kahari embora ainge aisuja embo amina ke ere kajihena amo God na ungo ambo ambo ava ikihoi ere kajihena avo eto kesuja
1CO 14:38 avoeto ke erevi ke be ae aisuja embo ta ke avo ingovojo.
1CO 14:39 Avoeto nau namei kamei, sovera ari God ta degi hande eto humbuto embo oje kahasi uje evujo rate embomeni na ivivi ta ke hajire nei Ahihi Otohu ta degi hande eto humbagora avo mane haekasova te
1CO 14:40 ari tapa amo inono ta evujo.
1CO 15:1 Eto nau namei kamei, na duru javotoho ungota degi hande uena avo ungona hotembava ere kajihena, avo ungo na humbuto jigito miheva
1CO 15:2 eto duru javotoho ungota degi hande uena avo ungona ke be ijie mihirovo amina ungo orekasuja te ke avo ungona ke be ae aisova amo amina ungo mane orekasuja.
1CO 15:3 Eto na ungota degi ke hande uena amita jota ke peni amo ungotenau ari sasapura avoembo Keriso pehena amo God ta ke kajari avo enu inono ena
1CO 15:4 eto pehenu koveo iji heriso nei vahai irae enu God na jiginu vasiri te erena amo God ta ke kajari amiga inono ena
1CO 15:5 eto vasiri te ereto Peter ta degi kihi puvunu kina eto ambota amo apostel tapa ta degi puvunu kia
1CO 15:6 eto amita ambota amo ekalesia tapa 500 amita degi puvunu kia rate embomeni amo eha oroho emo mihera te nei uhoho amo pepehekehera.
1CO 15:7 Eto amita ambota amo James ta degi puvunu kina eto ambota amo apostel tapa na ehako kia
1CO 15:8 eto ambo be ta amo nau degi ta puvunu kia, amo nau aja na na iji nei te ingarako ena avo na ere kogona
1CO 15:9 avoeto apostel tapa amita ambo be ta amo namora avoeto na embo peni manera. Eto na God ta ekalesia ta degi osaga memenga ere ikihahena avoeto eha emo na apostel ere ona te me kogue mihena.
1CO 15:10 Rate na God ta hondate ari na pure erevi ere ona amo na ere kogona eto God ta hondate ari nau degita ikaguja amita be isapamane puvuto ere hua te apostel isapamane avo nane dembeto pure peni vahai ere ona rate amo sovera nau na ae rate God ta hondate ari na ere ona.
1CO 15:11 Eto dombo be amo namorete apostel nei nei rete amina God ta duru javotoho ungota degi hande ehere ingito ke be ereva.
1CO 15:12 Eto dagona Keriso avo pehari ta eto erehija amita ke avo hande eragora te do eto ungo nei uhoho na embo pehari amo mane vasiri te ehako ere ora ke ereve?
1CO 15:13 Eto embo pehari vasiri te mane ereora avo ke be kito Keriso te tapa vasiri te mane eraehija
1CO 15:14 eto Keriso na vasiri te erae toaehija kito ke tapa hande ere ora erevi amo ke be mane eto ari do humota eagora amo tapa be ambu aehija.
1CO 15:15 Eto God na embo pehari mane jigou eraehija amo dagona Keriso vasiri te erari ke hande ue God ta ke avo sokova na ahera.
1CO 15:16 Eto erena emo ungo kogova amo embo pehari vasiri te erae ahera kito Keriso ta tapa vasiri te mane eraehija.
1CO 15:17 Eto Keriso vasiri te mane eraehija amo ungota humota tapa eagova aita hondate mane humbaeheva eto ainge dombo ungota sasapura ga tapa iraeheva.
1CO 15:18 Eto ainge dombo embo mamahu Keriso ta javota pepehekea amo pepeheketo pambuo irae ena.
1CO 15:19 Eto ungotenanena Keriso pere humota ere umakara peheto irae asora kito enda embomeni tapa ta tihita ungotena amo mu indoro aemo ta veasuja embomeni ra.
1CO 15:20 Aravorate ke be amo Keriso jiginu vasiri te erena amo ungotena vasiri te erasora avo amina kihi ahe kihira ena.
1CO 15:21 Eto embo vahai amita degi ta eto pehari avo embo tapa ta degi puvuna eto embo nei amita degi puvuna eto embo nei amita degi ta eto vasiri te erari avo embo tapa ta degi puvuto iraguja.
1CO 15:22 Amo Adam avo pehari ta puvuna te Keriso na ena avoembo embomeni vasiri te erasora.
1CO 15:23 Amo iji hekeri ta erasora, kihi amo Keriso na erena amita ambota amo Keriso puvuresuja eto ungotena Keriso ta jeka hoka amina iji amikote eresora.
1CO 15:24 Eto amita ambota iji ke kahari puvurou Keriso na enda ta tihi jigirikari embo pepeni te sovera neite neite tapa avo tau vovurou jeka hoka tapa amita avo humbuto God Mamo ta ingeni ta ikau humbuto amina tapa tihi jigesuja
1CO 15:25 rate Keriso amo embo dombo ue amita kitoho tapa tau karaun eto veto amita utu singi ta iresora
1CO 15:26 eto amita tutumo be ta amo pehari te tapa tau irae aisora.
1CO 15:27 Amita ke kajari amo, “Amina donda tapa amita utu hu ta ikau iriroro tihi jigesuja,” ke ainge avo kajari mihia te God vahai avo mane utu huta iresuja te
1CO 15:28 God na donda tapa humbuto Keriso ta hu ta ikau iriroro Keriso na uje amita na God ta huta irirou God vahai amina tapa be tapa amita hamota heteto irirou donda tapa amo amita jota iresuja.
1CO 15:29 Eto nei amo eto embomeni mahu pepehekari na vasiri te mane erasora kito do embo enana na hondate eto enana ta javota bapataito amo eagore?
1CO 15:30 Eto dago vasiri te erae asora kito do embo Keriso ambo ambo ue hamo ta memesi kamesi kaiketo kiore?
1CO 15:31 Eto ungo nau ekalesia vahai embomeni na na kiagova amo ungotenau Bada Iesu Keriso ta pure eagona amo pehari nau amo hombekari be iraguja.
1CO 15:32 Eto na embo nei nei ainge da Ephesus eita mihie isoro o ga isoro ere uaehena te na peheto vasiri te erae asona kito amita he ta ari javotoho nei do mane huresuja te na evito peheto vasiri te ehako erae ahena kito eha emo pondo kando ue indie gagihe ere uma pehaetena.
1CO 15:33 Rate ungo ke aravo be hotembavojo. Eto ungo umoro kamoro sasapura ta aisova kito amina ungo tihi teto humbau sasapura ta veasova.
1CO 15:34 Avoeto ungota siro avo embo ta siro ainge jigama ue ari sasapura tovujo. Eto emore ungo me kiagova erena ungo nei uhoho amo God be kiae eagova.
1CO 15:35 Eto embo nei na einge aisora, “Daingeto embo pehari na vasiri te eraro? Eto hamo do ihe na egerembeto puvuroro?”
1CO 15:36 eto ungo kiae kiae ue ke emo eagovete? Eto ve kovasoa amo iji vahai amina mane erau kesoa te kihi peheto ambota erasuja.
1CO 15:37 Eto ve kovagora vahai avo mane kahumbagora te ‘Rice’ retemo ve nei amina eketo pajioi kahumbagora.
1CO 15:38 Eto ve amita hamo ta hajire do aingere amo God na uje amita na hajire ikaguja eto ve oenga oenga amita hamo oenga oenga ra.
1CO 15:39 Eto o visi amo hajire oenga oengara embo ta visi oenga o ta visi oenga eto di visi umo o visi te tapa amo hajire oenga oengara.
1CO 15:40 Eto nei amo hamo nei uhu ita mihera eto hamo nei enda ta mihera, eto hamo uhu ita iraguja amita sago kiari nei, eto enda ta hamo amo sago kiari nei ra.
1CO 15:41 Eto iji ta sago kiari nei hariga ta sago kiari nei eto kuro amo nei ra. Eto kuro kuro nei nei amita sago kiari amo oenga oenga ra.
1CO 15:42 Eto ke erena amo ungotena peheto vasiri te erasora amo aingeko dombo aisuja amo ungotenau hamo amo kovaro sari au hamo eha sari ari haite mane amina vasirite erasuja.
1CO 15:43 Eto hamo kovagora amo kimu masa aisuja te eha erasuja amo sago kiari donda ra. Eto kovagora amo ivo irae rate hamo sovera te amo erasuja. Eto kovagora amo enda donda rate vasiri te erasuja amo uhu i ta donda aisuja.
1CO 15:44 Eto enda ta hamo mihia avoeto amita aririvo amo uhu ta hamo amite tapa mihia
1CO 15:45 eto amita ke amo einge kajari mihia, “Eto embo kihi javo Adam amo vasiri te mihahija,” ke ainge mihia te Adam nei puvuna amo Keriso ra eto amo uhu ta vasiri eha humbuto puvuto ahihi ta vasiri ikari embora
1CO 15:46 rate uhu ta irari ahihi amo kihi mane rate enda ta irari amo kihi eto uhu ta irari amo ambotara.
1CO 15:47 Eto embo kihi puvuna amo enda embo rate ambota puvuna amo uhu i ta eto puvuna.
1CO 15:48 Eto enda ta iragora embomeni amo embo kihi Adam ta hajire vahai rate uhu i ta iresora embomeni amo uhu embo Keriso amita kiari hajire vahai aravora.
1CO 15:49 Eto ungote embo enda na ari amita tombu hajire vahai ue mihovora te ungote uhu i ta eto puvuna Embo amita kiari vahai ainge eto iresora.
1CO 15:50 Eto nau namei kamei, na ke erena amo ungotenau hamo visi te orosa te amina God ta tihi jigari degi uhu ita horari haite mane ra amo sari ari donda avoeto daroho irari degi ta mane iresuja.
1CO 15:51 Avoeto na ke vahai oroho te mane ojikari avo ano ingivujo amo ungotena tapa mane pehasora te ungotena tapa saiveto sariketo hamo eha humbasora.
1CO 15:52 Amo iji ke kahari puvurou huin savari husihirou ungotenau sari ari hamo amo sariketo hamo nei daroho irari ta hamo aisuja, eto embomeni peheto mihera tapa amina vasiri te ereto daroho iresora.
1CO 15:53 Eto erena amo ungotenau hamo ta sari ari donda avo hoharo irae au daroho irari donda avo asukasora amo ehako mane pehasuja.
1CO 15:54 Eto ungotenau peheto sari ari hamo amo irae au daroho irari hamo avo irirou God ta ke einge kajari amita be puvurou kesora amo, “Embo ta pehari amita degi isoro eto dembehei irae ehija.
1CO 15:55 Avoeto pehari ta ivo ari amo davore? Amo embo ehako tari inono aera,” ke ainge kajari mihia.
1CO 15:56 Eto ari sasapura amina eoi embomeni ta ahihi pehagora amo God ta ke pepeni Moses ta degi ikena aita ivo ari humbuto embo ta ahihi teoi pepehekagora.
1CO 15:57 Eto ungotenau Bada Iesu Keriso peheto vasiri te erihe pehari ta degi isoro eto dembena avoeto God na Iesu ta ari amina ungotena pehari toto dembari embomeni ere ora avoeto ungote God osa ue jakeka are.
1CO 15:58 Avoeto nau namei kamei, Bada ta pure erevi mane toasova te tuneketo heteto turieto pure erevi ue irivujo. Eto ungo kogova amo Bada ta pure aisova amo be ambu mane aisuja te ari javotoho ungota degi puvuresuja.
1CO 16:1 Eto ungota koro siriketo humbuto God ta embomeni ta degi hande ikasova amita ke aisona. Eto enda Galatia ta ekalesia na do ara ijiena ainge dombo ungona evujo, amo
1CO 16:2 ungo ekalesia vahai vahai na ungo koro doinge hande ikari haite avo giu ari iji hekeri ta kaheketo oenga ikavo irirou na pambuto avo umbasona te iji amikote avo ungona mane sirikihirovo iresona.
1CO 16:3 Eto na ungota degi pambuto ungota embopo nei uhoho amo ungona siriketo humbasova amita embo amunure avo ahari ta harikasi kaeto ikihe koro ikano humbuto da Jerusalem ta pambuto ekalesia ai ta mihera amita degi hande ikasora.
1CO 16:4 Eto amo javotoho eto na pambasona kito namoga da Jerusalem ta pambasora.
1CO 16:5 Eto na enda Macedonia ta pure mane aisona te pesina ungota degi pambuto
1CO 16:6 ungota degi iji isapa porere mihie umoro aisora amo aita jajemo iji anote aisona amo na ungo toto degi dainge pambasona amo ungona embere avo pambasi uje ere ona.
1CO 16:7 Eto ungo kogova amo Bada na uje aisuja kito na ungota degi iji tuhaupa mane rate iji isapa porereko mihie umoro aisi uje ere ona,
1CO 16:8 te na da Ephesus ta mihimakara Pentecost iji puvuresuja.
1CO 16:9 Amo God na pe hirikehei ai ta pure aisona te aita amo kitoho embopo isapamane mihera te aravora, sove sove eto pure aisona.
1CO 16:10 Eto embo Timothy na ungota degi puvurou kito amina mane joru neite neite aisuja avo kito kogo evujo, amina na ere ona ainge dombo Bada ta pure ere ua.
1CO 16:11 Avoeto embomeni na amita degi hini kambari eagora simba evujo. Eto amita pure au irae au ikevu tunga javotoho te tapa nau degi ta egerembai. Eto namote namei kamei nei uhoho te tapa na Timothy ei puvuroja simba ue mihera.
1CO 16:12 Eto ungotenau namei Apollos ungota degi namei kamei nei uhoho ga pambaja penunu ijiena te amina eha mane pambasi ke ngahia na ijija te iji nei javotoho puvurou pambasuja.
1CO 16:13 Eto ungo God humota ue ahe ivote heteto turieto sinderite irivujo.
1CO 16:14 Eto ari tapa osa ari na evujo.
1CO 16:15 Eto ungo ari nei ava uje ere ona amo embo Stephanas te amita jeka hoka kivujo, amina enda Achaia aita kihi Iesu ambo ambo ea eto amina God ta embomeni ototohu kaiketo hondate ere ovora
1CO 16:16 avoeto ungona enana te embomeni nei aingeko amite avo hondate ava uje ere ona amo enana te enana ta pure hondate ari embomeni te tapa amita ke ambo ambo ava erena.
1CO 16:17 Eto embo Stephanas te Fortunatas te Achaicus na aingeto ei ta puvera avoeto tunga javotoho be ere ona amo ungota hondate amo enana na ereora avoeto tunga javotoho ereona.
1CO 16:18 Eto na osaga koguena te enanana osaga nau ehere irae ehei osaga ungota te tapa irae ehija avoeto embo aingeko amo osa vesa aheva.
1CO 16:19 Eto ekalesia tapa enda Asia ta mihera amina ungo ere pekihera, eto embo Aquila te amita ae Prisca te ekalesia amita bande ta horukagora amite tapa na jo tapa na Bada ta javota ungo ere pekihera.
1CO 16:20 Eto namei kamei ei mihera amina ungo ere pekihera. Eto ungo ari otohu na mune tavo mine ara ue pekari mine ara evujo.
1CO 16:21 Eto na Paul nanena ungo pekihe ingeni nau na javo nau ere kajihena-PAUL.
1CO 16:22 Eto embo vahai na Bada osa ae aisuja kito ohimbevu pe te pambai. MARANATHA Bada puvujo!
1CO 16:23 Eto Bada Iesu Keriso ta hondate ari ungota degi iroi.
1CO 16:24 Eto ungotena Iesu Keriso ta toho avoeto na ungo osa ere ona, Amen.
2CO 1:1 Na Paul Iesu Keriso ta apostel ana God na siriketo umbuna, amite ungotenau namei Timothy na ungo God ta ekalesia da Corinth embomeni te eto ungo enda Achaia embomeni ototohu tapa amita degi ahari erevi ere kajihera.
2CO 1:2 Eto ungotenau Mama God te eto Bada Iesu Keriso te amita hondate ari te peka te ungota degi iresuja.
2CO 1:3 Eto ungotenau jo ari ta Mamo God amita degi ta eto hondate ari tapa puvaguja avoeto ungotenau Bada Iesu Keriso ta Mamo God avo osa be ue jakeka erera.
2CO 1:4 Eto amina ungotenau osaga tapa avo kogue hondate uoi mine ungotenane hondate ari God ta degi humbagora avo jigama ue embo nei ta osaga neite neite avo kito hondate eagora
2CO 1:5 eto amita ke be amo Keriso na osaga peni vahai kina ainge dombo ungotenanena koguore Keriso na ungotenau tunga jamo ari mine avo ikeoi humbagora
2CO 1:6 eto dagona osagate memengate embota ingeni ta kogue mihera amo God na ungota ari sasapura avo oreketo humbuto tunga jamo ari ta ikaguja amita ke ungota degi hande ere ora avoeto kogue mihera. Eto dagona tunga osaga kiari ijite tunga jamo ari ere humbuhora avo ungona tunga jamo ari ere humbuhava avoeto ungotena tapa na tunga osaga humbari haite aisora.
2CO 1:7 Eto ungona osaga te memenga te kogue miheva avoeto dagote tapa God ta degi kekota ari ere humbuhava avo dago na ere kogora avoeto ungotena tapa do humota ue mihera avo humbasora.
2CO 1:8 Eto dagota namei kamei, ungo be kiagova uje ere ora amo eto dago enda Asia ta mihie bouka peni vahai umbua amo dago oenga humbari haite mane rate embo na tea amo pehari ahumpa ea
2CO 1:9 amo dagota sari ari ta duru avo humbuto arako ere ua ehera avoeto aita kehera amo sovera dagota avo humota mane aisora te God ambure embo jigeoi vasiri te eraguja embo vahai avo humota ere uahera.
2CO 1:10 Eto ari sapura be avo kia te God na ari avo kito dago oreketo umbuna avoeto dago ke be erera amo amina mahainge orekasuja
2CO 1:11 ari ainge avoembo jo vahai eto dago embo pari evujo. Eto ungona pari ijirovo God na dago orekihirou ungo embo isapamane na dago kito osa aisova.
2CO 1:12 Eto ke erevi ke be pere avoeto tunga javotoho ue ungota degi erera amo enda embo tapa ta degi ari tapa do eagora amo ke sokova na ae rate ke be ari te ke otohu ari te God ta degi puvaguja amina eagora, amo enda embo ta kiari sokova na ae rate God na hondate uoi eagora.
2CO 1:13 Eto dagota ahari kajari aita amo ke ojikari irae rate ke araha ta pere ungona eheketo kiari haite avo pere kajagora. Avoeto na uje ere ona amo
2CO 1:14 ungona dago be kogue hamo ere uma Iesu ta puvurari iji puvurou ungotenane javo mine kaha ue amita tihi ta hetasora.
2CO 1:15 Eto ungona dago hamo ueva avo ke be hotembihe hae heriso ungota degi pambasi uje uena amo
2CO 1:16 enda Macedonia ta pambasi pambuto ungota da aita heteto umoro eto pambuto egerembeto Judea ta pambasi ue ungoga umoro ehako asi aita hetasi uje uena.
2CO 1:17 Eto na ainge aisi hotembihena te tohena avo ungona na jo heriso ue ari ke eagovete? Eto enda embona aisona ke aisuja te ambota amo mane aisuja ke ainge avo dago na ari ke erevete?
2CO 1:18 Eto dago God ta ke be na ungota degi erera amo dagona hotembari heriso, jo heriso na ungota degi ke ae rate
2CO 1:19 God ta Meni Iesu Keriso amita ke avo namote Silas te Timothy te na ungota degi hande uera aita ke nei mane hambasova te ke vahai amina heteto mahainge iresuja.
2CO 1:20 Eto God na ke isapamane embo ta degi oje ereua amita ke be tapa amo Iesu ta degi hambasora avoeto amita ke avo ke be ijie embota degi hande uore jakeka ari te pekari te God ta degi puvaguja.
2CO 1:21 Eto eha emo God na oi ungotena tapa Iesu Keriso ta jo ta heteto mihera. Eto amina amita Ahihi Otohu ungotenau jo ta overekena
2CO 1:22 amo ungotena Iesu Keriso ta toho amita hajire embo na kiagora overekena avo ungotena kogue ambota do puvurou kesora avo ke be erera.
2CO 1:23 Eto na ungota da Corinth ta pambae tohena amita be avo ano ingivujo, amo ungona nau ke ngahia avo eagone ingito ungona osaga kiagova avo hotembeto pambae tohena avo God ta tihi ta erena.
2CO 1:24 Eto ungota God humota ari avo dagona tihi jigesi ae rate ungo God humota ue heteto miheva avoeto ungo daingeto tunga javotoho ue iresova avo ungote namote tapa na jombure ereora.
2CO 2:1 Avoeto ke erena amo ungo osaga kiagora na ungota degi pambae
2CO 2:2 amita be amo nanena ano ungo osaga kogurovo amo embo nei amuna au na tunga javotoho ano? Na tunga javotoho ari embo nei irae.
2CO 2:3 Eto na ungota degi ke ngahia na kajihena amita be amo na ungota degi pambae kihi ta ungona ke avo tambu au teho mihirovo pambuto ungota tunga javotoho ari avo kiaehena. Eto na kogona amo na tunga javotoho ururono ungote tapa tunga javotoho aisova.
2CO 2:4 Eto na ungota degi ke ngahia kajihena amo tunga osaga te tihi sisivu te tapa kajihena te amo ungo osaga kiagova na kajae rate ungo osa peni vahai eagona avo ungona be kiagova kajihena.
2CO 2:5 Eto embo vahai na enu osaga kogueva amo nau degi ta ae kiae rate amita ke na enu ungo osaga isapa kogue mihovova.
2CO 2:6 Eto amita ari sapura ta hajire amo ungo embomeni isapamane na eheve ere kogua amo inonora
2CO 2:7 avoeto amita ari avo hotembeto toto embo ehako humbuto osa ururoro amo osaga isapamane kogue mane veto pambasuja.
2CO 2:9 Eto na ungota degi ke kajihena amo ungo na ke tapa inono ta agi avote avo be kesi kajihena.
2CO 2:10 Eto ungona embo ta ari sapura hotembeto toasova amo namote tapa hotembeto toasona. Eto ari sapura mihirou hotembeto toasona amo ungo avoembo Keriso ta tihi ta hotembeto toasona.
2CO 2:11 Amo Satan ta sovera na mane dembasuja avoeto eagona, eto amita uje deire amo ungotena tapa kiarira.
2CO 2:12 Eto na da Troas ta pambuto mihio Bada na degi enu kito Keriso ta duru javotoho avo embomeni ta degi hande ue
2CO 2:13 nau namei Titus da aita hambae ue nau jota osa ari puvurae enu embomeni peketo toto Macedonia ta pambuhena.
2CO 2:14 Rate degi dainge dainge pambasora amo God na eoi Keriso ta ari sasapura dembari embopo ue amiga kajueto pahue amita ke javotoho embo tapa ta hande eagora, amo ji vuji javotoho na mune javotoho hande eaguja aingeko eagora.
2CO 2:15 Eto ungotena Keriso ta embomeni amo God ta degi jeune mune te aingeko eto God na oreketo humbasuja eto oreketo umbae toasuja embomeni enana amo mahu munehembagora.
2CO 2:16 Eto Keriso ta ke oreketo umbae embomeni ta degi amo visi sari kimu masa te aingekora te oreketo humbasuja embomeni ta degi amo jeune mune te aingeko aita amo vasiri be hambuto iresora. Eto Keriso ta pure dombo be emo embo amuna ari haitere?
2CO 2:17 Eto ke be amo embo nei nei na God ta ke embota degi koro na ombuto humbagora te dagona amo ainge aera te dagona Keriso ta ke hande ue God ta ke hande ari embopo ke ijie God ta tihi ta ke be na pere erera.
2CO 3:1 Eto ke ere kajihera emo ungona dago ke be ava kajari ke ijie ere hotembihevete? Eto enana ke sokova ijie ahe poekari embomeni na eagora ainge dagona popoja na kajagora ainge mane kajasora
2CO 3:2 amita be amo embomeni na ahari mane ehekasora te ungota vasiri kogue dago Keriso ta pure ari embo be avo ke be aisora.
2CO 3:3 Eto ahari be amo Keriso na ungota hotembari jo ta kajena amo ungona dagota ke avo be ijie humbuheva te ke amo ongo na kajae rate God ta Ahihi vasiri te na kajarira. Eto ke amo God ta ke 10 koro hamota kajena aingeko mane rate ungota hotembari jo vasiri te aita kajarira.
2CO 3:4 Eto dago ke erevi erera amo jo ta segigi ae rate Keriso avoembo God ta tihi ta ke be na erera
2CO 3:5 eto pure emo dago oenga ari ke mane eagora te God ta degi ke te pure ta sovera ari te puvaguja
2CO 3:6 avoeto God na enu dago God ta noma eha ta kajari amita ke hande ari embopo ereora eto God ta noma eha kajari amo ingeni na ahari ae rate Ahihi Otohu na ke ikarira. Eto ke mahu kajena aita amo embota Ahihi pehari puvuna te ke eha ikari ai ta amo Ahihi Otohu na ahihi ta vasiri ikaguja.
2CO 3:7 Eto ungo be hotembevujo. God ta ke pepeni koro hamota kaeto ikihinu Moses ta tombu usasa pajire be unu Israel embomeni na avo kiari inono ae ea te ke ikari aita embomeni na ke avo hatikea avoeto ahihi pehari hambua avoeto ke amita usasa irae ena.
2CO 3:8 Rate Ahihi Otohu ta ke eha ikari aita usasa pajire be kogora amo ke kihi ikari ainge manera.
2CO 3:9 Eto ke erena amo ahihi tari pehari amita ke ikari aita amo usasa isapa kogora te ahihi ta degi vasiri eha ikari amita ke eha puvija aita amo usasa pajire be ere kogora.
2CO 3:10 Eto usasa eha puvija amo pajire be pajire amina ke mahu Moses ta degi ikari amita usasa amo mahu peikehei irae ehija.
2CO 3:11 Eto ke kihi puvuna amo usasa ga tapa puvuna te amita usasa irae ere ua te usasa eha puvija amo daroho iresuja.
2CO 3:12 Avoeto ungotena vasiri te daroho irari embomeni na nei do joru mane aisora
2CO 3:13 te Moses tiri i ta eto vovue amo Israel embomeni na amita tombu ta usasa irae ere ua avo kiagora uje ae ue tombu ahurekena.
2CO 3:14 Eto nei amo enana ta siro ngahia unu ke ehekenu ingito ingae sira ere uahera avo embo eha oroho amo enana God ta ke Moses ta degi mahu ikari avo ehekihore ingae ere ovora te Keriso na enana ta siro hirikari inonora
2CO 3:16 amita be amo enana ta siro ngahia mane irae aisuja te jo ahereketo Bada ke be aisora iji amite amo siro ngahia ari amo irae aisuja.
2CO 3:17 Eto Bada amo Ahihi avo eto Bada ta Ahihi iresuja degi ai ta amo embo ta Ahihi ari sapura na andirari avo iraera.
2CO 3:18 Eto ungotenau tombu amo nei deina togae eto andirae avoeto siro ngahia ungotenau degi ta irae rate ungotenau tombu ta amo Bada ta usasa mihia, avoeto Bada ta Ahihi ungotenau jo ta mihie pure ururou ungotenau degi ta usasa pajihirou Bada ta tombu vahai aisora.
2CO 4:1 Eto God na amita jo ari na Keriso ta ke hande ara pure ikena avoeto jo segigi ae pure sovera eto eagora.
2CO 4:2 Eto enana ke sokova ahe poekari embomeni ainge mane dago God ta ke ojikari na hande mane eagora te God ta ke popoja na ae rate araha ta God ta tihi ta hande uore hotembari embopo na ingito ke be eagora.
2CO 4:3 Eto God ta ke amo embo tapa ta degi ojikae rate enana Ahihi pehari degi ta ere pahora amita degi amo ojikarira
2CO 4:4 amita be amo God ke be ae embomeni na Keriso amo God ta ari eto hajire vahai amita ke javotoho usasa te avo mane kiagora enda emita tihi jigari embo sapura na enana ta tihi ta kajehei kuru ehija.
2CO 4:5 Eto ke hande ere ora amo ke dagota mane rate Iesu Keriso amo ungotenau Bada eto tihi jigari embo eto dago amo Iesu avoembo ungota undurari embopo ra amita ke avo hande ere ora.
2CO 4:6 Eto iji ihikarita God na mume ta degi “Usasa e” ijinu usasa ena eto God na vahai dagota uha avo usasa amita na hirikenu kia amo God ta usasa Keriso ta tombu ta gain ena avo kia.
2CO 4:7 Eto ari javotoho be usasa te God na ikena amo ungotenau sari ari hamo ta mihia avoeto ungotena ere kogora amo usasa javotoho emo dago na ae puvurae rate God na hande ikehija.
2CO 4:8 Eto degi tapa ta kitoho mihia amina dago dembari inono ae eto osaga isapamane ere kogora te toae.
2CO 4:9 Eto embomeni na teore memenga kiagora te God na dago toto pambae eto teore enda ta veagora te dago pehae.
2CO 4:10 Eto degi dainge pambagora amo dago ta sari ari hamo na Iesu ta osaga te memenga te amina ahe kihira ere ora, amo dagota hamo avo embomeni na kogue Iesu ta vasiri avo hotembagora.
2CO 4:11 Eto ke be amo dago pehae mihie Iesu ta pure ere ora avoeto dagota pehari amo iji mahainge puvutuhoi hotembagora, eto dagota vasiri aita amo embomeni na Iesu ta vasiri kiagora.
2CO 4:12 Eto ke erena amo dago pehasi era pahora te ungona dagota pure avoembo vasiri te daroho iresova.
2CO 4:13 Eto God ta ke ta amo ke einge kajari mihia “Na ke be erena avoeto ke hande ere ona” ke ainge mihia avoeto amita ari vahai amo dago na eagora avoeto ke be ijie God ta ke amo embo ta degi hande ere ora.
2CO 4:14 Eto dago kogora amo Iesu jiginu vasiri te erena embo God na iji inono ta dago Iesu ga tapa jigou vasiri te erihiroro ungote tapa humbuto Iesu ta engihita ikau hetasora.
2CO 4:15 Eto ungo kogova amo osaga memenga ere kogora amo ungo avoembo ere kogora amo aita God ta hondate ari isapamane na embo ta degi pahurou embo isapamane na God osa ue jakeka ijiroro usasa God ta degi pambasuja.
2CO 4:16 Eto ari ainge avo dago joru ue pure mane toasora. Eto dagota hamo amo sari asi ere pahua te jo ta amo iji vahai vahai ainge God ta degi sovera mine ere humbuhora.
2CO 4:17 Eto dago enda eita mihie osaga isapa ere kogora amo usasa pajire be daroho ta kesora ainge mane isapa be ra
2CO 4:18 avoeto dago na enda ta sari ari donda tihi na kiari haite amo kon eto kiae rate tihi na kiae donda daroho iraguja avo kon eto kogue eheheto ere pahora.
2CO 5:1 Eto ungotena ere kogora amo ungotenau hamo te visi te amo iji tuho irari donda pure horoma aingeko avo irae au God na ungotenau irari bande nei embo ta ingeni na ae teho irerembari uhu i ta iraguja avo ikau humbuto daroho iresora.
2CO 5:2 Eto ungotena enda ei ta mihie amo uhu ta irari donda avo humbuto asukasi uje ue bija puri ue simba ue mihera.
2CO 5:3 Eto ungotenau hamo te visi te irae ahihi pere na mihiroro amo Keriso na hambaute avo ungotena joru ere ora
2CO 5:4 avoeto ungotena enda ta iji tuho irari hamo ga mihie avo houkari uje ae ue bija puri eagora te daingeto daroho irari donda humbuto hamo ta asukaehera avo hotembagora, amo hamo visi te amiga tapa uhu ta pambuto iresi uje ere ora.
2CO 5:5 Rate ari ainge ara God na ungotena ove ena amo daroho irari hamo ikau humbasi simba ue mihera amo God na ikasi oje ena amita hajire amo ungotenau jo ta Ahihi Otohu ikena iraguja.
2CO 5:6 Avoeto ungotena Bada ta irari degi ta irae enda ta hamo te visi te ga irari iji te Ahihi Otohu avoembo sovera ari humbuto mihie
2CO 5:7 teho tihi na kiari avo ae rate God humota ari na iragora.
2CO 5:8 Eto enda eita mihie ungotenau hamo te visi te avo toto pambuto ungotenau da be Bada ta degi pambuto iresi uje eagora te hamo ta sovera ari humbuto mihera
2CO 5:9 eto ungotena tapa na iji tutumota pambuto Bada ta tihi ta heteto mihiroro amina ungotenau ari tapa penite isapate enda ta mihie ere uahera avo siriketo hajire javotoho te sapura te ikau kesora avo eto ari avo hotembihe, ungotenau hamo iroutemo irae au amo ke peni be mane rate dombo be amo ari deina ururoro Bada na kito osa aisuja ari avo perekari eagora.
2CO 5:11 Eto Bada joru eagora avoeto embomeni na ke ingito jo haperekarote avoeto enana ta degi Keriso ta ke hande eagora. Eto dagota jo amo God na ere kogua te ungote tapa dagota jo kiagova uje ereona.
2CO 5:12 Eto ke erevi erera amo ungona dago ke be ava ke ae rate enana ungo oenga embo peni ke ijie embota jo avo hotembae ue ahe poekari sokova embomeni amita degi ke mine ava erera, amo dagota ari be avo ungona kito tunga javotoho ue ke mine enana ta degi aisova.
2CO 5:13 Eto dagota ke erevi eheketo kogue dago uha sapura ari ke ijie ere hotembiheva te God avoembo ere ora te dagota ke amo ke be ere hotembiheva amo ungoembo ere ora.
2CO 5:14 Eto Keriso ta osa ari peni vahai avo hotembihe haha puha eagora. Eto osa ari aita ere kogora amo embo vahai na embo tapa avoembo pehena te pehae toaehija amo embo tapa na pepehekaehera.
2CO 5:15 Eto amina embo tapa avoembo pehena avoeto embo na enda ta vasiri te irari iji te enana ta hamo ta ujeje neite neite avoembo mane iresora te embo enana embo peheto vasiri te erena amita uje avo asi iresora.
2CO 5:16 Avoeto iji eha eto ambota amo dago na enda ta hotembari na embo ari javotoho te sapura te avo mane sirikasora. Eto dagona Keriso enda ta mihinu amiga isa ue enda ta hotembari avo ere uahera te eha emikote ari ainge avo iraera
2CO 5:17 te embo amuna Keriso ta jo ta mihia amo ove eha ari ra te embo kihi enda ta vasiri na ari amo irae ehei ove eha ari avo pere mihia.
2CO 5:18 Eto ari amo God na eaguja amo mahu kihita ungotena amita kitoho rate Iesu Keriso ta pehari na peka humbuto peka humbari ta ke amo dagona hande ara ikena.
2CO 5:19 Eto ke erena amita be amo God na Iesu Keriso ta pure amina enda embomeni tapa ta degi peka humbuto enana ta ari sasapura avoeto kitoho ari ehako mane hotembasuja, eto duru javotoho erevi dagona hande ara ikena.
2CO 5:20 Avoeto dago Keriso ta ke hande ari embopora, amo God na pe dagota na embomeni ta degi ke eria avoeto Keriso ta javota erera amo ungo God ga peka umbuvujo.
2CO 5:21 Eto God na ari sapura irae embo Keriso ta degi embomeni ta ari sasapura tapa overekena avoeto ungotena amita jo ta mihera avoeto God na Keriso ta ari jajavotoho perekari avo ere kogua.
2CO 6:1 Eto dago God ta pure vahai embopo na ungo ari erevi ava erera amo ungo God ta hondate ari humbuheva avo be ambu ainge aja avojo
2CO 6:2 amo God na amita ke einge enu kajena “Eto na ungo kehene jo ehija iji te amo na ungota pari ingena eto ungo orekehena ijite amo na ungo hondate ehena”, ke ainge kajari mihia avoeto erena amo God na ungo jo ururou oreketo humbasuja iji amo eha oroho erevira.
2CO 6:3 Eto embo na dagota pure kito eoi sapura eaguja avo hotembihe dagota ari nei eagore embo hini kambari eagora ari avo mane eagora,
2CO 6:4 te ari tapa avo dago God ta ke agi ari embopo na ari avo embo na kiagora eagora avoeto osaga kiari iji te amo hamo ta sovera ari humbuto ngahia eto bouka humbari te,
2CO 6:5 hamo ta tari te, tipura ta gosukari te, embomeni na ereto ejembeto tari te, pure ngahia ari te, evo ae ari te, beuje te tapa amo sovera ue kiagora.
2CO 6:6 Eto embomeni na dago God ta pure ari embopo be kiagora dagota ari amo tongopa irae, hotembari javotoho ue, sausau ereto mane tumo eagora te embomeni tunga humbuto Ahihi Otohu ta ke be ari na embomeni osa eagora.
2CO 6:7 Eto God ta sovera humbuto amita ke be na ijie God ta isoro ari donda ingeni be ta eto anga ta jigito nununga ue mihera amo javotoho ari avo jigito mihera.
2CO 6:8 Eto dago nununga ue embona dagota javo otohu arote sapura aro, jakeka arote pehumba aro, dago ke be arote ke sokova aro avo tapa kesi nununga ue mihera.
2CO 6:9 Eto embomeni na dago kiari rate kiae ke ko eagora. Eto dagota hamo mahu pehari rate vasiri te mihera, eto embo na mahu tari pehari ke eagora te vasiri te mihera.
2CO 6:10 Eto dago tunga osaga ere kogorate tunga osa osa ue mihera eto dago ta degi donda irae rate embomeni isapamane na dagota degi ta donda ere humbuhora eto dagota hajae vajae irae rate dagota degi hajae vajae isapamane be mihia.
2CO 6:11 Eto da Corinth embomeni ungo ke erevi be ingova hariketo ke araha ta erera.
2CO 6:12 Eto dagona ungo jo tapa na osa ere ora te ungona jo tapa na dago osa mine ae
2CO 6:13 avoeto nau meniundi ungota hande mine inono ta ue jo tapa na osa evujo.
2CO 6:14 Eto ari jajavotoho te ari sasapura te vahaita iresuja amo sapura, eto ainge dombo usasa te mume te na vahai ta mane iresora avoeto God kiae embomeni ga kaju avojo.
2CO 6:15 Eto ungo kivujo Keriso te Satan te na tunga vahai ari inono rete? Ainge mane avoeto God ke be ari embo te God ke be ae embo te na tunga vahai ari inono aera.
2CO 6:16 Eto God ta bande Otohu aita amo God sokova ingeni na ari mane hambasora eto ungotena amo God ta bande otohura. Amita ke amo God na einge kajena “Eto embomeni nau amina nau irari bande ururoro na aita iresona, eto na enana ta God ururono enana embomeni nau aisora”.
2CO 6:17 Ke ainge ena eto Bada na ke nei einge ena “Ungo oenga iresi ue sasapura embomeni toto pambuvujo. Eto donda tapa tongopa te avo toto teho irirovo na ungo humbuto
2CO 6:18 ungota Mama ano ungo nau meniundi aisova, ke amo na Bada sovera isapamane te nanena erena”.
2CO 7:1 Avoeto nau namei kamei, God na ari erevi ungotenau degi ta asi oje ena avoeto ari tapa deina ungotenau hamo te ahihi te tongopa eaguja avo toto God Otohu ke ijie joru ue embomeni jajavotoho jo tapa na asi tunga iketo pure aisora.
2CO 7:2 Eto dago tunga humbuvujo. Dagona ungota embo vahai amita degi ari sapura ae, embo ta javo sapura ae, ke gamo na poeketo nei do umbae eto sapura ta kihi umbae.
2CO 7:3 Eto ke erena amo ujekari ungota avo ke ae rate ke mahu ijiena amo eto dago peharote teho iroro avoeto ungo osa mahainge aisora.
2CO 7:4 Eto na ungo humota ue javo ungota avo jakeka ijie ere ovona. Eto dago memenga kogue mihera te na ungo hotembihe sovera ari humbuto tunga javotoho ereona.
2CO 7:5 Eto dago enda Macedonia ta pambuto aita jangu indari avo hambae be rate hamota memenga te hini kambari te joru te tapa avo koguera.
2CO 7:6 Rate God amo ungotenau tunga javotoho ikari embo amina Titus ikenu puvunu kito osa ue tunga javotoho uera.
2CO 7:7 Eto tunga javotoho uera amo Titus puvei kehera avo pere mane rate ungota pekari te undurarite avo puvuto ehei ingito osa uera. Eto ungona tunga osaga te si te tapa ijie na hotembeto ehako kesi uje ere ova avo ehei ingito tunga javotoho be uena.
2CO 7:8 Eto ke erena amo na ahari mahu kihi ungota degi kaeto ikihane humbuheva avo humbuto eheketo osaga kogueva avoeto namote tapa osaga koguena te oroho amo osaga mane kesona te tunga javotoho ereona,
2CO 7:9 amita be amo nane one osaga kogueva avoembo tunga javotoho ae rate ungo osaga kito jo haperekehei ajato ijieva avoembo tunga javotoho ere ona, eto amo God ta uje avoeto osaga kogueva, avoeto dagota degi sapura nei do hambae ueva.
2CO 7:10 Eto erena amo God na au embona osaga kito jo haperekau oreketo humbasuja te enda ta ari sapura na au osaga kogue ere uma amita ahihi amo pehasuja.
2CO 7:11 Eto ungona osaga keheva amo God na ikena avoeto keheva te ungo be kivujo, amita tutumota amo ungona jo tapa na embo jajavotoho asi ue ungota ari avoembo ajato eto namote namei eto ehako osa ue ke avo tambu aja uje isapamane ereova avo kogue ungo pehumba ari haite ae kogona.
2CO 7:12 Avoeto ungo na ingova uje ereona amo ahari kajihena, amo ari sapura embo avoembo kajae, eto ungota degi ari sapura uija avoembo kajae rate ungona dago osa eagova avo do aingere avo ungona God ta tihi ta be kiagova kajihera.
2CO 7:13 Eto ungona dago humota ue osa isapamane ereovova avo dagona kito sovera ari umbera, amite eto ungo na ove Titus na kito tunga javotoho be eto puvuto ehei ingito dagote tapa tunga javotoho be ehera.
2CO 7:14 Eto na ungo osa kageni ue Titus ta degi ke ijiena avoeto amina ungota degi pambuto dagota ke ungo avoembo ijiera amo ke be pere avo koguija eto ainge dombo dago ke do ungota degi ta eagora amo ke be pere eagora.
2CO 7:15 Eto Titus na ungota degi pambuto ke ijinu ingito joru te tapa agi asi ueva avo koguija, avo eto amita osa ari ungota degi avo pajito peni vahai be ere ua.
2CO 7:16 Avoeto na kogona amo ungo iji tapa amo ungota hamota ra avo eto osa pajire be ere ona.
2CO 8:1 Eto nau namei kamei, God na enda Macedonia ta ekalesia ta hondate ari isapamane ikehija avo ungo ano ingova uje ereona.
2CO 8:2 Amo enana ta degi memesi peni vahai be puvuna amita mine amo osa ari peni vahai be pajina avoeto enana amo haja vaja embo mane rate hande embopo ere ora.
2CO 8:3 Avoeto God ta tihi ta erena amo enana hande ikari haite donda avo pere ikae rate nei amita hamota avo jo tapa na hande ikihara
2CO 8:4 amo enana ta uje na God ta embomeni hondate aisi dagota degi penunu kaiketo ijiera
2CO 8:5 eto amita tutumota amo enana ta hamo te tapa God ta degi ikihe amita pure asi dagota degi ikihara avo dago kito kore uera.
2CO 8:6 Eto enana ta ari avo kito ungotetapa na hondate ari ikavote avo kesi Titus ikaro pambuto ungota degi pure jua mahu ihikihaja avo au irae aisuja.
2CO 8:7 Eto na kogona amo ungota degi ari tapa inono mihia, amo God humota ari, ke hande ari, ke kiari, jo tapa na hondate ari, dagota degi osa ari te tapa amo ungota degi inono bera avoeto ungona hande erevi jo te tapa na ikava uje ere ora.
2CO 8:8 Eto ari erevi ungona ava ke ngahia na ae rate enana enda Macedonia ta hande embomeni ta ari vahai aingeko amo ungona osa arina avote avo be kesi uje ere ona.
2CO 8:9 Eto Bada Iesu ta ari avo be hotembevujo, amina uhu i ta mihie hajae vajae embo be ena te ari avo toto enda ta veto ungoembo hoivo ena, amo ungona aita donda embo ava ena.
2CO 8:10 Eto ari ainge avo ungona ava oje kahihe erena eto jua mahu ta ungona kihi hande ikasi ijieva avo ikiheva
2CO 8:11 avoeto ari avo evujo inono ai, eto ungota jota heka eto hande inono ta evujo irae ai.
2CO 8:12 Eto ungota uje doinge ikasi hotembiheva amo aravorate ungota degi doinge mihirou kito avo kaheketo hande ikihirovo God na kito aravora aisuja.
2CO 8:13 Eto ungona donda ambu embopo ta degi hande pete iketo ungo be ambu ava ke ae rate ungo mine omba eto inono inono eto irova erena.
2CO 8:14 Amita be amo erevira, eha oroho emo ungota degi donda mihia eto enana ta degi amo donda irae avoeto osaga erekogora te ambota amo ungona osaga kogurovo enanana ungo hondate aisora, eto ari ainge aisora amina ungota irari inono inono aisuja.
2CO 8:15 Ke ainge amo God ta ke ta einge kajari mihia, “Eto donda be peni vahai kahumbeto umbuna embo amina donda mamo ururae eto donda be isapa kahumbena embo amina donda ambu embo ae rate inonota donda embopo ea.”
2CO 8:16 Eto nau hotembari peni vahai amo ungota degita mihia ainge dombo Titus ta hotembari amo ungota degi ta avo kogue God ta degi osa be ere ona.
2CO 8:17 Eto dagona Titus na da Corinth ta pambaja ke ijiera te amita jo tapa avo degi ungota ta avoeto jo tapa na pambasi uje ere ua.
2CO 8:18 Eto ungota namei vahai ikaro Titus ga pambaja ikehera amo Keriso ta duru javotoho hande ari embo avoeto ekalesia tapa na kogue jakeka eagora.
2CO 8:19 Eto God ta degi usasa te jakeka te pambaja donda ambu embomeni avo jo oi koro na hondate asi uje isapamane ereora, pure avo hondate ue dagoga vahaita aja ekalesia embomeni na siriketo ikea amo embo nei mane rate namei ke ehera vahai avora.
2CO 8:20 Eto koro peni vahai be hande ere ovora avo humbuto pambuto embota hande ikasora avo embo na simba ari sapura ke eagora.
2CO 8:21 Avoeto dago daingeto Bada ta tihi ta eto embota tihita ari javotoho pere aisora avoeto ke ijie nununga ere ora.
2CO 8:22 Eto ungo humota eaguja ungotenau namei nei amita pure amo jo tapa na tunga iketo pure uoi dago ere kogovora amite tapa ikaro pambasuja.
2CO 8:23 Eto ungo kogova amo Titus amo nau pure vahai embo amina ungo avoembo ungota degi pure ere ua eto ungota namei heriso ekalesia ta javo ta pure javotoho eagora amina Keriso otohu eagora.
2CO 8:24 Avoeto dagota humota ari te ke be ari te amo ungota degi ta avo ekalesia tapa na kito ungo ke be ara embo einge erevi ungona kito osa ue pekihe umbuvujo.
2CO 9:1 Eto ungo God ta embomeni hondate asi tunga ikihe miheva amo na mahu kogona te teho ere kajihena. Eto ungota hande asi tunga ikava amita ke amo da Achaia embomeni ta degi nanena ke einge eo ingia, “Da Corinth ekalesia na jua mahu amina donda ambu embopo ta hande ikasi sirikea,” ke ainge amo nanena ungo jakeka ue ijio da Achaia embomeni na ingito hondate asi uje ea.
2CO 9:3 Avoeto ungota namei kamei ikaro ungota degi pambasora amo dagona ungota ari avo jakeka eagora avo dagota ke avo huti mane aisuja avoeto ikaro pambasora be ikevujo kiore.
2CO 9:4 Avoeto nanena ungo humota ue ke eagona avo enda Macedonia embomeni na namote pambuto ungona hande ikasova avo nununga ae amo koguroro ungote namote tapa me kesora.
2CO 9:5 Avoeto ungona hande ikasi oje ueva avo dago pambae mihiroro ungota namei kamei na pambuto ungo hondate ururoro nununga avote avo hotembihe erena. Eto hande javotoho aisova amo engekari ta hande mane rate ungota ujeta hande avoeto nununga aisova.
2CO 9:6 Eto ke erevi ungo jeneambu avojo, eto embona ve heriso urasuja amo be isapa humbasuja eto embona ve isapamane urasuja amo be isapamane humbasuja.
2CO 9:7 Eto embo vahai vahai amita jota ngahia mihirou penunu au jo te tapa ikae aisuja amo sapura ra te embota jo ta doinge ikasuja avo siriketo osa osa te tapa ikasuja amo God na kito osa aisuja.
2CO 9:8 Eto God na ungota degi javotoho ari iketo kane ari avo iraera te God na ungota degi donda rete ari tapa deire avo inono iroja simba ururou ungona pure jajavotoho nei do aisi uje aisova amo God na humbuto nei amita hamota ikasuja.
2CO 9:9 Eto God ta ke ta amo einge kajari mihia, “Eto donda ambu embopo ta degi hande embo ena avoeto amita ari javotoho avo daroho iresuja,” eto ke ainge mihia.
2CO 9:10 Eto God na ve urari embo ta degi ve ikeoi humbuto ve uraguja eto pure ta be amite tapa ikeoi humbuto indagora avoeto ungona ari jajavotoho tapa do do aisi uje aisova amo God na hondate ari ikau humbuto ururovo peni be aisuja.
2CO 9:11 Avoeto ari javotoho do kito asi uje aisova amo God na ikau humbuto hande embomeni be ari haite aisova, amo ungona hande ikavo dagona humbuto embo nei ta ikihiroro embo isapamane na God osa ue jakeka aisora.
2CO 9:12 Eto ungota hande ikasova amo God ta embomeni ta ujeje avo pere mane rate God ta degi osa kageni ari pambaguja avoeto ikasova.
2CO 9:13 Eto ungota hande ikasova aita amo ungota hande ta tunga enana ta degi eto embo tapa ta degi ere ikiheva amite eto ungo Keriso ta duru javotoho avo hamo na pere mane rate jo te tapa ambo ambo ereova amite tapa avo embona kito God jakeka aisora
2CO 9:14 eto God ta hondate ari isapamane ungota degi ikehei umbeva avo God ta embomeni na kito ungo jo tapana osa ue ungoembo pari aisora.
2CO 9:15 Eto God ta hande pajire be avo kogue kore ue God osa ere ora.
2CO 10:1 Eto na Paul ke nau avo ungota degita ere kajihena kivujo. Eto embo na ke eagora amo na ungote mihie na ke embo mane rate na ungote irae amo ke ngahia na eto ke peni be eagona ke ainge eagora te na Keriso ta jo ari eto tunga humbari na ungota degi penunu erena amo erevira.
2CO 10:2 Eto ungota embo nei uhoho amina ari nau eto ke nau amo teho enda embota ari te ke te ra ke ainge eagora avoeto na ungota degi pambuto ke ngahia be amina ke sapura avo haekasona avoeto ungo simba evujo
2CO 10:3 eto ke be amo ungotena enda ta mihie ari sasapura ta degi isoro ere orate amo enda ta isoro mane.
2CO 10:4 Eto enda ta ki emi amina isoro ae rate uhu ta ki emi sovera te amina Satan ta tihi jigari ta degi isoro ereora amo erevira
2CO 10:5 eto ke, eto ari deina au God ta kiari au sapura aisuja amita degi isoro eto embo ta hotembari tapa togeto humbuto eagore Keriso ta ke agi eagora
2CO 10:6 eto ungo jo hapereketo dagota ke agi aisova kito ungota peive ari do mihia avo kito hana kiari ikaro kogurovo irae aisuja.
2CO 10:7 Eto ke erena emo asavi avo mane ingesova te ke ta susu be avo ingihe be kivujo. Eto embo amuna dago Keriso ta tohora ke ainge aisora embo amina dagote tapa ainge dombo Keriso ta toho ke ara erena.
2CO 10:8 Eto dagona ungo taro veava Bada na ikae rate ungo jigoro ereva Bada na ikena eto na pure avo ana Bada na ikena avoeto na ke ijie me mane kesona te pure avo aisona
2CO 10:9 eto na ahari ta ke ngahia be na ere kajihena amo ungona kito joru ava kajae rate
2CO 10:10 embo nei nei na ke einge erera, “Paul na ahari ta ke ngahia na eriate ei ta iraehija amo ke ngahia eria aingeko amo mane aehija te eita puvuto gamo ke ijirou ungote mane ingesora,” ke ainge eagora te
2CO 10:11 ke ainge ari embo amina ke erevi hotembeto kioja erena. Eto ahari ta kajihone kiagova ainge dombo pambuto ungota tihi ta heteto ke ngahia be na ano ingesova.
2CO 10:12 Eto embo nei nei na ungo oenga, “Na, na” ijiroro ungona humota ava eagora avo dagona enana te dagote ari vahaira ke ainge avo mane aro ingesova te enana na God ta ari avo kogue ae rate enana ta ari avo ungo oenga heka ereora avoeto ari ainge amo sarika ue ere ora.
2CO 10:13 Eto dagona ari aingeko avo mane aisorate God na pure mahu ikari avo kogue ke aisora. Eto God ta pure ikena amo ungota degi eagora vahai avora.
2CO 10:14 Eto dagona Keriso ta duru ungota degi ikeo umbava avoeto dago ungo simba ere ora te dagota tihi jigari ta hane amo dembeto pambaera.
2CO 10:15 Eto embo nei na God ta pure eaguja avo kogue dagona ari ke mane eagora, te dagota uje amo ungona God humota ari avo pajihirou dagona kito pure neite neite ungota degi ururoro pajito
2CO 10:16 inono au dagona ungota enda hane oihota embo nei nei mihera amita degi God ta ke hande aisora, eto enda nei donda ve mahu urari aita dagona mane urasora te enda eha donda ve urae aita pambuto ve urasora.
2CO 10:17 Eto God ta ke ta einge kajari mihia, “Embo na ‘Na, na’ mane aisuja te Bada avoembo, ‘Na, na’ aisuja.”
2CO 10:18 ke amita be amo embona umo oenga, “Na, na” ijirou Bada na kito ke be ke mane aisuja te Bada na umo oenga kito ke be aisuja.
2CO 11:1 Eto siro sapura ari embo na keko ke isapa aisona amo ungo ingovote? Eto na ere kogona amo ungo ke ano ingesova, avo ere kogona.
2CO 11:2 Eto God ta hotembari vahai avo nanena hotembihe ungo amo embona pegene humbagora segigi ue mihovona. Eto ungo ekalesia amo Keriso ta kerari avoeto na kakara ta mamo aingeko eto ungo tongopa ambu teho javotoho na mihirovo nanena ungo Keriso ta degi ikasona.
2CO 11:3 Eto o koso o na evohu Eve ta degi ke sokova na enu sapura ta vena ainge dombo ungo embota hotembari sasapura na aro ungota siro sapura au amo Keriso osa ari te humota ari te avo toto pambuova simba ue mihovona.
2CO 11:4 Eto nanena kogona amo Iesu dagona humbuto puvua avo mane rate Iesu nei amite Ahihi dagona humbuto puvua avo mane rate ahihi nei amite eto duru javotoho hande uera avo mane rate duru nei humbuto hande eagora avo ungona ingihe aita porere mane pambuova.
2CO 11:5 Eto apostle sokova ungota degi puvuto ke eagora avo embo peni, na isapa ke ainge avo nanena mane aisona
2CO 11:6 eto na enana aingeko ke gamo na hande ari embo manera te nau degi ta amo God na kiari peni vahai be ikena amo ungote mihie ke hande ehene ingihava avoeto ke avo ungona ke be ari inonora.
2CO 11:7 Eto na ungota degi pambuto God ta duru javotoho hande uena amita mine na umbae ari amina ungo jigene eriheva te ainge uena amomo ari javotoho umahanete mo ari sapura umahane?
2CO 11:8 Eto na ekalesia nei nei amita koro avo pegene arako eto jigama ue ungota degi pure amo uena.
2CO 11:9 Eto na ungote mihie amo nau ujeje tapa do puvuna amo na ungota degi bouka nei do ikae rate ungota namei kamei enda Macedonia ta eto puvua amina na undua eto na ungota degi ombari asari ta eto bouka ikae mihovona ainge dombo bouka mane ikasona.
2CO 11:10 Eto Keriso ta ke be amo nau jota mihia avoeto amita hamota ke erevi erena amo enda Achaia ekalesia na ke nau erevi mane haekasora.
2CO 11:11 Eto na ungo osa ae avoeto koro umbae ari ke ijie hotembihevete? Na ungo osa ere ona amo God na ere kogua
2CO 11:12 eto ke sokova ari embopo na nau pure vahai embo ke ijie koro humbasi pure eagora avoeto na ke avo haekihe na ungota koro mane umbasona.
2CO 11:13 Eto embo aingeko amo apostle be mane rate pure sokova ue Keriso ta apostle ke ijie eagora
2CO 11:14 eto na enana ta ari avo kito jeneki honeki mane aisona te enana ta ari amo Satan na Anera usasa te ke ijie isa eaguja.
2CO 11:15 Avoeto amita pure ari embopo na amita ari vahai avo ue ari jajavotoho ta pure ari embopo ke ijie ke sokova na eagora. Avoeto enana ta pure eagora amita iji tutumota amo God na hana kiari ikau kesora.
2CO 11:16 Eto na ke ehako erena amo na siro sapura ari ke mane aisova te siro sapura ari embo ta ke ingito ingarako uore eagora aingeko simba ururovo ke nau avo ane.
2CO 11:17 Eto ke nau avo “Na, na” ijirono ingesova amo Bada na mane aehija te na siro sapura ari embona keko aisona
2CO 11:18 amo enana apostel sokova na enda embo tapa na enana ta ari amita ke eagora aingeko nanena aisona.
2CO 11:19 Eto ungona dago tupo embora eagova te siro sapura ari embomeni ta ke sau be ingagova
2CO 11:20 amo ungo tupo embo sira ove apostel sokova na puvuto ahe poekihere ungona ke agi ue kajumba ue ke tapa avo agi ue age ungota na timbuto indarako ereova.
2CO 11:21 Eto dagona ungota degi kihi pambuto ke sokova na ahe poekehene ungo na na kajumba ue age ungota na timbuto indarako aheva avo nau degi ta me kiari dombo be ra. Eto na siro sapura ari embo na keko ijie ke erevi aisona amo enana na ke ijie “Na, na” eagora amo dagote tapa na ke amo “Na, na” ari inonora.
2CO 11:22 Eto enana amo Hebrew embopo rete? Namote tapa Hebrew embora, eto enana amo Israel embopo rete? Namote tapa Israel embora. Enana amo Abraham ta meniundi rete? Namote tapa Abraham ta menira.
2CO 11:23 Enana amo Keriso ta pure ari emboporete? Namote tapa Keriso ta pure ari embora te ungo ere kogova amo nau hotembari javotoho avo toto “Na, na” ijie erena te nau ari tapa amina enana dembari avoeto erena amo pure ngahia eagona eto nei amo na tipura ta ikagora eto nei amo na teore memenga kiagona eto iji nei nei amo na pehari ahumpa eagona
2CO 11:24 eto Judea embo na iji tapa 5 rate iji vahai vahai amita jo ta na ejembeto tea amo tapa 39 ainge toruera
2CO 11:25 eto iji 3 amo ituha na toruera eto iji vahai amo koro na toruera eto iji 3 amo na e nga ta pambuhone e nga teto pejeo, iji vahai amina na iji vahai mume vahai eva ta daveto pambua.
2CO 11:26 Eto na enda tapa ta isa eagona degi aita amo umo vuenga ta degi osaga kiagona eto degi ta embo teto pegene eagora aita osaga kiagona eto enda nau embomeni ta ingeni ta enda nei embomeni ta ingeni ta osaga kiagona eto da jota eto degita eto eva hamota pahue osaga kiagona, eto nei amo nau namei ke eagora amita degi osaga kiagona.
2CO 11:27 Eto nei amo na pure ngahia ue evae eagona, eto nei amo indari te umo te na beuje uoi teho mihovona eto nei amo bo ambu eto jajemote avo kiagona
2CO 11:28 eto ari tapa amita hamota amo iji vahai vahai ekalesia avo hotembu hotembu ue iragona,
2CO 11:29 eto ekalesia embo vahai na ivo ambu eaguja amo na osaga kiagona, eto embo vahai na engekari ta veaguja amo na osaga kiagona.
2CO 11:30 Eto na “Na, na” asona amo nau sovera ta ke avo mane aisona te ivo ambu ta ari avo ungo na kiagova ari vahai erevi aisona.
2CO 11:31 Eto ke erevi aisona amo ke be pere avo Bada Iesu ta Mamo God daroho jakeka aisora amina ere kogua avoeto ke emo ke be pere erena.
2CO 11:32 Eto na da Damascus aita pambuto mihio King Aretas ta gavana na na andito humbasi amita isoro ari embopo ikenu da tapa joeketo mihio
2CO 11:33 nau namei kamei na na humbuto handija peni vahai aita juruketo otoho ta ikeo da arahata veto kiae pambua.
2CO 12:1 Eto nanena, “Na, na” ijie ungota degi ke ehako anote? Eto amita heta javotoho mane puvuresuja avo kogona te Bada ta ke nau degita harikihoi ehureta kiarako uena avo ungota degi ano ingivujo.
2CO 12:2 Eto Keriso ta embo vahai nanena kiari amo jua 14 irae ehija amita ihikari ta embo vahai amo God na humbuto uhu i be ta pambuna amo hamote visi te na pambunute hamo visi pehena pambunu amo na kiaera te God na vahai kina.
2CO 12:3 Te embo vahai amo hamote rete hamo ambu re amo God na vahai kina
2CO 12:4 embo amina uhu i God ta irari degi aita pambuto ke jajavotoho avo ingina te God na haekari avoeto embo na ke avo mane harikasuja
2CO 12:5 eto na embo amita javota nane ke aisona te “Na na” oenga amo ivo irae ke avo aisona.
2CO 12:6 Eto na ke nau be avo humbuto, “Na, na” ahena amo ke be avoeto na me mane kiaehena te na embo peni rete isapa re avo embo ta hotembari na aerate nau ke te arite avo embona kogue na embo peni rete embo isapa re avo ara uje ere ona avoeto nanena, “Na, na” mane aisona.
2CO 12:7 Eto na degi javotoho aita pambuto ari jajavotoho neite neite kehena avoeto na embo peni ke ijie one God na nau degita ambure vahai ikehei Satan ta pure embo na arako kaikari ereona avoeto na embo peni ke mane eagona
2CO 12:8 avoeto na ambure kaikari eagona avoeto iji 3 ainge Bada na humbau irae aja pari uenate
2CO 12:9 Bada na ke mine einge ijija, “Eto na no ambure avo mane umbano irae aisuja te iji vahai vahai na umo hondate aisona amo inonora te umo ivo ambu embo ururo ivo nau avo no degita ikano peni vahai aisuja,” ke ainge ijija avoeto Keriso ta ivo avo nau degi ta iroja ivo nau irae avoeto tunga javotoho ue, “Na, na” aisona.
2CO 12:10 Eto ke avoeto nau ivo ambuari embo ta isembari, hamota tari, ahumbari neite neite Keriso ta javota kiagona avoeto aita amo nau degi ta sovera ari puvaguja.
2CO 12:11 Eto na siro sapura ari embo na arako ue ke erevi ere kajihena amo ujekari ungota avoembo ereona te ungona osa ue ke be aheva amo na ke einge emo mane kajaehena te ungo be kivujo, ungota apostel sokova amo peni, na isapa arako manera.
2CO 12:12 Eto na apostel be amita hajire pepeni neite neite avo ungota degi one ungona iji koso be kogueva
2CO 12:13 eto nanena ungo avo ekalesia nei uhoho amiga inonora ainge ene ungona kogovete? Eto kogueva amo na ekalesia nei uhoho amita degi koro humbuhenate ungo nei nei amita degi amo koro umbae amina ehei inono ae ari ke erevete? Avoeto ari nau kito hotembeto tovujo.
2CO 12:14 Eto na ungota degi iji heriso mahu pambuhena te eha emo ehako pambuto ungota degi umoro ue ungona ari ngahia nei do ava ke mane aisona. Eto na ungota degi pambuto humbasi uje ereona amo ungota koro mane rate ungota osa ari. Eto erena amo meni isasaraho na enanata e mamo mane unduagorate emamo na meniundi simba ue unduagora.
2CO 12:15 Avoeto na ungota degi ta pambuto ungo hondate ururono nau koro te hamo te amo jigama ano irae aehija. Eto na ungo osa peni vahai ereona avoeto ungona na mine osa isapa be aheva.
2CO 12:16 Eto na ungota degi pambuto mihio na undiheva aita osaga nei do hambae rate embo nei na eagore ingagona amo nanena ungota degi pambuto ke gamo poekari ke na ene ingihava
2CO 12:17 amo ke hande ari embomeni ungota degi ikehene pambuhera amina ungo ke gamo na poekae
2CO 12:18 eto na Titus pambaja ijie ungotenau namei vahai amiga ikehene pambuhija avoeto Titus na ungota degi ke gamo na poekae rate ungona kogova amo Titus te namote amo ari vahai ahihi vahai amina eagora.
2CO 12:19 Eto dagona ke ere kajihera avo ungona dago embo jajavotoho ke ava kajari ke ijie ere hotembihevete? Eto nau namei kamei, ke amo ainge ae rate God ta tihi eto Iesu ta javota ungo avoembo ke emore ere kajihera.
2CO 12:20 Eto na ari vahai erevi joru ere ovona amo na aita pambuto ungota irari nei avo kogurono ungona na kogue amo ngahia embo ke aisova avo na joru ere ona. Eto nei amo jujunete, embo nei ta donda uje ari te humote, embo kahekarite, javo ari sapura arite, ke sokova hande arite viso orongote, vasiri siosao arite, tapa avo aita hambanote avo na joru ere ona.
2CO 12:21 Eto na ungota degi pambasona amo ungo nei nei na tiha paiha te sesena sasapura te hamo ta ujeje sasapura neite neite amo mahu ere ovova avo toae avo na God ta tihi ta me kesona avo joru ere ona.
2CO 13:1 Eto na ungota degi iji heriso pambuhena eto ehako pambasi ere ona. Eto ungota degi ari sasapura do mihia amo kiari embopo heriso eto nei heriso nei vahai amina pehumba ururoro ke be harikasova
2CO 13:2 avoeto na mahu ungote mihie ijiena eto ehako na ungote irae rate ehako erena avo ungo be ingivujo, na ungota degi pambasona amo ari sasapura mahu te ehaha te avo mane toasona bera
2CO 13:3 eto ungona Keriso Paul ta degi ke eagoite aere ainge eagova ungo be kiagova ari ainge amo aisona. Eto ungo kogova amo Keriso ungota degi ivo ambu ae rate sovera eaguja
2CO 13:4 eto ungo kogova amo Keriso ivo ambu enu ji atahuta tea te eha oroho emo God ta sovera avoeto iraguja. Eto Keriso na ena ainge dombo dagota ivo irae rate dago aita pambuto pure ururoro ungona God ta sovera avo be keisova.
2CO 13:5 Avoeto ungo Iesu humota ere ovete aere avo ungota jo sirikevujo. Eto ungo Keriso ta toho be kito amo Keriso ungota jo ta iresuja avo kesova.
2CO 13:6 Eto dago amo Keriso ta toho be avo ungona be kiagova uje ere ona.
2CO 13:7 Avoeto ungo vasiri jajavotoho pere ava uje ue God ta degi pari ereona amo embo na dago kito ahe poekari embo jajavotohora ke ainge ara ae rate dago embota tihita javotoho rete sapurare avo mane aisora te ungo avo jajavotohora uje ere ora.
2CO 13:8 Eto ke be amo dagona mane haekasora te sigeto pambaja pure ere ora.
2CO 13:9 Eto dagona ivoambu aisora te ungo na ivo aisova avo peni bera te ungona ari jajavotoho na pere inono ta aisova avoeto dago ungoembo pari ereora.
2CO 13:10 Eto Bada na nane ungo tihi jigihio kito nau degi ta sovera ari ikena amo na ungo tano veava ikae rate ungo jigono ereva ikena eto na ungota degi pambae eita mihie ke erevi ere kajihena amo ungona kito jo hapereketo mihirovo pambuto ungota degi ke ngahia na mane aisona avoeto ke erevi ere kajihena.
2CO 13:11 Avoeto nau namei kamei, ungota degi orere re erena, javotoho na pere irivujo, eto nau ke erevi eheketo kivujo, eto hotembari vahai evujo, eto pekata irivujo. Eto osa arita, peka ari ta God ungota degi iresuja.
2CO 13:12 Eto otohu ari amina mune tavo mine ara evujo.
2CO 13:13 Eto God ta embo ototohu eita mihera amina ungo ere pekihera
2CO 13:14 eto Bada Iesu Keriso ta hondate ari God ta osa ari eto Ahihi Otohu ta vahaita ari ungo tapa amita degi ta iresuja.
GAL 1:1 Na Paul na embo ta sovera na embo ta ke na ikae pambae rate Iesu Keriso te God Mamo Iesu jiginu vasiri te erena embo amite tapa na apostel humbuto ikeo pambua.
GAL 1:2 Eto namote nau namei kamei namote mihera amite tapa na ahari erevi kajihe ungo enda Galatia ekalesia miheva avo ere pekihera.
GAL 1:3 Eto ungotenau Mama God te Iesu Keriso te ta hondateari te peka te avo ungota degi iroi.
GAL 1:4 Eto Iesu Keriso amo ungotena ari sasapuraga tapa enda erei ta irora uje ae ue hamo amita na ungotenau ari sasapura ombuto umbuna amo ungotenau Mama God ta uje ta ena,
GAL 1:5 amita degi usasa daroho iroi, amen.
GAL 1:6 Eto God na Keriso ta orekari na ungo umbuna te ungo na God egikihie duru nei avo javotoho ke ijie aita borambu pambeve na kito mana mana ere ona.
GAL 1:7 Amo Keriso ta duru javotoho nei irae rate embo ungote mihera amina ungota jo kajaro Keriso ta duru sapura aja ere ora.
GAL 1:8 Avoeto erena amo namo retemo Anera nei amina ke kihi dagona hande ehere humbuheva avo mane rate nei avo javotoho ke ijie hande ururou na uje ere ona amo God na embo amo tau memenga iji datohota kogue iresuja.
GAL 1:9 Eto ke ehena amo ehako ano ingivujo, amo embo amuna ke kihi dagona hande ehere ingito humbuheva avo mane rate nei avo javotoho ke ijie hande ururou na uje ereona amo God na embo amo tau memenga iji datohota kogue iresuja.
GAL 1:10 Eto na ke erevi erena amo embona ingito na embo javotoho ke ara erevete? Ainge manera te God na ingoja erena. Eto ke be amo na embo ta tihi ta na ke be ara ari nau tapa avo mane eagona te embo ta tihi ta embo javotoho asi ahena amo Keriso ta pure ari embo mane ahena.
GAL 1:11 Eto nau namei kamei ungo be ingova uje ere ona amo duru javotoho hande eagona amo embo ta hotembari na puvuraera
GAL 1:12 eto embo na nau degi ta ae ingae eto ahe poekae umbae rate Iesu Keriso na nau degi ta harikenu ingia.
GAL 1:13 Eto na Judea ta ari tapa jigama ue ere uaehena amo ungo ingarira amo God ta ekalesia tano irae aja hamota osaga memenga neite neite ere ikihahena.
GAL 1:14 Eto nau namei kamei tapa Judea embomeni rate nane vahai Judea ohihi ta ari tapa avo inono ta asi uje eto jo tapa na jigama ere uaehena.
GAL 1:15 Te nau oje na na ingae pekota amo God ta hondate ari na na umbuna
GAL 1:16 amo amita Meni ta duru javotoho avo God kiae embomeni ta degi hande ana umbuna. Eto God na nau degi ta haeketo umbuna amo embo ta degi ke nei do ae
GAL 1:17 eto apostel mamahu Jerusalem ta mihia amita degi ke asi pambae rate toto enda Arabia ta pambuto mihimihe da Damascus ta egerembihiena.
GAL 1:18 Eto na God degi ta hambuhana jua 3 amita ambota Peter hambuto tombu kesi da Jerusalem ta pambuto iji tapa 15 ai mihiena
GAL 1:19 te apostel nei uhoho hambae rate Bada ta namei James vahai avo hambuhana.
GAL 1:20 Avoeto ke erena amo God ta tombu ta ke be na perekari ere kajihena.
GAL 1:21 Eto amita ambota amo enda Syria te enda Cilicia te ta pambuhone
GAL 1:22 Keriso ta ekalesia Judea enda ta mihahera amina na enana ta kitoho embo ke ijiore ingagora te tombu nau avo kiae pekota kito God humota ara ke hande eagona
GAL 1:24 avo ingito tunga javotoho be ue God jakeka ea.
GAL 2:1 Eto jua 14 irae ena emita ambota na Barnabas ga da Jerusalem pambasi ue embo Titus humbuto amiga pambua.
GAL 2:2 Eto ai ta pambuhena amo nau uje na pambae rate God ta uje ta pambuto ekalesia ta embo okokose aita mihera amita degi Iesu ta duru javotoho do do enda nei embomeni ta degi hande eagona avo ehene ingihera amo aravora arote avo eto ehene enana embo okokose pere na
GAL 2:3 ingito jo vahai eto aravora ijiera. Eto nei amo embo Titus amo Judea embo mane enda nei Greek embora te Iesu humota eaguja te hamo kakamba ae avo enana kito Judea ta ari avo hamo kakamba eto ekalesia ta horaja ke ae teho umbua.
GAL 2:4 Eto hamo kakamba ari ta ke amo mane ahera te enana ekalesia be mane amina popoja puvuto dago Iesu Keriso ta jo ta iragora avo ke mahu hamo kakamba ari ta ke amina ehako andiroja puvua
GAL 2:5 te enana ke amo dagota ke ahurekari inono ae ehei Keriso ta ke ungota degi hande ehere humbuheva ainge inono ta mihia.
GAL 2:6 Eto God ta tihi ta embo tapa inono rate embomeni na enana Jerusalem ta mihera amo ekalesia ta tihi jigari ke eagora te nau degi ta amo tehora, amina Iesu ta ke hande eagona amita hamota ke nei do ikae rate ke eagona avo perera.
GAL 2:7 Eto Peter na Iesu ta duru javotoho avo Judea embomeni ta degi hande aja God na humbuto ikena ainge dombo nanena enda nei embomeni ta degi hande ana umbuna avo enana ekalesia ta okokose amina kito ke be hotembea
GAL 2:8 amo erevira. Eto Peter na Judea embomeni ta degi ke hande ue pure uija aita God ta ingeni hajire koguera ainge dombo nanena enda nei embomeni ga pure uena aita God ta ingeni hajire koguera
GAL 2:9 avoeto James te John te Peter te amo ekalesia ta tutuvi be ari ke eagora amina namote Barnabas te na God ta hondate ari na enana ga pure vahai eagora avo kito ingeni humbuhe ke einge ea, namote Barnabas te avo enda nei embomeni ta degi pahuroro enana avo Judea embomeni ta degi pambasi ke ea.
GAL 2:10 Eto ke nei vahai amo hoivo embopo avo hondate ara ehera avo na jo tapa na asi uje ere ona.
GAL 2:11 Eto Peter da Antioch ta pambuto mihie ari vahai erevi ena avo sapura kito amita degi harikihena
GAL 2:12 amo Peter kihi ta amo enda nei embomeni ga vahaita arumbeto ere indiahija amo javotoho ere uahija te Judea embo nei uhoho James ta degi eto puvua, amo enda nei embopo ekalesia ta ehaha horagora avo Judea ta ari ambo ambo eto hamo kakamba ara ke hande eagora embopo puvua embomeni amina ke arote avo Peter na hotembeto joru ue ari sapura ihiketo ena amo enda nei embomeni ga vahaita indari uje ae eto toruhunu
GAL 2:13 Judea embopo nei uhoho da Antioch ta ekalesia eto mihahera amina Peter enda nei embo ga vahaita indae uija avo kito ainge inono ta hotembari vahai avo uera. Eto sapura ainge uo Barnabas na enana ta ari sokova avo kito ai ta kaju unu
GAL 2:14 na aita pambuto enana ta ari avo kia amo duru javotoho embota degi hande eagora aita irae avoeto ari sapura avoeto ekalesia ta tombu ta Peter ta degi ke einge ijiena, “Umo Judea embo rate enda nei embo ke kiae amina irarako ue enda nei embo na Judea ta ari humbuto irora ahe ere poekihea amo ari sapura be ere kogona.”
GAL 2:15 Eto ungotena aja ta hini ta eto puvurari amo Judea embopora te enda nei ari sasapura embopo ainge manera
GAL 2:16 te ungotena eha ere kogora amo embo God ta ke pepeni agi asora amina mane embo javotoho ke aisuja. Avoeto ungotena God ta tihi ta embo jajavotoho aisi ue God ta ke pepeni neite neite avo hotembae ue Iesu Keriso vahai avo humota ue mihera, eto ke be amo embo tapa na ke pepeni simba eagora amina embo javotoho mane aisora.
GAL 2:17 Eto ungotena God ta ke pepeni agi ari amina embo jajavotoho ae rate Iesu Keriso humota ari vahai amina God ta tihi ta embo javotoho eagora avoeto Keriso humota ari aita ere kogora amo embo tapa na ari javotoho amina embo javotoho ae rate embo tapa aemana embo sasapura pere rate Keriso amo ari sapura ta kihi humbari embo manera.
GAL 2:18 Eto ke pepeni neite neite agi ere uaehena amo embo javotoho anote ijie agi ere uaehena avo mahu toruhena te ehako simba asona amina na pehumba au ari sapura embo aisona.
GAL 2:19 Eto ke be amo na God ta degi vasiri eha humbuto iresi God ta ke pepeni Moses ta degi ikena avo toruhena amo ai ta amo ari sasapura nau do aingere avo koguena.
GAL 2:20 Eto na Keriso ga tapa ji atahu ta teo pehea avoeto vasiri sapura nau irae rate Keriso ta vasiri avo jo nau ta vasiri mihia amo God ta Meni na namo avoembo osa ue hamo amita ikena avo humota one vasiri amita amo hamo nau ta mihia.
GAL 2:21 Avoeto ke pepeni simba ari amina God ta hande nau degi ta ikena avo mane ano sapura aisuja, avoeto erena amo ke pepeni agi eto ungotena embo jajavotoho ahera amo Keriso puvuto, teho ujeto pehaehija.
GAL 3:1 O ve, ungo da Galatia ingito ingarako embopo. Ungota tihi mo amuna saruka ehei kiae ere ove? Iesu Keriso ji atahu ta pehena amo ke araha ta ehene ingihava te ungo na kiae kiae ereova,
GAL 3:2 avoeto na ke vahai erevi ungota degi eto ingesi uje ere ona amo God ta ke pepeni simba eheva amina God ta Ahihi Otohu ungota jo ta humbevetemo Keriso ta duru javotoho humota ueva amina humbuheve?
GAL 3:3 Ungo ke kiae embopo. Eto ungo na God ta Ahihi ta sovera na ihiketo ue mihena te aita amo hotembari ungota na kajueto iresi uje ere ove te?
GAL 3:4 Eto ungona God humota ue amita hajire neite neite kogueva amo teho koguevete?
GAL 3:5 Eto God na amita Ahihi Otohu ikeoi ari sovera neite neite eoi kiagova amo ungona ke pepeni neite neite simba eagova Keriso ta duru javotoho ingihe ke be eagova avoembo ikeoi?
GAL 3:6 Eto Abraham ta ari erevi be hotembevujo, amina “God humota unu kito embo javotoho ke ena” ke ainge kajari mihia
GAL 3:7 avoeto ungo kogova amo ari javotoho neite neite amina ae rate God humota eagora embomeni amo Abraham ta hajire vahai avoeto amita meniundi bera.
GAL 3:8 Eto enda nei embomeni tapa amuna God humota ururoro God na kogue embomeni jajavotohora ke eaguja amita duru javotoho amo Abraham ta degi einge enu kajena amo “Javotoho ari no degi ta eto enda embo tapa ta degi puvuresuja,” ainge kajena
GAL 3:9 avoeto Abraham na God humota unu God ta javotoho ari ikenu kina ainge dombo embo amuna humota eto kesuja
GAL 3:10 rate God ta ke pepeni agi eto embo jajavotoho asi mihera embomeni amo God na au sapura ta veasi mihera amita ke amo einge kajari mihia “Eto embo amuna God ta ke pepeni kajari avo tapa inono ta jigama ae eaguja amo God na au sapura ta veto hajire kesuja” eto
GAL 3:11 ke nei einge mihia “Embo amuna God humota aisuja embo amina God ta tihi ta embo javotoho eto vasiri humbuto iresuja,” ainge mihia avoeto ungotena kesora amo embo na God ta ke pepeni agi eto God ta tihi ta embo javotoho ari inono ae ra
GAL 3:12 te God na amita ke ta einge kajena amo, “Embo amuna nau ke peni te isapa te inono ta agi asuja amina vasiri hambasuja” ainge mihia avoeto ungotena kesora amo God humota ari amo oenga eto god ta ke pepeni agi ari amo oenga
GAL 3:13 rate embo na agi ari inono ae avoeto ungotena sapura ta veto hajire kiaehera te Keriso na ungotena hondate eto ari sasapura ungotenau aravo hamo amita ta humbunu vihinu God na kito hajire ikenu pehena avoeto Keriso ta ari avo kogue einge kajarira “Eto embo ji atahu ta taro pehasuja amo God ta tihi ta embo sapura be” ainge kajari ra.
GAL 3:14 Eto God na Iesu Keriso ikenu ungotena sapura oreketo umbuna amo God ta tihi ta ari javotoho ari Abraham ta degi ikasi oje ue noma kajena avo enda nei embomeni na umbara Iesu Keriso ikena avoeto God ta Ahihi Otohu umbara oje ena amo Iesu Keriso humota ururoro ikau humbasora.
GAL 3:15 Nau namei kamei ungo be kiagova enda embomeni ta ari avo humbuto ahe kihira aisona. Eto embo tapa na ke vahai amo jo vahai eto aravora asora amo ke peni avoeto ke embo vahai amina mane haekasuja eto ke nei amita hamota ikau mane hetasuja te ke vahai aravo aravora ehera amina hetasuja.
GAL 3:16 Eto God na Abraham ga noma kajena amo Abraham eto Abraham ta ahihije amita degi ari javotoho asi oje ue noma kajena te kivujo, God ta ke ta kajari mihia amo “Umo te no ahihije te ta eto puvuroja” ke ae rate “Umo te no ahije vahai amita degi eto puvuroja” ke enu kajena avo mihia. Eto Abraham ta ahije amo embo nei mane rate Keriso ra.
GAL 3:17 Avoeto ke erena amita be amo God na embomeni ta degi ari jajavotoho ikasi oje ue noma kajena amo toae rate jua tapa 430 amita ambota God na amita ke pepeni Moses ta degi ikenu kajena amina noma Abraham ta iji te kajena avo mane au irae aisuja avoeto God na oje ena amo irae ae rate mihia.
GAL 3:18 Eto embomeni na God ta ke pepeni agi ue God ta tombu ta embo jajavotoho ari inono ae rate inono ahera amo God na javotoho ari ikau hande eto mane humbahera. Rate God na umo oenga embo ta degi javotoho ari ikasi oje ena avoeto Abraham te tapa humbuto God ta tombuta embo javotoho ena.
GAL 3:19 Eto ungotena ere kogora amo embo na God ta ke pepeni avo agi eto embo jajavotoho ari haite mane rate do eto God na amita ke pepeni embo ta degi hande enu? Amo Abraham irari iji te eto puvuto Iesu Keriso puvuna iji te amita ugorota embomeni na ari sasapura ta hajire do aingere avo kiagora ikena. Eto ke pepeni amo God ta Anera na Moses ta degi ikenu humbuto embomeni ta degi hande ena
GAL 3:20 te God na ari javotoho ikasi oje ena amo embo nei na Abraham ta ikaja ikae rate ikasi oje ena embo Abraham amita degi orereto ikena.
GAL 3:21 Eto hondate ari, God na Abraham ta degi ikasi oje ena amita degi God ta ke pepeni amina tumo ue mine tara ere orete? Ainge mane ra te ke pepeni God na ikena aita amo ungotena vasiri humbari haite ahera amo embo tapa na ke pepeni avo agi eto God ta tombu ta embo jajavotoho ahera,
GAL 3:22 te God ta ke kajari ta mihia amo enda tapa eto embo tapa amo ari sasapura ta sovera na jigei mihera avoeto vasiri javotoho ari avo God na embo ta degi hande ikasi oje ena amo Iesu Keriso humota uore vasiri javotoho ari hande eoi humbagora.
GAL 3:23 Rate embo na Keriso humota asora iji puvurae pekota God ta ke pepeni na ganoka uore tipura ta irarako uo Keriso humota asora iji puvuna.
GAL 3:24 Amo embo na Keriso humota ore God na au embo jajavotoho ara Keriso puvurae kihi ta God ta ke pepeni amina embo simba ere uahija
GAL 3:25 te Keriso humota asora amita iji mahu puvuna avoeto God ta ke pepeni na ungotena mane simba aisuja.
GAL 3:26 Eto ungo amo Iesu Keriso humota ue amiga kajueto miheva avoeto ungo God ta meniundi ra.
GAL 3:27 Ungona Keriso ga kajuasi bapataito ueva avoeto Keriso ta vasiri avo asuketo miheva.
GAL 3:28 Eto Judea embomeni te enda nei embomeni te pure ari embo te pure ta tihi jigari embo te embo te evohu te tapa ke ainge eagora amo ke peni mane Iesu Keriso ga kajueto vahai ehera avo peni be ra.
GAL 3:29 Eto Abraham na God humota ena ainge dombo ungona Iesu Keriso avo humota ue amita toho ue iragova avoeto Abraham ta meniundi be amo ungona ere ova avoeto God na Abraham ta ikasi oje ena amo ungo na hoteto humbasova.
GAL 4:1 Eto ke erena amo eingera. Eto meni isapa amo pajito mamo ta donda tapa hoteto humbasuja avoeto mamo ta donda amo amitara te meni irari iji te amo mamo ta ke agi ari menira.
GAL 4:2 Eto meni isapa avoeto embo nei na amita donda simba uore pajito embo eto mamo ta donda avo hoteto humbaguja.
GAL 4:3 Eto ainge dombo ungotena God ta ke be ingae ue mihahera iji amite amo meni isasaraho na arako ue enda ta ahihi neite neite amita ke agi ere uahera.
GAL 4:4 Rate iji inonota God na amita Meni ikenu venu evohu hamo visi te amina ingenu God ta ke pepeni Judea ta degi ikari avo amina simba unu pajina.
GAL 4:5 Eto ungotena ke pepeni simba ari embomeni ta ari sasapura avo ombuto humbau tohota meniundi be ara Keriso amo Judea ta ke pepeni amina simba enu pajina.
GAL 4:6 Eto ungo God ta meniundi be eagova embo tapa na kiagora God na amita Ahihi Otohu ikenu veto ungotenau jo ta mihie “God amo nau mama ra” eaguja.
GAL 4:7 Avoeto umo ke pepeni ta tipura embo mane rate God ta meni be avoeto God ta meniundi na hoteto humbuhuro umote tapa hoteto humbasoa.
GAL 4:8 Eto ungo God kiae mihaheva iji amite amo ahihi sasapura neite neite God be mane amita ke agi ue tipura embo na irarako ere uaeheva
GAL 4:9 te eha amo ungo God sovera te avo ere kogova eto God na ungo ere kogua te do eto ungo egerembeto enda ta ahihi ivo ambupu neite neite amita ke agi ari embopo asi ere pahove?
GAL 4:10 Amo ungona ahihi sasapura ta ke ingihe iji te hariga te jua te tapa neite neite amo otohu ke ijie ereova
GAL 4:11 avoeto na ari avo kogue ungo hotembu hotembu ue na pure ungota degi uena amo teho uenete avo ere hotembihena
GAL 4:12 avoeto nau namei kamei, na Judea ta ke pepeni avo toto ari ungota avo hamo eto eagona ainge dombo ungona Judea ta ke pepeni amina andiaguja uje ae ere ona. Eto na ungota degi pambuhone amo ungona nau degi ta sapura ae ueva.
GAL 4:13 Eto kivujo, na ungota degi kihi pambuto God ta duru javotoho hande uena amo na ambure humbuto ungota degi pambuhena
GAL 4:14 eto nau ambure avoeto ungote tapa osaga kogueva te ungona na egikae ue God ta Anera humbaeheva ainge eto na humbuheva eto nei Iesu Keriso humbuhe pekaeheva ainge eto na humbuheva.
GAL 4:15 Eto ungota tunga javotoho ari osa osa ari pajire be koguena amo deina haekehei irae ehei amo ungona na osa ue nau degi ta donda nei do tapa humbuto nau degi ta hande ikasi uje ue kito ungota tihi te tapa avo kuruketo nau degi ta hande ikaeheva
GAL 4:16 avoeto na be kesi uje ere ona, amo na ungota degi ke be hande uena amina ungota kitoho ere onete?
GAL 4:17 Eto enana ke sokova ahe poekari embopo ungota degi puvera amina ungo ga namei asi ke erera te ungota degi amo sasapura pere puvuresuja. Eto enana uje ereora amo na egiketo enana avo embo pepeni ke ava uje ereora.
GAL 4:18 Eto enanana ungota degi ari javotoho asi tunga humbaehera amo ari javotoho ahera. Eto na ungote mihie one osa ueva ainge dombo enanana ururoro osa aheva
GAL 4:19 te nau osa ari meniundi, eto ungona pajito Keriso ta ari be umbava na evohu na meni ingasi ue memenga kiaguja ainge dombo nane memenga osaga kogue mihena
GAL 4:20 avoeto na ungote tombu mine kiara ue jo nei oi ke ngahia erena avo toto tunga jamo ari na ungota degi ke aisi ere ona amita be amo na ungo hotembu hotembu ere ona avoeto.
GAL 4:21 Eto ungo embo nei nei amina God ta ke pepeni amita hu ta iresi uje ere ova te irari amo do aingere avo ano ingesova.
GAL 4:22 Amo God ta ke kajari ta mihia amo embo Abraham ta meni heriso eto vahai amo amita pure evohu Hagar na ingena eto nei amo amita ae be evohu Sarah na ingena.
GAL 4:23 Eto pure evohu na meni ingena amo hamo ta ujeje ta ingena te amita ae be amina ingena amo God na ikasi oje ena avoeto ikenu ingena.
GAL 4:24 Eto evohu heriso amina ahe kihira ea amo God ta noma kajari ta ke mahu ikari eto God ta noma kajari ta ke eha ikari amita ahe kihira avo ea. Eto evohu Hagar amo Abraham ta pure evohu avoeto embo amita ke na andirari avoeto amita meniundi te tapa amo embo neite neite ta ke na andirarira. Eto God na tiri Sinai ai ta Moses ta degi ke pepeni ikena amita ahe kihira avo Hagar na ere ua.
GAL 4:25 Eto tiri Sinai enda Arabia jo aita amo Hagar na ahe kihira ere ua eto nei amo da Jerusalem embomeni eha mihera amo Judea ta ke pepeni mahu amina andirari avoeto Hagar na ahe kihira ere ua.
GAL 4:26 Rate da Jerusalem eha uhu ita mihia amo nei deina andirae avoeto ungotenau ajara.
GAL 4:27 Amita ke amo God ta ke kajari ta einge mihia, “Meni ingae evohu, inena meni ingihe memenga kiae avoeto osa osa ue hori gagaha ijie tunga javotoho ejo. Eto evohu ivu na toari amita meniundi na evohu nei ivute amo dembasora.” ainge kajari mihia amita be amo enda nei embomeni amo mahu toari te eha oroho amo Keriso humota ue tunga javotoho ere ora.
GAL 4:28 Avoeto nau namei kamei God na ke mahu ikihe oje ena amo Sarah ta meni Isaac na ena ainge dombo ungo amo Abraham ta meniundi God na oje ena avoeto God ta meniundi bera.
GAL 4:29 Eto Abraham irari iji te enda ta vasiri na ingari meni amo Hagar ta meni amina God ta Ahihi na ikari meni amo Sarah ta meni amita degi memenga osaga ikenu kina, ainge dombo amo eha oroho ore ere kogora.
GAL 4:30 Eto God na Abraham ta degi ke ena amo einge kajari mihia, “Eto no pure evohu ta meni amina no ae be amita meni ga donda mane hoteto humbasuja avoeto ohimbejo pambare,” ke ainge mihia
GAL 4:31 avoeto nau namei kamei ungotena embo ta ke na andirari evohu amita meniundi mane rate ungotenau aja amo nei deina andiraera.
GAL 5:1 Eto ungotena arahata pambara Keriso na ungotenau ari sasapura vujekena avoeto ungo oenga ke pepeni neite neite amina mane punduresova
GAL 5:2 Paul, nane ke ano ingivujo, eto ungo na aravora avo hamo ungota jeto kakamba asora amo Keriso na ungo mane hondate aisuja
GAL 5:3 avoeto ehako ano ingivujo. Eto ungo vahai amuna aravora au hamo kakamba aisora amina God ta ke pepeni Moses ta degi ikenu kajena tapa avo inono ta simba aisuja
GAL 5:4 avoeto ungo amuna God ta ke pepeni agi ari amina God ta tihi ta embo javotoho asi hotembasuja embo amo Keriso humota ari mahu egikari avoeto Keriso ta hondate ari umbae ue God ta tihi ta amo embo javotoho manera
GAL 5:5 te ungotena ke be eagora amo Keriso humota ururoro God ta Ahihi Otohu na amita sovera na eoi God ta tihi ta embo jajavotoho ere ora
GAL 5:6 avoeto ungote Iesu Keriso ta jo ta iresora amo hamo kakamba ari rete hamo kakamba ae re amo ke peni mane rate ke dombo be amo embo na Keriso humota ue embomeni osa ue iresora.
GAL 5:7 Eto ungona Keriso humota ari na pajirari javotoho be ove koguena te embo amuna ungota jo kajehei God ta ke ambo ambo ari toheve?
GAL 5:8 Amo God ungo jage eto humbari embo amina aera
GAL 5:9 te ke sokova isapa be amina pajito embo ta jo enetaguja.
GAL 5:10 Rate ungote namote Bada ta jo ta mihera avoeto na kogona amo ungona ke nau mane egiketo embo nei ta ke ta huhevasova. Eto ungota degi ke sokova tirari embo amunure, na kiae rate amo God na au hajire kesuja.
GAL 5:11 Eto nau namei kamei, na kogona amo embomeni amina Keriso ta embomeni ta ari sasapura orekasi ji atahu ta pehena avo ke be ae eagora te Keriso na embo orekaguja amita ke avo nane mane toasona te ke avo toto hamo kakamba ara ahe poekaehena amo enana ke sokova tirari embopo na nau degi ta osaga memenga mane ikaro kiaehena.
GAL 5:12 Eto nau uje amo enana ungo hamo kakamba eto memenga sio kiagova ahe poekari embopo na asivo humbuto ungo oenga jorembeto bau te tapa tiukihe memenga kiaehera.
GAL 5:13 Rate ungo nau namei kamei amo ungo Moses ta ke pepeni na mane andiroja God na jage eto umbuna te ke pepeni na andirae ururou hamo ta uje sasapura mane aisova te osa ari na hondate mine ara evujo.
GAL 5:14 Amo eingera. God ta ke pepeni Moses ta ikenu kajena amo ke neite neite rate tapa amita ke susu amo “Umo oenga osa ere oa ainge dombo namei osa ejo”.
GAL 5:15 Eto ungona isoro o na arako mine kambara ue isoro aisova amo ari amita tutumota amo ungo sasari eto irae aisova avoeto be kogue irivujo.
GAL 5:16 Eto ke erena amo ungota hamo ta uje sasapura ta mane huhevasova te God ta Ahihi Otohu na ungo tihi jigoja simba evujo.
GAL 5:17 Eto ungotenau hamo ta uje amina God ta Ahihi Otohu ta degi isoro ururou Ahihi Otohu na ungotenau hamo ta ujeje ta degi isoro eaguja. Eto enana heriso amo kitoho avoeto Ahihi Otohu na umo tihi jigihirou uje no sasapura avo mane aisoa
GAL 5:18 te Ahihi Otohu ta ke ambo ambo ue God ta ke pepeni amita simba ari ngahia mane hotembu hotembu ue iresoa.
GAL 5:19 Eto enda embomeni ta uje sasapura deire amo ungotena kiarira amo tiha paiha te sesena sasapura uje ari te ari sasapura isapamane deina eoi jo tongopa eaguja
GAL 5:20 amite eto ingeni na ove eto God ke ijie jakeka ue saruka neite neite eagora, eto embomeni na kaheke kaheke eto kitoho ue embo nei ta donda kito uje isapamane ue daingeto humbasora avo hotembihe tumo eto isoro mine ara eagora.
GAL 5:21 Eto hamo enana ta pere hotembihe umo peni vahai indito kava ue ke sokova eagora. Eto ke mahu eagona avo ehako erena amo embomeni amuna ari ainge eagora amina God ta tihi jigari ta horeto hotari mane humbasora.
GAL 5:22 Rate Ahihi na embo ta jo ta pure au be aisuja amo erevira amo tunga humbari, osa osa ari, pekari, embo tumo ae ue iji koso simba ari, tunga jamo jamo ari na embo simba ari, hondate ari, ari javotoho ari, humota ari haite
GAL 5:23 meni isapa ke ijie tumo mane asuja eto hamo ta ujeje kikira aisuja. Eto ari kajihera emina God ta ke pepeni poekari iraera.
GAL 5:24 Eto Iesu Keriso ta embomeni toho amina enanata hamo ta ujeje sasapura neite neite avo humbuto Keriso ta ji atahu ta teo irae ena
GAL 5:25 avoeto Ahihi Otohu ungotenau vasiri ikari embo amo ungotenau degi ta mihia avoeto amina ungotena tihi jigoja aisora.
GAL 5:26 Eto ungotena oenga “Na na” ijie jo mine kaja mane aisora eto embo nei ta donda te ari te avo kito uje ue tumo mane aisora.
GAL 6:1 Eto nau namei kamei, eto ungota embo vahai na ari sapura ururou hambuto kito hondate evu sapura avo toai. Eto avo hondate ue hini kambari na mane asoa te osari na hondate ue umo te tapa engekari ta veasoa kogue ejo.
GAL 6:2 Eto Keriso ta ke peni agi ari amo ungota ango bouka avo hondate mine ara ue umbuvujo.
GAL 6:3 Eto embo teho amina umo oenga embo peni ke ijie “Na na” aisuja amo umo oenga ere urumbihia,
GAL 6:4 te ungo vahai vahai na ungota ari do aingere avo inono ta sirikihe ari javotoho kito tunga javotoho ue embo nei ta ari mane urumbasoa,
GAL 6:5 amo embo vahai vahai amo amita pure simba ari embora.
GAL 6:6 Eto God ta ke ingari embo na amita ahe poekari embo hondate asi ue amita donda jajavotoho na unduresuja.
GAL 6:7 Eto embo na titiha ta ari nei ue God ta degi ke sokova eagora aingeko avojo, God na ari tapa be tapa amo kiaguja avoeto embo na ari do aisuja amita hajire avo ikau kesuja. Amo eingera,
GAL 6:8 eto embo na amita hamo ta uje sasapura ta ke agi ere uma hajire kesuja amo pehari na hambasuja rate embo na Ahihi Otohu ta ke agi ereuma Ahihi Otohu na vasiri be ikau humbuto vasiri datohote iresuja
GAL 6:9 avoeto ungote ari jajavotoho ari ta pegogo mane aisora te toae kaiketo ere uma iji tutumota be au pure ta be jajavotoho kesora
GAL 6:10 avoeto iji tapa daingeto ari javotoho asi jombure ue embomeni tapa ta degi aisora eto dombo be amo ungotenau Keriso humota vahai embomeni avo hondate aisora.
GAL 6:11 Eto na kikiva ari peni vahai be ingeni nau na ere kajihena erevi kivujo.
GAL 6:12 Eto ungo hamo kakamba ava ahe poekari embopo amo Keriso ji atahu ta pehena avo ahe poekahera te avo embo na ingito osaga memenga aro kiorote avo hotembihe Keriso ta ji atahu tiumbeto embo na kiagora hamo ta vasiri avo ahe ere poekihera
GAL 6:13 eto enana amo hamo kakamba eagorate God ta ke pepeni nei nei amo agi ae rate ungo na enana ta ke agi eto hamo kakamba ere ova avo embo na kito jakeka ara eagora.
GAL 6:14 Rate na amo ke nei do mane hande aisonate Iesu Keriso na ji atahu ta peheto vasiri te erena, ke avo pere dombo ke ijie hande aisona. Eto ke aita amo na enda ta ari sasapura amo nau degi ta mahu pehari irae arira.
GAL 6:15 Eto ke be amo hamo kakamba anote mane ano ke amo nau degi ta peni mane rate ke peni be amo na mahu pehari rate eha amo na vasiri daroho humbari embora.
GAL 6:16 Eto ungo ke avo ke be ari embomeni ta degi eto God ta embomeni tapa ta degi God ta peka te jo ari te ungota degi iroi.
GAL 6:17 Eto ke tutumota amo kitoho embo na tari pupuho hamo nau ta mihia amo na Iesu Keriso ta hajire avo mihia, avo ungona kiagova avoeto ungo nau degi ta osaga memenga nei ikavojo.
GAL 6:18 Eto nau namei kamei ungotenau Bada Iesu Keriso ta hondate ari ungota degi iroi, Amen.
EPH 1:1 Na Paul, Iesu Keriso ta apostero ana God na umbuna nanena ungo Iesu Keriso humota ue amita jo ta miheva embomeni ungota degi ahari erevi ere kajihena.
EPH 1:2 Eto God Mamo te Bada Iesu Keriso te ta hondate ari te peka te ungota degi iroi.
EPH 1:3 Eto ungotena Keriso ga kajueto vahai ehera avoeto God na uhu ta javotoho ari tapa ungotenau degi ta hande eaguja avoeto ungotenau Bada Iesu Keriso ta Mama God osa ue jakeka are.
EPH 1:4 Eto God na enda ove ae pekota ungotena osa ue amita Meni ga kajueto amita tihi ta embo sasapura irae ototohu ara siriketo umbuna.
EPH 1:5 Eto God na Iesu Keriso ta pure amina ungotena amita meniundi be ara jo tapa na ungotena humbasi uje ena avoeto ihikari ta nununga ena.
EPH 1:6 Eto God na ungotena hondate pajire be eto amita osa ari Meni avo ungotenau degi ta hande ikena avoeto ungote God jakeka are.
EPH 1:7 Eto ungotenau degi ta hande pajire be overekena amo Keriso ta orosa amina ungotenau ari sasapura ombuto humbuhe ungotena orekihie ari sasapura tapa hotembeto tona.
EPH 1:9 Eto God na amita kiari pajire be amina Keriso na ari do aisuja amo mahu ojikari mihahija te ungotenau degi ta hariketo tambu ena.
EPH 1:10 Eto ke ai ta amo God na iji inono ta donda tapa amita ingeni na ena uhu ta eto enda ta avo humbuto ikau enda vahai ari vahai eto irirou Keriso humbuto ikau heteto tihi jigesuja.
EPH 1:11 Eto God na amita hotembari mane toasuja te aisuja avoeto God na uje amita avo ihikari ta sirikena amo ungotena Keriso ga kajueto God ta toho ara iji ihikari ta sirikena
EPH 1:12 avoeto dago Keriso puvuroja kihi simba ere uahera embomeni na God jakeka erera.
EPH 1:13 Eto eha emo ungo tapa na God ta duru javotoho ingito Keriso ke be ere oreketo humbei amita embomeni eheva. Eto ungo God ta toho avo embomeni kiagora hajire ikena amo amita Ahihi Otohu ikasi oje ena avo ikehei ungota jo ta mihia.
EPH 1:14 Eto Ahihi Otohu ungotenau degi mihia avoeto ungotena ke be erera amo amita hotari ungotenau degi ikasi oje ena avo amite tapa ikau humbasora. Avoeto ungotena God ta embomeni avo ari sasapura na andirae teho iresora avoeto ungotena God jakeka ijiroro amita degi usasa puvuroi.
EPH 1:15 Eto ke be avoeto ungo Bada Iesu humota ue God ta embomeni osa ere ova ke avo nane ingito God ta degi osa ue
EPH 1:16 ungo embo pari kaiketo ijirono
EPH 1:17 Bada Iesu Keriso ta Mamo God usasa te na ungota degi Ahihi amita ikau God ta vasiri tapa harikihirou kiagova penunu erena.
EPH 1:18 Eto ungo God na siriketo umbuna embomeni ta uha hirikau God ta usasa kogue uhu i ta irari javotoho God na ikau humbasi simba miheva amo do aingere avo be kiagova pari erena. Eto javotoho ari God na amita embomeni ta degi ikaguja amite
EPH 1:19 eto God ta sovera ungotena God ke be ari embomeni ta jo ta pure ere ua amite tapa ungo be kiagova pari erena. Eto God ta sovera ungotenau jo ta pure ere ua sovera amina
EPH 1:20 Keriso pehari ta jiginu erenu humbuto uhu i ta ingeni be ta ikenu arumbeto mihie
EPH 1:21 tihi jigirikari embopo tapa uhu ta eto enda ta amita siro ta tihi jigihe mihia. Eto amita javo amo pajire be ra enda eha mihia ambota puvuresuja amita javo neite neite ainge manera.
EPH 1:22 Eto God na donda tapa be tapa humbuto Keriso na simba aja sovera iketo amita ekalesia ta tihi jigari embo peni aja ikena.
EPH 1:23 Eto ungotena God ta ekalesia amo Keriso ta hamora. Amita be amo Keriso donda tapa ari embo na ungotenau jo ta mihie enetaguja ainge dombo donda tapa ena amita jo ta iraguja.
EPH 2:1 Eto iji mahu amo ungo God agi ae ue ari sasapura eagova avoeto ungota Ahihi amo pehari mihahija
EPH 2:2 iji amikote ungo na enda ta ari sasapura ambo ambo ue uhu ta eto enda ta Ahihi sasapura ta ke agi ueva. Amo enana ta ke avo God uje ae embomeni na agi eagora.
EPH 2:3 Eto ungotena mahu kihi ta enana te tapa God uje ae embomenira avoeto hamo ta ujeje sasapura hotembari sasapura ta pambuhuma God na embomeni tapa ta degi tumo eto hajire ikau kesora avo ungotenamote tapa kiaehera
EPH 2:4 te God na ungotena osa peni vahai ue jo pajire enu
EPH 2:5 ungotena ke agi ae ore Ahihi pehari embomeni avoeto Keriso ga tapa jiginu vasiri te ereto mihera, avoeto amo God na ungo hondate eto umo oenga ari sasapura te pehari te oreketo ungo umbuna.
EPH 2:6 Eto avoeto Keriso uhu i ta tihi jigihe mihia ainge dombo ungotena Ahihi ehaha humbuto Keriso ga tihi jigihe mihera eto ari avoembo God na ungotena humbuto Keriso ga kajueto jiginu vasiri te erena
EPH 2:7 amo ungotena osa ue Iesu Keriso na hondate asi uje isapamane ena avo embo tapa na eha eto ambota kiagora ena.
EPH 2:8 Avoeto ungo kogova amo ari ungotenau na ae rate embo na umo oenga ari sasapura ta orekari inono ke mane ara God na embo amuna God humota ere ua avo hondate eto ari sapura oreketo humbaguja amo God ta hande avoeto embo ta degi ikaguja.
EPH 2:10 Eto ungotena amo God ta ingeni hajire Iesu Keriso ga kajueto ari jajavotoho ara mahu sirikena avo ara ungotena ove ena.
EPH 2:11 Eto ungo enda nei ta ingerekari embomeni ta degi ke erena ungo amo Judea embomeni hamo kakamba ari amina ungo hamo kakamba ae ke eagora ungota irari mahu avo hotembevujo.
EPH 2:12 Eto iji amite ungo Keriso ta javota horae avoeto God na siriketo humbari embomeni mane enda nei embora. Eto God na embomeni amita avo hondate asi oje ue noma kajena ke ai ta ungona horaera. Eto God ungota jota irae avoeto ungota degi ari javotoho puvuresuja avo ungo simba aera.
EPH 2:13 Te eha oroho amo Keriso na hamo amita na ungo ombuna avoeto ungo hoi ta iragova amina Iesu Keriso ta degi puvuto kajueto miheva.
EPH 2:14 Eto Judea embomeni te enda nei embomeni te mahu amo kitoho rate Keriso na hamo amita na hane timbenu irae enu peka ta humbunu seri kuru mine ara ue ere ova.
EPH 2:15 Eto Keriso na embo heriso javo oenga oenga avo humbuto amita jo ta embo vahai ara Judea ta ke pepeni neite neite amina andirari aravo bujeketo peka umbuna.
EPH 2:16 Eto Keriso ji atahu ta pehena amina kitoho irae enu embomeni heriso avo humbuto vahaita eto God ta degi ikena.
EPH 2:17 Avoeto erena amo Keriso na peka humbari ta duru javotoho enda hoi ta mihahera embomeni amita degi eto Judea embomeni auveto mihahera amita degi hande ena,
EPH 2:18 avoeto ungotena enda nei rete Judea rete amo Ahihi Otohu vahai amita sovera ari na God ta degi pari eagore ingioi amita jota pambagora.
EPH 2:19 Avoeto ungo enda nei embomeni amo kitoho embo javo nei mane ra te God ta embomeni be amita jeka hoka vahaira.
EPH 2:20 Eto God ta bande Otohu amo amita embomeni ra, tutuvi peroveta te apostero na hurukari aita gerikari mihia eto ungo enda nei embomeni te tapa na bande amita pokuatahu ere ova, eto bande amita tutuvi vahai pajire be amo Iesu Keriso na ere ua.
EPH 2:21 Eto amina huruketo turi turi eto mihoi amita hamota Bada God na amita bande Otohu gerikeoi sovera eto peni ereua.
EPH 2:22 Eto ungote tapa vahaita Iesu ga kajueto gerikagova God ta Ahihi na jo aita iraguja.
EPH 3:1 Eto na Paul ungo enda nei embomeni ta degi Keriso ta ke hande one humbuto tipura ta gosukehere mihena, na ke ungota degi kaehena avoembo God ta degi pari ereona.
EPH 3:2 Eto ungo ingiheva amo God na ungota degi ari javotoho puvuroja hondate amita na pure erevi nau degi ta ikena.
EPH 3:3 Eto God na ari erevi aisuja amita ke amo mahu ae ingae rate nau degi ta harikehei ingito ungo ingova kaehena
EPH 3:4 avoeto humbuto eheketo kogue Keriso ta ke mahu ojikari amita ke susu deire avo kaehena avo humbuto eheketo kivujo
EPH 3:5 amita ke amo God na embo ta degi mahu ae ingae rate eha amo amita Ahihi Otohu na apostero te peroveta te ta degi harikehei ingera.
EPH 3:6 Ke amo erevira, amo Judea embomeni na oenga ae rate enda nei embomeni te tapa na God ta degi javotoho ari humbasora, amo embomeni na Iesu Keriso ta degi ari javotoho umbara oje ena avo Judea te enda nei embomeni te na hamo vahai visi vahai eto humbasora.
EPH 3:7 Eto God na nau degi ta hande javotoho ikena amo amita sovera na amita duru javotoho hande ana amita pure embo umbuna.
EPH 3:8 Te na embo javote mane eto God ta embomeni tapa amita jo ta namo amo embo tehora te embomeni na Keriso ta degi ari javotoho be humbasora amita duru javotoho avo nane humbuto enda nei embomeni ta degi hande ana God na umbuna.
EPH 3:9 Eto God na daingeto embomeni oreketo humbuto tihi jigesuja amita ke mahu ojikari mihouva avo embo tapa na kiagora humbuto araha ereona. Eto uhu te enda te eto donda tapa ari God amina ke erevi mahu ojikena te
EPH 3:10 embo pepeni javote uhu i ta mihera amina kogue God ta ekalesia enda ta eha ere uhua aita God ta kiari pajire neite neite avo kiagora ere uhua.
EPH 3:11 Eto God na vasiri erevi aisuja amo mahu hotembena amo ungotenau Bada Iesu Keriso na ere ua erevira.
EPH 3:12 Avoeto ungotena humota ari na Iesu Keriso ga kajuari avoeto me kiae teho God ta degi horagora.
EPH 3:13 Eto na ungo avoembo osaga memenga kogue mihena avo hotembihe God toasi hotembavojo amo ungota degi ari javotoho puvuroja ereona.
EPH 3:14 Eto na ke erevi embo God Mamo, javo vahai embomeni tapa uhu ta eto enda ta amita javo ikerekari embo, amita tita ta paunge teteri eto humotepain eagona.
EPH 3:16 Eto God na amita usasa pajire be ai ta humbuto amita Ahihi na sovera ari ikau ungota hotembari jo ta sovera umbava God ta degi pari ereona.
EPH 3:17 Eto nei ungo humota ururovo Keriso na ungota jo amo irari bande amita ke ijie ai ta iroja pari ere ona.
EPH 3:18 Eto Keriso ai ta irirou ungote eto God ta embomeni tapa te amina Keriso ta osa ari pajire be rate heka doitokore avo ungona kiari haite avo pari ere ona.
EPH 3:19 Eto embo tapa na Keriso ta osa ari peni vahai avo tapa inono ta kiari inono ae rate ungota jo amo God ta Ahihi na eto God ta ari na enetaja pari ereona.
EPH 3:20 Eto ungote God ta degi do humbasi penunu arote mo ikau humbasi hotembaro amo God ta sovera ungotenau jo ta pure ere ua avoeto dembeto ikari haitera avoeto ungote ekalesia ta eto Iesu Keriso ta jo ta mihie God daroho ta jakeka are, amen.
EPH 4:1 Eto na Bada ta pure embo avoeto tipura eto mihena nane ungona ava erena amo God na ungo ehara ta jage eto umbuna iji te daingeto irova ena aingeto irova erena,
EPH 4:2 amo embo javote ke ijie “Na na” mane aisova, sausau ereto hini kambari mane aisova. Eto namei ta ari nei eto ururou kito mane urumbasova te osa mine ara evujo.
EPH 4:3 Eto Ahihi Otohu ta peka na ungo ajeketo pundurari iragova avo ungota jo tapa na simba evujo.
EPH 4:4 Eto ekalesia neite neite irae rate ekalesia vahai eto Ahihi Otohu vahai eto God na ungo iji puvurou kiagova jage ena amo vahaira.
EPH 4:5 Eto Bada vahai, humota ari vahai, bapataito vahai,
EPH 4:6 eto God amo embomeni tapa ta Mamo donda tapa ta Bada avoeto donda tapa eto embo tapa ta jota mihie pure eaguja.
EPH 4:7 Eto ungotena embo vahai vahai na Keriso hande ikari embo be amita degi Ahihi ta sovera ari oenga oenga hande eto umbera
EPH 4:8 amita ke amo einge kajari mihia, “Amina isoro eto dembeto i be ita vihito embomeni ta degi hande ikerekena,”
EPH 4:9 ke ainge mihia, eto Keriso na uhu i be ta vihina amita be amo Keriso na uhu i ta eto veto enda kovari jo ta vena.
EPH 4:10 Eto Keriso enda ta vena amina uhu i be ta vihito Ahihi amita na uhu te enda te tapa eneteto iraguja.
EPH 4:11 Eto Keriso na embomeni ta degi hande ikerekena amo nei apostero ara ikena nei peroveta ara ikena nei amo God ta ke hande ara ikena, nei God ta embomeni simba ara ikena eto nei embo ahe poekara ikena.
EPH 4:12 Eto hande ainge ikena amo God ta embomeni tapa na Keriso ta ke agi eto pure ue Keriso ta embomeni na ari jajavotoho ue pajirora ikena.
EPH 4:13 Avoeto ungotena na God ta Meni be avo kogue humota ue embomeni vahai eto pajito embo be eto Keriso ta hajire vahai aisora.
EPH 4:14 Eto ungotena meni isasaraho mane avoeto ahepoekari embo sapura puvuto embo kihi humbasi ke gamo poekasuja te ungote ai ta mane huhevasora
EPH 4:15 te ungotenau osa ari na ke be pere jigama ue Keriso ungotenau kihi humbari ke ijie ambo ambo ue ari amita na pajiresora.
EPH 4:16 Eto Keriso amo siro rate hamo uhu tapa amo ungotenamora. Eto ungotena osa mine ara ue pure eagora amo hamo ta vehu aingeko kaju ue pajiraguja.
EPH 4:17 Eto na Bada ta javota erena ungo God kiae embomeni amita ari avo ambo ambo avojo. Enana ta hotembari amo ke be mane
EPH 4:18 eto enana ta kiari amo mume ta mihera. Eto enana ta jo ngahia amina kiari irae avoeto enana God ta degi vasiri eha mane humbasora be ra.
EPH 4:19 Eto enana amo ari sasapura kaiketo asi uje isapamane eagora te me kiari avo irae ra.
EPH 4:20 Eto Keriso ta ahe poekari ai ta amo ari sasapura ainge amo iraera
EPH 4:21 te ungo amita ambotani ta degi ahe poekehere ingihava amo Iesu ta ke be avo pere ingihava.
EPH 4:22 Avoeto ungota irari mahu amo bo tongopate aingekora houketo gosukevu irae ai. Amo ungota hamo ta irari mahu na uje sasapura amita na umo oenga sari uija.
EPH 4:23 Eto evu God ta Ahihi Otohu na au ungota hotembari jo eha ururou
EPH 4:24 ari eha bo eha aingeko asuketo irivujo. Eto ari eha aita amo God ta tombu hajire vahai ai ta amo ke be te otohu te avo embo na kiagora.
EPH 4:25 Avoeto ke sokova tapa tovujo irae ai. Ungotena Keriso ta jo ta avoeto hamo visi vahai avoeto namei, Iesu ke be ari embo, amita degi ke be pere evujo.
EPH 4:26 Eto umo tumo ue kito amita tutumota ari sapura mane asoa te mume sihukae mihirou mahu iji te no tumo avo ejo irae ai.
EPH 4:27 Eto Satan na umo engekaguja na simba ejo.
EPH 4:28 Eto mahu pegene embo na ari avo toto ingeni amita na pure eto koro humbuhe ombari asari amita avo simba ue donda irae embomeni hondate aja evujo.
EPH 4:29 Eto isembari ta ke avo toto ke javotoho na pere deirami ijiro embo nei hondate aisuja avo pere evujo.
EPH 4:30 Eto ungo God ta toho amita hajire amo amita Ahihi Otohu ungota jo ta mihia avo kogue God na ungo vujekasuja iji puvuto ere hua avo ke be eagora avoeto ari deina eagove God ta Ahihi Otohu osaga kiaguja avo tovujo.
EPH 4:31 Amo jo memenga, ujeje sasapura, tumo sisire hini kambari boru jumbari, isembari ta ke avo pe te tovujo irae ururou
EPH 4:32 osa mine ara ue God na umo Keriso avoembo ari sasapura no avo hotembeto tona ainge dombo namei ta ari sasapura hotembeto tojo.
EPH 5:1 Eto ungo God ta osa ari meniundi avoeto God ta ari avo hamo eto evujo.
EPH 5:2 Eto Keriso na ungotena osa ue hamo amita avo God ta degi pene mune te avo ikihinu God na kito tunga javotoho ena avoeto ungota osa ari amina ungo tihi jigoja evujo.
EPH 5:3 Eto ungo God ta embomeni avoeto tiha pahia, sesena sasapura uje neite neite amina ungota irari javotoho avoeto ke sasapura eremina ungota degi mane ereto pajiresuja.
EPH 5:4 Eto nei ke tongopa ganini sasapura ainge amo ungona mane jigama aisova te God ta degi osa jakeka ari ta ke avo pere evujo.
EPH 5:5 Eto ungo kogova amo tiha paiha embo eto ari sasapura ari embo eto donda uje isapamane ari embo (amo donda na amita god eaguja) eto embomeni aingeko amina Keriso ta tihi jigari ta mane horeto God ta degi hotari humbasora.
EPH 5:6 Eto God ta ke agi ae ue ari avo ari embo ta degi God na tumo pajire be aisuja, avoeto embo amuna ungo ari sapura ainge ava ke sokova na jo kajasuja embo amita ke mane ingesova te
EPH 5:7 embomeni ainge avo tovujo oenga tinheto irore.
EPH 5:8 Eto ungo mahu mume ta irari embomeni rate Bada ta embomeni ueva amina usasa ta horiheva, avoeto usasa ta embomeni ta ari humbuto mihirovo
EPH 5:9 usasa ai ta amo be javotoho ekasuja amo ke sokova ai ta irae, ke be ari eto javotoho ari ekehija avo hambasova
EPH 5:10 avoeto ari deirami avo Bada na kito tunga javotoho aisuja avo pere evujo.
EPH 5:11 Eto mume ta ari amo be ambu avoeto ari ainge mane aisova te tovujo. Eto ari sapura evu araha ta puvurou embomeni kiore.
EPH 5:12 Eto enana ta ari ojikari ta eagora amo me kiari ta ari avoeto amita ke ijie me kiaehera.
EPH 5:13 Eto ari tapa humbuto usasa ta iketo kiagora amo ari amita tombu hajire be avo kiagora.
EPH 5:14 Amo usasa amina eoi ari tapa usasa eaguja amita ke amo einge kajari mihia, “Umo evari embo, pehari ta eto erao Keriso na no hamo ta gainhiro usasa aisuja”. Ke ainge mihia
EPH 5:15 avoeto irari ungota avo simba evujo, ungo kiae kiae embomeni mane ra, ungo kiari embomeni ra, irivujo.
EPH 5:16 Eto iji eha sapura avoeto ari jajavotoho deirami aisova avo jombure evujo.
EPH 5:17 Eto ungo uha irae embomeni na arako avojo te Bada na ungo do avo uje ere uo avo jombure evujo.
EPH 5:18 Eto ungo jae indito kava aisova amina ungo sapura aisuja avoeto ari avo toto Ahihi Otohu na ungo tihi jigoja simba evujo.
EPH 5:19 Eto ‘Psalms’ God ta ke ta kajari mihia amite eto haveni ototohu amite amita ke humbuto ke mine ara ijie jo tapa na Bada jakeka ijie evujo.
EPH 5:20 Eto Bada Iesu Keriso ta javota donda tapa eto ari tapa avoeto God Mamo ta degi osa evujo.
EPH 5:21 Eto ungo Keriso Otohu ere ova avoeto agi mine ara evujo.
EPH 5:22 Eto ungo airi na Bada ta ke agi eagova ainge dombo ungota ipone ta ke agi evujo.
EPH 5:23 Eto Kerisona hamo amita na ekalesia orekena avoeto tihi jigaguja ainge dombo ungo ipone na airi tihi jigivujo.
EPH 5:24 Avoeto ekalesia na Keriso ta ke agi eaguja ainge dombo ungo airi na ipone ta ke agi inono ta evujo.
EPH 5:25 Eto ungo ipone ta degi erena, eto Keriso na ekalesia osa eto hamo amita avo ikihe pehena ainge dombo ungota airi osa evujo.
EPH 5:26 Eto Keriso na amita duru javotoho eto amita bapataito ari umo amina amita ekalesia egeto hande javotoho be God ta degi ikena.
EPH 5:27 Eto ainge ena amo amita ekalesia amo sago kiari javotoho be sapura tongopa tapa irae donda javotoho be avo nau hande ra ijie umbuna.
EPH 5:28 Eto embo na ae osa eaguja amo hamo amita avo osa eaguja avoeto ungo embo na hamo ungota osa eagova ainge dombo ungota airi osa ava erena.
EPH 5:29 Eto ungo kogova amo embo na hamo tohota avo uje ae ari iraerate embo tapa na totohota hamo osa ue indari indie simba eagora, eto ari ainge dombo Keriso na amita ekalesia simba eaguja.
EPH 5:30 Eto ungotena amo Keriso ta hamo amita utukoho hamo uhu ra.
EPH 5:31 Eto God ta ke kajari ta amo ke einge mihia, “Eto embo na avoembo amita emamo toto pambuto ae ga kajueto amiga visi vahai aisuja”
EPH 5:32 ainge mihia te na kogona amo Keriso te amita ekalesia te ta timu hatirari ke rate
EPH 5:33 avo pere mane rate ungo ipone na hamo ungota osa eagova ainge dombo airi osa ururovo airi na ipone humota aisora amita ke ra.
EPH 6:1 Eto ungo meni isasaraho ungo Keriso ta toho avoeto emone mamone agi ari ta jaha mane aisova te agi aisova.
EPH 6:2 Eto God ta ke 10 Moses ta ikenu kajena ai ta ke vahai amo embo na agi ururou javotoho ari amita degi puvuroja God na oje ena amo erevira “No aja mama avo Otohu ue ke agi ejo” ke ainge mihia eto javotoho ari God na oje ena amo eingera
EPH 6:3 “Eto ke agi ururovo God na au irari javotoho ue iji koso enda ta iresova” ainge God na ijie oje ena.
EPH 6:4 Eto ungo emamo ta degi erena, amo ungota meniundi na ungota degi hini kambari eagora avo kaiketo mane isembasova te Keriso na embomeni ahe poekena ainge dombo ue oje kahihe ahe poekavo ari jajavotoho na pajirore.
EPH 6:5 Eto ungo embo nei ta ke agi ue pure ari embomeni ta degi erena amo ungota pure mamone amo Otohu ue ungota jo te tapa na enana ta ke agi evujo, amo ungona Keriso ta ke agi eagova ainge inono ta enana ta ke agi evujo.
EPH 6:6 Eto enana na ungo koguroro jakeka ari ta pure mane aisova te ungo Keriso ta pure ari embopo avoeto God ta uje avo jo tapa na eagova ainge dombo enana ta ke agi evujo.
EPH 6:7 Eto jo tapa na pure ngahia asi ue embo avoembo mane aisova te Bada avoembo asi hotembevujo.
EPH 6:8 Eto ungo kogova amo embo nei ta pure embo rete tohota pure embo re amo Bada na ari jajavotoho tapa kogue mine inono ta ikau humbasora.
EPH 6:9 Eto ungo pure tihi jigirikari embopo ta degi ke erena amo ari javotoho ainge amina ungota ke agi ari embopo ta degi evujo. Eto enana tasi ke mane aisova te tihi jigari embo enana ta eto ungota amo uhu i ta mihia amita tihi ta amo embo nei peni embo nei isapa ainge manera te embo tapa inono inonora.
EPH 6:10 Eto ke tutumota erena amo Bada ta sovera humbuto irivujo.
EPH 6:11 Eto Satan ta ke gamo ta degi isoro asi Bada ta ki emi te isoro donda te humbuto asevujo.
EPH 6:12 Amo ungotena embo visi te amita degi isoro ae rate mume ta tihi jigirikari Ahihi neite neite eto mume ta sovera neite neite amo Satan ta isoro ari embopo Ahihi sasapura ta irari degi ta isoro eagora amita degi isoro ereora
EPH 6:13 avoeto God ta ki emi tapa humbuto asuketo nununga evujo. Eto ari sapura puvuresuja iji te amo isoro ue mane veasoa te sovera ari humbuto heteto iresova.
EPH 6:14 Avoeto isoro embo na pupuri tigito eaguja aingeko God ta ke be jigito heteto irivujo, eto ungota jenge ta asukari amo javotoho ari na oreka aisuja.
EPH 6:15 Eto ungota utu goru amo God ta peka ta duru javotoho avo hembuhe hande asi uje evujo.
EPH 6:16 Eto God humota ari amo beha aingeko ungo oreka ururou Satan ta ki vevere te amina ikau puvuto ungo mane kajaro evekasova.
EPH 6:17 Eto ungo God na oreketo humbasuja amo ungota siro kope ainge hotembevujo eto God ta ke Ahihi Otohu na ikasuja amo isoro asivo aingeko avo ikau humbuto jigivujo.
EPH 6:18 Eto iji tapa ari tapa avoembo pari evujo amo Ahihi ta sovera na kaiketo pari ue siro pure eto God ta embomeni tapa hotembihe enana embo pari evujo.
EPH 6:19 Eto God na nau degi ta ke ikau ingito amita duru javotoho mahu ojikari avo joru ae ue embo ta degi hande ana pari evujo.
EPH 6:20 Amo na amita ke hande ari embo ‘Chain’ na tigere mihena te na embo joru ae ue sovera ari humbuto ke hande ana God na pari avo uje ere ua.
EPH 6:21 Eto Bada ta ke agi ari embo javotoho ungotenau namei Tychicus amina ungota degi pambuto ke nau eto ari nau na do ereona amo amina au ingesova
EPH 6:22 avoeto ungota degi ikano pambuto dagota ke avo au ingito sovera ari humbasova.
EPH 6:23 Eto God Mamo te Bada Iesu Keriso te na ungo namei kamei ekalesia tapa ta degi pekari te osa ari te humota ari te avo ikaro humbasova
EPH 6:24 eto jo tapa na Bada Iesu Keriso osa eagora embomeni amita degi God ta hondate ari iresuja.
PHI 1:1 Eto na Paul te Timothy te amo Iesu Keriso ta pure ari embopo na ungo God ta embomeni Keriso ga kaju ari da Philippi ta miheva amite ekalesia ta tihi jigirikari embopo te hondate ari embopo te tapa ungota degi ahari erevi ere kajihera.
PHI 1:2 Eto ungotenau Mama God te Bada Iesu Keriso te enana ta hondate ari te pekari te ungota degi ikasora.
PHI 1:3 Eto na ungo hotembihe God ta degi osa ue
PHI 1:4 iji tapa ungo embo God ta degi pari eagona amo tunga javotoho be ue pari eagona
PHI 1:5 amita be amo ungona na ihiketo Keriso ta duru hande ea iji te eto puvuto eha oroho emite amo ungo na na hondate ue God ta duru javotoho embo ta degi hande ere ovova.
PHI 1:6 Eto na be kogona amo ungota jo ta amita pure ihikena embo God na pure javotoho avo mane toasuja te ungota jo ta pure ere uma Iesu Keriso ta puvurari ijite pure irae aisuja.
PHI 1:7 Eto amo ke be eto mahainge na ungo hotembihone jo eaguja amo pure nau God na ikena ai ta ungona kajueto ere ova amo na arahata mihie enda ta hembuhe ke sapura peikihe God ta duru javotoho avo hande ere uaehena amite eto eha tipura ta mihena emite amo ungona na hondate ere ova avoeto ungo osa ere ona.
PHI 1:8 Eto ke erena emita be amo God na ere kogua amo na Iesu Keriso ta jo ari na ungo osa peni vahai ere ona.
PHI 1:9 Eto ungota degi God kiari te ari sirikari te osa ari te ainge avo pajito inono ara God ta degi pari eagona
PHI 1:10 amo ungona ari jajavotoho davore avo be kiagova pari ere ona. Eto ari ainge avo ungota degi inono aro Keriso puvuresuja iji te amo amina ungota degi sapura nei do mane hambasuja.
PHI 1:11 Te Iesu Keriso ta ari jajavotoho amina ungota irari eneteto inono au kogurou God ta degi usasa te peka te puvuresuja.
PHI 1:12 Eto nau namei kamei, ungo be kiagova uje ere ona amo osaga memenga nau degi ta puvija amo God ta duru javotoho hande ari ta pure avo peni aja puvija.
PHI 1:13 Amita be amo na Keriso ta pure ari embo avoeto na tipura ehena avo tipura ta simba ari embopo te embomeni tapa eita mihera amite tapa amina na kiarira.
PHI 1:14 Eto na tipura ta mihena te ungotenau namei kamei na na kogue joru ae rate Bada ta degi hamo ta sovera ari humbuhe embomeni ta degi duru javotoho hande ere ora.
PHI 1:15 Eto ke nei amo embo nei uhoho na Keriso ta ke hande ere ora amo hini kambari na ere orate nei uhoho amo osari tunga humbari amina ke hande ere ora.
PHI 1:16 Eto enana osa ari na God ta ke hande ere ora embomeni amina na God ta ke avo simba ue hande ana God na umbuna amo embomeni amina kiari ra te
PHI 1:17 embo nei uhoho amina ungo oenga embo peni asi ue Keriso ta ke amo jo te tapa hande ae rate hamo na hande ere ora amo na tipura ehena avoeto nau degi ta osaga hamota hamota puvuroja ari ainge amo ere ora.
PHI 1:18 Rate ari ainge amo tehora. Embo nei amo ke sokova na hande ore embo nei amo ke be na Keriso ta ke hande ere ora te embomeni na Keriso ta ke hande ore embo na ere ingihera avoembo na tunga javotoho ere ona.
PHI 1:19 Eto na kogona amo ungota pari te Iesu Keriso ta Ahihi ta hondate ari te na aro tipura toto arahata pambasona avoembo humota ari ke be na osa osa te mihena
PHI 1:20 eto na jo tapa na uje ereona amo pure nau mane toasona te sovera ari inono ta humbuto eha oroho eto ambota amo vasiri te ironote pehano amo pure nau avoembo embomeni na Keriso otohu ue jakeka aisora.
PHI 1:21 Amita be amo na eha vasiri te iresona amo Keriso avoembo iresona rate Keriso vahai amita javota pehasora amo nau degi ta javotoho pere puvuresuja.
PHI 1:22 Avoeto pehanote vasiri te mihie pure javotoho nei anote, na do asona amo na be kiaera.
PHI 1:23 Jo nau amo herisora, eto na nau vasiri toto pambuto Keriso ga mihie irari javotoho humbasi uje ere ona.
PHI 1:24 Rate na uje nau avo toto ungo avoembo hamo te visi te ei ta iresona
PHI 1:25 eto na kogona amo ungota tunga javotoho ari te God humota ari te na peni vahai aja ungote iresona.
PHI 1:26 Eto na ungote mihirono ungo Keriso ga kajuari ai ta namo avoembo tunga javotoho ari pajire be humbasova.
PHI 1:27 Eto ke peni be amo Keriso ta ahepoekari avo kogue inono ta irivujo. Eto na ungota degi pambuto ungo kionote mane kiono ungo na jo vahai eto ari vahai na heteto God ta duru javotoho avo ke be ijie ari sasapura ta degi isoro ereova ke avo ingesi uje ere ona.
PHI 1:28 Avoeto ungota kitoho embo joru mane aisova te sovera ari humbuto ijirovo enana na kito ungona dembihirovo enana veasora avo ke be aisora amita be amo embo na dembari inono ae rate God na au dembasuja.
PHI 1:29 Eto ungo na Keriso ta pure ava God na umbuna amo ungota ke be ari amina pere mane rate ungota memenga osaga kiari amina Keriso ta pure ere ova.
PHI 1:30 Avoeto namoga kajueto isoro evujo. Amo isoro nei mane rate da ungota ta one kogueva eto oroho eagore ingagova isoro vahai aravora.
PHI 2:1 Eto ungo Keriso ta jo ta mihie amita degi sovera humbuhe amita osa ari na ungo simba eoi Ahihi Otohu ga tatapeketo ue ungo na namei jo eoi hondate mine ara eagova
PHI 2:2 kito na tunga javotoho be ana eto ari erevi aheva avoeto avo erena amo ungo hotembari vahai osa ari vahai eto jo vahai ue
PHI 2:3 ungo oenga embo pepeni ke ijie na na mane aisova te meni isapa sira ue ungo amo embo isapa embo nei amo embo peni ke ijie
PHI 2:4 ari ungota pere mane hotembasova te embo nei ta vasiri amo ke be ke ijie irivujo.
PHI 2:5 Eto Iesu Keriso ta ari avo eto hamo asova amo erevira:
PHI 2:6 Iesu amo God ta ari vahai rate vuvure amita na God ga inono asi ae
PHI 2:7 rate uje amita na amita embo peni ari avo toto embo ta agi ari embo ta ari umbuna, amo embo ta hamo visi avo humbuto embo ena.
PHI 2:8 Eto amina meni isapa sira eto God ta ke agi ere uahija rate amo embo be avoeto ji atahu ta pehena.
PHI 2:9 Avoeto God na jiginu erenu humbuto i be i ta ikenu arumbenu javo peni be ikena, amo javo tapa tapa ta hamota avo ikena.
PHI 2:10 Avoeto embomeni tapa uhu i ta eto enda ta eto enda hota amina paunge teteri eto Iesu jakeka ijie
PHI 2:11 Iesu Keriso amo ungotenau Bada peni be ke ijiroro God Mamo hena ta usasa pambasuja.
PHI 2:12 Avoeto nau tunga humbari embomeni, na ungote mihene ke nau agi ueva te na ungote irae iji te peni be amo ke nau agi evujo. Eto ungo God otohu ue iji tutumota oreketo umbaja segigite jopapa te tapa ohare mamare ue pure evujo.
PHI 2:13 Amo God ta uje eto amita pure avo aisi uje ava God na ungota jo ta mihie pure ere ua.
PHI 2:14 Eto ungo kupi ambu ue boru jujune ke toto ari tapa avo evujo.
PHI 2:15 Eto ungo ari sasapura tehon tahon ari embomeni ga enda ta mihie God ta meniundi eto ari sasapura toto pehumba ari haite mane tongopa ambu irivujo. Eto kuro hunjara na uhu i ta usasa eaguja ainge arako ue enda embomeni ta usasa ue God ta vasiri eha ikari ta ke avo hande evujo.
PHI 2:16 Eto ainge ere uma Bada ta puvurari iji te amo nanena ungo kogue pure ngahia ea amo aijaja ae rate be uena avo na kito tunga javotoho aisona.
PHI 2:17 Eto orosa nau amo ungo God humota ari amita hamota God ta degi pene overekanote asona amo na kiae rate orosa nau overekasona kito amo ungote namote tapa tunga javotoho aisona.
PHI 2:18 Avoeto namoga tapa tunga javotoho evujo.
PHI 2:19 Eto Bada na uje au kito na ungota duru au ingito sovera humbasi Timothy ungota degi sausau ikano pambaja uje ere ona.
PHI 2:20 Eto eita amo Timothy na vahai namote ungo osa ue ere hotembihia.
PHI 2:21 Te embo nei tapa amina Iesu Keriso ta pure hotembae ue ungota ujeje avo pere hotembagora.
PHI 2:22 Eto Timothy amo pure ari embo javotoho amo ungo tapa na kiarira eto amite namote amo mamo te meni te na arako God ta duru javotoho avo amiga vahai ta pure ere ovora amo ungo mahu kiarira.
PHI 2:23 Avoeto na nau degi ta ari do puvuresuja avo kihi kito Timothy ungota degi ikano pahurou
PHI 2:24 na humota ere ona ambota Bada na uje aisuja kito namote tapa ungota degi sausau pambasona.
PHI 2:25 Eto ungona na hondate aja ikiheva embo Epaphroditus amina namoga Keriso ta ke na isoro ue pure ere ova te ungotenau namei avo ungota degi ikano pambasuja
PHI 2:26 amo ambure ena avo ungona ingiheva avo ingito osaga kogue iraguja avoeto ungo sausau pambuto kesi uje ere ua.
PHI 2:27 Eto amo ambure humbuto sari ari ahumpa be rate God ta jo ari amita degi eto nau degi ta avoeto enu kojena te sari aehija amo namote tapa na osaga pajire be kiaehena,
PHI 2:28 avoembo na uje ere ona amo Epaphroditus ikano pambau ungo kito tunga javotoho ururovo osaga nau irae aisuja.
PHI 2:29 Avoeto ungotenau namei avo jo tapa na peketo umbuvujo. Amo ungo na na hondate ari inono ae rate amo ungota hondate embo amina Keriso ta pure ue pehari ahumpa ehija avoeto embomeni aingeko avo osa be evujo.
PHI 3:1 Eto nau namei kamei, ke tutumota erena amo ungo Keriso ga kajuari avoeto tunga javotoho ue osa evujo ke ainge amo mahu ehene ingihava amina ungo simba eaguja ke avo na me kiae rate ehako erena.
PHI 3:2 Eto enana hamo jeto kakamba ue embo tapa na ainge ara ahe poekari embomeni amo sapura be avoeto be kivujo amo ino sasapura aingeko donda sasapura ta pambagora.
PHI 3:3 Te hamo kakamba ari embo be amo enana na ae rate ungotenanena eagona, amita be amo ungotena Iesu Keriso ga kajueto tunga javotoho ue amita Ahihi ta sovera na God jakeka eagora eto hamo ta vasiri amo humota mane eagora.
PHI 3:4 Eto ungo kogova, hamota ari amo nanena humota ere uaehena avo eha ahena amo embo nei na hamo ta ari humota eagora te nane ereuahena ainge manera amo erevira.
PHI 3:5 Eto na aja na humbunu iji 8 irae enu hamo nau jeto kakamba ea, eto na Judea ta ohihi vahai Benjamin ta javo vahai avoeto Israel embo be, eto vuvure nau ta amo Hebrew embomeni ta orosa na pere mihia. Eto na Pharisee embo avoeto Judea ta ke pepeni tapa inono ta agi ere uaehena.
PHI 3:6 Eto nau ohihi ta ari avo simba asi uje peni vahai ue Keriso ta ekalesia avo teo osaga memenga isapamane be kia avoeto embo na ke pepeni tapa agi eto God ta tihi ta embo jajavotoho ahera amo nanena vahai ahena.
PHI 3:7 Rate ari ainge tapa amo Keriso ta degi ari javotoho humbasi toa
PHI 3:8 eto ari avo pere mane rate ari nei tapa amo be ambu ke ijie Iesu Keriso nau tihijigari embo avo be kesi ari nei tapa toa amo ari nei tapa amo indari ta soka aingeko avoeto gosukeo pambunu irae ena te Keriso vahai avo nau degi ta iroja simba ue amiga kaju eto mihena.
PHI 3:9 Avoeto na ke pepeni neite neite simba ari amina ke sokova ta javotoho ari umbae rate javotoho ari be amo Keriso humota eto humbagora amo God na humota ari nau kito embo javotoho ke eaguja.
PHI 3:10 Eto nau degi ta ke dombo be amo na Keriso ta degi kiari humbuhe amina peheto vasiri te erena amita sovera avo be kesi uje eto amina hamota memenga kina ainge dombo nanena kogue amita pehari ta amiga embo vahai ue
PHI 3:11 Keriso vasiri te erena aingeko God na na jigou vasiri te erasi simba ereona.
PHI 3:12 Eto na ari avo mahu humbari inono ari ke mane asona te ari avo nau be aja uje ue dembasi ere huhevihena, amo na Keriso na humbei amita toho ere ona avoeto dembasi ere huhevihena.
PHI 3:13 Eto nau namei kamei, eha oroho amo na dembae rate ari nau amo eingera, na nau ku hena ta do mihia amo mahu jenete eto tihi buju ta do mihia avo hambasi ere pambuhona.
PHI 3:14 Amo siro kope javotoho avo nau be aja vasiri na ere huhevihena, eto siro kope javotoho amita be amo Iesu Keriso avoembo God na vasiri eha ikau humbuto iresona.
PHI 3:15 Eto ungotena meni isasaraho mane rate God ta kiari humbari embomeni be avoeto hotembari vahai erena erevi evujo eto hotembari avo be hotembae asova amo God na harikau be kesova aingera.
PHI 3:16 Rate dombo be amo ungotena God ta ke ingito agi ereovora vahai avo mane toasora te agi mahu ainge aisora.
PHI 3:17 Eto ungo nau namei kamei ta ahe kihira ere ona avoeto dago ungota ahekihira ari embo be avo ungona kogue ambo ambo evujo.
PHI 3:18 Eto ke nei erevi kaikari ungota degi erena eto ehako tihi sisivu te tapa erena ingivujo eto ke amo embo nei uhoho amita irari nei sapura amina Keriso ji atahu ta pehena amita kitoho embopora.
PHI 3:19 Eto enana ta hamo ta ujeje amo enana ta God ra amina Satan memenga kesuja degi ai ta memenga daroho kesi ere pahora. Eto enana na me kiari ta ari amina siro peni ue enda sapura emita ari avo pere hotembagora.
PHI 3:20 Rate ungotenamore uhu i ta irari embomeni ra avoeto Bada Iesu Keriso ungotenau orekari embo uhu i ta eto puvuresuja avo jo tapa na kesi simba mihera.
PHI 3:21 Amina donda tapa be tapa avo vahaita toreketo tihi jigihe mihia avoeto sovera amita na ungotenau sari ari hamo avo au amita hamo usasa te ainge dombo eto sari mane aisuja.
PHI 4:1 Avoeto nau namei kamei eto nau tunga humbari embomeni eto na ungo hotembeto osa ue na ungo ehako kesi uje ere ona. Eto ke ere kajihena avo eheketo kogue daingeto Bada ta javota heteto iresova avo ungo be kivujo.
PHI 4:2 Eto ungo evohu Euodia te evohu Syntyche te ta degi erena amo ungo Bada ta jo ta mihie jao tahe ue tunga vahai evujo.
PHI 4:3 Eto umo nau pure vahai embo javotoho amina evohu heriso avo hondate ejo, eto enana amo namoga pure ngahia ue God ta ke avo hande uera amite eto embo Clement amite eto embo nei uhoho amite tapa pure uera amita javo amo God ta book javo vasiri aita kajari mihia.
PHI 4:4 Eto ungo Bada ga kajueto iragova avoeto tunga javotoho evujo, eto ke ehako erena amo ungo tunga javotoho evujo.
PHI 4:5 Eto Bada puvuto ere hua avoeto embo tapa ta degi tunga humbari ke avo seima eto evujo.
PHI 4:6 Eto ari nei mane hotembasova te jote hotembari te na God osa ue ungota ujeje avo ikau humbasi penunu evujo.
PHI 4:7 Eto God ta peka amo embo na kiari inono ae rate amina ungo Iesu Keriso ga kajueto miheva embomeni amita jo te hotembari te avo simba aisuja.
PHI 4:8 Eto nau namei kamei ke tutumota amo ari javotoho jakeka ari haite avo pere hotembevujo. Ari ainge amo ke be ari donda te otohu ari te ke be ari te javotoho ari te ari sapura irae amite sago kiari te ari javotoho kito osa osa ari te tapa ainge avo be hotembevujo.
PHI 4:9 Eto ke nau eto vasiri nau na ahe poekihane kogueva avo eto kito ururovo peka ikari God amo ungota degi iresuja.
PHI 4:10 Eto ungo iji koso amo ungona na hotembihe iragova amo nau degita hande ikari inono ae rate eha iji tutumota amo nau hande ikeheve humbena avoeto Bada ta javota ungo osa ere ona.
PHI 4:11 Eto nau degita do mihia amo inono ke ijie mihovona te na koro uje ue ke ae ra te
PHI 4:12 na ke erena amo do ojikarire avo nane vahai kiagona amo nau degi ta donda iresuja eto irae amo na mahu hamo arira eto indari ijite eto beuje ijite donda iresuja ijite eto donda irae ijite amo na mahu hamo ngahia ari ra
PHI 4:13 eto ainge eagona amita be amo Keriso na sovera ari ikeoi umbagona avoeto ari tapa amo nau degi ta inonora.
PHI 4:14 Te ungona nau osaga avo kito koro hande ikeheva avoeto tunga javotoho be ere ona.
PHI 4:15 Eto na da Macedonia toto Iesu ta duru javotoho hande asi pambasi uo ekalesia nei nei na namote kaju ae rate ungo Philippians ekalesia vahai na namoga hande mine ara asi kaju ueva avo ungo kiari.
PHI 4:16 Eto iji nei nei ainge na da Thessolonica ta pambuto mihie ujeje kogone ungo na na hondate ueva.
PHI 4:17 Eto na hande humbasi ue ke ae rate na ungota hande ta be avo puvurou umbava uje ere ona.
PHI 4:18 Eto nau hande peni vahai ikeheva amina nau uje amo dembehija avoeto ere kajihena erevira, kivujo. Eto ungota hande ikeheve embo Epaphroditus na humbuto puvija amo hande mune te avo ikeheva avoeto God na osa ere ua avoeto na inono be ra.
PHI 4:19 Eto nau God na haja vaja usasa te Iesu Keriso ta jo ta mihia avo humbuto ungota degi ikau humbuhurovo ungota ujeje tapa irae aisuja.
PHI 4:20 Ungotenau God Mamo ta degi usasa daroho iresuja, Amen.
PHI 4:21 Eto God ta embomeni amo Iesu Keriso ta toho avoeto ere pekihena eto ungotenau namei kamei namote mihera amina ungo ere pekihera
PHI 4:22 eto God ta embomeni tapa da eita mihera amite eto Rome ta tihi jigari embo Caesar ta bande ta pure embopo amite tapa na ungo ere pekihera.
PHI 4:23 Eto ungotenau Bada Iesu Keriso ta hondate ari amo ungota degi iresuja.
COL 1:1 Na Paul God ta uje avoeto Iesu Keriso ta apostero namote eto ungotenau namei Timothy te na
COL 1:2 ungo God ta embomeni da Colossae ta mihie Keriso humota ereova amita degi ahari erevi ere kajihena. Eto ungotenau Mama God na hondate ari te peka te ungota degi ikasuja.
COL 1:3 Eto dagona ungo embo iji tapa pari ue ungotenau Bada Iesu Keriso ta Mamo God avo osa eagora
COL 1:4 amo ungona Bada Iesu Keriso avo humota ue God ta embomeni tapa avo osa eagova amita ke avo ijiore ingiora.
COL 1:5 Eto God ta duru javotoho ai ta amo ungota degi do puvuresuja amita ke amo ungona kihi ingito donda javotoho avo hotembihe God osa eto humota ueva donda amo uhu ita ungota javota nununga ari mihia.
COL 1:6 Eto duru javotoho sigeto eneteto enda tapa ta pahua ai ta amo embomeni na javotoho ari neite kainte humbuhovora. Eto God ta hondate ari amita ke be avo kihi ke ingari iji ta eto puvuto eha oroho amo ungota eto enda tapa ta be eketo veto ereto peni vahai ere ua.
COL 1:7 Eto ungotenau namei eto pure vahai embo Epaphras amo dago hondate eto ungota degi Keriso ta pure ena amina God ta hondate ari avo ungota degi ari ingari.
COL 1:8 Eto amina ungota osa ari Ahihi Otohu na hande ikenu umbava amita ke avo ehei ingito
COL 1:9 iji tapa ungo avoembo pari eagora amo God na ungo ari tapa do ava uje ere ua avo Ahihi Otohu na amita kiari peni be ungo ta degi ikau humbuhe be kiagova pari ere ora.
COL 1:10 Eto ungona ari tapa deirami humbuto irova Bada na uje ere ua avo humbuto God ta kiari na pajito ari jajavotoho neite kainte ururovo God na kito osa aisuja.
COL 1:11 Eto God na amita sovera usasa te avo ikau ungona sovera ue osaga kiari iji te amo mane veasova te ngahia eto iresova. Eto God ta embomeni na hoteto humbasora donda avo amina amita tihi jigari degi aita simba ue mihia eto God na ungo donda avo humbari haite aisova jo ungota ta pure javotoho ena avoeto God osa ue tunga javotoho aisova pari erera.
COL 1:13 Eto ungotenau jota pure javotoho ena amo God na ungotena mume ta sovera amina tipura embo na irarako ue mihahera avo oreketo humbuto amita osa ari Meni ta tihi jigari degi ta ikenu horea.
COL 1:14 Eto God ta Meni na ungotenamo avoembo pure ena amo ungotenau ari sasapura na andirari avo vujekenu tambu ta pahuo ari sasapura avo hotembeto tona.
COL 1:15 Eto God amo embo ta tihi na mane kiagorate Keriso amo God ta tombu hajire vahai avo kiagora. Eto God na amita Meni avo vahai kihi iketo donda tapa amo ambota ikena amo Keriso ta hu ta ikena.
COL 1:16 Eto donda tapa uhu ita eto enda ta, eto donda kiari haite eto kiari haite mane amo ahihi neite neite sovera te eto embo pepeni te tihi jigirikari embopote ahihi pepeni tapa amo God na Keriso na hondate unu amiga ena amo Keriso avoembo ena.
COL 1:17 Eto donda tapa irae pekota amo Keriso na mihahija eto donda tapa amo Keriso ta jota mihia amo amita irari degi be avoeto.
COL 1:18 Eto God ta ekalesia ta ohoruta amo Keriso mihia avoeto ekalesia ta vasiri amo Keriso ta degi humbagora. Eto God ta Meni bugo Keriso amo donda tapa amita tihi jigoja pehari ta jiginu vasiri te erena.
COL 1:19 Eto God na umo oenga siriketo amita Meni ta degi amita tombu eto hajire eto ari vahai avo ikena.
COL 1:20 Eto God na donda tapa iketo tona avo amita Meni na Mamo ta toho aja ue amita Meni ikenu ji atahu ta peheto peka humbunu donda tapa uhuta eto enda ta amo God ta degi egerembea.
COL 1:21 Eto ainge dombo iji mahu amo ungona ari sasapura te hotembari sasapura te amo God ta kitoho avoeto hombekari inono aera.
COL 1:22 Te God na amita Meni ta pehari amina ungote namei eto God ta eto embota tihi ta pehumba ambu ungota ari sasapura irae eto tongopa ambu otohu embopo ainge irova humbuto amita jota ere ikihia.
COL 1:23 Eto ungote tapa aita horari haite asova te ungo Keriso ta duru mahu ingito ke be ijieva avo be na jigito turi eto heteto humota ue mane ejekasova te aita heteto irivujo. Eto na Paul duru javotoho hande ari embora eto duru amina sigeto eneteto enda tapa ta pambuhoi embomeni tapa na ere ingihera.
COL 1:24 Eto na ungo embo osaga memenga hamo nau ta kogue mihena avoeto na tunga javotoho ereona. Eto ekalesia amo Keriso ta hamora avoembo osaga memenga kina aita osaga memenga nau amo kaju ano inono aisuja.
COL 1:25 Eto God na ungota degi ari javotoho puvuroja amita ke sinderi te avo na ungo ekalesia ta degi hande ana God na umbuna.
COL 1:26 Eto embo mahu mihahera amita degi God ta ke ojikari mihouva avo nanena harikano ungotena amita embomeni ototohu na ingora na humbija.
COL 1:27 Eto God na ke mahu asi sirikena amo God na ke javotoho mahu asi sirikena amo embo ta degi ojikari iraguja avo ungo enda nei embomeni ta degi ere harikihia ke amo Keriso na ungota jota iraguja avoeto ungo tapa God ta usasa ta horasova.
COL 1:28 Avoembo embo tapa ta degi Keriso ta ke hande ere ora. Avoeto kiari neite neite ojekahari neite neite na embo ahe poikihiroro Keriso ga kajueto kiari na pajito embo ainge eto God ta degi horasora avo ahe ere poekihera.
COL 1:29 Eto pure erevi asi ue amo kupi ambu ue Keriso na vasiri te sinderi na pure ana nau jota sovera ere ikihia amina pure erevi sove sove eto ere ona.
COL 2:1 Eto ungo te da Laodicea embomeni te eto embomeni isapamane amo nau tombu kiari eto nei kiae rate ungo avoembo pure ngahia eagona avo ano ingova uje ere ona.
COL 2:2 Eto ari ainge eagona amo ungona osa ari na embo vahai jo vahai ue siro pure ue God ta ke avo kito kogo ue tupo embo ainge ue God ta ke mahu ojikari avo be kiagova eagona.
COL 2:3 Eto ke erena amo Kerisora amita jota amo God ta kore ari dombo be avo mihia.
COL 2:4 Eto na ke erevi ungota degi erena amo embo na ungota degi ke gamo poekagora avo ere haekihena eto ungona enana ta ke mane ambo ambo aisova.
COL 2:5 Eto ke be amo na ungota degi irae rate jo nau ungota degi mihia eto ungo Keriso humota ue jo vahai na heteto miheva avo kogue tunga javotoho ere ona.
COL 2:6 Eto Keriso na ungota Bada eto ungo tihi jigoja umbeva avoeto amiga kajueto ambo ambo evujo.
COL 2:7 Eto ji peni amita susu enda hu ta ikeoi veaguja aingeko Keriso ta ari na pajito ungo ke mahu ingihava avo ambo ambo ue humota ari na sovera humbuto mihie osa pajire be evujo.
COL 2:8 Eto enda embo ta kiari amo ohihi ta degi eto Anera sasapura ta degi puvaguja amita be irae amo Keriso ta ahe poekari mane avoeto amina ungota hotembari andioi sapura eaguja avoeto kiari ainge avo be tovujo.
COL 2:9 Eto Keriso enda ta puvuna amita jo ta amo God ta ari eto amita hajire tapa avo mihia.
COL 2:10 Eto Keriso amo uhu te enda te amita ahihi tapa sovera te amita tihi jigari embo rate ungona amiga kajueto vasiri be avo amita degi humbuto miheva.
COL 2:11 Eto ungo amo Keriso ga kajueto hamo ta kakamba humbari embomeni be ra. Eto kakamba amo embo ta ingeni na ae rate Keriso na ena, amita be amo ungo ta hamo ta ujeje ta tihi jigari sapura amo mahu tiukenu irae ena avoeto ari sasapura amo ungota degi sovera ambura.
COL 2:12 Eto ungo bapataito ueva ai ta amo ungo Keriso ga kajueto use ta horeto God ta sovera avo humota ururave amina ungo Keriso ga tapa jiginu vasiri te ereto mihovova.
COL 2:13 Eto iji mahu amo ungo enda nei embo God ta ke pepeni umbae embomeni avoeto ari sasapura na ahihi pehari embomeni rate God na Keriso te ungote tapa ta degi vasiri eha ikena. Eto God na ari sasapura ungotenau tapa avo hotembeto toaguja.
COL 2:14 Eto ungotena amita ke isasaraho te pepeni te tapa ungotenau vasiri tapa avo simba ara ikena te ke tapa avo agi ae ue peive eagora te God na avo hotembeto toto ke tapa avo humbuto Keriso ta ji atahu ta hamo ta teto enu irae ena.
COL 2:15 Eto ji atahu ai ta amo Keriso na ahihi sasapura neite neite sovera te amita degi isoro eto dembeto enana avo amita tipura embo ke ijie enana avo tunga ta tigito humbuto embo tapa ta tihi ta pahunu kito Keriso jakeka ea. Eto embona ungo pehumba ue
COL 2:16 ungona iji ototohu rete hariga eha ta pondo rete jangu indari iji rete amita ke pepeni neite neite avo agi ava aisora avo ingito ingarako evujo.
COL 2:17 Ari tapa ainge amo ke be mane teho aririvo ainge rate ari be amo ambota puvurou kesova. Eto ambota kesora amo Keriso avo kesora.
COL 2:18 Eto embo nei na ehure ta ari neite neite kiaguja avoeto ungo tihi jigesi ke ijie meni isapa sira eto ari sokova ue Anera neite neite jakeka ava ahe poekaguja embo avo be tovujo, eto embo ainge amita ke amo be mane sokova amina keniga eaguja.
COL 2:19 Eto Keriso amo ungotenau siro rate enana na amita ke avo mahu egikari ra te Keriso ta tihi jigari be amo ungotena Keriso ta hamo amina indari javotoho be Keriso ta degi humbuto indie vasiri javotoho ue God ta simba ari na javotoho pajiagora.
COL 2:20 Eto ungo enda ta hotembari neite neite mahu agi ere uaeheva te ungo Keriso ga pehari avo God na ere kogua avoeto enda ta hotembari na ungo ehako mane peika tika aisuja te ungo do avoembo embo javotoho asi enda emita ari peni ke ijie mihove? Eto do avoembo enda ta ke pepeni neite neite amo agi eagove?
COL 2:21 Eto embomeni na ke einge eagora amo, “Donda mane hame asoa,” eto, “Donda amo mane indesoa,” eto, “Donda amo mane jigesoa,”
COL 2:22 ke ainge eagora amo teho enda ta donda jigama eoi irae eaguja amita ke ra eto ahe poekari ainge amo teho enda embo ta ahe poekari ra.
COL 2:23 Eto nei amo ari ainge amo enda embo ta be kiari na arako amina humotepain sokova sakova ara engekagora nei meni isapa sirako ara eagora eto ungotenau hamo ta degi memenga ikau kiagora eagora rate ke pepeni amina ungotenau hamo mane simba aisuja te ai ta hamo ta ujeje sasapura amita gamo hambagora.
COL 3:1 Rate ungo amo God ta tihi ta Keriso ga tapa vasiri te erari embopo avoeto ungota hotembari jo tapa na uhu i ta ari avo be hotembevujo. Ai ta amo Keriso na God Mamo ta avo arumba peni amita ingeni be hena ta arumbeto mihia.
COL 3:2 Avoeto enda ta ari toto ungota hotembari na degi amita ari avo eheheto hotembevujo.
COL 3:3 Eto ungo Keriso ga pehari embopo rate ungota vasiri be amo Keriso, God ta degi mihia amita jota nununga ari mihia.
COL 3:4 Eto Keriso amo ungota irari be avoeto Keriso egerembeto puvurou amo ungo amite tapa usasa javotoho be ai ta puvuresova.
COL 3:5 Eto enda ta ujeje sasapura ungota hamota mihia avo tevujo pehare, eto ari amo erevira tiha paiha sesena sasapura neite neite ue ino na arako uje ue ari sasapura neite neite ue donda humbasi ue tunga ta hotembagova (amo donda rate embo ta God eaguja.)
COL 3:6 eto ainge eagora embomeni amo God ta ke agi ae avoeto God na tumo peni vahai be aisuja.
COL 3:7 Eto ari ainge amina ungo tihi jigihoi ere uaeheva
COL 3:8 te ari ainge amo eha oroho emikote tovujo irae ai. Eto ke amo tumo te hini kambari te embo nei uje ae ari te urumbari te ke sasapura masa te amo ungota pe ta eto ivivi ta mane puvuresuja.
COL 3:9 Eto ungo na ke sokova mine ara mane aisova te ari tapa mahu hamo ari avo toto ari eha eto hamo eha asuketo miheva amo no hamo eha ari embo God amina no jota pure ururou ungo amita tombu hajire vahai ue amita ari be kesova.
COL 3:11 Eto ari amita heta amo enda nei embo rete Judea embo rete hamo kakamba humbari embo eto hamo kakamba umbae embo rete ke nei ari embo rete kiari kiae embo rete tapa amo Keriso ta tihi ta amina tihi jigihoi amita jota iragora.
COL 3:12 Eto ungo amo God ta embomeni avoeto God na osa ue amita toho ava siriketo umbuna avoeto ungona ari erevi amo hambo turarako evujo. Eto hamo ta turasova amo jo ari, hondate ari, meni isapa sira ari, sasaimbari, embo osa vesa ari,
COL 3:13 eto ari ainge avo tureto ue tapa amita hamota amo osa ari amina tatapeketo humbasuja. Eto embo osa vesa ari amo erevira, embo amuna no degi ta tumo ue ke au ingito amo hotembeto tojo eto Bada na ari no hotembeto toaguja ainge dombo hotembeto toari mine ara evujo.
COL 3:15 Eto God na ungo tapa toreketo humbei hamo vahai ere ova avoeto Keriso ta peka na ungota jo simba aja ue God osa evujo.
COL 3:16 Eto Keriso ta ke javotoho neite neite ari amina ungota jota iroja umbuvujo. Eto kiari javotoho amina oje kahari mine ara evujo. Eto God ta ke ta ‘Psalms’ kajari mihia amite eto ekalesia ta haveni ototohu kajari mihia amite na God ta degi haveni ijie jo tapa na osa osa evujo.
COL 3:17 Eto ungo ari do asova eto ke do aisova amo Bada Iesu ta javota eto amita Mamo God osa evujo.
COL 3:18 Eto ungo evohu tapa ta degi ke erena amo ungo Bada avoeto ipone ta ke agi evujo.
COL 3:19 Eto ungo ipone na airi ta degi ngahia mane aisova te osa evujo
COL 3:20 eto ungo meniundi na Bada ta ari be avo ue ungota emone mamone ta ke avo iji tapa agi evujo.
COL 3:21 Eto ungo emone mamone na meniundi isembeove pure peive eagora avoeto isembari isapamane avo tovujo.
COL 3:22 Eto ungo embo nei ta ke agi ue pure ari embomeni na ungota pure tihi jigari embopo ta ke tapa avo agi evujo. Eto ungota pure simba ari embo mihie ungota pure kogue osa aja mane aisova te iji tapa pure ue Bada osa eagova avoeto evujo.
COL 3:23 Eto ungo pure tapa do aisova amo embo avoembo ae rate Bada avoembo pure ere ona ke ainge ijie jo tapa na pure evujo.
COL 3:24 Eto ungo erevi be hotembevujo, ungota pure tihi jigari embo be amo Keriso eto amita embomeni na hoteto humbasora donda amo ungona humbasova.
COL 3:25 Eto God na embo tapa amo heka vahai ta ari sirikihe ari sasapura ari embo tapa ta hajire amo amina ikau kesora.
COL 4:1 Eto ungo embo nei ta tihi jigirikari embopo na ungota pure embopo avo ari jajavotoho na simba evujo. Eto ungo be hotembevujo eto embo ungo ainge amo ungota tihi jigari embo amo uhu i ta mihia.
COL 4:2 Eto pari kaiketo evujo. Eto pari ue hotembari na ke ijie God osa evujo.
COL 4:3 Eto pari ue dago hotembihe Keriso ta ke amo mahu ae ingae avo God na dagota pe handekau embomeni ta degi ke aro ingora pari evujo. Eto na Keriso ta pure avoembo tipura ehena.
COL 4:4 Avoeto na God ta ke be ingari haiteko avo harikano ingesora avo God na uje ere ua avoembo pari evujo.
COL 4:5 Eto enana Keriso ke be ae embomeni ta degi ari ungota tapa avo hotembari na ue iji javotoho jigama evujo
COL 4:6 eto enana ga umoro ue ke javotoho haso kambue gamo eaguja aingeko tirihiro enana na eto ingari aro ke deirami ijiro ke be kesora avo evujo.
COL 4:7 Eto ungotenau namei be Tychicus amo ungotenau pure vahai embo eto Bada ta pure embo javotoho amina duru nau tapa ungota degi au ingesova.
COL 4:8 Na avoembo Tychicus ungota degi ikano pambasuja amo amina dagota irari do aingere avo ungota degi ke na avo kakaja ururou ungota jenge erasuja.
COL 4:9 Eto ungota ekalesia vahai embo Onesimus amo ungotenau namei hondate ari embo amina embo Tychicus ga ungota degi pambuto dagota degi ari do puvija avo au ingesova.
COL 4:10 Eto nei embo Aristarchus namote tipura ere ua amina ungo ere pekihia eto nei Barnabas ta simbo Mark amina ungo ere pekihia. Eto Mark ungota degi pambau pekihe umbava amita ke mahu ehere ingihava, aravora.
COL 4:11 Eto embo Joshua, amita javo nei Justus, amite tapa ungo ere pekihia. Eto embo nei heriso nei vahai erena amo Judea embo na pere God na embo tihi jigesuja amita ke hande ue namoga pure ue hondate ari javotoho uore jo nau jamo jamo ere ua.
COL 4:12 Eto ungota ekalesia embo nei Epaphras amo Iesu Keriso ta pure ari embo amina ungo ahoka ue ungo embo pari ngahia eaguja amo ungo na God ta uje tapa agi ue Keriso ta ari na pajito inono eto heteto irova God ta degi iji tapa pari eaguja.
COL 4:13 Eto amina pure ngahia ungoembo eto da Laodicea te da Hierapolis te embomeni avoembo ere ua amo tihi nau na ere kogona.
COL 4:14 Eto ungotenau tunga humbari embo sivo ikaguja embo Luke amite eto Demas amite na ungo ere pekihera.
COL 4:15 Eto dagota namei kamei da Laodicea ta mihera amite eto evohu Nympha amite eto ekalesia amita bande ta horukagora avo ere pekihena evujo ingore.
COL 4:16 Eto ahari erevi humbuto ehekano irae au amo humbuto pambuto da Laodicea aita ehekevujo ingore. Eto ahari nei amo da Laodicea namei kamei na ungota degi ikaro humbuto ehekevujo.
COL 4:17 Eto embo Archippus ta degi ke einge evujo, “Umo Bada ta pure vahai humbuha avo ejo irae ai,” ainge evujo.
COL 4:18 Eto na Paul nanena pekari ta ke erevi ingeni nau na ere kajihena, na Paul nanena ungo ere pekihena. Eto na ‘Chain’ na pundera avo ungo jenambu avojo. Eto God ta hondate ari ungota degi iresuja.
1TH 1:1 Ajao da Thessalonia ekalesia embomeni God Mamo ta, eto Bada Iesu Keriso ta toho uho, dago Paul te Silas te Timothy te aingeto ungota degi ahari erevi ere kajihera kivujo. Eto God ta hondate ari te peka te ungota degi iroi.
1TH 1:2 eto dagona ungo avoembo God osa ue iji tapa pari eagora amo ungo na Iesu Keriso humota ue amita pure avo ngahia eto namei kamei osa ue ari javotoho ueva avo ungotenau mama God ta degi pari na ijie hotembagora,
1TH 1:3 eto ungo kupi ambu ue ungotenau Bada Iesu Keriso egerembeto puvuresuja avo jo tapa na simba ere ovova avo dago na hotembagora.
1TH 1:4 Eto dago ere kogora amo ungo dagota namei kamei avo God na osa ue amita toho ava siriketo umbuna
1TH 1:5 amita be amo dago ungota degi Iesu Keriso ta duru javotoho hande uera amo ke na pere ae rate ahihi otohu ta sovera na ungota jo ta enetenu ke be ava. Eto dago ungote mihie ari tapa ungo avoembo do uera amomo do aingere amo ungo kiarira.
1TH 1:6 Eto ungo na osaga memenga kogue toae rate Bada Iesu te dago te avo ambo ambo asi God ta ke avo humbuhove ahihi Otohu na ungota tunga jamo ari ikehei osa ove
1TH 1:7 enda Macedonia embo te enda Achaia embo te God ke be erera amina ungota ari avo kogue ambo ambo ue ere humbuhora.
1TH 1:8 Eto ungo na Bada ta ke avo hande ove enda Macedonia te Achaia te pere mane rate ungo God humota eagova amita duru avo hande ore enda tapa ta sigeto ere pahua avoeto dago ke avo ehako mane aisora.
1TH 1:9 Eto dago na ungota degi pahuore dago kito pekihe dagota ke avo ingihe ungota god ingeni na ari avo toto jo haperekeoi God vasiri te amita ke avo agi eagova amo embo isapamane na eagore dago na ingiora.
1TH 1:10 Eto God na amita Meni Iesu enu vasiri te ereto pambuna avo uhu ta eto puvuto ungotena orekihie mihova amo iji ke kahari puvurou ungotena orekasuja avo ungo simba ere ovova.
1TH 2:1 Rate nau namei kamei ungo kogova amo dago ungota da ta teho pambae rate pure uera amita be avo umbuhaja.
1TH 2:2 Eto dago ungota degi pambae kihi ta da Philippi ta pambuhore embo na urumbihore osaga koguera te toae ungota degi pambuhore God na enu hamo ngahia enu kitoho embopo ngahia ore God ta ke javotoho avo ungota degi hande uera.
1TH 2:3 Eto dago ke hande eagora amita ke be amo dago na ke sokova na mane eto dagota uje ta hotembari na mane eto ke gamo na poekihe ari ke mane
1TH 2:4 rate God ta ke javotoho avo dago na embo ta degi hande ara siriketo ikena avoeto God ta ke avo teto haito ae rate God na dagota jo te hotembari te kogue tunga javotoho aja amita ke avo hande eagora.
1TH 2:5 Eto dago ungota degi ke ijiroro ungo na ingito dago osa ava ae eto hajae vajae ikavo humbasi ue ae ra amo God na kiarira.
1TH 2:6 Eto dago Keriso ta ke hande ari apostero be ra te dago embo peni ke ijie ke ae eto ungo na eto embo tapa na jakeka ava ae
1TH 2:7 ra te evohu na meni eha simba eaguja aingeko ari ejeha be ungota degi uera
1TH 2:8 amo ungo osa javotoho be ue God ta ke javotoho te dagota jo te hotembari te tapa ungota degi hande uera amo ungo dago tunga be humbuheva avoeto.
1TH 2:9 Eto dagota namei kamei, dago pure ngahia uera avo hotembevujo. Eto dago God ta ke javotoho avo hande ore amo ungona dagota indari avoeto osaga kiagova avoeto mume te iji te pure ngahia uera.
1TH 2:10 Eto dagota ari tapa ungo God ke be ari embomeni ta degi uera amo hotembari heriso eto ae rate sapura irae javotoho pere uera amo ungote God te tapa kiarira
1TH 2:11 eto ungo kogova amo mamo na meni ta degi eaguja ainge dombo ungo oje kahihe sovera ari umbava ke ngahia na ijiera
1TH 2:12 amo ungo God na amita toho ke ijie au amita usasa peni ta iresova avoeto ari javotoho ue irirovo God na kito osa ai ke ainge oje kahari ke ijiera.
1TH 2:13 Eto God ta ke erevi ingito humbuheva amo embo ta ke ra ainge ijie umbae rate ungo ke be ijie emo God ta ke ra ainge ijie humbuheva amo ungo ke be ari embopo ta jo ta ere papajihia avoembo dago iji tapa God osa eagora
1TH 2:14 amo God ta ekalesia Iesu Keriso ta jo ta mihera amo Judea enda ta mihera amina eagora ainge dombo ungo na ereova amita be amo Judea embomeni na ekalesia embomeni ta degi eo osaga te memenga te kia ainge dombo ungota da vahai embomeni na ore osaga ere kogova.
1TH 2:15 Eto Judea embomeni na God ta peroveta mamahu te Bada Iesu te tapa teo pepehekihio dago ohimbeo pambua.
1TH 2:16 Eto ari ainge ue God ta uje avo hotembae ue dago na enda nei embomeni ta degi God na ari sapura orekasuja amita ke avo hande ere ora avo uje ae ue embo tapa ta degi kitoho ue ere haekihera. Eto ari ainge ere ora amo enana te degi ari sapura hamo ta hamo ta ere ua avoeto eha iji tutumo emita God na enana ta degi tumo ere ua avoeto hajire ikau kesora.
1TH 2:17 Rate nau namei kamei, Judea embomeni na ehere iji isapa dago ungota degi pambae amo dagota jo te hotembari te tapa avo ungota degi mihia te dagota hamo na daingeto pambuto ungote tombu mine kia aro avo dago uje isapamane ere ovora
1TH 2:18 te na Paul nanena iji nei ainge eto kito pambasi ereona te Satan na na peikihei pambae mihena.
1TH 2:19 Eto ke erena amo Bada Iesu na egerembeto puvurou dago na amita tombu ta heteto mihie ungo avoembo tunga javotoho be aisora, amo Iesu na di kogombari humbuto dagota siro ta asukau sago keisora,
1TH 2:20 eto di kogombari dagota erena amo ungora.
1TH 3:1 Avoeto dago iji koso be ungota ke ingae ue teho iresora avo inono ae ua avoeto dago heriso da Athens ta mihie
1TH 3:2 ungotenau namei Timothy amo God ta pure ari embo Keriso ta ke javotoho hande eaguja avo ungota degi ikaro pambaja ke sirikihera
1TH 3:3 amo ungo osaga memenga ere kogova avoeto egikagova Timothy ungo oje kahihirou sovera humbuto God humota be ava ikehere pambuhija.
1TH 3:4 Eto ungo kogova amo dago ungote mihie ke ehere ingihava amo osaga te memenga te kiagora God na uje ere ua amo mane haekasuja te kesora ainge ijiera avoeto osaga ere kogova.
1TH 3:5 Avoeto na ungota duru ingae iji koso iresona avo inono ae avoeto ungo Satan ta sovera na engekeoi egikagove dagota pure avo ajaja eagora Timothy na ungota humota ari do aingere avo kioja ikehere pambuhija.
1TH 3:6 Eto Timothy na ungota degi pambuto ungota vasiri kito egerembeto puvuto ungota osa ari te humota ari te peni vahaira ainge ehei ingito tunga javotoho ere ora eto ke nei ehei ingera amo ungona dago hotembeto osa ue ehako dago kesi uje ereova ainge dombo dago ungo kesi uje ereora.
1TH 3:7 Avoeto dagota namei kamei dago osaga te memenga te kogora te ungo God humota be ereova avo ingito tunga javotoho ue mihera.
1TH 3:8 Eto ungo Bada egikae sovera te tapa iresova amo dago ta irari javotoho iresuja.
1TH 3:9 Eto dago na ungo avoembo ungotenau Mama God ta tombu ta mihie tunga javotoho be ereora, eto ungo avoembo God osa isapamane ue
1TH 3:10 ungo tombu mine kia ue aro ungota humota ari avo javotoho be aisuja ainge iji te mume te pari ta ke avo eagora.
1TH 3:11 Eto ke nei pari ta eagora amo dago na ungota degi pambasora degi amo ungotenau Bada Iesu Keriso te Mama God te na sirikau tambu aisuja.
1TH 3:12 Eto dago na ungo osa eagora ainge dombo Bada na ungota osa ari ungo ta degi eto embo tapa ta degi irerembeto peni vahai ururou
1TH 3:13 ungota jo avo God na au sovera ari puvutuhurou ungotenau Bada Iesu na amita embo ototohu ga egerembeto puvurou God Mamo na ungo kogue amita toho avoeto ari sasapura irae teho kesuja avo pari ta eagora.
1TH 4:1 Eto, dagota namei kamei, ke nei amo ungo daingeto God ta uje avo ue iresova avo dagona ungota degi ahe poekihare ingito ambo ambo ereova eto ari avo be jigito kogoeto ava jo tapa na Bada Iesu ta javo ta erera.
1TH 4:2 Eto ungo ari do jigama ava Bada Iesu ta javota ikihara amo ungo kiarira
1TH 4:3 amo ungo God ta toho ue otohu ava uje ere ua avoeto tiha paiha avojo.
1TH 4:4 Eto ungota ae jimbasova amo dombo be ra ainge ijie otohu ue
1TH 4:5 God kiae embomeni na ungota hamo ta ujeje avo hotembihe eagora ainge avojo.
1TH 4:6 Eto ungota namei ta ae amo amita avoeto namei ta degi sapura avojo. Eto ke peni be ungota degi mahu ijiena amo eto ungo na ari sapura erena erevi ainge aisova amo Bada na ungota degi hana kiari ikasuja.
1TH 4:7 Eto ari tongopa sasapura ara siriketo umbae rate ari otohu ue amita toho ara God na umbuna.
1TH 4:8 Eto God Ahihi ikari embo amina ungota degi Ahihi Otohu ikaguja avoeto embo amuna ke erena erevi peive eaguja amo embo ta ke mane rate God ta ke avo peive eaguja.
1TH 4:9 Eto dagota namei kamei. Ungo osa mine ara ava God na ahe poekihia avoeto ke nei nanena mane kajasona,
1TH 4:10 eto ke be amo ungota namei kamei enda Macedonia jo ta avo osa ere ova te nau namei kamei, ari avo jo tapa na ava penunu erera.
1TH 4:11 Eto irari no avo umo oenga tunga iketo eto kogoeto simba ue tunga jamo jamo te irivujo. Eto ungo na ava ijiera ainge dombo ungota ingeni na indari humbari pure ue embo nei ta degi penunu ae ururovo
1TH 4:12 embo nei ekalesia ta kaju ae mihera amina ungo kogue jakeka aisora.
1TH 4:13 Eto dagota namei kamei ungo ke erena be ingova uje ere ora amo enana Iesu ke be ijie pepehekea embomeni amita degi do puvuresuja avo aro ingihe God ke be ae embomeni na osaga peni vahai kogue sisi sasi eagora ainge dombo eagova aro ingova erera
1TH 4:14 amo Iesu peheto vasiri te erena avo ke be erera eto ainge dombo embo pepehekari amo God na Iesu ta degi au ingito au vasiri te eraro amiga tapa puvuresora.
1TH 4:15 Eto Bada na ke ena avo ungota degi erera amo ungotena vasiri te mihiroro Bada egerembeto puvurou embomeni pepehekari avo kihi vasiri te erasora.
1TH 4:16 Eto God ta Anera peni amina jajage ijirou God ta huin husihirou Bada na uhu i ta eto veto puvuresuja.
1TH 4:17 Eto Keriso ta javo ta pepehekari embomeni kihi ereto pahuroro ungotena vasiri te enda ta irari embopo amite tapa avo God na sau eto humbuto johi ta ikau johiga tapa i ta vihito Bada uhu i ta hambuto Bada ga tapa daroho iresora
1TH 4:18 avoeto ke erena erevi ke mine ara eto ingihe tunga javotoho evujo.
1TH 5:1 Eto dagota namei kamei ari erevi iji deina puvurou kesora amita ke amo ungota degi ahari ta mane kajasora.
1TH 5:2 Ungo mahu kiagova amo Bada ta puvurari iji kombu te amo pegene embo mume jo ta puvaguja ainge dombo puvuresuja.
1TH 5:3 Eto embomeni na “Eha amo iji javotoho peka ta mihera,” ainge ijiroro ari sasapura ta isoro peni sau be puvuresuja amo evohu na meni humbasi ue hamo memenga titimbaguja ainge dombo puvurou kogue joru tiumbeto pambuto ojikari degi avo irae be ra.
1TH 5:4 Rate nau namei kamei, ungo mume ta irari embomeni mane rate iji ta eto usasa ta meniundi avoeto iji kombu na ungota degi pegene embo na puvaguja ainge dombo mane puvuresuja.
1TH 5:5 Ungotena mume ta toho mane avoeto embo nei na evagora ainge avojo,
1TH 5:6 rate ereto tihi kujeto kogue irivujo.
1TH 5:7 Eto embomeni evagora amo mumete evagora, eto umo indiore tihivi eaguja amo mumete eaguja
1TH 5:8 te ungotena iji embopo avoeto siro jigama ue hotembari javotoho ue isoro embo na beha ingeni na peiketo jigaguja ainge dombo humota ari osa ari avo be jigesora, eto God na ungotenau ari sasapura oreketo humbasuja amo ungotenau siro orekari kope mihia avo hotembeto tunga javotoho aisora.
1TH 5:9 Eto God na ungotena orekasuja ke amita be amo ungotena avo God na ungotenau ari sasapura avoeto amita tumo kiagora ijie umbae rate Bada Iesu Keriso na ungotenau ari sasapura oreketo humbau amita toho ara umbuna
1TH 5:10 avo eto ungotena teho irorote mo peheto iroro Iesu puvurou amiga vahaita daroho iresora avoeto pehena.
1TH 5:11 Avoeto ungo ere ova ainge pere ue ke javotoho mine ara ijie osa kageni ue sovera ari umbuvujo.
1TH 5:12 Eto dagota namei kamei ungota degi ke erevi erera amo Bada ta javo ta pure ere ora embo ungote mihie oje ere kahihera embo avo pepeni ke ijie osa evujo enana ta pure avoeto. Eto hini kambari avo, teho peka ta irivujo.
1TH 5:14 Eto dagota namei kamei, ke erevi ava erera amo kupi pegogo embomeni avo oje kahevujo, eto sovera ae ere ora avo hondate evujo, eto jopapa ere ora avo ke avo hamo ngahia ururou embomeni amita degi tumo sausau mane aisova.
1TH 5:15 Eto embo na ari sapura ungota degi au kito mine ungo na amita degi ari sapura mine avojo, eto iji tapa ari javotoho embo tapa ta degi mine ara evujo.
1TH 5:16 Eto iji tapa tunga javotoho ue iji tapa pari evujo.
1TH 5:18 Eto iji nei javotoho puvurou amo osa evujo eto iji nei sapura puvurou kito amo God osa evujo amo ungo Iesu Keriso ta toho na ainge ava God na uje ere ua.
1TH 5:19 Eto God ta ahihi otohu na ungota jo ta ji evekarako ere ua avo seikavojo.
1TH 5:20 Eto embo na ke emo God ta ke ra ainge ijie au ingito sokova ke mane asova
1TH 5:21 te ke tapa avo eto kito ke be davore sokova davore avo kito ke be avo jigama ue
1TH 5:22 ke sokova nei te nei te tapa tovujo.
1TH 5:23 Eto pari ta erera amo God, peka ikari embo amina au ungota jo tongopa irae au ungo otohu aisova. Eto God na au ungota ahihi te hamo te hotembari jo te tapa javotoho au pehumba ari inono ae ururovo Bada Iesu Keriso puvuresuja.
1TH 5:24 Eto ungo siriketo amita toho ava umbuna embo amo humota ari haite avoeto erena amo aisuja.
1TH 5:25 Eto dagota namei kamei, dago avoembo pari evujo.
1TH 5:26 Eto namei kamei tapa avo mune tavo ue pekevujo.
1TH 5:27 Eto Bada ta javo ta erena, ekalesia namei kamei tapa ta degi ahari erevi ehekevu ingore.
1TH 5:28 Aravora, ungotenau Bada Iesu Keriso ta hondate ari avo ungota degi iresuja.
2TH 1:1 Eto na Paul te Silas te Timothy te aingeto ungotenau Mama God te ungotenau Bada Iesu Keriso te ta toho uho ekalesia da Thessalonica ta miheva amita degi ahari erevi ere kajihera,
2TH 1:2 eto ungotenau Mama God eto Bada Iesu Keriso na ungota degi peka te hondate ari te ikasora.
2TH 1:3 Eto dagota namei kamei, ungoembo God ta degi iji tapa osa ere ora amo ungota degi God humota ari eto osa mine ara ari na pajito peni vahai ere ova avoeto osa ere ora.
2TH 1:4 Eto ungota kitoho embona ungo kesira ore memenga te osaga te ere kogova, eto kogue amo God toae rate ke be ijie ngahia na heteto miheva avoeto dagona ke avo God ta ekalesia nei nei ta degi hande ue tunga javotoho ere ora
2TH 1:5 eto ke erevi tapa ai ta ere kogora amo God ta ari sirikari amo ke be pere eto amita tutumota amo ungo na God ta tihi jigari degi ta horeto iresova, eto osaga memenga ere kogova amo ke avoembo ere kogova.
2TH 1:6 Eto God na ari javotoho erevi aisuja amo enana ungo kesira uore osaga memenga kiagova avoembo amita degi amo God na osaga memenga mine ikau humbasora
2TH 1:7 eto ungo osaga ere kogova ungota degi eto dagota degi tunga jamo ari ikau humbuto jangu indie iresora. Eto Bada Iesu na amita Anera sovera te ji peri te amiga uhu i ta eto puvuto Bada Iesu ta duru javotoho amita ke agi ae embomeni amita degi hana kiari ikau kogue
2TH 1:9 pehari ta memenga iji datohota kogue iresora te Bada ta irari degi usasa te ai ta mane horasora.
2TH 1:10 Eto Iesu puvuresuja iji te amo amina amita ke be ari humota ari embomeni ta degi otohu ari te jakeka ari te ikau humbasora. Eto ungona dago ta ke hande ore ingito ke be ijieva avoeto ungona enanaga tapa degi ai ta asova.
2TH 1:11 Eto dago ari ainge avoembo ungo hotembihe iji tapa pari eagora. Eto God na vasiri be ikau humbuto irova ungo jage eto umbuna avoeto ungo avo humbari haite ava pari eagora. Eto God na amita sovera na ungota jo ta pure ururou ungona embo jajavotoho asi uje eto God humota be ava pari ere ora.
2TH 1:12 Eto ungo ainge aisova amina Bada Iesu ta javo avo dombo be ururou amina ungota degi ikasuja amo God eto Bada Iesu Keriso ta hondate ari na ari avo humbasova.
2TH 2:1 Eto Bada Iesu Keriso na egerembeto puvuto ungotena tapa toreketo humbasuja amita ke be avo ano ingivujo. Eto nau namei kamei
2TH 2:2 embomeni na ke sokova na Bada ta iji mahu puvija ainge ijiore ingagova rate ke amo be mane avoeto ke avo ingovojo. Eto ke amo dagota pe na ari ke eagora eto ahari ta kajari ke eagora rate ke avo be hotembavojo.
2TH 2:3 Eto Bada ta iji puvuresuja amita kihita amo embo isapamane na God egikasora amita ijite amo ari sapura ari embo be avo puvuresuja. (Eto embo amina Satan memenga kesuja degi ai ta hana kesuja.)
2TH 2:4 eto God ke pepeni Sinena Purisa Ari Embo amina puvuto God jakeka ari donda tapa avo sapura ke ijie umo oenga embo peni vahai ke ijie donda tapa ta hamota hetasi uje ue God ta Temple Otohu aita horeto umo oenga God ke ijie arumbasuja.
2TH 2:5 Eto ungo be hotembevujo, na ungote mihie ke erevi tapa ehene ingihava.
2TH 2:6 Eto ari erevi mahu puvuraehija te ari vahai na ere haekihia amo ungo kiarira avoeto iji inonota amo Sinena Purisa Embo amina puvurou ungotena tapa kesora.
2TH 2:7 Rate ari sasapura aingeko amo mahu enda ta puvuto ore ungotena ere kogora rate simba ari embo mihia avoeto ari sapura amina pajito peni be mane aisuja te simba ari embo avo iji tutumota toto pahurou ari sasapura amo peni aisuja.
2TH 2:8 Eto pahurou Sinena Purisa Embo amo arahata koguroro Bada Iesu na puvuto amita sago kiari te hoenge te na Embo amo tau veasuja.
2TH 2:9 Eto Sinena Purisa Embo sapura puvuresuja amita ari amo Satan ta ari vahai avo kesora amo ari sovera neite neite amo be mane sokova avo ururou kogue embomeni na kito haha puha ara
2TH 2:10 ue embomeni peheto daroho irari degi ta osaga kesi pahora amo ari sasapura neite neite amina kihi humbasuja. Eto embo amuna pehasora amo God ta ke be avo osa ae avoeto God na mane orekasuja te pehasora.
2TH 2:11 Eto God na enana ta siro au ngahia ururoro God na Sinena Purisa Embo avo ikau puvuto ke sokova na ijirou ingihe mihima
2TH 2:12 God ke be ae rate ari sasapura uje isapamane eagora embomeni amite tapa hana kito peheto osaga kogue daroho iresora.
2TH 2:13 Eto nau namei kamei ungo God na osa ere ua avoeto dago ungo embo iji tapa God osa eagora. Eto God na embo oreketo humbasuja amo ungo avo kihi Ahihi Otohu ta sovera na oreketo humbau God ta ke avo humota eagova avoeto amita embo ototohu aisova.
2TH 2:14 Eto God ta duru javotoho ungota degi hande ore ingihava amina ungo jage eto humbuto Bada Iesu Keriso ta usasa avo ikau hoteto humbasova.
2TH 2:15 Avoeto nau namei kamei, ke be amo pe na ahari na hande ore ingihava avo be jigito heteto irivujo.
2TH 2:16 Eto ungotenau Bada Iesu Keriso te ungotenau Mama God amite na hamo ta sovera ari ikeoi humbuto ari javotoho avo puvuroja simba eagora
2TH 2:17 eto amina hamota sovera ari ikau humbuto ari javotohote ke javotohote avo iji tapa aisova.
2TH 3:1 Eto dagota namei kamei ke tutumota amo Bada ta ke hande ore sigeto eneteto ere pahua amo ungona humbuheva ainge dombo embomeni na otohu ke ijie umbara dago ke hande ari embo avoembo pari evujo.
2TH 3:2 Eto ke nei amo embo nei uhoho na God ta ke amo ke be mane ke eagora avoeto God na embo sasapura ta ingeni ta oreketo umbaja dago embo pari evujo.
2TH 3:3 Eto Bada amo humota ari embo avoeto Sapura Embo peikihe ungo oreketo humbuto sovera ari ikau humbasova.
2TH 3:4 Eto ungo Bada na ere ua avoeto ungo humota ere ora avoeto dago ere kogora amo ke mahu eo ingito ere ovova eto ehako aisova.
2TH 3:5 Eto Bada na hondate ururou God ta osa ari avo be kogue Keriso ta hondate ari na pure mane toasova te kaiketo aisova.
2TH 3:6 Eto nau namei kamei ungo Bada Iesu Keriso ta javota ari erevi ava erera, amo ahe poekehere humbuheva avo ungota namei vahai na ambo ambo ae kupi pegogo ururou kito amo be tovujo oenga iroi.
2TH 3:7 Eto ungo kogova amo ungo daingeto iresova avo ahe kihira uera amo dago ungote mihie kupi pegogo ae
2TH 3:8 eto indari amo teho humbuto indae rate dago mine ikihe humbuto indimahara. Eto ungo osaga kiagova dago ungo embo mumete ijite pure ngahia uera.
2TH 3:9 Amita ke be amo dagota pure ta mine avoeto ungota undurari amo teho humbahera te ungota ahe kihira ainge ava eto ari ainge amo uera.
2TH 3:10 Eto ungote mihie ke peni erevi ungota degi ikihara amo “Pure ae embo na indari mane indesuja.”
2TH 3:11 Eto dago ke nei eha ingera amo kupi pegogo embo amo ungote mihera amina pure be ue keko namei ta degi ta ke kaikari erera avo ingera.
2TH 3:12 Avoeto Bada Iesu Keriso ta javota erera amo embomeni amina ari enana ta avo simba ue ingeni pure eto ungo oenga indari umbara erera.
2TH 3:13 Eto nau namei kamei ungo ari javotoho asi ue kupi pegogo avojo.
2TH 3:14 Eto ke ahari ei ta ere kajihera amo embomeni nei uhoho ungote mihera amina agi ari uje ae ururoro kito amo tovujo oenga mihie me kiore.
2TH 3:15 Eto embo amo kitoho mane rate no namei rate ngahia na teho isembejo.
2TH 3:16 Eto Bada amo ungotenau peka humbari embo avoeto iji tapa te ari tapa te amita peka ikau humbuhurovo amina ungote iresuja.
2TH 3:17 Eto na Paul ingeni nau na ke erevi ere kajihena. Eto na Paul nanena ungo ere pekihena, eto nau ahari kajari tapa amita tutumota amo einge kajagona, amo kikiva ta hajire naura.
2TH 3:18 Eto Bada Iesu Keriso ta hondate ari amo ungote iresuja.
1TI 1:1 Na Paul ungotenau orekari embo God eto ungotenau hondate ari embo Iesu Keriso ta ke na apostel ereona
1TI 1:2 eto nanena Timothy umo Keriso humota ere oa avoeto umo nau meni be ra eto no degi ta ahari erevi ere kajihena. Eto God Mamo te ungotenau Bada Iesu Keriso te amita hondate ari te jo ari te peka te tapa no degi ta iroi.
1TI 1:3 Eto na enda Macedonia ta pahue umo da Ephesus ta iroa ke ngahia na ijiena eto ehako asa ta iroa erena amo da ai ta embomeni na God ta ke avo ke sokova nei te nei te na ahe ere poekihera avo ke ngahia na haekejo.
1TI 1:4 Eto enana amo ohihi ta hihi avo dombo ke ijie Moses ta ke pepeni amiga kaju ue ahe ere poekihera avoeto embomeni na ingihe jujune isapamane be ere ora rate God ta pure be amo God vahai humota ue eagora.
1TI 1:5 Eto ke erena emo embomeni na osa mine ara aisora avoeto erena. Eto osa ari amo jo javotoho eto hotembari javotoho eto God humota ari na puvaguja
1TI 1:6 rate embo nenei na ari erevi toto degi nei ta pahue ke gurou nei te nei te erera.
1TI 1:7 Eto enana God ta ke pepeni ahe poekari embo asi uje ere ora te ke erera avo ingihe ke amo be pere ra ainge erera te ke do erera amo ungo be ingito kogoaera.
1TI 1:8 Eto ungotena kiarira Moses ta ke pepeni amo javotoho ra te embo na mane jigito aro sapura aisuja.
1TI 1:9 Eto ke pepeni amo embo jajavotoho avoeto ikae rate ke poekari embomeni te ke ingae embomeni te God kiae embomeni te ari sasapura embomeni te ke te jo te tongopa embomeni te e mamo jigae embomeni te eto embo tari pehari embomeni te
1TI 1:10 eto tiha embomeni te embo nei pegene eto embo nei ta degi koro ombuto humbari te ke sokova ijie ke be ari ke eagora eto ari nei do tapa amo God ta ahe poekari mane avoeto God na Moses ta degi ke pepeni avo ikarira.
1TI 1:11 Eto God usasa te amita duru javotoho avo nanena simba ana ikena.
1TI 1:12 Eto ungotenau Bada Iesu Keriso na na humota ari embo kito amita pure ana iketo sovera ari ikena avoeto na God osa eagona.
1TI 1:13 Rate na iji kihi ta amo na God ta degi sapura ue tumo eto amita embomeni ta degi memenga ikeo kia amo na God ke be ae ue kiae kiae ere uaehena
1TI 1:14 avo God na kito jo enu ungotenau Bada Iesu Keriso ta humota ari te osa ari te hondate ari isapamane nau degi ta overekena.
1TI 1:15 Avoeto ke erevi asona amo ke be pere asona, Iesu Keriso na ari sasapura embomeni oreketo humbasi enda ta puvuna. Eto na amo ari sapura embo be ra te
1TI 1:16 Iesu Keriso na na toae jo enu umbuna avoeto embo amuna Iesu Keriso ke be ijie vasiri daroho humbasi uje aisuja kito embo amina na kogue ke be ava umbuna.
1TI 1:17 Eto God vahai daroho irari ta King amo tihi na mane kiagora eto mane sari aisuja eto amita degi jakeka ari te usasa te daroho iresuja, amen.
1TI 1:18 Eto Timothy nau meni umo God ta pure do asoa avo peroveta na mahu harikari avo kito inena pure erevi ae ere ikihena. Eto pure erevi asi hotembihe God humota be ue hotembari javotoho na isoro javotoho ejo.
1TI 1:19 Eto ari erevi embo nei nei na toto God humota ari amo ehere sapura be ehija.
1TI 1:20 Eto ari ainge ere ora embo heriso amo Hymenaeus te Alexander te aingeto God ta javo eagore sapura eaguja Satan ta ingeni ta toruhana amo ai ta kiari umbara uena.
1TI 2:1 Eto ke kihi ta amo ke nau erevi ava erena, God ta degi penunu ari eto jakeka ari eto God ta hondate avoeto osa ari eto embo tapa avoeto pari evujo.
1TI 2:2 Eto ungotena peka ta tunga jamo ari na otohu ue ari jajavotoho pere ue irora enda ta kings te tihi jigirikari embopo avoembo pari evujo.
1TI 2:3 Eto ungotenau Orekari Embo God amina embo tapa na amita ke be avo ingihiroro oreketo humbasi uje ere ere ua avoeto pari einge amo javotoho avoeto God na ingito tunga javotoho eaguja.
1TI 2:5 Eto God vahai ra te embo vahai orohuta mihie embo ta ke ingito God ta degi eoi ingito ke mine Iesu ta degi eoi ingito embo ta degi eaguja embo amo Iesu Keriso
1TI 2:6 amina ungotena vasiri te irora amita vasiri avo ikena amo iji inono ta ikenu puvunu kia.
1TI 2:7 Eto amita ari avo embo ta degi ke hande ana God na na amita apostel ikena amo ke sokova mane ke be pere amo na enda nei embomeni ta degi God humota ari amita ke avo ahe poekana ikena.
1TI 2:8 Avoeto embo tapa tumo irae hini kambari ke irae teho ingeni otohu na i ta jigito pari ara uje ere ona.
1TI 2:9 Eto evohu na me kiari irae bo javotoho pere evora uje ere ona amo siro pupu ta kogombeto hambo tureto humbuto mane asora te
1TI 2:10 ari jajavotoho God humota ari evohu amina ombuto aisora.
1TI 2:11 Eto evohu na jamo eto mihie kiari nei eha humbasuja
1TI 2:12 eto evohu na embo tihi jigesuja eto ahe poekasuja avo na uje ae ra te evohu amo jamo eto iresuja.
1TI 2:13 Eto amita be amo God na embo Adam kihi eto evohu Eve amo ambota ena.
1TI 2:14 Eto Adam avo Satan na engekae rate Eve avo Satan na engeka enu sapura ena
1TI 2:15 rate evohu amuna meni humbasi ue memenga kogue osa ari te otohu ari te na siro pure ue God humota ururoro God na kito oreketo humbasuja.
1TI 3:1 Ke peni amo erevira. Eto embo na bishop ta pure asi tunga ikasuja amo pure peni humbasi uje aisuja.
1TI 3:2 Eto bishop aisuja embo amo ari einge eto iresuja. Amita irari nei avoeto embo na mane pehumba aisora. Eto amita ae jimbari amo heriso mane, vahai jimbasuja eto amita okope unduresi evivi sununu mane asuja te amita vasiri te ari te na embo tapa avo unduhurou embomeni na kogue osa aisora.
1TI 3:3 Eto nei amo ahe poekari embo aisuja. Eto nei amo wine peni mane indesuja eto tumo embo mane aisuja eto jujune ke mane aisuja rate pekari, osari embo aisuja eto koro osa mane aisuja.
1TI 3:4 Eto embo amina amita ae te meniundi te omena javotoho ue meniundi na embo amo otohu ke ijie amita ke agi ara ahe poekasuja.
1TI 3:5 Eto ke erena amita be amo embo amina amita ae te meniundi te tihi jigae aisuja amo God ta embomeni ekalesia daingeto tihi jigou?
1TI 3:6 Eto embo eha ihiketo God ambo ambo ere ua amina bishop mane aisuja amo Satan uhu ta ari sapura eto enda ta vena ainge dombo embo amina hotembari peni ue “Na na” aisuja.
1TI 3:7 Eto bishop asuja embo avo ekalesia na pere mane ra te embo tapa na kito osa aisora eto ainge ae amo embo tapa na pehumba aisora eto pehumba amo Satan ta vage ra.
1TI 3:8 Eto embo amuna deacon aisuja amo embomeni na kito jakeka asora embo amina deacon aisuja amo ke sokova embo mane aisuja, wine peni mane indesuja, eto koro uje eto ke popoja na ijie mane humbasuja.
1TI 3:9 Eto jo vivisako te na God ta ke be avo jigama aisuja.
1TI 3:10 Eto embo amo eto kioro amita pure javotoho au kito aro deacon aisuja.
1TI 3:11 Eto ainge dombo deacon ta ae amo jakeka ari haitekora eto ke sokova sio sao mane aisuja eto amita visi ta undurari ujeje mane asuja avo embo tapa na evohu avo kito ari haiteko ke aisora.
1TI 3:12 Eto nei amo deacon aisuja embo amina ae heriso mane jimbasuja te vahai be jimbasuja eto meni hatira simba aisuja.
1TI 3:13 Eto embo na deacon eto pure javotoho ere uma sovera ari humbuto amo Iesu Keriso humota be ururou avo God na kito kore aisuja.
1TI 3:14 Eto na Paul nane no degi ta sausau pambasi uje ere ona
1TI 3:15 te ari nei na puvuto peikau kito amo inena God ta ekalesia embomeni ta irari inena kioa ahari erevi ere kajihena. Eto God vasiri te amita ekalesia amo eingera, embo na bande tutuvi enda ta koveto hurukeore turi eaguja ainge dombo ekalesia amo ke be ari ta tutuvi ra.
1TI 3:16 Eto embo na ke nei do mane aisora te God ta ari amo peni be amo erevira “Keriso visi te puvuna Amita ari sapura irae avo ahihi otohu na kito embo javotoho ke ena. Eto anera na amita vasiri ere koguahera. Eto embomeni na amita ke enda tapa ta hande uo ke be ea. Eto God na amita usasa ta jiginu vihina”.
1TI 4:1 Eto iji kombu auvihirou embo nei nei na God humota eagora avo toto ahihi sasapura ambo ambo ue enana ta ari sasapura avo jigama asora avo ahihi otohu na ke araha ta ere harikihia
1TI 4:2 eto ahe poekari sasapura ainge amo hotembari heriso embomeni na hande ere ora amo enana ta jo vahai ae amo ari sasapura na andirari avoeto ari einge emo eagora.
1TI 4:3 Eto embo na mane jimbara haekagora, eto indari nei nei avo mane indora haekagora te ke be amo God ta ke jigama ari embomeni na indari avo God osa eto indora God na ena.
1TI 4:4 Eto indari te o te tapa God na ena amo javotoho pere ra te nei do mane ajirekasora te God osa ue humbuto indesora
1TI 4:5 amo embo na osa ue God ta ke ikari ai ta pari uore indari avo otohu eoi humbuto indagora.
1TI 4:6 Eto ke erena erevi no namei kamei ta ao ingihiroro inena Iesu Keriso ta ke agi ari embo aisoa eto ahe poekari javotoho ambo ambo ereoa amite eto God humota ari amita ke be amina umo simba ururou irari javotoho aisoa.
1TI 4:7 Eto embo na God kiae ue sarika evohu na hihi tirarako ere ora avo be toto God ta ke avo eto kogue ere pambuhuma hamo ejo.
1TI 4:8 Eto embo na amita visi te hamo te sovera aja eto kogue pambuhuma hamo eto enda ei ta iresuja amo uhajahate aisuja, te embo na God ta ari be jigama asi uje eto kito amo eto kogue pambuhuma hamo eto enda ei ta mihie ari javotoho amita degi puvurou kesuja eto ari ambota amite tapa inono aisuja.
1TI 4:9 Eto na ke asona avo ke be ingito kogo ejo
1TI 4:10 amo ungotena God ke be ari embo te eto embo tapa oreketo humbari embo God vasiri te amita hajire amo puvurou kesora avo ungote na simba ere ovora.
1TI 4:11 Eto ungotena ke aravo embo pure ngahia ue osaga ere kogora avoeto ke ere kajihena tapa erevi embo ta degi ahepoekejo are.
1TI 4:12 Eto umo embo evovo mane rate embo eha avoeto no ke te vasiri te osa ari te humota ari te ari javotoho amina God humota ari embomeni ta degi ahe kihira ao kito embo be ke are.
1TI 4:13 Eto na pambasi eto mihena avoeto inena embo ta tihi ta heteto God ta ke eheketo oje kahihe embomeni ahe poekejo kiore.
1TI 4:14 Eto ekalesia ta embo okokose na ingeni hamo ta tembihio embo nei na umo God ta hande erevi humbuto pure ejo ainge ijinu ingia avoeto do ingiha amite tapa jigama ejo.
1TI 4:15 Eto tunga be iketo pure ngahia ururo no pure avo embomeni na eheheto ke be aisora.
1TI 4:16 Eto no vasiri te eto ke do ahe ere poekihea amite tapa simba ue eto kogoeto jigijo. Eto ainge ururo umo te no ke ingiora embomeni te tapa orekasuja.
1TI 5:1 Eto embo okose ta degi ke ngahia mane asoa te no mama ke ijie ke seima ejo ingito ai. Eto embo ehaha amo inena namei kamei ke ijie ejo.
1TI 5:2 Eto evohu okokose amo aja ke ijie ejo, eto evohu eha amo no du emone ke ijie ari jajavotoho pere ejo.
1TI 5:3 Eto evohu dodoru meniundi irae oenga mihera avo ohare mamare ejo.
1TI 5:4 Eto amita meniundi te ahihije te mihera amina e te mamo te umbovo te jape te simba mine ara asora amo God na kito osa aisuja. Amita be amo ekalesia ta ari amo javo vahai simba eagora avoeto ari avo kito humbasora.
1TI 5:5 Rate evohu doru amo oenga mihie iji te mume te God humota ue God na hondate aja pari eaguja
1TI 5:6 te evohu doru nei amo enda ta vasiri amita gamo avo uje eaguja amo mahu pehari rate teho iraguja.
1TI 5:7 Eto ke erena erevi ao ururoro amo ganoka mane asora.
1TI 5:8 Eto embo amuna amita javo vahai te eto orosa vahai na veari embomeni, avo simba ae toasuja amo God humota ari amo mahu toari eto God ke be ae embopo amo sapura eto embo amo sapura bera.
1TI 5:9 Eto evohu dodoru nei nei amo ekalesia na simba asi javo kakajekasora amita ari amo erevira. Eto amita jua amo kane 60 eto dembari, amina amita ivu pehae eha irari iji te amo vasiri javotoho ere uahija
1TI 5:10 amo amita ari jajavotoho einge eaguja amo embo tapa na kiagora amo meniundi simba ari javotoho eto embo undurari javotoho te eto God ta pure ari embo ototohu ta utu egaguja eto osaga kiari embomeni hondate eaguja eto ari jajavotoho neite neite eaguja avoeto evohu amo ekalesia na simba aisora.
1TI 5:11 Eto evohu doru nenei evovo mane ehaha amo ekalesia na simba ara javo mane kakajekasova amo hamo ta uje avo hotembihe Keriso ta pure amo jo te tapa mane asora te embo eha jimbasi hotembihe
1TI 5:12 Keriso ta pure asi ke ijiera avo toaro enana ta degi pehumba puvuresuja.
1TI 5:13 Eto nei amo evohu doru ehaha na Iesu ta pure avo kupi pegogo hamo ue bande ari na eagora. Eto kupi pegogo pere mane rate ke nei te nei te eagora eto hihi nei te nei te tiragora.
1TI 5:14 Avo eto evohu doru ehaha na jimbuto meni ingeto bande simba ue irora erena. Eto ainge asora amo kitoho embo na kito pehumba ari haite manera.
1TI 5:15 Rate evohu doru nei nei na Keriso ta ari toto egerembeto Satan ta ambota ere pahora.
1TI 5:16 Eto God ke be ari evohu amita jao tahe dodoru mihiroro kito amo amita javo vahai avoeto amina simba aisuja eto ekalesia ta degi pure amo mane bouka ikasora te evohu doru simba ari embo irae amo ekalesia na simba aisora.
1TI 5:17 Eto ke nei amo erevira. Eto embo okose na ekalesia tihi jigihe God ta ke oje kahihe embomeni ahe poekihirou embomeni na kito embo dombo ke ijie amita pure ta mine peni ikaro humbasuja.
1TI 5:18 Amo God ta ke ta einge kajari mihia, “Eto rice be overekeore o cow na hamo haito hamo hegaguja amo cow ta pe mane togagora te amita pure ta mine avoeto tore indie pure eaguja.” Eto nei amo “Pure embo na mine humbasuja” ke ainge kajari mihia.
1TI 5:19 Eto ekalesia ta tihi jigari embo amita degi pehumba sio mane aisova te embo heriso rete heriso nei vahai kiari amina pehumba aisora.
1TI 5:20 Eto embo amuna ari sapura kaiketo asora amo embo tapa ta tihi ta isembavo embo tapa kito ari sapura asi mane hotembasora.
1TI 5:21 Eto God te Iesu Keriso te Anera enana ta tihi kikinosa ta ke tapa ere kajihena erevi ambo ambo ae erena amore tapa haheto umbae erena.
1TI 5:22 Eto ekalesia ta pure peni humbuto aja uje eto amo embo ta hamo ta ingeni sau mane tembasoa te be kito ejo. Eto ingeni hamo ta sau tembao ari sapura puvuresuja amo umote tapa sapura embo asoa avoeto ari tongopa ambu pere irijo.
1TI 5:23 Eto umo pere mane indesoa te no hini te eto no ambure nei te nei te avoeto wine isapa indijo.
1TI 5:24 Eto embo nei nei ta ari sasapura amo araha ta pere avoeto embo kihi humbuto ganoka ari degi ta pambaguja eto embo nei nei ta ari sasapura amo ku ta puvuto ambota pambaguja.
1TI 5:25 Eto ainge dombo ari jajavotoho amo tihi na kiagora, eto embo na ojikasuja te araha ta puvurou kesora.
1TI 6:1 Eto ke agi ue pure ari embomeni na pure mamo avo embo peni ke ijie pure aisora. Eto ainge ae amo pure mamo na God ta javo te dagota ahe poekari te avo sapura ke aisuja.
1TI 6:2 Eto pure embo na pure ta mamo amo God ke be ari embo avoeto namei ke ijirou pure embo na mane peive aisuja te pure tunga iketo pure ururou pure ta be amo amita tunga humbari embo God ke be eaguja amina humbasuja avoeto ari erevi ara ahe poekejo.
1TI 6:3 Eto embo amuna God ta ahe poekari javotoho te ungotenau Bada Iesu Keriso ta ke te avo ingari uje ae ue ke sokova na ahe poekaguja
1TI 6:4 embo amo keniga embo eto amita hotembari irae be amita ari amo erevira. Embo amina boru jumbari jujune mine ara amita gamo avo uje isapamane eaguja embo amita hotembari sapura amo tumo, hini kambari, embo ta javo ari sapura ari hotembari sapura isapamane mihia. Eto ke be ari enana ta degi irae be avoeto enana koro humbari ta degi ke ijie ke sokova na God ambo ambo eagora.
1TI 6:6 Eto embo na God ta ke ingito kogo aisuja amo hajire be eto tunga jamo jamo ari te iresuja amo irari javotoho hambasuja.
1TI 6:7 Eto ungotena nei do umbae enda ta puvua ainge dombo pambari amo teho pambasora.
1TI 6:8 Eto enda ta ungotenau bo te indari te iresuja amo ungotena inono ke asora.
1TI 6:9 Eto embo na hajae vajae embo asi uje eto amo ere pambuhuma engekari ta veagora eto hamo ta ujeje isapamane na eoi embo ta vasiri sapura eaguja.
1TI 6:10 Eto ke amita be amo koro osa ari amo ari sapura isapamane amita susu be ra, eto embo nei nei na koro tunga humbuto huhevihe God jenete eagora embo amita jo amo osaga na enetarira.
1TI 6:11 Rate umo God ta embo avoeto ari sasapura toto ari javotoho erevi eheheto pambujo amo ari javotoho asoa eto God ta ari be jigesoa, eto God humota asoa, eto osa asoa, eto tihi turoturo eto mane ereto hini kambari asoa te sovera eto iresoa eto umo ereto tumo ke sausau mane aisoa.
1TI 6:12 Eto God humota ue heka eto ari sapura dembejo. Eto umo embo isapamane ta tihi ta God ke be ijie vasiri daroho humbuha avo be jigijo.
1TI 6:13 Eto Iesu Keriso na na embo ta orekari embo ke ainge ijie Pontius Pilate ta harikena amita tihi ta eto God donda tapa amita vasiri ikari embo amita tihi ta
1TI 6:14 inena ke erevi agi eto ae erena amo God ta ke erevi tapa javotoho na pere jigito ururo Bada Iesu Keriso puvuresuja.
1TI 6:15 Eto God na amita iji ikari ta puvuresuja. Eto God amo javotoho ari ta God, eto Tihi Jigari Vahai eto King vahai eto Bada vahai
1TI 6:16 eto amina pehari irae eto umo oenga usasa ta iraguja amo embo ta tihi na mane kiagora eto amita degi otohu te sovera te daroho iresuja, amen.
1TI 6:17 Eto enda ta hajae vajae te mihera avo na embo peni ke eagora avo mane ke aingeko mane asora avo ejo ingore. Eto nau hajae vajae na na simba ururou javotoho iresona ke ainge avo mane aisora. Eto hajae vajae amo ke be manera te ungotena God humota ururoro amina donda tapa amina ungotena unduhurou osa aisora.
1TI 6:18 Eto haja vaja embo na ari jajavotoho amina hajae vajae embo ue hondate eto hande embo ara ejo are.
1TI 6:19 Eto ainge ue iji kombu amita ambo avo hotembihe vasiri jajavotoho avo harau ta nununga arako ue vasiri be avo ivo eto jigesora.
1TI 6:20 Eto Timothy inena simba ae ikari avo be simba ejo. Eto embo nei uhoho na God humota ari avo toto enana ta hotembari avo ke be ke ijie God hotembae ue ke taimbagora embo avo tojo. Eto God ta hondate ari avo no degi ta iroi.
2TI 1:1 Eto embomeni na Iesu Keriso ta degi vasiri te irari humbasora avo God na ena avoembo na Paul Iesu Keriso ta apostel ana God na ikena.
2TI 1:2 Eto nau tunga humbari meni Timothy nanena no ahari erevi ere kajihena. Eto God Mamo te ungotenau Bada Iesu Keriso te amita hondate ari te jo ari te peka te tapa no degi ta iroi.
2TI 1:3 Eto nau mamahamane na ere uahera ainge dombo nanena nau hotembari nei irae hotembari vahai na God ta pure ue iji te mume te amo God osa ue umo embo pari eagona.
2TI 1:4 Eto umo si ijiea avo hotembeto nau jo tapa na umo kito tunga javotoho asi uje ere ona.
2TI 1:5 Eto umo God humota oe koguena amo no aja Eunice ta aja ta aja Lois te na God humota ea avoeto na kogona amo inena ainge ere oa
2TI 1:6 avoembo nau ingeni no hamo ta tembeo God na no pure ta sovera ari hande ikena avo ji hukarako ao perimbaja erena.
2TI 1:7 Eto amita be amo God na Ahihi Otohu ungotenau hande ena amo joru ari ta ahihi mane rate kiari te osa ari te amita sovera ikaguja.
2TI 1:8 Avoeto umo me mane kesoa te Bada ta ke embomeni ta degi hande ejo eto na Bada avoembo tipura ehena avo hotembihe me mane kesoa rate na tipura ta mihie memenga ere kogona ainge dombo God ta sovera jigihe Iesu Keriso ta ke avoembo memenga kijo.
2TI 1:9 Eto ungotena otohu ue irora God na oreketo umbuna amo ungotenau ari avoembo ae rate amita uje na hondate ena. Eto enda ae kihi ta God na ungotena hondate aisuja amo Iesu Keriso ta degi nununga ena.
2TI 1:10 Eto eha oroho emo Iesu na puvuto ungotena orekehija amo ungotena hondate ari ta be puvija erevira eto ungotena pehari amo Iesu na ehei irae ehija avoeto ungotena vasiri te daroho iresora avo Iesu na amita ke na harikehija
2TI 1:11 eto Iesu ta ke hande ana eto amita ke ahe poekana amita apostel God na ikena
2TI 1:12 avoembo na eha oroho memenga erekogona te na me kiae rate na ke be eagona embo God amita degi ari nau te ahihi nau te avo ikehena amo iji kombu avoeto simba aisuja avo kogona.
2TI 1:13 Eto inena nau ke ikehene humbuha amo God ta ahe poekari be ra ijie Iesu Keriso humota ue amita osa ari na simba ejo.
2TI 1:14 Eto God ta ke no degi ta ikari avo Ahihi Otohu ungotenau jo ta mihia amita hondate ari na simba be ejo.
2TI 1:15 Eto ke nei amo Asia province embo na na tohora amo umo mahu ingea. Avoeto embo Phygelus te embo Hermogenes te embo tapa na na tohora.
2TI 1:16 Eto na chain na pundera amo embo Onesiphorus na puvuto joru ue me kiae iji nei nei ainge puvuto na unduaguja. Avoeto Bada na Onesiphorus ta embomeni kogurou jo aisuja avo erena.
2TI 1:17 Eto embo amina Rome ta puvuto na jombure ere umihe na hambuhaja.
2TI 1:18 Avoeto iji kombu te Bada na Onesiphorus kogurou jo aisuja avo erena. Eto embo amina da Ephesus ai ta na hondate isapamane uija amo umo kiarira.
2TI 2:1 Eto nau meni umo Iesu Keriso ta hondate ari na sovera ari humbuto
2TI 2:2 embo isapamane ta tihi ta ehene ingiha avoembo God ta pure ari haite amita degi hande ejo ingito embo nei nei ta ahe poekaro ingito umbare.
2TI 2:3 Eto dago na ere ora ainge dombo Iesu Keriso ta isoro ari singa eto no degi ta ngahia puvurou kito sovera ejo.
2TI 2:4 Eto embo na isoro asi pure humbasuja amo enda ta ari neite neite avo mane hotembasuja te amita isoro ta tihi jigari embo amina kito tunga javotoho aja aisuja.
2TI 2:5 Eto ke nei amo huhevari embo na ke agi ae ue sio huheveto dembasuja amina siro ta kope kogombari mane hoteto humbasuja.
2TI 2:6 Eto embo amuna pure ngahia eto donda ve kovasuja amo embo amina donda kihi humbasuja.
2TI 2:7 Eto na ke erena avo be hotembejo eto Bada na au be kesoa.
2TI 2:8 Eto be hotembejo, Iesu Keriso amo peheto vasiri te erena eto Iesu Keriso ta ohihi amo King David ra. Eto na God ta ke javotoho erevi embo ta degi hande ereona
2TI 2:9 avoeto na enda ta ke peni poekari embo ke ijie chain na tigere osaga te memenga te tapa mihena te God ta ke avo chain na tigaera
2TI 2:10 avoeto God na siriketo humbija embomeni avo Iesu Keriso na oreketo humbuto au usasa ta daroho irora ivo eto mihie pure ereona.
2TI 2:11 Eto ke erevi amo ke be perera. Eto Keriso ga ji atahu ta pehihera amo Keriso ga tapa vasiri te iresora.
2TI 2:12 Eto ivo eto iresora amo Keriso ga tihi jigesora. Eto Keriso egikasora amo Keriso na ungotena egikasuja.
2TI 2:13 Eto ungotena Keriso humota ae asora te Keriso na humota ue amita ke avo mane toasuja.
2TI 2:14 Eto ke erevi mahainge kaiketo ejo ingore. Eto ke be mane avo ijie boru ere jumbuhora avo Bada ta tihita haekejo. Eto ari ainge ere ora amo be mane amina ke ingari embo ta hotembari sapura eaguja.
2TI 2:15 Eto no vasiri iketo pure ururo God na kito nau pure embo be ra ke ainge aisuja eto umo God ta ke be avo kiari embo aisoa avoeto umo mane me kesoa.
2TI 2:16 Eto enana God kiae ue hihi tirihie ere pambuhuma sapura be aisora avoeto umo hihi tirari aingeko avo tojo.
2TI 2:17 Eto enana ta ahe poekari sapura masa te sigeto pambaguja
2TI 2:18 amo embo Hymenaeus te embo Philetus te na ainge ue ke be avo toto pahue embomeni ta degi ke einge eagora “Embo peheto vasiri te erasora amo mahu puvuto pambari ra” ke ainge ijie embomeni ta degi ahe ere poekihere embomeni nei nei God humota eagora amo ere toruhora.
2TI 2:19 Rate God ta ekalesia amo sovera te mihia amita hajire amo einge kajari ra, “Eto Bada na amita embomeni amo kiarira” eto “Embo tapa amuna Keriso amo nau Bada ke aisuja amina ari sasapura mane aisuja te toasuja.”
2TI 2:20 Eto embo ta irari bande amita jo ta amo donda nei ‘gold’ na ari eto nei ‘silver’ na ari amo daroho irari donda eto bande vahai amita jo ta amo donda nei ji te ovu enda te na ari amo pejeuja eto sari eaguja. Eto kihi amina pure javotoho eagora te ambota amina pure sapura eagora
2TI 2:21 eto ainge dombo embo na ari sasapura tapa avo toto pure javotoho ari embo eto otohu ue bande mamo ta pure ari donda javotoho arako ue God ta pure javotoho tapa amo amita degi ari inono be aisuja.
2TI 2:22 Eto meni singa na ari sapura asi uje eaguja aingeko avo toto javotoho ari, humota ari, osa ari peka humbari avo eheheto ejo, eto Bada ta degi jo javotoho na pari eagora embomeni na ari ainge amo eagora.
2TI 2:23 Eto embomeni na sarika ue ke be mane hotembari na ijie tumo uore jujune puvaguja amo umo kiari avoeto tojo.
2TI 2:24 Eto Bada ta pure ari embo na jujune mane aisuja te embo osa ue embo ta ari sasapura hotembeto toto ahe poekasuja.
2TI 2:25 Eto amita degi ngahia ari embomeni enana tunga jamo jamo te ahe poekihirou God na au enana ta jo haperekaute au pambuhuma amita ke be avo kesora.
2TI 2:26 Eto embomeni amo Satan ta uje avo ara vage ikari avo God ta ke avo kito hotembari javotoho humbuto Satan ta vage amo toto pambasora.
2TI 3:1 Eto umo ke erevi be ingijo. Iji kombu puvuto auvihirou amo iji sapura be sapura avo puvuresuja
2TI 3:2 amikote amo embomeni na ungo oenga hamo ta ujeje avo hotembeto koro osa ue viso toro ue “Na na” ijie God te embo te avo urumbihe e ta mamo ta ke peive ue otohu ari osa ari irae
2TI 3:3 amo embo jo ari amo irae ue embo ta ari sapura mane hotembeto toasora te embo ta javo aro sapura aisuja eto enana ta isoro peikari irae eto ungo orosa kesi uje ue ungo ari sasapura avo uje isapamane avo eagora.
2TI 3:4 Eto embomeni amina jo vahai na namei ke ijie jo nei na namei tasora avo hotembagora rate enana ta uje avo pere ue hotembari peni avo ue God uje ae eto enda ta gamo ta ere pahora.
2TI 3:5 Eto enana God ta sovera hotembae ue hamo na God jakeka erera embomeni ainge avo tojo.
2TI 3:6 Eto embo aingeko amina embo ta hande ta jijimeto pambuto horeto hotembari irae evohu ta degi hihi ti tirihore enana ta ari sasapura isapamane amina bouka eaguja avoeto ari sasapura ta ujeje isapamane ue ke avo ingihe ambo ambo eagora.
2TI 3:7 Eto enana ke ehaha ta gamo ano ingesi uje isapamane eagora te ke be amo kiari inono aera.
2TI 3:8 Eto embo Jannes te embo Jambres te ta ke na Moses ta ke ga isoro ea ainge dombo embomeni eto embomeni emita siro mahu sapura ari avoeto God na enana mahu toarira.
2TI 3:9 Eto enana ta ke amo pajito degi hoi ta mane pambasuja te embo Jannes te Jambres te amita ke inono avoeto embo tapa na kito ke sokova ke aisora.
2TI 3:10 Eto nau ahe poekari te ari te pure te humota ari te embo hondate ari te osa ari te hamo ngahia eto sovera ari te tapa amo umo kiarira.
2TI 3:11 Eto da Antioch te da Iconium te Lystra te ai ta osaga memenga embo na nau degi ta ikea te hamo ta sovera ari umbua amo umo koguea te Bada na na oreketo umbuna.
2TI 3:12 Eto ke be amo embo na God ta ke avo jigama ue Iesu Keriso ta jo ta iresi uje aisuja amo embo na osaga te memenga te ikaro kesuja.
2TI 3:13 Eto embo sasapura ke sokova ari embopo amina ke sokova mine ara ere uma sapura be aisora.
2TI 3:14 Rate umo meni isapa ta ihiketo God ta ke otohu kajari avo ingihe ere puvutuhoa, eto amuna ijioi ere ingagoa amo umo kiari avoeto umo Iesu Keriso humota be ere oa amo daingeto umo oreketo humbasuja amita kiari avo ere umbuhoa avoeto ke avo be jigito irijo.
2TI 3:16 Eto God ta ke kajari tapa amo God ta pe na ikari ra avoeto ke amina embo ahe poekasora eto ari sapura harikasora eto degi javotoho davore amo au kesora eto irari javotoho au kesora,
2TI 3:17 eto God ta pure ari embo na God ta ke jigama ururou ari javotoho tapa amo au kito au inono aisuja.
2TI 4:1 Eto God ta tihi ta eto Iesu Keriso amo puvuto embo peharite vasiri te amita ari siriketo humbuto enana ta king eto tihi jigesuja amita tombu ta inena erevi ae erena.
2TI 4:2 Eto God ta ke embomeni ta degi hande ejo. Eto iji javotoho te eto iji sapura te ke hande asi nununga ejo. Eto ekalesia embomeni na sapura ururoro kito inena no ke na haeketo ejo javotoho are. Eto ke javotoho ejo ingihe sovera ari umbare. Eto inena embomeni avo mane toasoa te kogue ahe poekejo.
2TI 4:3 Eto erevi ao ingora erena amita be amo iji puvurou embomeni na God ta ke be ingari uje ae ue ungota ujeje sasapura avo ue ke gamo avo aro ingesi ahe poekari embomeni isapamane siriketo humbasora
2TI 4:4 amina ke be avo ingari uje ae ue oje sujuto ahereketo hihi sokova avo ingesora.
2TI 4:5 Eto umo iji tapa no siro jigama ue memenga puvuresuja amo sovera ejo. Eto God ta ke javotoho avo hande ue no ekalesia ta pure avo ejo inono ai.
2TI 4:6 Eto God ta pene ikari gaga ai ta wine overeketo God ta degi hande ikagora aingeko dombo nau pambari iji puvei hamo nau God ta degi hande ikasona
2TI 4:7 eto na isoro javotoho ehena, eto huhevari ta javotoho ehena, eto na God toae humota ere ovona.
2TI 4:8 Avoeto ari javotoho ari ta siro kope avo nununga ari mihia avo, embo sirikari embo javotoho, ungotenau Bada amina iji kombu te humbuto na kogombasuja amo na pere mane rate embo amuna Iesu ta puvurari simba ere ovora amite tapa kogombasuja.
2TI 4:9 Eto na embo tapa na toto pambari avoeto umo sau sau nau degi ta puvujo.
2TI 4:10 Eto embo Demas amo enda ta ari osa isapamane ue na toto da Thessalonica ta pambuhoi eto embo Crescens na enda Galatia ta pambuhoi eto embo Titus amo enda Dalmatia ta pambuhoi
2TI 4:11 eto Luke na vahai namote mihia, avoeto embo Mark amo pure nau hondate ari inono avoeto Mark humbuto puvujo
2TI 4:12 eto embo Tychicus amo da Ephesus ta ikehene pambuhija.
2TI 4:13 Eto nei amo nau pohukari bo amo da Troas embo Carpus ta degi toa avo humbuto puvujo. Eto peni be amo nau o hamo ta ke kajari amite nau books te aingeto humbuto puvujo.
2TI 4:14 Eto embo Alexander amo auri pure ari embo amina nau degi ta ari sapura be uija amo Bada na mine au kesuja
2TI 4:15 eto embo amina ungotenau ke avo ingito tumo eto jujune uija avoeto umo te tapa embo avo be kijo.
2TI 4:16 Eto na kihi koto ta ganoka ehera amo na hondate ari embo amo joru ue puvurae ehera amita degi Bada na memenga mane ikasuja evo erena
2TI 4:17 eto Bada vahai na namote mihie sovera ari ikehei humbuto amita ke tapa avo enda nei embomeni ta degi ingora hande ehena. Eto na o lion ta pe ta oreto humbija
2TI 4:18 ainge dombo ari sapura te isoro te nau degi ta do puvuresuja amo Bada na oreto humbuto ere uma iji puvurou tihi jigari degi uhu i ta ikau iresona. Eto usasa te daroho amita degi iroi, Amen.
2TI 4:19 Eto evohu Priscilla te amita ivu Aquila te embo Onesiphorus ta embomeni te ere pekihena.
2TI 4:20 Eto embo Erastus amo pambae da Corinth ai ta mihia, eto Trophimus ambure humbei da Miletus ai ta toto puvena.
2TI 4:21 Eto jajemo iji puvurae ua emikote umo mahu sau puvujo. Eto ungotenau namei kamei embo Eubulus te Pudens te Linus te Claudia te enana tapa na umo ere pekihera.
2TI 4:22 Eto Bada na no jo ta iresuja. Eto amita hondate ari ungota degi iroi.
TIT 1:1 Na Paul, God ta ke agi ari embo eto God na siriketo humbari embomeni amina God humota be ue amita ke be avo be kogue God ta ari javotoho avo be jigama ara na Iesu Keriso ta apostel nane ke hande ere ona
TIT 1:2 amo ungotenau irari daroho avo humbasi ue God ta ke be avo humota ara eagona. Eto irari daroho avo God ke sokova embo mane ke be ari embo amina enda ae kihi ta embo ta degi ikasi ke ena
TIT 1:3 amo amita iji inono ta embo na amita ke be avo kiagora ungotenau orekari embo God amita ke avo nanena hande ana ikena.
TIT 1:4 Na Paul ungotena God ta ke humota eagora avoeto Titus umo nau meni avoeto no degi ta ahari erevi ere kajihena. Eto God Mamo te Iesu Keriso ungotenau orekari embo amita hondate ari te peka te no degi ta iroi.
TIT 1:5 Eto umo enda Crete ta toto puvuhena amo pure huna toruhena avo inena ae umo toto puvuhena. Eto ke no degi ta ijiena ainge dombo da vahai vahai ta ekalesia tihi jigari embo avo inena siriketo umbujo.
TIT 1:6 Eto tihi jigari amo ari eingeko avo umbujo. Eto ari javotoho ari embo evohu vahai jimbari amita meniundi God ke be ijie e mamo ta ke agi ue isa sio sao mane eagora embo ainge avo umbujo.
TIT 1:7 Eto pure erena amo nei mane God ta pure avoeto ari jajavotoho eaguja embo amina aisuja, eto keniga embo eto tumo embo, wine indito tihivi ari embo, sausau ereto embo isembari embo, ke sokova ijie ombagora embo amina mane aisuja
TIT 1:8 te embo undurari embo, ari javotoho osa ari embo, hotembari javotoho hotembeto ari embo ari javotoho ari embo otohu embo amita hotembari sasapura uje sasapura toari veari embo
TIT 1:9 amina tihi jigihe ke tapa do ahe poekihera avo inono ta jigama ue hande ururou embo nei nei na sovera ari humbuhuro embo nei ta ke sokova amo tau iraesuja.
TIT 1:10 Eto ke sokova ari embopo ainge amo mihera amina God ta ke be ingito ingaesira ue ke sokova na embomeni humbuto ari neite neite amina kihi humbuto ere pahora.
TIT 1:11 Eto Judea embomeni na hamo kakamba eto God ta toho ara ke sokova na ijie ahe poekihore embo javo vahai amo kaheketo oenga pamba eagora avoeto enana ta ahe poekari sapura avo haekejo, amo osa ue koro humbasi ere ora.
TIT 1:12 Eto ke sokova ainge ere ora amo enana da Crete embo vahai ungota peroveta vahai amina hariketo ke einge ena, “Eto Crete embomeni amo ke sokova hihi tirari isoro ngahia ari kupi ue okope undurari embomeni ra”
TIT 1:13 ke ainge ena amo Ke be avoeto enana ta ari avo ngahia na haekejo God ta ke be avo humota ue
TIT 1:14 Judea ta hihi sokova amite ari neite neite avo ke be ae ari embopo na ara eagora avo toare
TIT 1:15 eto otohu embo ta degi donda tapa amo otohura te God ke be ae ari sapura ari embopo ta degi donda tapa amo otohu manera. Eto ke be amo enana ta hotembari te jo te tapa amo sapura ari ra.
TIT 1:16 Eto enana na God ke be eagona ainge eagora te God ke be ari embopo na enana ta ari na harikeoi kiagora amo enana God ke be ae embopo ra. Eto enana God ta ke agi ae ari sasapura embopo amina ari nei javotoho ari inono aera.
TIT 2:1 Rate inena ahe poekasoa amo erevira. Eto embo God ta ke ingihe irari javotoho iresora amita ke avo pere ahe poekejo.
TIT 2:2 Eto embo be na ari erevi ara ahe poekejo. Eto wine peni mane indesora, te ari javotoho pere ururoro embomeni na kito embo be ra ainge ijiroro iresora amo ari tapa sio mane aisora te ke be hotembeto aisora eto humota ari na osa ari na memenga do puvurou kito amo mane toasora te sovera eto iresora.
TIT 2:3 Eto ainge dombo veha evohu na ari einge ara ahe poekejo. Eto evohu amina ari ainge ururoro amo embomeni na evohu emo otohu evohu ra ainge aisora. Eto embo nei ta javo mane aro sapura aisuja eto wine peni mane indesuja te vasiri javotoho ahe poekari evohu aisuja
TIT 2:4 eto ainge ururoro evohu ehaha na kito amita ivu te meniundi te osa ue daingeto simba aisora avo be kesora.
TIT 2:5 Eto umo oenga vasiri te ari te simba ue enana ta jo ta hotembari javotoho ue bande ta pure agari jivari te gajika toreka te eto embomeni ta osaga kito hondate ari te ivu ta ke agi ururoro embomeni na kito God ta ke sokova ke mane aisora.
TIT 2:6 Eto ainge dombo embo ehaha avo ejo enana ta ari te vasiri te simba are.
TIT 2:7 Eto inena no ari javotoho amina enana ta degi ahe kihira ejo kiore. Eto embomeni ahe poekihe kege ganini mane sio aisoa te embo humota ari na ke be pere ijiro
TIT 2:8 kitoho embo na no ke javotoho avo ingihe ungotenau ari te ke te avo ingito urumbari inono ae avoeto me kito ke mane asora.
TIT 2:9 Eto embo nei ta ke agi ue pure ari embomeni na pure mamo ta ke tapa avo ejo agi are. Eto ke mine mane sapura asora te pure ururoro pure mamo na kito tunga javotoho aisuja
TIT 2:10 eto pure mamo ta donda mane pegene aisuja te javotoho be na pure ururoro pure mamo na kito humota aisuja. Eto ainge ururoro embomeni na ungotenau orekari embo God ta ahe poekari avo kito uje asora.
TIT 2:11 Eto God ta hondate ari puvuna amo embo tapa orekasi puvuna.
TIT 2:12 Eto God hotembae ue enda ta ujeje ta pahuore God ta hondate ari amina eoi ari avo toto God hotembeto ari javotoho jigama ue ungotenau vasiri avo kogue iragora
TIT 2:13 eto ari ainge ue God sovera te Iesu Keriso ungotenau orekari embo usasa te puvuresuja avo simba ere ora
TIT 2:14 eto embo amina ari sasapura tapa amo amita hamo na ombuto ungotena humbuto egau otohu ue amita toho be ara umbuna amo ungotena jo tapa na ari javotoho pere ara ena.
TIT 2:15 Avoeto ke erena erevi ahe poekejo. Eto ke emo na mane God ta ke avo eto ke eremina embo na sapura ururoro kito haeketo sovera ari ikejo umbare. Eto ari ainge ururo embomeni na umo kito ke be ari embo ke are.
TIT 3:1 Eto ke mahu ijiera ainge dombo ejo no embomeni ingito enda ta tihi jigari embopo ta ke agi ue ari javotoho tapa avo asi nununga are.
TIT 3:2 Eto embo na embo nei ta javo humbuto au mane sapura aisuja te peka ari tunga humbari ke ainge ijie, namei amo embo peni umo isapa ke ainge ijie iresora.
TIT 3:3 Eto iji mahu amo ungotena sarika ue ke agi ae degi nei sapura ta pahue enda ta uje neite neite na andirari amo ari sapura neite neite ue embo nei ta donda kito tumo ue mine tara asi ere uahera.
TIT 3:4 Rate ungotenau orekari embo God na kito jo enu osa ue
TIT 3:5 ungotena oreketo umbuna, amo ungotena ari jajavotoho avo eto ae rate amita jo ari na einge ena. Eto amita Ahihi Otohu na enu meni eha ingarako eto embo ehaha jajavotoho ea.
TIT 3:6 Eto God na ungotenau orekari embo Iesu Keriso ta pure avo kogue Ahihi Otohu ungotenau jo ta overekena
TIT 3:7 eto amita hondate ari amina ungotena embo sasapura mane embo jajavotoho ere ora amo vasiri daroho avo hoteto iresi simba ere ora.
TIT 3:8 Eto ke erena erevi ke be avoeto no embomeni ta degi ao ingora erena. Eto God humota ere ora embomeni na ke erevi ingihe ari jajavotoho asi tunga ikasora. Eto embo tapa amuna ke javotoho erevi ingihiroro amo ungota degi irari javotoho puvuresuja.
TIT 3:9 Rate Judea ta ke pepeni neite neite amite eto Judea ta Ohihi ta hihi sokova neite neite kakajekari avo kogue tumo ue boru jumbuhe ke sapura eagora avo tojo. Eto ke sokova amo be ambu ra.
TIT 3:10 Eto jujune ke aro ingesi jujumi ujekari embo amita degi ke ejo ingioi eto ao ingito toae au amo ehako ejo ingito toae au kito avo tojo oenga iroi
TIT 3:11 eto umo kogoa embo amo ari sapura na jo andirari avoeto ari sapura amita na pehumba aisuja.
TIT 3:12 Eto na jajemo iji amo na da Nicopolis ei ta iresona avoeto embo Artemis te embo Tychicus te ikano no degi ta pambaro kito umo etokito nau degi ta puvujo.
TIT 3:13 Eto enda ta ke pepeni papeni simba ari embo Zenas te embo Apollos te degi ta pahue indari te donda nei do jigama ue pambasora avo pere hondate ejo pambari pere are.
TIT 3:14 Eto ungotenau embomeni na kupi pegogo ambo ue ombari asari humbasi amo jo tapa na pure tunga iketo pure javotoho asora amita kiari avo umbara erena.
TIT 3:15 Eto embomeni tapa namote mihera amina umo ere pekihera. Eto embomeni dago osa ue God humota eagora avo ere pekihera, ejo ingore. Eto God ta hondate ari ungota degi iroi.
PHM 1:1 Ajao nau namei eto nau pure vahai embo Philemon. Na Paul Iesu Keriso avo embo tipura ehena te namei Timothy te na no degi ta ahari erevi ere kajihera,
PHM 1:2 te dagota du Apphia te Iesu ta pure ngahia ari embo Archippus te ekalesia no bande ta horukagora avo ere pekihera te ke erevi enana ta degi ikejo kiore.
PHM 1:3 Eto ungotenau Mama God te Bada Iesu Keriso te ta hondate ari te pekari te ungota degi iroi.
PHM 1:4 Eto na pari ue kaiketo umo hotembagona
PHM 1:5 te umo Bada Iesu te God ta embomeni tapa osa ue humota eagoa duru avo ingihe ungotenau God jakeka eagona.
PHM 1:6 Eto inena Iesu Keriso ta ke hande ururo ungotena Keriso ta ambotani na Keriso ta degi ta tunga jamo ari te hondate ari doitoko ere humbuhora avo be kesora ainge ijie pari eagora.
PHM 1:7 Eto nau namei no undurari javotoho na ehei God ta embomeni na tunga javotoho be ere ora avo duru ehere ingito tunga javotoho be ere ona.
PHM 1:8 Eto na Keriso na no okose ikehija avo eto na umo ari javotoho ai ke ngahia na ke ahena
PHM 1:9 rate osari avo eto ke ngahia toto ke erevi no degi ta seima asona. Amo embo mane na Paul Iesu ta ke hande ari embo te Iesu avoembo tipura ehena nanena nau meni Onesimus avo eto no degi ta penunu erena.
PHM 1:10 Eto na tipura ta mihene amina puvuto Iesu ta ke humota eto meni nau ainge uija.
PHM 1:11 Amina mahu umo hondate ari haiteko mane rate eha amo degi no ta nau ta hondate ari haiteko aisuja.
PHM 1:12 Eto Onesimus avo no degi ta egerembeto ere ikihena rate nau meni be ikarako ere ona.
PHM 1:13 Eto na Iesu ta duru javotoho avo eto tipura ta mihene umo hondate Onesimus na na hondate ue ei iroja uje ere ona.
PHM 1:14 Rate na no ke ingae mihie Onesimus mane haekasona te ikasona rate inena ikaehea amo jo ngahia eto mane ikaehea rate osa ari na hande ikaehea.
PHM 1:15 Eto Onesimus na umo toto pambuhija amo God ta uje ta pambuheite? Amo ke be eto amina iji isapa eto no degi ta eto pambuto no degi ta datoho aisuja avo God na uje enute?
PHM 1:16 Onesimus na nau namei ehija rate no namei be aisuja. Eto no pure ari embo pere mane rate no tunga humbari eto ekalesia vahai embo aisuja.
PHM 1:17 Avo eto Iesu Keriso ta ari avoeto ungotena namei kamei ra. Eto inena ke avo be hotembihea amo na pekaehea ainge dombo Onesimus puvurou javotoho eto pekejo.
PHM 1:18 Eto amina no degi ta sapura do uija amita be avo ejo nanena ombane,
PHM 1:19 nau javo erevi ere kajihena. Na Paul nanena mine ikasona, rate umo kogoa amo inena Iesu ta degi vasiri eha humbuha amo na Iesu ta ke hande uena avoeto humbuha.
PHM 1:20 Avo eto namei na do penunu erena avo Christian ta vasiri na ejo. Eto Bada Iesu avo embo nau degi ta Christian ta osari na ari erevi ejo tunga javotoho ane.
PHM 1:21 Eto na ahari erevi kajihe kogona amo tapa do penunu erena avo ikasoa avo pere mane rate nei hamo ta ikasoa.
PHM 1:22 Eto ke nei amo nau evari bande nununga ejo amita be amo na hotembihena ungota pari isapamane avo eto God na na ikau ungota degi egerembasona.
PHM 1:23 Eto na tipura vahai embo Epaphros na ungo ere pekihia amo namoga Iesu Keriso avoeto tipura ena.
PHM 1:24 Eto nau pure vahai ari embomeni Mark te embo Aristarchus te Demas te Luke te aingeto ungo ere pekihera.
PHM 1:25 Eto Iesu Keriso ta hande ari te hondate ari ungota degi iroi, orere re.
HEB 1:1 Mahu be mahu amina God na ungotenau ohihi ta degi ke au ingora peroveta ta degi ke ikenu hande ue ere pahovora
HEB 1:2 tutumota ke ikehija amo amita Meni avo ikehija. Eto amita Meni na donda tapa uhu ta enda ta ikenu irerembena avoeto donda tapa amo Meni na hoteto umbaja ena.
HEB 1:3 Eto Meni amo God ta usasa eto God ta hajire vahai iraguja. Eto donda tapa amo amina amita ke sovera te na vasiri ikihe simba eaguja. Eto God ta Meni na ari sasapura egenu irae enu uhu ta vihito tihi jigari embo okose amita ingeni be ta arumbeto.
HEB 1:4 Anera ainge mane embo peni ena ainge dombo amita javo amo God ta Meni avoeto peni be eto Anera ta javo ainge manera.
HEB 1:5 Eto ke be amo God na Anera ta degi ae rate amita Meni ta degi ke einge ena. “Eto umo nau Meni eto na no Mama ra.” Eto ke nei amo, “Na amita Mamo asona eto amo nau Meni aisuja,” ainge ena.
HEB 1:6 Eto God na amita Meni ikenu enda ta pahunu Anera ta degi, “Ungo nau Meni jakeka evu” ke ainge ena.
HEB 1:7 Eto Anera amo do aingere amita ke kajari amo einge mihia, “God na amita ke agi ari Anera ta degi ke eoi sariketo pisara te ji peri te eagora.” ke ainge Anera ta degi eaguja
HEB 1:8 te Meni ta degi amo ke einge eaguja, “Umo God avoeto ei ta arumbeto tihi jigihe daroho iresoa. Eto no tihi jigari ta hajire amo ari jajavotoho ta kani avo jigito iresoa.
HEB 1:9 Eto umo ari jajavotoho osa ue ari sasapura uje ae ere ova avoeto, no God nanena umo tunga javotoho ari ta seha na umo vurito no namei kamei ta siro ta ikehene hetehea.”
HEB 1:10 eto ke nei amo einge ena, “Bada, ihikari ta amo inena enda ove a, eto uhu amo no ingeni ta hajire ra.
HEB 1:11 Eto Umo avo daroho iresoa te uhu ta enda te avo irae asora. Eto bo iji koso jigama uore horerekaguja aingeko au
HEB 1:12 inena bo mahu avo egoveketo eha hondate ikarako aisoa, rate inena irari datoho ta iresoa no iji tutumo irae.”
HEB 1:13 eto God na amita Anera vahai ta degi ke einge ae ra, “Umo huma nau ingeni be ta arumbao nanena ano kitoho embo ta hamo ta no uhu tembasoa.”
HEB 1:14 eto Anera ta pure be amo God na embomeni amita avo oreketo humbasuja amita simba ari embopo ra.
HEB 2:1 Eto ke mahu ingihera avo toto pambagora ungote oje jivito ehako be ingesi erena.
HEB 2:2 Eto Anera na Moses ta degi ke enu kajena amo embo na ke vahai au sapura aisuja amo God na amita sapura ta mine ikau kesuja amo mane toasuja avoeto God na embo amita toho oreketo ere uhua.
HEB 2:3 Rate embo amuna God ta orekari avo ke be ae aisuja amo ari sapura ta memenga amo tiumbeto pambari inono aera. Eto God na ari sasapura orekihie embomeni humbasuja amo Bada na kihi embo ta degi harikenu ingia avo dagota degi eo ingia.
HEB 2:4 Eto God na ungotena kito ke be ara hajire neite neite ari sinderi neite neite ikenu kia. Eto Ahihi Otohu ta sovera ari amo ujena ikenu ungotena vahai vahai na humbuto pure eagora.
HEB 2:5 Eto enda ambota puvuresuja amita ke erera amo Anera na enda avo mane tihi jigesora
HEB 2:6 rate embo amuna tihi jigesuja amita ke amo embo vahai na einge kajari mihia, “Eto umo God rate do eto embo hotembihe, eto embomeni simba ere oe?
HEB 2:7 Eto iji isapa Anera amo peni eto embomeni amo isapa ainge amo inena ari rate inena jige vihito siro ta otohu pasari usasa te na kogombete koreora, amo donda tapa avo embomeni na tihi jigora ika.” ke ainge kajari mihia
HEB 2:8 amita be amo God na au donda tapa enda ta eto uhu ta amo embo na tihi jigesora amo eha oroho emo tihi na kiae
HEB 2:9 rate Iesu avo ungote ere kogora amo iji isapa God ta Anera ainge mane meni isapa siro ena amita be amo God na embo tapa hondate aisi ue Iesu ikenu memenga kogue embo tapa avoembo pehena. Avo eto God na enu siro ta otohu pasari usasa te avo asuketo otohu ue embo peni eto mihia.
HEB 2:10 Eto God amo donda tapa ari embo avoeto donda tapa amo amita jo ta iraguja amina meniundi isapamane na usasa amita ta hururoro embo oreketo humbasi kihi Umbari Embo Iesu avo ikenu osaga memenga kina amina ari tapa inono ena. Eto ari erevi God na javotoho be ena.
HEB 2:11 Eto Embo Otohu Ari Embo te embo ototohu te tapa amo javo vahai avoembo Iesu na namei kamei ke ijie meki meki mane eaguja.
HEB 2:12 Amina ke einge God ta degi eria, “Nanena no javo avo nau namei kamei ta degi harikihe embo tapa ta tihi ta haveni ta umo jakeka asona.”
HEB 2:13 eto “Na embo eto umo humota aisona” ainge eto, “Na nau meniundi God na ikehija amiga mihena.” ainge ena.
HEB 2:14 Eto amita meniundi amo visi te orosa te avoeto amina visi humbuto embo eto pehari ta ivo simba ari embo Satan amita sovera ari avo purisa tirisa ehei
HEB 2:15 embomeni pehari joru ue joru ta ke agi ue mihovora avo ehei joru toto teho mihera.
HEB 2:16 Eto ke be amo Anera hondate asi ae rate Abraham ta meniundi avo hondate ere ua
HEB 2:17 amo embo ta priest peni eto iji tapa God ta degi ungotena jo uoi embo ta ari sasapura tapa avo ajato ijioi ingito Iesu ta orosa mahu enda ta vena avoeto hotembeto toaguja eto Iesu na amita namei kamei ta visi te orosa te umbae toaehija amo ari ainge mane aehija.
HEB 2:18 Eto amita degi engekari puvunu osaga memenga kina amo mahu kina avoeto ungotenau engekari puvuresuja amo amina kito jo ururou hondate aisuja.
HEB 3:1 Avoeto nau namei kamei ototohu ungo uhu ta pondo ta oru humbari embopo ungo na ungotenau priest peni God ta ke hande ari embo Iesu ke be eagora avo be hotembevujo.
HEB 3:2 Eto God ta javo vahai embomeni eto Moses na God humota ena ainge dombo Iesu na Ikari Embo humota ena.
HEB 3:3 Eto bande amo peni rate bande gerikari embo amo peni be ra ainge dombo Moses amo peni rate Iesu amo peni be ra.
HEB 3:4 Eto bande tapa amo gerikari embo oenga oenga rate donda tapa amo God na ena.
HEB 3:5 Eto God ta javo vahai embomeni eto embo vahai Moses na God humota ue amita ke ingina avo inono ta hande enu ingia eto amita ambota God na ke nei ikenu puvuna amite tapa ungotena ere ingihera.
HEB 3:6 Rate God ta javo vahai embomeni rate Keriso vahai avo God ta Meni be ra. Te ungotenamo te tapa hamo ta sovera ari humbuto Keriso humota ue ke be ijie sovera ari iji kombu simba ue amo ungotena God ta hatira ere ora.
HEB 3:7 Avoeto Ahihi Otohu na ke einge eria amo, “Ungo na ke nau ingihe kito amo ungota jo ngahia mane aisova.
HEB 3:8 Eto ungota mamahamane na degi sapura be ojagatambu ta jua 40 amita jo ta nau degi ta tumo ue.
HEB 3:9 Na undupa ue engekihe ari nau avo kogue osaga ere koguahera. Eto enana ta ari avo nanena kito tumo ue ke einge ea, ‘Enana na ari nau avo kiae ue jo ta hotembari na degi nei ta sio ere pahora
HEB 3:11 avoeto enana nau jangu indari degi ta mane horasora,’ ke ainge tumo te tapa ngahia na ea.” Eto ke ainge amo Ahihi Otohu na eria.
HEB 3:12 Avoeto nau namei kamei ungo ari sapura asi jo ta hotembari na God ke be ae ue God vasiri te avo toto pambuova avo kito kogoevujo
HEB 3:13 eto ari sasapura ta hotembari sokova amina eoi jo ngahia eaguja avo haekihe Iesu egerembeto puvurae eha emikote ungo oenga ke javotoho na hondate mine ara ue sovera ari humbuhe irivujo.
HEB 3:14 Eto ungotena kihi Keriso humota ea ainge pere humota ere uma Keriso kito amiga javo vahai embomeni aisora avoeto ere ora.
HEB 3:15 Avoeto ke einge Ahihi Otohu na eria avo ungota degi ehako erena, “Eto ungo na ke nau ingihe kito ungota mamahamane na degi sapura ojagatambu ta mihie jo ngahia ere uahera aingeko mane aisova.”
HEB 3:16 eto embo God ta ke ingihe jo ngahia ere uahera amo amunure? Amo Moses na Egypt enda ta eto tihi jigena embomeni amina ea.
HEB 3:17 Eto God na jua tapa 40 amita jo ta embo amita degi ta tumo ere uahei? Amo embo ari sasapura ue ojagatambu ta sasari ere uahera amita degi ta ena.
HEB 3:18 Eto God na embo amuta degi, “Ungo nau jangu indari degi ta mane horasova.” ke ainge hariketo ena. Amo embo God ta ke agi ae embomeni ta degi ena
HEB 3:19 avoeto God ke be ae embopo amina God ta jangu indari degi ta horae, avo ere kogora.
HEB 4:1 Eto God na amita jangu indari degi ai ta embo na toruera ke ena amo irae ae mihia avoeto ungo na “Na degi ai ta horari haite manera” ke ainge mane aisova
HEB 4:2 te God ta duru javotoho amo enana embo mamahu ta degi ta, eto ungotenau degi ta ikari avoeto enana God ta duru avo ingito ingarako ue humota ae avoeto enana ta jangu indari irae
HEB 4:3 rate ungotena God ke be ijie humota eagora avoeto amita jangu indari ta horagora te enana ta degi God na ke ngahia na eto einge ena, “Enana nau jangu indari degi ta mane horasora.” ainge ena. Eto God na uhu te enda te enu irae enu
HEB 4:4 jangu indina amita ke amo einge kajari mihia, “Eto iji 7 rate iji 6 pure eto 7 amo jangu indina.” ke ainge kajena
HEB 4:5 te “Enana nau jangu indari ta mane horasora.” ke ainge amo enana avoembo kajena.
HEB 4:6 Eto enana God ta duru javotoho amo mahu enu ingia te ke agi ae avoeto jangu indari ta horae rate embo nei na horasora.
HEB 4:7 Avoeto God na iji nei ikena amita javo amo ‘Iji eha’ avo King David ta degi enu ingito ke einge kajena. “Eto ungo iji eha emikote God ta ke ingito jo ngahia avojo.” Ke ainge David na kajari mahu ta kajena.
HEB 4:8 Eto embo Joshua na enana ta degi jangu indari iji ikaehija amo God na jangu indari iji nei puvuresuja amita ke amo mane aehija.
HEB 4:9 Avoeto God ta embomeni ta jangu indari iji amo irae ae rate mihia
HEB 4:10 amita be amo God na pure enu irae enu jangu indina ainge dombo ungotena hamo memenga ta pure avo toto God ta degi jangu indesora
HEB 4:11 avoeto embo mamahu ta ahe kihira sapura ke agi ae avo toto jo tapa na God ta jangu indari ta eto kito horasora.
HEB 4:12 Eto God ta ke amo vasiri te sovera te mihia amita ti amo o hevari asivo aingeko mane pe heriso amina embo ta ahihi te hotembari te amita jo ta jeto haunketo veto jo ta hotembari sasapura te hotembari jajavotoho te avo siriketo sapura oenga ikihe javotoho oenga ikaguja
HEB 4:13 eto donda tapa amo God na ena avoeto donda nei God kiae titihata iraera te ari te hotembari te tapa amo araha ta pere mihia avo eto God na pehumba ururou amo ke mine aro ingesuja.
HEB 4:14 Eto ungotenau Priest Peni Dombo be God ta Meni Iesu na uhu ta pambuto mihia avo ke be eagora avoeto humota be are.
HEB 4:15 Eto ungotenau Priest Peni Dombo be amo ungotena Satan na engekaguja ainge dombo avo engekena rate amina ari sapura aera te ungotena ivo ambu embopo amo amina kiaguja amo jo eaguja.
HEB 4:16 Avoeto avo arumba peni ai ta arumbeto mihia amo osaga iji te amo meki mane kesora te amita jo ta auvaro kito jo ururou porere mane aisuja te sau sau hondate aisuja.
HEB 5:1 Eto priest peni ta pure amo einge eaguja, embo vahai humbuto ikeore amina embo ta ari sasapura na kitohosira eagora avoeto God ta degi peka humbasi pene gaga ta hande ikaguja.
HEB 5:2 Eto embo amite tapa amo embo avoeto ivo ambu embo amo kiari avoeto embo amuna ari sapura ta pahuroro kito ke seima kekaha eto oreto humbasuja.
HEB 5:3 Eto embo tapa ta ari sasapura pere mane rate embo amite tapa amita ari sasapura avoeto peneha ikaguja.
HEB 5:4 Eto embo na priest peni umo oenga mane hetasuja te God na ijukau hetasuja amo priest peni Aaron na ena ainge dombo.
HEB 5:5 Eto Keriso na umo oenga priest peni ae rate God na sago kiagora amita degi usasa ikenu humbuto hetenu amita degi ke einge ena. “Umo Meni nau eto na no Mama ra.”
HEB 5:6 eto ke nei amo, “Umo embo Melchizedek na ena ainge dombo inena Priest eto daroho iresoa.” ke ainge God na ena.
HEB 5:7 Eto Iesu na enda ta mihie hori gaga ijie si te tihi sisivu te tapa God na pehari ta oreketo umbaja pari ena amo meni isapasira ue God otohu ue pari ena amo God na amita pari ingina.
HEB 5:8 Eto umo God ta Meni rate daingeto God ta ke agiari Meni aisuja avoeto osaga memenga ere koguahija amina kiari humbunu inono ena.
HEB 5:9 Eto humbuto amita pure avo enu irae enu embo amuna amita ke agi eto amita degi vasiri daroho humbuto iresuja.
HEB 5:10 Eto embo Melchizedek na ena ainge dombo ungotenau priest peni dombo Keriso amo God na ikena.
HEB 5:11 Eto amita ke neite neite nanena avo ingaeheva te ungo na ke ehaha ingari uje ae ue ingito ingarako ere ova avoeto daingeto ke ehaha emo aro ingovo.
HEB 5:12 Eto ungo na ke ahe poekari embopo aheva te God ta ke ngangahia mane, avo ungo na ingesova amo ehako ingesova ehako ingesova ainge ue indari ngahia indae meni isapa emi kajarako uore ere ovova.
HEB 5:13 Eto embo amuna God ta ke javotoho Keriso ta degi umbera amo humbuto hamo ae avoeto emi mu pere indagora amo meni isasarahora.
HEB 5:14 Te embo na indari ngahia indaguja embo amo God ta ke ingito hamo eto sapura davore javotoho davore amo kiari avoeto meni isapa mane rate embo be ra.
HEB 6:1 Avoeto ungote Keriso ta ke ikari araha ta avo pere mane rate ke ngangahia amite tapa ingihe embo be are. Eto ke pepeni araha ta amo mahu ehere ingihava avo ehako mane aro ingesova, ke amo erevira, embo na ari sapura aisuja amo ahihi amita amo pehasuja eto embo na God humota ue vasiri te iresuja
HEB 6:2 amite bapataito ari te ingeni hamo ta tembari te eto peheto ehako vasiri te erari amita ke te eto God na ari sirikari amita ke ta avo ehere ingihave
HEB 6:3 ke avo toto God ta hondate ari na ke ngangahia avo aro ingesova.
HEB 6:4 Eto embo amuna God ta degi vasiri eha humbuto usasa kogurou Ahihi Otohu jo ta horau
HEB 6:5 God ta ke ta hondate ari eto iji ambota puvuresuja amita sovera ari avo ere koguhaete
HEB 6:6 avo toto pambasuja amo egerembeto aja to ari inono ae ra te vasiri eha ehako humbasi aisuja amo embo tapa ta tihi ta Iesu ji oreka (cross) ta tarako ue Iesu ere urumbihia.
HEB 6:7 Eto ga kaikari vouvoi enda na indie be javotoho enda mamo ta ikihe mine javotoho God ta degi humbaguja
HEB 6:8 rate enda na vive pepe te avo ikasuja amo enda sapura avoeto God na au aro evekasuja, eto God egikagora amore ainge dombora.
HEB 6:9 Eto ungo nau tunga humbari embomeni, na kogona amo ungota vasiri amo ke erena ainge mane avoeto ungo God na orekari embomeni avoeto ungota irari javotoho aita be javotoho God ta degi puvaguja.
HEB 6:10 Eto God na ungota pure ngahia amo mane jene ambuaisuja amo ungo na God osa ue amita meniundi ere unduhovova.
HEB 6:11 Avoeto dago ta uje amo ungona pure vahai avo tunga iketo ururovo iji tutumota puvurou ungotena simba ere ovora avo kesora.
HEB 6:12 Eto ungo mane kupi pegogo asova te God humota ari embomeni na simba ue hotari humbagora embomeni avo kogue ari ainge dombo avo humbasova.
HEB 6:13 Eto God amo peni be eto embo nei na God ta javo dembaera avoeto Abraham ta degi do aisuja avo ijie javo amita avo humbuto ke einge ena,
HEB 6:14 “Eto na no degi ta hondate ari isapamane ikihe ano umo te no ahihije te na be ikihirovo embo isapamane aisuja.” ke ainge God na ena.
HEB 6:15 Avoeto Abraham na humota ue simba ue mihinu ke amita be avo God na ikenu kina,
HEB 6:16 eto embo na embo teho amita javo umbae rate ke mine ara ijiore peni eoi amo embo peni God amita javo humbuto eagore ke irae eaguja.
HEB 6:17 Eto ainge dombo amita ke avo be pere avo hoteto humbasora embomeni na be kiagora javo amita avo humbuto ena avoeto ke amita avo egikari inono aera.
HEB 6:18 Eto God na ungotenau degi ta ke ena amo amita javo humbuto ena avoeto ke sokova ae rate God amo ke be pere eaguja, avo kesora vahai avora. Eto ungotena huheveto God ta degi pambuto hondate ari hambera avoeto tunga jamo ari humbuhe ungotenau degi ta do ikasi ena avo sovera ue amita ke avo be jigesora.
HEB 6:19 Avoeto ungotena do puvurou kesi simba ere ora amo ke be pere avoeto amo ungotenau ahihi ta orekari rate ungotena God tihi na kiae rate ahihi ta orekari amo indiri ainge amina peikari bo avo pauketo tutumo God ta degi Otohu be Otohu ai ta eto tutumo nei embo ta degi ainge eto kajuarira.
HEB 6:20 Eto indiri ai ta Iesu na kihi embuto Priest mahu javo Melchizedek amita javo ta ungotenamo avoembo Priest peni dombo eto ungotenau daroho embo ra.
HEB 7:1 Eto ungo hotembiheva amo embo Melchizedek amo enda Salem ta king eto God i be ta amita priest ra eto Abraham na king nei nei ga isoro eto dembeto puvutuhunu Melchizedek na pambuto hambuto Abraham ta degi javotoho ari ikenu,
HEB 7:2 Abraham na amita donda isoro ta umbuna avo kaheketo tapa ten ainge iketo vahai avo Melchizedek ta ikena. Eto ‘Melchizedek’ ta be amo ‘Ari javotoho ta king’ eto ‘Salem ta king’ emita be amo ‘Peka ta king’ ra.
HEB 7:3 Eto embo amita ohihi te e te mamo te amita javo amo kajae avoeto amita ohihi te e te mamo te avo amunure avo embo amuna kiae avoeto amita vasiri ihikari ta eto puvuto tutumota avo iraekora. Eto embo amo God ta Meni aingeko avoeto irari daroho ta priest ra.
HEB 7:4 Eto ungo tapa hotembevu. Eto ungo Judea ta ohihi vahai Abraham na donda isoro ta humbari avo kaheketo 10 ainge iketo vahai avo embo Melchizedek ta ikena avoeto embo Melchizedek amo peni be ra.
HEB 7:5 Eto embo Levi (Judea ta priests ta kihi humbari embora) ta ahihije nei uhoho na priest eto Judea ta ke pepeni agi ue donda tapa 10 ainge kaheketo vahai embomeni ta degi humbagora. Amo Judea embomeni ta ohihi amo Abraham avoeto namei kamei ta degi hande humbagora.
HEB 7:6 Eto Abraham ta be isapamane kahaja God na oje ue javotoho ari ikena avoeto Abraham amo embo peni rate embo Melchizedek amo Judea embo mane rate Abraham na hande ikihinu Abraham ta javotoho ari ikena.
HEB 7:7 Eto ke be amo embo isapa na peni ta javotoho ari mane ikaguja te embo peni na embo isapa ta degi javotoho ari ikaguja.
HEB 7:8 Eto ingeni nei ta amo javo Levi ta priests amo sasari eagora embopo amina embomeni ta donda tapa 10 rate vahai avo humbagora rate ingeni nei ta amo Melchizedek vasiri te irari ke eagora amina hande avo umbuna.
HEB 7:9 Eto ke nei amo einge ahera. Eto Abraham na Melchizedek hambuto hande ikena iji te amo Abraham ta ahije Levi hande humbari embopo ta ohihi amina puvurae Abraham ta poru ta irari iji te Melchizedek ta degi hande ikena amo Levi te tapa ikena ke ainge ahera.
HEB 7:11 Eto ke nei amo Levi ta javo vahai embomeni na priests eagora amita degi ta eto embo tapa na God ta ke pepeni avo umbua te embomeni amina ke pepeni avo agi ue amo God ta tihi ta amo javotoho manera avoeto God na ungotenau priest nei ikenu puvuna amo Levi ta ahije Aaron amita javo ta puvurae rate Melchizedek ta javo ta puvuna.
HEB 7:12 Eto priest nei eha puvuna amita ke pepeni te tapa amo neira.
HEB 7:13 Eto ke erena amo ungotenau Bada avoembo kajari ra eto amo Levi ta javo ta puvurae rate amo javo nei avoeto amita javo vahai embomeni na pene gaga ta God ta pure ae ra.
HEB 7:14 Eto ungotena kiarira Judah amo Iesu ta ohihi avoeto Moses na priest na pure do asora avo ikihe amo Judah na ara ae rate Levi na ara ena.
HEB 7:15 Avoeto ungotena ere kogora amo ungotenau priest nei puvija amo Melchizedek aingeko amina puvija
HEB 7:16 amo embo na ke pepeni ambo ambo ara amita priest manera te daroho irari ta priest ra.
HEB 7:17 Eto amita ke amo God ta ke ta einge kajari mihia, “Eto umo Melchizedek ta javo ta priest ue daroho iresoa.” ke ainge kajena.
HEB 7:18 Eto ke pepeni mamahu amo sovera ambu eto ari javotoho ari haite mane avoeto toari ra.
HEB 7:19 Te ke be amo Moses ta ke pepeni amo embo na aro javotoho aisuja inono ae rate ari eha javotoho puvija emina eoi God ta degi ta puvuto auvagora.
HEB 7:20 Eto God na amita javo humbuto priest mamahu amo ikae rate God na amita javo humbuto ungotenau priest peni dombo Iesu ikena. Eto God na Iesu priest ikasi ue ke einge ena, “Eto na Bada God nanena javo nau humbuhe umo priest ikehena amo mane toasona te daroho iresoa.” ke ainge ena.
HEB 7:22 Eto priests mamahu ainge mane rate God na Iesu amo noma kajagora ainge dombo enu peni be ena.
HEB 7:23 Eto nei amo eingera. Levi ta priests amina pepehekihe pure toa amita veta veta pure ere uahera,
HEB 7:24 te Iesu amo daroho ta priest avoeto Iesu ta pure hondate ari avo irae ra,
HEB 7:25 te embomeni hondate ue God ta degi penunu ijie kekaha te mihoi embo amuna God ta degi pambasi Iesu ta degi puvaguja amo eha eto daroho irari embo avo hondate eaguja.
HEB 7:26 Avoeto ungotena hondate ari haite Priest Iesu amita arimo do aingere? Amo otohu embo, ari sasapura ta tongopa irae eto ari sasapura embo na engekari inono ae uhu i be ta irari embo ra.
HEB 7:27 Eto priests tapa amina embo ta sasapura te amita sapura te tapa avoeto iji vahai vahai pene gaga ta pene ikagora, rate ungotenau priest vahai Iesu na iji tapa pene ikae rate iji vahai amita hamo na pene iketo ungotenau sasapura tapa avo ombuto umbuna.
HEB 7:28 Eto Moses ta ke pepeni God na ikena amita priests amo ivo ambupu avoeto ari sasapura embopo ra te amita ambota God na amita javo ta ungotenau Priest ikenu puvuna amo ari sapura irae daroho irari ta Priest ikena amo amita Meni be avo ikena.
HEB 8:1 Eto ke erera amita be amo erevira. Ungotenau priest peni dombo amo Keriso ra eto amita ari amo ke erena vahai aravora. Eto amina uhu i ta avo arumba Bada God ta ingeni be hena ta arumbeto mihie
HEB 8:2 utu i degi otohu ai ta Bada God ta tombuta God ta ke agi ue pure ere ua eto degi otohu amo embo na ae rate God na ena.
HEB 8:3 Eto priests pepeni na o teto heveto amite donda nei nei amite tapa God ta vivi ihagora te ungotenau priest peni amita hande ikaguja amo mihia.
HEB 8:4 Eto enda ta priest na Moses ta ke pepeni simba ue vivi ihagora avoeto Iesu na enda ta iraehija amo priest mane aehija
HEB 8:5 amita be amo enda ta priests na pure do eagora amo uhu ta do mihia amita aririvo avo ahe kihira eagora eto Moses na amo ainge dombo pene ikasi oro gerikihinu God na Moses ta degi ke einge ena, “Eto umo tiri hamo ta do koguea ainge dombo inono ta ejo.” ke ainge God na ena.
HEB 8:6 Eto ke be amo Iesu na priest eto pure aja ikena amo peni be rate enana ta pure amo isapa ra, eto God na embo ta degi ke ijie noma eha kajena ai ta eto be javotoho puvuroja ena amo noma mahu kajena ainge manera.
HEB 8:7 Eto noma kihi embo ta degi kajena amo ivo irae kito amo noma eha mane ikaehija
HEB 8:8 rate God na amita embomeni ta sapura harikihe ke einge ena, “Eto na bada God nane erena, amo iji puvuto ere hua avoeto Israel embomeni ta eto Judah embomeni ta noma eha kajasona
HEB 8:9 amo noma mahu enana ta ohihi ta ingeni ta humbuto Egypt enda toto pahue kajea aingeko mane aisuja. Eto nau noma mahu kajea amita ke amo enana agi ae avo kito toa te na Bada God nanena erena.
HEB 8:10 Amo Israel embomeni ta noma eha amo ambota kajihe ke einge aisona amo ke pepeni nau avo enana ta siro ta ikihe jo ta kikiva aisona eto na enana ta God ano enana amo embomeni nau aisora.
HEB 8:11 Eto embo peni te isapa te tapa na ari nau mo do aingere avo kiae ke ko mane aisora avoeto da vahai embomeni na namei ta degi ahe poekihe ke einge, ‘God avo be kijo.’ ke aingeko avo mane ahera.
HEB 8:12 Eto enana ta ari sasapura avo hotembeto toasona amo ehako daroho irari ta mane hotembasona.” ke ainge Bada God na ena.
HEB 8:13 Eto God na noma eha kajari avo ke ijie noma mahu kajari avo toau jaise eto saivasuja.
HEB 9:1 Eto noma kihi kajari amo embo na bande iketo bande jo ai ta God osa ue jakeka ijie ari do asora amita ke pepeni neite neite avo God na ikihinu agi ere uahera.
HEB 9:2 Amo embo na horoma peni vahai iketo horoma jo kaneketo amo Otohu Degi enu kerivo te gaga te God ta hande ikari bread amite aingeto jo otohu ai ta mihahija
HEB 9:3 eto horoma ai ta bo petutu koso vahai amina bokiri ikari amo degi javo Otohu be Otohu.
HEB 9:4 Ai ta amo God ta pene ikari gaga amo ‘Gold’ na ari ai ta mune donda avo ikeo evikihie iposi mune te vihina eto ai ta amo noma kajari amita goru otohu avo ‘Gold’ na togari amita jo ta amo ovu ‘Gold’ na ari amita jo ta amo indari javo ‘Mana’ ojaga tambu ta God na uhu ta eto ikenu venu indie mihahera amo ovu jo ai juruketo goru ta juruketo Aaron ta hetu osiri eto ope ena amite God ta ke 10 koro heriso amita hamo ta kajari amite aingeto goru jo ai ta jurukari mihahija.
HEB 9:5 Eto goru amita i hena ai ta amo o heriso gati te sago kiari amina God iraguja degi ai ta ahe kihira ue gati na kakareketo God na embo ta ari sasapura hotembeto toari degi ai ta horoma arako ea. Eto donda vahai vahai ei ta mihia amita ke amo ei ta mane aisona.
HEB 9:6 Te amita irari degi ta siriketo ikeo inono enu priests na horoma jo araha hena ta pure ue horihahera te
HEB 9:7 horoma jo kanekari javo Otohu be Otohu ai ta amo priest peni amina jo ai ta jua vahai vahai amita jo ta iji vahai vahai horena amo orosa umbae amo mane horaehija te embomeni na sasapura eto jenambu ea te God na mane jenambu asuja amite eto priest ta sasapura amite avo eto o ta orosa humbuto God ta degi ikasi horena
HEB 9:8 avoeto Ahihi Otohu na ke araha ta eria amo erevira, horoma jo kanekari ai ta ari do tapa ai ta irirou kito amo embo na God ta degi Otohu ai ta amo horari haite manera.
HEB 9:9 Eto ari emo iji eha amita ahe kihira amo embo na o teto heveto o te donda nei nei amite God ta degi hande ikasuja te hande amina au ikari embo ta jo javotoho mane aisuja.
HEB 9:10 Eto ari amo indari te umo te amo hamo daingeto simba ururou tongopa ambu iresuja amita ke pepeni ra. Eto embomeni na ari ainge ere uahera Iesu puvuna iji te amo God na ari mamahu avo toto enu ari ehaha pere ena.
HEB 9:11 Eto ari eha puvuto mihia amita jo ta amo Keriso na ungotenau Priest peni dombo eto mihie horoma eha ta pure ere ua amo enda God na ena amina mane eto embo ta ingeni na ae eto horoma mahu ainge mane horoma eha peni be eto ari javotoho be ai ta mihie pure ere ua.
HEB 9:12 Eto Keriso na amita horoma eha uhu i ta Otohu be Otohu ai ta horihe amo o ‘cow’ siaja ta orosa te o ‘goat’ ta orosa te avo humbuto horae rate amita orosa avo humbuto horeto ungotena orekihie daroho irora ombuto umbuna.
HEB 9:13 Eto Priest na o ‘goat’ te o ‘cow’ siaja amita orosa te o ‘cow’ meni ingari amita amisa te aingeto humbuto embo ta hamo ta ihajara eo kuheo embomeni ta ari sasapura irae ena.
HEB 9:14 Eto ari ainge amo o ta orosa na ere uahera te Keriso na Ahihi Otohu daroho irari amita sovera humbuto amita hamo tongopa ambu na God ta degi hande javotoho be ikena avoeto amita orosa na ungotenau hotembari ari sasapura pehari ta kihi umbarua avo egau javotoho ururou God vasiri te amita ke agi ue iresora.
HEB 9:15 Avoeto Keriso na noma kajari amita ke avo eha siriketo ere ua eto noma eha kajari amita ke amo eingera, embo amunure avo God na jage asi ena avo ai ta daroho mihie God na irari javotoho ikasi ena avo ikau humbasora. Eto noma mahu kajari ai ta embomeni na ari sasapura isapamane ea rate Keriso na peheto embomeni ta ari sasapura oreketo umbuna.
HEB 9:16 Eto embo na pehasi ue amita donda avo meniundi ta hekeri eto ikari
HEB 9:17 rate pehae mihoi amo mane humbagora te pehasuja amo donda tapa amo hekeri eto humbagora.
HEB 9:18 Eto ainge dombo noma kihi kajari ai ta embomeni na o teo peheto orosa vovunu enana ta ari sasapura hotembeto toari amo ai ta umbua. Eto ari amo einge ea,
HEB 9:19 eto Moses na God ta ke pepeni tapa avo embomeni ta hande enu irae enu o ‘Goat’ te o ‘Cow’ siaja amita orosa te umo te aingeto korineketo o ‘Sheep’ ta hu ove pangari amite, aingeto javo ‘Hyssop’ amina timbuto humbuto God ta ke kajari aita eto embo ta hamo ta teterenu vovunu,
HEB 9:20 ke einge ena, “Eto ungo ke agi ava God na ehija amo orosa emina ehei inono ehija,” ke ainge eto
HEB 9:21 horoma te pene ikari degi amite donda tapa amite aingeto Moses na orosa amina tehere enu vena.
HEB 9:22 Eto ke be amo Moses ta ke pepeni mamahu amita ari amo orosa amina ere egikihahera. Eto orosa overeketo veae amo ari sasapura mane hotembeto toaehija.
HEB 9:23 Eto God ta pene ikari donda amo uhu i ta iraguja amita ahe kihira avo o orosa na ere egikihahera eto pene ikari donda be uhu i ta mihia amo o orosa na mane egagora te donda peni be amina egagora.
HEB 9:24 Rate ke be amo Keriso na embo ta ingeni na ae degi uhu i otohu be otohu degi ai ta horeto God ta tihi ta ungotenamo avoembo pure ue mihia.
HEB 9:25 Eto Judea embo ta priest pepeni na o orosa humbuto degi Otohu be Otohu ai ta jua vahai vahai amita jo ta iji vahai vahai horeto God ta degi pene ere ikihahera
HEB 9:26 rate Keriso na iji tapa hamo amita avo pene ikae rate iji vahai pene ikena. Rate God na enda te uhu te ena eto puvuto eha emikote amo Keriso na hamo amita avo kaikari pene ikihe amo memenga iji neite neite kiaehija
HEB 9:27 te embo tapa na peharo God na enana ta ari sirikasi ena
HEB 9:28 avoeto Keriso na iji vahai amita hamo na pene ikihe peheto embo isapamane ta ari sasapura ombuto humbunu irae ena, avoeto embomeni na Keriso ehako puvuresuja ijie simba ere ovora avo Keriso na puvuto ari sapura ta pene ehako mane ikasuja te embomeni avo orekihie toreketo humbuto uhu ita pambasuja.
HEB 10:1 Eto Moses ta ke pepeni agi ue Judea embomeni na iji tapa God ta degi pene gaga ta ere ikihahera te ke pepeni amina embo javotoho ari inono aera, amita be amo Moses ta ke pepeni amo ari be mane rate ari be puvuresuja amita ahe kihira.
HEB 10:2 Eto embo na o teto pene ikari amina embo jajavotoho ari inono kito embo na amita ari sasapura mahu humbari irae ari avo kito amo pene ehako mane ikaehija
HEB 10:3 rate enana jua vahai vahai amita jo ta enana ta ari sasapura avo hotembihe pene kaiketo ere ikihahera
HEB 10:4 amo o ‘Cow’ siaja te o ‘Goat’ te eto o tapa amita orosa na embo ta ari sasapura amo egari irae ari inono ae ra.
HEB 10:5 Avoeto Keriso na enda ta puvuresi ue God ta degi ke einge ena, “Eto embomeni na Umo jakeka ijie o teto heveto pene neite neite ue ikagora avo inena kogue jenge erae ere ua avoeto hamo nau avo siriketo ikasi ere oa.
HEB 10:6 Eto nei amo embo ta ari sasapura irae aja o teto heveto pene gaga ta ikeore evekaguja avo inena kogue jenge erae ere ua.
HEB 10:7 Avoeto, God nau, ke erena amo no uje ana ke mahu kajari mihia avo ano inono inono aja asi uje ue puvena.” ke ainge Keriso na ena.
HEB 10:8 Eto ungo ke ingeva amo Keriso na ke kihi ta einge ena, “Eto Moses ta ke pepeni agi ue ari sasapura avoeto o teto heveto ikeore ji ta evekihoi pene neite neite eagora te ari ainge avo inena kogue jenge erae ere ua.” ke ainge ena.
HEB 10:9 Te ke nei tutumota amo einge ena, “Na uje no avo asi puvena,” ainge ena amo ari mahu avo toau irae ururou ari eha ihiketo asi ue ena.
HEB 10:10 Eto God ta uje ena amo hamo amita avo pene gaga ta ikena amo iji vahai ikena rate amo daroho irari ta pene avoeto amina ungotena otohu ere ora.
HEB 10:11 Eto ari mahu amo eingera, eto Judea ta priests na iji tapa o teto heveto pene gaga ta hande vahai aravo iji tapa kaikari ikagora te hande amina ari sasapura irae ari inono aera.
HEB 10:12 Te ungotenau priest vahai eha puvija amina ari sasapura ta hande iji vahai ikenu inono enu vihito God ta ingeni be ta arumbeto mihie
HEB 10:13 amita kitoho embomeni taro veau amita uhu avo embomeni ta hamo ta haito iresuja iji avo simba ue mihia.
HEB 10:14 Eto God ta embomeni tongopa ambu ue au otohu ara God na siriketo umbuna avo pene vahai amina enu enana ta ari sasapura irae enu embo jajavotoho eagora.
HEB 10:15 Eto Ahihi Otohu na ungotenau degi ta ke aravo araha ta hariketo eria amo einge kajari mihia,
HEB 10:16 “Eto Bada God na ke einge eria ‘Na noma eha kajari ta ke asona amo einge asona, nau ke pepeni tapa amo embo ta jo ta eto hotembari ta kajasona.’”
HEB 10:17 eto ke nei ena amo erevira, “Na enana ta ari sasapura te ke pepeni poekari te avo ehako mane hotembasona,” ke ainge ena.
HEB 10:18 Amo ari sasapura mahu hotembeto toari avoeto ehako mine mane aisora.
HEB 10:19 Avoeto namei kamei, ungotena kogora amo Iesu ta orosa amina ungotena degi Otohu be Otohu amita jo ta horari haite
HEB 10:20 amo degi peikari be mahu avo toto bo eha vasiri te amo Iesu ta hamo ai ta horasora.
HEB 10:21 Eto God ta bande Otohu ai ta amo ungotenau Priest Peni Dombo be amina mihia
HEB 10:22 avoeto ungotenau jo ari sasapura na tongopa avoeto hotembu hotembu eagora avo orosa na humbuto jahevau javotoho au umo javotoho na humbuto hamo ta tongopa egau javotoho au jo tapa na God humota ue God ta degi puvuresora.
HEB 10:23 Eto ke Ikari Embo avo humota ari haite avoeto amita degi do humbasi uje ere ora amo ihikitoki mane asora te tihi tambueto ere pambuhuma humbasora
HEB 10:24 eto ungotena daingeto osa mine ara ue ari jajavotoho asora amita ke avo oje kahari mine ara aisora
HEB 10:25 eto embo nei nei amo vahai ta horukari peive ere ora te ungotena vahai ta horukari avo mane toasora. Eto Bada ta puvurari iji avo puvuto ere hua avo kito sovera ari ta ke javotoho mine ara evujo.
HEB 10:26 Rate embo amuna God ta ke be avo ingito ari sasapura toae kaikari aisuja amo amita ari sasapura ta pene Keriso na ikena avo iraera
HEB 10:27 te embo amina ari sapura ta hajire God ta degi humbasuja eto God na amita kitoho embo ji vevere pajire be ta ikau evikihirou ari avo amita degi puvuresuja amo umo kiari avoeto joru ue iresuja.
HEB 10:28 Eto ari mahu amo eingera, eto embo vahai na Moses ta ke pepeni avo amita uje na sapura unu embo nei heriso nei vahai na kito harikeo embo amo ihase ae teo pehena.
HEB 10:29 Ainge dombo God ta Meni ta orosa ari eha ta overekari amina embo egari javotoho ari haite rate embo amina God ta Meni ta orosa be mane ke ijie Ahihi Otohu ta degi urumbihe God ta Meni haito jaevekasuja amo amita ari sapura avo eto hajire peni vahai ngahia na ikau kesuja.
HEB 10:30 Eto God na ke einge ena amo ungotena kiari amo, “Enana ta ari sapura ta mine amo nanena ikasona,” ainge ena eto ke nei amo, “Bada na amita embomeni ta ari tapa avo siriketo amita hajire ikasi ke ena.”
HEB 10:31 Avoeto embo na God vasiri te amita ingeni ta veaute avoeto joru pajire be ue osaga kesora.
HEB 10:32 Eto ungo God ta usasa kihi humbuheva avo hotembevu. Eto iji amikote amo ungo na embo nei ta degi osaga memenga humbuheva te toae sovera eto mihaheva.
HEB 10:33 Eto iji nei nei amo ungona embo tapa ta tihi ta urumbari te memenga te kogueva eto iji nei amo ari ainge dombo namei kamei nei ta degi eo osaga koguo ungo na jo unu hondate ava.
HEB 10:34 Eto ungota namei kamei tipura ta ikeo mihio ungo na jo enu hondate ava. Eto ungota haja vajae egimbeto umbua te ungota daroho irari ta donda nununga ari avo hotembihe mine do ae toava.
HEB 10:35 Eto ungota hamo ta sovera ari amina ungota hotari peni be avo humbasova avoeto hamo ta sovera ari avo gosukavojo
HEB 10:36 eto ungo God na hotari umbava ke ena avo sovera eto God na ungo do ava uje ere ua avo ere uma hotari avo humbasova.
HEB 10:37 Amita ke amo einge kajari mihia, “Eto iji isapa eto Embo puvuresuja amo porere mane aisuja te puvuresuja.
HEB 10:38 Eto embo nau javotoho amina Na humota ue iresuja te Na toasuja amo Na amita degi tumo aisona.” ke ainge kajari mihia.
HEB 10:39 Rate ungotena God egikari embo mane avoeto God na au daroho irari ta osaga memenga mane kesora te ungotena God humota ururoro amo God na oreketo humbari embopo ra.
HEB 11:1 Eto ari do puvuresuja amo kiae rate ke be ijie eagora. Eto nei amo tihi na kiae rate ke be eagora eto ke ainge amo humota ue eagora.
HEB 11:2 Eto humota ari ainge avo embo mamahu na uo God na kito javotoho ke ena
HEB 11:3 eto ungotena tihi na kiae donda avo God na amita ke na enu enda te uhu te irerembena avo ungotena kogue humota eagora.
HEB 11:4 Eto mahu be ta embo Abel na God humota ue God ta hande javotoho ikena amo Cain ta hande ainge manera te Abel na God humota ena avoeto God na Abel ta hande kito osa ue embo javotoho ke ena. Eto Abel sari ena te Abel ta humota ari amina ungotenau degi ta ahe kihira ue ke eaguja.
HEB 11:5 Eto embo Enoch na God humota ere uahija avo God na kito tunga javotoho eto Enoch pehae vasiri te uhu ta humbuto pambunu embomeni na jombure ea rate hambae ea.
HEB 11:6 Eto embo na God ta degi sio mane huresuja rate God mihia avo ke be ijie God jo tapa na jombure eaguja embo avo God na hondate aja ke be ijie huresuja, te God humota ae embo amina au God tunga javotoho mane aisuja.
HEB 11:7 Eto Noah na God humota ena amo ari do puvuresuja avo God na harikenu ingito God otohu avo eto joru ue e nga pajire be geriketo amita ae te meni undi te orekena eto ari ainge amo embo vahai amo javotoho, eto embo tapa amo sasapura avoeto God na enu embo tapa sasari eo Noah avo God humota ena avoeto God na Noah embo javotoho ke ena.
HEB 11:8 Eto Abraham na God humota unu kito God na enda nei amita ikasuja enda ai ta pambaja enu ingito da mahu avo toto degi dainge pambasuja amo kiae rate teho pambuto
HEB 11:9 enda ai ta God humota ue hari tumbuto hembarako ue horoma eto mihahija amo amita meni Isaac te Jacob te aingeto enda amo God na ikau enana ta enda toho aisuja ai mihahera
HEB 11:10 rate God na amita da be avo hotembeto kogombeto ikau daroho iresuja avo Abraham na simba ere uahija.
HEB 11:11 Eto Abraham amo evovo eto amita ae Sarah amo meni umbae mihahija rate God na Abraham ta degi oje ena avo Abraham na God ke be ijie humota ena, avoeto be ikenu Sarah na meni umbuna.
HEB 11:12 Amo ainge dombo evovo ena ijite amita degi be isapamane kuro ainge eto hora ainge ehekari inono ae avo titimbeto degi enetena.
HEB 11:13 Eto embo tapa eremina God humota ere uahera sasari ea. Eto enana God na do umbara oje ena amo humbuto tihi na kiae rate hoi ta avo tihi na kogue tunga javotoho ue dago enda erevi embo manera te ijo hujo ari embomeni enda nei ambota puvuresuja avo embopora ainge ijie mihahera.
HEB 11:14 Eto enana ta enda mahu toto pambua avo kaiketo hotembae avoeto ke ainge ae amo egerembeto enana ta enda mahu ta puvuraeherate enana ta enda be avo puvuresuja avoeto simba ue ke ainge ea.
HEB 11:16 Eto enana ta enda be eto da be amo God na nununga eto simba ue mihia eto enana God humota ea avoeto God ke asora amo God na meki meki mane kesuja.
HEB 11:17 Eto God na Abraham ta degi oje ue no ahihije isapamane na no meni Isaac ta eto puvuresuja ainge oje ena rate Abraham na God humota be aute avo God na kesi Abraham na God embo pehari au vasiri te erari haite embo Abraham amina God humota ue meni tasi unu God na haekena te ungotena timu hatirari ke na Isaac vasiri te erenu Abraham ehako umbuna ainge ahera
HEB 11:20 eto nei amo Isaac na God humota ue iji ambota do puvuresuja avo eto meni Jacob te Esau te amita degi oje kahari javotoho ikena.
HEB 11:21 Eto Jacob na God humota ena avoeto evovo eto pehasi ue hetu humbuto kaeto heteto God jakeka ijie amita meni Joseph ta meniundi ta degi oje kahari ikena
HEB 11:22 eto Joseph God humota ere uahija amita pehari iji auvenu Israel embomeni na Egypt enda toto pambasi ue amita vehu ga humbuto pambara ke ena
HEB 11:23 eto Moses ta e te mamo te na God humota ere uahera avoeto meni Moses ingena amo meni nei ainge mane meni javotoho kito king na meni singa isasaraho humbuhore toruahija amo enana joru ae hariga 3 amita jo ta ojikeo mihahija.
HEB 11:24 Eto Moses na God humota ere uahija avo embomeni na Moses te King Pharoah ta iae ta meni ke eagora uje ae ena
HEB 11:25 eto ari sasapura ta gamo iji tuho avoeto toto God ta embomeni ga tapa osaga memenga kina.
HEB 11:26 Amo Moses na ambota hotari pajire be humbasuja avo hotembihe Egypt enda ta hajae vajae tapa toto Keriso puvuresuja amo koguhaete amita embomeni ga tapa osaga kina.
HEB 11:27 Eto Embo tihi na mane kiagora avo humota ue sovera humbuto king ta tumo joru ae ue Egypt enda toto tihi tambueto pambuna.
HEB 11:28 Eto Moses na God humota ue o ta orosa humbuto bokiri pe i ta kuhara enu kuheo Anera na veto o ta orosa kito Israel embo ta meni bugo tae toto jaruketo pambuna.
HEB 11:29 Eto Israel embomeni na God humota ea avoeto umo eva pangari avo orohuta tiuketo ombo enu embomeni embuto oiho ta pahuo Egypt embomeni ambota puvuto pahuo umo na ajekenu indito sasari ea.
HEB 11:30 Eto Israel embomeni na God humota ue da Jericho ta koro na huga tigarako eto joekari avo bambute bambute jorereto pahuo iji 7 irae enu koro karau eto venu da jo ta horeto isoro eto da Jericho amo umbua.
HEB 11:31 Eto Israel embopo na pambuto isoro embo doingere avo tapa poeto kito egerembasi uo viro evohu vahai javo Rahab amo God humota ari evohu amina embo hondate eto ojikenu isoro puvuto God ke be ae embopo tapa tea te evohu amo tae toa.
HEB 11:32 Eto ke nei do ano? Iji inono mihirou kito amo embo Gideon te Barak te Samson te Jephthah te David te Samuel te peroveta tapa amita hihi avo kajaehena
HEB 11:33 enana amo kitoho embopo ta degi isoro eto dembeto God ke be ae embopo ta degi hajire iketo God na enana ta enda toho avo oje ena avo umbua. Eto enana amo o ‘Lion’ ta pe vahikea
HEB 11:34 ji peri eo jamo ena isoro asivo ta ti tiumbeto pambua eto enana ivo ambupu amo God na enu ivo ue isoro eto enana ta kitoho embopo amo dembea.
HEB 11:35 Eto embo pepehekari avo vasiri te ereo evohu na humbuto tunga javotoho ea. Eto embo nei amo kitoho embo na torore memenga ere kogora te peheto vasiri te ereto javotoho kesora avoeto toto pambari uje ae ea
HEB 11:36 eto nei amo kitoho embo na urumbihe ere ejimbihahera eto nei amo chain na punduto tipura ta gosukihahera.
HEB 11:37 Eto nei amo koro na tea nei amo ‘Saw’ na jeto jirembihahera nei amo asivo na kajeo pepehekea. Eto nei amo ombari asari irae ‘Sheep’ ta hamo eto o ‘Goat’ ta hamo asuketo pahore kito hoivo embopo ke ijie urumbihe memenga ere ikihahera.
HEB 11:38 Amo enda ta mume avoeto enana embomeni ototohu amina kuho sindeto ojaga tambu ta eto tiri ta eto panga ho ta eto enda ho ta pambuto mihahera.
HEB 11:39 Eto enana tapa God ke be ijie humota ere uahera avo God na kito amo javotohora ainge ena te God na do umbara oje ena amo umbae ra
HEB 11:40 te ungotenamote tapa humbuto tunga javotoho ue daroho iresora avo God na sirikena avoeto aisuja.
HEB 12:1 Avoeto God humota ari embo mamahu isapamane na ungotenau ahe kihira ea amo ungotena enana na joeketo kogue mihere vasiri tutumota huheveto dembari embopo na arako ere pahora amo ari sasapura rete nei deina andirari avo tojikaro karaun eto veau hamo ta sovera ari humbuto
HEB 12:2 Iesu tihi na kon eto kogue huhevasora. Eto ungotena God daingeto humota eagora amita ahe kihira amo Iesu na mahu kihi pambuna amo ungotenau kihi humbari embora. Eto Iesu na ji atahu ta taro me kioja tea te iji ambota tunga javotoho ari God na ikasuja avo hotembihe me kiae teho peheto vasiri te ereto pambuto God ta avo arumba peni ai ta ingeni be ta arumbeto mihia.
HEB 12:3 Eto Keriso na sasapura embopo ta ingeni ta memenga osaga kina te toae sovera ena avo ungo na hotembihe jopapa ue pegogo mane aisova te sovera eto irivujo.
HEB 12:4 Eto ungo enda ta ujeje sasapura ta degi isoro ere ovova te isoro amita jo ta amo ungota orosa enda ta veaera
HEB 12:5 eto ungo Bada God ta meniundi ke ijie ungote hamo ta sovera ari umbava kajari avo jenambu ue mihovova amo eingera. “Nau meni, Bada God ta oje kahari ke avo ingito ganini ke aojo eto amita isembari avo joru aojo”
HEB 12:6 eto amita be amo God na embo osa ere ua avoeto oje kahari ke aisuja eto amita meni be au humbasi ue amita degi memenga ikeoi kiaguja
HEB 12:7 eto mamone na meniundi oje kahihiore kiari humbagora avoeto ungo ari memenga te kogue kito dago God ta meniundi be avoeto oje ere kahihia ainge ijie sovera umbuvujo.
HEB 12:8 Eto God ta oje kahari ke avo ingae aisova amo ungo amita meniundi mane rate tiha meni ra eto God amo ungota Mama manera.
HEB 12:9 Eto ke nei amo ungotenau enda ta mamahamane mihera amina oje kahihiore ingito otohu ue agi eagora ainge dombo ungotenau Ahihi ta Mama amita ke agi ue vasiri te iresora.
HEB 12:10 Eto ungotenau enda ta mama na amita hotembari na oje kahaguja te God amo otohu avoeto ungotena ainge otohu ue javotoho be ara oje kahihe memenga ikeoi kiagora.
HEB 12:11 Eto memenga kogue amo osaga kiagora te memenga amita be puvurou amo memenga kiaguja embo amina God ta tihi ta embo javotoho ue tunga javotoho ue peka ta iresuja.
HEB 12:12 Avoeto ungota ingeni te utu paunge te vuvure irae avo evu sovera ai
HEB 12:13 eto ungota uhu ta pambari degi avo evu visi visi au degi ai ta popora ari embo pahurou utu mane hounkasuja te pahue utu gorasora.
HEB 12:14 Eto ungo pure tunga iketo embo tapa peka humbuto ari otohu jigama ue irivujo eto ari otohu umbae embo amina Bada ta tombu mane kesuja.
HEB 12:15 Eto ungo ari erevi be kogue irivujo, eto embo na God ta hondate ari avo humbasi uje eaguja te eoi tarasembeoi toaguja amite eto embo ta hotembari sokova na ungota jo ta ereto ese saruka na embo ta jo ta saruka eaguja amite tapa simba evujo.
HEB 12:16 Eto embomeni tiha paiha eagora avo simba evujo, eto nei embomeni na God hotembae eagora eto embo mahu Esau ainge God hotembae ue eambo ta degi hotari ombuto indari indinu irae enu
HEB 12:17 ambota hotembeto hotari ehako humbasi si te kekaha te ena te mamona jo ahereketo ehako ikari inono ae ena avoeto simba evujo.
HEB 12:18 Eto ungo eha miheva amina ae rate ungota ohihi na tiri amo ingeni na hame ari haite ai ta ji perimbeto evikihie usasa unu mume kambujoro te ga te pisara te uhu tururu te unu embomeni kito joru ea.
HEB 12:19 Eto huin ta asavi te ke peni vahai be eto embo rete o rete na tiri erevi hame aisuja amo koro na tevujo pehai ainge ijinu ingito joru ue ke avo ingari uje ae ue penunu ea.
HEB 12:21 Eto Moses te tapa kiari nei kito joru ue tatatata ena.
HEB 12:22 Eto ungo tiri nei javo ‘Zion’ amo God vasiri te iraguja amita da Jerusalem uhu i ta mihia ai ta puveva. Eto ai ta amo Anera isapamane be ehekari haiteko mane amina vahaita horuketo tunga javotoho ue mihera.
HEB 12:23 Eto God ta meniundi be javo uhu i ta kakajekari avoeto hotari ikau humbasora amita ekalesia ta degi puveva. Eto embo ta ari siriketo hajire ikari Embo, God, amina embomeni enu embo jajavotoho eto amita ahihi ta irari degi ta puveva.
HEB 12:24 Eto ungotena daingeto God ta degi pambasora amita kihi humbari embo Iesu amo ai ta mihia. Eto Abel ta orosa overekena avo isapa rate Iesu na orosa overekena amo ke be avoeto ungotena God Otohu ue jakeka eagora.
HEB 12:25 Avoeto Embo ungota degi ke eria avo ingito ingarako avojo. Eto enana enda ta mihie Embo amita ke ingari uje ae ue ari amita memenga avo tiumbeto pambari inono ae ere uahera eto eha Embo uhu i ta mihie ke eria avo ungo ingae asova amo daingeto God ta tumo te memenga te mo tiumbeto pambavo.
HEB 12:26 Eto iji mahu kihi ta amo God na ke ijinu enda tiro tiro ena eto God na ke einge eria, “Na ke ehako ijirono amo uhu te enda te tiro tiro aisora.” ke ainge ena.
HEB 12:27 Amo God ta ingeni na ari avo tiro tiro eto irae aisuja te donda nei tiro tiro ari inono ae donda amina pere hetasuja.
HEB 12:28 Avoeto ingivujo, God ta irari degi amo tiro tiro ari inono ae ai ta ungotena simba ururou daroho iresora. Avoeto ungote God osa ue otohu ue jakeka asora.
HEB 12:29 God amo ji ainge be donda tapa eveketo irae ari God aravora.
HEB 13:1 Eto iji tapa namei kamei ari na osa mine ara evujo.
HEB 13:2 Eto umo kiae embo avo puvurou kito amo osa ari na jumbuhe pagihe evujo, amita be amo iji nei nei ainge Anera avo embo tambu ke ijie unduagora.
HEB 13:3 Eto enana tipura ta mihera avo hotembevujo. Eto ungona tipurata mihie tunga ta do hotembaeheva avo ungo na kogue enana hotembihe teki evujo. Eto enana embo nei ta ingeni ta mihie osaga memenga ere kogora avoeto ungo na ainge osaga memenga kiaeheva avoeto enana hotembevujo.
HEB 13:4 Eto embo ta jimbari amo otohura ainge evujo eto tiha pahia te sesena sasapura eagora amo God na kito memenga ikasuja.
HEB 13:5 Eto ungota donda mihia avo kito tunga javotoho ue koro ta tunga mane ikasora te God na ke einge eria avo hotembevujo. “Na umo mane toto pambasona te ungote iresona,” ke ainge eria.
HEB 13:6 Avo hotembihe sove sove eto pahue ke einge evujo, “Bada amo nau hondate ari Embo avoeto embo na nau degi ta do aisuja avo joru mane aisona,” ainge evujo.
HEB 13:7 Eto ungota tihi jigari embopo amo God ta ke ungota degi hande ea amo enana ta ari avo ungota degi ahe kihira ea amo God humota ue ea avo ungo kogue ainge God humota evujo.
HEB 13:8 Eto Iesu Keriso na iji eha eto iji ambota eto iji mahainge irari ta hajire nei mane aisuja te hajire vahai avo iresuja.
HEB 13:9 Eto ungotena God ta degi indari hande ikari amina indito ahihi ta sovera ari mane humbagora te God ta hondate ari amina ahihi ta sovera ari amo humbagora avoeto embo ta ahe poekari sapura neite neite avo be hotembavojo
HEB 13:10 eto Judea ta ari mahu ai ta ari sasapura ta o teto pene ikari amo priests na ikeore priest peni amina orosa humbuto degi otohu be otohu ai ta horeto embo ta ari sasapura avoeto ikaguja te o be avo indae humbuto pambuto da sahu ta undukeore evekihahija.
HEB 13:12 Eto Iesu na da sahu ta pambuto memenga kogunu orosa amita na embomeni tohota avo otohu ea.
HEB 13:13 Avoeto Iesu na da sahuta pambuto osaga te memenga te urumbari te kina avoeto da sahu ta amita degi huma kesora.
HEB 13:14 Eto enda ei ta ungotenau da be iraera te ambota puvuresuja avo kesi simba ere ovora.
HEB 13:15 Eto ungotenau pe na Iesu ta javo ke be ijie ke hande eagora amo ungotenau pene God ta degi ikihe jakeka eagora.
HEB 13:16 Eto embo ta degi ari javotoho ue hande ikari avo jenambu avojo ainge amo God ta degi pene ikarako ere ova avoeto God na osa eaguja.
HEB 13:17 Eto ungota tihi jigirikari embopo na ungo simba ere ora amo enana ta embo okose ta aro ingesuja avoeto ungo simba javotoho be ere ora eto ungona enana ta ke peive aisova amo memenga kogue ungota degi ari javotoho mane aisora avoeto enana ta ke agi ururovo enana tunga javotoho ue pure javotoho aisora.
HEB 13:18 Eto dago ei mihera avoembo pari evujo. Dago iji tapa ari jajavotoho pere ue iresi ere ora avoeto dagota jo ta ari sapura ta memenga iraera
HEB 13:19 eto na ungota degi pambasi uje ere ona amo peni be avoeto ari vahai avo irae aja pari evujo na pambane.
HEB 13:20 Eto peka humbari embo God na o ‘Sheep’ simba ari embo javotoho Bada Iesu avo enu vasiri te erenu amita orosa na ari eha ta daroho irora ena.
HEB 13:21 Eto God na ke amita avo agi ara ari jajavotoho ikau humbuto amita ujeje avo pere aisora. Eto ungotenau jo ta Iesu Keriso ta javota pure ere uma kito osa aisuja eto amita degi usasa iresuja, Amen.
HEB 13:22 Nau namei kamei nau oje kahari ke erevi ingova erena amo ke koso mane ere kajihena
HEB 13:23 eto ungotenau namei Timothy avo tipura ta mihia avo ehere arahata puvija avo ingivujo, eto nau degi ta sausau puvurou kito amo amiga ungo kesi pambasona
HEB 13:24 eto ekalesia ta tihi jigirikari embomeni te ungo God ta embomeni te tapa ere pekihera. Eto enana Italy enda ta mihera amite tapa ungo ere pekihera.
HEB 13:25 God ta hondate ari ungota degi iroi.
JAM 1:1 Ahari erevi, na James, God ta Bada Iesu Keriso ta pure ari embo nane ere kajihena. Eto ungo Israel javo vahai tapa 12 enda tapa ta sio pambuto iragova avo ere pekihena.
JAM 1:2 Nau namei kamei ungo ta degi osaga nei te nei te puvuresuja avo kito tunga javotoho evujo.
JAM 1:3 Ungo kogova amo ungo osaga kogue irirovo God na ungota degi tunga jamo ari ikasuja eto ungo osaga avo tiumbeto pambasi mane hotembasova
JAM 1:4 rate God humota ue tunga jamo ari ungo ta degi pajito inono au ambota ari sapura do puvuresuja ai ta mane ereto sapura aisova te ari javotoho aisova.
JAM 1:5 Eto ungo amuna ari sapura davore ari javotoho davore amita kiari humbasi uje eto kito God ta degi penunu eto umbuvujo. Eto God amo hande embo be amina tumo ae ue embo ta degi kiari aravo hande ikaguja.
JAM 1:6 Rate embo amuna Bada be humota ae ue hande avo penunu aisuja amina humbasi mane hotembasuja, humota be ae avoeto.
JAM 1:7 Embo avo ji sirivo eva piri hamo ta ainge pisara na humbuto egahu egahu ue
JAM 1:8 pambaguja hotembari heriso ta ere pahua avoeto Bada ta degi nei do penunu aisuja avo mane ikau humbasuja.
JAM 1:9 Avoeto Christian namei amuna donda ambu eto osaga ere kogue amo Keriso ta degi embo dombo eto tunga javotoho ere ua.
JAM 1:10 Eto namei nei embomeni na mahu embo dombo eto haja vaja embo ke ijiera rate donda irae ehei embo teho ke eagora embo amo Keriso ta tohora avoeto amina tunga javotoho aisuja
JAM 1:11 amita be amo amita haja vaja avo sasaha koru ainge iji vevere na kajeoi jaise eto karaun eto veaguja eto haja vaja embo ainge dombo pehasuja eto amita pure nei te nei te irae aisuja.
JAM 1:12 Eto embo na ari sapura amita ke gamo ingaguja rate mane eaguja te sovera eaguja amina tunga javotoho aisuja amita be amo embo amina vasiri datoho God ta degi hoteto humbasuja. Eto embo tapa amuna God osa aisora amita degi God na hotari ikasi ke ena.
JAM 1:13 Eto embo amuna ari sapura ta ke gamo ingito asi uje aisuja amina ke einge mane aisuja, “Ke emo God na ehei ingito asi ereona.” ainge mane, God na ari sapura mane aisi uje eaguja eto embo ari sapura ara ke gamo mane eaguja.
JAM 1:14 Rate embo vahai vahai ta ujena ujena na ari sapura kito ai pambasi uje eagora.
JAM 1:15 Eto uje sapura amita be ikari amo ari sapura ra, eto embo ta degi ari sapura pajito inono au pehari puvuresuja.
JAM 1:16 Avoeto nau namei kamei ke sokova ta pambavojo.
JAM 1:17 Ari sapura ta ke gamo God ta degi mane puvaguja rate God ta hande tapa amo javotoho pere eto God Mamo uhu ta usasa ari embo amita degi hande tapa ikeoi puvaguja, eto God mane nei aisuja eto kuho sindeto usasa seiketo dago mume ta irora mane aisuja.
JAM 1:18 Amo amita ke be na embo amita toho ere uhua eto donda tapa God na ena amita degi ta eto ungotena dombo be ara ere ua.
JAM 1:19 Eto namei kamei ke erevi ungo mahu kiarira avoeto ke mane sausau aisova te ke sausau ingivujo. Eto tumo sau sau mane aisova
JAM 1:20 amita be amo embo javotoho aja God uje eaguja rate embo amita tumo na javotoho mane aisuja.
JAM 1:21 Eto ungota degi hotembari sasapura te ari sasapura tapa do mihia avo ejo irae au God na ke ungota jo ta urena avo sisire ae osari na pekari na unduvujo ungo oreka ai.
JAM 1:22 Eto God ta ke ingari pere ari irae amo sokova ra.
JAM 1:23 Embo amuna God ta ke ingito ae eaguja amo embo na amita aririvo umo ta kiaguja ainge dombora,
JAM 1:24 embo amina amita tombu do ainge kiaguja rate umo toto pambuto jeneambu eaguja ainge dombora
JAM 1:25 rate God ta ke javotoho na embo orekaguja eto embo amuna ai ta kaiketo ingaguja eto ingari pere mane rate ingito jeneambu ae eaguja amina iji tapa tunga javotoho aisuja.
JAM 1:26 Eto amuna “Na God jakeka ari embora,” ke eaguja rate amita ivivi tongopa te ra embo amita humotepain ari amo sapurara.
JAM 1:27 Rate God Mamo na humotepain ari kito javotohora ke eaguja amo eingera. Embo na evohu dodoru te meni hohojo te ta osaga kito jo ue unduaguja eto enda ta ari sasapura ta mane pambaguja ari ainge God na kito javotohora eaguja.
JAM 2:1 Eto nau namei kamei, ungo na ungotenau Bada usasa te kiari isapamane te Iesu Keriso humota eagova avoeto ungo na embo nei donda te avo dombo ke ijie embo nei donda ambu avo sapura ke mane aisova.
JAM 2:2 Eto ungo giu ururovo embo vahai bo javotoho asuketo ingeni pupunge gold na ari asuketo puvuresuja eto embo nei donda ambu te bo perarari te puvuresuja
JAM 2:3 eto ungo donda te embo jakeka ue amita degi ‘Arumbari javotoho ei ta arumbaote’ ke asova te donda ambu embo ta degi ‘Umo ai hete’ o nei ‘Umo enda ta arumbe’ ainge asova
JAM 2:4 amo embo nei javotoho nei sapura ke aisova eto embo sirikari ainge amo sokova ra avo ungo kiaere?
JAM 2:5 Namei kamei ingivujo, enda embomeni na embo nei donda ambu embo ke eagora, rate God na enu enda ta donda ambu embomeni na God be humota eagora. Avoeto enana na God ta degi hotari humbasora, avo tapa amuna God osa eagora amita degi ikasi ke ena.
JAM 2:6 Rate ungo na donda ambu embopo ta degi me kiari ereova rate ungo kogova amo haja vaja embo na ungota degi ngahia ue andito humbuto ganoka ta ere ikihera
JAM 2:7 eto Iesu na amita javo otohu iketo ungo amina saso ari ke ena,
JAM 2:8 rate enana haja vaja embopo na javo aravo eagore sapura eaguja eto ungo ke be na God ta ke pepeni amita ke ta kajari avo ‘Inena umo oenga osa ere oa, ainge dombo no namei osa ue amita degi javotoho ejo,’ avo agi ereoa amo javotoho ere oa
JAM 2:9 rate umo embo nei javotoho nei sapura ke asoa amo God ta ke pepeni ere poekihea
JAM 2:10 eto embo amuna God ta ke pepeni vahai poekasuja amo ke tapa poekehea aravora
JAM 2:11 amita be amo God na, “Umo tiha mane aisoa.” eto, “Umo embo nei mane tao pehasuja.” ke ena te umo tiha ae rate embo tao pehasuja amo ari sapura eto God ta ke pepeni tapa poekehea aravora
JAM 2:12 rate God na enu ungo ari sapura na andiraera avo hotembu ue amita ke pepeni agi ue ke te ari te tapa javotoho pere evaguja.
JAM 2:13 Eto embo amuna embo nei tunga umbae aisuja embo aravo God na kito tunga umbae aisuja rate embo amuna embo nei tunga humbasuja amina embo ta ari sirikari Embo mane joru aisuja.
JAM 2:14 Nau namei kamei eto embo na God ke be ke aisuja rate ari jajavotoho ae God ke be ari pere amina embo amo orekaute?
JAM 2:15 Eto namei retemo du re bo-avo irae indari irae avoeto teho evesuja
JAM 2:16 eto ungo embo vahai amita degi ke einge aisoa, “Umo pambuto bo asukao hamo vevere ururou indari indijo” ainge aisoa rate bo te indari te ikae amo javotoho rete?
JAM 2:17 God ke be ari amo einge ra, ke pere ari irae amo pehari embo aingera.
JAM 2:18 Rate embo nei na ke mine einge aisuja. “Embo nei na God ke be eagora rate ari javotoho ae eto embo nei na God ke be ae ue ari javotoho pere avo eagora.” ainge aisuja rate erena amo ari irae umo God ke be eagoa avo daingeto ao kiono. Nanena God ke be eagona avo vasiri na ano kesoa. Umo God vahai ke be eagoete?
JAM 2:19 Ke be eo amo javotoho rate enana ahihi sasapura na God vahai ke be eagora rate God humota ae avoeto joru ue gatari gitari eagora.
JAM 2:20 Umo sarika embora! Ari javotoho irae God ke be ari pere avo sokova amita ke erena be ingesi uje ere ovete?
JAM 2:21 Ungotenau Mama Abraham na do ena avo hotembevujo amina God agi ue amita meni Isaac andito God ta degi pene eto gaga ta ikena avo God na kito embo javotohora ena
JAM 2:22 amo Abraham na God ke be ena avo pere mane rate God ta ke agi enu God na kito “Na ke be ere ua” ena.
JAM 2:23 Avoeto God ta ke kajari ta ke einge mihia, “Abraham na God ke be eto humota unu God na embo javotohora ena.” eto tunga humbuto ‘Namei’ ke ena.
JAM 2:24 Avoeto ungo kogova embo na God ke be aisuja rate avo pere mane rate ari jajavotoho ururou God na embo javotohora ke eto orekasuja.
JAM 2:25 Eto embo ta irari bande simbari evohu javo Rahab hotembevujo, amina Israel ta popoja ari embopo osa ue hondate eto ikenu degi pe nei ta veto pambua amo amita ari javotoho avo ena avoeto isoro iji te God na orekena.
JAM 2:26 Eto embo na God ke be aisuja rate ari javotoho amita degi irae amo embo pehari hoenge irae ainge dombora.
JAM 3:1 Nau namei kamei ungo embo isapamane na embo nei ahe poekavojo. Ungo kiarira ahe poekari embopo na ke isapa te peni te tapa kiari irae arira avoeto God na enana ta ari kito hajire be ikau kesora
JAM 3:2 amita be amo ungotena tapa pe na sokova sakova eagora eto tihi na kiae eagora eto embo amuna pe na sapura mane aisuja embo amina javotoho na amita tihi te ingeni te hamo te tapa javotoho na jigama ari haiteko aisuja.
JAM 3:3 Eto embo na o horse ta pe ta auri iketo hamo ta vihio arumbeto pambujo.
JAM 3:4 Eto embo na o horse ta pe jigito do uje aisuja avo o horse na agi eaguja eto nei e nga peni eva ta pambaguja avo kivujo, amo donda pajire be avo pisara peni na humbuto pambaguja, rate amita tari isapa avo embo vahai na jigama uore inono ta pambaguja.
JAM 3:5 Eto ainge dombo embo ta ivivi amo donda isapa be rate ke pajire be ijiore pure pajire be eaguja eto ahoe pema pajire be rate ji peri isapa amina undukau evekasuja.
JAM 3:6 Eto ivivi amo ji peri ainge dombora, ari sapura na enetari ji avo Satan na ivivi ta undukau hamo tapa ta evikihie pahurou embo tapa amita vevere na evekasora.
JAM 3:7 Eto di o neite neite avo embo na undurou hajire eto ke agi aisuja
JAM 3:8 rate embo na amita ivivi avo undurari hajire ari inono aera amo o koso o ainge embo agi ari irae hotembari sapura te ivivi saruka te iraguja.
JAM 3:9 Eto embo na amita ivivi na Bada God jakeka eaguja te embo avo God ta tombu vahai rate embo na embo ta degi hini kambari ke eaguja,
JAM 3:10 amo pe vahai ai ta ke sapura te jai te puvaguja. Eto nau namei kamei ari avo sapura bera.
JAM 3:11 Umo pauka vahai ai ta umo gamo te sogaga te puvuroute?
JAM 3:12 Eto ji ‘Olive’ ta be avo ji ‘Fig’ ta umbagore te? Nei ji ‘Fig’ ta be avo esi ‘Grape’ ta humbagorete? Ainge manera eto umo surusuru eva ta mane indagora.
JAM 3:13 Avoeto nau namei kamei ungota degi kiari embo miheite? Amina amita osari te pekari te kiari be ta eto puvua amina ari jajavotoho ururou kesora,
JAM 3:14 rate ungota degi hini kambari te uje sapura te jo ta mihirou ungo mane embo peni asi uje ue ke sokova na no jo ta do mihia avo ojikasoa.
JAM 3:15 Kiari ainge na uhu ta eto mane puvaguja te amo enda ta ari embo ta jota eto Satan ta degi ta eto puvaguja.
JAM 3:16 Eto embo damina embo nei uje ae ue ‘Na, na’ eto oenga pepeni asi uje aisora ai ta ari sio sao ururoro ari sapura nei te nei te kesora.
JAM 3:17 Rate kiari be uhu i ta eto puvaguja amita degi sapura irae eto amo pekari osari te ra eto, embo nei ta ke tunga jamo ari na ingaguja eto embo hondate asi hotembihe tunga nei nei mane eaguja rate jo tapa na eaguja
JAM 3:18 eto ari ainge amo ji be ainge dombora pekari embo na urau be au ondeto humbuhe ari javotoho iji datoho iresuja.
JAM 4:1 Eto boru jumbari te jujune ari te isapamane ungota degi mihia avo daingeto ere puvutuhoi? Ungo ‘Na, na’ ijie hamo ta uje neite neite ta ere pambuhova avo eto jujune ereovova.
JAM 4:2 Ungo uje eto umbae ue ereto embo teto donda humbagora eto uje isapamane ta pahue humbari inono ae kito isoro kaiketo eagova eto donda javotoho amo God ta degi penunu ae avoeto umbae.
JAM 4:3 Eto nei penunu eagova amo umo oenga embo peni asi penunu eagova avoeto God na ikae.
JAM 4:4 Ungo God ta degi ke sokova ijie no ivu ta kitoho ga tiha eagova eto ungo enda ta uje avo namei ururovo God avo ungota kitoho aisuja avo ungo kiae kiae ere ovete?
JAM 4:5 Eto God ta ke kajari ta ke einge mihia, ‘God ta Ahihi Otohu na embo ta jo aema na jigama asi uje ere ua’ ainge mihia avo peni ra.
JAM 4:6 Eto ke nei dombo be amo God na embo jo uoi hondate ari kaiketo ikaguja amita ke einge kajari mihia. “God na, ‘Na, na’ ari embo avo mane hondate eaguja rate embo amuna ‘Na, na’ ae ue God ta hondate ari jo tapa na uje aisuja embo avo God na hondate aisuja.”
JAM 4:7 avoeto God humota ue amita hondate ari uje evujo, eto Satan kuho sindavo toto pambai.
JAM 4:8 Eto ungona God ta degi hururovo God ungota degi huresuja. Ungo ari sasapura embomeni ungota ingeni egevujo, ungo hotembari heriso embomeni ungota jo ta tongopa evujo irae ai.
JAM 4:9 Ungota sasapura avoeto si evujo, ganini toto osaga kivujo,
JAM 4:10 meni isapa emi ta aingeto ahoheto eto Bada ta degi puvurovo amina jigou erasova.
JAM 4:11 Nau namei kamei ke sapura mine ara avojo, eto embo amuna amita namei ta javo au sapura autemo amita namei embo sapura ke aute embo amina God ta ke mane eto jijigi ue ke amo peni ereua. Eto umo God ta ke peni jijigi aisoa amo ke peni agi ari embo mane rate sirikari embo ere oa.
JAM 4:12 Rate ke pepeni ikari vasiri sirikari embo vahai be mihia amina vasiri embo ta degi ikaguja rate humbaguja avoeto umo no namei ta ari sirikari embo umo hotembihea amo umo God na sirikihete?
JAM 4:13 Eto ungo ke einge eagova embomeni, “Dago eha oroho o evito ainge da nei ta pambuto jua vahai ai pure ue donda na ombuto koro peni humbasora.” ari ainge eagova embomeni ta degi ke aisona ingivujo.
JAM 4:14 Evito do puvuresuja avo ungo kiae ue ereva. Ungota vasiri deire? Amo iposi ainge vihito tahun eaguja
JAM 4:15 avoeto ungo ke einge aheva “Bada ta ujena dago vasiri te mihie pure do do aro avo kesora.” ainge aheva
JAM 4:16 rate ere ova amo, “Na, na” ijie ungo oenga pure do do aisi uje eagova ai ta ere ovova amo ari sapura bera.
JAM 4:17 Eto embo amuna ari jajavotoho daingeto aisuja avo kiaguja rate aijaja eaguja amina God ta degi ari sapura ere ua.
JAM 5:1 Eto ungo haja vaja embomeni ungo ta degi ke erena ingivujo. Ungota degi osaga nei te nei te puvuresuja avoeto mahu ihiketo hori gaga eto sisi sasi evujo.
JAM 5:2 Ungota kiari bo o soan na papasekari
JAM 5:3 te koro ain kembari te donda tapa sasari ari eto ungota ‘Gold’ te ‘Silver’ te ta ain kembari avo embomeni na kogue ungo ari sasapura embo hotembasora eto ungota donda ta ain kembari amina ji vevere ainge ungota hamo visi eveketo hohueto eto veasuja. Eto iji tutumota irae ere ua rate ungo donda hamo ta hamo ta eto ere humbuhava.
JAM 5:4 Kivu, ungota pure ari embomeni na ungota donda urari ta be humbuhe pure ngahia ere ora te ungo na ke sokova ijie mine ikae umbae ue si ijiore uhu te enda te ta Bada na oje jevito ere ingihia.
JAM 5:5 Ungo enda ta mihie donda nei te nei te pere avo ere hotembihe no hamo ta beuje ta pere pahue seha isapamane o ohu na arako ere ova rate ungota hevari iji auvehija.
JAM 5:6 Eto ungo na embo jajavotoho ganoka eto tave pehagora rate enana ungota degi mine ae.
JAM 5:7 Eto nau namei kamei simba ururovo Bada puvuresuja amo embo na donda ve ureto ga kihi veasuja eto simba ururo ga ambota veau enda ta donda be javotoho be au humbasuja.
JAM 5:8 Eto ungo ainge dombo ungota jo ta sovera humbuto Bada puvuto ere hua avo simba evujo.
JAM 5:9 Eto namei kamei ke sapura mine ara tovujo, eto God na ungo mane ganoka aisuja kivujo, te embo ta ari sirikari Embo na bokiri pe ta heteto horasi ere ua.
JAM 5:10 Eto ungo daingeto osaga kogue simba ue iresova avo be kesi uje eto kito peroveta Bada ta ke hande ari embomeni ta ari avo kogue hotembevujo.
JAM 5:11 Enana hamo sovera te osaga te Bada ta pure ere uahera avo eto enana na tunga javotoho ere ora. Eto embo Job ungo kiarira amina osaga kito hamo sovera humbuto iji koso Bada humota ere uahija eto tutumota God na jo enu hande isapamane Job ta degi ikena.
JAM 5:12 Eto amo dombo be eto ungo uhu ta javo nei nei humbuto ke ngahia mane aisova nei enda ta javo mane humbuto ke ngahia aisova rate umo ‘Aravora’ ke asi uje aisova kito teho ‘Aravora’ ke ejo. Eto umo ari uje ae eto kito ‘Mane’ ke ejo eto ainge aisoa amo God ta javo mane sapura ta jigama eto ari sapura aisoa.
JAM 5:13 Eto ungota degi embo amuna tunga osaga kesuja amina God ta degi hondate penunu aisuja.
JAM 5:14 Eto amuna tunga javotoho kesuja amina haveni aisuja. Eto embo amuna ambure humbasuja amina ekalesia ta okokose jage au puvuto “Oil” na hamo ta kuheto Bada ta javo ta ambure avoembo pari aisora.
JAM 5:15 Eto embo na Iesu be humota ururoro kojau Iesu na jigou erau amita ari sasapura do mahu ari avo God na hotembeto toasuja.
JAM 5:16 Eto ungo na ari sasapura do ueva avo donda mamo ta harikasova amo hotembeto toasuja eto ari ainge avo mine ara evujo. Eto ungota ambure avoeto pari mine ara ururovo God na au kojasova. Eto embo javotoho ta pari amo sovera pajire bera, God na ai ta pure ere ua avo eto.
JAM 5:17 Peroveta Elijah hotembevujo, embo amo ungotena ainge rate ga mane veaja pari enu ga amo jua vahai eto hariga six amita jo ta enda ta veae,
JAM 5:18 eto ehako pari enu ga na uhu ta eto venu enda na ehako ihiketo be ikena.
JAM 5:19 Eto nau namei kamei ungo vahai na God ta ke be toto sio pambasuja eto embo nei na embo avo peiketo au jo hapereketo God ta degi egerembasuja
JAM 5:20 amo hondate ari embo amina ari sapura ehija embo amita ahihi pehasuja avo orekasuja eto au God na embo ta ari sapura isapamane hotembeto toasuja.
1PE 1:1 Na Peter, Iesu Keriso ta apostero nanena ungo God na siriketo humbari embomeni ungota enda toto hari tumbuto pambuto enda Pontus ta enda Galatia ta Cappadocia ta Asia ta eto Bithynia ta mihovova avoeto ungo ta degi ahari erevi ere kajihena.
1PE 1:2 Eto ungo amo God Mamo na uje amita na siriketo umbuna eto ungo Iesu Keriso ta orosa na kuheto javotoho ue ke amita avo agi ava Ahihi Otohu na ungota jo ta pure amita oi Otohu ereova. Eto God ta hondate ari te peka te isapamane ungota degi iroi.
1PE 1:3 Eto ungotenau Bada Iesu Keriso ta Mamo God avo osa aro amina jo ari amita na vasiri eha ikehei God ta meniundi be ere ora amita be amo Iesu Keriso peheto erena avoeto ungotenamote tapa vasiri eha umbera avoeto daroho iresora avo simba ereora eto donda javotoho ikasi ere ua amo pehari irae sapura ari irae eto irae ari mane donda avo God na ungota degi ikasi uhu i ta simba ere ua.
1PE 1:5 Eto ungo God humota ere ova avoeto sovera amita na ungo simba ere uma iji kombuta ungo daingeto oreketo humbasuja avo au kesova.
1PE 1:6 Avoeto ungona ari avo hotembihe tunga javotoho ere ova te eha oroho emina iji isapa memenga osaga kogue mihovova.
1PE 1:7 Eto ungo memenga osaga kogova amita be amo ungo God humota be ere ovetemo ae re avo be kesi embo na ‘Gold’ ji vevere ta ingagore eveketo tongopa irae eto javotoho eaguja aingeko amina memenga osaga na ungota degi etokiari ere ikihia. Rate God humota eagora ainge mane ra ‘Gold’ amo irae aisuja te iji kombu te Iesu Keriso ikau puvurou ungo God humota ari embomeni avo God na kogue otohu usasa te ke ijie ungo jakeka aisuja.
1PE 1:8 Eto Iesu amo ungo tihi na kiae rate osa ueva eto eha amo mane kiagova rate hotembihe ke be ijie tunga javotoho isapamane be ere ova,
1PE 1:9 amita be amo ungo iji kombu te humbasi humota ere ova amo God na ungota Ahihi oreketo humbasuja.
1PE 1:10 Eto God na ungo oreketo humbasuja amita ke amo peroveta na hande ere uahera te ke amita be amo deire avo mana mana ue jombure ngahia ere uahera.
1PE 1:11 Eto Keriso na osaga te memenga te kito amita usasa ta horasuja amita ke avo Ahihi Otohu na enana ta siro ta harikenu ingito ari amo iji deina eto daingeto puvuresuja avo jombure ere uahera.
1PE 1:12 Rate ke amo God ta peroveta avoeto ikae rate ungoembo ikari avo God na enana ta degi harikenu kito ke hande ere uahera eto duru javotoho avo God ta ke hande ari embomeni na Ahihi Otohu uhu i ta eto ikari puvurari amita sovera na ungota degi ikehere ingeva, ke eremita be amo God ta Anera te tapa na be kesi uje ere ora.
1PE 1:13 Avoeto hotembari neite neite tapa avo toto hotembari vahai avo be jigito God na Iesu Keriso iji kombu te ikau puvuto ungota hondate ari isapamane ikasuja avo jo tapa na hotembu hotembu ue irivujo.
1PE 1:14 Ungo God ta ke agi ari meniundi avoeto ungo kiae ue hamo ta ujeje isapamane ere uaeheva avo tovu.
1PE 1:15 Amita be amo ungo siriketo umbuna embo God amo otohu avoeto vasiri tapa otohu ue evujo
1PE 1:16 amita ke ta amo einge kajari mihia “Na otohu avoeto otohu evujo” ke ainge God na ena.
1PE 1:17 Eto God na embo tapa amita ari sapura davore ari javotoho davore amo heka vahai amina sirikaguja eto ungo na God ta degi “Nau Mama” ke eagova avoeto hari da ei mihie vasiri tapa avo be simba eto kogoeto irivujo.
1PE 1:18 Eto ungota ahihi ta ari sasapura avo oreketo ungo humbasi God na Iesu Keriso ta orosa javotoho amina ungo ombuto umbuna, amo ‘Gold’ te ‘Silver’ te sapura eaguja aingeko amina ombae
1PE 1:19 rate Keriso ta orosa javotoho amo God ta o sheep Meni aingeko amina ungo ombuto umbuna.
1PE 1:20 Eto God na uhu te enda te ae pekota amita Meni Iesu Keriso ikasi sirikena avo iji tutumo puvija emite ungoembo ikehei puvuto pehenu
1PE 1:21 God na jiginu erenu amita degi sago kiari isapamane ikena avoeto ungo na God ke be ijie humota ue ambota do puvuresuja avo simba ere ova.
1PE 1:22 Eto ungo God ta ke agi eagova amina jo tongopa irae avoeto namei kamei osa ere ova te jo tapa na namei kamei osa peni vahai evujo.
1PE 1:23 Eto ungo vasiri eha humbari embomeni amo embo na be ikari amina vasiri eha umbae rate amo irae eaguja avoeto, vasiri eha umbeva amo God ta ke vasiri te daroho iraguja ai ta umbeva.
1PE 1:24 Amita ke amo God ta ke ta einge kajari mihia, “Embo visi te amo sasaha ainge eto embo ta sago kiari amo sasaha ta koru ainge ra. Eto sasaha giroro au amita koru karaun eto veto irae aisuja rate
1PE 1:25 Bada ta ke avo daroho iresuja” ainge kajari mihia eto ke javotoho aravo amo ungota degi hande ikari ra.
1PE 2:1 Avoeto namei ta degi tumo ue hini kambari eagova eto nei namei ta degi ke be avo teto haito ke sokova eagova eto nei namei ta donda javotoho kito humbasi tunga ta sirikagova eto nei namei ku ta hihi tiragova amite eto ari sapura tapa eagova avo tovujo be irae ai.
1PE 2:2 Eto Bada ta hondate ari ta gamo do aingere amo ungo kiari ra avoeto meni isasaraho na emi indesi tigaho eagora ainge dombo God ta ke amo ahihi ta indari be avo uje ue pajihirovo God na siriketo humbau amita toho be aisova.
1PE 2:4 Eto Bada amo God ta koro vasiri te aingeko avo kito God na amita hamo ta bande otohu ere gerikihia. Eto koro avo embo na kito bande ikari haite mane kito toagora te God na ere kogua avo dombo be avoeto bande ikasi siriketo umbuna avoeto amita degi havu.
1PE 2:5 Eto ungote tapa koro vasiri te aingeko amina God na amita irari bande otohu ere gerikihia. Eto ungo na amita pure ari priests ototohu eto ungota pene otohu avo God ta degi ikihirovo God na Iesu Keriso avoembo hande jajavotoho ke ijie humbasuja.
1PE 2:6 Eto ke erena amo God ta ke ta Keriso avoeto einge kajari mihia, “Kivujo, na koro javotoho siriketo humbuto ‘Zion’ ai ta ikano amita hamo ta nau embomeni na hetasora eto embo amuna koro avo ke be aisuja amina mane me kesuja”, ke ainge kajari mihia
1PE 2:7 avoeto koro amo ungo ke be ari embomeni ta degi dombo bera. Rate enana ke be ae eagora embomeni ta ke amo einge kajari mihia, “Embomeni na koro sapura ke eto toa avo God na humbuto bande ta koro dombo be ikena” ainge eto
1PE 2:8 ke nei amo “Embomeni na koro ai ta teto veasora, eto koro amina au embomeni vurereketo veasora.” Ke ainge mihia amita be amo embomeni na God ta ke mane ingora ena avoeto koro teto vea.
1PE 2:9 Rate ungo amo God na siriketo humbari embomeni eto ungotenau ‘King’ God amita priests pure ari embomeni eto amita embomeni ototohu eto God ta embomeni toho be ra. Eto ainge ere ova amita be amo ungo mume ta mihaheve God na jage enu amita usasa javotoho ta horiheva amita ke avo humbuto embo tapa ta degi hande ava umbuna.
1PE 2:10 Eto mahu kihi ta amo ungo embomeni mane ra te eha amo ungo God ta javo vahai embomeni be ra. Eto iji mahu amo ungo na God ta jo ari do aingere amo kiae rate eha amo ungona God ta jo ari ere kogova avoeto irari javotoho miheva.
1PE 2:11 Eto nau namei kamei ungo enda embomeni mane uhu embomeni hari da ta miheva avo hamo ta ujeje isapamane amina ungota ahihi ta degi isoro eaguja avo be tovujo.
1PE 2:12 Eto God kiae embomeni ga miheva avoeto vasiri javotoho pere ue irivujo eto embomeni amina ungo ari sasapura embomeni ke eagora avo ungota ari javotoho amina haekevujo. Eto ungota ari jajavotoho avo enana na kogue mihiroro iji kombu ta puvurou God jakeka aisora.
1PE 2:13 Eto Bada avoembo gavana ta ke pepeni tapa agi evujo amo enda ta tihi jigari embo peni amita ke te
1PE 2:14 eto amina embopo siriketo humbuto ikeoi pambuto tihi jigihe ari sasapura embopo ta hajire ikeore kiagora eto ari jajavotoho embopo avo humota ue ari javotoho eagora amite tapa ke agi evujo.
1PE 2:15 Eto God ta uje amo kiae embomeni na ungota ke amo sokova ra eagora avo ungo na ari jajavotoho amina haekasova.
1PE 2:16 Eto ke be amo ungo enda embo ta ke pepeni ta horae rate God ta tihi ta hetari embomeni avoeto ke pepeni poeketo ke amina ahurekasi mane hotembasova te God ta uje tapa asi ue irivujo.
1PE 2:17 Eto embo tapa be tapa humota ue evujo eto God ke be eagora embomeni tapa amo no namei kamei ra osa evujo, eto God otohu ra ijie joru evujo, eto nei enda ta tihi jigari embo peni avo humota evujo.
1PE 2:18 Eto ungo embo nei ta pure ari embopo ta degi erena, ungota embo peni avo humota ue agi evujo. Eto hande ari osa ari embo ta ke pere mane agi aisova te tumo ahua ari embo ta ke te tapa agi evujo.
1PE 2:19 Amita be amo embo na sapura nei do ae rate embo nei na osaga memenga au kogue God ta uje avo hotembihe jamo eto irirou God na kesuja amo tunga javotoho aisuja.
1PE 2:20 Eto ke be amo no ari sapura avoeto hajire ikau kogue jamo eto iresoa amo God na kesuja amo tunga nei do mane aisuja amo ujekari no rate umo ari sapura ae rate embo na au memenga kogue jamo eto iresoa amo God na kesuja amo tunga javotoho aisuja.
1PE 2:21 Amo God na ungo ari ainge aisova avoeto siriketo umbuna amore Keriso na ungota ahe kihira ue ungo avoembo memenga osaga umbuna amo amita utu hain hatirari asa ai ta hatihe pambava ena,
1PE 2:22 amo eingera, Keriso na ari sapura nei do ae, ke sokova ae mihahija
1PE 2:23 te embo na Keriso urumbea rate mine urumbae eto hamo ta memenga ikeo kina rate mine asi hotembae rate embo ta ari ke be na sirikaguja embo God avo humota ue hamo amita avo amita ingeni ta iketo tona.
1PE 2:24 Eto ungotena ari sasapura tapa toto ari jajavotoho pere ue irora Keriso na ungotenau ari sasapura tapa amita hamo ta vihinu humbuto cross ta vihina, amo Iesu ta hamo teto tiukea amina ungotenau hamo ta pupuho uhekena.
1PE 2:25 Ke emita be re ungo o sheep vaine pambari avo egerembeto o mamo Keriso amore ungota ahihi simba eaguja amita degi puveva.
1PE 3:1 Eto ungo evohu tapa ta degi erena, ungota ipone ta ke agi evujo. Eto ke agi ururovo ungota ipone nei nei amo God ta ke be ae eagora amina ungota pe ta ke avo mane ingesora te ungota ke agi ari, osa ari eto humota ari avo kogue enana God ke be aisora.
1PE 3:3 Eto umo kiari evohu asi eto kito amo siro vuvunda jigesoa, hambo turasoa eto kiari bo asukasoa amina pere mane kiari evohu asoa
1PE 3:4 rate no jo te tapa osa ari pekari eto humota ari amina umo kiari evohu aisoa, eto hambo sago te avo turasoa amo God ta tihita daroho iresuja.
1PE 3:5 Eto ari ainge amo God humota ari evohu mamahu na ue kiari evohu eto ipone ta ke agi ere uahera,
1PE 3:6 ainge amo evohu vahai javo Sarah amina ivu Abraham ta ke agi ue “Nau Bada” ainge Abraham ta degi ere ijiahija, eto ungo eha oroho miheva amina ari javotoho ue joru ae teho iresova amina Sarah ta iariri aisova.
1PE 3:7 Eto embo ungo ainge dombo ungota airi amo embo ta vuvure ainge mane rate God na ivu te ae te ta degi vasiri daroho avo inono inono ta ikau hotasora avoeto tunga humbuto humota evujo. Eto ungota airi humota ue pari aisova amo God na ingesuja.
1PE 3:8 eto ke tutumota aisona amo erevira, amo ungo tunga vahai eto pure evujo, Keriso ta toho amo namei kamei ra jo ue osa mine ara evujo. Eto namei embo peni na isapa ra ainge mine ara ijie irivujo.
1PE 3:9 Eto ari sapura mine asi mane hotembasoa eto mine mane urumbasi hotembasoa te God ta hondate ari umbara ke ejo, amo ungo na ari ainge eto God ta degi ari javotoho umbava God na ungo humbei embomeni amita toho be ere ova.
1PE 3:10 Ke amore God ta ke ta einge kajari mihia, “Eto embo amuna amita vasiri osa ue iji javotoho kesi uje aisuja amina amita ivivi te pekihi te simba ue amita pe ta embo nei hihi tirari te ke sokova sakova ari te mane puvuresuja
1PE 3:11 eto amina ari sapura kuho sindeto ari javotoho ue pekari avo eheheto pambasuja.
1PE 3:12 Eto ke amita be amo Bada ta tihi na embo jajavotoho amo kogue enana ta pari avo oje na ere ingihia rate ari sasapura ari embomeni amo Bada na kogue tumo ere ua.”
1PE 3:13 Eto ungona ari jajavotoho jo tapa na asi uje aisova amo embo na kito osaga memenga aro kiovo? Mane aisora
1PE 3:14 te ungo ari jajavotoho ere ova avo enana na kito aro osaga memenga kesova amo God na hondate au tunga javotoho aisova, avoeto enana do ere ora avo joru ue osaga kiovojo,
1PE 3:15 rate ungota jo tapa na evujo Keriso ungota Bada ai. Eto embo amuna ungo God humota ere ova amita be deire avo ungota degi eto ingari ke humbuto puvuresuja amita degi ke mine do aisova avo siriketo nununga evujo.
1PE 3:16 Eto ke mine aisova avo hini kambari na mane aisova te jokeka ke na eto hotembari javotoho ke ijirovo enana na ungota irari javotoho Keriso ta javo ta ere ova avo ungo urumbari embo na kito me kesora.
1PE 3:17 Eto ungo na ari sasapura eto memenga osaga kiaeheva amo sapura rate ungo na God ta uje ta ari jajavotoho ue memenga osaga ere kogova avoeto amita sapura amo iraera.
1PE 3:18 Eto Keriso na ungotena God ta degi kihi humbuto pambasi iji vahai amina pehena amo embo javotoho amina ari sasapura embomeni tapa avoeto pehena, amo embo na amita hamo avo teo pehena te God na amita Ahihi avo jiginu ereto
1PE 3:19 God ta ke agi ae embomeni mamahu ta ahihi amo God na andito humbari amita degi pambuto amita ke hande ena,
1PE 3:20 eto embomeni sasapura amore Noah na e nga gerikena iji amikote enana na jo haperekara God na iji koso simba ena te jo haperekae eo ga peni vahai veto umo irerembeto ukomo unu embomeni sasari uo embo tapa 8 e nga jo ta mihia avo umo na oreketo humbuto i ta pambuna.
1PE 3:21 Eto ungo umo na bapataito eagova amita ahe kihira amo Noah ta iji te umo irerembena amina ena. Eto umo na embo orekaguja amo hamo tongopa egari amina ae rate God ta degi ke be ikihe jo javotoho ari humbagora.
1PE 3:22 Eto ungotena orekena embo Iesu Keriso amina vasiri te ereto God ta degi uhu i ta vihito God ta ingeni be ta arumbeto Anera te uhu ta tihi jigirikari embomeni tapa amita embo okose eto mihia.
1PE 4:1 Eto Keriso na hamo ta memenga kina avoeto ungo ainge dombo ari sasapura toasi avo hotembihe sovera evujo, ke amita be amo hamo memenga kiari embo amita degi ari sasapura amo ivo ambu aisuja avoeto enda ta mihie hamo ta ujeje sasapura avo mane asi hotembasuja te God ta uje vahai avo asi ue iresuja.
1PE 4:3 Eto God kiae embomeni ta ari sasapura ungote tapa ere uaeheva amo ke pepeni poekagora eto emo indito kava ue sarika ue eagora eto sesena sasapura eagora eto pondo kando isapamane eagora eto donda Otohu o, a, ijie jakeka eagora aingeko amo ungo na eheve inono uija avoeto toruheva
1PE 4:4 avo enana na kito ungo do eto enana ga kajueto ari sasapura neite neite ae eagova avo mana mana ue urumbihera
1PE 4:5 rate erevi hotembevujo amo enana na embo pepehekari te embo vasiri te mihera amita ari sasapura siriketo hajire ikari Embo amita degi enana ta ari avoembo ke aro ingesi simba mihia.
1PE 4:6 Eto embomeni mahu pepehekari amina eha vasiri te irari iji te ari do ere uahera amo God na ijuketo kina avoeto enana ta ahihi avo God iraguja ainge dombo irora God ta duru javotoho avo enana ta degi hande ena.
1PE 4:7 Eto iji tutumota ere puvutuhua avoeto uha javotoho be na pari evujo.
1PE 4:8 Eto pajire be avo jo tapa na osa mine ara evujo, eto osa ari amina ungota ari sasapura tau veto irae aisuja.
1PE 4:9 Eto osa ari na pekari na umoro kamoro ue hande puanda mine ara evujo.
1PE 4:10 Eto ungo God na amita pure do ava kiari hande ikena amina hondate mine ara ue God ta pure ari embomeni be evujo,
1PE 4:11 eto God na no hande ikena amo ke ra avoeto no jo tapa na God ta ke avo hande ejo, eto God na no hande ikena amo hondate ari avo ikena avoeto God ta sovera na embo nei hondate ejo. Eto ari ainge avo ururovo amo Iesu Keriso avoembo God ta degi usasa puvurou embomeni na sago javotoho kesora, eto Iesu Keriso ta degi usasa te sovera te mahu ainge iroi, amen.
1PE 4:12 Nau namei kamei, eto ungota degi eto kiari memenga te puvuresuja avo kito tututu mane aisova amo ungota degi ari nei do asi mane puvija te
1PE 4:13 Keriso ta memenga avo ungona amiga kajueto ere kogova avoeto tunga javotoho evujo. Eto iji kombu ta puvurou Keriso ta usasa sago kiari peni be araha ta puvurou kito tunga javotoho be aisova.
1PE 4:14 Eto embo na ungo Keriso ta javo ta iragova avo kito ungo urumbasora amo God ta Ahihi usasa te ungota hamota mihia avoeto urumbasora avoeto tunga osaga avojo.
1PE 4:15 Rate ungo vahai amuna embo tari retemo donda pegene retemo ari sapura retemo embo nei ta ke togeto humbuto hande aheva amo ujekari ungota avoembo memenga kiaeheva rate ari ainge amo sapura be ra avoeto mane aisova.
1PE 4:16 Rate umo Keriso ta toho avoembo au memenga osaga kogue mane me kesoa te na Keriso ta tohora ijie God jakeka ejo.
1PE 4:17 Eto God na amita ke be ari embomeni ta ari do aingere avo sirikari iji puvuto ere hua amo ungotenau degi mahu puvija rate God ta duru javotoho ingito ke be ae ari embomeni amita degi hajire do au?
1PE 4:18 Eto ke be amo ari jajavotoho ari embomeni na God ta irari degi ai horari haite rate ngahia be ra te God ke be ae ue ari sasapura ari embomeni na ai ta daingeto horaro?
1PE 4:19 Rate embo amuna ari jajavotoho ururou kitoho embo na aro osaga memenga kogue amita ahihi avo ove ari Embo God ta ingeni ta ikau humbuto simba ururou ari jajavotoho mahainge aisuja.
1PE 5:1 Eto ungo ekalesia embo okokose ta degi ke erevi erena amo Iesu Keriso ta memenga amo tihi nau na koguena avoeto amo puvutuhurou amita usasa aisuja ai ta namote tapa horasora avoeto ungotena embo pepeni pere rate nane ungota degi erena amo
1PE 5:2 ungota ekalesia amo God ta o meniundi ra unduvujo amo kupi ue hamo na mane unduresova rate jo tapa na tunga iketo evujo. Eto amo koro humbari ta pure ke ijie mane aisova te God na uje ere ua avo jo tapa na pure evujo.
1PE 5:3 Eto na embo peni ra ijie mane ungota embomeni ta degi ngahia aisova te ungota ahe kihira avo ue pahurovo ungota o meniundi avo ambota ambota are.
1PE 5:4 Eto ungo ari ainge avo ururovo o simbari Embo Be avo puvurou kesova iji amikote amina siro kope javotoho usasa te avo ikau asukavo daroho iresuja.
1PE 5:5 Eto ungo embo ehaha ta degi erena embo okokose ta ke ingito agi evujo. Eto ungo tapa ta erena amo embo nei avo peni ke ijie umo isapa ke eto no pure ari bo asuketo hondate mine ara evujo. Eto ke amita be amo God ta ke ta einge kajari mihia “God na embo umo oenga na na ijie jakeka aisuja embo amita ke mane ingesuja te embo meni isapa sira eagora amita degi hondate ari ikaguja.”
1PE 5:6 avoeto ungo meni isapa sira eto God ta ingeni sovera te amita hemba hu ta mihirovo God na iji inono ta au ungo peni aisova.
1PE 5:7 Amo God na ungo simba ere ua avoeto ungota osaga tapa amita ingeni ta iketo tovujo.
1PE 5:8 Eto ungota kitoho embo Satan na isoro o ‘Lion’ beuje oi jajavone ijie embo kambuto indesi enda ta ereto ere ua avoeto be kogue mihie
1PE 5:9 Bada humota ue sovera humbuto Satan ta ari kito kiarako ue ngahia eto irivujo, eto ungo osaga ere kogova amore ungo oenga kiae rate ungota namei kamei enda tapa ta mihera amite tapa osaga memenga kogora avo eto ungo ere kogova.
1PE 5:10 Eto ungo na iji isapa osaga memenga kogurovo ungota jo ari hondate ari God ungo Keriso ta usasa ta daroho irova siriketo humbari Embo amina puvuto ungo oreketo humbuto degi javotoho ta iketo sovera ikau humbuto iresova,
1PE 5:11 amita degi sovera ari daroho iroi, amen.
1PE 5:12 eto ungota namei Silvanus ungotena humota ari haite amina ahari tuhaupa erevi Peter nane ene ere kajihia. Eto ahari emita jo ta amo God ta hondate ari be amo do aingere avo ano humbuto eheketo kito sovera humbuto be isieto jigito irivujo.
1PE 5:13 Eto enda Babylon (embo nei nei na ‘Rome’ ke eagora) ta ekalesia God na ungo umbuna ainge eto humbari amina ungo ere pekihera eto nau meni Mark amite tapa ungo ere pekihia.
1PE 5:14 Eto ungo namei kamei ue jao tahe ue andito mune tavo mine ara evujo. Ungo Keriso ta embomeni be amita degi peka iroi. Orerere.
2PE 1:1 Na Simon Peter, Iesu Keriso ta apostero eto ke agi ari embo nanena ungo God na eto Iesu Keriso na hondate ari avoeto God humota eagova amita degi ahari erevi ere kajihena amo God na embo tapa inono inono ke ijie eaguja avoeto ungota God humota ari amo dago na God humota eagora ainge dombo eagova.
2PE 1:2 Eto ungona God te Bada Iesu te kogurovo amita hondateari te peka te ungota degi pajito peni be ai.
2PE 1:3 Eto ungotena amita degi ta usasa te ari jajavotoho te hande iketo umbara jage eaguja embo God avo be koguroro amita sovera na ari jajavotoho tapa ikau humbuto irari javotoho hambuto God ta vasiri ambo ambo aisora.
2PE 1:4 Eto ke amita be amo God na ari jajavotoho ikasi oje ena avo ikau humbuto jigama ue enda ta uje sasapura avo tiumbihe God ta ari ikau humbuto amita hajire vahai ainge aisora
2PE 1:5 avoembo ungo God humota ue kito ari jajavotoho amite tapa evujo
2PE 1:6 eto ari jajavotoho ue kiari eha umbuvujo, eto kiari eha humbuhe ungota tumo eto ungota hini kambari toruhue sovera ari humbuto ari jajavotoho ue irivujo eto hamo sovera ari humbuhe God ta ari avo asi tunga ikevujo
2PE 1:7 eto tunga ikihe ekalesia emboga namei kamei evujo eto namei kamei ere uma Keriso ta osa ari na embo tapa osa evujo.
2PE 1:8 Eto ungona ari tapa erena erevi aemana humbasova kito ungona Bada Iesu Keriso ta ari be avo kogue sovera amita na asova
2PE 1:9 rate ari erevi amuna umbae asuja amo tihi kuru ari embo ainge ambota do puvuresuja avo kiae ue amita ari sasapura mahu egari iraeari avo mahu jenete arira.
2PE 1:10 Avoeto nau namei kamei ungo God na amita toho avo siriketo jage ehei puveva avoeto amita toho be eto iresova avoeto tunga iketo pure ngahia ue God mane egiketo pambasova.
2PE 1:11 Eto ari ainge aisova amo God na au umo Bada Iesu Keriso ungotena oreketo humbari embo na datohota tihi jigari degi ai ta horasova.
2PE 1:12 Eto na kogona amo ungona ke erena erevi tapa be jigito ke be ijie ereova te
2PE 1:13 na hamo visi te ei ta mihie ke eremina ungota jo ta undurono be hotembasova.
2PE 1:14 Eto ainge ere ona amita be amo Iesu na ke ehei ingena amo na hamo te visi te houketo pambasova iji ere auvihia.
2PE 1:15 Eto na pambuto mihirono ke erevi mahainge hotembu ue irova avo be eto kogoeto nununga ere ona.
2PE 1:16 Eto Bada Iesu Keriso usasate egerembeto puvuresuja amita ke humbuto puvuto ungota degi hande uera amo embo ta hihi sokova tirari avo hande ae rate dagota tihina amita soverate avo koguera
2PE 1:17 amo dago amiga mihere God Mamo na usasa te otohu te avo ikihe uhu i ta usasa ta eto ke einge puvei ingihera, “Emo nau osa ari Meni ra avo kogue tunga javotoho ere ona”
2PE 1:18 ke ainge amo dago tiri otohu amita hamo ta mihere uhu ita eto puvuhija avoeto ke dagota amo ke be perera.
2PE 1:19 Eto peroveta mamahu na ke do hande ere uahera avo jo tapa na ke be erera amo ungo na hotembu ue siro pure evujo ke amina kerivo ijimbeto mume ta jigoro usasa ururou Bada Iho vujihirou iho kuro na ungota jo usasa ururou ke hande uera avo be hotembasova
2PE 1:20 rate ke dombo be erevi hotembevujo, ke tapa peroveta na God ta ke ta kajari amo embo vahai amuna umo oenga hotembari amita na kajaera
2PE 1:21 te peroveta ta ke amo enana ta hotembari na ungo oenga ae rate ahihi Otohu na God ta ke avo humbuto enana ta jo ta ikeoi ingihe hande ere uahera.
2PE 2:1 Eto ungotenau ohihi ta iji te peroveta sokova na mihahera ainge dombo ke sokova ahe poekari embopo ungota degi mihie enana ta orekari embo Iesu avo egikihie enana ta hotembari ke ga ojikari na God ta ke ga kajueto hande ue ungo oenga ahihi totoho ta avo borambu taro pehasuja.
2PE 2:2 Rate enana ta me kiari ta ari avo embo isapamane na ambo ambo ue pahuroro embo na enana ta ari avo kito God ta ke javotoho amite tapa aro sapura aisuja.
2PE 2:3 Eto ahe poekari sokova amina ungo ombuto koro humbasi uje isapamane aisora. Rate ari sapura ta hajire ikari embo God amo enana tasi evae teho mihouva.
2PE 2:4 Eto ke be amo God ta Anera na ari sapura ea amo toae rate ambota hajire au kiagora ikenu pambuto Satan ta tipura ari degi mume ai ta pundurari mihera.
2PE 2:5 Eto nei amo iji mahu be mahu God uje ae embomeni ta sapura amo God na hotembeto toae umo ikenu irerembeto humbunu sasari uo embo ari javotoho ara ke hande ari embo Noah te embo nei uhoho tapa ainge amite avo oreketo umbuna
2PE 2:6 eto nei amo God uje ae ari embopo ta degi ahe kihira ai kiagora ena amo da Sodom te Gomorrah te avo ji na ikenu veto evekena
2PE 2:7 rate da ai ta embo javotoho vahai avo Lot amina mihie enana ke pepeni poekihe ari sasapura neite neite uore kogue tunga osaga te tapa mihahija vahai avo God na oreketo umbuna.
2PE 2:9 Eto ke erena amo Bada na embo Jajavotoho ari sasapura uore osaga kiagora avoeto oreketo humbaguja te God ta ke peni avo otohu ae ue hamo ta uje ta huhevihe ari sasapura neite neite eagora embopo avo God na hajire ikau kogue mihiroro iji kombu ta ari sirikari iji puvuresuja. Eto ke sokova ahe poekari embopo na ungo oenga embo peni ke ijie God ta Anera uhu i ta iragora avo otohu ae urumbagora
2PE 2:11 te Anera sovera te amina God ta avo arumba peni amita engihita iragora amina mine mane urumbagora
2PE 2:12 te embomeni amo God ta ke kiae avoeto urumbagora avoeto enana kiari embomeni mane ahoe o ohu aingeko amina erera eto o ahoe ta mihoi embo na teto heveto indagora ainge dombo God na enana tau pepehekasora
2PE 2:13 amo embo ta degi osaga memenga ikagora avoeto God na osaga memenga mine ikau kesora. Eto enana ta tunga humbari be amo iji te kava ue sarika ue ungote arumbeto indie hihi sokova sakova neite neite tiragora embopo amo ungo God humota ari embomeni ta tongopa ra.
2PE 2:14 Eto ungota degi evohu ivo ambu jo suruha te avo amiga tiha asi poeto kiagora avoeto enana ta ari sapura ta kane irae ra. Eto enana amo hamo ta ujeje humbari kiari isapamane be avoeto God na tasi simba mihia
2PE 2:15 eto embo javo Beor ta meni javo Balaam na degi toto tihi mimeto pambuna ainge dombo enana na ari sasapura ta gamo avo osa ue degi javotoho toto tihi mimeto ere pahora
2PE 2:16 te peroveta Balaam degi sapura ta pahunu o ‘donkey’ amo ke ambu rate embo na ke eagora aingeko eto Balaam ta kava ere una avo isembihe haekena.
2PE 2:17 Eto ke sokova ahe poekari embopo amo umo isogo sausau evekaguja ainge eto johi pisara na tahuneto humbuto pambaguja ainge ra eto mume kambujoro be ai ta irora nununga ehija.
2PE 2:18 Eto enana hamo ta gamo donda isapamane daingeto humbasora avo hihi tirihore embomeni ingiora amo embo God ta javota eha horagora amina ke sokova ta gamo avo ingesi ambo ambo uore
2PE 2:19 “Ungo God ta ke peni amina andiroujo” ainge eagora te enana ari sasapura na andirarira amita be amo donda deina amita jo punduresuja embo amo amita agi ari embora.
2PE 2:20 Eto ke be amo embo amuna ungotenau orekari embo Bada Iesu Keriso avo be hotembihe enda ta ari sasapura toaguja te ehako tunga hapereketo ari sapura ta veoi andiaguja amo embo amo kiae pekota ari sapura embo rate God kito egikasuja amo sapura be hambasuja
2PE 2:21 eto God ta ke otohu enana ta degi kiari avo ingito humbuto ehako ku sindeto ere pahora te enana na God ta ke otohu avo ingae ahera amo ari sapura ta hajire kiaehera te ingito ingarako ue pahora amo ari sapura ta hajire pajire kesora.
2PE 2:22 Eto ke erevi enana ta ke be ra “Ino na pere huketo ehako indaguja” eto “Ino umo kuheore ehako amisa ta herekeoi tongopa eaguja” aingera.
2PE 3:1 Eto nau tunga humbari embomeni, na ahari mahu kajihena amite eha ere kajihena amita jo ta amo ari do puvuresuja amita ke avo peroveta mamahu na kakajekea amite eto ungotenau orekari embo Bada Iesu na ungo daingeto iresova amita ke avo apostero na hande eagora avo be hotembihe siro pure ava ere kajihena.
2PE 3:3 Eto ke kihita amo erevira, iji tutumota puvutohururou embo hamo ta ujeje osa ari embopo amina puvuto ungo kege ganini na ungo urumbihe
2PE 3:4 ke einge aisora, “Iesu puvurari ta oje ena amo daingere? Ungotenau mamahamane mahu sasari ea eto enda ehara ta ena ai ta eto puvuto eha oroho ere ora amo nei puvurae irari vahai avo iragora te Iesu daingetare?” ke ainge ijie
2PE 3:5 ke be erevi teto hatihe aisora amo iji ehara ta God na ke enu enda te uhu te ena amo God na umo humbuto enda ena
2PE 3:6 te ari sasapura uo kito umo na ikenu irerembeto enda mahu avo humbunu irae ena.
2PE 3:7 Eto uhu te enda te eha mihia avo God ta ke na simba ururou God kiae embopo ta hajire ikau pehasora amita iji puvutuhurou God na enda te uhu te avo ji na ikau eveketo jaekau irae asuja.
2PE 3:8 Rate nau tunga humbari embomeni ke vahai erevi jenambu avojo amo Bada ta degi ta jua tapa 1,000 amo iji vahai aingeko eto iji vahai amo jua tapa 1,000 aingekora
2PE 3:9 te embo nenei na Bada na oje ena amo sausau ikae mihouva, amo ainge mane rate embo peheto ari sasapura ta hajire kesora avo uje ae eto ari sapura toto jo haperekarote avoeto enana ta iji isapa kosoko asusumbeto ere ikihia.
2PE 3:10 Rate Bada ta puvurari iji amo pegene embo na puvurarako ururou uhu i ta asavi pajire ijie saivihirou uhu i ta donda iraguja tapa amo eveketo jaekihirou enda te enda ta donda tapa amo irae aisuja.
2PE 3:11 “Eto ari ainge amo ambota puvuto ere hua avoeto ungo dainge eto nununga ue irovo?”
2PE 3:12 Ungo God ta ari be avo jigama ue vasiri be ue otohu ururovo iji avo sausau puvuroi. Eto iji amite uhu i ta perimbeto vevere pajire be au donda tapa amo sigeto irae asuja.
2PE 3:13 Eto ungotena Bada na oje ari simba ere ovora amo uhu eha enda eha eto ari jajavotoho ari da avo simba mihera
2PE 3:14 avoeto nau namei kamei ungo simba ue ari sasapura irae tongopa irae ue irirovo Bada puvuto ungo peka ta irirovo hambasuja.
2PE 3:15 Eto ungo jo ahereketo God ta degi hurova bada simba ere ua avo hotembevujo, amita ke amo ungotenau namei Paul amo ungotenau tunga humbari embo amina ungota degi kajena amita kiari amo God na hande ikari humbari ra
2PE 3:16 te Paul ta ahari kajena amo do aingere amo na kiarira amo ke pepeni amo ke be hambari haite rate ngahia avoeto embo kiae embopo eto hotembari sasapura embopo amina Paul ta ke jigiore okokombaguja eto God ta ke tapa amo eagore sapura eaguja avoeto enana ta ahihi avo pehasuja.
2PE 3:17 Aravora te nau namei kamei ungo oje kahehena aravora avoeto ungo embo God ta ke pepeni poekari embopo amita ambo ambo mane aisova te God ta ke be ai ta heteheva aita mihie
2PE 3:18 ungotenau orekari embo Bada Iesu Keriso be kogue amita hondate ari na pajivujo, amita degi usasa eha oroho eto daroho iresuja, aravora.
1JO 1:1 Eto enda ae pekota amo ungotenau orekari embo mihahija amita ke avo dago apostels na oje na ingihera tihi na koguera ingeni na hame uera eto vasiri te irari ta ke amita degi ta eto puvaguja amita ke avo ungota degi ta ere kajihera.
1JO 1:2 Eto Keriso amo Mamoga mihahija te ikenu enda ta puvunu tihi na koguera avoeto vasiri te daroho irari amo amita degi ta, avo dago na ungota degi hande eagora.
1JO 1:3 Eto dago na Mamo te Meni Iesu Keriso amiga tunga vahai ue osa mine ara eagora ai ta kaju avote do ingihera eto do koguera avo ungota degi hande ereora
1JO 1:4 eto ere kajihera avo ungo kogue ururovo dago tunga javotoho be aisora.
1JO 1:5 Eto God ta Meni ta degi ke ingito ungota degi hande eagora amo erevira: God amo usasa avoeto amita degi mume irae be
1JO 1:6 avoeto ungotena God ga tunga vahai eto osa osa ari ke ijie mume ta mihera amo ari na eto ke na sokova erera.
1JO 1:7 Rate God usasa ta mihia avoeto usasa ta mihie tunga vahai ue osa osa te tapa iriroro God ta Meni Iesu ta orosa na ungotenau ari sasapura tapa egeoi irae eaguja.
1JO 1:8 Eto ungotenau ari sapura irae ke asora amo ungotena ke be ari haite mane rate ke sokova eagora.
1JO 1:9 Rate God ta degi ari sasapura harikihiroro amina ari javotoho ikasi oje ena amo ari sasapura hotembeto toruhue jo egau javotoho aisuja.
1JO 1:10 Rate ari sapura irae ke asora amo God ke sokova ke asora avoeto ke amita avo jo ungotenau ta irari haite mane aisuja.
1JO 2:1 Nau meniundi ungo ari sapura mane ava ke erevi ere kajihena te inena ari sapura aisoa kito embo javotoho Iesu Keriso amina God ta degi ke ijie ungotena ere orekihia.
1JO 2:2 Eto Iesu Keriso avoembo ungotenau ari sasapura hotembeto toaguja amo ungotena ari sapura ta pene na mahu ombari eto ungotenau pere mane rate enda tapa embomeni ta pene ra.
1JO 2:3 Eto ungotena God kiari retemo kiaere amita eto kiari amo erevira, amo God ta ke peni avo ambo ambo asora amo God be kesora
1JO 2:4 te embo na God kiari ke ijie amita ke peni ambo ambo ae asuja amo ke sokova embo eto ke be ari haite mane
1JO 2:5 rate God ta osa ari na God ta ke peni amita agi eaguja embo amita jo ta pajito enetasuja. Eto embo na God ta jo ta mahu horari ke ijie kito Iesu na do ue mihahija avo pere ururou kito amo God ta embo be ke ahera.
1JO 2:7 Eto nau tunga humbari embomeni ungo God ta ke peni erevi ava ere kajihena amo ke eha mane ihikari ta eto ungota degi ikari eto ungota degi mahu hande ari aravora
1JO 2:8 te ungota jo ta mume irae oi iho vujarako oi ke mahu amo eha puvurarako ere ua ke peni amo “Osa mine ara evujo” Keriso na ere uahija ainge dombo ere ova avoeto ungota jo usasa ere ua.
1JO 2:9 Rate embo amuna usasa ta irari ke ijie namei tumo aisuja amo mume ta mihia aravora.
1JO 2:10 Te embo amuna namei osa aisuja amo usasa ta mihia avoeto teto be ari mane joru aisuja
1JO 2:11 rate namei ta degi tumo eaguja embo amina mume ta mihie dainge dainge ere pahua amo be kiaera, mume avoeto kiari inono ae ra.
1JO 2:12 Nau meniundi ungota ari sasapura God na Iesu ta javota hotembeto tona amita degi ere kajihena
1JO 2:13 eto ungo embo okokose daroho irari embo amo ungo kiari avoeto ungota degi ere kajihena, eto ungo embo ehaha ungo na Ari Sapura embo Satan, sovera eto dembari avoeto ungota degi ere kajihena.
1JO 2:14 Eto meni memeni ungo God Mamo mahu kiari avoeto ungota degi ere kajihena. Eto ungo embo okokose ungota degi kaehena amo ungona ihikari ta eto irari embo kiarira avoeto kaehena. Eto ungo embo ehaha sovera eto mihove God ta ke ungota jo ta mihouva amina Ari Sapura embo dembeto ere ova avoeto ungota degi kaehena.
1JO 2:15 Ungo enda te eto enda ta donda tapa amite avo osa avojo. Eto embo na enda ta donda osa asuja amo God mamo ta osa ari, embo amita jo ta mane horasuja.
1JO 2:16 Amita be amo enda ta ari sasapura tapa visi ta hamota ujeje sasapura amite eto donda neite neite humbari amite eto embo ta tihi ta embo peni asi hotembari amite tapa eingeko amo God Mamo ta degi puvurae rate enda ta vasiri na puvaguja.
1JO 2:17 Eto enda eto enda ta ujeje tapa amo irae asi ere puvutuhua te God ta ke agi ari embomeni amina daroho iresora.
1JO 2:18 Nau meniundi ungotena iji tutumo auvehija amo iji tutumo auvihirou Keriso ta kitoho puvuroja ke eagore ingiora amo kitoho nei nei amo mahu puvuto mihera avoeto iji tutumo mahu auvehija.
1JO 2:19 Eto Keriso ta kitoho amo ungotena vahai mane rate ungotenau ekalesia ta jo ta eto puvuto pambera. Eto ungotenau toho kito mane pambaehera te ungotenau toho mane avo embo na kiagora toto pambera.
1JO 2:20 Rate Keriso na ungota jo ta Ahihi Otohu overekena avoeto ungo ke be kiarira.
1JO 2:21 Eto ungo ke be kiari eto ke be ai ta ke sokova irae amo ungo kiari avoeto ungota degi ere kajihena
1JO 2:22 rate embo amuna Iesu amo Keriso ungotenau orekari embo mane ke aisuja amo ke sokova eria avoeto Keriso ta kitoho ra eto Meni ke be ae ue Mamo te tapa ke be ae eaguja
1JO 2:23 eto God Meni ke be ae eaguja, embo amina God Mamo te tapa ke be ae eaguja te God Meni humbaguja amo Mamo te tapa humbasuja.
1JO 2:24 Avoeto ungo ihikari ta eto ke umbeve ungota jo ta vovuija avo simba evujo eto ke avo egikae iketo mihie ungona Mamo te Meni te ga kajueto daroho iresova.
1JO 2:25 Eto Keriso na pe amita na oje ena amo vasiri te daroho irora oje ena.
1JO 2:26 Ungo degi aemo kaheto pambava ke sokova oje kahari embopo avo kiagova ke erevi ere kajihena
1JO 2:27 te Keriso na ungota jo ta Ahihi Otohu overekena avoeto ungota degi Ahihi Otohu mihia avoembo ungo embo nei amuna mane ahe poekara hotembasova te Ahihi amina javotoho davore sapura davore ahe poekasuja amo ke sokova irae ke be pere avoeto ke tapa asi ue Keriso ta toho eto irivujo.
1JO 2:28 Avoeto nau tunga humbari meniundi, Keriso ta jo ta irivujo eto mihirovo Keriso egerembeto puvurou me kogue mane ojikasova te tihi buju ta hetasova.
1JO 2:29 Eto Keriso ari javotoho ari embo amo ungo kiarira avoeto ari jajavotoho ari embomeni amo God ta meniundi avo be kivujo.
1JO 3:1 Eto kivujo, God Mamo na ungotena osa pajire be ere ua avoeto ungotena amita meniundi ke eaguja avoeto ungotena amita meniundira te enda embomeni God kiae avoeto ungotenamote tapa kiaera.
1JO 3:2 Eto nau tunga humbari embomeni ungotena eha emo God ta meniundira te ambota embo ta hamo uhu hajire do ainge asuja amo God na ae ingae rate ungotena kiari amo Keriso amo hajire do ainge ere ua amo egerembeto puvurou tihi na be kesora avoeto amita tombu vahai ainge aisora.
1JO 3:3 Eto Keriso amo tongopa ambu avoeto Keriso ainge dombo asi simba mihia embo amina amita vasiri ta tongopa irae eaguja.
1JO 3:4 Eto embo amuna ari sapura aisuja amo God ta ke pepeni poekasuja eto ke be amo ari sasapura tapa amo God ta ke peni avo poekasora.
1JO 3:5 Eto ungo kiarira amo Keriso na embo ta ari sapura humbuto pambasi enda ta puvuna eto amita degi ari sapura tapa amo irae
1JO 3:6 avoeto embo amita jo ta iresuja amo ari sapura mahainge aisuja embo amo God kiae be kiaera.
1JO 3:7 Nau meniundi ungo embo nei ta ke ambo ambo ue degi aemo ta pambavojo, Keriso amo ari javotoho ari embo eto embo ari javotoho aisuja amite tapa God ta tihi ta embo javotoho aisuja, rate Satan na ihikari ta eto ari sapura ere ova ainge embo amuna ari sapura mahainge aisuja amo Satan ta tohora. Rate Satan ta pure sosou asi God ta Meni enda ta puvuna.
1JO 3:9 Eto God ta meniundi na ari sapura mane aisora amo God hajire avoeto, eto God amo enana ta Mamo avoeto ari sapura amo toasora.
1JO 3:10 Eto God ta meniundi davore Satan ta meniundi davore amita etokiari erevira, eto embo na ari sapura eto namei osa ae asuja embo amo God ta meni manera.
1JO 3:11 Eto ke peni ihikari ta ingihava amo ungo osa mine ara evujo
1JO 3:12 amo embo Cain na ena ainge mane aisova amo Satan ta toho ena avoeto namei tenu pehena. Eto tenu pehena amita be amo Cain na amo ari sapura ere uahija eto namei Abel amo ari javotoho uoi kogue tunga osaga ere uahija avoeto tenu pehena
1JO 3:13 ainge dombo ungo ari javotoho ere ova avo enda embo na kito ungo uje ae ururoro kito hotembari nei avojo.
1JO 3:14 Eto ungotena namei osa eagora avoeto ungotena pehari toto vasiri ta embari embopo amo ungotena kogora, rate namei osa ae embo amo pehari ta mahainge iraguja.
1JO 3:15 Eto namei uje ae eaguja embo amo embo teore pehagora ainge ra eto tari pehari embo amina vasiri te daroho mane iresuja.
1JO 3:16 Eto namei osa ari amo eingera: eto Iesu na ungotena avoeto vasiri amita avo toto pehena ainge eto ungotena ue namei kamei avoeto ungotenau vasiri toari haite aisora
1JO 3:17 eto namei donda te amina namei nei donda ambu avo kito jo ae aisuja amina God ta osa ari amita jo ta daingeto irou?
1JO 3:18 Avoeto nau meniundi teho pe na ivivi na ijirou mane osa aisora te ari be avo ururo ke be aisora.
1JO 3:19 Eto ari ainge ue amo ungotenau hotembari jo ta avo pehumba mane aisora te God ta meniundi be hotembasora.
1JO 3:20 Eto ungotenau jo ta hotembari avo pehumba ururo God sovera isapamane te amina ungotenau hotembari tapa avo kito hondate aisuja.
1JO 3:21 Avoeto nau osa ari embomeni ungotenau hotembari jo ta amita pehumba irae kito God ta degi pari ijie amita tombu ta heteto pari ue jopapa mane aisora te ungotena amita uje tapa eto amita ke tapa amo agi ereora avoeto do penunu aisora amo ikau humbasora.
1JO 3:23 Eto ungotena do ara amita ke peni ikehija amo erevira: Ungotena God ta Meni Iesu Keriso hotembihe ke be ijie osa mine ara ue irora ehija
1JO 3:24 eto amuna God ta ke agi eaguja embo amo God ta jo ta mihia eto God amo embo amita jo ta mihia, eto amuna ungotenau jo ta iraguja amita hajire amo amita Ahihi Otohu avo ungotenau jo ta ikaguja.
1JO 4:1 Nau osa ari embomeni ungota degi erena, embo na Ahihi ta sovera na ke asi ijie puvuresora te God ta Ahihi Otohu retemo Ahihi neire avo be eto kogo eto kivujo amo peroveta sokova neite neite enda ta hembuhe mihera
1JO 4:2 avoeto god ta Ahihi Otohu be amita etokiari ikena amo erevira eto Ahihi Otohu be amo Iesu Keriso God ta degi puvuto visi umbuna avo ke be aisuja
1JO 4:3 te Iesu Keriso God ta degi puvurae ke asuja amo Ahihi nei avoeto Keriso ta kitohora eto Ahihi nei puvurari ke ingihava amo mahu enda ta horeto ere ua.
1JO 4:4 Te nau meni undi God ta Ahihi Otohu sovera peni vahai ungota jo ta mihia amina Ahihi sasapura enda ta mihia amo dembarira avoeto enda ta peroveta sokova amite tapa ungona dembarira.
1JO 4:5 Rate enana enda ta toho avoeto enda ta ke avo ijiore enda embomeni na ingiora
1JO 4:6 te ungotena God ta meniundi amina ke ijiore God ta toho na ingiora te God ta toho mane amina mane ingesora avoeto ke erena amo ke be ta Ahihi Otohu davore ke sokova ta Ahihi davore amo etokiari emina eoi kiagora.
1JO 4:7 Ajao nau osa ari embomeni, osa ari God ta degi puvaguja amo osa ari embo amo God ta meni ra eto God kiaguja avoeto ungotena osa mine ara aisora.
1JO 4:8 Eto God amo osa ari ta susu avoeto osa ae embo amina God mane kiaguja.
1JO 4:9 Eto ungotena God ta osa ari be kiagora ari erevi ena: Ungotena vasiri amita degi humbuto daroho irora amita Meni avo vahai ikenu enda ta puvuna.
1JO 4:10 Eto osa ari erena amo ungotena God osa eagora avo mane rate God na ungotena osa eto amita Meni avo vahai amina ungotenau ari sasapura hamo amita ta vihou humbuto pehaja ikenu puvuna.
1JO 4:11 Nau osa ari embomeni, eto God na ungotena osa ue ari aingeko ena avoeto ungotena osa mine ara ahera.
1JO 4:12 Eto embo amuna God tihi na kiaera te osa mine ara ururoro God ungotenau jo ta mihie osa ari amita avo pajito inono aisuja.
1JO 4:13 Eto God na amita Ahihi Otohu ungotenau degi overekena amina God ungotenau jo ta eto ungotena God ta jo ta amo kiagora.
1JO 4:14 Eto God Mamo na Meni enda ta embomeni orekaja ikena amo dago na tihi na kia avoeto ke hande eagora
1JO 4:15 avoeto Iesu amo God ta Meni be ke asuja embo amo God ta jo ta, God amo embo amita jo ta ra
1JO 4:16 avo eto God na ungotena osa eaguja avo ke be ijie be hotembagora. Eto God amo osa ari ta susu ra. Eto embo amuna osa ue iresuja amo God amo amita jo ta eto amo god ta jo ta iresuja.
1JO 4:17 Eto ungotena enda ta mihie God ta hajire vahai avo ue iriroro ungotenau degi ta osa ari avo pajito inono au ke kahari iji puvurou joru mane aisora te tihi ta hetasora.
1JO 4:18 Eto embo na ari sapura ta hajire avo joru aisuja te osa ue iresuja amina au joru avo irae asuja amo osa ari javotoho aita joru irae rate embo joru ue iresuja amo amita osa ari pajito inono mane aisuja.
1JO 4:19 Eto ungotena osa eagora amo God na mahu osa arita eagora
1JO 4:20 te embo na namei ta degi tumo ue God osa ari ke eaguja amo ke sokova ra amita be amo embo amina namei tihi na kiaguja rate osa ae ra te God amo tihi na kiae ra te daingeto osa amo eoi?
1JO 4:21 Avoeto God na ke peni erevi ikena: eto embo na God osa asuja amo namei te tapa osa asuja.
1JO 5:1 Eto embomeni amuna Iesu avo Keriso ungotenau orekari embo be hotembasora amo God ta meniundi be asora, eto Mamo osa asuja amo meniundi te tapa osa asuja.
1JO 5:2 Eto ungotena God ta meniundi osa ere oretemo aere amita etokiari amo erevira: amo embo amuna God osa ue amita ke agi aisuja embo amina meniundi te tapa osa aisuja.
1JO 5:3 Eto God osa ue amita ke agi ahera te ungotena God ta meniundi avoeto sovera umbera amina enda ta ari dembehera avoeto God ta ke agi aisora amo ngahia mane aisuja, eto ungotena God humota eagora amina enda ta ari sovera eto dembagora.
1JO 5:5 Avoeto erena amo enda ta ari sovera eto dembagora embo amo amunure? Amo Iesu avo God ta Meni be ke asuja amina dembasuja.
1JO 5:6 eto Iesu amo God ta Meni be ra amo ari deina harikau kioro? Amo umo na bapataito unu God na Meni nau be ra ainge ijinu ingia eto nei amo teo orosa vena ai ta ere kogora avoeto Iesu God ta Meni be ere kogora amo umo ta eto orosa ta kogora.
1JO 5:7 Eto avo pere mane rate Ahihi Otohu na harikeoi ingiora eto Ahihi Otohu amo ke be perekari eaguja avoeto harikeoi ingiora
1JO 5:8 amo donda tapa heriso nei vahai amo umo te orosa te Ahihi Otohu te amina harikeora.
1JO 5:9 Eto embo na kito harikeore ingiora amo peni mane rate God na kito harikasuja amo pajire be ra eto harikari amita be amo hajire heriso nei vahai ehena aravora
1JO 5:10 eto embo amuna God ta Meni ke be aisuja amo hajire heriso nei vahai erena amina amita jo ta iresuja rate God na amita Meni Iesu ere harikihia avo humota ae ue ke be ae aisuja amo God ta ke sokova ke eria aravora.
1JO 5:11 Eto God na ungotenau degi ta ke hande ena amo erevira amo vasiri te daroho irari embo ta degi hande ikaguja amo Meni ta degi ta eto humbagora
1JO 5:12 avoeto God ta Meni humbasuja amita degi vasiri iresuja rate umbae amo vasiri iraera.
1JO 5:13 eto ke erevi ungota degi ere kajihena amo ungo God ta Meni ke be ereva avoeto vasiri te daroho iresova avoeto be kiagova ere kajihena.
1JO 5:14 Eto ungotena kiarira amo God na do hotembihia avo kogue penunu aisora amo ingito ikau kesora
1JO 5:15 avoeto ungotenau pari God na ere ingihia avo ke be erera avoeto pari ta mine mahu ere ikihia avo ke be aisora.
1JO 5:16 Eto embo na namei amo ari sapura ta pambasuja amo amita Ahihi amo God na tau pehasuja avo kito namei avoembo pari ijirou God na vasiri ikasuja, rate ari sapura nei ururou God na kito embo ta Ahihi tau peheto iresuja avoembo pari avojo,
1JO 5:17 eto ke be amo ari sasapura neite neite tapa amo javotoho mane rate ari sapura nei nei amina embo ta Ahihi tari pehari haite manera.
1JO 5:18 Aravora ungotena ere kogora amo God ta Meni Iesu Keriso amina God ta meni undi oreketo simba ururou Ari sasapura embo Satan na hame ari inono ae ra avoeto God ta meniundi na ari sapura mane mahainge ue iresora te toasora.
1JO 5:19 Eto ke nei ere kogora amo enda eto enda ta ari tapa amo Satan ta sovera na andirari rate ungotena God ta tohora.
1JO 5:20 Eto ke nei ere kogora amo ungotena God be avo kiagora God ta Meni be amina puvuto sovera ari ikena eto ungotena God be eto amita Meni Iesu Keriso ta jo ta mihera, amo God be eto vasiri daroho irari ta susura.
1JO 5:21 Nau meniundi ungo God sokova sakova neite neite avo eto kogoeto kivujo, aravora.
2JO 1:1 Na John ekalesia ta okose nanena umo God na humbari evohu no degi ta ahari erevi ere kajihena amo God ta ke be ari na umo osa ue no meniundi te tapa ere pekihena eto ke be amina ungotenau degi ta oroho eto daroho iresuja avoeto nane vahai ae rate ke be kiari embomeni amite tapa na umo osa ere ora.
2JO 1:3 Eto ungotena osa ari na ke be ari na mihiroro God Mamo ta eto amita meni Iesu Keriso ta hondate ari te jo ari te pekari te na ungotenau degi ta iresuja.
2JO 1:4 Eto no meniundi na God Mamo ta ke peni agi ue ke be ari na mihovoreija avo ingito tunga javotoho be ereona
2JO 1:5 eto nau osa ari evohu ke ere kajihena amo ke eha kajae rate ke mahu ihikari ta ingihava amo osa mine ara ari ta ke avo be simba ava ere kajihena.
2JO 1:6 Eto ihikari ta ingihava amo osa ari na irova ena eto osa ari ta ke susu amo God ta ke agi ava ena vahai aravora.
2JO 1:7 Eto ke sokova hande ari embomeni na enda tapa ta hembuhe Iesu Keriso amo mamo ta degi ta eto puvuto visi umbae ke eagora amo Keriso ta kitoho avoeto ke sokova eagora
2JO 1:8 te ungo pure ngahia eto umbeva avo veto pambuoi ungo hotari mane humbagova na simba evujo.
2JO 1:9 Eto embo Iesu Keriso na ahe poekena avo toto degi nei ta huhevasuja amo amita degi God irae rate Keriso ta ahe poekari ai ta iresuja amo God mamo te God Meni te amita jo ta iresuja.
2JO 1:10 Avoeto embo na puvutuhue ke sokova avo hande ururoro ingito Keriso ta ahepoekari mane kito inena embo avo mane pekihe humbao bande ta horasuja
2JO 1:11 eto pekasoa amo embo amita pure sapura ai ta kaju ere oa aravora.
2JO 1:12 eto na no degi ta ke neite neite ahena te na no degi ta sausau pambasona avoeto ahari eita ke koso mane kajasona te nane pambuto ungote tombu mine kiara ue ke neite neite amo ijie tunga javotoho aisora.
2JO 1:13 Eto no jao ta meniundi God na siriketo humbari amina umo ere pekihera, Orere re.
3JO 1:1 Na John, na ekalesia ta okose nanena nau osa ari embo Gaius no degi ta ahari erevi ere kajihena, eto nau ke be na umo osa ere ona.
3JO 1:2 Eto nau namei no Ahihi javotoho mihei kogona ainge eto no hamo te ari nei nei tapa amite javotoho na ue iroa pari ere ona.
3JO 1:3 Eto umo God ta ke be avo humota ue iragoa avo ungotenau namei kamei nei uhoho na puvuto ehere ingito tunga javotoho be ehena.
3JO 1:4 Eto nau meniundi na ke be ta iragora avoeto duru vahai amina eoi tunga javotoho eagona.
3JO 1:5 Eto nau namei no namei kamei umo hamoari amite umo hamo ae amite tapa humbuto unduagoa
3JO 1:6 amina puvutuhue ekalesia eita mihera amita degi ere ingihe tunga javotoho ereora. Avoeto hondate ari deina ao enana ta pambari amo ejeha au avo ejo God kito osa ai.
3JO 1:7 Amo Keriso ta javota pahue God kiae embomeni ta degi ta hondate ari mane humbagora
3JO 1:8 avoeto ungotena enana ta namei kamei na hondate ikihiroro humbuhuro God ta ke be avo ungotenane hande asora.
3JO 1:9 eto na ahari koso mane tuhaupa ekalesia ta degi ikehena te embo Diotrephes na tihi jigari amina asi uje ue nau ke umbae eaguja
3JO 1:10 avoeto aita pambuto amina ari do eaguja avo harikano ingesora amo amina ke sokova hande uoi dagota javo sapura ere ova eto avo pere mane rate ungotenau namei kamei aita pambagora amina umbae ue namei kamei nei nei na humbasi eagora te amina haeketo ekalesia toto pambara ohimbaguja.
3JO 1:11 Eto nau namei, ahe kihira sapura ainge avo toto ahe kihira javotoho amo davore avo kito ambo ambo ue erevi hotembejo: ari javotoho ari embo amo God ta Meni rate ari sapura eagora embo amo God mane kiagora.
3JO 1:12 Eto ke nei amo embo Demetrius amo embo tapa na avo Demetrius javotoho ke eagora eto God ke be ari Ahihi amite tapa Demetrius javotohora eaguja avoeto dago te tapa Demetrius javotoho ke eagora eto dago ke be eagora amo ungo kiarira.
3JO 1:13 Aravora na ke isapamane ano ingaeheva te ahari eita mane kajasona te
3JO 1:14 na sausau pambuto ungote tombu mine kiara ue ke amo ano ingesova.
3JO 1:15 God ta peka no degi ta iroi. Eto no namei kamei eita mihera amina umo ere pekihera. Eto dagota pekari avo namei kamei umote mihera avo vahai vahai ejo ingore.
JUD 1:1 Na Jude, Iesu Keriso ta pure embo eto James ta namei nanena ungo God na humbuto osa eaguja embomeni Iesu Keriso na simba eaguja avo engekari ta veagova ungota degi ahari erevi ere kajihena
JUD 1:2 eto God ta peka te jo ari te osa ari te ungota degi peni vahai ai.
JUD 1:3 Nau osari namei kamei eto God na ungotena oreketo humbari ta ke kajasi uje eto ihiketo kaehena te ngahia nei puvei avo toto God ta ke ungotena amita embomeni ta degi ikari avo sovera eto jigihe kitoho ta degi isoro ava ere kaehena
JUD 1:4 amita be amo erevira amo embo nei uhoho na ungota jo ta kiae ojikari na horeto hamo ta ujeje sasapura asi uje isapamane uore ari sasapura teto hatihe God na ari sasapura hotembeto toari ta ke avo jigiore eundu uoi ari sasapura eoi ungotenau Bada eto embo okose Iesu Keriso avo ere egikihera, avoeto hajire amo God uje ae ue ere ora kesora amo God ta ke ta mahu kajari mihia ainge dombo avo God na ikau osaga pajire be kesora.
JUD 1:5 Amita ahe kihira avo ingivujo, eto emita ke emo ungo mahu kiari rate hotembari avo humbuto puvurovote avo ere kajihena amo Israel embomeni enda Egypt ta mihio Bada God na oreketo humbunu pahuo embo nei uhoho God egikea avo tenu pepehekea.
JUD 1:6 Eto amita ke nei amo Anera ta degi God na uhu i ta pure pajire be sovera te avo ikena te enana ungo pure avo ujeae eto toto pahuo God na kito humbuto “Chain” na punduto humbuto mume ta ikenu iragora amo iji ke kahari puvurou hajire God na ikau kesora avo simba ereora.
JUD 1:7 Ainge dombo da Sodom te Gomorrah te da nei uhoho amita engihita amita embomeni na tiha paiha ue ari sapura neite neite avo uo God na kito ji na ikenu veto evekena amo embo na ari sasapura ururoro humbuto ji ta gosukau daroho ta evekasora amita ahe kihira avo ena.
JUD 1:8 Eto ainge dombo embo ungote mihera amita tihi amo ari sasapura na tihi vavahikari amina ari sapura uore amina hamo ta tongopa eaguja God ta tihi jigari egikagora eto God ta Anera ototohu amo urumbagora.
JUD 1:9 Eto ke be amo God ta Anera okose javo Michael amina Moses pehena amita hamo amita eto Satan ga boru jumbuna amo Satan hoviro ae rate ke einge ena “Bada na hajire ikau kesoa” ainge ena
JUD 1:10 te embomeni sasapura emina God ta Anera te ke pepeni te tapa avo be hotembae ue hoviro eagora te enana ta hotembari amo o ohu ta hotembari vahai aingeko amina enana ta Ahihi tehere pepehekehera avoeto God na hajire ngahia na ikau kesora.
JUD 1:11 Jove jove, enana embo Cain na ari ena vahai avo ere ora eto enana koro mine humbasi embo Balaam na ari sapura ena vahai avo ere ore eto enana God egikehera amo embo Korah na Moses egiketo hajire kina ainge dombo avo vahai kesora.
JUD 1:12 Eto ungo Keriso ta pondo ta vahaita uove enana na puvuto ungote vahaita eto God hotembae ue enana ta visi unduresi puvagora amo ungota tongopa mihia amo enanara avoeto enana amo johi ainge pisara na humbuto piroun eto pambuhoi ga veae eaguja eto nei amo ji jaise ainge be ari ijira te be mane eaguja avoeto koheketo veto sari eaguja aingera
JUD 1:13 eto nei amo enana ari sapura ue me ambuko eagora amo eva vasiri pajire be eto horo na papajiketo tongopa humbuto vihito hora ta ikaguja aingekora, eto nei amo embomeni amina kuro na sohuketo veto mumeta daroho ue iresora aingekora.
JUD 1:14 Eto enana embo sasapura amina puvuresora amita ke amo Adam ta heka hoka tapa 6 puvuo ambota 7 amo embo Enoch na puvuto ke einge ena, “Kivujo, Bada God na amita embo ototohu tapa ‘Thousand’ doitokore avo humbuto ere puvutuhua amina God uje ae ue ari sasapura neite neite ue God hoviro eagora eto God ta javo urumbagora embopo amita hajire ikaro memenga osaga kiagora ere puvutohora”, ke ainge ijie Enoch na harikena.
JUD 1:16 Eto embo emo ari urumbari embo uje amita ta pahue umo oenga na na ijie na javotoho rate embo nei sapura ra ke ainge ijie donda embo nei ta degi humbasi ue donda mamo ta degi hamo na osa ue humbuto ambota amo ehako sapura eaguja.
JUD 1:17 Avoeto nau namei kamei erevi hotembevujo. Embo ainge puvuresora amo Bada Iesu Keriso ta apostels na ke einge ijie harikeo ingia.
JUD 1:18 “Iji tutumo auvihirou embo puvuresora amina God uje ae ue ungo kege ganini na urumbihe enana ta uje ta huhevasora” ainge ea
JUD 1:19 avoeto puvurora ea embopo amo puvuto enana ta hamo ta uje ta pahue ungo kaheke kaheke eagora amo enana ta degi Ahihi Otohu irae be ra.
JUD 1:20 Rate nau namei kamei ungo God ta ke Otohu avo be kito ambo ambo ue Ahihi Otohu ta sovera na pari evujo
JUD 1:21 eto God ta osa ari ta mihie Bada Iesu Keriso na ungo jo au vasiri daroho ikaja simba evujo.
JUD 1:22 Eto ungo God humota ae embopo avo jo evujo.
JUD 1:23 Eto enana avo ji peri ta evekara gosukihiroro oreto umbuvujo rate ungote tapa na enana ta ari sapura ta veagova na kogue mihie enana jo ururou ari sapura tapa uje ae ue irivujo.
JUD 1:24 Eto ungo ari sapura ta veagova simba ari Embo na ungo oreketo humbuto amita usasa ta ikau heteto ari sapura irae tunga javotoho te iresova.
JUD 1:25 Eto Bada Iesu Keriso ta ari avo embo ungotenau orekari embo God jakeka ijie amita degi usasa te sovera te tihi jigari te sago kiari te tapa oroho eto daroho iresuja, aravora.
REV 1:1 Eto book emita jo ta amo ari ambota do puvuresuja avo God na Iesu Keriso ta degi enu ingito amita pure ari embopo na iji isapa mihiroro do puvuresuja avo be ingora amita Anera ikenu puvuto pure meni John ta degi unu kogue kajena.
REV 1:2 Eto God ta ke Iesu Keriso ta degi ikenu humbuto ehako John ta degi ikenu humbuhe amo ke be perekarira ainge John na ena
REV 1:3 eto ari erei ta kajari amo porere mane sausau puvuresuja avoeto embo amuna ke erevi ehekaro ingito mane toasuja te be hotembihe tunga javotoho ari humbasuja.
REV 1:4 Na John nane ekalesia tapa 7 enda “Asia” jo ta mihera amita degi ke erevi ere kajihena. Eto embo mahu mihahija, eto eha mihia eto ambota iresuja eto amita avo arumba peni ai ta Ahihi tapa 7 areto mihera
REV 1:5 eto Iesu Keriso amo God ta ari kito harikari embo eto vasiri te erari ta kihi humbari embo, eto enda ta kings tapa ta tihi jigari embo, aingeto amita degi ta eto ungota degi hondate ari te pekari te puvuresuja. Eto ungotena osa ari Embo Iesu na amita orosa na ungotena ari sasapura na andirari aravo bujeketo humbunu
REV 1:6 embomeni amita toho eto priests ea avoeto God Mama ta ke agi ue iresora avoeto Iesu Keriso ta degi usasa te sovera te daroho iresuja aravora,
REV 1:7 eto kivujo, amina johi ga puvutuhurou embo tapa na tihi na kogue avo tari embopo amite eto enda embopo tapa amite na osaga kogue sisisasi aisora, avo puvuroi ejo, aravora.
REV 1:8 Eto Bada God na ke einge eria, “Na mahu iragona eto eha mihena eto ambota iresona avoeto iji susu te kombu te donda tapa simba ari Embo Sovera te amo namora”, ainge eria.
REV 1:9 Eto na ungota namei John ungote tapa Iesu Keriso ta toho eto memenga te osaga te kogue sovera ari humbuto iragora embo nanena God ta ke avo ke be ijie Iesu humota eagona avoeto tipura ana ikeo tiuka javo Patmos ai ta pambuto mihene,
REV 1:10 Bada ta jangu indari iji puvei God ta Ahihi Otohu ta sovera na jigei mihene nau kuho ta huin hindu ainge pajire be avo puvutuhoi ke einge ingena.
REV 1:11 “Umo o hamo humbuto tapa do kesoa avo kaeto ekalesia tapa 7 eremita degi ikejo amo da Ephesus te da Smyrna te da Pergamum te da Thyatira, te Sardis te Philadelphia te Laodicea te amita degi ikejo”.
REV 1:12 Ainge ijinu ingito amuna erei avo kesi egerembeto tutuvi gold na ari tapa 7 ainge avo usasa hamo ta tetembehere evekihera avo kehena.
REV 1:13 Eto usasa ta jo ta amo Embo ta Meni avo heteto mihei kiarako ehena amita bo amo koso kaso tunga ta eto veto utu singi ta ari avo asukehija eto pupuri gold na ari avo temaketo heteto mihei kehena.
REV 1:14 Eto amita siro amo parara be johi ainge eto o sheep ta hu ainge eto amita tihi amo ji peri vihiuja ainge kehena.
REV 1:15 Eto amita utu amo auri ji ta ingagore eveketo pangaguja ainge eto amita ke hindu amo umo vuenga na hindu eaguja aingera.
REV 1:16 Eto amita ingeni be ta amo kuro tapa 7 ainge jigito mihia eto asivo amo oiho oiho ti perekari avo amita pe ta eto puvutuhua, eto amita tombu amo iji na heri heri eaguja aingera.
REV 1:17 Eto na avo kito joru ue veto amita utu ta peheto mihene amita ingeni be na nau siro ta tembihie ke einge ijija, “Umo joru mane asoa, na iji kombu ta eto iji susu ta irari embo
REV 1:18 vasiri te daroho iragona. Eto na embo pepehekagora avo simba ue peheto pambuto iragora amita degi javo ‘Hades’ amita bokiri pe ikari jigito iragona.
REV 1:19 Avoeto iji eha amita ari te ambota do puvuresuja amite avo eha ururono kogue kajejo embomeni eheketo kiore.
REV 1:20 Eto kuro 7 ainge nau ingeni be ta mihia eto usasa 7 tutuvi hamo ta tetembehere mihia amita be amo erevira, kuro 7 amo ekalesia tapa 7 amita Anera eto usasa 7 amo ekalesia tapa 7 aingera.”
REV 2:1 Eto da Ephesus ta ekalesia ta ke hande ari Anera ta degi ke einge kajejo: Eto embo vahai amina usasa tapa 7 tutuvi hamo ta tetembari amita ugorota hembuhe kuro tapa 7 ingeni be ta jigito mihia amina einge eria ingivujo,
REV 2:2 ungo na hamo ngahia eto pure ngahia ue ari neite neite avo ere ova eto ungo na ke sokova na ahe poekari embopo uje ae ue God ta apostero ke ijie ungota degi irari embopo ta degi eto kiari iketo enana ke be mane avo hambeva.
REV 2:3 Eto ungona javo nau humota ere ova avoeto embo na eagore memenga osaga kiagova te pegogo eto toae hamo ngahia eto iragova.
REV 2:4 Rate ungota sapura vahai eagove kiagona amo erevira. Amo ungona mahu kihi ta Keriso osa ue osa mine ara uove kiagona avo toto hu be ta heteheve irae ehija
REV 2:5 avoeto jo hapereketo kihi ueva ainge dombo evujo. Eto ungo jo haperekae aisova amo na puvuto ungota usasa tutuvi hamo ta tembari avo umbano irae aisuja.
REV 2:6 Rate ungota ari javotoho vahai amo na Nicolaitanari uje ae eagona ainge nombo ungo uje ae eagova.
REV 2:7 Eto ungota oje irirou kito Ahihi Otohu na ekalesia tapa ta ke do eria avo ingivujo. Eto embo amuna sovera eto dembasuja amo ano God ta ‘Paradise’ ta horeto ji vasiri ta be indesuja.
REV 2:8 Eto Da Smyrna ta ekalesia ta ke hande ari Anera ta degi ke einge kajejo: Eto iji susu ta eto pambuto kombu ta irari embo peheto ehako vasiri te erari amina ungota degi ke einge eria,
REV 2:9 “Ungo memenga osaga kogue donda ambu teho mihovova amo na kogona te ungota ari javotoho amina ungo hajae vajae embopo ere ova. Eto Judea embopo nei uhoho na ungota degi ta pehumba ere ora amo na ere kogona te amo Judea embopo be manera te Satan ta toho uho na ere ora
REV 2:10 eto ungota degi memenga puvuresuja avo joru avojo rate na ungota degi erena amo Satan na ungo nei uhoho avo eto kesi tipura ta ikau mihirovo iji tapa 10 ainge amita jo ta memenga ikaro osaga kesova. Eto enana na ungo taro pehasi ahumpa ue kito na egikae asova amo na ungota siro ta vasiri daroho irari na kogombasona.
REV 2:11 Eto ungota oje irirou kito Ahihi Otohu na ekalesia tapa ta ke do eria avo ingivujo. Eto ke be amo sovera eto iresuja embo amita Ahihi mane pehasuja.
REV 2:12 Eto Da Pergamum ta ekalesia ta ke hande ari Anera ta degi ke einge kajejo: Embo Asivo ti oiho te oiho te jigama ari embo amina ungota degi ke einge eria”,
REV 2:13 eto ungota da vahai embomeni ta ari sasapura isapamane amo Satan na da aita irarako oi kogona rate ungo na na ke be ijie javo nau humota eagova amo na kogona. Eto ungota da ai ta Satan iraguja avoeto ai ta nau ke hande ari embo javotoho javo Antipas avo teo pehena te ungona na egikae humota ue mihovova.
REV 2:14 Rate ungota ari sasapura ere ova amo eingera: Peroveta sapura mahu javo Balaam amina King Balak ahe poekenu Israel embomeni na indari God ingeni na ove ari amita degi pene ikari avo indie tiha paiha ue sesena sasapura te tapa ara ena. Eto ungota embo nei uhoho na ahe poekari ainge amo ere ora.
REV 2:15 Eto ungota embopo nei nei amina Nicolaitans ta ahe poekari sasapura avo jigama ere ora.
REV 2:16 Avoeto enana jo haperekara erena te jo haperekae amo nau pe ta asivo mihia amina humbuto enana ga isoro asona.
REV 2:17 Eto ungota oje irirou kito Ahihi Otohu na ekalesia tapa ta ke do eria avo ingivujo, eto embo amuna sovera eto iresuja amita degi uhu ta indari javo ‘mana’ ojikari avo humbuto ikano indirou koro orina parara be amita hamo ta javo eha kaeto ikano humbuto umo oenga kesuja.
REV 2:18 Eto Da Thyatira ta ekalesia ta ke hande ari Anera ta degi ke einge kajejo: Ke emo God ta Meni tihi ji perimbarako eaguja eto amita utu amo auri gajukeore piriki piriki eaguja aingeko amina eria.
REV 2:19 Na ungota ari jajavotoho te osa ari te humota ari te pure kihi isapa isapa ueva ainge mane pure eha amo pajire be rate pegogo eto toae ereova.
REV 2:20 Rate ungota ari sapura vahai amo erevira. Amo ungota evohu vahai ‘Jezebel’ amo oenga peroveta ke ijie nau pure ari embomeni na tiha ue sesena sapura ue indari god sokova ingeni na ove ari amita degi hande ikari avo indora ahe poekaguja te ungo na haekae eagova
REV 2:21 avoeto na amina jo ahereketo ari sasapura avo toaja iji ikehena te toari uje ae ere ua
REV 2:22 avoeto na evohu avo humbuto gosukano evari besi ta veto mihie osaga memenga kogue mihirou enana amiga tiha eagora embomeni amina jo ahereketo toae asora amo amite tapa ano osaga te memenga te peni vahai be kesora
REV 2:23 amo na evohu amita meniundi te tapa tano pehihiroro ekalesia tapa na na kogue embo ta hotembari te jo te sirikari embo ke asora eto na ungo vahai vahai ta ari tapa siriketo hajire ikasona aingera.
REV 2:24 Eto na ungo nei uhoho Thyatira ta miheva amina evohu amita ahe poekari umbae ue Satan ta ke ojikari ta iraguja avo umbae iragova ungota degi bouka nei do mane ikasona te
REV 2:25 ungota humota ari be avo jigito irirovo puvuresona.
REV 2:26 Eto embo amuna sovera ue uje nau avo ururou iji kombu puvurou nau Mama na enu na heteto iragona ainge dombo ano
REV 2:27 embo amina heteto enda tapa tihi jigihe daho ngahia ikano humbuto jigito mihie enda tapa embomeni taro veasora amo ovu enda na ari teoi karaun eto vearako aisora.
REV 2:28 Eto embo avo ano iji te kuro na kaeto usasa arako aisuja.
REV 2:29 Eto ungota oje irirou kito Ahihi Otohu na ekalesia tapa ta ke do eria avo ingivujo.
REV 3:1 Eto da Sardis ta ke hande ari Anera ta degi ke einge kajejo: ke erevi amo embo God ta Ahihi tapa 7 eto kuro tapa 7 jigito mihia amina eria. Nane ungota ari kogona amo embomeni na ungo vasiri te ke erera te na kogona amo ungo pehari embopora.
REV 3:2 Avoeto ungo erevu! Ungota ari tapa avo God na kogua avo inono ae be ra avoeto ungota sovera isapa do mihia ano veto pambuto irae asi ere pahua
REV 3:3 avoeto ungo nau ke do ingito humbuheva avo ehako hotembeto jo ahereketo agi evujo, rate ungo erae asova amo na iji nei hotembae asova amikote pegene embo na puvurarako aisona.
REV 3:4 Eto ungo da Sardis embo heriso amina ungota bo tongopa na hatikae eagova amo ungota ari jajavotoho inono mihia avoeto nane ano bo parara asuketo namote isa aisova.
REV 3:5 Eto embo amuna enana ainge sovera eto irirou bo parara ikano asukasuja. Eto amita javo amo Book javo vasiri eha aita kajari mihia avo mane hirasona te daroho irirou Mama te Mama ta Anera te amita degi ano ingesora
REV 3:6 eto ungota oje mihirou kito Ahihi Otohu na ekalesia tapa ta degi ke eria avo ingesuja.
REV 3:7 Eto da Philadelphia ta ekalesia ta ke hande ari Anera ta degi ke einge kajejo: ke emo ke be ari embo otohu, David, ta bokiri pe ikari God ta irari da avo hirikasuja avo jigito iraguja amina eria. Eto na da avo embo ta degi hirikasona amo embo na ahurekari inono ae eto na da avo embo ta degi ahurekasona amo embo na hirikari inono ae ra.
REV 3:8 Eto na ungota ari tapa kogona avoeto, kivujo, na ungota tihi ta bokiri iketo pe hirikehene mihia amo embo na ahurekari inono aera eto na kogona amo ungota sovera isapa be rate ungo na javo nau egikae mihie ke nau agi ere ova
REV 3:9 avoeto enana Satan ga kajuari embomeni amina dago Judea ra ijie ke sokova na erera avo ano ungota utu ta veto gombuto God na ungo osa ere ua ke ainge ara aisona.
REV 3:10 Eto ungo na memenga kito toae ke nau agi ue sovera eto iragova avoeto enda embomeni tapa ta degi eto kiari ikasona amo ungo na mane kesova te oreketo umbasona.
REV 3:11 Eto na sausau puvuresona avoeto ungota degi ari javotoho do mihia avo ngahia na jigivujo eto embo nei na ungota siro kope mane egimbeto humbasuja.
REV 3:12 Eto embo amuna sovera eto irirou amo na nau mama ta bande otohu ai ta ano tutuvi vahai eto hetasuja eto amina bande avo mane toto pambasuja te nau God ta javo eto nau God ta da Jerusalem eha uhu i ta eto veasuja amita javo te eto nau javo eha amite tapa amita hamo ta kajasona.
REV 3:13 Avoeto ungota oje irirou kito Ahihi Otohu na ekalesia tapa ta degi ke do eria avo ingivujo.
REV 3:14 Eto da Laodicea ta ekalesia ta ke hande ari Anera ta degi ke einge kajejo: Eto ke erevi amo donda tapa God ta ingeni na ari amita tihi jigari embo amina God ta ke avo tapa inono ta hande eaguja avoeto humota ari haite embo amina einge eria.
REV 3:15 Na ungota ari tapa ere kogona amo jo na ae hamo na ere ova avoeto javotoho manera. Eto ungona ari javotoho aheva amo tunga javotoho ahena te
REV 3:16 amo ari javotoho be mane eto ari sapura be mane avoeto nau pe na ungo isuva ano veto irae aisova.
REV 3:17 Amo ungo na “Na haja vaja embo avoeto inonora” ainge ereva te ke be amo ungo donda ambu, tihi kuru ari hoivo iri bo irae hamo uhu teho miheva amo ungo kiaera
REV 3:18 avoeto ungo ‘gold’ ji vevere ta ikeore eveketo sapura tapa karaun eto veau javotoho pere avo nau degi ta ombuto haja vaja embo be evujo, eto hamo uhu teho avoeto bo parara humbuto asuketo me mane kesova, eto sivo humbuto tihi ta kaimbavo tihi hirikau javotoho kesova.
REV 3:19 Eto na embo osa ue ari javotoho ahe poekagona avo umbara memenga ikagona avoeto ungota jo tapa na jo ahereketo ari sasapura tovujo.
REV 3:20 Eto kivujo, na bande pe ta vahihiri ue mihena avoeto embo amuna ke nau ingito bande pe hirikau horeto amiga arumbeto indesona.
REV 3:21 Eto na sovera ereuahena avoeto puvuto nau Mama ga amita avo arumba ta arumbeto mihena avoeto embo amuna sovera aisuja avo umbano nau avo arumba ta namo ga arumbasuja.
REV 3:22 Eto ungota oje mihirou kito Ahihi Otohu na ekalesia tapa ta degi ke do eria avo ingivujo.
REV 4:1 Eto ke avo nau degi ta ehei irae ehei uhu i ta pe avo nau tihi buju ta hiriketo mihei kogone ke huin ta hindu ainge ingihana amina ehako nau degi ta ke einge ehija “Umo ei huma hetejo, na iji ambota do puvuresuja avo ano kesoa” ke ainge ehei
REV 4:2 Ahihi na na humbuto pambuto ikehei uhu i ta avo arumba peni ai embo arumbeto mihia amita tihi buju ta heteto mihie embo hajire einge kehena.
REV 4:3 Amita bo amo ji kikino be na kembari ainge kiarako ehena eto eriri ove green avo kaseto embo avo jorereto mihei kehena.
REV 4:4 Eto avo arumba peni amita engihita amo avo arumba tapa 24 amina jorerari eto embo okokose tapa 24 amina bo parara asukari eto siro kope gold na ari amo asukari amina areto mihere kehena.
REV 4:5 Eto sariambu sariambu ue (pipiri te tururu te) avo arumba peni ta eto puvutohoi amita tihi buju ta amo usasa tapa 7 ainge eveketo peri peri ore kehena amita be amo God ta Ahihi Otohu vahai amita uhoho tapa 7 ra eto avo arumba peni amita tihi buju ta amo umo ukomo pajire eto visivisi be eto amita kiari javotoho be usasa perekari avo mihia.
REV 4:6 Eto avo arumba peni ai ta amo o tapa 4 vasiri te hajire nei amina joeketo mihera amita ku te joga te tapa amo tihi perekari
REV 4:7 vahai amo o lion aingeko nei amo o cow siaja aingeko nei amita tombu amo embo ta tombu aingeko eto nei amo di huna gati na pambaguja aingekora.
REV 4:8 Eto o vahai vahai amita gati tapa 6 eto hamo uhu tapa amo tihi perekari ra. Eto o tapa 4 amina iji te mume te mahainge ke einge eagora. “Otohu, Otohu, Otohu, Bada God sovera isapamane te amo mahu mihahija eha mihia eto ambota iresuja embo ra.”
REV 4:9 ainge eagora amina daroho irari embo avo arumba peni ta mihia avo Otohu ue jakeka ijie osa uore
REV 4:10 embo pepeni tapa 24 amina veto gombuto mihie daroho irari embo avo jakeka ijie enana ta siro kope houketo avo arumba peni amita engihita tembihie ke einge eagora,
REV 4:11 “Donda tapa amo ingeni no na ove ari iragora avoeto dagota Bada eto dagota God inena sovera ari te usasa te osa ari te avo humbari inono ra.” ke ainge eagora.
REV 5:1 Eto nei kehena amo avo arumba peni ta arumbeto mihia amita ingeni be ta o hamo egovekari ai ta ke kajari amo joga te ku te kajari pere avo jigito mihei kehena eto o hamo amita pe amo pangire tapa 7 amina vavahikari
REV 5:2 eto Anera vahai peni sovera te amina jage eto ke einge ijija, “Embo javotoho vahai damina ke eremita pangire pirouketo hirikari haitere?” ainge ijinu
REV 5:3 uhu ta eto enda ta eto embo peheto pambuto iragora degi ai ta jombure ehera te ke erevi hiriketo jo ta kiari haiteko embo avo hambaera.
REV 5:4 Eto o hamo hiriketo ke jo ta kiari embo aravo hambae avoeto osaga kogue si ijie mihene
REV 5:5 embo okose vahai amina puvuto nau degi ta ke einge ijija, “Umo si toto ke nau inga! Israel javo tapa 12 rate vahai Judah ta embo sovera te vahai javo ‘Lion’ ke eagora amo King David ta susu be amina tapa dembeto heteto tihi jigihe mihia avoeto pangire 7 amo pirouketo hiriketo ke jo ta amo kiari haitera” ke ainge ijinu
REV 5:6 avo arumba peni amita engihita o vasiri te tapa 4 eto embo okokose te tapa joeketo mihera avo arumba peni amita ugorota amo O Sheep Meni tari pehari avo heteto mihei kehena eto amita perema tapa 7 eto tihi tapa 7 kehena amita be amo God ta Ahihi tapa 7 enda tapa ta ikeoi pambagora avo kehena.
REV 5:7 Eto O Sheep Meni amina imihe embo avo arumba peni ta arumbeto mihina amita ingeni be ta o hamo ta ke kajari avo humbuhunu
REV 5:8 o vasiri te tapa 4 eto embo okokose 24 enana vahai vahai ainge ‘guitar’ jigito aguhu gold na ari amita jo ta ‘incense’ ikeo evekihina amo embo ototohu ta pari avoeto jigito O Sheep Meni ta utu ta veto gombuto
REV 5:9 haveni eha ganihe einge ea, “Umo embo na teo peheto orosa no na God ta toho ara enda embo tapa eto ke hajire nei te nei te tapa avo ombuto umba avoeto inena vahai pangire na o hamo vahaikari avo pirouketo hiriketo kesoa inonora.
REV 5:10 Eto God na embomeni amita toho avo simba ururou amita ke agi ue enda tapa tihi jigesora” haveni na ainge ea.
REV 5:11 Eto na arerembeto kehena amo Anera isapamane be ehekari haiteko mane amina haveni ijie puvuto avo arumba peni amite o vasiri te eto embo okokose amite tapa joeketo haveni ea
REV 5:12 amo hindu pajire be ijie einge ea “O Sheep Meni tari amita degi sovera te haja vaja te ari te kiari te otohu ari te usasa te embo jakeka ari amite tapa amita degi puvuroi”, haveni ainge ijio
REV 5:13 o te embo te tapa uhu i ta eto enda ta eto eva jo ta eto embo pepehekari amite tapa na haveni einge ijiera, “Avo arumba peni ta mihia amite eto o sheep meni amita degi jakeka ari te otohu ari te usasa te sovera te daroho mahainge irore”, ainge eo
REV 5:14 o vasiri te 4 amina aravora ainge ijio embo okokose amina veto gombuto jakeka ea.
REV 6:1 Eto na kogue mihene O Sheep Meni na ihiketo pangire vahai heukehei o vasiri te 4 rate vahai amina ke ‘Hae’ ainge amo tururu na keko ehei ingihene
REV 6:2 o horse hamo parara amina sariketo embo hamo ta arumbari eto ki te peva te jigari puvei enana na amita degi siro kope ikehere asuketo amita kitoho ga isoro eto dembasi pambija.
REV 6:3 Eto O Sheep Meni na pangire nei heukehei O Vasirite nei amina ‘Hae’ ainge ijinu
REV 6:4 o horse nei hamo ji peri ainge hamo pangari amina embo hamota arumbari sariketo puvera amita degi peka haeketo isoro asora sovera ari amite eto isoro asivo peni te avo ikehere humbuto pambuhija.
REV 6:5 Eto O Sheep Meni na pangire heriso heukehei irae ehei nei avo heukihinu O Vasirite nei amina ‘Hae’ ainge ijinu o horse hamo mume amina nau tihita sariketo puvei kehena. Eto o amita hamota embo arumbeto puvija amo donda tembeto bouka heka humbari avo ingeni na jigito puvija.
REV 6:6 Eto O Vasirite tapa 4 amita jo ta ke einge puvei ingena “Eto ejo embomeni na koro pajire be na indari isapa be umbare amo embo na pure iji vahai asuja amo wheatavo litre vahai umbautemo barley3 litre humbuhe koro ikau irae aisuja ainge ejo are, Rate esi grapei olivepure avo ao mane sapura aisuja! ainge ena.”
REV 6:7 Eto O Sheep Meni na pangire heriso nei vahai heukehei irae ehei nei heukihinu O Vasiri te tutumota vahai amina ‘Hae’ ainge ijinu
REV 6:8 o horse nei hamo karere ari amo embo javo Tari Pehari avo hamo ta arumbari puvutuhunu amita ambota amo embo peheto pambuto iragora da javo Hades amite tapa embo na puvurarako ehei kehena. Eto embo javo Tari Pehari amite eto embo javo Hades amina enda embomeni tapa avo humbuto kaheke kaheke eto tapa 4 ainge iketo heriso nei vahai avo toto vahai avo asivo na tasora, indari pure sosou aro beuje na pehasora eto isoro o na kambaro pehasora eto ari tapa erevi ara sovera ari amo embo javo tari pehari amite eto embo javo Hades amita degi ikehere umbera.
REV 6:9 Eto pangire heriso nei heriso pirouketo nei heukihinu God ke be ari embopo amo God egikae ue iragora avo kitoho embo na teo pepehekea amita Ahihi amo pene ikari gaga suvu ai kogone
REV 6:10 enana amina ke peni vahai be eto einge ehera, “Bada God donda tapa simba ari embo umo ke be eto Embo Otohu avoeto iji doinge simba eto enda embo ta ari sasapura sirikihe dago kitoho na teo pepehekea amita orosa veari amita mine humbuhe hajire ikao kiaeherete avo simba mihovora,”
REV 6:11 ke ainge ijio enana ta degi bo parara kokoso avo ikerekenu aseo, “Iji isapa simba ururovo ungota namei kamei God ta ke agi ari embopo nei uhoho avo kitoho na taro peharo heka inono ai avo simba evujo”, ainge ena.
REV 6:12 Eto na kogue mihene o hamo ta ke kajari amita pangire 5 heukehei irae ehei God ta o Meni na 6 heukihei enda ta titira pajire puvutuhoi embo pehari ta sinena ue pusu kuhagora hajire avo iji na mume ehei hariga na orosa ta hajire arako ehei
REV 6:13 kuro tapa enda ta vehera amo ji junga be sari pisara na jaheveoi veaguja aingeko vehera.
REV 6:14 Eto uhu amo ohi na egoveketo pambaguja aingeko oi tiri te tiuka te na toto degi nei ta pambera.
REV 6:15 Eto enda ta kings te embo pepenite isoro kihi humbari embopo te haja vaja embopote, sovera embopote embo nei ta ke agi ue pure ari embomeni te eto embo teho te tapa na pambuto panga ho ta eto tiri hemba ta karu ho ta ojijiketo mihie
REV 6:16 tirite korote ta degi ke einge ehera, “O Sheep Meni na tumo ere ua avoeto embo avoarumba peni ta arumbeto mihia amita tombu titiha eto dagota hamota veto ahureke ojiketo irore.
REV 6:17 Amo embo siriketo hajire ikari iji peni puvija amo enda embo amuna hetari haitere?” ke ainge ehera.
REV 7:1 Eto amita ambota ari einge puvei kehena. Amo Anera tapa 4 amina kaina ta pahina ta ihane ta eto sohe ta pambuto heheteto pisara enda ta pambaguja haekehere eva ta enda ta eto isibasi ta pambae toruhoi
REV 7:2 Anera nei vahai amina God ta hajire avo ikehei amita ingeni na jigito ihane ta eto puvuto Anera tapa 4 amita degi ta ke peni vahai eto einge ijija “Ungota sovera na enda te eva te isibasi te sosou asi miheva te isapa simba ururovo ungote ungotenau God ta hajire erevi amita pure ari embomeni ta beo ta vahaikaro kakamba ai”. Ke ainge ei Israel ta ohihi javo tapa 12 amita embomeni tapa 144,000 ainge avo God ta hajire ikerekehera
REV 7:5 Amo Judah ta embomeni tapa 12,000 eto nei Reuben ta embomeni tapa 12,000 eto nei Gad ta embomeni tapa 12,000
REV 7:6 Eto nei Asher ta embomeni tapa 12,000 eto nei Naphtali ta embomeni tapa 12,000 eto nei Manasseh ta embomeni tapa 12,000
REV 7:7 Eto nei Simeon ta embomeni tapa 12,000 eto nei Levi ta embomeni tapa 12,000 eto nei Issachar ta embomeni tapa 12,000
REV 7:8 Eto nei Zebulon ta embomeni tapa 12,000 eto nei Joseph ta embomeni tapa 12,000 eto nei Benjamin ta embomeni tapa 12,000 aingeto God ta hajire beo ta ikehere umbera.
REV 7:9 Eto amina ambota kehena amo embomeni isapamane be ehekari haiteko mane avo horuketo mihere kehena amo enda neite neite amita embomeni tapa ke neite neite tapa eto ohihi javo neite neite tapa amina puvuto avo arumba peni amita eto O Sheep Meni amita tihi buju ta horukehera amo bo parara kokoso aseto koropa iki jigiriketo mihie
REV 7:10 ke peni vahai be eto einge ijiera “Embo oreketo humbari amo ungotenau God avo arumba peni ta arumbeto mihia amita degi mihia eto O Sheep Meni amita degi ta mihia”, ainge ijiera.
REV 7:11 Eto Anera tapa na avo arumba peni te embo okokose te o vasiri te 4 amite avo jorereto veto gombuto God jakeka ijie
REV 7:12 ke einge ijiera. “Aravora, jakeka ari te usasa te kiari te osa ari te Otohu ari te tihi jigari te sovera ari te avo ungotenau God ta degi daroho iroi, aravora” ainge ijio
REV 7:13 embo okose vahai amina nau degi ta ahereketo ke einge eto ingija “Embomeni bo parara kokoso asari emo davo embore eto dainge eto puvere?” ainge ehei
REV 7:14 “Mama, embomeni emo umo kiarira” ainge ehene ke mine jandireketo einge ehija. “Embomeni emina enda ta osaga memenga kesora iji puvuresuja ai ta eto puvuto enana ta bo avo O Sheep Meni ta orosa ta egehere parara ehija avoeto enana God ta degi otohu ai horeto iji mahainge avo arumba ta tihi buju ta God ta ke agi ue mihera
REV 7:16 avoeto enana God na uhumo au umo beuje indari beuje mane kesora eto iji na mane evekau vevere kesora
REV 7:17 te O Sheep Meni avo arumba peni ugorota mihia amina enana avo o simba arako ue enana urumbeto humbuto pambuto umo vasiri te kuru vihiuja ai ta au indiroro God na enana ta tihi sisivu tuhasuja”. Ainge ijija.
REV 8:1 Eto o hamo pangire tutumota heukihei uhu i ta asavi ae iji ‘1/2 hour’ ainge jamo uija.
REV 8:2 Eto na kogone Anera tapa 7 God ta tihi buju ta hetehere huin tapa 7 ainge ikehei umbera.
REV 8:3 Eto Anera nei vahai amina iposi mune te vihiuja amita aguhu gold na ari avo ingeni na jigito pene gaga ta pambuto hetehei donda evikihie mune asuja avo isapamane ikehei humbuto embo ototohu ta pari amiga humbuto avo arumba engihita pene gaga gold na ari ai ta tembehei eveketo
REV 8:4 iposi mune te amina embo ototohu ta pari ga Anera ta ingeni ta eto God ta degi vihija.
REV 8:5 Eto Anera na pene gaga ai ta ji buju humbuto aguhu gold na ari ai ta jojehei pe vihei humbuto enda ta gosukehei vehei sariage oi pipiri tururu pajire be ei enda titira uija.
REV 8:6 Eto Anera tapa 7 amita degi huin 7 ainge ikari avo huasi nununga eto mihere
REV 8:7 Anera vahai na kihi husihei ‘ice’ te ji peri te orosa te omba omba ari avo enda ta jojekehei vovoi enda te ji te huna, 1/3 ainge amina evekihei sasaha avo irae evekihaja.
REV 8:8 Eto Anera nei amina huin husihei tiri pajire be amina peri peri evikihoi humbuto eva ta gosukehere vovoi eva huna 1/3 ainge amina orosa sarikehei
REV 8:9 eva o huna, 1/3 ainge, amina pepehekihere e nga huna, 1/3 ainge, avo hururumbeto eva jo ta vovuera.
REV 8:10 Eto Anera heriso amo huin husehere irae ehei nei vahai amina husihoi kuro pajire be amina kerivo na ijimbarako eto uhu ta eto veto umo eto umo be huna 1/3 ainge aita vena.
REV 8:11 Eto kuro amo sogaga te amina veto umo ta sigeto umo sogaga oi embomeni indito pepehekihera.
REV 8:12 Eto Anera heriso nei vahai amo huin husehere irae ehei Anera nei amina husihoi iji huna eto hariga huna eto kuro huna tapa 1/3 ainge amina mume ore iji te hariga te amita usasa huna avo irae uija.
REV 8:13 Eto na kogue mihene di huna na gati na enda ta puvutuhue ke einge isara na ijija, “Jove jove jove enda embomeni tapa ta degi erena Anera 3 amina huin husae mihera avoeto erena.”
REV 9:1 Eto Anera tapa 4 amina huin husehere irae ehei nei vahai amina husihoi kuro vahai uhu i ta eto veto enda ta iraguja amita Anera ta degi bokiri pe ikari God na ikehija amo ahihi sasapura enda hu ta iragora amita degi ta hoto koveto veto peun ari amita bokiri pe ikari avo God na ikehei
REV 9:2 humbuto enda ho ta bokiri hirikehei iposi kumbo kumbo enda ho ta eto vihina amo embo na ehe undukeore eveketo vihiuja aingeko vihito iji te uhu te peikehei mume ehei
REV 9:3 o boruga avo ikehei iposi jo ta eto enda ta vehei God na o saiho ta sovera avo boruga ta degi iketo
REV 9:4 mane embo ta indari pure te isibasi te avo hatikasora te embo God ta hajire beo ta umbae amita degi isoro ara ehija
REV 9:5 rate mane taro pehara ehija te teho kambaro o saiho na kambuoi memenga kiagora aingeko avo hariga 5 amita jo ta kogue
REV 9:6 embomeni na pehasi uje eto pehari jombure aisora te pehari na enana tiumbeto pambasuja.
REV 9:7 Eto o boruga ta kiari amo o horse isoro o ainge ki emi hamo ta nununga arira eto enana ta siro ta amo king ta kope gold na ari aingeko kehena eto enana ta tombu amo embo ta tombu hajire ainge kehena.
REV 9:8 Eto enana ta siro hu amo evohu ta ainge eto ti amo o ‘lion’ ta ti ainge ra.
REV 9:9 Eto enana ta jenge ta beha ari asukehera amo ‘iron’ na ari avo asuketo gahi na pambuhore pupu ingena amo horse isapamane be na isoro gaga handuketo humbuto isoro ta pambagora aingeko avo ingena.
REV 9:10 Eto o boruga ta ehu ta amo o saiho na kambuoi memenga hariga tapa 5 amita jo ta kiagora aingeko avo mihia.
REV 9:11 Eto enana ta embo okose amo Anera sasapura enda hu ta iragora amita tihi jigari Anera amita javo amo hebrew ta ke na “Abaddon” ke eagora eto Greek ta ke na eagora amo “Apollyon” ke eagora.
REV 9:12 Eto osaga vahai amo irae ehija te osaga nei heriso amo puvurae mihera puvuresora.
REV 9:13 Eto Anera tapa 5 amo huin husehere irae ehei Anera nei vahai amina husihoi God ta tihi buju ta pene gaga gold na ari ai ta o ta perema tapa 4 ainge mihera amina Anera huin husehija amita degi ta
REV 9:14 ke einge eria, “Anera 4 ainge umo pajire javo ‘Euphrates’ aita pundurari mihera avo vujekejo pambare”, ke ainge ehere
REV 9:15 Anera 4 avo iji amikote arahata pambara pupundukeo iji aravo simba ue iragora avo Anera na vujekehere embomeni tapa amo kaheke kaheke eto di 3 ainge iketo di vahai avo tehere pepehekehera.
REV 9:16 Eto enana ta isoro embopo horse hamo ta areto pambera amo embo tapa ‘200 million’ ainge pambereija.
REV 9:17 Eto horse te embo te pambera amita kiari one amo ehure ta einge kehena. Eto jenge ta beha ikehera amo ji peri ainge pangari te mume te ovevari te na kaneke kaneke arira. Eto o horse ta siro amo o lion ta siro ainge eto o amita pe ho ta amo ji peri te johi te enda pusu masa te tapa puvija.
REV 9:18 Eto embomeni di 3 rate ji peri te johi te pusu masa te avo munehembeto di vahai amo pehehera.
REV 9:19 Eto o horse ta sovera amo pe ta eto amita ehu ta ra. Eto amita ehu amo o koso o ta ehu aingera eto siro na memenga ikaguja.
REV 9:20 Eto osaga puvija amina embomeni nei uhoho pehae mihera enana amina ari sasapura ingeni na ari avo joru ue tunga ahereketo toae amo ahihi sasapura na jakeka ari amo toae eto enana ta ‘god’ ‘gold’ na ari, ‘silver’ na ari, ‘bronze’ na ari koro na ari eto ji na ari amo tihi irae amo oje irae eto amo hae ambu rate toae jigama ere ora
REV 9:21 eto nei embo tari pehari te saruka ari te tiha paiha ari te pegene ari te amo toae jigama ue mihera.
REV 10:1 Eto Anera nei sovera isapamane te amo utu ta eto veto mihei kehena amo johi na togari eto amita siro kombu ta amo eriri kaeto mihei kehena eto amita tombu amo iji ta tihi ainge eto amita utu amo ji peri koso vahai vihiuja aingekora.
REV 10:2 Eto o hamo isapa ai ta ke kajari avo ingeni joga ta tembeto mihei kehena. Eto Anera amina utu be na eva ta haito anga na ombo ta haito mihie
REV 10:3 o ‘lion’ na hori gagaha eaguja ainge ei pipiri tapa 7 amina ke ehera.
REV 10:4 Eto ke ehera avo ihiketo kajihone ke nei uhu i ta eto puvuto ke einge ijie haekehija “Eto pipiri tapa 7 ainge amina ke ehera amo mane kajasoa te no jo ta tojo iroi” ke ainge ehei
REV 10:5 Anera eva ta haito ombo ta haito amita ingeni be avo uhu i ta jigei vivihei uhu te
REV 10:6 enda te eva te amita jo ta donda tapa mihera amita ari embo amo daroho iraguja amita tombuta ke einge ehija, “Eto Anera tapa 6 amo mahu husehere irae ehija te iji porere mane aisora
REV 10:7 te Anera nei vahai amita huin huasi simba ururou God na ari mahu ojikari iraguja avo au kesora amita ke amo God ta ke agi ari peroveta ta degi ikena”.
REV 10:8 Ke ainge ehei ke nei uhu i ta puvei ingena amo nau degi ta ke einge ehija, “Pambuto Anera utu eva ta haito ombo ta haito mihia amita ingeni ta o hamo hirikari tembeto mihia avo pambuto umbujo”, ainge ehei
REV 10:9 ingito pambuto Anera ta degi o hamo ke kajari isapa avo penunu ehene ikihe ke einge ehija, “Humbuto inda! Pe ta amo iruha muko gamo te ra te hini ta amo sogaga te ra” ke ainge ehei
REV 10:10 Anera ta ingeni ta humbuto indena amo pe ta amo iruha ta gamoko kehena te hini ta vehija amo sogaga ehija.
REV 10:11 Eto ke nei einge puvei ingena “Umo embomeni te enda te eto embomeni ta ke te kings te ta degi do puvuresuja amita ke avo kajejo” ainge ehija.
REV 11:1 Eto Anera vahai na God ta Bande Otohu ta heka humbana ituha ikihe ke einge ehija, “Umo pambuto God ta temple te God ta pene gaga te amita heka mo doitokore avo humbuhe embomeni ai ta God jakeka ue mihera amite tapa ehekejo.
REV 11:2 Rate temple apupu ta enda amo Judea ta mane rate enda nei embomeni ta degi ikarira avoeto heka amiga mane humbasoa te tojo amo enda nei embomeni amina hariga tapa 42 amita jo ta God ta da Otohu haito hatikasora.
REV 11:3 Eto na kito nau ke hande ari embo heriso ta degi sovera ari ikano bo baiki asuketo iji tapa 1,260 amita jo ta amo ari do puvuresuja amita ke avo embomeni ta degi hande aisora.”
REV 11:4 Eto nau ke hande ari ji amo ji ‘olive’ herisora amina kerivo ijimbari heriso avo tembeto enda ta bada ta tombu ta heteto mihera.
REV 11:5 Eto embo amuna avo tasi aisora amo ji peri na enana ta pe ho ta eto puvuto kitoho amo tau pepehekasora.
REV 11:6 Eto embo heriso amina enda ta ari do puvuresuja amita ke avo hande ururoro enana ta sovera na uhu i peikau ga mane veasuja. Eto embo heriso amita sovera na enana ta uje na aro umo orosa pere aehija enda taro osaga memenga puvuraehija amo enana ta degi inonora.
REV 11:7 Eto enana ta ke hande aro irae au o sapura be sovera te amina enda ho ta eto vihito embo heriso amo kambau peharo
REV 11:8 enda timu hatirari ke na Sodom te Egypt te ai enana ta Bada Iesu teo pehena da ai ta sari ururoro
REV 11:9 enda neite neite embomeni eto ke neite neite ari embomeni amina puvutuhue kesora rate embo heriso amita hamo mane kovasora
REV 11:10 amo peroveta heriso amina enda embomeni sasapura ta degi osaga ere ikihahera avoeto puvuto kogue tunga javotoho ue pondo kando ue hande puanda mine ara aisora.
REV 11:11 Eto iji 3 eto huna irae ehei God ta hoenge na jo ta horehei embo heriso amo ereto uhu ta hetehere embomeni na kito tututu ue joru pajire be ore.
REV 11:12 Uhu i ta eto ke einge ingena “Ungo einge have” ainge ehei johi jo ta horeto uhu i ta pambuhore kitoho embomeni na arerembeto kehera.
REV 11:13 Eto iji amikote titira pajire be ehei da ta bande huna, 1/10 ainge amina karauneto vehei embomeni tapa 7,000 ainge pepehekehere embo nei huna amina joru peni vahai ue ihiketo uhu ta God avo jakeka ea.
REV 11:14 Aravora osaga heriso irae ehera te nei vahai puvuto ere hua.
REV 11:15 Eto Anera tapa 6 na huin husehere irae ehei Anera nei na husihei uhu i ta ke isara na einge puvija, “Enda ta king irae ehija eto ungotenau Bada Keriso amina God ta king eto hetehija amina tihi jigihe daroho iresuja”, ke ainge.
REV 11:16 Embo okokose tapa 24 amo God ta tombu ta arumbeto mihera amina tombu na veto gombuto God jakeka
REV 11:17 einge ehera, “Bada God sovera isapamane te daroho iragoa inena sovera no humbuto ihiketo tihi jigihea avoeto no degi ta osa be ere ora,
REV 11:18 eto enda embomeni tapa na no degi ta isoro ere ovora avoeto inena enana ta degi tumo ehea. Embo pepehekari ta ari sirikari iji puvija erevira avoeto no pure ari embomeni te peroveta te embo jajavotoho isapa te peni te tapa amuna no javo Otohu eagora amita degi hotari ikao humbasora eto enda sosou ari embopo avo tao irae aisora” ainge ehere irae ehei
REV 11:19 God ta Temple uhu i ta avo pe hirikehei God ta ke pepeni amita donda ototohu ta irari ‘box’ ai ta mihei kogue mihene pipiri sariambu oi tururu pajire be ei titira oi ga ‘ice’ te tapa vehija.
REV 12:1 Eto uhu i ta hajire pajire be irerembehei kehena amo evohu iji ta usasa na togari hariga amita utu joga ta eto amita siro kope amo kuro tapa 12 ainge amina kogombari
REV 12:2 amina meni ingasi ue memenga oi si ei kogue mihene
REV 12:3 hajire nei uhu i ta irerembena amo o koso o pajire be javo ‘dragon’ hamo pangari amita siro tapa 7 ai ta perema tapa 10 eto kope tapa 7 ainge avo mihei kehena,
REV 12:4 eto o amita ehu na jiheto kuro tapa kaheke kaheke eto di 3 ikari avo di vahai avo tehei enda ta karaun eto vehija. Eto koso o ‘dragon’ na evohu ta tihi ta heteto meni ingihirou humbuto indesi simba oi
REV 12:5 meni singa amo enda tapa embomeni daho ngahia avo jigito tihi jigesuja meni avo ingihoi God na egimbeto humbuto amita avo arumba peni ai ta simba ue mihei
REV 12:6 evohu amo joru huheveto pambuto degi ojaga tambu God na nununga ena ai ta iji tapa 1,260 ainge mihei God na simba ehija.
REV 12:7 Eto utu ji ta amo Anera okose javo Michael te amita Anera te na o koso o ‘dragon’ ga isoro ehere
REV 12:8 ‘dragon’ te amita Anera te avo ivo ambu eto dembari inono ae ehere, Michael na koso o ‘dragon’ te amita Anera te tapa avo humbuto gosukehei enda ta vigo vigo vehera. Eto o koso o amita javo Satan na amita ke gamo na enda embo tapa avo kihi humbuto ari sapura ta pambagora.
REV 12:10 Eto ke uhu i ta eto puvei ingena amo einge ehija, “Embo iji te mume te God ta tihi ta heteto ungotenau namei kamei pehumba eaguja avo humbuto gosukehere vehija avoeto God ta sovera na embo orekihie tihi jigihirou ungotenau hondate ari embo Keriso na heteto king asuja.
REV 12:11 Eto God ta ke be ari embopo amina God ta o ‘Lamb’ ta orosa te God ta ke hande ari te amina Satan dembehera. Eto enanana amita vasiri peni avo osa ae avoeto embo na tari pehari avo joru ae ra. Avoeto ungo uhu ta irari embomeni tapa tunga javotoho ue osa evujo, rate jove jove enda ta eva ta degi erena, Satan na ungota degi pambija avoeto. Eto amita iji koso mane irae ere ua avoeto amita tumo sisire hini kambari amina jo enetarira,” ke ainge ehei ingena.
REV 12:13 Eto koso o ‘dragon’ amo enda ta gosukehere vehija avo kito evohu meni singa humbija avo ehehasona ainge hotembihei
REV 12:14 God na kito evohu amita degi di huna ta gahi heriso avo ikehei asuketo degi ojagatambu God na amita irari degi sija ehija ai pambei God na simba oi jua tapa nei heriso nei vahai eto nei huna ai ta mihei o koso o na avo hame ari inono ae ehija.
REV 12:15 Eto o koso o aramina evohu avo umo na umbaja ehei amita pe ho ta umo pajire be veto pambuhoi
REV 12:16 enda na evohu avo hondate eto oenga haunketo pambuhoi umo amo ai ta veto pambei
REV 12:17 koso o ‘dragon’ amo evohu amita degi tumo pajire eto evohu amita meniundi ta degi isoro asi pambija. Eto evohu ta meniundi amo Iesu ta ke avo ke be ijie God ta ke agi eagora embomeni ra.
REV 13:1 Eto o ‘dragon’ amo pambuto eva hora ta heteto mihei, o nei isoro o eva jo ta eto vihei kehena amita siro tapa 7 ai ta perema tapa 10 eto kope tapa 10 perema vahai vahai amita tumo ta asukari eto amita beo vahai vahai ta God ta javo avo urumbihe ke kakajekari ainge avo mihei kehena.
REV 13:2 Eto o amita kiari amo o javo ‘leopard’ amita kiari aingeko rate amita utu amo o ‘bear’ ta utu ainge eto pe amo o ‘lion’ ta aingera. Eto o ‘dragon’ na o sapura amita degi sovera pajire ke iketo avo arumba ikehei arumbeto tihi jigiha.
REV 13:3 Eto o amita siro vahai ai ta amo pupuho pajire be kehena amo pehari haite rate kojihaja. Eto enda embo tapa na o avo kito vani vini ue aha puha ijie ihiketo o avo ambo ambo ue.
REV 13:4 O ‘dragon’ amina o sapura amita degi sovera ikehija avoeto o ‘dragon’ amite eto o sapura amite tapa jakeka ijie ke mine ara eto einge erera, “O erevi nei eingeko iraera eto embo amuna amita degi isoro ari haitere?”
REV 13:5 eto o ‘dragon’ na o sapura ta degi ke aisuja amita pe ikehei humbuto amina na javotoho ra ijie God ta javo urumbehei hariga tapa 42 amita jo ta sovera amita jigama
REV 13:6 ue pe haunketo God ta javo te eto God ta irari degi te eto God ta toho uhu i ta iragora avo hoviro ue urumbehei sapura be ehija.
REV 13:7 Eto o ‘dragon’ na sovera nei ikehei o sapura amina humbuto God ta embopo ototohu ta degi isoro eto dembeto ke neite neite eagora embomeni tapa enda tapa ta mihera amita sovera na tihi jigiha.
REV 13:8 Eto enda embopo tapa na o sapura avo jakeka ijie humote pain asora rate book javo vasiri amita jo ta javo kakajekari amo o Lamb uhu te enda te ae pekota embo avoembo ikari pehari amita toho embomeni amina mane humote pain aisora
REV 13:9 te ungo embo amuta oje irirou kito ke erena erevi ingivujo.
REV 13:10 Eto embo na kitoho ta ingeni ta pambaja aisuja amo pambasuja eto asivo na jau pehaja aisuja amo jau pehasuja avoeto erena amo ungo God ta embo ototohu ungo God humota ue sovera eto irivujo.
REV 13:11 Eto na o nei enda jo ta eto puvutohoi kehena amita siro ta amo o ‘sheep’ meni ta perema ainge heriso avo mihera te amita ke hajire amo o koso javo ‘dragon’ ta ke hajire vahaira.
REV 13:12 Eto o pupuho te eva jo ta eto vihina amina o nei eha puvija amita degi sovera ikehei humbuto jigama ue enda embo tapa na o mahu eva ta eto vihina amita degi humotepain ara ke
REV 13:13 ijie amita hajire kiagora ehei ji peri na uhu i ta eto evikihie vovuoi embo tapa kogore hajire pepeni nei te neite ehija
REV 13:14 eto ari sovera ainge oi embo tapa na amita ke sokova avo ke be ijie ambo ambo ehera ore eto asivo na jari pupuho te o avo kogue ingeni na ove eto humotepain ara ehei ore
REV 13:15 sovera nei humbuto o ove ehera amita degi hoenge ikehei ihiketo ke eria avo humotepain ae ehere tehere pehehera
REV 13:16 eto ari nei ehija amo embo pepeni te isapa te eto embo koro te koro ambupu te eto pure mamo te pure embo te tapa amina beo ta rete mo ingeni be ta retemo hajire umbara ehija,
REV 13:17 eto ‘number’ umbera amo o sapura ta ‘number’ eto amita javo ta hajire ra. Eto embo amuna ‘number’ aravo hamo amita ta umbae aisuja embo amina donda nei do mane ombuto humbasuja.
REV 13:18 Avoeto umo kiari embo kito o ta ‘number’ avo eto kito eheketo hambujo amo embo na donda ehekagora amita ‘number’ avoeto 666 ra.
REV 14:1 Eto na arerembeto kogue mihene nau tihi ta amo tiri javo Zion amita hamo ta amo O ‘Lamb’ heteto mihia eto amiga mihera amo embo tapa 144,000 ainge amita beo ta O ‘Lamb’ ta javo te amita Mamo ta javo te avo kakajekari avo mihere kehena.
REV 14:2 Eto uhu i ta hindu ingena amo umo vuenga ta hindu ainge eto tururu pajire be amita hindu aingeko rate gita javo ‘harp’ embo isapamane na teagora amita hindu aingeko avo ingena
REV 14:3 eto God ta avo arumba peni amite eto o vasiri te tapa 4 amite eto embo okokose tapa amita tombu ta embomeni tapa 144,000 amina haveni eha ganeto haveni erera amo embo eha God na enda ta ombuto humbari amina pere haveni amo humbari haitera.
REV 14:4 Eto embomeni aramina evohu ga tiha paiha ae ari jajavotoho pere ere uahera amina iji mahainge O ‘Lamb’ ambo ambo ue pambagora amo ji eha uragora ereto be jajavotoho pepeni ekaguja aingeko amina embo aravo embo tapa ta degi ombuto humbuto O ‘Lamb’ ta degi eto God ta degi hande ikari ra.
REV 14:5 Eto enana ta pe ta ke sokova irae eto ke sasapura irae avoeto enana amo pehumba ari haite manera.
REV 14:6 Eto Anera vahai i ta kin eto pambuhoi kehena amina God ta duru javotoho daroho iraguja avo ke neite neite ari embomeni enda tapa ta iragora amita degi ke hande ue
REV 14:7 ke isara na einge ehija. “Embo ta ari siriketo hajire ikari iji puvija avoeto uhu te enda te eva te umo kuru vihiuja amite tapa ari embo God avo joru ue jakeka ijirovo amita degi usasa puvuroi,”
REV 14:8 ainge ijie pambuhoi Anera nei amita ambota puvutuhue ke einge ehija “Eto enda peni Babylon amita tiha evohu na eoi enda embo tapa na amita esi mu indie ari sasapura uje peni vahai eagora avoeto enda Babylon avo karaun eto ere vovua,” ke ainge ehei
REV 14:9 Anera nei vahai ambota puvutuhue ke isara na einge ehija, “Eto embo amuna o sapura aririvo embo na ove ari amite avo kogue humotepain ue eto amita hajire ‘number’ avo beo ta rete o ingeni ta rete humbasuja
REV 14:10 amo God na tumo pajire be eto amita degi wine saruka sovera te overekau humbuto indirou humbuto Anera ototohu te O ‘Lamb’ te amita tombu ta ikau evikihie memenga kogurou
REV 14:11 amita iposi na daroho ta vivihe iresuja. Eto embo amuna o sapura amita javo ta hajire humbuhe o amite amita aririvo te avo jakeka aisuja amina iji te mume te tapa jangu indari mane kesuja,” ke ainge Anera amina ehija
REV 14:12 avoeto ungo embo ototohu God ta ke agi ue Iesu humota eagova avo ungo sovera eto irivujo.
REV 14:13 Eto ke nei uhu i te ei ingena amo eingera, “Ke erevi kajejo: eto embo amuna eha oroho eto ambota Bada ke be ere ijima pehasuja amita degi ta javotoho be puvuresuja.” Ainge eto Ahihi na einge eria, “Ke be, amo enana ta pure irae au jangu indie iriroro pure ta be ambota puvurou kesora.”
REV 14:14 Eto na tihi i ta eto kehena amo johi parara be ai ta Embo ta Meni kiarako ehena amita siro ta kope gold na ari avo asuketo asivo okokombari ti te avo jigito mihei kehena.
REV 14:15 Eto Anera nei na ‘Temple’ jo ta eto puvuto embo vahai johi parara hamota arumbeto mihina amita degi ke isara na einge ehija, “Enda ta be javotoho avo sari ari iji puvija no asivo humbuto pambuto kahumbeto umbujo” ke ainge ehei
REV 14:16 embo johi hamota arumbeto mihia amina asivo na jiheto enda ta be tivehei iraehija.
REV 14:17 Eto Anera nei uhu i ta temple jo ta mihina amite tapa asivo okokombari ti te avo jigito puvei
REV 14:18 Anera nei ji evekaguja amita simba ari Anera amina pene gaga ta eto puvuto Anera nei asivo te amita degi ta ke isara na einge ehija, “Enda ta esi ‘grape’ be sari eto mihia avo kahumbeto humbuto puvujo” ainge ehei
REV 14:19 Anera na asivo humbuto enda ta ‘grape’ be jiheto kahumbeto humbuto God na hini kambari ue haito sahaguja degi ai gosukehei vehei
REV 14:20 da sahu ai ta sahihere orosa na pevihito gavineketo veto ‘300 kilometres’ eto ukomo eto vihito o ‘horse’ ta pe ga inono ehija.
REV 15:1 Eto na hajire nei pajire be avo uhu i ta kehena amo Anera tapa 7 amina osaga memenga hajire neite neite tapa 7 ainge avo embota degi aro koguroro God ta tumo irae asuja avo jigito mihere kehena.
REV 15:2 Eto eva visi visi javotoho ji peri na ombuto ombuto ari kehena amita hora ta o sapura te amita aririvo ove ari te amita javo ta number hajire te umbae sovera eto dembari embopo amina gita javo ‘harp’ God ta degi umbera ai ta torue
REV 15:3 Moses, God ta pure ari embo te eto God ta O Lamb te amita haveni avo einge ijie ehera, “Bada God sovera isapamane te no ari tapa avo pajire be eto javotohora. Eto vasiri no tapa amo ke be ke be umo iji daroho ta king.
REV 15:4 Oarie Bada embo tapa na umo joru ururoro usasa javo no ta puvuroi no ari jajavotoho eoe kiagora avoeto enda embo tapa na no degi ta puvuto humote pain ue jakeka asora”.
REV 15:5 Haveni ainge ehere irae ehei uhu i ta God ta irari degi Otohu be Otohu avo hirikihoi
REV 15:6 Anera tapa 7 amina osaga memenga tapa 7 ainge avo jigiriketo arahata puvutuhore kehena amo enana bo parara be asari eto jenge ta amo pupuri gold na ari avo kajari ainge avo puvutohore
REV 15:7 o vasiri tapa 4 rate vahai amina aguhu gold na ari tapa 7 ainge avo ikerekehija amita jo ai ta amo God ta tumo pevihari avo mihia.
REV 15:8 Eto temple jo ai ta amo God ta sovera te eto God ta usasa te amina ji iposi ainge eto kumbo kumbo vihito temple jo enetehei embo horari haite mane kihi Anera 7 amina osaga memenga tapa 7 avo aro embomeni na kioro irae au ambota horasora.
REV 16:1 Eto temple jo ta ke isara na Anera tapa 7 amita degi ta ke einge ei ingena, “Ungo pambuto, aguhu tapa 7 ainge God ta tumo na pevihari avo humbuto enda embomeni ta degi jojevujo veare,” ke ainge ehei
REV 16:2 Anera vahai amina pambuto amita aguhu avo enda ta jojehei veto embo o sapura amita aririvo ingeni na ove ari avo jakeka ue hajire humbari embomeni amita hamota mahu memenga te masa te pajire be avo paukena.
REV 16:3 Eto Anera nei amina aguhu nei avo eva hamota jojehei veto embo pehari ta orosa ainge avo irerembehei eva ta o vasiri te tapa be tapa amo pepehekehera.
REV 16:4 Eto Anera heriso jojehere irae ehei Anera nei amina aguhu humbuto umo kombu te avo te ai ta amite umo kuru vihiuja ai ta jojehei veto orosa irerembehei,
REV 16:5 Anera umo simba eaguja amina ke einge ehija, “Umo daroho irari Embo Otohu inena enana ta ari sasapura ta hajire ere ikihea amo javotohora amo
REV 16:6 enana na peroveta te embo ototohu te amita hamo tiukehere orosa vehija avoeto inena orosa ikihe enana ta ari hajire avoeto kogue ere indera” ainge ehei
REV 16:7 pene gaga kehena ta ke mine einge puvija “Ke be umo Bada God sovera isapamane te embo sasapura ta degi no hajire ikari amo be perera”, ainge ehija.
REV 16:8 Eto Anera heriso nei vahai jojehere irae ehei nei amina iji hamo ta jojehei iji vevere pajire be eto ihiketo embomeni evekehei
REV 16:9 vevere memenga koguroro amo God na osaga memenga embomeni na kogora avo haekari haite rate embomeni na memenga kogue ari sasapura toto jo hapereketo God jakeka ae hoviro ehera.
REV 16:10 Eto Anera nei heriso nei heriso jojehere irae ehei nei amina aguhu o sapura amita avo arumba peni ai ta jojehei mume kambujoro pajire be sihukehija.
REV 16:11 Eto embomeni na osaga memenga eto masa kehera avo hotembeto tunga hapereketo ari sasapura toae rate uhu i ta God avo hoviro ehera.
REV 16:12 Eto Anera tapa 5 jojehere irae ehei nei amina umo pajire javo Euphrates ai ta jojehei eveketo irae ehei kings nei nei ihane hena ta eto isoro ue puvurora ehija.
REV 16:13 Eto na kogue mihene Ahihi sasapura o kana ainge tapa heriso nei vahai amo vahai o koso o javo ‘dragon’ ta pe ho ta puvija eto nei amo o sapura amita pe ho ta eto puvija eto nei amo peroveta ke sokova na ke hande eaguja amita pe ho ta eto puvija.
REV 16:14 Eto Ahihi sasapura amina pambuto enda tapa ta ‘kings’ amita tombuta ari sovera neite neite eagora amore God sovera te ta iji peni amite vahai ta puvuto isoro pajire be ara ari ainge amo eagora.
REV 16:15 Eto God na ke einge eria, “Ingivujo, na pegene embo na joru paseto puvurarako asona avoeto embo amuna evo ae ue bo asuketo ereto iresuja embo amina hamo teho mane avoeto me mane kesuja”, ainge eria.
REV 16:16 Eto enana na enda tapa ta ‘kings’ avo siriketo ikehere pambuto ‘Hebrew’ ke na degi javo ‘Armageddon’ eagora ai ta horukehera.
REV 16:17 Eto Anera tapa 6 amina God ta tumo aguhu ta avo jojehere irae ehei nei vahai amina aguhu humbuto jiginu vihinu i ta jojehei vehei temple jo ta avo arumba peni ai ta ke isara na “Irae ehija aravora”, ainge ehei
REV 16:18 pipiri te tururu te asavi ei enda titira pajire be ereto enda tiroki koheki ehija amo embo ari iji te eto puvuto eha emikote amina titira aingeko ae peko ta eha ehei
REV 16:19 da pajire be avo enda haunketo tapa heriso nei vahai ainge oi enda tapa ta da pepeni tapa amo karaun eto vehera. Amo da sapura javo Babylon avo hotembeto aguhu ta ‘wine’ jojarako eto amita tumo avo jojeto ikehei indija.
REV 16:20 Eto eva tiuka tapa amo irae oi tiri tapa amo karaun eto veto visi visi ehera.
REV 16:21 Eto uhu i ta eto ‘ice’ moti pepeni papeni bouka ‘50 kilo’ ainge amina embo ta hamo ta vehei osaga memenga pajire be kogue God ta degi hoviro peni vahai ehera.
REV 17:1 Eto Anera 7 aguhu 7 rate vahai amina puvuto nau degi ta ke einge ehija, “Umo einge hae tiha evohu pajire be umo isapamane amita hamo ta arumbeto mihia amita ari sasapura ta hajire God na do ainge au kesuja avo ano kesoa,
REV 17:2 amo enda tapa ta ‘kings’ na amiga tiha eagora avo eto enda tapa embomeni na amita tiha ‘wine’ ainge amina indere tihivi oi ere ora,” ainge eto
REV 17:3 Anera amina Ahihi nau humbuto pambei tiha evohu avo ojaga tambu ai ta o hamo pangari eto o amita hamota amo God ta javo urumbihe kajari eto o amita siro tapa 7 amita perema tapa 10 ainge amita hamota arumbeto mihei kehena.
REV 17:4 Eto amita bo amo ove ohoma te ovihasuko ta ove kaneke kaneke ari eto bo hamota amo ‘gold’ te koro orina uhuruma memeni jajavotoho amina kogombari avoeto pingi sari ehija. Eto amita ingeni ta amo aguhu ‘gold’ na ari avo jigito mihia eto aguhu jo ta amo amita tiha paiha ta tongopa te eto donda sasapura neite neite amina pevihari avo jigito mihia
REV 17:5 eto amita beota amo ke ojikari na einge kajari kehena: “Enda ta ari sasapura tapa amite eto tiha paiha ari evohu tapa amita e amo Da peni javo Babylon”.
REV 17:6 Eto evohu amina Iesu ta ke hande ari embopo ototohu ta orosa avo indito kava oi kehena. Eto na evohu avo kogue mana mana one
REV 17:7 Anera na nau degi ta ke einge harikehei ingena, “Umo mana mana ere oate evohu emite eto o siro 7 amite perema 10 amite amita be avo harikano ingesoa,
REV 17:8 amo o sapura ere kogoa amo mahu mihahija te eha amo iraera te enda jo hu ta eto vihito pahurou God na tau irae asuja amo embomeni enda eha ra ta ari iji te eto puvuto eha eremikote avo enana ta javo book vasiri amita jo ta kajae avoeto o sapura aravo kogue ti kakambuketo mana mana aisora amita be amo o sapura amo mahu mihahija rate eha amo irae avoeto ambota puvuresuja.
REV 17:9 Eto ke nei asi ereona amo embo uha hotembari javotoho te amina kesuja amo evohu amina heti tapa 7 ai arumbeto mihia amo amita siro tapa 7 ra eto nei amo enda ta ‘kings’ tapa 7 ra,
REV 17:10 te 5 amo enana ta tihi jigari mahu irae ari nei vahai amo tihi jigihe mihia eto nei amo eha heteto iji tuho be tihi jigesuja. Eto o sapura amo mahu mihahija te eha amo irae ra te eha ereto enana 7 amiga king inono ue king 8 aisuja rate God na tau irae asuja.
REV 17:12 Eto perema 10 amina ahekihira oi ere kogoa amo ambota kings heteto o sapura amiga tapa iji tuho be tihi jigihe
REV 17:13 uha vahai asora amo enana na o sapura amita sovera ari ikihe
REV 17:14 O Lamb ta degi isoro asora te O Lamb amo bada tapa te amita Bada eto king tapa te amita King avoeto amita ambotani jajage eto siriketo humbari amiga heteto isoro eto o sapura amo dembasora” ainge eto
REV 17:15 Anera na ke nei einge ehija, “Eto tiha evohu na umo hamo ta arumbeto mihia umo amo enda tapa te amita ke neite neite avo ijie iragora embomeni ra.
REV 17:16 Eto o sapura amite eto perema 10 amite na tiha evohu ta degi tumo ue ereto tiha evohu amita bo jigito houketo taro pehau visi indie ji ta ikaro evekasuja
REV 17:17 eto ainge asora amita be amo God na amita uje avo ara jo ta hotembari ikau tunga vahai eto o sapura ta degi sovera ari ikihiroro God na ke ehija amita be avo puvurou kesora.
REV 17:18 Eto evohu ere kogoa amo enda sapura ta da okose vahai amina enda tapa ta ‘kings’ tihi jigihe mihia amita ahe kihira avo ere ua.
REV 18:1 Eto ari avo kehene irae ehei Anera nei uhu i ta eto veto puvutuhoi kehena amo Anera okose be amina puvutuhoi amita usasa pajire be amina enda tapa daha daha oi
REV 18:2 amina ke isara na einge ehija, “Da pajire be javo Babylon amina karaun eto vehei irae ehei embahe te ahihi sasapura te di sasapura te amina ai ta mihera.
REV 18:3 Amo da tapa embomeni na amita tiha ta ‘wine’ indito kava ue ere vovora eto enda ta kings tapa na amiga tiha uoi enda ta donda ombari embopo na amita degi ombuto humbuhe koro mamone ere ovora” ainge Anera amina ehei
REV 18:4 uhu i ta eto ke einge ehija, “Nau embomeni ungo evohu avo toto have eto ungote tapa na evohu ta ari sasapura ta veasova amore evohu amita degi osaga memenga ikasona avo ungo te tapa kiagova uje ae ereona
REV 18:5 amo evohu ta ari sasapura hamota hamota ue vihito uhu hame ere ua avo God na jenambu ae rate kogue mihia
REV 18:6 eto evohu amita sapura do ikehija avo mine ikari avo inono ta mane ikasuja rate nei hamota ikihe aisuja amo evohu ta aguhu ta inja mihia ai ta God na inja nei sovera te amo hamota jojeto ikau indesuja.
REV 18:7 Eto evohu amina haja vaja te usasa te do ainge humbija amo God na kito memenga te osaga te amo ainge inonota ikau kesuja. Eto evohu amina jo ta einge ere hotembihia, “Na evohu doru mane na ‘queen’ pajire be avoeto si mane asona te daroho ta tunga javotoho ue iresona” ainge eria
REV 18:8 te amita ari siriketo hajire ikari embo Bada God amo sovera isapamane be amina iji vahai osaga memenga ikau puvutuhurou sorara humbasuja, pehasuja, eto beuje kesuja, eto ji na evekau irae asuja,” ainge ehija.
REV 18:9 Eto enda ta kings amita hajae vajae indie amiga tiha ere ova avoeto evohu avo memenga kogua avo joru ue ahen ta heteto amita iposi kumbo kumbo vihesuja
REV 18:10 avo kogue si ijie ke einge asora, “Oio, da peni Babylon sovera te, iji isapa amita tutumota irae ereoa,” ainge ijiroro
REV 18:11 enda ta donda ombuto humbari embopo na donda na ombuto koro humbari degi irae ere ua avoeto bija puri aisora
REV 18:12 amo enana ta ‘gold’ te ‘silver’ te bo ove neite neite na kembari te ji savari te donda neite neite o ti na ji na ‘bronze’ te ‘iron’ te na eto koro na ove ari amite eto
REV 18:13 donda mune te ji osare hamo te jeune te doriva te ‘wine’ te seha te ‘wheat’ be jasari te jasae amite o ‘cow’ te o ‘sheep’ te o ‘horse’ te amita gaga te eto embo ta hamo te ahihi te tapa amo ombuto humbari degi irae avoeto
REV 18:14 enana na ke einge aisora, “No ji be neite neite uje isapamane ereova amita gamo ehako mane kesoa eto no hajae vajae tapa irae ere ua ehako egerembari inono ae,”
REV 18:15 ainge donda na evohu amita degi ombuto koro isapamane humbagora embopo amina joru ue hoi ta heteto evohu amina memenga kogurou si ijie
REV 18:16 einge aisora, “Ajao da pajire no bo ove hohoma te ovihasuko te na kembari eto no bo hamota gold te koro orina uhuruma jajavotoho amina kogombari amina pingi sari eaguja te
REV 18:17 iji isapa amita tutumota tehei hajae vajae irae ere ua,” ainge ijio e nga tari jigari embo te tihi jigari embo te e nga ta eagora embomeni tapa amina hoi ta heteto
REV 18:18 amita iposi kumbo kumbo vivihirou kogue ke einge aisora, “Da pajire be eingeko mahu be mahu amo iraera” ainge ijie
REV 18:19 amisa timbuto siro ta kuhihe bija puri ijie ke einge aisora “Oio da pajire be, dago e nga tihi jigirikari embopo na no degi ta pambuto donda na ombuto koro mamone ere ovora te iji isapa amita tutumota tehei irae ere ua,” ainge amo enana na aisora te
REV 18:20 ungo uhu i ta irari embopo tunga javotoho evujo amo ungo embo ototohu te apostero te peroveta te tapa tunga javotoho ue haveni evujo, amo ungota degi sapura eaguja avoeto God na hajire mine ikehei kogua,” ainge Anera amina ehei
REV 18:21 Anera nei vuvure te amina koro pajire be ‘wheat’ jasagora aingeko avo humbuto eva ta gosukehei vehei ke einge ehija “Vasiri pajire be eingeko amina da peni Babylon amo gosukaro veto irae au ehako hambari haite mane aisuja.
REV 18:22 Eto amita huin husari te isepuri husari te gita tari te haveni ganari te amo embo na ehako mane ingesora eto amita ingeni na pure ari embopo ai ta mane hambasora eto ‘wheat’ jasari ta hindu ai ta mane ingesora.
REV 18:23 Eto amita jo ta usasa mane undukaro evekasuja eto singa te kakara te jimbari ta ke mane ingesora. Eto no donda na ombuto humbari embopo amo enda ta embo okokose avoeto no saruka ke na enda tapa embomeni kihi humbuto sapura ta pambua.”
REV 18:24 Eto embo tapa enda ta tari te peroveta te embo ototohu te ta orosa amo da amita jo ta hambera.
REV 19:1 Eto ari ainge ehija amita ambota uhu ita embomeni isapamane na ke o a ijie einge ehera, “Aleluia God na embomeni ta ari avo ke be na siriketo enana ta hajire ikihe tohota embomeni avo oreketo siriketo humbija, amo usasa te sovera te amita degi iroi. Eto tiha pajire be ari evohu amina amita tiha na ehei enda tapa sapura be ehei God ta pure embopo tehei orosa vehija avoeto God na amita sapura ta hajire ikehei humbuto ere ahua,”
REV 19:3 ainge eto ke o a ijie ehako einge ehera “Aleluia, evohu avo evikihie amita iposi na kumbo kumbo vivihe daroho ta iresuja”, ainge ijio,
REV 19:4 embo okokose tapa 24 amite o vasiri te tapa 4 amite na God avo arumba peni ai ta arumbeto mihia amita tombu ta veto gombuto God jakeka ijie, “Amen, Aleluia,” ainge ere.
REV 19:5 ke avo arumba peni ai ta eto einge puvija, “Ungo God ta pure ari embomeni pepeni te memeni te ungo God joru ue otohu eagona embomeni avo God jakeka evujo,” ke ainge ehei ingihene
REV 19:6 ke nei umo pajire be ta hindu ainge eto pipiri pajire be ta hindu ainge amina ke mine einge ehija, “Aleluia, ungotenau Bada God sovera te na heteto tihi jigihe mihia.
REV 19:7 Ungotena osa osa ue jakeka ijie haveni ijiroro amita degi usasa puvuroi, amo God ta o ‘Lamb’ ta jimbari iji puvei amita kerari kakara amo amita ekalesia avo nununga oi bo parara javotoho tongopa ambu ikehei asukehija amita be amo embo ototohu tapa amita ari jajavotoho avo asukehija,” ainge ehere Anera na nau degi ta ke einge ehija, “Ke erena erevi kajejo, O ‘Lamb’ ta jimbari dorovu indora oru humbari embopo amina osa osa ue tunga javotoho aisora” eto nei amo “Ke kajihena amo God ta ke be ra,” ke ainge kajana ehei, Anera jakeka ijie utu ta gombuto mihene haekihe ke einge ehija “Na mane jakeka asoa te namote umote eto no namei kamei Iesu ta ke hande eagora amite tapa God ta pure embopora te ambota do puvuresuja avo ene ere kogoa amita be amo Iesu ta ke vahai aravora avoeto God vahai avo jakeka ejo.
REV 19:11 Eto uhu pe hirikari ai ta o ‘horse’ hamo parara heteto mihei amita hamota arumbeto mihia amo embo javo Humota ari Ke Ve ari amo embo ta ari avo siriketo hajire ikari embo eto isoro embo avo mihei kehena,
REV 19:12 amita tihi amo ji peri ainge amita siro ta kope isapamane be eto amita javo hamo ta kajari amo embo tapa kiae rate umo oenga ere kogua
REV 19:13 amita bo amo orosa ta hatito pohukari eto amita javo amo “God ta ke” ra.
REV 19:14 Eto amita ambota amo uhu i ta isoro embopo avo bo parara javotoho tongopa ambu avo asuketo horse hamo parara ai ta areto puvutohore kehena.
REV 19:15 Eto embo amita pe ta amo asivo koso vahai ti te amina enda embo tapa jasuja avo pe ta eto puvutuhoi kehena. Eto embo amina daho ngahia be avo jigito embo tapa tihi jigesuja. Eto Embo amina God sovera te tumo avoeto embomeni ta hajire ikau kesora amo ‘grape’ ta hamo ta haito saharako aisuja
REV 19:16 eto amita bo pohukari hamota eto utu poru ta amo embo amita javo amo einge kajari mihia “King tapa ta king eto Bada tapa ta bada” ainge kajari kehena.
REV 19:17 Eto Anera nei kehena amina iji ta heteto di i ta ere pahua amita degi jage eto einge ehija “Ungo God ta pondo indova na have,
REV 19:18 amo kings te isoro tihi jigirikari embopo te vuvure embopo te, o horse hamota arumbeto pambari embopo te o horse te embo okokose te pure embopo te eto peni te isapa te indova na have”, ainge ehei
REV 19:19 o sapura amite eto enda ta kings te enana ta isoro embopo te na embo o horse parara ai ta bo parara asari amite eto amita isoro embopoga isoro asi horukea
REV 19:20 rate peroveta sokova o sapura amita javota ari sovera neite neite oi embomeni kogue o sapura ta hajire kikiva ari avo humbuto o sapura ta aririvo ingeni na ove ari avo humotepain ehera peroveta amite eto o sapura amite tapa avo andito umbera te tae pehae umo joremba ji peri masa te ai ta gosukehere veto evekehere
REV 19:21 o sapura amita isoro embopo nei uhoho amo embo o horse hamota arumbari amita asivo pe ho ta eto puvuto mihia amina jehei pehehere di na veto visi indere hini guru ehija.
REV 20:1 Eto Anera vahai uhu i ta eto veto puvutuhoi kehena amo ingeni vahai amo enda jo hu ta amita bokiri hirikari ‘key’ avo jigito ingeni nei na amo ‘chain’ pajire be jigija
REV 20:2 amina veto o koso o sapura be javo ‘dragon’ amo ke gamo poekari embo ‘Satan’ embo avo andito punduto enda jo hu beta gosukehei
REV 20:3 veto jua tapa 1,000 ainge ai ta iroja iketo ahureketo arinako ehija amo enda tapa embomeni engekihoi amita ujeta ambo ambo eagora avoeto enda huta jua tapa 1,000 ainge mihirou aro araha ta puvuto iji isapa isa aisuja.
REV 20:4 Eto avo arumba pepeni ai ta kehena amo embomeni ta ari sirikari embopo avo God na siriketo ikehei areto mihere kehena eto nei amo God ta ke avo ke be ijie Iesu ta ke hande ari embopo avo tunga tiukari amita ahihi avo kehena. Eto enana amo o sapura te eto amita aririvo ingeni na ove ari amite avo humotepain ae eto amita hajire beo ta eto ingeni ta umbae avoeto enana amina ereto Iesu ga jua tapa 1,000 ainge amita jo ta heteto tihi jigesora
REV 20:5 te tihi jigari iji amita tutumota amo embomeni pehari tapa amina vasiri te erasora
REV 20:6 te enana kihi erasora amina Otohu be ue tunga javotoho be aisora eto enana ta degi God na sovera ari ikau ehako mane pehasora te vasiri te daroho ta mihie God ta eto Keriso ta priests ue amiga jua tapa 1,000 amita jo ta tihi jigesuja.
REV 20:7 Eto jua tapa 1,000 irae au Satan tipura ta avo hirikau vihito
REV 20:8 pahue God ta kitoho enda tapa ta mihera (amita javo amo Gog te Magog te ainge amo eagora) avo jajage au puvuto isoro asi vahaita horukasora amo eva hora ehekari inono ae aingeko
REV 20:9 amina enda tapa ta eto puvuto God ta osa ari da amita embomeni mihera avo joeketo mihiroro ji na uhu i ta eto veto embo amo evekau pehihiroro
REV 20:10 enana engekari embo Satan avo humbuto o sapura te peroveta sokova mahu gosukari veari degi ji peri masa te umo joremba ta evekaguja ai ta gosukau veto mihie iji te mume te daroho ta memenga kesuja.
REV 20:11 Eto avo arumba pajire hamo parara be amita hamota Ari Sirikari Embo mihei kehena amita degi ta eto uhu te enda te na joru pambere irae ehija amo ehako hambari haite manera,
REV 20:12 eto embo pepeni pehari te isapa pepehekari te tapa amina avo arumba peni amita tihi buju ta heheteto mihere enda ta ari do ere uahera tapa books ai ta kajari avo hiriketo ai ta kogue siriketo hajire ikehija.
REV 20:13 Eto book nei hirikehija amo vasiri ta book ra eto use te embo pehari ta ahihi irari degi te eto eva te na pehari embomeni tapa ikehere puvera
REV 20:14 eto embo amita javo book vasiri amita jo ta kajari irae kito amo ehako pehaja humbuto umo joremba ji peri ai ta gosukaro veto mihie ji vevere daroho kogue iresora. Eto ji peri aita amo embo pehari te degi javo Hades amite tapa irae aisuja.
REV 21:1 Eto uhu te enda te eva te mamahu irae ehere uhu te enda te ehaha avo kehena
REV 21:2 eto kerari kakara kogombeore amita ivu na sago pajire be kiaguja aingeko avo da eha Jerusalem Otohu amo God ta degi uhu i ta eto vovuoi kogone
REV 21:3 ke pajire be avo arumba peni ai eto einge puvija “God ta irari degi avo embo ta degi puvija amo emboga iresuja eto enana amo amiga mihiroro God na enana ta God ue
REV 21:4 enana ta tihi sisivu tapa avo tuhasuja amo donda tapa be tapa eto ari tapa mamahu amo irae ehija avoeto pehari sorara humbari bija puri ari memenga tapa amo embo na ehako mane kesuja,” ainge eto
REV 21:5 avo arumba peni ta arumbeto mihia amina ke einge ehija “Na donda tapa ehaha ereona amo ke be ijie humota ari haite ra, tapa book ta kikiva ejo kiore,” ainge ijie
REV 21:6 nau degi ta einge ehija “Aravora, irae ehija namo amo ihikari ta eto pambuto tutumota ra (amo Alpha te Omega te ra) eto embo umo beuje asuja amo umo vasiri kuru vihiuja ai ta nane mine vahai timbuto ikano indesuja te mine mane ikasuja.
REV 21:7 Eto embo amina sovera eto dembasuja amina hotari erevi humbau na amita God ururono amo nau meni aisuja
REV 21:8 rate joru ue ke hande ae embopo te God ke be ae embopo te ari sasapura embopo te embo tari pehari embopo te tiha paiha embopo te saruka embopo te God ingeni na ove eto humota ari embopo te ke sokova eagora embopo te tapa amita irari degi amo umo joremba ji peri masa te evekaguja aita amo enana ari ainge eagora amita pehari nei amo aravora,” ke ainge ehei.
REV 21:9 Anera tapa 7 aguhu 7 aita osaga memenga na pevihari overekehera ta Anera vahai amina nau degi ta puvuto ke einge ehija “Na O ‘Lamb’ ta ae kerari avo ano kioana hae” ke ainge
REV 21:10 eto ahihi nau humbuto pambuto tiri pajire koso vahai aita ikehei hetehene Da Otohu Jerusalem uhu i God ta degi ta eto ikehei vouvoi ehei kehena.
REV 21:11 Eto amina God ta sovera te usasa te amina gain eto koro orina javo ‘jasper’ na usasa pingi sari eaguja ainge amina ehei kehena
REV 21:12 eto huga koro na hamota hamota iketo vihari koso vahai be amina joekari aita pe tapa 12 ainge paukari aita amo Anera tapa 12 amina heteto simba ue iragora eto pe bokiri amita hamota amo Israel embomeni ta Ohihi javo tapa 12 amina kakajekari mihia
REV 21:13 eto pe tapa 12 rate 3 ainge amo ihane ta nei 3 ainge amo sohe ta nei 3 ainge amo kaina ta eto nei 3 ainge amo pahina ta
REV 21:14 eto da ta huga jigito ngahia iroja atahu ikari koro tapa 12 amita hamota amo O ‘Lamb’ ta apostels 12 amita javo kakajekari avo mihere kehena.
REV 21:15 Eto Anera namote ke ehija amina heka humbari ituha gold na ari amina da ta heka do aingere eto huga amita heka do aingere eto bokiri ta heka doaingere avo humbasi jigija.
REV 21:16 Eto heka humbija amo i ta eto hu ta kaina eto pahina ihane eto sohe amo heka inono inono ta ikari avoeto 1,400 kilometres koso ra
REV 21:17 eto ehako huga ta heka humbija amo huga apupu oiho ta eto pambuto apupu oiho ta eto heka humbija amo 65 miters ra amo embo heka humbagora ainge dombo amina jigama ehija.
REV 21:18 Eto da ta huga amo koro orina javotoho javo ‘jasper’ amina gerikari eto da be amo ‘gold’ javotoho usasa eaguja amina gerikarira.
REV 21:19 Eto da ta huga jigito ngahia iroja atahu ikari koro tapa 12 amo koro orina kiari jajavotoho ove neite neite amina kogombari ra eto vahai amo ‘jasper’ na kogombari nei amo ‘sapphire’ na kogombari nei amo ‘chalcedony’ na kogombari nei amo ‘emerald’ na kogombari
REV 21:20 nei amo ‘sardonyx’ na kogombari nei amo ‘sardus’ na kogombari nei amo ‘chrysolite’ na kogombari nei amo ‘beryl’ na kogombari nei amo ‘topaz’ na kogombari nei amo ‘chrysoprase’ na kogombari nei amo ‘jacinth’ na kogombari eto ambo dombota amo ‘amethyst’ na kogombari ra.
REV 21:21 Eto huga pe ta bokiri 12 amo eva ta gagina uhuruma parara be eto pajire vahai vahai amina bokiri tapa 12 amo ahurekari mihia eto da jo ta degi pambari amo gold javotoho usasa te amina vevendeto pambarira.
REV 21:22 Eto da amita jo ta amo embo vahai vahai amina degi tapa ta ue Bada God sovera te eto O Lamb amite jakeka eagora avoeto da jo ta Temple amo irae ra.
REV 21:23 Eto God ta usasa te eto O Lamb ta usasa te na da jo ai ta usasa eaguja avoeto iji te hariga te ta usasa amo mane eaguja.
REV 21:24 Eto enda tapa amita embomeni na amita usasa ta iriroro enda ta ‘kings’ na enana ta sago kiari te hajae vajae te humbuto da ai ta horasora
REV 21:25 eto da ai ta mume mane sihukasuja avoeto huga ta pe bokiri amo mane ahurekasora te hirikari mihirou
REV 21:26 enda tapa embomeni na donda sago kiari jajavotoho humbuto ai ta horasora te
REV 21:27 donda sapura te ari sapura te ke sokova te avo mane ai horasora te O Lamb ta book javo vasiri ai ta javo kakajekari embomeni amina pere horasora.
REV 22:1 Eto Anera na vasiri ikari umo avo God ta eto O Lamb ta avo arumba peni ai ta eto puvutuhoi ehei kehena
REV 22:2 umo amina da amita jo ta degi tambu orohu ai ta puvuto pambuhoi umo ahone ta vasiri ikari ji amina ereto be ekari iji amo hariga vahai vahai amita jo ta ekasuja eto amita iki amo enda embo tapa ta sivo avoeto indie kokojekasora.
REV 22:3 Eto enda ta saruka ari memenga ikari neite neite tapa amo irae asuja. Eto God te O Lamb te na da jo ta avo arumba peni ta arumbeto mihiroro amita pure embopo na ke agi aisora.
REV 22:4 Eto embomeni na God ta tombu kesora eto God ta javo avo enana ta beo ta kajasuja.
REV 22:5 Eto da ai ta mume mane sihukasuja avoeto embo na mane usasa undukasora te usasa amo Bada God ta degi puvuresuja avoeto usasa iji ta avo mane kesora. Eto embomeni na heteto God ga daroho mihie tihi jigesora.
REV 22:6 Eto Anera na nau degi ta ke einge ehija “Eto ke erevi erena amo ke be ijie humota ue evujo amo Bada God peroveta tapa ta Ahihi amita God na amita pure ari embopo na ari tapa do puvuresuja avo be kiagora amita Anera namo avo ikehei puvena.”
REV 22:7 “Kivujo na eha puvuto ere hona avoeto embo amuna ambota do puvuresuja avo book eita kajari mihia avo toae jigama ue iresuja amina tunga javotoho be aisuja,” ainge Bada na eria.
REV 22:8 Na John nanena ke erevi kehena eto ingena avoeto na ari kiari Anera avo jakeka asi veto gombuhone haekihe ke einge ehija.
REV 22:9 “Na jakeka aojo. Namote umote peroveta tapa amo no namei kamei ra amite eto book amita ke agi eagora embo tapa amiga God ta pure ari embora avoeto God vahai avo jakeka ejo,” ainge ijie ke nei
REV 22:10 einge ehija, “Ari do asora avo o hamo vujekari ei ta kajari mihia amita iji avo auvehija avoeto o hamo mane egovekasova.
REV 22:11 Eto ari sapura embo amo ari sapura mahainge ue iresuja God kiae embo amo God kiae ue mahainge iresuja, ari javotoho embo amo ari javotoho mahainge ue iresuja eto embo otohu amo embo otohu mahainge ue iresuja,” ke ainge Anera na ehija.
REV 22:12 Eto Iesu na ke einge eria “Kivujo, na puvuto ere hona, eto na embo jajavotoho te sasapura te amita ari ta hajire amo mine nau degi ta mihia avo inonota ikasi ere puvutuhona
REV 22:13 na ihikari tutumota, kihi eto ambota, susu eto kombura.
REV 22:14 Eto embo amuna da peni ta horasi bo egasuja amo God na au huga pe ta horeto vasiri ikari ji ta be avo indito tunga javotoho ue iresuja.
REV 22:15 Rate da ahone ta amo embo sasapura amina ino na arako ue mihera amina saruka te tiha paiha te embo tari pehari te god sokova ingeni na ove ari avo humotepain ue iragora ke sokova na tirihie osa ue iragora amina da ahone ta mihera.
REV 22:16 Eto na Iesu nanena ekalesia nau tapa avo ke erevi kiagora uje eto nau Anera emina au kioa ikehene puvija, na Susu ra, na David ta Meni ra eto na Iho Tarama usasa te ra,”
REV 22:17 ainge eto Ahihi te O Lamb ta kerari kakara te na “Ungo havu” erera eto ke ingari embo na ke einge aisuja “Ungo havu, umo beuje kogue havu, ungo ujena vasiri ikari umo avo mine vahai indesi havu,” ainge aisuja.
REV 22:18 Eto iji ambota do puvuresuja avo book eita kaehena erevi ingari embo ta degi erena amo amuna ke nei hamota ikasuja amita degi God na memenga osaga book erei ta kajari mihia amo au kesuja.
REV 22:19 Eto embo amuna book eremita ke davo purasuja amo God na au Da Otohu ta vasiri ikari ji book erei ta kajari amita be amo mane indesuja.
REV 22:20 Eto ke erevi ikari embo na einge eria “Ke be, puvurari iji nau auvehija,” ainge eria avoeto ‘Bada Iesu umo hae!’ ke ainge na John na erena aravora.
REV 22:21 Eto Bada Iesu ta hondate ari avo God ta embomeni ta degi iroi. Aravora.
