MAT 1:1 Suar igi izeg Jesu Kuraison saifarif iji bu e Eburamon ijia uinve roke e Devidon ijia usem roke Jesu nafenva ijin.
MAT 1:2 Regavo e uij iji bu uinve ruainva iji bu ijeg. E Eburam fu farifuon e Aisek nafega Aisek fu uri farifuon e Jekaf nafen. Fu Jekaf nafega fu uri e Juda ga uviaifijaf iji nafen.
MAT 1:3 Areme Juda fu uri am nokarok (2) e Ferez ko e Zera nafen gavo asie buon iji bara Tama. E Ferez fu uri farifuon e Eziron nafega Eziron fu uri farifuon e Ram nafen.
MAT 1:4 E Ram fu uri farifuon e Aminadab nafega Aminadab fu uri farif fuon e Nason nafen. E Nason fu uri farifuon e Sarmon nafega Sarmon fu uri farifuon e Boaz nafen. E Boazon asie iji bara Reab. E Boaz fu uri bara Rut abene e Obed nafen. E Obed fu uri farifuon e Jesi nafega Jesi fu uri farifuon Devid e iji fu Kin renma iji nafen. Areme Devid fu uri farifuon e Soromon nafen revo asei fuon iji fu e Uraiaon barak.
MAT 1:7 E Soromon fu uri farifuon e Reoboam nafega Reoboam fu uri farifuon e Abija nafen. Abija fu uri farifuon e Asa nafega Asa fu uri farifuon e Jeosofat nafega Jeosofat fu uri farifuon e Jeoram nafen. Jeoram fu uri farifuon e Uzaraia nafega Uzaraia fu uri farifuon e Jotam nafega Jotam fu uri farifuon e Eas nafen. Eas fu uri farifuon e Esekaia nafega Esekaia fu uri farifuon e Manasa nafega Manasa fu uri farifuon e Amon nafen.
MAT 1:11 Amon fu uri farifuon e Josaia nafega Josaia fu uri farifuon e Jekonaia ga diaifarifuon iji nafen. Areme e Babironko ijieb usem Jerusarem mai iji arafirime uri e Isrerko iji bun aferdiame una ar buon Babiron ijia vain. Areme rad e Jekonaia fu uri farifuon e Sirtir nafega Sirtir fur uri farifuon e Zerubaber nafen. E Zerubaber fu uri farifuon e Abiud nafega Abiud fu uri farifuon e Eriakim nafega Eriakim fu uri farifuon e Azo nafen. Azo fu uri farifuon e Zadok nafega Zadok fu uri farifuon e Akim nafega Akim fu uri farifuon e Eriud nafen.
MAT 1:15 E Eriud fu uri farifuon e Eriasa nafega Eriasa fu uri farifuon e Matan nafen. E Matan fu uri farifuon e Jekaf nafega Jekaf fu uri farifuon e Josof bara Merion baru iji nafen. Bara Merir Jesu e iji bu kua Kuraisno kuavo e iji fu e fok karauniakafa ruainma ijin nafen. Ijefuon e Eburam ijia roke e Devid bu nafenva ijia e uij iji buka e fotin (14) ijeg. Regavo una madu e Devidon uifarif ijia roke tavan iji e Babironko bu usem Jerusarem mai iji arafirime e Isrerko bu aferdia Babiron vainva ijia e uij bu madu e fotin (14) ijeg. Regavo una tavan iji bu aferdia Babiron vainva ijia roke e iji God fu abe enuvuon E Bomana renma iji bu nafenva ijia e uij bu madu e fotin (14) ijeg.
MAT 1:18 Ijegvo Jesu Kurais bu nafenva iji fu ijeg. Bara Meri Jesuon asie iji bu e Josof jakfuon kuain. Regavo fu vek naise ba baruna nainma ijia fu fuon ganamigak fu Kaven Akai ijefuon daro ijia fu e fudienma fu iji gain.
MAT 1:19 Regavo e Josof fuka e mado fuba una Meri e iji fu fudienma iji afeme dab kuaimgakfuon iji fuba ijeg ren. Ijefuon fum oifuon ijia Meri fu abekfuon iji fu isuar ijia arekafa fu ijeg vierafen.
MAT 1:20 Fu ijeg vierafeoga E Bomana ijefuon anera ijar ari naka kuardame kua, Josof e Devidon uifarif ige bara Meri a abekafa jumo iji fu bano abene. Regavo am iji fu fudienma iji fu Kaven Akai ijefuon daro ijia fudiedo fu am farif nafekma a abe ime Jesuno kuak. Ijefuon maiji fur efuon ijiebuon ise iji bu reoijo ijia karauniakno kuain.
MAT 1:22 Ijegvo ire uruvana bu renva iji fun izeg E Bomana fu usuibe Aisaia e vuak fuon vierafe kuaimon ijefuon oij ijia vierafe mamga fu kuainma fun ijekma aresrekro fu iji ijeg ren.
MAT 1:23 Regavo vuak iji fu kuainma iji bu ijeg isoi, Bara naise be fuba baruna naino fu e fudieme am farif be nafega bu e Imanuerno kuak. (Regavo if ijefuon ma iji God fu nona).
MAT 1:24 Ijefuon Josof fun naine suok urine izeg E Bomana ijefuon anera fu kuardainma ijeg fun bara Meri aben.
MAT 1:25 Fu aben gavo fuba fusik besum naikoga fun vake amfuon amur iji nafen. Fu nafega Josof fu abe ime Jesuno kuain.
MAT 2:1 Bu tavan iji bu Jesu ar Betriem moik Judia guf ijia nafenva ijia fu e Erodri e bomana rene moik iji samuamo. Ijegrekoga rad e nokbek (3) bun ar tavan ajiemo nak ijia roke Jerusarem usen. Regavo e iji ruainva iji bu karine mujur ijia anf sumakin kafo nisaivo ijieb ruain.
MAT 2:2 Bu useme e iji kia, Am ukak iji fu rad e Jiusbuon e bomana rekfuon iji bu izia nafen. No anf fuon sumakin be ire mujur ijar ar tavan ajiemo nak ijia ajie roka no gain. Ijefuon no fuon sirimamene kurituamajakuai ruainvano kiain.
MAT 2:3 Bu ijeg kuardiaoijga e Erod ga e uruvana mai Jerusarem guf ijia karinva bu vuak iji faiva buka bomana deajidiain.
MAT 2:4 Ijefuon Erod fun urine e Godon isuf baroijo ijiebuon e mamkanuk ijigam e vuak akai nijaidiavo iji kumega bu una besum afuin. Bu afuivga fu kia, E iji God fu kuaga fu ruakno kuainva iji ja vierafega bu ar izia ijia nafenvano kiain.
MAT 2:5 Fu ijeg kuardiamga bu kua, Godon buk akai bu usuibe isoinva ijia fu kua, Am iji bu ar Betriem moik Judia guf ijia nafek. Ijefuon maiji Maika e Godon vuak vierafene kuaimon iji fu ijeg isoime kuai,
MAT 2:6 Ai Judia guf ijia mai mamkanuk roin iji bu karinva ijiebuon kafar ijia mai Betriem aiji aka mai ma ukakbe bakin. Ijefuon maiji rad ar am farif be mai ijia nafek. A am iji nafega fur rad e bomana rene e Isrerko nun fok samuagdiakno kuain.
MAT 2:7 Bu ijeg kuardavga Erod fun e nokbek (3) iji mujur ijia anf nisaivo iji ruainva ijin kiavga bu isuar aferdia ar fuon ijia vain. Bu vakga fu uri tavan iji bu ivez mujur iji fu ajiema bu gainva ijefuon kuardiain.
MAT 2:8 Fu kuardiame uri kia, Nin va am iji amarigia nisaimoine ja gakva nika migegare una ro na kuardief. Ja kuardiega nak va fu kurituamajame fuon sirimamejno kiain.
MAT 2:9 Erod fu ijeg kuardiamga bun vakuai vake unam gafia una madu mujur besum iji bu ar tavan ajiemo nak fu ajiema bu gainva ijin gain. Mujur iji fu amur vakok bu gavknum ja vake ka ar iji am fu namo ijia usen.
MAT 2:10 Bu usem mujur iji manino ijin gavga buka ma uruvana igia oimadiain.
MAT 2:11 Ijegreare bun aru vaga am iji fu asiefuon Merik ijia karija bu giain. Bu aru giame uri fuon ato same sirimamen. Rene bun uri kamui buon ijia ire gord ga ire udi mukor urino nokarok (2) bu kua frenkinsens ga meno kuavo ijin kege am iji vajain.
MAT 2:12 Ijegreare bun naoinva ijia God fu naka ijia kuardiame kia, Jab una Erod fino ijia vakvano kiamga bun uri unam be ijia una ar buon ijia vain.
MAT 2:13 E mujur davo nokbek (3) iji bun una vakga Josof fu nainmaga E Bomana ijefuon anera ijar arime naka kuardain. Fu kua, Migegare urine am gureko asiefuon ijin aferdiame ni uri ko gamia ar Ijift ijia ari va figa nar kuaga ni una rokne. Ijefuon maiji e bomana Erod moik samuamo iji fu am iji kanakafa nisaimoino kuain.
MAT 2:14 Ijefuon Josof fun ve ufrenma ijia urine am ijiga asiefuon iji aferdiame bun Ijift vain.
MAT 2:15 Bun va ijia karine e Erod fun fine guakoga bu rad una ruain. Regavo iji bu ijegrenva iji bu izeg Osia e Godon vuak vierafene kuaimon fu usuibe isoime kuainma ijekma aresrekro fu iji ijeg ren. Regavo vuak iji bu ijeg isoi, Na e iji bu ai Ijift guf ijia karinva iji uf ijia am farinun iji kumejga fu keko ruain.
MAT 2:16 Regavo tavan iji Erod fu vierafega e iji mujur ijia anf nisaivo iji bu biesuainvaga fuka uruvana igia deajin. Ijefuon fun uri e bijaivo fuon uruvana kia, Ni va ar Betriem ijia am farif ukakna juaivasia besum (1) vo nokarok (2) barenva iji fok kaniaf. Regavo madu ni va ar ukakna Betriem samaij ijia ga juar bu menva ijia oknum am ukakna fok kania barefno kiain. Ijefuon maiji bun e ijieb ivez mujur iji fu mani sanama bu gainva iji kuardainva ijefuon fu am ijekin iji kaniamno kiain.
MAT 2:17 Ijefuon iji bu ijegrenva iji bu izeg Jerimaia e Godon vuak vierafene kuaimon fu usuibe isoinma ijekma aresrekro bu iji ijeg ren. Regavo vuak fu kuainma iji bu ijeg isoime kuai,
MAT 2:18 Ar Rama guf ijia e be niraima na fain revo e iji bara Resor afijaf ijiebuon niraim. Regavo fu erar ifejdakma bakin ijefuon maiji am uruvana bun aoim barenvano kuain.
MAT 2:19 Ijegreare e Erod fun guakoga E Bomana ijefuon anera iji fun una Ijift ijia arime Josof naka kuardame ijeg kuardain.
MAT 2:20 Fu kua, Nin am ijiga asiefuon iji aferdiame una uri ar Isrer ijia vakne. Ijefuon maiji e iji bu am iji kanakuai nisaimoijo iji bun aoim barevano kuain.
MAT 2:21 Ijefuon Josof fun am ijiga asie fuon iji aferdiame una urine Isrer ajie vain.
MAT 2:22 Fu una Judia ijia fivako ijia fu e Akeras fu asoifuon Erodon ar iji abene e bomana rene ai Judia samuamo iji fain. Fu iji faima fuka bomana jumga E Bomana ijefuon anera iji fu una arime Josof izeg fu rekfuon fok fuka naka ijia kuardain. Ijefuon fu ar Judia fu ijia areme va Nasaret ai Gareri ijia ar fuon same ijia fin. Regavo ijeg fu renma iji fu izeg e Godon vuak vierafe kuaimon fu isoinma ijekma aresrekro fu iji ijeg ren. Regavo vuak iji bu ijeg isoime kuai, E iji God fu kuaga fu ruakfuon iji fu e ar Nasaretkono kuain.
MAT 3:1 Ijegreare tavan ijia Jon e do ruardiamo iji fu moik Judia guf ai moikum namo ijia uri anerene e iji bu fuon roko iji vuak nijaidiam.
MAT 3:2 Fu vuak nijaidiaoknum e iji kuardiame kia, Unam jon ka ise iji ja nakikmazak reoijo iji arega una unam ma ijia keof. Ijefuon maiji tavan iji God fu efuon ijiebuon oij iji samuagdiakfuon iji fuka samaij igijarno kiain.
MAT 3:3 Regavo e iji fu ijeg kuainma iji e Aisaia e Godon vuak vierafene kuaimon ijar fuifuon usuibe ijeg kuai, E be fu ai moikum namo ijia fine kume, E Bomana ijefuon unam iji amarigia arir amarme samuake fu rokno kuain.
MAT 3:4 Regavo e Jon sinuom fuon fu samon iji fu fanuf kamer jau ijia amardiain gavo madar fuon iji fu madu fanuf surif ijia amaren. Regavo duok fuon fu ino iji fu kuamutu ga muni rif iji ino.
MAT 3:5 Jon fu ijegreoga e uruvana ai Jerusarem karinva abevo ai Judia karinva iji bu biom fuon ruain. Bu ijegrekoga e ar ukakna do Jodan irif ijia karinva iji bu vuak fu kuaimon iji faikuai ruain.
MAT 3:6 Bu biom fuon ruaknum ise buon iji fu kuardakoga fu aferdiame do Jodan ijia do ruardiain.
MAT 3:7 Regavo una e Feresis ijiga e Sejusis uruvana bu do ruaikuai fuon rokga fu giame uri kia, E gari ka isema vierafeoknum aroikaraoijo garie, Ja vierafero jan ma reoido God fuba rad ja kam arafiriakro ja ijeg vierafej. Jon izeg ja e biesiaoknum aroikaravo iji aref. Regavo ni una asume amarigia reoga e fok bu vierafero ja ise jon ja rejo iji jan arenvaro bu ijeg vierafef.
MAT 3:9 Regavo jab kuaik no sai nuvuon Eburamon uifarifdo God fuba nuigafuokro ijeg jab kuaik. Regavo igia faif. God fu e darokido fu mun guri kege una e Eburamon afijaf amarega bur ai jon abekno kiain.
MAT 3:10 Jon fu ijeg kuardiame uri vuak be ijeg bijame kuardiain. Fu kia, E bu in kafo buba sunin kiraga bu giavo iji buka mua kam um ataseme mian javo. Ijegvo jak ja unam ma iji jaba kegokva God fu ja kam mian iji naino ijia kozega ja ijia naoik.
MAT 3:11 Regavo eraneb ja unam ise jon fok ja reoijo iji jan arenva iji na aferdia do ijia ja ruardiak. Regavo e iji fu rad jajie roko ijar ruakma fur kafut uruvana oijon ijia naoivo iji kaname mian ja vo Kaven Akai iji kege ja uniafdiak. Fur fu ma E Bomana gavo naiji nam e ukakbe. Naba aresredo na dia surif fuon iji fu sainma iji azokfuon.
MAT 3:12 E iji fu rad rodo fu ruakma fur e igi ja kam ataken. Fu kam atame eraneb bu unam ise iji areme una unam ma ijia kegoijo iji fu kege be uniak. Regavo eraneb ja unam ise ijia kegoijo iji fu kege una mian iji tavan bog naine vako ijia uniakno kiain.
MAT 3:13 Areme ve iji Jon fu ijegreoinon ijia Jesu fu ar Gareri ijia uri vake do Jodan Jon fu e do ruardiamo ijia kekoin. Fu vierafe Jonri fu do ruardakafa fu ijefuon vain.
MAT 3:14 Fu vakga Jon fu uri kuai, Na a do ruardakfuon iji na vierafega fuka ba maren revo na vierafe ar na do ruardiemne kuain.
MAT 3:15 Fu ijeg kuardamga Jesu fu kua, Iji an ma kuaim gavo na vierafe aba arekga a na do ruardiek. No ijegrenki no tavan bog irerag God fu kuarduomo iji kafo noba uzagavo noka tavan bog fu igame kegokno kuain. Fu ijeg kuardamga Jon fu vierafega fun magame fu uri Jesu do ruardain.
MAT 3:16 Ijegreare Jesu fun do iji areme ajie roko ijia ai nairekoga daro iji fu e karauniakfuon iji fu Jesuon ruain. Regavo daro iji fu Godon Kaven ijar um guaf igeg arime Jesuon nigen ijia kiren.
MAT 3:17 Areme bu faik vuak be varur gufia kume, E iji fu Farinun na oijmavo ijin. Na unam fu kegoino iji na gaga fuka oimadiemno kumen.
MAT 4:1 Ijegreare ve ijia Godon Kaven iji fun uri Jesu afeme dab ai moikum namo ijia vakga Setan fu biesuain.
MAT 4:2 Jesu fun va ai moikum namo ijia duok karome oko naki foti (40) ga tavan foti (40) ijeg barekoga fuka vasiaguain.
MAT 4:3 Fu vasiaguainma ijia Setan fu kekome kua, A ma Godon fariga ni urine mun guri naoivo iji kiaga bu una duok rega a kege ine kuain.
MAT 4:4 Fu ijeg kuamga Jesu fu una kua, Usuibe Godon vuak bu buk akaij ijia isoinva iji fu ijeg kuai, Barubara buba tavan bog duok ijesugin iogavo buka Godon vuak iji vierafene reok.
MAT 4:5 Jesu fu ijeg kuardamga Setan fun una madu afeme ar mai Jerusarem ijia ajie vain. Fu afeme ajie vake ar bomana bu sirimamejo ijefuon azan gafia unain.
MAT 4:6 Areme Setan fun uri Jesu kua, A ma Godon farikma ni ijia manine furikome moik gamia arimne. Ijefuon maiji usuibe buk akaij ijia bu ijeg isoime kuai, Godri anera fuon uruvana kiaga bur a samuagak. Regavo a furik akozekma bur a dabe ari vake moik ijia unakva aba arime oi kananamikvo madu diak on iji aba kege nizukdiakno kuain.
MAT 4:7 Fu ijeg kuardamga Jesu fu una kua, Godon vuak bu usuibe isoinva ijia fu madu ijeg kuai, Jab E Bomana God jon ma iji abe biesuavno kuain.
MAT 4:8 Ijegreare Setan fun una madu Jesu afeme uruor makaf ijia ajie vain. Bu ijia ajie useme Setan fun uri ar iror fok nijaime madu uri ire ni mukor uruvana moik ijia naoivo ijin nijain.
MAT 4:9 Fu ijeg nijaime uri kua, Kam ijia ga. A ivia igia na ato same na sirimamekma na ire fok a giainma iji una a vajakno kuain.
MAT 4:10 Regavo Jesu fu una roin kua, Setan gareg va. A vuak iji bu usuibe buk akaij ijia isoime kuai, Jaka E Bomana God jon ma ijesugin fuonkua sirimamekgavo jab una e roin igiavno kuainva iji abe vierafenmano kuain.
MAT 4:11 Regavo Setan fun ijia areme vakoga anera ijieb arime Jesu ifejdaknum samuain.
MAT 4:12 Ijegreare rad Jesu fu faik e bu Jon dab dibur unava fu faime fun una uri ai Gareri ijia vain.
MAT 4:13 Fu va Nasaret keko gavo fuba ijia fin revo fu asime va ai Kafoniam ijia fin. Regavo ar iji fu do Gareri nafuinma samaij ijia gavo fu ar Zeburun ko Nafetari guf ijia.
MAT 4:14 Regavo Jesu iji fu uri vainma fun izeg usuibe Aisaia e Godon vuak vierafene kuaimon ijar usuibe isoinma ijekma aresrekro fu ijin ijeg ren.
MAT 4:15 Regavo vuak iji fu kuainma iji bu ijeg isoime kuai, E moik Zeburun ko Nafetaribuon uifarif iji bu do Jodan gara unam iji saofnak vainma iji irif ijia karin. Regavo e ijiebuon moik iji bu kua Gareri kuavo ga moik iji e Jius bakin iji buka uruvana ijia karin.
MAT 4:16 E iji bu unam ise nakinma ijia karioijo ga rad E Bomana ijefuon unam ikin ma iji sanainma iji bu gak. Regavo madu e iji bu unam ise nakinma ijia kegoijo kaven buon iji buka aoinva iji bu madu sanainma iji bu gak.
MAT 4:17 Ijegreare tavan ijia Jesu fun uri anerene e iji vuak nijaidiain. Fu nijaidiaknum kia, Tavan iji God fu oijon iji samuagdiakfuon iji fuka samairen. Ijefuon oij iji ja ire ise kafokafo moik igefuon vierafejo iji arega una oi karoime Godon ruafno kiain.
MAT 4:18 Areme tavan be Jesu fu do Gareri daturaiko nafuinma irif ijia oin. Fu oinon ijia fu e kimai savo nokarok (2) no diaikin e Saimon e iji bu madu kua Fitano kuavo ijiga uviaifuon e Edru iji biedien. Regavo e nokarok (2) iji bu ugie buon iji kege kijum karav.
MAT 4:19 Jesu fu biediame kia, Ni ire iji ja reoijo iji arega na jajief. Ja na jajiega na kijum iji ja karavo ijeg unam nijaidiaga ja e aferdiafno kiain.
MAT 4:20 Fu ijeg kuardiamga buba ir fuon abe akozen revo bum migegare uri ugie buon ijin ijia areme uri fu ja vain.
MAT 4:21 Jesu fun aferdiame vake una madu no diaikin e Jeims ko Jon e Zebedin afijaf iji giain. E nokarok (2) iji bu asoibuon Zebedina vanag ijia karine ugie buon iji amarev.
MAT 4:22 Bu ijegrejo ijia Jesu fu kumega e nokarok (2) iji bun migegare uri vanag buon ijiga asoibuon iji ijia areme ari Jesuna vain.
MAT 4:23 Areme Jesu fun ve ijia urine ai Gareri guf ijia ar ukakna e Jius bu afuime vuak kuaivo ijia arume oknum vuak nijaidiaoin. Fu vuak nijaidiaknum e uruvana vuak ma iji God fu izeg oibuon iji samuagdiakfuon iji kuardiaoin. Fu ijegrejknum madu e zazaikin uruvana adam abeknum vo aikirariainva iji karauniain.
MAT 4:24 Fu ijegreokogame e bu vuak fuon iji dab kuaime ai Siria guf ijia oin. Ijefuon e uruvana ijia karinva iji bu vuak iji faime uri e adam ise kafokafo ga vajai fian abejo ga e kaven ise urasdiainva ga e iji bu ir sabatenva ijin aferdiame fuon ruain. Bu madu e vajai garadiainva iji aferdiame rokga fu amardiamga bu una madiain.
MAT 4:25 Fu ijegreoga e ka uruvana bu uri fu jame dab arafiri vain. E ar Gareriko iji abevo e mai ten (10) guf ijia karinva ijieb uri fu ja vain. Regavo madu e mai Jerusarem ijia karinva iji abevo e moik Judia karinva abevo e do Jodan gara karinva uruvana ijieb uri fu dab arafiri vain.
MAT 5:1 Areme tavan be Jesu fu giak e uruvana bu fuon rokga fu giame uri uruor ijia ajie vain. Fu uruor makaf ijia ajie vakoga e vuak fuon faivo bu ijia usem kari ameoine arekoga fu uri anerene vuak nijaidiain.
MAT 5:3 Jesu fu vuak nijaidiame kia, Eraneb bu oibuon ijia vierafega buka God gakuai vierafeoijo iji buka oimarkfuon. Ijefuon maiji bu e ijekin ijieb e iji God fu oibuon iji samuagdiafo ijiena mazik.
MAT 5:4 Regavo eraneb bu tavan bog ise buon ijiga e kafobuon ise ijiebuon oifian abeoijo e iji buka oimarkfuon. Ijefuon maiji e ijegreoijo iji Godri rad oifian buon iji dasumdiaga bu nido iji bu abeoijo iji bu arek.
MAT 5:5 Regavo eraneb bu tavan bog Godon nifak ijia kabuaikabuaikin karioijo iji buka oimarkfuon. Ijefuon maiji e ijekin iji God fu rad ire ma iji fu vajiakno kiainma iji fu kege bu vajiak.
MAT 5:6 Regavo eraneb bu tavan bog oibuon ijekma vierafega buka God irerag fu vierafemiamo ijesugin igame reokuai vierafeoijo iji buka bomana oimarkfuon. Ijefuon maiji e ijeg vierafeoijo iji Godri ire fok nidosiake bum tavan bog ijia oimarknum karivak.
MAT 5:7 Regavo eraneb bu tavan bog una e roin vierafeoknum buon oifian abe ifejdiafoijo iji buka bomana oimarkfuon. Ijefuon maiji e ijegreoijo iji Godri vef una buon oifian abene ifejdiak.
MAT 5:8 Regavo eraneb tavan bog oibuon buka maturainva iji buka bomana oimarkfuon. Ijefuon maiji e ijekin iji bur God gak.
MAT 5:9 Regavo eraneb bu tavan bog e moik igia karinva iji unam afuime karijo iji abe nijaidiaga bu afurve karijo iji buka bomana oimarkfuon. Ijefuon maiji e ijegreoijo iji Godri kega bu una afijaf rek.
MAT 5:10 Regavo eraneb bu tavan bog irerag God fu vierafe vajiamo ijesugin kegoko e buka vuak ise buisina kuaiknum bu kam unam ise bu vajai fian abekfuon ijia kegoijo iji buka bomana oimarkfuon. Ijefuon maiji bu ijeg vajai fian abeoijo iji bu e iji God fu oibuon iji samuagdiamo ijiena besum mazik.
MAT 5:11 Regavo madu jak jan una e vuak nun faivo iji ren ijefuon e buka vuak ise joisina kuaiknum ja kam unam ise ijia arafiriak. Bu ijegrega jaka vajia fian abene isejavaikfuon. Regavo bu ijegrekva nika uruvana igia oimaref. Ijefuon maiji God fu iji ja ijeg kegoijo ijefuon fun vef roin ire ma iji fok joifuon varur ijia kanafuido ja iji kekfuon. Regavo igia faif. Usuibe e Godon vuak vierafene kuaivo iji e bu unam besum ijia bu kam ijeg arafiriainvano kiain.
MAT 5:13 Jesu fu vuak ijeg kuardiame vake uri vuak be ijeg bijame kuardiain. Fu kia, Eraneb ja na jajivo iji ja e moikigia oinva ijiebuon kujan iji bu duok same iga madiavo igekin. E bu kujan abe duok same ikva marien iji fuka mukor. Regavo kujan marien fuon iji fu bakrekma iji fun ma bado bu dab akozga e bu ijia datuaimok. Ijegvo ja na jajioga fuka aimiaga ja ijia arekva iji ik ja nuifuon reoijo iji fuka mukor barekfuon.
MAT 5:14 Regavo madu eraneb ja na jajivo iji jaiji ja e moikigia karinva ijiebuon rait igekin. Izeg e bu mai be uruor makaf ijia karinva ijefuon rait iji samakaf giavo ijegvo e buka jon rait iji giak.
MAT 5:15 Regavo madu igia faif. Fu erar rait abe saname sauikma bakin gavo buka abe samakaf abede fu sanake e bu karik.
MAT 5:16 Unam besum ijegvo ja uri unam nun ma iji na nijaidiainva ijin reoknum karivaga e bu ijia giaf. Bu unam ma iji ja kegoijo iji giame una Asoijon varur gufia fino iji dab aroifno kiain.
MAT 5:17 Jesu ijeg kuardia vake kia, Ja na ruainva iji jab oi isema vierafek. Jab vierafero na akai usuikor ijiga e Godon vuak vierafene kuaivo ijiebuon vuak bu usuibe isoinva ja giaknum karijo na iji kuriaire ja arekro na ijefuon ruainvaro jab ijeg kuaik. Regavo na ruainva iji nam vuak buon bu isoime nijaidiainva ijiebuon maiji fuka ijekma aresrekfuon.
MAT 5:18 Naka ma kuardiavo igia faif. Na moik igeko varur iji bu vek naoivo iji na vierafega naba vuak akaij ijiga vuak bu usuibe isoinva iji na besum be ba asik. Regavo na vierafega naka ire fok bu usuibe kuaim ruainva ijiebuon maiji besubesum ka reoga buka ijekma aresre barekfuon.
MAT 5:19 Ijefuon erar akai fok bu isoinva ijia akai ukakbe be ba igiaknum una kaifijaf roin nijaidiaga buk ijegrejo e iji fuka ba marem. Ijefuon fu rad guamo ijia fu e iji God fu oibuon iji samuagdiamo ijia fuba e ikin rek. Regavo eraneb bu akai fok igiaknum una kaifijaf roin nijaidiaga buk ijegrejo iji fun mukor reoin. Ijefuon fu guakma fu e iji God fu oibuon iji samuagdiamo ijiena mazik.
MAT 5:20 Ijefuon igia faif. E be erar e akai nijaidiavo ijiga e Ferisisbuon unam bu kegoijo iji fuba asidiame amarigia kegoino e iji fuka ba aresredo fuba e iji God fu oibuon ijia samuagdiamo ijiena mazik.
MAT 5:21 Jesu vuak ijeg kuardiame uri kia, E iji bu akai nijaidiavo bu kuai, Jab e kania bu aoivno kuainva iji jan fain. Ijefuon erar e kana fu guamo e iji bu afeme kot rene dab arafirikfuon.
MAT 5:22 Regavo na kuardiako ni faif. Erar fu uviaifuon iji ziegafamo iji bu madu afeme kot rene dab vajai fian makfuon. Regavo madu erar fu uviaifuon be kua aka e omiseno kuamo e iji bu afeme dab e mamkanuk sos akai samuavo ijiebuon vaga bu dab vajai fian makfuon. Regavo erar fu uviaifuon be kuak aka mukor reno bano kuamo e iji fun koikfuon unam amarme ar ise mian naino ijia vak.
MAT 5:23 Ijefuon ja ire kafo kege Godon ar guf fata ijia isuf barokuai vako ijia ni mukoi vierafekfuon. A vierafega kaion be fu osik zienamiga ni ire a kege vako iji fata samaij ijia name una migegare kekome va. Ni una va kaion iji fusik afuime oimarme ni una isuf on iji kege God baroida.
MAT 5:25 Regavo igia fai. A kaion befuon ire ise be renma fu ijefuon a aferda kot rekafa vierafekma nivek iji jaba e kot faimo iji fino ijia usenva ijia ni migegare una fusik vuak iji kuaim iraseme imut kenami. Regavo bakma fu a aferdame dab e kot faimo ijefuon vaga a nifak fuon ijia vuak on iji kuaik. A kuaiga fu vuak on iji faime fu una foris kiaga bu a dab dibur abesek.
MAT 5:26 Regavo madu igia fai. Bu a dab dibur una a ijia fiknum mon izeg bu kuainva a ijin kime barme ijar ason una kekokno kiain.
MAT 5:27 Jesu fu ijeg kuardiame kia, E iji bu akai nijaidiavo bu kuain, Jab ebuon bara turakno kuainva iji jan fain.
MAT 5:28 Regavo na kuardiakrejo ni faif. E be erar bara be game fum isuar oifuon ijia bara ijek naikafa ijeg vierafeno e iji fun bara ijek naino igekin ijefuon fun ise ren.
MAT 5:29 Ijefuon a vierafega niom on maink besum ijar rekok a ise rejga ni kunaim jafe akoze. Fu niom on besum ijar ise rene vajat on fok fun dab ar ise mian naino ijia akozekredo a ijegrekma iji fuka marek.
MAT 5:30 Regavo madu a vierafega imut on maink besum ijar ire ise kuniaikok a ise rega ni kanafu akoze. Fu imut on besum ijar ise rene vajat on iji fok fun dab ar ise mian naino ijia akozekredo a ijegrekma iji fuka markno kiain.
MAT 5:31 Regavo madu bu kuai, Erar fu bara fuon be abe vo rad fu rotkurakafa vierafekma fuka fefa ukakbe ijefuon isoim mamne kuain.
MAT 5:32 Regavo na kuardiakrejo ni faif. E be erar fu bara be abe ga bara iji fu ebuon baru turamo ijefuon fu rotkuriakma iji fun maren. Regavo bara iji fuba ebuon baru turain gavo baru fuon fum rotkurakma fu una va baru be jakma bara iji fun isema rene ebuon baru turam. Regavo baru erar fu una va bara iji bu abe unainva iji abeno iji fun isema rene ebuon bara turamno kiain.
MAT 5:33 Regavo madu e iji bu akai nijaidiavo bu kuai, Ja Godon if ijia kurame vuak kuaikva jab arek nika irerag ja kuainva iji ka refno kuainva jan fain.
MAT 5:34 Regavo na kuardiakrejo ni faif. Ja vuak ijeg kuaimokva jab e if ijeg kuriame vuak kuaik. Jab varur gufefuon if ijia ga moik igefuon ire kafobuon if ijia kuriame vuak kuaik. Ijefuon maiji varur gufi God fu ijia fino ga moikigi diak fuon iji fu igia kore fino. Regavo jab mai Jerusarem kurak ijefuon maiji mai iji fu God Kin ka ikin ijefuon ar.
MAT 5:36 Regavo madu jab nigen jon ijia kanakanaknum kuaik ijefuon maiji ja daro bado ja izeg nigen jau jon kiaga bu abaiki ga kazin tavuakfuon.
MAT 5:37 Ijefuon a vuak kuaiga e bu kua, Vuak iji abe ma kuaimno kuakva ni keno kia. Regavo a vierafega a kufuimega ni bano kiamne. Regavo a feme una madu vuak kafo buin ijia vierafene kuaimon iji a Setanri vierafe vajaga a iji dab kuaimno kiain.
MAT 5:38 Jesu fu ijeg kuardiame kia, E iji bu vuak akai nijaidiavo bu kuardiame kia, Ja e be fu on ise rega asik una roib ise reno kuaiva iji jan fain.
MAT 5:39 Regavo na kuardiakrejo ni faif. E kafo bu jon ise rekva jab una roib bu ise rek. Ijefuon e be erar fu keko sano on maink ijia kanakma ni areke fu una madu roin ijia kana.
MAT 5:40 Regavo madu fu set on a mon ukakbe ijia kimenma iji abekafa fu uri a aferda dab kot rekma ni madu ugon on ma iji a azan abesmo iji a mon bomana kimenma iji abe ma.
MAT 5:41 Regavo madu ebe fu a kuriaireme kua, In nun guri abe samaij gafia miemne kuakma ni abe biom va aibe ijia ma.
MAT 5:42 Regavo e be fu ro ire kafofuon kuakma ni zinunba abe ma. Regavo fu kuak ire on iji mie na vaikin una abe mamne kuakma ni oimarknum abe maga fu va.
MAT 5:43 Jesu fu ijeg kuardiame kia, E iji bu vuak akai nijaidiavo bu kuardiame kia, Kaifjon ma ijesugin oijmiagavo e ani jon iji ka ziegafiavno kuainva iji jan fain.
MAT 5:44 Regavo na kuardiakrejo ni faif. E ani jon iji amarigia oijmiavo e iji bu jon ise rejknum vajai fian vajiavo iji ni buon sirimamef.
MAT 5:45 Ja ijegrenki ja una God Asoijon varur gufia fino ijefuon afijaf rekfuon. Ijefuon maiji fur veni iji kuaga fu e ise ga ma iji oijo ijiebuon azan ijia sanafiako bu oij. Regavo madu fu ve iji kuaga fu e ise ga ma kegoijo ijiebuon dam.
MAT 5:46 Regavo ja uri e iji bu ja oijmiavo ijesugin oijmiakva iji God fu irerafuon unam ma kafo jon rediak? Unam iji bu e ise takes abeoijo ijieb ijeg kegoijo.
MAT 5:47 Regavo ja uri kaifjon ja vierafenva ijesugin anadiavo iji ja unam mukor sumakin kafo kege una e roin nijaidiavo bakin. Regavo unam ijeg kegoijo iji bu e iji God ma vierafenva bakin ijieb ijeg kegoijo.
MAT 5:48 Ijefuon jak nika maturaime unam ma ijesugin keof. Ijefuon maiji Asoijon varur gufia fino iji fuka maturainma ijefuon jak nika ijeg amarigia e roin oijmiaknum kariofno kiain.
MAT 6:1 Jesu fu ijeg kuardiame kia, Ja ik jon ma iji ja reoijo ijia jab vierafero bu eb kam arorduovoro uri e nifak ijia aroikarame ik reoijo. Regavo ja ijeg kegokva God Asoijon varur gufia fino iji fuba unam ma kafo jon rek.
MAT 6:2 Ijefuon ja e ire bakin iji ire kafo vajiakva jab aramame e nifak ijia vajiak. Regavo ja ifejdiakuai vierafekva ni isuar sauime ifejdiaf. Regavo jab uri e iji bu unam ijia ga ar e bu afuivo ijia vuak ijia mareoijo iji matiavo. E ijegreoijo iji bu kuai, Are e garieb no kam arorduovoro bu ijefuon ijeg reoij ga na igi kuardiakrejo faif. E ijeg kegoijo iji bun ema ijieb siban arordiav. Ijefuon God fu irerafuon una vef unam ma kafo e ijekin ijiebuon rediak.
MAT 6:3 Regavo ja oine e zazaikin ijekin iji ifejdiakva iji nika sauime ifejdiaikin kaifjon jana besum oijo iji bu irerag ja rejo iji buba giame vierafekfuon.
MAT 6:4 Ja isuar ijeg sauime rekin God Asoijon fu unam sauivkin ja rejo iji giakma fu rad vef ijefuon unam ma kafo jon rediakno kiain.
MAT 6:5 Jesu fu ijeg kuardiame kia, Ja oine Godon sirimamekva jab e i kufuikin iji matiame buonak sirimamek. Bu tavan bog Godon ar ijia arume vierafero are eb faivoro buka uri arir ireme jaoijmana sirimamej. Regavo madu buka usem makaf ijia ijeg vierafeoknum sirimameoij. Regavo na kuardiakrejo ni faif. E iji ijeg kegoijo iji bun ema ijieb siban arordiav. Ijefuon God fu irerafuon rad una unam ma kafo vef ijefuon buon rediakma bakin.
MAT 6:6 Ijefuon ja oine sirimamekva jab buonak vak. Regavo nin isuar jonkua va ar guf jon ijia arume vien kam bijume ijia karine Asoijon iji e bu gavo bakin ijefuon sirimamef. Ja ijegrenki Asoijon fu iji ja sauim sirimameko fu giamo iji fu unam ma kafo jon rediak.
MAT 6:7 Regavo ja oine sirimamekva jab e God ba ma vierafejo iji matiame buon ma bakin iji bu kukma sirimamejo ijeg sirimamek. Bu vierafero bu ijeg jaoijmana sirimamega God fuka faikro bu ijeg vierafen.
MAT 6:8 Ijefuon jab bu rejo ijeg kegoijo ijefuon maiji Asoijon iji fu irerag ja fu kuakuai vierafenva iji fun usuibe giame vierafen.
MAT 6:9 Regavo ja sirimamekva ni ijeg sirimamef. God Asoinuvuon kaf gufi samuamo. No if on akaij iji aroiken.
MAT 6:10 No vierafega a ro oinuvuon igi samuaguokfuon. No vierafega izeg varur gufia bu rejo ijeg e moikigia karinva iji bu irerag a vierafeno ijia keok.
MAT 6:11 Ivia duok no nakikmazak iokfuon iji vajuo.
MAT 6:12 Regavo ni izeg e kafobuon ise iji no giame arevo ijeg ni ise nuvuon guome are.
MAT 6:13 Regavo ab no aferduome una unam ise ijia biesuok. Regavo ni ifejduoga no kaven ise Setanon daro ijia no karioijo iji no areme vak.
MAT 6:14 Jesu fu ijeg sirimame nijaidiame kia, Ja ebuon ise giame arekva God Asoijon kaf gufia fino iji fuk ise jon fu giame arek.
MAT 6:15 Regavo ja ebuon ise iji jaba giame arekva God Asoijon kaf gufia fino iji fu ise jon ja renva iji fuba giame arekno kiain.
MAT 6:16 Fu ijeg kuardiame areme kia, Ja oine duok kafo karokuai vierafekva jab uri e i kufuikin bu kegoijo ijeg rejo. Bu kuai are e roib giakuai bu usem e nifak ijia buka vasia abenva igeg oij. Regavo na igi kuardiakrejo faif. E iji bu ijeg kegoijo iji bun ema ijieb siban iji giame arordiav. Ijefuon God fu irerafuon una bu kam arordiakma bakin.
MAT 6:17 Ijefuon ja ire kafo ijeg karokva nin dazme do ruaime nigen bijame oimarknum of. Ja ijegrenki e roin buba ire iji ja karomoijo iji giame vierafekfuon. Regavo fun God Asoijon kaf gufia fino ijar fuonkua unam iji ja jonkua isuar vierafene reoijo iji giakma fu ire ma kafo jon rekfuon.
MAT 6:19 Regavo madu igia faif. Jab moik igefuon sinuom ga mon uruvana kege karik. Ijefuon maiji sinuom mukor fok rad buka muture ga ire farat ijieb ufuseknum vo dedirik revo madu buka e niekib niesak.
MAT 6:20 Ijefuon sinuom moik igefuon iji ja uruvana vierafejo iji arega una varur gufefuon sinuom ijieb uruvana vierafeknum ijefuon ikre. Sinuom iji bu ire farat buba ufuse vo madu buba dedirime iserek. Regavo madu e niekin buba arume niesa ga buba muture ga bujame iserek.
MAT 6:21 Ijefuon tavan bog nika oijon iji fu izer ire jon bu naoivo ijia naoikfuon.
MAT 6:22 Regavo madu igia faif. Niom jon iji fu vajai jon fok ijefuon rait igekin. Ijefuon niom jon iji fu makma vajai jon fok fu mukor sanakfuon.
MAT 6:23 Regavo niom jon fu ise iji ja vierafejo ijar okurakma vajai jon fok iji fuka nakikfuon. Ijefuon vajai jon fok ijefuon sanainma iji fu garekma iji fuka mukor nakido ja izeg una giriesame unam ma iji ja abekfuon iji nisaikva bakin.
MAT 6:24 Regavo madu igia faif. E besum fu izeg uri oifuon fok ijekma e mamkanuk nokarok (2) ijiebuon ikrekma bakin. Regavo fu ikrekma iji fu e be fuka mukor oijmagavo una be iji fuba mukor ifejdak. Regavo madu tavan bog e be iji fuka amarigia fuifuon ikreknum igak gavo una e be iji fum ni iken gaok. Ijefuon ja moik igefuon sinuom ijiga mon iji uruvana oijmiaknum vierafekva iji ja izeg una amarigia God igame tavan bog fuifuon ikrekva bakin.
MAT 6:25 Ijefuon na igi kuardiakrejo ni mukoi faif. Jab tavan bog uri vajai surif ijefuon duok ga do ja ik ga ugon ja sakfuon iji uruvana vierafeok. Ijefuon maiji duok ijiga sinuom iji bu ikin bakin. Regavo vajai jon ijiga jon ja karivakfuon ijar fuka ma ire bomana ijefuon ja ijar bomana vierafekfuon.
MAT 6:26 Regavo madu nin um ukakna gufi bu oijo iji giaf. Buiji bu ire uij abejknum ga kanafui navo bakin ga fun Asoijon varur gufia fino ijar bu fuka amarigia samuagdiam. Regavo jaiji ja um iji God fu oijmiamo ijekin bakin ijefuon maiji jaiji ja Godon nifak ijia jaka ma ikin.
MAT 6:27 Ijefuon erar fu vajai surif ijefuon ire iji uruvana vierafeoino iji fu juaivasia fuon iji abe biom jiamana abedeme fivakma bakin.
MAT 6:28 Regavo madu jab karine ugon ja sakfuon ga kekfuon ijefuon uruvana vierafek. Regavo madu ni sinar tarar gamia irenva iji giaf. Buiji bu ikrene koikbuon ugon buon bu savo iji amariavo bakin ga bum ijia ireme ni buon ka mukor iji irav.
MAT 6:29 Regavo igia faif. E bomana moik samuamo ga ka sinuom zarainma be e Soromon fuka ugon uruvana ni mukor kafokafo iji ken. Regavo ugon ni mukor fuon iji bu sinar ijiebuon ni kafokafo bu iravo ijar ugon ni iji fuka ma asidiain.
MAT 6:30 Regavo madu igia faif. Garas iji bu ivia ijia irega e bu giav revo niar bu karajavori bun naoime barev. Ire garas iji buka ire ukakna ga God fuka vek bu samuagdiam. Ijefuon e guri ka ma vierafeoijo bakin gurie jaiji ja garas ijekin bano oifian ja abeoijo iji aref. God ja fuka ma amarigia samuagdiam ijefuon jaka fu ma vierafekfuon.
MAT 6:31 Regavo jab uri duok ga do ga sinuom ijiebuon kari uruvana igia vierafero note izia ire fok karekro karine ijeg vierafek.
MAT 6:32 Unam ijeg ja karine sinuom ga duok ga do ijiebuon uruvana vierafeoijo iji bu e iji God ma vierafejo bakin ijieb ijeg rejo. Regavo jaiji fu Asoijon varur gufia fino iji fu irerag fok ja kege karivakfuon iji fun amur giame vierafen.
MAT 6:33 Ijefuon ni izeg God fu oijon iji samuagdiakfuon iji bomana vierafe vo unam fuon ma iji fu vierafenma ijar abe amur vierafene keof. Ja ijegrejknum kariokva fur koikfuon una madu ire iji ja kege karivakfuon iji kafo ifejdiak.
MAT 6:34 Ijefuon afikin niarfuon iji jab karine uruvana vierafek. Ijefuon maiji fu God Asoijon ijar afikin niar ja abekfuon iji fur ifejdiak. Ijefuon ni isuar oij asusame afikin iji fu tavan kafokafo ijia roko iji besubesum giaknum kariofno kiain.
MAT 7:1 Jesu fu ijeg kuardiame kia, Ja e kafobuon ise iji jaba giame kuaikva God fuba vef ise jon iji giame una ijefuon kiak.
MAT 7:2 Ijefuon maiji God fu unam izeg ja e kafobuon ise iji giame kuaivo ijeg fu vef ise jon iji giame una ijefuon kiak. Regavo madu unam izeg ja una e roin ijiebuon ja rejo God fu una vef ja ijeg rediak.
MAT 7:3 Ijefuon a irerafuon uviaion ijefuon kafut ukakbe fu ni fuon ijia namo iji game kuagavo una kafut bomana iji fu ni on iji namo iji aba gam?
MAT 7:4 A ni on kafut iji fu vek ijia namo iji a izeg una uviaion kua, Uviainu ro na ni kafut guraiji sadainma iji kedavno kuak. E guri ka iti kufuikin gure amur ni on ijia kafut bomana iji sadainma iji ke akorme ni ijar una kafut ukakbe iji fu uviaion ijefuon ni ijia namo iji game ke akozemne. A ni on kafut iji aba ke akozekma ab una uviaion ijefuon iji game kuaik.
MAT 7:6 Regavo na kuardiainva ijeg jab Godon vuak akaij iji abe va e iji bu vuak ma iji faikuai uzavo ijin kuardiak. E iji bu ire mon igi bu kege maf iji vajiavo igekin. Maf iji bu ire mon iji kege irerag abekfuon iji bu vierafenva bado bu kam datuaik. Ijegvo jaba mukor giaknum vuak nun ma iji abe va e iji buba oimarknum faikuai vierafenva iji kuardiakva buka uzak. Buka ada bijume una vuak jon bu ke karoime una buon ijia kuardiaknum kam kania arafiriakno kiain.
MAT 7:7 Jesu fu ijeg kuardiame kia, Ja ire kafo vierafekva nika Asoijon varur gufia fino iji kuardaf. Ja kuardakva fu irerag ja kuavo iji fuka vajiak. Regavo ja ire be nisaikva nika giriesame magaga nisaikva God fu nijaidiaga ja gak. Regavo madu ja ire kafo vierafene ar fuon vien ijia kanakanakva fu vien dajame ifejdiak.
MAT 7:8 Ijefuon maiji eraneb ja God tavan bog ire kafofuon kuavo iji ja karekfuon. Regavo eraneb ja nisaikva ja giak. Regavo madu eraneb ja vien ijia kanakanavo iji fu vien dajame ifejdiak.
MAT 7:9 Regavo igia faif. A ebe erar farifon iji fu iro fuon kuakma abe una mun abe mak?
MAT 7:10 Regavo fu kijumfuon kuakma abe una tabar abe mak? Iji fuka ma bakin.
MAT 7:11 Jaiji ja e ise rejo ga amjon bu ijeg ire kafofuon kiakva jaka uri ire ma iji bu kiavo iji kam vajiakfuon. Ijegvo Asoijon iji varur gufia fino iji fu eraneb bu kuakva fu ire ma iji vajiak.
MAT 7:12 Regavo ja e kiaga bu joifuon ire kafo rediakva iji ni jasik una vef buifuon izeg bu joifuon renva ijeg rediakfuon. Ijefuon maiji akaij iji e Mosis ga e Godon vuak vierafene kuaivo bu usuibe isoinva iji no ijeg kegokuai bu ijefuon isoinvano kiain.
MAT 7:13 Jesu fu e vuak fuon faivo iji vuak kuardia vake kia, Ja unam ma iji ma karivako iji abekuai vierafekva ni vien ukak ijia aru vaf. Regavo unam iji fuka ma ukakbe ijefuon bu e sibank ijia vak. Regavo unam iji bu ar zuarunam ijia vako iji fuka ma bomana ijefuon e uruvana buka ijia vakno kiain.
MAT 7:15 Jesu fu ijeg kuardiame kia, Ja okva ni e i kufuikin iji bu vuak nun abe kuaimoijo iji mukor giaknum of. Bu ja karinva ijia roko iji buka e ma ga mukoi kego igekin. Regavo oibuon ijia izeg bu vierafeoijo iji buka siroij kuriai igekin. Bu jon ja ma vierafejo iji kam arafiriakuai reoij.
MAT 7:16 Regavo izeg ja bu ma vierafekfuon iji ja unam buon bu kegoijo ijia giakfuon. Regavo igia faif. In ifuor iji fube manine sunin ma iji bu ijo iji kirak? Regavo madu ja vierafe ufien ise gurogino kuavo juar ijia irenva iji bube sunin ma iji e bu ijo iji kirak? Iji fuka bakin.
MAT 7:17 Regavo in mukor iji fuka manine sunin fuon ka mukor ijesugin kirak vevo fuba sunin ise ijekma kirak. Regavo in ise iji fuba sunin ise kiraknum ga sunin ma iji kirak.
MAT 7:19 Ijefuon in iji bu ireme sunin ma iji ba kiravo iji bu ufu karose mian jaga fu ijia nai barek.
MAT 7:20 Ijefuon e i kufuikin iji bu vuak nun abe kuaimoijo iji ja unam buon iji bu kegoijo ja ijia giame vierafek.
MAT 7:21 Regavo igia faif. E fok bu na kie, E Bomanakono kiev. Regavo na vierafega e fok buka una e iji God fu oibuon iji samuagdiamo ijia buna mazikva bakin. Regavo bun e iji bu Asoinun iji varur gufia fino ijefuon ik iji fu vierafeno iji reoijo ijieb Godon e ijiena mazik.
MAT 7:22 Regavo vake tavan ka bomana ijia e uruvana bu uri kiek, E Bomana no if on ijia Godon vuak abe e kuardiainvano kiek. Regavo madu bu kiek no if on ijia kaven ise rotkuriaknum unam sumakin kafo renvano kiek.
MAT 7:23 Areme na uri samakaf kiak, E guri ka God igavo bakin gurie, Jaiji naka ba vierafenvano gareg vafno kiak.
MAT 7:24 Ijefuon igia faif. Eraneb bu vuak nun igi mukor faime igiavo iji bu e iji fu mukor vierafeknum ar fuon iji munuag azan ijia sainma ijekin.
MAT 7:25 Fu munuag azan ijia ar same arekoga ve dame do firame ar iji abekafa arafirikoga buibur bomana ufime ar iji aben. Regavo ar iji fuba tuame bujain gavo fuka giremanin. Ijefuon maiji e iji ar fuon iji fuka munuag ka gigikin ijefuon azan ijia sain.
MAT 7:26 Regavo e fok eraneb bu vuak nun igi faime ba mimatavo iji bu e iji fuba mukor vierafene ar fuon iji abe jier azan ijia sainma ijekin.
MAT 7:27 E iji fu ar fuon jier azan ijia same areko ve buikma dame uri do firain. Fu firame keko ar iji bijamga fuka tua dijeme bujase iserenmano kiain.
MAT 7:28 Jesu fu vuak fok ijeg kuardiame barekoga e fok ijia karinva iji bu vuak fuon iji faiva buka oiserdiain.
MAT 7:29 Ijefuon maiji fu ebuon vuak akai nijaidiavo ijekin iji fu bakin gavo fuka e daro bomana abenma igeg nijaidiain.
MAT 8:1 Ijegreare Jesu fun e iji funa oijo ijiena uruor iji areme una ari vako e ka uruvana bun uri fu jain.
MAT 8:2 Bu ijeg ja vako ijia e be adam kasi igekin bu kua refrosi kuavo iji abenma ijar kekome Jesu vako ijia ruain. Fu ijia keko ato same kua, E Bomana a oimarkma ni vajai nun igi amardiega na una madiemno kuain.
MAT 8:3 Fu ijeg kuamga Jesu fu imut akozme niriaknum kua, Na amardakro vierafenvano kuain. Fu ijeg kuardako ve ijia adam refrosi iji fu bakiten.
MAT 8:4 Jesu fu uri kua, Ab va e kafo irerag na on renva iji kuardiagavo nin amur va e God isuf baroidamon iji vajat on iji abe fu nijai. Areme ni ire kafo kege e Mosison akaij iji fu kuainma ijeg una God isuf baroga e bu ijia game vierafero adam on iji fun barenmaro bu ijeg vierafekno kuain.
MAT 8:5 Ijegreare tavan be Jesu fun roke ar Kafoniam kekomga e Romkobuon e bomana be ijia fino ijar kekome fu bien. Fu vierafega Jesu fuka fu ifejdakro fu ijeg vierafen. Ijefuon fu keko Jesu dab soisoime kua, E Bomana enun ik reno be fu adam bomana abene fuka vajai gareme ar gafia nam. Regavo fuka vajai fian bomana abene isejavaimno kuain.
MAT 8:7 Fu ijeg kuardamga Jesu fu kua, Iji fun mardo na vua amardaga fu una maikno kuain.
MAT 8:8 Jesu fu ijeg kuardamga e iji fu kua, E Bomana na e ma bado a ar nun ijia aba vuak. Regavo nin ir on ijia kuaike enun ik reno iji fu una maimne. Na ma vierafega a vuak irerag ir on ijia kuaikma ire iji fuka rek.
MAT 8:9 Ijefuon maiji nak na enun mamkanuk vuak irerag bu kuardievo na ijia kegoijo. Regavo madu e bijaivo roin bu rotit nun ijia ikrejo. Ijefuon na e be kua vakne kuakva fu vak. Regavo na be kua rokne kuakva fu ruak. Regavo na una enun ikreno iji be kua ire igi rene kuakva fu rekno kuain.
MAT 8:10 E iji fu ijeg kuardamga Jesu fu vuak ijin faima fuka uruvana igia oiseren. Ijefuon fu una dakaroim e iji bu fu ja vako iji kia, Na ar Isrer guf igia e kafo bu e igi fu ma vierafenma ijeg ma vierafenva iji kafo naka ba giain.
MAT 8:11 Regavo naka ma kuardiavo igia faif. Bu e Jius ijesugin bakigavo buka e uifarif kafokafo ar iror fok igi tavan ajiemo ga koino ijia e ma vierafejo uruvana e igekin iji bu e iji God fu oibuon iji samuagdiamo ijiena mazikfuon. Bu e Eburam ga Aisek ga Jekaf ijiena fata ijia karine duok ik.
MAT 8:12 Regavo e Eburamon uifarif iji bu vierafega bu e iji God fu oibuon iji samuagdiamo ijiena besum karine duok ikfuon iji God fu rotkuriaga bu usek. Bu usem makaf nakinman ijia niraime ubai jakinamikno kiain.
MAT 8:13 Jesu fu ijeg kuardiame una e iji kua, A na ma vierafenma ijefuon irerag a kuardienma iji na ifejdakno ni una vakne kuain. Jesu fu e iji ijeg kuardamga efuon ikreno iji fu ve ijia una main.
MAT 8:14 Areme Jesu fu e Fitan ar ijia aru vagak Fitan barak ijefuon asiej iji fu vajai vuaturiga fu ijia nam.
MAT 8:15 Fu ijia namga Jesu fu arume imut kega vajai vuat iji urino iji fun baren. Fun baremga bara iji fu uri duok vajiaknum bu samuagdiain.
MAT 8:16 Areme tavan fun nakisrenma ijia e uruvana bun uri e iji bu kaven ise ninarukiainva ijin aferdiame Jesuon ruain. Bu rokga Jesu fu kaven ise iji kuriaireme kiamga bu e iji areme usem vaknum e uruvana adam abejo iji amardiamga bu una madiain.
MAT 8:17 Jesu fu ijegrega vuak iji Aisaia e Godon vuak vierafene kuaimon fu usuibe kuainma iji fuka ijekma aresren. Regavo vuak iji fu ijeg isoime kuai. Fu koikfuon adam nuvuon fok kafokafo fur kiaga bu barekno kuain.
MAT 8:18 Areme tavan be Jesu fu giak buka e uruvana fu fino ijia zaraivga fu giain. Ijefuon fu uri e vuak fuon faivo iji kiamga bun uri do iji daturaiko nafuinma iji vajame gara vain.
MAT 8:19 Bun ik vakrejo ijia e vuak akai nijaidiamon be fu roke Jesu fino ijia kekoin. Fu kekome Jesu kuai, E nijaidiamon nan samuaido a izia vakma na osik ijia vakno kuain.
MAT 8:20 Fu ijeg kuardamga Jesu fu una roin kua, Iji a ma kuaim ga igia fai. Siroij taraiko foksno kuavo ijiga um iji bu mako ga nait buon bu amarenva bu ijia kariknum oijo. Regavo ema igiebuon farif igi naiji na ar nun na ijia fiknum ga nai fu madiega na una uri ik reokfuon iji na bano kuain.
MAT 8:21 Fu ijeg kuardakoga e vuak fuon faimo be fuk kekome Jesu kuai, E Bomana na a jakafie vierafen. Regavo ni areke na va asoinun samua fu guaga na abe mako rume una javno kuain.
MAT 8:22 Fu ijeg kuardamga Jesu fu una roin kua, E iji ba Godon vuak faivo iji bun aoinva igekin ijefuon nin are bur e iji aoivo iji kege mako ruf. Regavo aiji ani uri na jajiemne kuain.
MAT 8:23 Areme Jesu fun vanag be ijia ajiemgame e vuak fuon faivo iji bun funa ijia ajien.
MAT 8:24 Bu ijia ajiekoga migegare buibur ka bomana ijar ijia ufikok do iji fuka firame foikoga vanag iji dab dakaroikafa ren. Regavo Jesu fuiji fun ni nain.
MAT 8:25 Buibur iji fu ijegrega e vuak fuon faivo iji bu uri Jesu saknum kua, E Bomana noiji noka aoikuai rejno ifejduomne kuain.
MAT 8:26 Bu ijeg kuardavga Jesu fu uri kia, E guri ka ba bomana ma vierafejo gurie jaiji ja irerafuon juvno kiain. Fu ijeg kuardiame uri buibur ijiga do iji firame foino iji ir fuon ijia kuriaireme bijuin. Fu bijumga do ijiga buibur iji bun ijia arekogame do iji fun una izeg ur fu nainma ijeg nain.
MAT 8:27 Fu ijegrega e vanag ijia karinva iji bu ire iji renma ijin gava buka oiserdiain. Buka oiserdiamga bu uri bui kuai, E iji fu e izekido fu buibur ijiga saof guri bijukuriamga buka fu igainvano kuain.
MAT 8:28 Areme Jesu fu vake moik Gadara do gara ijia kekoin. Fu ijia kekomga e nokarok (2) kaven ise ijieb ninarukiainva ijieb munua tit iji bu e aoiga bu ke uniavo ijia usem ruain. E nokarok (2) iji buka e ise ga ka e darokin ijefuon e bu ar iji bu karijo samaij ijia bu vako bakin.
MAT 8:29 Ijefuon bu Jesu vakga bu uri biumame kume, Godon Farif gafe a noiji a kege irerag abekafa vierafen. Iviakma tavan igi fu tavan ma bakin ijefuon ab no kege arafiruomno kumen.
MAT 8:30 Regavo ar iji bu irenva samaij ijia buka maf uruvana ijia kunuimoij.
MAT 8:31 Ijefuon kaven ise nokarok (2) iji bun uri Jesu soisoime kua, E-e ni kuoga no usem maf gafi ajiemdiavno kuain.
MAT 8:32 Ijefuon Jesu fu uri kia, Ja iviakma e iji areme usem vafno kiain. Fu ijeg kiamga kaven ise iji bun e nokarok (2) iji areme usem maf iji ajiemdiain. Bu usem ajiemdiavga migegare maf iji bun subinai uruor ka ise ijia arime do ijia urame do ine aoim baren.
MAT 8:33 Maf iji bu ijegrejga e iji maf samuagdiavo bu ire iji renma iji game bun subinai una mai bomana ijia vain. Bu va gafia useme ire iji renma ijin e fok kuardiain. Bu maf iji bu renva iji kuardiame madu uri e nokarok (2) iji bu kaven ise ijieb bu kam ninarukiavo iji izeg bu renva iji kuardiain. Ijefuon e fok mai guf ijia karinva iji bun uri Jesu biekuai useme vain. Bu usem va Jesu bieme uri soisoime kuavga fu mai iji areme una ar be ijia vain.
MAT 9:1 Areme Jesu fun vanag abe do iji vajame una gara ar fuon ijia vain.
MAT 9:2 Fu ijia vakga e roin bu e vajai garenma iji dab fata ijia uname abe fuon ruain. Bu afeme fuon rokga Jesu fu uri izeg e iji bu fu ma vierafenva iji giain. Ijefuon fu uri e iji kua, Farinu a mamoimo ijia giriesamne. Ise on iji nan game arenvano kuain.
MAT 9:3 Jesu fu ijegrega e vuak akai nijaidiavo roin bu iji game una isuar bui kuai, E iji erar fu God asikro fu vuak ijeg kuaimno kuain.
MAT 9:4 Bu ijeg isuar karine bui kuaivga fun giame uri kia, Ja irerafuon isema vierafene karine kuaiv?
MAT 9:5 Ja vierafega naba e igi kuaga fu suf fuon kara tuame uri vak? Nabe kuak ise on iji nan game arenvano kuak. Vuak nokarok (2) iji na izar e guri kuardaga ja ijia gieme na ma vierafekfuon?
MAT 9:6 Ja naba ma vierafejo ijefuon na nijaidiaga ja ijia game ma vierafek. Ja ijia vierafero Emabuon Farif igi na daro abedo na moikigia ebuon ise iji na giame arevro ja ijeg vierafek. Fu ijeg kuardiame uri e vajai garenma iji kuai, Ni uri suf on iji kara tuame ar vakne kuain.
MAT 9:7 Fu ijeg kuamga e iji fu uri suf fuon iji karatuame fun ar vain.
MAT 9:8 Fun vako e fok bu iji gava buka dejufdiamga bu uri God dab aroin. Ijefuon maiji God fu e moikigia oijo iji daro miaga bu ire sumakin ijekin iji rej.
MAT 9:9 Ijegreare Jesu fun ar iji areme vako ijia fu e Metiu e takes abeoinon iji bien. Fu ar fu fine ikreno ijia bieme kua, Ik on iji a reno iji areme na jajiemne kuain. Jesu fu ijeg kuamga Metiu fun ve ijia uri ire iji fu reno iji fuka ijia areme uri Jesu jame vain.
MAT 9:10 Ijegrene rad Jesu fun va e Metiun ar ijia kekome fusik fine duok in. Fu ijia fusik duok ikogame e takes abesvo ijiga e ise reoijo uruvana bu usem Jesuga e vuak fuon faivo ijiena karine besum duok in.
MAT 9:11 Bu ijegrejga e Ferisis roin bu giame una e Jesuon vuak faivo iji kia, Ja ejon e vuak nijaidiamon iji fu irerafuon e takes abejo ijiga e ise reoijo ijiena duok ino kiain.
MAT 9:12 Bu ijeg kuardiavga Jesu fun faime uri vuak be ijeg bijame kia, E adam bakin iji fuba e adam giamo iji vierafek ijefuon maiji fu adam bakin. Regavo fu e adagin ijar e adam giamo iji kuaga fu ifejdaga adam fuon fu una maik.
MAT 9:13 Ijegvo ni e Osea vuak be fu usuibe kuainma iji nisaim dame vuak ma iji gaf. Regavo vuak iji bu ijeg isoime kuai, Naiji e bu fanuf ijia kania isuf baroijo iji na bomana vierafejo bakin. Regavo na e iji bu una kai kafobuon oifian abejo ijar naka bomana vierafejno kuain. Ijefuon na ruainva iji na e iji bu maturainva ijiebuon ruainva bakin. Regavo na e iji bu ise reoijo iji karauniakro ruainvano kiain.
MAT 9:14 Areme Jon e do ruardiamo ijefuon e vuak fuon faivo iji bu roke Jesu fino ijia useme kua, Noiji e Ferisis ijiena tavan uruvana no duok karovo. Regavo eon vuak faivo iji buba ijeg duok karov revo buka duok ijno kuain.
MAT 9:15 Bu ijeg kuardavga Jesu fu una vuak be ijeg bijame kuardiain. Fu kia, Tavan iji barubara bu sanamikuai duok ijo ijia e baru iji fu ijia fike bu e ruainva iji kia bu ire karome karine una oifiaigma vakva bakin. Buka oimarknum karine besum duok ik. Regavo buson rad tavan be baru iji fu bara iji afeme ai be vakma ijia e iji bu ijiason buifuon oifian abene duok karokno kiain. Unam besum ijegvo naiji na e iji fu bara abekreno igekin ijefuon na vek e vuak nun faivo iji buna fioijo ijia no besum oimarknum duok besum ik. Regavo tavan rad e ani nun iji bu na aferdiefe kaniga na guakva ijia bu nuifuon oifian abene duok karokno kiain.
MAT 9:16 Jesu fu ijeg kuardiame uri vuak be izeg e Ferisis ijiebuon unam usuikor ijiga unam fuon iviamkor iji buba kege besum arunamikfuon ijefuon bijame kuardiain. Fu kia, E be fu erar ugon iviamkor be abe una usuikor ijekma sigukma bakin. Ijefuon maiji fu ijegrekma ugon usuikor iji fuka bomana bujakno kiain.
MAT 9:17 Unam besum ijegvo fu erar vuain iviamkor iji abe una kamuij usuikor iji bu fanuf surif ijia amarenva ijia usekma bakin. Regavo fu ijegrekma kamuij usuikor iji fuka sisuikene bujaga vuain iviamkor iji fuk fuka usekma iji ire nokarok (2) iji buka iserek. Ijefuon vuain iviamkor iji buka kege una kamuij iviamkor ijia usekin ire nokarok (2) iji buka markno kiain.
MAT 9:18 Jesu fu vek vuak iji kuardiamo ijia e bomana be e Jiusbuon ar ukakna bu afuime vuak kuaivo iji samuamo iji fu roke ijia kekoin. Fu kekome Jesu manino nifak ijia atosame kua, Na kabainun iji iviakma fuka guain. Regavo na vierafega aka nosik vaikin a imut on ijia vajai fuon iji niriaga fu una uri oino kuain.
MAT 9:19 Ijefuon Jesu fun uri fusik vako e vuak fuon faivo iji bu uri buna vain.
MAT 9:20 Regavo bara be fu ijia buna vako iji fu ise fi roke fun juaivasia tuer (12) ijeg baren. Regavo kavuan iji arimo iji fuba baren. Bara iji fu Jesuon nuon ijia ja vaknum vierafero fu Jesuon ugon buin ijia niriakma adam fuon fuka barekro fu ijeg vierafene uri ugon buin ijia niriain.
MAT 9:22 Bara iji fu ijegreko Jesu fun faime una dakaroim kua, Kabainu gufe a jumo iji arega giriesamne. On a ma vierafenma ijar adam on iji fun mukor barenmano kuain. Fu ijeg kuardako migegare bara iji fun ijia una main.
MAT 9:23 Ijegreare Jesu fun e bomana ijefuon ar ijia aru vaga e uruvana bu ijia karine niraiknum mario foiknum ka uruvana irovajav.
MAT 9:24 Bu karine ijegrejga fu arume kia, Bara ukak iji fuba guain revo fum ninainmano ja niraivo arega ni usem makaf gafia vafno kiain. Jesu fu ijeg kuardiamga e fok bu uri fu dab varaimene kijdain.
MAT 9:25 Fun ijeg kiamga e fok bun usem makaf ijia vakga Jesu fun bara ukak iji namo ijia aru vain. Fu arume imut kega bara ukak iji gua namo iji fu una urin.
MAT 9:26 Fu ijegrega e fok ar mai samaij ijia karioinva bu ire sumakin iji renma iji fain.
MAT 9:27 Areme Jesu fun mai iji areme una ar be vakro vakgame e nizuriaigin nokarok (2) bu usem fu jame dab arafiri vain. E nokarok (2) iji bu ja vaknum kume, E Devidon uifarif gafe a no guoga oifiadaga ni ifejduomne kumen.
MAT 9:28 Ijegrene Jesu fun vake ar ijia kekome ijia aru vakgame e ni zuriaigin nokarok (2) iji buk bun ijia jame aru vain. Bu aru vakga fu uri kia, Ni jon iji na amardiaga bu una marek gavo jabe na ma vierafekno kiain. Fu ijeg kiamga bu una kua, E Bomana no ma vierafega a aresredo a ni nuvuon igi una amarduokno kuain.
MAT 9:29 Areme Jesu fun uri ni buon ijia niriakdiaknum kia, Jon izeg ja ma vierafenva ijar ni jon iji bu una naravno kiako ni buon iji bu ijia una narain.
MAT 9:30 Bun ni naraga Jesu fu kuriairene kia, Ja vakva e kafo ire iji na rediainva iji jab kuardiakno kiain.
MAT 9:31 Fu ijeg kuriaire gavo buka magaga Jesuon vuak iji dab ai mai samaij ijia karioinva ijia kuaime vain.
MAT 9:32 Ijegrene e nokarok (2) bun usem vakoga bu una madu e be afeme Jesuon ruain. Regavo e iji fu kaven ise ijar niroinma fu vuak kuaimon bakin.
MAT 9:33 Bu e iji afeme rokga Jesu fu migegare kaven ise iji kuamga fu e iji areme keko vako e iji fu ijia una vuak kuain. Fu una vuak kuaimga e fok buka oiserdiamga bu kuai, No usuibe ar Isrer igia ire ijekin be noka ba gainvano kuain.
MAT 9:34 Regavo e Ferisis roin bu kuai, E iji fu kaven ise ijiebuon e bomana ijefuon daro iji abenma ijefuon fu iji kaven ise iji kiaga bu i fuon iji faime usem vakno kuain.
MAT 9:35 Ijegrene Jesu fun ar besubesum Gareri guf ijia ura giaoknum va e Jiusbuon ar ukakna bu afuime vuak kuaivo ijia arume vuak nijaidiaoin. Fu ijegrejknum e iji vuak ma iji God fu izeg oibuon iji samuagdiamo ijefuon vuak iji kuardiain. Fu ijegreknum e iji bu kavek kafokafo abejo ijigam adam abejo iji amardiain.
MAT 9:36 Jesu fu ijegrejknum uri e uruvana bu unam kafokafo ijia oifiaigma oijo iji giama fuka bomana oifiain. Ijefuon maiji e iji buka unam kafokafo maf-sif iji bu e samuagdiamo bakin igeg buka oifian ga afikin abeoijo fu iji giain.
MAT 9:37 Ijefuon Jesu fu una dakaroim e vuak fuon faivo iji kia, Godon juar ijia ire iji na giamga buka uruvana duin. Regavo e iji bu juar iji masime ire ijin kanafum ar ma ijia nakfuon iji buka sibank.
MAT 9:38 Ijefuon uri sirimame God juar iji samuamo iji kuardaga fu una e juar ijia ikrekfuon iji kafo kega bu juar ijia ire iji masime una ar ma ijia nafno kiain.
MAT 10:1 Jesu fun e vuak fuon faivo tuer (12) iji kiamga bu rokga fu daro fuon iji miain. Fu daro iji bu abe kaven ise kiaga bu e iji areme vakfuon ga e adam abejo iji amardiakfuon iji miain.
MAT 10:2 Regavo e vuak fuon abe oijo tuer (12) if buon iji igin. Amur iji e Saimon e iji bu kua Fitano kuavo ijiga uviaifuon e Edru ijin ken. Areme ura nokarok (2) iji fu e Zebedin afijaf nokarok (2) no uviaiki e Jeims ko Jon ga ura e Firif ko Batoromiu iji ken. Areme ura e Tomas ko Metiu e iji takes karmo ijiga e Arfiason farif Jeims ko e Tadias iji ken.
MAT 10:4 Areme ura e Saimon e iji bu kua Serotno kuavo ijiga Judas e iji bu kua Iskariotno kuavo e iji fu Jesu abe una e ise rejo iji miainma ijin ken.
MAT 10:5 Jesu fu e tuer (12) e iji ik fuon rekfuon ijin kege ar guf ijia uniame vuak ijeg kuardiamga bu vain. Fu kia, Ja vakva jab e Jius bakin ijiebuon moik ijia vako revo madu e Sameriakobuon mai ijia kafo jab aru vak.
MAT 10:6 Regavo ja vakva nin e Isrerko iji bu maf-sif igeg sauime ka isema karioinva ijiebuon ar ijia vaf.
MAT 10:7 Va bu karinva ijia vuak igi kuardiame kia, Tavan iji God fu efuon ijiebuon oij iji samuagdiakfuon iji fun samairenmano kiaf.
MAT 10:8 Ja va vuak iji kuardiaknum vo e adagin iji amardia bu una madiaknum vo e aoivo iji kia bu una urif. Regavo madu e iji bu adam refrosi abejo iji amardia bu una madiav. Regavo madu ni e iji bu kaven ise ijieb ninarukiainva ijin kuriaireme kiaga bu e iji areme usem vaf. Regavo igia faif. Daro nun igi na vajiainva iji ja mon kime kenva bakin. Ijefuon irerag ja va kegoijo iji jab una vef ijefuon ire kafo karekuai vierafek.
MAT 10:9 Regavo madu igia faif. Jab ire gord ga sirva ga mon kavuan kafo kege ok.
MAT 10:10 Regavo madu jab e iji bu ire kafofuon ninamivo iji matiame kamuij mamkanuk kege ok. Regavo jab ugon ja savo iji uruvana ke ok ga jab diak surif ja savo ga guduar ja bijuasamoijo iji kafo kege ok. Ijefuon maiji irerag fok e ikreoijo bu kekfuon iji bu e iji bu ifejdiavo ijieb samuagdiaknum ifejdiak.
MAT 10:11 Regavo madu igia faif. Ja oine mai mamkanuk kafo ijia vakva ni giamga e be erar fu ja oimardiaknum aferdiaga ni ijia funa karif. Ja ijia funa karine vo nin ar iji areme vaf.
MAT 10:12 Regavo ja gire be ijia ajiekva ni e ijia karinva iji mukor anadiame oimardiaf. Regavo ja ijia ajie vaga bu ja oimardiaknum aferdiaga ni ifejdiame sirimame God kuaga fu bu samuagdia. Regavo buba ijeg ja oimardiame aferdiaga jab sirimame God kuaga fu bu samuagdiamo.
MAT 10:14 Ja afuime ar guf ijia oga e buba ja oimardiame aferdiakva ni ar ga mai iji areme vaf. Regavo madu ni uri diak surif jon ja savo iji azome kuotuvat iji kaniaseme ni ar iji areme vaf. Ja ijegrekin e mai ijia karinva bu giame vierafero ja bu jan mukor magiainvaro bu ijeg vierafek.
MAT 10:15 Regavo vuak igi naka ma kuardiav, Tavan radkma iji God fu una moikigia e ise kegoijo iji kege mazim giakma ijia ar Sodom ko Gomora iji fum sibank kege arafiriaken. Regavo una e iji eraneb bu ja nuigafiavo iji fuka kam unam ise ijia arafiriaga bu vajai fian abek.
MAT 10:16 Regavo igia faif. Jaiji na um kukoro igeg kege e ise siroij kuriai e jakiavo igekin uf ijia uniaga ja vak. Ijefuon ja va ik reokva ni amarigia jon samuanamiknum oij asusame kabuaikabuaikin ik jon ma ijesugin reof. Regavo jab uri bijaiknum vo ire ise kafo rega bu ja kam arafiriak.
MAT 10:17 Regavo ja okva ni e iji mukor giaknum of. E iji buka oine ja tofdiame kam e kot faivo ijiebuon vakfuon. Regavo madu buka e Jiusbuon ar ukakna bu vuak kuaivo guf ijia fijiakfuon.
MAT 10:18 Regavo madu ja nuifuon ik reoijo ijefuon e bu ka ja tofdia kam e kin kafo ga e Romkobuon e mamkanuk ijiebuon vakfuon. Bu aferdia ijia vaga ja e mamkanuk iji abevo e Jius bakin ijiebuon nifak ijia ireme Godon vuak ma iji kuardiakfuon.
MAT 10:19 Bu ja ijeg tofdiame aferdia vaga jab uri oiserdiamo. Regavo madu jab vuak irerag ja bu kuardiakfuon iji ga madu izeg ja kuardiakva ijefuon oifian abek. Ja tavan ijekin iji biediavo ijia vuak irerag ja una bu kuardiakfuon iji jam jar vierafekva bakin. Regavo vuak iji fu Asoijon ijefuon Kaven Akai ijar vif vajiaga ja kuardiakfuon.
MAT 10:21 Regavo vake tavan iji e bu uri e nuifuon ikrejo iji kania bu aoivo ijia e buka uri uviaifijaf ga afijaf iji koikbuon kege una foris vajiaga bu kania bu aoik. Regavo madu am iji bu una karoime eofijaf iji koikbuon sivisaga foris bu va kania bu aoik.
MAT 10:22 Ja nuifuon ikrejo ijefuodo e fok buka ja ziegafiakfuon. Regavo eraneb bu giriesa magaga nuifuon ikre vake buin ijia usevo e iji God fu karauniak.
MAT 10:23 Regavo madu ja mai be ijia vaga e bu ja kaniaknum unam ise kafo jon rekva ni mai iji areme una be ijia vaf. Regavo igia faif. Mai fok ar Isrer guf ijia karioinva iji roin vuak nun jaba abe kuardiame barenva ijia Emabuon Farif igi na una ruakno kiain.
MAT 10:24 Jesu fu ijeg kuardiame vake kia, E iji fu sikur reno iji fu efuon fu nijaimo ijefuon nigen iji fu fur asinma bakin. Regavo madu e monfuon ikreno bakin iji fu e bomana fuon iji fu fur asikma bakin.
MAT 10:25 Ijefuon e iji fu sikur reno ijiga e iji fuba monfuon ikreno iji bu e mamkanuk buon matiame buonak kegokva iji fun marek. Regavo e iji na bu kiev aiji a Setan e kaven ise ijiebuon e bomanano kiev. Ijefuon bu E Bomana jon igi na bu izeg kiekva iji na vierafe ijefuon jak buka kam ma if ise ijia ifdiakfuon.
MAT 10:26 Ijefuon e ise bu ire ise kafokafo jon rega jab giame juk. Ijefuon maiji unam ise buon fok kafokafo bu isuar nuriet reoijo iji rad God fu kege una e fok ijiebuon nifak ijia samafrega bu giak.
MAT 10:27 Regavo vuak irerag na naki kuardiavo iji ni jasik maza ijia useme dab e fok kuardiaf. Regavo vuak irerag no isuar nuvuonkua kuaimoinva iji nika abe useme ar iror fok kuardiame vaf.
MAT 10:28 Regavo jab e iji bu kaven jon iji buba kaniagavo bum vajai surif jon ijesugin kaniakrejo iji giame juk. Regavo e iji ja jukfuon iji nika God iji fu vajai surif abevo kaven iji kege mian iji tavan bog ijia naivako ijia kozega ja naoime barekfuon ijin juf.
MAT 10:29 Regavo igia faif. E bu um ukakna (um sfaro) roin kege una e kafobuon kimekva buka mon ukakna kafo kekfuon. Ijegvo God Asoijon iji fu fuon vierafenma ijia fu ire ka ukakna ijekin iji fu nuigafiamo bakin gavo fuka oijmiaknum samuagdiamon.
MAT 10:30 Regavo madu nigen jau jon izeg bu ijia irenva iji God fun vierafen.
MAT 10:31 Regavo um ukakna ijiga nigen jau iji buka ire ukakna gavo God fu fuon vierafenma ijia ire iji fu vek mukor samuagdiam. Ijefuon jak jaka Godon ire ikin kafo fu oijmiamo ijefuon ja fuka ijeg amarigia samuagdiamno jab juk.
MAT 10:32 Regavo erar fu e nifak ijia oknum kuai na Jesuon agano kuaimon iji nasik varur ijia Asoinun iji kua e iji fu e nuno kuak.
MAT 10:33 Regavo erar fu e nifak ijia na uzamo iji nasik varur ijia Asoinun ijefuon nifak ijia manine kua e iji fu enun bano kuakno kiain.
MAT 10:34 Jesu fu ijeg kuardiame kia, Moikigia na ruainva iji na e igi aferdia una besum afuikro ruainva bakigavo na e igi dab atakro ruain. Na e dab atasega e roin bu uri na igieme una nun ruakevo roin buka na nuigafiek. Bu ijegrene farif fu uri asoifuon ziegafake kabai fu uri asiefuon ziegafak. Regavo saifuon fu uri saifuon ziegafak.
MAT 10:36 Regavo iji bu ijegrekva iji bu e garerb kafo ijieb buna ijegrekva bakin. Regavo buka e gire besum karijo ijieb una buon ziegafanamime uri buon karijo iji dab iserek.
MAT 10:37 Regavo madu e be erar fu asoifuon ga asiefuon ijin uruvana oijmiagavo na fum sibank oijmiemo e iji fuba aresredo fu izeg kua na Jesuon agano kuaik. Regavo madu erar fu farifuon ga kabaifuon iji uruvana oijmagavo una na fu sibank oijmiemo e iji fuba aresredo fu izeg kua na Jesuon agano kuaikfuon.
MAT 10:38 Regavo erar fuba na oijmieme uri makai nun ijia jajieme vajai fian abeoino e iji fuka ba aresredo fuba e vuak nun faimo rek.
MAT 10:39 Regavo erar fu moikigia tavan bog fuon vierafenma iji oijmaknum kegoino iji rad fu una izeg unam ma karivako iji abekma bakin. Regavo erar fu moikigia tavan bog fuon ma fivakfuon iji fuka dazmevo una e roin vierafeknum oijmiame ifejdiafoino e iji fu rad unam ma karivako iji abek.
MAT 10:40 Regavo igia faif. Erar fu ja oimardiaknum aferdiamo iji fu madu na oimardieknum aferdiem. Regavo erar fu na oimardieknum aferdiemo iji fu madu e iji fu kiemga na ruainva iji oimardaknum afem.
MAT 10:41 Regavo madu erar fu e iji Godon vuak vierafene kuaimo iji amarigia giame oimardiaknum aferdiame samuagdiamo iji fun maren. Fu ijegreno ijefuon fu ire ma iji God fu bu vajiamo iji roin kekfuon. Regavo madu erar fu e iji Godon unam ma ijesugin kegoino iji amarigia game oimardaknum afeme samuagdamo iji fun maren. Fu ijegreno ijefuon fu ire ma iji God fu e iji vajamo iji roin kekfuon.
MAT 10:42 Regavo igia faif. E be erar fu vierafero jaiji ja e vuak nun faivo ijiro fu uri ire ukakna kafo ifejdiamo iji God fuka rad unam ma kafo fuon rekno kiain.
MAT 11:1 Jesu fun e vuak fuon faivo iji vuak ijeg nijaidiame fun uri ai Gareri guf ar ukakna ijia oknum e ijin vuak nijaidiain. Fu ijia vuak nijaidiaknum e ijin vuak ma iji abe kuardiamoin.
MAT 11:2 Fu ijegreokoga Jon fu dibur fine Kurais irerag fu reoinon iji fain. Fu vuak ijin faime uri e vuak fuon faivo roin kiamga bu fu kuagakuai vain.
MAT 11:3 Bun vake fu fino ijia useme kua, Aiji a e iji God fu kua fu ruakno kuainma ijin vo a baga no una e be samuakno kuain?
MAT 11:4 Bu ijeg Jesu kuardavga fu kia, Nin una va Jon irerag fok ja faivknum giainva ijin kuardaf.
MAT 11:5 Regavo ja kuardakva ni kua, E iji bu ni zuriainva iji bun una ni naraknum ga e aikirariainva iji bun una uri oij. Regavo e iji bu adam refrosi abenva iji bun una madiakok e ada bijukin iji bun una vuak faivno kuaf. Regavo madu ni kua e iji bu aoinva iji bun una urikok nan vuak ma iji dab e kavekin iji kuardiav.
MAT 11:6 Regavo kua, Erar fu ire igi na reoijo iji fuba faime dazga fum zinunba na ma vierafeno iji funika oimaremne kuaf.
MAT 11:7 Jesu fu e Jonon vuak faivo iji ijeg kuardiame bun vakoga fu una dakaroim e fok bu afuinva ijin Jonsina kuardiain. Fu kia, Ja Jon fu ai moikum namo ijia oina ja faime usem gakuai vainva iji ja irerag iji gakuai vain? Jakafu e zazaikin be fu buibur asif abeno igekin ja iji gakuai vain. Ni irerag ja ijia gakuai vainva ni kuardie na fai. Regavo baga na vierafega jakafu ja e be fu ugon ni mukor same ijia oinon ja iji gakuai vierafene vain. Regavo iji fu bakigavo e ijeg ugon mukor savo iji bu e mamkanuk moik samuavo ijiebuon ar ma ijia karijo.
MAT 11:9 Regavo ja vainva iji ja irerag iji gakuai vain? Ja e Godon vuak vierafene kuaimon iji gakuai vainki ja eraiji gakuai usem vain? Ni kuardie na fai. Regavo na vierafega e iji ja gakuai vainva iji fun ma e Godon vuak vierafene kuaimon be. E iji fuka ma e ikin fur e Godon vuak vierafene kuaivo iji fu asidiain.
MAT 11:10 Ijefuon maiji God fu usuibe buk akaij iji bu isoinva ijia fu e Jonon fu ijeg kuai, Na e vuak nun abe oinon be kuaga fu amur vuak. Fur amur unam jon iji amarme vakno kuain.
MAT 11:11 Regavo vuak igi naka ma kuardiavo faif. E mamkanuk roin bu ur kari ruainva iji bu e Jon e do ruardiamo ijekin bakin. E Jonri fuka ma e ikin fur bu asidiain. Regavo e iji God fu oibuon iji samuagdiamo ijiebuon uf ijia e be erar una e ukakbe reno e ijar fuka ma Jon asime e ikin rek.
MAT 11:12 Regavo tavan iji Jon fu uri anerene Godon vuak ma iji fu abe kuardiainma ijia roke iviakma igi Godon e iji fu samuagdiamo iji buka ma e uruvana rej. E uruvana bun ise bu reoijo iji areme una God e iji fu samuagdiamo ijiena mazikuai buka giriesav.
MAT 11:13 Regavo tavan iji e Godon vuak vierafene kuaivo bu karinva ijia ga e Mosison akai bu ik abenva ijia e iji buka karine tavan iji God fu ivez efuon ijiebuon oij iji samuagdiakfuon ijin dab karine kuaimoin. Bu vuak iji dab ijeg karine kuaime roke Jon e do ruardiamo ijefuon tavan ijia usen.
MAT 11:14 Regavo ja vuak buon iji jan ma vierafekuai samuainvaga e Jon ja gainva iji fu e Eraija e iji bu kuai fu ruakno kuainva ijin.
MAT 11:15 Ijefuon ja adakiga ni vuak igi amarigia faime ma vierafekfuon.
MAT 11:16 Regavo na be bijame kuardiakrejo ni faif. E igi iviakma karine vuak ma iji ba mukoi faivo iji buka am ukakna igi bu ar iji e uruvana bu afuime ire kimejo ijia afuivo ijekin.
MAT 11:17 Am ukakna roin bu una roin kia, No joifuon zaij vajaga jaba dua uruv. Regavo no sise bijadiaga jaba oifian abe niraivo bu ijekin.
MAT 11:18 E mamkanuk jon iji buk buka karine ijeg rej. Bu Jon fu tavan kafo ire karoknum ga do kugi iji ba iknum vo madu tavan iji fu uri Godon vuak ma iji abe kuardiamo iji bu game buka uzav. Bu kuai, E iji fuka kaven ise ijar niroinmano kuain.
MAT 11:19 Regavo una Emabuon Farif igi na keko duok iknum do vuain ijo bu una madu ijin uzav. Bu uzame kuai, Jam e guraiji gaf fu ire fok fuka abe i barme uri do vuain nibe ino gaf. Regavo madu fuka e iji takes abesvo ijiga e ise rejo ijiena kaikaraimoino kuaiv. Regavo igia faif. E ma vierafejo iji bu Jon ik irerag fu reoino ga na kegoijo iji bun guome vierafen. Bu vierafega God irerag fu vierafene reno iji fun amarigia renoro bu ijeg vierafejno kiain.
MAT 11:20 Ijefuon Jesu fu ve ijia uri mai kafo fu amur oknum unam sumakin fok e ijiebuon nifak ijia reoinma ijin kam arafiriakafa buisina kuain. Ijefuon maiji e ijia karinva iji bu ire ise bu rejo iji buba areme una oi karoime fu ma vierafen.
MAT 11:21 Ijefuon fu uri e iji kia, E iji ar Korazin ko Besaida karinva iji na vierafega ire ka ma ise be fu jon rekno nika juf. Ja unam sumakin na nifak jon ijia reoinva iji na una e ar Taia ko Saidon karinva ijiebuon rebatie e iji buka una ise buon ijefuon oifian abekfuon. Bu oifian abe niraime duok karoga e bu ijia giame vierafero bun una oi karoinvaro bu ijeg vierafek.
MAT 11:22 Regavo vuak igi naka ma kuardiavo igia faif. Vake rad tavan iji God fu una e moikigia ise rejo iji kege arafiriamo ijia e ar Taia ko Saidon karinva iji fum sibank arafiriaken. Regavo una e iji ar Besaida ko Korazin karinva iji ja fuka kam unam ma ise ijia arafiriakfuon.
MAT 11:23 Regavo una e ar Kafoniamko iji jaiji jab vierafero God fu ja fuka kege arordiame kam kaf gufia uniakro jab ijeg vierafek. Jaiji God fuka kam una ar ise mian naino ijia korekfuon. Ja unam sumakin iji na ni jon ijia kegoija ja gienva iji na ur e ar Sodom karinva ijia renvabatie e iji bun usuibe oi karoinvado God fuba amur fu kege arafiriaima ijeg fuba arafiriaken.
MAT 11:24 Regavo igia faif. Rad tavan iji God fu e fok igiebuon ise fu kege mazim giamo ijia fu e ar Sodom karinva iji fum kege sibank arafiriaken. Regavo una e ar Kafoniamko iji jaiji fuka amarigia kege unam ise ijia arafiriakno kiain.
MAT 11:25 Jesu fu tavan ijia ijeg kuardiame una dakaroim Asoifuon sirimame kua, God asoinun moik igeko varur gufi samuamo naka bomana on oimarev. Ijefuon maiji a e iji bu moikigia vuak mukoi vierafene kegoijo iji vuak ma iji a izeg ire kafokafo reno iji aka kege bu nisauikuriain. A bu ijegrene vuak ma iji aka dab una e ukakna iji bu vierafe ukakna kenva iji samafrediain.
MAT 11:26 Ijefuon Asoinun unam ijeg a vierafene kenma iji an on izeg a rekafa vierafenma a ijia kenmano kuain.
MAT 11:27 Jesu fu ijeg sirimamene una e iji kia, Ire fok na vierafeknum kegoijo iji fun Asoinun ijar kuardienma na ijia vierafeknum reoij. Regavo fu erar na amarigia gieme vierafekma bakin revo fun Asoinun ijar fuonkua na fun vierafen. Regavo madu fu erar Asoinun iji game vierafenma bakin revo nan farifuon igi nar nunkua fu nan game vierafen. Regavo nar koiknun na era vierafekva na iji amarigia ifejdaga fu Asoinun iji mukor game vierafekno kiain.
MAT 11:28 Jesu fu ijeg kuardiame kia, Erar ire afikin uruvana kege oko aimaiga ni una nun roga na dasumda.
MAT 11:29 Na vierafega naka ja samuagdiakro vierafen ijefuon ni una agan nun iji na samuagdiavo ijiena mazif. Regavo uri unam nun iji abeknum vo na igief. Ijefuon maiji naiji naka e oi soigin ga naka kabuaikabuaiki kegoijo. Ja nana mazikva kaven jon iji bu dasu karikfuon.
MAT 11:30 Ijefuon unam ma iji nun iji fuka mukor ga ik iji ja reokfuon iji na vajiavo iji fuka gigikin bakin.
MAT 12:1 Jesu fu ijeg kuardiame tavan be fun e vuak fuon faivo ijiena va ire vuit juar ijia urame oin. Regavo tavan Sabat (Satade) iji bu isuar karine God sirimameknum oimardavo. Regavo e Jesuon vuak faivo iji buka vasiaordiainma ijefuon bun uri ire vuit garin iji kafo tuame imut tat ijia dakumume surif iji fuas koreknum ioij.
MAT 12:2 Regavo e Ferisis roin bu iji giame una Jesu kua, Tavan Sabat (Satade) igi noka isuar karijo. Regavo e vuak on faivo bu ire ijegreoijo iji buka tavan iji no isuar karine God sirimamejo ijefuon akaij iji dab tuasevno kuain.
MAT 12:3 Bu ijeg kuardavga Jesu fu una kia, Regavo ja buk akaij ijia Kin Devid fu efuon ijiena Godon ar ijia arume irerag abenva iji jabe dame vierafen? Bu vasiaordiainma ijefuon bu aru bred iji karme in. Regavo bred iji bu kege inva iji fuka akaij ijefuon e maikava bu ijo bakin. Regavo bun e iji God isuf baroijo ijieb buonkua bred iji ijo.
MAT 12:5 Regavo madu ja e Mosison akai fu isoinma ja ijia dame gabatie ja gia e iji bu God isuf baroijo iji bu tavan Sabat (Satade) uruvana buka tavan iji e bu isuar karijo ijefuon akaij iji dab tuaseme una ikrejo iji ja giak. Regavo iji bu rejo iji bu Godon nifak ijia ise rejo bakin.
MAT 12:6 Vuak igi naka ma kuardiav. Ik iji God fu kiemga na rekro ruainva ijar fuka ma ikin ga una ik iji bu Godon ar ijia rejo iji fum sibank ukakbe.
MAT 12:7 Regavo madu usuibe buk akai bu isoinva ijia God fu ijeg kuai, Naiji fanuf iji bu kania isuf baroidievo iji naba oimadiem. Regavo na e iji bu una e kafobuon oifian abene ifejdiavo na iji bomana oimarevno kuain. Regavo ja vuak iji mukor game vierafebatie ja e iji bu ise kafo ba rejo iji ja irerafuon ire ise kafo kege una bu namdiakva bakin.
MAT 12:8 Ijefuon maiji Ema igiebuon Farif igi naiji fun Godri daro mieme ire fok kiemga na samuagdiav. Ijefuon tavan Sabat (Satade) iji ja isuar karijo ijefuon akaij iji ja javo iji nar kuardiaga ja faivknum kegokno kiain.
MAT 12:9 Jesu fu ijeg kuardiame fun vake e Jiusbuon ar ukakbe bu afuime vuak kuaivo ijia aruin.
MAT 12:10 Regavo ar guf ijia e be ij abe kirainma ijar ijia fin gavo madu e roin buk bu ijia afuime karin. Bu vierafega buka Jesu fu ire kafo isema rega bu iji gakuai vierafene nikajain. Ijefuon bu uri Jesu kua, A vierafega fube maredo a tavan Sabat (Satade) akai igi bu isuar karijo ijia e adagin iji una amardiakno kuain?
MAT 12:11 Bu ijeg kuardavga Jesu fu una kia, Ja e be erar a maf-sif be dabenma fu va tavan Sabat (Satade) iji isuar karijo ijia mako urakma a izeg rek? Abe ijia magake fu mako ijia manine vajai fian abek? Na vierafe a ijegrekma bakin gavo aka va keunaga fu ajiekek vakfuon.
MAT 12:12 Regavo maf-sif iji bum mafdo a ijegrekma iji fun marek. Regavo ema iji fu ijeg vajai fian abeke am ni ijesugin gakma iji fuka ba markfuon. Ijefuon no tavan Sabat (Satade) akai isuar karijo ijia no e ifejdiakva iji no akai tuasekva bakigavo no ma rekno kiain.
MAT 12:13 Jesu fu ijeg kuardiame una dakaroim e iji ij abe kirainma iji kua, Eko ij on iji akozemne kuain. Ijefuon e iji fun ij fuon iji akozemga fuka una ij fuon ma iji be ijekin ren.
MAT 12:14 Jesu fu ijegrega e Ferisis roin bu una usem makaf ijia unam izeg bu fu kanakfuon iji isuar buon kuaime uijuinamin.
MAT 12:15 Bu ijegreoijga Jesu fun giame uri ar iji areme una ai be vain. Fu vakgame e ka uruvana bu fu jame dab arafirime vakga fu adam buon fok kafokafo iji amardiama bu una madiain.
MAT 12:16 Fu amardiame kia, Ja vaga eb ja giame kia ja erar ja amardiaimano kiaga jab kuardiakno kiain.
MAT 12:17 Regavo Jesu iji fu kuriairenma iji fuka izeg e Godon vuak vierafene kuaimon E Asaia fu usuibe kuainma ijekma aresren.
MAT 12:18 Regavo vuak iji fu kuainma iji bu ijeg isoime kuai, E iji God nar kuaga fu nuifuon ikreoin. Fuiji naka bomana oijmavo ga fu nuifuon ikreko na gaga fuka oimadiem. Ijefuon na Kaven nun iji fu unafdaga fu e Jius bakin iji vuak nun abe kuardiak. Fu kuardiaga e fok buka izeg God nar rad bu karauniakfuon bu iji mukoi faime vierafekfuon.
MAT 12:19 Regavo fu vuak kuardiakma fuba uri uruvana kuriaireme kuardiak. Regavo fuba ena musikuaik ga vuak aramame kuaimok. Regavo madu fu unam ijia vuak kuaimoino iji e buba faik.
MAT 12:20 Regavo e iji bu unam ma iji reokuai zazaivo iji fuba kuriaikuriaiki kuardiaknum ifejdiak. Regavo madu fu e iji bu buon ma vierafejo ijia zazaivo iji fu ifejdiaga bu una giriesame izeg God nar rad karauniakfuon iji ma vierafekfuon.
MAT 12:21 Fu ijegrekega e ai moik fok karioinva iji buka una fu ma vierafe barekno kuain.
MAT 12:22 Areme e kafo bu uri e be ni zuriaigin fu vuak kuaimo bakin iji afeme Jesuon ruain. Regavo e iji fu kaven ise ijar ninarume dab arafirimo ijefuon fu vuak kuaim vo ni narame e giamo bakin. Bu e iji afeme Jesuon rokga fu uri kaven ise iji kuriairemga fun e iji areme keko vain. Fu vakoga e iji fun ijia una vuak kuaiknum ni narame nisain.
MAT 12:23 E iji fu ijegrega e fok bu unam sumakin iji Jesu fu renma iji gava buka oiserdiain. Buka oiserdiamga bu una bui kuai, Ja vierafega e iji kafu e Devidon uifarif iji fu ruakno kuainva ijino kuain.
MAT 12:24 Bu ijeg kuaimoijga e Ferisis iji bu faime una kia, E iji fu kaven ise Setan E Birzibabno kuavo ijefuon e. Ijefuon fur daro maga fu kaven ise iji kuriairega bu faime e iji areme usem vakno kuain.
MAT 12:25 Regavo Jesu fun oibuon ijia izeg bu vierafenva iji fun giainma ijefuon fu uri vuak be ijeg bijame kuardiain. Fu kia, E moik besum ijia karijo iji bu uri ata roinroin rene bui bijaikva iji bu izeg amarigia karikva bakin. Regavo madu mai be ga agan be bu una bui nigaraiknum karikva iji buon ma karijo iji fuka iserekfuon.
MAT 12:26 Ijegvo Setanon ar fu samuamo ijia kaven ise bu uri una buon nigaraikva fuka mukor iserekfuon. Bu buon nigaraikva iji bun abe atavo ijefuon bu izeg una mukoi karikva bakin.
MAT 12:27 Ja kuai na Setan e Birzibabno kuaivo ijar daro miega na kaven ise iji kuriairega bu usem vakno kuaiv. Regavo ja vierafega e vuak jon faivo iji bube Setanon daro ijia kaven ise iji nisarediaga bu usem vak? Na vierafe iji fu bakin. Ijefuon vuak izeg ja nuisina kuaivo iji jaka mukoi vierafene kuaivo bakin.
MAT 12:28 Regavo giega na Godon daro ijia kaven ise iji kuriaireme rotkuriaga ja vierafek. Ja ijia giame vierafero tavan iji God fu una anerene efuon iji samuagdiakfuon iji fun igijaro ja ijeg vierafekfuon.
MAT 12:29 Regavo madu igia faif. E be fu erar va e darokin be ijefuon ar ijia ajieme sinuom fuon iji niesakma bakin. Regavo fu niesakafa vierafekma fuka e kuriai iji kunaim dab tome fuson sinuom fuon iji niesamdakfuon.
MAT 12:30 Regavo e be erar fuba na oimardiemo e iji fu enun bakin. Regavo madu erar fuba ifejdieme e aferdia una Godon roko e iji fuimve e kuriaireme nisaremdiaga bu atase vak.
MAT 12:31 Ijefuon na kuardiako faif. Godri fuonkua ema ijiebuon ise bu rejo ga vuak ise bu kuaivo iji fu giame arek. Regavo erar bu vuak ise una Kaven Akai iji fuisina kuaivo iji God fuba giame arekfuon.
MAT 12:32 Regavo madu erar fu vuak ise kafo una Emabuon Farif igi na nuisina kuaimo iji God fu giame arek. Regavo erar bu vuak ise kafo una Kaven Akai iji fuisina kuaimo iji God fuba giame arek. Fu iviakma igi ga tavan bog fuka ijeg navakno kuain.
MAT 12:33 Jesu fu e Ferisis iji ijeg kuardiamo ijia fu madu vuak be ijeg bijame kuardiain. Fu kia, Ja in ma be fu manina ja gainva iji ja vierafero fu sunin ma iji kirakro ja ijeg vierafek. Regavo in ise ijar manikma iji ja vierafero fu sunin ise iji kirakro ja ijeg vierafek. Ijefuon in iji fu ma vo fu ise iji ja sunin fuon fu kiramo ja ijia game vierafek.
MAT 12:34 E guri ka ise tabar gurie, Iviakma vuak igi na bijame kuardiainva jaiji ijekin. Ja e guri ka ise reoijo iji ja izeg una vuak ma kuaimok? Ijefuon maiji e ijiebuon oij ijia irerag bu vierafejo iji bu ir ijia kuaimoij.
MAT 12:35 Regavo e iji fu oifuon ijia ire ma ijesugin vierafeoino iji ir fuon iji fun vuak ma ijesugin kuaimoin. Regavo e iji fu oifuon ijia ire ise vierafeoino iji ir fuon iji fun vuak ise ijesugin kuaimoin.
MAT 12:36 Regavo igia faif. Rad tavan iji God fu una e moikigia ise reoijo iji kege mazim giamo ijia fu e fok vuak ise iji bu kuaimoinva ijefuon kiaga bu irerafuon kuainva bu iji kuardaga fu faik.
MAT 12:37 Ijefuon maiji God fu ir on ijia vuak irerag a kuaimoinma ijia jame ise on iji gaga an mukor kegoijga fu iji gak. Regavo fu gaga a isema kegoiga fu ijia samakaf kuaga a faikno kiain.
MAT 12:38 Jesu fu ijeg kuardiamga e vuak akai nijaidiamo roin ga e Ferisis roin bu uri una kua, E nijaidiamon no vierafe aka ire sumakin be rega no ijia game a ma vierafekfuon. No ijia ma vierafero an ma Godri kuamga a ruainmaro no ijeg vierafekno kuain.
MAT 12:39 Bu ijeg kuardavga fu una kia, E guri ka God mukoi vierafejo bakin ka ise reoijo gurie jar ire sumakin giakuai vierafen. Regavo na vierafe iviakma ire sumakin be naba rek. Regavo nason rad ire sumakin besum fu e Jona e Godon vuak vierafene kuaimon ijefuon renma ijekin be ja gakfuon.
MAT 12:40 E Jona fu tavan nokbek (3) ga naki nokbek (3) fu kijum ka bomana be ijefuon defok ijia fin. Ijefuon Ema igiebuon Farif igi nak na moik guf ijia tavan nokbek (3) ga naki nokbek (3) na ijia nak.
MAT 12:41 Regavo vake rad tavan iji God fu e moikigia ise reoijo ijiebuon ise iji kege mazim giamo ijia e mai Ninevako iji buka una vuak ise e igi ja iviakma karinva iji joisina kuaikfuon. Ijefuon maiji bu e Jona vuak iji fu kuardiainma iji faime buka una oi karoime ire ise fok bu nuigafiain. Regavo e Jona fuiji fum e moik igeko ga e Ninevako buka vuak fuon amarigia faime igain. Regavo ivia naiji naka E Bomana gavo vuak nun igi jaka ba faiv.
MAT 12:42 Regavo madu bara Kuin moik Sibako iji fuka rad tavan iji God fu e moikigiebuon ise iji kege mazim giamo ijia fu e igi ja fuka kam arafiriame vuak ise joisina kuaik. Bara iji fuka moik buin roin ijia fino ga fuka uri Kin Soromonon uguar ma iji fu vierafene kuaimon iji ifejdakro ruain. Regavo e Soromon iji fum sibank e ukakbe gavo nar naka ma e ikin be na iga manine vuak kuardiav. Regavo vuak nun igi jaka ba mukoi faivknum vo na ma vierafejo bano kiain.
MAT 12:43 Jesu fu ijeg kuardiame kia, Na e unam ise rejo buba oi karoigakva bu izegrekfuon na iji be bijame kuardiako ni faif. Tavan iji e bu kaven ise iji kuriaireme rotkuraga fu e iji areme vako iji fu va ai moikum namo ijia ar fu fikfuon iji nisaimok.
MAT 12:44 Fu nisaimoga bakma fu una fui kuaik, Nan ka una ar na ur fine ruainva ijia vakno kuaik. Ijefuon fun una roga ar iji fuka mukor iviamkor kafut ga ire kafo bakin ga fu ro gak.
MAT 12:45 Areme fun una madu va kaven ise seven (7) ka ma ise ijin aferdia una ro ar ijia arume karik. Bu una ro e iji fu ur fu ire ise sibank keoinma iji niroikva rad fuka una biom ka ma ise iji keok. Ijefuon e zazaikin guri ja iviakma karijo iji jaiji jaka ijekin. Na ire sumakin be nifak jon ijia rekva janim surif jon ijesugin ma reokfuon. Regavo ja una oijon ijekma ma vierafeknum kegokva bakin. Ja ijegreoijo ijefuon ise iji fu oijon ijia namo iji rad fuka bomana rekno kiain.
MAT 12:46 Jesu fu vek e fok vuak kuardiamo ijia asiefuon ijiga uviaifijaf iji bu roke vien ijia useme fu samuame iren.
MAT 12:47 Ijefuon e be fu uri Jesu kua, Asieon ijiga uviaifon iji bu a vuak kuardakuai ruainva vien gufa samuagdame irenvano kuain.
MAT 12:48 Bu ijeg kuardavga Jesu fu una kua, Regavo ja vierafega asienun ijiga uviaifnun iji erano kiain?
MAT 12:49 Jesu fu ijeg kuardiame una dakaroim e vuak fuon faivo iji imut bijiame kia, Uviaifnun ga asiefnun ma iji e igi ja karinva ijin.
MAT 12:50 Ijefuon maiji erar fu irerag fok Asoinun varur gufia fino fu vierafenma ijia kegoino e ijar fu uviainun ga makinun ga asienuno kiain.
MAT 13:1 Jesu tavan besum ijia ijeg kuardiamevo fun ar iji areme una kekome do Gareri nafuinma irif ijia va ijia fin.
MAT 13:2 Fu fine vuak nijaidiaknum giak buka e uruvana usem dab kirakuravga fu uri vanag be ijia namo ijia ajien. Jesu fu vanag ijia ajieme abe sibank biom do ijia abedeme fikoga e iji vainva bu irif ijia iren.
MAT 13:3 Bu ijia irekoga fu ijia uri vuak fuon fok fuka ke bijiame kuardiain. Fu kia, Ni e be juar meno fu kekome juar fuon ijia uij dajaikafa vainma iji vierafef.
MAT 13:4 E iji fun va uij koremoko uij roin bu uduime unam iji e bu oijo irif ijia ariva bun um ijieb ari kare in.
MAT 13:5 Regavo roin bu uduime munuag azan ijia arime buka tavuain revo gireg buon iji buba uruvana sain. Ijefuon maiji sakin maiji fu ukakbe ijefuon bu tavua ajievo fun ve keko kaniama buka sairen.
MAT 13:7 Regavo uij roin bu uduime ufien gurogin uf ijia ariva fun ijar tavuame uij ma iji fun okuriain.
MAT 13:8 Regavo uij roin bu uduime moik mukor safikin ijia arime buka mukor tavuame sunin kirain. Sunin roin buka uruvana adred (100) ijeg kirakoga roin bu sibank siksti (60) ijeg kirako roin bu teti (30) ijeg kirain.
MAT 13:9 Ijegvo erar fu adakiga ni vuak igi amarigia faifno kiain.
MAT 13:10 Areme e Jesuon vuak faivo bu uri ro Jesu kua, Vuak on fok a bijiame e guri kuardiainma iji a irerafuon ijeg kuardiainma ni kuarduo no faivno kuain.
MAT 13:11 Bu ijeg kuardavga Jesu fu una kia, Na unam sauivkin izeg God fu efuon ijiebuon oij iji samuagdiamo iji nan e iji ja na jajievo iji kuardiame nijaidiain. Regavo una e roin iji naba samakaf nijaidiagavo nam ijeg bijame kuardiak.
MAT 13:12 Ijefuon erar fu vuak ijefuon maiji roin fun faime vierafenma iji God fu una ifejdaga fu madu vuak fuon ma iji kafo faivknum fivak. Regavo erar fu Godon vuak ijefuon maiji fuba amarigia faikro vierafeno iji God fum una vierafe sibank iji fu vierafeno iji fuka kamazaga fum ijia ijeg fivak.
MAT 13:13 Ijefuon maiji e igi iviakma karinva iji bu vuak fok na kuardiaknum izeg na kege nijaidiavo iji buka giavknum faiv. Regavo buka ba faim vo giainva igeg karioij.
MAT 13:14 Ijefuon na vierafe vuak iji Aisaia e Godon vuak vierafene kuaimon fu usuibe kuainma iji fuka ma kuain. Regavo vuak iji fu kuainma iji bu ijeg isoi, E iji vuak faivo iji jan faik revo anej ma iji jaba mukoi vierafekfuon. Regavo ja nisaivo iji jan nisaik ga ja ire be gakva bakin.
MAT 13:15 Ijefuon maiji e ijiebuon nigen iji buka mukoi gigikin ga ada bu vuak faikfuon iji bun koikbuon bijukuriain. Regavo ni buon iji buka nisuinvado bu ire kafo giavo bakin. Regavo buba ijegrevabatie bu unam ma iji giaknum vo vuak ma iji faik. Regavo madu bu nigen samafrega bu vierafene una nun roga nar amardiak.
MAT 13:16 Regavo una e guri ja na jajievo iji fun Godri ifejdiaga ja vuak nun faiv. Regavo madu fur ni jon mukor narakdiaga ja amarigia gieme vierafero na ma Godon farifro ja ijeg vierafek.
MAT 13:17 Regavo naka ma kuardiavo igia faif. E Godon vuak vierafene kuaivo fok ga madu e fok bu Godon unam ma ijesugin kegoinva iji buka vuak ma igi faikuai karine ijefun ren. Regavo madu buka irerag igi ja iviakma giavo ijefuon buka bomana karine ijefun ren. Regavo nibuon ijia be buka bagain vo fain.
MAT 13:18 Ijefuon ni vuak iji na abe e iji fu uij dajaioinma ijia bijame kuardiainva ijefuon ma iji mukor vierafeke na kuardiaf.
MAT 13:19 Ire uij roin bu uduime unam ijia ariva um ijieb kare inva ijefuon maiji fu ijeg. E roin bu Godon vuak ma igi na izeg God fu oibuon iji samuagdiamo iji na kuardiavo bun fain. Regavo bu vuak ma iji buba abe oijbuon ijia abedev. Bu ik faiko fun Setanri kekome vuak ma iji fun abe vak.
MAT 13:20 Regavo uij roin iji bu uduime munuag azan sakin ukakbe namo ijia arinva iji e iji bu oimarknum vuak iji migegare faivo ijin.
MAT 13:21 Bu vuak iji fai gavo buba abe oibuon ijia gigikin vierafej. Ijefuon bu Godon vuak iji abe oine ga e binob ise kafo buon rejknum kam unam ise ijia arafiriaga bu vajai fian abejo ijia buon vierafejo iji buka migegare ijia arev.
MAT 13:22 Regavo uij roin bu uduime gurogin uf ijia ariva ufien ijieb okuriainma iji e iji bu vuak ma iji faiknum ga una izeg bu moik igia oi marknum kariokfuon iji vierafejo ijin. Bu ijegrejknum buka sinuom ga mon uruvana oij miaknum uruvana vierafejo ijar vuak ma iji bu fainva iji buka rubdiam. Ijefuon vuak ma iji bu fainva iji fu oijbuon ijia tavuame ajie sunin kiramo bakin.
MAT 13:23 Regavo uij iji bu uduime sakin ma ijia arinva iji e iji bu vuak ma iji faime abe ma gigikin vierafejo ijin. Bu vuak ma iji fu oijbuon ijia tavuame sunin kiramga buka uri unam ma iji ma uruvana reoko roin bu sibank uruvana reko roin bu sibank ren.
MAT 13:24 Jesu fu ijeg kuardiame fun una madu vuak be abe bijame ijeg kuardiain. Fu kia, Unam izeg God fu efuon ijiebuon oij iji fu samuagdiamo iji fu e be juar fuon ijia uij mukor iji abe dajaimoine fun una ar vainma ijekin.
MAT 13:25 Fun una vakoga naki be e fok bun ni naoikoga e ani be fu isuar kekome uij be ka ise iji abe uij ma kafar ijia dajaimoine fun vain.
MAT 13:26 Fu vakoga uij ma iji fun tavuame ajie sunin fuon ma iji kirakafa reno ijia e bu ijiason uri uij ise ijin giain.
MAT 13:27 Ijefuon efuon ikrejo iji bu useme kua, E bomana juar on aka uij ma iji abe dajain. Regavo ufien nibe guri fu unam izer ijia ro ijia tavuainmano kuain.
MAT 13:28 Bu ijeg kuavga fu kia, Unam iji bu e ani nun ijieb renvano kiain. Fu ijeg kuardiamga bu una roin kua, Regavo abe kuoga no va ufien iji fok ka jafene kare korekno kuain?
MAT 13:29 Bu ijeg kuardavga fu kia, Ja ufien mekva jaka uij ma ijekma jafekno ni ijia are bu besum tavua. Bu ijia besum tavuake no vake tavan iji no uij afurvejo ijia nason giak. Na tavan ijia e ire uij afurvejo iji kiaga buka amur ufien ise ijar jafe ufame kam mian ja bu naoik. Bu jame fu naike bu uij ma iji kanafume una ar nun ma ijia namdiekno kiain.
MAT 13:31 Jesu fu ijeg kuardiame una madu vuak be madu bijame kuardiain. Fu kia, God izeg fu efuon ijiebuon oij iji fu samuagdiamo iji fu ire uij ka ukakbe in sira sunin igekin e be fu abe oinma ijekin.
MAT 13:32 E iji ire uij iji fuka ukakbe ga fu abe juar ijia oga fu tavuame in ka bomana um fok bu ro ijia nait abejo ijekin. Unam besum ijegvo iviakma Godon e iji bu sibank uruvana rej gavo rad e ma uruvana buka una efuon rekno kiain.
MAT 13:33 Jesu fu ijeg kuardiame una vuak be bijame ijeg kuardiain. Fu kia, Iviakma unam izeg God fu efuon ijiebuon oij iji samuagdiamo iji fuka ire ist igi fu reno ijeg ren. Bara iji fu ire farava bomana dis ijia useme ire ist ukakbe abe farava ijekma davaruaime abedekma fuka ma bomana buofoi urikno kiain.
MAT 13:34 Jesu vuak fuon fok fu e uruvana kuardiainma iji kafo fuba una vuak ma ijekma kuardiain. Regavo vuak fok fuka ke bijiame ijia kuardiain.
MAT 13:35 Ijefuon vuak izeg e Aisaia e Godon vuak vierafene kuaimon fu usuibe kuainma iji fun ijekma aresren. Regavo vuak fu kuainma iji bu ijeg isoi, Na e iji vuak kuardiakva naba vuak ijiebuon maiji samakaf kuardiagavo vuak fok naka ke bijiame kuardiak. Na vuak ma iji fok sauivkin iji God fu ik ire fok igi ba amardiainma ijia bu sauime naoivo iji naka kuardiame nijaidiaga e bu faikno kuain.
MAT 13:36 Areme Jesu fun e iji ijia uniakome fun una ar ijia aru vakga e vuak fuon faivo iji bun ijia jame aru vain. Bu aru ijia useme kua, Ni vuak iji a abe ufien iji bu juar ijia tavuavo ijia bijame kuainma ijefuon ma iji kuarduo no faivno kuain.
MAT 13:37 Bu ijeg kuavga fu una kia, E iji fu uij ma iji dajainma iji Emabuon Farif igi nar.
MAT 13:38 Regavo juar iji moik fok gavo uij ma iji Godon e iji bu unam ma ijia kegoijo ijin. Regavo ufien iji Setanon e iji ise reoijo ijin.
MAT 13:39 Regavo e ani iji fu ufien dajaimo iji Setan. Regavo tavan iji uij afurvejo iji tavan radkma ijin gavo e iji uij afurvejo iji Godon anera ijin.
MAT 13:40 Regavo ufien iji bu jafene anuse mian javo iji tavan radkma ijia fu ijeg rekfuon.
MAT 13:41 Tavan ijia Emabuon Farif igi nar anera nun iji kia bu moikazan fok igia oknum e kege atak. Bu ijia oknum ufien igi bu jafene mian javo ijeg bu ga e iji bu enun iji arafiriavo fok bu kam mian ijia jaken.
MAT 13:42 Bu e ijin kam ar ise mian naino ijia jaga bu ijia naoim niraime ubai jakinamik.
MAT 13:43 Areme e iji bu Godon unam ma iji abenva iji bu God Asoibuon ijefuon ar fu samuamo ijia karik. Regavo vajai buon iji buka tavan iji fu sanamon ijeg sanake bu ijia karik. Ijefuon erar ja adakiga ni vuak igi mukoi faime vierafeofno kiain.
MAT 13:44 Jesu fu ijeg kuardiame kia, God izeg fu efuon ijiebuon oij iji fu samuagdiamo iji fu ire gord be bu abe juar kafar be ijia mako rume sauinva ijekin. Bu abe sauivga e be fu ijia juai meoine uri gord iji game fusik una sakin atame okurame ijia aren. E iji fu ire iji gama fuka oimaimga fu una ar ijia kekome sinuom fuon fok fu karme una e kafobuon kimen. Areme fun mon ijin kege una va e ar kafar iji samuamo iji kimene fun moik kafar iji fuon aben.
MAT 13:45 Regavo madu God efuon ijiebuon oij iji fu samuagdiamo iji fu e iji fu mun ka ni mukor iji kimekafa nisaimoino ijekin.
MAT 13:46 E iji fu mun ijekin iji nisaimoine be gakma fuka oimarek. Fu oimarme una va sinuom fuon fok kege una e kafobuon kimene mon abe una mun mukor iji kimekfuon.
MAT 13:47 Regavo madu igia faif. God izeg fu efuon ijiebuon oij iji fu samuagdiamo iji fu ugie iji e do oijo bu abe do gamia oine kijum kafokafo karavo ijekin.
MAT 13:48 Bu ugie iji abe oine kijum bu ijia iviame irtoijekma e iji bu dakara dab irif ijia abedek. Areme bun karine kijum iji karame ma iji bu kamuij ijia kegavo ise iji bu kare korek.
MAT 13:49 Ijefuon vake tavan radkma ijia unam ijekin iji fu rek. Godri anera iji kiaga bu arime moik fok igia oknum e kege atak. Bu atame e ise renva iji bu be uniagavo e iji unam ma ijia kegoinva iji bu be uniak. Bu ijeg atame e iji ise renva iji bu kam ar ise mian naino ijia jaga bu ijia naoime niraiknum ubai jakinamikno kiain.
MAT 13:51 Jesu fu e vuak fuon faivo ijin vuak ijeg bijame kuardiame kia, Ja vuak fok na kuardiainva iji jan fainvano kiamga bu kua keno kuain.
MAT 13:52 Ijefuon fu una kia, E iji erar fu Mosison akai bu nijaidiainva iji fai vo iviakma fu una vuak igi God izeg fu efuon ijiebuon oij iji fu samuagdiamo iji mukoi faime vierafeno iji fu e ar koikin igekin. E iji fu gire fuon ijia sinuom fuon fok iviamkor ga usuikor iji fuka karme keko e fok nijaidiakfuon. Unam besum ijegvo jaka va e fok Godon vuak ma usuikor ijiga vuak nun iviamkor iji kege fok nijaidiafno kiain.
MAT 13:53 Jesu fu vuak ijeg bijame kuardiame barme fun una ar fuon ijia vain. Fu ijia kekome va e Jiusbuon ar ukakna bu afuime vuak kuaivo ijia arume e iji vuak nijaidiain. Fu vuak nijaidiamga e bu vuak fuon iji faiva buka oiserdiain. Ijefuon bu una bui kuai e iji fu unam izeg vierafe ijiga daro iji fu abe unam sumakin iji reoinon iji abenmano kuain.
MAT 13:55 Bu ijeg kuaiknum kuai e iji fu Josof e iji ar samon ijiga bara Meri iji non vierafenva ijiebuon farif. Regavo madu fu e Jeims ga Josof ga Saimon ga e Judas iji non giavo ijiebuon uviaij.
MAT 13:56 Regavo makifijaf iji bu nona igia oijo iji non vierafen. Regavo ire fok fu reoinon iji fu izeg iji reoinon kuaime buka fu uzain. Rega Jesu fu kia, E ar kafokafo ijieb e iji Godon vuak vierafene kuaimon ijefuon vuak iji bu mukor faime una fu igain. Regavo una e aganfuon ga e ar fuon iji buka una fu nuigafainvano kuain.
MAT 13:58 Ijefuon Jesu fu ar fuon ma ijia fu unam sumakin kafo fuba uruvana ren. Ijefuon maiji efuon iji buba fu ma vierafenva ijefuon fu ijeg ren.
MAT 14:1 Jesu fu ijegreokoga tavan ijia e Erod moik Gareri samuamo iji fu vuak ijin fain.
MAT 14:2 Fu faime uri efuon ikrejo iji kia, Ire ijekin iji fu erar igia reokma bakin. Ijefuon na vierafe e iji fuka e Jon e do ruardiamo ijar una urinman ijefuon fur ire sumakin darokin iji reno kiain.
MAT 14:3 Regavo iji fu ijeg kuardiainma ijefuon maiji fu Erodri ur kiamga bu Jon kunaim tome afem dab dibur unain. Ijefuon maiji Erod fu uviaifuon Firifon barak Erodias abega Jon fu kua, Aka isema remano kuamga fu ijefuon dab dibur unain.
MAT 14:4 Fu kuardame kua, Unam iji a una uviaion ijefuon bara iji abenma iji aka akai tuasen.
MAT 14:5 Regavo Erod fuiji fu vierafe fuka kia bu Jon kanaga fu guakro fu ijeg vierafene fu una e Jius iji juin. Ijefuon maiji e Jius iji bu ma vierafega e Jon fu ma e Godon vuak vierafene kuaimon be ijefuon fu iji vierafen.
MAT 14:6 Areme tavaibe e Erodon tavan bu nafenva iji rokga e bu besum afuime duok in. Bu duok ikoga bara Erodiason kabaij iji fu uri e fok ijiebuon nifak ijia dua urumgame Erod fuka oimain.
MAT 14:7 Ijefuon Erod fuka uri e fok karinva ijiebuon nifak ijia bara iji kua, A irerag be vierafene kiekman naka ke vajakno kuain.
MAT 14:8 Erod fu ijeg kuardamga bara iji fun izeg asiefuon Erodias fu ur kuardainma ijeg kuardain. Fu kua, Na vierafega aka iviakma igia e kia bu va Jon e do ruardiamo iji kaname nigen fuon iji kanafume abe ter ijia abedeme igia miega na vierafero fu ma guainmaro na ijeg vierafekno kuain.
MAT 14:9 Fu ijeg kuardamga Erod fuka bomana oifiaimga fu arekafa vierafen. Regavo fuka e fok duok ijo nifak ijia kua, A irerag kafo kiekma na ke vajakno kuainma ijefuon fum ijia ren. Ijefuon Erod fun e bijaivo fuon iji kia, Ni va dibur ijia aru Jon kaname nigen fuon iji kanafume abe una igia ruafno kiain.
MAT 14:11 Ijefuon e bijaivo iji bun vake dibur ijia useme Jon kaname nigen fuon iji kanaufuin. Bu kanaufume abe ter ijia abedeme abe usem aru bara iji mavga fun abe una asiefuon iji main.
MAT 14:12 Ijegrekoga rad e Jonon vuak faivo iji bun va dibur ijia usem e ma iji abe usem mako ruin. Areme bun vake Jesu fino ijia usem vuak fok izeg bu renva iji kuardain.
MAT 14:13 Ijefuon Jesu fu vuak iji faime fun uri e vuak fuon faivo ijiena vanag abe ar iji areme bun ai e bakin ijia vain. Bun vakga e fok bun vuak iji faime uri ar buon iji areme bun roin diak ar fu vakafa vako ijia vain.
MAT 14:14 Bu vake ijia useme karijga Jesu fu rad vanag abe do uf ijia urame vake ijia kekoin. Jesu fu ijia ari kekome e fok bu afuinva iji giama fuka oifiain. Ijefuon fu uri e adagin uruvana roin bu vainva iji adam buon iji ifejdiame amardiamga buka una madiain.
MAT 14:15 Jesu fu e ijin ijeg ifejdiakok tavan fuka kokafa ren. Ijefuon e vuak fuon faivo iji bu useme kuai, Ar igi fuka ai e bakin ga tavan gari fun gara kokafa vak. Ijefuon ni e guri kiaga bu mazak va ar gafia duok bu ikfuon iji kafo nisaime kimejno kuain.
MAT 14:16 Bu ijeg kuardain rega Jesu fu una kia, E iji na vierafe buba vakgavo ni jar duok kafo asaimgia vajiaga bu ijno kiain.
MAT 14:17 Fu ijeg kuardiamga bu una kua, No duok iji fu bakigavo no bred imut roin (5) ga kijum nokarok (2) ijeg igaijar ke ruainvano kuain.
MAT 14:18 Bu ijeg kuardavga fu kia, Ni duok iji kare igia vajiefno kiain.
MAT 14:19 Jesu fu ijeg kuardiame una dakaroim e fok imut ijia bijukuriamga bun garas azan ijia ari karin. Bun ari karikoga fun uri bred imut roin (5) ijiga kijum nokarok (2) iji ken. Fu kege kaf ijia kuniaime gafeg Asoifuon iji oimardame kege ukakna tuasen. Areme fun kege e vuak fuon faivo iji vajiamga bu karme e fok ijia karinva iji vajiain.
MAT 14:20 Bu vajiavga e fok buka defiamga ukur iji bu e vuak fuon faivo ijieb karen. Bu karme ter ka uruvana mamkanuk tuer (12) ijeg anusen.
MAT 14:21 Regavo e fok iji bu duok inva iji e baru ijesugin bu dainva iji fuka ma uruvana faiv taosen (5,000) ijeg. Regavo bara ijiga am ukakna iji buba dain.
MAT 14:22 Areme Jesu fun migegare e vuak fuon faivo iji kiamga bun vanag be ijia ajieme bun ur do iji nafuinma ijia ura gara vain. Bun vakoga Jesu fun roin uri e fok vainva iji kiamga bun una ar buon ijia vain.
MAT 14:23 Bun vakoga fu roin una fuonkua uruor be ijia ajieme sirimamekafa vain. Fun va ijia fuonkua fine sirimameko fun ve nakim.
MAT 14:24 Regavo e vuak fuon faivo iji buiji bun vanag abene buka do uf garia vain. Regavo madu buka buibur bomana iji ufimo ijia vako ijefuon do iji fuka foine vanag iji dab dakaroikro ren.
MAT 14:25 Areme Jesu fu ve ik afarkreno ijia fun uruor iji areme una arime do azan ijia vuim una e vuak fuon faivo bu vako ijiebuon ruain.
MAT 14:26 Fu do azan ijia rokga bu game ka bomana juin. Bu vierafero kafu zuar rokoro buka uri jume kumen.
MAT 14:27 Buka juvga Jesu fu migegare kia, Na narno jaib jukgavo giriesafno kiain.
MAT 14:28 Areme Fita fu una roin kua, E Bomana aiji an ma arga ni kiega na do azan guria vuim vuakno kuain.
MAT 14:29 Fu ijeg kuamga Jesu fu una roin kua, Ni do azan ijia vuim rokne kuain. Ijefuon Fita fun arime anere do azan ijia vuim Jesu manino ijia vain.
MAT 14:30 Regavo Fita fu una buibur bomana iji fu ufiko do iji fu foinon iji game fuka bomana juin. Fu ijeg juko ijia fun anerene gama arimga fu una Jesu kume, E Bomana na ifejdiemne kumen.
MAT 14:31 Rega Jesu fun migegare ij akozme Fita imut kene kua, E ige on a na ma vierafeno iji fuka ukakbe. Ire fok nar rejo ijefuon na ma vierafegavo iji a uri jume zazaimo iji aremne kuain.
MAT 14:32 Bu ijegrene bun una vanag ijia ajiekoga buibur iji fu ufimo fun ijia aren.
MAT 14:33 Areme e fok vanag guf ijia karinva iji buka uri fu ato same sirimamene kua, No vierafega aka Godon Farifno kuain.
MAT 14:34 Areme bun vanag abe ijia ura vake do irif gara ar Genesaret kuavo ijia arin.
MAT 14:35 Bu ijia arivga e ijia karinva iji Jesu bun game vierafedo bun uri e iji bu ar ukakna samaij ijia karioinva iji vuak nijiain. Bu vuak nijiavga e fok bun uri e adagin iji ijia karioinva iji darume Jesuon ruain.
MAT 14:36 Bu usem Jesu soisoime kuaga fu kia bum ugon fuon buin ijia niriaga bu una madiakno kuain. Ijefuon eraneb bu uri Jesuon ugon buin ijia niriainva iji adam buon iji fuka migegare una madiain.
MAT 15:1 Areme e Ferisis roin ga e vuak akai nijaidiavo iji bun Jerusarem ijia uri roke Jesu fino ijia usen.
MAT 15:2 Bu useme kua, E vuak on faivo iji bu irerafuon bu unam usuikor saifnuvuon iji bu kegoijo iji no jajiavo iji buba ijia jajiav. No saifnuvuon iji bu duok ijo buka imut do some duok ijo. Regavo eon iji buba ijegrejno kuain.
MAT 15:3 Bu ijeg kuardavga Jesu fu una kia, Regavo jak ja irerafuon Godon vuak iji jaka magaga una unam jon usuikor iji reoij.
MAT 15:4 Ijefuon maiji God fu kuain, Am iji asiefjon ijiga asoifjon iji igiafno kuain. Regavo madu erar fu vuak ise kafo una asoifuon ga asiefuon kuardakma e iji ka kana fu guamno kuain.
MAT 15:5 Regavo jar nijaidiavo iji ja kuai, E be erar fu mon fuon kafo fu duok kime eofijaf vajiakafa nainma iji fub mon iji kege una God vajakno kuain. Ijefuon fu ijegreno iji fu asoifuon igamo bakin. Ja ijegrejo ijia ja Godon vuak iji fu ja kuardiamo iji jaka faime magaga una unam jon ijia reoij.
MAT 15:7 E guri ka i kufuikin vuak ijia mareoijo gurie, Na vierafe Aisaia e Godon vuak vierafene kuaimon vuak irerag fu usuibe joifuon kuainma iji fuka ma.
MAT 15:8 Regavo vuak fu kuainma iji bu ijeg isoi, E iji bum ir ijesugin kuai no God aroivo kuaigavo bu oibuon ijekma aroivo bakin.
MAT 15:9 Regavo madu buon bu sirimamene na vierafeoijo iji ma iji fuka bakin. Ijefuon maiji bu Godon akaij iji e nijaidiavo bakigavo bu ema ijiebuon akaij iji kege e nijaidiavno kuain.
MAT 15:10 Areme Jesu fun e fok kumega bu fuon rokga fu uri kia, Vuak igi na kuardiakrejo iji amarigia faime vierafef.
MAT 15:11 E iji fu oine duok ino iji fu duok ijar fu abe Godon nifak ijia ise reno bakin. Regavo fu vuak irerag fu oifuon ijia vierafene kuaimoino iji fu vuak isekma ijar e iji fuka Godon nifak ijia fuba maturainmano kiain.
MAT 15:12 Rega e vuak fuon faivo iji bu uri kua, No vierafega vuak iji a kuainma iji e Ferisis iji bu kafu ka oifiadiainmano kuain.
MAT 15:13 Bu ijeg kuardavga Jesu fu una vuak be ijeg bijame e iji kuardiain. Fu kia, E Ferisis iji bu uij iji Asoinun varur gufia fino ijar oinma bakin ijekin. Ijefuon rad bu uij ijin gireg gamekma jafek.
MAT 15:14 Ijefuon ja buifuon jab bomana vierafek. E Ferisis iji bu oknum una e roin aferdiame unam buon ijia vako iji buka e ni zuriaigin. Ijefuon maiji e be fu una be imut ke vakma bu busik buka mako urakno kiain.
MAT 15:15 Fu ijeg bijame kuardiamga Fita fu una kua, Ni vuak ijefuon ma iji kuarduoga no faivno kuain.
MAT 15:16 Fu ijeg kuardamga Jesu fu kia, Ja e fok jaka non giako e vuak nun faivo iji buk buka vek non giav.
MAT 15:17 Regavo ni igia faif. E iji duok fu ino iji fu ir ijia iga fu ari defok ijia kekome na vak.
MAT 15:18 Regavo vuak irerag fu oifuon ijia vierafeno ijar fu ir ijia kuaimon. Ijefuon ijar e iji fu Godon nifak ijia fuka ba mukoi reoin.
MAT 15:19 E iji fu oifuon ijia ire ise vierafeno iji fu e kaniaga bu aoiknum ebuon bara turaknum ebuon sinuom niesamo ijin. Regavo madu vuak kufuimeknum una e kafobuon vuak ise buisina kuaivo ijin.
MAT 15:20 E ire ijegreoijo ijieb bu Godon nifak ijia buka maturainva bakin. Regavo iji una imut do ba some duok ijo iji fu Godon nifak ijia fu iserenma bano kiain.
MAT 15:21 Jesu fu ijeg kuardiame fun e vuak fuon faivo ijiena ar Genesaret areme bun una uri ar Taia ko Saidon samaij ijia vain.
MAT 15:22 Bu ijia vakga bara Keinanaitko be ar ijia fino ijar kekome Jesu biumaknum ruain. Fu ruaknum kume, E Bomana e Devidon uifarif gafe a nuifuo oifiadakma ni ifejdiemne. Na kabainun fuka kaven ise ijar dab arafiriko fuka mukorigia vajai fian abeno kumen.
MAT 15:23 Fu ijeg kumega Jesu fuba una vuak kafo kuardain. Ijefuon e vuak fuon faivo iji bu useme Jesu soisoime kua, Bara iji fuka biumaknum ruako noka iseduomno kua fu vakne kuain.
MAT 15:24 Bu ijeg kuardaga Jesu fu una kia, God fu kiemga na ruainva iji na e Isrerko ijesugin ifejdiakro ruain. Na e Isrerko iji buka maf-sif igeg bu e iji bu samuagdiamo iji buka unakome buonkua oifiaigma oijo na iji ifejdiakafie ruainvano kiain.
MAT 15:25 Fu ijeg manine kuardiamo ijia bara iji fu kekome Jesu ato same kua, E Bomana ifejdiemne kuain.
MAT 15:26 Fu ijeg kuamga Jesu fu una roin kua, No am ukakna ijiebuon duok bu ijo iji no kamaziame ke una siroij iji vajiakva fuka ba markno kuain.
MAT 15:27 Jesu fu bara iji ijeg kuardamga fu una kua, Iji a ma kuardiem. Gavo siroij iji bu ebuon mamkanuk ijiebuon fata rotit ijia duok ukur iji uduime arivo iji buka ijin ikno kuain.
MAT 15:28 Ijefuon Jesu fu una roin kua, Bara gure on a na ma vierafenma iji fuka ma bomana ijefuon irerag a vierafenma iji na ifejdakno kuain. Jesu fu tavan ijia bara iji ijeg kuardakoga tavan besum ijia kabaifuon ijefuon adam iji fuka bakiteme una main.
MAT 15:29 Areme Jesu fun ar iji areme uri e vuak fuon faivo ijiena uri do Gareri nafuinma irif ijia amedakiem vain. Jesu fu ijia ame vako ijia fu uruor be ajieme vake makaf ijia kekoin.
MAT 15:30 Fu ijia ajie kekome fikoga e ka uruvana bu e adam kafokafo kenva iji aferdiame fuon ruain. Bu e iji aikirariainva ga ni zuriainva ga vua ba kuaivo ga adam abenva ijin aferdia ijia ruain. Bu aferdiame usem Jesu manino ijia uniavga fu amardiama bu una madiain.
MAT 15:31 Jesu fu ijeg amardiamga e iji ai kirariainva iji bun una uri oko e iji ni zuriadiainva iji bu una ni narakoga e iji vua ba kuaivo iji bu una vuak kuain. Fu ijegrena e fok bu iji gava buka oiserdiamga bu uri e Isrerkobuon God ijin dab aroin.
MAT 15:32 Areme Jesu fun uri e vuak fuon faivo iji kiamga bun una besum afuivga fu kia, Na e guri bu afuinva iji giaga naka bomana oifiadiem. Ijefuon maiji bu tavan nokbek (3) bu nana igia karin ijefuon na vierafe buka duok bakin. Regavo na duok kafo ba vajiaga nam kia bu una ar buon ijia vakva iji fuka ba marek. Bu vasiakma una vakva bu izeg daro abekva bado buka nizigdiame ari kaniakno kiain.
MAT 15:33 Jesu fu ijeg kuardiamga e vuak fuon faivo iji bu una kua, Noka ai moikum namo duok bakin igia karij. Ijefuon no izia duok kege e fok guri gormiakno kuain.
MAT 15:34 Bu ijeg kuardavga Jesu fu kia, Regavo ja bred izeg nainvano kiain. Fu ijeg kiamga bu kua, No bred seven (7) ga kijum ukakna sibank nainvano kuain.
MAT 15:35 Bu ijeg kuardavga Jesu fun e fok kiamga bu moik ijia ari karin.
MAT 15:36 Areme fun uri bred seven (7) ijiga kijum iji kege una Asoifuon oimardain. Areme fun ke tuaseme una e vuak fuon faivo iji vajiamga bu karme una e iji vajiain.
MAT 15:37 Bu vajiavga e fok bu ija buka defiamga ukur roin bu iremiren. Areme e Jesuon vuak faivo iji bun uri duok ukur ijin karme ter mamkanuk seven (7) ijeg anuin.
MAT 15:38 Regavo e fok bu ijia duok inva iji e baru ijesugin buka e fo taosen (4,000) ijeg.
MAT 15:39 Jesu fun uri e fok kiamga bun una ar buon ijia vakoga fu roin uri vanag abe fun moik Magedan ijia vain.
MAT 16:1 Areme tavan be e Ferisis ijiga e Sejusis roin bu Jesu biesuakuai ruain. Bu roke fu fino ijia useme kua, A vierafega an ma Godri kuamga a ruaiga ni unam sumakin be nifak nuvuon ijia rega no game una a ma vierafejno kuain.
MAT 16:2 Bu ijeg kuardavga Jesu fu una vuak be ijeg bijame kuardiain. Fu kia, Ja oine ga fu tavan nakisrene varur garia kavuaimo iji ja kuai fu tavan markreno kuaiv.
MAT 16:3 Regavo suok iji fu varur garia kaziga ja kuai fu ve bomana dakreno kuaiv. Ijefuon ja tavan gari fu ve dakre vo bakin iji jan varur garia izeg fu reno iji game vierafek. Ijegvo ire sumakin kafo na igaijar reoko jan giev ga ja ire ijiebuon maiji jaka ba mukoi vierafej.
MAT 16:4 E guri ka isema rejknum God ma vierafejo bakin gurie jar ire sumakin iji giakuai vierafen. Regavo na vierafe God fuba kiega na unam sumakin be rega ja gakfuon. Regavo nason rad ire sumakin besum iji fu e Jona e Godon vuak vierafene kuaimon iji fuon renma ijekin be ja gakno kiain. Jesu fu ijeg kuardiamevo fun e iji ijia uniakome fun vain.
MAT 16:5 Fu vakoga e Jesuon vuak faivo iji bu uri vanag be abene bun do iji nafuinma irif gara vain. Regavo iji bu vainva iji buka rubdiamga bu bred kafo bu ikfuon iji buka ba ke vain.
MAT 16:6 Ijefuon bu isuar buon karine una ijefuon kuaiv. Bu ijeg karine kuaiva Jesu fu giame uri kia, Ja okva ni e Ferisis ijiga e Sejusis buon ire ist iji bu bred amardiavo iji mukorigia akariaknum ofno kiain.
MAT 16:7 Jesu fu ijeg kuardiamga bu vierafekuai fu kafu bred buba ke vainva ijefuon kuaimoro bum isuar karine una bui kuaiv.
MAT 16:8 Regavo Jesu fun giame uri kia, E gurie jon ma vierafejo iji fuka ma ukakbe. Nan ma bred jaba ke ruainva ijefuon kuardiavo bakigavo ja irerafuon una ijin dab siguv.
MAT 16:9 Jaiji jaka nana besum oin gavo jaka vek ba na ma vierafen. Ja bred faiv (5) sibank iji na ke tuaseme e fok faiv taosen (5,000) iji na gormiainva iji jabe vierafen? Regavo ja bu iga ukur arevga ja karme ter izeg anuinva iji jabe vierafen?
MAT 16:10 Regavo madu ja bred seven (7) iji na ke tuaseme e fo taosen (4,000) iji na gormiainva iji jabe vierafen? Regavo madu ire ukur iji ja ter izeg anuinva iji jabe vierafen?
MAT 16:11 Ja unam iji jan giain gavo ja irerafuon jaka ba ma vierafen? Regavo bred iji bu ire ist ijekma amarenva iji na kuardiainva iji na ma ijefuon kuardiainva bakin. Gavo na e Ferisis ijiga e Sejusis buon unam ka ise bu kegoijo na ijefuon abe ijeg ire ist ijia bijame kuardiain. Ijefuon iji vierafene mukorigia giaknum ogavo jab una unam buon ka ise bu vierafene kegoijo ijia jajiavno kiain.
MAT 16:12 Areme e vuak fuon faivo iji bu ijiason una vuak ma iji vierafen. Bu ijia vierafero fu ma ire ist ijefuon kuainma bakigavo fu bur e Ferisis ijiga e Sejusis buon unam bu nijaidiavo iji agordiakro kuainmaro bu ijeg vierafen.
MAT 16:13 Ijegreare Jesu fun e vuak fuon faivo ijiena vake ai Sesaria Firifai samaij ijia kekoin. Fu ijia kekome uri kia, Ja vierafega e bu Emabuon Farif igi na giekva bu era vierafekno kiain?
MAT 16:14 Fu ijeg kuardiamga e vuak fuon faivo iji bu una kua, No vierafega e roin bu a gakva bu vierafero aiji a e Jon e iji fu e do ruardiamo ijinro bu ijeg kuain. Regavo roin bu vierafero aiji a e Eraija ga roin bu kuai a e Jerimaia vo baga a e Godon vuak vierafene kuaimon bero bu ijeg vierafenvano kuain.
MAT 16:15 Bu ijeg kuardavga Jesu fu una kia, Regavo jaiji ja izeg vierafenvano kiain.
MAT 16:16 Fu ijeg kuardiamga e Saimon Fita fu una kua, Na vierafega aiji aka God iji tavan bog ijia fivako ijefuon Farif. E iji bu usuibe kuai fu ruakno kuainma ijino kuain.
MAT 16:17 Fu ijeg kuardamga Jesu fu una kua, E Saimon e Jonan farif gare na vierafega fun Godri a mardain. Ijefuon maiji bu e kafob nijaidainva bakigavo fun Asoinun varur gufia fino ijar oion ijia vuak iji vierafe maga ijefuon a ijeg vierafen.
MAT 16:18 Ijefuon igia fai. Aiji iviakma if on na Fita kuak, Regavo if ijefuon maiji tuar ka gigikin ijin. Ijefuon na enun bu na jajievo iji na kege a uniafdaga ar samuagdiaga buon ma vierafejo iji fuka gigikin rek. Regavo Setanon e iji buiji bu daro bado bu unam on a kegoino iji buba bijukurak. Regavo nar a daro maga a Godon unam ma iji abe e fok kuardiame nijaidiaknum samuagdiak. Regavo irerag kafo e bu moikigia reoijo iji a giamga bu isega a kuriaireme bijukuriamo iji God varur gufia fino iji fuk fu ijeg kuriaireme bijukuriak. Regavo irerag kafo bu moikigia reoijo a giamga bun ma a oimadako bu reoijo iji God varur gufia fino fuk fu ijeg oimardiakno kuain.
MAT 16:20 Areme Jesu fu uri e vuak fuon faivo iji fuka kuardiame kia, Jab va e roin kia na Kurais e iji bu kuai fu ruakno kuainva ijino kuardiakno kiain.
MAT 16:21 Areme Jesu fun tavan ijia anerene uri fu guakfuon iji fuka samakaf visume e vuak fuon faivo iji kuardiain. Fu kia, Na vierafe naka Jerusarem ijia e mamkanuk nuvuon ga e akai nijaidiavo ga e Godon isuf baroijo iji karinva ijia vak. Na ijia vaga bu na dab unam ise kafokafo ijia arafirieme vajai fian vajiega naka vajai fian uruvana igia abene isejavaik. Na isejavaime vake buka kaniega na guame naki nokbek (3) barke God fu kiega na una madu urikno kiain.
MAT 16:22 Fu ijeg kuardiamga Fita fun uri Jesu imut ke va fuonkua manine kua, E Bomana vuak iji kuaimo iji fuba maren. Na vierafe God fuba ire ise ijekin iji kuaga fu on rekno kuain.
MAT 16:23 Fu ijeg kuardamga Jesu fu una dakaroime Fita kua, Setan gareg va. Na gaga aka ik iji God fu kie na rekro ruainva a iji bijukuriem. Ijefuon maiji vuak iji a vierafene kuardiemo iji fu Godri vierafe mako a kuardiemo bakin. Regavo vuak iji am ema ar vierafene kuardiemno kuain.
MAT 16:24 Areme Jesu fun una e vuak fuon faivo iji kia, E be erar fu diak makai nun ijia jajiekafa vierafekma ni ire fuon fok moik igefuon iji ka nuigafiakfuon. Fu ijegrevo uri vajai fian kafokafo bu fuon roko iji ka ijia magiaga nuifuon ikrekfuon.
MAT 16:25 Ijefuon maiji erar fu una fuon izeg fu ma fivakfuon iji uruvana vierafeno iji rad fuba unam ma karivako iji abek. Regavo erar fu tavan bog una e roin oijmiame ifejdiamo iji rad fu unam ma karivako iji abek.
MAT 16:26 Regavo erar fu moik igefuon sinuom iji oijmiagavo God fu uzamo iji kaven fuon iji fun abe aberem. Regavo madu fu moik igefuon sinuom ijieb ifejdaga fu Godon ar ma ijia aru vakma bakin.
MAT 16:27 Ijefuon maiji Emabuon Farif igi nar tavan radkma ijia anera nun ijiena una Asoinun ijefuon sanainma ijekma ruak. Na una kekome uri e besubesum izeg bu kegoinva ijia giaknum una vef ijefuon unam ma iji ga ise kafo buon rediakfuon.
MAT 16:28 Regavo vuak igi naka ma kuardiavo faif. Iviakma e guri ja karinva ijia e roin ja aoim barekfuon. Regavo roin ja nivek karinva ijia ja Emabuon Farif fu una Kin rene e fok samuagdiakro roga ja giakno kiain.
MAT 17:1 Areme tavan siks (6) ijeg baremga Jesu fun uri Fita ga no uviaiki e Jeims ko Jon aferdiame bun buonkua uruor ka jaoijmanako be ijia ajie vain.
MAT 17:2 Bu ijia ajieme ire gakoga Jesuon vajat fok fu ijia una nibe ren. Uikinik fuon iji fuka veni igeg sanakoga ugon fuon iji buka abarme ire bivar iji bu abe veni ijia karavo ijeg ren.
MAT 17:3 Fu ijegrekoga ijia e Jesuon vuak faivo nokbek (3) bu gak e Mosis ko Eraija bun migegare iji bu irenva ijia Jesuna ireme vuak kuaiva bu giain.
MAT 17:4 Ijefuon Fita fu uri Jesu kua, E Bomana aka magoi no aferduo igia ruain. Ijefuon a vierafega fu markma ni kiega na ar muvua nokbek (3) be on ga be Mosison ga be Eraijaon ijeg igia savno kuain.
MAT 17:5 Fita fu vek ijeg mani kuaimon ijia vana ka abaikin ijar e fok bu irenva ijia fuka okuriain. Vana fu ijeg okuriakoga kua be fu vana guf ijia kume, E iji fu Farinun ma na fu bomana oijmavo. Na ik fu reoino iji gaga naka bomana oimadiemno vuak fuon iji mukoi igia faifno kumen.
MAT 17:6 E Jesuon vuak faivo nokbek (3) bu vuak iji faiva buka dejufdiamga bu tuame moik ijia dijeme uikinik buon iji kam sauin.
MAT 17:7 Bu ijegrejga Jesu fu kekome imut karamdiaknum kia, Ja juvo aregavo urifno kiain.
MAT 17:8 Fu ijeg kiamga bu asarajie ga e bino iji bu bakigavo fu Jesur fuonkua ijia manina bu gain.
MAT 17:9 Areme bun una uruor ijia ari vako ijia Jesu fu uri kia, Ja ire gufi fu rena ja gainva iji jab va e roin kuardiak. Janim areke Emabuon Farif igi na guame una uriga ni ijar e kuardiafno kiain.
MAT 17:10 Fu ijeg kuardiamga e vuak fuon faivo bu una kua, E vuak akai nijaidiavo iji bu kua, Fu e Eraijar ur una ruakno kuainva iji bu irerafuon ijeg kuainvano kuain?
MAT 17:11 Bu ijeg kuardavga Jesu fu una kia, Ke iji ja ma kuaiv. Fu e Eraijar amur ro ire fok amarigia kanafum una arir nakfuon.
MAT 17:12 Gavo igia faif. E Eraija aikin be fun amur ruain gavo e buba fu amarigia game vierafen. Regavo buka uri ire ise fok kafokafo bu vierafenva iji fuon ren. Ijegvo Emabuon Farif igi nak madu buka dab ijeg ire ise kafokafo nun rekno kiain.
MAT 17:13 Ijegreare e vuak fuon faivo iji bu tavan ijiason vierafero fu Jon e do ruardiamo ijefuon kuaimro bu ijeg vierafen.
MAT 17:14 Bun ijeg kuaiknum una ari roke e gumi bu afuinva ijia usevga e be fu migegare kekome Jesu manino nifak ijia ato sain.
MAT 17:15 Fu ato same kua, E Bomana a farinun ijefuon oifiadakma nin ifejda. Fu kaven ise ijar niroime dab arafirikok fuka ir simaiknum isejavaim. Fu ijegrejknum vo tavan kafo fu kaven ise ijar dab mian ijia akozga fu mian naiknum vo tavan kafo fuka do uramon.
MAT 17:16 Ijefuon na afeme e vuak on faivo iji nijaidiaga bu ifejdakrega buka ba aresrenvano kuain.
MAT 17:17 Fu ijeg kuardamga Jesu fu uri kia, E guri ka nonamimoknum God ba ma vierafejo gurie igia faif. Ja vierafega na juaivasia izeg jana fioke ja ijia una God ma vierafek? Am iji afeme igia roga na gavno kiain.
MAT 17:18 Jesu fu ijeg kuardiamga e iji fun am iji afeme rokga Jesu fu uri kaven ise iji kuriaireme rotkurain. Fu ijeg rotkuramga kaven ise iji fun am iji areme keko vakoga migegare am iji fu ijia una main.
MAT 17:19 Rega e Jesuon vuak faivo iji bun isuarigia una ro Jesu kua, Kaven ise iji nor amur rotkurain gavo fu irerafuon ba keko vainmano kuain?
MAT 17:20 Bu ijeg kuardavga Jesu fu una kia, Ijefuon maiji God jaka bomana vierafejo bakin. Naka ma kuardiavo igia faif. Jon ja God ma vierafejo iji fuka ukakbe in sira sunin ijekin iji ja aresredo ja uri nafar iji kua, Ni jafe biom garia manine kuakva fu jafe biom vak. Regavo fu irerag ijar ja girekma bano kiain.
MAT 17:21 Regavo kaven ise ijekin iji bu e iji buba areme usem vakfuon. Regavo jaka ijefuon sirimame duok karokva bu ijar usem vakno kiain.
MAT 17:22 Areme e vuak fuon faivo iji bun una Gareri ijia besum afuin. Bu besum afuivga Jesu fu uri kia, Iviakma igem e bu Emabuon Farif igi na tofdieme dab una e ise iji miak. Bu na abe e iji miaga bur na dab kaniega na guak revo tavan nokbek (3) barke God fu kiega na una madu urikno kiain. Fu ijeg kuardiamgame e vuak fuon faivo iji buka oi bijukuriain.
MAT 17:24 Areme Jesu fun e vuak fuon faivo ijiena roke ar Kafoniam ijia usen. Bu usevga e iji Godon ar bomana ijefuon mon iji e bu abese bu abeoijo iji roin bu ijia usen. Bu useme Fita kua, A vierafega eon iji e nijaidiamo iji fube mon iji bu Godon ar bomana ijefuon abesvo fube ifejdia abesemno kuain.
MAT 17:25 Bu ijeg Fita kuavga fu kia, Ke iji mon fu abesemno kiain. Fita fu e iji ijeg kuardiame fun ar ijia aru vain. Fu ik aru vakoga Jesu fu gafa uri kua, Fita e vuak gafi bu kuainva iji aiji a izeg vierafenmano kuain. A vierafega e mamkanuk moikigi samuavo mon iji bu kiaga e bu oknum kareoijo iji bu erafon mon iji karemoij? A vierafega bu ebuon ijiebuon mon vo bu e ai kafoko ijiebuon mon iji karevno kuain.
MAT 17:26 Jesu fu ijeg kuamga Fita fu kua, Mon iji buka e moik kafoko ijiebuon mon iji karevno kuain. Fu ijeg kuardamga Jesu fu una kua, Ke iji aka ma kuaim. Ijefuon na vierafe afijaf iji buba una karoime buifuon mon takes abesekfuon. Ijegvo nak na ma Godon Farif ijefuon na irerafuon una ar fuon ijefuon mon abesekfuon?
MAT 17:27 Regavo noba mon abesekva na vierafe e takes abeoijo iji bu kafu buka no ziegafuokfuon. Ijefuon ni va saof ijia kimai same kijum kafo kara. A kijum be amur kekma a ir fuon ijia mon be gakfuon. Regavo a mon ijin gakma ni abe va takes abese. Regavo mon iji na vierafe fun takes on ga nun iji fun sibank aresrekno kuain.
MAT 18:1 Jesu fu ijeg kuardiamevo tavan ukakbe barekoga e vuak fuon faivo iji bu una uri kua, A vierafega e iji God fu oibuon samuagdiamo ijia e iji erar fuka e bomanano kuain?
MAT 18:2 Bu ijeg kuardavga Jesu fu uri kiamga bu am ukakbe iji afeme rokga fu e fok ijiebuon nifak ijia manin. Fu ijia manikoga Jesu fu uri kia, E besubesum ja irerafuon e ikin rekuai vierafen? Naka ma kuardiavo faif. Ja unam ise jon fok ja kegoijo iji jaba areme una am ukakbe igi fu kabuaikabuaiki kegoino ijeg kegokva ja God e iji fu oijbuon iji samuagdiamo ijiena mazikva bakin.
MAT 18:4 Ijefuon e iji God fu oibuon iji samuagdiamo ijiebuon araf ijia e ikin rekfuon iji e iji fu una am ukakbe igi fu manino ijeg kabuaikabuaiki reoino e ijar fuka e fok asidiame e ikin rek.
MAT 18:5 Ijefuon erar fu enun kafo am igekin iji if nun ijia oimardiavo iji fu madu nak oimardiamno kiain.
MAT 18:6 Regavo erar fu e iji bu oij asusame am ukakna igeg na ma vierafejo iji kam arafiriaga bu una ise reokva e iji nika mun bomana be dab uro fuon ijia kira saof uf ijia akozga fu urame do ikfuon.
MAT 18:7 Regavo e moikigia oijo iji esenia. Ijefuon maiji e ise reoijo iji buka una e roin biesiakok buka unam ma iji areme una unam ise iji reoij. Regavo igia faif. E iji bu ijeg ise reoijo iji tavan rad God fuka bu kam unam ise ijia arafiriakno kiain.
MAT 18:8 Areme Jesu fu uri vuak kafo ijeg bijiame kuardiain. Fu kia, E be erar a vierafega fu imut on vo diatat on ijieb a aferda dab ise rega na vierafe aka kafo kaniaufu korekfuon. A vierafe aka Godon unam ma iji abekafa vierafekma ni vajat on roin bu ise reoijo iji kege ijeg kaniaufu. A ijegrekma iji fuka markfuon. Regavo aba ijegrekma vajat on fok iji fuka ar ise mian naino ijia vak.
MAT 18:9 Regavo madu a vierafega ni on ijar a aferdame ise rega ni niom on be jafe akoze. A ijegrekma iji fuka markfuon. Regavo aba ijegrekma ni niom ijar a dab ar ise mian naino ijia akozga a ijia vajai fian abekno kiain.
MAT 18:10 Jesu fu ijeg kuardiavake kia, E iji bu am ukaknak igeg na ma vierafejo iji jab oknum ni iken giavo. Ijefuon maiji na kuardiakrejo faif e ijekin ijiebuon anera iji bu samuagdiavo iji buk buka Godon nifak ijia oijo. Ijefuon unam izeg ja bu kam kafokafo reoijo iji mukor vierafeknum reokfuon.
MAT 18:11 Ijefuon maiji Emabuon Farif igi na ruainva iji na e iji bu Godon unam ma iji areme aibe ijia oijo ijin karauniakro ruain.
MAT 18:12 Regavo na vuak be bijame kuardiakrejo ni faif e be fu maf-sif fuon uruvana vuan adred (100) ijeg samuagdiamo. Regavo tavan be maf-sif iji irenva ijia besum fu oine sauikma e iji ja vierafe fu izeg rekfuon? Fube kuaik iji fun marenmano are fu ijia oine guamne kuaik? Fu ijegrekma bakin revo fuka maf-sif roin nainti nain (99) iji fu ijia uniagavo fu va besum iji subinma iji nisaimoine gakma fuka bomana oimarkfuon. Regavo una roin iji buba sauinva iji fum sibank oimarkfuon.
MAT 18:14 Ijegvo Asoijon iji varur gufia fino iji fu e iji bu e ukakna igeg na ma vierafejo iji buiji fuka ijeg vierafen. Fu e ijekin besum fu va subikfuon iji fuka ba oimarkno kiain.
MAT 18:15 Jesu fu e fok vuak ijeg kuardiame vake kia, A uviaion be fu osik Jesu ma vierafeno ijar ise be afak rekma ni isuar oimarknum va fusik besum karine ise irerag fu afak renma iji kuaime amaref. A va ijeg fine kuaiga uviaion iji fun una oimarknum vuak a kuaimon iji faikma iji jan una besum agan igeg oimarknum ok.
MAT 18:16 Regavo a kuardaga fuba una osik oimarknum vuak on iji faikma ni va e besum (1) vo baga nokarok (2) ijeg aferdia una va ga. A ijeg e nokarok (2) aferdia vaikin bu vuak izeg a fusik kuaimon iji bur ifejdiame kuaik.
MAT 18:17 Regavo fu madu e ijiebuon vuak iji fuba oimarknum faikma ni va e iji God ma vierafejo iji giakfuon. Regavo gaga fu ijekma ba oimarkma nika kuriaireme kuaga fu va e iji God ba ma vierafejo ijiena fioine kiain.
MAT 18:18 Jesu fu ijeg kuardiavako ijia fu madu kia, Vuak igi naka ma kuardiav, Irerag e bu moikigia reoga a vierafero fu ise ro a bijukuriamo iji God varur ijia fino iji fuk fu ijeg kuriaireme bijukuriak. Regavo irerag bu reoga a giame vierafero fu maro a oimardiako bu reoijo iji God varur gufia fino iji fuk fu besum ijeg oimardiak.
MAT 18:19 Regavo madu igia faif. Ja e nokarok (2) ja moikigia oine ire kafofuon oi besum vierafene sirimamene kuakva Asoinun varur gufia fino iji fu ifejdiak.
MAT 18:20 Ijefuon maiji e nokarok (2) vo nokbek (3) bu besum karine vuak kuaime nun sirimamekva na ijia buna fiknum buon bu sirimamejo iji faikno kiain.
MAT 18:21 Areme Fita fu uri Jesu kua, E Bomana uviainun be fu nosik Jesu ma vierafeno fu ire ise be nun rekma na game arek. Regavo fu vek magiaga tavan bog nun ise rekma nabe tavan seven (7) ijeg game arekno kuain?
MAT 18:22 Fita fu ijeg kuardamga Jesu fu una kua, Uviaion iji fu afak ise rega a tavan seven (7) ijesugin game arekma iji na vierafega fuka ba maren. Regavo madu a tavan seventi (70) ijeg game arekma iji madu fuka ba markfuon. Regavo fu tavan bog fuka magaga una afak ijeg ise reunaikma nin game oion ijia aregavo ab una iji bomana vierafemne kuain.
MAT 18:23 Jesu fu ijeg kuardiame uri vuak be ijeg bijame kuardiain. Fu kia, God izeg fu efuon ijiebuon oij iji fu samuagdiamo iji fu ijekin. E kin be fu tavan be vierafe fuka efuon ikrejo iji kiaga bu funa besum afuim karine sinuom roin bu kenva ijin kuaime amarekro fu iji vierafen.
MAT 18:24 Ijefuon fun uri ijegrekoga bu e be iji fu sinuom ka mon ma bomana ijeg kenma ijin afeme fuon ruain.
MAT 18:25 Fu kekome uri sinuom iji fu kenma ijefuon mon iji una e kin ijin kimekrega fuka ba aresrega fu ijia aren. Ijefuon e kin iji fu uri efuon ikrejo roin kia, E guriga agbarak ga sinuom fuon fok ka kege una e kafobuon kimekfuon. Ja kege kimega bu mon ijefuon vajiaga ni kege ro sinuom igi fu karenma iji kimejno kiain.
MAT 18:26 Fu ijeg kuaimga e iji fu vuak iji faima fuka bomana oifiaimga fu uri e kin ijefuon nifak ijia ato same soisoin. Fu soisoime kua, E-e ni isuar oi dasume fike na oga mon kafo biediekva na una ro vajakno kuain.
MAT 18:27 Fu ijeg kuardamga e kin iji fu vierafena fuka bomana oifiaima fu kuamga fuba kimen revo fum ijia areme keko vain.
MAT 18:28 Rega fun va oine una kaifuon be fu ur mon fuon ukakbe kuama fu vajainma iji bien. Fu bieme keko uro ijia kunaime kua, Eko iviakma migegare mon nun a inma iji una vef vajiemne kuain.
MAT 18:29 Fu ijeg kuardamga kaifuon iji fu una kua, Kainu e-e ni isuar oi dasume fike na oga mon kafo biediekma na una ro vajavno kuain.
MAT 18:30 Regavo e iji fuba una kaifuon ijefuon oifian aben revo fuka magaga kunaim dab dibur unain. Fu dab dibur uname kua, Ni ijia fiknum mon nun a inma ijin una kime barme nin keko vakne kuain.
MAT 18:31 E iji fu ijegrega e kaifijaf roin bu gava buka oifiadiain. Ijefuon bun una va e iji izeg fu renma ijin e kin iji kuardain.
MAT 18:32 Bu ijeg kuardavga e kin iji fu kiamga bu e iji afeme rokga fu uri kua, E gurie aka e ma bakin aka e ise. A mon nun bomana ar in ga na ijefuon kuavga aka soisoimga na kuava a ijia areme vain.
MAT 18:33 Naiji a oifiadienma ijefuon na kuavga aba una na kimen revo a ijia areme vain. Regavo a irerafuon una uviaion iji izeg na renva ijeg aba fuon oifian abenmano kuain.
MAT 18:34 Rega e kin iji fuka uruvana deajin ijefuon fu kiamga bu e iji kunaim dab dibur unavga fu ijia fine vajai fian aben. Fu ijia fiknum mon fuon iji fu inma iji una kime baremne kiain.
MAT 18:35 Jesu fu vuak ijeg bija kuardiame barekro kia, Ja e fok ja e ise iji fu kenma ijeg jaba kaifjon ijiebuon ise iji isuar giame oijon ijia arekva fuka ba marek. Ja ijegrekva God Asoinun varur gufia fino iji fuk fu ise jon iji fuba giame arekgavo fuka kam unam ma ise ijia arafiriakno kiain.
MAT 19:1 Jesu fu vuak fok kuardiame barme fun uri Gareri areme una ar Judia guf do Jodan ruvainma irif gara ijia vain
MAT 19:2 Fu ijia vakoga e uruvana bu jame ijia vaka fu bu karauniain.
MAT 19:3 Fu ijegreoino ijia e Ferisis roin bu ro usem Jesu bisuame kua, A vierafega akai nuvuon fu kuainma ijeg e be fu bara fuon fu ire kafokafo ba fu oimaikfuon ijia kegokma fube datura unaga fu vakno kuain?
MAT 19:4 Bu ijeg kuavga Jesu fu una roin kia, Regavo ja buk kafar be bu isoime kua, Ik anej ijia God iji ire fok amardiainma ijar baru ga barak amardiainmano kuainma iji jabe dame gain?
MAT 19:5 Regavo madu buk kafar be ijia bu ijeg isoime kua, Efarif iji fu uri asoifuon ijiga asiefuon iji areme una bara fuon abek. Bu ijeg sanamime besum karioijo ijia bu una busik vajai besum rekno kuain.
MAT 19:6 Ijefuon bu busik bu nokarok (2) bakin gavo buka vajai besum. Ijefuon bara iji Godri abe efarif ijek besum kamainma iji e kafo buba ke atase kafokafo uniakno kiain.
MAT 19:7 Jesu fu ijeg kuaimga e Ferisis iji bu uri kua, Regavo irerafuon Mosis fu kua, E be fu bara fuon datura una fu vakma fu fefa be isoime kua ivia aiji a bara nun bano kuame abe maga fu vakno kuain.
MAT 19:8 Bu ijeg kuardavga Jesu fu uri kia, Vuak iji Mosis fu isoime kuai ja barafjon tura uniakno kuainma ijefuon maiji oijon fuka ma gigikin. Regavo iji ja kuaivo iji ik anej ijia buba ijegrene ruain.
MAT 19:9 Regavo na kuardiakrejo faif. E be fu bara fuon abe uname una bara be abekma e iji fu bara ijin daturam. Regavo bara fuon iji fu amur ba e be daturainma gakma baru iji fu bara iji unako fu vakma iji fuka ba markno kiain.
MAT 19:10 Jesu fu ijeg kuardiamga e vuak fuon faivo iji bu uri kua, Regavo gaga unam iji bara kege uniaga bu vako iji fuka gigikin gakma iji no vierafe barubara sanamivo iji ka ijia arefno kuain.
MAT 19:11 Bu ijeg kuardavga Jesu fu uri kia, Ke iji fun maren gavo na vierafe e fok bu vuak iji ja kuainva bu ijeg vierafeokva bakin. Regavo bun e iji eraneb Godri kiaga bu ijeg amunamun oijo ijieb ijeg reok.
MAT 19:12 Regavo irerafuon efarif iji buba bara kego ijefuon anej maiji bu kafokafo. E roin bun ijeg nafediain revo roin iji bun emab ke ijeg amardiain. Regavo e roin buba bara kego iji bu Godon ikreokuai bu ijefuon akaim oij. Regavo e be erar fu vierafega fu aresredo fu ijeg kegokma iji ni are fu ijeg kegoino kiain.
MAT 19:13 Areme e roin bu vierafe bu afijaf iji aferdiame Jesuon roga fu bu imut nigen namdiaknum buifuon sirimamekuai ruain. Regavo e vuak fuon faivo iji buka ba oimarenva ijefuon bu uri e iji afijaf aferdia roko iji kuriairen.
MAT 19:14 Bu kuriairevga Jesu fu uri kia, Ja am ukakna iji jab kuriairek revo are bu aferdia nun ruaf. Ijefuon maiji e iji eraneb bu am ukakna iji bu asoibuon iji ma vierafejo ijeg bu na ma vierafekva God fu e ijekin iji samuagdiakro vierafenmano kiain.
MAT 19:15 Fu ijeg kuardiame uri am ukakna ijin imut nigen namdiaknum buon sirimamene fun ar iji areme vain.
MAT 19:16 Areme e be fu ro kekome Jesu kua, E nijaidiamon na irerag iji rekva na ma karivako iji abekno kuain?
MAT 19:17 Fu ijeg kuardamga Jesu fu uri una roin kua, A irerafuon ire maiji rekro bomana vierafene kiem? Fu e be erar fuka e ma bakin gavo fun e besum Godri fuonkua fu e ma. Ijefuon a unam iviamkor ma karivako iji abekro vierafekma ni Godon akaij iji igiamne kuain.
MAT 19:18 Jesu fu ijeg kuardamga e iji fu una kua, Regavo akaij iji na izin igiakno kuain? Fu ijeg kuamga Jesu fu uri roin kua, Ab e kafo kaniaknum e kafobuon bara turaknum vo e kafobuon ire niesaknum vo e kafobuon vuak kufuimene kuaimon. Regavo madu nika asoion ijiga asieon iji igiaknum izeg a koikon on oijmanamimo ijeg una e roin oijmiamne kuain.
MAT 19:20 Fu ijeg kuardamga e iji fu una kua, Akai fok iji naka igiav. Regavo na una ire be iji na irerag iji rekno kuain?
MAT 19:21 Fu ijeg Jesu kuardamga Jesu fu una kua, A vierafega aka maturaiga ni va sinuom on fok ke kime mon abe e sinuom bakin iji vajiame ni uri na jajie. A ijegrekma a unam iji tavan bog ma karivako ijin abekno kuain.
MAT 19:22 Ijefuon e nivek iji fu vuak iji faima fuka bomana oifiaimga fu oifiaigma vain. Ijefuon maiji fu vierafega fuka sinuom ma uruvana zarain.
MAT 19:23 Areme Jesu fu uri e vuak fuon faivo iji kia, Vuak igi na ma kuardiav. E be erar fu sinuom uruvana iji fu agan iji God fu samuagdiamo ijia buna besum mazikfuon iji fuka ma gigikin.
MAT 19:24 Regavo igia faif. Fanuf kamer iji fu ma bomana ga siem tit iji fuka ukakbe ijefuon fu tit ijia aru vakma fuka ma gigikin. Unam besum ijegvo e iji sinuom zarainma iji fu izeg e iji God fu samuagdiamo ijia buna besum mazikfuon iji fuka ma gigikino kiain.
MAT 19:25 Ijefuon e vuak fuon faivo bu vuak iji faiva buka oiserdiamga bu uri uruvana vierafeknum bui kuai, Fu erar aresredo fu e iji God fu oibuon iji samuagdiamo ijiena besum mazik?
MAT 19:26 Bu ijeg kuaivga Jesu fu kia, E kafo erar fum fuon vierafega unam fuon fu kegoino ijia fu aresrenma bakin. Regavo fun Godri aresredo fu ire fok rekfuon. Regavo fu fuonkua era fu vierafenma iji kuaga fu e iji God fu oibuon iji samuagdiamo ijia buna besum mazikno kiain.
MAT 19:27 Fu ijeg kuardiamga Fita fu una kua, No ire fok non ijia areme uri a jame ruain. Ijefuon no ire ma iji no irerag iji abekno kuain?
MAT 19:28 Bu ijeg kuardavga Jesu fu una kia, Vuak igi na ma kuardiav. Tavan iji ire fok bu una iviamkor rejo ijia Emabuon Farif igi na fata nun ma iji sanainma ijia ajie fijo ijia e iji eraneb ja na jajievo iji jak ja fata ma iji tuer (12) kege karik. Ja fata iji kege ijia karine e agan tuer (12) Isrerkobuon ise iji kege mazim giak.
MAT 19:29 Regavo erar fu ar fuon ga uviaifijaf ga makifijaf ga eofijaf ga afijaf ga juar fuon iji nuifuon aremo e iji fu una madu ire ma uruvana kafo kekfuon. Regavo madu fu unam ma karivako iji abe ijia fivak.
MAT 19:30 Regavo igia faif. E uruvana bu amur irenva iji bu una rad ireken. Regavo eraneb iviakma rad irevo bu una amur ireken. Ijefuon maiji e sinuom zarainva iji iviakma bu e mamkanuk gavo rad bu una e ukakna rekno kiain.
MAT 20:1 Ijefuon e iji God fu oibuon iji samuagdiamo iji fu e juar koikin iji fu suok nakitu gamia kekome va e kiaga bu fuifuon ikredake fu mon vajiakma igekin.
MAT 20:2 Ijefuon e iji fu vierafe fu e kafo kega bu fuifuon ikrekfuon iji fu vierafega fun maren. Ijefuon fu va e iji kia, Ja tavan besum nuifuon ikrekva na mon sunin ijia e besubesum ka afurvene vajiakno kiain. Fu ijeg kiamga bun oimarvga fun kiama bun juar fuon ijia ikrekuai vain.
MAT 20:3 Bun vakoga fun tavan ajie ruainma ijia una madu ar bu ire kimejo ijia vaga e roin bu ijia iremoija fu giain.
MAT 20:4 Ijefuon fu kia, Jak na vierafe ja va juar nun ijia ikreke na mon besum afurvene vajiakno kiain.
MAT 20:5 Fu ijeg kuardiamga bun vako fu una tavan uk manino ijia roke una tavan ura gura manino ijia fu una ire besum fu renma ijeg ren.
MAT 20:6 Fu una va fivake tavan fun kokreno ijia una vaga e roin bu ijia iremoija fu giain. Fu giame uri kia, Ja irerafuon tavan igi ja abe ire kafo ba rega jam igia iremoijno kiain.
MAT 20:7 Fu ijeg kiamga bu una roin kua, Ijefuon maiji e kafo buba no buifuon ikrekfuon kuinvano kuain. Bu ijeg kuardavga fu uri kia, Jak nin va kof juar nun ijia ikrefno kiain.
MAT 20:8 Areme tavan fun nakisrega e iji juar koikin iji fun uri e iji nigen rene e ikrejo iji samuagdiamo iji kua, E iji ikrejo iji kume bu roga mon buon vajiamne. Regavo mon a vajiakma ni e iji eraneb bu rad ikrek ruainva ijia anerene vajiajame una gafeg baremne kuain.
MAT 20:9 Regavo e iji rad tavan kokreno ijia ikrekuai vainva iji bu mon sunin besum (1) ijeg e besubesum fu aben.
MAT 20:10 Regavo e iji bu amur ikrekuai ruainva iji buka bur mon sibank bomana abekuai vierafen. Regavo e besubesum buka mon sunin besum ijeg aben.
MAT 20:11 Bu mon buon abe una e iji kof juar fuon menma ijiena zienamin.
MAT 20:12 Bu uri kua, E guri a rad kiainma iji bum tavan ukakbe ik ren. Regavo noiji noka suok anerene ruako tavan kanuin. Regavo a irerafuon mon noiji a buna besum afurvene vajuinmano kuain.
MAT 20:13 Bu ijeg kuardavga e iji juar koikin iji fu uri e iji vuak kuaimon iji kua, Kainu na ja biesiainva bakin. Regavo na vuak irerag na ja kuardiainva nan ijegrene mon jon iji nan afurve vajiav.
MAT 20:14 Ijefuon ni mon on abe vake na e roin bu rad ikrenva iji mon izeg a abenma na ijeg una bu vajiav.
MAT 20:15 Ijefuon maiji na daro namo ijefuon mon nun iji na kege na vierafejo ijia rek. Regavo a ziemo iji akafu igi na e suaiki rene mon afurve vajiainva ijefuon ziem.
MAT 20:16 Jesu fu vuak ijeg kuardia barekafa kia, Unam besum ijeg e iji bu rad gamia roko iji vef bur amur ruak. Regavo e iji bu amur roko iji vef bur una rad gamia ruakno kiain.
MAT 20:17 Jesu fu e vuak fuon faivo tuer (12) ijiena bun Jerusarem vakuai vako ijia fu unam ijia izeg e bu Jerusarem ijia fu dab izegrekfuon ijin isuar kuardiain.
MAT 20:18 Fu kia, Igia faif no vake Jerusarem usevo ijia Emabuon Farif igi naiji bu abe e isuf baroijo ijiebuon e mamkanuk ijigam e vuak akai nijaidiavo iji miaga bur na tofdieme ise nun kuaime dab arafirikfuon.
MAT 20:19 E ijieb na bu abe una e Jius bakin iji miaga bur na abe anu baroiknum juvit foimadieknum fijieme abe kuros kaniek. Regavo naki nokbek (3) barekma God fu kiega na una uri nivek fivakno kiain.
MAT 20:20 Areme rad e Zebedin barak ijar afijaf ijiena Jesu fino ijia vain. Bara iji fu ire be vierafenma ijefuon fu va Jesu manino nifak ijia ato same uri ire befuon kuain.
MAT 20:21 Fu ijeg kuamga Jesu fu uri kua, Regavo a irerag vierafenmano kuain? Jesu fu ijeg kuardamga bara iji fu una roin kua, E-e ni iviakma igia kuardiekin tavan iji a una E Bomana rene Godon e iji samuagdiakro roko ijia am afnun nokarok (2) igi be fu imut on maink ijia fikevo be fu imut on aizinak ijia fikno kiemne.
MAT 20:22 Jesu fu una afijaf nokarok (2) iji kia, Vuak iji ja na kuardievo iji jaba vierafe gavo jam ijia kuardiev. Ja vierafero ire igi na vajai fian abekrejo iji jan aresredo fu jon rekro ja iji vierafenvano kiain? Fu ijeg kuardiamga bu una roin kua, No vierafe no aresredo no rekno kuain.
MAT 20:23 Bu iji kuardavga Jesu fu uri kia, Ire iji e bu nun rega na vajai fian abekrejo iji jak madu fu jon rega ja ijeg vajai fian abek. Regavo e iji bu ar ij nun maink ga azinainak ijia karikfuon iji na nar kekva bakin. Regavo ar iji fu e iji Asoinun fu karmo ijiebuon arno kiain.
MAT 20:24 Ijegrene tavan ijia e ten (10) Jesuon vuak faivo iji bu vuak iji faiva buka deajidiamga bu uri no uviaikin iji ziegafiain.
MAT 20:25 Ijefuon Jesu fu uri e vuak fuon faivo iji kiama bu besum afuivga fu kia, Jan vierafe e Jius bakin ijiebuon e mamkanuk iji bu ebuon kege una daro buon rotit ijia uniav. Regavo madu e aiko ijiebuon e mamkanuk iji bu daro buon ijia e aiko buon iji samuagdiav.
MAT 20:26 Regavo igia faif. Unam ijeg jab arega fu jon rek. Erar fu vierafe fu joifuon e bomana rekma e iji fuka ja ifejdiaknum vo joifuon ikreokfuon. Regavo erar fu joifuon e nigen rekro vierafekma e iji fuka e be joifuon ikreno igeg reok. Unam besum ijegvo Emabuon Farif igi na ruainva iji na e bomana rekro ruainva bakin. Regavo nam e be fu e befuon ikreno na ijegrekro ruain. Regavo madu na ruainva iji na kuros ijia guame kavuan nun ijia useme e fok karauniakafie na iji ruain.
MAT 20:29 Areme Jesu fun e vuak fuon faivo ijiena ar Jeriko areme usem vakoga e ka uruvana bu usem jajiame buna vain.
MAT 20:30 Regavo e ni zuriaigin nokarok (2) bu unam irif ijia karido bu faik Jesu fu ijia asidiame ruvaka bu fain. Bu faime uri kume, E Bomana e Devidon uifarif gare abe nuvuifuon oifian abene ifejduokno kumen?
MAT 20:31 Bu ijeg kumejga e ijia roko ijieb uri kuriaireme kia, Isuar karifno kiain. Rega buka uri ma uruvana igia biumame kume, E Bomana e Devidon uifarif gare abe nuvuifuon oifian abene ifejduokno kumen.
MAT 20:32 Bu ijeg kumejga Jesu fu roke ijia kekome uri kia, Na irerag joifuon rekro ja iji vierafenvano kiain?
MAT 20:33 Fu ijeg kiamga bu una roin kua, E Bomana no vierafe a ni nuvuon iji amarduoga no una ni naravno kuain.
MAT 20:34 Bu ijeg kuardavga Jesu fu buifuon oifian abene uri ni buon ijia niriakiamga tavan ijia bu una ni narame bun uri fu jame vain.
MAT 21:1 Areme Jesu fun e vuak fuon faivo ijiena Jerusarem vakuai roke ar Betifas uruor Orivs kuavo samaij ijia usen. Areme Jesu fun uri e vuak fuon faivo iji nokarok (2) vuak igin kuardiain. Fu kia, Va ar gafia usem gaga bu maf-donki be kirainva fu uka fuon ijekma ijia maniga iji irame afem una igi na fijo igia ruaf.
MAT 21:3 Ja va iraga e be fu kia, Ja irerafuon maf-donki iji iravno kiaga ni kua, No E Bomana ijar vierafega no ijin iravno kuaf. Ja ijeg kuarda fu areke ja afem ruak.
MAT 21:4 Regavo ire iji renma iji fun izeg e iji Godon vuak vierafene kuaimon fu usuibe kuainma ijekma aresren.
MAT 21:5 Regavo vuak iji bu ijeg isoi, E Jerusaremko iji E Bomana jon fu jon rok. Fu maf-donki azan ijia ajie fine ruakfuon. Regavo fu e bijaimoijo ijiebuon e bomana bakin ijefuon fuba maf-os ijia ajie fik revo fum maf-donki uka ijia ajie fine ruak.
MAT 21:6 Ijefuon e vuak fuon faivo nokarok (2) iji bun va vuak irerag Jesu fu kuardiainma ijia jame ijeg ren.
MAT 21:7 Areme bun va maf-donki ijiga uka fuon iji aferdiame una roke Jesu fino gumia usen. Areme bun uri ugon buon bu azan savo iji azome maf-donki azan ijia riedavga Jesu fu ijia ajie fin.
MAT 21:8 Bu ijegrekoga e fok bu funa ruainva iji buk bun uri ugon buon roin bu azan sainva ijin azome unam ijia riesdakoga e roin bu uri anam kiak iji mukiene unam ijia riesdain.
MAT 21:9 Ijegrene e fok bun roinroin ireme ruako Jesu fu uf ijia ruain. Fu ijia ruakoga e fok bu biumaknum kume, No e Devidon Farif igi dab aroiv. No vierafe Godri E Bomana ijefuon if ijia fu daro mak. Regavo noka Godon bomana oimarvno kumen.
MAT 21:10 Bu ijegrejknum Jesu afeme vake Jerusarem usen. Regavo e fok mai ijia karinva iji buka oiserdiamga bu uri kuai, E iji kafu erarno kuain?
MAT 21:11 Bu ijeg kuaivga e fok Jesuna vako ijieb uri kume, E igi fu Jesu e iji Godon vuak vierafene kuaimon ijin. Regavo fu ar Nasaret Gareri guf ijekorno kumen.
MAT 21:12 Bu ijegrene Jesu fun Godon ar bu sirimamejo makaf ijia e iji bu ijia arume ire kafokafo kare kimejo iji kuriairema bu usen. Bu useme subiko fu uri e iji bu karine mon dame vajuinamivo ijigam e iji um kimejo ijiebuon fata ijigam sinuom buon iji kam karoidiain.
MAT 21:13 Fu ijegrene uri kia, Buk akaij iji bu usuibe isoinva ijia God fu kuai, Ar nun iji bu ijia arume sirimamejo gavo jar arume abe e niesavobuon ar igeg amarvno kuain.
MAT 21:14 Jesu fu ijeg kuardiame rad e ni zuriaigin ijigam e aikirariainva iji bu Godon ar ijia rokga fu karauniain.
MAT 21:15 Regavo e mamkanuk Godon isuf baroijo ijiebuon e mamkanuk ijigam e vuak akai nijaidiavo iji bu unam ka mukor iji Jesu fu reno bu iji giava buka deajidiain. Regavo madu bu giak am ukakna iji buka Godon ar ijia arume biumame kume, E Devidon Farif gari aroifno kumen.
MAT 21:16 Ijefuon bu uri Jesu kua, Am ukakna iji bu vuak irerag kuaivo iji abe fainmano kuain? Bu ijeg kuavga Jesu fu una roin kia, Vuak irerag bu kuaivo iji nan fainvano kiain. Fu ijeg kuardiame fu madu uri kia, Ja buk akaij ijia vuak igi bu isoinva iji jabe dame vierafen? Regavo vuak iji bu ijeg isoi, Godri am ukakna iji mukorigia vierafe vajiaga bu fu aroikno kiain.
MAT 21:17 Jesu fu ijeg kuardiame fun ijia areme una Beteni naikafa vain.
MAT 21:18 Bu va ijia naoinva nakitu Jesu fun una e vuak fuon faivo ijiena una Jerusarem ruakuai roko ijia fuka vasiaguain.
MAT 21:19 Fu vasiaguamga fu in durim igekin be bu kua figno kuavo iji be unam irif ijia manina fu gain. Fu game ura vaga in iji fu sunin ba kirain revo fum ma ijesugin. Ijefuon fu uri in iji kuai, Aiji aba una sunin kirakno kuamga in iji tavan ijia fuka sairen.
MAT 21:20 Fu ijeg e vuak fuon faivo iji bu in iji sairenma iji gava buka oiserdiain. Ijefuon bu uri kua, In iji kafu izeg migegare sairenmano kuain. Bu ijeg kuardavga Jesu fu uri kia, Vuak igi naka ma kuardiav. Ja ire ijekin iji jaba giame zazaik gavo jam uri ma vierafekva ja in guri na kuavga fu sairenma ijeg ja ire ijekin kafo rek. Ja ire ijekin ijesugin rekva bakigavo ja madu uruor bomana be kuak koikon tuame saof ijia arimne kuakva fu ir jon abek.
MAT 21:22 Regavo madu ja ma vierafekva irerag ja sirimamene Asoijon kuavo iji fu vajiakno kiain.
MAT 21:23 Areme Jesu fun e vuak fuon faivo ijiena una Godon ar bu sirimamejo makaf ijia vain. Fu ijia vuak nijaidiamo ijia e Godon isuf baroijo ijiebuon e mamkanuk ijigam e Jiusbuon e mamkanuk ijieb useme Jesu kua, Ire iji a reno iji daro iji a izia abe ren? Regavo a daro iji erar mainmano kuain?
MAT 21:24 Bu ijeg kuardavga Jesu fu una roin kia, Na duna besum ja kiaga ja una roib kuardiekva na ijar daro igi na erafon abe ire igin reoijo na iji kuardiakno kiain.
MAT 21:25 Fu ijeg kuardiame uri kia, Ja vierafega Jon e do ruardiamo daro iji fu abe e do ruardiamo iji fu Godri main ki fu emab mainvano kiain? Fu ijeg kuardiamga bu uri dab bui kuaime siguknum kuai, Nokafu una izeg roib kuardak? No uri kuak fu Godri mainmano kuakva fu una kuok revo ja irerafuon ba Jon ma vierafenvano kuok?
MAT 21:26 Regavo no kuak Jon daro iji fu emab mainvano kuakva e guri bu izegrekfuon no iji vierafega fuka dejufduom. Ijefuon maiji e fok bu ma vierafega e Jon fun ma e Godon vuak vierafene kuaimon beno kuain.
MAT 21:27 Ijefuon bu una Jesu kua, Noba vierafenvano kuain. Rega fu uri kia, Ijekido daro igi na izia abe ire igin reoijo iji naba kuardiakno kiain.
MAT 21:28 Jesu fu ijeg kuardiame una kia, Iviakma vuak igi na kuardiakrejo iji ja izeg vierafej? E be fu am farif nokarok (2) nafen. Regavo fun uri va farifuon amur iji kua, Ivia ni va juar gafia ikreno kuain.
MAT 21:29 Fu ijeg kuamga farifuon amur iji fu kua, Na isediemno kuamevo rad fu una oi dakaroime fun una juar ijia vain.
MAT 21:30 Areme asoifuon iji fun madu va farifuon diar iji kua, Aiji ivia va juar gafia ikrene kuain. Fu ijeg kuamga farifuon fu kua, Ke asoinun na ijegrekno kuagavo fuba vain.
MAT 21:31 Regavo ja vierafega am nokarok (2) ijia erar fu asoifuon fu vierafenma ijia kegoinmano kiain? Fu ijeg kiama bu kua, Farif amur ijarno kuain. Bu ijeg kuavga Jesu fu kia, Ni vuak igi na kuardiakrejo iji faif e iji takes abeoijo ijigam bara iji ebuon baru turaoijo iji bur ja asidiame e iji God fu oibuon iji samuagdiamo ijiena besum mazik.
MAT 21:32 Regavo e Godon vuak vierafene kuaimon Jon e do ruardiamo iji fun ro ja karinva ijia kekome unam ma iji ja vakfuon iji fun nijaidiain. Gavo vuak fuon iji jaba mukor faikoga bu e takes abeoijo ijigam bara iji ebuon baru turavo ijieb vuak fuon iji bu faime ma vierafen. Ja iji jan giain gavo jaka ba oijon karoime una vuak fuon faime ma vierafenvano kiain.
MAT 21:33 Ijegreare Jesu fu una kia, Ni una vuak be na bijame kuardiako faif. E be fu moik fuon ijia juar meneare fak kira ameoine aren. Areme guf ijia fu ar be madu bu ijia karine juar samuakfuon iji same uri e kafo kega bu juar iji samuakoga fun ar aibe vain.
MAT 21:34 Fu va ijia fiko in fuon bun sunin kirame duinva fu fain. Ijefuon fu efuon ik reoijo iji kiamga bu va in sunin roin fuifuon turakuai vain.
MAT 21:35 Bu vake gafia usevga e iji in samua karinva ijieb uri e iji kuniaime e be bu dab fijakoga be bu dab kanava fu guain rega be bu mun karme kanain.
MAT 21:36 Bu ijegrejga e iji fun una efuon ikrejo uruvana kiamga bu madu una vain. Bu vakga e iji juar ijia in iji samua karinva iji bun madu e iji vainva iji kam unam besum iji bu renva ijeg ren.
MAT 21:37 Bu ijegrejga e iji fun una fui kuai, Na farinun kuaga fur vakma buba fu kanaken. Regavo bum fu agoime vuak fuon abekno kuaime fun farifuon kuamga radkma iji fur vain.
MAT 21:38 Fu vakoga e iji juar samuame karinva iji bun game uri bui kuai, E guri fu e iji juar igi menma ijefuon farif ijin. Ijefuon no fu kaname asoifuon ijefuon juar fok iji nor abekno kuain.
MAT 21:39 Bun ijeg kuaime uri farifuon kunain dab juar fak gufa akozme usem kanavga fu guainmano kiain.
MAT 21:40 Jesu fu ijeg kuardiame kia, Bu ijeg ren gavo e iji juar koikin iji fu una ruakma fu e iji juar iji samuainva ijiebuon fu izegarekno kiain?
MAT 21:41 Fu ijeg kuardiamga e iji bu una kua, Fu ruakma fu uri e ise ijin kaniagavo e ma iji juar fuon mukor samuainva iji fu kege uniaikin bur juar fuon ijia in sunin iji kiriavo iji turame kafo fui namdakno kuain.
MAT 21:42 Bu ijeg kuardavga Jesu fu una kia, Regavo ja Godon vuak bu usuibe isoinva iji jabe dame gain? Regavo vuak iji bu ijeg isoi, E ar savo iji bu mun ma iji fu ar uf ijia manine girekfuon iji bu game vierafero fu isero bu dab akozen. Regavo E Bomana iji fu mun iji una abenma ijefuon iviakma mun iji fu ar uf iji biekudieme manino iji fuka ikin. Regavo iji fuka ma fun E Bomana ijar koikfuon ire iji rena non gaga fuka ma.
MAT 21:43 Ijefuon igia faif jaiji ja e ise iji bu juar ba mukorigia samuagdiavo ijekin. Ja na uzainva ijefuon God fu ik iji ja efuon samuagdiamo fu miainma iji fu kamaziame una e Jius bakin iji bu ik mukor rejo iji miak. Fu miaga bur vuak fuon ma iji abe kuaimoga e fok bu ma vierafene una e iji God fu oibuon iji samuagdiamo ijiena besum mazim kari vak.
MAT 21:44 Ijefuon naiji na mun bomana ijin ijefuon e be erar fu ari kanaga fu mun azan ijia arikma buka buaseme iserek. Regavo madu e be erar fu mun ijar ari kanakma fuka una kuotuvat igegrekno kiain.
MAT 21:45 Fu ijeg kuardiamga e mamkanuk isuf baroijo ijigam e Ferisis iji bu Jesu vuak iji fu bijame kuaimon iji faime vierafero fu buisina kuaimoro bu ijeg vierafen.
MAT 21:46 Ijefuon bu uri Jesu kunaime tokuai vierafen. Gavo e fok ijia ruainva iji bu vierafega Jesu fuka ma e iji Godon vuak vierafene kuaimon ijin. Ijefuon e mamkanuk iji buka jume ire kafo buba fuon ren.
MAT 22:1 Areme Jesu fu una madu vuak be ijeg bijame kuardiain. Fu kia, E iji God fu oibuon iji samuagdiamo iji fu e kin be fu moik samuamo iji fu farifuon ijar bara abekrega fu iro bomana be ikafa kanafuinma igekin.
MAT 22:3 Kin iji fu iro iji kanafume fun efuon ikrejo iji kiamga bu va e iji bu iro fuon sarekfuon kiainma iji kiamga bu iro fuon iji sarekuai vain. Bun va e iji kiamoij ga e iji bu uzame ba iro ijia ruain.
MAT 22:4 Ijefuon e kin iji fun una madu vuak igin efuon ikrejo ijin kuardiain. Fu kia, Ni va e iji kia, Maf-kau ma iji saruigin iji bun kaniame buaseme akozen ijefuon nan iro ikro samuain. Ijefuon ni migegare iro nun sarekno ruafno kiain.
MAT 22:5 Fu ijeg kuardiamga bun va e fok vuak ijin kuardiain. Ijegrene e iji buba una vuak iji fain gavo bun una ire buon kafokafo bu vierafenva iji reokuai vain. Be fu juar mekafa vain revo be fu monfuon ikrekafa vain.
MAT 22:6 Regavo e roin bu uri e iji vuak abe vainva iji kuniaime kam unam ise kafo buon reknum kaniavga bun aoin.
MAT 22:7 Bu ijegrejga e kin iji fu vuak iji faima fuka deajimga fu uri e azi kegoijo fuon kiamga bu va e iji kaniavga bu aoiknum uri ar buon kara java bu naoin.
MAT 22:8 Areme kin iji fun una efuon ikrejo iji kumena bu rokga fu kia, Iro nun fuka samairen gavo e iji na kiainva iji bu isema vierafene buba iro sarekuai ruain.
MAT 22:9 Ijefuon iviakma ni una va mai mamkanuk unam ijia oknum e kafo ja giakva iji uruvana kia bu iro nun igi sarevno kiain.
MAT 22:10 Fu ijeg kiamga bun va unam ijia oknum e ise abevo ma iji uruvana kiavga bu iro iji sarekuai ruain. Bu roke ar gufi bu sanamikrejo iji fuka e ijar mame irtoijen.
MAT 22:11 Areme e kin iji fun arume e fok gia vake gak e be fu ugon bu same e sanamivo ijia roko iji fuba same ruainmaga fu gain. Fu game uri e iji kua, Eko a izegarega a ugon iji bu same e sanamivo ijia vako iji aba same ruainmano kuain. E kin iji fu ijeg kuamga e iji fuba una roin kuardain.
MAT 22:13 Ijefuon e kin iji fu una efuon ikrejo iji kia, E guri kunaim dab dia ga imut fuon iji tome abe ai makaf nakinma ijia akozef. Abe ijia akozga fu ijia fine vajai fian abeknum niraime ubai jakiknamikno kiain.
MAT 22:14 Areme Jesu fu vuak fuon kuaim vake barekafa uri kia, Unam besum ijegvo God fu vierafe buka e uruvana una aganfuon ijiena besum mazikfuon fu iji vierafene kumen. Regavo buka e sibank vuak fuon faime una aganfuon ijiena mazivno kiain.
MAT 22:15 Areme rad e Ferisis roin bun useme va unam izeg bu Jesu biesuame duna kuakfuon iji kuaima maren.
MAT 22:16 Bun kuaime uri e vuak buon faivo roin ga e Erodon e roin kiavga bun Jesu fino ijia vain. Bu va ijia useme Jesu kua, E nijaidiamon no vierafega vuak irerag a kuaimon iji aka vuak ma ijesugin kuaim. Regavo e iji a vuak kuardiamo iji bukafu e mamkanuk ga e ukakna iji a juvknum kuardiamo bakin. Regavo aka vuak ma iji izeg God fu e igiebuon fu vierafenma a ijin dab e ijin nijaidiam.
MAT 22:17 Ijefuon a vierafega akai nuvuon ijia no e Sisa e Romkobuon e bomana iji fuon takes abesvo iji kafu maren vo fuba marega ni ar kuarduoga no faivno kuain.
MAT 22:18 Bu ijeg kuardain gavo Jesu fu vuak buon ka kufui iji fun giain ijefuon fu uri kia, E guri ka ir kufuikin gurie ja era biesuakuai vierafene vuak kufui iji ke ruainvano kiain?
MAT 22:19 Fu ijeg kuardiame kia, Ni mon sunin iji ja takes rekfuon iji abe nijaidie na gavno kiain. Fu ijeg kiamga bu uri mon sunin abe mavga fu abe nijaidiaknum kia, Ja igi jan gain. Ja gaga uikinik igeko if iji isoinva iji bu erafono kiain?
MAT 22:21 Fu ijeg kuardiamga e mamkanuk iji bu uri kua, Fu e Sisan uikinikno kuain. Bu ijeg kuardavga fu kia, Ijefuon ni giamga irerag iji bu e bomana Sisan kuaikva ni kege una fu vajaf. Regavo irerag iji ja giaga bu Godon kuaikva ni kege una God vajafno kiain.
MAT 22:22 Fu ijeg kuardiamga bu vuak iji faiva buka oiserdiamga bu Jesu areme vain.
MAT 22:23 Areme tavan besum ijia e Sejusis roin bu Jesu fino ijia ruain. (Regavo e iji ruainva iji bu e iji aoime una urijo iji buba ma vierafej). Ijefuon bu useme Jesu duna ijeg kua, E nijaidiamon Mosis fu kuo, E be erar fu bara abe fu am kafo ba tuanaga fu guakma uviaifuon iji fuka bara amun iji fusik abe fuifuon am tuanakno kuin.
MAT 22:25 Ijegvo e agan besum ijia bu efarif seven (7) ijeg bu igia nona karij. Ijefuon e bo buon iji fun bara aben gavo am kafo fuba tuanain gavo fum guain. Fu guamga uviaifuon iji fusik bara iji aben gavo fuk fuba am kafo tuanain gavo fum guain.
MAT 22:26 Fu guakoga uviaifijaf fok buk ijegrene vake efarif diar ijia baren.
MAT 22:27 Bu ijegrene rad bara ijar guain.
MAT 22:28 Regavo bara iji e fok bu abenva iji tavan iji e bu aoime una uri nivek kari vako ijia bara iji fu erafon barakno kuain?
MAT 22:29 Bu ijeg kuardavga Jesu fu una kia, Jaiji jaka ba mukor vierafen. Ijefuon maiji ja Godon vuak iji jaba fain ga daro fuon ijia fu ire kafokafo reno iji jaba vierafen.
MAT 22:30 Ijefuon maiji tavan iji e bu aoime una uri nivek karijo ijia bara baru buba una sanamik. Gavo buka una anera iji bu varur gufia karijo igegrekno kiain.
MAT 22:31 Regavo ja God e iji bu aoime una urijo ijefuon fu buk akai ijia kuainma iji jabe dame gain?
MAT 22:32 Regavo vuak iji bu isoinva iji God fu ijeg kuai, Naiji na e Eburam ga e Aisek ga e Jekafbuon Godno kuain. Ijefuon maiji fu e iji nivek karijo ijiebuon God. Regavo fu e iji buka mukor aoivo ijiebuon God bano kiain.
MAT 22:33 Fu ijeg kuardiamga e fok bu vuak fuon iji faiva buka oiserdiain.
MAT 22:34 Regavo e Ferisis iji bu faik fun Jesur vuak fuon ijia e Sejusis buon vuak iji fuka kaniatuama bu faime bun una besum afuin.
MAT 22:35 Bu besum afuikoga e vuak akai nijaidiamon be fu uri Jesu biesuakafa kua, E nijaidiamon akai fok bu nainva ijia akai izar fuka ma bomanano kuain?
MAT 22:37 Fu ijeg kuardamga Jesu fu una roin kua, Akai ma bomana iji igin, Nika oion fok ga kaven on ga vierafe on fok iji nika God on iji oijmamne. Akaij ijar fuka bomana ga fuka ma ikin.
MAT 22:39 Regavo madu akai be ka ma bomana ijefkin iji, Nika izeg a on oijmanamimo ijeg una kaifon roin oijmiamne.
MAT 22:40 Ijefuon maiji e fok Godon vuak vierafene kuaivo ijiebuon vuak ijiga Mosison akai fok bu akai nokarok (2) ijieb bu biduakiakok e bu ijia kegoinvano kuain.
MAT 22:41 Regavo e Ferisis iji bu vek ijia afuinva ijia Jesu fu uri kia, E iji God kuama fu ruainma iji ja vierafega fu erafon uifarifno kiain? Fu ijeg kuardiamga e Ferisis iji bu una roin kua, No vierafe fu e Devidon uifarifno kuain.
MAT 22:43 Bu ijeg kuardavga Jesu fu una madu kia, Regavo irerafuon Kaven Akai iji fu Devidon oij ijia vierafe mamga fu e iji kua E Bomanano kuain? Ijefuon maiji fun Devidiri kua, God E Bomana ijar una e bomana nun iji kuak, Ni igi ij maink igia fi. A ijia fike na e ani on bu ana nigaraioijo iji nar kege kaniame ke diak rotit on ijia uniamno kuain.
MAT 22:45 Regavo Devid fu e iji God kuama fu ruainma iji kuak E Bomanano kuakma iji Devid fu izeg una e iji kuak, Aiji a uifarif nuno kuakno kiain?
MAT 22:46 Fu ijeg kuardiame barekoga rad e be fuba una Jesuon vuak iji roib kuardain vo una duna kafo fu kuardain. Regavo madu buba vierafero Jesu vuak iji fu kuardienma iji fu fuifuon kuainmaro buba ijeg vierafen.
MAT 23:1 Areme Jesu fu uri e fok abevo e vuak fuon faivo iji afuinva iji vuak nijaidiame kuardiain.
MAT 23:2 Fu kia, E akai nijaidiaoijo ijigam e Ferisis iji bu Godri akaij iji abe e Mosis mama fu abe miamga bu iji abe nijaidiaoij.
MAT 23:3 Ijefuon jaka irerag fok bu kuardiavo iji ka igiame reof. Regavo jaib unam buon bu mimatame kegoijo ijia jajiak. Ijefuon maiji irerag bu kuaimoijo iji bu ma ijekma mimatame kegoijo bakin.
MAT 23:4 Regavo buka uri akai uruvana kege vajiavo iji buka in mug ka ma afirenma igeg kege kam faraf kamudiav. Regavo bu koikbuon una ja ifejdiaga ja akaij iji igiakfuon iji buba vierafen.
MAT 23:5 Regavo ire fok bu kegoijo iji bum ema ijieb giakuai bu ijin reoij. Buka uri buk akaij ijia vuak kafar kafo kege isoiseme kam mavua ukakna iji bu i fat ijia amardiainva ijia isoime kam faraf ga variatar buon ijia kiriamoij. Bu ijegrene buka uri ugon buon iji kam mukorigia amarme samoijo iji e bu giame kuai e iji buka e mamkanukno kuaivo.
MAT 23:6 Bu ijegreoknum ar bu iro ijo ijia buka ar ma ijia kariknum ga ar bu afuime vuak kuaivo ijia buka bur e ikin rene fata ma iji kege karioijo.
MAT 23:7 Bu vierafe e buka ar bu afuime ire kafokafo kimejo ijia bu mukorigia anadiakuai bu ijeg vierafej. Regavo madu e buka bu mukorigia agordiaknum kia jaiji jaka e nijaidiavno kiakuai bu ijeg vierafekno kiain.
MAT 23:8 Jesu fu ijeg kuardiame kia, Ja koikjo jab kuaik noiji no e nijaidiavo ijino kuaik. Ijefuon maiji e nijaidiamo jon iji fun e besum ijesugin ga e fok iji bu uviaifjon.
MAT 23:9 Regavo madu jab e moik igeko igia e be kua, Ateno kuak. Ijefuon maiji Asoijon fun e besum iji varur gufia fino ijin.
MAT 23:10 Regavo jab areke e bu kia jaiji ja e nijaidiavo ijino kiak. Ijefuon maiji e nijaidiamo jon iji fun Kurais nar nunkua.
MAT 23:11 Regavo kafar jon ijia e iji erar fu e bomana rekma e iji na vierafe fuka una e ikreno igeg rekfuon.
MAT 23:12 Ijegvo erar fu koikfuon abe e bomana reno iji God fu e iji abe una e ukakbe rek. Regavo erar fu una e ukakbe rene adumaduigin oino iji Godri fu dab una e ikin rekno kiain.
MAT 23:13 Regavo e vuak akai nijadiaoivo ijiga e Ferisis i kufuikin iji jaka juf. Ijefuon maiji ja e iji bu Godon e rekuai roko iji jaka jar unam buon iji bijukuriaknum vo jaka koikjo unam jon bijuv.
MAT 23:14 Regavo e iji vuak akai nijaidiavo ijigam e Ferisis i kufuikin iji jaka juf. Ijefuon maiji ja bara amun iji jaka mukorigia biesiame uri sinuom ga ar buon iji kamaziav. Jaka ijeg isema reoijknum vo una e nifak ijia jaka aroikarame jaoijmana sirimamej.
MAT 23:15 Regavo e vuak akai nijaidiavo ijigam e Ferisis i kufuikin iji jaka juf. Ijefuon maiji jaka jar sisim kege ar aibe ijia oknum e iji bu una jana rekfuon iji nisaimoijo. Ja nisaidiame e aferdiaga bu una unam jon ja reoijo ijia ifejdiav. Regavo iji bu ijeg ifejdiavo ijia buka ise jon iji asidiame ma ise rejo ijefuon bu iji buka jana besum maziv.
MAT 23:16 Ijefuon jaka juf ijefuon maiji jaka e nizuriaigin igeg e iji jan aferdiame kam una unam ise ijia nijaidiaoij. Ijefuon God fuka ja kege arafiriak. Ja kuai e be erar fu Godon ar iji kurame akai kafo nakma fu ijar ire be rekma bano kuaiv. Regavo erar fu ire gord bu amarme ar bu sirimamejo guf ijia nainva ijia kurame akai kafo nakma irerag fu kuaimon iji fu markno kuain.
MAT 23:17 E guri ka e buzegin nizuriaigin gurie. Ire gord iji fu akai bakin gavo fum tavan iji bu abe Godon ar ijia aru sirimamene abe God mavo ijia fu akai ren.
MAT 23:18 Regavo madu ja kuai, E be erar fu fata iji bu isuf baroijo ijia kurame akai be abedekma fu ijar irerag rekma bano kuaiv. Regavo erar fu ire iji bu karme isuf baroijo ijia kurame akai kafo nakma iji fu markno kuain.
MAT 23:19 E guri ka ni zuriaigin gurie. Isuf iji fu akai bakin revo bum tavan iji bu kege isuf baroijo ijia isuf iji fu akai ren.
MAT 23:20 Ijefuon eraneb bu fata iji bu isuf baroijo ijia kurame akai kafo navo iji buka ire fok fata azan ijia naoivo ijiebuon fok kuaiv.
MAT 23:21 Regavo madu erar fu Godon ar ijia kurame akai kafo namo iji fu ar ijesugin kurame kuaimon bakin. Regavo fu God madu kurame kuaim ijefuon maiji God fu ar ijia fin.
MAT 23:22 Regavo madu e be erar fu varur gufefuon if ijia kurame kuaimon iji fu Godon fata ma iji ga e iji ijia ajie fino ijefuon if ijia kuaim.
MAT 23:23 Regavo e vuak akai nijaidiavo ijiga e Ferisis gurie ka i kufuikin guri jaka juf. Ijefuon maiji ja juar jon ijia ire isaf ukakna minit ijigam diri ga kamin kuavo ja iji masivo iji jaka roin kege God vajaf. Regavo ire iji bum ukakna ga ja ijegrejo iji fun maren. Gavo una vuak ka mamkanuk iji fu akaij ijia kuai e oimardiaknum e ifejdiaknum e roin ma vierafejno kuainva iji jaka reoijo bakin. Ja ire ijin kege mimatame kegoknum vo una ire ukakna igi na kuainva iji madu kegokva iji fuka marek.
MAT 23:24 E guri ka nizuriaigin gurie. Akai ukakna iji jaka kege mukorigia agordiav. Regavo una akai mamkanuk iji jaka nuigafiavno kiain.
MAT 23:25 Jesu fu ijeg kuardiame uri kia, E guri vuak akai nijaidiavo gurie ga e Ferisis gurie ka i kufuikin gurie. Ja vajai surif jon iji jaka kam mukorigia samuagdiav. Regavo oijon guf ijia jaka ire kafokafo ja jonkua vierafene kegoijo ijar fuka raren.
MAT 23:26 E Ferisis nizuriaigin gurie, Amur ni oijon guf iji amare bu marke vajai jon fok bu mardiamno kiain.
MAT 23:27 Jesu fu ijeg kuardiame madu uri e iji vuak akai nijaidiavo iji abevo e Ferisis iji kia, E gurie ka i kufuikin gurie janika juf. Ijefuon maiji jaiji jaka e mako vien iji buka mukorigia amaren gavo guf iji fuka e an burarenva ijieb ijia naoivo ja ijekin.
MAT 23:28 Ijegvo madu ja e fok ijiebuon nifak ijia oijo iji jaka e mukor. Gavo oijon guf ijia jaka ebuon vuak ise kuaiknum ise reoijno kiain.
MAT 23:29 Jesu fu ijeg kuardiame madu uri e vuak nijaidiavo iji abevo e Ferisis iji kia, E guri ka i kufuikin gurie janika juf. Ijefuon maiji ja e iji Godon vuak vierafene kuaivo ijiebuon mako vien iji jaka mukorigia amarev. Ja ijegrene kuros amare saknum sinar abedev. Regavo madu jaka e iji bu unam mukor reoijo bu aoinva ijiebuon mako vien ijin kam mukorigia amarev.
MAT 23:30 Regavo madu ja kuai, No saifnuvuon bu usuibe kari ruainva no ijia buna karivabatie noba bu renva ijeg una e iji Godon vuak vierafene kuaivo iji kaniakno kuaik.
MAT 23:31 Ja ijeg kuaivo iji jaiji jaka saifjon iji bu e Godon vuak vierafene kuaivo iji bu kaniainva ja ijekin. Ijefuon maiji vuak jon izeg ja kuaivo ijia jan koikjon iji visume kuaiv.
MAT 23:32 Ijefuon ni uri saifjon izeg bu kegoinva iji buin ijia ifejdiame rene vafno kiain.
MAT 23:33 Jesu fu ijeg kuardiame uri kia, E guri e biesiaoijo gurie jaiji jaka tabar nafediainma igekin. Ja mian iji fu naine ja jakiakreno iji ja izeg subinai usem vakva bakin.
MAT 23:34 Ijefuon igia faif. Vuak igi na ma kuardiav. Na e Godon vuak vierafene kuaivo ijigam e Godon vuak iji mukor vierafejo ijigam e iji e nijaidiavo iji kiaga bu jon vuak. Na kia bu vuaga jar e roin ja kania bu aoiknum kam kuros kaniakfuon. Regavo roin bu ar jon ja sirimamejo guf ijia ga mai besubesum ijia vuakva jaka fijiaknum kaniame kam arafiriaok.
MAT 23:35 Ijefuon maiji bun ik anej gamia anerene roke ivia igia ruainva ijia e iji maturainva iji God fu kiamga bu ruainva iji bun saifjon ijieb kaniain. Regavo e iji amur bu e Ebor kaname ura e Berekaian farif e Zekaraia kanain. E iji ja Godon ar bu sirimamejo ijefuon fata akaij iji samaij ijia kaniain.
MAT 23:36 Ijefuon vuak igi naka ma kuardiav, Godri ire fok iji rene ruainma ijefuon e uifarif buon igi ja iviakma karinva iji fok fur kam arafiriaga jaka ma vajai fian abekno kiain.
MAT 23:37 O Jerusarem Jerusarem ar e iji Godon vuak vierafene kuaivo iji kaniain. Regavo madu ar e iji vuak abe oijo iji God fu kege uniamga bu jon vuainva iji mun tuame kaniain. Regavo nar afon iji na ja oijmiainva iji nakafu tavan izeg oijmiain. Na buiji naka um kukoro iji fu ukafijaf aferdia daf fuon ijia irame nakariamo ijeg na ij nun akozme afjon okuriain. Regavo na jaka ba bomana vierafej.
MAT 23:38 Ijefuon jaiji ja ar iji e bu same ba ijia karijo igeg God fu ja ijeg areme unia vakfuon. Regavo e ani ga ire ise kafo bu jon rekva God fuba ifejdiak.
MAT 23:39 Regavo vuak igi naka ma kuardiav. Ja na jaba una giek revo ja vake tavan iji ja na oimardieme kie, No vierafe Godri e iji fu E Bomana ijefuon if ijia roko iji daro maga fu roko kuaivo ijia jason una na giekno kiain.
MAT 24:1 Areme Jesu fun Jerusarem Godon ar iji areme kekome vako ijia e vuak fuon faivo iji bu usem ar ni mukor bu sainva iji kuardame nijain.
MAT 24:2 Bu ar ijefuon kuardavga Jesu fu kia, Iji fuka ma gavo ni ire iji bu kege ar iji sainva iji mukorigia giaf. Regavo na kuardiako faif. Mun besubesum guri bu kege ar guri sainva iji rad buba iji bu name ajienva ijeg naoime vak. Regavo mun fok buka uduime arikno kiain.
MAT 24:3 Jesu fu ijeg kuardiame fun va uruor be bu kua Orivsno kuavo ijia fikoga e vuak fuon faivo iji bu buonkua isuarigia fu fino ijia ruain. Bu useme kua, Nin Godon ar bu tavan ivez buja korekfuon iji a kuarduinma iji kuarduo no fai. Regavo madu no anf irerag ijia game vierafero tavan on a una roko iji fun samairenmaro no ijeg vierafek. Regavo madu moikigi fun barekafa buin ijia rokoro no ijeg vierafekno kuain.
MAT 24:4 Bu ijeg kuardavga Jesu fu uri kia, Ni vuak igi na kuardiavo iji mukorigia gavknum of. Regavo jab e iji bu vuak kufui kuaimoijo ijiebuon vuak iji faime jajiak.
MAT 24:5 Ijefuon maiji e uruvana bu useme biesiame kiak naiji na Kuraisno kiakva e uruvana buka uri bu jajiakfuon.
MAT 24:6 Regavo madu e buka ai samaij ja karinva ijia vo baga aibe ijia buon bijaimoga ja faik. Regavo igia faif. Ja vuak iji faikva jab uri juk. Ire ijekin iji buka rekfuon. Regavo jab vierafero moik igi fun iviakma barekro jab ijeg vierafek.
MAT 24:7 Ijegvo moik mamkanuk roin bu uri buon bijaikega moik ukakna iji bu uri buon bijaik. Regavo madu moik kafokafo ijia fuka vasia kekokega moik fu urak.
MAT 24:8 Regavo ire ise kafokafo bu ijeg anerekva ni vierafero ire ise ka ma uruvana ijekin iji bu rad rekro ja iji vierafekfuon.
MAT 24:9 Rega e ise iji bu ja tofdia kam arafiria vo kaniaga ja aoik. Regavo madu e buka ja uzak ijefuon maiji ja nuifuon ikreoijo ijefuon bu ijeg rekfuon.
MAT 24:10 Regavo tavan ijia e roin bu buon ma vierafejo iji bun ijia areme una e roin oi isema vierafek. Bu ijegrene uri buon sivisanamiknum uri koikbuon kege una e ani buon vajiak.
MAT 24:11 Areme e roin bu usem biesiame kiak noiji no e Godon vuak vierafene kuaivo ijino kiame uri vuak kufui ijia kuardiame ja aferdiak.
MAT 24:12 Regavo fun unam ise ijieb moikigia rarekva e ma vierafejo iji bun kaifijaf bu oijmiavo iji bu ijia arekfuon.
MAT 24:13 Regavo e iji erar fu fuon ma vierafeno ijia fuka giriesame ifejdame vake buin ijia kekomo e iji God fu keunak.
MAT 24:14 Regavo vuak nun ma iji God izeg fu efuon ijiebuon oij iji samuagdiamo iji bu enun ik reoijo ijieb abe ar iror fokigia e fok kuardiak. Areme ijarson ire fok bu ijia barekno kiain.
MAT 24:15 Jesu fu ijeg kuardiame kia, Ja ar bu sirimamejo guf ijia vo fata akaij iji bu isuf baroijo ijia ire ise be fu ijia rega ja gak. Ja gakva ni Danier e Godon vuak vierafe kuaimon fu usuibe kuai, Ire ise be fu rekno kuainma iji vierafef. Ja ire iji gakva ni e fok Judia guf ijia karinva iji kiaga bu migegare subinaime uruor mamkanuk iji irevo irif ijia vaf.
MAT 24:17 Regavo e iji fu ar fuon azan ijia ajie fino iji fub una arime ar guf ijia sinuom fuon karekfuon.
MAT 24:18 Regavo e be fu juar fuon ijia ikreoino iji fub una ar fuon ijia ugon fuon fu azan samo iji karekafa vak.
MAT 24:19 Regavo tavan ijia bara iji bu e fudienva ijigam bara iji eraneb am gatkin aferdia oijo iji buka oifian abek.
MAT 24:20 Ijefuonvo ni God sirimamekin jaba tavan iji iduan ufino ijiga tavan iji bu isuar karine God sirimamejo ijia subime vakfuon. Ijefuon maiji tavan ise iji ja oifian abekfuon iji fuka ma ise ijar rekfuon. Regavo ire ka ma ise ijekin be fu ik anej ijia roke iviakma igi be fuba ijeg ren. Regavo rad ire ka ma ise ijekin be fuba una rekfuon.
MAT 24:22 Regavo God tavan iji fuba ufume una ari ruainmabatie fu e be erar nivek fivakma bakin. Regavo fun Godri e iji fu imut bijiainma iji bu vierafenma ijefuon fu buifuon tavan iji abe ufume una arik.
MAT 24:23 Ijefuon e be fu uri kiak e iji God fu kuamga fu no karaunuokafa ruainma iji fu gafa rokno gafno kiakma jab uri fu ma vierafek.
MAT 24:24 Ijefuon maiji tavan ijia e kafo bu useme ja biesiame kiak, Naiji na e iji God fu kiemga na ruainva ijino uri na jajiefno kiak. Regavo roin bu usem biesiame kiak, Naiji na e Godon vuak vierafene kuaivo ijino kiak. Bu ijeg kuardiame uri anf ga ire sumakin kafokafo iji rene e ijiebuon oi ga buon ma vierafejo iji kam iserek. Regavo bu giriesakva bu e iji Godri imut bijiame kenma ijiebuon oij iji kam iserediak.
MAT 24:25 Regavo igia faif. Na vuak igi na amur kuardiaikin rad tavan iji ruakma ja giame vierafek.
MAT 24:26 Regavo madu igia faif. Ja e kafob kuardiame kiak e iji fu ai moikum namo gafa vo ar gafijano kiaga jab ma vierafene usem vak.
MAT 24:27 Ijefuon maiji tavan iji Emabuon Farif igi na una roko iji na varur iji fu kaf gufia vebui karaga e fok ai moikigia karijo bu gavo na ijeg una roga e fok bu na giek.
MAT 24:28 Regavo ja um kafo bu kaf ijia ram oga ja giakva ni vierafero ire mutur be fu moikigia namoro ja ijeg vierafek. Unam besum ijegvo ja ire iji na kuardiainva ijekin kafo giakva ni vierafero Emabuon Farif iji nan una rokoro ja ijeg vierafekno kiain.
MAT 24:29 Regavo tavan iji ja ire ka ise iji biediame barke rad tavan iji fuka una nakikega asam fuba una sanak. Regavo ire fok varur gufia girme naoivo iji buka katime uduime arikega mujur iji buk buka varur gufia jafeksa arik.
MAT 24:30 Rega tavan ijia Emabuon Farif ijefuon anf iji nar varur gufia reke e moik igeko bu gieme niraik. Bu ijegrejknum gieke Emabuon Farif igi na daro nun ga sanainma nun ka ma bomana ijekma vana araf ijia ari ruak.
MAT 24:31 Ijegreare veg ka mamkanuk ijieb ijia foikega na ijia anera nun kege uniaga bu moik igefuon buin ijia ga varur gufefuon buin ijia e iji bijukuriak. Areme bur enun iji bu moik kafokafo igia karioinva iji na imut bijiainva ijin aferdiame una besum afuikno kiain.
MAT 24:32 Jesu fu ijeg kuardiame uri in makam ijia bijame kia, Nin in makam iji game vierafef. Tavan iji in makam fu a kanamon iji ja game vierafero tavan iji juar mejo iji fun samairenmaro ja ijeg vierafej.
MAT 24:33 Unam besum ijegvo tavan iji ire fok ja giakva ja vierafero tavan iji na ruakfuon iji fuka samairenvo fun ijia anerenro ja ijeg vierafek.
MAT 24:34 Regavo vuak igi naka ma kuardiav, Ire fok na kuardiavo iji e aganjon igi bu iviakma kari roko iji bu vek karine giame rad son aoik.
MAT 24:35 Regavo varur gufeko moikigi buka bakrek gavo vuak nun fuba barekgavo fu tavan bog ijia navakno kiain.
MAT 24:36 Jesu fu ijeg kuardiame kia, Tavan iji na una roko iji Godon anera varur gufia karijo iji abevo Godon Farif igi nak naka ba vierafen. Regavo fun Godri fuonkua tavan iji vierafen.
MAT 24:37 Regavo tavan iji Emabuon Farif igi na una ruakfuon iji fun unam besum izeg fu e Noan renma fu una ijeg rekfuon.
MAT 24:38 Usuibe do fuba firainma ijia e iji buka do kugi ine uri duok ine baru bara buon sanamiknum ijegre vake ka Noar sisim ijia ajikoga bu ijia aren.
MAT 24:39 Bu ijegreogavo irerag iji rekreno iji buka ba vierafen. Buba vierafenva ijia do iji fum ijia firame keko e ga ire fok numume vain. Regavo tavan ijia e nokarok (2) bu juar ikreoijo ijia Godon anera iji bu arime e besum afegavo be bu ijia areme vak. Regavo bara nokarok (2) bu duok nifiejo ijia anera bu arime bara besum afegavo be bu ijia areme vak. Unam besum ijegvo tavan iji Emabuon Farif na una roko iji fu ijeg rekfuon.
MAT 24:42 Ijefuon ni mukorigia gavknum karif. Ijefuon maiji ja tavan ivez E Bomana jon igi na una roko iji jaiji jaba vierafen.
MAT 24:43 Regavo madu igia faif. E niesamo be fu tavan ivez e befuon ar bujakafa ruakreno iji e ar koikin iji fun vierafekma iji fuba ninaikfuon. Regavo fu uri ijia fino ijefuon e niesamo iji fu izeg ar fuon iji bujame ajiekma bado fu ijia arek.
MAT 24:44 Ijefuon jak nika tavan bog samuaknum of. Ijefuon maiji Emabuon Farif igi na una roko iji jaba vierafenva ijia na ruakno kiain.
MAT 24:45 Areme Jesu fu uri kia, Tavan iji na una vainva ijia janika ma vierafene e iji fu mukorigia vierafene kegoino igeg ikreof. E iji fu mukorigia vierafene reoke efuon bomana fu iji gakma fu kuaga fur una e iji funa ikreoijo iji samuagdiak. Fur samuagdiaga tavan bu duok ijo iji abekma fur migegare duok buon kege ro vajiak.
MAT 24:46 Fu ijegreokega e bomana fuon fu una ar roke keko gakma fuka bomana fuon oimarek. Ijegreare fu e iji kuaga fur uri ire fuon fok samuagdiakfuon.
MAT 24:48 Regavo e iji fu kegoknum samuaba uri kuaik enun bomana igi na vierafe fuba migegare una ruakno kuaik. Fu ijeg kuaime uri e iji fu samuagdiamo iji fijiaknum uri e ise ijiena duok ioknum do kugi iok. Fu ijegrene efuon bomana iji fuka rume ba una fu vierafeoino ijia fu una ruak.
MAT 24:51 Fu una kekome e iji fijame dab kaname kuaga fu ar iji e i kufuikin bu niraiknum ubai jakiknamivo ijia buna fikno kiain.
MAT 25:1 Jesu fu ijeg kuardiame uri vuak be ijeg bijame kuardiain. Fu kia, Tavan iji God fu una efuon ijiebuon oij iji samuagdiakfuon iji fu bara naise imut roin (5) ga roin (5) bu rait buon kege e bara abenma iji biekuai vainva igeg rek.
MAT 25:2 Bara imut roin (5) bu mukor vierafen gavo bara imut roin (5) buba mukor vierafen.
MAT 25:3 Ijefuon bara iji isema vierafenva iji bum uri rait buon ijesugin ke gavo kiresini kafo bu rad usekfuon iji kafo buba kuniaime vain.
MAT 25:4 Regavo bara imut roin (5) iji mukor vierafenva iji bun butor kege kiresini buon kafo veseme rait buon ijekma kuniaime vain.
MAT 25:5 Bara imut roin (5) ga roin (5) iji bun va gak e iji fu isuar tavan ufrenma ijia saroime ruakrega bu va vien ijia samuame karin. Bu ijia samuame kari vake ninadiamga bun ninaoin.
MAT 25:6 Areme tavan ufrenma ijia bu faik e be fu kumen, E iji bara abekreno iji fun rokno ni uri fu biefno kumen.
MAT 25:7 Fu ijeg kumega bara iji bun uri rait buon kege sanakuai urin.
MAT 25:8 Regavo bara imut roin (5) iji mukor vierafene kiresini vese kuniaime ruainva iji bun uri kiresini buon kege rait ijia vesen. Ijegreare bun vakuairejga bara iji ba mukor vierafenva iji bun uri kia, Rait nuvuon bu kiresini bakin ijefuon ni kiresini jon roin rait nuvuon ijia veseduovno kiain.
MAT 25:9 Bu ijeg kiavga bara iji mukoi vierafenva iji bu una kia, Kiresini igi fuka ba aresren. Ijefuon non kege rait nuvuon ijia vesenva fun aresren. Ijefuon ni una va sitova gafia kiresini jon kafo kimefno kiain.
MAT 25:10 Bu ijeg kiavga bun una kiresini kimekuai vako e iji bara abekreno iji fun rokga bara imut roin (5) iji mukoi vierafenva iji bun samuainvado bun funa aru vain. Bu arume ar iji bu sanamikrejo ijia duok ikuai vakoga bun vien dab bijukurain.
MAT 25:11 Ijegrekoga rad bara iji ba mukoi vierafenva iji bun una roke ijia usen. Bu useme e iji bara abekreno iji anaiknum kua, E bomana E bomana ni kuoga no ijia aru vuakno kuain.
MAT 25:12 Bu ijeg kuardavga e iji bara abekreno iji fu una roin kia, Naiji ja naba vierafenvano kiain.
MAT 25:13 Ijegreare Jesu fu vuak fuon kuaim barekafa uri kia, Ni mukorigia nisaiknum karif. Ijefuon maiji ja ivez ga tavan ivez na una ruakrejo iji jaba gainvano kiain.
MAT 25:14 Jesu fu ijeg kuardiame uri vuak be ijeg bijame kuardiain. Fu kia, Tavan iji God fu izeg efuon ijiebuon oij iji samuagdiakfuon iji fu e be fu aibe ijia vakafa uri efuon ikrejo nokbek (3) mon fuon atame vajiame vako bu fuifuon samuagdiainva igekin.
MAT 25:15 E iji fu uri e be fu amur rokga fu uri mon faiv taosen (5,000) ijeg main. Regavo be fu mon tu taosen (2,000) ijeg main. Rega be fu vuan taosen (1,000) ijeg main. Regavo mon iji fu e besubesum vajiainma iji fu buon izeg mukoi vierafeknum kegoijo ijia giaknum vajiain.
MAT 25:16 Areme fun vakoga e iji fu mon faiv taosen (5,000) mainma iji fun mon iji abe va ikreoin. Fu ikreoine fusik una faiv taosen (5,000) be abe ijekma mazin.
MAT 25:17 Fu ijegrekoga e iji fu tu taosen (2,000) abe mainma iji fu madu mon iji abe ikreoine fusik una mon tu taosen (2,000) ijeg abe ijekma mazin.
MAT 25:18 Regavo e iji fu mon vuan taosen (1,000) ijeg mainma iji fun uri e bomana fuon ijefuon mon iji abe va mako rume ijia sauin.
MAT 25:19 Areme tavan jaoikin barekoga rad e bomana iji fun una roke gufia kekoin. Fu kekome e iji fu mon vajiainma iji kumega bu mon iji karme rokga fun mon iji bu karme ikrenva iji buna kuaim amaren.
MAT 25:20 Regavo e iji mon faiv taosen (5,000) ijeg abenma iji fun ro kekome e bomana fuon kuain. E bomana mon a mienma iji na abe va ikrene nasik una mon be abe ijekma mazime ruainva igijano ni gamne kuain.
MAT 25:21 Fu ijeg kuardamga e bomana fuon fu una roin kua, Ire sibank igi a kege mukorigia samuagdiainma ijefuon na kuaga ar ire fok samuagdiak. A ijegrenma ijefuon ni ro nosik besum oimarknum fioine kuain.
MAT 25:22 Areme e iji mon tu taosen (2,000) ijeg abenma iji fuk fun kekome kua, E bomana mon on a mienma iji na abe va ikrene nasik una be abe ijekma mazime ruainva igijano ni gamne kuain.
MAT 25:23 Fu ijeg kuardamga e bomana fuon fu uri kua, A ire sibank igi a mukor samuagdiainma ijefuon na kuaga ar ire fok samuagdiak. A ijegrenma ijefuon ni ro nosik besum oimarknum fioine kuain.
MAT 25:24 Ijegreare e iji mon vuan taosen (1,000) ijeg abenma iji fun ro kekome kua, E bomana na vierafega aka e giki be. Regavo irerag kafo ar ba oinma iji am ijia kiaga bu kege vajav.
MAT 25:25 Ijefuon naka dejufdiemga mon on na abe va mako rume ijia sauinva iji na abe ruainva igijano ni gamne kuain.
MAT 25:26 Fu ijeg kuardamga e bomana fuon fu kua, Aiji aka nuifuon ik mukorigia reoino bakin revo aka e nuon gikin. Regavo igia fai. Irerag na imut nun ijia ba oijo iji na kiaga bu kege vajievo iji an vierafen.
MAT 25:27 Ijefuonvo a ijeg vierafekma ni mon nun iji abe va ar bu mon navo ijia abedega na una igeg ajie abekva a irerafuon ba ijegrenmano kuain.
MAT 25:28 Areme fu uri mon iji kamazame abe una e iji mon ten taosen (10,000) ijeg abenma iji main.
MAT 25:29 Ijefuon igia faif. Erar fu tavan bog ire kafo bu vajavo ijia ma ijesugin kegokma fu una ire uruvana kafo madu kekfuon. Regavo erar fu tavan bog ire kafo bu vajavo iji kege ba mukorigia reoinon e iji bu una ire sibank iji bu vajainva iji buka kamazak.
MAT 25:30 Ijefuon ni uri e ise iji kunaime dab makaf nakinma ijia akozga fu e iji bu ijia oifian abe niraiknum ubai jakiknamivo ijiena fino kiain.
MAT 25:31 Areme Jesu fu madu uri kia, Tavan iji Emabuon Farif igi na una Kin igeg varur gufefuon sanainma ijiga Godon anera ijiena una roko ijia na fata ma ijia ajie fike e agan besubesum moikigia karioinva iji bu nifak nun ijia afuik. Bu nifak nun ijia karikega na e iji maf-sif samuagdiamo fu maf-sif ga maf-gout iji fu kanafum kafokafo uniamo na ijeg rek. Na uri e ma reoijo iji ke ata be uniaga e ise reoijo iji na ke be uniak.
MAT 25:33 Na ijegrene uri e ma reoijo iji na kege ij maink nun ijia uniagavo e ise reoijo iji na kege ij azinak ijia uniak.
MAT 25:34 Areme rad E Bomana nar uri e maturainva iji ij maink nun ijia karinva iji kiak, Jaiji fun Asoinun ijar daro miain. Ijefuon ni ro ar ma iji sanainma God fu ik anej fu moik ga varur igi ba amarenma ijia fu joifuon amardiainma iji abe karifno kiak.
MAT 25:35 Ijefuon maiji na vasiaordien ga do kafiemga jar do ga duok vajieva na in. Regavo na jaka ba vierafe gavo jam kievga na ar jon ijia jana naioin.
MAT 25:36 Regavo madu na ugon bakin oijga jar ugon kafo vajien ga adam abejga jar samuagdien ga dibur fijga jar vua na gienvano kiak.
MAT 25:37 Rega e iji maturainva iji bu uri kiek, E Bomana no ivez a vasiakma oga no game duok vajain ga do kafamga no do main?
MAT 25:38 Regavo no ivez ba a game vierafe ga nom kuavga a nona nain ga detabar oga no sinuom vajainvano kieken?
MAT 25:39 Regavo madu a ivez adam aben vo dibur figa no ifejdaknum gak vuainvano kieken?
MAT 25:40 Bu ijeg kuardiekva na E Bomanabuon igi na uri kiak, Vuak igi naka ma kuardiav, Ire fok ja kaifnun igi e ikin bakin igiebuon ja renva iji ja nun renvano kiak.
MAT 25:41 Areme na una e ise iji ij azinak ijia irenva iji kiak, Jaiji na isediemo gareg vaf. Jaiji jan koikjo tavan bog unam ise iji oifian abeokfuon ja ijia kegoinva ijefuon ni mian iji naine vako iji God fu Setan ga anera fuon ijiebuon fu kanafuinma ijia vaf.
MAT 25:42 Ijefuon maiji na vasiaordien ga do kafiemga jaba duok ga do vajieva na invano kiak.
MAT 25:43 Regavo naiji jaba na gieme vierafe ga jaba aferdieva na ar jon ijia jana naioin. Regavo madu na ugon bakin oijga jaba ugon kafo vajien. Regavo na adam abejga jaba ifejdien ga dibur figa ja madu ba vua gienvano kiak.
MAT 25:44 Na ijeg kuardiagakva bu una uri kiek, E Bomana a ivez vasiaordain ga do kafamga noba ifejdain? Regavo no izia ba game vierafevo ba aferda ar nuvuon ijia naoin? Regavo a izia ugon bakin oga noba ugon vajain vo adam abeknum dibur figa noba gavknum ifejdainvano kieken?
MAT 25:45 Bu ijeg kuardiega Kin igi na uri kiak, Vuak igi naka ma kuardiav. Tavan iji ja e ikin bakin igi uzame ba ifejdiainva iji ja na uzame ba ifejdien.
MAT 25:46 Jaba ijeg e roin ifejdiainva ijefuon ni ar iji ja tavan bog ijia oifian abe vakfuon ijia vafno kiak. Regavo e iji maturainva iji bu ar iji e bu tavan bog ijia ma karivako ijia vafno kiakno kiain.
MAT 26:1 Jesu fu vuak fok kuardiame barme fu uri e vuak fuon faivo iji kia, Tavan iji e Jius bu iro Fasova bu ikfuon iji fun naki nokarok (2) namo iji jan vierafen. Ijefuon igia faif. Bu tavan ijia Emabuon Farif igi na bu abe e ani iji miaga bu abe kuros ijia kaniekno kiain.
MAT 26:3 Areme e Godon isuf baroijo ijiebuon e mamkanuk ijigam e Jiusbuon e mamkanuk roin bun e Godon isuf baroijo ijiebuon e bomana e Kaiafason ar ijia afuin.
MAT 26:4 Bu ijia afuime isuar sauime izeg bu Jesu kanakfuon ijin kuain. Bu kuaime kuai, Noba tavan iji no iro ijo ijia kanaken. Ijefuon maiji e igia ruainva iji buka deajidiakma bu una no kanuokno kuain.
MAT 26:6 Areme rad Jesu fun ar Beteni e Saimon e iji matan kasi igekin iji abene una mainma ijefuon ar ijia fin.
MAT 26:7 Jesu fu ijia fino ijia bara be fu ire udi mukor urino bu kege mon mamkanuk kimejo iji be saror ijia useme abe fu fino ijia ruain. Fu keko gak Jesu fu duok iga bara iji fu ire iji dab nigen fuon ijia ruardain.
MAT 26:8 Fu ijegrega e vuak fuon faivo iji bu ire iji fu reno iji gava buka deajidiain. Ijefuon bu kua, Irerafuon ire maigari fum dab nisem. Fu ire mukor iji arega abe kimene mon bomana abe una e sinuom bakin iji vajiakma fu arenmano kuain.
MAT 26:10 Bu ijeg kuaivga Jesu fun giame uri kia, Bara garefuon vierafe iji ja irerafuon dab arafirime oifian mav. Irerag fur renma iji fuka ire mukor iji nuifuon ren.
MAT 26:11 Ijefuon maiji e iji sinuom bakin iji bu tavan bog igia jana karik. Regavo naiji naba tavan bog igia jana fiokfuon.
MAT 26:12 Regavo irerafuon fu ire udi mukor urino igi fu abe na ruardienma iji fu vek igi naba mako arinva ijia fu abe usemdieme amardiek.
MAT 26:13 Regavo vuak igi naka ma kuardiav, Ar iror izerkin bu vuak ma igi abe kuaimoijo ijia irerag bara igi fu renma iji bu abe ijia kuaimoijknum fu vierafekno kiain.
MAT 26:14 Areme e tuer (12) Jesuon vuak faimo be if fuon iji Judas Iskariot iji fun va e isuf baroijo ijiebuon e mamkanuk iji karinva ijia kekoin.
MAT 26:15 Fu kekome kia, Na Jesu abe una ja miakva ja irerag iji abe na miekno kiain. Judas fu ijeg kuardiamga bu ijefuon uri mon sunin teti (30) ijeg kege vajain. Ijegreare tavan ijia fun uri unam izeg fu Jesu abe miaga bu kanakfuon iji nisaimoin.
MAT 26:17 Areme tavan iji bu bred iriaikin ba istkma baroijo ijefuon tavan amur iji bu anerene duok ikfuon iji rokga e iji Jesuon vuak faivo iji bun useme Jesu kua, A vierafe no izia oifuon duok kanafuga a iro Fasova iji ikno kuain.
MAT 26:18 Bu ijeg kuardavga Jesu fu kia, Ni va Jerusarem useme aru vaga e be fu na ma vierafeno fu ijia figa iji gaf. Ja gakva kua, E Bomana iji fu kume tavan nun fun samairen. Ijefuon na vierafe na e vuak nun faivo ijiena ar on ijia iro Fasova iji ine oimarkno kuafno kiain.
MAT 26:19 Ijefuon e iji Jesuon vuak faivo iji bun vuak irerag fok Jesu fu kuardiainma ijia jame va useme iro Fasova ijefuon duok kanafuin.
MAT 26:20 Bu ijegreoine tavan nakisrega Jesu fun e tuer (12) vuak fuon faivo ijiena fata irif ijia kari ameoine duok in.
MAT 26:21 Bu karine duok ijo ijia Jesu fu uri kia, Vuak igi naka ma kuardiav. E igi ja nana karinva ijia e be fu na abe una e ani iji miaga bu kaniega na guakno kiain.
MAT 26:22 Jesu fu ijeg kuardiamga e vuak fuon faivo iji buka oifiadiain. Ijefuon e besubesum bu uri Jesu kua, E Bomana a vierafega kafu nar ijegrek vo na bano kuain.
MAT 26:23 Bu ijeg dab kuaivga Jesu fu uri kia, E iji fu bred fuon iji imut fuon ijia abe nosik dis guria abesmo e ijar na abe e ani iji miak.
MAT 26:24 Emabuon Farif igi naiji na bu izeg buk akaij ijia bu isoime nuisina kuainva ijeg bu na dab kaniega na guak. Regavo e iji erar fu na abe una e ani iji miakfuon iji naka fuifuon bomana oifiadiem. Ijefuon maiji Godri e iji fu dab unam ise ijia arafirik. Regavo asiefuon iji fuba fu nafenmabatie iji fun markno kiain.
MAT 26:25 Jesu fu ijeg kuardiamgavo Judas e iji Jesu abe una e ani iji miaga bu kanakfuon iji fu uri Jesu kua, E Bomana a narno kuain. Fu ijeg kuamga Jesu fu una roin kua, Ke ire iji ar rekno kuain.
MAT 26:26 Ijegreare bu vek karine duok ijo ijia Jesu fu uri bred abe Godon sirimamene oimaren. Areme fu abe tuaseme ke e vuak fuon faivo iji vajiaknum kia, Bred igi fu vajai surif nun igekino ni kege if.
MAT 26:27 Areme fu madu una kafus iji abe Godon sirimamene oimarme abe miaknum kia, Ire iji fu kavuan nun igekino abe if. Kavuan nun na usevo ijefuon duadok ijia God fu e fok ijiebuon ise iji giame arek. Regavo ise iji fu giame aremo ijia fu unam iviamkor iji amarek.
MAT 26:29 Regavo igia faif. Naiji na iviakma igia una gafeg naba una jana do vuain igi ik. Regavo nason rad Godon ar maijia jana ikno kiain.
MAT 26:30 Jesu fu ijeg kuardiame barme bun uri dua uruknum usem uruor Orivs kuavo ijia vain.
MAT 26:31 Bun va ijia usevga Jesu fu uri kia, Ivia naki e fok ja subinai vaga na ja ijia areme vak. Ijefuon maiji bun buk akai ijia isoime kuai, Bu e iji maf-sif samuagdiamo iji kanaga maf-sif fuon bu dab ataseme vakno kuain.
MAT 26:32 Regavo rad God fu kiega na una uri nar amur Gareri vake ja rad vuakno kiain.
MAT 26:33 Jesu fu ijeg kuardiamga Fita fu uri kua, E guri roinb bu a uname subinai vak gavo naiji naba a uname kovakno kuain.
MAT 26:34 Fita fu ijeg kuardamga Jesu fu uri kua, Vuak igi naka ma kuardavno mukor igia faimne. Ivia naki kukoro fuba kumeke ijia e bu nuifuon kuakva a tavan nokbek (3) kiak na e iji naba vierafenvano kiake kukoro fu ijia kumekno kuain.
MAT 26:35 Jesu fu ijeg kuardamga Fita fu una kua, Na vierafe bu kaniega na osik guakva iji naba kiak aiji naba vierafenvano kiak. Fita fu ijeg kuardamga e iji Jesuon vuak faivo iji buk bu uri vuak besum ijeg Jesu kuardain.
MAT 26:36 Areme Jesu fun e vuak fuon faivo ijiena juar Getsemenino kuavo ijia vain. Bun va ijia useme Jesu fun uri e vuak fuon faivo iji kia, Janin igia karike na va gafia sirimamejno kiain.
MAT 26:37 Areme fun uri e nokbek (3) Fita ga e Zebedion afijaf nokarok (2) e Jeims ko Jon ijin aferdiame funa vain. Regavo fuka uruvana igia oifiaime ka ma oiseren.
MAT 26:38 Ijefuon fu uri kia, Naiji oinun iji fuka uruvana igia oifiadiedo na bagain nakafu guakfuon. Ijefuon jaka igia karine na samuagdiefno kiain.
MAT 26:39 Fu ijeg kuardiame fun fuonkua sibank biom aibe ijia tuame moik ijia dijeme sirimamen. Fu sirimamene kua, Asoinun a vierafe fun markma ni vajai fian igi na abekrejo ijiga na guakrejo iji fub nun rekfuon. Regavo baga ni on vierafenma ijia rene kuain.
MAT 26:40 Jesu fu ijeg sirimamene barme una rogak e vuak fuon faivo nokbek (3) iji bun ninaoin. Bu ni naoivga fu giame keko Fita kua, Fita ja e nokbek (3) iji ja irerafuon ni naoiv? Ja izegrenva ijefuon jaba tavan ivuankbe uri ni narame nana karij?
MAT 26:41 Uri koikjo samuanamime sirimameknum kariga kaven ise Setan fu ja biesiakma jaba zazaikno kiain. Fu ijeg kuardiame kia, Vuak igi naka ma kuardiav. Oijon buka sirimamekuai vierafe gavo vajai jon ijieb buka zazaivno kiain.
MAT 26:42 Fu ijeg kuardiame fun una fuonkua madu sirimamekafa vain. Fu va sirimamene kua, God Asoinun vajai fian igi na abekrejo iji ab areke na vajai fian abe vake guakva iji na vierafe fun vierafeon ijia ren ijefuon fuka rekno kuain.
MAT 26:43 Fu ijeg sirimamene una madu rogak e iji buka nitubaidiamga bun ninaoin.
MAT 26:44 Ijefuon fun ijia magiame una madu va besum fu amur sirimamenma ijeg una sirimamen.
MAT 26:45 Areme fun una kekome e vuak fuon faivo iji kia, Jaiji ja vek ijeg ninan abej. Ja ninan abejo ijefuon ni gaf tavan iji Emabuon Farif igi bu na abe una e ise reoijo iji miaga bu kaniekfuon iji fun samairen.
MAT 26:46 Regavo e iji fu na abe e ani nun miakfuon iji fun iga rokno uriga no vakno kiain.
MAT 26:47 Jesu fu vek manine vuak kuardiamo ijia e vuak fuon faimo be e Judasno kuavo iji fun ijia kekoin. Fun e azi kegoijo iji ga e isuf baroijo ijiebuon e mamkanuk ijigam e Jiusbuon e mamkanuk bu uniafdainva ijiena kakigam jua magu kege ijia ruain.
MAT 26:48 Regavo Judas fun vek ijia ujuriame kia, Ja giega na va e izin abe ui mikva ja e ijin kunaime tofno kiain.
MAT 26:49 Ijefuon Judas fun migegare kekome Jesu manino ijia manine kua, E nijaidiamon afurvejo iji fu osikno kuame fu kunaime uimin.
MAT 26:50 Fu uimimga Jesu fu uri kua, Kainu migegare irerag a vierafenma iji rene kuain. Jesu fu ijeg kuardako ijia e ani iji bu ijia useme Jesu kunaime dab toin.
MAT 26:51 Regavo e iji Jesuna oijo be fun uri kaki fuon darume dab e be e bomana isuf baroino ijefuon ikreno ijefuon ada iji kana daturain.
MAT 26:52 Fu ijegrega Jesu fu uri kua, Kaki on iji abe una surif fuon ijia abesemne. Ijefuon maiji e iji eraneb bu kaki buon ijia kege e kaniavo iji kaki ijieb una bu kaniakfuon.
MAT 26:53 Regavo igia faif. Na Asoinun iji kua fu anera fuon ka ma uruvana kiaga bu iviakmaigia migegare na ifejdiebatie na vierafega na ijeg rekfuon.
MAT 26:54 Regavo na ijegrekva na vierafe Godon vuak iji bu buk akai ijia isoime nuisina kuainva iji fuba aresrekfuon. Ijefuon ni areke irerag fu kuainma iji fu reno kiain.
MAT 26:55 Jesu fu ijeg kuardiame una e fok ruainva iji kia, Ja vierafero na e kuriai e kaniavo ijefuon jaka kakigam jua magu iji kege na okurieme tofdiekuai ruain. Na tavan bog naka e Jiusbuon ar bu sirimamejo ijia aru fine vuak nijaidiain gavo jaba ijia arume na tofdien.
MAT 26:56 Regavo na vierafe ire fok iviakma reno iji fuka vuak irerag fok e Godon vuak vierafene kuaivo bu buk akaij ijia isoinva iji fu ijekma aresrekno kiain. Jesu fu ijeg kuardiako ijia e vuak fuon faivo fok bu ijia uname bun uri subinai vain.
MAT 26:57 Ijegrene e iji Jesu kunaime toinva iji bun fu afeme e Kaiafason ar ijia vain. Ijefuon maiji e vuak akai nijaidiavo ijigam e mamkanuk iji bu ijia besum afuin.
MAT 26:58 Bu Jesu afeme vakga Fita fu aibe gamia giaknum jajia roke e isuf baroijo ijiebuon e bomana ijefuon ai makaf ijia kekoin. Fu ijia kekome aru va e iji juo karijo ijiena fin. Fu ijia fine gia are bu Jesu abe izegre fu giakro fu ijeg ren.
MAT 26:59 Regavo e isuf baroijo ijiebuon e mamkanuk ijigam e mamkanuk fok kot faivo iji bun uri vuak kufui kafo Jesusina kuaime nisain. Bu nisaiga fu ise kafoga bu abe kuros kanakuai bu ijefuon ijeg ren.
MAT 26:60 Regavo bu vuak ise fuon kafo buba fain. Regavo madu buka e uruvana arume Jesuon vuak kufui ijin ijia kuain gavo bu vuak ise kafo buba fain. Bu ijegrejo ijia e nokarok (2) bu arume kia, E guri fu kuai na aresredo na Godon ar bu sirimamejo iji buzakorega naki nokbek (3) barke na una same barekno kuainmano kiain.
MAT 26:62 Bu ijeg kuaivga e isuf baroijo ijiebuon e bomana iji fu uri una Jesu kua, A vuak guri bu oisina kuaivo iji abe una vef kuardiak vo a bano kuain.
MAT 26:63 Fu ijeg kuardamga Jesu fu vuak kafo ba una roin kuardain. Fu vuak ba kuardiamga fu una kua, Naka God iji fu ijia fivako iji kurainvano a vierafega an ma Godon farif e iji fu kuamga fu ruainma ijiga ni ijeg kuarduomne kuain.
MAT 26:64 Fu ijeg kuardamga Jesu fu una roin kua, Vuak iji an koikon ija kuaim ijefuon naiji na e ijin. Regavo na igi kuardiakrejo ni faif. Ivia igia una gafeg vako ijia Emabuon Farif igi naiji na God e darokin ijefuon ij maink ijia fik. Regavo rad na varur gufia una vana araf ijia ari roga ja giekno kiain.
MAT 26:65 Fu ijeg kuardiamga e isuf baroijo ijiebuon e bomana iji fu vuak iji faima fuka deajimga fu uri ugon fuon fu sainma iji kuniai bujain. Fu ijegrene uri e iji kot faivo iji kia, Fun koikfuon ija kuaima non fain. Ijefuon na vierafe no una vuak irerag iji faikva bakin revo madu no una e kafo erane kiaga bu vuak ise fuon kafo kuarduoga no faikva bakin. Regavo vuak ise kafo fun Godsina kuaimon jan fain ijefuon fuiji ja dab izegarekno kiain?
MAT 26:66 Fu ijeg kuardiamga e fok bu uri roin kuain. E iji fu kuai, Fu Godk besumno kuainma ijefuon no vierafe noka dab kana fu guakno kuain.
MAT 26:67 Areme e iji kot faivo iji bun uri ugon fat be abe Jesuon nikuik ijia kiramdame uri uikinik fuon ijia juvit foisdaknum kanain. Regavo roin bu uri kua, A kume naiji na Kurais e iji God fu kuamga fu ari ruainma ijino kumen. Ijefuon ni e iji erar a kanamo iji kura no vierafero an ma e iji God fu kuamga fu ari ruainma ijinro no ijeg vierafejno kuain.
MAT 26:69 Regavo Fita fu Kaiafason ar makaf fak gufa ijia fin. Regavo bara be ijia ikreno ijar keko game kua, Na vierafega a e be Jesu e Gareriko ijek oina na gainvano kuain.
MAT 26:70 Bara iji fu ijeg kuamga Fita fuka uri e fok ruainva ijiebuon nifak ijia fen. Fu feme kia, Na e iji ja kuaivo iji naka ba vierafenvano kiain.
MAT 26:71 Fu ijeg kuardiamevo fun una kekome Kaiafason ai makaf vien ijia vain. Fu ik keko vako ijia bara be ijia ikreno ijar game uri e iji irenva iji kia, E igi fu Jesu e Nasaretko ijek oina na gainvano kiain.
MAT 26:72 Bara iji fu ijeg kuaimga fu madu una feme kia, Naka God kuraido e iji naka ba vierafenvano kiain.
MAT 26:73 Areme tavan sibank barko e be samaij ijia manino ijar kekome Fita kua, Bara iji fuka ma kuaim. Aiji ak a ebe fusik oinon ijin. Regavo madu ir on no faiga aka e be buna oino ijino kuain.
MAT 26:74 Bu ijeg kuardavga Fita fu uri God kurame kia, Na kufuimekva Godri na abe arafiriek. Regavo nan ma kuardiav. E iji naka ba vierafenvano kiain. Fu ijeg kuardiako kukoro fu ijia kumen.
MAT 26:75 Fita fu ijia una vuak iji Jesu fu ur kuardame kua, A kukoro fuba kumeke a ijia tavan nokbek (3) fekno kuainma fu iji vierafen. Rega fuka uruvana igia oifiaimga fu kekome makaf ijia ka bomana nirain.
MAT 27:1 Areme suok nakitu tavan ik abaisako ijia e isuf baroijo ijiebuon e mamkanuk ijigam e Jiusbuon e mamkanuk iji bun unam izeg bu Jesu kanaga fu guakfuon iji kuaime ujuinamin.
MAT 27:2 Areme bun Jesu bu toinva ijekma afeme una usem Fairet e Romkobuon e bomana ijefuon vain.
MAT 27:3 Bu Jesu afem vakoga Judas e iji fu Jesu abe una e ani iji miainma iji fu giak bun Jesu abe kanaga fu guak ijefuon fu tavan ijia oi dakaroin. Fu ijia oi dakaroime mon sunin teti (30) iji fu kenma iji ke una va e isuf baroijo ijiebuon e mamkanuk ijigam e Jiusbuon e mamkanuk iji karinva iji vajiakafa vain.
MAT 27:4 Fu va ijia kekome kia, Naka e iji fu ise kafo ba renma iji abe e ani iji miainvado bun kanaga fu guak. Ijefuon na vierafe naka ma ise renvano ni mon jon igi una karefno kiain. Fu ijeg kuardiame mon iji abe miamga bu uri kua, Regavo mon iji no abe irerag abek? Unam iji no nor renva bakin gavo an ar koikon renma ijefuon afikin iji fu on no kuain.
MAT 27:5 Bu ijeg kuardavga Judas fu uri mon iji dab ar bu afuime God sirimamejo guf ijia akoziame keko va iki guain.
MAT 27:6 Regavo e isuf baroijo ijiebuon e mamkanuk iji bu uri mon sunin iji abe kuai, Mon igi bu abe e kimene kanain ijefuon noba abe una mon iji no God vajavo ijekma abedekno kuain.
MAT 27:7 Ijefuon bu uri mon iji abe izegrekfuon iji kuaime bun mon iji abe e ai kafoko bu aoiga bu kege makorukfuon iji kimen. Regavo moik iji bu e saror amardiavo ijiebuon moik. Ijefuon iviakma igia moik if iji bu kua, Moik iji bu mon iji e kimene kanavga fu guainma ijia abe kimenvano kuavo.
MAT 27:9 Bu ijeg kuainva ijia vuak irerag Jerimaia e Godon vuak vierafene kuaimon fu ma usuibe kuainma iji fun ijekma aresren. Regavo vuak iji fu kuainma iji bu ijeg isoi, Mon iji e Isrerko bu abe fu kimekfuon iji bu kuaime abe marenva iji bu mon sunin teti (30) ijeg. Regavo mon iji bu abe e iji saror amardiamo ijefuon moik iji kimekno kuain. Regavo vuak iji fun Godri kuardiainma bu ijegrenvano kuain.
MAT 27:11 Areme e mamkanuk iji bun Jesu afeme e Romkobuon e bomana Fairet nifak ijia unava fu ijia manin. Fu manikoga Fairet fu uri Jesu kua, A vierafega aiji an ma e Jiusbuon kin ijino kuain. Fu ijeg kuamga Jesu fu uri una roin kua, Ke vuak iji a kuaimon iji an ma kuaimno kuain.
MAT 27:12 Rega e isuf baroijo ijiebuon e mamkanuk ijigam e Jiusbuon e mamkanuk bu uri unam ise kafo fu kegoinma ijefuon kuardavga Jesu fuba una vef vuak kafo kuardiain revo fuka ir bijuin.
MAT 27:13 Ijefuon Fairet fu madu una uri Jesu kua, A vuak fok bu oisina kuaivo iji an faigavo a irerafuon vuak kafo aba una vef kuardiamno kuain.
MAT 27:14 Regavo Jesu fuba una vuak kuaikafa vierafen ijefuon e Romkobuon e bomana iji fu iji gama fuka bomana oiseren.
MAT 27:15 Regavo juaivasia besubesum ijia bu iro Fasova iji ijo ijia e fok bu e Romkobuon e bomana iji kuaga fu e dibur karijo ijia e be bu vierafejo iji keunaga fu keko vako.
MAT 27:16 Ijefuon tavan ijia e be ka ma ise reoinon fu ijia dibur fino iji e fok bun game vierafenva if fuon Barabas.
MAT 27:17 Ijefuon e fok bun besum afuivga Fairet fun uri kume, Ja vierafega na e Barabas keunak vo na Jesu e iji bu kua Kuraisno kuavo iji keunaga fu vakno kumen.
MAT 27:18 Regavo Fairet fun vierafega bu Jesu oi isema vierafeknum funa nigaraioijo ijefuon bu fu afeme fuon ruain.
MAT 27:19 Regavo tavan iji Fairet fu fata iji bu ijia ajie karine kot faivo ijia fino ijia bara fuon ijar vuak abedeme kume, Ab fine e iji ka ise kafo ba renma iji abe ire kafo fuon rek. Ijefuon maiji na naki naka ise be naine fu gainvano kumen.
MAT 27:20 Regavo e isuf baroijo ijiebuon e mamkanuk ijigam e mamkanuk roin bu uri e fok soisoime kia, Jaka E Romkobuon e bomana iji ijeg kua, No vierafe a Barabas keunaga fu vak. Regavo Jesu iji no kanaga fu guakno kuafno kiain.
MAT 27:21 Ijefuon bu irevga Fairet fu uri kumen. E nokarok (2) igi ja vierafe na era joifuon kua fu keko vakno kumen. Fu ijeg kuardiamga bu una roin kua, No vierafe aka Barabas kuaga fu keko vakno kumen.
MAT 27:22 Bu ijeg kumejga Fairet fu una madu uri kia, Regavo ja Jesu e guri bu kuai fu Godri kuamga fu ruainma kuainva iji na abe izegrekno kiain? Fu ijeg kuardiamga e fok buka uri una roin kume, Abe kuros kanafno kumen.
MAT 27:23 Regavo Fairet fu una kia, Regavo fu ise irerag iji renma ijefuon ja abe kuros kanakrejno kiain. Fu ijeg kuardiamga buka uri uruvana igia biumame kume, Abe kuros kanafno kumen.
MAT 27:24 Bu ijeg kumejga Fairet fun giame vierafero fu una vuak kafo kuaikma buka bijaikro fu uri do jiame abe e fok ijiebuon nifak ijia imut soin. Fu imut do some kia, E igi kanakfuon iji na nar kiaga ja rekva bakin. Regavo ja e igi ise renma bakin iji kanakva afikin iji jan jar abek.
MAT 27:25 Fu ijeg kuardiamga e fok ijia irenva bu una kume, Iji aka ma kuaim. Ijefuon ni a e iji no fu kanaga fu vajai fian abene guakma iji nor afnuvuon ijiena afikin iji abekno kumen.
MAT 27:26 Areme Fairet fun uri Barabas buifuon kuamga fu keko vakga fu uri Jesu abe e azi keoijo iji miamga bu fijame afem kuros kanakuai vain.
MAT 27:27 Areme Faireton e iji azi keoijo iji bun uri Jesu afeme dab usem una Faireton ar mai makaf ijia ruain. Bu afeme ijia rokga e azi keoijo fok bu useme Jesu dab kirakurain.
MAT 27:28 Areme bun uri ugon fuon fu sainma iji rusdame uri ugon jaraikin kavuan iji be dab abesdain.
MAT 27:29 Bu ijegreare uri kiej ufume abe ateveme dab Jesuon nigen ijia abesdain. Areme bun uri guduar abe maga fu imut maink ijia kunaim manikoga bun nifak fuon ijia ato saknum kua, E igi fu e Jiusbuon Kin fu tavan bog ijia fivako ijino kuain. Regavo ire fok bu ijegrenva iji bu ma vierafene renva bakin revo bum Jesu dab varaimenva ijefuon bu ijeg ren.
MAT 27:30 Bu ijegrene dab juvit foimadiknum guduar iji fu kunainma iji dab kiej fu abesenma azan ijia nizuin.
MAT 27:31 Bu dab ijeg varaimene barme uri ugon kavuan bu abe abesdainva iji kunaim irain. Areme bun una ugon fuon ma iji kege samdame bun afeme usem kuros kanakuai vain.
MAT 27:32 Bun useme afem unam ijia vako ijia bu e Sairinko be if fuon Saimon ijin bien. Bu e iji bieme kuriairevga fu uri Jesu ifejdame kuros ijin dab dabein.
MAT 27:33 Fun kuros iji abe dabemga bun roke ar Gorgotano kuavo ijia usen. (Regavo if Gorgota ijefuon ma iji uruor iji fu e nigen an igekin).
MAT 27:34 Bu ar ijia useme do vuain abe inak kugi kafo ijekma amarme abe maga fu ine fuba vajai fian abekro bu ijeg ren gavo fu sira faime fuka uzain.
MAT 27:35 Areme e azi kegoijo iji bun uri Jesu dab kuros ijia kanain. Bu dab kuros kaname rad bun uri Jesuon ugon iji kam name kas dab akoze arega are erar kegaro bu ijeg ren.
MAT 27:36 Bu ijegrejknum karine Jesu fu kuros kaf ijia kiramo ijin nikajain.
MAT 27:37 Regavo in bu Jesu abe kuros kanainva buin ijia bu vuak be ijeg fuisina isoime kanain. Regavo vuak iji bu ijeg isoime kua, E igi Jesu fu e Jiusbuon Kin ijino kuain.
MAT 27:38 Areme madu bun e niekin nokarok (2) kam Jesuna kuros ijia kaniain. Be bu abe ij maink ijia kanaga be bu abe ij aizinak ijia kanain.
MAT 27:39 Regavo e roin bu unam iji bu Jesu abe kuros kanainva samaij ijefuon roko iji bu usem game nigen katikatiknum dab varaimene kuai, A kume a Godon ar bu sirimamejo iji buja kore gavo naki nokbek (3) a una same barekno kumen. Ijefuon ni koikon keunanamimne. Regavo madu an ma Godon Fariga ni kuros iji areme una ari roga no gavno kuain.
MAT 27:41 Bu ijeg kumekoga e iji isuf baroijo ijiebuon e mamkanuk ijigam e vuak akai nijaidiavo ijigam e mamkanuk roin iji buk bu Jesu dab unam besum ijeg varaimen.
MAT 27:42 Bu dab varaimeknum kuai, Fu e roin karauniain gavo fu izeg una koikfuon keunanamikma bakin. Regavo madu fuka e Isrerkobuon Kin bomanakono kuainma ijefuon ni are fu koikfuon kuros kaf ijia iviakma ari roga no game una fu ma vierafej.
MAT 27:43 Regavo madu fuka God ma vierafeknum kuai fu Godon Farifno kuaimon. Ijefuon ni areke God fu iviakma fu keuna vo fu baga no iji gavno kuain.
MAT 27:44 Regavo madu e niekin nokarok (2) iji bu ke funa kuros kaniainva iji buk bu unam besum ijeg una Jesusina vuak ise kafo kuain.
MAT 27:45 Bu ijegrene roke tavan uk maniko ijia vana o ruakoga ai fok fuka tavan nakime vake tavan una gara manin. Areme Jesu fuka ijia uruvana igia biumame kume, Irai Irai rama sabatanino kumen. Regavo vuak ijefuon ma iji God nun God nun a irerafuon na unieko vain?
MAT 27:47 Fu ijeg kumega e kafo ijia irenva iji bu faime kuai, Iji fu e Eraija kumeno kuain.
MAT 27:48 Regavo e be fuka una kukume keko atebu be abe in buin ijia utime abe do vuain ijia abesme Jesuon ir ijia azirda are fu iga fu gakafa fu ijeg ren.
MAT 27:49 Regavo e roin bu uri kuai, Areke no irem gaga Eraija fu ro fu keuna no gavno kuain.
MAT 27:50 Ijegrekoga Jesu fuka una uruvana igia biumame arekoga kaven fuon fu ijia unako vako fu guain.
MAT 27:51 Fu guako ijia ugon iji bu abe Godon ar sirimamejo guf ijia kirainva iji fu dab uf ijia bujame ari roke buin gumia kekoin. Fu ijegrekoga moik urame munuag iji bu kam uf ijia visuseme roinroin ren.
MAT 27:52 Fu ijeg urakoga mako vien iji buka kam visu korekoga Godon e akaij iji bu aoinva bu kege mako ruinva iji Godri e fok fuka karauniama bu una uri nivek karin.
MAT 27:53 Bu mako iji areme ajie usekoga rad Jesu fu guame una uriga bu una Jerusarem mai akaij ijia aru vakoga e fok bu e iji giain.
MAT 27:54 Regavo e azi kegoijo ijiga ebuon bomana iji bu karine Jesu nikajavo iji bu moik iji uramo ijiga ire fok bu rejo iji giava buka bomana dejufdiain. Bu dejufdiamga bu uri bui kuai, E guri no vierafe fuka ma Godon Farifno kuain.
MAT 27:55 Regavo bara uruvana eraneb bu Gareri gamia Jesu jame ifejdaknum ruainva iji buka aibe gafia ireme giain.
MAT 27:56 Regavo bara iji buna ruainva iji bara Meri Megdarin ga Meri e Jeims ko Josofbuon asie ijiga e Zebedin bara ijieb ijia ruain.
MAT 27:57 Ijegrene fun tavan nakisrenma ijia e sinuom zarainma be ar Arimatiako if fuon iji Josof fu ijia ruain. Regavo fuk fu e Jesuon vuak faimo be.
MAT 27:58 Ijefuon fun va Faireton nifak ijia kekome Jesuon vajat surif jafe arikafa kuain. Fu kuamga Fairet fu kua, Fun marenmano ni va surif fuon kunaim jafene kuain.
MAT 27:59 Ijefuon Josof fun una va Jesuon surif kunaim jafene ugon iviamkor ijia abe anuin.
MAT 27:60 Areme fu abe va munua be fur koikfuon iviakma kajuame amarenma ijia unain. Fu abe ijia uname uri mun bomana be mako vien ijia namo iji vajame dab munua vien iji bijukurame fun vain.
MAT 27:61 Fun vakoga bara Meri Megdarin ko bara be if fuon Meri iji bu mako vien iji samuame karin.
MAT 27:62 Ire fok renma iji fu tavan Fraide ijia ijeg ren. Regavo afarma iji fu e Jiusbuon tavan Sabat (Satade) bu isuar karine Godon sirimamejo ijin. Ijefuon e isuf baroijo ijiebuon e mamkanuk ijiga e Ferisis iji bun Fairet vuak kuardakuai vain.
MAT 27:63 Bun va useme kua, E bomana e ir kufuikin iji fu vek fioinma ijia fu kuai, Na naki nokbek (3) bareke na una uri fivakno kuainma iji no vek vierafen.
MAT 27:64 Ijefuon ni kuoga no e roin kega bu va mako vien iji samua vake tavan nokbek (3) iji fu kuainma iji asimno kuain. Regavo noba ijegrekva e vuak fuon faivo ijieb ro vajai surif fuon niesame abe va e biesiame kia Jesu fun una uri nivek fino kiak. Ijefuon maiji fu ur vuak kufuimene kuai, Na Godon Farifno kuain. Regavo bu una madu kufuimene kuai fun una urinmano kuaikva ijar fuka ma iserkno kuain.
MAT 27:65 Bu ijeg Fairet kuardavga fu una roin kia, Ijekino ni una va mako vien ijin ka mukorigia samuafno kiain.
MAT 27:66 Fairet fu ijeg kuardiamga bun una va e azikeoijo roin karevga bu mako vien ijia ire ameoine ijia samua karin. Bun ijegrene uri mun abe vien bijukurainva ijia anf oine e juo karijo iji kiavga bu mako iji mukorigia samuame karin.
MAT 28:1 Areme afarma Sade suok tavan ik irasemo ijia bara Meri Megdarin ga bara Meri be iji bun una mako gafi gakuai vain.
MAT 28:2 Bu vake mako vien ijia usekoga migegare moik bomana urako E Bomana ijefuon anera fu varur ijia arin. Fu ari kekome mun bomana iji bu abe vien bijuinva iji dab biom iken ijia abedeme azan ijia ajie fin.
MAT 28:3 Regavo uikinik fuon iji fuka varur igeg karame ugon fu sainma iji fuka ma abaren.
MAT 28:4 Ijefuon e iji mako vien ijia juo karinva iji bu fu gava buka uruvana dejufdiame simardiamga buka e aoinva igeg tuame moik ijia dijen.
MAT 28:5 Regavo anera iji fu una bara iji kia, Jab juk. Na vierafe ja Jesu e iji bu abe kuros kanainva iji nisaimoij.
MAT 28:6 Regavo e iji igi fu bakin revo e iji fun izeg ur fu kuainma ijeg fun una urinmano ni gufi fu nainma ijin gaf.
MAT 28:7 Ja iji gavo nin migegare una va e vuak fuon faivo iji kuardiame kia, Jesu fun una urinmano kiaf. Regavo madu kia, Fun ar Gareri ijia ja biediakafa fun amur vakno kiaf. Regavo vuak igi na kuardiavo iji jab rubdiavo nika mukor vierafefno kiain.
MAT 28:8 Anera iji fu ijeg kuardiamga bara nokarok (2) iji bun mako iji areme bun migegare igia una ar vain. Buka juin gavo bu oimarknum una kukubijame e vuak fuon faivo iji kuardiakuai vain.
MAT 28:9 Bu ijeg una vako ijia Jesu fun migegare una iji bu vako ijia keko biediame anadiain. Fu ijeg anadiamga bu usem fu manino ijia ato same diak fuon niriakiaknum fuon sirimamen.
MAT 28:10 Areme Jesu fun una kia, Jab jukgavo nin oimarknum va uviaifnun iji kia bu Gareri ijia vua na biedievno kiain.
MAT 28:11 Areme bara iji bu vek isuar vakoga e iji mako vien juo karinva roin bun migegare va mai ijia useme e mamkanuk iji Godon isuf baroijo ijin vuak fok fu izegrenma bu giainva iji kuardiain.
MAT 28:12 Areme e mamkanuk Godon isuf baroijo iji bun vuak iji faime uri e mamkanuk roin mai ijia karinva ijiena besum afuime izeg bu rekfuon ijin kuain. Bu kuaime uri mon ka mamkanuk ijeg kara uri e iji bu mako vien iji juo karinva iji kimen.
MAT 28:13 Bu kimene kia, Ja unam gami izeg fu rena ja giainva iji jab abe uruvana kuaim bomana rek. Regavo ja e roin kuardiakva ni kia, No naki nitubaiduoga no ni naoikoga bu e vuak fuon faivo ijieb isuar useme surif fuon iji abe vainvano kiaf.
MAT 28:14 Regavo E Romkobuon Gaman iji fu vuak iji faikma iji nor funa vuak kuaim amarega fuba ja ise kafo rekno kiain.
MAT 28:15 Ijefuon e iji mako vien iji juo karinva iji bun mon iji bu kimenva iji ke e bun e mamkanuk bu kuardiainva ijeg ren. Ijefuon iviakma igi e Jius fok bu Jesu fu una urinma iji bu kuai fu e vuak fuon faivo ijieb isuar ro surif fuon niet abe vainvano kuaimoij.
MAT 28:16 Areme e Jesuon vuak faivo ireven (11) iji bun ai Gareri uruor iji Jesu fu kia ja ijia vua na biediefno kiainma ijia vain.
MAT 28:17 Bu va ijia useme gak Jesu fun ma una urinma game e roin bu ijia una fuon sirimamen revo e roin bu Jesu fu una urinma iji buka vek ba ma vierafen ijefuon buka nonamin.
MAT 28:18 Ijefuon Jesu fu roke iji bu karijo ijia kekome kia, Ire fok varur gufia ga moikigia naoivo iji nar daro nun iji Asoinun fu mienma ijia samuagdiav.
MAT 28:19 Ijefuon uri ar iror igia vuak nun iji abe e fok kuardiame aferdiaga bu una e vuak nun faivo iji rej. Ja aferdiakva ni kege God Asoi ga God Farif ga God Kaven ijiebuon if ijia do ruardiaf. Regavo madu jaka vuak nun fok ja rekfuon na kuardiainva ijin e nijaidiaga bu igiame ijia keof. Regavo igia faif. Naiji naba ja uniakok revo naka tavan bog jana fivake ka tavan radkma ijia kekokno kiain.
MAR 1:1 Vuak igefuon anej ma iji Jesu Kurais fu Godon Farif. Regavo vua fuon iji bun izeg Asaia e iji Godon vuak vierafene kuaimon fu kuainma iji bu ijeg isoi, God fu Farifuon kume, Vuak nun iji faimne kumen. Nar e vuak nun abe oinon be kuaga fu amur unam on iji amarekega a rad vak.
MAR 1:3 Fu va ai moikum namo ijia fine kume, E Bomana iji fu ruakreno jaka fuifuon unam kara mukorigia asu arir amarefno kumen.
MAR 1:4 Ijefuon Jon e do ruardiamo fu ai moikum namo ijia oijknum e ijia fuon roko iji kia, Unam ise iji ja kegoijo iji nika arega una oi karoime Godon roga fu ise jon giame arega na ja do ruardiafno kiain.
MAR 1:5 Fu ijeg kuardiaknum reokoga e fok Judia samaij ijia karinva iji abevo e Jerusaremko iji bu Jonon vuak iji faime fuon ruain. Bu ro do Jodan ijia useme ise buon visu God kuardavga Jon fu bu aferdiame do ruardiain.
MAR 1:6 Regavo Jon ugon fu samon iji fu fanuf kamer surif ijia amarenva iji samon. Regavo madar fuon iji fu fanu surif ijia amaren. Regavo duok fu inon iji fu kuamutu ga muni safik iji inon.
MAR 1:7 Jon fu vuak nijaidiame kuardiaknum kia, E be fu rad jajie roko iji daro fuon fuka ma darokin revo naiji daro nun iji fuim sibank ukakbe. Ijefuon na fuifuon ik rekfuon iji na vierafe naka ba aresren.
MAR 1:8 Ijefuon maiji nam ja do ijesugin ruardiak gavo fur ro Godon Kaven iji uniafdiakno kiain.
MAR 1:9 Rene tavai besum ijia Jesu fu ar Nasaret areme vake do Jodan ijia kekomga Jon fu uri Jesu abe do ruardain.
MAR 1:10 Fu do ruardame Jesu fu ik do iji areme irif ijia ajie roko ijia ar nairekoga Jesu fu gako ijia daro iji fu e karauniakfuon iji fu fuon ruain. Regavo daro iji fu Godon Kaven ijar um guaf igeg ari Jesun nigen ijia kirem fin.
MAR 1:11 Fu ijegrekoga varur gufia vuak be ijeg kume, Fariknu game na a gavo fuka oimadienmano kumen.
MAR 1:12 Fu ijeg kumekoga tavai besum ijia Godon Kaven ijar Jesu afeme ar e bakin ai moikum namo ijia vain.
MAR 1:13 Fu va ijia naki foti (40) ga maza foti (40) ijeg ijia fikoga Setan fu Jesu biesuain. Fu ijegre oinon ijia bu fanu taraikor ijieb funa ijia okoga anera ijieb ari fu ifejdain.
MAR 1:14 Ijegreare bu Jon abe dibur unakoga rad Jesu fu ar Gareri ijia vain.
MAR 1:15 Fu va ijia kekome e Gareriko iji Godon vuak ma ijin nijaidiame kia, Tavan iji God fu una anerene oijon iji samuagdiakfuon iji fun samairenmano kiain. Ijefuon ise jon ja re oijo iji nika aregavo una oi karoime vuak ma iji ma vierafefno kiain.
MAR 1:16 Areme tavan be Jesu fu do daturaiko nafuinma bu kua Gareri kuavo irif ijia uraoinon ijia fu e kimai savo nokarok (2) no diaikin iji biediain. Bogaf ijefuon if iji Saimon ga diar ijefuon if iji Edru. E nokarok (2) iji bu do iji daturaiko nafuinma ijia kimai saoij.
MAR 1:17 Bu kimai saoijga Jesu fu biediame kia, Ni ire iji ja reoijo iji aregam na jajifno kiain. Ja na jajiekva na kijum iji ja karavo ijeg unam nijaidiaga ja ijeg e aferdiakno kiain.
MAR 1:18 Fu ijeg kiamga bu migegare ugie buon iji ijia arega uri Jesu jame vain.
MAR 1:19 Jesu fun buna vako ijia fu samaij ijia madu una no diaikin Jeims ko Jon e Zebedin afijaf ijin giain. Bu vanag buon ijia karine ugie buon iji amarvo ijia fu biediain.
MAR 1:20 Jesu fu giame uri kumega bu asoibuon Zebedi ga ebuon ikrejo iji bu vanag ijia uniame uri Jesu jame vain.
MAR 1:21 Jesu fun e vuak fuon faivo ijiena roke ar Kafoniam kuavo ijia usebijain. Regavo afarma tavan Sabat (Satade) iji e bu isuar karijo ijia Jesu fun e Jiusbuon ar iji bu afuim vuak kuaivo ijia arume anerene vuak nijaidiain.
MAR 1:22 Fu vuak nijaidiamga e fok bu vuak fuon iji faivga buka oiserdiain. Ijefuon maiji vuak fuon fu nijaidiamo iji fu e Jius bu vuak akai nijaidiavo ijiebuon vuak ijekin iji fuka bakin. Regavo vuak fuon iji fuka ma darokin nijaidiain.
MAR 1:23 Regavo e be kaven ise niroinma ijar ar ijia aru uruvana igia kume,
MAR 1:24 Jesu e Nasaretko gare a noiji a kege izegrekafa ruain? Akafu a no kege kam arafiruokafa ruain? Regavo aiji a Godon e Akai iji nan vierafenvano kumen.
MAR 1:25 Fu ijeg kumega Jesu fu uri kaven ise iji kuriairene kua, Vuak iji a kuaimon iji arega ibijume kek gareg vakne kuain.
MAR 1:26 Jesu fu ijeg kuamga kaven ise iji fun e iji dab uruvana igia simain. Fu dab simaifiriknum uruvana kakurime areme fun e iji areme kek vain.
MAR 1:27 Jesu fu ijeg kaven ise iji kiamga e fok buka oiserdiain. Ijefuon bu anerene uri bui kuai, E iji fu e izekido fuka vuak sumakin be abe darokma nijaiduom. Fu ijegrekok kaven ise iji buka ifuon iji faime fu i gavno kuain.
MAR 1:28 Jesu fu ijegrega vuak fuon iji fuka migegare ifene vakoga e ar Gareri guf ijia karinva iji buka faim baren.
MAR 1:29 Jesu fun e Jiusbuon ar bu afuim vuak kuaivo iji areme e Jeims ko Jon aferdia bun Saimon ko Edruk buon ar ijia vain.
MAR 1:30 Bu va ijia usevga e iji buka migegare usem Saimonon barak ijefuon asiej fu vajai vuaturime fu adam abe namo iji kuarain.
MAR 1:31 Ijegrejga Jesu fun vake bara iji namo ijia kekome idkena fu uriga adam vajai vuaturimo iji fuka ijia barein. Fun barga bara iji fu uri bu samuagdiaknum ire vajiain.
MAR 1:32 Areme tavan nakisrenma ijia e uruvana bun e adagin ijiga e kaven ise ijieb ninarukdiainva ijin aferdia Jesuon ruain.
MAR 1:33 E ar Kafoniam karinva ijieb e adagin iji aferdia ar vien ijia afuinva fuka ma uruvana.
MAR 1:34 Areme Jesu fun e iji adam kafokafo abenva iji karauniaknum e iji kaven ise ijieb nirokiavo iji uruvana karauniain. Fu ijegreknum kaven ise iji ba unam arediaga bu vuak kafo kuain. Ijefuon maiji kaven ise iji bun Jesu ga vierafen ijefuon bun ibijume usem vain.
MAR 1:35 Jesu fun naine suok nakitu ve ba iraskin ijia uri ar iji fu nainma iji arega fun ai e bakin ijia sirimamekafa vain.
MAR 1:36 Fu vakga Saimon ga e vuak fuon faivor iji bun fu nisaime ja ijia vain.
MAR 1:37 Bu nisaime vake fu bieme uri kua, E uruvana buka a nisaidavno kuain.
MAR 1:38 Bu ijeg kuardavga fu kia, Roga noka ar kafo samaij ijia va. No ijia vainki na e iji vuak nijaidiak ijefuon maiji naiji na ijefuo ruainvano kiain.
MAR 1:39 Ijefuon Jesu fu moik Gareri guf ijia oijknum e Jiusbuon ar bu afuim vuak kuaivo ijia aru vuak nijaidiain. Fu vuak nijaidiaknum kaven ise iji bu e rosdiavo iji kuriairemga bu e iji areme usem vain.
MAR 1:40 Jesu fu ijeg vuak nijaidiamoine e be adam kasi igekin bu kua refrosi kuavo iji abenma ijar Jesuon ruain. Fu kekome Jesuon nifak ijia ato same uri soisoime kuain. A vierafega a vajai nun igi amardiega fu una madiekman ni ijegrene kuain.
MAR 1:41 Fu ijeg kuardamga Jesu fu iji faima fuka bomana oifiain ijefuon fu ij fuon akozme e mataigin iji kunain. Fu kunaime kua, Na amardakafie vierafenvano kuain.
MAR 1:42 Fu ijeg kuardako tavan ijia adam refrosi iji fu bakitemga e iji fu migegare una main.
MAR 1:43 Areme Jesu fun uri vuak gigikin kuardame kua, Ire igi na renva iji ab va e kafo kuardiak. Regavo nin migegare va e Godon isuf baroijo iji vajat on abe nijaidiamne. Areme ni ire kafo kege e Mosison akaij iji fu kuainma ijeg una Godon isuf baroine. A ijegrega e bu ijia game vierafero adam on iji fun barenmaro bu ijeg vierafekno kuain.
MAR 1:45 Regavo e iji fu faime fuka vuak iji dab e uruvana kuardiame nijaidiain. E iji fu vuak iji dab uruvana igia kuardiame samafrega Jesu fuba kekome una ar samakaf ijia oijknum vuak nijaidiain. Fu ai e bakin ijia fikoga e uruvana bu ar kafokafo ijia fuon rokga fu vuak nijaidiain.
MAR 2:1 Naki sibank barekoga Jesu fu una madu Kafoniam rokga vuak iji fu ifene vakga e uruvana bu fain.
MAR 2:2 Ijefuon e uruvana bun una vuak faikuai Jesu fino ijia ruain. Bu ro ijia afuime ar fu fino guf ga vien makaf iji buka irtoijen. Regavo Jesu fu ijia mani vuak ma iji nijaidiamo ijia e baru nokarok ga nokarok (4) bu e vajai garenma iji gieme Jesuon ruain.
MAR 2:4 Regavo bu izeg ar guf ijia arume vakva bakin ijefuon maiji ar fun e fok ijieb bijukurain. Ijefuon bu e iji gieme dab ar azan ijia ajieme abe Jesu fu manine vuak kuaimon ijia umaij iji bujain. Bu bujame e iji abe fata ijekma kajek kiriame dab Jesu manino ijia abesen.
MAR 2:5 Bu ijegrejga Jesu fu e iji bu fu ma vierafenva iji giain. Ijefuon fu una dakaroim e vajai garenma iji kua, Fariknu gure ise on iji nan giame oinun ijia dazenvano kuain.
MAR 2:6 Fu ijegrega Jius e mamkanuk akai nijaidiavo iji bu ijia karinvado bu iji game una buon kuai,
MAR 2:7 E gari fu irerafuon vua ijeg kuaim? E be moikigia fu erar e kafobuon ise iji giame arekma bakin. Regavo fun Godri fuonkua revo fu irerafuon vua ijeg kufuimene kuaimno kuain.
MAR 2:8 E iji bu ijeg vierafejga Jesu fun giain. Ijefuon fu uri kia, Ja irerafuon vua kafokafo ijeg karine oijon ijia vierafej?
MAR 2:9 Ja vierafe vuak nokarok (2) igi izar fu samakafdo na e vajai garenma guri kuak? Naba kuak eko ise on iji nan game arenvano ni uri vakne kuak vo na kuak nin suf on iji ke datome uri vakne kuakno kiain?
MAR 2:10 Fu ijeg kuardiame kia, Ja naba ma vierafejo ijefuon na nijaidiaga ja ijia game ma vierafek. Ja ijia vierafero Ema ijiebuon Farif igi na daro abedo na moikigia ebuon ise iji na giame arevro ja ijeg vierafekno kiain? Fu ijeg kuardiame uri e vajai garenma iji kua, Ni uri suf on iji kara tuame ar vakne kuain.
MAR 2:12 Areme e uruvana bu vek ijia ireme nikajakoga e iji vajai garenma iji fun migegare uri suf fuon ke datome fun vain. Fu vakoga e fok bu iji gavga buka oiserdiamga bu una Godon oimaren. Bu oimarknum buon kuai, Ire iji fu renma iji fuka ma sumakin gavo madu ire ijekin kafo ur noka ba giainvano kuain.
MAR 2:13 Jesu fun ijegreare fun una Gareri do daturaiko nafuinma irif ijia vain. Fu ijia vakoga e uruvana bu fu jame ijia vakga fu vuak nijaidiain.
MAR 2:14 Fu vuak nijaidiame fun do irif ijia amedakiem vako ijia fu e Arfiason farif Rivai iji bien. Regavo Rivain ik iji fu takes abeoinon ijefuon fu ar fuon fu ikreno ijia figa fu iji bien. Fu biem kua, Ni uri na jajiemne kuamga Rivai fu uri Jesu jame vain.
MAR 2:15 Regavo tavan besum ijia Jesu fun una Rivain ar ijia fusik duok ikafa vain. Fu vakoga e takes abeoijo ijiga e ise reoijo uruvana bun fu jame ijia vain. Bun va fata ijia ari karine Jesuga e vuak fuon faivo ijiena besum duok in.
MAR 2:16 Bu duok iko ijia e Ferisis roin vuak akai nijaidiavo iji bu ijia buna karine duok ij. Ijefuon bu uri e iji Jesuon vuak faivo iji kia, E jon bomana iji fu irerafuon e guri ise reoijo ijiga e takes abeoijo ijiena duok ino kiain?
MAR 2:17 Bu ijeg kuaivga Jesu fun giame uri vua be ijeg bijame kuardiain. Fu kia, E iji adam abenva ijieb bu e adam giavo iji vierafev. Regavo e iji buba adam abejo iji buba e adam giavo iji vierafekno kiain. Ijegvo na ruainva iji na e iji bu mareoijo ijiebuon ruainva bakin revo na e iji bu ise reoijo iji karauniakro ruainvano kiain.
MAR 2:18 Areme tavan be e Jonon vuak faivo ijigam e Ferisis iji bu duok karoin. Bu duok karovga e kafo bu ro usem Jesu kua, E Jonon vuak faivo ijiga e Ferisis bu duok karov. Regavo e vuak on faivo iji bu irerafuon ba duok karovno kuain?
MAR 2:19 Bu ijeg kuardavga Jesu fu una vuak be ijeg bijame kuardiain. Fu kia, Tavan iji barubara bu sanamikuai duok ijo ijia e baru iji fu ijia fike bu e ruainva iji kia bu duok karome karine una oifiaigma vakva bakin. Regavo buka oimarknum karine besum duok ik. Regavo vake son rad baru iji fu bara iji afeme ai be vakma e iji bu ijiason buifuon oifian abe duok karok. Unam besum ijegvo naiji na e iji fu bara abekreno igekin. Ijefuon e vuak nun faivo iji bu na vek igia buna oijo iji no besum oimarknum duok ij. Regavo tavan rad e ani nun bu na aferdieme kanie na guakva ijia bu nuifuon oifian abe duok karokno kiain.
MAR 2:21 Fu ijeg kuardiame uri vuak be bu izeg e Ferisis ijiebuon unam usuikor ijiga unam fuon iviamkor iji buba kege besum mazikfuon ijefuon bijame kuardiain. Fu kia, E be fu erar ugon fuon usuikor fu bujaga fu una ugon iviamkor buin abe ijia abedeme sigukma bakin. Regavo fu ijegrekma ugon iviamkor ijar usuikor iji dab jijukman fuka bomana bujak.
MAR 2:22 Unam besum ijegrevo fu e be erar vuain iviamkor iji abe una kamuij usuikor iji bu fanuf surif ijia amarenva ijia usekma bakin. Regavo fu ijegrekma iji kamuij usuikor iji fuka sisuikene bujaga vuain iviamkor iji fu usek. Bu ijegrekva ire nokarok (2) iji buka iserek. Ijefuon bu vuain iviamkor iji buka kege una kamuij iviamkor ijia usega ire nokarok (2) iji buka markno kiain.
MAR 2:23 Areme tavan Sabat (Satade) iji e Jius bu isuar karijo ijia Jesu fu e vuak fuon faivo ijiena juar bu vuit ire rais igekin iji oinva ijia urame oin. Bu va ijia oijo ijia e vuak fuon faivo ijieb uri ire vuit garin iji kafo tuame imut tat ijia dakumume surif iji fuas korevknum ioin.
MAR 2:24 Bu ijegreoijga e Ferisis iji bu giame uri Jesu kua, E vuak on faivo iji bu irerafuon akai nuvuon abe tuaseme tavan Sabat (Satade) iji no isuar karijo ijia vuit iji tuame ijno kuain.
MAR 2:25 Bu ijeg kuardavga Jesu fu una kia, Regavo ja tavan iji Devid fu efuon ijiena vasiaordiamga bu duok ikuai vierafenva iji jabe dame gain? Bu tavan iji e Abiata fu vek Godon isuf baroinon ijia Devid fu vasiaguamga fu Godon ar ijia arume vain. Fu ijia arume bred iji Abiata fu Godon isuf baroinma iji fuka ire akai regavo e Devid fu iji abe iga efuon iji vajiainma iji jan vierafenvano kiain.
MAR 2:27 Fu ijeg kuardiame uri e Ferisis iji kia, Tavan Sabat (Satade) iji ja isuar karijo iji Jesu nar amaren. Ijefuon na koiknun na aresredo na tavan ijia e kiaga bu ire kafo rekva iji fu marek.
MAR 2:28 Ijefuon Ema ijiebuon Farif igi naiji na tavan Sabat (Satade) iji e bu isuar karijo ijefuon E Bomana ijino kiain.
MAR 3:1 Ijegreare tavan be Jesu fu madu una e Jiusbuon ar bu afuime vua kuaivo ijia arume vaga e imut abe kirainma iji fu ijia fin.
MAR 3:2 Regavo e roin ijia karinva iji buka Jesu nikajain. Bu vierafe buka nikajaoga fu tavan Sabat (Satade) iji e bu isuar karijo ijia e iji imut abe kirainma be keunaga bu abe kotrekuai vierafen.
MAR 3:3 Bu ijeg vierafene karinva ijia Jesu fu e iji imut abe kirainma iji kua, uri igia rokne kuain.
MAR 3:4 Areme Jesu fun uri e ijia karijo iji kia, Tavan Sabat (Satade) akaij iji no isuar karijo ijia e ijekin iji no kege izeg rek? Nobe bu ifejdiak vo no buon ise rek? Regavo madu nobe kaniak vo no bu karauniakno kiain? Fu ijeg kuardiamga e iji buba una vua kafo kuardain revo bum isuar igia katibitene karin.
MAR 3:5 Jesu fu uri e iji giama fuka deajin. Regavo madu fu giamga oibuon iji buka gigikin ijefuon fuka bomana oifiain. Ijegreare fun uri e iji imut abe kirainma iji kuama fu imut akozemga imut fuon fu una maren.
MAR 3:6 Fu ijegrega e Ferisis iji bu iji game bun ar iji bu afuim vuak kuaivo iji areme usem e iji bu Erodon vuak faivo ijiena izeg bu Jesu kanakfuon iji kuaime ujuinamin.
MAR 3:7 Ijegrene Jesu fun uri e vuak fuon faivo ijiena fun una do daturaiko nafuinma ijia vakoga e Gareriko ka ma uruvana bu uri bu jajia vain.
MAR 3:8 Regavo madu buka e uruvana ar kafokafo ijia karioinva iji bukmadu ijia ruain. Bu e ar Judia ga mai Jerusarem ga Aidumia guf ijia karioinva ijieb ruain. Regavo madu e kafo buk do Jodan ruvainma gara karioinva ijigam e ar Taia ga Saidon ijia karioinva ijieb uri ruain. Ijefuon maiji bu irerag Jesu fu reoino iji fainva ijefuon bu ijia ruain.
MAR 3:9 Buka e uruvana rokga Jesu fu uri e vuak fuon faivo iji kiamga bu sisim ukakbe fuifuon abe ruain. Buka e uruvana afuime fu dab utikurakrejga fu ijia ajieme vuak kuardiakafa kiamga bu abe ruain.
MAR 3:10 Ijefuon maiji fun amur e uruvana karauniainma ijefuon e roin adam abenva iji buka fu kunaimgakuai vierafen.
MAR 3:11 Regavo kaven ise iji rosdiainva ijieb Jesu gavo iji buka uri e iji kam rosdiame Jesu manino ijia ato sav. Bu ato same biumame kume, Aiji anka ma Godon farifno kumej.
MAR 3:12 Bu ijeg kumejga Jesu fu uri kaven ise iji kuriairene kia, Ja if nun jab abe samafrekno kiain.
MAR 3:13 Ijegreare Jesu fun uruor ijia ajie va kekome uri e fu vierafenma iji kumega bu fuon ruain. Bu ijia fuon rokga Jesu fu e tuer (12) imut bijiame kia, Jaiji ja e afasor nun rek. Na ijeg ifdiaga ja nana oijknum vua nun abe e kuardiak. Regavo madu na daro miaga ja e iji kaven ise rosdiainva iji kiaga bu e iji areme usem vakno kiain.
MAR 3:16 Regavo e iji fu imut bijiame kenma ijiebuon if iji ijeg e Saimon e iji Jesu fu una Fita kuainma ijin. Regavo e Jeims ga Jon e Zebedion afijaf ijin. (Regavo madu Jesur una ifdiafe kia Boanegis kiainma ijin. Regavo if ijefuon ma iji e varur igeg kumejo ijin).
MAR 3:18 Regavo be iji Edru ga be iji Firif ga be iji Batoromiu ga be iji Metiu ga be iji Tomas ga Jeims e Afiason farif ijin. Regavo be iji Tadias ga Saimon e iji fu e mamkanuk ijiena vua gigikin kuaimon iji rega be iji Judas Iskariot e iji Jesu abe e ani miamga bu kanainva ijin ken.
MAR 3:20 Ijegreare Jesu fun una ai be ijia ajie vakga e fok bu madu usem ijia afuin. Ijefuon Jesu ga e vuak fuon faivo iji bu duok ikrega fuka tavan bakin.
MAR 3:21 Regavo e roin bu kuai Jesu fu nigen iserenma kuaivo ijefuon aganfuon bu vuak iji faime Jesu afekuaim ruain.
MAR 3:22 Regavo e vuak akai nijaidiavo roin bu Jerusarem ijia ruainva ijieb kuai Jesu fu kaven ise Setan bu kua Birzibubno kuavo ijar oifuon ijia arinmano kuain. Regavo e roin bu kuai fu kaven ise ijiebuon e bomana Setanri daro maga fu kaven ise iji kiaga bu usem vakno kuain.
MAR 3:23 Bu ijeg kuavga Jesu fu vuak iji faime e iji kumega bu rokga fu uri vuak be ijeg bijame kuardiain. Fu kia, Kaven ise Setan fuba koikfuon una fuon nisarenamikno kiain?
MAR 3:24 Fu ijeg kuardiame uri madu kia, Ai be fu uri una ata roinroin rene una buon bijaikva fu tavan jiamanak ijia na vakma bakin. Ijefuon madu e agan be bu uri ata roinroin rene una buon musikuaiknum karivakva bu tavan jiamanak kari vakva bakin.
MAR 3:26 Ijegvo Setanon e iji fu samuagdiamo iji bu uri buon ata roinroin rene bijaikva buba tavan jiamanak karikva bakin. Regavo buka migegare darobitedia barek.
MAR 3:27 Regavo madu e darokin ijefuon ar iji fu erar bujame aru sinuom fuon niesame karekma bakin. Regavo fuka amur e darokin iji kunaim tome rad fu son sinuom fuon niesak.
MAR 3:28 Regavo vuak igi naka ma kuardiav. Ema igiebuon ise iji ga vuak ise uruvana bu kuaimoijo iji God fu giame arekfuon.
MAR 3:29 Regavo erar fu Godon Kaven Akai iji fuisina vuak ise kafo kuaikma God fuba ga arek. Ijefuon maiji ise ijekin fu renma iji fu tavan uruvana ijia navakfuon.
MAR 3:30 Jesu vuak iji fu kuainma iji bu e roinb kuai fu kaven ise ijar oifuon ijia arinmano kuaivo ijefuon fu iji kuardiain.
MAR 3:31 Jesu fu vek vuak iji kuardiamo ijia asiefuon ijiga uviaifijaf bu ijia usen. Bu ro makaf ijia useme irega e be kuavga fu arume Jesu kuakafa vain.
MAR 3:32 Regavo buka e fok ijieb dab kirakura ameoine fu uf ijia manino ijia bu arume kua, Asieon ijiga uviaifon bu a nisaime ro makaf gufa irenvano kuain.
MAR 3:33 Bu ijeg kuavga Jesu fu una kia, Asienun ijiga uviaifnun iji eranebno kiain?
MAR 3:34 Areme fu uri e ijia karinva iji giaoine kia, Asienun ijiga uviaifnun iji bu iga nana karin.
MAR 3:35 Ijefuon maiji erar fu irerag fok Asoinu fu vierafenma ijia kegoino e ijar fu uviainun ga makinun ga asienuno kiain.
MAR 4:1 Areme Jesu fu una madu do Gareri daturaiko nafuinma irif ijia anerene vuak nijaidiain. Fu ijia vuak nijaidiakoga e ka ma uruvana bu una ijia fu dab kirakurain. Ijefuon fu uri vanag ijia ajie biom do azan ijia fikoga e fok ruainva iji bu do irif ijia iren.
MAR 4:2 Bu ijia karikoga fu uri vuak fok fuka ke bijame nijaidiain. Fu vuak nijaidiame kia, Igia faif. Tavan be e be fun va uij dajaiko uij roin bu uduime unam iji e bu oijo ijia ariva bun um ijieb arime kare in.
MAR 4:5 Regavo roin bu uduime munuag azan ijia arime buka tavuan revo gireg buon iji buba uruvana sain. Ijefuon maiji sakin ma iji fu ukakbe ijefuon bu tavua ajievga fun tavan kek kaniamga buka sairen.
MAR 4:7 Regavo uij roin bu ufien gurogin uf ijia arivga fu ufien ijar name raremga buba sunin kirain.
MAR 4:8 Regavo roin bu sakin ma ijia ari tavuame sunin kirain. Regavo sunin bu kirainva iji roin bu sunin siban (30) ijeg kirain revo roin bu igeg sibank uruvana (60) ijeg kirain revo roin buka ma uruvana (100) ijeg kirain.
MAR 4:9 Fu ijeg kuardiame kia, Ja adakikva ni vuak igi na kuardiavo iji mukor faifno kiain.
MAR 4:10 Areme tavan be Jesu fu fuonkua fino ijia e roin vuak iji faivo ijieb e vuak fuon faivo ijiena fuon ruain. Bu useme Jesu kuai, Nin vuak iji a bijame kuarduinma ijefuon maiji visume samakaf kuarduomne kuain.
MAR 4:11 Bu ijeg kuardavga Jesu fu una kia, Na unam sauivkin God fu izeg efuon ijiebuon oij iji samuagdiamo iji nan e iji ja na jajievo iji kuardiame nijaidiain. Regavo e iji buba na jajievo iji vuak iji na ke bijame kuardiak.
MAR 4:12 Na ijeg bijame kuardiaikin vuak irerag e Asaia fu kuainma iji fu ijekma aresrek. Regavo vuak iji fu kuainma iji bu ijeg isoi, Bu vuak ijefuon ma iji nisaik revo buba ma iji gak. Regavo madu bu tavan uruvana vuak iji kukma faik revo buba amarigia faim vierafek. Regavo bu vuak iji amarigia faim vierafebatie bu ise buon ijia oi karoiga God fu ise buon giame arekno kuain.
MAR 4:13 Jesu fu ijeg kuardiame kia, Ja vuak igi na bijame kuardiavo iji jaba amarigia faikva ja izeg una vuak kafo bu ijeg bijame kuainva iji mukor faime vierafek.
MAR 4:14 Vuak na bijame kuardiavo ijefuon ma iji igin. E iji uij dajainma iji fu e iji Godon vuak abe e kafo kuardiamo ijekin ijin.
MAR 4:15 Regavo e roin bu uij iji bu uduime unam ijia arinva ijekin. Bu vuak nun faiv revo Setanri migegare ro vuak nun bu faime abe oibuon ijia abedevo iji fu kare vak.
MAR 4:16 Regavo uij roin bu uduime munuag azan sakin ukakbe namo ijia arinva iji e iji bu oimarvknum vuak iji migegare faivo ijin. Bu vuak iji migegare faiv revo buba abe oibuon ijia gigikin vierafej. Ijefuon bu Godon vua iji abe oibuon ijia abedeme oijo ijia e kafob ise kafo buon rejknum kam unam ise ijia arafiriaga bu vajai fian abejo ijia buon ma vierafejo iji buka migegare ijia arevo ijin.
MAR 4:18 Regavo uij roin bu uduime gurogin uf ijia ariva ufien ijieb okuriainma iji e iji bu vua ma iji faivknum vo una izeg bu moikigia oimarvknum kareokfuon iji vierafejo ijin. Bu ijegrejknum buka sinuom ga mon uruvana oijmiaknum ire kafokafo uruvana vierafejo ijar vua ma iji bu fainva iji buka rubdiav. Ijefuon vua ma iji bu fainva iji fu oibuon ijia tavuame ajie sunin kiramo bakin.
MAR 4:20 Regavo uij iji sakin ma ijia arinva iji bu e iji vua nun iji faime amarigia abejo ijin. E ijieb vuak ma iji fu oibuon ijia tavuame sunin kirain. Roin bu sibank abeko roin bu sibank uruvana abekoga roin buka ma uruvana abejo ijino kiain.
MAR 4:21 Fu ijeg kuardiame madu uri kia, Fu e be erar rait fuon abe datome ar fuon guf fata rotit ijia sauim abedekma bakin. Regavo fuka abe ar fuon guf kaf ijia kira abesga fu ai guf fok sana barek.
MAR 4:22 Ire iji sauim naoivo iji buson rad samafrega bu giakfuon. Ijegvo vuak nun iji fu ijekin. Ijefuon vuak irerag na bijame kuardiavo iji anej ma iji buson faikfuon.
MAR 4:23 Ijefuon ja adakiga ni vuak igi mukor faifno kiain.
MAR 4:24 Jesu fu ijeg kuardiame kia, Vuak igi na kuardiakrejo iji amarigia vierafef. Erar fu ada amarigia irame Godon vuak iji faimo e ijar fu amarigia faime vierafekfuon. Regavo Godri madu una vua maiji kafo madu nijaidiak.
MAR 4:25 Regavo e iji erar fu Godon vuak iji amarigia faime ke mimataoino e iji God fu una madu ifejdaga fu vuak fuon ma iji kafo madu vierafeken. Regavo e iji erar fu Godon vuak iji fuba oimarvknum faim vo fum sibank faimo iji God fu una vuak fuon ma iji oifuon ijia naoivo iji fu kamazakfuon.
MAR 4:26 Jesu fu ijeg kuardiame madu kia, Unam izeg God fu efuon ijiebuon oij iji fu samuagdiamo iji fu e iji fu juar fuon ijia uij dajainma ijekin.
MAR 4:27 E iji fu uij dajaime tavan bog nakikmazak fu nai urino iji fu uij bu tavuame ajie vo bu izegrejo iji fuka ba vierafen.
MAR 4:28 Fu va fiokoga uij bum koikbuon ijia tavuame ajie kiak atame sunin kirain.
MAR 4:29 Bun kira vake i sunin fok buka duime barekoga e juar koikin iji fun i sunin fok turame kanafuikafa ruain. Ijefuon maiji tavan iji fun juar masivo ijefuon tavan ijino kiain.
MAR 4:30 Jesu fu ijeg kuardiame kia, Unam izeg God fu efuon ijiebuon oij iji fu samuagdiamo iji fu izekin iji no izeg kuaik? Regavo madu no abe irerag ijia bijame kuaiga fu samafrediak?
MAR 4:31 Igia faif. Unam izeg God fu efuon ijiebuon oij iji fu samuagdiamo iji fu uij ka ukakbe in sira sunin fu rekfuon igekin. E be fu i sunin ukak iji abe juar ijia oga tavan sibank barko fuka tavuame bomana ren. Fu bomana rene kiak fuon mamkanuk atame ire fok juar ijia oinva iji fuka asidiamga um bu ijia nait abejo ijekino kiain.
MAR 4:33 Jesu fu vuak ijefkin kafo madu ke bijame kuardiako bu vuak iji faime vake buka aresrega fu ijia aren.
MAR 4:34 Regavo vua fuon fok fu e iji kuardiainma iji fuka ke bijame kuardiain. Regavo vuak ijefuon anej ma iji fu fuonkua e vuak fuon faivo ijiena fioinma ijia kuardiain.
MAR 4:35 Areme tavan besum iji nakifuon ijia Jesu fu uri e vuak fuon faivo iji kia, Roga no do vajame gara vakno kiain.
MAR 4:36 Ijefuon e vuak fuon faivo iji bun uri e fok ijia areme Jesu afeme funa vanag ajieme bun vain. Regavo madu vanag kafo bu madu buna vain.
MAR 4:37 Bu vako ijia buibur ka ma darokin ijar ufikoga saof iji fuka foine vanag ijia arin. Fu foine ijia arikok vanag iji fuka irtoijekafa ren.
MAR 4:38 Regavo Jesu fu vanag nuon ijia anum abe nigen abedeme fun ninain. Fu ninaiko e vuak fuon faivo iji bu uri same kua, E Bomana noka oifian abe do urame aoikrejo abe guome ifejduokafa vierafenmano kuain.
MAR 4:39 Bu ijeg kuavga Jesu fu uri buibur iji biju vo uri saof iji foinon iji kua, Sibano ni areme isuar namne kuain. Fu ijeg kuamga buibur iji fu bakite vako saof fu una isuar katibitene una fu nainma ijeg nain.
MAR 4:40 Fu isuar namga Jesu fu una dakaroim e vua fuon faivo iji kia, Ja izegrekuai juv? Ja God jabe ma vierafen vo ja bano kiain?
MAR 4:41 Fu ijeg kiamga buka bomana dejufdiainma ijefuon bu uri kua, E iji kafu erar? E iji noka ba vierafenva ijar buibur guri ga saof guri kiamga buka vuak fuon faime arenvano kuain.
MAR 5:1 Areme bun vanag abe vake do Gareri gara ar e Gerasako karinva ijia usen.
MAR 5:2 Bu vake ijia useme Jesu fun vanag iji areme ajie roko ijia e be kaven ise ijieb dab rosemokok fu mun tit iji bu e aoiga bu ke uniavo ijia naioino ijar kaven ise ijiena usem Jesuon ruain. Regavo e iji fuka e ise e darokin ijefuon bu izeg fu kunaime sen kam tokva bakin.
MAR 5:4 E buka tavan bog sen kam diak fuon ijiga imut iji kam tovo iji fuka giriesame kam turasega bu uduim arivo. Regavo fu erar daro mene fu kunaikma bakin ijefuon bu ijia arev.
MAR 5:5 Ijefuon nakikmazak fu mun tit ijia ga uruor ijia biumavknum koikfuon vajai fuon dab mun ijia kania buaseko fuka kavuanariko fu ijia oino.
MAR 5:6 Fu ijia oine Jesu fu vakga fu aibe gafia manine game kukum roke ijia kekoin. Fu kekome Jesu ato same uruvana biumame kua, Jesu God E Bomana kaf gufia fino ijefuon Farif gure a irerag iji nun rekro vierafen? Ni Godon if ijia kuraga na vierafero a na aba abe arafiriekro na ijeg vierafekno kuain.
MAR 5:8 Fu ijeg kuainma ijefuon maiji Jesur kaven ise iji kua e iji areme keko vakne kuainma ijefuon fu iji ijeg kuardain.
MAR 5:9 Fu ijeg kuamga Jesu fu kua, Regavo if on iji erano kuain? Jesu fu ijeg kuamga e iji fu una roin kua, Na if nuvuon bu kuo Uruvanano kuovo ijefuon maiji noka kaven uruvana oifuon guf ijia karinvano kuain.
MAR 5:10 Fu ijeg kuardame una madu Jesu soisoime kua, Ab kuoga no ar igi no karijo iji areme usem ai be vakno kuain.
MAR 5:11 Regavo uruor samaij ijia maf uruvana bu ijia ireme duok ioij.
MAR 5:12 Ijefuon kaven ise iji bu maf ijiebuon oij ijia arikuaim vierafene uri Jesu soisoime kua, E-e ni kuoga no useme maf gariebuon oij ijia arivno kuain.
MAR 5:13 Bu ijeg kuavga fu kia, Ni ijegrefno kiamga kaven ise iji bu e iji areme usem una maf ijiebuon oij ijia arin. Regavo maf buka ma uruvana tu taosen (2,000) ijeg. Ijefuon bu usem subinai uruor igegamekin ijia arime do urame aoin.
MAR 5:14 Bu ijegrejga e iji maf samuagdiamo iji bu giame usem subinai e iji bu juar mene samuagdia karijo ijigam e iji mai guf ijia karioinva ijin vuak iji dab kuardiame vain. Bu ijeg kuardia vakoga e iji bu vuak iji faime usem Jesu ire iji fu renma iji gakuai ruain.
MAR 5:15 Bu useme e iji kaven ise ijieb fu dab niroimoijo iji gain. Bu ga fu ire iji fu reoinon iji fun dasume dab akozga una e ma rene ugon fuon same fina bu gava buka dejufdiain.
MAR 5:16 Areme e iji bu ire iji kaven ise iji ga maf ijiebuon renma iji giainva ijieb una e iji ruainva iji kuardiain.
MAR 5:17 Bu kuardiavga e iji ijia ruainva iji bu vuak iji faime uri Jesu dab kuakuavknum kua, Nika ar nuvuon igi areme vakne kuain.
MAR 5:18 Bu ijeg kuavga Jesu fun una vanag ajiekrega e iji kaven ise ijieb dab niroimoijo iji fu kekome Jesu kua, Nabe osik vakno kuain?
MAR 5:19 Fu ijeg kuamga Jesu fu faime kua, Ni una ar on ijia va irerag E Bomana fu on renma iji aganon iji kuardiamne. Regavo madu izeg E Bomana fu on oifian abene ifejdainma ijin kuardiamne kuain.
MAR 5:20 Jesu fu ijeg kuardamga e iji fun una va ai Dikaforis ijia oijknum irerag Jesu fu fuon renma iji kuardiaoin. Fu ijeg kuardiafga e fok bu vuak fuon faiva buka oiserdiain.
MAR 5:21 Areme Jesu fun sisim abe una do daturaiko nafuinma iji gara vain. Regavo do gara ijia bu e uruvana fu samuame afuim karinva fu vake ijia kekomga bu usem dab kirakurain.
MAR 5:22 Regavo e iji ar bu afuime vuak kuaivo ijefuon e bomana if fuon Jairas fuk fu ijia ruain. Fu ijia ruainmado fu kek Jesu game uri fu manino ijia ato same uri Jesu kua, Kabainun fuka guakafaren. Ijefuon e-e ni ro imut nigen abedega adam fuon fu barga fu una uri oino kuain.
MAR 5:24 Fu ijeg kuamga Jesu fun fusik vain. Regavo buka e uruvana Jesuna vako ijefuon buka buon ajiefirainamiknum vain.
MAR 5:25 Regavo bara be buna vako iji fu ise fi ruako fuka juaivasia tuer (12) ijeg baren. Regavo kavuan fu arimo iji fuba baren.
MAR 5:26 Fu juaivasia uruvana fuka oifian abe va e mamkanuk adam giavo iji giame mon fuon fok karme kimega bu ifejdain. Bu ifejdavo iji adam fuon fuba maim revo fuka una ma bomana ren.
MAR 5:27 Barak ijar Jesuon vuak iji faime fu e fok roko ijia jajiame Jesuon ugon fu sainma iji niriain.
MAR 5:28 Fu vierafero fu ugon iji niriakma fu maikro fu ijefuon ijfuon akozme Jesuon ugon buin ijia kunain.
MAR 5:29 Fu ugon fuon ijia kunaimga kavuan fu arimo iji fuka migegare bakren. Bara iji fu koikfuon vajai fuon ijia faik adam ijigam iji fu oifian abeno iji fuka barema fu fain.
MAR 5:30 Fu ijegreko ijia Jesu fuk fun faik daro fuon kafo bun useva fu fain. Fu faime una dakaroime e fok bu jame vako iji kia, Erar ugon nun igia kunainmano kiain?
MAR 5:31 Fu ijeg kiamga e vuak fuon faivo iji bu uri una roin kua, Igia gamne buka e uruvana a dab kirakurakoga a ijia kia erar ugon nun kunainmano kiam.
MAR 5:32 Regavo Jesu fuka e iji erar fu ugon fuon kunainma iji gakafa nisain.
MAR 5:33 Regavo bara iji fu vierafega fun fur Jesuon ugon iji niriain. Ijefuon fuka bomana juvknum va Jesu ato same irerag fu renma fok visume kuardain.
MAR 5:34 Fu ijeg kuardamga Jesu fu una kua, Kabainu on a ma vierafenma ijar adam on iji fu keunain. Ijefuon adam on a abeno iji fun madainmano ni va mukorigia fioine kuain.
MAR 5:35 Jesu fu vek vuak iji bara iji kuardamo ijia e kafo bu e Jairason ar ijia ruainva ijieb useme Jairas kua, Kabaion fun guain ijefuon e guri E Nijaidiamo iji a afekro vierafeno iji aremne kuain.
MAR 5:36 Bu ijeg kuavga Jesu fu vuak buon fum faim dazga una Jairas kua, Ab vuak ijar oifiadagavo nin ma vierafemne kuain.
MAR 5:37 Areme Jesu fun uri Fita ga Jeims ga Jon e Jeimson uviai iji aferdiame funa vaga e roin fu kiamga bu ijia aren.
MAR 5:38 Bun vake Jairason ar ijia usem giak e uruvana buka uruvana igia niraime iseknevknum biumaoij. Bu ijegreoijga Jesu fu na ar guf ijia aru manine kia, Ja irerafuon oifian abe niraiv. Am igi fuba guain revo fum ninainmano kiain.
MAR 5:40 Fu ijeg kiamga bun uri fu dab anu baroine kijdain. Bu dab kijdavga fu uri e fok kuriairemga bu usem vakoga fu am ijefuon asie ijiga asoij iji ga e vuak fuon faivo nokbek (3) iji aferdiame ar guf bara ukak fu namo ijia aru vain.
MAR 5:41 Bun aru irekoga Jesu fun bara iji imut kene isama fuon ijia kua, Tarita kumino kuain. (Regavo vuak ijefuon ma iji bara ukak igi nar kuavo ni una urimne.)
MAR 5:42 Fu ijeg kuamga bara ukak iji fu uri ar guf ijia oin. Regavo bara ukak iji juaivasia fuon tuer (12) ijeg. Jesu fu bara iji keunamga e uruvana bu iji gavga buka bomana oiserdiain.
MAR 5:43 Fu ijegreare uri kuriaireme kia, Jab irerag igi na renva iji e roin kuardiakno kiain. Areme fu madu uri kiamga bu ire kafo kege bara ukak iji vajavga fu kege in.
MAR 6:1 Ijegreare Jesu fun ar iji areme una uri ar fuon ijia vakoga e vuak fuon faivo iji bu uri funa vain.
MAR 6:2 Bun va Nasaret useme bun tavan Sabat (Satade) iji e bu isuar karijo iji rokga Jesu fun e Jiusbuon ar bu afuime vuak kuaivo ijia arume vuak nijaidiain. Regavo buka e fok ijia karine vuak fuon faiv ijefuon buka oiserdiamga bu uri kua, E iji fu erar vuak iji nijainvo vierafe vajam? Regavo madu fu izia iji kege kuaimoijknum ire sumakin kafokafo iji reoinon kuain?
MAR 6:3 Regavo madu bu kuai, E iji fum e be ar samon ijin revo madu fu barak Merion farif ijin. Regavo uviaifijaf iji e Jeims ga Josof ga Judas ga e Saimon ijin. Regavo madu makifijaf bun igia karijo iji non vierafenvano kuain. Bu ijeg kuaime vierafega buka jufdiamga bu ijefuon fu uzain.
MAR 6:4 Bu fu uzavga Jesu fu uri kia, E Godon vuak vierafene e kuardiamo ijefuon vuak iji bu e ar roib faime ma vierafev. Regavo una aganfuon ma iji buba vuak fuon ma vierafekno kiain.
MAR 6:5 Fu ijeg kuardiame vo fuba una ijia ire sumakin kafo ren. Regavo fum e sibank adam abenva iji imut nigen namdiame karauniain.
MAR 6:6 Fu e roin karauniain revo e fok buka vek ba fu ma vierafejga fu iji giamo fuka bomana oiseren. Areme Jesu fun uri ar ukaknak besubesum ijia oijknum vuak nijaidiaoin.
MAR 6:7 Fu ijia vuak nijaidiaoino ijia fu e tuer (12) vuak fuon faivo iji kumega bu fuon ruain. Bu fuon ruainki fu daro miaga bu e iji kaven ise ijieb rosdiainva iji kuriairega bu usem vakuai bu iji ruain. Bu rokga fun uri kia, Ja e nokarok (2) ga nokarok (2) ijeg mazime use vakno kiain.
MAR 6:8 Fu ijeg kuardiame madu uri vuak kafo nijaidiame kia, Ja ire uruvana jab kege ok. Regavo nin tamag jon ke same vo guduar jon ke kuniaime vakgavo jab bred ga kamui ga mon ga set kafo keme vak.
MAR 6:10 Regavo ja mai be ijia vaga e be fu ja aferdiakma ni ar fuon ijesugin karine tavan iji ja vako ijia areme vaf.
MAR 6:11 Regavo ja ar guf ijia oga e buba ja oimardiame aferdiakva ni mai iji areme vaf. Regavo madu ni uri diak surif jon iji azome kuotuvat iji kaniaseme ni ar iji areme vaf. Ja ijegrenki e mai ijia karinva bu giame vierafero ja bu jan mukor magiainvaro bu ijeg vierafekno kiain.
MAR 6:12 Areme bu usem oijknum vuak iji e bu ise buon ijia oi karoime una God ma vierafekfuon ijin abe kuardiaoin.
MAR 6:13 Bu kuardiaoijknum kaven ise iji kuriaireme nisarerdiaga bu e iji areme usem vaknum e iji adam abejo iji safi nameriaknum karauniaknum ijeg reoin.
MAR 6:14 Regavo Kin Erod fu vuak irerag fok Jesu fu reoinon iji fun fain. Ijefuon maiji irerag Jesu fu reoinon iji e fok bun faime if fuon bun abe ma vierafen. Regavo e roin bu kuai, Fu e Jon e iji e do ruardiamo iji guainma ijar una urinman ijefuon fu daro abene ire sumakin iji reoinon kuain.
MAR 6:15 Regavo e roin bu kuai, Fu e Eraijarno kuain. Regavo e roin bu kuai, Fu e iji usuibe Godon vuak vierafene kuaimoinva ijekin kafono kuain.
MAR 6:16 Regavo Erod fu vuak iji faime fu kuai, E iji fu e Jon e iji na abe uro ufuinva fu guainma ijar una urinmano kuain.
MAR 6:17 Regavo iji fu ijeg kuardiainma ijefuon maiji fu Erodri amur kiamga bu Jon kunaim tom afem dab dibur unain. Ijefuon maiji fu uviaifuon Firifon barak Erodias abega Jon fu kua, Aka isenma renmano kuamga fu ijefuon dab dibur unain. Fu kuardame kua, Unam iji a una uviaion ijefuon barak iji abenma iji aka akai tuasemano kuardumo ijefuon fu iji ijeg ren.
MAR 6:19 Ijefuon Erodias fuka vuak ijar deajiemga fu una oi ise Jon vierafene Jon kanakvega Erodri unam fuon bijukurain. Erod fuka juin ijefuon maiji fu vierafega Jon fu e ma ga fuka e akai ijefuon fuba ire ise kafo fuon rekafa vierafen. Regavo tavan ijia Erod fu Jonon vuak iji faimo iji fu oimarvknum fain revo fu vuak ijefuon maiji fuba vierafen.
MAR 6:21 Regavo tavan be Kin Erod fun tavan fuon bu nafenva iji rokga bara fuon Erodias fun unam izeg Jon kanakfuon iji fun vierafen. Rega Erod fun tavan fuon ijefuon e mamkanuk fuon ikrejo ijigam e azikegoijo ijiebuon e mamkanuk ijigam e mamkanuk kafo ar Gareri guf ijia karinva ijiebuon duok kanafuin.
MAR 6:22 Areme bun karine duok ijo ijia Erodiason kabaij iji fu arume uf ijia mani dua urumga Erod ga e iji funa karinva iji bu gavga buka oimadiain. Ijefuon Erod fu uri bara iji kua, A irerag vierafekma ni kiega na abe mavno kuain. Na god nun ijefuon if ijia irerag a vierafene kiekma na kege vajak. Regavo madu ire fok na samuavo iji a vierafekma na ke ata roin a vajakno kuain.
MAR 6:24 Ijefuon bara iji fun kek va asiefuon kua, A vierafe fu kiekma na izeg kuakno kuain? Fu ijeg kuardamga asiefuon fu kua, A vaga fu kuakma kua na Jon e do ruardiamo ijefuon nigen iji vierafenvano kuamne kuain.
MAR 6:25 Fu ijeg kuardamga bara iji fu migegare kukum una gumia kek Erod kua, Na vierafe aka iviakma igia e kia bu va Jon e do ruardiamo iji kanak. Bu kaname nigen fuon iji kanafu ter ijia anume abe igia miega na vierafero fu ma guainmaro na ijeg vierafekno kuain.
MAR 6:26 Fu ijeg kuardamga Kin Erod fuka bomana oifiain. Regavo fun e fok ruainva ijiebuon nifak ijia god fuon kuardainma ijefuon fuba arek.
MAR 6:27 Ijefuon fuka migegare uri e iji juo karijo iji kiamga bu Jonon nigen iji kanafume makuai vain. E iji bun va dibur ijia useme Jon kaname nigen fuon iji kanafuin.
MAR 6:28 Ijegreare bun abe ter ijia abedeme abe bara iji mavga fu abe una asiefuon main.
MAR 6:29 Areme e iji Jonon vuak faivo roin bu vuak iji faime va gafia usem surif fuon abe mako ruin.
MAR 6:30 Rekoga afasor iji Jesu fu kiamga bu usem vainva iji bun una irerag bu nijaidiaknum reoinva ijin Jesu kuardain.
MAR 6:31 Bu ijegrejo ijia e uruvana bu ijia giame una vaknum ijegreko tavan iji bu duok ikfuon iji fuka baren. Ijefuon Jesu fu uri e vuak fuon faivo iji kia, No nuvuonkua ai e bakin ijia va isuar karike ja madiakno kiain.
MAR 6:32 Fu ijeg kiamga bun uri buonkua vanag abe ai e bakin ijia vain.
MAR 6:33 Bun vanag abe vakrejga e uruvana ar kafokafo ijia ruainva iji bun giame vierafen. Ijefuon bun uri amur do irif ijia diak amedakie vake gafia usekoga Jesu fu e vuak fuon faivo ijiena rad kekoin.
MAR 6:34 Bu va ijia usevga Jesu fun uri e fok ijia afuinva iji giama fuka oifiain. Ijefuon maiji e iji buka maf-sif iji bu e samuagdiamo bakin igeg oija fu iji giain. Ijefuon fun uri anerene vuak nijaidiain.
MAR 6:35 Fu vuak nijaidiako fun ve nakikreko e vuak fuon faivo iji bu uri ro Jesu kua, Noka ai e bakin igia ruain revo fun ve nakikren. Ijefuon ni e guri kia bu una va mai ga ar samaij ijia duok bu ikfuon iji kafo kime ijno kuain.
MAR 6:37 Bu ijeg kuavga Jesu fu uri kia, Ni jar uri duok kafo nisaime vajia bu ijno kiain. Bu una madu uri kua, No buifuon duok kimekva iji noka e iji fu asam eit (8) ijeg fu ikrene mon iji fu abeno no ijeg abe duok kimek. Regavo a vierafega nobe mon izeg abe duok kime e igi vajiaga bu ikno kuain?
MAR 6:38 Bu ijeg kuardavga fu kia, Va e iji giamga bu bred izeg ke ruainvagia iji giafno kiain. Fu ijeg kiamga bun va e iji ruainva iji giame una ro Jesu kua, Bu bred imut roin (5) ga kijum nokarok (2) ijeg kege ruainvano kuain.
MAR 6:39 Areme Jesu fun e vuak fuon faivo iji kiamga bu e iji ruainva iji kiavga bu garas azan ijia atame kafokafo karioin.
MAR 6:40 E roin bu atame vuan adred (100) ijeg kariko roin bu atame fifti (50) ijeg karioin.
MAR 6:41 Bu ijeg karioine arekoga Jesu fun uri bred imut roin (5) ijiga kijum iji kege gafeg varur gufia gavknum Godon sirimamen. Ijegreare fun uri bred imut roin (5) ijiga kijum iji ke tuaseme e vuak fuon faivo iji vajiamga bu kege e fok ijia karinva iji vajiain.
MAR 6:42 Bu kege vajiavga e fok bu duok iji ijga buka defiavga e vuak fuon faivo iji bu uri duok ukur karme una ter tuer (12) ijeg anusen.
MAR 6:44 Regavo e fok bu ijia duok inva iji e baru ijesugin buka faiv taosen (5,000) ijeg.
MAR 6:45 Areme Jesu fun e vuak fuon faivo iji kiamga bu vanag ajieme abe do ijia urame gara ar Besaida ijia vain. Bun vako fu uri e fok ijia karinva iji kia, Ni una ar jon ijia vafno kiamga bun vakoga fu una ajie uruor ijia sirimamekafa vain.
MAR 6:47 Regavo ve nakinma ijia e vuak fuon faivo iji bu vek vanag abe do uf ijia vak. Regavo Jesu fu vek fuonkua iror ijia sirimamen.
MAR 6:48 Fu ijia sirimameknum giak e vuak fuon faivo iji buka vek vanag dab do azan ijia zazaimoij. Ijefuon maiji buibur ka bomana ijar bu vako ijia ufim. Ijefuon Jesu fun ve ik afarekreno ijia do azan ijia vuim buon ruain. Fun ijia asidia ruvakga bun game vierafero kafu zuar oinoro buka juin. Regavo e fok bun fu gainva ijefuon buka bomana dejufdiamga bu uri kumen. Bu juvga Jesu fu migegare uri kia, Na narno jab jukgavo nika giriesafno kiain.
MAR 6:51 Areme fun vanag ijia ajie buna fikok buibur iji fu bakitemga e vuak fuon faivo iji buka oiserdiain. Ijefuon maiji irerag fu reno ijefuon anej ma iji buba amarigia vierafen. Regavo madu Jesu fu daro fuon ijia bred ukaknak imut roin (5) iji kege e ka ma uruvana iji gormiava e vuak fuon faivo iji buka ba game vierafen. Ijefuon maiji nigen buon fuka ma gigikin.
MAR 6:53 Bun do ijia urame vake Genesaret ijia usen. Bu ijia useme ariko vanag iji bu dab do irif ijia kirain. Regavo e ijia karinva iji bu Jesuon uikinik iji bun amur gainva ijefuon bun vierafen.
MAR 6:55 Ijefuon bu usem kukubija mai kafokafo ijia oijknum e iji adam abejo iji aferdiame fata ijia uniame ke Jesu fina bu fainva ijia ruain.
MAR 6:56 Regavo Jesu fu mai ukaknak ga mamkanuk ijia vo ar kafokafo ijia fu vakon e iji buka e adam abejo iji aferdia ar bu duok kimejo makaf ijia uniain. Bu aferdia ijia uniame Jesu soisoime kua fu kiaga e adagin bu ugon buin fuon ijia niriakuai bu ijeg ren. E iji bu uri ugon fuon buin gamia kuniaivga adam buon iji buka una madiain.
MAR 7:1 Tavan be e Ferisis iji ga e iji vuak akai nijaidiavo roin bu Jerusarem ijia ruainva iji bu va Jesu fino ijia kari ameoine aren.
MAR 7:2 Bu ijia kariknum giak e Jesuon vuak faivo roin buba imut do soin revo bum duok ij. Bu unam e Ferisis bu imut do some duok ijo ijeg buba rej.
MAR 7:3 Usuibe saifijaf bu duok ikrejo bu imut do sovo ijefuon e Ferisis ijigam e Jius iji bu madu buka ijeg rejo.
MAR 7:4 Regavo ire be bu rejo iji bu va duok kimene una roko iji buka imut do so vo ire iji karme do some ijiason duok ijo. Regavo madu bu unam besum ijeg kafus ga firet ga saror iji do sovo. Regavo unam iji bu rejo iji bu saifijaf ijieb ijegrenva ijefuon bu madu bu ijeg rej.
MAR 7:5 Ijefuon e Ferisis ijigam e vuak akai nijaidiavo iji bu uri Jesu kua, E vuak on faivo iji bu irerafuon ba saifnuvuon ijiebuon akaij ijia jajiame revo bum imut muigma duok ijno kuain.
MAR 7:6 Bu ijeg kuavga Jesu fu una roin kia, E guri ka i kufuikin gurie amur e Asaia buk kafarbe ijia vuak be fu joifuon kuainma iji fuka ma kuain. Regavo vuak iji bu ijeg isoin, E iji bum ir ijia kuai no God aroivo kuaigavo bu oibuon ijekma aroivo bakin. Regavo madu bu sirimamene na vierafeoijo iji maiji fuka bakin. Ijefuon maiji bu Godon akaij iji e nijaidiavo bakigavo bum ema ijiebuon akaij iji kege e nijaidiavno kuain.
MAR 7:8 Jesu fu ijeg kuardiame uri kia, Ja God akaij iji fu nainma iji jan areme uri ema ijiebuon akaij iji kege e nijaidiavno kiain. Areme fu kia, Ja ijegreoknum ja Godon akaij iji ja izeg jakva iji jaka amarigia vierafen. Regavo jaka vuak iji bu ema ijieb vierafene amarenva iji ke nijainamime ijesugin vierafeoij.
MAR 7:10 Ijefuon maiji e Mosis fu akai fuon fu isoinma ijia fu kuai, Asoion ijiga asieon iji mukor igiaf. Regavo madu erar fu asiefuon ga asoifuon iji vuak ise kafo buisina kuardiakma e iji nika kana fu guamne kuain.
MAR 7:11 Regavo jar nijaidiavo iji ja kuai, E be fu mon fuon fu ire kime eofijaf vajiakafa nainma iji fuka aremne kuain. Ijefuon maiji mon iji fun amur kuai fu kege God vajakno kuain. Ja ijeg kuaimoijo ijia jaka izeg fu asie vo asoifuon iji ifejdakma ijia jaka kuriairev.
MAR 7:13 Regavo madu saifjon ijiebuon unam iji ja kege ijeg e nijaidiaoijo ijar fu Godon vuak ijek nibijaim. Regavo madu jaka ire kafo ijekin uruvana rejno kiain.
MAR 7:14 Fu ijeg kuardiame fun uri e fok kumega bu samaij ijia rokga fu kia, E fok ni na fadieke na vuak igi kuardiaga amarigia faif. E iji fu oine duok ino iji fu duok ijar fu abe Godon nifak ijia e ise reno bakin. Regavo fun vuak irerag ise fu oifuon ijia vierafene kuaimoino ijar e iji fuka Godon nifak ijia fuba mukoi reoin.
MAR 7:16 Ijefuon ja adakiga ni vuak igi na kuardiavo iji amarigia faifno kiain.
MAR 7:17 Areme Jesu fun e iji afuim karinva iji areme ar guf ijia aru vakga e vuak fuon faivo iji bu uri kua, Ni vuak iji a bijame kuarduinma ijefuon ma iji kuarduomne kuain.
MAR 7:18 Bu ijeg kuavga fu kia, E fok buka non giaga ja e vuak nun faivo iji jak jaka non giain. E be fu ire be abe ikma fu ire ijar fu dab ise rekma bakin. Regavo ire iji fu ino iji fu oifuon guf ijia arivakma bakin. Regavo fum defok ijia arime una vajai fuon ijia keko vak. (Regavo Jesu vuak ijeg fu kuainma iji duok fok no ijo iji fu iseno kuainma bakin revo buka ma ijesugin).
MAR 7:20 Jesu fu ijeg kuardiame una madu kia, E iji vuak irerag fu oifuon ijia vierafeno iji fu ir ijia kuaimon. Ijefuon ijar e iji fu Godon nifak ijia fuka ba mukoi kegoin.
MAR 7:21 Ijefuon maiji e iji fu ire ise kafokafo fu oifuon ijia vierafenon. Ijefuon fun ise iji fu oifuon guf ijia vierafeno ijar urino ijefuon fun va ire ise kafokafo ren. Regavo ire ise iji barubara oijo ijigam e kaniavo ijigam ebuon bara turavo ijin. Regavo madu sinuom uruvana kekafa vierafeno ijigam kai roin oij isema vierafejo ijigam vuak kufuimejo ijigam ise reoknum ba juf abejo ijin. Regavo madu e kafobuon sinuom karekuai vierafejo ijigam e kafobuon vuak ise kuaivo ijigam aroikaravo ijigam unam ise e ba juf abejo ijia kegoijo ijin. Ire ise ijekin ijieb e ijefuon oij ijia useko fu va ise reoino kiain.
MAR 7:24 Jesu fu ijeg kuardiame fun uri vake ai Taia samaij ijia kekoin. Fu ijia kekome gire be ijia ajie sauikafa vierafen gavo e roin bu fu izia fino iji bun vierafen.
MAR 7:25 Rega bara be fu kabaifuon kaven ise ijar niroinma ijefuon fu Jesu ruainma iji fain. Ijefuon fun vake fu fino ijia keko nifak fuon ijia ato sain.
MAR 7:26 Regavo bara iji fu bara Grik rega bu fu ar Siriafonisia ijia nafen. Bara iji fu keko ato same Jesu soisoime kua, Ni kaven ise igi kuaga fu kabainun igi areme keko vakne kuain.
MAR 7:27 Regavo e Jius iji bu vierafero bu buonkua Godon e revo e kafo bum siroij igekinro bu ijeg vierafen. Ijefuon Jesu fu uri kuai, No amur am ijiebuon duok iji vajiame rad noson siroij iji vajiak. Regavo am ijiebuon duok iji no amur ke siroij iji vajiakva fuba marek.
MAR 7:28 Regavo bara iji fu magaga kua, Vuak iji aka ma kuaim. Regavo siroij iji bu vek am ijiebuon duok ukur iji buka ikno kuain.
MAR 7:29 Fu ijeg kuamga Jesu fu kua, Iji a ma kuardiem ijefuon ni vakgavo kaven ise iji fu kabaion iji fun areme vainmano kuain.
MAR 7:30 Jesu fu ijeg kuamga bara iji fu una va ai fuon gafia kekome gak am iji fun ninain. Ijefuon maiji kaven ise iji fun am iji areme keko vain.
MAR 7:31 Areme Jesu fu ar Taia samaij ijia fioine areme fun vake ar Saidon asime vake do Gareri Dekaforisi guf ijia kekoin.
MAR 7:32 Fu ijia kekomga e roin bu uri e ada bijukurainma vuak ba kuaimo iji afeme ro Jesu fino ijia usem soisoime kuaga fu e iji imut nigen abedekuai ruain.
MAR 7:33 Ijefuon Jesu fun fuonkua e iji afeme va e iji ni sauikuriame imut fuon ijia e ijefuon ada ijia uniame juvit foine imut fuon ijia azime e ijefuon miane ijia kunain.
MAR 7:34 Areme fun gafeg varur ijia nisaiknum oij foine kua, Efafatano kuain. (Regavo vuak ijefuon maiji nin ada ira vo ir ako).
MAR 7:35 Jesu fu ijeg kuamga fun ada fuon ijia faime fun uri anere vuak kuain.
MAR 7:36 Areme Jesu fu uri e fok uruvana igia kuriaireme kia, Ire igi na renva iji jab e kafo kuardiakno kiain. Regavo e iji buka magaga uri e roin kuardiain.
MAR 7:37 Bu kuardiavga e fok bu vuak iji faiva buka oiserdiamga bu kuai, E iji ire uruvana fuka amarigia reoin. Regavo madu fuka e ada bijukuriainma iji kiaga bu una vuak faiknum vo e vua ba kuaivo iji kiaga bu una vuak kuaivno kuain.
MAR 8:1 Ijegrene afarma bun una madu ka e uruvana ijia afuin. Regavo duok bu ikfuon iji fuka bakin ijefuon Jesu fu uri e vuak fuon faivo iji kumega bu ruain. Bu rokga fu kia, Naka e igiebuon oifiadiem ijefuon maiji bu naki nokbek (3) nona karinva ijefuon iviakma duok bu ikfuon iji fuka bakin.
MAR 8:3 Regavo na duok ba vajiaga nam kiaga bu una ar vakva buka vasiaoriak rega nizigdiame ari kaniak. Ijefuon maiji e roin buka aibe ijia ruainvano kiain.
MAR 8:4 Fu ijeg kuardiamga e vuak fuon faivo iji bu uri kua, Regavo a vierafega no ai moikum namo igia no izeg bred karme e igi vajiaga bu iga bu defiakno kuain.
MAR 8:5 Bu ijeg kuardavga Jesu fu uri kia, Ja bred izeg nainvano kiamga bu kua, No bred seven (7) nainvano kuain.
MAR 8:6 Bu ijeg kuavga fu uri e fok kiamga bu ari karikoga fu bred seven (7) iji kege Godon oimaren. Areme fun ke tuaseme e vuak fuon faivo iji vajiamga bu kege e fok ijia karinva iji vajiain.
MAR 8:7 Regavo madu bu kijum ukaknak sibank kafo madu nainva ijefuon Jesu fun uri iji ke madu Godon oimarme kiamga bu kege e fok vajiain.
MAR 8:8 Areme e fok bu duok iji ijga bun defiain. Rega e Jesuon vuak faivo iji bun uri duok ukur iji karme ter seven (7) ijeg anuin.
MAR 8:9 Regavo e ijia ruainva ijia efarif ijesugin bu e fo taosen (4,000) ijeg. Areme Jesu fun e fok kiamga bu vakoga fu uri e vuak fuon faivo ijiena vanag ijia ajieme bun una ar Damanuta ijia vain.
MAR 8:11 Bun va ar Damanuta ijia usevga e Ferisis roin bu Jesu biesuakuai ruain. Bu usem Jesu kua, Ni ire sumakin be rega no game vierafero an ma Godon daro ijia reoinro no ijeg vierafekno kuain.
MAR 8:12 Bu ijeg kuavga Jesu fu uruvana igia aduime kia, Irerafuon e igi iviakma karijo iji bu ire sumakin kafo giakuai kiev. Regavo vuak igi naka ma kuardiav na ire sumakin kafo naba rega ja giakno kiain.
MAR 8:13 Fu ijeg kuardiame fun una vanag abe do gara vain.
MAR 8:14 Regavo e vuak fuon faivo iji bu rubdiamga ire kafo buba kege vain gavo bum bred besum (1) abe vain.
MAR 8:15 Ijefuon Jesu fu uri kia, Ja oijo iji ni e Ferisis ijigam e Erod ijiebuon ire ist iji amarigia akariaknum ofno kiain. (Regavo Jesu vuak iji fu ire ist ijefuon fu kuardiainma iji fu e Ferisis ijigam e Erod ijiebuon unam bu kegoijo fu ijefuon kuain).
MAR 8:16 Regavo e vuak fuon faivo iji bu vuak fuon fu kuaimon iji buba mukoi fain. Ijefuon bu vierafekuai fukafu bred buba ke ruainva ijefuon kuaimro bum isuar karine una bui kuaiv.
MAR 8:17 Regavo Jesu fu vuak irerag bu kuaivo iji fun gia vierafenma ijefuon fu uri kia, Ja irerafuon bred iji jaba ke ruainva ijefuon dab kuaiv? Ja vuak igi na kuardiavo iji jaka ba mukoi faim vierafen. Ja oijon iji fuka vek gigikin.
MAR 8:18 Ja nikin revo jaka ba giav revo madu jaka adakin revo jaka ba faiv. Ja amur bred imut roin (5) iji na ke tuaseme e faiv taosen (5,000) ijeg vajiainva iji jabe vierafen? Regavo madu ja ter izeg duok ukur iji anusenva iji jabe vierafenvano kiain? Fu ijeg kiamga bu kua, No ter tuer (12) ijeg anusenvano kuain.
MAR 8:20 Bu ijeg kuavga Jesu fu una kia, Regavo ja madu bred seven (7) iji na ke tuaseme e fo taosen (4,000) ijeg vajiainva ijia duok ukur iji ja ter izeg anusenvano kiain? Fu ijeg kuardiamga bu kua, No ter seven (7) ijeg anusenvano kuain.
MAR 8:21 Areme Jesu fu uri kia, Ja ire sumakin nokarok (2) iji na renva iji jan giain. Regavo jaka vek ba vierafero na aresredo na ire kafo ja karekuai vierafejo iji na vajiakro ijeg jaka vierafenva bano kiain.
MAR 8:22 Areme bun roke ar Besaida ijia usevga e roin bu e nizuriaigin iji afeme usem Jesu soisoime kua are fu e nizuriaigin iji niriamoro.
MAR 8:23 Bun usem soisoivga Jesu fu uri e nizuriaigin iji afeme ar iji areme keko makaf ijia vain. Fu va ijia keko juvit foine e ijefuon uikinik ijia azime imut nigen abedeme kua, A iviakma abe una ire kafo giamno kuain?
MAR 8:24 Fu ijeg kuamga e iji fu una asarajie gaknum kua, Na e iji nan giain revo bu in igeg oijno kuain.
MAR 8:25 Fu ijeg kuamga Jesu fu una e ijefuon ni iji kunaimga fuka ni narame uri ire fok amarigia giain.
MAR 8:26 Areme Jesu fun e iji vuak nijaime kua, Ni una ar on ijia vagavo ab una mai gafia va irerag na renva ijin e kuardiamne kuain.
MAR 8:27 Areme Jesu fun e vuak fuon faivo ijiena mai ukaknak kafo Sesaria Firifai guf ijia vako unam ijia fu uri kia, Ja vierafega e iji bu na gievo iji bu era vierafejno kiain?
MAR 8:28 Fu ijeg kiamga bu kua, E roin bu kuai aiji a e Jon e do ruardiamo ijin. Regavo roin bu kuai, A e Eraija ga roin bu kuai, Aiji a e be Godon vuak vierafene kuaimon ijino kuain.
MAR 8:29 Bu ijeg kuavga fu una kia, Regavo jaiji ja vierafega naiji na erano kiain? Rega Fita fu uri kua, Aiji a Kurais e iji God fu kuamga fu ari ruainma ijino kuain.
MAR 8:30 Fita fu ijeg kuamga Jesu fu kuriairene kua, Vuak iji jab e kuardiavno kiain.
MAR 8:31 Areme Jesu fu uri e vuak fuon faivo iji vuak nijaidiame kia, Ema ijiebuon Farif igi naiji bu e mamkanuk ijigam e Godon isuf baroijo ijigam e vuak akai nijaidiavo ijieb na buka uzame kaniega na vajai fian abene guak. Regavo naki nokbek (3) barke na una urikno kiain.
MAR 8:32 Jesu fuka samakaf ijeg kuardiamga Fita fuka uri Jesu imut ke vain. Fu imut ke va fuonkua kekome vuak iji Jesu fu ijeg kuainma ijefuon zieme una Jesu kuriairen.
MAR 8:33 Fu ijeg kuriaireme kuardamga Jesu fu dakaroime una e vuak fuon faivo iji giame una Fita kuriaireme kua, Setan gareg va. A Godon vierafe iji a bakin revo am emabuon vierafe ijia kuardiemno kuain.
MAR 8:34 Areme Jesu fun uri e fok ijigam e vuak fuon faivo iji kumega bu samaij ijia ruain. Bu ijia rokga fu uri kia, E be erar fu dia makai nun ijia jajiekro vierafekma e iji ni ire fuon fok moik igefuon iji ka nuigafiakfuon. Fu ijegreare vo uri vajai fian kafokafo bu fuon roko iji ka ijia giriesame magaga nuifuon ikrekfuon.
MAR 8:35 Ijefuon maiji erar fu una fuon izeg fu moikigia ma fivakfuon iji uruvana vierafeokma rad fuba unam ma karivako iji abek. Regavo erar fu tavan bog if nun ijia una e roin oijmiame ifejdiaknum vo vuak nun abe kuaimokma e iji fu rad unam ma karivako iji abek.
MAR 8:36 Regavo erar fu moik igefuon sinuom iji oijmiagavo God fu nuigafakma e iji kaven fuon iji fun abe aberem. Regavo madu fu moik igefuon sinuom ijieb fu ifejdaga fu Godon ar ma ijia aru vakma bakin.
MAR 8:38 Regavo e be erar fu e vuak nun faimo rekro jumo ga vuak nun abe e ise rejknum God ba vierafejo iji nijaidiakro jumo iji Ema ijiebuon Farif igi na una Godon sanainma ijiga anera akaij ijiena una roko ijia nasik una bu giame jukno kiain.
MAR 9:1 Jesu fu ijeg kuardiame kia, Vuak igi naka ma kuardiavno mukoi faif. E fok guri ja karinva ijia e roin ja nivek karinva ijia ja tavan iji God fu efuon ijiebuon oij iji samuagdiakro fuka darokma roga ja ni jon ijia gak.
MAR 9:2 Areme tavan siks (6) ijeg barekoga Jesu fun Fita ga Jeims ga Jon ijin aferdiame bun buonkua uruor kaf ijia ajieme vain. Bu va ijia usem ireme gakoga Jesuon vajat iji fun migegare una nibe ren.
MAR 9:3 Fu ijegrekoga ugon fuon iji buka mukoi saname abaren. Ugon iji bu abarenva iji bu e moikigia ugon soga bu abarvo ijekin iji fuka bakin revo fuka ma abaren.
MAR 9:4 Bu iji ireme gavo ijia e Mosis ko Eraija e iji usuibe aoinva ijieb bum ijia usem Jesuna ireme vuak kuain.
MAR 9:5 Bu ireme vuak kuaivga Fita fu uri Jesu kua, E nijaidiamo igi no ruainva iji fuka maren. Na vierafe noka ai muvuakar nokbek (3) be on ga be Mosison ga be Eraijaon ijeg igia sakno kuain.
MAR 9:6 (Regavo Fita ga e nokarok (2) iji bu ire iji renma iji gavga buka uruvana dejufdiame i girdiain ijefuon Fita fu izeg kuaikma baga fum ijia manine giain).
MAR 9:7 Areme vana ijar utime ari e iji ka fok okuriakoga vua be vana araf ijia ijeg kume, E iji fu farinun ma na fu bomana oijmavo. Ijefuon vuak fuon iji amarigia faime igafno kumen.
MAR 9:8 Bu vuak iji faime migegare una karoime nisaimga e iji fu baki gavo fu Jesur vek fuonkua buna ijia manina bu gain.
MAR 9:9 Bu ijegrene bun uruor iji areme una ari roko ijia Jesu fu uri kia, Ja una vakva irerag igi fu rena ja gainva iji jab e kafo kuardiak. Janim areke Ema ijiebuon Farif igi na guame una urike ni ijiason kuardiafno kiain.
MAR 9:10 Fu ijeg kuardiamga bun uri fu igame isuar oibuon ijia aren. Regavo bu una buon kuaime kuai fu guame una urikno kuinma iji fu irerafuon ijeg kuainmano kuain.
MAR 9:11 Bu buon ijeg kuaime una Jesu kua, E vuak akai nijaidiavo iji bu irerafuon kuai fu Eraijar amur una ruakno kuain?
MAR 9:12 Bu ijeg kuardavga Jesu fu una kia, Fu Eraijar amur una ro ire fok amardiame kanafukno kuainva iji bu ma kuain. Regavo Godon buk akaij ijia vuak iji bu isoime kuai, Ema ijiebuon Farif iji fuka vajai fian abek ga madu e fok buka fu uzakno kuainva iji bu irerafuon ijeg isoinvano kuain?
MAR 9:13 Vuak igi naka ma kuardiav, E Eraija fun amur ruain. Fun rokga e iji bun uri izeg Godon vuak akaij ijia bu buifuon isoime kuainva ijeg buka fu dab buon bu vierafenva ijia ren.
MAR 9:14 Jesu fun e vuak fuon faivo nokbek (3) ijiena una ari vake gami e vuak fuon faivo roin bu karinva ijia usen. Bu usem giak e ka ma uruvana bu ijia karioine areko e vuak akai nijaidiavo roin bu e Jesuon vuak faivo roin ijiena musikuaiv.
MAR 9:15 Bu ijegrejo ijia Jesu fu rokga buka oiserdiamga bu kukubija usem bieme anain.
MAR 9:16 Areme fu uri e vuak fuon faivo iji kia, Ja vuak igi irerag iji buna kuaime dab siguvno kiain.
MAR 9:17 Fu ijeg kiamga ebe fu e uf ijia uri kume, E nijaidiamo na farinun fuka vua ba kuaimo na iji afeme on ruain. Ijefuon maiji fu kaven ise ijar niroinma fu vuak kuaimon bakin.
MAR 9:18 Kaven ise iji fu farinun iji niroime kana dab akozemga fu sakinazan ijia dijeme itatan arime ubai jakiknamiknum vajai garem. Na fu afeme ro e vuak on faivo iji kia, Kaven ise iji kuaga fu amnun iji areme vakno kiain gavo bu amarega fuka iseremno kumen.
MAR 9:19 Fu ijeg kumega Jesu fu una roin kua, E guri nivek karinva gurie jon ma vierafejo iji fuka ma ukaknak. Na tavan izeg jana fiknum vuak nijaidiaga ja ijia mukorigia ma vierafek? Am iji afeme roga na gavno kiamga bu afeme Jesu fino ijia ruain. Bu afem rokga kaven ise iji fu Jesu game keko vakafa uri am iji kana dab akozemga fu moik ijia dijeme jiekeknum itatan arin.
MAR 9:21 Fu ijegrega Jesu fu una dakaroim asoifuon iji kua, Farifon iji fu iviakma ijegren vo fun usuibe ijegrene ruainmano kuain. Fu ijeg kuamga am ijefuon asoij iji fu kua, Fu vek ukakbe ijia ijegrene ruain. Kaven ise iji fu ijegrene fuka kanaga fu guakafa fuka tavan bog kana dab do ijia abeseknum dab mian baroin. Regavo a vierafega an aresrega ni oifian nuvuon iji guome ifejduomne kuain.
MAR 9:23 Fu ijeg kuardamga Jesu fu una kua, A irerafuon kie a aresga ni ifejduomne kiem? Erar fu ma vierafekma iji fu aresredo fu ire kafokafo rekno kuain.
MAR 9:24 Jesu fu ijeg kuardamga am ijefuon asoij iji fu uri kume, Na a ma vierafen revo vierafe nun fu ma ukakbe. Ijefuon ni una madu ifejdiega na una biom ma ka gigikin a ma vierafejno kumen.
MAR 9:25 Ijegrene Jesu fu gak buka vek e uruvana rokga fu uri kaven ise iji kuriaireme kua, Kaven ada bijukin vuak ba kuaimo gure na a kuavo ni e iji areme kek vakne. Rega ab una ro fu niroimne kuain.
MAR 9:26 Jesu fu ijeg kuamga kaven ise iji fu kekokafa uri am iji dab niroimga fu guafaruime kakurime keko vain. Fu keko vakoga am iji fuka daro baremga fun ijia zazaime ajuaremga e fok bu game vierafero fun guainmaro bu ijeg vierafen.
MAR 9:27 Regavo Jesu fu uri ifejdame imut kega fu una urin.
MAR 9:28 Ijegreare rad Jesu fun una ar ijia aru vakoga e vuak fuon faivo iji bu isuar jame aru Jesu kua, Kaven ise iji nor rotkurain revo fu irerafuon ba e iji areme keko vainmano kuain.
MAR 9:29 Bu ijeg kuardavga Jesu fu kia, Ire ijekin iji jaka sirimame God kuardakva fu rekfuon. Regavo una unam kafo iji ja irerag ijia rene kaven ise iji kuriairega bu usem vakva bano kiain.
MAR 9:30 Areme bun ar iji areme una ar Gareri ijia urame vain. Regavo Jesu fu vierafe fuka e iji ni sauikuriame vakafa fu ijeg vierafene vain. Ijefuon maiji fu e vuak fuon faivo iji izeg fu rad guame una urikfuon fu ijin kuardiain. Fu kia, Rad Ema ijiebuon Farif igi na bu dab e ise rejo iji miaga bu kaniega na guaken. Regavo rad naki nokbek (3) barga na una urikno kiain.
MAR 9:32 Regavo e vuak fuon faivo iji bu Jesu vuak iji fu irerafuon ijeg kuardiamo iji buka ba mukorigia faime vierafen. Regavo madu bu juinva ijefuon buba una Jesu duna kuardain.
MAR 9:33 Areme bun vake ar Kafoniam useme gire be ijia ajie karinva ijia Jesu fu uri e vuak fuon faivo iji kia, Ja unam gafi ja vuak irerag iji kuaime dab siguinvano kiain.
MAR 9:34 Jesu fu ijeg kuardiamga e vuak fuon faivo iji buba una roin kuardain. Ijefuon maiji bu unam ijia erar fu e ikin rekfuon ijefuon kuaime dab sigunamin.
MAR 9:35 Areme Jesu fun ari fine e tuer (12) vuak fuon faivo iji kiamga bu rokga fu kia, Erar vierafega fu e ikin rekma amur funika una e ukakbe rene e fokbuon ikrene kiain.
MAR 9:36 Fu ijeg kuardiame uri am ukakbe be afeme uf ijia unain. Areme fu uri kaivene una dakaroi e vuak fuon faivo iji kia, E iji eraneb ja if nun ijia am ukak igekin iji anadiavo iji bu na anadiev. Regavo eraneb bu na anadievo iji bu na nunkua anadievo bakin gavo bu e iji fu kiemga na ari ruainva bu e iji madu anaivno kiain.
MAR 9:38 Areme Jon fu uri kua, E nijaidiamo e be fu if on ijia kaven ise iji kuriairena fu keko vaka no game kuavga fu aren. Ijefuon maiji fu nona oinon bano kuain.
MAR 9:39 Bu ijeg kuardavga Jesu fu uri kia, E iji fu ijegreoinon iji jab bijukurak. Ijefuon maiji erar fu if nun ijia ire sumakin be rekma fuba una nuisina vuak ise kafo kuaikfuon. Regavo madu erar fuba nona nibijaimo e iji fu nona ren.
MAR 9:41 Rega vuak igi naka ma kuardiavo faif. E be erar fu vierafero aiji a Kuraison e ro fu ijeg vierafeknum ire ukakbe do gaikin ijekin iji a ifejdakma iji Godri unam ma iji kafo fuon redakno kiain.
MAR 9:42 Jesu fu ijeg kuardiame una madu kia, Erar fu e iji bu oij asusame am ukaknak igeg na ma vierafejo iji kam arafiriaga bu una ise reokva na vierafega e iji fuka mun bomana be dab uro fuon ijia kira saof uf ijia akozga fu do ikfuon.
MAR 9:43 Regavo madu a vierafega bu imut on ijieb a aferdame ise kafo rekva na vierafega aka kanafu akozek. A ijegrekma iji fun mardo a imut roibknum ar ma karivako ijia vak. Regavo aba imut on nokarok (2) iji be kanafu akozekma iji bun imut on ijieb aferdame ar ise iji mian fu naine udaremo bakin ijia vak.
MAR 9:45 Regavo madu a vierafega bu diak on ijieb a aferdame unam ise ijia vakoga ni diak ijin be kanafu akoze. A ijegrekma iji fuka mardo a diak besum e aikirainma igeg ar iji ma karivako ijia vak. Regavo aba diak on be kanafume akozekma iji bu diak on nokarok (2) ijieb a dab mian ise iji fu tavan bog ijia naino ijia akozga a vajai fian abek.
MAR 9:47 Regavo madu a vierafega bu ni on nokarok (2) ijieb a aferdame ise reoga ni niom on iji be jafe akozemne. A ijegrekma iji fuka mardo a ni roibknum ar iji ma karivako ijia vak. Regavo aba ijegrekma iji bu niom on ijieb a dab ar ise mian naino ijia akozga a ijia vajai fian abekfuon.
MAR 9:48 Regavo vuak iji ar ise mian naino ijefuon iji fun e Asaiar usuibe ijeg kuainma bu ijeg isoime kuai, Ar ise ijia ire nifun iji buba aoik ga mian iji ijia naine vako iji fuba udarkno kuain.
MAR 9:49 Ijegvo fu Godri ik jon fok ja reoijo iji fu kege mian ijia jagiame ise iji fu ke kozega ma iji fu arekfuon.
MAR 9:50 Regavo madu tavan iji no mit abe duok savo iji fuka marien mukor. Regavo marien fuon fuba markma iji no izegrega marien fuon iji fu una markma bakin. Ijefuon ni vuak nun iji mit igekin iji tavan bog oijon ijia vierafene reknum jon afuime kariofno kiain.
MAR 10:1 Areme Jesu fun ar iji areme una Judia guf ijia do Jodan ruvainma irif gara ijia vain. Fu ijia vakga e uruvana bu una fuon rokga fu amur fu renma ijeg fu una madu vuak nijaidiain.
MAR 10:2 Fu vuak nijaidiamo ijia e Ferisis roin bu Jesu biesurakuai ruain. Bu usem kua, A vierafega akai nuvuon ijia fu kuainma ijeg e be fube bara fuon datura unaga fu vakno kuain?
MAR 10:3 Bu ijeg kuavga Jesu fu uri kia, Regavo Mosis akai fuon iji fu abe miainma iji fu akai irerag iji abe miainmano kiain?
MAR 10:4 Fu ijeg kiamga bu uri kua, Mosis fu kuo, E be fu bara fuon datura unako fu vakma fuka fefa be isoime kua, Ivia a bara nun bano kuame abe maga fu vakno kuain.
MAR 10:5 Bu ijeg kuardavga Jesu fu uri kia, Vuak iji Mosis fu isoime kuai ja barafjon tura uniakno kuainma ijefuon maiji oijon fuka ma gigikin.
MAR 10:6 Regavo ik anej iji God fu moikigi amarenma ijia fu kuai, God fu efarif amareme vo bara amaren. Ijefuon efarif iji fu uri asoifuon ijiga asiefuon areme una bara fuon ijek fiok. Bu ijeg karioijo ijia bu una busik vajai besum rek. Ijefuon bu busik bu nokarok (2) bakin revo buka vajai besum. Ijefuon bara iji God fu abe efarif ijek besum kamainma iji e kafo buba ke ata kafokafo uniakno kuain.
MAR 10:10 Areme rad bun una va ar ijia karinva ijia e vuak fuon faivo iji bu uri Jesu vuak iji fu kuardiainma ijefuon duna kuain.
MAR 10:11 Ijefuon Jesu fu uri kia, E be fu bara fuon abe uname una bara rir iji abekma e iji fu bara ijin daturam. Regavo madu bara be fu baru fuon iji ijia areme una baru rir iji jakma fu baru ijin daturamno kiain.
MAR 10:13 Regavo e roin bun afijaf iji aferdiame Jesuon roga fu bu imut nigen namdiaknum buifuon sirimamekuai ruain. Regavo e vuak fuon faivo iji buka ba oimarenva ijefuon bu uri e iji afijaf aferdia ruainva iji bijukuriain.
MAR 10:14 Regavo Jesu fuka deajin ijefuon fu uri e vuak fuon faivo iji kia, Ja am ukaknak iji jab bijukuriakgavo areke bu aferdia nun ruaf. Ijefuon maiji e iji eraneb bu am ukaknak iji bu asoibuon iji ma vierafejo ijeg bu na ma vierafekva God fu e ijekin iji samuagdiak.
MAR 10:15 Ijefuon ni vuak igi na kuardiakrejo iji amarigia faif. Erar fu am ukaknak igi bu na ma vierafejo ijeg God ma vierafekma fu Godon e iji fu oibuon ijia samuagdiamo ijiena mazikfuon. Regavo fu bakma fu izeg buna mazikma bano kiain.
MAR 10:16 Fu ijeg kuardiame uri am ukaknak iji imut fuon ijia kamudiame imut nigen namdiaknum God kuamga fu bu daro miain.
MAR 10:17 Areme Jesu fun e vuak fuon faivo ijiena una unam ijia roko ijia e be fu kukum ruain. Fu kekome Jesu roko nifak ijia ato same kua, E maiguri e nijaidiamon na ire ma iji na irerag iji rega na unam ma karivako iji abekno kuain?
MAR 10:18 Fu iji kuamga Jesu fu una kua, A irerafuon na kie e maigurieno kien? Fu e be fu erar e ma bakin revo fun e besum Godri fuonkua e ma.
MAR 10:19 Regavo duna iji a kienma iji Godon akaij iji fu kua, Ab e kafo kaniaknum e kafobuon bara turaknum ga e kafobuon ire niesaknum e kafobuon vuak kufuimene kuaiknum e kafo biesiame sinuom buon karek. Regavo madu nika asoion ijiga asieon igiamne kuainma iji an vierafenmano kuain.
MAR 10:20 Jesu fu ijeg kuardamga e nivek iji fu uri kua, E nijaidiamon na vek e ukakbe gamia vuak irerag a kuardiemo iji nan ijeg kegoijknum igia ruainvano kuain.
MAR 10:21 Fu ijeg kuardamga Jesu fu uri e iji game oijmaknum kua, Ire uruvana an rena fun maren. Regavo nin ire besum igin va re. Va sinuom on uruvana ke kime mon iji abe una e sinuom bakin iji vajiame ni uri na jajiemne kuain.
MAR 10:22 Ijefuon e nivek iji fu vuak iji faima fuka bomana oifiaimga fu oifiaigma vain. Ijefuon maiji fu vierafega fuka sinuom ma uruvana zarain.
MAR 10:23 Areme Jesu fu una dakaroime e vuak fuon faivo iji giame kia, E iji sinuom zarainva bu sinuom ijia biduame karijo iji bu Godon e iji fu oibuon iji samuagdiamo ijiena besum mazikfuon iji fuka ma gigikino kiain.
MAR 10:24 Fu ijeg kuardiamga e vuak fuon faivo iji bu vuak iji faiva buka oiserdiain. Ijefuon Jesu fu una kia, Afnun gurie unam iji e bu Godon e iji fu oibuon iji samuagdiamo ijiena mazikfuon iji fuka ma gigikin.
MAR 10:25 Regavo igia faif. Fanuf kamer iji fu ma bomana ga siem tit iji fuka ukakbe ijefuon fu ijia aru vakma fuka gigikin. Unam besum ijegvo e sinuom zarainma iji fu Godon e iji fu oibuon iji samuagdiamo ijiena mazikma fuka ma gigikino kiain.
MAR 10:26 Ijefuon e vuak fuon faivo bu vuak iji faiva buka oiserdiamga bu uri buon kuai, Fu erar aresredo fu e iji God fu oibuon iji samuagdiamo ijiena besum mazikno kuain?
MAR 10:27 Bu ijeg kuardavga Jesu fu kia, E kafo erar fum fuon vierafenma ijia ga unam fuon fu kegoino ijia fu aresrenma bakin. Regavo fun Godri fuonkua fu aresredo fu ire fok rekfuon. Regavo madu fun koikfuon era fu vierafenma iji kuaga fu Godon e iji fu oibuon iji samuagdiamo ijia buna besum mazikno kuain.
MAR 10:28 Areme Fita fu una kua, Noiji ire nuvuon fok iji non ijia areme uri a jame ruainva iji guomne kuain.
MAR 10:29 Fu ijeg kuardamga Jesu fu uri kua, Vuak iji a ma kuain revo ni igia fai. Erar fu ar fuon ga uviaifijaf ga makifijaf ga asoi asie ga afijaf ga juar fuon iji nuifuon Godon vuak ma iji fu kuaimoino ijefuon nuigafiakma fuka marek. Fu ijegrekma rad God fu ifejdaga fuka ire fok fu kenma ijefuon azan ijia una ire ma kafo madu uruvana kekfuon. Regavo ire iji fu rad kekfuon iji ar ga uviaifijaf ga makifijaf ga asie asoi ga afijaf ga juar ijin. Regavo madu fu na jajiekma fuka unam ise uruvana kafo biediakfuon. Regavo Godri rad unam ma karivako iji abe maga fu ijia fivak.
MAR 10:31 Regavo e uruvana iji amur irevo iji bu una rad ireken. Regavo eraneb iviakma rad irevo bu una amur irekno kiain.
MAR 10:32 Areme bun una Jerusarem ajie vakuai unam ijia vak. Regavo Jesu fu amur vako e vuak fuon faivo iji buka oiserdiamga bum ijia jame vaknum bomana vierafej. Regavo e roin ijia ja vako iji bu madu buka bomana juin. Areme Jesu fun una madu e tuer (12) vuak fuon faivo iji aferdiame va buonkua useme fun uri uniaibe rad fuon rekfuon iji kuardiain.
MAR 10:33 Fu uri kia, Igia faif no vake Jerusarem usevo ijia Ema ijiebuon Farif igi na bu abe e isuf baroijo ijiebuon e mamkanuk ijigam e vuak akai nijaidiavo iji miakfuon. Bu abe miaga bur na tomdieme ise nun kuaime dab arafirikfuon. E ijieb na bu abe una e Jius bakin iji miaga bur na abe varai meknum juvit foimadieknum fijieme abe kuros kaniek. Regavo naki nokbek (3) barga God fu kiega na una uri nivek fivakno kiain.
MAR 10:35 Areme Zebedion afijaf nokarok (2) e Jeims ko Jon bu ro Jesu fu manino ijia useme kua, E nijaidiamon no vierafega aka ire be nuvuifuon rekno kuain.
MAR 10:36 Bu ijeg kuavga Jesu fu una kia, Ja vierafega na irerag iji joifuon rekno kiain?
MAR 10:37 Fu ijeg kuardiamga bu uri kua, E Bomana no vierafega a tavan iji a una e bomana rene fata on ma iji sanainma ijia fine e fok samuagdiamo ijia a no kuoga no ana ij maink ga aizinan on ijia karijno kuain.
MAR 10:38 Bu ijeg kuavga Jesu fu uri kia, Vuak iji ja kuardievo iji jaka ba amarigia vierafen. Na vajai fian bomana abekro rejo ja vierafega jabe aresredo jak ja vajai fian iji abek? E iji bu na buka dab vajai fian mikrej revo ja vierafega jak jabe ijeg vajai fian abekno kiain?
MAR 10:39 Fu ijeg kuardiamga bu uri kua, No vierafega no aresredo no rekno kuain. Bu ijeg kuardavga Jesu fu uri kia, Na vierafega e buka ire ise iji bu nun rega na vajai fian abekrejo iji bu madu jak jon rega ja ijeg vajai fian abek.
MAR 10:40 Regavo e iji bu ij nun maink ga aizinan ijia karikfuon iji na nar aferdiakva bakin. Regavo ar iji fun e iji Asoinun ijar kenma ijiebuon arno kiain.
MAR 10:41 Regavo tavan ijia e ten (10) iji Jesuon vuak faivo iji bu vuak iji faiva buka deajidiamga bu uri Jeims ko Jon ziegafiain.
MAR 10:42 Ijefuon Jesu fu uri e vuak fuon faivo iji kiamga bu besum afuivga fu kia, Ja e Jius bakin ijiebuon e mamkanuk bu ebuon iji bu daro buon ijia samuagdiavo iji jan vierafen. Regavo madu e aiko ijiebuon e mamkanuk iji bu e aiko buon iji daro buon ijia samuagdiavo iji jan vierafen.
MAR 10:43 Regavo igia faif. Unam ijeg kegoijo iji jab arega fu jon ijeg rek. Regavo erar vierafega fu joifuon e bomana rekma e iji fuka ja ifejdiaknum vo joifuon ikrekfuon. Regavo erar fu joifuon e nigen rekro vierafekma e iji fuka e be joifuon ikreno igeg reok. Unam besum ijegvo Ema ijiebuon Farif igi na ruainva iji na e bomana rekro ruainva bakin. Regavo na ruainva iji nam e be fu e befuon ikreno na ijegrekro ruain. Na ruainva iji na kuros ijia guame kavuan nun ijia useme e fok karauniakro na iji ruainvano kiain.
MAR 10:46 Jesu fu ijeg Jeims ga Jon kuardiaknum roke mai Jeriko ijia usen. Jesu fun e vuak fuon faivo ijiga e fok buna roko ijiena bun Jeriko useme bun nanusem vakuai roko ijia bu e Timiason farif e Batimias bien. E iji fu e ni nizuriaigin fu unam irif ijia fine e uruvana bu asime vako iji duofuon nimdiam.
MAR 10:47 Ijefuon fu fine faik Jesu e Nasaretko iji fu roka fu faime uri uruvana igia kume, E Bomana e Devidon uifarif gari abe nuifuon oifian abene ifejdiek?
MAR 10:48 Fu ijeg kumen revo e ijia roko ijieb uri bijume kua, Isuar igia fine kuain. Regavo fuka uri ma uruvana igia biumame kume, E Bomana E Devidon uifarif gare abe nun oifian abene ifejdiekno kumen.
MAR 10:49 Fu ijeg kumega Jesu fun faime fu vako iji fu ijia areme maniga e iji kia, E gami kume fu rokne kiain. Ijefuon bu e nizuriaigin iji kume, Jesu fu a kumeno ni uri oimarvknum rokne kumen.
MAR 10:50 Bu ijeg kumejga e nizuriaigin iji fu uri ugon fuon fu nakaim fino iji ke dab akozme migegare uri Jesuon vain.
MAR 10:51 Fu vakga Jesu fu kua, Na irerag iji redakro a iji vierafenmano kuain? Fu ijeg kuamga e nizuriaigin iji fu uri kua, E nijaidiamo na vierafega a ni nun iji amardiega na una ni naravno kuain.
MAR 10:52 Fu ijeg kuamga Jesu fu uri kua, On a ma vierafeno ijar a keunainmano ni oimarvknum vakne kuamga ni fuon iji fun migegare naramga fun uri Jesu jame unam ijia vain.
MAR 11:1 Areme Jesu fun e vuak fuon faivo ijiena bun Jerusarem vakuai roke ar Befas ga Beteni uruor Orivs kuavo samaij ijia usen. Areme Jesu fun uri e vuak fuon faivo iji nokarok (2) vuak igin kuardiain. Fu kia, Va mai gafia useme gaga bu maf-donki be bu abe oijo bakin iji ijia kiraiga iji irame afeme una igi na fijo igia ruaf.
MAR 11:3 Regavo ja iraga e be fu giame kia, Ja irerafuon maf-donki iji iravno kiakma ni kua, No E Bomana ijar tavan ivuankbe vierafenma ijefuon no iji iravdo no una afeme ruakno kuafno kiain.
MAR 11:4 Ijefuon bun va gafia useme gak maf-donki iji bu abe ar vien iji bu aruvo ijia kirainva bu gain. Bu game iravga e iji vien samaij ijia irenva ijieb uri giame kia, Ja erar kiaga ja maf-donki iji iravno kiain?
MAR 11:6 Bu ijeg kuardiavga e vuak fuon faivo nokarok (2) iji bu uri vuak izeg Jesu fu kuardiainma ijeg una e iji kuardiavga bu arekoga bu irame una vain.
MAR 11:7 Bun irame una Jesu fino ijia useme uri ugon buon bu azan sainva iji rume maf-donki azan ijia riedame arekoga Jesu fu ijia ajie fin.
MAR 11:8 Fun ijia ajie fikoga e fok bu uri ugon buon bu azan savo iji rume unam ijia rieme vain. Bu ijegrekoga e roin bu inak ma iji bu juar buon ijia oinva iji ufuseme unam ijia riesdakoga fu ijia vuim vain.
MAR 11:9 E roin bu amur vako roin bu rad ja vaknum kume, No Godon if iji abe aroiken. Godri e igi fu E Bomana ijefuon if ijia roko iji daro maken. Fu amur Devid fu saifnuvuon fu samuagdiainma ijeg e igi fu no samuagduokro roko iji daro mak. No God E Bomana kaf ijia fino ijefuon if iji abe ajiekno kumen.
MAR 11:11 Bu ijeg kumejknum Jesu afeme roke Jerusarem ijia useme Jesu fun arime Godon ar bu sirimamejo ijia arume ire fok giamoin. Areme fun ve nakikirega fun uri e vuak fuon faivo ijiena una Beteni ijia vain.
MAR 11:12 Areme bun va ijia naoiva suok una roko ijia Jesu fu unam ijia vasiaguain.
MAR 11:13 Fu vasiaguamga fu aibe gamia ruaknum in durim igekin iji bu kua figno kuavo iji be akma manino iji gain. Ijefuon fu urame gaga in fu sunin kirainmaro fu urame vain. Regavo fu ura va gak in iji fum ak ijesugin manin. Ijefuon maiji in iji fu sunin kirakfuon tavan iji fuba ruain.
MAR 11:14 Ijefuon Jesu fu uri in iji kua, Aiji a una sunin kiraga e bu ijia tura ikva bano kuain. Fu ijeg kuamga e vuak fuon faivo bu vuak iji fain.
MAR 11:15 Areme bun una roke Jerusarem usekoga Jesu fun name Godon ar bu sirimamejo ijia aruin. Fu arume e iji bu ire kafokafo karme kimejo iji kania kuriairemga bu usen. Fu ijegrene uri e iji mon dame vajuinamivo ijigam e iji um guaf kege kimejo ijiebuon fata iji kam karoidiain. Fu madu uri e iji bu sinuom buon kege Godon ar guf ijia oijo ijin kuriairemga bu aren.
MAR 11:17 Fu ijegrene uri e iji vuak nijaidiame kia, Usuibe Godon vuak ijia bu isoinva iji bu ijeg isoi, Ar nun bu e fok ai kafokafo ijia karioinva iji bu ijia arume Godon sirimamekfuon. Regavo jar ijia aru karine dab e niesavobuon ar igeg amarevno kuain.
MAR 11:18 Fu ijeg kuardiamga e isuf baroijo ijiebuon e mamkanuk ijigam e vuak akai nijaidiavo iji bu vuak ijin fain. Ijefuon bu uri unam izeg bu Jesu kanakfuon iji nisain. Bu unam kuaime nisain revo buka juin ijefuon maiji e fok bu vuak fuon faiva buka oiserdiamga bu oimarvknum vuak fuon faiv.
MAR 11:19 Bu ijegre vake ve nakikrega Jesu fun uri e vuak fuon faivo ijiena mai iji areme vain.
MAR 11:20 Bun va naoiva suok una unam ijia ruaknum in iji Jesu fu amur kuainma iji gak fun sairen. Fu a fuon iji ga kiak fuon fok fuka saire vake gireg gamia kekoin.
MAR 11:21 Regavo Fita fu irerag Jesu fu amur renma iji fun vierafenma ijefuon fu uri Jesu kua, E nijaidiamon garia ga. In gari a kuainma iji fun sairenmano kuain.
MAR 11:22 Fita fu ijeg kuamga Jesu fu uri e vuak fuon faivo iji kia, Jaka God ma vierafef. Naka ma kuardiav erar fu oifuon ijia ba none ga fum oi besum ma vierafene uruor gari kua, Ni koikon tuame saof gamia uramne kuakma fu rega ja gak.
MAR 11:24 Ijefuon igia fai. A ire befuon God sirimame kuakma nin oion ijia ire iji an abenma igeg vierafene sirimamekma ire a kuamo iji a abek.
MAR 11:25 Regavo ja Godon sirimamejo ijia ja ire ise kafo ja kaifjon ijiebuon renva iji vierafekva ni oijon ijia dazme aref. Ja ijegrekva God Asoijon varur gufia fino iji fu ise jon ja renva iji fu giame arek.
MAR 11:26 Regavo ja e kafobuon ise iji jaba giame oijon ijia dazekva God Asoijon varur gufia fino iji fu ise jon ja reoinva iji fuba giame arekno kiain.
MAR 11:27 Jesu fu ijeg kuardia barme bun una uri vake Jerusarem usen. Areme Jesu fun una madu va Jerusarem ijia Godon ar bu sirimamejo ijia arume oin. Fu ijia aru oinon ijia e mamkanuk Godon isuf baroijo ijigam e vuak akai nijaidiavo ijigam e mamkanuk kafo bu uri kua, Ire iji a reno iji daro iji a izia abe ren? Regavo erar daro iji a mainmano kuain?
MAR 11:29 Bu ijeg kuardavga Jesu fu una roin kia, Na duna besum kiaga ja una roib kuardiekva na ijarson daro iji na izia abe ire igin reoijo na iji kuardiak.
MAR 11:30 Ja vierafega Jon e do ruardiamo daro iji fu abe e do ruardiamo iji fu God o fu emab maiga ni kuardie na faivno kiain?
MAR 11:31 Fu ijeg kuardiamga bu uri dab bui kuaime siguknum kuai, Note una izeg roib kuardak. No uri kuak fu Godri mainmano kuakva fu una kuok revo ja irerafuon ba Jon ma vierafenvano kuok.
MAR 11:32 Rega no kuak daro iji fu emab mainvano kuakva e guri bu izegrekfuon iji no vierafega fuka jufduom. Ijefuon maiji e fok bu ma vierafega e Jon fun ma e Godon vuak vierafene kuaimon be.
MAR 11:33 Ijefuon bu una Jesu kua, Noba vierafenvano kuain. Areme fu uri kia, Ijekido na daro igi na izia abe ire igin reoijo iji naba kuardiakno kiain.
MAR 12:1 Areme Jesu fun uri anerene vuak kafo bijame kuardiain. Fu kia, E be fu moik fuon ijia juai mene fak kira ameoine aren. Rega guf ijia fu ar be madu bu ijia karine juar samuakfuon iji same uri e kafo karga bu juar samuakoga fun ar aibe ijia vain.
MAR 12:2 Fu va ijia fine faik i sunin fun kira duinfai fu faime fun efuon ik rejo be kuamga fu i sunin roin fuifuon karekafa vain.
MAR 12:3 Fu vake gafia kekomga e iji in samua karinva ijieb uri e iji kunaime dab fijame arevga fu imut kiriasame una ruain.
MAR 12:4 Areme e iji fun una efuon ikreno be kuamga fu una vain. Fu vakga e iji juar samua karinva iji bu madu e iji vainma iji nigen ijia kaname ka ire ma ise iji fuon ren.
MAR 12:5 Bu ijegrejga e juar koikin iji fu madu una e be kuamga fu vaka bu kanavga fu guain. Bu ijegrejga fu una madu unam besum izeg e roin kiamga bu vakga e roin bu fijiaknum roin bu kaniava bu aoin.
MAR 12:6 Regavo e juar koikin iji fu e radkma iji fu kuaga fu vakfuon iji fu farifuon ma besum fu oijmamo ijin. Ijefuon fu una fuon kuai, Na farinun kuaga fur vakma buba fu kanaken. Regavo bu fu agoime vuak fuon abekno kuaime fun farifuon kuamga radkma iji fur vain.
MAR 12:7 Regavo e iji juar samuame karinva iji bu fu vakga bun game uri bui kuai, E guri fu e juar igi menma ijefuon farif ijin. Ijefuon noka fu kaname asoifuon ijefuon juar fok nor abekno kuain.
MAR 12:8 Ijefuon bun uri farifuon iji kunaime kanavga fu guamga bun dab juar fak gama akozenvano kiain.
MAR 12:9 Jesu fu ijeg kuardiame uri kia, E juar koikin iji fu vuak iji faikma fu irerag abek? Fu faikma fu ro kekome e iji juar samua karijo iji kania bu aoiga juar fuon fu una e roin kiaga bur samuakno kiain.
MAR 12:10 Areme Jesu fu uri kia, Regavo ja Godon vuak bu usuibe isoinva iji ja davo iji jabe vierafen? Vuak iji bu isoime kuai, E ar savo iji bu kudie ma iji fu manine girekfuon iji bu game vierafero fu isero bu dab akozen. Regavo E Bomana iji fu kudie iji una abenma ijefuon iviakma kudie iji fu ar uf iji biduame manino iji fuka ikin. Regavo iji fuka ma fun E Bomana ijar koikfuon ire iji rena non gainvano kuain.
MAR 12:12 Jesu fu vuak ijin kuardiamga bu ijefuon uri Jesu kunaime tokuai vierafen. Ijefuon maiji bu vierafega vuak iji fu bijame kuaimon iji fu buisina kuaim. Regavo buka e uruvana ijia ruainva iji juinva ijefuon buba ire be fuon ren gavo bu ijia areme vain.
MAR 12:13 Ijegrene rad bun e Ferisis roin ga e Erodon e roin iji kiavga bu Jesu biesuame duna kafo kuardakuai ruain.
MAR 12:14 Bu va usem kua, E nijaidiamon no vierafega vuak irerag a kuaimon iji aka vuak ma ijesugin kuaim. Regavo e iji a vuak kuardiamo iji bu e mamkanuk ga e ukaknak iji a juvknum kuardiamo bakin. Regavo aka vuak ma iji izeg God fu e igiebuon vierafenma a ijin e igi nijaidiam. Ijefuon a vierafega akai nuvuon ijia no Sisa e Romkobuon e bomana iji fuon takes abesvo iji kafu maren ki fuba maren? Regavo nobe takes abesek ga no arekfuon iji ni ar kuarduoga no faivno kuain? Regavo Jesu fu vuak kufui buon fun giame vierafen ijefuon fu kia, Ja irerafuon na biesiekuai rej? Ni mon sunin iji abe nijaidie na gavno kiain.
MAR 12:16 Fu ijeg kiamga bu uri mon sunin iji be abe main. Bu abe mavga fu abe nijaidiaknum kia, Igia gaf. Ja gaga uikinik igeko if iji isoinva iji bu erafono kiain? Rega e mamkanuk iji bu uri kua, Fu e Sisaon kuain.
MAR 12:17 Bu ijeg kuardavga fu kia, Ijefuon irerag ja giamga bu e bomana Sisan ga iji ni kege una va fu vajaf. Regavo irerag iji bu Godon ga iji ni kege una God vajafno kiain. Jesu fu vuak mukor ijin kuardiama e fok bu vuak iji faiva buka oiserdiain.
MAR 12:18 Areme e Sejusis roin bu ro Jesu fino ijia usen. Regavo e iji ruainva ijieb kuaiv e iji aoivo iji buba una urijno kuaiv.
MAR 12:19 Ijefuon bu usem Jesu duna ijeg kuain, E nijaidiamon Mosis fu kuo, E be fu uviaifuon ijar bara abe am kafo ba tuanaga fu guakma uviaifuon iji fuka bara amun iji abekin fur uviaifuon ijefuon am tuanakno kuin.
MAR 12:20 Regavo tavan be bu e agan besum ijia buka e agan seven (7) ijeg karin. Ijefuon bo buon iji fun bara abene am kafo ba tuanain rega fum guain.
MAR 12:21 Fu guamga uviaifuon ijar fusik bara iji aben gavo fuk fuba am kafo tuanain gavo fum guain. Bu ijegrene am diaifarif fok bu madu bun besum ijegrene vake am diar gamia usen. Am farif seven (7) uruvana bu bara besum iji aben revo bu am kafo ba tuanakoga radkma ijia bara iji fun guain.
MAR 12:23 Regavo a vierafe e uruvana bu bara iji abenva iji tavan iji e aoi vo una uri nivek karijo ijia bara iji fu erafon barakno kuain?
MAR 12:24 Bu ijeg kuardavga Jesu fu una kia, Jaiji jaka ba mukor vierafejo bakin. Ijefuon maiji ja Godon vuak iji jaka ba faiv ga madu ja daro fuon iji fu ire kafokafo reno iji jaba vierafen.
MAR 12:25 Ijefuon maiji tavan iji e bu aoime una uri nivek karijo ijia bara baru buba una sanamik. Regavo buka anera iji varur gufia karijo igegrekno kiain.
MAR 12:26 Regavo ja e iji bu aoime una urijo ijefuon vuak iji Mosis fu tarar iji mian nainma ijefuon fu isoinma iji jabe dame gain? Mosis vuak iji fu isoinma ijia God fu ijeg kuai, Naiji na e Eburam ga e Aisek ga e Jekaf ijiebuon Godno kuain.
MAR 12:27 Regavo vuak ijefuon maiji God fu e iji aoivo ijiebuon God bakin revo fu e iji bu nivek karijo ijiebuon God ijin. Regavo jaiji jaka ma isema vierafenvano kiain.
MAR 12:28 Areme e vuak akai nijaidiamon be fu ijia fido fu faik e iji bu vuak iji dab bui karine kuaiva fu fain. Fu faik Jesu fun e Sejusis ijiebuon duna bu kuainva iji fun una amarigia kuardiama fu fain. Ijefuon fu uri duna be Jesu kuai, A vierafega akaij iji bu nainva ijia akai izar fuka ma bomanakono kuain?
MAR 12:29 Fu ijeg kuardamga Jesu fu uri kua, Akai ma bomana iji igin, E Isrerko iji akai ma bomana iji igino faif. God E Bomana nuvuon iji fun God besum ijesugin fuka E Bomana. Ijefuon jaka oijon ma ijekma ga kaven jon ga vierafe jon ga daro jon fok ijekma God jon iji oijmiafno kuain.
MAR 12:31 Regavo madu akai be ka ma bomana ijefkin iji, Nika izeg a on oijmanamimo ijeg una kaifon roin oijmia. Ijefuon maiji akai nokarok (2) ijieb buka akai mamkanuk bur akai roin bu asidiainvano kiain.
MAR 12:32 Jesu fu ijeg kuardamga e iji fu uri kua, E nijaidiamon vuak iji a kuainma iji anka mukorigia vierafene kuain. Regavo vuak iji a kuai God kafo fu bakin gavo fu God besum ijesugino kuainma iji anka ma kuain.
MAR 12:33 Ijefuon noka God ijin oinuvuon ga vierafe nuvuon ga ka daro nuvuon ijekma oijmakfuon. Regavo madu izeg no nuvuon oijmanamivo ijeg no una e roin oijmiakva ijar fuka ma ikin. Akai nokarok (2) ijieb ire fok no kege isuf baroijo iji fuka ma asidiainmano kuain.
MAR 12:34 Fu ijeg kuaiga Jesu fu gak fuka mukorigia una roin kuardamga fu uri kua, Aiji na gaga anka e iji God fu oibuon iji samuagdiamo ijiena besum mazikafa samairenmano kuain. Jesu fu ijeg kuardiamga e kafo buba una duna kafo kuardain.
MAR 12:35 Jesu fu vek Godon ar ijia vuak nijaidiamon ijia fu uri e ijia karinva iji duna be kuardiain. Fu kia, E iji vuak akai nijaidiavo iji bu izeg game vierafenva ijefuon bu kuaiv e iji God fu kuaga fu ruakma iji fum e Devidon uifarif ijiano kuaiv?
MAR 12:36 Fun Godon Kaven ijar una Devidon oij ijia vierafe mamga fu kuai, God E Bomana ijar una e bomana nun iji kuak, Ni ro igi ij maink igia fi. A ijia fike na e ani on bu ana nigaraioijo iji kege kaniame ke diak rotit on ijia uniamno kuain.
MAR 12:37 Ijefuon Devid fu kokfuon e iji God kuamga fu ruainma iji kua E Bomanakono kuain. Regavo Devid fu izeg una e iji kuak, Aiji a uifarif nuno kuak. Jesu fu ijeg kuardiamga e fok ijia afurvenva buka oimarvknum vuak iji fain.
MAR 12:38 Bu karine faimdakoga fu vuak nijaidiame vake kia, E iji vuak akai nijaidiavo ijiebuon unam bu kegoijo iji amarigia giaknum of. Bu vierafe buka ugon jaoijmana same ar bu duok kimejo ijia oga e bu giame mukorigia agordiame anadiakuai bu iji vierafen.
MAR 12:39 Bu ijegreoknum buka ar bu afuime vuak kuaivo ijia fata ma iji kege kariknum ar bu iro ijo ijia fata ma iji kege karioij.
MAR 12:40 Bu ijegrejknum bara amun iji biesiame sinuom buon niesamdiaknum buka e nifak ijia jaoijor sirimamega e bu giame arordiakuai bu ijeg reoij. Regavo e ijegreoijo iji God fu kam unam gigikin ijia vajai fian miaga bu vajai fian abekno kiain.
MAR 12:41 Ijegrene Jesu fun Godon ar ijia fine giakoga e fok bu ro mavua iji bu mon abesvo ijia mon abesev. E sinuom zarainva uruvana iji bu ro useme mon mamkanuk abese gavo bara amun sinuom bakin iji fu ro mon ukakna nokarok (2) iji kege mavua ijia sain.
MAR 12:43 Fu kege ijia samga Jesu fu game uri e vuak fuon faivo iji kumega bu rokga fu kia, Vuak igi naka ma kuardiav. Bara amun sinuom bakin igar mon iji fu mavua garia sainma ijar e fokigiebuon mon bu sainva iji asidiain.
MAR 12:44 Ijefuon maiji e roin bu mon uruvana zarain revo bu mon sibank kege mavua ijia sain. Regavo bara amun gari fu mon ukak fu duok fuon kimekafa na fino iji fun kege mavua ijia sainmano kiain.
MAR 13:1 Jesu fu Jerusarem ijia Godon ar bomana bu afuime sirimamejo iji areme keko vako ijia e vuak fuon faimo be fu uri kua, E nijaidiamo ar garia ga. Buka mun ma ijia kege ar gari dab mukorigia sainvano kuain.
MAR 13:2 Fu ijeg kuamga Jesu fu uri kia, Mun besubesum guri bu kege ar guri sainva iji rad buba iji bu name ajienva ijia ijeg naoime vak. Regavo mun fok bu eb bujaga buka uduime arikno kiain.
MAR 13:3 Jesu fu ijeg kuardiame fun va gara uruor be bu kua Orivsno kuavo ijia fikoga Fita ga Jeims ga Jon ga Edru ijieb isuarigia buonkua fu fino ijia ruain.
MAR 13:4 Bu ro useme kua, E Bomana ni tavan ivez bu ar iji buja korekfuon iji kuarduo no faiv. Regavo unerag rega no ijia giame vierafero vuak igi a kuarduomo iji fun rekro no ijeg vierafekno kuain.
MAR 13:5 Bu ijeg kuardavga Jesu fu uri kia, Ni vuak igi na kuardiavo iji amarigia gavknum of. Jab e iji bu vuak kufui kuaimoijo ijiebuon vuak iji faime jajiak.
MAR 13:6 Ijefuon maiji e uruvana bu usem biesiame kia, Naiji na Kurais narno kiaga e uruvana bu uri bu jajiakfuon.
MAR 13:7 Regavo e bu ar samaij ja karinva ijia ga aibe gamia bu bijaimoke ja faik. Regavo igia fai. Ja vuak iji faikva jab uri juk. Ire ijekin iji buka rekfuon. Regavo jab vierafero moikigi fun iviakma barekro jab ijeg vierafek.
MAR 13:8 Ijegrekega moik mamkanuk roin bu uri bui bijaik ga ar ukaknak iji bu uri bui bijaik. Regavo ar kafokafo ijia fuka vasia kekome uri moik urak. Regavo ire ise kafokafo ijieb ijeg anerekva iji ni vierafero ire ise ka mamkanuk ijieb rad rekfuon.
MAR 13:9 Regavo madu jaka amarigia jon samuanamiknum of. Ijefuon maiji e kafo bu ro ja tomdiame va e mamkanuk kot samuavo ijiebuon kot rejknum buka ar e Jius bu afuime vuak kuaivo ijia ja kaniak. Regavo madu ja na jajievo ijefuon e mamkanuk moik samuavo ijigam e kin ijiebuon nifak ijia irek. Ja irevo ijia ja vuak ma iji na nijaidiainva ja ijin bu kuardiakfuon.
MAR 13:10 Regavo amur iji enun bu Godon vuak ma iji abe e iji ar iror ijia karioinva iji kuardiaoine barke son rad moikigi fu barekfuon.
MAR 13:11 Regavo tavan iji bu ja aferdiame kot rekvako ijia jab uri vuak ja izeg kuaikfuon iji bomana vierafek. Ijefuon maiji vuak iji ja jar vierafene kuaikva bakin revo fu Godon Kaven ijar vierafe vajiaga ja kuaik.
MAR 13:12 Regavo madu e roin bu uri uviaifijaf aferdiame una e ani buon iji vajiaga bu kania bu aoik. Regavo madu asoifijaf bu uri afijaf kege ijegrekega afijaf iji bu madu uri eofijaf nuigafiame kam una e ani buon vajia bu kaniaga bu aoik.
MAR 13:13 Regavo e fok buka ja amarigia uzak ijefuon maiji ja nuifuon ik reoijo ijefuon bu ijeg rek. Regavo erar fuka giriesame ma vierafene vake buin ijia kekomo e iji God fu keunaga fu ijia ma fivak.
MAR 13:14 Regavo tavan iji ja ar bu sirimamejo guf ijia ire ka ma ise be fu ar iji fu fuon bakin gavo fum ijia manino ja iji gakva ni e Godon vuak vierafene kuaimon e Danier fu kuainma iji vierafef. Ja ire iji gakva ni e uruvana Judia guf ijia karinva iji kiaga bu migegare subinai uruor mamkanuk iji irenva irif ijia vaf.
MAR 13:15 Regavo e iji fu ar fuon azan ijia fino iji fub una arime ar guf ijia sinuom fuon karek.
MAR 13:16 Regavo e be fu juar fuon ijia ikreoino iji fub una ugon fuon fu azan samon iji karekafa vak.
MAR 13:17 Regavo tavan ijia bara iji bu e fudienva ijigam bara iji eraneb bu am gatkin aferdiaoijo iji buka oifian abek.
MAR 13:18 Ijefuon ni God sirimamekin tavan iji iduan urino ijia jaiba subinai vakfuon. Ijefuon maiji tavan ise iji ja vajai fian abekfuon iji fuka ma ise ijar rekfuon. Regavo igia faif. Ire ka ma ise ijekin be fu ik God moikigi amarenma ijia roke iviakma igia fuba ijeg ren. Regavo madu rad ire ka ma ise ijekin be fuba una rekfuon.
MAR 13:20 Regavo tavan iji God fuba una ufume aribatie fu e be erar ni vek fivakma bakin. Regavo fun Godri e iji fu imut bijiainma iji vierafeno ijefuon fu buifuon tavan iji abe ufu una arin.
MAR 13:21 Ijefuon e be fu uri kia e iji God fu kuamga fu no karaunuokafa ruainma iji fu gafa roko gafno kiakma jab fu ma vierafek.
MAR 13:22 Ijefuon maiji tavan ijia e kafo bu useme ja biesiame kia, Noiji no e iji God fu kuomga no ruainma ijino uri no jajuofno kiak. Rega roin bu usem biesiame kia, Noiji no e Godon vuak vierafene kuaivo ijino kiak. Bu ijeg kuardiame uri anf ga ire sumakin kafokafo rene e ijiebuon oij ga buon ma vierafejo iji buka kam iserek. Regavo bu giriesakva bu e iji Godri imut bijiame kenma ijiebuon oij iji kam iserdiak.
MAR 13:23 Regavo igia faif. Vuak igi na amur kuardiainki rad tavan ijefuon ruakma ja game vierafekno kiain.
MAR 13:24 Regavo tavan iji ja ire ka ise iji biediame barke rad tavan iji fuka una nakikega asam fuba una sanak. Regavo ire uruvana varur gufia girme naoivo iji bu katime uduim arikega mujur iji bu madu varur gufia uduime arik. Regavo ire uruvana varur gufia girenamime naoivo iji buka katikatik.
MAR 13:26 Areme tavan ijia Ema ijiebuon Farif igi na una vana uf ijia daro ga sanainma nun ijekma roga ja giek.
MAR 13:27 Ja giakega na anera iji kiaga bu moik igefuon buin ijia ga varur gufefuon buin ijia e iji God fu imut bijiainma iji kanafume afuik.
MAR 13:28 Jesu fu ijeg kuardiame uri in makam ijia bijame kia, Nin in makam iji game vierafef. Tavan iji in makam fu a kanamon iji ja game vierafero tavan juar mejo iji fun samairenmaro ja ijeg vierafej.
MAR 13:29 Unam besum ijegvo tavan iji ja ire fok bu rejo iji giakva ja vierafero tavan iji na una ruakfuon iji fuka samaire vo fun ija anerenro ja ijeg vierafek.
MAR 13:30 Regavo vuak igi naka ma kuardiav ire fok na kuardiavo iji e aganjon igi bu iviakma kari roko iji bu vek karike fu rega bu giame radson aoik.
MAR 13:31 Regavo varur gufiga moikigi buka barek revo vuak nun fuba barekgavo fu tavan bog ijia navakno kiain.
MAR 13:32 Jesu fu ijeg kuardiame una kia, Tavan iji na una roko iji Godon anera varur gufia karijo iji abevo Godon Farif igi nak madu naka ba vierafen. Regavo fun Godri fuonkua tavan iji vierafen.
MAR 13:33 Ijefuon ni uri ni narame nisaiknum karif. Ijefuon maiji ja tavan iji fu ivez rekfuon iji jaka ba vierafen.
MAR 13:34 Regavo na una roko iji na e iji fu ai jaoijor be vakafa uri e fuon ikrejo iji aferdiame ik buon irerag e besubesum bu rekfuon iji nijaidiainma ijekin. Fu nijaidiame vaga e iji vien samuakfuon iji kua, Aiji vien iji samua fiknum ire fok samuagdiake na vaikin una rokno kuame fun vakno kiain.
MAR 13:35 Ijefuon ni jak ijeg samuame kariof. Ijefuon maiji na ivez una roko iji jaka ba vierafen. Nate nakifuon vo baga ve ufrenma ijia vo baga kukoro kumeno ijia vo baga ve irasemo na ijia ruakfuon iji jaba vierafen.
MAR 13:36 Ijefuon ni amarigia samuame kariof. Na una roga ja vek ni naoinva na giakfuon iji naka isediek. Regavo vuak igi na ja jonkua kuardiavo bakin gavo na e fok kuardiavno kiain.
MAR 14:1 Regavo tavan iji bu iro Fasova ijiga bred iriaikin ire ist bakin iji bu ine una God fu usuibe saifijaf karauniainma iji vierafejo iji fu naki nokarok (2) ijeg vek nam. Ijefuon e mamkanuk iji Godon isuf baroijo ijigam e vuak akai nijaidiavo iji bu isuar sauime Jesu kanakuai vuak kuaime unam nisain. Bu kuai, No tavan iji no iro ijo ijia noba kanaken ijefuon maiji e igia ruainva iji buka deajidiaido bu una no kanuokno kuain.
MAR 14:3 Regavo rad Jesu fun va ar Beteni ijia kekome Saimon e iji ire kasi igekin iji abe barenma ijefuon ar ijia fin. Fu ijia fino ijia bara be fu ire udi mukor urino bu kege mon mamkanuk kimejo iji be abe saror ijia usiame abe fu fino ijia ruain. Fu keko gak Jesu fu duok iga bara iji fu duok iji dab nigen fuon ijia usiamdain.
MAR 14:4 Fu ijegrega e roin bu ire iji fu reno iji gava buka deajidiain. Ijefuon bu kua, Bara gari fu irerafuon ire maigari fum dab nisem. Fu ire mukor iji fuka arekin abe kime mon bomana abe una e sinuom bakin iji vajiakma fu arenmano kuaime buka fu ziegafain.
MAR 14:6 Ijefuon Jesu fu uri e iji kia, Bara garefuon vierafe iji ja irerafuon dab arafirime oifian mav. Irerag fur renma iji fuka nuifuon ire mukor iji ren.
MAR 14:7 Ijefuon maiji e iji sinuom bakin iji bu tavan bog igia jana karik. Ijefuon tavan kafo ja bu ifejdiakuai vierafekva iji ja ifejdiak. Regavo naiji naba tavan bog igia jana fiokfuon.
MAR 14:8 Ijefuon bara iji fu irerag fu vierafenma fu ijeg ren. Fu ire udi mukor urino igi fu abe na ruardienma iji fu vek igi naba mako arinva ijia fu abe usemdieme amarek.
MAR 14:9 Regavo vuak igi naka ma kuardiav, Ar iror izerkin bu vuak ma igi abe kuaimoijo ijia irerag bara igi fu renma iji bu abe ijia kuaimoijknum fu vierafeokno kiain.
MAR 14:10 Areme e tuer (12) Jesuon vuak faivo ijia e be e Judas Iskariot kuavo iji fu Jesu afeme e ani miakafa vierafen. Ijefuon fun e isuf baroijo ijiebuon e mamkanuk iji karinva ijia vain.
MAR 14:11 E mamkanuk iji bu vuak fuon faiva buka oimadiamga bu kua, No mon a vajakno kuain.
MAR 14:12 Regavo tavan iji bu bred iriaikin ire ist bakin javo iji roko ijia e Jius bu iro be bu kua Fasovano kuavo iji ijo. Bu tavan iji roko ijia e Jius bu maf-sif uka iji kania isuf baroijo. Ijefuon e iji Jesuon vuak faivo iji bu tavan ijia useme Jesu kua, A vierafega no izia oifuon duok kanafuga a iro Fasova iji ikno kuain.
MAR 14:13 Bu ijeg kuavga Jesu fu uri e vuak fuon faivo nokarok (2) iji kia, Ni va Jerusarem ijia arume e be fu do jia roko iji bief. Ja biekva nin e iji jame ar guf ijia arume e ai koikin iji kua, E Bomana nuvuon fu a kume ar na enun ijiena iro ikfuon no izia ikno kumenmano kuaf.
MAR 14:15 Ja ijeg kuaga fu ar no iro ikfuon iji nijaidiaga ni iro iji no ikfuon iji ijia amarefno kiain.
MAR 14:16 Fu ijeg kuardiamga bun uri vake mai ijia useme irerag Jesu fu kuardiainma iji game ijia jame iro Fasova ijefuon duok kanaufuin.
MAR 14:17 Ijegrene fun ve nakisrega Jesu fun e tuer (12) vuak fuon faivo ijiena vake ar ijia usen.
MAR 14:18 Areme bun karine duok ijo ijia Jesu fu uri kia, Vuak igi naka ma kuardiav. E igi ja nana karine duok ijo igia e be fu na abe una e ani iji miaga bu kanie na guakno kiain.
MAR 14:19 Jesu fu ijeg kuardiamga e vuak fuon faivo iji buka oifiadiain. Ijefuon e besubesum bu uri Jesu kua, E Bomana a vierafega nakafu nar ijegrek ki na bano kuain.
MAR 14:20 Bu ijeg dab kuaivga Jesu fu uri kia, E tuer (12) igi ja nana karinva ijia e besum fu bred fuon abe nosik dis guria abesmo e ijar na abe e ani iji miak.
MAR 14:21 Ema ijiebuon Farif igi naiji bu buk akaij ijia bu isoime nuisina kuainva ijeg na bu dab kaniekfuon. Regavo e iji erar fu na abe una e ani iji miakfuon iji naka fuifuon bomana oifiadiem. Ijefuon maiji Godri e iji fu dab unam ise ijia arafirik. Regavo asiefuon iji bu fuba nafebatie iji fuka markno kiain.
MAR 14:22 Areme bu vek karine duok ijo ijia Jesu fu uri bred abe Godon sirimamene oimaren. Areme fu abe tuaseme ke e vuak fuon faivo iji vajiaknum kia, Bred igi fu vajai surif nun igekino ni kege if.
MAR 14:23 Areme fu madu una kafus iji abe Godon sirimame oimarme abe miamga bu in.
MAR 14:24 Bu ijga Jesu fu kia, Ire iji fu kavuan nun igekin. Kavuan nun ijar usega God fu ijia unam iviamkor iji fu e fok ijiebuon ise iji giame arekro kuainma iji fu kavuan nun azan ijia e fok ijiebuon ise iji somdia korekfuon.
MAR 14:25 Vuak igi naka ma kuardiav naiji na iviakma igia gavo una gafeg naba una jana do vuain igi ik. Regavo nason rad tavan iji Godri koikfuon una efuon igi samuagdiakfuon ijia na ar iviamkor ijia jana ikno kiain.
MAR 14:26 Jesu fu ijeg kuardiame barekoga bun uri dua rene bun usem uruor Orivs kuavo iji manino ijia vain.
MAR 14:27 Bun va ijia usevga Jesu fu uri kia, Ivia naki e fok ja subinai vaga na ja ijia areme vak. Ijefuon maiji bun buk akai ijia isoime kuain, Bu e iji maf-sif samuagdiamo iji kanaga maf-sif fuon bu dab ataseme vakno kuain.
MAR 14:28 Regavo rad God fu kiega na una urijo ijia na amur Gareri vake ja rad vuakno kiain.
MAR 14:29 Jesu fu ijeg kuardiamga Fita fu uri kua, E guri roin bu a uname subinai vakva naiji naba a uname kovak.
MAR 14:30 Fita fu ijeg kuardamga Jesu fu uri kua, Vuak igi naka ma kuardavo mukoi faif. Ivia naki kukoro fuba kumenma ijia e bu nuisina kuakva a tavan nokbek (3) kia na e iji naba vierafenvano kiake kukoro fu ijiason kumekno kuain.
MAR 14:31 Fu ijeg kuamga Fita fu una darokma kua, Na vierafe bu kanie na osik guakva naba kia aiji naba vierafenvano kiak. Fita fu ijeg kuardamga e iji Jesuon vuak faivo iji bu madu bu uri vuak besum ijeg Jesu kuardain.
MAR 14:32 Areme bun ar bu kua Getsemenino kuavo ijia vain. Bu ijia useme Jesu fun uri e vuak fuon faivo iji kia, Jan igia karike na sirimamejno kiain.
MAR 14:33 Areme fun uri e nokbek (3) Fita ga Jeims ga Jon iji aferdiame vain. Regavo fuka uruvana igia oifiain ga madu fuka oiseren.
MAR 14:34 Ijefuon fu uri kia, Oinun iji fuka uruvana igia oifiadiemo iji nakafu na guakfuon. Ijefuon janika igesugin karine na samuagdiefno kiain.
MAR 14:35 Fu ijeg kuardiame are fun fuonkua sibank biom aibe ijia tuame moik ijia dijeme sirimame God kuaga ire afikin fu abekreno iji fuba fuon rekro fu vain.
MAR 14:36 Fun va sirimamene kua, God Asoinun a vierafe fu markma ni vajai fian igi na abekrejo ijigam na guakrejo iji ab arega fu nun roko. Regavo ire iji na nar vierafenva bakin gavo fun on vierafe ijia rekma ni areke fu ren.
MAR 14:37 Jesu fu sirimame barme una roga e vuak fuon faivo iji bun ninaoin. Bu ninaoivaga fu giame keko Saimon Fita kua, Saimon a irerafuon ninain? A irerarenma ijefuon aba tavan ivuankbe uri ni narame na samuagdien?
MAR 14:38 Uri koikjo samuanamime sirimameknum kariga kaven ise Setan fu ja biesiakma jaba zazaik. Fu ijeg kuardiame kia, Vuak igi naka ma kuardiav kaven jon iji buka sirimamekuai vierafen revo vajai jon ijieb buka zazaivno kiain.
MAR 14:39 Fu ijeg kuardiame fun una amur fu sirimamenma ijeg sirimamekafa vain.
MAR 14:40 Fu sirimame barme una roga e iji bu ninadiaga ijefuon buka ninaoinva fu giain. Regavo bu uri Jesu gain revo bu vuak irerag kuardakfuon iji buka ba vierafen.
MAR 14:41 Areme fu madu una ro giame kia, Jaiji ja irerafuon vek ninan abej. Jan siban ninaoinva urif. Tavan iji Ema ijiebuon Farif iji na bu abe una e ise reoijo iji miaga bu kaniekfuon iji fun ruain.
MAR 14:42 Regavo e iji fu na abe e ani nun miakfuon iji fun iga roko uriga no vakno kiain.
MAR 14:43 Jesu fu vek manine vuak kuardiamo ijia e vuak fuon faimo be e Judasno kuavo iji fu ijia kekoin. Fu e azikegoijo iji ga e isuf baroijo ijiebuon e mamkanuk ijigam e Jiusbuon e mamkanuk iji bu uniafdainva ijiena kakigam jua magu kege ijia ruain.
MAR 14:44 Regavo Judas fun vek ijia ujuriame kia, Ja giega na va e izin abe ui miga ja e ijin kunaime amarigia tome afem vafno kiain.
MAR 14:45 Areme Judas fun migegare kekome Jesu manino ijia manine kuai, E nijaidiamo kuame kunaime uimin.
MAR 14:46 Judas fu ijeg kuardako ijia e ani iji bun ijia usem Jesu kunaime toin.
MAR 14:47 Regavo e be ijia manino ijar uri kaki fuon iji darume dab e be e bomana isuf baroino ijefuon ikreno iji ada fuon kana daturain.
MAR 14:48 Rega Jesu fu uri kia, A na e niekiga ja ijefuon jua magu abe na tomdiekuai ruain?
MAR 14:49 Na tavan bog naka e Jiusbuon ar bu sirimamejo ijia aru fine vuak nijaidiaoij revo jaba ijia arume na tofdien. Regavo na vierafe ire fok igi iviakma reno iji fu Godon buk akaij ijia vuak irerag bu nuifuon isoime kuainva iji fuka aresrekno kiain.
MAR 14:50 Areme e vuak fuon faivo iji bu ijia magame subinai vain.
MAR 14:51 Regavo e nivek Jesu jaoijo be iji fu ugon fat be dab iruainmado bu usem niriavga ugon fuon iji fu jafekoga fu ijia areme detabar ko vain.
MAR 14:53 E iji Jesu kunaime toinva iji bun fu afeme e Godon isuf baroijo ijiebuon e bomana e Kaiafason ar ijia vain. Ijefuon maiji e Godon isuf baroijo ijiebuon e mamkanuk ijigam e vuak akai nijaidiavo ijigam e aiko ijiebuon e mamkanuk iji bu ijia besum afuin.
MAR 14:54 Bu Jesu afeme vako Fita fu giaknum aibe gamia jajia roke Kaiafason ar makaf ijia kekoin. Fu ijia e iji juo karijo ijiena mian irua fin.
MAR 14:55 Regavo e isuf baroijo ijiebuon e mamkanuk ijigam e mamkanuk fok kot faivo iji bun uri vuak kufui kafo Jesusina kuaime nisain. Bu kuaime nisaimga fu ise kafo rega bu abe kuros kanakuai ijeg ren.
MAR 14:56 Regavo buka e uruvana arume Jesuon vuak kufui fuisina kuain revo vuak buon buba abe maren.
MAR 14:57 Areme e roin bu uri vuak kufui igin fuisina kuaime kuai no fai fu kuai na ar igi emab sainva iji bujakore ga naki nokbek (3) barga na una ar be emab sainva bakin iji sakno kuain. Regavo vuak buon bu kuaivo iji buka vek ba abe maren.
MAR 14:60 Bu ijeg kuaivga e Kaiafas fu e ijiebuon nifak ijia uri Jesu kua, A vuak igi bu oisina kuaivo ijia a vuak kafo kuak o bano kuain?
MAR 14:61 Fu ijeg kuardamga Jesu fu vuak kafo ba una roib kuardain. Ijefuon e Kaiafas fu una madu kua, Aiji abe ma Godon Farif e iji God fu kuamga fu ruainma ijino kuain?
MAR 14:62 Fu ijeg kuamga Jesu fu kua, Ke iji naiji na ma e ijin. Regavo Ema ijiebuon Farif igi naiji na God e darokin ijefuon ij maink ijia fik. Regavo rad na varur gufia una vana araf ijia ari roga ja giekno kiain.
MAR 14:63 Fu ijeg kuardiamga e Kaiafas fu uri ugon fuon fu sainma iji kuniaim bujain. Areme fu uri kia, Vuak fuon iji non siban fain revo no irerafuon una madu e kafo kiaga bu vuak ise fuon kafo kuarduok? Regavo ja vuak ise kafo fu Godsina kuainma iji jan fain ijefuon ja fu izegarekno kiain? Fu ijeg kiamga e fok bu uri kua, E iji fu kuai fu Godk bu besumno kuaimon ijefuon noka dab kana fu guakno kuain.
MAR 14:65 Regavo e roin bu uri juvit foimadime ugon fat be dab uikinik fuon ijia kiramdame uri imut anume uikinik ijia kanaknum kua, Ni e igi erar a kanainma iji kuramne kuain. Bu ijegrene e juo karijo iji bun usem Jesu afeme dab fijain.
MAR 14:66 Regavo Fita fu Kaiafason ar makaf fak gufa manino ijia barak be Kaiafason ikreno ijar gak Fita fu mian iruame manin. Fu manina bara iji fu game uri kua, Na vierafega a e be Jesu e Nasaretko ijek oinon na gainvano kuain.
MAR 14:68 Rega Fita fuka feme kua, Na vuak iji a kuaimon iji naka ba fain vo vierafenvano kuame fun kekome vien samaij ijia vako kukoro fu ijia kumen.
MAR 14:69 Regavo bara besum ijar una ijia game uri e ijia irenva iji kia, E igi fu e be Jesuk oina na gainvano kiain.
MAR 14:70 Rega Fita fuka una madu fen. Areme tavan sibank barko e kafo ijia irenva ijieb uri Fita kua, Eko ak e be fusik oinon ijefuon maiji a e Garerikono kuain.
MAR 14:71 Rega Fita fuka uri God kurame kia, Na ma kufui mekva God fu na abe arafiriek. Regavo nan ma kuardiav e iji naba vierafenvano kiain.
MAR 14:72 Areme tavan iji Fita fu vuak ijeg kuaiko ijia kukoro fu ijia kumen. Areme Fita fu ijia vuak iji Jesu fu amur kuardafe kua a kukoro fuba tavan nokarok (2) kumeke a ijia nokbek (3) kuai na e iji naba vierafenvano kiakno kuainma iji vierafek. Areme fuka uruvana igia oifiaimga fu kekome makaf ijia ka bomana nirain.
MAR 15:1 Areme tavan ik abaisamo ijia e isuf baroijo ijiebuon e mamkanuk ijigam e Jiusbuon e mamkanuk ijigam e vuak akai nijaidiavo ijigam e mamkanuk kot faivo iji bun vuak izeg bu Jesu kana fu guakfuon iji kuaime abe maren. Bu Jesu kunaime dab tome afem una usem Faireton vain.
MAR 15:2 Areme Fairet fu uri Jesu kua, A vierafega aiji an ma e Jiusbuon Kin ijino kuain. Rega Jesu fu uri una roin kua, Ke vuak iji a kuaimon iji an ma kuaim.
MAR 15:3 Fu ijeg kuardiamga e isuf baroijo ijiebuon e mamkanuk iji bu uri vuak ise fuisina uruvana kuain. Ijefuon Fairet fu madu uri Jesu kua, Buka vuak ise uruvana oisina kuaiv gavo abe una roin kuardiak?
MAR 15:5 Rega Jesu fuba una vuak ijefuon roib kuardakafa vierafega Fairet fu iji gama fuka oiseren.
MAR 15:6 Regavo juaivasia besubesum ijia iro Fasova iji bu ijo ijia e Romkobuon e bomana iji fu e aiko bu dibur ijia era bu vierafene kuavo fu ijin kiaga bu usem vako.
MAR 15:7 Regavo e roin bu e Romko ijiena bijaime e roin kaniainva iji bu dibur ijia karij. Regavo e iji dibur karijo ijia e be if fuon iji Barabas. Ijefuon e uruvana ijia afuinva iji bun uri va Fairet fu juaivasia besubesum ijia izegreno ijin kuardain.
MAR 15:9 Bu ijeg kuardavga Fairet fun uri kume, Ja vierafega na Jesu e Isrerkobuon Kin iji keunaga fu vakno kumen? Regavo Fairet fun vierafega bu Jesu oisema vierafene funa nigaraioijo ijefuon bu fu afeme fuon ruain.
MAR 15:11 Regavo e isuf baroijo ijiebuon e mamkanuk iji bu uri e uruvana soisoi kuardiame kia, Jaka e Romkobuon e bomana iji kua no vierafe a e Barabas keunaga fu vakno kuaf.
MAR 15:12 Bu ijeg kuavga Fairet fu una madu uri kia, Regavo ja e guri ja kume fu e Jiusbuon Kin no kumenva iji fuiji na abe izeg rek?
MAR 15:13 Fu ijeg kiamga bu kume, Abe kuros kanafno kumen. Rega Fairet fu una kia, E igi fu ise irerag iji renma ijefuon ja abe kuros kanakrejno kiain. Rega buka uri uruvana igia biumame kume, Abe kuros kanafno kumen.
MAR 15:15 Rega Fairet fu vierafe fu irerag e uruvana oimardiakfuon ijia rek. Ijefuon fu Barabas buifuon kuama fu vakoga fu uri e azikeoijo iji kiamga bu Jesu dab fijame afem usem abe kuros kanakuai vain.
MAR 15:16 Areme e azikeoijo iji bun uri Jesu afeme dab usem una Faireton ar mai makaf bu kua Faitoriamno kuavo ijia ruain. Areme bu uri e azikeoijo uruvana kumejga bu besum afuin.
MAR 15:17 Bu besum afuime uri ugon jaraikin kavuan iji dab abesdame uri kiej ufu abe atevene dab Jesuon nigen ijia abesdain. Areme bu uri kua, Aiji a e Jiusbuon Kin bomana ijefuon no if on abe ajiev!
MAR 15:19 Bu ijegrene uri guduar dab nigen ijia kukma kanaknum juvit foimadime ato same kurituamajain.
MAR 15:20 Bun dab varaimene barme uri ugon kavuan bu abe abesdainva iji kunaim darumdame una ugon ma fuon iji kege samdain. Areme bun afeme usem kuros kanakuai vain.
MAR 15:21 Bu Jesu afeme unam ijia vako ijia bu Saimon e Sairinko iji fu ar fuon areme una Jerusarem roko iji bieme kuriairevga fu Jesuon kuros iji abe dabe vain. (Regavo e Saimon fu Areksedako Rufasbuon asoij).
MAR 15:22 Fun kuros iji abe dabemga bun afeme roke ar Gorgota kuaivo ijia usen. (Rega if Gorgota ijefuon maiji uruor iji fu e nigen an igekin.)
MAR 15:23 Bu ar ijia useme uri do vuain iji abe inak kugi kafo amarme abe maga fu inkin fuba vajai fian abekro bu ijeg ren gavo fuba in.
MAR 15:24 Areme e azikeoijo bun uri Jesu dab kuros kaname uri Jesuon ugon iji kam name kas dab akozga are erar kega bu gakuai ijefuon bu ijeg ren.
MAR 15:25 Regavo veni iji fun ajie kaf garia ruainma ijia bu Jesu abe kuros kanain.
MAR 15:26 Regavo vuak iji bu fuisina kuaime isoinva iji bu ijeg isoi, E igi fu e Jiusbuon Kin ijino kuain.
MAR 15:27 Regavo madu bu e niekin nokarok (2) kege Jesuna kuros kaniain. Be bu abe ij maink ijia kanaga be bu abe ij azinak ijia kanain.
MAR 15:28 Bu ijegrejga vuak iji bu usuibe buk akaij ijia isoime kuai, Fuiji bu abe e ise reoijo ijiena kamainvano kuainva iji fuka ijekma aresren.
MAR 15:29 Regavo e roin bu unam iji bu Jesu abe kuros kanainva samaij ijefuon roko. Ijefuon bu usem game nigen kativknum dab varaimene kuain. E gare ar kuaim a Godon ar bu sirimamejo iji bujame vo naki nokbek (3) una same barekno kuain. Ijefuon ni koikon keunanami kuros iji areme una ari roga no gavno kuain.
MAR 15:31 Unam besum ijeg e iji isuf baroijo ijiebuon e mamkanuk ijigam e vuak akai nijaidiavo ijieb buon afuime Jesu dab ijeg varaimene kuai, Fu e roin karauniain gavo fu koikfuon keunanamikfuon iji fuka ba aresrenmano kuain.
MAR 15:32 Regavo bu madu kuai, Ni arekega e gari God kuamga fu ari ruainma iji ga E Isrerkobuon Kin iji fu kuros ijia ari roga no game ma vierafejno kuain. Regavo e niekin nokarok (2) iji bu ke funa kuros kaniainva iji buk bu unam besum ijeg una Jesusina vuak ise kuain.
MAR 15:33 Bu ijegrene roke tavan uk maniko ijia vana utime okoga ar fok fuka ve naki vake tavan ura gura manin. Fu gura manino ijia Jesu fuka uruvana igia biumame kume, Irai Irai rama sabatanino kumen. (Regavo vuak ijefuon maiji God nun God nun a irerafuon na unieko vain).
MAR 15:35 Fu ijeg kumega e kafo ijia irenva iji bu iji faime kuai, Iji fu e Eraija kumeno kuain.
MAR 15:36 Regavo e be fu una kukum keko atebu abe in buin ijia bijame abe do vuain ijia abesme abe Jesuon ir ijia aziga are fu iga fu gakafa. Areme fu uri kua, Ni arekega Eraija fu ro fu keunaga no gavno kuain.
MAR 15:37 Fu ijeg kuaikoga Jesu fu una uruvana igia biumame arekoga kaven fuon fu ijia uname vakoga fu guain.
MAR 15:38 Fu guako ijia ugon iji bu abe ar bu sirimamejo guf ijia arume kirainva iji fu dab uf ijia bujame ari roke buin gumia kekoin.
MAR 15:39 Rega e azikeoijo ijiebuon e bomana iji fu ijia manine Jesu nikajamo iji fu Jesu fu kumeno iji faimevo izeg fu guainma iji game kuai, E guri fuka ma Godon Farifno kuain.
MAR 15:40 Regavo bara uruvana bu aibe gafia ireme giav. Regavo bara iji ruainva iji bara Meri Megdarinko ga bara Sarom ga bara Meri e Jeims e ukak ijiga Josof buon asie ijieb ijia ruain.
MAR 15:41 Regavo bara ijieb amur gamia Gareri Jesu jame oijknum samuaoin. Regavo madu buka bara uruvana gamia Jerusarem jame ruainva iji bu ijia buna iren.
MAR 15:42 Areme fun tavan nakikreno ijia e Josof e Arimatiako iji fu ruain. E iji fu e ikin be ga fu e Jiusbuon e mamkanuk ijiena fino. Regavo madu fuka tavan iji God fu una efuon ijiebuon oij iji samuagdiakfuon iji samuaoino ijin. Regavo nakifuon iji bu tavan Sabat (Satade) iji bu isuar karine God sirimamejo ijefuon duok kanaufuvo. Ijefuon Josof fu Jesuon vajat surif jafe arikafa fun zinunba Fairet kuakafa vain.
MAR 15:44 Regavo Fairet fu Jesu fu guainma iji faime fuka ba ma vierafen ijefuon fu e azikeoijo ijiebuon e bomana iji kumena fu rokga fu kua Jesu fube ma guainmano kuain?
MAR 15:45 Fu ijeg kuamga e iji fu kua, Ke Jesu fun ma guainmano kuain. Ijefuon Fairet fu Josof kua, Ni va Jesuon surif jafe arimne kuain.
MAR 15:46 Fu ijeg kuardamga Josof fu va Jesuon surif kunaim jafene ugon iviamkor ijia abe utin. Areme fu abe va munuag be bu kajuame amarenva ijia unain. Fu abe ijia uname uri mun bomana be mako vien ijia namo iji vaja dab vien iji bijukurain.
MAR 15:47 Regavo bara Meri ar Megdarinko ijiga Meri e Josofon asie ijieb Jesu bu abe unainva iji gain.
MAR 16:1 Ijegrene tavan Sabat (Satade) iji bu isuar karine God sirimamejo iji fun barekoga bara Meri ar Megdarinko ijiga bara Sarom ga e Jeimson asie Meri iji bun inak udi mukor urino iji kafo Jesuon vajat surif iji azirdakuai kimen.
MAR 16:2 Areme Sade suok tavan ik abaisamo ijia bun Jesu bu mako ruinva ijia vain. Bu unam ijia vaknum bui kuai, Erar mun gami bu abe mako vien iji bijukurainva ijin biom iken abededuokno kuain?
MAR 16:4 Regavo bu vake ar Jesu bu mako ruinva ijia usem gak mun ka bomana iji bun biom dab iken abedenvaga bu name mako guf ijia aruin. Bu arume gak e nivek ugon abaikin sainma ijar mako guf iji imut maink ijia fina bu game ka juin.
MAR 16:6 Buka juvga fu kia, Bara gurie jab juk. Na vierafe ja Jesu e Nasaretko iji bu abe kuros kanainva iji nisaimoij. Regavo ar igi bu fu abe unainva igia gaf. Fu igia fu bakin revo fun una urin. Ijefuon ni una va e vuak fuon faivo iji ga Fita iji kia fun amur fu kuardiainma ijeg fun Gareri vakno ni va ijia biefno kiain.
MAR 16:8 Ijefuon bara iji buka oiserdiame dejufdiamga bu usem kukume una vain. Regavo irerag bu gainva iji buka ba e kafo kuardiain ijefuon maiji buka dejufdiain.
MAR 16:9 Jesu ik fu urinma iji fu bara Meri ar Megdarinko iji fu kaven ise seven (7) bu fu niroivga fu kuriairemga bu bara iji areme usem vainva iji bien.
MAR 16:10 Fu biemga bara iji fun va e iji bu funa oinva iji bu oifian abeknum niraivo ijin kuardiain.
MAR 16:11 Fu kuardiame kia, Jesu fun una uri nivek fina na gainvano kiamga e iji bu vuak fuon iji faime buka ba ma vierafen.
MAR 16:12 Areme rad Jesuon uikinik fu una nibe rene e nokarok (2) bu ai be vakuai unam ijia vako fu iji biediame buna vuak kuaiknum vain. Regavo e nokarok (2) ijieb una ro usem e vuak fuon faivo roin iji Jesuon vuak iji kuardiain gavo buka ba vuak buon ma vierafen.
MAR 16:14 Regavo rad e ireven (11) vuak fuon faivo iji bu karine duok ijo ijia Jesu fu ijia ruain. Fu ijia kekome vuak kuriaikuriaiki kuardiain ijefuon maiji fuka tavan bog fu guame una uri nivek fivakfuon vuak iji fun kuardiain gavo buka vek ba ma vierafen. Regavo fu madu uri e iji bu fu bieme una ro bu kuardiavo buba ma vierafenva ijefuon vuak kuriaikuriaiki kuardiain.
MAR 16:15 Areme Jesu fu uri kia, Va ar iror ijia vuak nun ma iji abe e fok kuardiaof. Erar fu oi dakaroime na ma vierafene do ruaikma e iji God fu keunak. Regavo erar fuba na ma vierafekma God fu e iji abe vajai fian mak.
MAR 16:17 Regavo e iji eraneb bu na ma vierafejo iji buka ire sumakin kafo rek. Bu if nun ijia kaven ise iji kiaga bu usem vak vo madu buka isama kafokafo kuaik. Regavo madu tabar jakia vo bu imag ikva iji buba aoik. Regavo e iji eraneb bu na ma vierafejo e ijieb bu e iji adam abejo iji imut nigen namdiaga bu madiakno kiain.
MAR 16:19 Jesu fu vuak ijin kuardiame rad fu uri varur ijia va Godon ij maink ijia fin. Regavo e vuak fuon faivo iji bun usem ai kafokafo ijia Jesuon vuak ma iji abe e fok kuardiaoin. Bu kuardiavga e fok buka Jesu ma vierafen ijefuon maiji bu buonkua ikreoinva bakin gavo fu E Bomana ijar ifejdiako bu ire sumakin uruvana reoin.
LUK 1:1 Eko Tiofiras e uruvana bun giriesame ire iji igia nuvuon renma iji bun isoin.
LUK 1:2 Regavo vuak iji bu isoime no kuarduinva iji bu e gami bu ik amur ijia ire ma iji giame abe kuarduo ruainva ijieb isoin.
LUK 1:3 Ijefuon e bomana Tiofiras na vek ik amur ijia unam iji nan amarigia gain. Ijefuon na vierafega naka izeg Jesu fu reoknum nijaidiaoinma na iji abe amarigia isoime a nijav.
LUK 1:4 Rega fas iji na ijeg isoinva iji na vierafero na ijeg isoikin a unam ma iji bu nijaidiainva iji a ma vierafekro na iji isoin.
LUK 1:5 Ijegreare tavan iji Erod fu e Judiakobuon e bomana renma ijia Zekaraia fu e Godon isuf baroino iji rene e Abijan uifarif ijiena ik ren. Regavo bara fuon Erisabet fuk fu e Eronon uifarif be.
LUK 1:6 Bu busik besum E Bomana God fu oimarkfuon ijia karioknum vo buka akai fuon iji ga vuak fuon fok mukor igame karioin.
LUK 1:7 No barakin iji bu am bakin ijefuon maiji Erisabet fun abiten gavo madu bun eoradiain.
LUK 1:8 Regavo ve be Zekaraia fu tavan fuon fu ikrekfuon iji rokga fun Godon ar ijia ik ren.
LUK 1:9 Regavo izeg bu akai buon ijia bu e karevo ijeg bun fu aben. Ijefuon fuiji ik fuon iji fu ire udi mukor urino iji kege fata ijia baroinon. Ijefuon fu E Bomana Godon ar guf ijia arume vain. Fu arume ire udi mukor urino iji kege jako e uruvana bu makaf ijia karine sirimamen.
LUK 1:11 Fu ijegreno ijia fu E Bomana ijefuon anera iji gain. Anera iji fu fata iji bu ire udi mukor urino iji javo imut maink ijia manin.
LUK 1:12 Fu ijia manina Zekaraia fu gama fuka oisereme ka bomana juin.
LUK 1:13 Fu jumga anera iji fu uri kua, Zekaraia jumo aremne kuain. Ijefuon maiji God fun on a sirimameno iji fain ijefuon barakon Erisabet fu oifuon am farif be nafega if fuon a Jon kuak.
LUK 1:14 Barak on iji fu am iji nafekma ja ga e uruvana jaka ma bomana oimarkfuon.
LUK 1:15 Regavo Godon nifak ijia fuiji fuka ma e bomana reken. Fu vuain ga do kugi kafo fuba ik. Regavo tavan iji bu fu nafekva ijia fuka Kaven Akai ijar oifuon ijia rareken.
LUK 1:16 Fur efuon Isrerko uruvana aferdiame una E Bomana God buon ijefuon ruak.
LUK 1:17 Fu usuibe Eraija e Godon vuak vierafene kuaimon fu e darokin renma ijeg fu daro abene amur E Bomana ijefuon unam iji amarme vak. Regavo fur am ijigam asoifijaf iji aferdiame una agan besum rek. Regavo madu fur e iji bu God ba igavo iji aferdiame una unam ma ijia uniak. Rega fur E Bomana ijefuon e uruvana aferdiame ke amardiaga bu una E Bomana iji samuakno kuain.
LUK 1:18 Anera ijar ijeg kuardamga Zekaraia fu una kua, Naiji nan eorega bara nun fuk fuka ma barasrenma kuain. Regavo ire iji a kuaimon iji fu izegrekno kuain?
LUK 1:19 Regavo anera iji fu urine kua, Naiji na Gebrior anera iji Godon nifak ijia manino iji nar. Godri na kiega na vuak ma iji abe igia a kuardakro ruain.
LUK 1:20 Regavo a vuak nun igi na kuardavo iji aba ma vierafeno ijefuon iviakma a vuak kafo aba kuaik. Regavo am isuar fivake bu am iji nafekva ijia ason una vuak kuaik.
LUK 1:21 Zekaraia fu ijegreko e iji bu samua karinva iji bu vierafero fute Godon ar guf ijia aru irerag abenoro bu ijeg vierafen.
LUK 1:22 Fu ijegreare fu kekome ba vuak kafo kuardiama bu vierafero kafu Godon ar guf ijia ire be nimamaime gainmaro bu ijeg vierafen. Regavo Zekaraia fu vuak kuardiakrena fuka iseremga fum imut ijia kuardiain.
LUK 1:23 Ijegreare fu Godon ar ijia ik fuon fu reno iji fun baremga fun una ar fuon ijia vain.
LUK 1:24 Ijegrene naki sibank barko ijia bara fuon Erisabet fu e fudiene ar fuon ijia fikok vake asam imut roin (5) baren.
LUK 1:25 Ijefuon fu uri kuai, Iviakma E Bomana ijar na ifejdieme unam ijin ren. God fun na mardienma ijefuon na e uruvana ijiebuon nifak ijia na e fudienva iji na jukfuon iji fun fur abe vainmano kuain.
LUK 1:26 Erisabet fu e fudiene fivake asam imut roin ga nikit (6) ijeg barko ijia God fu anera Gebrior kuamga fu ar Nasaret vain. Rega ar iji fu moik Gareri guf ijia.
LUK 1:27 Regavo iji fu vainma fu bara be fuba baruna naino iji bu e Josof kuainva ijefuon vuak abe vain. Rega e Josof iji fu Devidon uifarif revo bara ijefuon if iji Meri.
LUK 1:28 Ijefuon anera iji fun va kekome Meri kua, Makarijo iji fu osik. E bomana iji fu osik fino ijefuon fur daro mame unam ma ijin on renmano kuain.
LUK 1:29 Regavo Meri fu vuak iji anera ijar kuardainma iji faime uri bomana vierafero anera fu irerafuon izeg anadiamro fu iji vierafen.
LUK 1:30 Ijefuon anera iji fun uri Meri kua, Ab juk aiji fun Godri oi fuon ijekma a mainma ijefuon fur a oijmame mardain.
LUK 1:31 Aiji ason rad e fudiene am farif be nafek ga if fuon a Jesu kuak.
LUK 1:32 Regavo fuiji fuka E Bomana rene vo bu fu kua E Bomana God kaf gufia fino ijefuon Farifno kuak. Rega E Bomana God fu izeg saifuon Devid fu e bomana renma ijeg fu kuaga fur E Bomana rek.
LUK 1:33 Regavo fur ka ma E Bomana rene e Jekafon uifarif iji samuagdiaknuvo fur ire fok samuagdiame ijia fivak.
LUK 1:34 Anera ijar ijeg kuardamga Meri fu una kua, Naiji naba baruna naijo gavo vuak iji a kuardiemon iji fu izeg nun rekno kuain?
LUK 1:35 Meri fu ijeg kuamga anera iji fu una roin kua, Godon Kaven iji fu a nirokame daro maga a daro abek. Ijefuon am akaij iji a nafekma fu Godon Farif rek.
LUK 1:36 Regavo igia fai. Aganon be bara Erisabet fuiji e bu kua fu e uibitenmano kuain. Fuiji fuka ma barasren gavo iviakma fun asam imut roin ga nikit (6) ijeg e fudien.
LUK 1:37 Regavo God fu ire besum revo ire kafo fu aremo bakin revo fuka e ire uruvana reno kuain.
LUK 1:38 Anera fu ijeg kuardamga Meri fu una kua, Na tavan uruvana God vuak irerag fu kuardiemon iji na rejo ijefuon vuak irerag a kuardiemon iji na vierafega fuka nun rekno kuain. Fu ijeg kuardamga anera iji fu ijia areme vain.
LUK 1:39 Ijegreare tavan ijia Meri fun migegare sinuom fuon kanafume fun mai be bu uruo kaf ijia karinva ijia vain. Regavo mai iji fu ai Judia guf ijia.
LUK 1:40 Fu va ijia kekome Zekaraian ar ijia ajie Erisabet anain.
LUK 1:41 Meri fu Erisabet anaiko am ijar Erisebeton defok ijia katin. Regavo Erisabet fuka Kaven Akai ijar oifuon iji samuamo ijefuon fun uri uruvana igia kume, Aiji aka bara uruvana ijiebuon araf ijia if on fuka ma bomana rekfuon. Regavo amon iji fuk if fuon fuka ma bomana reken.
LUK 1:43 A E Bomana ijefuon asie iji ar na giekafa ruain. Regavo irerafuon ire ka ma sumakin igi fu nun ren?
LUK 1:44 A na giekafa ruainma ijia na faik am igi fu ijia katin.
LUK 1:45 Rega iviakma aiji anka oimarek ijefuon maiji a irerag God fu rekno kuainma iji aka ma vierafenma ijefuon ire iji fuka on rekno kumen.
LUK 1:46 Areme Meri fu uri kuai, Naiji na oinun ijekma E Bomana God nuvuon fu no karaunuinma ijefuon oimardaknum fuon oimaren.
LUK 1:48 Regavo madu if nun fu ma ukakbe gavo fun Godri na imut bijienma ijefuon ire ka bomana iji fu nun ren. Ijefuon rad e uruvana bu ire ma iji God e darokin iji fu nun renma ijefuon bu na kiek bara oimarmo ijino kieken. Ijefuon vo tavan uruvana Godon if akaij iji dab aroik.
LUK 1:50 E uij kafokafo ijia Godon ma rediamon iji fu e iji bu fu juvknum igavo ijin nijaidiamon.
LUK 1:51 Regavo fur daro fuon ijia ire mamkanuk ijin re vo madu fur e aroikaraoijo ijiebuon vierafe iji kam karoimon.
LUK 1:52 Fu ijegrene uri e iji bu e mamkanuk moik samuagdiavo iji ke arigavo e oi naiki ga e ma iji kege ajie uniain.
LUK 1:53 Fu ijegrene uri e iji bu vasia oriainva iji duok ma iji vajiaga e iji ire uruvana zarainva iji fum kiamga bu imut kiriasame vain.
LUK 1:54 Fu usuibe Eburam ga uifarif fuon vuak ma iji fu ifejdiakro kiainma iji fun ijekma aresredo fu bu ifejdiak. Regavo fum efuon Isrerko ijiebuon oifian abene mardiain. Ijefuon maiji fu Eburam ga uifarif fuon iji fu ifejdiakafa kiainma ijefuon fu buon oifian abene tavan uruvana bu mardiaknum ifejdiak.
LUK 1:56 Meri fu asam nokbek (3) Erisabetk fine fun una ai fuon ijia vain.
LUK 1:57 Ijegreare Erisabet fun tavan iji fu amfuon nafekfuon iji rokga fun am farif nafen.
LUK 1:58 Fu am iji nafega e ai samaij ijia karinva iji abevo kaifijaf uruvana bu ire mukor iji E Bomana fu bara Erisabeton renma iji faime buka fuon bomana oimaren.
LUK 1:59 Ijegreare fun naki eit (8) barekoga bun am iji abe vajai fuon ijia anf abedeme abe asoifuon Zekaraia nabui kuai vierafen.
LUK 1:60 Bu ijeg vierafen gavo asiefuon ijar uzame kia, Na if fuon iji na Jon kuakro vierafenvano kiain.
LUK 1:61 Fu ijeg kuardiamga bu una kua, E uifarifon ijia if iji fu bano kuain.
LUK 1:62 Ijegreare bu uri asoifuon imut ijia nijaime kua, A vierafega no am igi no era kuakno kuain.
LUK 1:63 Bu ijeg kuardavga Zekaraia fu uri imut ijia nijaidiame fefafuo kiamga bu abe mavga fu ijia isoime kia, If fuon Jon no kiama e uruvana buka oiserdiain.
LUK 1:64 Areme tavan ijia Zekaraia fu una vuak kuaime uri Godon if abe ajieme fu oimardain.
LUK 1:65 Ijegrekoga e ar samaij ijia karioinva iji buka oiserdiamga bu uri vuak iji abe Judia guf ijia kuardiame vain.
LUK 1:66 Rega e uruvana bu vuak iji faime dab karine vierafeknum kuai, Am iji kafu rad irerag abek? Ijefuon maiji no samakaf gaga Godon daro iji fun fusikno kuain.
LUK 1:67 Jonon asoi Zekaraia fu Godon Kaven ijar oifuon ijia arimga fu uri Godon vuak ma igi kuai.
LUK 1:68 No E Bomana ga e Isrerkobuon God ijefuon oimare vo ifuon abe ajiek! Fur efuon bu ise ijar kuniaim girenma ijia ifejdiaknum karauniakafa ruain.
LUK 1:69 Godri nuvuifuon e darokin iji fur no karaunuokfuon iji kuamga fu ruain gavo fuiji fu e Devid e Godon ikreno ijefuon uifarif.
LUK 1:70 Regavo usuibe e akai Godon vuak vierafene kuaivo iji bu ijeg kuain.
LUK 1:71 Fur e ani iji bu nuvuon isemareknum ziegafuovo iji fur karaunuokno kuain.
LUK 1:72 Regavo Godri sai nuvuon Eburam ujuime kua, Nar unam akai iviamkor ja nana besum rekfuon iji vierafene kuainvado na uifarif on iji oijmiame ifejdiakno kuain.
LUK 1:74 Regavo madu fu una ujurduome kuo, Na e ani iji bu ja isemareknum ziegafiavo ijia karauniakno kuain ijefuon noba juvknum ik fuon rek. Regavo madu noka e akai rene una unam fuon ma ijia tavan bog ijia karivak.
LUK 1:76 Aiji a farinun ga aiji bu kua E Bomana God kaf gufia fino ijefuon vuak vierafene kuaimon ijino kuak. Regavo ar amur vaknum E Bomana ijefuon unam iji amarme vaken. Regavo ar efuon iji kuardiame kia, Ja ise jon iji areme una oi karoigakva fu giame ja karauniak.
LUK 1:78 Ijefuon God nuvuon fu e ifejdiamo ga oijmiamon. Ve nakinman ijia tavan fu kekome ijia sanaga nakinman iji fu iraseme vakon ijeg e no karaunuokfuon iji fu ijeg ruak. Regavo noiji no ise nuvuon ijefuon nakinman ijia karin. Regavo non aoikuai juvo ijia E Bomana nuvuon ijar nakinman no karijo ijia unam iviamkor no afurvene ma karivakfuon iji amarme no karaunuin.
LUK 1:80 Jon fun ofrene e darokin renma ijia unam fuon fu God ma vierafeno iji fuk bomana rene darokin ren. Ijegreare fu ai moikum namo ijia fine una e Isrerko ijia anerene Godon vuak ma iji kuardiame oin.
LUK 2:1 Areme tavan iji e Ogastas fu e bomana renma ijia fu kiamga bu moik kafokafo iji e Romko bu samuagdiavo ijia e dame vain.
LUK 2:2 Regavo tavan iji bu e damoinva ijia e Kuirinias fu e Siriakobuon e bomana ren.
LUK 2:3 Ijefuon e uruvana bu mai buon bu nafediainva ijia va ifbuon vajiaga bu isoikuai vain.
LUK 2:4 Ijefuon e mamkanuk e daoijo iji bu usem Josof kua, Aiji a e Devidon uifarif be ijefuon ni una va Betriem ar bu sat on Devid nafenva ijia if on isoimne kuain. Ijefuon Josof fun bara Meri kaifuon iji afeme Nasaret Gareri guf iji areme una Betriem Judia guf ijia vain. Regavo bara Meri e Josof fu abekno kuainva iji fun fudien.
LUK 2:6 Regavo bu vek Betriem karinva ijia am fu nafekfuon tavan iji fun ruain.
LUK 2:7 Bu ijia vain gavo ar bu naoikfuon iji fuka ba aresren ijefuon bu kiavga bu una mabuon ar ijia vain. Ijegreare rad bara Meri fun am farifuon amur iji nafene abe ugon ijia anume abe mavua guf iji bu maf-kau duok vajiavo ijia unain.
LUK 2:8 Rega tavan ijia e maf-sif samuagdiavo iji buk bu ar ijia naki maf-sif iji bu kege fak kirakuriainva iji samuagdiaoij.
LUK 2:9 Bu ijegreoijo ijia E Bomana ijefuon anera be fu bu oijo ijia ruakoga E Bomana ijefuon sanainma iji fu ijia sanama buka bomana juin.
LUK 2:10 Bu ijeg juvga anera iji fu uri kia, Jab juk igi na ruainva iji na joifuon vuak ma iji abe ruain. Regavo e uruvana bu vuak maigi faikva buka oimarek.
LUK 2:11 Ijefuon ivia e Devidon mai ijia e iji e karauniakfuon iji bun nafen revo e iji fu E Bomana Kurais.
LUK 2:12 Regavo ja izeg fu game ma vierafekfuon iji ijeg am iji bu abe ugon ijia anume abe mavua bu maf-kau duok vajiavo ijia unainva iji ja gakno kiain.
LUK 2:13 Anera iji fu vuak ijeg kuardiame barekoga migegare bu gak anera ma uruvana bu Godon dua oimarvo iji uruknum varur ijia ari roka bu giain.
LUK 2:14 Regavo anera iji bu dua be ijeg roin, No God e iji kaf gufia fino iji abe aroiv gavo God fu efuon iji fu oimardiamo iji ifejdiame samuagdiaga bu afuim kariok.
LUK 2:15 Ijegreare Godon anera iji bun areme una varur gufia ajie vakoga e iji maf-sif samuagdiavo iji bu una bui kuai, Ruano va Betriem usem ire iji renma E Bomana fu kuarduinma iji gavno kuain.
LUK 2:16 Bu ijeg kuaime bun migegare vake Meri ko Josof biediame gak am iji fu mavua bu maf-kau duok vajiavo ijia nam. Fu ijia namga bu game urine am ijefuon vuak iji Godon anera fu kuardiainma iji Meri ko Josof kuardiame uri e uruvana Betriem karinva iji kuardiain.
LUK 2:18 Ijegreare e uruvana bu vuak iji faiva buka oiserdiain revo Meri fuk uri ire uruvana iji renma iji fum oifuon ijia vierafen.
LUK 2:20 Rega e iji maf-sif samuagdiavo iji bun vuak irerag Godon anera bu kuardiako bu faivknum giainva ijefuon dua oimarvo iji uruknum God aroime if fuon abe ajieknum bun una vain. Ire fok bu faiknum giainva iji anera ijieb kuardiainva ijin.
LUK 2:21 Ijegreare vuik besum barekoga bu am iji abe vajai surif fuon iji kana ufume anf abeden. Bun ijegrene uri if fuon iji fuba nafeko ijia Godon anera iji bu ime kua Jesuno kuainva ijin in.
LUK 2:22 Areme Josof ko Meri bun tavan buon rokga bun e Mosison akaij iji fu kuainma ijeg bun ire fok reoine baren. Ijegreare bun uri am iji afeme abe E Bomana God makuai Jerusarem vain.
LUK 2:23 Regavo iji fun buk akaij ijia kuai, Am farif amur ja nafekva iji kege E Bomana God vajafno kuainma ijefuon bun ijeg ren.
LUK 2:24 Regavo madu bu vainva iji bu E Bomana ijefuon akai fu kuainma ijeg bu um nokarok (2) kege isuf barokuai vain.
LUK 2:25 Regavo ar Jerusarem ijia eof be if fuon Simion fu ijia fin. Fu e mukor ga fu Godon vuak mukor vierafeknum Godon unam ma ijia jamon. Regavo madu fuka e iji God fu kua fu e Isrerko karaunia ruakno kuainma iji samuame fino ijin. Regavo Godon Kaven Akai iji fu fusik oinon.
LUK 2:26 Ijefuon Godon Kaven fu kua, Aiji a e iji God fu kuaga fu e Isrerko iji karauniak ruakno kuainma a iji game son guakno kuain.
LUK 2:27 Godon Kaven ijar Simion afeme sos ijia arume vakoga Jesuon eofijaf iji bun Jesu afeme izeg Godon Akai iji fu kuainma ijegrekuai ijia aru vain.
LUK 2:28 Simion fu uri imut fuon ijia am iji dabeme abe God oimardame ijeg kuardai, E Bomana na guakva iji na oimarknum guaken. Ijefuon maiji nan e iji a kie fu e moikazan igia oinva iji karauniakfuon iji a kie na gakno kienma iji nan gain. Regavo fur e Jius bakin ijiebuon sanainma ijin ga fu ruainma iji fur e Isrerkobuon if iji dab bomana rekno kuain.
LUK 2:33 Jesuon asoij ijiga asiefuon bu vuak irerag fok Simion fu am ijefuon kuaimon bu iji faiva buka oiserdiain.
LUK 2:34 E Simion fu daro miame uri asiefuon Meri kua, Am igi God fu kuamga fu ruainma ijin revo fur e Isrerko iji kege atasek. Ijefuon maiji fun oibuon bu vierafejo ijin kam atasega e roin bu fu abega fu bu karauniakfuon. Regavo roin bu fu uzavo iji bu koikbuon kege vajai fian manamik. Regavo fur Godon anf igeg rega e uruvana bu fuisina kuaikfuon.
LUK 2:35 Rega fur ise irerag buon bu isuar sauime vierafeoijo iji kege e uruvana ijiebuon nifak ijia samafrekfuon. Regavo rad oion bu kunaime jafega a oifian abekno kuain.
LUK 2:36 Regavo barak Godon vuak vierafene kuaimon be bara Ana fu e Fanveron kabaij ga fu e Asan agan be. Fu baru fuon ijek juaivasia imut roin ga nikit nokarok (7) ijeg fine roke baru fuon fu guain. Bara iji fu baru fuon guakoga rad fu fi ruainma iji fu juaivasia uruvana eiti fo (84) barko fu barasren. Fu Godon ar bu ijia arume sirimamejo iji fuba aren. Regavo fu nakik mazak fu duok karoknum Godon sirimamenon.
LUK 2:38 Areme Simion fu Meri ko Josof vuak kuardiamo ijia bara Ana fuk tavan besum ijia kekome Godon oimaren. Rega fu uri e uruvana Jerusarem ijia karine e iji God fu kuaga fu bu karauniakafa kuainma iji samuavo iji kuardiame kia, E iji no karaunuokfuon iji fun ruainmano kiain.
LUK 2:39 Areme Josof ko Meri bun E Bomana Godon akai fu kuainma ijeg bu ire fok reoine barme bun una ai Nasaret ar Gareri guf ijia vain.
LUK 2:40 Ijegrene am iji fun Godon daro ijekma bomanare revo fuon vierafenma iji fuka ma bomana rekoga Godon ma rediamon iji fun abe fu main.
LUK 2:41 Juaivasia besubesum guf ijia Jesuon eofijaf bu Jerusarem ijia iro Fasova iji ijo. Regavo iro iji bu ijo ijefuon maiji bu saifarif iji bu ar Ijift ijia vajai fian abeknum e ijiebuon ikreoijo ijia God fu karauniainma iji vierafejo. Ijefuon Jesu fu juaivasia tuer (12) ijeg barekoga eofijaf bu una iro iji ikuai vain.
LUK 2:43 Bu va iro iji ine barme e fok bun una ar buon ijia vako Jesu fu Jerusarem ijia fin. Regavo eofijaf bu Jesu fu vek Jerusarem ijia fiko bu ruainva iji buba vierafen. Bu vierafero kafu fu e uruvana ijiebuon kafar ijia oinoro naki besum barekoga bu uri ebuon ga kaifijaf bu oijo ijia fu nisain.
LUK 2:45 Bu nisaimoga fu bakiga bu nisaime una Jerusarem vain. Ijegreare tavan nokbek (3) barko ijia bu vaga fu Godon ar ijia arume Jius e mamkanuk ijiena ijia fine vuak bu kuaivo iji faiknum duna kafokafo kuardiam.
LUK 2:47 Rega e uruvana ijia karinva bu vuak fuon ma iji fu vierafeknum kuaimon iji faiva buka oiseradiain. Rega eofijaf buk fu gavga buka oiserdiain. Ijefuon asiefuon fu uri kua, Farinu a irerafuon ijegreko no a nisaime oko noka oifiaduinmano kuain.
LUK 2:49 Bu ijeg kuardavga Jesu fu uri kia, Ja irerafuon na nisaidieoij? Naiji na asoinun ijefuon ar ijia ik fuon rekno kuainva iji jabe vierafenvano kiain? Jesu fu vuak ijeg eofijaf kuardiagavo eofijaf bu vuak fuon iji buba mukoi faime vierafen.
LUK 2:51 Rega Jesu fun uri una eofijaf ijiena Nasaret ijia kekome ire uruvana bu fu kuardavo iji igiain. Regavo Meri fu irerag uruvana Jerusarem ijia renma iji tavan uruvana fum oifuon ijia vierafen.
LUK 2:52 Regavo Jesu fu ofrenma iji fu fuon mukoi vierafeno ijekma ofren revo ire uruvana fu reoinma iji fu God abevo ema iji bu oimardiakfuon ijia reoin.
LUK 3:1 Juaivasia fiftin (15) abenma ijia e Taibirias fu Gaman bomana ren. Regavo tavan besum ijia e Fontias Fairet ijar e Judiabuon Gaman rekoga Erod fu e Gareriko samuagdiakoga uviaifuon Firif fu ar Ituria ko Trakonaitis iji samuagdiain. Regavo Risanias fu e Abirinko samuagdiain.
LUK 3:2 Regavo Anas ko Kaiafas bu e Godon isuf baroijo ijiebuon e mamkanuk renva ijia e Zekaraian farif Jon fuk fu tavan besum ijia ai moikum namo ijia figa God fu Jon vuak kuardain.
LUK 3:3 Ijefuon Jon fu kekome do Jodan ruvainma ijia oknum e iji vuak kuardiame kia, Ise jon arega una do ruaiga God fu ise jon giame arekno kiain.
LUK 3:4 Regavo vuak iji Jon fu ijeg kuainma iji fun e Asaia Godon vuak vierafene kuaimon ijar buk akaij ijia isoin. Fu isoime kuai, Ebe fu ai moikum namo ijia fine kume, E Bomana ijefuon unam iji amardake fu ijia rokno kumen. Regavo ar amaramar iji nika amarega bu una ajie ruaf revo madu uruor ga nafar iji nika amarega bu una besum arir ref. Regavo unam giekin iji nika kara asume arir amarega unam ise iji amarigia amaref. Ijegrekin e iji bu God e iji fu kuaga fu e fok karauniakafa roko iji bu mukoi game vierafefno kumen.
LUK 3:7 Ijefuon e uruvana bu Jonon roga are fur do ruardiakafa bu iji ruain. Bu rokga Jon fu uri kia, E ise guri ka tabar igegreoijo gurie ja ise jon jaka ba aren. Ja vierafero na ja do ruardiaga God fu e ise rejo iji fu kege arafiriakfuon iji jan amasuainvaro ja ijeg vierafek.
LUK 3:8 Amur nika va unam ma ijesugin reoga e fok bu giame vierafero jan ise jon ja kegoijo iji jan arenvaro. Regavo jab kuaik noiji sainuvuon Eburamon uifarifdo God fuba nuigafuokro ijeg jab kuaik. Regavo igia faif. Jaba ise jon arekva God fu e darokido fu mun guri kege una e Eburamon afijaf amardiaga bur ar jon abekno kiain.
LUK 3:9 Jon fu ijeg kuardiame fun uri vuak be ijeg bijame kuardiain. Fu kia, E be fu mua uikin be abe in anej ijia samuain. Fun samuaido in iji bu sunin ba mukoi kirakma fu gireg gamia um mian jaken.
LUK 3:10 Jon fu vuak ijeg kuardiamga e uruvana bu uri kua, Ijefuon a vierafega no irerag abekno kuain?
LUK 3:11 Bu ijeg kuavga Jon fu una kia, E iji erar set nokarok (2) naoigakma ni be abe e be erar set bakin iji ma. Regavo erar fu duok ijo iji uruvanakma fuk nin duok fuon e roin ikvajiamne kiain.
LUK 3:12 Regavo e takes abeoijo roin bu do ruaikuai ruainvado bu uri Jon kua, E nijaidiamon revo noiji no irerag rekno kuain?
LUK 3:13 Bu ijeg kuavga Jon fu una kia, Ja takes abeokva jab mon kafo miji kareme roin joi karekno kiain.
LUK 3:14 Regavo madu e bijaivo roin bu uri Jon kua, Regavo noiji no izegrekno kuain? Bu ijeg kuavga fu una roin kia, Ja e kiaga bu mon vajiavo iji jab biesiaga bu mon uruvana vajiaga ja kafo joi kareknum vo jab una e roin vajiak. Regavo madu jab ik jon ja rene mon abejo ijefuon kuaime ziekno kiain.
LUK 3:15 Jon fu e uruvana ijeg kuardiamga bu vierafero Jon kafu e iji God fu imut bijame kuamga fu ruakro kuainma ijinro bu ijeg vierafen.
LUK 3:16 Regavo Jon fu kia, Naiji naim e ukakbe ijefuon na do ijia ja ruardiakfuon. Regavo e iji ka ma e darokin iji fu rad rok. Revo naiji na ik fuon fu rekreno iji rekva naka ba aresren. Ijefuon e ijar Godon Kaven iji mian igeg naino iji kege oijon ijia uniafdiak.
LUK 3:17 Regavo madu igia faif. Kof iji bu dis ijia useme do jia abesga sunuat iji fu una azan ijia ajiega bu kege usiakorevo. Rega ma iji bu dis dibuor ijia ariga bu karev. Unam besum ijeg e iji rad rokon iji fu ruakma fur e uruvana ijiebuon ise bu reoijo ijia giaknum ke atasek. Fu ijegrene e ma reoijo iji fu kege ar fuon ma ijia uniaga ise iji fu kege ar mian iji ijia naine vako ijia jaga buka vajai fian abekno kiain.
LUK 3:18 Jon fu ijeg kuardiame uri vuak ma iji kafokafo ijia e uruvana soisoigin kuardiain. Fu ijegrenki bu unam isema bu karioijo iji buka arega una oi karoikafa fu ijeg ren.
LUK 3:19 Ijegreare fu uri e Erodon izeg ise iji fu renma ijefuon vuak fuisina kuain. Ijefuon maiji Erod fu uviaifuon ijefuon bara Erodias aben revo madu fuka unam ise uruvana kafo ren.
LUK 3:20 Erod fu amur ijegren ga rad fu madu una kiamga bu Jon dab dibur unainva ijar fuka ma iseren.
LUK 3:21 Ijegrene e uruvana bun do ruaime barekoga Jesu fuk do ruain. Regavo fu vek sirimameno ijia varur gufia vana fu irame vakoga Godon Kaven ijar um guaf igeg arime Jesuon ruain. Areme God fun varur gufia kume, Aiji a Farinun na oijmavo na a gavo naka bomana oimadienmano kumen.
LUK 3:23 Areme Jesu fu ofrene vake juaivasia teti (30) ijeg abega fu ijia anerene ik fuon iji ren. Regavo igi Jesuon saifarif iji bu Adamon uifarif ijia anere ruainva ijin. Regavo e uruvana bu vierafe Jesu fu Josofon farif ga Josof fu e Erin farif ga Eri fu e Mataton farif ga Matat fu e Rivaion farif. Regavo Rivai fu e Merkin farif ga e Merki fu Janain farif ga Janai fu e Josofon farif ga Josof fu e Mataiason farif ga e Mataias fu e Emoson farif ga e Emos fu e Neamon farif ga Neam fu e Esrin farif ga e Esri fu e Nagain farif. Rega e Nagai fu e Maton farif ga e Mat fu e Mataiason farif ga e Mataias fu e Semeinon farif ga e Semein fu e Josekon farif ga e Josek fu e Jodan farif ga e Joda fu e Joananon farif ga e Joanan fu e Resan farif. Rega Resa fu e Zerubaberon farif ga e Zerubaber fu e Seatieron farif ga e Seatier fu e Nerin farif ga e Neri fu e Merkin farif ga e Merki fu e Adin farif ga e Adi fu e Kosamon farif ga e Kosam fu e Ermadamon farif ga e Ermadam fu e Eron farif. Regavo Er fu e Josuan farif ga e Josua fu e Eriesan farif ga e Eriesa fu e Jorimon farif ga e Jorim fu e Mataton farif ga e Matat fu e Rivain farif ga e Rivai fu e Simionon farif ga e Simion fu e Judan farif ga e Juda fu e Josofon farif ga e Josof fu e Jonamon farif. Regavo e Jonam fu e Eriakimon farif ga e Eriakim fu e Merian farif ga e Meria fu e Menan farif ga e Mena fu e Matatan farif ga e Matata fu e Netanon farif ga e Netan fu e Devidon farif. Regavo e Devid fu e Jesin farif ga e Jesi fu e Obedon farif ga e Obed fu e Boazon farif ga e Boaz fu e Sarmonon farif ga e Sarmon fu e Nasonon farif ga e Nason fu e Aminadabon farif ga e Aminadab fu e Adminon farif ga fu e Anin farif ga e Ani fu e Esronon farif. Rega e Esron fu e Ferezon farif ga e Ferez fu e Judan farif ga e Juda fu e Jekafon farif ga e Jekaf fu e Aisekon farif ga e Aisek fu e Eburamon farif ga e Eburam fu e Teran farif ga e Tera fu e Neoron farif ga e Neor fu e Serugon farif ga e Serug fu e Reun farif ga e Reu fu e Feregon farif ga e Fereg fu e Eban farif. Regavo e Eba fu e Seran farif ga e Sera fu e Keinanon farif ga e Keinan fu e Afaksadon farif ga Afaksad fu e Semon farif ga e Sem fu e Noan farif ga e Noa fu e Remekon farif ga e Remek fu e Metusaran farif. Rega e Metusara fu e Enokon farif ga e Enok fu e Jaredon farif ga e Jared fu e Marareron farif ga e Mararer fu e Keinanon farif ga e Keinan fu e Inoson farif. Regavo e Inos fu e Seton farif ga e Set fu e Adamon farif ga e Adam fu Godon farif ijin. Ijefuon e agan bu ijeg uinvene ruain.
LUK 4:1 Tavan iji Jon fu Jodan do ijia Jesu do ruardame barekoga Godon Kaven ijar oifuon ijia arime raren. Rega Kaven Akai iji fun Jesu dab ninarume fun afeme ai moikum namo ijia vakoga Setan fu naki foti (40) ijeg Jesu biesuaoin. Regavo tavan iji fu oinma ijia fuka duok kafo ba ioin. Fu duok ba ioko fun naki foti (40) ijeg barenma buin ijia fuka vasia mukoi guain.
LUK 4:3 Fu vasia mukoi guainma ijia Setan fu ijia kekome Jesu kua, Aka ma Godon Fariga ni mun gari kuaga fu una duok rene kuain.
LUK 4:4 Fu ijeg kuardain gavo Jesu fu una roin kua, Godon buk akai bu isoinva ijia fu kuai, Barubara buba tavan bog duok ijesugin iok gavo bum Godon vuak ijesugin vierafene rekno kuain.
LUK 4:5 Ijegreare Setan fun uri Jesu afeme nafar bomana be manino buin ijia ajie vain. Fu ijia ajie manine ar iror fok e mamkanuk kafokafo bu samuagdiavo iji nijaiknum ga ire uruvana nijain.
LUK 4:6 Areme fun uri Jesu kua, Nar ire nun uruvana a giainma iji kege a vajak. Ijefuon maiji ire uruvana iji nar daro nun ijia samuagdiavo ijefuon nar koiknun kege e be era nar vierafekva iji vajak.
LUK 4:7 Ijefuon a na ato same sirimamekma na ire fok na kuaga ar samuagdiakno kuain.
LUK 4:8 Fu ijeg kuardamga Jesu fu una roin kua, Usuibe buk akai bu isoinva ijia God fu kuai, Janika E Bomana God jon ijesugin fuon ato same sirimameknum ga ik fuon reofno kuain.
LUK 4:9 Areme Setan fun madu Jesu afeme va Jerusarem Godon ar bomana bu sainva azan ijia unain. Fu ijia ajie manikoga Setan fu uri kua, Aka ma Godon Farikma ni ijia furiko moik gamia akoze.
LUK 4:10 Ijefuon maiji usuibe buk akai bu isoinva ijia God fu kuai, Godri anera fuon uruvana kiaga bur a samuagdak. Regavo a furik akozekman bur dabe ari vake moikazan ijia unakva aba arime oi kananamiken. Regavo madu diak on iji aba kege nizukdiakno kuain.
LUK 4:12 Rega Jesu fu uri Setan kua, Usuibe buk akai bu isoinva ijia God fu kuai, Ab God E Bomana on iji bisuamne kuain.
LUK 4:13 Setan fu ijeg Jesu bisuamoine barme tavan ukakbe fun Jesu areme vain.
LUK 4:14 Ijegreare Jesu fu una Gareri guf iji fu ruainma iji fun Kaven Akai ijar dab ninarumga fu daro abe oknum ik fuon ren. Fu kekome mai besubesum ijia E Jiusbuon ar bu afuime vuak kuaivo ijia arume vuak nijaidiamoin. Fu ijegreogame e uruvana bu vuak fuon iji faime uri fu dab aroin.
LUK 4:16 Areme Jesu fun una madu Nasaret ar iji bu fu nafenva ijia vain. Regavo tavan Sabat (Satade) iji e Jius bu isuar karijo ijia Jesu fun izeg fu tavan uruvana reoino ijeg fun ar bu afuime vuak kuaivo ijia aru vain. Fu ijia arume va manine kiamga bun Asaia e Godon vuak vierafene kuaimon ijefuon buk ijin abe main. Bu abe mavga fu kafarbe irame vuak be bu ijeg isoinva iji dain.
LUK 4:18 Godon Kaven iji fun na nirokdien ijefuon fun Godri na imut bijieme kie, Ni vuak nun ma iji abe va e iji isema karioijo iji kuardiamne. Regavo madu ni va e iji dibur karijo ijiga e ni zuriaigin iji ga madu e iji eraneb bu e ise ijieb samuagdiavo ijin karauniamne.
LUK 4:19 Regavo madu ni e uruvana kuardiame kia, Tavan iji God E Bomana fu ja ma rediakfuon iji fun igijar ruainmano kiamne kuain.
LUK 4:20 Jesu fu buk iji dame barme fun abe una e buk samuamo iji mame fun una ari fin. Fu una ari figa e uruvana ar ijia karinva iji buka uri uruvana Jesu nikajain.
LUK 4:21 Ijegreare Jesu fun anerene uri vuak kuardiame kia, Buk kafar igi na dava ja fainva iji ivia tavan igi fun ijekma aresrenmano kiain.
LUK 4:22 E uruvana bun isuar igia karine vuak fuon ma iji fu ir fuon ijia fu kuaimon iji faiva buka oiserdiain. Ijefuon e iji bu uri kuai, E guri fu Josofon farif gavo fu izeg vuak ijekin iji kuaimno kuain.
LUK 4:23 Bu ijeg kuaivga Jesu fu una kia, Na giaga ja vuak be ijeg kuaikuai vierafen. Ja kuai, A e karauniamo ijefuon ni koikon oi keunanamimne. Regavo ni izeg a ar Kafoniam ijia ire iji a reoina no fainva ijeg una ar on ma igia rega no game a ma vierafejno kiekuai vierafenvano kuain.
LUK 4:24 Regavo na igi kuardiakrejo ni faif. E Godon vuak vierafene kuaivo iji e aiko buon ma iji bu giame ijia oimardiavo bakin.
LUK 4:25 Regavo igia faif. Tavan iji e Eraija fu ar Isrer finma ijia bara amun uruvana bu ijia oin. Regavo tavan ijia juaivasia nokbek (3)ga asam sibank ijeg tavan fuba dakoga fuka tavai maren. Fun tavai marme ire ikva uruvana fuka saire barekoga vasia kekome ar iror ijia ruain.
LUK 4:26 Rega bara amun uruvana buka vasia kaniain gavo God fuba Eraija kua, Va bara amun uruvana ifejdiamne kuain. Regavo fum kua, Va ar Zarefet Saidon guf ijia bara amun iji fino ijin ifejdamne kuain.
LUK 4:27 Regavo madu una Eraisa e Godon vuak vierafene kuaimon ijefuon tavan ijia e uruvana ar Isrer ijia karinva iji bu kasi refrosi kuavo iji aben. Rega Eraisa fu Godon if ijia e kafo ba karauniain gavo fum kuamga fu e Neman ai Siriako iji fuonkua keunainmano kiain.
LUK 4:28 Jesu fu ijeg kuardiamga e uruvana bu Jiusbuon ar iji bu afuivo ijia aru karinva iji bu vuak iji faiva buka deajidiain.
LUK 4:29 Bu deajidiamga bu uri Jesu kunaime dab mai iji bu karinva makaf ijia useme dab uruor ijia abesekuai reoin.
LUK 4:30 Bu ijegreoijga Jesu fu e uruvana ijiebuon kafar ijia uniakome vakga bu ijia aren.
LUK 4:31 Areme Jesu fun vake ar Kafoniam moik Gareri guf ijia kekoin. Fu ijia kekome tavan Sabat (Satade) iji bu isuar karine Godon sirimamejo ijia e uruvana vuak nijaidiain.
LUK 4:32 Jesu fu ijia vuak nijaidiamga e uruvana bu vuak fuon fu kuaimon iji faiva buka oiserdiain. Ijefuon maiji vuak fuon iji fuka darokin.
LUK 4:33 Regavo e Jiusbuon ar iji bu afuivo guf ijia e be fu kaven ise ijar dab ninaruoino iji fu ijia fin. Ijefuon fu uri uruvana igia Jesu biumame kume, Jesu e Nasaretko gare a nuvuifuon a izeg vierafen? A igi a ruainma akafu no kege arafiruokafa ruain. Na vierafega aiji a Godon e Akaij ijino kumen.
LUK 4:35 Fu ijeg kumega Jesu fu uri kaven ise iji kuriaireme kua, Vuak iji a kuaimon iji arega i bijume keko ruvakne kuain. Fu ijeg kuamga kaven ise iji fu uri e iji dab e uruvana ijiebuon nifak ijia akozme fuba una ire ise kafo fuon ren gavo fum kekome vain.
LUK 4:36 Kaven ise iji fu kekome vakga e ijia karinva bu iji gava buka oiserdiamga bu una bui ganamin. Bu bui ganamiknum kuai, Vuak iji fuka sibe darokido e guri fu darokma kaven ise iji kiaga bu usem vakno kuain.
LUK 4:37 Bu ijeg kuaime uri Jesu izeg fu renma ijefuon vuak iji abe kuaime ar iror ijia oin.
LUK 4:38 Bu ijegrekoga Jesu fu ar iji areme keko Saimonon ar ijia vain. Regavo Saimonon bara ijefuon asie iji fu vajai vuat bomana urino ijefuon bu Jesu kuaga fu ifejdakafa bu useme kuain. Bu kuardavga Jesu fu va fu namo samaij ijia manine uri vajai fuon vuaturimo iji kuain. Jesu fu adam iji kuamga fu bara iji areme vakga fu maimga fun uri ire vajiaknum samuagdiain.
LUK 4:40 Ijegreare rad tavan koko ijia e roin bu kaifijaf adam kafokafo abenva iji aferdiame Jesuon rokga fu e besubesum imut nigen namdiaknum e uruvana karauniain.
LUK 4:41 Fu ijegreknum madu kaven ise uruvana bu e nirokiavo iji kuriaireme kiamga bu e iji areme usem vain. Bu usem vaknum biumame kume, Aiji anka ma Godon Farifno kumen. Rega Jesu fuka kuriaireme kiamga buba vuak kuain. Ijefuon maiji bun vierafega Jesu fuka ma e iji God kuamga fu ari moikigia e fok karauniakafa ruainma ijin.
LUK 4:42 Areme tavan ik irasemo ijia Jesu fun uri mai ijin areme ari ai moikum namo ijia vain. Fu ijia vakga e uruvana bu uri anerene fu nisaimoine ja bieme nikajain. Ijefuon maiji bu vierafero fu una bu uniame vakro buka bijuknum nikajaoin.
LUK 4:43 Bu ijeg nikajaoijga fu uri kia, Na vierafega naka mai roin ijia Godon vuak ma iji izeg tavan rad fu koikfuon efuon iji samuagdiakfuon ijin abe kuardiak. Ijefuon ma iji God fu ijefuon kiemga na ruainvano kiain.
LUK 4:44 Fu ijeg kuardiame uri mai uruvana guf ijia oknum e Jiusbuon ar besubesum bu afuivo ijia vuak fuon ma iji kuardiaoin.
LUK 5:1 Areme tavan be Jesu fu do Genesaret daturaiko nafuinma irif ijia maniko e uruvana bu biom fu dab kirafirime ireme Godon vuak ma iji faiv.
LUK 5:2 Bu ijia ireme faivo ijia fu giaga e kijum arafiriavo nokarok (2) bu sisim buon kege do irif ijia name ugie buon kareme do sov.
LUK 5:3 Ijefuon Jesu fun e Saimonon sisim ijia ajieme kuamga fu abe biom saof azan ijia abedeko fu ijia fine e uruvana vuak nijaidiain.
LUK 5:4 Fu vuak kuardia barme fun uri Saimon kua, Sisim on abe biom saof uf garia abedeme ugie jon kege do ijia oine kijum kafo karafno kuain.
LUK 5:5 Rega Saimon fun uri kua, E Bomana no naki arafirin gavo kijum kafo noka ba karain. Regavo a kiemo ijefuon na ugie abe una okno kuain.
LUK 5:6 Fu ijeg kuardame bun uri ugie buon kege oine kijum uruvana karavga ugie buon fuka bujasekafa ren.
LUK 5:7 Ijefuon bu uri kaifijaf roin sisim be ijia karinva iji kumejga bu ro ifejdiain. Bu ifejdiame kijum ijin kareme sisim nokarok (2) ijia navga fuka afirene gama arikrena bu kege una irif ijia ruain.
LUK 5:8 Jesu fu ijegrega Saimon Fita fu iji game ari Jesu ato same kua, E Bomana naiji na e ise reoijo ijefuon gareg vakne kuain.
LUK 5:9 Jesu fu ijegrega Saimon Fita ga e iji bu kijum mamkanuk uruvana iji bu karainva ijin giava buka bomana oij iserdiain.
LUK 5:10 Rega Saimon Fita ga e roin Zebedin afijaf Jeims ko Jon buk buka oij iserdiain. Ijefuon Jesu fu uri Saimon kua, A jumo arega ni iviakmaigia una gafeg a kijum igi a karainma ijeg e aferdiakno kuain.
LUK 5:11 Ijefuon bu sisim buon iji dakara ajie irif ijia abedeme ire uruvana ijia areme uri Jesu jame vain.
LUK 5:12 Tavan be Jesu fu mai be ijia fino ijia e be adam kasi igekin bu kua refrosi kuavo iji abenma ijar kekome Jesu fino ijia ruain. Fu keko Jesu game tua moik ijia dijeme uri Jesu soisoigin kua, E Bomana a vierafega a oimarkma ni vajai nun igi amardiega fu una madiemne kuain.
LUK 5:13 Fu ijeg kuardamga Jesu fu uri imut akozme e iji kunaime kua, Na vierafega na amardakno kuain. Fu ijeg kuardako ijia kasi iji fuka baren.
LUK 5:14 Areme Jesu fun uri kua, Ab va e kafo irerag na on renva iji kuardiakgavo nin amur va e Godon isuf baroijo iji vajat on ijekma abe fu nijaimne. Ijegreare ni ire kafo kege e Mosison akaij iji fu kuainma ijeg una God isuf baroiga e bu ijia game vierafero adam on iji fun barenmaro bu ijeg vierafekno kuain.
LUK 5:15 Jesu fu ijegrekoga e uruvana bu uri vuak fuon dab mai ijia kuaime bomana re vain. Ijefuon e uruvana bu vuak fuon iji faikuai rokga fu adam ise kafokafo bu abenva iji karauniain.
LUK 5:16 Regavo tavan roin fu isuar areme va ar e bakin ijia fine sirimamen.
LUK 5:17 Tavan be Jesu fu manine e vuak kuardiamo ijia e Ferisis roin ga e vuak akai nijaidiavo roin bu ijia ruain. Regavo e iji ruainva iji bu ar Gareri ga Judia guf ga Jerusarem mai ijia ruainva iji bu ijia karin. Regavo Jesu fun Godon daro iji fu e adam abejo iji karauniakfuon iji fuka fuon ruain.
LUK 5:18 Regavo e kafo bu e vajai garenma iji abe suf ijia anume abe fata ijia uname ruain. Bu e ijin abe Jesu manino uinak ijia abedevga fu amardakuai bu ijeg vierafen.
LUK 5:19 Regavo fuka e uruvana zarainva ijefuon bu unam iji bu afeme aru vakfuon iji fuka bakin. Ijefuon bu abe gieme ajie ar azan kuf ijia umaij ijia bujame abe kajek ijia kira dab abesva fu Jesu manino uinak ijia ari nain.
LUK 5:20 Ijegreare Jesu fu buon izeg bu ma vierafejo iji giame uri e iji kua, Eko ise on iji nan giame arenvano kuain.
LUK 5:21 Rega e vuak akai nijaidiavo ijiga e Ferisis roin bu iji game uri bui kuai, E iji erar una Godon if iji dab buze im. Ema igi fu erar e kafobuo ise iji giame arekma bakin gavo fun God fuonkuano kuain.
LUK 5:22 Rega Jesu fu izeg bu vierafenva iji fun giain ijefuon fu uri kia, Ja irerafuon vuak kafokafo oijon ijia vierafejno kiain.
LUK 5:23 Fu ijeg kuardiame uri kia, Ja vierafega nabe e igi kuaga fu suf fuon kara tuame uri vaken? Regavo na kuak ise on iji nan game arenvano kuak.
LUK 5:24 Vuak nokarok (2) iji na izar e guri kuardaga ja ijia gieme ma vierafekfuon? Ja naba ma vierafejo ijefuon na nijaidiaga ja ijia game ma vierafek. Ja ijia vierafero Ema ijiebuon Farif igi na daro abedo na moikigia ebuon ise na giame arekro ja ijeg vierafekno kiain. Fu ijeg kuardiame fun uri e vajai garenma iji kua, Ni uri suf on iji kara tuame ar vakne kuain.
LUK 5:25 Fu ijegrega migegare e adagin iji namo iji fun uri suf fuon fu barie namo iji ke datome God oimarknum fun ar fuon ijia vain.
LUK 5:26 Fu ijegrega e uruvana buka bomana oiserdiamga bu uri juknum Godon oimarme kuai, Noka ivia ire sumakin iji gainvano kuain.
LUK 5:27 Ijegreare rad Jesu fu vagak e takes abeno be if fuon iji Rivai fu fine e ijiebuon takes abega fu bieme kua, Ni na jajiemne kuain.
LUK 5:28 Fu ijeg kuamga Rivai fun uri ire uruvana fu reno iji fun ijia areme uri Jesu ja vain.
LUK 5:29 Areme Rivai fu ar fuon ijia Jesuon ire kanafumga e takes abeoijo iji ga e roin bun ijia duok ikuai afuin.
LUK 5:30 Bu Jesuna duok ijga e Ferisis roin ga e vuak akai nijaidiavo roin buba oimaren ijefuon bu uri una e Jesuon vuak faivo iji kia, Jaiji ja irerafuon e iji takes abesvo ijiga e ise reoijo ijiena duok ijno kiain.
LUK 5:31 Bu ijeg kuardiavga Jesu fu uri kia, E iji buba adam abejo iji bu e adam giavo iji vierafejo bakin. Regavo bun e iji adam abejo ijieb bu e adam giavo iji vierafekno kiain.
LUK 5:32 Ijegvo na ruainva iji na e maturainva ijiebuon ruainva bakin. Regavo na e ise reoijo iji kiaga bu ise buon iji aregavo una oi karoime unam ma ijia kegokro na ijefuon ruainvano kiain.
LUK 5:33 Ijegreare e kafo bu uri Jesu kua, E Jonon vuak faivo iji bu duok karoknum ga sirimamejo. Regavo madu e iji e Ferisis ijiebuon vuak faivo iji buk bu ijeg rej. Rega eon bu ijeg buba rej gavo buka duok iknum ga do ijno kuain.
LUK 5:34 Bu ijeg kuardavga Jesu fu una vuak be ijeg bijame kuardiain. Fu kia, Tavan iji barubara bu sanamikuai duok ijo ijia e baru iji fu ijia fike bu e ruainva iji kia bu duok karome karine una oifiaigma vakva bakin. Regavo buka oimarknum karine besum duok ik. Bu duok ine barme son rad e iji fu bara iji afeme ar be vakma ijia buson oifian abe buifuon duok karok. Unam besum ijeg gavo e vuak nun faivo iji na vek igia buna oijo iji no besum oimarknum duok besum iken. Regavo tavan rad e ani nun iji bu na aferdieme kaniga na guakva ijia bu nuifuon oifian abe duok karokno kiain.
LUK 5:36 Jesu fu ijeg kuardiame una madu vuak be ijeg bijame kuardiain. Fu kia, E be fu erar ugon iviamkor be abe bujame una ugon usuikor ijekma sigukma bakin. Fu ijegrekma rad fuka iserekfuon. Ijefuon maiji ugon be fu usuikor ga be fu iviamkor ijefuon fuba marek.
LUK 5:37 Unam besum ijeg gavo fu erar vuain iviamkor iji abe una kamui usuikor iji bu fanuf surif ijia amarenva ijia usemo bakin. Regavo fu ijegrekma kamui usuikor iji fuka sisuikene bujaga vuain iviamkor iji fuka usek. Bu ijegrekva ire nokarok (2) iji buka iserek. Ijefuon vuain iviamkor iji buka kege una kamui iviamkor ijia usekin ire nokarok (2) iji buka marek.
LUK 5:39 Regavo ebe erar fu vuain usuikor iji ikma fuba una vuain iviamkor iji iken. Ijefuon maiji fu vierafero vuain usuikor ijefuon marien ijar fu mukor ro fu una vuain iviamkor mukor iji fuka uzakno kiain.
LUK 6:1 Tavan Sabat (Satade) be bu isuar karijo ijia Jesu fu juar bu vuit oinva ijia ura oin. Fu ijia urame okoga e vuak fuon faivo iji buk bu funa ijia ura oknum ire vuit sunin iji kafo turame imut tat ijia dakumume surif iji fuase oknum ioij.
LUK 6:2 Regavo e Ferisis roin bu giame uri kia, Ja irerafuon akai nuvuon abe tuaseme tavan Sabat (Satade) iji no isuar karijo ijia vuit sunin tuame ijno kiain.
LUK 6:3 Bu ijeg kiavga Jesu fu una roin kia, Ja buk akai kafar be ijia e Devid fu efuon ijiena bu vasiaordiavga bu kenva iji jabe dame gain?
LUK 6:4 Devid fu Godon ar iji bu sirimamejo ijia arume bred iji bu abe isuf baroijo ijin abe iga roin fu kege una efuon vajiama bu in. Regavo bred ijekin iji bu e iji Godon isuf baroijo ijieb buonkua ikfuon gavo e maikava buba ikno kiain.
LUK 6:5 Jesu fu ijeg kuardiame uri e Ferisis iji kia, Ema ijiebuon Farif igi naiji na tavan Sabat (Satade) iji isuar karijo ijefuon e Bomana ijin. Tavan Sabat (Satade) iji ja isuar karijo iji Jesu nar amaren. Ijefuon na aresredo nar tavan ijia e kiaga bu ire kafo rekva iji fun marek.
LUK 6:6 Areme tavan Sabat (Satade) be bu isuar karijo ijia Jesu fu una ar iji e Jius bu afuime vuak kuaivo ijia arume vuak nijaidiain. Regavo ar guf ijia e be imut abe kirainma fu ijia fin.
LUK 6:7 Rega e Ferisis iji abevo e vuak akai nijaidiavo iji buka Jesu nikaja are fu ise kafo rega bu ijefuon afeme kot rekuai reoin. Bu kuai are fu e be tavan iji bu isuar karijo ijia keunaga bu gakuai bu ijegarain.
LUK 6:8 Regavo Jesu irerag bu vierafejo iji fun giain ijefuon fu uri e iji imut maink iji abe kirainma iji kuai, Uri e uruvana ijiebuon nifak igia manine kuamga fu uri ijia manin.
LUK 6:9 Areme Jesu fun uri e Ferisis iji abevo e vuak akai nijaidiavo iji kia, Tavan Sabat (Satade) iji no isuar karijo ijefuon akaij iji fu kuainma ijia e ijekin iji no kege izeg rek? Nobe bu ifejdia vo no buon ise rek? Regavo madu noba kaniakgavo no bu karauniakno kiain?
LUK 6:10 Fu ijeg kuardiame uri e uruvana giaoine uri e iji kua, Imut on akozemne kuain. Jesu fu ijeg kuamga e iji fu uri Jesu fu kuainma ijeg ren. Fu ijegrega imut fuon fuka mukorigia main.
LUK 6:11 Rega e Ferisis ijiga e vuak akai nijaidiavo iji buka deajidiamga bu uri unam izeg bu Jesu kanakfuon ijin kuaime nisain.
LUK 6:12 Areme tavan ijia Jesu fu una uruor ijia ajieme sirimamekafa vain. Fun va uruor ijia kekome naki fu God sirimameko vake tavan irasen.
LUK 6:13 Fun tavan irasemga fu uri e vuak fuon faivo iji kumena bu rokga fu uri e tuer (12) kege kiama bu e afasor fuon ren.
LUK 6:14 Regavo e ijiebuon if iji Saimon (e iji Jesu fu una Fita kuainma) ijigam uviaifuon Edru ga Jeims ga Jon ga e Firif ga Batoromiu iji ken.
LUK 6:15 Regavo madu fu e Metiu ga Tomas ga Jeims e Arfiason farif ijigam Saimon (e iji fu e Romko ijieb fu samuakfuon iji fu uzamon e ijin).
LUK 6:16 Regavo madu Judas e Jeimson farif ijigam Judas Iskariot e iji fu rad Jesu abe una e ani fuon miakfuon ijin ken.
LUK 6:17 Areme Jesu fun e afasor iji fu kenma ijiena una arime roke uruor anej gumia usen. Rega e ma uruvana mai Jerusarem ga Judia guf ijia ruainva iji abevo e uruvana mai Taia ga Saidon saof irif ijia karijo iji bu ijia afuin.
LUK 6:18 Regavo e iji bu ruainva iji bu Jesur adam ni kafokafo iji bu abejo iji karauniaknum ga madu bu vuak fuon faikuai ruain. Revo e iji kaven ise ijieb ninarukiainva iji fu karauniamga bu una e ma ren.
LUK 6:19 Regavo e uruvana buka uri fu niriakuai vierafen ijefuon maiji daro fuon ijar e ijin abeko buka una madiain.
LUK 6:20 Fu ijegrejknum uri e vuak fuon faivo iji giaknum kia, E sinuom bakin iji jaka Godon oimaref. Ijefuon maiji Godri ja kedo fur una ja samuagdiak.
LUK 6:21 Regavo e iji ja vasiaordiavo iji jaka oimaref. Ijefuon maiji rad Godri duok uruvana vajiaga ja iken. Regavo e iji eraneb ja iviakma niraimoijo iji nika oimaref. Ijefuon maiji rad ja oimarme kiknum okfuon.
LUK 6:22 Regavo e iji ja bu eb jon deajin abe ga ja uzavo ga if jon kam isema ifdiavo ga ja kam buze ifdiaknum vuak joisina kuaivo iji nika oimaref. Ijefuon maiji ja Ema ijiebuon Farif igi na ma vierafejo ijefuon bu jon ijeg reken.
LUK 6:23 Ijefuon tavan iji bu ja kam ijegreokva nika oimarknum of. Ijefuon maiji ire ma iji ja karekfuon iji bu varur gufia naoiv. Bu ijegrejo iji ni vierafero iji bun saifarif ijieb e amur Godon vua vierafene kuaivo iji bur kam ijegrene ruain.
LUK 6:24 Regavo e iji ja sinuom zarainva iji jaka juf. Ijefuon maiji ire ma iji jan iviakma karev. Regavo ire iji bu barekva nabagain kafu irerag ijar jon rekfuon?
LUK 6:25 Regavo e iji ja iviakma duok uruvana ijo iji nika juf. Ijefuon maiji rad jaka vasiaordiaken. Regavo e iji ja e ba ifejdiakuai vierafejo ja kiknum ura oijo iji nika juf. Ijefuon maiji rad jaiji jaka oifian abeknum niraiken.
LUK 6:26 Rega e iji bu e uruvana ijieb ja kam arordiame vuak jon bu mukorigia kuaimoijo iji nika juf. Ijefuon maiji saifijaf ijieb e iji bu vuak kufuime e roin kuardiame ruainva ijiebuon vuak buisina ijeg kuain. Bu ijeg kuaime e iji Godon vuak ma iji abe ruainva iji buba igiain. Rega buka una e iji bu vuak kufui kuaimoinva iji igiain.
LUK 6:27 Jesu fu vuak ijin kuardiame barme uri kia, E iji erar vuak nun igi na kuardiavo iji faivo iji nika e ani jon iji oijmiaf. Regavo e iji bu jon deajir abejo iji nika una bu ma rediaf. Rega e iji eraneb bu jon isema rekva ni una buon oimaref. Revo eraneb bu ja kam ise ijia reoijo iji nika una buifuo sirimamef.
LUK 6:29 Rega erar adafak roin kanakma ni una roin abe maga fu kana. Regavo e kafob ugon jon ja azan savo iji kekva nin kiaga bu madu ugon jon ja rotit savo ijekma kef.
LUK 6:30 Regavo e kafob ire kafofuon ja kiakva nin irerag bu kiavo iji kege vajiaf. Regavo e kafob ire jon kafo kenva iji jab una roib ijefuon kiak.
LUK 6:31 Regavo irerag ja vierafe e kafo bu joifuon rejo iji nin jasik una roib ijeg ref.
LUK 6:32 Ja e iji bu ja oijmiavo ijesugin oijmiakva iji Godon nifak ijia fu ma bakin. Ijefuon maiji e iji ise reoijo iji buk bu e iji bu oijmiavo iji oijmiavo.
LUK 6:33 Regavo ja e iji bu ja mardiavo ijesugin mardiakva Godon nifak ijia fuka ma bakin. Ijefuon maiji e ise reoijo iji buk bu e iji bu mardiavo iji bu mardiav.
LUK 6:34 Regavo ja e roin mon vajiame rad una vef roin kekuai vierafejo iji fu Godon nifak ijia fuka ma bakin. Ijefuon maiji e ise reoijo iji bumadu bu ijeg e kafo mon vajiame una roib kekuai vierafejo.
LUK 6:35 Regavo nin e ani jon oijmiame bu mardiaga ire kafo ja buon vajiakva jab una roib kekuai vierafek. Ja ijegrekva Godri joifuon unam mukor iji jon rediak. Regavo ja kukma ijegreokva iji ja Asoijon varur gufia fino ijefuon afijaf igeg reken.
LUK 6:36 Ijefuon ni izeg Asoijon fu oijfuon ijia jon oifian abeno ijeg jak e kafobuon oifian abefno kiain.
LUK 6:37 Jesu fu ijeg kuardiame kia, Jab e kafobuon ise iji giame kuaik. Ja ijegrekva God fuba ise jon giame kiaken. Regavo ja e kafobuon ise giame arekva God fu ise jon fuk fu giame arekfuon.
LUK 6:38 Regavo ire jon kafo ja nainva iji kege e roin vajiakva God fu una ijefuon roib uruvana vajiaken. Ja ijegrekva God fu e suaikin ijefuon fu ifejdiame una biom ma uruvana vajiakfuon. God fu unam jon ma iji izeg ja e kafobuon reoijo ijia God fu giame una unam besum ijeg jon rekno kiain.
LUK 6:39 Jesu fu ijeg kuardiame vo una madu vuak be bijame kuardiain. Fu kia, E ni zuriaigin iji fuba uri e ni zuriaigin be afeme unam nijaiok. Regavo fu afeme vakma bu busik buka mako uraken.
LUK 6:40 Rega madu igia faif. E sikur reno be fuba uri e fu nijaimo iji asime ik fuon fu reno iji reken. Regavo fu irerag uruvana e fuon fu nijaimo fu nijainma iji mimatame keoino iji fu efuon fu nijainma igegrekno kiain.
LUK 6:41 Jesu fu ijeg kuardiame vo una madu kia, Ja irerafuon uviaijon ijefuon kafut ukakbe fu ni fuon ijia karino iji game kuagavo una kafut bomana iji fu ni on ijia karino iji aba gam?
LUK 6:42 A kafut iji fu vek ni on ijia karino iji a izeg una uviaion iji kua, Uviainu ro na ni kafut guraiji samdainma iji kedamno kuak. E guri ka i kufuikin gurie amur ni on ijia kafut bomana iji karino iji ke akoze fu marga ni ijar una kafut ukakbe iji fu uviaion ijefuon ni ijia karino iji game ke akoze. Regavo a on iji aba ke akozekma ab una uviaion ijefuon iji game kuaikno kiain.
LUK 6:43 Jesu fu ijeg kuardiame una madu vuak igi bijame kuardiain. Fu kia, In ma iji fu sunin ise iji kiramo bakin. Rega in ise iji fu sunin mukor kiramo bakin.
LUK 6:44 Regavo in besubesum bun sunin buon izeg bu kiravo ijia e bu giame vierafej. Regavo e bu duribat karekuai vierafekva bu va kajesan sunin iji karekva bakin. Regavo kof nubukva bu va sir iji nubukva bakin.
LUK 6:45 Ijegvo madu e ma iji fu ire ma iji fu oijfuon ijia vierafeno fu iji kuaimoin. Regavo e ise iji fu ire ise iji fu oijfuon ijia vierafene fu ijin kuaimoinon. Ijefuon vuak irerag itit fuon ijia fu kuaimon iji fu oijfuon ijia vierafenma fu ijin kuaimnon kiain.
LUK 6:46 Jesu fu ijeg kuardiame una kia, Ja irerafuon na kie E Bomanakono kieknum ga irerag na kuardiavo iji ja rejo bakin?
LUK 6:47 Regavo na e iji bu nun ruaknum vuak nun iji faime igiemo iji fu e izekin na ijin kuardiakrejo ni faif.
LUK 6:48 E iji fu mukor vierafeknum ar fuon iji munuag azan ijia sainma ijekin. Fu ijia samga do firame daro ijar kekome ar fuon bijamga fuba katin ga fuka gire manin. Ijefuon maiji fun amarigia vierafene sain.
LUK 6:49 Regavo e iji fu vuak nun faime vo fuba abe mimatamo iji fu e iji ba amarigia vierafene kudie fuon iji amarigia rume ijia ar sainma ijekin. Ijefuon do daro fu firame keko ar iji bijamga fuka migegare tuain. Fu unam ma ise ijia tua dijeme fuka bujame iserenmano kiain.
LUK 7:1 Areme Jesu fun ire uruvana e iji kuardiame barme fun una uri ar Kafoniam ijia vain.
LUK 7:2 Rega e Romkobuon e bomana ijefuon efuon ikreno be fu oijmamo iji fuka adam bomana abene fuka guakafa ijia fin.
LUK 7:3 Ijefuon e Romkobuon e bomana iji fu faik Jesu fu Kafoniam ruainma faime fu uri e Jius e mamkanuk roin ijin kia, Va Jesu kuaga fu ro enun ikreno igi amarega fu una maimno kiama bu vain.
LUK 7:4 E Jius ijiebuon e mamkanuk iji bun vake Jesu fino ijia usen. Bu useme soisoigin igia kua, E Romkobuon e bomana iji fuka e nuvuon iji oijmamo ga fuka fuonkua nuvuifuon ar iji e bu ijia afuime vuak kuaivo iji samduin. Ijefuon no vierafega a va fu ifejdakno kuain.
LUK 7:6 Ijefuon Jesu fun buna vake e bomana ijefuon ar iji samairenma ijia e bomana iji fun kaifijaf kiama bu Jesu kuakuai ruain. Bu ro useme Jesu kuai, No E bomana nuvuon iji fu kume naba aresredo ab ar nun igia ruak. Regavo madu na koiknun vuakva na maturainva bakin ijefuon nin vuak nijiega enun ikreno igi fu maimno kumen.
LUK 7:8 Regavo madu fu kume, Nak na enun mamkanuk ijiebuon rotit ijia ikrej. Rega madu na enun bijaivo iji roin kareva bu rotit nun ijia ikrej. Ijefuon na e be kua ro kuavo iji fu rok. Regavo na una madu be kua vakne kuavo iji fu vak. Regavo na madu enun ba mon fuon ikreno iji be kua ire igi rene kuavo iji fu reno kumen.
LUK 7:9 E iji vuak abe ruainva iji bu vuak ijeg Jesu kuardavga fu vuak iji faima fuka oiseren. Fu oiseremga fu una dakaroim e uruvana fu ja vako iji kia, Na ar Isrer guf igia e kafo bu e igi fu ma vierafenma ijekin naka ba giainvano kiain.
LUK 7:10 Fu ijeg kuardiako e iji vuak abe ruainva iji bun una va e Romkobuon e bomana ijefuon ar ijia useme gak e iji adam abenma iji fun una main.
LUK 7:11 Areme tavan ukakbe barko rad Jesu fun e vuak fuon faivo ijigam e uruvana roin ijiena uri mai Nein kuavo ijia vain.
LUK 7:12 Fu vake mai bomana iji bu karinva vien ijia kekoin. Fu ik ijia kekme ga bu e guainma iji abe useme mako rukuai rok. Rega e iji guainma iji fu bara amun be ijia fino ijefuon farifuon besum ijar. Ijefuon e uruvana mai bomana guf ijia karinva iji bu funa ijia usem rok.
LUK 7:13 Bu usem rokga Jesu fu bara amun iji gama fuka bomana oifiaimga fu uri kua, A niraimo iji aremne kuain.
LUK 7:14 Fu ijeg kuame fun va mavua iji bu e guainma iji abe ijia abesme roko iji kunaime e iji mavua iji abe roko iji bu arega ijia iren. Bu ijia irekoga Jesu fu uri kua, E nivek ige nar kuavno urine kuain.
LUK 7:15 Fu ijeg kuamga e iji guainma iji fu una uri fine vua kuaimga Jesu fu abe una asiefuon unafdain.
LUK 7:16 Areme e uruvana bu unam sumakin iji Jesu fu renma iji gava buka bomana oiserdiame ka dejufdiain. Ijefuon bu uri Godon bomana oimarme kuai. E Bomana iji Godon vuak vierafene kuaimon iji fun iga ruainmano kuain. Rega madu e roin bu uri kua, God fun e fuon igi karauniakafa ruainmano kuain.
LUK 7:17 Jesu fu unam sumakin iji rega e bu vuak iji dab e ar iror ijia karioinva ijia kuaime bomana re vain.
LUK 7:18 Areme e Jonon vuak faivo iji bun uri ire uruvana Jesu fu renma ijin Jon kuardain. Bu kuardavga fu uri e nokarok (2) kiama bu roga fu kia, Ni va e gafi kuaga fun ma e iji fu ruakno kuainva ijar vo fu bano kiaga no una e be samuavno kiain. Jon fu ijeg kuardiamga bun vake Jesu fino ijia useme kua, Jon e bomana nuvuon e do ruardiafo iji fu kuo, Va a kuaga aiji a e iji God fu kua fu ruakno kuainma iji vo a bakma noba una e be samuakno kuain?
LUK 7:21 Regavo tavan ijia Jesu fu e adam abenva iji karauniaknum e iji kaven ise ninarukiainva iji kiaga bu useme vaknum ga e ni zuriaigin iji kiaga bu una ni narav.
LUK 7:22 Fu ijegreoinon ijia fu uri e Jonon vuak abe vainva iji kia, Ni una va Jon irerag ja ni jon ijia giaknum fainva ijin kuardaf. Va kuardame kua, E ni zuriaigin iji bun una ni narako e aikirariainva iji buk bun una uri oijno kuaf. Regavo madu e iji bu adam refrosi abenva iji bun una madiav revo e ada bijukuriainma iji bun una faiv ga e aoinva iji bun una urij. Rega vuak ma iji bun abe e isema karioijo iji kuardiavno kuaf.
LUK 7:23 Regavo erar fu ire igi na reoijo iji fu faime ba oi kafokafo vierafega fum na ma vierafeno e iji fuka oimarmne kiain.
LUK 7:24 Fu ijeg kuardiamga e Jonon vuak abe ruainva iji bun una vakoga rad Jesu fu uri Jonon vuak iji dab e uruvana ruainva iji kuardiain. Fu kuardiame kia, Tavan iji Jon fu ai moikum namo ijia fikoga ja useme fuon vainva iji ja irerag iji ijia gakuai vierafene usem vain? Jakafu e zazaikin be fu buibur asif abeno igekin ja iji gakuai vain. Ki ja irerag iji gakuai vainva ni kuardie na faiv. Regavo baga na vierafe jakafu ja e iji bu sinuom zarainva ugon ka mukor same ijia oijo ja iji giakuai vierafene vain. Iji fuka bakin gavo e ijeg ugon mukor savo iji bu e mamkanuk moik samuavo ijiebuon ar ma ijia karij.
LUK 7:26 Regavo ja vainva iji ja irerag iji ijia gakuai vain? Ja e Godon vuak vierafene kuaimon ja iji gakuai ki ja era gakuai usem vain? Ni kuardie na fai. Naka ma kuardiav, E iji ja gakuai vainva iji fu ma e Godon vuak vierafene kuaimon be. E iji fuka ma e aduigin fur e Godon vuak vierafene kuaivo iji fur asidiain. Regavo Godon buk akaij iji bu usuibe isoime kuainva iji bu fuifuon kuain. Regavo vuak bu isoinva ijia God fu ijeg kuai, Na e vuak nun abe oinon be kuaga fu amur vak. Fur amur unam jon iji amarme vakno kuain.
LUK 7:28 Regavo vuak igi naka ma kuardiav. E mamkanuk iji roin bu ur kari ruainva iji bu e Jon e do ruardiamo ijekin bakin. Regavo e Jon fur fuka ma e ikin ga fur bu asidiain. Regavo Godon e iji fu oijbuon iji samuagdiafo ijiebuon uf ijia e be erar una e ukakbe reno e ijar fu Jon asime ka e ikin rekno kiain.
LUK 7:29 Fu ijeg kuardiamga e uruvana abevo e takes abeoijo iji bu vuak iji fain. Bu faime vierafega Godon unam ma iji ijia kekfuon iji fuka maga bu ijeg vierafen. Ijefuon bu Jonon vuak iji igame fuon rokga fur aferdiame do ruardiain.
LUK 7:30 Regavo e Ferisis iji ga e roin vuak akai nijaidiavo iji bu Godon ma iji fu buifuon vierafenma iji buka uzame ba Jonon rokga fu do ruardiain.
LUK 7:31 Jesu fu ijeg kuardiame kia, Na e igi bu unam ma iji uzamoknum vo madu unam buon bu kegoijo ijiebuon nar bijame kuaikno ni faif.
LUK 7:32 E iji bu God uzavo iji bu am ukaknak iji bu va ar iji bu ire kimejo ijia useme ata roinroin rene karijo ijekin. Am roin bu uri una roin kume, No joifuon zaij vajaga jaba dua uruv. Regavo roin bu uri kume, No joifuon sise bijadiaga jaba niraivno kumejo bu ijekin.
LUK 7:33 Ijegvo Jon e do ruardiamo fu ruainma iji fu tavan kafo duok karoknum ga do kugin iji fuba ioin. Fu ijegreoga ja kuai fu kaven ise ijar fusik oinon kuain.
LUK 7:34 Ijegvo Ema ijiebuon Farif igi na ruainva iji na unam besum ijeg duok iknum do vuain ioijga ja kuai, E iji gaf. Fu duok uruvana iknum do vuain uruvana ioinon kuain. Regavo ja madu kuai fuka e takes abeoijo ijiga e ise ijiena kaireoino kuain.
LUK 7:35 Regavo igia fai. E ma vierafejo iji bu Jon ik irerag fu renma ga na reoinva iji bun giame vierafen. Bu vierafero God irerag fu vierafene reno iji fun mukorigia renoro bu ijeg vierafejno kiain.
LUK 7:36 Jesu fu ijeg kuardiame barekoga e Ferisi be fu uri Jesu kuama fu fusik ar fuon ijia duok ikafa vain. Jesu fun va ar fuon ijia kekome duok ikafa ari fin.
LUK 7:37 Rega bara mai ijekor be ijia fino iji fuka ise uruvana reoinon. Ijefuon fu faik Jesu fu e Ferisi ijefuon ar ijia duok ikafa ruainma faime fun uri saror bu do jiavo iji abe ire udi mukor urino iji abe ijia useme abe ijia ruain.
LUK 7:38 Fu abe keko Jesuon nuon iji diak fu korenma ijia manine niraiko nido fuon ijar Jesuon diak azan ijia arin. Fu ijegrene uri nigen jau fuon ijia fidame fun uri diak iji kam irkuardiame uri do iji udi mukor urino iji abe ijia usemdain.
LUK 7:39 Rega e Ferisi iji Jesu kuama fu fusik duok ikafa vainma iji fu bara iji irerag fu reno iji gain. Fu game uri fui kuai, E igi fu ma e Godon vuak vierafene kuaimon ijarkma fu bara iji fu izekin ijar fu niriamo iji fu vierafekno kuain. Regavo madu bara iji fu unam ise izekin kegoino iji fu vierafekno kuain.
LUK 7:40 Ijegreare Jesu fun uri kua, Saimon na vuak be kuardakno ni faimne kuain. Fu ijeg kuardamga Saimon fu uri kua, E nijaidiamon nin kuardiemne kuain.
LUK 7:41 Fu ijeg kuardamga Jesu fu uri vuak be ijeg bijame Saimon kuardain. Fu kua, E nokarok (2) bu e sinuom uruvana renma iji monfuon kuavga fu e be mon ukakbe maga be fuka mon bomana main. Rega bu mon fuon iji una vajakuai vierafe gavo buba aresrenva ijefuon fu kiama bu ijia aren. Bu ijegrenva ijia a vierafega e nokarok (2) iji e izar fu e sinuom uruvana renma iji fuon ma bomana oimaremno kuain?
LUK 7:43 Jesu fu ijeg kuardamga Saimon fu uri kua, Na vierafega e iji fu mon bomana abenma ijarno kuain. Fu ijeg kuardamga Jesu fu una kua, Iji a ma kuainmano kuain.
LUK 7:44 Areme fu dakaroim una bara iji gavknum Saimon kua, A bara igi abe gain? Na ar on igia ajie rokga aba diak tat nun iji do somdien. Regavo fu bara igar nido fuon ijia diak tat nun somdieme nigen jau fuon ijia fidien.
LUK 7:45 Regavo madu aba na oimardieme na irkuardien. Regavo fu bara igar na rokga fur ba arega fuka uri dia tat nun iji kam irkuardiain. Regavo madu aba nigen jau nun ijefuon ire udi mukor urino iji abe azirdien. Regavo fur ire iji ka udi mukor urino iji abe diak tat nun igi somdien. Ijefuon na gaga fuon oijmiemo iji fuka ma bomana ijefuon maiji ise fuon uruvana fu keoinma iji nan game aren. Regavo e be erar ise fuon fu reoinon iji na sibank giame arenva iji fuon oijmiemo iji fuim ma ukakbeno kuain.
LUK 7:48 Jesu fu ijeg kuardiame uri bara iji kua, Ise on iji nan giame arenvano kuain.
LUK 7:49 Regavo e kafo fata irif ijia karioinva ijieb uri kua, E iji fu God aikido fu e kafobuon ise giame aremno kuain.
LUK 7:50 Regavo Jesu fu uri bara iji kua, On a ma vierafeno ijar a keunainma ijefuon aib una ijin bomana vierafegavo ni dazme vakne kuain.
LUK 8:1 Ijegreare tavan sibank barko rad Jesu fu mai ga ar ukaknak besubesum guf ijia oknum e iji God fu izeg oijbuon iji samuagdiafo ijefuon vuak ma iji abe e uruvana kuardiaoin. Regavo iji fu ijegreoinma iji fu e tuer (12) vuak fuon faivo ijiena oknum ijeg ren.
LUK 8:2 Regavo fu madu bara roin vajai matan abenva ijigam bara roin kaven ise ijieb kam nirokiava Jesu fu karauniainma ijieb funa vain. Regavo bara be iji Meri (bara iji bu kua Megdarino kuavo) fu kaven ise imut roin ga nikit nokarok (7) iji bu dab ninaruoijo Jesu fu kiama bu usem vainva ijin. Rega kafo iji bara e Susa e iji fu Erodon ar bomana ijia fuifuon ikreno ijefuon bara Joana ga bara Susana ga bara uruvana roin ijieb funa vain. Bara ijieb mon buon ga ire buon ijia Jesu ga e vuak fuon faivo iji samuagdiame duok iknum vajiain.
LUK 8:4 Areme Jesu fu giaga buka vek e uruvana biome vuak fuon iji faikuai roka fu giain. Ijefuon fu uri vuak igi bijame kuardiain.
LUK 8:5 Fu kia, E be fu juar fuon ijia uij dajaikafa vain. Fu va juar ijia uij dajaikoga kafo bu uduime unam iji e vuimoijo ijia arivga bun um ijieb useme roin bun ine baren.
LUK 8:6 Regavo roin bu uduime munuag azan ijia arime bun tavuavo ijia bu sairen. Ijefuon maiji moik iji fu safik bakin.
LUK 8:7 Rega uij roin bu uduime tarar ijia arime tavuavga fun ufien gurogin ijieb kam okuriain.
LUK 8:8 Regavo uij roin bu uduime moik mukor safikin ijia ari tavuame buka mukorigia sunin kirain. In besubesum sunin fuon fu kirainma iji fuka uruvana vuan adred (100) ijeg kirainmano kiain. Regavo Jesu fu vuak ijin kuardiame barme kia, Ja adakiga ni vuak igi amarigia faifno kiain.
LUK 8:9 Areme rad e vuak fuon faivo iji bu vuak ijefuon ma iji buba vierafenva ijefuon bu uri Jesu kuardain. Bu kuardavga fu uri kia, Godon vuak sauivkin iji izeg fu efuon ijiebuon oij iji fu samuagdiafo iji fun fuon vierafenma ijia abe samafrena jan gain. Regavo una e iji roin bu God uzavo iji na ijeg bijame kuardiaikin bu nisaik gavo buba giak. Regavo bu faikva buba amarigia vierafekno kiain.
LUK 8:11 Jesu fu ijeg kuardiame kia, Vuak iji na bijame kuardiaiva ijefuon ma iji igin. Uij iji Godon vuak ijin. Rega uij bu uduime unam e vuimoijo ijia arinva iji e iji bu Godon vuak iji fain. Regavo kaven ise Setanri oijbuon ijia vuak iji abe vakok buba God ma vierafeko fu bu karauniamo ijin.
LUK 8:13 Regavo uij iji uduime munuag azan ijia arime tavuame una sairevo iji e iji bu Godon vuak iji oimarknum faiv gavo ba kege oij buon ijia gigikin vierafejo ijin. Regavo bum tavan ukakbe ijia ma vierafe ga ise kafo buon roko iji buka ijia arevo ijin.
LUK 8:14 Regavo uij roin bu uduime gurogin uf ijia arinva iji e iji bu Godon vuak iji faiknum ga una moik igefuon ire kafokafo vierafeknum ga una vajai buon bu oi madiakfuon iji vierafejo ijin. Bu karine mon ga duok ga ire uruvana igia uruvana vierafejo ijefuon bu Godon vuak iji fu uij igeg abe oijbuon ijia oinma iji fu tavuame ajie sunin kiramo bakin.
LUK 8:15 Regavo uij iji moik ma ijia arime mukoi tavuame sunin kiravo iji e iji bu Godon vuak iji amarigia faime oijmame abe oijbuon ijia abedevo ijin. Bu abe oijbuon ijia abedeme uri giriesame nuibakin rene kaifijaf roin nijaidiaga buk rad Jesu ma vierafejo ijin.
LUK 8:16 Jesu fu ijeg kuardiame una kia, E be fu erar ikuosaij abe saname fata rotit ijia sauikma bakin. Regavo fuka abe saname samakaf ijia abedega e uruvana bu ijia gavknum aru vaken.
LUK 8:17 Ijefuon irerag uruvana bu kege sauivo iji rad bu kege samakaf ijia roga bu giak.
LUK 8:18 Ijefuon amarigia juknum faif. Erar ire uruvana kenma iji bu madu una ire kafo uruvana vajak. Regavo erar ire kafo bakikma iji ire sibank fu nainma iji buka karevakno kiain.
LUK 8:19 Jesu fu ijeg fine vuak nijaidiamon ijia asiefuon ijiga uviaifijaf bu fu gakuai ruain. Rega Jesu fu e uruvana ijiebuon nifak ijia oinon ijefuon bu ro makaf ijia samuame iren.
LUK 8:20 Ijefuon e be fu kekome Jesu kua, Asieon ijiga uviaifon bu a gakuai ro makaf gafa irenvano kuain.
LUK 8:21 Fu ijeg kuamga Jesu fu una dakaroime kia, Asienun ga uviaifnun iji e iji bu Godon vuak iji faime igiavo ijino kiain.
LUK 8:22 Areme tavan be Jesu fun e vuak fuon faivo ijiena sisim ijia ajieme kia, Ruano do igi daturaiko nafuinma irif gara vakno kiame bun anerene sisim abe vain.
LUK 8:23 Bun sisim abe vako ijia Jesu fu ninain. Fun ninaikoga buibur ka bomana ijar bu vako do azan ijia ufin. Fu ufiko do iji fun guf ijia arume irtoijme fuka sisim dab dakaroiga bun aoikfuon ijia ren.
LUK 8:24 Ijefuon e vuak fuon faivo iji bun useme Jesu same kua, E Bomana E Bomana noka aoikuai samairenvano igi guomne kuain! Bu ijeg kuavga Jesu fun uri buibur ijiga do iji darokma fira rokon iji kuama fu bakite vako do iji fun narume una ur nainma ijeg nain.
LUK 8:25 Areme fu uri e vuak fuon faivo iji kia, Jon ja ma vierafejo iji fu izegrenmano kiain? Fu ijeg kuardiamga buka oiserdiame dejufdiain. Ijefuon bu bui kua, E igi fu e izekido fu buibur ijeko do igi firame darokma rokon iji fafdiamga bu fu igame arenvano kuain.
LUK 8:26 Areme bun sisim abe do Gareri daturaiko nafuinma gara e Gerasako karinva ijia vain.
LUK 8:27 Regavo Jesu fu ik dia jafe jier azan ijia vuikoga e be ar ijeko ijar fuon ruain. Regavo e iji fu kaven ise ijieb fu dab ninaruv. Fu ar fuon iji fun usuibe areme va munuag tit bu e aoiga kege uniavo ijia fioin. Rega madu fu sinuom kafo samo bakin gavo fum detabar oinon.
LUK 8:28 Ijefuon fu tavan ijia Jesu game uri nifak fuon ijia ato same uruvana biumame kume, Jesu God E Bomana kaf gufia fino ijefuon farif guri a irerag iji nun rekafa vierafen? E-e na anadame kuavno ab na abe arafiriekno kumen.
LUK 8:29 Fu ijeg kumenma ijefuon maiji Jesur amur kaven ise iji kiama bu fu areme vainva ijefuon fu ijeg kumen. Regavo madu buka tavan kafo e iji dab ninaruoijo. Ijefuon e aivo iji bu uri e iji kunaime dab e diburko igeg sen kam imut ga masian fuon iji kam tomdain. Bu tomdavo fu kam turakoreko kaven ise ijieb fu dab ninarume ai moikum namo ijia oij.
LUK 8:30 Ijefuon Jesu fu kua, A ifon iji erano kuama fu kua, Na ifnun Uruvanano kuain. Fu ijeg kuainma ijefuon maiji buka kaven ise uruvana fu dab ninaruoijo.
LUK 8:31 Kaven ise ijieb uri Jesu soisoime kua, E-e a no ab kege mako iji dibuor bakin ijia sakno kuain.
LUK 8:32 Regavo ar bu maf samuagdiavo iji fu uruor be manino samaij ijia. Ijefuon kaven ise iji bu maf ijiebuon oij ijia arikuaim Jesu soisoin.
LUK 8:33 Ijefuon Jesu fun kaven ise iji kiama bu e iji areme usem maf uruvana ijin kam ninaruva bu usem subinai ar igegamekin ijia arime do ine aoin.
LUK 8:34 Bu ijegrejga e iji maf samuagdiavo iji bu ire iji renma ijin giame bun usem kukubija mai buon ijia e mamkanuk iji abe vo e juar mejo iji kuardiame vain.
LUK 8:35 Bu vuak iji abe va kuardiavga e uruvana bu iji faime ire iji renma iji gakuai ruain. Bu ro Jesu fino ijia useme gak e iji kaven ise ijieb fu dab ninaruoijo iji fu Jesu manino samaij ijia fina bu game buka juin. Bu jume kuai, E iji kaven ise ijieb niroinva iji fun una e ma rene ugon same gafa fino kuain.
LUK 8:36 Ijegreare e iji bu fu gainva ijieb vuak iji abe una va e roin ijin kuardiain.
LUK 8:37 Ijefuon e ar Gerasa guf ijia karinva iji bu useme Jesu rotkurain. Ijefuon maiji buka uruvana igia juinva ijefuon Jesu fun una sisim abe vain.
LUK 8:38 Regavo e iji kaven ise bu fu niroiva Jesu fu kiama bu usem vainva iji fu Jesu soisoime kua, E-e ni kiega na osik vakno kuain. Fu ijeg kuardamga Jesu fu vuak igin kuardame kuama fun vain.
LUK 8:39 Fu kua, Ni una va ar on ijia God irerag fu on renma iji abe e roin kuardiamno kuain. Fu ijeg kuardamga e iji fun mai ijia oknum irerag Jesu fu fuon renma iji e uruvana kuardiaoin.
LUK 8:40 Areme Jesu fun e vuak fuon faivo ijiena bun una sisim abe do Gareri urame gara vain. Rega e uruvana bu fu samuame ijia karinva ijefuon Jesu fu vakga bu fu oimardain.
LUK 8:41 Areme ebe Jairasno kuavo iji fu ar iji bu afuime vuak kuaivo iji samuamo. E ijar ro Jesu ato same soisoime kua, Abe nosik ar nun ijia vakno kuain.
LUK 8:42 Ijefuon maiji kabainun juaivasia tuer (12) ijeg barenma ijar adam abene guakafaren. Rega fu am kafo bakin ga fun kabaifuon besum ijesugin. Fu ijeg kuamga Jesu fu uri e iji jame vakga e uruvana buk bu uri buna vain. Regavo bu vek unam ijia vako ijia e uruvana bu vierafega buka Jesu vako uikinik fuon ijia vakuai buka bui ajifnamuiknum vain.
LUK 8:43 Rega bara be fu ijia buna vako iji fu ise fi ruake fuka juaivasia tuer (12) ijeg baren. Regavo kavuan iji arifon fuba baren. Ijefuon tavan uruvana fu va e adam giavo iji giam gavo kavuan fu arifon iji fuba baren.
LUK 8:44 Ijefuon bara iji fu e ijiena ijia rokdo fu uri Jesuon ugon ijia kunaima kavuan fu arifon iji fuka migegareigia baren.
LUK 8:45 Bara ijar ijegrega Jesu fu faime kia, Erar na niriakienmano kiain? Fu ijeg kiamga e uruvana bu kua, No bano kuain. Rega Fita fu uri kua, E Bomana buka e uruvana a dab kirakuravno kuain.
LUK 8:46 Fu ijeg kuamga Jesu fu kua, Na fai e be fu na niriakiema nan fain. Ijefuon maiji daro nun roin bun usem e ijefuon vaka na fainvano kiain.
LUK 8:47 Rega bara iji fu gak izeg fu renma iji Jesu fun faiga fuka bomana juvknum ro Jesuon nifak ijia ato sain. Areme fu e uruvana ijiebuon nifak ijia fu irerafuon Jesu niriainma ijin kuardain. Fu iji kuardame madu fun izegrena adam fuon fu migegare mainma ijin kuardiain.
LUK 8:48 Fu ijeg kuardamga Jesu fu uri bara iji kua, Kabainu on a ma vierafeno ijar adam on iji fun mukoi barenmano nin va tavan bog oimarknum oine kuain.
LUK 8:49 Jesu fu vek manine bara ijin ijeg kuardamo ijia e vuak abe oino be fu e Jairason ar ijia ruain. Fu ro kekome Jairas kua, kabaion fun guainma ijefuon e guri E Nijaidiamo iji a afekafa vierafeno iji aremne kuain.
LUK 8:50 Fu ijeg Jairas kuamga Jesu fu vuak iji faime Jairas kua, Ab oifian abekgavo nin ma vierafega kabaion iji fu una maimno kuain.
LUK 8:51 Ijegreare Jesu fu vake Jairason ar gafia kekome giak e uruvana bu bara ukak ijefuon oifian abene niraiv. Bu niraivo ijia fu keko kia, Bara ukak iji fuba guain revo fum ninainmano ja niraivo iji arefno kiain. Fu ijeg kiamga e uruvana bu vuak fuon iji buba ma vierafenva ijefuon bu Jesu dab varaimene kijdain. Ijefuon maiji bu vierafega bara ukak iji fun ma guain. Regavo Jesu fu uri Fita ga Jon ga Jeims ga bara ukak ijefuon asoij ijigam asie ijin aferdiame ar guf iji bara ukak fu namo ijia aru vain.
LUK 8:54 Jesu fu arume bara ukak iji imut kene kua, Kabainu ni una urimne kuain.
LUK 8:55 Fu ijeg kuamga bara ukak ijefuon kaven fu una fuon rokga fu migegare una urina Jesu fu una eofijaf kiama bu duok vajavga fu in.
LUK 8:56 Jesu fu ijegrega bara ukak ijefuon eofijaf iji buka oiserdiame vuaturiamga Jesu fu kia, Jab va ire igi na reja ja gienva iji jab e kafo kuardiakno kiain.
LUK 9:1 Ijegreare tavan be Jesu fun e vuak fuon faivo tuer (12) iji kumena bu besum afuin. Bu afuiva fu kia, Na ivia ja daro miame kiavo ni va e iji kaven ise ijieb ninarukiainva ijigam e iji adam kafokafo abejo iji karauniafno kiain.
LUK 9:2 Fu ijeg kuardiame madu kia, Nin va vuak ma iji izeg God fu koikfuon una efuon ijiebuon oij iji samuagdiakfuon ijin abe kuardiaknum vo e adagin iji karauniaf.
LUK 9:3 Rega jab guduar ga kamui ga duok ga mon ga sinuom kafo kege vak.
LUK 9:4 Regavo ni vaga e ar be bu ja oimardiaknum aferdiaga nin ar ijesugin karine vake mai iji areme vaf.
LUK 9:5 Regavo eraneb buba ja oimardiakva ni dia tat jon ijia ireme anf odiame kuotuvat kanaseme nin mai iji areme vafno kiain.
LUK 9:6 Rega e vuak fuon faivo iji bun uri mai besubesum ijia oknum Jesuon vuak ma iji abe kuardiaknum e adagin iji karauniamoin.
LUK 9:7 Bu ijeg kegoijo ijia e Erod ar Gareri samuamo iji fu ire uruvana bu reoijo iji faime fuka ba ma vierafen. Ijefuon maiji e roin bu kuai Jon e do ruardiamo iji fun una urinmano kuain.
LUK 9:8 Rega madu e roin bu kuai e Eraijar una ruainmano kuain. Regavo e roin bu kuai bu e iji usuibe Godon vuak vierafene kuaivo iji aoinva ijia e bes una ruainmano kuain.
LUK 9:9 Bu ijeg kuaivga Erod fu uri kia, Na Jonon nigen iji nan kaname daturain revo e igi na erafon vuak iji una faivno kiain? Fu ijeg kuardiame uri unam izeg fu Jesu biekfuon iji giriesame nisain.
LUK 9:10 Areme e afasor iji bun una useme irerag uruvana bu reoinva ijin Jesu kuardain. Bu kuardavga fun aferdiame buonkua ar Betsaidano kuavo ijia vain.
LUK 9:11 Bu ijia vakrejga e uruvana bun fain ijefuon bun uri buna vain. Bu vakga fu oimardiame are aferdiame izeg God fu oijbuon iji samuagdiakfuon ijin kuardiaknum e adam abejo iji karauniain.
LUK 9:12 Ijegreare tavan kokreno ijia e vuak fuon faivo iji bu useme kua, E igi kiaga bu una mai iji e karijo ijia duok bu ikfuon ga ar bu naoikfuon iji nisaim vaf. Ijefuon maiji ar igi fuka ai moikum namo igiano kuain.
LUK 9:13 Bu ijeg kuardavga Jesu fu uri kia, Jar duok kafo vajia bu ijno kiain. Fu ijeg kiamga bu una roin kua, No duok uruvana bakigavo no bred imut roin (5) ga kijum nokarok (2) ijesugin. Regavo a vierafega nobe e uruvana ijiebuon duok kimekno kuain.
LUK 9:14 Rega e ijia karinva iji e baru ijesugin bu e faiv taosen (5,000) ijeg. Ijefuon Jesu fu uri e vuak fuon faivo iji kia, E iji kiaga bu e fifti (50) ijeg afuime kafokafo karifno kiain.
LUK 9:15 Fu ijeg kiamga e vuak fuon faivo iji bun fu kiainma ijeg e uruvana kiava bu ari karin. Bun ari karikoga Jesu fun bred imut roin (5) iji ga kijum nokarok (2) iji kege varur gufia gavknum Godon sirimamen. Ijegreare fun ke tuaseme e vuak fuon faivo iji vajiama bu kege e iji vajiain.
LUK 9:17 Bu vajiavga e uruvana bu duok iji ine buka aresrega e vuak fuon faivo iji bun ter tuer (12) ijeg kege duok ukur iji kareme ijia anuin.
LUK 9:18 Tavan be Jesu fu fuonkua sirimameno ijia e vuak fuon faivo bu fuon ruain. Bu rokga fu uri kia, Ja vierafega e uruvana bu vierafe naiji na erano kiain?
LUK 9:19 Fu ijeg kiamga e vuak fuon faivo bu una kua, E roin bu kuai aiji a Jon e do ruardiamo ijin. Rega roin bu kuai, Aiji a Eraijano kuain ga kafo bu kuai aiji a e amur Godon vuak vierafene kuaivo be ijar una ruainmano kuain.
LUK 9:20 Bu ijeg kuardavga fu kia, Regavo jaiji ja vierafega naiji na erano kiain? Fu ijeg kiamga Fita fu uri kua, Aiji no vierafega a e iji God fu kuaga fu ruakno kuainva ijino kuain.
LUK 9:21 Fu ijeg kuamga Jesu fu uri vuak gikin kuriaireme kia, Jab e kafo vuak iji kuardiakno kiain.
LUK 9:22 Ijegreare Jesu fun uri kia, Ema ijiebuon Farif igi naka uruvana vajai fian abekfuon. Regavo e aiko ijiebuon e mamkanuk ijigam e Godon isuf baroijo ijiebuon e mamkanuk ijigam e akai nijaidiavo iji roin buka na uzaken. Buka uzame unam ise kafokafo ijia na dab arafiriega naka uruvana igia vajai fian abene guak. Revo naki nokbek (3) barke God fu kiega na una madu urikno kiain.
LUK 9:23 Areme fu uri e uruvana kia, E iji erar vierafega fu nosik vakma fuka tavan bog ire fok fu vajainma ijefuon vierafeno iji nuigafiakfuon. Fu ijegrene uri vajai fian kafokafo bu fuon roko ijia ka magaga giriesame nuifuon ikrekfuon.
LUK 9:24 Regavo erar fu moikigia tavan bog fuon vierafe iji oijmiaknum fiokma rad fu una izeg unam ma karivako iji abekma bakin. Regavo erar fu moikigia tavan bog una e roin vierafeknum oijmiame ifejdiakma fu rad unam ma karivako iji abek.
LUK 9:25 Regavo erar fu moik igefuon sinuom igi oijmiagavo God fu uzakma kaven fuon iji fun abe aberen. Ijefuon maiji fu moik igefuon ire ijieb fu ifejdaga fu Godon ar ma iji abekma bakin.
LUK 9:26 Regavo eraneb bu na jume madu bu vuak nun faikuai jukva Ema ijiebuon Farif igi nasik tavan radkma ijia bu uzaken. Na tavan iji na una nun sanainma ijiga Asoinun ga anera ijiebuon sanainma ijekma roko ijia na ijeg reken.
LUK 9:27 Regavo vuak igi naka ma kuardiav. E kafo igia karinva iji jaba aoik ga ja vek karinva ijia ja tavan iji God fu una efuon ijiebuon oij iji samuagdiakfuon iji fu roga ja ni jon ijia gakno kiain.
LUK 9:28 Jesu fu vuak ijeg kuardiame vuik besum (1) barko ijia fu uri Fita ga Jon ga Jeims iji aferdiame uruor be makaf ijia sirimamekafa vain.
LUK 9:29 Fu va fine sirimameno ijia uikinik fuon iji fuka una nibe rekoga ugon fuon fu sainma iji fuka mukorigia sanain.
LUK 9:30 Fu ijegreko migegare e nokarok (2) Mosis ko Eraija bum ijia funa ireme vuak kuain.
LUK 9:31 E nokarok (2) iji bum varur ijefuon sanainma ijekma arime izeg God fu Jesur Jerusarem ijia vajai fian abe guakfuon iji kuainma bu iji funa kuaiv.
LUK 9:32 Regavo Fita ga Jon ga Jeims bu ni nadiama bun ni naoin. Regavo buka ijia una migegare turanamime uri Jesuon sanainma ijiga e nokarok (2) iji funa irenva iji giain.
LUK 9:33 Areme e iji bun Jesu areme vakga Fita fu uri Jesu kua, E bomana noka magoi igia ruain ijefuon na vierafe no ar muvua nokbek (3) be on ga be Mosison ga be Eraijaon igia sakno kuain. Regavo vuak irerag Fita fu kuaimon iji fuka ba mukoi vierafen gavo fum ijia kuain.
LUK 9:34 Fita fu vek vuak kuaimon ijia vana bomana ijar oine iji bu irenva ijia okuriakoga bu rotit ijia juvknum aru iren.
LUK 9:35 Ijegreko ijia God fu vana guf ijia kume, E iji fu farinun nar kuava fu ruain. Ijefuon vuak fuon fu kuardiamo iji mukoi faifno kuain.
LUK 9:36 Areme vuak iji kuaimon fun arekoga Jesu fu fuonkua ijia manina bu gain. Areme e Jesuon vuak faivo iji bun tavan ijia ire uruvana bu giainva iji buba e kafo kuardiain.
LUK 9:37 Ijegrene afarma bu uruor makaf iji areme ari vakoga e uruvana bu useme Jesu bien.
LUK 9:38 Areme e be fu e uruvana ijiebuon uf ijia uri Jesu biumame kume, E nijaidiamon e-e farinun ka besum igin ga.
LUK 9:39 Farinun igi fu kaven ise ijar fum tavan kafokafo ijia ro kanaga fu moik ijia dije name aramavknum niraime ir tatan arim.
LUK 9:40 Rega na e vuak on faivo iji soisoime kia kaven ise iji azofdafno kiain revo bu ifejdaga fuka iserenmano kumen.
LUK 9:41 Fu ijeg kumega Jesu fu uri efuon ikrejo iji kia, E guri ka ba ma vierafejo gurie. Ja vierafe nakafu tavan izeg igia jana figa jason ijia nana oij besum rene God ma vierafek? Amon iji afeme igia roga na gavno kuain.
LUK 9:42 Fu ijeg kuama am iji fun Jesu manino ijia roko ijia kaven ise ijar ka uruvana igia am iji kaname dab moik ijia akoren. Ijefuon Jesu fu uri kaven ise iji kuriairega fu am iji areme vakga fu abe una asoifuon iji main.
LUK 9:43 Jesu fu ijegrega e uruvana bu Godon daro ka ma bomana iji gava buka oiserdiain.
LUK 9:44 E uruvana bu vek karine irerag Jesu fu kegoino iji kam uruvana igia vierafejo ijia Jesu fu una e vuak fuon faivo iji vuak igi kuardiain. Fu kia, Vuak igi na iviakma kuardiakrejo igi mukoi vierafegavo jab rubdiak. Ema ijiebuon Farif igi naiji bu abe una e ani iji miakno kiain.
LUK 9:45 Regavo e vuak fuon faivo iji bu Jesu fu irerafuon vuak ijin kuardiamo iji buka ba vierafen. Ijefuon maiji Godon Kaven ijar nigen buon fuba samafrediain. Regavo madu bu vuak iji Jesu fu kuardiainma ijefuon kua faikuai buka juin.
LUK 9:46 Areme tavan be e Jesuon vuak faivo iji bu erar fu e bomana rekfuon bu ijin dab bui kuaime sigunamin.
LUK 9:47 Bu ijegrejga Jesu fun irerag bu vierafejo iji fun giain. Ijefuon fu uri am ukak iji afeme fu manino ijia uname uri kia, Erar ifnun ijia am ukak igi oimardakma e iji fu na oimardiek. Revo erar na oimardiemo iji fu madu e iji fu na kiema na ruainva iji oimardak. Ijefuon maiji e uruvana jon uf ijia e ukaknak iji bu e mamkanukno kiain.
LUK 9:49 Jesu fu ijeg kuardiamga Jon fu uri kua, E Bomana e be fu ifon ijia kaven ise iji kuama fu keko vakga no kuava fu aren. Ijefuon maiji fu nona besum oinon bano kuain.
LUK 9:50 Fu ijeg kuardamga Jesu fu una Jon ga e vuak fuon faivo iji kia, Jab kuaga fu arek. Ijefuon maiji erar fuba ja nuigafiamo e iji fu una jana rene ja ifejdiakno kiain.
LUK 9:51 Areme tavan iji Jesu fu una varur gufia ajie vakfuon iji fun samairenma ijia fu una Jerusarem vakafa vierafene uri vain.
LUK 9:52 Fu e vuak fuon faivo iji kiama bun amur va e Sameriako buon mai ijia ire uruvana fuifuon kanafuin.
LUK 9:53 Regavo e ijekor iji buba fu afen ijefuon maiji bu vierafero fun Jerusarem vakafa vakoro bu ijeg vierafen.
LUK 9:54 Bu ijegrejga e vuak fuon faivo nokarok (2) e Jeims ko Jon bu giame una Jesu kua, E Bomana a vierafega nobe varur gufia mian kumega fu ari e igi kege arafiriakno kuain?
LUK 9:55 Bu ijeg kuavga Jesu fu uri kuriairema bun una mai be ijia vain.
LUK 9:57 Areme Jesu fu e vuak fuon faivo ijiena unam ijia vako ijia e be fu uri Jesu kua, A izer vakma nak naka osik ijia vakno kuain.
LUK 9:58 Fu ijeg kuardamga Jesu fu una kua, Siroij taraiko foksno kuavo ijiga um iji bu mako ga nait buon bu amarenva bu ijia kariknum oij. Regavo Ema ijiebuon Farif igi naiji na ar na naijo ga fikfuon iji fu bano kiain.
LUK 9:59 Fu ijeg kuardiame fun una e be iji kua, Na jajiemne kuain. Regavo e iji fu kua, E Bomana ni areke na amur va asoinun samuake fu guaga na abe mako rume una javno kuain.
LUK 9:60 Fu ijeg kuardamga Jesu fu una kua, Erar buba oi karoime na ma vierafejo iji bun aoinva igekino ni arega bur e iji aoivo iji kege mako ruf. Regavo aiji ani uri vuak iji God fu izeg una e fuon ijiebuon oij iji samuagdiakfuon ijin abe e uruvana kuardiamne kuain.
LUK 9:61 Regavo e be fu kekme kua, E Bomana nak na a jakafie vierafen gavo ni areke na amur va aganun anadiame una a javno kuain.
LUK 9:62 Fu ijeg kuardamga Jesu fu kia, E be erar uri unam nun ijia reoknum ga una moik igefuon ire kafokafo vierafeno e iji fuba aresredo fuba una Godon e iji fu oijbuon iji samuagdiamo ijiena besum mazikno kiain.
LUK 10:1 Areme rad Jesu fun uri e seventi tu (72) ijeg kege e nokarok (2) ijeg ke mazime kiama bu amur useme mai iji fu vakma ijia vain.
LUK 10:2 Fu ijegreare uri vuak be ijeg bija kuardiame kia, Juar ijia ire uij uruvana fun duin. Regavo bu e iji uij iji kanafukfuon iji buka uruvana bakin. Ijefuon ni sirimamene una e uij koikin iji kuaga fur e ikrejo roin kega bu uij iji kanafukfuon.
LUK 10:3 Regavo igia faif. Jaiji na maf-sif igeg kege siroij kuriai e jakiamo ijiebuon uf ijia uniaga ja vak.
LUK 10:4 Regavo ja vakva jab kamui ga faus ga tamag kafo kege vak. Revo madu unam ijia ja vako ijia jab e kafo biediame anadiame ijia irem saroik.
LUK 10:5 Regavo ar amur iji ja ajievo ijia ni e iji karinva anadiame kia, Ni afurvene kariof.
LUK 10:6 Regavo ja gaga e iji fu unam afurvejo iji fu mukoi kegoino ijar ijia finoga ni arega daro iji ja mainva iji fu fusik navakfuon. Revo fu bakma ni God kuaga fu daro iji ja mainva iji una abe.
LUK 10:7 Regavo fu ja oimardiame aferdiakma ni ar besum ijia karine duok ga do fu vajiaga iji if. Ijefuon maiji e ikreoino iji fu ik fuon fu reoino ijefuon maiji abekfuon. Regavo jab ar be ijia ajie vo una ari be ajievknum ijeg reok.
LUK 10:8 Regavo madu ja mai kafo ijia vaga e bu ja oimardiame aferdiakva ni ijia karine duok bu joifuon kanafukva iji if.
LUK 10:9 Regavo madu ni e mai ijia adam abejo iji karauniaknum vuak iji God fu izeg efuon ijiebuon oij iji samuagdiamo ijin kuardiaf.
LUK 10:10 Regavo ja mai kafo ijia vaga e buba ja oimardiakva ni una usem unam ijia vaknum kia, Mai jon igia kuotuvat iji bu dia tat nuvuon igia kamafduokva iji non una azome jon dajaiv. Regavo ni kia tavan iji God fu efuon ijiebuon oij iji samuagdiamo iji fun samaij ijajarno kiafno kiain.
LUK 10:12 Jesu fu vuak ijeg e vuak fuon faivo iji kuardiame madu kia, Vuak igi na ma kuardiav. Tavan iji God fu ar Sodom arafirinma iji fum sibank. Regavo una mai iji eraneb ja vaga bu ja uzakva God fuka bu kam ma arafiriakno kiain.
LUK 10:13 E mai Korozinko bu vajai fian abekrejo ijegvo e mai Betsaidako iji jak jaka ijeg vajai fian abek. Ja ire sumakin iji na nifak jon ijia renva iji na mai Saidon ga Taia guf ijia ijegrenvabatie e ijekor iji buka usuibe uri ise buon ijefuon oifian abe duok karokfuon. Bu ijegrene vierafero ise buon uruvana bu renva iji bun nuigafiainvaro bu ijeg vierafek.
LUK 10:14 Regavo tavan radkma iji God fu una ise nuvuon ke mazim guomon ijia fu ar Taia ga Saidon iji fum sibank arafiriak. Regavo una e Korozinko iji ja fuka ma uruvana igia arafiriaken.
LUK 10:15 Rega e ar Kafoniamko iji jak jaka juf. Ijefuon maiji ja vierafero jaiji jan aresredo ja Godon ar ijia vakro ja iji vierafe gavo iji fu bakin. God ja fuka kam ar ise mian naino ijia kozekno kiain.
LUK 10:16 Jesu ijeg kuardiame uri e vuak fuon faivo iji kia, Erar fu vuak jon faimo iji fu madu vuak nun iji fu ijek madu faim. Regavo erar fu ja uzamo iji fu madu na uzam vo madu fu e iji fu kiema na ruainva iji uzamno kiain.
LUK 10:17 Areme e seventi tu (72) iji bu usem vainva iji bun bomana oimarknum una useme izeg bu reoinva ijin Jesu kuardain. Bu useme kua, E Bomana kaven ise iji no if on ijia kiavga buka no iguome e adagin iji areme usem vakno kuain.
LUK 10:18 Bu ijeg kuardavga Jesu fu una kia, Iji jaka ma kuardiev. Na ire varur igi fu karamo ijeg na gak Setan fu kaf gufia arima nan gain.
LUK 10:19 Regavo igia faif. Jaiji nan daro miain. Ijefuon tavan iji ja oijo ijia tabar ga sugon ga ire ise kafo buba ja jakiak vo ise kafo buba jon rekfuon. Regavo madu Setan fu daro bado fuba ire ise kafo jon rekfuon.
LUK 10:20 Regavo jab kaven ise iji bu ja igiainva ijiebuon oimarvo. Rega nin oimaref ijefuon maiji Godri if jon fun buk fuon varur gufia namo ijia isoinmano kiain.
LUK 10:21 Areme tavan ijia Jesu fuka Godon Kaven ijar oimarmo iji abe fuon rokga fu uri kua, God Asoinun varur ga moik igefuon E Bomana. Na on oimarev ijefuon maiji a e igi ba ma vierafenva iji irerag a kege sauinma iji kege nijaiduogavo e ma vierafejo iji aka kege bu ni sauikuriain. Rega iji an on vierafenma ijia ijeg ren.
LUK 10:22 Regavo ar ire uruvana igi na samuagdiakfuon ijin vajien. Regavo an ar onkua na vierafe ga madu nan nar nunkua a vierafen. Revo madu e iji nar kenva iji nan koiknu a God izekin iji nan nijaidiainvano kuain.
LUK 10:23 Areme Jesu fun ijeg God sirimamene una dakaroim e vuak fuon faivo iji isuarigia kuardiame kia, Jaka ire iji ja giainva ijefuon oimaref.
LUK 10:24 Regavo vuak igi naka ma kuardiav. E iji amur Godon vuak vierafene kuaivo iji abevo e mamkanuk moik samuavo iji buka irerag ja giavo ijin giakuai vierafen gavo buba giain. Regavo madu bu vuak irerag ja faivo buka ijin faikuai vierafen gavo buba fain. Ijefuon maiji bun usuibe aoi barenvano kiain.
LUK 10:25 Tavan be e vuak akai nijaidiamon ijar Jesu biesuame kua, E Nijaidiamo na izegrekva na unam ma fivako iji abekno kuain?
LUK 10:26 Fu ijeg kuamga Jesu fu una roin kua, Regavo a buk akaij ijia vuak iji ma karivako ijefuon bu isoinva iji a izeg dame vierafenmano kuain?
LUK 10:27 Jesu fu ijeg kuardamga e iji fu uri kua, Aka oion ga kaven on ga daro on ga vierafe on fok ijekma God E Bomana on iji oijmak. Regavo madu on izeg a oijmanamimo ijeg ni una kaifon ijin oijmiamne kuain.
LUK 10:28 Fu ijeg kuaimga Jesu fu kua, Ke iji aka ma kuaim. A ijegrekma a unam iji ma karivako iji abekno kuain.
LUK 10:29 Fu ijeg kuardamga e iji vuak akai nijaidiamon iji fu vierafega fu e uruvana oijmiamo bakin ijefuon fu uri Jesu kua, Revo kainun iji na era oijmakno kuain?
LUK 10:30 Fu ijeg kuardamga Jesu fu una vuak be ijeg bijame kuardain. Fu kua, E be fu ar Jerusarem ijia una Jeriko ari vakafa vakon ijia e niesavo ijieb useme fu bien. Bu bieme kunaim dab ugon fuon azome uri kanava fun guakrega bu ijia areme vain.
LUK 10:31 Bu ijia areme vakoga E Jius buon isuf baroino be fu unam ijefuon vain. Fu vaga e iji fu ijia namga fu asime vakoga e Rivait be fuk rad jame vaga e iji bu kanainva iji fu ijia namga fuk keko game asim vain.
LUK 10:33 Bu ijegrene vakoga e Sameritenko be fu unam iji bu vainva ijefuon roke kekome e iji namo ijin gama fuka oifiain.
LUK 10:34 Ijefuon fu va e iji namo ijia kekome muramura ijigam do vuain iji kege usemdavknum matan somdain. Fu somdame uri matan fuon iji ugon utifdame dabme maf-donki fuon azan ijia uname fun afeme va ar be e bu naoivo ijia keko uname ijia samua fin.
LUK 10:35 Areme afarma fun uri mon sunin kafo karame e iji ar samuamo iji vajain. Fu vajame kua, Ni amarigia e igi samuake na vainki una igefuon ruakva ni ire izeg a fuon akozenma iji kuardiega na una vef ijefuon vajavno kuain.
LUK 10:36 Jesu fu ijeg kuardame uri kua, A vierafega e nokbek (3) iji bu vainva ijia e izar fu e iji bu kanainva ijefuon kaino kuain?
LUK 10:37 Fu ijeg kuamga e iji vuak akai nijaidiamon iji fu kua, Na vierafe e iji fu ifejdainma ijar fu ma kaifuono kuain. Fu ijeg kuamga Jesu fu kua, Ijefuon ak nin va unam besum iji fu kenma ijeg kegoine kuain.
LUK 10:38 Areme Jesu fun e vuak fuon faivo ijiena Jerusarem vakuai roke mai be ijia usevga bara Mata fu Jesu oimardame afem ar fuon ijia vain.
LUK 10:39 Regavo bara Matan uviai Meri fu ro Jesu fu manine vuak nijaidiamon samaij ijia ari fine vuak fuon iji faim.
LUK 10:40 Regavo Mata fu ik uruvana fuonkua reno ijefuon fuka oifiain. Ijefuon fu ro Jesu kua, E Bomana naka nunkua ire uruvana rejno a nuifuon oifiadakma ni Meri kuaga fu ro na ifejdiemno kuain.
LUK 10:41 Fu ijeg kuamga E Bomana Jesu fu una roin Mata kua, Aiji a irerafuon ire uruvana rekafa bomana vierafeknum ziem?
LUK 10:42 Na vierafega ire besum fuka ma bomana. Regavo Meri fu ire iji fun gain ijefuon naba ire ma iji fu vierafeno iji abe vakno kuain.
LUK 11:1 Naki be Jesu fu ar be ijia fine sirimameno ijia e vuak fuon faimo be fu uri kua, E Bomana nin izeg Jon e do ruardiamo fu sirimamene e vuak fuon faivo iji nijaidiainma ijeg ak no nijaiduomne kuain.
LUK 11:2 Bu ijeg kuavga Jesu fu uri kia, Ja sirimamekva nin igeg sirimamef. God Asoinu no if on akaij iji abe ajieknum aroiv. Regavo tavan iji a una e uruvana igiebuon oij iji samuagdiakfuon iji nin migegare igia rene.
LUK 11:3 Rega tavan besubesum ijia nin duok no ikfuon iji vajuomne.
LUK 11:4 Regavo nin ise no reoijo iji guome are. Ijefuon maiji no eraneb bu nuvuon ise rejo iji non giame arev. Regavo ab no kege una unam gigikin ijia biesuk.
LUK 11:5 Jesu fu ijeg sirimame nijaidiame uri vuak be ijeg bijame e vuak fuon faivo iji kuardiain. Fu kia, Ja e igi ja karinva ijia e be a naki ve ufrenma ijia a kaion ijefuon ar ijia va kuak, Eko uviainu abe bred nokbek (3) ifejdiek?
LUK 11:7 Na kainun be fuka iviakma ruain gavo naka irerag abe makva bano kuak. Regavo kaion iji fu vek guf ijia moik naknum kuak, Kainu na ag bara nun ijiena noka ninaoido noba uri duok kafo ifejdakno kuakfuon.
LUK 11:8 Regavo fu kaion igeg fuba migegare uri ke vajakfuon. Regavo aka vek tavan jaoikin manine kanakanamo ijefuon fu irerag a vierafenma iji ke vajak. Ijefuon maiji aba juknum manine kuardain gavo aka zinunba manine kuardain.
LUK 11:9 Ijefuon na kuardiako faif. Jon ja sirimamejo iji ja tavan uruvana giriesame kukma kuakva fu kege vajiak. Regavo madu uri tavan bog nisaikva ja gak. Regavo kanakanakva vien fu joifuon dajak.
LUK 11:10 Ijefuon e uruvana eraneb fu kuakva bu karekfuon ga nisaikva bu giakfuon. Regavo madu bu kanakanakva vien iji fu buifuo dajadiak.
LUK 11:11 Regavo madu igia faif. E be erar a farifon fu kijum ikafa kuakma abe uri tabar abe mak?
LUK 11:12 Regavo fu madu uri kukoro fuo fu kuakma abe uri sugon abe mak?
LUK 11:13 Rega madu igia faif. Jaiji jam ise reoijo revo jaka uri ire ma ijesugin afjon vajiaken. Regavo Asoijon varur gufia fino iji fu e uruvana ja fuka ma bomana oijmiamo. Ijefuon fur Kaven Akai fuon iji kege eraneb bu fu kuavo iji vajiakno kuain.
LUK 11:14 Areme tavan ijia Jesu fu e be kaven ise ijar dab ninaruko fu vuak ba kuaimon fu ijia fina fu gain. Fu game uri kaven ise iji kuriaireme kuama fu kekome vakga e iji fu ijia anerene una vuak kuain. Fu vuak kuaimga e uruvana buka oij iseradiain.
LUK 11:15 Rega e roin bu kuai, Fu e Birzibab e iji kaven ise samuagdiamo ijar daro mainma ijefuon fu iji kiaga bu usem vakno kuain.
LUK 11:16 Regavo e roin bu Jesu biesuakuai uri kua, Ni ire sumakin be rega no ijia Godon daro iji game ma vierafejno kuain.
LUK 11:17 Bu ijeg kuardavga Jesu fu izeg bu vierafenva iji fun giame uri vuak be bijame ijeg kuardiain. Fu kia, Moik be e bu afuime besum karijo iji bu ata roinroin rene bui bijaikva bu koikbuon ar buon iji bun dab iserek. Regavo madu e agan be bu ata roinroin rene una bui bijaikva bu if buon iji bun koikbuon kam iserek.
LUK 11:18 Ijefuon Setanon ar ijia efuon buk bu ijeg dab ata roinroin rene una bui bijaikva bu izeg jaoijor karivak? Rega madu ja kuai kaven ise iji na kaven ise Birzibab daro miega na kiaga bu usem vakno kuain.
LUK 11:19 Regavo na ijeg Birzibabon daro ijia kaven ise iji kiaga bu usem vagiakva ejon bu erafon daro ijia kaven ise iji kiaga bu usem vak? Ni ejon iji kiaga na erafon daro ijia kaven ise iji kiaga bu usem vako iji kuardiaga ja faif. Regavo gaga na Godon daro ijia kaven ise iji kiaga bu usem vagiakva ni vierafe tavan iji God fu una efuon ijiebuon oij iji samuagdiakfuon iji fun ruain.
LUK 11:21 Regavo madu igia faif. E darokin be fu ire bijaivo iji kanafume ar fuon iji samuame fikma ire fuon uruvana bu mukorigia naoik.
LUK 11:22 Regavo e ka ma darokin ijar kekome e darokin iji ire uruvana kanafu samuagdiamo iji kunaime juaf ga kaki fuon kamazak. Fu kamazame ar fuon ijia aru ire fuon fu amur kanafu name ijia bidua fino iji kareme kaifijaf ata vajiain.
LUK 11:23 Ijefuon ebe erar fuba nosik renman iji na vierafe e iji bu e ani nun. Regavo erar fuba na ifejdieme e aferdiamo e iji fuka e igi kam atasega bu na nuigafieme atase vakno kiain.
LUK 11:24 Ijegreare Jesu fu uri kia, Kaven ise be fu e be dab niroimoine are kekome ai moikum namo ijia oknum ar fu fikfuon iji nisaimok. Fu nisaimoga bakma fu una kuaik, Nan ka una ar nun na amur fine ruainva ijia vakno kuaik.
LUK 11:25 Fu ijeg vierafene una vaga ar fuon fu fino iji bun amarme fuka mukor.
LUK 11:26 Ijefuon fun una va madu kaven seven (7) ka ma ise iji aferdiame una ro ar fu amur finma ijia buna fik. Ijefuon e iji fu amur fu sibank fiogavo rad fuka una unam ma ise ijia fikno kiain.
LUK 11:27 Jesu fu vuak iji kuardiame barekoga bara be fu e uruvana ijiebuon uf ijia uri kume, Na vierafe God fuka bara iji fu a nafene samuagdainma iji fuka bomana oimarkno kumen. Fu ijeg kumega Jesu fu una roin kua, Ijeg ga madu na vierafe God fu e iji bu vuak fuon iji faime igavo iji buk buka oimarkno kuain.
LUK 11:29 Jesu fu ijeg kuardiamga e uruvana bun uri Jesu dab kirakuravga fu uri kia, E igi iviakma karinva iji bu unam ise kafokafo bu reoijo iji buka ba aren. Regavo bu vierafe naka ire sumakin kafo rega bu giakuai bu iji vierafen. Regavo ire sumakin iji na nijaidiakfuon iji nam ire iji Jona fu renma ijesugin nijaidiak. Jona e Godon vuak vierafene kuaimon e Ninevako iji anf be rene nijaidiain. Regavo iviakma Ema ijiebuon Farif igi nak na e igi iviakma karijo iji unam sumakin be rega bu gak.
LUK 11:31 Regavo tavan radkma iji God fu una e uruvana ijiebuon ise iji ke mazim giak rokon ijia na vierafe bara bomana be ar Siba samuamo iji fuka ja imut bijiame vuak ise joisina kuaik. Ijefuon maiji moik fuon iji fuka aibe gavo fuka uri una e Soromonon vuak maiji fu kuaimon iji faikafa vain. Regavo vuak igi naka ma kuardiavo igia faif. E Soromonon vuak iji fuim ukakbe gavo ire igi na iviakma keoijo ijar fuka ma ikin. Regavo madu tavan radkma ijia e Ninevako iji buka uri ise jon ja rejo ijefuon ja imut bijiame joisina kuaik. Ijefuon maiji e Jona fum ema revo buka vuak fuon faime una fu igame ise buon nuigafiain. Ijegvo iviakma vuak irerag igi na kuardiavo ijar fuka ma bomana gavo e Jonan vuak iji fuim ukakbeno kiain.
LUK 11:33 Jesu fu ijeg kuardiame kia, E be fu erar ikuosaij saname abe sauikma bakin revo fuka abe samakaf ijia abedega e bu ruakva bu ijia gaknum aru ruakfuon.
LUK 11:34 Ijegvo madu ni jon fu vajai jon ijefuon ikuosaij ijin. Ijefuon ni jon fu mukor abarekma vajai jon fuka amarigia sanak. Regavo ja ni jon fu tavan uruvana ire ise iji giaokva vajai jon fuka ise ijar rareme nakik.
LUK 11:35 Ijefuon nika amarigia agordiaikin vajai jon fu sanainma ijar rarekevo nakinman iji fu areken.
LUK 11:36 A ijegrekma a ikuosaij iji fu sanamon ijeg vajat on iji fuka tavan uruvana sanaga nakinman iji fuka barekno kiain.
LUK 11:37 Jesu fu vuak ijeg kuardiame barko e Ferisis be fu Jesu kuama fu fusik duok ikafa vain. Fun va ari fine duok ikreno ijia e Ferisis iji fu Jesu fuba imut do soin ga fum duok ikreno iji gama fuka oij iseren.
LUK 11:39 Ijefuon E Bomana Jesu fu uri e iji kua, Iviakma igi e Ferisis iji janim vajai surif jon ijesugin do ruardiaf. Regavo oijon guf ijia jaka e kaniaknu ire ise reokuai vierafen.
LUK 11:40 E guri ka isema vierafejo gurie. Jaiji fun Godri vajai surif jon iji amarme madu ijar vajai jon guf iji fuk amardiain. Ijefuon ni vajai surif jon ja kege samuavo ijeg oijon guf iji kege ijeg amarigia samuaf.
LUK 11:41 Regavo vajai surif jon iji ja kege uruvana vierafejo iji arekgavo nika uri oijon ma ijekma kaifjon oijmiame ifejdiaga fuka mardiaf.
LUK 11:42 E Ferisis gurie jaka juf! Ijefuon maiji jaka duok ukakna kafo ja juar jon ijia masivo iji roin jaka kege una God vajavo iji fun maren. Regavo ja una e isema karioijo iji ja ifejdiaknumvo God jaka oijmavo bakin. Ire nokarok (2) ijieb bun Godon nifak ijia buka mamkanuk ijefuon ja ire ijieb kegokfuon.
LUK 11:43 Regavo madu e Ferisis jaiji jaka juf! Ijefuon maiji ja ar e Jius bu afuime vuak kuaivo ijia jaka jar fata mukor ijin oijmiame ijia karij. Rega madu ja vierafe e buka ar iji bu ijia afuime ire kimejo ijia ja amarigia agordiavknum anadiakuai ja iji vierafen. Regavo madu jaiji jaka e iji bu aoivga bu kege mako rume ijia areko tarar ijieb okuriainva e bu ijia datuamoijo ijekin. E bu unam ijia ja biediavo iji bu vierafero ja e maro bu ijeg vierafej. Regavo oijon guf iji buka ma aoinva igekino kiain.
LUK 11:45 Jesu fu ijeg kuardiamga e vuak akai nijaidiamon be fu uri kua, E nijaidiamon a vuak ijeg kuaimon iji aka uruvana igia vuak ise nuvuisina kuaimno kuain.
LUK 11:46 Fu ijeg kuamga Jesu fu una roin kua, Ja e vuak akai nijaidiavo iji jak jaka juf! Ijefuon maiji Mosis akai fu isoinma iji fuim sibank e bu igiakfuon ijin isoin. Regavo jar una madu akai kafo nainva ijefuon e bu akai uruvana igiakrega fuka ba aresren. Ja ijegreknum jaka e ijin afikin kam vajiak revo ja koikjo kafo imut miame ifejdiavo bakin.
LUK 11:47 Ijefuon nika juf! Ijefuon maiji ja e Godon vuak vierafene kuaivo bu kania mako ruinva iji jaka kam ar sakuriame amariav. Ijefuon na vierafe irerag saifon bu renva ja besum ijeg rej.
LUK 11:49 Ja ijegrejo ijefuon God fuon izeg fu mukoi vierafeno ijia fu usuibe ijeg kuai, E vuak nun vierafene kuaivo iji abevo e vuak abe oijo na e iji kege uniaga bu vuak. Bu vuaga e kafo bu kaniaga kafo bu kam arafiriakno kuain.
LUK 11:50 Bu moikigi ik amarenva ijia bu anerene e Ebor kaname uri e Godon vuak vierafene kuaivo uruvana kaniain. Bu ijeg kania roke radkma iji bu Godon ar guf fata iji bu isuf baroijo samaij ijia bun e Zekaraia kanain. Bur ijegrenva ijefuon God fu una e igi iviakma karinva iji fuka kam mukorigia arafiriakfuon.
LUK 11:52 Regavo e Ferisis guri vuak akai nijaidiavo iji jaka madu juf. Ijefuon maiji ja vuak ma iji e roin kuardiame nijaidiavo bakin gavo jaka kam sauiv. Regavo madu jak ja vuak iji ja mukoi faime abejo bakin gavo madu ja e iji bu ma vierafekfuon iji jaka jar bijukuriav. Jaiji ja ki iji bu kege ar vien azovo igekin ijefuon jar vien buon azomiakfuon revo ja vien buon jaka azomiavo bano kiain.
LUK 11:53 Jesu fu ijeg kuardiame fun vakrega e vuak akai nijaidiavo ijigam e Ferisis roin bu uri vuak ka ise fuisina kuaiknum ire uruvana ijefuon duna kafokafo kuardain. Bu ijeg biesua arega fu vuak kafo isema kuaiga bu gakuai bu iji ijeg ren.
LUK 12:1 Ijegrene buka e uruvana ijia afuivo ijefuon buka bui ajifnamuiv. Bu ijegrejo ijia Jesu fu amur uri e vuak fuon faivo iji kia, E Ferisis ijiebuon unam ka kufui iji bu e biesiaoijo iji amarigia giame datomdiagavo jab buonak kegok.
LUK 12:2 Irerag uruvana ja nuriet sauime kegoijo iji bu tavan iji E Bomana fu una fine e uruvana ijiebuon ise iji giamo ijia buka una samafrek.
LUK 12:3 Ijefuon maiji vuak irerag ja tavan nakinma ijia kuainva iji bu dab maza ijia kuaik. Regavo irerag uruvana ja isuar adatit kuaimoinva iji bu dab uruvana igia kuaik.
LUK 12:4 Regavo kaifnun na kuardiakrejo faif. Jab uri e iji bu vajai surif ijesugin kaniagavo rad buba una ire ma ise kafo rekfuon ijin juk.
LUK 12:5 Regavo e iji ja jukfuon iji nika God juf. Ijefuon maiji ja aoikva God fu daro namdo fur ja kege mian iji ijia naine vakon ijia korek. Ijefuon nika fu juf.
LUK 12:6 Ijegvo ja vierafega um ukaknak imut roin (5) ijekin iji buba kege mon abekgavo nokarok (2) kimek? Unam besum ijegvo God fu um iji ukaknak iji fuka rumo bakin.
LUK 12:7 Regavo madu nigen jau jon uruvana God fun dain ijefuon jab juk jar jaka ma ikin ga um iji buim ukakna.
LUK 12:8 Regavo igia faif. E be erar fu e uruvana ijiebuon nifak ijia manine kuaik fuiji fu e nuno kuainma iji Ema ijiebuon Farif igi nasik Godon anera ijiebuon nifak ijia fu abe aroiken. Regavo erar e uruvana ijiebuon nifak ijia kuaik fu naba vierafenmano kuaikma iji Ema ijiebuon Farif igi nasik Godon anera ijiebuon nifak ijia kua a naba vierafenvano kuak.
LUK 12:10 Regavo madu e be erar fu Ema ijiebuon Farif igi vuak ise nuisina kuaimon iji na game arek rega erar fu vuak ise kafo una Kaven Akai iji fuisina kuaimon iji God fuba game arek.
LUK 12:11 Regavo madu igi faif. E bu ja aferdia kam ar e Jius bu afuime vuak kuaivo ijia vo ba e mamkanuk roin ijiebuon nifak ijia vo ba e akai samuavo ijiebuon nifak ijia kotrekuai vaga jab oifiadiak. Ja vuak izeg ga vuak irerag ja kuardiakva ijin jab uruvana vierafek. Ijefuon maiji Godon Kaven ijar tavan ijia vuak irerag ja kuaikfuon iji fur vierafe vajiaga ja kuardiakno kiain.
LUK 12:13 Jesu fu ijeg kuardiamga e be fu e uruvana afuinva ijia uri kume, E nijaidiamon uviainun iji fun asoinuvuon ijefuon ire uruvana fun fur raren ijefuon ni kua fu roin atame na kiemne kumen. Fu ijeg kumega Jesu fu uri una e iji kua, E gare naiji na erar daro mienmado na uviaion kuaga fu ire uruvana kege una osik ata vajuonamikno kuain?
LUK 12:15 Fu ijeg kuardiame uri e uruvana kuardiame kia, E guri ja ire uruvana kafokafo ja jonkua rareme karevo iji nika joi samuanamiknum of. Ijefuon maiji e ma bu oimarknum kareoijo iji bu sinuom buon ma iji bu zaraivo ijar ifejdiaga bu oimarknum karijo bakin. Ijefuon fu ire uruvana zarainma iji jab vierafejno kiain.
LUK 12:16 Ijegreare Jesu fun madu uri vuak be ijeg bijame kuardiain. Fu kia, E sinuom ga ire uruvana zarainma iji fu moik ire mukoi tavuavo be abene fun ijia fin. Fu fine fuon ijeg vierafero na ar nun na uij nakfuon iji bado nakafu izegarekno kuain?
LUK 12:18 Fu ijeg vierafene uri kua, Na vierafe na ar nun na uij navo iji bujame una mamkanuk same kumun uij nun uruvana ijia nak.
LUK 12:19 Areme rad nan oimarme nui kuai na vierafe naka aresredo naba uri ire kafofuon rek. Regavo juaivasia uruvana naba una ikregavo nam ire ijin iknum ijia fivakno kuaik.
LUK 12:20 Regavo God fu uri e iji kuak, E buzeikin gare ivia naki a guake ire on fok a kanafuinma iji erar karekno kuain.
LUK 12:21 Areme Jesu fu uri vuak fuon kuaime barekafa kia, Unam besum ijeg e buka sinuom zaraime karik revo buba God ma vierafekva e ijekin iji bu Godon nifak ijia buka e sinuom bakin igekino kiain.
LUK 12:22 Areme Jesu fu uri e vuak fuon faivo iji kuardiame kia, Na ijefuon na ijin kuardiame kia, Jab ire iji ja ine karivako iji vierafek gavo uri vajai surif jon igefuon sinuom iji uruvana vierafef.
LUK 12:23 On a fivakfuon iji fuka ma bomana gavo ire iji fuim ukakbe. Regavo madu vajat on fuka ma bomana gavo sinuom iji fuim ukakbeno kiain.
LUK 12:24 Ijegvo ni madu um iji giaf. Buiji bu uij oijga afurvejo bakin. Rega madu bu ar bu ijia ire afurvene nakfuon iji bu bakin gavo fun Godri samuagdiame ire vajiamon. Regavo jaiji ja um ijekin bakin ga jaiji ja Godon nifak ijia jaka e ikin.
LUK 12:25 Regavo ja ire iji bomana vierafekva iji fu erar aresrenma bado fuba fuon fu fivako iji abe biom jaoijmana abedeme fivakma bakin.
LUK 12:26 Ja ire ukaknak iji jaba mukoi vierafekva iji ja izeg una ire mamkanuk roin giame mukoi vierafek?
LUK 12:27 Regavo ni madu sinar taraiko iji bu tavuame iravo iji giaf buiji bu koikbuon ugon bu savo iji amardiavo ga kimejo bakin. Regavo madu e Soromon fuka sinuom uruvana zarain revo ugon fu samo iji fuka ma mukor. Regavo bun sinar ijieb buon izeg ni mukor bu iravo ijia buka Soromonon ugon iji amarigia asidiame irav.
LUK 12:28 Regavo ni madu una garas bu ivia irenva a giainma ga niar a una vaga fun sairenma iji God fu vek garas iji samuagdiam. Regavo e iji jaiji ja sinar ijekin baki ijefuon God ja fuka tavan uruvana samuagdiame ifejdiam. Ijefuon efnun ja irerafuon jon ma vierafejo iji fuka vek ukaknak?
LUK 12:29 Ijefuon jab oifian abeknum ga jab tavan bog do ga duok ja ikfuon ijefuon karine vierafek. Regavo unam ijegrejo iji bu e iji God ma vierafejo bakin ijieb ijeg rej. Regavo iji ja ire kafokafo vierafejo iji Asoijon varur gufia fino iji fun giame vierafen.
LUK 12:31 Ijefuon ja ire kafokafo ja vierafejo iji aregavo ijeg ja ar fuon sanaima iji vierafene fuifuo ik reokva fur irerag ja vierafenva iji fur ifejdiaken.
LUK 12:32 Jesu fu ijeg kuardiame kia, E sibank igi vuak nun faivo iji jab juk. Ijefuon maiji Asoijon iji fun izeg jon ja vierafejo iji fun giainmado fur ja kege una e iji fu oijbuon iji samuagdiamo ijia uniak.
LUK 12:33 Ijefuon ni va ire jon uruvana ka kege kime mon abe una e sinuom bakin iji vajiaf. Regavo koikjo uri giriesame kaven jon ijiebuon kanafuf. Regavo jab uri sinuom jon ijiebuon bomana vierafegavo nika uri varur gufefuon ire ma iji bu bakrekva bakin ijin kanafuf. Ijefuon maiji varur gufia ire jon ma iji e buba niesa ga fanufanuf buba arafiriak.
LUK 12:34 Ijefuon maiji ire ma iji jon uruvana bu izia naoivo iji oijon ijiga vierafe jon buk ijia naoikfuon.
LUK 12:35 Jesu fu ijeg kuardiame kia, Ire be fu rekrega ja samuavo ijeg nika ugon jon kege amarigia same ivia kiriame ikuosaij jon kege saname samua karif.
LUK 12:36 Jaka e ikrejo bu ebuon bomana fu iro bu sanamikuai ijo fu ijia vakafa kiame vako bu samua karijo ijeg ref. Bu samuame karikin fu una ro fai bu migegare vien dajakfuon ijeg jaka samuaf.
LUK 12:37 Regavo e iji eraneb bu e bomana buon iji fu una roga bu vek samuame karinva fu giakfuon iji buka oimarkfuon. Areme fu uri kiama bu ari karikoga fu kia jaiji jaka ma vierafene karido ja ar nun igia duok uruvana jam kareme ikno kiak.
LUK 12:38 Jesu fu ijeg kuardiame kia, Na ve ufrenma ijia ga suok nakitu gamia na roga ja vek ijeg samua karikva naka jon bomana oimarek.
LUK 12:39 Regavo madu ni vierafef. E niesamo be fu niesak roga e ar koikin fuba ninain ga fu gazregakma iji e niekin fu izeg arume niesakma bakin. Ijegvo jak jaka ijeg samua karif. Ijefuon maiji Ema ijiebuon Farif iji na tavan iji jaba vierafenva ijia na una ruakno kiain.
LUK 12:41 Areme Fita fu uri Jesu kua, E Bomana duna iji a no faikfuon iji kuarduo ki a e uruvana ijiebuon kuarduomno kuain?
LUK 12:42 Fu ijeg kuardamga Jesu fu una roin kua, E iji erar fu ma vierafene amarigia ikreno e ijar ire uruvana samuagdiakfuon. E bomana fuon fu e iji kuamga fu e iji funa ikrejo ijin tavan ma ijia ire vajiaken. Fu ijegreno ijia e bomana fuon fu una ar fuon rokon ijia fu iji gakma fuka fuon oimarkno kiain.
LUK 12:44 Jesu fu ijeg kuardiame uri kia, Vuak igi naka ma kuardiav. E bomana fuon iji fu uri e iji kuamga fur una ire fuon uruvana samuagdiak.
LUK 12:45 Regavo e ikreno iji fu kuaik e bomana fuba migegare una roga fuka saroimno kuame fu uri e funa ikrejo barga baru ijin fijiaknum do kugi ine nigen iserme duok uruvana i bareknum ijeg reken.
LUK 12:46 Areme e bomana iji fu una ar fuon ijia ire fuon uruvana ga efuon ikrejo iji giakafa ruak. Regavo fu rokon iji efuon ikreno fuba vierafen. Fuba vierafenma ijia fu ijia kekome ga fuba ire fuon uruvana mukoi samuagdiaga fu kuriaireme rotkuraga fu kekome e iji buba fu igiavo ijiena besum karine vajai fian abekno kiain.
LUK 12:47 Areme Jesu fu madu uri kia, E ikreno erar fun ik irerag fu e Bomana ijefuon rejdakfuon iji fun vierafen. Regavo fuba koikfuon amur kanafume uri ik fuon iji redakma e iji fu e bomana ijar dab unam ise ijia vajai fian mak.
LUK 12:48 Regavo e ikreno erar fu efuon bomana ijefuon ik iji fu rekfuon iji fuba mukoi vierafen gavo fuim oijfuon ijia vierafero fu rad vajai fian abekro fu uri ik reoino iji rad e bomana fuon fuim ukakbe vajai fian mak. Ijeg ga God fu e iji fu ik sibank mamkanuk vajiaga bu reoijo iji fu vierafe bu giriesame sibank amarigia reoga fu una giakafa vierafen. Regavo eraneb fu ik ka mamkanuk vajiainma bu reoijo iji fu vierafe buka giriesame amarigia reoga fu una giakafa fu ijeg vierafenmano kiain.
LUK 12:49 Jesu fu ijeg kuardiame madu uri kia, Na ruainva na e uruvana moikigia oinva ijiebuon oij ijin kam arafiriakro ruain. Regavo na bomana vierafe ire iji fuka migegare barekfuon.
LUK 12:50 Regavo madu na ruainva iji na izeg vajai fian abekfuon ijefuon daro iji abedo na vajai fian abe vake barek.
LUK 12:51 Regavo ni vierafe na makarijo iji abe e moik iror igia karioinva iji miakro ruainva bakin. Regavo na ruainva iji na e fok ke atame kafokafo rekro ruain.
LUK 12:52 Ijegvo iviakma e agan imut roin (5) iji bu dab ata nokarok (2) bu roin reke nokbek (3) bu roin rek. Rega madu ar be ijia asoifijaf iji bu uri afijaf ijiena dab atame roinroin reke gavo asiefijaf iji buk bu uri kabaifijaf ijiena unam besum ijeg rek. Regavo madu afijaf ijiebuon barafijaf iji buk bu barufijaf ijiebuon asiefijaf ijiena ata roinroin rene zinamikno kiain.
LUK 12:54 Jesu fu ijeg kuardiame uri e Jius iji kia, Ja oine vana iji bu kaziga ja kuai fu vedakro kuaiko fu vedam. Regavo madu buibur fu bomana ufimon ja kuai fu tavai markreno kuaiko fu tavan marmon.
LUK 12:56 Ijefuon e guri ka isema rejo gurie ja moik ga varur ijia irerag rekreno iji jan giame vierafej gavo ja irerafuon ire igi na kegoijo iji jaba amarigia gieme vierafej?
LUK 12:57 Ja irerafuon ise jon ja reoijo iji jaba koikjo amarigia giame una ire ma ijesugin reoij.
LUK 12:58 Regavo igia faif. A ebe fu a aferda kot rekafa vakma iji nika vek a unam ijia vako ijia vuak on fusik kuaime amare. Regavo aba ijegrekma fu a dab dakarame e bomana kot faimo ijia vakma fur a abe una foris miak. Fu a abe foris miaga bur aferda dab dibur abesek. Regavo igia faif. Bu aferda ijia unaga a ijia fine mon izeg bu kuainva a ijin kime vake barme una kekokno kiain.
LUK 13:1 Jesu fu vuak ijeg kuardiame barekoga e iji bu ireme gakoga Fairet fu e Gareriko Godon isuf baroijo iji kaniainma ijieb uri vuak ijin Jesu kuardain.
LUK 13:2 Bu kuardavga fu una roin kia, Bu e ijin kam ijeg kaniainva ijefuon ja vierafega bur ma ise uruvana ren gavo e Gareriko roin bu bakin?
LUK 13:3 Regavo igia faif. Iji fuka ma bakin. Regavo ja unam ise jon uruvana ja kegoijo iji jaba arega una oij karoigakva e uruvana jak jaka bu aoinva ijeg aoikfuon.
LUK 13:4 Regavo madu e eitin (18) iji bu ar Sairom ijia ar iji bu tor ijia maduame sainva ijar tuame okuriama bu aoinva iji ja izeg vierafen?
LUK 13:5 Ja vierafega bur ise ka uruvana rekovo e uruvana Jerusarem guf ijia karinva iji bu bakin? Regavo madu igia faif. Iji fuka ma bakin. Regavo jak jaba unam ise jon ja reoijo iji jaba areme una oij karoigakva ja bu renva ijeg jaka aoikno kiain.
LUK 13:6 Areme Jesu vuak be ijeg bijame kuardiain. Fu kia, E be fu in be jafene ar fuon aror ijia oin. Areme fu va in iji fu oinma iji gaga fu sunin kiraga fu turakafa ga unaim.
LUK 13:7 Regavo in iji fuba sunin kiramga fu una e juar fuon samuamo iji kua, Na juaivasia nokbek (3) na in igi ga unaim revo fuba sunin kiram. Ijefuon ni ufu dab akoze. In iji fum ijia manine moik roin fur raremno kuain.
LUK 13:8 Fu ijeg kuamga e iji juar samuamo iji fu una kua, E Bomana ni juaivasia besum (1) igesugin are fu ijia manin. Fu manike na ase amareknum sakin akozaga ni juaivasia be ijia una gaga fu sunin kirakma iji fun marek revo bakikma nin ufume akozemne kuain.
LUK 13:10 Areme tavan Sabat (Satade) be e Jius bu isuar karine God sirimamejo ijia Jesu fu e Jiusbuon ar bu afuime vuak kuaivo ijia arume vuak nijaidiam.
LUK 13:11 Regavo bara nivek be fu kaven ise ijar niroinma fu ijia fin. Bara iji fu juaivasia eitin (18) ijeg fu adam iji abene nuon fuon dab giemoine fun arir oinon bakin.
LUK 13:12 Ijefuon Jesu fu tavan ijia bara nivek iji game uri kua, Bara game adam on a abenma fun ivia barenmano kuain. Areme fun imut nigen abedemga migegare nuon fuon fu una arir rega fu una Godon oimaren.
LUK 13:14 Rega e bomana ar iji bu afuime vuak kuaivo iji samuamo iji fu Jesur tavan Sabat (Satade) iji e Jius bu isuar karine God sirimamejo ijia bara iji keunamga fuka deajin. Ijefuon fu uri e iji kia, Tavan siks (6) iji no ikreoijo ijefuon ja tavan ijia roga fu karauniaf. Revo jab tavan Sabat (Satade) iji no isuar karine God sirimamejo ijia ruakno kiain.
LUK 13:15 Fu ijeg kuardiamga Jesu fu una roin kuardame kua, E i kufuikin gare vuak iji a kuaimon iji ja ijeg reoijo bakin. E roin jaka tavan Sabat (Satade) iji ja isuar karijo ijia ja maf-os ga maf-donki jon ja kiriainva iji irame aferdiame va do vajiaga bu ij. Ijefuon nak na tavan igi ja isuar karijo ijia na bara igi keunava iji fun maren. Ijefuon maiji bara ijar fuka ma ikin ga fanuf iji bu ikin bakin. Ijeg barak igi e Eburamon uifarif iji fu Setanri juaivasia eitin (18) ijeg adam fuon fu abenma iji abe anu kunain. Ijefuon na tavan Sabat (Satade) iji ja isuar karine God sirimamejo ijia keunainva iji ja vierafega na isema ren?
LUK 13:17 Jesu vuak ijeg fu kuainma ijar e ani fuon bu faiva buka jufdiain gavo e uruvana roin bu ire sumakin iji fu renma ijefuon fuon oimardain.
LUK 13:18 Areme Jesu fu uri kia, Na unam ijeg God fu efuon ijiebuon oij iji fu samuagdiamo na iji kuardiakrejo nin faivno kiain. Areme fu kia, God efuon ijiebuon oij iji fu samuagdiamo iji fu e be juar mene uij ukak be in sira sunin ijekin abe oina fu bomanarenma ijekin. Fu in iji abe oga fu tavuame ka bomana rena um bu ro in kiak ijia naitabenvano kiain.
LUK 13:20 Jesu fu ijeg kuardiame una madu vuak be bijame kuardiain. Fu kia, God efuon ijiebuon oij fu samuagdiamo iji fu ire ist ijekin. Bara iji fu ire ist ukakbe abe dis ijia useme farava ijekma amarekma fuka ofre uri bomana rekfuon. Unam besum ijeg gavo iviakma Godon e iji bu e sibank ga rad buka ma e uruvana rekno kiain.
LUK 13:22 Jesu fu ijeg kuardiame fun una Jerusarem vakafa uri mai ga ar ukaknak kafokafo ijia vaknum vuak iji God fu izeg efuon ijiebuon oij iji samuagdiamo ijefuon vuak iji nijaidiaknum vain. Fu ijegreoinon ijia ebe fu uri Jesu kua, A vierafe God fube e uruvana karauniak ki fu e sibank karauniakno kuain?
LUK 13:24 Fu ijeg kuamga Jesu fu una roin kua, A koikon giriesakma a vien ma kifit ijia aru vaken. Ijefuon maiji e ka uruvana bu ijia aru vakuai giriesak gavo bu izeg aru vakva bakin.
LUK 13:25 Regavo igia faif. E ar koikin fu uri vien fuon iji fu abe bijukurak. Areme a makaf ijia manine kanakanaknum kua, Eko vien dajamne kuakma fu una kua, A izia ruainma iji naba vierafenvano kuak.
LUK 13:26 Areme a una roin dakaroim kua, No ana duok ga do ioko a mai nuvuon ijia vuak nijaiduinmano kuak. Ja ijeg kuakva fu una madu kia, E ise reoijo gurie gareg vaf. Na ja izia ruainva iji naba vierafenvano kiak.
LUK 13:28 Areme ja gia Eburam ga Aisik ga Jekaf ga e iji bu amur Godon vuak vierafene kuaimoinva iji bu Godon e ijiena besum afuime irenva ja giak. Ja gia fuka deajidiaga ja imut kam jakia isoiknum niraiken ijefuon maiji ja iji fun kam makaf kozen.
LUK 13:29 Regavo tavan ijia e uruvana ar iror igia oinva bu ro Godon ar sanainma ijia karine iro ike ja giak. Regavo eraneb iviakma bu koikbuon kam amur vierafeoijo iji tavan rad buka una rad gamia ruak. Regavo eraneb bu koikbuon kam rad gamia navo iji tavan rad bu amur irekno kiain.
LUK 13:31 Areme tavan besum e Ferisis roin bu useme Jesu kua, Nika ar igi a oinon iji areme uri ai be va ijefuon maiji Erod fu a kanakafa vierafenmano kuain.
LUK 13:32 Bu ijeg kuardavga Jesu fu una roin kia, Va e iji siroij taraiko igekin iji kua, Na ivia ga niar na igia fine kaven ise iji kia bu e iji areme usem vaknum e adam abejo iji amardiaken. Regavo nituag ijar na ik nun na reoijo iji re barekno kuafno kiain.
LUK 13:33 Fu ijeg kuardiame una e Ferisis iji kia, Nason Jerusarem vak. Ijefuon maiji e Godon vuak vierafene kuaimon iji bu ar be ijia kanakva bakin gavo bu Jerusarem ijia kanak.
LUK 13:34 Jesu fu ijeg kuardiame kua, O Jerusarem Jerusarem ar eon ijiena e Godon vuak vierafene kuaivo iji kaniain. Regavo madu ar e iji vuak abe oijo iji God fu kiama bu ruainva iji mun tuame kaniain. Na tavan uruvana naka imut akozme ja aferdiame kukoro iji fu uka fuon aferdiame daf fuon rotit ijia uniamo ijeg rej revo jaka na uzain.
LUK 13:35 Ijefuon jaiji God fu ar iji e kafo ijia karijo bakin ijeg fu ijia areme vak. Regavo igia faif. Ja na jaba una giek gavo va tavan abega na una roko ijia ja kuak Godri e iji rokon iji e bomana ijefuon if ijia daro mamne kuaikno kiain.
LUK 14:1 Areme tavan Sabat (Satade) iji e Jius bu isuar karijo ijia e Feresibuon e bomana fu Jesu kuama fu ar fuon ijia fusik duok ikafa vain. Fu vakga e uruvana ijia ruainva iji buka amarigia nikaja arega fu irerag rega bu gakuai.
LUK 14:2 Regavo e be diak ga faraf foinma ijar Jesuon ruain. Fu rokga Jesu fu uri e vuak akai nijaidiavo iji abevo e Ferisis iji kuardiame kia, No tavan Sabat (Satade) akaij ijia e karauniakva fube markno kiain?
LUK 14:4 Jesu fu vuak ijeg kuardiamga buba uri vef roin kuardavga fu uri e iji keuname kuama fu vain.
LUK 14:5 Ijegreare fu madu una kia, E be igia erar amfuon be ga maf-kau fuon be fu tavan Sabat (Satade) igi ja isuar karijo ijia mako iji bu do jiavo ijia urakva jabe arega bu ijia karik ki ja va bu ifejdiame karauniaga bu ajie vakno kiain?
LUK 14:6 Jesu fu vuak ijeg kuardiamga buba una vuak ijefuon una roin kuardain.
LUK 14:7 Jesu fu izeg e kafo bu ar ma iji rarevo iji fun giain ijefuon fu vuak be igeg bijame e uruvana kuardiain.
LUK 14:8 Fu kia, E be fu iro ine a kua a vakma ab migegare va ar ma ijia ari fik. Ijefuon maiji a va ari fike e ikin be fu rad roga aba gak. Fu rad ruakma e iji fu ja e nokarok (2) kiama ja vainva iji fu ro a kua, Ani uri moik ijia fike fu e igar ar ma ijia fine kuakma aka juvknum urik.
LUK 14:10 Ijefuon a vakma ni moik ijia figa e iji fu kuama a vainma iji fu roga a e ikin bega fur kuaga a uri fata ma ijia fik. E iji fu a ijegrekma e uruvana ruainva iji bu ijia izeg e iji fu a oimardame renma iji gakfuon.
LUK 14:11 Ijefuon maiji e besubesum erar fu koikfuon abe e bomana rekma fu una e ukakbe reken. Rega erar fu koikfuon abe e ukakbe rekma fu una e bomana rekno kiain.
LUK 14:12 Areme rad Jesu fu uri e iji fu kuama fu fusik duok ikafa vainma ijin kua, A tavan kafo e kiaga bu ana duok ikva ab kaion ga uviaion ga e ar ana karijo ga e ire uruvana zarainva iji kiaga bu ro ana duok ik. Ijefuon maiji bu rad duok on a vajiainma ijefuon kume a vakma bu una vef izeg a buon renma ijeg on rek.
LUK 14:13 Ijefuon a iro vajiakma ni e iji ire bakin ijigam e ai kirariainva ijigam e diak ga imut foinva ijigam e ni zuriaigin ijia kiaga bu ro iro on sare.
LUK 14:14 Regavo a ijegreno iji anka oimarek. Ijefuon maiji buba una ire on vef roin vajakfuon. Rega aiji fu Godri tavan iji e maturainva iji aoinva bu una urijo ijia fur unam ma kafo on rekno kiain.
LUK 14:15 Regavo e be ijia buna fine duok ino iji fu vuak iji faime uri Jesu kua, E iji eraneb bu Godon ar sanainma ijia fata ma ijia karine duok ikfuon iji buka oimarkno kuain.
LUK 14:16 Fu ijeg kuardamga Jesu fu una vuak be ijeg bijame kuardain. Fu kua, E be fu iro ikafa ire uruvana kanafume e uruvana kiaga bu sarekfuon.
LUK 14:17 Areme tavan iji iro ikfuon iji roga fun efuon ikrejo iji kia, Ni va e na kiainva iji kia ire uruvana nan kanafu samuainvano nin kia bu rokno kiain.
LUK 14:18 Fu ijeg kuardiamga efuon ikrejo iji bun va e iji e bomana buon fu kiainma iji kiain. Rega e uruvana bu iro iji buba vakuai vierafen ijefuon bu uri vuak kafokafo bu vierafenva ijia kuardiain. E be fu uri kia, Na moik be kimedo na iji gak vak. Ijefuon ni va vuak nun ejon bomana iji ijeg kuardafno kiain.
LUK 14:19 Regavo e be fu uri kia, Naiji na maf-kau nun ten (10) kimedo na iji kege ar nun ijia mimatame giak vakno ni va e iji vuak ijeg kuafno kiain.
LUK 14:20 Rega e be fu madu uri kia, Naiji na iviakma bara aben ijefuon naba vuakno ni va e iji ijeg kuardafno kiain.
LUK 14:21 Bu ijeg kuardavga e iji e bomana ijefuon ikreno iji fun una va gafia kekome vuak ijin efuon bomana iji kuardain. Regavo e bomana ar iji samuamo iji fuka deajin. Ijefuon fun uri efuon ikreno iji kua, Migegareigia una kekome va mai unam ijia oknum e duok bakin ijigam e ai kirariainva ijigam e ni zuriaigin ga imut ga diak foinva iji aferdiame rokne kuain.
LUK 14:22 Areme rad efuon ikreno fun una kekome kua, E bomana vuak on nan abe kekome kuardiame vain revo ar kafar fu vekno kuain.
LUK 14:23 Fu ijeg kuardamga e bomana iji fu uri kua, Ni va ar kafokafo samaij ga unam ijia oknum e uruvana kiaga bu ruainki ar nun fu e uruvana zaraik.
LUK 14:24 Rega igia faif. E iji na kiava buba iro nun igi sarenva e iji bu duok nun igi buba ikno kiain.
LUK 14:25 Areme tavan be e uruvana bu Jesuna vako ijia fu dakaroime kia, E be erar fu asoifuon ga asiefuon ga barafuon ga afijaf ijin uruvana oijmiagavo na fum sibank oijmiemo e iji fuba aresredo fu izeg kua na Jesuon agano kuaik. Regavo madu e be erar fu uviaifijaf ga makifijaf uruvana oijmiame una fui uruvana oijmana migavo na fun sibank oijmiemo e iji fuba aresredo fu e vuak nun faimon rekfuon.
LUK 14:27 Regavo madu erar fuba nuifuon vajai fian abe guame rad jajimo e iji fuba e vuak nun faimo reken.
LUK 14:28 Ijegvo igia faif. A e be ar sakafa vierafekma e iji amur fuka va fine mon iji fu ar sakfuon iji vierafeknum kanafu vake fun aresrekma fu vierafero ar iji fu same barekro fun ijeg vierafek. Regavo fuba ar ijefuon ire uruvana kanafukma iji fuba same barek. Ijefuon e bu usem gakva buka dab varaimene kijdakfuon.
LUK 14:30 Bu dab varaimene kuaik, E iji ar iji fu anerene sain gavo fuba same barenmano kuaik.
LUK 14:31 Unam besum ijeg ga e bomana be fu e sibank ten taosen (10,000) ijeg aferdiame una e bomana be fu efuon ka uruvana tuenti taosen (20,000) ijeg aferdiainma ijek bijaikafa rokon iji fu isuar fine vierafekfuon. Fu fine vierafega fun aresredo fu e fuon ijiena va e bomana be ijek bijaikafa fu ijin vierafekfuon.
LUK 14:32 Fu fine vierafega fuba aresrekma fu e vuak abe oijo iji kiaga bur va e bomana be ijin vek gafi fu aibe ijia rokon ijia bieme una vuak oimarme kafaikfuon iji kuardakno kiain.
LUK 14:33 Jesu fu ijeg kuardiame kia, Unam besum ijeg ga e be fu erar e vuak nun faimo rekafa vierafekma ni amarigia fine vierafekfuon. Fu vierafega fun aresrekma fu ire uruvana ga unam ise kafokafo iji nuigafiame una e vuak nun faimon rekfuon.
LUK 14:34 Regavo madu igia faif. Kujan iji fu ma gavo fu ve da arume safikirakma marien fuon fuba una kujan igeg rek. Ijefuon kujan ijekin iji fu ma bado bu kege korekfuon. Unam besum ijegvo ja na jajivo ijia ja isediaga ja ijia arekva iji ikjon iji ja nuifuon rejo iji fu barek. Ijefuon ja adakiga ni vuak igi amarigia faifno kiain.
LUK 15:1 Ijegreare tavan be e takes abeoijor ijigam e ise uruvana bu Jesu vuak fu kuaimon iji faikuai ruain.
LUK 15:2 Regavo e Ferisis ijiga e vuak akai nijaidiavo iji bu uri ijefuon dab bui kuaime sigunamin. Bu kuai, E iji fu e ise iji oimardiame aferdiaknum buna duok ioinon kuain.
LUK 15:3 Bu ijeg kuaivga Jesu fu ijefuon una vuak be bijame kuardiain.
LUK 15:4 Fu kia, Ja e be erar fu maf-sif vuan adred (100) samuagdiamo ijia be fu sauikma fu izeg rek? Na vierafega fuka urine maf-sif nainti nain (99) iji fu ijia uniaga fuka kekome va be iji sauinma iji nisaimok.
LUK 15:5 Fu nisaimoine gakma fuka oimarme dabeme una ar ruak. Areme fu una kaifijaf ga e ar funa karijo iji kume bu besum afuiga fu uri kiak, Na maf sif nun sauinma iji nan una bien. Ijefuon naka oimadienmano ni roga no besum maf-sif igi sauinma iji fuon oimarkno kiak.
LUK 15:7 Ijegvo igia faif. E uruvana bun unam ma ijesugin kegoijo ijefuon God fu buon oimarem. Regavo e besum fu ise rene oi dakaroime una Godon roko e uruvana varur gufia karijo iji buka fuon ma bomana oimarevno kuain.
LUK 15:8 Jesu fu ijeg kuardiame madu una vuak be bijame ijeg kuardiain. Fu kia, Bara be fu mon sunin imut roinroin (10) ijin nain revo fu be abe aberekma fu izeg rek? Na vierafega fuka uri ikuosaij fuon abe saname ar kafut amarigia kanaknum nisaik.
LUK 15:9 Fu nisaim vake gakma fuka oimarme uri kaifijaf ga e ar ijia funa karijo iji kume bu besum afuik. Bu afuiga fu kia, Na mon nun na abe aberenva iji nan una abenvano nin roga no besum duok ine oimarevno kiak.
LUK 15:10 Ijegvo igia faif. Godon anera iji bu e iji erar fu ise fuon areme una oi dakaroime Godon roko iji buka fuifuon bomana oimarevno kiain.
LUK 15:11 Areme Jesu fu vuak fuon vek kuaimvako ijia fu una vuak be ijeg bijame kuardiain.
LUK 15:12 Fu kia, E be fu am farif nokarok (2) nafen. Regavo tavaibe am farif diar iji fu isema vierafene uri asoifuon kua, Asoinu a vek fino igia ni iviakma sinuom nun kege vajie vo nijaidiemne kuain. Ijefuon asoifuon fun uri sinuom kege afijaf nokarok (2) iji atame vajiain.
LUK 15:13 Fun atame vajiame arekoga naki sibank barko ijia farifuon diar iji fun sinuom fuon uruvana kege una e kafobuon kimene mon abe fun uri ai be vain. Fun va moik be aibe ijia kekome mon fuon dab unam ise kafokafo ijia akozeoin.
LUK 15:14 Fu ijegreoine mon fuon baremga ijia ar iji fu oinon ijia fuka vasia kekomga fuka vasia abene oifian abeoin. Ijegrene tavan be fun va e be moik iji abe fino ijefuon ik reoin.
LUK 15:15 Fu e ijefuon ik reoino ijia e iji fun kuama fu va maf fuon samuagdiaoin.
LUK 15:16 Regavo fuka mukorigia vasiaguainma ijefuon fu oinba maf ijiebuon duok iji roin ikafa vierafen ijefuon maiji fu erar fu duok kafo vajamo bakin.
LUK 15:17 Fu ijegre vake tavan be fu una fine mukoi dasu vierafene fui kuai, Na vierafega e iji bu iviakma asoinun ijefuon ikrejo iji buka duok uruvana iknum oij. Regavo naka igia vasia abene guakrej.
LUK 15:18 Ijefuon na vierafe na ivia naka uri una asoinun fu fino ijia vak. Na va kekome asoinun kua, Naiji ja Godk nifak jon ijia ka isema ren.
LUK 15:19 Ijefuon na ab una farifon igeg kiek. Regavo ni kie naiji na e on ik rejo igekino kiemne kuain.
LUK 15:20 Fun fui fi ijeg vierafene fun uri una asoifuon fu fino ijia vain. Fu vake asoifuon ijefuon ar iji fun samairen.
LUK 15:21 Fun samairenma ijia asoifuon fu gak farifuon fu gamia rokgame fuka uruvana oifiain. Ijefuon fu kukum vake gamia kekome farifuon dab anaime uimin. Fu uimimga farifuon fun uri kua, Asoinu naiji naka on isema ren vo madu Godon isema ren. Ijefuon na ab abe una farifon igeg kiek. Rega nin kie enun ik reno kiemne kuain.
LUK 15:22 Rega asoifuon iji fu faim arega uri e iji fuon ik rejo iji kume, Migegare ruafno kumen. Fu kumega bu rokga fu kia, Va ugon ka mukor ijia abe ro farinun igi abesame nin imut rin ga tamag iji kege samdafno kiain.
LUK 15:23 Bun ijegrejga fu kia, Nin va maf-kau saruigi ijia be kaname abe roga no fuifuon duok bomana ik.
LUK 15:24 Ijefuon maiji farinun igi fun guaigavo ivia fu una vek igaijar. Regavo madu fun sauigavo ivia no una bienvano kiain. Ijegreare bun fuifuon iro bomana ine oimaren.
LUK 15:25 Bu ijegrene farif amur iji fu juar gafia oine una ar gufia ruakafa roke mani faik bu asoifuon ijefuon ar ijia dua uruknum oimarev.
LUK 15:26 Bu ijegreja fu faime isuarigia roke ar samaij ijia manine e iji asoifuon ijefuon ikreno iji be kuama fu vakga fu kua, Ar gafi bu irerag abejno kuain.
LUK 15:27 Fu ijeg kuamga fu kua, Uviaion ijar una ruaiga asoion iji fu kuoga no maf-kau kaname fuifuon duok ij. Ijefuon maiji uviaion fuba guaigavo fu una ruainmano kuain.
LUK 15:28 Fu ijeg kuardamga farif amur iji fuka mukoi zieme fuba ar ijia aru vain. Fuba vakga asoifuon iji fu vierafe fu kekome farifuon soisoiga fu aru vakafa fu ijeg vierafene keko ruain.
LUK 15:29 Regavo farifuon amur iji fu una asoifuon ijeg kuardain. Fu kua, Ate na juaivasia uruvana naka igia on dibur ik igeg ik ren revo madu vuak a kuardiemo naba kege tuain rega naiji a irerag ma be abe mienma bakin. Aba ijeg maf-gout be kiema na kaname kaifnun ijiena ine oimaren.
LUK 15:30 Regavo farifon iji fu sinuom a vajainma iji fuka kege va kam bara iji bu baru turavo ijiebuon vajat ijia koren. Fu ijegreoine una rokga aka uri maf-kau iji dab fuifuon kana duok besum invano kuain.
LUK 15:31 Fu ijeg kuardamga asoifuon iji fu una kua, Farinu aiji a tavan uruvana nosik igia fino ijefuon irerag fok fun onum.
LUK 15:32 Regavo ivia noka duok ine oimarek ijefuon maiji uviaion fun guain gavo fu una urin revo madu fun sauin gavo ivia no una fu bienvano kuain.
LUK 16:1 Jesu e vuak fuon faivo ijin ijeg kuardiame una madu vuak be ijeg bijame kuardiain. Fu kia, E sinuom uruvana zarainma iji fu e be fu mon fuon samuakfuon iji aben. Regavo e sinuom uruvana zarainma iji fu rad faik efuon ikreno fu mon fuon iji fun kege unam kafokafo ijia koreoina fu fain.
LUK 16:2 Ijefuon fu e iji kumena fu rokga fu kua, Eko na vuak on be ijeg fainva iji a irerag iji ren? Ni ik on a izeg renma iji kuardie na faiv. Ijefuon maiji aiji a una nuifuon ikreknum ire nun fok samuagdiakma bano kuain.
LUK 16:3 Rega e iji fuon ikreno iji fu uri fui kuai, Iviakma nakafu irerag abek? Na E bomana nun iji fun ik igi na rejo iji fun kiega na arek. Regavo naiji na daro bakin ijefuon na izeg una ik gigikin rekva ba. Regavo madu fuka ire jufdo naba una e kafo monfuo nimdiak.
LUK 16:4 Ijefuon iviakma na irerag rekfuon iji nan vierafen. Na kaifnun iviamkor kafo kairenki na ik nun igi arekva na kaifnun iviamkor ijiebuon vaga bur oimarknum kiega na ar buon ijia vakno kuain.
LUK 16:5 Ijefuon fun e besubesum iji bu e bomana fuon ijefuon ire iji bu kenva iji kumejga bu ruain. Bu rokga fu e iji amur ruainma iji kua, A ire izeg e bomana nun ijefuon kenmano kuain?
LUK 16:6 Fu ijeg kuamga fu kua, Na oir butor vuan adred (100) kenvano kuain. Fu ijeg kuamga e bomana iji fu una kua, Ni igia ari fine ire iji a kenma iji ufu una ari fifti (50) ijeg buk igia isoimne kuain.
LUK 16:7 Areme fu una e be iji kua, Regavo aiji a e bomana ijefuon ire iji a izeg kenmano kuain. Fu ijeg kuamga fu kua, Na farava beg vuan taosen (1,000) ijeg kenvano kuain. Fu ijeg kuamga fu kua, Ni igia ari fine ire iji a kenma iji ufu una ari eit adred (800) ijeg buk igia isoimne kuain.
LUK 16:8 Jesu fu ijeg kuardiame kia, E iji fuka ise rene e bomana fuon iji bisuain revo buka fu dab aroin. Ijefuon maiji fu mukor vierafene una kaifijaf iviamkor aferdia roga bu afikin fuon dasumdain. Ijefuon e moik igefuon e iji buk buka ijeg amarigia vierafeoknum una kaifijaf iviamkor roin aferdiaga bu afikin buon dasumdiav. Bu ire ijeg kegoijo ijia buka e iji Godon unam ma iji sanainma ijia kegoijo iji buka bur ka ma asidiav.
LUK 16:9 Ijefuon Jesu fu uri vuak kuardiame kia, God abe kaijon igegrene ni mon jon kege e roin ifejdiaf. Ja ijegrenki God fu ja ifejdiame oimarknum aferdiaga ja varur gufia vakfuon.
LUK 16:10 Ijefuon e be erar fu ire ukaknak iji kege mukor samuagdiakma fu una ire mamkanuk iji kege mukoi samuagdiakfuon. Revo erar ire ukaknak iji isema samuagdiakma fu izeg una ire mamkanuk iji mukor samuagdiakma bakin.
LUK 16:11 Ijefuon a mon iji God fu vajamo iji aba kege una e roin ifejdiakma God fu varur gufia kaven ijefuon sinuom kafo una ja vajiakma bakin.
LUK 16:12 Ijefuon ja Godon irerag fu vajainma iji jaba kege mukoi reokva fuba unam ma kafo una jon rek.
LUK 16:13 Ijegvo madu igia faif. E besum fuba e nokarok (2) ijiebuon ik rekfuon. Ijefuon maiji fu e be fu mukoi oijmame fuifuon ikregavo una be iji fuka oisema vierafekfuon. Ijefuon jab God ga mon kege besum mazime buifuon ikreoijo. Rega nika God agoiknum vo igakgavo mon iji jab bomana vierafekno kiain.
LUK 16:14 Regavo e Ferisis iji buka mon uruvana oijmiavo ijefuon bu Jesu vuak iji fu kuaimon iji faime buka uri dab varaimen. Ijefuon Jesu fu uri kia, Vuak igi na kuardiainva iji jar e ijiebuon nifak ijia jaka mukoi kegoijo ijeg reoij. Regavo God fu oijon iji fun samakaf gia vierafen. Ijefuon maiji irerag ema bu ke mamkanuk igeg vierafejo iji una Godon nifak ijia buka bakin.
LUK 16:16 Regavo igia faif. E iji bu usuibe karine ruainva iji bu Mosison akaij ijiga e Godon vuak vierafene kuaivo ijiebuon vuak bu isoinva ijia giame jajiaknum karine roke e Jonon tavan ijia usen. Areme Jon fu tavan ijia Godon vuak ma iji izeg fu koikfuon una e fuon ijiebuon oij iji samuagdiakfuon ijin anerene kuain. Ijefuon iviakma e fok bu vuak iji faime buka una Godon e ijiena besum mazikuai buka giriesav.
LUK 16:17 Regavo igia faif. Rad varur gufeko moikigi bu barekfuon revo Godon akaij iji fuba bakrek. Ijefuon ja ise jon fok ja kegoijo ijia jaba arekva God fu ja kege akai fuon ijia giaknum vajai fian miak.
LUK 16:18 Ijefuon igia faif. E be erar fu bara fuon abe uname vo una bara be abekma iji fuka e befuon bara iji daturam. Regavo e be erar fu bara iji bu abe unainva iji una abekma iji fu madu e befuon bara daturamno kiain.
LUK 16:19 Fu ijeg kuardiame vake uri vuak be ijeg bijame kuardiain. Fu kia, E sinuom zarainma be fu tavan uruvana sinuom ni mukor same ar ma ijia fino. Regavo madu e sinuom bakin be if fuon Rasaras matan uruvana abenma iji bu afeme e sinuom zarainma ijefuon ar vien ijia unaga fu ijia fin.
LUK 16:21 Bu afeme ro ijia unaikin fu figa vasiaguakma fu uri va e sinuom zarainma ijefuon ar vien ijia duok ukur iji fu iga korenma iji ikafa bu ijeg ren. Regavo siroij iji buk buka ro matan fuon iji sirafiriknum ijeg rej.
LUK 16:22 Fu ijegrevake tavan be e sinuom bakin iji fu guamga anera ijieb dabme ajie Godon ar ma iji Eburam fu fino ijia unain. Fu ijia fikoga e sinuom zarainma iji fuk rad guamga bu abe mako ruin.
LUK 16:23 Regavo e iji fun guame va ar ise mian naino bu kua Edis kuavo ijia fine vajai fian bomana aben. Fu abeknum una gafeg kaf gufia gak Eburam fu Rasaras afeme fusik aibe ijia fina fu giain.
LUK 16:24 Ijefuon fu uri kume, Eburam asoinu abe nun oifian aben. Ni Rasaras kuaga fu ro imut fuon ijia do abesme itit nun igia azirdiega fu gardiem. Ijefuon maiji naka mian igi naino ijia vajai fian bomana abejno kumen.
LUK 16:25 Rega Eburam fu una roin kume, Farinu ni vierafe on a fi ruainma ijia ire on ma iji fok an ken. Regavo e Rasaras fu ire ise iji ken. Ijefuon ni ijia fine vajai fian abegavo fuiji fu igia oimarknum fik.
LUK 16:26 Regavo igia fai. Mako ka dibuor bakin be fu uf ijijar. Ijefuon eraneb bu igia una ijia on vuakfuon iji buka ba aresredo bu izeg vuakva bakin. Regavo madu fu erar izeg iji a fino ijia una igia nuvuon ruakma bano kumen.
LUK 16:27 Fu ijeg kuardamga e sinuom zarainma iji fu una kume, Asoinu e-e ni Rasaras kuaga fu una va asoinun ijefuon ar ijia uviaifnun imut roin (5) iji samakaf visume kuardia. Va kuardiaikin buba ar igi na fine vajai fian abejo igia rokno kumen.
LUK 16:29 Regavo Eburam fu una roin kume, Uviaifon iji bu Mosis ga e Godon vuak vierafene kuaivo ijiebuon akaij iji bu isoinva iji bun dame vierafen. Ijefuon ni arega uviaifon bu vuak iji bu isoinva iji dame mukoi vierafekfuon. Ijefuon maiji bun siban e ijieb ijia isoime kuardiainvano kumen.
LUK 16:30 Eburam fu ijeg kumega e sinuom zarainma iji fu una roin kume, Eburam asoinu iji na vierafe fuka ba aresren. Ijefuon fuka e guainma ijar una uri buon vake bu ijia game una ise buon nuigafiakno kumen.
LUK 16:31 Rega Eburam fu una kume, Regavo bu vuak iji Mosis ga e Godon vuak vierafene kuaivo vuak iji bu buk akaij ijia isoinva iji buka ba dame fain. Ijefuodo bu madu e guainma fu una uri buon vakma buba vuak fuon faime ise buon arekno kumen.
LUK 17:1 Jesu fu ijeg kuardiame una e vuak fuon faivo iji kia, Tavan uruvana ire iji bu e biesiako bu iserejo iji buka nuvuon rekfuon. Regavo e iji erar fu e roin ifejdiako bu ise rejo e iji fuka amarigia jukfuon. Regavo madu erar fu e roin bu iviakma God ma vierafejo iji biesia bu ise rekva Godri e iji abe ka amarigia arafirik. Ijefuon fu iji fu isekma nika uri mun ma bomana ijia abe uro fuon ijia kira saof ijia arikma iji fuka marek.
LUK 17:3 Ijefuon nika koikjo mukoi samuanamif. Regavo uviaion be fu ise reoinon a gakma ni kua, Irerag a reoinon iji fu iseno aremne kuamne. Regavo a ijeg kuaga fu ise fuon una a kuardakma ni faime oion ijia are.
LUK 17:4 Regavo fu madu una tavan besum ijia on ise uruvana rejknum ro kuak, Kainu naka on ise renvano gieme aremne kuakma ni giame aremne kiain.
LUK 17:5 Ijegreare Jesuon e afasor ijieb madu uri fu kua, E Bomana nuvuon no ma vierafejo ijin kege mamkanu reduoga no darokma God ma vierafejno kuain.
LUK 17:6 Bu ijeg kuardavga fu uri kia, Jon ja ma vierafejo iji bu ukaknak in sira sunin ijekin iji ja aresredo ja uri in guri kuak, Ni gireg gamia jafene saof ijia arimne kuakva fu igiakno kiain.
LUK 17:7 Areme Jesu fu una vuak be ijeg bijame kuardiain. Fu kia, Ja e be fu oifuon ikreno fu juar ijia ikrek vain vo baga fu maf samuagdiafoine una ruakma a irerag abek? Abe uri kuak, Eko migegare ro igia arifine duok on na kanafuidainva igi ine kuak?
LUK 17:8 Na vierafe jaba ijeg kuardakfuon revo jaka una madu kuak, Migegare va duok nun na ikfuon iji kanafu. A ijegreare nin samuake na duok ga do ine barga nin son rad ro fine duok ga do on ine kuak.
LUK 17:9 Fu ijegrene uri vuak fok a kuardamo ijia reokma a vierafe abe ijefuon una fuon oimarek? Iji fu bakin ijefuon maiji fun ik fuon fu reno fu iji ren.
LUK 17:10 Ijefuon jak jaka unam besum ijeg rekfuon. Ja ikjon ja rekfuon God fu vajiainma ja iji reokva iji nin kuai, Noiji nom e Godon ik reoijo ijin ijefuon non ik nuvuon reoijno kuaikfuon.
LUK 17:11 Areme tavan be Jesu fun ar Sameria irif Gareri samaij ijia mai be ijia kekokafa vako ijia fu e imut roinroin (10) e vajai kasi bu kua refrosi kuavo iji abenva iji biediain. E iji buba usem Jesu niriain revo bum aibe gafia ireme uruvana igia kume, Jesu E Bomana abe nuvuon oifian abene ifejduokno kumen.
LUK 17:14 Bu ijeg kumejga Jesu fu giame uri kia, Ni va e isuf baroijo iji giame vajai jon iji bu nijaidiavno kiain. Jesu fu ijeg kuardiamga bun una vakuai unam ijia vako ijia vajai kasi iji bu abenva iji fun bakiten.
LUK 17:15 Rega e besum fu uri gak vajai fuon fun una marenma fu gain. Ijefuon fuka uruvana igia kumejknum Godon if abe ajievknum oimarme una ruain.
LUK 17:16 Fu una roke Jesu fino ijia ato same fuon oimaren. Regavo e iji fu e ai Sameriako ijar ijeg ren.
LUK 17:17 Areme Jesu fu uri e iji kua, E iji na e imut roinroin (10) ijeg kasi abenva na ifejdiava bu madiain revo e nain (9) iji bu izer?
LUK 17:18 Regavo irerafuon e ai beko igi fu fuonkua God oimardakafa ruainmano kuain.
LUK 17:19 Rega Jesu fu uri e iji ruainma iji kua, On a ma vierafenma ijar a keunainmano ni uri vakne kuain.
LUK 17:20 Areme tavan be E Ferisis roin bu uri Jesu duna be kua, A vierafe tavan iji God fu una efuon ijiebuon oij iji samuagdiakfuon iji fu ivez rekno kuain? Bu ijeg kuardavga Jesu fu kia, Unam iji fu reno e bu izeg ni buon ijia gakva bakin.
LUK 17:21 Ijefuon e be fuba kuaik, God fu iga ga garano kuaik. Ijefuon maiji God fu e besubesum oijon ijia samuagdiamno kiain.
LUK 17:22 Ijegreare fu madu uri e vuak fuon faivo iji kia, Vake tavan abekma jaka karine Ema ijiebuon Farif ijefuon tavan iji fu una ruakfuon jaka iji gakuai karine ijefun rek. Regavo tavan iji e fok jaba gak. Regavo tavan iji fu una roko iji fu Godon sanainma ijekma una ruak. Regavo tavan ijia e buka usem biesiame kiak, Fu gafia vo fu igijano kiaga jab useme na nisaidie vuak.
LUK 17:24 Ijefuon maiji tavan iji na una roko iji fu varur gari fu karaga e fok bu gavo ijeg Ema ijiebuon Farif igi na una roko iji fun unam besum ijeg ruak.
LUK 17:25 Regavo amur naka uruvana igia vajai fian abek ga madu e igi iviakma karijo iji buka na uzak.
LUK 17:26 Bu e Noan tavan ijia e uruvana izeg bu kenva ijeg Ema ijiebuon Farif igi na una roko tavan ijia e uruvana bu unam besum ijeg rekfuon.
LUK 17:27 Noan tavan ijia e uruvana bu karine duok iknum do iknum barubara bui sanamiknum buka ijeg rein. Bu ijegrene roke tavan iji Noa fu sisim ijia ajiekoga do iji fuim ijia firame keko e fok numume vain.
LUK 17:28 Ijegvo madu tavan iji e Rot fu finma ijia e fok bu madu duok iknum do iknum ire kafokafo kimejknum ijeg ren. Bu ijegreknum uri ire kafo kege una e kafona ivajuinamiknum ire uij iviamkor abedeknum ar saknum ijeg ren.
LUK 17:29 Bu ijegre roke tavan iji Rot fu ar Sodom areme vakoga mian iji fum varur gufia arime e fok ka naibaren.
LUK 17:30 Ijegvo tavan iji Ema ijiebuon Farif igi na una roko iji fun unam besum ijeg rekfuon.
LUK 17:31 Regavo igia faif. Tavan iji E Bomana na una roko ijia e be fu ar fuon azan ijia ajie fino iji fuba una arime ar guf ijia sinuom fuon fok karekfuon. Regavo madu be fu juar fuon ijia oinon iji fu tavan ijia fuba una ire kafo ar fuon ijia naoivo iji karekfuon.
LUK 17:32 Ijegvo ni unam izeg e Roton bara iji fu ar fuon mian naiga fu uri sinuom fuon iji vierafega mian fu jakinma iji vierafef.
LUK 17:33 Ijefuon erar fu moikigia tavan bog fuon vierafenma iji oijmame keokma rad fu una izeg unam ma karivako iji abekma bakin. Regavo erar fu moikigia tavan bog una e roin vierafeknum oijmiame ifejdiafoinma iji fu rad unam ma karivako iji abek.
LUK 17:34 Regavo naka ma kuardiavo igia faif. Tavan iji na una roko ijia e nokarok (2) bu ar besum naoinva ijia anera bu ari e besum (1) afegavo be bu ijia arek.
LUK 17:35 Regavo madu bara nokarok (2) bu duok nifiejo ijia anera bu arime bara besum (1) afega be bu ijia arek.
LUK 17:36 Regavo madu e nokarok (2) bu juar ijia oijo ijia anera bu arime e besum (1) afega be bu ijia areme vakno kiain.
LUK 17:37 Jesu fu ijeg kuardiamga e vuak fuon faivo iji bu uri kua, E Bomana ire iji fu izia rekno kuain? Bu ijeg kuardain gavo Jesu fuba una vef roin kuardiain revo fum uri vuak ijeg bijame kia, Ar izerkin ire kafo aoinva bu naoivo iji um buruof iji fanuf kuniai bua ioijo ijieb udi ijia faime va ijia reoga ja giakno kiain.
LUK 18:1 Areme Jesu fu vuak be bijame e vuak fuon faivo iji kuardiain. Fu ijeg kuardiaga bu vierafekin buka tavan uruvana sirimamekgavo buba uzakfuon.
LUK 18:2 Fu kia, Mai be ijia e bomana e kot faimo be fu ijia fino. Revo e iji God fuba bomana juvknum vo ema iji fu jume agordiamo bakin.
LUK 18:3 Regavo bara amun be mai besum ijia fino iji fuka tavan uruvana ro fu fino ijia kekome kua, Abe e iji bu na dab arafirievo iji ifejdieme oifian nun dasumdiekno kuam unaim.
LUK 18:4 Regavo e bomana kot faimo iji fuka ba ifejdakafa vierafen. Revo fu uri fui kuai, Na God na juvknum ema iji akariavo bakin. Revo bara amun iji fu na kiekieko naka isediem. Ijefuon ivia na fu ifejdame unam fuon amarek. Regavo bakma fu ijegreke na fuka isediekno kuain.
LUK 18:6 Areme E Bomana Jesu fu uri kia, Ja vuak irerag e bomana akai samuamo fu renma na kuaivo iji jan fain. Regavo ja vierafe God fube efuon iji bu nakikmazak fuon sirimamejo iji ijeg ifejdiak? Revo madu ja vierafe fube saroime ifejdiak?
LUK 18:8 Naka ma kuardiav fuba saroik gavo fuka migegare ifejdiak. Regavo tavan iji Ema ijiebuon Farif igi na una roko iji ja vierafe e fok bu kafu vek na ma vierafeke na giak? Ijefuon nika unam izeg bara amun fu kenma ijeg mimatame God sirimamene kuara unar kekin fu ifejdiaga e ani jon buba unam jon kam arafiriakfuon.
LUK 18:9 Areme Jesu fu madu uri vuak be ijeg bijame e iji kuardiain. Fu giak e roin buka koikbuon aroinamiknum vierafero buka mukor rej ga e roin buka isema reojoro buka una e roin ni iken giamoijo ijefuon fu vuak ijeg bijame kuardiain.
LUK 18:10 Fu kia, Tavan be e nokarok (2) bu Godon ar ijia sirimamekuai vain. E be fu e Ferisi ga be fu e takes abeoinon ijin.
LUK 18:11 E Ferisi iji fu va fuibe manine Godon sirimamen. Fu sirimane kua, God na on oimarev ijefuon maiji nam e roin bu bara turaknum sinuom rareknum ire ise kafokafo reoijo ijekin bakin.
LUK 18:12 Na vuik besum (1) guf ijia naka naki nokarok (2) na oifuon duok karoknum vo naka mon nun na abejo iji roin na abe oifuon abedevo. Naka on oimarev. Na e gari takes abeoinon ijekin bano kuain.
LUK 18:13 Fu ijeg sirimamen vo e takes abeoinon iji fu aibe ijia manin. Fuba ro asarajieme varur gufia gavknum sirimamen revo fum oi fuon ijia kanaknum kuai, O God naka isema reoijo ijefuon ni nun oifian abene kuain.
LUK 18:14 Jesu fu vuak ijeg bijame kuardiame kia, Na ma kuardiav e nokarok (2) iji bu sirimamenva ijia e iji takes abeoinon ijar fu Godon nifak ijia fu mukoi ken revo e be iji fu bakin. Ijefuon maiji erar fu koikfuon abe e bomana rekma rad fu e ukakbe rek. Revo e iji erar fu iviakma kabuaikabuaiki reoinon iji rad God fu e iji abe e bomana rekno kiain.
LUK 18:15 Jesu fu vuak iji kuardiame barko bara roin bu am ukaknak iji aferdia fuon roga fu imut nigen namdiakro bu iji aferdia ruain. Regavo e vuak fuon faivo buka uri kuriaireme bijuin.
LUK 18:16 Bu ijeg bijuivga Jesu fu uri kia, Am ukaknak iji jab bijukuriakgavo ni arega bu ruaf. Ijefuon maiji God fu e iji eraneb bu am ukaknak igi bu asoijbuon ma vierafejo ijeg bu na ma vierafejo fu e ijekin iji samuagdiakafa vierafen.
LUK 18:17 Regavo igia faif. Eraneb buba am ukaknak iji bu asoijbuon ma vierafejo igegreare na ma vierafekva e iji bu Godon e rekva bano kiain.
LUK 18:18 Areme tavan be e Jiusbuon e bomana fu uri Jesu kua, E nijaidiamon mukor gure. Na irerag rekva na ma karivako iji abekno kuain?
LUK 18:19 Fu ijeg kuardamga Jesu fu una kua, A irerafuon na kie a e mano kiem? Fu e be erar e ma bakin revo e ma iji fun e besum God fuonkua.
LUK 18:20 Regavo a Godon akai fu nainma iji an vierafen. Ijefuon ab e kafobuon bara turaknum ab e kaniaknum vo ab niesaknum vo ab vuak kufuimene kuaimok. Regavo madu nika asie asoion iji amarigia igiamne kuain.
LUK 18:21 Jesu fu vuak ijeg kuardamga e iji fu una kua, Na vek am ukak ijia na akai fok naka igia ruainvano kuain.
LUK 18:22 Fu ijeg kuardamga Jesu fu faime una kua, Iji fun maren revo na vierafega a una ire besum ijin rekfuon. Na vierafe aka una va ire on fok kege kime mon abe e sinuom bakin iji vajiame nin una na jajie.
LUK 18:23 Jesu fu vuak ijeg kuardamga e iji fu vuak iji faima fuka oifiain. Ijefuon maiji fu vierafega fuka sinuom uruvana zarain.
LUK 18:24 Ijegreare Jesu fu gak e iji fuka oifiain magame fu uri kua, E iji bu sinuom uruvana zarainva iji bu una e iji God fu oibuon iji samuagdiafo ijiena mazikva fuka ma gigikin.
LUK 18:25 Regavo igia faif. Fanuf kamer iji fuka ma bomana ga siem tit iji fuka ukakbe ijefuon fu ijia aru vakma fuka ma gigikin. Ijefuon unam besum ijegvo e sinuom zarainma fu e iji God fu oibuon iji samuagdiamo ijiena besum mazikfuon iji fuka ma gigikino kiain.
LUK 18:26 Areme e vuak iji fainva ijieb uri bui kuai, Fu erar aresredo fu e iji God fu oibuon iji samuagdiamo ijiena besum mazikno kuain.
LUK 18:27 Bu ijeg kuaivga Jesu fu una kia, E be fu erar fum fuon izeg fu mukoi vierafeno ga unam fuon fu kegoino ijia fu aresrenma bakin. Regavo fun Godri fuonkua fu aresredo fu ire fok rekfuon. Fur fuonkua era fu vierafenma iji kuaga fu e iji God fu oibuon iji samuagdiamo ijiena buna besum mazikno kiain.
LUK 18:28 Rega Fita fu uri Jesu kua, E Bomana no ar nuvuon iji noka ijia areme uri a jame ruainvano kuain.
LUK 18:29 Fu ijeg kuardamga Jesu fu uri kua, Vuak iji an ma kuardiem. Regavo igia faif. Eraneb bu uri ar buon ga ag barabuon ga uviaifijaf ga eofijaf fok ka nuigafiame uri nuifuon ikrekva bu vek moikigia karijo ijia God fuka unam ma kafo buon rek. Regavo madu bu aoikva tavan rad bu unam ma karivako iji abekno kiain.
LUK 18:31 Areme Jesu fun e tuer (12) vuak fuon faivo iji aferdia besum uniame kia. Igia faif. No Jerusarem ijia vak. No ijia vainki vuak irerag fok e Godon vuak vierafene kuaivo bu Ema ijiebuon Farif igi nuifuon buk akaij ijia isoinva iji fuka aresrek.
LUK 18:32 Bu na abe una e Jius bakin iji miaga bu vuak ise nuisina kuaiknum dab varaimeknum juvit foimadiek. Regavo madu bu na dab fijieme dab kuros kaniek. Regavo naki nokbek (3) barekma na ijia una urikno kiain.
LUK 18:34 Jesu fu vuak ijeg kuardiain gavo e vuak fuon faivo iji buba amarigia fain. Ijefuon maiji fu Kaven Akai ijar vuak ijefuon maiji fuba abe oibuon ijia samafrediain ijefuon buba mukoi faime vierafen.
LUK 18:35 Areme Jesu fun ar Jeriko samaij ijia roko ijia e ni zuriaigin be fu unam irif ijia fine duokfuon nimdiam. Fu fine ijegreno ijia fu faik buka e uruvana fu fino ijia irovajaknum asiva fu faime uri e iji kia, Iji bu irerag abejno kiain.
LUK 18:37 Fu ijeg kiamga bu kua, Fu Jesu e Nasaretko ijar ruvakno kuain. Bu ijeg kuavga fu uri kume, Jesu e Devidon uifarif gafe ni afikin igi na abejo iji gieme nun oifian abene ifejdiemne kumen.
LUK 18:39 Fu ijeg kumega e iji amur roko ijieb uri kuriaireme kua, E gume isuar fine kuain. Regavo fuka una madu uruvana igia kume, E Devidon uifarif gafe ni afikin igi na abejo iji gieme nun oifian abene ifejdiemne kumen.
LUK 18:40 Fu ijeg kumega Jesu fu faime ijia manine kiama bu e ni zuriaigin iji afeme fuon vain. Bu afeme Jesu manino samaij ijia vakga fu kua, Na irerag iji redakro a iji vierafenmano kuain. Fu ijeg kuamga e ni zuriaigin iji fu una roin kua, E Bomana na vierafega naka una ni narakafie vierafenvano kuain.
LUK 18:42 Fu ijeg kuamga Jesu fu uri e ni zuriaigin iji kua, On a ma vierafenma ijar a amardainmano ni ninaramne kuain. Rega tavan ijia e iji fu una ninara nisaime uri Godon oimarknum Jesu ja vain. Fu ja vakga e fok bu iji game buk uri Godon oimaren.
LUK 19:1 Jesu fu ijegrene fun Jeriko mai bomana iji asidiame vakafa vain. Regavo e takes abejo ijiebuon e bomana be ijia fino if fuon iji Zekias. Regavo e iji fu e ikin ga fuka e sinuom uruvana zarain.
LUK 19:3 Regavo Zekias fu Jesu e izekin fu iji gakafak vierafen revo fuka e ivuankbe ijefuon fu izeg e fok ijiebuon nifak ijia Jesu gakma bakin. Ijefuon fu asidiame kukum roke in durim ijekin be unam irif ijia manino ijia ajien. Fu ijia ajie fine Jesu vuako iji gam.
LUK 19:5 Fu fine gakoga Jesu fu roke in anej ijia kekome asarajie Zekias game kua, Zekias migegare ari rokne ijefuon maiji ivia na ar on ijia fikno kuain. Fu ijeg kuamga Zekias fuka oimaimga fu migegare ari kekome Jesuon bomana oimaren.
LUK 19:7 Fu ijegrega e fok bu game buka zien. Ijefuon bu isuar kuai e guri fuka e ise reno gavo e ikin guri fuka ar fuon ijia vakreno kuain.
LUK 19:8 Regavo Zekias fu uri manine E Bomana Jesu kua, E Bomana igia fai na vierafega naka ire nun fateroin kege una e sinuom bakin iji ik vajiaken. Regavo gaga na e roin biesiame ire buon roin kegogakva iji na vierafega naka una ire kafo kege una ire buon iji na kenva ijekma vajiakno kuain.
LUK 19:9 Fu ijeg kuardamga Jesu fu una roin kia, Ivia e ar igia karijo ijiebuon ise iji God fun giame aren. Ijefuon ja jonkua Eburamon uifarif bakin gavo Zekias fuk fu Eburamon uifarif be. Ijefuon maiji fu na ma vierafen. Regavo Ema ijiebuon Farif igi na ruainva iji na e ijekin bu ise rene God uzame vainva na ijin nisaidiame aferdiaknum karauniakro ruainvano kiain.
LUK 19:11 Areme e uruvana bu vek karine Jesu vuak iji fu kuardiamo iji faikoga fu madu vuak be bijame kuardiain. Ijefuon maiji fun Jerusarem samaij ijia vako ijia fu vuak ijin kuaimga e bu vierafero tavan iji God fu efuon ijiebuon oij iji samuagdiakfuon iji fun iviakma igia rekrenoro bu ijeg vierafen.
LUK 19:12 Ijefuon Jesu fu uri kia, E ikin be fu moik be ijia e bomana rekafa ijefuon daro abek vaido fu una ruakfuon.
LUK 19:13 E bomana iji fu vakafa vierafene uri efuon ikrejo imut roinroin (10) iji kege uri mon fu nainma iji kege ata vajiain. Fu vajiame kia, Na vako ni mon ijin kege ik jon kafokafo rene una mon kafo amarega na una ro karevno kiain.
LUK 19:14 Fu ijeg kuardiame fun vek unam vako efuon iji buka fu uzame ziegafain. Ijefuon bu e vuak abe oijo iji kiava bu rad jame va e ikin iji kua, Eon gami bu kume no e iji fu e bomana nuvuon rekreno iji noka iseduomno kuain.
LUK 19:15 Regavo e ikin iji fu vuak buon iji fum faim arega fun va izeg fu e bomana rekfuon daro iji abe una ruain. Fun una ro kekome e iji mon fu atame vajiama bu kege ikrene una kafo azan kenva ijin giakafa kumena bu besum ufuin.
LUK 19:16 Ijegreare e be fun kekome kua, E bomana na mon iji a mienma iji na abe ik rene una mon kafo imut roinroin (10) ijeg kege ijekma nainvano kuain.
LUK 19:17 Fu ijeg kuardamga e bomana iji fu uri kua, A ire ukaknak iji kege amarigia samuagdiado na kuaga a mai mamkanuk imut roinroin (10) iji samuagdiakno kuain.
LUK 19:18 Fu ijeg kuardame una efuon ikreno be kumena fu vain. Fu kekome kua, E bomana na mon a mienma iji na abe ikreoine una mon kafo imut roin (5) ijeg kege una ijekma nadaivano kuain.
LUK 19:19 Ijefuon e bomana iji fu una kua, A ijegrenma ijefuon a mai imut roin (5) iji samuagdiakno kuain.
LUK 19:20 Areme fu una efuon ikreno be iji kumena fu vain. Fu kekome kua, E bomana mon on a mienma iji igaijar. Naka a juinva ijefuon na abe amarigia ugon ijia anume abeden.
LUK 19:21 Ijefuon maiji na vierafega aiji aka e darokin fu erar a biesuakma bakin. Ijefuon na mon igi kege iremirekva tavan iji a una roko ijia na izegrekva bakin. Regavo madu a ire kafo a imut on ijia oinma ga nainma bakin iji am ijia kareknum masimoino ijefuon na iji ijegrevano kuain.
LUK 19:22 Fu ijeg kuardamga e bomana fuon iji fu una kua, A ijeg kuaimon ijefuon na vierafega aka ba nuifuon ik amarigia ren ijefuon na a dab arafirak. Regavo igia fai. Naiji naka e darokido na irerag nar nainva ga oinva bakin iji na masiknum karvo.
LUK 19:23 Ijefuon a irerag abega a mon nun iji aba abe ar bu mon navo ijia abedekoga bu abe ikrene una mon kafo amardienvano kuain.
LUK 19:24 Fu ijeg kuardame fu una efuon ikrejo ijia irenva iji kia, Mon guri abe una e gari mon kege amarigia ikreno iji mafno kiain.
LUK 19:25 Fu ijeg kiamga bu una kua, E bomana e iji an amur mon bomana be fu mainmano kuain.
LUK 19:26 Bu ijeg kuardavga e bomana iji fu una roin kia, Na igi kuardiavo ni faif. E iji eraneb bu ire uruvana kenva iji bu una madu ma uruvana kek. Regavo erar fu ire kafo ba nainma iji irerag sibank fu nainma iji bu una kamazak.
LUK 19:27 Regavo e ani nun bu na e bomana rekfuon iji bu uzainva iji ni aferdiame ro na manijo nifak guria usem kania bu aoivno kiain.
LUK 19:28 Jesu fu vuak ijeg bijame kuardiame baremga fun amur Jerusarem vakga e uruvana bu rad jame vain.
LUK 19:29 Fun roke ar Betifas ko Beteni samaij uruor Orivsno kuavo ijia kekoin. Fu ijia kekome uri e vuak fuon faivo nokarok (2) iji vuak igin kuardiain. Fu kia, Va ar gafia useme vien ijia aruvaf. Ja vien ijia aru vaga bu maf-donki uka be buba abe oijo iji ijia kiraiga iji irame abe una igia ruaf.
LUK 19:31 Regavo ja iraga ebe fu giame kiaga ni kua, E Bomana ijar kuoga no iravno kuaf.
LUK 19:32 Areme e iji bun vake gafia usem vuak fok Jesu fu kuardiainma iji bun useme ijeg ren.
LUK 19:33 Bun usem maf-donki uka iji iravga e koikin iji fun uri kia, E garie ja irerafuon maf-donki uka iji iravno kiain?
LUK 19:34 Fu ijeg kiama bu una kua, No E Bomana ijar kuoga no iji iravno kuame bun abe una roke Jesu fino ijia usen. Areme bun ugon buon bu azan savo iji azome maf-donki azan ijia rieme Jesu imuikeja fu ijia ajie fin.
LUK 19:36 Areme fun abe unam ijia vako e roin bu ugon buon bu azan savo iji azome unam ijia riedako fu azan ijia vain.
LUK 19:37 Fun vake ar Jerusarem samaij uruor Orivs unam dorok ijia kekoin. Fu ijia kekomga e uruvana vuak fuon faivo iji bu fu ja roko iji bun ijia anerene ire sumakin fu rena bu gainva ijefuon uruvana igia Godon oimaren.
LUK 19:38 Bu oimarknum kume, No vierafe Godri Kin igi fu E Bomana ijefuon if ijia rokon igi daro mak. Regavo no vierafega ire fok varur gufia naoivo bu afuime ijia naoim vak. Regavo madu noka Godon if iji dab aroikno kumen.
LUK 19:39 Areme e uruvana irenva guf ijia e Ferisis roin bu uri Jesu kua, E nijaidiamon ni e vuak on faivo iji kia bu isuar irevno kuain.
LUK 19:40 Bu ijeg kuavga Jesu fu una roin kia, Naka ma kuardiav na kuriaire bu arekva mun guri naoivo iji buka uri na arordiekno kiain.
LUK 19:41 Fu ijeg kuardiame fun ajie roke mai bomana Jerusarem samaij ijia keko mai iji gama fuka oifiaima fu una efuon ijiebuon nirain.
LUK 19:42 Fu niraiknum kume, O e Jerusaremko igie irerafuon ni jon fuka vek nakinman ijefuon na jaka ba gieme vierafen. Regavo ja na gieme vierafenvabatie iviakma ja na amarigia agordiek.
LUK 19:43 Regavo ijeg jaka bakin ijefuon vake tavan be abekma ijia e ani jon bu unam jon iken roinroin ja usem vakfuon iji buka ufutkuria ameoine bijukuriak.
LUK 19:44 Areme bu uri ar jon ga e fok mai guf ijia karinva ijin arafiriak. Regavo mun iji bu kege ar jon sainva iji buka uduimarik. Ijefuon maiji ja Godon tavan iji fu ja karauniakafa ruainma iji jaba game ma vierafenvano kumen.
LUK 19:45 Jesu fun ijeg niraiknum kuardiame fun Godon ar bu sirimamejo ijia arume e iji bu karine ire kafokafo kimejo iji kuriaireme kiama bu usen.
LUK 19:46 Fu ijeg kiama bu usekoga fu uri kia, Usuibe buk akaij iji bu isoinva ijia God fu kuai, Ar nun iji bu ijia sirimamejno kuain. Regavo jar ijia aru karine dab e niesavobuo ar igeg amarevo kuain.
LUK 19:47 Fu ijeg kuriairega bu usem vako fu tavan uruvana Godon ar ijia vuak nijaidiam. Regavo e Godon isuf baroijo ijiebuon e mamkanuk ijiga e vuak akai nijaidiavo ijiga e aiko ijiebuon e mamkanuk iji bu ka Jesu kanakuai vierafen.
LUK 19:48 Regavo bu unam iji bu izeg Jesu kanakfuon iji bu nisaimga fuka iseren. Ijefuon maiji e uruvana buka vek ijia karine vuak fu kuaimon ijefuon ma ijin abekuai amarigia faiv. Bu vuak besum be buka ba asikuai vierafen.
LUK 20:1 Areme tavan be Jesu fu Godon ar ijia arume vuak nijaidiaknum vuak fuon ma iji kuardiain. Fu ijeg kuardiamo ijia e mamkanuk Godon isuf baroijo ijigam e mamkanuk vuak akai nijaidiavo ijigam e mamkanuk roin bu besum afuime usem Jesu kua. A daro iji a izia aben ga erar abe mainma a iji abe ire igi reoinon ni kuarduo no faivno kuain.
LUK 20:3 Bu duna ijeg kuardavga Jesu fu uri kia, Iji jan ma kuardien revo ni areke na duna be kuardiakrejo ni faif. Ja vierafega e Jon daro iji fu abe e do ruardiamo iji fu emab main ki fu Godri mainmano kiain?
LUK 20:5 Fu ijeg kuardiamga bu uri vuak ijefuon dab bui sigume kuai, Vuak iji note una izeg kuardak? No kuaik Jon daro iji fu Godri mainmano kuakva fu una kuok revo ja irerafuon jaba Jon ma vierafenvano kuok?
LUK 20:6 Regavo madu no kuak daro iji fu emab mainvano kuakva no vierafega e uruvana igia irenva buka mun tuame kanuokno kuain. Ijefuon maiji e fok bu vierafega Jon fun ma e Godon vuak vierafene kuaimon ijin.
LUK 20:7 Ijefuon bu vierafega fuka iserga bu uri kua, No Jon daro iji fu izia abenma iji noba vierafenvano kuain. Bu ijeg kuardavga Jesu fu kia, Ijekido nak na daro igi na izia abe ire igi kegoijo iji naba kuardiakno kiain.
LUK 20:9 Areme Jesu fu una madu suar be bijame e iji kuardiain. Fu kia, E be fu juar be mene e kafo kena bu juar iji samuako fun ar aibe vain.
LUK 20:10 Fu va ijia fine faik in fu oinma iji bun sunin kira baiva fu faime fun una efuon ikreno be kuama fu i sunin iji kafo tura vajakafa ruain. Fu roke gufia kekomga e iji juar samuame karinva ijieb uri e iji kunaime kanavga fu ire kafo ba ken revo fum imut kiriasame una vain.
LUK 20:11 Bu ijegrejga fu una efuon ikreno be kuama fu una rokga bu madu kanaknum dab unam kafokafo fu juf abekfuon ijia rejga fu ire kafo ba ken revo fum una imut kiriasame vain.
LUK 20:12 Areme e bomana iji fu una efuon ikreno be kuama fu rokga bu una madu e iji kaname dab gama akozen.
LUK 20:13 Areme e iji juar menma iji fun uri fui kuai, Nakafu izeg rek? Na vierafe iviakma naka farinun iji kua fu vakma bu ir fuon abene fu agordakno kuaime fun farifuon iji kuama fu ruain.
LUK 20:14 Regavo e iji in fu oinma iji samuagdiame karinva iji bun uri fu game bui kuai, E gafi no vierafega fu e juar igi mene vainma ijefuon farif ijin. Ijefuon rono kaname uri asoifuon ijefuon ire fok nuvuon karevno kuain.
LUK 20:15 Ijefuon bun uri farifuon iji kunaime dab vuain oinva fak gufa akozme fu kanava fu guainmano kiain. Ijegreare Jesu fu uri kia, E iji bu ijeg ren revo ja vierafega e in iji oinma fu una ruakma fu e iji in samuagdiavo iji fu izeg rek?
LUK 20:16 Fu ruakma fu e in iji isema samuagdiavo iji fuka kaniaga bu aoike fu in fu oinma iji kege una e roin vajiakno kiain. Fu ijeg kuardiamga e iji bu vuak iji faime bui kuai, E iji no vierafe buba ijegrekno kuain.
LUK 20:17 Bu ijeg kuaivga Jesu fu una bu giame kia, Regavo ja vierafega Godon vuak iji bu usuibe buk akaij ijia isoinva iji bu irerafuon ijeg isoime kuai, E iji ar savo iji bu kudie ma iji girme manikfuon iji bu garo fu kudie isero bu abe akozen. Regavo rad bu ga kudie iji fuka ma mukor ga fuka mano kuain.
LUK 20:18 Ijefuon erar fu kudie iji uzainma iji fu rad arikanaga fu kudie ijefuon azan ijia arikma fuka buaseme iserek. Regavo madu kudie iji fu ari e be kanakma fuka buaseme kuotuvat igeg rekno kiain.
LUK 20:19 Ijefuon e vuak akai nijaidiavo iji abevo e Godon isuf baroijo ijiebuon e mamkanuk iji bu vierafe buka migegare Jesu kunaim tokuai vierafen. Ijefuon maiji bu vierafega vuak iji fu bijame kuainma iji fu buisina kuain. Regavo bu una e ijia ruainva iji juin.
LUK 20:20 Ijefuon bu ebuon kafo subidiame sivisa bu isuarigia Jesu nikajame oknum biesuame duna kafokafo kuaknum ijeg ren. Bu ijegreoknum ga are fu vuak iji bu kuardavo ijia una vuak ise kafo kuaiga bu kunaim tokuai ijeg ren. Bu tom abe una e Romko buon e bomana daro iji samuamo iji maga fu efuon bijaivo iji kiaga bu kanakuai bu ijeg ren.
LUK 20:21 Ijefuon e iji bu sivisainva iji bun va Jesu fino ijia usem kuai, E Nijaidiamo no vierafega vuak on a kuaimoijknum nijaidiamon iji aka ma reoin. A ijegrejknum e kafo a jumo bakin ga aka Godon vuak ma iji fu e igiebuon vierafenma a ijin kuardiam.
LUK 20:22 Ijefuon a vierafega akai nuvuon ijia fube mardo no e Romkobuon e bomana ijefuon takes rek. Ni ar kuarduoga no faivno kuain.
LUK 20:23 Regavo Jesu fun giaga bu fu biesuavga fu kia, Mon sunin ja takes rekfuon iji abe nijaidie na gavno kiain. Fu ijeg kiamga bu abe nijaivga fu kia, Ja vierafega uikinik ga if igi bu isoinva iji fu erafono kiain. Fu ijeg kiamga bu una roin kua, Fu Sisa e Romkobuon e bomana ijefuon uikinik ga if fuon ijino kuain.
LUK 20:25 Bu ijeg kuavga fu kia, Ire iji ja giaga bu Sisan ga iji ni kege una Sisa vajaf. Regavo irerag iji bu Godon ga ni kege una God vajafno kiain.
LUK 20:26 Fu vuak ijeg kuardiamga bu e uruvana ijiebuon nifak ijia una vuak kafokafo ijia biesuakrejga buka jufdiama bu ijia aren. Ijefuon maiji bu vuak iji fu una kuardiainma iji faivga fuka oiserdiama bum ijia isuar karine vuak fuon ijesugin fadain.
LUK 20:27 Areme e Sejusis bu Jesu gakuai ruain. (Revo e ijieb kuai e iji aoivo iji bu una urijo bano kuaiv). Bu roke fu fino ijia usem kua, E nijaidiamon Mosis fu nuvuifuon akai be ijeg isoime abeden. Efarif be fu bara be abega fu am kafo ba tuanaga fu guakma bara iji fu uviaifuon ijar fusik abek. Fu abekin fur uviaifuon iji guainma ijefuon am tuanak.
LUK 20:29 Ijegvo e agan seven (7) iji amur ijar bara abe fu am kafo ba tuanai gavo fum guain.
LUK 20:30 Fu guakoga diar fuon ijar fusik bara amun iji abe am kafo fuba tuanain gavo fun madu guakoga diar fuon be ijar fusik madu aben. Bu e agan seven (7) fok buka ijegre vake baren. Regavo bu am kafo ba tuanain revo bum aoim barekoga rad bara iji fu guain.
LUK 20:33 Bu ijegrene agan fok seven (7) bu bara besum ijin aben. Revo a vierafega tavan rad agan fok aoinva bu una urijo ijia bara iji fu erafon barakno kuain?
LUK 20:34 Bu ijeg Jesu kuardavga fu una kia, Iviakma igi barabaru bu bui sanamiv. Regavo rad tavan be abekma ijia e iji God fu kiak jaiji jan aresredo ja mako guf ijia una uri karikno kiakma ijia buba una buon sanamik.
LUK 20:36 Ijefuon maiji fun Godri mako guf ijia karauniainma ijefuon bu una uri efuon rene anera igeg buba aoik gavo bum ijia karivak.
LUK 20:37 Regavo igia faif. Fun Mosisri e iji bu aoime una uri karivakfuon ijefuon vuak iji fu kuainma iji fun samakaf nijaidiain. Fun buk kafar be fu tarar iji fu nainma ijefuon vuak iji fu isoime kuainma ijia fu kuai, E Bomana iji fu e Eburam ga Aisek ga Jekaf ijiebuon Godno kuain.
LUK 20:38 Vuak iji fu kuainma ijefuon maiji God fu e aoivo ijiebuon God bakin. Regavo God iji fu e nivek karijo ijiebuon God ijin. Ijefuon maiji Godon nifak ijia e fok bu nivek karijno kiain.
LUK 20:39 Jesu fu ijeg kuaimga e roin vuak akai nijaidiavo iji bu uri uruvana igia kume, E nijaidiamon duna buon iji an una amarigia roib kuardiainmano kumen.
LUK 20:40 Ijefuon e iji buba una duna kafo Jesu kuain.
LUK 20:41 Areme Jesu fu uri e ijin kia, Ja irerafuon kuai e iji God kuama fu ruainma iji fu Devidon uifarifno kuaiv? Ja ijeg kuaivo ijia ja kuai Jesu fum emano kuaiv.
LUK 20:42 Regavo Devid fun koikfuon buk Sams ijia isoime kuai, God E Bomana ijar uri E Bomana nun kua ani ro imut maink nun igia e bomana rene fi. A ijia fike na e ani on bu ana nigaraivo iji kege kaniame ke diak rotit on ijia uniamne kuain.
LUK 20:44 Areme Jesu fu kia, E iji God kuama fu ruainma iji fu e Devidon uifarif ijia revo Devid fu una e iji fu e Bomanakono kuain. Ijefuon e iji God kuama fu ruainma iji fu izeg una Devidon uifarif rekno kiain.
LUK 20:45 Ijegreare e fok bu karine faiko Jesu fu uri e vuak fuon faivo iji kia, E iji bu vuak akai nijaidiaoknum if buon kam ajievo iji mukoi agordiaknum ofno kiain. Fu kia, E iji bu vierafero buka sinuom ma same e fok ijiebuon nifak ijia oga bu giame arordiakuai bu ijeg reoij. Bu ijegrejknum buka arume ar iji e Jius bu afuime vuak kuaivo ijia ga madu ar iji bu iro ijo ijia buka ar maiji kege karijo.
LUK 20:47 Regavo buon bu sirimamejo iji bu kufuimene jaoijor sirimameknum e biesiame kuai bu e mano kuaiv. Bu ijeg kuaimoijknum buka bara amun iji biesiame sinuom buon niesav. Bu ijeg kufuimeoijo ijefuon God fuka bu kam unam ma ise ijia arafiriakno kiain.
LUK 21:1 Areme tavan be Jesu fu Godon ar ijia aru fine giako e sinuom zarainva ijieb arume mavua iji bu mon savo ijia mon saknum ijegrej. Fu ijia fine giamo ijia fu gak bara amun be fu mon kavuan ukakna nokarok (2) kege mavua ijia sama fu gain.
LUK 21:3 Ijefuon fu uri kia, Na ma kuardiav e fok mon iji bu abesvo iji fu bara amun garar asidiain. Ijefuon maiji e roin mon uruvana karevo iji roin bu bui kega bum ukaknak kege vajiev. Regavo bara amun iji fu mon ma ukakbe fu duok kimekafa abedenma iji fun fok abe miainmano kiain.
LUK 21:5 Areme e Jesuon vuak faivo roin bu kari Godon ar iji game kuai, Ar maiguri sainva iji buka mun ka mukor ijesugin kareme sain. Regavo madu ar guf ijia buka ire uruvana kege Godon isuf baroijo kuain. Bu ijeg kuavga Jesu fu uri kia, Ire fok igi ja giavo iji bu rad tavan be ruakma mun igi besum be fuba guri fu namo ijia ijeg nakfuon. Regavo rad bu bujame kozega mun iji bu uduim arikno kiain.
LUK 21:7 Fu ijeg kuardiamga e vuak fuon faivo iji bu uri kuai, E Nijaidiamo a vierafega ire iji fu ivez rekfuon? Regavo a vierafe no anf irerag ijar rega no ijia ga vierafero ire iji fu rekro no ijeg vierafekno kuain.
LUK 21:8 Bu ijeg kuardava Jesu fu una kia, Tavan rad e buka oine biesiakno nika amarigia giaknum of. Ijefuon maiji e uruvana buka if nun ijia usem biesiame kiak, Noiji no e iji fu ruakafa kuainva ijin ijefuon tavan iji fun ruainmano kiaga jab uri jajiak.
LUK 21:9 Regavo madu e roin buka una e roina bijaiknum vo e mamkanuk buon bu samuagdiavo ijiena vuak gigikin kuaimoga jab juk. Regavo igia faif. Tavan ijia ire kafokafo buka rega ja giakfuon. Regavo jab vierafero iji fun tavan radkma iji barno ijinro jab ijeg vierafek iji fui bakin.
LUK 21:10 Ja e moik kafokafo ijia karioinva iji buka una bui bijaiga ja faik.
LUK 21:11 Regavo madu moikigi fuka unam ma ise ijia urake vasia kekokega e kafo bu vasia oriaga buka aoik. Regavo madu e uruvana buka adam ise abekfuon. Ijegrekega ire ni kafokafo ka ise ja jukfuon iji bu ijia rekega varur gufia anf mamkanuk roin bu ijia rek.
LUK 21:12 Regavo ire uruvana na kuardiavo iji bu rad rekfuon. Regavo amur e buka e Jiusbuon ar bu afuime vuak kuaivo ijia ja kam arafiriaknum aferdiame dibur uniakfuon. Regavo madu buka ja aferdiame e kin iji ga e mamkanuk ijiebuon vaga bur uri ja kege kam unam gigikin ijia vajai fian vajiakfuon. Ijefuon maiji jaka na ma vierafejo ijefuon bu ijeg rek.
LUK 21:13 Regavo bu unam ijegrejo iji bun ja ar aremdiado ja ijia vuak nun ma iji ijia kuardiakfuon.
LUK 21:14 Ijefuon jab uri vuak jon ja izeg una bu kuardiakfuon ijin uruvana vierafek.
LUK 21:15 Ijefuon maiji nar oijon ijia ga nigen jon ijia vuak vierafe vajiaga ja e iji bu ja kam vuak gigikin kuardiavo ijiebuon vuak iji karatuame una roin kuardiakfuon.
LUK 21:16 Regavo madu bu asie asoijon ijigam uviaifjon ijigam makifjon ga e jana ai besum karioijo ijieb ja ziegafiak. Bu ijegrene buka ja tomdiame kam e ani iji vajiaga bu kege arafiriaga e roin ja aoikfuon.
LUK 21:17 E fok ja buka kam unam kafokafo ijia ijeg arafiriaknum ziegafiak ijefuon maiji jan una enun rene if nun dab kuaimoijo ijefuon bu ijeg rek. Regavo igia faif. Na e besubesum jaiji naka amarigia samuagdiak. Ijefuon jaka koikjo giriesainki God fu ifejdiame daro miaga ja tavan bog ijia ma karivak.
LUK 21:20 Areme Jesu fu uri kia, Ja tavan iji e bijaivo bu usem mai Jerusarem okurakva ni vierafero Jerusarem bun abe iserekrejoro ja ijeg vierafekfuon.
LUK 21:21 Regavo e iji eraneb ja ar Judia guf ijia karinva iji ni subime va uruor mamkanuk irif ijia sauif. Regavo madu e iji eraneb ja mai guf ijia karijo iji ni subime vaf. Regavo eraneb ja mai iji areme usem makaf ijia vainva iji jab una mai ijia ruak.
LUK 21:22 Ijefuon maiji tavan iji ire iji bu ijegrekfuon iji bun buk akaij ijia isoin. Bu isoime kuai, Tavan ijia bu e moikigia oinva iji abevo ire fok moikigia naoivo iji kam vajai fian miakuai kuainva iji fu ijekma aresrek.
LUK 21:23 Ijefuon vake tavan ise iji fu moikigia reno ijia bara am fudienva ijiga am iviakma nafenva iji buka afikin abek. Regavo God fu tavan ijia e Jius iji ziegafiakma bu unam ma ise ijia vajai fian abekfuon.
LUK 21:24 Regavo tavan ijia e bijaivo iji bu e roin kaniaga e roin bu aferdiame moik kafokafo ijia dibur uniak. Regavo mai Jerusarem iji bu e Jius bakin ijieb dab isereknum vake rad God fu una kiak tavan jon fun barenmano kiakno kiain.
LUK 21:25 Jesu fu ijeg kuardiame kia, Bu ijegreke varur gufia anf ka mamkanuk kafo bu veni ga asam ga mujur ijia rega bu giak. Regavo madu moikigia fuka buibur bomana ufike saof fu foine ma iserke ijia e fok buka nonamime ka juk. Ijegrene Godri ire fok varur gufia kege katiga bu uri iji giame kuaik, Ire iji fukafu uniaibe moikigia rekreno kuaik. Regavo ire ijefuon daro ijar bu kekma buka bomana oi bijukuriakfuon.
LUK 21:27 Areme tavan ijia Ema ijiebuon Farif igi na una vana araf ijia daro ga sanaima nun ijekma roga ja giek.
LUK 21:28 Ijefuon ja oga ire fok bun anerene rega nin oimaref. Ijefuon maiji e iji fu ja karauniakfuon iji fun samairen.
LUK 21:29 Areme Jesu fu vuak be ijeg bijame kuardiame kia, Ni in makam ga in kafo bu a kanavo iji vierafef.
LUK 21:30 Ja oine in iji bu a kanavo ja giame vierafero tavan iji juar mekfuon iji fun samairenmaro ja uri anere juar mej.
LUK 21:31 Unam besum ijeg vo ja oine giaga ire kafokafo bu rega ni vierafero tavan iji God fu efuon ijiebuon oij iji samuagdiakfuon iji fun samairenmaro ni ijeg vierafef.
LUK 21:32 Regavo na igi kuardiako e iji ja iviakma vek karinva iji irerag na kuardiaiva iji fu Jerusarem ijia rega ja game radson aoik.
LUK 21:33 Regavo varur ijiga moikazan igia ire fok God amardiainma iji bu iserme barek gavo vuak nun fuba barek gavo fu tavan bog ijia nakno kiain.
LUK 21:34 Jesu fu ijeg kuardiame una kia, Ijefuon nika amarigia joi samuanamikgavo jab uri iro ine do kugi iknum una moik igefuon ire iji uruvana vierafek. Ja ijegrekva moik igefuon ire ijieb ja kam utufutuf miaga ja tavan iji Ema ijiebuon Farif igi na una roko iji ja afurvene samuakva bakin.
LUK 21:35 Ijefuon maiji tavan iji na una roko iji fu ire buar iji fu dasuikome fanuf muamafamo ijeg jaba samuainva ijia nam ijia una ruak.
LUK 21:36 Ijefuon jab zazaigavo nika amarigia jon samuanamiknum ga tavan bog sirimamef. Ja ijegrejknum karinki Ema ijiebuon Farif igi na una roko ijia ire fok bu rekva ja giriesame uri irekno kiain.
LUK 21:37 Areme naki besubesum ijia Jesu fu ro Godon ar bu sirimamejo ijia vuak nijaidiame tavan nakimon iji fu una va uruor Orivs manino ijia naino.
LUK 21:38 Ijefuon e uruvana bu tavan bog suok vana ijekma va Godon ar ijia vuak fuon fu nijaidiamon iji faikuai vak.
LUK 22:1 Ijegvo e Jiusbuon tavan iji bu iro Fasovano kuavo ijigam bred iriaikin ire ist bakin iji bu ine God izeg fu usuibe saifijaf karauniainma iji vierafejo iji fun samairen.
LUK 22:2 Tavan iji fun samairega e mamkanuk Godon isuf baroijo iji abevo e vuak akai nijaidiavo iji bu uri unam izeg bu Jesu kanakfuon iji nisain. Regavo vuak iji buba abe kuaime samafren ijefuon maiji bu e uruvana ijia ruainva iji juin.
LUK 22:3 Ijefuon tavan be Setan fu e Jesuon vuak faivo e tuer (12) ijia e Judias Iskariotno kuavo ijefuon oij ijia vuak vierafe mama fu oisema vierafen.
LUK 22:4 Ijefuon fun kekome va e mamkanuk Godon isuf baroijo iji abevo e Godon ar juokarijo ijiebuon e mamkanuk ijiena izeg fu Jesu abe miakfuon ijin kuardiain.
LUK 22:5 Judas fu vuak ijin kuardiamga e iji bun oimarme uri kua, A ijegrekma no mon be a makno kuain. Bu Judas ijeg kuardavga fun vuak iji buna kuaim abe maren. Areme fun uri isuar nuriet ijia izeg fu Jesu abe e ani fuon miakfuon ijin e fok sauikuriame reoin.
LUK 22:7 Areme tavan iji bu bred iriaikin ist bakin baroijo fun ruain. Regavo e Jius bu tavan iji bu iro Fasovano kuavo iji ikuai maf-sif uka iji kaniaknum ire kafokafo kanafuin.
LUK 22:8 Ijefuon Jesu fu uri Fita ko Jon vuak nijaidiame kia, Va iro no tavan Fasova ijia ikfuon iji kanafufno kiain. Fu ijeg kiamga bu una Jesu kua, Regavo no izia duok iji kanafukno kuain?
LUK 22:10 Bu ijeg kuavga Jesu fu kia, Igia fai ja mai bomana vien iji bu aru vako ijia ja ebe fu do jia roko iji biekfuon.
LUK 22:11 Regavo ja biekva ni jame ar iji fu aru vako ijia arume e ar koikin iji kua, E Nijaidiamon iji fu kume ar iji na e vuak nun faivo ijiena iro Fasova ikfuon iji nijaiduomne kumenmano kuaf.
LUK 22:12 Ja ijeg kuaga fur ar kaf ijia ajie ai guf bomana be bu mukorigia amarenva iji nijaidiaga ni ijia duok uruvana kanafufno kiain.
LUK 22:13 Areme bun va usem vuak irerag fok Jesu fu kuardiainma iji fuka maga bun uri duok uruvana bu tavan Fasova ijia ikfuon iji kanafuin.
LUK 22:14 Areme tavan fun nakisrenma ijia tavan ma iji fun rokga Jesu fu e tuer (12) vuak fuon faivo ijiena va ar guf ijia aru fata irif ijia kari ameoine duok in.
LUK 22:15 Bun duok ikrejo ijia Jesu fu uri kia, Na bomana vierafega naka jana amur iro Fasova igin ine rad naka bomana vajai fian abek. Regavo igia faif. Rad naba una jana duok igavo nason duok fok God fu izeg e moikigia ise reoijo iji karauniakafa vierafenma ijin ka re barekno kiain.
LUK 22:17 Jesu fu ijeg kuardiame uri kafus iji abe Godon sirimane oimaren. Areme fu abe una e vuak fuon faivo iji miaknum kia, Kafus igi abe jon ivajuinamif. Ijefuon maiji naba una ijeg jana do vuain ik. Regavo tavan rad ijia na una moikigia e bomana rene e fok samuagdiavo ijia nason una jana ikno kiain.
LUK 22:19 Areme fun una madu uri bred iji abe Godon sirimane oimaren. Ijegreare fun abe ukaknak tuaseme kege e vuak fuon faivo iji vajiaknum kia, Ire igi fu vajai surif nun igekin na abe ja miav. Ijefuon ni irerag na reoinva iji jak ijegrejknum na vierafefno kiain.
LUK 22:20 Areme fun madu una uri kafus iji abe do vuain abe ijia useme abe miame kia, Vuain igi fu unam iviamkor iji God fu joifuon amardiakfuon ijefuon anf ijin. Ijefuon na guame kavuan nun iji na joifuon use ga ijia ja vierafero nar unam jon amarva ja una Godna besum renro ja ijeg vierafek.
LUK 22:21 Ijegvo ni gaf ejon be fata igia nona fino ijar na abe e ani iji miak.
LUK 22:22 Regavo Ema ijiebuon Farif igi na guavo iji fun Godri ijeg vierafenma ijefuon na guak. Regavo e iji fu na abe una e ani miamo iji fuka ma ise rekno kiain.
LUK 22:23 Jesu fu ijeg kuardiamga e vuak fuon faivo iji bu uri bui kuai, E igia no karinva ijia kafu erar Jesu abe una e ani iji miakreno kuain.
LUK 22:24 Ijegreare e Jesuon vuak faivo iji bun uri erar fu e bomana rekfuon ijefuon bui duna kuanamin.
LUK 22:25 Bu ijeg kuaivga Jesu fu una kia, E moikigia e mamkanuk rejo iji buka daro abe ebuon ikrejo iji vuak gigikin kuardiaknum samuagdiavo. Regavo na vierafe unam ijeg kegoijo iji fuba jon rekfuon. Regavo erar fu e bomana rekafa vierafekma iji nika una e kabuaikabuaiki rene efuon ijiebuon ikrene.
LUK 22:27 Regavo igia faif. E bu duok ijo iji bu e be fu ari fine samuako e be fu duok kege ro fu fino ijia nadaga fu ino. Regavo iji bu ijegrenva ijia ja vierafega e izar fu e ikin? Na vierafega e iji fata ijia finma ijar. Regavo naiji na e iji fu koikfuon abe e bomana reno na e ijekin bakin. Naiji na e bomana jon gavo na una ja nijaidiaga ja ijia gieme una e ukaknak igegrene una e kafobuo ikrekfuon kiain.
LUK 22:28 Jaiji jan ik izeg na unam gigikin na biediame ruainva ijia jan nana besum afikin ijia aru ruain.
LUK 22:29 Ijefuon izeg asoinun fu na imut bijieme kiega na e fok ijiebuon e bomana rene samuagdiavo ijeg na ja oimarme kiavo ni jak ijeg kef.
LUK 22:30 Ja ijegrenki ja rad nana ar iji asoinun fu samuamo ijia fata ma iji abe ijia karik. Ja ijia karine duok iknum vo do iknum e mamkanuk rene e Isrerko ijiebuon agan tuer (12) iji samuagdiakno kiain.
LUK 22:31 Areme Jesu fu uri Saimon kua, Saimon ni igi fai fun Godri Setan kuaido fu e iji ja vuak nun faivo iji jon izeg ja na ma vierafejo iji biesia giaga jan vek na ma vierafega fu iji giak.
LUK 22:32 Regavo Saimon aiji nan oifuon sirimamene God kuardaido fuba arega on a ma vierafeno iji aba arekfuon. Regavo a una oi dakaroime na ma vierafene ar uviaifon fok ifejdiaga bu buon ma vierafejo iji buka darokin rekno kuain.
LUK 22:33 Jesu fu ijeg kuardamga Fita fu una Jesu kua, E Bomana na vierafega nan samuain. Ijefuon e bu a tomda dibur unakva nak na ijia osik vajai fian abevo guakno kuain.
LUK 22:34 Fita fu ijeg kuardamga Jesu fu una kua, Vuak igi naka ma kuardav a tavan nokbek (3) bu nuifuon kuakva a kiak na e iji naba gainvano kiake rad kukoro fu kumekno kuain.
LUK 22:35 Areme Jesu fu uri kia, Tavan iji na kiava ja mon ga kamuij ga tamag bakin usem mai besubesum ijia vainva ijia jaba ire kafofuo zazainvano kiain? Fu ijeg kuardiamga bu una kua, Ba ire fok no fun aresreno kuain.
LUK 22:36 Jesu fu ijeg kuardiame uri kia, Iviakma igi tavan iviamkor. Ijefuon erar fu sinuom ga mon kafo kege okafa vierafeno iji ni kamuij jon kege of. Regavo erar fu kaki baga fu set fuon fu iduaiga fu abesmo ijin abe una ebefuon kimega fu mon maga abe kaki bijaivo iji kime.
LUK 22:37 Ijefuon maiji usuibe vuak iji bu buk akaij ijia isoime kuai, E iji bu abe e niesavo ijiena kamakno kuainva iji buka na abe ijegrega fu ijekma aresrekno kiain. Ijefuon maiji vuak irerag bu nuisina isoinva iji na vierafega bu rekno kiain.
LUK 22:38 Fu ijeg kuardiamga e vuak fuon faivo iji bu kua, E Bomana no kaki nokarok (2) igijarno kuavga fu kia, Vuak iji fun siban jaba una kuaikno kiain.
LUK 22:39 Jesu fu tavan uruvana vuak nijaidiaoine vo fun uruor Orivs manino ijia vak. Ijefuon fun mai iji areme una ijia vakga e vuak fuon faivo iji bun funa ijia vain.
LUK 22:40 Fu aferdiame buna vake uruor Orivs manino ijia useme fun uri kia, Ni koikjo sirimame God kuardaikin Setan fu oine biesiakma jaba zazaikno kiain.
LUK 22:41 Fu ijeg kuardiame fun ijia uniame bu karikoga fun uri sibank aibe ijia sauime sirimamekafa vain.
LUK 22:42 Jesu fun va kekome God sirimamene kua, Asoinu a vierafega fu markma ni vajai fian igi na abekrejo ijigam na guakrejo iji biju. Regavo baga ni vierafe nun iji arekgavo on a vierafenma ijia rene kuain.
LUK 22:43 Regavo tavan iji fu fine sirimameno ijia anera ijar varur gufia arime Jesu daro main.
LUK 22:44 Regavo kaven fuon fuka vajai afin ijefuon fuka darokma sirimamekoga vakik ijar kavuan igeg vajai fuon ijia arin.
LUK 22:45 Fu sirimamene baremga fu una e vuak fuon faivo iji karinva ijia vaga bun ni naoin ijefuon maiji buka Jesuon oifian bomana abenva ijar buka aimiain. Bu ni naoivga Jesu fu kia, Ja irerafuon ni naoiv? Uri sirimame God kuardaikin Setan fu jon ja ma vierafejo iji biesia giakma jaba zazaikno kiain.
LUK 22:47 Jesu fu vek manine e vuak fuon faivo iji vuak kuardiamo ijia e azikeoijo iji abevo e uruvana roin bu ijia usen. Bu Judas e Jesuon vuak faimo ijar aferdiame roke ijia useme Judas fun uri Jesu uimin.
LUK 22:48 Regavo Jesu fu uri kua, Judas a Ema ijiebuon Farif igi naiji a ijeg uimimdiega e ani nun bu ijia game na tofdiekuai a ijefuon ijeg kenmano kuain.
LUK 22:49 Regavo e Jesuon vuak faivo iji bu gak Jesu bun kunaim tokrejga bu uri Jesu kua, E Bomana noba kaki nuvuon igia kege buna bijaikno kuain.
LUK 22:50 Rega e vuak fuon faimo be fu ijia manido fu uri kaki fuon iji kunaim darume dab e be e Godon isuf baroijo ijefuon ikreno ijefuon ada maink iji kana daturain.
LUK 22:51 Fu ijegrega Jesu fu uri kia, Iji fun sibano arefno kiain. Areme fu una e ijefuon ada iji abe una amardamga fun una maren.
LUK 22:52 Areme fu una e Godon isuf baroijo ijiebuon e mamkanuk ijigam e Godon ar juokarijo ijiebuon e mamkanuk ijigam e aiko ijiebuon e mamkanuk iji bu fu tokuai ruainva iji kia, Naiji na e kaniaknum isereoijo bakin. Regavo ja irerafuon jua magu abe na vierafe ruain.
LUK 22:53 Na tavan bog na Godon ar ijia vuak kuardiaknum vuak nijaidiaoin gavo jaba tavan ijia na tofdien. Regavo igi fun Setanri ja samuagdiamo ijefuon ja tavan jon ijia naki na tofdiekuai ruainvano kiain.
LUK 22:54 Areme bun Jesu tome afem e bomana Godon isuf baroijo ijefuon ar ijia arume vakoga Fita fu aibe gamia giaknum jajiame aru vain.
LUK 22:55 Regavo ar uf ijia bu mian bomana jame ijia iruavo ijefuon Fita fun va ijia buna mian iruame manin.
LUK 22:56 Ijefuon bara be ijia ikreno ijar uri Fita game uruvana igia nikajame kia, E igi na vierafega fu ebe fusik oinon ijino kiain. Fu ijeg kiamga Fita fuka uri feme kia, Bara gare na e iji naba vierafenvano kiain.
LUK 22:58 Fu ijeg kuardiavo fiko ijia e be fu una madu keko game kuai, Na vierafega ak a e be fusik oinon ijino kuain. Rega Fita fu una madu feme kua, Naiji ma bano kuain.
LUK 22:59 Regavo tavan ivuankbe barko ijia ebe fusik madu uri ka darokma kume, E igi fu fusik oinon non game vierafen. Ijefuon maiji Jesu fu ar Gareri ijia ruainma ijefuon e igi fu e ijekono kumen.
LUK 22:60 Rega Fita fuka uri kua, E gari na vuak irerag a kuaimon iji naka ba vierafenvano kuain. Fita fu vek vuak ijeg kuardiako kukoro ijia kumen.
LUK 22:61 Kukoro fu kumeko ijia E Bomana fu dakaroime Fita nikajamga fu ijia una E Bomana vuak iji fu kuardainma iji vierafen. Fu kuardame kua, A e bu nuifuon kuaraga a tavan nokbek (3) feke kukoro fu ijia kumekno kuainma fu ijin vierafen. Ijefuon Fita fuka oifiainma fu kekome makaf ijia ka bomana nirain.
LUK 22:63 Regavo e iji Jesu afem vako iji bu uri fu dab varaimeknum kanaknum ijeg ren. Regavo e iji bu e Jius e mamkanuk ijiebuon ar juokarijo ijieb ijeg ren.
LUK 22:64 Bu Jesu afeme ijegrejknum uri ugon fat ijia abe ni fuon fok okurain. Areme bun uri uikinik ijia kanaknum kua, Ni erar a kanamo iji kurano faivno kuain.
LUK 22:65 Bu ijegreknum uri fu arafirime vuak ise kafokafo fuisina kuain.
LUK 22:66 Bu ijegrene vake tavan afaremga e aiko ijiebuon e mamkanuk ijigam e Godon isuf baroijo ijiebuon e mamkanuk ijigam e vuak akai nijaidiavo iji bu besum afuikoga bu Jesu afem ijia ruain.
LUK 22:67 Bu afem ijia rokga e ijieb uri Jesu kuai, A vierafega an ma e iji God kuama fu moikigia e fok karauniakafa ruainma ijiga ni kuarduo no faivno kuain. Bu ijeg kuavga fu una roin kia, Regavo ja vierafega na keno kiakva ja na jabe ma vierafek. Regavo madu na duna una ja kiakva jabe una roin kuardiek?
LUK 22:69 Regavo ivia tavan igia anerene una gafeg vako ijia Ema ijiebuon Farif igi naiji na God e darokin ijefuon imut maink ijia fikno kuain.
LUK 22:70 Jesu fu ijeg kuardiamga e mamkanuk fok bu uri uruvana igia biumame kume, Ijefuon no vierafega akafu a Godon farifno kumen. Bu ijeg kumejga fu kia, Vuak iji ja kie a Godon farifno kievo iji jan ma kuaivno kiain.
LUK 22:71 Fu ijeg kiamga bu uri uruvana igia biumame kume, No vierafega no irerafuon una vuak kafo kuardakva bakin. Ijefuon maiji vuak iji fun koikfuon ir fuon ijia kuaima non fainvano kumen.
LUK 23:1 Areme e Jiusbuon e uguaikin iji bun uri Jesu afem Fairet e iji tavan ijia fu moik buon samuamo ijefuon vain.
LUK 23:2 Bun afem va Fairet fino ijia usem uri vuak kafokafo bu kege una fu namdainva ijin Fairet kuardain. Bu kua, E igi no afem ruainva iji fu enuvuon iji aferdiame una unam be ijia nijaidiam. Fu ijegreknum e iji kiam, Jab e bomana Sisa moik Rom samuamo ijefuon takes rekno kiam. Regavo madu fu kume fuiji fu Godri kuama fu E Bomana rene efuon karauniakafa ruainmano kumen.
LUK 23:3 Bu ijeg kumejga Fairet fu vuak iji faime uri Jesu kua, Bu ijeg kuaivo ijefuon a vierafega an ma e Jiusbuon Kin ijino kuain. Fu ijeg kuardamga Jesu fu uri kua, Vuak iji a kuaimon iji an ma kuaimno kuain.
LUK 23:4 Areme Fairet fu uri e Godon isuf baroijo ijiebuon e mamkanuk iji abevo e fok ijia ruainva iji kia, Na e igi na abe vajai fian makfuon iji vuak ise fuon kafo naba fainvano kiain.
LUK 23:5 Fairet fu ijeg kuardiamga e ijia irenva buka madu una darokma kume, Fuka fur e fok aferdiame kam nijaidiakok buka oi kafokafo vierafeknum ba ma karij. Fur ijegreno ijefuon vuak iji fuka bomana rene ar Judia guf ijia rarem. Ijefuon maiji fun fur Gareri ijia anerene ijegrene roke iviakma fun una igia ruainmano kuain.
LUK 23:6 Bu ijeg kuardavga Fairet fu uri kia, Regavo ja vierafega e igi fu e Garerikono kiain.
LUK 23:7 Regavo tavan ijia e Erod fu e bomana rene moik Gareri iji samuamo gavo madu fu Jerusarem ijia fino. Ijefuon Fairet fu faik Jesu fu e Garerikoga fu kiama bu afem Erodon vain.
LUK 23:8 Regavo Erod fu Jesu irerag fu reoinon iji fun fain revo fuba bien. Regavo madu fuka tavan jaoijor Jesu uikinik iji gakafak bomana vierafen. Regavo madu fu vierafega Jesu fu fuifuon ire sumakin be rega fu gakafak fu ijeg vierafen. Ijefuon e azi keoijo iji bu Jesu afeme fuon rokga fu Jesu game fuka bomana oimaren.
LUK 23:9 Ijefuon Erod fu uri Jesu duna uruvana kuardain gavo Jesu fuba una vef roin kuardain revo fum faime ijia aren.
LUK 23:10 Regavo e iji isuf baroijo ijiebuon e mamkanuk ijigam e vuak akai nijaidiavo iji bu ijia ireme faivo ijefuon bu biom vaknum darodarokin igia Jesu musikuame arafirin.
LUK 23:11 Bu ijegrekoga Erod ga efuon azi keoijo iji bun uri Jesu dab varaimene kijdaknum buka ba fu agoime ma vierafen. Bu ijegrene Erod fum uri efuon azi keoijo ijiena uri ugon ni mukor bu azan savo iji abe abesdame afem una Fairet fino ijia ruain.
LUK 23:12 Regavo amur Erod fu Fairetk bu oijmanamivo bakin gavo buka zienamiv revo bu tavan ijia e nokarok (2) iji buka Jesu dab kaname una no kaikin ren.
LUK 23:13 Areme Fairet fun e isuf baroijo ijiebuon e mamkanuk ijigam e aiko ijiebuon e mamkanuk ijigam e fok ijia ruainva iji kiava bu besum afuin.
LUK 23:14 Bu besum afuikoga Fairet fu uri e fok kia, E igi ja afem igia usem kie fu e Jius iji aferdiame kam unam ma ijia nijaidiaoino bano kien. Regavo jan ireme kieko na nifak jon ijia duna kafokafo kuardako fun una kuardieko jan faiv. Regavo na vuak ise iji ja fuisina kuardievo iji na nisaimga fu ise kafo ba ren.
LUK 23:15 Regavo Erod fuk fu ire ise kafo fu renma iji fuba fain. Regavo fum kiama ja afem una nuvuon ruain. Regavo igia fai. Fu ire ise kafo renmabatie fu ijefuon guak revo no faiga fu ise kafo fuba ren.
LUK 23:16 Ijefuon na enun azi keoijo iji kiaga bu kunaim fijame arega fu vakno kiain.
LUK 23:17 Regavo juaivasia besubesum guf ijia iro Fasova bu ijo iji e bu Fairet kuaga fu e dibur karijo ijia e besum buifuo kuaga fu keko vak.
LUK 23:18 Ijefuon Fairet fu vierafega fu Jesu kuaga fu keko vakafa vierafen. Ijefuon fu ijeg kuaimga e fok bu kume, No vierafega a e Barabas kua fu keko vagavo Jesu iji kana fu guamne kumen.
LUK 23:19 Regavo e Barabas fu e roin kaniaknum vo e kafobuo oij iji kam karoima bu una e mamkanuk buon ijiena bijaikuai vierafenva ijefuon bu dab dibur unainva fu ijia fin.
LUK 23:20 Regavo Fairet fu vierafe fuka Jesu kuaga fu keko vakafa fu ijeg vierafen. Ijefuon fu una madu kekome e fok ijia irenva ijin vuak iji kuardiamga bu una roin kume, Abe kuros kana abe kuros kanafno kumen.
LUK 23:22 Regavo Fairet fu tavan nokarok (2) vuak iji kuardiamga bu abe damurevga fu ijefuon una madu kia, Regavo ja vierafega fu ire ise iji fu irerag iji ren? Fu ise kafo rebatie na ijefuon kia bu kana fu guak revo na faiga fu ise kafo fu bakin. Ijefuon nam enun azi keoijo iji kiaga bu fijaga na keunaga fu vakno kiain.
LUK 23:23 Regavo e fok bu vierafega buka Jesu dab kuros kanakuai vierafen. Ijefuon buka uri uruvana igia kume, No vierafega no Jesu abe kuros kanakno kumen. Ijefuon bu ijeg Fairetna kuaime vake buka bur rarevga Fairet fun una bu kuaivo ijia ifejdiain.
LUK 23:25 Ijefuon Fairet fun e iji fu e kaniaknum e roin biesiaga bu Fairet ba igavo iji bu abe dibur unainva iji keunama fu vain. Fu vakga Fairet fu una Jesu abe miamga bu abe buon vierafenva ijia ren.
LUK 23:26 Areme e Romko buon e azi keoijo iji bun uri Jesu afem kuros kanakuai vain. Bun afem unam ijia vako ijia bu e Saimon ar Sairinko iji fu ai be areme una Jerusarem vakafa roko iji bien. Ijefuon e azi keoijo iji bun uri kuriaireme kuava fu Jesu ifejdame kuros abe vain.
LUK 23:27 Bu vakga e uruvana bu rad jajiame vain. Regavo madu bara kafo buk bu Jesuon oifian abene niraivknum buna vain.
LUK 23:28 Regavo Jesu fu una dakaroim giame kia, Bara Jerusaremko garie! Ja nuifuon niraivo iji aregavo ni afjon ijiebuon oifian abeknum jon oifian abef.
LUK 23:29 Ijefuon maiji tavan iji fu rokdo fu va ijefuon afarekma e bu kiak, Bara iji e amuibitenva ijigam bara iji am nafejo bu arenva ijigam bara iji ba am nafene mut vajiavo iji jaka mukoi kenvano kiak.
LUK 23:30 Regavo madu tavan ijia e bu uri nafar mamkanuk ijigam uruor mamkanuk ijin kiak, Jaka tuame no okuruoga no migegare aoikno kiak.
LUK 23:31 E bu ire ise ijeg nun rejo iji jaiji rad kafu izeg una jon rekno kiain?
LUK 23:32 Regavo e azi keoijo iji bu tavan besum ijia e niekin nokarok (2) aferdia Jesuna kuros kaniakuai vain.
LUK 23:33 Bu vake ar bu kua E Nigen Ano kuavo ijia usem Jesu abe ijia kuros kanain. Areme bun madu e niekin nokarok (2) iji kege be abe imut maink ijia kanaga be bu abe imut aizinan ijia kanain.
LUK 23:34 Bu ijegrekoga Jesu fu una Asoifuon sirimame kua, God Asoinu ise iji bu nun rejo iji giame daze. Ijefuon maiji irerag bu rejo iji buba mukoi vierafenvano kuain. Regavo e azi keoijo iji bu uri ugon Jesu fu samo iji kege name kas abe akoze arega erar ke garo bu iji ijeg ren.
LUK 23:35 Bu ijegrekoga e fok ijia ruainva iji bu ireme giakoga e Jius ijiebuon e mamkanuk iji bu Jesu dab varaimene kuai, Fu e roin bu aoivga fu karauniain. Ijefuon fun ma Godri imut bijame kuama fu ruainvaga ni are fu koikfuon fui kenunanami no gavno kuain.
LUK 23:36 Bu ijegrekoga e azi keoijo iji buk bu madu uri Jesu dab varaimene kijdaknum do vuain ise iji abe maga fu in. Fu iga bu kuai, A vierafega a e Jiusbuon Kin ijiga ni koikon keunanamimne kuain.
LUK 23:38 Regavo bu madu vuak be ijeg isoime nigen azan kuros buin ijia kaname kuai, E igi fu e Jiusbuon Kin ijino kuain.
LUK 23:39 Regavo e niekin nokarok (2) iji bu kege Jesuna kuros kaniainva ijia e be fu uri vuak ise kafo Jesuon kuain. Fu kua, A vierafega an ma e iji God fu imut bijame kuama a ruainmaga ni oi keunanamime no karaunuomne kuain.
LUK 23:40 Regavo e be iji fu uri kaifuon kuriaireme kua, A vuak ijeg a Jesu kuardamo iji are. A God abe jum? No e nokarok (2) igi no besum vajai fian abej revo no bu kege vajai fian muovo iji fun maren. Regavo una e guri fu ise be ba ren gavo fum masok vajai fian aben. No bu kege vajai fian vajuovo ijefuon maiji no nor unam ise iji kegoijo ijefuon bu iji kege vajai fian vajuov. Regavo a irerafuon una vuak ijekin fu kuardamno kuain?
LUK 23:42 Fu ijeg kuardame una dakaroim Jesu kua, Jesu tavan iji a una E Bomana rene moikigia roko ijia ni na vierafene kuain. Fu ijeg kuamga Jesu una roin kua, Ivia aiji an nosik varur gufia vakno kuain.
LUK 23:44 Areme tavan fun uk manino ijia vana oine ruakoga ar fok fuka tavan naki vake tavan dakaroim gura manin. Fu ijegrekoga ugon iji bu abe Godon ar guf kirakurainva fu tavan ijia dab bujame nokarok (2) ren.
LUK 23:46 Areme Jesu fu kuros kaf ijia uruvana igia kume, God Asoinu kaven nun na imut tat on ijia arenvano kumene fun ijia guain.
LUK 23:47 Ijegrekoga e azi keoijo ijiebuon e bomana iji fu uri ire iji renma iji game una God aroime kua, E iji fuka e mano kuain.
LUK 23:48 Areme e fok eraneb ijia ruainva iji bu nifak buon ijia Jesu fu guama bu game buka fuifuon oifian abene niraiknum una ar buon ijia vain. Regavo madu e fok bu ijia afuime ire ijin giakuai vainva iji bu sibank aibe ijia ireme giakoga ire fok bu ijia ren. Regavo bara iji bu Gareri ijia Jesu jame ruainva iji buk bu buna ijia ireme giain.
LUK 23:50 Areme e be if fuon Josof fu ar Arimatia Judia guf ijia ruain. E iji fu e ma gavo fu unam mukoi kegoino. Regavo madu tavan fok fu tavan iji God fu ivez efuon ijiebuon oij iji samuagdakfuon fu ijin gakafa samuaoino ijin. Regavo fu e Jiusbuon e bomana be revo bu Jesu kanakuai kuaimoija fuba ifejdiame vuak kuai vo ire kafo ren.
LUK 23:52 E ijar Jesuon surif iji kuros ijia jafe arikafa kekome Fairet kuakafa ruain.
LUK 23:53 Areme fun kekome Jesuon surif kuros ijia jafene abe ari ugon ijia anume abe va mako iji bu munuag ijia kajuam amarenva ijia unain. Regavo mako iji bu amur e aoinva kafo buba kege ijia uniain.
LUK 23:54 Regavo tavan iji fu Fraide gavo madu tavan Sabat (Satade) iji bu isuar karine God sirimamekfuon iji fun samairenma ijefuon bu ijeg ren.
LUK 23:55 Regavo bara iji bu ar Gareri ijia Jesu jame Jerusarem vainva iji bu Josofna va mako iji gakoga fu Jesuon vajai surif abe ijia unain. Ijegreare bara iji bun una ar ijia ire udi mukor urino iji kanafu Jesuon vajai surif iji azikuai kuaiknum bun una ar vain. Bun va ire udi mukor urino ijin kanafuin. Regavo afarma fu tavan Sabat (Satade) akai buon bu isuar karine God sirimamejo ijefuon bu akai ijin tuasekuai bu ijia aren.
LUK 24:1 Regavo Sade tavan ik abaisamo ijia bara iji bun una uri inak udi mukor urino bu amardia nainva iji kege Jesuon vajai surif iji azirdakuai bun vain.
LUK 24:2 Bu va mako vien mun iji bu abe bijukuraiva iji gak fun eb abe vaja biom abeden. Ijefuon bum name ijia aruin gavo bu Jesu E Bomana ijefuon vajai surif iji buba gain.
LUK 24:4 Ijefuon buka ijia ire bomana nuanamivo ijia migegare anera nokarok (2) ugon ka ma abaikin sainva ijieb bum iji bu irenva samaij ijia iren.
LUK 24:5 Regavo bara iji buka bomana juin gavo bum ijia anera nokarok (2) iji ato same kurituamajain. Regavo anera nokarok (2) iji bu uri kia, Ja irerafuon e iji bu aoinva ijia e iji fu nivek fino iji nisaimoij?
LUK 24:6 E iji igi fu bakin gavo fun una urin. E iji fu izeg fu una urikfuon iji fun amur jana Gareri fu oinma ijia kuardiain. Fu kia, Ema ijiebuon Farif iji bu abe e ise reoijo iji miaga bu abe kuros kanagavo naki nokbek (3) barga fu una uri fivakno kiain.
LUK 24:8 Rega bara iji bu ijiason vuak irerag Jesu fu amur kuardiainma iji vierafen. Areme bun una va gafia usem vuak irerag bu ijia giaknum fainva iji abe una e Jesuon vuak faivo e ireven (11) iji kuardiaknum efuon roin iji kuardiain.
LUK 24:10 Regavo bara iji vuak ijin abe ruainva iji Meri Megdarin ga Joana ga Meri e Jeimson asie ijigam bara roin ijieb vuak iji abe ruain. Bur ire iji renma ijin game una e Jesuon vuak abe oijo iji kuardiain. Regavo e iji Jesuon vuak abe oijo iji bu vierafero vuak iji bu kufuimene kuaivoro buba ma vierafen.
LUK 24:12 Regavo Fita fuka migegare uri kukum va Jesu bu abe unainva ijia kekome amainkome gak bu ugon iji bu e aoiga bu anuvo ijieb ijia naoiva fu giain gavo ire kafo bu bakin. Ijefuon fu una vaknum irerag iji renma ijin ka bomana vierafeknum vain.
LUK 24:13 Areme tavan besum ijia e Jesu jaoijo nokarok (2) bu ar be bu kua Emeasno kuavo ijia vakuai vain. Regavo ar iji fu Jerusarem samaij ijia bakin gavo fuka sibank ma aibe ireven (11) kiromitas ijeg. Bu unam ijia vaknum ire iji tavan nokbek (3) guf ijia renma ijin bui kuaiknum vain.
LUK 24:15 Bu kuaime buon duna kuanamiknum vako ijia Jesu fum iji bu vako ijia buna vako bu gain gavo buba mukoi game vierafen.
LUK 24:17 Ijefuon fu uri kia, Ja vuak iji ja kuaiknum ruainva iji ja irerag iji kuaiknum ruainvano kiain. Fu ijeg kiamga bu faime isuarigia oifiaigma iren. Bu ijia irekoga e be Kirofasno kuavo ijar uri kua, Noka bomana oiserduom ijefuon maiji e fok ar Jerusarem ijia karinva iji bu vuak irerag iji renma iji bun faim baren. Regavo aiji a izegrenma ijefuon a vuak iji aba faimano kuain?
LUK 24:19 Bu ijeg kuardavga Jesu fu uri kia, Regavo ire iji irerag ijieb renva ja ijin kuaivno kiain. Fu ijeg kuardiamga bu kua, No ire iji Jesu e Nasaretko fu renma no iji kuaiv. E iji fuka e bomana be fu Godon vuak vierafene kuaimon ijin. E iji fu Godon nifak ijia ga madu e fok ijiebuon nifak ijia fuka daro bomana abene Godon vuak nijaidiaknum ire sumakin mukor roin reoinon.
LUK 24:20 E iji bu enuvuon Godon isuf baroijo ijiebuon e mamkanuk ijieb kunaim dab e Romko buon e bomana iji mavga fu abe e azi keoijo iji miamga bu abe kuros kanain.
LUK 24:21 Regavo oinuvuon bomana iji no vierafega fun e ijar e Isrerko no karaunuokfuon. Ijegvo madu ire iji fun naki nokbek (3) barenma ijia ren.
LUK 24:22 Regavo madu ivia suok tavan ik irasemo ijia bara kafo nona oijo ijieb mako ijia vainva una kuarduin. Bu ijia vain gavo bu vajai surif fuon iji buba gain. Ijefuon bu una kuarduome kuo bu nimamainva igeg anera kafo giavga bur kuardiame kia, Jesu fuba guain gavo fu vek fino kiain.
LUK 24:24 Regavo madu efarif roin nona oijo buk bu vuak iji fainva ijefuon bu va mako iji gaga fun ma Jesuon surif iji buba gain.
LUK 24:25 Bu vuak ijeg Jesu kuardame barevga Jesu fusik uri kia, E guri ka nigen iserenva gurie. Ja irerafuon e Godon vuak vierafene kuaivo ijiebuon vuak bu usuibe isoinva iji jaba migegare faime ma vierafen.
LUK 24:26 Igia faif. God fu vierafenma iji Kurais fuiji fu ijeg amur vajai fian abene guame rad fu una varur gufia ajie Godon sanaima ijia fikno kiain.
LUK 24:27 Jesu fu ijeg kuardiame uri vuak irerag fok bu fuisina buk akaij ijia isoinva iji kuardiame nijaidiain. Fu amur e Mosison vuak fu isoinma ijia anerene kuardiame dab E Godon vuak vierafene kuaivo kafobuo ijia vain.
LUK 24:28 Bu ijeg kuaiknum vake ar e nokarok (2) bu vako iji fun samairen. Regavo Jesu fu nakek vakvega e nokarok (2) bu kua, No vierafega tavan fun baren ijefuon a nona igia naikno kuain.
LUK 24:30 Areme fun fata azan ijia ari fine buna duok ikafa uri bred iji abe Godon oimaren. Areme fun abe ukaknak tuaseme kege vajiain.
LUK 24:31 Fu vajiama bu bred ijin kege ijga ni buon bu ijia naradiamga bu ijiason Jesu game vierafen. Rega bu uri kua, E igi Jesuno kuaivga fu migegare ni buon ijia bakren.
LUK 24:32 Fu ijegrekoga bu ijiason uri bui kuai, No unam gafi no funa ruainva ijia fu vuak iji bu usuibe buk ijia isoime kuainva iji kuarduoko oinuvuon iji buka mian igeg naimano kuain.
LUK 24:33 Areme tavan ijia bu una uri va Jerusarem ijia e Jesuon vuak faivo ireven (11) bu karinva ijia vain. Bu va biediame buna besum afuime kia, E Bomana iji fun ma una urinmano kiain. Areme bu madu kia, Saimon fun Jesu gainmano kiain.
LUK 24:35 Rega e nokarok (2) iji una Jerusarem vainva iji bu ijia uri e vuak fuon faivo roin ijin vuak irerag bu Emeas vakuai unam ijia vako Jesu fu kuardiainma iji kuardiain. Rega bu madu izeg Jesu fu bred iji abe tuame vajiama bu ine ijia ni naradiama bu Jesu gainva ijin kuardiain.
LUK 24:36 E nokarok (2) bu vek vuak iji karine kuardiavo ijia E Bomana Jesu fum migegare iji bu karinva ijia manine kia, Makarijo iji fu janano kiain.
LUK 24:37 Rega e iji bu uri fu game ka juin ijefuon maiji bu vierafero fukafu ekavenro bu ijeg vierafen.
LUK 24:38 Rega Jesu fu una kia, Ja irerafuon juvknum naba gieme ma vierafej? Na ma Jesu nar. Ijefuon ni imut jon kege imut nun ga diak nun matan igi kuniaime giaf. Ijefuon maiji e aoinva ijiebuon kaven iji bu vajai surif ga an nun igi ja giavo ijekin bano kiain.
LUK 24:40 Fu ijeg kuardiame uri imut fuon ijigam diak tat fuon matan iji kege nijaidiain.
LUK 24:41 Regavo bu vek ba fu ma vierafen. Ijefuon maiji oijbuon iji buka oimaren gavo ka oiserdiain. Ijefuon Jesu fu uri kia, Ja duok ikfuon iji jabe kafo nainvano kiain?
LUK 24:42 Fu ijeg kiamga bu uri kijum be bu baroinva iji abe main. Bu abe mavga fu abe uri nifak buon ijia ina bu gain.
LUK 24:44 Ijegreare fu uri e vuak fuon faivo iji kia, Ire fok nan vek iji na jana oinva ijia izeg na guame una urikfuon iji nan kuardiain. Regavo madu irerag fok e Mosison akaij ijia fu nuisina isoinma ijigam e Godon vuak vierafene kuaivo bu isoinva ijigam buk Sams ijia bu isoinva iji fun aresrenmano kiain.
LUK 24:45 Fu ijeg kuardiame uri e vuak fuon faivo ijiebuon nigen bu girenva iji kam una irasdiame daro miain. Fu ijegrenki bu buk akaij ijia vuak fok buka mukoi vierafekuai fu iji ijeg ren. Fu ijegrene uri kia, Fun usuibe buk akaij ijia ijeg isoime kuain. E iji God kuama fu ruainma iji fu guame tavan nokbek (3) barke fu una uri fivakno kuain. Regavo madu buka if fuon ijia vuak iji e bu izeg ise buon iji arega una oi karoiga God fu ise buon iji giame arekfuon ijin dab kuaime vakno kuain. Regavo amur buka Jerusarem ijia anerene kuardiame abe ar iror ijia vakno kuain.
LUK 24:48 Jesu fu ijeg kuardiame kia, Ja ire fok fu renma iji jan jar giain. Ijefuon ni jar vuak iji abe va e fok kuardiaof. Regavo na vakva nar e iji fu ar nun abekfuon iji Asoinun fu unafdiakno kiainma iji kuaga fu jon ruak. Regavo e iji fu Godon Kaven ma iji ijefuon fur ja kege e darokin rekfuon. Regavo igia faif. Jab migegare Jerusarem areme usem vak revo nin e iji fu varur gufia arime ja daro miakfuon iji samuafno kiain.
LUK 24:50 Areme Jesu fun e vuak fuon faivo iji aferdiame funa usem Jerusarem areme vake Beteni ijia usen. Areme fun imut kaf ijia akorme bu daro miaknum buifuo Godon sirimamen.
LUK 24:51 Fu ijeg manine buifuo sirimameko Asoifuon God fun ijia fu abe una varur ijia ajie vain.
LUK 24:52 Rega e vuak fuon faivo iji bun uri fu dab bomana aroime oimarknum bun una Jerusarem vain. Regavo tavan uruvana bu va Godon ar ijia arume God sirimameknum fuon oimarknum ijeg reoin.
JOH 1:1 Ik amur God fu moikigi ba amarenma ijia Vuak Iji fun ijia fusik fine ruain. Regavo Vuak Iji fu Jesur Godk fin ga Jesu fu Godk bu besum.
JOH 1:2 Ik amur ijia Jesu fun Godk fin.
JOH 1:3 God fu Jesuon if ijia ga daro fuon ijia ire fok amardiain.
JOH 1:4 Regavo Jesu fu ma karivako ijin ijefuon fur sanainma ijin abe e fok miain.
JOH 1:5 Jesu fu sanainma iji abe moikigi nakinma ijia rokga e moikigia ise reoijo iji buba abe unain.
JOH 1:6 Ijegreare God fu e Jon kuavo e vuak fuon abe oinon iji kuamga fu sanainma ijefuon vuak iji abe moikigia ruain. Jon fu uri moikigia e fok sanainma ijefuon kuardiamga bu vuak fuon iji mukoi faime ma vierafekro fu ruain.
JOH 1:8 Jon fu sanainma iji fu bakin gavo fuim e iji sanainma iji ruakreno ijefuon vuak iji abe amur e iji kuardiame ruain.
JOH 1:9 Jesu fur fu ma sanainma iji ga fur moikigia e fok sanainma fuon iji abe nijaidiain.
JOH 1:10 Areme Jesu fun ema igegrene moikigia oin. God fu Jesuon azan ijia moikigi amaren. Regavo e fok buba fu mukoi game ma vierafen.
JOH 1:11 Fu moik fuon ijia rokga efuon iji bu fuba oimarknum afen.
JOH 1:12 Regavo e roin bu fu ma vierafene bu fu oijmame afevga fu daro miamga bu Godon afijaf ren.
JOH 1:13 Bu Godon afijaf renva ijefuon maiji Godri Kaven fuon iji kege bu uniafdiain ijefuon bu ema ijiebuon afijaf bakin gavo bu Godon afijaf.
JOH 1:14 Areme Vuak iji fun ema rene tavan ivuankbe nona besum moikigia oin. Fu Asoifuon kaf gufia fino ijefuon Farif besum ijin ga fuon sanainma asoifuon fu abe mainma iji non gain. Jesu fu unam ma ijiga Godon ma ijekma oin.
JOH 1:15 Jon fu e ijefuon kuaimoin. Fu kume, Na e ijefuon kuardiame kia, E iji fu rad jajie rok ga fur fu ma e ikin fu na asidien. Ijefuon maiji naiji bu rad nafedien gavo fuiji fun usuibe fun Godk ijia fi ruain.
JOH 1:16 Godon maiji zarainma fu kanafu nainma iji fu tavan bog vajuoknum ifejduom.
JOH 1:17 Regavo God fu akai fuon abe Mosis mama fur abe no kuarduin ga Godon oijmiamo ijiga fuon ma iji fun kege Jesu vajama fur kege no vajuin.
JOH 1:18 Regavo God fu erar gainma bakin. Fun Farifuon iji fuk God renma ga fu tavan bog fusik fino ijar Godon vuak iji abe e fok kuardiain.
JOH 1:19 Areme e Jiusbuon e mamkanuk ai Jerusarem karinva bu e Godon isuf baroijo iji abevo e Rivait iji kiavga bu va Jon kua, Aiji a erano kuain.
JOH 1:20 Bu ijeg kuavga Jon fuba vuak kafo kuardiain revo fuka vuak ma ijesugin samakaf kuardiame kia, Naiji na e iji God fu kuamga fu arime e fok igin karauniakro roko iji bano kiain.
JOH 1:21 Fu ijeg kuardiamga e iji bu uri Jon kua, Regavo aiji a era? A e Eraija ki a erano kuain? Bu ijeg kuavga Jon fu una kia, Naiji na e Eraija bano kiain. Fu ijeg kiamga bu una kua, Regavo a e Godon vuak vierafene kuaimon ijino kuain. Bu ijeg kuavga Jon fu una kia, Naiji na e Godon vuak faime vierafene kuaivo iji bano kiain.
JOH 1:22 Fu ijeg kiamga bu una kua, Regavo aiji a era? Regavo if on iji era ga a irerag reoinon iji kuarduoga no una e gafi bu no kuova no ruainva iji kuardiafno kuain.
JOH 1:23 Bu ijeg kuavga Jon fu uri e be usuibe Godon vuak vierafene kuaimon e Asaia ijefuon vuak ijia bijame ijeg kuardiain. Fu kia, Naiji na e be fu ai moikum namo ijia fine kume, E Bomana ijefuon unam iji mukoi arir amarekega fu rokno kumeno ijino kiain.
JOH 1:24 Ijegreare e iji vuak abe oijo iji e Ferisis bu kiavga bu Jon fino ijia ruainva iji bun useme Jon kua, A kume a e iji God fu kuamga fu ruainma iji bakin ga a e Eraija bakin ga madu a e iji Godon vuak vierafene kuaimon iji bano kumen. Regavo a irerafuon e do ruardiamno kuain?
JOH 1:26 Bu ijeg kuavga Jon fu una roin kia, Na ja kege doma ijesugin ruardia gavo e be jaba vierafenva iji fu jana ijia manin.
JOH 1:27 E iji fu rad jajie rok revo naiji naba aresredo na diak surif fuon fu samo naba kuniairumdakno kiain.
JOH 1:28 Regavo ire fok renma iji fu ai Betenino kuavo do Jodan irif gara tavan ajiemo Jon fu e do ruardiainma ijia ijeg ren.
JOH 1:29 Areme afarma Jon fu gak Jesu rokga fu game uri kia, Ni gafia gaf! E iji fu nuvuifuon vajai fian abene vajai fuon abe isuf barokfuon iji fu gafa roko gaf. Regavo e iji God fu abe e fok ijiebuon isuf baroga fur e fok moikigia ise reoijo iji karauniakfuon.
JOH 1:30 Na e ijefuon na iji kuardiame kia, E be fu rad jajie rokon kiain. Regavo fuiji fuka ma e ikin gavo naiji na bakin. Ijefuon maiji fuiji fun usuibe Godk ijia fin gavo na bu rad nafedien.
JOH 1:31 Na e iji naba mukoi vierafen. Regavo nam e iji do ruardiaga e fok ai Isrer karinva iji bu fu mukoi vierafekva ijefuon na iji ijeg ren.
JOH 1:32 Areme Jon fu izeg Godon Kaven fu gainma iji e fok kuardiame kia, Na ga varur gufia Godon Kaven be fu um guaf igeg arime Jesuon nigen ijia finan na gainvano kiain.
JOH 1:33 Fu ijeg kuardiame kia, Na um iji nan gain gavo naba fu mukoi game vierafen. Regavo fu God e iji na kiema na e do ruardiavo ijar kie, A do ruardiaknum gaga Kaven Akai fu um igeg arime e befuon nigen ijia kunaiga ro e ijar Kaven Akai iji kege ja uniafdidiakno kiain.
JOH 1:34 Regavo iji fuka ma na ni nun ijia gainva ijefuon e iji fu ma Godon Farifno kiain.
JOH 1:35 Areme afarma Jon fun una Jodan do ijia e vuak fuon faivo nokarok (2) na ijia oinon ijia fu gak Jesu ni fuon ijia ruvaka fu gain. Fu game uri e nokarok (2) iji kia, E iji God fu abe nuvuifuon isuf barokfuon iji gafijarno kiain.
JOH 1:37 Fu ijeg kiamga e Jonon vuak faivo nokarok (2) iji bu vuak iji faime bun Jesu fu vako ijia jame vain.
JOH 1:38 Bu ja vakga Jesu fu giame una dakaroime kia, Ja irerag abekuai rokno kiain. Fu ijeg kiamga bu kua, Rabai a izia fine ruainmano kuain? (Revo vuak Rabai ijefuon anej ma iji e nijaidiamon).
JOH 1:39 Bu ijeg kuavga Jesu fu una kia, Ni ro gafno kiain. Regavo tavan iji fu ve nakisrenma ijefuon e nokarok (2) iji bun Jesuna vake ar fu fino ijia usem game funa ijia karine ve nakin.
JOH 1:40 Regavo e nokarok (2) iji bu Jonon vuak iji faime uri Jesu ja vainva ijia e be if fuon iji Edru e Saimon Fitaon uviaij ijin.
JOH 1:41 Areme e Edru fun migegare va uviaifuon Saimon Fita bieme kua, Uviainu no e iji fu no karaunuokfuon e Kurais e iji God fu visu kuinma iji non bienvano kuain.
JOH 1:42 Areme Edru fun Saimon afeme Jesu fino ijia ruain. Bu ijia rokga Jesu fu uri Saimon nikajame kua, E gari a Saimon e Jonon farif. Regavo aiji rad bu Kifasno kuakno kuain. (Revo if Kifas ko Fita ijefuon ma iji Mun Ikin. Ijefuon maiji rad fuon ma vierafeno iji fuka gigikin rega e fok Jesu ma vierafejo iji fur kudiej igeg biukudiak).
JOH 1:43 Areme afarma Jesu fun ai Gareri ijia vakro vierafeoino ijia fu e Firif nisaime kua ni na jajiemne kuain.
JOH 1:44 Regavo Firif fu ai Betsaidano kuavo ijia ruain. Regavo Saimon ko Edru bu madu bu ar ijekor.
JOH 1:45 Regavo Firif fun madu e Natanior nisaime kua, No e iji usuibe Mosis ga e iji Godon vuak vierafene kuaivo iji bu buk akaij ijia isoime kuai fu ruakno kuainva iji non bien. Regavo e iji Jesu fu Josofon farif ga fu ai Nasaretkor.
JOH 1:46 Fu ijeg kuardamga Natanior fu una e Firif kua, Ar ukak Nasaret aikin iji fun irerag ma be fu ijia rekma iji fuka ma bano kuain. Fu ijeg kuamga Firif fu kua, Anim nosik va gafia keko koikon gamne kuain.
JOH 1:47 Areme Jesu fu gak Natanior fu samaij ijia vakga fu uri kua, E gari fu ma e Isrerko buon uifarif revo fu e ir kufuikin bano kuain.
JOH 1:48 Rega Natanior fu uri Jesu kua, A izeg unam nun na kuaim kegoijo iji gieme vierafenmano kuain. Fu ijeg kuamga Jesu fu una roin kua, Firif fu rad kuamga a uri fu ja ruain revo naiji na amur gafi in anej a finma ijia na on izeg a vierafenma ga a e izekin iji nan gainvano kuain.
JOH 1:49 Fu ijeg kuardamga Natanior fu uri kua, E vuak nijaidiamon aiji a Godon Farif ga madu a e Isrerkobuon E Bomanano kuain.
JOH 1:50 Fu ijeg kuardamga Jesu fu una kua, A na ma vierafenma ijefuon maiji na a kua a vek gafi in anej ijia fino ijia na ga vierafenvano kuainva ijefuon a na ma vierafen. Regavo ire igi na iviakma kuardavo ijesugin bakin gavo rad na ire sumakin uruvana rega a giakno kuain.
JOH 1:51 Areme Jesu fun dakaroime kia, Vuak igi naka ma kuardiavno faif rad ja kaf gufi asoinun fu fino ijefuon vien fu dajaga anera fuon bu ijia ajie fuon vaknum una arime Godon Farif igi nun roga ja giak.
JOH 2:1 Naki nokarok (2) barko bu ai Keina Gareri guf ijia sanamikuai iro bomana be ijga Jesuon asiej iji fu ijia vain. Regavo Jesu ga e vuak fuon faivo iji bu madu bu iro iji sarekuai kiavga bun ijia vain.
JOH 2:3 E uruvana bun iro iji iknum do be bu kua vuain no kuavo iji iknum ijegre vake vuain iji fun barekoga Jesuon asiej iji fun uri Jesu kua, E iji bu do vuain iji bun i barenvano kuain.
JOH 2:4 Fu ijeg kuamga Jesu fu uri kua, Asienu a irerafuon na nijaidie ga kuardiem? Ire fok nan vierafen ga tavan nun na anerene ik nun rekfuon iji fuba ruainmano kuain.
JOH 2:5 Fu ijeg kuardamga Jesuon asiej iji fun una e iji ire karme e fok vajiaoijo iji kia, Jesu fu irerag kuardiaga ni ire iji fu kuardiamo iji mukoi faime refno kiain.
JOH 2:6 Regavo ar iji bu karine duok ijo samaij ijia bu saror mamkanuk imut roin ga nikit (6) besum ijeg bu kege ijia nain. E Jius bu akai buon bu nainva ijia bu vierafe bu imut do sokva God fu oimaik. Ijefuon bu saror iji kege ar ijia nain. Saror iji buka mamkanuk ijefuon bu do uruvana jiaga buka irtoijev.
JOH 2:7 Jesu fun e iji bu duok nifie e iji vajiaoijo iji kiamga bu rokga fu kia, Ni saror igi karme do jiafno kiain. Fu ijeg kiamga bun saror fok karme do jiava buka irtoije baren.
JOH 2:8 Areme fun una kia, Nin do iji kafo jiame va e gafi iro igi inma iji samuamo iji vajafno kiain.
JOH 2:9 Fu ijeg kiamga bu do iji kafo veseme va e iro iji samuamo iji vajava fu kege ine faik do iji fun ma vuain. E iji iro samuamo iji fu vuain iji bu izia kege ruainva iji fuba giain. Regavo bun e iji do iji veseme vainva ijieb vuain iji fu izia ruainma iji bur mukoi vierafen. Areme e iro iji samuamo iji fun e iji sanamivo iji abevo e fok kiamga bu isuar kariko fun uri Jesu kua, No unam nuvuon no rejo iji fu be. No amur no do vuain ma ijar ijknum e fok vajiame rad noson vuain ise iji ijo. Regavo aiji a vuain ma iji a abe abede fine radkma ijia abe e fok no vajuinmano kuain.
JOH 2:11 Rega Jesu fu amur anerene darokma ire sumakin fu kege e fok nijaidiainma iji fu ai Keinan Gareri guf ijia ijeg ren. Ar ijia fu fuon sanainma iji abe e fok nijaidiamga e vuak fuon faivo fok bu ijia game fu ma vierafen.
JOH 2:12 Bu ijegrene Jesu ga asiefuon ijigam uviaifijaf ijigam e vuak fuon faivo iji bun uri vake ai Kafoniam ijia useme naki sibank ijia karin.
JOH 2:13 Areme e Jiusbuon tavan iji bu kua Fasovano kuavo bu iro ine una saifijaf iji bu ai Ijift ijia vajai fian abeknum e ijiebuon ikreoija God fu karauniainma iji vierafejo iji fun samairen. Ijefuon Jesu fun Jerusarem aji vain.
JOH 2:14 Fu va Jerusarem kekome Godon ar ijia arume gak e uruvana bu ijia arume maf-kau ga maf-sif ga um iji kege isufuon una e kafobuon kimej. Regavo fu giak e roin bu fata ijia karine mon dame vajuonamiv.
JOH 2:15 Fu giame uri ire be isua igekin ka gigikin iji abe dab fanuf fok bu kege ijia aru karine kimejo iji fijiama bu usem subin. Bu usem subi vakga fu uri e ijiebuon fata iji bu karine mon dame vajuonamivo iji kam karoime mon buon kam uduim kozen.
JOH 2:16 Areme fu uri e iji karine um kimejo iji kia, Um jon iji kare usem vaf. Ja erar kiaga ja Asoinun ijefuon ar igi abe maket akar igeg amarvno kiain.
JOH 2:17 Jesu fu ijegrega e vuak fuon faivo iji bu migegare Godon vuak iji bu usuibe buk akaij ijia bu isoinva iji vierafen. Regavo vuak iji fu ijeg kuai, O God ar on ijia bu vuak ma iji kuaiknum sirimamejor iji oinun fuka mian igeg naino kuain.
JOH 2:18 Jesu fu ijegrega e Jiusbuon e mamkanuk iji bu migegare una duna be kua, Ni ire sumakin be rega no ijia game vierafero a daro namo ijefuon a ivia no kuriairega no usem vakno kuain.
JOH 2:19 Bu ijeg kuavga Jesu fu una kia, Ja Godon ar bomana igi bujakorekva na naki nokbek (3) guf ijia na una sa barekno kiain.
JOH 2:20 Fu ijeg kuardiamga bu una kua, Ar igi no juaivasia uruvana foti siks (46) ijeg akozme ar iji sa baren revo a izeg naki nokbek (3) ijia una sakno kuain.
JOH 2:21 Rega Jesu fu Godon ar ijefuon kuainma bakin revo fu vajai fuon ijefuon bijame kuaima e Jius iji buba fain.
JOH 2:22 Regavo rad Jesu fu guame naki nokbek (3) barga fu uriga e vuak fuon faivo iji bu vuak fuon iji fu Godon ar ijia bija kuainma iji vierafen. Areme bu ijia una Jesuon vuak fu kuainma ijiga Godon buk akaij iji ma vierafen.
JOH 2:23 Jesu fu Jerusarem ijia tavan bu kua Fasovano kuavo ijia iro iji bu ijo ijia fu fiknum ire sumakin uruvana reoga e fok bu iji giame bu fu ma vierafen.
JOH 2:24 Regavo Jesu fu e uruvana ijiebuon oij iji fun giain ijefuon fu erar una ema ijiebuon unam bu kegoijo ijin Jesu nijaikma bakin. Rega fun oibuon giainma ijefuon fuba bu ma vierafene fuon ma iji abe samafrediama bu gain.
JOH 3:1 E Ferisi be if fuon iji Nikodimas revo fu e Jiusbuon e bomana be ijar naki be naki ijia vake Jesu fino ijia kekome kua, E Nijaidiamon no vierafega Godri a kuamga a e fok no nijaiduokro ruain. Fu erar ire sumakin darokma fok a reoino ijekin rekma bakin gavo fun e iji tavan bog Godk oinon ijar ire sumakin igi a reoinon ijekin kafokafo rek.
JOH 3:3 Fu ijeg kuamga Jesu fu una kua, Vuak igi na ma kuardavo fai erar fu vierafega fu e iji God fu oibuon iji samuagdiamo ijiena mazikma iji fuka God kuaga fu Kaven Akai abe unafdak. Kaven Akai iji fu oifuon ijia fine daro maga fu am ukak igeg nafene una unam iviamkor ijia amarigia kege vakfuon.
JOH 3:4 Fu ijeg kuardamga Nikodimas fu vuak iji fuba mukoi faime vierafenma ijefuon fu una Jesu kua, E iji bun e mamkanuk renva iji bu izeg una am ukakna rene asiefijaf defok ijia arime bu una nafediakno kuain.
JOH 3:5 Fu ijeg kuardamga Jesu fu una kua, Vuak igi na ma kuardav. Erar fu vierafe fu e iji God fu oibuon iji samuagdiamo ijiena mazikma e iji fuka God kuaga fu daro fuon ijia do ijiga Godon Kaven ijefuon azan ijia oifuon iji somdaga fu una e iviamkor rek.
JOH 3:6 Regavo am iviamkor iji bu ema ijieb nafejo revo kaven iviamkor iji fu Godri koikfuon abe e iji unafdiak.
JOH 3:7 Ijegvo e fok bu una am ukakna igeg nafekfuon iji na kuardainva ijefuon ab vuak iji faime oiserdak.
JOH 3:8 Regavo ni igia fai buibur iji fu ufime roko ijigam fu ufime vako iji no gavo bakin ga nom vua fuon ijesugin faiv. Buibur iji fu ufimo ijeg Godon Kaven iji fu e besubesum ijiebuon oij ijia ikreno iji no izeg gakva bakin.
JOH 3:9 Jesu fu ijeg kuardamga Nikodimas fu vuak iji fuba mukoi faime vierafen ijefuon fu una madu Jesu kua, Vuak igi a kuardiemo iji na izeg vierafek?
JOH 3:10 Fu ijeg kuardamga Jesu fu kua, Aiji aka e Isrerkobuon e vuak nijaidiamon e bomana be revo a vuak igi na kuardavo iji aba mukoi faim.
JOH 3:11 Vuak fok no kuaimoijo iji noka kufuimejo bakin no irerag no vierafenva ijiga giaoinva no iji abe ja kuardiav. Regavo ja vek vuak nuvuon jaba mukoi faime reoij.
JOH 3:12 Regavo iviakma na moik igefuon vuak iji abe kuardaga aka ba ma vierafen ijefuon na varur gufefuon vuak iji ja kuardiakva jaka ba una ma vierafek.
JOH 3:13 Regavo fu erar varur gufia ajie vainma bakin revo fun Ema buon Farif iji God fu kuamga fu ari ruainma e ijar una varur gufia ajie vain.
JOH 3:14 Regavo Mosis fu ai moikum namo ijia ire be bu abe tabar igeg amarme abe kaf ijia ajie kiraga e adagin bu iji gavo ijia bu madiain. Ijegvo Ema buon Farif igi nak madu bu abe kuros kaf ijia kaniega na guak.
JOH 3:15 Ijefuon erar fu kuros kaf ijia na guavo iji gieme ma vierafekma fu unam ma karivako iji abek.
JOH 3:16 God fu e fok moikigia oijo iji oijmiainma ijefuon fu Farifuon besum iji kuamga fu ari ruain. Ijefuon erar fu Farifuon iji ma vierafekma e iji fuba guak gavo fum tavan bog unam ma karivako iji abe ijia fivak.
JOH 3:17 God fu Farifuon iji kuamga fu e fok moikigia ise reoijo ijiebuon ise iji kege mazim giakafa ruainma bakin gavo fum bu karauniakafa ruain.
JOH 3:18 Regavo erar fu Godon Farif iji ma vierafekma God fuba rad ise fuon fu renma iji giame duna kafo kuak. Regavo erar fu Godon Farif iji ba ma vierafenma iji God fun ise fuon giame vierafedo rad fu duna kafo kuak. Ijefuon maiji fu Godon Farif besum iji fuba ma vierafen.
JOH 3:19 Regavo Godon sanainma iji fun moikigia e fok ise reoijo ijiebuon ise iji kege mazim giakafa ruain. Regavo e fok bu sanainma iji areme una unam nakinma iji oijmainva ijefuon e fok bu ire ise fok reoin.
JOH 3:20 Regavo erar fu ise reoinon iji fu sanainma iji fu ma uzam. Ijefuon fuba una sanainma ijia ruak. Ijefuon maiji fun ise fok reoido fu una sanainma ijia ruakrega ise fuon fu samafrekro fuka mukoi jum.
JOH 3:21 Regavo erar fu unam ma ijesugin reoinon iji fu una sanainma ijia ruakro fuba juk. Ijefuon maiji ire fok fu reoinon iji fu God fu oimaikfuon ijia reoin.
JOH 3:22 Jesu fu ijeg kuardiame fun e vuak fuon faivo ijiena e Judiakobuon ar ijia vain. Fu va ijia tavan sibank ai Judia ijia e ijiena fiknum bu aferdia do ruardiain.
JOH 3:23 Regavo tavan besum ijia e Jon fuk fu ai be bu kua Ainon kuavo Sairim samaij ijia fin. Fu ijia fiko e fok bu ijia vako fu aferdiame do ruardiam. Ijefuon maiji ar Ainon ijia fuka do uruvana ijia ruvako ijefuon fu ijeg ren.
JOH 3:24 Regavo Jon iji fu reoinma iji buba abe dibur unainva ijia fu ijeg reoin.
JOH 3:25 Ijegrekoga e Jonon vuak faivo roin bu e Jius be ijiena unam izeg bu e Jiusbuon unam ijia e kege do ruardiavo ijefuon dab bui kuaime sigunamin.
JOH 3:26 Bu dab kuaime siguba areme va usem Jon kua, E nijaidiamon a e be fu osik do Jodan garainak ijia oinma iji abe vierafen? E iji a fuisina kuarduinma iji fu iviakma e uruvana do ruardiaga e fok bun una fuon vak.
JOH 3:27 Bu ijeg kuardavga Jon fu una kia, Fu erar daro fuon ijia ire ijekin kafo reokma bakin gavo fun Godri kuakma fu moikigia ire ijekin iji reok.
JOH 3:28 Regavo jan koikjo nana oknum faikoga na kuai, Naiji e iji God fu kuamga fu moikigia ari ruainma iji bano kuain. Regavo naiji na ur unam fuon amarme moikigia ruain gavo fu rad jajie rokno kiain.
JOH 3:29 Regavo ni faif e be fu farifuon ijar bara abekro fuifuon unam amaren gavo fu faifai farifuon fun bara abenma fai fuka bomana oimarek. Unam besum ijeg ga naiji na e iji fu ruakreno ijefuon unam iji amare ruain. Regavo iviakma na fai e iji fun ruain ijefuon naka bomana oimadien. Ijefuon maiji fur fu e ikin reke ga naiji na e ukakbe rek.
JOH 3:31 E iji fu kaf gufia ari ruainma iji fuka e bomana revo ire fok fur asidiain revo fur ire fok samuagdiamon. Regavo e iji bu moikigia nafenva iji fu e moik igekor ijefuon vuak fuon fok fu kuaimoino iji fu moik igefuon kuaimoin.
JOH 3:32 Regavo e iji kaf gufia ari ruainma iji fu vuak fok fu fainma ijiga ire fok fu giainma iji abe e moikigia karinva iji kuardiain. Regavo e iji bu vuak fuon buba mukoi faime igav.
JOH 3:33 Regavo erar fu vuak fuon iji mukoi fainma iji fu ma vierafero God fu maro fu ijeg vierafen.
JOH 3:34 Regavo e iji God fu kuamga fu ari ruainma iji fu vuak God fu kuardainma ijesugin abe e fok kuardiam. Ijefuon maiji Godri Kaven fuon darokin iji fu daknum vajamo bakin.
JOH 3:35 Regavo God Asoij iji fu Farifuon mukoi oijmamo ijefuon ire fok fu Farifuon iji kuaga fu samuagdiam.
JOH 3:36 Regavo erar fu Farifuon iji ma vierafekma e iji fu unam ma karivako iji abek. Regavo erar fu Farifuon ijefuon vuak iji ba mukoi faime igakma e iji fu unam ma karivako iji fuba abekfuon. Regavo Godon ziemo iji fuka tavan bog fusik navak.
JOH 4:1 E Ferisis iji bu faik e uruvana buka una Jesuon vuak faivknum una fuon vakok fu aferdiame do ruardiako Jon bu arevo bu iji fain.
JOH 4:2 Regavo Jesu fu koikfuon ba e iji kege do ruardian revo bu e vuak fuon faivo ijieb e iji aferdia do ruardiav.
JOH 4:3 Jesu fu faik e Ferisis iji bu vuak iji abe kuaimoijga fun ai Judia areme una madu uri Gareri ijia vain.
JOH 4:4 Regavo Jesu fu ai Gareri fu vainma iji ur fu ai Sameria ijia kekomevo ijar Gareri vakro ijeg vierafene vain.
JOH 4:5 Ijefuon Jesu fu roke ai be Sameria guf iji bu kua Saikano kuavo ijia kekoin. Regavo ai Saika fu moik ivuankbe Jekaf fu abe farif fuon Josof mainma iji samaij ijia.
JOH 4:6 Regavo ai Saika ijia Jekafon do be fu moik guf ijia nafuinma bu jiavo iji fu ijia. Ijefuon Jesu fu unam jiamana roke tavan uk manino ijia fu aimamga fu do iji irif ijia fin.
JOH 4:7 Jesu fu do irif ijia figa bara Sameriako be fu do jiakafa rokga fu uri bara iji kua, Do be jia mie na ijno kuain.
JOH 4:8 Regavo e Jesuon vuak faivo fok bun ar ijia duok ikfuon iji kimekuai vakoga fu fuonkua ijeg ren.
JOH 4:9 Jesu fu bara iji dofuo kuamga bara iji fu una kua, Aiji a e Jius ga naiji na bara Sameriako ijefuon a irerafuon na dofuo kiemno kuain. (Bara iji fu Jesu ijeg kuainma ijefuon maiji e Jius buba e Sameriakona besum afuime karioijo).
JOH 4:10 Ijefuon Jesu fu una kua, A irerag God fu vajamo ijiga e igi erar igia fine a dofuo kuamo iji mukoi vierafebatie a fu kuaga fur do ma iji jiame a mak. Ijefuon maiji fur do iji bu ine tavan bog ijia ma karivako iji abe una a mak.
JOH 4:11 Jesu fu ijeg kuardamga bara iji fu una kua, E Bomana do igi nafuinma iji fuka mako dibuor gamia revo a baket bakin. Ijefuon a izer do iji bu ine ijia ma karivako iji jiak.
JOH 4:12 Regavo no sainuvuon Jekaf fu mako igi rume arema do iji fu ijia nafuimga afijaf iji abevo fanuf fuon fok bu do ijia iknum oin. Regavo aiji a vierafero ar e bomana ga Jekaf fu e ukakbero a ijeg vierafene kuaim.
JOH 4:13 Bara iji fu ijeg kuardamga Jesu fu una roin kua, Erar do mako igia nafuinma igi jia ikma fuka rad una do kafak. Regavo erar fu do igi nar jia mavo iji abe ikma rad fuba una do kafak. Ijefuon maiji do iji nar jia miainva iji fu tavan bog oijon guf ijia navak revo do ijar ja ifejdiaga ja unam ma karivako iji abek.
JOH 4:15 Jesu fu ijeg kuardamga bara iji fu una kua, E Bomana ni do iji a kuaimon iji iviakma jia miega na abe ij. Naka tavan bog mako igia do jiakok fuka isediem ijefuon ni do iji a kuaimon iji jia miega na inkin rad naba una do kafiekno kuain.
JOH 4:16 Fu ijeg kuamga Jesu fu kua, Ni una va baru on iji afeme una igi na fijo igia rokne kuain.
JOH 4:17 Rega bara iji fu una kua, Naiji na baru bano kuain. Rega Jesu fu una kua, A kie a baru kafo bano kienma iji aka ma kuardiem.
JOH 4:18 Regavo a amur baru imut roin (5) ren gavo iviakma baru iji a fusik fino iji fu ma baru on bakin. Regavo iviakma na kuavga a kie a baru bano kienma iji an ma kuardienmano kuain.
JOH 4:19 Jesu fu ijeg kuardamga bara iji fu kua, E Bomana na gaga aiji a e iji Godon vuak vierafene kuaimon ijin.
JOH 4:20 Regavo e Sameriako saifnuvuon bu usuibe uruor igia ajieme Godon sirimameknum dua urukafame aroivo. Regavo ja e Jius iji ja kuai Godon ar no sirimameknum aroikfuon iji fu Jerusarem ijiano kuaiv.
JOH 4:21 Fu ijeg kuamga Jesu fu una kua, Ni vuak igi na kuardavo igi ma vierafe tavan abekma noba una uruor igia ga ai Jerusarem ijia karine Godon sirimameknum fu aroik.
JOH 4:22 Regavo ja e Sameriako iji ja erafon sirimamejo iji jaba mukoi vierafeknum sirimamej. Regavo e Jius noiji no erafon sirimameknum aroivo iji non mukoi vierafen. Ijefuon maiji God fu e fok karauniakfuon iji fu e Jius ijia kuamga fu ari ruain.
JOH 4:23 Regavo e iji bu kaven ma vierafeknum Godon sirimameknum fu aroikva ijefuon tavan iji fu vek gavo na ma kuardav ire iji bun iviakma igijar rej. Ijefuon God fu e ijeg sirimamejo fu iji vierafeknum nisaidiam.
JOH 4:24 Regavo God fu e Kaven ijefuon erar fu Godon sirimamekma fuka kaven fuon ijekma oi ma vierafeknum sirimamek.
JOH 4:25 Jesu fu ijeg kuardamga bara iji fu una kua, Na e iji fu e fok karauniakfuon God fu kuaga fu ari ruakfuon if fuon Kurais iji nan vierafen. Ijefuodo fu rad ruakma fur ire fok amarigia kuarduok.
JOH 4:26 Fu ijeg kuardamga Jesu fu una kua, E iji God fu kuaga fu ruakfuon iji nan iga ruainva iviakma nar igi osik manine vuak kuaivno kuain.
JOH 4:27 Bu ijeg kuaivo ijia e Jesuon vuak faivo iji bu vainva iji bun una ijia usen. Bu usem gak Jesu fu bara ijek vua kuaimga buka oiserdiain. Buka oiserdiain gavo buba una bara iji kua, A irerag abekro vierafen? Regavo madu buba una Jesu kua, A irerafuon bara ijek vuak kuaimno kuain? Buka rubdiamga bu ijia irem giain.
JOH 4:28 Bu irekoga bara iji fun do iji fu jiainma iji dab ijia abedeme una va ar ijia e fok kia, E be fu ire fok na nuriet reoinva iji fuka visu kuardiema na fain. Ijefuon na vierafe e iji fu kafu Kurais Godri kuamga fu ari ruainma ijino rua no gak vakno kiain.
JOH 4:30 Bara iji fu ijeg kuardiamga e fok bun ar iji areme una Jesu fino ijia fu gak vain.
JOH 4:31 Ijegrekoga e Jesuon vuak faivo iji bun uri Jesu soisoime kua, E vuak nijaidiamon duok kafo ine kuain.
JOH 4:32 Bu ijeg kuavga fu una kia, Duok nun iji na ine daro abe oijo iji jaba mukoi vierafenvano kiain.
JOH 4:33 Fu ijeg kuardiamga e vuak fuon faivo iji bu isuar una bui kuai, E iji fu kafu e kafob duok kege ro vajainvano kuain.
JOH 4:34 Bu una bui ijeg kuaivga Jesu fun giame una kia, Na ire iji na bijame kuardiavo iji na Asoinun ire iji fu vierafenma iji igame vo ik fuon iji fu na kuardiema na ruainva iji ka re barek.
JOH 4:35 Fu ijeg kuardiame uri vuak be ijeg bijame kuardiain. Ja kuai no asam nokarok ga nokarok (4) barekma no juar masikno kuaiv. Regavo ni juar garia giaf ire fok buka du barme masikfuon samuain.
JOH 4:36 Ijefuon e iji fu juar masime kanafu ai mukor ijia naga bu tavan bog ijia naoimvakfuon iji fun Godri kimen. Ijefuon vo e iji uij dajaimo ijiga e uij kanafumo iji bu gia e uruvana bu una oi karoime una unam ma karivako iji kegoi bu giakva buka oimarek.
JOH 4:37 Regavo vuak iji bu kuaivo iji fuka ma e be fu uij dajaiko be fu masim.
JOH 4:38 Na ja kiavno nin va juar iji jaba menva ijia ire duinva iji masif. Regavo juar iji bu e roinb menva iji ja ijia ire ma iji duinva ijin masime karfno kiain.
JOH 4:39 Areme e Sameriako iji ar ijia karinva roin bu una Jesu ma vierafen. Ijefuon maiji bara iji fu kia, Fu ire fok na nuriet reoinva iji kuardienmano kiain.
JOH 4:40 Ijefuon e Sameriako bu usem soisoime kua, Nika nona igia fine kuavga fu naki nokarok (2) una ijia buna fin.
JOH 4:41 Fu buna ijia fiknum vuak nijaidiamga e uruvana buka tavan ijia una fu ma vierafen.
JOH 4:42 Areme bu una usem bara iji kua, No ivia noka fu ma vierafen ijefuon maiji non koiknuvuon vuak fuon ma iji fu kuarduomo non fain. Regavo no vuak a kuarduinma ijefuon no iji fu ma vierafejo bakin. Gavo fuiji fu ma e moikigia oijo iji karauniakfuon ijin.
JOH 4:43 Jesu fu naki nokarok (2) barekoga fun una madu uri gafia Gareri ajie vain.
JOH 4:44 Regavo Jesu fu koikfuon e vuak fuon faivo kuardiame kia, E iji Godon vuak vierafene kuaimon iji e aiko fuon iji buba fu akaime vuak fuon amarigia faime igakno kiain.
JOH 4:45 Regavo tavan ijia fu vake Gareri kekomga e iji karinva iji buka fu oimardame afen. Bu oimardainva ijefuon maiji bu Jerusarem ijia tavan Fasova iro iji iknum oimarkuai vainva ijia bu fu gain. Bu koikbuon ni buon ijia ire sumakin kafokafo fu rena bu giain ijefuon bu fu afen.
JOH 4:46 Ijefuon Jesu fun tavan be una madu vake ai Keinan moik Gareri guf ijia kekoin. (Revo ar iji fu ur ijia do iji abe una do vuain bu ijo iji amarenma ijin). Regavo ai Kafoniam ijia e gaman ijiebuon ikreno be ijefuon am ijar ka adam ma bomana be aben.
JOH 4:47 E iji fu ijia fine Jesu fu ai Judia areme una Gareri ruainma fu iji fain. Ijefuon fu va kuaga Jesu fu farifuon iji adam abene fuka guakreno ijin keunakro fu ijeg vierafene vain.
JOH 4:48 Fu vake gafia keko kuamga Jesu fu una kua, Ja e fok ja vierafe naka ire sumakin mukor kafo uruvana rega ja ijia giame ijar una na ma vierafekuai ja ijeg vierafenvano kiain.
JOH 4:49 Jesu fu ijeg kuardamga e bomana iji fu una kua, E Bomana e-e nika nosik vakne revo a saroikma farinun iji fuka guak.
JOH 4:50 Fu ijeg kuardamga Jesu fu una kua, Na vierafe farifon iji fuba guakgavo fu una maikno ni una vakne kuain. Fu ijeg kuardamga e bomana iji fu Jesuon vuak ijin abe ma vierafene fun una ai fuon ijia vain.
JOH 4:51 E bomana iji fun una vakgame efuon ikrejo roin bu vuak abe roke unam ijia fu bieme usem kua, Amon adam abenma iji fun mainmano kuain.
JOH 4:52 Bu ijeg kuardavga e bomana iji fu tavan ivez farifuon fu una mainma ijefuon kiamga bu una kua, Fu niar tavan una gura manino ijia fu una urinmano kuain.
JOH 4:53 Ijefuon e bomana iji fu ijia una vierafero Jesu fu tavan besum ijia fu una kua, Farifon iji fun una urikno kuainma fu iji vierafen. Ijefuon fu aganfuon ijiena tavan ijia una Jesu ma vierafen.
JOH 4:54 Jesu fu Judia oinevo fu una Gareri roko ijia fu unam sumakin nokarok (2) ijin rena bu giain.
JOH 5:1 Tavan sibank barekoga Jesu fun una Jerusarem ijia e Jius bu afuime iro buon be ijo ijia vain.
JOH 5:2 Regavo ai Jerusarem ijia vien bomana be bu kua Sif Vieno kuavo iji samaij ijia do be fu ijia nafuin. Regavo do iji nafuinma iji bu e Ibrukobuon isama ijia bu kua Betesdano kuavo. Do iji nafuinma irif ijia bu ar kafo sa ameoine aren.
JOH 5:3 Ijefuon e adam abejo ga e diak ise ga e ni zuriaigin ga vajai garenva uruvana bu ar ijefuon banad ijia naoiga do iji fu katiga bu gakuai bu iji samua naoiv.
JOH 5:4 Ijefuon maiji Godon anera iji bu tavan kafokafo do ijia ari dab kativ. Regavo e adagin erar fu amur migegare do iji fu katime areke fu ijia arime una ajiekma e iji adam fuon irerag fu abeno iji fuka migegare barek.
JOH 5:5 Ijefuon e be ijia namo iji fuka juaivasia uruvana adam abenma ijar ijia nam.
JOH 5:6 Ijefuon Jesu fu keko e iji namo iji gain. Fu game vierafega e iji fuka usuibe adam abenma ijar ijia nam. Ijefuon Jesu fu uri kua, A vierafe adam on iji fube migegare madakno kuain?
JOH 5:7 Fu ijeg kuardamga e adagin iji fu una roin kua, E Bomana na erar na aferdieme imuikie do guri katimo ijia uniega na do ruaikva bakin. Na do guri fu ik katimo ijia na ruaikafie urijo iji bun e roinb amur asidie ruaigame naiji na ijia arevno kuain.
JOH 5:8 Fu ijeg kuardamga Jesu fu uri kua, Ni uri suf on iji ke matome vakne kuain.
JOH 5:9 Fu ijeg kuamga migegare e ijefuon adam iji fuka maimga fu uri suf fuon iji ke matome una ai fuon ijia vain. Regavo e adagin iji Jesu fu kuamga fu suf ke mato vainma iji fu tavan Sabat (Satade) iji e Jius bu isuar karine Godon sirimamejo ijia fu ijeg ren.
JOH 5:10 E Jiusbuon e mamkanuk roin bu usem e iji game kua, Ivia tavan Sabat (Satade) igi fu akai no isuar karijo revo suf iji a ke matom roko iji fuka ba maren. Ijefuon maiji akai nuvuon ijia no tavan iji no isuar karijo ijia ire kafo noba kege ok. Regavo suf on guraiji a abe oinon iji aka akai nuvuon iji dab tuasenmano kuain.
JOH 5:11 Bu ijeg kuardavga e adagin iji fu una kia, Na e iji fu amardienma ijar kie ni suf on iji ke mato vakne kiemga ijefuon na iji suf ke rokno kiain.
JOH 5:12 Fu ijeg kuardiamga bu kua, Regavo e iji erar a kuamga a suf ke mato kunaim rokno kuain?
JOH 5:13 Bu ijeg kuardaga e adagin iji fu e iji fu amardainma iji fuba mukoi vierafen. Ijefuon maiji buka e uruvana ijia afuinva ijefuon Jesu fun e kafar ijia sauin.
JOH 5:14 Ijegreare Jesu fu rad una Godon ar bomana bu sirimamejo ijia e iji fu amardainma iji bieme kua, Eko vajat on guraiji fuka una madain ijefuon rad ab una madu ise rek. Regavo a una adamene ise rekma ire ka ma ise be fu una vajat on ijia rega a gakno kuain.
JOH 5:15 Jesu fu ijeg kuardame vakoga e iji fun va e Jiusbuon e mamkanuk iji kuardiame kia, E iji fu Jesur na amardienmano kiain.
JOH 5:16 Ijefuon e mamkanuk iji bun va unam iji Jesu fu renma ijefuon bu uri vuak ise kafokafo fuisina kuain. Ijefuon maiji e adagin iji fu tavan Sabat (Satade) akaij iji e Jius bu isuar karine God oimardavo ijia amardain.
JOH 5:17 Bu ijeg kuaivga Jesu fu giame uri kia, Asoinun iji fu tavan bog ikreno ijefuon nak na ikrejno kiain.
JOH 5:18 Jesu fu vuak ijeg kuainma ijefuon e Jiusbuon e mamkanuk iji buka uruvana deajidiamga bu uri Jesu kanakuai vierafen. Ijefuon maiji fu akaij iji bu isuar karine God oimardavo iji bu abedenva ijesugin abe tuasenma bakigavo fu madu kuai fu God Asoifuon ijek bu besumno kuainma ijefuon bu ijeg ren.
JOH 5:19 Ijefuon Jesu fu una roin kia, Vuak igi naka ma kuardiavo mukoi faif. Na Godon Farif na irerag na reoijo iji nam nar oinun igia vierafene reoijo bakin. Regavo nam irerag Asoinun ijar rega na giavo na ire ni besum ijesugin reoij.
JOH 5:20 Ijefuon maiji Asoij iji fu Farifuon iji oijmamo ijefuon fu uri ire fok fu reoinon iji Farifuon kuardako fu ren. Regavo fu uri ire ma mamkanuk kafo madu igekin iji nijaidie na rega ja giekva jaka oiserdiak.
JOH 5:21 Asoinun iji fu e bu aoivo iji fu kiaga bu una uri oijo ijeg ga Farifuon nak na e iji bu aoivo iji na koiknun e iji na vierafenva iji kiaga bu una uri karik.
JOH 5:22 Regavo Asoinun iji fu koikfuon e moikigia ise reoijo ijiebuon ise iji kege mazim giaknum duna kiamo bakin. Regavo ire iji fun una na kuardiega nar e moikigia ise reoijo ijiebuon ise iji fine giaknum duna kiak.
JOH 5:23 Regavo na ijegrega e fok bu Asoinun iji bu aroivo ijeg bu una na abe arordiek. Ijefuon eraneb buba arordievo iji bu Asoinun iji fu na kiema na ari ruainva iji buba aroiv.
JOH 5:24 Ijefuon naka ma kuardiav eraneb vuak nun igi igieme una e iji fu na kiema na ruainva iji fu ma vierafekva e iji bu unam iji ma karivako iji abek. Fu ijegrenki rad God fuba una ise fuon iji kege mazim giame duna kafo kuaknum dab arafirak. Regavo fun koikfuon una madu guakfuon unam iji fun dajame una unam ma karivakfuon ijia ruain.
JOH 5:25 Regavo vuak igi na ma kuardiav tavan iji fun samairen gavo fu iga ruaido e gami aoinva iji bu Godon Farif na i nun igi faik revo eraneb bu faikva bu una ma karivak.
JOH 5:26 Asoinun iji fu unam ma karivako ijefuon anej ijin. Unam besum ijeg Farifuon fu na abe unam ma karivako anej iji amaren.
JOH 5:27 Regavo fun Godri daro miedo na fine e moikigia ise rejo iji kege mazim giame duna kafokafo kiak ijefuon maiji na Ema buon Farif.
JOH 5:28 Ijegvo jab vuak igi na kuardiavo ijefuon uri oiserdiavo. Tavan iji fun samairedo e gami mako ijia uniainva iji bu i fuon iji faikva bu mako ijia una usem ruak. Bu mako buon ijia una usemvo e iji bu ma kegoinva iji bu una ijia karivak revo e iji bu isema kegoinva iji bu una uri vajaifian abek.
JOH 5:30 Regavo na moikigia ire be irerag daro nun ijia reoijo iji fuka ma bakin. E moik igiebuon ise iji na kege mazim giavo iji na Asoi nun ijar kuardieko na faime ijia reoij ijefuodo iji naka ma ijefuon rej. Ijefuon maiji na nun vierafenva ijia reoijo bakin revo nan e iji fu kiema na ruainva ijefuon vierafenma na ijesugin jame reoij.
JOH 5:31 Regavo na koiknu uri kiak vuak nun igi na kuardiavo iji fuka mano kiakva ja izeg vuak nun iji abe ma vierafekva bakin.
JOH 5:32 Regavo Godri nuisina una e roin kuardiamo iji na vierafega vuak irerag fu kuardiamo iji fuka ma.
JOH 5:33 Jar e iji kiavga bu va e Jon fino ijia usem nuisina kuavga fuba una vuak kufui ijia kuardiain. Regavo fuka uri samakaf vua ma iji nuisina kuardiain.
JOH 5:34 Vuak igi na Jon fu nuisina kuainma na iji visu kuardiaikin ja ijia ma vierafekva God fu tavan radkma ijia ja karauniak.
JOH 5:35 E Jon vuak fu kuardiame ruainma iji fu ikuosaij abe baroina fu sanamga fu abe ruainma igekin. Fu sanainma iji abe rokga ja tavan ivuankbe ijesugin oimardain.
JOH 5:36 Jon vuak iji fu nuisina kuardiainma iji fum sibank kuardien gavo iviakma ire sumakin ka darokin igi na rejo ijar fuka ma bomana. Ire mamkanuk sumakin igi na rega ja gievo iji ik iji Asoinun iji fu na vajienma ijin. Ja ire iji na rejo iji giakva ja ijia una ma vierafero naiji Godri kiema na ruainvaro.
JOH 5:37 Regavo madu Asoinun iji fu na kiema na ruainva iji fuk fu nuisina fun kuardiain. Ja i fuon iji jaka ba fain gavo uikinik fuon iji jaba gain gavo ja e iji fu na kiema na ruainva iji jaba ma vierafen. Regavo madu vuak fuon jaba kege oijon ijia nain.
JOH 5:39 Ja vierafe ja Godon vuak bu usuibe isoinva iji amarigia dakva ja unam ma karivakfuon iji ja ijia abekuai ja ijeg vierafen. Regavo vuak fok bu kuaime isoinva iji bu nuisina isoin.
JOH 5:40 Regavo ja nun roga nar ifejdiaga ja ma karivakfuon iji jaka uzav.
JOH 5:41 Na ema jar na dab arordiekro na iji vierafenva bakin. Revo madu ja naka samakaf giain. Na giamga ja Godon oijmiamo iji jaba abe oijon ijia abeden.
JOH 5:43 Naiji na Asoinun ijefuon daro ga if fuon ijia ruain gavo ja oijon fok ijekma vuak nun igi ja mukoi faime abejo bakin. Regavo ja e be fum daro ga if fuon ijia ga vuak fuon iji dab ja kuardiabatie jaka amarigia vuak fuon iji faime fu kuardiamo iji igame keok.
JOH 5:44 Ja una joi nidoinamikuai ja iji vierafen gavo Godri fu ja nidosiakfuon iji jaba bomana vierafene uri ijef ren. Ja ijegrejo ijia ja izeg una na ma vierafek?
JOH 5:45 Regavo jab vierafero nar ise jon igi ja reoijo ijin giame una Asoinun iji kuardakro jab ijeg vierafek. Regavo fu Mosison akaij iji ja dab ma vierafeoijo ijar ise jon ke mazim giak.
JOH 5:46 Ja akaij iji fu abe miainma ja iji ma vierafeoijobatie ja madu una na ma vierafek. Ijefuon maiji vuak fok fu isoime kuainva iji fu nuisina kuain.
JOH 5:47 Regavo ja vuak fuon fu isoinma iji jaba abe ma vierafeoijo iji ja izeg una vuak nun igi abe ma vierafek?
JOH 6:1 Jesu fu vua kuardiame fun vanag abe una do Gareri (if fuon be bu kua Taibiriasno kuavo iji) irif gara vain.
JOH 6:2 Fu ijia vakga e ka uruvana bu unam sumakin ka darokin iji fu e adagin fu karauniaga bu una madiamo iji gainva ijefuon bu iji jame vain.
JOH 6:3 Jesu fun e vuak fuon faivo ijiena uruor be ajie vake makaf ijia usem ijia karin. Regavo iji fun e Jiusbuon iro Fasova iji bu ijo iji samairenma ijia bu ijeg ren.
JOH 6:5 Rene Jesu fu una dakaroim gia buka e uruvana javga fu una Firif kua, Buka e uruvana rok revo a vierafe duok iji no izia kimene vajiaga bu ikno kuain.
JOH 6:6 Jesu fu izegrekfuon iji fun vierafen gavo fum Firif oifuon fu izeg vierafenma iji gakafa fu ijefuon vuak ijeg kuardain.
JOH 6:7 Fu ijeg kuardamga Firif fu una roin kua, E guri buka e uruvana ijefuon a mon ka ma uruvana kege bred uruvana kimene vajiaga bu ikva iji madu na vierafe fuka ba aresremano kuain.
JOH 6:8 Fu ijeg kuardamga Edru e Saimon Fitaon diar ijar uri Jesu kua, Na am ukakbe fu bred ukakna imut roin (5) ga kijum nokarok (2) ijeg ke roka na gain. Regavo iji na vierafe fu izeg e fok bu iga fu defiakma bano kuain.
JOH 6:10 Bu ijeg kuardavga Jesu fu una kia, Ni e fok kiaga bu moik ijia ari karifno kiain. Regavo ar iji bu irenva iji fu garas mukoi name aren ijefuon bu ijia ari kariga e uruvana iji vainva ijia e baru ijesugin buka e faiv taosen (5,000) ijeg.
JOH 6:11 Jesu fun uri bred am ukak iji fu kege vainma iji kege uri kaf gufia kuniaime Godon sirimamene kege vajiamga bu kege una e fok iji vajiain. Ijegreare fun una madu kijum iji kege amur fu renma ijegrene kege e iji vajiamga bu ija buka defiain.
JOH 6:12 Bun defiamga Jesu fun uri e vuak fuon faivo iji kia, Duok ukur iji kafo jab nisek nika amarigia kanafufno kiain.
JOH 6:13 Fu ijeg kuardiamga bun uri bred ijiga kijum ukur iji bu ija defiamga bu nainva iji karme una ter tuer (12) ijeg anusen.
JOH 6:14 Jesu fu tavan ijia ire sumakin iji rena e uruvana bu game kuai, E iji fun ma e iji fu Godon vuak vierafene kuaimon iji fu ruakno kuainma ijarno kuain.
JOH 6:15 Regavo Jesu fun giamga e iji bu fu dab Kin buon rekuai ejafavga fu uri fuonkua uruor ijia ajie vain.
JOH 6:16 Rene fun tavan nakisrega e Jesuon vuak faivo iji bun uruor iji areme una do Gareri irif ijia ari vain.
JOH 6:17 Bu ari usem vanag abe una ai Kafoniam nak vain. Regavo iji fuka tavan nakinma ijia bu vanag abe do ijia vain revo Jesu fuba ijia buna.
JOH 6:18 Regavo buibur bomana ijar ijia ufiko do iji fuka bomana foin.
JOH 6:19 Regavo e vuak fuon faivo iji bunka vanag abe do uf garia vainva ijia bu gak Jesu fu do azan ijia bu biediakro rokga bu game buka uruvana igia juin.
JOH 6:20 Bu juvga Jesu fu giame kia, Na narno jab jukno kiain.
JOH 6:21 Rega bun una oimarknum fu afeme vanag ijia uname migegare vanag iji fu do irif iji bu vako ijia kekoin.
JOH 6:22 Areme afarma e iji do irif gara fu bred ga kijum vajiama bu inva ijieb uri Jesu nisain. Bu vanag iji fu besum do irif ijia namo iji bun e Jesuon vuak faivo ijieb abe vaka bun gain revo Jesu fuba buna vanag ijia ajiema bu gainva ijefuon bu fu nisain.
JOH 6:23 Regavo vanag ai Taibiriasko iji bu roke do irif ar iji Jesu fu bred kege Godon oimarme kege una e fok vajiama bu inva ijia usen.
JOH 6:24 Ijefuon bu uri gak e iji Jesuon vuak faivo ijiga Jesu bu baga bu uri vanag iji bu ik usem naoivo ijia ajieme bun Jesu nisaim ai Kafoniam ijia vain.
JOH 6:25 Bu nisaim vake do gara ijia bieme kua, E Nijaidiamon a izeg igia ruainmano kuain.
JOH 6:26 Bu ijeg kuavga Jesu fu kia, Naka ma kuardiav ja na nisaidie ruainva ijefuon maiji ja bred na vajiava jaka uruvana inva ijefuon ja iji nisaidieme ruain. Regavo ja unam iviamkor sumakin na reja ja gienva ijefuon nisaidie ruainva bakin.
JOH 6:27 Jab uri juar ja duok abedeme ikfuon ijesugin vierafek. Ijefuon maiji duok iji bu tavan rad bu barek. Regavo ni uri daro jon iji kege ire iji ja ine tavan bog ijia karivakfuon ijin vierafene ijefuon ik reof. Regavo ire iji Ema buon Farif igi nar ja vajiakfuon. Ijefuon maiji God Asoij ijar na abe unam igi na reoijo ijefuon marme uniemga na ruainvano kiain.
JOH 6:28 Fu ijeg kuardiamga bu una kua, Regavo ik iji God fu vierafe no rekfuon iji no irerag iji rekno kuain?
JOH 6:29 Bu ijeg kuardavga fu kia, Ik iji God fu vierafe ja rekfuon iji ja e igi fu kiema na ari ruainva igi na ma vierafek.
JOH 6:30 Fu ijeg kuardiamga bu una kua, Regavo a ire sumakin be a irerag iji rega no ijia game una a ma vierafek? Regavo Godon buk akai bu usuibe isoinva ijia bu kuai, Mosis fu ai moikum namo ijia bred mena fum kaf gufia ari rokga fu kege e saifnuvuon iji vajiama bu invano kuain. Izeg bu ai moikum namo ijia vasiaordiamga bu bred mena fum kaf gufia arimga bu kege in. Ijefuon vo abe ire sumakin be ijekin iji rega no ijia game una a ma vierafek?
JOH 6:32 Bu ijeg kuardavga Jesu fu una kia, Naka ma kuardiav bred iji Mosis fu ai moikum namo ijia bred kege saifjon iji vajiamga bu inva iji fu bred ma iji bakin. Regavo bred iji asoinun fu iviakma vajiamo ijar fu bred ma.
JOH 6:33 Ijefuon bred ma iji fu e ijar arime e moikigia oinva iji ifejdiaga bu ijia ma karivak.
JOH 6:34 Fu ijeg kuardiamga bu uri kua, E bomana nika ivia anerene tavan bog bred ijekin ijesugin vajuoke no ijno kuain.
JOH 6:35 Bu ijeg kuardavga Jesu fu uri kia, Naiji na bred iji ja ine tavan bog ijia ma karivakfuon ijin. Erar fu nun ruakma e iji fuba vasia guak. Regavo erar fu na ma vierafekma e iji fuba do kafak.
JOH 6:36 Ijefuon igia faif iviakma na giamga ja irerag na reoijo iji jaka giev revo na giamga jaka ba una na ma vierafej.
JOH 6:37 Regavo na e iji Asoinun ijar oibuon iji ke karoiga bu enun rekva naba bu rotkuriak.
JOH 6:38 Ijefuon maiji kaf gufia na ari ruainva iji nam nar nun vierafenva ijia reokro ruainva bakin na e iji fu kiemga na ari ruainva ijar irerag fur vierafeno na ijesugin reok.
JOH 6:39 Regavo Asoinun iji fu kiemga na ruainva ijefuon fuon fu vierafenma ijeg na e iji Asoinun ijar oibuon iji ke karoiga bu e nun rejo iji kafo naba uniakok. Regavo na tavan iji ire fok moikigia bu barekva na ijia e iji bu aoinva na kia bu una uri unam ma ijia ma karivak.
JOH 6:40 Regavo Asoinun ijar vierafenma iji erar Farifuon na gieme una na ma vierafekva bu unam ma ijia ma karivak. Bu ijegrenki tavan radkma ijia bu aoikva na kiaga bu una uri unam ma ijia ma karivakno kiain.
JOH 6:41 Fu ijeg kuardiamga e Jius iji bun ijefuon uri vuak iji dab bui musikuain. Ijefuon maiji fu kia, Naiji na bred iji kaf gufia ari ruainma ijino kiain.
JOH 6:42 Bu kuai, E iji fu Jesu e Josofon farif iji non vierafenva ijin. No eofijaf iji non giavo gavo fu irerafuon kuai naiji na kaf gufia ari ruainvano kuaim?
JOH 6:43 Bu vuak iji dab bui siguvga Jesu fu giame una kia, Vuak iji ja dab joi musikuaivo iji aref.
JOH 6:44 Fu erar izeg koikfuon giriesame una na ma vierafekma bakin. Revo fun Asoinun iji fu kiemga na ruainva ijar e ijiebuon oij iji kege karoiga bu ijia na ma vierafek. Bu na ma vierafekva na tavan radkma ijia bu aoikva na kia bu una uri ijia ma karivak.
JOH 6:45 Regavo usuibe e iji bu Godon vuak vierafene kuaivo bu isoinva iji bu ijeg kuai, E fok bu Godri koikfuon nijaidiakno kuain. Ijegvo eraneb bu Asoinun ijefuon vuak iji faivknum unam fuon ma iji mukoi vierafekva e iji bu nun ruak.
JOH 6:46 Regavo e be fu erar Asoinun iji gainma bakin. Regavo fun e iji God fu kuamga fu ari ruainma ijar fuonkua gain.
JOH 6:47 Ijefuon naka ma kuardiav eraneb ja na ma vierafekva ja unam ma karivako iji abek.
JOH 6:48 Naiji na bred ma iji ja ine tavan bog unam ma ijia ma karivakva ijin.
JOH 6:49 Saifjon iji bu ai moikum namo ijia bred mena kuavo iji igavo buka aoim baren.
JOH 6:50 Regavo bred iji kaf gufia ari ruainma iji fuka mukor ga nibe ijefuon eraneb bu bred iji ikva bu aoikva bakin.
JOH 6:51 Ijefuon naiji na bred ma iji fu kaf gufia ari ruainma ijin. Erar bred ijin ikma fuba guakgavo fuim una unam ma karivako iji abek. Regavo bred iji vajai surif nun igin. Na vajai surif nun iji abe e fok moikigia oinva iji mia bu inki bu unam ma iji abe ijia ma karivak.
JOH 6:52 Jesu fu ijeg kuardiamga E Jius iji bun vuak ijefuon una bui musikuain. Bu kuai e iji fu izeg vajai surif fuon iji abe muoga no ikno kuain.
JOH 6:53 Bu ijeg kuaivga Jesu fu una kia, Naiji na ma kuardiavo igia faif ja Ema buon Farif ijefuon vajai surif ijiga kavuan iji ba ikva ja izeg unam ma karivako iji abekva bakin.
JOH 6:54 Regavo eraneb kavuan nun ijiga surif nun iji ikva bu unam ma karivako iji abedo na tavan radkma ijia bu aoikva na kia bu una uri ijia ma karivak.
JOH 6:55 Ijefuon maiji vajai surif nun ijiga kavuan iji bu kaven nuvuon ijiebuon duok ma. Ijefuon erar kavuan nun ijiga surif nun iji ikma na oifuon ijia fioga fuiji fu nosik besum fiok.
JOH 6:57 Asoinun iji fum ijia fino ijar na kiemga na ari ruain revo fum ijia vek fino ijefuon na vek fij. Ijefuon gavo eraneb bu vajai surif nun ijiga kavuan nun iji ikva na vek fijo ijefuon bu ijia karivak.
JOH 6:58 Regavo bred iji na kuardiavo iji fu kaf gufia ari ruainma ijin. Regavo fun bred iji saifjon iji bu ai moikum namo ijia inva ijekin bakin. Saifjon iji bu ai moikum namo ijia bred mena kuavo iji ine rad bu aoin gavo bred igi na kuardiavo iji fu ijekin bakin. Eraneb bred ijin ikva buba aoikno kiain.
JOH 6:59 Regavo vuak igi Jesur ai Kafoniam ijia ar iji bu afuime vuak kuaivo ijia aru mani vuak nijaidiamon ijia fu ijeg kuardiain.
JOH 6:60 E Jesuon vuak faivo iji bu vuak iji faime una bui kuai, Vuak iji fuka gigikin fu erar vuak iji faime ma iji vierafekma bano kuain.
JOH 6:61 Bu ijeg dab bui siguvga Jesu fun giame uri kia, Ja vuak iji na kuardiainva iji jaka dab oi kafokafo vierafen ijefuon ja jon izeg ja na ma vierafejo iji jan arekuai ja ijeg vierafen?
JOH 6:62 Regavo ja Ema buon Farif iji fu una ar fu ari ruainma ijia ajie vakma ja izeg rek?
JOH 6:63 Unam ma iji ja abe ijia ma karivako iji fun besum ja Godon Kaven Akai abega fur oijon samuagdiakma ja ma karivak revo jam ema jar koikjo daro jon ijia ma karivakva iji ja izegrekva bakin. Revo vuak igi na kuardiainva iji na Kaven Akai ijefuon vuak iji kuardiain. Vuak ijar ja ifejdiaga ja unam ma karivako iji abek.
JOH 6:64 Regavo e guri roin na giamga jaka ba vuak iji abe ma vierafenvano kiain. Regavo Jesu iji fu kuainma iji fuka uria ijia eraneb bu fuba ma vierafekfuon iji fun giain. Regavo madu eraneb bu fu abe una e ise rejo iji miakfuon iji fun giame vierafenma ijefuon fu ijeg kuain.
JOH 6:65 Fu ijeg kuardiame kia, Na ijefuon ja kia fu e be erar fum koikfuon una na ma vierafekma bakin. Rega fun Asoinun ijar koikfuon e ijefuon oij iji abe dakaroiga fu ijia una na ma vierafekno kiain.
JOH 6:66 Jesu fu ijeg kuardiainma ijefuon e vuak fuon faivo roin bu una funa okfuon iji bun uzain.
JOH 6:67 Ijefuon Jesu fu uri e vuak fuon faivo tuer (12) ijeg kia, E roin bun na are vain gavo jak jab na areme vakuai vierafekvano kiain?
JOH 6:68 Jesu fu ijeg kuardiamga Saimon Fita fu uri kua, E Bomana iviakma no ma vierafega a onkua aka e akai Godri kuamga a ruain. Revo vuak ma iji ma karivako iji ar kuarduoga no faiv gavo no a unako vakva no una e be erafon vakno kuain.
JOH 6:70 Fita fu ijeg kuardamga Jesu fu una kua, E guri tuer (12) iji na nar koiknu kega ja nana oin gavo iji ja oijo ijia e besum fu kaven iseno kiain.
JOH 6:71 Regavo iji fu kiainma iji fu Judas e Saimon Iskarioton farif ijefuon kuain. E iji fuka vuak fuon faimo be gavo fuka tavan rad Jesu abe una e ise reoijo iji miak ijefuon fu iji kuain.
JOH 7:1 Areme Jesu fun ai Gareri ijia oknum e iji vuak nijaidiaoin. Regavo fu una ai Judia ijia fuba oin ijefuon maiji Jius e mamkanuk iji bu fu kanakuai samuame karinva ijefuon fuba ijia vuak nijaidiain.
JOH 7:2 Regavo ai Judia ijia bu tavan iji e Jius bu usuibe ai moikum namo ijia busame ijia karioinva iji vierafekuai iro ijo iji fun samairen. Ijefuon Jesuon uviaifijaf iji bun uri Jesu kua, Ar igi a oinon iji arega ni una uri gamia Judia vakne. A ijia va ire sumakin igi a reoinon iji roin ijia regakva e vuak on faivo iji bu ire sumakin a reno iji gak.
JOH 7:4 A igia sauime fikma e ar iror fok bu izeg a ma vierafekva bakin. Ijefuon vierafe e fok bu a game ma vierafekva ni uri una gamia Judia e uruvana bu afuime iro ijo ijia va ire sumakin iji rega bu gavno kuain.
JOH 7:5 Vuak iji e uviaifijaf ijieb ijeg Jesu kuardain gavo bu madu Jesu buka ba ma vierafen.
JOH 7:6 Ijefuon Jesu fu uri una kia, Tavan kafokafo e iji bu iro ikuai afuivo ijia ja tavan kafo vak ga tavan kafo ja arekva iji fun maren. Regavo iviakma naiji na tavan nun iji fuba abedo naba vak.
JOH 7:7 E moikigia oinva iji ja bu ziegafiakva bakin revo bu na ziegafieknum dab arafiriek. Ijefuon maiji na unam ise bu kegoijo iji na samakaf visume kuardiavo ijefuon bu na ijeg rek.
JOH 7:8 Ijefuon ni jar iro ijia vaf revo naiji naba vuak. Ijefuon maiji tavan nun iji fuba abenmano kiain.
JOH 7:9 Fu ijeg kuardiame fun ijia areme Gareri ijia naki sibank fin.
JOH 7:10 Areme Jesuon uviaifijaf iji bun Judia ijia iro iji bu inva ijia vakga Jesu fu rad isuar sauime jajia vain.
JOH 7:11 Fu vakgame e Jius e mamkanuk iji bu iro ijia karinva iji bu uri Jesu nisaimoknum e iji afuinva iji kia e iji fu izerkiga nijaiduofno kiain.
JOH 7:12 Regavo e iji afuinva ijia e roin bu fuisina isuar karine bui kuai e iji fuka e mano kuaiv. Regavo e roin bu kuai e iji fuka e uruvana aferdiame una unam ise ijia nijaidiamno kuain.
JOH 7:13 Bu dab ijeg fuisina kuaimoin revo buba abe uruvana kuaime samafren ijefuon maiji bu e Jius e mamkanuk iji juin.
JOH 7:14 Rene iro iji bun ine rirkinenva ijia Jesu fun Godon ar ijia aru manine e iji vuak anerene nijaidiam.
JOH 7:15 Fu ijeg nijaidiamga Jius e mamkanuk iji bu gava buka oiserdiamga bu kuai, E iji fu Godon buk akaij ijia vuak akaij iji buba abe fu nijain revo fu izeg vuak ma iji mukoi vierafenmano kuain.
JOH 7:16 Bu ijeg kuaivga Jesu fu una kia, Vuak igi na kuardiavo iji fu nun bakin revo vuak iji fun God Asoij iji fu kiema na ari ruainva ijefuon vuak.
JOH 7:17 E be erar fu Godon vierafenma ijia kegoino e ijar vuak igi na abe kuardiavo iji fur giek. Fu giega na vuak nun nar vierafenva iji abe kuardia vo na Godon vuak abe kuardiavga iji fur gieme vierafek.
JOH 7:18 Regavo e be erar fum vuak fuon fur vierafeno iji abe kuardiaoino iji fu fuon aroinamikro fu iji vierafen. Regavo erar fu vierafe e iji fu kuamga fu ruainma iji abe aroikro fu ijeg vierafeno e iji vuak fuon fu kuaimon iji fuka ma ijesugin ga kufui kafo ijia fuka bakin.
JOH 7:19 Mosis fuka akai uruvana kege ja vajiain gavo e fok guri ja karinva ijia e besum fu erar akaij iji mukoi igiainma bakin. Regavo ja irerafuon ja na kaniekuai nisaidievno kiain.
JOH 7:20 Jesu fu ijeg kuardiamga e iji bun uri kume, E gafi ka kaven ise ijar niroinma gafi a erar a kanakvega a iji kuaimno kumen.
JOH 7:21 Bu ijeg kuardavga fu una kia, Na ire sumakin besum tavan iji ja isuar karine Godon sirimamejo ijia reja ja gieva jaka oiserdiain.
JOH 7:22 Regavo iviakma ja Mosisri akaij iji surif kania ufu anf navo iji miainma ijefuon ja ijin ijeg keg. (Regavo unam iji bu saifjon ijieb ijeg kege ruain revo Mosis akai fu rad isoime ke vajiain). Ja am ukakna ijiebuon surif iji ja kania ufu anf navo iji fu tavan akaij iji guf ijekma ja iji jaika vierafekva bakin. Ijefuon vo ja irerafuon e adagin gafi na tavan iji ja isuar karine God sirimamejo ijia amarva fu mainma ijefuon una oij isema na vierafeknum jaka ziemoij.
JOH 7:24 Ebuo ise iji ja giame kuaikva iji isuar irerag bu rejo iji anej ma iji amarigia giame kuaikfuon. Regavo iji jam uri irerag bu rejo iji giame una ise buon ijefuon kuaivo iji fuba maren.
JOH 7:25 Fu ijeg kuardiamga e Jerusaremko iji bu uri bui kuai, E iji kafu e igi e mamkanuk bu kanakuai nisaimoijo ijin.
JOH 7:26 Bu fu kanakuai kuaimoij revo fuba jum fuka uri e fok ijiebuon nifak ijia manine vuak kuaim. Rega madu e mamkanuk iji buba una vuak fuon gari roib kuardav. Bu kafu vuak fuon iji faime vierafega e iji fun ma e iji God fu kuamga fu ruainma ijarga buba una vuak fuon gari roib kuardav.
JOH 7:27 No e gari fu e izekor iji non vierafen gavo tavan rad God e iji fu kuaga fu ruakno kuainma iji fu ruakma fu erar izia fu ruainma iji mukoi game vierafekma bano kuain.
JOH 7:28 Jesu fu vek Godon ar bomana bu sirimamejo ijia manine vuak kuardiamo ijia bu ijeg kuaivga fu kume, E fok guri karinva gurie ja na e izekin ga na izia ruainva iji jaka ba vierafen. Naiji nam nar igia ari nun na vierafenva ijia reokro ruainva bakin. Regavo God iji fu kiema na ruainva iji fuka God ma ga fu e kufuikin bakin. Regavo fuiji ja game vierafenva bakin gavo nar fu nan vierafen. Ijefuon maiji na fur kiema na fu fino ijia ari ruainvano kuain.
JOH 7:30 Fu ijeg kuardiainma ijefuon e roin bu fu kunaim dibur unakuai vierafen. Regavo bu imut buon ijia kafo buba vajai fuon niriain. Ijefuon maiji tavan fuon ma iji bu fu kanakfuon iji fuba ruain.
JOH 7:31 Bu ijeg ren gavo e iji afuinva ijia buka e uruvana una fu ma vierafene isuar bui kuai, E iji bu usuibe kuai fu ruakno kuainva iji fu ruakma fute ire sumakin ka uruvana kafo e gari fuba renma iji asime rekno kuain.
JOH 7:32 Bu fuisina vuak ijeg kuaivga e Ferisis ijiga e mamkanuk Godon isuf baroijo iji bu e juo karijo roin kiavga bu Jesu tokuai vain.
JOH 7:33 Bun vake gafia usevga Jesu fu uri kia, Naiji nam asam sibank igia oine nan una God e iji fu kiema na ruainva ijefuon vak.
JOH 7:34 Na ijia vakva jaka uri na nisaidiek revo ja giekva bakin. Ijefuon maiji ja ar na vako ijia jaba vuakno kiain.
JOH 7:35 Fu iji kuardiamga e Jius bu vuak iji faime una bui kuai, E iji fu ar fu izia vakredo fu vaga noba gak? Fu kafu uri e Grikbuon mai ijia e Jius iji bu kari vainva ijia E Grik iji vuak nijaidia vak?
JOH 7:36 Fu kuai fu vakma no fu nisaik revo noba fu biek. Regavo madu no ar fu fino iji noba vakno kuainma ijefuon anej ma iji irerag?
JOH 7:37 Tavan bomana be bu iro ine barekrejo ijia Jesu fu uri uruvana igia aramajiame kume, E be erar do kafakma ni nun roga na do jiamavno kumen. Ijefuon maiji usuibe Godon buk akaij ijia bu isoinva iji bu ijeg isoi, Eraneb bu na ma vierafekva do iji fu bu ifejdiaga bu ma karivako iji fu oibuon ijia abesek.
JOH 7:39 Regavo Jesu vuak iji fu do ijefuon kuainma iji fu Godon Kaven iji bu eraneb ma vierafene abekfuon fu ijefuon kuain. Regavo tavan ijia bu Godon Kaven buba aben. Ijefuon maiji Jesu fuba guame una uri sanainma fuon kaf gufia vain.
JOH 7:40 Areme e fok afuinva ijia e uruvana roin bu Jesu vuak iji fu ijeg kuainma iji faime kuai, E iji no vierafe fu ma e iji Godon vuak faime una e roin kuardiamo ijarno kuain.
JOH 7:41 Regavo e roin bu kuai, E iji fu God e iji fu kua fu ruakno kuainma ijar. Regavo roin bu kuai, E iji God fu kua fu ruakfuon iji fu ai Gareri guf ijia fu ruakma bano kuain.
JOH 7:42 Regavo Godon buk akaij iji bu usuibe isoinva ijia fu ijeg nijaiduin. E iji God fu kuai fu ruakfuon iji fun e Devidon uifarif ijia ruak. Regavo e iji fu ai Betriem e Devid fu fino ijia nafekno kuain.
JOH 7:43 Ijefuon bu Jesuon vuak iji ijeg kuaime dab ata roinroin rene bui sigunamin.
JOH 7:44 E roin buka deajidiamga bu Jesu kunaim tokuai vierafen gavo vajai fuon iji buba kafo niriain.
JOH 7:45 Areme e Godon ar juo karijo iji bu Jesu tokuai ruainva iji bun ijia areme una va e mamkanuk Godon isuf baroijo ijiga e Ferisis gafi bu karinva ijia usen. Bu usevga bu uri kia, Ja irerafuon e iji no kiava ja vainva iji jaba tom afem ruainvano kiain?
JOH 7:46 Bu ijeg kuardiavga e Godon ar juo karijo iji bu una roin kia, E iji no afekuai vain gavo no usem vuak fuon iji fu kuaimon iji faiva fuka oiseraduin. Vuak fuon iji fuka vuak sumakin e bu igia kuai no faivo bakin fu ijin kuaimga no ijia are ruainvano kiain.
JOH 7:47 Bu ijeg kuardiavga e Ferisis iji abevo e mamkanuk iji bu una kia, Ja kafu e ijefuon vuak fuon ijar oijon iji fun kam karoidiain.
JOH 7:48 Ja vierafega e Ferisis ijiga e mamkanuk igi roin buba una fu ma vierafev?
JOH 7:49 E iji nigen ka ba mukoi vierafejo iji bu kafu e Mosison akaij iji buba jajiav ijefuon bu uri e ijin ma vierafej. Bu ijegredo rad God fu bu kam unam ise ijia arafiriakno kuain.
JOH 7:50 Bu ijeg kuaivga Nikodimas e iji fu tavan be naki ijia ro Jesuk fine vuak kuainma ijar uri kia, No akai nuvuon ijia kuainma iji noka amur e iji no kege vajai fian vajiakrejo ijiebuon vuak irerag bu isema rejo ijefuon anej ma iji faikfuon. Regavo rad ijar no bu kege vajai fian vajiakva iji fu markno kiain. Nikodimas fu ijeg kuardiamga e mamkanuk ijiga e Ferisis iji bu madu uri kua, A ijeg kuaimdo ak a kafu e Garerikor. Ni Godon buk akaij iji bu usuibe isoinva ijia dame ga. A ijia dame gabatie a ga e iji fu Godon vuak vierafene kuaimon iji fu ai Gareri ijia ruakma bano kuain.
JOH 8:1 Areme e fok bun una ar buon ijia vakga Jesu fu roin una uruor be Orivs kuavo in oriv ijesugin nainma ijia ajie vain.
JOH 8:2 Fu ijia vainma suok ijia fun una Godon ar bu sirimamejo makaf ijia ruain. Fu ijia rokga e uruvana bu biom fu dab kirakuravga fu ijia arifine e iji vuak nijaidiain.
JOH 8:3 Fu ijia vuak nijaidiakoga e Ferisis roin ga e Mosison akai nijaidiavo iji roin bu bara be fu baru turamon iji afeme ijia ruain. Bu ijia usem kuava fu e fok ijiebuon nifak ijia manin.
JOH 8:4 Fu maniga bu uri Jesu kua, E nijaidiamo no gaga bara gari fuka bara befuon baru turamga no iji game afem ruain.
JOH 8:5 Regavo akai nuvuon iji Mosis fu abedema iji bara ijeki iji no mun tuame kaniaga bu aoik revo iji a izeg vierafenmano kuain?
JOH 8:6 Regavo vuak iji bum ijeg kuardaga are Jesu fu uri ijia vuak isema kuardiaga bu rad fu tokuai ijefuon bu ijeg kuardain. Regavo Jesu irerag bu rejo iji fun vierafen ijefuon fu daime imut fuon ijia sakin ijia isoin.
JOH 8:7 Bu duna ijeg ireme Jesu kuardavga fu uri ninuime kia, E guri ja irenva ijia e besum erar fu vierafega fu ise be fuba regakva nin amur uri mun guri kege bara gari kanafno kiain.
JOH 8:8 Fu ijeg kuardiame vo fu una madu daime imut fuon ijia sakin ijia isoin.
JOH 8:9 Fu isoikoga e iji bu vuak iji faime bun isuarigia besubesum vakga Jesu ko bara ijek bu ijia areme vain. E makin ijieb amur vako e roin iji bu rad vain.
JOH 8:10 Bu vako Jesu fu uri ninuime una bara iji kua, E guraiji irenva kafo bube vek ise on ijefuon kuaime kanakuai irenvano kuain?
JOH 8:11 Jesu fu ijeg kuamga bara iji fu una kua, E iji bun vabarenvano kuain. Fu ijeg kuamga Jesu fu kua, Nak naba a arafirak. Ijefuon a vakma ab una ise ijekin kafo rekno kuain.
JOH 8:12 Ijegreare Jesu fu una madu e Ferisis iji kuardiame kia, Naiji na e moikigia oijo ijiebuon sanainma ijin. Eraneb bu na kegoijo ijeg bu rad nun ijia mimatame kegokva buba nakinma ijia ok. Regavo madu buka sanainma nun iji fu tavan bog ijia navako iji abekno kiain.
JOH 8:13 Fu ijeg kuardiamga e Ferisis iji bu uri kua, A ijeg kuaimon iji no vierafe aka kufuimen. A vuak on a vierafenma a iji dab no kuarduom ijefuon no vierafe vuak on iji fuka ma bano kuain.
JOH 8:14 Bu ijeg kuardavga Jesu fu kia, Na vuak nun igi na koiknu kuardiavo iji na koiknu vierafega naka ma kuardiav. Ijefuon maiji na izia ruain ga madu na izia vakfuon iji nan vierafen gavo jaiji jaka ba vierafen.
JOH 8:15 Regavo ema igi jar jon izeg ja karine una e kafobuon ise iji ja giavo iji jaka isema rej. Ijefuon maiji jaba amarigia vierafeknum ise buon iji giav. Regavo na nunkua na iviakma e kafobuon ise iji na ijeg giavo bakin.
JOH 8:16 Regavo na ebuon ise kafo giame kuaikva iji na aresredo na ijeg rek. Ijefuon maiji nam nar ebuon ise iji giavo bakin revo na Asoinun fu na kiema na ruainva iji na fusik ise iji giav.
JOH 8:17 Regavo madu bun usuibe buk akaij ijia ijeg isoi, E nokarok (2) bu e mamkanuk ijiebuon nifak ijia ireme vuak ni besum abe kuaikva vuak buon buka ma ijesugin kuaik.
JOH 8:18 Regavo vuak nun igi na kuardiaoijo iji naka ma kuardiav. Regavo madu Asoinun fu na kiema na ruainva iji fuk vuak irerag fu nuisina kuardiamo iji fu ma kuardiamno kiain.
JOH 8:19 Jesu fu ijeg kuardiamga e iji bu uri kua, Regavo Asoion fu izer fino iji nijaiduomne kuain. Bu ijeg kuavga Jesu fu kia, Ja na jaba ma vierafenva ijefuon ja Asoinun iji jaba vierafen. Revo ja na ma vierafebatie ja Asoinun iji madu ma vierafekno kiain.
JOH 8:20 Jesu fu Godon ar bomana guf ijia aru mavua be bu mon God vajavo iji savo ijia manine vuak ijeg kuardiain. Fu ijia manine vuak ijeg kuardiain gavo buba uri fu kanain vo ire kafo fuon ren. Ijefuon maiji tavan fuon fuba aben ijefuon bum karine vuak fuon ijesugin fadain.
JOH 8:21 Areme Jesu fu una madu kia, Naiji na oinevo nan vak. Na vakva ja uri na nisaidiek revo jaka ise jon ijekma mukoi aoik ijefuon ja ar na vako ijia jaba vuakno kiain.
JOH 8:22 Ijefuon Jius e mamkanuk iji bu kuai, E iji fu kuai ja ar na vako ijia jaba jajie vuakno kuainma iji fu irerafuon ijeg kuaim? Fu kafu fui kananamikafa fu ijefuon ijeg kuain.
JOH 8:23 Jesu fu ijeg kuardiame una kia, Jaiji ja e moik igekor gavo naiji na e kaf gufekor. Regavo madu jaiji ja e moik igekor ga naiji na e moik igekor bakin.
JOH 8:24 Ijefuon na iji kuardiame kia jaka ise jon ijekma mukoi aoik. Jaba ma vierafero naiji na e iji God fu kuai fu ruakno kuainma jaba ijeg vierafekva jaka ise jon ijekma mukoi aoik.
JOH 8:25 Jesu fu ijeg kuardiamga bu uri kua, Regavo aiji a erar iji ni samakaf kuarduoga no faivno kuain. Bu ijeg kuavga fu kia, Na ik vuak na kuardiainva ijia naiji na era iji nan kuardiain.
JOH 8:26 Na e moikigia ise jon iji ja reoijo iji fine giaknum ga ijefuon ja kuardiakva iji fuka uruvana. Regavo e iji fu na kiema na ruainva iji vuak fuon fuka ma. Ijefuon na e moikigia oinva ijin irerag fu kuardienma na ijesugin abe kuardiavno kiain.
JOH 8:27 Jesu fu Asoifuon ijefuon fu ijin kuardiain revo e iji buba mukoi fain.
JOH 8:28 Ijefuon fu uri kia, Tavan iji ja Ema ijiebuon Farif iji abe uri kaf ajiekva ijia ja ma vierafek. Ja vierafero naiji na e iji God fu kua fu e fok karaunia ruakno kuainma ijinro ja ijeg vierafek. Rega ja ijia vierafero irerag igia na reoknum kuardiaoinva iji na nun vierafenva ijia kuardiaoijo bakin. Regavo na Asoinun irerag fu nijaidienma na ijesugin kuardiaoijoro ja ijeg vierafek.
JOH 8:29 Regavo Asoinun iji fu kiema na ruainva iji fuba na unieko vain. Ijefuon maiji tavan bog irerag na reoijo iji na fu oimarkfuon ijia reoijno kiain.
JOH 8:30 Fu ijeg kuardiamga e roin bu Jesu vuak iji fu kuardiainma iji faime buka una fu ma vierafen.
JOH 8:31 Ijefuon Jesu fun uri e Jius iji bu fu ma vierafenva iji kia, Ja vuak nun iji na nijaidiavo iji faime igiekva ja ma e vuak nun faivo iji rek.
JOH 8:32 Ja vuak ma abe ma vierafega vuak ma ijar ise jon bu ja tomdiainva ijia karauniakno kiain.
JOH 8:33 Jesu fu ijeg kuardiamga bu uri kua, Noiji no e Eburamon uifarif ijefuon e be fuba no aferduome kam irerag fu vierafenma ijesugin kuoga no faime renva bakin. Regavo a irerafuon kuai, No ma iji abe ma vierafekva ma ijar ise nuvuon iji bu no tomduinva ijia karaunuokno kuain.
JOH 8:34 Areme Jesu fu uri kia, Vuak igi naka ma kuardiav eraneb bu ise reoijo iji bun ise ijar aferdiaga bu una fuifuon ikrej.
JOH 8:35 Regavo ni igia fai. Ja ise ijar tavan bog ja samuagdakma iji ja izeg oimarknum dazme karikva bakin.
JOH 8:36 Regavo ja Godon Farif ijar fu ise jon bu ja tomdiainva ijia karauniakma iji ise jon iji fu izeg una ja tomdiakva bakin.
JOH 8:37 Ja e Eburamon uifarif iji nan vierafen gavo jaka na kaniekuai oij. Ijefuon maiji ja vuak nun igi na nijaidiavo iji jaba mukoi faime abej.
JOH 8:38 Regavo madu na Asoinun irerag fu nijaidienma na ijin abe kuardiav gavo jaiji ja vek una asoijon Setan irerag fu nijaidiainma ja ijin rejno kiain.
JOH 8:39 Fu ijeg kuardiamga bu uri kume, No asoinuvuon iji fu Eburamno kumen. Bu ijeg kumejga Jesu fu uri kia, Ja Eburamon afijafbatie ja irerag fu reoinma iji jak ja ijeg rek.
JOH 8:40 Regavo iji jaka bakin ja vek una na kaniekuai vierafen. Ijefuon maiji na vuak ma iji God fu kuardienma ijin na abe kuardiainva ijefuon ja iji kaniekuai vierafen. Regavo e Eburam fuba ijeg ren revo iji ja rejo iji ja asoijon Setan fu reoinma ja ijegreoijno kiain. Fu ijeg kuardiamga bu uri kua, Noino am oij bakin revo no Asoinuvuon iji fun God fuonkua revo noino ma afijafno kumen.
JOH 8:42 Bu ijeg kuardavga Jesu fu uri kia, Ja God fu ma Asoi jonbatie ja na oijmiek. Ijefuon maiji fur na kiema na ruainva ivia na nifak jon igia manij. Na ari ruainva iji nam nar daro nun ijia ruainva bakin revo fun Godri kiema na ruain.
JOH 8:43 Regavo irerafuon ja vuak igi na kuardiavo iji jaba mukoi faiv? Jaba faivo ijefuon maiji jaba vuak faikuai ijefun rej ijefuon ja vuak asur ma nun iji jaba mukoi faiv.
JOH 8:44 Ja asoijon Setan e kaven ise ijin ijefuon ja uri asoijon ijefuon fuon fu vierafeno ijia reokuai vierafen. Ik anej ijia fuiji fuka e kaniaga bu aoivo gavo fuba una vuak ma iji jame unam ma ijesugin reoin. Ijefuon maiji fu oifuon ijia fu vuak ma iji vierafene ijia reoino bakin. Fu vuak kufui kuaimon ijefuon maiji fu e ir kufuikin ga madu fuiji fu e kufuimeoijo ijiebuon asoij.
JOH 8:45 Vuak igi naka ma kuardiavo ijefuon jaba una na ma vierafej.
JOH 8:46 Regavo ni erar uri ise be na irerag iji reja fu gienma ijia kuardie na faiv. Regavo ja vierafega na vuak ma kuardiaga ja irerafuon ba na ma vierafev.
JOH 8:47 Regavo erar fu vierafega fun Godon e renma iji fur Godon vuak igi na kuardiavo iji fu mukoi faim. Regavo jaiji ja Godon e bakin ijefuon ja vuak fuon igi na kuardiavo iji jaba mukoi faivno kiain.
JOH 8:48 Areme e Jius iji bu uri kua, Regavo a vierafega igi no kuai a iji a e Sameritenko ga madu a kaven ise ijar a niroinmano kuainva iji kafu no ma kuainvano kuain.
JOH 8:49 Bu ijeg kuardavga Jesu fu kia, Naiji kaven ise ijar na niroikienma bakin. Naiji na Asoinun iji abe aroiv revo jaiji ja na arordievo bakin.
JOH 8:50 Naiji na koiknu nun sanainma iji abe aroikafie vierafejo bakin revo fun e besum fur fine nun sanainma iji abe arordiem. Regavo madu fur fine e fok no kege besum name guom.
JOH 8:51 Ijefuon na ma kuardiav erar vuak nun igi mukoi faime igiakma e iji fuba guak.
JOH 8:52 Jesu fu ijeg kuardiamga e Jius iji bu uri kua, Iviakma no samakaf gainva iji no vierafe aiji aka kaven ise ijar a nirokain. E Eburam ga e Godon vuak vierafene kuaivo iji bun aoim baren revo a una kuaimon erar vuak nun igi faime igiekva buba aoik.
JOH 8:53 A vierafe Eburam fu e buze gavo ar a e ikin? Eburam fun guain revo madu e Godon vuak vierafene kuaivo iji bun aoim baren. Revo aiji a era aikido a vuak ijeg kuaimno kuain?
JOH 8:54 Bu ijeg kuardavga fu kia, Na uri koiknu nun sanainma iji abe aroikva iji na vierafe fuba marek. Regavo e iji fu nun sanainma iji abe arordiekfuon iji fun Asoinun e iji ja kume fuka God jonno kumejo ijar fuonkua arordiek.
JOH 8:55 Jaiji ja Asoinun iji jaba vierafen ga nar na fu vierafen. Revo na ivia igia kiak na fu naba vierafenvano kiakva iji na ja kuaivo ijeg naka vuak kufui kuardiak. Regavo na fu nan vierafen revo vuak fuon iji na igiav.
JOH 8:56 Regavo asoijon Eburam fu tavan iji bu na nafediekfuon fu iji gakro uruvana vierafen. Regavo fu ma vierafega na moikigia roko ijefuon fu tavan iji gainma igeg fu ma vierafene bomana oimarenmano kiain.
JOH 8:57 Fu ijeg kuardiamga bu uri kua. A juaivasia on iji fu bomana bakigavo a kume na Eburam nan gainvano kumen.
JOH 8:58 Bu ijeg kuardavga fu kia, Vuak igi na ma kuardiav Eburam bu rad nafen gavo naiji nan ur ijia firuainvano kiain. Fu ijeg kuardiamga e Jius iji bu vuak iji vierafega buba aresren. Ijefuon bu uri mun tuame Jesu kanakrejga fu Godon ar bomana iji areme fun keko vain.
JOH 9:1 Ijegreare Jesu fu oine e be ni zuriaigin nafenva fu fino iji fu keko gain.
JOH 9:2 Regavo e vuak fuon faivo iji bu uri Jesu kua, E nijaidiamon a vierafe e guri ni fu zuriainma iji fu ise fuon fu renma ijar ki fu eofijaf ijiebuon ise ijar fu ni zuriainmano kuain.
JOH 9:3 Bu ijeg kuardavga fu kia, E guri fu ni zuriainma iji fu ise fuon ijiga eofijaf ijiebuon ise ijar fu ni zuriainma bakin. Regavo ni fuon iji fu ijeg zuriainkin rad fu una ni naraga e fok bu ijia Godon daro iji fu izeg ikreno iji gakuai fu ijefuon ni zuriain.
JOH 9:4 Ijefuon noka migegare tavan igi fu vek sanainma igia no e iji fu kienma na ruainva ijefuon ik ijin rekfuon. Regavo no saroike fu tavan nakikma fu erar izeg naki ikrekma bakin.
JOH 9:5 Regavo na vek moikigia oijo ijefuon naiji na moik igefuon sanainma ijino kiain.
JOH 9:6 Fu ijeg kuardiame uri juvit foine abe sakin ijekma ujumujume abe e iji ni zuriainma ijefuon niom ijia azimdain. Areme fu uri kua, Ni va do Sairom bu kuavo iji nafuinma ijia uikinik on abe do ijia somne kuain. (Revo vuak Sairom ijefuon anej ma iji, Fu kuama fu ruain). Ijefuon e ni zuriaigin iji fun va do iji Jesu fu kuainma ijia uikinik fuon iji abe ijia somga ni fuon iji fun una naramga fun una ar vain.
JOH 9:8 Fu una vakga kaifijaf ijigam e roin bu ur fu ni zuriaigin fu e ire nimdiamon bu gainva vo fu una ni narainma ijefuon bu uri kuai, E iji fu kafu e ni zuriaigin iji fu unam ijia oknum ire nimdiamo ijarno kuain.
JOH 9:9 Regavo e roin bu kuai, Iji furno kuain. Regavo roin bu usem kuai, E iji fu e be gavo uikinik fuon iji fu e ni zuriaigin iji aikino kuain. Bu ijeg dab bui kuaivga e iji ni narainma iji fu kia, Na e ni zuriaigin iji ja ur gienva iji narno kiain.
JOH 9:10 Fu ijeg kuardiamga e iji bu uri kua, A ni on iji a irerag abega fu una naraimano kuain?
JOH 9:11 Bu ijeg kuardavga e iji ni narainma iji fu kia, Na e be bu kua Jesuno kuavo ijar sakin numume niom nun ijia azirdien. Fu azirdieme kie, Ni va do Sairom kuavo ijia ruaimne kiemga na va do ijia uikinik nun iji do ijia ruaivga ni nun iji fu una naraimano kiain.
JOH 9:12 Fu ijeg kuardiamga bu uri kua, Regavo e iji fu izerkino kuavga fu kia, Na e iji fu ni nun iji amardieme fu una izeg vaka naba gainvano kiain.
JOH 9:13 Rega bun e iji ni narainma iji afeme una e Ferisis ijiebuon vain.
JOH 9:14 Regavo tavan iji Jesu fu e ni zuriaigin ijin sakin numume ni fuon iji amarema fu una ni narainma iji fu tavan iji e Jius bu isuar karijo ijia fu ijeg ren.
JOH 9:15 Ijefuon e Ferisis iji bun madu una usem e iji fu izeg ni fuon iji fu una narainma ijefuon kuardain. Bu kuavga fu kia, E iji fu sakin ijia numume ni nun ijia azirdieme areko na do ruaivga ni nun iji fu una naraimano kiain.
JOH 9:16 Fu ijeg kuardiamga e Ferisis roin bu vuak iji faime bu una kuai, E iji fu tavan iji no isuar karine Godon sirimamejo ijefuon akaij iji fuba jam. Ijefuon no vierafe e ijegreoino iji fu Godon ruainma bano kuain. Regavo e roin bu kuai, E ijeg ise reoino iji fu izeg ire sumakin ijekin iji rekno kuain. Bu ijeg kuaime dab ata roinroin ireme bui musikuain.
JOH 9:17 Ijefuon e Ferisis iji bu una e iji kua, A kuo na Jesur ni nun iji amardiama na una ni naraivano kuin. Regavo a e iji fu ijeg redainma iji a izeg vierafenmano kuain. Bu ijeg kuavga fu kia, Na vierafe e iji fu e Godon vuak vierafene kuaimon ijino kiain.
JOH 9:18 Fu ijeg kuardiain gavo e Jiusbuon e mamkanuk iji bu e iji bu ni zuriaigin nafegavo fu una ni narainma iji bu vek ba ma vierafen ijefuon bu una eofijaf iji kiava bu aferdia ruain. Bu rokga e mamkanuk iji bu uri kia, Am igi fube amjon? Ja iviakma igia kuok non ijeg ni zuriaigin nafenvano kuokva nin fu izegrega ni fuon iji fu una narainma ijin kuarduo no fai. Bu ijeg kuardiavga eofijaf bu kia, Am guri fu farinuvuon no ni zuriaigin nafenva ijin no vierafen.
JOH 9:21 Regavo erar izegrega fu ni narainma iji noba vierafen. Regavo madu fu erar ni fuon iji amarema fu una narainma iji noba gain. Revo fu am ukak bakin ijefuon ni kuaga fu koikfuon vuak ma iji kuardiamno kiain.
JOH 9:22 Regavo eofijaf iji bu Jiusbuon e mamkanuk iji juinva ijefuon bu ijeg kuardiain. Ijefuon maiji e Jiusbuon e mamkanuk iji bun ur kuai, Erar bu kuaik Jesu fu e iji God fu kuamga fu ruainma ijino kuaikma e iji bu kuriairega bu rad buba una ar iji e Jius bu afuime vuak kuaivo ijia aru vakno kuain.
JOH 9:23 Ijefuon e ni zuriaigin ijefuon eofijaf iji bu kuardiavga bu kia, Fu am uka bano ni kuaga fu koikfuon izeg fu ni narainma iji kuardiamno kiain.
JOH 9:24 Ijefuon e Jius iji bun madu una e ni zuriaigin iji fu ni narainma ijin kua, No vierafe e iji fu ni on iji amardainma iji fuka ise reoino ijefuon a iviakma Godon if ijia kurame vuak iji ka visume kuarduomne kuain.
JOH 9:25 Bu ijeg kuardavga e iji fu kia, E iji naba gain kafu ise reoino kafu bakin. Regavo naiji na ni nun igi fu ur zuriain revo iviakma na una ni narainva na ijesugin vierafenvano kiain.
JOH 9:26 Fu ijeg kuardiamga bu kua, Regavo e iji fu a irerag redain vo fu izegredamga ni on iji fu una narainmano kuain.
JOH 9:27 Bu ijeg kuardavga fu kia, Vuak iji nan amur ja kuardievga nan kuardian revo jaka ba fain. Ja irerafuon una madu faikuai vierafej? Jakafu jak ja una e vuak fuon faivo iji rekuai vierafenvano kiain?
JOH 9:28 E iji fu ni narainma iji fu vuak ijeg kuardiamga bu uri musikuame kua, Noiji no e Mosison vuak faivo gavo ar a e ijefuon vuak faimno kuain.
JOH 9:29 No usuibe God fuka samakaf Mosis kuardaga fu faimo ijar no vierafe fu ma. Regavo e iji a kuaimo iji fu izia ruainma iji noka ba vierafenvano kuain.
JOH 9:30 Bu ijeg kuardavga e iji fu uri kia, Vuak iji ja kuaivo iji na faiga fuka oiserdiem. Fu izia ruainma iji jaka ba vierafen revo fur ni nun igi abe naradien.
JOH 9:31 Regavo non vierafe God fun e ijeg ise reoijo iji vuak buon fu faimo bakin. Regavo fu e guri bu tavan bog fuon sirimameknum ga irerag fu vierafenma ijia reoijo fu vuak buon iji faimon.
JOH 9:32 Regavo ik anej moikigi amarenva ijia e be fuba ijeg e ni zuriaigin iji amardiamga bu una ni narainva bakin.
JOH 9:33 Regavo e iji na kuaivo iji fuba Godon ruainmabatie fu izeg ire sumakin ijekin iji rekma bano kiain.
JOH 9:34 E iji una ni narainma iji fu ijeg kuardiamga bu una kua, E guri ka vek ijia ise ijekma nafenva gure a vierafe a no nijaiduokreno kuain. Bu ijeg kuardame ka kuriaireme dakara dab makaf ijia akozva fu ar iji bu afuime vuak kuaivo iji areme keko vain.
JOH 9:35 Rene rad Jesu fu Jiusbuon e mamkanuk iji bu izeg e iji fu amarenma iji bu fu fak renva iji fain. Ijefuon fu tavaibe una e iji bieme kua, Abe Ema buon Farif iji na ma vierafenmano kuain.
JOH 9:36 Jesu fu ijeg kuardamga e iji fu una kua, Ni e iji era iji kuardiega na fu ma vierafejno kuain.
JOH 9:37 E iji fu ijeg kuardamga Jesu fu kua, E iji an gainma ijin. Fur iviakma igi manine osik vuak kuaimno kuain.
JOH 9:38 Jesu fu ijeg kuardamga e iji fu uri Jesu ato same kurituamajame kua, E Bomana iviakma nan a ma vierafenvano kuain.
JOH 9:39 Fu ijeg kuardamga Jesu fu kua, Na moikigia na ari ruainva iji na e iji bu Godon unam buba gavo iji ifejdiaga bu gakuai na iji ruain. Regavo madu e iji bu vierafero bu Godon unam bun gavno kuain revo buka ba gavo iji ifejdiaga bu una ise buon samakaf giame vierafekro na iji ruain.
JOH 9:40 Jesu fu vuak ijeg e iji kuardamga e Ferisis roin bu ijia irevado bu vuak iji faime una Jesu kua, A ijeg kuaido no kafu ni zuriaigino kuain.
JOH 9:41 Bu ijeg kuardavga Jesu fu kia, Ja ni zuriaiginbatie ja ise iji jaba rekfuon revo ja kuai no ni zuriainva bano kuaivo ijefuon ise jon iji fu vek ijeg namo kiain.
JOH 10:1 Areme Jesu fu kuardiame kia, Naka ma kuardiav e iji fu maf-sif ijiebuon vien iji bu amarenva iji fu aregavo fum maikava ijia ajie urame aru vako iji fun e niesamo ga madu fu e kaniamon.
JOH 10:2 Regavo e iji fu maf-sif buon vien ma ijia arume vako ijar fu ma e maf-sif samuagdiamon.
JOH 10:3 Fu vaga e iji vien samuamo iji fu vien iji dajadaga fu arume maf-sif fuon ijiebuon if ijia kumeko bu faime usem jaga fu aferdiame keko makaf ijia vak.
JOH 10:4 Fu aferdia keko amur kiaknum vako bu ijia jav. Ijefuon maiji bun ir fuon iji mukoi faime vierafen.
JOH 10:5 Regavo bu e be buba ja vak ijefuon maiji bu ir fuon bu faivo bado bu faikva buka subinai vak.
JOH 10:6 Jesu fu vuak iji abe bija ijeg kuardiain gavo e iji bu vuak iji fu kuainma ijefuon maiji buba mukoi faime vierafen.
JOH 10:7 Areme Jesu fu una kuardiame kia, Na ma kuardiav na iji na maf-sif ijiebuon vien ijin. E iji roin bu amur ruainva iji bu e niekin ga madu bu e kaniavo. Regavo buiji e maf-sif samuagdiavo bakin ijefuon maf-sif iji bu ir buon iji buba fain.
JOH 10:9 Regavo naiji na vien ma ijin. Erar fu nun ruakma fu vien ma ijia arume ar nun ma ijia vak. Fu aru ruaknum vo una keko va duok ma iji ijknum ijeg rek.
JOH 10:10 Regavo e niekin iji fum niesaknum vo maf-sif iji kam arafiriaknum kaniakafa fu iji rok. Regavo naiji na ruainva iji na ma karivako iji abe miaga ja abenkin jam tavan bog ijia oimarknum ma karivakro na iji ruain.
JOH 10:11 Ijefuon maiji na e maf-sif mukoi samuagdiamo iji nar oimarknum maf-sif nun ijiebuon guak.
JOH 10:12 E iji fu maf-sif fuon bakin gavo fum e ijieb kuaga fu samuagdiamo iji fu monfuon ikreno ijefuon fuba mukoi samuagdiak. Ijefuodo fu siroij iji maf-sif jakiamo ijar ruakma fuka jume kovak. Fu vake siroij iji fu urame maf-sif iji jakiame buaseknum kam arafiriakva bu subinaime dab tata vak.
JOH 10:13 E iji bu kuaga fu maf-sif samuagdiamo iji siroij ruakva fuka kovak. Ijefuon maiji maf-sif iji bu fuon bado fuba amarigia maf-sif iji mafardiame samuagdiak.
JOH 10:14 Regavo naiji na e maf-sif mukoi samuagdiavo. Asoinun iji na fun vierafen gavo nak na Asoinun iji nan vierafen. Unam besum ijeg maf-sif nun iji na bun vierafen gavo nak bu nan vierafen. Ijefuon na oimarknum buifuon guakafie vierafen.
JOH 10:16 Maf-sif roin bu nun revo bu tata oij ijefuon iviakma buba fak uf igia oij. Ijefuon na vierafe maf-sif iji naka aferdia roga bu besum ireke na nunkua samuagdiake bu ir nun ijesugin faik.
JOH 10:17 Asoinun iji fu na oijmiemo ijefuon maiji naka koiknu buifuon guakafie vierafen. Na guainkin rad fu kiega na una uri ijia fivak.
JOH 10:18 Naiji fu erar na dab kaniekma bakin. Regavo naka koiknu vajai nun igi abe ijia nijaidiaga bu kanie na guak. Na e darokin ijefuon bu kaniega na guame rad na daro nun ijia una urik. Regavo iji fun Asoi nun iji fu kiema na ruainva ijar na ijegrekfuon fu iji kuardienmano kiain.
JOH 10:19 Rega e Jius iji bun madu Jesu vuak iji fu ijeg kuardiainma ijefuon bun dab bui kuaime dab ata roinroin ren.
JOH 10:20 E uruvana roin bu kuai, E iji kafu kaven ise ijar niroin kafu nigen iseren. Regavo ja irerafuon vuak fuon iji faikuai dab uruvana vierafejno kuain.
JOH 10:21 Regavo roin bu kuai, E kaven ise niroinma iji fu izeg vuak ijekin kuaimokma bakin. Regavo fu madu izeg e ni zuriaigin iji amardiaga bu una ni narakva bano kuain.
JOH 10:22 Areme tavan iji ve damo ijia e Jius fok bun una Jerusarem ijia afuin. Bu Godon ar bomana vien iji bu dajainva ijefuon tavan ijia oimardaknum iro bomana be in.
JOH 10:23 Bu ijegrejo ijia Jesu fu Godon ar bomana ijefuon makaf be bu kua Soromonon banadno kuavo ijia arume oin.
JOH 10:24 Fu ijia oga e Jiusbuon e mamkanuk roin bu game usem fu manino ijia irem ameoine kua, A ivez son amarigia kuarduoga no a oinon ijefuon anej ma iji vierafek? No if on iji a era ga madu a erar kuaga a ire sumakin kafokafo reoinon iji noka ba vierafen. Ijefuon a vierafega a Godri kuamga a ruainmaga nika samakaf kuarduoga no faiv?
JOH 10:25 Bu ijeg kuardavga fu kia, vuak iji naka ur kuardiain gavo jaka vek ba ma vierafej. Na Asoinun ijefuon daro ijia na ire sumakin iji rej. Ijefuon ja ire iji na rejo ijia giame una na ma vierafekfuon revo iji jaka bakin. Ijefuon maiji jaiji maf-sif nun bakin.
JOH 10:27 Maf-sif nun iji nan vierafen ijefuon na kiakva bu ir nun iji faime una na jajiek.
JOH 10:28 Bu jajie roga na unam ma karivako iji abe miainkin buba aoigavo bu ijia ma karivak. Regavo e kafo buba maf-sif nun iji na samuagdiavo iji kafo imut nun ijia kuniai turame aferdia usem vakva bakin.
JOH 10:29 Ijefuon maiji asoinun iji maf-sif iji fu kege vajienma iji fuka darokin ga fur ire fok asidiain. Ijefuon fu erar fu asime maf-sif fuon iji kafo imut fuon ijia kuniai turame aferdiame usem vakva bakin. Ijefuon asoinun ijek irerag no rejo iji fuka besumno kiain.
JOH 10:31 Jesu fu ijeg kuardiamga e iji bun una madu mun tuame kanakrejga fu kia, Na ire sumakin uruvana ka mukor iji ni jon ijia reoija jan gien. Regavo ja vierafe ire sumakin iji na reja ja gienva iji irerag ijar fuka isediaga ja iji kaniekuai reoijno kiain.
JOH 10:33 Fu ijeg kuardiamga bu kua, No ire ma sumakin uruvana a renma ijefuon kanakrejo bakin. Regavo ar koikon Godon if iji abe buze imo ijefuon no iji ijeg rej. Aiji a ema igi no aikin gavo aka koikon dab God aikin amaremno kuain.
JOH 10:34 Bu ijeg kuardavga Jesu fu uri kia, Usuibe buk iji bu vuak akai isoinva ijia God fu vuak be e igi nuvuifuon kuaima bu isoinva iji bu ijeg isoin. God e igi no fu kuo jaiji moik igefuon godno kuin.
JOH 10:35 Regavo vuak iji bu isoinva iji no vierafe fuka ma fu izeg barekma bakin fu ijia navak. Ijefuon God fu e iji bu vuak fuon ma iji faivo iji fu kia, Ja moik igefuon godno kiain.
JOH 10:36 Regavo naiji na asoinun ijar na fu vierafen ijefuon fu kiema na moikigia ruain ga ja irerafuon kie a Godon if iji abe buzemno kiev. Ja kafu igi na kia naina Godon Farifno kiainva ijefuon ja ijeg rej.
JOH 10:37 Regavo ja giega na Asoinun ijefuon ik iji naba kegoijga ja ijefuon naba ma vierafekva iji fun ijin.
JOH 10:38 Regavo ja giega na asoinun ijefuon ik iji nan reoin gavo jaba na ma vierafejgakva nin ire sumakin iji na rejo ijia gieme una na ma vierafef. Ja ijegrekva ja ijiason una ma vierafero asoinun ijek irerag no rejknum kuaivo iji no besum ro ja ijeg vierafekno kiain.
JOH 10:39 Jesu fu ijeg kuardiamga e iji bun una madu kunaim tokrejga fu giame isuar ar iji areme vain.
JOH 10:40 Fun Jerusarem areme una madu do Jodan vajame gara ar iji e Jon fu e do ruardiamo ijia fiokafa vain.
JOH 10:41 Fu ijia vako e uruvana bu biom fuon ruaknum kua, E Jon fu ire sumakin kafo fuba rena no gain revo vuak irerag fok fu e garefuon fu kuarduinma iji fuka mano kuain. Areme e ka uruvana bu ijia una fu ma vierafene kuai, E iji fu ma e iji God fu kuai fu ruakno kuainma ijino kuain.
JOH 11:1 Regavo ai Beteni ijia e Rasaras kuavo ijar adam ka bomana aben. Regavo ai Beteni iji fu bara Mata ko Merik buon mai.
JOH 11:2 Regavo Meri iji bara iji fu oir udi mukoi urino iji fu abe Jesuon diak ijia useme some nigen fuon jau ijia abe fidainma ijin. Bara ijefuon makin e Rasarasno kuavo ijar adam aben.
JOH 11:3 Fu adam abene fuka guakvega makifijaf ijieb uri Jesu vuak nijame kume, E Bomana kaion a oijmamo iji fuka adam bomana abenmano kumen.
JOH 11:4 Bu vuak ijeg Jesu nijavga fu faime uri e vuak fuon faivo iji kia, E Rasaras fu adam aben ga na vierafe fu guame una uriga e bu ijia izeg Godon daro fu ikreno iji game una fu abe aroivknum vo Farif fuon igi na arordiekno kiain.
JOH 11:5 Regavo Jesu fu Mata ga Meri ga makin fuon Rasaras iji fuka bomana oijmiamo. Ijefuon Rasaras fu adam abenma ijefuon vuak iji bara nokarok (2) bu nijainva iji fun fain gavo fuba ijia vain fu magaga una madu naki nokarok (2) ijia fin.
JOH 11:7 Fu ijia fine rad fu una e vuak fuon faivo iji kia, Ruano una ai Judia vakno kiain.
JOH 11:8 Fu ijeg kuardiamga bu una roin kua, E Nijaidiamo ai Judia a una vakveno iji e Jius iji bu nito igem bu mun tuame kanakveja a ijefuon uri igia ruain. Regavo iji aba vierafe gavo a una madu ijia vakafa vierafenmano kuain.
JOH 11:9 Bu ijeg kuardavga fu kia, Tavan iji fuka jaoijmanak manine sanam. Ijefuon e iji fu tavan ijia oinon iji fuba arikanak ijefuon maiji fu moikigi fu sanainma ijia oin.
JOH 11:10 Regavo fu naki oinon iji fuka dia kam ire kafo nizukiak. Ijefuon maiji ire sanamo be fu bado fu izeg ai ni nisaime okma bakin.
JOH 11:11 Jesu vuak ijeg kuardiame uri e vuak fuon faivo iji kia, Kainuvuon Rasaras fu ninaido na vakva na saga fu una urikno kiain.
JOH 11:12 Fu ijeg kuardiamga e vuak fuon faivo iji bu una roin kua, E Bomana Rasaras fu ma ninaikma iji no vierafe fu una urikno kuain.
JOH 11:13 Regavo Jesu fu Rasaras fun ma guainma ijefuon fu iji vierafene kuain. Regavo e vuak fuon faivo iji bu vierafero fu ma ninainmaro bu ijeg vierafen.
JOH 11:14 Ijefuon Jesu fu uri ka visu kuardiame kia, E Rasaras fun ma guain.
JOH 11:15 Regavo magoi noba ijia kariko fu guainma ijefuon iji fun maren. Fu ijeg guaga na va gafia kua fu una uriga ja ijia game una na ma vierafekno uri no fu gak vakno kiain.
JOH 11:16 Ijegreare e Tomas e iji bu kua Fuatkaru nafenvano kuavo ijar uri kia, E fok roga no enuvuon E Nijaidiamo guriena vainkin no funa besum aoikno kiain.
JOH 11:17 Regavo Rasaras fun guamga bu abe mako ruinva iji naki nokarok ga nokarok (4) barko ijia Jesu fu Beteni ijia kekoma bu vuak iji kuardain.
JOH 11:18 Regavo ai Beteni fu Jerusarem samaij ijia ijefuon e Jius uruvana bu bara Mata ko Merik giakuai ijia ruain. Bara nokarok (2) iji bu makibuon guainma ijefuon buka oifian abenva ijefuon e iji bu bara iji ifejdiakuai ijia ruain.
JOH 11:20 Regavo Mata fu oifian abeknum fino ijia bu kua Jesu rokno kuava fu faime fu kekome unam gafia biekafa vain. Fu vako Meri fu vek ar gafia e ijiena fin.
JOH 11:21 Regavo Mata fun kekome va Jesu bieme kua, E Bomana a igia finobatie makin nun iji fuba ijeg guak.
JOH 11:22 Regavo ivia na vierafega a fuifuon irerag a God kuardakma fu rekno kuain.
JOH 11:23 Mata fu ijeg kuardamga Jesu fu kua, Makin on iji fun guain gavo na vierafe fu una uri okno kuain.
JOH 11:24 Fu ijeg Mata kuardamga fu kua, Na vierafe tavan radkma iji ruakma ijia makin nun iji fu una uri fivakno kuain.
JOH 11:25 Areme Jesu fu madu una Mata kua, Naiji na ma karivako ijiga aoime una urijo ijin. Regavo erar fu na ma vierafekma iji fu guak revo kaven ijia fu una ijia fivak.
JOH 11:26 Regavo erar fu nivek fine na ma vierafeno e iji fu ijia ma fivak. Ijegvo a vuak igi na kuardavo iji abe faime ma vierafen?
JOH 11:27 Jesu fu ijeg kuardamga Mata fu kua, E Bomana na vierafega aiji a Godon Farif. E iji bu kuai fu moikigia ruakno kuainva ijino kuain.
JOH 11:28 Mata fu Jesu ijeg kuardame fun va ar gafia kekome isuar Meri kuardame kua, E iji E Nijaidiamo iji fun ruainma gafaija oifuon kiemno kuain.
JOH 11:29 Fu ijeg kuardamga Meri fun migegare kekome Jesu biekafa vain.
JOH 11:30 Regavo Jesu fuba ar ijia kekoin revo fu vek unam gami Mata fu bienma ijia manin.
JOH 11:31 Ijefuon Meri fu migegare kekome fu biekafa vakgame e Jius iji bu fu samua karinva iji bu gak fu vakga bu uri dab arafirin. Bu vierafero kafu gami makifuon ijefuon mako vien ijia niraikafa vakoro bu usem jain.
JOH 11:32 Meri fu vake gami Jesu fu manino ijia kekome uri ato same kua, E Bomana a igia fibatie makin nun fuba ijeg guak.
JOH 11:33 Regavo Jesu fu uri Meri ga e Jius iji bu niraivo iji giama fuka bomana oifiain.
JOH 11:34 Ijefuon fu uri kia, Ja surif fuon iji ja abe izia mako ruinvano kiain. Fu ijeg kiamga bu kua, E Bomana no abe gafia mako ruinvano ni ro gamne kuain.
JOH 11:35 Areme Jesu fuka oifiaima fu ijia niraimga e Jius iji ruainva bu ijia gain. Bu game una bui kuai, Ni garia gaf fuka Rasaras oijmamo ijefuon fu iji niraimno kuain.
JOH 11:37 Bu ijeg game kuaiko e roin bu kuai, Fu ur e ni zuriaigin iji amarema fu una ninarain. Regavo igi fuka igia fikin fu Rasaras ifejdaga fu una urikdo fuba igia fimano kuain.
JOH 11:38 Areme bu Jesu afeme vake mako iji Rasaras bu uname mun dab vien iji bijuinva ijin nijain. Bu nijaivga fu kekome mako iji gama fuka bomana oifiain.
JOH 11:39 Ijefuon fu kia, Mun guri ja dab mako vien guri bijuinva ijin biom gareg abedefno kiain. Jesu fu ijeg kuardiamga bara Mata e iji guainma ijefuon makin ijar una roin kua, E Bomana Rasaras no dab unainva iji fuka naki nokarok ga nokarok (4) baren. Ijefuon no mun guri biom abedekva fuka udi ise rikno kuain.
JOH 11:40 Mata fu ijeg una kuardamga Jesu fu kua, Nabe amur kua a ma vierafekma Godon sanainma iji a gakno kuain?
JOH 11:41 Areme e iji bun uri mun iji dab biom ken ijia abeden. Bu abedevga Jesu fun gafeg varur gufia nikajaknum sirimamene kua, Asoinun na on sirimamega a faimo ijefuon na bomana on oimarev.
JOH 11:42 Na tavan bog on sirimamene a irerag na kuardavo iji a faimon. Regavo igi na sirimamejo ijefuon maiji na e igi irenva ijiebuon na iji sirimamej. Na on sirimamega a faime irerag na kuardavo iji rega bu ijia game una ma vierafero naiji ar kiema na ruainvaro bu ijeg vierafek.
JOH 11:43 Jesu fu ijeg sirimamene barme uri e iji bu unainva iji uruvana igia nizume kuai, Rasaras una keko ro.
JOH 11:44 Jesu fu ijeg kuamga e iji bu dab ugon ijia anume unainva iji fu una ijekma kekoin. Fu anugma una keko rokga Jesu fu uri kia, Ugon gari ja dab anudainva iji iramdafno kiain.
JOH 11:45 Areme e fok bu Mata ko Merik giakuai ruainva iji bu Jesu ire sumakin iji fu renma iji game buka una fu ma vierafen.
JOH 11:46 Regavo e roin bu Jesu ire iji fu rena bu gainva ijin una va e Ferisis iji kuardiain.
JOH 11:47 Ijefuon e Ferisis ijigam e mamkanuk Godon isuf baroijo iji bun e mamkanuk roin ijiena afuime vua kuain. Bu kuai, No e iji fu ire sumakin ka mamkanuk iji fu reoinon iji no fu abe izeg rek?
JOH 11:48 No ire iji fu reoinon iji no game areke fu vek ijegreokma e uruvana buka una fu ma vierafek. Regavo madu e Romko buon e mamkanuk bu iji giakva bu uri ar bomana nuvuon igi no sirimamejo iji keduokfuon. Regavo madu buka uri enuvuon fok kam arafiriakno kuain.
JOH 11:49 Bu ijeg kuain gavo e Kaiafasno kuavo iji fu ijia fin. Regavo madu fu juaivasia ijia fu e Godon isuf baroino ijiebuon e bomana ijefuon fu uri kia, E gurie jaka ire kafo ba mukoi vierafej.
JOH 11:50 Ijefuon na vierafe e besum fu e fok nuvuifuon guakma iji fu marek. Regavo no areke e Romko bu uri moik nuvuon fok keduokva fuka ba marek.
JOH 11:51 Regavo e Kaiafas vuak iji Jesu fu e Jius ijiebuon guakfuon iji fu kuainma iji fum fur vierafene kuainma bakin. Fuiji fu juaivasia ijia fu e Godon isuf baroino e bomana be ijefuon vuak iji fu ma ijefuon fu ijeg kuain.
JOH 11:52 Regavo fu madu e Jius ijesugin buifuon kuainma bakin. Regavo fuka Godon afijaf fok eraneb bu dab atase ar iror igia karioinva ijin aferdiame agan besum rekafa fu iji vierafene kuain.
JOH 11:53 Ijefuon e Jius ijiebuon e mamkanuk iji bu tavan ijia vuak iji faime bun anerene uri Jesu kanakuai vuak kuaime ujuinamin.
JOH 11:54 Ijefuon Jesu ai Judia fu oinma iji fuba una e ijiebuon nifak ijia oin. Regavo ar iji fu ijia areme una uri ai mai Ifrem ai moikum namo samaij ijia e vuak fuon faivo ijiena ijia fikafa vain.
JOH 11:55 Regavo tavan Fasova iji e Jius bu iro ijo iji fun samairega e fok bun ar buon iji areme una iro ijefuon kanafume samuakuai bu una Jerusarem ijia besum afuin.
JOH 11:56 Bu ijia afuiknum ijegrejo ijia bu Godon ar ijia arume besum afuim karine Jesu nisain. Bu fu nisaimoknum uri bui kuai, Ja vierafega Jesu fube iro igia ruak?
JOH 11:57 E Ferisis ijiga e Godon isuf baroijo iji bu ijegrejknum uri e iji kuardiame kia, Iviakma ar iji e Jesu fu fino iji erar game vierafekma ni migegare una kuarduoga no e iji kunaim abe tofno kiain.
JOH 12:1 Areme tavan Fasova iji bu iro ijo iji fun samairen. Ijefuon Jesu fun una vake ai Beteni e Rasaras fino ijia kekoin. Revo e Rasaras iji e iji fu guamga Jesu fu keunama fu una urinma ijin.
JOH 12:2 Fu una ijia vako e iji bu ijia Jesu oimardame fuifuon duok amare vajain. Regavo Rasaras fu ijia Jesuk fiko makifuon Mata fu duok karme vajiain.
JOH 12:3 Jesu fu duok ino ijia bara Meri fu kekome do be bu in nadno kuavo ijefuon gireg safik ijia amarenva fuka udi mukor urino iji abe keko ruain. Fu abe keko Jesuon diak ijia usemdame nige jau fuon ijia abe fimdain. Regavo do iji buka mon ka ma bomana ijia kimejo revo bara iji fuba iji vierafen gavo fuka dab uruvana uduime Jesuon diak somdain. Fu ijegreko ire ijefuon udi ijar ar iji bu karine duok ijo iji fuka raren.
JOH 12:4 Regavo e Judas e Jesuon vuak faimo gavo madu fu tavan rad Jesu abe e ani iji miaga bu kanakfuon e ijar uri Meri kua, Ire udikin mukor guraiji a abe usenma iji aka abe abedekin abe mon kimene e sinuom bakin ijin kafo vajiakfuon gavo a irerafuon abe una ijegrenmano kuain.
JOH 12:6 Regavo e Judas vuak iji fu ijeg kuainma iji fu e sinuom bakin iji mukor ifejdiamo ijefuon fu iji kuainma bakin. E iji fu e niekin ijefuon fu kamui mon kenma iji fur samuaknum koikfuon ijia kafo niesamoinon.
JOH 12:7 Areme Jesu fu uri kia, Ja bara igi fu nuifuon ire igi fu reno iji jab bijuk. Fu tavan iji na guaga fu abe azirdikfuon fu ijin iviakma mimatam.
JOH 12:8 E iji sinuom bakin iji bu tavan bog bu igia jana ok revo naiji na tavan bog jana igia okva bano kiain.
JOH 12:9 Regavo tavan besum ijia e Jius iji bu faik Jesu fu ai Beteni ijia oina bu fain ijefuon e fok bu ijia vain. Bu Jesu fuonkua gakuai vainva bakin gavo bu madu e Rasaras fu guama Jesu fu kuamga fu una urinma bu iji gakuai vain.
JOH 12:10 Ijefuon Jius e mamkanuk iji bu madu Rasaras kanakuai Jerusarem ijia kari kuaime ujuinamin.
JOH 12:11 Ijefuon maiji fu guama Jesu fu keunama fu una urinma ijia e Jius uruvana bu ebuon mamkanuk iji arega bu una Jesu ma vierafen.
JOH 12:12 Areme afarma e uruvana Jerusarem ijia tavan Fasova iji bu iro ikuai ruainva ijieb Jesu fu ijia Jerusarem roko iji fain.
JOH 12:13 Ijefuon e fok bu uri anam kiak mukiene unam gafia Jesu biekuai vain. Bu usem vaknum uruvana biumavknum kume, No Godon oimarek. Godri e Isrerko buon Kin iji fu ma E Bomana ijefuon if ijia roko iji fuon oimardakno kumen.
JOH 12:14 Areme Jesu fun buk akaij ijia usuibe bu isoime kuainva ijeg fun fanuf be bu kua maf-donkino kuavo ijefuon azan ijia ajie fine Jerusarem vain. Regavo vuak iji bu ijeg isoi,
JOH 12:15 E mai Zaionko iji E Kin jon iji fu maf-donki uka iviamkor azan ijia ajie fine rokno jab jukno kuain.
JOH 12:16 Regavo e Jesuon vuak faivo iji bu unam kafokafo e iji bu Jesu fak rejo iji bun giain revo buka ba mukoi vierafen. Bu vake ijiason bu Jesu kanava fu guamga Godri kuamga fu una unam sanainma ijia uriga bu ijia vierafen. Bu vierafero vuak gami bu usuibe buk akaij ijia isoime kuainva iji bu fuifuon kuainva ijefuon bu fu abe ijegredainvaro bu ijeg vierafen.
JOH 12:17 E iji bu ni buon ijia ireme gako Jesu fu Rasaras bu unainva ijia kuamga fu una uri keko roka bu gainva ijieb vuak ijin dab kuaime iravain.
JOH 12:18 E fok bu unam sumakin darokin iji fu renma iji fainva ijefuon bu usem unam gafia Jesu biekuai vain.
JOH 12:19 E Ferisis roin bu oknum iji giame kuai, Jam garaiji giaf. E fok buka biom fu ma vierafeknum dab arafiri vak. Regavo noiji no izegrenva ijefuon no bu ijia areme una fu dab arafiri vakno kuain.
JOH 12:20 Regavo e Griko roin bu Jerusarem ijia tavan Fasova iro iji bu ikrejo ijia sirimamekuai ruain.
JOH 12:21 Ijefuon bu usem e Firif ai Besaida Gareri guf ijia ruainma ijin bieme kua, No Jesu gakuai vierafenvano kuain.
JOH 12:22 Bu ijeg kuavga Firif fun va Edru kuame busik bun vake Jesu fino ijia usem e iji bu kuardiainva ijeg fu kuardain.
JOH 12:23 Bu ijeg kuardava Jesu fu una roin kia, Tavan iji God fu Ema buon Farif iji abe fuon izeg fu kege ruainma ijefuon aroime kuaga fu fuon sanainma ijia fikfuon iji fun igijar.
JOH 12:24 Regavo vuak igi naka ma kuardiavno faif. Ire ufien sunin besum fu vek an ijia kira sairekma iji fu izeg una madu moik ijia arime una uruvana tavuakma bakin. Regavo ufien iji fu saireme una dabuiko moik ijia arikma ijar fuka uruvana tavuak.
JOH 12:25 Regavo erar fu moikigia tavan bog fuon vierafenma iji oijmaknum kegokma rad fu una izeg unam ma karivako iji abekma bakin. Regavo erar fu moikigia tavan bog una e roin vierafeknum oijmiame ifejdiaokma fu rad unam ma fivako iji abek.
JOH 12:26 Erar vua nun faimo rekafa vierafekma iji nika uri igi na kegoijo ijeg matieme keof. Regavo e vua nun faivo iji bu ar izer na fijo iji buk bu ijia karivak. Regavo asoinun iji fu gia eraneb bu na jajievo iji fu bu kege arordiakno kiain.
JOH 12:27 Fu ijeg kuardiame uri e vuak fuon faivo iji kia, Iviakma oinun fun ma bijukuriem ijefuon na izeg rek? Naba una asoinun kuak a tavan iji na vajai fian abekrejo iji ab kuaga fu nun rokno kuak? Regavo na ijeg una Asoinun kuakva iji fuba maren. Ijefuon maiji na tavan iji na ijeg vajai fian abekrejo iji biekro na ijefuon moikigia ari ruain.
JOH 12:28 Areme fu una Asoifuon sirimamene kua, Asoinun ni e fok nijaidiaga bu if on iji abe aroivno kuain. Areme bu faik God fu varur gufia ijeg kume, Na if nun sanainma iji nan usuibe abe e fok nijaidiain. Regavo iviakma na una madu if nun sanainma iji abe nijaidiaga bu game abe arordiekno kumen.
JOH 12:29 Regavo e fok samaij ijia irenva bu vuak iji faime una bui kuai fu varur kumeno kuain rega roin bu kuai fu anerak vuak kuainmano kuain.
JOH 12:30 Bu dab ijeg kuaivga Jesu fu kia, Vuak iji kaf gufia fu kuaima ja fainva iji fu nuifuon bakigavo fu e fok joifuon kuain.
JOH 12:31 Regavo ivia tavan igi fu e moikigia oijo ijiebuon tavan God fu ise buon iji ke mazim giak. Regavo e moik igefuon e bomana Setanon daro iji dab datuai fu ajuarek.
JOH 12:32 Regavo tavan iji bu na kanieme abe urikva ijia na e fok aferdiaga bu una nun ruakno kiain.
JOH 12:33 Regavo Jesu ijeg fu kuainma iji fu tavan iji bu rad fu dab kuros ijia kanaga fu guakma ijefuon fu vuak iji kuardiain.
JOH 12:34 Fu ijeg kuardiamga e fok bu una roin kua, Akai nuvuon ijia fu kuai E iji God fu kuaga fu moikigia ari ruakno kuainma iji fuba guak ga fu ijia fivakno kuain. Regavo a izegrenma ijefuon a kume, Ema buon Farif fu guaga bu abe kaf ajiekno kuaim. Regavo Ema buon Farif iji a kuaimon iji fu erar ga fu izerkin?
JOH 12:35 Bu ijeg kuardavga Jesu fu una roin kia, Ve igi fu sanainma iji fuka ijia tavan bog saname vakma bakin ijefuon ivia tavan igi fuba nakin gavo fu vek sanainma ijia mukoi keof. Ijefuon maiji e be erar ga fu naki oinon iji fuka ba ni nisaiknum vierafene oin.
JOH 12:36 Ijefuon iviakma Kurais naiji na sanainma ijin. Ijefuon jaka vek igi na jana oijo ijia ja amarigia na ma vierafenkin ja una sanainma ijefuon e rekno kiain.
JOH 12:37 Jesu fu ire ma sumakin fok e Jius ijiebuon nifak ijia rene nijaidiain gavo bu giame buka ba una fu ma vierafen.
JOH 12:38 Ijefuon maiji bu izeg e Asaia e Godon vuak vierafene kuardiamo bu usuibe buk akaij ijia isoinva ijekma riarekafa ijefuon bu ijeg ren. Regavo vuak iji e Asaia fu kuainma iji bu ijeg isoi, E Bomana eraneb vuak igi no kuardiainva iji faime ma vierafen? Revo madu E Bomana ijefuon daro iji fu eranebuon nifak ijia samafrene ikrega bu gak?
JOH 12:39 Bu ijeg isoinva ijefuon e iji buba fu ma vierafen. Ijefuon maiji fu madu vuak be madu ijeg kuai, Godri e ijiebuon niom iji kam zuriadiain ga madu nigen buon iji ba kam samafrediain. Fu ijegrediaikin buba ni narame nisaik ga madu buba mukoi vierafek. Regavo madu bu una nun roga na karauniakfuon iji buba vierafen.
JOH 12:41 E Asaia vuak iji fu ijeg kuainma iji fum ur nimamaime Jesuon sanainma iji gainma ijefuon fu vuak iji vierafene isoin.
JOH 12:42 Regavo tavan ijia e Jius ijiebuon e mamkanuk roin buka una Jesu ma vierafen. Regavo bu una e Ferisis iji juinva ijefuon bu izeg Jesu bu ma vierafenva iji buba samakaf kuain. Ijefuon maiji bu vierafero e Ferisis ijieb sos iji bu vako iji kuriairekvaro bu iji vierafen.
JOH 12:43 Fu Godri bu kam nidosiame arordiakfuon iji buba vierafen revo buimve una ema ijieb bu kam arordiakfuon bu ijin vierafen.
JOH 12:44 Areme Jesu fu uri uruvana igia kuardiame kia, Erar fu na ma vierafeno iji fu nunkua vierafeno bakin gavo fu e iji fu na kiema na ruainva ijin madu ma vierafen.
JOH 12:45 Regavo e iji erar fu na giemo iji fu madu asoinun iji fu na kiema na ruainva iji gam.
JOH 12:46 Naiji na sanainma ijin abe moikigia ruain ijefuon eraneb bu na ma vierafejo iji bu nakinma ijia kariokva bakin gavo bu sanainma nun ijia kariok.
JOH 12:47 Regavo eraneb bu na nuigafieme vuak nun ma iji ba faime igievo e iji fu fine una ise fuon iji giakfuon iji fu ijijar. Revo na ruainva iji na e moikigia ise reoijo iji ke mazim giakafie ruainva bakin gavo nam ise buon ijia karauniakafie ruain. Ijefuon vuak nun ma iji fok na kuardiainva ijieb tavan radkma iji ruakma bur una dakaroim ise buon iji giak.
JOH 12:49 Regavo na vuak kufui kuardiavo bakin ijefuon maiji na vuak nun na vierafenva ijin abe kuardiavo bakin. Regavo vuak irerag fok na kuardiavo iji fun Asoinun iji fu kiema na ruainva ijefuon vuak na iji abe ja kuardiav.
JOH 12:50 Regavo na vierafe vuak irerag fu kuainma vuak ijieb ifejduoga no unam ma ijia ma karivak. Ijefuon vuak na kuardiavo iji naka Asoinun ijefuon vuak fu kuardienma na iji abe kuardiavno kiain.
JOH 13:1 Areme tavan Fasova iji e Jius bu iro ijo iji fun samairen. Ijefuon Jesu fu vierafero tavan iji fu moikigia oinon iji fun abedo fu una Asoifuon ijefuon vakro fu ijeg vierafen. Fu tavan bog fu moikigia oinma ijia fu e iji bu fu ma vierafejo iji oijmiame roke ka tavan radkma ijia ruain. Ijefuon Jesu fu naki be e vuak fuon faivo ijiena fine duok ino ijia Setan fu Judas e Saimon Isekarioton farif iji biesuakafa fu oifuon ijia arin. Ijefuon fu Jesu abe e ani iji miakafa vierafen.
JOH 13:3 Regavo Jesu fu vierafero ire fok fun asoifuon ijar kege daro fuon rotit ijia nadain ga madu fur kuamga fu moikigia ari ruaido fu madu una Asoifuon fino ijia vakro fu iji vierafen.
JOH 13:4 Ijefuon fu ari fino iji fu areme uri ugon be fu azan abesenma iji daja abedeme uri taver abe viej fuon ijia kirain.
JOH 13:5 Fu kirame fun uri dis ijia do jiame e vuak fuon faivo ijiebuon diak iji sodiame taver abe safik fimdiain.
JOH 13:6 Fu ijegredia roke e Saimon Fita fino ijia keko diak sodakvega fu uri kua, E Bomana a irerafuon diak nun sodiemno kuain?
JOH 13:7 Fu ijeg kuama Jesu fu una roin kua, A iviakma ire igi na rejo iji aba vierafen revo ason rad ijar a gieme una na vierafekno kuain.
JOH 13:8 Fu ijeg kuardain gavo Fita fu una madu kua, A iviakma igia ga rad a diak nun igi sodiekma iji naka ma isediemno kuain. Fu ijeg kuamga Jesu fu una kua, Na diak on iji ba sodakva iji aiji a e vuak nun faimo bano kuain.
JOH 13:9 Jesu fu ijeg una Saimon Fita kuamga fu kua, E Bomana a diak nun igi sodiekveno ijefuon nika diak nun ga imut ga nigen nun ijekma sodiemne kuain.
JOH 13:10 Fu ijeg kuardamgavo Jesu fu una kua, Erar fu amur do fok ruainma iji fuka maren. Fu vajai fuon muin iji fuka soin ijefuon fuba una do ruaik. Regavo fu do ruaikafa vierafekma fu diak ijesugin ruaik. Ijegvo e guri ja fun maradiain revo e besum fuba maren fu vek muigin kiain.
JOH 13:11 Jesu vuak iji fu kuardiainma ijefuon maiji fu e iji erar rad fu abe una e ani iji miaga bu kanakfuon iji fun vierafen. Ijefuon fu iji kia, E fok ja fun maradiain gavo e besum fuka muigino kiain.
JOH 13:12 Areme Jesu fun e vuak fuon faivo iji diak somdia barme fun ugon fuon fu daru abedenma iji abe una abesme una ar fu fino ijia ari fine kia, Ja iviakma ire guri na renva iji jabe gieme vierafen?
JOH 13:13 Ja na kie, E Nijaidiamo ga E Bomana kievo iji na vierafe fun maren ijefuon maiji na ijefuon ruain.
JOH 13:14 Na E Bomana jon ga E Nijaidiamo jon revo naka uri diak jon iji somdiain. Ijefuon iviakma ire guri na renva iji na rene ja nijaidiain. Ijefuon jak ijeg koikjo kege una e ukakna rene uri e roin oijmiaknum ifejdiaf.
JOH 13:16 Regavo vuak igi naka ma kuardiavo faif. E iji fu e bomana befuon ikreno iji fu izeg una e iji fu fuifuon ikreno iji asime fur e bomana rekma bakin. Regavo madu e iji fu figa e be kuaga fu vuak abe va e be kuardamo iji fu izeg una e iji fu kuaga fu vuak abe vako iji asime e bomana rek? Regavo ja uri vuak igi na kuardiava ja fainva iji abe mimatame kegokva jaka oimarknum karik.
JOH 13:18 Regavo vuak igi na kuardiavo iji na e fok ja faikfuon na iji kuardiavo bakin. Nan amur ijia oijon fok nan gia baren ijefuon na iji ja ken. Regavo na vierafero vuak iji bu usuibe buk akaij ijia isoime kuai, E iji fu nosik duok ioinon ijar una na ziegafiekno kuainma iji fuka riarekro na iji kuain.
JOH 13:19 Naka vek igia kuardiaga ja faime vierafekin rad ire iji fu rega ja ijia game vierafero naiji na e iji bu kuai fu ruakno kuainma ijinro ja ijeg vierafek.
JOH 13:20 Regavo vuak igi naka ma kuardiav, Erar e iji na kiaga bu vuak nun ma iji abe kuardiaoijo iji oijmiaknum aferdiamo iji bu madu na oijmieme aferdiev. Regavo madu e iji bu na oijmieme aferdievo iji bu madu Asoinun iji fu na kiema na ruainva iji oijmame afev.
JOH 13:21 Jesu fu vuak ijeg manine kuardiagak fuka oi bijukurakrega fuka uri samakaf visu kuardiame kia, Naka ma kuardiav, E guri ja karinva ijia e besum fu na abe una e ani iji miakno kiain.
JOH 13:22 Fu ijeg kuardiamga e vuak fuon faivo bu vuak ijin dab vierafega fuka ba aresren. Vuak iji Jesu kafu erafon kuainma iji buka ba vierafen ijefuon bu uri bui ganamin.
JOH 13:23 Regavo e vuak fuon faimo be fu oijmamo iji fuka samaij ijia Jesuk fin. Ijefuon e Saimon Fita fu e iji ni riajama fu gamga fu kua, Kam ar ijia kuaga fu erafon kuaga fu kuarduo no faivno kuain.
JOH 13:25 Fu ijeg kuamga e iji fu Jesuon samaij ijia fino iji fu biom Jesuon navaivknum kua, E Bomana a vuak iji a kuaimo iji a erafon kuaimno kuain?
JOH 13:26 Rega Jesu fu una kua, A e iji na bred abe vuain guria abesme abe e iji maga a ijia game vierafekno kuain. Areme fu uri bred abe vuain ijia abesme abe e Judas Iskarioton Saimon farif ijin main.
JOH 13:27 Jesu fu bred iji abe e Judas mamga Setan fuka ijia migegare Judason oij ijia vuak ise vierafe main. Regavo Jesu fu uri kua, Ni migegare irerag a vierafenma iji rene kuain.
JOH 13:28 Areme e fok fata ijia afuime kari duok ijo iji bu Jesu fu irerafuon vuak ijeg Judas kuardainma ijefuon maiji buka ba vierafen.
JOH 13:29 Regavo e Judas fu mon buon fok fur samuagdiamo ijefuon bu vierafero kafu kuaga fu mon ijia kafo kege una va duok kafo kimekafa kuainmaro bu ijeg vierafen. Regavo be kafu kuaga fu mon ijia kafo kege una va e sinuom bakin iji vajiakro bu ijeg vierafen.
JOH 13:30 Ijefuon Jesu fu bred buin iji abe e Judas mama fuba uzain gavo fu uri abe in. Regavo tavan iji fun ve nakin gavo madu ise iji fun rekreno ijefuon fu ijeg ren.
JOH 13:31 Judas fu vakga Jesu fu uri ijeg kia, Iviakma Ema buon Farif ijefuon sanainma iji fun samafren. Ijefuon Godon sanainma iji fu Jesuon azan ijia abe e igiebuon nifak ijia samafren.
JOH 13:32 Regavo Godon sanainma iji fu Jesur abe e fok nijaidiakma God fuk madu fu daro fuon ijia Jesuon sanainma iji abe e fok iviakma nijaidiak.
JOH 13:33 Uviaifnu na vierafe na tavan uruvana naba jana ok. Ijefuon jaba na giekva jaka uri na nisaidiek. Regavo ur na e Jius e mamkanuk iji na kuardiainva ijeg jak na kia ja ar na vako iji jaba jajie vuak.
JOH 13:34 Regavo ni vuak iviamkor be na kuardiakrejo igi faif. Ni jon oijmanamif. Izeg na ja oijmia ruainva ijegvo jasik una jon ijeg oijmanamif.
JOH 13:35 Ja jon oijmanamikva e iji bu ja giame vierafero jaiji ja ma e vuak nun faivro bu ijeg vierafekno kiain.
JOH 13:36 Jesu fu ijeg kuardamga e Saimon Fita fu una roin kua, E Bomana ar iji a izia vakafa kuaimno kuain? Saimon Fita fu ijeg kuardamga Jesu fu una kua, A iviakma ar na vako iji aba jajie vuak. Regavo ason rad ar na vako a ijia vuakno kuain.
JOH 13:37 Fu ijeg kuardamga Saimon Fita fu kua, E Bomana na iviakma naka oifuon guame ar a vakreno ijia vakro vierafen gavo a irerafuon na arekno kuain?
JOH 13:38 Saimon Fita fu ijeg kuardamga Jesu fu una roin kua, A nuifuon guakno kienma iji a ma kuardiem ki a kufuimen? Vuak igi naka ma kuardavo ni fai, Ivia naki kukoro fuba kumenma ijia e bu nuisina una a kuakva a tavan nokbek (3) feme kiak e iji ja kuaivo iji naba gainvano kiak.
JOH 14:1 Areme Jesu fu uri kia, Jab uruvana vierafeknum oifian abek ni God ma vierafeknum vo na ma vierafef.
JOH 14:2 Regavo ar gufi asoinun fu fino iji fuka ar guf uruvana ijefuon na vakva na ar jon kafo amardiak. Regavo asoinun ijefuon ar guf iji fuba uruvanabatie na vuak igi naba biesiame kuardiak revo fuka ma uruvana ijefuon na ijin ja kuardiav.
JOH 14:3 Na amur ajie va gufia kekome ar jon amarme na una ja aferdia ijia vaga ja nana karik. Ja va ar na fijo ijia jak ja ijia karik.
JOH 14:4 Regavo ar iji na vako ijefuon unam iji jan vierafedo ja ijia jajieme vuak.
JOH 14:5 Jesu fu ijeg kuardiamga e Tomas fu uri kua, E Bomana no ar a vakreno iji noba gain ga no izeg unam iji vierafene ja vuakno kuain.
JOH 14:6 Fu ijeg kuamga Jesu fu una kua, Naiji na unam ma iji ga vuak ma iji ga ma karivako ijin. Ijefuon unam ma iji Asoinun fu fino ijia vakfuon iji fu unam be a izeg vakma bakin gavo fun duadok nun ijia vak.
JOH 14:7 Jesu fu ijeg kuardiame kia, Ivia jan na gieme mukoi vierafen revo rad ja madu ijeg Asoinun game fu mukoi vierafek. Regavo iviakmaigia jan fu mukoi vierafen ga madu jan fu gainvano kiain.
JOH 14:8 Jesu fu ijeg kuaimga e Firif fu uri Jesu kua, E Bomana no Asoion iji gakuai vierafenvano ni nijaiduoga no ga fu oimaduomno kuain.
JOH 14:9 Fu ijeg kuamga Jesu fu una roin kua, Firif! Na tavan uruvana na jana oin gavo jaka vek naba gieme mukoi vierafen. Regavo erar fu na gienma iji fu Asoinun fun gain. Regavo ja irerafuon na kie, Ni Asoion nijaiduo no gavno kiev?
JOH 14:10 Regavo Firif a na giemo ijefuon ni ma vierafero naiji na Asoinun ijek fioijo ga Asoinun fu nosik tavan bog fioino kuain. Areme Jesu fu uri e vuak fuon faivo iji kia, Vuak fok na kuardiavo iji nam nar kuardiavo bakin revo vuak iji fu Asoinun ijefuon vuak. Ijefuon ik irerag na reoijo iji fu Asoinun fu nosik fioino ijar duadok nun ijia ik fuon iji ren.
JOH 14:11 Regavo ni vierafef. Naiji na Asoinun ijek fioijo ga Asoinun fu nosik fioin. Regavo naiji jaba ma vierafekva ni ik fuon na reoijo ijia giame una na ma vierafef.
JOH 14:12 Regavo vuak igi na ma kuardiavno ni amarigia faif. Erar fu na ma vierafekma fu ik iji na reoijo iji fuk ijeg reok. Regavo iji fuka ma rad na una Asoinun fu fino ijia vakva e iji bu iviakma nuifuon ik ukakna reoijo iji bu rad ik mamkanuk kafo nuifuon rek.
JOH 14:13 Regavo irerag kafo ja if nun ijia kiekva na migegare ifejdiak. Na ijegrekva e fok bu ire iji na reoijo ijia gieme bu una Asoinun iji oimardame dab aroik.
JOH 14:14 Regavo ja na ire kafo fuon ja if nun ijia kiekva na oi marknum ifejdiak.
JOH 14:15 Ja na mukoi oijmiekva nika vuak nun fok mukoi faime igiame reof.
JOH 14:16 Ja ijegrekva na Asoinun kuaga fu e iji ja ifejdiakfuon iji abe ja unafdiak.
JOH 14:17 Regavo e iji fu ja ifejdiakfuon iji Godon Kaven Akai ma iji fur ja ifejdiaga ja tavan bog Godon ma iji giaknum karivak. Regavo e moikigia ise reoijo iji buba oimarknum Kaven Akai iji abek. Ijefuon maiji bu fu buba gak ga madu buba mukoi vierafek. Regavo fuiji jan mukoi vierafen ijefuon maiji jan ni jon ijia fu gain ga fu jana tavan bog fiknum oin.
JOH 14:18 Regavo ja naba uniako vaga ja jonkua kariok ga na una ja karinva ijia ruak.
JOH 14:19 E moikigia ise reoijo iji bu tavan sibank ijesugin bu na buba giek revo jaiji ja una na giek. Ijefuon maiji na guame una uri ijia fivako ijefuon jak ja ijia karivak.
JOH 14:20 Ijefuon tavan iji abekma ja ijia gieme vierafero naiji na Asoinun ijek fioga ja nana karioij ijefuon maiji na oijon ijia fij.
JOH 14:21 Erar fu vuak nun fok na kuardiavo iji mukoi faime igiamo e iji fu tavan bog na oijmiem. Regavo e iji na mukoi oijmiemo iji Asoinun fu e iji mukoi oijmak ga nak na e iji mukoi oijmaknum na koiknu abe fu samafredaga fu na giek.
JOH 14:22 Jesu fu vuak iji kuaim barko vo e Judas e iji fu Jesu abe e Jius iji miainma iji bakigavo e Judas be ijar uri Jesu kua, E Bomana a izegredo a nuvuon ruaga e iji moikigia ise reoijo iji a arekno kuain?
JOH 14:23 Fu ijeg kuamga Jesu fu una roin kua, Erar fu na mukoi oijmiekma fu vuak nun iji mukoi faime igiak. Regavo erar fu ijegreno iji Asoinun fu e ijin game oijmak ga na Asoinun ijek tavan bog no e ijiena oifuon ijia kariok.
JOH 14:24 Regavo erar fuba na mukoi oijmiekma e iji fu vuak nun fuba mukoi faime igiak. Ijefuon vuak iji ja faiko na kuardiainva iji fu vuak nun bakin gavo vuak fok fu Asoinun gufi fu kiema na ruainva ijefuon vuak.
JOH 14:25 Na vuak fok nan vek moikigi na jana oijo ijia nan kuardiain.
JOH 14:26 Regavo e iji fu ja ifejdiakfuon iji Godon Kaven Akai ijar ga iji fu Asoinun ijar if nun ijia kuaga fu ari jon ruak. Regavo fur ire fok nijaidiaknum ifejdiaga ja vuak fok na kuardiainva iji jaba rumdiagavo ja mukoi vierafeknum ok.
JOH 14:27 Nan vakrej ijefuon na daro mia ja afurvene oimarknum kariok. Revo ijeg afurvene karijo ijekin be ja moikigia biekva bakin ijefuon jab uruvana oifian abeknum juk.
JOH 14:28 Nan kuardiava jan fain, Na kia na ja unia vainki na una ruakno kiain. Regavo ja na mukoi oijmiekva ja nun oimareke na Asoinun fu fino ijia vak ijefuon maiji Asoinun ijar fu na asidien.
JOH 14:29 Na vuak fok nan amur kuardiain gavo ire ma iji bu rad rega ja ijia giame una ma vierafek.
JOH 14:30 Naba jana uruvana fine vuak kuaik ijefuon maiji Setan e iji moikigi samuamo iji fun rok. Setan fu daro nun fu asikma bakin. Regavo e moikigia oinva ijieb ma vierafero naiji Asoinun iji oijmavo ijefuon na irerag fu kuardiemo na iji mukoi igiame reoij. Jesu fu vuak ijeg kuardiame kia, Ni uriga no ar igi no karinva iji areme vakno kiain.
JOH 15:1 Jesu naiji na in of ijekin ga Asoinun fu juar iji samuamon.
JOH 15:2 Fu giega in kiak nun kafo buba sunin kiraiga fu kaniafu korek. Regavo kiak iji sunin kiravo iji fuka amarigia nidosiame amarega bu sunin uruvana kirak.
JOH 15:3 Regavo vuak nun na kuardiainva ijar ise jon fun fikordiama jan una maradiain.
JOH 15:4 Ijefuon ja tavan bog nana besum karioke na jana tavan bog oijon ijia fiok. Regavo in kiak fu izeg koikfuon sunin kirakma bakin gavo fu of fuon ijia bijakma fu sunin kirak. Regavo ja tavan bog ba nana besum kariokva jaba sunin kirak.
JOH 15:5 Ijefuon naiji na in of ijin ga jaiji ja in kiak nun igekin. Ijefuon erar fu tavan bog nosik besum oin rega na fusik oifuon ijia tavan bog fiokva e iji fu in iji sunin uruvana kiramo ijin. Regavo na jana ba fiokva ja izeg amarigia sunin kiriakva bakin.
JOH 15:6 Regavo eraneb buba nana besum kariokva e iji fu in kiak bu kaniafu kozega bu sairvo ijeg bu kaniafu kozega bu sairek. Regavo madu in kiak buba sunin kiravo iji bu kaniafume mian naino ijia kozega bu naoime barek. Ijegvo erar fuba nosik fiokma Asoinun juar iji samuamo fu e ijekin iji kege mian naino ijia kozega bu naoime barek.
JOH 15:7 Regavo ja tavan bog nana karioknum ga vuak nun iji igiekva ja ire kafo vierafene kiekva God fu ifejdiak.
JOH 15:8 Regavo eraneb ja e vuak nun faivo ijegrene uri oijmanamiknum ifenami vo unam ma ijekin iji reokva iji ja in iji fu sunin uruvana kiramo ijeg rek. Ja unam ma ijekin iji ja rejo ijia e bu Asoinun ijefuon if iji abe nidoime aroik.
JOH 15:9 Regavo Asoinun fu na oijmiemo ijeg na una ja oijmiav ijefuon ni uri izeg na ja oijmiavo ijeg jon oijmanamime kariof.
JOH 15:10 Na Asoinun ijefuon vuak iji mukoi faime igavo ijefuon na fuon oijmiamo ijia tavan bog biduame firok. Unam besum ijeg jak ja vuak nun mukoi faime igiekva ja nun oijmiamo ijia biduame karivak.
JOH 15:11 Na vuak igi ja kuardiaikin ja tavan bog nun oimarvo iji abe oijon ijia abedega oimarvo nun ijar tavan bog oijon ijia name rarek.
JOH 15:12 Ijefuon nika izeg na ja oijmiainva ijeg tavan bog jon oijmanamiknum kariof.
JOH 15:13 Regavo igia fai e be erar fu kaifijaf ijiebuon guakma iji fuon fu e oijmiamo iji fuka ma bomana.
JOH 15:14 Ja irerag na kuardiavo ja ijia reokva jaiji ja ma kaifnun.
JOH 15:15 Regavo naba ja kia jaiji ja enun ikrejo kiak. Ijefuon maiji e iji fu e befuon ikreno iji fu e bomana fuon irerag fu vierafene reoinon iji fuka ba vierafen. Regavo naiji na e ijekin bakin gavo naiji na vuak irerag fok Asoinun fu kuardienma iji nan ja kuardia baren. Ijefuon naba kia ja enun ikrejo kiak. Regavo na ja kiakva na kaifnun kiak.
JOH 15:16 Regavo jaiji jam jar nun ruainva bakin gavo nar ja kenvano ni va tavan bog if nun ijia unam ma ijesugin kegokfuon. Ja ijegrenki ja ire kafofuon if nun ijia Asoinun kuakva fu ifejdiak.
JOH 15:17 Regavo na una madu kia, Nika jon mukoi oijmanamiknum kariof.
JOH 15:18 E ise rejo moikigia oinva ijieb ja ziegafiame nibijiakva ni vierafero amur bu na ziegafie vo rad bu ja ziegafiavro.
JOH 15:19 Ja e moikigia ise reoijo ijiebuon unam iji abe buna okva buka oijmiame ja aferdia kam unam buon ijia vak. Regavo jaiji ja e moikigia ise reoijo ijiebuon e bakin. Ijefuon nar ja kega ja e ijekin ijiebuon unam iji nuigafiain. Ijefuodo e moikigia ise reoijo iji buka ja ziegafiak.
JOH 15:20 Ni vuak iji na amur kuardiainva iji vierafef, E iji e befuon ikreno iji fuba efuon bomana iji asim e bomana rek. Ijefuon bu na abe arafirienva ijeg bu ja kege arafiriak. Regavo bu vuak nun mukoi faime igiabatie buk bu vuak jon mukoi faime igiak. Bu ire ise fok jon rek ijefuon maiji ja enun ga madu bu e iji fu na kiema na igia ari ruainva iji buba mukoi vierafen.
JOH 15:22 Regavo naba ari moikigia vuak igi abe kuardiabatie e ise reoijo iji bu izeg ise iji mukoi giame vierafekva bakin. Regavo iviakma Jesu nar arime unam ma ga ise iji nan kuardiain ijefuon bu izeg una kuaik no ise iji noba mukoi giainva ijefuon noba giaga renvano kuaikva bakin.
JOH 15:23 Regavo erar fu na ziegafiemo iji fu Asoinun iji ziegafam.
JOH 15:24 Naba ari moikigia ire sumakin e bu rejo bakin iji rebatie e iji buba ise bu reoinva ijefuon vajai fian abek. Regavo nan arime buna oknum ire sumakin uruvana reko bun gien gavo bu uri na abevo Asoinun iji no fusik ziegafuv.
JOH 15:25 Regavo Godon buk akaij ijia bu isoime ijeg kuai, Bu vuak ma ijefuon na ziegafienva bano kuain. Regavo iji bu kuainva iji fun riaren ijefuon bu ijeg ren.
JOH 15:26 Regavo e iji fu ja ifejdiakfuon iji fu Asoinun fino ijia ruak. Regavo e iji Kaven Akai fu Godon ma iji abe samafreoino ijin. Nar Asoinun kuaga fu Kaven Akai iji abe ja uniafdiak rega Kaven Akai ijar vuak nun iji abe nuisina ja kuardiak.
JOH 15:27 Regavo madu jar vuak nun abe e roin kuardiak ijefuon maiji ja ik anej ijia ja nana oknum unam nun fok jan gie baren.
JOH 16:1 Regavo naiji nan vakvej ijefuon na vuak igi kuardiaga ja uri giriesame ma vierafeknum kegok.
JOH 16:2 Regavo ja e Jiusbuon ar bu afuime vuak kuaivo ijia aru vakva bu kuriaireme rotkuriak. Regavo tavan abekma bu e igi ja oijo ijia be kanaga fu guak. Regavo bu ijegrekva bu vierafero bu Godon ik rejoro bu ijeg vierafek.
JOH 16:3 Bu na abevo Asoinun iji buba ma vierafen ijefuon bu ire ise ijekin iji jon rek.
JOH 16:4 Regavo vuak igi na kuardiavo ijefuon vake tavan abega bu ire ise iji jon rekva ja vierafero vuak iji nan kuardiainvaro ja ijeg vierafek. Ik anej iji na jana oinva ijia vuak ijekin kafo naba kuardiain ijefuon maiji na vek jana besum oij.
JOH 16:5 Regavo iviakma na una e iji fu na kiema na ruainva ijefuon vakrej revo jaba na kie, A izia vakreno kiev?
JOH 16:6 Regavo iviakma na koiknu kuardiavo iji jaka oifiadiam.
JOH 16:7 Regavo na ma kuardiav, Na joifuon na magoi vakrej revo naba vakva Godon Kaven Akai iji fu ja ifejdiakfuon iji fuba ruak. Regavo na vakva nar Kaven Akai iji kuaga fu jon ruak.
JOH 16:8 Regavo Kaven Akai iji fu ruakma fu e moikigia oinva iji nijaidiaga bu unam ise iji bu reoijo iji koikbuon giak. Regavo madu fur nijaidiaga bu una unam ma ijia ja vak. Regavo fur tavan iji God fu una ise nuvuon kege mazim guokafa roko iji kuardiaga bu vierafek.
JOH 16:9 Bu moikigia ise reoijo ijefuon buba na ma vierafeknum vo unam ma iji gak. Ijefuon maiji nan una Asoinun ijefuon vado jaba una na giek.
JOH 16:11 Regavo madu Kaven Akai fu ruakma fu e fok moikigia ise reoijo ijiebuon ise iji ke mazim giame samakaf nijaidiaga bu vierafek. Ijefuon maiji e moikigi samuamo iji God fun amur ise fuon giain.
JOH 16:12 Na vuak uruvana kuardiakafie vierafen gavo fuka uruvanado ja izeg vuak nun fok faime mukoi vierafeokva bakin.
JOH 16:13 Regavo Kaven Akai fu ruakma fur ja aferdiame una Godon unam ma ijiga vuak ma ijesugin nijaidiaga ja ijia ja vak. Regavo Kaven iji fuba daro fuon ijia vuak fuon fu vierafenma iji abe ja kuardiak gavo vuak fok fu Godon faimo ijesugin abe ja kuardiaknum vo irerag fu rad rekreno iji fur kuardiaga ja faime vierafek.
JOH 16:14 Kaven Akai iji fu vuak nun fok nar kuardavo fu iji abe ja kuardiaga e fok bu nun sanainma iji abe aroiknum oimareok. Ire fok Asoinun fu samuagdiaknum fu reoinon iji bu nun ijefuon Kaven Akai fu ruakma fu vuak nun fok kafo madu kuardiakno kiain.
JOH 16:16 Jesu fu ijeg kuardiame uri kia, Tavan ukakbe barga rad jaba na giek revo tavan ukakbe barga son ijar ja una na giekno kiain.
JOH 16:17 Fu ijeg kuardiamga e roin vuak fuon faivo iji bu uri una bui kuai, Vuak iji kafu irerafuon ijeg kuarduom? Fu kuo, Tavan ukakbe barga rad noba fu gak rega madu tavan ukakbe barga noson una fu gak. Regavo fu madu kuo fun una Asoifuon ijefuon vakno kuin.
JOH 16:18 E iji vuak fuon faivo iji bu uri kua, Tavan ukakbe barko kuinma iji fu irerafuon ijeg kuarduin? No vuak iji fu kuaimon iji noka ba mukoi fainvano kuain.
JOH 16:19 Regavo Jesu fun vek ijia giame vierafega bu vuak ijefuon una duna kuakuai vierafejga fu uri kia, Na kia ja tavan ukakbe jaba na giek rega tavan ukakbe barekma ja una na giekno kiainva ijefuon ja iji dab una joi siguv.
JOH 16:20 Na ma kuardiav ja niraiknum oifian abek gavo e iji moikigia ise reoijo iji bu iviakma bu oimarek gavo jaiji jaka oifiadiak. Regavo tavan rad oifian iji ja abejo ijia ja una oimarek.
JOH 16:21 Regavo na vuak be bijame kuardiakrejo ni faif. Bara be fu am iviamkor iji nafekreno iji fuka oifian aben ijefuon maiji fuka vajai fian bomana abek revo am iji fun nafekma fu vajai fian fuon fuba una uruvana vierafek. Regavo fuka una uruvana oimarek ijefuon maiji amfuon iji fun nafe moikigia unain.
JOH 16:22 Bara iji fu renma ijeg iviakma ja ijeg rekvej. Ja iviakma oifian abej gavo rad na una ja biediakva jaka oimarek revo madu rad jon oimarevo iji fuka tavan bog jana navak.
JOH 16:23 Tavan iji na kuardiavo iji ruakma ja una na ire kafofuon kiekva bakin. Regavo vuak igi na iviakma kuardiakrejo iji ni mukoi faime vierafeof. Rad ja koikjo irerag ja vierafenva iji Asoinun iji if nun ijia kuakva fu vajiak.
JOH 16:24 Regavo usuibe jaba ire kafofuon Asoinun iji if nun ijia kuain. Regavo iviakma ni if nun ijia kuaf. Ja kuakva fu ifejdiaga ja tavan bog oimarknum karivak.
JOH 16:25 Regavo vuak fok na kuardiainva iji na bijiame kuardiaoin. Regavo tavan abekma naba una vuak kafo bijiame kuardiak. Regavo naka ir nun ijia Asoinun ijefuon vuak iji abe samakaf visume ja kuardiak.
JOH 16:26 Regavo tavan iji na kuardiainva iji ruakma ja koikjo if nun ijia God kuardak gavo naiji naba una joifuon fu kuardak. Ijefuon maiji Asoinun iji fun mukorigia ja oijmiamo ijefuon ja kuakva fu ifejdiak. Fu ja oijmiamo ijefuon maiji ja na oijmieme ma vierafero naiji na Godon Farif ga fur kiema na ari ruain. Regavo iviakma nan moikigi areme una Asoinun ijefuon vak.
JOH 16:29 Areme e vuak fuon faivo iji bu uri Jesu kua, No gaga a vuak iviakma a kuarduomo iji aba bijiame kuarduom rega vuak fok aka ma samakaf visu kuarduom. Ijefuon fu erar una a duna kafokafo kuakma bakin.
JOH 16:30 Iviakma no gaga aka ire fok vierafen vo emabuon vierafe iji an amur giame vierafeno. Ijefuon no ma vierafe a ma Godon ruain.
JOH 16:31 Bu ijeg kuardavga Jesu fu kia, Iviakma jaba ma vierafej?
JOH 16:32 Tavan iji fu roko iji fun iviakma ruain ijefuon ja subinai ar jon ijia tata vaga na ja ijia unieko vak. Regavo naiji na nunkua bakin na vek Asoinun ijek oij.
JOH 16:33 Na vuak igi na kuardiavo ijefuon maiji ja tavan bog nana karivakva ja afuime ok. Regavo e moikigia ire ise reoijo ijieb jon ire ise kafokafo rega jaka vajai fian abek. Regavo ni vierafe moik igefuon ise iji nar asin ijefuon jab zazaik revo nika giriesaf.
JOH 17:1 Jesu fu vuak iji kuardia barme fu uri gafeg kaf gufia nisaiknum kua, Asoinun tavan iji na guame vo una urikfuon iji fun ruain. Ijefuon ni on sanainma iji abe miega e bu izeg na guame una urikrejo iji gieme una if on dab aroik.
JOH 17:2 Ar na abe daro mienma ijefuon na moikigia e fok samuagdiav. Regavo e iji a kege na vajienma iji nar aferdiame una unam ma karivakfuon iji abe miak.
JOH 17:3 Regavo unam ma karivako iji fu ijeg. E bu una a vierafe a God ma besum ijia fino iji ga na Jesu Kurais iji ar kiema na ruainva bu ijeg ma vierafekva bu unam ma karivako iji abek.
JOH 17:4 Na on sanainma iji nan abe e moikigia karinva iji nijaidia ga madu ik on fok a kiema na ruainva iji nan re baren.
JOH 17:5 Asoinu ni iviakma nifak on ijia sanainma on iji abe miemne. Regavo sanainma on iji usuibe a moikigi aba amarenma ijia na osik besum fikna a mienma ijin abe una miemne.
JOH 17:6 Na vuak oisina nan e moikigia ise reoijo ijiebuon kafar ijia e iji a karema bu oi karoime una e a ma vierafenva iji kuardiain. E iji bu eon ga ar bu kege una na vajien. Bu vuak on bu mukoi faime igavo ijefuon iviakma bu ma vierafero ire fok na reoijo iji fu on rokoro bu ijeg vierafej.
JOH 17:8 Regavo na vuak on a kuardienma iji nan abe bu kuardiavga bu vuak on mukoi fain ga bu ma vierafega naiji na ma ar kiema na moik igia ari ruain.
JOH 17:9 Ijefuon ivia na buifuon sirimamej. Na e fok moikigia ise reoijo ijiebuon sirimamejo bagavo na e iji a kege na vajienma ijiebuon sirimamej.
JOH 17:10 Ijefuon maiji enun iji bu eon ga eon iji bu e nun. Regavo e nun fok na aferdiainva iji bu if nun abe bomana rej.
JOH 17:11 Regavo ivia nan moikigi areme una on vuak revo e vuak nun faivo iji bu moikigia karik. O Asoinun E Akai ni if on a abe na mienma ijefuon daro ijia bu samuagdiaga na osik no besum karinva ijeg bu agan rene besum karivak.
JOH 17:12 Na igia buna oinva iji na if on a abe mienma ijefuon daro ijia bu samuagdiain. Ijefuon e besum (1) fuba a nuigafame vain regavo fun e besum ijar fuon vierafenma ijia fu a nuigafame vainma ijefuon maiji fu buk on akaij ijia bu isoinva iji riarekafa fu iji a nuigafame vain.
JOH 17:13 Regavo iviakma nan una on vuak gavo na vek igi na buna moikigia oijo ijia na vuak fok kuardiaikin oimarvo nun iji fuba barek gavo fuka tavan bog oibuon ijia name rarek.
JOH 17:14 Na vuak on abe bu miavga bu abe e fok kuardiaknum mimatame kege nijaidiain gavo e moikigia karinva ijieb bu ziegafiame vuak buon buba mukoi fain. Ijefuon maiji na e vuak nun faivo ijiena no e moik igeko bakin.
JOH 17:15 Ijefuon na sirimamene a kuaga a bu aferdiame moikigi areme vakma bakin gavo nam a kua, Ni bu mukoi samuagdiaga e moikigia ise reoijo iji buba biesiame aferdia una unam ise ijia vak.
JOH 17:16 Regavo na e moik igeko bakin ijeg buk bu e moik igeko bakin.
JOH 17:17 Regavo vuak on iji fu ma ijesugin ijefuon ni unam ma iji nijaidiaga bu tavan bog ana akai rene karivakfuon.
JOH 17:18 A na abe moikigia unienma ijeg na bu kege moikigia uniav.
JOH 17:19 Regavo na buifuon na vajai nun abe isuf baroine oifuon ikredo buk bu e akai rene oifuon ikrek.
JOH 17:20 Regavo na buonkua buifuon sirimamejo bakin gavo na e iji bu vuak buon mukoi faime una na ma vierafejo ijiebuon sirimamej.
JOH 17:21 Na sirimamega bu agan besum igegrene kariok. O Asoinun na osik no besum karinva ijeg ni bu aferdiaga bu nona agan besum rek. A bu aferdia agan besum rekma e moikigia karinva iji bu ma vierafero naiji na ma ar kiema na moikigia ruainvaro bu ijeg vierafek.
JOH 17:22 Na sanainma on iji a abe na mienma iji nan abe bu miain. Na sanainma iji abe miaga bu izeg na osik no besum karinva ijeg bu besum karik.
JOH 17:23 Na iji na buna tavan bog oin ga aiji a tavan bog nosik oin. Ijefuon no tavan bog no besum okva e fok moikigia ise reoijo iji bu una ma vierafero na ma ar kiema na moikigia ruainvaro bu ijeg vierafek. Regavo bu madu vierafero a na oijmiemo ijeg a bu oijmiamro bu ijeg vierafek.
JOH 17:24 O Asoinun ar e iji kege na vajien ijefuon na vierafe bu nana ar na fikfuon ijia vak revo bu ijia nun sanainma a abe na mienma bu iji gak. Ijefuon maiji a ik anej a moikigi ba amarenma ijia an na oijmien ijefuon a on sanainma ijin abe mien.
JOH 17:25 Asoinun ma ijesugin kegoino e iji moikigia karioijo iji bu a buba mukoi vierafen gavo na a nan mukoi vierafen. Regavo madu e vuak nun faivo iji buk bu ma vierafega ar na kiema na moikigia ruain.
JOH 17:26 Na vuak on nan abe bu kuardiava bu fain gavo na vek vuak on abe kuaimok. Na vuak on abe kuaimoga on oijmiemo iji a abe na mienma iji fu tavan bog buna nak ga na tavan bog buna ok.
JOH 18:1 Jesu fu ijeg sirimame barme fun uri e vuak fuon faivo ijin aferdiame do Kidron isof iji garainak ijia vain. Regavo ar iji bu vainva iji bu in ga sinar ni kafokafo bu oinva ijia Jesu fu e vuak fuon faivo ijiena ijia vain.
JOH 18:2 Regavo Judas e iji fu Jesu abe una e ani iji miakfuon iji fu ar iji bu vainva iji fun vierafen. Ijefuon maiji Jesu fu tavan uruvana e vuak fuon faivo ijiena va juar ijia kari vuak kuaimoinevo una rokdo fun vierafen.
JOH 18:3 Ijefuon e mamkanuk Godon isuf baroijo ijiga e Ferisis ijieb e juo karijo ijiga e bijaivo iji kafo kege Judas uniafdava fu aferdia ijia vain. E uruvana fu aferdiainma iji bun juaf magu abeko ikuosaij saname bun Jesu nisaime ar ijia vain.
JOH 18:4 Regavo Jesu fu unam fok bu izeg fuon rekvejo iji fun giame vierafen. Ijefuon e iji bun fu nisaime vakga fu biom bu roko ijia vaknum kia, E gari jua magu abe roko garie ja era nisaime rokno kiain?
JOH 18:5 Fu ijeg kiamga bu una roin kua, No e Jesu ai Nasaretko iji nisaim rokno kuain. Bu ijeg kuardavga fu kia, E iji ja nisaim roko iji na igijano kiain. Regavo Judas e iji fu Jesu abe una e ani iji miainma iji fu e ijiena ruainma fu ijia manin.
JOH 18:6 Areme Jesu fu uri kia, Na e iji ja nisaimoijo iji na igano kiamga ir vuat fuon ijar e fok vajiama buka una nuink dijen.
JOH 18:7 Areme Jesu fu madu kia, E garie ja era nisaim rokno kiain? Fu ijeg kiamga bu kua, No Jesu e Nasaretko iji nisaimoijno kuain.
JOH 18:8 Regavo Jesu fu una kia, Na ik ja rokga na ijia kia na e iji na igijano kiain gavo jaka ba fain. Jan ma na nisaidieoijga ni e nun guri roin kiaga bu vafno kiain.
JOH 18:9 Regavo vuak iji fu ijeg kuardiainma ijefuon ma iji fu vierafe vuak gafi fu amur Asoifuon sirimame kua, Asoinun na e iji a kege na vajienma iji naba nuigafiakno kuainma iji fuka riarekafa fu ijefuon ijeg kuardiain.
JOH 18:10 Regavo Saimon Fita fu kaki be ka uikin jaoijmana iji dab kunaim manido fu uri ijia dab e be e bomana Godon isuf baroino ijefuon ikreno iji ada maink fuon iji kana daturain. Regavo e ijefuon if iji Markas.
JOH 18:11 Areme Jesu fu una Fita kua, Ire iji a reno iji fuba marenmano kaki on iji abe una suaf fuon ijia abese. A vierafero Asoi nun iji fu vajai fian igi na abene vajai fian abekfuon iji fu vierafenma iji fuba nun rekro a ijeg vierafenmano kuain.
JOH 18:12 Areme e iji bijaivo ijigam e bomana buon bu samuagdiamo ijigam e Jius roin iji bun Jesu kunaim tome afem e Anason ar ijia vain.
JOH 18:13 Regavo e Anas fu e Kaiafason ajuam revo madu Kaiafas fu juaivasia iji fuiji fu e Godon isuf baroino e bomana be.
JOH 18:14 Regavo madu e Kaiafasri ur ijia e Jius iji kia, Fu e besum ijar e fok nuvuifuon guakma fuka markno kiain.
JOH 18:15 Bun Jesu afeme Anas e bomana Godon isuf baroino ijefuon ar ijia aru vakga Saimon Fita ko e Jesuon vuak faimo iji fu jame ijia vain. Regavo e Anas fu e Jesuon vuak faimo be iji fun vierafen ijefuon e iji fuka arume gami bu vuak kuaivo ijia vain.
JOH 18:16 Regavo Fita fuba guf ijia aru vain gavo fu va vien bu aruvo ijia manin. Ijefuon e Jesuon vuak faimo be iji fu aru vainma ijar una kekome ro bara vien samua manino iji kuame Fita afem una guf ijia vain.
JOH 18:17 Bu aru vakga bara vien iji manino iji fu uri Fita game kua, Eko na vierafe ak a e gumi bu tom afem aru vainva ijefuon e vuak faimo be. Bara iji fu ijeg kuardamga Fita fuka juin ijefuon fu una roin kua, Naka ma bakin.
JOH 18:18 Buka iduadiainva ijefuon e iji bu e bomana Godon isuf baroijo ijiebuon ikrejo iji abevo e Godon ar bomana iji juo karijo iji bun mian jame ijia iruame iren. Ijefuon Fita fun va ijia e ijiena mian irua manin.
JOH 18:19 E Bomana Godon isuf baroino iji fun uri Jesu vuak fuon fu e nijaidiaoino ijiga e vuak fuon faivo iji fu aferdiame oino ijefuon duna kafokafo kuardain.
JOH 18:20 Fu ijeg kuardamga Jesu fu una roin kua, Na tavan uruvana naka e fok ijiebuon nifak ijia vuak nun na ijia kuardiaoin. Na ar ukakna jon iji ja ijia aru afuim vuak kuaivo ijigam madu Godon ar bomana iji e Jius abevo e Jius bakin iji bu tavan bog ijia afuim sirimamejo na ijia arume vuak nijaidiaknum kuardiaoin. Regavo na vuak kafo naba isuar sauim kuardiaoin.
JOH 18:21 Ijefuon a duna kafokafo iji a irerafuon na kuardiem? A duna ijeg kuardiekafa vierafekma ni e guraiji bu vuak irerag na kuaimoijo bu fainva ijin kiaga bur a kuardav.
JOH 18:22 Jesu fu ijeg e bomana iji kuardamga e Godon ar bomana iji juo karijo be fu samaij ijia manido fu uri Jesu uikinik ijia kanaknum kua, E igi a erar kuaga a vuak ijeg una e bomana gari kuardamno kuain.
JOH 18:23 Fu ijeg kuardamga Jesu fu una kua. Regavo a vierafega a ijia mani faiko na vuak ise irerag iji e bomana gari kuardaiga ni e fok vuak irerag na kuainva iji kuardiamne. Regavo a vierafega vuak irerag nar kuainva iji na ma ijefuon kuaivga a irerafuon na kanienmano kuain.
JOH 18:24 Areme Anas fun kiamga bu Jesu afem una Kaiafas fino ijia vain. Regavo Jesuon ij iji bu kege nuink kiriainva iji buba iradain gavo bu ijekma afem vain.
JOH 18:25 Regavo Fita fu vek e roina mian iruame manin ijefuon e iji funa irenva ijieb uri kua, E gure aiji no vierafega a e gufefuon vuak faimon beno kuain? Bu ijeg kuavga Fita fuka oi bijukurain ijefuon fu migegare uri kia, Naka ma bakin.
JOH 18:26 Regavo e be e bomana Godon isuf baroino ijefuon ikreno iji fu ijia manin. Regavo e iji fu e gami Fita fu naki gamia kaki dab ada kana daturava ijefuon agan be. Ijefuon e ijar uri Fita game kua, Na vierafe ak uikinik on iji na naki gamia Jesuk gainvano kuain.
JOH 18:27 Fu ijeg kuardamga Fita fu madu una kua, Na e iji ja kuaivo iji naka bagainvano kiako kukoro fu migegare ijia kumen.
JOH 18:28 Areme bu suok tavan ik gamia abaisako Jesuon e ani iji bun Kaiafason ar ijia Jesu afem una usem Fairet e Romkobuon e bomana ijefuon ar ijia vain. E Jius roin bu Jesu afem vainva iji buba ar guf gami e uruvana bu kot rejo ijia aru vain revo bum makaf ijia karin. Bu karinva ijefuon maiji bu ise iji amarigia agoinkin bu iro Fasova buon iji ikuai ijefuon buba aru vain.
JOH 18:29 Ijefuon Fairet fu keko kia, E gufi ja afem nun ruainva iji fu irerag renma ijefuon ja iji afem ruainvano kiain.
JOH 18:30 Fu ijeg kuardiamga bu uri kume, No fu noba masok afem ruakva bagavo fu koikfuon isema renma ijefuon no iji afem on ruainvano kumen.
JOH 18:31 Bu ijeg kumejga Fairet fu kia, Na fu abe izegrekfuon iji naba gainvano ni koikjo afem abe akai jon iji ja abedenva ijia vierafene refno kiain. Fu ijeg kuardiamga bu una kume, Noim nor e kege kaniaga bu aoikva iji fuka akaino kumen.
JOH 18:32 Regavo iji bu Jesu dab ijegrenva iji fun izeg Jesu fu vek ijia unam izekin ijia e iji bu fu dab arafiriaga fu vajai fian abe guakfuon fu kuainma ijekma riarekafa bu ijeg ren.
JOH 18:33 Areme Fairet fun una ar guf ijia arume Jesu kua, Aiji a vierafe a e Jiusbuon Kin ijino kuain?
JOH 18:34 Fu ijeg kuardamga Jesu fu una roin kua, A duna iji a kuardiemo iji am ar vierafene kuardiem ki bu eb nuifuon kuardava a fainma ijefuon a duna ijeg kuardiemno kuain?
JOH 18:35 Fu ijeg kuardamga Fairet fu uri kua, Regavo a vierafega naiji e Jius? Bu eon ijiga Jius e mamkanuk ijieb a aferda nun ruain. Ijefuon a irerag iji ren?
JOH 18:36 Fu ijeg kuardamga Jesu fu uri kua, Na e mamkanuk moik igeko bu e fok moikigia oijo iji bu samuagdiavo ijeg na bakin. Regavo na moik igefuon e bomanabatie ivia e vuak nun faivo iji bu na mafardieme una e igi ja na aferdie abe e Jius miakrejo ijiena bijaikfuon. Regavo ar nun fu moikigia bano kuain.
JOH 18:37 Jesu fu ijeg kuardamga Fairet fu una kua, A ijedo na vierafe a E Bomana be? Fu ijeg kuardamga Jesu fu una roin kua, A kie a e bomana beno kiem? Regavo moikigia bu nafedieva na ari ruainva iji na vuak ma iji abe e moikigi oinva iji kuardiakva bu ijefuon nafedien. Erar fu vuak nun iji mukoi faikma fu enun rek.
JOH 18:38 Fu ijeg kuardamga Fairet fu una madu kua, Regavo vuak ma iji irerag? Areme Fairet fun una madu kekome e Jius makaf ijia karinva iji kia, E gufi ja afem nun ruainva iji ise fuon naba gaivado naba abe arafirik.
JOH 18:39 Regavo usuibe unam jon iji ja e bu dibur ijia kariga ja kege ijegrejo iji ja tavan Fasova iji roko ja ijia kiega nar e iji kafo karauniav. Ijefuon ja vierafega fu mardo na e Jiusbuon Kin iji keunaga fu vakno kiain.
JOH 18:40 Fu ijeg kuardiamga e fok buka una roin biumavknum kume, No Jesu no iseduom revo no vierafe a e Barabas keuna fu vakno kumen. (Revo e Barabas fu e niekin be fu dibur ijia fino ijin).
JOH 19:1 Ijefuon Fairet fun e bijaivo iji kiamga bun Jesu afem makaf ijia useme dab fijain.
JOH 19:2 Bun fijame e bijaivo ijieb kiej kanaufu atevme abe Jesuon nigen ijia abesdain. Areme bun madu uri ugon kavuan ka mukor abe iruafdain.
JOH 19:3 Bu usem varaimeknum biesuame kua, No vierafe e igi fu e Jiusbuon e bomana fu tavan bog ijia fivako kuaime uikinik ijia kanain.
JOH 19:4 Bu dab ijegreko Fairet fu una madu keko ro e makaf gufi karinva iji kia, Ni gaf na e gumefuon ise be naba gain ijefuon na afem roga ja koikjo gak.
JOH 19:5 Jesu fu kiej iji bu ateve abesdainva ijigam ugon kavuan igekin iji bu abe iruadainva ijekma fu keko ruain. Areme Fairet fu uri kia, E iji na kiavo iji igijano ni gafno kiain.
JOH 19:6 Fu ijeg kuardiamga e mamkanuk Godon isuf baroijo ijigam e Godon ar juo karijo iji bun Jesu fu keko rokga bu game buka biumame kume, Abe kuros kana abe kuros kanafno kumen. Bu ijeg kumejga Fairet fu uri kia, Ni koikjo abe kuros kanaf. Na ise fuon kafo naba giaido naba abe arafirik.
JOH 19:7 Fairet fu ijeg kuardiamga e Jius fok buka uri kume, No akai nuvuon ijia e ijekin iji no kania bu aoivno kuain ijefuon no vierafe fuka guak. Ijefuon maiji fu koikfuon kuai, Naiji Godon Farifno kuain.
JOH 19:8 Areme Fairet fu vuak iji faima fuka uruvana igia juin.
JOH 19:9 Ijefuon fu una ar ijia aru kekome Jesu kua, Regavo aiji a izia ruainmano kuain? Fu ijeg kuardamga Jesu fuba una roin kuardain.
JOH 19:10 Areme Fairet fu una madu kua, A na aba kuardiekma ni vierafe naiji daro bomana abedo na kiaga bu keunak vo baga na kia bu abe kuros kanak.
JOH 19:11 Fairet fu ijeg kuardamga Jesu fu una roin kua, A kie na daro bomana abenvano kiem revo a onkuabatie daro ijekin iji a izeg abekma bakin. Regavo fun Asoinun gufar daro ijin mainma ijefuon a daro ijin aben. Ijefuon e iji fu kiama bu na abe una igia on ruainva iji fuka ise ma bomana iji renmano kuain.
JOH 19:12 Fu ijeg kuamga Fairet fu vuak ijin faima fuka ba aresren ijefuon fu una unam be fu izegrene Jesu keunaga fu vakfuon iji nisain. Regavo e Jius iji buka una uri kuriaikuriaiki kume, A e guraiji keuna fu vakma aiji a gaman Sisaon kai bakin. E be erar fu kuai, Na e Kin beno kuaikma e iji fu Sisaon e anino kumen.
JOH 19:13 Regavo Fairet fu vuak iji bu kuardavo iji faime uri Jesu afem keko makaf ijia ar iji e bu kot faivo ijia ruain. Fairet fun kekome fata iji e mamkanuk bu karine kot faivo ijia arifin. (Regavo ar iji fu fata ijia arifinma iji e Ibrukobuon isama ijia bu kua Gabatano kuavo).
JOH 19:14 Tavan iji iro ikrejo iji fu niar igeg ga ivia tavan fun uokaf abekreno ijia Fairet fu uri e Jius iji kia, E igi manino iji fu e Kin jon no kiain.
JOH 19:15 Fu ijeg kuardiamga e fok buka uruvana igia una madu kume, Kana kana abe kuros kana fuka guamno kumen. Ijefuon Fairet fu una kia, Ja vierafega fube maredo na joifuon e Kin jon iji dab kuros kanakno kiain. Fu ijeg kuardiamga e mamkanuk Godon isuf baroijo iji bu una kume, No e Kin iji fu no samuagduomo iji fun Sisa fuonkua.
JOH 19:16 Bu ijeg kumeja Fairet fun Jesu abe e azikeoijo iji miamga bu abe kuros kanakuai vain.
JOH 19:17 Areme Jesu fun kekome kuros fuon abe dabeme uruor iji fu E Nigen An Igekino kuavo ijia vain. (Regavo uruor iji bu vainva iji e Ibrukobuon isama iji bu Gorogotano kuavo).
JOH 19:18 Bun afem vake uruor ijia usem dab kuros kanain. Rene bu madu e nokarok (2) kam Jesu bu kanainva iken ijia roinroin kaniain.
JOH 19:19 Regavo Fairet fun vuak be isoime abe Jesuon kuros buin ijia kanain. Regavo vuak iji bu ijeg isoi, E igi Jesu ai Nasaretko fu e Jiusbuon Kin ijino kuain.
JOH 19:20 Bu vuak isama nokbek (3) e Ibrukobuon ga Reten ga Grik ijiebuon isama ijia isoin. Regavo uruor iji bu Jesu abe kuros kanainva iji fu Jerusarem mai samaij ijia. Ijefuon e Jius uruvana bu ijia oijo iji bu vuak iji bu daoijo.
JOH 19:21 Fairet fu vuak ijeg isoimga e Jius ijiebuon e bomana Godon isuf baroino ijar una kua, Vuak gari a isoime kuai e Jiusbuon e Kin ijino kuainma iji aregavo kua, E igi fu kuai naiji e Jius ijiebuon Kin ijino kuainma ijeg isoin.
JOH 19:22 Fu ijeg kuardamga Fairet fu una kua, Irerag na kiavga bu isoinva iji fun mardo fu ijeg navakno kuain.
JOH 19:23 E bijaivo iji bun Jesu abe kuros kaname bun uri ugon fuon fok bu ruinva ijin ke ata nokarok ga nokarok (4) name karme buon vajuinamin. Areme bun madu ugon be ni besum siguinva fu azan ijia abesmo ijin jafene aben.
JOH 19:24 Bun abe bui kuai, Ugon igi noba abe bujagavo no kas abe akozga erar abega no gakno kuain. Regavo ijeg bu kenva iji bu Godon vuak bu usuibe buk akaij ijia isoime kuainva ijekma aresrekro bu ijeg ren. Regavo vuak iji bu ijeg isoi, Bu ugon nun iji kam bukik vajuinamime uri ugon nun mukor iji abekuai kas abe akozekno kuain.
JOH 19:25 Bu ijegrekoga kuros iji bu Jesu abe kanainva anej samaij ijia e Jesuon asiej Meri ga uviaifuon be e Kirofason barak Meri ga Meri Megdarin iji bu ijia iren.
JOH 19:26 Jesu fu una nese gia asiefuon ga e vuak fuon faivo be fu mukoi oijmiamo iji bu ijia iren. Ijefuon fu asiefuon iji kua, Bara gume e guraiji fu farifono ni mukoi samua.
JOH 19:27 Areme fu una dakaroim e vuak fuon faimo iji kua, Bara guraiji fu asieono ni mukoi samuamne kuain. Areme e Jesuon vuak faimo iji fu tavan ijia bara iji abe asiefuon kuame afem ar fuon ijia fikafa vain.
JOH 19:28 Areme Jesu fu vierafe ire fok fu moikigia rekro ruainma iji fun rene baren ga madu vuak iji bu buk akaij ijia isoime kuainva iji fuka riarekafa fu kume, Na do kafiem.
JOH 19:29 Regavo kuros manino anej ijia bu ire vuain ise be jiame ijia abeden. Ijefuon Jesu fu ijeg kumega bu uri atebu ijia abe do vuain ijia abesme abe in ijia bijame abe Jesuon ir ijia azirdain.
JOH 19:30 Jesu fu vuain iji sira ine areme kume, Fun barenmano kumene ijia kurij ajuareme guain.
JOH 19:31 Areme rad e Jius iji bu vierafe bu Fairet kuaga fu kiaga bu va e iji kuros kaniainva ijiebuon masian iji kaniatuase bu migegare aoiga bu jafe arikuai bu ijeg vierafen. Bu ijeg vierafenva ijefuon maiji tavan iji fu Fraide bu ire kanafuinkin niar iji fuka tavan Sabat (Satade) e Jius bu isuar karine God sirimamek. Ijefuon surif buon bu areke bu ijia kiriakva fuka ma iserek.
JOH 19:32 Ijefuon e bijaivo iji bun va gafia usem e nokarok (2) iji bu kege Jesuna kuros kaniainva ijiebuon masian iji kania tuasen.
JOH 19:33 Bu ijegreare una usem Jesu ga fun guainmaga buba masian fuon iji kania tuain.
JOH 19:34 Bu areko e bijaivo be fu uri juaf iji fu kunainma ijia dab Jesuon ken ijia bijako migegare kavuan ijiga do iji bu ijia arin.
JOH 19:35 Regavo e iji fu ire fok bu rejo fu ni fuon ijia giainma ijar vuak igi dab isoiga ja dame jak ma vierafekuai fu iji isoin. Regavo vuak irerag fu isoime kuainma iji fuk vierafega vuak iji fuka ma.
JOH 19:36 Regavo ire iji bu ijegrenva iji fu buk akaij ijia bu isoime kuai, An fuon be buba kana datok kuainva ijekma riarekafa fu ijin ren.
JOH 19:37 Regavo madu buk kafar be ijia bu isoinva fu kuai, E iji bu ken ijia bijainva iji e uruvana bu gakno kuain.
JOH 19:38 Bu ijegre barme rad Josof e Arimatiako ijar Jesuon surif jafe arikafa va Fairet kuain. Regavo Josof fu e be Jesu ma vierafeno. Regavo fu e Jius e mamkanuk iji jume fu isuar sauim ren. Regavo Fairet fun Josof kua ni Jesuon surif jafene kuamga fu jafene abe vain.
JOH 19:39 Regavo e Nikodimas e iji fu ur naki Jesu gak vainma ijar ire aros ga mer ire udi mukoi urino bu e aoiga bu azirdiaga surif buon iji buba muturevo iji kege Josofk vain. Regavo ire iji bu kege vainva iji afik buon bu teti kirogrem (30kg) ijeg.
JOH 19:40 E Jiusbuon unam izeg bu e kege anume ke uniavo ijeg Josof ko Nikodimas bu ire udikin iji bu kege vainva iji ugon ijia azime Jesuon surif jafene abe ari anuin.
JOH 19:41 Regavo ar iji Jesu bu abe kuros kanainva iji ar iji bu in ga sinar oinva samaij ijia kanain. Regavo munua tit iviamkor be e ijia uniavo bakin iji fu ar iji bu in ga sinar oinva guf ijia.
JOH 19:42 Regavo tavan iji e Jius bu isuar karine God sirimamejo iji udam ijia ga madu munua tit iji fu samaij ijia ijefuon bu uri Jesuon surif iji abe munuag ijia unain.
JOH 20:1 Areme Sade suok tavan ik abaisako ijia bara Meri Megdarin fun vake mako gafi bu Jesu abe uname mun abe bijukurainva ijia kekoin. Fu ijia kekome ga mun iji bu abe vien bijuinva iji bun dab biom ken garia abeden.
JOH 20:2 Fu iji game fun una kukum vake Saimon Fita ga e Jesuon vuak faimo be fu oijmamo iji bu karinva ijia kekoin. Fu kekome kia, E Bomana nuvuon ijefuon surif fuon gafi bu unainva iji no vaga fu bado kabu dab izeg abedenva noka ba gainvano kiain.
JOH 20:3 Fu ijeg kuardiamga Saimon Fita ga e Jesuon vuak faimo be iji bun usem kukum mako gafi amarigia gakuai vain.
JOH 20:4 Bu kukubija vain gavo Fita fu saroiko e be ijar amur asim vake mako gafia kekoin.
JOH 20:5 Fu kekome ba gafi mako guf ijia aru vain revo fum makaf ijia manine amainko ugon iji bu Jesu anuinva iji giain.
JOH 20:6 Fu ijeg manine gamo ijia Saimon Fita fu rad jame vake ijia kekome ka asim mako guf gafia aruin. Fu ijia aru gak ugon iji bu Jesu anuinva ijesugin bu ijia naoiv. Regavo ugon be iji bu abe Jesuon nigen anuinva iji fuk ijia nam. Ugon iji bu Jesuon vajat iji anuinva iji fu fuibe nako ga be iji bu abe nigen anuinva iji fu ba irasen revo fum vek izeg ur bu anuinva fu ijeg ijia nam.
JOH 20:8 Areme e be iji fu amur kukum vainma iji fuk fun rad jame aru ugon iji bu naoivo giame fu ijia ma vierafero Jesu fun una urinmaro fu ijeg vierafen.
JOH 20:9 Fu ma vierafen gavo e Jesuon vuak faivo roin bu izeg Godon vuak iji bu usuibe buk akaij ijia bu isoime kuai fu guame madu una urikno kuainma iji bu vek ba ma vierafen.
JOH 20:10 Bu iji game bun usem una ar vain.
JOH 20:11 Regavo Meri fu vek mako vien ijia manine niraim.
JOH 20:12 Fu ijia mani niraiba una mako ijia amainko gak anera nokarok (2) ugon abaikin sainva ijieb gafi mako guf iji Jesuon surif fu nainma ijia karij. Anera be fu Jesu fu nainma ijefuon diak ijia fiko be fu nigen ijia fin.
JOH 20:13 Bu ijia karijga Meri fu amainko giamga bu uri kua, Bara gafe a irerafuon ijia manine niraimno kuain. Bu ijeg kuavga fu kia, Na e Bomana nun ijefuon surif fuon igi bu dab izia abedenva naka ba vierafenva ijefuon na iji niraivno kiain.
JOH 20:14 Meri fu ik ijeg una kaven dakin iji kuardiame una dakaroim ga Jesu fu iji Meri fu manino samaij ijia manina fu gain. Fu Jesu gain revo fuba amarigia vierafen.
JOH 20:15 Areme Jesu fu uri kua, Bara gure a irerafuon niraim. A era nisaime niraimno kuain? Fu ijeg kuamga Meri fu vierafero fu e juar samuamo ijar ro fu una kua, E-e a vierafega e surif igi ar abe va izer abedega ni nijaidiega na va abejo kuain.
JOH 20:16 Meri fu ijeg kuamga Jesu fu una kua, Merino kuain. Jesu ijeg kuamga Meri fu ijia faime una dakaroim e Ibrukobuon isama ijia kua, Raboni. (Revo vuak Raboni ijefuon maiji e nijaidiamon.)
JOH 20:17 Meri fu ijeg kuamga Jesu fu una kua, Naba una Asoinufuo vain revo na vek ijefuon ab na niriadiek. Regavo ni una va e vuak nun faivo gafi vuak nun igi abe kuardiamne. Va kia naiji nan una Asoinun ga Asoijon ga madu God nun ga God jon ijefuon vakno kia.
JOH 20:18 Fu ijeg kuamga Meri Megdarin fun una va gafia kekome e Jesuon vuak faivo iji E Bomana fu una uri fu bienma ijin kuardiame kia, Vuak igi fur koikfuon kuardienmano kiain.
JOH 20:19 Areme Sade tavan besum ijefuon nakifuon ijia e Jesuon vuak faivo fok bun ar buon vien fok bijume bun isuarigia guf ijia karin. Ijefuon maiji bu e Jiusbuon e mamkanuk iji juinva ijefuon bu ijeg ren. Bu isuar karinva ijia Jesu fu migegare iji bu karinva uf ijia manine uri kia, Na vierafe afuime karijo iji fu janano kiain.
JOH 20:20 Fu ijeg kuardiame fun uri imut tat fuon iji bu kaniainva matan ijiga ken bu bijainva ijin kege nijaidiain. E Bomana fu vajai matan iji kege e vuak fuon faivo iji nijaidiamga bu game vierafero fu ma Jesuro buka oimaren.
JOH 20:21 Areme fu una madu kia, Afuime karijo iji fu jana. Na Asoinun fu kiema na ari ruainva ijefuon na ja kiavno ni usem ar iror igia vafno kiain.
JOH 20:22 Jesu fu ijeg kuardiame fun uri ivuat fuon vajiaknum kia, Kaven Akai igi na vajiavo ijin kef.
JOH 20:23 Ja e kafobuon ise iji giame arekva God fuk ise jon iji fu giame arek. Regavo ja ise buon iji jaba giame arekva God fuk ise jon iji fuba giame arekno kiain.
JOH 20:24 Tavan iji Jesu fu una e vuak fuon faivo iji fu biediainma ijia e Tomas if fuon be bu kua e fuatkaruk nafenva Didimasno kuavo iji fuba buna ijia fino ijia Jesu fu biediain.
JOH 20:25 Ijefuon fu vainma una rokga e Jesuon vuak faivo bu uri kua, Tomas no kariga Jesu fu igia ajie roka no gainvano kuain. Bu ijeg kuardavga Tomas fu uri una kia, Na koiknu imut nun igia kege imut tat fuon iji ikok bu kaniainva matan ijia unia ga madu na imut nun igia abe ken fuon iji bu bijainva matan ijia kunaikva nason ma vierafekno kiain.
JOH 20:26 Areme vuik besum (1) barko e Jesuon vuak faivo fok bun una madu gire ijia besum afuim karin. Regavo tavan ijia Tomas fu buna besum ijia fin. Bu vien fok buka bijume karinva ijia Jesu fu migegare iji bu karinva uf ijia manine uri kia, Na vierafe afuime karijo iji fu janano kiain.
JOH 20:27 Fu ijeg kiame una dakaroim Tomas kua, Naiji nan ma una urin ijefuon uri imut on iji kege imut tat matan nun ijia uniame gia. Areme madu imut on iji akozme ken nun igi bu bijienva matan igia kuniem giamne. A matan ijia giame una ma vierafekgavo a nonamimo iji aremne kuain.
JOH 20:28 Fu ijeg kuamga Tomas fu uri kua, Na vierafega aiji aka ma E Bomana nun ga madu aka ma God nuno kuain.
JOH 20:29 Fu ijeg kuardamga Jesu fu una kua, A vierafe an ni on ijia gienma ijefuon a na ma vierafen? Regavo eraneb buba ni buon ijia gien gavo bum na ma vierafejo iji na bu ma rediakno kuain.
JOH 20:30 Jesu fu e vuak fuon faivo ijiebuon nifak ijia fu oknum ire sumakin ka mamkanuk uruvana kafo madu reoin revo ire iji roin buba buk igia isoin.
JOH 20:31 Regavo unam sumakin roin fu kegoinma igia bu isoinva iji bu e igi joifuon isoin. Jar dame giame ma vierafero Jesu fu ma Godon Farif ga Godri kuamga fu moikigia ari ruainmaro ja ijeg vierafekuai bu iji isoin. Regavo jon izeg ja fu ma vierafejo ijia ja tavan bog ma karivakno kiain.
JOH 21:1 Ijegreare Jesu fu una madu tavan besum e vuak fuon faivo roin do Taibirias irif ijia biediain. Regavo fu izeg keko biediainma iji fu ijeg.
JOH 21:2 Fu Saimon e Fitano kuavo ijigam Tomas e iji bu kua Didimasno kuavo ijigam e Natanior ai Keinan Gareri guf ijekor ijigam e Zebedion afijaf nokarok (2) ijiga madu e vuak fuon faivo nokarok (2) ijiena bu besum ijia afuim karin.
JOH 21:3 Bu besum karinva ijia Saimon Fita fu uri kaifijaf roin kia, Na do daturaiko nafuinma gamia ugie abe kijum arafiriak vakno kiain. Fu ijeg kiamga kaifijaf iji bu uri kua, Nodua no vierafe no ana vakno kuain. Ijefuon bun ari vanag abe kijum nisaim vain. Bu naki bog arafirin gavo kijum besum be buka ba ken.
JOH 21:4 Bu do ovake tavan ik gamia abaisamo ijia Jesu fu do irif gura ijia manina bu gain. E vuak fuon faivo bu fu gain revo buba vierafero fu Jesuro buba ijeg vierafen.
JOH 21:5 Regavo Jesu fu uri kia, E nivek gari ugie iji ja kijum arafiriaoinva iji jabe kafo karaivano kiain. Fu ijeg kuardiamga bu kua, No kijum besum be noka ba kenvano kuain.
JOH 21:6 Areme fu una kia, Jaka naki bomana arafirin gavo nin ugie jon iji dakarame una vanag gufa ij maink ijia oine kijum kafo karafno kiain. Fu ijeg kiamga bun ugie iji dakarame abe una vanag maink gufa ijia oin. Bu oine una dakara ga buka izeg dakarakva bakin. Ijefuon maiji kijum ijar ugie iji fuka irtoijen.
JOH 21:7 Areme e Jesuon vuak faivo be Jesu fu oijmiamo iji fu unam sumakin iji game una Saimon Fita kua, Na vierafe e gari mani vuak kuarduomo iji fu E Bomana ijarno kuain. Regavo Fita fu ugon fuon be fu azan abesmo iji fu daru abedega rotit ijesugin abesoido fu ijeg kuamga fu uri ugon iji abe abesme furiko do ijia akozen.
JOH 21:8 Fu do ijia vaja vakoga e Jesuon vuak faivo roin bun vanag ugie iji kijum karainva ijekma dakarame irif garia vain. Ijefuon maiji bu samai do irif ijia oijo ijefuon bu migegare una irif ijia vain.
JOH 21:9 Bu ijia ari usem vaknum ga duok bred ijiga kijum ijieb mian naine mareg ijia naoiva bu giain.
JOH 21:10 Bu iji giame Jesu fu uri kia, Kijum ja karainva iji kafo ke ruafno kiain.
JOH 21:11 Fu ijeg kiamga Fita fu una vanag ijia ajieme e Jesuon vuak faivo iji ifejdiame ugie iji bu kijum karainva ijin dakarame dab iror ijia abeden. Kijum ugie ijia karainva iji buka uruvana vuan adred fifti tiri (153) ga ka mamkanuk ijesugin revo ugie iji fuba bujain.
JOH 21:12 Areme Jesu fu uri kia, Igia ruaf no duok igi ijno kiain. Fu ijeg kiamga e vuak fuon faivo buba una kua a erarno kuain. Regavo bun vierafega fun E Bomana ijar ijefuon bu ijia aren.
JOH 21:13 Bu ijia areko Jesu fu uri bred iji dab tuaseme vajiaoine una madu kijum iji dab una ijeg buame vajiain.
JOH 21:14 Regavo Jesu fu guame una uri uikinik fuon fu abe una e vuak fuon faivo nijaidiainma iji fu amur tavan nokarok (2) biediamevo una igi be biediain.
JOH 21:15 Bun kari duok i barme Jesu fu uri Saimon Fita kua, Saimon e Jonon farif gure on a na oijmiemo iji fuba e guri roin bu na oijmievo iji asidiainmano kuain. Fu ijeg kuamga Saimon Fita fu una kua, E Bomana nun na a oijmavo iji an gieme vierafenmano kuain. Fu ijeg kuamga Jesu fu una kua, Saimon Fita maf-sif nun ijesugin amarigia samuagdiamne kuain.
JOH 21:16 Areme Jesu una madu kua, Saimon Fita e Jonon farif gure abeka na mukoi oijmiem ki a bano kuain? Fu ijeg kuamga Saimon Fita fu una kua, E Bomana nun na a oijmavo iji an gieme vierafenmano kuain. Areme Jesu fu una kua, Maf-sif nun ijesugin mukoi samuagdiamne kuain.
JOH 21:17 Areme Jesu fu tavan radkmaiji una kua, Saimon Fita e Jonon farif gure abe na mukoi oijmien ki a bano kuain? Regavo Fita fuka uruvana oifiain ijefuon maiji Jesu fu tavan nokbek (3) kua abe na oijmienmano kuain. Fu ijeg kuamga Fita fu kua, E Bomana nun a ire fok an gia vierafen. Ijefuon izeg na a oijmavo iji an samakaf gieme vierafenmano kuain. Fu ijeg kuamga Jesu fu una kua, Maf-sif nun iji mukoi samuagdiamne.
JOH 21:18 Jesu fu ijeg kuardame vuak be ijeg bijame Saimon Fita kuardame kua, A vek e nivek iji aka kekome ar izia a vakro vierafeno a ijia vak. Regavo a vake eoreno iji a ij kozega bu e roinb sinuom sadame imutkedame aferda ar aba ijia okafa vierafema ijia vakno kuain.
JOH 21:19 Jesu vuak iji fu ijeg bija kuardiainma iji fu Saimon Fita fu izeg rad guaga Godon if bu abe aroime nidoikfuon fu iji kuardiain. Jesu fu ijeg kuardiame uri Saimon Fita kua, Ijefuon a unam iji na kegoinva ijia ak makai nun ijia jajieme kegoine kuain.
JOH 21:20 Areme Saimon Fita fu dakaroim ga e Jesuon vuak faimo be fu oijmamo iji fu rad ja roka fu gain. (Regavo e iji fu ur bu Jesuna naki radkma ijia duok iko fu tuame Jesuon navaime kua, E Bomana e iji erar a abe una e ani iji miakreno kuainma ijar.)
JOH 21:21 Saimon Fita fu e ijar jamga fu dakaroim Jesu kua, E Bomana revo e gami roko iji fuiji fu izegrekno kuain?
JOH 21:22 Fu ijeg kuamga Jesu fu una roin kua, Fuiji na ivia kuak a ni igia oke na una rokno kuaibatie na ijeg rek. Regavo a irerafuon iji abe bomana vierafen? Ijeg a vierafeno iji arega igi na kegoijo iji makai ijia jak ijeg mimatame kegoine kiain.
JOH 21:23 Fu ijeg kiama e Jesu ma vierafejo bu vuak iji e Jesuon vuak faimo besum iji fuba guakfuon fu kuainma iji fain. Regavo Jesu fuba kua e iji fuba guak gavo fu ijia fivakno kuain gavo fu kua, Na vierafe fu ijia nivek fike na una ruakbatie na ijegrek ga a irerafuon iji abe bomana vierafemno kuain.
JOH 21:24 E Jesuon vuak faimo iji fu kuainma e ijar vuak fok bu buk igia isoime kuainva iji fur ni fuon ijia giain. Regavo madu fu vuak iji abe e roin nijaidiaknum ga fur abe buk igia isoin. Ijefuon no vierafe vuak irerag fok fu igia isoinma iji fuka ma.
JOH 21:25 Areme Jesu fu madu ire ka ma uruvana kafo madu ren. Regavo ire fok buka abe buk igia isoibatie no vierafe e ar iror fok bu izeg vuak iji abe isoim barekva bakin.
ACT 1:1 Tiofiras buk nun iji na amur isoinva iji na ire fok Jesu fu renma ijiga nijaidiainma iji isoin. Fu amur ikre vake uri varur gufia ajie vainma ijefuon vuak igi na iji isoin. Jesu fu Godon Kaven duadok ijia fu e afasor fuon bu vuak fuon faime una e roin kuardiavo iji bu izegrekfuon iji kuardiame fu uri varur gufia ajie vain.
ACT 1:3 Fu guame una urin gavo tavan foti (40) ijeg fu vajai fuon abe e vuak fuon faivo iji nijaidiaoin. Fu uri ka samakaf nijaidiamga bu game ma vierafero fu una urinmaro bu ijeg vierafen. Regavo tavan ijia fu uri God fu una efuon ijiebuon oij iji samuagdiakfuon ijefuon vuak iji nijaidiain.
ACT 1:4 Bu una besum afuivga fu uri vuak kuardiame kia, Jab ar Jerusarem arek. Regavo vuak na amur kuardiainva iji vierafene janika ijia karine ire iji Asoinun fu nijiakro kiainma iji samuaf.
ACT 1:5 Ijefuon maiji Jon fu do ijesugin ja ruardiav revo iviakma igi God fu Kaven fuon uniafdiakno kiain.
ACT 1:6 E afasor iji bu una besum karinva ijia bu uri Jesu kua, E Bomana abe iviakma no karaunuome ar nuvuon Isrer abe una muoga no koiknuvuon samuak?
ACT 1:7 Rega Jesu fu kia, Ja ivez ire iji rekfuon iji jab vierafejo revo fun Asoinun e ka darokin ijar fuonkua vierafenmano kiain.
ACT 1:8 Regavo Godon Kaven fu oijon ijia arikma ja ijia daro abene vuak nun iji amarigia e nijaidiak. Ja e Jerusaremko ijiga e Judiako ijiga e Sameriako ijiga e ar iror ijia karioinva iji nijaidiaok.
ACT 1:9 Fu ijeg kuardia bu nikajako ijia fun ajie vako vana ijar fu abe utime vako buba una gain.
ACT 1:10 Fu vako bu varur gufia nikajako ijia migegare e nokarok (2) ugon abar sainva ijieb bum ijia buna iren.
ACT 1:11 Bu ijia ireme uri kia, E Gareriko gurie ja irerafuon ijia irem varur gufia nisaiv? Igi iviakma Jesu fu varur gufia ajie vaka ja gainva ijeg fu una roga ja gakno kiain.
ACT 1:12 Areme e afasor ijiga e roin Jesuon vuak faivo iji bu uruo Orivs iji areme una unam samaij ijefuon Jerusarem vain.
ACT 1:13 Bu Jerusarem useme gire be bu karijo ijia ajie vain. Regavo e iji ijia vainva iji Fita ga Jon ga Jeims ga Edru ga Firif ga Tomas ga Batoromiu ga Metiu ga Afiason farif e Jeims ga Saimon e mamkanuk ijiena musikuaimo ijiga Jeimson farif Judas ijieb ijia vain.
ACT 1:14 Regavo tavan bog bu una besum afuime Godon sirimamejo bara roin ga Meri Jesuon asiej ijigam Jesuon uviaifijaf iji bu buna besum afuime Godon sirimamej.
ACT 1:15 Naki sibank barekoga e fok vuan adred tuenti (120) Jesu mukoi vierafejo bu una besum afuiko Fita fu vuak kuardiakafa uri kia, Efnun Godon vuak bu usuibe isoinva fuka ma riaren. Regavo vuak iji fu usuibe Godon Kaven ijar Devidon ir ijia kuainma iji izeg Judas fu e ani ijiebuon unam amarega bu Jesu tokfuon.
ACT 1:17 Regavo e iji fun Jesur abenma ijefuon fu nona ik ren.
ACT 1:18 Regavo mon iji Judas fu unam ise ijia abenma iji fu abe moik be kimen. Regavo moik iji fu kimenma iji fu ijia ari kanamga fu detavuame guain.
ACT 1:19 Rega e fok ar Jerusarem ijia karinva bu vuak iji faime uri vua buonak ar iji abe ime kua Akerdamno kuain. Regavo Akerdama ijefuon maiji Ar Kavuan Arimon.
ACT 1:20 Regavo vuak iji bu buk Sams ijia ijeg isoi, Ar fuon iji e be fuba ijia fikno kuain. Regavo vuak be bu madu ijeg isoi, E be fuka ik fuon fu reno iji abekno kuain.
ACT 1:21 Ijefuon e be fuka nona rene Jesuon vuak iji fu guame una urinma iji abe e roin kuardiakfuon.
ACT 1:22 Regavo e iji fu tavan fok nona Jesu jaoinma iji ga ik anej ijia Jon fu e nijaidiaknum do ruardiainma iji game roke Jesu fu varur gufia ajie vaka fu gainma no e ijin abekno kiain.
ACT 1:23 Ijefuon bu e nokarok (2) be fu if nokbek (3) Josof Basabas ga Jastas kuavo iji abega e be if fuon Mataias ijin aben.
ACT 1:24 Bu e iji kege Godon sirimamene kua, E bomana a e fok ijiebuon oij iji ar giamon ijefuon e nokarok (2) igi giame e a vierafenma iji nijaiduomne. E Judas fu vuak on abe oinon ijia fu ik fuon iji areme ar fu vakfuon ijia vainmano ni erar fu ar fuon abekfuon iji nijaiduomne kuain.
ACT 1:26 Rene bu if buon isoime ke kaf gufia korva Mataiason if ijar amur arimga bu fu abe una e ireven (11) Jesu jaoijo ijiena mazin.
ACT 2:1 Tavan iji bu kua Fentikosno kuavo iji rokga e fok Jesu ma vierafejo bu una ar besum afuin.
ACT 2:2 Bu besum karikoga migegare varur gafia gurovisiko ijia buibur bomana igeg ufime ar guf bu karinva ijia aruin.
ACT 2:3 Areme bu gak ire be mian igeg vuije ikikene e besubesum ijiebuon vajat ijia kiren.
ACT 2:4 Godon Kaven ijar e fok ijiebuon oij ijia arume nirokiamga bu uri isama kafo bu faivo bakin ijia nanuame kuain.
ACT 2:5 Bu ijeg kuaivga e Jius God ma vierafejo bu ar iror ijia ruainva bu Jerusarem ijia karinva ijieb fain.
ACT 2:6 Bu vuak nanuameja e fok bu faime una besum afuin. Regavo e kafokafo bu vuak buon bu kuaivo bu iji faiva buka oiserdiama bu kuai, E gafi ijeg kuaivo iji bu e Garerikor.
ACT 2:8 Regavo noiji no isama kafokafo kuaiv revo e Gareriko gafi bu izeg vuak nuvuon kuaiv?
ACT 2:9 Regavo no e roin no e Fatiako ga Meidko ga Eramko ga Mesafotamiako ga Judiako ga Kafadosiako. Regavo e roin no e Fontasko gavo ar be Eisia uf ijia revo roin Frigiako ga Femfiriako. Regavo roin e Ijiftko ga roin e Ribiako guf ar Sairini samaij ijia ruain. Regavo madu e kamono e Romko ga madu e roin no e Kritko ga Arabiako ijia ruain.
ACT 2:11 Regavo e roin no e Jius ga roin no e Jius bakin revo nom e Jiusbuon unam bu rejo no ijeg reoij. Noiji no ar iror ijia ruain revo e iji bu isama nuvuon ijia una karoim ire ma iji God fu renma iji kuarduoga no faivno kuain. E fok bu vuak iji faiva buka oiserdiama bu una bui kuai, Vuak igi bu kuaivo ijefuon maiji ireragno kuain?
ACT 2:13 Regavo e roin bu e Jesu ma vierafejo ijin kam varaimene kuai, E iji bu do kugi ine nigen kam karoinvano kuain.
ACT 2:14 Areme Fita fu e ireven (11) Jesuon vuak abe oijo ijiena uri e fok aramajiame kia, E Jius guriga e Jerusarem karinva gurie janim isuar karine fadieke na irerag igi renma ijefuon gireg ma iji kuardiafno kiain.
ACT 2:15 Areme fu kia, Ja vierafero e igi bu do kugi invaro ja ijeg vierafen gavo iji bu bakin iviakma igi fu vek suok.
ACT 2:16 Regavo vuak igi e Joir e Godon vuak vierafene kuaimon ijar ijeg kuai, God fu kia, Na tavan radkma ijia na Kaven nun abe e fok unafdiak. Rega afjon bu Godon vuak iji faime una e roin kuardiak. Rega e nivek iji bu nimamaik rega eof iji bu naka naoik.
ACT 2:18 Regavo vuak igi naka ma kuardiav e nuibakin vuak nun faivo iji na Kaven Akai nun abe unafdiaga bu vuak nun faime una e roin kuardiak.
ACT 2:19 Na kaf gufia ire bomana sumakin jaba gainva iji rejknum kafo moikigia rega kavuan firake mian ijia naine uk ajiek.
ACT 2:20 Regavo tavan fu nakike asam fu kavuaime una ire kavuan igeg rek. Ire ijieb amur rega rad ijia E Bomana ijefuon tavan bomana fu ruakfuon iji fu ruak.
ACT 2:21 Regavo tavan ijia erar fu E Bomana ijefuon if ijia kura kumekma fu keunak.
ACT 2:22 Ijefuon e Isrerko gurie vuak igi faif. God fu Jesu e Nasaretko kuamga fu ire sumakin ga anf kafokafo ja amur ba giainva iji samakaf rena jan giain.
ACT 2:23 God fu e iji bu Jesu abe ja miakfuon iji fun usuibe vierafen. Regavo fun usuibe oibuon ijia ijeg nirenma ijefuon ja arekoga bu Jesu abe e ani iji miava bu abe kuros kanain.
ACT 2:24 Jesu fu vajai fian abega Godri fu keunama fu una urin. Ijefuon maiji Jesu fuka izeg una zuarunam ijia manikma bakin.
ACT 2:25 Regavo Devid fu Jesusina vuak ijeg kuai, Fu kia, Tavan uruvana na ga E Bomana fu na uinak ijia maniunaim. Revo fuka mukoi samuagdiemo ijefuon fu erar ire ise be nun rekma bakin.
ACT 2:26 Ijefuon naka oimarme vuak iji e bu oimarkfuon iji kuaiv. Revo naka vek God a ma vierafen ijefuon maiji a kaven nun ab arega fu zuarunam vak. Regavo eon iji maturainma iji ab arega vajai fuon fu mako ijia muturek.
ACT 2:28 Regavo an ar unam iji ma karivako iji nijaidien. Regavo a nosik fino ijefuon naka oi madiem. Regavo vuak iji e Devidri ijeg kuain.
ACT 2:29 Ijefuon efnun vuak igi na sai nuvuon e Devidon vuak iji abe samakaf kuardiakrej. Fu guama bu abe mako ruin revo mako fuon iviakma no vek gav.
ACT 2:30 Fu vek fino ijia fu e be fu Godon vuak vierafene kuaimon. Revo Devid izeg fu rekfuon iji fun Godri Devid kuardama fun vierafen. Fu ijeg kua, Na saton ijia e be abega fur uri a Kin renma ijegrene e fok samuagdiakno kuain.
ACT 2:31 Fu vierafega Jesu fu una urik ijefuon fu vuak ijeg kuardiame kia, God fuba e iji fu kuama fu ari ruainma iji arega fu zuarunam vak vo vajai fuon fuba mako ijia muturek.
ACT 2:32 Regavo God fu Jesu kuama fu una urina no e fok ni nuvuon ijia non gain.
ACT 2:33 Fu Godri kuamga fu uri ij maink fuon ijia fin. Fu ijia fikoga God fu Kaven Akai iji fu mako kuainma iji abe unafdain. Ijefuon irerag ja iviakma giaknum faivo iji fun Godri Kaven fuon iji abe no unafduin.
ACT 2:34 Devid fun guain gavo fuba varur ijia vain. Regavo fu vuak iji kuai, E Bomana fu e bomana nun kua, Ni nosik samai igia fike na e ani on moikigia karinva iji ke a uniafdaga bur moikigia karine oifuon ik rejno kuain.
ACT 2:36 Ijefuon e Isrerko e fok igie vuak igi fuka vuak mano jaka mukoi faif. Godri Jesu e iji ja abe kuros kanainva iji kuama fu E Bomana ren. Regavo e iji God kuama fu ari ruainma iji fun e Jesur ari ruain.
ACT 2:37 E bu vuak iji faiva vuak ijar oi kediama buka oi karoime uri Fita ga e afasor roin iji kia, Efnun No izegrekno kiain?
ACT 2:38 Rega Fita fu uri kia, E besubesum jaka oi karoime ise jon iji nuigafiakfuon. Ja ijegrega e be fu ja ke Jesuon if ijia do ruardiaga God fu ise jon giame arega ja Kaven Akai iji abejno kiain.
ACT 2:39 Regavo fun Godri kiainma ijefuon jaka afjon ijiga e aibe karinva ijiga e fok eraneb God fu if buon ijia kuria kumeno iji bu fuon vakfuon.
ACT 2:40 Fu ijeg kuriaikuriaikin vuak ju kuardiame kia, Jaka e iji ise rejo ijiebuon unam iji agordiaikin ja jon karaunianamifno kiain.
ACT 2:41 Regavo e fok bu Fitaon vuak iji faime ma vierafejga e be fu uri bu do ruardiain. Regavo tavan ijia e ka ma uruvana tiri taosen (3,000) bu uri e Jesu ma vierafejo ijiena mazin.
ACT 2:42 Regavo tavan uruvana bu besum e afasor ijiebuon vuak bu nijaidiavo iji faime buna gorveknum besum duok iknum Godon sirimameknum ijeg reoin.
ACT 2:43 God fu daro efuon miamga bu uri unam sumakin kafo rejga e fok bu giava buka oiserdiain.
ACT 2:44 E iji Jesu ma vierafejo iji buka besum afuim gorveknum sinuom vajuinamiknum ijeg reoin.
ACT 2:45 Regavo erar fu isema fioino bu gakva e roin buka uri sinuom buon ke kimene mon abe buon oifian ganamiknum atame vajuinamiv.
ACT 2:46 Tavan fok bu Godon ar ijia afuiknum ar buon ijia duok besum ine oimarev.
ACT 2:47 Bu ijegrejknum Godon oimarga e fok bu giaro e Jesu ma vierafejo buka e maro bu ijeg vierafej. Rega E Bomana fu tavan besubesum e roin karauniame aferdiaga bu una e ma vierafejo ijiena maziv.
ACT 3:1 Tavan be Fita ko Jon bu tavan gara vako ijia bu sirimamejo ijefuon bu uri Godon ar ijia vain.
ACT 3:2 Regavo Godon ar be vien bu kua Vien Ireragigekin kuavo ijia e be diak garenma ijar ijia fin. Regavo e iji tavan uruvana e bu fu suime Godon ar vien ijia unaga fu ijia fine e Godon ar ijia roko iji monfuon nimdiam.
ACT 3:3 Ijefuon Fita ko Jon bu aru vakga fu giame uri nimdiame kia, Ja ni ire kafo vajiefno kiain.
ACT 3:4 Fu ijeg kiamga bu uri aigin fu nikajakoga Fita fu uri kua, No guomne kuamga fu uri ire iji bu kuavo iji kekafa aigin bu nikajiain.
ACT 3:6 Regavo Fita fu uri e iji kua, Naka mon bakin ga ire iji na abe a makfuon iji na Jesu Kurais e Nasaretko ijefuon if ijia kua, Ni koikon uri vakne kuav.
ACT 3:7 Areme Fita fu uri ij maink fuon ijia e iji imut ke unamga migegare e ijefuon diak iji fu una girnamin.
ACT 3:8 Masian fuon bun girevga fu uri arin manin. Areme fun Godon oimarme aroikaraknum Fita ko Jonkna Godon ar bu sirimamejo ijia arume oin.
ACT 3:9 Tavan ijia fu uri oknum Godon oimarmga e iji guf ijia karinva iji bu fu game vierafega e iji fu e ire nimdiamo ijar. Revo fu Godon ar vien bu kua Vien Ireragigekin kuavo ijia fino iji game buka oiserdiain.
ACT 3:11 Regavo e iji fu uri Fita ko Jon kuniaikoga e fok bu biom bu irenva ijia ruain. Regavo ar iji bu irenva iji bu kua, Soromonon Banadno kuavo.
ACT 3:12 Ijefuon Fita fu uri giame kia, E Isrerko gurie ja iragrega ja uri uruv no nikajuov? Ja vierafero e guri fu daro nuvuon ijia ga nuvuon maturainva ijia fu mainmaro jab ijeg vierafek.
ACT 3:13 God iji saifnuvuon e Eburam ga Aisek ga e Jekaf ijiebuon God ijar Farifuon Jesu sanainma fuon iji abe main. Regavo jar Jesu dab e Jiusbuon e mamkanuk miavga bu kanain. Rega Fairet fu Jesu keunakrega jar Faireton nifak ijia Jesu uzain.
ACT 3:14 Fuka e akai ga e maturainma ijin revo jar fu uzain. Regavo jar Fairet kuava fu Jesu abe e ani iji miama bu kanaga e Barabas e iji e kaniamo iji ja areva fu vain.
ACT 3:15 Ja e iji fu unam ma karivako iji e fok ijiebuon amarenma iji ja areko bu kanain. Regavo Godri keunamga fu una urinma iji nor Jonk gain.
ACT 3:16 No Jesuon if iji ma vierafejo ijefuon ma vierafejo ijar e guri diak garenma guri keunama fu uri nifak jon ijia oina ja gain.
ACT 3:17 Regavo e gurie na giamga jaka ba ma vierafejo ijefuon ja e mamkanuk jon ijiena Jesu dab ijeg ren.
ACT 3:18 Usuibe God e iji bu vuak fuon vierafene kuaivo ijiebuon ir ijia kuai, E be gafia Godon ruakma fu vajai fian abekno kuainma ijefuon fu areko bu ijeg ren.
ACT 3:19 Ijefuon ni unam ise iji areme una Godon roga fur ise jon iji fi korek.
ACT 3:20 Ja ijegrekva God fu kaven jon ifejdiaga bu girnamiga fuson e iji fu abe no unafduoko kuinma iji kuaga fu madu una ruak. Regavo e iji fu una ruakfuon iji Jesur.
ACT 3:21 Jesu fu kaf gafia fike God fu ire fok iviamkor amarega fu ijar una ruak. Regavo vuak iji fu Godri usuibe e vuak fuon vierafene kuaivo ijiebuon ir ijia kuain. Regavo madu e Mosis fu kuainma ijeg, God fu e vuak fuon kuardiaoino be unaga fu na ruainva ijeg ruak. Regavo e iji fu ejon igia be ijefuon jaka vuak irerag fu kuardiakma iji mukoi faifno kiain.
ACT 3:23 Regavo erar fu vuak fuon faime ba mukoi kego iji fuka Godon e iji areme daturak garef maninki rad e iji bu abe arafirik.
ACT 3:24 Regavo e fok Godon vuak vierafene kuaivo iji bu irerag Jesu fu igia renma iji bun kuardiain. Regavo e Samuer ga e roin rad ruainva ijieb vuak iji abe kuardiain.
ACT 3:25 E Godon vuak vierafene kuaivo iji bu irerag God fu rekafa kuainma iji fu ja abevo saifjon ijiebuon kuain. Regavo God e Eburam fu kuainma iji fu ijeg kuai, Nar ijeg renvado na uifarif on ijiebuon duadok ijia e fok moikigia oinva iji daro miak.
ACT 3:26 Ijefuon God fu amur Jesu e ifejdiamo iji abe ja unafdiaga fu e fok ja ifejdiaga ja unam ise iji areme una unam ma ijia kari vakno kuain.
ACT 4:1 Fita ko Jon bu vek vuak kuardiavo ijia e Godon isuf baroijo ijigam e bomana Godon ar iji juo karijo iji samuagdiamo ijigam e Sejusis iji bu ijia usen.
ACT 4:2 E iji bu faik Fita ko Jon bu kuai, Jesu fu guainma iji fun una urinma kuaivga bu iji faiva buka iserdiain. Bu kuai e fok gurieb vuak iji faime vierafero e iji aoivo iji bu una urijoro ijefuon buka isediain.
ACT 4:3 Ijefuon bu tofdiame ke dibur uniava bu ijia naoin revo fun ve nakinma ijefuon bu ijeg ren.
ACT 4:4 Buka e uruvana Fitan vuak iji faime ma vierafen. Regavo e iji Jesu ma vierafejo iji buka e uruvana faiv taosen (5,000) ijeg.
ACT 4:5 Regavo afarma e Jius ijiebuon e mamkanuk ijigam e aikor ijiebuon e mamkanuk ijigam e vuak akai nijaidiavo iji bu una ar Jerusarem ijia besum afuin.
ACT 4:6 Regavo e iji ijia afuinva iji e Kaiafas ga Jon ga Areksada ga Anas e bomana Godon isuf baroino ijigam efijaf ijieb ijia afuin.
ACT 4:7 Bu afuime uri e afasor iji kiava bu nifak buon ijia irekoga bu duna kia, Ja daro iji ja izia abe ga madu ja erafon if ijia ja ire ijekin rejno kiain?
ACT 4:8 Bu ijeg kiavga Fita oifuon fu Godon Kaven ijar rarenma ijefuon fu uri kia, E makin gurie ja ire ma iji no izegreja e diak garenma iji fu urinma ja iji gakva ni are no samakaf visu kuardiaf.
ACT 4:10 Rega e fok guri karinva ijigam e Isrerko fok jaka mukoi faif. E igi manino iji Jesu e Nasaretko iji ja kanava fu guain ga Godri kuama fu una urinma ijefuon if ijia fu main.
ACT 4:11 Godon vuak usuibe bu isoinva ijia bu Jesuon bu ijeg kuai, Kudie be e ar savo iji bu vierafero fu isero bu ijeg vierafene dab akozen gavo rad ar uf iji fu kudie ijar kunaim manik.
ACT 4:12 Regavo fu e be erar ja karauniakma bakin gavo fun Jesur fuonkua ja karauniak. Regavo madu fu e be erar moikigia if fuon ijia ja karauniakma iji fuka ma bakino kiain.
ACT 4:13 Fita fu ijeg kuardiamga e Jius ijiebuon e mamkanuk iji bu giame vierafero e guri bu e aikor buba sikur ren gavo buka uri zinunba kuardiavo ijefuon buka oiserdiain. Regavo rad bu ijar vierafero e gurie bu Jesuna oijoro bu ijeg vierafen.
ACT 4:14 Bu madu gak e iji diak garenma iji fu ma ijia buna maniga buka i girdiain.
ACT 4:15 Ijefuon bu e iji kiava bu ar iji bu vuak kuaivo iji areme usem vakga e iji bu una afuime bui kuai.
ACT 4:16 No e iji no ke izegrekno kuain? Bu ijeg kuaikoga vo e fok ar Jerusarem ijia karinva iji bu daro iji Fita ko Jon bu abe ire sumakin iji rejo iji bun fain. Ijefuon noba kuaik vuak iji fu kufuino kuaik.
ACT 4:17 Regavo noka vuak iji bu e kuardiavo iji bijuk. Regavo no arekva buka vuak iji abe una e roin kuardiame ira vak. Ijefuon noka kuriairega buba una Jesuon if ijia kurame vuak kafo kuaimokfuon.
ACT 4:18 Ijefuon bu kumejga Fita ko Jon bu una aru vakga bu vuak kuriaikuriaikin kuardiame kia, Jab una Jesuon if ijia kurame e nijaidiakno kiain.
ACT 4:19 Rega Fita ko Jon bu uri kia, Ja vierafe no ir jon iji faiga Godon ir iji no arekva ja vierafe God fu izeg vierafekno kiain?
ACT 4:20 Regavo no ire ma iji Jesu fu rena no gavknum fainva iji no abe kuaimoijo iji noba arekno kiain.
ACT 4:21 Regavo God fu ire sumakin iji rega e fok buka una Godon oimarme fu aroin. Ijefuon maiji e iji bu ire sumakin iji fuon reja fu una urinma iji fu eof ga juaivasia foti (40) ijeg baren. Revo e Jius ijiebuon e mamkanuk iji bu unam ise iji giame bu Fita ko Jon ke dibur uniakfuon iji nisaiga fuka bakin. Ijefuon bum kuriaireme kia, Rad jab una ijegrekno kiame areva bu usem vain.
ACT 4:23 Bu ijeg Fita ko Jon kiavga bu migegare usem vuak iji izeg e mamkanuk bu kuardiainva iji abe e Jesu ma vierafejo iji kuardiain.
ACT 4:24 Bu vuak iji faime uri Godon oimarme fuon sirimamene kua, E Bomana ire fok samuagdiamo ar moikigi ga varur gufi ga saof iji amardiain ga guf ijia ire kafokafo amardiain.
ACT 4:25 Ar usuibe Kaven on ijefuon duadok ijia sai nuvuon eon ikreno e Devidon ir ijia kuai, Irerafuon e Jius bakin iji bu Godon deajir abejno kuain. Unam ukakna iji bu Godon bui sivisanamivo iji fu una buzerek. Regavo e Kin roin ga e mamkanuk iji moik kafokafo samuagdiavo iji bu una besum afuime vuak kuaim iganamime E Bomana iji ga e iji God fu kuama fu ari ruainma ijiena bijaikuai vierafekno kuain.
ACT 4:27 Regavo iji fuka ma kuain. Ar bomana igia e Erod moikigi samuamo ijigam e Fontias Fairet ga e Jius bakin ijiga e Isrerko fok bu besum ireme Jesu Farifon e akaij iji oifuon ikreno iji a daro mainma ijefuon unam iji bijukuai sivisanamiv.
ACT 4:28 Bu afuinva iji bu ire fok an daro on ga vierafe on ijia amur vierafene kuai bu rekno kuainma bu ijin rej.
ACT 4:29 Regavo E Bomana iviakma e uguaikin iji bu nuvuon ire ise kafo rekrejo iji faime e igi no oifuon ik rejo iji daro muoga no vuak on abe giriesame darokma e kuardiak.
ACT 4:30 Regavo imut on akozme Farifon e akaij iji oifuon ikreno ijefuon if ijia e adagin iji karaunia ga ire sumakin ga anf kafokafo rega bu giav.
ACT 4:31 Bu ijeg Godon sirimamene barekoga ar iji bu ijia afuinva iji fu dab katin. Fu ijegreko e fok bu Godon Kaven Akai ijar oibuon ijia arimga buka uri anerene Godon vuak iji abe darokma e kuardiain.
ACT 4:32 E fok Jesu ma vierafejo iji buka oi besum vierafene iganamime uri sinuom buon karme vajuinamin. Rega e be fuba kiak ire iji fu nuno kiainma bakin.
ACT 4:33 Areme e afasor iji bu uri Jesu fu guame una urinma ijefuon vuak darokma e kuardiavga God fu e fok ma rediain.
ACT 4:34 Areme e Jesu ma vierafejo iji bu uri moik buon ijigam ar buon iji ke kimene mon abe e afasor iji miava bu abe e sinuom bakin iji vajiavga e abevo sinuom abe fuka aresren.
ACT 4:36 E be if fuon Josof kuavo ijar ijeg ren. E afasor ijieb if fuon bu kua, Banabasno kuain revo if Banabas ijefuon ma iji e roin ifejdiamon. Fu e Rivait ga ar bu fu nafenva iji Saifuras.
ACT 4:37 Josof fuk fu moik fuon abe kimene mon abe e afasor iji miama bu abe e sinuom bakin iji vajiain.
ACT 5:1 Regavo e be if fuon Ananaias ko bara fuon Safaira e ijar uri moik fuon dab kimen.
ACT 5:2 Regavo fun bara fuon ijek vuak kuaim iganaminma ijefuon fu uri mon roin fu kege fuon sauin ga roin fu abe e afasor iji miain.
ACT 5:3 Fu abe miamga Fita fu uri kua, Ananaias a Setanri oion ijia arimga a Godon Kaven iji biesuame mon roin a on ken. A keme una vuak kufui iji no kuarduome kuo, Na moik ijefuon mon iji nan fok abe ja miainvano kuin.
ACT 5:4 A vierafe a moik on iji abe kimene mon abekma iji fun maren. Revo madu a vierafe a mon roin a on abega roin e vajiakma iji madu fun maren. Regavo iji a renma iji a irerag abekafa a ijeg ren? Aka no biesuinma bakin revo aka God biesuainmano kuain.
ACT 5:5 Rega Ananaias fu vuak iji faime tua moik ijia dijeme guamga e fok buka juin.
ACT 5:6 Fu guamga e nivek ijieb uri ugon abe fu anume abe usem mako ruin.
ACT 5:7 Regavo rirkinenma ijia bara fuon fu bagaga ijia aru ruain.
ACT 5:8 Fu ijia aru rokga Fita fu uri bara iji kua, Jabe moik be abe mon igi na abedenva ijeg kimenvano kuamga bara iji fu kua keno kuain.
ACT 5:9 Rega Fita fu bara iji kua, Ja no barukin ja izeg vierafene ijegrenvano kuain? Regavo iji ja renva iji ja Godon Kaven biesuain ijefuon vien garaijia e nivek iji bu baru on abe usem mako rukuai vainva ijeg ak bu abe giem usem vakno kuain.
ACT 5:10 Fita fu ijeg kuardamo ijia migegare bara iji fu tua moik iji Fita fu manino ijia dijemga e nivek bu aru gak fun guaiga bu abe usem baru fuon irif ijia mako ruin.
ACT 5:11 Regavo e iji Jesu ma vierafejo ijigam e iji bu vuak iji faiva iji buka dejufdiain.
ACT 5:12 E afasor iji buka tavan uruvana ire sumakin kafo e fok ijiebuon nifak ijia reoin. Regavo e fok God ma vierafejo iji bu tavan fok Soromonon banad ijia afuime vuak kuaivknum Godon oimarev.
ACT 5:13 Regavo e roin bu juinva ijefuon buba ifejdiain gavo bum unam iji bu rejo iji ke arordiav.
ACT 5:14 Regavo tavan kafokafo ijia e uruvana barubara bu Jesu ma vierafene una e iji ma vierafejo ijiena mazin.
ACT 5:15 Ijefuon bu e adam abenva iji ke unam ijia suf rieme ijia uniavknum fatakma ke ijia uniain. Bu ijia uniaga Fitar ijia oke kaven fuon ijar e roin nufiaga bu una madiakuai bu ijeg ren.
ACT 5:16 Areme e fok ar Jerusarem samaij ijia karinva iji bu biom e adam abenva ijigam e kaven ise ijieb ninarukiainva iji aferdia Fitan rokga buka madiain.
ACT 5:17 E bomana Godon isuf baroino ijigam efuon roin e Sejusis iji bu e fok bu e afasor ijiebuon vako iji faiva buka deajidiamga bu uri e iji tofdiame ke dibur uniain.
ACT 5:19 Regavo naki igia Godon anera ijieb dibur vien iji dajame ari e afasor iji aferdia usem makaf ijia kia, Ni va Godon ar bomana ijia aru ireme unam iviamkor bu ma karivako iji abe e kuardiafno kiain.
ACT 5:21 Rega e afasor iji bu anera ijefuon ir iji abene suok nakitu bun Godon ar ijia aru ireme e nijaidiav. Regavo e bomana Godon isuf baroino ijigam e roin fu ifejdiavo iji bu e Jiusbuon e mamkanuk fok kumejga bu besum afuin. Areme bu e kiava bu e afasor bu dibur uniainva iji aferdiakuai vain.
ACT 5:22 Regavo e iji bu kiava bu vainva iji bu dibur ijia usem gak e iji bu bakiga bu una ebuon mamkanuk iji kia dibur vien bun bijukurain revo e juokarinva iji bu makaf ijia iren. Rega vien iji no dajaga e iji bu bano kiain.
ACT 5:24 Bu ijeg kiavga e Godon ar juokarijo iji samuamo ijigam e mamkanuk Godon isuf baroijo iji bu vuak iji faime vierafero e Afasor igi bu izeg usenva bu ijin bomana vierafen.
ACT 5:25 Areme e be fun vuak iji abe arume kia, E iji ja kege dibur uniainva iji bun useme Godon ar bomana gamia aru ireme vuak abe e roin nijaidiavno kiain.
ACT 5:26 Fu ijeg kiamga e juokarijo iji samuagdiamo iji fu efuon juokarinva ijiena va e afasor iji bu Godon ar bomana ijia aru irem e nijaidiavo iji isuar aru aferdia usem ruain. Bu ijegrenva ijefuon maiji bu vierafega bu kuriaikuriaikin kuardiakva e iji karinva ijieb uri mun tuame bu kaniak. Ijefuon bum isuar aferdiame ebuon mamkanuk ijiebuon vain. Bu aferdia gamia usevga e bomana Godon isuf baroino iji fu uri kia, No vuak gigikin ja kuardiame kia, Jab Jesuon if ijia e roin nijaidiavno kiain.
ACT 5:28 Regavo ar Jerusarem fun vuak jon ijar raren. Ja vierafega Jesu fu guainma iji ja abe no namduokno kiain.
ACT 5:29 Bu ijeg kiavga e afasor iji bu uri roin kia, Noka God igak gavo noba ema igiakno kiain.
ACT 5:30 Saifnuvuon ijiebuon God ijar Jesu ja abe kuros kanava fu guaga fur daro mama fu una urin.
ACT 5:31 God fu Jesu daro mamga fu una uri fusik besum ij maink ijia fin ijefuon Jesu fu e ikin ga fu e karauniamon. Regavo God fu vierafe e Isrerko iji bu ise buon areme una Godon roga fur giame arekafa ijefuon fu unam iviamkor iji amaren.
ACT 5:32 No Godon Kaven ijiena God irerag fu renma iji nor abe kuaimoij. Regavo kaven fuon iji fu e iji eraneb fu igavo ijin unafdiak. Vuak iji Fitar ijeg kuardiain.
ACT 5:33 Regavo e Jiusbuon e mamkanuk iji bu vuak iji faiva buka deajidiamga bu vierafe buka e afasor iji kania bu aoik.
ACT 5:34 Regavo e Ferisi be if fuon Gamerier fur Godon akaij iji nijaidiaga e bu ir fuon amarigia faivo ijar uri kia, E guraiji Jesuon vuak abe oijo iji ke usem vafno kiain.
ACT 5:35 Areme fu kia, E Isrerko guri ja afuinva gurie, Vuak igi faime irerag ja iviakma e guribuon rekrejo iji ni mukoi vierafeknum refno kiain.
ACT 5:36 Ur e iji bu kua Tiudasno kuavo ijar e ijeg biesiame e be bomana igegreoga e uruvana fo taosen (4,000) bu uri fu ifejdain. Revo e roinb uri fu kanavga e iji funa oijo iji bu dab ataseme vain.
ACT 5:37 Areme rad gaman bu e if abeoijor ijia e Judas e Gareriko ijar e roin aferdia ijegrena e roinb madu fu kaniain. Bu kanava fu guakoga e iji funa oijo iji bu madu dab ataseme vain.
ACT 5:38 Ijefuon na vierafe ja vuak nun igi abene e iji magiaga bu vakno kiain. Regavo irerag bu kuardiavo iji bu vierafe buon iji rekva iji fu iserekno kiain.
ACT 5:39 Regavo vuak iji fu Godon ruaiga bu iji abe kuardiavgakva iji ja izeg unam buon abe iserekva bakin. Ja unam ijeg ja rejo ijia ja joi ganamibatie jaga jaka Godna nigaraiv.
ACT 5:40 E fok karinva iji bu e Gamerieron vuak iji abene uri e afasor iji kumeja bu una aru rokga bu fijiame kia, Jab rad una Jesuon if ijia e nijaidiavno kiame uniavga bu usem vain.
ACT 5:41 Bu ar e Jiusbuon e mamkanuk bu vuak kuaivo iji are usem ai makaf ijia ruaknum Godon bomana oimaren. Ijefuon maiji bu Jesuon azan ijia vajai fian abejo ijefuon bu oimaren.
ACT 5:42 Rene tavan bog bu naoim urijo iji bu Godon ar bomana ijia arume e nijaidiaknum e ijiebuon ar ijia va Godon vuak ma iji abe nijaidiav. Bu nijaidiame kia, Jesu fu ma e iji usuibe God fu kua fu ruakno kuainma fu e ijarno kiain.
ACT 6:1 Tavan ijia e iji Godon vuak faivo iji buka ma uruvana rejga e Jius roin isama Griks kuaivo ijigam e Jius roin isama Arameik kuaivo ijieb uri buna musikuain. Ijefuon maiji bara amun buon kafo ijia karijo iji buba amarigia samuagdiame duok iknum vajiav.
ACT 6:2 Ijefuon e afasor tuer (12) iji bun uri e fok Jesu ma vierafejo iji kumeja bu besum afuivga bu kia, No vierafega noba ik nuvuon no Godon vuak iji abe kuaimoijo iji arekgavo una mon samuame duok kege e vajiakfuon iji fuba marek.
ACT 6:3 Ijefuon uviaifnun ni jakikum e uguaikin iji bu Godon Kaven iji igavo ijia kega bur unam iji samuak. Regavo noiji no koiknuvuon Godon sirimameknum ga vuak fuon ijesugin abe e roin kuardiak.
ACT 6:5 E fok buka afasor ijiebuon vuak iji faiva buka oimadiain. Ijefuon bu uri e Stiven e ka God ma vierafeno Godon Kaven Akai iji igamo iji aben. Regavo madu uri e Firif ga e Frokoras ga e Nikano ga e Timon ga e Famenas ga e Nikoraus e be ar Entiok ijia ruainma fu una e Jius ijiena mazinma ijin ken.
ACT 6:6 Bu e iji kege una e afasor iji uniafdiaga bu ke Godon sirimamene imut nigen namdiain.
ACT 6:7 Areme Godon vuak iji fu abe bomana rene vakga e ar iror bu vuak iji fain. Regavo e kafo bu ar Jerusarem karinva iji bu una e Jesu ma vierafejo ijiena mazin. Regavo e Godon isuf baroijo fok buk bu una oi karoime Jesu ma vierafen.
ACT 6:8 Stiven e iji ka Godon daro bomana oifuon ijia arinma ijar ire sumakin fok rejknum ire ma iji e fok ijiebuon ren.
ACT 6:9 Regavo e roin bun ijeg afuivo ijiebuon if bu kua E Oi Mafaiva kuavo ijigam e Jius ar Sairinko ijigam Areksadriako ijigam e Sirisiako ijigam Esiako iji bu ijia ruainva ijieb uri Stivensina kuain.
ACT 6:10 E ijieb Stivensina kuain revo fuka Godon Kaven ijar fu daro mainmado fu vuak bu kuardavo iji fuka karatuame una kuardiam.
ACT 6:11 Ijefuon bu e roin biesiame kam nidosiame duok vajiame kia, E Stiven fu Mosis ko Godk ijiebuon if iji ke buze ifdiamno kuain.
ACT 6:12 Bu ijeg kuardiavga e iji bu uri vuak iji abe e mamkanuk ijigam e akai samuagdiavo ijigam e fok kuardiavga vuak ijar e fok ijiebuon oij iji kam arafiriava buka deajidiain. Bu deajidiamga bu uri Stiven kunaim abe e Jiusbuon e mamkanuk iji karinva ijia vain.
ACT 6:13 Areme bun e iji bu amur kam nidosiame duok vajiainva iji kumeja bu usem Stivenon vuak iji abe kuardiame kia, E iji fu tavan bog fu Godon ar ma iji abe buzeiknum Godon vuak fu usuibe Mosis kuainma iji abe buzeimno kiain.
ACT 6:14 Bu ijeg kuardiavga e mamkanuk iji bu kia, No faiga fu Jesu e Nasaretko iji fu Godon ar bomana iji bujakoreme Mosison unam iji fu abe muinma iji abe una be amareko kuaima no fainvano kiain.
ACT 6:15 Bu ijeg kuaivo ijia e mamkanuk ga e fok bu una Stivenon uikinik iji gak fuka ire anerabuon uikinik igekin.
ACT 7:1 Areme e bomana Godon isuf baroino ijar uri Stiven kua, A vierafega vuak igi bu oisina kuaivo iji fube mano kuain?
ACT 7:2 Fu ijeg kuamga Stiven fu uri kia, Uviaifnun ga asoifnun gurie igia faif. God e iji sanainma fuon fuka zin igeg iramo iji fun usuibe sainuvuon Eburam fuba ar Mesofotamia arega Aran vainma ijia fun fu bien. Fu bieme kua, Ni ar on igeko e aganon igi arega uri ar be nar nijaidakrejo ijia vakne kuain.
ACT 7:4 Ijefuon Eburam fu ar Kardia arega uri va ar Aran ijia figa asoifuon fu guama Godri fu kuamga fu uri una ro ar igi ja iviakma karinva igia fin.
ACT 7:5 Moik iji God fu Eburam mainma iji fu ma fuon mainma bakin. Revo God fum kua, Moik iji a saifon ijiena abe fikno kuain. Regavo tavan iji God fu vuak iji kuainma iji Eburamon fu am kafo ba nafen.
ACT 7:6 Regavo God fu vuak ijeg Eburam kuardain. Fu kua, Saifon bu juaivasia fo adred (400) ijeg ebuon ar ijia karine e ijiebuon ikrek. Regavo e ijieb madu bu kam arafiriaga bu oifian abeknum ikrek. Regavo nar e ijekor iji kam arafiriaga bu vajai fian abega rad saifon bu moik iji areme usem moikigi na abe miavo ijia karine una nun sirimamekno kiain.
ACT 7:8 Eburam fu Godon vuak iji igamga God fu kua, Na am farifon iji na kege vajai surif buon kania ufume anf naga bu ijia vuak na kuardiainva iji vierafekno kuain. Ijefuon Eburam fu uri am farif Aisek nafene naki eit (8) barekoga fu abe ijeg ren. Revo rad Aisek fu uri Jekaf nafega fur uri am tuer (12) nafen. Revo am tuer (12) ijieb buka saifnuvuon ma anej ijin.
ACT 7:9 Regavo am ijieb Josofna nibijaikuai vierafejo ijefuon bu uri fu dab e Ijiftko ijiebuon kimeja fu buon ik ren. Josof fuka oifiain gavo God fu fusik ijefuon fur afikin fuon iji dasumdako fu fioin. Josof fu va ar Ijift e kin Fero fino ijia kekoin. Regavo Godri daro mamga Kin Fero fu Josofon unam iji ga fuka mukor ijefuon fu kuama Josof fu moik Ijift ijia e bomana rene Kin ijefuon ar iji samuagdiain.
ACT 7:11 Areme ar Ijift ga Keinan ijia vasia kekome e fok kaniama e saifnuvuon bu duok bu ikfuon iji fun baren.
ACT 7:12 Regavo Jekaf fu faik ar Ijift ijia bu duok kafo ija fu faime uri saifnuvuon iji kiama bu ar ijia vain. Regavo ar iji bu vainva iji buon amur bu ijia vain.
ACT 7:13 Regavo rad bu una vaka Josof fu ijar vajai fuon abe nijaidiame kia, Naiji uviaijon ijino kiame aferdiame Kin Fero nijaima fu Josofon uviaifijaf iji giain.
ACT 7:14 Areme Josof fu ijia vuak buon abedeme kia, Ni vaga Jekaf asoinun iji kua fu aganuvuon iji aferdiame igia Ijift ruafno kiain. Regavo aganfuon fuka uruvana e seventi faiv (75) ijeg.
ACT 7:15 Fu ijeg kiainma ijefuon Jekaf fu va Ijift ijia saifnuvuon ijiena ijia karine aoin.
ACT 7:16 Bu aoivga surif buon bu ke va ar Sekem kuaivo ijia e Eimobuon munuag be Eburam fu kimenma ijia uniain.
ACT 7:17 Regavo tavan iji God fu Eburam efuon karauniakafa kuainma iji fun samairega enuvuon ar Ijift ijia karinva iji buka uruvana ren.
ACT 7:18 Regavo rad e Kin be fu Josof ba vierafenma ijar anerene ar Ijift samuain.
ACT 7:19 Kin ijar saifnuvuon iji biesiame kuriairema bu am buon iviamkor iji kam koreva bu aoin.
ACT 7:20 Tavan ijia bu e Mosis ka e mukor iji nafen. Bu nafene abe ar fuon ijia samuame kariko asam nokbek (3) baremga bu fu abe akozva Kin Feron kabaij ijar Mosis abe fuirene farifuon igeg samuain.
ACT 7:22 Fu ijia figa e Ijiftko ijieb unam buon ma iji nijaiva fu e makin rene vuak mamkanuk iji kuai vo unam ma ijia reoin.
ACT 7:23 Mosis fu juaivasia fuon foti (40) ijeg baremga fu uri efuon e Isrerko iji giak vain.
ACT 7:24 Fu vaga efuon be e Ijiftko ijar dab arafirimga Mosis fu e iji abe uname e Ijiftko iji kanama fu guain.
ACT 7:25 Mosis fu vierafe fu ijegrega efuon bu game vierafero Mosis fu bu karauniakafa fu ijeg ren. Regavo efuon iji buba ijeg vierafen.
ACT 7:26 Rega afarma fu giak e Isrerko nokarok (2) bu bui bijaivga fu keko turamdiame kia, Jam igi faif jaiji nouviaikin revo ja iragrekuai joi bijaivno kiain.
ACT 7:27 Fu ijeg kiamga e iji kaifuon kanama ijar uri Mosis vaja dab gareg akozme kua, Erar a kua ani e makin rene no samuagduomne kuain.
ACT 7:28 A vierafe a niar e Ijiftko iji a kanainma ijeg a na kaniekreno kuain?
ACT 7:29 Fu ijeg kuamga Mosis fu vuak iji faime uri ko ar Midian ijia va fine am farif nokarok (2) nafen.
ACT 7:30 Mosis fu ijia fine juaivasia foti (40) ijeg barko ijia fu una uruor Sainai ai moikum namo ijia mian naiga fu game va ijia Godon anera iji bien.
ACT 7:31 Mosis fu ire iji game fuka oiserma fu ura samaij ijia mian ifirik iji naino iji gakafak vain. Fu gak vako ijia fu Godon ir iji fain. Fu faik fu kua, Na saifon Eburam ga Aisek ga Jekaf ijiebuon God ijin. Fu ijeg kuama Mosis fuka turanamime simaimga fu uri ni dab sauin.
ACT 7:33 Areme God fu ijia Mosis kua, Ar iji a manino iji fu akaino diak surif on a sainma iji rume namne kuain.
ACT 7:34 Regavo God fu madu kua, Na giaga enun ar Ijift ijia karinva buka vajai fian abej. Bu vajai fian abene aduiva na iji faime bu ifejdiakafie na ari ruainvano kumen. Ijefuon iviakma roga na vuak kuardaga a ar Ijift ijia vakne kuain.
ACT 7:35 Areme Stiven fu madu uri saifijaf ijiebuon suar iji buin ifene kuardiame kia, Mosis e iji Isrerko bu uzame kua, A erar kua ani e makin rene no samuagduomno kuainva ijin. Rega Godri anera iji mian rene naino ijefuon azan ijia Mosis kuama fu efuon samuagdiame karauniakafa vain.
ACT 7:36 Fu efuon Ijift karinva iji aferdiame juaivasia foti (40) ijeg fu buna ar Ijift ga saof Kavuan irif ijia ga ar ijia ire sumakin fok reoin.
ACT 7:37 Rega Mosis besum ijar e Isrerko kia, Godri ejon igia e vuak fuon vierafene kuaimon be kuaga fu igi na fu kiema na ruainva ijeg ruakno kiain.
ACT 7:38 Mosis fu saifnuvuon e Isrerko ijiena ai moikum namo ijia besum buna oinma ijin. Regavo madu uruor Sainai ijia anera ijar Godon vuak ma iji abe fu mavga fu abe no karaunuokafa ruainma ijin.
ACT 7:39 Regavo e saifnuvuon bu Mosis buba igain. Rega buka Mosis uzame oibuon buka una ar Ijift ijia vakuai vierafen.
ACT 7:40 Ijefuon bu uri e Eron kua, No e Mosis fu no aferduo ar Ijift are ruainma unam fu reno iji noka bagainva ijefuon ni ar god kafo amarme uniafduo no una iji jajiavno kuain.
ACT 7:41 Bu ijeg kuaime uri ire be maf-kau igekin iji amarme uri fuifuon isuf baroknum iro ine ire iji bu imut buon ijia amarenva ijefuon oimaren.
ACT 7:42 Regavo God fuba bu igiamga bu una mujur varur gafia irenva ijiebuon sirimamen. Rega vuak e Godon vuak vierafene kuaivo bu isoime ijeg kuai, E Isrerko iji ja ai moikum namo ijia juaivasia foti (40) ijeg ijia oin revo ja nuifuon fanuf kafo jaba kania isuf baroidien.
ACT 7:43 Ja mavua be amare god jon Morek abe ijia abesme god jon Refanon mujur ijefuon kaven abe ijekma oij. Ire iji jam jar amardiain gavo jaka iji ke amarigia sirimamejo ijefuon na ja aferdia ja ar Babiron asim gafaijia vakno kiain.
ACT 7:44 Regavo saifnuvuon ijieb Godon ar muvua iji abe ai moikum namo ijia karioin. Regavo bu ar muvua ijin game vierafega God fuka ma ga ar muvuaka iji God fu Mosis kuardama fu gainma bu ijeg sain.
ACT 7:45 Regavo rad saifnuvuon bu ar muvuaka iji abe afijaf miava bu dab gieme e Josuana e ar kafoko ijiebuon ar abekuai vain. Regavo Godri ifejdiama bu e moik ijekor iji kuriaireva bu subinai vain. Bu subinai vakoga ar iji fum ijia na roke e Devidon tavan ijia ruain.
ACT 7:46 Devid fu unam amarigia kegoino ijefuon God fu Devid abe nidoin. Ijefuon Devid fu una God kua, Ar Jekafon God ijefuon ni kie na ar on be savno kuain.
ACT 7:47 Rega Devid fu bakigavo fu e Soromonri Godon ar be sain.
ACT 7:48 Regavo God fu e bomanado fuba ar emab sainva ijia fik. Regavo e Godon vuak vierafene kuainma iji fu ijeg kuai,
ACT 7:49 God fu kua, Varur gafi fu ar nun gavo moikigi na dia ijia korevo ijefuon ja ar izia nuifuon sak? Regavo ar na ijia fikfuon iji izer? Regavo ire fok igi nan nar imut nun igia amardiain.
ACT 7:51 Stiven fu suar iji kuardia barme uri kia, Ja sibe nui giren. Jaika e taraikor igeg Godon vuak iji jaba faiv. Ja e saifjon bu kenva jak ja ijeg Godon Kaven iji nuigafav.
ACT 7:52 Regavo saifjon ijieb e iji Godon vuak vierafene kuaivo iji kaniain. Regavo madu e ma iji bu kia fu ruakno kiainva iji ja iviakma koikjon kunaim kanain.
ACT 7:53 Godon vuak iji anera bu abe roka jan fain gavo irerafuon jaba vuak iji igain.
ACT 7:54 E iji karinva bu Stivenon vuak iji faiva buka ma deajidiamga bu uri kuriaikuriaikin igia kuriaireme fu ziegafain.
ACT 7:55 Regavo Stiven e ka Godon Kaven Akai ijar oifuon ijia raren ijefuon fu gafeg varur gufia ga God fino ijia fuka sanako Jesu fu una Godon imut maink ijia fin.
ACT 7:56 Fu ijia figa Stiven fu game kume, Varur fu daja ruvako naga Jesu fu una Godon imut maink ijia fina na gainvano kumen.
ACT 7:57 Fu ijeg kumega e fok bu imut ada bijume set iduadiaga bu savo buon iji ru moik ijia name vakga e nivek Sor kuavo ijar samuagdiako bu biom Stiven manino ijia vain. Bu ijia usem fu diakara dab ar iji bu karinva iji arega abe usem makaf ijia mun tuame kanain.
ACT 7:59 Buba aren gavo buka kanako fu uri kume, Jesu E Bomana ni kaven nun iji abene kumen.
ACT 7:60 Areme fu uri ato same biumame kume, E Bomana unam ise igi bu nun rejo iji ni giame aremne kumene ijia guain. Bu ijegreja e Sor fu giame oifuon ijia vierafene kuai magoino kuain.
ACT 8:1 Ijia anerene e Jesu ma vierafejo Jerusarem karinva bu ijia vajai fian aben. E afasor iji bu bakigavo e fok ar ijia karinva bu dab ataseme ar Judia ga Sameria ijia vain.
ACT 8:2 E God ma vierafejo roinb bu Stiven abe niraifiriknum abe mako ruin.
ACT 8:3 Regavo e Sor e Jesu ma vierafejo ijiebuon unam dab iserekafa ijefuon gire buon ijia ajiemoijknum barubara imut kara kuniairu makaf ijia koreme kam dibur uniain.
ACT 8:4 E Jesu ma vierafejo iji bu dab atase vainva iji bu una ar iror ijia oknum e iji God fu kuama fu moikigia ari ruainma ijefuon vuak iji abe e roin kuardiaoin.
ACT 8:5 Bu ijegrekoga e Firif fu va mai be moik Sameria guf ijia kekome Jesuon vuak iji abe ijia kuardiain.
ACT 8:6 Regavo e fok ijia karinva iji buka e Firifon vuak iji mukoi faivknum ga unam sumakin fu reno iji gain.
ACT 8:7 E Firifri ijegrega e iji kaven ise bu nirokdiainva iji bu una arega usem vakga e vajai garenva ijigam e ai kirariainva iji bu una madiain.
ACT 8:8 Ijefuon e mai ijia karinva iji buka oimarvknum oin.
ACT 8:9 Regavo mai ijia e be adam isekma fainma if fuon Saimon. Tavan kafo e iji fu unam sumakin kafo rega e Sameriako bu fu game buka oiserev. E iji fu koikfuon uri e iji kia, Naiji e ikin. Revo e makin abevo e ir vasiakin iji bu vuak fuon mukoi faivknum kuaik, E ijefuon daro iji fuka Godon daro ijekino kuaiv.
ACT 8:11 Bu ijeg kuaiv ijefuon maiji fuka tavan jaoikin unam sumakin kafo fu reno iji giavo buka oiserdiaga bu vuak fuon mukoi faiv.
ACT 8:12 Regavo tavan ijia bu Firifon vuak iji God fu izeg efuon ijiebuon oij iji samuagdiamo ijiga Jesuon unam iviamkor fu iji abe kuardiamga bu vuak iji faime buka ma vierafen. Ijefuon Firif fu uri barubara aferdia do ruardiain.
ACT 8:13 Fu ijegrekoga e Saimon fuk fu Jesu ma vierafega e Firif fu abe do ruardama fu una fusik fine unam sumakin iji fu reno iji giama fuka oiseren.
ACT 8:14 Ijegrekoga ar Jerusarem ijia e afasor bu faik e Sameriako bu Jesuon vuak iji bun faivga bu Fita ko Jon kiava bu ijia vain.
ACT 8:15 Bu va moik Sameria usem e ijiebuon sirimamene God kua, Ni ar e Jesu ma vierafejo iji ifejdiaga bu Kaven Akai on iji abejno kuain.
ACT 8:16 Regavo e iji do ruainva iji bu Godon Kaven buba aben. Regavo bum Jesuon if ijia do ijesugin ruardiain.
ACT 8:17 Areme Fita ko Jonbi e iji imut nigen namdiava bu Godon Kaven iji aben.
ACT 8:18 Saimon fu giak e iji Fita ko Jon bu imut nigen namdiainva iji buka Godon kaven abejga fu uri Fita ko Jon kia, Na mon vajiaga ni na daro miega nak ijeg e imut nigen namdiaga bu Godon kaven abejno kiain.
ACT 8:20 Fu ijeg kiamga Fita fu uri kua, A Godon ire ma iji mon ijia kimekafa vierafeno iji fuka ma ise. Ijefuon na vierafega a mon on ijek mian vak.
ACT 8:21 God fu gaga oion iji fuka ise ijefuon ab no ifejduok.
ACT 8:22 Rega a unam ise iji a vierafenma iji nuigafiame una Godon ruakma fuka ise on iji giame arek.
ACT 8:23 Aiji a unam igi no rejo iji gama fuka riezdain revo fun unam ise on ijar nigen on fun rarenmano kuain.
ACT 8:24 Bu ijeg kuavga Saimon fu uri kia, E-e ni nuifuon God kuaga vuak iji ja kuardienva iji fuba nun rekno kiain.
ACT 8:25 Ijegrene bun Godon vuak ma ijiga unam ma iji izeg God fu buon renma ijin kuardiaknum nijaidiame barko Fita ko Jon bun una Jerusarem vain. Bu una vako ijia bu unam ijia Jesuon vuak ma iji abe e Sameriako iji kuardiaknum vain.
ACT 8:26 Areme Godon anera ijar e Firif kua, Aiji unam Jerusarem ijia una gafia Gaza vako ijefuon vakne kuain. Regavo unam iji bu e ijia oijo bakin ga fuka ma usuikor.
ACT 8:27 Ijefuon Firif fun kanaufume fun vako ijia fu e bomana be moik Itiofiako ijiebuon barak Kuinon mon samuamo iji unam ijia bien. Regavo e Itiofia buon bara Kuin ijefuon if iji Kedesino kuain. E bomana iji fu ar Jerusarem ijia Godon sirimamekafa vainma una fata iji bu maf-os kege iritia oijo ijia ajie vuaknum e Asaia e Godon vuak vierafene kuaimon iji fu isoinma iji daknum rok.
ACT 8:29 Regavo Godon Kaven ijar Firif kua, Fata gari maf-os fu dakara ruvako iji samaij ijia ura vakne kuain.
ACT 8:30 Fu ijeg kuamga Firif fu kukum garia keko faik e iji fu Asaiaon vuak iji dama fu faime uri kua, Vuak iji a damo iji abe vierafenmano kuain.
ACT 8:31 Firif fu ijeg kuardamga e iji fu kua, Na izeg vierafkva bakin revo fu e bes vuak igi na davo iji faime una kuardiekma na ijiason vierafekno kuain. Areme fu Firif kuama fu ajieme fusik fata ijia fikok maf-os ijar dakarama bun vain.
ACT 8:32 Regavo buk ijia Godon vuak kafar be fu ijeg dai, E be fuka maf-sif igeg bu kaniaga bu ekenavo bakin revo jau buon ufuga bu jiekejo bakin ijeg bu fu kanavga fuba vuak kafo ijia kuardiain revo fum ibite nain.
ACT 8:33 Regavo bu fu kunaime abe varaimeknum vuak kufui ijia fu abe kot ren. Regavo fum guainma ijefuon fu erar uifarif fuon ijiebuon vuak iji abe e kuardiakma bakin. (Revo vuak iji e bomana fu dainma iji e Asaiar ijeg kuainma fu iji dain).
ACT 8:34 Ijefuon e bomana ijar uri Firif kua, Regavo e iji Godon vuak vierafene kuaimon iji fu e iji erafon fu ijeg kuain? Fu fuifuon ki fu e befuon fu ijeg kuainmano kuain.
ACT 8:35 Fu ijeg kuamga Firif fu uri ijia anerene vuak iji fu dainma ijiga Jesuon vuak ma iji abe kuardain.
ACT 8:36 Bu kuaiknum unam ijefuon roko ijia bu do be game e bomana ijar uri Firif kua, Do be iga revo fube mardo a iviakma na abe igia do ruardiekno kuain.
ACT 8:37 Fu ijeg kuamga Firif fu uri kua, oion fok a God mukoi vierafekma na a abe do ruardakno kuain. Firif fu ijeg kuamga fu kua, Iji na vierafega Jesu Kurais iji fu ma Godon Farifno kuain.
ACT 8:38 Areme e bomana iji fun e iji maf-os abe roko iji kiava bu ijia ireko Firif ko e bomana iji bun ari do ijia useme Firif fun e iji abe do ruardain.
ACT 8:39 Fun do ruardame ajie iror ijia ruako ijia Godon Kaven ijar Firif afem vain. Fu vakga e bomana iji fu gak Firif fu baga fum uri fata ijia ajie fine oimarvknum vain.
ACT 8:40 Regavo Firif fu ga fu una ar Asotas ijia fin. Fu ijia figa fum uri ar ukakna ijia oknum Jesuon vuak ma iji kuardiame roke ar Sesaria ijia kekoin.
ACT 9:1 Bu ijegrekoga e Sor fu deajima fu uri e Jesuon vuak faivo ijin kaniakafa vierafen ijefuon fu va e isuf baroijo ijiebuon e bomana iji gain. Fu game kua, Ni fas be miega na abe va ar Damaskas ijia e Jiusbuon ar bu afuime vuak kuaivo ijia aru barubara bu Jesu jaoijo iji nijaidiame tofdia una igia Jerusarem rokno kuain.
ACT 9:3 Sor fu ijegrene fu ar Damaskas ijia vakafa unam ijia vako ijia migegare kaf gafia saname e Sor ni manina fu tuame moik ijia dijen. Fu ijia dijekoga Jesu fu kume, Sor Sor a irerag fuon ise iji nun reno kumen. Jesu fu ijeg kumega Sor fu una kume, E Bomana a erarno kumen. Rega Jesu fu una kume, Na Jesu e iji a ise nun reno ijino kumen. Ni uri ar Damaskas ijia vaga e be fu irerag a rekfuon ijin kuardamno kumen.
ACT 9:7 Regavo e iji Sorna vako iji bu ir iji fain revo e ma iji buba gain. Ijefuon bu vuak kafo ba kuain rega bum ijia iren.
ACT 9:8 Regavo Sor fu moik iji arega uri ni naraga fuka iseremga ire kafo fuba giain ijefuon bu imut kene ar Damaskas ijia vain.
ACT 9:9 Fu naki nokbek (3) ijeg fu ni fuon iserma fu do ga duok kafo fuba in.
ACT 9:10 Regavo e Damaskasko be if fuon Ananaias fu Godon vuak faimo ijar nimamaime gak Jesu fu kume, Ananaiasno kumen. Rega Ananaias fu uri roin kua, E bomana na igijano kuain.
ACT 9:11 Fu ijeg kuama E Bomana fu kua, Ni kanaufume uri unam bu kua Arirarino kuavo ijia va e Judason ar ijia e Sor e Tasasko ijefuon kia giamne. E iji fu Godon sirimameknum nimamai gak e be if fuon Ananaias fu ro imut fuon ijia vajai fuon ijia kunaima fu ni fuon una narama fu gain.
ACT 9:13 Rega Ananaias fu kua, E bomana e iji fu eon ar Jerusarem karinva iji isema rediam.
ACT 9:14 Regavo igia fu ruainma iji fu e mamkanuk Godon isuf baroijo iji kiamga bu igakva fu igia Damaskas e a ma vierafejo iji tomdiakafa fu ruainmano kuain.
ACT 9:15 Fu ijeg kuamga E bomana iji fu kua, Ni uri va gamne na fu kuaga fu nuifuon ik rene if nun iji abe ar iror ijia Kin ijigam e Jius iji kuardiaga bu if nun iji abe ma vierafek.
ACT 9:16 E iji fu enun ijefuon na koiknun unam izeg fu nuifuon vajai fian abekfuon iji na nijaiga fu vierafek.
ACT 9:17 Ijefuon Ananaias fun va ar ijia kekome aru imut fuon ijia Sor kunaime kua, Sor uviainu na E Bomana ijar na kiemga na ruain. Jesu e iji a igia ruakafa roko unam gafia a gainma ijar fu una ni on iji amarega kaven fuon iji fu oion ijia ari a samuagdakafa fu iji kiema na igia ruain.
ACT 9:18 Fu ijeg kuardako migegare ire be kijum gen igekin ijieb Soron niom ijia azoiksa ariko ni fuon fu una maren. Fun marmga fu uri manikoga bu fu abe do ruardama fu uri duok ine daro fuon una aben. Fu daro abene naki sibank fu ar Damaskas ijia fiknum e Jesu jaoijo ijiena naioin.
ACT 9:20 Fu amur va ar e Jius bu afuim vuak kuaivo ijia kekome e iji vuak kuardiame kia, Jesu iji fu ma Godon farifno kiain.
ACT 9:21 Fu ijeg kuardiamga e fok bu vuak iji faiva buka oiserdiama bu bui kuai, E iji fu ar Jerusarem ijia e iji Jesu ma vierafejo iji kaniamo ijar. Regavo fu igia ruainma iji fu e igi tofdiame una e mamkanuk Godon isuf baroijo ar Jerusarem karinva ijia vakafa fu ijefuon ruainmano kuain.
ACT 9:22 Regavo e Sor vuak fuon fu kuardiamo iji fuka ma darokin rega e fok ar Damaskas karinva iji bu vuak iji faime bu ma vierafen. Areme bu ijia vierafero Jesu fu ma Godri kuamga fu ari ruainmaro bu ijeg vierafen. Regavo e Jius ar Damaskas karinva iji bu izeg Soron vuak iji asikva bakin.
ACT 9:23 Regavo tavan kafo barenma ijia e Jius iji bu bui ujuinamime e Sor kanakuai kuaiv revo Sor vuak iji fun fain. Ijefuon nakikmaza ijia e iji bu mai vien ijia fu kanakuai ijia samua karioij. Bu ijegrejga e Soron vuak faivo iji bu isuar naki Sor abe ire kamuij igekin ijia abakarime abe fak iji bu kirainva iji gama abesen.
ACT 9:26 Areme e Sor fu va Jerusarem ijia kekome e Jesuon vuak faivo ijin biediame buna okrega e Jesuon vuak faivo iji buka juin. Ijefuon maiji e Sor fu Jesuon vuak faimo be renma iji buba vierafen. Regavo e Banabasri ro kekome Sor afeme abe e afasor iji miame vuak izeg E Bomana fu Sor kuardainma ijiga izeg Sor fu E Bomana iji gainma ijigam izeg Sor fu Jesuon vuak gigikin fu e Damaskasko iji kuardiainma iji abe kuardiain. Ijefuon Sor fu ar Jerusarem ijia oknum Jesuon vuak iji darokma kuardiaoin. Sor fu ijegrejknum vo e Jius iji bu e Grikbuon isama ijia kuaiknum dab mafaivo iji kuaim amaren. Regavo e iji bu uri fu kanakrejga e Jesuon vuak faivo iji bu game uri Sor afem ar Sesaria ijia useme kuava fu una ar Tasas ijia vain.
ACT 9:31 Regavo e Jesuon vuak faivo iji ar Judia ga Grik ga Sameria ijia karinva iji bu una afurveknum kari vain. Regavo Godon Kaven ijar daro miaknum ifejdiama buka e uruvana rene E Bomana iji agoiknum ma vierafene karioin.
ACT 9:32 Fita fu ai kafokafo oino ijia fu ar Rida ijia Godon e iji giakafa vain. Fu va ijia kekome e Ainias bien revo e iji fu diak ise fu juaivasia eit (8) igeg fuba diak oin. Ijefuon Fita fu Ainias kua, Jesu Kurais fu a amardainmano ni uri suf on kara matome vakne kuamga Ainias fu migegare uri arir manin.
ACT 9:35 Regavo e fok ar Rida ga Seron karinva iji bu fu game una oi karoime E Bomana ijefuon ruain.
ACT 9:36 Regavo bara be Jesuon vuak faimo if fuon Tabita ga Grikbuon vuak ijia bu kua Dokasno kuavo iji fu ar Jofa ijia fino. Regavo bara iji fu naikafare fuka ma rejknum e isema karinva iji ifejdiamon.
ACT 9:37 Fu ijegreoinon ijia fu adam abe vake guamga bu surif fuon dab do ruardame abe ar guf kaf ijia abeden.
ACT 9:38 Rega ar Rida fu Jofa samaij ijia ijefuon e Jesuon vuak faivo iji bu faik Fita fu ar Rida ijia oina bu fain. Bu faime e nokarok (2) kiava bu Fita afem migegare ruakuai vain. Bu vake ar Rida ijia usem Fita kuava fu migegare uri buna vake ar Jofa ijia kekoin.
ACT 9:39 Fu ijia kekomga bu fu afem ar guf kaf ijia ajie vain. Bu vagak bara amun fok bu sinuom kafo Dokasri buifuon amardiainma iji kege una fu nijaiknum niraifiriv.
ACT 9:40 Fita fu bara iji kiama bu usem vakga fu dakaroim bara iji guainma iji gavknum ato same sirimamene kua, Tabita urine kuamga bara iji fu ni narame Fita gavknum uri arir fin.
ACT 9:41 Fu uri arir figa Fita fu uri bara iji ifejdame imuike unama fu uri arin maniga fu bara amun iji abevo e God ma vierafejo iji nijaidiame kia, Bara igi fun una urinmano kiain.
ACT 9:42 Fu ijeg kiakoga vuak iji fun migegare igia e ar Jofa iji karinva iji buka faim baren. Areme e fok bu oi karoime E Bomana iji ma vierafen.
ACT 9:43 Rega Fita fu Jofa ijia tavan kafo e Saimon fu fanuf surif kege sinuom amardiamo ijek fioin.
ACT 10:1 Ar Sesaria ijia e be if fuon Konirias fu e bijaivo ijiebuon e bomana ga fu madu e Itariko buon e bijaivo fok samuagdiamon. Regavo fu ga agbara fuon ijin buka God ma vierafeknum e iji bu oifiaigma karioijo iji oijmiame duok vajiaknum ga tavan fok fuka God sirimameno.
ACT 10:3 Fu ijegre vake nakibe tavan gara vako ijia fu nimamaime samakaf gak Godon anera be fu ro kua, Koniriasno kuain.
ACT 10:4 Fu kuamga Konirias fu uri juvknum uruvana igia anera iji nikajame kua, E Bomana a izegrenmano kuain? Fu ijeg kuamga anera iji fu uri Konirias kua, E oifian abejo iji a ifejdiamo ijigam buifuon a sirimameno iji God fun vierafenmano kuain.
ACT 10:5 Ijefuon ni iviakma e kafo kia bu va ar Jofa ijia e Saimon e iji bu kua Fitano kuavo iji afem rofno kuain.
ACT 10:6 Regavo fu e nabui fuon Saimon be iji fu fanuf surif ijia kege sinuom amardiamo ijek fin gavo ar fuon fu saof irif ijiano kuain.
ACT 10:7 Areme anera iji fu vuak kuardamo iji fun vako Konirias fu uri e ar fuon ijia ik rejo iji nokarok (2) ke are e bijaivo be fu ifejdamo iji God ma vierafeno ijin aben. Areme fu kiama bu rokga fu uri vuak fok fu nimamaime gainma iji kuardiame kiama bu ar Jofa ijia e Fita afekuai vain.
ACT 10:9 Bu vako afarma tavan uk manino ijia e iji Fita afekuai vainva iji bun vake mai iji samaireko ijia Fita fu ar azan ijia ajieme sirimamekafa vain.
ACT 10:10 Regavo fuka vasiaguainma ijefuon fu duok kafo ikafa vierafen ijefuon bu fuifuon duok amarekoga fu ijia nimamain. Fu nimamai ga kaf gafia vien fuka dajame ire ugon igekin bomana be bu dab abesva fu moik ijia ari ruain.
ACT 10:12 Regavo ugon iji fu fanuf ni kafokafo ga um kafokafo ijekma ari ruain.
ACT 10:13 Areme kaf ijia vuak be ijia kume, Fita uri fanuf ijigam um iji kania bua ine kumen.
ACT 10:14 Rega Fita fu una roin kume, E Bomana na ijeg naba rekfuon ijefuon maiji duok ise ijekin iji naba ijno kumen.
ACT 10:15 Fu ijeg kumega vuak be fu una madu kaf gufia kumen. Ire ijekin iji fun usuibe Godri ja ikfuon amardiain ijefuon ab kua duok iji bu iseno kuaik.
ACT 10:17 Rega Fita fu vek fine ire iji fu nimamaime giainma iji vierafeko e iji Konirias fu kiama bu ruainva iji bun Saimonon ar iji game ro vien ijia iren. Bu vien ijia ireme kia, E Saimon Fita kuavo iji fube ijia fino kiain?
ACT 10:19 Bu ijegreko Fita fu vek ijia fine ire iji fu nimamaime gainma iji vierafeno ijia Godon Kaven fu kua, Saimon e nokbek (3) bu a nisaivno ni uri una moik ijia ari vakne kuain. Regavo ab mani vierafek gavo nin buna vakne. Ijefuon maiji e iji nar kiava bu ruainvano kuain.
ACT 10:21 Areme Fita fun ari moik ijia kekome e iji kia, E iji ja nisaivo iji na iga ga ja irerafuon ruainvano kiain.
ACT 10:22 Fu ijeg kiamga bu kua, No Konirias e bijaivo ijiebuon e bomana ijar kuoma no ruain. Regavo e iji fuka ma amarigia reoknum God ma vierafeno gavo e Jius fok bu fu agoiv. Ijefuon Godon anera iji fu Konirias kua, Ni a kuaga a ar fuon ijia roga fu vuak on a kuaimon iji faimne kuain. Areme Fita fun e iji aferdia ar guf ijia aru funa naoikuai vain. Regavo afarma Fita fun urine buna vakoga e Jofako roin God ma vierafejo iji bu funa vain.
ACT 10:24 Bu vake tavan besum ijia bu Sesaria ijia usen. Regavo Konirias fu bu vakfuon iji samua fido fun aganfuon ijigam kaifijaf iji kiama bu besum afuime karin.
ACT 10:25 Bu besum afuim karikoga Fita fu ik vien ijia arumo ijia Konirias fu uri fu bieme aguaiknum ato sakafain.
ACT 10:26 Fu ijegrega Fita fu kua, Naiji nam ema narno urine kuain.
ACT 10:27 Areme Fita fu Koniriask vuak kuaiknum aru vagak e uruvana bu ar guf ijia karijga fu kia, Jan vierafen no akai nuvuon ijia e Jius bu e Jius bakin ijiena afuiknum ga bu giavo bano kiain. Regavo God fun na kie, Ab vierafero e kafo bu e ise gavo ar e maro ab ijeg vierafekno kien. Ijefuon bu na aferdiekuai vuakga naba uzain gavo nam uri ruain. Ijefuon naba kiak ja irerafuon na kieva na igia ruainva kiak?
ACT 10:30 Fu ijeg kuardiamga Konirias fu una roin kuai, Naki nokbek (3) barenma ijia na ar nun ijia tavan una gura manino (tiri (3) o korok) ijia na sirimamejga migegare e be ugon zin igeg iramo iji sainma ijar fu nifak nun ijia manin.
ACT 10:31 Fu manine kie, Konirias God fun on a sirimameno ijigam ire iji a e isema karioijo iji a vajiamo iji fun game vierafen.
ACT 10:32 Ijefuon ni e kiaga bu va Jofa ijia e Saimon Fita kuavo iji fu e Saimon be iji fu fanuf surif ijia kege sinuom amardiamo ijek saof irif ijia fino iji afem rokne kien.
ACT 10:33 Ijefuon na migegare oifuon kiava bu vuainva an magoi ruainmado no Godon nifak igia kari faivo ni vuak fok E Bomana fu nuvuifuon kuardainma iji no kuarduomne kuain.
ACT 10:34 Fu ijeg kuardame arekoga Fita fun uri anerene kia, Iviakma nan vierafega God fu e roin oimardiaga e roin fu uzamo bakin. Regavo fum e moik kafokafo eraneb fu ma vierafeknum ma rejo iji aferdiam.
ACT 10:36 Regavo igi Godon vuak iji fu e Isrerko iji nijiainma ijin. E fok ijiebuon E Bomana Jesu Kurais fu buifuon ire be rekreno ijefuon vuak ma iji ja Godna afuikfuon ijin.
ACT 10:37 Regavo ar Judia ijia izegrenma iji jan vierafen Jon fu Jesu do ruardainma ijia God fu Kaven Akai fuon kuama fu Jesu e Nasaretko ijefuon oij ijia arin. Fu ijia arimga fu daro abene unam ma ijia reoknum mareknum e iji Setan fu aferdiama bu efuon renva iji amardiame karauniaknum ijeg reoin. Regavo Godon Kaven fu fusik oino ijefuon fu ire ijeg reoin. Regavo ire iji fu renma iji fu ar Gareri ijia anerene gafeg vainmano kiain.
ACT 10:39 Regavo ire fok fu e Jiusbuon ar ijigam Jerusarem ijia fu reoinma iji nor giain. Regavo bu fu abe kuros ijia kanavga Godri naki nokbek (3) barko ijia keunama fu una urina e roin bu gain. E fok buba gain gavo no e iji God fu kuoma no funa besum oinva iji nor fu una urina no funa besum duok ga do inva iji nor fu gain.
ACT 10:42 Regavo fu ijeg kuo, Ni e fok kia naiji na ma Godri kienmado na Godon vuak ma iji nijaidiaknum e iji aoinva ijigam nivek karinva iji fine ise buon iji ke mazim giak.
ACT 10:43 E Godon vuak vierafene kuaivo ijieb fuisina kuai, Erar fu Jesu ma vierafekma ise fuon fu reno iji Jesur if fuon ijia giame arekno kuin.
ACT 10:44 Fita fu vek vuak iji kuaimon ijia Godon Kaven fu ari e iji vuak iji faivo ijiebuon ruain.
ACT 10:45 E Jius God ma vierafejo iji bu Fitana ruainva iji buka oiserdiain ijefuon maiji Godon Kaven fu ari madu e iji Jius bakin ijiebuon oij ijia ruain.
ACT 10:46 Ijefuon maiji bu fai e Jius bakin iji buka vuak nanuame kuaiknum Godon oimarev. Rega Fita fu uri kia, E be fuba e igi bu do ruaikrejo iji bijukuriak. Buka izeg Godon Kaven iji no abenva buk ijeg aben. Ijefuodo buka Jesu Kuraison if ijia kege do ruardiak. Areme bu Fita kuava fu naki sibank fu ijia buna fin.
ACT 11:1 Areme e afasor ijigam e kafo God ma vierafejo iji ar Judia ijia karinva iji bu fai e ar kafoko e Jius bakin iji buk bun Godon vuak iji abe ma vierafej.
ACT 11:2 Ijefuon tavan iji Fita fu Jerusarem ijia vakga e Jius iji bu vajai surif buon ufume anf navo ijin ma vierafejo ijieb uri fuisina kuaime kuai, A vainma a e Jius bakin ijiebuon ar ijia ajie buna duok inmano kuain.
ACT 11:4 Bu ijeg kuavga Fita fu uri vuak fok izeg fu renma iji anej gamia kuardiame vake garin gafia baren.
ACT 11:5 Areme Fita fu una uri kia, Na Jofa mai ijia fine sirimamejo ijia na nimamai ga ire ugon igekin iji bu kaf gufia dab abesva fu ari roke na fijo ijia ruain.
ACT 11:6 Fu ijia ari rokga na ga ugon iji fu fanuf kafokafo ijigam um kafokafo iji anuinva ijar ari ruain.
ACT 11:7 Na iji gavknum na fai kaf gufia vuak be na kume, Fita ni uri ire iji kania bua ine kumen.
ACT 11:8 Fu ijeg kumega na una roin kua, E Bomana iji naba ijeg rek. Na duok ise ijekin kafo naba invano kumen.
ACT 11:9 Na ijeg kumejga kaf gufia fu una madu kume, Ire iji fun Godri amardiainmano ab kia iseno kiak.
ACT 11:10 Vuak iji fu nokbek (3) ijeg kuardieme ire ugon igekin iji fun una varur gufia ajie vain.
ACT 11:11 Ijegrekoga e nokbek (3) iji bu na aferdiekuai ruainva iji bu ro ar na fijo vien ijia iren.
ACT 11:12 Bu ijia irekoga Godon Kaven fu na kie, Ab mani vierafek nin buna vakne kien. Areme enun God ma vierafejo e sibank buk bu uri nana vake Koniriason ar ijia usen.
ACT 11:13 No Koniriason ar ijia aru vakga fu vuak izeg anera iji fu ar fuon ijia ari vuak kuardainma iji kuarduin.
ACT 11:14 Fu kuo, E kafo kia bu va ar Jofa ijia useme e Saimon Fita kuavo iji afem roga fur Godon vuak ma iji abe roga a ga aganon iji bu vuak iji faiga God fu bu karauniakno kien.
ACT 11:15 Ijegrene na ik vuak kuaivo ijia Godon Kaven fu izeg amur oi nuvuon ijia ruainma ijeg fu oibuon ijia ruain.
ACT 11:16 Fu ijegrega na una izeg Jesu fu usuibe kuainma na ijin vierafen. Fu kua, Jon fu e do ruardiain gavo a iji a Godon Kaven abekno kuainma na iji vierafen.
ACT 11:17 No ma vierafega God fu ire ma iji fu e igi no Jesu ma vierafejo iji reduomo ijeg fu una e Jius bakin iji buon rediain. Revo naiji nam ema ijefuon na ire iji God fu renma iji na irerafuon unam fuon iji bijukva bakin.
ACT 11:18 E iji bu vuak iji faime uri kai roinbuon bu kuaivo iji bu areme uri God abe aroiknum kua, Ijekido God fu e Jius bakin iji fu kiaga bu oi karoime ise buon una God kuardame una unam ma ijia karivakno kuain.
ACT 11:19 Bu e Stiven kanavga e God ma vierafejo iji bu bijaiknum musikuaivo iji bu jume dab ataseme uri ar Fonisia ga Saifras ga Entiok ijia vain. Bu ijia oknum Godon vuak iji abe e Jius ijesugin kuardiaoin.
ACT 11:20 Bu ijegreko e God ma vierafejo roin bu ar Saifras ga Sairini iji bu va ar Entiok ijia usem Jesu E Bomana ijefuon vuak ma iji abe e Jius bakin iji madu kuardiain.
ACT 11:21 Regavo Godon daro iji fuka ijia buna ijefuon e uruvana bu God ma vierafene una oi karoime E Bomana ijefuon ruain.
ACT 11:22 Ijegrekoga vuak iji fu va Jerusarem sos ijia kekomga bu uri e Banabas kuavga fu ar Entiok ijia vain.
ACT 11:23 Fu va gamia kekome izeg God fu e iji daro miainma iji giama fuka oimaimga fu kia, Jab E Bomana iji uzak revo jaka amarigia fu igame jafno kiain.
ACT 11:24 Regavo e Banabas fuka e ma fu God ma vierafen ga Kaven Akai fuon ijefuon daro iji aben. Ijefuon e uruvana fur oibuon ke karoimga bu una E Bomana iji ma vierafen.
ACT 11:25 Areme Banabas fu ar Tasas ijia e Sor nisaim vain.
ACT 11:26 Fu nisaim vake bieme afem una ar Entiok ijia ruain. Bu ijia usem juaivasia besum (1) ijia Banabas ko Sor bu sos ijia e uruvana Jesuon vuak nijaidiain. Bu nijaidiavga ar Entiok ijia e iji bu amur Jesuon vuak faime ma vierafejga bu kia Kuristien no kiain. (Revo if ijefuon maiji e iji bu oi karoime Godon Kaven abenva ijin).
ACT 11:27 Tavan besum ijia e Godon vuak vierafene kuaivo iji bu ar Jerusarem arega Entiok ari vain.
ACT 11:28 Regavo e be if fuon Agabas fu Godon Kaven ijefuon daro ijia fu uri manine kia, Moik fok fu vasia kekokveno kiain. Regavo tavan ijia e Krodias fu e bomana renma ijia vasia fu ijia kekoin.
ACT 11:29 Regavo iviakma igi e Jesuon vuak faivo iji bu Agabason vuak iji faime vierafero bu giriesame mon mamkanuk kafo e Jesuon vuak faivo iji ar Judia ijia karinva iji vajiakuai vierafen.
ACT 11:30 Bu ijegrene ire buon bu kege e Banabas ko Sor vajiavga bur kege vain.
ACT 12:1 Areme tavan ijia Kin Erod fu e sos vako iji roin tofdia kam arafiriakafa vierafen.
ACT 12:2 Fu e Jeims e Jonon diar iji kiama bu ire kaki jaoijor ijia dab bijava fu guain.
ACT 12:3 Fu ijegrejknum gak e Jius iji bu unam iji fu reno ijia oimarvga fu uri madu Fita toin. (Revo iji fu tavan iji bu besum afuime bred iriaikin ijefuon iro ijo ijia fu ijeg ren).
ACT 12:4 Bu Fita tome rad bu dab dibur unavga e bijaivo kafo bu atame nokarok ga nokarok (4) rene fu samuame karij. Bu karivake tavan abega bu vako kafo busik ro vien iji samuav. Bu ijegrekoga Kin Erod fu vierafero tavan iji Fasova iji barekma fu Fita dab e fok ijiebuon nifak ijia kot rekro fu ijeg vierafen. Fu ijeg vierafene Fita dab dibur unain. Regavo e sos ijia karinva iji buka Fitan giriesame Godon sirimamen.
ACT 12:6 Regavo niar igeg Erod fu Fita afem e ijiebuon ruakoga ga naki ijia Fita bu sen nokarok (2) kege kiriadame arevga fu e iji bu e diburko iji samuagdiavo nokarok (2) bu roinroin reko fu uf ijia nain.
ACT 12:7 Fu ijia naikoga e iji roin bu dibur vien iji samuame iren. Bu ijegrekoga migegare Godon anera be fu ari dibur guf ijia manikoga ijia tavan igeg sanain. Areme anera iji fu uri Fita faraf ijia kunaime sama fu uriga fu kua, Migegare urine kuain. Fu ijeg kuako sen fok bu Fita imut ijia kiriamdainva iji bu iraiksain.
ACT 12:8 Areme anera iji fu uri Fita kua, Sinuom on amarigia same diak surif on ke same uri ugon on e iduadiaga bu savo iji abe abese nosik vako rokne kuain.
ACT 12:9 Fu ijeg kuamga Fita fun uri ijegrene anera iji jame dibur iji arega keko makaf ijia vain. Fita fu anera iji fu reno iji fuba mukoi vierafen gavo fu vierafero fu nimamainmaro fu ijeg vierafen.
ACT 12:10 Bu ijegrene usem roke ar be e dibur samuagdiavo iji bu irenva ijia asim roke vien be e bu samuavo ijia usen. Bu ijia usevga vien iji bu ajan ijia abe amarme bijukurainva iji fu koikfuon dajamga bu ijia usem vain. Bu useme unam be ijia vakga anera iji fun migegare ijia Fita unako vain.
ACT 12:11 Fu uname vakga Fita fu ijia izeg fu dibur iji arega keko ruainma iji vierafene fui kuai, Iviakma nan vierafe God fu anera fuon kuama fu na keuniekafa ruain. Ijefuon maiji na Kin Erodon daro rotit ijia fij gavo madu e Jius iji buk bu na abe ire ise kafo rekrejo ijefuon anera iji fu ruain.
ACT 12:12 Fu ijeg vierafene fun vake bara Meri e Jon Makon asiej ijefuon ar ijia kekoin. Fu keko ga e uruvana bu ijia afuime sirimamejga Fita fu vien ijia manine kanakanama bara be if fuon Roda kuavo ijar keko e iji kanakanamo iji gakafa ruain.
ACT 12:14 Fu ruaknum Fitan ir iji faima fuka oimaimga fuba vien iji dajain revo fum una kukum aru e iji kia, Fita fu vien gafa manino kiain.
ACT 12:15 Fu ijeg kiamga bu kua, A no biesumno kuavga fu una madu kia, Naka ma kuardiav. Roda fu ijeg kiamga bu kua, No vierafe fu kaven fuon ijarno kuain.
ACT 12:16 Bu ijegreko Fita fu vek ijia manine kanakanamga buson uri vierafene va vien dajame ga fu Fitar maniga buka oiserdiain.
ACT 12:17 Areme Fita fun imut fuon ijia e iji bijukuriama bu isuar kariko fu uri E Bomana iji fu izeg fu afem ar dibur iji arega keko ruainma iji kuardiain. Fu kuardiame kia, Ni vuak iji abe Jeims ga e Jesu ma vierafejo kafo iji kuardiafno kiame fun bu areme uri ar be ijia vain.
ACT 12:18 Fu ijegreko ve irasemga e iji dibur samuavo iji bu uri Fita nisaime dab bui sigunamin.
ACT 12:19 Rega Kin Erod fu kiama bu una madu Fita nisain revo buba fu bien. Ijefuon fu e dibur samuavo iji kiama bu fuon rokga fu duna kafokafo kiame uri e bijaivo iji kaniakafa kuardiain. Regavo rad Erod fu Judia iji arega va Sesaria ijia keko naki kafo fu ijia fin.
ACT 12:20 Regavo Kin Erod fuka e ar Taiako ga Saidonko iji fuka ziegafiamga bu ijefuon besum afuime Erod gakuai vain. Bu vake gafia useme e Brastas fu Kin ijefuon ar iji samuamo ijia usen. Bu vierafe bu amur bu fu soisoiga fu buna rene bu ifejdiakma bu ijefuon fu soisoin. Bu ijegrene bun va Erod fino ijia kuaga fur izeg bu amur buon ziegafanamioinva iji bijukuriakafa ijefuon maiji duok buon bu ijo iji bu Kin ijefuon moik ijia karvo.
ACT 12:21 Tavan be bu abedenva ijia Erod fu ugon fuon mukor ijesugin same ajie fata fuon ijia fine e uruvana vuak kuardiain.
ACT 12:22 Fu vuak kuardiamga e fok bu uri kume, E igi fu ema ijar kuarduomo bagavo fu Godri kuarduomno kumen.
ACT 12:23 Erod fu God fuba juvknum agoin gavo fu fine ijegrega tavan besum ijia E Bomana ijefuon anera ijar ari fu kana dasu abesemga fun guain. Fu ijia guamga ire nifun ijieb fu zain.
ACT 12:24 Fu guamga Godon vuak iji buka dab kuaim bomana rene ar fok ijia vain.
ACT 12:25 Regavo Banabas ko Sor bu Jerusarem ijia ik buon bun re barme e Jon Mak afem una ruain.
ACT 13:1 Regavo ar Entiok sos ijia e kafo Godon vuak vierafene kuaivo ijigam e vuak nijaidiavo ijiebuon if iji Banabas ko Simion e iji bu kua e kazin no kuavo ijin. Regavo madu e Rusias e ar Sairinko ijigam e Manain e Kin Erodon farif iji fu farikenma ijigam e Sor ijieb Godon vuak kuaiv.
ACT 13:2 E ijieb bu E Bomana ijefuon e iji ifejdiame sirimameknum duok karovga Godon Kaven ijar kia, E Banabas ko Sor iji kege garia be uniainki bu ik be na kiainva bu iji rekno kiain.
ACT 13:3 Fu ijeg kiamga bun duok karoknum e Banabas ko Sor ke imut nigen namdiame buifuon sirimamene kege uniavga bun vain.
ACT 13:4 Banabas ko Sor bun Godon Kaven fu kiainma ijeg bun ari va ar Serusia ijia useme ijia sisim abe saof ijia moik be datura namo bu kua Saifurasno kuavo ijia vain.
ACT 13:5 Bu va ar Saramis ijia usem e Jiusbuon ar bu afuime vuak kuaivo ijia aru ireme Godon vuak iji kuardiain. Regavo e Jon Mak fu buna vaindo fu ifejdiame vuak kuardiain.
ACT 13:6 Areme bun ar Saramis areme bun saof uf ijia ura gama usem vake ar Fefos ijia usem e be if fuon Ba Jesu fu e masifdiamo iji bien. Regavo e iji fu e Jius gavo fu e iji vuak kufui kuardiame kia, Naiji na e be Godon vuak vierafene kuaiv e ijino kiain.
ACT 13:7 Regavo Ba Jesu fu e Segias Foras e iji fu ar moik iji daturaik namo iji samuamo ijefuon kai. Regavo e Sejias Foras fuka e nigen ma fu ire fok amarigia vierafeno. Regavo e iji fu Godon vuak iji faikafa vierafen ijefuon fu Banabas ko Sor kiama bu fu fino ijia vain.
ACT 13:8 Bu ijia vakga e Ba Jesu e iji e masifdiamo iji bu e Grik buon isama ijia bu kua Erimasno kuavo ijar e moik iji daturaik namo iji samuamo ijin kuriairen. Fu kuriaireme oifuon iji abe dakaroiga fu vuak iji bu kuardakrejo iji fuba ma vierafekafa fu ijeg ren.
ACT 13:9 Fu ijegrekoga e Sor if fuon be For iji fu Godon Kaven ijar oifuon ijia arimga fu uri e iji e masifdiamo iji nikajame kua, Aiji a Setanon farif gavo aka ire ma igiena bijaikreno kuain. Revo madu vajat on fuka ire isekma ijieb ajiemdainva ijefuon aka naikafare E Bomana ijefuon vuak ma iji abe kufuimene kuaimon.
ACT 13:11 Ijefuon iviakma E Bomana iji fu ire nibe rega ni on fu zuriaiga a tavan ivuankbe aba sanainma iji gak. Fu ijeg kuardamga Erimas fu ga vana kazin ijar ni fuon iji okuramga fu uri oknum imut ijia e ijin barame ofai arega e ijieb fu imuikedavro fu ijeg ren.
ACT 13:12 Erimas fu ijegrega e iji moik iji datura namo iji samuamo iji fu ire sumakin iji gama fuka oiseren. Fu oiseremga fu ijia E Bomana ijefuon vuak iji bu nijaidiavo iji faime ma vierafen.
ACT 13:13 Areme rad For ga e iji funa oijo iji bun sisim abe ar Fefos areme vake ar Fega moik Famfiria guf ijia usen. Bu ijia usekoga Jon Mak fun bu uniakome una Jerusarem vain.
ACT 13:14 Bu Fega nak roke ar Entiok moik Fisidia guf ijia usen. Bu ijia useme ga tavan iji fu e Jius bu isuar karijo iji game bun e ijiena e Jiusbuon ar bu afuim vuak kuaivo ijia karin.
ACT 13:15 Bu ijia kariko e iji bun Mosison akaij ijigam e Godon vuak vierafene kuaivo ijiebuon vuak iji dain. Bu dame barekoga e mamkanuk iji Jiusbuon ar iji samuavo iji bun vuak be e iji Forna vainva iji nijain. Bu nijiame kia, Uviaifnuvuon gamie ja vierafega ja vuak kafo e igi soisoime kuardiakuai vierafekva ni uri ro kuardiafno kiain.
ACT 13:16 Bu ijeg kiavga For fun vuak kuardiakafa uri imut ajieme anere vuak kuardiain. Regavo vuak iji For fu kuardiainma iji fu ijeg kuain. Enun fokigie e Isrerko abevo e Jius bakin iji eraneb Godon sirimameknum God ma vierafejo iji vuak igi faif.
ACT 13:17 E Isrerko ijiebuon God ijar saifnuvuon iji kiamga bu moik Ijift ijia kariko buka e uruvana ren. Regavo God besum ijar daro fuon ka ma bomana iji abe e iji nijaidiame aferdia moik iji are keko ruain. Regavo fuka juaivasia foti (40) ijeg ai moikum namo ijia oknum God dab vuak ise fuisina kuain revo fuka vek bu amarigia samuagdiain.
ACT 13:19 Regavo fu moik Keinan guf ijia e isama kafokafo kuaivo bu moik seven (7) ijia karijo iji fok kaniama bu aoivga fu una e fuon fu aferdia roko iji kiamga bu moik iji abe ijia karin. Regavo bu juaivasia fo adred fifti (450) bu ijia kari ruain. Bu kari ruakga God fu uri e mamkanuk kafokafo iji kege uniama bu ijia karine e fok samuagdia roke e Godon vuak vierafene kuaimon e Samueron tavan ijia ruain.
ACT 13:21 Ijefuon tavan iji fu nafenva iji rokga bu una Kinfuon God kuavga God fu e Sor abe miain. Regavo Sor fu e Kison farif gavo fu e Bezmanon uifarif ijefuon bu fu abeja fu juaivasia foti (40) ijeg fu Kin buon ren.
ACT 13:22 Sor fu Kin revake God fu Sor kuama fu areko fu una e Devid abe una e ijiebuon Kin rediain. Areme God fu Devidon vuak iji kuardiain, Na Devid e Jesion farif iji afenvano kiain. Regavo na e ijekin iji vierafedo fur fine ire fok na oinun ijia vierafejo iji fur rek.
ACT 13:23 For fu ijeg kuardiame madu kia, E Devidon uifarif ijia Godri Jesu e iji e fok karauniamo iji kuama fu e Isrerko buon ruain. Regavo ijiebuon vuak iji fun Godri usuibe kuainma ijefuon fu ijeg ren.
ACT 13:24 Jesu fu rad ruain revo amur fu Jonri e Isrerko iji kia, Ni ise jon fok ja reoijo iji areme roga na ja do ruardiavno kiain.
ACT 13:25 Regavo Jon fu ik fuon fu reoino iji fun barekrega fu uri e iji kia, Ja vierafe naiji na erano kiain? Areme fu una kia, Naiji na e iji fu ruakrega ja samuavo iji bakin gavo naka ba aresredo naba e iji fu ruakreno ijefuon dia surif fu sainma iji rumdakno kiain.
ACT 13:26 Regavo efnun e Eburamon uifarif ijigam e Jius bakin eraneb ja igia ato same God aroivo igi vuak igi izeg Jesu fu e karauniakfuon iji fu nuvuifuon nijuin.
ACT 13:27 Regavo e ar Jerusarem ijia karinva abevo ebuon mamkanuk iji bu Jesu buka ba ma vierafen. Regavo bum e iji Godon vuak vierafene kuaivo ijiebuon vuak iji bu kuainva ijekma riarekafa bu Jesu dab kot rene kua, A isema renmado a guakno kuain.
ACT 13:28 Bu ijeg kuaime fu abe kana fu guakuai bu uri ire ise fu reoinma iji nisaiga fuka bakiga bu uri Fairet kua, Ni ar e igi abe kana fu guamne kuain.
ACT 13:29 Bu Godon buk akaij ijia vuak fok fuisina bu isoime kuainva iji bun re barme kuros ijia fu jafe arime abe mako ijia unain.
ACT 13:30 Regavo Godri fu keunama fu una uri tavan uruvana fu e iji bu funa ar Gareri ijia una Jerusarem vainva iji biediamga bu fu gain. Ijefuon iviakma e iji fu gainva ijieb e Isrerko iji kia Jesu bun gainvano kiain gavo noiji nom vuak fuon ma iji abe jon ruain.
ACT 13:32 Regavo vuak iji God fu amur e makin nuvuon kuardiame kia fu rekno kiainma iji fun iviakma e uifarif buon igi nuvuon rene Jesu keunama fu una urin. Regavo Godon buk be bu kua Samno kuavo ijia bu ijeg isoi, Aiji a Farinun gavo iviakma nan una Asoion renvano kuain.
ACT 13:34 Regavo God fu Jesu keunamga fu una urik rega surif fuon fuba muturekafa fu iji vierafene vuak ijin kiamga bu buk Sam ijia isoi, Ire ma iji na Devidon rekafa kuainva iji fu una on rek.
ACT 13:35 Regavo usuibe bu buk iji kafar be ijia ijeg isoi, Ja ejon ma iji fu joifuon ik reno iji jaba arega fu mako guf ijia muturek.
ACT 13:36 Regavo Devid fu vek fino ijia fum tavan fuon ijia Godon ikre roke fu guamga bu abe emakin fuon bu uniainva ijia unavga vajai fuon fuka muturen.
ACT 13:37 Regavo e iji God fu keunama fu una urinma iji fuba muturen. Ijefuon efnun fokigie jabe ma vierafe God fu Jesuon azan ijia ise jon giame arek. Regavo fu Mosison akaij ijar ise jon ijia karauniakma bakin. Regavo eraneb bu Jesu ma vierafekva bu ise buon iji bu vajai fian abekrejo iji bun are usem una Godon nifak ijia buka maturaik.
ACT 13:40 Ijefuon ni koikjon samuanamiknum vuak iji e Godon vuak vierafene kuaivo iji fuba jon rek. Regavo vuak iji bu ijeg kuai,
ACT 13:41 E guri Godon vuak kania tuavo gurie ni mukoi faif. Ja ire sumakin be gakva jaka oiserdiaga ja aoik. Regavo ja vek karinva ijia irerag sumakin igi na rekva bu e kafob ire ijefuon anej ma iji kuardiabatie ja ma vierafekva bakin.
ACT 13:42 For ko Banabas bu ik ar iji e Jius bu afuime vuak kuaivo iji are usevga e iji bu una kia, Ni tavan be e Jius bu isuar karijo ijia una ro vuak ijekin kafo kuarduofno kiain.
ACT 13:43 Bu ijeg kiame e iji bun vuak iji bu kuaivo iji are usem vakga e Jius iji abevo e Jius bakin iji bu e Jius ijiebuon unam iji abenva iji fok bu uri For ko Banabas jajiame vain. Bu jajia vakga e For ko Banabas bu uri soisoime kia, Ni ire ma iji God fu jon reno iji mukoi vierafeknum karifno kiain.
ACT 13:44 Regavo madu una tavan be e Jius bu isuar karijo ijia e ka ma uruvana mai guf ijia karinva iji bu E Bomana ijefuon vuak iji faikuai ruain.
ACT 13:45 Regavo e Jius iji bu roke ijia usem ga buka e uruvana ijia kariga buka iserdiama bu uri Forsina kuaime kuai, Vuak iji fu kuaimon iji fuka kufuimeno kuain.
ACT 13:46 Bu ijeg kuaivga For ko Banabas bu uri vuak iji abe darokma e Jius iji kuardiame kia, Godon vuak igi no abe amur ja kuardiainva iji fun maren revo ja vuak iji ja uzain. Ja uzainvado jakafu vierafe jaba aresredo ja ma karivako iji abek? Regavo jan ijegrenva ijefuon no jaiji no ijia areme una e Jius bakin ijiebuon vakno kiain.
ACT 13:47 Bu ijeg kuardiame kia, Vuak igi E Bomana ijar nijuome kuo, Na ja kege uniaga ja sanainma iji abe va e moikazan fok igia karinva iji aferdia roga na bu karauniakno kuin.
ACT 13:48 Ijerene e Jius bakin iji bu vuak iji faime bu E Bomana ijefuon vuak iji abe oimarvknum aroin. Regavo e iji God fu kia bu unam ma karivakfuon iji abekno kiainma bu tavan ijia uri God ma vierafen.
ACT 13:49 Regavo E Bomana ijefuon vuak iji bu dab kuaime vako e fok ijia karinva iji buka faim baren.
ACT 13:50 Regavo E Jius mai ijia karinva ijieb uri e mamkanuk buon ijigam bara ikin kafo God ma vierafejo ijiebuon oij iji ke karoidiavga bu For ko Banabas uzame uri bu kaniakfuon kuaime kiava bun ar iji areme vain.
ACT 13:51 E Jius iji bu ijegrejga For ko Banabas bu uri dia sakin buon fivga e iji bu giame vierafero bun no areme vakvejoro bu ijeg vierafekoga e afasor iji bun una ar Ikoniam ijia vain.
ACT 13:52 Regavo e Jesuon vuak faivo ar Entiok karinva iji fu Godon Kaven ijar oibuon ijia arima bu oimarvknum oin.
ACT 14:1 Ire iji ar Entiok ijia renma ijeg ar Ikoniam ijia fu una madu ijeg ren. Ijegreko For ko Banabas bu va ar e Jius bu afuime vuak kuaivo ijia arume vuak mukor igia kuaivga e Jius iji abevo e Jius bakin fok bu God ma vierafen.
ACT 14:2 Regavo e Jius roin bu God ba ma vierafejo ijieb e Jius bakin ijiebuon oij iji ke karoidiavga bu e iji God ma vierafejo iji ziegafiain.
ACT 14:3 Regavo e afasor iji bu naki uruvana bu ijia karine E Bomana ijefuon vuak iji abe darokma ijia kuaivga E Bomana iji fu uri daro miamga bu ire sumakin e buba giavo iji ren. Bu iji rejga e iji bu gia vierafene kuai Godon vuak iji bu kuarduovo iji fuka mano kuain.
ACT 14:4 Bu ijeg kuaivga e fok mai guf ijia karinva iji bu dab ata roin bu una e Jius ijiena reko roin bu una e afasor ijiena ren.
ACT 14:5 Areme e Jius bakin iji abevo e Jius iji bu e mamkanuk vuak buna kuaime bu uri afasor ijiebuon ise rene mun tua kaniakuai kuain.
ACT 14:6 Bu ijeg kuaivga afasor iji bu vuak iji faime bun subinai ar Raikonia ijia vain. Bu va ijia usem ar ukakna kafo Raikonia guf ijia bu kia Ristra ko Debi kuaivo ijia ga ar kafo madu Raikonia samaij ijia oknum Godon vuak ma iji abe e iji kuardiain.
ACT 14:8 Regavo e be ar Ristra ijia fino iji ik bu nafenva ijia fuka aikirain revo fuba koikfuon diak oinon.
ACT 14:9 E iji fu Foron vuak iji fain ijefuon For fu gak e iji fu vuak fuon ma vierafega fu e iji keunakafa vierafene uri e iji nikajame uruvana igia kua, Ni uri koikon arin manine kuain. Areme e iji fu uri furik ajieme fun koikfuon oin.
ACT 14:11 For fu ijegrega e fok bu izeg fu renma iji game uri Raikonia buon isama ijia kuaime kume, God fok bun ema igegrene una e igi ari nuvuon ruainvano kumen.
ACT 14:12 Bu ijeg kumene uri ifdiame Banabas bu ime Zeus kuaga For bu Emesno kuain ijefuon maiji For vuak fok abe e iji kuardiainma ijefuon bu ijeg kuain.
ACT 14:13 Bu ijeg ifdiame e isuf baroino be fu god Zeuson ar bu sirimamekuai mai samaij ijia sainva iji samuamo ijar sinar ga maf-kau aferdia vien gufia ruain. Ijefuon maiji fu e fok ijiena bu e afasor ijiebuon isuf barokuai vierafen.
ACT 14:14 Bu ijegreoijga For ko Banabas bu vuak iji faime uri ugon buon kam buja koreme kukubija e fok bu afuinva uf ijia ura vaknum kume, E igi ja irerafuon ijegrejno kumen. Bu kume, Noiji nom ema e igi jaikin revo no irerafuon ruainva iji no Godon vuak ma iji abe ja kuardiaga ja ire ise ijekin iji ja arega oi karoime una God iji nivek fino ijia fuon vakuai no iji ruain. Regavo God ijar moikigi ga varur gufi ga saof gami amarme ire fok amarme ijia uniain.
ACT 14:16 Ur fu areko e fok bu uri unam buon ijia reoin revo iviakma fu koikfuon ire ma iji rene nijaidia ja ijia game ma vierafero fu iji fur ma God. Fu varur gufia ve iji kuaga fu daga fu tavan ma ijia ire uij kafokafo kar ja vajiam. Regavo fu ire vajiaknum vo oijon ijia tavan fok oimarvknum karijo iji vierafe vajiamon.
ACT 14:18 Bu vuak iji e fok kuardiain revo e fok buba fain buka magaga buon isuf baroikrejga e afasor ijieb kiava bu aren.
ACT 14:19 Regavo e Jius roin bu Entiok moik Fisidia guf ijia ruainva ijigam ar Ikoniam ijia ruainva ijieb e fok aferdiavga bu una buna ren. Areme bun uri mun tuame For kaname dab moik ijia dakarame mai iji areme usem vain. Regavo bu vierafero fun guainmaro bu ijeg vierafen.
ACT 14:20 Bu ijegrejga e God ma vierafejo bu fu namo ijia irem ameoijga fu uri una mai ijia vain. Regavo afarma fu Banabask bu una ar Debi ijia vain.
ACT 14:21 For ko Banabas bu Godon vuak ma iji abe Debi ijia kuardiavga e fok bu vuak iji faime ma vierafene oi karoime Jesuon e ren. Areme bu una va ar Ristra ijia useme asime va Ikoniam usem nanuse va ar Entiok Fisidia guf ijia usen.
ACT 14:22 Regavo buka e Jesuon vuak faivo iji ejafiame kia bu giriesame oi buon Jesu ma vierafejo iji buka ma ijesugin vierafekuai bu iji una vain. Bu usem nijaidia kia, No oifian ga afikin fok moikigia biediaknum vajai fian abek. Regavo no giriesakva no tavan iji God fu una efuon ijiebuon oij iji samuagdiakafa roko iji no efuon rekno kiain.
ACT 14:23 Bu sos kafokafo ijia oknum vuak ijin kuardiaoin. Bu kuardiaoknum e mamkanuk kafo sos iji samuakfuon iji kege ijia uniaoin. Bu ijegrejknum duok karome buifuon sirimamene e iji kege una E Bomana iji bu ma vierafenva ijefuon imut tat ijia uniafdain.
ACT 14:24 Bu moik Fisidia ijia oine are una moik Femfiria ijia ruain.
ACT 14:25 Bu Godon vuak iji abe ar Fega ijia e iji kuardiame una Etaria ijia ari vain.
ACT 14:26 Bu va Etaria ijia useme madu sisim abe vake ar Entiok ijia usen. Regavo e Entiok sos ijia karinva e ijieb For ko Banabas amur kege Godon imut tat ijia uniava fur samuagdiain. Bu ik igi iviakma bu reoine barenva iji reokuai bu iji kege vajain.
ACT 14:27 Bu Entiok ijia useme e sos ijia karinva fok afuime vuak fok God fu buna reoinma ijin kuardiaknum izeg fu unam amardiama e Jius bakin iji bu Jesu ma vierafenva ijin kuardiain.
ACT 14:28 Regavo bu ijeg kuardiaknum tavan uruvana buka e God ma vierafejo ijiena ar ijia karin.
ACT 15:1 E kafo bu Judia ijia roke Entiok ijia usem anere e God ma vierafejo iji vuak nijaidiain. Bu nijaidiame kia, Mosison akai iji fu muinma iji fu kuo, Ni vajai surif jon iji kania ufume anf nafno kuin. Regavo jaba ijegrekva God fuba ja karauniakno kiain.
ACT 15:2 Bu ijeg kuardiavga For ko Banabas bu vuak ijefuon buna uruvana igia musikuaiknum nigarain. Bu ijegrene For ko Banabas ga e Entioko roin bu vierafe bu Jerusarem ijia e afasor ijigam e sos samuavo ijiebuon e mamkanuk iji vuak ijefuon giakuai vain.
ACT 15:3 Regavo e sos Entiok ijia karinva ijieb kiavga bu moik Fonisia ga Sameria guf ijia vaknum vuak iji izeg e Jius bakin iji bu una oi karoime Godon ruainva ijin kuardiain. Regavo e God ma vierafejo iji bu vuak iji faime buka oimaren.
ACT 15:4 Areme For ko Banabas bun ro Jerusarem ijia usevga e sos ijia karinva ijigam e afasor ijigam sos ijefuon e mamkanuk iji bu oimardiavga bu uri vuak fok God fu buna izeg reoinma iji kuardiain.
ACT 15:5 Regavo e roin God ma vierafejo iji bu e Ferisis ijiena oijo ijieb uri kia, E iji buka vajai surif buon iji kaniaufu anf name Mosison akaij iji igiavno kiain.
ACT 15:6 Areme afasor ijigam sos ijiebuon e mamkanuk iji bu vuak iji abe kuaime markuai besum afuin.
ACT 15:7 Bu vuak iji dab kuaime siguvga Fita fu uri kia, Efnun jan vierafe usuibe God fu ja uf ijia fu na kiema na uri vuak ma iji abe e Jius bakin iji kuardiava bu vuak iji faime ma vierafenvano kiain.
ACT 15:8 Regavo God fun e fok ijiebuon oij iji fun giainma ijefuon fu uri Kaven Akai fuon kege izeg fu no uniafduinma ijeg fu kege e Jius bakin iji uniafdiain. Fu ijegrenkin e fok bu vierafero God fun e Jius bakin iji aferdiame una efuon renmaro bu ijeg vierafek.
ACT 15:9 Regavo fu e Jius bakin iji ga no fuba ke ata kafokafo ren. Revo buka fu ma vierafenva ijefuon fu ise buon giame aren.
ACT 15:10 Regavo ja irerafuon God biesuame ire afikin iji kege e God ma vierafejo ijiebuon nuon ijia namdiav. Regavo ire iji afikin iji bu e saifnuvuon ijiena nor kekfuon iji noka ba aresren revo jaka kege una bu namdiav.
ACT 15:11 Regavo no ma vierafe God fu Jesu izeg fu fuon ma redamo ijefuon azan ijia fu no karaunuoma ijeg fu madu e Jius bakin iji karauniak.
ACT 15:12 Ijefuon e fok afuinva iji buka isuar karine faiko Banabas ko For bu uri ire sumakin fok God fu buon azan ijia e Jius bakin ijiebuon reoinma iji kuardiain.
ACT 15:13 Bu kuardiame barko Jeims fu uri kia, Uviaifnu ni vuak nun igi faif. E Saimon fun amur uri izeg God fu e Jius bakin iji nidosiame e kafo aferdiama bu una fuon ruainva iji fun kuardiain.
ACT 15:15 Ijegvo vuak igi fuka ma e Godon vuak vierafene kuaivo iji bu kuainva iji fuka riarenmano kiain. Ijeg gavo Godon vuak bu usuibe isoinva iji bu ijeg isoi,
ACT 15:16 E Bomana fu ijeg kuai, Ire iji barekma na una ruak. Areme na e Devidon ar iji tuainma iji abe una urik. Na in buin tuasenva iji kare afurvene ar iji una sak.
ACT 15:17 Na ijegrega e moikazan fok na kumenva iji bu nun ruakrejo iji bu na jajie ruakuai vierafekno kuain.
ACT 15:18 E Bomana fu ijeg kuain revo vuak iji fu kuainma iji fun usuibe e iji nijaidiain.
ACT 15:19 Areme Jeims fu kia, Iji na oinun igia vierafe noba e Jius bakin bu iviakma oi karoime Godon roko iji ke arafiriak.
ACT 15:20 Regavo iji noka arega no fas isoim nijiame kia buba ire iji bu god kafokafo iji vajiainva iji kege ik. Regavo barubara bu buon fudainamivo iji bu arek. Regavo madu fanuf iji bu uro musaidiaga bu aoivo ijigam fanuf kavuan buba ikno kiain.
ACT 15:21 Ijefuon bu tavan iji bu isuar karijo ijia e Jiusbuon ar iji bu afuime vuak kuaivo ijia bu Mosison akaij iji davo. Regavo vuak fuon bu dab e mai fok ijia karinva iji kuardiaoij.
ACT 15:22 Areme afasor ijigam e sos ijiebuon e mamkanuk ijigam e sos ijia karinva fok bu vierafe bu besum afuim e kafo kega bu For ko Banabas na ar Entiok ijia vakuai bu ijeg vierafen. Ijefuon bu uri Sairas ko Judas e iji bu kua Basabasno kuaivo iji ken. Regavo e nokarok (2) iji e God ma vierafejo iji bu bu akardiavo.
ACT 15:23 Bu ijegrene uri fas igi isoime miava bu abe vain. Regavo fas iji bu ijeg isoi, E afasor ijigam e sos ijiebuon e mamkanuk no efjon igi nor e Jius bakin iji God ma vierafejo bu mai Entiok ga moik Siria ga Sirisia ijia karinva iji anadiav.
ACT 15:24 No faiga enuvuon roin bu ijia useme ja arafiriame vuak kafo kuardiava jaka isediain. Regavo e iji bu vuainva iji bu nor kiavga bu ijegrekuai vuainva bakin.
ACT 15:25 Ijefuon no besum afuime vuak kuaime e roin kenvado buson jon vuak. Regavo e ma iji Banabas ko For gavo bu kaifnuvuon ma ijin. E iji bu koikbuon kege una E Bomana Jesu Kuraison ik reokuai renva ijieb vuak.
ACT 15:27 Ijefuon no e Judas ko Sairas kege uniaido bu buna vuak. Regavo bu vua ijia vuak fok bu kuardiakva iji bun izeg no fas igia isoinva bu iji abe kuardiak.
ACT 15:28 Ijegvo Godon Kaven Akai ijiga nok non koiknuvuon iganamido no ire ise kafo jon rekva bakin revo fun akaij ijesugin.
ACT 15:29 Regavo akaij iji ijeg duok ja god kafokafo vajiainva iji jab kege ik. Regavo fanuf iji bu uro musainva ijigam fanuf kavuan iji jab ik. Regavo madu barubara jab fudainamik. Regavo ja ire iji no kiavo iji agordiakva iji fuka marek. Fun ijin no ja anadiav.
ACT 15:30 Areme e vuak iji abe vakrejo iji bun vake ar Entiok ijia usem e fok God ma vierafejo iji aferdia besum afuime fas iji abe miain.
ACT 15:31 Bu abe miavga e fok bu fas iji abe da barme buka oimaren. Ijefuon maiji fas iji fuka bu ifejdiama buon ma vierafejo iji fuka gigikin ren.
ACT 15:32 Regavo Judas ko Sairas buk bu e Godon vuak vierafene kuaivo ijin. Ijefuon bun tavan jaoijaor Godon vuak iji abe e God ma vierafejo ijin kuardiame ejafiaknum daro miaoin.
ACT 15:33 Bu vuak iji kuardiaknum karivake e God ma vierafejo ijieb Judas ko Sairas anadiame kia, Ni Godna afuim kariofno kiavga bun una ebuon bu kiava bu vainva ijiebuon ruain.
ACT 15:35 Regavo For ko Banabas bu tavan ivuankbe bu mai Entiok ijia karine e fok ijiena besum E Bomana ijefuon vuak iji abe kuaivknum abe nijaidiaoin.
ACT 15:36 Areme For fun uri Banabas kua, Rono una mai fok no oknum E Bomana ijefuon vuak iji no abe kuardiaoinva ijia giame vaga bu izegrejo no iji giavno kuain.
ACT 15:37 Fu ijeg kuamga Banabas fun uri e Jon Mak afem buna vakafa vierafen revo For fu vierafega fuba maren. Ijefuon maiji e Jon Mak fuba buna fivake ik iji bu reoijo iji buin ijia kekoin revo fum ar Femfiria ijia magiame una ruainma ijefuon fu uzain.
ACT 15:39 Ijefuon Banabas ko For bu bui musikuaime bun unanamime vain. Regavo Banabas fun uri Jon Mak afem sisim abe ar Saifuras ijia vakga For fun e Sairas afem vakrega e God ma vierafejo bu kia, Ni Godon ma iji abe ofno kiain.
ACT 15:41 Bu ijeg kiavga bun va moik Siria ko Sirisia guf ijia vaknum Godon vuak iji abe kuardiaknum sos fok daro miame vain.
ACT 16:1 Areme For fun vake ar Debi ko Ristra ijia kekoin. Regavo e be God ma vierafeno be if fuon Timoti fu ijia fin. E iji asiefuon iji fuk fu God ma vierafeno revo fu bara Jius ga asoifuon fu Grik.
ACT 16:2 E God ma vierafejo iji ar Ristra ko Ikoniam karinva iji buka e Timoti dab nidoiv.
ACT 16:3 For fu Timoti afem fusik vakafa vierafene fu dab vajai surif fuon kana ufume anf abedain. Regavo iji fu renma ijefuon maiji e Jius fok ijia karinva iji bun vierafega Timotin asoij iji fu e Griko ijefuon fu ijeg ren.
ACT 16:4 Bu ijegrene mai ijia vaknum akai fok e sos ijiebuon e mamkanuk iji bu Jerusarem ijia karine kuainva iji abe e God ma vierafejo iji kuardiain. Bu ijegre barme kia, Ni akaij iji abe amarigia igafno kiain.
ACT 16:5 Bu ijeg kiavga e sos fok ijia karioinva iji bu buon izeg bu God ma vierafejo iji fuka daro uriga e uruvana bu tavan besubesum ijia una buna mazime God ma vierafen.
ACT 16:6 Bun vake moik Firgia ko Garesia guf ijia vako ijia Godon Kaven fu kia, Ja Godon vuak iji jab abe Esia vakno kiamga buba ijia vain.
ACT 16:7 Bun vake ar Misia buin ijia usem ar Bitinia vakrejga Jesuon Kaven Akai iji fu uzain.
ACT 16:8 Fu uzamga buka Misia ijia una arir ar Troas ijia vain.
ACT 16:9 Regavo For fu naki ijia nimamaime ga e Mesedoniako be fu ijia manine anaime kua, Ni ro Mesedonia ijia no ifejduomne kuain.
ACT 16:10 For fu ijeg nimamaime kuomga no uri Mesedonia vakuai sinuom nuvuon kanafuin. Ijefuon maiji no vierafe God fu no kumenma ijefuon noka va ijia usem vuak fuon ma iji abe e iji kuardiakuai no iji vierafen.
ACT 16:11 Areme non sisim abe ar Troas areme arir vake ar Samotras ijia usen. Regavo afarma non vake ar Neaforis ijia usen.
ACT 16:12 Areme ijia non saof iji areme una moik vake ar Firifai ijia usen. Regavo ar iji fu e Mesedoniako buon mai bomana iji bu e Romkob samuagdiavo no ijia usem naki sibank no ijia karin.
ACT 16:13 Regavo tavan iji bu isuar karijo ijia no mai iji are va do irif ijia oin. No vierafero ar iji e Jius bu ijia sirimamejo iji fu ijiaro no ijefuon ijia vain. No va gak bara kafo bu ijia afuim karijga no usem buna vuak kuain.
ACT 16:14 No buna vuak kuaivga bara be ijia fine vuak iji faimo if fuon Ridia fu ar Taiatairako gavo bara iji fu ugon ni mukor iji sigumon. Bara iji fu naikafare fu Godon sirimameno ijefuon E Bomana ijar nigen fuon samafredamga fu isuarigia fine For vuak iji fu kuaimon iji mukoi faim.
ACT 16:15 Fu vuak iji fine faimga bu uri fu ga aganfuon ke do ruardiavga fun no kuoma no ar fuon ijia vain. Fu kuo, Ja vierafega naiji nan E Bomana iji ma vierafega ni roga nana ar nun ijia karijno kuin. Fu ijeg kuome fuka no soisoima no ar fuon ijia vain.
ACT 16:16 Areme naki be no una ar iji bu sirimamejo ijia vakuai vakga bara be bu madu kimenva fu kaven ise ijar oifuon ijia arinma ijar keko bieduin. Regavo bara iji fu ire uruvana rad rekreno fu iji kuaimoinon. Fu ire rad rekreno iji abe e roin kuardiaknum mon uruvana karme efuon bu fu kimenva iji vajiam.
ACT 16:17 Bara ijar no Forna jajuo ruaknum kume, E iji bu God Bomana kaf gufi fino ijefuon ikredo bu iji ja God fu izeg karauniakfuon bu iji abe kuardiaoijno kumen.
ACT 16:18 Regavo bara iji fu tavan uruvana fu ijeg kumeno ijefuon For fuka ma isemga fu una dakaroime kaven ise iji kua, Na Jesu Kuraison if ijia kuavno ni bara iji areme keko vakne kuain. Fu ijeg kuamga kaven ise iji fuka tavan ijia bara iji areme keko vain.
ACT 16:19 Regavo e iji bu bara iji kimenva iji bu gak unam buon bu mon abejo iji bun bijuvga bu uri For ko Sairas kuniaime kam moik iritiame ai makaf e mamkanuk bu kot rejo ijia vain.
ACT 16:20 Bu aferdia va e mamkanuk iji bu kot faivo iji vajiame kia, E iji bu e Jius gavo bu mai nuvuon igia ire ise kafokafo rejno kiain.
ACT 16:21 Ijefuon maiji unam buon bu e uruvana nijaidiavo iji bu akai nuvuon iji jame nijaidiavo bano kiain.
ACT 16:22 Bu ijeg kuardiavga e uruvana bun uri For ko Sairas iremdakieme kaniakfuon kuain. Ijefuon e mamkanuk iji bun uri ugon bu sainva iji kam bujakordiame uri e iji kiava bu kam fijiain.
ACT 16:23 Bun kam unam ise ijia fijiame kege dibur uniame e dibur iji samuamo iji kuava fu dibur vien iji dab amarigia bijukuriain.
ACT 16:24 Bu ijeg kuavga e iji dibur samuamo iji fun For ko Sairas kam dibur ma guf ijia uniame uri diak buon roinroin kam in mug mamkanuk ijia kiriamdiain.
ACT 16:25 Fu ijegrene areko ve ufrenma ijia For ko Sairas bu Godon sirimameknum dua roko e diburko roin bu karine bu fadiav.
ACT 16:26 Bu karine fadiavo ijia migegare moik iji fu dab urakoga ar dibur iji fuka uruvana igia urain. Fu ijeg urako ar dibur vien uruvana buka azoiksako e diburko uruvana bu sen ke tomdiainva iji uruvana buka iras baren.
ACT 16:27 Regavo e iji dibur samuamo iji fu uri turanamime ga dibur vien uruvana buka azoga fu vierafero e diburko uruvana bun usem subinai vainvaro fu ijeg vierafen. Ijefuon fu uri kaki fuon iji darume abe koikfuon kananamikafa vierafen.
ACT 16:28 Fun koikfuon kananamikrega For fu uri uruvana igia kume, Ab koikon kananamik noiji no vek igijarno kumen.
ACT 16:29 Fu ijeg kumega e iji dibur samuamo iji fuka uruvana igia jume migegare ikuosaifuon kumene vo fun kukum aru tuame vake For ko Sairas bu irenva ijia dijen.
ACT 16:30 Areme fun aferdiame ai makaf ijia kekome kia, E mamkanuk gurie na irerag abekva God fu ise nun gieme arekno kiain?
ACT 16:31 Fu ijeg kiamga bu kua, A aganon uruvana ijiena Jesu E Bomana iji ma vierafekva God fu ise on game arekno kuain.
ACT 16:32 Bu ijeg kuardame E Bomana ijefuon vuak iji abe e uruvana ar fuon ijia karinva iji una kuardiain.
ACT 16:33 Regavo naki besum ijia e iji dibur samuamo iji fu uri do jiame matan buon somdiamga For ko Sairas bu uri fu abevo aganfuon uruvana kam Jesuon if ijia do ruardiain.
ACT 16:34 Areme fun For ko Sairas aferdiame ajie ar fuon ijia keko duok vajiama bu in. Regavo fu aganfuon ijiena buka oimaren ijefuon maiji bu iviakma bun God ma vierafen.
ACT 16:35 Areme afarma suok e mamkanuk kot samuavo iji bu ebuon juo karijo iji vuak nijiame kia, Ni e iji kia bu usem vakno kiain.
ACT 16:36 Bu vuak ijeg nijiavga e dibur samuamo iji fu For ijeg kuardain. Fu kua, E mamkanuk kot samuavo iji bu vuak nijiame kume a ko Sairas ni usem oimarvknum vafno kiain.
ACT 16:37 Fu ijeg kiamga For fu una e iji juo karijo iji kia, Noiji no e Romko gavo ise kafo noba ren revo bum no kam e uruvana ijiebuon nifak ijia fijuome kam dibur unuin. Regavo ivia bun isuarigia kuoga no usem vakuai bu iji vierafen revo noba rek. Ijefuon maiji no vierafe buka e mamkanuk kot samuavo ijieb koikbuon roke igia usem kuoga no ijar usem vakno kiain.
ACT 16:38 Bu ijeg kiavga e juo karijo iji bu vuak iji abe una vake e kot samuavo e mamkanuk iji kuardiain. Bu ijeg kuardiavga bu fai For ko Sairas bu e Romkoga buka juin.
ACT 16:39 Ijefuon bun va For ko Sairas kia, No isema renvano ni guome arefno kiain. Areme bun aferdia dibur iji are usem makaf ijia kia, Jaka mai igi areme vafno kiain.
ACT 16:40 Regavo For ko Sairas bun dibur iji areme bara Ridian ar ijia vain. Bu va ar ijia useme e God ma vierafejo iji kafo biediame uri vuak soisoigin e iji kuardiame bun mai iji areme usem vain.
ACT 17:1 For ko Sairas bun mai Firifai iji areme va ar Emfiforis ko Aforonia guf ijia usem vake mai Tesaronaika ijia usen. Regavo e Jiusbuon ar bu afuime vuak kuaivo iji be fu ijia manin.
ACT 17:2 Regavo For fun naikafar izeg fu reoino ijeg fun ar iji e Jius bu afuime vuak kuaivo ijia vain. Regavo tavan nokbek (3) iji e Jius bu isuar karijo ijia For fun e ijiena besum Godon vuak bu usuibe isoinva iji abe kuardiaknum amarigia nijaidiain. Fu ijeg nijaidiamga bu vuak iji faime vierafero e iji God fu kuama fu ari ruainma iji fu igia nuvuifuon vajai fian abe guamevo una urinmaro bu ijeg vierafen. For fu ijeg kuardiaknum madu kia, E iji Jesu na fuisina kuardiavo iji fu ma e iji God fu kuama fu ari ruainma ijino kiain.
ACT 17:4 Fu ijeg kiama e roin bu ma vierafene una For ko Sairasna rekoga vo madu e Griko uruvana Godon sirimamejo ijigam barak mamkanuk iji buk bu buon ruain.
ACT 17:5 Regavo e Jius bu giak e uruvana buka For ko Sairasbuon unam bu rejo iji jajiavga buka zieme uri e ise roin aferdiame kiava bu besum afuime For ko Sairas kaniakfuon kuain. Bu ijegrejga e uruvana mai ijia karinva iji bu vuak iji dab kuaime deajir aben. Ijefuon bun usem Jesonon ar ijia aru For ko Sairas nisaidiaiga bu ijia karijga bu aferdia usem e uruvana ijiebuon ruakuai ijeg ren.
ACT 17:6 Bu ijegrene gak For ko Sairas buba karijga bu uri Jeson ko e God ma vierafejo roin kam iritdiame mai e mamkanuk bu karinva ijia vain. Bu ijia usem kume, E iji bu ar uruvana igia ire ise reoij gavo iviakma bu mai nuvuon igia rokga e Jesonri aferdiame ar fuon ijia uniain. E iji buka e Romkobuon Kin ijefuon akaij iji dab tuaseme kuai, E Kin be madu if fuon Jesuno kuaiv.
ACT 17:8 Bu ijeg kuaivga e uruvana abevo e mai ijiebuon e mamkanuk iji buka deajidiamga bu uri Jeson ko e roin iji kia, Ja iviakma mon igi no kiavo ja iji vajuokva no kiaga ja vakno kiain.
ACT 17:10 Ijegrene fun ve nakimga e God ma vierafejo iji bun For ko Sairas kiava bun ar Beria ijia vain. Bu vake Beria usem nausem e Jiusbuon ar bu afuime vuak kuaivo ijia vain.
ACT 17:11 Regavo e Beriako iji bu e Tesaronaika bu rejo ijekin bakin gavo bu ijegrejo buka e nigen mado bu Godon vuak iji faikuai vierafen. Ijefuon buka uruvana oimarvknum vuak iji faivknum naoikafare buka Godon vuak iji bu usuibe isoinva iji amarigia dav. Bu ijeg dame gaga For vuak iji fu kuardiamo iji fun ma kuardiamga bu iji gakuai bu ijeg ren.
ACT 17:12 Regavo e uruvana buka God ma vierafen revo madu efarif Griko iji abevo bara Griko makin iji buk buka ma vierafen.
ACT 17:13 Regavo e Jius ar Tesaronaika ijia karinva iji bu fai For fu Godon vuak iji abe e Beriako nijaidiama bu faime ro gumia usem e ijiebuon oij iji kam arafiriame vuak soisoigin ijia kuardiava buka oisema vierafen.
ACT 17:14 Bu ijegrejga e God ma vierafejo ijieb migegareigia uri For kuava fun ar saof irif ijia vakga Sairas ko Timoti bu ar Beria ijia karin.
ACT 17:15 E iji bu For afem vako iji bu vake ar Atens ijia usem For abe ijia uname una Beria ruakrejga For fu kia, Vaga Sairas ko Timoti kia bu migegare na jajie ruafno kiain.
ACT 17:16 For fu vek ar Atens ijia fine Sairas ko Timoti samuagdiamo ijia fu gak mai iji fuka ire kafokafo bu mun ijia amardiainva ijiebuon sirimamejo fu iji giama fuka oifiain.
ACT 17:17 Ijefuon fu va e Jiusbuon ar bu afuime vuak kuaivo ijia arume e Jius bakin iji abevo e Jius iji bu God ma vierafejo iji vuak gigikin kuardiain. Regavo tavan uruvana fu va ai makaf iji e bu bienamime vuak kuaivo ijia e iji bu ijia roko ijiena vuak kuaimoin.
ACT 17:18 Regavo e vuak nijaidiavo roin bu kia Efikurien kiavo ijigam roin bu kia Stoikno kiavo iji bu usem Forna vuak gigikin kuain. E roin bu kuai, E buzer guraiji aroikaramo iji fu irerafuon vuak ijeg kuaimno kuain. Regavo roin bu kuai, Kafu e ai kafobuon god ijiebuon kuaimno kuain. Bu ijeg kuainva ijefuon maiji For fu Jesusina kuaiknum izeg fu guame una urinma ijefuon kuaimga bu iji ijeg kuain.
ACT 17:19 Areme bu uri For afem va ar be bu kua Erofegasno kuavo ijia usem kua, No vierafe a vuak iviamkor iji a e uruvana kuardiamo ijefuon maiji no kuarduok.
ACT 17:20 No faiga vuak kafo a kuarduomo iji fuka iviamkor no amur vuak ijekin kafo noba fain. Ijefuon no vierafe a vuak ijiebuon maiji kuarduo no faikno kuain.
ACT 17:21 Regavo e ar Atensko ijigam e ar kafoko iji bu buna mai ijia karinva iji tavan uruvana buka oknum vuak iviamkor iji abe kuaivknum fainamioin.
ACT 17:22 For fu uri e iji bu ar Erofegas ijia ar afuime vuak kuaivo ijia uri manine kia, E ar Atensko igi na giaga ja unam uruvana ja god kafokafo ijiebuon ja sirimamejo iji jaka rubdiavo bakin.
ACT 17:23 Regavo na mai jon guf ijia aru oknum ar uruvana ja god jon sirimamejo ijia na giaga fata be ja isuf baroijo ijefuon buin ijia ja vuak kafo God be jaba gainva ijefuon isoin. Regavo iji ja fuon sirimamejo iji jaba gain revo iviakma nar ja kuardiakrej.
ACT 17:24 God igi moik fok amarme ire fok amardiame ke guf ijia nainma iji fu varur gufeko moik igiebuon E Bomana gavo fuba ar kafo bu fuon sirimamekuai savo fu ijia aru fino.
ACT 17:25 Regavo fu ema ijieb ire kafo fu oimaikfuon iji ke fu vajakfuon iji fuba vierafen. Regavo fum koikfuon fine ire fok fu moikigia nainma iji fuka mukoi samuagdiame ire iji bu oirufoijknum nivek karikfuon iji abe miain.
ACT 17:26 Regavo fu e besum abe amarmga e kafokafo moikigia karinva iji bu fuon uinve ruain. Regavo fun koikfuon vierafega tavan ivez moik be fu una moik kafo samuagdiavo bu karine izia durekfuon iji fun vierafene ijeg amaren.
ACT 17:27 Fu ijeg amarega bu uri fu gakuai nisaik. Regavo fu aibe ijia oino bakin gavo fuka no samaij ijia oin.
ACT 17:28 Regavo e be fu kuainma fu ijeg kuai, No daro fuon ijia kariknum oij. Regavo ejon bu suar vierafene kuainva iji bu kuai, Nok no afijaf kuaiv.
ACT 17:29 Regavo jan Godon afijaf renva ijefuon jab vierafero ema kafo bu aresredo bu ire gord ga sirva ga mun ijia kege God ma iji amarekro jab ijeg vierafek.
ACT 17:30 Usuibe e uruvana buba Godon ma iji gainva ijefuon bu isema reoijor fuba ke arafiriakafa vierafeno bakin. Regavo iviakma fun e fok karioinva iji kiamga bu unam ise iji bu reoijo iji areme una oi karoime unam ma ijia karioin.
ACT 17:31 Regavo fu tavan iji fu fine e uruvana ijiebuon ise iji ke mazim giame e ma iji ke kafo uniakfuon iji fun abeden. Regavo no vierafe vuak iji God fu kuainma iji fu rekfuon. Ijefuon maiji e iji fu fine e uruvana ijiebuon ise iji ke mazim giakfuon iji fun guamga God fu keunama fu una urina non gain.
ACT 17:32 Regavo tavan ijia For fu vuak iji aoime una urijo iji kuaimga e roin bu faime uri fu dab varaimen. Regavo e roin bu kuai, No vierafe a vuak iji tavan be una kuarduo no faivno kuain.
ACT 17:33 Bu ijeg kuavga For fu vuak iji bu kuaivo iji fu areme vain.
ACT 17:34 Regavo efarif roin bu funa rene una God ma vierafen revo e be iji if fuon Daionaisius e Erofegas ijia vuak kuainma ijin. Regavo bara be if fuon Damaris fu God ma vierafeko e roin buk God ma vierafen.
ACT 18:1 Areme For fun mai Atens areme una mai Korint ijia vain.
ACT 18:2 Fu ijia kekome e Jius be bu kua Akuirano kuavo ijiga bara fuon Frisira iji biediain. E Akuira bu mai Fontas ijia nafen rega fu iviakma fu ar Itari areme ruain. Ijefuon maiji E Itaribuon Kin Krodiasri e Jius uruvana ar Rom guf ijia karinva iji fuka kuriairme rotkuriain. Fu kia, Ni uri vafno kiamga Akuira fu ijefuon barafuok uri ar Korint ijia ruain.
ACT 18:3 Regavo For fu tavan bog fu fanuf surif sigume e bu kimejo fu mon ijia abe fuon samuanamiknum fioin. Regavo madu no barakin iji buk bu ijegrejo ijefuon fu va ijia buna fiknum fanuf surif siguko e bu kimej.
ACT 18:4 Regavo For tavan uruvana fuka tavan iji bu isuar karijo ijia va e Jiusbuon ar bu afuime vuak kuaivo ijia vuak kuardiam. Fu vierafe fu e Jius ijiga e Jius bakin ijin oibuon iji kam karoga bu vuak fuon iji faime abekuai fu ijefuon ijeg ren.
ACT 18:5 Areme e Sairas ko Timoti bun ar Mesedonia ijia uri roke ar Korint ijia usega For fuka tavan uruvana e Jius ijin vuak mukorigia nijaidiam. Fu nijaidiame kia, E Jesu fu e iji fu ruakno kuainma iji ja kua Mesaiano kuavo ijino kiain.
ACT 18:6 Regavo buka uri fu uzame vuak ise kuardavga fu uri ugon fuon kafut iji kanaseknum kia, Ja oine ire ise kafo bu ajiediakva ni vierafero jan koikjo isema renvaro ja ijeg vierafekfuon. Na Godon vuak ma iji nan kuardiain rega jaba fain. Ijefuon ivia nan uri una e Jius bakin iji nijaidiak vakno kiain.
ACT 18:7 Ijefuon fun bu areme uri e Taitas Jastasno kuavo ijefuon ar ijia vain. Regavo e Taitas fu God mukoi vierafeno rega ar fuon iji fu e Jiusbuon ar bu afuim vuak kuaivo iji samaij ijia manin.
ACT 18:8 Regavo Krisfas fu ar e Jius bu afuime vuak kuaivo iji samuamon. E iji fu Jesuon vuak For fu abe kuardiamo iji faime fuka aganfuon ijiena Jesu ma vierafen. Regavo e kafo mai Korint ijia karinva iji bu vuak iji faime ma vierafejga bu aferdia Jesuon if ijia do ruardiain.
ACT 18:9 Regavo naki be For fu nimamaime gak God fu kua, Ni vuak iji a kuardiamo iji ab jume arekgavo nika giriesa magaga kuardiamne.
ACT 18:10 Naiji na osik ijefuon fu erar a isema rekma bakin ijefuon maiji e roin mai Korint ijia karinva iji bu e nuno kuain.
ACT 18:11 Fu ijeg kuamga For fu Godon vuak iji abe e iji ijia karinva iji nijaidia vake juaivasia besum ga be (1 1/2) iji uf ijia kekoin.
ACT 18:12 Regavo tavan iji e Romko bu e Gario abeja fu e iji moik Akaia karinva iji samuagdiamo ijia e Jius roin bu besum afuim For afem kot rekuai ruain.
ACT 18:13 Bu useme e bomana Gario kua, For fu no soisoime kuo jaka unam nuvuon iji no Godon sirimamejo ijia jajuofno kuom rega no vierafe vuak ijeg fu kuaimon iji fuka akai nuvuon abe tuasemno kuain.
ACT 18:14 Regavo For fu ik kuardiakreno ijia Gario fu uri e Jius iji kia, Na vierafe unam iji fu Fori isema rebatie nason igia jana fine vuak iji kuaik. Regavo unam iji fu vuak jon ja kuaivo ijigam if ijigam akai jon ijefuon ni koikjo kuaim amaref. Na unam iji naba fine faikno kiame fun uri e iji kiamga bu kot iji areme usem ar makaf ijia vain.
ACT 18:17 Bu usem e Sostenes e iji sos iji samuamo iji kunaime dab ar iji bu kot rejo vien ijia kanain. Regavo e Gario fu giaga fuba bijukuriain.
ACT 18:18 For fu vek ar Korint ijia e God ma vierafejo ijiena naki uruvana buna fivake are fu e iji areme uri Firisra ko e Akuirana sisim abe ar Siria ijia vain. For fu ar Siria ijia vakreno ijia fu ar Senetria ijia uri Godon if ijia kurame kiamga bu nigen jau fuon iji ufudain.
ACT 18:19 Areme bu roke ar Efisis ijia usem For fun bara Firisra ko e Akuira ijin ijia uniame fun va e Jiusbuon ar bu afuime vuak kuaivo ijia vain. Fu va ijia kekome buna vuak amarigia dasume kuaimga bu kua, A nika naki uruvana igia nona fine kuain. Bu ijeg kuava fuba igiain revo fu vakafa uri kia, Godri na kiekma na una giak ruakno kiain. Areme fun sisim abe ar Efisis areme vain.
ACT 18:22 For fun va ar Sesaria ijia keko nankek Jerusarem vain. Fu va ijia keko e sos ijia karinva ijin anadiame fun asidiame mai Entiok ijia vain.
ACT 18:23 Areme fun tavan ukakbe Entiok ijia fine fun uri moik Garesia ko Frigia ijia vain. Fun va ijia oknum e iji God ma vierafejo ijin Godon vuak nijaidiaknum ifejdiako bu daro aben.
ACT 18:24 Regavo e Jius be if fuon Aforas bu ar Areksedria ijia nafenva ijar ar Efisis ijia ruain. Regavo e iji fuka Godon vuak iji bu usuibe isoinva iji fuka mukoi kuaiknum vierafeno.
ACT 18:25 Regavo madu fu E Bomana ijefuon unam uruvana bun nijain. Ijefuon fu Jesuon vuak iji fu mukoi kuaiknum vierafeno. Regavo vuak iji fu amarigia fainma bakin rega fum e Jon e do ruardiamo fu Jesuon kuainma fu ijesugin fain.
ACT 18:26 Ijefuon fu keko e Jiusbuon ar bu afuime vuak kuaivo ijia aru darokma kuardiain. Ijefuon e Akuira ko bara Firisira bu vuak iji faime usem fu afeme va ar buon ijia usem Godon unam iji amarigia nijain.
ACT 18:27 Regavo e Aforas fun ar Gris ijia vakafa vierafen ijefuon e God ma vierafejo ar Efisis ijia karinva iji bu fas isoin. Bu fas isoime uviaifijaf ar Gris karinva iji nijiame kia, Ni e Aforas oimarvknum afefno kiain. Ijefuon Aforas fun va ijia kekome e izeg God fu bu ma rediame ifejdiamga bu Jesu mukoi vierafenva iji ifejdiain. Ijefuon maiji fu e uruvana ijiebuon nifak ijia vuak gigikin kuaiknum e Jius ijiebuon vuak iji fuka kaniatuam. Fu ijegrenki fuka Godon vuak iji bu usuibe isoinva ijia dame nijaidiame kia, Jesu fu ma e iji God fu kuamga fu ruakno kuainma ijino kiain.
ACT 19:1 Ijegrene Aforas fu vek mai Korint ijia fiko For fu moik Frigia guf ijia urame vake mai Efisis ijia kekoin. Fu ijia kekome e Jesuon vuak faivo iji biediame kia, Ja tavan iji ja Jesu ma vierafenva ijia jabe Godon Kaven abenvano kiain? Fu ijeg kiamga bu kua, No Godon Kaven iji noba vierafenvano kuain.
ACT 19:3 Ijefuon For fu uri kia, Regavo bu do iji bu izeg ruardiainvano kiamga bu kua, No Jon fu do ruarduinma bu ijeg ruarduinmano kuain.
ACT 19:4 Bu ijeg kuavga For fu uri kia, Jon e iji fu aferdia do ruardiainma iji buka ise buon bu rejo iji bun arenva fu ijin kege do ruardain. Fu ruardiaknum kia, Ni e iji rad roko iji ma vierafefno kiain. Regavo e iji fu kuardiainma iji fu Jesuno kiain.
ACT 19:5 Areme e iji bun vuak iji faime ma vierafejga For fu aferdiame Jesuon if ijia do ruardiain. Areme fun imut nigen namdiamga Godon Kaven Akai iji fu buon rokga buka uri isama kafo buba vierafenva ijia vuak kuain. Bu ijegrejknum uri Godon vuak iji dab e roin kuardiame nijaidiain. Regavo e iji bu e tuer (12) ijieb ijeg ren.
ACT 19:8 Ijegrene For fun asam nokbek (3) ijeg fu e Jiusbuon ar bu afuime vuak kuaivo ijia aru vuak darokma nijaidiain. Fu aru e iji ijia karinva ijin vuak ma iji God fu izeg efuon ijiebuon oij iji fu samuagdiamo ijin amarigia dasume kuardiaknum nijaidiain.
ACT 19:9 Regavo e roin buka ma gigikin ijefuon buba ma vierafen revo bu uri e uruvana nifak ijia Jesuon unam iviamkor ijefuon vuak ise kuain. Bu ijegrejga For fu uri ijia areme uri e Jesuon vuak faivo iji aferdia funa vain. Regavo tavan uruvana fu ar be bu kua Tairinasno kuavo bu ijia vuak kuaivo ijia arume buna vuak kuaim amaren.
ACT 19:10 Bu ijegrevake juaivasia nokarok (3) barko e Jius abevo e Jius bakin iji mai Esia guf ijia karinva iji bu E Bomana ijefuon vuak iji fain.
ACT 19:11 Regavo tavan ijia God fu For dab ninarume ire sumakin kafo reoin.
ACT 19:12 Regavo madu Foron ages ijiga ugon ukak fu kege oinon iji fu kege e adagin ijiebuon vako adam buon iji buka barem. Regavo madu kaven ise iji buka e iji areme usem vak.
ACT 19:13 Regavo e Jius kafo bu ijia oijo iji buk bu E Bomana ijefuon if ijia oknum kaven ise iji kiaga bu usem vak. Bu kaven ise iji kia, No Jesu e iji For fu kuaimoino ijefuon if ijia kiavno usem vafno kiain.
ACT 19:14 E iji bu e Skiva e Jiusbuon e ikin fu Godon isuf baroino ijefuon afijaf seven (7) ijieb ijeg ren.
ACT 19:15 Bu ijegrejga kaven ise iji fu kia, Na Jesu ko For iji nan vierafen revo jaiji ja eranebno kiain?
ACT 19:16 Areme e iji kaven ise ijar niroinma iji fu uri e iji rareme kania kam arafiriama bu mataigma subinaim detabar vain.
ACT 19:17 E uruvana Jius abevo e Jius bakin mai Efisis ijia karinva iji bu vuak iji faiva buka dejufdiama bu uri E Bomana Jesuon if iji abe aroin.
ACT 19:18 Areme e uruvana bun ro e nifak ijia usem ise bu reoijo iji visume God kuardain.
ACT 19:19 E uruvana bu e siga bijiaknum e masifdiavo ijieb buk uruvana karme ro e uruvana nifak ijia mian jain. Bu mon iji bu kege buk uruvana kimenva iji da vake giak fuka mon ka ma bomana fifti taosen (50,000).
ACT 19:20 Bu unam darokin ijin rejga e bu uri E Bomana ijefuon vuak iji dab ar iror ijia darodarokin kuaime bomana rene vain.
ACT 19:21 Bu ijegrene For fu vierafero fu va moik Mesedonia ko Gris guf ijia keko nakek Jerusarem vakafa vierafen. Fu ijeg vierafene kuai, Na va garia kekokva naka ar Rom gak vakno kuain.
ACT 19:22 Ijefuon fu e fu ifejdavo nokarok (2) Timoti ko Erastas kiama bu Mesedonia vakga fu tavan uruvana fu moik Esia guf ijia oin.
ACT 19:23 Tavan ijia mai Efisis ijia e bu E Bomana ijefuon unam iviamkor ijin gava buka bomana deajidiain.
ACT 19:24 Regavo e be if fuon Dimitriasno kuavo iji fu ire sirva ijia kege ire kafokafo amardiamon. Regavo ire iji fu amardiamo iji fu god be bu kua Atemisno kuavo ijefuon ar bu fu sirimamejo ijekin ukakna iji imut fuon ijia amardiamon.
ACT 19:25 Ijefuon fu efuon ik rejo uruvana abevo e kafo ik ijekin rejo ijin kumena bu besum afuin. Bu afuivga fu uri kia, E gurie ik igi no rejo iji noka mon mukor amarvo iji jan vierafen.
ACT 19:26 Regavo iviakma jan koikjo e iji bu kua Forno kuavo iji irerag fu reno iji jan faivknum gain. Fu kuai god iji bu e imut ijia amardiainva iji bu god ma bano kuaim. E iji fuka ijegreoijknum e uruvana biesiako e Efisisko igi abevo e moik Esia guf ijia karinva uruvana buka una vuak fuon abej.
ACT 19:27 Fu ijegredo rad ik igi no rejo iji fuka iserek. Regavo be iji na vierafega rad ar god Atemis fu fino iji madu fuka ma bakrek. Revo fuon izeg fu bomana renma iji fuka iserek. Regavo god iji bu e uruvana Esia karinva iji abevo e moik uruvana igia karinva iji bu fuon sirimamejno kiain.
ACT 19:28 Fu ijeg kuardiamga e uruvana bu vuak iji faiva buka deajidiamga bu uri kume, Efisison god nuvuon Atemis iji fuka bomanano kumen.
ACT 19:29 Bu ijeg kumejga e uruvana mai guf ijia karinva iji bu uri e iji ifejdiain. Regavo e iji zienva iji bu uri e Gaias ko Aristakas e Mesedoniako e nokarok (2) iji bu Forna oijo ijin kam iritdiame ar e uruvana mai guf ijia karinva bu afuivo ijia vain.
ACT 19:30 Regavo For fu vierafe fuka e uruvana bu afuinva ijia vuak kuardia vakafa vierafen revo e iji God ma vierafejo ijieb fu kuriairen.
ACT 19:31 Regavo madu kaifon roin bu e mamkanuk rene mai iji samuavo roin buk bu For vuak nijame kume, Ab e uruvana bu afuinva ijia vakno kumen.
ACT 19:32 Regavo e uruvana bu afuinva iji buka irovajavo ijefuon vuak bu kuaivo iji buka fainamivo bakin. E roin bu uri vuak kafo kuaiko roin bu uri vuak kafo kuaiv. Regavo bu irerafuon bu ijia besum afuinva ijefuon maiji buka ba vierafen.
ACT 19:33 Areme e Jius iji bun uri e Arekseda kuava fun e uruvana ijia afuinva ijiebuon nifak ijia manin. Fu ijia maniga e roin bu game vierafero kafu ire be renmaro bu uri vuak nijaime kuardain. Bu ijeg kumejga Arekseda fun uri imut ijia bijume vuak iji izeg fu ba isema renma ijin kuardiakafa urin.
ACT 19:34 Fu uriga e uruvana bu ga fuiji fu e Jius game bu uri besum afuime kume, No vierafe igia Efisis god nuvuon bomana iji Atemisno kumen. Bu tavan jaoijmana ijeg kume vake son ijia aren.
ACT 19:35 Areme mai ijefuon e bomana ijar e uruvana kiama bu ijia areme una isuar karin. Bu isuar kariko fu uri kia, E Efisisko igi e uruvana ar iror ijia bun vierafen. Fun Efisis mai ijar god nuvuon Atemis e bomana ijefuon ar ijigam mun kuriai iji kaf gufia kobari ruainma ijin samuamo.
ACT 19:36 Ijefuon fu erar vuak kufui buisina kuaikma bakin. Ijefuon nika oij asume jab una ire ise kafo rek.
ACT 19:37 Regavo e igi ja aferdia ruainva iji buba ire kafo god Atemison ar ijia kareknum vuak ise kafo god nuvuon ijefuon kuaik.
ACT 19:38 Regavo e Dimitrias ga e iji fuon ik rejo iji bu vierafega e kafo bu isemarekva ni kia bu tavan iji e mamkanuk bu kot faivo ijia aferdia vaga bu kot rek.
ACT 19:39 Regavo ire kafo bu ka mamkanukga ja ijarson e ar Efisisko uruvana bu afuiga ja ijia kuaik.
ACT 19:40 Regavo ivia igi no renva iji e mamkanuk Rom karinva iji bu faikva bu vierafekuai nom nor nuvuon bijainvaro bu ijeg vierafek. Ijefuon e mamkanuk iji bu kuo, Ja irerafuon bijaiknum irovajavno kuokva no izeg kuardiak.
ACT 19:41 Fu ijeg kuardiame vuak iji bu kuaivo iji fun ijia baren.
ACT 20:1 E uruvana bu vuakmame deajir abejo iji bun areme una oij asusavga For fu ijia uri e God ma vierafejo iji kumena bu besum afuin. Bu afuivga fu uri ejafiame vuak soisoigin ijia kuardiame anadiame fun uri ar Mesedonia ijia vain.
ACT 20:2 Fu va moik guf ijia oknum e uruvana ejafiame vuak soisoigin kuardiame roke moik Gris ijia kekoin.
ACT 20:3 Fu ijia kekome asam nokbek (3) fu ijia fin. Fu ijia fine are fun uri ar Siria vakafa sinuom kanaufuin. Fu ijegreno ijia fu faik e Jius iji bu fu kanakuai kuaivga fun ijia areme una Mesedonia vakafa vierafen.
ACT 20:4 Areme e Fairuson farif Sofata kuavo e Beriako iji fun fusik vain. Regavo e uruvana buk bu funa vain gavo e iji funa vainva ijiebuon if iji ijeg. E Tesaronaikako nokarok (2) e Aristas ko Sekudas ga e Gaias Debiko ijigam e Timoti ga Taikikas ko Torofimas e moik Esiako ijieb funa vain.
ACT 20:5 E uruvana bu Forna vainva iji bun amur vake ar Troas ijia no samuagduome karin. Regavo noiji no ar Firifai ijia bu Bred Iriaikin Ist Bakin ijefuon iro no ijin ine naki imut roin (5) barekoga no ijiason jajiain. No sisim abe vake Troas ijia usem e iji biediame buna vuik besum (1) no ijia karin.
ACT 20:7 Regavo Satade nakifuon ijia no besum afuime kari duok iko For fu ijia uri e uruvana vuak kuardiain. Fu suok fun vak ijefuon fu e iji vuak kuardiame vake fuka ve ufren.
ACT 20:8 Regavo ar guf kaf iji no afuinva iji buka rait uruvana ijia sanav. Regavo e iviam urino be if fuon Iutikas fu iken tit bu titoinva ijia fine For vuak iji fu kuaimon iji faim. Fu ijia fine vuak iji faim vake fun nitubaime ni naimga fu ar kaf iji no karinva ijia ari kanama fu ari roke moik gumia dijen. Fu dijemga e roin bu uri imut kega fun guain.
ACT 20:10 Rega For fu ari vake gamia kekome tuame azan fuon ijia dijeme fu kunaim game kia, E igi fuiba guainmano jab vierafekno kiain.
ACT 20:11 Fu ijeg kiame fun una ajie kaf gafia keko bred abe tuame in. For fu e ijiena vuak kuaim vake tavan keknamga fun uri bu uniame vain.
ACT 20:12 Fun vako e iji bun uri e iji ari kanainma iji afem va ar fuon ijia oimarvknum samuagdain.
ACT 20:13 Areme non Asos vakrejo ijia For fu kuo, Jani amur sisim abe va Asos ijia na biedieme aferdiefno kiame fun diak vain. Fun vako no sisim abe vake Asos ijia For bien.
ACT 20:14 Areme non fu afeme sisim abe vake ar Mitirin ijia usen.
ACT 20:15 No ijia usem madu vake afarma no ar Kios ijia usen. Regavo naki besum (1) barko no vake ar Samos useme afarma non va ar Miritas ijia usen.
ACT 20:16 For fuba ar Efisis ijia vainma ijefuon maiji fu vierafero fu tavan uruvana fuba ar Esia guf ijia okro fu ijeg vierafene fu ar Efisis asim vain. Regavo fu vierafe fuka migegare va Jerusarem ijia kekokafa fu ijeg vierafen. Ijefuon maiji fu tavan iji bu kua Fentikosno kuavo ijefuon tavan ijia fu buna rekafa vierafen.
ACT 20:17 Areme For fun ar Miritas ijia fine vuak e Efisisko iji nijiame kia, E sos ijiebuon e mamkanuk iji bu ro fu gafno kiain.
ACT 20:18 Fun ijeg kiamga e iji bun rokga fu uri ijeg kuardiain. Fu kia, Amur na ar Esia guf ijia ruainva ijia na izeg jana oinva iji jan vierafen.
ACT 20:19 Na E Bomana ijefuon ikrejo naba aroikarain. Regavo ik nun na reoinva ijia ire ise uruvana bu nafak reja naka vajai fian abeknum niraimoin. Ijefuon maiji e Jius ijieb isuar na kaniekuai kuaimoinva ijefuon na ijeg reoin.
ACT 20:20 Regavo jan vierafe na vuak ma kafo ja karekfuon iji naba fen. Regavo naka vua ar jon ijia vuak nijaidiaknum e uruvana bu afuivo na ijia vuak kuardiaoin.
ACT 20:21 Regavo e Jius iji abevo e Jius bakin iji madu nan vuak gigikin kuardiain. Na kia, Ni ise jon ja reoijo iji aregavo una oi karoime Godon ruaknum E Bomana nuvuon Jesu ma vierafefno kiain.
ACT 20:22 Ijefuon ivia nan Godon Kaven Akai iji igame nan Jerusarem vakvej revo na ijia vakva irerag be na fak rekfuon iji naba vierafen.
ACT 20:23 Godon Kaven Akai iji na fun kuardiema nan vierafen. Na mai uruvana ijia okva ire ise uruvana bu na fak rejknum e iji bu na abe dibur uniekva iji nan vierafen.
ACT 20:24 Regavo na vierafega naba koiknu vajai nun bomana vierafek. Na vierafega na ik nun E Bomana Jesu fu miema na ruainva iji re barek. Ik iji fu mienma iji fu kie, Ni vuak ma iji God fu fuon izeg fu ma rediamo ijia fu e uruvana karauniamo iji kuardiamne kien.
ACT 20:25 Nan jana oknum vuak uruvana izeg God fu efuon ijiebuon oij iji samuagdiamo ijefuon vuak iji nan kuardiain. Regavo iviakma na vierafega e uruvana ja na jaba una giek.
ACT 20:26 Ijefuon ivia na vuak gigikin igi kuardiakrej ja God ijia arekva iji na nar isema rejo bakin. Ijefuon maiji na Godon vierafe uruvana nan kuardiame baren.
ACT 20:28 Ijefuon ni koikjo samuanamiknum ga ni e iji fu Godon Kaven kege ja uniafdiainma iji mukoi samuagdaf. Regavo e iji Godon farif Jesu fu kavuan fuon ijia bu kimenma iji bu sos ijia karinva iji mukoi samuagdiaf.
ACT 20:29 Regavo na vierafega na vake rad e ka ma ise kafo bu ro jana oknum unam jon iji bur kam arafiriak.
ACT 20:30 Regavo tavan ruakma e kafo ijia jana oijo iji buka una ja biesiame vuak kufui kuardiaga e God ma vierafejo uruvana ja una bu jajia vak.
ACT 20:31 Ijefuon ni amarigia samuanamiknum izeg na juaivasia nokbek (3) igia nakikmazak vajai fian abeknum ja nijaidiainva iji vierafef.
ACT 20:32 Regavo iviakma ja nan kege una Godon imut tat ijia uniaido ja vuak fuon ma iji abekva ja mukoi karikfuon. Regavo fur izeg fu e fuon uruvana iji ma rediainma ijeg fu ja ifejdiame ma rediake ja kariok.
ACT 20:33 Regavo na e kafobuon sirva ga gord ga ugon buon iji naba karekafie vierafej.
ACT 20:34 Regavo jan gien na ire uruvana na ga e uruvana nana oijo iji bu vierafenva iji uruvana nan nar koiknu imut nun igia ik rene mon abe ire iji kege vajiain.
ACT 20:35 Vuak uruvana nan naikafar kuardiavo jan fain ijefuon maiji no giriesame ikrekva no e iji adagin iji ifejdiak revo E Bomana Jesuon vuak fu kuainma iji noba rubduok. Regavo vuak iji fu ijeg kuai, No ire kafo e kafo vajiakva noka bomana oimarek revo e kafob ire kafo vajuokva noba ijefuon bomana oimarvno kuain.
ACT 20:36 For fu vuak ijin kuardia barme fun buna ato same sirimamen. E uruvana bu fu game niraiknum fu abe anaime uimin. Revo e uruvana buka oifiadiain ijefuon maiji fu kia, Naba una giakno kiainma ijefuon buka oifiadiain. Areme bun funa sisim iji namo ijia vain.
ACT 21:1 Areme non anadiame bu uniakome non sisim abe roke ar Kos ijia usen. Rega afarma non vake ar Rodes ijia usem nanusem vake ar Fatara ijia usen.
ACT 21:2 Regavo Fatara ijia no ga sisim be fu ar Fonisia ijia vakrega no sisim ijia ajieme vain.
ACT 21:3 No vaknum ar Saifuras no ij aizinan nak gavknum asime vake ar Siria ijia usen. Areme non nanusem vake ar Taia ijia usen revo sisim iji no kegduo vako iji fun ijia sinuom roin kara nakrega no ijia arin.
ACT 21:4 No ijia arime e God ma vierafejo iji kafo biediame non buna ijia naki sibank karin. Regavo e iji bun Godon Kaven Akai ijar kuardiame nijaidiainma ijefuon bu For kua, Ab ar Jerusarem ijia vakno kuain.
ACT 21:5 Regavo noba ijia buna uruvana karikuai vierafenva ijefuon non bu uniame vain. No vako e uruvana bun agbara buon ijiena mai buon iji areme nona vake saof irif ijia usem jier azan ijia ato same sirimamen.
ACT 21:6 No sirimamene bare non nuvuon ananamime non sisim ijia ajieme vako e iji bun una ar buon ijia vain.
ACT 21:7 Non sisim abe ar Taia iji areme vake ar Toremais ijia usem e God ma vierafejo kafo biediame anadiame buna ijia naki besum karin.
ACT 21:8 Areme afarma non vake ar Sesaria ijia usem non vake e be Godon vuak ma iji mukoi vierafeno e Firifon ar ijia usem funa karin. Regavo Jerusarem ijia bu e seven (7) ijeg ke uniain gavo e be iji Firif.
ACT 21:9 Fu kabaifijaf nokarok ga nokarok (4) buba baru ren gavo buka Godon vuak iji mukoi vierafejo.
ACT 21:10 No buna ijia naki sibank karijga e Godon vuak vierafene kuaimon be e Agabas kuavo iji fu ar Judia ijia uri no guokafa ruain.
ACT 21:11 Fu roke no karinva ijia kekome uri Foron biret iji dab Foron diak ga imut fuon kam toin. Fu ijegrene uri kuo, Godon Kaven Akai iji fu na ijeg kie, E biret igefuon asoij iji bu e Jius iji ar Jerusarem karinva ijieb fu bu dab ijeg tome abe e Jius bakin iji miakno kien.
ACT 21:12 Fu ijeg kuarduomga no faime uri e uruvana ijia karinva ijiena For kuriaireme kua, Ab Jerusarem ijia vakno kuain.
ACT 21:13 No ijeg kuavga fu uri no kuo, Ja irerafuon oifian abekok oinun fuka ba madiem. Naiji nan samuainva ijefuon bu na tomdiekva iji fun marek. Na Jesu E Bomana ijefuon if fuon iji dab kuaimoijo ijefuon bu Jerusarem ijia na kanie na guakva iji fu madu markno kuin.
ACT 21:14 Fu iji kuome no bijuva fun maguomga non ijia areme uri nuvuon kuai, Ire uruvana ni arega fu E Bomana ijar fu vierafenma ijia rega no gavno kuain.
ACT 21:15 Areme non naki sibank buna ijia karine non uri sinuom nuvuon kanafume non uri Jerusarem vain.
ACT 21:16 No vako e Jesuon vuak faivo kafo ar Sesariako iji bu nona vainvado bun no aferduome e iji no fuon vako ijefuon ar ijia vain. E iji if fuon iji Nason fu e ar Saifurasko gavo fu usuibe fu God ma vierafeno.
ACT 21:17 Areme non vake Jerusarem usevga e God ma vierafejo kafo ijia karinva iji bun oimarvknum anaduome aferduin.
ACT 21:18 Areme afarma For fun nona e Jeims gakuai vain revo tavan iji e sos ijiebuon e mamkanuk iji bun ijia afuime karin.
ACT 21:19 For fun bu anadiame uri vuak uruvana izeg fu ik reoko God fu e Jius bakin ijiebuon renma ijin abe e iji kuardiain.
ACT 21:20 E uruvana bu vuak fuon faime buka Godon oimaren. Areme bu uri For kua, Uviainuvuon Jerusarem igia an vierafen. E Jius uruvana bu Jesu ma vierafe ga buka akaij iji oimarknum amarigia jajiav.
ACT 21:21 Regavo vuak on uruvana bun faim baren bu faiga ar oknum e Jius uruvana bu e kafobuon ar ijia karinva iji nijaidiame kia bu Mosison akaij iji bu rubdiakfuon. A ijegrejknum madu kiaga bu afijaf iji bu ke surif buon kania ufume anf namdiaknum e Jius ijiebuon unam bu rejo iji jajiavo bakin.
ACT 21:22 Regavo a igia ruainma iji buka faikfuon. Ijefuon no izeg rek? Ijefuon ni vuak irerag no kuardavo iji faime re. E nokarok ga nokarok (4) igia nona karinva iji bu akai oij. Ijefuon bu va e uruvana ijiebuon nifak ijia ire kafo rega e uruvana bu giame vierafero e iji bu Godon akai oijoro bu ijeg vierafekfuon. Ijefuon bu vaga ni buna va ifejdiame ijegrene vo ni mon on ijia bu kimega bu nigen buon ufu korek. A ijegrekma e uruvana bu vierafero vuak uruvana bu oisina kuaivo iji fu ma baro bu ijeg vierafek. Bu vierafero aiji a Mosison akaij iji mukoi vierafeknum oinro bu ijeg vierafekfuon.
ACT 21:25 Regavo e Jius bakin iji eraneb bu God ma vierafejo iji non fas isoim nijiame kia, No vierafe bu ire kafo bu kege god kafo iji bu namdiainva iji buba ik. Regavo madu fanuf kavuan ijigam fanuf iji bu kege uro musaidiavo iji buba ikfuon ga buba bui fudanamikno kiain.
ACT 21:26 Areme afarma For fun e iji aferdiame buna va e uruvana ijiebuon nifak ijia ire kafo reja bu giame vierafero bu akai oijro bu ijeg vierafen. Areme fun va Godon ar ijia keko e Godon isuf baroino iji kua, No naki sibank samua fu barga no e iji besubesum buon Godon isuf barokno kuain.
ACT 21:27 Areme vuik besum (1) iji barekreno ijia e Jius kafo ar Esia guf ijia karinva ijieb aru Godon ar ijia For gain. Bu game uri e uruvana ruainva iji biesiavga bu zieme uri For kunain.
ACT 21:28 Bu kunaime kume, E Isrerko gurie ifejduof e igar ar iror ijia oknum e Isrerko igi nuvuisina kuaivknum Mosison akaij ijigam Godon ar ijiebuon vuak ise kuaimoin. Regavo ivia fu e Jius bakin ijin aferdiame Godon ar igia aru ar akai igi dab buzeimno kumen.
ACT 21:29 Bu ijeg kumenva ijefuon maiji e be ar Efisisko e Trofimas iji fu Fork mai ijia oina bu gain. Bu game vierafero fu Fori e iji afem Godon ar ijia aru ruainmaro bu ijeg kumen.
ACT 21:30 Regavo e uruvana mai guf ijia karinva buka uruvana igia nuanamikoga e iji bun besum kukum usem For kunain. Bu kunaime dab dakarame Godon ar iji areme usem vakoga Godon ar vien uruvana bu kam bijukuriain.
ACT 21:31 Regavo e iji zienva iji bun For kanakuai reokoga e be fun vake e Romkobuon e bijaivo ijiebuon e bomana iji kua, Ar Jerusarem ijia e uruvana bu vuakredo buka karine bijaikno kuain.
ACT 21:32 Fu ijeg kuamga e bomana iji fun migegare e bijaivo kafo gavo e bijaivo ijiebuon e mamkanuk kafo aferdiame vake e uruvana gami bu afuinva ijia kekoin. E uruvana bu ga fu e bijaivo ijiena kukubija vaka bu For bu kanavo iji bu ijia aren.
ACT 21:33 E bomana iji fun va For kunaim kiama bun sen nokarok (2) kam For tome fu uri e iji kia, E igi erar? Regavo fu irerag abenmano kiain?
ACT 21:34 Fu ijeg kiamga e uruvana bun uri vuak kafokafo kuardain. Revo e bomana iji fu vuak ma iji fuba mukoi fain ijefuon maiji e uruvana buba fainamiknum vuak kuain. Ijefuon fun efuon kiama bu For afem una e bijaivo ijiebuon ar bu ire gigikin ijia kege sainva ijia vain.
ACT 21:35 Bu afem ar iji vien ijia ajie vagak e iji zienva iji buka For kanakvejga e bijaivo iji bun For dab gieme aru vain.
ACT 21:36 Regavo e iji zienva iji bu rad jajia vaknum kume, Kana fu guamno kumen.
ACT 21:37 Bu For afeme e bijaivo ijiebuon ar ijia aru vakrejo ijia For fu uri e bijaivo e bomana iji kua, Naba vuak be a kuardakno kuain? Fu ijeg kuamga e bomana iji fun kua, Regavo abe e Grisbuon isama iji kuaimno kuain?
ACT 21:38 A e Grisbuon vuak iji kuaimon iji na vierafega a e Ijiftko iji fu e uruvana aferdiame ai moikum namo ijia vainma ijin. Ar e ijin aferdia afuime una e Romko ijiena bijaikafa kuain. Ijefuon iji abe ar ijegre ki a bano kuain?
ACT 21:39 Fu ijeg kuamga For fu uri roin kua, Naiji na ma e Jius. Revo naiji bu ar Tasas Sisiria guf ijia nafedien. Rega ar iji bu na nafedienva iji fuka ma bomana. Regavo e-e ni kiega na e uruvana gumi vuak kuardiavno kuain.
ACT 21:40 Fu ijeg kuamga e bomana iji fun kua, Iji fun marenmano ni kuardiamne kuain. E bomana iji fu ijeg kuamga For fun vien ijia manine imut igia e uruvana bijukuriama bu isuar kariko fun uri e Ibrukobuon isama ijia ijeg kuardiain.
ACT 22:1 E uviaifnun abevo asoifnun igie na ire ise be jon renva bakin ijefuon na vuak igi kuardiakno ni faifno kiain.
ACT 22:2 Areme fu uri e Ibrukobuon vuak ijia kuardiamga buka isuarigia karine faiko fu ijeg kuardiain.
ACT 22:3 Naiji na e Jius gavo bu ar Tasas Sisiria guf ijia nafedien revo bu aferdieme igia Jerusarem rokga na e Gamarieron rotit ijia sikur ren. Regavo bu e makin ijiebuon akai uruvana bun amarigia nijaidieva na fain. Regavo izeg ja Godon ik reoijo ijeg nak naka ijeg amarigia giriesa ikreoij.
ACT 22:4 Regavo usuibe na e iji bu Godon unam ma iji rejo iji naka kam isema rejknum kaniav. Rega madu na bara ga baru iji kuniaim dibur uniav.
ACT 22:5 Regavo ja vierafe na kufuimekva ni e Godon isuf baroijo ijiebuon e mamkanuk ijigam e mamkanuk fok kiaga na biesia vo na ma kuaivga bur kuardiaga ja faif. Ijefuon maiji bur fas isoime na nijieme kieva na va ar Damaskas ijia keko e Jius iji Jesu ma vierafejo ijia karinva iji tofdiav. Na ijeg kuniaim kam sen ijia tofdiame aferdia una ar Jerusarem roga bu kam arafiriav.
ACT 22:6 Na e ijin tofdiakafie vake ar Damaskas ijia kekokafie samairenva ijia tavan uk maniko ijia migegare kaf gufia vebu karako ar iji na manijo ijia fuka mukorigia sanain.
ACT 22:7 Fu sanama na tuame moik ijia dijeko vuak be ijia kumena na fain. Regavo vuak iji fu ijeg kume, E Sor Sor a irerafuon nun isema renmano kumen.
ACT 22:8 Fu ijeg kumega na uri roin kua, E Bomana a e gufi erarno kumen? Na ijeg kumejga fu una roin kume, Na Jesu ar Nasaretko iji nar revo aka na dab ire ise kafo rejknum vajai fian vajiemno kumen.
ACT 22:9 Rega e uruvana ijia nana irenva iji bu varur gufia ire iji saname ari ruainma iji bun gain gavo e iji fu na vuak kuardiemo ijefuon ir buba fain.
ACT 22:10 Regavo nar uri kume, E Bomana na izegrekno kumen? Na ijeg kumejga E Bomana iji fu una roin kie, Ni uri ar Damaskas ijia vaga bu ijiason ik uruvana a rekfuon iji God fu oifuon vierafenma iji kuardamno kumen.
ACT 22:11 Areme e iji nana vainva ijieb na imuikievga non Damaskas ijia vain. Ijefuon maiji na ire iji fu varur gufia saname ari ruainma iji gainva ijar ni nun fuka riruin.
ACT 22:12 Regavo ar Damaskas ijia e be if fuon Ananaias fuka God mukoi vierafeknum akai nuvuon uruvana igiamo. Regavo madu e Jius uruvana ar Damaskas ijia karinva iji bu fu dab nidoiv.
ACT 22:13 E ijar roke na fijo samaij ijia manine kie, Sor uviainu ni on iji fun marenmano ni una ni narame nisaimne kien. Fu ijeg kiemga naka migegare una ni narame fu gain.
ACT 22:14 Na Ananaias gavga fu kie, Saifnuvuon ijiebuon God ijar kuainmado a irerag fuon rekafa vierafekma a mukoi vierafek. Regavo madu a Jesu e maturainma iji a gavknum vo fu koikfuon ir fuon ijia vuak kuardaga a faik.
ACT 22:15 Regavo izeg fu reno a giaknum fainma iji ar oknum e uruvana kuardiak.
ACT 22:16 Ijefuon iviakma a irerafuon fine saroim. Ni uri Jesu kuaga fu ise on uruvana giame arega bu a abe if fuon ijia do ruardavno kien.
ACT 22:17 Fu ijeg kiemga nan una va Jerusarem ijia keko nankek Godon ar ijia aru sirimamejo ijia na nimamaime E Bomana iji gain.
ACT 22:18 Na fu gava fu kie, Ni migegare Jerusarem areme va ijefuon maiji e uruvana igia karinva iji bu irerag na rejo a gievknum fainma iji a abe kuardiakma buba mukoi faikno kien!
ACT 22:19 Fu ijeg kiemga na una kua, E Bomana na tavan uruvana na e Jiusbuon ar bu afuim vuak kuaivo na ijia aru e iji eraneb bu a ma vierafejo iji tofdiaknum kaniava bun gieme vierafen.
ACT 22:20 Regavo madu tavan iji bu Stiven e vuak on vierafene kuaimon iji bu kanava fu guainma iji nar ijia buna vuak kuai iganamivga bu fu kanain. Regavo madu na e iji bu fu kanainva ijiebuon set iji bu iduadiaga savo iji bu azome na vajieva na samuagdiako bu fu kanainvano kuain.
ACT 22:21 Na ijeg kuavga E Bomana fu kie, Nar a abenvano ni uri va e Jius bakin iji bu aibe ijia karioinva iji ifejdiamne kien.
ACT 22:22 Regavo e uruvana bu kari faiko For fu vuak kuaim vake ijeg kuaimga bu uri uruvana igia biumame kume, E iji fu uruvana isema reoinon iji fu erar oimardamo bano ka kana fu guamno kumen.
ACT 22:23 Bu ijeg biumame kumejknum uri ugon buon azome kaf ijia koreknum kuotuvat iji numume koreknum ijeg ren. Bu ijegrejga e Romkobuon e bomana iji fu uri efuon iji kiama bu For afem ar iji bu ire gigikin kege sainva ijia aru vain. Fu kia, Afem va ijia fijaknum kuaga e Jius iji bu irerafuon fu dab ijeg kumejo iji kuagafno kiain.
ACT 22:25 Areme bun uri fijakuai imut ga diak fuon ke kiriavga For fu uri e Romkobuon e bomana iji manino iji kua, A e Romko be fu ise renma buba vuak fuon iji kuaim irasenva iji a fu abe fijamo iji fuba marenmano kuain?
ACT 22:26 Fu ijeg kuamga e bijaivo be fu vuak iji faime va e bomana fuon iji kua, E iji fu e Romko gavo a izeg vierafenmano kuain.
ACT 22:27 Ijefuon e bijaivo ijiebuon e bomana iji fun va For kua, A e Romkoga ni ijeg kuardie na faivno kuain. Fu ijeg kuamga For fu kua, Ke iji ma na e Romkono kuain.
ACT 22:28 Rega e bomana iji fu kua, Naiji amur na e Romko bakin. Regavo na mon ka bomana abe e mamkanuk ar Rom samuavo iji miavga bu kieva na e Romko renvano kuain. Rega For fu uri kua, Aiji a ijeg ren gavo naiji na eofnun bu e Romko ijieb na nafedienvano kuain.
ACT 22:29 For fu ijeg kuaimga migegare e iji bu fu duna kafokafo kuardakuai samaij ijia irenva iji bun biom una aibe ijia iren. Areme e bijaivo ijiebuon e bomana iji fu faik For fu e Romko gavo bu dab sen kiriadainvaga fuka uruvana igia juin.
ACT 22:30 Areme afarma e bijaivo ijiebuon e bomana iji fu vuak ma iji e Jius iji bu irerafuon For dab arafirivo iji fuba fainma ijefuon una mukoi faikafa vierafen. Ijefuon fu kiama bu For sen imut iji bu toinva iji irasen. Areme fu madu kiamga e Godon isuf baroijo ijiebuon e mamkanuk ijigam e Jius ijiebuon e mamkanuk uruvana ijia karinva iji bu besum afuivga fun For kuamga fu e ijiena vuak fuon kuaim irasen.
ACT 23:1 For fu e mamkanuk ijia karinva iji giame kia, uviaifnu oinun igi fu e bes samuagdiemo ijefuon nakikmazak na God vierafeoijo iji fuka mukorigia marenmano kiain.
ACT 23:2 Regavo e Godon isuf baroijo ijiebuon e bomana Ananaias fu kiamga e iji Forna irenva ijieb uri For ir ijia matuin.
ACT 23:3 Bu ijegrejga For fu uri Ananaias kua, A madu aka e ma bakin ijefuon God fu a ijeg rad kanak. Regavo Mosison akaij iji fun ijeg namo ijefuon a ijia fine na ise nun iji faimo iji fun maren revo a e iji kiaga bu na kanievo iji ak an akai abe tuasmno kuain.
ACT 23:4 Fu ijeg kuamga e kafo For samaij ijia irevo ijieb For kua, Aiji a e izekin ijefuon a vuak ise ijekin ijin una e bomana Godon isuf baroino iji kuardamno kuain.
ACT 23:5 Rega For fu uri e iji kia, Uviaifnu naba vierafenva ijefuon na iji vuak ise e bomana Godon isuf baroino iji kuardainvano kiain. Ijefuon maiji Godon vuak bu usuibe isoinva iji fu kuai, Jab e bomana jon fu ja samuagdiamo iji vuak ise kafo kuardavno kiain.
ACT 23:6 For fu gia e mamkanuk iji afuinva ijia e roin bu e Ferisis ga roin bu e Sejusis. Ijefuon fu giame uri e mamkanuk iji afuinva iji kia, Efnun naiji na e Ferisis ga na e Ferisis ijiebuon farif revo na e mamkanuk igiebuon nifak igia manijo ijefuon maiji na vierafega God fu e iji aoinva iji fu kiaga bu una urikfuon ijefuon na iji igia manine vuak nun kuaim irasevno kiain.
ACT 23:7 For fu ijeg kiamga e Ferisis iji abevo e Sejusis iji bun uri bui musikuaime dab atame roinroin ren.
ACT 23:8 Ijefuon maiji e Sejusis iji bu vierafero e iji aoivo iji bu una urijo ba ga madu Godon anera ijigam Godon kaven iji bu bakiro bu ijeg vierafen. Regavo e Ferisis iji bu vierafega vuak iji fu maga bu ijeg vierafe. Regavo e Ferisis roin e Mosison akai nijaidiavo iji bu ga e iji buka uruvana musikuaivga bu uri uruvana igia juin. Bu zieme kuai, No e iji no gaga fu ire ise kafo fuba ren. Ijefuon no vierafega e iji kafu fun ma Godon anera vo baga Godon kaven ijar kuardaga fu iji kuaimno kuain.
ACT 23:10 Regavo e bijaivo ijiebuon e bomana iji fu gak e iji buka musikuaivga fuka uruvana igia jum. Fu vierafero e iji bu ijegredo uri For kana dab buasekro fu iji vierafen. Ijefuon fu e bijaivo fuon kiama bu va e iji afuinva ijia usem For afeme ar bu ire gigikin ijia kege sainva ijia aru vain.
ACT 23:11 Regavo tavan besum (1) naki ijia Jesu fu For samaij ijia manine kua, Ni giriesa! Vuak izeg na reoija a gienma iji an Jerusarem gafia kuardiain ijefuon aka madu una Rom gafia ijeg kuardiamne kuain.
ACT 23:12 Areme afarma suok e Jius roin bun isuar bui afuim vuak kuaime ujuinamin. Bu akai be abedeme kuai, Bu For kaname ijar rad duok ga do ikno kuain. Regavo e iji afuime vuak iji kuainva iji buka e uruvana.
ACT 23:14 Areme bun va e mamkanuk Godon isuf baroijo ijigam e aiko ijiebuon e mamkanuk uruvana kia. No akai be abededo no For kaname ijiason duok ga do ikno kiain.
ACT 23:15 Ijefuon iviakma ni e mamkanuk jon ijiena vuak e Romkobuon e bomana iji biesua fu For afem igia roga ja vuak fuon ma iji faik. Revo fu vek igia ruakafa roko ijia no unam ijia fu kanakno kiain.
ACT 23:16 Bu ijeg kuaimoijga Foron makin ijefuon farif ijar vuak iji bu kuaivo iji faime vake ar iji bu ire gigikin ijia kege sainva ijia kekome For kuardain.
ACT 23:17 Fu kuardamga For fun e bijaivo be kuama fu rokga fu kua, E nivek igi afem e bomana on fino ijia vaga fu vua be fu kuardamno kuain.
ACT 23:18 Ijefuon fun e nivek iji afem va e bomana fuon iji fino ijia vain. Fu va ijia kekome kua, For e iji dibur gamia fino ijar na kiema na vakga fu kiema na e nivek igi afem on ruain. Regavo fukafu vuak be a kuardakafa vierafenmano kuain.
ACT 23:19 Fu ijeg kuardamga e bomana iji fun e nivek iji imut ke va isuar sauime kua, A vuak irerag iji na kuardiekafa vierafenmano kuain.
ACT 23:20 Rega e nivek iji fun uri kua, E Jius e uruvana bun vuak kuaime fainamido niar bu a biesuaga a For afem gami e Jiusbuon e mamkanuk bu karinva ijia vaga bu Foron vuak ma iji faikno kuain.
ACT 23:21 Regavo vuak buon ab faik ijefuon maiji e uruvana bu fu kanakuai isuar samua karinvano kuain. E iji bun akai be abededo bu fu kaname bu ijiason duok ga do ik. Bun vuak iji kuainva iji rekuai bu a samuagdav revo ar izeg kiakma bun ijeg rek.
ACT 23:22 Areme e bomana iji fun e nivek iji kua, A vuak igi a na kuardienma iji ab e kafo kuardiakno kuame fun e nivek iji kuama fu vain.
ACT 23:23 Areme e bijaivo ijiebuon e bomana iji fun efuon nokarok (2) kiama bu rokga fu kia, Ni e bijaivo uruvana tu adred (200) ijeg ke ga e maf-os oijo e seventi (70) ijeg ke vo e juaf ijia bijaivo tu adred (200) ijeg kege ivia naki nain (9) okurok ijia nin ar Sesaria ijia vafno kiain.
ACT 23:24 Regavo maf-os kafo kege For vajaga fu ijia ajiega ni amarigia afem va Romkobuo e bomana Firiks fino ijia usefno kiain.
ACT 23:25 Areme e bomana iji fun fas be ijeg isoin.
ACT 23:26 Na e Krodias Raisias nar fas igi isoime a e bomana Firiks a anadav.
ACT 23:27 E Jius uruvana bu bui ujuinamime e For kanakuai kuain. Revo na fai fu e Romko ijefuon na e bijaivo nun ijiena va fu fino ijia keko vuak fuon fain.
ACT 23:28 Regavo bu irerafuon fuisina kuaivo na iji faikafie fu afem e mamkanuk buon bu karinva ijia vain.
ACT 23:29 Rega na gaga fuiji fu ire ise kafo ba ren revo bum fu dab kana fu guak vo baga bu dab dibur unakuai vierafen. Bum fu abe duna kafokafo akai buon ijia amarme kanakuai rej.
ACT 23:30 Regavo rad na faiga e Jius iji bu fu kanakuai ujuinamiga na iji fu abe una a unafdain. Ijefuon na e iji bu fuisina kuaivo iji kege a vajado bu nifak on ijia ireme vuak fuon iji kuaim irasek. Fun ijin.
ACT 23:31 Areme e bijaivo iji bun e bomana buon fu kuardiainma ijeg uri For afeme naki ijia va ar Entifatris ijia usen.
ACT 23:32 Bu ijia usem naoiva afarma e bijainva iji bun diak vako iji bun una ar buon ijia vakoga vo e iji maf-os vako iji bun For afem vain.
ACT 23:33 Bun vake Seseria ijia usem fas iji abe e bomana Firiks mame For abe ijia fu unafdain.
ACT 23:34 Regavo e bomana iji fun fas iji abe dame uri For kua, A e izekono kuain? Fu ijeg kuamga For fu kua, Na e Sirisiakono kuamga fu uri kua, Nason e iji bu a abe ise on kuaim irasekuai roko bu roga na ijia una vuak on faikno kuain. Areme fun e fuon kiama bu For abe Firikson ar ma iji Kin Erod fu same gua vainma ijia uname e juo karijo iji kiama bu amarigia fu samua karin.
ACT 24:1 Areme naki imut roin (5) baremga e Godon isuf baroijo ijiebuon e bomana Ananaias fun e aiko ijiebuon e mamkanuk ijigam e akai samuamo Teturas iji afeme ar Sesaria ijia vain. Bun va ijia useme For afem dab e bomana Ferikson ar ijia aru vuak ise iji kuaim irasen.
ACT 24:2 Bu Teturas kumeja fu aru Foron vuak ise fuon iji ijia kuain. Revo vuak iji fu kuainma iji fu ijeg, E bomana aiji a e ma ijefuon on ma iji a no samuagduinma ijar noka juaivasia uruvana noba bijaivknum zienamioin revo nom afurve karin. Regavo madu ar unam nuvuon ma iji no ma karivakfuon iji kafo a moik nuvuon igefuon ren.
ACT 24:3 Ijefuon no izer oijo iji noka oifuon kuaiknum tavan bog no on uruvana oimarev.
ACT 24:4 Ijegvo ivia na tavan on bomana naba abe vuak jaoijmana kuardak. Ijefuon na a kua, Nika oimarvknum vuak nuvuon ivuankbe no kuardakrejo igi fai.
ACT 24:5 No e igi gaga fuka ire ise uruvana reoknum fuka e Jius moik uruvana igia karioinva iji vuak ise kafo kuardiaga bu bui bijaiknum musikuaiv. Rega fuiji fu e kafo bu kia Nasarino kiavo ijiebuon e bomana gavo madu fu Godon ar ijia arume ar iji dab arafirikafa rega no ijia fu toin. No fu dab una akai nuvuon ijia kot rekuai kuain revo fu e bijaivo ijiebuon e bomana Raisias arume darodarokin igia fu afeme keko on ruain. Regavo vuak igi na kuardavo iji a vuak fuon iji faimo ijia ason no irerafuon abe ise fuon nisaivo iji a ijia faime ma vierafek.
ACT 24:9 Fu ijeg kuamga E Jius uruvana buk bu uri e Teturas ifejdame Foron ise fuon iji ijia kuaime kuai, E igi fuka ma kuaimno kuain.
ACT 24:10 Areme e bomana Firiks fun For imut ijia kuamga For fun vuak fuon kuai, Na vierafega aka juaivasia uruvana e akai samuamo iji rene moikigia e iji bu ise rejo a iji fine giam. Ijefuon ivia naka oimarvknum nifak on igia manine vuak nun iji kuaik.
ACT 24:11 Regavo vuak nun iji na naki sibank barenma ijia na Jerusarem ijia Godon sirimamekafie vainva a iji samakaf gakfuon.
ACT 24:12 Regavo na e Jius ijiena Godon ar ijia ga ar buon bu afuim vuak kuaivo ijia ga madu mai guf ijia naba vuak ise kuardiavga bu ijefuon uri bui bijaiknum musikuaimoin.
ACT 24:13 Regavo igi bu na aferdieme unam nun nisaivo ijefuon maiji buba vierafedo buba a kuardak.
ACT 24:14 Ijefuon vuak na a kuardakfuon iji izeg na saifnuvuon ijiebuon God iji sirimamene unam iji bu kua kufuino kuaivo na ijin jajiav. Regavo na madu Mosison akai uruvana ma vierafeknum e Godon vuak vierafene kuaivo ijiebuon vuak iji bu buk ijia isoinva na iji ma vierafej.
ACT 24:15 Rega izeg bu God ma vierafejo nak na ijeg vierafeknum vo madu na vierafero e fok aoinva ma ga ise bu una urikro na ijeg vierafej.
ACT 24:16 Ijefuon na tavan uruvana naka nui giriesame God ga e ijiebuon nifak ijia naka giriesame ire ma iji na oinun igia vierafenva iji reoij.
ACT 24:17 Na juaivasia sibank uruvana na Jerusarem areme vain gavo na una mon kafo kege una enun ijia karinva iji vajiaknum Godon isuf barokafie una vain.
ACT 24:18 Na tavan ijia Godon ar ijia aru Godon isuf baroija bu ijia gien. Regavo na ire iji e Jius no rega ise nuvuon fu barekfuon iji nan re barenva ijia bu gien. Regavo e kafo buba ijia aru nana ijegrejknum e kafo buba ijia bijaiknum zienamin.
ACT 24:19 Regavo e Jius roin ar Esiako iji bur ijia nana ijegredo bur ro igia usem nuisina a kuardabatie iji fuka marek.
ACT 24:20 Regavo ni e igi irenva igi kiaga na irerag ise kafo e Jius e mamkanuk ijiebuon nifak ijia reja bu giekva bur a kuardaga a faik.
ACT 24:21 Regavo vuak besum igi nan nar ma nifak buon ijia kumenva ijin na vierafero e iji aoinva iji bu una urikro na ijeg vierafene kumen. Ijefuon ivia na nifak on igia ise nun iji a kuardavno kuain.
ACT 24:22 Areme Firiks fun Jesuon unam e iji bu rejo iji mukoi gainma ijefuon fun vuak ise iji bu kuaivo iji bijuin. Fu kia, E bijaivo ijiebuon e bomana Raisias fu ruakma na una For fu ma ren vo isema renma iji nason ijia kuaimgakno kiain.
ACT 24:23 Areme fun e juo karijo be For samuamo iji kua, Ni fu mukor samuaga tavan kafo ni unaga efuon bu irerag fu vierafenma iji kafo ifejdavno kuain.
ACT 24:24 Areme naki sibank barko Firiks fun bara fuon Drusirak ruain. Regavo bara iji fu bara Jius. Fu Foron kiama bu afem rokga fu fine faikoga For fun vuak iji izeg bu Jesu Kurais ma vierafekfuon ijin kuardain.
ACT 24:25 Regavo For fun Firiks vuak kafo kuardamo ijia fu madu vuak iji izeg no ma reokfuon ijigam izeg no nuvuon junamikfuon ijin kuardain. For fu iji kuardame uri tavan iji God fu izeg una e fok moikigia ise reoijo iji ke mazim giakfuon iji kuardain. For fu ijeg kuardamga Firiks fu vuak iji faime fuka juin. Ijefuon fu uri For kua, Nin vakevo nason rad tavan be nakma na ijia una a kumekno kuain.
ACT 24:26 Regavo madu fu vierafero For fu mon kafo vajakro fuka naikafar For kumega fu ar fuon ijia fusik vuak kuaik rok.
ACT 24:27 Fu ijegrene vake juaivasia nokarok (2) barko e Fosias Festas fu Firikson ar abe e Romkobuon e bomana ren. Firiks fu una e Jius iji bu oimardiakfuon ijia renma ijefuon fuba For kuama fu dibur areme keko ruain.
ACT 25:1 E Festas fu roke Sesaria guf ijia kekome naki nokbek (3) barko fun ijia uri Sesaria areme Jerusarem vain.
ACT 25:2 Fu vake Jerusarem kekomga e mamkanuk Godon isuf baroijo ijigam e Jiusbuon e mamkanuk kafo bun una uri Foron vuak ise ijin fu kuardain.
ACT 25:3 Bun For kanakuai vuak kuaime bui ujuinaminva ijefuon bun Festas anaime kua, Ni For kua fu Jerusarem ijia rokne kuain.
ACT 25:4 Bu ijeg Festas kuardavga fu uri e iji kia, For bu abe Sesaria ijia dibur unain ga naiji na iviakma igavo nan una ijia vak.
ACT 25:5 Ijefuon ni ejon mamkanuk iji kiaga bu nana va Sesaria ijia For kuardaga fu ire ise kafo rega ni funa ise fuon kuaime gafno kiain.
ACT 25:6 Ijegrene Festas fun naki roin ijia buna fine fun una Sesaria ijia vain. Areme afarma fun ar iji bu kot rejo ijia aru fine kiama bun For afem ijia aru vain.
ACT 25:7 For fun aru rokga e Jius iji ar Jerusarem ijia ruainva iji bun biom fu manino ijia ire ameoine uri Foron vuak ka ise gigikin kafo bu ma vierafekfuon bakin ijin fu kuardain.
ACT 25:8 Regavo For fuka koikfuon amarigia vierafeknum una vuak fuon fu ijeg kuardiain. Fu kia, Naiji na e Jiusbuon akai kafo naba ke tuasen ga Godon ar ijia naba ire ise kafo ren. Rega madu na vuak ise kafo naba e Romkobuon e bomana Sisa ijefuon kuainvano kiain.
ACT 25:9 Regavo Festas fuka una e Jius iji ifejdiakafa vierafen ijefuon fu uri For kua, Ni vuak on iji kuardie na faivno kuain.
ACT 25:10 Fu ijeg kuardamga For fu una roin kua, Na vierafega naka e Romkobuon e bomana igefuon ar igi bu kot ma iji rejo na ijia oimarvknum vuak nun kuaik. Regavo jan koikjo vierafe naiji na ire ise kafo e Jius ijiebuon naba ren.
ACT 25:11 Regavo na e Jius ijiebuon akai kafo ke tuaseme ire ise kafo renva ja ijefuon na kaniekuai kuaikva iji fun marek. Regavo ja vierafega vuak igi bu nuisina kuaivo iji fu ma bakigakva iji na vierafe fu erar na abe bu miaga bu abe ire kafo nun rek. Ijefuon na vierafe na va e Romkobuon e bomana iji kuaga fur vuak nun iji kuaim irasek vakno kiain.
ACT 25:12 For fu ijeg kuardamga Festas fu una e mamkanuk fu samuako fu kot faimo ijiebuon vuak faime una For kua, A Romkobuon e bomana ijefuon vakro kuainma ijefuon na vierafega nan ivia kuaga a fuon vakno kuain.
ACT 25:13 Ijegrene vake asam kafo barekoga Kin Agrifa ko bara fuon Bernesk bun Sesaria ijia Festas anaikuai ruain.
ACT 25:14 Bu roke Sesaria usem ijia naki sibank kariko Festas fun uri Foron vuak iji abe Kin Agrifa ko bara fuon iji kuardiain. Regavo vuak iji fu ijeg kuardia, E be fu Firiksri abe dibur unainma fu igia fin. Regavo na ar Jerusarem ijia vako e Jius Godon isuf baroijo ijiebuon e mamkanuk ijigam e Jius ijiebuon e mamkanuk iji bu vuak ise kafo fuisina na kuardien. Bu kie, A no kuoga no e iji kana fu guamno kien.
ACT 25:16 Bu ijeg kie gavo na una bu kia, No e Romko iji no e ijekin iji noba migegare kege e kafo vajiak. Regavo no samuake bu va e iji bu vuak fuisina kuaivo ijiena bui vuak iji kuaime noson kege una e kafo vajiavno kiain.
ACT 25:17 Na ijeg kiavga e Jius iji bun igia rokga naba saroin gavo nam afarma aru ar no kot rejo igia fine kiava bu For afem aru ruain.
ACT 25:18 Regavo e iji Foron vuak kuainva iji buba aru ire ma ise iji na vierafenva iji kuain.
ACT 25:19 Regavo vuak iji bu Foron kuainva iji bum izeg bu unam buon bu God sirimamejo ijiga e be fu guainma if fuon Jesu ijiebuon kuain. Bu kuai Jesu fun guainmano kuain gavo For fu kuai Jesu fu una urinmano kuain.
ACT 25:20 Na vuak iji bu kuaivo ijefuon mai iji naba mukoi fainva ijefuon na uri For kua, Abe va Jerusarem ijia kekome vuak ise on iji ijia kuaikno kuain?
ACT 25:21 Na ijeg kuaga For fu kie, Vuak nun fu Romko e ka bomana Sisa ijar faikno kiemga na ijefuon e bijaivo nun kiava bu fu abe mukor samuame karido na kiaga bu afem e Sisan vakno kuain.
ACT 25:22 Festas fu ijeg kuardamga Kin Agrifa fu kua, Na vierafe naka koiknu e ijefuon vuak iji faikafie vierafenvano kuain. Fu ijeg kuardamga Festas fu una kua, Vuak fuon ason niar faikno kuain.
ACT 25:23 Ijegreare afarma Kin Agrifa ko Bernes bun e bijaivo ijiebuon e mamkanuk ijigam e makin mai iji samuavo ijiena arume ar iji bu kot rejo ijia vako e uruvana buka buon oimarko bu vain. Areme Festas fun kiama bu For afem ijia aru vain.
ACT 25:24 Bu aru vakga Festas fun kia, Kin Agrifa ga e uruvana ja igia nona aru ruainva iji ni e guri gaf. E guri manino iji bu e Jius kafo igia ruainva iji abevo roin vek Jerusarem karinva ijieb vuak ise kafo fuisina na kuardienva ijin. Buka uruvana igia biumame kume, E iji fuka guakno kumen.
ACT 25:25 Regavo na gaga fu ire ise kafo ba renmado fuba guak. Regavo madu fun koikfuon kie fu e Romkobuon e bomana iji game vuak fuon iji kuaikno kienma ijefuon nan kiaga bu afem fuon vak.
ACT 25:26 Regavo na ire ise fu renma ijefuon vuak iji naba fain ijefuon na izeg fas isoime e Romkobuon e bomana iji nijakva bakin. Ijefuon na iji fu afem igia ja abevo Kin Agrifa nifak ijia aru ruain. Ijefuon ja vuak fuon mukoi faime son ijar na fas be isoime e Sisa nijak.
ACT 25:27 Regavo na ise iji bu fuisina renva iji naba isoigavo nam kiaga bu afem e Sisaon vakva iji fuka iserekno kiain.
ACT 26:1 Ijegreare Agrifa fun uri For kua, Ivia no kari faivno ni uri vuak on kuaimne kuain. Fu ijeg kuardamga For fun uri mani ninuime vuak fuon iji fu ijeg kuardia,
ACT 26:2 Kin Agrifa na ivia na vuak e Jius bu nuisina kuaivo na iji a kuardak.
ACT 26:3 Iji fun ma an koikon e Jiusbuon unam bu rejo ijigam duna buon bu kuaivo iji an mukoi vierafen. Ijefuon ni vuak nun igi na kuardakrejo iji mukoi fai.
ACT 26:4 Na vek eukak ijia na anerene ire uruvana na rene ruainva iji e Jius bun vierafen. Regavo madu izeg na vek eukak ijia moik nun ijia fiknum Jerusarem ijia fioinva iji bun vierafen.
ACT 26:5 Rega madu bun gien na vek eukak ijia na e Jiusbuon unam bu God ma vierafejo ijeg na e kafo bu kia Ferisisno kiavo ijiena oin. Regavo bu gienva iji bu kafu e roin kuardian kabu bakin.
ACT 26:6 Rega ivia na igia manine ise nun kuaim irasevo ijefuon maiji na vuak iji God fu usuibe saifnuvuon iji kuardiame kia fu rekno kiainma iji na ma vierafej. Ijefuon na iji igia unam nun na rejo iji kuaim irasek.
ACT 26:7 Vuak iji God fu kuainma iji e aganuvuon uruvana vuak fuon faivo iji bu nakikmazak God aroiknum samuav. Regavo e bomana na vuak iji God fu kuainma iji samuavo ijefuon e Jius bu iji na abe ise nun iji kuaim iraseknum vuak nuisina kuaiv.
ACT 26:8 Regavo e Jius gurie God fu e aoinva iji fu kiaga bu una urijo rega ja irerafuon iji jaba ma vierafej?
ACT 26:9 Ur nak na Jesu e Nasaretko ijefuon if iji dab ire ise kafo rekafie vierafen.
ACT 26:10 Regavo iji nan ar Jerusarem ijia ijeg ren. Na e Godon isuf baroijo ijiebuon e mamkanuk ijieb daro mievga na Godon e iji bu Jesu ma vierafejo iji kafo kam dibur uniain. Rega madu na e ijiena vuak kuaim iganamivo bu e iji kam kaniava bu aoin.
ACT 26:11 Tavan uruvana na ar bu afuim vuak kuaivo ijia aru e iji kam ire kafo reja bu vajai fian abeknum biesiaga a bu Jesu vierafeoijo iji bu arevro na ijeg ren. Regavo madu bu na ka mukoi ziegafiainva ijefuon tavan kafo na e ai kafobuon mai kafokafo ijia va e iji aferdiame uruvana igia vajai fian vajiain.
ACT 26:12 Na ijegreoijo ijefuon e Godon isuf baroijo ijiebuon e mamkanuk iji bu daro mieme kieva na ar Damaskas ijia vain.
ACT 26:13 E bomana na Damaskas vako ijia tavan uk maniko ijia na ga varur gufia vebu karako na gaga e iji nana vako iji no irenva iji fuka amarigia sanain.
ACT 26:14 Fu ijegrega e uruvana noka tuame moik ijia dijkoga na faik varur gufia vuak be fu e Ibrukobuon isama ijia na kumen. Vuak iji fu ijeg kume, E Sor Sor a irerafuon nun isema ren? A unam ma iji aba mukoi jam gavo a maf igeg adamene una unam ise ijia vakreno kumen.
ACT 26:15 Vuak iji fu ijeg kumega na una roin kua, E Bomana a e gufi a erarno kuain? Na ijeg kuavga fu kie, Naiji na Jesu nar gavo a nun isema ren. Regavo nin una uri manine.
ACT 26:16 Na a biedame kuaido a nuifuon ikreok. Regavo ni ivia izeg na reja a gienma iji ni ar vuak iji abe e uruvana kuardiaknum vo ire roin nason rad nijaidakrejo iji ar abe kuardiak.
ACT 26:17 Na a abe e Isrerko ijigam e Jius bakin iji miaga a ijia buon vakma bu ise kafo on rekva nar a samuagdak.
ACT 26:18 Ar va ni buon kege naramdiaga bu riruinma iji bu karinva iji bu areme una sanainma ijia ruak. Regavo madu kaven ise ijefuon daro iji bu arega una Godon ruak. Bu ijegrene una na mukoi vierafekva Godri ise buon giame arega bu aferdiaga bu una e iji fun usuibe kiama bu moikigia karioinva ijiena mazik.
ACT 26:19 Ijefuon Kin Agrifa naiji na nimamaime varur gufia na gainva iji na ir fuon iji naba abe gareg akozen.
ACT 26:20 Na vuak iji abe amur na Damaskas ijia kuardiame va Jerusarem ijia kuardiain. Areme na madu va moik uruvana Judia guf ijia kuardiaknum va e Jius bakin iji kuardiain. Na ijia oknum vuak iji nijaidiame kia, Ni ise jon God kuardame una oi karoime fuon ruaknum ire ma kafo rega e bu ijia game vierafero jan oi karoinvaro bu ijeg vierafek.
ACT 26:21 Na ijegreoijga e Jius bu ijefuon bui kuaim ujuinamime Godon ar ijia arume na kaniekuai ruain.
ACT 26:22 Regavo God fuka na mukoi ifejdie roke ivia na igia manine vuak uruvana na faivknum giaoinva iji abe ja e ukakna abevo e mamkanuk igi ja kuardiav. Regavo vuak igi na kuaivo iji fun vuak besum iji e Godon vuak vierafene kuaivo ijigam e Mosis fu kuai fu rad rekno kuainma ijin.
ACT 26:23 Rega vuak iji bu kuainva iji bu ijeg kuai, E iji God kuamga fu ari ruainma ijar amur vajai fian abene guak. Fu guame una uri vuak iji sanainma ijia ma karivakfuon iji abe e Jius iji abevo e Jius bakin iji kuardiak.
ACT 26:24 For fu vuak fuon ijeg kuaimon ijia e Festas fu uruvana igia biumain. Fu biumame kume, For aiji aka nigen dab dakaroin ijefuon maiji aka naikafar vuak uruvana dame vierafeno ijar nigen on fuka dab dakaroinmano kumen.
ACT 26:25 Fu ijeg kumega For fu una roin kua, E bomana na nigen dakaroinva bakin gavo vuak nun igi na kuardavo iji na kufuimejo bakin naka ma kuardav.
ACT 26:26 Kin Agrifa vuak nun kafo na sauime kuardavo bakin revo vuak uruvana naka iga visu kuardav. Ijefuon maiji a vuak uruvana an faim baren. Na vierafega a ire iji besubesum an gia baren ijefuon maiji buba sauime ren gavo buka samakaf ijia reja an giain.
ACT 26:27 Kin Agrifa a e iji Godon vuak vierafene kuaivo iji abe ma vierafen? Na vierafega a bu iji aka ma vierafeoinon.
ACT 26:28 Fu ijeg kuardamga Kin Agrifa fu una kua, A vierafe a tavan ukakbe igi a manine vuak kuardienma iji an na abe una Jesu Kuraison unam ijia unienmano kuain?
ACT 26:29 Fu iji kuardamga For fu una roin kua, A ijeg kie gavo na vierafe naka tavan ukakbe vo baga tavan uruvana na Godon sirimamek. Na sirimamene a abevo e uruvana guri ja ivia ireme vuak igi faivo iji joifuon God kuaga fur ja kege una karoime na renva ijeg rek. Regavo na Godon sirimamejo iji na ja kege sen ijia tomdiakafie kuardavo bano kiain.
ACT 26:30 Areme e Kin ko bara fuon Bernes ijigam e Festas ga e uruvana buna karinva iji bu uri usem vain.
ACT 26:31 Bu usem vakuai bui kuai, E iji fu ire ise kafo renma bado fu irerafuon dibur vaknum guakma bano kuain.
ACT 26:32 Rega Agrifa fu uri Festas kua, E iji fuba Sisan vuak kuaim irasekafa kuaimabatie no vierafe noka ivia fu keunakno kuain.
ACT 27:1 Bun vuak kuaim marme non sisim abe ar Itari vakrejga bu uri For ga e diburko roin kege e Romkobuon e bijaivo iji samuagdiamo if fuon Jurias iji uniafdain. (Revo e Jurias bu e Emforan e bijaivo ijiena renma ijin).
ACT 27:2 Areme non uri sisim be fu ar Adtramitiam Esia guf saof ijia okreno ijia ajieme non vain. Non vakoga e Aristakas e iji fu ar Tesaronaika Mesedonia guf ijia ruainma iji fun nona vain.
ACT 27:3 Non vake suok non ar Sidon ijia usen. No ijia useme Jurias fun For nidoime kuama fun ar Sidon ijia va kaifuon kafo giaga bu ire kafo fu vierafenma iji vajakuai fun ijia vain.
ACT 27:4 Areme non una sisim abe Sidon areme vain revo buibur fuka uruvana ufimo ijefuon na una saof iken be bu kua Saifrasno kuavo buibur ba ufimo iji nak vain.
ACT 27:5 No vake moik Sirisia ko Femfiria iji asidiame vake ar Maira Raisia guf ijia usen.
ACT 27:6 Areme e Romkobuon e bomana iji fun ga sisim be ar Areksedrako iji fun ar Itari vakrega fu no kuoma non sisim ijia ajieme vain.
ACT 27:7 Sisim iji fu no keduome isuarigia roke naki sibank barko no ar Snaidas ijia usen. Regavo unam iji no ruainva iji noka afikin bien ijefuon maiji buibur iji fuka uruvana igia ufim. No ijia usem nanusem vakrejga buibur iji fuka uruvana ufimga non una saof uf moik datura namo be bu kua Kritno kuavo ijefuon vake ar Sarmon asime vain.
ACT 27:8 No saof irif ijia amedakime vake ar be bu kua Seif Abasno kuavo ijia usen. Regavo ar iji fu mai Rasia samaij ijia ga unam iji no vainva buibur fuka uruvana ufimo ijefuon noka afikin bieknum vain.
ACT 27:9 No Seif Abas ijia naki uruvana karine no una uri vakrega fuka ma iserem. Ijefuon maiji tavan iji bu ise reoinva iji kuaivo iji fun asin ga madu saof fu tavan ijia fuka firamo ijefuon fuka uruvana foin. Fu ijegrega For fun uri e iji karinva ijin vuak be ijeg kuardiain.
ACT 27:10 Fu kia, E igi na gaga unam no vakfuon iji fuka ma iserem. Revo no vakva sisim nuvuon ijigam sinuom nuvuon roin bun saof ijia gama arik. Regavo madu e roin bu saof ijia aoik.
ACT 27:11 Regavo e Romkobuon e bomana iji fu For vuak iji fu kuainma iji fuba ma vierafen revo fu e sisim koikin ijiga e iji sisim abe oino ijiebuon vuak iji fain.
ACT 27:12 Regavo do sakiat bu kirainva iji fu ve damon fuka isermo ijefuon e uruvana bu vierafe buka saof azan ijia vake ve iji fu ijia dake bu vake ar Finikis ijia usekuai vierafen. Regavo ar Krit do sakiat iji fu ma ijefuon fu ve dakma bu va ijia karikuai bu iji vierafen.
ACT 27:13 Regavo buibur ukakbe fum iji no vakrejo nak ijia ufim. Fu ufimga e iji bu vierafero vuak buon bu kuainva iji fun markrenro bun uri kajek iji bu mun kiriame sainva iji kara ajie sisim ijia name bun sisim iji abe una ar Krit nak vain.
ACT 27:14 Bu ijeg vako buibur bomana be bu kua Not Istano kuavo ijar saof uf moik datura namo nak ijia ufime ruain.
ACT 27:15 Buibur iji fun uruvana igia ufime sisim unam fu vako iji fun iserem. Fu ijegrega no giriesame sisim abe una buibur iji ufimo ijeg vaga fun iseremga nom karikok buibur ijar no kege vain.
ACT 27:16 No vake saof uf moik datura namo be bu kua Kaudano kuavo iji iken iji asime vako buibur iji fun ukakbe ren. Fun ukakbe rega non giriesame uri vanag ukak be bu sisim guf ijia abedenva iji abe sisim buin no kirainva iji dakarame abe una sisim guf ijia abeden.
ACT 27:17 Bun dakarame abe sisim ijia abedeme kajek kege kunaim kirain. Bu vierafero sisim iji fu vake uri moik be bu kua Ribiano kuavo iji jier ijia vakro bun uri farai iji bu kirainva iji irava fu moik ijia arin. Areme bun ijia karikoga buibur ijar ufime bu kege vain.
ACT 27:18 Regavo buibur bomana iji fuba baren revo fuka vek ufimga afarma bu uri sinuom kafo sisim ijia naoivo iji karme saof ijia koren. Regavo afarma bu ga buibur iji fu vekga bu madu uri koikbuon sisim ijefuon sinuom roin karme saof ijia koren.
ACT 27:20 Bu ijegreko tavan uruvana no veni ijiga mujur iji noba giain revo buibur iji fuka uruvana igia ufim. Fu ijeg ufimga no vierafero non saof ijia aoinvaro noba nuvuon karaunianamikfuon vierafen revo nom ijia karine vain.
ACT 27:21 E uruvana bu vasia abeknum karijga For fu uri kia, E gurie ja vuak na kuardiainva iji mukoi faime ar Krit ijia karibatie sisim nuvuon fuba dakaroiga sinuom nuvuon roin fuba do vaknum ijeg rek.
ACT 27:22 Regavo iviakma na ja anadiame kia, Ni oi ma vierafekin e besum fuba saof ijia arik. Regavo fun sisim iji fuonkua fu saof guf ijia sauik.
ACT 27:23 Ijefuon maiji God iji fu na ifejdieknum na tavan bog fuon sirimamejo ijar anera fuon kuama fu ivia naki nun ruain. Fu arime na kie, For ab juk ani e Romkobuon e bomana Sisan nifak ijia manine kot reno kien. Regavo madu fu kie, Fun Godri fuon izeg fu e mardiamon ijia fu e iji ana sisim ijia vako iji samuagdiainmano kien.
ACT 27:25 Ijefuon e gurie nika oi ma ijesugin vierafef. Ijefuon maiji na vierafega God fu ma ijefuon anera vuak iji fu kuardienma iji fu riarek.
ACT 27:26 Regavo noiji noba aoigavo nom sisim azan ijia karike buibur ijar no aferduome vake saof uf moik datura namo ijia usek.
ACT 27:27 No vuik nokarok (2) barenma ijefuon naki iji no vek buibur ijar no kege saof be bu kua Meditoreniano kuavo ijia oin. Regavo ve ufrenma ijia e iji sisim iji abe vako iji bun vierafega bun moikazan ijia usekuai samairen.
ACT 27:28 Ijefuon bu kajek be abe in afikin be abe kira do ijia abesme ga do iji fu sibank tasman. Areme tavan ukakbe barko bu kajek iji abe una do ijia abesme ga do iji fuka tasaman. Do iji fuka tasamaga bu vierafero sisim iji fu vava uri mun kafo nizukro buka juin. Ijefuon bu uri ire ka afikin iji nokarok ga nokarok (4) kege sisim nuon ijia kiriame do ijia sava sisim iji fu do ijia manin. Sisim iji fu do ijia maniko e iji bun uri ve iji fu migegare irasekfuon ijefuon sirimamen.
ACT 27:30 Areme e iji sisim iji abe vako iji bun sisim iji areme vakuai bun sisim ukak iji dab biova fun do guf ijia arin. Ijegrene bun uri e iji biesiavga bu vierafero bu ire afikin iji sisim udam iji bu kiriame do ijia sainva ijin kuniairuga sisim fu gama arimro bu ijeg vierafen.
ACT 27:31 Bu ijegrejga For fu uri e Romko e bomana ijiga e bijaivo fuon iji kia, E guri sisim iji abe roko iji bu sisim igi areme subinai vakva ja izeg una urikva bano kiain.
ACT 27:32 Fu ijeg kiamga e bijaivo iji bun kajek iji bu kege sisim ukak ijia kiriame do ijia sainva iji kania turavga sisim ukak iji fun buibur ijar abe do azan ijia vain.
ACT 27:33 Areme ve fun afarekafa samaijrega For fun uri e fok anadiame kia, Duok kafo if. Ijefuon maiji ja naki sibank uruvana jam sisim ijia karine samua ruain gavo ja duok kafo jaka ba in.
ACT 27:34 Ijefuon na ja anadiame kiavno ni duok kafo if. Regavo ja duok jaba ikva jaka aoik. Rega igia faif. No vierafe God fu e uruvana sisim igia karinva iji ja karauniak.
ACT 27:35 For fun ijeg kuardia barme uri bred kafo kege bu karinva nifak ijia manine Godon oimarme ke tuaseme be abe in. Areme fun bred iji kege e uruvana vajiamga buka oimarvknum kege in.
ACT 27:37 Regavo e iji no sisim ijia ajienva iji bu dainva iji fuka ma uruvana tu adred seventi siks (276) ijeg.
ACT 27:38 E uruvana bun duok ine defiamga bu uri farava uruvana karme saof ijia koren. Farava ijar sisim ijia naoime be afiremo ijefuon bu kam saof ijia use koren.
ACT 27:39 Areme afarma e iji sisim abe roko iji bu ar bu roko iji bu ba gain. Rega bum gak saof irif be jier ijieb sanainvaga bun vierafero bu giriesakva bu sisim iji abe ijia vakro bu ijeg vierafen.
ACT 27:40 Bun ire afikin iji bu kege saof guf ijia saga sisim fu do ijia manino iji kaniafuin. Areme bu madu kajek iji bu kege sisim buin ijia kiriainva iji irasen. Areme bun farai iji abe sisim udam ijia kirava fu ajie vain. Bu vierafero buibur ijar farai iji ufime sisim abe bioga bu iror ijia vakuai bu ijeg ren.
ACT 27:41 Regavo sisim fun jier ijia urame fuka giren. Sisim udam fun jier ijia arinma fu izeg katik. Rega sisim buin fun saof ijar foine kania tuase baren.
ACT 27:42 Fu ijegrega e bijaivo uruvana bu e diburko iji kaniakuai isuar kuai, No kaniaga e be fuba jaraigana vake irif ijia keko ko vakno kuain.
ACT 27:43 Bu ijeg kuai gavo e Romko e bomana iji fu For keunakafa vierafenma ijefuon fu efuon kuriairema bu ijia aren. Areme fun uri e fok kia, Erar do jaraiganakafa vierafekma e iji bu amur jaraikana irif ijia vake e roin bu rad sisim ijefuon in buin tuasenva ijia kunaime vakno kiain.
ACT 28:1 No ijegrene non jaraigana roke irif ijia usen. Regavo saof uf moik datura namo iji no usenva iji no rad vierafega non ar Morta ijia usen.
ACT 28:2 Regavo e ijia karinva iji buka no mukoi ifejduin. Regavo fuka ve dame iduan uriga bun uri mian jame no kuova no ijia irua karin.
ACT 28:3 For fun mian gajo kafo karme jamga tabar be fu ijia nado mian fu naine vuat urino faim tabar iji fu kekome Foron imut kaf ijia utime jakin.
ACT 28:4 Fu jakimga e iji bun game uri bui kuai, Tabar iji fu e guri jakinma iji no vierafega kafu e be kana ruain. Fu saof ijia fu jaraigana ruain gavo no vierafe fuka igia guakno kuain.
ACT 28:5 Bu ijeg kuain revo tabar fu ma For jakin rega fu tabar iji abe katima fu kobarime mian ijia nain.
ACT 28:6 Rega e iji karinva iji bu karine For ga are fu uri nizigome vo tua dijeme gua bu gakuain. Bu kari gaga fu ire kafo fuba rega bu uri kuai, Fuiji fu god beno kuain.
ACT 28:7 Regavo ar iji no karinva samaij ijia ai be fu e Fabriason. Fabrias iji fu saof uf moik datura namo ijefuon e bomana ijefuon fu oimarvknum aferduo no tavan nokbek (3) ar fuon ijia funa karin.
ACT 28:8 Regavo e Fabriason asoij iji fuka adam abe iduaiga fu ar fuon ijia nam. Fu namga For fu aru ijia keko fuon sirimamene imut nigen abedema fu una main.
ACT 28:9 Fu ijegrega e adam abenva uruvana saof uf moik datura namo ijia karioinva iji bu fuon rokga fu e uruvana karauniain.
ACT 28:10 Fu ijegrega e iji bu uri sinuom uruvana no vajuin. Regavo madu non sisim abe vakrejga bu uri duok uruvana no unam ijia iknum vakfuon iji kege sisim ijia naduova no vain.
ACT 28:11 Ijegrene asam nokbek (3) barko non sisim be bu kua Tuin Godno kuavo ijia ajieme non vain. Sisim iji fu ve daga fu saof uf moik datura namo ijia name ve marmga fun no aferduome vain.
ACT 28:12 Non vake mai be bu kua Sirakusno kuavo ijia useme naki nokbek (3) no ijia karin.
ACT 28:13 Areme non uri vake ar mai Regiamno kuavo ijia usen. Regavo afarma non vako buibur fu sisim nuvuon no vako iji ufime dab una ikeniken vake naki nokarok (3) barko no ijia ar Futeori ijia usen.
ACT 28:14 No ijia usevga e God ma vierafejo kafo bu ijia karinvado bun aferduovga no buna naki sibank ijia karin. No buna naki sibank ijia karine non uri diak mai bomana Rom vain.
ACT 28:15 No vakga e God ma vierafejo Rom karinva iji bun no roko iji faime bun roin roke Afias Maket ijia bieduin. Regavo e roin bu roke ar Tiri In ijia bieduome aferduom vain. Bu ijegrejga For fu e iji giame fuka Godon oimarkoga kaven fuon iji fuka ijia una daro bomana aben.
ACT 28:16 Ijegrene non roke Rom usevga bun For kuava fu fuibe naiko e Romkobuon e bijaivo be fu fu samuam.
ACT 28:17 Bu ijegre vake naki nokbek (3) barko For fun Jius e aiko ijiebuon e mamkanuk iji kiama bu besum afuin. Bu afuivga fu uri vuak be ijeg kuardiain. Fu kia, uviaifnun igie na ire ise kafo naba enuvuon igiebuon ren. Regavo madu na unam usuikor saifnuvuon bu kegoijo iji bu nijaiduinva no reoijo na ijefuon ire ise kafo na ba reoin. Regavo bum na abe Jerusarem ijia dibur unieme ivia bu na abe una e Romko igi miain.
ACT 28:18 Bu duna kafokafo na kien gavo bu giega na ire ise kafo naba ren ijefuon bu na abe kaniekuai reba bu gieme aren.
ACT 28:19 Regavo e Jius iji buiji buka isediain ijefuon na koiknu kia na e Romkobuon e bomana Sisa iji gakno kiame ruain. Regavo naiji na irerafuon enun iji buisina vuak ise kafo kuainva bakin.
ACT 28:20 Ijefuon na ja giame jana vuak iji kuaikafie vierafen. Ijefuon maiji na e iji e Isrerko bu samuavo ijefuon afikin iji nar abejo ijefuon ivia na igia senkma manijno kiain.
ACT 28:21 For fun ijeg kuardiamga Jius e mamkanuk iji bu kua, Noiji no fas kafo noba Judia ijia oisina ken. Regavo madu enuvuon God ma vierafejo roin bu ijia ruain ga bu vuak ise kafo oisina buba kuarduin.
ACT 28:22 Regavo nom vuak on kafo faikuai vierafen ijefuon maiji e fok igi oinva buka a ga e iji roin bu unam jon ja reoijo ijefuon joisina kuainvano kuain.
ACT 28:23 Bu ijeg kuardame bun una tavan be abedeme kua, No tavan ijia una ana vuak kafo kuaikno kuain. Areme bun tavan iji bu abedenva ijia e uruvana bun roke For fino ijia usen. Bu usevga For fu suok ijia anerene vuak iji izeg God fu efuon ijiebuon oij iji samuagdiamo iji kuardiame vake ve ijia nakin. Fu vuak iji kuardiame una Mosison akaij ijia bija kuardiaknum una e Godon vuak vierafene kuaivo ijiebuon ijia bija kuardiain. Fu vierafe fuka oibuon iji kam karoga bu vuak fuon iji ma vierafekafa fu ijeg ren.
ACT 28:24 Fu ijeg kuardiamga e roin bu vuak fuon faime kuai, Fu ma kuaimno kuain rega roin buba mukoi vierafen.
ACT 28:25 Ijefuon rad bun una ar buon ijia vaknum vuak iji For fu kuardiainma iji dab bui siguknum vain. For fu kuardiame kia, Godon Kaven Akai ijar vuak ma iji Asaia e Godon vuak vierafene kuaimon ijefuon oij ijia vierafe mama fu saifjon ijiebuon kuain. Revo vuak iji Asaia fu kuainma iji fu ijeg kuai,
ACT 28:26 Ni va e ijin kia, Ja karine vuak bu kuardiavo iji faik revo jaka ba fainva igeg reok. Ja karine nisaik gavo jaba gak.
ACT 28:27 Ijefuon maiji e iji bu nigen bakin ga roin bu ada buon bu bijukuriain. Regavo madu ni buon bu nisuin. Regavo ijeg bubatie bu ni narame nisaik ga ada tit buon bijukuriainma iji fu bakirega bu una faik. Regavo madu nigen buon fu una samafrega bu vuak vierafek. Areme ijar buson una oi karoime nun roga na bu ifejdiakno kuain.
ACT 28:28 Areme For fun vuak fuon kuardiame barekafa kia, Ni mukoi vierafef. Ijefuon maiji e Jius bakin iji bun Godon vuak iji izeg fu e karauniamo iji bun fain. Ijefuon na vierafe bun karine faikno kiain.
ACT 28:29 For fun vuak iji kuardiame barko e Jius uruvana bun dab ata roinroin rene vuak iji dab kuaime sigunamiknum vain.
ACT 28:30 Bu vako For fun juaivasia nokarok (2) fu ijia ar be fu koikfuon mon ijia kimenma ijia fin. Fu ijia fiknum e iji bu fu gakuai roko iji fu oimarvknum aferdia ar fuon ijia funa karioin.
ACT 28:31 Fu aferdiame ijia fiknum vuak iji izeg God fu efuon ijiebuon oij iji fu samuagdiamo iji kuardiain. Fu ijeg kuardiaknum madu izeg E Bomana Jesu irerag fu renma ijiga vuak fu nijaidiainma ijin kuardiain. Regavo vuak iji fu kuardiainma iji fuba sauime kuardiaknum vo jum. Regavo fuka samakaf ijia oimarvknum kuardiain.
ROM 1:1 Efnun fas igi For nar isoime e fok ja ai Rom guf ijia karinva iji ja nijiame anadiav. Naiji na Jesu Kuraison ik rejo revo fun usuibe Godri na abe unien. Ijefuon na e vuak fuon abe oijo be nar vuak fuon ma iji abe e roin kuardiav.
ROM 1:2 Regavo Godon vuak ma iji iviakma na abe kuardiaoijo iji fun fur koikfuon usuibe e vuak fuon vierafene kuaivo ijiebuon oij ijia vierafe miama bun vuak iji abe e roin kuardiain. Regavo madu bun abe buk akaij ijia isoin.
ROM 1:3 Regavo vuak ma iji fu kuarduinma iji fu Farifuon ijefuon kuarduin. Farifuon Jesu Kurais fu E Bomana nuvuon ga fuiji fu ma ema ijieb moikigia nafen. Fuiji fu ma ema ga fu Kin Devidon agan ijia uinre ruain. Regavo fu guamga Godri kuamga fu una urin. Ijefuon fu una urinma ijia fu e fok no anf nijuin. No ijia game vierafero fu iji fu ma Godon Farif ga fu e darokin ga fu sanainma iji abe oinonro no ijeg vierafekro fu iji Godri kuamga fu una urin.
ROM 1:5 Jesu fu ire ma iji fu nun renma ijia fun na kienma ijefuon na fateroin ijia vuak fuon abe oij. Na vuak fuon abe e kuardiaga e fuon fok moikigia karinva bu Jesu ma vierafeknum vuak fuon ma iji igakfuon.
ROM 1:6 Ijefuon e fok ai Rom ijia karinva iji jak fu Godri ja aferdiainma ijefuon jaiji ja Jesu Kuraison e ren.
ROM 1:7 Regavo fun Godri e fok ja ai Rom karinva iji oijmiame ja aferdia una e fuon ren. Ijefuon fas igi na isoime ja nijiav. Regavo na nun na sirimamejo ijia na vierafe God Asoinuvuon ga E Bomana Jesu Kurais bu tavan bog mardiaknum ifejdiaga ja afurve kariok.
ROM 1:8 Amur iji na joifuon Jesu Kuraison if ijia Godon oimarek. Ijefuon maiji jon ja izeg Jesu Kurais ma vierafejo iji e roin moikigia karinva iji bun faim baren.
ROM 1:9 Regavo God fun na gie na tavan bog sirimamejor na ja vierafej. Regavo fun giega naiji na oinun fok na God nun ijefuon ik rej ijefuon maiji na Farifuon ijefuon vuak ma iji abe e roin kuardiav. Na nun sirimamejo ijia naka ja vierafejo iji God fun gieme vierafen. Ijefuon na God kuaga fur radkma ijia fuon fu vierafeno ijia kiega na una ja giak vuak.
ROM 1:11 Na bomana vierafe naka una ja giakafa vierafen ijefuon maiji na ja ifejdiame besum God kuaga fu Kaven Akai fuon ijefuon daro maiji kafo ja vajiaga ja daro abeok.
ROM 1:12 Regavo vuak igi na kuaivo ijefuon maiji na vierafero no besum afuime nuvuon no ma vierafejo ijia nuvuon nijainami vo ifenamiga no daro abekro na vuak iji kuardiav.
ROM 1:13 Regavo efnun ni vuak igi mukoi faime vierafef. Tavan bog naka una ja giakafa vierafen gavo ire kafokafo ijieb unam nun bijuv. Na vierafero naka izeg ur na e Jius bakin ijiebuon na renva ijeg na una madu jon rekafa vierafen. Na vierafe na Godon vuak ma iji abe ja kuardiaga rad fuka vuak ijar rarek ga vuak ijar ifejdiaga e fok ja Jesu ma vierafek.
ROM 1:14 Regavo God fu ik iji na mienma ijefuon na e fok kuardia ga vuak iji nijaidiakfuon. Ijefuon na e iji bu mai ma ijia karinva iji abevo e iji bu tarar karinva iji nijaidiak. Regavo madu na vuak iji abe e iji bu sikur rene vierafenva iji abevo e iji buba sikur rene vierafenva iji nijaidiak.
ROM 1:15 Ijefuon na bomana vierafe na Godon vuak ma iji abe e iji ja ai Rom guf ijia karinva iji kuardiak.
ROM 1:16 Naiji na ma vierafe Godon vuak ma iji fuka ma ga ka darokin. Ijefuon erar fu vuak iji mukoi faime Jesu ma vierafekma God fu e iji keunak. Regavo vuak iji bu e Jius ijieb amur fain revo e Jius bakin iji bu rad fain.
ROM 1:17 Regavo Godon vuak ma ijar fu no nijaiduoga no Jesu Kurais irerag fu nuvuifuon renma ijin abe ma vierafekva fu no karaunuoga no maturaik. Regavo vuak ijefuon iji bun buk akaij ijia isoinva iji bu ijeg isoi, E be erar fu Jesu ma vierafeno ijefuon God fu game keunainma e iji tavan rad fu unam ma ijia fivak.
ROM 1:18 E fok moikigia karinva bu ise uruvana reoin revo ise ijar unam ma iji Godon roko iji fu rarem. Ijefuon God fu varur ijia ziemo ijefuon e moikigia ise reoijo iji fu kege vajai fian vajiak.
ROM 1:19 God fu e iji kege vajai fian vajiamo ijefuon maiji Godon vuak ma iji bu faikfuon iji fu samakaf bun vierafen. Regavo madu fun Godri koikfuon vuak fuon abe mukoi samafrena bun gain ga vierafen regavo buba amarigia mimatame reoij.
ROM 1:20 Bu izeg daro fuon iji gakva bakin gavo bu ire fok kafokafo fu amardiainma bu iji giavo ijia bu vierafe God fuka e darokin. E fok Godon daro iji bun gav ijefuon rad fu una ise nuvuon ke mazim guokafa ruakma ijia e iji bu izeg sauiknum vuak ma iji bu kegoinva ijesugin kuardakva bakin.
ROM 1:21 E iji God bun vierafen gavo bu fu aroiknum fu oimardabatie fuka marek. Regavo bu fu uzainva ijefuon nigen buon buba mukoi vierafen. Bu nigen buon buka ire kafo ijia naoivo bakin revo buka ma nakinma ijia oin.
ROM 1:22 Bu koikbuon kuai, No ma vierafene kegoijo kuaiv gavo buka ma kufuimej.
ROM 1:23 E iji bu God ma iji tavan bog ijia fivako iji buka uzame una ire kafo e imut ijia amardiainva bu iji ato same kam arordiav. Ire kafo bu emab kege fanuf ga um igeg amardiainva bu ijin kam arordiame aroifiriv.
ROM 1:24 E iji bu ire ise iji rene God nuigafainva ijefuon God fu areko e iji bu una fudainamiknum ire ka ma ise iji bu oibuon ijia vierafenva iji reoin. Bu ijegrejknum una kaifijaf ijiena bukikum ire ise jukin ijin reoin.
ROM 1:25 Bu God ma iji bu uzagavo bu una ire kufui iji ma vierafen. Bu ire iji God fu amardiainma ijiebuon ik reknum bu kam name arordiain revo God ma iji fu ire fok amardiainma iji bu game ijia arev. Regavo bu God ma iji abe aroiv vo fuifuon ik rekva fuka markfuon.
ROM 1:26 E fok bu God ma iji bu nuigafame una unam ise ijekin renva ijefuon God fu bu magiako bu una unam ise kafokafo bu jufdiakfuon ijia reoin. Regavo bara iji bu amarigia baru buon giame jajiavo bakin gavo bu una bukikum unam ise iji rej.
ROM 1:27 Regavo efarif iji buk bu bara buon iji amarigia giame karvo bakin gavo bu unam ise iji rene una bukikum fudainamiv. Efarif iji bu unam ise bu jufdiakfuon ijia renva ijefuon bun koikbuon vajai buon iji kam vajai fian mian.
ROM 1:28 God fu giamga e fok bu unam ma iji fu vierafenma iji buba javga fu arekoga e iji bu oibuon iji buba mukoi vierafene reoin. God fu bu arenma ijefuon ire ise iji bu vek ijia reoij.
ROM 1:29 Bu ijegrejo ijefuon ire ise fok bun nigen buon ijia naoiv. Regavo ire ise iji bu rejo iji bu e kaifijaf sinuom giame oijmiaknum moik igefuon ga vajai surif igefuon ise iji vierafej. Regavo bu e kafob ire roin rejo buka iji giame isuar buisina kuaiknum ga e kaniaknum e roin ziegafiaknum vuak kufui kuaiknum ire ka ma ise iji rekuai vierafej. Regavo madu bu kaifijaf musikiaknum ga e kafobuon vuak ise iji giame isuar kuaiknum God bu ma uzav. Bu kaifijaf roin kia, Jaiji ja ise rejo kiaknum buka aroikaraknum koikbuon if buon kam mamkanuk rej. Regavo madu bu tavan bog ire ise iviamkor kafo rekuai vierafe ga eofijaf igiavo bakin. Regavo buon vierafejo iji fuka ma ise ijesugin ga madu bu akai fok buba mukoi jajiav. Bu kaifijaf bu amarigia oijmiavo iji giame buon oifian abejo bakin.
ROM 1:32 Bun Godon akaij ijia fu kuai erar ire ise ijekin iji rekma fu guakno kuainma iji bun vierafen. Godon akaij iji bun vierafen gavo bu magaga una ise kafokafo iji reoij. Regavo madu bu buonkua ijegrejo bakin revo bu giamga e kafo bu ise kafo rejo bu kia, Iji fun marenmano kiav.
ROM 2:1 Ijefuon efnun jab karine e kafobuon ise bu renva iji giame kiak jaka ise renvano kiak. Erar fu ijegrega iji nika are ijefuon maiji God fu una ruakma a izeg una God kuardakma bakin. Ijefuon erar a e kafobuon ise bu rejo iji giame kiaknum vo ak una ise besum iji reoinon iji an koikon on vajai fian manamim.
ROM 2:2 No vierafega God fu fuonkua daro namo ijefuon e iji bu ire ise ijekin rejo iji fur giame ke vajai fian vajiak.
ROM 2:3 Regavo efnun ja e kafobuon ise bu rejo iji giame kiav revo jak ja ise besum iji reoijo ijefuon ni giame aref. Regavo a magaga e kafobuon ise iji giame kiakma iji God fu una ruakma a izeg ko sauikma bakin.
ROM 2:4 Regavo naba gain jakafu fuon fu ma rediamon ijigam fu ja oi bomana vierafeno ga madu ire ise kafo jon migegare reno bakin iji ja uzav. Regavo jan vierafen fuiji fu e ire ma ijesugin rediamon ijefuon fu ja aferdia una fuon roga ja oijon karoime una ma rekro fu iji vierafen.
ROM 2:5 Regavo jaba mukoi faime vierafej ijefuon ja koikjo Godon nifak ijia ise jon kam uruvana rej. Ijefuon tavan iji God fu fuon ma ijekma una e fokbuon ise bu renva iji giakma fu ise jon ijefuon ja kege uruvana vajai fian vajiak.
ROM 2:6 Ijefuon tavan iji God fu una ruakma eraneb bu unam fu vierafenma ijia kegoinva iji fu ire ma kafo una ef vajiak. Regavo eraneb bu buon vierafenva ijia kegoinva iji fu kam vajai fian vajiak.
ROM 2:7 E kafo buka tavan uruvana mimatame unam ma ijia reoij. Bu tavan uruvana kaifijaf ga e kafokafo ifejdiaga God fu bu arordiaknum nidosiakro bu iji vierafen. E iji ijeg kegoijo iji God fu buon oimarmo ijefuon fu bu kege uniaga tavan rad bu ma karivak.
ROM 2:8 Regavo e roin bu vek buon vierafenva ijia reoij. Bu unam ma iji bu uzame una unam ise ijia reoij. E iji bu ijegreoijo iji God fu bu mukoi ziegafiame kam vajai fian vajiak.
ROM 2:9 Regavo e fok bu moikigia karine ise kafokafo reoijo iji God fu bu giak. Tavan rad God fu bu kege vajai fian vajiaga bu vajai fian abek. Regavo iji God fu ur e Jius iji kege ijeg vajai fian vajiake rad fu e Jius bakin iji kege vajai fian vajiak.
ROM 2:10 Regavo eraneb bu unam God fu oimarkfuon ijia kegoinva iji God fun giain. Ijefuon fu fuon afuimo ijiga sanainma iji kege bu arordiame vajiak. Regavo God iji fu rekma iji amur fu e Jius ijiebuon rene rad fu una e Jius bakin ijiebuon rek.
ROM 2:11 Ijefuon maiji God fu e fok fu kege besum name giamo ijefuon fu e Jius ijiga e Jius bakin iji fu kege besum name giak.
ROM 2:12 Regavo e Jius bakin bu Godon akaij iji e Mosis fu minma iji buba aben. Regavo bu vek ise kafokafo reoijo ijefuon God fu ise buon bu rejo ijefuon bu kam vajai fian vajiak. Regavo e Jius iji bu akaij iji bun aben ijefuon bu ise kafo rejo iji God fu akaij iji bu kege tuasenva ijefuon fu tavan rad ise buon ke mazim giak.
ROM 2:13 Regavo e iji kafo bu vierafero bu Godon akaij iji fainva ijefuon bu Godon nifak ijia bun ma ijia kegoijoro bu ijeg vierafen. Regavo iji fuba maren. Regavo bu Godon akaij iji faime mimatame kegokva ijar bu Godon akaij iji amarigia jakfuon.
ROM 2:14 E Jius bakin iji bu Godon akaij iji buba aben. Regavo bu tavan kafo bu buon vierafenva ijia jajiaoijori God fu fine giamga buka maren. Bu akai fuon iji buba fain gavo unam buon bu kegoijo iji fuka maren.
ROM 2:15 Regavo ire Godon akaij ijekin iji e Jius bakin iji bun amarigia oibuon ijia vierafenva ijefuon bu unam ma ijia reoij. Revo vierafe ijar oibuon ijia namo ijefuon bu unam ma ga ise bu rejo iji fu vierafe buon ijar nijaidiam.
ROM 2:16 Ijefuon Godon vuak ma iji na kuardiava ja fainva iji ire fok bu tavan iji God fu una roko ijia rek. Regavo tavan ijia God fu Jesu Kuraison duadok ijia e fok ijiebuon oij iji besubesum kege mazim giak.
ROM 2:17 Regavo iviakma vuak igi na e Jius iji kuardiav. Ja koikjo ja kuai no e Jiusno kuaiv. Regavo tavan uruvana ja Godon akaij ijia biduame kariknum kuai, Noiji Godon nifak ijia non unam ma ijia reoij ijefuon God fu no guome oimarkno kuain.
ROM 2:18 Regavo ja unam izeg God fu vierafe ja ijia kegokfuon iji jan koikjo vierafen. Regavo madu fun God akai fuon ijia nijaidiainma ijefuon ja unam ma iji ja kegokfuon iji jan vierafen.
ROM 2:19 Regavo jan vierafe jaiji ja e iji buba vierafenva iji aferdia una Godon ruak. Regavo madu e iji bu nakinma ijia karinva iji jar sanainma iji abe miav.
ROM 2:20 Regavo tavan uruvana jar e iji buba mukoi vierafene kegoijo iji nijaidiaknum e iji vek rubdiainva iji nijaidiav. Ja vierafero Godon akaij iji jan amarigia aben ijefuon vuak fok ja kuaivo iji ja vuak ma ijesugin kuaivro ja ijeg vierafej.
ROM 2:21 Ja vuak ma iji e roin nijaidiav gavo jaiji ja irerafuon vek ise kafokafo reoij? Ja e roin kuardiame kia, Jab niesavo kiav gavo jaiji jabe niesav ki ja bakin?
ROM 2:22 Regavo ja e roin kuardiame kia, Jab e kafobuon bara turakno kiav gavo jaiji jabe e kafobuon bara turav ki ja bakin? Ja e kafo bu god kafokafo moikigia amardiame buon sirimamene vo arordiavo jaka kuriaireknum ziegafiav. Regavo jabe God kafokafo iji bu amardiainva ijiebuon ar ijia arume ire kafo niesav ki ja bakin?
ROM 2:23 Ja kuai, No Godon akaij iji non amarigia faime abenvano kuaiv. Regavo jak jabe Godon akai ke tuaseknum if fuon abe arafirivo ki ja bakin?
ROM 2:24 Igia fai buk akaij iji bu usuibe isoinva ijia bu ijeg kuai, E Jius iji jar unam ise kafokafo rejo ijefuon e Jius bakin bu iji giame una vuak ise kafokafo Godsina kuaivno kuain.
ROM 2:25 Ja Godon akai amarigia igiakva iji surif jon bu kania ufume anf namdiainva iji fu maijekma ijefuon fu rad ja ifejdiak. Regavo ja akaij iji jaba mukoi igiakva anf iji bu namdiainva iji fu ma ijekma bakin.
ROM 2:26 Regavo e Jius bakin be fu vajai fuon ijia buba kana ufume anf abeden gavo fuka Godon akaij iji amarigia igiame kegokma God fu e iji game oimarek. God fu game vierafero e Jius bakin iji fu vajai fuon ijia anf namo igeg kegoinoro fu ijeg vierafek.
ROM 2:27 Ijefuon tavan iji God fu e fok ijiebuon ise iji kege mazim giakma ijia fu izeg e Jius iji ja unam isema kegoinva iji fu samakaf giak. Regavo e Jius bakin iji bu unam ma ijia kegoinva iji fuk samakaf giak. Ijefuon maiji e Jius iji ja vajai surif jon kania ufume anf nain revo jaba Godon akaij iji amarigia igiav. Revo e Jius bakin iji bu Godon anf kafo bu vajai buon ijia ba nain gavo bu Godon akaij iji buka amarigia igiav.
ROM 2:28 Ijefuon e iji vajai surif buon kania ufume anf nainva iji bu ma e Jius bakin. Regavo e Jius ma iji fu e iji Godon Kaven ijar oifuon ijia amarema fu una e iviamkor renma ijar fu ma e Jius. Ijefuon maiji fu Godon akaij iji igiame vo Godon anf iji abe vajai fuon ijia abedenma bakin revo fu Godon Kaven iji abena fu oifuon ijia fin. Ijefuon e ijekin iji fu ema ijieb fu abe aroikva bakin gavo fu Godri tavan rad fu abe aroik.
ROM 3:1 Regavo surif ja kania ufume anf igeg nainva iji fu ma irerag joifuon ren? Rega ni vierafe ja e Jius rekva iji fuon maiji fuka uruvanak.
ROM 3:2 Ijefuon ma be iji Godon akaij iji e Mosisri abe e Jius iji miain.
ROM 3:3 Regavo e Jius kafo buba Godon vuak ma iji amarigia vierafene abe oibuon ijia abedekva ja vierafe God fu izeg rek? Jab vierafero e iji bu vuak fuon ma iji buba mukoi vierafenva ijefuon God fu ire ma kafo fu rad buon rekno kiainma iji fu arekro jab ijeg vierafek.
ROM 3:4 Regavo jan vierafe e fok bu tavan uruvana bu kufui meknum e biesiav. Regavo Godon vuak kufui be a gakma bakin. Fuka ma bakin ijefuon maiji buk akaij iji bu usuibe isoinva ijia fu ijeg kuai, Tavan uruvana vuak on a kuaimon iji nika vuak ma ijesugin kuaimoga e fok bu gak. Regavo tavan kafo e roin bu ise on ijefuon a kuagakva ni vuak ma ijesugin kuardiaga bu game arekno kuain.
ROM 3:5 E roin bu ijeg kuaiv ise nuvuon no rejo ijar e roin ifejdiaga bu Godon unam ma iji game vierafek. Ijefuon God fu irerafuon ise no renva ijefuon no vajai fian vajuok?
ROM 3:6 Bu ijeg kuaimoij gavo na vierafe God fu ma ijefuon no kam vajai fian vajuomon. Ijefuon maiji Godon unam fu reno iji fuka unam ma ijesugin ren. Regavo e iji bu vuak ijeg kufuimene kuaimoijo iji fu makma tavan rad God fu una ruakma fu izeg fine e fok igiebuon ise iji giak?
ROM 3:7 Ijefuon e roin bu kuai, No vuak kufuime kuaiknum ise kafokafo rekva iji fun maren. Ijefuon e roin bu ise nuvuon no rejo ijia guome migegare vierafero Godon vuak iji fu ma ijesugin ro bu ijeg vierafek. Regavo vuak ijeg bu vierafene kuaimoijo iji fu makma God fu ise nuvuon no renva ijefuon no kam vajai fian vajuomon iji fuba maren? E roin bu ijeg vierafene kuaiv. Bu kuai, Rono ise kafokafo rega ise nuvuon ijar Godon if abe ajiemo kuaiv. Regavo vuak ijeg bu vierafene kuaivo iji fuka vuak kufui ga fuka ma bakin. Regavo e roin bu vierafero For nar vuak kufui ijekin vierafene kuaimoijoro bu ijeg vierafene vuak ise nuisina kuaiv. Revo na vierafe eraneb bu ijeg vierafene nuisina kuaimoijo iji Godri rad e iji kege vajai fian vajiak.
ROM 3:9 Ijefuon ja izeg vierafej? Ja vierafega e Jius noiji Godon nifak ijia non maturain gavo e Jius bakin iji bu Godon nifak ijia buba maturain? Iji fuka bakin revo e fok no Godon nifak ijia noba maturain revo noka ise uruvana rej. E Jius abevo e Jius bakin iji no besum Godon nifak ijia noba maturain. Regavo vuak iji nan usuibe kuardia ga nijaidiava jan vierafen.
ROM 3:10 Regavo vuak ijefuon iji bun usuibe buk Sams ijia ijeg isoime kuai, E besum fuba Godon nifak ijia maturain.
ROM 3:11 E besum fuba ma vierafene Godon unam ma iji gakrok nisaimo bakin. Regavo e fok bun God nuigafame bun unam ise iji jaoij. Regavo e fok bu unam ma iji ba mimatame kegoijo ijia e besum fuka ma bakin.
ROM 3:13 Regavo ir vuat buon ijia e roin bu aoiv. Regavo vuak buon buka kufuij ijesugin kuaiv. Regavo vuak buon kufuij ijar tabar miarin igeg e roin jakiaga bu aoiv.
ROM 3:14 Bu ir buon buka vuak zievo ijesugin kuaiv.
ROM 3:15 Bu migegare e roin kam arafiriaga bu vajai fian abeknum vo kaniaga bu aoikuai vierafej.
ROM 3:16 Regavo tavan bog bu oijo iji bu e roin arafiriaga bu vajai fian abej.
ROM 3:17 Bu unam ma iji bu afuime karivakfuon iji buba mukoi vierafen.
ROM 3:18 Regavo madu buka ba God juvknum agoiv. Regavo vuak iji e igi nor ijegreoij ijefuon God fu usuibe ijeg kuaima bu buk akaij ijia ijeg isoinva ijin.
ROM 3:19 Ijefuon God fu akai fuon abe e Jius fok no nijuin. Regavo akai fuon iji noka ba amarigia igiame reoij. Ijefuon tavan iji God fu una e fok ijiebuon ise iji fu ke mazim giak ruakma ijia noiji no izeg sauim vo izeg fu kuardakva bakin. Ijefuon maiji no ma kegoijo kuakva noka kufuimek.
ROM 3:20 Regavo e fok no Godon akaij iji noba mukoi jaoij. Ijefuon fu erar Godon nifak ijia maturainma bakin. Ijefuon Godon akaij ijar dakaroim nijaiduoga e fok no game vierafero noiji no ise renvaro no ijeg vierafek.
ROM 3:21 Ur no Godon akaij iji faime ijia jaoin revo akai fuon fuba ifejduoma no Godon nifak ijia maturain. Regavo iviakma God fu una unam be ijia ise nuvuon no reoijo ijia karaunuome no kege una unam fuon ma ijia unuom. Regavo unam be iji God fu iviakma nuvuon reno iji fun usuibe akai fuon ijia kuarduin. Areme madu fun usuibe e vuak fuon vierafene kuaivo ijiebuon oij ijia vierafe vajiamga bun abe no kuarduin.
ROM 3:22 God fu e iji bu oibuon ijia Jesu Kurais ma vierafejo ijiebuon ise iji giame aregavo bu karauniame una unam fuon ma ijia uniain. Regavo e fok no Godon nifak ijia no besum. No kafokafo bakin ijefuon maiji e fok no ise uruvana reoijo ijefuon no Godon sanainma iji noba gain.
ROM 3:24 Noiji no ise reoij. Regavo God fu Jesu Kuraison if ijia ire fuon ma iji fum kege no vajuomo ijia fu no karaunuome una unam fuon ma ijia unuom. Regavo Jesu Kurais fu no karaunuinma ijefuon God fu if fuon ijia ire ma iji kege no vajuom.
ROM 3:25 God fu Jesu Kurais kuamga fu e fok ijiebuon ise ijefuon guain. God fu vierafero Jesu Kurais fu guakma fur e fok ijiebuon ise bu reoijo ijia karauniakafa fu iji Jesu kuama fu guain. Regavo fun Jesur e fok ijiebuon unam amaren ijefuon erar fu Jesu Kurais ma vierafeno iji God fu ise fuon game arek. Regavo God fu unam iji fu kenma ijia fu fuon sanainma ga maturainma iji abe e fok no nijaiduin. Usuibe God fu oi dasume isuarigia fine e fok ijiebuon ise iji fuba amarigia giame kuaim.
ROM 3:26 Regavo iviakma igi e fok bu ise reoijo iji fu vajai fian vajiamo ijefuon maiji e iji bu ijia game vierafero God fu ma ijesugin reoinoro bu ijeg vierafek. Regavo God fu unam ijeg fu reno ijia fu unam fuon maum reno iji abe e fok nijaidiam. Ijefuon eraneb bu Jesu ma vierafejo fu e iji karauniame una unam fuon ma ijia uniam.
ROM 3:27 Ijefuon no izeg vierafek? No vierafero no Godon akaij iji non amarigia igiavo ijefuon no nifak fuon ijia no maturainvaro no ijeg vierafene noka nuvuon aroinamiv. Regavo iji fu bakin ga no nuvuon izeg Jesu no ma vierafejo ijia no Godon nifak ijia no maturain.
ROM 3:28 Ijefuon no vierafe e fok bu Godon akaij iji amarigia igiavo ijefuon bu nifak fuon ijia maturainva bakin. Regavo bu buon izeg bu Jesu ma vierafejo ijia bu Godon nifak ijia bu maturain.
ROM 3:29 Regavo ja izeg vierafej? Ja vierafega God fu e Jius ijesugin samuagdiaknum bu karauniam? Iji fu bakin revo fu madu e Jius bakin ijiebuon God. Ijefuon maiji e fok no e ni kafokafo bakin ijefuon fu e Jius abevo e Jius bakin iji fu kege besum samuagdiam. Fu e fok ijiebuon God ijefuon e Jius abevo e Jius bakin eraneb bu Jesu ma vierafejo iji bu nifak fuon ijia bu maturain. Ijefuon God fu karauniame ke unam fuon ma ijia uniak.
ROM 3:31 Regavo jab vierafero no Jesu ma vierafejo ijefuon no Godon akaij iji noba amarigia igiakro jab ijeg vierafek. Iji fuka bakin. Revo no Jesu ma vierafekva no madu Godon akaij iji amarigia igiak.
ROM 4:1 Regavo ja vierafega sai nuvuon e Eburam fu usuibe God ma vierafenma iji fu no izeg nijaiduom?
ROM 4:2 E Eburam fu Godon nifak ijia fu ire ma kafo kegoinmabatie God fu game fuon ma iji abe fu makfuon. Regavo Eburam fu iji fu renma ijefuon fuba una koikfuon fuon aroinamin revo fum una God aroime if fuon iji abe ajien.
ROM 4:3 Ijefuon maiji bun usuibe Godon buk akaij ijia isoime kuai, E Eburam fu God irerag ma kafo fuon rekno kuainma iji fu abe ma vierafen. Fu Godon vuak iji ma vierafenma ijefuon God fu Eburam abe una unam fuon ma ijia unainmano kuai.
ROM 4:4 Regavo e be fum miji a mon vajakma bakin. Regavo a ik fuon rekma fu iji a mon vajakfuon.
ROM 4:5 Unam besum ijeg vo erar fu ik kafo God fu oimaikfuon iji ba ren gavo fum Jesu ma vierafeno iji God fun game vierafen. Regavo madu eraneb bu unam ise kegoijo iji bu God iji fu e fok ijiebuon ise iji giame aremo iji ma vierafeno iji fun gia vierafen. Ijefuon tavan rad e ijekin iji God fuba vajai fian vajiagavo fu karauniak.
ROM 4:6 Regavo vuak ijefuon maiji fun usuibe e Kin Devidri kuai, Erar fu ire ma kafo God fu oimaikfuon iji reno bakin gavo fum God fu kuainma fu iji ma vierafekma Godri fu keunak.
ROM 4:7 Regavo Kin Devid vuak ijefuon maiji fu kuainma iji fu ijeg kuai, Erar fu ise rega God fu game arenma e iji fu oimarek. Regavo erafon ise iji fun Godri ga dazme abe sauinma e iji fu oimarek.
ROM 4:8 Regavo erafon ise iji E Bomana fu gain gavo fuba abe vajai fian makafa vierafenma e iji fu bomana oimarek.
ROM 4:9 Regavo vuak iji e Devid fu usuibe kuainma iji ja izeg vierafek? Jab vierafero Devid vuak iji fu e Jius iji bu surif buon kania ufume Godon anf igeg nainva ijiebuon ijesugin kuainmaro jab ijeg vierafek. Regavo vuak iji fu kuainma iji fu e fok igi nuvuisina kuain. Regavo ur e Eburamon na kuardiainva ijeg na una kuardiakno ni faif, Eburam fu God ma vierafenma ijefuon God fu Eburam keuname abe unam fuon ma ijia unain.
ROM 4:10 God fu ur e Eburam abe unam ma ijia unain. Areme rad Eburam fu surif fuon kana ufume Godon anf abeden. Ijefuon e Eburam fu anf ijia game vierafero ur fu God ma vierafenma ijefuon Godri fu abe unam ma ijia unainmaro fu ijeg vierafen. Ijefuon fun Eburamri fuonkua amur God ma vierafega Godri fu keuname abe unam fuon ma ijia unain. Ijefuon erar bu God ma vierafega fu karauniamo e ijieb bu ma e Eburamon uifarif.
ROM 4:12 Regavo e Eburam fu e Jius iji bu surif buon kania ufume Godon anf nainva ijiebuon asoij. Regavo e Jius iji buba vierafero buiji bu Godon anf iji nainva ijefuon bu e Eburamon uifarifro bu ijeg buba vierafek. Buiji bu Eburamon uifarif ijefuon maiji e Eburam fu Godon anf iji fuba abenma ijia fu izeg God ma vierafeknum fioinma iji e Jius iji buk bun ijeg reoij. Ijefuon bu e Eburamon uifarif.
ROM 4:13 God fu usuibe e Eburam ga aganfuon fu kiainma iji fu ijeg kia ire fok moikigia naoivo iji na abe ja miakno kiain. Regavo e Eburam fu Godon akaij iji mukoi igiainma ijefuon God fu moikigi abe bu miainma bakin. Regavo fun e Eburamri God ma vierafega Godri fuon oimarknum keuname abe unam fuon ma ijia unain. Ijefuon God fu gaga Eburam fun maturaimga fu moikigi abe Eburam ga uifarif fuon iji miain.
ROM 4:14 Regavo e fok bu Godon akaij ijesugin igame kegoinvabatie no izeg unam fuon ma iji abek? No izeg God ma vierafek? Regavo madu God fu izeg ire ma iji fu vajuokno kuinma iji kege vajuok? Ijefuon no akaij ijesugin igakva bakin gavo no God ma vierafek.
ROM 4:15 Regavo Godon akaij iji fu namo ijefuon e fok bu akai fuon iji igiav. Regavo erar fu akaij iji kege tuasekma rad God fu e iji kege vajai fian vajiak. Regavo God fu akaij iji fuba nainmabatie e fok bu ise kafokafo bu reoijo iji bu izeg mukoi giame vierafekva bakin.
ROM 4:16 Regavo eraneb bu Jesu ma vierafekva God fu vuak fu kuainma ijegrene e iji karauniame ke unam fuon ma ijia uniak. Regavo God e iji fu karauniamo iji fu e Jius ijesugin karauniamo bakin. Regavo fuka e fok bu e Eburam fu God ma vierafenma ijeg buk God ma vierafejo fu e iji karauniak. Regavo ni vierafe usuibe e Eburam fu God ma vierafenma ijefuon erar fuk iviakma God ma vierafenma e iji fu e Eburamon uifarif.
ROM 4:17 Noiji no e Eburamon uifarif ijefuon maiji God fun usuibe buk akaij ijia e Eburamon ijeg kuai, Aiji nan abe unainvado e ar iror igia oinva iji bu uifarif on rekno kuain. Ijefuon e Eburam fu Godon nifak ijia fu ma asoinuvuon ijefuon maiji fuka God ma vierafen. Ijefuon God iji fuka ma e darokin. Revo fur e iji aoivo iji kiaga bu una urij. Regavo madu ire fok no giavo bakin iji fur amardiain.
ROM 4:18 God fu Eburam kua, Aiji nan abe unainvado e fok bu on uifarif rek. Ijefuon e Eburam fu God ma vierafene tavan bog fu vuak iji God fu kuainma iji vierafeoin. Eburam fun eoren ga God fu kua, Barakon fu am nafega vo rad uifarif on bu ire mujur iji a giamo ijeg uruvana rekno kuainma ijefuon Eburam fu vuak iji abe oi fuon ijia abedeme ma vierafeoin. Fu vierafero fu am be nafekro fu ijeg vierafene God ma vierafeoin.
ROM 4:19 Regavo e Eburam fun ma eoren gavo bara fuon Sera fuk fun ma barasren. Ijefuon bu izeg una am be nafene samuakva bakin. Regavo e Eburam fu God vuak iji fu kuainma ijar oifuon ijia namo ijefuon fu God ma vierafen. Fu vierafero bara fuon Sera fu am nafekro fu ijeg vierafen.
ROM 4:20 E Eburam fu fuon fu ma vierafeno iji fuba ruin ga madu God vuak iji fu kuainma iji fu abe kufui igeg vierafenma bakin. Regavo vuak iji fu abene vierafenma ijefuon fuon ma vierafeno iji fuka ma bomana ren. Eburam fu fuon ma vierafeno iji fu bomana rena fu game una God aroin.
ROM 4:21 Fu ma vierafero God irerag fu fuon rekafa kuainma iji fu rekro fu ijeg vierafen.
ROM 4:22 Regavo e Eburam fu fuon izeg fu God ma vierafeno ijia God fu game keuna abe unam fuon ma ijia unain.
ROM 4:23 Regavo God fu e Eburam fuonkua keuname abe unam ma ijia unainma bakigavo fu madu e fok roin nodua karaunuome ke unam ma ijia unuok. Ijefuon erar fu ma vierafero God ijar E Bomana nuvuon Jesu fu guamga fur kuama fu una urinmaro fu ijeg vierafekma God fu e iji keuname abe unam fuon ma ijia unak.
ROM 4:25 Regavo God fu ise nuvuon no reoijo ijefuon E Bomana nuvuon abe e ani iji miama bu kanava fu guamga fu kuama fu una urin. Jesu Kurais fu una urinma ijefuon God fu no karaunuome ke una unam fuon ma ijia unuokfuon.
ROM 5:1 No Jesu ma vierafenva ijefuon iviakma God fu E Bomana nuvuon Jesu Kuraison duadok ijia no kege una unam fuon ma ijia unuido no una funa besum afurvene karivak.
ROM 5:2 No Jesu Kurais ma vierafenva ijefuon fu unam nuvuon amarema no Godon unam ma iji gain. Regavo iviakma non Godon unam ma ijia funa karij. No bomana oimarev ijefuon maiji no vierafe God fu no aferduoga no tavan rad funa fuon sanainma ijia karivak. No ijesugin oimarvo bagavo no madu izeg no moikigia afikin abejo no ijefuon oimarev. Ijefuon maiji no afikin abejo no ijia game vierafero rad no God ma vierafeknum giriesame karivakro no ijeg vierafej.
ROM 5:4 Noka afikin abej gavo no vek God ma vierafejo ijefuon God fu iji guome oinuvuon ijia unam ma iji vierafe vajuoko no reoij. No unam ma ijia ijeg kegokva no ma vierafe God fu rad no amarigia samuagduokfuon.
ROM 5:5 No vuak iji ma vierafen ijefuon no oifiaduomo bakin. Ijefuon maiji God fu Kaven Akai fuon fun kege oinuvuon guf ijia uniafduin. Ijefuon no Kaven Akai ijia game vierafega God fu bomana no amarigia oijmuom.
ROM 5:6 Usuibe no oinva ijia no daro abe koiknuvuon karaunianamikfuon unam iji fuka bakin. Regavo God fuka bomana no oijmuin ijefuon fu Jesu Kurais kuamga fu tavan ma ijia ise nuvuon ijefuon guain.
ROM 5:7 Regavo ni vierafe fu ebe erar fu Godon akaij iji mukoi igiamo ijefuon fu fuifuon guakma bakin. Regavo noba gain e be fu unam ma ijia kegoino ijefuon e be fu kafu iji game fuifuon guak. Unam iji fuka ma gigikin ijefuon e ise reoino iji fu erar fuifuon guakma bakin.
ROM 5:8 Regavo no madu usuibe noka vek ise reoin. Regavo God fuka bomana no oijmuinma ijefuon fu Jesu Kurais kuamga fu ise nuvuon ijefuon guain.
ROM 5:9 God fu Jesu Kuraison kavuan fu kuros ijia arinma iji abe ise nuvuon somduome karaunuin. Ijefuon tavan rad God fu Jesuon duadok ijia no fuba kege vajai fian vajuok.
ROM 5:10 Ur no Godna noba afuime karin revo no e ani fuon ren. Regavo iviakma fun Farifuon Jesur nuvuofuon guame unam nuvuon amaren ijefuon no una Godna afuime karij. Regavo madu iviakma Jesu Kurais fu vek fino ijefuon fur daro fuon ijia tavan bog no samuagduokfuon.
ROM 5:11 Regavo ijesugin bakin gavo no Godon bomana oimarev. Ijefuon maiji fur Jesu Kuraison duadok ijia unam nuvuon amarema iviakma no funa afuim karioij.
ROM 5:12 Ik amur ijia e besum ijar ise renma ijefuon ise iji fu e fok igiena moikigia nam. E Adamri ise iji ren ijefuon God fu Adam abe vajai fian mama fu ise fuon fu renma ijefuon guain. Regavo fun e besum ijar vuak abe e fok miainma ijefuon e fok bu moikigia vajai fian abeknum aoin.
ROM 5:13 Ur fun ise ijar moikigia nako e Mosis fu rad Godon akaij iji abe e fok kuardiain. Regavo Godon akaij iji fu rad ruain ijefuon e iji bu usuibe ise kafo rejo God fu giame ba kege vajai fian vajiain.
ROM 5:14 Godon akaij iji fuba ruainma ijia e iji Adamon uifarif iji bu karine roke e Mosison uifarif ijia ruainva iji God fuka bu vajai fian vajiama bu aoiknum kari ruain. E Adamri Godon akai bomana iji abe tuasenma ijefuon Godri fu abe vajai fian mama fu guain. Regavo Adamon uifarif iji bu Godon akai mamkanuk kafo buba kege tuasen revo bu akai ukakna kafo kege tuasen ijefuon God fu bu vajai fian vajiama bu aoin.
ROM 5:15 Adam ko Jesu Kurais bu ema revo unam buon bu kegoinva iji fuka ma kafokafo. Ijefuon maiji Adam fu God ba igain gavo fu Jesur God igain. God fu akai besum abe Adam main gavo Adam fuba abe mukoi samuain. Regavo fun e besum ijar ise iji abe e fok miain ijefuon God fu e Adamon uifarif iji kege vajai fian vajiama bu aoiknum kari ruain. Regavo God fu fuon ma iji abe Jesu Kuraison duadok ijia e fok miain. Fun Jesu Kuraisri God igame fur fuonkua e fok igiebuon unam amarme Godon unam ma iji abe e fok miain.
ROM 5:16 E Adam fu ise iji abe e fok miain revo God fu e fok oijmiainma ijefuon fu fuon ma iji fum efkin abe e fok miain. Regavo e besum ijar ise besum iji renma ijefuon e bu ise fok rejga God fu bu kam vajai fian vajiama bu aoin. Regavo e fok buk ise reoin gavo Jesu fu guainma ijia God fu unam fuon ma iji fum efkin abe e iji miame kia, Ise jon fok fun baren ga iviakma na unam nun ma iji abe ja miavno kiain.
ROM 5:17 Iji fuka ma e besum ijar vuak abe e fok miainma ijefuon e fok bu vajai fian abeknum aoin. Regavo ni vierafe e Jesu Kurais fur fuonkua ire ma iji e fok igiebuon rene e fok igiebuon unam iji amaren. Ijefuon God fu Jesu Kuraison duadok ijia izeg fu e fok ijiebuon ise fu giame aremo ijiga izeg fu e karauniame ke unam fuon ma ijia uniamo iji fum efkin kege e fok vajiain.
ROM 5:18 Regavo e besum ijar ise besum iji renma ijefuon fur vuak abe e fok miama bu vajai fian abeknum aoin. Regavo Jesu Kurais fuk fu tavan besum efknum guainma ijia fu e fok karauniamga bu Godon unam ma iji abe tavan bog ijia ma kari vain.
ROM 5:19 Regavo fun Adamri Godon akaij iji ba igainma ijefuon fur vuak rene e fok miain. Ijefuon e fok bu moikigia ise reoin. Regavo madu fu Jesu Kuraisri fuonkua God irerag fu vierafenma ijia kegoinma ijefuon fur unam amaredo God fu e fok karauniame ke unam fuon ma ijia uniak.
ROM 5:20 Regavo fu e Mosisri Godon akaij iji abe e fok no muin. Regavo no akaij iji game vierafega noka ise uruvana ren. Rega God fu e fok ijiebuon oifian abene ise buon giame arenma iji fuka ma bomana.
ROM 5:21 Ur noka ise uruvana reoko ise ijar no samuagduoknum aferduome una unam no aoikfuon ijia unuin. Regavo iviakma fun Godon ma reduomo ijar no samuagduomo ijefuon no Godon nifak ijia no maturain. Regavo madu no E Bomana nuvuon Jesu Kuraison duadok ijia no ma karivakfuon iji abek.
ROM 6:1 Regavo ja izeg vierafej? Ja vierafero no vek adamene ise reokva God fu tavan uruvana nuvuon oifian abeknum ise nuvuon guome arekro ja ijeg vierafej?
ROM 6:2 Regavo iji fuka ma bakin. Unam usuikor nuvuon no usuibe reoinva iji bun e iji bu aoinva ijeg bun aoin. Ijefuon iviakma no irerafuon una ise kafokafo reoij?
ROM 6:3 Regavo jan koikjo vierafen do iji no Jesuon if ijia ruainva ijia non Jesuna besum ren. Ijefuon Jesu fu guainma iji no madu non funa besum aoin.
ROM 6:4 Regavo do iji no ruainva ijia non unam ise usuikor nuvuon no oijmiame kegoijo iji non Jesuna besum aoivga bu kege funa mako besum ruinva ijekin. Regavo fu Godri daro ga sanainma fuon ijekma fu Jesu Kurais kuama fu una urinma ijia fu no madu aferduome una unam fuon ma iviamkor no ma karivako ijia unuin.
ROM 6:5 Regavo no Jesuna besum fu guainma ijeg no madu no aoivabatie no iji fu una urinma ijeg no madu no una urik.
ROM 6:6 Regavo non koiknuvuon vierafe unam nuvuon usuibe no kari ruainva iji bun Jesuna kuros ijia aoin. Ijefuon unam usuikor ijefuon daro iji fun Jesur mukorigia abe arafirin. Ijefuon iviakma fu ise nuvuon ijar una no samuagduokma bakin. Ijefuon maiji e guainma iji fu izeg una uri ise reokma bakin.
ROM 6:8 Regavo unam usuikor nuvuon no kari ruainva iji bu Jesu Kuraisna besum aoivabatie no ma vierafero tavan rad no funa ma karivakro no ijeg vierafek.
ROM 6:9 Ijefuon maiji non vierafe Jesu Kurais fu guamga Godri kuama fu una urin ijefuon fuba una guak. Ijefuon Setanon daro iji fu Jesu asikma bakin.
ROM 6:10 Regavo Jesu fu guainma iji fum efknum guain ijefuon ise iji fu izeg una madu fuon rekma bakin. Regavo iviakma fun una uri unam God fu oimarekfuon iji abe Godk fin.
ROM 6:11 Ijefuon noka tavan bog vierafero unam usuikor nuvuon bun Jesuna aoivaro no ijeg vierafekfuon. Ijefuon iviakma no Jesuna besum rene unam fu renma iji no madu no ijegrejknum una unam God fu oimaikfuon ijia karivak.
ROM 6:12 Iviakma noiji non Jesu Kuraisna agan besum ren ijefuon no giriesame vajai nuvuon koiknuvuon samuakfuon. Regavo noba zazaike ise iji fu oinuvuon ijia naoime tavan uruvana no aferduome una unam ise ijia vak.
ROM 6:13 Regavo madu noba zazaike vajai nuvuon roin bu ise reogavo noka giriesame vajai nuvuon samuagdiaga buka marme ok. Noiji non ise reoijga Godri no aferduome una unam fuon ma ijia unuin. Ijefuon no vajai nuvuon samuagdiavo kege God vajaga fur kege fuon fu vierafenma ijia ik fuon ma iji rek.
ROM 6:14 Jab zazaime tavan uruvana Setanon ir iji abene ise reok. Revo nika giriesame koikjo vajai jon samuanamif. Ijefuon maiji ja Godon akaij ijia bidua karinva bakin revo ja fuon ma iji fu vajuomo ijiga izeg fu nuvuon oifian abe ifejduomo no ijia biduame karij.
ROM 6:15 Regavo iviakma no Godon akaij ijia bidua karinva bakin. Gavo no fuon ma iji fu vajuomo ijia bidua karij. Ijefuon jab vierafero ja una ise rejknum karivakafa jab ijeg vierafek.
ROM 6:16 Regavo jan koikjo e bomana izin abekfuon iji jan vierafen. Ijefuon eraneb ja vierafe ja Setan igaga fur ja samuagdiakva iji jaka ise reknum aoik. Regavo eraneb ja vierafe ja God igame vo arega fur ja samuagdiame aferdia una unam ma karivako ijia uniakma iji ja koikjo vierafekfuon.
ROM 6:17 Ja ur jan Setan igame ik fuon ise iji reoin. Regavo iviakma jan oijon fok Godon vuak ma iji faime una e iji bu Jesu Kuraison vuak abe ja nijaidiainva iji igiain. Ja ijegrejo ijefuon naka bomana Godon oimarev.
ROM 6:18 Iviakma fun Godri ja aferdiame ise jon ja renva iji areme una unam fuon ma ijia ruain. Ijefuon iviakma ja Setanon ik rejo bakin gavo ja Godon ik ma iji rej.
ROM 6:19 Na vuak igi na e mamkanuk ijiebuon ja ik rekva na ijia bijame kuardiav. Na vuak ijekin iji kuardiaga ja faime ma vierafekro na iji kuardiav. Regavo usuibe ja Jesu Kurais ba ma vierafenva ijia jaba vajai jon koikjo samuagdiain. Regavo jam vajai jon kege una unam ise kafokafo ijia reoin. Regavo iviakma ni arega God fu ja aferdia una unam fuon ma ijia uniaga ja ik fuon akaij iji reok.
ROM 6:20 Ur ja Setanon unam iji abene jaka ik fuon ise kafokafo reoin ijefuon ja Godon unam ma iji jaba vierafene abe oijon ijia abedeva fur ja samuagdiain.
ROM 6:21 Regavo ja vierafe unam ise iji ja ur kegoinva ijefuon maiji ja irerag iji gain? Ire ma iji fuka bakin gavo kaven jon buka vajai fian abene aoin gavo ba Godna karikuai vain. Ijefuon iviakma ja una karoime unam ise iji ja kegoinva iji ga fuka mukorigia jufdiam.
ROM 6:22 Iviakma fun Godri ja karauniame oijon samuagdiamo ijefuon ja ise jon ja reoijo iji jan areme una ik fuon rej. Ijefuon iviakma ja e fuon akai rene unam fuon ma iji abe funa rad tavan bog ijia karivak.
ROM 6:23 Ja iviakma ise reoijo iji tavan rad ja unam ma iji abekva bakin revo kaven jon bum vajai fian abene aoik. Regavo bu aoikva buba Godna karivak. Regavo no Jesu E Bomana nuvuon ma vierafekva God fu duadok fuon ijia unam fuon ma karivako iji fum efkin abe muok.
ROM 7:1 Efnun iviakma vuak irerag na kuardiakrejo iji jan vierafen. Ijefuon maiji e uruvana ja emabuon akaij iji jan faime vierafen. Ijefuon e uruvana erar fu moikigia nivek fino iji fu akaij iji igame reoknum vake fu guamo ijia akaij iji fuba una fu samuak.
ROM 7:2 Regavo na akai besum ijia bijame kuaiga ja ijia vierafek. Bara be fu baru jakma baru fuon iji fu vek fino ijefuon fu akaij iji igame baru fuon ijek mukoi fivak. Regavo baru fuon iji fu guakma bara iji fu akaij iji fu igame una baru fuon ijek fu fioinma iji fun ijia arek.
ROM 7:3 Regavo bara iji baru fuon fu vek fino ijia areme una baru kafo turakma iji fu ise ren. Ijefuon e be fu bara iji kuak aiji ebuon baru turamo kuak. Regavo bara ijefuon baru iji fun guainma ijia bara iji fu una baru be jakma iji fu ise reno bakin. Ijefuon maiji baru fuon fun guain ijefuon fu una e iviamkor jain.
ROM 7:4 Ijefuon efnun vuak igi iviakma na bijame kuardiainva iji jan ijeg ren. Regavo jaiji ja e iji fu guamga God fu kuama fu una urinma ijiena agan besum ren. Ijefuon iviakma Mosison akaij iji fu ja samuagdiamo bakin gavo fun Kuraisri ja aferdiame una Godon ik maiji fuifuon rek.
ROM 7:5 Usuibe no vek unam usuikor no oinuvuon ijia vierafenva no iji reoin. No tavan bog noka ire iji Godon akaij ijar kuriairemo iji noka vek adamene ijia reokuai vierafen. No unam ijeg kegoijo ijefuon God fuka no kam vajai fian vajuoko no vajai fian abene aoiv. Regavo iviakma fun Godri no ifejduomga no ise nuvuon ijefuon Jesu Kuraisna besum aoin. Ijefuon iviakma no Godon akai usuikor iji non ijia aren gavo no una Godon unam iviamkor Kaven Akai fuon fu reno no ijia keoij.
ROM 7:7 Regavo e roin no kuai Godon akaij iji fu iseno kuaiv revo fu ise bakin fuka ma. Ijefuon maiji ise rejo iji fu akaij ijar mukorigia nijaiduom. Regavo Godon akai be fu no muome kuo, Jab e kafobuon sinuom iji giame oi bomana vierafekno kuin. Regavo God fu akaij iji fuba muinmabatie no izeg ma vierafevo e kafobuon sinuom giame oi bomana vierafejo iji no ise rejoro no ijeg vierafek.
ROM 7:8 Regavo fu Godon akaij ijar ise fok no vierafene kegoijo ijiebuon unam amarduin. Ijefuon ise ijar oinuvuon iji kege una unam ise ijia jame ise uruvana rekuai vierafej. Regavo God fu Akai iji fuba abe no muinmabatie ise iji fuba oinuvuon ijia ikrek gavo fum guainma igeg rek.
ROM 7:9 Ur na akaij ijefuon maiji naba mukoi vierafenva ijefuon na ma fi ruain. Regavo iviakma na akaij ijefuon anej ma iji nan gia baren. Ijefuon na koiknu vierafega oinun fun ise ijar rarenma ijefuon kaven nun fun guainma igekin.
ROM 7:10 God fu akai fuon muome vierafero no akai fuon mukoi faime igakva no ma karivakro fu ijeg vierafen. Regavo na akai fuon iji kege tuasenva ijefuon kaven nun fun guain.
ROM 7:11 Regavo madu fun akaij ijar unam amarenma ijefuon ise fok bu unam ijia jame oinun dab dakaroinva ijefuon iviakma kaven nun fun guainma igekin.
ROM 7:12 Godon akaij iji fu abe muinma iji fuka akai ga ka maturainva ijesugin.
ROM 7:13 Regavo jab vierafero fu akaij iji maturainva ijar kaven nun dab arafirima fu guainmaro jab ijeg vierafek. Iji fu bakin. Regavo fun ise ijar kaven nun dab arafirima fun guain ga akaij ijar ise na renva iji kege samakaf nijaidiema na giame vierafen. Ijefuon no vierafe akaij iji fuka ma ijefuon maiji no akaij iji game una vierafega ise uruvana no reoijo iji buka ma ise ijesugin.
ROM 7:14 Regavo non vierafe Godon akaij iji fu kaven nuvuon ijefuon akai. Regavo naiji na ema ijefuon tavan uruvana akaij iji naba igiav revo na nun vierafenva ijia reoij. Ijefuon ise iji fu tavan uruvana nosik name fur na samuagdiem.
ROM 7:15 Ijefuon ise ijar oinun abe dakaroiga ise kafokafo naba mukor vierafeknum rej. Na unam ma iji na vierafenva naba ijia reoij gavo na una unam ise iji na isediemo ijia reoij.
ROM 7:16 Na ise kafo naba rekro vierafen revo nam magaga ijia reoij. Ijefuon na rad una vierafega Godon akaij iji fu ma ga naiji na ise reoij.
ROM 7:17 Ijefuon nam nar ise ijekin reoijo bakin revo fu ise iji tavan uruvana oinun ijia namo ijar kiega na ise ijekin iji reoij.
ROM 7:18 Na vierafega unam ma iji fuba oinun ijia namo ijefuon na unam ise iji reoij. Regavo unam ma iji na kegokfuon iji nan oi nun ijia vierafen gavo na zazaivo ijefuon naba mimatame reoij. Na unam ma iji nan vierafene gavo na una unam ise iji naba kegokro vierafenva na ijin reoij.
ROM 7:20 Na unam ise iji naba ijeg kegokro vierafen gavo naka magaga unam ise ijin reoij. Ijefuon na vierafe unam ise iji na nar kegoijo bakin revo fun ise iji tavan uruvana oinun ijia namo ijar kiega na unam ise ijekin ijin reoij.
ROM 7:21 Ijefuon unam be oinun ijia ik reno iji na unam ma iji na kegokfuon iji na oinun ijia vierafen gavo ise iji fu oinun ijia namo ijefuon na una unam ise ijin reoij.
ROM 7:22 Regavo oinun guf ijia naka irerag God fu vierafenma na iji ma vierafene bomana oimarev.
ROM 7:23 Regavo na koiknu oknum vierafega unam nokarok (2) bu oinun ijia naoiv. Na vierafe naka unam ma ijesugin vakro vierafen gavo ise iji fuka giriesame na ivie dab una unam ise ijia vak. Ijefuon fu ise ijar na samuagdieko na unam ise ijin reoij.
ROM 7:24 Ijefuon iviakma naka oifian bomana abej. Na fuka ise ijar giriesame ivie dab una unam ise na guakfuon ijia vak. Ijefuon erar na turamdieme una aferdie unam ma ijia vak? Fu Jesu Kurais E Bomana nuvuon ijar na keunieme aferdie una unam ma ijia vak. Ijefuon na unam nun na izeg kegoinva na iji kuaiv. Na koiknu vierafe naka oinun fokma na Godon akaij iji mukoi igame unam ma ijia kegokro vierafen. Regavo vajai surif nun fu una akai ise be iji igame una unam ise ijia kegokro vierafen.
ROM 8:1 Regavo no Jesu Kurais ma vierafenva ijefuon God fu no kege una unam fuon ma ijia unuin. Ijefuon eraneb bu Jesu Kuraisna agan besum renva iji God fuba bu kam vajai fian vajiak.
ROM 8:2 Ur fu ise ijar giriesame no aferduome una unam ise ijia vako no ijia jame ise reoinva ijefuon no vajai fian abeknum aoin. Regavo iviakma fun Godon Kaven Akai ijar daro fuon ijia no karaunuome ke una unam fuon ma iji iviamkor ijia unuin. Regavo Kaven Akai ijar daro fuon ijia ma karivako iji Jesuon duadok ijia abe muin.
ROM 8:3 God fu akai fuon abe no muin revo ise iji bu vek oinuvuon guf ijia naoiv. Ijefuon no izeg Godon akaij iji mukorigia abekfuon iji noba aresren. Regavo God fu karaunuokafa Farifuon besum iji kuama fu ema ise reoino igeg moikigia ari ruain gavo fu ise besum fuba ren. Regavo God fum areko Jesu fu ise nuvuon ijefuon vajai fian abene guain. Regavo Jesu iji fu guainma iji fun Godri ise nuvuon ijefuon abe isuf igeg baroin.
ROM 8:4 God fu vierafero fu Jesu abe isuf igeg baroga no ijia game vierafene akai fuon fok mukorigia igiakro fu ijefuon ijeg ren. Revo unam no Godon akaij iji igiakfuon iji no vajai surif nuvuon bu vierafenva ijia kegokva bakin. Regavo no Godon Kaven Akai iji fu vierafenma ijia kegokva no Godon akaij iji mukoi igiak.
ROM 8:5 Regavo erar fu unam ise vajai surif fuon fu vierafenma ijia jame kegoino iji tavan uruvana fuka ise ijefuon daro ijia fioin. Revo erar fu una unam ma iji Godon Kaven fu vierafenma ijia kegoino e iji tavan bog fuka Kaven ijefuon daro ijia fioin.
ROM 8:6 A vajai surif on fu vierafenma ijar samuagdako a ijia ja kegoino iji an zuarunam ijia vak. Regavo a oion iji fu Kaven Akai ijar samuako a fu vierafenma ijia jame kegoino iji a Godon unam ma iji ga fuon kafaimo iji an aben.
ROM 8:7 Regavo erar oifuon iji fu vajai surif fuon iji fu vierafenma ijar fu samuako fu ijia jame kegoino e iji fu Godk nibijaim. Regavo e iji bu ijegreoijo iji bu Godon akaij iji buba mukoi vierafen ijefuon akai fuon buka izeg igiakva bakin.
ROM 8:8 E iji bu vajai surif buon ijieb samuagdiako bu ijia jajiame kegoijo e iji God fuba buon oimarek.
ROM 8:9 Regavo jaiji ja vajai surif jon ijar ja samuagdiako ja ijia jame kegoijo bakin. Regavo ja Godon Kaven fu oijon ijia finoga iji jaiji jan fu vierafenma ijia reoij ijefuon unam ise iji jan rubdiame una unam ma ijia ruain. Regavo erar fu Jesu Kuraison Kaven fuba abenma e iji fu Jesuon e bakin.
ROM 8:10 Regavo eraneb ja Jesu Kuraison Kaven abe oijon ijia unainva iji kaven jon bu uria karij. Ijefuon maiji God fun ja karauniame ke una unam fuon ma ijia uniain. Regavo ise jon ja rejo ijar vajai surif jon bun Godon nifak ijia buka aoinva igekin.
ROM 8:11 Regavo Godon Kaven fu oijon ijia fikma na vierafe vajai surif jon bu aoikrejo iji Godri kiaga bu una urik. Ijefuon maiji God besum ijar Jesu fu guamga fu kuama fu una urin. Ijefuon fu Kaven fuon ijefuon duadok ijia ja kiaga ja una urik.
ROM 8:12 Ijefuon efnun noba vajai surif nuvuon bu vierafenva ijia jajiame unam ise iji keok.
ROM 8:13 Regavo ja vajai surif jon bu vierafenva ijia jajiame unam ise iji kegokva rad ja vajai fian abene aoik. Regavo ja una Kaven Akai fu vierafenma ijia jame kegokva iji ja unam ise jon iji jan kaniava bun aoin. Ijefuon tavan rad God fu ja kiaga ja funa ma karivak.
ROM 8:14 Regavo erar fu Godon Kaven Akai ijar kuardako fu ijia jame kegoino e iji fu ma Godon farif.
ROM 8:15 Regavo eraneb bu Godon Kaven Akai ijar oibuon ijia samuagdiako bu oijo e iji buba God game juk. Ijefuon maiji Kaven Akai ijar no aferduoma no una Godon afijaf ren. Ijefuon iviakma non una fu kua Ate Asoinuvuono kuav.
ROM 8:16 No vierafe no ma Godon afijaf ijefuon maiji Godon Kaven Akai fu oinuvuon guf ijia fine kaven nuvuon iji kuardiame kia, Jaiji ja Godon afijafno kiam.
ROM 8:17 Noiji no Godon afijaf ijefuon tavan rad God fu ire ma iji fu kege afijaf namdiainma iji kafo fu kege no vajuok. Regavo amur no uri Jesu Kurais fu vajai fian abenma no ijeg vajai fian abekva God fu ire ma iji fu kege Jesu Kurais namdainma iji kafo fu kege no vajuok. Regavo madu no fuon sanainma fateroin abekfuon.
ROM 8:18 Na ma vierafega iviakma no ire kafokafo bu nuvuon rega no vajai fian abejo iji fum ma ukakbek. Regavo tavan rad God fu fuon ma iji ga sanainma iji fu kege no vajuokreno ijar fuka ma bomanak.
ROM 8:19 Regavo ire fok God fu amardiainma iji bu tavan iji God fu una afijaf fok kege samafrekfuon bu iji bomana vierafeknum samuav.
ROM 8:20 Ijefuon maiji bu usuibe tavan iji samuain revo God fu fuon vierafenma ijia ire fuon fok kam arafiriain ijefuon maiji bu ise uruvana ren. Regavo ire fok God fu amardiainma iji buba ijeg arafiriakro vierafen. Regavo fun Godri fuon vierafenma ijia fu ire fuon fok kam ijeg ren.
ROM 8:21 Regavo God fun usuibe vierafega tavan rad ire fuon fok fu amardiainma iji fuba kege arafiriagavo fum karauniak. Regavo fu vierafe ire fuon fok bu arafiriaknum muturvo iji bu arek. Bu arega fu fuon sanainma iji fu abe afijaf miainma ijeg fu abe una buk miaga bu dazme ma karivak.
ROM 8:22 Regavo ire fok God fu amarme nainma iji bu vek afikin abeknum vajai fian abej. Bu iviakma bu bara iji fu am nafekro vajai fian abeno bu ijeg vajai fian abe rok.
ROM 8:23 Regavo bu Godon ire iji fu amardiainma ijesugin vajai fian abejo bakin. Regavo e fuon igi no Kaven Akai fuon anf igeg amur aben ga rad no ire ma kafo kekfuon iji no madu noka ijeg vajai fian abeknum samuak. No samuaikin Godri no aferduo una afijaf rene vajai surif nuvuon iviamkor vajuoga no kege ijia ma karivak.
ROM 8:24 No ire ijin ijeg vierafene samuavo ijefuon God fu no karaunuom. Regavo irerag no vierafeknum samuavo iji no ni nuvuon ijia gaivabatie no irerafuon ma vierafene samua karikva bakin. Revo e be fu ire be fun game abenma iji fu irerafuon fine ire iji vierafene samuakma bakin.
ROM 8:25 Regavo ire kafo no ni nuvuon ijia giavo bakin iji no ma vierafene samuakva iji noka oi mafaime samua karik.
ROM 8:26 Regavo madu nuvuon vierafejo iji fuka ma zazaikin revo fu Godon Kaven Akai ijar no ifejduom. No ijeg Godon sirimamekfuon iji noka ba vierafen revo fu Kaven Akai ijar nuvuifuon Godon sirimamen. Vuak iji Kaven fu God kuardakreno iji fuka ir afisen ga fuka vajai fian abeknum nuvuifuon God soisoime kuardam.
ROM 8:27 Regavo God fu e fok ijiebuon oij iji fun gia ga Kaven Akai ijefuon vierafenma iji fun gain. Regavo Kaven Akai iji fuk fu ire fok God fu rekro vierafeno iji fun vierafen. Ijefuon fu Godon e ijiebuon fateroin ijia fur God soisoime kuardamon.
ROM 8:28 Regavo non vierafe eraneb bu God oijmav ga eraneb fu kege uniainma bu fuon vierafenma ijia kegoijo iji fu ire ma iji buon ren. Revo ire ma ga ise iji buon roko iji fu ma ijefuon ijeg ren.
ROM 8:29 Regavo e iji God fu usuibe kege unianma iji fun fur kiainmado rad bu Farifuon ijekin rek. E iji bu Godon afijaf reke ga Farif fuon ijar fu e amuifarif rek.
ROM 8:30 Regavo e iji God fu usuibe kege uniainma iji fun kumenma ijefuon fu bu ken. Regavo madu e iji God fu kumenma iji fun karauniame ke una unam fuon ma ijia uniain. Regavo e iji God fu kege una unam fuon ma ijia uniainma iji bun fuon sanainma iji abe funa karij.
ROM 8:31 Vuak fok na kuardiainva iji na izeg God ire uruvana fu nuvuon reno na iji kuardiain. Ijefuon ire iji ja izeg vierafen? Revo God fu nona ren ijefuon e ise reoijo iji buba no aferduome una unam ise ijia vak.
ROM 8:32 Ijefuon maiji God fu Farifuon iji ba abe muin gavo fu kuamga Farifuon fu ise nuvuon ijefuon guain. God fu Farifuon besum iji fu abe no muin. Ijefuon fu madu ire fuon ma iji fuba kege raren gavo fum kege no vajuok.
ROM 8:33 Noiji fun Godri kege unuinma ijefuon fu erar una no guome kuo ja ise rejno kuokva bakin. Regavo madu fun Godri ise nuvuon no renva iji guome fu no aferduo una unam fuon ma ijia unuin.
ROM 8:34 Regavo fu erar una guome ise nuvuon no renva ijefuon kuokma bakin. Ijefuon maiji fu Jesu Kuraisri nuvuifuon Godon sirimamen. Fun Jesu Kurais e iji fu ise nuvuon ijefuon guamga God kuama fu una uri ij maink fuon ijia fino ijar ise nuvuon no renva ijefuon God soisoime kuardam.
ROM 8:35 Jesu Kurais fu no bomana oijmuinma ijefuon fu erar no aferduo una garef be unuokma bakin. No tavan kafo no afikin ga vajai fian abej. Regavo madu noiji no Jesu Kuraison e ik rejo ijefuon e kafo bu nuvuisina kuaiknum nuvuon iserekfuon. Regavo tavan kafo noka duok bakin rene sinuobatekfuon. Regavo madu tavan kafo e buka kanuoga no aoikfuon. Ire ise ijekin uruvana buka nuvuon ruakfuon revo bu ijieb no kege Jesu Kuraison oijmuomo iji areme una garef be vakva bakin.
ROM 8:36 Regavo ire ise fok bu nuvuon roko iji bun usuibe Godon buk akaij ijia ijeg isoime kuai, God noiji no oifuon ik rejo ijefuon tavan bog e bu no ziegafuok vo no kanuokuai vierafen. Noiji bu maf-sif bu kania bua ijo ijeg bu no kam ijegreoijno kuain.
ROM 8:37 Regavo bu ire ise fok iji nuvuon roko ijieb no kege Jesu Kuraison oijmuomo iji areme una garef be vakva bakin. Regavo Jesu Kurais fu no oijmuomo ijefuon fu daro muoga no giriesame ire ise fok bu nuvuon roko iji no kege gareg korken.
ROM 8:38 Na ma vierafega Godon oijmuomo iji fu tavan bog nona navakfuon ga fu erar abe gareg akozekma bakin. No nivek kari ga non aoinva iji Godon oijmuomo iji fu vek nona navak. Regavo Godon anera ijigam kaven darokin kafo buba God fu no oijmuomo iji abe gareg akozekva bakin. Regavo madu bu ire kafo iji bu iviakma rejo ga rad rekrejo ijieb God fu no oijmuomo iji abe gareg akozekma bakin. Regavo bu ire kafo varur gufia ga moikigia naoivo ijieb Godon oijmuomo iji abe gareg akozekva bakin. Regavo madu bu ire kafo Godri amardiainma ijieb fuon fu no oijmuomo iji abe gareg akozekva bakin. Godon oijmuomo iji fu tavan bog nona ijeg navak. God fu E Bomana nuvuon Jesu Kuraison duadok ijia fuka no bomana oijmuin. Ijefuon fu erar izeg God iji fu no oijmuomo iji abe gareg akozekma bakin.
ROM 9:1 Efnun na vuak be madu kuardiakrej. Naiji na Jesu Kuraisk besum renva ijefuon vuak irerag na kuaivo iji na kufuimejo bakin. Na Kaven Akai iji fu oinun ijia ik reno ijefuon vuak irerag na kuaivo iji na kufuimejo bakin.
ROM 9:2 Na e nun Jiusbuon oifian ga vajai fian bomana abej. Ijefuon maiji bu nana ai besum ruain ga madu bu e uifarif nun. Regavo God fu Jesu Kurais kuama fu ise nuvuon ijia karaunuokro ruainma iji buba ma vierafene fu abe oibuon ijia unain.
ROM 9:3 Bu e nun gavo bu koikbuon Jesu Kurais bun nuigafainva ijefuon tavan rad God fu bu kam vajai fian vajiaga bu aoik. Na e nun Jiusbuon oifian bomana abejo ijefuon na vierafero God fu na abe arafirie vo abe garef be uniega na Jesu Kuraisk besum na mazinva fuka arekro na iji vierafen. Na vierafe God fuka na abe ijegrega e nun bu ijia gieme una God ma vierafek.
ROM 9:4 God fun usuibe e Jius iji kege uniame fuon sanainma iji abe bu miain. Rene fu bu kia, Jaiji ja afnuno kiain. Regavo madu God fu buon bomana oimarenma ijefuon fu akai fuon abe miain. Rene fu unam ma iji bu izeg fu aroikfuon iji nijaidiame fu madu tavan rad bu ma karivakfuon iji abe miakno kiain. God fu ijeg kuardiain gavo e Jius iji buba fu igain.
ROM 9:5 E Jius iji buka e ikin Eburam ga Aisek ga Jekafbuon agan ijia uinvene ruain. Regavo madu Jesu Kurais e iji God fu kuama fu ari ruainma iji fuk fu agan besum ijia uinvene ruain. Jesu Kurais fuk fu God ga fu ire fok samuagdiamon. Ijefuon na vierafe noka tavan bog Jesu Kurais dab aroikfuon. Mare.
ROM 9:6 Regavo God irerag fu e Jiusbuon rekro kuainma iji fu arekma bakin. Fu rek revo e Isrer roin ga e Eburamon uifarif ijia bu Godon e renva bakin. Regavo God fu usuibe e Eburam fu ijeg kua, Farif on Aisek kuaivo ijar e iji na usuibe imut tuainva ga bu kege uniainva iji nafekno kuain.
ROM 9:8 Regavo e Eburamon uifarif ijia e roin buba Godon afijaf rek. Revo fu e iji God fu usuibe bu kege uniainma ijesugin bu ma Eburamon uifarif rek.
ROM 9:9 Regavo usuibe God fu vuak be ijeg kuai, Na tavan iji na abedenva ijia una bara Sera kuaga fu am farif be nafekno kuain.
ROM 9:10 Areme rad e Aisek fun uri ofrene bara fuon Rebeka kuavo iji aben. Regavo Rebeka fu am farif fuatkaruk nokarok (2) nafega God fu Rebeka ijeg kua, Na vierafe amon amur e Iso kuavo iji fu una uviaifuon diar e Jekaf kuavo iji nidoime vo fu agoikno kuain. Regavo vuak iji God fu Rebeka kuardainma iji bun usuibe buk akaij ijia ijeg isoime kuai, Na vierafe na e Jekaf fuonkua oijmak revo e Iso na ziegafakno kuain. Regavo God vuak iji fu kuainma iji bara Rebeka fuba am fuatkaruk iji nafenma ijia fu ijeg kuain. Regavo madu am nokarok (2) iji buba koikbuon uri unam ma ga ise iji giame vierafenva ijia God fu vuak ijeg amur buifuon kuain. Regavo e Iso ko Jekaf bu ire kafo ma renva ijefuon God fu bu kege uniainma bakin. Regavo fun Godri fuon vierafenma ijia fu e besum (1) oijmaga be fu ijia aren.
ROM 9:14 Regavo no God e iji fu vierafene ke uniainma ijefuon noba kuaik. Ijefuon maiji fuiji fuka roinknum reno bakin.
ROM 9:15 Ijefuon maiji God fun usuibe e Jekafon uifarif ijiebuon e Mosis kua, Na e iji na kege uniainva na ijin ifejdiak. Regavo madu na e iji na kege uniainva na ijiebuon oifian abekno kuain.
ROM 9:16 Ijefuon e iji God fu kege uniamo iji bum e ijieb buon vierafejo ijia ga giriesavo ijefuon God fu bu kege uniamo bakin. Revo fun Godri buon oifian abene e ijekin iji ifejdiam.
ROM 9:17 Regavo God fu usuibe buk akai bu isoinva ijia e bomana be ai Ijift samuamo if fuon Fero kuardainma iji fu ijeg kuai, Na a kuava a e ikin renma ijefuon maiji na daro nun abe a maga a abe e fok nijaidiaga bu ijia game vierafero naiji na e darokiro bu ijeg vierafek. Regavo madu ar vuak nun ma iji ga if nun bomana iji abe e fok nijaidiakno kuain.
ROM 9:18 Ijefuon God fu fuon vierafenma ijia fu e kafo giame buon oifian abeknum ifejdiamon. Regavo e kafo fu giame oibuon kege karoiga bu dazme una Godon vuak faivo ma vierafejo bakin.
ROM 9:19 Regavo e kafo ja una na kiek, Fu Godri fuon vierafenma ijia no kege unuoknum no maguom. Regavo God fu ijegreno e igi fu erar Godon vierafe iji uzamo bakin. Regavo e igi bu oine ise kafo rejo God fu irerafuon ise buon giame kiaknum ke bu namdiak.
ROM 9:20 Regavo efnun ja vuak ijekin iji jaib una God kuardak. Regavo ni saror bu duok nifiejo iji vierafef. Saror fuba una e iji fu amarenma iji kuak, A irerafuon na abe ijeg amaremno kuak? Saror fu una ijeg kuakma bakin.
ROM 9:21 Regavo e iji saror amardiamo iji fu sakimug besum ijia abe fuon vierafenma ijia saror nokarok (2) amardiak. Saror be fu amarekin bu tavan bog duok nifie ik revo be fuka amarkin bu tavan mamkanuk ijesugin abe duok nifiek.
ROM 9:22 Regavo God fuk fu e iji saror amardiamo fu ijeg ren. Fu fuon vierafenma ijia fu fine e Jius iji kege unam kafokafo buon ren. Ijefuon God fu fuon fu vierafenma ijia fu e iji ise renva iji uzain. Regavo madu fu e iji bu ise rega fu kam vajai fian vajiamo ijia fu daro fuon abe e fok nijaidiain. Regavo ni vierafe e iji bu Godon nifak ijia ise reoinva iji God fuka ma deajin ga fuka e iji kam arafiriakfuon. Regavo fuba ijeg ren revo fu vek afuime buna isuar fi ruain.
ROM 9:23 God fu e iji ise renva iji fu afuime isuar buna finma ijefuon maiji fu fuon ma kediamon iji abe e Jius iji miakro fu ijefuon ijeg ren. Regavo fu madu vierafe fu fuon sanainma iji abe e igi no fu usuibe kege unuinma iji muokafa fu ijeg vierafen. Regavo madu fu nuvuifuon oifian abeknum fuon sanainma iji abe muokafa fu ijefuon nona isuar fin.
ROM 9:24 God ire iji fu rekma fu e igi no fu kege unuinma iji nuvuon rek. Regavo ire iji fu rekma fu e Jius ijesugin ijegrekma bakin revo fu e Jius bakin igi no madu ijeg rek.
ROM 9:25 Regavo buk e Osia fu isoinma ijia God fu ijeg kuai, E iji buba e nun renva iji na kiaga bu una e nun rek. Regavo e iji naba bu oijmiainva iji na kia nan ja oijmiavno kiak.
ROM 9:26 Regavo madu buk besum ijia God fu e Jius bakin iji kia, Jaiji ja e nun bano kiainva iji fu una kia, Jaiji ja God iji tavan bog ijia fivako ijefuon afijaf renvano kiain.
ROM 9:27 Regavo madu buk Asaia ijia fu madu e Isrerkobuon ijeg kuai, E Jius ai Isrer ijia karinva iji buka ire jier bu davo bakin ijeg uruvana rek. Regavo e sibank bu God ma vierafega God fu e ijesugin karauniak.
ROM 9:28 Regavo tavan iji fun samairen ijefuon fu e fok bu iserejo iji fu kam arafiriakno kuain.
ROM 9:29 Regavo madu buk Asaia ijia vuak be fu madu ijeg kuai, God fuba nuvuon oifian abene ifejduinmabatie noiji noka ai Sodom ga Gomora God fu kam arafiriainma ijeg fu madu no kam ijeg arafiruokno kuain.
ROM 9:30 Ijefuon non ga e Jius bakin iji bu ur bu unam God fu e karauniame una ke unam fuon ma ijia uniamo iji buba nisaime aben revo iviakma bu unam iji bun aben. Ijefuon maiji bu ma vierafega Jesu fu ise buon ijefuon guain ijefuon God fu bu karauniame ke una unam fuon ma ijia uniain.
ROM 9:31 Regavo e Jius iji bu ur Godon unam ma iji abekuai giriesainva iji buba aben. Ijefuon maiji bu Godon akaij iji buba mukorigia igiain.
ROM 9:32 Bu Godon unam ma iji buba abenva ijefuon maiji buba God ma vierafen. Regavo bum vierafero bu Mosison akaij iji mukoi igiavo ijefuon God fu buon oimarkro bu ijeg vierafen. Bu ijeg vierafeknum reoijo ijefuon God fu buk akaij ijia fu Jesuon ijeg kuai,
ROM 9:33 Na ai Jerusarem ijia e be abe mun igeg ijia ruabesek. Regavo mun ijar maniknum e uruvana diak nizukiaknum atog kaniak. Regavo erar fu mun iji ma vierafekma e iji fu tavan rad fuba oifian abekno kuain.
ROM 10:1 Efnun na oinun guf ijekma na e nun Jiusbuon Godon sirimamej. Na vierafero God fu bu karauniakro na iji fuon sirimamej.
ROM 10:2 Regavo na ma kuardiav e nun Jius iji buka Godon unam ma iji abekuai buka giriesame nisaiv. Regavo unam buon bu God nisaikfuon iji buka ba mukoi vierafen.
ROM 10:3 Bu unam ma iji God fu e karauniamo iji buba game aben gavo buka una unam buon bu vierafenva ijia reoij. Ijefuon bu Godon unam ma iji fu e karauniamo iji buba abekuai ijef ren.
ROM 10:4 Bu vierafero bu koikbuon giriesame mukorigia keojknum akaij iji igiaga God fu karauniakro bu ijeg vierafej. Regavo iji fuka ma bakin. Regavo bu Jesu Kurais ma vierafekva God fu bu karauniame ke una unam fuon ma ijia uniakfuon.
ROM 10:5 Regavo unam iji God fu izeg e karauniame ke unam fuon ma ijia uniamo iji fun e Mosisri usuibe buk akaij ijia ijeg isoime kuai, Eraneb bu Godon akaij iji mukoi samuagdiame igiavo e iji bu tavan rad bum ijia ma karivak.
ROM 10:6 Regavo unam izeg no ma vierafega God fu no karaunuome ke una unam fuon ma ijia unuokfuon iji bun usuibe buk akaij ijia ijeg isoime kuai, Jab oijon ijia vierafene kuai erar ajie vake varur gufia kekome Jesu Kurais afem ari roga fur no karaunuokno kuaik.
ROM 10:7 Regavo madu jab oijon ijia vierafene kuai, Erar va zuarunam kekome Jesu Kurais afem roga fur no karaunuokno kuaik.
ROM 10:8 Regavo Godon vuak ma iji fu e karauniakafa fu kuainma iji fu ja samaij ijija. Regavo vuak iji fun oijon ijia nam ga madu jan ir jon ijia kuaimoij. Regavo iviakma vuak igi no kuardiavo iji non e besum Jesu Kuraison vuak ijin abe ja kuardiav.
ROM 10:9 Ijefuon ja e fok ijiebuon nifak ijia ja kuai, Jesu fu E Bomanano kuaikva God fu ja karauniak. Regavo madu ja oijon guf ijia ma vierafero Jesu fu guain revo Godri kuama fu una urinmaro ja ijeg vierafekva God fu ja karauniak.
ROM 10:10 Ijefuon ja oijon ijia ma vierafekva God fu ja kege una unam fuon ma ijia uniak. Regavo madu ja ir jon ijia e fok ijiebuon nifak ijia kuai Jesu fu E Bomanano kuakva God fu ja karauniak. Ijefuon erar fu tavan bog ire nokarok (2) iji reoinon iji God fu e iji keunak.
ROM 10:11 Regavo buk akaij ijia vuak irerag bu Jesuon kuainva iji fuka ma ga vuak iji fu ijeg kuai, Erar fu Jesu ma vierafeno e iji fuba oifian abekno kuain.
ROM 10:12 Regavo God fu e Jius ijesugin ifejdiamo bakin revo fu e Jius bakin iji madu giame ifejdiamon. God fu e fok ijiebuon E Bomana ijefuon e iji bu fu kumejo fuka ifejdiame ire ma ijesugin buon ren.
ROM 10:13 Ijefuon maiji God fu usuibe buk akaij iji bu isoinva ijia kuai, Erar fu E Bomana ijefuon if iji oifuon fok kuakma God fu e iji keunakno kuain.
ROM 10:14 Regavo eraneb buba amur Jesu Kurais ma vierafekva bu izeg kuaiga fu faime ifejdiakma bakin. Regavo madu bu vuak fuon buba faikva bu izeg fu ma vierafekva bakin. Regavo e kafo bu Jesu Kuraison vuak iji buba abe kuardiakva bu izeg vuak iji faikva bakin.
ROM 10:15 Regavo God fuba e iji Jesuon vuak abe oijo iji kia bu vuak maiji abe usem vakva bu izeg vuak ma iji abe e roin kuardiakva bakin. Regavo e iji bun Jesu Kuraison vuak iji bun fain. Ijefuon maiji vuak ijefkin be bun usuibe buk akaij ijia isoime kuai, Magoido e iji roko iji bu Godon vuak ma iji abe rokno kuain.
ROM 10:16 Regavo e uruvana buba Godon vuak ma iji faime abe oibuon ijia abeden. Regavo madu e Asaia fun gaga e uruvana bu Godon vuak ma iji buba abekrejga fu ijefuon buk akaij ijia vuak be ijeg isoime kuai, E Bomana no vuak on ma iji abe e roin kuardiain revo e uruvana buba vuak on faime ma vierafenvano kuain.
ROM 10:17 Ijefuon e iji Godon vuak abe oijo bu Jesu Kuraison vuak iji abe e roin kuardiakva bu Godon vuak ma iji faik. Regavo bu Godon vuak ma iji faikva bu fu ma vierafek.
ROM 10:18 Regavo E Isrerko iji kabu Jesu Kuraison vuak iji bun faime ma vierafen? Na vierafe bun usuibe fain. Ijefuon maiji bun usuibe buk akaij ijia isoime ijeg kuai, Bu Godon vuak fok bu nijaidiaknum kuardiainva iji bun abe kuaime ar iror fokigia oin. Regavo madu vuak iji bu abe kuaimoinva iji e aibe ijia karioinva iji bun faim barenvano kuain.
ROM 10:19 Regavo vuak iji God fu kuainma iji fu e Isrerkobuon ijeg kuai, Ja unam nun na e karauniavo iji ja uzakva na una e Jius bakin iji ifejdiame karauniakno kuainma iji kabu vierafen ki bu bakin? Na vierafe vuak iji bun fain. Ijefuon maiji fun Mosisri usuibe ijeg kuai, God nar e Isrerko iji bu naba ma vierafejo ijefuon na una e Jius bakin iji bu na ma vierafejo bakin iji ifejdiame karauniak. Na ijeg karauniaga e Isrerko bu iji gia buka deajidiaga kabu ijiason una na ma vierafekno kuain.
ROM 10:20 Regavo madu usuibe God fu e Asaia kuama fu vuak ijefkin be vierafe mama fu ijeg kuai, E Jius bakin iji bu naba nisaidienva iji bu na giek. Regavo madu e Jius bakin iji buba nana vuak kuaikuai vierafejo iji bu na giek.
ROM 10:21 Regavo madu usuibe God fu e Isrerkobuon fu ijeg kuai, Na tavan jaoijor na e Isrerko iji imut tairene samuagdiain. Regavo buka na uzame una nun ire ise kafokafo renvano kuain.
ROM 11:1 Ijefuon ja vierafe God fube e fuon Isrerko iji nuigafiain ki fu bakin? Iji fuka ma bakin! God fuka ba bu nuigafiain. Na ijeg kuardiavo ijefuon maiji nak na e Isrerko gavo madu na e Eburamon uifarif na e Bezimanon agan ijia uinvene ruain.
ROM 11:2 Regavo God fu e fuon fu usuibe kege nainma iji fuba bu nuigafiain. Regavo jan vierafe usuibe e Eraija fu e moik Isrer karinva iji buisina una God soisoime kuardainma iji jan vierafen.
ROM 11:3 E Eraija fu God ijeg kuai, E Bomana bu e on vuak vierafene kuaivo uruvana bun kaniain. Revo madu bu fata on no ijia isuf baroijo iji bun kam kania taosen. Regavo e iji vek a ma vierafejo iji na nunkua fij revo buka vek giriesame nak kaniekrej.
ROM 11:4 E Eraija fu ijeg kuardamga God fu una roin kua, Na e seven taosen (7,000) ijeg na ke uniainva bu vek e nun. Revo e iji na kege uniainva iji na giamga bu god kufui Bar bu kuavo iji buba fuon ato same sirimamej.
ROM 11:5 Regavo God usuibe fu renma ijeg fu iviakma e Jius sibank igi no fu fuon izeg fu ma rediamo ijia fu no kege unuin.
ROM 11:6 God fu fuon ma rediamo iji fu e fuon iji nijaidiame ke uniam. Regavo bu e ijieb buon izeg bu mukoi kegoijo fu iji giame ke uniamo bakin. Regavo God fu buon izeg bu mukoi kegoijo ijia giame ke uniamobatie fuon ma rediamo iji fuka markma bakin.
ROM 11:7 Ijefuon non game vierafega e Isrerko uruvana bu unam ma iji God fu izeg e karauniamo iji bu giriesame nisaivo iji buka ba gain. Regavo fu e sibank kege uniama bu unam fuon ma iji game aben. Revo e Jius roin bun Godri vierafe buon iji fuka bijuin ijefuon bu Godon unam ma iji izeg fu e karauniamo iji buka ba gain.
ROM 11:8 Regavo e Jius iji bu unam ma iji ba gainva iji fun Godri usuibe buk akaij ijia ijeg kuai, Godri oibuon ga nigen buon bu vierafejo iji fun mukorigia bijuin. Ijefuon oibuon fuka rubdian ga madu nigen buon buka samafrenva bakin. Fu ni buon vajiain gavo ni buon buka taikin ijefuon unam ma iji buba mukoi gain. Fu ada bu vuak faikfuon iji kege vajiain revo buka vek ba mukoi faivknum rokno kuain.
ROM 11:9 Regavo madu e Devid fu usuibe vuak besum ijefkin iji ijeg kuai, God fu ire ma iji uruvana vajiainma ijefuon bu iro ine oimarev. Bu vierafero God fun buon oimarmoro bu ijeg rej. Regavo bu iro ine utufutu abejo ijia God fu bu kam arafiriaga bu vajai fian abek.
ROM 11:10 Regavo Godri ni buon iji nufiaga bu Kaven Akai fuon ijefuon unam ma iji buba giak. Regavo madu bu ise rejo ijefuon fu ni buon bu kam vajai fian vajiaga bu tavan bog afikin abeokno kuain.
ROM 11:11 Regavo ja vierafe e Jius buka ise uruvana rejo ijefuon God fuba bu mukorigia nuigafiain ki fu bakin? Na vierafe iji fuka bakin. Regavo bu ise renva ijefuon God fu una e Jius bakin iji ifejdiame karauniam. God fu ijegrega e Jius iji bu ijia una e Jius bakin ijiebuon unam ma iji bu rejo iji gia buka deajidiaga bu ijia una oi karoime Jesu Kurais ma vierafekfuon.
ROM 11:12 Regavo e Jius iji bu Jesu Kurais uzainva ijefuon God fuimve una e fok moikigia karinva iji karauniakfuon. Regavo e Jius iji bu una Jesu Kurais ma vierafekva God fuka e Jius abevo e Jius bakin iji madu ifejdiame unam fuon ma iji abe miak.
ROM 11:13 Regavo vuak igi na una e Jius bakin iji ja kuardiakrej. Naiji fu Godri e Jius bakin iji joifuon kiema na uri jon ruain. Ijefuon na God ik irerag fu na kiema na ruainva na iji bomana vierafene rej.
ROM 11:14 Regavo na vuak ma iji abe jon ruainva ijefuon na vierafe enun Jius roin bu iji giekva buka deajidiak. Bu deajidiakva kafu bu una oi karoime Jesu ma vierafega God fu bu karauniak.
ROM 11:15 Regavo God fu e Jius iji fu uzainma ijefuon fu e fok moikigia karioinva iji karauniame aferdia una kaifijaf ren. Regavo naba gain God fu rad una e Jius iji ijegrekma kabu una e izekin rek? Na vierafe God fu una bu karauniakma buka e iji bu aoime una urijo igeg rek.
ROM 11:16 Regavo Eburam ga e iji bu usuibe Godon vuak vierafene kuaivo iji bur Godon e rekva uifarif buon iji buk bu Godon e rek. Ijefuon na be bijame kuardiakno ni faif. In ijefuon gireg iji fuka ma rekma na vierafe in kiak iji buk buka ma rek.
ROM 11:17 Regavo madu igia fai. God fu e Jius iji fun uij kafo juar fuon ijia vit zubitrenva ijeg fun jafene ke koren. Regavo ja e Jius bakin iji ja fun Godri uij nita ijia irenva ijeg fu kege una juar fuon ijia oido ja mukoi tavuame irasek.
ROM 11:18 Regavo e Jius bakin igi jab uri koikjo kam ajieme una e Jius iji God fu uij vit zubitrenva ijeg jafene ke korenma iji neseme giak. Regavo e Jius bakin iji ja ijeg vierafene koikjo aroikaravga ni mukoi vierafef. Fu uij ijar moik iji ifejdamo bakin gavo fu moik ijar uij ifejdame safik maga fu mukorigia tavuame irasem. Ijefuon e Jius bakin iji jaiji ja uij igekin gavo e Jius iji bu moik igekido bur ja safik miaga ja mukoi tavuame irasek.
ROM 11:19 Regavo naba gain jakafu kuaik God fu e Jius iji bu uij kafo bu vit zubitrenva ijeg fun jafene ke koren. Ijefuon God fu e Jius bakin iji fu uij nitako igeg kege una juar fuon ijia oido bur e Jius ijiebuon ar iji abekgavo jakafu ijeg vierafene kuain.
ROM 11:20 Ja ijeg vierafekva iji fun maren. Ijefuon maiji e Jius iji buba Jesu Kurais ma vierafenva ijefuon God fu bu nuigafiain. Revo e Jius bakin jaiji ja Jesu Kurais ma vierafenva ijefuon God fu ja kege una e Jius iji fu uzainva ijiebuon ar ijia uniak. Ja e Jiusbuon ar iji jar aben ijefuon jab uri koikjo aroikarak gavo nin juvknum of.
ROM 11:21 Regavo e Jius iji buka Godon uij vit mukoi tavuavo ijin gavo God fu uij ise igeg jafene ke koren. Regavo ja e Jius bakin iji jaiji ja uij nitako igekin ijefuon ja aroikaraknum ijeg ise rekva God fu jak jafene ke korek.
ROM 11:22 Regavo ni vierafe God fuka e mukoi ifejdiaknum oijmiamo. Regavo madu tavan kafo fuka e kam arafiriaga buka vajai fian abeknum oifian abejo. Regavo God fu e Jius iji kam arafiriaga buka vajai fian abenva ijefuon maiji bu koikbuon fu nuigafainva ijefuon fu ijeg ren. Regavo e Jius bakin iji ja God ba uzain gavo jaka fu mukorigia oijmaknum ma vierafekva fu e besubesum ja mukorigia ifejdiaknum oijmiak. Regavo jaba ijegrekva fu uij iji fu jafene koremo ijeg fu madu ja kege korek.
ROM 11:23 Regavo e Jius iji bu una Jesu Kurais ma vierafekva God fu bu uij igeg kege una juar fuon ijia ok. Ijefuon maiji God fu e darokido fu aferdiaga bu una e fuon rek.
ROM 11:24 Regavo e Jius bakin iji ur jaiji ja Godon afijaf renva bakin. Regavo iviakma God ja fun kega ja una e fuon ren. E bu uij nitako ijia kege una juar ijia oijo bakin. Regavo God fu e Jius bakin iji fu unam ijegrene ire ma iji fu ur kege e Jius iji vajiainma ijeg fu ire ma iji kege una bu vajiam. Regavo e Jius iji buka uij ni mukor iji bu Godon juar ijia tavuavo igekin gavo fu Godri koikfuon uzame jafe ke koren. Regavo God fu vierafe fu una uij fuon fu jafe korenma iji kekro vierafekma fu samakaf ijia kege una juar fuon ijia oga bu una mukorigia tavuak.
ROM 11:25 Efnun na vierafe ja vuak ma iji sauivkin igi na kuardiakrejo amarigia faikfuon. Na ijeg kuardiakin jab aroikarame vierafero jaiji ja e ma ga e Jius iji bu e isero jab ijeg vierafekfuon. E Isrerko uruvana buka oi karoime una ire ise kafokafo reoknum God uzaken. Bu ijeg vek ise reoke e Jius bakin iji God fu kege uniainma iji buka uruvana Godon ruakega rad God fuson ijar e Isrerko iji karauniak. Ijefuon maiji Godon buk akaij ijia bun usuibe ijeg isoime kuai, E iji e fok igiebuon ise ijia karauniakfuon iji fu Godri e fuon Isrerko ijia be kuaga fu ruak. Regavo e ijar e Jekafon uifarif fok bu unam ise ijia kegoijo iji karauniame aferdia una unam ma ijia uniak.
ROM 11:27 Na tavan ijia vuak iji na ur kia na rekno kiainva ijeg na ise buon giame arekno kuain.
ROM 11:28 Regavo e Jius iji bu Godon vuak ma iji buba mukoi faikuai vierafenva ijefuon buiji bu Godon e ani ren. Regavo e Jius bakin iji jaka mukoi ken ijefuon God fu ire ma iji uruvana jon ren. Regavo God fu e Jius iji fu vek oijmiam. Fu vek oijmiamo ijefuon maiji fu saifarif iji fu vek ijia kia fu ire ma kafo vajiakno kiainma ijefuon fu vek e Jius iji oijmiam.
ROM 11:29 Regavo God fu oi dakaroime una kafokafo vierafeno bakin. Regavo fu vierafe fu ire ma kafo kege e kafo vajiakreno iji fum kege vajiam. Regavo madu fu vierafe fu e roin kega bu e fuon rekva iji fum kege uniam.
ROM 11:30 Regavo ur e Jius bakin iji jaiji ja God igavo bakin. Regavo iviakma e Jius bu God buba igavo ijefuon God fuim una e Jius bakin iji jon oifian abene ise jon ja rejo iji giame areknum karauniam.
ROM 11:31 Unam besum ijeg God fu izeg jon oifian abene karauniamo ijeg fu rad una e Jius iji bu iviakma fu uzainva iji buon oifian abene karauniak.
ROM 11:32 Regavo God fu vierafe fu rad e fok ifejdiame karauniakro fu ijeg vierafene areko e fok bu unam ise iji reoin.
ROM 11:33 Barim God nuvuon iji sibe. Fuon izeg fu vierafene reno iji fuka ma ikin. Regavo madu ar fuon ijia ire ma iji buka ma uruvana ijia naoiv ijefuon fu erar daknum ga mimgiakma bakin. Regavo irerag fu rekro vierafeno ijiga unam izeg fu ire kafokafo reno iji no izeg giame vierafekva bakin.
ROM 11:34 Ijefuon maiji vuak ijefuon maiji bun usuibe buk akaij ijia isoime ijeg kuai, E Bomana fu vierafeno iji fu erar gain ga madu fu erar uguai kuardamo bakin.
ROM 11:35 Regavo fu erar E Bomana iji ire ma kafo vajainma ijefuon fu una roib ire ma kafo vajakno kuain?
ROM 11:36 Regavo ire fok fu Godri amardiainma ijefuon bu daro fuon ijia ni uria kariko fu daro fuon ijia samuagdiam. Ijefuon ire fuon fok bu una if fuon iji dab aroik. Regavo na vierafe e fok buk bu tavan bog fuon sanainma iji dab aroik. Mare!
ROM 12:1 Efnun God fu unam kafokafo ijia oifian nuvuon guome ifejduomo. Ijefuon na ja soisoime kia, Ni oijon fok ka kege isuf igeg vo e akaij igeg God vajame fuifuon ikref. Regavo ja ijegrekva iji jan unam ma iji ja God aroikfuon ja iji rej. Ijefuon God fuka jon oimarek.
ROM 12:2 Regavo jab uri e kafo moikigia God ba ma vierafenva iji giame unam ise bu rejo ijeg kegok. Regavo nika arega fu Godri oijon kege karoiga ja una unam fuon ma iji vierafeokfuon. Fur oijon ijin kege karoiga ja koikjo irerag fu vierafeno ijesugin vierafene reoknum ga unam ma iji ja kegokfuon iji vierafek. Regavo madu ja irerag God fu oimaikfuon ja iji vierafene kegokfuon.
ROM 12:3 Regavo God fu fuon ma iji fu abe na mien ijefuon na e besubesum ja kia, Jab aroikarame koikjo if jon kam ajiek rega nin isuar oi mafaime vierafeknum keof. Regavo fun Godri e besubesum oijon iji ja ma vierafekfuon iji kege vajiain ijefuon ni koikjo jon ja ma vierafejo iji giaknum keof.
ROM 12:4 Ijefuon ni igia fai e igi no vajai nuvuon fu besum revo vajai gurom fuka uruvana. Regavo vajai gurom uruvana bu besum afuime ik rejo bakin gavo buka ik ni kafokafo rejo.
ROM 12:5 Unam besum ijeg vo e iji no Jesu Kurais ma vierafejo iji noka e uruvana gavo no ik kafokafo rej. Regavo no vek vajai besum igekin ijefuon maiji no Jesu Kuraisna agan besum ren.
ROM 12:6 Regavo God fun ik irerag kafokafo no mukoi kegokfuon iji fun kege e besubesum no vajuin. Ijefuon no Godon daro iji fu no vajuomo iji kege ik irerag fu no vajuinma iji reok. Ijefuon fu daro muome kuo jaka vuak nun abe e roin kuardiafno kuokma iji noka ijeg rek. No oinuvuon no ma vierafekfuon iji God fu vajuinma ijia vierafeknum vuak fuon abe e roin kuardiak.
ROM 12:7 Regavo fu daro muome kuo jani e roin nijaidiafno kuokma iji noka e nijaidiak. Regavo madu fu daro muome kuo jani e roin ifejdiafno kuokma iji noka e roin ifejdiak.
ROM 12:8 Regavo fu daro muome kuo jani e roin ejafiame kuardia bu ik buon mukorigia rejno kuokma iji noka ijeg rek. Regavo eraneb fu ja daro miame kia sinuom jon e roin vajiafno kiakma nika oijon ijekma vajiaf. Regavo eraneb fu ja daro miame kia ni e jon samuagdiafno kiakma nika giriesame bu mukorigia samuagdiaf. Regavo madu eraneb fu ja daro miame kia ni e kafobuon oifian giame ifejdiafno kiakma nika oimarknum ifejdiaf.
ROM 12:9 Regavo madu igia fai ja e roin oijmiakva jab kufuimene oijmiak revo nika mukorigia bu oijmiaf. Regavo nika unam ise iji mukorigia giame nuigafiame una Godon nifak ijia unam ma ijesugin nikajiame keof.
ROM 12:10 Regavo jaiji jan Godna agan besum ren ijefuon nika mukorigia jon oijmanamif. Regavo madu nika kaifjon mukorigia agordiakfuon iji abe bomana vierafe of.
ROM 12:11 Regavo jab zazaik nika giriesame E Bomana ijefuon ik iji reof. Regavo madu nika oijon ga kaven jon ijekma E Bomana ijefuon ik iji reof.
ROM 12:12 Regavo ja ma vierafega God fu rad ire ma kafo jon rekma iji nika oimarknum samua kariof. Regavo madu ja oine unam kafokafo ijia vajai fian abekva jab ijefuon uruvana vierafek. Regavo nika tavan bog giriesame Godon sirimameknum kariof.
ROM 12:13 Regavo kaifjon kafo bu sinuom kafo karekuai ijefuon oifian abe oijoga nin on a nainma ijia kafo ke vajia. Regavo madu ni e iji bu aibino ijia roko iji oimarknum aferdia bu jana naoif.
ROM 12:14 Regavo madu e roin bu ja arafiriame vuak ise joisina kuaivga ni God kua fu e ijiebuon ma redia gavo jab God kuaga fu bu kege arafiriak.
ROM 12:15 Regavo tavan iji e bu oimareoijo iji ni buna oimaref. Regavo madu tavan iji e bu oifian abejo iji ni buna oifian abef.
ROM 12:16 Regavo madu ni e fok ijiena afuim kariogavo jab aroikarak nika una e nui bakin rene ik ukakna roin iji oimarknum reof. Revo jab koikjo vierafero no e ma ga ire ma ijesugin reoijoro jab ijeg vierafek.
ROM 12:17 Regavo igia fai e kafo bu ise kafo jon rekva jab una vef roin buon ise rekuai vierafek. Regavo nika tavan bog e fok ijiebuon nifak ijia ire ma ijesugin mimatame reof.
ROM 12:18 Regavo madu ni God daro fu miainma iji abe giriesame e iji bu ise rejo iji turamdiaf. Ja ijegrekva ja e fok ijiena afuim karik.
ROM 12:19 Regavo efnun e kafo bu ise kafo jon rekva jab una vef roin buon ise rekuai vierafek revo ni arega fu Godri e iji ziegafiame kam arafiriak. Ijefuon maiji God fun usuibe buk akai fuon bu isoinva ijia fu ijeg kuai, Erar fu ise kafo rekma God na e darokido nar una vef roin fuon ise rek.
ROM 12:20 Ijefuon jab una ef roin ise rekuai vierafek. Regavo madu buk kafar be ijia fu ijeg kuai, Erar fu ja ziegafiamo iji fu vasiaguakma nika ire kafo una fu vajaf. Regavo madu fu do kafakma ni do jiame maga fu i. Ja ijegrekva e iji ziemo iji fu unam iji ja rejo iji game una ise fu renma iji vierafekma fuka juk.
ROM 12:21 Regavo jab zazaiga e iji jon ise rejo ijieb rareme ja asidiak. Regavo nika jar giriesame una e iji bu jon ise rejo iji ma rediaga bu oi karoime ise bu rejo iji bu ijia aref.
ROM 13:1 Regavo efnun igia faif e fok jaka e mamkanuk jon bu ja samuagdiavo ijiebuon ir abene bu igiaf. Ijefuon maiji fun Godri usuibe bu kege uniainma ijefuon bu ja samuagdiav. Regavo God fu daro iji fuba abe bu miainmabatie bu e mamkanuk rene no samuagduokva bakin.
ROM 13:2 Ijefuon eraneb bu e mamkanuk iji uzame vo vuak buon ba faivo iji buk God irerag fu rekafa vierafenma iji bu uzav. Regavo eraneb bu e mamkanuk iji uza vo vuak buon ba faivo iji bu koikbuon unam amarvo ijefuon e bu bu kam vajai fian vajiak.
ROM 13:3 Regavo God fu e mamkanuk iji fu kege uniainma iji bu e unam ma kegoijo ijieb bu giame jukva bakin. Regavo bu e iji ise kegoijo ijieb e mamkanuk iji giame juk. Ijefuon erar fu e mamkanuk fuon fuba giame juvknum vierafekma iji ni unam ma ijesugin reoine. Ja unam ma ijesugin kegokva e mamkanuk jon bu una ja kam arordia vo nidosiak.
ROM 13:4 Regavo e mamkanuk iji bun Godri kege uniainma ijefuon bu ja mukoi samuagdiav. Regavo ja ise kafo rekva ni e jon mamkanuk iji giame juf. Ijefuon maiji buiji bu daro nado bu ise jon ja renva ijefuon ja kam vajai fian vajiak. Regavo e mamkanuk iji bun usuibe Godri kege uniainma ijefuon bu Godon ik rej. Ijefuon bu e iji ise rejo iji kege vajai fian vajiaga bu ijia giame vierafero God fu e ijekin iji fu ziegafiamoro bu ijeg vierafek.
ROM 13:5 Ijefuon ja e jon mamkanuk iji ja ma ijefuon bu igiak. Regavo ma be iji ja e mamkanuk jon jaba igiakva bu ja kam vajai fian vajiak. Regavo madu be iji jan vierafen e iji bu e mamkanuk jon ijefuon jaka bu igiak.
ROM 13:6 Regavo e mamkanuk jon bu takes mon ijefuon ja kiakva ni mon kege takes ref. Ijefuon maiji e mamkanuk iji ja buon takes rejo iji fu Godri kege uniainma ijefuon bu fuifuon ikreknum ja samuagdiav.
ROM 13:7 Regavo e mamkanuk gaman ijia ik rejo ijieb mon ga ire kafo ja vajiainva bu ijefuon kiakva ni migegare una ef vajiaf. Ijefuon e takes abeoijo e roin bu ja monfuon kiakva ni migegare vajiaf. Revo igia fai naka ja soisoime kuardiavno jaka e mamkanuk jon fok agordiaknum bu nidosiame arordiaf.
ROM 13:8 Ijefuon e kafo bu mon ga ire kafo kege ja vajiakva ni migegare una ef kege vajiaf. Regavo ire be iji ja tavan uruvana rekfuon iji nika e fok oijmiaf. Ijefuon maiji eraneb bu e fok mukorigia tavan uruvana oijmiakva bu Godon akaij iji bu igiavo iji fuka ijekma riarek.
ROM 13:9 Regavo ni vajai jon ja oijmiavo ijeg e fok oijmiaf. Ja ijeg jon oijmanamikva jab jon zienamiknum niesanamik. Regavo madu jab e kafobuon bara turaknum sinuom buon iji giame oi bomana vierafek. Revo God akai fuon fok fu kege Mosis vajainma iji fun akai besum izar akai fok fur okuriain. Regavo akaij iji vajai jon ja oijmiavo ijeg una e roin oijmiaf.
ROM 13:10 Regavo ja e roin ijeg mukoi oijmiakva jab ise kafo buon rekfuon. Ijefuon eraneb ja ijegreoijo iji ja Godon akai fok jan mukoi igiav.
ROM 13:11 Regavo ja vuak fok na kuardiava jan ijegreoijo ijefuon ja ni nisuime karijo bakin. Ijefuon nika ijeg ni narame kariof ijefuon maiji tavan iji Jesu fu una ise nuvuon fok no moikigia reoijo ijia karaunuokafa roko iji fun samairen. No ik Jesu no ma vierafenva ijia no kuai tavan iji Jesu fu una ruakreno iji fun samairenmano kuain gavo iviakma ijar tavan iji fuka ma samairen.
ROM 13:12 Regavo tavan nuvuon moikigia no karine roko iji fun tavan irasekreno ijeg barek ren. Regavo tavan iji no una Jesu Kuraison sanainma iji gakrejo iji fun samairen. Ijefuon no unam ise fok e bu naki reoijo ijeg no reoijo iji noka kege gareg kozegavo una unam ma ijesugin keok. No ijeg kegokva noka e iji bu tavan iji bu bijaikuai jua magu buon kege samua karijo ijeg nok madu no samua karine ire ise fok Setan fu nuvuon rekafa roko iji rareknum karik.
ROM 13:13 Regavo no uri Jesu Kurais fu una nuvuon ruainma igeg fuon sanainma ijia karikva fuka marek. Regavo jab uri do kugin iji ine nigen iserme duok uruvana ine jer foiknum barubara fudainamiknum unam ise kafokafo reok. Regavo madu jab uri oi isema vierafeknum joi bijaik.
ROM 13:14 Ja unam ise fok jab kegok gavo nika E Bomana Jesu Kurais abe ugon igeg vajai jon ijia abesef. Regavo jab ire ise uruvana vajai surif jon bu vierafenva ja kegoijo iji jab una kegok.
ROM 14:1 Regavo e roin bu buon Jesu Kurais bu ma vierafejo ijia buka zazaivo ijefuon madu akaij iji buba igiaknum ga unam buon bu kegoijo iji buka kafokafo. No e ijekin iji bu buon vierafenva ijia kegoijo iji noba giame kuaik gavo noka oimarknum bu aferdia una nona agan besum rek.
ROM 14:2 E kafo bu buon vierafejo ijia buka duok uruvana ij gavo e roin bu buon vierafejo ijia bu zazatdiamo ijefuon bu duok roin ij gavo roin buba ij.
ROM 14:3 Ijefuon e iji duok uruvana ijo iji jab una e iji duok roin ba ijo iji giame kuaik. Regavo madu e iji duok roin buba ijo iji jab una kaifjon roin bu duok uruvana ijo iji giame kuaik. Ijefuon maiji God fu e iji bu duok uruvana ijo ijiga e iji bu duok roin ba ijo iji fu vek bu oimardiam.
ROM 14:4 Regavo jab e iji bu duok uruvana ijo ijiga e iji bu duok roin ba ijo iji giame arafiriak. Ijefuon maiji e iji bu joifuon ik rejo bakin revo bu God E Bomana buon ijefuon ik rej. Ijefuon fu koikfuon giamga bu isema rej o bu ma reoijo iji fur giame vierafek. Regavo fur e fuon ifejdiaga bu tavan bog fu ma vierafeknum mukorigia keok.
ROM 14:5 Regavo madu e kafo bu vierafega fun marenma ijefuon bu tavan besum abe God aroiv. Regavo e roin bu vierafega fun marenma ijefuon bu tavan kafokafo bu God aroiknum oij. Regavo e besubesum no koiknuvuon irerag kafokafo no kegokva iji no koiknuvuon nigen nuvuon ijia vierafene keok.
ROM 14:6 Eraneb bu tavan besum abe God aroivo iji E Bomana fu oimaikfuon ijia rej. Regavo eraneb bu vierafega fun marenma ijefuon bu fanuf ijo iji bu E Bomana fu oimaikfuon ijia rejo ijefuon bu God oimardav. Regavo madu eraneb bu duok roin ba ijo iji bu E Bomana fu oimaikfuon ijia rej ijefuon bu una God oimardav.
ROM 14:7 Regavo e fok moikigia oijo iji e besum be fu fuon vierafenma ijia oinon bakin. Regavo madu e be fu oine guamo iji fu fuon vierafenma ijia guamo bakin. Ijefuon ire nokarok (2) iji aoivo ijiga nivek karijo iji nom nuvuon vierafenva ijia rejo bakin gavo noka E Bomana fu vierafenma ijia rej.
ROM 14:9 Jesu Kurais fu e fok aoinva ijiga nivek karinva ijiebuon E Bomana rekafa fu ijefuon guame una urin.
ROM 14:10 Ijefuon eraneb ja akai kafokafo igiavo iji jab uri kaifjon roin buba akai kafokafo igiavo iji giame arafiriak. Regavo madu eraneb ja akai kafokafo igiavo bakin iji jab kaifjon bu akai igiavo iji giame arafiriak. Ijefuon maiji e fok no tavan rad uri Godon nifak ijia irega fu fine ise nuvuon fok no reoinva ijin kege mazim giak.
ROM 14:11 No vierafega ire iji fu tavan rad rega no ni nuvuon ijia gak. Ijefuon maiji bun usuibe buk akaij ijia ijeg isoi, God naiji na nivek fido e fok bu nifak nun ijia ato same ise buon visume na kuardieknum kie God aiji a e fok igiebuon E Bomanano kiek.
ROM 14:12 Ijefuon noiji no izeg sauikva bakin gavo noka Godon nifak ijia ireme ise nuvuon fok no renva ijin visume kuardak.
ROM 14:13 Regavo fun Godri ise nuvuon fok fine ke mazim guokreno ijefuon noba uri ise nuvuon ganamime kuaimokfuon. Regavo ni mukoi vierafe jab kaifjon ijiebuon unam ise iji kege nijaidiaga buk uri ijia jajiame ise rek.
ROM 14:14 Regavo naiji na E Bomana Jesu jaoijo ijefuon na ma vierafega God fu irerag fok no ikfuon iji fuka ma ijesugin amardiain. Ire fok bu ma ijesugin ga e kafo bu vierafega ire roin bu buifuon fu ise ijefuon buba ij. Regavo bu ijegrekva noba giame kiak.
ROM 14:15 Regavo ire kafo kaifjon roin buba ijo ja iji ikva iji ja unam bu oijmanamivo ijia kegoijo bakin. Regavo e kaifjon roin bu Jesu ma vierafejo iji bu duok roin buba ijo ja ijin ikva ja kaven buon kam arafiriav. Jesu Kurais fun besum joifuon guainma ijefuon ni mukorigia vierafeknum jon oijmanamif.
ROM 14:16 Regavo jab ire kafo bu ja oimardiakfuon iji rega e bu ijia giame una ja musikiak.
ROM 14:17 Ijefuon igia faif Godon unam ma iji no kegokfuon iji no duok iknum ga karokfuon iji fuka bakin. Regavo unam ma iji no kegokfuon iji noka Godon Kaven Akai iji kuaga fur oinuvuon ijia fine no samuagduok. Fu no samuagduoga no unam ma iji sanainma iji abe kaifnuvuon ijiena afuime oimarknum kari vak.
ROM 14:18 Regavo erar fu unam Jesu Kurais fu kuainma fu ijegrejknum kaifijaf roin oijmiakma e iji fu unam God fu oimarkfuon ijia reoin. Ijefuon e roin bu fuon oimarme fu agoik.
ROM 14:19 Ijefuon ni roga no tavan bog mimatame unam ma ijesugin kegoknum e kaifnuvuon Jesu Kurais ma vierafejo ijiena afuim kariokfuon. Regavo madu ni roga no mimatame unam ma ijesugin reoinki kaven nuvuon bu ma karivakfuon.
ROM 14:20 God fu kaifjon ijiebuon nakikmazak irerag bu rekfuon iji fun vajiain. Ijefuon duok roin buba ijo iji jab giame kuaik. Revo ire fok fun Godri nuvuifuon amaren ijefuon noka ikfuon. Regavo jab duok iji kaifjon roin buba ijo ijin nifak buon ijia iok. Ja ijegrekva ja buon izeg bu ma vierafejo ijin kam arafiriak.
ROM 14:21 Regavo no magaga duok kafokafo iknum unam ise kafokafo kegokva noka kaifnuvuon ijiebuon buon izeg bu ma vierafejo iji kege arafiriak.
ROM 14:22 Jon ja ma vierafejo ijia ja unam kafo ire ijiebuon vierafejo iji ni jonkua oijon ijia arega God fu giam. Regavo e be fu oifuon ijia vierafega ire be fu reno iji fun maga fu reno iji fu oimarkfuon.
ROM 14:23 Regavo ja vierafega duok kafo ja ikfuon iji fu ise gavo ja magaga ikva iji God fuba oimaik. Ijefuon maiji jan vierafega duok iji fu ise revo ja ijo ijefuon ja ise rej.
ROM 15:1 Eraneb no giriesame Jesu ma vierafejo iji noka uri kaifnuvuon ijiebuon afikin iji ifejdiame dasumdiak. No uri kaifnuvuon bu zazaivo unam izeg God fu oibuon ijia vierafe vajiama buba ijia kegoijo no iji ifejdiak. Regavo noba koiknuvuon uri unam ma ijesugin kege nuvuon oimarknum karivak.
ROM 15:2 Regavo e besubesum noka uri unam ma ijia kege kaifnuvuon roin Jesu ma vierafejo iji bu oimarkfuon ijia ifejdiaga bu buon Jesu ma vierafejo ijia buba zazaik.
ROM 15:3 No unam izeg Jesu Kurais fu kegoinma no madu no ijeg keok. Ijefuon maiji Jesu Kurais fuk fu God revo unam fu moikigia kegoinma iji fuba fuon fu oimarkfuon ijia vierafene reoin. Fuba ijeg ren gavo e ani ijieb fu arafirivga fu una Godon oimaren. Regavo vuak iji Jesu fu una God kuardainma iji bun usuibe buk akaij ijia isoime ijeg kuai, E ani iji bu a arafirainva iji bun na arafirienvano kuain.
ROM 15:4 Usuibe vuak fok bu buk akaij ijia isoinva iji bu no nijaiduokuai isoin. Ijefuon no vuak iji dame vierafek. No vuak iji ma vierafekva vuak ijar no ifejduo vo ejafuoga noba zazaik. Revo no giriesame uri ma vierafero God fu tavan rad ire ma kafo nofak reduokro no ijeg vierafeknum zinunba ke vak.
ROM 15:5 Regavo na God iji fu fuon vierafenma ijia tavan bog no ifejduoknum ejafuoga no giriesame ma vierafejo ijefuon sirimamej. Na sirimamega fur fuon vierafenma ijia ja e besubesum oijon kege karoiga ja una oi besum ma vierafek. Ja oi besum vierafene unam izeg Jesu Kurais fu kegoinma jak ijeg keok.
ROM 15:6 Ja ijeg una agan besum rene oi besum vierafeknum vuak besumkuaim fainamikva iji ja God E Bomana Jesu Kuraison Asoij iji aroiknum if fuon abe ajiev.
ROM 15:7 Regavo vuak uruvana na kuardiainva ijefuon vuak anej iji igin. Izeg Jesu Kurais fu oijmiame ja aferdia una aganfuon besum renma ijeg jak oijmiame kaifjon aferdia una jana agan besum ref. Ja unam iji Jesu Kurais fu kegoinma ja ijeg kegokva e roin bu unam jon ma iji giame una God nidoime fuon sanainma iji abe aroik.
ROM 15:8 Vuak na kuardiavo ijefuon maiji na kia, Jesu Kurais fu ari ruainma iji fu e Jius ijiena fioknum God izeg fu ma ijesugin vierafene kegoino fu ijin abe nijaidiakro ruain. Regavo God fu vuak be usuibe e Jius ijiebuon saifarif iji bu Godon vuak ijia e uguaikin renva iji nijaidiame kia, Fu e be kuaga fu vuak fuon ma iji abe buon ruakno kiain. Ijefuon Jesu Kurais fu Godon vuak iji abe markro vierafene ari ruain.
ROM 15:9 Regavo madu Jesu Kurais fu ari ruainma iji fu e Jius bakin iji kiaga bu God aroikro fu iji ruain. Ijefuon maiji God fu tavan bog buon oifian abene ifejdiamo. Regavo irerag God fu e Jius bakin ijiebuon renma iji fun e Devid usuibe vuak be fu buk akaij ijia isoime una God kuardainma ijekma riaren. Regavo vuak iji e Devid fu kuainma iji fu ijeg kuai, Na vek e Jius bakin ijiena oknum on oimarme a dua urukafakno kuain.
ROM 15:10 Regavo madu una buk kafar be ijia fu una ijeg kuai, E Jius bakin iji ni Godon e ijiena besum oimarfno kuain.
ROM 15:11 Regavo madu fu kuai, E Jius bakin iji ni E Bomana iji aroi ga e fok isama kafokafo kuaivo iji jak fu aroif.
ROM 15:12 Regavo madu e Asaia fuk fu buk akaij ijia ijeg kuai, E Jesion agan ijia bu e be nafek. Regavo Godri e iji abe unaga fur e Jius bakin iji samuagdiak. Regavo e fok bu oibuon ijekma e iji ma vierafekno kuain.
ROM 15:13 Na joifuon Godon sirimamej. Ijefuon maiji na vierafe God fur oijon ijia vierafe vajiaga ja kaifjon ijiena afuime oimarknum karivak. Regavo ja fu ma vierafejo ijefuon fu Kaven Akai fuon ijefuon daro ijia ifejdia vo samuagdiak. Fur samuagdiaga ja tavan uruvana ire ma ijesugin fu oijon ijia vierafe vajiaga ja oimarknum vierafek.
ROM 15:14 Regavo efnun na nunkua ma vierafega jan ire ma ijesugin e kaifjon ijiebuon rej. Regavo madu irerag kafokafo God fu kiainma iji jan mukoi vierafene rej. Regavo madu jan koikjo una kaifjon ijiena nijainamiv.
ROM 15:15 Na fas igia vuak kafokafo isoime darokma kuardiaga ja ire ma iji ja rejo jaba arek ga jaka giriesame ijeg revakfuon. Ijefuon maiji God fu fuon izeg fu e marediamo ijia fu na abe uniemado na fuifuon ik rej. Fu vierafe naiji naka e Jius bakin ijiena fioknum Jesu Kuraison vuak ma iji nijaidiak. Na ijegrenki e Jius bakin iji bu oi karoime una Godon ruak. Bu una roga Kaven Akai fu bu daro miaga bu Godon nifak ijia buka maturaikfuon.
ROM 15:17 Regavo naiji na Jesu Kuraison e revo na Godon ik rene vuak fuon ma iji abe e Jius bakin iji kuardiavo ijefuon na Godon bomana oimarev.
ROM 15:18 Regavo na Jesu Kurais ik irerag fu mienma ijesugin abe darodarokin kuaik. Regavo ik iji fu mienma iji na e Jius bakin iji ifejdiaga bu una God ma vierafene igakfuon.
ROM 15:19 Ijefuon maiji vuak kafo na kuaim ga ire kafo na reoinva iji na Kaven Akai ijefuon daro iji abene ire sumakin kafo bu ur ba giainva iji reoin. Ijefuon na ai Jerusarem ijia uri vaknum Jesu Kuraison vuak ma iji abe mukorigia kuardia vake ai Iririkam ijia kekoin.
ROM 15:20 Regavo na vierafe na unam ijekin ijia na Godon vuak ma iji abe kuardiaokro vierafen. Regavo igia fai na e iji bu ur ar sako ga e roin bu usem muja buon ijia savo ijeg naba rekro vierafen. Ijefuon na vierafe naka e iji bu ur ba Jesu Kuraison vuak iji fainva ijiebuon ar ijia oknum vuak ma iji abe kuardiak.
ROM 15:21 Na ijegrekro vierafen ijefuon maiji bun usuibe buk akaij ijia isoime ijeg kuai, E iji bu Jesu Kuraison vuak iji buba fainva iji bu Jesu irerag fu reno iji bu gak. Regavo e iji bu Jesu Kuraison vuak ma iji buba fainva iji bu vuak fuon mukoi faime ma vierafekno kuain.
ROM 15:22 Naka una jon vuakro vierafen revo naba vuain ijefuon maiji na Godon vuak ma iji abe una madu e Jius bakin roin nijaidiav.
ROM 15:23 Regavo iviama ar uruvana bu Jesuon vuak ma iji bun faim baren. Regavo na juaivasia uruvana naka ja giakro vierafen ijefuon na vierafe na ai Sfen vako ijia na tavan sibank ijia jana fik. Na ijia jana fine oimadiega na ijarson ja ifejdiega na una ai Sfen vak.
ROM 15:25 Na ja giakafie vierafen revo iviakma na una ai Jerusarem ijia vakvej. Na mon abe Jerusarem ijia Godon e iji miak vak.
ROM 15:26 E Jesu Kurais ma vierafejo ai Mesedonia karinva ijigam ai Akaia karinva iji bu oimarknum mon kafo afuin. Mon iji bu afuime Godon e roin ai Jerusarem ijia isema karinva iji nijiain.
ROM 15:27 Regavo iji bu renva iji bu koikbuon vierafene ijeg ren. Regavo e Jius God ma vierafejo ai Jerusarem karinva iji bu Godon vuak ma iji abe e Mesedoniako ijiga e Akaiako iji miain. Ijefuon e Jius bakin iji busik una e Jius iji isema karinva iji ifejdiame mon kafo nijiain.
ROM 15:28 Ijefuon na vierafe naka amur mon iji e Jius bakin bu afuinva na iji abe ai Jerusarem ijia e Jius iji miame nason jon vuak. Na ai Sfen vako ijia na vua ja giame nason nakeko ai Sfen vak.
ROM 15:29 Regavo na vierafe na ja giak vuakva Jesu Kurais fu fuon ma iji uruvana joifuon vierafe vajiega na vua ja nijaidiaga ja jon amarigia oijmanamiknum kariokfuon.
ROM 15:30 Regavo efnun na ja ejafiame kia, ni nana E Bomana nuvuon Jesu Kuraison if ijia ga Godon Kaven iji fu nakikmazak no ifejduoga no nuvuon oijmanamivo ijefuon daro iji abe Godon uruvana nuifuon sirimamef.
ROM 15:31 Ja na ifejdie nuifuon sirimamega e iji Godon vuak ma iji ba abenva bu ai Judia karinva iji buba ise kafo nun rek. Regavo madu ja sirimamega mon iji na abe e Jius iji bu ai Jerusarem ijia isema karinva iji ifejdiak vako iji bu oimarknum mon iji abekfuon.
ROM 15:32 Regavo ni nuifuon sirimamega God fu vierafe na ja giakro vierafekma na uruvana oimarknum ja giak vuakfuon. Ja ijegrekva na tavan sibank oimarknum jana fik.
ROM 15:33 Regavo na vierafe na Godon sirimamega fur tavan bog ja ifejdiaga ja mukorigia afuime kariok. Mare!
ROM 16:1 Na vierafe na barak Foibe on kuardiaga ja vierafek. Bara iji fu kainuvuon be fuk God ma vierafeno gavo fu ai Sentria ijia e iji bu Jesu ma vierafejo ijiebuon ik ren.
ROM 16:2 Na bara ijefuon kuardiaga ja vierafekin ja oimarknum bara iji ja E Bomana ijefuon e ijeg afek. Regavo ja Godon e ijefuon ni Godon e igeg bara iji oimarknum afef. Regavo na vierafe ja irerag fok fu vierafekma iji jaka mukorigia ifejdakfuon. Ijefuon maiji bara iji fu e fok Jesu ma vierafejo iji ifejdiaknum ga madu nak fuka mukorigia ifejdiem.
ROM 16:3 Na bara Frisira ko baru fuon Akuira iji anadiav. Bu nana Jesu Kuraison ikrejo ga buka unam bu aoikfuon ijia nuifuon vajai fian abej. Na buon bomana oimarev ijefuon maiji bu nunkua ifejdieva bakin gavo bu e Jius bakin iji bu besum afuime God aroivo iji madu mukorigia ifejdiain.
ROM 16:5 Regavo madu na e iji bu besum ar buon ijia afuime God aroivo iji anadiav. Regavo na e Efainitas na oijmavo iji anaiv. Fuiji fu ai Esia guf ijia fur amur Jesu Kurais ma vierafen.
ROM 16:6 Regavo madu na bara Meri anaiv. Ijefuon maiji fu jana besum oino ga madu fuka giriesame joifuon ik ren.
ROM 16:7 Na e Edronikas ko e Junias anadiav. E nokarok (2) bu aga aganun ga ur bu nana besum dibur karin. Regavo e afasor iji bu e nokarok (2) iji buk Jesuon ik mukorigia rejo iji bun giame vierafen. Regavo madu bun bur ur Jesu Kurais ma vierafen gavo naiji na rad Jesu ma vierafen.
ROM 16:8 Na e nun Amfiriatas na oijmiavo iji anaiv. Regavo fuk fu Godon e.
ROM 16:9 Na e Ebanas fu nona Jesu Kuraison ik reno iji anaiv. Regavo madu na e Stakis na mukoi oijmavo iji anaiv.
ROM 16:10 Na e Aferis anaiv ijefuon maiji Setanri fu biesuain gavo fuka vek giriesame Jesu Kurais ma vierafen. Regavo madu na e Aristoburason agan iji anadiav.
ROM 16:11 Na e Erodion anaiv. Fuiji fu nosik no agan besum. Regavo madu na e Nasisason agan iji anadiav. Buiji bu E Bomana ijefuon e.
ROM 16:12 Na bara Traifaina ko uviaifuon bara Traifosa iji anadiav. Bu E Bomana ijefuon ik rej. Regavo madu na e Fesis na oijmavo iji anaiv. Fuka giriesame E Bomana ijefuon ik reoin.
ROM 16:13 Na e Rufas anaiv. Fu iji fuka mukorigia Jesu Kurais E Bomana ijefuon ik reoin. Regavo madu na asiefuon anaiv. Ijefuon maiji fur asienun igeg na samuagdien.
ROM 16:14 Na e Asinkritas ga e Firegon ga e Emis ga e Fatrobas ga e Emas iji anadiav. Regavo madu na e iji Jesu ma vierafejo iji bu buna afuime God aroivo iji anadiav.
ROM 16:15 Na e Firorogas ga bara fuon Juria ga e Nerias ga makin fuon anadiav. Regavo madu na e Orimfas anaiv. Regavo e iji Jesu Kurais ma vierafejo bu buna besum afuime God aroivo na iji anadiav.
ROM 16:16 Regavo nika e iji bu Jesu ma vierafejo iji bu anainamivo ijeg oijon guf ijekma jon anainamiknum karif. Regavo e igi Jesu Kurais ma vierafejo bu igia besum afuime God aroivo iji bu ja anadiav.
ROM 16:17 Regavo efnun na vuak ejafiame kuardiavo ijefuon ni mukorigia samuanamiknum kariof. E ise roin jana karinva iji buka unam ja agan besum rene afuime karijo iji kam ataseme kafokafo reoij. Regavo madu buka giriesame oijon kam karoiga ja God uzakuai bu iji reoij. E ijieb bu vuak ma iji ja fainva iji kam arafiriame una vuak buon kufui iji nijaidiav. Ijefuon ni mukorigia e ijekin iji akariaknum of.
ROM 16:18 Regavo ni vierafe e ise ijekin iji buba E Bomana nuvuon Jesu Kuraison ik rekuai vierafen. Regavo bum vajai surif buon ijefuon vierafenva fok kegoknum oimarev. Regavo e ijekin iji bu vuak buon bu e biesiame soisoigin kuaivo ijia bu e iji buba ma vierafene kegoijo ijiebuon oij iji kam karoiv.
ROM 16:19 Regavo igia fai e ar iror igia karine Jesu ma vierafejo iji bu izeg ja Godon vuak ma iji igavo iji bun faim baren. Ijefuon na irerag ja rejo ijefuon naka bomana Godon oimarev. Regavo vuak igi na isoime kuardiavo iji na vierafe jaka unam ma iji amarigia gia vierafene kegoknum ga ise iji amarigia agordiakro na iji vierafen.
ROM 16:20 Ijefuon ja ijegrekva God iji fu tavan bog e ifejdiako bu afuime karioijo ijar daro miaga ja uri giriesame Setanon daro iji abe gareg akozek. Regavo madu fu ifejdiaga jab e iji bu jana karine ise kafokafo kegoijo ijiebuon vuak iji igiak.
ROM 16:21 Regavo Timoti e iji fu nosik ik besum reoino iji fu ja anadiain. Regavo madu aga aganun e Rusias ga e Jeson ga e Sosifata iji bu ja anadiain.
ROM 16:22 Regavo na e Tetias nak na E Bomana ijefuon if ijia ja anadiav. Regavo fas igi na For kuardiekoga na isoime ja nijiav.
ROM 16:23 Regavo e Gaias fuk fu ja anadiain. Na For na ar fuon ijia fioijo ga e uruvana bu Gaiason ar ijia besum afuime God aroiv. Revo e Erastas fuk fu ja anadiain. E iji mai igi no karinva ijefuon mon iji samuamo ijar ja anadiain. Regavo madu e Kuotas e be fu nona Jesu Kurais ma vierafeno iji fuk fu ja anadiain.
ROM 16:24 Regavo na vierafe Godon marediamo iji fu tavan bog jana navak. Mare!
ROM 16:25 No Godon oimarkfuon ijefuon maiji fu aresredo fur ifejdiaga ja jon ma vierafejo ijia jaka giriesame ok. Regavo vuak iji Jesu Kuraison vuak ma iji na abe e nijaidiaoijo ijar ijeg kuain. Regavo usuibe Godon vuak ma iji fuka ma sauime na ruain. Regavo iviakma vuak iji fun e Godon vuak vierafene kuaivo ijieb abe kuaime samafreja non gain. Regavo vuak iji e karauniakfuon iji fu Godri kuainma ijefuon noka vuak iji abe ar iror ijia kuaime samafrega e fok bu God ma vierafekfuon.
ROM 16:27 Ijefuon ni roga no God iji aroiv. Fu fuonkua fu God ga fu fuonkua fu tavan bog ma ijesugin vierafene kegoin. Regavo no Jesu Kurais irerag fu renma ijefuon God abe aroik. Fun ijin. Mare.
1CO 1:1 Na For nar fas igi isoime e iji ja ai Korint ijia karinva iji nijiav. Naiji fun Godri usuibe kumenma ijefuon na Jesu Kuraison afasor rene vuak fuon ma iji abe ijia vua ja kuardiak. Revo e Sostenas uviainuvuon iji Kurais ma vierafeno igi nosik fino iji no besum ja anadiav.
1CO 1:2 Fas igi na isoinva iji na Godon sos iji ja anadiav. Regavo jaiji fun Godri ik amur ijia ja e akai fuon rene karikfuon fu iji kumen. Regavo madu fun ik amur ijia ja kege una Jesu Kuraisna besum uniain.
1CO 1:3 Regavo na vierafe God Asoinuvuon ijiga E Bomana Jesu Kurais bu ja ma rediaknum vo ifejdiaga ja afuime karik.
1CO 1:4 Naka tavan uruvana God fu izeg ja daro miame unam kafokafo ijia ifejdiamo ijefuon fuon oimarev. Fu ijegrejo ijefuon maiji ja e besubesum ja e fuon. Fu vierafe ja vuak fuon ma iji amarigia faivknum ga abe e roin kuardiakro fu ijin ifejdiame daro miain.
1CO 1:6 Ja ire ijegrejo iji jan Godon vuak ma iji fu Kuraison kuainma iji no abe nijaidiainva iji jaka abe gigikin vierafej.
1CO 1:7 Ijefuon jaiji ja una Kaven Akai ijia ire ma kafo efkin karvo iji jaka zazaivo bakin. Jaka vek ijeg karine rejknum tavan iji Jesu Kurais fu una moikigia ruakfuon ja iji samuav. Regavo madu na vierafe Kuraisri ifejdiaga ja jon ja ma vierafejo ijia giriesame vierafeknum karivake tavan iji ja aoivo ijia usek. Ja ijegrenki E Bomana Jesu Kuraison tavan iji fu una roko ijia buba vuak ise kafo kege una ja namdiak.
1CO 1:9 Regavo vuak igi na kuardiavo iji God fu arekma bakin gavo fuka rek. God iji fu ik amur ijia ja kumena ja una Farifuon Jesu Kurais E Bomana nuvuon ijiena mazinva ijar ire iji fu rek.
1CO 1:10 Regavo kaifnun na E Bomana Jesur daro mienma ijefuon na ja vuak gigikin kuardiav. Na kuardiame bijukuriavno ja joi musikuaivo iji nika arenki iji ja abe atavo iji ja arekfuon. Ja ijegrejo iji arega na vierafe jaka oi besum vierafekfuon. Regavo madu jaka unam izeg ja Kurais igame karikfuon ijin abe besum kuaim iganamime kariokfuon.
1CO 1:11 Regavo vuak igi na ijeg kuardiavo ijefuon maiji e Koroion agan ijia e ma vierafejo kafo bu samakaf kuardieme kie jaka ijia jon musikuaiknum karioijno kien.
1CO 1:12 Regavo igi na kuaivo iji izeg e be a kuai na Foron vuak iji fu Jesuon kuardienma na iji javno kuain. Regavo e be fu kuai na e Aforason vuak iji javno kuain. Regavo e be a kuai na e Fitaon unam ijia javno kuain. Regavo be fu kuai na nunkua na Kuraison unam ijia javno kuain.
1CO 1:13 Regavo igia fai ijeg ja karine rejo iji na vierafega fuka ba maren. Regavo ni vierafe Kurais fu abe ata kafokafo renma bakin. Revo For nak na kuros ijia guainva bakin revo fu Kuraisri guain. Regavo madu do ja ruainva iji ja if nun ijia ruainva bakin.
1CO 1:14 Regavo be iji naba e uruvana do ruardiain gavo nan e Krisfas ko Gaias buonkua ke do ruardiain ijefuon na bomana oimarev. Ijefuon maiji fu erar kuai na For do ruardiedo na e fuono kuaikma bakin.
1CO 1:16 Regavo madu e be iji nan vierafen na e Stefanas ko aganfuon ijin ke do ruardiain. Regavo na e kafo na erane ke do ruardiainva bakin.
1CO 1:17 Na e sibank ijin ke do ruardiainva ijefuon naka oimarek. Ijefuon maiji Kurais fu kie, A va e do ruardiamne kienma bakin. Revo ik iji fu na kiema na ruainva iji na Kurais izeg fu kuros ijia guamevo una urinma na vuak ijesugin abe kuardiav. Ijefuon maiji vuak ijar fuka darokin. Regavo na una emabuon vierafe abe kuardiakva vuak iji fu daro bado fuba e roin karauniak.
1CO 1:18 Ijefuon maiji e iji ba ma vierafejo iji bu unam ise ar mian naino ijia vako iji bu vuak ma iji buba ma vierafen. Bu vuak ma iji God fu Jesu kuama fu arime kuros ijia guainma iji buimve dab ise igeg vierafej. Regavo e iji eraneb no ma vierafeko fu karaunuomo iji non vierafega Godon vuak ma iji fuka ma darokin ijefuon fu vuak ijar e karauniakfuon.
1CO 1:19 Ijefuon maiji vuak besum iji bun buk akai bu usuibe isoinva ijia God fu ijeg kuai, Nar e iji mukorigia vierafejo ijiebuon vierafe iji nar kam iserediak. Regavo nar e iji bu ire kafokafo mukoi vierafejo ijiebuon vierafe iji naka mukoi bijukuriakno kuain.
1CO 1:20 Ijefuon maiji e ijeg vierafejo iji Godri giamoni vierafe buon ma iji bu vierafejo iji fuka buzer. Regavo madu e iji akai mukoi samuavo ijigam e iji bu una e kafobuon vierafe iji kam karoiga bu una unam be ijia jajiavo e ijekin iji bun Godon unam maiji bun areme una unam ise ijia vak. Bu ire ijegreoijo ijefuon God fu vierafega vierafe buon mukor ijigam vuak buon ma bu kuaivo iji fuka buzer.
1CO 1:21 Ijefuon God fu fuon vierafenma ijia fu e iji bu buon bu mukoi vierafejo ijia God gakuai giriesavo ijiebuon vierafe iji fuka mukorigia bijukuriain. Fu ijegrediagavo una e iji bu vuak fuon ma iji ma vierafejo iji fu karauniam. Regavo vuak iji e bu abe ma vierafejo iji e moik igekor bu vierafero fu isero bu ijeg vierafej.
1CO 1:22 E Jius iji bu vuak ma iji bu dab ise igeg vierafen ijefuon maiji tavan bog bu vierafe buka unam sumakin kafo ni buon ijia giakuai vierafen. Regavo e Jius bakin iji bu e iji vuak ma vierafene kuaivo ijiebuon vuak iji faikuai nisaidiav.
1CO 1:23 Regavo noiji no vuak iji no abe e kuardiavo iji no kia, Kurais kuros ijia fu guainma iji fu no aferduome una Godon unam ma ijia unuinmano kiav. Regavo e Jius bu vuak iji faiga buka isediagame buka ziev. Regavo e Jius bakin iji bu vuak iji faiva bu vierafero vuak iji fu irerag ma be rekma baro bu ijeg vierafen.
1CO 1:24 Regavo una e Jius ijiga e Jius bakin iji eraneb bu God fu vek ijia kumene karauniainma iji ni buon iji fun Godri ke samafrediain. Ijefuon bun mukorigia game vierafega Kurais iji fu Godon daro ka ikin iji bu karauniakfuon ijiro bu ijeg vierafen. Revo madu bu vierafero God fu irerag fok fu rekafa vierafeno iji fuka mukorigia fine vierafeknum renro bu ijeg vierafen.
1CO 1:25 Ijefuon God irerag fu rekafa vierafeno iji e bu kuai fuka iseno kuaivo iji fuka mukor. Godon vierafe ijar emabuon irerag mukoi bu rekuai vierafenva iji fuka asidiain. Regavo Godon vierafe maiji fu vierafene Kurais kuama fu kuros ijia guainma iji e bu vierafekuai fu daro bano kuain revo ire ijar fuka ma darokin. Ire iji God fu renma ijar ema irerag bu vierafene rejo iji fuka ma asidiain.
1CO 1:26 Regavo kaifnun nin izeg ur ja oijga God fu kumena ja una e fuon renva iji vierafef. Tavan ijia e sibank roin ja e iji bu moikigia vuak mukoi vierafejo iji no kuaivo ijeg jak ja mukoi vierafej. Regavo madu e sibank roin jak jaka daro mamkanuk kege e roin samuagdiav. Regavo madu e sibank roin iji ja e ikin ijiebuon agan ijia nafene samuagdiain.
1CO 1:27 Regavo God e iji fu kumega bu efuon rejo iji fu e iji e moik igeko bu vierafekuai bu e iseno kuaivo fu ijin ken. Fu ijeg kekin e iji bu moikigia koikbuon vierafero bu vierafe buon ijia bun aresrevaro bu ijeg vierafek. Regavo bu una buon ganamime vierafega vierafe buon mukor iji fuka ma baga bu juk. Regavo madu e kafo God fu kege efuon reno iji fu e iji e moik igeko bu giame vierafero bu e zazaikinro bu ijeg vierafejo fu e ijin ken. Ijefuon maiji fu ijegrega e darokin iji bu moikigia karinva iji bu una buon ganamime vierafero daro buon fuka ma buzero bu ijeg vierafene juk. Ijefuon maiji vuak buon iji e bu faivo iji bu izeg e roin ifejdiaga bu God ma vierafekva bakin.
1CO 1:28 Regavo madu God fuba e iji bu e mamkanuk ijiebuon ar ijia nafediainva ijin ken. Regavo fu e iji e moik igeko bu nese giame kuai bu ire kafo vierafejo bano kuaivo fu ijin ken. God fu e ijekin iji kenma ijefuon maiji eraneb bu iviakma vierafe bu moik igia e mamkanuk renva iji rad God fu e iji fuka magiak.
1CO 1:29 Fu e ijekin ijin kenma ijefuon maiji fu vierafero fu bu kenki buba uri buon aroikaraknum kuai, No koiknuvuon nigen nuvuon no mukoi vierafejo ijia no God gainvano kuaik.
1CO 1:30 Regavo fun irerag God fu joifuon renma ijia jan iviakma una Jesu Kuraisna agan besum ren. Regavo Godon vierafe ma iji fu vierafenma iji fu Kuraison duadok ijia abe ik ren. Regavo vierafe fuon ma iji fu ijeg. Kurais kuros ijia fu guainma ijia fuka unam iji abe mukorigia amarduinma ijefuon God fu no aferduome una unam fuon ma ijia unuom. Fu vierafe noka Godon e akai rene karikro fuka tavan bog giriesam. Regavo fun ire ise iji no reoijo ijia turamduome aferduido fu rad e ise rejo iji kege vajai fian vajiakro roko ijia fu no karaunuok.
1CO 1:31 Regavo God fu ire iji renma ijefuodo e be fu oine vuak kuaikma fu E Bomana irerag fu renma ijesugin kuaime aroikarakfuon. Ijefuon iviakma no vierafe vuak irerag bu usuibe Godon buk ijia isoime kuainva iji fu ma kuain. Regavo vuak iji bu ijeg isoime kuai, Erar fu aroikarakro vierafekma ni irerag E Bomana fu renma ijesugin kuaime aroikaramne kuain.
1CO 2:1 Regavo kaifnun ik na jon vuainva na Godon vuak ma iji no abe ja kuardiakfuon fu abe muinma na iji abe kuardiakro vuain. Regavo vuak ijia na vua kuardiainva iji naba vuak ka jaoijmana kuardiain. Revo madu naba uri e iji bu nigen mukoi vierafene kuaimoijo ijegrene kuardiain.
1CO 2:2 Regavo madu na una vuak garef kafo kege kuardiakfuon iji naba vierafen. Regavo nam vuak ma iji izeg Jesu Kurais fu kuros ijia ise jon ja reoijo iji karauniakafa guainma na ijesugin samakaf kuardiain.
1CO 2:3 Regavo ijia na manine vuak kuardiainva iji naka uruvana zazatdien ga madu naka juv ga ka uruvana igia simarien.
1CO 2:4 Regavo madu nifak jon ijia na manine Godon vuak ma iji na kuardiainva iji naba vuak jaoijmana kuardiain. Regavo madu naba e vuak mukoi vierafene kuaivo ijeg manine kuardiain. Ijeg naka bakin gavo nam vierafero ja Godon Kaven iji fu ire sumakin roin jon reno ja iji giame God ma vierafekro na ijin kuardiain.
1CO 2:5 Ijefuon ja ema ijiebuon vierafe ma iji bu kuardiavo ja ijia faime una God ma vierafejo bakin. Regavo jan Godon daro iji fu ikreno ja ijia gavknum ma vierafej.
1CO 2:6 Regavo na e iji bu Godon Kaven Akai ijar kege ninarumoko bun e darokin renva ijiena oijo ijia na vuak kuaivo iji naka vierafe mukoi roin na ijia kuardiav. Regavo vierafe ijekin na vierafejo iji fu e moikigia oijo ijiebuon vierafe bakin. Regavo madu fu e mamkanuk moikigia e roin samuagdiavo ijiebuon vierafe bakin. Ijefuon maiji vierafe buon iji iviakma fun una bakitem.
1CO 2:7 Regavo vuak igi na abe ja kuardiavo iji ja ijia una God fu izeg ire fok mukorigia vierafeno ja iji vierafek. Regavo vierafe iji fu Godri ka vek iji ire fok fuba amardiainma ijia vierafenma ijin. Godon vierafe ka mukor iji no fu aikin rekro fu vierafenma iji usuibe fuka mukorigia abe sauin. Regavo iviakma fun abe una afasor igi no samafreduoma non gain.
1CO 2:8 Regavo e mamkanuk moikigia karinva iji besum be fu erar Godon vierafe mukor fu sauinma iji gainma bakin. Ijefuon maiji bu God irerag fu reno iji bu gavobatie bu E Bomana iji fu Godon ire fok samuagdiamo iji buba abe kuros kanak.
1CO 2:9 Regavo vuak igi na kuardiavo iji vuak besum iji bun usuibe Godon buk akaij ijia ijeg isoime kuai, Ire iji God fu e iji bu fu oijmavo ijiebuon fu kanaufumdiainma iji fu erar ni fuon ijia giainma bakin. Regavo madu fu erar ire iji fu reno iji fainma bakin ga madu fu erar giame vierafenma bano kuain.
1CO 2:10 Regavo iviakma ire iji bu sauinva iji non giame vierafen ijefuon maiji Godri Kaven fuon kuama fu moikigia arime ire fok nijaiduoknum kuarduokafa ruain. Fu Kaven ijar Godon vierafe ma iji fu nuvuifuon vierafe vajuoma iji buka mukorigia sauinva iji fur oknum giame una no nijaiduom.
1CO 2:11 Regavo ema ijefuon oij ijia irerag fu vierafeno iji fu erar gakma bakin revo fun kaven fuon ijar vierafen. Unam besum ijeg fun Godon Kaven ijar Godon oij ijia irerag fok fu vierafeno iji fur vierafen.
1CO 2:12 Regavo no e moik igeko bu koikbuon karine vierafejo no ijeg koiknuvuon oinuvuon ijia karine vierafejo bakin. Ijefuon maiji buon vierafe iji fu kafo. Regavo iviakma non Godon oij ijia irerag fu vierafeno iji non vierafen. Ijefuon maiji fur Kaven fuon iji kuaga fu irerag ma iji fu vajuomo ijin oinuvuon ijia kuarduom.
1CO 2:13 Regavo vuak ijekin no ja kuardiavo iji no ema bu vierafejo ijeg vierafeknum kuardiavo bakin. Regavo vuak irerag no kuardiavo iji nom vuak irerag Kaven Akai ijar nijaiduomo no ijin abe kuardiav. No vuak ijesugin abe e iji bu Kaven Akai iji abenva ijin kuardiav.
1CO 2:14 Regavo erar fu Godon Kaven Akai ba abenma iji fu ire ma iji Kaven fu e kuardiamo iji fuka faikafa uzam. Ijefuon maiji fu vierafero vuak iji buka isero fu ijeg vierafen. Regavo madu Kaven Akai fuba ifejdakma fu izeg mukoi faime vierafekma bakin.
1CO 2:15 Regavo fun e iji Godon Kaven ijek oino ijar fu Godon irerag fok fu vierafeno iji fu vierafekfuon. Ijefuon fu erar e gari be kua, Vuak irerag a kuaimon iji aka ba vierafenmano kuakma bakin.
1CO 2:16 Ijefuon maiji vuak ijefuon iji bun usuibe Godon buk akai ijia bu ijeg isoime kuai, Iji fuka ma fu erar E Bomana fu fine vierafeno iji giame vierafeno bakin. Regavo fu erar irerag fu rekfuon iji nijaikma bano kuain. Regavo noiji non vierafen. Ijefuon maiji no fun Godon Kaven ijar unam izeg Kurais fu vierafeno ijeg nijaiduoko no vierafej.
1CO 3:1 Regavo kaifnun vua ik na kuardiainva iji naba e iji bu Kaven Akai abene e darokin renva igeg kuardiain. Regavo jaiji naka e iji bu vek moik igefuon unam iji kegoijo ijeg na Godon vuak ma iji ka amur gamia anerene kuardiain.
1CO 3:2 Tavan iji na ijeg kuardiainva ijia na Godon vuak ka mamkanuk roin naba nijaidiain. Regavo iviakma na vierafe na Godon vuak mamkanuk roin naba nijaidiak. Ijefuon maiji ja vek e moik igekor bu karioijo ja ijeg karij. Jaka kaifjon ijiena oi isema vierafene musikuaiknum karij. Ja ire ijegrejo iji jaka e iji eraneb bu E Bomana ijefuon e renva bakin iji bu rejo ja ijeg rej.
1CO 3:4 Ijefuon e be fu kuai, Na Foron unam iji javno kuain. Regavo be fu kuai, Na e Aforason unam ijia javno kuain. Ijefuon ijeg ja karine rejo iji jaka una e moik igekor bu rejo ja ijeg rej.
1CO 3:5 Unam iji ja ijeg vierafene kari Aforask no kam e ikin igeg vierafejo iji na vierafe jaka arekfuon. Noiji nom Godon ik ijesugin reoij. Nom ja ifejdiame vuak fuon ma iji abe kuardiava ja iji faime ma vierafen. Regavo no e besubesum no E Bomana ijefuon ik fu vajuinma no ijin rej.
1CO 3:6 Ijegvo na vuak be bijame kuardiako ni faif. Ire uij oijo iji e be fu amur uij dajaime areko be fu kekome samuaknum amareko bu tavuav. Unam besum ijeg nar ur Godon vuak abe ja kuardiain rega rad Aforas fu kekome ifejdiama ja vuak iji mukorigia vierafen. Regavo fun Godri koikfuon ifejdiama ja vuak fuon ijia e darokin ren.
1CO 3:7 Ijefuon e be fu anerene Godon ik reko be fu rad keko ifejdamo iji buiji bu e ikin bakin. Regavo fun Godri fuonkua fu e ikin ijefuon fur no ifejduoko nuvuon ma vierafejo iji buka girev.
1CO 3:8 Regavo e iji fu anere Godon vuak ma iji abe kuardiamon ijiga e iji fu ifejdiaga ja vuak iji mukoi faivo iji bu God besum ijefuon ikrej. E nokarok (2) iji bu besum Godon ik redo Godri rad ik ijeg bu rejo ijia giaknum unam ma kafo buon rediak.
1CO 3:9 Ijefuon na Aforask no kafokafo bakin gavo no besum Godon ik rej. Regavo jaiji ja juar God fu samuamo ijekin. Revo kaifnun na una vuak be bijame kuardiako ni faif. E fok ai Korint ijia ma vierafejo iji jaiji ja Godon ar igekin. Fu ja kam ar fuon fu ijia fikfuon ijeg amaren.
1CO 3:10 Regavo naiji God fuka mukorigia ifejdieme ik ma iji mieme izeg na ar mukorigia sakfuon iji nijaidien. Na Godon ik ijin ja karenva ijia anere rene God irerag fu Kuraison duadok ijia joifuon renma na iji ja kuardiain. Regavo iji na renva iji na tuar jon ka gigikin ja ijia bidua karikfuon na iji abe ijia sainva igekin. Na tuar iji abe same ruakoga e roin bu jajieme ifejdieva ja Godon vuak ma iji mukoi vierafen. Regavo ijeg bu renva iji bu ar sainva igekin. Regavo e besubesum ikreno iji fuka mukorigia vierafeknum ik fuon iji rekfuon.
1CO 3:11 Regavo na vierafe e kafo buba tuar gigikin iji na abe ijia sainva iji jafe vakfuon. Ijefuon maiji tuar gigikin iji fu Jesu Kurais.
1CO 3:12 E bu tuar iji sainva ijefuon azan ijia ar sakva buka in gigikin ijia kege saikin fu tavan jaoijmana mani vakfuon. Regavo e roin buka in ise ajuaikin buka migegare iserekfuon ijia kege ar sav. Regavo ijeg na kuardiavo ijefuon maiji Godon ikrejo unam iji buka kafokafo. Unam roin bu reoijo iji fu ma ga roin buka ise.
1CO 3:13 Regavo tavan iji Jesu Kurais fu una roko ijia unam ise ga ma iji fu ijia samafrega e bu ijiason giame vierafek. Ijefuon maiji tavan iji sanainma ijefuon daro ijar e besubesum ik fuon fu reoinma iji fu ma vo fu ise iji buson ijia giame vierafekfuon.
1CO 3:14 Regavo Kurais fu giamga e besubesum ik fuon iji fu e ma vierafejo iji ifejdiako bu ma vierafej gakva fu ifejdiame unia ma kafo ga unam ma kafo e ijefuon redak.
1CO 3:15 Regavo Kurais fu giamga e be erar fuba ik mukoi reno gakva fuba unia ma kafo ga unam ma kafo fuon rek. Regavo fu magaga fu e bu ar mian naiga bu usem subinai vako sinuom buon fu naine barmo fu ijeg rek. Fu ijegrene sinuom fuon fok fu ijia naine baregavo kaven fuon ijesugin fu una ijia fivak.
1CO 3:16 Regavo igia fai vuak igi naka ma kuardiav. Jaiji ja Godon ar igekin ijefuon Godon Kaven iji fu oijon ijia fin.
1CO 3:17 Ijefuon e be fu vierafe fuka Godon ar iji dab arafirime kuaga a unam fuon ma iji a jamo iji arekro fu ijeg vierafekma e iji fu Godri dab arafiriakfuon. Ijefuon maiji Godon ar iji fu fino iji fuka akaij. Ijefuon vuak na kuardiainva iji jab rubdiak jaiji ja Godon ar igekin. Ijefuon maiji Kaven fuon iji fu oijon ijia fin.
1CO 3:18 Regavo kaifnun igia faif. E be ab koikon Godon vierafe ma iji fu vierafe mainma iji abe arafirik. God fu vierafega ema igiebuon vierafe iji fuka omise. Ijefuon erar a vierafe Godon vierafe iji fu ema igiebuon vierafe ijekinro fu ijeg vierafeno iji fuka arekfuon. Fu ijeg aregakma God fu ifejdaga fu izeg God fu vuak mukoi vierafeno ijeg fuk fu vuak mukoi vierafeknum ok. Ijefuon maiji vuak iji bun usuibe Godon buk akaij ijia ijeg isoime kuai, Godri e iji bu mukoi vierafejo ijiebuon vierafe buon mukor ijia kege buar igeg kurdiaga bu koikbuon una ijia arukno kuain.
1CO 3:20 Regavo madu fu kuai, E Bomana fu e iji bu mukoi vierafejo ijiebuon oij iji fu giamga fuka ma bano kuain.
1CO 3:21 Ijefuon fu erar emab irerag bu rekfuon ijefuon kuaime aroikarakva bakin. Regavo jaka irerag fok God fu ja ifejdiakro vajiainma jaka iji mukoi vierafekfuon.
1CO 3:22 Regavo ma iji ja ijia giame vierafekfuon iji emabuon e mamkanuk For ga Aforas ga Fita iji no ja ifejdiavo ja iji vierafekfuon. Regavo madu ire fok kaf gufia ga moikigi God fu joifuon amarenma ijia naoivo iji fok fun jon. Regavo madu unam ma iji God fu tavan bog ifejdiamo iji fuka jon. Regavo madu ja aoikva ja mukoi barkva bakigavo fu una madu ifejdiaga ja una ijia karivakfuon. Regavo unam ma iji roin ga ire ma iji bu iviakma igia rega ja giavo ijiga roin bu rad rekrejo iji fok buka jon. Ijefuon ja Kurais kuaga fu oijon ijia fikma irerag fok igi na kuardiavo iji buka jon rekfuon.
1CO 3:23 Regavo ni vierafe ire ka ma bomana iji jaiji ja Kuraison e ijesugin. Regavo madu Kurais fu Godri joifuon kuama fu ja samuagdiakafa ari ruainma ja iji vierafekfuon.
1CO 4:1 Ijefuonvo e igi no Kuraison ikreoijo iji nom fu ifejdame ik fuon ma iji fu vajuinma no ijin reoij. No ik fuon iji rene Godon vierafe ma iji fu amur kege sauinma no iji e ijin kuardiaoij.
1CO 4:2 Regavo igia fai e be fu efuon bomana ijefuon ikreno iji fuka vuak izeg e bomana fuon fu kuardamo fu iji faime kegokfuon. Fu ijegrekma iji fun mukorigia ren.
1CO 4:3 Regavo naiji na ik igi na reoijo iji na mukoi rej vo na isema reoijo iji ja e roina gieme kuaikva iji na bomana vierafekva bakin. Regavo madu na koiknu naba uri nui ganamime kuai naka ik mukoi renvano kuaikfuon.
1CO 4:4 Regavo na vierafe tavan bog ik nun na reoijo iji naka amarigia rene ruain. Regavo na vierafe iji fuka uria ba aresren ijefuon naka una madu biom ma amarigia rekfuon. Regavo fun E Bomana ijar fuonkua ik izeg na isema rej o mukoi rej ga iji fur giekfuon.
1CO 4:5 Ijefuon na vierafe iviakma igi fu tavan ma bado e buba aiginekfuon. Buba aigineme e ikrejo God fu kiaga bu ja ifejdiavo ijiebuon ik bu rejo iji biekudiaknum kuaikfuon revo nin samuaga E Bomana fu una ruakfuon. Fu tavan iji fu una roko ijia fuson e besubesum vierafe buon fok bu isuar oibuon ijia vierafeoijo iji fu kege una samafrega e fok bu giak. Rene tavan ijia fuson e besubesum ik fu izeg mukoi ren vo isema renma fu iji giak. Fu tavan ijia e besubesum ik buon izeg bu renva iji giame una ef ire ma kafo buon rekfuon.
1CO 4:6 Regavo kaifnun iviakma na Aforask nuvuon ijia bijame kuardiaga ja ijia vuak irerag fok na kuardiainva iji mukorigia vierafekfuon. Regavo irerag fok ja reoijo iji ni God vuak irerag fu kuardiamo ijesugin faivknum reof. Regavo jab uri vuak fuon iji abe datuaigavo una jon ja vierafenva ijia kegok. Regavo madu jab e mamkanuk jon ijiebuon if roin kam ajie ga roin ke arik.
1CO 4:7 Iji ja ijeg karine rejo iji ja vierafega e iji erar ja ke e ma amardiaknum e ise amardiain? Ire fok igi jam jar koikjo daro jon ijia rejo bakin gavo fun Godri vajiam. Ijefuon ja irerafuon jon aroikarav?
1CO 4:8 Regavo igia fai jaiji ja vierafekuai jan ire ma iji uruvana God fu e ijiebuon rediakro vierafenma iji jaka vierafe barenvaro ja ijeg vierafen. Ja vierafekuai jan kaven ijefuon ire ma iji uruvana Kaven Akai fu e iji vajiamo iji jan ke barenvaro ja ijeg vierafen. Ja ijeg vierafeknum ga iviakma ja karioijo iji jaka Kurais fun una ari kekome daro abe ire fok igi samuagdiamo ijeg jak jan uri funa ire fok samuagdiavo igeg rej. Ja ijeg karine rejknum noiji jaka maguoko no irif gamia karioij. Regavo gaga iviakma jan uri Kuraisna ire fok samuagdiavoga na vierafe no madu noka jana ire iji roin karine samuagdiakro no iji vierafen.
1CO 4:9 Regavo tavan kafo na vierafe God fu e afasor noiji fuka kege una e ukakna igeg ren. E iji bu vierafe noka aoikuai bu iji vierafen ijefuon noiji buka kam e fok ijiebuon nifak ijia unam ise iji nuvuon rej. Regavo e moikigia oinva iji abevo kaven dakin iji bum karine ire ise bu nuvuon rejo iji karine guov.
1CO 4:10 Noiji no Kuraison vuak iji abe e kuardiavo ijefuon e iji bu no kam e ise igeg vierafej. Regavo jaiji ja vierafero jar Kuraisna besum renva ijefuon ire fok jan vierafe baren. Regavo noiji e bu vierafero noka e zazaikido fu erar vuak no kuaivo iji faikva baro bu iji vierafen. Regavo jaiji jaka e mamkanuk ren ijefuon e buka ja kam arordiaknum vuak jon iji mukoi faikuai vierafen. Regavo una e igi no Kuraison vuak abe e kuardiavo iji e bu kuai no irerag ma iji rejo bano kuaiv.
1CO 4:11 Regavo igia fai vuak igi naka ma kuardiav. Noiji noka vasiaguamduome ka do kafuin. Regavo madu sinuom no savo iji buka bujame iseren. E bu no kam unam ise no jufduokfuon ijia rejknum kam kanuov. Regavo no ar nuvuon ma iji no izia asu karikva iji fuka bakin.
1CO 4:12 Regavo madu noka koiknuvuon giriesame ikrene ijia mon kege irerag no vierafenva iji kimej. Regavo e bu no kam buze ifduovo iji no una ef ijefuon rejo bakin revo noka una buifuon Godon sirimamej. Regavo madu e bu no kam arafiruome vajai fian vajuov revo noka una oimarknum bu biediav.
1CO 4:13 Regavo bu vuak ise nuvuisina kuaivo iji no una vuak soigin ijia kuardiav. Regavo e iji God ba vierafejo iji no buka ba mukorigia kafuov. Ijefuon noiji buka kege e buzer igeg vierafeoknum vo no buka kam kafut igi bu kana korvo ijeg reoij.
1CO 4:14 Regavo igia fai vuak igi na ijeg isoime kuardiavo ja iji faime jukfuon bakin. Regavo na vierafe jaka vuak iji mukorigia vierafeknum okfuon. Ijefuon maiji jaiji ja afnun mukor na ja oijmiavo. Regavo jaiji e uruvana buka ja samuagdiaknum izeg ja Kuraison unam iji jakfuon bu iji nijaidiav revo asoijon ma besum iji fun na nunkua. Ijefuon maiji nar vuak ma iji amur abe ja kuardiame aferdia una Jesu Kuraison ruain.
1CO 4:16 Ijefuon na vierafe naka vuak gigikin kuardiaga ja faime una izeg na rejo ijeg jak jaka una Kuraison unam ijia jakro na iji vierafen.
1CO 4:17 Ijefuon iviakma na farinun na oijmavo e Timoti kuaga fu ijia vuak. Na vierafe fuiji fuka e ma. Ijefuon maiji fu izeg na E Bomana ijefuon ik reoijo fuk fu ijeg ik ren. Na fu kuaga fur vua ijia izeg Jesu Kuraison unam na javo fu ijin ijia reoga ja ijia game una ijeg keok. Na sos uruvana ar izia na oijo iji na unam besum ijin abe ijia nijaidiav.
1CO 4:18 Regavo iviakma e ijia karinva roin bu vierafero naba una giak vuakro bu ijeg vierafen. Ijefuon buka uri buon ganamime aroikaraoij.
1CO 4:19 Regavo E Bomana fu vierafega na vua giakva iji na una vuak. Na una vuakva ijia na koiknu e iji aroikaravo iji bun ma Godon daro aben vo bu bakin bum karine vuakrejo na giak.
1CO 4:20 Ijefuonvo ja izeg God fu e ijiebuon oij iji fu samuamo iji giakfuon iji ja vuak bu kuaivo ijia giakva bakin. Regavo ja unam buon izeg bu darokma reoijo ja ijia giakfuon.
1CO 4:21 Ijefuon ja vierafe na una giak vuakva naba ja kuriaire vo kam vajai fian vajiak? Regavo be iji ja vierafe na vuakva naba isuar oi mafaime ja oijmiaknum vuak soisoigin kuardiak? Unam nokarok (2) iji izar fu mardo na vuakva no ijeg rek?
1CO 5:1 Regavo vuak be bu kuardienva iji unam be fu sos iji ja afuivo guf ijia reno bu iji kuardiava na fain. Bu kie unam iji barubara fudainamime ise rejo iji fuka iji ja afuivo ijia reno kieva na fain. Regavo unam iji na vierafe fuka ma bakin fuka ise e God ba ma vierafejo bu rejo bakin ja ijin rej. Unam iji efarif fu una asoifuon ijefuon bara rir ijek fudainamivo ire iji fuka ma ise fu iji ren.
1CO 5:2 Ja e iji fu unam ise ijegreno iji jaba ire be rekuai vierafej. Regavo jam game ijia aregavo jaka una jon izeg ja mukoi rejo ijefuon aroikarav. Ja aroikaravo iji arega nika oifian abene e iji fu unam ijeg kenma iji migegare rotkuraga fu jana besum afuimo iji fu are vakfuon.
1CO 5:3 Regavo iviakma naka aibe igia fij revo vuak irerag ja ijia kuaime rejo iji nak nan kaven ijia oi besum ijeg vierafej. Na vierafega e iji fu unam ka omise iji renma iji fun koikfuon ise renma ijefuon fu rad vajai fian abek. Na vierafe jaka izeg na jana rejo ijeg ni E Bomana Jesuon if ijia besum afuime sirimamega E Bomana Jesuon daro iji fu ijia ikrekfuon.
1CO 5:5 Ja daro ijin abene ni e iji unam ise iji reno ijin nisarega fu keko fuonkua fiokfuon. Fu fioga Setan fu samakaf surif fuon iji dab arafiriga fu vajai fian abekfuon. Regavo kaven fuon iji fu fivaga rad E Bomana fu una e moikigia ise rejo iji ke mazim giakro ruakma ijia naba gain kafu keunak.
1CO 5:6 Regavo jam uri jon ganamime aroikaravo iji fuka ba maren. Regavo ni vierafe ja ire ist ukakbe abe farava ijia useme davaruaikva ire farava iji fuka bomana foi urikfuon. Ijegvo ire ise ukakbe iji fu ja karinva ijia reno iji fuka rad ijeg bomana rekfuon.
1CO 5:7 Ijefuon ise iji fu ijia reno iji ka abe akoze fu barke jaka Godon e maturai rene karik. Regavo isuf nuvuon iji fun Kuraisri kuros ijia nuvuifuon guame kavuan fuon ijar tat nuvuon fok fun somduin.
1CO 5:8 Ijefuon unam nuvuon no karioijo ijia ire ise iji noka mukoi agordiakfuon. Regavo noba una unam usuikor nuvuon ijia jajiak. No ur noka kaifnuvuon iji kam arafiriaga bu vajai fian abekuai no ijeg vierafene uri unam ka omise iji reoin. Regavo iviakma no vierafe noka una unam iviamkor ijia jakfuon. Regavo unam iji noka e roin oi ma vierafeknum uri unam ma iji jakfuon.
1CO 5:9 Regavo fas nun iji na amur isoim nijiame kuardiainva ijia na kuriaireme kia, Jab e iji bu fudainamime unam ise rejo ijiena oknum buna karikno kiain. Regavo vuak iji na e iji buba God ma vierafejo ijiebuon kuardiavo bakin. Ijefuon maiji e iji ma vierafejo bakin iji buka ise uruvana kafokafo reoij. E roin buka barubara fudainamime unam ise rejknum roin buka e kafobuon sinuom iji uruvana vierafejo ijefuon buka usem sinuom buon iji kamazia vak. Regavo madu buka god kufui iji sirimamej. Regavo e ijekin iji bu ar fok igia buka ijia karioin ijefuon ja izeg bu akardiakva bakin.
1CO 5:11 Regavo vuak nun na amur fas ijia isoime kuardiainva iji na e God ma vierafejo ijiebuon kuardiain. E roin bu kuai, No God ma vierafejno kuaiv gavo unam buon bu kegoijo iji bu e ma vierafejo bu karioijo bu ijegreoijo bakin. E roin buka barubara fudainamime unam ise reoknum vo buka uri e kafobuon sinuom iji karkuai uruvana vierafej. Regavo roin buka una god kufui ijiebuon sirimamej. Regavo e roin bu uri e roin uruvana igia kuardiaknum kam buzeifdiav. Regavo e roin bu do kugi ine nigen kam karoivknum vo e roin bu ebuon ire niesaknum ijeg reoij. Ijefuon ja e ijekin iji jab buna kariknum duok buna ik.
1CO 5:12 Regavo igi fai na For nar e iji bu God ma vierafejo bakin ijiebuon unam bu kegoijo iji giame kuaikva iji fuba maren. Regavo e iji fu unam buon iji kege mazim giakfuon iji fun Godri fuonkua. Regavo e iji bu jana besum afuiknum una ise rejo iji jaka koikjo kege giakfuon. Regavo e iji fu uf jon ijia ise reno iji nika fu kuriaireme nisarega fu keko vakfuon.
1CO 6:1 Regavo igi na una madu afikin be ja ijia abejo ijefuon kuardiakrej. E be a oine kaion be fu Jesu ma vierafeno a fusik zienamikva jab afikin iji abe una e mamkanuk iji God ma vierafejo bakin ijiebuon vak. Ja afikin iji kege e ijekin ijiebuon vakva buba afikin jon iji mukorigia dasumdiakfuon. Regavo ja afikin biediakva ni e iji bu God ma vierafejo kiaga bur ifejdiame dasumdiakfuon.
1CO 6:2 Ijefuon maiji ni vierafe tavan rad Godon e ijieb e moikigia ise renva iji bur kot buon iji faikfuon. Regavo ja vierafega jan aresredo ja rad ijegrekva iji ni afikin ukakna iji ja afuivo guf ijia ja biediavo iji kege giakfuon.
1CO 6:3 Ijefuon ni vierafe vake tavan abekma nor anera dakin iji kege kot rekfuon. Ijefuon ja iviakma igi ja karinva ijia ja uri afikin ukakna igi no moikigia biediavo iji kafo giame dasumdiakva iji fuka marek. Ijefuon ja afikin ijekin kafo dasumdiakuai vierafekva ni e mafkin kafo bu God ma vierafejo ijia kega bur kot iji rekfuon. Ijefuon maiji e mafkin ijekin God ma vierafejo iji bur afikin ijekin iji bu mukoi vierafeknum dasumdiak. Regavo ja una e God ba vierafenva ijiebuon vakva bu vierafe buon ijia rejo ijefuon buba mukoi ifejdiak.
1CO 6:5 Regavo kaifnun unam iji jab ijeg rek. Ja vierafero are bu e ma vierafejo ijieb afikin iji dasumdiakro ja ijeg vierafej. Ja ijeg vierafene jaka uri kaifjon aferdia kam e bomana God ma vierafeno bakin iji akai samuamo iji fuon kot rekuai vak. Regavo vuak iji na kuardiavo iji jaka jufdiakfuon. Ja e ijeg mukorigia vierafeknum afikin ijin dasumdiakfuon iji fuka sos jon guf ijia revo jaka ba vierafene ijeg rej.
1CO 6:7 Ja afikin iji ja ijeg kege una va e ijekin iji buon kot rejo iji fuka ba maren. Ja ijegrejo iji jaba unam ma iji Jesu Kurais fu nijaidiainma ijia reoij. Ja e kafo bu ise kafo jon rekva ja giame dazekva fuka marek. Regavo madu e iji bu ja biesiame sinuom jon iji kamaziavo iji nin giame aref. Regavo jab aferdiame va e ma vierafejo bakin ijiebuon kot rek. Ja ijegrekva iji fuka marek.
1CO 6:8 Regavo iji ja bakin jaka biom una unam ka ma ise iji rej. Bu e kafo ijieb jon ise rejo bakin revo jaka jar koikjo una jakikum ise rej. Regavo madu jaka una e roin biesiame sinuom iji niesamdiav. Regavo unam ijekin iji ja una kaifjon bu jana besum ma vierafejo iji buon rejo iji fuka unam ma ise.
1CO 6:9 Regavo kaifnun ni mukoi vierafef e ise ijekin iji buba Godon e iji fu oibuon iji samuagdiamo ijiena karikfuon. Ijefuon ja rubdiavo iji arekga jaka mukorigia vierafe of. Ijefuon maiji igia fai e iji barabaru fudainamime unam ise rejo ga god kufui iji sirimamejo ga ebuon bara turavo iji buba Godon e ijiena karik. Regavo madu efarif buon fudainamine unam ise rejo ga e niekin ga e iji e kafobuon sinuom iji karkuai uruvana vierafejo iji buk buba Godon e ijiena karik. Regavo madu e iji do kugi ine nigen iservo ga e iji bu besum oknum ebuon ire niesavo ga e iji bu e roin uruvana kuardiame kam buzeifdiavo iji buba Godon e ijiena karik. E iji bu unam ijegreoijo iji buba rad God e iji fu oi buon iji samuagdiamo ijiena karik.
1CO 6:11 Regavo ur tavan kafo e roin jak jaka unam ma ise igi na kuardiavo ja ijeg reoin. Regavo fun E Bomana nuvuon Jesu Kuraisri kavuan fuon ijia abe ise jon iji somdiain. Fu somdiame ke una e akai fuon ren. Fu ise jon ijesugin somdiainma bakin gavo fu madu Kaven Akai ijefuon daro ijia ja karauniame ke una unam fuon ma ijia uniain.
1CO 6:12 Regavo e be fu vuak igi na kuardiavo iji faime vierafero fun mardo fuka ire fok reokro fu iji vierafen. Fu ijeg vierafeno iji fun maren revo na vierafega ire roin na reokfuon iji bu na ifejdiega na Kurais ma vierafejo ijia naka e darokin rekva bakin. Na ire kafokafo reokva iji fu mardo na reok revo besum iji naba uri vajat ijefuon vierafenma ijesugin reokfuon.
1CO 6:13 Regavo ja kie God defok iji fu duokfuon amaren gavo duok iji fu defok ijefuon amarenmano kiekva iji ja ma kuaiv. Regavo rad Jesu fu una ruakma duok ijiga defok iji buka barek gavo God fu una ire ma be reduok. Ja vierafero barubara fudainamivo iji fu duok igekido no ikro ja ijeg vierafekva iji fuka ise. God vajai nuvuon igi fu ijefuon amardiainma bakin. Regavo vajai nuvuon iji fu E Bomana nuvuon ijefuon amaren. Fu vierafe fuka fur fuonkua vajai nuvuon fok ijia fikro vierafen.
1CO 6:14 Regavo no aoikva God fu daro fuon ijia izeg fu E Bomana Jesu Kurais kuama fu una urinma ijeg fu kuoga no una urikfuon.
1CO 6:15 Regavo madu jan vierafe vajai jon fok iji buka una Kuraison vajat ijekma besum ifen. Ijefuon ja vierafe na vajai nun igi abe una bara iji fu vajai fuon abe e miamoino ijefuon vajai ijekma besum ifekva fube marek? Na vierafe iji fuka markma bakin.
1CO 6:16 Ijefuon e be erar fu vajai fuon abe una bara iji vajai fuon abe e miamoino ijek besum kamamo iji fun una fusik vajai besum ren. Ijefuon maiji buk akaij iji bu usuibe isoinva ijia God fu ijeg kuai, E nokarok (2) bu una besum kamavo iji bun besumno kuain.
1CO 6:17 Ijegvo e iji erar fu una E Bomana ijek mazime unam ma ijia kegoino iji bu busik kaven ijia buka besum rekfuon.
1CO 6:18 Ijefuon na iji kuardiame kia barubara fudainamivo iji fuka ma bakin ijefuon nika unam ma ijia agordiaf. Regavo igia fai ire ise kafo e iji bu reoijo iji bu vajai buon arafiriavo bakin. Regavo e iji bu barabaru fudainamime ise rejo ijar buka ma ise rej. Ijefuon maiji bu vajai buon iji buka mukorigia kam arafiriav. Revo madu unam iji bu Kuraisna besum mazinva iji bun dab mukorigia arafiriv.
1CO 6:19 Regavo e besubesum vajai surif jon iji fuka ma akaij. Ijefuon maiji fu Kaven Akai iji God fu vajiainma iji fu ijia fin. Ijefuon vajai surif jon iji bu sinuom jon bakin. Ijefuon maiji God fu Kurais kuama fu nuvuifuon kuros ijia guame ise iji no reoijo ijia kimene karaunuin. Ijefuon vajai jon iji kege una irerag God fu oimaikfuon ijesugin reof.
1CO 7:1 Regavo igia fai fas iji ja amur isoim nijienva ijia ja unam izegrene mukorigia kariokfuon ja iji kuardien. Amur iji ja kie e God ma vierafeno iji fube bara abek ki fu bano kien. Ja ijeg kuardien revo na vierafe e God ma vierafeno iji fu bara ba abekma iji fuka markfuon.
1CO 7:2 Regavo ai Korint ijia barubara iji bu ijia oknum buon fudainamime unam ise rejo iji fuka ma uruvanak. Ijefuon na vierafe e baru iji fuka bara fuon abek gavo bara iji fuk fuka baru fuon jakma iji fuka marek.
1CO 7:3 Regavo madu e iji bun amur sanaminva ijiebuon iji na igi kuardiako faif. Baru iji fu bara fuon fu abenma ijek naikgavo bara iji fuk fu baru fuon fu jainma ijek naikma iji fuka marek. Ijefuon maiji bara ijiga baru iji bun sanaminva ijefuon buka buon iganamikfuon.
1CO 7:4 Regavo madu bara ijefuon vajat iji fu fuon bakin gavo fu baru ijefuon vajat. Regavo baru iji fuk vajai fuon iji fu fuon bagavo fu bara fuon ijefuon vajat.
1CO 7:5 Ijefuon ja jakikum naoimokuai vierafekva jab uzakfuon. Regavo ja tavan kafo jan oi besum vierafene daze okuai vierafekva iji fu markfuon. Ja ijegrenki ja tavan jon roin kege isuar karine una God sirimamekfuon. Regavo rad nin una besum kariokfuon ijefuon maiji ja izeg tavan jaoijmana giriesame mikekva bakin. Ja ijeg oi besum vierafeknum reokva Setan fuba ja biesiaga ja una va bara ga baru roin turakfuon.
1CO 7:6 Regavo vuak iji na kuardiakrejo iji jaka igieme ijegreokro na iji kuardiavo bakin. Regavo vuak iji nam nijaidiaga ja vierafega fun maren vo iserekma iji ja vierafekfuon.
1CO 7:7 Na bara bakin ga nam vierafe e God ma vierafejo iji bu na oijo ijeg okfuon. Regavo na vierafe e fok buka ijegreoijo bakin. Revo fun Godri unam ijeg vajiainma ijefuon e baru roin bu bara sav revo roin bu mumogana oko bun e damuikin rej.
1CO 7:8 Regavo una vuak be ja fas ijia isoime kuardienva iji ja e mumogana ga bara amun ijiebuon kuardien. Ja kie fube mardo e mumogana ga bara naise bu buon sanamigavo bara amun iji bube mardo bu una baru rekno kien? Regavo nar vierafenva iji ijeg naise mumogana ga e amun bu vierafe bu aresredo bu ijeg kariokva iji fu mardo bu ijeg kariok. Regavo bu oibuon ijia bu vierafe buka zazaidiamo ijefuon bu sanamikuai vierafekva iji na vierafe buka sanamikfuon. Ijefuon maiji buba sanamikva bu tavan bog ire ijin uruvana igia vierafeoijo ijefuon tavai be fuka ire ijar oibuon ijia mian igeg naiga buka va unam ise iji rekfuon.
1CO 7:10 Regavo una e iji jan sanaminva iji vuak igi na kuardiakrejo iji fu vuak nun bakin. Regavo fu E Bomana ijar kuainma ijefuon ni mukorigia faif. E iji bun sanaminva iji bara iji fub baru fuon areme vak. Regavo fu areme vakma iji fuka amunamun igeg fiok. Regavo fu iji uzakma fuka una va baru amur ijek fiokfuon. Revo baru iji buib bara kege uniaga bu vak.
1CO 7:12 Regavo madu igi na una vuak be e kafobuon kuardiako ni mukoi faif. Regavo vuak iji fu E Bomana ijefuon vierafe bakin gavo nam nar vierafe ja ijegreokva fuka markfuon. Ijefuon baru erar fu God ma vierafeno fu bara be fuba ma vierafeno ijin abenma fuka fusik fivakro vierafekma iji fub nisarek.
1CO 7:13 Ijegvo bara erar fu God ma vierafeno fu baru be fu God ma vierafeno bakin iji jame besum oimarknum karioijo iji bara iji fub baru fuon iji arega fu vak.
1CO 7:14 Ijefuon maiji efarif iji fuba God ma vierafen revo fu bara iji ma vierafenma iji abenma ijefuon God fu nobarakin iji fu besum samuagdiakfuon. Unam besum ijeg bara be fuba God ma vierafen revo fu baru be ma vierafeno iji jainma iji God fu no barukin iji fu madu besum samuagdiakfuon. Regavo buba ijegrejobatie afijaf iji buka e iji ba God ma vierafejo ijiebuon afijaf igeg rek. Regavo fun asoij ijar God ma vierafenma ijefuon God fu am iji madu mukorigia samuagdiakfuon.
1CO 7:15 Regavo efarif iji fu God uzame bara fuon iji rotkurakro vierafekma iji ni arega fu ijeg re. Unam besum ijeg bara iji ba God ma vierafeno iji fu God nuigafame baru fuon iji una vakro vierafekma iji na vierafe buon sanamivo iji fun ijia baren. Regavo ni mukoi vierafef. God fun efuon iji kumene aferdia unam bu afuime kariokfuon ijia uniain. Ijefuon bara iji God ma vierafeno iji fu baru fuon ijek afuim fikma God kafu baru fuon iji keunakfuon. Regavo madu baru iji God ma vierafeno iji fu bara fuon ijek afuim fikma God kafu bara fuon iji keunakfuon.
1CO 7:17 Iviakma na una vuak be kuardiakrej. E besubesum ni ik irerag a re roke are E Bomana fu kumena a una aganfuon ijiena kamainma iji nin ijeg fine re vakne. Ni giriesame ik on iji E Bomana fu mainma iji mukorigia revakne. Akaij iji na kuardiavo iji na sos fok nan ijeg besum kuardiav.
1CO 7:18 Regavo efarif be erar fun surif fuon kana ufu Godon anf iji abeko God fu ijia fu kumenma iji nin ijeg fivakne. Regavo madu erar fuba surif fuon kana ufuko God fu ijia fu kumenma iji fuk nin ijeg fivakne.
1CO 7:19 Ijefuon maiji erar fu surif fuon kania ufume Godon anf iji abeko erar fuba surif fuon kania ufuinma iji Godon nifak ijia ire iji fu ire ikin bakin. Regavo ire ikin iji no mukoi agoikfuon iji noka Godon akaij iji mukorigia igiak.
1CO 7:20 Ijefuon ni giriesame ik irerag a reoga God fu a kumenma iji mukorigia rene vakne.
1CO 7:21 Ijefuon a e befuon ba mon ik reoga God fu a kumega ni oimarknum fuifuon ik iji rene. Regavo ab bomana ijefuon oifian abek. Regavo e iji a fuifuon ik reoino iji fu vierafe fu a keunaga a vakma iji ni arega fu ijeg ren. Fu keunaga a vakma iji ni koikon va giriesame ik reknum fine.
1CO 7:22 Ijefuon a e makin befuon ba mon ik reoino ijia E Bomana fu a kumega ni vierafe ise iji fu vek a samuagdamo bakin. Regavo a e befuon aba ik reoga a ik on be reoina E Bomana fu ijia a kumega ni vierafe Kurais fun E Bomana on.
1CO 7:23 God fuka ire ma gigikin bomana iji ren. Fu ise on ijia keunakafa vierafene Farifuon ijefuon vajai fuon iji abe fok miain. Ijefuon ni arega fur amur kevake a makai fuon ijia ja. Revo ab arega ema ijieb a samuagdaknum kuardaga a ijia jajiame ire kafokafo kegok.
1CO 7:24 Ijefuon efnun vuak irerag na kuardiainva iji na una madu kuardiavo ni faif. E besubesum ni ik irerag a reoga E Bomana fu a kumena a aganfuon ijiena kamainma iji ni ijeg reoine. Ijefuon maiji God fuka osik fioido fur tavan bog a samuagdame dasumdak.
1CO 7:25 Ja na kie. E iji buba sanaminva iji fube mardo bu sanamikno kien. Regavo na igi kuardiakno fai na vierafe buba sanamikfuon. Ijefuon maiji ire ise kafokafo bu tavan rad bu nuvuon rekfuon. Uguar iji fu E Bomana ijar kuardienma bakin revo nam nar vierafene kuardiav. Ijefuon na vierafe jaka vuak nun iji ma vierafekfuon.
1CO 7:27 Regavo e iji an bara abenma iji a barak abekma ab barak on iji nisarek. Regavo a bara ba abega ab uri bara be abekro vierafek.
1CO 7:28 Ijegvo a mumogana oine are bara abekma iji fu unam irerag ijar iserenma bakin. Regavo bara naise iji fu una baru rekma iji fu irerag ijar iserekma bakin. Regavo eraneb bu sanaminva iji bu buon bu besum karivako ijia buka afikin uruvana biediak. Ijefuon na vierafe ja afikin kafokafo iji asidiakva iji na vierafe jab sanamik revo nin e mumogana ga bara naise rene of.
1CO 7:29 Ijefuon maiji efnun iviakma igia izeg no karine roko iji fu tavan jaoijaor ijeg na vakma bakin. Ijefuon jab uri ire moik igefuon iji kege uruvana igia giame oijmiak. Regavo nin unam izeg a E Bomana ijefuon ik rekfuon iji mukorigia vierafef. Regavo efarif iji a bara abekma ab uri ire kafokafo rubdiaga barak on ijesugin bomana vierafek. Regavo madu e be a oifian be abekma ab uri oifian iji abe ma bomana vierafek. Regavo madu erar a tavan kafo oimarmo iji ni mukoi vierafero tavan iji oimarvo iji fu rad bakekro ni ijeg vierafene. Regavo e be a sinuom kimene mon abeno iji a mukoi vierafekfuon. Ijefuon maiji ire iji a fine abeno iji bu tavan bog ana naoimvakva bakin. Ijefuon ab ire moik igefuon iji kege uruvana vierafek. Ijefuon maiji ire ni kafokafo fu moikigia rene vako ijefuon ni giriesame unam ma iji a izeg E Bomana ijefuon ik rekfuon iji mukoi vierafene kevakne.
1CO 7:32 Na vierafe a oifian on iji nika areme una dazme fikfuon. Revo e iji erar fuba bara abenma iji na vierafe fu tavan bog E Bomana ijefuon ik ren. Regavo madu fu unam izeg fu E Bomana iji oimardakfuon ijesugin vierafeknum keoin.
1CO 7:33 Regavo e iji bara abenma iji fu tavan bog fuka moik igefuon unam iji kam uruvana vierafen. Ijefuon maiji fu vierafe fu unam kafokafo ijia giriesame reoinki bara fuon fu oimarkro fu iji vierafen.
1CO 7:34 Fu ijegreno ijefuon vierafe nokarok (2) ijieb fu dab ki igeg roinroin ivav. Regavo madu na vierafe bara amun ga naise iji buka tavan bog E Bomana ijefuon unam ma ikin ijesugin vierafeknum okfuon. Bu vierafe vajai buon ga kaven buon ijekma buka Godon nifak ijia bu maturaikuai bu iji vierafen. Regavo bara iji baru renma iji fuka tavan bog moik igefuon unam iji kege uruvana oijmiame vierafeknum unam izeg fu baru fuon oimardakfuon iji bomana vierafekfuon.
1CO 7:35 Na vuak ijeg kuardiavo ijefuon maiji na jon ma ijefuon na giriesame ja ifejdiav. Regavo na ja bijuga ja sanamivo iji arekfuon iji fu bakin. Regavo na ja ifejdiaga ja unam ma ijia jame karioknum vo vierafe jon fok kege karoim E Bomana fu oimaikfuon ijesugin vierafek.
1CO 7:36 Regavo erar fu barubara fudainamime unam ise rejo iji fu vierafene dazokrega fu iserekma iji ni migegare baru re ga bara abek. A ijegrekma iji a ise reno bakin.
1CO 7:37 Regavo e be fun koikfuon oij ga nigen fuon ijia vierafega fun marenma ijefuon fuba bara abekma iji fun maren. Fu erar kuriairega fu bara abekma bakin. Ijefuon e iji fun dazme E Bomana ijefuon ik reoido fun unam ma ijia reok.
1CO 7:38 Ijefuon efarif erar fu bara abenma iji fu sibank unam ma ijia ren. Regavo efarif erar fuba bara abenma iji fuka mukorigia ren.
1CO 7:39 Regavo madu bara erar baru fuon iji fu nivek fino iji fub una baru be rek. Regavo fu baru fuon fun guainma iji fun mardo bara iji fu una baru be jak. Regavo baru iji fu una jainma iji fu E Bomana iji fu ma vierafekma iji fuka markfuon.
1CO 7:40 Regavo na vierafe bara iji baru guainma iji fuba una baru be jakma iji fuka markfuon. Ijefuon maiji na vierafe Godon Kaven fuk fu unam besum ijeg vierafen.
1CO 8:1 Regavo efnun iviakma ja madu duna be ijeg kuardien. Ja kie fube mardo e kafo Kurais ma vierafejo iji bu fanuf iji bu kege god kufui bu ema imut amardiainva iji buon isuf baroinva iji kege ikno kien. Regavo na kuardiako ni faif. Na vierafega ire kafokafo ema imut amardiainva iji bu God ma bakin. Regavo e kafo igia nana karinva iji bu vierafega fu marenma ijefuon bu fanuf iji bu kege god kufui iji isuf baroinva iji bu karme ij. Regavo e roin bu vierafega fuba marenma ijefuon buba karme ij. Regavo na vierafe oij ijeg no kafokafo vierafene reoijo ijia noba uri aroikarame ka ada mekfuon. Regavo noka kaifnuvuon ijiebuon vierafe buon giaknum ogavo noba una vierafe buon kam arafiriak. Regavo noka oijmiame ifejdiaknum bu ejafiaga bu unam ma ijia keok.
1CO 8:2 E iji erar fu vierafero ire fok fun vierafero fun aresrenmaro fu ijeg vierafeno e iji na vierafe fuka kufuime ga fuba mukoi vierafene reoin. Regavo e iji erar fu God oijmamo iji na vierafe e iji God fu mukorigia ifejdaga fu unam ma ijesugin vierafeknum reok.
1CO 8:4 Na madu una vuak kafo fanuf iji bu kege god kufui iji isuf baroijo iji bu karme ijo ijefuon kuardiak. No fanuf iji no kege ijo ijefuon maiji no ma vierafega ire iji bu imut amardiainva iji bu god ma bakin gavo buka god kufuij. Regavo God ma iji no vierafe fun ma besum ijesugin.
1CO 8:5 E roin bu vierafero god iji ema imut amardiainva iji buka ma uruvana moikigia ga varur gufia karinvaro bu ijeg vierafene buon sirimamej. Regavo no vierafega God Asoinuvuon iji fuka ma besum ijesugin. Fur ire fok amardiain ga fur no amarduinma ijefuon no fuon vierafenma ijesugin jame keok. Regavo madu E Bomana nuvuon fun Jesu Kurais fuonkua. God fu Jesu ik fuon fu mainma iji fu ire fok amareknum samuagdiakro main. Ijefuon noiji no Jesu Kuraison azan ijia no ni uria karine rok.
1CO 8:7 Regavo e Jesu ma vierafejo roin bu vek ba mukoi vierafero ire iji e imut amardiainva iji bu god kufuiro buba ijeg vierafen. Bu ijeg vierafejo ijefuon juaivasia uruvana buba Jesuon e ijiena mazin. Regavo buka god kufui kafokafo ijiebuon sirimameknum kari ruain. Ijefuon bu ire iji bu kege god kufui iji isuf baroijo iji karme ijo buka afikin uruvana biediav. Regavo madu bu koikbuon oibuon ijia vierafega buka ise rej.
1CO 8:8 Regavo no mukorigia game vierafekfuon. No ire iji bu kege god kufui kafokafo isuf baroinva iji no kege iknum vo roin noba ijo iji fu ijar no aferduo God samaij ijia unuomo bakin. No duok iji ijo ga noba ijo iji God fu bomana vierafeno bakin.
1CO 8:9 No fanuf iji ik vo noba ikva iji no koiknuvuon vierafek. Revo a ijeg vierafene kegoino ijia ab kaifon roin bu buon ma vierafejo ijia bu zazaidianva ijiebuon vierafe iji kam arafiriaga bu ise rek.
1CO 8:10 Regavo ni igia faif. Aba mukorigia dasu vierafene ijia jame reokma iji rad akafu e kafobuon ma vierafejo iji kam arafiriadiak. Ijefuon a va ar bu god kufui kafokafo iji isuf baroinva ijia ari fine duok iji ikma e roin bu vierafe buon fu zazaidiainma iji bu a gak. Buba ijia duok ikuai vierafen revo ar nijaidiamo ijefuon buk bu a game ijegrekva iji fuba marek.
1CO 8:11 A ijegreno iji an uviaion fu vierafe fuon ijia zazaimo iji Jesu Kurais fu fuifuon guainma a vierafe fuon ijin dab mukorigia arafirin. A vierafe fun marenma ijefuon a god kufui ijiebuon isuf ijin ik revo uviaion iji aba bomana vierafeknum ren.
1CO 8:12 Ijefuon a kaion be fu Jesu Kurais ma vierafeno iji afem unam ise ijekin ijia arafirikma iji ak an una Jesu Kuraison nifak ijia isema ren. Ijefuon maiji a kaion iji fu ma vierafeno ijin dab soisoiko fu unam fu vierafega fu isega fuba reoino fu ijin reoin.
1CO 8:13 Ijefuon na vierafega na fanuf na ijo ijar kainun dab arafirivoga iji na vierafe naka arekfuon. Na ijegrenki naba una kainun fuon ma vierafeno iji dab arafiriga fu una unam ise reok.
1CO 9:1 Efnun naka dazme unam kafokafo rekfuon revo ire roin naba aren. Regavo na ire iji naba renva ijefuon e roin ja vierafero naiji na afasor baro ja ijeg vierafen. Naiji na ma afasor ijefuon maiji Kurais fu na kumene daro miema na if fuon ijia vuak ma iji abe kuaimoij. Regavo na E Bomana Jesu Kurais iji nan ni nun ijia gain. Regavo madu iviakma jan ma vierafenva ijefuon maiji fu E Bomana Jesur na kiema na vuak fuon ma iji abe ja kuardia vuain.
1CO 9:2 E roin bu na afasor igeg buba vierafen revo jaiji jan vierafega naiji na ma afasor. Ijefuon maiji E Bomana fu na abe uniema na vuak fuon abe kuardia vuakga ja vuak fuon ma vierafen. Ijefuon na jon izeg ma vierafejo iji giavo ijia na vierafe naiji nan ma E Bomana ijefuon afasor. Ijefuon e uruvana bu kuai, Na ma afasor bano kuaivo iji naka uri vuak irerag jon renva iji abe kuardiav.
1CO 9:4 Ijefuon E Bomana fu no kege unuoga no ja karinva ijia ik fuon re vuako iji noka ma ijefuon no vierafe ja ifejduome duok no ikfuon iji vajuok.
1CO 9:5 Regavo no ar kafokafo ijia useme vako e barakin iji buka ma ijefuon bu barafijaf Jesu ma vierafejo iji aferdiame nona vuak. Revo iji no vuako iji noka bomana vierafe ja duok iknum no vajuok. No nuvuonkua ijegrejo bakigavo afasor roin abevo E Bomana ijefuon uviaifijaf ga e Fita buk madu bu ijeg reoij.
1CO 9:6 Regavo una no Banabask noiji no izeg rek? No madu no afasor rene joifuon ikreoij. Regavo ja vierafero noka koiknuvuon ikrene samuanamikro ja ijeg vierafen.
1CO 9:7 Na unam kafo bijame kuardiaga ja ijia samakaf vierafekfuon. E iji bu afasor rene joifuon ik rejo iji bu ma ijefuon ja mon buon vajiakfuon. Regavo igia fai e be fu e bijaimo renma iji ja vierafe fube koikfuon sinuom fuon kimek? Regavo madu e be fu in sunin oine samuagdiamo fu mon fuon fu abekfuon iji ja vierafe fube in sunin iji bu baivo ijia kafo fuon nubume ik? Regavo madu e be fu maf-kau samuagdiamo fu mon fuon fu abekfuon iji ja vierafe fube maf-kau ijiebuon mut iji kafo fuon veseme ik?
1CO 9:8 Vuak iji na bijame kuardiainva iji nor ijeg nakikmazak reoijo ijin. Regavo madu God fu vuak besum iji fun akai fuon fu kege e Mosis vajainma ijia kuain. Regavo bun usuibe e Mosison akai ijia isoime ijeg kuai, Erar fu maf-kau fuon afem vaga fu fuifuon vajai fian abene ik reoino iji fube ir fuon iji kajek abe kasu abesdakfuon. Regavo fu arega maf-kau iji fu ikreknum ire ukur roin fuon ikno kuain. Regavo ja vierafega God vuak iji fu maf-kau ijefuon fu kuainma iji fum maf-kau ijesugin vierafene kuain ki fu irerag vierafene kuain?
1CO 9:10 God vuak iji fu ijeg kuainma ijefuon maiji fu e iji no fuifuon ik reoijo ijin bomana vierafenma ijefuon fu ijeg kuain. Regavo madu e iji bu juar uij oknum vo uij afurvejo iji bum mikeme reoijo bakin. Regavo buka uij iji bu oknum afurvejo iji kafo karme iknum ok. Ijefuon unam besum ijeg e iji bu Godon ik reoijo iji buk madu bu mon kafo abekfuon.
1CO 9:11 No Godon vuak ma iji non abe ja kuardiain. Ijefuon jabe vierafe fube mardo ja duok kafo ga ugon kafo no vajuok?
1CO 9:12 Ja e roin bu ijia ja nijaidiak vuako ja ifejdiavo iji fun maren. Regavo ja vierafe jabe no madu ijeg ifejduokfuon? Na nunkua naba ire kafofuon ja kiain gavo afikin nun fok nan koiknu asuseoin. Ijefuon maiji na eraneb bu vuak ma iji izeg Jesu Kurais fu bu karauniakfuon iji bu abekrejo ijiebuon unam iji naba bijukuriain.
1CO 9:13 Regavo jan vierafe e iji bu Godon ar ijia ik rejo iji duok buon bu kege ijo iji bu ar guf ijia karev. Bu ire kumun ijigam in sunin kafokafo e ijieb kege isufuon navo bu iji roin kege ij. Revo e iji bu Godon isuf baroijo iji buk madu bu fanuf iji bu kege isuf baroijo iji roin bu buame buon ij.
1CO 9:14 Unam besum ijegvo E Bomana fu ijeg kuai, E iji bu vuak maiji abe kuaimoijo iji bu eraneb vuak buon iji mukorigia faime ma vierafejo ijieb una karoime duok ga ugon bu ifejdiaga bu buna kari ikrejno kuain.
1CO 9:15 Na ik nun na rejo ijefuon mon na abejo na iji abe ire kafo kege koiknu nun nakikmazak na fivako iji samuanamikva iji fu mado na ijegrekfuon. Regavo ijeg naba ren. Regavo iviakma vuak igi na isoivo iji na ja kiaga ja uri anerene ik nun na rejo ijefuon mon vajiekro na iji isoivo bakin. Regavo na ire besum na reoijo na iji game aroikarav. Ire iji na ga aroikaravo iji na Godon vuak maiji nam abe e kuardiav revo na una ijefuon mon abejo bakin. Revo ja vierafe ijeg na aroikaraoijo iji naka arekva ja ijeg vierafekva iji na vierafe na migegare guaga fu ijia barekfuon.
1CO 9:16 Ijefuon maiji na kuardiako ni igia faif. Na E Bomana ijefuon vuak ma iji abe kuaimoijo na ijefuon aroikaravo bakin. Revo fun Jesur na kienma ijefuon na vuak fuon abe kuaiv. Regavo naba fu igakva iji rad naka bomana vajai fian abekfuon.
1CO 9:17 Na ik igi na rejo iji nam nar oinun ijia vierafene rejobatie na oi marknum mon nun abek. Regavo ik igi na vuak maiji abe e kuardiaoijo iji fu E Bomana ijar mienma ijefuon naba uzak.
1CO 9:18 Ijefuon na vierafe na mon nun abekfuon. Ke mon nun na abekfuon iji naka oimarkfuon. Na Kuraison vuak ma iji abe e roin kuardiaoijo iji na vierafe e roin buba ik nun na rejo ijefuon mon miek. Na ijegrejo iji naka oimadiem ijefuon iji fu mon nun na abejo ijin.
1CO 9:19 Regavo iviakma fu erar na samuagdiemo bakin ijefuon nam dazme oij. Regavo nam koiknu uri e fok ijiebuon ik reoij revo na mon abejo bakin. Na vierafero na ijegrekva na e uruvana aferdiaga bu una Kurais ma vierafekro na ijefuon ijeg reoij.
1CO 9:20 Na e Jius ijiena fioijo iji nak na buna besum unam buon bu kegoijo na ijeg reoij. Regavo madu na e iji bu Mosison akaij iji mukorigia igiavo ijiena fioijo iji nak na buna akaij ijin mukoi igiav. (Regavo iviakma naiji nan Jesu Kuraisk besum mazinva ijefuon na vek Mosison akai rotit ijia fioijo bakin). Na vierafero na ijegreoinki e Jius ijiga e iji bu akai igiavo iji buka vuak irerag na kuardiavo iji buka migegare faik. Bu faime una Jesu Kurais ma vierafekro na ijeg reoin.
1CO 9:21 Unam besum ijeg na madu e iji buba e Jius ijiena akai rotit ijia karijo ijiena besum fioijo iji nak na unam buon bu kegoijo na ijeg reoin. Na vierafero no ijeg kegokva e iji bu vuak irerag na kuardiavo iji buka migegare faime una Jesu Kurais ma vierafekro na ijeg reoin. Regavo iji na ijeg kegoijo iji na Godon akaij iji nuigafiavo bakin. Iviakma na Kuraisk besum mazin ijefuon fun fur na samuagdieko na fuon fu vierafenma ijesugin jajiame reoij.
1CO 9:22 Regavo na madu e iji bu buon Kurais ma vierafejo ijia buka zazaidiainva na buna fioin. Na buon bu vierafejo ijia buba ma vierafe ga bu vek nuanamivo iji na giame ijesina kuaivo bakin. Revo nam unam buon bu kegoijo iji naka mukoi agordiav. Na vierafero na ijegreoinki e iji bu vuak irerag na kuardiavo buka migegare faime una Jesu Kurais ma vierafekro na ijeg reoin. Na e iji bu unam kafokafo ijeg kegoijo iji nak na ijia buna besum reoij. Ijefuon maiji na vierafero na ijegreoinki na e roin aferdia una Kuraison roga fu bu karauniakro na ijin ijeg reoin.
1CO 9:23 Na vierafero na ijegreoinki e uruvana bu Kuraison vuak maiji mukorigia game abekro na ijeg vierafene reoin. Regavo madu na vierafero na tavan iji Jesu fu una roko ijia na ire ma kafo ijia biediakro na ijeg vierafene reoin.
1CO 9:24 Regavo na vuak be bijame kuardiako faif. E iji bu kukubijavo iji buka e uruvana kukubijavo iji jan vierafen. Regavo fun e besum erar fu amur kekomo fun e ijar ire ma iji bu abedenva iji abek. Ijefuon e iji bu kukubijavo ijeg nika mukorigia giriesame moikigia Kurais fu kuardamo ijesugin faivknum fivakne. A ijegrekma a ire ma iji God fu kege efuon vajiakreno a iji roin kekfuon.
1CO 9:25 Regavo ni vierafe e aikeno be fu mukor kukumo iji fuka vajai fuon mukorigia samuam. Fuba uri duok uruvana iknum do uruvana ikfuon. Ijefuon maiji fu vierafe fu kaifijaf roin asidiame amur vakro vierafen. Regavo e iji bu kukubijavo iji bu ire sinar iji bu o nainva ijin kekuai kukubijav. Regavo sinar iji bu migegare saireme bun bare vak. Regavo no moikigia karioijo iji noka koiknuvuon samuanamiknum ma kariokfuon. No ijegrekva God fu tavan rad ire ma iji fu tavan uruvana ijia navakfuon iji kege vajuok.
1CO 9:26 Ijefuon na vierafe naka giriesame uruvana kukuikin na kaifnun roin asidiame amur vak. Regavo ni vierafe na azi guf ijia arume bijaik vakva naka darokma bijaik. Regavo nam ijia urame aikeokva bakin.
1CO 9:27 Regavo nar uri e roin kuardia aferdiaga bu Kuraison unam ijia jame karioij. Ijefuon naka koiknu vajai nun gurom kafokafo iji mukoi samuagdiake buba na abe dakarame ise kafo rekfuon. Ijefuon maiji na vierafe naba ijegreokva God fu rad na kie, A unam ma iji aba kege roke buin ijia kekoimano kiekma iji fuka ba marek.
1CO 10:1 Efnun ja Kuraison unam abe fu jakva ni mukorigia samuanamif. Revo jab saifnuvuon bu kenva ijeg jab rek. E Mosis fu bu aferdiame ai Ijift areme keko vainma iji bu vana iji jame vain. Revo vana iji fu Godri abe abedenma ijefuon fu vana ijar bu samuagdiame vain. Regavo God fu madu saof be bu kua Kavuano kuavo iji kuamga fu uf ijia abe ataseme roinroin ren. Fu ijegrekoga e iji bu uf ijia iriaikin vake gara usen.
1CO 10:2 Bu ijegrene ruainva ijefuon buiji buka Mosis fuonkua fadame igaknum reoin. Regavo bu madu duok iji God fu naki besubesum vajiamo bu iji besum afuime iknum oin.
1CO 10:4 Regavo madu e uruvana bu do besum ijia in. Regavo do iji bu inva iji fu Godri ire ma sumakin be buon ren. Bu ai moikum namo ijia urame vakga God fu buifuon do iji kuama fu mun tit ijia abesenma bu iknum vain. Regavo mun iji God fu kuama do iji fu ijia abesenma iji fu Jesu Kurais. Ijefuon Kurais fu koikfuon ijia buna vaknum irerag kafokafo bu vierafenva ijin ifejdiame vajiain.
1CO 10:5 God fuka ire ijekin uruvana buifuon ren gavo e uruvana bu unam buon bu kegoinva iji buka unam God fuba oimaimo ijia reoin. Ijefuon e uruvana buba moik iji God fu kiainma iji aben. Regavo bu vek ai moikum namo iji urame vako ijia God fu bu arekoga bu aoime dab ai moikum namo ijia tata vain.
1CO 10:6 Regavo ni iviakma karine una ire iji saifnuvuon ijiebuon renva iji mukoi giaf. No mukoi kari giakva no gaga ire iji fuka ma bomana be fu buon renma no iji gak. Ijefuon maiji ire iji buon renma iji no junamikfuon fu ijin nijaiduin. Ijefuon noba oinuvuon kege ire ise iji bu renva ijekin ijesugin vierafeok.
1CO 10:7 Ijefuon jab uri e Isrerko roin bu renva iji matiame god kufui kafokafo iji kege bomana vierafek. Ijefuon maiji ire kafokafo bu renva iji bun usuibe buk akaij ijia isoin. Bu isoime ijeg kuai, Godon e iji bu besum afuim karine iro iknum god kufui ijiebuon if kam arordiaknum uri dua urume datomokno kuain.
1CO 10:8 Regavo madu noba uri e iji bu barubara fudainamime unam ise reoijo iji matiame ijeg reok. Saifnuvuon roin bu ai moikum namo iji urame vako ijia bu ijeg ren. Ijefuon God fu zieme uri e ka ma uruvana tuenti tiri taosen (23,000) ijeg tavan besum ijia kaniamga bu aoim baren.
1CO 10:9 Regavo madu E Bomana fu fine guomon ijefuon noba uri ise uruvana rene fu dab deajin maga fu no kam vajai fian vajuok. Usuibe saifnuvuon roin buka ijegrene ka ise uruvana ren. Ijefuon God fu tabar uruvana kege uniama bu e ka uruvana jakiava bu aoim baren.
1CO 10:10 Regavo madu jab e iji bu e mamkanuk buon ziegafiainva iji matiame uri ejon mamkanuk ijin ijeg rej. Ijefuon maiji igia fai saifnuvuon bu ijegrene e Mosis ko Eronkna zienamivga God fu anera fuon iji kiamga bu arime e uruvana kaniava bu aoim baren.
1CO 10:11 Regavo God fun vierafene kiamga e iji bu ire iji usuibe renma iji abe isoime abeden. Regavo vuak iji bu isoinva iji fuka no jukuarduomo ijefuon iviakma no ijia giame vierafekin noba uri e iji bu renva ijeg ise rekuai vierafek. Regavo vuak iji bu abe no jukuarduinva iji noka mukoi faime una unam ma arir ijia kariok. Ijefuon maiji tavan radkma iji fuka ma samaij ijia rok.
1CO 10:12 Ijefuon a vierafega a Godon nifak ijia an daro abe oinoga iji nika mukorigia samuanamikin ise kafo buba una on ruakfuon.
1CO 10:13 Regavo ni vierafe tavan bog a fivako ijia vierafe ise kafokafo bu on roko iji bu sumakin bakin. Ijefuon maiji afikin ijekin iji bun e uruvana roin ijieb ur biediain. Regavo God fu vuak irerag fu kuainma iji fu rumo bakin. Ijefuon afikin iji fu on ruakma God fu daro maga a daro fuon abe uri afikin iji biekfuon. Regavo madu fur ifejdame unam amarega a uri afikin iji dasu akozek.
1CO 10:14 Ijefuon efnun e-e nika e iji bu kaven ise ijiga e zuaigin iji arordiavo iji amarigia giame akariaf.
1CO 10:15 Na vierafega jaiji jaka e vuak mukoi faime vierafejo ijefuon vuak igi na ja kuardiav. Ijefuon ni vierafe vuak irerag na kuardiavo iji na ma kuaiv vo na kufui kuaikva iji ni koikjo vierafef.
1CO 10:16 No besum afuime do vuain iji abe ijo iji no Godon oimarme rad no do iji abe ij. No ijegrejo iji no vierafega non besum afuime Kuraison kavuan iji fum nuvuifuon usema no iji oimarknum vierafej. Regavo no madu ire bred iji abe ijo iji non vierafega no besum afuime Kuraison surif fu abe nuvuifuon kuros ijia guainma no iji oimarknum vierafej.
1CO 10:17 Bred iji fu fat besu ijesuginum revo no e uruvana no bred besum ijin abe tuase vajuinamiv. Ijefuon no bred iji abe ijo ijia no vierafega noka ma agan besum ren. Regavo madu no Kuraisna besum mazin.
1CO 10:18 Regavo ni e Isrerko bu renva iji giaf e iji eraneb bu besum afuime ar bu isuf baroijo ijia duok inva iji buka Godna besum mazin.
1CO 10:19 Na vuak fok na kuardiainva iji na ja ifejdiaga ja unam izeg bu ire kafo kaven ise ijiebuon isuf igeg vajiavo ijin giame mukoi vierafekro na iji kuardiav. Regavo vuak iji na kuardiavo iji ja fai nabe kia fanuf ja kege kaven ise iji vajiavo iji buka ire mano kiain? Regavo madu ja fai nabe kuai, Kaven ise iji bu daro maiji abenvano kiain? Baki naba ijeg kuardiain.
1CO 10:20 Regavo vuak irerag na kuainva iji ijeg E iji bu kaven ise ijiebuon isuf baroijo iji bu God ma ijefuon sirimamejo bakin. Revo bu una Setanon kaven ise ijiebuon sirimamej. Ijefuon na vierafe jab uri e iji bu kaven ise ijiebuon sirimamene arordiavo ijiena besum mazik.
1CO 10:21 Regavo jab vierafero fun marenmado ja E Bomana ijefuon kafus ijia vuain iknuvo una kaven ise ijiebuon isuf barokro jab ijeg vierafek. Unam besum ijeg jab uri E Bomana ijefuon fata ijia bred abe iknumvo una kaven ise ijiebuon isuf barok.
1CO 10:22 Jab vierafero fun mardo no ire nokarok (2) iji kege fok rekro jab ijeg vierafek. Iji fuba maren. Regavo ja koikjo kege una kaven ise ijiena besum mazikva iji jaka God E Bomana jon dab deajir mav. Ijefuon maiji E Bomana fu no kam vajai fian vajuokma noka ma daro bado no izeg fu bijukurakva bakin.
1CO 10:23 Na amur na kuardiainva ijeg na una madu kuardiav. Ire fok nom dazme reokfuon revo tavan kafo ire roin no reoijo iji bu no ifejduovo bakin ijefuon noba ire ijekin reokfuon. Iji fuka ma ire bomana nom dazme reokfuon. Regavo una unam kafo no kegoijo iji no e roin ifejdiaga bu God ma vierafene unam fuon ijia ja oijo bakin.
1CO 10:24 Ijefuon ire kafokafo ja reoijo iji jab uri jonkua vierafene reok. Regavo nika unam ma iji izeg ja una e roin ifejdiakfuon iji vierafeknum reof.
1CO 10:25 Regavo ja ar bu duok karme kimejo ijia fanuf kafo giakva nin kimene va if. Regavo jab una duna kafokafo fanuf bu izia kege ruainva ijefuon kiagiav. Ja ijegrekva iji fu irerag ijar iserekma bakin. Ijefuon maiji fun buk akaij ijia ijeg kuai, Moikigi abevo ire fok guf ijia naoivo iji fun E bomana ijar nuvuifuon amardiame namduimano kuain. Ijefuon nom dazme oimarknum ire fok iok.
1CO 10:27 Regavo e kafo bu Kurais ba ma vierafenva bu kiaga ja buna duok ikva ni jajia vaf. Ni vaga bu fanuf kafo nifiene ja vajiakva jab kia, Fanuf igi jabe kege kaven ise ijefuon isuf baroinvano kiak. Regavo nin oimarknum fanuf ijin kege if.
1CO 10:28 Regavo jan duok ikrejo ijia e be fu ja kia, Fanuf igi bu kege kaven ise iji isuf baroinva ijin bu kege ruainvano kiakva jab fanuf iji ik. Ja ijegrekva iji ja e iji fu ja kuardiainma iji ifejdav. Ijefuon maiji ja e ijefuon oij ijia irerag kafokafo ma ga ise fu vierafene kegoino iji ja arafiridavo bakin. Regavo igia fai vuak igi na joifuon kuaivo bakin. Regavo na e iji fu ja vuak ijeg kuardiainma na fu vierafejo ijefuon na iji kuaiv. Regavo naba gain jakafu una na kie, No irerafuon no uri e kafo ijiebuon vierafe ijesugin igiame kegokno kiak.
1CO 10:30 Regavo madu jakafu kie duok igi no ikrejo iji non amur kege Godon oimarenva ijefuon fu erar ire ijefuon una nuvuisina kuaikma bano kiekfuon?
1CO 10:31 Regavo efnun ni igia faif. Duok ijiga do ja ijo ijigam ire fok ja reoijo iji fu jon vierafe ijar kuardiaga ja rejo bakin. Revo ni vierafe ire fok no rejo iji no Godon if iji abe aroikuai no iji rej.
1CO 10:32 Regavo unam kafo ja kegoijo ijia jab e Jius ga e Jius bakin ga e kafo God ma vierafejo ijiebuon vierafe iji kam arafiriak.
1CO 10:33 Na ire kafokafo na kegoinva ijia naka koiknu giriesame e uruvana oimardiaoin. Regavo iji na reoinva iji na nun ma ijefuon reoinva bakin. Regavo na vierafe na e uruvana ifejdiaga bu ma karioknum ga madu rad E Bomana fu bu karauniakro na ijin ijegreoij.
1CO 11:1 Na Kurais unam izeg fu fine ke ruainma na iji matame ijeg reoij. Ijefuon ni jak unam na kegoinva iji makai ijia jajieme keof.
1CO 11:2 Efnun iviakma na ja arordiav. Ijefuon maiji na vierafe ja ire fok no nijaidiainva iji jaba rubdiav. Regavo jaka vek giriesame vuak iji vierafeoij. Regavo ja madu unam nun fok na kegoinva iji jaka mukorigia vierafene makai nun ijia jajiev.
1CO 11:3 Regavo iviakma na una unam izeg ja besum afuime God agoivo iji ja mukorigia vierafeknum besum afuim kegokfuon iji kuardiak. Vuak amur iji ja vierafekfuon iji bara iji ja barufjon ijiebuon rotit ijia ijefuon ja barufjon agordiak. Regavo baru iji jak ja Kuraison rotit ijia ijefuon ja Kurais agordak. Regavo Kurais fuk fu Godon rotit ijia ijefuon fu God agoik.
1CO 11:4 Regavo iji fuka ma ijefuon na unam izeg ja besum sos ijia mimatame rekfuon na iji kuardiako ni mukoi faif. Efarif iji fu sirimame ga Godon vuak abe kuaikma fu nigen fuon fub okurak. Ijefuon maiji fu ijegreno iji fu E Bomana fuon Jesu Kurais fuba agoim.
1CO 11:5 Regavo bara be fu sirimame ga Godon vuak be Kaven Akai ijar vierafe maga fu abe kuaikro vierafe gavo fuba nigen fuon okurakma iji fuka juf bomana abe baru fuon fu samuamo iji mam. Bara iji fu sos guf ijia unam ijegreno iji fuka bara be fu ebuon baru turaga bu ga kuaiga fu juf abeno ijeg fuka bomana juf abek. Ijefuon bara erar fu vierafe fuba ijeg juf abekro vierafekma iji fuka nigen fuon okurakfuon.
1CO 11:7 Regavo madu vuak ijefuon kafo na kuaikfuon iji efarif iji fuba nigen fuon okuriak. Ijefuon maiji efarif iji fu Godri fu aikin amaren. Fu vierafero fu efarif iji amarega fu uri ire kafokafo fu reoga e roin bu ijia giame una God aroikro fu ijeg vierafene amaren. Unam besum ijeg bara iji fu ire kafokafo reokma fuka unam izeg fu baru fuon aroikfuon ijesugin vierafene reok. Regavo iji fuka ma ijefuon maiji ik anej ijia God fuba bara ijefuon ken abe efarif iji amaren. Regavo fu e Adamon ken ijin abe una bara iji amaren.
1CO 11:9 Regavo madu God fuba efarif iji amarme kua, Ani barak on iji ifejdamne kuain. Regavo fu bara iji amarme kua, Ani baru on iji ifejdamne kuain. Ijefuon bara iji fu nigen fuon okurak. Fu ijegrekma anera fok bu iji game fuon oimark. Ijefuon maiji bara iji fu nigen fuon okurame anf abedenmado fu baru fuon ijefuon rotit ijia fiok.
1CO 11:11 Regavo ni mukorigia vierafef vuak igi na kuardiavo iji efarif ijieb bu Godon nifak ijia buka e ikin ga bara iji bu bakin iji na ijeg vierafene kuaivo bakin. Naba ijeg vierafene kuaiv revo Godon vierafenma ijia bara iji fu baru fuon iji vierafeke ga baru iji fuk fu bara fuon iji vierafek. Ijefuon maiji bu besum karikva bu buon dasunamik. Regavo no vierafe ik anej ijia Godri efarif ijefuon an ijia abe bara amaren. Regavo iviakma no kari roko ijia no gavo efarif fok bu bara ijieb nafej. Regavo iji fun Godri fuon vierafenma ijia ijeg ren.
1CO 11:13 Regavo bara iji bu nigen buon okuriame sirimamekfuon vuak iji nan kuardiava jan faime vierafen. Ijefuon bara iji bu ar bu afuime God aroivo ijia buba nigen buon okuriame Godon sirimamekva iji fuka ba marek.
1CO 11:14 E fok non vierafen. Efarif be fu nigen jau fuon arega fu jauname jaoijor reno e iji fuka koikfuon juf abekfuon.
1CO 11:15 Regavo bara ijar nigen jau fuon arega fu jauname uikinik fuon okurakma iji fun marek. Ijefuon maiji fu ugon fat abe nigen fuon fun okurainma igekin ijefuon e bu fu game aroikfuon.
1CO 11:16 Regavo e kafo ijia bu vuak igi na kuaivo ijefuon abe kuaim musikuaikuai vierafekva ni vierafe no una unam be izegrekva bakin. Regavo madu Godon sos ijia buk unam kafokafo bu bagavo bu unam besum ijesugin reoij.
1CO 11:17 Regavo efnun na madu vuak nun kafo madu kuardiakrejo ni faif. Vuak amur iji na vuak jon be faiva naka ba bomana jon oimaren. Ijefuon maiji ja besum afuime Godon sirimamejo iji jaba jon ifenamin revo jaka uri unam ise kafo rene jon arafirinamiv.
1CO 11:18 Ja sos ijia besum afuivo jaka ba oimarknum besum afuim karioin revo jaka atame kafokafo karioijo na iji fain.
1CO 11:19 Regavo igia fai iji ja ijegreoijo iji fuka ba maren. Regavo naba gain jakafu vierafero ja ijeg ata kafokafo kariokva e kafo bu jon izeg ja ma vierafene rejo iji giame kam arordiakuai ja ijefuon ijeg rej.
1CO 11:20 Regavo madu tavan iji ja besum afuime duok ijo iji ja izeg Jesu Kurais fu nuvuifuon kuros ijia guainma iji ja abe ma vierafeknum reoijo bakin.
1CO 11:21 Ijefuon maiji ja duok ijo iji jaka ba joi samuanamiknum duok ij. E roin buka migegare duok uruvana iko buka defiam revo e roin bu duok isema ijo ijefuon buka vasiakma vak. Regavo madu e roin buka do vuain uruvana ine nigen kam karoiv.
1CO 11:22 Ja e fok ja e aikin ga e juaikin ijefuon ja irerafuon ba ar jon ijia duok nifie iknum do iga fu mukoi defiam? Efnun ijeg ja rejo iji fuka unam ma ise ijin ja rej. Ja ijegrejo iji jaka juf bomana abe e iji bu duok bakin ga sinuom bakin iji miav. Ijefuon maiji bu duok bakin ijefuon bu imut kiriasame duok ikuai rok. Revo naba gain jakafu Godon e iji jaba mukoi akardiavo ijefuon ja unam ijeg rej. Regavo ja ijegrekva na ja naba arordiak.
1CO 11:23 Na vierafe na E Bomana duok radkma iji fu e vuak fuon faivo ijiena inma ijefuon anej ma iji abe kuardiaga ja faikfuon. Vuak iji fu E Bomana ijar na nijaidienma na ijin madu abe una ja kuardiain. Regavo vuak iji fu ijeg kuardie, Naki besum iji e Judas fu Jesu abe e Jius miainma ijia Jesu fu e vuak fuon faivo ijiena besum afuime duok in. Fu bred fat be abe Godon oimareme abe ukakna tuaseme vajiaknum kia bred igi fu surif nun ijekin. Regavo na surif nun igi abe joifuon guakro miav. Ijefuon ja oine besum afuime bred iji ikva ni irerag nar joifuon renva iji vierafef.
1CO 11:25 Fu ijegrene fu una madu uri kafus iji do vuain ijekma namo ijin aben. Fu abe kia do vuain igi kafus igia nafuinma iji fu kavuan nun ijekin. Regavo kavuan nun fuka ma darokido fu ise jon fok somdiame ja kege una Godna besum mazik. Ijefuon ja oine do vuain ijekin ikva ni irerag nar joifuon renva iji vierafef.
1CO 11:26 Ijefuon ivia igia anerene vake tavan iji E Bomana fu una roko ijia ja ijeg besum afuime bred iknum ga kafus igia do vuain ijo ijia ja izeg Kurais fu e fok igiebuon guainma iji vierafene kuaimok.
1CO 11:27 Ijefuon erar fuba E Bomana agoiknum bred ijiga do vuain iji kege ikma e iji fuka ise ren. Ijefuon maiji fuba E Bomana ijefuon surif ijiga kavuan iji mukorigia agordiam.
1CO 11:28 Ijegvo e besubesum noka koiknuvuon oinuvuon guf iji mukorigia vierafekfuon. No vierafega no ise kafo rega iji noka amur ise nuvuon iji migegare visume God kuardak. No ijegrene noson ijar bred ijiga do vuain iji kege ik.
1CO 11:29 Regavo erar fu Kurais kuros ijia fu guainma ijefuon maiji fuba mukoi vierafegavo fum bred ijiga do vuain iji kege ikma E Bomana fu koikfuon abe vajai fian mak.
1CO 11:30 Ja e uruvana ja unam iji jaba mukorigia vierafeknum ijegreoijo ijefuon jaka zazaiknum adam ise uruvana abeknum ga e roin jaka aoiv.
1CO 11:31 Regavo no e Kurais ma vierafejo roin no koiknuvuon migegare unam ise nuvuon iji no mukoi giame una karoime unam ma ijesugin reoijobatie E Bomana fuba no kege vajai fian vajuok.
1CO 11:32 Regavo iji fu no kege vajai fian vajuomon iji fu no nijaiduom. Fu vierafero fu ijeg nijaiduoga no una karoime efuon maiji fu vierafenma ijegrene karikro fu iji ijeg ren. Regavo madu fu vierafero fu iviakma no kege vajai fian vajuinki tavan rad fu e fok kam arafiriamo ijia fuba una no kege buna besum vajai fian vajuokro fu ijeg vierafene ren.
1CO 11:33 Ijefuon efnun na ja soisoime kuardiavo ni faif ja oine besum afuime duok iknum unam izeg E Bomana fu e fok igiebuon kuros kaf ijia vajai fian abenma iji vierafekva ni mukoi ganamiknum ikfuon. Ja mukorigia giamga e fok bun rua barga ni duok if. Regavo erar fu vierafega fu vasiaguainma ijefuon fu kaifuon roin ba samuagdiakro vierafenma e iji na vierafe fu amur ar fuon ijia duok ine ruakfuon. Fu ijegrekma fun mardo E Bomana iji fuba fu unam ise iji fu renma ijefuon vajai fian mak. Regavo vuak kafo una unam sirimamejo ijefuon iji nason vuakva ijia na kuardiame nijaidiak.
1CO 12:1 Regavo madu ja Kaven Akai iji fu unam izeg e iji ebuon ik reno ja iji faikuai na kuardien. Regavo efnun na vierafe jaka unam ijin mukorigia faikfuon.
1CO 12:2 Jan vierafe ur jaba God sirimameknum kari ruainva ijia ja e iji bu god kufui ijiebuon sirimamejo iji jajiame unam buon aben. Ja ijegreoinva ijefuon unam ise buon ijar ja kema ja dasuaime una unam ise kafokafo reoin.
1CO 12:3 Ijefuon ja unam izekin ijia e iji bu Godon Kaven ma iji abe vuak kuaivo iji mukoi giame vierafek? Unam iji ja giame vierafekfuon iji izeg e iji fu Godon Kaven ma iji ijar nijaiko fu oino iji fuba kuaik Jesu fu e buzeno kuaik. Regavo madu e maikava be fu erar kuaik Jesu fu E Bomanano kuaikma bakin revo fun e iji Godon Kaven Akai abenma ijar ijeg kuaikfuon.
1CO 12:4 Godon Kaven ijar no daro muoga no ik kafokafo mukorigia reoij. Regavo Kaven iji fu daro muoko no ik kafokafo rejo iji fu kafokafo bakin gavo fun Kaven besum ijar.
1CO 12:5 No ik ni kafokafo reoij revo non E Bomana besum ijefuon ik ijin reoij.
1CO 12:6 Regavo madu e iji bu unam kafokafo ijia ik buon reoij. Regavo fun E Bomana besum ijar e fok ijiebuon oij ijia daro miaknum vierafe vajiako bu ik buon iji mukorigia reoij.
1CO 12:7 Fun Godon Kaven ijar no e besubesum eraneb no Kurais ma vierafejo iji daro muoga no ik nuvuon kafokafo iji mukorigia reoij. Ijefuon ik iji no reoijo iji God fu vierafe e fok buka giriesaga buon ma vierafejo ijia biom gigikin rekro fu iji vierafen.
1CO 12:8 Ijefuon na unam izeg Kaven Akai fu ik reno na iji nijaidiako ni mukorigia faif. Fun Godon Kaven ijar e kafo daro miaga bu izeg God fu vierafeno iji mukoi giame vierafene una e roin kuardiav. Revo madu fu Kaven akai besum ijar e roin daro miako bu Godon vuak ma iji mukoi vierafene uri e roin nijaidiaknum ifejdiako bu una Godon unam ijia kegoij.
1CO 12:9 Regavo madu fu Kaven besum ijar una e kafobuon ma vierafejo iji kam biom mamkanuk rediam. Ijefuon e iji bu una e kafobuon sirimamejo buka ma vierafega God fu vuak irerag bu kuavo iji fu ifejdiak. Regavo madu fu Kaven besum ijar una e kafo daro miaga bu e adam abejo iji karauniav.
1CO 12:10 Regavo madu fu Kaven Akai besum ijar e roin daro miaga bu uri ire sumakin kafokafo ema bu rejo bakin iji rej. Regavo madu fu una e roin daro miaga bu Godon ir ijia vuak faime una e roin kuardiav. Regavo madu fu e roin daro miaga bu uri e iji bu Godon Kaven abe vo bu kaven ise abenva bu iji samakaf giame kiav. Regavo madu fu Kaven besum ijar e roin daro miaga bu uri isama kafokafo bu ba vierafenva ijia kuaiv. Regavo madu fu e roin daro miaga bu e iji isama kafokafo ijia kuaivo ijiebuon vuak iji ke karoime e iji Kurais ma vierafejo ijia afuinva iji kuardiaga bu faiv.
1CO 12:11 Ijefuon fu Kaven besum ijar ire fok reoknum vo daro ma iji kafokafo e besubesum fu vierafeno iji vajiam.
1CO 12:12 Na vierafe na vajai nuvuon iji God fu irerafuon ik kafokafo vajuoga no reoijo ijia bijame kuardiako ni mukoi faif. Vajai nuvuon fuka besum ijesugin revo gurom fuon fuka ma uruvanak. Unam besum ijegvo E Bomana nuvuon Jesu Kuraison e iji no e kafokafo revo noka agan besum ren.
1CO 12:13 E iji bu kege do ruardiainva ijeg God fu Kaven fuon kege oinuvuon guf ijia uniafduin. Ijefuon usuibe noiji no nuvuibe karioin revo iviakma non una Jesuon e ijiena besum mazin. No e roin no e Jius ga e roin no e Jius bakin. Regavo madu e roin no mon abejo bakin ga nom e kafobuon ik rediavo ga roin noka e mamkanuk rene daze karioij. No ijegreoijga Godon Kaven ijar no kege una besum afuime unuin. Fur e besubesum oinuvuon ijia fine daro muomo ijefuon no fuifuon ik kafokafo reoij.
1CO 12:14 Vajai nuvuon fu gurom kafokafo bijia nainma ijeg E Bomana ijefuon e fok buk bu ijekin. God fun ik kafokafo no reokfuon iji ke dame vajuin.
1CO 12:15 Na ik kafokafo God fu kege vajuinma ijefuon na be bijame kuardiako ni faif. Dia tat nuvuon buba uri kuai, Naiji na imut tat iji fu vajaima ijia ifenma ijekin bado na nuibeno kuaik. Ijefuon maiji dia tat fu vuak ijekin kuaik revo fuiji fu vek vajaima ijefuon gurom be.
1CO 12:16 Regavo madu ada nuvuon buba uri kuai, Naiji na niom iji fu vajat ijia ifenma ijekin bado na nuibeno kuaik. Ijefuon maiji ada fu vuak ijekin kuaik revo fuiji fu vek vajat ijefuon gurom be.
1CO 12:17 Regavo igia faif vajai nuvuon gurom kafokafo bu bakin ga nom niom ijesugin bijiaibatie iji no izeg ire kafokafo faik? Regavo madu vajai nuvuon fu gurom kafokafo fu bakin revo fum ada ijesugin bijiaibatie iji no izeg ire kafokafo ijiebuon udi iji faik?
1CO 12:18 Regavo ijeg iji fuka bakin. Regavo God fun ma ijefuon vierafene vajai nuvuon gurom kafo iji kege ar buon ijia bijiamuin. Ijefuon vajai gurom kafokafo iji bu uri ik irerag God fu miainma bu ijin rej.
1CO 12:19 Regavo madu vajai nuvuon fu gurom kafokafo bijiainma bakin gavo fu gurom besum bijainmabatie ja vierafega nobe emabuon vajat igeg rene ok?
1CO 12:20 Iji fuka ma bakin. Ijefuon maiji bu vajai nuvuon gurom kafokafo ijieb besum afuinva ijefuon bu vajai besum amaren. Ijegvo Jesuon e fok no madu no unam besum ijia reoij. God fu e besubesum ik nuvuon no reokfuon iji fun kafokafo vajuin.
1CO 12:21 Ijefuon vajai gurom nuvuon fok bu vajaima ijia ifenva iji buka buon ifenamikuai bu ijefuon vajaima ijia ifen. Ijefuon niom fuba uri imut tat iji kua, Na a naka isediemno ni garef vakne kuak. Regavo madu nigen iji fuba uri dia tat iji kua, Na a naka isediemno ni garef vakne kuak.
1CO 12:22 Buba ijeg kuaik ijefuon maiji vajai gurom kafokafo buka ik buon rekuai ijefuon bu vajaima ijia ifen. No vajai gurom nuvuon kafo no giamga bu ma zazaikin revo buka nuvuifuon ik ikin kafo vajai nuvuon ijia reoij.
1CO 12:23 Regavo vajai gurom kafo no giame vierafero buka ikin baro no ijeg vierafen revo noka vek bu mukorigia samuagdiav. Regavo madu vajai sauivkin nuvuon roin no vierafe nobe kege samafrekfuon ijefuon noka mukorigia okuriav.
1CO 12:24 Regavo vajai gurom roin no giamga bun maradiainva ijefuon no bomana vierafene samuagdiavo bakin. Unam besum ijeg God fu fuon vierafenma ijia vajai nuvuon gurom kafokafo iji kege besum afuim namduin. Fu vierafe noka vajai gurom nuvuon roin no kuai bu ikin bano kuaivo iji noka mukorigia samuagdiakro fu ijeg vierafen.
1CO 12:25 Ijefuon maiji God fu vierafero fu ijegrenki vajai gurom fok buba buon musikuaiknum buon zienamigavo bum oi besum reare besum afuim ik reokro fu ijeg vierafene ren.
1CO 12:26 Ijefuon vajai gurom besum fu afikin abe vajai fian abeno iji vajai fok fuka vajai fian aben. Regavo bu una vajai gurom besum dab aroivo iji vajai fok iji fuka oimarem.
1CO 12:27 Vuak igi na kuaivo ijefuon maiji iji e fok jaka afuime Kuraison vajat ijia besum ifek. Regavo ja vajai gurom kafokafo no bijiame kuainva ijeg ja sos ijefuon ik kafokafo reoij.
1CO 12:28 Ijefuon ik amur bu sos ijefuon reoijo iji bu e afasor rene oij. Regavo una ik be bu reoijo iji bu Godon vuak abe e roin kuardiav. Regavo una be iji bu Godon vuak anej ma iji abe e roin nijaidiav. Regavo una be iji God fu e roin kege daro miaga bu ire sumakin kafokafo reoij. Regavo e roin fu kege daro miaga bu e adagin iji karauniaoij. Regavo madu una e roin iji God fu kege daro miaga bu e roin oifiadiainva iji dasumdiaoij. Regavo madu una e roin iji fu daro miaga bu e nigen rene Kuraison sos iji samuagdiav. Regavo una e roin iji fu daro miaga bu uri isama kafokafo buba kuaivo iji kuaimoij. Unam ijekin ijia God fu ik fuon kafokafo e kafokafo vajiam.
1CO 12:29 Regavo efnun ni mukorigia vierafef. God fuba e fok no kuo, Ja ik nun besum ijesugin afuime rekno kuinma bakin. Ijefuon jab vierafero e fok noka uri afasor rejknum uri Godon vuak abe kuaimokro jab ijeg vierafek. Regavo madu jab vierafero e fok noka uri Godon vuak ma iji abe e roin nijaidiaknum ga ire sumakin kafokafo rejknum ga e adagin karauniakro jab ijeg vierafek. Regavo madu jab vierafero noka e fok uri isama kafokafo kuaiknum vo e iji bu isama kafokafo kuaivo ijiebuon vuak iji faime ke karoim una e kuardiakro jab ijeg vierafek. Regavo God fun e besubesum ik kafokafo no reokfuon iji fun kege vajuin.
1CO 12:31 Regavo ja vierafe jaka God kuaga fu ik jon Kaven ijefuon daro ijia miaga ja reokva iji ni kuaga fuka ik ma iji vajiaf. Regavo iviakma naka unam ma iji ja ma karikfuon ijin kuardiame nijaidiavo ni mukorigia faif.
1CO 13:1 Na vierafe na uri ire sumakin rene e fokbuon isama iji abevo anera fokbuon isama iji faime kuaimokafie vierafen revo naba una kaifnun roin oijmiakva iji isama kafokafo na kuaikafie vierafejo buka ma bakin revo buka buzer.
1CO 13:2 Regavo na vierafe naka Godon vuak iji faime abe e roin kuardiaknum ga ire fok vierafeknum ga madu Godon ire sauivkin fok giame vierafe barekafie vierafek. Regavo naba una e roin mukorigia oijmiakva na vierafe ire fok na rekafie vierafenva iji fuka buzer ijesugin. Regavo madu na vierafe na God ma vierafejo iji fuka ma bomana rebatie na uri Godon sirimamene kuaga fu uri uruor mamkanuk iji kiaga bu biom una ai kafo ijia va irek. Regavo naba kaifnun roin oijmiakva iji naka e fokbuon nifak ijia na e ma bakin. Ijefuon ire fok nar vierafene rejo iji fuka ma buzer ijesugin.
1CO 13:3 Regavo naka uri sinuom nun fok ke kimene mon abe una e sinuom bakin iji vajiak. Regavo madu na Godon vuak ma iji abe kuaimoijo ijefuon bu na kaniega na guak. Regavo naba una e roin mukorigia oijmiakva iji ire fok na mukorigia reoinva iji buka ma buzer ijesugin.
1CO 13:4 Regavo iviakma na izeg no e roin mukorigia oijmiakfuon na ijin kuardiakno ni faif. Amur no e binob una nuvuon ise kafo rekva noba una ijefuon bomana vierafek gavo nom oij asusame ise buon giame dazek. Regavo madu noka e suaikin rene e fok mukorigia ifejdiakfuon. Regavo madu no e kafobuon sinuom noba giame oi isema vierafekfuon. Regavo madu noka e roin mukorigia oijmiakva noba uri nuvuon aroikarame if nuvuon kam ajiega e roin kam arikfuon.
1CO 13:5 No e oijmiakva iji noka bu mukorigia agordiak gavo noba uri nuvuonkua vierafeoknum ga madu noba ziemokfuon. Regavo no e oijmiakva noba uri e iji bu ire ise kafo usuibe nuvuon renva iji una vierafeok gavo nom giame dazekfuon.
1CO 13:6 No e oijmiakva no e roin bu ire ise kafo rekva noka giame buon oifian abekfuon. Regavo no giamga bu unam ma ijesugin kegoijo iji noka ma bomana oimarkfuon.
1CO 13:7 Ijefuon no kaifnuvuon no oijmiavo bu ise kafo nuvuon rekva noba magiagavo noka magaga una bu mukorigia tavan bog oijmiaknum ifejdiakfuon. Regavo no kaifnuvuon oijmiakva noka tavan bog bu vierafeknum ifejdiaga bu unam ma ijesugin kegokfuon.
1CO 13:8 Regavo ik kafokafo iji Kaven Akai ijar kege no vajuome daro muoga no reoijo iji buka ma ikin. Regavo tavan abekma ik iji no reoijo iji bu barek. Regavo ire iji ka ma ikin ga tavan rad barekma bakin iji e oijmiavo ijin. Kaven ijar ik kafokafo muome kuo, Godon vuak ma iji abe kuaiknum e kafobuon isama ijia kuaiknum Godon vuak ma iji abe e roin nijaidiafno kuin revo iji fok tavan rad buka barek.
1CO 13:9 Regavo vierafe nuvuon iji buka ma ukaknak ijefuon tavan kafo no Godon vuak iji e kuardiavo iji no vuak ma rotit gamia naoivo iji kege kuardiavo bakin gavo nom azan ijia kuardiav. Regavo rad God fu ire fok samakaf nijaiduoga no una vuak fuon ma rotit ijia naoivo no iji mukorigia gia vierafene e kuardiakfuon.
1CO 13:11 Regavo na vek am ukakbe renva iji nun vierafe iji fuka ma ukakbe ijefuon na am ukak igeg vierafene reoin. Regavo iviakma nan uri e makin renva iji nun vierafe iji fun bomana ren. Ijefuon na una madu am ukakbe ijeg vierafene kegoijo bakin.
1CO 13:12 Unam besum ijeg iviakma no Godon unam iji nom isebe kafo giame vierafen. Regavo rad God fu ire fok kege amare barekma ijar noson ire fok samakaf vierafekfuon. Na izeg fu iviakma oinun iji mukoi gieme vierafenma ijeg nak na koiknu ire fok ijeg giame vierafekfuon.
1CO 13:13 Regavo iviakma igi God fu vierafe no ire nokbek (3) iji noka vek giriesame revakfuon. Amur iji fu vierafe noka fu ma vierafene ifejdak. Regavo ire be iji fu vierafe no mukorigia karine ire ma iji God fu nuvuifuon varur gufia rekafa kuinma iji samuaknum karikfuon. Regavo ura be iji fu vierafe noka nuvuon oijmanamikfuon. Revo ire nokbek (3) iji fu kuarduinma ijia ire iji ka ma bomana no abe nikajakfuon iji noka nuvuon oijmanamik.
1CO 14:1 Ijefuon unam oijmanamivo iji fuka ma ire bomana be. Ijefuon ni una E Bomana Jesu kua fu daro miaga ja ik kafokafo Kaven Akai fu kege e Jesu ma vierafejo iji vajiamo iji vajiaga ja reokfuon. Revo ik kafokafo ja reoijo ijia ik iji ka ma bomana iji Godon vuak ma iji faime abe e roin kuardiavo ijin.
1CO 14:2 Na ijeg kuardiavo ijefuon ma iji E be fu isama kafo fuba amur vierafenma ijia kuaimon iji fu e fok kuardiamo bakin gavo fu Godri fuonkua kuardam. Ijefuon maiji e fok bu isama iji fu kuaimon iji buba faime vierafen. Ijefuon maiji e iji fu Kaven Akai ijefuon daro iji abe vuak ma sauivkin ijin kuaim.
1CO 14:3 Regavo e iji fu Godon vuak faime abe samakaf e kuardiaga bu migegare faivo iji fuka mukorigia ifejdiam. Ijefuon bu afikin ga oifian kafo biediakva buka koikbuon giriesame asusek.
1CO 14:4 Regavo e iji fu isama kafo ba vierafenma ijia kuaimon iji fum fuon ifenamikafa vierafen. Regavo erar fu Godon vuak iji abe kuaime samafrega e fok bu mukoi faivo iji fuka Godon e fok ijia afuinva iji mukoi ifejdiam.
1CO 14:5 Regavo na vierafe nun iji be kuardiako ni faif. Na vierafe Kaven Akai fu daro miaga ja isama jaba faivo ijia kuaikva iji fun maren. Regavo na vierafe Kaven Akai iji fu madu daro miaga ja uri Godon vuak iji abe e kuardiakfuon. Ijefuon maiji ik ijar fuka ma bomanak. Regavo una isama kafo ijia kuaimokfuon iji fu ma bakin. Ijefuon maiji a e be fu vuak a kuaimon iji fuba abe dakaroime e iji mukoi nijaidiakma vuak on fu izeg bu ifejdiakma bakin. Ijefuon vuak on a kuaimon iji fuka ma bakin.
1CO 14:6 Ijefuon efnun igia faif. Na tavan be ijia ja giak vuako ijia na uri isama be jaba faikfuon ijia vuak kuardiakva ja izeg vierafek? Ja vierafe na ijegrekva nabe ja ifejdiak? Na vierafe iji fuka ma bakin revo unam besum iji na ja ifejdiakfuon iji na Godon vuak na fainva na iji abe ja kuardiak. Regavo madu na irerag God fu nuvuifuon renma iji abe ja kuardia vo madu Godon ma iji abe nijaidiakva ijar na ja mukor ifejdiakfuon.
1CO 14:7 Regavo na be bijiame kuardiako ni faif. Ire zaij iji fu ema igeg vuak kuaimo bakin revo a fu abe dua irerag a urukreno ijefuon vajakma e fok bun zaij ijia faime dua ijefuon uruk. Regavo e be fum uri zaij fuon dab matumatuknum uri dua roine dab isermo iji e fok bu izeg fainamiknum dua mukorigia uruk?
1CO 14:8 Regavo madu ni vierafe e iji bu buon bijaikrejo iji e bu samuagdiamo iji fu uri e be abega fu veg abe foik. Fu foiga e fok bu vierafero tavan iji bu bijaikfuon iji fun ruainmaro bu ijeg vierafej. Ijefuon e veg iji samuamo fuba veg iji abe mukorigia foine e fok ada vajiakma iji e bijaivo fok buba migegare uri bijaikuai samuak.
1CO 14:9 Unam besum ijeg vo jak ja uri isama iji e fok buba faivo ijia vuak kuaikva e iji bu izeg vuak a kuaimon iji mukoi faik? Revo ni gaf ja ijegrekva iji vuak jon jam dab ijia arafiriv. Regavo madu vuak jon ja kuaivo iji fuba e roin ifejdiakfuon.
1CO 14:10 Regavo madu na vuak be madu bijame kuaikno ni faif. Ar iror fok fuka isama ma uruvana ijefuon e iji bu isama kafokafo ijia vuak buon kuaime fainamiv.
1CO 14:11 Ijefuon e be fu isama be naba fainva ijia vuak kuardiekma na izeg una roib kuardakva bakin. Ijefuon no e ijek noka e taraiko igeg ireme nuvuon nuanamik.
1CO 14:12 Ijegvo jak ja unam besum ijeg e roin isama iji buba fainva ja ijia vuak kuardiakva e iji bu karine faivo iji buka ba mukoi faikfuon. Regavo jaka Kaven Akai iji fu daro fuon abe e iji Kurais ma vierafejo iji miaga bu ire kafokafo rejo ja iji abekuai bomana vierafen. Ijefuon ni E Bomana kuaga fu daro ma iji abe miaga ja ire kafokafo rene Godon e iji ifejdiaga bu una Kaven ijia mukorigia ofriakfuon.
1CO 14:13 Ijefuon erar fu vierafe fu Kaven Akai kua fu daro maga fu isama kafokafo ijia vuak kuaikma iji ni una madu God kua fu ifejdakfuon. Fu ifejdame daro maga fu vuak fu kuaimon iji abe dakaroime una e fok sos ijia afuinva ijiebuon isama ijia samakaf kuardiaga bu mukorigia faikfuon.
1CO 14:14 Ijegvo na madu isama be naba faivo ijia sirimamekva iji na vuak irerag na kuaivo iji naba mukoi faikfuon. Ijefuon maiji fu kaven nun ijar fuonkua sirimamen.
1CO 14:15 Ijefuon na izeg rek? Tavan kafo kaven nun fu fine isama kafo ijia God sirimameknum dua urukafak. Regavo tavan kafo na isama iji e fok bu faime vierafenva ijia sirimamek. Regavo madu tavan kafo na isama iji na faime vierafenva ijia God sirimameknum ga madu dua urukafak. Na ijegrenki na vuak irerag na God oimardavo iji na koiknu faivknum vierafek.
1CO 14:16 Regavo ja kaven jon isama kafokafo ijia God aroiknum fuon sirimamek. Regavo e be fuba vuak jon faimo fu jana ijia fino iji ja izeg vierafek? Ja vierafe e iji fun vuak irerag ja God kuardavo iji fun fain ijefuon fu jana besum marenmano kuak. Iji fu bakin!
1CO 14:17 Ijefuon ja sirimamene Godon oimarenva iji fun maren. Regavo e iji fu jana fino iji sirim jon fuba fu ifejdain.
1CO 14:18 Naka Godon bomana oimarek. Ijefuon maiji na nunkua fijo God fuka daro miega na isama kafokafo ijia mukorigia sirimamej. Ijefuon na vierafega unam ijeg no rejo ijia naka nar ja mukorigia asidiain.
1CO 14:19 Regavo na ar iji bu sirimamejo guf ijia Jesu Kuraison e fok bu afuinva ijia naba ijeg isama kafokafo ijia kuardiak. Regavo nam uri vuak e bu faime vierafekfuon ijesugin kuardiak. Ijefuon na isama e bu faivo ijia Godon vuak ma iji sibank kuardiakva iji fu marek. Regavo na uri isama e buba faivo ijia vuak uruvana kuardiakva iji fuka ba maren.
1CO 14:20 Efnun jab uri am ukakna igeg vierafek. Regavo ni am ukakna iji buba ise kafo rekuai vierafejo ijeg jak ise kafo jab rekuai vierafek. Regavo jon izeg ja Kurais ma vierafejo ijia nika e damuigin igeg vierafeof.
1CO 14:21 Ijefuon maiji God fun usuibe buk akai bu isoinva ijia ijeg kuai, Na moik kafo ijia e kafo kiaga bu enun iji isama kafokafo ijia vuak kuardiak. Regavo enun iji bu vuak iji na kuardiakafie vierafenva iji buba mukoi faik.
1CO 14:22 Ijefuon na vierafe isama kafokafo ijia ja kuaimoijo iji God anf fuon iji fun ija abe e iji bu fuba ma vierafejo iji nijaidiam. Regavo Godon vuak ma ka mamkanuk iji bu rotit gamia sauinva iji bu e iji fu ma vierafejo ijieb giame vierafekfuon.
1CO 14:23 Ijefuon Godon e fok sos ijia besum afuime isama kafokafo ijia vuak kuaivo ijia e God ma vierafejo bakin iji bu arume vuak iji faikva buba vierafek. Regavo bum uri buon ganamime kuai, E iji buka nigen iserdiainvano kuaik.
1CO 14:24 Regavo ja Godon vuak iji sos jon ijia isama kuaivo ijia e be fu God ba ma vierafeno fu vuak irerag ja kuaivo iji faikma fuka mukoi vierafekfuon. Areme fu uri kuaik, Naka e ise uruvana reoijo ijefuon nan unam na vajai fian abekfuon ijia vuim manijno kuaik.
1CO 14:25 E iji fu ijegreno iji vierafe fuon fok bu sauinva iji buka samafrega e fok bu giak. Rene fu madu kuri tuame Godon sirimamek. Revo fu una uri e iji ja God ma vierafenva iji giame kia, Fuka ma God fu jana fino kiak.
1CO 14:26 Ijefuon efnun na unam ma ja izeg Godon daro iji fu kege vajiainma iji kege mimatakfuon na iji kuardiakno ni faif. Ja oine besum afuikva iji e be fu dua urukfuon. Regavo be fu Godon vuak ma iji abe kuardiame nijaidiak. Regavo be fu vuak sumakin be Godri kuardainma fu ijin abe e roin kuardiak. Regavo e be fu isama be fuba faimo ijia Godon vuak ma iji abe kuaike e be fu uri vuak iji abe dakaroime una e fok kuardiak. Ijegvo unam kafokafo ja rekva nika unam izeg ja Godon e fok bu sos ijia afuinva iji ifejdiakfuon ijesugin vierafene rekfuon.
1CO 14:27 Regavo e kafo ijia karinva bu vierafe bu isama kafo buba fainva bu ijia uri vuak kuaikva iji fun maren. Regavo bu e nokarok (2) vo baga e nokbek (3) bu ijegrekva iji fun marek. Regavo buka samuanamiknum kuaikva iji fu markfuon. Regavo madu e be fuka samuainki fu migegare uri vuak buon iji abe dakaroim isama ijia kuaiga e fok bu mukoi faikfuon.
1CO 14:28 Regavo gaga e vuak iji abe dakaroim isama ijia e kuardiakfuon iji bu baga iji na vierafe e iji buba vuak kafo kuaikfuon. Regavo bum isuar karine vuak irerag bu vierafenva iji buon kuaiknum vo Godna kuaik.
1CO 14:29 Regavo madu e kafo bu vierafe bu vuak kafo God fu kuardiainma bu iji e sos ijia afuinva ijiebuon isama ijia e nijaidiakuai vierafekva iji fun maren. Regavo na vierafe buka e nokarok (2) vo baga e nokbek (3) ijesugin uri buon samuanamiknum vuak kuardiakfuon. Bu ijegrekva e fok vuak iji faivo iji buka mukorigia faime vierafekfuon.
1CO 14:30 Regavo e be fu vek vuak kuaimon ijia kaifuon be fuk fuka Godri vuak ma be nijainma fu iji abe kuaikafa vierafekma iji na vierafe e iji amur uri vuak kuaimon iji fuka migegare e iji ar aremdaga fu vuak fuon kuaikma iji fuka marek.
1CO 14:31 Regavo na vierafe buka buon samuanamiknum kuaikva fuka marek. Bu ijegrekva e uruvana bu vuak iji bu kuainva ijia vuak ma kafo faik. Regavo madu vuak ijieb daro miaga bu God mukorigia igakfuon.
1CO 14:32 Regavo igia fai e be fu vuak be Godri vierafe maga fub migegare uri vuak iji abe kuaikfuon gavo fuka isuar oi dasume samuakfuon. Ijefuon maiji God fu vierafe noba uri rubduinva igeg una isema reokfuon. Regavo madu God fu vierafe noka unam ma ijia ire kafokafo rekfuon. Ijefuon ja sos ijia afuime ire kafokafo rekva nika Godon e iji bu rejo ijeg reokfuon.
1CO 14:34 Regavo madu ja sos ijia afuivo ijia bara fok buba vuak kuaikfuon bum isuar karikfuon. Ijefuon maiji noba bu daro miaido bu ijia vuak kafo buba kuaik gavo bum barufijaf ijesugin samuagdiakfuon. Ijefuon maiji vuak iji fun e Mosisri akai fuon ijia ijeg isoime kuainma ijefuon buba ijegrekfuon.
1CO 14:35 Regavo bu vuak kafo vierafene duna kafo kiakuai vierafekva iji na vierafe buson una ar buon ijia barufijaf ijin kuardiakfuon. Ijefuon maiji igia fai bara iji bu sos guf ijia vuak kafo ijeg kuaivo iji barufijaf iji buka bomana jufdiav.
1CO 14:36 Regavo na vierafe ja na kuardiainva ijegrejo bakin. Ja vierafero ja jar amur Godon vuak iji abe e roin kuardiaoijoro ja ijefuon ijeg reoij. Regavo madu ja vierafero jar jonkua Godon vuak maiji faivaro ja ijeg rej. Unam iji ja ijegreoijo iji na vierafe fuka ma bano iji ka arekfuon.
1CO 14:37 Regavo e be erar fu vierafero fun Godri daro maido fu vuak fuon abe e roin kuardiaokro fu ijeg vierafen. Regavo madu fu vierafero fun Godri daro mainmado fu uri ire kafokafo reokro fu ijeg vierafen. Regavo na vierafe e iji fu ijeg vierafene reoinon iji fuka una mukorigia dasume vierafekfuon. Ijefuon maiji ire kafokafo na igia isoime kuardiavo iji fok bu E Bomana ijar kuardieko na kuardiavoro fu vierafekfuon.
1CO 14:38 Regavo fu vuak nun igi na kuardiavo iji fuba faiga fu uzakma iji jak jab vuak fuon fu kuardiamo iji faime igiak.
1CO 14:39 Ijefuon efnun vuak irerag fok na kuardia ruainva iji na vierafe jasik Godon vuak ma iji abe e roin kuardiakfuon. Regavo madu jab e iji bu isama kafokafo buba fainva ijia vuak kuaivo iji bijuk.
1CO 14:40 Regavo ire fok ja reokva iji nika mukorigia unam ma iji God fu vierafenma ga izeg e bu oimadiakfuon ijia reof.
1CO 15:1 Regavo efnun iviakma na vierafe na ja ifejdiame ejafiaga ja Jesu Kuraison vuak iji mukoi faime vierafekfuon. Na amur na ja giak vuainva ijia vuak fuon nan abe ja kuardiava jan faime ma vierafen. Ijefuon ja iviakma jon nakikmazak ja karine roko iji jan vuak ijia bidua kari rok.
1CO 15:2 Ijefuon ja vek giriesame Godon vuak ma iji na kuardiava ja fainva iji abe anu kunaime karikva God fu vuak ijefuon azan ijia ja karauniak. Ijefuon nika vuak iji na kuardiainva iji ma vierafef. Regavo jaba vuak iji ma vierafekva iji jon ma vierafejo iji fuka buzem rek.
1CO 15:3 Na ik anej ijia vuak fok E Bomana fu kuardienma iji nan abe ja kuardiain. Ire fok fu na kuardienma iji fuka ma ijesugin ijefuon ja ire iji ma vierafekfuon. Regavo vuak amur iji ja ma vierafekfuon iji Jesu Kurais fu usuibe bu buk ijia isoime kuai fu ise nuvuon ijefuon guakno kuainva iji fun riarenma ijefuon ja ma vierafekfuon.
1CO 15:4 Jesu fu guama bu abe mako ruvga naki nokbek (3) barko fu una uriga vuak iji bu usuibe buk kafar ijia isoime kuainva iji fuka ijekma riarein.
1CO 15:5 Regavo madu amur na kuardiainva ijeg fu una urine fu koikfuon una e Fita kuavo iji bien. Rene rad fu koikfuon una madu e tuer (12) vuak fuon faivo iji fu kege unienma iji biediain.
1CO 15:6 Areme rad fu una madu e ka ma uruvana faiv adred (500) bu fu ma vierafejo iji ka tavan besum ijia biediain. E ma vierafejo iji bu fu gainva iji e sibank bun aoin gavo e ka ma uruvana bu vek karij.
1CO 15:7 Areme fu rad una uri e Jeims bieme una madu e afasor fuon iji roin madu biediain.
1CO 15:8 Regavo ma radkma iji fu madu For nak biedienma na gavga fu kiema na afasor fuon ren. Fu na ijegregame e uruvana buka oiserdiain ijefuon maiji ik anej ijia naiji na efuon rene vuak fuon abe kuaimoinva bakin.
1CO 15:9 Regavo e afasor fok ijiebuon uf ijia naiji naka ma e ma bakin. Regavo madu na bu e afasorno kiekfuon iji naba bomana vierafen. Ijefuon maiji naka Godon e ijin kam arafiriavga buka uruvana vajai fian aben.
1CO 15:10 Regavo God fuba na abe arafirien. Regavo fum fuon ma iji abe na nijaidien ga madu fuka na ma rene kiema na e afasor fuon ren. Regavo God fu fuon ma iji fuba abe vajai nun ijia nisen ijefuon maiji naka giriesame fuifuon ik reoij. Regavo ja e afasor fok kege mazime guobatie ja guoga naka nar mukorigia fuifuon ik reoijo ja giek. Regavo ik iji na reoijo iji na daro nun ijia reoijo bakin gavo fun Godri na mardieko na oknum ik ijin reoij.
1CO 15:11 Ijefuon efnun igia faif. Godon vuak ma iji fun besum ijesugin ijefuon na vuak besum ijin abe kuaimoko e afasor roin buk bu vuak besum ijin abe e kuardiaoij. Regavo madu jak jan vuak ni besum ijin abe ma vierafeoij.
1CO 15:12 Regavo efnun na duna be ja kuardiakno faif. Ja vuak iji no kuardiame kia, God fu Kurais guamga fu kuama fu una urinmano kiainva iji jan ma vierafen. Regavo ja irerafuon e roin ja kuai e bu aoikva buba una urikno kuaiv?
1CO 15:13 Regavo igia fai e aoinva iji bu ma ba una urijobatie iji na vierafe God fu Kurais fu guainma iji fuba kuaga fu una urik.
1CO 15:14 Regavo God fu Kurais fuba kuama fu una urimabatie na vierafe Kuraison vuak iji no abe kuaimoijo iji noka ma kufuimekfuon. Regavo madu jak ja era ma vierafekva bakin.
1CO 15:15 Regavo God Kurais fun ma guamga fu kuama fu una urinma ijefuon no vuak iji abe kuaimoij. Regavo e iji aoivo iji God fuba kiaga bu una urijobatie jaka una no kuo, Vuak iji ja kuaimoijo iji jaka kufuimeoijno kuok.
1CO 15:16 Regavo God fu e iji bu aoivo iji fuba kiaga bu una urijobatie fuba Jesu Kurais kuaga fu una urik.
1CO 15:17 Fun ma ijeg renmabatie jaiji ja era ma vierafekva bado jon ma vierafejo iji fuka buze rekfuon. Regavo madu God fu ise jon ijefuon ja kege vajai fian vajiakreno iji fu arekma bakin. Ijefuon e fok Kurais ma vierafejo bu usuibe aoinva iji buba una urikfuon.
1CO 15:19 Regavo God fu ire ma iji fu iviakma igi no karioijo ijesugin ifejduome vajuogavo rad no aoime vako iji fuba una ifejduomobatie noiji noka ma oifiaigma moikigia kariokfuon.
1CO 15:20 Regavo iji fun ma. God fu e fok aoinva ijia fu Kurais kuama fu una urin. E fok eraneb Kurais ma vierafenva bu aoinva iji God fu bu kege juar fuon ijia uij igeg dajaime samuagdiamo igekin. Ijegvo madu Kurais fuiji fu Godon juar ijia uij amur fu kira baikfuon ijin.
1CO 15:21 Regavo fun e besum ijar unam iji zuarunam vakfuon vien iji dajainma ijefuon e fok noka aoikfuon.
1CO 15:22 Regavo una ema ijia e iji fu zuarunam vien iji amur dajainma iji fu e Adamri dajain. Fuba God mukoi igainma ijefuon e fok no iviakma moikigia aoiknum karioij. Regavo Kurais fuka God mukoi igain. Ijefuon eraneb bu Kuraisna besum mazinva iji God fu rad vajai buon iviamkor kege vajiaga bu tavan bog ijeg nivek karivak.
1CO 15:23 Regavo God fu e besubesum kuaga fu una urikfuon tavan iji fun vierafene abe be abeden. Regavo God e amur iji fu Kurais kuamga fu una urin. Ijefuon rad Kurais fu una moikigia roko ijia God fu eraneb bu Kuraison e renva iji fu kiaga bu zuarunam ijia una urik.
1CO 15:24 Regavo moikigia ire fok bu barekfuon tavan iji fu rad ruak. Regavo amur fu Kuraisri moikigia arime e kin fok abevo e mamkanuk moik samuavo ijigam e darokin fok kam arafiriak. Kurais fu ijegrene fur ar buon abe e fok samuagdiak. Fu vek e fok samuagdiamo ijia God fu kaven ise iji bu Jesuna nigaraioijo iji kege una Kurais vajaga fu kam uinituk. Areme God fu unam e bu aoivo iji madu abe mukorigia bijukuraga fu barek. Areme Kurais fu ire fok fu samuagdiamo iji fok fuka abe una God Asoij iji mak.
1CO 15:27 No vierafega ire iji fuka marek. Ijefuon maiji God fun buk akaij iji bu isoinva ijia fu ijeg kuai, God fu Kurais abe unaga fu ire fok samuagdiak. Regavo God fuk fuba arime Farifuon ijefuon rotit ijia fik. Ijefuon maiji fu Godri koikfuon Kurais abe unaido fu ire fok samuagdiak.
1CO 15:28 Regavo Kurais fu uri ire fok samuagdiamo ijia ire fok buka fuon rotit ijia naoik. Rene fu uri koikfuon abe una e ukakbe igegrene Godon rotit ijia ikrekfuon. Regavo fuba koikfuon ire kafo samuagdiak gavo fun Godri fuonkua ire fok samuagdiak.
1CO 15:29 Regavo no ma vierafe God fu e iji aoinva iji fu kiaga bu una urikfuon. Regavo God fu e iji ijeg aoivo iji fuba kiaga bu una urikva iji na vierafe e iji bu una ebuon aoinva iji buifuon do ruaivo iji fuka ba maren.
1CO 15:30 Regavo madu God fu e iji aoivo iji fuba kiaga bu una urikva iji na vierafe e afasor iji no E Bomana ijefuon ik reoijo iji noba unam bu kanuoga no aoikfuon ijia ikreok.
1CO 15:31 Ijefuon efnun vuak igi na kuardiakrejo iji naka ma kuardiav. Na tavan bog naka unam na guakfuon ijia reoij. Regavo madu vuak be iji naka izeg ja E Bomana ijiena besum rene unam fuon ma ijesugin kegoijo na ijefuon Godon bomana oimarev.
1CO 15:32 Regavo igia ai Efisis na fioinva iji naka e ka ma ise rejo ijigam e ka ma kuriai ijiena nigaraimoin. Regavo unam iji na reoinva iji na moikigia ire ma be abekafie vierafene reoinvabatie ja vierafega iji fube na ifejdiek? Regavo madu God fu e iji aoivo iji fuba kiaga bu una urijobatie no madu nom e roin bu kuaim reoijo ijeg reok. E roin bu ijeg kuaivo no nakikmazak nom ijia karine nuvuon oimarknum duok uruvana iknum do ijesugin ik. Ijefuon maiji no aoime vakfuon iji fun samairenmano kuaiv.
1CO 15:33 Regavo efnun jab arega e iji bu vuak ijeg vierafene kuaimoijo ijieb ja biesiame aferdia una unam ise ijia vak. Regavo jan vierafe e be ma reoinon iji fu una e roin ise reoijo ijiena besum okma iji unam fuon fu kegoino iji fuka ma iserek.
1CO 15:34 Ijefuon ni unam ise iji ja reoijo iji aregavo una asume mukorigia vierafef. Regavo vuak igi na kuardiakrejo iji fuka jufdiak. Ijefuon maiji ni faif e roin ijia jana besum oijo iji bu God buka mukoi vierafejo bakin.
1CO 15:35 Regavo vuak iji God fu e aoivo iji kiaga bu una urikfuon iji nan samakaf nijaidiava jan fain. Regavo e be ba ma vierafeno iji fu ijeg kuai e iji aoivo iji bu izeg una madu urikno kuaik? Regavo madu fu kuai revo bu una urikva vajai buon kafu izekin rekno kuaik?
1CO 15:36 Bu ijeg kuaik revo duna ijekin iji bu kuaivo iji fuka ma bakin. Regavo na vuak be bijame kuardiakno ni faif. A ire be uifuon abe dajaikma fuba migegare tavuak gavo fu isuar ijia na mutureme uij iviamkor iji fuson ijia tavua ajieme irasek.
1CO 15:37 Regavo uij iji a abe dajainma iji fun iviamkor tavuame irasekma fuka ma nibe rekfuon. Ijefuon maiji a ire uij ga ire be iji fun ma sairenma a iji abe moik ijia sauin. Regavo fun Godri fuon vierafenma ijia vajai fuon iviamkor ka ni mukor iji amaren. Ijefuon uij kafokafo bu tavuame ajievo iji buka ni kafokafo ijia tavuav.
1CO 15:39 Ijefuon ire fok ijiebuon vajai iji buk madu buka kafokafo. Revo madu e vajai iji fu be ga fanuf ijigam kijum ijigam um ijiebuon vajat iji buka kafokafo.
1CO 15:40 Regavo madu ire fok varur ijia naoivo ijiebuon vajat iji buka kafokafo ga una ire fok moikigia naoivo ijiebuon vajat buka kafokafo. Regavo ire fok varur gufia naoivo ijiebuon sanainma ga marenma iji buka ma kafokafo. Regavo madu moik igefuon ire kafokafo ijiebuon sanainma ga buon marenma iji buka kafokafo.
1CO 15:41 Regavo madu tavan ijefuon sanainma iji fuka ma bomana. Regavo una asam ijefuon sanainma iji fum sibank. Regavo madu mujur ijiebuon sanavo iji bum ma iji sanav. Regavo madu buon sanavo iji buka ni kafokafo.
1CO 15:42 Unam besum ijekin ijia God fu e iji bu aoinva iji kiaga bu una urikva bu ijeg rekfuon. E be fu guaga bu abe mako ruvo iji surif fuon fun muturek. Regavo God fu e iji kuaga fu una urikma surif fuon iji rad fuba una muturekfuon.
1CO 15:43 Vajai nuvuon igi no iviakma kege oijo iji buka tavan uruvana juf kege no vajuov. Ijefuon maiji vajai iji buka ma daro bakido bu iji adam kege no vajuoko noka aoiv. Regavo God fu zuarunam ijia kuoga no una urikva iji vajat nuvuon buka darokin rekfuon.
1CO 15:44 Ijefuon vajai surif nuvuon bu aoivo iji bum vajaima ijesugin. Regavo God fu no kuoga no una urikva iji noka vajai surif maiji ke fu maraduoga no Godna ar varur ijia karik. Ijefuon maiji no vierafega vajat igi no iviakma kege oijo iji fum moik igefuon vajat. Regavo rad kaven nuvuon bu vajai ma iji kege una ar varur ijia karivakfuon.
1CO 15:45 Regavo madu Godon buk akaij ijia bu ijeg isoime kuai, God fu e amur fu e Adam amareme kuamga fu uri ema rene oiru foiknum fi vain. Regavo una Kurais e iji fu rad ema igegrene ruainma iji fu Godon Kaven iji abe fi ruain. Ijefuon eraneb bu Kuraison e renva iji Kurais fu Kaven fuon abe unafdiamo ijefuon bum karivakfuon.
1CO 15:46 Ijefuon iviakma no moik igefuon vajai surif iji kege oij. Revo rad God fuson vajai surif nuvuon no kege varur ijia funa karikfuon iji kege no vajuok.
1CO 15:47 God fu amur e Adam kuavo iji fu moik igefuon kuotuvuat ijia abe amaren gavo una Kurais e iji rad ruainma iji fu varur gufia ari ruain.
1CO 15:48 Ijegvo ema fok vajai surif nuvuon noka e Adamon vajat iji bu moik kuotuvuat ijia abe amarenva ijekin. Unam besum ijegvo erar fu Kuraisk besum kamainma iji vajai fuon iji fuka Kuraison ijekin. Ijefuon e iji fun aresredo fu varur ijia vakfuon.
1CO 15:49 Ijefuon iviakma vajai surif igi no kege oijo iji no e Adamon vajat ijekin iji kege oij. Regavo rad God fu vajai surif nuvuon no kege ar varur ijia karikfuon iji kege vajuok. Vajai surif iji no rad kekfuon iji bu Kuraison surif ijekin rekfuon.
1CO 15:50 Regavo efnun vuak igi na ma kuardiav vajai surif bu moik kuotuvuat igia kege amardiainva iji bu God ar fu samuamo ijia vakva bakin. Vajai surif igi no iviakma kege oijo iji rad buka muturek. Ijefuon vajai iji buba aresredo buba rad ijia kari vakfuon.
1CO 15:51 Regavo vuak sauivkin igi na kuardiakrejo iji God fuba ur e kafo kuardiain. Ijefuon ni mukorigia vuak sauivkin igi faif. E roin eraneb no Kurais ma vierafejo iji noba aoik. Regavo no vek nivek karinva ijia Kurais fu una roga nom migegare karoime una vajai surif nuvuon iviamkor iji kekfuon.
1CO 15:52 Ire iji fu rekma iji fuka migegare igia ire varur igi fu karamo ijeg rek. Regavo be iji fum ni iji no nisuim iravo ijeg rek. Revo tavan ivuank ijia anera iji bu veg abe foiga e fok no veg ijia faime vierafero tavan iji no moikigia oijo iji fun ijia barmoro no ijeg vierafek. Regavo veg iji fu urino ijia e iji eraneb bu ma vierafene bu aoinva iji bu migegare una vajai surif iviamkor buon kege urikfuon. Regavo e iji no nivek karinva iji no madu no migegare uri vajai surif nuvuon iviamkor kek.
1CO 15:53 Regavo iviakma no moik igefuon vajai surif iji kege oij gavo rad bu muturek. Regavo vajai surif igi no iviakma kege oijo iji bu rad bu una karoik. Bu karoiga no surif ma iji kekva iji no aresredo no ar varur ijia tavan bog ijia karivak.
1CO 15:54 Ijegvo ire fok bu rekva iji vuak irerag bu buk akaij ijia isoinva iji fuka ijekma riarek. Regavo vuak iji bu buk akaij ijia isoinva iji fu ijeg kuai, God fun e ani fuon mukorigia asidiame unam aoivo iji fuka abe uinitukno kuain.
1CO 15:55 Regavo madu rad ire fok fun riaremo ijia e fok bun uri vuak igi fu buk akaij ijia kuainma ijin kuaikfuon. Regavo vuak iji fu ijeg kuai, No aoivo ijefuon daro iji non mukorigia asin revo madu aoivo iji rad fuba una no vajai fian kafo vajuokno kuaik.
1CO 15:56 Ijefuon maiji fu ise ijar unam aoivo iji abe no muom. Regavo iviakma ise iji fun Jesu Kuraisri abe kanama fun baren. Revo amur ise nuvuon no reoijo iji fu e Mosison akaij ijar kege samafrega no giav. Regavo tavan rad fu akaij ijekin ijar ise no renva ijefuon una no kege kot rekma bakin.
1CO 15:57 Ijefuon iviakma noka Godon bomana oimarek. Ijefuon maiji ire fok rad bu daro bado bu izeg una no samuagduokva bakin. Ijefuon maiji E Bomana nuvuon Jesu Kurais fu ise nuvuon ijefuon guain. Ijefuon fur no karaunuome samuagduoga no unam ma ijia karivakfuon.
1CO 15:58 Ijefuon efnun e-e nika giriesame kevaf. Jab zazaiga e roin bu unam kafokafo ijia uri jon izeg ja ma vierafejo iji kam iserdiak. Regavo nika E Bomana ijefuon ik ijin tavan uruvana rene ifejdiame vaf. Ijefuon maiji jan vierafe ire kafokafo ja fuifuon reoijo iji jam vajaifian abe reoijo bakin.
1CO 16:1 Regavo madu na mon ja kare afuime Godon e iji bu ai Judia karinva iji nijiakfuon na ijin kuardiakno ni faif. Vuak igi nan amur Godon e iji bu ai Garesia sos ijia afuivo iji kuardiain ijefuon na vierafe jak ja unam besum ijeg rekfuon.
1CO 16:2 Ijefuon na vierafe e besubesum ja tavan Sade fok jaka mon jon ja ik kafokafo rene karvo iji kafo atame garer nakfuon. Revo mon iji ja atame navo iji jab una kege ire kafokafo ijia korek. Regavo nika kege mukorigia nainkin tavan iji na ar jon ijia vuakva jaba una madu uri mon iji ja ke e roin vajiakfuon iji nisaikfuon.
1CO 16:3 Regavo madu na vierafe jaka koikjo e ma kafo jar giainva iji kege nainkin bur mon jon ja afuivo iji kege mai Jerusarem ijia vakfuon. Regavo na vuakva na fas kafo isoime e iji ja kenva iji vajiaga bur mon ijekma kege vainki Godon e iji bu ai Jerusarem mai ijia karinva iji nijaidiak. Bu nijaidiaga bu vierafero e iji bu jon fateroin ijia mon iji kege vainvaro bu ijeg vierafek.
1CO 16:4 Regavo madu nak na Jerusarem vakafie vierafekva iji na vierafe fun mardo e iji bu nana vakfuon.
1CO 16:5 Regavo na moik Mesedonia vakva na vierafe nam naki sibank ijia fine na ijar uri jon vuakfuon.
1CO 16:6 Na vuakva na vierafe naba gain kafu na vuik ga ba asam sibank na jana ijia fik. Ijefuon maiji na vierafe na ijia fine tavan iji ve dame buibur bomana ufimo iji samuaga fu barekma nason ijia uri vak.
1CO 16:7 Regavo nam ijia tavan ivuankbe ja giakafie vuako iji naka ma isediem. Ijefuon fun E Bomana ijar fuon vierafenma ijia fu unam nun amarekma iji na vierafe na tavan sibank jaoijor ijia jana fikfuon.
1CO 16:8 Regavo na vierafe na igia ai Efisis fivake tavan Fentikos bu iro ijo iji abekfuon. Ijefuon maiji e ka ma uruvana bu Godon vuak iji faikuai samuame karin ijefuon na vierafe na vuak ma iji abe bu kuardiak. Regavo e ka ma uruvana fateroin bu una vuak ma iji na abe kuaikrejo iji bu giriesame bijukuai vierafej.
1CO 16:10 Regavo e Timoti fu ijia ja giak vuakma na vierafe jaka fu mukorigia oimardaknum afega fu jana ijia fikfuon. Ijefuon maiji jan vierafenva ijin Timoti fuka e be na E Bomana ijefuon ik reoijo ijeg ik reoin.
1CO 16:11 Ijefuon jab arega e kafo bu fu nese game ba agoik. Regavo nika mukorigia ifejdame samuainki fu una ruakma fu oimarknum una igia ruakfuon. Regavo na vierafe fu naka igia e iji bu funa ik rekuai vuainva ijiena besum biediakafie samuagdiame fij.
1CO 16:12 Regavo madu ja e Aforas e iji nona ik besum reoino iji fu vez ja giak vuakfuon ja ijefuon kuardien. Na fu naka soisoime kuaga fu e roin bu ik reoijo ijiena besum vuakro na iji vierafene kuain. Regavo fu iviakma jon vuakfuon iji fu uzam. Regavo na vierafe fu rad tavan ma be abekma fuson ijia ja giak vuakfuon.
1CO 16:13 Regavo efnun igia fai tavan bog nika koikjo giriesame samuanaminki e kafo buba ja biesia aferdiame una unam ise ijia vakfuon. Regavo jon ja Kurais ma vierafejo iji nika vek darokma vierafeknum vo nika uri e darokin igegrene ire kafokafo jab giame juk. Regavo madu jab arega ire ise kafokafo bu uri daro abene ja samuagdiak.
1CO 16:14 Ijegvo ire kafokafo ja reokva nika unam ja God oijmaknum vo e fok oijmiakfuon ijesugin mimatame reof.
1CO 16:15 E iji bu ur moik Akaia guf ijia Jesu Kurais ma vierafenva iji fu e Stefanas ga aganfuon ijieb ma vierafen. Regavo madu bu tavan uruvana buka Godon e ijin unam kafokafo ijia ifejdiaoin. Ijefuon na ja soisoime kuardiavo ni jasik una e ijekin iji kega bur ejon mamkanuk rene ja samuagdiaf. Regavo madu na vierafega jaka e kafo eraneb jana ik ijekin iji ifejdiame reoijo iji mukorigia agordiaknum buna besum ik iji rene barekfuon.
1CO 16:17 Regavo iviakma e Stefanas ga Fotunatas ga Akaikas iji bun igia Efisis na giakuai ruainva ijefuon naka bomana oimaren. Ijefuon maiji jar ba koikjo igia ruainva ijefuon vuak jon bur abe nun ruain.
1CO 16:18 Regavo bu ruainva iji buka izeg bu ja ifejdiava ja oimadiainva ijeg bu madu kaven ijia nak ifejieva naka bomana oimadien. Ijefuon ja uri e ijekin ijin mukorigia agordiaknum vo vuak buon mukoi faikva iji fuka marek.
1CO 16:19 Regavo igia fai e Godon agan bu ai Esia guf ijia karinva iji bu ja anadiav. Regavo Akuira ko Frisira buk madu bu E Bomana ijefuon if ijia kukma ja anadiav. Regavo madu e iji bu ar buon ijia besum afuime God aroivo iji buk ja anadiav.
1CO 16:20 Regavo madu e iji bu jana besum Kurais ma vierafejo igia karinva iji buk madu ja anadiav. Regavo ja oine jon bienamikva nika mukorigia sano guria anainamif.
1CO 16:21 Regavo fas igi nan For nar koiknu imut nun igia isoime ja anadiav.
1CO 16:22 Regavo erar fuba E Bomana iji oijmakma iji na vierafe ire ise be fuka fuon rekfuon. Regavo madu na vierafe E Bomana nuvuon fu migegare una ruakfuon.
1CO 16:23 Regavo na sirimamega E Bomana Jesu fuka tavan bog jon ma rediakfuon.
1CO 16:24 Na Jesu Kuraison if ijia ja oijmiame anadiav.
2CO 1:1 Na For e iji God fu fuon vierafenma ijia kiega na Jesu Kuraison afasor rene ikrejo iji nar e Timoti uviainuvuon ijek fas igi isoime ja nijiav. Fas igi no isoime e God ma vierafejo bu afuime ai Korint guf ijia karinva ijiga Godon e fok ai Gris guf ijia karinva iji nijiav.
2CO 1:2 No vierafe God Asoinuvuon ijiga E Bomana Jesu Kurais bu tavan bog ja ma rediaknum mukorigia samuagdiaga ja afuime kariokfuon.
2CO 1:3 Na vierafe noka God nuvuon E Bomana Jesu Kuraison Asoij iji fu e mardiaknum oijmiame ifejdiamo ijefuon oimarek. Ijefuon maiji fur e iji bu oifian abeknum afikin biediavo iji tavan bog ifejdiam.
2CO 1:4 Fu ijeg tavan bog ifejduomo ijefuon nosik unam besum ijeg una e iji oifian abejo iji mukorigia tavan bog ifejdiakfuon.
2CO 1:5 No vierafe noka izeg Jesu fu vajai fian abenma no madu noka ijeg vajai fian abekfuon. Regavo madu Jesu fu vajai fian abega God fu ifejdainma ijeg God fu una Jesuon duadok ijia no dasumduome mukorigia ifejduom.
2CO 1:6 Regavo tavan iji no Godon vuak abe kuaimoijo iji noka vajai fian abej. Regavo vuak iji no abe kuaimoijo iji fun ja ifejdiame karauniamo ijefuon noka bomana oimarev. Regavo madu izeg no vajai fian abeko God fu ifejduomo ijeg nosik una ja ifejdiakfuon. No ja ifejdiaga ja giriesame irenki ja kabuaikabuaikin unam vajai fian abejo kafo bu jon roko ja iji biediakfuon.
2CO 1:7 Regavo kaifnun no ma vierafe ja uria giriesame karij. Regavo no vierafe unam izeg no vajai fian abejo iji jak jaka ijeg vajai fian abej. Regavo madu no vierafe izeg God fu no uruvana ifejduomo ijeg fu madu ja ifejdiam.
2CO 1:8 Regavo kaifnun igia faif. No ai Esia ijia afikin iji no biediainva iji buka mamkanuk no izeg giriesame asusekfuon bakin no ijin biediain. No afikin iji biediame noka uruvana vajai fian abeknum vierafero non aoikro no ijeg vierafen. Regavo no vierafe noba aoikfuon ijefuon maiji no vierafe God fu e aoivo iji fu kiaga bu una urij. Regavo ire iji bu nuvuon rejo iji no daro nuvuon ijia biduakva bakin. Regavo noka Godon daro ijia biduakuai bu ijefuon nuvuon ren.
2CO 1:10 Regavo God fuka unam ni kafokafo no aoikfuon fu ijia karaunuin. Regavo madu fur tavan bog no karaunuomo ijefuon nok fu ma vierafej. Regavo jaka e uruvana no ifejduome Godon sirimamejo ijefuon God fu tavan bog no karaunuok. Regavo fu no mukorigia ifejduomo ijefuon e uruvana bu una nuvuifuon Godon bomana oimarkfuon.
2CO 1:12 No ire ijiebuon no bomana aroikaravo ijefuon no oinuvuon ijekma noka ma kuardiav. Regavo ik anej ijia ire igi no kuardiakrejo iji fu Godri ifejduomga ire fok no moikigia reoknum vo jon reoinva iji noka ma vierafeknum reoin. Regavo iji no renva iji no e moikigia oijo ijiebuon vierafenva ijia renva bakin. Revo ire fok no reoinva iji fun Godri no ma reduome daro muokoga no ire ijin reoin.
2CO 1:13 Regavo vuak igi no isoinva iji no vuak sauivkin iji isoivo bakin revo noka vuak iji ja samakaf dame faikfuon ijin isoiv. Ijefuon na vierafe ja izeg no ma afasor renva iji jan sibank fain revo rad ja vuak nuvuon fok faime vierafekfuon. Ja tavan afikin iji E Bomana Jesu Kurais fu una roko ijia ja vuak ma iji no nijaidiainva ijefuon nuvuon oimarme aroikarak. Regavo madu no izeg ja vuak no nijaidiavo ja faime jajiavo ijefuon noka jon oimarknum aroikarak.
2CO 1:15 Na ijeg vierafenva ijefuon unam iji na igeg amaren. Na Mesedonia vako ijia na ja giame vainki una roko ijia na madu una giame ruakro na ijeg amaren. Regavo unam ijeg na rejo ijia ja na tavan nokarok (2) giekva ja una oimarknum daro abekfuon. Na ja giaga jar ifejdiega na unam nun amarme ai Judia vak.
2CO 1:17 Regavo ja vierafega unam iji naba vierafeknum amaren? Regavo be iji jakafu vierafero na ema moikigia oijo ijiebuon vierafenva ijia jame amaren. Ijefuon maiji e moikigia oijo bu ire kafo rekuai kuaivo iji bum ir ijia kuai keno kuaiv revo bu oibuon ijia bu rekuai vierafejo bakin.
2CO 1:18 Regavo God fu ire kafo rekafa kuaimon iji fu aremo bakin gavo fuka ren. Ijegvo nak na unam besum ijeg irerag na kuaivo iji naka rej.
2CO 1:19 Regavo na Sairas ko Timotina vuak iji no Godon Farif Jesu Kuraison kuardiainva iji no kufui kuardiainva bakin. Ijefuon Jesu Kurais irerag fu rekafa kuaimon iji fu aremo bakin gavo fuka ren.
2CO 1:20 Regavo God vuak fok fu rekro kuainma iji fun Jesu Kuraisri rega vuak fu kuainma iji fuka ijekma riaren. Ijefuon no vuak iji Jesu fu God igame ire fok renma no ijefuon God dab aroikfuon.
2CO 1:21 Regavo fun Jesur irerag fu nuvuifuon renma ijia fu no kege jana besum amarduoga no e darokin rene una efuon ren. Regavo fu Kaven Akai fuon iji kege oinuvuon ijia anf igeg naduoma no e fuon redo no ire ma iji God fu kuainma no ijin kekfuon.
2CO 1:23 Regavo vuak igi na kuardiavo iji God fun gieme vierafenma ijefuon naka ma kuardiav. Na vierafe na una ai Korint vuakva naka afikin abe miak. Ijefuon na unam iji na ijia vuakfuon amarenva iji na areme una unam be amaren.
2CO 1:24 Regavo no jon izeg ja God ma vierafejo iji no nor samuagdiavo bakin ijefuon maiji no vierafe jon ja ma vierafejo ijia jaba zazaiv. Regavo ik igi no reoijo iji nom ja ifejdiaga ja oimarknum mukorigia ikrekfuon.
2CO 2:1 Regavo amur na vuainva iji naka oifian abe miain ijefuon na vierafe naba una madu vua oifian abe miakfuon. Ijefuon unam iji na ja giakafie amarenva iji nan aren.
2CO 2:2 Na ja kege oifian miakva bu eraneb na ifejdiega na una oimarkva bakin revo jan jar jonkua ifejdiega na una oimarkfuon.
2CO 2:3 Ijefuon fas igi na amur isoim nijiav. Na vierafe jan jar na oimardiekfuon ijefuon na oifian abe miakva iji fuba maren. Ijefuon na vierafe ja amur afikin fok ka mukorigia asume amarega na vuakafie na iji vierafen. Ja ijegrenki na vuakva naka oimarke vo jak jaka oimarkfuon.
2CO 2:4 Regavo fas iji na isoim nijiainva iji na asoijon igeg na bomana oifiaigma ga nidokma isoime nijiain. Regavo iji na isoim nijiainva iji na jar game oifian abekfuon na ijefuon nijiainva bakin. Regavo nam izeg na ja oijmiavo ja iji game vierafekro na iji isoime nijiain.
2CO 2:5 Regavo igia fai e be fu jana ijia fino iji fu ire ise ukakbek reno jaka oifian abej. Regavo oifian iji fu abe na mienma bakin gavo fu abe ja miain. Ijefuon naba una vuak fuon iji uruvana kuaiga fu bomana jukfuon. Ijefuon maiji vajai fian iji e uruvana ja abe fu mainva iji fun siban.
2CO 2:7 Ijefuon ni iviakma ise fuon fu renma iji game dazegavo ifejdaga fu una jana besum fioinki fuba oifian bomana abene fuon fu ma vierafeno iji arekfuon.
2CO 2:8 Ja ijegreoinki fu izeg ja vek fu oijmavo fu iji giak.
2CO 2:9 Regavo madu amur fas iji na isoim nijiainva iji na vierafe na ja biesiame giamga ja ma ire fok na kuardiavo iji jan igieme kegoijo na iji giakafie na iji isoime nijiain.
2CO 2:10 Regavo ja e befuon ise iji game arekva iji nak na ise fuon game arek. Regavo na ise kafo giame arevo iji Jesuon nifak ijia na ma game arev. Regavo iji na rejo iji na e iji God ma vierafejo ja ijia karinva iji joifuon ijeg ren.
2CO 2:11 Na ijegrekva Setan fuba no asiduome ire kafo rene no biesuok. Ijefuon maiji no unam fuon izeg fu e biesiamo iji non mukorigia game vierafen.
2CO 2:12 Na ai Troas ijia Kuraison vuak ma iji abe nijaidiakro vuakga E Bomana Jesu Kurais fu e Troas ijia karinva ijiebuon oij iji kam karoimga buka vuak nun faikuai vierafen. Regavo ijia naka ba oi dasuin. Ijefuon maiji na uviainun Taitas naba bie vo fu vuak joisina kuardien. Ijefuon na e ijia karinva iji anadiame nan una ai Mesedonia ijia vain.
2CO 2:14 Regavo noka Godon bomana oimare ijefuon maiji fun Jesur ise ijefuon daro iji fun asin. Ijefuon fu tavan bog daro fuon ijia e iji no fuifuon ikrejo iji ifejduoko no Jesuon vuak ma iji abe ar iror ijia nijaidiaoko e bu vuak iji faiv. Regavo vuak iji no abe kuardiavo iji fuka ire be udi mukor urino igeg udi uri ar iror ijia vak.
2CO 2:15 Ijefuon eraneb non Kuraisna besum mazinva iji noiji no Godon nifak iji noka ire be udi mukor urino igekin. Regavo ire udi iji bu e iji zuarunam ijia vako ijia irenva ijiga e iji bu unam ma karivako unam ijia irenva ijieb udi iji fain.
2CO 2:16 Regavo e iji buba God ma vierafejo ijieb udi iji faivo buka e aoivo ijiebuon udi ijeg fain. Regavo una e iji bu God ma vierafejo ijieb faivo iji buka udi mukor bu iji fain. Regavo vuak igi na kuardiava ja fainva iji erar fu aresredo fu Godon vuak fu udi mukor urino igekin iji abe e fok nijaidiakfuon?
2CO 2:17 No vierafe non aresren ijefuon maiji fun Godri no kema no e Jesuon ikrejo iji ren. Ijefuon noka mukorigia Godon vuak ma iji abe Godon nifak ijia e fok nijaidiav. Regavo e uruvana roin buka Godon vuak iji kege e uruvana nijaidiame mon uruvana karkuai vierafen gavo noiji no ijegrejo bakin.
2CO 3:1 Ja vierafega nobe una anerene nuvuon aroikarav? Regavo madu ja vierafe nobe e kafo kiaga bu ik nuvuon no mukorigia reoijo ijefuon fas isoime ja nijiak? Regavo madu ja vierafe nobe ja kiaga jar nuvuisina ik no reoijo ijefuon fas isoime e roin nijiak?
2CO 3:2 No fas ijeg noba vierafen revo jaiji jaka fas nuvuon igekin. Ja unam ise kafokafo ja reoijo iji jan nuigafiame una unam ma ijesugin reoij. Ijefuon e uruvana bu unam ma iji ja kegoijo ijia giame vierafero no ik mukor iji jon renvaro bu ijeg vierafek.
2CO 3:3 Ijefuon unam ma iji jon ja kegoijo ijia jaiji ja Kuraisri koikfuon fas isoinma igekin. Usuibe God fu mun azan ijia akaij iji isoime ke e Mosis vajain. Regavo iviakma Kurais fuba safir abe fefa azan ijia isoin revo fu God tavan bog ijia fine vako ijefuon Kaven Akai iji abe oijon ijia vuak fuon iji isoin.
2CO 3:4 No vuak ijeg kuaivo ijefuon maiji no ma vierafega fun Godri no kega no afasor renva ijefuon ik no rejo iji fu oimarem.
2CO 3:5 Regavo ik igi no rejo iji no daro nuvuon ijia rejo kuaikva iji fuka ma bakin. Regavo ik fok fun Godri daro muome ifejduoko no ik fuon iji rej.
2CO 3:6 Regavo madu fun fur no ifejduoko no unam iviamkor iji God fu e karauniamo no ijin nijaidiav. Regavo unam usuikor Mosison akaij iji igame javo iji fu e karauniamo bakin. Regavo fuka e aferdiaga bu unam iji bu aoime zuarunam vako ijia vak. Regavo unam iviamkor iji tavan bog ijia ma karivako iji fu Kaven Akai ijar kege no vajuom.
2CO 3:7 Godon akai fuon usuikor iji fu mun fat ijia isoime Mosis vajama fu Godon sanainma ijekma kege ruain. Regavo sanainma iji fuka Mosison uikinik ijia abaikirame ire bivar bu abe tavan ijia karavo igeg iramo ijefuon e Isrerko buba uruvana nikajain. Regavo rad Mosison uikinik ijia sanainma iji fu migegare una baren. Regavo una unam iviamkor ijia Godon Kaven fu ikreno iji fuka ma bomana sanain ijefuon fuka akai usuikor ijefuon sanainma iji fuka ma asin.
2CO 3:9 Akai usuikor iji fu e kege vajai fian vajiavo iji fu Godon sanainma ijekma ruain. Regavo una unam iviamkor iji fu e kege maturaiga bu una Godon e rejo iji fuka akai usuikor ijefuon sanainma iji fu ma asin. Ijefuon akai usuikor iji fun mukorigia zubit ren.
2CO 3:11 Akai usuikor iji fum tavan ivuankbe Godon sanainma ijekma igia saname fun una baren. Regavo unam iviamkor iji fu tavan bog ijia navak ijefuon fuon sanainma ijar fuka ma bomanak.
2CO 3:12 Regavo e Mosis fu ga uikinik fuon iji fu sanainma iji fun una baremga fu uri ugon abe uikinik fuon iji okurain. Ijefuon maiji fu vierafe e Isrerko buba gakro fu ijefuon ijeg ren. Regavo iviakma non ma vierafe Godon unam iviamkor iji fu e karauniamo iji fuka barekfuon bakin. Ijefuon noka vuak fuon ijin tavan uruvana abe darokma nijaidiaoij.
2CO 3:14 Mosis fu uikinik fuon ijesugin okurainma bakin gavo God fu madu e Isrerkobuon vierafejo iji fuka ma bijukuriain. Bu ijeg karine ruaido bu iviakma buk akai usuikor iji da vo vuak ijefuon maiji fuba samafren. Regavo iviakma e iji bu oi karoime una Kurais fuonkua ma vierafejo fur ire iji fu vierafe buon bijukuriamo iji ke vak.
2CO 3:15 Regavo madu eraneb bu iviakma Mosison akaij iji davo ire iji fu uria vuak ma iji okuram ijefuon vuak ma iji bu mukoi faivo bakin.
2CO 3:16 Regavo erar fu ise fuon iji nuigafiame oi dakaroime una E Bomana ijefuon ruakma fur oifuon iji fuba ma vierafeoino iji fu ugon igeg okurainma iji abe vak.
2CO 3:17 Regavo E Bomana iji na kuaivo iji fu Godon Kaven Akai besum ijin. Ijefuon erar fu Kaven Akai iji abega fu fusik fino e iji fu ire iji bu usuibe fu samuavo iji fun uniakome ruain.
2CO 3:18 Regavo noiji no oinuvuon iji non karoime una E Bomana iji vajain ijefuon ire iji fu oinuvuon iji okuruinma iji fun baren. Ijefuon e uruvana bun unam izeg no karioijo ijia God fu e izekin iji bun samakaf gav. Ijefuon fun Kaven Akai iji oinuvuon ijia ikreno ijar no kege una ka E Bomana iji aikin ren. Fur no kege una fu aikin ren ijefuon e uruvana bu nakikmazak nuvuon no karioijo ijia bu God fu e izekin bu iji giav.
2CO 4:1 Ijefuon fun Godri fuon izeg fu no oijmuome ma reduomo ijia fu ik igi no vuak fuon ma iji e nijaidiakfuon ijin vajuin. Ijefuon no unam kafokafo no biediame vajai fian abej revo noka magaga vek ikrej.
2CO 4:2 No e iji bu unam ise jufdiavo iji bu sauime kegoijo iji non nuigafiain ijefuon no una ijegreoijo bakin. Ijefuon noba una e biesiaknum Godon vuak iji kege karoime nuvuon vierafenva ijia e nijaidiak. Regavo madu no Godon nifak ijia vuak ma iji samakaf nijaidiavo ijia e uruvana buka no guome oimarev.
2CO 4:3 E iji buba oi karoime una Godon ruainva iji buka unam iji zuarunam vakfuon ijia irev. Regavo madu Godon vuak ma iji no nijaidiavo iji fu nigen buon ijia ba samafrediainma ijefuon buka ba vierafej.
2CO 4:4 Ijefuon maiji fun Setan e iji moik igefuon god ijar bu kam ada bijukuriain. Ijefuon bu Godon vuak ma iji bu faiv revo buka ba ma vierafeknum ga unam fuon ma iji ka mukor ijin gav. Fu kaven ise ijar nizuriaidiainma ijefuon bu Kurais fu e izekin ijefuon anej ma iji buka ba gav. Jesu fu God aikin iji Setan fun vierafenma ijefuon fu e iji bu Jesu mukorigia game vierafekfuon iji fuka uzamo ijefuon fu vierafe buon iji fuka mukorigia bijukuriam.
2CO 4:5 Regavo vuak igi no nijaidiavo iji no if nuvuon kam ajievo bakin. Regavo noka Jesu Kurais fu E Bomana renma no vuak ijin abe nijaidiaoij. Regavo madu no izeg no Jesu Kuraison if ijia joifuon ikreoijo no iji nijaidiaoij.
2CO 4:6 Regavo Godri ik amur ijia vuak be ijeg kuai, Sanainma nun ijar ar iji fuka nakinma ijia sanakno kuain. Ijefuon God besum ijar vuak fuon ma iji abe oinuvuon ijia abededo fu tavan bog ijia na vak. Revo iji fu ijegreno iji fu no ifejduoga no fu e izekin iji no samakaf game vierafekuai fu iji ijeg ren. Fu sanainma fuon ijia fu e izekin iji fu Kuraison uikinik ijia no nijaiduoma non gain.
2CO 4:7 God fu vuak fuon ma iji fu kege ema igi noka daro bakin iji oi nuvuon ijia nain. Ijefuon e uruvana bu tavan iji no Godon vuak ma iji abe e nijaidiavo ijia no ire kafokafo rejo bu ijia guome vierafero daro iji fu emabuon roko bagavo fu Godon rokoro bu ijeg vierafej.
2CO 4:8 Tavan uruvana e buka no kam vajai fian vajuome afikin uruvana kege no vajuov. Regavo unam uruvana bu nuvuon renva iji buba rareme ik no rejo ijin bijukuruin. No afikin iji bu irerafuon nuvuon rejo iji noba mukoi vierafen revo noba zazaime ijia aren.
2CO 4:9 Regavo tavan bog e ani nuvuon buka unam ise kafokafo nuvuon rega noka vajai fian abej. Regavo God nuvuon iji no fuka ba unuokoin. Fu tavan bog fuka vek nona ijefuon bu kanuovo iji noba aoiv.
2CO 4:10 Tavan iji no Godon vuak e nijaidiaoijo ijia no vierafero bu izeg Jesu bu kanava fu guainma ijeg buka kanuoga no aoikro no ijeg vierafen. Regavo ijeg no vajai fian abeoijo ijia noba aoin gavo noka vek karij. Ijefuon e bu ijia guovo bu vierafero Jesu fu oinuvuon ijia fino ijefuon fur no mafarduomoro bu ijeg vierafej.
2CO 4:11 Regavo noiji no Jesuon ikrejo ijefuon nakikmazak noka unam iji no migegare aoikfuon ijia karioij. No ijegreoijo ijia e uruvana bu vajai nuvuon igi bu aoivo ijia Jesuon daro ijiga unam fuon ma iji fu reno bu ijia giame vierafero God fu vek no samuagduomoro bu ijeg vierafek.
2CO 4:12 Ijefuon igia fai no ijegreoijo ijefuon e ani nuvuon buka kanuo no aoikuai bu ijeg vierafen. Regavo Kuraison vuak ma iji jan jar mukoi faiv. Ijefuon jan jar unam iji tavan bog ijia ma karivako iji jan jar rej.
2CO 4:13 Regavo nuvuon izeg no ma vierafejo iji bun usuibe buk Sams ijia isoime kuai, Na ma vierafejo ijefuon na iji kuaivno kuain. Ijefuon noiji no Godon vuak iji no ma vierafejo ijefuon no darokma vuak fuon iji abe kuaimoij.
2CO 4:14 Regavo no vierafega God fu E Bomana Jesu keunama fu una urinma ijeg fu madu no karaunuoga no funa una urik. Fu ijegreare fu afeduoga no jana besum nifak fuon ijia irek.
2CO 4:15 Regavo madu ire fok no rene vajai fian abejo iji noka joifuon rej. No ijegrenki God fu fuon izeg fu e ma rediamo ijia fu e uruvana ifejdiaga bu oi karoime una efuon rek. Bu una efuon rejknum ga una fuon sirimamene oimarek.
2CO 4:16 Regavo e uruvana buka una oi karoime God ma vierafejo ijefuon no ik iji no rejo iji noba arek. Regavo madu no vajai nuvuon fun eoraduome zazatuom revo Godon Kaven iji fu oinuvuon ijia fino ijar tavan bog kaven nuvuon iji kege una e iviamkor igeg amarduom.
2CO 4:17 Regavo iviakma igi no afikin abene vajai fian abejo iji fum tavan ivuankbe ijesugin. Regavo bun vajai fian ijieb ifejduoga no Godon ar sanainma ijia tavan bog ijia karivakfuon. Fu ar iji sanainma mukor ijar vajai fian igi no iviakma abejo iji fuka ma asin.
2CO 4:18 Ijefuon noba oinuvuon ijia uri ire iji no ni nuvuon ijia iviakma giavo ijia biduame karikuai vierafekfuon. Regavo noka ire iji no giavo bakin ijia biduame karikfuon ijin vierafek. Ijefuon maiji ire iji no iviakma giavo iji bu migegare barkfuon. Regavo ire iji no giavo bakin iji buka tavan bog ijia naoime vak ijefuon no ijia biduame karikfuon iji vierafek.
2CO 5:1 Ijefuon no vajai nuvuon igi iviakma moikigia no karijo iji bu kanuoga no aoikva fu Godri una amarduok. Fur vajai nuvuon iji una amarduoga no vajat iviamkor ma iji varur gufia fu imut fuon ijia amardiainma no iji kekfuon. Regavo vajat iji fuka tavan bog ijia fivakfuon.
2CO 5:2 Regavo iviakma moikigia no karijo iji vajai nuvuon buka isediame aimiain. Ijefuon no vierafe no Godon ar varur ijia vaga fu ugon no savo ijeg vajai nuvuon iviamkor iji kege samduokfuon.
2CO 5:3 No ijia vaga fu vajai iviamkor iji kege samduokma ijia kaven nuvuon buba detabar ok gavo bu una ugon sainva igeg ok.
2CO 5:4 Regavo vajai nuvuon iji no moikigia karioijo iji noka afikin abene noka karine aduiv. No vajai nuvuon iji bu aoikfuon iji noba bomana vierafej. Ijefuon iviakma no vek moikigia karijo iji noka varur gufefuon vajat iji ke same karikuai no ijin vierafen. No ijegrenki vajai nuvuon iji buka una iviamkor rene tavan bog bu ijeg karivakfuon.
2CO 5:5 Regavo e iji unam iji kanafuinma iji fun Godri fuonkua ren. Fun Godri ijeg amarenma ijefuon fu Kaven Akai iji kege oinuvuon ijia anf nain. Ijefuon no ijia giame ma vierafero God vajai iviamkor fu vajuokno kuinma iji fu kege vajuokro no ijeg vierafek.
2CO 5:6 No ijeg vierafejo ijefuon noka tavan uruvana giriesav. Regavo vajai nuvuon iji no iviakma kege moikigia karijo ijia noka E Bomana ijiena karijo bakin.
2CO 5:7 Regavo ire iji God fu nuvuon rekfuon iji no ni nuvuon ijia giavo bakin revo nom ire iji ma vierafeknum karioij.
2CO 5:8 No ma vierafejo ijefuon no aoikfuon iji no juvo bakin. Ijefuon no vierafe no ar moikigi areme una mai ma ijia E Bomana ijiena karikfuon no ijin ma vierafen.
2CO 5:9 No moikigia ga varur ijia karikfuon iji no bomana vierafejo bakin. Regavo ire iji no bomana vierafejo iji no irerag God fu oimaikfuon nom ijesugin reokuai no iji vierafen.
2CO 5:10 Ijefuon maiji tavan ijia e fok no Jesu Kuraison nifak ijia iregakva fu ire fok no renva iji kege mazim giakfuon. Rene Jesu fu e besubesum fuon izeg fu moikigia fioknum mukoi reoin vo fu isema kegoinma fu ijia giaknum kam vajai fian vajiaknum ga karauniak.
2CO 5:11 Ijefuon no vierafe e fok bu Jesuon nifak ijia irekva buka bomana jukfuon. Ijefuon noka e fok soisoiga bu unam ma ijesugin kegokfuon no iji vierafen. God fu ire igi no reoijo iji fun vierafen ga madu jak jan unam izeg no kegoijo iji jan guome vierafen.
2CO 5:12 No koiknuvuon anerene aroikarame una if nuvuon iji kam ajievo bakin revo nom unam ma iji nuvuon iji kege ja nijaidiav. Ijefuon jasik una e iji bu buon ganamime aroikaragavo oibuon buka ma vierafejo bakin ijin samakaf nijaidiame kuardiakfuon. Revo madu ja unam ma iji izeg no karioijo ijin bu nijaidiakfuon.
2CO 5:13 Regavo ja vierafero vuak igi na kuardiavo iji nakafu na nigen iserenvaro ja iji vierafen? Regavo vuak iji nam Godon vuak ijin kuardiav. Ijefuon na nigen iserenva bakin gavo na ja ifejdiakafie na ijefuon kuaiv.
2CO 5:14 Jesuon oijmiamo ijar no kam ijegrega no vuak fuon iji abe e fok nijaidiaoij. Ijefuon maiji no vierafe fun e besum ijar nuvuifuon guame e fok no karaunuin. Ijefuon e fok no unam nuvuon usuikor no kegoijo iji bun Jesuna besum aoinva igekin.
2CO 5:15 Jesu fu e fok ijiebuon guame madu una urin. Ijefuon eraneb bu nivek karinva iji buba buon vierafenva ijia keok. Regavo buka Jesuon unam iji fu oimaikfuon ijia jame reoknum karikfuon.
2CO 5:16 Ijefuon e iji no God ma vierafejo iji noba e moik igeko bu e uikinik ijia giame vierafejo ijeg noba rekfuon. No amur Jesu Kurais no dab ijeg ema igeg game vierafen revo iviakma no ma vierafega fuka ma E Bomana.
2CO 5:17 Regavo erar fu oi dakaroime Jesu ma vierafene una efuon reno iji fuka e iviamkor ren. Fu unam fuon usuikor iji fun abe akozen gavo iviakma fun una unam iviamkor iji anerene reoin.
2CO 5:18 Ire fok fu Godri Jesuon duadok ijia no e ani fuon iji fun kege una efuon ren. Ijefuon fu ik iji no vajuido no e ani fuon fok aferdiame una efuon rek.
2CO 5:19 Regavo vuak iji no abe e fok kuardiakfuon iji no Jesu Kurais fu e moikigia oijo ijiebuon ise iji abe kuros ijia guainma no iji kuardiakfuon. Ijefuon eraneb bu iviakma oi karoime una God ma vierafejo iji fu ise buon giame areknum karauniaga bu una efuon rej. Regavo iviakma no una funa besum renva ijefuon fu no kuoga no vuak iji abe e kuardiaoij.
2CO 5:20 No Kuraison ik rejo ijefuon no fuon fateroin ijia vuak abe kuaimoij. Regavo vuak iji no kuaimoijo iji fu Godri ir nuvuon ijia ja kuardiamo igekin. Ijefuon no Jesuon fateroin ijia ja kuardiavno ni oijon ke karoime una God ma vierafef. Ja ijegrenki ja e ani fuon rejo iji ja areme una funa afuime karikfuon.
2CO 5:21 Jesu Kurais fu ise kafo ba ren gavo Godri ise nuvuon dab una vajai fuon ijia dabedain. Fu ise nuvuon abe dabedamga fu guaido fur no kam amarduoga no marme una fu aikin rek.
2CO 6:1 Regavo efnun no jana besum Godna ikrej ijefuon no soisoime kiavno jab izeg God fu ja ifejdiame ma rediainma ijin abe nisek.
2CO 6:2 Ijefuon maiji Godon buk akaij iji bu usuibe isoinva ijia fu ijeg kuai, Na tavan iji na ja ma rediakro vierafenva ijia ja sirimamejo na iji faiv. Regavo madu tavan iji na e karauniavo ijia na ja karauniainvano kuain. Ijefuon mukorigia faif. Iviakma tavan igi fu Godon tavan iji fu ja ma rediaknum ga karauniakfuon ijin.
2CO 6:3 Regavo noba ire ise kafo rega e binob ik nuvuon igi no rejo iji kam iserduok. Buba kuaik For fu Godon ikreno revo fu unam ise iji reoinon ijefuon noba Kuraison vuak iji fu nijaiduomo iji igakno kuaik.
2CO 6:4 Regavo noka unam fok kafokafo no rejo ijia nijaidiaga bu vierafero no Godon ikrejoro bu ijeg vierafekfuon. Ijefuon noka kabuaikabuaikin unam ise kafokafo gigikin bu nuvuon roko iji biediav.
2CO 6:5 Regavo unam gigikin kafokafo iji tavan roin noka duok ba iknum ga ni naoivo bakin. Regavo madu noka nuibakin rene vuak ma iji abe nijaidiaoij. Regavo tavan roin e bu vuak nuvuon faivo buka deajidiaga bu fijuoknum ga kanuoknum kam dibur unuov.
2CO 6:6 Regavo madu unam nuvuon no karioijo iji noka mukorigia maturaime karioknum mukorigia vierafene reoij. Regavo madu noka kabuaikabuaikin karioknum e fok mardiaknum oijmanamime karioij. Revo ire fok no reoijo iji noka e fok mukorigia oijmiaknum ga madu fun Godon Kaven Akai ijar ifejduoko no ijeg reoij.
2CO 6:7 Regavo madu no Godon daro ijia vuak fuon ma iji kuaivo bu ijia guov. Regavo madu unam nuvuon no mukorigia rejo iji fu ire magu nuvuon igekin ijefuon no ijia abe Godon vuak ijefuon bijaiv. No Godon vuak ijar magu ga darer igeg kege imut maink ga aizinan ijia kuniaime uri ise iji bu nuvuon roko iji rareknum oij.
2CO 6:8 Regavo e roin bu no kam arafiruoga noka juv ga roin buka una no kam arorduov. Regavo e roin bu vuak ma iji nuvuisina kuain revo roin buka vuak ise iji nuvuisina kuaiv. Noka vuak ma iji dab kuardiav revo e roin bu kuai noka kufuimejno kuaiv.
2CO 6:9 No God nifak ijia noka e ikin kafo revo e moikigia oijo bu guo kuai noka e buzerno kuaiv. Regavo madu bu vierafero noiji noka ma aoinvaro bu ijeg vierafen revo no vek igijar e nivek karin. No buka kanuoga no vajai matan uruvana abej revo noka ba aoiv.
2CO 6:10 Regavo madu noka oifian abej revo tavan uruvana noka vek oimarev. Regavo madu noiji no e sinuom bakin revo no e uruvana non aferdiame Godon unam iviamkor ijia uniav. Regavo noka ma ire kafo bakin gavo Kaven Akai ijefuon sinuom ijia noka zaraiv.
2CO 6:11 E Korintko kaifnuvuon no ma e Godon ikrejo ijefuon no oinuvuon ijekma vuak fok noka samakaf visume kuardiain.
2CO 6:12 No izeg no ja oijmiavo iji noba aren gavo jaiji ja no oijmiavo iji jan ijia aren.
2CO 6:13 Ijefuon iviakma jaiji na afnun igeg vuak kuardiav. Jaka izeg no ja oijmiame nijaidiainva ijeg oi karoime una no mukorigia oijmuof.
2CO 6:14 Regavo efnun igia fai. Jab e iji bu God ba ma vierafejo ijiena besum bienamime ikreok. Unam iji fuka ba marenmano jab ijeg rek. Regavo ni vierafef e ma reoino ijiga ise reoino iji bu besum kamavo bakin. Regavo madu sanainma ijiga nakinma iji bu besum naoivo bakin.
2CO 6:15 Jesu Kurais ko Setan bu oi besum vierafene kegoijo bakin. E iji God ma vierafeno ijiga e God ba ma vierafeno iji tavan bog buka oi besum vierafeknum afurvejo bakin.
2CO 6:16 Regavo madu e bu sirimamejo iji bu ar besum ijia God sirimameknum ga kaven ise iji sirimamejo bakin. Ijefuon maiji God fu oinuvuon ijia fino ijefuon oinuvuon buka ar akai fuon. Regavo vuak besum iji bun usuibe Godon buk akaij ijia ijeg isoime kuai, Na enun ijiena fioknum ga buna ok. Regavo madu na God buon rekega bu enun rekno kuain.
2CO 6:17 Ijefuon E Bomana iji fu kume, E iji bu ise reoijo iji ni bu uniame usem ruafno kumen. Regavo ja unam ise kafokafo iji agordiame aibe ijia joi kafo karikva na oimarknum ja anadiame aferdiakno kuain.
2CO 6:18 Regavo madu E Bomana ka ma darokin iji fu ijeg kume, Ja ijegrekva na Asoijon rekega ja afnun rekno kumen.
2CO 7:1 Ijefuon kaifnun vuak iji fu God Asoinuvuon ijar nona fikinuvo okfuon fu iji kuarduin. Ijefuon ire ise kafo bu vajai nuvuon ga kaven nuvuon iji kam arafiriame muimiavoga iji noka migegare kege koreme maturaime okfuon. Regavo madu noka God akaime mukorigia ise fok nuigafiame naiki kariokfuon.
2CO 7:2 Regavo no e roin ise kafo buon renva bakin ga madu no e kafo bu buon ma vierafejo iji kege arafiriainva bakin. Noba ja biesiame ire jon karekuai kam arafiriainva bakin.
2CO 7:3 Regavo igi na kuardiainva iji na ja jufdiakfuon na iji kuardiainva bakin. Regavo izeg na ja oijmiavo iji nan amur kuardiava jan fain. Ijefuon no aoi vo no nivek karijo ijia fu irerag ijar no kege atame kafokafo unuokma bakin.
2CO 7:4 Na oimarvo ijefuon maiji naka afikin ma uruvana biediain gavo jar na soisoime ifejdienva ijefuon naka oinun ijia bomana oimarev.
2CO 7:5 No ai Mesedonia ijia no vuainva noka ba oi mafaime asu karin. Regavo noka vajai fian ga afikin uruvana ijia biediain. E ani nuvuon iji buka nona besum musikuai kuai vierafen. Regavo madu no vierafe jakafu vek God ma vierafej ki ja Jesu nuigafame una jon vierafenva ijia reoijo iji noba giain ijefuon noka bomana iji vierafej.
2CO 7:6 Regavo God nuvuon e oifiaigin iji dasumdiamo ijar no soisoime ifejduin. Ijefuon maiji e Taitas fu nuvuon ruainma iji noka bomana oimarev.
2CO 7:7 No fu fuonkua gavo no oimaduinma bakin gavo no madu izeg ja fu mukoi samuainva fu iji kuarduoma noka bomana oimaduin. Regavo madu fu kuarduome kuo jaka bomana na giekuai vierafenvano kuin. Revo madu jaka e iji bu ise rejo iji giame buon bomana oifian abejno kuin. Regavo tavan kafo e ani nun bu vuak nuisina kuaivo ja iji faime jaka na turamdiekuai vierafenvano kuin. Ja ijegreoijno kuinma ijefuon iviakma naka bomana oimarv.
2CO 7:8 Regavo fas iji na isoi nijiainva iji fu tavan ukakbe oifian abe miain. Ijefuon na ik iji fainva ijia na ukakbe oifiadien. Regavo iviakma naka oimaren ijefuon maiji ja fas iji dame oifian abeknum unam ise ja reoijo iji areme una God ma vierafen. God fu vierafe ja ijeg oifian abenki ja ijia vierafene una unam ise ja kegoijo iji ja arekuai fu ijefuon ijeg ren. Ijefuon fas nun iji fun ma oifian abe ja miainma bakin.
2CO 7:10 Regavo God unam iji fu oifian abe muomo iji fu ijegrega no unam ise nuvuon ijia oi karoime una fu ma vierafekro fu ijin reduom. Fu ijegrene no karaunuomo ijefuon iji fun maren. Regavo unam ise iji no oi karoime una roko iji noba una madu ijia vakfuon. Regavo e iji eraneb moik igefuon unam ise ijia jajiavo buk oifian abej. Regavo oifian iji fu izeg bu mukorigia ifejdiakma bakin. Ijefuon maiji bu Jesu ma vierafene oi karoivo bado buka unam zuarunam vako ijia vak.
2CO 7:11 Regavo oifian iji fu Godri fuon vierafenma ijia kuamga fu jon ruain ijefuon jaka ik fuon iji mukorigia rej. Regavo ja vuak iji na fas ijia isoim nijiainva iji jaka bomana vierafe ga fuka deajidiain ga bomana jufdiain. Ijefuon ja unam ise iji na fas ijia isoime kuardiainva iji jaka nuigafiame ruain. Ja ire oifiaigin iji renma ijar ja ifejdiamga ja una na oijmieme nun ruain. Ja ijegrenva ijia ja una enun revo e ise iji fu jana oino iji jan dab vajai fian mame ruain. Regavo unam jon izeg ja renva ijar nijaiduomoni jan unam jon amareme una ruain ijefuon iviakma ise kafo ja fak buka bakin.
2CO 7:12 Regavo fas iji na amur isoime nijiainva iji na e iji fu ise reoino ijiga e iji fu fine vajai fian abeno ijiebuon vuak ijesugin isoime nijiainva bakin. Regavo vuak bomana iji na vierafene abe samakaf isoime nijiainva iji ja Godon nifak ijia izeg ja no oijmuovo iji mukorigia game vierafekfuon.
2CO 7:13 No jon izeg ja no oijmuovo iji faiga fuka oimaduomga noka daromene ikreoij. Regavo no ijesugin oimarvo bakin gavo noka Taitas fu oimarknum ruainma no ijin gava fuka bomana oimaduin. E uruvana ja oifian fuon ja mukorigia ifejdainva ijefuon fu oimarknum rokga no madu noka bomana oimaduin
2CO 7:14 Regavo nan amur Taitas kuardame kuai naka bomana joifuon aroikaravno kuain. Regavo rad fu jon vuakga ja irerag na kuardiainva ijin rene oi karoime una God ma vierafeknum unam fuon ma iji ren. Regavo ni vierafe tavan bog vuak na ja kuardiavo iji na vuak ma ijesugin kuardiav. Ijefuon na Taitas fu rokga na game vierafega amur na joifuon aroikarainva iji na kufuimenva bakin revo na ga fuka maga na ijefuon aroikarain.
2CO 7:15 Fu vuakga jaka jume simariain revo ja magaga oimardaknum afen. Regavo madu jaka vuak fuon fu kuardiainma iji mukorigia igain. Ijefuon fuon izeg fu ja oijmiainma iji fuka vek iji vierafeknum oin.
2CO 7:16 Na iviakma na ja ma vierafene jon biduav ijefuon naka ma bomana oimarev.
2CO 8:1 Efnun igi no ai Mesedonia guf ijia God fu izeg e iji fu ma vierafejo bu sos ijia afuime ikrejo iji marediame ifejdiako bu ikreoijo no iji kuardiakrejo ni faif.
2CO 8:2 Buka ma vajai fian abe ruain gavo God fuka bu marediamo ijefuon buka oimarknum ikrej. Buka e sinuom bakin gavo bum efkin oimarknum mon buon iji karame no vajuin.
2CO 8:3 Regavo naka ma kuardiav e iji bum koikbuon vierafene mon ka mamkanuk karme no vajuin. Regavo bu mon buon bu ikrene abejo iji buka asime ajie gafa ijia vajuin. Regavo iji bu renva iji bu e kafob kiava bu renva bakin revo bum buon vierafenva ijia ijeg ren.
2CO 8:4 Buka no soisoime kuo bu vierafe buka e sinuom bakin ai Judia ijia karine God ma vierafejo iji ifejdiakno kuin.
2CO 8:5 Bu ijeg kuarduin revo buka irerag no vierafenva iji bu ma asiduome gafa ren. Amur iji buka koikbuon kege una isuf igeg God vajain. Areme bu kuai, God fu vierafenma iji no vuak irerag ja nijaiduinva iji igiame jajiame kegokno kuain.
2CO 8:6 Regavo unam iji mon karame e sinuom bakin iji vajiakfuon iji fu e Taitasri ai Korint ijia jana aneren. Ijefuon no soisoime kuaga fur koikfuon vua ijia unam ma iji fu anerenma iji ifejdiaga ja rene barekfuon.
2CO 8:7 Regavo jaiji ja unam kafokafo ja reoijo iji jaka mukorigia vierafeknum reoij. Jaka unam iji God ma vierafejo ijigam Godon vuak kuaivo ijigam jon izeg ja vierafene reoijo ijia jaka daro bomana aben. Regavo madu unam ma iji izeg ja oijon ijekma e ifejdiavo ijigam jon ja no oijmuovo iji buka biom mamkanuk ren. Ijefuon no madu soisoime kiavno ni unam izeg ja mon vajuinamivo ijia nika tavan bog ijeg mukorigia reof.
2CO 8:8 Regavo igia fai na akai abedeme kia jaka e ifejdiavno kiavo bakin. Regavo nam izeg e God ma vierafejo ai Mesedonia ijia karinva ijieb e ifejdiavo na iji nijaidiav. Regavo iji na renva iji nam madu jon izeg ja e oijmiavo iji kafu na ma ijin gakafie na iji vierafene ren.
2CO 8:9 Ja E Bomana nuvuon Jesu Kurais fu ma rediamo iji jan vierafen. Regavo madu igia fai. Jesu Kurais fu Godon ar iji sanainma ijia fuka ire uruvana zarain revo fu ijia areme una nuvuifuon moikigia e sinuom bakin renma iji jan vierafen. Jesu Kurais fu vierafero fu ijegrenki ja una Godon unam ma iji reoijo ijia jaka sinuom zaraikro fu ijeg ren.
2CO 8:10 Regavo na vierafe ja igi na kuardiakrejo ja ijeg rekfuon. Ja juaivasia barenma ijia jar e ifejdiakuai vierafe ga madu jar amur anerene mon kanafuin. Ijefuon ni mon iji ja kanafuinva iji buin iji kar baref. Ijefuon ni uri vuak iji ja amur kuai no e ifejdiakno kuainva ijin mimatame mon iji ja nainva iji kege ref.
2CO 8:12 Ja ire kafo e vajiakuai vierafekva ni vajiaga God fu oimarek. Regavo ja ire kafo baga iji ni aref. Ijefuon maiji God fun ire iji ja nainva fu ijesugin vierafen. Regavo una ire kafo jaba nainva iji fu bomana vierafeno bakin.
2CO 8:13 No vierafe e iji bu ire iji ja vajiainva iji kege bu una e sinuom zaraike jaiji ja sinuom bakin rekfuon iji noba ijeg vierafen. Regavo no vierafe irerag fok ja rejo iji jaka buna besum afuim kariokuai no iji vierafen.
2CO 8:14 Ja iviakma sinuom iji ja zarainva ja ijia e foir iji ifejdiakfuon iji fuka siban aresren. Ja ijeg ifejdiaikin tavan rad bu ire kafo zaraikva busik una ire kafo ja vierafekva bur ifejdiame vajiakfuon. Ja ijegrekva ja buna besum sinuom afuim kekfuon.
2CO 8:15 Regavo vuak ijefuon iji bun usuibe Godon buk akaij ijia isoime ijeg kuai, E iji fu ire uruvana karmo iji ar fuon ijia buka ire uruvana naoivo bakin. Regavo e iji fu ire sibank karmo iji ar fuon ijia ire fuon iji fuka zaraik. (Revo vuak ijefuon ma iji E iji erar fu ire uruvana karmo iji fuka tavan bog e ikvajiamon ijefuon ire fuon iji fu sibank aresren. Regavo erar fu tavan bog ba ire karmo iji fu e kafob ire fu vajavo ijefuon fu siban aresrenmano kuain. Ijefuon roga no unam besum ijeg nuvuon ifenamiknum karinki noka besum afuime karikfuon).
2CO 8:16 No Godon bomana oimarev ijefuon maiji fu Taitason oij ijia izeg nor vierafenva ijeg vierafe mama fu ja mukorigia oijmiame ifejdiakafa vierafen.
2CO 8:17 Ijefuon maiji fu ijia ja giak vuakfuon vuak iji no kuardavga fuka bomana oimarme abe maren. Regavo fun amur oifuon ijia una vua ja ifejdiakafa vierafen ijefuon no kuava fuka oimaren.
2CO 8:18 Regavo fu vuako ijia no e be fu God ma vierafeno jan vierafenva iji kuaga fu fusik vuak. E iji fuka God ma vierafeknum Godon vuak iji sos kafokafo ijia mukorigia kuaimon. Ijefuon e God ma vierafejo igia karinva iji bu fu ma vierafene agordav.
2CO 8:19 Bu fu agordavo ijefuon e igi God ma vierafejo iji bu kua, Aiji For ga e funa oijo iji ifejdiame buna mon iji no e sinuom bakin ai Jerusarem karinva iji ik vajainva iji kege va vajiafno kuain. Fu mon iji kar va vajiaga e roin bu ijia giame vierafero no e sinuom bakin ai Jerusarem ijia karijo iji ifejdiakro bu ijeg vierafej. Regavo madu irerag no rejo iji no E Bomana iji aroikfuon no iji rej.
2CO 8:20 Ijefuon noka buna ik iji rene mon iji abe mukorigia samuaknum e ifejdiak. No ijegrenki e kafo buba kuai no mon dab isema ikrene kafo niesainvano kuaik.
2CO 8:21 No vierafe noka unam ma ijesugin rekuai vierafen. Noka unam ma iji E Bomana nuvuon fu oimaimo ijia rejknum ga madu ema oimardiavo ijia rekuai vierafen.
2CO 8:22 Ijefuon no madu kainuvuon be kuaga fu buna vuak. No unam kafokafo ijia kukma una fu biesuagain revo fuka tavan bog oimarknum e ifejdiakafa vierafen. Regavo iviakma fun ja ma vierafen ijefuon fu bomana ja ifejdiakafa vierafen.
2CO 8:23 Regavo e kainun Taitas fu nosik besum ikrene ja ifejdiamon. Revo e nokarok (2) kaifnuvuon bu funa vuako iji bu e God ma vierafejo igia karinva ijieb bu kega bu buon fateroin ijia vuak. Revo ik iji bu rene vuako ijia e kafo bu giame una Jesu Kurais dab oimardak.
2CO 8:24 Ijefuon izeg ja jon oijmanamivo ijin e iji vuako iji nijaidiaga e God ma vierafejo bu ijia giame vierafekfuon. Bu giame vierafero no joifuon aroikaravo iji no ma ijefuon aroikaravro bu ijeg vierafek.
2CO 9:1 Na vierafe a e God ma vierafejo ai Jerusarem ijia bu sinuom bakin karinva iji ifejdiakuai vierafen. Ijefuon na una vuak ijia kafo naba isoime kuardiak. Na joifuon naka aroikaraknum e ai Mesedonia karinva iji kuardiain. Na kia e ai Akaia ijia karinva iji bun juaivasia amur barenma ijia anerene e ifejdiakuai kanafuinvano kiain. Na ijeg kuardiavga e uruvana buk madu buka ifejdiakuai vierafen.
2CO 9:3 Regavo iviakma na e kaifnuvuon iji uniaga bu ijia vuak. Bu vuako ijia bu ire iji no joifuon aroikarainva iji bu ijia giakfuon. Regavo e ijieb ifejdiaga ja ire iji ja e ifejdiakfuon na kuardiainva iji kanafume samuakfuon.
2CO 9:4 Regavo e kafo bu igia ai Mesedonia ijia nana ijia vuakva bu giamga jaba mukoi samuaigakva noka bomana jufdiakfuon. Ijefuon maiji nom vierafero jaka samuainro no ijeg vierafene kuardiainva ijefuon noka jufduokfuon. Ijefuon jaba samuakva jak jaka bomana jufdiakfuon.
2CO 9:5 Ijefuon na vierafe na kaifnuvuon igi kiaga bu amur ar jon ijia vuak. Bu ijia vuainki bu ja ifejdiaga ja mon uruvana ja e ifejdiakfuon kuainva iji kanafume samuake noson rad vuakfuon. Revo jaba samuainva ijia no vuakva ja uri migegare vajuokva iji no vierafe ja oimarknum vajuokva bakin.
2CO 9:6 Regavo ni vuak igi na kuardiakrejo iji mukorigia faime vierafef. E iji fu juar uruvana meno iji fu juar uruvana masime duok uruvana karek. Regavo e iji fu juar sibank meno iji fu juar masime duok sibank karek.
2CO 9:7 Ijefuon erar fu e kafo ifejdiakafa vierafekma fuka fuon izeg fu vierafeno ijia mon e vajiakfuon. Regavo fub vierafero bu kiekievo ijefuon naka vajiakro fub ijeg vierafek. Ijefuon maiji God fu e iji erar fu oimarknum vajiamo iji bomana oijmak.
2CO 9:8 A ijeg rekma God fu tavan uruvana ire iji a nainma iji azan ijia kafo madu vajak. Fu vajaga a ire uruvana a vierafenma iji a ijia kenki tavan bog a una e roin ifejdiakfuon.
2CO 9:9 Regavo vuak ijefuon iji bun usuibe buk akaij ijia ijeg isoime kuai, E ma iji fu tavan bog oimarknum e iji sinuom bakin iji ifejdiam. Fu ijegreno ijefuon e bu unam ma iji fu reno ijefuon tavan bog fuifuon God oimardaokno kuain.
2CO 9:10 Ijefuon Godri e iji juar meno iji uij vajaga fu oin. Regavo ire uij fu oino iji Godri ifejdiaga bu tavuame marknum duv. Unam besum ijeg Godri ire kafokafo iji fu vajiaga ja karvo ijefuon azan ijia una ire uruvana vajiaga ja una madu e kafo ifejdiakfuon.
2CO 9:11 Regavo God fu tavan bog ifejdiaga ja unam kafokafo ijia ire zarainki ja e ifejdiame efkin vajiakfuon. Ja ijeg efkin vajuinki nosik kege una e roin vajiaga bu kege una Godon oimarek.
2CO 9:12 Regavo ik iji ja rene Godon e iji sinuom bakin iji ja ifejdiavo iji fu ijesugin bakin. Regavo jak e uruvana aferdiafo ijefuon bu una Godon oimarev.
2CO 9:13 E uruvana bu ja rejo iji giame Godon oimarek. Ijefuon maiji ja Jesu Kuraison vuak ijesugin nijaidiavo bakin gavo jaka vuak ijin jame e uruvana ifejdiame sinuom jon iji buna vajuinamiv.
2CO 9:14 Ijefuon buka uruvana oimarknum joifuon sirimamek. Ijefuon maiji God fun ja mukorigia ma rediame ifejdiainma ijefuon ja iji una bu ifejdiav.
2CO 9:15 Ijefuon ni roga no besum God izeg fu no marduome Farifuon abe muinma ijefuon fuon bomana oimaref.
2CO 10:1 E roin bu kuai na tavan roin jana fijo iji naka vuak isuar kuaiv revo tavan iji naba jana fijo iji naka vuak ma gigikin ja kuardiavno kuaiv. Regavo na Kurais izeg fu oi mafaime kabuaikabuaikin renma na ijegrene vuak soisoigin ja kuardiakrej.
2CO 10:2 Na vierafe na vuakva na ja vuak gigikin kuardiakfuon iji naka ba ijeg vierafen. Regavo na vierafe na e iji bu kuaiv noiji no e moik igeko bu kegoijo no ijeg kegoijno kuaivo na e iji vuak gigikin kuardiak.
2CO 10:3 Regavo iji fun ma no moikigia karioij gavo no oinuvuon ijia no e God ba ma vierafejo bu moikigia karine bijaimoijo ijeg bijaimokuai vierafenva bakin.
2CO 10:4 Regavo madu sinuom iji no kege bijaimoijo iji bu e moik igeko bu kege bijaimoijo ijekin bakin. Regavo sinuom iji fu Godon sinuom fur kege daro miain. Ijefuon no iji kege ar iji Setan fu azi bume fino ijia vakva no buja korek.
2CO 10:5 Regavo no Godon sinuom bijaivo ijar kege e iji aroikarame vuak kufuimeknum Godon vierafe iji abe buzeivo ijiebuon vuak ijin kaniatuav. Regavo madu no Godon sinuom bijaivo iji kege e raremoknum e iji kega bu una oi karoime Jesu igame unam fuon iji jav.
2CO 10:6 Regavo amur iji no vierafe jaka vuak iji Jesu Kurais fu kuainma iji jan igiavoga ja iji no nijaiduokfuon. Ja nijaiduokva no e iji eraneb bu Godon vuak ma iji no nijaidiaga buba igiavo iji kege vajai fian vajiak.
2CO 10:7 Regavo ja no guovo iji ja guoga noka e zazaikin ijefuon maiji ja vajai surif nuvuon azan ijesugin guov. Regavo ebe erar fu ijia kuaik naiji na Jesuon vuak abe kuaimoijno kuaikma iji ni vierafero fu ijeg kegoino iji no madu no ijegreoijoro fu ijeg vierafekfuon.
2CO 10:8 Regavo noka E Bomana daro fuon fu no vajuinma ijefuon bomana aroikarak. Regavo daro iji fu muinma iji no ja arafiriakva bagavo noka ja ifejdiako jaka daro abej. Ijefuon na daro iji fu miainma ijefuon naka oimarknum aroikarav.
2CO 10:9 Regavo fas igi na isoime nijiavo iji ja jukva na iji isoim nijiavo bakin.
2CO 10:10 E roin bu kuai Foron fas iji buka darokin ga fu vuak ma iji ijia isoinvano kuain. Regavo tavan iji fu nona igia fina iji fuka e ma ga vuak fuon fuka ma bakin.
2CO 10:11 Regavo buka vuak igi vierafekfuon. No jana ba ijia karinva ijefuon no vuak ijeg fas ijia isoime nijiav. Regavo no jana ijia karikva vuak irerag no darokma fas ijia isoinva iji no ijia ir nuvuon ijia mimatame nijaidiak.
2CO 10:12 Regavo no vierafe noba e iji bu koikbuon kam ajievo ijiena besum ganamiknum karikfuon bakin. Buka koikbuon kege una buon mazim ganamiknum vierafejo iji no giamga fuka ba maren.
2CO 10:13 Regavo noiji noba ik nuvuon no rejo ijia aroikaravo uri buin ijia mujuikma aroikarak. Regavo nom ik nuvuon izeg God fu no e roin ifejdiaknum ga ja e Korintko iji ifejdiakfuon fu muinma no ijefuon aroikarakfuon. Regavo ik iji fu no vajuinma iji no ja ifejdiaga ja God ma vierafejo ijia ja e darokin rekfuon fu ijin vajuin.
2CO 10:14 Ijefuon fun mardo nor daro abene ja samuagdiak ijefuon maiji nor amur Jesu Kuraison vuak ma iji abe jon vuain.
2CO 10:15 Regavo madu no e kafokafo ik bu rejo ijefuon aroikarakva bakin. Regavo nom ik nuvuon God fu muinma no jana rejo no ijesugin aroikarak. No vierafe ja jon izeg ja God ma vierafejo iji fuka ma gigikin rega ja e damuigin rene karikfuon.
2CO 10:16 Regavo rad no madu Godon vuak ma iji abe Korint asime moik kafo ijia kuardiame vak. Ijefuon maiji noba ar iji e kafob ur ikrenva ijia ikreknum una ik buon ijefuon aroikarak.
2CO 10:17 Regavo vuak ijefuon iji bun usuibe Godon buk akaij ijia ijeg isoime kuai, Erar fu vierafe fu aroikarakma fuka E Bomana ijefuon ik iji fu renma ijefuon aroikarakno kuain.
2CO 10:18 Ijefuon e iji erar fu koikfuon aroikaramo iji vuak fuon fu kuaimon iji fuka ma bakin. Regavo fu E Bomana ijar koikfuon e ijefuon oij ijia game abe aroikma ijar fu marek.
2CO 11:1 Efnun igia faif na vuak igi na kuaikrejo iji naka vuak ise kafo ijekma kuaikrej. Ijefuon e-e ni oi mafaime isuar kari faike na kuaikfuon.
2CO 11:2 Na God fu izeg ja bomana vierafeno ijeg nak naka ja bomana vierafej. Na vierafe na bara iji fu baru turamo bakin gavo fu baru besum ijesugin oi mame fivake jainma ijeg na ja kege e iji bu maturainva igeg Kurais vajakafie vierafen.
2CO 11:3 Regavo na vierafe e roin buka nigen jon iji kam arafiriadiaga ja Jesuon unam iji ja mukoi kegoijo iji jaka arekrejo ijefuon naka jufdiem. Usuibe tabar Setan fu bara Iv biesuamga fu unam ise iji ren. Regavo na jufdiemo iji e iji bu vuak kufuij iji bu nijaidiaoijo ijieb biesiakva ja Kuraison unam ma iji ja reoijo iji jan uzame vak.
2CO 11:4 Regavo vuak iji na ijeg kuardiavo ijefuon maiji tavan bog jaka oimarknum karine e kafokafo vuak kufui kafo bu kuardiavo jaka bu fazdiav. Regavo vuak bu kuardiavo iji bu Jesuon vuak na kuardiainva ijefkin iji kuardiavo bakin. Regavo bu kaven nibe ga vuak nibe ijin abe kuardiavo ja ijin faime jajiav. Regavo una Godon Kaven ma iji ga vuak fuon ma iji na kuardiainva iji jan ijia arev.
2CO 11:5 Ja vierafe e iji bu ja vuak nijaidiaoijo iji buka e ma revo na vierafe bu na asidieme ma reoijo bakin.
2CO 11:6 Regavo jakafu ja vierafero vuak na kuaimoijo iji na isema kuaimoijoro ja ijeg vierafej. Regavo ni vierafe vuak nun na kuaimoijo iji naka vuak ma ijesugin vierafene kuaimoij. Regavo madu unam nuvuon kafokafo no kegoijo ijia non samakaf kege nijaidiain.
2CO 11:7 Na Godon vuak ma iji abe ja nijaidiain gavo naba monfuon ja nimdiain. Na ijegrenva ijia na if jon kege mamkanuk revo naiji nam una e kabuaikabuaikin ren. Regavo ja vierafega unam iji na reoinva iji nabe isema reoin?
2CO 11:8 Regavo tavan iji na ijia jana fioknum Godon vuak abe kuardiaoinva iji bu e God ma vierafejo sos kafokafo ijia karinva ijieb ifejdien. Bur ifejdieme mon vajiekoga na una joifuon ik ren. Revo iji na renva iji naka mon buon iji niesame nui samuanamiknum una joifuon ikreoinva igeg na ijin ren.
2CO 11:9 Regavo kaifnun ai Mesedonia ijia vuainva ijieb ire kafo na vierafenva iji bur kege vuain. Ijefuon naba ja nimdiaknum afikin abe miak. Regavo na jon navaime finva bagavo na vierafega rad naba una ijeg rek.
2CO 11:10 Na Jesu Kuraison vuak ma iji fu oinun ijia ikreno ijefuon naka ma kuardiakredo naba rad una jon navaikfuon. Ijefuon vuak igi na aroikarame kuaivo iji fu e be erar ai Akaia igia fino ijar na bijukma bakin.
2CO 11:11 Regavo ja vierafega na irerafuon naba jon navaime fij? Ja vierafero nakafu ja naba oijmiavo ijefuon na ijegrejoro ja ijeg vierafej. Regavo na ijegrejo bakin naka ja uruvana oijmiavo iji fun Godri gieme mukoi vierafen.
2CO 11:12 Na vierafe ik igi na mon bakin nam rejo iji naba arekfuon. Na magaga ijia ikrene vaga e iji bu kufuimene vuak nijaidiaoijo iji bu ijia giekfuon. Bu ijia gieme vierafero ik buon bu reoijo iji fu nuvuon ijekma mazinva bagavo bu aroikaravo iji bu ijia arekfuon.
2CO 11:13 E iji bu ik buon bu reoijo ijefuon vuak kufuimene e biesiaoij. Bu ijeg kufuimeoknum kuai no afasor Jesu Kuraison vuak ma iji abe e nijaidiaoijno kuaiv.
2CO 11:14 Regavo unam ijeg bu rejo iji no oiserduomo bakin. Ijefuon maiji igia fai Setan ebuon bomana iji fuk fu una Godon anera sanainma ijegrekafa vierafekma iji fu rekfuon.
2CO 11:15 Ijefuon e iji bu Setanon ikreoijo iji bu koikbuon kege una e Godon ikrejo igeg kegokva jab giame oiserek. Bu ijegreoij gavo tavan radkma ijia irerag bu reoijo ijieb una bu kam arafiriak.
2CO 11:16 Na vuak na amur kuardiainva na iji una kuardiakrejo ni faif. Ja e roin jab vierafero naiji na e iji bu vuak isema vierafeoknum aroikaraoijo ijekinro jab ijeg vierafek. Ja ijeg vierafekva ni e ijekin iji ja oimarknum vuak buon fazdiavo ijeg ni na oimardief. Ja oijon ijia ijeg vierafejo ni oi mafaime fazdieke na ukakbe aroikarak.
2CO 11:17 Regavo na vuak ijeg kuaime aroikaravo iji na E Bomana ijar kuardien vo vierafe miega na ijeg kuaivo bakin. Regavo vuak ijeg na kuaivo iji na e iji bu nigen iserenva bu kuaivo na ijeg kuaiv.
2CO 11:18 Regavo e uruvana buka e iji bu moikigia karine aroikaravo ijeg aroikarav. Ijefuon nak na ijeg aroikarakfuon.
2CO 11:19 Regavo ja vierafero ja e iji bu vuak mukorigia vierafejo ijekin ro ja ijeg vierafen. Ijefuon ja uri e vuak kufuimeoijo ijiebuon vuak iji jaka oimarknum faiv.
2CO 11:20 Ijefuon e kafo bu ja kiaga ja buifuon ikrejo iji jaka oi mafaime ik rediav. Regavo madu e kafo bu ja kam am ukakna igeg kiakiaga jaka oi mafaime uri buifuon ire kafokafo reoij. Regavo madu bu koikbuon kam e mamkanuk rene ja bu nikatet giaknum ga uikinik jon ijia kaniav gavo jaka oi mafaime ba una ijefuon rej.
2CO 11:21 Regavo no unam ijekin kafo jon rekuai vierafebatie iji no ijeg rekfuon. Regavo noba ijegrekuai vierafen. Regavo e iji bu buon aroikaravo ijeg nak naka giriesame vuak besum ijefuon aroikarak. Regavo igi na iviakma kuaivo iji naka una e iji isema vierafene kuaimoijo na ijeg kuaiv.
2CO 11:22 Bu vierafekuai bu e Ibrukono kuaiv ga madu bu e Eburamon uifarif ga madu bu ai Isrer ijia ruainvano kuain. Regavo naiji nak na e Ibruko revo madu na e Isrerko ga e Eburamon uifarif ijefuon naka ik nun na rejo ijefuon aroikarak.
2CO 11:23 Bu ijegreoknum kuaivo iji ja vierafega bube ma Jesu Kuraison ikrej? Bu ma fuifuon ikrejbatie bu afikin igi na biediainva iji buk madu bu ijeg biediakfuon. Regavo bu bakin ijefuon bu ma e afasor bakin ga nar na ma Jesu Kuraison ikreoij. (Na vuak nun iji naka e vuak isema vierafene kuaivo ijeg kuaiv). Regavo nan nar tavan bog giriesame ik uruvana reoin. Na ijegreoko bu tavan uruvana na kanieknum dab dibur unievo na guakfuon ijia na una giriesain.
2CO 11:24 Regavo e Jius ijieb naki imut roin (5) aferdieme vajai nun dab teti nain (39) ijeg fijiemoin.
2CO 11:25 Regavo tavan nokbek (3) bu in ijia abe kanien. Regavo tavan besum (1) bu mun karme kanien. Bu vierafe buka kanie na guakro bu ijeg ren. Regavo tavan nokbek (3) na sisim ajieme saof azan ijia vakga sisim iji bu iseren. Regavo tavan be na una madu ijia vakga sisim fu iseremga na naki besum (1) ga tavan besum (1) ijeg na saof azan ijia jaraiganaoin.
2CO 11:26 Regavo naka unam afikin uruvana biediame vajai fian abeknum oin. Regavo naka do uruvana firamo ijia baimoin ga madu e Jius ijigam e kafo ijieb na niedien. Na tavan uruvana na mai guf ijia juvknum oin ga madu ar iji e buba karinva na ijia oin. Regavo madu na saof uruvana foino ijia juvknum oin. Regavo madu naka e iji bu kuai bu God ma vierafejo kuaiv revo unam buon buka isema kegoijo na e ijiena juvknum buna oin.
2CO 11:27 Na tavan uruvana naka ik gigikin uruvana reoijo ijefuon tavan kafo naka ninaijo bakin. Regavo tavan uruvana naka do kafiem ga vasiaguamdiemo iji naka magaga ikreoin. Regavo tavan uruvana naka duok ga sinuom bakin ga ka ma iduadiem gavo naka magaga ijia ikreoin.
2CO 11:28 Na unam kafokafo na vajai fian abejo iji kafo nan kuardiain gavo roin bakin. Regavo ire iji na vajai fian abenva ijia na e iji bu vuak kufuimene nijaidiaoijo iji nan asidiain. Regavo ire afikin fok ijiebuon uf ijia ire ma bomana iji naka e iji God ma vierafejo ar kafo ijia karinva iji bomana vierafen.
2CO 11:29 Ijefuon tavan kafo e roin bu buon ma vierafejo ijia zazaivo nak na izeg bu rejo iji na vajai nun ijia faiva naka oifiadien. Revo tavan kafo e roin bu unam ise ijia arikaniaga bu una ise rejo na oinun ijia naka bomana ziev.
2CO 11:30 Regavo na vierafe na aroikarakva iji na unam izia na giriesame ire kafo renva na ijefuon aroikarakva bakin. Regavo naka unam izia na zazainva ijefuon aroikarakfuon.
2CO 11:31 Regavo vuak igi na ijeg kuardiakrejo iji fu God E Bomana Jesu Kuraison Asoij ijar gienma ijefuon na kufuimekfuon bakin. (Revo God nuvuon fuka e darokin ijefuon na vierafe noka tavan bog fuon oimarkfuon).
2CO 11:32 Na ai Damaskas ijia fijo ijia e Kin Aretason rotit ijia ikrene e samuagdiamo ijar na dab dibur uniekafa vierafen. Ijefuon fu efuon juokarijo iji kiamga bu vien bu arume mai ijia vako ijia na samuagdieme iren.
2CO 11:33 Regavo e kaifnun ijieb na dab kamui bomana ijia abakarime dab fak bu kirainva tit ijia abesen. Bu ijia abesevga na irif ijia ari ko ruako e iji bu na tofdiekuai vien ijia irenva iji bu nisaidiega baga bu ijia aren.
2CO 12:1 Na aroikaravo iji fu ire ma be rekma bakin gavo naka magaga aroikarakfuon. Na aroikaravo iji na ire iji na nimamainva ijiga ire iji E Bomana Jesu Kurais fu nijaidienma na ijefuon aroikarak.
2CO 12:2 Na vierafe juaivasia fotin (14) barenma ijia e God ma vierafeno be fu varur kaf ijia ajie vain. (Revo iji fu vainma iji kafu nimamaime vain ga fu ema ijar koikfuon ajie vainma iji naba vierafen. Regavo unam iji fu Godri fuonkua game vierafen). Regavo na ma vierafe varur gufia Godon ar ma iji bu kua Faradaisno kuavo ijia fu vainma ijia fu ire kafo giaknum fain. Regavo ire iji fu fainma ijiga giainma iji fu izeg dab kuardiame nijaidiakma bakin. Revo madu fun Godri bijuido fuba e kuardiak.
2CO 12:5 Na aroikarakva iji na ire ka mukor iji fu renma na ijefuon aroikarak. Regavo na una ire kafo ijiebuon aroikarakva iji nam ire kafo na izeg zazaivo na ijesugin aroikarak.
2CO 12:6 Regavo na koiknu aroikaravo iji na e vuak isema vierafejo ijekin bakin. Ijefuon maiji vuak nun na kuaivo iji naka ma ijesugin kuaiv. Regavo madu e bu na gieme dab bomana vierafekfuon iji naka isediem gavo bum ire iji na reoijo ijiga vuak na kuaivo ijesugin giame vierafekfuon.
2CO 12:7 Regavo God fu vierafero nakafu ire ma iji varur ijia fu nijaidiema na giainva ijefuon aroikaravro fu ijeg vierafen. Ijefuon fu vajai fian abe mienma iji fu Setanri efuon kuamga fu na kanienma igekin. Fu ijegrega iji na aroikarakfuon iji na ijia arekro fu ijeg ren.
2CO 12:8 Ijefuon na tavan nokbek (3) E Bomana iji kuaga fur vajai fian igi abe vakro na iji sirimamene naka fu ejafain.
2CO 12:9 Na ijeg ejafavga E Bomana fu kie, Unam nun na e fok na ma rediavo iji fu afak fun aresren. Regavo a zazaimo ijia daro nun ijar a mukorigia dasumdamno kien. Ijefuon naka unam iji na zazaivo ijia aroikarakin Kuraison daro iji fu nun navak.
2CO 12:10 Ijefuon na zazaivo naka bomana oimarev. Regavo unam kafokafo ijia na vajai fian ga afikin biedia ga e kafob musikieme vuak ise kuardievo iji naka ijia daro abej. Regavo unam kafokafo ijia afikin iji na biediavo iji naka Jesu Kuraison fateroin ijia na biediav. Revo na afikin iji biediame zazaivo iji naka bomana oimarev ijefuon maiji Kurais fu ijia ifejdiega na daro abej.
2CO 12:11 Na Kuraison afasor rene jana besum ikreoin gavo jaba na arordienva ijefuon na koiknu aroinamiv. Regavo e iji vuak kufuimene nijaidiavo iji bu kuai na e iseno kuaivo iji bukafu ma kuaiv revo vuak nun ga unam nun ijar fuka ma bu asidiain.
2CO 12:12 Na jana ijia finva ijia na afasor rene Godon ikrene unam sumakin ma iji ijia nijaidiava ja gieme vierafen. Regavo naka e kabuaikabuaikin rene nuibakin ikrekoga God fu ire sumakin kafokafo rene ja nijaidiain.
2CO 12:13 Regavo e God ma vierafejo bu sos kafokafo ijia karinva ire iji na buon renva ire besum iji na una igia jon ren. Regavo ire besum naba renva iji naba monfuon ja nimdiain ijefuon ni unam iji na isema renva iji gieme aref.
2CO 12:14 Na ijia vuaka ja giainva iji na naki nokarok (2) ijia ja giain. Regavo iviakma igi na una madu kanafudo na ja giak vuakfuon. Na una ja giak vuako iji na vierafe naba una ire kafo ja nimdiakfuon ga na oijon ja izeg una Jesu vajavo na ijin giak vuak. Ijefuon maiji bu afijaf ijieb ire fok eofijaf bu vierafenva iji vajiavo bakin revo bu eofijaf ijieb ire fok afijaf bu vierafenva iji vajiav.
2CO 12:15 Ijefuon na vierafe na vajai nun abe vo ire fok nafak naoivo iji naka ja vajiak. Regavo na ja bomana oijmiakva jabe jasik una na sibank be oijmiek?
2CO 12:16 E roin bu vierafero na kufuimene ja biesiaknum aferdiavoro bu iji vierafen. Regavo iviakma jan gieme vierafe na monfuon ja nimdia ga afikin kafo vajiavo bakin. Regavo madu naba vuak kufuime kuardiaknum biesiain.
2CO 12:17 Regavo madu jakafu ja vierafero e iji na kiava bu vuainva iji bu ja biesiame ire kafo kamaziakuai vuainvaro ja iji vierafen. Regavo iji na ijeg vierafene kiava bu vuainva bakin.
2CO 12:18 Regavo na Taitas soisoime kuava fu jon vuakrega no kainuvuon be kuava fu fusik vuain. Regavo Taitas fu vuainma ijia fuba ja biesiame ire kafo nimiaknum kamaziain? Na vierafe fu ijeg fuba ren revo fuka izeg na renva fuk fu unam besum ijeg jon ren. Ijefuon maiji no fusik no kaven ni besum ijar oinuvuon ijia ikreno ijefuon fu ijeg ren.
2CO 12:19 Regavo jakafu ja vierafekuai noiji no tavan bog nifak jon ijia noka unam izeg no mukoi kegoijo ijin mafaivoro ja iji vierafen. Regavo iji noka ma bakin. Regavo vuak iji no kuaimoijo iji fu Jesur vierafe vajuoko no Godon nifak ijia ja kuardiav. Regavo jaiji jaka kaifnuvuon no oijmiavo ijefuon ire fok igi no kuaiknum reoijo iji no ja ifejdiaga ja e darokin rekuai no ijin rej.
2CO 12:20 Regavo na vierafe na ijia vuakva na giamga jaba unam ma ijia karijo na giakva naka ba oimarek. Regavo madu na vua ijia unam be jaba vierafenva iji rekva jaka ba oimarek. Regavo na vuakva nakafu jana musikuaime deajir abeknum vo zienamiknum ire iknisanamivo na iji giak. Regavo e roin ja atame tata kariknum bijaiknum ga jaka unam ma ijia ikreknum karikva bakin. Regavo madu ja koikjo kam e mamkanuk rejknum ga vuak ise kuaiknum ga e kafobuon vuak kufui iji kam ma igeg vierafene kuaivo na iji giak.
2CO 12:21 Regavo na tavan be una vua giamga ja uria unam ise iji amur ja karijo ijeg karigakva God nun iji fuka na oifian miega na nifak jon ijia jukfuon. Fu ijegregakva naka e iji bu usuibe unam ise reoinva iji buba areme una oi karoinva ijiebuon oifian abene niraik. Ijefuon maiji unam buon usuikor iji bu barabaru fudainamime unam ise rejo iji buba aren. Ijefuon naka bomana oifiadieme jufdiekfuon.
2CO 13:1 Efnun na amur tavan nokarok (2) giame vain ga iviakma igi na una madu giakafie rok. Regavo igi na una roko ijia e God ma vierafeno be fu ro kaifuon be God ma vierafeno ijefuon vuak be na kuardiekma iji na Godon vuak iji bu izeg buk ijia isoime kuainva na ijeg rek. Regavo vuak iji fu ijeg, Bu e nokarok (2) vo e nokbek (3) ijeg bu e befuon vuak iji izeg fu isema renma ijin ro na kuardiekva na e iji abe vajai fian mak.
2CO 13:2 Na amur giame ruain ga ura rir iji na vuainva ijia na vuak kafo e iji ise reoijo iji nan ju kuardiain. Regavo iviakma igi na aibe igia fijo ijia na una madu fas igia isoime kuardiaga ja faik. Regavo tavan be na una jon vuako ijia e kafo eraneb bu unam ise reoijo iji na arordiakva bakin gavo naka kam vajai fian vajiak.
2CO 13:3 Regavo vuak ijeg na kuardiavo ijefuon maiji eraneb ja Jesuon vuak faikuai vierafekva ja ir nun ijia vuak na kuaivo ijia Jesuon vuak iji faikfuon. Jesu fu e iji ise reoijo iji kam ma vajai fian vajiamo iji fu zazaiknum rekma bakin. Regavo fuka e darokido fu daro fuon iji ja nijaidiakfuon.
2CO 13:4 Jesu bu abe kuros ijia kanavga fu ema igeg zazain gavo iviakma fuka Godon daro ijia una uri fin. Regavo noiji non Jesuna besum mazinva ijefuon fu kuros ijia izeg fu zazainma ijeg no madu noka zazaik. Ijefuon Godon daro iji no abenva iji noba migegare nijaidiain. Regavo no jana agan besum rene vuak fuon iji abe nijaidiavo ijia Godon daro iji fu oinuvuon ijia ikreknum ifejdiakfuon.
2CO 13:5 Ijefuon nika koikjo mukorigia ganamiknum biesuanamiga jan jon izeg ja God ma vierafejo ijia navaime karijo iji giaf. Regavo jabe ma vierafega Jesu fu oijon ijia tavan bog fin? Ja tavan bog unam ma ijesugin reokva iji ja vierafero Jesu fuka oijon ijia finoro ja ijeg vierafekfuon.
2CO 13:6 Regavo noiji jan guome vierafega Jesu fu oinuvuon ijia fino ijefuon no afasor e ir kufuikin bakin.
2CO 13:7 No Godon sirimamega jab unam ise kafo rekfuon ga jaka unam God fu oimaikfuon ijesugin rek. Regavo no afasor igeg noba daro nuvuon ijin abe e nijaidiavo ijefuon e bu uri no musikuome ziegafuokva iji no bomana vierafekva bakin.
2CO 13:8 Regavo ja Godon vuak ma iji mukorigia igavo gakva na joisina vuak kafo naba kuardiak.
2CO 13:9 Regavo e bu vierafero ik igi no afasor rene reoijo iji noba mukorigia reoijno kuaikva iji no bomana vierafekva bakin. Regavo noka bomana oimarek e bu ja giamga jaka e darokin ga ja vuak ma iji igavo bu iji giakva iji fuka marek. Regavo no vek jon sirimamej ijefuon jaka jon ja ma vierafejo ijia ja e darokin rene God ma vierafekfuon.
2CO 13:10 Na jana naba fijo ijia na fas igi isoim nijiav. Na nijiaikin na vuako ijia naba una daromene ja kege kikekmiame vajai fian vajiak. Regavo na E Bomana daro iji fu mienma iji na abe jon izeg ja ma vierafejo iji arafiriakfuon bakin. Regavo jam jon ja ma vierafejo ijia e damuigin rekfuon.
2CO 13:11 Regavo kaifnun iviakma na ja anadiav. Irerag na kuardiainva ijesugin rene unam ma ijia maturaime oi besum vierafeknum afuime kariof. Ja ijegrekva Godon oijmiamo ijiga afuimo fuon iji fu tavan bog jana navak.
2CO 13:12 Ja tavan bog jon ja anainamivo iji nika mukorigia bog diaik igeg anainamif. Regavo e God ma vierafejo igia karijo iji bu ja anadiain.
2CO 13:14 Na vierafe E Bomana Jesu Kurais fu tavan bog ja mardiak. Revo madu fu Kaven Akai ijefuon daro ijia samuagdiaga ja izeg God fu ja oijmiamo ijeg ja tavan bog jon oijmanamiknum karivak.
GAL 1:1 Na afasor For e iji Jesu Kuraison daro abene vuak fuon kuaimoijo iji nar fas igi isoime ja nijiav. Na emab kienva bakin gavo bu God Asoij ijiga Jesu Kurais e iji fu guamga Godri keunama fu una urinma ijieb kiega na vuak ma iji kuardiav.
GAL 1:2 Na uviaifnun Jesu ma vierafejo igia karinva ijiena besum e iji ja God ma vierafejo sos fok moik Garesia guf ijia karinva iji anadiav.
GAL 1:3 Na vierafe God Asoinuvuon ijiga E Bomana Jesu Kurais bu tavan bog ja mardiaknum vo mukorigia samuagdiaga ja afuime kariokfuon.
GAL 1:4 Kurais fu ise iji moikigi no karijo igia naoivo ijia karaunuokafa ruain. Fuka God igame fu vierafenma iji rene ise nuvuon fi koreduokafa guain.
GAL 1:5 Regavo no Godon oimarknum fu abe aroivo iji noba arekfuon gavo fu tavan bog ijia navak.
GAL 1:6 Na vuak jon faiva naka bomana oiserdien! Ijefuon maiji tavan ivuankbe ijia jan God e iji fu Kuraison azan ijia ja kumene aferdia sanainma fuon ma iji fum efkin miainma ijia uniainma iji jan uzav. Regavo ja una vuak sumakin be ka ma bakin iji faiv.
GAL 1:7 Regavo naka ma kuardiav Godon vuak ma be ijia fuka bakin. Na ijeg kuardiavo ijefuon maiji e kafo bu Kuraison vuak ma iji abe dakaroime kuardiame oijon kam karoiga ja nonamiv.
GAL 1:8 Regavo varur gufefuon anera ijieb vo nor vuak nibe iji abe nijaidiakva na vierafe God fu e ijekin iji aferdiame mian iji naine udarmo bakin ijia uniaga bu arafiriak.
GAL 1:9 Na usuibe nan kuardiain revo na iviakma una madu kuardiav. E binob vuak igi ja faime abenva ijefkin bakin gavo bu vuak nibe iji kuardiavgakva na vierafe e iji bu mian iji naine udarmo bakin ijia naoik.
GAL 1:10 Regavo vuak igi na kuaivo iji na ema ijieb oimardiakfuon na kuaivo bakin gavo na God fu oimaikfuon ijin kuaiv. Regavo na ema ijieb gieko na kuaivgakva iji na Jesuon ikrejo bakin.
GAL 1:11 Uviaifnun vuak ma igi na abe kuardiavo iji fu ema ijiebuon vuak bano mukorigia faif!
GAL 1:12 Regavo vuak iji fu emabuon ruainma bakin gavo fu Jesu Kuraisri abe nijaidien.
GAL 1:13 Na e Jiusbuon unam bu guriguri rejo ijia izeg na buna finva iji bun kuardiava jan fain. Regavo izeg na oifian bakin Godon e iji kam giriesame uruvana vajai fian abeknum ke mimatame arafiriakrejo jan fain.
GAL 1:14 Regavo e Jiusbuon sos ijia unam izeg bu guriguri rejo ijia kaifnun nana besum ofrenva iji nar asidiain. Na saifnuvuon ijiebuon unam ijia naka kaifnun iji asidiame giriesa ren.
GAL 1:15 Regavo God fuon ma rediamo ijiga oijmiamo ijia na buba nafedienva ijia fu vierafe na fuifuon ikrekro fu kumen.
GAL 1:16 Tavan iji God fu vierafenma ijia fu Farifuon abe na nijaidieme vo fur oinun abe dakaroime daro miemga na Jesuon vuak ma iji abe e Jius bakin iji kuardiakafie vain. Regavo na Jesu fu izeg oinun abe dakaroinma iji naba e be kuardain. Regavo irerag na rekfuon iji naba e afasor roin bu ur Godon vuak abe kuaimoijo ai Jerusarem ijia karinva iji kuardiakafie vain. Regavo iji na arega na migegare ai Arebia vakga Jesu fu fuon ma rediamo iji abe madu nijaidiemga na una ai Damaskas vain.
GAL 1:18 Regavo God fu ur Farifuon abe na nijaidiekoga rad juaivasia nokbek (3) barko nason ijia Jerusarem e afasor Fita game vuak fuon kafo faikafie va vuik nokarok (2) ijia fin.
GAL 1:19 E afasor kafo Godon ikrejo iji roin naba giain revo na e besum Jeims Jesuon uviaij iji na gain.
GAL 1:20 Regavo irerag na iviakma isoivo iji God fu vierafe na kufuimejo bakin gavo naka vuak ma ijin isoiv.
GAL 1:21 Rega rad na ai nokarok (2) Siria ko Sirisia guf ijia Godon vuak ijin kuardiakafie vain.
GAL 1:22 Tavan ijia e Kurais ma vierafejo roin ai Judia sos ijia karinva iji buba na ma vierafen ijefuon maiji naba sos buon ijia Godon vuak nijaidiain.
GAL 1:23 Regavo bun e kafob kuardiainva bu fai e iji fu ur mimatame no kege arafiruinma iji aferdiame iviakma una Godon vuak ma iji e fok nijaidiam. Regavo ur fu e fok no God ma vierafenva iji fu kege vajai fian vajuokro reoinmano kuain.
GAL 1:24 Regavo bun vuak iji God fu nun renma iji faime bomana nuifuon una Godon oimaren.
GAL 2:1 Na juaivasia fotin (14) ijeg barekoga rad na Banabask no una Jerusarem vainva iji na madu Taitas afevga fu nona ijia vain.
GAL 2:2 Na vainva ijefuon maiji e kafob kumeja na vainva bakin revo fun Godri koikfuon abene na nijaidieme daro miemga na vain. Regavo naba e uruvana kuardiain revo na isuar e roin na vierafe bu e mamkanuk na e iji aferdia Godon vuak ma iji na e Jius bakin iji na nijaidiainva iji kuardiain. Vuak na kuardiainva iji bun abe maren ijefuon maiji irerag na amur renva ijiga iviakma na rejo iji fu ma ijefuon buba arega fu barekfuon. Regavo madu buba kuardieme kie, E Jius bakin God ma vierafejo iji buka vajai buon kania ufume anf name Mosison akaij iji javno kien.
GAL 2:3 Ijefuon na kainun Taitas na afem vainva iji fu e Grik revo buba vajai fuon ijia kana ufume anf abedekuai ejafian. Ijefuon maiji e mamkanuk iji bun vierafe na e Jius bakin iji na vajai buon ijia kania ufume anf namdiavo bakin.
GAL 2:4 Regavo efarif kafo bu kufuimene God vierafenva ijieb buna oijo iji bu vajai buon ijia kana ufume anf abedekuai vierafen. Regavo e ijieb isuar sauime izeg no Jesu abe dazme ma karinva iji guome no kuoga no una e Mosison akaij iji jaknum karikuai bu iji ruain.
GAL 2:5 Regavo noka ba vuak besum bu kuaivo iji faime oimarknum rejo bakin. Ijefuon ma iji no vierafega vuak ma iji fun Jesur e iji bu ma vierafejo ijia giame karauniamo ga fu ik buon bu rejo ijia giame karauniamo bakin. Ijefuon no Godon vuak ma iji abe e Jius bakin iji joifuon abedega fuba nibe rekfuon gavo fu ijia navak.
GAL 2:6 Regavo e iji izeg ur bu e mamkanuk rene ruainva iji na bu naba bomana vierafej. Ijefuon ni igia faif. God fu uikinik nuvuon ijia no e izekin iji fu kege mazim guomon bakin revo fu oinuvuon ijia guomon. Regavo e mamkanuk iji ruainva iji na Godon vuak ma iji kuardiavo buba una azan ijia vuak nibe na nijaidien.
GAL 2:7 Regavo bun vierafega na unam besum izeg God fu Fita daro maga fu Godon vuak ma iji abe e Jius nijaidiamo ijeg fu una na daro miega na e Jius bakin iji vuak fuon ma iji abe nijaidiavro bu ijeg vierafen.
GAL 2:8 Regavo God fu daro iji fu Fita mama fu e afasor rene e Jiusbuon ikreno ijeg fuk na daro miema na afasor rene e Jius bakin buon ikrej.
GAL 2:9 Regavo e mamkanuk Fita ga Jeims ga Jon e Jiusbuon sos ijefuon tuar igekin ijieb God ire ma iji fu mienma iji game vuak na kuriavo iji faiga fu ma. Ijefuon bu no Banabask oimarduoknum imut keduoknum ik no rejo iji abe maren. Ijegreare no uri e Jius bakin buon ar ijia vakga bu e Jiusbuon ar ijia ikrekuai no ijeg besum buna kuaime abe maren.
GAL 2:10 Ire na oimarknum rejo iji bu kuarduinva iji bu kuo, Jab e sinuom bakin iji ja ifejdiavo iji arekno kuin.
GAL 2:11 Regavo rad Fita fu ai Entiok vuakga na vuak uruvana e uruvana ijiebuon nifak ijia kuriaikuriaikin kuardain. Ijefuon maiji irerag fu reno iji fuba mukorigia rena na samakaf ijia gain.
GAL 2:12 Regavo vuak kuriaikuriaikin iji na kuardainva ijefuon maiji Fita fu amur e Jius bakin ijiena duok in revo rad Jeimson e iji bu usevga fuba una buna duok in. Regavo e iji Jeimsna ruainva iji bu e Jius bakin iji vajai buon kania ufume anf namdiavo ijieb ruain. Ijefuon bur Fita fu duok iji fu e Jius bakin ijiena ino bu iji gakva bu una va e mamkanuk iji kuardiame kia Fita fu akai abe tuasenmano kiakro fu ijefuon juin.
GAL 2:13 Regavo e Jius roin bu Fita fu isema rena iji game buk buka juvknum rejga Banabas fu ijia jajiame ren.
GAL 2:14 Na unam iji bu rejo iji ga buba Godon vuak ma iji arir jame rej. Ijefuon na e uruvana ijiebuon nifak ijia Fita kua, Aiji a e Jius gavo unam on a fine kegoino iji a e Jius bakin bu kegoijo Ijeg reoin ga a e Jius bu kegoijo ijeg kegoino bakin. Regavo a ijeg reoino ijia a izeg e Jius bakin iji kiaga bu e Jius iji bu karijo ijeg karikfuon?
GAL 2:15 Regavo igia faif iji fuka ma no bu nafeduinva iji no e Jius gavo no e Jius bakin ise reoijo ijekin bakin.
GAL 2:16 Regavo no vierafe bu e iji Jesu Kurais ma vierafejo ijieb bu Godon nifak ijia maturain revo una e iji bu akaij ijia jame kegoijo iji bu Godon nifak ijia maturaikva bakin. No e Jius bakin ijiena Jesu Kurais ma vierafej revo nuvuon no Jesu ma vierafejo ijar no kege Godon nifak ijia maturain. Regavo akaij iji no jame kegoijo ijar no kege Godon nifak ijia no maturaikva bakin. Ijefuon e besum fu akaij ijia jame kegokma akaij ijar fu keunaga fu Godon nifak ijia maturaikma bakin.
GAL 2:17 Ijefuon no vierafe no Kuraison daro ijia maturakfuon iji vo no Mosison akaij iji uzakva e Jius bukafu vierafe noka ma ise rej. Ijefuon ja vierafega fu Kuraisri ja ejafiaga ja ise rej? Fuka ma bakin.
GAL 2:18 Regavo na una unam kafokafo usuikor iji na amur abe arafirinva iji una mimatame kegoknum vo na vierafe e Jiusbuon akaij ijar na keuniekfuon iji naka ma iserej.
GAL 2:19 Regavo e Jiusbuon akaij ijar nijaidienma iji na akai igiame jaokva na fu abe arafirik. Ijefuon nan Mosison akaij iji nan unakome iviakma na una Kurais jav. Ijefuon fu akaij ijar iviakma na samuagdiemo bakin. Regavo na vierafe na Jesu ma vierafekva na God fu oimaikfuon ijia fiok.
GAL 2:20 Ijefuon iviakma na fioijo iji nam nar fioijo bakin gavo fu Kuraisri oinun ijia fin. Kurais Godon Farif iji fu na oijmieme nuifuon kuros ijia guain. Ijefuon iviakma na fioijo iji na Kurais ma vierafene fioij.
GAL 2:21 Regavo Godon ma rediamo ijar na keunien ijefuon ma rediamo fuon na uzavo bakin. Regavo e be fu akaij ijefuon duadok ijia Godon nifak ijia marme aresrebatie Kurais fu guainma iji fu e karauniaga bu maturakfuon iji fuka ma bakin.
GAL 3:1 E Garesiako isema vierafejo gurie, Ja erar masifdiamga ja una vuak kufui iji faiv. Nan amur nifak jon ijia Jesu bu ise jon ijefuon abe kuros ijia kanainva iji nan samakaf nijaidiain.
GAL 3:2 Regavo na duna besum samakaf igi ja kuardiakrej. Ja Godon Kaven iji ja abenva iji ja Mosison akaij iji javo ijia ja aben ki ja Godon vuak ma iji ja faime ma vierafejo ijia ja Godon Kaven aben?
GAL 3:3 Ja irerafuon nigen iserev? Ja Godon Kaven fu oijon ijia arimga ja anerene fu ma vierafen. Regavo iviakma ja una unam usuikor ijia reoij ijefuon jab daro jon ijia rene fu igaga God fu oimaik?
GAL 3:4 Ja Godon vuak ma ijefuon jaka uruvana igia vajai fian abe ruain. Regavo iji ja vajai fian abene ruainva iji ja vierafe ja ma ijefuon vajai fian aben vo jam jar vajai fian aben?
GAL 3:5 God fu Kaven fuon fum efkin vajiaga bu ik sumakin kafokafo reoijo iji fu akaij iji ja jame kegoijo ijefuon vajiamo bakin. Revo fu vuak fuon ja faime ma vierafene ijia jame kegoijo ijefuon fu Kaven fuon iji ja vajiain.
GAL 3:6 Regavo ni e Eburam vierafef. Fu God ma vierafene irerag fu kuainma iji fu rekfuon ijefuon God fu kua a e maturainmano kuain.
GAL 3:7 Regavo ni igi vierafef e iji eraneb bu ma vierafejo bu e ijieb e Eburamon uifarif.
GAL 3:8 Regavo Godon buk ijia bu ijeg isoime kuai, God fu e Jius bakin iji buon bu fu ma vierafekfuon ijia giame aferdiaga bu nifak fuon ijia e maturaik. Ijefuon God fu amur e Eburam nijaime kua, E fok moikigia oinva ijia eraneb bu unam izeg a renma ijeg na ma vierafekva iji na unam ma karivako iji vajiakno kuain.
GAL 3:9 Eburam fu Godon vuak iji ma vierafega God fu unam ma karivako iji abe main. Ijefuon e fok eraneb bu ma vierafejo iji bu Eburam unam ma iji God fu mainma ijeg fu bu miak.
GAL 3:10 Regavo eraneb bu Mosison akaij ijia jame karioijo iji Godri e iji kege vajai fian vajiak. Ijefuon maiji Godon vuak ijia fun ijeg kuai, Erar fu vuak fok buk akaij ijia isoinma iji tavan bog ba igaoino iji Godri fu abe vajai fian makno kuain.
GAL 3:11 Ijefuon iviakma iji fun ma samafren e kafo buba Mosison akaij ijia jame Godon nifak ijia maturaime karikfuon. Ijefuon maiji bun Godon vuak ijia ijeg isoime kuai, E iji fu God ma vierafeno ijar fu unam ma karivako iji abekno kuain.
GAL 3:12 Regavo e iji fu akai igame ijia jaoijo iji fu ma vierafeno ijia biduamo bakin. Ijefuon maiji bun Godon vuak ijia ijeg isoime kuai, E iji fu ire fok akaij ijia jame mukorigia kegoino iji fu akaij ijia biduame fik.
GAL 3:13 Regavo akaij ijia God fu no vajai fian abekfuon iji fun Kuraisri nuvuifuon vajai fian abene kavuan fuon abe usen. Ijefuon maiji bun Godon vuak ijia ijeg isoime kuai, E be erar fu ise fuon ijefuon bu fu dab in ijia kanakva e iji Godri fu dab vajai fian makno kuain.
GAL 3:14 Jesu Kurais fu kavuan fuon nuvuifuon usemga God fu unam ma karivako iji fu Eburam makafa kuainma iji fu madu e Jius bakin iji Jesu Kuraison duadok ijia abe miak. Regavo e uruvana no nuvuon ma vierafejo duadok ijia no Godon Kaven fu kuainma iji abek.
GAL 3:15 Uviaifnu na unam be ema igi no tavan bog rejo ijia bijame kuardiak. E nokarok (2) bu ire be rekuai bu vuak kuaime abe markva e be fuba abe tuasek vo una vuak be azan ijia kuaikma bakin.
GAL 3:16 Ijegvo vuak irerag igi iviakma na kuardiakrejo iji fuka ijekin. Godon vuak iji fu Eburam ga uifarif fuon iji kuardiain. Godon vuak ijia God e uifarif iji fu kuainma iji fuba e fok ijiebuon kuain. Regavo fum e besum Jesu Kuraison fu bijame kuain.
GAL 3:17 Vuak na kuardiavo ijefuon ma iji igin. Akaij iji fu juaivasia fo adred teti (430) ijeg barekoga fu rad ruainma iji God fu vuak iji fu amur Eburam kuardainma iji fuba aren.
GAL 3:18 Regavo Godon unam ma iji fu no vajuokfuon iji no akaij iji igavo ijia biduavobatie God vuak fu kuainma iji no ijia biduakva bakin. Regavo God fu unam ma karivako iji fu abe Eburam makafa kuainma iji fu izeg fuon fu e oijmiame ifejdiamo ijefuon duadok ijia efkin abe main.
GAL 3:19 Regavo fu Eburam ijeg efkin ifejdakma akaij ijefuon maiji irerag? Akaij iji miainva ijefuon maiji fu ijar ifejdiaga e iji bu vierafe ire izi fu ma ga ire izi fu ise ijieb oifian abe miavo bu ijin giaknum kariokfuon fu ijefuon miain. Regavo akaij iji fum ijia na roke Kurais e iji God fu Eburam kuainma iji fu ruain. God fu akaij iji abe anera iji miavga bu abe e iji uf ijia manino e Mosis mavga fu abe e iji miain.
GAL 3:20 Regavo tavan iji God fu e Eburamon uifarif iji fu daro miakafa kuainma iji fu koikfuon abe miain. Regavo fuba abe e be uf ijia manino iji mamga fu abe mainma bakin.
GAL 3:21 Ijefuon Mosison akaij iji fuba Godon vuak fu kuainma ijekma aresren? Baki fuba ijekma aresren. Regavo akaij iji fu miainma ijefuon maiji e iji bu ijia jame ma karivakfuon. Regavo akaij ijar e iji buon bu karivako iji samuagdia bu ma karibatie e iji akai igavo iji bu Godon nifak ijia maturaime irek. Regavo akaij iji fu daro bado bu izeg Godon nifak ijia maturaikva bakin.
GAL 3:22 Regavo Godon vuak ijia fu kuai moik fok fu ise ijefuon daro ijar okuraimano kuain. Ijefuon God ire iji fum efkin kege e iji Jesu Kurais ma vierafejo iji vajiakafa kuainma iji fu kege e iji eraneb ma vierafejo iji vajiak. Regavo fun unam besum ijesugin fu ijia e karauniamon.
GAL 3:23 Regavo ma vierafejo iji fu rad ruako akaij ijar no kege ivia kiruoma no dibur karinva ijeg kari roke God fu unam izeg no Jesu ma vierafejo iji abe nijaiduin.
GAL 3:24 Akaij iji fu ijegre roke Kurais fu ruain. Regavo Kuraisri nuvuon no ma vierafejo ijia guome ke Godon nifak iji maturainma ijia unuin.
GAL 3:25 Ijefuon tavan iji Kurais ma vierafejo iji fun iga. Regavo Mosison akaij iji fu e samuagdiamo iji fu iviakma una no samuagduomo bakin.
GAL 3:26 Regavo ja e Garesiako uruvana iviakma ja Kurais ma vierafejo ijefuon ja Godon afijaf ren.
GAL 3:27 Regavo ja do ruaivo ijar nijaiduomo e uruvana ja una Kuraison e ren. Ja Kuraison e rene unam fuon fok jaka mukorigia aben.
GAL 3:28 Ijefuon e fok eraneb ja Kuraisna renva iji jan funa besum ren. Ijefuon ja e Jius ga e Jius bakin ga e kafobuon ikrejo ga baru ga barak iji ga e uruvana jab e kafokafo ijeg vierafejo revo jan Jesu Kuraisna besum renva iji vierafef.
GAL 3:29 Regavo ja Kuraison e renva iji jan Eburamon e uifarif ijefuon ja ire ma iji God fu Eburam vajakafa kuainma iji jar karkfuon.
GAL 4:1 Regavo na una madu vuak be ijefkin kuardiakrejo ni faif. Na uifarif nuvuon ijiebuon kuaime vakfuon iji ijeg. Efarif iji fu ofreno fu asoifuon ijefuon ire fok fur tavan bog karmon. Ire fok fuka fuon gavo fu vek e ukakbe ijefuon fu e kafobuon ikreno ijeg rek.
GAL 4:2 Fu vek e ukakbe ijia asoifuon fu guakma e kafo bu ire fuon ifejdame samua vake tavan iji bu fu ga fu e damuigin reno bu ijia kuaga fu koikfuon samuagdiak.
GAL 4:3 Unam besum ijeg Kurais fuba ruainma ijia noiji no ijeg ren. No vierafero bu akai ga kaven ise ga unam usuikor moik igefuon iji no kunuom kiruinma ijieb no karaunuokro no iji jajiame ikreoin.
GAL 4:4 Regavo radkma ijia God fuon fu vierafenma ijia tavan ma iji rokga fu Farifuon iji kuamga fu ari ruain. Fu ema igeg asiefuon fu nafega fu e Jiusbuon akai rotit ijia fioin.
GAL 4:5 Fu ari ruainma ijefuon maiji fu e iji akaij ijefuon rotit ijia karinva iji karaunuoga no ma Godon afijaf rekfuon.
GAL 4:6 No afuon ijefuon tavan amur iji no Jesu ma vierafenva ijia fu Farif fuon ijefuon Kaven iji unafduomga fu oinuvuon ijia aru fine kume Ate Asoinuno kumen.
GAL 4:7 Ijefuon no uria e kafobuon ikrejo bakin revo non Godon afijaf ijefuon fun no kege uifarif fuon redo no ire fu kuainma iji kekfuon.
GAL 4:8 Usuibe jaba God ma vierafenva ijefuon moik igefuon kaven kafokafo bu god ma bakin ijieb ja samuagdiain.
GAL 4:9 Regavo iviakma jan God ma vierafen ga God fun ja vierafen. Revo ja irerafuon una karoime kaven kafokafo moik igefuon iji jajiav? Regavo kaven iji bu ma bakin gavo bu zazaivo ijefuon bu izeg ja karauniakfuon? Regavo irerafuon ja vierafe jaka una rotit buon ijia buifuon ikrek?
GAL 4:10 Regavo ja e Jius bu rejo ijeg ja tavan kafo ga asam ga juaivasia guf ijia unam kafokafo ja rejo iji ja vierafe God fu ja karauniakfuon.
GAL 4:11 Regavo naka joifuon bomana oifiadien ijefuon maiji na Godon vuak ma iji na ja nijaidiainva iji jan abe dakaroinva ijefuon na daro nun nam ijia nisen.
GAL 4:12 Uviaifnu eraneb bu Jesu Kurais ma vierafejo iji na ja soisoime ejafiame kia ja e Jiusbuon akai ja javo iji nan arenvano jak jaka arekfuon. Jan vierafe na jana fioinva ijia naba e Jiusbuon akaij iji jain gavo na ja vierafene kegoijo na ijeg jame reoin. Regavo tavan ijia jaba ire ise kafo nun ren revo iviakma ja e Jiusbuon akaij iji javo ijia ja na arafirieme oifian abe miev.
GAL 4:13 Regavo jan vierafen na ai be vakro vuako ijia na adam abejga ijefuon na ijia jon vuain. Regavo tavan iji na vua ijia jana finva ijia na Godon vuak iji na amur abe ja nijaidiain.
GAL 4:14 Regavo madu adam ise vajai nun ijia namo iji fu ja biesiain revo jaba na jume uzain. Regavo ja oimarknum anera ga Jesu Kurais oimardiavo ijeg ja na oimarknum aferdien.
GAL 4:15 Regavo tavan ijia jaka bomana oimarknum vuak nun fain! Regavo iviakma jon ja oimarvo iji fu irerag aben? Ja vek oimarevbatie jaka bomana oimarenva ijefuon ja ni jon jafe na vajiek ijefuon maiji ja na ifejdiekuai vierafen.
GAL 4:16 Regavo vuak ma iji fu una ja isema rejo iji visu kuardiav ijefuon ja vierafe iviakma naiji nan e ani jon ren?
GAL 4:17 Regavo bu e iji vuak nijaidiavo ir kufuikin ijieb ja biesiaga ja uri akai buon iji jajiav. Regavo iji bu rejo iji bu jon ma ijefuon rejo bakin. Regavo ire fok bu rejo iji bu no tura be unuoga ja una bu bomana vierafekuai bu ijeg rej.
GAL 4:18 Regavo iji fun maren e kafo buka ja bomana vierafejo iji ma gavo bu ma ijefuon rejga iji fuka maren. Regavo bu tavan uruvana ma ijefuon ijeg tavan iji na igia fijo bakin ijia rekva iji fun maren.
GAL 4:19 Regavo afnun na una madu bara iji fu am nafekafa vajai fian abeno ijeg na una joifuon vajai fian abej. Regavo vajai fian na abejo iji fu ijeg navake ja kaven ijefuon unam ijia ja Jesuon e darokin rekfuon.
GAL 4:20 Regavo na ijia jana fijbatie na vuak ijeg naba kuardiak. Revo naka bomana ja vierafejo ijefuon na vuak ijeg kuaiv.
GAL 4:21 Regavo igia faif na e iji eraneb bu akaij ijefuon rotit ijia karine jakfuon iji vuak be kuardiakrejo ni faif. Godon akaij iji ja irerag rekfuon iji jabe samakaf vierafen?
GAL 4:22 Ijegvo Eburam ga afijaf nokarok (2) fu irerag kuardiainma iji vierafef. Eburamon barak Sera fu am besum (1) nafen. Regavo Eburam fu bara Ega bara iji fu Seraon ikreno iji afem fusik naiga fu am be nafen.
GAL 4:23 Regavo am iji barak Ega Seraon ikreno iji fu nafenma iji fu Godri kuainma bakin gavo fum Eburamri bara ijek nainma ijefuon fu am iji nafen. Regavo am iji bara fuon Sera fu nafenma iji fu am iji God fu kua a nafekno kuainma ijin.
GAL 4:24 Regavo suar igi God fu unam nokarok (2) ijia fu efuon ifejdiamo iji fu bijame kuain. Regavo bara Ega iji fu akaij iji God fu uruor Sainai ijia Mosis mainma ijekma aresren. Regavo afijaf iji bu Mosison akaij iji javo ijefuon akaij ijar anu kuniaimga bu ijefuon ikrej.
GAL 4:25 Regavo madu isama Arabiak ijia if Ega ijefuon maiji fu uruor Sainai. Regavo fuiji fu e fok bu mai Jerusarem bu iviakma karinva ijiebuon asie ijekin ga bu akaij ijar anu kuniaimga bu ijefuon ikrej.
GAL 4:26 Regavo madu bara Sera Eburamon barak iji fu mai Jerusarem varur ijek aresren ijefuon e iji bu mai ijia karijo iji bu akaij ijefuon rotit ijia karijo bakin. Ijefuon fuiji fu asienuvuon igekin.
GAL 4:27 Regavo Godon buk bu usuibe isoinva ijia fu mai iviamkor Jerusaremon ijeg bijame kuai, Bara guri ba vajai fiaigma am nafenma iji ni uruvana biumame oimaremne. Ijefuon maiji ja am uruvana nafekfuon revo bara iji baru fuon ijek fino iji fu sibank nafek.
GAL 4:28 Regavo uviaifnun noiji no e Aisek aikin. No am iji God fu Eburam kuainma ijia nafeduinva ijekin ijefuon no Godon afijaf.
GAL 4:29 Regavo tavan be Ismair am be bara Ega fu Eburamk naine nafenma ijar uri Aisek am iji Godon Kaven ijefuon daro ijia Sera fu nafenma ijek bijain. Ijegvo iviakma e iji eraneb bu akaij ijefuon rotit ijia karinva iji bu e iji Jesu ma vierafejo ijiena bijaiv.
GAL 4:30 Regavo Godon vuak bu usuibe isoinva ijia fu irerag iji kuai? Bara iji fu barak on Seraon ikrekafa a kimene mainma iji ni farif fuon ijek kiaga bu ar igi areme vak. Barak iji Seraon ikreno ijefuon farif iji fuba am iji God fu Sera kua a nafekno kuainma ijefuon sinuom roin karkno kuain.
GAL 4:31 Ijefuon uviaifnun noiji no barak iji Ega Seraon ikreno ijefuon afijaf bakin revo noiji no bara Sera e kafobuon ikreno bakin ijefuon afijaf. Ijefuon e iji bu ja aferdia una e Jiusbuon akai rotit ijia uniaga ja jakfuon iji vuak buon jab faik.
GAL 5:1 Regavo Kuraisri no karaunuoga noka dazme ma karikfuon. Ijefuon jaka giriesame iref. Regavo jab zazaiga e Jiusbuon unam usuikor ga akai buon ijar una ja kuniai kiriak.
GAL 5:2 Ijefuon enun igi na For nar kuardiavno faif. Ja e binob vajai jon ijia kania ufume anf namdiaga ja maturaikva Kurais irerag fu rene guainma iji fu ja ifejdiakma bakin.
GAL 5:3 Regavo na madu una vuak ni besum iji kuardia e kafo bu Mosison akai besum iji jame vajai jon ijia kania ufume anf namdiakva nika akai fok Mosison iji igiame jakfuon.
GAL 5:4 Regavo ja vierafe ja akaij iji igiame Godon nifak ijia maturaime irekva iji ja Kurais ja daturame nuink akozev revo ja Godon ma iji areme usem gama ijia irev.
GAL 5:5 Regavo noiji no ma vierafe God fu no kege fuon maturainma ijia unuokfuon no iji samuav. Regavo iji fu nuvuon no Kurais ma vierafejo ijefuon duadok ijia Godon Kaven fu daro fuon ijia ikrek.
GAL 5:6 Regavo e iji no Kuraisna besum renva iji ja e vajai jon ijia kania ufume anf nain revo jaba anf nakva iji jab bomana vierafek revo ja e ni kafokaforo jab ijeg vierafejo. Regavo ire besum iji ka ma bomana iji jon ja Kurais ma vierafejo ijar ja ifejdiaga ja e oijmiaknum ma rediakfuon.
GAL 5:7 Regavo ni igia faif jon ja God ma vierafene karijo iji ja mukorigia reja na giain. Regavo erar ja ni guragura abe miamga ja una fu gaga vuak ma iji ja javo iji jan aren.
GAL 5:8 Regavo iji fu Godri renma bakin gavo fu Kuraison duadok ijia ja kege una ar iji afuime ma karivakfuon ijia uniain.
GAL 5:9 Na vuak be bijame kuardiakrejo ni faif. Ire ist ukakbe ijar bred bomana iji fu foi urino. Regavo unam besum ijeg e nokbek (3) ijieb vuak kafo kufuime nijaidiakva iji bu e uruvana ijiebuon unam bu ma karivako iji kam ma arafiriav.
GAL 5:10 Regavo noiji non Jesuna besum ren ijefuon na vierafe vuak irerag na kuardiavo iji ja nana oimarev. Regavo e iji erar fu ja ni guragura abe miamo iji God fu e iji abe vajai fian mak.
GAL 5:11 Regavo uviaifnun naiji na vuak iji bu vajai buon ijia kania ufume anf navo na iji vek nijaidiavga E Jiusbuon e mamkanuk bu irerafuon vek na dab vajai fian miev? Regavo na kia God fu e iji bu ma vierafe Kurais fu kuros ijia buifuon guainma fu iji karauniamno kuaivo ijefuon e Jius iji bu na uzame vo na vajai fian miev.
GAL 5:12 Regavo e Jiusbuon e mamkanuk iji bu ja oifian miame vajai jon kania ufu anf namdiakrejga na vierafe buka buon bu vierafenva ijia jame vajai buon roin ka fok ufu korek.
GAL 5:13 Regavo uviaifnun gurie God fu ja kumedo ja fuon ruakfuon revo akai fu ja fuba samuagdiame anu kuniaikfuon. Regavo jan iviakma akaij ijefuon rotit ijia karijo bakin ijefuon jab una unam ise iji vajat jon bu rekuai vierafejo iji reok. Regavo nika jon ja oijmiavo iji nijainamime e besubesum ifenamiof.
GAL 5:14 Ijefuon maiji akai fok Mosis fu muinma iji fun akai besum ijar okuriain. Regavo akai besum iji noka izeg no vajai nuvuon oijmiavo ijeg e fok oijmiakfuon.
GAL 5:15 Regavo ja jon oijmanamivo iji ja arega tavan bog deajir abe musikuaiknum bijaikva iji jaka jon ja ma karijo iji dab arafirikfuon ijefuon nika mukoi jon samuanamiknum karif.
GAL 5:16 Ijefuon vuak igi na kuardiakrejo igi faif Kaven Akai iji mukorigia fine unam fu nijaidiame samuagdiamo ijia vaf. Ja ijegrekva iji ja tavan bog una vajat iji fu oimaikfuon fu vierafenma ijia jame kegokva bakin.
GAL 5:17 Regavo ire iji vajai nuvuon iji oimaikfuon iji vierafe rejo iji Godon Kaven iji fuka uzam revo irerag Kaven ijar vierafeno iji vajai nuvuon iji fu uzamon. Ire nokarok (2) vajai nuvuon guf ijia bu bijaime ire ma ga ire ise no vierafe no rekfuon iji bur zaraime bijuv.
GAL 5:18 Regavo tavan iji a Kaven Akai ijar kuardamo a ijin jame kego iji a akaij ijia biduame fino bakin.
GAL 5:19 Regavo no samakaf vierafega vajai nuvuon fu vierafenma iji no unam ise fok rejknum ire fok jufduokfuon fu ijesugin rekafa vierafen. Regavo ire iji fu vierafeno iji efarif roin bu e kafobuon bara tura ga bara roin bu bara kafobuon baru ijiena naoiv. Regavo madu barubara buba sanaminva ijia bu buon fudanamivo ijigam bara roin gia riezaga a oi isema vierafeno ijin. Regavo kafo iji bu god kufui ijiebuon sirimamejo ga zuaigiaknum musikuaiknum zienamime deajir abene bijaivo ijigam zie vo ire uruvana buonkua karvo ijin. Regavo agan bu ata kafokafo kariknum oi besum vierafejo bakin ijigam e kafobuon ire iji karekuai vierafej. Regavo bu do kugi ine nigen isereknum vo duok uruvana ine jer foiknum baru bara unam ise reoijo ijigam vuak ise uruvana kuaiknum uruvana irovajame ire ise kafokafo ijekin rej. Na amur kuardiainva ijeg na una kuardiav eraneb bu ijegrejknum kariokva e iji bu iviakma Godon afijaf rekva bado bu e iji God fu oibuon ijia samuagdiakfuon ijiena mazikva bakin.
GAL 5:22 Regavo Godon Kaven iji fu oinuvuon ijia fikma no fu vierafenma ijia jame keok. Ijefuon ire iji bu nuvuon no karine vako ijia rega e kafo bu giakfuon iji unam e roin oijmiavo ijigam oimarknum kariokfuon ijefuon maiji God fu no samuagduom. Regavo afurvejo ijigam unam kabuaikabuaikin karijo ijigam oi mafaime kaifnuvuon ijiena karijo ijigam e suaivki ga unam ma ijesugin e kafo marediavo ga ire ma iji nuibakin tavan bog giriesame kuniaime reoijo ga koiknuvuon samuanamik. Regavo ire iji bu Kaven Akai ijefuon ire ma ijefuon fu erar akai be abedeme ire iji bijukuriakma bakin.
GAL 5:24 E iji erane Jesuna besum renva iji jan vajai jon fu isema vierafene kiaga ja javo iji jan abe akozenva fu guame bakre vain. Ijefuon ire ise iji vajai nuvuon fu vierafene kuoga no rejo iji fuba una no irituome samuagduokva bakin.
GAL 5:25 Ijefuon maiji iviakma noiji no Kaven Akai iji oinuvuon ijia fino ijefuon daro ijia karij ijefuon fur samuagduoko no funa ejafanamime besum ok.
GAL 5:26 Regavo noba aroikarame vo e kafobuon ire iji giame oi isema vierafene nuvuon no besum oijmanamime afuim kari roko iji dab arafirikfuon.
GAL 6:1 Regavo uviaifnun e God ma vierafeno be fu ise ijar biesuaga fu zazaikma e iji ja Kaven Akai ijefuon daro ijia ikrejo iji ja isuar oi mafaime kabuaikabuaikin ifejdaga fu una unam ma ijia vak. Regavo jak koikjo samuanamiknum ifejdaf. Regavo jab zazaiga ise ijar vo ise ijefkin ijieb ja iviame vaga jak ise rek.
GAL 6:2 Regavo madu ja e kafobuon afik iji abe dabeknum dasumdiakva iji ja Kuraison vuak oijmanamivo iji jav.
GAL 6:3 Regavo erar fu aroikaraknum vierafe fu e bomanado fuba e ijekin iji ifejdiakma e iji fu koikfuon biesuanamimo ijefuon fu Godon nifak ijia fuka e ma bakin.
GAL 6:4 Regavo e besubesum ire iji ja rejo iji koikjo giame vierafega ja isema ren vo ja ma rejo iji giaf. Regavo ja giamga irerag ja rejo iji ja mukorigia rejga iji jaka ijefuon oimarek. Regavo jab kuai unam nuvuon no rejo iji fu mukor ga kaifnuvuon roin bum sibank mukoi kegno kuaik.
GAL 6:5 Regavo e kafobuon unam bu kegoijo iji jab giame kuaik ijefuon maiji no e fok no Godon nifak ijia irega fu ire fok no renva iji kege besum mazim guokfuon.
GAL 6:6 Regavo e iji erar bu Godon vuak iji nijaiva fu fainma iji fuka ire fuon fu nainma iji kege e nijaidiamon fuon kafo vajiakfuon.
GAL 6:7 Regavo ja vierafe ja God biesuakva iji ja isema vierafen ijefuon maiji ja izeg God biesuakva bakin. Regavo e be erar ire uij be abe mekma iji fu una ire ni besum iji rukfuon. Ijegvo fu iro bara abe mekma iji fu iro bara iji una ruk.
GAL 6:8 Unam besum ijeg e be fu tavan bog ire vajat iji fu oimaikfuon iji reoino iji fu kaven fuon iji dab arafirido ire ise kafokafo fu fuon ruakfuon. Regavo una be iji erar fu tavan bog Godon Kaven iji fu oimaikfuon ijia reoino iji fu Kaven ijefuon ire ma kafo karknum unam ma karivako iji abek.
GAL 6:9 Ijefuon noba zazaime unam ma iji no kegoijo ijia zazaiknum anajuar abekfuon. Ijefuon maiji noba zazaikva no tavan iji God fu abedenma ijia ire ma iji fok bu rega no giame roin kekfuon.
GAL 6:10 Ijefuon tavan ma kafo ruakma ni e fok eraneb bu oifian abejo iji ifejdiaknum of. Regavo e iji bu jana agan besum rene God ma vierafejo iji bu bomana vierafene bu ma rediaf.
GAL 6:11 Iviakma vuak nun fun iga barem ijefuon na kainun na kuardako fu vuak nun isoinma iji fu areko na koiknu vuak radkma iji isoiv. Na isoiga ja vuak mamkanuk iji na isoinva iji giame vierafero fas igi For nar koiknu isoim nijiavro ja ijeg vierafek.
GAL 6:12 Regavo e iji eraneb bu ja vajai jon ijia kania ufume anf nakuai bu kikekmiavo iji bu jar giame buon oimarkuai bu iji rej. Bu ijegrejo na For na Jesu Kuraison kuros ijia na vajai fian abenva iji buba ijeg vajai fian abekfuon.
GAL 6:13 Regavo e iji eraneb bu amur vajai surif buon kania ufume anf nainva iji bu Mosison akai fok bu jame igiavo bakin. Regavo bu ja kiaga ja vajai jon ijia kania ufume anf naga e Jius bu ja giame una bu arordiakuai bu iji rej.
GAL 6:14 Regavo naiji na if nun iji abe aroikaravo bakin. Regavo na Jesuon if iji abe ajievknum aroikarav ijefuon maiji fu kuros ijia nuifuon guain. Regavo ire fok moik igefuon iji nan guainva ijekin ijefuon ire iji bu una na samuagdievo bakin. Regavo na roin na rejo bakin ijefuon maiji na bu nan areme gua ruainva ijekin.
GAL 6:15 Regavo efarif kafo bu vajai surif buon iji kania ufume anf nainva iji ga ba anf nainva iji fu ire bomana bakin. Regavo Godon Kaven ijar fu e be abe nibe rega fu Godon nifak ijia e iviamkor rekma iji fuka ma ire bomana ga mukor.
GAL 6:16 Regavo e iji bu oi karoime e iviamkor renva ijiga e fok ar iror igia Godon afijaf renva iji na buifuon sirimamek. Na sirimamega Godri tavan bog roigin buon oifian abene ma rediaknum samuagdiaga bu afuime karikfuon.
GAL 6:17 Regavo vuak nun radkma igi na ja kuardiavno jab arega e kafo bu una na vajai fian ga oifian abe miek. Ijefuon maiji ur vajai nun igi mataimatan na abenva iji ja gieme vierafe naiji na e Jesuon ikrejo.
GAL 6:18 Regavo uviaifnun na sirimamega E Bomana Jesu Kurais fu ja ma rediaga ja mukorigia kari vakfuon.
EPH 1:1 Fas igi For nar isoiv. Regavo fun Godri na imut bijieme daro mienma ijefuon na e afasor fuon rene Jesu Kuraison vuak ma iji abe e roin kuardiaoij. Ijefuon nar fas igi isoim e iji ja ai Efisis karine God ma vierafeknum vo giriesame unam fuon ijia kegoijo iji nijiav.
EPH 1:2 Regavo na sirimamega God Asoinuvuon ijiga E Bomana Jesu Kurais fu jon oifian abene ma rediaknum mukorigia samuagdiaga ja afuime karikfuon.
EPH 1:3 No God E Bomana nuvuon Jesu Kuraison Asoij iji aroik. No Jesu Kuraisna agan besum renva ijefuon God fu fuon ma iji fu varur gufia nainma iji fum efkin vajuom. Regavo iji fu vajuomo iji fu kaven nuvuon daro miam.
EPH 1:4 Regavo God fu moikigi fu vek ba amarenma ijia fun Jesu Kuraison duadok ijia no kege unuoga no una efuon rekro vierafen. Fu vierafero no nifak fuon ijia no e akai re vo madu noba ise kafo rekro fu ijeg vierafen.
EPH 1:5 God fu no bomana oijmuinma ijefuon fun usuibe ijeg vierafero fu no ke arir unuikin no una afijaf rega Jesu Kurais fu no karaunuokro fu iji vierafen. Regavo iji fun Godri fuon vierafenma ijia ga fu oi maikfuon ijia fu ijeg ren.
EPH 1:6 Ijefuon noka bomana God aroik. Ijefuon maiji fuka unam ma bomana iji nuvuifuon rene Farifuon besum fu oijmamo iji abe efkin no muin.
EPH 1:7 Regavo Jesu Kurais fu kuros kaf ijia fu guame kavuan fuon fu arinma ijia fun no karaunuin. Regavo fuon fu no ma reduomo iji fuka ma bomana ijefuon fu ise nuvuon guome aren. Regavo Godon vierafenma iji fuka ma bomanak.
EPH 1:9 Ijefuon fun usuibe vierafe fuon ijia jame ire fok kanaufu baren. Regavo fuba migegare kege samafren gavo fu kege sauim rein. Regavo iviakma fu Jesu Kuraison duadok ijia unam iji fu abe sauinma iji abe samafren.
EPH 1:10 Regavo tavan radkma iji abekma ijia God fu irerag fu rekafa vierafenma iji fu rekfuon. God fu vierafe fu ire fok fu amardiainma bu moikigia ga varur gufia naoivo iji kege una besum uniame Jesu Kurais abe unaga fur nigen rene ire fok samuagdiakafa fu ijeg vierafen.
EPH 1:11 Ijefuon God fun vierafe fuon ijesugin javknum ire fok amardiam. Regavo madu fun fuon vierafenma ijia fu usuibe no kege unuin. Fu vierafe fu no kege unuinkin no Jesu Kuraisna agan besum rene una Godon e rekafa fu ijeg vierafen. Regavo fu ik amur ijia fu no kege unuinma iji fu anej ma ijefuon kege unuin.
EPH 1:12 Regavo noiji no efuon amur Jesu Kurais ma vierafen. Regavo God fu vierafe fu no kege unuoga no fuon sanainma iji abe oga e fok bu ijia guome una God aroikro fu ijeg ren.
EPH 1:13 Regavo madu ja Godon vuak ma iji ja mukoi fai ga ja Jesu Kurais ma vierafenva ijefuon vuak ma ijar ja karauniam. Regavo tavan iji ja Jesu Kurais ma vierafenva ijia God fu Kaven Akai fuon fu usuibe kege vajiakafa kiainma iji fun kege oijon ijia anf igeg namdiain.
EPH 1:14 Regavo God fun Kaven Akai fuon kege oinuvuon ijia anf igeg namduin. Ijefuon no anf ijia game vierafero God fu no fun kege efuon rene aferduo una unam ma karivako ijia unuin. Regavo God fu ijegrenma ijefuon iviakma eraneb bun una Godon e rejo iji buka fu aroiknum if fuon abe ajiev.
EPH 1:15 Ijefuon irerag fok God fu jon renma na ijefuon fuon oimarknum sirimamej. Regavo madu na jon izeg ja E Bomana Jesu Kurais ma vierafejo ijigam izeg ja Godon e iji ja oijmiavo iji fuka ma bomana rena na iji fain. Ijefuon na tavan bog naka joifuon God on oimarvo ga madu naka tavan bog joifuon God sirimamej.
EPH 1:17 Regavo na E Bomana nuvuon Jesu Kuraison Asoij iji sanainma ijekma kaf gufia fino ijefuon sirimamek. Na sirimamene kuaga Kaven Akai iji fu ja ifejdiaga ja God fu e izekin iji ja mukorigia game vierafeknum ga fu mukoi vierafek.
EPH 1:18 Regavo na madu joifuon sirimamega Kaven Akai ijar nigen jon kege samafrediaga ja ire ma iji God fu joifuon rediamo ja iji mukorigia giame vierafek. Regavo madu Kaven Akai ijar nigen jon kege samafrediaga ja izeg Godon ma rediamon iji fu efkin vajiamon iji mukorigia giame vierafek.
EPH 1:19 Regavo eraneb no fu ma vierafejo iji fu daro fuon ma gigikin ijia ifejduoknum vo samuagduom. Regavo daro iji fu iviakma no ifejduo ga samuagduomo iji God fu daro besum ijia Jesu Kurais kuamga fu una urin. Areme fu kuamga Jesu fu varur gufia ajieme imut maink fuon ijia daro abe fin.
EPH 1:21 Regavo Jesu Kurais fu iviakma fu anera kafo bu varur gufia ire fok samuagdiavo iji fur samuagdiam. Regavo e iji bu iviakma ga rad bur moikigi samuakuai bu daro abe karinva iji fok fur samuagdiam. Regavo Jesu Kuraison if fu abe ik fuon reoino iji fu iviakma fu ijeg nam vo tavan bog fu ijeg navak. Regavo fu if kafo izekin ijieb iviakma moikigia vo rad if fuon asim gafa ajie vakma bakin.
EPH 1:22 God fu Jesu Kurais daro mamga fur ire fok samuagdiain. Revo madu God fu Jesu Kurais abe unamga fu sos ijefuon nigen ren. Revo eraneb no Jesu ma vierafene sos ijia besum afuivo iji no Jesuon vajat ijin. Ijefuon fun e besum Jesur koikfuon fine ire fok moikigia ga varur gufia naoivo iji samuagdiaknum e iji no sos ijia besum afuivo iji samuagduom.
EPH 2:1 Usuibe ja karine ruainva iji kaven jon bu Godon nifak ijia buka aoin. Ijefuon maiji ja God jaba mukoi igame ka ise kafokafo reoin.
EPH 2:2 Ja unam ise ijin jajiame e moikigia bu karine ise kafokafo reoijo jak ja ijeg reoij. Unam ijeg ja kari ruainva iji ja kaven ise iji fu fine varur gufi samuamo iji igain. Regavo kaven ise iji ja igainva iji fu iviakma fu moikigia fine e iji buba God igavo iji samuagdiam.
EPH 2:3 Regavo e fok bu usuibe izeg bu kegoinva iji no madu non unam besum ijeg reoij. Regavo madu noka vajai nuvuon ijefuon vierafenma ijia jajiame reoin. Regavo ni vierafe God fu ise nuvuon no kegoinva ijefuon fu no kam e fok bu moikigia oijo ijiena unam besum ijia vajai fian vajuoga no vajai fian abek.
EPH 2:4 God fuka no bomana oijmuinma ijefuon fu nuvuon oifian bomana aben. Fu oifian abe guok kaven nuvuon buka aoin ijefuon maiji no fu noba mukoi igain. Regavo fu vierafe fuka no ma reduokafa fu ijefuon no karaunuoma no Jesu Kuraisna besum una uri funa agan besum ren. Regavo iji Jesu fu renma iji kaven nuvuon bun aoinva ijefuon fu kuoma no una urin. Areme God fu no kege unuoga no Jesu Kuraisna besum una uri funa kaf gufia karij.
EPH 2:7 Regavo God fu ijegrenma ijefuon maiji fu e fok nijaidiaga bu fuon izeg fu e mardiamo iji giakafa fu ijeg ren. Regavo madu God fu vierafe fu e fok nijaidiaga bu izeg fu Jesu Kuraison duadok ijia e fok no oijmuinma bu iji gakafa fu ijeg ren.
EPH 2:8 God fu ja mardiamo ijefuon fu jon ja fu ma vierafejo ijia giame ja karauniain. Regavo God fu ja karauniainma iji fum fur efkin ja karauniain. Regavo jar ire ma kafo fuon renva ijefuon fu ja karauniainma bado jab ijeg aroikarame kuaikfuon.
EPH 2:10 Regavo God fu Jesu Kuraison duadok ijia no amarduoma no una e iviamkor ren. Regavo fun usuibe ijeg vierafenma ijefuon noka uri unam ma ijesugin jame karioknum vo ire kafokafo no reokva noka ma ijesugin reok.
EPH 2:11 Regavo ja e Jius bakin iji ja bu nafenva ijia izeg ja amur kegoknum karioinva iji jabe vierafen? E Jius iji bu vajat surif buon kania ufume Godon anf nainva ijieb bu ja kia jaba maturainvano kiain. Ijefuon maiji jaiji jaba Godon anf iji e Jius bu nainva iji jaba vajai jon ijia nain.
EPH 2:12 Regavo ja usuibe tavan besum Jesu Kurais jaba mukoi vierafen. Jaba Godon e iji fu usuibe kege uniainma igegrenva ijefuon jaiji ja e Jius bakin igeg kari ruain. Jaba Godon Akai iji fu usuibe efuon ijiena iganamikafa fu kuainma iji guf ijia kari ruain. Regavo ja moikigia jaba God vierafeknum karioin. Regavo madu ire ka ma mamkanuk kafo God fu rad jon rekfuon iji jaba vierafeknum kari ruain.
EPH 2:13 Usuibe ja God samaij ijia jaba kari ruain revo jaka aibe ijia karioin. Regavo iviakma jaka Jesu Kuraisna besum mazim karin. Revo jaiji fu Jesu Kuraisri kuros ijia guame kavuan fuon fu joifuon arinma ijia fu ja aferdia una Godna besum mazin.
EPH 2:14 Fun Jesu Kuraisri koikfuon no aferduome una unam no afuim kariokfuon ijia unuin. Fu e Jius iji abevo e Jius bakin iji aferduome una besum unuomga no agan besum rene karioij. Regavo fun Jesu Kuraisri kuros ijia guame azi iji bu bukuruvga no nuvuon junamime karioijo iji fun buja koren.
EPH 2:15 Regavo madu fu e Jiusbuon akai kafokafo bu name igiavo iji kege tuase koren. Areme e uifarif fuon iji no ataseme karinva iji aferduome una aganfuon iviamkor amarme unuin. Regavo iji fu renma ijia fu e agan nokarok (2) iji no nuvuon junaminva iji aferduo besum unuoma no afuime karin.
EPH 2:16 Regavo e Jius iji abevo e Jius bakin iji bu buon zienamiknum junamivo iji fun Jesu Kuraisri unam ijin abe iserekafa buifuon kuros ijia guain. Fu kuros iji fu guainma ijia fu bu aferdiame una Godon agan besum ren.
EPH 2:17 Regavo Kurais fu ruainma iji fu vuak ma iji no afuime karikfuon iji abe e fok kuardiakafa ruain. Vuak iji fu abe ruainma iji fu e Jius bakin iji aibe ijia karioinva ijigam e Jius iji bu God samai ijia karioijo iji kuardiakafa ruain.
EPH 2:18 Regavo fun Kuraisri e fok nuvuifuon unam amaren. Ijefuon iviakma e Jius bakin iji abevo e Jius iji no Kaven Akai ijar ifejduoga no God Asoinuvuon ijefuon nifak ijia ruak.
EPH 2:19 Ijefuon e Jius bakin iji iviakma ja una e ni kafo ga e ai binoko bakin. Regavo ja Godon afijaf renva ijefuon ja efuon ijiena agan besum rene karin.
EPH 2:20 Regavo jak madu jaiji Godon ar iji fu tuar azan ijia name kuniai kiriainma ijin. Ar ijefuon tuar iji e iji bu Godon vuak vierafene kuaivo ijiga e afasor iji bu Kuraison vuak abe kuaimoijo ijin. Regavo tuar uf iji ar fok kunaime manino iji fu Jesur.
EPH 2:21 Fu kunaim manine ifejdakok ar iji fu E Bomana ijefuon ar akai igeg datura uri arir manin.
EPH 2:22 Regavo jak madu ja efuon fok ijiena jaiji ja Jesuna ar bu sainva igekin. Jaiji ja ar iji God fu Kaven Akai fuon kuaga fu fuifuon ijia tavan bog fino iji bu savo ijin.
EPH 3:1 Na For na e be Kuraison ik reoijo. Regavo iviakma na dibur igia fijo ijefuon maiji na joisina e roin kuardiame kia, Ja e Jius bakin iji ja Godon eno kiav.
EPH 3:2 Regavo jaka fainva ijin God fu na ma redieme ik igin mienma ijefuon na jon ma ijefuon ik reoij.
EPH 3:3 Regavo fun Godri fuon vierafenma sauivkin iji na nijaidien ga vuak iji nan amur ijefuon ukakbe isoime ja nijiain.
EPH 3:4 Ijefuon ja vuak irerag na isoinva iji mukorigia dame giakva ja Jesu Kuraison sauivkin iji na kuaivo iji giame vierafek.
EPH 3:5 Ur God fu ire fuon sauivkin iji fuba abe e fok usuibe kari ruainva iji nijaidiain. Regavo iviakma fu koikfuon Kaven Akai fuon kuamga fu ire sauivkin fuon iji abe samafren. Fu ire sauivkin iji abe samafrega e ijiga e vuak fuon vierafene kuaivo iji bu Godon ire sauivkin iji gain.
EPH 3:6 Regavo Godon ire sauivkin iji fu abe sauinma iji God fu Farifuon Jesu kuama fu ari ise nuvuon ijefuon guain. Fu ijegrenma ijefuon maiji fu vierafe fuka e Jius bakin iji abevo e Jius iji kege una agan besum rene uniak. Areme fu kiaga bu unam ma karivako iji God fu Jesu Kuraison duadok ijia miakno kiainma bu iji abekfuon.
EPH 3:7 Regavo God fu na ma rediema ijefuon fu na imut bijieme daro miema na fuifuon ik rene vuak fuon ma iji abe e roin kuardiaoin.
EPH 3:8 Regavo Godon e fok ijiebuon uf ijia na vierafega naiji naka ma e ikin bakin. Regavo God fu na ar aremdieme kiemga na Jesu Kuraison vuak ka ma iji fu kanafuinma ijin abe e Jius bakin iji kuardiain.
EPH 3:9 Regavo fun God iji fu moikigi ga varur gufi amardiainma ijar usuibe juaivasia bare ruainma ijia fu koikfuon ire sauivkin fuon iji ba abe samafrena e fok bu gain. Regavo iviakma ik nun be na rekfuon iji na e fok nijaidiaga bu unam izeg God fu ire sauivkin fuon iji fu abe samakaf mimatamo bu iji game mukoi vierafek.
EPH 3:10 Regavo madu iviakma God fu vierafe fu e iji bu Jesu Kurais ma vierafejo ijiebuon duadok ijia fu ire sauivkin fuon iji abe samafrekafa fu ijeg vierafen. Fu samafrega anera fok bu daro abe varur gufi samuavo iji bu ire sauivkin fuon iji gakafa fu ijeg vierafen. Regavo anera ijieb unam ma iji kafokafo God fu reno iji bur mukoi giame vierafek.
EPH 3:11 God fun ik amur gamia ijeg vierafene ken. Ijefuon iviakma fun E Bomana nuvuon Jesu Kuraisri Godon vierafe ijin abe samakaf ijia mimatain.
EPH 3:12 Regavo noiji non Jesu Kuraisna agan besum ren revo madu non fu ma vierafejo ijefuon no Godon nifak ijia no vakuai noba nuanamik revo no zinunba vak.
EPH 3:13 Regavo e-e naka ejafiame kuardiavno jab igi na joifuon vajai fian abejo ijefuon bomana oifian abek. Regavo igi na vajai fian abejo iji na rad izeg ja Godon sanainma iji fateroin abekuai na iji joifuon vajai fian abej.
EPH 3:14 Ijefuon na ato same Asoinuvuon varur gufia fino ijefuon sirimamej.
EPH 3:15 Regavo fun fur agan kafokafo eraneb bu fu ma vierafejo varur gufia karinva iji abevo moikigia karinva ijiebuon Asoi besum ijin.
EPH 3:16 Na Godon sirimamega fu daro fuon ka ma darokin ijiga sanainma fuon ijia fu Kaven Akai iji kuaga fu oijon guf ijia daro miak. Fu daro miaga kaven jon buka darokma kariknum vo ja ma vierafejo ijefuon Jesu Kurais fu oijon ijia tavan bog fivak. Revo na sirimamega irerag kafokafo ja reokva jaka unam oijmanamivo ijesugin vierafene reok.
EPH 3:18 Ja ijegrenki ja uri Godon e fok ijiena besum izeg Jesu Kurais fu ja ka ma bomana oijmiainma iji mukorigia game vierafek. Revo Kurais izeg fu e fok igi no oijmuinma iji anej ga garin iji fuka bakin ijefuon fu erar mimgakma bakin.
EPH 3:19 Iji fuka ma God izeg fu e oijmiamo iji fu erar mukorigia game vierafenma bakin. Regavo no joifuon sirimamega ja koikjon uri unam izeg Jesu Kurais fu ja oijmiamo iji mukorigia game vierafek. Regavo na sirimamega Godon ma iji fok fu oijon ijia rare vo madu jaka fu aikin rek.
EPH 3:20 Regavo noka God aroik ijefuon maiji daro fuon fu oinuvuon ijia ikreno fuka ma bomanak. Ijefuon ire kafo noba fu kuakuai vierafenva ijiga no giavo bakin iji fuka kege vajuom. Ijefuon eraneb no Godon sos ijia besum afuiknum vo madu Jesu Kuraisna agan besum renva iji noka tavan bog God dab aroiknum karivak. Mare.
EPH 4:1 Naiji na e be E Bomana ijefuon ik reoijo ijefuon iviakma na dibur fij. Ijefuon nar ja ejafiame kiavno ni uri unam God fu vierafe ja ijia karikfuon fu kiainma ijia karivaf.
EPH 4:2 Regavo ni nakikmazak e soigin rene kabuaikabuaikin igia oi mafaime kaifjon ijiena oijmanamiknum kariof.
EPH 4:3 Regavo fun Kaven Akai ijar unam izeg no oi besum rene kariokfuon iji abe muin ijefuon jaka ijeg giriesame kariof. Ja ijegrekva jaka afuime kariokfuon.
EPH 4:4 Regavo e fok jaka Kaven Akai besum ijesugin abenva ijefuon jaka besum ren. Regavo ire besum ja abe ni guria abedeme vierafeknum kariokfuon iji God fu no karaunuokfuon ja ijesugin vierafek.
EPH 4:5 Regavo ni vierafe E Bomana nuvuon fuka besum ijesugin ga nuvuon no ma vierafejo iji fuka besum ijesugin. Regavo madu no bu kege Godon if ijia do ruarduinva iji bun e besum Jesuon if ijia kurame do ruarduin.
EPH 4:6 Regavo God fuka ma besum ijesugin ga fu e fokbuon Asoij ijin ga fur fuonkua e fokbuon E Bomana rene bu samuagdiam. Regavo madu fur e fokbuon oi guf ijia fine samuagdiako bu ire fok fu kuardiamo ijia jame reoij.
EPH 4:7 Regavo iji fuka ma E Bomana nuvuon fuka besum ijesugin. Regavo Kurais fu ik kafokafo kege e besubesum no vajuin. Areme fu madu daro muoga no ik kafokafo ijin reoij.
EPH 4:8 Regavo buk akaij ijia kafar be bu isoinva iji bu ijeg kuai, Fu varur ma kaf ijia ajie vainma iji fu e kafo aferdiame ijia vain. Areme fu uri efuon ire ma kafo efkin kege vajiain.
EPH 4:9 Regavo vuak iji bu kuai, Fu varur kaf gufia ajie vainmano kuaivo ijefuon maiji irerag? Ijefuon maiji Jesu fu ur moikigia ari kekome guamga bu abe mako guf ijia unain. Regavo rad fu varur ma kaf ijia ajie vain.
EPH 4:10 Ijefuonvo e besum iji ari ruainma ijar una madu ajieme varur kaf iji asime vain. Regavo fur fine ire fok moikigia naoivo iji abevo varur gufia naoivo iji samuagdiam.
EPH 4:11 Regavo fun e ijar koikfuon daro fuon iji efkin kege e kafokafo vajiain. Regavo e roin fu ke uniame kiamga bu afasor rene vuak fuon abe oin revo e roin fu ke uniame kiamga bu Godon vuak vierafene e kuardiaoij. Regavo madu e roin fu ke uniamga bu Godon vuak ma iji abe e roin nijaidiav. Regavo e roin fu kega bu e iji God ma vierafejo ijin samuagdiaknum vuak nijaidiav.
EPH 4:12 Fu vierafero fu ijegrenki Godon e fok eraneb bu Jesu Kurais ma vierafejo iji bu daro abe mukorigia kanafume samuaknum fuifuon ik re vakafa fu ijeg ren. Regavo iji fu renma ijefuon maiji fu vierafe bu efuon mukorigia ifejdiaga bu unam fuon ijia bu e darokin rene karikafa fu ijeg ren.
EPH 4:13 Regavo ire ma iji Jesu fu efkin vajuomo ijar no kege besum unuoga no oi besum revo vierafe besum abe Godon Farif iji ma vierafek. Areme no uri e darokin igegrene Jesu Kurais mukorigia game vierafekin no fu aikin rek.
EPH 4:14 Ijefuon noba una madu am ukakna igeg vierafek. Regavo noba ire vanag iji bu saof azan ijia naoikok buibur ijar bu kam ufime unam kafokafo ijia oijo ijeg noba rek. Ijegvo noba karine e ir kufuikin ijiebuon vuak kufui iji bu nijaiduovo iji faik. Ijefuon maiji e iji kufui reoijo iji bu e biesiako bu unam ma ijesugin kegoijo bakin revo bu afikin uruvana biediav.
EPH 4:15 Ijefuon noba ijegrek revo noka vuak ma ijesugin oijmiame kaifnuvuon kuardiaok. Regavo Kurais fu sos nuvuon ijefuon e nigen ijin. Ijefuon noka uri unam kafokafo ijia izeg fu kegoino no madu noka uri giriesame ijeg kegokfuon.
EPH 4:16 Fun fur vajai nuvuon kafokafo kege besum samuam. Regavo ni vierafe vajai ijiebuon besum afuime ik buon rejo ijefuon bu vajai iji biduako fu oin. Ijegvo e fok no madu no nuvuon oijmanamikva sos nuvuon fu ofrene e darokin igeg rek.
EPH 4:17 Na E Bomana ijefuon if ijia ja ejafiame kiavno jab una e iji bu God ba vierafeknum karioinva iji matiak. Ijefuon maiji e iji bu unam ijekin ijia kari ruainva ijiebuon vierafe iji fuka ma buze ijesugin ga nigen buon fuka samafrenma bakin.
EPH 4:18 Regavo e ijekin iji bu unam iviamkor iji God fu e kege uniamo ijia bu ar kafar kafo abekva bakin. Ijefuon maiji e ijekin iji bu ire ma kafo bu vierafenva bakin. Regavo madu buka ada girme Godon vuak iji ba faikuai vierafen.
EPH 4:19 Ijefuon buka unam iji barubara fudainamivo iji vierafeknum unam ise ijekin iji reoij. Regavo madu bu vuak ise kafo kuaiv ga ire ise kafo rega bu jufdiakfuon iji bu juvo bakin. Bu ijegrejo ijefuon buka tavan uruvana ise kafokafo rekuai vierafej.
EPH 4:20 Regavo jaiji ja e iji bu Kuraison vuak nijaidiavo iji bu unam ise ijekin kafo buba nijaidiain revo naka ma vierafega bu Jesusina bun kuardiava jan fain. Regavo madu ja efuon renva ijefuon bu vuak fuon ma iji abe nijaidiain.
EPH 4:22 Ijefuon ni unam usuikor iji ja ijia kari ruainva ijin giame nui gafiaf. Ijefuon maiji unam usuikor ijar ja kam arafiriain ga ja kam karoimga ja uri unam ise kafokafo rekuai vierafeoin.
EPH 4:23 Ijefuon ni nigen jon ga oijon ja vierafejo iji kege una God vajaga fur kege iviamkor amardiak.
EPH 4:24 Regavo jaiji fun Godri kege una fu aikin amare uniainmado ja e akai rene unam fuon ma ijia keok. Ijefuon ni uri una e iviamkor igegrene kariof.
EPH 4:25 Ijefuon noba una kufuimeok gavo noka vuak ma ijesugin kuaik. Ijefuon maiji e fok noka Jesu Kuraison agan ga vajai besum renva ijefuon noba nuvuon biesuanamik.
EPH 4:26 Regavo ja kaifjon kafona ire kafofuon zienamikva iji jab ziem oine tavan nakik revo nika migegare uri kaifjon ijiena vuak kuaim imut kenamif. Regavo jab zazaike zien jon ijar uri bomana rene ja kam ise kafokafo rek.
EPH 4:27 Regavo jaba ijegrekva iji ja Kaven ise Setan ar aremdaga fu ja kam ise kafo rekfuon.
EPH 4:28 Regavo e iji bu tavan bog niesaoijo iji buba una madu niesakuai vierafek. Regavo buka daro buon ijia giriesame ik renkin bu koikbuon biduanamiknum vo e iji bu sinuom bakin isema karijo iji ifejdiakfuon.
EPH 4:29 Regavo madu vuak jon ja e roin kuardiavo ijia jab vuak ise kafo kuaik. Regavo nika vuak ma ijesugin kuaiga e iji bu ja fazdiavo iji vuak ijar bu ifejdiaga bu daro abene una biom ma vierafek.
EPH 4:30 Regavo jab oine uri vuak ise kafo kuaim Godon Kaven Akai iji oifian mak ijefuon maiji Kaven Akai iji fu oijon ijia fin. Regavo madu fu Kaven Akai ijar anf igeg jana namdo rad tavan ijefuon ruakma God fu ja karauniak.
EPH 4:31 Ijefuon ja oi ise vierafejo ijigam zienamivo ijigam ire kafofuon deajin abejo iji nika kege gareg koref. Regavo madu ja kaifjon ijiena musikuaivo ijigam buisina vuak ise kafo isuar kuaimoijo iji nika aref. Regavo madu kaifjon ijiebuon oi isema ja vierafejo iji nika kege gareg koref.
EPH 4:32 Regavo nika kaifjon iji tavan bog ma rediame buon oifian abef. Regavo izeg God fu Jesu Kuraison duadok ijia fu ise jon giame aremo ijeg ni jak una kaifjon ijiebuon ise iji giame aref. Regavo jab ise ijefuon afikin iji barenma iji kege una ruak.
EPH 5:1 Regavo ni vierafe jaiji jaka Godon afijaf ga fuka bomana ja oijmiamon. Ijefuon ni uri giriesame makai fuon ijia javaf.
EPH 5:2 Regavo jon ja nakikmazak karivako ijia nika unam izeg Kurais fu no oijmuinma ijeg jak kaifjon oijmiaf. Ijefuon maiji fu no ifejduokafa vierafene areko bu fu kanain. Regavo fu guainma iji fuka isuf udi mukor ijar utuame ajie vakga God fuka isuf ijin faime oimaren.
EPH 5:3 Regavo jaiji jaka Godon e ren ijefuon jab uri siroij igegrene barubara ok. Regavo madu jab uri sinuom ga mon rareme jasugin kareoknum vo vuak ise kafokafo kuaimoijo. Ijefuon maiji ire ise ijekin iji e Godon Akai oijo iji buba reok.
EPH 5:4 Regavo madu jab uri ir jon ijia vuak ise ka muigin kafo kuaik vo barasina ga barusina jab kuaiknum e roin ke varaimene kimok. Ijeg jab revo nika tavan bog ir jon ijia una Godon oimaref.
EPH 5:5 Regavo vuak igi na kuardiakrejo iji fuka mano ni mukorigia faif. Erar fu sinuom ga mon iji bomana oijmiaknum uruvana vierafeno iji fu e iji bu God kufui iji sirimamejo fu ijeg ren. Revo erar bu oifuon ijia ire ise muigin iji vierafeoino ga barubara fudainamime unam ise rejo e iji buba una e iji God ko Kurais bu oibuon iji samuagdiavo ijiena mazim karik.
EPH 5:6 Ijefuon jab uri zazaime una e iji bu kuai unam ise ijekin iji bu mano ijeg kegofno kuaivo ijiebuon vuak kufuij iji faik. Ijefuon maiji God fu e ijeg ise reoijo iji fu kam arafiriak.
EPH 5:7 Ijefuon ni e ijekin ijin mukorigia giame agordiaf.
EPH 5:8 Ja usuibe jaka nakinma ijia kari ruain gavo iviakma jaka una E Bomana ijefuon e renva ijefuon jaka una sanainma ijia karij. Ijefuon ni uri e iji bu sanainma ijia karinva ijeg kariof.
EPH 5:9 Ijefuon maiji ja sanainma iji abe kariokva e fok buka unam izeg ja ire ma ijesugin reoknum karijo iji giak. Regavo madu bu izeg ja unam ma ijia kegoknum vo vuak ma ijesugin kuaimoijo bu iji samakaf giakfuon.
EPH 5:10 Ijefuon unam kafo ja rega E Bomana fu jon oimarkfuon iji ni koikjon giriesame nisaif.
EPH 5:11 Regavo ja e iji bu unam nakinma ijia kariknum ire ise kafokafo reoijo iji jab jajiame buna ijegreogavo nika mukorigia agordiaf. Regavo nin Godon sanainma iji abe e iji bu unam nakinva ijia kegoijo ijia nijaidiaga bu koikbuon ise buon bu renva iji giame vierafek.
EPH 5:12 Regavo unam ise kafokafo bu isuar sauime reoijo iji fuka ma ire juvkin ijefuon noba uri vuak ijin kege kuaimok.
EPH 5:13 Regavo ja ire ise fok isuar sauime reoijo iji kege sanainma ijia samafrekva ja unam ise ijiebuon anej ma iji giakfuon.
EPH 5:14 Ijefuon maiji fu sanainma ijar ire ise kafokafo no sauime reoijo iji fur kege samafrek. Regavo dua be bun usuibe roinva iji fu ijeg kuai, E iji ni turanamime urif. Regavo madu e iji ja aoinva iji ni una uriga Kurais fu ja aferdia sanainma ijia uniak.
EPH 5:15 Ijefuon nika nakikmazak jon ja karivako ijia mukorigia samuanamiknum kariof. Regavo jab uri e iji buba mukoi vierafenva ijeg kariok.
EPH 5:16 Regavo iviakma moikigia fuka ise ijar raren ijefuon ni giriesame tavan jon iji kege ire ma ijesugin mimatame reoknum vo Godon vuak iji nijaidiaf.
EPH 5:17 Regavo jab uri nigen iserenva igegreok revo nika irerag E Bomana fu joifuon vierafenma iji giriesame nisaif.
EPH 5:18 Regavo ja do kugi iji ine nigen iservo iji nika aref. Ijefuon maiji do kugi ijar unam jon ja ma karivakfuon iji kam arafiriak. Revo nika Kaven Akai ijar abega fu tavan bog oijon guf ijia rare ga fur ijia fine ja samuagdiaf.
EPH 5:19 Regavo ja jon besum afuime oimarvo ijia ja E Bomana iji aroime fu dua Sams ga dua akai ga dua kafo no fu urukafakva iji nika oijon fok ijekma urukafaf.
EPH 5:20 Regavo nika E Bomana nuvuon Jesu Kuraison if ijia ire kafokafo ijefuon tavan bog God Asoinuvuon ijin oimardaf.
EPH 5:21 Regavo ni Kurais ja igame abe E Bomana kuame nidoivo ijeg una jon iganamime nidoinamif.
EPH 5:22 Regavo bara iji ni E Bomana iji ja igame fu nidoivo ijeg ni una madu barufjon igiame bu nidosiaf.
EPH 5:23 Ijefuon maiji Kurais fu sos ijiebuon e nigen rene bu samuagdiamo ijefuon unam besum ijeg vo baru iji fu daro nado fur e nigen rene bara fuon samuak. Regavo e iji bu Kurais ma vierafejo iji fun karauniainma ijefuon bun una Kuraison vajat ren.
EPH 5:24 Ijefuon ni unam izeg e sos iji bu Kurais igavo ijeg bara iji fuk una barufuon ijesugin nidoime irerag fok fu kuardamo ijin igiak.
EPH 5:25 Regavo baru iji ni igi faif. Kurais fuka e sos fuon iji bomana oijmainma ijefuon fu vajai fuon abe buifuon guain. Ijegvo baru iji jak barafjon ijesugin mukorigia oijmiaf.
EPH 5:26 Regavo Kurais fu efuon ijiebuon guainma iji fuka vajai fuon abe isuf igeg God baroidain. Regavo fu e iji bu fu ma vierafejo iji kege una e akai igeg uniakafa vierafen. Ijefuon fu ja do ruardiainma ijiga ja uri vuak fuon ma vierafenva ijar fun ise jon iji somdiain.
EPH 5:27 Fu ijegrenma ijefuon maiji fu efuon ijiebuon unam iji amaren. Regavo fu vierafe buka maturai ga e akai rene nifak fuon ijia e ise renva bakin igeg irekfuon fu iji ijeg ren.
EPH 5:28 Ijegvo efarif iji fuka vajai fuon fu oijmamo ijeg una barafuon iji madu mukorigia oijmakfuon. Ijefuon maiji a baraon oijmamo iji a vajat on ijin oijmamo igekin.
EPH 5:29 Regavo ni vierafe fu erar vajai fuon game uzakma bakin revo fuka tavan bog vajai fuon samuaknum ire vajak. Ijegvo Kurais fuk unam besum ijia fu e sos fuon iji fuka mukorigia samuagdiam.
EPH 5:30 Ijefuon maiji noiji non funa vajai besum renva ijefuon fu no samuagduom.
EPH 5:31 Regavo ja buk akaij ijia dame gakva iji bu ijeg isoime kuain. Ijefuon baru iji fun asie ga asoifuon areme una bara fuon abe are no barakin iji bun vajai besum rene karivak.
EPH 5:32 Regavo vuak iji bu buk kafar ijia isoinva ijefuon anej ma iji fu vek ija sauim nam. Regavo vuak iji nan game vierafen revo vuak ijefuon maiji fu Kurais ga e iji bu fu ma vierafejo ijiebuon kuaim.
EPH 5:33 Regavo madu vuak ijefuon maiji fu joisina kuaim. Ijefuon e baru besubesum fuka vajai fuon fu oijmamo ijeg una bara fuon mukorigia oijmakfuon. Regavo madu bara iji ni baruon iji mukorigia agoikfuon.
EPH 6:1 Am iji jan e Bomana iji jame fu ma vierafenva ijefuon nika eofjon mukorigia igiaf. Regavo iji fuka unam ma ijefuon ja ijeg rek.
EPH 6:2 Regavo e Mosis fu akai fuon fu muinma ijia fun visume kuin asie ga asoijon mukorigia igiaf. Regavo erar fu eofijaf fuon mukorigia igiakma fu eofijaf fuon ijiena ma fivaknum vo ire ma kafo bu fuon rek. Regavo madu fu moikigia tavan jaoijor fivakno kuin.
EPH 6:4 Regavo asoifijaf iji ni faif. Jab uri afjon vuak ise kafo ga ire ise kafo buon rega bu bomana isediak. Regavo nika kuriaireknum mukorigia samuagdiaknum uguar ma ijia kuardiaga bu uri unam ma ijia Jesu Kurais jame ma vierafef.
EPH 6:5 Regavo e iji ja e kafobuon ba mon ik rejo iji nika ik irerag iji ja rekfuon ijesugin oi besum vierafene ejon mamkanuk ijiebuon ik ref. Regavo nika bu agordiaknum vo mukorigia igiaf. Revo madu ik irerag bu ja kuardiakva ni iji oijmiame ik ijin reknum vierafero ik iji ja Jesu Kuraison ik rejoro ijeg vierafef.
EPH 6:6 Regavo madu ja buon ik rekva iji jab uri vierafero ja nifak buon ijia ik reoijga bu ja giaknum vo bu jon oimarkro jab ijeg vierafene ik reok. Regavo ni vierafe. Ja e mamkanuk jon ijiebuon ik reoijo iji ja madu Jesu Kuraison ik reoij. Regavo God fun usuibe ijeg vierafenma ijefuon nika oijon fok ijekma ik ijin ref.
EPH 6:7 Regavo ja e kafobuon ik reokva nika oimarknum buifuon ik ref. Ijefuon maiji ja ma ema ijiebuon ik rejo bakin revo ja E Bomana ijefuon ik rej.
EPH 6:8 Regavo ni vierafef eraneb ja e kafobuon ba mon ik rejo ga eraneb ja monfuon ik rejo iji E Bomana fuka ik jon ma iji ja reoijo ijefuon unam ma kafo roib rediak.
EPH 6:9 Regavo e mamkanuk iji ni e iji bu jon ikrejo iji unam izeg bu ja igiavo ijeg jak una bu mukorigia samuagdiaf. Regavo jab uri e iji kam vajai fian vajiakfuon iji visume kuardiak. Regavo ni vierafe fu E Bomana jon varur gufia fino ijar ja abevo e iji bu joifuon ik rejo iji besum samuagdiam. Regavo tavan rad fu e mamkanuk iji abevo e iji buifuon ik rejo iji fok fu kege besum mazime ise buon giak.
EPH 6:10 Regavo vuak buin iji nika darokma E Bomana ijiena besum mazime kuaga fu daro fuon iji abe ja miak.
EPH 6:11 Regavo ni sinuom iji ja vajai samuanamikfuon iji God fu vajiamo iji kege saf. Ijefuon maiji sinuom ijieb kaven ise Setan fu tavan kafo ja biesiakva ja ijia kege rarekfuon.
EPH 6:12 Regavo ni vierafe no ema ijiena bijaivo bakin revo noka e mamkanuk e ka ise iji moik kafokafo samuavo ijigam kaven ise iji ka ma darokin iji bu moik igefuon ise iji samuavo ijiena bijaiv. Revo madu no kaven ise iji bu varur gufia karine ise kafokafo rejo ijiena bijaiv.
EPH 6:13 Ijefuon ni uri sinuom irerag ja vajai samuanamikva God fu vajiainma ijin kege saf. Ja sinuom ijin kege sakva tavan kafokafo ijia kaven ise Setan fu jana bijaikma jaba fu game juk. Regavo jaka uri giriesame funa bijaikin radkma ijia jar rarme Setan asime vek irek.
EPH 6:14 Ijefuon ni uri giriesame samuaf. Regavo Godon vuak ma iji a fainma iji nika abe madar igeg abese. Regavo on a nakikmazak maturai ga ma ijesugin reoino iji abe ire be gigikin igeg guge on iji okuramne.
EPH 6:15 Regavo madu vuak ma iji ja e roin kuardiako bu afuime karioijo iji abe diak surif igeg same samuaf.
EPH 6:16 Regavo tavan bog ni jon ja God ma vierafejo iji abe darer igeg nakaif. Ijefuon maiji darer jon ijar Setanon juaf uikin iji bu mian igeg naine ja iremdiakuai roko ijin kege bijia udakfuon.
EPH 6:17 Regavo ni unam izeg God fu tavan rad ise nuvuon ijia karaunuokfuon iji abe nigen jon ijia at gigikin igeg abesef. Regavo ni madu Godon vuak iji Kaven Akai ijar abe kuardamo iji abe kaki ka uikin igeg anu kunaif.
EPH 6:18 Regavo ire fok ja rekva iji ni arega Kaven Akai ijar nijaidaga ni ijia jame sirimamef. Ijefuon jab dazme karikfuon gavo jaka uri samuaknum karik. Regavo tavan kafokafo ijia ja sirimamejo ijia ni e iji God ma vierafejo ijiebuon sirimamef.
EPH 6:19 Regavo jon ja sirimamejo ijia ni nuifuon sirimamega God fu vuak ma ijesugin vierafe vajiekin. Fu vuak ma ijesugin vierafe vajiekin tavan iji na anerene vua kuaivo ijia naba juk gavo naka Godon vuak ma ijefuon anej ma iji abe visume kuaiga e uruvana bu faikfuon.
EPH 6:20 Ijefuon maiji naiji na e be Jesu Kuraison fateroin ijia vuak fuon abe e roin kuardiav. Regavo iviakma na dibur fijo ijefuon ni nuifuon sirimamega naba jukgavo naka vuak ma iji abe darokma kuaikfuon.
EPH 6:21 Taikikas fu uviainuvuon be no bomana oijmavo iji fu nona ma vierafeknum E Bomana ijefuon mukorigia ik reoin. Ijefuon fur vuak nun ga irerag fok na reoijo ijin abe ja kuardiaga ja vierafekfuon.
EPH 6:22 Ijefuon na kuaga fu jon vuakdo fur igia irerag no rejo iji abe kuardiaknum vo fur ja ejafiaga jon ja ma vierafejo iji fu girekfuon.
EPH 6:23 Regavo na kaifnuvuon bu jana besum Kurais ma vierafejo ijiebuon sirimamej. Na sirimamega God Asoinuvuon ijigam E Bomana Jesu Kurais kiaga bu ma vierafejo ijin abe bu miaga bu buon mukoi oijmanamiknum afuim karik.
EPH 6:24 Na vierafe God fu e iji bu tavan bog E Bomana nuvuon Jesu Kurais ba oijma daturagavo bum oijmamevako iji ma rediame mukorigia samuagdiakfuon.
PHI 1:1 Na For nar Timoti e iji no Jesu Kuraison ikreoijo nor fas igi isoin. No isoime Godon e iji ja mai Firifai ijia oi besum rene Jesu Kurais ma vierafejo ijigam e mamkanuk jon ijigam e iji bu e roin ifejdiavo iji ja nijiav.
PHI 1:2 No sirimamega God Asoinuvuon ijigam E Bomana nuvuon Jesu Kurais ijieb tavan bog ma rediame mukorigia samuagdiaga ja afuime karikfuon.
PHI 1:3 Tavan bog naka ja vierafejo ijefuon na joifuon God Asoinuvuon iji fuon oimarev.
PHI 1:4 Tavan bog na e fok joifuon na nun sirimamejo iji naka oimarknum sirimamej. Ijefuon maiji ja ik anej ijia Jesu Kuraison vuak ma iji na kuardiava ja faime uri na ire kafokafo nijieknum biduakienva iji ja vek rene rok.
PHI 1:6 Ja vuak iji faime ka abe ma vierafenva ijefuon na vierafe fu Godri unam ma iji jon renon iji fuba arek. Regavo fuka vek ijeg ifejdiaga ja unam ma ijesugin rejknum vake tavan radkma iji Jesu Kurais fu una roko ijia ire fok fur fok re barek.
PHI 1:7 Regavo jaiji naka tavan bog na oinun igia ja vierafeoijo iji fu mardo na ijeg ja vierafeknum fiok. Ijefuon maiji e fok ja nana ik ka mukor igi God fu abe na mienma iji ifejdiev. Ja dibur igi na fijo ijia ga madu na kekokva ijia na Godon vuak ma igi na mafaime abe kuaivo ijia jaka na ifejdien. Ijefuon e fok bu vuak iji faime uri giriesame vuak iji abe anu kunaime ma vierafe.
PHI 1:8 Regavo fun Godri fuonkua gieme vierafega izeg na ja oijmiavo iji fuka Jesu Kuraison oij ijia ruain.
PHI 1:9 Regavo igi fu nar nun na sirimamekafie vierafejo iji jon ja oijmanamivo iji fuka ofrene vak. Ja ijegrekva ja God fu e izekin iji ja ijia mukoi game vierafekfuon. Regavo ja ijia samakaf unam ise iji ga unam mukor iji ja giame unam ma ijesugin jajiame ke vakfuon. Regavo tavan radkma iji Kurais fu una roko ijia jab jukgavo jaka maturaime fu biek.
PHI 1:11 Regavo madu ja Jesuon daro ijefuon duadok ijia Godon unam ma ijia kegokva e bu ire ma iji ja e kafobuon rejo iji giame una Godon if iji dab aroik.
PHI 1:12 Ijefuon efnun na vierafe ja vuak igi mukoi vierafekfuon. Vajai fian kafokafo igi na biediavo ijieb Godon vuak ma iji Jesuon fu kuainma iji bijukurainma bakin revo fu ifejdamga fu bomana rene vain.
PHI 1:13 Unam ijegrejo ijar e juo karijo uruvana ga e uruvana igia karinva bu unam igi nun renma iji bun gien. Bu gieme una ma vierafega na ma Kuraison ikreknum vuak fuon ma iji abe e nijaidiavo ijefuon na dibur fijro bu ijeg vierafen.
PHI 1:14 Vajai fian ijieb nun rejo ijefuon e Jesu ma vierafejo uruvana buka ba juv vo jufdiaknum Godon vuak ma iji dab kuaiv.
PHI 1:15 Regavo iji fuka ma e iji God ma vierafejo roin Kuraison vuak maiji una e roin nijaidiavo bu igi na ijegrejo ijefuon buka oi isema na vierafene una na ziegafiev. Ijefuon maiji God fu na ifejdiega e uruvana bu uri vuak nun iji faime una Jesu ma vierafej. Regavo e roin bu na oijmienva iji bu oi ma vierafene vuak maiji abe kuain.
PHI 1:16 Ijefuon maiji e iji buk vierafega na Kuraison vuak ma iji ma faivo ijefuon na ijegrejoro bu iji vierafene una na ifejdiev.
PHI 1:17 Regavo e iji ziemoijo iji bu Jesu Kuraison vuak ma iji buba abe ma vierafene e kuardiav. Regavo bum if buon iji kam biom ajieme e mamkanuk rekuai vierafejo iji bu vierafe bu dibur igi na fijo ijia buka una vajai fian kafo madu vajiekuai vierafen.
PHI 1:18 Regavo vuak iji bu nijaidiavo iji bu ma vierafene nijaidiav vo bu isema vierafeknum nijaidiavo iji naba bomana vierafen. Revo bum ma Jesu Kuraison vuak iji nijaidiakva iji naka oimarev.
PHI 1:19 Regavo naka oimarkfuon ijefuon maiji na ma vierafe Jesu Kuraison Kaven ijefuon daro ga jon ja nuifuon sirimamejo ijar afikin nun kafokafo na biediavo ijia keuniev.
PHI 1:20 Regavo nun bomana na vierafenva iji iviakma igi vo tavan bog ik nun igi na rejo ijia naba zazaik. Na gua vo na nivek fijo ijia naba juk gavo na bomana oimarknum oinun fok ijekma Kurais aroikfuon.
PHI 1:21 Regavo unam na vierafenva iji igin na vajai nun igi na abe moikigia fijo ijia ire fok na rejo iji naka Kurais aroikfuon iji rek. Regavo na vajai nun moikigi na fijo ijia guakva iji fuk fu maren.
PHI 1:22 Regavo na vek moikigia fikva iji naka ire uruvana Kuraison rek. Regavo naba vierafe ire nokarok (2) iji guakfuon ga nivek fikfuon iji izar fu ma bomana iji naba vierafen.
PHI 1:23 Na ire nokarok (2) ijieb na kunie roinroin iviev. Regavo na vierafe na vajaima moikigi na fijo iji naka areme Kuraisk fivakfuon. Ijefuon maiji ar iji na Kuraisk fikfuon ijar moikigi no karijo iji fuka asin. Regavo na ja ifejdiakfuon ijefuon na joifuon vek moik ijia nivek jana fiok.
PHI 1:25 Regavo iji naka ma vierafejo ijefuon na vierafe God fuba kiega naba guakgavo na nivek jana fikin na ja ifejdiakfuon. Ijefuon maiji na ja ifejdiaga ja giriesame vuak na nijaidiaknum kuardiavo iji ma vierafene e damuikin rek. Na vek jana fijo ijefuon jon izeg ja Jesu Kurais oimardavo iji fuka oijon ijia do igeg irtoijme ajie urakfuon.
PHI 1:27 Regavo igia faif vuak ka ma bomana iji igin Jesu Kuraison vuak ma iji na nijaidiava ja fainva ijia kegoknum karivaf. Ja ijegreoinki na ijia vua giak vo naba ijia vuakva na oknum izeg jon ja unam ma ijin vek giriesame kegoijo na iji faik.
PHI 1:28 Ijefuon ka giriesame tavan bog uri vuak ma ijefuon mafaigavo jab uri e iji bu jana nigaraivo iji giame juk. Ja ijegrekva ja samakaf bu nijaidiaga bu ijia giame vierafega bu iji bu rad God fu bu kam uinituk. Regavo jaiji fun Godri karauniakafa fu ijeg vierafen.
PHI 1:29 Ijefuon maiji ja fun Godri vek ik amur ijia ja Jesu Kuraison ikrekfuon iji ken. Regavo ja fu ma vierafekva ijesugin bagavo ja madu fuifuon vajai fian kafokafo biediak.
PHI 1:30 Ijefuon iviakma jan nana azi ni besum ijia urav. Ja azi ni besum iji usuibe ijia na buna keva ja gienva iji na iviakma vek fine azi ni besum iji vek rejo iji jan faiv.
PHI 2:1 Ja Jesu Kurais ma vierafejo ijefuon Kurais fu ja daro miame oijmiame ja samuagdiako ja afuime karioij. Regavo jan Godon Kaven ijiena besum rene oijmanamiknum jon ifenamikuai vierafene rej.
PHI 2:2 Regavo ja unam ma iji jan rej ijefuon na ja ejafiame kia, Ire roin na oimarkfuon iji ja oi besum rene vo nigen besum vierafene besum oijmanamiv vo tavan bog ifenamikfuon.
PHI 2:3 Regavo jab uri ka aroikarame jonkua vierafeogavo e roin jab giame arek. Regavo ni isuar oi mafaime buna besum ganamime ifenamiknum kariof.
PHI 2:4 Regavo jab jonkua ik jon ja rejo ijesugin vierafegavo nika e roin vierafeknum vo izeg ja bu ifejdiakfuon iji vierafef.
PHI 2:5 Regavo oijon iji ka izeg Jesu Kurais fu vierafene kegoinma ijeg jak vierafene keof.
PHI 2:6 Regavo Jesu fu kegoinma iji fu ijeg keoin. Fuiji fu God ga bu busik buka besum ga fuba una asoifuok ar kaf iji bu karinva ijia fikafa vierafen. Regavo fum uri ire iji fu asoifuok samuagdiamo fok fuka nuigafiain.
PHI 2:7 Fuka koikfuon una am ukakbe rene una ema igeg moikigia nafen. Regavo fu ema igegrene e fok igiebuon ikreoin.
PHI 2:8 God fu vierafe Jesu fu guak ijefuon Jesu fu adumaduigin Asoi fuon igame vuak fu kuardainma iji rene vake bu dab kuros ijia kanava fu guain.
PHI 2:9 Fu guamga Godri kuama fu una urinma ijefuon fu dab aroime abe ka ar ma kaf ijia unain. Regavo fu madu if iji ka e fok ijiebuon if asidiainma iji abe fu main.
PHI 2:10 Regavo unam iji fun Godri vierafene amarenma ijefuon kaven fok kaf gufia karinva iji ga e fok moikigia ga aoime zuarunam karinva fok bu Jesuon if dab aroikafak.
PHI 2:11 Bu aroikafaknum sirimamene kuaiv Jesu Kurais fu ma E Bomana nuvuono kuaiv. Bu ijeg kuavo ijia buka God Asoij iji dab aroiv.
PHI 2:12 Ijefuon efnun Jesu Kurais fu asoifuon igainma ijeg na ijia jana fiko ja God igain. Regavo iviakma igi na ja uniame ruainva ijia nika God mukorigia igaf. Nika God agoiknum giriesame unam iji God oimaikfuon ijesugin ikrene vake barga ijar ja karauniak.
PHI 2:13 Ijefuon maiji fun Godri koikfuon oijon ijia ikreno ijefuon ja tavan bog irerag fu vierafe ja rekfuon ja ijin reoij.
PHI 2:14 Regavo ik fuon fok ja rekva jab vuak kafo ijefuon kuaiknum vo ik ijefuon musikuaiknum ikrek.
PHI 2:15 Ja ijegrekva iji jaka maturaime ok ga e buba ise kafo kege una ja namdiak. Regavo madu jaka maturaime Godon afijaf ijegreoga e iji tavan uruvana oi moik igefuon ise ijesugin reokuai vierafejo iji bu ja giak. Regavo jaka ikuosaij iji no kege nakinma ijia sana vako ijeg ja e ise rejo ijiebuon kafar ijia karikva iji ja ikuosaij ijeg sanaknum Godon vuak ma iji bu karauniakfuon iji nijaidiaf. Ja ijegrekva na ma ijefuon na tavan iji Jesu Kurais fu una roko ijia na joifuon aroikarak. Ijefuon maiji daro nun fok na akozme ik iji na renva iji fuba nisen.
PHI 2:17 Regavo jon ja ma vierafejo ijiga ik iji ja Godon rejo iji ja Godon isuf baroijo ijekin. Regavo bu na kaniebatie kavuan nun usekfuon ijar isuf jon ja baroinva iji fu ijar akum ijeg misoiga God fu oimaikfuon. Regavo na joifuon guakva iji naka nun na oimarvo iji jana ivajuinamik. Regavo jak na joifuon guakva iji jaka ijefuon nana besum oimarkfuon. Ijefuon maiji isuf nuvuon no baroinva iji God fun game oimaren.
PHI 2:19 Regavo na vierafe naka Timoti kua fu vua ja giak revo iji fu E Bomana ijar ijeg vierafekma na kua fu vuak. Fu vuakma fur vuak jon izeg ja karijo ijin giame una ro kuardie na faikva na oimadiek.
PHI 2:20 E iji fu nosik oi besum rene noka bomana joifuon rej.
PHI 2:21 Regavo e uruvana roin bu una buon bu oimardiakfuon ijin reoijgavo Jesu Kuraison ik iji bu rega fu oimaikfuon iji bu vierafejo bakin.
PHI 2:22 Regavo e igi Timoti fu e ma ga fur ka am iji fu asoifuon ifejdamo ijeg fur ifejdiema na Godon vuak ma iji abe e roin nijaidiain.
PHI 2:23 Na vierafe fu vuakfuon revo na samuaga e bomana akai samuamo iji fu vuak nun izeg kuaiga na game son Timoti kuaga fu vuak.
PHI 2:24 Regavo na E Bomana ijar ijeg vierafe miekma nason rad koiknu vua giak.
PHI 2:25 Regavo e be Ifafrodaitas iji uviainuvuon God ma vierafeno ga fu nosik besum Godon vuak ma iji abe e roin nijaidiamon. Regavo madu fuka nosik daromene Godon vuak ma ijefuon mafaime e roina musikuaimon. Regavo madu fur afikin roin nun roko iji kafo fur dasumdiemon. E iji ja kariga kuava fu igi na fijo igia vo jon fateroin ijia ifejdiemo iji kuaga fu ja giak vuakro na iji vierafen.
PHI 2:26 Regavo e iji fuka ja giakafa uruvana vierafen. Regavo madu fuka uruvana oifiaim ijefuon maiji ja adam bomana iji fu abenma iji jan fain.
PHI 2:27 Regavo iji fuka ma Ifafrodaitas fu adam bomana abene fuka guain gavo Godri ifejdainma ijefuon fu una urin. Regavo God fu Ifafrodaitas fuonkua ifejdainma bakin gavo fu madu nak ifejdien ijefuon maiji fu guainbatie naka bomana oifiadiek.
PHI 2:28 Ijefuon na vierafe naka fu kuaga fu una vuaga ja una fu ga fu oimadiakega oifian nun fok fu barek.
PHI 2:29 Regavo na kua fu una ja giak vuakma ni Jesuon if ijia fu oimardaknum afef. Regavo e fu aikin ijin arordiame oimarknum aferdiaf. Ijefuon maiji fuka Kuraison ikrene fuka guainma ijia ga fu una urin. Regavo madu izeg jar na ifejdiekuai vierafejo iji fur jon fateroin ijia uri ifejdieme Kuraison ik ren.
PHI 3:1 Ijefuon efnun ni E Bomana iji oimardaf. Regavo igia faif na vuak iji na amur isoim nijiainva iji madu kuardiakva fube afikin abe miak. Regavo vuak ijar ja samuagdiaga ja e iji bu ise rejknum ja biesiakfuon iji giame kekirakfuon.
PHI 3:2 Ijefuon e iji mukoi giavknum of ijefuon maiji e iji buka ise rejo. Buka maf kuriai iji bu e jakiavo ijegrene oknum ja biesia soisoime kia ja vajai surif jon kania ufukva ja Godon afijaf rekno kiavo iji agordiaf.
PHI 3:3 E ijekin iji agordiaf ijefuon maiji God fu vierafega buiji bu anf fuon ma iji abenva bakin. Regavo nor no ma anf fuon ma iji aben ijefuon maiji no Kaven Akai iji ma vierafene God sirimameknum vo madu Jesu Kurais ire fok fu nuvuifuon renma iji ma vierafeknum oimarev. Regavo noba ire kafo vajai surif nuvuon ijia reoijo iji kege ma vierafek. Ijefuon maiji ijeg no rejo iji noba Godon nifak ijia maturain.
PHI 3:4 Regavo ire iji no vajai surif nuvuon ijia reoijo iji nak na amur ijegreoin revo iviakma na una iji na ma vierafejo bakin. Revo erar fu iviakma irerag no vajai surif nuvuon ijia reoijo iji kege ma vierafekma ni faif. Ire ijekin iji nar ur mukorigia ja asidiame ire iji kege ma vierafeoin.
PHI 3:5 Ijegvo naiji bu nafedienva iji vuik besum (1) barko ijia bu vajai surif nun iji kanie ufu anf abedien. Regavo eofnun iji bu e Isrerko bu e Bezimanon uifarif ga saifnun iji bu ma e Ibrukor. Revo naiji na E Ferisi ijefuon maiji na Mosison akaij iji mukorigia vierafene reoin. Regavo madu na saifnuvuon ijiebuon akai ijigam unam usuikor buon iji bu nijaidienva iji naka mukorigia igiame ijia jajiain.
PHI 3:6 Na vierafero unam iji na renva iji fu ma God oimaikro na ijeg giriesame biom mukorigia reoin. Ijefuon na uri e iji Jesuon unam ma iji ja oijor iji naka ziegafiaknum kaniame vajai fian uruvana vajiain. Na vierafero na Mosison akaij iji mukorigia igiaga e kafob gieme vierafero na Godon nifak ijia na maturaivaro bu ijeg vierafekro na ijeg reoin.
PHI 3:7 Regavo ire iji na ur rejknum ijia biduame fi ruainva iji iviakmana vierafega ire iji buka ma bakin. Ijefuon maiji iviakma na Jesu Kurais abe vo unam fuon ma iji giain.
PHI 3:8 Ijefuon iviakma unam kafo ga ire fok na ur kegoinva iji naka rubdien. Na rubdiegavo naka oi besum izeg na Kurais E Bomana nun game ma vierafekfuon ijar fuka ma bomanak. Ijefuon na fuifuon ire fok na ur rejknum vierafenva iji na ire mutur igeg nuigafiagavo na una Kuraison unam ka ma ijesugin reoij.
PHI 3:9 Na ijia reokin naka fusik besum rek. Na iviakma maturainva iji na akai usuikor iji mukorigia igiainva ijefuon na maturainva iji fui bakin. Regavo nan vierafe fun Godri na gie naka fuon nifak ijia maturain ijefuon maiji na Kurais ma vierafejo ijefuon na maturain.
PHI 3:10 Na vierafe naka Kurais unam kafokafo fuon iji ka mukorigia giame vierafek. Regavo madu daro fuon iji fu abe mako ijia una urinma na vierafe naka daro besum ijin abe fuifuon ikrek. Regavo madu na God igavo ijefuon na vierafe naka izeg fu vajai fian kafokafo igia fu abenma ijeg nak na vajai fian kafo abek. Regavo fu guainma ijeg na vierafe unam usuikor nun fuk fu ijeg guak.
PHI 3:11 Na unam ijegreknum Godon ma iji mukoi vierafekin na guakva rad fu kie na una urik.
PHI 3:12 Regavo iji na kuardiavo iji na unam fok nan re barenva bakin revo madu na Godon nifak ijia mukoi maturainva iji bakin. Regavo na uria unam izeg na Godon nifak ijia maturaikfuon na ijefuon vek giriesame arafiri rok. Naka giriesame unam fuon ma ijia reoikin na izeg fu vierafenma na ijeg maturaik.
PHI 3:13 Ijefuon efnun na vierafega na Jesu Kurais ire iji fu vierafenma iji naba bieme aben. Regavo besum iji na unam izeg usuibe na kegoijo iji nan rubdien. Regavo na Jesu Kuraison unam ma ijesugin kege vake izeg fu vierafenma na ijin biekafie na iji vierafene gavknum rok.
PHI 3:14 Ijefuon naka unam ma ijesugin mukorigia kege vake buin gami barvo ijia kekome ire ma iji kekfuon. Regavo ire ma iji Godri tavan rad na guame vaga fu izeg ik fu kumena na uri anerene Jesu Kuraison if ijia unam ma ijesugin kegoinva ijefuon fu ma karivakfuon iji abe na miek.
PHI 3:15 Ijefuon na vierafega e iji ja Godon Kaven ijekma oko jan e damuigin renva iji ja unam na reoijo jak ja ijeg rek. Regavo e roin eraneb ja unam nibe rekuai vierafekva fu Godri koikfuon ifejdiaga ja unam ma iji vierafekfuon.
PHI 3:16 Regavo no tavan bog unam ma iji no iviakma kegoijo no ijesugin kege mukorigia nikajiame re vak.
PHI 3:17 Ijefuon efnun na vierafe tavan bog jaka unam nun iji na kegoijo ja gienva ijeg reof. Regavo madu e roin ijia karinva iji bun unam izeg na kegoijo iji bun ijia jajiev ijefuon ni mukorigia unam bu rejo iji giaf.
PHI 3:18 Regavo e roin ijia oijo unam buon iji buka be. Regavo tavan bog na e ijiebuon naka kuardiava jan fain revo ivia na una madu nido nun igekma ja kuardiav. E uruvana ijia karijo ijiebuon unam bu kegoijo iji buka ma ise. E ijekin iji bu Godon vuak ma iji uzaknum Jesu kuros ijia fu guainma iji dab buzeiv.
PHI 3:19 Regavo bu ire iji bu jufdiakfuon iji tavan bog aroikarame reoknum vo ire moik igefuon iji uruvana vierafej. Regavo god buon iji bum vajai buon bu vierafe kegoijo ijin. Ijefuon bu aoikva buka ar iji ma ise mian naino ga vajai fian abejo ijia vak.
PHI 3:20 Regavo noiji no bu rejo ijegreoijo bakin ijefuon maiji no Godon e. Ijefuon no E Bomana nuvuon Jesu Kurais fu no karaunuinma iji fu varur ijia una ari afeduokafa roko no ijin samuaknum kariok.
PHI 3:21 Fu vajai surif nuvuon igi zazaikin ijin iviakma karinva iji kege una ka ma nibe amarduoga noka vajai izeg Jesu fu iviakma abe varur ijia fino iji abek. Regavo iji fu rekfuon iji fu daro fuon ka ma bomana fu ire fok samuagdiamo ijia abe rek.
PHI 4:1 Ijefuon efnun na tavan bog ja oijmiavo ijefuon naka una ja giakro vierafen. Regavo naka unam jon izeg ja mukoi kegoijo ijefuon ka aroikaraknum jon oimarev. Ijefuon nika oi besum rene jon izeg ja God ma vierafejo ijia giriesame karif.
PHI 4:2 Regavo bara Euodia ko Sintiki e-e iji ja jon nigaraivo iji nika aref. Ja josik ja God besum iji ma vierafejo ijefuon ni una besum oimarknum afuime karif.
PHI 4:3 Regavo madu e kainun be fu nuibakin nosik besum ikreno iji na vierafe fu va bara iji nigaraivo iji ifejdiak. Ijefuon maiji bara iji bu darokma ifejdieme nana Godon vuak ma iji abe e roin kuardiain. Regavo madu e Kiremet ga e roin nana darokma ikreoinva iji buk Godon vuak ma iji abe e roin kuardiaoin. Ijefuon if buon iji bun Godon buk bu e if iji bu rad una ijia karivakfuon isoinva ijia isoin.
PHI 4:4 Regavo tavan bog nika E Bomana jon ja ma vierafejo ijefuon oimaref. Regavo na madu una kia nika E Bomana ijefuon oimaref!
PHI 4:5 Regavo madu unam izeg mukoi oi mafaime kegoijo ijin ijegreoga e bu giaf. Ijefuon maiji E Bomana fun una ruakreno ijefuon iji vierafef.
PHI 4:6 Regavo jab uri afikin kafo bu jon roko iji uruvana vierafekgavo nin jon ja sirimamejo ijia God irerag ja vierafenva iji kuardaf. Regavo ja sirimamejo ijia jaka tavan bog ire ma iji fu rediamo ijefuon oimardaf.
PHI 4:7 Ja ijegrekva Godon afuimo ka ma mukor ema bu vierafejo iji ma asidiainma ijar oijon ja vierafejo iji samuagdiak. Regavo ja oifian abekva fuon afuimo ijar ifejdiaga ja dasu karik. Ijefuon maiji ja Jesu Kurais ma darokma vierafej.
PHI 4:8 Vuak radkma iji kaifnun ja God ma vierafejo iji na ja kuardiakfuon iji nika unam ma ijesugin vierafe ga unam iji God oimaikfuon ijesugin ref. Regavo ire iji ja vierafejo iji vuak ma ijesugin vierafe ga ire iji ja nidosiavo ijiga ire maturainva ijesugin vierafef. Regavo barubara iserejo iji jab vierafejo vo ni unam e bu oimardiakfuon ga oimarkfuon ijesugin vierafef.
PHI 4:9 Ire iji na ir nun ijia nijaidiava ja fainva ijiga ire iji na reja ja gienva iji kege mimataf. Ja ire iji kege mimatakva God fu tavan bog ja ifejdiame samuagdiaga ja afuime karik.
PHI 4:10 Na E Bomana ijefuon bomana oimarev ijefuon maiji iviakma ja mimatame mon nijienva ijar nijaidiemon ja vek na vierafej. Regavo ja na vierafejo iji jaba rubdiav revo ja nijaidiekrega fu unam baga ja ijia aren.
PHI 4:11 Regavo vuak igi na kuardiavo iji ja na ifejdiekfuon na ijefuon kuardiavo bakin. Regavo na vierafega irerag na rejo iji fun aresren.
PHI 4:12 Na unam vasiakma oijo ga duok iknum oijo iji nan vierafen. Ijefuon ar kafokafo ijia vo tavan ise duok bakin ga tavan ma duok zaraimo iji na vek oimarknum oij.
PHI 4:13 Ijefuon na Jesu Kuraison daro ijia ire ma ga ire ise iji nun roko iji na oimarknum biediame vak.
PHI 4:14 Regavo ja afin nun iji ifejdienva iji fuka bomana maren.
PHI 4:15 Ja e mai Firifai ijia karinva iji jan vierafen. Na amur ijia Godon vuak ma iji abe nijaidiame ai Mesedonia areme vakga e sos roin buba ifejdien revo jar jonkua ja nana ikrene mon kafo jam roigin na vajien.
PHI 4:16 Regavo na vek ai Mesedonia guf mai Tesaronaika ijia finva ijia ja mon kafo kukma efkin nijieme ifejdien.
PHI 4:17 Iji ja ifejdienva na kuaivo iji jar ire kafo madu roigin nijiekafa na kuaivo bakin. Regavo na vierafe ja ire kafo roigin vajievo ijia ja Godon daro iji abekfuon.
PHI 4:18 Ire fok ja nijienva iji nan kein ijefuon ja iji vierafekfuon. Iviakma ire fok na vierafenva iji nan uruvana ken ijefuon maiji e Ifafrodaitas fu ire fok ja nijienva iji fur kege rokga nan kein. Revo ire iji ja renva iji fuka isuf ma iji fu udi uriga God fu oimaikfuon ja ijin ren.
PHI 4:19 Regavo God nun ijar Jesu Kuraison duadok ijia ire fuon ma iji varur gufia naoivo ijia ire izieb bu ja ifejdiakfuon fu ijin kege vajiaga ja ire kafo jaba vierafekfuon.
PHI 4:20 Regavo na vierafe e fok bu tavan bog God Asoinuvuon iji aroikfuon. Mare.
PHI 4:21 Regavo na God ko Jesu Kuraisbuon e fok iji bu anadiav. Regavo madu e uviaifnun God ma vierafejo igia karinva iji buk bu ja anadiav.
PHI 4:22 E fok God ma vierafejo igia mai Rom karinva iji ga e iji Sisaon ar bomana ijia ikrejo iji ja anadiav.
PHI 4:23 Na sirimamega E Bomana Jesu Kurais nuvuon iji fu e fok jana fiknum tavan bog ma rediame samuagdiakfuon.
COL 1:1 Na For e afasor e iji Godri fu vierafenma ijia fu na kie ar daro miema na Jesu Kuraison vuak ma iji abe una e roin kuardiaoijo ijin. Regavo nar e Timoti uviainuvuon ijek fas igi isoime e ai Korosi ijia karine Kurais ma vierafejo iji nijiav. No vierafe God Asoinuvuon iji fu tavan bog ja ma rediavknum ga ifejdiaga ja afuime karikfuon.
COL 1:3 No tavan bog sirimamejo noka joifuon una God E Bomana Jesu Kuraison Asoij ijefuon oimarev.
COL 1:4 Ijefuon maiji no jon izeg ja Jesu Kurais ma vierafejo ijiga jon izeg ja e God ma vierafejo iji oijmiavo no iji fain.
COL 1:5 Amur ijia Godon vuak ma iji fu jon vuainma ijia jan ire ma iji God fu jon rekfuon iji jan fainva ijefuon ja ma vierafej. Regavo ire iji God fu joifuon varur ijia kanafuknum joifuon samuamo ja iji vierafejo ijar ja kam oi karoiga ja ijefuon ma vierafeknum oijmiav.
COL 1:6 Regavo ar iror ijia Godon vuak iji e fok bun faime oi karoime una unam ma iji mimatame reoij. Regavo vuak ma iji ga Godon mardiamo iji fun ar jon ijia rokga ja faime vierafene jak ja uri vuak iji oimarknum jajiav.
COL 1:7 Regavo vuak iji jan e Ifafrasri kuardiama jan fain. Regavo e Ifafras fu kainuvuon ma fu nuvuon fateroin ijia fu nuibakin rene tavan bog Kuraison ikreno.
COL 1:8 Regavo fun izeg Kaven Akai ijefuon daro iji fu abe miama ja Godon e iji oijmiainva iji kuarduin.
COL 1:9 Ijefuon ik anej ijia jon izeg ja kegoijo iji no fainva ijia noka tavan bog joifuon sirimamej. No joifuon Godon sirimamega Kaven Akai ijar izeg ja ma mukorigia vierafejo ijiga faikfuon iji vajiaikin ja unam fuon ma iji fu vierafenma iji mukoi vierafene kekfuon.
COL 1:10 Regavo no sirimamega ja izeg E Bomana fu vierafenma ijia kariknum ga ire fu oimarkfuon ijesugin kegok. Regavo izeg ja karioijo ijia ja unam ma kafokafo ijia mukoi reoinki jon ja God vierafeoijo iji fuka ma bomana rene vak.
COL 1:11 Regavo no God sirimamega fu daro fuon iji ka ma bomana ijia daro miaga ja afikin kafo bu jon ruakva ja uri giriesa ireme adumaduigin kegok. Regavo tavan bog oijon guf ijia Asoinuvuon oimardaf. Ijefuon maiji Godri ja kege ma e darokin amardiamga jan aresredo ja ire iji fu ar fuon sanainma ijia kanafume nainma iji ja rad roin kekfuon.
COL 1:13 God fu Setanon daro iji fu no samuagduomo ijia aferduo una Jesu Farifuon ijefuon daro iji fu no samuagduomo ijia unuin.
COL 1:14 Iji fu renma ijia fu Jesuon duadok ijia no mukorigia karaunuome ise nuvuon fok fuka guome aren.
COL 1:15 Kurais fu ire fok fu amardiainma iji fuka ma asidiain revo fuiji fuka ma God iji no gavo bakin iji aikin.
COL 1:16 Regavo duadok fuon ijia God fu ire fok moikigia no giavo ga roin no giavo bakin ijiga ire fok varur gufia naoivo iji amardiain. Regavo duadok fuon ijia God fuk kaven ma iji amardiain revo kaven ijieb buka ma darokido bu ire fok samuagdiav. Regavo God ire fok fu amardiainma iji fu Jesuon duadok ijia fu oimarkfuon iji amardiain.
COL 1:17 Regavo Kurais fu ire fok ba amardiainva ijia fun ijia fine ruain. Regavo fu fino ijefuon ire fok fur kege besum daro fuon ijia samuagdiam.
COL 1:18 Regavo fuiji fu e iji God ma vierafejo ijiebuon nigen iji fur ga igi bu karine roko iji anej iji fur. Regavo e fok buba nafenva ijia fuiji fun amur ijia fine ruain revo fu guame amur iji fun fur una urin. Fu urido fur ire fok asidiame ka ma amur ijia fine ire fok samuagdiak.
COL 1:19 Ijefuon God fun fuon vierafenma ijia daro fuon ga izeg fu fino ga e izekin ga izeg fu reno iji fun Farifuon ijefuon duadok ijia fun unam fuon fok nijaiduin.
COL 1:20 Regavo God fu vierafe fu Farifuon ijefuon duadok ijia ire fok moikigia ga varur gufia naoivo ga e fok no ke una fuon ren. Revo Godon Farif iji fu kuros ijia guainma kavuan fuon fu abe usema kavuan ijar ise nuvuon fun somduo korema no una efuon rene besum afuime karij.
COL 1:21 Ur ja oijon ijia isema vierafeknum ise uruvana reoijo ijefuon ja God nuigafame e ani fuon ren.
COL 1:22 Regavo iviakma igi Farifuon Jesu Kuraison vajat iji fu abe kuros ijia guainma ijefuon duadok ijia fu ja kega ja una besum afuime efuon ren. Regavo fu ja kega ja e maturain ga e akai redo ja vajai naikin nifak fuon ijia irek.
COL 1:23 Ijefuon giriesame nuibakin rene darokma God besum iji vierafef. Regavo jab zazaime ire iji tavan rad rekfuon iji Godon fu kuainma iji ja vierafejo iji arek. Na For naiji na Godon vuak iji bu abe ar iror igi bu nijaidiavo ijefuon ikrej.
COL 1:24 Na joifuon vajai fian abejo iji na bomana oimarev. Ijefuon iviakma na Kurais vajai fian izeg na abekfuon fu vierafenma iji nan biedia barev. Regavo iviakma na e God ma vierafejo ijiebuon fateroin ijia vajai fian igin abej. Regavo e iji God ma vierafejo iji bu Jesuon sos ijin.
COL 1:25 Na e sos ijiebuon ikrejo renva ijefuon maiji Godri jon ma ijefuon ik igi na mien. Na e ikrejo renkin nar Godon vuak ma iji fok nijaidiame abe samafrediak.
COL 1:26 Regavo vuak ma iji bu Godon kuainva iji fu vuak sauivkin. Regavo e iji bu usuibe kari roke aoinva bu vuak iji fu sauinma iji buba faivknum gain. Regavo iviakma ijar fun Godri abe e iji bu fu ma vierafejo ijiebuon samafrena bu faivknum gain.
COL 1:27 God fuon fu vierafenma iji fu vuak fuon sauime namo iji fuka abe e Jius bakin iji ja samafrene nijaidiakafa fu iji vierafen. Regavo vuak iji sauime namo iji Kurais fun oijon ijia fido ja Godon sanainma ma iji roin kekfuon.
COL 1:28 Ijefuon no Kuraison vuak iji e fok nijaidiav. Regavo vuak iji non faime ma vierafejo ijefuon no e fok nijaidiame oi karamdiav. No ijeg nijaidiainkin e fok bu Godon nifak ijia e damuigin rene Jesuna besum irekfuon.
COL 1:29 Ijefuon na Kuraison daro gigikin uruvana fu mienma ijia joifuon giriesame ikrej.
COL 2:1 Ijefuon e iji mai Raodisia karinva ijiga e iji buba na gieme vierafenva iji na ik gigikin igi na joifuon rejo iji kuardiavo ni faime vierafef.
COL 2:2 Na ik gigikin iji na ijegrenki ja kaven jon ijia daro abe oijmanamime kariknum vo Godon vuak sauivkin iji mukoi vierafek. Revo vuak sauivkin iji fu Kurais Farifuon ijin. Regavo igia faif Godon vierafe ma iji fu mukorigia vierafene reno iji no Kuraison duadok ijia giakfuon.
COL 2:4 Ijefuon na vuak iji kuardiaga ja faikin e kufuikin ijiebuon vuak kufui ka ma igekin bu kuardiavo iji jab faime unam buon ijia jajiak.
COL 2:5 Na vajai nun naba abe jana ijia oin revo na ja vek bomana vierafej. Regavo madu na bomana oimarev ijefuon maiji izeg ja besum uri ireme giriesame Jesu ma vierafejo na iji gain.
COL 2:6 Regavo Jesu Kurais E Bomana ja abenva ijeg ni fuon biduame kari vaf.
COL 2:7 Regavo ire in iji fu moik ijia gireg same arir manino ijeg nakikmazak jon ja kari roko iji Jesuon biduame kariga fu ofriakfuon. Regavo vuak ma iji amur bu nijaidiainva iji ma vierafene e darokin renki oimarevo jon fu do igeg oijon ijia irtoijeme ajie urak.
COL 2:8 Regavo jab uri e iji vuak kufui ka ma bakin iji bu kuardiavo iji jab faime ijia jajiak. Ijefuon maiji vuak iji bu nijaidiavo iji fun ema moikigia oijo ijiebuon buon vierafenva ga akai kafokafo bu moikigia name jajiavo ijin. Ijefuon vuak bu kuaivo iji fu Kuraison vuak ma iji bakin revo bum vuak nibe iji kuaiv.
COL 2:9 Regavo igia faif ire fok God fu rejknum vo izeg fu fioknum ga fu e izekin iji ire fok Kurais fu vek moikigia oinma ijia fuk ijeg reoin.
COL 2:10 Regavo ja Jesu abe funa besum rejo ijefuon kaven jon irerag fok bu vierafejo iji bu fuon bijame abejo ijefuon buka aresren. Ijefuon maiji Jesu fu ire fok ga kaven darokin uruvana ire roin samuagdiamo iji fur asidiame e nigen rene samuagdiam.
COL 2:11 Jan funa besum renva ijefuon Kurais fu ema igi bu moikigia vajai surif jon kania ufume anf namdiavo iji fu ijegrenma bakin. Revo fu moik igefuon unam ise ja kegoijo ijefuon daro iji fu ja kege anu kuniainma iji dab tura kordiain.
COL 2:12 Tavan iji ja do ruainva ijia jan Jesuna aoiva God fu kege mako ruinma ijekin. Regavo tavan iji Jesu fu una mako ijia urinma ijia God fun una karauniama ja Jesuna urinva ijekin. Ire iji fu renma iji ja Godon daro iji ma vierafejo ijefuon fu iji ren.
COL 2:13 Ja ur ja aibe karinva ijia ja Godon akaij iji ja samuavo bakin revo jaka ise rejo ijefuon kaven jon iji buka aoin. Regavo iviakma iji God fu Jesu keunama fu una uri nivek fino ijeg fu ja karauniama ja una urin. Fu ja karauniainma iji fu ise jon giame dazen.
COL 2:14 Regavo iji fu renma iji Jesur ise nuvuon fok God fu fefa ijia isoime no kege arafiruok reno iji fu Jesur guainma ijia ire ise iji fun abe buja kore barema fu darobitien.
COL 2:15 Regavo Kurais kuros iji fu guainma ijia e fok samakaf nijaidiame fu kaven ise ijefuon daro iji fu no samuaguomo ga anu kunuinma iji fur ufuseme kar kore baren.
COL 2:16 Ijefuon jab arega bu e kafob duok ga do ja ijo ijefuon joisina akai nak. Regavo tavan akai mamkanuk ga asam iviakma ruainma ijiga tavan iji bu isuar karine God sirimamejo iji jaba jajiame ijegrejo ijefuon bu vuak ise ja kuardiakva jab iji faik.
COL 2:17 Regavo akai fok kafokafo bu name jajiavo iji bum ire ma iji bu isuar rad rekfuon ijiebuon kaven ijin. Regavo ire ijiebuon anej maiji fu Jesu Kurais.
COL 2:18 Regavo jab areke bu e kafob iji jaba adumaduigin rene anera iji bu sirimamejo ijeg sirimamejo ijefuon if jon kam arafiriak. Revo ja zazaime bu jajiakva jakafu unam iji ja ma karivakfuon iji jan abe unakov. Regavo e ijekin iji bu kuai no nimamaime giamga no Godna oijo kuaivo iji bum aroikaraoij revo vuak ma kafo bu oibuon ijia naoivo bakin.
COL 2:19 Regavo madu e ijekin iji bun Jesu Kurais nuigafame vain. Regavo fun Kurais fuonkua e sos ijiebuon nigen ga fur kajek kim iji a abe kot kiramo ijeg fu efuon kege daro fuon ijia besum kuniaime gigikin reko bu unam God oimaikfuon ijia ofriav.
COL 2:20 Jan Jesuna besum aoime kaven ise moik igefuon daro iji bu ja samuagdiavo iji ke turame usem vain. Ijefuon ja irerafuon una moik igefuon kaven ise kafokafo ijiebuon daro ijia e moik igeko igeg karij? Ja irerafuon akai kafokafo emab nainva iji igiav?
COL 2:21 Regavo akai bu nainva iji ire iji jab kege ifaivknum kuniaimoknum vo ire ijefkin kafo iji niriakdiak. (Revo akaij iji bu duok ikfuon ijiebuon akai).
COL 2:22 Regavo akaij iji bu nainva iji tavan rad bu iserme barek. Ijefuon maiji akai fok buim ema moikigia oijo ijieb kuaime ke mare nijaidiaoido rad bu barek.
COL 2:23 E iji akai kafokafo ijekin name jajiavo iji bu vierafero buka mukoi vierafej. Regavo madu bu kuai bu adumaduigin oijo kuai revo buka bakin. Bu e iji ejafiaga bu anera ijiebuon sirimameknum vajai buon kam isema samuagdiame arafiriav. Regavo ire fok bu kegoijo ijieb bu ifejdiaga bu vajai buon bu oimardiakfuon iji bu kegoijo samuavo bakin.
COL 3:1 God fu Jesu Kurais guamga fu keunama fu una urin. Unam besum ijeg fu kaven jon iji karauniama bu una uri nivek karinvano tavan bog ire varur ijia naoivo iji vierafef. Regavo ire iji naoivo iji bu ar ma iji God fu kaf gufia Kurais mainma Godon imut mainak iji fu fino ijia naoiv.
COL 3:2 Ijefuon nika oijon ga nigen jon fok ire iji kaf gufia naoivo iji vierafeof. Regavo ire kafokafo moikigia naoivo ema ijieb rejo iji jab tavan bog vierafek revo jaka dazef.
COL 3:3 Regavo moik igefuon ise kafokafo ja ur reoinva iji jan ijia aoime tote vain. Ijefuon maiji unam iviamkor jon ja rad ma karivakfuon iji bu Jesuna Godon nifak ijia sauim naoiv.
COL 3:4 Jesu Kuraisri kaven nuvuon fok kega bu nivek karij. Bu karido God fu Jesu abe una e fok samafrediakma ijia fu jak kega ja besum usem samafrek. Regavo ja una usem samafrejo ijia ja Godon sanainma iji fateroin abek.
COL 3:5 Ijefuon tavan bog ire isekma kafokafo ja reoijo iji nika aref. E gua namo iji fu izeg ire kafokafo vierafekma bakin. Ijefuon jak besum ijeg ire isekma kafokafo ja vierafejo iji jan aoime ruainvano nika aref. Ire ise ebuon baru turavo ijiga baru uri baru roina ise reoijo iji jab rejo. Tavan bog jab ijeg mimataoijo revo jab ire isekma kafokafo reokuai iji uruvana vierafejo. Regavo madu jab uri ire ma ka uruvana kafo madu karekuaime uruvana vierafek. Regavo jab uri e kafobuon sinuom iji giame karekuai uruvana vierafeok. Ijefuon maiji ja ijegreoijo iji ja sinuom moik igefuon iji sirimameknum bu kam god igeg vierafej.
COL 3:6 Regavo eraneb bu unam ise ijekin reokva God fu bu kam arafiriak.
COL 3:7 Usuibe jaba God vierafejo ijia ja ire ise ijin ijegrene ruain.
COL 3:8 Regavo iviakma ni ire ise kafokafo na kuardiakrejo iji giame agordiaf. Regavo ire ise iji zieme deajin abeknum vo e roin oi isema vierafeoknum buisina kuaimoijo ijin. Regavo madu e musikiaknum vo kaibuon vuak ma ise kafo iti jon ijia jab kuaimoijknum vo jab vuak kufui e roin kuardiak. Regavo jab unam ijeg mimataoijo ijefuon maiji ja unam ise jon usuikor iji ja reoijo iji jan azo koreme rubdiain.
COL 3:10 Regavo iviakma God fu jon izeg ja kari roko iji fur kege karoime una unam iviamkor fuon fu izeg fine roko ijeg amardiam. Fu ijegrega ja una fu mukorigia ma vierafekfuon.
COL 3:11 Regavo Kurais fuonkua fur e ni kafokafo iji ka besum karauniamo. Ijefuon fur e Grik ga E Jius ga e iji vajai anf nain ga ba anf nainva ijigam e iji isama kafokafo kuaivo ijigam e kafokafo bu e kafobuon ikrejo ga bu buonkua ikrejo iji Kuraisri e ni kafokafo iji besum karauniain.
COL 3:12 Regavo jaiji jan Godon e iji fu oijmiamo ijin. Ijefuon fu ja kege una efuon ren. Ijefuon nika isuar igia oi mafaime e suaiki rene adumaduigin reoknum e iji bu vajai fian abeknum ire kafo karekuai vierafejo iji ifejdiaf. Regavo e kafo bu ire ise ukakna kafokafo tavan uruvana jon reunaivga nin oi mafaime buna karif.
COL 3:13 Regavo ja e kafob ire ise kafo jon rekva ni izeg Kurais fu ise jon giame dazenma ijeg oijon ijia dazme aref.
COL 3:14 Regavo oijmanamivo ijar vuak fok igi kuainma iji ka ma asidiain. Ijefuon ja oijmanamiokva ijar ifejdiaga ja besum afuime karik.
COL 3:15 Regavo jaiji fun Godri kenmano tavan bog Kuraison kafaimo iji arega fu oijon ijia ikrene jon ja vierafejo iji fur samuagdiaf. Fu ijia ikrega ja e roin ga ejon ja buna karijo ijiena afuime tavan bog God oimardakfuon.
COL 3:16 Regavo nika mukorigia tavan bog jon ja nijainamivo ijia Kuraison vuak iji oijon ijia vierafef. Regavo unam be iji ja oijon ijia God vierafekfuon iji ja dua oimarevo iji urukfuon. Regavo be iji dua iji Kaven Akai ijar nijaidiaga ja roinva ijia God rokafaknum oimardaf.
COL 3:17 Regavo ire fok ja kuaiknum reoijo ijia nika e fok ijiebuon nifak ijia Jesuon e rene ik iji fu joifuon renma ijefuon God Asoi iji oimardaf.
COL 3:18 Bara iji barufjon iji igiame oijon bu vajiaf. Ijefuon maiji jaiji jan Jesuna besum ren ijefuon ja tavan bog igiakfuon.
COL 3:19 Baru iji barafjon iji mukorigia oijmiaf. Regavo jab vuak gigikin kuardia vo kiaga bu tavan bog ire fok joifuon rek.
COL 3:20 Regavo am iji eofjon iji tavan bog unam kafokafo ijia igiaf. Ijefuon maiji e iji Jesuna besum renva iji bu ijeg igiavo iji bu God oimardav.
COL 3:21 Regavo eof iji jab tavan bog afjon ire roin bu uzaknum isema rejo iji giame kuaik. Ja ijegrekva bu oifiadiaga tavan bog buba oimarknum ok.
COL 3:22 Regavo e iji e kafobuon ba monfuon ikrejo iji e mamkanuk jon moikigia ire kafokafo bu kiavo iji mukoi igiaf. Regavo jab tavan iji bu samaij ijia ireme giaknum samuagdiavo ijefuon ja uri bu juvknum ikrek. Regavo madu jab vierafero ja ikrega bu jon oimarkuai ja ijeg jab vierafene ikrek.
COL 3:23 Regavo ire kafokafo ja reoijo ijia nika oijon ijekma E Bomana Jesu Kuraison ikreof. Regavo jab emabuon ik ja reoijo ijeg reok.
COL 3:24 Ijefuon maiji ni vierafe E Bomana iji fu tavan rad unam izeg ja kegoinva iji vef una ijefuon vajiak. Regavo ire iji God irerag fu usuibe vajiakafa kuainma ijin. Ijefuon maiji ja emabuon ikrenva bakin revo ja ma E Bomana jon ijefuon ikrej.
COL 3:25 Regavo e iji e kafobuon ba monfuon ikrejo iji ga e iji fu e bomana rene e roin kiaga bu ir fuon ijesugin faime ikreoijo e ijekin iji bu ise reokva Godri bu kege besum afuime ise bu renva iji faik.
COL 4:1 Regavo e iji ja e mamkanuk renva iji jab e iji jon ba monfuon ikrejo iji vuak gigikin kuardiak revo nin oi asume ire ma ijesugin buon ref. Ijefuon maiji jan vierafe irerag fok ja reoinva iji ja E Bomana varur gufia fino iji kuardakfuon.
COL 4:2 Regavo sirimamejo iji jab arek revo nika tavan bog sirimame vaf. Regavo jab zazaik revo nika uri ni narame nisaiknum sirimame God vierafene fu oimardaf.
COL 4:3 Regavo jon ja sirimamejo ijia no vierafe ja nuvuifuon sirimamekfuon. Ja ijegrenki Godri unam nuvuon abe samafreduoga no vuak fuon abe kuaiknum ga Kuraison vuak sauime namo ijin madu kuaik. Regavo ni vierafe na Godon vuak ma iji abe kuaimoijo ijefuon na iji dibur igia fij.
COL 4:4 Ijefuon ja ijeg nuifuon sirimamekin na vuak ma iji abe samafrene kuaimoga e fok bu faikfuon. Regavo God fun ijefuon na kumenmado na vuak fuon ma iji abe kuaimok.
COL 4:5 Regavo ja e iji bu vuak ma iji ba ma vierafejo ijiena ire kafokafo ja reoijo ijia mukorigia vierafene reof. Regavo ja God ma vierafejo ijefuon ja tavan abe vuak kuardiakva iji mukorigia vierafeknum e fok samakaf nijaidiaga bu giaro ja God ma vierafejoro bu ijeg vierafek.
COL 4:6 Regavo ire sor iji no abe duok same iga fu rif mukoi reno ijeg vuak jon ja kuaivo iji nika isuar oi mafaime oijmiaknum kuardiaga fu ire sor ijeg ref. Ja ijegrekva bu oimarknum vuak jon faik. Revo bu duna kafokafo kiakva ja una duna ijefuon maiji vef roin vierafene kuardiak.
COL 4:7 Regavo vuak nun fok fu e Taikikasri vuakma fu ijiason kuardiak. Taikikas fu kainuvuon ma no oijmuomo fu tavan bog nuibakin rene E Bomana ijefuon ikreno.
COL 4:8 Ijefuon na fu kuaga fu ijia vua izeg no igia karinva ijin ja kuardiaga ja iji faime oimarek.
COL 4:9 Regavo fu vuakma fu Onesimas e kainuvuon no oijmuovo ka nuibakin ikreoino ijek vuak. Regavo e iji fu jana besum God ma vierafeno ijin. Bu busik vuako ijia bu igia irerag no rejo iji bur kuardiak.
COL 4:10 Regavo Eristakas e iji nosik dibur fino iji fu ja anadiain. Revo madu e Mak e Banabason vien iji fu ja anadiain. Regavo fu jon vuakma ni oimarknum samuaf ijefuon maiji na fuisina nan ur fas isoime kuardiain.
COL 4:11 Regavo madu Josua e iji bu kua Jastasno kuavo iji fuk fu ja anadiain. E nokbek (3) iji buk bu e Jius ga bu buonkua Kurais ma vierafeknum nana ikrejo. Bu na ifejdiega no besum e nijaidiame kia bu Jesu abega fu ebuon Bomana igegrene God kuaga fu bu samuagdiakuai no iji kuardiav.
COL 4:12 Regavo e kaijon be fuk jana besum sos jon ijia sirimameknum ga madu Jesu Kuraison ikreno e Efafuras ijar ja anadiam. Fu tavan bog joifuon oifian abene sirimamene God kuardaga fu ja ifejdiaga ja e darokin rene darokma irekfuon. Regavo madu fu God kuardaga fu oijon kege karoiga ja tavan bog fuon fu vierafenma iji igame jakfuon.
COL 4:13 Nar e Efafuras fu izeg joifuon ga e ai Raodisia ijiga ai Airaforas karinva ijiebuon daromene Godon vuak ma iji nijaidiava na gainva na iji kuardiav.
COL 4:14 Regavo e kainuvuon ma be Ruk no oijmavo eadagin samuagdiamo ijiga Dimas bu ja anadiav.
COL 4:15 Regavo e iji God ma vierafejo bu ai Raodisia ijia karijo ijiga bara Nimfaga e God ma vierafejo bu ar fuon ijia bienamivo iji no bu anadiav.
COL 4:16 Ja fas igi dame barkva ni madu abe una e Raodisiakobuon ar guf bu ijia afuime Godon sirimamejo ijia daga bu faik. Regavo madu e Raodisiako bu fas isoime ja nijiakva ni iji madu abe daf.
COL 4:17 Regavo ni Akifas kuaga fu dakarome ik iji E Bomana fu mainma iji fu reno iji mukorigia rene vake bare.
COL 4:18 Na For nar imut nun igia fas igi e anadiavo igi isoin. Na bu abe dibur uniega na fijo iji jab rubdiak. Na vierafe God fu tavan bog ja mardiame samuagdiakfuon.
1TH 1:1 For nar Sairas ko Timotina fas igi isoime e iji ja ai Tesaronaika ijia afuime Jesu ma vierafejo iji nijiav. E iji ja God Asoij ijiga E Bomana Jesu Kuraison efijaf. Regavo no vierafe God fu tavan bog ma rediame mukorigia samuagdiaga ja afuime kariokfuon.
1TH 1:2 Ijefuon tavan bog no sirimamejo no ja vierafene joifuon Godon oimarev.
1TH 1:3 No God Asoinuvuon iji no sirimamejo noka ja vierafej. Ijefuon maiji ja Jesu Kurais ma vierafejo ijefuon jaka ik jon mukorigia rej revo madu izeg ja jon oijmanamivo ijefuon jaka vajai fian abeknum ifenamiv. Regavo madu izeg E Bomana Jesu Kurais fu una ruakfuon ja vierafejo iji jaka arevo bakin revo jaka giriesame ma vierafeknum kegoij.
1TH 1:4 Regavo efnun God fuka ja bomana oijmiainma ijefuon fun usuibe ja kege uniainmado ja una efuon rek.
1TH 1:5 Ijefuon Godon vuak ma iji no abe kuardiainva iji nom nor abe kuardiainva bakin revo fun Godon Kaven Akai ijar vuak iji abe darokma kuardiamga ja faime ma vierafen. Regavo jan vierafe izeg no jana ijia karioknum irerag no reoinva iji no jon ma ijefuon ijeg ren.
1TH 1:6 Regavo izeg no E Bomana ijiena no kegoinva iji jan makai nuvuon ijia jajuov. Jaka vajai fian abeknum jajuo ruain revo fun Godon Kaven Akai ijar ifejdiamga ja vuak iji faime jaka oimaren.
1TH 1:7 Ijefuon jar e Mesedoniako bu jana moik ijia karinva ijiga e Akaiako bu nana moik be igia karinva ijin eraneb bu God ma vierafejo iji unam ma iji kege nijaidiain.
1TH 1:8 Regavo E Bomana ijefuon vuak iji ja abe kuaimoinva iji fu ai Mesedonia ko Akaia ijesugin vainma bakin gavo fuka moik roinroin ijia vain. Ijefuon e fok bu jon izeg ja God ma vierafejo iji bun faim barenva ijefuon no irerafuon una vuak kafo kuardiakva bakin.
1TH 1:9 E fok vuak jon bun faim barenva ijefuon bu izeg no jon vuakga ja oijmuome afeduinva iji bur kuarduin. Regavo madu bur izeg ja god kafokafo kufui iji aregavo una God ma iji tavan bog ijia fivako ijefuon ja anerene ik rejo iji bur kuarduin.
1TH 1:10 Regavo madu ja Godon Farif Jesu fu guamga God fu keunama fu una urinma iji fu una kaf gufia ari ruakreno ja iji samuav. Regavo tavan rad fu una ruakma God fu e iji bu ise rejo iji fu ziegafiame ke arafiriak. Regavo noiji fun Jesur karaunuinma ijefuon fuba no kege e ijiena arafuruok.
1TH 2:1 Regavo efnun tavan iji no ja giak vuainva ijia irerag no rejo fu ja ifejdiainma iji jan koikjon vierafen.
1TH 2:2 Regavo ai Firifai no karinva ijia e roin bu ire ise nuvuon renva iji jan fain. Regavo no mai jon Tesaronaika vuainva ijia fu God nuvuon ijar ifejduomga no vuak fuon ma iji abe ja kuardiain. Revo e uruvana buka vuak ma iji no kuaivo iji bietduokuai reoij revo noka Godon daro ijia giriesame vuak iji abe ja kuardiain.
1TH 2:3 Regavo vuak iji no abe kuardiainva iji no nor kufuime ga vuak ise iji ja biesiame kuardiainva bakin. Regavo vuak iji noka vuak ma ijesugin kuardiain.
1TH 2:4 Regavo no fun Godri usuibe guome ke unuinma ijefuon no irerag fu vierafenma ijia kuaimok. Regavo vuak iji no abe kuaivo iji no e iji bu oimardiakfuon iji kuaivo bakin revo no God fu oimaikfuon no ijin abe kuaiv. Ijefuon maiji God fu rad oinuvuon guf ijia guok.
1TH 2:5 Regavo jan vierafe vuak iji no abe ja kuardiainva iji noba ja biesiaknum soisoiga ja mon vajuokuai no ijegrenva bakin revo iji fun Godri guo vierafen.
1TH 2:6 Regavo iji no renva iji e fok jar no ke nidosuokuai no ijegrenva bakin.
1TH 2:7 Regavo noiji no e mamkanuvo no Jesu Kuraison e afasor ijefuodo no ja kuriaikuriaikin igia vuak kuardiabatie iji fu marek. Regavo ijeg noba ren revo nom isuar vuak kuardiaknum jana oin. No asie iji fu amfuon samuagdiamo ijeg noka jana karioin.
1TH 2:8 No ja bomana oijmiavo ijefuon no Godon vuak ma ijesugin abe ja kuardiainva bakin gavo noka koiknuvuon oinuvuon ijekma kege ja vajiain. Ijefuon maiji no vierafega jaka ma e nuvuon.
1TH 2:9 Regavo efnun izeg no vajai fian abeknum giriesame ik reoinva iji jan vierafen. Regavo nakikmazak no ijia ik reoinva ijia noba ja arafiriame monfuon vo sinuomfuon ik ren. Regavo nom Godon vuak ma iji abe ja kuardiain.
1TH 2:10 Regavo irerag no reoinva iji jan guo ga God fuk fun guoin. Ijefuon ire iji no e iji ja Jesu ma vierafejo iji jon renva iji noka ire akai ijigam unam ma iji ren.
1TH 2:11 Regavo jan vierafe izeg no ja e besubesum samuagdiaknum ifejdiainva iji noka asoij iji fu afijaf samuagdiamo ijeg samuagdiain.
1TH 2:12 No ja ejafiaknum ifejdiame kia, Ni unam ma iji God fu oimaikfuon ijia karifno kiain. Regavo jan vierafe God ijar ja ke uniainma ijefuon ja una e iji God fu oibuon iji samuagdiamo ijiena mazime sanainma fuon ijia funa karikno kiain.
1TH 2:13 Regavo madu ire be ja reja no gainva ijefuon no Godon oimarev. Ire iji ja renva iji no Godon vuak ma iji abe vuakga jaka vuak iji mukoi faime aben. Ja vierafe vuak iji fu emabuon vuak bakin revo fuka Godon vuak ijefuon ja vuak iji aben. Regavo vuak iji fu ma Godon vuak ijefuon e iji ja Jesu ma vierafejo iji God fu oijon ijia ifejdiaga ja e damuigin rek.
1TH 2:14 Regavo efnun ja Godon e iji bu ai Judia ijia Jesu Kuraison if ijia sirimamejo ijiebuon diak makai ijia jajiav. Regavo e Jius iji bu e Judiako iji bu kam ise kafokafo buon renva ijeg jak bu ejon moik besum ijieb ja kam ire ise kafokafo ren.
1TH 2:15 Regavo e Jius ijieb E Bomana Jesu abevo e Godon vuak vierafene kuaivo iji kaniava bu aoin ga madu bu no kam ire ise reduin. Regavo iji bu renva iji God fuka ba oi main revo madu e iji bu e fok karioinva iji ziegafiav.
1TH 2:16 Regavo Godon vuak ma iji no abe e Jius bakin iji kuardiaga vuak ijar bu karauniakfuon iji bu e ijieb kuriairev. Bu ijeg kuriairejknum tavan bog ise rejo ijefuon iviakma ise buon ijar rarem. Ijefuon Godon ziemo iji fun buon namdo tavan rad God fu bu kege arafiriak.
1TH 2:17 Regavo efnun noiji no tavan ukakbe ijesugin noba una ja biediak. Regavo noka usuibe ja uniainva ijefuon no vek oinuvuon ijia una ja giakuai uruvana vierafeknum oij.
1TH 2:18 Noka una ja giak vuakuai vierafen revo na For naijin tavan uruvana una ja giakafie vierafej. Regavo no jon vuakrega Setan fuka unam nuvuon bijukurain.
1TH 2:19 Regavo oinuvuon iji tavan bog noka bomana vierafeknum joifuon oimarev. Ijefuon Jesu fu una ruakma no irerafuon no nifak fuon ijia ireme aroikaraknum oimarek? Ire kafo bakin revo jan jar vuak fuon ma iji no abe kuardiava ja mukoi faime ma vierafen. Ijefuon E Bomana fu una ruakma ja nona nifak fuon ijia irek.
1TH 2:20 Ijefuon noka ja giame aroikaraknum oimarek.
1TH 3:1 Regavo efnun tavan uruvana noka ja giakuai vierafe vo vuak jon faikuai uruvana vierafen. Regavo madu no vuak iji vierafejo ijar ik nuvuon no rejo iji noba oimarknum rej. Ijefuon no e Timoti kuava fu jon vuakga no nuvuonkua ai Etens ijia karin. Regavo e Timoti fu nona ik besum reno revo fuk Godon ik reoino ijefuon fu Jesu Kuraison vuak ma iji abe e kuardiamon. Ijefuon no fu kuava fu ijia vuak jon faivknum ja ifejdiaga izeg ja Jesu ma vierafejo iji ja giriesame vierafeknum karikafa fu iji vuain.
1TH 3:3 Regavo e iji bu jon ire ise kafokafo renva ijefuon Timoti fu vua ja ifejdiaga ire ise iji buba ja kam vajai fian miak. Regavo fu ifejdiaga ja jon ja ma vierafejo iji jaba arega jaka giriesame Jesu ma vierafekafa fu ijefuon vuain. Regavo jan vierafe ire ise ijekin iji fun Godri roirinma ijefuon bu tavan rad ma nuvuon rega no afikin abek.
1TH 3:4 Regavo no uria ijia jana karinva ijia non kuardiame kia, Ire ise ijekin bu nuvuon ruakno kiain. Regavo ire ise iji fu nuvuon rekfuon no kiainva iji fun iviakma rena jan giame vierafen.
1TH 3:5 Ijefuon no Timoti kuava fu jon vuain. Na ja vierafega fuka isediem ijefuon na Timoti kuava fu vua jon ja izeg Jesu ma vierafejo iji giame una kuardiekafa na iji kuava fu vuain. Na vierafero Setan fun ja biesiama ja una unam fuon ijia vagavo irerag no kuardiaknum nijaidiainva iji jan arenvaro na iji Timoti kuava fu una giakafa vuain.
1TH 3:6 Regavo Timoti fu ja giakafa vuainma iji fun iviakma una ruain. Fu vua jon ma iji izeg ja God ma vierafejo ijiga e roin ja oijmiavo iji abe una no kuarduin. Regavo fu madu kuarduome kuo, Usuibe na ja giak vuainva iji ja vek oimarknum vierafeoij revo jaka una no guokuai vierafenvano kuin.
1TH 3:7 Ijefuon efnun noka vajai fian abeknum oifian uruvana biediain revo no vuak jon ja izeg God ma vierafejo iji faivga vuak ijar no ifejduomga no giriesame ik nuvuon rej.
1TH 3:8 Regavo iviakma no faiga jaka E Bomana iji mukoi vierafeknum karinva ijefuon no madu no igia ma karine oimarknum ik nuvuon reoij.
1TH 3:9 Regavo iviakma no joifuon God oimarev. Ijefuon maiji jar mukorigia oimarknum rejo ijefuon no fuon nifak ijia noka bomana oimarev.
1TH 3:10 No nakikmazak no oinuvuon ijekma Godon sirimamene kuaga fur ifejduoga no una uikinik jon giakuai no iji vierafen. No vua giame unam kafo ja oijon ijia ma vierafe vo jaba giriesame kegoijo iji una nijaidiakuai no iji Godon sirimamej.
1TH 3:11 Regavo ivia no sirimame God Asoinuvuon kuaga fur fuonkua E Bomana nuvuon Jesuk unam nuvuon amarega no jon vuak. Ijefuon maiji Setanri unam nuvuon bijuinma ijefuon no bu kia bu unam iji abe samafrega no jon vuak.
1TH 3:12 Regavo no vierafe E Bomana ijar ja ifejdiaga izeg no ja oijmiavo ijeg ja una jon oijmanamikfuon. Regavo madu no vierafe fuka tavan bog oijon ijia uruv madu vierafe vajiake ja e oijmiaknum kariok.
1TH 3:13 Regavo madu no vierafe E Bomana fu oijon guf ijia daro miaga ja unam ise iji aregavo una e akai rek. Ja e akai rene una God Asoi nuvuon ijefuon nifak ijia ireme E Bomana Jesu fu e akai fuon ijiena una ruakfuon iji samuak.
1TH 4:1 Regavo efnun iviakma na vuak radkma iji isoime kuardiakrejo iji unam izeg God fu oimaikfuon ijia karivakfuon iji non nijaidiava jan ijeg kari rok. Regavo iviakma no E Bomana Jesuon if ijia darokma ja anadiame kia, Ni unam ma iji God fu oimaimo ijia ja kari roko ijeg una uruvana rejknum kari vaf.
1TH 4:2 Regavo vuak fok no kuardiainva iji non E Bomana Jesuon if ijia kuardiava jan vierafen.
1TH 4:3 Regavo God fu ijeg vierafen fu vierafega jaka tavan bog unam ma ijesugin reoknum e akai igeg karik. Regavo barubara oijo iji jaka arek.
1TH 4:4 Regavo e besubesum a unam ma ijia vo akai ijia a barakon abekfuon iji a koikon vierafekfuon.
1TH 4:5 Regavo jab uri e iji bu God ba vierafenva iji matiame siroij igeg reok.
1TH 4:6 Regavo erar fu unam ise iji rene e kafobuon bara turamo iji fu kaifuon ijefuon ise rejknum unam fuon ma iji fu kegoino iji abe arafirim. Regavo vuak iji non usuibe ju kuardiame kia, Eraneb bu unam ise ijekin iji rekva E Bomana fu e iji kam arafiriakno kiain.
1TH 4:7 Regavo God fu vierafe noka e akai rene karivak ijefuon maiji fur no kege unuin. Regavo fu vierafe noba e kafobuon bara turak ga noka e akai rene kari vak.
1TH 4:8 Regavo God fu Kaven Akai fuon iji abe ja uniafdiainma ijefuon vuak iji no iga abe ja kuardiav. Ijefuon erar fu vuak iji faime uzakma fu emabuon vuak iji uzamo bagavo fu Godon vuak iji uzam.
1TH 4:9 Regavo no irerafuon fas isoime ja kia ni kaifjon oijmiafno kiakva bakin. Ijefuon maiji jan koikjon vierafene e roina ja oijmanamikfuon iji fun Godri usuibe oijon ijia vierafe vajiain.
1TH 4:10 Ijefuon ja e kaifjon roin Jesu ma vierafejo bu ai Mesedonia ijia karinva iji jan ijeg oijmiav. Regavo iviakma no una madu kuardiame kia, Ni iji ja oijmianamivo ijeg tavan bog oijmanamiknum vaf.
1TH 4:11 Regavo madu no kia unam ja rekfuon iji mukorigia vierafene isuar igia karine ik jon rekgavo e kafobuon unam jab ke iserdiak. Revo nin isuar igia karine imut jon ijia koikjon ik rejknum karif. Vuak iji non usuibe kuardiainva iji no una madu kuardiav.
1TH 4:12 Ijefuon ja unam iji mukorigia abekva e iji buba Jesu ma vierafejo iji bu unam jon faivknum giame bu ja agordiak. Regavo ja imut jon ijia ik rejo ijefuon jab ire kafofuon e roin sirvek.
1TH 4:13 Efnun vuak igi no e iji bu Jesu ma vierafejo iji bu aoinva ijiebuon vuak iji abe kuardiav. Ijefuon jab e iji buba Jesu ma vierafejo iji matiame kari e iji bu aoinva ijiebuon oifian abek. Ijefuon maiji e iji Jesu ma vierafejo bu aoinva iji bu una urik.
1TH 4:14 Regavo no ma vierafega Jesu fu guame una urin. Ijefuon God fu Jesu kuaga fu arime e iji bu fu ma vierafejo bu aoinva iji aferdiaga bu una Jesuna urik.
1TH 4:15 Regavo vuak igi fu E Bomana ijar no kuarduinma no iji abe kuardiav. Eraneb no nivek karinva ijia E Bomana fu una ruakma no e iji bu aoinva iji noba asidiame amur irek. Regavo bu e iji Jesu ma vierafene bu aoinva ijieb amur Jesu biek.
1TH 4:16 Ijefuon maiji E Bomana iji fu fuonkua kaf gufia ari ruaknum kumeke Godon anera ikin fuk fu kumeke e fok bu Godon veg iji urino iji faik. Ijegrekega e iji Jesu ma vierafejo bu aoinva ijieb amur una urik.
1TH 4:17 E iji aoinva ijieb amur uriga ijiason e iji no tavan ijia no nivek karinva iji Godri migegare no aferduome buna besum vak. No besum vaga vana ijieb no ke utime ajie kaf ijia E Bomana iji biek. No ijia ajie vainki no tavan bog E Bomana ijiena kari vak.
1TH 4:18 Ijefuon ni vuak igi no kuardiavo iji abe jon kuaime ejafanamime karif. Regavo jab karine e iji Jesu ma vierafejo bu aoinva ijiebuon oifian abek.
1TH 5:1 Regavo efnun ire igi bu ivez rekfuon iji naba isoime kuardiak.
1TH 5:2 Ijefuon maiji jan koikjo vierafen tavan iji E Bomana fu una ruakreno iji fu erar vierafene samuakma bakin. Regavo fum e iji bu isuar naki niesakuai roko igeg isuarigia ruak.
1TH 5:3 Rad e iji bu karine kuai, Noiji no ma karioijo kuaik. Regavo migegare ire ise be fu buon rek. Ire ise iji fu buon rega e iji buka bara iji fu am nafekafa vajai fian abeno ijeg vajai fian abek. E iji bu vajai fian abene uri sauikuai ai nisaik revo bu izeg sauikva bakin.
1TH 5:4 Regavo efnun jaiji ja e iji bu God uzame ise reoijo ijekin bakin revo jaiji ja sanainma ijia karij. Ijefuon tavan iji E Bomana fu una ruakfuon iji fu e niesamo ijeg ruakma jaka turanamik.
1TH 5:5 Regavo jaiji ja tavan sanainma ijia ga Godon sanainma ijia karioij. Regavo no e iji bu ise rene nakinma ijia karioijo ijeg karinva bakin.
1TH 5:6 Ijefuon noba e iji buba mukoi vierafejo iji matiame ni naoik gavo noka koiknuvuon giriesame uri nisaiknum ok.
1TH 5:7 Regavo e iji buba mukoi vierafeknum ire ise reoijo iji bu naki ire ise rejo. Regavo madu e iji bu ire ise kafokafo reoijo iji bu tavan bog naki do kugi ij.
1TH 5:8 Regavo noiji no Godon sanainma ijia karioijo ijefuon tavan bog noka koiknuvuon samuaknum karik. Regavo no unam izeg God fu tavan rad ise nuvuon ijia karaunuokfuon iji abe nigen nuvuon ijia at gigikin igeg abesek. Regavo madu noka e iji bu bijaikuai darer buon kege nakaimoijo ijeg no nuvuon God ma vierafejo ijiga nuvuon no oijmanamivo iji no ke oinuvuon ijia naga bur ire ise iji nuvuon roko iji rarek.
1TH 5:9 Ijefuon maiji God fu no kege vajai fian muokafa vierafenma bakin revo fu E Bomana nuvuon Jesu Kuraison if ijia no karaunuoga no ma karivak.
1TH 5:10 Regavo E Bomana nuvuon Jesu Kurais fu nuvuon ise ijefuon guain. Ijefuon non aoinva ijia gavo no vek karinva ijia fu una ruakma no funa tavan bog kari vak.
1TH 5:11 Ijefuon vuak igi na E Bomana fu una ruakfuon iji na abe kuardiavo iji abe jon kuaime ejafanamiknum ifenamime ire ma ijesugin oijon ijia vierafeof. Regavo ire iji jan iviakma rej revo na una kuardiavo ijefuon ni iji ja rejo ijeg biom ka mukorigia rene vaf.
1TH 5:12 Regavo efnun ivia no ja vuak gigikin nijiame kiav. Ni e iji E Bomana fu ke uniaga bu ja samuagdiaknum kuardiaga ja unam ma iji Jesu ma vierafekfuon ijia kari vako iji mukor igia agordiaf.
1TH 5:13 Ni Godon ik iji bu jon rejo ijefuon bu mukorigia agordiaknum oijmiaf. Regavo ni mukorigia afuime kari vaf.
1TH 5:14 Regavo no madu una vuak gigikin be kuardiav. Ni e iji bu ik buon rekuai uzavo iji una kuardiaknum e iji bu juvo iji vuak kuardia ejafiaknum e zazaikin iji ifejdiaf. Regavo ni e fok ijiena isuarigia oimafaime buna karine ik re vaf.
1TH 5:15 Regavo e roin bu jon ire ise kafo rega jab una vef buon ire ise kafo rek. Regavo nin tavan bog jon ifenamiknum e fok ifejdiakfuon iji vierafeknum kari vaf.
1TH 5:16 Regavo ja Jesu Kurais ma vierafenva ijefuon God fu vierafega jaka tavan bog fuon oimarknum fuon sirimamek.
1TH 5:18 Regavo madu ja Jesu Kuraison e ijefuon tavan iji ja afikin kafo biedia vo unam ma kafo biediakva iji nika una fuon oimaref. Ijefuon maiji God fu ijeg vierafen.
1TH 5:19 Regavo Godon Kaven Akai iji fu mian igeg oijon ijia naino iji jab abe udak.
1TH 5:20 Regavo madu E Bomana ijefuon vuak iji e roin bu faime una ja kuardiavo iji jab faime uzak.
1TH 5:21 Ni ire fok mukorigia giame ire ma ijesugin igiame reogavo ire ise iji giame akardiaf.
1TH 5:23 Na sirimamene God iji fu mukorigia samuagduoko no afuime karijo iji kuaga fur oijon kege amardiaga buka mukorigia mardiak. Regavo madu na kuaga fur vajai jon ga kaven jon ga oijon ja vierafejo iji mukorigia ifejdiaga ire ise kafo buba unam jon kam arafiriak. No God kua fu ijeg ja samuagdia vake tavan iji E Bomana Jesu Kurais fu una ruakfuon iji abek.
1TH 5:24 Regavo God fun usuibe ja kege afuon ren. Regavo madu fu e ir kufuikin bakin ijefuon vuak fok na joifuon sirimamejo iji fu keno kiek.
1TH 5:25 Regavo efnun ni nuvuifuon Godon sirimamef. Regavo madu ni kaifnuvuon ijia karinva iji nuvuifuon mukorigia anadiaf.
1TH 5:27 Regavo no E Bomana ijefuon if ijia anadia kia, Ni fas igi na isoinva iji abe daga e iji Jesu ma vierafejo bu jana besum afuim karinva iji bu vuak iji faif.
1TH 5:28 Regavo na joifuon sirimamega E Bomana Jesu Kurais fu ja ma rediaga ja mukorigia kari vakfuon. Fun ijin.
2TH 1:1 Fas igi For nar e Sairas ko Timotina besum isoime e uruvana ja sos Tesaronaika ijia besum afuime God aroivo iji nijiav. Regavo jaiji jan God Asoinuvuon ga E Bomana Jesu Kuraisbuon e ren.
2TH 1:2 Ijefuon na God Asoinuvuon ijiga E Bomana Jesu Kurais buon sirimamek. Na sirimamene kiaga bu tavan bog ma rediame mukorigia samuagdiaga ja afuime kariokfuon.
2TH 1:3 Efnun iji fuka mardo noka joifuon tavan bog Godon oimarek. Ijefuon maiji jon izeg ja Kurais ma vierafejo iji fuka gigikin ren. Regavo madu izeg e besubesum ja una kaifjon roin oijmiavo iji madu fuka ma bomana ren.
2TH 1:4 Jan ijegrejo ijefuon no Godon ar kafo bu afuivo ijia arume aroikaraknum if jon kege ajiev. No unam izeg ja ise kafokafo biediako bu ja kam vajai fian vajiaga ja vajai fian abejo iji jaka vek giriesame ma vierafejo ijefuon no joisina kuaiv.
2TH 1:5 No iji ja vajai fian abejo iji giame vierafe God fuka ma ijefuon tavan rad fu no kege mazim guok. Ijefuon maiji God fu unam izeg ja vajai fian abejo ijia giame uri unam jon kanafum. Ijefuon jaka samuaikin ja e iji God fu oibuon iji samuagdiamo ijiena mazikfuon.
2TH 1:6 Regavo madu God fu ma ijefuon fu ijegrejknum vo una eraneb bu ja kam arafiriaga ja vajai fian abejo ijin kanafume arir uniaido tavan rad fu bu kam vajai fian vajiak.
2TH 1:7 Regavo iviakma igi ja vajai fian abejo iji God fu rad ja abevo no abe besum karaunuoga no vajai fian bakin karik. Regavo ijeg fu rekfuon iji fu tavan iji E Bomana Jesu Kurais fu anera fuon darokin ijiena besum varur gufia ari roko ijia fu ijeg rek.
2TH 1:8 Regavo tavan iji Jesu fu una ari roko ijia fuka mian ma bomana ijia naine kavuaike fu iji guf ijia ari ruak. Regavo mian iji naine kavuaima iji fu e iji buba God ma vierafenva ijiga vuak ma iji bu E Bomana nuvuon Jesusina kuardiainva iji ba igiainva iji kam vajai fian vajiak.
2TH 1:9 Regavo tavan iji ruakma e iji bu ijegreoijo iji buba una E Bomana ijefuon uikinik iji gak. Regavo madu bu fuon ma iji darokin iji fu e izekin iji buba una giak. Regavo fuka bu kam arafiriaga buka tavan bog vajai fian abejknum karivak.
2TH 1:10 Regavo tavan sumakin be fu irasega Jesu fu una rokon ijia efuon fok eraneb bu fu ma vierafenva iji bu fuon sanainma ma iji game abe aroiknum aroifirik. Regavo jak ja e ijiebuon guf ijia ireme E Bomana nuvuon iji abe aroikfuon ijefuon maiji jaka vuak iji no abe ja kuardiainva iji jan abe ma vierafen.
2TH 1:11 Regavo noka vek joifuon sirimamene God kuavo iji no vierafe fu ja ifejdiaga ja una uri unam ma iji fu vierafe ja izeg karivakafa fu kiainma ja ijia karivak. Regavo no madu God kuaga fu daro fuon ijia ja dasumdia vo unam amardiaga ja ire ma kafo rekuai vierafenva iji ja rek. Regavo madu ja Kurais ma vierafejo ijefuon ja ire ma kafo ja ma vierafene revako iji jaka mukorigia rene buin gafia barga fu aresrekfuon.
2TH 1:12 No ijeg joifuon sirimamek. Ijefuon maiji no vierafe ja irerag fok ja rejo ijia e bu giame una E Bomana nuvuon Jesu Kuraison if ma iji abe ajievknum vo if jon kege kaf ijia ajiek. Ijefuon maiji God nuvuon ijiga E Bomana nuvuon Jesu Kurais bu tavan bog ja ma rediame samuagdiavo ijefuon bu ijeg rek.
2TH 2:1 Regavo efnun igia faif. E Bomana Jesu Kurais fu una rokon ijiga no fu aferduome una besum afuikfuon ijefuon vuak iji bu eb kuaiga jakafu asi fain. Regavo bu kuaik E Bomana ijefuon tavan iji fun ruainmano kuaikva jab uri migegare nuanami vo oifian abek. Ijefuon maiji e roin bu kaven ise ijieb naka kuardiainva bu ijin ja kuardiak. Regavo e roin bu vuak buon ijia ja biesiak ga e roin bu fas kege biesiame kiak fas igi For nar isoinvano kiak. Regavo vuak iji bu ijeg kuaimoijo iji buka kufuimek.
2TH 2:3 Ijefuon e ijieb vuak kufui kafokafo kuardiakva jab ma vierafek. Regavo ni vierafe tavan sumakin iji fuba migegare ruak revo fu samuake e uruvana bun God uzaga fuson ijia ruak. Regavo madu tavan sumakin iji fu samuake e ise iji fu iviakma Godk nigarain vo ke darotuakafamo iji fu koikfuon abe samafrek. Regavo e ise iji fu Godri rad abe ai vajai fian abejo ijia arafiriaga fu vajai fian abene barek.
2TH 2:4 Regavo e iji ma ise reoinon iji fuka kaven kafokafo ga god kafokafo ema bu sirimamejo ijiebuon vuak ise kuaiknum bu kam buze ifdiak. Fu ijegrene fuka koikfuon dab e ma rene una ire uruvana samuagdiak. Fu ijegrejknum vo madu fuka va Godon ar ijia aru fine e uruvana kuardiame kiak fuiji fuka Godno kiak.
2TH 2:5 Regavo na vierafega vuak igi na kuardiavo iji ja uria vierafen. Ijefuon maiji na uria ijia jana finva ijia vuak iji nan abe kuardiain.
2TH 2:6 Regavo ire ise iji fu iviakma rekreno iji erar vo irerag ijar unam iji bijukurainma iji e besubesum jan koikjo game vierafen. Ijegvo tavan ma iji God fu abedenma ijia e iji ise reoinon iji fuson ijia keko samafrega e fok no gakfuon.
2TH 2:7 Regavo e iji ma ise reoinon ijefuon ik izeg fu reoino iji fun iviakma moikigia reoin. Regavo uikinik fuon ijesugin fuba migegare abe samafrek. Regavo fu isuar samuaga fu Godri e iji fu unam fuon rarenma iji abe biom garef unakma ijiason e iji ma ise reoinon iji fuson uikinik fuon abe samafrega e fok bu uikinik fuon gakfuon. Regavo E Bomana nuvuon Jesu Kurais fu una fuon sanainma ijekma rokon ijia Jesu fu e iji ma ise reoinon iji dab arafirime i vuat fuon ijar kanaga fu guak.
2TH 2:9 Regavo e iji ma ise iji fu Setanon daro iji abe ruak. Ijefuon fu arime unam kufui sumakin kafokafo rega e fok bu unam iji giame nuanamikfuon.
2TH 2:10 Regavo fuka isema rene unam ise ijia e iji bu tavan rad barekfuon iji kam unam kafokafo ijia biesiak. Regavo e iji bu barekfuon iji bu vuak ma iji fu bu karauniakfuon iji buba mukorigia oijmia vo oimarknum vuak ma iji fain.
2TH 2:11 Regavo unam ise ga unam kufui ijia bu vierafeknum abe mimatame kegoijo iji fun Godri vierafe ijeg vajiam. Ijefuon buka unam ma ise iji abe darokma vierafeoij.
2TH 2:12 Ijefuon eraneb bu oimarknum ise rekuai vierafeknum vo vuak ma iji buba ma vierafenva iji rad God fu bu kege mukorigia arafiriakfuon.
2TH 2:13 Regavo efnun e iji E Bomana fu ja oijmiamo iji no vierafe noka joifuon tavan bog Godon oimarek. Ijefuon maiji jaiji fun Godri vek ik anej ijia ja fun imut bijiaido fu ja karauniak. Regavo madu jaiji fun Godri ja karauniain ijefuon maiji ja vuak fuon ma iji jan ma vierafen. Regavo fun Kaven fuon ijefuon daro ijia ja kege una efuon akai ren.
2TH 2:14 God fu vuak ma iji no abe ja kuardiainva ijia fun ja kumene kara uniainmado ja e Bomana nuvuon Jesu Kuraison sanainma ijia funa karivak.
2TH 2:15 Ijefuon efnun jab zazaik. Regavo ni uri giriesa ireme vuak ma iji no abe ir kuardiaknum vo fas ijia isoime kuardiainva iji kege mukorigia anu kuniaif.
2TH 2:16 Regavo E Bomana Jesu Kurais ga God Asoinuvuon buka tavan bog no oijmuov. Regavo fuon izeg fu no ma reduomo ijia fuka tavan bog noka uri giriesame ire ma iji fu nuvuon rekreno iji samua kariok.
2TH 2:17 Ijefuon no sirimamega bu ja ejafiaknum daro miaga ja tavan bog vuak ma ijesugin kuaiknum vo unam ma ijesugin mimatame keok.
2TH 3:1 Regavo efnun iviakma na vuak radkma iji kuardiakrej. Ni nuvuifuon sirimamega E Bomana ijefuon vuak ma iji no kuaivo iji fu izeg ja faime ma vierafenva ijeg fu igia rarega e fok bu vuak ma iji abene God aroikfuon.
2TH 3:2 Regavo ni madu nuvuifuon sirimamega God fu no samuagduokin e iji ise reoijo iji buba no kam arafiruoga no vajai fian abekfuon. Ijefuon maiji e uruvana bu vuak ma iji no abe kuardiaoinva iji buka ba ma vierafej.
2TH 3:3 Regavo jaiji no vierafe E Bomana fu tavan bog fuka e iji bu fu ma vierafejo iji samuagdiamo. Ijefuon fur oijon kege gigikin rediaknum vo ja samuagdiado ja e iji ise reoinon Setan fu biediakva jaka giriesakfuon.
2TH 3:4 Regavo no ma vierafega E Bomana nuvuon fu ja ifejdiaga ja vuak irerag fok no kuardiainva ijegrejknum karivak.
2TH 3:5 Regavo madu no sirimamega E Bomana fu unam jon amarega ja tavan bog nuibakin rejknum vo giriesame Kuraison ikreknum izeg God fu ja oijmiamo iji giaknum karivak.
2TH 3:6 Efnun no E Bomana nuvuon Jesu Kuraison if ijia ja soisoime daro miame kiav. Ni kaifjon eraneb vuak nuvuon no kuardiainva iji buba abe mimataknum vo ba ik rejo ijin mukorigia giame agordiaf.
2TH 3:7 Regavo jan koikjon guome vierafe no jana ijia karioinva iji noba zazain ga noka giriesame ik reoin. Ijefuon ni jak izeg no kegoinva ijeg keof.
2TH 3:8 Regavo jan vierafe no ire fok no jon kenva iji fok non kimene ken. Regavo noba zazain ga noka nakikmazak vajai fiaigma ik reoin. Revo no una ja afikin kafo vajiakfuon iji noba vierafenva ijefuon no ijeg ren.
2TH 3:9 Regavo noka ma ijefuon kiaga ja ire vajuoknum vo ar muoga no ijia naoik. Regavo ijeg noba ren revo nom giriesame ik reoin. Ijefuon maiji no vierafe ja unam izeg no kegoinva ijia guome makai nuvuon ijia jajuokuai no ijeg reoin.
2TH 3:10 No vek ijia jana karioinva ijia no ijeg kuardiame kia, Erar fuba ik rekro vierafenma iji jab ire iknum vajakno kiain.
2TH 3:11 Iji no ijeg isoime kuardiavo ijefuon maiji iviakma no faiga e roin jana ijia karinva iji buka zazaime ba koikbuon giriesame ik rekuai vierafen. Regavo bum ijia uzame oknum una e kafobuon ma karivako iji kam arafiriav.
2TH 3:12 No E Bomana nuvuon Jesu Kuraison if ijia e iji eraneb bu unam ijeg kegoijo iji darokma ejafiame kuardiav. Ijefuon nika unam izeg bu ma karikfuon ijia kegoknum vo koikbuon giriesame ik rene una agbara buon samuagdiaf.
2TH 3:13 Regavo kaifnun roin eraneb nana Kurais ma vierafejo iji jan unam ma ijia kegoijo ijefuon jab arek.
2TH 3:14 Regavo e kafo ijia eraneb vuak igi no fas igia isoime kuardiavo iji ba abe mimatame kegokva ni e ijin mukorigia giame agordiaf. A fu game agoikafakma fu koikfuon ijia game juk.
2TH 3:15 Regavo a fu ab abe e ani igeg game vierafek. Regavo ni uviaion igeg ejafame kuardaga fu unam ise iji fu reno iji fu are.
2TH 3:16 Regavo na sirimamene E Bomana nuvuon kuardak. Fur tavan bog ifejduo no afuime karijo ijefuon na kuaga fu koikfuon ire kafokafo ja reoijo ijia ifejdiaga ja tavan bog afuime ok.
2TH 3:17 Regavo igi na koiknu imut nun igia isoiv. Na tavan uruvana fas nun kafokafo na isoivo iji buin ijia na if nun nan ijeg isoiv. Ijefuon For nar ja anadiav.
2TH 3:18 Regavo E Bomana nuvuon Jesu Kuraisri tavan bog ja ma rediaga ja mukorigia ma karivakfuon. Fun ijin.
1TI 1:1 Na For e iji Godri kieme daro miega na afasor renva iji nar fas igi isoin. Regavo na Jesu Kurais e iji fu unam iviamkor nuvuifuon amarekafa kuainma ijiga God e iji no karaunuinma ijieb kiega na vuak buon abe e fok kuardiav. Regavo fas igi na isoime Timoti a nijav. Regavo a Kurais ma vierafeno ijefuon aiji aka farinun igekin. Regavo na sirimamega God Asoi ga Jesu Kurais E Bomana ijieb tavan bog on oifian abene ma redame mukorigia samuagdaga a e iji God ma vierafejo ijia karinva ijiena afuime fiokfuon.
1TI 1:3 Regavo Timoti na vierafe aka ai Efisis ijia fik. Regavo na amur na Mesedonia vakafie vuak gigikin na kuardame vainva ijeg na una soisoime kuardavo ni igia fi. Ijefuon maiji e roin bu vuak kufui iji Godon vuak ma iji ijekin bakin iji abe nijaidiavo ijefuon na vierafe a kuardiame kuriairega buka arekfuon.
1TI 1:4 Regavo nika kuardiaga bu vuak kufui iji buba faivknum vo saifijaf ijiebuon if fok buba kege uruv vierafekfuon. Regavo eraneb bu ijegreoijo iji bu tavan bog ire izar ma ga izar ise ijiebuon musikuaiv. Bu unam kufui iji reogavo Godon unam ma iji bu ma vierafekfuon iji bu ijia arev.
1TI 1:5 Regavo na vierafe aka kuriairega bu vuak kufui iji bu kuaivo iji buka aregavo oijmanamivo ijar abega fu oibuon ijia rarekfuon. Regavo oibuon fu maturaikma vierafe buon fu samafrega ma vierafejo buon iji fuka ma darokin rekfuon.
1TI 1:6 Regavo e roin bun unam ma iji na kuainva iji bun uzame una vuak ka ma bakin ijesugin vierafene kuaimoij.
1TI 1:7 Regavo bu Godon akaij iji e nijaidiakuai vierafen revo vuak buon bu kuaivo iji buba mukoi vierafej. Bu vuak kafo gigikin kuaimoin revo bu vuak ma iji buba mukoi vierafej.
1TI 1:8 Regavo no vierafe God akaij iji fu Mosison duadok ijia muinma iji fu mado fu ise no rejo iji samakaf nijaiduomo ijefuon no una mukorigia karij.
1TI 1:9 Regavo no madu vierafega akaij iji fu e iji ma reoijo ijiebuon abedenva bakin ga fu e iji bu akaij iji abe tuaseme ba igame javo ijiebuon abeden. Regavo akaij iji bu e iji ba God ma vierafejo ijigam e iji unam ise kafokafo re ga ba maturaime karijo ijiebuon abeden. Regavo madu e iji buba ire ma iji God oimaikfuon ijia rejo ijigam e iji e kaniavo ijigam e iji bu eofijaf kaniaga bu aoivo ijiebuon akai igi God fu iji abeden.
1TI 1:10 Regavo madu akaij iji bu barubara fudainamiknum ise rekuai vierafejo ijiebuon abeden. Regavo efarif iji bu efarif roina unam ise rejo ijiga e roin kuniaime tome kevaga bu buifuon ikrejo ijigam vuak kufuimejo ijiebuon abeden. Regavo be iji kot guf ijia vuak ma kafo kege karoime kufuimega e bu dibur vako ijigam e kafo Godon akai ma iji kege tuaseknum ba igiame javo ijiebuon akai iji bu abeden.
1TI 1:11 Regavo vuak irerag akaij ijia fu kuainma iji fu Godon vuak ma iji na abe kuaimoijo ijefuon guf ijia nam. Regavo vuak ma iji fu God nuvuon sanainma ga ka e darokin ijar nijuin.
1TI 1:12 Regavo na Jesu Kurais E Bomana ijefuon oimarev. Fu vierafega na ma vierafejo ijefuon fu daro mieme imut bijieme kie na fuifuon ikrekno kien.
1TI 1:13 Regavo amur naka vuak ise fuisina kuain ga efuon arafiriaknum ire ise buon ren revo fu na kie na fuifuon ikrekno kien. Regavo God fu na gieme ba afikin mien revo fu ise nun gieme aren. Ijefuon maiji naba Jesu Kurais vierafen ijefuon irerag na rejo iji naba vierafeknum ren.
1TI 1:14 Regavo Jesu E Bomana iji fu nun bomana oifian abene mukorigia ifejdieme ma redien. Regavo madu fu ma vierafejo ijiga kaifijaf roin oijmiakfuon iji kege vajien. Ijefuon tavan iji no una Jesuna besum rejo ijia ire iji bu nuvuon ruakfuon.
1TI 1:15 Regavo vuak igi fuka ma ijefuon noka mukorigia faime ma vierafekfuon. Vuak iji igin Jesu Kurais fu moikigia ari ruainma iji fu e ise rejo iji karauniakafa ari ruain. Regavo e be nar amur ise uruvana rene e uruvana asidiain. Regavo God fu ise fok na amur renva ijefuon fuba arafirien. Na ise uruvana ren gavo fu fuon adumaduigin e ifejdiamo iji abe na nijaidien. Fu ijeg adumaduigin rega e roin bu game vierafero fu buon ijegrekuai kuaime buk bu God ma vierafene unam ma karivako ijin abek.
1TI 1:17 Regavo na sirimamene God aroiknum if fuon abe ajiek. Regavo fu E Bomana God ma iji no gavo bakin gavo fum tavan bog ijia fivak. Regavo na vierafe noka if fuon sanainma iji abe tavan bog aroime vakfuon.
1TI 1:18 Timoti farinun na vuak be madu a kuardakrej. Regavo vuak iji fu ni besum e iji Godon vuak vierafene kuaivo bu ur oisina kuainva ijefkin. Regavo vuak igi bu oisina kuainva ijieb a ifejdame daro maga a Godon e ani Setank mukoi bijaik.
1TI 1:19 Regavo on a God ma vierafeno iji mukoi kunaim giriesaikin a unam fuon ma iji giame ijia jame kekfuon. Regavo e roin bu unam ma iji bu vierafejo iji bun uzain ijefuon buon bu ma vierafejo iji bun kam arafiriain. Regavo e nokarok (2) Aimenaias ko Areksada nan kege Setan vajaido fur kege arafiriame vaga bu ijia giame buba una Kuraison if abe jufdiakfuon ijia kuaimok.
1TI 2:1 Ijefuon Timoti vuak fok na kuardainva ijia vuak bomana besum iji sirimamejo ijin. Na bomana vierafega e fok God ma vierafejo iji buka duok fok bu tavan bog ine karikfuon iji bu sirimamene God kuardaknum vo fu vajiamo ijefuon una fuon oimarkfuon. Regavo kuardiaga bu e kafokafo ijiebuon sirimamekfuon. Regavo e mamkanuk nuvuon kafokafo moikigia no samuagduovo ijiebuon sirimamekin no tavan bog afuime isuar igia unam akaij iji God oimaikfuon ijia kariokfuon.
1TI 2:3 Regavo ijeg tavan roin e kafobuon sirimamejo iji fu unam mukor God fuka oimaimo. Regavo God e iji fu no karaunuinma iji fu madu vierafe e fok bu vuak fuon ma iji faime vierafega fu rad karauniakfuon.
1TI 2:5 Regavo vuak fuon ma iji igin God fu besum ijesugin fin. Regavo Kurais fu God roin rega ema roin renva rir ijia manin. Regavo fu koikfuon abe miamga bu abe kuros kanain ijefuon e fok fur karaunuin. Regavo ijar nijaiduomon iji God fu tavan ma ijia e besum kuamga fur e fok ijiebuon guame bu karauniain.
1TI 2:7 Regavo iji fu renma ijar nijaidiamo iji fu vierafe fu e fok karauniak. Ijefuon fu na kumega na afasor rene e Jius bakin iji vuak fuon ma iji nijaidiaga bu Jesu Kurais ma vierafekfuon. Regavo vuak irerag na kuardiavo iji na kufuimejo bakin revo na vuak ka ma iji kuardiav.
1TI 2:8 Ijefuon e fok bu moik iror igia karinva iji bu sirimamekva iji na vierafe buka maturaime ij akaij ijia ise rejo bakin ijia ke ajieme sirimamek. Regavo efarif iji sirimamekfuon iji bu e roin ziegafiavo bakin revo bu God ma vierafega fu ifejdiak.
1TI 2:9 Regavo bara ijiebuon vuak bu izeg karikfuon iji na isediemo iji bu ugon e jufdiakfuon iji buba sak revo bum adumaduigin ugon sibank ma iji samokfuon. Regavo bara iji God ma vierafejo iji bu e kafokafo oijmia vo mardiaga e roin bu ijia giakfuon. Regavo nigen jau buon mukoi bijavo ijiga ugon mon mamkanuk kimenva iji savo iji fuba maren. Regavo ja jon amarenamikfuon iji ja oijon ijia amarenamime e roin oijmiakfuon.
1TI 2:11 Regavo bara iji bu sos guf ijia isuar adumaduigin karine vuak faikva bu mukoi faime vierafekfuon. Regavo bara be fuba sos guf ijia uri baru iji asime vuak kafo kuaik.
1TI 2:13 Ijefuon maiji God fu Adam amur amareme rad Iv amaren. Revo Adam fuba Setanon ir faime ise ren revo fu bara Ivir Godon akaij iji dab tuasen.
1TI 2:15 Regavo God fu bara iji kege fuon sanainma ma ijia uniain ijefuon maiji bara ijar Jesu Kurais nafen. Regavo bu ma vierafeknum e fok oijmiaknum adumaduigin akai karikva God fu bu karauniak.
1TI 3:1 Timoti na vuak ma be kuardak. Efarif kafo ijia karinva bu vierafe bu sos iji samuakuai vierafekva iji na vierafe ik iji bu rekuai vierafenva iji fuka ik mukor.
1TI 3:2 Ijefuon erar fu ik iji rekafa vierafekma iji fuka unam arir maturame fikfuon vo fuka bara besum abekfuon. Regavo fuka koikfuon mukoi samuanamiga e fok bu fu agoik. Regavo madu fu e sumakin iji tavan bog oimarknum aferdiamo ga Godon vuak e iji mukorigia nijaidiamo.
1TI 3:3 Regavo e iji fuba do kugi uruvana ino ga migegare deajiga e kaniamo bakin. Regavo fuba e roina musikuaimon ga unam fuon fu mukoi afuiknum fioinon. Regavo madu e iji fuka mon ba bomana oijmiamo.
1TI 3:4 Regavo e be fu vierafe fu e bomana be rene sos samuakma fuka amur aganfuon gire besum karinva iji mukorigia samuagdiaknum afijaf nijaidiaga bu iganamiknum uguar faime fu mukoi agordak.
1TI 3:5 Regavo e iji fuba agan iji mukoi samuagdiakma fu izeg Godon e iji samuagdiak?
1TI 3:6 Regavo e iji fuka iviakma igef God ma vierafejo iji jab kuaga fu e bomana rene sos samuak. Ijefuon maiji fuka koikfuon abe aroikarame ajiega God fu abe afikin mak. Regavo God Setan fu izeg aroikarame koikfuon abe ajiemga fu abe arafirinma ijeg fu e iji abe arafirik.
1TI 3:7 Regavo madu e be fu e bomana rekafa vierafekma fuka unam ma ijia fine roko ijin abekin e God ma vierafejo bakin iji bu game mukoi vierafene agordak. Regavo fu unam fuon fu isema fioga Setan fu biesuame if fuon abe arafirikma fu bomana jumga ik fuon fu reno iji fu migegare iserek.
1TI 3:8 Regavo madu na una e sos guf ijia ifejdiavo ijiebuon vuak kuardiakrej. Regavo e iji buka vuak ma ijesugin kuaimoijknum vo unam buon bu karijo iji fuka marga e fok bu ijia giame bu agordiakfuon. Regavo buba do kugi iji uruvana ik ga mon ga sinuom kafokafo buonkua vierafene karek.
1TI 3:9 Regavo bum Godon vuak ma iji bu abe nijaidiainva iji abe oibuon ijia abedeme giriesame ma vierafekfuon. Regavo buon bu karijo iji buka vierafe buon iji jame karik.
1TI 3:10 Erar fu vierafe fu sos ijia ifejdiame ikrekma amur ja unam fuon fu ikreno iji ga unam fuon fu tavan bog fino ijia gakfuon. Fu unam nokarok (2) iji fun ma reoga ni abega fu sos ijia ifejdiak.
1TI 3:11 Regavo unam fu bara fuon ijek fuka unam mukorigia fioknum vo fuba ura oknum e kafobuon vuak kuaimoin ga fuka koikfuon samuanamiknum nuibakin ma vierafene ik fuon reno ijia abekfuon.
1TI 3:12 Regavo madu e iji sos ifejdiamo iji fuka bara besum abekfuon vo madu fu agbara fuon mukorigia samuagdiakfuon.
1TI 3:13 Regavo e iji bu mukorigia ikrekva e fok buka bu giame agordiakfuon. Regavo madu buon izeg bu Jesu Kurais ma vierafejo iji fuka ma darokin rekfuon.
1TI 3:14 Regavo Timoti na vierafe na rad a gak vuakfuon revo nakafu saroime vuak ijefuon fas igi na iji isoime nijiav.
1TI 3:15 Na isoime nijaikin a unam izeg Godon e iji bu buon samuanamiknum karioijo ijiena dame vierafekfuon. Regavo Godon agan iji bu God iji ijia fivako ijefuon sos. Regavo sos ijar Godon vuak ma iji bu nijaidiavo iji biduakfuon.
1TI 3:16 Regavo unam izeg e God ma vierafejo bu karijo ijeg karikfuon iji fuka unam ma ikin. Regavo unam iji fu Jesu Kurais fak nam. Kurais fu ema igeg moikigia ruain. Regavo Kaven Akai ijar nijaiduome kuo Jesu Kurais fu ma Godon Farifno kuin. Regavo anera fok bu fuon ma iji sanainma iji gain. Regavo e iji bu fu jaoinva ijieb vuak fuisina ar iror ijia kuardiain. Regavo e fok moikigia karinva bu fu ma vierafen. Fu una varur iji Asoifuon God samuamo ijia vain.
1TI 4:1 Regavo fun Godon Kaven ijar fun samakaf vuak iji kuai, Tavan rad e roin bu Kuraison vuak ma iji nijaidiavo iji bu ijia arekfuon. Regavo bu kaven ise iji biesia vuak kufui nijaidiavo iji jajiame vakfuon.
1TI 4:2 Regavo kaven ise ijieb e iji biesiaga bu una e roin vuak kufui nijaidiak. Regavo vuak kufui bu nijaidiavo iji bu ise rejo iji buba vierafenva ijefuon buka ba juk.
1TI 4:3 Regavo e iji vuak kufuimene nijaidiavo ijieb nijaidiame kia, Bara savo ijigam duok kafokafo ijo iji fuka ba marenma jab ijeg rekno kiak. Regavo vuak iji fu ma bakin ijefuon maiji fun Godri ire fok fur amardiain. Ijefuon e iji eraneb bu God ma vierafe vo vuak fuon ma iji ma vierafejo iji bu duok iji oimarknum kege sirimamene ikfuon.
1TI 4:4 Ire fok God fu amardiainma iji bu mukordo ire besum jab uzak. Regavo duok fok nika kege Godon sirimamene oimarknum ikfuon. Ijefuon maiji Godon vuak ijiga Godon sirimamejo ijieb duok iji kege marev.
1TI 4:6 Regavo Timoti a vuak iji na kuardavo iji kege uviaifnuvuon iji nijaidiakma a ma Jesu Kuraison ikreno. Regavo Godon vuak iji a ma vierafene nijaidiamo ijieb a ifejdaga a on a ma vierafeno ijia a e damuigin rekfuon.
1TI 4:7 Regavo suar usuikor iji ka ma daro bakin iji ijia aref. Regavo tavan bog nika daro on ijekma Kaven Akai ijefuon unam ijia uruvana mimataoikin a daro abek.
1TI 4:8 Ijefuon maiji vajai nuvuon fu daro abekafa no mimatame ire kafo rejo iji fu ma. Regavo Kaven ijefuon ijia mimatavo ijar kaven nuvuon ifejdiaga no Godon unam ma ijesugin jak. Regavo ijar ifejduoga no iviakma ma kariknum vo rad no ma karivak. Regavo vuak iji fuka ma ijefuon aka mukorigia faime vo ma vierafe jame kekfuon.
1TI 4:10 Ijefuon tavan bog no giriesame vajai fian abeknum ikrej ijefuon maiji no tavan bog God ijia fivako iji ma vierafen ijefuon no ijeg rej. Regavo fun Godri aresredo fu e fok eraneb fu ma vierafejo iji karauniakfuon.
1TI 4:11 Ijefuon Timoti vuak iji na kuardavo iji abe e iji nijaidia vo soisoime ejafiaga bu vuak iji jakfuon.
1TI 4:12 Regavo ab arega e kafob a neseme e ukakbe ijeg gak revo mimatame ma rejo ijia kege nijaidiaga bu ma vierafene a oijmame agordak. Regavo unam iji a mimatame nijaidiakfuon iji nika vuak ma ijesugin kuardia vo unam mukorigia mimatame ke nijaidia. Revo madu e fok oijmia vo tavan bog God ma vierafekfuon. Regavo on a vierafeno iji fuka maturai vo arir vierafekfuon.
1TI 4:13 Regavo a vek na samuagdiemo ijia na vierafe a daro on fok ijekma Godon vuak iji sos guf e nifak ijia samakaf uruvana daknum vuak ijefuon ma iji e iji kuardiaknum nijaidiak.
1TI 4:14 Regavo amur aba anerene ik on rene vuak kuardiamo ijia e Godon vuak vierafene kuaimo be fu ik on a rekfuon iji fun kuardain. Regavo e mamkanuk roin bu imut nigen abedevga God fu ik on ijefuon daro main. Ijefuon daro iji God fu mainma iji ab rubdame nui girek revo ire iji nika mukor igia mimatame re. Regavo nika oion ijekma ikrega e fok bu ik on ma iji a mukorigia rene vako bu iji gak.
1TI 4:16 Regavo izeg a oino ijia ga vuak ma iji a nijaidiamon ijia mukorigia vierafeknum ire ijieb giriesa re vakne. Ijefuon maiji a ijegrekma e iji bu a fazdavo iji a ise buon ijia karauniaknum ga a koikon keunanamim.
1TI 5:1 Regavo a emakin be fu ire be isema rega ab uruvana kuriaikuriaikin kuardamo revo nika oi mafaime isuar asoion igeg kuarda. Regavo am mumogana iji diaifarifon igeg ifejdiame samuagdiamne. Regavo bara barukin iji asieon a oijmiaknum agordiamo igeg ifejdiame samuagdia ga bara naise iji makifon ma igeg mukorigia ifejdiame samuagdiamne.
1TI 5:3 Regavo e iji Kurais ma vierafejo iji kuardiaga bu bara amun iji e kafo ba samuagdiavo iji mukor igia oijmiaknum samuagdiakfuon.
1TI 5:4 Regavo bara amun iji fu amfuon roin ga saifijaf roin iji buka buon izeg bu ma vierafejo iji mimatame eofijaf iji mukoi oijmiaknum samuagdiakfuon. Regavo bu ijegrekva God fu oimarek.
1TI 5:5 Regavo bara amun ma be e bu samuagdiavo bakin iji fuka God ma vierafene tavan bog nakikmazak Godri ifejdakafa fu sirimameno.
1TI 5:6 Regavo bara amun be fu tavan bog unam ise iji vierafeknum reoino iji vajai fuon iji fuba guain revo kaven fuon iji fun guain.
1TI 5:7 Ijefuon na vierafe a e iji God ma vierafejo iji kuardiaga bu agan buon buna gire besum naoivo iji mukoi samuagdiakfuon. Bu mukorigia samuagdiaikin e kafo buba vuak ise kafo bara amun ijiebuon kuaikfuon.
1TI 5:8 Regavo e be fuba e uifarif fuon iji ga aganfuon ma iji samuagdiakma fu fuon ma vierafeno iji fuba ijia jame kegoin. Revo fuka e iji God ba ma vierafejo iji fur ma asidiain vo ma vierafe fuon iji fuka ma ise.
1TI 5:9 Regavo bara amun be fu vierafe fu bara amun iji sos ijia ikrejo ijiena fikma iji fuka juaivasia siksti (60) ijeg asime vain revo baru besum jainma ijar ijeg rekfuon.
1TI 5:10 Regavo fuiji buka e fok ijieb fu ma vierafejo ijefuon maiji unam fuon fu reno iji fu ma ijia ren. Regavo unam ma iji roin am mukoi samuagdia ga e sumakin ifejdiaknum samuagdia vo adumaduigin Godon e iji ifejdiamo. Regavo madu Godon e iji vajai fian abejo iji oi fuon ma ijekma mukorigia ifejdiaknum vo unam ma kafokafo e kafobuon reno.
1TI 5:11 Regavo bara amun roin eraneb nivek iji buba migegare bara amun sos ijia ikrejo ijiena rene ikrekuai vierafek. Ijefuon maiji bu rad efarif ma kafo giame una jajiakva bu Kurais nuigafame una vuak bu amur sos ijia ikrekuai kuainva iji kege tuasek. Regavo bu ijegrejo ijar bu koikbuon kege arafirinamiv.
1TI 5:13 Regavo madu bara amun nivek iji bu gire ijia ajie ari oknum ise kafo rejknum e kafobuon vuak kuaiknum e ise rejo ijiena besum karine vuak bu kuaivo iji ifejdiame kuaik. Regavo buka vuak ise iji e bu kuaikfuon bakin ijin kuaimoijo.
1TI 5:14 Ijefuon na vierafega bara amun nivek iji buka una baru jajiame am nafene ar samuakfuon. Regavo bu ijegrekva e ani nuvuon iji God ma vierafejo bakin bu vuak ise kafo buba e iji God ma vierafejo ijiebuon kuaik.
1TI 5:15 Na vuak iji kuardiavo ijefuon maiji bara amun roin bun usuibe karoime una Setan jain.
1TI 5:16 Ijefuon bara erar God ma vierafeno fu bara amun roin aganfuon ijia karijga nika mukoi samuagdiamne. Ja ijegrekva sos iji buba bara amun iji samuagdiakfuon revo sos iji fum bara iji ka ma amun e kafob samuagdiavo bakin iji samuagdiakfuon.
1TI 5:17 Regavo ni e mamkanuk iji eraneb sos ik samuavo iji mukorigia kimene mon buon vajiaknum arordiaf. Regavo ni e mamkanuk kafo ijia bu tavan bog nui bakin Godon vuak iji mukorigia uruvana kuardiaknum nijaidiavo iji ka mukorigia kimejknum arordiaf.
1TI 5:18 Regavo Godon vuak iji usuibe isoinva ijia bu vuak nokarok (2) e iji sos guf ijia ikrega kimejo ijefuon kuain. Vuak amur iji fu bijame kuai, Ja kumun uij karkuai maf-kau afem vaga fu kumun jon utamoknum vo kumun roin ikma jab bijuk. Regavo vuak be iji fu kuainma iji E iji ikreno iji ja kimene mon fuon vajakfuon.
1TI 5:19 Regavo e be fu kia e bomana sos samuamo be fu ise be renma kiaga jab uri fu fazdak. Regavo bu e nokarok (2) vo e nokbek (3) ijeg bu kuai e iji fu ise renma kuakva ni vuak buon fai.
1TI 5:20 Regavo e mamkanuk sos samuavo iji bu ise rekva ni kege e God ma vierafejo ijiebuon nifak ijia samakaf nijaidiame arir uniaga e roin bu ijia giame juvknum buk buba ire ijekin kafo rekuai vierafek.
1TI 5:21 Regavo na a kuardame na Godon nifak ijia ga Jesu Kurais ga anera fuon akaij ijiebuon nifak ijia na kua ni una vuak igi na kuardavo iji mukorigia igiamne. Regavo ab e roinknum ijesugin vuak gigikin kuardiagavo kaifon iji soisoime kuardiak. Regavo nika e fok kege afuime besum vuak gigikin kuardiame aferdia unam arir ijia unia.
1TI 5:22 Regavo ja vierafe ja e kafo kega bu e mamkanuk rene sos ijia ikrekva jab migegarek. Regavo amur iji unam buon bu karijo iji giame ni son imut nigen namdiaga bu Kuraison ikref. Regavo a e be aba mukoi gain gavo am kuamga fu e bomana rene fu una ise rekma iji ar isema rene fu abenma ijefuon a ise fuon fateroin aben. Ijefuon iji game nika kekirame unam ma ijesugin rejknum maturaime fi.
1TI 5:23 Regavo ab do gaikin ijesugin ik revo nika do vuain ukakbe abe iga fu defok on iji ifejda vo madu fu adam a tavan bog abeno iji ifejdak.
1TI 5:24 Regavo ja e mamkanuk karvo iji mukorigia unam buon giaknum vierafef. Ijefuon maiji e kafobuon ise iji bu isuar sauime naoivo ijieb rad samafrek. Regavo e kafobuon ise iji bu migegare samafrega no giakfuon.
1TI 5:25 Unam besum ijeg unam ma iji buon bu rejo iji fuka samakafdo a giak. Regavo unam ma buon bu isuar sauime rekva rad buson samafrekfuon.
1TI 6:1 Regavo e iji God ma vierafejo eraneb bu mon abejo bakin gavo bum e kafobuon ikrejo iji buka daro mene ikreknum e mamkanuk buon agordiakfuon. Regavo bu tavan bog ijegrekva e roin bu Godon if ijiga Godon vuak iji no nijaidiavo iji buba abe vuak ise kuaime buzeik.
1TI 6:2 Regavo e iji bu e mamkanuk iji God ma vierafejo ijieb samuagdiavo iji buba vierafero e mamkanuk iji bu Kuraison if ijia bu uviaifijaf. Ijefuodo buba ziekno kuaime bu tavan bog buba nuibakin rene ikrekuai vierafej. Regavo buka giriesa daromene e mamkanuk buon ijiebuon ikrekfuon. Ijefuon maiji e mamkanuk iji bu God ma vierafeknum ebuon ikrejo iji oijmiav. Regavo Timoti na vierafe a vuak igi nijaidia vo madu e iji darokma kuardiaga bu vuak iji mukoi igakfuon.
1TI 6:3 Regavo e roin bu vuak kufui kafo nijaidiaknum vuak ma iji E Bomana nuvuon Jesu Kuraison no nijaidiavo iji bu uzav. E ijegreoijo iji bu aroikaravo ijieb oibuon ijia irtoijen ijefuon bu ire kafo ba vierafeoij. Regavo bu vuak ukakna kafo ga vuak mamkanuk bakin iji kege mijum abene ijefuon musikuaiknum e kafobuon oi kege karoiga bu zienamiv. Regavo bu besum afuim karijo bakin gavo bu vuak ise kafokafo buon kuaiknum e kafo ire bu renva ijin kam kufuimene uruvana buisina vierafen.
1TI 6:5 Regavo e iji eraneb bu vuak kufui kafo kege mimatame kuardiavo iji bu tavan bog musikuaivo ijefuon maiji nigen buon bun karoime iseren ijefuon bu vuak ma iji irerag buba vierafen. Regavo buka ma isema vierafen ijefuon bu vierafe kuai bu God ma vierafekva iji bu emakin rene sinuom uruvana zaraikno kuaiv.
1TI 6:6 Regavo e be fu Jesu Kurais jakma Kuraisri oifuon fu vierafeno iji abe dakaroiga fu sinuom fu nainma iji fu vierafega fun siban aresredo fu oimaikfuon. Vuak igi fu vuak ma iji sinuom zaraikfuon ijin.
1TI 6:7 Regavo no bu nafeduova no moikigia ari ruainva iji ire kafo no ba kege ruain. Regavo no aoikva iji no ire kafo moikigia noba kege una vak.
1TI 6:8 Ijefuon no duok ijo kafo ga sinuom savo kafo naoikva iji fun siban aresren. Regavo noba sinuom uruvana karekuai vierafek. Regavo e iji bu sinuom uruvana karkuai vierafejo iji bu migegare arikaniaga bu ise rek vo buon bu ma vierafejo iji bu buzereme ga ise ijar bu aferdia arafiriakfuon.
1TI 6:10 Ijefuon noka mon oijmiakva noka unam ise uruvana biediakfuon. Regavo e roin eraneb bu sinuom zaraikfuon iji bomana vierafejo iji buon ma vierafejo iji bun uzame vain. Ijefuon bu unam vajai fian abejo uruvana bun kege una vajai buon ijia ruain.
1TI 6:11 Regavo Timoti aiji a Godon e ijefuon ire ise uruvana na iviakma kuardainva iji giame agordiamne revo giriesame darokma mimataga ire igi bu oion ijia ofrek. Ire iji maturaime akai karijo ijiga ma vierafejo ijiga oijmanamivo ijiga giriesame nuibakin tavan bog ikrejo ijiga adumaduigin oijo iji bu oion ijia ofrek.
1TI 6:12 Regavo nika e iji fu ire ma be abekafa giriesame kukumo ijeg nika Jesu Kurais ma vierafene unam fuon iji mukorigia jame reof. Regavo God fu a kumenma iji fu unam ma karivako iji makafa kuainma ijefuon aka vuak iji abe darokma kunaime vakne. Regavo on a Kurais ma vierafeno iji an e fok ijiebuon nifak ijia samakaf nijaidiain.
1TI 6:13 God ko Jesu Kuraisbuon nifak ijia na if buon ijia kuriame a kuardav. God e iji ire fok samuagdiako bu nakikmazak nivek karijo ijiga Jesu Kurais e iji Fairet fu vek fino ijia God fu kuamga fuba uzain gavo fu ire fok rene barenma ijiebuon if ijia na kurame a kuav. Ire fok God fu kuardaga iji igame re.
1TI 6:14 Regavo ire iji rejknum vo ab zazaime ise kafo rek rega giriesame unam ma ijesugin rega e iji bu vuak ise kafo oisina buba kuaik. Regavo fum ijeg navake tavan iji God fu abedenma ijia E Bomana Jesu Kurais fu una ruak.
1TI 6:15 Regavo fun Jesur daro abene ire fok samuagdiamo revo tavan iji fu ruakfuon iji fun Godri tavan iji abededo fur abe rega fu samafrekfuon. Regavo God iji Kin ka bomana kin ukakna kafo iji fur asidiain. Regavo madu fu E ka Bomana e mamkanuk kafo iji fur asidiain.
1TI 6:16 Fu fuonkua fu tavan bog ijia fine vak revo fuka ar ma sanainma e kafo samaij ijia vako bakin ijia fin. Regavo e be fuba God gain vo madu e besum moikigia oino iji fu God gakma bakin. Ijefuon na tavan bog sirimamega e fok bu if fuon abe ajiek revo daro fuon fu tavan bog ijia navak. Mare.
1TI 6:17 Regavo eraneb moik igefuon sinuom ijia uruvana zaraiga ni kiaga buba aroikarame sinuom buon bomana vierafek. Regavo buba ma vierafero sinuom buon ijieb ifejdiaga bu ma karivakuai kuaiv. Ijefuon maiji tavan iji sinuom buon fok bu barekfuon iji buba vierafen. Ijefuon kiaga bu buon bu ma vierafejo iji bu God e iji tavan bog ire iji no oimarknum karikfuon vajuomo iji mame vierafekfuon.
1TI 6:18 Regavo ni kiaga bu mukorigia reoknum vo unam ma iji ka uruvana reokfuon. Regavo ka e suaikin rene tavan bog e ifejdiakafa ijefuon rek.
1TI 6:19 Regavo bu ijegrejo ijefuon God fu ar ma iji varur gufia buifuon kanaufum. Ijefuon bu varur gufia vakva God fu vef ijefuon ar ma iji fu amarduinma iji miaga bu ijia ma karivakfuon.
1TI 6:20 Regavo Timoti Godon vuak ma iji fu nijaidainma iji mukorigia samuagdiamne. Regavo vuak kuaivo ijiga vuak ise ijefuon musikuaivo iji e bu kufuime kuai mano kuaivo iji mukorigia agordiaf.
1TI 6:21 Ijefuon maiji e roin bu iji uruvana vierafene ba rubdiavo ijefuon bu buon ma vierafejo iji bun uniakoin. Regavo na sirimamega Godri ma rediame ifejdiaga ja tavan bog oimarknum kariokfuon.
2TI 1:1 Timoti farinun na e For Godon vierafenma ijia na afasor rene Jesu Kuraison vuak nijaidiaoijo nar fas igi isoin. Regavo vuak iji na kuardiavo iji no Jesu Kuraisna besum rene ma karivakfuon na iji kuardiavo nar fas igi isoim nijav.
2TI 1:2 Regavo Timoti farinun na a oijma vo God Asoi ga Jesu Kurais E Bomana nuvuon ijieb tavan bog on oifian abeknum vo ma redame mukorigia samuagdaga a afuime fiokfuon.
2TI 1:3 Na Godon oimarme saifnun bu renva ijeg na oinun ijekma fuifuon ikrej. Regavo na nakikmazak nun na sirimamejo na tavan uruvana a vierafe vo Godon oimarev.
2TI 1:4 Na a uname vakga a niraime nido on fu arinma iji nan vierafen ijefuon na tavan uruvana a gakro vierafen. Regavo na vua a gakva oinun fu oimarvo ijar irtoijek.
2TI 1:5 Na on a ma vierafeno iji nan vierafen. On a ma vierafeno iji fu sat on Rois ko asieon Iunesbuon oij ijia amur nainma ijar una oion ijia nam.
2TI 1:6 Ijefuon na iviakma una kuardaga a daro iji God fu tavan iji na imut nigen abedekoga fum efkin mainma iji abe ikrega fuka darokin rekfuon.
2TI 1:7 Na vuak iji na kuardavo ijefuon maiji God fuba Kaven fuon no jukfuon iji vajuin. Regavo fu Kaven darokin iji vajuo no giriesa ireme e fok oijmiaknum vo ijieb ifejduoga no nuvuon samuanamikfuon iji vajuin.
2TI 1:8 Ijefuon ab E Bomana nuvuon ijefuon vuak iji fu e fok ifejdia karauniamo iji kuardiakafa juk revo na fuon ikrejo ijefuon na dibur fijo iji ab gieme juk. Regavo nika igi na vajai fian abejo ijeg ak Godon daro ijia vuak fuon ijefuon vajai fian abene.
2TI 1:9 Fur no karaunuome kumega no e akai rene karij. Regavo no ire ma be renva ijefuon fu no kumenma bakin revo fum fuon vierafenma ijia ga fuon ma iji fu no vajuomo ijia no kumen. Regavo fuon ma iji fu no vajuinma iji fu Jesuon duadok ijia amur ik anej ijia vajuin.
2TI 1:10 Regavo iviakma Jesu Kurais e iji fu no karaunuok ruainma ijar abe samafren. Regavo fu samafrene nijaiduinma iji fu aoivo ijefuon daro iji abe akozen rega Godon vuak ma iji nom sanainma ijia karivakfuon iji abe nijaiduin.
2TI 1:11 Regavo God fu na imut bijieme daro miega na vuak fuon ma iji abe kuardiaknum nijaidiame e aferdiaga bu Godon e rej.
2TI 1:12 Regavo na vuak ijefuon na ire igi kafokafo vajai fian abej. Ijefuon maiji na Jesu Kurais e iji na ma vierafejo iji nan vierafen. Regavo na vierafe ik iji na Godon vuak ma iji abe kuaimoijo fu mienma iji fu imut tat fuon ijia ma name vake tavan rad fu una ruak.
2TI 1:13 Irerag na mimatame nijaidava a fainma iji kege kuniaime samuagdiamne. Regavo giriesame God ma vierafeknum e fok oijmiamne revo ire nokarok (2) iji no Jesu Kuraisna besum rejo ijia no karev.
2TI 1:14 God fu a ma vierafe a vuak ma iji fu vajainma iji kege Kaven Akai oinuvuon ijia karinva ijefuon daro ijia samuagdiak.
2TI 1:15 Regavo an vierafe e fok God ma vierafejo igi Esia guf ijia karinva ijigam e Faijeras ko Emogenis iji na bun uzam vain.
2TI 1:16 Regavo na vierafe E Bomana iji fu e agan uruvana Onesiforason iji fu ma rediak ijefuon maiji fu e-e fur tavan bog na vajai fian abejo fu ifejdien. Regavo na bu tofdieme dibur unienva iji fuba gieme jum.
2TI 1:17 Regavo fu Rom kekome migegare vajai fiaigma na nisaidieme vuake na fijo ijia keko biedien.
2TI 1:18 Regavo fun E Bomana ijar tavan fuon fu vierafenma fu una ruakfuon ijia e iji fu fuon oifian abene ma redakfuon. Ijefuon maiji fu izeg ai Efisis ijia tavan izeg ifejdienma iji ar gain ijefuon an mukorigia vierafen.
2TI 2:1 Regavo farinu ni Jesuon daro iji fu no vajuomo iji abe giriesame fuifuon ikrene.
2TI 2:2 Vuak iji na e uruvana bu gieko na nifak buon ijia kuardava a fainma iji abe e iji zazaivo bakin iji kuardiaga bur giriesa abe e roin nijaidiak.
2TI 2:3 Regavo uri afikin igi no abejo iji fateroin abe e bijaivo bu bijaime vajai fian abejo ijeg Jesu Kuraison vuak iji abe e roin nijaidiaknum vajai fian abene.
2TI 2:4 Regavo e bijaimo fu ikreno iji fu e bomana fuon fu samuamo ijar oimaikafa fu mukorigia ikreno revo fuba ik kafo kege ijekma mazim rekfuon.
2TI 2:5 Ijegvo ni aikejo iji vierafe. E be fu bor kanamo iji fu akaij ijia jame mukorigia aikekma fu rad ire be abek. Regavo fuba mukorigia akaij iji jakma fuba ire be abek.
2TI 2:6 Regavo madu e iji fu giriesame juar fuon migegare meno e ijar amur juar fuon masik.
2TI 2:7 Vuak na bijiame kuardiainva iji vierafe ijefuon maiji E Bomana ijar fu ire fok na kuardiainva iji ifejdiaga ja vierafekfuon.
2TI 2:8 Godon vuak ma iji na e fok kuardiavo iji e Jesu Kurais Devidon uifarif fu guame una urinma ijefuon vuak no vierafeknum ikref.
2TI 2:9 Na Godon vuak iji na nijaidiavo ijefuon vajai fian abejo iji nan roke buin igi e bu kege tofdiame dibur uniavo ijia ruain. Regavo Godon vuak iji buba abe tome abeden revo bu vek ar iror ijia nijainamiv.
2TI 2:10 Ijefuon na e iji God fu kenma ijiebuon fateroin ijia nar uruvana vajai fian abej. Na ijeg vajai fian abekin buk bu Jesu Kurais fu karauniaga bu nona unam ma karivako iji abekfuon.
2TI 2:11 Vuak igi fu ma, No do ruainva ijia no unam usuikor iji non kanava fu Jesuk guain ijefuon no una uri funa karik.
2TI 2:12 No vajai fian abejo ijia giriesame irekva tavan rad no ire uruvana samuagdiakfuon. Regavo noba fu abekva iji fuk no fuba kekfuon.
2TI 2:13 Regavo noiji no e nuigikin rene ba vuak fuon igav revo fuiji fu vek e nui bakin rek ijefuon maiji fu kufuimeno bakin.
2TI 2:14 Vuak iji na amur kuardainva iji tavan bog e iji a samuagdiamo iji kuardiamne. Regavo ni una Godon if ijia kuardia kia ir ijia musikuaivo iji fu ma bakin. Ijefuon maiji e iji bu vuak iji faivo iji vuak ijar bu ifejdiamo bakin revo fu bu kam arafiriam.
2TI 2:15 Regavo nika koikon giriesame Godon nifak ijia ikrega fu on a izeg mukor igia ikreno fu iji gakma fu oimaikfuon. Regavo fu vierafega ar vuak fuon ma iji abe mukorigia samuame nijaidiamo ijefuon a God ga e fok ijiebuon nifak ijia a jukma bakin.
2TI 2:16 Regavo vuak kufuij ga vuak ise ijia buba a aferdaga a God maiji unakome aibe vakfuon. Regavo e vuak kufui nijaidiavo vuak ijeg bu kuaivo iji ni mukorigia agordiamne.
2TI 2:17 Vuak bu nijaidiavo iji bu matan igi bu vajai surif iji bu muture arume vako ijekin. Ijefuon e iji bu vuak iji faivo buon bu ma vierafejo iji buka arafiriav. Regavo e nokarok (2) iji vuak kufui nijaidiavo iji Aimenas ko Firetas.
2TI 2:18 E ijieb vuak ma iji game vain. Regavo bur e kafobuon ma vierafejo iji kege arafiriame vuak kufuimene kia Jesu fun una ro e iji aoinva iji aferdiame vainmano kiain.
2TI 2:19 Regavo Godon tuar gigikin mun ijekin iji fu abe sainma iji fu vek mukorigia manin. Ijefuon maiji Godon e iji bu ma vierafejo iji bu tuar ijekin. Regavo God fu efuon ijiebuon tuar ijia fu ijeg isoime kuai E Bomana iji fu vierafe eraneb bu efuon renva iji fun vierafen. Regavo madu vuak be fu ijeg isoime kuai, E fok eraneb bu kuai no E Bomana ma vierafejo kuaivo iji buka unam ise kafo iji mukorigia agordiafno kuain.
2TI 2:20 Regavo igia faif ar bomana guf ijia sinuom ijia naoivo iji bu ire gord ijiga sirva ijia amardiainva ijesugin ijia naoivo bakin. Revo bu madu ire kafo in ijia amardiainva ijiga moik ijia amardiainva ijieb ar guf ijia besum naoivo. Regavo ire roin bu ire gord ijiga sirva ijia amardiainva iji bu unam ma ga tavan ma ijia kege ire kafo rekuai nain. Regavo ire in ga moik ijia amardiainva iji bu kafut numukuai nain.
2TI 2:21 Regavo e be fu ise fuon iji koikfuon God kuardaga fu game arekma e iji fu ire saror iji bu kafut rieme abe use kozegavo una muinbaki abedevo ijeg ren. Unam besum ijeg bu fu abe una unam ma iji ire gord ga sirva bu ikrejo ijeg ikrekfuon. Ijefuon maiji fuiji fu maturai ga e bomana ijefuon nifak ijia fu e mukor ijefuon fu ire ma kafo fu rek.
2TI 2:22 Regavo Timoti ni unam ise iji am mumogana bu rejo ijin agordiamne. Regavo giriesame maturaivo ijigam ma vierafejo ijigam oijmanamivo ijigam afuim karijo ijieb kege oion ijia name maturaime E Bomana iji kuaga fu ifejdak.
2TI 2:23 Regavo vuak isekma kufuime kuaivo iji agordiamne ijefuon maiji ijieb musikuaivo iji anerek.
2TI 2:24 Regavo e iji E Bomana ijefuon ikreno iji fuba e roina musikuaimo revo fuka e fok oijmiaknum adumaduigin vuak nijaidiakfuon.
2TI 2:25 Regavo e roin eraneb bu vuak fuon ba faikva fuka oi mafaime vuak kuardiakfuon. Regavo ma vierafe Godri oibuon kege karoiga bu una unam ma iji vierafekfuon.
2TI 2:26 Regavo buka Godon unam ma iji vierafekgavo Setanon unam iji fu vajai fian abekfuon ijar kiaga bu igame jaga fu kege dibur igeg uniainma iji areme usem vakfuon.
2TI 3:1 Regavo igi vierafef. Tavan radkma iji Jesu fu una ruakma ijia ire ise ni kafokafo bu rek.
2TI 3:2 E uruvana buka uri vajai buon iji uruvana oijmiame uri mon bomana oijmiaknum koikbuon kam e mamkanuk rene aroikarak. Regavo vuak buon bu kuaivo iji buba e roin ifejdiaknum vo eofijaf igiak revo buka oifiaigma oknum oibuon ijia buka ire ma kafo vierafekva bakin.
2TI 3:3 Regavo buka e roin oijmia vo buon oifian abekva bakin. Regavo e kafobuon ise iji buba giame arek revo madu buka kufuimene e kafobuon vuak kuaik. Regavo buka tavan bog nigaraiknum karik ga buka fanuf taraiko igeg ura oknum unam ma kafo bu oijmiavo bakin.
2TI 3:4 Regavo fu kaifuon ijek vuak besum kuaim iganamik gavo rad fu una vuak ise fuisina kuaik. Regavo ka zabarene ire mijem keok vo ka aroikarame fuonkua vierafek. Regavo buka ire moikigia oimareoijo iji uruvana oijmiak revo bu Godon unam iji buka oijmiakva bakin.
2TI 3:5 Bum vajai buon iji kege va guriguri rek revo oibuon ma iji buba Godon daro iji abek. E ijegreoijo iji mukorigia giame agordiaf.
2TI 3:6 E ijieb e kafobuon ar ijia ajie bara iji ise buon ijieb kam anu kuniainva iji bu izeg arekfuon iji buba mukoi vierafeknum samuagdiak. Regavo e iji vuak kufuimeoijo ijieb una bu ifejdiame samuagdiaknum vuak iviamkor buon iji nijaidiak.
2TI 3:7 Bara iji bu tavan bog Godon vuak ma iji izeg fu e fok karauniamo iji gakuai nisain revo buba bien.
2TI 3:8 E Jenes ko Jebres bu Mosis nui mainva ijeg e iji vuak kufui nijaidiavo iji buk bu Godon ma iji buba biek. Ijefuon maiji oibuon buka isema vierafen revo bu Godon vuak ma iji ma vierafejo bakin.
2TI 3:9 Regavo buba ijegrene tavan jaoijmana vak. Ijefuon maiji e uruvana bu giamga bu e Jenes ko Jebres bu vierafenva ijeg isema vierafen.
2TI 3:10 Regavo Timoti aiji a e iji na amur kuardainva ijekin bakin. Revo vuak nun fok na nijaidiavo ijiga unam nun na fine roko iji an vierafen. Regavo madu an izeg na ma vierafejo ijiga na adumaduigin oijo ijiga e oijmanamivo iji an vierafen. Regavo madu an daro nun iji na tavan bog giriesame nuibakin ikreoko e bu vuak ise nuisina kuaime arafiriega na vajai fian abejo iji an gieme vierafen.
2TI 3:11 Ire iji bu ai Entiok ga Aikoniam ga Ristura ijia nun rokga na uruvana vajai fian abenva iji naba zazaivga Jesu fu ifejdieme keunien.
2TI 3:12 Ijegvo e uruvana eraneb bu Jesuon if ijia Godon unam ma iji abekva e bu buisina vuak ise kuaim arafiriaga bu vajai fian abek.
2TI 3:13 Regavo e iji ise reoijo iji bu ise ukaknak iji kam biom mamkanuk rejknum e kafo vuak kufuimene kuardiaknum vo koikbuon arafirinamiv.
2TI 3:14 Regavo aiji nika Godon vuak ma iji bu nijaidiainva iji mukorigia giriesame vierafe. Ijefuon maiji a e iji bu nijaidiainva iji an koikon giame vierafen.
2TI 3:15 Regavo a vek am ukakbe ijia Godon vuak bu usuibe isoinva iji bun nijaidain. Vuak iji bu nijaidiainva ijieb e iji bu Jesu Kurais ma vierafejo iji fu ijeg karauniak.
2TI 3:16 Vuak fok bu buk akaij ijia isoinva iji Godri vajiama bu isoin. Ijefuon vuak ma ijesugin abe e roin nijaidiakfuon. Regavo e vuak kufuimeoijo ga ire ise reoijo iji kuriairega bu arek. Regavo e iji bu God ma vierafejo iji ifejdia nijaidiaga bu mukoi vierafene e damuigin rene ik kafokafo mukoi vierafene rekfuon.
2TI 4:1 Na God ko Jesu Kurais e iji fu tavan rad e fok igiebuon ise ga ma bu reoinva iji faikfuon ijefuon if ijia na kuavno nika ire no kuardavo igi rene.
2TI 4:2 Nika tavan bog Godon vuak iji abe tavan ise ga tavan ma ijia e nijaidiame aferdia arir uniamne. Regavo kuriaireknum adumaduigin soisoime mukorigia vuak iji kuardiame samua.
2TI 4:3 Tavan iji ruakma e uruvana buka vuak ma iji uzame buba mukoi faikfuon. Regavo buka una vajat ijefuon ire iji bu vierafenva iji kegokfuon. Regavo bu madu e iji vuak kufui nijaidiaoijo ijiebuon vaga bur vuak irerag bu faikuai vierafejo iji nijaidiakfuon.
2TI 4:4 Regavo bu Godon vuak ma iji uzame una vuak suar iji faikuai vierafekfuon.
2TI 4:5 Regavo Timoti aiji ire kafo bu on rekva iji aka koikon samuanamik. Regavo unam ise kafokafo bu on roga a vajai fian abeno ijia ni oi mafaime vajai fian abene. Regavo nika Godon vuak iji abe e nijaidia vo ik iji E Bomana fu mainma iji kege mukorigia samuaknum reoine.
2TI 4:6 Regavo naiji na tavan iji e Romko bu na abe kaniekfuon iji fun ruain ijefuon na moikigi na fioijo iji nan ijia arev.
2TI 4:7 Na God ma vierafene fu igame roke iviakma nan eoren. Regavo e iji fu kukumo ijeg nan mukorigia daromene kukume ruain. Regavo Godon vuak ma iji nan abe ma vierafeknum nijaidia ruain.
2TI 4:8 Regavo iji na daromene mukoi kukuinva ijefuon maiji ire ma be fun na samuagdie nam. E Bomana maturainma iji fu fine ise nuvuon kege mazim guokfuon ijar unam ma iji sanainma ijia ma karivako iji abe tavan radkma ijia miek. Regavo fu abe nunkua miekma bakin revo fu kege e iji bu oibuon ijekma bomana fu ruakfuon bu samuavo iji vajiak.
2TI 4:9 Regavo Timoti ni koikon giriesame rad migegare vuakne.
2TI 4:10 Ijefuon maiji e Kuresens fu ai Garesia vakga Taitas fuk fun ai Darmesia ijia Godon vuak nijaidiame vain. Regavo Dimas fu ire moik igefuon oijmiamo ijefuon fu na unieme fun ko ai Tesaronaika vain.
2TI 4:11 Regavo iviakma Ruk fu fuonkua fu vek nosik fin. Ijefuon a ruakma Mak afeme roga fur ifejdieme ik igi rekfuon.
2TI 4:12 Regavo e Taisikas nan kuava fun ai Efisis vain.
2TI 4:13 Regavo a igia ruakma ugon nun na azan abesvo iji na ai Troas e Kafason ar ijia abedeme ruainva iji abedie vo buk nun ijigam fefa iji na isoim nainva iji kedie ro.
2TI 4:14 Regavo e Arekseda e iji fu ajan ijia kege ire kafo amardiamo iji fuka ire ise uruvana nun redo Godri ijefuon fu abe vajai fian mak.
2TI 4:15 Ijefuon fu mukorigia agordamne ijefuon maiji fu vuak Kuraison no nijaivo iji fu darokma uzam.
2TI 4:16 Regavo amur bu na abe kotreja ijia e kafo buba na ifejdieme vuak kuaik ruain. Ijefuon na vierafe God fu ise buon iji fu giame arekfuon.
2TI 4:17 Regavo E Bomana iji fu na ifejdieme daro miemga na Godon vuak maiji fok kuardiain. Na kuardiava e Jius bakin mai Rom ijia ar kotrejo guf ijia karinva iji bu vuak iji fain. Bu faivga God fu e iji bu na kaniekuai vierafenva ijia keunien.
2TI 4:18 Regavo God fu tavan bog ire ise fok kafokafo nun roko ijia keunienmo. Ijefuon fu aferdieme ar varur iji fu samuamo ijia vak. Na tavan bog sirimamega e fok ar iror igia oinva iji bu fu abe aroik. Mare.
2TI 4:19 Regavo Frisira ga Akuira ga e fok bu e Onesiforason ar ijia karinva iji na bu anadian.
2TI 4:20 Regavo e Erastas fu vek mai Korint ijia fin. Regavo e Trofimas fu adam abeno ijefuon na vek ai Maritas ijia uname ruain.
2TI 4:21 Regavo tavan bomana dakreno ijefuon ni migegare ruake tavan iji fu rad dam. E Iuburus ga Fudens ga Rinas ga Kurodia ga e God ma vierafejo ar igia karijo bu a anadain.
2TI 4:22 Na vierafe Godon Kaven fu kaven on ijek fike God fu ma rediame ifejdiaga ja mukorigia kari vakfuon. Fun ijin.
TIT 1:1 Na For nar fas igi isoime Taitas a nijav. Na Godon ikreoknum vo Jesu Kuraison vuak abe nijaidiaoijo ijefuon bu na afasorno kiev. Regavo naiji fun Godri imut bijieme e iji fur imut bijiainma na ijin ifejdiav. Na bu ifejdiaga bu una buk akaij ijia vuak ma iji faivknum ma vierafene maturaime karivak.
TIT 1:2 Regavo vuak ijefuon gireg ma iji izeg no rad Jesuna varur gufia ma karivakfuon no iji abekfuon. Regavo ur moikigi ba amarenma ijia God e iti kufui bakin ijar rad no funa ma karivakfuon iji fun kuain.
TIT 1:3 Regavo God e iji no karaunuinma iji fun tavan ma ijia vuak fuon na nijaidien. Fu na nijaidiega nar vuak fuon abe kuaime samafrega e bu vuak fuon ma iji mukorigia faim vierafek.
TIT 1:4 Regavo Taitas aiji a farinun nar nafenva igekin. Ijefuon maiji tavan iji na Jesu Kuraison a kuardainva ijia aka izeg nar ma vierafejo ijeg ak aka ma vierafen. Ijefuon na vierafe God Asoinuvuon ijiga Jesu Kurais e iji no karaunuinva ijieb tavan bog a ma redame mukorigia samuagdake a afuime fiokfuon.
TIT 1:5 Regavo anej ma iji irerafuon aiji na moik Kurit ijia uname ruainva iji a ik buin na ijia are ruainva a iji re barekafa na iji uname ruain. Regavo e sos samuakfuon iji a mai besubesum ijia kekfuon. Regavo vuak irerag na a kuardainva iji ni mukoi vierafe. A vierafekin tavan iji a e sos samuakfuon iji kekma aka e iji fuka unam maturainma ijia kegoino ga bara besum abenma iji abekfuon. Revo afijaf buka Jesu ma vierafeknum eofijaf igiavo ga unam ise kafokafo rejo bakin ijia game abene.
TIT 1:7 Regavo vierafe e iji sos samuakfuon iji fu Godon ik iji samuakreno ijefuon fub ise kafo reok. Regavo e iji fub tavan bog vierafero fu fur e bomanaro aroikarak. Regavo e iji fuka ba migegare uri zieknum do kugin ioknum bijaimoknum ga ire uruvana fuon karkafa vierafeno ijin.
TIT 1:8 Regavo fuka e iji oimardiaknum ga unam ma ijesugin oijmiamo ijin. Regavo irerag vajai fuon ijar rekreno ijia mukorigia samuanamimo ga e vuak ma ijesugin kuaimoino ga ka e akai igegreoinon e ijekin ijia abene.
TIT 1:9 Regavo fuka e Godon vuak ma iji no nijaidiavo iji giriesame anu kuniaimo. Fu ijegreokma ijia fur e roin ifejdiaga bu giriesame ma vierafek. A e ijekin iji abekma fur e iji eraneb bu unam ma iji uzame una e iji vuak ma iji abe kuaimoijo ijiena nigaraioijo ijiebuon ise iji fur visume e fok kuardiak.
TIT 1:10 Ijefuon maiji e uruvana buka vuak kufui kuaimoijknum una vuak ma ijin dab buzeime nigaraimoij. E ijegreoijo iji bu e Jius bu ur oi karoime Jesu ma vierafenva ijieb ijeg reoij. Bu kuardiame kia, Ja vierafe bu ja karauniakva ni E Jiusbuon akai iji mukoi igiafno kiav.
TIT 1:11 Regavo na vierafe aka vuak buon kufui iji bu kuaivo iji kuriaireme kiaga bu arek. Ijefuon maiji bu vuak ise naba nijaidiavo bu iji nijaidiav. Bu ijegrejo ijia buka e agan kafo ma vierafejo iji kam iserediav. Bu kufuimeoijo ijesugin bakin gavo buka vuak kufuimeoknum mon amarev.
TIT 1:12 Regavo vuak iji fun ebuon Kritko fu suar isoimo ijar ijeg kuai, E Kritko iji buka vuak kufui mene kuaimoijo ijia bun ijejkirariain. Regavo buka maf kuriai igeg bijaimoknum e nui giki rene ik rejo bakin revo buka maf igeg duok uruvana ijno kuain.
TIT 1:13 Regavo vuak irerag fu kuainma iji fu ma kuain. Ijefuon nika uruvana igia darokma kuardiaga bu una unam ma ijia Kurais ma vierafe.
TIT 1:14 Regavo buba una e Jiusbuon suar usuikor ijiga e iji bu vuak maiji uzainva ijiebuon vuak iji uruvana igia vierafek.
TIT 1:15 Regavo e iji maturainva iji buiji ire uruvana bu oibuon ijia vierafejo iji buka maum ren. Regavo e iji nigen ga oibuon ka ma taikin ga ba mukoi kegoknum God ma vierafejo iji ire fok bu vierafeoijo iji buka ma ise.
TIT 1:16 Bu ijegrejknum kuai, No God non vierafenvano kuaiv revo unam buon bu kegoijo ijar nijaiduomoni bu God buba mukorigia vierafej. Regavo e ijekin iji buka ma e ise vo ba God igavo ijefuon buba ire ma kafo rekfuon.
TIT 2:1 Regavo Taitas aiji nika Godon vuak iji no nijaidiainva iji e fok nijaidiaoine.
TIT 2:2 Regavo e makin iji a nijaidiakma ni kiaga bu e makin igeg vuak ma iji bu faivo ijesugin jajiame kegokfuon. Regavo buka koikbuon vajai buon ga vierafe buon bu kegoijo iji samuagdiak. Regavo buka giriesame Kurais ma vierafeknum e roin oijmiaknum vo giriesame afikin kafokafo iji biediakfuon.
TIT 2:3 Unam besum ijegvo madu bara makin iji kuardiaga buka bara akai igeg keojknum kari. Regavo buba va kaifijaf roina karine una kaifijaf kafobuon vuak kuaiknum vo do kugin iok. Regavo buka unam ma ijesugin bara nivek iji nijaidiaokfuon.
TIT 2:4 Bu ijegrenkin bur uri bara iji iviam baru renva iji nijaidiame kuardiaga bu barufijaf ijigam afijaf mukorigia oijmiame samuagdiak.
TIT 2:5 Regavo buka koikbuon vajai buon samuaknum vo oibuon ijia ire ma ijesugin vierafeok. Regavo buka bara iji ar buon iji mukoi samuagdiavo ijin rene barufijaf iji igia vo bara suaikin rek. Bu ijegrenkin e bu unam buon bu kegoijo ijia giame buba una vuak ma igi Godon ruainma ijefuon vuak ise kafo kuaik.
TIT 2:6 Unam besum ijegvo efarif nivek iji ejafiame kuardiaikin buk bu vierafe buon ga unam buon bu kegoijo ijia vajai buon mukorigia samuagdiakfuon.
TIT 2:7 Regavo ire fok ja reoijo ijia mukorigia reoknum vo unam ma ijesugin nijaidiainkin e roin bu iji faivknum giame uri ja jajiak. Regavo vuak irerag jon ja e roin nijaidiavo iji jab varan igeg vierafek. Regavo nika ma vierafene darokma nijaidiaf.
TIT 2:8 Regavo vuak ma ijesugin kuaimoga e ani nuvuon bu ijia faime jume buba una vuak ise kafo vuak iji no nijaidiavo ijefuon kuaik.
TIT 2:9 Regavo ni madu e iji God ma vierafejo eraneb bu mon abejo bakin ga bum ikreoijo iji nijaidiaga ik irerag fok bu reoijo iji buka e mamkanuk buon bu oimardiakfuon ijia ikreoknum bu agordiaf. Revo buba una vuak ise kafo ef roin kuardiak.
TIT 2:10 Regavo ire kafo buba niesagavo bu e nuibakin rene ik buon reoga e mamkanuk iji bu giame bu ma vierafek. Bu unam ijegrega e uruvana bu ijia giame una God nuvuon fu no karaunuinma ijefuon vuak iji oimarknum faikfuon.
TIT 2:11 Ijefuon maiji Godon ma rediamo iji fu abe Kuraison duadok ijia bu karauniakafa fu abe e fok ar iror igia karioinva iji samafrediain.
TIT 2:12 No izeg God fu e fokigiebuon oifian abene ma rediaknum ifejdiainma iji gakfuon. No ire iji fu renma iji game una ise nuvuon nuigafiame moik igefuon ise iji fu no anu kunuomo iji are useme sanainma fuon ijia vak. Regavo vajai nuvuon fu vierafene rekreno iji mukorigia samuagdia vo unam ma iji God oimaimo ijia kegokfuon.
TIT 2:13 No ijegrejknum vo tavan iji no oimarkfuon iji no abekuai vierafejo iji samuak. Regavo tavan iji Jesu Kurais God nuvuon e iji ise nuvuon ijia karaunuinma ijefuon sanainma no iji gak.
TIT 2:14 Fu koikfuon abe miamga bu abe kuros ijia kanain. Ijefuon fur ise nuvuon no rejo ijia karaunuok. Regavo fur no kege amarduoga no maturainkin no efuon rene tavan bog unam ma ijesugin kegokuai vierafekfuon.
TIT 2:15 Regavo nika vuak igi na isoime kuardavo iji nijaidiaga bu ijia kegokfuon. Regavo a nijaidiakma nika daro on mene ejafiaga bu unam ma ijesugin reok. Regavo unam ise buon bu kegoijo iji kuriairemne. Regavo ab zazaiga e fok buka a ba juvknum una a neseme gak.
TIT 3:1 Regavo Taitas eon una madu kuardiaga bu e mamkanuk buon bu samuagdiavo ijiebuon rotit ijia oimarknum kariokfuon. Regavo madu kuardiaga bu vuak irerag bu kuardiavo iji igiame tavan bog unam ma ijesugin kegokuai samuakfuon.
TIT 3:2 Regavo kuardiaga buba e kafobuon vuak ise kuaik revo buka afuime e fok vierafeknum kariok. Regavo tavan bog bu e kafobuon nifak ijia okva buka e adumaduigin reok.
TIT 3:3 Ijefuon maiji ur noba oinuvuon karoinva ijia Godon vuak ma iji noka ba mukorigia vierafen revo noka ise reoin. Regavo madu noka ba God igain revo noka irerag vajai nuvuon fu vierafeno no ijesugin reoin. Ijefuon vajai nuvuon buka ise ijar anu kunuin. Revo madu noka vuak ise kafo e kafobuon kuaiknum e kafobuon ire kafo karekuai vierafen. Regavo e kafo bu no guovo buka deajidiam ga no madu bu giavo noka deajiduom.
TIT 3:4 Regavo God e iji fu e karauniamo ijar no guome oijmuoknum ma reduome karaunuin. Regavo fu no karaunuinma iji no ire kafo ma renva ijefuon fu karaunuinma bakin. Regavo fum nuvuon oifian abene ma reduome efkin karaunuin. Fur ise nuvuon iji somduo korega Kaven Akai ijar oinuvuon kege una iviamkor amarduin.
TIT 3:6 Regavo tavan iji oinuvuon bu maturaivo ijia God fu Kaven Akai fuon darokin iji kege oinuvuon ijia samduin. Regavo fu ijegrenma ijefuon maiji Jesu Kurais kuros ijia fu guame kavuan fuon fu usenma ijar ise nuvuon somduin.
TIT 3:7 Regavo God fu ijegrenma ijia fu ma reduome no karaunuome unam arir ijia unuin. Regavo Kaven Akai fuon muido no unam ma karivako iji no ma vierafene samua roko iji abek. Regavo vuak iji na kufui kuardiavo bakin revo naka ma kuardiav.
TIT 3:8 Ijefuon Taitas nika vuak irerag na kuardavo iji eon kuardiaikin e iji God ma vierafejo iji bu mukorigia vierafene tavan bog bu unam ma ijesugin keok. Regavo e iji bu nakikmazak ijeg kegokva iji fuka mardo unam buon bu kegoijo ijar e uruvana ifejdiak.
TIT 3:9 Regavo e iji vuak ise ma bakin iji kuaime buon musikuaiknum vo saifijafbuon suar faivo iji agordiamne. Regavo nika e iji bu bui bijaivo ijigam e iji bu Mosison akaij ijefuon musikuaivo iji agordiamne. Ire iji na kuardavo iji buka ire ise ga bu ire ma kafo ijia rejo bakin.
TIT 3:10 Regavo erar fu e ma vierafejo iji kege atakrega ni tavan nokarok (2) igeg vuak nijaime kuarda. Regavo fu vek ijegrene vaga ab una ire kafo fuon reno ni ijia aremne.
TIT 3:11 Regavo an vierafe e ijekin iji unam ma iji areme ise reoinon iji fuka e ise. Ijefuon maiji unam fuon fu reno ijar nijaiduomon fuka ma e isereoino.
TIT 3:12 Na vierafe na Atemas kua fu on vuak vo baga na Taisikas kuaga fu on vuak. Regavo fu ijia kekokma aiji ni unam on nisaime una ai Nikoforis ijia nun ro. Ijefuon maiji na vierafe tavan iji fu ve damo iji na Nikoforis ijia fik.
TIT 3:13 Regavo ni giriesame e Zinas e akai samuamo ijiga e Aforas iji ifejdiaga bu anerene mukorigia ar bu vakrejo ijia vak. Regavo madu mukorigia ifejdiame ire kafokafo bu vierafenva iji vajiaga bu kege vak.
TIT 3:14 Regavo enuvuon kuardiaga bu nakikmazak buon bu karioijo ijia buka tavan buon abe e roin ifejdiaknum vo buon ifenamiknum kariok. Regavo madu irerag ma iji kaifijaf bu vierafejo iji kege samakaf ifejdiak. Regavo buba tavan buon niseknum kariok.
TIT 3:15 Regavo no madu no e fok igia nana karijo iji bu ja anadiav. Revo kaifnuvuon God ma vierafejo ijia karinva iji no bu anadiav. Revo no God sirimamene kuaga fu tavan bog ma rediame ifejdiaga ja mukorigia kariokfuon.
PHM 1:1 Fas igi For nar e Timoti e iji nosik ikreno ijek isoiv. Revo naiji na Jesu Kuraison ik reoijo ijefuon iviakma na dibur fij. Ijefuon fas igi no isoime e Firimon a nona ik besum reoino iji nijav. Regavo madu fas igi no isoime e sos iji bu ar on ijia besum afuivo iji abevo bara Afia ko e kainuvuon Akifas ik besum igi no reoijo ijekin ijin vajai fian abeknum reoijo iji nijiav.
PHM 1:3 Na sirimamega God Asoinuvuon ijiga E Bomana Jesu Kurais bu tavan bog ma rediame mukorigia ifejdiame samuadiaga ja afuime kariokfuon.
PHM 1:4 Eko Firimon uviainu na tavan bog na sirimamejo naka a vierafej. Regavo na if on kuame oifuon God nun ijefuon oimarev.
PHM 1:5 Ijefuon maiji na faiga aka Godon e uruvana mukorigia oijmian. Regavo madu on a izeg E Bomana Jesu ma vierafeno iji fuka ma bomana ren.
PHM 1:6 Na sirimamega aka giriesame Jesu Kuraison vuak iji abe e roin nijaidiakfuon. A ijegrekma a Godon ma iji fu efkin vajuomo iji a mukorigia anej ma iji giame vierafekfuon.
PHM 1:7 Eko uviainu on a e roin oijmiamo na iji faiga naka oimadien revo madu na on izeg a e oijmiamo na iji faivo naka bomana vajai nairdiem. Ijefuon an ar Godon e ijiebuon oij iji kam karoima bu bomana oimarev.
PHM 1:8 Regavo a Godon e uruvana oijmiamo ijefuon nan uviaion be na izeg a Kuraison makai ijia jaoijo nak na ijeg reoij. Ijefuon na ma ijefuon kuriaireme kuaga a irerag na kuavo ijin rekfuon.
PHM 1:9 Regavo ni vierafe naiji nan ma eoren revo na Jesu Kuraison fateroin ijia na vuak fuon abe oij ga madu iviakma na fuifuon dibur fij. Ijefuon na unam ijeg vierafene kuardaga a ijegrekma iji fu marek. Regavo noka nuvuon oijmanamivo ijefuon nam isuar a kua gak.
PHM 1:10 Ijefuon na e Onesimason fateroin ijia na a anadame kuav. Revo e Onesimas fu Kuraison if ijia fuiji fuka ma farinun igekin. Ijefuon maiji na dibur finva igia na Godon vuak ma iji kuardavga fu oi dakaroime una Jesu ma vierafen.
PHM 1:11 Fu usuibe ijia fuka irerag ma kafo oifuon renma bakin revo iviakma fuka bomana a ga na ifejduokfuon.
PHM 1:12 Ijefuon iviakma nan kuaga fu una on vuak. Regavo fuiji naka ma bomana oijmav ijefuon fu vuakon fu oinun igi fun abe ijia vuak.
PHM 1:13 Regavo na vuak ma iji abe kuaimoijo ijefuon na igia dibur fij. Ijefuon naka Onesimas kuaga fu igia nosik fikro na ijeg vierafen. Fu igia nosik fikin irerag fok ar dasumdiekfuon iji fur ifejdiek.
PHM 1:14 Regavo naiji naiba a ejafame kuaga a Onesimas kuaga fu igia nosik fik. Regavo na vierafe ar koikon izeg a vierafenma ijia rek. Ijefuon nam samuaga ar koikon keno kiekma nason ijia ire kafo rek.
PHM 1:15 Regavo na vierafega Onesimas fukafu Godri kuama fu tavan ivuankbe a uname ruaido iviakma fu una ma vierafene osik tavan uruvana ijia fivak.
PHM 1:16 Regavo iviakma na vierafe fu e be fum una oifuon ba mon ik reokma bakin. Regavo aka uviaion be ja fusik Kurais ma vierafejo igeg oimardakfuon. Na Onesimas naka bomana vierafen ijefuon na vierafe ak aka fu bomana vierafek. Ijefuon maiji fuka e be fum oifuon ba mon ikrene a fu bomana ifejdak. Regavo madu fu izeg a E Bomana iji ma vierafeno fuk fu ijeg ma vierafek.
PHM 1:17 Ijegvo no osik no besum E Bomana ijefuon ik reoijo. Ijefuon ni unam izeg a na oimardiemo ijeg Onesimas oimarda vo anaiknum afemne.
PHM 1:18 Regavo fu ire ise kafo on rejknum vo sinuom on kafo fur niet karkma iji ni if nun ijia isoiga nar sinuom on ijefuon una roib vajak.
PHM 1:19 Regavo igi naka ma imut nun ijia isoiv na For nar Onesimas sinuom irerag on fu kenma iji una roib vajak. Regavo ni vierafe nar a ifejdavga a una Kuraison e ren ijefuon a irerag ma ijin abe na miek?
PHM 1:20 Ijefuon uviainu ni E Bomana ijefuon if ijia ire ma iji nuifuon rene Onesimas oimarknum afemne. Regavo noiji non besum Kuraisna mazinva ijefuon ni irerag na kuavo ijin rega na oimadiemne.
PHM 1:21 Ijegvo na fas igi abe a nijaknum ma vierafega irerag nar a kuavo iji a igieme rekfuon. Regavo madu na vierafe a irerag na kuavo iji aka biom mukorigia rek.
PHM 1:22 Regavo madu na vierafe a ar be nuifuon kanafukfuon. Ijefuon maiji naka ma vierafega God fu sirim jon fok ja isoinva iji avediado fu kiega na una jon vuak.
PHM 1:23 E Ifafras fuiji fu igia dibur fin ijefuon maiji fu nosik besum Jesu Kuraison vuak abe kuaimon iji fu ja anadiam.
PHM 1:24 Regavo madu e Mak ga Eristakas ga Dimas ga Ruk iji bu nana ik besum reoijo ijefuon bur ja anadiav.
PHM 1:25 Regavo na sirimamega E Bomana Jesu Kurais fu ja ma rediame ifejdiaga ja mukorigia kari vakfuon. Fun ijin.
HEB 1:1 Usuibe God fuka tavan kafokafo ijia ga unam kafokafo ijia fu e Godon vuak vierafene kuaivo ijiebuon ir ijia saifnuvuon iji vuak kuardiain.
HEB 1:2 Regavo iviakma tavan igi God fu Farifuon iji fu kuama fu moikigia ruainma iji duadok fuon ijia kuarduin. Ire fok Godri Jesu kuamga fu amardiame vajamga Jesur ire fok samuagdiain.
HEB 1:3 Fu God aikin ijefuon Godon sanainma ma iji fu vajai fuon ijia sanam. Regavo fur ire fok varur gufia ga moikigia naoivo ijin vuak fuon darokin ijia samuagdiame vak. Tavan iji God fu ik fuon iji mamga fu ari e igi ise buon ijia karauniame fun una God e ka ma darokin ijefuon imut maink ijia fin.
HEB 1:4 Ijefuon fu anera iji asidiame ma e bomana ren. Regavo madu fur fu ma Godon Farif revo anera iji bui bakin.
HEB 1:5 No iji ma vierafejo ijefuon maiji buk akaij iji bu usuibe isoinva ijia God fuba anera be kua, A Farinun ga na ivia nan ma Asoi on no kuain. Regavo madu fu anera be fuka ba kuai, Na Asoion ga a Farinun rekno kuain.
HEB 1:6 Regavo tavan iji God fu Farifuon besum ijesugin iji abe moikigia unaga fu ruakreno ijia fu kuai, Anera fok nika fuon ato same sirimamefno kiain.
HEB 1:7 Regavo God fu anera ijiebuon iji fun buk akai bu isoinva ijia ijeg kuai, Fu anera iji kega bu buibur igeg ufime ar kafokafo ijia oga bu mian igeg migegare naikno kuain.
HEB 1:8 Regavo madu God fu Farifuon ijefuon iji fu buk akaij ijia fu ijeg kuai, Ar tavan bog God rene ijia fine maturaime arir e fok mukorigia samuagdiame vak.
HEB 1:9 Regavo aiji aka unam ma iji bu rejo ijesugin oijmiamo revo unam ise bu rejo iji a uzam. Ijefuon Godon oimarvo iji fu a mainma ijar fuka oimarvo iji fu e kafobuon oimarvo iji fu vajiainma iji fuka ma asidianmano kuain.
HEB 1:10 Regavo fu madu kuai, A E Bomana a ik anej ijia moik fok amare vo imut on ijia varur ga ire fok amardiain.
HEB 1:11 Regavo rad ire fok a amardiainma iji buka ugon igeg bujak vo barekfuon revo aiji a ijia fivak.
HEB 1:12 A ire fok amardiainma iji ugon igeg abe matomga bu una ni kafokafo rek. Regavo aiji a una be rekma bakin revo an tavan bog ijeg fivak.
HEB 1:13 Regavo God fu anera fuon ijia be fuba ijeg kuai, A imut maink nun ijia fike na e ani on fok kam arafiria barekno kuain. Regavo fuba vuak be ijekin iji anera iji kuardiain.
HEB 1:14 Ijefuon maiji anera iji bu kaven iji Godon ikrejo iji fu uniaga bu tavan bog ari moikigia e iji God fu karauniamo iji ifejdiak.
HEB 2:1 Vuak Jesu fu anera asidiainma iji fuka ma ijefuon noka vuak iji no fainva iji mukorigia vierafene kunaim karikin noba oi karoime una kafokafo vierafek.
HEB 2:2 Vuak iji anera iji bu abe sai nuvuon Mosis kuardainva iji fuka darokin. Regavo e uruvana eraneb bu vuak iji ba igiame una ise reoinva iji Godri kam arafiriak.
HEB 2:3 Ijefuon no Godon Farif ijefuon vuak ma bomana izeg fu no karaunuomo iji nuigafakva no izeg God fu no arafuruokreno iji asidiame usem vakva bakin. Regavo vuak iji fun Jesu E Bomana ijar koikfuon kuardiainma vo rad bun e iji bu vuak iji fainva ijieb abe no kuarduin.
HEB 2:4 Regavo madu fun Godri koikfuon e iji bu vuak fuon abe kuaimoijo ijiebuon duadok ijia unam sumakin ka darokin kafokafo iji reoija non giain. Regavo madu God fuon vierafenma ijia fum efkin Kaven Akai ijefuon ire ma iji fok kafokafo kege efuon iji vajiam.
HEB 2:5 God fuba anera kafo kege ar iviamkor iji no kuaivo ijia uniame kia, Janim ar ma iji na amar ga bu karikfuon ijia e mamkanuk rene ire fok samuafno kiainma bakin.
HEB 2:6 Regavo iji fun Godon buk akaij iji bu usuibe isoinva ijia ijeg kuai, Ema iji God a irerafuon bu vierafek revo ema ijiebuon afijaf iji a irerafuon bu samuagdiak?
HEB 2:7 A tavan ivuankbe bu kege anera ijiebuon rotit ijia uniama bu karioin. Regavo anka bu ma bomana arordiain.
HEB 2:8 Regavo a bu kege uniamga bu ire fok a kiainma iji samuagdiain. Regavo iji fun ma e iji bu ire fok mukorigia samuagdiain. Regavo iviakma no gia e kafo bu daro uruvana bakin ijefuon buba ire fok samuagdiav.
HEB 2:9 Regavo no Jesu e iji ire fok samuagdiamo iji igak. Fu tavan ivuankbe fum ema igeg anera ijiebuon rotit ijia fikin fu vajai fian abene guakafa fu ijeg ren. Regavo God fu e fok bomana oijmiain vo ma rediamo ijefuon fu ijeg ren. Regavo iviakma no ga fu Godri if fuon abe ajieme dab aroin.
HEB 2:10 Regavo iji fun mardo God e iji ire fok amardiame samuagdiamo ijar Jesu kuaga fu vajai fian abene guame una urino ijia fu maturakfuon. Regavo iji fu reno ijia fu e uruvana aferdiamga bu Godon afijaf ren revo fur amur unam amareme aferdiame unam iji ma karivako ijia uniain.
HEB 2:11 Jesur e fok ise buon iji somdiame baren. Regavo fuga e iji fu ise buon somdiama bu maturainva iji bun una agan besum ren. Ijefuon Jesu fuba jum gavo fu aroikaraknum kia, Ja diaifnuno kiain.
HEB 2:12 Regavo Jesu fu buk akaij iji bu usuibe isoinva ijia fu ijeg kuai, Nar uviaifnun iji irerag a renma iji abe kuardiak. Regavo nar e fok bu afuivo ijiebuon nifak ijia a arordame a dua urukafak.
HEB 2:13 Regavo fu madu kuai, Na God ma vierafek. Regavo fu madu buk kafar be ijia e iji bu ma uviaifijaf rejo ijiebuon ijeg kuai, Na ga am iji God fu vajienma iji no igijano kuain.
HEB 2:14 Godon afijaf iji bum ema ijefuon Jesu fuk fum ijeg ema ren. Revo fu kuros ijia guame una urinma ijia fu Setan e iji fu aoinva iji fu darokma samuagdiamo iji dab arafirin.
HEB 2:15 Jesu fu unam ijegrene bu karauniain ijefuon maiji bu vebko bu aoikuai jume tavan buon iji bu kari roko iji fun buon juvo ijar kege anukuniain.
HEB 2:16 Regavo iji fuka ma fu anera iji ifejdiamo bakin revo fu e Eburamon uifarif iji mukorigia ifejdiamo.
HEB 2:17 Jesu fum ema iji karauniakafa ari ruain ijefuon fuka una ema igegrene una uviaifijaf igi no aikin ren. Fu e isuf baroijo ijiebuon e bomana igegrene rir ijia manine e fok ijiebuon oifian abe una God ma vierafene ire fuon fok mukorigia ren. Regavo iji fu ijegrenma iji fu e fok ijiebuon ise iji abekafa fu ijeg ren.
HEB 2:18 Ijefuon iviakma e iji Setan fu biesiamo iji fur ifejdiam. Ijefuon maiji fuk fu ema igeg moikigia oga Setan fu biesuain gavo fuka magaga una vajai fian abene guain.
HEB 3:1 Ijefuon uviaifnun God ma vierafejo igi Godri kege afuime kumenma igie ni Jesu e iji Godri kuama fu afasor igegrene roka no vuak fuon abe kuaimoijo revo fuk fu nuvuifuon e isuf baroinon igegreno iji vierafef.
HEB 3:2 Fu Godri fu abega fu ma vierafene Godon ik ren. Fu unam besum izeg Mosisri ma vierafene Godon e ijiebuon ikrenma ijeg ik ren.
HEB 3:3 E iji fu ar samo iji e buka fu dab aroiv revo bu ar iji aroivo bakin unam besum ijeg no vierafe God fuka Jesu bomana aroin revo Mosis e iji akaij iji abenma iji fum sibank aroin.
HEB 3:4 Ar iji bu eb savo ijeg vo Godri ire fok amardiain.
HEB 3:5 Mosis fum ema revo fu ma vierafene Godon ikreknum efuon mukorigia oi mafaime samuagdiaknum ire iji God fu rad Jesuon rekfuon ijin abe nijaidiain.
HEB 3:6 Regavo una Kurais fuiji fu ma Godon Farif fu ma vierafene mukorigia Godon ik iji oi mafaime am farif iji fu aganfuon samuagdiamo ijeg efuon samuagdiam. Regavo no mukorigia vuak irerag Kuraison iji no faime vierafenva iji giriesame kunaim vo oimarknum God fu nuvuifuon irerag rekreno iji samuakva iji noiji non Godon agan ijiena besum rej.
HEB 3:7 Jan vierafe e Isrerko bu ise rene God ba ma vierafenva ijefuon buba ar ma iji God miaga bu karikfuon ijia vain. Regavo Kaven Akaij ijar vuak ijefuon fun buk akaij ijia ijeg kuai, Jab ada girek revo jaka Godon vuak iji igaf. Regavo jab e Isrerko bu magaga ba vuak fuon igain revo bu karoime God ma uzame una buon vierafenva ijia kegoinva ijeg rek. Jab tavan iji bu ai moikum namo ijia ire iji God ba oimaikfuon iji bu renva ijeg rek.
HEB 3:9 Bu ire sumakin fok ni kafokafo na renva iji bun giain revo buka una na biesieme giekuai bu ijeg ren.
HEB 3:10 Ijefuon naka deajidiema na kia, Buiji oibuon iji buka tavan bog unam ise kegoknum buka vuak na kuardiavo iji ba faime igiav.
HEB 3:11 Na bomana zienva ijefuon na if nun ijia kuranamime vuak gigikin kuardiame kia buba moik iji na miaga bu isuar karikfuon ijia vakno kuain.
HEB 3:12 Ijefuon uviaifnun vuak iji faime e be fuba oifuon abe dakaroime ire ise iji uruvana vierafegavo God ba ma vierafek. A ijegrekma fur dab dakaroidaga a God e darokin ijia fivako iji aka uzak.
HEB 3:13 Tavan igi uria namo ijia e besubesum tavan bog jaka jon ejafanamif. Ijefuon maiji ja ijegrekva ise iji fuba una ja biesiaga ja ise rene God nuigafak.
HEB 3:14 No vuak amur no fainva iji mukorigia vierafene kunaim vakva tavan rad ijia no Kuraison sanainma iji fateroin abek.
HEB 3:15 Regavo vuak na amur kuardiainva ijeg, Jab ada girek revo jaka Godon vuak iji igaf. Regavo jab e Isrerko bu magaga ba vuak fuon igain revo bu karoime God ma uzame una buon vierafe ijia kegoinva ijeg rek.
HEB 3:16 Regavo jaka ejafanamif ijefuon maiji e iji eraneb God ba igame vo ba oijmiainva iji jan vierafen. E iji Mosis fu ai Ijift ijia aferdiame keko vainma ijieb God fu kuardiama bun fain revo bu vek magaga una Godon vuak iji uzain.
HEB 3:17 Regavo God fu erane juaivasia foti (40) ijeg ziegafiainma iji jan vierafen. Bu e ijieb ise renva ijefuon bu ai moikum namo ijia aoime baren.
HEB 3:18 Regavo madu God fu e iji erane vuak gigikin kuardiame kia buba moik iji bu isuar karikfuon fu miakno kiainma ijia vakfuon iji jan vierafen. Regavo vuak iji fu e Isrerko e iji bu fuba igain revo buka magame una fuon ise renva iji kuardiain.
HEB 3:19 Ijefuon iji bu renva iji no vierafe bu ar God fu kiainma ijia buba vain. Ijefuon maiji bu vuak iji God fu kuainma iji ba ma vierafen. Ijefuon no madu ijegrekva noba ar ma ijia vak.
HEB 4:1 Ijefuon noka ar iji God fu kuainma iji ma vierafene ka ijefuon rene e roin jaba moik iji isuar karikfuon iji arekgavo jaka ijia vakfuon. Noba e Isrerko bu moik iji bu isuar karikfuon ijia ba vainva ijeg rekfuon. Regavo iviakma God fun no ujurduome kuo noba uzagavo noka giriesaikin no ar iji isuar karikfuon ijia vakno kuin.
HEB 4:2 No Godon vuak ma iji e Isrerko bu fainva no madu no ijeg fain. Bu vuak iji bun fain revo vuak iji fu ire ma be ba buon ren. Ijefuon ma iji vuak iji buba abe oibuon ijia ma vierafen.
HEB 4:3 Regavo eraneb no God ma vierafejo nor moik iji isuar afuime karikfuon ijia vakfuon. Ijefuon maiji God fun buk akaij ijia e iji buba fu ma vierafejo ijiebuon fu ijeg kuai, Naka bomana ziev ijefuon na if nun ijia kuranamime vuak gigikin kuai buba moik iji na miaga bu isuar karikno kuainva ijia vak. Regavo ik anej ijia God fu moik igeko varur ijek amardiame barme fun isuar fine bu samuagdiam.
HEB 4:4 No vierafe God fun e iji bu fu ma vierafejo iji samuagdiame fin. Ijefuon maiji no buk akai kafar be bu usuibe isoinva ijia dame gainva ijia fu ijeg kuai, God fu naki imut roin ga nikit besum (6) ijia ikrene ire fok amardiame baren revo nikit be (7) iji fu isuar finmano kuain.
HEB 4:5 Regavo vuak besum iji ar iji no isuar afuime karikfuon iji God fun ur kuai, Buba moik iji na miaga bu isuar karikfuon ijia vakno kuain.
HEB 4:6 Regavo tavan iji fun uriado e kafo bu moik iji isuar afuime karikfuon ijia vak. E iji bu amur vuak ma iji bur fain revo moik iji isuar afuime karikfuon iji buba vain. Ijefuon maiji bu adamene God ba mukoi igain.
HEB 4:7 Ijefuon God fu tavan be abedeme unam nuvuon amardo no moik iji isuar afuime karikfuon iji fu iviakma kuaimo ijia vakfuon. Revo vuak iji fun Devidri buk akaij ijia ijeg isoi ga nan ur kuardiainva ijeg, Regavo ivia ja fai fu ja kuardiafai jab ada girek revo jaka vuak fuon igaf.
HEB 4:8 Josua fu e Isrerko iji aferdiame vakga bu isuar karivabatie God fuba tavan rad ijefuon kuaik.
HEB 4:9 Ijefuon no ma vierafe Godri tavan be abedenma iji fu vek namdo Godon e fok no isuar karik. God fu ire fok amardiame barme fu tavan be fu abe finma ijeg no tavan be isuar karikfuon.
HEB 4:10 Regavo erar fu moik iji isuar afuime karikfuon iji fu kuainma ijia vakma fu ire fok fuon fu vierafene reoino iji fun arek. God fu ire fok amardiame barme fum tavan be finma ijeg e iji bum isuar karik.
HEB 4:11 Ijefuon noka giriesaikin no God moik iji isuar karikfuon iji fu muokafa kuainma ijia vak. Regavo noba e Isrerko iji bu vuak fuon ba faivknum igainva ijeg noba bu matiame God nuigafame vakfuon.
HEB 4:12 Godon vuak iji fu ma darokin revo fuka ma uikin ire viam sin iji fu e kiniamo iji fu asin ijefuon fu nuvuon no vierafejo iji mukorigia ufusduok. Fuka ma ufuseme aru oinuvuon kaven fu fino ijia vak. Ire iji ma uikin iji fu vajai nuvuon ijia kinuome ufuse ari an ijia vako ijeg Godon vuak iji fu oinuvuon no vierafene rejo iji kege mazim guok.
HEB 4:13 Ire fok Godri amardiain ijefuon ire be fu God ni sauikurame namo bakin revo ire fok bun samakaf Godon nifak ijia naoiv. Regavo madu ire fok no moikigia renva iji no God besum ijefuon nifak ijia ireme vuak nuvuon ma ga ise no renva ijin kuardaga fu faik.
HEB 4:14 E Bomana Jesu Kurais Godon Farif iji nuvuon isuf baroino iji fun nuvuifuon una varur gufia Godon sanainma ijia vain. Ijefuon no Jesu e iji no ma vierafejo ijefuon vuak iji giriesame kunai vakfuon.
HEB 4:15 Jesu E Bomana e iji nuvuifuon isuf baroino iji fu oifian nuvuon kafokafo iji giame vierafeno iji fu igia nona oin. Ijefuon maiji Setan fu no biesuomo ijeg fu Jesu ise rekafa fu biesua gain revo Jesu fuba ise be ren.
HEB 4:16 Ijefuon giriesame roga no God e darokin e mukorigia oijmiaknum samuagdiamo iji fino ijia vak. No ijia vakva fur oifian nuvuon fok ifejduome dasumduok.
HEB 5:1 E iji Godon isuf baroijo iji bu Godri ema iji kega bu Godon e ijiebuon fateroin ijia Godon isuf kege rok. Regavo isuf iji bu kege roko iji bu e iji ise kafokafo renva ijiebuon fateroin ijia God isuf baroidaga fu giame arekafa bu kege rok.
HEB 5:2 E iji Godon isuf baroijo iji bu e iji ba mukoi vierafene rejo ijiga e iji unam ise kafokafo rejo iji kege isuar oi mafaime kiagiav. Ijefuon maiji e iji isuf baroijo buk bu e zazaikin bu samakaf Setan fu tavan kafo biesiamoni bu ise rekuai vierafej.
HEB 5:3 Ijefuon bu e ijiebuon ise ijesugin isuf God barokva bakin revo bu madu ise buon ijefuon God isuf baroij.
HEB 5:4 Regavo ik iji God isuf baroikafavo iji fum e be fu koikfuon ik ijin rekma bakin. Regavo fun Godri koikfuon izeg fu Eron abenma ijeg fu e fu vierafeno iji kiaga bu ik iji rek.
HEB 5:5 Unam besum ijeg vo Kurais fuba koikfuon aroikarame e iji Godon isuf baroinon iji renma bakin revo fun Godri fu aben ijefuon fu iji ren. Regavo Kuraison vuak iji bun Godon buk ijia ijeg isoime kuai, Aiji a Farinun ga ivia nan Asoion renvano kuain. Regavo vuak ijefkin be fuba e isuf baroijo iji roin kuardiain.
HEB 5:6 Regavo madu buk kafar be ijia God fu ijeg kuai, Ar e bomana Godon isuf baroino rene e Mekisidek fu fine vainma ijegrekno kuain.
HEB 5:7 Regavo Kurais moikigi fu oinma fu vierafe fuka God ifejdakafa fu ijeg vierafene fuka biumavknum niraime nidokma Godon sirimamen. Fu sirimamega Godri ifejdaga fu vajai fian abene guakfuon iji fuba jumgavo fu ijeg ren. Regavo God fu Jesuon sirimameno iji fain ijefuon maiji fuka adumaduigin God vuak fu kuardainma iji fu igame ren.
HEB 5:8 Kurais fu Godon Farif ga fu mukoi vierafene God igame vajai fian abene guain. Ijefuon maiji Godri ijeg vierafenma ijefuon fu ijeg ren.
HEB 5:9 Regavo iviakma fu vajai fian abenma ijia fuka mareme aresredo e iji fu igavo iji fur karauniaga bu ijia karivakfuon.
HEB 5:10 Ijefuon maiji Godri kuamga fu izeg e Mekisidek fu renma ijeg fu e bomana isuf baroino ren.
HEB 5:11 Jesu ko Mekisidekbuon vuak iji no kuardiavo iji fuka ma bomana. Regavo na nijaidiakva fuka ma gigikin ja vierafekva bakin ijefuon maiji vuak ja faivo iji jaka saroime vierafej.
HEB 5:12 Ja usuibe God ma vierafene ruain ijefuon iviakma ja e kafo nijaidiakfuon revo jaka ba aresren. Jaka vek am ukakna iji bu mut ga do vierafejo ijeg ja vek zazaido e kafo bu una vuak amur iji ja nijaidiakfuon.
HEB 5:13 E kafo eraneb bu vek vuak soigin faikuai vierafejo iji buiji buka vek am ukakna iji bu mut ijo ijekin. Ijefuon bu ire izi fu ma ga izi fu ise iji buba mukoi vierafen.
HEB 5:14 Vuak ma iji na ja kuardiakrejo iji fu duok gigikin iji no ijo ijekin revo iji fu e God ma vierafejo e damuigin ijiebuon vuak. Regavo vuak iji fu e iji tavan bog mimatame Godon vuak iji javo ga eraneb ire ise iji giame agordiame unam ma ijesugin rejo ijiebuon vuak.
HEB 6:1 Ijefuon noba vuak iji no amur faime God ma vierafenva iji tavan bog abe karine kuaik. Regavo noka uri vuak igi kaven nuvuon ifejdaga fu daro abekfuon iji vierafek. Regavo jab uri ire ise iji bu ja kam arafiriako ja tavan bog God kuardako fu ise jon giame aremon ijia vak. Regavo madu jab uri God ma vierafejo ijefuon anej ma ijin dab tavan bog kuaimok.
HEB 6:2 Regavo madu unam iji do ruaivo ijigam imut nigen navo ijigam e bu aoime una urijo ijigam rad God nuvuon fu unam no kegoijo iji kege mazim guokfuon ijin jab kuaimok.
HEB 6:3 Regavo vuak iji aregavo roga noka uri vuak iji fu no ifejduoga no e damuigin rekfuon iji abe mimatame rekfuon. Regavo God fu tavan muokma no ijeg rekfuon.
HEB 6:4 Noka kaven ijefuon vuak ijia nijaidiame vaga ijar ifejduoga no e damuigin rek. Ijefuon maiji fuka ma giredo e iji Kuraison vuak ma iji nuigafame vainva iji bu izeg una karoime ruakva bakin. Ijefuon maiji e iji bun amur Kuraison vuak iji bun mukorigia fain. Regavo madu bu Jesu e iji varur ijia ari ruainma iji fun oibuon ijia ik ren revo Kaven Akai ijefuon ire ma iji fateroin bun aben.
HEB 6:5 Regavo madu vuak irerag Godon buk ijia bu isoinva iji bun dame giamga vuak iji fuka ma. Regavo unam izeg God fu rad ikrekfuon iji bun vierafen.
HEB 6:6 Regavo buka una Kurais ma nuigafame vainva iji bu izeg una oi karoime roga God fu ise buon giame arekma bakin. Ijefuon maiji e iji buka izeg tavan iji e Jius bu Kurais Godon Farif iji abe e nifak ijia kuros kanava fu jufabekafa bu renva bu ijeg rej.
HEB 6:7 Regavo e iji God ma vierafejo iji bu moik iji tavan bog ve dame arimo ijekin. Ire fok moik ma ijia tavuavo iji buka ire mukor ijefuon God fu kuai moik iji fun maren. Unam besum ijegvo e iji God ma vierafejo ijieb ire ma kafo God fu oimaikfuon ijin rejo iji God fuka bu daro miame ifejdiam.
HEB 6:8 Regavo e iji God ba ma vierafejo iji buba ire kafo God oimaikfuon iji rejo iji bu moik iji fu ire ufien gurogin namo ijekin. Moik ijekin iji fui ma bakin ijefuon ufien fok bu aseme ke javo igekin. Ijegvo e iji ire kafo God ba oimaikfuon rejo iji bu ijeg aseme mian iji tavan bog ijia naivako ijia jak.
HEB 6:9 Kaifnun na oijmiavo iji na vierafe vuak iji na abe ja kuardiavo iji na vierafe fu jon bakin. Regavo jaiji jan biom una ma rej ijefuon maiji ja moik ma iji ire fok bu ma tavuame sunin kirainma ijekin. Na vierafe ja ire ma iji e bu God ma vierafejo God fu bu karauniainma ijeg rekfuon.
HEB 6:10 Regavo jan vierafe God fu roinknum reno bakin. Ja fuon oijmavo ijiga ja fuifuon ikrenva iji ga e God ma vierafejo iji ja vek unam kafokafo ijia ifejdiav. Ijefuon God fuba ja rubdiak revo fu daro miame ifejdiak.
HEB 6:11 Ijefuon no vierafe e besubesum ja giriesame ijegrene vak. Revo madu jaka uruvana igia God ma vierafekin ja tavan radkma ijia irerag ja oi mafaime samuavo iji kekfuon.
HEB 6:12 Regavo ja zazaime uzakva no vierafe fuba maren ijefuon jaba arek. Regavo jaka e iji bu adumaduigin vierafejo ijeg buonak rekfuon.
HEB 6:13 God Eburam fu kuainma iji fu buk iji bu usuibe isoinva ijia ijeg kuai, Nar daro bomana maga a am uifarif uruvana tuanakno kuain. God fu ijeg Eburam kuamga fu adumaduigin ire iji samuame fioga God fu ire iji fu kuainma iji fun ren. (Revo ire kafo moikigia naoivo iji bu mamkanuk Godon if asinva bakin ijefuon fu if fuon ijia kuranamime vuak iji Eburam kuain.)
HEB 6:16 Regavo e roin bu oine vuak kuaivo bu if be ka if buon iji ma asidiainma ijia kurame kuaik. Regavo madu e musikuaivo bu Godon if ijia kuavori bu musikuaivo iji bu ijia arev.
HEB 6:17 Ijefuon God fu vierafe fu vuak iji fu kia bu abekno kiainma iji fuka abe samafrediak revo fuba vuak iji fu kuainma iji abe tuasek. Ijefuon God fu if fuon ijia kuranamime kuain.
HEB 6:18 Ijefuon fu ire nokarok (2) iji fu kuainma iji fuba una kufuimek. Ijefuon e iji no God ma vierafejo iji ire nokarok (2) if fuon fu kuranaminma ijiga vuak darokin fuon iji bu no soisoiga no Kurais ma vierafene unam ma karivako fu kuinma iji noka ma vierafekfuon.
HEB 6:19 Regavo noka darokma ma vierafega God fu no karaunuok. Ijefuon ire ise kafo bu nuvuon ruakva no vierafe noka giriesame irekfuon. Fun Jesur izeg e iji e isuf baroijo ijiebuon e bomana iji fu efuon ijiebuon fateroin ijia ar ka ma akaij ijia aru vako ijeg ren. Fun fur unam iji no Godon nifak ijia aru vakfuon iji fur dajaduin. Fu Jesu E Bomana nuvuon ijar izeg e Mekisidek fu renma ijeg fur e isuf baroino rene fivakfuon.
HEB 7:1 Na e Mekisidekon vuak uruvana kuardiain revo na una vuak kafo kuaikafie vierafen. E iji fu Kin rene mai Seram samuamo revo madu fuka God e darokin kaf ijia fino iji isuf baroinon ijin. Eburam fu e mamkanuk ai kafokafo samuagdiavo ijiena bijaime kania kuria barme fu una unam ijia roko ijia fu e Mekisidek bien. Regavo Mekisidek fu God sirimamene kuamga fu Eburam imut nigen abedeme daro main.
HEB 7:2 Areme Eburam fun uri e ai kafoko ijiebuon sinuom iji bu karme roko iji imut roin ga roin (10) ijeg name kuama fu Godon fateroin ijia besum (1/10) karen. Regavo e Mekisidekon if ijefuon maiji E kin maturainma ijin. Regavo if fuon be iji mai Seramon Kin. Revo if ijefuon maiji fu Kin afuime fino ijin.
HEB 7:3 Regavo buk akaij ijia e saifijaf ga eofijaf ijiebuon if buba isoin. Regavo madu buk ijia Mekisidek bu ivez nafen ga fu tavan fu guainma iji buba isoin. Ijefuon fu Godon Farif ijekin ijefuon maiji fu tavan uruvana e isuf baroino rene ijia fivak.
HEB 7:4 Regavo ni e Mekisidek fu izeg e bomana renma iji vierafef. E Eburam sai nuvuon e ma ijar sinuom iji fu e aikafoko iji fu kania kuriame kare roko iji imut roin ga roin (10) ijeg name kuama fu besum (1/10) karen.
HEB 7:5 E Rivaion uifarif iji isuf baroijo iji God fun akaij iji fu Mosis mainma ijia kuainma ijefuon bu e Isrerko bu ire dame vake imut roin ga roin (10) renoni bu besum (1/10) karev. Regavo e Rivait iji bu ijegrenva iji bum e aiko gavo buk bu E Eburamon uifarif.
HEB 7:6 Regavo tavan iji Eburam fu sinuom uruvana karme una ro Mekisidek biema ijia fu uri roin karme fu vajain. Regavo God fu am uifarif uruvana Eburam vajakafa kuainma ijefuon Mekisidek fu Eburam imut nigen abedame daro main.
HEB 7:7 No vierafe e iji imut e roin nigen namdiame daro miamo ijar fu e bomanak. Regavo una e iji imut nigen abedemo iji fu e ukakbe ijefuon no vierafe Mekisidek fu e bomana ga Eburam fu e ukakbek.
HEB 7:8 Regavo e Isrerko buka sinuom buon roin karme e mamkanuk buon God isuf baroijo iji vajiavga bu karen revo buiji bum ema bu aoin. Regavo no vierafe e Mekisidek fuiji fu e ijekin bakin revo fu tavan bog ijia fivak.
HEB 7:9 Regavo tavan iji Eburam fu sinuom atame Mekisidek vajainma iji fu e Rivai vajainma ijeg ren.
HEB 7:10 Regavo Rivai fu Eburamon sat fu kavuan besum gavo fuba nafenva tavan ijia Mekisidek fu Eburam bien.
HEB 7:11 E Mosison akaij iji God fu abe e iji miamga e isuf baroijo ijieb abe samuain. Regavo e iji isuf baroijo ijieb e ijiebuon Godon nifak ijia mukorigia rebatie bu e be e Mekisidek aikin iji buba vierafek.
HEB 7:12 Regavo Mosison akaij iji fu e fok karauniakfuon iji fu Godon nifak ijia fuka ba aresren ijefuon bu madu akai iviamkor abe ruain. Ijefuon bu madu e iviamkor God isuf baroidakfuon iji aben revo e iviamkor iji Jesu na iviakma kuardiavo ijin.
HEB 7:13 Fuiji fu e befuon agan revo aganfuon ijia e be fuba e bomana rene ar isuf baroijo ijia ik ren.
HEB 7:14 No iji vierafen ijefuon maiji no vierafe Jesu fu e Judiakbuo uifarif. Regavo Mosis fuba kuai e Judiakbuo uifarif ijia be fu e bomana Godon isuf baroidiamo rekno kuin.
HEB 7:15 Regavo iviakma e iviamkor be madu e Mekisidek aikin fu isuf baroino iji fun ruain.
HEB 7:16 Fuiji fu e Rivaion uifarif ijia ruainma bakin ga fu daro fuon ijia fine vak.
HEB 7:17 Ijefuon maiji bun buk akaij ijia ijeg isoime kuai, A e bomana Godon isuf baroinon rene e Mekisidek fu fine vainma ijegrekno kuain.
HEB 7:18 Regavo God fu Mosison akaij iji abe biom irif ijia abeden. Ijefuon maiji bu Mosison akaij iji jame igakva e besum fu maturaikma bakin. Regavo iviakma God fun unam iviamkor mukoi nuvuifuon amaren. Regavo unam iji fu amarenma iji fu Kurais nuvuon E Bomana God isuf baroino iji abe muido non Godon samaij ijia vak.
HEB 7:20 God fu ur e isuf baroijo uruvana ken revo fuba mukorigia abe marme kuai bur isuf barokno kuain.
HEB 7:21 Regavo tavan iji fu Jesu abenma ijia fun abe marme gigikin kuain. Regavo vuak fuon fu kuainma iji bun buk akaij ijia ijeg isoime kuai, E Bomana iji fun if fuon kuranamime kuai fuba oi dakaroime una unam be vierafek. Regavo a ijia fine isuf baroivakno kuain.
HEB 7:22 Ijeg fu renma ijia God fu Jesu abe unam iviamkor mukoi nuvuifuon amarme samuain.
HEB 7:23 E iji ur isuf baroijo iji bu e uruvana isuf baroijo. Ijefuon maiji e isuf baroijo iji roin bu aoivo iji e roinb ar buon abene ik iji rek.
HEB 7:24 Regavo Jesu fu ijia fivak ijefuon ik fuon iji isuf baroino iji fu abe e kafo miakma bakin revo fu koikfuon ren.
HEB 7:25 Ijefuon Jesur iviakma ga tavan bog e iji eraneb fuon duadok ijia Godon roko iji karauniak. Ijefuon maiji fu tavan bog ijia fine efuon mafariame God sirimameno.
HEB 7:26 E Bomana isuf baroino Jesu fuka ma e iji no mukorigia ifejduomo ijin. Fuiji fuka ma e akai ga fu ire ise reno bakin revo ka e maturain revo fu e ise reoinva ijeg fioinma bakin. Fun varur asim ajieme ma varur kaf ijia ajie fin.
HEB 7:27 Jesu fu ise kafo ba ren ijefuon fu e iji isuf baroijo iji fuba bu matiain. Bu tavan besubesum ise buon ijiga e kafobuon ise ijiebuon isuf baroijo ijeg fuba ren. Ijefuon maiji fu e iji ifejdiame karauniakafa fum koikfuon tavan besum efknum kuros ijia guain.
HEB 7:28 Mosison akaij ijia bu e iji ba maturainva kega bu isuf baroijo. Regavo rad Godon vuak iji fu if fuon ijia kuranamime ma gigikin kuainma iji fu rad samafrenma ijar Farifuon maturainma ga tavan bog ijia fivako ijin aben.
HEB 8:1 Regavo vuak fok na kuardiainva anej iji E Bomana isuf baroino nuvuon iji fun God ka ma darokin varur ijia fino ijefuon imut maink ijia fin.
HEB 8:2 Fuka ar ma akai sos ma iji varur kaf ijia ik ren. Regavo ar iji fu emab sainva bakin revo fu E Bomana ijar amarenma fu ijia ik ren.
HEB 8:3 E iji isuf baroijo iji bu e iji ise reoijo ijiebuon isuf God baroijo ijefuon Kurais fuk fuka isuf kafo kege Godon isuf barok.
HEB 8:4 Regavo fu moikigia vek finbatie fuba e isuf baroino rek ijefuon maiji e isuf baroijo iji bur Mosison akaij ijia jame isuf baroij.
HEB 8:5 Regavo ik iji e isuf baroijo bu rejo iji bu varur gufia izeg bu rejo ijeg bu kaven iji moikigia mimatav. Regavo tavan iji Mosis fu sos iji fanuf surif ijia sakreno ijia God fu kua, Mukorigia unam izeg na uruor ijia nijaidiainva ijeg jame samne kuain.
HEB 8:6 Regavo Kurais fu ik fuon isuf baroino iji fu iviakma abenma iji fuka ma bomanak. Fun ik ijar e iji bu moikigia isuf baroijo iji fur ma asidiain. Regavo madu unam iviamkor iji Jesu fu amarenma ijar unam akai usuikor iji fuka ma asin. Tavan iji fu no kuo unam iviamkor iji jafno kuinma ijia fu ire ma iji fu nuvuifuon rekfuon fu iji kuarduin.
HEB 8:7 Regavo unam akai usuikor iji fu no ifejduoga no Godna besum karikfuon iji fu aresrenbatie God fuba una unam iviamkor be vierafek. Regavo fuba aresrenma ijefuon fu una unam iviamkor be vierafen.
HEB 8:8 God fu unam iviamkor be vierafene amaren ijefuon maiji e Isrerko buba unam akai usuikor iji igain revo bu adamen. Ijefuon fu vuak be buifuon ijeg kuai, E Bomana iji fu kuai, Ni faif. Tavan iji na e Isrerko ga e Judiakona akai iviamkor iji na abedekfuon iji fu vek rok.
HEB 8:9 Regavo tavan iji na e Isrerko ijiebuon saifijaf aferdiafa bu ai Ijift areme usem vainva ijia na akai bu jakfuon iji abeden. Regavo buba akai usuikor iji igain revo buka magainva ijefuon naka bu nuigafiain.
HEB 8:10 Regavo iviakma na unam iviamkor iji e Isrerko ijiebuon abedek. Tavan iji abekma na akai nun abe nigen buon ijia abedekin bu mukorigia vierafek. Regavo naka oibuon ijia isoikin bu akaij iji mukorigia igiak. Rene na God buon reke bu enun rek.
HEB 8:11 Na ijegrenkin e be fuba kaifuon ga aganfuon iji E Bomana ijefuon unam ijin nijaime kuardiak. Ijefuon maiji enun fok am ukakna ga e mamkanuk fok buka na ma vierafekfuon.
HEB 8:12 Regavo bu ise rekva na buon oifian abek revo na ise buon iji naba giame uruv vierafek revo nam giame arekno kuain.
HEB 8:13 Regavo tavan iji God fu e fok aferdiaga bu funa besum rekno kuainma ijia akai usuikor iji fun abe biom iken ijia abeden rega fuka mukorigia bakren.
HEB 9:1 Regavo unam izeg bu akai usuikor iji bu fuon sirimamejo iji God fun e iji kuardiain. Regavo madu ar iji bu ijia aru karine sirimamejo iji fu ema ijieb sain.
HEB 9:2 Regavo Ar Muvuaka iji bu fanuf surif ijia sain revo ar guf iji bu ugon ijia nokarok (2) kiraten. Regavo ar guf amur iji bu in iji bu rait nakuivo ijiga fata iji bu bred ijia abedeme abe God mavo ijieb ijia irev. Regavo ar guf iji bu kua Ar Akaino kuavo.
HEB 9:3 Regavo ugon iji bu kirainva ijefuon nuon ijia ar kafar iji bu kua Ar Ka Ma Akaino kuavo.
HEB 9:4 Regavo ar ka ma akai guf iji fata ijia bu ire gord ijia okurain revo bu ijia ire udi mukor urino iji ijia baroijo. Regavo mavua akai iji bu madu ire gord ijia okurainva iji fu ijia nam. Regavo mavua guf ijia bu duok bred bu kua menano kuavo ijar nata dibur gord ijia amarenva iji fu mavua ijefuon guf ijia nam. (Regavo duok mena iji e Isrerko bu ai moikum namo ijia vaka vasiaordiamga bu God sirimameja fu vajiama bu inva ijin). Regavo madu Eronon guduar iji fu bijuasaoino iji God ifejdama fu akivajamo iji fu ijia nam. Regavo madu mavua ijia bu mun iji God fu abe akaij iji isoime Mosis vajainva ijieb ijia naoiv.
HEB 9:5 Regavo mavua azan ijia bu ire dakin serabimno kiavo ijieb ijia iren. Regavo ire iji bu Godon sanainma iji e nijaidiame daf irame ar iji ise giame arevo iji nakarain. Ijegvo iviakma na ire fok ka mukorigia nijaidiakfuon iji fuka ba aresren.
HEB 9:6 Ijegrene ire fok bu ijeg amaren revo e isuf baroijo iji bu nakikmazak ar akai guf amur ijia arume ik buon rej.
HEB 9:7 Regavo ar guf iji ka ma akaij iji fun e isuf baroijo ijiebuon e bomana ijar fuonkua efknum juaivasia besubesum ijia aru vako. Regavo tavan bog fuka fanuf maf ijekin ijefuon kavuan iji kege arume ise fuon ijiga e iji ise renva ijiebuon God isuf baroino.
HEB 9:8 Regavo unam iji bu renva ijia Kaven Akai iji fun samakaf nijaiduom. Ijefuon no vierafe eraneb bu vek unam usuikor ijin javo iji bu unam iviamkor iji bu Godon nifak ijia vakfuon iji buka ba aresren.
HEB 9:9 Regavo irerag bu ar guf ka ma akaij ijia renva iji bu Kurais irerag fu iviakma renma ijin. Ijefuon maiji ire fanuf iji bu God isuf baroinva iji buba e iji Godon sirimamejo ijiebuon oij iji mukorigia some amardiain.
HEB 9:10 Regavo ire fok bu renva iji bu e iji akai kafo name duok ga do iknum unam kafokafo bu imut do sovo iji bum vajai nuvuon ijefuon nain. Bu ire iji vek reoko Kurais fu unam iviamkor iji God fu vierafenma iji abe ari ruain.
HEB 9:11 Regavo fun Kuraisri iviakma E Bomana isuf baroino rene unam iviamkor no iviakma javo iji ifejduom. Regavo Kurais fu moikigia ar iji ema igieb sainva ijia fine ikreno bakin. Regavo fuka varur ijia ar iji ka ma mukor ema ijieb sainva bakin ijia fine ik ren. Regavo fum efknum e fok ijiebuon ar iji ma akaij ijia kavuan fuon abe ijia usen. Regavo fu maf ga fanuf kafobuon kavuan ijia abe Godon isuf barokafa vainma bakin. Regavo fu kavuan fuon iji abe no karaunuoga no ijia ma karivakafa fu ijefuon vain.
HEB 9:13 Regavo ni una akai usuikor iji vierafef. E kafo bu ise kafo rejo iji e isuf baroino iji fu fanuf ijiebuon kavuan iji abe ro isuf iji bu amur baroinva ijefuon kuotuvuat iji abe do ijia davaruaime abe e iji usemadiav. Fu ijegrediame barmo iji e iji bun una Godon nifak ijia mardiav.
HEB 9:14 Regavo iji fu fanuf ijiebuon kavuan ijar ijeg ren revo nin izeg Kuraison kavuan ma mukor bomana fu rekfuon iji vierafef. Kaven Akai ijia fine vako ijefuon duadok ijia Kurais fu vajai fuon maturainma iji abe God isuf baroidain. Regavo fanuf ijiebuon kavuan iji bu izeg mukorigia oinuvuon ijia ise no reoijo iji somduokva bakin. Regavo fun Jesur ise ijia no aferduome unam zuarunam vako ijia mukorigia somduodo no God ma ijia fivako ijefuon ikrek.
HEB 9:15 Ijefuon Kurais fu guame e iji bu Godon akaij iji abe tuaseme ise rejo iji karauniakafa kavuan fuon abe usen. Ijefuon Kurais fu unam iviamkor iji roin ga God roin renma rir ijia manin. Fu ijegrenki e iji God fu kumenma iji bu unam ma iji God fu tavan bog buon rekno kiamo bu iji reknum vo giaknum karivak.
HEB 9:16 Regavo jan vierafe unam usuikor nuvuon ijia eof iji bu aoikuai (bu ire uij ga azik iji afijaf kuardiavo ijeg) bu ire if ijia dame am iji ata vajiakfuon iji isoin. Regavo am iji bu ire iji bu kekfuon iji bu samuaga e iji fu guamga buson ijia karev.
HEB 9:18 Unam besum ijeg akai usuikor ijefuon rotit ijia unam izeg bu Godna besum rekfuon iji fu fanuf ijar guakma ijia kavuan fuon iji fu unam iji abe marek.
HEB 9:19 Regavo Mosis fun akai usuikor ijia jame e Isrerko iji vuak fok kuardiame rad fu maf-kau uka ijefuon kavuan abe do ijekma davaruain. Areme fu ifirik ijia datome ire atebu ijia abe ijia utime do ijia abesme ke buk akaij ijiga e iji samaij ijia irenva iji usemadian.
HEB 9:20 Mosis fu ijegrejknum e iji kuardiame kia, Kavuan ijar akaij igi abe marenmado ja God fu kiainma iji igakno kiain.
HEB 9:21 Unam besum ijegvo Mosis fu kavuan iji abe ar iji sos igekin bu Godon sirimamejo ijia ire fok usemadiak.
HEB 9:22 Regavo iji fuka ma akai usuikor ijia ire fok bu kege rega bu maturaiga bu kege sirimamejo iji fok buka kavuan ijia kege usemadiav. Regavo bu fanuf be buba kaname kavuan usekva God fu e iji ise rejo ijiebuon ise iji fu izeg giame arekma bakin.
HEB 9:23 Ijefuon unam fok bu varur gufia rejo iji bum kaven ijesugin moikigia mimatav. Regavo madu unam iji bu varur gufia rejo iji buka isuf iji maturainma ijia baroij.
HEB 9:24 Kurais fu ar iji ma akai ema ijieb varur gufia sainva fu ijekin ijia aru vainma bakin. Regavo fuka ar ma iji varur ijia aru vain. Ijefuon iviakma fu nuvuifuon Godk fine vuak nuvuon iji God kuardam.
HEB 9:25 Regavo e Jius ijia e iji God isuf baroino iji fu juaivasia besubesum fu kavuan fuon ijia abe ar ka ma akaij ijia aru vako bakin. Regavo fu fanuf kavuan ijia abe aru vak. Regavo Kurais fu varur gufia vainma iji fu vajai fuon abe madu God isuf baroikafa vainma bakin. Ijefuon maiji fu ijegrebatie God moikigi fu amarenma ijia Jesu fum tavan bog guavknum vakfuon. Regavo iviakma Kurais fum efknum keko vajai fuon abe isuf baroine ise iji e bu moikigia rejo iji somdiain.
HEB 9:27 Regavo e fok bu aoikva bum efknum aoik revo rad God fu ise buon iji kege mazim giak. Unam besum ijegvo Jesu fu efknum vajai fuon abe isuf baroine guain. Regavo iji fu renma iji fu e iji ise rejo bu vajai fian abekfuon ijiebuon ise iji somdiakafa ren. Regavo fu una moikigia rokon iji fu ise ijefuon una guakafa rokon bakin. Regavo fu e iji bu fu samuame karinva fu ijin karauniakafa rok.
HEB 10:1 Mosison akaij iji fum ire ma iji fu rad ruakreno ijefuon kaven iji nijaiduin. Bu isuf ni besum ijin juaivasia besubesum ijia baroijo revo bu e iji akaij ijefuon rotit ijia karijo iji karauniavo bakin.
HEB 10:2 Regavo e iji God sirimamejo iji ise buon iji bun mukorigia somdiakva iji buba una ise buon ijefuon juk. Bun mukoi soinva ijefuon isuf buon bu baroijo iji bu usuibe ijia aren.
HEB 10:3 Regavo isuf bu juaivasia besubesum baroijo ijia e iji bu izeg ise bu renva bu ijia ganamime vierafej. Regavo iji fuka ma maf-kau revo fanuf kafokafo ijiebuon kavuan iji fu izeg ise iji somdiakma bakin.
HEB 10:5 Ijefuon Kurais fu vek moikigia ruakreno ijia fu vuak be ijeg kuai, Fanuf ijia isuf baroijo ijiga ire kafokafo ijia isuf baroijo iji aka uzam. Regavo an vajai igi a nuifuon amarenma na ijia abe ise ijefuon isuf barok.
HEB 10:6 Fanuf iji bu fata ijia isuf baroijo ijigam fanuf roin bu ise buon sokuai baroijo iji buka ba aresren ijefuon aka ba oimadam.
HEB 10:7 Ijefuon na kua, O God na igija ruain. Irerag a vierafenma iji kiega nar ise iji bu rejo ijefuon vajai fian abekrejo ijin ise buon iji somdiavno kuain. Regavo vuak ijefuon iji a nuisina kuaimon bun buk akaij ijia isoin.
HEB 10:8 Amur Kurais fu kua, A ire kafokafo bu isuf baroijo ijiga fanuf iji bu fata ijia isuf baroijo iji a oimarmo bakin. Regavo madu a fanuf roin e bu ise buon bu renva iji sokuai bu isuf baroijo iji a uzamo ijefuon a oimarmo bano kuain. Regavo ire iji Kurais fu kuainma iji bu usuibe Mosison akaij ijia jame baroin.
HEB 10:9 Areme Kurais fu madu kuai, Na igaijar ijefuon irerag a kuardiekma iji nar ise buon bu vajai fian abekfuon iji nar abe vakafie ruain. Ijefuon God fu unam usuikor isuf baroijo iji abe biom abedeme Kurais abe isuf baroine unam iviamkor ijin aneren.
HEB 10:10 Jesu Kurais fu irerag God fu vierafenma iji ren. Ijefuon e fok no Kurais vajai fuon fu abe efknum isuf baroinma ijia fun ise nuvuon iji mukorigia somduoma non maturaime e akai ren.
HEB 10:11 Tavan bog e isuf baroijo iji bu tavan besubesum ire ni besum iji God isuf baroij. Regavo isuf iji bu baroijo iji fu ise buon bu renva God fu kege vajai fian abekreno fu iji somdiamo bakin.
HEB 10:12 Regavo fun Kuraison vajat iji fu abe efknum nuvuifuon isuf baroinma ijar e fok ijiebuon ise bu renva iji fun okurain. Areme fun Godon sanainma imut maink varur ijia Godk fine ire fok samuagdiam.
HEB 10:13 Fu Godk ire fok samuagdiavknum vo e ani fok bu biom fuon rotit ijia ruako fu samuagdiame fin.
HEB 10:14 Ijefuon vajai fuon fu abe efknum isuf baroinma ijia e iji bu fu ma vierafejo ijiebuon oij iji fun somdiain. Regavo ise buon ijefuon fu vajai fian abekfuon iji fun dasumdiame karauniain ijefuon bu tavan bog Godon nifak ijia e maturaime karivak.
HEB 10:15 Regavo Kaven Akaij iji fuk vuak iji fun maga fu abe maren. Ijefuon amur ijia fu buk akaij iji bu usuibe isoinva ijia fu vuak be ijeg kuai, Na vuak iji kuaime enun iji nijiak. Tavan iji abekma na akai nun abe nigen buon ijia abedekin bu mukorigia vierafek. Regavo na madu oibuon ijia isoikin bu mukorigia iji igak.
HEB 10:17 Regavo Kaven Akai fu una kuai, Na ise buon bu renva iji naba una vierafekno kuain.
HEB 10:18 E ijiebuon ise iji fun Godri giame aren ijefuon ire kafokafo no God isuf baroijo iji God fu iviakma fuba una iji vierafek.
HEB 10:19 Ijefuon uviaifnun iviakma no Godon sanainma ijia karikfuon iji fu erar bijukma bakin. Fun Jesur vajai fuon abe isuf baroine kavuan fuon iji abe nuvuifuon useme unam nuvuon amaren. E Bomana isuf baroino ijeg Jesu fu ugon iji ma asime Ar Ka Ma Akaij ijia aru vain. Regavo unam iji fu Godk sanainma ijia fikfuon iji fu amarenma iji fu unam iviamkor ma darokin.
HEB 10:21 Jesu fu ma enuvuon isuf baroino fu Godon e iji samuagdiam. Ijefuon noka oinuvuon ijia maturai vo ka ma vierafeknum God samaij ijia vak. Ijefuon maiji izeg no do ma ijia vajai nuvuon iji ruardiavo ijeg no vierafega ise nuvuon fun Jesur kavuan fuon ijia somduin. Ijefuon noka ma vierafevo juvknum Godon nifak iji vak.
HEB 10:23 Regavo noka vuak ma iji no ma vierafejo ijiga kuaivo iji mukorigia kuniaime giriesak. Ijefuon maiji no ma vierafe God vuak fu kuainma iji fu rekafa samuain.
HEB 10:24 Regavo noka unam izeg no nuvuon ejafanamime oijmanamiknum vo ma reoijo iji nuvuon nijainamikfuon iji vierafek.
HEB 10:25 Regavo noba unam iji no afuim besum E Bomana ijefuon sirimamejo iji e roin bu arenva ijeg arek. Regavo noka nuvuon ejafanamikva fuka mardo no ijeg rekfuon. Ijefuon maiji no vierafe E Bomana tavan iji fu ruakfuon iji fun samairen.
HEB 10:26 Ijefuon noka ire ijin rekfuon ijefuon Jesuon vuak ma iji non fain. Regavo no ijia areme nakikmazak una ise rekva no ire be irerag ijar abe isuf baroiga fu no vajai fian abekfuon ijia karaunuokma bakin.
HEB 10:27 Ijefuon noka juvknum God izeg fu ise nuvuon no renva iji kege mazim guokreno iji samuak. Ijefuon maiji fu izeg zieme e ani fuon iji kege mian iji fu ire kafokafo naino ijia jamo ijeg fu no ke vajai fian vajuok.
HEB 10:28 Regavo e nokarok (2) vo nokbek (3) bu gaga e be fu Mosison akaij iji ba igaga fu abe tuasemo iji bu fuon oifian abeno bakin revo buka kanaga fu guak.
HEB 10:29 Unam besum ijegvo eraneb bu Jesu Godon Farif iji abe buzeivo iji God fu kam unam ise ijia arafiriak. Regavo madu eraneb bu Jesuon kavuan iji fu e ijiebuon ise iji sokafa useme unam iviamkor iji abe marenma iji ba abe ikin igeg vierafejo iji God fu kam vajai fian miak. Regavo madu fu e iji bu Godon Kaven Akaij iji fu ma rediamo ijefuon vuak ise kuaivo iji God fuka unam ma ise ijia vajai fian miakfuon.
HEB 10:30 No vierafe Godri e iji kege ma isenisegin igia arafiriak. Ijefuon maiji fun Godri koikfuon buk akaij ijia kuai, Na koiknun una e iji bu ise rejo iji roib ise rediak. Regavo na una roib ise buon ijefuon arafiriak. Regavo buk kafar be ijia fu madu una vuak be ijeg kuai, E Bomana ijar efuon ijiebuon ise iji kege mazim giakno kuain.
HEB 10:31 God e darokin ijar guome kam unam ise ijia arafiriakfuon iji fuka ma ise.
HEB 10:32 Regavo nin amur izeg ja karioinva iji vierafef. Amur iji ja Kuraison vuak fainva iji jaka ire uruvana kafokafo ijia vajai fian aben revo jaka ba zazain.
HEB 10:33 Tavan ijia jaka samakaf juv gavo ijia buka e iji God ma vierafejo bakin ijieb ja kam nibijiaknum vajai fian vajiain. Regavo tavan roin jaka una e roin bu kege ijeg nibijiavo ga vajai fian miavo ijiebuon oifian abene una buna rejknum ifejdiav. Ijefuon jaka buna besum vajai fian abeknum vo e iji bu dibur karijo ijiebuon oifian abeknum ifejdiav. Regavo e iji bu God ba ma vierafejo bu sinuom jon kamazia vako jaka oimarev. Ijefuon maiji jan koikjo vierafero Kaven ijefuon sinuom ma iji bu varur ijia naoivdo ja rad kege oimarknum kari vakro ja ijeg vierafen.
HEB 10:35 Ijefuon jab jon izeg ja ma vierafejo ijia zazaik revo nika giriesaf. Ijefuon maiji ja ijegrene vakva God fu ijefuon una roib unam ma kafo jon rek.
HEB 10:36 Jaka oi mafaime nakikmazak God ma vierafef. Ja izeg God irerag fu vierafenma iji rekva ja ire iji God fu kuainma iji kekfuon.
HEB 10:37 Ijefuon jaka ire ijin reokfuon ijefuon maiji God usuibe fu e iji fu kuamga fu ruainma ijefuon fu ijeg kuai, Fu tavan ivuankbe ijia fu una ruak revo fuba saroik.
HEB 10:38 Regavo enun iji bu maturainva iji bu ma vierafene karivak. Revo bu una na nuigafieme vakva naba buon oimarkno kuain.
HEB 10:39 Regavo noiji no e iji bu jume ma vierafejo iji bu arevo ga God fu kege vajai fian mianma ijekin bakin. Regavo noiji noka God ma vierafejo ijefuon fu no karaunuom.
HEB 11:1 Regavo ma vierafejo iji irerag? Ma vierafejo iji ire iji noba ni nuvuon ijia giaknum vo kuniaivo no iji oij ijia ma vierafega ire ma iji bu rad rekfuon ijin. Regavo no mukorigia vierafe ire iji no giavo bakin iji buka ma.
HEB 11:2 God fu e saifnuvuon ijiebuon oimaren ijefuon maiji bu ire kafo buba giainva iji gavo God fu kuai bu rad rekno kuainma iji buka ma vierafen.
HEB 11:3 No ma vierafejo ijia no vierafega ire fok moikigia ga varur gufia naoivo iji fu God vuak fuon ijar abe amardiain. Regavo ire fok iji fu amardiainma iji fu ire iji noba giavo ijia kege amardiain.
HEB 11:4 Ebor fu God ma vierafenma ijefuon isuf fuon iji fu God baroidainma iji fuka mukor ijin barodain. Regavo Kein isuf iji fuka ise ijin baroin. Regavo Ebor fuka God ma vierafenma ijefuon God fu kua, A maturain ijefuon ire on iji a na isuf baroidiemo iji fuka mukor ijesugino kuain. Regavo ire iji Ebor fu usuibe rene fun guain. Regavo unam fuon izeg fu God ma vierafenma ire iji fu vek iviakma no mukorigia nijaiduom.
HEB 11:5 Regavo ni madu izeg e Inok fu kenma ijin gaf. E Inok fuka God ma vierafenma ijefuon God fu fu afem varur ijia ajie vain. Fuba guain revo madu e kafo bu uikinik fuon iji buka ba gain. Ijefuon maiji fun Godri isuar afeme varur ijia ajie vain. Ur Inok fuka ire iji God oimaikfuon ijesugin renmano kuain ijefuon God fu Inok afem ajie vain.
HEB 11:6 Ijefuon igia faif ebe erar fuba God ma vierafekma God fu izeg oimarkma bakin. Ijefuon erar fu Godon e rekma fuka ma vierafekfuon. Fu ma vierafero God fuka tavan bog ijia fivako ga madu fu e iji eraneb bu fu gakuai nisaivo ijin roib unam ma kafo buon rediamro bu ijeg ma vierafek.
HEB 11:7 Regavo madu fun ma vierafejo ijar Noa ifejdamga fu ire ise iji fu ni fuon ijia giamo bakin iji bu rekfuon iji God fu ju kuardainma iji ma vierafen. Fu God jume vuak fuon iji igame sisim amarenma ijia fu aganfuon ijiena buon karaunianamin. Noaon ma vierafeno ijar fu keunain revo e iji buba vuak fuon fainva iji God fu kam arafirian. Rene God fu Noa kua, Aiji anka maturainmano kuain.
HEB 11:8 Ijegvo fun madu ma vierafeno ijar Eburam ifejdamga fu God igame keko moik iji God fu makno kuainma ijia vain. Fu ar iji fu vako iji fuba vierafen revo fum moik fuon areme keko vain.
HEB 11:9 Fu ma vierafenma ijefuon fu e aibeko rene e kafobuon moik iji God fu kuainma ijia ar ukakna same ijia fioin. Ijegvo madu farif fuon Aisek ko saifuon Jekaf buk bu vuak ni besum iji God fu kuainma iji faime ijeg karioin.
HEB 11:10 Regavo Eburam fu mai gigikin iji fu ijia navakfuon iji God fu sakafa kuainma ijia fikafa fu iji vierafene fuka ijin samuame fin.
HEB 11:11 Regavo bara Sera fu God ma vierafen revo fu am nafekfuon iji fun ma barasren. Regavo God fu daro mamga fu una am nafen ijefuon maiji Eburam ko Sera bu God vuak fu kuainma iji buka ma vierafen. Buka ma vierafero God am iji fu miakno kiainma iji fu rekafa buka abe ma vierafen.
HEB 11:12 Regavo Eburam fuka guakafa samairenma ijia e besum ijar e uifarif ka uruvana ire mujur vo jier saof irif iji noba davo ijeg abeden.
HEB 11:13 God fu ire iji fu kiainma iji fuba vajiain revo bum vek God ma vierafene samuaoijo ijia bu aoin. Regavo God fu kiainma iji bu giame vierafero bu uriado bu ruakro buka oimarknum samuain. Revo iji bu ijegrenva iji no vierafe e iji bu e moik igeko bakin revo bum moikigia tavan ivuankbe karikuai ruain.
HEB 11:14 Regavo e iji bu vuak ijeg vierafene kuaivo iji no samakaf vierafe e iji buka moik buon mukor be bu ur ba ijia vainva ijia vakuai unam nisaiv.
HEB 11:15 Regavo bu moik iji bu areme ruainva iji bu vek oi bomana vierafebatie bun una vakfuon.
HEB 11:16 Regavo moik iji bu arega bu ar ma iji iviamkor varur ijia nisaiv. Regavo God fun ar buon bu ijia funa karikfuon iji amardiainma ijefuon bu kua God nuvuono kuavo iji God fu jufabeno bakin.
HEB 11:17 Eburam fu God ma vierafenma ijefuon God fu biesuamga fu farifuon Aisek abe isuf baroikafa vierafen. Regavo God fu Eburam amur kua, Na am farif Aisek mak revo am besum ijar saifijaf uruvana tuanakno kuain. Regavo Eburam fu am farif besum ijin abe isuf baroikafa vierafen.
HEB 11:19 Fu vierafero Aisek fu guakma God fu una keunaga fu una fikafa fu ijeg vierafen. Ijefuon Aisek fun guainma igeg gavo Eburam fu una afen.
HEB 11:20 Aisek fu God ma vierafenma ijefuon fu afijaf Jekaf ko Iso daro miaikin tavan rad Aisek fu guake God fu ire ma kafo buon rekafa fu ijin daro miain.
HEB 11:21 Regavo Jekaf fuk fu madu God ma vierafenma ijefuon fun guakreno ijia fu Josofon afijaf iji besubesum daro miain. Fu ijegrene tuame in iji fu bijuasamoino ijia navaim manine Godon sirimamen.
HEB 11:22 Regavo madu Josof fuk fu God ma vierafenma ijefuon fun guakreno ijia fu e Isrerko bu izeg rad ai Ijift areme vakfuon iji kuardiain. Regavo madu fu guaga vajai fuon iji bu abe izegrekfuon fu ijin kuardiain.
HEB 11:23 Regavo madu Mosison asoij ijiga asie iji bu ma vierafenva ijefuon bu Mosis faribuon bu nafene tavan sibank barko bu dab asam nokbek (3) sauin. Ijefuon maiji bu ga am iji fuka mukor ga e iji ai Ijift samuamo iji fu e Jiusbuon am farif amur iji kaniaga bu aoikfuon iji buba juin.
HEB 11:24 Ijegvo madu Mosis fu God ma vierafenma ijefuon fu e bomana rega fu kia fu e bomana ai Ijift samuamo ijefuon kabai ijefuon am bano kiain.
HEB 11:25 Regavo fu koikfuon fu vierafe fuka Godon e Isrerko ijiena besum vajai fian abekafa fu iji vierafen. Regavo una tavan ivuankbe moikigia karine ise iji oimarknum karikfuon iji fuka uzain.
HEB 11:26 Fu vierafe fuka Kurais e iji God fu kuai fu ruakno kuainma ijefuon vajai fian abekva fu rad ijefuon maiji fu gakafa fu iji vierafen. Regavo una ai Ijift ijia ire ma iji kafokafo fu samuakfuon iji fu ma bomana baro fu ijeg vierafen.
HEB 11:27 Regavo madu e Mosis fu God ma vierafenma ijefuon fu E bomana ai Ijift samuamo fu ziekfuon iji fuba jum revo fum ai Ijift areme vain. Regavo fu God iji e buba gavo iji ma vierafeno ijefuon fu unam iji God fu nijaimo ijia giriesame jame vain.
HEB 11:28 Mosis fu God ma vierafenma ijefuon fu God vuak irerag fu kuardamo iji faime uri iro Fasova iji aneren. Ijefuon fu kiama bu maf-sif uka iji kaniame kavuan iji kege ar buon vien tuar ijia azin. Bu azivga anera iji God fu varur ijia kuaga fu ari ruakma fuba Isrerkobuon am amur iji kaniakafa fu ijeg ren.
HEB 11:29 Regavo madu e Isrerko bu God ma vierafenva ijefuon bu ari saof iji vajavga fu dab turase roinroin rekoga bu iriaikin vajame vain. Regavo e Ijiftko buk bu ijegrekuai ari vajavga bun do ine aoim baren.
HEB 11:30 Regavo madu e Isrerko bu ma vierafenva ijefuon bu ai Jeriko iken iji bu kirainva iji imut roin ga nikit nokarok (7) ijeg ameoine arekoga iken iji fu tuame arin.
HEB 11:31 Regavo madu bara Reab ebuon baru turamo iji fu ma vierafenma ijefuon fu e Isrerko iji bu isuar sauime ai Jeriko gakuai vainva fu iji ifejdiame kege sauin. Ijefuon fuba e iji bu God ba igainva ijiena guain.
HEB 11:32 E ijeg ma vierafenva iji buka e uruvana na kuardiak. E roin iji Gidion ga Bera ga Samson ga Jefta ga Devid ga Samuer ga e Godon vuak vierafene kuaivo na ijiebuon kuardiak revo fu tavan bakin.
HEB 11:33 Bu ma vierafenva ijefuon bu moik roin ijia e roin kania kuriame moik buon aben. Bu unam ma iji renva ijefuon bu ire iji God fu kuainma iji ken. Bu ire raion ijiebuon ir bijukuriaknum mian faruikin naino iji mafaiknum e kafob bijia kaniakfuon ijia bu subime usem vain. Bu e ma zazaikin revo rad buka e darokin rene e ai kafoko ijiebuon e bijaivo iji kaniava bu aoin.
HEB 11:35 Bara iji bu ma vierafenva ijefuon aganbuon roin bun aoinva ijia bu una urija bu aferdiain. Regavo roin bu e ijieb kaniaknum kam arafiriava buba bijuin revo bu vajai fiaigma aoin. Ijefuon maiji bu vierafe bu una uri unam ma ijia karivakuai bu ijeg ren.
HEB 11:36 Regavo e kafo bu juvit foimadiaknum musikiaknum fijiain revo roin bu sen kege tofdiame kege dibur uniain.
HEB 11:37 Regavo roin bu mun karme kaniava bu aoin revo roin bu so kege vajai buon ufuseme nokarok (2) ren revo roin bu kaki uikin ijia kege bijiava bu aoin. Regavo roin bu maf-sif ga maf-gout ijiebuon surif ijia kege ugon amardiame same oin. Regavo roin bu e sinuom bakin revo roin bu kam vajai fian miaknum arafiriain.
HEB 11:38 E moikigia oinva iji bu e iji God ma vierafejo iji bu kam vajai fian miainva iji bu kam unam ise ijia ren. Regavo e iji God ma vierafejo iji buka unam mukor ijin reoijo ijefuon e iji ise reoijo iji bu buna besum karikrega buka ba aresren. Regavo e iji God ma vierafejo iji bu ai moikum namo iji uruor ijia e ai bakin ijeg moik tit ijia naoimoknum muitit ijia naoimoin.
HEB 11:39 God fuka buon izeg bu ma vierafenva ijefuon fuka buon oimaren revo ire iji fu kiainma iji buba ken. Ijefuon maiji God fu unam ma iji be nuvuifuon amarenma iji fu vierafe bu nona besum renki bu nona maturaikfuon.
HEB 12:1 E fok na kuardiainva iji bu ma vierafenva na ijin kuardiain. Revo iviakma e iji bun karine no nikajuov. Ijefuon ruaf no ire fok bu unam nuvuon ijia rarenva ijin kege koref. Regavo ire ise nuvuon bu no kunuome gigikin rene karinva iji kege kozme uri giriesame Jesuon unam ijia kukubijaf.
HEB 12:2 Regavo ni roga no Jesu e nigen nuvuon iji fu izeg no nijaiduoga no God ma vierafejo ijin abe nivariar ijia abedeme nikaja vaf. Fu kuros iji game fu areme vainma bakin revo oimarvo iji fu rad biekfuon fu iji samuainma ijefuon fu vajai fian abene jufdiakfuon iji fuba jum. Regavo iviakma fu Godon ij maink fata fuon ma ijia fin.
HEB 12:3 Regavo ni izeg ise fok bu Jesuon ruainva iji vierafef. Fu adumaduigin ire ise fok e ise ijieb fuon rejga fuka vajai fian aben. Ijefuon jab jon ja ma vierafejo ijia zazaik vo uzame arek.
HEB 12:4 Regavo ise iji ja ijia vajai fian abejo iji jaba roke buin iji bu kaniaga ja aoikfuon ijia ruain.
HEB 12:5 Regavo God fu afijaf ijeg soisoime ejafia kuardiainma iji jab rubdiak. Fu kuai, Afnun igie E Bomana fu ja musikiaknum ja kege arir uniaga jab oifian abek revo nika mukorigia faif.
HEB 12:6 E Bomana iji fu e iji bu afijaf rejo iji fu kege musikiamoni fu uguar kuardiam. Ijefuon maiji fu e fok oijmiamo ijefuon fu ifejdiame kege arir uniam.
HEB 12:7 Regavo iji ja vajai fian abejo iji fu Asoijon ijar musikiaknum uguar kuardiam. Jon ja vajai fian abejo iji fu ja afijaf igeg nijaidiakafa ijeg ren. Regavo ni vierafe am fu tavan bog ise reno iji asoifuon fu afeme vuak gigikin kuardamon.
HEB 12:8 Regavo a vierafega fuba ijeg a musikuaknum uguar kuardavga ni vierafero iji a amfuon bakin revo a am oij.
HEB 12:9 Asoifnuvuon moikigia bu no musikuome uguar kuarduovoni no mukorigia bu akardiavo. Ijegvo no God Asoinuvuon fu kaven nuvuon iji samuagdiamo fu mukorigia fu agoiknum moikigia kari vakfuon.
HEB 12:10 Moikigia asoifnuvuon bu tavan ivuankbe no kege ma ijefuon musikuoknum uguar kuarduin. Regavo God fuk nuvuon ma ijefuon ijegredo fu no kege izeg fu e akai renma ijeg amarduom.
HEB 12:11 Tavan iji bu no kege musikuoknum uguar kuarduovo iji ire kafo ijia noba oimarev revo noka oifian abekfuon bu iji rej. Revo rad e iji bu uguar iji faime ma vierafenva iji bu unam afuime kariknum ga maturaime mukorigia kari vak.
HEB 12:12 Ijefuon aimiainva ijeg ja rejo iji aregavo uri ni narame arir God ma vierafeknum karivaf.
HEB 12:13 Regavo nika giriesame unam arir ijia vaga e iji bu ja jajiame vuako iji buba God nuigafakgavo buka darokma ofriakfuon.
HEB 12:14 Efnun iji ja musikuaivo iji aregavo giriesame e fok ijiena afuime kariknum vo akai kariokfuon ijar ijefuon ref. Ijefuon maiji e besum be fuba akai fikma fu E Bomana iji fuba gak.
HEB 12:15 Regavo nika mukorigia vierafekin e be fuba Godon ma iji fu ifejdiamo iji arek. Regavo jab ise kafo e roin kege vajai fian miakfuon iji rek. Ja ijeg rekva ja e uruvana God ma vierafejo iji aferdiame Godon nifak ijia ise redo ijar bu kam arafiriak.
HEB 12:16 Regavo nika mukorigia ganamif e be fub unam ise barubara oknum vo Godon if abe arafirik. Iso fu renma ijeg jab God fu kuainma iji abe ukakbe vierafene rubdiak. E Iso fu farif amur fu asoifuon ijefuon sinuom iji fur kekfuon revo fu vasiaguamga ire ma iji fok fu rad kekfuon iji fuim una diar fuon ijefuon ire sibank iji kimen.
HEB 12:17 Regavo rad fu una sinuom iji kekro vierafen revo unam be fu rene una kekfuon iji fu nisaime uruvana niraikafian revo fuba kenma iji jan vierafen.
HEB 12:18 Uviaifnun ja tavan iji God fu uruor Sainai ijia akaij iji fu abe E Isrerko iji miakoga irerab ijia renma iji jabe vierafen? Tavan ijia fu ve bomana nakiko buibur bomana ufime ruakoga uruor ijia fuka mian bomana nain.
HEB 12:19 Regavo ijia ire ka ma ise e bu juvo iji buka uruvana ijia vebu ijeg karakoga God ijia vuak darokma kuardiamga e fok buka bomana juin. Ijefuon bu soisoime kume, Vuak iji arefno kumen.
HEB 12:20 Regavo tavan ijia God fu vuak kuardiame kia, E be ga fanuf be fu uruor Sainai ijia vakma iji nika mun karme kanaga fu guamno kuain. Ijefuon maiji ar iji fuka ma kuriaino kiain.
HEB 12:21 Ijefuon e fok buka juvga Mosis fu kia, Nak naka anajuai mieme simarien revo naka bomana dejufdiemno kiain.
HEB 12:22 Regavo Kurais fuba ja aferdiame roke uruor ijekin be moikigia ja imut jon ijia kunaime gain. Regavo ja fu aferdiame Godon samai varur ijia ruain. E saifjon iji bu uruor Zaion Jerusarem mai God e darokin fino ijia Godon guriguri rekuai ruainva ijeg ruain. Regavo ja anera fok bu karinva ijia ruain.
HEB 12:23 Regavo jan e iji God ma vierafejo if buon Godri isoinma ijia buna oimarknum afuime karin. Regavo jan God iji fu e fok kege mazim giakfuon iji fu fino ijia ruain. Regavo madu jan e iji God ma vierafejo iji aoinva ijiebuon kaven maturainva ga Godri iviakma varur ijia kege amardiainma iji bu karinva ijia ruain.
HEB 12:24 Regavo madu jan Jesu e iji fu God roinre ga no roinrenva rir ijia unam iviamkor amarme kavuan fuon kuros ijia useme guainma iji fu fino ijia ruain. Kavuan fuon ijar ise nuvuon iji mukorigia somduin. Regavo God fu Eboron kavuan iji fu gaga bu e be vajai fian main revo una Kuraison kavuan iji fu gamo iji fu gaga fu e ijiebuon ise iji giame aremon.
HEB 12:25 Ijefuon mukorigia samuanamiknum karigavo jab God fu kuardiamo iji faime uzak. Ijefuon maiji Mosis fu moikigia e Isrerko ijeg kuardiamga bu magainva iji kafo buba iji fu kege vajai fian miamo iji asidiame usem subinai vain. Unam besum ijegvo no God e varur gufia fino fu kuarduomo iji ba faime igakva no izeg iji fu kege vajai fian muokreno ijia asidiakva bakin.
HEB 12:26 Tavan iji fu uruor Sainai ijia fu kuaimga moik iji fuka ukin. Regavo iviakma fuka una kuai, Naba una moik ijesugin abe ukik revo naka varur ijekma efkin abe ukikno kuain.
HEB 12:27 Vuak iji fu madu efkin una kuarduinma ijefuon maiji ire moik igefuon iji God fu kege ukikfuon iji bu barkfuon. Regavo ire maiji buba barekgavo bu vek ijia naoime vakfuon.
HEB 12:28 Ijefuon roga no Godon oimaref. Ijefuon maiji non e iji God fu oibuon iji samuagdiamo ijin buna mazido noba barkfuon. Ijefuon roga no unam iji God fu oimaikfuon ijia fuon sirimameknum fuon oimaref. God fu e bomana ga fuka e akaij ijefuon no fu juvknum ato same fuon sirimamek.
HEB 12:29 Ijefuon maiji God iji no sirimamejo iji fuka ire mian igekido fu ire fok ba maturainva iji fu naine barkfuon.
HEB 13:1 Uviaifnun nika giriesame kaifjon iji God ma vierafejo ijiena jon oijmanamif.
HEB 13:2 Regavo ni vierafe e ai kafoko bu ar jon ijia ruakva ni e iji aferdiame ar jon ijia vaf. Ijefuon maiji e kafo bu ur e kafo aferdiainva ijia bu Godon anera iji kafo ba mukoi giaknum aferdiain.
HEB 13:3 Regavo nika e iji bu aferdia dibur uniainva iji vierafeknum ifejdiaf. Ijefuon maiji bu God ma vierafejo ijefuon jar dibur ijia karinva ijeg vierafene ifejdiaf. Regavo e iji vajai fian abejo iji ni jar buna vajai fian abejo ijeg bu vierafef.
HEB 13:4 Regavo tavan bog unam iji barubara sanamivo iji nika abe bomana vierafene agoiknum vo jab ebuon bara turak. Ijefuon maiji God fu e iji e kafokafo bara turavo ijiga barubara bu fudainamime unam ise kafokafo vierafejo iji fu kam arafiriak.
HEB 13:5 Jon ja kari roko ijia jab mon bomana oijmiak revo ire sibank iji a nainma ijiebuon bomana oimaremne. Ijefuon maiji God fun kuai, Na tavan bog a naba rubdiek vo a naba unako vakno kuain.
HEB 13:6 Ijefuon noba jukgavo no Devid vuak irerag fu buk fuon ijia isoinma iji dame darokma kuaik, E Bomana ijar na ifejdiemo ijefuon naba juk. Ijefuon e be fu erar ire ise be nun rekma bano kuain.
HEB 13:7 Regavo uviaifnun ni e mamkanuk jon iji bu Godon vuak iji abe ja kuardiainva iji izeg bu karioinva ijiga izeg bu Kurais ma vierafene mimatainva ijin vierafene uri bu kenva ijeg ka ma vierafef.
HEB 13:8 Jesu Kurais fu nibe reno bakin fu niar ga ivia ga tavan bog ijia fivak.
HEB 13:9 Ijefuon jab arega vuak sumakin kafokafo bu nijaidiavo ijeg ja aferdiame una unam ise ijia vaga ja Godon unam ma iji arek. Revo ni vierafe kaven jon ijefuon daro iji Godri vajiamo revo ja duok kafokafo ijo ijiebuon akaij ijia jajiame igiavo bu ijieb kaven jon vajiavo bakin. Regavo e iji bu ire iji igiavo iji bu ire ijieb bu ifejdiavo bakin.
HEB 13:10 No Jesu aben. Regavo e iji bu e Jiusbuon unam akaij iji vek jame isuf baroijo iji bu izeg Jesuon daro iji fu no muinma iji abekva bakin.
HEB 13:11 E bomana isuf baroino iji fu fanuf kavuan iji kege ar ka ma akai guf ijia ise buon ijefuon isuf barok. Regavo rad bu fanuf ma iji kege usem ar mai makaf ijia jak.
HEB 13:12 Bu ijegrejo ijefuon Jesu fu Jerusarem makaf vien iji aru vako ijia fu vajai fuon iji abe e fok ise nuvuon ijefuon isuf barokafa guain. Fu vierafe fu ijegrenki kavuan fuon ijar no kege maturaime akai rekafa fu ijeg ren.
HEB 13:13 Ijefuon noka e Jiusbuon akai usuikor iji no igiame jajiaga bu ise nuvuon ba sovo iji ka aregavo una Jesuon vakfuon. Regavo no va ijia funa besum vajai fian abek vo fu juinma iji fateroin abekfuon.
HEB 13:14 Ijefuon maiji e roin bu vierafero ai Jerusarem iji moikigia namo iji noka tavan bog ijia karine God sirimameknum vakro bu iji vierafen revo iji fui bakin. Regavo nom karine ar mai iji varur ijia namo iji fu ruakreno ijin samuakin rad no ijia ma karivak.
HEB 13:15 Ijefuon Jesu fu ifejduomo ijia noka tavan bog Godon oimarek. Revo iji fuka unam ma iji be no God isuf baroijo ijin. No oimar vo ijia no kaifnuvuon roin izeg no God ma vierafejo ijin nijaidiak.
HEB 13:16 Regavo jab jon ja mareoijo ijiga ifenamivo iji rubdiak ijefuon maiji ire ijegrejo iji fuka isuf igekin fu ijar God fuka oimaim.
HEB 13:17 Regavo ni e mamkanuk unam ma iji bu Kaven ijefuon ijia ifejdiavo iji irerag bu kiavo iji igiame ref. Regavo ik buon iji bu oijon iji samuavo ijefuon God fu ik iji bu rejo ijefuon bu kege mazim giak. Regavo ja bu igiakva bu oimarknum ik buon mukoi rek. Revo ja buba igiakva bu oifiaigma ik buon isema rekva bu izeg ja mukorigia ifejdiakva bakin.
HEB 13:18 Regavo ni nuvuifuon sirimamef. Ijefuon maiji no vierafe oinuvuon fu Godon nifak ijia samafren revo nuvuon no vierafenva iji no unam mukor tavan bog ma rejo iji anerek. Ijefuon na ja soisoime kia ni giriesame nuifuon sirimamega ire iji fu unam nun na vuakrejo iji bijukurainma iji fu abe biom abedega na vuak.
HEB 13:20 Regavo na sirimamega God e iji e ifejdiaga bu afuime karioijo iji fu ja ifejdiak. Ijefuon maiji fu E Bomana Jesu Kurais Farifuon besum iji kuama fu guame una urin. Regavo fu Jesur e fok igi no maf-sif ijeg oijo iji mukorigia samuagduome kavuan fuon abe useme unam iviamkor iji no Godna besum karikfuon iji amaren.
HEB 13:21 Ijefuon na sirimamega fur ire ma iji uruvana vajiaknum ifejdiaga ja irerag fu vierafenma iji rek. Regavo madu fur Jesu Kuraison duadok ijia no ire ma iji oinuvuon ijia vierafeknum reoga fu oimaik. Regavo na vierafega Kuraison sanainma iji fu tavan bog ijia navak.
HEB 13:22 Uviaifnun na ja soisoime kia jaka isuar adumaduigin karine vuak igi fu ja ejafiamo iji faik. Ijefuon maiji fas igi na isoime nijiavo iji fu jaoijmana bakin revo fuka ivuankbe.
HEB 13:23 Na kuardiaikin ja vierafero Timoti uviainuvuon God ma vierafeno iji fu dibur fino iji fun kekoinmaro ja ijeg vierafek. Revo fu migegareigia nun ruakma na fusik ja giak vuakfuon.
HEB 13:24 Regavo ni e mamkanuk jon iji bu ja samuagdiavo ijiga Godon e fok ijia karinva iji nuvuifuon anadiaf. Regavo madu e Itariko God ma vierafejo roin nana igia karinva iji bu ja anadiav.
HEB 13:25 Na sirimamega God fu ja ma rediame ifejdiaga ja mukorigia kari vakfuon.
JAM 1:1 Fas igi e Jeims nar isoime Godon e fok iji moikigia kekirame karioinva ijin nijiame anadiav. Regavo naiji na God ko E Bomana Jesu Kuraisbuon ik reoijo.
JAM 1:2 Efnun erar ire ise kafokafo jafak rega ja vajai fian abekva iji nika oimarknum of.
JAM 1:3 Ijefuon maiji ire ise iji bu jon ruak revo jon ja ma vierafejo ijar ifejdiakma ja giriesame ok.
JAM 1:4 Jon ja ma vierafejo ijia jab zazaik. Ja ijegrenki ja uri e damuigin rene mukorigia maturaime keok.
JAM 1:5 Eraneb bu vajai fian abeknum uri nonamimoijo iji nika Godon sirimamene fu ifejdaga ja ma vierafene keok. Ijefuon maiji God fu e ziegafiamo bakin revo fu e fok oijmiaknum ifejdiamo.
JAM 1:6 Regavo ja God kuardakva nika oion ijekma ma vierafene kuardagavo jab uri fu kuardakuai nonk. Erar fu nonekma iji fu do iji fu firame munuag azan ijia siriamo ijeg rek.
JAM 1:7 E ijegreoinon iji fuba vierafero E Bomana ijar fu ifejdakro fub ijeg vierafeno. Ijefuon maiji e iji fu irerag fu reoinon iji fuba mukoi vierafeknum vo unam fuon fu reno iji fuka nonem. Ijefuon e iji fu ijegreoino iji fuba vierafero E Bomana ijar fu ijegreoino ijeg vierafen.
JAM 1:9 God fu e iji erar sinuom ba zarainma iji ifejdame ire kafo vajaknum abe aroikma e iji funi oimarmne. Regavo God fu e iji sinuom zarainma ijefuon sinuom iji una kekma e iji nika oimarmne. Ijefuon maiji e iji sinuom zarainma iji fu sinar iji fu irasemevo rad fu tavan kaname sairmo ijekin. Fu tavan ivuankbe ijia sinuom iji kege na fivake ga fu guamo ijia sinuom fuon iji fun ijia areme vak.
JAM 1:12 Regavo erar fu ire afikin kafo bu fuon rok gavo fuba zazaimo e iji fu iviakma fuka oimarknum ok. Ijefuon maiji ire iji bum fu biesuain revo fu vek giriesame ma vierafeknum oin. Ijefuon rad God fu e ijekin iji bu fu mukoi oijmavo iji kiaga bu unam ma karivako iji fu abe miakafa kiainma iji abek.
JAM 1:13 Regavo ire ise kafob e be biesuakva e iji fuba uri kuai, Ise igi biesiemo iji fu Godri na biesiemno kuaik.
JAM 1:14 Ijefuon maiji ise iji bu e igi nor koiknuvuon vierafejo ijin. Regavo no ise iji uruvana igia vierafeoijo ijar oinuvuon iji kam karoiga no iji ise reoij. No ise iji reoijo ijefuon ise nuvuon ijieb kaven nuvuon iji buka mukor kaniaga bu aoiv.
JAM 1:16 Ijefuon efnun ire ise kafob ja biesiaga jab unam buon ijia jajia vak.
JAM 1:17 Regavo irerag fok God fu vajuomo iji fuka ma ijesugin. Regavo ire ma iji fok fuka e iji varur gufi sanainma iji amarenma ijar kege no vajuom. Fu tavan bog ijegreno revo fu no nuigafuome vako no nakinma ijia karioijo bakin.
JAM 1:18 God fu vierafenma ijia fun vuak fuon ma ijefuon duadok ijia no kege amarduoma non una afijaf ren. Ijefuon noiji ma afijaf amur ijin.
JAM 1:19 Efnun vuak igi mukoi faif. E fok ja bu vuak kuaiga nika migegare vuak iji faif revo ja vuak iji jab una migegare roin kuardia vo jab migegare ziek.
JAM 1:20 Ijefuon maiji erar fu migegare ziemoino e iji fu unam ma iji God fu vierafe fu ijia fiokfuon iji fuba ijeg fiok.
JAM 1:21 Ijefuon ni koikjon mukoi samuanamiknum ire isekma kafokafo ja vierafene reoijo iji aref. Regavo nika oijon fok Godon vuak iji fu abe oijon ijia oinma iji mukoi vierafeknum of. Ja ijegrekva vuak iji oijon ijia tavuamo ijar rad ja karauniak.
JAM 1:22 Ja vuak fuon faimvo ba abe mimatame kegoijo iji jaka koikjo unam jon kam arafiriav.
JAM 1:23 Erar fu vuak fuon faimvo ba abe mimatame kegoino iji fuiji fu e iji fu koikfuon bivar ijia ganamimo ijekin.
JAM 1:24 Fu bivar ijia uikinik fuon ganamime vo rad fu bivar iji areme vakma uikinik fuon fuka migegare ruk.
JAM 1:25 Regavo erar fu vuak iji God fu e fok no karaunuokafa kuarduinma iji mukoi faime ba totegavo fu tavan bog oifuon ijia abedeme mimatame kegoino iji Godri rad daro mame ifejdaga fu unam ma ijia reokfuon.
JAM 1:26 Regavo e be fu vierafero fuiji fu tavan bog God ma vierafeoinon revo fu itit fuon ijia fuka vuak ise fok kuaimoino iji fuka God ma vierafeno bakin gavo fuka koikfuon arafirinamim.
JAM 1:27 Regavo God Asoi nuvuon fu vierafenma iji ijeg. E iji fu God ma vierafeno iji fuka am iji asieasoi bakin iji ga bara amun iji oifian abejo iji samuagdiak. Regavo madu e iji fuka moik igefuon ire ise kafokafo ijieb fu arafirikro fu iji agoimoino ijin.
JAM 2:1 Efnun jaiji ja E Bomana nuvuon Jesu Kurais fu sanainma ijekma fino ja iji ma vierafejo. Ijefuon jab ejon iji ja oijmiavo ijesugin ifejdiagavo e roin jab giame arek.
JAM 2:2 Regavo ni suar igi na bijame kuardiakrejo iji vierafef. Tavan be ja afuime mitin kuaivo ijia e nokarok (2) bu mitin iji faikuai vuain. Regavo e be fu sinuom zarainma ijefuon fu ugon ma iji same vuain. Regavo e be fu sinuom bakin ijefuon fu ugon ise iji same mitin ijia aru vuakma ja izeg rek?
JAM 2:3 Ja uri e iji sinuom ma sainma iji dab akaime kuaga fu fata ma ijia ari fik. Regavo e iji ugon ise sainma iji ja kuaga fu sakin azan ijia ari fik vo baga ja kua fu arir manik.
JAM 2:4 Ja ijegrekva iji fuba marek. Ijefuon maiji jam uikinik buon ijesugin giame ke atame uniav revo oibuon guf iji jaba giavo ijefuon ja isema vierafene rej.
JAM 2:5 Efnun vuak igi e sinuom bakin ijiebuono mukorigia faif. E uruvana sinuom bakin iji Godri aferdiain. Fu aferdia bu fu mukorigia ma vierafevo aganfuon rene unam ma karivako iji fu e iji bu fu oijmavo iji miakafa kiainma iji abek.
JAM 2:6 God fun ijegrevo jaiji ja e iji bu sinuom ba zarainva iji jaba oij miav. Regavo erar ma jon ise rejknum ja aferdia e iji kot faivo ijiebuon vako iji bu e iji sinuom zarainva ijieb ijeg rej.
JAM 2:7 E iji sinuom zarainva ijieb Jesu e iji ja efuon renva ijefuon if bur dab vuak ise fuisina kuaimoij.
JAM 2:8 Regavo ja vuak akai bomana iji bu buk akaij ijia isoime kuai, Vajai jon ja oijmiavo ijeg una e kafo iji oijmiafno kuainva iji ja mukoi game reokva iji ja fuka maradiak.
JAM 2:9 Regavo ja e sinuogin iji ke mukoi oijmiaknum samuagdia ga e sinuom bakin iji jaba mukoi oijmiaknum samuagdiakva iji ja Godon akaij iji abe tuasevo ijefuon jaka ma ise rej.
JAM 2:10 Regavo ja Godon akai fok fu nainma ijia ja akai besum abe tuasekva iji jan akai fok kege tuasev.
JAM 2:11 Regavo God fu kuai, Jab e kafobuon bara turakno kuainma ijar una madu kuai, Jab e kafo kaniakno kuain. Regavo ja e kafobuon bara ba turagavo ja e kafo kaniakva iji ja akai fuon iji kege tuasev.
JAM 2:12 Regavo jon ja kuaiknum rejo iji ni mukoi vierafef. Ijefuon maiji God iji e fok karauniamo iji ire fok ja kuaiknum renva iji fu duna kafokafo kiakfuon.
JAM 2:13 God fu no kege ise nuvuon ijefuon duna kafokafo kuokma fu e iji buba moikigia e kafobuon oifian abenva ijiebuon oifian abekma bakin. Regavo fu e iji bu moikigia e kafobuon ise giame arevo ijigam oijmiavo ijin oijmiaknum oimardiak.
JAM 2:14 Efnun e iji fu kuai fu God ma vierafeno kuain revo unam ma iji fuba abe mimatame kegoino iji fuon ma vierafeno iji fu izeg fu ifejdiame keunak?
JAM 2:15 Regavo na vuak be ijia bijame kuardiakrejo ni faif. E be God ma vierafeno fu kaifuon be fu sinuom bakin vo duok bakin fino fu gakma fu mukorigia anaime kua, God fu a ma redaga a duok iknum vo mukorigia ok. Fu ijeg kuardame vo fuba fuon oifian abene duok kafo ifejdakma vuak iji fu kuainma ijiga iji fu anainma iji bu izeg fu ifejdakva bakin.
JAM 2:17 Ijefuon jon ja ma vierafejo iji fu ijekin ja ire kafo giamevo ba ifejdiakuai vierafejo iji jon ja ma vierafejo iji fuka ma bakin.
JAM 2:18 Regavo e be fu kuok, Jaiji jaka ma vierafeoin revo na ma ijesugin kegoijno kuok. Regavo igia faif e be fu ma ijesugin vierafeoknum vo unam ma iji fuba kegoino iji ja izeg vierafen? Revo igia faif. A ire ma igi no reoijo a iji guokma a ijia izeg no God ma vierafejo ijin giak.
JAM 2:19 Regavo ja ma vierafega God fun besum ijesugiekma iji fuka maren. Regavo kaven ise iji buk bu vierafega God fun besum ijesugin ijefuon bu juvknum oij.
JAM 2:20 Regavo e kufuikin gurie ja iviakma igi no kuardiavo ijia faime vierafef e iji fu ma vierafeoknum vo ba unam ma iji mimatame kegoino iji fuka ba marem.
JAM 2:21 Eburam fu ma vierafe God fu am uifarif iji fu kuainma iji fu vajak. Ijefuon tavan iji God fu kuamga Eburam fu uri farifuon Aisek e iji God fu duadok fuon ijia uifarif vajakfuon iji abe isuf barokrega God fu kuama fu ijia aren. Eburam fu ijegrega God fu iji game Eburam kua, A ma vierafenma ijefuon a e maturainmano kuain.
JAM 2:22 Ja e Eburam fu kenma iji jaba gain revo ma vierafe? Fu ma vierafene uri unam ma iji kega ijar Eburamon ma vierafeno iji fuka ijekma aresren.
JAM 2:23 Eburam fu ijegrega Godon vuak iji bu usuibe buk akaij ijia isoinva iji fuka ijekma aresren. Regavo vuak iji bu isoinva iji bu ijeg isoi, Eburam fu God ma vierafen. Ijefuon God fu fuon oimarme fu abe una fuon ma ijia unama Eburam fuka maturain. Ijefuon God fu Eburam kua, Aiji a kainun mano kuain.
JAM 2:24 Ijefuon God fu e iji bu Jesu Kurais ma vierafejo ijin kege una fuon ma ijia uniamo bakin. Regavo fu e iji bu Jesu Kurais ma vierafeknum vo mimatame unam ma ijia kegoijo fu e iji kege una fuon ma ijia uniam.
JAM 2:25 Eburam fu renma ijeg vo bara amun be baru turamo if fuon Reab fuk fu ijeg ren. Fu e iji bu e Jiusbuon vuak abe e iji gazre giakuai vainva iji oimarknum aferdiain. Regavo madu fu kiamga bu una unam bes isuar subinaime vain. Bara Reab fu unam ma iji fu kenma ijefuon God fu fu abe una fuon ma ijia unain.
JAM 2:26 Ijefuon noba kaven ma ijekma okva iji vajai nuvuon bun aoin. Regavo madu no Jesu Kurais ma vierafen revo noba mukoi mimatame unam ma ijia kegoijo iji nuvuon no ma vierafejo iji fuka aoinva igekin.
JAM 3:1 Efnun e uruvana jab uri Godon vuak iji abe e roin kuardiaoijo ijefuon maiji jan vierafe rad God fu e iji no vuak fuon abe e roin kuardiaoinva iji fuka duna gigikin fok no kuarduok.
JAM 3:2 Ijefuon maiji e fok moikigia oinva iji no ire ma ijesugin reoijo bakin revo noka ire ise fok reoijo. Regavo e iji fu vuak fuon fu kuaimoino iji fu vuak ma ijesugin kuaimoino e iji fuka maturai vo fu madu koikfuon mukoi samuanamim.
JAM 3:3 Ijegvo igia faif. No kajek iji kege maf-os buon ir ijia kiriaga bu irerag no kiavo iji faivknum vo kajek ijia iviaga bu unam no vierafenva ijia vak.
JAM 3:4 Regavo ni madu sisim mamkanuk iji vierafef bu saof azan ijia vako buibur mamkanuk ijieb ufime sisim iji kege kam una unam kafo ijia vak. Regavo e iji sisim iji samuamo ijar in ukakbe ijia kunaime abe una unam fu vakreno ijia unaga sisim iji fu una unam ijia vak.
JAM 3:5 Unam besum ijegvo ir nuvuon iji fu ijekin fu ma ukakbe revo fuka aroikarame vuak kafokafo kuaimoinon. Regavo ni madu nafar bomana be bu ke javo iji vierafef. Bu mian mareg ukakbe iji abe isur ijia kejaga fu nai vake nafar bomana iji naik.
JAM 3:6 Ijegvo ir nuvuon iji fu mian ijekin. Vuak ise fok no ir ijia kuaivo ijar ire fok no rejo iji mian igeg nai bakitem. Ijefuon ir ijar vajai nuvuon fok iji abe una ar mian naino ijia baroin.
JAM 3:7 E ijar fanuf taraiko kafokafo iji kege samuagdiak revo fuba ir fuon iji abe samuakma bakin. Ir fuon iji fuka vuak ise kuaikro rumo bakin ijefuon fuka ma ire kugin fur ire kafokafo kaniaga bu aoiknum sairevo.
JAM 3:9 No ir nuvuon ijia Asoi nuvuon E Bomana iji oimardaknum vo ir besum ijia no una kaifnuvuon Godri fu aikin amardiainma iji kam arafiriame ma isegamia uniav.
JAM 3:10 Ir nuvuon besum ijar vuak oimarvo iji kuaiknum vo una e kafobuon vuak ise iji kuaimoin. Ijefuon efnun iji fu ma isedo noba ijeg reok.
JAM 3:11 Regavo do tit besum ijia do sorkin fuba fateroin arikevo do ma iji fu fateroin arik.
JAM 3:12 Regavo madu kaifnun ire siar iji fuba ajieme dorok atame roin siar kiragavo roin fu makam kirak. Regavo do sorkin iji abesmo iji fuba una do ma abesek. Unam besum ijegvo vuak ise ga ma iji buba ir besum ijia usem ruak.
JAM 3:13 E iji ja ma reoijo iji jab kaifjon roin kuardiame kia no ma reoijo kiak. Anim aregavo ire fok ja reoijo ijesugin adumaduigin nijaidiaoga bu ijia giame vierafero ja ma reoijoro bu ijeg vierafek.
JAM 3:14 Regavo ja oijon guf ijia jaka e kafobuon vuak kuaiknum e roin ziegafiaoknum sinuom zaraiknum ijegreokva jab uri koikjon aroikarame e roin biesiame Godon vuak ma iji kuardiak.
JAM 3:15 Vuak kufui ijekin iji ja kege e roin kuardiaoijo iji fu vuak ma iji varur gufia ari ruainma ijekin bakin. Regavo vuak iji fuka moik igefuon vuak ga kaven ise Setanon vuak revo fu Kaven Akaij ijefuon vuak bakin.
JAM 3:16 Eraneb bu kaifijaf ziegafiaknum ba bu oijmiav revo bun buonkua vierafejo iji ni vierafe ise fok bu ijia anerene vak. Ijefuon ise ijefuon anej iji ijin.
JAM 3:17 Regavo vuak ma iji varur gufia rokon iji fuka vuak mukor. Ijefuon vuak iji fu no nijaiduoga no kaifnuvuon vierafeknum isuar adumaduigin oknum ise nuvuon ganamime areknum ifenami ikreknum vuak ma ijesugin nijainamik. Regavo no vuak kuaimokva noba kaifnuvuon kafobuon ise iji gia kuaimok. Regavo madu noba iti nuvuon ijia vuak ma iji kuaiknum vo una unam ise ijia reok.
JAM 3:18 Regavo e iji bu bijuga bu afuim karioijo iji bur rad afuime kariknum unam ma ijesugin nijaidiaknum reok.
JAM 4:1 E fok ja bijaiknum musikuaivo iji erar kiaga ja ijeg rej? Ja koikjo oijon ijia vajai jon iji uruv vierafeoijo ijefuon ja iji karine musikuaiknum bijaimoij.
JAM 4:2 Ja vierafe jaka e kafobuon sinuom iji karekuai vierafen gavo buba kege ja vajiavo iji jaka e iji kaniame sinuom buon iji karvo. Revo be iji ja madu e kafobuon sinuom karekuai uruvana vierafeoijo ijefuon ja e roina musikuaiknum bijaiv. Ire kafo ja karekuai uruvana vierafenva iji jaba amur God kuavo ijefuon jaba ire iji keg.
JAM 4:3 Regavo ja God kuakva irerag ja vierafenva iji fuba ifejdiak ijefuon maiji irerag ja kuavo iji fu vajiakma ja kege una vajai jon iji fu oimarkfuon ijia reok. Ijefuon God fuba irerag ja kuavo iji mukoi faime ja igiak.
JAM 4:4 Regavo jaiji ja bara iji fu baru fuon ba ma vierafen revo fu baru fuon ijefuon e ani iji oijmiamo ijekin. Ijefuon e guri ka ba vierafenva gurie igia faif ja moik igefuon ire iji oimarknum oijmiavo iji ni vierafe jak ja Godon e ani.
JAM 4:5 Regavo Godon vuak ijia bu isoime kuai, Emabuon kaven God fu kege no vajuinma iji buka unam ise kafokafo uruv vierafen. Regavo iji bu kuainva iji buka ma kuain revo bu kufuimenva bakin.
JAM 4:6 Regavo Godon ma iji fu vajuomo iji fuka ma bomana gigikin ga madu fuka ise igi no vierafejo iji fu asin. Vuak iji fu buk akaij ijia kuai, God fu e iji adumaduigin oijo iji fuon ma iji vajiamo revo e iji aroikaraoijo iji fu nuigafiamo kuain.
JAM 4:7 Ijefuon ni una karoime Godon vuak iji igiaknum vo irerag fu vierafenma ijia keof. Regavo ni giriesame Setan rarega fu ja areme vak.
JAM 4:8 Regavo ni biom God samaij ijia vaga fu biom jon ruak. E guri oi nokarok (2) vierafene tavan bog ise rejo gurie. Ni imut jon ijiga oijon kege do some una karoif.
JAM 4:9 Regavo iviakma igi nika oifian abeknum niraiknum isema oifiaigma kariof. Regavo ja tavan bog kimokva ni niraif revo ja tavan bog oimarkva ni iviakma ise jon ja renva ijefuon oifian abeknum of.
JAM 4:10 Ni Godon nifak ijia adumaduigin karioga fu ja ejafiame ifejdiame kam arordiakfuon.
JAM 4:11 Uviaifnun jab uviaifjon ijiebuon ise iji giame kuaimok. Erar fu e kafobuon vuak iji abe kuai vo ise buon bu renva iji abe kuaimoijo iji bu Godon akaij iji abe tuasev. Ja akaij ijin abe tuasekva ja akaij iji jaba mukoi igavo ijefuon ja e iji akaij iji nijainma iji jaba igiav.
JAM 4:12 God fu fuonkua akaij iji vajuomo ga ise nuvuon iji kege mazim guomon ga fu fuonkua e karauniaknum ga kege vajai fian vajiamo. Regavo jaiji jaka daro bakin ijefuon ja irerafuon una e uviaifjon ijiebuon ise iji kege mazim giav?
JAM 4:13 Vuak nun igi mukoi faif. E roin ja kuai, Ivia vo baga niar no uri va mai mamkanuk ijia useme ijia karine juaivasia besum (1) guf ijia no mon unam kafokafo amardiame mon uruvana kekno kuain.
JAM 4:14 Regavo niar ja izegrekfuon iji jaba vierafen ijefuon maiji jaiji ja mian fu iviakma utuamevo migegare una bakreno ijekin.
JAM 4:15 Regavo ja kuaik, Ni arega E Bomana ijar fuon fu vierafenma ijia ire fok nijaiduoga no ijia karine ire fok rejknum okno kuaikva iji fuka marek.
JAM 4:16 Regavo iviakma jaka aroikaraknum uri koikjon irerag ja vierafejo ijin reoijo revo iji ja ijegreoijo iji fuka ba marem.
JAM 4:17 Ijefuon erar fuka ire ma ijesugin reokafa vierafen revo fuba ire iji fu vierafenma iji mimatame reoinon iji fuka ma ise iji reoin.
JAM 5:1 E guri sinuom zarainva iji ni iviakma vuak igi na kuardiakrejo iji mukoi faif. Ire ise uruvana bu jon roko ijefuon nika niraiknum oifian abef.
JAM 5:2 Ire jon fok bu ja fak zaraivo iji bu muturek revo ugon jon ja savo iji bu kazuib ufusek.
JAM 5:3 Regavo madu ire gord ga sirva jon zin igeg iravo iji bu dedirik. Regavo sinuom iji dedirinma ijieb rad tavan iji God fu fine e fok ijiebuon ise bu renva iji giakfuon ijia bu una karoime mian igegrene ire fok naine ja kam arafiriak. Ijefuon maiji moikigia ja karine sinuom uruvana kege ar jon ijia nainva iji fu mian igeg ja naikafa samuagdiam.
JAM 5:4 Ja ijegrejknum e iji bu jon ik rejo iji jaba mon bu ikrejo ijefuon vajiav revo vuak buon iji bu kuardiavo iji jaba mukoi faiv. Regavo e iji juar jon ijia ire jon kanafum oijo iji bu oifiaigma kume oijo iji God E Bomana iji fun faim.
JAM 5:5 Regavo juaivasia jon fok ja moikigia karinva iji jaka sinuom ma ijesugin karknum oimare oin. Regavo tavan iji God fu fine e fokbuon ise bu renva iji giakma ijia jaiji jaka maf saruigin ijin bu kaname buakuai abe jau dadime samuavo igeg rek.
JAM 5:6 Regavo ja e iji bu ire ise ba buon naoivo iji buon ire ise uruvana ren gavo buba una ja bijuin vo ziegafiain. Regavo madu buba una vef roin ire ise kafo jon rekoga ja kam kaniava bu aoin.
JAM 5:7 Uviaifnun igie ni isuar igia oknum E Bomana fu ruakreno iji samuaf. Ijegvo ni e be fu juar fuon be mene samuame okoga juar fuon iji fuka mukoi duinma iji vierafe. Fu rad kekome vasiaguain revo fuka magame oine are juar fuon iji masinma iji vierafef.
JAM 5:8 Ijegvo ni jak oi mafai vo madu oijon ma ijesugin vierafeknum of. Ijefuon maiji tavan iji E Bomana fu una ruakreno iji fun samairen.
JAM 5:9 Ijefuon uviaifnun vuak ise kafo jab joi kuaiknum ok. Ja ijegrekva God fu rad ise jon ja renva ijefuon duna kafo kiak. Revo ni mukorigia vierafe tavan iji God fu ise nuvuon kege mazim guokfuon iji fun samairen.
JAM 5:10 Regavo uviaifnun ni e iji bu Godon vuak vierafene kuaivo iji bu E Bomana ijefuon if ijia kuaimoinva iji mukoi vierafef. Buka bomana vajai fian aben revo buka oi mafaime karioij.
JAM 5:11 Regavo jan vierafe e iji bu oi mafaime vajai fian abeoinva iji God fu bu ma rediamo. Regavo e Job fu vajai fian aben ga izeg fu oi mafaime oga rad E Bomana fu Job ifejdaknum ma redainma iji jan fain. Regavo E Bomana iji fuka e fok nuvuifuon oifian abeknum vo ifejduomo.
JAM 5:12 Regavo uviaifnun jab vuak jon ja kuaimoijo ijia jab ejon bu aoinva iji kuriame akai kafo nak. Ja vuak kufui roin ga vuak ma roin kuaikva iji jab Godon if iji kurame kuaik. Regavo ja vierafega vuak ja kuaivo iji fu maga ijar ni keno kuaf revo ja vierafega fu vuak kufuiga ni bano kuaf. Ja vuak ma ijesugin kuaimokva God fu rad fuba ja duna kafokafo kiak.
JAM 5:13 Regavo erar vierafega fu afikin uruvana fuon naoikva ni migegare Godon sirimamef. Regavo erar fu iviakma oimarkma ni God abe aroime if fuon abe ajiemne.
JAM 5:14 Regavo erar fu adam abeknum oga ni migegare e sos samuavo iji giaga bu sirimameknum E Bomana ijefuon if ijia oir abe a usemdaf.
JAM 5:15 Regavo e iji bu sirimamejo iji bu ma vierafeknum sirimamekva e adagin iji fu migegare maik. Ijefuon maiji E Bomana fu sirim buon fainma ijefuon adam fuon iji fu barek. Regavo e adagin iji fu ise kafo rega E Bomana iji fu ise fuon game arek.
JAM 5:16 Regavo ni ise jon ja reoijo iji kaifjon roina kuaiknum kaifjon ijiebuon sirimameknum ijegreoga God fu ifejdiaga adam jon fu madiakfuon. Regavo e iji maturaime oino ijefuon sirim iji fu ma darokido fu ire ma kafo rek.
JAM 5:17 Regavo ni vierafe e Eraija fu ema igi no oijo ijeg oin ijefuon fu uruvana ma giriesame sirimamene kuai tavan fuba dakno kuamga tavan iji fu asam uruvana fuba dain.
JAM 5:18 Rene fu madu una sirimamegame tavan iji fu moikigia dame ire fok tavuavo iji bu una mukorigia tavuain.
JAM 5:19 Regavo uviaifnun ni vierafe ejon be fu Godon ma iji nuigafame vainma iji e bes una fu afem Godon ruakma iji fuka marek. Ijefuon maiji erar fu e iji ise reoinon iji afem una Godon ruainma iji fu e ijefuon kaven iji fu guakreno iji keunan. Regavo madu e iji ise reoinon ijefuon ise fok iji fun Godri game aren.
1PE 1:1 Na Fita e iji Jesu Kuraison afasor rene vuak fuon abe oijo iji nar fas igi isoime e iji ja God fu ik anej ijia vierafene ke uniainma iji nijiav. Regavo ar jon ma iji fu varur ijia revo jam moik ijia e kafobuon moik Fotunatas ga Geresia ga Kafadosia ga Esia ga Bitinia ijia karij.
1PE 1:2 God fu vek ik anej ijia ja vierafen ijefuon fu kege uniain. Ijefuon maiji fu vierafega jaiji fun Godon Kaven Akaij ijar ja ke e akairekin ja Jesu Kurais igak. Regavo kavuan fuon ijar kuros ijia joifuon usenma ijar ise jon fikordiain. Regavo God fu tavan bog ma rediame mukorigia ifejdiame samuagdiaga ja afuime kariokfuon.
1PE 1:3 No God ga e Bomana Jesu Kuraison Asoij iji fuon bomana oimarek. Revo fuon fu no oijmuoknum ifejduomo iji fuka bomana ijefuon fu unam iviamkor no ma karivako iji abe muin. God fu Jesu guamga fu keunama fu una urin ijefuon no unam fuon iviamkor ijia jak.
1PE 1:4 Ijefuon maiji no vierafe tavan be no God ire ma kafo fu kaven nuvuon ijiebuon kaf gufia nainma no iji kek. Regavo ire iji fu kaf ijia namduinma iji bu izeg muture ga isere ga barekfuon bakin.
1PE 1:5 No fu ma vierafe ijefuon fu daro fuon ijia no mukorigia samuagduo vake tavan radkma ijia fu no karaunuo barek.
1PE 1:6 Ijefuon jaka ire ijiebuon oimarkfuon revo iviakma tavan ivuankbe igi ja ire kafokafo ijia ja vajai fian abejo iji jaka magaga oimarknum of.
1PE 1:7 Regavo ire iji bu oijon iji ja izeg ma vierafejo ijin biesiame giav. Ire gord iji fu ire ma gavo bu abe mian ijia baroine kafut kanaufuv revo tavan be fu iserme bakren. Regavo jon ja ma vierafejo iji fuka ma bomana ijefuon bu abe ijeg biesiame giak. Ijefuon maiji bu ijegrega jon ja ma vierafejo iji fu ijia navak. Regavo tavan iji Jesu fu una ruakma e fok moikigia oijo iji bu fu gak. Regavo tavan ijia oijon ja ma vierafejo iji fu vek gigikin God fu ja kege arordiame nidosdiak.
1PE 1:8 Ja Jesu Kurais jaba ni jon ijia gain revo jam fu oijmav. Revo madu ja ni jon ijia fu gavo bakin ga jam fu ma vierafejo ijefuon jaka oimadiamdo ja izeg una vuak ijefuon kuaikva bakin.
1PE 1:9 Ijefuon maiji jon ja ma vierafejo ijia God fu kaven jon iji karauniam.
1PE 1:10 Regavo e Godon vuak vierafene kuaivo ijieb bu God fu ja karauniakfuon iji abe kuaimoin. Bu ijeg kuaimoijknum karine kuai ire iji kafu ivez rek revo God fu izeg e fok karauniakfuon bu ijefuon uri giriesame nisaimoin. Bu ijegrejga Kuraison Kaven ijar unam izeg Kurais fu moikigia vajai fian abene gua vo rad fu una uri Godon sanainma ijia jakfuon iji nijaidiain.
1PE 1:12 Regavo Kaven Akai fu kia vuak ma iji fu usuibe kuardiainma iji fu tavan buon ijia rekma bakin gavo fu tavan jon ijia rekno kiain. Ijefuon iviakma vuak ma iji Kurais fu no karaunuinma iji e bu ja kuardiavo iji bu Kaven Akaij iji fu kaf gufia ari ruainma ijefuon daro ijia kuardiain. Regavo Godon kaven dakin iji buk bu vuak besum iji faikuai vierafen.
1PE 1:13 Ijefuon jab oijon karoime una ire kafokafo vierafek revo ni oijon kanafume mukorigia Jesu fu una ro ja mardiakfuon iji mukoi vierafeknum kari vaf.
1PE 1:14 Regavo jaka Godon afijaf igeg nuibakin rene fu igaf revo jab una ire ise kafokafo ja vierafene reruainva iji una rek.
1PE 1:15 Ijefuon maiji God iji fu ja kege uniainma iji fuka maturain ijefuon jak jaka maturaime ire fok mukorigia keof.
1PE 1:16 Regavo madu Godon vuak iji fun buk ijia isoime kuai, Naiji naka maturain ijefuon jak jaka maturaime kegofno kuain.
1PE 1:17 Ijefuon igia faif God Asoijon kaf gufia fino iji ja fuon sirimamejo fu e igi oinuvuon iji kege besum name guokfuon. Fu guoga no ma reoin vo no isema reoijo fu iji guokfuon. Ijefuon tavan ivuank igi ja karikva iji ni e ar kafoko igeg mukorigia God juvknum agordaknum karif.
1PE 1:18 Regavo ik saifjon unam iji bu rejknum kari ruainva iji fuka ma bakin ijefuon izeg ja kari ruainva iji jan vierafen. Unam iji fuka ma bakin revo ja vierafero unam iji fu ja ifejdiame karauniakro ja ijeg vierafen.
1PE 1:19 Regavo iji fui bakin revo fuka Kuraisri kavuan fuon iji irerag igekin ijia abe ise jon iji ja renva ijia karauniain. Regavo Kurais bu maf-sif iviakma ofrenma fu vajai matan ga tat bakin iji e Jius bu kaniame ise bu renva ijefuon God isuf baroidavo ijekin.
1PE 1:20 Fun Godri vek ik anej ijia fu ire kafo fuba amardiainma ijia fu Jesu e karauniakfuon iji abe unain. Regavo Kurais fun iviakma tavan radkma igaijar joifuon roka jan gain.
1PE 1:21 Ja iviakma God mukorigia vierafe ijefuon maiji Kuraisri unam jon ma iji amaren. Regavo Kurais fu guamga Godri keunama fu una uriga fu dab aroime nidoin. Ijefuon iviakma oijon fok ja God fu rad una ro ifejdiakfuon ja iji ma vierafeknum karij.
1PE 1:22 Godon vuak iji tavan bog ijia navako ijar unam iviamkor ma iji abe miain. Regavo ja Godon vuak ma iji ja ma igain ijefuon oijon iji fun mukorigia amardo iviakma jan kaifjon bu God ma vierafejo iji oijmiav. Ijefuon iviakma ni oijon ga daro jon ijekma jon oijmanamif.
1PE 1:23 Regavo unam iviamkor ma iji fu unam iji eofjon iji bu abe miainva iji fu rad barekfuon ijekin bakin. Regavo unam iviamkor ma iji fu Godon ruainma ijefuon fu ijia navak.
1PE 1:24 Ijegvo Godon vuak iji bu usuibe buk ijia isoinva iji fu kuai, Ema iji bu moikigia oijo ijiebuon sanainma iji fu jaoikin bakin. Buon sanainma iji bu ire sinar iji bu tavan ukakbe iravo una anume asuiksame arivo igekino kuain. Regavo Godon vuak iji fuba sinar ijeg iravo una migegare sairek. Regavo fuka tavan bog ijeg navak. Regavo vuak ma igi ijia navakfuon iji fu vuak besum e iji bu Godon vuak abe kuaimoijo iji bu ja kuardiainva ijin.
1PE 2:1 Regavo jaiji ja e iji bu Godon unam ma iji abe miainva ijekin ijefuon ire isekma iji ja reoijo iji aref. Regavo madu jab e roin biesiame vuak kufui kuardiak. Regavo madu oijon iji bu vek ise uruvana ijia naoike jab e roin biesia kia no ma reoijno kiak. Revo jab uri e kafobuon sinuom ijiebuon rieziak ga jab vuak ise iji kuaimok.
1PE 2:2 Regavo jan izeg E Bomana fu ja mardiainma iji jan game aben. Ijefuon izeg am ukakna bu mut buon muinbakin iji ikuai vierafejo ijeg vo ja e God ma vierafejo iji jak kaven jon iji bu Godon vuak ma iji mut igeg ikuai vierafekfuon. Ja mut ijekin iji kaven jon ijiebuon iji ikva kaven jon iji bu daro abe karikin rad ja mukorigia Godna karivak.
1PE 2:4 Jaka Jesuon ruaf. Fu tuar ma igekin gavo e fok bu fu uzame abe akozen. Regavo Godon nifak ijia fuka irera igekin ijefuon fu abe unain.
1PE 2:5 Ijefuon jak ja tuar ma ijin God fu ja kege ar iji Kaven Akai fuon iji fu ijia fivakfuon iji saf. Ijegvo e Jiusbuon e isuf baroijo bu Godon ar ijia arume isuf baroijo ijeg ja oijon iji kege Jesuon duadok ijia isuf igeg God vajaf. Ja ijegrekva God fu oimaikfuon.
1PE 2:6 Regavo Godon vuak bu usuibe buk akaij ijia isoinva iji fu kuai, Nan e bomana nun iji abe unaido fur enun fok samuagdiak. Regavo e bomana iji fu mun ga tuar iji fu ar uf iji kunaim girme manikfuon igekin. Regavo eraneb bu fu ma vierafekva buba juk revo bu Godon nifak ijia aroikaraknum oimarek.
1PE 2:7 Regavo e iji ja Kurais ma vierafejo iji fu irerag igekin ijefuon ja fu ma oijmav. Regavo e iji bu fuba ma vierafejo iji Godon vuak iji bu usuibe isoinva iji fu kuai, E iji bu mun ga tuar ijia ar savo bu vierafero tuar iji fu isero buba abe ar sain revo bu abe akozen. Bu ijeg ren revo iviakma fu Godri tuar iji abe ar uf ijia ru abesenma ijar ar iji kunaim girme manin. Regavo tuar iji fu kuainma iji fu Jesu Kurais E Bomana iji iviakma sos fok bu ijia fuon biduame karijo ijin.
1PE 2:8 Regavo madu Godon vuak iji fu kuai, Rad e roin bu tuar ijar nizukdiaga bu mukoi ari kaniakno kuain. Regavo vuak ijefuon anej ma iji e igi bu Godon vuak ma iji buba vierafene rejo iji bu ari kaniak. Ijefuon maiji God fu vierafenma iji fu bu kam vajai fian miakfuon.
1PE 2:9 Regavo e iji ja ma vierafejo iji ja Godon e rej. Regavo jar e iji bu isuf baroijo bu ikrejo ijeg e ma ijefuon ikrej. Regavo jaiji ja Godon e iji ja fuon ikrekuai fu kege uniainma ijin. Regavo madu God fu ja kege uniainmado jar e iji vuak fuon ma iji kuardiak. Revo fur e iji ja vek nakinma ijia karinva iji fur aferdiame una fuon ma iji sanainma ijia uniain.
1PE 2:10 Ur ja e ma bakin revo iviakma jan una Godon e ma ren. Regavo madu ur God fu jon oifian abene ifejdiainma bakin revo iviakma fuka ja oijmiaknum vo jon oifian abene ifejdiam.
1PE 2:11 Ijefuon kaifnun jaiji jam tavan ukakbe moikigia karik. Revo ar jon ma iji fu vek kaf gufia namo ijefuon na moik igefuon ire ise iji na ejafiame kiavo iji ni mukorigia agordiaf. Regavo ire ise iji bu e ani igekin bu jana bijaikva jon izeg ja God ma vierafejo iji fu kam arafiriak ijefuon nika ire ise iji agordiaf.
1PE 2:12 Regavo ja e iji bu God ba vierafenva ijiena okva ni unam ma ijesugin keof. E iji bu ja musikiaknum vo arafiriakva bu unam jon ma iji ja rejo bu iji giame God aroiknum vo rad God ma vierafek.
1PE 2:13 Ijefuon jaka e fok bu e roin samuagdiavo iji bu vuak kuardiavo iji igiaf. Ijefuon maiji E Bomana fu vierafe jaka ijeg rekfuon. Regavo e Kin iji fu e mamkanuk fok samuagdiamo ijigam e mamkanuk iji fu kege uniainma iji madu bu igiaf. Fu bu ke uniaga bu e iji eraneb ire ise reoijo iji ke vajai fian miagavo eraneb bu ma reoijo iji fu ke arordiame ire ma iji vajiakfuon.
1PE 2:15 God fu vierafenma iji ja bu igiaknum vo mukorigia kekfuon. Ja ijeg kegokva e iji bu nigen iserenva iji bu vuak ba mukoi vierafeknum kuaimoijo iji bu jon izeg ja mukorigia kegoijo iji giame buba vuak ise kafo joisina kuaimok.
1PE 2:16 Regavo e mamkanuk jon iji igiaknum vo jaka mukorigia ke turame nibe karif. Regavo jab jon ja ketura karijo iji kege una ise kafokafo rek revo jaka e Godon ikrejo ijeg karif.
1PE 2:17 E fok agordiavo ejon iji bu Kurais ma vierafejo iji oijmia vo God e darokin iji mukorigia agoiknum oimardaf. Regavo e Kin iji fu e mamkanuk iji samuagdiamo iji agoif.
1PE 2:18 Regavo e iji ja e mamkanuk iji bu ja samuagdiavo ijiebuon ikrejo iji vuak igi vierafef. E mamkanuk jon iji bu ja samuagdiavo iji bu e ma jon ijefuon irerag bu kuardiakva iji nika igiaf. Regavo e ma jon iji bu e ma vo bu ja mardiaknum vuak soisoigin kuardiakva iji igiaf. Regavo jab e ijekin ijesugin igiakgavo madu e ma iji bu ja isema vierafejo vo uri vuak gigikin kuardiakva ni iji madu igiaf.
1PE 2:19 Regavo bu uri ja musikia vo unam ise ja vajai fian abekfuon iji jon rega jaka vek magiaga God ma vierafeknum unam ma ijia revakva God fuka jon oimarek.
1PE 2:20 Regavo ja ise rega bu ke vajai fian miaga ja isuar vajai fian abekva bu irerafuon ja ke arordiak? Regavo ja ire ma ijesugin rega bu kam vajai fian miaga ja ijefuon isuarigia vajai fian abekva unam ijeg ja rejo iji Godon nifak ijia fuka ma mukor.
1PE 2:21 Regavo unam ijeg vajai fian abejo iji Godon unam iji fu ja miainma ijin. Regavo Kurais fu vajai fian abenma iji fu mimatame ja nijaidiain ijefuon jak uri diak makai fuon ijia jaf.
1PE 2:22 Fu ise kafo ba ren ga vuak kufui kafo ba kuain. Regavo e iji bu uri fu musikuame vuak ise kuardain gavo fuba una vef roin vuak ise ijeg kuardian. E iji bu uri ire ise uruvana fuon reja fu uri ijefuon vajai fian aben. Regavo fuba vef roin una ijeg buon rekafa vierafen revo fum afikin iji fu abe God e iji fu ise fok ke mazim giamo ijefuon imut tat ijia abeden.
1PE 2:24 Kurais fu ijegrenma ijia fu ise nuvuon ijefuon afin iji dab vajai fuon ijia dabme kuros ijia guain. Fu ijeg kuros ijia guainkin ja tavan bog ise iji ja rejo iji ja arega una ma karivakafa fu ijeg ren. Iji fu vajai fian abenma ijia fu unam jon iji ja una nivek karivakfuon iji amardiain.
1PE 2:25 Ur ja Kurais ba vierafenva ijefuon ja uri maf-sif bu tavan uruvana sauivo ijeg rej revo iviakma jan una karoim Kurais e iji fu kaven jon samuagdiamo ijefuon ruain.
1PE 3:1 Regavo bara iji jak barufjon iji mukorigia igiaf. Ja ijeg igiaikin barufjon iji eraneb bu Godon vuak ma iji ba ma vierafejo iji bu unam jon ma iji ja rejknum karijo ijia giame oibuon karoime una God ma vierafek. Regavo ja vuak kafo jab bu kuardiak revo nin God agoime unam jon ma iji izeg ja kariknum rejo ijia bu giak.
1PE 3:3 Regavo bara iji jab vierafero bu e kafob giakuai uri aroikarame nigen jon iji bijavo er rene ugon ma ni kafokafo sak.
1PE 3:4 Regavo ja jon amarkarakfuon iji ja oijon iji fu tavan bog ijia navakfuon ja iji vierafene amarkarakfuon. Jab uri vuak gigikin kuai vo zienamik revo jaka isuar kariof. Regavo bara iji fu ijegrekma kaven fuon iji fu Godon nifak ijia fuka irerag igekin rek.
1PE 3:5 Bara iji usuibe bu God ma vierafene akai oinva iji bu vajai buon ijia amarkarainva bakin revo buka oibuon ijia amarkaranamin. Ijefuon maiji buka barufijaf iji mukorigia oijmiaknum igiain. Bara be iji Sera bara ijar barufuon Eburam igame kua e bomanakno kuain. Regavo jaiji ja Seraon afijaf ijefuon barufjon bu ire kafo jon rega jab juk revo jaka ire ma ijesugin ref.
1PE 3:7 Regavo madu baru iji ja barafjon izeg samuagdiakfuon iji jan vierafen. Ijefuon ja barafjon ijiena karikva ni mukorigia buna vuak soisoigin kuaim oimarknum karif. Ijefuon maiji bu bara zazaikin revo baru iji jai bakin. Regavo be iji bu izeg ja Godon ma karivako iji ja abenva ijeg buk bu Godon ma karivako iji abek. Ja barafjon iji ijeg oijmiakva sirim jon iji ja Godon amejo iji fuba faime arek.
1PE 3:8 Regavo igia faif e fok jaka oi besum rene bogdiaik igeg mukorigia oijmanamif. Regavo oi besum vierafene e kafobuon oifian abeknum karif. Regavo madu jaka adumaduigin oknum kaifjon roin ijin oij miame duok ivajuinamiknum karif.
1PE 3:9 Regavo e kafo bu ire ise kafo jon rekva jab una vef roin buon ise rek. Regavo bu vuak ka ma ise iji joisina kuaikva jab una ijeg vef roin kuardiak. Bu ijegrekva ni una buon oifian abene ifejdiame buifuon sirimamef. Ijefuon maiji ja Godon ire ma kafo kekfuon fu ijefuon ja karauniain.
1PE 3:10 Regavo Godon vuak iji bu usuibe buk ijia isoinva iji fu kuai, Erar fu mukorigia oimarknum fivakafa vierafekma e iji fuba vuak ise kafokafo kuai vo fuba vuak kufui kafo kuaimok.
1PE 3:11 Regavo madu erar fu vierafe fu oimarknum fiokma e iji fuba ire ise kafo e kafobuon revo fuka ire ma ijesugin reokfuon. Revo fu madu unam izeg fu kaifijaf kafona afuikfuon iji giriesame rekfuon.
1PE 3:12 Ijefuon E Bomana ijefuon ni iji fu e iji bu fu ma vierafene unam ma ijesugin reoijo fu iji fine gia vo sirim buon bu amejo iji faim. Regavo e iji bu ire ise rejo iji fu kege vajai fian miam.
1PE 3:13 Ijefuon ja giriesame uri ire ma ijesugin rekva erar ja kege vajai fian miak?
1PE 3:14 Regavo ja ire ma ijesugin rega e iji bu ja kege vajai fian miaga ja vajai fian abekva God fu jon oimarme ja mardiak. Ijefuon eraneb ire ise kafo jon rega jab ijefuon uruv vierafene uri oifian abek.
1PE 3:15 Regavo jaka oijon ijia Kurais E Bomana iji agoime ire fok fu kuardiamo iji igame reof. Regavo tavan kafo eraneb bu jon ja ma vierafejo ijefuon anej ma iji faikuai kiakva jaka samuaikin ja vuak ijefuon anej ma iji kuardiak.
1PE 3:16 Regavo ja kuardiakva ni isuar agordiame adumaduigin kuardia vo tavan bog ire ma ijesugin rejknum of. Ja ijegrekva e iji bu jana vuak ise ka gigikin kafo kuardiame ifjon iji kam iserekva iji bu una koikbuon juk. Ijefuon maiji ja Kuraison unam ma ijia jame reoij revo bur vuak kufui iji una joisina kuaiv.
1PE 3:17 Regavo ja ire ise kafo rene ijefuon vajai fian abekva iji ja koikjo ise renva ijefuodo iji fun ijin. Regavo ja ma ijefuon renva ijia ja una ijefuon vajai fian abekva iji fun Godri vierafe fuon ijia reno ijefuon iji fun maren.
1PE 3:18 Ja unam ijegrekva iji ja Kurais fu renma ja ijeg rej. Regavo Jesu e iji ire ise kafo fuon naoivo bakin iji fu e igi bu ise rejo ijiebuon ise iji fikorediakafa fu tavan besum efkin buifuon guain. Regavo fu guainma iji fu ja aferdiame una Godon ruakafa fu ijefuon guain. E moikigia oinva ijieb kanavga fum vajai fuon ijesugin guain revo Kaven Akaij ijar kuama fu una uri nivek fin.
1PE 3:19 Regavo madu Kaven Akaij ijefuon daro ijia Jesu fu va e iji aoinva ijiebuon kaven iji bu dibur karinva ijin izeg fu renma iji kuardiain.
1PE 3:20 E iji Jesu fu vuak kuardiainma iji fu e iji bu tavan iji Noa fu sisim sako bu Godon vuak iji uzainva fu e ijiebuon kaven iji kuardiain. Noa fu sisim bomana iji amarekoga e iji bu vek e rene karinva ijia bu Godon vuak iji buba igain revo God fuba migegare bu kam arafirian revo fu bu samuagdiain. Regavo rad bu e sibank e eit (8) ijeg vuak fuon iji igain ijefuon ve bomana fu dame do nafuima e iji buba do in.
1PE 3:21 Regavo e sibank iji bu do firamo ijar karauniama buba do inva iji fu do iji ja ruaiga fu ise jon ijia karauniamo ijia bijame nijaidiainma igekin. Regavo do iji ja ruainva iji fu doma igi ja ruaiga fu tat somo ijekin iji fu bakin. Regavo do iji ja ruainva ijar ja nijaidiainma iji ja fun daro iji Jesu Kurais fu guame una urinma ijar ja God fu vajai fian miakfuon iji jan daru abeden. Revo iji fu madu ja nijaidiamga ja una karoim Godon ruaknum vo kua fu oijon ijia ise ijin somdiakfuon.
1PE 3:22 Regavo iviakma Kurais fun kaf gufia Godon ij maink ijia ar bomana be abe fin. Fu ijia fikok Godon kaven dakin ijiga kaven mamkanuk kafo bu kaven roin samuagdiavo iji bu fu igav.
1PE 4:1 E ise ijiebuon imut tat ijia Kurais fu vajai fian aben. Ijefuon ja unam besum iji fu vierafenma ijeg giriesame jak fu renma iji vierafek. Ijefuon maiji erar fu vajai fuon ijia vajai fian abekma fu una ise rekma bakin.
1PE 4:2 Ijefuon tavan iji ja moikigia karinva iji jab arekega ise ijar oijon fok rarek revo jaka God irerag fu vierafenma ijia rejknum karif.
1PE 4:3 Vuak igi na kuardiavo ijefuon maiji ire iji e bu Godon vuak kafo buba fainva iji bu rekuai vierafenva ijeg jab rek. Regavo jan usuibe ire igekin iji jan rene ruain. Ja uri barubara oknum e kafobuon bara turaknum jaka uri siroij igeg reoin. Regavo ja madu do kugin iji ine nigen iseren. Regavo ja iro ijo ijia jaka duok uruvana ine ijar defiamga ja ire kekfuon iji jaka nui girdiain. Regavo madu ja besum afuime do kugin ka uruvana ine moik ijia maf igeg jiekeoknum vo jaka uri god kafokafo bu e imut igia amardiainva ijiebuon sirimamej.
1PE 4:4 Regavo iviakma ire ise fok ja reoijo iji fuka baren. E iji bu Godon vuak kafo ba fainva iji bu tavan bog ire ise kafokafo ijeg rej. Regavo jaba una bu jajia bu giakva buka oiserdiak. Jaba unam iji bu kegoijo ijia jajiavo ijefuon bu ja vuak ise kuardiaknum vo God jon iji ja vierafejo iji abe kufui ik.
1PE 4:5 Regavo God fu iviakma samuaknum fine izeg bu rejo iji kege mazim giam. God e iji fu fine e nivek karinva iji abe vo e iji bu vuak fuon faime oinva ijiebuon ise iji ke mazim giakafa fin. Revo iji fu e fok moikigia oijo ijiebuon ise iji fine ke mazim giak.
1PE 4:6 Ijefuon Jesu Kurais fu vuak ma iji abe e iji bu usuibe ve dame do firama bu do ine aoinva ijiebuon kaven iji kuardiain. Bu vajai buon iji bun aoin revo bu Jesuon vuak iji faime ijia jakva kaven buon bu izeg God fu fioino ijeg kariokfuon.
1PE 4:7 Regavo efnun tavan iji ire fok moikigia naoivo iji bu barekfuon iji fun samairen. Ijefuon ni uri ni naraknum vo koikjon mukor samuanamikin ja giriesame Godon sirimameknum karik. Regavo ire ijia ka ma bomana iji nika mukorigia jon oijmanamif. Ja ijeg oijmanamikva ja kaifjon iji bu jon isema rekva ja magiaga una bu oijmiaknum karivak.
1PE 4:9 Regavo madu kaifjon iji oimarknum aferdiame ar jon ijia uniaf revo jab una ijefuon kuaik.
1PE 4:10 God fun daro kafokafo vajuoma no ik kafokafo reoij. Ijefuon noka daro iji fu e besubesum no vajuinma iji kege una e roin ifejdiakfuon.
1PE 4:11 Ijefuon erar a Godon vuak iji e roin kuardiaokma ni Godon daro ijia vuak fuon ma ijesugin kuardiamne. Regavo erar a e roin ifejdiakma ni daro fuon iji fu mainma ijin abe e iji ifejdiamne. Regavo ire fok ja ijegreokva e iji bu Jesuon if ijia God nidoik. Regavo na vierafe bu tavan bog Godon oimare ga fur daro fuon ijia ire fok samuagdiame vak. Mare.
1PE 4:12 Ijefuon efnun vajai fian iviamkor iji mian ijeg jakuomo ni kafokafo bu jon roko iji bu ja biesiame giak roko ijefuon jab giaga fu oiserdiak.
1PE 4:13 Jaka unam izeg Jesu fu vajai fian abenma ijeg jak vajai fian abekva ni oimaref. Regavo ja ijegrekva rad tavan iji Jesu fu una ruakma ijia Godon sanainma iji fu samafrega jaka uruv oimarek.
1PE 4:14 Regavo e roin bu Jesu Kuraison if ijefuon ja musikia vo vuak ise kuardiakva nika oimaref. Ijefuon maiji Godon Kaven iji ka ma sanainma iji fu jana fin.
1PE 4:15 Regavo jab e kania bu aoik ga jab niesa ga jab unam ise iji rek revo madu jab uri e kafobuon ik iji rareme rek. Ja ijegrene uri ijefuon vajai fian abekva iji ja koikjon isema ren.
1PE 4:16 Regavo ja Jesuon e rejo ijefuon ja vajai fian abekva jab iji vajai fian abejo ijefuon jufabek revo jaka Godon oimarme vierafero no Jesuon if iji abenva ijefuon no ijeg vajai fian abenvaro.
1PE 4:17 Ijefuon tavan iji moikigia ire kafokafo no renva iji God fu guokfuon iji fun aneren. God fu efuon bu fu ma vierafejo iji unam buon kafokafo bu rejo iji fu amur giakfuon. Regavo God fu fine unam nuvuon kafokafo no rejo iji guokfuon iji fun iviakma nuvuon anerekma fu rad e iji bu Godon vuak iji bu kuardiaga buba faivo iji fuka unam ma ise ijia vajai fian abek.
1PE 4:18 Regavo Godon vuak bu usuibe isoinva iji fu ijeg kuai, God fu e iji bu if fuon ijia vajai fian abenva iji karauniakafa vierafen revo fuka ma gigikin gakma e iji buba ma vierafene ise reoijo iji bu izeg rek?
1PE 4:19 Ijefuon e iji bu vajai fian abejo iji fun God fu vierafenma ijin. Ijefuon unam ma iji ja rejo iji jab aregavo ka vajai jon ijiga oijon fok kege una God e iji fu ja amardiame samuagdiamo iji vajaf.
1PE 5:1 Ijefuon na e mamkanuk sos akai samuavo iji na ja ejafiame kia. Nak na ejon bomana be nar Kurais fu vajai fian abenma iji gain. Regavo madu tavan iji fu una ruakma ijia God e bomana fuon ma iji sanainma ijigam daro iji fu kege e bu Kurais ma vierafejo iji nijaidiakma nak na ijia jana fateroin abek.
1PE 5:2 Regavo e iji sos samuavo iji ja e roin samuagdiavo iji mukorigia e iji fu maf-sif iji samuagdiamo ijeg jak Godon e iji samuagdiaf. Regavo jab vierafero bu eb kuardiaga ja ijesugin rekuai vierafejo revo jaka oijon ijia ma vierafene mukoi oi mafaime ref. Ijefuon maiji God fu vierafe jaka ijeg rekfuon. Ja e iji samuagdiakva jab oi isema vierafene mon ijesugin karkuaime ik iji rejo revo jaka oijon ijia ma vierafene mukorigia ik iji reof.
1PE 5:3 Jab koikjo kam e mamkanuk rejknum uri bu kam e ukakna igeg vierafek. Regavo jaka unam ma ijesugin nijaidiaga bu ijia giame buk ijeg reok.
1PE 5:4 Ja ijegrekva E Bomana iji fu ja e mamkanuk iji ja samuagdiamo iji fu tavan iji fu una ruakma fu izeg ja fuifuon mukorigia ikrenva fu iji giakma fu fuon sanainma ma iji fu barekfuon bakin iji abe miak.
1PE 5:5 Ijefuon e nivek iji e makin jon iji igiaf. Regavo jaka tavan bog adumaduigin oknum vo jon mukoi ifenamiknum of. Ijefuon maiji Godon buk iji bu usuibe isoinva ijia fu kuai, God fu e iji adumaduigin oijo iji fu mardiakgavo e iji bu aroikaraoijo iji fu nuigafiakno kuain.
1PE 5:6 Ijefuon jaka God E ma ka darokin iji fu tavan bog ja ifejdiaknum samuagdiamo ijefuon nifak ijia adumaduigin of. Ja ijegrenki tavan iji God fu vierafekma ijia fu ja kege e mamkanuk rek.
1PE 5:7 Ijefuon oifian jon fok kege una God vajaf. Ijefuon maiji fuka tavan bog ja vierafeknum samuagdiamo.
1PE 5:8 Regavo jab nitubaikgavo uri ni narame koikjo samuanamime nisaiknum karif. Ijefuon maiji fanuf raion ka ma kuriai e jakia bua ino iji fu vasiaguaga fu kurimoino ijegvo e ani jon Setan fu ijeg jon izeg ja Jesu ma vierafejo iji kam iserekafa oin.
1PE 5:9 Ijegvo jon izeg ja ma vierafejo iji jab arek jaka ijesugin vierafene gireknum vo Setan iji nuigafaf. Ijefuon maiji jan vierafe e kafo bu Jesu ma vierafejo ar iror igia karinva iji buk tavan kafo bu unam ise ijekin ijia vajai fian abej.
1PE 5:10 Ja tavan ukakbe vajai fian abe vo rad God iji fu tavan bog e mardiamo iji fu una ja kege ire fok ja vajai fian abene vajai fiaigma oinva iji amarediak. Regavo madu fu daro gigikin iji ja ijia girme irekfuon iji miaga ja rad izeg ja Jesu ma vierafejo iji jab arek. Regavo fun Godri ja kumedo ja una Kuraisna besum rega fu sanainma fuon ijia navako iji abe miakfuon.
1PE 5:11 Regavo na vierafe Godon daro iji fu ire fok samuagdiamo iji fu tavan bog ijia na vak. Mare.
1PE 5:12 Regavo efnun fas ukak igi na e Sairasri ifejdiema na isoin. Revo e Sairas fu uviainuvuon be fu God ma vierafeno. Regavo fas igi na isoime nijiavo iji na vierafe na ja ejafiame kuardiav. Revo vuak fok na isoinva iji izeg God fu e fok ma rediamo iji fu vuak ma ijesugin ijefuon na iji isoin. Ijefuon ni vuak iji kege ma vierafene darokma kuniaime karivaf.
1PE 5:13 Regavo e igi God fu jana besum ke uniainma bu ai Babiron igia karine Jesu ma vierafejo ijiga e be na ifejdiemo e Mak bu ja anadiain.
1PE 5:14 Ijefuon jaka e iji Kurais ma vierafejo bu anainamivo ijeg oijon guf ijekma anainamiknum karif. Regavo na vierafe God fu e iji ja ijia karine Jesu Kurais ma vierafejo iji ifejdiaga ja afuime karikfuon.
2PE 1:1 Na Saimon Fita afasor Jesu Kuraison ikrejo nar fas igi isoime e iji ja ma vierafejo besum igi no abenva ijekin iji ja abenva iji ja nijiav. Regavo ma vierafejo nuvuon fuka ma irerag igekin iji Jesu Kurais God nuvuon fu e karauniamo iji ga e ka maturain ga e mukor ijefuon duadok ijia abe muin.
2PE 1:2 Ijefuon na sirimamega ja God ko Jesu Kurais E Bomana nuvuon ijiebuon unam iji vierafega God fu tavan bog ja ma rediame mukorigia ifejdiame samuagdiaga ja afuime karikfuon.
2PE 1:3 Regavo no God ma vierafenva ijefuon fu daro ijia ire fok no kege moikigia unam iji God fu oimaike no ma karivakfuon iji fun vajuin. Regavo fur no kumenmado no sanainma fuon ga unam ma iji mukoi fu fino iji fateroin abe karij.
2PE 1:4 Regavo sanainma fuon ijeko daro fuon ijiebuon duadok ijia fu e God ma vierafejo iji ire ma iji fu vajuokafa kuinma iji fun kege vajuin. Fu ijegrenkin e iji moikigia ise vierafeknum reoijo iji buba no kege arafiruokfuon revo bu arega no unam ma fuon iji fateroin abene vo izeg fu fino no madu ijeg kariokfuon.
2PE 1:5 Regavo God fu ijegrenma ijefuon ja giriesame fu ma vierafeknum mukorigia akai karif. Regavo madu nika God irerag fu vierafenma iji vierafef. Regavo jaka vajai jon fu oimaikro ja vierafene reoijo ijia mukorigia samuanamikfuon. Tavan ise oi fiaigin iji roga jaka giriesame ma vierafef. Regavo kaifjon bu God ma vierafejo iji oijmiaf. Regavo jaka Godon unam ma ijia karioknum e fok mukorigia oijmiaf.
2PE 1:8 Ja ire fok na kuardiainva iji mukorigia tavan bog mimatame rega bu oijon ijia ofrene uruvana rek. Ja ijegrekva jaiji ja E Bomana Jesu Kuraison e mukor ik rejo ijin rek.
2PE 1:9 Regavo e be erar ba unam iji kegoino iji fu e iji ni fuon fuka nakin vo zuriainma ijekin. Ijefuon fu izeg Kurais fu guame ise fuon somdainma iji game vierafekma bakin.
2PE 1:10 Ijefuon efnun nika giriesame Godon unam ma iji na kuainva iji vierafene mimatame reoga e bu iji giame vierafero jaiji ja e kafo Godri kumene ja karauniamga ja efuon renro bu ijeg vierafek. Regavo ja tavan bog ijegrejknum okva ja zazaime una ise kafo rekva bakin. Regavo rad ja aoikva E Bomana Jesu Kurais e iji fu e fok karauniamo ijar ja oimarknum anadiame aferdia ar fuon maiji fu samuamo iji tavan bog ijia karivako ijia uniak.
2PE 1:12 Vuak igi na kuardiavo iji jan amur vierafene giriesa uruvana mimatame kegoijo na iji una kuardiav. Regavo ik iji fu nun ijefuon na vek nivek fijo ijia na giriesa ja soisoime kuardiaga ja ire ijin mukorigia vierafekfuon.
2PE 1:14 E Bomana Jesu Kurais fu na iviakma igef guakfuon iji fun samakaf nijaidien. Ijefuon na giriesame unam igi nijaidiaga ja vierafekin na guaga ja ire iji jaba rubdiakfuon.
2PE 1:16 Regavo tavan iji no kuardiame kia Jesu Kurais fuka ma e darokin ga fu darokma una moikigia ruakfuon iji no vuak kufui iji kuardiainva bakin. Regavo vuak iji noka vuak ma ijin kuardiav ijefuon maiji no ni nuvuon ijia daro fuon ga ma fuon iji non giain.
2PE 1:17 Regavo tavan iji God fu Farifuon abe aroi vo sanainma fuon fu abe uruor akaij ijia mainma iji no funa ijia irekoga fu abe main. No ada nuvuon ijia Godon ir darokin iji fai fu kume, Farinun besum iji naka fuon bomana oimarvno kumen.
2PE 1:19 Ijefuon noka iviakma giriesame e Godon vuak vierafene kuaivo iji bu usuibe kuainva iji ma vierafekfuon. Regavo jak jaka vuak iji giriesame mukorigia vierafef. Ijefuon maiji vuak iji fu ire ikuosaij iji ar nakinma ijia sanamo ijekin. Regavo vuak ijar fu ja ifejdiaga ja unam ma ijiga ise iji giaknum karivake tavan bomana iji fu ruakfuon. Regavo Jesu Kurais fu ire mujur iji tavan afarekrega fu ajiemo ijekin. Ijefuon fur oijon ijia saname ifejdiaga ja ire fok God fu reno iji mukorigia giame vierafek.
2PE 1:20 Regavo ire iji ka ma bomana mukor iji vierafekfuon iji igin. E iji Godon vuak abe e nijaidiaoijo iji bu Godon Kaven ijar ifejdiaga bu kuaimoin. Regavo e besum be fu erar daro fuon ijia ire iji rad rekreno ijefuon ma iji nijaidiakma bakin. Regavo e iji Godon vuak abe kuaimoijo buba vuak kafo daro buon ga oibuon ijia vierafene nijaidiaoinva bakin revo fun Godon Kaven ijar bu ifejdiaga bu Godon vuak iji nijaidiaoin.
2PE 2:1 E Isrerko bu karijo uf ijia efarif roin bu amur kufuime kuai bu Godri kiaga bu vuak fuon kuaimoijo kuai. Regavo unam besum ijeg iviakma ja afuime karine roko ijia e kafo bu kufuimene vuak iviamkor kafo nijaidiakfuon. Regavo e iji eraneb bu isuar sauime vuak buon faikva iji buka unam ma iji uzak. Regavo vuak iji bu nijaidiavo iji bu Jesu Kurais fu ise nuvuon ijefuon kuros ijia guainma iji buba ma vierafejo ijefuon God fu bu kam arafiriaken.
2PE 2:2 Ja e uruvana God ma vierafejo iji ja unam ma iji ja uzame una unam buon iji ka ma ise iji jufdiakfuon ja ijia jajiame reoij. Ja ijegrega e iji God ba ma vierafejo bu iji giame vuak joisina kuaime unam izeg God ma vierafejo iji dab kufui ikfuon.
2PE 2:3 Ijegvo e iji vuak kufuimene kuaimoijo iji buka buonkua vierafejo ijefuon bu kufuimene ja biesiame mon jon karkfuon. Usuibe God fu e ijekin iji fu kege arafiriakafa vierafene fu kuainma iji fuba ruin revo fu vek vierafedo fu rek.
2PE 2:4 Regavo ni vierafef God fu usuibe anera iji ise renva iji kam arafiriain ijefuon irerag fu kuainma iji fu rek. Fu anera iji ke tome ke ar ise mian naino nakinma ijia kozega bu ijia naoivdo tavan radkma ijia God fu kege mazim giakfuon.
2PE 2:5 Regavo madu usuibe God fu e iji ba mukoi fu vierafe gavo bu ire ka ma ise iji rejga fu kam arafirianma iji jan vierafen. Iji fu arafirianma iji fu ve bomana kuama fu dame do firamga e fok bu do ine aoikoga fu Noan afijaf ijiga barafijaf iji karauniain. Revo e Noa fu vuak ma ijesugin kuardiaknum ire ma iji rene maturai fioin ijefuon God fu keunain.
2PE 2:6 Regavo madu God fu ar mai Sodom ko Gomora guf ijia mian kuama fu e fok nainma iji jan vierafen. Unam iji fu renma ijia fu e iji God ba ma vierafen revo bu ire ise uruvana reoijo iji kam ijegrekafa fu iji nijaidiain.
2PE 2:7 Regavo madu fu ijia e Rot e unam mukoi kegoino iji keunain. E Rot fu bomana oifiain ijefuon maiji e mai Sodom ko Gomora karinva iji buba Godon akai ja ga bu unam ise kafokafo uruvana ren.
2PE 2:8 Regavo e mukor Rot fu buna ijia Sodom fiknum tavan bog ire ise fok buba jufdiaknum rejo fu iji giama fu bomana e ijiebuon oifiain.
2PE 2:9 Regavo ni vuak ma igi faif. E Bomana Jesu Kurais fu aresredo fu e iji bu e iji God mukoi vierafejo iji kam arafiriaga bu vajai fian abejo iji karauniakfuon. Regavo ni vierafef izeg God fu mai Sodom guf ijia e iji kege arafirianma ijeg no vierafe fu e iji ise reoijo iji fu tavan radkma ijia kam arafiriak.
2PE 2:10 Ijegvo God fu e iji bu vajai buon kam ise ijia rejknum barubara fudainamime ise vierafe revo God ba igaknum e mamkanuk bu samuagdiavo ba igiavo iji kam arafiriak. Regavo e iji bu aroikarame vuak kufuimene kuaimoijknum ise rejo iji bu juvo bakin. Regavo bu madu kaven sanainva iji kaf ijia karijo iji bu agordiakva bakin revo buka vuak ise buisina kuaik.
2PE 2:11 Regavo anera iji buk buka ma darokin e iji vuak kufuime nijaidiavo iji asidiain. Regavo buba e iji vuak kufuimejo ijiebuon if iji kege E Bomana ijefuon nifak ijia arafiriavo bakin.
2PE 2:12 E iji vuak kufuimene nijaidiavo iji bu fanuf taraiko ijeg ba vuak vierafeknum ire kafokafo rej. Fanuf iji bum nafega bu ofriaga rad bu kaniak. Ijegvo e iji vuak kufuimene nijaidiaoijo iji God fu bu kam fanuf ijeg arafiriak. Ijefuon maiji bu vuak iji buba mukoi vierafenva iji kam kufuimene isema kuaimoij.
2PE 2:13 Regavo madu bu e roin vajai fian abe miavo ijefuon God fu bu kege vajai fian miaga buk vajai fian abekfuon. Bu tavan keko sanainma ijia bu ire ise kafokafo bu vajai buon oimaikfuon iji rene oimarev. Bu ijeg unam ise kafokafo rejo ijefuon bu e iji ja e God ma vierafejo ijiena afuime duok iga e kafo bu iji giakva jaka bomana jufdiakfuon.
2PE 2:14 Regavo bu ni buon bu bara iji nikajiaknum oi isema vierafe ga ebuon bara turavo iji buba arek. Bu e iji zazaime God isema vierafejo biesiaga bu una karoime bu jajiak. Regavo oibuon bu sinuom ga mon bomana vierafejo ijar irtoijen ijefuon ijieb bu samuagdiak.
2PE 2:15 Bu unam ma iji arir iji bun unakome una unam ise ijia vain. Bun unam e Beram Beon am iji jame vain. Fu mon uruvana kekafa bomana vierafen ijefuon fu Godon e Isrerko iji kam ise kafo buon rega bu God ijia arekafa fu iji ren. Fu ijegrega God fu maf-donki vuak kuaimo bakin iji vuak vierafe mamga fu vuak kuaim e Beramon ise fuon ijefuon musikuame unam ise fu rekafa vierafeoino iji bijukurain.
2PE 2:17 Regavo e ijegreoijo iji bu do ukakna iji bu migegare naruvo ijekin. Regavo madu bu ire vana iji fu ve bomana dakafa nafui ko buibur fu ufime dakara vako ijekin. E ijekin iji God fu ar buon iji fu ise ma nakinma ijia buifuon amardiain.
2PE 2:18 Regavo e iji bu ise buon bu reoijo ijefuon buka aroikarame kuaiv revo vuak buon fu ma bakin. Regavo bu e iji iviakma oi karoime ise buon areme una God ma vierafejo iji kuniairuv. Bu kuniairume una unam ise usuikor vajaima iji fu oimaikfuon bu reoijo ijia uniav.
2PE 2:19 Regavo bu e iji iviakma oi karoime God ma vierafejo iji kia, Ja no jajuokva no ja karauniaga ja Godon akaij iji ja javo iji ja arega jaka dazme karikfuon revo ire kafo buba ja anu kuniaik. Regavo buka koikbuon ise reoijo ijefuon bu ise ijar bu anu kuniaime samuagdiam. Irerag ijar e be kuaga fu reno iji ire ijar e iji anu kunaim.
2PE 2:20 Regavo e kafo ur unam ise kafo reoijo iji arega una Jesu Kurais ma vierafejga Kuraisri ise buon somdiame karauniain. Fu ise moik igefuon ijar bu anu kuniaime bu kam arafiriamo ijia karauniain. Regavo iviakma bu una ise rejo ijefuon ise ijar bu aferdiama buka una Godon nifak ijia bu ise ur bu renva iji asime ka ma iseren.
2PE 2:21 Bu Godon unam ma iji ba ur vierafekva iji fun maren. Regavo bu God ur vierafene rad una karoime Godon vuak akaij iji uzavo ijefuon God fu bu kege ma arafiriak.
2PE 2:22 Ijegvo vuak kafo bu e ijekin bijame kuaivo iji bu ma. Be bu bijame kuaivo iji siroij fu jer foine una koikfuon in. Regavo be iji ire maf iji fu do ruaime marenma iji fu una tor ijia uram. Fanuf nokarok (2) iji no bijiame kuaivo ijegvo e iji bu una ire ise iji no kuaivo iji reoijo iji buka biom ur bu renva iji asime ma iserej.
2PE 3:1 E kaifnun maigie fas igi na rir iji una isoime ja nijiav. Fas nokarok (2) iji na vuak kuardiaga ja vierafene unam ma ijesugin arir okfuon.
2PE 3:2 Na ja ejafiame kuardiaga ja vuak iji e akai iji Godon vuak vierafene kuaivo bu kuardiainva ijiga e afasor bu E Bomana Jesu Kurais e iji e karauniamo ijefuon vuak iji bu kuardiainva iji mukorigia vierafekfuon.
2PE 3:3 Vuak amur iji igi vierafef. Tavan radkma ijia e kafo moikigia ise ijar samuagdiako bu ire kafokafo vajat iji oimaikfuon reoijo iji bu ruakfuon. Bur usem ja kam varaimeknum kijdiakfuon. Revo bu kia, E Bomana jon fu rad una ruakafa kumen gavo fu izer ruainmano kiak? Usuibe saifnuvuon bun aoime mako igia naoiv gavo buba una urin revo ire fok vek ik anej ijia bu naoivo iji bu iviakma vek ni besum ijeg naoime rok.
2PE 3:5 Regavo bu vuak ma iji bun vierafen revo bu uzame e roin kuardiavo iji buba vierafenva ijeg kuardiav. Regavo usuibe God fu iti fuon ijia kuaikoga varur ijiga moikigi bu amardiain. Regavo fu moik iji do guf ijia namo iji kuamga fu ajieme samafren.
2PE 3:6 Regavo rad fu do iji kuamga fu una moik iji okurame e iji ise reoijo ijiga ire fok moikigia naoivo iji okuriavga bu aoiknum iseren.
2PE 3:7 Regavo iviakma God fu kuai moik ga varur ga e igi iviakma moikigia oijo iji fu tavan radkma ijia mian bomana kuaga fu naikno kuain. Regavo madu tavan besum ijia e iji ba God ma vierafene unam fuon jaoijo iji fu kam arafiriak.
2PE 3:8 Ijefuon kaifnun jab vierafero E Bomana iji fu saroime ire iji fu kuainma iji rekro ijeg jab vierafek. Regavo madu jab rubdiak E Bomana fu juaivasia vuan taosen (1,000) barekma fu kuainma iji fu aibe iji bakin revo fu vierafenma fuka naki besum (1) igekin. E roin bu vierafe E Bomana iji fu saroim ijefuon ire iji fu usuibe ruakafa kuainma iji fuba reno kuaiv. Regavo ni mukorigia vierafef fu isuar oi mafaime ja samuaknum ren. Ijefuon maiji fu e besum be fu arafiriakfuon iji fu uzam revo fu vierafe e fok no ise iji areme una fuon vaga fu no karaunuokfuon.
2PE 3:10 E iji niesamo fu isuar roko iji e buba vierafene samuavo ijeg tavan be E Bomana iji fu ruak. Regavo tavan ijia varur fu bomana kume areme ijia barek. Mian bomana ijar ire fok varur ijia ga moikigi ga ire fok no giavo iji bu naoime barkfuon.
2PE 3:11 No vierafe ire fok Godri kege kam ijeg iserme arafiriakfuon. Ijefuon oijon kege ire kafokafo iji vierafejo arega una unam ma iji akai karine ire iji God oimaikfuon ijesugin ref.
2PE 3:12 Regavo tavan iji fu ruakfuon iji ja samuavo ijia nika tavan bog ejafanamime sirimameknum kaifjon roin ifejdiaga bu oi karoime una E bomana iji vierafene samuaf. Unam ijeg ja rejo ijia ja migegare ifenamime Jesu fu ruakfuon iji abe samairej. Regavo tavan iji fu rokon ijia varur ijiga ire fok moikigia naoivo iji mian bomana ijar naine barkfuon.
2PE 3:13 Fu naine barekega no ar iviamkor ma iji God fu kuainma ijia e fok no vuak fuon ijiga unam fuon iji mukorigia igiame fu vierafenma ijia kegoinva iji no ijia karikfuon.
2PE 3:14 Regavo madu kaifnun igi ja vek tavan iji fu una ruakfuon iji ja samuavo ijia nika giriesame unam ma iji God oimaikfuon ijesugin ref. Ja ijesugin renkin ja Godon nifak ijia ja irekva ja afuime ise kafo bakin revo ja maturaime irekfuon.
2PE 3:15 Regavo fu irerafuon saroime samuamo iji vierafef. Fu no tavan muoga no vuak fuon faime e roin iji fu karaunuokfuon iji nijaidiak. For fu vuak besum iji fas fuon fok ijia isoime e fok nijaidiain. Fas fuon fu isoinma ijia vuak roin fuka gigikin no izeg faime vierafekva bakin iji isoin. Regavo e iji bu vuak iji uzavo ga ka God vierafejo ijia zazaivo ijieb Foron fas igi dakva vuak ma iji buba faik. Ijefuon bu vuak nijaidiavo ijia buka vuak kam karoime una vuak ni kafo iji nijaidiav. Regavo madu bu Godon vuak kafar roin isoinva iji bu madu kege ijeg rek. Bu ijegrejo ijefuon tavan iji God fu ruakma ijia fu ise buon kege mazim giame kam arafiriak.
2PE 3:17 Regavo kaifnun iji na oijmiavo iji vuak igi na kuaivo iji jan vierafen. Ijefuon jaka jume mukorigia koikjon samuanamif. Ja ijegrenki e iji vuak kufuimene e nijaidiaoijo iji buba ja aferdiame una unam ise ijia vaga jon ja ma vierafejo iji ja arekfuon.
2PE 3:18 Regavo na joifuon Godon sirimamega fur ma fuon ja miaga ja giriesame E Bomana Jesuon vuak iji nijainamikin jon ja ma vierafejo iji fuka darokma ofriakfuon. Ijefuon iviakma no Jesu Kurais abe aroiknum tavan bog oimardakfuon. Mare.
1JO 1:1 Fas igi no isoime nijiavo iji no vuak iji ma karivako ijefuon vuak ijin isoime nijiav. Regavo e iji vuak ma karivako iji abe ruainma iji fun usuibe moikigi buba amarenva ijia fu Godk besum fine ruain. Regavo e iji no vuak fuon abe oijo iji no vuak fuon iji non faivknum non koiknuvuon ni nuvuon igia fu gain. Regavo iji fuka ma non ni nuvuon ijia gavknum vajai fuon non imut nuvuon ijia kunaim gain.
1JO 1:2 Regavo e iji vuak iji ma karivako ijefuon vuak iji fun abe e fokigiebuon nifak ijia rokga non fu gain. Ijefuon no vuak fuon abe kuaiknum ja kuardiaga ja mukoi vierafero e iji fu vuak ma karivako iji abe ruainma iji fu usuibe Asoinuvuon ijek fine iviakma fu nuvuon ruainmaro ja ijeg vierafek.
1JO 1:3 Ijefuon no irerag no giainva ijiga fainva no ijin abe ja kuardiav. No kuardiaga ja roga nona besum afuime no una Asoinuvuon ijiga Farifuon Jesu Kurais bu karinva ijia buna agan besum rene oimarknum karik.
1JO 1:4 Regavo vuak igi no isoime ja nijiavo ijefuon maiji ja vuak ijia dame oimarknum karikfuon. Regavo no izeg iji ja oimarvo iji faikva no madu noka ijeg oimarknum karikfuon.
1JO 1:5 Vuak igi no nijaidiavo iji no Godon Farif ijar kuarduinma no iji abe ja kuardiav. God fu sanainma iji ga ar fu fino iji fu sanainma ijesugin gavo nakinma iji ja gakva bakin.
1JO 1:6 Regavo no kuai noiji no Godna agan besumno kuain revo vuak nuvuon no kuaivo ijigam irerag no reoijo iji no vek nakinma ijia reoijogakva iji noka kufuimej.
1JO 1:7 Regavo no tavan bog no God fu sanainma ga fu fivako no ijeg kari vakva no agan besum rene karik. No agan besum rene karivakva Farif fuon Jesuon kavuan ijar ise nuvuon fok no reoijo ijia karaunuok.
1JO 1:8 Regavo no kuai no ise kafo reoijo bano kuaikva iji noka kufui mej ijefuon vuak ma iji fu oinuvuon ijia namo bakin.
1JO 1:9 Regavo no ise nuvuon fok no reoijo iji no God kuardakva fuiji fu naikafare ma reoinon ijefuon fur ise nuvuon fok guome areknum vo unam ise no reoijo iji fikorduok.
1JO 1:10 No kuai no ise reoijo bano kuaikva iji noka God dab kufui igeg kuaimoij. Ijefuon e iji fu vuak ma karivako iji abe ruainma ijefuon vuak iji fuba oinuvuon ijia nona na vak.
1JO 2:1 Na fas igi isoime afnun fok ja nijiaga vuak ijar ifejdia ja ise kafo biediakva ja agordiak. Regavo eraneb bu ise reokva iji Jesu Kurais e iji maturainma fu nuvuifuon Asoinuvuon iji kuaramdo fu ise nuvuon guome arek.
1JO 2:2 Ijefuon maiji Jesu fu ise nuvuon ijiga e fok ar iror igia karioinva ijiebuon ise ijefuon guain.
1JO 2:3 Regavo no Godon akai fok fu kuarduinma iji mukoi faime rekva iji no vierafero noka ma fu vierafejro no ijeg vierafek.
1JO 2:4 Regavo e be fu kuai, Fu God ma vierafenmano kuai revo fu akai fuon iji fuba mukoi vierafekma e iji fuka kufuimen.
1JO 2:5 Regavo erar fu vuak fuon mukoi faime rekma fuon izeg fu God oijmamo iji fuka ma bomana rene vak. Regavo erar fu kuai fu Godk fioino kuaikma e iji fuka Jesu Kurais fu fivainma ijeg fiok. Regavo fu ijeg fiokma no ma vierafero fu Godk finoro no ijeg vierafek.
1JO 2:7 Regavo e kaifnun igie vuak igi na isoi nijiavo iji fu iviamkor bakin revo vuak iji fu usuikor. Regavo vuak iji bu usuibe nijaidiava ja faime ruainva ijin.
1JO 2:8 Regavo vuak igi na isoime nijiavo iji fu vuak iviamkor. Regavo vuak ijefuon maiji fun Jesu Kuraisri reoinon jan gain revo madu jan koikjo mimatame reoin. Ijegvo nakinma iji fun barekoga sanainma iji fun no karinva ijia sanain.
1JO 2:9 Regavo erar oine kuaik fuiji fu sanainma ijia fino kuaimevo fu una kaifuon be ziegafakma e iji fuka vek nakinma ijia fin.
1JO 2:10 Ijegvo erar fu kaifuon mukoi oijmakma fuiji fu sanainma ijia oin. Fu sanainma ijia oinon ijefuon kaifijaf bu fuon ruakva bu ise kafo biediakva bakin.
1JO 2:11 Regavo erar kaifijaf fuba mukoi oijmiakma fu nakinma ijia fiknum nakinma ijia vak. Ijefuon maiji ni fuon fun mukoi okuraimado fu izeg mukoi nisaikma bakin.
1JO 2:12 Afnun fokigie fas igi na isoime nijiavo ijefuon maiji ise jon fok fun Jesu Kuraisri joifuon guame fun abe vain.
1JO 2:13 Asoifnun fokigie fas igi na isoime nijiavo ijefuon maiji e iji fun roka jan gain revo jan mukoi vierafega fuiji fu ik anej ijia Godk fine ruain. Regavo e nivek fokigie fas igi na isoime nijiavo ijefuon maiji ja Setan jan jar rareme asim vain. Regavo afnun igie fas igi na isoime nijiavo ijefuon maiji jan Asoijon iji mukoi vierafen.
1JO 2:14 Regavo asoifnun igie fas igi na isoim nijiavo ijefuon maiji e iji fun usuibe Godk besum fi roka jan game vierafen. Regavo e nivek igie fas igi na isoim nijiavo ijefuon maiji jaiji e darokin vo Godon vuak iji fun oijon ijia namdo ja Setan dab gareg akozme ok.
1JO 2:15 Regavo moik igeko ire kafo moikigia naoivo iji jab uruvana oijmiak. Ja moik igefuon sinuom iji uruv oijmiavo iji ja God ma oijmavo bakin.
1JO 2:16 Ijefuon maiji ire isekma fok moikigia naoivo iji bu Godon roko bakin. Unam iji barabaru oijo iji uruv ijefun rejo ijigam ire fok no ni igia giame ijefun rejo ijin. Regavo madu unam izeg no sinuom nuvuon no karvo ijefuon aroikaravo iji ire fok bu Godon roka bakin revo bu moikigia naoivo ijin.
1JO 2:17 Moikigi ga ire fok moikigia e iji bu giame oijmiavo iji rad bu barek. Regavo erar fu irerag God fu vierafenma ijesugin reokma tavan rad fu ma fivak.
1JO 2:18 Afnun igie tavan iji Jesu Kurais fu una ruakfuon iji fun samairen. Regavo bun usuibe kuardiame kia, E iji Jesuk nigaraimoino iji fu una ruakno kiain. Regavo iviakma e ijekin iji bu Jesuna nigaraimoijo iji buka uruvana samafrena no giain. Ijefuon no vierafega tavan iji fun samairen.
1JO 2:19 E iji Jesuna nigaraioijo iji buba nona aganuvuon ijia besum rene oij ijefuon bun no unuome vain. Regavo bu aganuvuon ijia besum rene oijobatie bu nona besum kariok. Regavo bun aganuvuon iji areme vainvado non samakaf giame vierafero buiji buba nona besum oijoro no ijeg vierafej.
1JO 2:20 Regavo jaiji fun Jesur Godon Kaven iji kege uniafdiain ijefuon ja vuak ma ijesugin vierafej.
1JO 2:21 Regavo ja fas igi na isoim nijiavo iji ja game vierafero ja vuak kufui vierafeoijo ijefuon na iji isoim nijiavo bakin. Regavo na ja ifejdiaga ja vuak iji mukorigia giriesame vierafekuai na iji isoim nijiav. Regavo na madu ja ifejdiaga ja mukorigia vierafero e iji Jesuna nigaraimoijo iji bu kufuimejoro ja ijeg vierafek.
1JO 2:22 Regavo e iji Jesuna nigaraimoijo iji era? E iji bu kuai Jesu fu ma Godon ruainma bano kuaivo e ijieb bu Jesuna nigaraimoij. Revo madu bur ijegreoijo ijefuon bu Asoinuvuon ijiga Farifuon Jesu bu giame uzav.
1JO 2:23 Regavo erar fu Farifuon nuigafakma e iji fu madu God Asoifuon iji uzam. Regavo erar fu Farifuon mukorigia oijmame afemo iji fuk Asoifuon iji oijmame afem.
1JO 2:24 Regavo ni vuak iji ja ik anej ijia faime ruainva iji mukoi oijon ijia vierafeof. Ja vuak iji mukoi oijon ijia vierafeokva ja Jesu ko Asoifuon ijiena besum agan rene karik.
1JO 2:25 Regavo Jesu Kurais fu koikfuon vuak ma iji abe no muokno kuin. Ire iji fu abe no muokno kuinma iji fu unam ma karivako iji abe muok.
1JO 2:26 Regavo vuak igi na isoim nijiavo iji e iji ise reoijo ijieb ja aferdiame kam unam ise ijia vakrejo ijefuon na iji isoim nijiav.
1JO 2:27 Regavo jaiji fun Kuraisri Kaven fuon iji kege oijon ijia uniafdiain. Regavo tavan iji Kaven fu oijon iji samuagdiamo ijia e kafo buba ja nijaidiakfuon. Ijefuon maiji Kaven Akaij ijar ire fok nijaidiam vo irerag fu nijaidiamon iji fu kufui iji nijaidiamo bakin revo fuka vuak ma iji nijaidiam. Ijefuon vuak iji Kaven fu nijaidiamon iji igame Kuraisna besum kariof.
1JO 2:28 Regavo afnun na oijmiavo iji jaka Jesu ma vierafene funa of. Ja funa besum okva tavan rad fu una ruakma jaba uri ise jon ja renva ijefuon fu game jum subinai vak.
1JO 2:29 Regavo jan vierafega Jesu fu unam ma ijesugin reoinon ijefuon erar fu unam ma ijesugin reoino iji ni vierafe e iji fu Godon farif rek.
1JO 3:1 Regavo ni Asoinuvuon iji fu izeg no oijmuinma iji gaf! Fu no oijmuinma iji fuka ma bomana ijefuon noiji fu kuo, Jaiji ja afnuno kuin. Regavo iji fuka ma noiji noka ma Godon afijaf. Regavo e iji moikigia ise reoijo iji bu God buba mukoi vierafenva ijefuon noiji no afijaf ijeg buba mukoi vierafen.
1JO 3:2 Ijefuon e kaifnun ma igie noiji non iviakma Godon afijaf redo rad no ar fu fino ijia vakva nokafu e izekin rekfuon iji noba mukoi vierafen. Regavo no vierafega Jesu fu una ruakma vajai nuvuon iji fu una fuon ijegrega no gak ijefuon maiji Jesu no ni nuvuon ijia gak.
1JO 3:3 Regavo erar fu ma vierafero Jesu fu una ruakrenoro fu ijeg vierafekma e iji fuka Jesu fu ma ijesugin reoinon fu ijeg reok.
1JO 3:4 Erar fu ise kafo reoino iji fu Godon vierafe ijia jaoino bakin. Regavo madu fu Godon akaij iji fu agoimo bakin ijefuon fu tavan bog Godon akaij iji abe tuasem.
1JO 3:5 Regavo jan vierafe Jesu fu ruainma iji fu e iji ise reoijo ijiebuon ise iji abe vakafa ruain. Regavo fuiji fu ise kafo reoinma bakin.
1JO 3:6 Regavo erar fu Jesuk tavan bog fivakma fuba una ise reunaik. Revo erar fu ise fu reoinon iji fuba aremo iji fu Jesu fuba gain vo fu fusik tavan bog fioino bakin.
1JO 3:7 Afnun igi ni koikjo mukoi samuanamiknum of. Regavo jab arega e ise kafob aferdia una unam ise ijia vak. Regavo erar fu unam ma ijia kegokma fuiji fuka Jesu fu maturainma ijeg maturaik.
1JO 3:8 Regavo erar fu ise reoinon iji fuka Setanon e ijefuon maiji Setan fu ik anej ijia fu ise rene ruain. Regavo Godon Farif iji fu irerafuon moikigia ari ruainma iji fu Setanon ik iji dab tuase gareg akozekafa ruain.
1JO 3:9 Regavo erar fu Godon am rekma ise fuon fu reoinon iji fuba una rek. Ijefuon maiji God fu kaven iviamkor abe e iji main. Regavo God fun e ijefuon Asoi renmado e iji fuba una ise reok.
1JO 3:10 Regavo izeg no Godon afijaf iji no kafo giakgavo Setanon afijaf iji no kafo giakva unam iji ijeg. Erar fu unam ma iji fu kegoino bakin vo madu kaifijaf fuba mukoi oijmiamo e iji fu Godon am bakin. E iji fu Setanon am ijar ijeg reoin.
1JO 3:11 Vuak iji ik anej ijia ja fainva iji igin noka kaifnuvuon na oijmanamik.
1JO 3:12 Regavo no e Kein fu kenma ijeg noba rek. Fuiji fu Setanon e ijefuon fu uviaifuon kanama fu guain. Regavo Kein fu irerafuon uviaifuon kanama fu guain? Ijefuon maiji Kein fu unam fuon fu reoinon iji fuka ma ise revo uviaifuon fuka unam ma ijesugin reoga fu iji kanama fu guain.
1JO 3:13 Ijefuon uviaifnun igie e moikigia ise reoijo ijieb ja ziegafiakva jab uri oiserdiak.
1JO 3:14 No kaifnuvuon oijmiavo ijefuon no vierafega no unam ise iji bu no aferduo zuarunam vakfuon iji non areme una unam ma karivako ijia ruain. Regavo erar fuba kaifijaf mukoi oijmiakma fuiji fu vek unam ise ijia oin.
1JO 3:15 Regavo erar fu kaifijaf ziegafiamo iji fu e kaniamoino ijekin revo e iji e kaniamoijo iji bu unam ma karivako iji buba gain.
1JO 3:16 Jesu fu nuvuifuon guainma ijia no izeg fu no oijmuinma iji non gain. Ijefuon no madu God fu vierafe noka uri kaifnuvuon ijiebuon aoikva fuka marek.
1JO 3:17 Regavo e be fu sinuom uruvana kege oknum kuai fu God mukoi oijmamo kuain. Regavo fuba kaifuon be isema oinon iji ifejdakma iji fuka ba God mukoi oijmam revo fuka kufuimen.
1JO 3:18 Ijefuon afnun igie noba ir igia kuai no kaifnuvuon no mukoi oijmiavo kuaik. Regavo nika uri unam ma ijia mukorigia kegoknum vo oijon ijekma mukorigia e ifejdiak.
1JO 3:19 No e kaifnuvuon iji no mukorigia ijeg ifejdiaknum oijmiakva na vierafe noka Jesu Kuraison diak makai iji jame reoij. Regavo no ijegrekva noka Godon nifak ijia oimarknum ok revo noba fu game juk.
1JO 3:20 Regavo no oinuvuon ijia vierafega unam no kegoijo iji fu ise ga God fuk fu vierafe unam iji fuka ma ise. Ijefuon maiji irerag fok no reoijo iji fun guome vierafen.
1JO 3:21 Ijefuon efnun maigie ja vierafega jafak ire ise kafo bakma jaka giriesame Godon nifak ijia vakfuon.
1JO 3:22 Regavo irerag no kuaga fu vajuomo ijefuon maiji no vuak fuon mukoi igaknum irerag no reoijo iji fuka oimarmo ijefuon fu ijeg ren.
1JO 3:23 Regavo vuak iji God fu no kuinma iji ijeg. Fu kuo nika Farinun iji ma vierafe vo izeg Jesu fu kuardiainma ijeg kaifjon mukoi oijmiafno kuin.
1JO 3:24 Regavo erar fu Godon vuak iji mukorigia faime igakma e iji fu tavan bog Godk oke God fu fusik ok. God fun Kaven fuon kege no uniafduin ijefuon noka ma vierafega God fu tavan bog nona oin.
1JO 4:1 Kaifnun maigie jab oine e kafob biesiame kia, Noiji no kaven ma iji abenvano kiaga jab vuak buon faik. Regavo ni amur mukorigia oknum giaga kaven iji fun ma Godon Kaven ijar oibuon ijia ariga ni ijar vuak buon faif. Ijefuon maiji e fok bu kufuimene oknum e iji kia, No iji no ma Godon vuak iji abe oijno kiak.
1JO 4:2 Regavo ja unam izeg e iji bu Godon kaven abenva iji giak? Ja e iji bu kuai bu Godon Kaven abenvano kuainva iji giakva ni oknum vuak buon bu kuaivo iji faif. Ja faiga erar fu kuai, Jesu Kurais fu ma emano kuaikma ni vierafero e iji fu ma Godon Kaven abemaro ja ijeg vierafek.
1JO 4:3 Regavo ja faiga e roin bu kuai, Jesu fu ma ema bano kuaiga ro e iji bu kaven ise iji abenvaro. Ijefuon maiji vuak fuon fu kuaimo iji fu kaven ise ijar kuardaga fu iji kuaim. Regavo jan faime vierafero e iji Jesuna nigaraimoino iji fu moikigia ruakreno iji fun ruainmaro ja ijeg vierafek. Ijefuon kaven ise ijar e kafobuon oij ijia aruga bu uri kuai, Jesu Kurais fu ma ema bano kuaiv.
1JO 4:4 Regavo afnun jaiji jan Godon e ren ijefuon maiji e iji bu kufuimene Godon vuak iji abe ruainva iji jaba vuak buon fain. Ijefuon maiji Kaven fu jana oino iji fuka ma darokin revo kaven be fu e moikigia ise reoijo ijiena oino iji fuka daro bakin.
1JO 4:5 E iji moikigia ise reoijo iji bu vuak buon bu kuaivo iji bu moik igefuon vuak iji kuaiv. Bu kuaivo iji e kafo moikigia ise reoijo ijieb vuak buon faivo ijefuon maiji buiji bu e moik igeko ijefuon bu ijeg rej.
1JO 4:6 Regavo noiji no Godon e ijefuon erar fu vuak nuvuon mukoi faimon iji fuiji fu Godon e revo erar fu vuak nuvuon ba mukorigia faimo e iji fu Godon e bakin. No ijegreoijknum giaga kaven izar fu Godon Kaven ga kaven izi fu e biesiamoino no iji gak.
1JO 4:7 Kaifnun igie nika ro no nuvuon oijmanamif ijefuon maiji God fu no oijmuomo. Erar fu e roin oijmiakma e iji fu God mukoi oijmam rega God mukoi vierafe ijefuon fu Godon e.
1JO 4:8 God fuka e mukoi oijmiamo ijefuon erar fuba kaifijaf oijmiakma e iji fu God fuba gain vo mukoi vierafen.
1JO 4:9 Regavo unam izeg God fu no mukorigia oijmuinma iji fu Farifuon besum iji kuamga fu moikigia ari ruain. God fu vierafero Farif fuon ijar ari roga e igi no Farifuon ijefuon unam ma kari vako iji abekafa fu iji ijeg ren.
1JO 4:10 Regavo oijmanamivo ijefuon anej ma iji no nor God oijmainva bakin revo fur no mukoi oijmuinma ijefuon fu Farifuon kuama fu moikigia ari ise no reoijo ijia karaunuokafa ruain.
1JO 4:11 Regavo kaifnun igie God fu no ijeg mukoi oijmuokma no madu no uri nuvuon oijmanamibatie fuka marek.
1JO 4:12 God fu erar gainma bakin revo no nuvuon oijmanamikva no tavan bog Godna ok rega fuon oijmuomo iji fuka oinuvuon ijia ofrene vak.
1JO 4:13 Noka ma vierafega God fu nona ga no madu Godna oij ijefuon maiji fu Kaven fuon kege no uniafduin.
1JO 4:14 Regavo madu fu Farifuon kuama fu moikigia ari e fok karauniakafa ari roka no koiknuvuon gavknum vuak fuon non abe e roin kuardiaoin.
1JO 4:15 Regavo erar fu kuai, Jesu fu Godon Farifno kuaikma e iji fu tavan bog fu Godk oin revo God fu e ijek oin.
1JO 4:16 Regavo non vierafega Godon oijmuomo iji fuka tavan bog nona navak ijefuon no oimarknum kari rok. Regavo God fuiji fu oijmanamivo ijefuon anej ijin. Ijefuon erar fu kaifijaf mukoi oijmiakma e iji fu tavan bog Godk fivak.
1JO 4:17 No mukorigia God oijmaknum kaifnuvuon iji mukoi oijmiakva tavan iji God fu fine e fokbuon ise iji kege mazim giamo ijia noba fu game juk. No God mukoi oijmakva no Jesu Kurais fu moik igia oinma no ijeg ok.
1JO 4:18 Ja God jon iji mukoi oijmakva jaba juvknum ok ijefuon maiji ire fok ja giame jumoijo iji fun oijmanamivo jon ijar okuriaido jaba una juvknum ok. Ijefuon erar fu juvknum okma e iji fu God fuba mukoi oijmam revo fu izeg God fu e iji ise reoijo iji kege vajai fian miakfuon fu ijesugin vierafeoin.
1JO 4:19 Regavo God fun usuibe no oijmuinma ijefuon no kaifnuvuon iji oijmiav.
1JO 4:20 Regavo erar fu kuai, Na God oijmavno kuaim revo fu una kaifijaf iji ziegafiaoino iji fuka ma kufuimen. Fu kaifijaf iji fun ni fuon ijia giamo iji fuba mukoi oijmiamo iji fu God e iji fu ba gainma iji fuba oijmak.
1JO 4:21 Regavo Jesu Kurais fu no kuo, Erar fu God oijmakma ni kaifijaf mukoi oijmiamne kuin.
1JO 5:1 E be erar fu ma vierafero Jesu fu ma Godri kuama fu moikigia e fok karauniakafa ari ruainmaro fu ijeg vierafeno e iji fu Godon e. Regavo erar fu God mukoi oijmamo e iji fu madu Farifuon Jesu mukoi oijmam.
1JO 5:2 No vierafega no God mukoi oijmaknum vuak fuon fok mukorigia igiakva iji noka afijaf iji madu oijmiakfuon.
1JO 5:3 Regavo no God vuak fuon fok fu kuarduomo iji mukorigia igiakva na ijia vierafero non fu mukoi oijmavro no ijeg vierafek. Revo vuak fuon fok fu kuarduomo iji fuka gigikin bakin. Ijefuon maiji e fok no Godon afijaf revo noka aresredo no Godon vuak iji igiame Setan nuigafak. Regavo unam ise iji Setan fu no biesuoga no rekfuon iji noba rek. Ijefuon maiji noiji non Jesu ma vierafene unam fuon ijia reoij.
1JO 5:5 Regavo erar fu aresredo fu koikfuon Setanon unam iji nuigafak. Revo fun e iji erar God ma vierafevo madu fu vierafero Jesu fu ma Godon Farifro fu ijeg vierafeno e ijar fu aresredo fu Setanon unam iji nuigafakfuon.
1JO 5:6 Na Jesu Kuraison vuak iji kuai. Jesu fu moikigia ari ruainma iji fu ire nokarok (2) ren. Fu ire iji rega no ijia game vierafero fu ma Godon Farifro no ijeg vierafen. Ire nokarok (2) fu rena no giainva iji be bu fu abe Godon if ijia do ruardain revo be iji fu guamga kavuan fuon fu moikigia usen. Regavo bu abe do ruardainva ijesugin bagavo fu madu kavuan fuon abe nuvuifuon moikigia usen. Regavo iji fun Godon Kaven Akaij ijar no kuarduome kuo Jesu irerag fu moikigia renma iji fu mano kuin.
1JO 5:8 No Godon Kaven ijigam do iji Jesu fu ruainma ijigam kavuan fuon fu usenma no iji giame vierafe Jesu fu ma Godon Farif. Ire nokbek (3) iji buka besum ga ire iji giavo iji no ma vierafero Jesu fun ma Godon Farifro no ijeg vierafej.
1JO 5:9 No e kafo ijieb Jesuon vuak iji abe kuarduovo iji no ma vierafej revo Godon vuak iji fu Jesusina kuarduomo iji fuka ma darokin ijefuon no Godon vuak iji faime igak.
1JO 5:10 Ijefuon erar fu oifuon ijia ma vierafero Jesu fu Godon Farif ro fu ijeg vierafeno e iji fuka ma vierafen. Regavo erar fu Godon vuak iji fuba mukoi faime vierafeno iji fuka God abe kufui igeg vierafen. Ijefuon maiji vuak God fu Farifuon ijefuon kuainma iji fuba mukoi faime vierafenma ijefuon fu ijeg ren.
1JO 5:11 Regavo God fun ijeg kuarduin erar fu Farinun Jesu tavan bog ma vierafeknum fivakma e iji fu unam ma karivako iji abekno kuin.
1JO 5:12 Regavo fu madu kuo erar Farinun abega fu fusik okma e iji fu unam ma karivako iji abek. Regavo erar fu Farinun fuba mukoi oijmame fusik okma e iji fu unam ma karivako iji fuba abek.
1JO 5:13 Vuak igi na isoim nijiavo ijefuon maiji ja izeg Godon Farif ijefuon unam ma karivako iji ja abenva iji jaka mukorigia vierafekfuon na ijin isoim nijiav.
1JO 5:14 No fu noba juk gavo no irerag fu oimarkfuon ijia kuardakva fu vuak nuvuon mukoi faime ifejduok.
1JO 5:15 Regavo no mukoi vierafero fu vuak nuvuon fok no kuardavo iji fun fainmoro no ijeg ma vierafej. Regavo iji fuka ma ijefuon maiji nom koiknuvuon vierafega irerag fok no kuardavo iji fu faime vajuomo.
1JO 5:16 Regavo erar fu gaga e kaifuon be fu ise be rene unam mian naino ijia vakga nika fuifuon sirimamekma God fu ise fuon game are vo ifejdaga fu unam ma karivako iji abekfuon. Regavo e iji erar fuka God Asoinuvuon iji ma nuigafame vainma e iji fu unam ise iji mian naino ijia vak ijefuon jab e ijekin ijiebuon sirimamek.
1JO 5:17 Regavo e iji bu ise rejo iji bu Godon akaij iji ke tuasev. Regavo ise roin bu rejo iji bu unam iji mian naino ijia vako ijekin bakin.
1JO 5:18 Regavo non vierafen erar fu Godon farif reno e iji fuba tavan bog ise reok. Ijefuon maiji Godon Farif Jesur fu samuamdo Setan fuba e iji abe unam ise ijia arafirik.
1JO 5:19 Regavo noiji non vierafe no Godon afijaf revo e iji bu moikigia ise reoijo iji Setanri samuagdiam.
1JO 5:20 Regavo fun Jesu Godon Farif ijar ari moikigia nona oknum nijaiduinma ijefuon no God ma vierafej. Noiji no God ma ijiga Farif fuon Jesu Kuraisna karioij. God iji fu God ma ga fuiji fu unam ma karivako ijin.
1JO 5:21 Ijefuon eofnun igie ni koikjon mukoi samuanamiknum kariof. Revo jab ire kafo kege una God igeg oijon ijia name uruvana ijin vierafek.
2JO 1:1 Fas igi e sos samuamo ijar isoin. Fas igi na isoime bara be ijiga afijaf na mukoi oijmiavo iji nijiain. Na nunkua ja oijmiavo bagavo e kafo bu God mukoi vierafejo iji buk ja oijmiav. Ijefuon no vierafe Godon vuak ma iji fu oinuvuon ijia namo iji fuka tavan bog nona navak.
2JO 1:3 Ijefuon no una God Asoij ijiga Farifuon Jesu kiaga bu ise iji no reoijo iji guome areknum vo ma reduome ifejduoga no afuime karik. Regavo bur tavan bog no ifejduoga no unam ma iji vierafeknum e oijmiak.
2JO 1:4 Naka uruvana oimadiem ijefuon maiji afon roin buka Asoinuvuon fu kuarduinma ijeg buka unam ma ijia karioij.
2JO 1:5 Ijefuon bara maigure na a kuav. Noka nakikmazak uri kaifnuvuon oijmiak. Regavo vuak igi na isoim nijavo iji fu iviamkor bakin revo vuak iji non usuibe faime ruain.
2JO 1:6 Regavo oijmanamivo ijefuon anej ma iji irerag? Oijmanamivo ijefuon anej ma iji no vuak fok God fu kuarduomo no iji faim igiak. Regavo Godon vuak iji no ik anej ijia fainva iji fu ijeg kuai, Ni tavan bog oijmanamiknum karifno kuain.
2JO 1:7 Regavo e uruvana bu moikigia e roin biesia ruain. Regavo e iji bu ruainva iji bu usem e roin kia Jesu fu ma ema bano kuain. E iji ijeg kuaimja ruainva iji bu e roin biesiamoij ijefuon buiji bu Jesu uzav.
2JO 1:8 Ijefuon ni koikjon mukorigia samuanamiknum of. Regavo irerag ma iji ja Godon renva iji mukoi vierafekin God fuson rad unam ma iji jon rekfuon.
2JO 1:9 Erar fu Jesu Kuraison vuak iji faimvo una vuak kufui kafo faime reoinon e iji God fu oifuon ijia fino bakin. Regavo erar fu Jesuon vuak iji faime mukorigia reoinon e iji God ko Farifuon Jesu bun oifuon ijia kariknum vo tavan bog funa oij.
2JO 1:10 Regavo e kafo bu Jesuon vuak iji bu bakin revo bu vuak kafo nijaidiakva jab karine vuak buon mukoi faik. Regavo bu ar on ijia ajiekva ni kuriairemne revo ab anadiaknum bu aferdiak.
2JO 1:11 E iji bu ise reoijo ijefuon erar fu bu anadiame aferdia ar fuon ijia ajiemo e iji fun unam ise iji bu reoijo iji ifejdiame reoin.
2JO 1:12 Na vuak fok kuardiakafie vierafen revo vuak iji na fas igia naba isoim nijiak. Nason koiknu vua ja karinva ijia kekome jana vuak iji kuaim oimarek. Vuak nun nan igia durev revo uviaifnun ijiebuon afijaf iji bu ja anadiav. Fun ijin.
3JO 1:1 Fas igi e iji sos samuamo ijar isoime e Gaias e na mukoi oijmamo iji nijain.
3JO 1:2 Gaias kainu na vierafe na tavan bog God sirimamene kuaga fu a ifejdaga a oimarknum fioinki ire fok a reno iji fu marek. Regavo na vierafega kaven on fuka darokma oin.
3JO 1:3 Regavo e God ma vierafejo kafo bu ro useme izeg a Godon vuak ma iji mukorigia abe ma vierafeno iji kuardieva naka bomana oimaren. Regavo madu bu kuardieme kie aka tavan bog unam ma ijesugin reoino kien.
3JO 1:4 Regavo tavan roin e kafo bu usem kie afon buka unam ma ijia kegoijno kievo iji naka uruvana oimarev.
3JO 1:5 Gaias kainu aiji aka e iji bu Godon vuak ma iji abe oijo iji aka mukoi oijmiaknum ga e roin aba ur biediainma iji madu aka mukoi oijmiame ifejdiam.
3JO 1:6 Regavo e iji vuainva ijieb una e sos igia afuivo iji vuak on a izeg e roin oijmiaknum ifejdiamo iji dab kuarduin. Ijefuon nika e ijekin iji tavan bog ifejdiamne ijefuon maiji bu Godon ik reoijo.
3JO 1:7 Regavo e iji bu Jesuon if ijia ikreoijo iji bu Godon vuak ma iji abe ar kafokafo kuardiaoijknum vo bu e iji God ba ma vierafejo iji ire kafofuon siervekuai vuainva bakin.
3JO 1:8 Ijefuon e iji no God ma vierafejo iji no e iji vuainva iji mukoi ifejdiak. No ifejdiakva no buna besum Godon vuak ma iji abe kuaimokfuon.
3JO 1:9 Fas ukak igi na isoime e sos jon ijia karioinva iji nijiav. Revo Diotrefis fu e sos jon iji samuagdiakafa vierafen revo fu fas igi na isoinva iji fu game vuak nun iji fuba fain.
3JO 1:10 Ijefuon na vuakva nason Diotrefis ire fok fu renma iji kuardaga fu faik. Regavo vuak ise kafo fu nuvuisina kuainma ijiga vuak kufui iji fu abe e roin kuardiainma iji nason kuardaga fu faik. Fu ijesugin renma bagavo fu madu e iji bu Godon vuak ma iji abe oijo iji bu ijia vako iji fuka oimardiamo bakin. Fu ijegrejknum vo efuon bu e iji Godon vuak abe oijo iji aferdiakuai vierafejo iji fuka kuriairega bu sos iji areme usem vak.
3JO 1:11 Regavo Gaias kainu a e iji bu unam ise ijia kegoijo ijeg ab matiak revo nika una unam ma ijesugin mimatame reo. Erar fu unam ma ijesugin kegoino e iji fu Godon e revo erar fu unam ise iji kegoino iji fu God fuba gainma ijefuon fu ijeg reoin.
3JO 1:12 Regavo e fok buka Demitriason unam ma fu reno iji dab aroime fuisina kuaimoij. Regavo e fok bu vierafega fuiji fuka vuak ma ijesugin kuaim. Regavo no madu no vierafe irerag Demitrias fu reno iji no vierafe fu unam ma ijesugin reoin. Regavo jan vierafe no tavan bog no vuak kufui kuaimoijo bakin ijefuon irerag no fuisina kuaivo iji noka ma kuaiv.
3JO 1:13 Na vuak fok kuardiakafie vierafen revo na fas igia naba isoime kuardiak.
3JO 1:14 Regavo nason oine ja biediakva no ijia besum karine vuak iji kuaik.
3JO 1:15 Regavo ni mukorigia afuime of. Regavo e kaifjon fok bu igia karinva bu ja anadiain. Regavo ni kaifjon roina mukoi anainamiknum of. Fun ijin.
JUD 1:1 Fas igi e Jiud Jeimson uviaij ga Jesu Kuraison ikreno nar isoin. Nar isoime e iji ja Godri kenma ja efuon renva ijin nijiav. Regavo e iji ja God Asoinuvuon ijar oijmiamo ga Jesur samuagdiam.
JUD 1:2 Regavo na sirimamega God fu tavan bog jon oifian abene ma rediaknum ifejdiaga ja afuime oijmanamiknum kariokfuon.
JUD 1:3 Efnun na nuvuon no Jesu Kurais fu no karaunuinma iji no fateroin abenva ijefuon vuak iji anerene isoim nijiakafie vierafen revo iviakma na una vuak be iji isoim nijiav. Vuak iji na soisoime kuardiaga ja giriesame unam iji no God ma vierafejo iji God fu efuon iji vajiainma ijia giriesame biduame karivak. Revo God fu vierafega vuak ijar magame fu abe e fok no muido no vuak ijesugin mukorigia samuakfuon.
JUD 1:4 E kafo God ba ma vierafejo iji bu isuar sauime e iji ja afuime karinva ijia biedareme karikuai vuain. Bu Godon vuak ma iji fu izeg e fok oijmiaknum ise buon giame aremo iji bun dab dakaroime vierafen. Bu kuai unam fudainamiknum unam isema reoijo iji God fuba no kege vajai fian vajuokno kuaiv. Regavo bu Jesu Kurais E Bomana nuvuon fu fuonkua no samuagduomo iji bu uzame ba abega fu oibuon ijia fin. Regavo usuibe e iji Godon vuak vierafene kuaimoijo ijieb e iji isema reoijo iji God fu bu kege arafiriakfuon ijiebuon vuak iji bun buk akaij ijia isoin.
JUD 1:5 Regavo vuak iji jan vierafen revo na una ja nijaidiaga ja vierafek. E Bomana iji fu efuon Isrerko iji Ijift ijia karauniainma iji vierafef. Fu karauniain revo rad e iji buba fu ma vierafenva iji fu kam arafiriak.
JUD 1:6 Regavo madu ni anera iji vierafef. Buk bu daro iji God fu miainma bu una Godon daro iji asikuai vierafen. Ijefuon God fun bu kege sen iji fuba turasekfuon ijia abe kiriame ar nakinma ijia uniaido fu tavan radkma ijia kege arafiriak.
JUD 1:7 Regavo ni madu mai Sodom ga Gomora ga mai ukakna kafo samaij ijia bu izegrenva iji vierafef. E iji bu anera iji bu renva ijeg bu ba God igain revo bu barubara buon fudanamiknum ka unam ma ise iji ren. Bu iji renva ijefuon mai iji bu vajai fian abene mian ijia naoin. Regavo e fok bu ijia giame vierafe bu iserekva bu ijeg arafiriame mian naoikro bu ijeg vierafek.
JUD 1:8 Regavo e iji sauime jon vuainva iji bu vuak iji bun vierafen. Revo bu koikbuon naka naoime una unam ise iji rene bu fudainamiknum koikbuon vajai buon kam arafiriav. Bu ijegrene Godon daro ma iji uzame una vuak ise kafo Godon anera ijiebuon kuaiv.
JUD 1:9 Anera vuamakin Maiker fuba ijeg ren. Erar Mosison vajat surif iji abekfuon iji fuba kaven ise Setank musikuaime vuak ise kafo fuon kuain. Regavo fum Setan kuai, Godri a abe arafirakno kuain.
JUD 1:10 Regavo e iji bu vuak kafo buba mukorigia faime vierafenva iji bum vuak ise kafo ijefuon kuain. Regavo unam buon bu rejo iji bu ire fanuf buba vierafejo ijeg reoijo. Ijefuon unam iji bu rejo ijar vajai buon kam arafiriak.
JUD 1:11 Bu esenia! Bu unam ise ijia rene e Kein fu vainma ijia ja vain. Bu mon vierafene bu koikbuon uri e Beram (e iji fu Godon vuak uzame mon abekafa bomana vierafenma ijin) fu unam ise fu renma iji jame ren. Regavo madu bu uri Kora fu renma ijeg Godna bijain ijefuon God fu bu kege Kora fu arafirinma ijeg arafiriain.
JUD 1:12 Regavo ja Godon ar ijia besum afuime oijmanamime duok ijo ijia bu jana duok ijo iji buka unam ise kafokafo iji rejo ijefuon jaka jufdiav. Regavo bu duok uruvana iknum buonkua buon vierafej. Buka ire vana iji buibur ijar abe vak revo tavan iji fu damo bakin ijekin. Regavo madu buka in iji fu a kaname ba tavan fuon ma ijia una kiramo gavo fum sairmo igekin.
JUD 1:13 Bu ise buon iji buka ire do iji fu firame kafut ga do tatan iji fu irif ijia areme vako ijekin. Regavo bu ire mujur iji buba ar besum irev gavo bum ijia oijo igekin. Regavo e ijekin iji bun Godri ar iji ka ma nakinma e iji bu tavan bog ijia karivakfuon iji buifuon amaren.
JUD 1:14 Regavo vuak ijiebuon iji fun e iji uinre ruainva ijia Adamon sat be e Inok kuavo ijar amur buisina kuain. Regavo Inok fu ijeg kuai, Ni gaf! E Bomana iji fu anera fuon akai ka ma uruvana iji aferdia buna rokno kuain.
JUD 1:15 Fu aferdia e fok kege ise buon iji mazim giakafa rok. Fu e iji bu Godon e ani rene unam ise God ba oimaikfuon bu rejo iji kege arafiriakafa rok. Regavo madu bu vuak kuriaikuriaikin bu Godsina kuaivo iji kam arafiriakafa bu iji rok.
JUD 1:16 E iji buka vuak kam e kafo namdiaknum zie vuak iji tavan bog kuaiv. Regavo buka aroikaraknum unam ise buon bu vierafenva iji jajiav. Regavo tavan iji bu e kafobuon vuak ma iji bu kuaivo iji bum ire kafo ijia biesia soisoime nimdia kuaiga bu ire vajiaknum buifuon ire kafo rej.
JUD 1:17 Regavo kaifnun vuak iji e afasor E Bomana Jesu Kuraison ikreoijo bu kuardiainva iji mukorigia vierafef.
JUD 1:18 Bu kuardiame kia, Tavan radkma iji ruakma ijia e bu ro unam jon ga God jon iji kam varaimene kijdiakfuon. Regavo bu unam buon bu vierafenva ijesugin rejknum unam iji God ba oimaikfuon iji rek.
JUD 1:19 E iji buka Godon Kaven ba abenva ijin. Bur e kege atame kafokafo uniaknum unam iji bu vajai buon bu oimardiakfuon bu reoijo e ijieb ijeg reoij.
JUD 1:20 Regavo kaifnun jab unam ijeg rek. Regavo ni giriesame ifenamiga jon ja ma vierafejo iji fu ofriak. Regavo Godon Kaven Akai ijefuon daro ijia sirimameof.
JUD 1:21 Jon ja nakikmazak kegoijo iji jaka Godon oijmiamo iji abe joi nijainamif. Ja ijegrejknum karioga Jesu Kurais fu una roko ijia fu fuon mardiamo ijia unam iji tavan bog ijia karivako ijin vajiak.
JUD 1:22 E iji bu God ma vierafekuai nuanamime rubdiavo iji buon oifian abene oijmiaknum ifejdiaga bu una darokma God ma vierafek.
JUD 1:23 Regavo e iji roin bu Godri kam arafiriaga bu mian naoikrejo ijin oijmiame ifejdia kuniai turame una unam ma ijia uniaf. Revo unam ise iji bu e iji tomdiainma iji mukorigia nuigafiame e iji oijmiame karauniaf. Regavo ni mukorigia samuanamigavo jab zazaime ise ijefkin iji kafo reok.
JUD 1:24 God e iji fu no karaunuinma ijefuon fuon oimaref. Fur ja mukorigia samuagdiaga jaba jon ja ma vierafejo ijia zazaime ari kaniak. Regavo fur aferdiaga ja ise kafo bakin ja maturaime oimarknum ar fuon sanainma fu tavan bog daro fuon ijia samuame fivakfuon ijia karik.
JUD 1:25 God fuonkua fu God ma ga fur Jesu Kuraison duadok ijia no karaunuin. Ijefuon roga no God ijin aroiknum oimardaf. No vierafe sanainma ijiga daro bomana ijiga daro iji fu ijia ire fok samuagdiamo iji bu ik anej ijia ga iviakma ga tavan rad bu fuon rekfuon. Mare!
REV 1:1 Buk igi God fu ire iji fu iviakma igem rekfuon iji fu abe Jesu Kurais nijaimga fu abe e iji bu fu igame fuifuon ikrejo iji nijaidiainma ijin. Jesu fu anera fuon iji kuamga fu ari e fuifuon ikreno e Jon ire iji nijain.
REV 1:2 Regavo Jon fu Godon vuak ma ijiga Jesu Kurais ire iji fu nijaimga fu giainma iji abe e fok kuardiain.
REV 1:3 E iji erar fu irerag fu rad rekreno iji mukoi dame faimo iji fuka oimarkfuon. Regavo madu erar fu vuak iji bu isoinva iji faime abe oifuon ijia abedeme igamo iji fuk fuka oimarkfuon. Ijefuon maiji tavan iji fun samairedo ire fok fu rekfuon.
REV 1:4 Jon nar vuak igi isoime e Jesu ma vierafejo bu besum afuim sirimamejo mai seven (7) ai Esia guf ijia karijo iji nijiav. Regavo na sirimamega God e iji fu usuibe ijia fine ruainma ijiga madu vek fino ga rad ruakreno iji fu tavan bog ja ma rediame mukorigia ifejdiame samuagdiaga ja afuime kariokfuon. Regavo madu na vierafe Kaven Akaij iji Godon fata ma iji nifak ijia ik seven (7) rejo iji fuk ijeg ja samuagdiakfuon.
REV 1:5 Regavo na sirimamega Jesu Kurais e iji fu nuibakin rene Godon vuak ma iji abe ruainma iji fuk ja mardiame ifejdiakfuon. Fur amur guame una uri E Bomana rene moik igefuon e mamkanuk fok samuagdia fin. Jesu Kurais fu no oijmuomo ijefuon fu guame kavuan fuon useme ise iji fu no anu kunuinma ijia somduome baren.
REV 1:6 Fu somduome no kege e sos samuavo iji reduido no funa efuon samuaknum God asoifuon ijefuon ikrek. No if fuon abe ajieme aroiknum sirimamega fu tavan bog daro fuon ijia no samuagduome vak. Fun mare!
REV 1:7 Regavo e fok bu ni buon ijia fu vana ijia burame ari roga bu gakfuon. E iji bu juaf abe fu bijainva iji buk bu fu gak. Regavo e ar iror igia karioinva fok bu fu game dab niraifirik. Regavo ire iji fuba masirek revo fu tavan rad rek. Mare.
REV 1:8 God E Bomana iji fu ijeg kuai, Nar God amur ijia anerene ruain vo nar tavan radkma ijia re barek. Na E Bomana darokin amur ijia fine ruain revo iviakma ijia vek fij vo tavan rad nar ruak.
REV 1:9 No Jesuon if ijia no agan besum renva ijefuon naiji uviaijon. No makai fuon ijia javo ijefuon no vajai fian abej. Regavo no adumaduigin tavan iji Kurais fu una moikigi samuakfuon no iji samuav. Bu na aferdieme do uf moik daturaik namo bu kuai Fatmos kuavo ijia unien. Ijefuon maiji na Godon vuak ijiga vuak ma iji Jesu Kurais fu nijaidiainma iji nijaidiavga bu aferdieme ijia unien.
REV 1:10 Na e Bomana ijefuon tavan ijia Godon Kaven ijar na nirokdien. Fu na nirokdiema na nuon nun ijia fai vuak be uruvana veg ijeg foin.
REV 1:11 Na fai fu ijeg na kuardien, Irerag fok a giamo iji buk ijia isoimne kien. A isoime abe e God ma vierafejo ar mai seven (7) karinva iji nijiamne. Ar mai if buon iji Efisis ga Smairna ga Fegamam ga Taiataira ga Sadis ga Firaderfia ga Reodisia iji nijiamne.
REV 1:12 Fu ijeg kuardiemga na vuak iji erar kuardiemo na iji gakafie dakaroin. Na dakaroim ga ire in jaoijmana gord ijia amardiainva rait kuivo iji seven (7) ijieb ar buon ijia iren.
REV 1:13 Regavo rait iji ireme sanavo ijiebuon kafar ijia ire be e igekin ijar ijia manin. Regavo e iji fu ugon jaor iji abesen revo oi garin ijia fu ire biret gord ijia amarenva zin igeg iramo iji jafain.
REV 1:14 Regavo e ijefuon nigen jau iji buka ma abarme ire vana abaikin ijekin. Regavo niom fuon iji fuka ire mian mareg igeg nain.
REV 1:15 Regavo dia tat fuon iji fuka ma abarme ire gord zin igeg iramo igekin ga vuak fuon fu kuaimon iji fu do igeg abesme kumen.
REV 1:16 Regavo ij fuon maink ijia fu ire mujur seven (7) kuniain. Revo ir fuon ijia kaki ka ma uikin roinroin rinva ijar ijia kekoin. Regavo uikinik fuon iji fuka saname ire veni iji fu uk manine kekomo ijeg sanain.
REV 1:17 Na fu game tua fu manino diak ijia dijeme ka e guainma igeg ijia nain. Regavo fu ij fuon maink ijia akozme nigen nun ijia abedeme kie, Ab juk naiji na ik anej ijin ga radkma ijino kien.
REV 1:18 Fu ijeg kieme vo fu madu kie, Naiji na e iji tavan bog ijia fivako ijin revo na ur kuros ijia guain gavo nan una uri ijia fivak. Regavo na aoivo ijiga ar iji bu aoime va karijo iji na daro nun ijia bu samuagdiavno kien.
REV 1:19 Iviakma irerag a giainma ijiga irerag iji bu tavan rad rekfuon iji a giainma iji isoi.
REV 1:20 Regavo ire mujur seven (7) ij maink nun ijia irenva ijiga ire in jaor seven (7) gord ijia amardiame rait kuivo ijefuon maiji igin. Ire in jaor gord ijia amardiainva rait kuivo ijefuon maiji sos seven (7) ijin. Regavo mujur seven (7) ijefuon ma iji kaven ma iji sos samuavo ijin.
REV 2:1 Areme E Bomana iji fu kie, Vuak igi isoime kaven ma iji sos Efisis samuamo ijefuon duadok ijia enun ijia karinva iji nijiamne kien. Fu kie, Vuak igi isoime kia vuak igi e iji fu ire mujur seven (7) iji imut maink ijia kuniaimo ijiga ire rait kuivo bu irenva iji uf ijia oinon ijefuon vuakno kia.
REV 2:2 Ja ire fok ja rejo iji nan giame vierafen. Jaba zazain revo ja daromene ikrejo iji nan vierafenvano kia. Regavo ja e iji bu ire ise kafokafo reoijo iji ja uzavo iji nan giame vierafen. Revo e iji bu ja biesiame kuai bu afasor Jesuon ikrejo kuaivo iji jan giame vierafedo ja kuai bu kufuimejo kuaiv.
REV 2:3 Jaba zazaime ijia arega ja vek giriesame nuifuon ikrene if nun ijia vajai fian abene rok.
REV 2:4 Regavo na ise jon be nijaidiako faif. Ja izeg ja na amur anerene oijmienva iji jan arekoga fun una garen.
REV 2:5 Ijefuon iviakma ni oi karoime una izeg ja amur kege ruainva ijeg anerene ke vaf. Ja oijon ba karoikva na ijia vua ire in jaor gord ijia amarenva rait nakuivo jon fu ar fuon ijia manino iji jafene biom abedek.
REV 2:6 Regavo ire be jar marejo iji ja e Nikoresanko unam ise kafo bu rejo iji na uzavo iji jak uzavo iji fuka maren.
REV 2:7 Regavo ja e adakiga ni Godon Kaven iji fu e God ma vierafejo iji fu kuardiamo iji mukorigia faif. Erar fu mukorigia Setanon unam ise fu biesiamo ijia ba zazai ga fu giriesame asidiamo iji fu in sunin iji bu ine tavan bog ijia ma karivako iji fu Godon juar ijia manino iji datura ik.
REV 2:8 E Bomana fu kie, Vuak nun igi isoime kaven ma iji sos Smairna samuamo ijefuon duadok ijia enun ijia karinva iji nijiamne kien. Vuak igi E Iji ik anej ijia finma iji ga fu guame una urinma iji ga radkma ijia vek fikfuon e ijefuon vuakno kia.
REV 2:9 Regavo na afikin jon iji nan vierafen revo na vierafega ja moik igefuon sinuom iji ja bakin revo jaka vek kaven ijefuon sinuom ijia ja uruvana zarain. Regavo e iji bu kuai bu e Jiusno kuaivo ijieb vuak ise kafo joisina kuaivo iji nan faime vierafen. Bu e ijieb Jesu uzame una Setanon e ren.
REV 2:10 Regavo jab ire iji ja rad vajai fian abekfuon iji fu jon rekreno iji juk. Kaven ise Setan fu ja biesiame e kafo kam dibur uniaga ja naki ten (10) ijeg karine vajai fian abek. Regavo ja vajai fian ja abejo ijia jab zazaik rega ja giriesame vake ja aoikva iji nar mardiaknum unam iji ja tavan bog ma karivakfuon iji abe miak.
REV 2:11 Regavo ja e adakiga Godon Kaven iji fu e God ma vierafejo iji fu kuardiamo iji mukorigia faikfuon. E iji erar fu e Setan fu biesuamo ijia ba zazain gavo fu mukorigia giriesame agordiamo iji fuba rad una guak revo fu ijia fivak.
REV 2:12 E Bomana iji fu kie, Vuak igi isoime kaven ma iji fu sos Fergamam samuamo ijefuon duadok ijia enun ijia karinva iji nijiamne kien. Regavo vuak igi e iji fu kaki ka ma uikin roinroin rinva ijieb ir fuon ijia usenva ijefuon vuak.
REV 2:13 Ja ar izia ja karinva iji nan vierafen revo ar iji ja karinva ijia kaven ise Setanon fata iji fu ijia nam. Jaba na rubdien revo jaka vek na ma vierafej. E Antifas fuba zazain revo fu nuibakin vuak nun nijaidiama iji bu kaven ise Setanon mai ijia kanava fu guama jan gain. Regavo jaba jon ja na ma vierafejo ijia na rubdieme vain.
REV 2:14 Regavo na ise jon kafo ja kuardiako ni faif. E iji ja karinva ijia e roin ja e Beramon vuak iji ma vierafene jav. E Beram fu e Berak iji nijaiga fu e Isrerko iji aferdiaga bu ise rekuai fu iji vierafen. Regavo ise iji e Isrerko bu fanuf iji bu kege kaven ise iji isuf baroijo iji una iknum vo tavan roin bu una barubara buon fudainamiv.
REV 2:15 Regavo madu e roin ja vek e Nikoresanko vuak iji oijmame vek jaoij.
REV 2:16 Ijefuon ise jon areme oijon karoime unam ma ijesugin keof. Revo jaba ijegrekva nar migegare vua kaki nun uikin ir nun ijia usenva ijia abe buna bijaik.
REV 2:17 Regavo ja e adakiga ni Godon Kaven iji fu e God ma vierafejo iji fu kuardiamo iji mukorigia faikfuon. Regavo erar fu daromene unam ise fok e Setan fu biesiamo ijia ba zazain ga fu giriesame agordiamo iji na ire ma iji bu kua menano kuavo iji fu kege sauim nainva iji kege vajak. Regavo nar ire mun abaikin azan ijia if iviamkor isoime abe e iji mak. Regavo if iji na isoikfuon iji e kafo buba gak revo fun e iji abenma ijar fuonkua gak.
REV 2:18 E Bomana iji fu kie, Ni vuak nun igi isoime kaven ma iji fu sos Taiatairako samuamo ijefuon duadok ijia enun ijia karinva iji nijiamne kien. Regavo vuak iji fu Godon Farif e iji ni fuon mian mareg igekin ga diatat fuon fuka ma abaikin ire gord zin igeg iramo igekin ijefuon vuakno kia.
REV 2:19 Nar ire fok ja rejo iji nan giame vierafen. Jon ja oijmanamivo ijiga jon ja ma vierafejo ijiga jon izeg ja nuifuon ikrejo ijia jaba uzain revo jaka nuibakin ikrejo iji nan vierafen. Regavo nan vierafega ja ik iji ja amur anerene re ruainva iji jan asime ka uruvana rene rok.
REV 2:20 Regavo na ise jon be nijaidiakrejo ni faif. Ja bara Jezeber jaba kuriairev revo ja areko fu irerag fu vierafenma iji nijaidiam. Fu kia fu Godon vuak e nijaidiaoino kiame fu enun iji aferdiame una unam ise ijia nijaidiam. Fu nijaidiame kia, Fun marenmano kiaga bu barubara fudainamiknum fanuf bu kaven ise iji isuf baroijo iji ioij.
REV 2:21 Na tavan fu mame samuaga fu unam ise fuon iji fu baru kafo turaoinma iji areme una oifuon dakarokro na iji samuain. Regavo fu unam ise fuon fu reoino iji fuba areme oi dakarokro vierafen.
REV 2:22 Fuba unam ise fuon areme oi dakaroimo ijefuon na fu dab fata iji fu e ijiena ijia fudainamiknum naoim unam ise reoijo ijia kozga fu buna ijia ka ma vajai fian abekfuon. Regavo e iji bu funa fudainamiknum unam ise reoijo iji buba oi karoikva iji nar unam ise ijia kam vajai fian vajiak.
REV 2:23 Regavo nar e iji bu igame fu jaoijo iji kaniaga bu aoikfuon. Na kania bu aoiga e sos fok bu iji giame vierafero na nunkua e fok ijiebuon oij iji bu vierafejo iji nar giavoro bu ijeg vierafekfuon. Regavo nar unam izeg e besubesum ja kegoijo ijia giaknum kam vajai fian vajiak.
REV 2:24 Regavo e Taiatairako e roin jaba vuak ise iji Jezeber fu nijaidiamo iji jajiav. Regavo madu ja kaven ise Setanon unam sauivkin iji naoivo iji roin jaba giame vierafen. Ijefuon naba una ire afikin kafo madu azan ijia vajiak. Regavo nika giriesame unam ma iji ja rejo ijesugin gigikin kuniaime kariga na una ruak.
REV 2:26 Regavo erar fu mukorigia Setanon unam ise fu biesiamo ijia ba zazain revo fu giriesame asidiame unam ma iji nun na vierafenva ijesugin ke vakma na una ruakva ijia na ja daro iji Asoinun fu mienma ni besum iji ja miaga ja moik fok samuakfuon.
REV 2:27 Regavo jar izeg na Asoinun ijefuon daro iji abenva ijeg ja daro abe darokma bu samuagdiakfuon. Regavo buba ja igiakva ja bu kege ma vajai fian vajiame ire saror ise igi bu abe matuvo ijeg bu kege matume vajai fian vajiaken.
REV 2:28 Regavo madu nar ire ma iji mujur iji suok ajiemo ijekin iji ja vajiakfuon.
REV 2:29 Regavo ja e adakiga ni Godon Kaven iji bu e God ma vierafejo iji fu kuardiamo iji mukorigia faikfuon.
REV 3:1 E Bomana iji fu kie, Vuak nun igi isoime kaven ma iji fu sos Sadis samuamo ijefuon duadok ijia enun ijia karinva iji nijiamne kien. Vuak iji isoim nijiame kia, Vuak igi e iji fu Kaven akai abenma fu ik seven (7) reno ga madu fu mujur seven (7) ijia kuniainma ijefuon vuakno kiamne. Ja irerag ja rejo iji nan giame vierafen. E bu giavo iji ja e nivek karin revo na giaga jaka kaven ijia aoin.
REV 3:2 Ijefuon ni uri giriesaf! Jon ja ma vierafejo fu vek sibank oijon ijia naoivno nika uri koikjon daromef. Jaba ijegrekva jon ja ma vierafejo fu barkfuon. Na gia unam jon ja God vierafejknum karijo iji fuka ba God nun ijefuon nifak ijia maren.
REV 3:3 Regavo vuak irerag iji ja amur abe vierafenva ijesugin kunaime giriesaknum mukorigia igame vo unam iji ja nuigiremoijo iji areme una nun ruaf. Regavo nika uri nisaiknum samuame kariof. Regavo jaba samua karikva na e niesavo ijeg vuakva jaba giek. Regavo na tavan ivez jon vuakfuon iji jaka ba vierafen ijefuon uri samuaknum karif.
REV 3:4 Regavo e sibank God ma vierafejo ai Sadis ijia karinva jaba unam ise ijia zazaime ire ise kafo ren. Ijefuon ja aresredo ja ugon abaikin same nana ok.
REV 3:5 Regavo erar fu mukorigia Setanon unam ise fu biesuomo ijia ba zazain gavo fu giriesame asidiamo iji fuk ugon abaikin iji abese ok. Regavo na if fuon na buk iji e iji bu tavan bog ijia karivakfuon ijiena na isoinva iji naba fik. Regavo nar Godon nifak ijia ga anera fuon ijiebuon nifak ijia kia, E iji fu God ma vierafene na jajieme ikrenma kiak.
REV 3:6 Regavo ja e adakiga ni Godon Kaven iji fu e God ma vierafejo iji fu kuardiamo iji mukorigia faikfuon.
REV 3:7 E Bomana iji fu na kie, Ni vuak nun igi isoime kaven ma iji fu sos Firaderfia iji samuamo ijefuon duadok ijia enun ijia karinva iji nijiamne kien. Vuak igi e iji maturainma ka ba vuak kufuimeno ijefuon vuak. Regavo e iji fu e darokin e Devid aikin ga Godon ar ma iji vien ijefuon ki iji fur kunain. Fu vien dajakma e be fuba abe una bijukuraken revo fu bijukurakma e be fuba una dajak.
REV 3:8 Na unam jon izeg ja ikrejo iji nan giame vierafen. Regavo daro jon iji izeg ja na ma vierafejo iji fu ukakbe revo jaba zazain. Regavo jaka vek vuak na nijaidiainva iji igieme jajie vo madu jaba if nun uzav. Ja ijegrejo ijefuon na joifuon vien dajame abe uikinik jon ijia abededo fu erar una abe bijukurakma bakin.
REV 3:9 Regavo ni faif e iji kufuikin iji bu kufuimene kuai no e Jiusno kuaik revo bu kaven ise Setanon e ijieb afuime kufuimeoij. Regavo nar bu kiaga bu ro uinak jon ijia ato same ja kurituamajiak. Bu ijegrene ijia vierafero na ja oijmiavoro bu ijeg vierafek.
REV 3:10 Na izeg ja adumaduigin vajai fian abekfuon iji nan nijaidiava ja faime igien. Ijefuon na tavan iji moikigi na abe vajai fian miakafie roko ijia na ja karauniak. Regavo iji na vajai fian miakafie roko iji na e moikigia oinva iji biesiame giakafie rok.
REV 3:11 Naka iviakma igef roko ijefuon giriesame unam ma iji ja rejo ijia kegof revo jab zazaiga e kafob ja asidiame kaven ijefuon ire ma iji ja varur gufia kekfuon iji karek.
REV 3:12 Regavo na e iji fu mukorigia Setanon unam ise fu biesuamo ijia ba zazain gavo fu giriesame asidiamo iji abe e ikin rega fu tuar gigikin rene God nun ijefuon ar guf ijia manik. Regavo fuba ar iji fu manino iji areme keko vak. Regavo na God nun ijefuon if ijiga Godon ar mai iviamkor ijefuon if Jerusarem kuavo iji oifuon ijia isoikfuon. Regavo ar iji God nun ijar varur ijia kuaga fu ari ruak. Regavo na madu e ijefuon oij ijia if nun iviamkor iji isoik.
REV 3:13 Regavo ja e adakiga ni Godon Kaven iji fu e God ma vierafejo iji kuardiamo iji mukorigia faif.
REV 3:14 Regavo E Bomana iji fu madu kie, Ni vuak nun igi isoime Kaven ma iji fu sos Reodisia samuamon ijefuon duadok ijia enun ijia karinva iji nijiamne kien. Naiji na e iji vek ijia giriesame manino ijin. Regavo naiji na e iji tavan bog una nuibakin reoinon ijin. Regavo madu vuak nun na kuaivo iji na kufui kuaivo bakin revo naka vuak ma ijesugin kuaiv. Regavo nar ire fok God fu amardiainma iji samuagdiav.
REV 3:15 Irerag ja reoijo iji nan giame vierafen. Na gia jaba turanamime oimarknum na oijmieme Kaven akai ijefuon unam ijia jav revo madu jaba unam nun iji ma uzav revo jam ukakbe jav. Ijefuon ja vek unam uf ijia ireva na iji giaga naka isediem.
REV 3:16 Ja ire nokarok (2) iji rene naba uruvana oijmie ga ziegafievo ijefuon na ja na juvit igeg iti nun ijia foi korek.
REV 3:17 Ja kuai noka sinuom zarain ga ire kafo noba vierafenvano kuain. Regavo ja una kaven ijefuon unam ijia jaka ma sinuom bakin revo jaka detabar ni zuriaime oij. Regavo ijeg ja reoijo iji jaba ganamime vierafen.
REV 3:18 Ijefuon na kiavo nin ro gord ma iji zin igeg iramo iji nun kimef. Regavo gord iji fuka ma mukor bu mian ijia abe kafut fok kanasenva ijin kimega fu jafak sinuom zaraif. Regavo madu ja detabar oijo ijefuon ugon abaikin iji nun kimene vajai jon ja samakaf ijia jumoijo iji okuriaf. Regavo muramura kimene ni jon uju fu madiaga ja nisaime giaf.
REV 3:19 Na e iji na bu oijmiavo iji na kege vajai fian miavo iji na kege arir nijaidiame uniav. Ijefuon giriesame oijon karoime unam ma ijesugin jame kariof.
REV 3:20 Regavo faif. Na vien on ijia manine kanakana. A faikma a vien on iji dajaga na aru vua osik fine duok iga a nosik fiok.
REV 3:21 Erar fu mukorigia Setanon unam ise fu biesuamo ijia ba zazai ga fu giriesame asidiamo iji nar daro maga fu fata nun ma irif ijia fik. Regavo Asoinun fu izeg na e fok ise reoijo iji asidiavo ijefuon fu fata fuon miema na fijo ijeg na e iji fata nun maga fu irif ijia fik.
REV 3:22 Regavo ja adakiga ni Godon Kaven iji fu e God ma vierafejo iji kuardiamo iji mukorigia faif.
REV 4:1 Areme na una madu nimamaime ga varur gufia vien be fu dajain. Regavo kua be veg igekin fu amur kuardiema na fainva ijar vek ijia kume, Ajieme igia roga na irerag fu rad rekreno iji nijaidavno kumen.
REV 4:2 Fu ijeg kumekoga migegare Kaven Akai ijar na dab niroikiema na varur ijia gak Godon fata ijia e be fu ijia fin.
REV 4:3 E iji fata ijia fino nifak fuon fu abaikirame ire mun ka mukor kavuan be bu jasfa kuavo ijekin ga madu mun inak vajat be bu kanerian kuavo ijekin. Regavo fata iji fu fino irif ijia ire anuag inak vajat be ijar ijia same ameoin.
REV 4:4 Regavo Godon fata irif ijia fata kafo madu tuenti fo (24) ijeg ijia iren. Regavo e uguaikin tuenti fo (24) bu ugon abaikin iji same vo ire kafo gord zin igeg iramo ijia amardiavo iji nigen buon ijia same ijia karin.
REV 4:5 Regavo Godon fata ijia na ga varur ijar ijia karame sanaknum uruvana ijia tavuam. Regavo Godon fata ijefuon uinak ijia na ga ire ikuosaij igekin seven (7) ijieb buin ijia mian igeg naine sanav. Regavo ikuosaij iji naine sanamo iji Godon Kaven seven (7) ijin.
REV 4:6 Regavo madu Godon fata uinak ijia ire be na ga saof igeg nafuin revo fuka ma rituraime ma abaren. Godon fata iji namo irif ijia ire kafo nivek fo (4) ni buon roin nuon ijia ga roin oinak ijia ijieb ijia karin.
REV 4:7 Ire iji karinva amur iji na gaga fu fanuf raion igekin ga be iji na ga fu maf-kau igekin. Regavo uf be iji fino iji na ga fu emabuon uikinik igekin revo rad iji fino iji na ga fu ire um buruof kaf ijia rame oinon igekin.
REV 4:8 Regavo ire fo (4) nivek karijo iji bu daf siks (6) ijeg bijianain. Regavo ire ijiebuon vajai fok azan ga guf iji buka niom ijieb okuriain. Regavo nakikmazak bu dua igi roij, Akai Akai Akai iji God E Bomanak. E Darokin fu ik anej ijia fi ruain ga iviakma fu vek fin ga fur rad una ruakfuon.
REV 4:9 Regavo ire fo (4) nivek iji karinva ijieb e iji fu fata ijia tavan bog fivako iji dua rokafav. Bu tavan bog Godon sanainma ijefuon dua roij. Bu ijegrejknum fu dab aroime oimardaknum dua rokafav.
REV 4:10 Bu ijegreko ijia e uguaikin tuenti fo (24) iji karinva iji bu e fata ijia tavan bog fivako ijefuon nifak ijia tuame moik dijeme fuon sirimamej. Bu ire iji gord ijia amardiainva bu nigen buon ijia sainva iji kare fata iji manino moik ijia korme ijeg kuai, Aiji a E Bomana nuvuon ga God nuvuon ga ar ire fok igi naoiko no giavo iji amardiain. Regavo on vierafenma ijia kege uniaga bu nivek kari ikrej. Ijefuon fun mardo no on daro bomana ijiga on sanainma ijiebuon no arordame aroifiriknum oimardame dua rokafav.
REV 5:1 Regavo na madu e iji fata ijia fino ijefuon imut maink ijia ga fu ire buk igekin be anuinma iji kunaime fin. Regavo ire buk igekin iji fu kunaime fino iji bu roinroin isoime okurame aren revo kaf ijia bu kajek seven (7) tamukuriain.
REV 5:2 Regavo na gako anera ka ma darokin ijar uruvana biumame kume, Erar fu aresredo fu kajek tamug iji kunia turame buk iji anu abedenva iji abe irakno kumen.
REV 5:3 Regavo e be varur ijia fino ga moikigia ga moik guf ijia fino iji fuka ba aresredo fuba buk iji abe ira guf ijia vuak iji isoinva iji dakfuon.
REV 5:4 Na iji faime na una madu nirain ijefuon maiji e be fuka ba aresredo fu buk iji abe irame guf iji dakro na ijefuon nirain.
REV 5:5 Regavo e uguaikin be fu kie, Ab niraikno kien. Ni ga e darokin be Judian agan ijia ga Devidon uifarif ijar ise ijefuon daro iji fun mukorigia asin. Ijefuon fun aresredo fur kajek tamug seven (7) iji ufuseme buk iji abe irame dak.
REV 5:6 Rene na madu ga Maf-Sif Uka ijar fata uf ijia manin revo ire fo (4) nivek ijieb ijia iren. (Revo Maf-Sif Uka iji fu Jesu Kurais). Regavo e uguaikin iji bu fata buon ijia ire ameoine iren. Revo ire Maf-Sif Uka iji fino iji bu ur kana mataimava fu guainma ijin. Regavo nigen fuon ijia ire muan seven (7) ijieb ijia ajie usen revo ni fuon iji seven (7). Regavo ire seven (7) ijiebuon ma iji Godon kaven seven (7) fu uniama bu ar iror ijia vainva ijin.
REV 5:7 Ire Maf-Sif Uka iji fun va e iji fata ijia fino ijefuon imut maink ijia buk iji anume abedenva iji aben.
REV 5:8 Fu ijegrega ire fo (4) iji irenva ijiga e uguaikin tuenti fo (24) iji bu tuame Maf-Sif Uka ijefuon nifak ijia dijen. Regavo e besubesum imut buon ijia bu ire gita kanavo ijekin ijiga dis gord ijia amardiainva iji kuniain. Regavo dis ijia ire ka mukor bu baroga fu udi urino ijar ijia irtoijen revo ire iji bu kuniainva iji Godon e ijiebuon sirimamejo iji bu kuniain.
REV 5:9 Bun dua iviamkor iji roknum kua, Aka aresredo a buk iji anum igekin iji abe irainmano kuain. A bun kanavga a guain revo on a guainma a vajat on abe isuf igeg baroin. A baroine e fok agan kafokafo ga isama kafokafo ga moik ga vajai surif kafokafo iji kime aferdiame Godon e ren.
REV 5:10 Regavo an bu kege Godon e mamkanuk amaredo bur God nuvuon ijefuon ikrejknum e kafobuon sirimameknum moikigi samuakfuon.
REV 5:11 Regavo na madu ga anera ka ma uruvana ba dakva ijieb irovajava na fain. Regavo anera iji bu Godon fata ijigam ire fo (4) iji nivek irenva ijiga e uguaikin iji kege uf ijia uniame bu fata ijia ire ameoine irovajav.
REV 5:12 Bu uruvana irovajaknum dua roine kume, Maf-Sif Uka iji bu kanain gavo fu una urinma ijar fun aresren. Fu aresredo Godri daro ga unam mukoi vierafene rejo ijigam unam sinuom zaraivo ijigam sanainma iji kege fu vajak. Regavo ema iji buka fu dab aroime oimardak.
REV 5:13 Areme na madu fai ire fok God fu amardiainma bu varur gufia ga moikigia nivek oijo ga moik guf ijia ga saof guf ijia karinva iji bu oimarknum dua roij. Na fai bu dua roine kume, No e iji fata ijia fino ijiga Maf-Sif Uka ijiebuon daro ga buon bu e mukoi renva ga sanainma buon iji tavan bog arordiaknum vak.
REV 5:14 Bu ijeg kumeko ire fo (4) nivek irif ijia irenva iji bu kume, Maremano kumen. Regavo e uguaikin iji irenva iji buk kurituamajiame buon sirimamen.
REV 6:1 Na ijia manine gako Maf-Sif Uka iji fu ire anum amur iji dab ufuseme irasen. Regavo ire iji fu irakoga ire fo (4) nivek irenva ijia besum fu kume, Rokne kumekoga fuka varur igeg kumen.
REV 6:2 Na ijia manine ga naka ire maf-os abaikin iji gain. Regavo e iji azan ijia fino iji fu feva iji kunain revo ire nigen abesvo gord ijia amarenva ijin abe abesen. Regavo iji fu kekome bijaim vainma iji fun fur rareme e roin kaniakafa vain.
REV 6:3 Areme Maf-Sif Uka iji fun una ire anum be iji madu abe ufume irasen. Fu iji ufume iraseko ire fo (4) nivek ijia irenva besum ijar na fai fu kume, Rokne kumen.
REV 6:4 Na gakoga ire maf-os kavuan ijar madu kekome ruain. Regavo e iji fu azan ijia fino iji fu daro iji e igi bu moikigia afuime karijo iji abe iserdiaga bu bui nigaraime bijaiknum karikfuon fu ijin aben. Regavo madu fu ire kaki uikin roinroin rinva bomana iji madu aben.
REV 6:5 Areme Maf-Sif Uka iji fun una ire anum be tiri (3) iji abe irain. Fu iji irakoga na fai ire fo (4) iji nivek irenva iji be fu na kume, Rokne kumen. Fu iji kumeko na ijia ga maf-os kazin ijar ijia manin revo e iji azan ijia fino iji fu ire siker bu ire afik iji da giavo iji imut fuon ijia kunaime fin.
REV 6:6 Regavo na fai ire fo (4) nivek irenva iji uf ijia e igeg vuak kuaime kume, E iji ejafiaga bu mon mamkanuk iji karame ire ukakna ijia korevno kumen. Ijefuon bu naki besum ikrekva bu rais fasor besum kimek revo baga farava fasor besum kimek. Regavo in Oriv sunin ijefuon safik ijiga ire kaijesan sunin ijefuon safik bu kua vuain kuavo iji ab kuniai giak.
REV 6:7 Rene Maf-Sif Uka iji fun ire anum be fo (4) ijin abe irain. Fu irasekoga ire fo (4) iji nivek irenva ijia be fu kume rokne kumen.
REV 6:8 Ijegreare na ga ire maf-os vajai garam ijar ijia manin. Regavo e iji azan ijia fino iji e iji bu kua aoivo kuavo ijar ijia fin revo ma samaij ijia jainma iji ar iji bu kua Zuarunam karijo ijar ijia jame rok. Bun daro vajiame kia, E moikigi oinva ijin atame nokarok ga nokarok (4) refno kiain. Areme ja daro namo ijefuon ar kafar be ire bijaivo ijiga unam izeg bu vasia karijo iji kege bu vajiaf. Regavo madu kafar be iji ire adam ise ijiga fanuf taraiko e jakiavo iji kiaga bu e iji ata besum karinva bu iji kege arafiriaga bu aoikno kiain.
REV 6:9 Areme Maf-Sif Uka iji fun ire anum faiv (5) iji abe irain. Na ar fata iji bu ijia Godon isuf baroijo rotit ijia ga ekaven kafo bu ijia karin. Regavo ekaven iji bu e iji bu Godon vuak iji ma vierafene nuibakin nijaidiainva ijiga e iji bu Godon ire ma iji fu oimaikfuon bu reoijga bu kaniainva ijieb bu ijia karin.
REV 6:10 Bu uruvana igia biumame kume, E Bomana ma darokin ga ka ma Akai gufe, A ivez una ruak? Regavo madu no tavan izeg a samuaga a una e fok moikigia oijo ijiebuon ise iji ke mazim giame e iji bu no kanuinva iji kege vajai fian vajiak?
REV 6:11 Regavo e besubesum bu ugon abaikin ka jaoikin iji vajiame kia, Ja oi mafaime sibank naoime samuak. Ja isuar samuake e uviaifijaf ga makifjon bu God ma vierafejo roin bu nuifuon ikreoijo iji madu bu ja kaniainva ijeg kaniaga bu e uruvana rega nason ijia vua e fok ijiebuon ise iji kege mazim giavno kiain.
REV 6:12 Regavo na una Maf-Sif Uka iji gako fu ire anum siks (6) iji abe irain. Fu irakoga moikigi fu dab uruvana urakoga tavan iji fu sanamo iji fuka nakime una kazin ren. Regavo asam iji fuka dakaroime kavuan ren.
REV 6:13 Ire mujur iji bu ire makam ga duribat buibur fu ufiga bu nubuiksame moik ijia arivo ijeg bu varur gufia jafeksame arin.
REV 6:14 Bu ijegrekoga varur iji fu ire fefa igeg abe anume bakitemga do uf moik daturaik namo ijiga uruor fok bu ar buon bu irenva iji areme biom ai kafo vain.
REV 6:15 E Kin fok moik kafokafo samuagdiavo ga e darokin ga e sinuom zarainva ga e mamkanuk e bijaivo iji samuagdiavo ijin. Revo madu e fok e kafobuon ikrejo ga e ba ikrejo e fok bu subime mikiar ga mun rotit uruor mamkanuk ijia sauin.
REV 6:16 Bu ijia sauime uruor ijiga mun mamkanuk iji kume, Migegare tuame no okuruofno kumen. Bu kume, No e iji fata ijia fino ijefuon ni iji ga fu dejufduom. Regavo madu ire Maf-Sif Uka iji fu no vajai fian vajuokafa ziemo iji fuka bomanakno migegare tuame no okuruofno kumen.
REV 6:17 E nokarok (2) ijiebuon tavan iji e vajai fian vajiakfuon iji fun igija ruaido fu e besum be fu erar nivek fikma bakin.
REV 7:1 Na ire iji gia barme na una ga anera nokarok ga nokarok (4) iji bu moik igefuon kusok roinroin ijia iren. Regavo anera be fu kusok iji tavan ajiemonak ijia manin. Regavo be fu kusok iji tavan koin nak ijia manin. Regavo nokarok (2) bu kakare ijefuon kusok roinroin ijia iren. Bu ireme buibur iji bu ufime ire fok moik guf ijia naoivo ijiga saof ijia kativo iji bijukuriame iren.
REV 7:2 Regavo na una tavan ajiemonak ga anera be fu vajai fuon ijia God iji tavan bog ijia fine vako ijefuon anf iji fu vajai fuon ijia nako fu ajieme rok. Anera nokarok ga nokarok (4) iji God fu daro miame kia, Ja moik igeko saof iji vajai fian miakno kiainma iji fu uruvana kumen.
REV 7:3 Fu kumene kia, Jab moik igeko in ga saof iji kege vajai fian miak. Regavo ja samuake no Godon anf iji e Godon ikrejo ijiebuon variatar ijia name arega jason kege vajai fian maikno kumen.
REV 7:4 Regavo na fai bu kuai e iji Godon anf iji nigen ijia nainva iji e uruvana vuan adred foti fo taosen (144,000) ijeg bu anf iji nainvano kuain. Regavo e iji bu e Isrerkobuon agan tuer (12) guf ijia bu anf iji nain.
REV 7:5 Regavo e agan besubesum ijiebuon guf ijia e tuer taosen (12,000) bu ijia usem ruain. Regavo agan ijiebuon if iji Juda ga Ruben ga Gad ga Asa ga Naftari ga Manasa ga Simion ga Rivai ga Iso ga Zebura ga Josof ga Beziman ijin.
REV 7:9 Na iji gia barme na una gia e ka ma uruvana e bu dakva bakin ijieb ijia afuin. Regavo e iji bu agan ga ai kafokafo ga isama ga vajai surif kafokafo ijia ruain. Bu fata ijiga Maf-Sif Uka iji fino nifak ijia iren. Regavo bu ugon abaikin jaoijmana iji sain revo imut buon ijia bu ire anam kiak iji kuniaime ijia iren.
REV 7:10 Bu ijia ireme uruvana igia biumame kume, God nuvuon fu fata ijia fino ijiga Maf-Sif Uka ijieb no karaunuinvano kumen.
REV 7:11 Anera fok bu fata ijia ire ameoine ijia iren revo e uguaikin ga ire fo (4) nivek irenva iji buk ijia iren. Bu ijia iremoine bu fata iji samaij ijia kurituame moik ijia dijme Godon sirimamej.
REV 7:12 Bu kume, Mare God nuvuon iji fuka e darokin ga ka mukorigia vierafe keno ga ka sanainma iji fuon. Ijefuon no fu abe aroifiriknum oimardavo kumen.
REV 7:13 Regavo e uguaikin be fu na kie, E iji ugon abaikin ga jaoijor sainva iji bu e izeko ga bu izia ruainvano kien?
REV 7:14 Na kua, E Bomana naba giain revo aiji an vierafenmano kuain. Revo e iji fu una na kie, E iji irenva iji bu e iji bu unam ise ijia vajai fian abene roke igia usenva ijieb irenvano kien. Bu ugon buon iji bu sainva iji bun Maf-Sif Uka ijefuon kavuan ijar somdiamga fu abaren.
REV 7:15 Ijefuon bu nakikmazak Godon fata nifak ijia ireme fuon ikrej. Bu ijia ikreko e iji fata ijia fino ijefuon daro fuon vuat ijar bu samuagdiam.
REV 7:16 God fu daro fuon ijia samuagdiamo ijefuon buba una vasiaoriak ga do kafiak ga tavan ga ire kafo ijiebuon vuat iji fuba jakiak.
REV 7:17 Ijefuon maiji Maf-Sif Uka iji fu fata uf ijia fino ijar bu samuagdiak vo fur aferdiame do ma iji bu ine ijia karivakfuon ijia uniak. Regavo God Asoij ijar tavan bog oifian buon iji dasumdiak.
REV 8:1 Maf-Sif Uka iji fun anum seven iji abe irakoga ire fok varur ijia karinva iji buka tavan ivuankbe ba irovajain Regavo buka katitaren.
REV 8:2 Regavo na giako anera seven (7) iji Godon nifak ijia irevo iji bu veg seven (7) kege vajiain.
REV 8:3 Regavo anera be fu ire udi mukoi urino bu javo ijefuon dis gord ijia amarenva iji kunaime roke fata iji bu God isuf baroijo irif ijia manin. Regavo buka ire udi mukor urino uruvana kege anera iji vajava fu kege e Godon ikrejo ijiebuon sirim ijekma God isuf baroidain.
REV 8:4 Ire iji udi mukor urino ijiga Godon e ijiebuon sirim iji bu anera iji Godon nifak ijia manino ijefuon imut ijia udi urine ajie Godon vak.
REV 8:5 Fu ijegrene anera iji fun ire iji udi mukor urino ijefuon dis an iji aben. Fu iji abe mian fata iji bu God isuf baroijo iji karame ijia same abe moikigia uduimkoren. Fu ijia uduimkoremga varur iji fu karame uruvana tavuakoga moik iji fu dab ukin.
REV 8:6 Areme anera seven (7) iji bun veg buon seven (7) iji foikuai kanafume samuain.
REV 8:7 Bu samuame ireko anera amur iji fu veg fuon dab foin. Fu foiga ire ais ijiga mian ijar kavuan ijekma afurvene moikigia usen. Fu usem moikigia arime moik ivuankbe in bu ijia irenva iji roin naine ire garas fok fuka naine baren.
REV 8:8 Fu ijegrekoga anera tu (2) iji fu uri veg fuon dab foin. Fu foiga ire be nafar bomana mian naino igekin iji buda saof ijia akozen. Bu dab ijia akozekoga saof iji fu dab atame nokbek (3) ren. Areme saof iji ivuankbe fuka kavuan ijar okurakoga kijum guf ijia oijo fok buka aoim baren. Regavo madu sisim iji bu ijia oijo fok buka ma iseren.
REV 8:10 Regavo madu anera tiri (3) iji fu veg fuon dab foikoga varur ijia mujur bomana ijar ikuosai igeg naine ari dijen. Fu ari moik ivuankbe do iji vako ijiga do iji e bu ijo ijia arin.
REV 8:11 Fu ijia arimga do iji roin bun una imag aruin. Ijefuon maiji mujur ijefuon if iji bu kua Imagno kuavo. Do iji bu imag aruinva ijefuon e uruvana bu do iji ine buka aoim baren.
REV 8:12 Regavo anera fo (4) iji fun uri veg fuon dab foin. Fu foiga veni fateroin dab iseren revo asam ijiga mujur ijiebuon sanavo iji fateroin bun iseren. Bu iserenva ijefuon veni iji fu sanamo iji fu suok ijesugin sanam revo nakifuon fu nakim. Regavo asam fu sanamo iji fu sana vake ve ufrenma ijia fu sanamo bakin revo fu migegare una ve nakim.
REV 8:13 Na iji giame na mani faikoga um buruof kaf ijia oino ijar uruvana igia kumen. O ja esenia o ja esenia e moikigia oijo esenia. E anera nokbek (3) vek irenva ijieb veg buon foikva ire ka ma ise ijieb rene e fok kam ma arafiriakno kumen.
REV 9:1 Anera faiv (5) iji fu veg fuon dab foin. Fu foikoga mujur ijar varur ijia ko ari moik ijia dijen. Fu ijia dijemga God fu mako iji dibuor iji ka gavo bakin zuar bu ijia karijo ijefuon vien ki iji abe main.
REV 9:2 Mujur iji fu ki iji abe mako ijefuon vien iji dajain. Fu dajamga mia mareg numume javo igekin ijar ijia utuame ajien. Mako ijefuon mian uk ijar ajieme veni ijiga varur iji kam nakin.
REV 9:3 Fu ijeg nakikoga ire misur mamkanuk ijieb mian uk ijia useme moik ijia ruain. Bu ijia rokga Godri daro miamga bu ire sugon igeg ren.
REV 9:4 Regavo God fu daro miame kia, Jab ire kafo moikigia irenva ire garas ga in ga ire kafo moikigia tavuavo iji jab arafiriame jakiak. Regavo e iji eraneb Godon anf iji ba variatat buon ijia nainva ijesugin jakiafno kiain.
REV 9:5 Ire misur iji bu e kafo buba jakiaga bu aoik revo bum vajai fian miaga bu asam imut roin (5) karine vajai fian abek. Regavo vajai fian bu abekfuon iji buka ire sugon ijar jakiainma igeg bu vajai fian abekfuon.
REV 9:6 Asam imut roin (5) guf ijia buka vajai fian abek ijefuon bu aoikuai unam nisai vo uri bomana ijefuon rek revo buba aoik.
REV 9:7 Regavo ire misur mamkanuk iji bu gia bu ire maf-os igi e bu kege va bijaikuai samuavo ijekin. Regavo nigen buon bu ire gord ijia amardiainva iji sain gavo uikinik buon buka efarif igekin.
REV 9:8 Regavo nigen buon jau iji bu bara igekin ga ubai buon bu ire siroij kuriai bu kua raion no kuavo igekin.
REV 9:9 Regavo guge buon iji bu ire darer ajan gigikin ijia amardiainva ijar okuriain. Regavo ire misur ijiebuon daf iji bu vuijevo iji a faikma iji fu e uruvana bu ire sariot kuavo fata igekin e bu ijia ajie kariko maf-os bu kiria iritia bijaikuai vako igekin.
REV 9:10 Regavo misur ijiebuon vien iji bu ire sugon ijiebuon vien igekin ga daro buon bu e jakiaga bu asam imut roin (5) abe karijo iji bu vien buon ijia naoiv.
REV 9:11 Regavo e bomana iji fu bu samuagdiamo iji anera iji mako dibuor gavo bakin iji samuamo ijar bu samuagdiam. Regavo e ijefuon if iji e Ibrukobuon isama ijia bu kua Abadon kuavo revo e Grikbuon isama ijia bu kua Aforion. (Revo vuak Aforion ijefuon maiji e vajai fian vajiamo).
REV 9:12 Areme fu kie, Ire amur iji ka ma ise iji fun ijija re baren revo rad bu ire una nokarok (2) ka ma ise bu vekdo buson ruak.
REV 9:13 Areme anera siks (6) iji fun uri veg fuon iji abe foin. Fu foiga na faiko kuso roinroin fata iji ire gord ijia amarenva bu ijia God isuf baroijo iji Godon nifak ijia manino ijia vuak be fu ijia kumen.
REV 9:14 Regavo vuak iji fu anera siks (6) iji kua, Ni anera nokarok ga nokarok (4) iji bu kege kiriame do Iufretis irif ijia uniainva iji irasefno kumen.
REV 9:15 God fu anera nokarok ga nokarok (4) iji kege name tavan iji ruakreno iji samuain. Fu tavan iji roga fu irasdiaga bu usem moik ivuankbe e ijia karinva iji bur kania barek.
REV 9:16 Regavo anera iji nokarok ga nokarok (4) iji e bijaivo buon bu samuagdiavo be iji na fai fuka ma uruvana tu adred mirion (200,000,000) ijeg.
REV 9:17 Regavo iji na nimamainva ijia na maf-os ijiga e iji ijia ajie karinva iji nan giain. Regavo ire darer buon bu guge nufiavo iji fu kavuan mian igeg nain. Regavo fuka ire inak vajat mun safaia kuavo inak vajat ga madu ka garam ire sarfa kuavo igekin. Regavo maf-os ijiebuon nigen iji buka fanuf raionbuon nigen ijekin. Regavo ir buon ijia fuka mian igeg naikoga uk ka garam sarfano kuavo ijekin ijar ijia utuame usev. Ire nokbek (3) ka ise maf-os ijefuon ir ijia usenva ijieb moikigia e moik ukakbe (1 1/3) oinva iji bur kania barek.
REV 9:19 Maf-os ijefuon daro iji bu ir ijiga vien ijia naoiv. Vien buon buka ire tabar igekin ijefuon bu ijia e uruvana jakia matan vajiav.
REV 9:20 Regavo e iji ire ise ijieb ba kaniainva iji buba ire iji bu imut ijia amardiainva iji nuigafiame subim vain. Regavo bu vek kaven ise ga ire iji bu in ijigam gord ga sirva ga mun ijia amardiainva iji bu ire kafo giaknum ga kativo ga vuak faivo bakin ijiebuon sirimamej.
REV 9:21 Regavo e iji buka ba oi karoime e iji bu kaniavo ijigam kaven ise kafokafo vierafejo ijigam barubara buon fudainamime ise rejo ijigam niesavo iji aren.
REV 10:1 Na madu ijia mani ga anera darokin be fu varur ijia vana iji burame ari rok. Fu vana ijar okurako fu ijia ari ruako na gaga nigen fuon iji fu ire anuag ijar sa ameoine aren. Regavo uikinik fuon fuka veni igeg sanain revo masian fuon buka mian igeg nain.
REV 10:2 Regavo imut fuon ijia fu ire buk igekin ukakbe anuinma iji abe irame kunain. Regavo dia maink fuon iji fu saof ijia vuin revo dia aizinan iji fu moik ijia vuin.
REV 10:3 Fu ijia vuime ka uruvana igia kumeko fuka ire siroij raion igeg goime ruain. Fu kumene arekoga varur seven (7) karame una roib uruvana igia tavuame kumen.
REV 10:4 Bu kumejga na migegare vuak iji isoikrejga e be fu varur ijia na kumen. Fu kume, Varur seven (7) iji bu kumene vuak iji bu kuaivo iji ab abe isoik revo nin vuak iji isuar sauime oij on ijia vierafene abedemne kumen.
REV 10:5 Fu ijeg kumekoga anera iji saof ijiga moik azan ijia vuim manino iji fu imut maink iji akozme varur ijia ajien.
REV 10:6 Fu imut maink iji varur ijia akozeknum God tavan bog ijia fivako ga varur ga moik ga ire fok igia oijo amardiainma ijefuon if iji kurain. Anera iji fu Godon if ijia kurame kuai, Ire iji rekreno iji fuba arek vo saroikma bano kuain.
REV 10:7 Regavo anera seven (7) iji fu veg fuon iji foikma ijia God fu vuak ma iji fu sauim vierafene fino iji fu abe samafrek. Regavo vuak iji fun ur e iji bu vuak fuon abe vierafene kuardiaoinva iji kuardiain.
REV 10:8 Areme vuak iji varur ijia kuardienma ijar una kumene kie, Va e anera iji saof ga moik azan ijia vuim manino ijefuon imut ijia ire buk igekin anuinva iji fu irame abedenma iji abene kien.
REV 10:9 Na vake anera iji kua, Ire buk igekin ukakbe iji a kunainma iji abe miemne kuain. Na iji kuardavga fu kie, Buk iji abe ine kien. A ikma ir on ijia fuka muni rif ijefuon marin igeg madak revo rad defok on ijia fu fiadakno kien.
REV 10:10 Na ire buk igekin ukakbe iji imut tat fuon ijia abe ijga ir nun ijia fuka ire muni rif ijefuon marin igeg fuka madien. Revo na inuosevga rad fuka defieme fuka bomana viefiadien.
REV 10:11 Areme fu una madu kie nika una Godon vuak iji abe moik kafokafo ga e surif kafokafo ga isama kafokafo ijigam e Kin moik samuavo iji ire iji buon rekfuon ijin kuardiame nijaidiamne kien.
REV 11:1 Areme fu in be bu ire kafo mim giavo iji abe mieme kie, Iji abe va Godon ar iji mime ar fata iji bu Godon isuf baroijo iji mimne kien. Regavo madu e izeg bu ijia Godon sirimamejo iji damne kien.
REV 11:2 Regavo ab ar makaf iji God fun abe e Jius bakin iji miainma iji mikno kien. Fu abe miaido e Jius bakin bu mai Jerusarem kuavo ijia juaivasia nokbek ga be uf (3 1/2) ijia ar iji arafiriknum ok.
REV 11:3 Bu ijia arafiriknum okega na e nokarok (2) bur nuifuon ijia vuak nun e roin kuardiavo iji kiaga bu vuak. Bu vua ijia usem ugon e oifiaigin bu savo iji same ijia vuak nun iji nijaidiak. Revo vuak nun iji bu nijaidiaokfuon iji bu naki vuan taosen tu adred siksti (1,260) ijeg bu ijia vuak kuardiaknum nijaidiaok.
REV 11:4 Regavo e nokarok (2) iji vuak nun abe nijaidiakfuon iji bu in nokarok (2) bu kua Orivno kuavo ijiga ire nokarok (2) gord ijia amardiainva bu rait kuivo ijin. Regavo ire iji bu E Bomana moik fok amarenma ijefuon uikinik ijia irenva ijin.
REV 11:5 E kafo eraneb bu kege vajai fian vajiakuai ruakva ir buon ijia mian ijar ijia naine usem e ani buon kege arafiriak. Ijefuon eraneb bu kege arafiriakva bu unam ijekin ijia kaniaga bu aoik.
REV 11:6 Bu daro namo ijefuon bu varur iji ve damo iji bijukuraga tavan iji bu vuak nijaidiaokva ijia ve iji fuba dak. Regavo madu bu daro naoivo ijefuon bu do ukakna iji e bu ijo iji kege karoiga bu una ka kavuan rek. Regavo madu bu daro naoivo ijefuon bu tavan kafo buon vierafenva ijia ire ise kafo rene e moikigia oinva iji kege arafiriakva iji bu aresredo bu rek.
REV 11:7 Bu Godon vuak nijaidiame vake barkva ijia ire fanuf kuriai be maf kuriai igekin ijar mako dibuor iji gavo bakin ijia ajie kekome e ijiena bijaik. Fu buna bijaime jakiaga bu aoik.
REV 11:8 Bu aoiga surif buon iji bu mai bomana Jerusarem bu E Bomana abe kuros kanainva iji unam ijia naoik. (Revo mai bomana ijefuon if bu abe dakaroime una mai ise Sodom ga Ijift bu kiavo ijeg kurak).
REV 11:9 E ijiebuon surif iji bu tavan nokbek ga be uk manino (3 1/2) ijeg bu ijia naoikega e moik kafokafo ga agan kafokafo ga isama kafokafo ga vajai surif kafokafo iji bu giakfuon. Bu giak revo bu kege mako rukva bakin.
REV 11:10 E nokarok (2) iji Godon vuak nijaidiaoijo iji bu aoikva e fok moikigia oijo iji buka bomana oimarkfuon. Bu iro ine oimarknum sinuom vajuinamik. Ijefuon maiji e nokarok (2) iji Godon vuak nijaidia ruainva iji buka ire vajai fian bomana iji abe e moikigiebuon ruain. Regavo bun aoinva ijefuon bu ijegrene oimarkfuon.
REV 11:11 Tavan nokbek ga be uk manino (3 1/2) iji barekoga God fu buibur iji kuama fu ufime e ijiebuon oij ijia arimga bu oiru foiseme una urin. Bu urijga e fok eraneb bu giainva buka bomana juk.
REV 11:12 Rene e nokarok (2) iji Godon vuak nijaidiavo iji bu fai e be varur ijia uruv kume, Igia ruafno kumen. Fu ijeg kumega e ani buon iji bu ireme giakoga bu ajieme vana iji burame varur ijia vain.
REV 11:13 Bu ajieme vako moik iji fuka bomana urakoga mai bomana iji fateroin fuka moik ijar daturaikme okurain. Fu ijegrene e seven taosen (7,000) kaniavga bu aoim baren. Bu aoim barga e fok roin ba kaniainva iji bu iji giame juin. Rega bu una oi karoime God varur ijia fino ijefuon daro bomana iji dab aroin.
REV 11:14 Rene na faiko fu kie ire iji ma ise iji be uf iji fun ijia rua baren revo be iji radkma iji fu vekdo fuson ruakno kien.
REV 11:15 Anera seven (7) iji fun veg fuon iji dab foiga varur ijia buka e uruvana irovajame kume, E darokin iji fu moik fok samuakfuon iji fu iviakma fun una God E Bomana nuvuon ga e iji fu kuamga fu ari ruainma ijefuon daro rotit ijiano kumen. Fur moik fok iji samuame fivak.
REV 11:16 Bu iji kumejga e uguaikin fata buon Godon nifak ijia karinva iji bu kurituamajame moik ijia dijeme fuon sirimamen.
REV 11:17 Bu sirimamene kua, God E Bomana ka darokin a usuibe ijia fine ruain ga iviakma a vek ijia fin. A daro on iji an abe iviakma moikigi samuamo ijefuon no oimarev.
REV 11:18 E moik kafoko iji bu God ba igavo iji buka zieknum ana nibijaiv. Regavo tavan iji a bu arafiriakfuon ijiga e iji aoinva ijiebuon ise iji a kege mazim giakfuon iji fun ruain. Regavo madu eon mamkanuk ga ukakna uruvana iji bu unam on ijia akai karioinva ijiga e iji bu a agordame jumoinva ijiebuon ire ma iji a bu vajiakfuon iji fun ruain. Tavan iji a ire iji rekfuon iji fun ruain. Ijefuon a e iji bu moikigia eon kam kaniaknum ire on kam arafiriainva iji a una bu kege arafiriak.
REV 11:19 Areme varur ijia Godon ar iji bu sirimamejo iji fu vien dajakoga mavua iji Godon akaij iji bu ijia abesenva iji nan gain. Na ijia gakoga varur fu karame kumejknum tavuakoga moik fu dab urain. Fu urakoga ve bomana buikma dako ire makibt ijekma arin.
REV 12:1 Areme ire be sumakin ijar varur ijia ari ruain. Na ga bara ijar ugon ka abaikin veni igeg sana ameoinma iji abe abesen ga dia fuon rotit iji fu asam azan ijia manine ari ruain. Regavo nigen fuon fu ire gord ijia amarenva mujur tuer (12) ijia irenva iji abesen.
REV 12:2 Bara iji fu e fudien vo fu e nafekreno ijefuon fu vajai fiaiga fu uruvana biumamo ijekin ijar ijia ari ruain.
REV 12:3 Fu ijegrekoga ire sumakin be ijar madu varur ijia ari ruain. Ire iji fu tabar bu kua dregon kuavo ka bomana ga kavuan ijar ijia kekoin. Regavo nigen fuon iji seven (7) ga muan fuon iji ten (10) ga ire gord ijia amardiainva iji bu nigen besubesum ijia sain.
REV 12:4 Areme dregon iji fun vien fuon ijia dab varur fateroin ijia ire mujur fok irenva iji numume abe moikigia abesen. Fu ijegrene fun bara ijefuon nifak ijia mani arega bara iji fu am nafega fu jaki dab ikafa fu ijia manin.
REV 12:5 Regavo bara iji fun am iji fu daro abe moik fok samuagdiakfuon iji nafen. Fu nafega ire dregon iji fu am iji ba jakin revo Godri kamazame afem fata iji fu fino ijia vain.
REV 12:6 Regavo bara iji fu ko ai moikum namo ijia ar iji God fu kanafume samuainma ijia vain. Fu ijia naki vuan taosen tu adred siksti (1,260) ijeg ai moikum namo ijia fikega Godri fu samuakro fu ijefuon ijia vain.
REV 12:7 Anera uguaikin Maiker fu anera fuon ijiena bu ire dregon ijiga anera fuon ijiena ka bomana varur ijia bijain.
REV 12:8 Bu ijegrene ire dregon ijiga anera fuon iji bu zazainva ijefuon bu rotkuriavga bu varur ijia karikfuon iji bu areme ari ruain.
REV 12:9 Bu ire dregon bomana iji bu dab kozva fu ari ruain. Regavo ire dregon iji fu usuibe fi ruainma iji if fuon be bu kua Setan kuavo. Regavo e iji fu e fok moikigia oijo iji biesiamo ijin. Bu fu dab akozevga fu anera fuon ijiena ari moikigia ruain.
REV 12:10 Regavo na vuak bomana be varur ijia fai fu kume, Tavan iji God fu Setan asime daro fuon ijia efuon karauniame E Bomana rene moikigi fu samuakfuon iji fun iviakma ruainmano kumen. Unam iji fun iviakma efuon Kuraisri daro fuon ijia abe samafren nijaiduin. Regavo Setan e iji fu Godon nifak ijia manine nakikmazak kaifnuvuon God ma vierafene fuifuon ikrejo iji imut bijiamo iji bun dab kozva fu varur gufi areme ari ruain.
REV 12:11 Regavo e kaifnuvuon iji God ma vierafejo iji bun Jesu Kuraison kavuan ga vuak fuon ma iji bu e nijaidiaoijo ijar Setanon daro iji asin. Ijefuon moikigia bu karijo iji buba bomana oijmain revo bu vierafe buka Jesu Kuraison vajai fian abene aoikuai bu iji bomana vierafej.
REV 12:12 Ijefuon e fok varur guf ijia karinva iji jaka bomana oimaref. Regavo e iji moikigia karinva ijiga saof ijia karinva iji esenia buka ma vajai fian abek. Ijefuon maiji kaven ise Setan fuka ari jon vuain. Regavo fuka ma deajin ijefuon maiji fu vierafe tavan fuon fuka ma ukakbe ijesugin.
REV 12:13 Tavan ijia Setan fu ga fu bun dab kozva fu moikigia ari ruainmaga fu bara iji am nafenma iji anerene ja vain.
REV 12:14 Regavo Godri bara iji um buruof ijefuon daf iji kege vajamga fu iji kege bijiame rame ai moikum namo ijia vain. Fu ijia vaga Godri fu samuake fu ijia juaivasia nokbek (3) ga asam siks (6) ijeg ijia fikfuon. Regavo madu fu va ijia fiokega ire dregon iji fuba bara iji jakikafa fu ijefuon ijia vain.
REV 12:15 Regavo dregon ijefuon ir ijia do bomana ijar davuame bara iji vainma iji abe vakafa jame vain.
REV 12:16 Do iji fu davuame vain revo moik ijar bara iji ifejdame ir akome mako igeg daturakoga do fok dregon ir ijia davuame vainma iji fu ijia ari baren.
REV 12:17 Rene ire dregon iji fuka bomana deajimga fu una bara ijefuon uifarif ijiena bijaikafa vain. E uifarif fuon iji e Godon akaij iji mukoi igame nuibakin jaknum Jesuon vuak ma iji abe nijaidiaoijo ijin.
REV 12:18 Fu e ijiena bijaikafa fu va do saof irif jier azan ijia samuagdiame manin.
REV 13:1 Areme na una ga ire maf kuriaij ijar saof guf ijia ajie kekoin. Regavo nigen fuon iji buka seven (7) ga muan fuon iji buka ten (10) ga ire muan buon besubesum bu ire gord ijia amardiainva iji samdiain. Regavo nigen besubesum ijia bu if ise iji ijia isoin ijefuon maiji bu Godon if iji abe buze ikuai bu iji isoin.
REV 13:2 Ire maf kuriaij iji saof ijia ajie kekoma na gainva iji fuka ire busi bomana bu kua refodno kuavo igekin. Regavo dia tat fuon iji fu ire fanuf bu kua beano kuavo igekin ga ir fuon iji fu ire raion igekin. Regavo ire dregon ijar daro fuon fu e bomana rene fata fuon ijia fine ai fok fu samuagdiamo iji atame maf kuriaij iji vajain.
REV 13:3 Regavo ire maf kuriaij ijefuon nigen seven (7) iji be bun e kafob fu guakfuon ijia kanain revo fuba guakoga matan fuon iji fu una subin. Matan iji fu subienma ijefuon e fok moikigia oijo bu iji gavo iji oiserdiaga bu una fu jav.
REV 13:4 Regavo e fok bu ire dregon iji ma vierafene fu javo ijefuon maiji fur daro fuon iji atame maf kuriaij iji main. Regavo madu bu maf kuriaij iji igame jaknum fuon sirimamene kuai, Erar fu maf kuriai iji aikin ga erar fu fusik bijaikno kuaiv?
REV 13:5 Regavo dregon ijar maf kuriaij iji daro mamga fu aroikaraknum vuak kuaime Godon if iji dab buzeren. Regavo ijeg fu reoinma iji fu juaivasia nokbek ga be ijefuon uf (3 1/2) ijeg baren. Regavo God fuba unam iji fu reno iji bijukurain.
REV 13:6 Regavo madu God fuba bijukoga fu ir fuon ijia una Godsina vuak ise kuaiknum if fuon ijigam ar fuon ga efuon ijia karinva iji kam buzeifdiaknum ijeg reoin.
REV 13:7 Regavo madu God fu ijia arekoga maf kuriaij iji fu dregon ijefuon daro iji abe una Godon e ijiena bijaime bu asidiain. Regavo fu daro abe e agan kafokafo iji samuaknum moik kafokafo ga isama kafokafo ga e vajai surif kafokafo iji samuagdiam.
REV 13:8 Fu ijegreko e fok moikigia karijo iji bu maf kuriaij ijefuon sirimameknum fu igav. Regavo e iji God fu usuibe moik igeko varur iji ba amardiainva ijia fu if buon buk iji bu tavan bog ijia karivakfuon ijia isoinma e iji buba maf kuriaij iji igame fuon sirimamek. Regavo if buon bu isoinva iji fu Maf-Sif Uka iji bu kanava fu guainma ijefuon buk ijia isoin.
REV 13:9 Regavo ni faif eraneb bu adakin iji ni mukorigia faif.
REV 13:10 Regavo God fu vierafe ja Jesu Kuraison if ijia dibur karikva iji fu arega ja dibur karik. Regavo madu God fu vierafe bu kaki uikin iji kege ja bijiaga ja aoikva iji fu arega bu ijeg rek. Revo ire ijekin iji bu rad jon rek gavo Godon e iji jaka adumaduigin jon ja ma vierafejo ijia giriesaf.
REV 13:11 Ijegreare na una gakoga maf kuriai be fuk moik ijia ajie kekoin. Regavo maf kuriaij iji fu ire muan nokarok (2) maf-sif ijiebuon muan ijekin ga fu ire tabar bomana iji bu kua dregono kuavo ijeg vuak kuaim.
REV 13:12 Fu kekome maf kuriai amur keko ruainma ijefuon daro besum iji abe ik ren. Fu e fok moikigia oijo iji ejafiame kia, Janim maf kuriaij iji fu amur roka bu kanava fuba guainma iji igame fuon sirimamejno kiain.
REV 13:13 Regavo maf kuriai be iji fu kekome ruainma iji fuka ire sumakin mamkanuk kafo ren. Fu e fok ijiebuon nifak ijia mian iji kuamga fu varur ijia ari moikigia ruain.
REV 13:14 Regavo God fu maf kuriai fu rad ruainma unam fuon fuba bijukuraido fu maf kuriai amur ruainma ijefuon nifak ijia ire sumakin kafo rene e fok moikigia oijo iji biesia aferdiam. Regavo maf kuriaij iji rad ruainma ijar madu kiaga bu ire be ka maf kuriaij iji bu kaki ijia bijain gavo fuba guainma ijekin iji amar abedeme fuon sirimamejno kiain.
REV 13:15 Rene maf kuriaij iji rad ruainma iji fu daro aben. Fu daro abe fur una maf kuriai amur ruainma ijefuon kaven fu aikin bu amarenva iji ivuat maga fu vuak kuaikro fu iji main. Fu maga fu una vuak kuaime e iji bu fuon ba atosame sirimamejo iji kaniaga bu aoik.
REV 13:16 Maf kuriaij iji fuk e fok e mamkanuk ga ukakna ga e sinuom zarainva ga sinuom bakin iji kuriairen. Regavo madu fu e iji e kafobuon ba mon ikrejo ga e iji e kafobuon ikrejo bakin iji kuriaireva bu anf fuon iji imut tat maink ga variatar ijia isoin.
REV 13:17 E iji anf iji ba abenma iji fuba ire kafo kimejknum ire vajuinamik. Regavo fu anf maf ijefuon if ga naba iji abekma e ijar ire iji rekfuon.
REV 13:18 Vuak igi mukorigia faif erar fu mukorigia vierafeno iji ni naba maf kuriaij ijefuon ma iji nisaime vierafekfuon. Regavo naba iji siks adred siksti siks (666). Ja naba iji kege besum mazime dakva ja maf kuriaij ijefuon if iji gak.
REV 14:1 Areme na una madu ga Maf-Sif Uka iji fu uruor Zaion ijia manin. Regavo fu manino ijia efuon vuan adred foti fo taosen (144,000) bu ijia funa iren. Regavo variatar buon ijia bu if fuon iji isoin ga Asoifuon ijefuon if isoin.
REV 14:2 Regavo na varur ijia vuak be ijia kuaimo iji na fai fuka ire do iji fu abesme kumeno vo varur igeg kumeno na iji fain. Regavo madu fuka e dua uruvo ijieb zaij vajavo ga mario foijo igeg na iji fain.
REV 14:3 E fok vuan adred foti fo taosen (144,000) bu fata nifak ijia iren revo ire fo (4) nivek iji irenva iji bu e uguaikin ijiena ijia ireme dua roij. E fok moikigia oinva iji bu dua iji buba vierafen. Regavo bun e iji vuan adred foti fo taosen (144,000) e iji God fu Jesuon kavuan ijia abe karauniainma ijesugin buonkua vierafene dua iviamkor iji roij.
REV 14:4 E ijieb bu maturaime oij ga buba barubara buon fudainamiknum unam ise kafo ren revo buka akai karioij. Regavo Maf-Sif Uka iji fu vako iji bu ijia jaoij. Regavo e fok moikigia oinva iji bu e vuan adred foti fo taosen (144,000) ijesugin Jesuon kavuan ijar karauniain. Ijefuon bu God ko Maf-Sif Uka ijiebuon nifak ijia bu am amuifari rej.
REV 14:5 E iji buka ir buon ijia vuak kufui kafo buka ba kuaimoij vo bu ise kafo bufak buka ma bakin.
REV 14:6 Regavo na una ga anera be fu Godon vuak ma iji tavan bog ijia navakfuon iji abe e moikigi oinva iji kuardiakafa kaf ijia ramoin. Fu vuak iji abe e agan ga moik kafokafo ga surif ga isama kafokafo iji kuardiakafa kaf ijia ramoin.
REV 14:7 Anera iji fu uruvana igia kume, Godon daro bomana iji jume fu aroiknum oimardaf. Tavan fuon iji fu e fok ise buon iji fu kege mazim giakfuon iji fun ruain. E iji fu moik ga varur ga saof ga do fok ruvako iji fur amardiainma iji fuon atosame sirimamefno kumen.
REV 14:8 Rega anera be madu fu rad jame kume, Mai darokin Bebiron fuka iserme ari kanam. Ijefuon maiji fu do vuain fuon abe e moik kafokafo karijo bu ijia ruainva iji miavga buk ijin abe in. Regavo do vuain iji fu unam ise iji fu kaven ise ijiebuon sirimamejo ijiga barubara fudainamime unam isereoijo ijin. Fu unam ise ijegrenma ijefuon mai bomana iji fuka iseren.
REV 14:9 Regavo madu anera be fuk anera nokarok (2) iji bu amur rame ruainva iji jajia ruain. Fu ruaknum uruvana biumame kume, Eraneb maf kuriaij ijiga maf kaven kufui iji bu imut amardiainva ijiebuon anf iji kege variatar ijiga imut ijia name buon sirimameoijo iji God fu kam arafiriaken. Ijefuon maiji e iji fun koikfuon Godon vuain kugin fu e arafiriamo ga ziemo iji fu vese abedenma iji dab do igeg ruainamin. E iji bu do vuain kugin iji abe ruainva iji bu Godon anera akaij iji karinva ga Maf Sif Uka iji fino nifak ijia mian kavuaime naino bu kua sarfano kuavo ijia buka vajai fian bomana abekfuon.
REV 14:11 Regavo e iji bu maf kuriaij iji bu imut amardiainva ijiebuon sirimamejo ijiga e iji bu anf iji kege variatar buon ijia nainva iji bu mian iji nakikmazak naino ijia vajai fian abek.
REV 14:12 Bu ijegrek ijefuon e iji Godon ikrejo iji buka giriesame adumaduigin oi mafaime Godon akaij iji igame Jesu fuonkua ma vierafek.
REV 14:13 Rene na fai varur ijia vuak be ijia kume, Igi isoimne kumen. Iviakma anerene gafeg vako ijia erar fu E Bomana ijefuon ikreoine guakma e iji fu oimarknum guamno kumen. Fu ijeg kuaikoga Kaven Akai iji fu kume, Iji fuka ma. Bu buon bu vajai fian abene ik reoinva ijefuon bu ar buon bu isuar karikfuon ijia vak. Regavo iji bu vajai fian abene ik reoinva ijefuon maiji ijieb bu jajiame varur ijia vakno kumen.
REV 14:14 Rene na madu ga vana abaikin ijar ijia nako azan ijia ire be e igekin ijar ijia fin. Regavo e iji nigen fuon iji fu ire gord ijia amarenva iji abese ga imut fuon ijia fu ire kaki uikin (atevkin bu koko ufuvo igekin) iji kunain.
REV 14:15 Regavo anera be fu Godon ar ijia kekome e vana ijia fino iji uruvana kumen, Kaki on uikin iji abe juar iji masimne kume. Ijefuon maiji tavan iji fun aben ga ire fok moikigia buka baime samuainvano kaki uikin iji abe masimne kumen.
REV 14:16 Ijefuon e iji vana ijia fino iji fu uri kaki fuon uikin iji abe ire fok moikigia naoivo iji aseme ire fok kanaufuin.
REV 14:17 Regavo na madu varur ijia gak anera be fu Godon ar ijia keko ruain revo imut fuon ijia fuk kaki ka uikin iji kunain.
REV 14:18 Regavo madu anera be fata iji Godon isuf baroijo mian iji samuamo ijar fata ijia kekome ruain. Fu kekome uruvana igia biumame anera iji kaki uikin kunainma iji kume, Kaki on uikin iji abe moik ijia kaje sunin iji fun bainmano kajek sunin ijefuon ket iji ufusemne kumen.
REV 14:19 Fu ijeg kumen ijefuon anera iji fu uri kaki fuon uikin iji abe moikigia kaje sunin ijefuon ket fok ufusen. Fu sunin iji ufuseme karme ar mai aror iji God fu arafiriame dia tat fuon ijia datuaikfuon ijia koren.
REV 14:20 Fu ijia koreme kaje sunin datuaimga safik iji fu dakaroime ire kavuan igeg useme ijia arin. Regavo ire kavuan iji fu ijia arimga do bomana ijar ijia firain revo iji fu firainma iji fuka (300 kiromitas) jaoijmana vain ga fuka manek e bu gama arivo ijeg nafuin.
REV 15:1 Areme na una varur ijia ire ka ma bomana sumakin ijin gain. Na ga anera seven (7) bu ire seven (7) kege moikigi vajai fian makuai rok. Ire ijieb radkma ijia moikigi vajai fian maga Godon ziemo iji fu ijia barek.
REV 15:2 Rega na ire be saof igeg nafuime riturainma mian ijekma davaruainma fu ijia naino na iji gain. Regavo na madu e iji bu maf kuriaij ijiga kaven fuon bu imut ijia amarenva iji asidiainva iji bu ijia irenva na giain. Regavo e ijieb e iji naba isoinva iji bur asidiain. Bu saof riturainma ijia irem ameoine ire kafo gita igekin ijin imut buon ijia kuniaime iren.
REV 15:3 Bu ijia ireme e Godon ikreno Mosison dua ijiga Maf-Sif Uka ijefuon dua ijin roij. Regavo dua iji bu rokva iji bu kua, God E Bomana darokin unam on a reno iji fuka ma mukor. Regavo E Bomana moik fok samuagdiamo unam on a reno fuka ma ijesugin ga ise kafo ijia bakin. Kin Bomana a onkua aka ma Akai ga e fok buka a juvknum a arordak. Regavo e fok moikigia oinva iji bu ro on atosame sirimamek. Ijefuon maiji unam on a ma ijesugin reno e fok moikigia oijo iji bun gain.
REV 15:5 Na iji ga barme rad na una varur ijia ga Godon ar iji fu fino ijia vien ka bomana ijar ijia dajain.
REV 15:6 Fu ijeg dajakoga anera seven (7) bu ire ka ma ise moikigi vajai fian makfuon iji seven (7) kege vien ijia usem ruain. Regavo anera iji bu ugon abaikin ga jaoikin iji sain revo guge ijia bu ire biret gord ijia amardiainva iji kege sain.
REV 15:7 Regavo ire fo (4) nivek irenva iji be fun uri anera seven (7) ijin dis gord ijia amardiainva ijin seven (7) kege vajiain. Regavo dis iji fu kege vajiainma iji buka God iji tavan bog ijia fivako ijefuon ziemo ijar ijia irtoijen.
REV 15:8 Regavo Godon ar guf iji fuka Godon sanainma ijiga fuon daro ijefuon vuat ijar irtoijedo e kafo bu izeg ar ijia aru vakva bakin. Regavo buka samuake ire seven (7) ise iji bu moikigi abe vajai fian makuai anera bu kege ruainva iji bu barga buson aru vak.
REV 16:1 Areme na faik Godon ar ijia vuak be ijia uruvana anera seven (7) iji kuardiain. Fu kia, Useme va ire ise Godon ziemo diskin seven (7) iji naoivo iji kar moik ijia usekorefno kiain.
REV 16:2 Anera amur iji fun va dis fuon iji dab moik ijia usekoren. Fu ijia usekoremga vajai fian ijiga vajai matan ka ma ise ijieb moikigia ari ruain. Bu ari e iji maf kuriaij ijefuon anf nainva ijiga ire iji bu imut ijia amarenva ijefuon sirimamejo ijiebuon vajat ijia kamafdiain.
REV 16:3 Rene anera tu (2) iji fun dis fuon iji dab saof ijia usekoren. Fu ijia usekoremga do iji fu dakaroime e guainma ijefuon kavuan igeg ren. Ijegrekoga ire kafokafo saof ijia oijo fok buka aoim baren.
REV 16:4 Rene anera tiri (3) iji fu dis fuon dab do iji vako ijia usekoren. Fu usekoremga do iji vako fok buka karoime una e kavuan igeg ren.
REV 16:5 Rene na faik anera iji do fok samuamo ijar una varur ijia God kuardame kume, O God aka usuibe ijia fine ruain ga iviakma aka vek fin. A mukorigia vierafene e igi ise rejo iji kam mazim giak.
REV 16:6 E ise rejo ijieb eon oifuon vuak kuaiknum ikrejo iji kaniavga bu kavuan arime aoin. Ijefuon a unam ma iji rene una do iji a aregavo a kavuan iji kege una e ise rejo iji vajiaga bu ire bu renva ijefuon ijo iji fun marenmano kumen.
REV 16:7 Areme na faik vuak be fu fata iji bu God isuf baroijo ijia kume, God E Bomana ga e darokin a unam ijeg e moikigia ise reoijo iji kege mazim giamo iji fuka marenmano kumen.
REV 16:8 Rene anera fo (4) iji fun dis fuon dab veni iji usemadamga fuka kuriaikuriaikin keknakoga vuat ijar e iji kaniain.
REV 16:9 Veni ijar e iji kaniamga e iji ise rejo iji bun God e iji daro fuon ijia ire fok vajai fian miame samuagdiamo ijefuon if iji dab buzein. Regavo buba oibuon iji karoime una Godon daro bomana iji dab aroin.
REV 16:10 Rene anera faiv (5) iji fun dis fuon dab maf kuriai amur ijefuon fata ijia usekoren. Fu ijia usekoremga maf kuriaij ijefuon ar iji fu samuamo iji fuka nakiko e iji bu vajai fiadiamga ubai jakinamin.
REV 16:11 Bu vajai fian ijiga matan buon ijefuon bu una God varur gufia fino iji dab buzeiknum abe fu namdain. Regavo buba unam ise buon ijia oi karoime una unam ma ijia reoin.
REV 16:12 Rene anera siks (6) iji fun dis fuon iji dab do bomana Iufretis kuavo ijia usekoren. Fu ijia usekoremga do iji fuka naru barme e mamkanuk ar iji veni ajiemonak samuavo ijiebuon unam amardiain.
REV 16:13 Areme na una ga kaven ise nokbek (3) ire saban igekin ijieb dregon ijefuon ir ijia usen. Regavo saban roin bu maf kuriaij ijiga e iji vuak kufuimene kuaivo ijiebuon ir ijia usev.
REV 16:14 Regavo kaven iji buka kaven ise ga bu daro buon ijia ire sumakin kafo reoij. Bur useme va e kin moik kafokafo samuavo iji aferdiame besum afuikin bu God e darokin ijefuon tavan ijia bu bijaikfuon.
REV 16:15 Regavo igia faif naiji na e niesamo igeg ruak. Regavo e iji oimarknum fikfuon iji fu e iji tavan bog ba ni naino ga fu sinuom fuon fu samo iji imut kuniaime samua fino e ijin. Fu samaij ijia kuniaime nisaiknum samua fido e fok ijiebuon nifak ijia fuba detabar juvknum ok.
REV 16:16 Areme kaven ise iji bun e kin kafo aferdiame ar iji bu e Ibrukobuon isama iji bu kua Amagedono kuavo ijia besum afuin.
REV 16:17 Rene anera seven (7) iji fun dis fuon dab kaf ijia use koren. Fu ijegrega Godon ar guf fata fuon ijia vuak be ijia uruvana kume, Fun ijia barenmano kumen.
REV 16:18 Fu ijeg kumeko varur iji fu karaknum tavuame kumekoga moikigi fuka uruvana igia dab urain. Regavo ar iji fu urainma iji usuibe God fu e iji amardiainma ijia moikigia ar ijekin be fuba ijeg urain. Regavo amur iji bu ukakna kafo urain gavo igar fuka ma bomana urain.
REV 16:19 Ire iji fu ijegreko ar mai bomana Bebiron fuka moik dab ataseme nokbek (3) ren. Regavo moik fok ijiebuon mai mamkanuk iji buka ma iseren. God fu ai Bebiron fu arafirikfuon iji fuba ruido fu abe arafiriga fuka dakaroime kafus do vuain kavuan Godon ziemo ijin abe ik.
REV 16:20 Fu ijeg urakoga moik iji turame naoivo fok ijigam uruor mamkanuk iji buka bakiten.
REV 16:21 Regavo varur ijia ire makibt mun igekin ka mamkanuk ijiebuon afik iji buka fifti (50 kg) ijekin ijieb uduime arin. Bu uduime ari e iji bu God ire igi ka ma ise iji fu rekok e bu vajai fian abene fu dab buzeivo iji kaniame matan vajiain.
REV 17:1 Areme anera seven (7) ijia anera besum iji dis seven (7) kuniainma ijar kekome na kie, Roga na bara iji fu tavan bog ebuon baru turamo igekin iji Godri abe vajai fian makreno na iji nijaidavno kien. Regavo bara iji do uruvana ruvako irif ijia fino iji fu mai Bebironon kuain.
REV 17:2 E kin moik kafokafo samuagdiavo iji bu funa unam ise iji reoij. Regavo madu e fok moikigia oijo iji bu unam fuon ka ise iji bun dab do vuain igeg ija buka nigen iserdiain.
REV 17:3 Na ijia manijga Kaven Akaij iji fu na niroikiemga anera ijar na dabadieme ai moikum namo ijia vain. Na va ga bara ijar maf kuriai vajat kavuan ijia ajieme fin. Regavo maf ijefuon vajai ijia bu vuak kafo ijia isoime Godon if dab buzein. Regavo maf kuriaij ijefuon nigen iji fuka seven (7) ga ire muan fuon iji buka ten (10).
REV 17:4 Regavo bara iji maf ijia ajie fino iji fu sinuom aroikaravo ugon kavuan iji sain. Regavo vajai fuon iji fu ire gord ga mun ma zin igeg iramo ijia amardiainva iji sain. Regavo imut fuon ijia fu ire kafus gord ijia amarenva iji kunain. Regavo kafus guf ijia fu ise fuon iji fu ebuon baru turainma ijiga unam ise uruvana fu renma ijar irtoijen.
REV 17:5 Regavo bara ijefuon variatar ijia fu if be ijia ijeg isoime kua, Ai Bebiron fuka darokino kuain. Regavo vuak ijefuon anej ma iji fu bara fok moikigia oknum baru turavo ijiga e iji bu moik igefuon unam ise iji rejo ijiebuon asiej.
REV 17:6 Regavo bara iji na ga fu Godon e ijiebuon kavuan ijiga e iji bu Jesu ma vierafene fuifuon vajai fian abeoija bu kaniavga bu aoinva ijiebuon kavuan dab ine nigen iseren.
REV 17:7 Na iji gava fuka oiserdiemga anera fu kie, A irerafuon oiserem? Regavo nar bara ijiga maf kuriai nigen seven (7) ga muan ten (10) iji fu bara iji suinma ijefuon maiji sauime namo iji kuardakno ni faimne kien.
REV 17:8 Fu kie, Maf kuriaij iji a gainma iji ur fu nivek fin revo ivia fuba nivek fin. Fu mako iji dibuor ba gavo ijia ajie ruakredo fu ajie keko vaga Kuraisri dab ma arafiriga fu barek. Revo God fu moikigi ba amarenma ijia fu e iji bu tavan bog ijia karivakfuon ijiebuon if iji fu buk ijia isoin. Regavo e moikigia oijo eranebuon if iji buba buk ijia isoinva iji bu maf kuriaij iji gakva buka oiserdiak. Ijefuon maiji fu usuibe fin revo iviakma fuka ma bakiten gavo rad iji fu una samafrek.
REV 17:9 Ja vuak igi na kuardiakrejo ijin mukorigia faikva ja vuak ijefuon anej ma iji faikfuon. Maf kuriaij ijefuon nigen seven (7) iji bu uruor seven (7) ijin. Regavo bara iji fu uruor seven (7) iji irenva azan ijia ajieme fin. Regavo madu uruor seven (7) iji bu kin seven (7) ijin.
REV 17:10 E kin imut roin (5) mai iji samuagdia kari ruainva iji bun aoin. Regavo besum (1) fu vek fine samuagdiam ga be fuba ruain. Fu ruakma fum tavan ivuankbe fikfuon.
REV 17:11 Regavo maf kuriaij iji fu usuibe finma ga iviakma fuba fino iji fu kin eit (8) iji fur rene e samuagdiain. Regavo fuiji fu e kin seven (7) ijiebuon kai be. Ijefuon Jesu fuk fu dab arafiriga fu barek.
REV 17:12 Regavo ire muan ten (10) iji a giainma iji e kin ten (10) bu uriado buson rad kin rek. Regavo bur kin rene ar iji samuagdiakfuon iji buka tavan ivuankbe ijia maf kuriaij ijiena ar iji samuagdiak.
REV 17:13 E kin ten (10) iji buka oi besum vierafene daro buon fok buka maf kuriaij ijin vajak.
REV 17:14 Rene bu Maf-Sif Uka ijiena bijaik. Regavo Maf-Sif Uka iji fu efuon iji fu kumega bu e nuibakin fuifuon ikreoinva ijiena roibrene rareme maf kuriaij iji kania barek. Ijefuon maiji fuka e darokin e moikigiebuon kin fok fur asidiame ka Kin bomana ijia fine vako ijin rekno kien.
REV 17:15 Regavo anera iji fu madu kie, Do iji ruvako irif ijia bara ebuon baru turamo iji fu fino ijefuon anej ma iji e moik kafokafo ga isama kafokafo ga vajai surif kafokafo ga agan kafokafo ijino kien.
REV 17:16 Regavo ire muan ten (10) ga maf kuriaij iji a giainma iji bu bara iji baru turamo ijin ziegafak. Bu uri ire fuon fok kam arafiriadaknum ugon fuon fu sainma iji kam bujadaga fu detabar fik. Regavo madu bu vajai kunuk fuon kafo buame iknum dab mian baroiga fu guame barek.
REV 17:17 Regavo unam iji muan ten (10) iji bu kenva iji fun Godri fuon vierafenma ijia oibuon ijia vierafe vajiain. Fu vierafe vajiamga bu oi besum rene daro buon fok bu maf kuriaij iji maga fur bu samuagdiakro bu iji vajain. Regavo bu uri fu igame vake God irerag fu vierafenma iji fu ijekma aresrek.
REV 17:18 Regavo bara iji a gainma iji fu mai darokin iji fu moikigia e kin moik kafokafo samuagdiavo iji samuagdiam.
REV 18:1 Areme na una gak anera be fu varur ijia ari rok. Regavo anera iji fuka ma darokin ga vajai fuon iji fu zin igeg iramo ijar moik fok igi fuka sanabaren.
REV 18:2 Anera iji fu uruvana igia biumame kume, Mai bomana Bebiron ka darokin iji fun Godri abe vajai fian mame dab mukorigia arafirin. Regavo mai iji iviakma fuka kaven ka ma ise ijiga um ka ise ire mutur ioijo ijieb ijia karioij.
REV 18:3 E fok moikigia oijo iji buka unam fuon ise iji fu ebuon baru turame unam ise reno ijin dab do vuain kugin igeg abe ruainamin. E kin moikigi samuavo fok bu funa fudainamime unam ise iji ren. Regavo mai Bebiron fu vierafe fuka tavan bog sinuom mukor ijesugin karme oimarknum fiokafa fu iji vierafen ijefuon fuka e kafobuon sinuom uruvana ni kafokafo ijin kimen. Fu ijegreno ijefuon e iji bu sinuom fuon kimejo iji buka mon uruvana zaraiv.
REV 18:4 Rene na madu faik vuak be varur ijia kume, Enun guf ijia karinva iji fok usem ruvaf. Unam fuon ise iji fu reno iji jab fu ifejdame unam fuon iji abek. Regavo jab izeg fuon fu vajai fian abekreno ijia ifejdakno kume.
REV 18:5 Ijefuon maiji ise fuon iji God fu gaga fuka akoze ajieme kaf varur ijia ajie vain.
REV 18:6 Ijefuon fu izeg ja isema renma iji ni jasik una unam besum ijeg fuon ref. Regavo fu ise be jon rega ni jasik una roib ise nokarok (2) igeg fuon ref. Regavo fu kafus jon ijia do kugin ma kuriai fu vajai fian abekfuon iji efknum usediainmaga ni jasik roib una do kugin fu vajai fian abekfuon iji kafus fuon ijia nokarok (2) usedaga fuka irtoijek.
REV 18:7 Fu koikfuon aroikarame sinuom ma iji same oimarknum fioinma ijefuon ni jasik una roib uruvana igia vajai fian ga oifian iji vajaf. Fu tavan bog fu kuai, Naiji bara makido na fata nun ijia fijno kuain. Regavo naiji bara amun igekin bakin gavo naiji oifian kafo bano kuaim.
REV 18:8 Fu ire ijegrenma ijefuon tavan besum ijia ire fok fu vajai fian abekfuon matan ijigam oifian ijigam vasia iji bu fuon ruak. God E Bomana e darokin ijar fu vajai fian abene ire iji fu reno ijefuon dab mian baroga fu ijia naine barek.
REV 18:9 E kin moikigia moik roin samuagdiavo iji bu funa fudainamime unam ise rejknum ire fuon ma iji fateroin kenva iji bun mian iji naine utuamo iji game bu una mai ijefuon oifian abene niraiken.
REV 18:10 Regavo buka juvknum aibe ijia ireme gak ijefuon maiji bu vierafero buk ise buon ijefuon ijeg vajai fian abekro buka juvknum gak. Bu gavknum buon kuaik, Mai ka bomana darokin Bebiron iji fuka tavan ivuankbe guf ijia fuka unam ma ise ijia vajai fian abeno kuaik.
REV 18:11 E fok moikigia bisnis rejo iji buk buka oifian abe fuifuon niraiken. Ijefuon maiji ire buon fok erar kimekma bakin.
REV 18:12 Ire buon gord ga sirva ga mun zin igeg iravo mukor ga madu ire savo kafo bu ire ijia kege amardiainva iji bu erar kimekva bakin. Regavo madu ire ugon buon ni mukor kafokafo uruv ka mukor ijia sainva iji ga madu ire vajat azivo udi ka mukor urino bu in ijia amardiainva iji bu eraneb kimekva bakin. Regavo madu ire kafo maf ubai ga in ijia amardiainva mon mamkanuk kimejo ga ire ajan ga mun abaikin ijia amardiainva iji bu eraneb kimekva bakin ijefuon buka nirain.
REV 18:13 Regavo ifirik mukor udi urino bu kua sinamon ga ire sifais ga ire insens ga me ga frenkinsens ire ka udi mukor urino iji bu eraneb kimekva bakin. Regavo ire do vuain ga farava ga oir ga maf-kau ga maf-sif ga maf-os ga fata ire karme iritiavo ijigam e iji e kafobuon ikrejo bu ijiebuon ka bomana oifian abek.
REV 18:14 E mamkanuk iji bisnis rejo iji bu ireme mai Bebiron (bara igekin) iji kua, Ire fok a karkafa vierafenma iji bun iviakma bakiten. Regavo ire fok afak zarainma ijiga ire ma iji mukor a nainma iji bun bakitedo a una giakma bakin.
REV 18:15 E bisnis rejo bu mai ijia bisnis rejknum sinuom zarainva iji buka aibe ijia ireme gak. Ijefuon maiji bu iji fu vajai fian abeno iji game buka jume ka aibe ijia ireme niraiknum oifiaigma gak.
REV 18:16 Bu gavknum kuaik, Mai ka darokin iji fuka unam ise ijia vajai fian aben. Fu ur fuka ugon uban ka ni mukor kafokafo ijia azinva iji same fiknum ga ire uro savo kafokafo ka ni mukor ijia amardiainva iji same vajai fuon okuriame fin. Regavo tavan ivuankbe igia ire fok fufak zarainma iji fun iremire baren. E iji sisim kege saof azan ijia oijo ijiga e sisim ijia guf ikrejo ijigam e iji sisim ijia ajieme ar roin vako ijigam e iji bu saof ijia duok abe iknum kari mon amardiavo fok buka aibe ijia irem gav.
REV 18:18 Bu ijia uruvana niraiknum gak mian iji fu naine utuamo ijar mai iji fu naine baren. Fu naine barekoga bu kuai, Moikigia mai darokin be ijekin iji fuka bakin.
REV 18:19 Areme bu moik kuotuvat numume nigen buon ijia koreme oifian abe niraiken. Bu niraiknum kuai, Mai darokin iji fuka unam ise ijia vajai fian aben. Mai ijar fuka e iji sisim kege saof ijia oijo iji ifejdiama buka sinuom uruvana zarain. Regavo fun tavan ka ivuankbe ijia ire fok iremire baren.
REV 18:20 Mai Bebiron fun iserme barenma ijefuon e fok varur ijia karinva e Godon ikrejo ijigam Jesuon vuak abe e kuardiavo iji fok jaka oimaref. Mai iji fu ise iji fu jon renma ijefuon Godri ef una fu dab ma arafirinmano kuain.
REV 18:21 Rega anera darokin ijar mun ka bomana afikin iji dab urine saof ijia akozen. Fu abe ijia akozme kume, Mai bomana Bebiron iji fu ijeg dab saof ijia kozga noba una fu gakno kumen.
REV 18:22 No dua on ma iji bu mai guf ijia zaij vajaknum mario ga veg foiknum roijo iji noba una faik. Regavo madu e kafo imut buon ijia ar saknum ire kafokafo mukorigia amardiavo iji kafo buba una mai ijia karkfuon. Regavo ire masim iji farava amarmo fu tavan bog vuijmo iji noba una faik.
REV 18:23 Regavo ire rait iji fuba Bebiron ijia una sanak. Regavo e bu ijia sanamivo no katit faivo iji noba una faikfuon. E bu bisnis rejo iji moikigia buka e darokin rene e fok asidiain. Regavo unam on iji a kufuimene kegoino ijar e fok moikigia oinva iji an kam arafiriain.
REV 18:24 Mai Bebiron Godri abe arafirin. Ijefuon maiji e Godon vuak vierafene kuaivo ijigam e Godon ikrejo iji bu kaniainva kavuan buon iji bu mai ijefuon guf ijia arin. Bu buonkua bakigavo e fok God ma vierafejo e mafkin ijekma kavuan buon iji buk mai guf ijia arin.
REV 19:1 Na iji game una madu faik varur ijia e uruvana igeg ijia irovajaknum ijia uruvana kuai Godon oimaref. Ijefuon maiji sanainma ijiga daro iji e karauniavo iji buka God nuvuon ijefuon rok.
REV 19:2 Regavo e iji ise reoijo iji fu kege mazim giamo iji fuka mukorigia ren. God nuvuon ijar mai iji fu bara igeg tavan bog ebuon baru turame unam ise iji reno iji dab vajai fian main. Fu ijeg fine ise reko ise fuon ijar moik fok fuka dab arafirim. Regavo Godri fu dab arafirin ijefuon maiji fur e iji Godon ikrejo iji kaniain.
REV 19:3 Regavo na una madu faik bu una uruvana igia kume, God oimardaf mai bomana darokin mian iji fu naino ijefuon uk iji fu tavan bog ijia utuame vako kumen.
REV 19:4 Regavo e uguaikin tuenti fo (24) ga ire fo (4) nivek iji irenva iji bu tuame Godon fata iji fu fino nifak ijia dijme fuon sirimamen. Bu sirimamene kua, Fuka mardo no Godon oimarev.
REV 19:5 Areme vuak be fata ijia kume, E fok Godon ikrejo e ukakna ga mamkanuk iji God aroiknum fu oimardafno kumen.
REV 19:6 Rene na una faik ire be e uruvana irovajavo ijeg na fain. Revo iji bu irovajavo iji na fai bu ire varur ijar tavuame kumen vo do ijar firamo ijeg na fai bu kume, God oimardaf. God nuvuon E Bomana darokin iji fun ka E Bomana rene no samuagduom.
REV 19:7 Ijefuon ni roga no daro fuon ka ma bomana ijefuon oimaref. Ijefuon maiji tavan iji Maf-Sif Uka iji fu bara abekfuon iji fun ruain. Regavo vuak iji fu kuainma iji fu Jesur efuon fu ma vierafejo iji fu aferdiakfuon iji kuain. Regavo bara iji fun fu abekafa kanaufume samuain.
REV 19:8 Regavo bara iji ugon fuon fu abesenma iji Godri ugon ka ma abaikin zin igeg iramo ijin abe abesain. Regavo ugon iji abaikin ijefuon maiji e iji bu maturaime Godon ik reoinva ijin.
REV 19:9 Areme anera iji fu na kie vuak igin isoimne kie, E iji bu Maf-Sif Uka fu bara abekreno iro ijia vakuai fu kiainma iji buka bomana oimarkfuon. Regavo anera iji fu una madu kie, Vuak igi fuka ma Godon ruainmano kien.
REV 19:10 Na fu manino ijia dijeme fuon ato same sirimamekreja fu kie, Ab nun ato same sirimamegavo ni una Godon sirimamene. Ijefuon maiji na e be a aikin. No besum kaifnuvuon no Godon ikrene Jesuon vuak ma iji ma vierafene kuardiaoin. Regavo e iji Godon vuak vierafene e kuardiaoijo ijiebuon ik ma iji bu rejo iji bu Jesu Kuraison vuak iji abe e kuardiaoijo.
REV 19:11 Ijegreare na una varur ijia ga vien ijar dajakoga maf-os abaikin ijar ijia manin. Regavo e iji azan ijia ajie fino iji bu kua e nuibakin kegon ga ma ijesugin ren. E iji fuka maturain ijefuon fur e iji ise buon iji fu mukorigia kege mazim giaknum vo ena bijaimon.
REV 19:12 Niom fuon iji fuka mian igeg nain revo nigen fuon ijia fuka ire iji bu gord ijia amardiainva uruvana sain. Regavo vajai fuon ijia fu if be ijia anf abeden revo if iji e kafo buka ba vierafe gavo fun fuonkua vierafen.
REV 19:13 Regavo ugon iji fu sainma iji fuka e kavuan ijar azinma fu iji sain. Regavo if fuon iji Godon Vuak ijin.
REV 19:14 E fok bijaivo varur ijia karinva bu ugon abaikin iji same maf-os abaikin ijia ajie karine fu ja ruain.
REV 19:15 Regavo ir fuon ijia fu kaki ka uikin fu abe rareme e moik roina bijaime kaniakfuon iji biekunain. Ijefuon fur darokma samuagdiame bu kam ar Godon fu bomana ziemo ijia use korek. Fu ijia koreme dia tat fuon ijia datuaga kavuan buon iji bu vain igeg arik.
REV 19:16 Regavo ugon fuon fu sainma ijia ga masian fuon ijia if ijeg isoi, Kin bomana iji kin ukakna samuagdiamo ga E Bomana iji e sibank igeg mamkanuk samuagdiamo iji fu ijia isoin.
REV 19:17 Rene na ga anera be fu veni ijia manin. Fu uruvana igia um e aoinva bua ijo uruvana kaf ijia rame oijo iji kume, God fu joifuon iro be kanaufuinmano afuime ijia ruafno kumen.
REV 19:18 Fu kume, E igi aoinva ijiebuon vajai kunuk fok ifno kumen. Revo e iji aoinva iji e kin mamkanuk ijiga e bijaivo ijiebuon e mamkanuk ijiga e darokin bijaivo ijin. Regavo roin ire maf-os ga e iji maf-os kege oijo ijiebuon surif ijiga e monfuon ikrejo ga e ba monfuon ikrejo ijiga e mamkanuk ga e ukakna ga e uruvana ijiebuon surif ijin ifno kumen.
REV 19:19 Rene na giak maf kuriaij ijiga e kin moikigia karinva fok bun ebuon bijaivo ijiena e iji maf-os ijia ajie fino ijiga e bijaivo fuon ijiena bijaikuai samuain.
REV 19:20 Regavo ire maf kuriaij ijiga e iji vuak kufuimene nifak fuon ijia e nijaidiaoknum ire sumakin kafokafo reoinva iji bu kam dibur uniain. (Fu ire sumakin iji reoinma ijia fu e iji bu maf kuriaij ijefuon anf kenva ijiga maf kuriaij ijefuon kaven iji imut amarenva bu sirimamejo ijin biesiain). Maf kuriaij ijiga e iji vuak kufuimene e nijaidiaoinva iji fu nivek aferdiame kam mian iji kavuaime naino bu kua sarfano kuavo ijia korek.
REV 19:21 Regavo ebuon fok bijaivo iji fun e iji maf-os ijia ajie fino ijefuon kaki iji fu ir ijia biekunaima ijar kania baren. Fu kania baremga um uruvana ijieb vajai buon fok kam bua in.
REV 20:1 Areme na ga anera be fu varur ijia ari rok. Regavo imut fuon ijia fu mako bomana ka dibur iji ba gavo ijefuon ki ijiga ire sen afikin ijin imut fuon ijia kuniain.
REV 20:2 Regavo anera iji bun ire dregon iji amur bu kua tabar Setano kuavo iji kunaime sen dab tome juaivasia vuan taosen (1,000) ijeg unain.
REV 20:3 Areme bun kunaim dab mako iji dibur ba gavo ijia abesme vien bijukurain. Fu una kekome e moikigia oijo iji arafiriakro bu ijefuon dab bijukurain. Ijefuon fu juaivasia vuan taosen (1,000) ijeg fu ijia fikfuon. Fu ijia fine juaivasia iji barga bu sen irasga fu tavan ivuankbe ijesugin ok.
REV 20:4 Na ijia manine varur ijia ire fata kafo e ijia ajie karinva iji giain. Regavo e iji karinva iji bu Godri daro vajiaga bu e fok ijiebuon ise iji kege mazim giakfuon ijieb ijia karin. Regavo na madu e iji bu nuibakin Jesuon vuak ma iji dab e kuardiaoijga bu kaniainva ijiebuon kaven ijin ijia giain. E iji bu kaven ise maf kuriai ijiga kaven imut amarenva iji ba buon sirimameknum vo buba ire anf kafo variatar ijia ga imut ijia nain. Regavo bum una uri e mamkanuk rene juaivasia vuan taosen (1,000) bu Kuraisna moikigi samuame karin.
REV 20:5 Regavo e roin bu aoinva iji buba una urin revo bu samua vake juaivasia vuan taosen (1,000) abega bu ijiason una urin. Regavo bu una urinva iji bur amur urin.
REV 20:6 E iji eraneb ijia amur urinva iji buka bomana oimarek ijefuon maiji bun Godon e redo rad buba una mian iji naino ijia naoime barek. Bu God ko Kuraisbuon e isuf baroijo rene Kuraisna besum juaivasia vuan taosen (1,000) ijeg moikigi samuak.
REV 20:7 Areme juaivasia vuan taosen (1,000) iji fun barekoga Setan bu sen iji bu toinva iji irasdakva fu dibur fuon iji fu areme kekokfuon.
REV 20:8 Fu kekome moik fok ar iror igia oknum e iji Gog ga Megog bu ateseme oinva iji biesiak. Setan fu e iji biesiame aferdia ijia afuime bu e uruvana ire jier saof irif ijia naoivo ijegrega fu aferdia bijaikfuon.
REV 20:9 Bu useme ar iror igia oknum Godon e bu mai Jerusarem ar God fu oijmamo guf ijia karinva iji azi bukurian. Regavo God fu varur ijia mian iji kuamga fu ari e fok jakia baren.
REV 20:10 Rene Setan e iji fu bu biesiainma iji bu kunaim dab mian kavuaime naino bu kua sarfano kuavo ijia akozen. Bu kunaime ar iji maf kuriaij ijiga e iji bu e biesiame vuak nijaidiaoijo bu koreva ijia korek. Regavo e iji bu nakikmazak ijia vajai fian abene vak.
REV 20:11 Areme na fata abaikin iji be gavo e iji fu ijia ajie fino iji gain. Regavo Godon nifak ijia moik ijiga varur buka bakiteme vaka fuba una giain.
REV 20:12 Regavo na gia Godon fata ijefuon nifak ijia e fok aoinva ukakna ga mamkanuk iji bu ijia iren. Bu ijia irekoga bu buk kafo kam irame madu una buk be e iji bu tavan bog ijia karivako ijiebuon if bu isoinva iji dab irain. Bu ijia irame e fok aoinva ijiebuon unam izeg bu kegoinva iji bu buk ijia isoinva iji kege mazim giain.
REV 20:13 Amur iji bu e iji saof ijia aoinva ijieb Godon vaka fu kege mazim giain. Fu giame una e moikigia aoinva bu zuarunam karinva ijiebuon unam iji izeg bu kegoinva iji kege mazim giain. Fu unam buon izeg bu kegoinva iji bu buk ijia isoinva ijia giaknum kuardiain.
REV 20:14 Rene unam iji aoivo ijiga e ar iji e bu aoime va karijo iji fu kam ar iji mian tavan bog naino ijia koren. Regavo ar iji mian naino bu vainva iji bu una ijia tavan radkma ijia aoime barkfuon.
REV 20:15 Regavo e iji eranebuon if iji buba buk iji e bu tavan bog ijia karivakfuon ijia isoinva iji bu kam ar iji mian naino ijia koren.
REV 21:1 Areme na moik ga varur iviamkor iji giain. Regavo moik ga varur usuikor iji ga do saof iji bun bare vain.
REV 21:2 Bu bare vako na varur ijia ga Godon mai akai Jerusarem iviamkor ijar varur iji God fino ijia ari rok. Regavo mai iji fuka mukorigia bara naise iji fu baru rekafa kanaufume samuainma igeg ari barufuon biekafa roka na gain.
REV 21:3 Rene na faik vuak be uruvana igia fata ijia kume, Godon ar iji fu fino iji iviakma fun areme una ema ijiena fioke bu efuon rek. Regavo God fu koikfuon fuka buna fioknum ga fur ka God buon rek.
REV 21:4 Regavo fur nido buon fikorediake ga bu rad buba una aoik. Regavo vajai fian ijiga oifian iji rad buba una abeknum niraik. Regavo unam ise iji ma usuikor iji fuka bare vainvano kumen.
REV 21:5 Areme e iji fata ijia fino ijar kume, Igia gaf. Iviakma na ire fok kege iviamkor rej. Regavo fu una madu na kie, Vuak iji isoimne ijefuon maiji vuak iji fuka ma ga vuak iji buka ma vierafekfuon.
REV 21:6 Ijegreare fu madu kie, Unam usuikor fok fun baren. Regavo naiji na amur iji ga Rad ijin. Revo nar amur anere ga nar rad barek. Regavo e kafo eraneb do duadiakva nar do ma iji tavan bog ijia navako iji vajiaga bu ik revo bu mon ijia kimekva bakin.
REV 21:7 Erar fu mukorigia Setanon unam ise fu biesuamo ijia ba zazai gavo fu giriesame agordiamo iji ire ma iji fu nun abekfuon iji na God fuon reke fu amnun rek.
REV 21:8 Regavo e iji bu nuifuon ikrekuai juvknum uzame ba unam nun ijia jajie vako ijigam e iji ba na ma vierafejo ijigam e iji bu unam ise siroij igegrejo iji bu mian naoik. Regavo e iji e kaniavo ga e kafobuon bara turavo ijigam e zuaigin ga e iji ire kafo imut ijia amardiame buon sirimamejo ijigam e iji kufuimejo ijiebuon ar iji mian kavuaime naino ijin. Bu ijia madu una aoime barekno kien.
REV 21:9 Areme anera seven (7) dis iji bu kege moikigi vajai fian miakuai kuniaime irenva iji be fu na manijo ijia ruain. Fu kekome na kie, Roga na Maf-Sif Uka ijefuon bara iji fu iviakma abenma iji nijaidavno kien.
REV 21:10 Fu ijeg kiekoga Kaven Akai ijar na niroikiemga anera ijieb na aferdieme uruor kaf ijefuon buin ijia ajie vain. No ijia ajie useme fun Jerusarem mai akaij iji varur ijia Godri kuaga fu ari rokon iji nijaidien.
REV 21:11 Regavo mai iji fuka Godon sanainma ijar sana baren. Regavo mai iji sanainma iji fuka ire mun abaikin bu kua jasfano kuavo ijekin. Regavo fuka mukor abarme ire do riturainma ijekin.
REV 21:12 Regavo mai iji buka mun ijia fak kira ameoine dab bijain. Revo vien iji bu tuer (12) ijeg amaren ga anera tuer (12) bu vien ijin samuame iren. Regavo vien ijia bu agan tuer (12) Isrerko ijiebuon if iji ijia isoin.
REV 21:13 Regavo vien nokbek (3) iji bu tavan ajiemo nak ga nokbek (3) bu tavan koinonak. Regavo madu nokbek (3) bu iken roinfuon ga nokbek (3) bu madu iken roinfuon ijia amaren.
REV 21:14 Regavo mai ijefuon fak iji bu anerene kirainva iji bu mun tuer (12) mamkanuk ijiebuon azan ijia kira ajien. Regavo mun tuer (12) iji bu e iji Maf-Sif Uka ijefuon afasor rene ikreoijo ijiebuon if tuer (12) iji isoin.
REV 21:15 Regavo anera iji fu na vuak kuardiemo iji fu imut fuon ijia in ukakbe gord ijia amarenva iji kunain. Regavo in iji fu mai ijiga fak bu kirainva ga vien iji mikfuon ijin abe kunain.
REV 21:16 Regavo mai ijefuon jaor ijiga kakare iji buka mukorigia mim besum sain. Regavo anera iji fu in ukakbe bu ire mimgiavo ijia abe mai ijefuon jaor iji min. Fu mim gainma iji fuka tu taosen fo adred (2,400) kiromitas ijeg vain. Regavo kakare fuon ijefuon jaor iji fu ajienma iji fuka ijek besum aresren.
REV 21:17 Regavo fu madu fak ijefuon jaor iji fu ajienma iji miga fu siksti (60) mitas ijeg ajien.
REV 21:18 Regavo ire fak bu kirainva iji bu ire mun abaikin bu kua jasfano kuavo ijia kege kirain. Regavo mai iji fuka ire gord ijia amarenva fuka mukorigia abarme do iji fu riturainma ijekin.
REV 21:19 Regavo mai ijefuon fak bu kirainva iji bu mun mamkanuk tuer (12) ijiebuon azan ijia kira ajien. Mun amur iji bu nainva iji bu mun kavuainma bu kua jasfano kuavo ijin nain. Regavo naba tu (2) iji bu nainva iji kazin bu kua sefaijano kuavo ijin kege nain. Revo ura naba tiri (3) iji bu mun ni fuon kafokafo bu kua egetino kuavo ijin nain. Regavo naba fo (4) iji bu mun emerodino kuavo ijin nain revo naba faiv (5) iji madu fu ni kafokafo bu onisno kuavo ijin nain.
REV 21:20 Regavo naba siks (6) iji bu kaneriano kuavo iji nain revo ura naba seven (7) iji bu mun ni garagarakin bu kua kuots no kuavo ijin nain. Regavo naba eit (8) iji bu nainva iji bu ni inak vajat ga kazin besum iji bu kua berino kuavo ijin nain. Regavo ura naba nain (9) iji bu ni garam bu kua tofasno kuavo ijin nain. Regavo ura naba ten (10) iji bu nainva iji bu mun inak vajat igekin bu kua karesidonino kuavo ijin nain. Regavo ura rad nokarok naba ireven (11) ijiga tuer (12) iji bu nainva iji bu kuai tekuos ga amatesno kiavo ijin nain.
REV 21:21 Regavo vien tuer (12) bu amarenva iji bu mun ka mukor bu kua ferono kuavo mon ka bomana kimejo ijia besubesum kege amardiain. Revo mai guf ijia unam iji bu oijo iji bu ire gord zin igeg iramo ijia amaren.
REV 21:22 Regavo mai ijia Godon ar iji bu ijia sirimamejo iji be naka ba gain. Ijefuon maiji God E Bomana darokin ijiga Maf-Sif Uka iji bun tavan bog ijia buna karin. Ijefuon ar be bu ijia God sirimamekfuon iji buba ijia sain.
REV 21:23 Regavo mai guf ijia ire veni ijiga asam iji bu ijia sanavo bakin. Ijefuon maiji fun Godon sanainma ijar ijia sanam revo Maf-Sif Uka iji fu rait igeg sanam.
REV 21:24 Regavo e fok moikigia karinva iji bu mai ijefuon sanainma ijia kariok. Regavo e iji moikigia bu e kin renva iji bu ire buon ma iji kege fuon ruak.
REV 21:25 Regavo mai ijefuon vien iji bu bijukva bakin gavo bu tavan bog dajak ijefuon maiji nakimo iji fu ijia fuka ma bakin.
REV 21:26 E fok moikigia oijo iji bu ire buon ma iji kege mai ijia ruak.
REV 21:27 Regavo e be erar fuba maturain vo fu ire ise jufabeno iji reoino ijiga vuak kufui kuaimo iji fu mai ijia fikma bakin. Regavo bun e iji bu if buon iji Maf-Sif Uka ijefuon buk iji e bu ijia karivakfuon ijiebuon if isoinva ijieb buonkua mai ijia karik.
REV 22:1 Areme anera iji fun una do be e bu ine ijia karivako iji fu ruvako ijin nijaidien. Regavo do iji fuka mukoi abarenma ijar God ko Maf-Sif Uka ijiebuon fata rotit ijia kaname keko ruain. Revo do iji fu kaname mai ijefuon unam iji vainma ijefuon uf ijia vain. Regavo do irif roinroin ijia bu in iji sunin iji tura ine tavan bog ijia karivako ijieb ijia name vain. Regavo in iji bu asam besubesum guf ijia kiravo ga juaivasia besum iji buka kukma kiravo. Regavo in ijefuon ak iji e moikigia oijo bu iji turame matan buon ga vajai fian buon omaniga bu madiamo.
REV 22:3 Regavo ire iji ba maturainva iji God fu uzamo iji a mai ijia giakma bakin. Regavo God ko Maf-Sif Uka ijiebuon fata iji fu mai ijia manikega e Godon ikrejo fok bu buon sirimamek.
REV 22:4 Regavo bu ijia uikinik fuon iji ga vo if fuon iji bu variatar buon ijia isoidiak.
REV 22:5 Mai ijefuon guf ijia nakinma iji fuka ma bakin. Regavo ire rait ga veni iji a ijia vierafekma bakin ijefuon maiji God E Bomana iji fu buon sanainma ijin. Regavo e Godon ikrejo bur e mamkanuk rene e fok moikigia oijo iji tavan bog samuagdiame vak.
REV 22:6 Areme anera iji fu na kie, Vuak igi fuka mano abe ma vierafene kien. Regavo God E Bomana iji fu Kaven fuon fu e vuak fuon vierafene e kuardiavo iji vajiamo. E ijar anera fuon kuamga fu ari e iji Godon ikrejo iji tavan rad ire iji rekreno iji kuardiakafa ari ruain.
REV 22:7 Jesu fu kia, Mukorigia faif naiji na migegare una ruak. Erar fu e iji Godon vuak vierafene kuaivo ijiebuon vuak ma iji bu buk ijia isoinva iji igakva e iji buka oimarkfuon.
REV 22:8 Regavo na Jon nar vuak fok ada nun ijia fai ga ni nun ijia giako bu ren. Regavo na ire fok iji giaknum faime barme na uri anera iji fu ire iji nijaidiema ijefuon nifak ijia ato same fuon sirimamekafie vierafen.
REV 22:9 Regavo anera iji fu una na kie, Ab nun sirimamegavo ni una Godon sirimamene. Ijefuon maiji naiji na e be a aikin Godon ikrejo revo e uviaifnuvuon iji Godon vuak vierafene kuaivo ijekin be. Regavo madu na e iji bu Godon ik reoknum vuak fuon ma iji buk igia isoinva iji igiavo ijekin beno kien.
REV 22:10 Areme anera iji fu madu kie, Ab vuak iji e Godon vuak vierafene kuaivo bu buk igia isoinva iji abe sauik. Ijefuon maiji tavan iji fuka samairedo ire fok buka rekfuon.
REV 22:11 Ijegvo ni vierafe tavan nuvuon ma iji no ise nuvuon iji areme una oi karoime Godon ruakfuon iji non mukorigia nise baren. Ijefuon erar fu vierafega fu ise reokafa vierafekma iji ni arega fu ijeg reoine. Regavo erar fu siroij igeg unam ka ise iji reokafa vierafekma ni arega fu ijeg reoine. Regavo erar fu unam mukor ijesugin reoknum ga unam akaij ijia fioino iji ni arega fu mukorigia reoinon kien.
REV 22:12 Regavo Jesu fu madu kia, Igia faif naiji na una ruakfuon. Revo na ruakva na ire kafo kege ruainki e iji bu izeg nuifuon mukorigia ik reoinva iji na una ef ire kafokafo vajiak.
REV 22:13 Regavo naiji na amur iji ga rad ijin. Regavo nar amur anere ga nar rad barek.
REV 22:14 E iji bu oibuon iji ugon igeg some abarenva iji buka oimarkfuon. Ijefuon maiji bun aresredo bu in sunin bu ine tavan bog ijia karivakfuon bu iji nubume ik. Regavo madu bu aresredo bu ar mai iviamkor ijia arume guf ijia vak.
REV 22:15 Regavo mai ijefuon makaf ga aror ijia bu e iji unam ise reoijo ijigam e iji zuainavo ijieb ijia ok. Regavo madu e iji bu barubara buon fudainamime unam ise rejo ijigam e roin kaniavo ijieb ijia ok. Regavo madu e iji bu kaven kufui imut ijia amardiainva iji oijmiavo ijigam e iji bu vuak kufui kuaimoijo ijiga unam kufui iji kegoijo ijieb ijia ok. Bu e fok ire ise ijekin ijia reoijo iji buba Godon mai iviamkor ijia aruk revo bu makaf ijia ok.
REV 22:16 Na Jesu nar anera nun iji kiavga bu vuak iji sos ijia ja kuardiakuai vuain. Naiji na e Devidon uifarif ga na aganfuon ijia uinve ruain. Regavo naiji na ire mujur iji mukorigia sanamo iji fu tavan irasmo ijia ajiemo ijin.
REV 22:17 Regavo Kaven akai ijiga Maf-Sif Uka iji fu sos iji bara igeg abekreno iji bu kua, Migegare rokne kuak. Regavo e iji eraneb vuak iji faikva buk ijeg kua, Rokne kuak. Regavo erar fu do kafakma ni ro. A ro do iji bu ine tavan bog ijia karivako iji ba mon ijia kimejo iji efkin abe ikfuon. Regavo iji fu koikfuon fu ikafa vierafekma fu abe ikfuon.
REV 22:18 Na Jon nar ire iji fu rad rekfuon iji buk igia isoin. Na isoime e fok ja ejafiame ju kuardiame kia, E iji eraneb vuak buon kafo vuak igefuon ijia buin ifene kuaikva Godri ire iji fu e vajai fian abekfuon iji bu buk igia isoinva ijia kege e ijin vajai fian miak.
REV 22:19 Regavo eraneb bu vuak igi fu rad rekfuon na buk igia isoinva iji roin fikoregavo busik una kafo isoikva Godri ire in iji sunin bu ine tavan bog ijia karivako iji fu fuifuon nijainma iji abe vak. Regavo madu e iji fu mai akaij iji buk igia isoime kuainva ijia fuba vakfuon.
REV 22:20 Jesu Kurais e iji vuak fok igi kuarduomo iji fu kume, Iji fuka mano kuom. Regavo fu madu kume, Naiji na migegare una rokne kumen. Regavo naiji na una kume, Mare! Jesu E Bomana ni rokno kumen!
REV 22:21 Na sirimamega Jesu E Bomana fu Godon e fok ar iror igia karioinva iji mardiame ifejdiaga bu mukorigia kariokfuon. Mare!
