﻿Yona.
2.
Yona ni gaali mu guyeeni, galomba Musengwa Hatonda wuwe. 
Galomba ati, “Ni naali ŋagati mu biŋeeriŋeeri, Musengwa nahweŋundeerera wunjeede nga wungobolamo. Ni naali mu hyalo hyʼabamagombe nahweŋunderera wategera ohutwi era wanjeeda. 
“Ni wanjuguja mu njuho ŋagati neyinihire ŋaasi mu buliba amaaji ganeswanigirisa, amayengo aga wasindihire ganjolohera hu mutwe nʼamaani gosigosi. 
Nga peega ti olwo ko wundanyiriiye, kuŋooye mu moni? Sikigoboyeyo hwingira mu Yekaalu yiyo enjawufu? 
Amaaji gaamirire getotera ohunjita neyinihire mu njuho ŋagati nʼebinyaasi byomu nyanja byanewotolera hu mutwe. 
Neyinihire nolera erala hu simuho yʼesozi eyo, ŋaasi mu hyalo hyʼabamagombe. Aye ewe Musengwa Hatonda wange, wanjinululayo naŋwayo mulamu. 
Ni naŋulira obulamu ni butiina, Musengwa nahebulira nahweŋundeerera ni kulomba ngobole eyi oli. Weesi ni waali mu hifo hihyo ehyabufu omu wihala, waŋulira ohweŋundeera hwange. 
Abo abagaaniiye mu hujumirya emisambwa ejibula ehi jiyeeda, bafiirwa emiyaaya ohuŋwa eyi oli. 
Aye ese, ewe ndiiwe oyu najumiryenga. Nahahuŋe eŋongo, noherese hiisi ehi neyamire. Olwohuba ewe Musengwa ndiiwe onoŋola.” 
Ngʼaŋo Musengwa alagira oguyeeni guhaasa Yona hwigobo. 
