﻿Ezabbuli.
149.
Mujumirye Musengwa. Mwembere Musengwa olwembo olunyaaha, mwembe etendo lirye mu luhumbaano lwʼabagwalaafu. 
Leha Abayisirayiri basaŋalye olwʼoyo owabatonda. Leha abaatu bomu Sayuuni basaŋalye olwa habaha waawe. 
Leha bamujumirye nʼohuhina era bamwembere ni bahubba etambulini nʼahatongooli 
olwohuba Musengwa asangaalira abaatu babe, abewombeeha abatihira engule eyʼobuŋangusi. 
Abamwesiga bosibosi basaŋalye olwohuba baŋanguuye, bembe nʼesangaalo ni bali hu buliri waawe. 
Leha bembe enyembo ni bajumirya Hatonda, ni baŋambire nʼepiima enjogi hu njuyi jombi, 
ohwegalula amawanga nʼohuboneresa abaatu 
basidihe abahabaha baawe, baboŋe nʼabatangirisi baawe epingu, 
bahole ebibonerezo ebi babasalira. Eryo njʼeŋono lyʼabagwalaafu babe. Mujumirye Musengwa. 
