﻿Ezabbuli.
146.
Mujumirye Musengwa, omwoyo gwange gujumirya Musengwa. 
Nja hujumirya Musengwa, obulamu wange wosiwosi nja hwemberanga Hatonda wange ni kiiri mulamu. 
Simwesiganga batangirisi, abaatu obuutu, abataŋanga hubanoŋola. 
Omuuya gunabaŋwamo nga baagama mwiroba, hu ludaalo olwene olwo etegeha jaawe nga jifa. 
Gesiimire oyo ali ni Hatonda wa Yakobbo ngʼomuyeedi wuwe era asuubirira mu Musengwa Hatonda wuwe, 
owatonda egulu nʼehyalo nʼenyanja ko nʼebiitu byosibyosi ebirimo, oyo Musengwa omwesigwa emirembe nʼemirembe. 
Agonjoola esonga jʼababanyigirisa nʼatehubbira, abayala abaŋa ehyohulya, Musengwa aboŋolola abasibe, 
Musengwa gegula emoni jʼabaŋofu, Musengwa ayeeda abakokomaaye, Musengwa genda abagwalaafu. 
Musengwa ahuuma abalugendwa era ayeeda abanamwandu nʼabafuubbi aye asihiirisa ekola yʼabahosi bʼebibi. 
Musengwa aŋuga emirembe nʼemirembe. Ewe Sayuuni, Hatonda wuwo aja huŋuga emirembe nʼemirembe. Mujumirye Musengwa. 
