﻿Ezabbuli.
107.
Mweyaase Musengwa olwohuba mulaŋi, ohwenda huhwe hwʼemirembe nʼemirembe. 
Leha aba Musengwa ganunula balome baatyo, abo aba ganunula ohuŋwa mu balabe. 
Abo abagatusa ohuŋwa mu mawanga, ohuŋwa e buŋwalyuba nʼe bugwalyuba, ohuŋwa mu maniino nomu mehiriro. 
Abandi batangatangira mu lulafu era sibabona ngira eyitiina mu hibuga omwohumenya. 
Enjala nʼenduŋo byabaluma era baŋwamo esuubi. 
Ngʼaŋo beriririra Musengwa mu bigosi byawe era ngʼabanunula mu hunyigirisiwa ohu baalimo. 
Gabatangirira mu ngira enuŋamu eyitiina mu hibuga ehyʼohumenyamo. 
Leha beyaase Musengwa olwohuba ohwenda huhwe hubitiirifu nʼolwebyamaliholiho bibye ebi aholera abaatu. 
Hiri hiityo olwohuba aba enduŋo eruma abaŋa ehyohunywa era aba enjala eruma abaŋa ebiraŋi. 
Abandi baali baŋutaliiye mu hiirema, ni beboŋeeye mu hubonaabona, era aba basidihire enjegere ejʼebyoma, 
olwohuba baali bajemeeye ebiragiro bya Hatonda Owaŋamugulu Obugali era ni banyooma ebi abalaabbira. 
Gaabaŋwa olwʼohufululuhana ohwʼamaani, befuumulirangaŋo eminyiha aye nga ŋaŋuma abayeeda. 
Ngʼaŋo beriririra Musengwa mu bigosi byawe era ngʼabanunula mu hunyigirisiwa ohu baalimo. 
Ngʼabatusa mu hiirema nomu hufa, nga ahapujula enjegere ejaali ni jibaboŋire. 
Leha beyaase Musengwa olwohuba ohwenda huhwe hubitiirifu nʼolwebyamaliholiho bibye ebi aholera abaatu. 
Hiri hiityo olwohuba abbwagabbwaga enjigi ejʼebihomo era gabotojola emitalimbwa. 
Balala hu bo bafuuha baŋubeebe olwʼebibi byawe, era babonaabona olwʼohubbenga hwawe. 
Emyoyo jaawe nga jenyinyalya ebyʼohulya byosibyosi, era baali huupi hufa. 
Ngʼaŋo beriririra Musengwa mu bigosi byawe era ngʼabanunula mu hunyigirisiwa ohu baalimo. 
Galagira hulagira baŋona, gabanunula ohuŋwa emagombe. 
Leha beyaase Musengwa olwohuba ohwenda huhwe hubitiirifu nʼolwebyamaliholiho bibye ebi aholera abaatu. 
Leha baŋeyo eŋongo ni beyaasa, era bembe nʼesangaalo. 
Abandi hu bo basabaalira mu meeri hu nyanja baali basubuuzi ni baholera hu gayanja agabbala. 
Baabona ebi Musengwa ahola, ebyamaliholiho hu gayanja agabbala. 
Galagira omuyaga gwenyoha, gwenyosa amayengo hu nyanja. 
Bedunda ŋamugulu mu bbanga nga bahena beeha ŋaasi mu njuho, mu tiisa eyʼamaani abagimbi bʼemeeri baŋwamo esuubi. 
Olumbuuju lwabaŋamba era batagala hyʼabameesi, baŋwamo ahategeera. 
Ngʼaŋo beriririra Musengwa mu bigosi byawe era ngʼabanunula mu hunyigirisiwa ohu baalimo. 
Gehahania omuyaga era amayengo hu nyanja gabunjeera. 
Basangaala enyanja ni yabunjeera, nga abatangirira boola hu mwalo omulaŋi. 
Leha beyaase Musengwa olwohuba ohwenda huhwe hubitiirifu nʼolwebyamaliholiho bibye ebi aholera abaatu. 
Leha balangirire obubbala wuwe mu lwijuuye lwʼabaatu era bamujumirye mu luhumbaano lwʼabatangirisi. 
Gafuula enjabi lulafu, amaaji aŋa gahuluhutiranga ŋafuuha ŋoomu. 
Ehyalo ehigimu gahifuula ehyʼoluunyu, olwʼebibi byʼabo abamenyangamo. 
Gafuula olulafu bidiba byʼamaaji, nʼehyalo ehyoomu gahifuula esulo ejihuluhuta amaaji. 
Omwo njʼomugata abayala era batongolamo ehibuga omu baamenya. 
Bamwa obumo mu bisambu, era nga bahoma emizabbibbu, omwaŋwa egesa eryʼamaani. 
Gabaŋa ekabi baala bugali weene era sigaleha byayo byawe huhendeera. 
Ngʼaŋo bahendeera obungi era babatusaaho obuŋangi ohunyigirisiwa nʼendibo nʼohubonaabona byabagwira. 
Oyo agima abahungu babajerega, gabaleetera ohutangatangira mu lulafu. 
Aye gaŋonia abagadi gabatusa mu hubonaabona hwawe era gabaleetera ohusalagana hyʼebidooli byʼetaama. 
Abagwalaafu babibona nga basaŋalya ne abahosi bʼebibi bosibosi bagawiihaho. 
Hiisi ali nʼamagesi, ate omwoyo hu biitu ebyo, baŋeege hu hwenda hwa Musengwa ohubitiirifu. 
