﻿Ezabbuli.
78.
Zabbuli ya Asafu. Baatu bange muŋulire esomesa yange. Mutegere amatwi muŋulire ebibono byange. 
Nja huloma ni nabo mu ngero, nja huloma ebyama ebi bahweha ahale nahale. 
Ebiitu ebi hwaŋulira era ebi humanyire, ebiitu ebi basehule beefe batulomera. 
Sihuja hubihweha abaana beefe, huja hulomera abʼomulembe oguuja ebiŋamba hu maani ga Musengwa nohu byʼamaani nʼebyeŋunjisa ebi gaahola. 
Gaŋa abejuhulu ba Yakobbo ebiragiro, gaŋa abasehulu beefe Abayisirayiri amagambi bagasomese abaana baawe, 
abʼomulembe ogulondaho bahagamanya era ni naabo ababahiiri husaala boosi bahagasomesa abaana baawe. 
Bahesiga Hatonda era batebirira ebi ahola aye bahaŋamba ebiragiro byange. 
Bataba hyʼabasehulu baawe, omulembe ogwʼabaatu abahahanyafu era abajeemu abaali nʼemyoyo ejitagonderanga Hatonda era abatamwesiganga. 
Abaatu bomu hiha hyʼEfulayimu wayire baali nʼobusaale, baatya baduluma hu ludaalo lwʼolutalo. 
Babbwaga endagaano ya Hatonda era bajeemera amagambi gage. 
Beebirira ebi gaali nʼaholire ebyeŋunjisa ebi gabalaga. 
Gaahola ebyamaliholiho mu moni jʼabasehulu baawe mu hyalo hyʼe Misiri, mu twale lyʼe Zowani. 
Gaabula enyanja ngʼabaatu babitaamo. Gaahola amaaji gemeerera hyʼehiteepe hu luuyi nohu luuyi. 
Mu muusi gabatangiriranga nʼali mu hireri ngʼowiire abatangirira nʼomuliro. 
Gaadisa amabaale mu lulafu gabaŋa amaaji amangi oti gʼenyanja. 
Gaaleetera esulo jʼamaaji ohuŋwa mwibaale, amaaji nga gahuluhuta hya gʼolwabi. 
Aye ni bali mu lulafu beeyongera ohwonoona bajeemera oyo Ali Ŋamugulu Obugali. 
Basalaŋo ohuhema Hatonda ni baduhanira ebyʼohulya. 
Bemulugunya hu Hatonda baati, “Dala Hatonda asobola ohutuŋa emere mu lulafu luno? 
Ni gahubba hwibaale amaaji ameene amangi gaŋwamo. Aye asobola ohuŋa abaatu babe enyama nʼemere?” 
Musengwa ni gabaŋulira ni baloma baatyo gabaluŋira gaŋwana omuliro hu Yakobbo era ehiruŋi hihye hyali hu Yisirayiri. 
Sibafugiirira bya Hatonda era sibesiga ti aja hubanoŋola. 
Aye galagira ebireri mu bbanga gegulaŋo enjigi ejʼegulu, 
gakukumuhisa abaatu emaanu balye gabaŋa emere ohuŋwa mwigulu. 
Abaatu balya hu emere eyʼabamalayika, bosibosi gabaŋa emere mu bungi. 
Galehula hibuyaga ohuŋwa ebuŋwalyuba gafuuŋa era olwʼamaani gage gagira embeŋo ohuŋwa mu mehiriro yahubba. 
Gabakukumuhisa enyama hyʼefuuhe, enyuni ejiguluha ehibbiiryo hyʼomujehe hwigobo lyʼenyanja. 
Enyuni ejo jagwa ohweswanigirisa ekambi jaawe, ohwetoloola eweema jaawe. 
Abaatu balya byabameera hu myoyo olwohuba gabaŋa ehi baali ni baŋembaho. 
Aye ni baali ni bahiirya era emere ni yaali nʼehiiri mu hanwa, 
Hatonda gabaluŋira nga geeta abaali ni basinga ohuba abʼamaani era gasalaho abavubuka mu Yisirayiri. 
Aye wayire gabahola atyo beeyongera ohwonoona era wayire gabalaga ebyamaliholiho sibafugiirira bibye. 
Olwʼehyo baheneeresa obulamu waawe wubi era emyaha jaawe bajihenera mu bigosi. 
Hiisi olu Hatonda gahabeetire, nga bebbwaga bamwendula bacuuhisa erala emyoyo jaawe. 
Nga bahebulira baati Hatonda gaali njʼolwanda lwawe Ali Ŋamugulu Obugali gaali njʼOmununuzi waawe. 
Aye ebibono byawe byali byʼobudulingi wereere, eŋuma ehi baloma ehyʼamazima. 
Emyoyo jaawe sijaali miheneerefu, sibaali besigwa ohuhuuma endagaano yiye. 
Aye Hatonda gaali wʼehisa eyi bali, gabasoniŋa ebibi byawe era sigabasihiirisa. Emirundi mingi gahuuma obusungu wuwe era sigabajuhaho hiruŋi hihye. 
Gahebulira ati baali baatu buutu baali mbeŋo eyifuuŋa yaŋwaŋo. 
Ne mirundi mingi bamujeemera eyo mu lulafu, bamweŋunamisa eyo mu luhoola. 
Mirundi mingi bahema Hatonda, banyiigisa Omwawufu wa Yisirayiri. 
Sibahebulira baati ali nʼobuŋangi oludaalo olu gabanunula mu balabe. 
Oludaalo olu gahola obubonero oweŋunjisa e Misiri, ebyamaliholiho ebi gahola mu twale lyʼe Zowani. 
Amaaji gomu lwabi gafuuha mafugi era Abamisiri sibaganywa. 
Gabasindihira agasoŋera agabahehera nʼagahere agabaleetera ohwesinya. 
Endimiro jaawe gajiŋa amadeede era ebirime byawe gabiŋa esige. 
Efula eyʼamabaale yonoona emizabbibbu jaawe nʼemisaala emitiini jasihiiriha. 
Efula eyʼamabaale yahubba eŋombe jaawe, ebisolo byawe byafa olwʼohubbwabbwanuha nʼohumyasa hwʼekuba. 
Gabajuhaho ehiruŋi hihye, gabataaho obusungu nʼohunyiiga, ehibbubbu hyʼabamalayika hyabasihiirisa. 
Gabajofumulaho obusungu wuwe, sigabaŋonia hufa aye gabataho haŋupuli baafa. 
Geeta abaana abadaayi bosibosi mu Misiri, ebibala ebidaayi mu weema ja Haamu. 
Ngʼaŋo atangirira abaatu babe hyʼetaama gabaluŋamya mu lulafu. 
Gabatangirira bulaŋi weene ni ŋaŋuma hutya. Aye enyanja yamira abalabe baawe. 
Ngʼaboosa hu salo yʼeroba lirye eryawufu, ehyalo ehyʼesozi olu gaŋangula nʼamaani gage. 
Gabbinga amawanga agaalimo ngʼaŋamba ehyalo ehyo ahiŋa abaatu babe ngʼobusika amago gaawe, gagaŋa Abayisirayiri. 
Aye bahema Hatonda era bajeemera Ali Ŋamugulu Obugali, sibahuuma biragiro bibye. 
Sibaali badimamu era baŋuma hufugiirira hyʼabasehulu baawe, ni becuusa hyʼembasa mu muŋaya. 
Bamuleetera obusungu olwʼamasabo gaawe hu sozi ni bajumirya ebiitu ebibbote. 
Hatonda ni gabona ebiitu ebyo gabaluŋira ngʼahubbira erala Yisirayiri omugongo. 
Gahubba Eweema Enjawufu e Siilo omugongo, eweema eyi gaali ni gemehire ŋagati wʼabaatu babe. 
Galeha Esanduuku yiye enjawufu bayiŋira mu buŋaŋanguse eyaali ni yiraga eŋono lirye ohutiina ohuba mu balabe. 
Galeha abaatu babe babeeta nʼepiima, ganyiigira abaatu babe bugali. 
Omuliro gwasihiirisa abaseere baawe, abahaana baawe bahaya nʼobufumbo. 
Galeha beeta abasengi baawe nʼepiima era abanamwandu baawe babagaana nʼohubalira. 
Ngʼaŋo Musengwa genyoha ohuŋwa mwiro hyʼomeeye omwenge 
ngʼabbinga abalabe babe era baswalira erala olwohuba gabaŋangula. 
Gahubba abejuhulu ba Yosefu omugongo era sigatobola hiha hyʼEfulayimu. 
Aye gatobola ehiha hya Yuda, olusozi Sayuuni olu genda. 
Aŋo paŋa gatongola ehifo hihye ehyawufu ohuba hyʼamago gage mwigulu, hyʼehyalo ehi gataŋo emirembe nʼemirembe. 
Gatobola Dawudi ohuba muŋeeresa wuwe oyu gatusa mu hwaya etaama, 
ohuŋwa mu hwemera etaama, gamufuula mwayi wʼabejuhulu ba Yakobbo, Abayisirayiri, abaatu ba Musengwa. 
Era Dawudi gabaaya bulaŋi nʼowesigwa gabaŋuga nʼamagesi. 
