﻿Ezabbuli.
65.
Yʼomutangirisi wʼabembi. Ezabbuli ya Dawudi. Olwembo. O Hatonda, hiraŋi ohuhujumirya mu Sayuuni era huja hwoheresa oweyamo weefe. 
Ewe oŋulira esaala abaatu baja huuja eyi oli. 
Wayire ohubbenga hwefe hutusitoŋerera aye otusoniŋa. 
Besiimire abo abotobola wabaleeta huupi ohuba mu hifo hihyo ehyawufu. Husuna ebiraŋi ebyomu nyumba yiyo ebituhuumire mu Yekaalu yiyo enjawufu. 
Otuŋa obuŋangusi era ohola ebyeŋunjisa ohutunoŋola. O Hatonda, abaatu bosibosi hu hyalo ni naabo abali engereha wʼenyanja ejaŋaleeŋi, banahwesigenga. 
Wahola esozi olwʼobuŋangi wuwo era oli nʼamaani. 
Obunjeesa amayengo hu nyanja obunjeesa nʼebimoto byʼamaaji abaatu balehera aŋo ohuteetema. 
Abo abamenya aŋaleeŋi eyo beŋunja ebyamaliholiho ebi ohola era bosibosi ohuŋwa ebuŋwalyuba ohwola ebugwalyuba bejula esangaalo olwʼebiitu ebi ohola. 
Olabirira ehyalo Watonyesa efula ebimera ebya hiisi ngeri byahula enjabi jejula amaaji. 
Ojuhirira amalime gagonda nʼefula eyʼamaani ohuyeeda ebimera ebihiiri ebiŋere ohuhula. 
Oli mulaŋi eyi huli otuŋaaye amakungula mangi bugali. 
Enyaasi eryʼebyayo ohwaya lingi era esozi jijuuye ebisangaasa. 
Esugu lijuuye embusi nʼetaama engaano ereremaaye mu hiiho era hiisi hiitu hyembera ŋamugulu olwʼesangaalo. 
