﻿Ezabbuli.
64.
Yʼomutangirisi wʼabembi. Ezabbuli ya Dawudi. O Hatonda, ŋulira ohusaba hwange ni kulomera ebinduma. Kuume abalabe batanjosaho hibi. 
Taase etegeha jʼabaatu abahosi bʼebibi, ogubbubbu gwʼababbengi. 
Ebibono byawe byogi hyʼepiima era ebibono byawe biri oti busaale. 
Aŋaŋuma hutya balumba abaatu abaŋumaho musango babataho ebibono ni baŋuma hutya. 
Begobosamo amaani ohuhola ebibi bateesa aŋa banaate emitego jaawe ni baloma baati, “Ŋaŋuma oŋanga ohujibona.” 
Bahola etegeha embi ni baloma baati, “Engeri eyi hutegehiremo ebyefe, ŋaŋuma ayimanyire.” Mu butuufu ŋaŋuma amanyire ebi baatu baŋeega mu myoyo jaawe. 
Aye Hatonda aja hubalasa nʼobusaale abate ŋaasi mu dakiika ndala. 
Ebibono byawe ebyene biribaleetera ohusihiiriha era hiisi alibabona aja hubatala. 
Abaatu bosibosi balitya era baliŋeega hu ebi Hatonda aholire era baaloma hu hikolwa ehyo. 
Leha abagwalaafu basangaale olwa Musengwa era beŋogome mu ye leha abo bosibosi abalaŋi mu myoyo jaawe bamujumirye. 
