﻿Ezabbuli.
47.
Yʼomutangirisi wʼabembi. Ezabbuli yʼabaatu bomu lulyo lwa Koora. Abaatu mwesimwesi muhubbe mu ngalo muhubbe ebigalagala ni mujumirya Hatonda, 
olwohuba Musengwa Ali Ŋamugulu Obugali atiisa era nje habaha ahira obuhulu mu hyalo hyosihyosi. 
Agima hwaŋangula abalabe beefe era hwabaŋuga. 
Gatutobolera ehyalo omwohumenyanga efe abaatu ba Yisirayiri abagenda oti hi. 
Hatonda aniina ŋamugulu gehala hu tebe yiye eyobuŋugi. Amajanjaasi gebigalagala ebibahubba nʼamagwala aga bafuuŋa, biŋulirihana Musengwa nʼatiina ŋamugulu. 
Mwembe enyembo ejipaaha Hatonda, mwembe enyembo ejipaaha, mwembe enyembo ejipaaha Habaha weefe, mwembe enyembo ejipaaha. 
Hatonda nje habaha wʼehyalo hyosihyosi, mumwembere ezabbuli eji mupaaha. 
Hatonda aŋuga amawanga gosigosi. Hatonda gehaaye hu tebe yiye eyʼobuŋugi era enjawufu. 
Abahungu bʼamawanga bahumbaana nʼabaatu ba Hatonda wa Yibbulayimu olwohuba aŋuga abahabaha bamawanga era nje Hatonda owʼeŋono eryʼamaani. 
