﻿Ezabbuli.
14.
Yʼomutangirisi wʼabembi. Ezabbuli ya Dawudi. Omuŋubeebe aloma mu mwoyo gugwe ati, “Ŋaŋumaaŋo Hatonda.” Bahosi bʼebibi, ebi bahola byambiho. Era ŋaŋuma wayire mulala ahola ehiraŋi. 
Musengwa aba mwigulu galengerera baatu ŋaasi hu hyalo, abone oba ŋaliŋo omuutu yesiyesi ategeera, yesiyesi amwendula. 
Aye bosibosi baaŋaba, bosibosi ŋalala bahola ebibi. Era eŋuma wayire mulala ahola ebiruŋamu. 
Abahosi bʼebibi, sibaja hwega? Bahenireŋo ohulya abaatu bange oti balya mere era sibasunga Musengwa ohubayeeda. 
Aye bulihya lulala jabagaana olwohuba Hatonda ali ŋalala ni naabo abahola ebiruŋamu. 
Enywe abahosi bʼebibi muhayisa etegeha jʼabagadi aye Musengwa ahuuma ababe. 
Era saba ti omuutu aŋwe mu Sayuuni anunule Yisirayiri! Musengwa nʼaligobosa abaatu babe bunyaaha, leha olulyo lwa Yakobbo lusangaale era Yisirayiri asaŋalye! 
