﻿Ezabbuli.
12.
Yʼomutangirisi wʼabembi. Ohwemba nʼotiinira hu seminisi. Ezabbuli ya Dawudi. O Musengwa, tunoŋole olwohuba abaatu abesigwa baŋwaŋo, abaatu abʼamazima baŋumaŋo. 
Hiisi muutu ahola gwahudulinga wahye, beŋoomya hu mugulu ni baloma aye mugati mula ni bejuuye budulingi wereere. 
O Musengwa, simya abo abaloma ni beŋoomya era limba hu hiisi munwa gwʼabo abepaahapaaha 
ni bebuuja baati, “Efe hunaloma ŋaŋuma wundi aloma era huja husuna hiisi ehi hwenda, njʼani musengwa yeefe?” 
Nga Musengwa aloma ati, “Nja huuja olwohuba banyigirisa abagadi nʼolwohuhiyaania ohubabahiyaania abo ababinda. Nja hwinyoheramo tiine mbaŋe obuhuumi ngʼolu basunga.” 
Ebi Musengwa asuubisa biŋumaaho hamogo era ebibono bibye biri hyʼefeeza eyi bata hu muliro hyʼezaabbu eyi bahenenulamo obucaafu efunda musanvu. 
O Musengwa, tuhuumenga otuŋonie ababi abʼomulembe guno. 
Abahosi bʼebibi bali hiisi ŋaatu era hiisi muutu abapaaha olwʼebibi ebi bahola. 
