﻿Ohuŋunuha.
15.
Ngʼaŋo Musa nʼAbayisirayiri bembera Musengwa olwembo baati, “Nja hwembera Musengwa, olwohuba aŋanguye abalabe babe nʼobuŋangi. Adanyire embalaasi nʼabayihalaho mu nyanja. 
Musengwa njʼamaani era njʼolwembo lwange. Njʼobunoŋosi wange. Niye nje Hatonda wange era nja humujumiryanga, Hatonda wa Bbaabba era nja humugulumisanga. 
Musengwa ali hyʼomusooli era esiina lirye nje Musengwa. 
Amagaali ga Falaawo nʼeŋe lirye babiholoŋire mu Nyanja Enando. Abahungu ba Falaawo abahira ohuba abaŋamugulu banywoye etubbi mu Nyanja Enando. 
Amaaji amaleeŋi gabamirire era beyinihire mu njuho hyʼebaale. 
“O Musengwa, omuhono gugwo omulungi, gwʼamaani era gwʼeŋono. O Musengwa, omuhono gugwo omulungi guhubbire omusigu. 
Mu buŋangi wuwo ohubbiyeŋo abo abahuŋahania. Ehiruŋi hihyo hibalire hyʼomuliro era baguhulihire oti binyaasi. 
Ofuuŋire omuuya ohuŋwa mu suulu yiyo ngʼamaaji geŋamba etuumo. Era gahena gemeerera hyʼehiteepe. Amaaji getengereye mu wuliba. 
“Omulabe gepaahire ati, ‘Nja hubabbinga kene mbagaane era mbaheneŋo. Nja huŋira ebyʼobuŋinda byawe byosibyosi ebinenda. Nja hugolola epiima yange, omuhono gwange guja hubasihiirisa.’ 
Aye wafuuŋa omuuya ngʼenyanja ebamira. Beeyiniha mu maaji hyʼehyoma ehisito. 
“Hu bahatonda baawe, njʼani ali hyʼewe, O Musengwa? Njʼani owʼeŋono hyʼewe, omwawufu, atiisa era owʼetendo ahola ebyeŋunjisa? 
Wagolola omuhono gugwo omulungi, ngʼeroba libamira. 
“Mu hwenda huhwo ohubitiirifu oja hutangirira abaatu babo abawanunula. Mu buŋangi wuwo oja hubatangirira oboose mu hifo hihyo ehyawufu. 
Amawanga gaja huŋulira, gateeteme. Obuti buja huŋamba abaatu bʼe Firisuuti. 
Abahungu bʼEdomu baja hweŋendeherera, olusisimo luja huŋamba abatangirisi bʼe Mowaabbu. Abeehasi bomu Kanani baja huŋwamo amaani. 
Ohutya ohwʼamaani nʼetiisa bija hubagwaho. Olwʼobuŋangi wʼomuhono gugwo baja huba hyʼebaale eritatengeta mu hifo, ohwola olu abaatu babo babitaŋo, O Musengwa, ohwola olu abaatu babo abawanunula babitaŋo. 
Olibaŋira era wabahoma hu lusozi lwʼobusika buwo, ehifo ehi ewe watobola ohubangamo O Musengwa, Yekaalu eyi wetongolera O Musengwa. 
Musengwa aliŋuga emirembe nʼemirembe.” 
Abayisirayiri baabita mu nyanja oti bagendera hu woomu. Aye amagaali nʼembalaasi nʼeŋe eryohu mbalaasi erya Falaawo ni bengira mu nyanja, nga Musengwa agobosaŋo amaaji, gabamira. 
Ngʼaŋo Miryamu naabbi, mboojo yʼAlooni, aŋamba etambulini, ngʼabahasi bosibosi baŋwerehereramo bamulondaho ni bacakasa etambulini jaawe ni bahina. 
Nga Miryamu gemba olwembo ati, “Mwembere Musengwa, olwohuba aŋanguye. Adanyire embalaasi nʼabayihayeho, mu nyanja.” 
Ngʼaŋo Musa atangirira Abayisirayiri ohuŋwa hu Nyanja Enando, nga batiina boola hu lulafu e Suuri. Nga bagenda mu lulafu endaalo edatu ni batabona maaji. 
Ni boola e Maara, sibasobola hunywa maaji gaayo olwohuba gaali malulu. (Cʼehifa ehifo ehyo bahiranga baati Maara.) 
Ngʼabaatu bemulugunya eyiri Musa ni baloma baati, “Hunanywe hi?” 
Nga Musa gegayirira Musengwa, nga Musengwa amulaga ehisaala. Nga Musa ahiŋamba ahidanya mu maaji. Ngʼamaaji ago gafuuha malaŋi. Eyo Musengwa peyi gabaŋeera amagambi nʼebiragiro bibye era eyo peyi gabagezesya. 
Ngʼabaloma ati, “Ni muja hugondera Musengwa Hatonda wenywe nʼohwegenderesa era mwahola ebiraŋi mu moni jije, ni muja hutayo omwoyo hu magambi gange era mwaŋamba ebiragiro bibye byosibyosi, sindibaleetaho bulwaye obu naleeta hu Bamisiri, olwohuba ndiise Musengwa abaŋonia.” 
Ngʼaŋo batiina boola mu Elimu, eyo yaaliyo esulo ehumi nʼebiri ejʼamaani nʼebihindu esanvu, nga bahomeha eweema jaawe aŋo ŋaapi nʼamaaji. 
