﻿Etandiha.
49.
Ngʼaŋo Yakobbo alanga abasaani babe abaloma ati, “Muhumbaane mbalomere ebiribabaho mu biseera ebiija mu moni. 
“Muhumbaane, muŋulire, enywe abasaani ba Yakobbo. Muŋulire ehi senywe Yisirayiri aloma. 
“Lubbeeni, ndiiwe namudaayi wange, ndiiwe oweeta amaseere gange, eŋono nʼamaani gago gahira aga bosibosi. 
Ewe otabuha hyʼamaaji agabanda, sooja huba wʼeŋono olwohuba waniina hu hitanda hya lataawo, hu buliri wange wawonoona, waŋenyuha nʼomuhasi wange. 
“Simyoni ni Leevi baganda, epiima jaawe bisoosa ebisihiirisa. 
Sinja hubeŋimbaho mu huteesa hwawe, sinja huba mu luhiiho lwawe, olwʼetima lyawe beeta abasinde, era balemasa eŋombe ebunwa ohwenda ohwesangaasa. 
Obusungu waawe buholimirwe, olwohuba bungi, obuhambwe waawe obuleeta olusisimo. Ndi sasaania abejuhulu babo mu Yisirayiri mwosimwosi. 
“Ewe Yuda, abaganda babo baja huhutendanga, banahuhubbirenga amafuha, olwohuba oja huŋangula abalabe babo. 
Mwana wange Yuda oli musira hyʼepologoma, eyigobola ohuŋwa mu huŋiima. Mwana wange Yuda oli musira hyʼepologoma, njʼani ahusagadula? 
Esimbo yʼowaami siyija huŋwa mu ngalo ya Yuda, oba esimbo yʼobuŋugi ohuŋwa mu ngalo yʼabejuhulu babe, ohwola olu omweneeyo aliija ohuyiŋira oyo oyu baatu bosibosi mu hyalo baligondera. 
Emizabbibbu jije jiryama bugali, jiryama goola nʼohujirobbaho nasugirya era alyosa engoye mu mwenge omutwahaali ogwomu mizabbibbu. 
Emoni jije jiritwahaala ohuhiraho omwenge gwʼemizabbibbu, nʼameeno gage galiba mahosa hyʼamabeere. 
“Zebbulooni aja humenya hu gobo lyʼenyanja, eyo hu mwalo eyi amaato gagobera. Esalo yiye eja huba yi Sidoni. 
“Yisikaali ali hya nasugirya eyʼamaani, egalamira ŋagati wʼemigugu ne ni tasobola hwenyoha. 
Cooka nʼabona ehifo ehi ali huŋuumuliramo ni hiri hiraŋi era ni hyesiimisa, agonda bamutwiha emigugu, gaahola owiidu. 
“Ewe Daani oja hulamulanga abaatu babo nʼotehubbira, nga hirala hu biha bya Yisirayiri. 
Daani oja huba wahabi hyʼomusota ogweteegire hu tulo wʼoluguudo, hyʼefulugudu hu tulo wʼoluguudo, ebooja ohugulu hwʼembalaasi yesinduha ngʼoyo ayihayeho agwa hinyumanyuma.” 
Ni gahena ngʼalomba ati, “O Musengwa, kusunga wuuje wunoŋole.” 
Nga Yakobbo atiina mu moni nʼohulaamira abaana babe ati, “Ewe Gaadi, ehibinja hyʼabasigu hirihuwaagala, aye olyesoolaho wahibbinga era baduluma ni bataheja nʼegongo. 
“Ewe Aseri, eroba liryo lija huba gimu bugali, abejuhulu babo balimanga emere eyi bahabaha baliryanga. 
“Ewe Nafutaali wuuja huba hyʼemaadu eyetaaya mwisugu era esaala otwana otuboneha obulaŋi. 
“Yosefu oja huba hyʼomuzabbibbu ogwamera hu tulo wʼolwabi, oguleremala nʼamasaga gagwo ganiina gasingaho nʼehiteepe. 
Abalabe babo bahuwaagala nʼobuhambwe owʼamaani, nga ko balasa obusaale nʼehabyo. 
Aye waguma wanywanywasa ehisoosa hihyo, olwohuba Omwene Buŋangi, Hatonda wa Yakobbo, Oyo Amulabirira era Ogubaale omu Yisirayiri geŋogoma, 
Hatonda wa lataawo, gahuyeeda, Hatonda Omwene Buŋangi ahuŋe ekabi, ekabi eja ŋamugulu mwigulu, ekabi ejiŋwa ŋaasi mwiroba, ahuŋe ekabi osaale ekasi nʼesinde era nʼebyayo bibyo bisaalagane. 
Ekabi eji lataawo ali huhuŋa jihiriraho erala ejo ejiŋwa mu sozi, esozi ejibaŋo emirembe nʼemirembe, era eŋingi ejolubeerera ekabi ejo josijosi jibe hu Yosefu olwohuba ewe onaabenga mulangira mu balebe babo. 
“Ŋaahani ewe Bbenjamini oli hya nahinywamalwa, mu mugamba ahafuula ehyaŋiimire era ehyʼegulo gaheneresa ehi asigahiise.” 
Ebyo byosibyosi njʼebiha bya Yisirayiri ehumi nabibiri era ebyo mbebi saawe galomaho nʼabasabira ekabi, hiisi muutu namuŋa ekabi ejimusaanira. 
Ngʼaŋo saawe Yakobbo abaloma nʼabahamiirisa ati, “Ndi huupi hufa aye ni fanga, musiihanga ŋalala nʼabasehulu bange mu pungulu eyiri mu hisugu ehyali ehyʼEfulooni Omuhiiti, 
mu pungulu eyiri e Makupeera ŋaapi ni Mamule mu hyalo hyʼe Kanani. Ehisugu ehyo Yibbulayimu gahigula hu Efulooni Omuhiiti ohusiihangamo abaatu babe. 
Ŋaweene aŋo, paŋa baasiiha Yibbulayimu ni Saala omuhasi wuwe, ŋaweene aŋo paŋa baasiiha Yisaka ni Labbeka omuhasi wuwe era aŋo paŋa nasiiha Leeya. 
Ehisugu omuli epungulu eyo, bahigula hu Bahiiti.” 
Yakobbo ni gahena ohulaabbira abasaani nʼebibono ebyo, ngʼadunda amagulu agata hu hitanda gegolola, nga geesa omuuya ogusembayo, ngʼafa. 
