﻿Puurrpa Pirnitjarra 2.
25.
Nyangka Tjatikayinya tungun-tungunarringu puurrpa Napitjaku. Nyangka warrmarla pirnitjarra pitjangu Tjurutjamanya yangatjunu kanyiranytja. Puru-tjananya kulyakanyiranytja pakaltjakutarra. 
Nyangka-ya kaninytjarranguru nyinarra purtu kuliranytja pakara yankula mirrka yurralkitjalu. Nyangka mirrka-tjanampa wiyarringu. 
Nyangka mungangka puurrpa Tjatikayinya palunyaku warrmarla pirnitjarra yarla kurlunywana pakara kukurraarnu kapi Tjuutantakutu. 
Nyangka-ya puurrpa Napitjaku warrmarla pirnilu ngurlura wanarnu puurrpa Tjatikayinya tjulyarnu kanyiranytja. Nyangka Tjatikayiku warrmarla pirninya-ya ngurlu kukurraarnu wiyarringu. 
Nyangka-ya puurrpa Tjatikayinya katingu puurrpa Napitjalakutu. Nyangka-tjananya watjarnu Tjatikayiku katja pirninya-ya pungkula tjunkutjaku mamangka mirangka. Nyangka-tjananya mularrpartu pungu mirrirntanu. Palunyalu-ya Tjatikayinya kuru kutjarranyartu wakarnu yurltupungu. Palunyalu-ya rankapungka karrpira yalatjalu katingu ngurra nyarra Papulantakutu. 
Nyangka puurrpa Napitjalu wati nyarra warrmarla kanyilpayinya witurnu. Nyangka warrmarla pirnitjarra yanu ngurra nyarra Tjurutjamalakutu. 
Palunyalu-ya tjurrtju purlkanya puru yiwarlatarrartu tilirnu tjarrpatjunu. 
Puru-ya yaarrpa purlkanya nyarra yiwarlawana parrangarapayinya yurnturnu punkatjingarnu. 
Palunyalu-tjananya yarnangu pirninya karrpira katingu Papulantakutu. 
Palunyalu-ya yarnangu mungutja-mungutja nyinapayinyakutju wantingu, tjiinya-ya nyinarra manta tjawara yurninypa tjunkula mirrka pakaltjingaltjaku. Nyangka-ya mularrpartu nyinarra mirrka pakaltjingaranytja. Yuwa, palunya. 
