﻿ฮีบรู.
3.
ปี้น้อง​ตังหลาย​ผู้​ตี้​เป๋น​คน​ของ​พระเจ้า ตี้​พระองค์​ฮ้อง​เหมือน​กั๋น ขอ​หื้อ​มี​ใจ๋จดจ่อ​ตี้​พระเยซู ผู้​ตี้​พระเจ้า​ใจ๊​มา​กับ​เป๋น​มหา​ปุโรหิต​ของ​ความ​เจื้อ​ของ​เฮา 
พระองค์​สัตย์ซื่อ​ต่อ​พระเจ้า​ผู้​ตี้​แต่งตั้ง​พระองค์ เหมือน​กับ​โมเสส​ซื่อสัตย์​ใน​ก๋าน​ฮับใจ๊​คน​ใน​บ้าน​ของ​พระเจ้า 
แต่​จาใด​ก็​ต๋าม​พระเยซู​ก็​สมควร​ได้​ฮับ​เกียรติ​นัก​เหลือ​โมเสส อย่าง​กับ​คน​แป๋ง​บ้าน​มี​เกียรติ​นัก​เหลือ​ตั๋ว​บ้าน 
ย้อน​ว่า​บ้าน​กู้​หลัง​ต้อง​มี​คน​สร้าง แต่​พระเจ้า​เป๋น​ผู้​สร้าง​กู้​สิ่ง​กู้​อย่าง 
โมเสส​นั้น​ฮับใจ๊​คน​ใน​บ้าน​ของ​พระเจ้า​ตึงหมด​อย่าง​ซื่อสัตย์ ต้าน​เป๋น​พยาน​เถิง​สิ่ง​ตี้​พระเจ้า​จะ​อู้​ใน​ปาย​หน้า 
แต่​พระคริสต์​นั้น​ได้​เยียะ​หน้าตี้​ลูก​ตี้​ปกครอง​คน​ใน​บ้าน​ของ​พระเจ้า​อย่าง​ซื่อสัตย์ เฮา​ก็​เป๋น​คน​ใน​บ้าน​ของ​พระองค์ ถ้า​เฮา​ยึดมั่น​ใน​ความ​ก้า​กับ​ความ​หวัง​ตี้​เฮา​ภูมิใจ๋​นั้น 
ย้อน​จาอั้น​ก็​เป๋น​ต๋าม​ตี้​พระวิญญาณ​บริสุทธิ์​อู้​ไว้​ว่า “วันนี้ ถ้า​หมู่​ต้าน​ได้ยิน​เสียง​ของ​พระองค์ 
บ่﻿ดี​เยียะ​ใจ๋​หลึ่ง เหมือน​ต๋อน​ตี้​หมู่​ป้อ​อุ๊ย​แม่​หม่อน​ของ​หมู่​ต้าน​ได้​กบฏ​ต่อ​พระเจ้า ใน​หละหว่าง​มี​ก๋าน​ลองดี​ต่อ​พระองค์​ต๋อน​อยู่​ใน​ดินแดน​ทุรกั๋นดาร 
ตี้​หั้น​หมู่​เขา​ได้​ลองดี​กับ​ทดลอง​เฮา กับ​ได้​หัน​สิ่ง​ตี้​เฮา​เยียะ​ตลอด​สี่​สิบ​ปี๋ 
ย้อน​จาอี้​เฮา​จึง​โขด​คน​หมู่​นั้น กับ​เฮา​ได้​อู้​ว่า ‘ใจ๋​ของ​หมู่​เขา​หลงผิด​สะลวด กับ​หมู่​เขา​บ่﻿เกย​ฮู้จัก​ตาง​ของ​เฮา’ 
เฮา​จึง​ปฏิญาณ​ต๋อน​ตี้​เฮา​โขด​ว่า ‘หมู่​เขา​บ่﻿มี​วัน​ตี้​จะ​ได้​เข้า​ไป​ย้างพัก​ใน​ตี้​ของ​เฮา’ ” 
ปี้น้อง​ตังหลาย​หละวัง​ไว้​หื้อ​ดี ตี้​จะ​บ่﻿มี​ใผ​สัก​คน​ใน​หมู่​ของ​ต้าน​มี​ใจ๋​ฮ้าย​กับ​บ่﻿ยอม​เจื้อ แล้ว​หลง​ไป​จาก​พระเจ้า​ผู้​มี​จีวิต​อยู่ 
แต่​จง​หื้อ​ก๋ำลังใจ๋​กั๋น​กู้﻿ๆ วัน ตลอด​เวลา​ตี้​ยัง​ฮ้อง​กั๋น​ว่า “วันนี้” เปื้อ​จะ​บ่﻿มี​ใผ​คน​ใด​ใน​หมู่​ต้าน​ถูก​บาป​ล่อลวง​หื้อ​หลึ่ง​ไป 
ย้อน​เฮา​มี​ส่วน​ฮ่วม​กับ​พระคริสต์ ถ้า​เฮา​ยึดมั่น​ใน​ความ​เจื้อ​ตี้​เฮา​มี​ตั้งแต่​เก๊า​จ๋น​เถิง​ตี้​สุด 
พระคัมภีร์​มี​เขียน​ไว้​ว่า “วัน​นี้​ถ้า​หมู่​ต้าน​ได้​ยิน​เสียง​ของ​พระองค์ บ่﻿ดี​เยียะ​ใจ๋​หลึ่ง เหมือน​ต๋อน​ตี้​หมู่​ป้อ​อุ๊ย​แม่​หม่อน​ของ​หมู่​ต้าน​ได้​กบฏ​ต่อ​พระเจ้า” 
ใผ​ตี้​ได้ยิน​เสียง​พระเจ้า​แล้ว​กบฏ​ต่อ​พระองค์ ก็​คือ​คน​ตังหลาย​ตี้​โมเสส​ได้​ปา​ออก​มา​จาก​ประเทศ​อียิปต์​บ่﻿ใจ้​กา 
ใผ​ตี้​พระเจ้า​โขด​ตลอด​สี่​สิบ​ปี๋ ก็​คือ​คน​ตังหลาย​ตี้​เยียะ​บาป เซิ่ง​ได้​ต๋าย​ใน​ดินแดน​ทุรกั๋นดาร​บ่﻿ใจ้​กา 
กับ​ใผ​ตี้​พระเจ้า​ปฏิญาณ​ว่า จะ​บ่﻿มี​วัน​ได้​เข้า​ไป​ย้างพัก​ใน​ตี้​ของ​พระองค์ ก็​คือ​คน​ตังหลาย​ตี้​บ่﻿เจื้อฟัง​บ่﻿ใจ้​กา 
ย้อน​หมู่​เขา​บ่﻿เจื้อ เฮา​จึง​หัน​ว่า​หมู่​เขา​บ่﻿สามารถ​เข้า​ไป​ย้างพัก​อยู่​ใน​ตี้​ของ​พระองค์ 
