﻿ยอห์น.
8.
แล้ว​พระเยซู​ก็​ไป​ดอย​บ่ากอกเทศ 
ต๋อน​เจ๊ามืด​วัน​ถัด​มา พระองค์​ก็​ปิ๊ก​เข้า​ไป​ใน​พระวิหาร​แหม​เตื้อ​นึ่ง คน​ตังหลาย​ก็​มา​หา​พระองค์ แล้ว​พระองค์​ก็​นั่ง​ลง​สั่ง​สอน​คน​หมู่​นั้น 
หมู่​ธรรมาจ๋ารย์​กับ​หมู่​ฟาริสี​ปา​แม่ญิง​คน​นึ่ง​มา แล้ว​หื้อ​ยืน​ต่อ​หน้า​หมู่​คน แม่ญิง​คน​นี้​เล่น​จู๊​แล้ว​เขา​ยับ​ได้​คาหนังคาเขา 
หมู่​เขา​ก็​อู้​กับ​พระองค์​ว่า “อาจ๋ารย์ แม่ญิง​คน​นี้​โดน​ยับ​ได้​ต๋อน​ตี้​ก่ำลัง​เล่นจู๊​อยู่ 
ใน​บท​บัญญัติ โมเสส​สั่ง​หื้อ​เอา​บ่าหิน​ขว้าง​แม่ญิง​จาอี้​หื้อ​ต๋าย แล้ว​อาจ๋ารย์​จะ​ว่า​จาใด” 
(​ตี้​หมู่​เขา​ถาม​จาอี้​ก็​ย้อน​ว่า​หมู่​เขา​ใค่​ทดลอง​พระองค์​เปื้อ​หา​เรื่อง​ตี้​จะ​ยับ​พระองค์​) แต่​พระเยซู​ก็​ก้ม​ลง​เอา​นิ้ว​เขียน​บน​ปื๊น​ดิน 
หมู่​เขา​ก็​เข​หื้อ​พระองค์​ตอบ​ติก﻿ๆ แล้ว​พระองค์​ก็​เลย​ลุก​ขึ้น​อู้​กับ​หมู่​เขา​ว่า “ใน​หมู่​ต้าน​คน​ใด​บ่﻿มี​บาป​เลย ก็​หื้อ​เอา​บ่าหิน​ขว้าง​นาง​ก่อน​แล่” 
แล้ว​พระองค์​ก็​ก้ม​ลง​ใจ๊​นิ้ว​เขียน​บน​ปื๊น​ดิน​ต่อ 
บ่ากอง​หมู่​ธรรมาจ๋ารย์​กับ​หมู่​ฟาริสี​ได้ยิน​พระเยซู​อู้​จาอั้น แล้ว​หมู่​เขา​ก็​ออก​ไป​เตื้อ​คน﻿ๆ คน​เฒ่า​เริ่ม​ออก​ไป​ก่อน​จ๋น​เหลือ​ก้า​พระเยซู​กับ​แม่ญิง​คน​นั้น​ยัง​อยู่​ตี้​หั้น 
พระเยซู​ก็​ลุก​ขึ้น​แล้ว​ถาม​แม่ญิง​คน​นั้น​ว่า “หญิง​เหย หมู่​เขา​ไป​ไหน​กั๋น​หมด​แล้ว บ่﻿มี​ใผ​ลงโต้ษ​เจ้า​กา” 
แม่ญิง​คน​นั้น​ก็​ตอบ​ว่า “บ่﻿มี​เจ้า” แล้ว​พระเยซู​ก็​อู้​ว่า “เฮา​ก็​บ่﻿ลงโต้ษ​เจ้า​เหมือน​กั๋น ไป​เต๊อะ แล้ว​ห้าม​เยียะ​บาป​แหม” 
แล้ว​พระเยซู​ก็​อู้​กับ​คน​ตังหลาย​แหม​เตื้อ​ว่า “เฮา​เป๋น​ความ​เป่งแจ้ง​ของ​โลก คน​ตี้​ติดต๋าม​หลาม​ตวย​เฮา​มา​ก็​จะ​บ่﻿เตียว​ใน​ความ​มืด แต่​จะ​มี​แสงแจ้ง​ตี้​ส่อง​นำ​จีวิต​ของ​เขา” 
หมู่​ฟาริสี​ก็​อู้​กับ​พระองค์​ว่า “ต้าน​เป๋น​พยาน​หื้อ​ตั๋ว​เก่า กำ​พยาน​ของ​ต้าน​ก็​เจื้อถือ​บ่﻿ได้” 
พระเยซู​ก็​ตอบ​ว่า “เถิง​เฮา​เป๋น​พยาน​หื้อ​ตั๋ว​เก่า แต่​สิ่ง​ตี้​เฮา​อู้​มา​นั้น​ก็​เป๋น​ความ​จริง ย้อน​ว่า​เฮา​ฮู้​ว่า​ตั๋ว​เฮา​ลุก​ไหน​มา​กับ​ก่ำลัง​จะ​ไป​ไหน แต่​หมู่​ต้าน​บ่﻿ฮู้​ว่า​เฮา​ลุก​ไหน​มา​กาว่า​ก่ำลัง​จะ​ไป​ไหน 
หมู่​ต้าน​ตัดสิน​เฮา​ต๋าม​วิธี​ของ​คน เฮา​บ่﻿ได้​ตัดสิน​ใผ 
แต่​ถ้า​เฮา​ตัดสิน​คน​ใด กำ​ตัดสิน​ของ​เฮา​ก็​ถูกต้อง ย้อน​เฮา​บ่﻿ได้​ตัดสิน​คน​เดียว แต่​เฮา​ตัดสิน​ฮ่วม​กับ​พระบิดา​ผู้​ตี้​ใจ๊​เฮา​มา 
ใน​บท​บัญญัติ​ของ​ต้าน​บอก​ว่า ถ้า​มี​กำ​พยาน​สอง​คน กำ​พยาน​นั้น​ก็​เจื้อถือ​ได้ 
เฮา​เป๋น​พยาน​หื้อ​ตั๋วเก่า และ​พระบิดา​ผู้​ตี้​ใจ๊​เฮา​มา​ก็​เป๋น​พยาน​หื้อ​เฮา​ตวย” 
แล้ว​หมู่​เขา​ก็​ถาม​ว่า “พระบิดา​ของ​ต้าน​อยู่​ตี้​ไหน” พระเยซู​ก็​ตอบ​ว่า “หมู่​ต้าน​บ่﻿ฮู้จัก​เฮา​กับ​บ่﻿ฮู้จัก​พระบิดา​ของ​เฮา ถ้า​หมู่​ต้าน​ฮู้จัก​เฮา หมู่​ต้าน​ก็​จะ​ฮู้จัก​พระบิดา​ของ​เฮา​ตวย” 
ต๋อน​ตี้​พระองค์​อู้​เถิง​สิ่ง​หมู่​นี้ พระองค์​ก่ำลัง​สั่ง​สอน​อยู่​ใน​ห้อง​ตั้ง​ตู้​ถวาย​อยู่​ใน​บริเวณ​พระวิหาร แล้ว​บ่﻿มี​ใผ​มา​ยับ​พระองค์ ย้อน​ยัง​บ่﻿เถิง​เวลา​ของ​พระองค์​เตื้อ 
พระเยซู​อู้​กับ​คน​ตังหลาย​แหม​ว่า “เฮา​จะ​ไป​จาก​ตี้​นี่ แล้ว​หมู่​ต้าน​จะ​ตวย​เซาะ​หา​เฮา แต่​หมู่​ต้าน​จะ​ต๋าย​ใน​ต๋อน​ตี้​ยัง​เป๋น​คน​บาป​อยู่ ตี้​ตี้​เฮา​ไป​นั้น​หมู่​ต้าน​ไป​บ่﻿ได้” 
หมู่​ผู้นำ​จาว​ยิว​ก็​ถาม​กั๋น​ว่า “เขา​จะ​ไป​ฆ่า​ตั๋ว​ต๋าย​กาว่า​จาใด เถิง​อู้​ว่า ‘ตี้​ตี้​เฮา​ไป​นั้น​หมู่​ต้าน​ไป​บ่﻿ได้’ ” 
พระเยซู​อู้​ว่า “หมู่​ต้าน​มา​จาก​โลก​นี้​ตี้​อยู่​ตัง​ลุ่ม แต่​เฮา​มา​จาก​สวรรค์​ตี้​อยู่​ตัง​บน แล้ว​หมู่​ต้าน​ก็​เป๋น​ของ​โลก​นี้ แต่​เฮา​บ่﻿ใจ้​เป๋น​ของ​โลก​นี้ 
เฮา​เลย​บอก​ว่า หมู่​ต้าน​จะ​ต๋าย​ใน​ต๋อน​ตี้​ยัง​เป๋น​คน​บาป​อยู่ แม่น​แล้ว หมู่​ต้าน​จะ​ต๋าย​ใน​ต๋อน​ตี้​ยัง​เป๋น​คน​บาป​อยู่​แน่﻿ๆ ถ้า​หมู่​ต้าน​บ่﻿เจื้อ​ว่า เฮา​เป๋น​คน​นั้น​ตี้​เฮา​บอก​ว่า​เฮา​เป๋น” 
หมู่​ผู้นำ​จาว​ยิว​ก็​ถาม​พระองค์​ว่า “แล้ว​ต้าน​เป๋น​ใผ” พระเยซู​ก็​ตอบ​ว่า “เฮา​เป๋น​คน​นั้น​ตี้​เฮา​บอก​หมู่​ต้าน​ตั้งแต่​เก๊า​แล้ว 
แต๊﻿ๆ เฮา​มี​หลาย​เรื่อง​ตี้​จะ​ว่า​หื้อ​หมู่​ต้าน​กับ​ตัดสิน​ลงโต้ษ​หมู่​ต้าน แต่​เฮา​จะ​อู้​ก้า​เรื่อง​ตี้​เฮา​ได้​ยิน​จาก​พระองค์​ผู้​ตี้​ใจ๊​เฮา​มา​หื้อ​คน​ใน​โลก​ฟัง ย้อน​พระองค์​อู้​ความ​จริง” 
(​หมู่​เขา​บ่﻿เข้าใจ๋​ว่า​พระเยซู​ก่ำลัง​อู้​เถิง​พระบิดา​) 
จาอั้น​พระเยซู​ก็​อู้​แหม​ว่า “เมื่อ​หมู่​ต้าน​ยก​บุตรมนุษย์​ขึ้น หมู่​ต้าน​ก็​จะ​ฮู้​ว่า​เฮา​เป๋น​คน​นั้น​ละ เฮา​บ่﻿ได้​เยียะ​ต๋าม​ใจ๋​ตั๋วเก่า แต่​เฮา​อู้​สิ่ง​ตี้​พระบิดา​สอน​เฮา​มา 
พระองค์​ผู้​ตี้​ใจ๊​เฮา​มา​ก็​อยู่​กับ​เฮา​ตวย พระองค์​บ่﻿เกย​ละ​เฮา​ไว้​หื้อ​อยู่​คน​เดียว ย้อน​เฮา​เยียะ​ต๋ามใจ๋​พระองค์​ตลอด” 
บ่ากอง​พระเยซู​อู้​จาอี้ ก็​มี​หลาย​คน​เจื้อ​วางใจ๋​พระองค์ 
พระเยซู​ก็​อู้​กับ​จาว​ยิว​ตี้​เจื้อ​วางใจ๋​ใน​พระองค์​ว่า “ถ้า​หมู่​ต้าน​ยึดถือ​ใน​กำ​สั่ง​สอน​ของ​เฮา หมู่​ต้าน​ก็​เป๋น​สาวก​ของ​เฮา​แต๊﻿ๆ 
หมู่​ต้าน​จะ​ฮู้จัก​ความ​จริง แล้ว​ความ​จริง​นั้น​ก็​จะ​เยียะ​หื้อ​หมู่​ต้าน​มี​อิสระ” 
หมู่​เขา​อู้​ว่า “หมู่​เฮา​เป๋น​ลูกหลาน​ของ​อับราฮัม บ่﻿เกย​เป๋น​ขี้ข้า​ใผ เยียะ​หยัง​อาจ๋ารย์​อู้​ว่า ‘หมู่​ต้าน​จะ​มี​อิสระ’ ” 
พระเยซู​ตอบ​ว่า “เฮา​จะ​บอก​ความ​จริง​แก่​ต้าน​ตังหลาย​ว่า แต๊﻿ๆ แล้ว​กู้​คน​ตี้​เยียะ​บาป​ก็​เป๋น​ขี้ข้า​ของ​ความ​บาป 
ขี้ข้า​บ่﻿ใจ้​คน​ใน​ครอบครัว แต่​ลูก​เป๋น​คน​ใน​ครอบครัว​ตลอด​ไป 
ถ้า​พระบุตร​หื้อ​หมู่​ต้าน​มี​อิสระ หมู่​ต้าน​ก็​จะ​มี​อิสระ​แต๊﻿ๆ 
เฮา​ฮู้​ว่า​หมู่​ต้าน​เป๋น​ลูกหลาน​ของ​อับราฮัม แต่​หมู่​ต้าน​ฮิ​หา​ตาง​จะ​ฆ่า​เฮา ย้อน​ว่า​หมู่​ต้าน​บ่﻿ยอมฮับ​กำ​สั่ง​สอน​ของ​เฮา 
เฮา​บอก​หมู่​ต้าน​เถิง​สิ่ง​ตี้​พระบิดา​ของ​เฮา​เยียะ​หื้อ​เฮา​หัน แต่​หมู่​ต้าน​ก็​เยียะ​สิ่ง​ตี้​ได้​ยิน​จาก​ป้อ​ของ​หมู่​ต้าน” 
หมู่​เขา​อู้​ว่า “อับราฮัม​เป๋น​ป้อ​อุ๊ย​แม่​หม่อน​ของ​หมู่​เฮา” พระเยซู​เลย​อู้​ว่า “ถ้า​หมู่​ต้าน​เป๋น​ลูกหลาน​ของ​อับราฮัม​แต๊﻿ๆ หมู่​ต้าน​ก็​จะ​เยียะ​ต๋าม​ตี้​อับราฮัม​เยียะ 
เฮา​เป๋น​คน​บอก​ความ​จริง​เถิง​สิ่ง​ตี้​เฮา​ได้ยิน​จาก​พระเจ้า แต่​หมู่​ต้าน​ก็​ฮิ​หา​ตาง​ตี้​จะ​ฆ่า​เฮา อับราฮัม​บ่﻿เกย​เยียะ​จาอี้​เน่อ 
หมู่​ต้าน​เยียะ​ต๋าม​ตี้​ป้อ​ของ​หมู่​ต้าน​เยียะ” หมู่​จาว​ยิว​ก็​อู้​กับ​พระเยซู​ว่า “หมู่​เฮา​บ่﻿ใจ้​ลูก​จู๊ พระเจ้า​เต้าอั้น​ตี้​เป๋น​ป้อ​ของ​หมู่​เฮา” 
พระเยซู​ก็​อู้​ว่า “ถ้า​พระเจ้า​เป๋น​ป้อ​ของ​หมู่​ต้าน​แต๊﻿ๆ หมู่​ต้าน​ก็​จะ​ฮัก​เฮา ย้อน​เฮา​มา​จาก​พระเจ้า​และ​เฮา​อยู่​นี่​แล้ว เฮา​บ่﻿ได้​มา​โดย​ต๋ามใจ๋​ตั๋ว​เก่า แต่​พระเจ้า​ใจ๊​เฮา​มา 
เยียะ​หยัง​หมู่​ต้าน​บ่﻿เข้าใจ๋​เรื่อง​ตี้​เฮา​อู้ ย้อน​ว่า​หมู่​ต้าน​อด​ฟัง​กำสอน​ของ​เฮา​บ่﻿ได้ 
หมู่​ต้าน​มา​จาก​ป้อ​ของ​หมู่​ต้าน​คือ​มาร แล้ว​หมู่​ต้าน​ก็​ใค่​เยียะ​ต๋าม​ความ​ต้องก๋าน​ของ​ป้อ​หมู่​ต้าน ตั้งแต่​เก๊า​มาร​ก็​เป๋น​ฆาตกร และ​บ่﻿เกย​อยู่​ฝ่าย​ความ​จริง​เลย ย้อน​มัน​บ่﻿มี​ความ​จริง​ใน​ตั๋ว​ของ​มัน เมื่อ​มัน​อู้​กำ​จุ มัน​ก็​เยียะ​ต๋าม​สันดาน​ของ​มัน ย้อน​ว่า​มัน​ขี้​จุ​กับ​เป๋น​ป้อ​ของ​ก๋าน​จุ 
ย้อน​จาอั้น เมื่อ​เฮา​อู้​ความ​จริง​กับ​หมู่​ต้าน หมู่​ต้าน​ก็​บ่﻿เจื้อ​เฮา 
มี​ใผ​พ่อง​ใน​หมู่​ต้าน​ตี้​จี๊​หื้อ​หัน​ว่า​เฮา​เยียะ​บาป แล้ว​เยียะ​หยัง​หมู่​ต้าน​บ่﻿ยอม​เจื้อ​เฮา​เมื่อ​เฮา​อู้​ความ​จริง 
คน​ของ​พระเจ้า​ก็​ฟัง​กำ​อู้​ของ​พระเจ้า แต่​ตี้​หมู่​ต้าน​บ่﻿ยอม​ฟัง​เฮา​ก็​ย้อน​ว่า​หมู่​ต้าน​บ่﻿ใจ้​คน​ของ​พระเจ้า” 
หมู่​จาว​ยิว​ก็​อู้​ว่า “หมู่​เฮา​อู้​ผิด​ตี้​ไหน ตี้​ว่า​ต้าน​เป๋น​จาว​สะมาเรีย กับ​โดน​ผี​เข้า​ตวย” 
พระเยซู​ก็​อู้​ว่า “เฮา​บ่﻿ได้​โดน​ผี​เข้า แต่​เฮา​หื้อ​เกียรติ​พระบิดา​ของ​เฮา แต่​หมู่​ต้าน​ก็​ดู​ถูก​ดู​แควน​เฮา 
เฮา​บ่﻿เซาะ​หา​กำ​ยกย่อง​สรรเสริญ​หื้อ​ตั๋ว​เก่า แต่​พระเจ้า​เป๋น​ผู้​เซาะ​หา​หื้อ​เฮา และ​พระองค์​ก็​เป๋น​ผู้​ตัดสิน​เข้า​ข้าง​เฮา 
เฮา​บอก​ความ​จริง​แก่​ต้าน​ตังหลาย​ว่า ถ้า​ใผ​คน​ใด​เยียะ​ต๋าม​กำ​สั่ง​สอน​ของ​เฮา คน​นั้น​ก็​จะ​บ่﻿มี​วัน​ต๋าย” 
หมู่​จาว​ยิว​ก็​อู้​กับ​พระองค์​ว่า “ต๋อน​นี้​เฮา​ฮู้​แล้ว​ว่า​ต้าน​โดน​ผี​ฮ้าย​เข้า​แน่﻿ๆ ย้อน​อับราฮัม​กับ​ผู้​เป๋น​ปาก​เป๋น​เสียง​แตน​พระเจ้า​ก็​ต๋าย​กั๋น​ไป​แล้ว แต่​ต้าน​อู้​ว่า ‘ใผ​คน​ใด​ตี้​เยียะ​ต๋าม​กำ​สั่ง​สอน​ของ​เฮา​ก็​จะ​บ่﻿มี​วัน​ต๋าย’ 
ต้าน​เป๋น​ใหญ่​นัก​เหลือ​อับราฮัม ป้ออุ๊ย​แม่หม่อน​ของ​เฮา​กา ย้อน​อับราฮัม​กับ​ผู้​เป๋น​ปาก​เป๋น​เสียง​แตน​พระเจ้า​ก็​ต๋าย​กั๋น​ไป​แล้ว ต้าน​กึ๊ด​ว่า​ต้าน​เป๋น​ใผ” 
พระเยซู​ตอบ​ว่า “ถ้า​เฮา​ยกย่อง​สรรเสริญ​ตั๋วเก่า กำ​ยกย่อง​สรรเสริญ​นั้น​ก็​บ่﻿มี​ความหมาย​อะหยัง​เลย พระบิดา​ของ​เฮา​ผู้​ตี้​หมู่​ต้าน​อ้าง​ว่า​เป๋น​พระเจ้า​ของ​หมู่​ต้าน​นั้น​เนาะ เป๋น​ผู้​ตี้​ยกย่อง​สรรเสริญ​เฮา 
แต๊﻿ๆ แล้ว หมู่​ต้าน​บ่﻿ฮู้จัก​พระองค์ แต่​เฮา​ฮู้จัก​พระองค์ ถ้า​เฮา​อู้​ว่า​เฮา​บ่﻿ฮู้จัก​พระองค์ เฮา​ก็​เป๋น​คน​ขี้​จุ​เหมือน​หมู่​ต้าน แต่​เฮา​ฮู้จัก​พระองค์​กับ​เยียะ​ต๋าม​ตี้​พระองค์​บอก​เฮา 
อับราฮัม​ป้อ​อุ๊ย​แม่​หม่อน​ของ​หมู่​ต้าน​ดีใจ๋​ตี้​จะ​หัน​วัน​ตี้​เฮา​มา เขา​ได้​หัน​ล่วงหน้า​แล้ว กับ​ดีใจ๋​แล้ว​ตวย” 
หมู่​จาว​ยิว​ก็​อู้​ว่า “ต้าน​อายุ​ยัง​บ่﻿เถิง​ห้า​สิบ​เลย ต้าน​เกย​หัน​อับราฮัม​ได้​จาใด” 
พระเยซู​ตอบ​ว่า “เฮา​บอก​ความ​จริง​แก่​ต้าน​ตังหลาย​ว่า ก่อน​อับราฮัม​เกิด เฮา​ก็​เป๋น​อยู่​แล้ว” 
คน​หมู่​นั้น​ก็​เลย​หยิบ​บ่าหิน​ขึ้น​มา​จะ​ขว้าง​พระเยซู แต่​พระองค์​ก็​หลบ​ออก​จาก​พระวิหาร​ไป 
