﻿มาระโก.
3.
พระเยซู​เข้า​ไป​ใน​ธรรมศาลา​ของ​จาว​ยิว​แหม มี​ป้อจาย​คน​นึ่ง​มือ​เผิก​นึ่ง​ของ​เขา​ลีบ​อยู่​ตี้​หั้น 
มี​จาว​ยิว​บาง​คน​ก่ำลัง​ผ่อ​ว่า​พระองค์​จะ​ฮักษา​ป้อจาย​มือ​ลีบ​คน​นั้น​ใน​วัน​สะบาโต​ก่อ เปื้อ​จะ​หา​เหตุ​นาบ​โต้ษ​พระองค์ 
พระองค์​บอก​คน​มือ​ลีบ​คน​นั้น​ว่า “ลุก​ยืน​ขึ้น​ส่อง​หน้า​คน​ตังหลาย” 
แล้ว​พระองค์​ก็​ถาม​หมู่​เขา​ว่า “ควร​จะ​เยียะ​ก๋าน​ดี​กาว่า​เยียะ​ก๋าน​ฮ้าย​ใน​วัน​สะบาโต จะ​จ้วย​จีวิต​กาว่า​จะ​ทำลาย​จีวิต” แต่​หมู่​เขา​ก็​ปา​กั๋น​ดัก​ปิ้ง 
พระเยซู​ผ่อ​รอบ﻿ๆ หมู่​เขา พระองค์​โขด​กับ​เสียใจ๋​ตี้​หัน​ว่า​หมู่​เขา​มี​จิตใจ๋​หลึ่ง แล้ว​อู้​กับ​คน​มือ​ลีบ​ว่า “เหยียด​มือ​ออก​มา” เขา​ก็​เยียะ​ตวย​ต๋าม แล้ว​มือ​ของ​เขา​ก็​หาย​เป๋น​ปกติ 
เมื่อ​หมู่​ฟาริสี​หัน​จาอั้น ก็​ฟั่ง​ออก​ไป​วางแผน​กับ​หมู่​ของ​กษัตริย์​เฮโรด​ว่า​จะ​ฆ่า​พระเยซู​ได้​จาใด 
พระเยซู​ไป​ทะเลสาบ​กาลิลี​กับ​หมู่​สาวก แล้ว​มี​คน​นัก​ขนาด​ตวย​พระองค์​ไป ตึง​คน​ตี้​มา​จาก​แคว้น​กาลิลี แคว้น​ยูเดีย 
กรุง​เยรูซาเล็ม แคว้น​อิดูเมอา กับ​แคว้น​ตี้​อยู่​เผิก​แม่น้ำ​จอร์แดน แล้ว​ก็​ยัง​มี​คน​ลุก​มา​จาก​แถว​เมือง​ไทระ​กับ​เมือง​ไซดอน​มา​ตวย ย้อน​ได้ยิน​เถิง​เรื่อง​ต่าง﻿ๆ ตี้​พระองค์​เยียะ​มา 
พระองค์​ก็​เลย​สั่ง​หมู่​สาวก​เกียม​เฮือ​ลำ​นึ่ง​หื้อ เปื้อ​กั๋น​คน​หมู่​นั้น​บ่﻿หื้อ​มา​ยัด​ยู้​พระองค์ 
ย้อน​ใน​วัน​นั้น​พระองค์​ได้​ฮักษา​คน​จ๋ำนวน​นัก​หื้อ​หาย คน​เป๋น​พยาธิ​พะยำ​ต่าง﻿ๆ ก็​ยัด​ยู้​กั๋น​เข้า​มา​เปื้อ​จะ​หยุบ​จะ​ก๋ำ​พระองค์ แล้ว​จะ​หาย​โรค 
เมื่อ​หมู่​ผี​ฮ้าย​ตี้​เข้า​ใน​คน​หัน​พระองค์ ก็​หมอบ​ลง​กราบ​ไหว้​พระองค์ แล้ว​ฮ้อง​เสียง​ดัง​ว่า “ต้าน​เป๋น​บุตร​ของ​พระเจ้า” 
แต่​พระเยซู​สั่ง​ห้าม​หมู่​ผี​ฮ้าย​อย่าง​เด็ดขาด​บ่﻿หื้อ​บอก​ว่า​พระองค์​เป๋น​ใผ 
หลัง​จาก​นั้น​พระเยซู​ขึ้น​ไป​บน​ดอย​ม่อน​นึ่ง แล้ว​พระองค์​เปิงใจ๋​จะ​ฮ้อง​คน​ใด​ก็​ฮ้อง​คน​นั้น​ตวย​พระองค์​ไป หมู่​เขา​ก็​มา​หา​พระองค์ 
ตึง​หมด​มี​สิบ​สอง​คน พระองค์​แต่งตั้ง​คน​หมู่​นี้​เปื้อ​จะ​อยู่​ตวย​ต้าน กับ​จะ​ใจ๊​หมู่​เขา​ไป​บอก​ข่าวดี​หื้อ​คน​อื่น​ฟัง พระเยซู​ฮ้อง​หมู่​เขา​ว่า​หมู่​อัคร​สาวก 
ตึง​หื้อ​หมู่​เขา​มี​อำนาจ​ตี้​จะ​ขับ​ไล่​ผี​ออก​ได้​ตวย 
หมู่​อัคร​สาวก​สิบ​สอง​คน​นี้​มี​จื้อ​ว่า ซีโมน​คน​ตี้​พระองค์​ตั้ง​จื้อ​หื้อ​แหม​จื้อ​ว่า เปโตร 
ยากอบ​ลูกบ่าว​ของ​เศเบดี กับ​ยอห์น​น้องบ่าว​ของ​เขา สอง​คน​นี้​พระองค์​หื้อ​จื้อ​แหม​ว่า โบอาเนอเย​แป๋​ว่า “ลูกบ่าว​ของ​ฟ้า​ฮ้อง” 
อันดรูว์ ฟีลิป บารโธโลมิว มัทธิว โธมัส ยากอบ​ลูก​บ่าว​ของ​อัลเฟอัส ธัดเดอัส ซีโมน​คน​ของ​พรรค​จ้าดนิยม 
กับ​ยูดาส อิสคาริโอท ต๋อน​เมื่อ​ลูน​คน​นี้​ได้​หักหลัง​พระเยซู 
จาก​นั้น​พระองค์​ก็​ปิ๊ก​บ้าน มี​หมู่​คน​มา​ยืนออ​กั๋น​อยู่​ตี้​บ้าน​หั้น​แหม จ๋น​เยียะ​หื้อ​พระเยซู​ตึง​หมู่​สาวก​สิบ​สอง​คน​บ่﻿มี​เวลา​กิ๋น​ข้าว​กิ๋น​น้ำ 
เมื่อ​ครอบครัว​ของ​พระองค์​ได้ยิน​ข่าว​นี้ ก็​กึ๊ด​ว่า​พระองค์​เป๋น​บ้า​ไป​แล้ว จึง​ปา​กั๋น​มา​หา​เปื้อ​จะ​ยับ​ปิ๊ก​เมือ​บ้าน 
แต่​มี​หมู่​ธรรมาจ๋ารย์​ตี้​ลุก​จาก​กรุง​เยรูซาเล็ม​มา อู้​กั๋น​ว่า “เขา​ถูก​เบเอลเซบูล หัวหน้า​ผี​เข้า ตี้​เขา​ไล่​ผี​ออก​ได้​นั้น ก็​ย้อน​ใจ๊​อำนาจ​ของ​หัวหน้า​ผี​ตั๋ว​นี้​ละ” 
พระเยซู​จึง​ฮ้อง​หมู่​เขา​เข้า​มา​ใก้﻿ๆ แล้ว​เล่า​กำเผียบ​หื้อ​เขา​ฟัง​ว่า “ซาต๋าน​จะ​ขับ​ไล่​ตั๋ว​เก่า​ได้​กา 
ถ้า​อาณาจักร​ใด﻿ๆ แตกแยก​กั๋น​เหีย อาณาจักร​นั้น​ก็​จะ​ตั้ง​อยู่​ต่อ​ไป​บ่﻿ได้ 
กาว่า​ถ้า​ครอบครัว​ใด​แตกแยก​กั๋น ครอบครัว​นั้น​ก็​จะ​ตั้ง​อยู่​บ่﻿ได้ 
เหมือน​กับ​ถ้า​ซาต๋าน​ต่อต้าน​หมู่​ของ​มัน หมู่​มัน​ก็​จะ​แตกแยก​กั๋น แล้ว​ซาต๋าน​ก็​จะ​ตั้ง​อยู่​บ่﻿ได้ แต่​จะ​หล้มจ๋ม​ไป​เต้าอั้น 
“บ่﻿มี​ใผ​สามารถ​ตี้​จะ​เข้า​ไป​ปล้น​เอา​ทรัพย์​สมบัติ​ใน​บ้าน​ของ​คน​ตี้​มี​ก๋ำลัง​นัก​ได้ เขา​จะ​ต้อง​มัด​เจ้าของ​บ้าน​ตี้​มี​ก๋ำลัง​นัก​นั้น​เหีย​ก่อน เถิง​จะ​สามารถ​ปล้น​ได้ 
“เฮา​บอก​ความ​จริง​แก่​ต้าน​ตังหลาย​ว่า ความ​บาป​ต่าง﻿ๆ ตึง​กำ​อู้​หมิ่น​ประมาท​ตี้​คน​ใด​ว่า​มา​นั้น ยัง​ยกโต้ษ​หื้อ​ได้ 
แต่​ถ้า​ใผ​อู้​หมิ่น​ประมาท​พระวิญญาณ​บริสุทธิ์​จะ​ยกโต้ษ​หื้อ​ตึง​บ่﻿ได้​เลย ย้อน​ว่า​บาป​นั้น​จะ​ติด​ตั๋ว​ไป​ตลอด” 
ตี้​พระเยซู​อู้​จาอั้น​ก็​ย้อน​ว่า หมู่​เขา​ปา​กั๋น​หา​ว่า​พระองค์​มี​ผี​ฮ้าย​เข้า 
เวลา​นั้น แม่​กับ​หมู่​น้อง​บ่าว​ของ​พระเยซู​ก็​มา​ยืน​ถ้า​อยู่​ตัง​นอก หมู่​เขา​ใจ๊​คน​เข้า​ไป​ฮ้อง​พระองค์​ออก​มา 
มี​หลาย​คน​ตี้​นั่ง​แวด​พระเยซู​เป๋น​หมู่ บอก​กับ​พระองค์​ว่า “แม่​กับ​หมู่​น้อง​บ่าว​มา​ยืน​ถ้า​อยู่​ตังนอก” 
พระเยซู​บอก​ว่า “ใผ​เป๋น​แม่​กับ​ปี้น้อง​ของ​เฮา” 
แล้ว​พระองค์​ก็​ผ่อ​ไป​ตี้​คน​นั่ง​แวด​พระองค์​อยู่ อู้​ว่า “หมู่​เนียะ​เป๋น​แม่​กับ​ปี้น้อง​ของ​เฮา 
ย้อน​ว่า​คน​ตี้​เยียะ​ตวย​ต๋าม​ความ​ต้องก๋าน​ของ​พระเจ้า คน​นั้น​ก็​เป๋น​ปี้น้อง​กับ​เป๋น​แม่​ของ​เฮา” 
