﻿Isaiah.
6.
De ngadau huu o de hodooligi go Uzziah ne magau ai, gai au ne gidee de Ia Aamua laa e noho i honga dahi nohoanga maolunga ma de hagaamua, gai de bido i lalo o dono malo e hola ma e dohu ai lo te temple. 
Gai hanu seraph e tuu i ono elunga. Gilaadeu e dagiono olaadeu bakau; e dagilua e haoli ai olaadeu mada, e dagilua e haoli ai olaadeu vae, gai e dagilua olaadeu e llele ai. 
Gai gilaadeu e hagadau pasa ma e hagataba, “E dabu, e dabu, e dabu Tagi o denga hagabuulinga hebagi, henua i lalo alodahi gu honu i dono mahamaha.”  
Gai olaadeu leo e hagangalungalue denga abaaba, gai de temple gu honu i de useahi. 
Gai au ne hagadaba, “Gu vakaa loo au! Au gu se dangada gu magau! Go hiidinga au se dangada baubau dogu ngudu, gai au e noho i magavaa o dangada e baubau olaadeu ngudu; go hiidinga luoogu mada gu gidee de Hodooligi, Tagi o denga hagabuulinga hebagi.” 
Gai dahi seraph ne lele mai gi ogu daha ma dahi maga ahi i lo tono lima, se mee niiana ne gabi i de igohi mai i honga de mommee o ssigidaumaha. 
Gai ia ga dugu mai de maga ahi laa gi dogu ngudu, ga hai mai, “Tilo, de maga ahi nei gu dugu adu gi luoo malaungudu; oo baubau gu kave gee mai i oo daha, gai de Maadua gu degi adu gi oo haisala.” 
Gai au ne langona de leo o de Ia Aamua laa e hagadaba, “Goai aagu e hai gi hano? Gai goai e suuia gimaadeu e hano ai?” Gai au ga hai ange, “Deenei au, haia au gi hano!” 
Gai ia ne hai mai gi de au, “Hannoo hai ange gi de huaadangada nei: ‘Goodou e dee modu doodou langona, aagai e dee maua gi tonu ange, goodou e dee modu de gidee, aagai e dee maua gi madea.’  
Hagamakaga ina lodo o de huaadangada nei, haia olaadeu dalinga gi longoduli, gai haia olaadeu ganomada gi dee kide. Kana gidee e gilaadeu i olaadeu ganomada ma de langona i olaadeu dalinga, gai gilaadeu gu tonu ange i olaadeu lodo, ga daahuli olaadeu lodo, gai gilaadeu gu ieiangi.” 
Gai au ne ssili ange, “De Ia Aamua, dee hee maa taulooloa de hai mee nei?” Ia ne hai mai: “Mee nei e hai ga dae ai gi de odi aduhale alodahi i de oha gai gu deai dangada e nnoho ai, ga dae ai gi teai dangada e doe i denga hale i kilaa, gai de henua gu ngadi dagodo; 
ga dae ai gi de hai a Tagi Maolunga gi hulo dangada gi denga henua mmao, gai gu lagolago mommee i honga de henua gu ngadi daakodo. 
Gai ga dahi naa donu huu diba i diba e madaangahulu o dangada e doe i de henua, gai e ahe ange naa donu ga ngadi dagodo. Aagai e bei naa de terebinth ma de oak e sele iho laa gai olaau daahido e tuu i honga de gelegele, gai de uli dabu laa go tahido donu i honga de henua laa.” 
