﻿Song of Songs.
6.
De hine e mahamaha ange i denga haahine, go hee o de ia oou e aloha ai ne hano aagena? Dee hee dono haiava ne daa ga hano ai, gai gimaadeu ga bale adu goe e ssala ai ia? 
De ia oogu e aloha ai gu hano gi dana veelenga, gi de mommee e doo ai denga manu hagamanongi, e tilo saele ai dana veelenga, ga hagabudu ai huaala o denga lilii. 
Au nii dogu dau soa, gai dogu dau soa niiagu; ia e haangai ana ssiibi i magavaa o denga lilii. 
Dogu dau soa, koe e mahamaha mmao bei Tirzah, ma de mahamaha bei dagodo o Jerusalem, gai e hagalele mouli bei de hagabuulinga hebagi ma olaadeu flag. 
Huli gee luoo mada i de au, au e dee maua i de tilo luoo mada. Oo ngaangaaulu e bei de hagabuulingaa guudi e loiho laa i de mounga go Gilead. 
Oo niho e bei de hagabuulingaa ssiibi haahine, gu hakaugau ma gu loage i lo te vai; alodahi e dau ngaadahi, gai e deai donu se gilaadeu e dee maleva. 
Luoo galaahuu e bei luu dibaa pomegranate i lalo de malo e haoli ai laa luoo mada. 
E dinoono bodu o de hodooligi, ma e dinovalu ono bodu laa daha, ma denga bua mmoe soa mmao; 
aagai dagu manu kono, e honu abodonu dono mahamaha, e dahi donu huu, ia go tamaa hine donu huu a dono dinana, gai e hagamogomogo i daho de ia ne hanaua ia. Denga damaa hine e gidee ia e hagataba bolo ia e manuuia; denga bodu o de hodooligi ma ono bodu laa daha e tuhi hogi ia. 
Goai e bei nei dagodo o de maalama o taiao, ma de mahamaha bei de maasina, ma de maalama bei de laa, gai e hagamaatagu bei de hagabuulinga hebagi ma olaadeu flag? 
Au ne hano iho gi de veelenga hua laagau, e tilo ai denga huaala i lo te geelonga, ma de tilo be denga grape gu matili age, aabe denga pomegranate gu loage olaadeu huaala. 
Gai au tee angahia donu de masavaa aagu ne maanadu ai bolo au gu noho i lodo hada o dahi dangada aamua. 
Ahe mai, ahe mai, tamaa hine Shulam, ahe mai, ahe mai, gimaadeu e llodo e haaina goe. Taane dau soa Gu aha gu llodo ai goodou e haaina de hine Shulam, bei doodou tilo de aanunga i mada i mua o e lua hagabuulinga hebagi? 
