﻿Proverbs.
31.
Muna a de hodooligi go Lemuel — go muna hagadaemaha a dono dinana ne agoago ange ai ia: 
“Dagu dama, tama aagu ne haanau, tama o dagu hagatoo donu, 
aude moumou ina oo mahi i daho denga haahine dagodo haisala, ma oo mahi i daho olaadeu e hagahaisala ina denga hodooligi. 
Lemuel, e dee ni mee ange gi denga hodooligi — e dee heohi de unu a denga hodooligi denga uvaini, aabe go de unu a denga dagi mee mmahi, 
kana unu gilaadeu ga ssenga ga ngalo denga hainga gu hagasauaa, gai gilaadeu ga kave gee de heohi o dangada alodahi e duasala. 
Gaavange mee mmahi gi dangada gu dai maakau, ma uvaini gi gilaadeu e daemaha olaadeu lodo; 
dugua ange gilaadeu gi unu gi ngalo ai e gilaadeu delaadeu hagaau aloha, gilaadeu gu dee manadua delaadeu duasala. 
Basa mage balea ange gilaadeu e dee maua i de pasa, ma de bale ange heohi o dangada alodahi gu deai selaadeu tali. 
Basa mage hagamodu ina muna i de heohi, daalaa heohi o de gau hagaau aloha ma de duasala.” 
Goai e maua i de gidee dahi hahine dahulinga danuaa? De hine bee nei e hagao ngadaa ange i denga ruby. 
Dono bodu e dahi ana tali ange gi de ia, gai e deai donu sana mee daudahi e deai. 
De hine bee nei e hai hegau danuaa ange gi dono bodu, e dee hai ange de baubau gi de ia, i taulooloa o dono mouli. 
Ia e ssala mee e hai i huluhulu o denga manu ma flax, ma de hagammahi ga hai hegau i luoono lima. 
Ia e bei dagodo o denga vaga hagao mee, ia e gaamai ana gai i de mommee mmao. 
Ia e oho age i de masavaa goi gohu ai; ia e hai gai a dangada i dono hale, ma duuhanga o ono haahine hai hegau. 
Ia e tilo gi danuaa de alahenua i mua dana hagao; gai e hai ana mee gu mau ga doo ai dahi veelengaa grape. 
Ia se hine mmahi i de hai hegau; gai luoono lima e mmahi i de hai ana hegau. 
Ia e iloo bolo ana goloa e hagao e danuaa, gai dana laama e dee diinei donu i de boo. 
Ia e poo de laagau e hilo ai ana deleisi, ma de hai ana deleisi ga llanga ai denga malo. 
Ia e abodonu ange gi de gau hagaau aloha, ma de ngadi gaavange mee gi gilaadeu e duasala. 
Ia e dee manavasaa donu i dono huaabodu i de masavaa hagamagalili, go hiidinga gilaadeu alodahi e kahu i malo mmea. 
Ia e dui malo e haoli ai moenga; ono malo e hai i linen danuaa gai e purple. 
Dono bodu se daane hagadubu i de haitoga o de aduhale, madali denga daane maatua o de henua. 
De hine nei e hai denga malo linen ma e hagao; ia e hagao ange mee noonooa ungaalodo gi de gau hagao mee. 
Ia e mmahi gai se hine hagadubu i daho dangada, gai ia e malangilangi i dana maanadu denga masavaa e loomai. 
Ia e tala ana muna i de heiangi, gai de hainga e dagina ana muna go de abodonu. 
Ia e tilo danuaa ange mee alodahi i dono hale, gai ia e dee se hine vaiduu. 
Ana dama e tuu age ga tala hagadanuaa ono dagodo; dono bodu e tuhi hogi ia, ga hai ange, 
“E soa haahine e hai hegau danuaa mmao, aagai koe e dubu ange i gilaadeu alodahi.” 
De tuhi a dangada e daahanga tangada, gai de mahamaha e moolau de lilo; aagai de hine e madagu laa i Tagi Maolunga e duuhia naa. 
Hagadubu ina de hine nei i hua o ana hegau, gai duuhia ia i denga haitoga o de aduhale, i hiidinga o ana hegau.
