﻿Proverbs.
12.
Be goai e malangilangi i dono haelea, e lodo hogi i de iloo mee, aagai tangada e kino i dono hagaheohi ange, se dangada senga. 
Tagi Maolunga e abodonu ange gi tangada danuaa, aagai Tagi Maolunga e hagabaubau tangada e haia hagasaele baubau. 
Tangada e dee maua gi noho baba i dana hai de baubau, aagai dangada heohi e dee maua donu gi unuunusia age olaadeu aga. 
De hine danuaa e bei de hau mahamaha i honga de biho o dono bodu, aagai de hine hagadogaa dangada e bei de mee e haia laa ga pobo ono ivi. 
Maanadu a de gau heohi e heohi, aagai hagasaele a de gau baubau e daahanga dangada. 
Muna a de gau baubau e daa gilaadeu ga magau, aagai muna a dangada e hai hegau i de heohi e hagaola dangada. 
De gau baubau e hagadee kii ina naa donu ma de llilo, aagai de huaabodu o olaadeu e heohi e duudagi naa donu huu. 
Dangada e tuhi tangada maanetonu, aagai dangada e kino i tangada maanadu baubau. 
E danuaa ange noo koe se dangada e dee dau, gai e dahi oo dangada hai hegau, i dau tala bolo koe se dangada e dau, gai e deai donu au gai. 
Tangada heohi e tilo danuaa ange ana manu dolodolo, aagai de lodo aloha o de gau baubau e vaivai hai dangada. 
Tangada e dooa dono alahenua e lagolago ana gai, aagai tangada e dolohia saele mee e deai haigamaiana se dangada senga. 
Tangada baubau e lodo i goloa o dangada e haia de baubau, aagai tagelo o tangada heohi e hai gi duu ia gi makaga ma de hua lagolago. 
Tangada baubau e hagahaisala donu huu i ana muna e tala, aagai tangada heohi e ola mai naa i de hai ngadaa. 
Muna a tangada e hagadanuaa naa ia i mee danuaa; hegau a tangada e hagadanuaa naa donu huu ia. 
Tangada lodo senga e maanadu bolo ana hegau e heohi donu, aagai tangada heiangi e hagallongo denga muna bale. 
Tangada lodo senga e moolau donu de hagaago mai dono lili, aagai tangada maanetonu e dee anga ange gi muna hagadookaa. 
Tangada e daalaa laa de mee heohi e hai ga sula mai de muna abodonu, aagai tangada hagadonu hadu muna e tala de muna hagasenga. 
Muna aau e tala i mua dau maanadu e velo lodo o tangada bei de gadilaasa kangi, aagai muna a tangada heiangi e hagaieiangi tangada. 
De muna abodonu e dagodo ga hano ai, aagai denga muna hhadu e dagodo donu i dahi masavaa bodobodo. 
De daahanga dangada e dagodo i lodo dangada e hagatau ina de hai de baubau, aagai gilaadeu e haia laa gi sula de nnoho paba e malangilangi. 
E deai donu se hai ngadaa e duu ange gi gilaadeu e heohi, gai de gau baubau e lagolago donu olaadeu hai ngadaa. 
Tagi Maolunga e kino i de gau hadu muna, aagai ia e malangilangi i dangada e hai hegau i de mee abodonu. 
Tangada maanetonu e dee tala ange gi dangada dana mee e iloo, aagai de gau llodo ssenga e hagaago mai donu delaadeu llodo ssenga. 
Tangada hai mee e sula naa ga dagi, gai tangada vaiduu e hai naa ga se dangada hai hegau. 
Tangada e manavasaa laa ono lodo e lodo baubau, aagai muna danuaa e hagamaamaane ono lodo. 
Tangada heohi e hagakana ange dono soa, aagai de haiava o de gau baubau e dagi gee gilaadeu. 
Tangada vaiduu e dee maua i de dunu i honga de ahi dana manu ne mau, aagai tangada hai hegau e kave naa goloa hagamogomogo. 
De haiava heohi go de mouli donu, gai e deai donu se magau i lo te haiava nei. 
