﻿Psalm.
148.
Duuhia Tagi Maolunga! Duuhia Tagi Maolunga mai i de langi; duuhia ia i de mommee maolunga. 
Ono dangada de langi alodahi, goodou duuhia ia; ono hagabuulinga hebagi i de langi, goodou duuhia ia. 
De laa ma de maasina, duuhia ia; denga heduu maalama alodahi, duuhia ia. 
Lo te langi maolunga, duuhia ia, aama denga vai i lo te langi i lunga! 
Mee nei alodahi gi duuhia de ingoo o Tagi Maolunga, go hiidinga ia ne basa donu huu, gai mee nei gu hanu. 
Ia ne hai gi daakodo mee nei ga hano ai e dee ngado mai; ia gu hagasauaa dahi mee, gai e dee maua naa donu i de sui. 
Duuhia Tagi Maolunga i henua i lalo, goodou denga dragon o lausedi aama denga moana kelo alodahi, 
de ahi ma de uila, ma denga snow ma duudangaa haisi, ma de madangi mmahi e daudali i ana muna; 
denga mounga ma duuduu alodahi, ma manu ssomo iai hua ma denga cedar alodahi; 
denga manu lodo henua ma manu haangai, ma manu e tolo i honga de gelegele ma manu llele; 
denga hodooligi o henua i lalo ma huaadangada alodahi, ma de gau aamua ma dagi alodahi o henua i lalo; 
denga dama daane ma damaa hine, ma de gau madumaatua ma denga gauligi. 
Mee nei alodahi gi duuhia de ingoo o Tagi Maolunga, i hiidinga go dono ingoo donu huu e heohi de hagaamua; dono mahamaha e maolunga ange i henua i lalo ma de langi. 
Ia gu hagasula age dahi hanga moo ono dangada, de tuhi a ono dangada dabu alodahi, ma de gau Israel, go dangada aana e hagamogomogo. Duuhia Tagi Maolunga! 
