﻿Psalm.
143.
Se Psalm nii David Tagi Maolunga, hagalaangona dagu dalodalo; hulia mai hagalaangona dagu dangidangi i doo abodonu; humai balea mai au, i hiidinga koe e hai hegau i de muna abodonu ma de heohi. 
Koe gi dee hagamodu ina muna o doo dangada hai hegau, go hiidinga e deai donu se dangada mouli e heohi i mada luoo mada. 
Dogu hagadaumee e doolohi au, ia gu dagadagahi au gi honga de gelegele; ia gu hai au gi noho i lo te gohu bei dangada gu maakau odiodi laa. 
Deenei ai, au gu lodo baageaa; gai ogu lodo gu manavasaa mmao. 
Au e manadua denga laangi gu hulo; au e hagamaumau mee alodahi aau gu hai, ma de hagasaele dagodo o au hegau. 
Au e haalo adu dogu lima gi de goe; dogu hagasaalunga e lodo mmao i de goe bei dagodo o de gelegele e deai vai iai. Selah 
Tagi Maolunga, hagamoolau basa mai gi de au; dogu hagasaalunga gu daemaha mmao. Koe gi dee hagamuunia luoo mada i de au, ana vakaa au ga bei gilaadeu e hulo laa gi de mommee o de gau maakau. 
Haia gi langona e au i taiao doo abodonu, go hiidinga au e hagadonusia goe. Agoagona mai dogu haiava e hano ai, i hiidinga au e dalodalo adu gi de goe. 
Tagi Maolunga, hagaola ina mai au i ogu hagadaumee, go hiidinga au e mmuni i oo daha. 
Agoagona mai au i de hai oo lodo, i hiidinga go koe dogu Maadua; doo Hagasaalunga danuaa gi dagina adu au i de mommee soe. 
Tagi Maolunga, hagaola ina dogu mouli i hiidinga o doo ingoo; hagaola ina dogu mouli mai i ogu hai ngadaa, i hiidinga koe e heohi. 
Hagallilo ina ogu hagadaumee i hiidinga doo abodonu, gai daia gi maakau ogu hagadaumee alodahi, i hiidinga go au doo dangada hai hegau. 
