﻿Psalm.
142.
Se Maskil nii David, i de masavaa oona ne noho ai i lo te haonga. Se dalodalo Au e hagahi Tagi Maolunga i de leo laumalie; au e dangi ange gi Tagi Maolunga, gi abodonu mai gi de au. 
Au e tala ange dogu duasala gi de ia, au e tala ange ogu hai ngadaa gi de ia. 
De masavaa e baageaa ai ogu lodo, gai go koe e iloo ogu dagodo. Gai gilaadeu gu hagammuni ssele e dada ai au i honga de haiava oogu e seesee ai. 
Galo ange gi dogu madau ma gi diiloo, gu deai donu dangada e kalo mai gi de au. Gu deai sogu mommee e buibui ai, gu deai donu dangada e aloha mai gi de au. 
Tagi Maolunga, au e dangi adu gi de goe; au e hai adu, “Go koe donu dogu buibui, ma dogu duuhanga i dogu mouli nei.” 
Hagalaangona dagu dangidangi, go hiidinga au gu duasala mmao. Hagaola ina mai au i gilaadeu e dolohia mai au, go hiidinga gilaadeu e mmahi ange i de au. 
Hagasao ina mai au i lo te hale pono nei, gai au ga hagaahe adu de abodonu gi de goe. Gai gilaadeu e heohi e hagabuni mai naa gi ogu daha, i hiidinga o doo abodonu mai gi de au. 
