﻿Psalm.
141.
Se Psalm nii David Tagi Maolunga, au e hagahi adu goe; hagamoolau humai balea mai au. Hagalaangona dagu dangidangi, i de masavaa aagu e hagahi ai goe! 
Dagu dalodalo gi bei mee maanongi e dudu laa i oo mada i mua, gai au gi haalo ina luoogu lima i talodalo bei ssigidaumaha i de ahiahi. 
Tagi Maolunga, dagidiiloo mai agu muna e tala i dogu ngudu; koe gi hagaloosi ina de abaaba o luoogu malaungudu. 
Koe gi dee dugua mai au gi lodo e hai de mee dee heohi, ma de hai de baubau madali gilaadeu e haia de baubau; gai au gi dee gaina alaadeu gai mammami. 
De hagaili a tangada heohi au, e bei donu dono abodonu mai; dana hagasee au, e bei donu de lolo e hagasulu ai laa dogu biho; gai au e dee hagaui gee ai donu. Gai au e duudagi naa donu de dalodalo e hai baasi ange ai gi dangada e haia de baubau. 
Olaadeu dagi gu tili iho i de hadi aho, gai gilaadeu e iloo naa agu muna, go hiidinga ni muna hagamalangilangi. 
Omaadeu ivi gu maoha saele i gaogao denga daanunga, bei de gelegele a dahi gu geli age laa. 
Aagai luoogu mada e daumada goe Tagi Maolunga, dogu Ia Aamua; au e mmuni i oo daha; aude dugua ange au gi de magau. 
Hagaola ina mai au i sele a dangada gu dugu e dada ai au, ma lodo sele a dangada e haia de baubau! 
Haia de gau baubau gi too ange gi lodo alaadeu sele gu hagadabena mai gi de au, gai au gu dee madagu i de seesee i kilaa. 
