﻿Psalm.
138.
Se Psalm nii David Tagi Maolunga, au e hagaahe adu de abodonu i ogu lodo alodahi; au e tuhi goe i taahili i mada i mua o denga diinonga. 
Au e huli ange gi doo temple dabu ga daumaha ai, ma de hagadegi doo ingoo i hiidinga doo abodonu aama doo hai hegau i de mee abodonu; go hiidinga koe gu hagaamua doo ingoo aama au muna. 
De masavaa aagu ne hagahi adu ai goe, gai koe ne basa mai gi dagu dangidangi; koe ne hai au gi lo taane ma de lodo mmahi. 
Tagi Maolunga, denga hodooligi alodahi o henua i lalo gi hagaahe adu de abodonu gi de goe, i delaadeu langona au muna, 
gai gilaadeu e daahili naa i dagodo hegau a Tagi Maolunga, i hiidinga de laumalie de mahamaha o Tagi Maolunga. 
Tagi Maolunga e galo ange gi gilaadeu e maolalo, e dee galemu donu ia e maolunga mmao, aagai ia e hagammao gee i de gau hagamaolunga. 
Gai ga duu ange naa donu au gi de hai ngadaa, gai koe e hagaola dogu mouli; koe e hagaabo doo lima e hai baasi ange gi de lili o ogu hagadaumee, gai doo lima madau e hagaola dogu mouli. 
Tagi Maolunga e hagasula naa dana hagatau mai gi de au; Tagi Maolunga, doo abodonu e dagodo ga hano ai. Koe gi dee dilia dangada aau ne hai i luoo lima. 
