﻿Psalm.
132.
Se daahili ange gi de loage ⌊e hulo gi Jerusalem⌋ Tagi Maolunga, manadua David i denga hai ngadaa alodahi gu hai ange gi de ia. 
Ia ne hai dahi hagatoo donu ange gi Tagi Maolunga, ma de hagatoo donu ange gi de Ia Mmahi o Jacob: 
“Au e dee ulu naa donu i dogu hale, aabe e hano e dagodo i dogu moenga; 
au e dee seni naa donu aabe e mmoe luoogu mada e dama seni iho, 
ga dae ai gi dagu gidee dahi mommee moo Tagi Maolunga, se mommee e noho ai de Ia Mmahi o Jacob.” 
Tilo, gimaadeu ne langona i Ephrathah; gai gimaadeu ne gidee i lo te duu malaelae o Jaar: 
“Gidaadeu ga hulo gi dono mommee e noho ai; gidaadeu ga ino e daumaha i gaogao de mommee e dugu ange aagena luoono vae.” 
Tagi Maolunga, hidi age humai gi doo mommee e hagamabu ai; go koe ma de ngavesi iai doo sauaa. 
Oo dangada haimeedabu gi kahu i de heohi; gai oo dangada dabu gi daahili i delaadeu malangilangi. 
Koe gi dee huli gee i de ia aau gu hagadabu i de lolo, i hiidinga o doo dangada hai hegau go David. 
Tagi Maolunga ne hagatoo donu ange gi David i de muna abodonu, gai ia e dee sui naa donu dana hagatoo donu: “Au e hai naa dahi oo hagadiilinga gi noho i honga doo nohoanga hodooligi. 
Noo au dama e daohi dagu hagatoo donu hagaheloongoi, ma muna aagu e agoago ange gi gilaadeu, gai alaadeu dama e dagi naa i doo nohoanga ga hano ai e dee ngado mai.” 
Go hiidinga Tagi Maolunga gu hili Zion; ia ne lodo danuaa i de hai ai dono mommee e noho ai: 
“Deenei dogu mommee noho ga hano ai; go kinei oogu e noho ai i hiidinga go de mommee oogu e lodo ai. 
Au e hagamanuuia naa de mommee nei i tau gai laumalie; Au e hai naa gi boobosu de gau hagaau aloha i kilaa. 
Au e hakahu naa ono dangada haimeedabu i de hagaola, gai ono dangada dabu e daahili naa i delaadeu malangilangi. 
Au e hagasula age naa dahi hagadiilinga o David gi hodooligi i kilaa; ma de hagaduu age dahi laama ange gi de ia aagu e hagadabu i de lolo. 
Au e hai naa gi dookaa ono hagadaumee, aagai de hau hodooligi i honga dono biho e hagadagadaga age naa.” 
