﻿Psalm.
128.
Se daahili ange gi de loage ⌊e hulo gi Jerusalem⌋ E manuuia gilaadeu alodahi e maatagu i Tagi Maolunga, ma de seesee i ono haiava. 
Koe e gai naa hua o au hegau, gai koe manuuia naa ma de duadonu. 
Doo bodu e bei naa de grapevine e hua lagolago i doo hale; au dama e bei naa denga uli o de olive i luu baasi doo deebele. 
Tilo, tangada e madagu i Tagi Maolunga e manuuia. 
Tagi Maolunga gi hagamanuuia ina goe mai i Zion, gai koe gi gidee de duadonu o Jerusalem i taulooloa o doo mouli. 
Koe gi mouli ga dae ai gi dau gidee dama a au dama. De baba gi dagodo i Israel! 
