﻿Psalm.
126.
Se daahili ange gi de loage ⌊e hulo gi Jerusalem⌋ De masavaa a Tagi Maolunga ne hagaahe ange ai de manuuia o Zion, gai gimaadeu ne bei dagodo o dangada e midi. 
Gai gimaadeu ne kada i demaadeu malangilangi, ma de hevaalogi ga malangilangi; gai dangada i denga huaahenua ne hagataba, “Tagi Maolunga gu hai dahi hegau hagalele mouli ange gi gilaadeu.” 
Tagi Maolunga gu hai dahi mee hagalele mouli mai gi gimaadeu, gai gimaadeu gu malangilangi. 
Tagi Maolunga, hagaahea mai demaadeu manuuia, bei dagodo o de vai e hagahonu age laa i Negev! 
Gilaadeu e doo ma de tangi e hagihagi naa i de malangilangi. 
Tangada e sao ga hano i de dangi ma de saabai ana golee e doo ga hano ai, e aahe mai naa donu i de malangilangi, ga saabai mai ana noodangaa grain madali ia. 
