﻿Psalm.
113.
Duuhia Tagi Maolunga! De gau hai hegau o Tagi Maolunga, duuhia ia, duuhia de ingoo o Tagi Maolunga. 
Hagadegi ina de ingoo o Tagi Maolunga mai iainei ga hano ai e dee ngado mai. 
Gai hagadegi ina de ingoo o Tagi Maolunga mai i de sobo age o de laa ga dae ai gi de danu! 
Tagi Maolunga e aamua ange i denga huaahenua alodahi, dono mahamaha e maolunga ange i de langi. 
Gai goai e bei dagodo o Tagi Maolunga taadeu Maadua; go de ia e noho i dono nohoanga maolunga, 
gai go de ia e ino iho e tilo honga de langi ma henua i lalo? 
Ia e hai gi hiihidi age de gau hagaau aloha mai i lodo gelegele, gai e hai gi tuu age gilaadeu e duasala mai i lodo lehu; 
ia e hai gilaadeu gi nnoho madali de gau aamua, madali gilaadeu e dagina ono dangada. 
Ia e gaavange naa gi de hine dee hua dahi huaabodu, gai ia gi se dinana e malangilangi i ana dama. Duuhia Tagi Maolunga! 
