﻿Psalm.
85.
Ange gi tagi o taahili. Se Psalm nii de aamuli o Korah Tagi Maolunga, koe gu abodonu ange gi doo henua; koe gu hagaahe ange de manuuia o Jacob. 
Koe gu degi ange gi baubau o oo dangada; ma de haoli olaadeu haisala alodahi. Selah 
Koe ne tuu doo bole alodahi gai ne huli gee mai i doo lili laumalie. 
De Maadua, demaadeu Ia Hagaola, hagaola ina gimaadeu, gai hagahelui ina doo dee malangilangi i gimaadeu! 
E aha, koe ga lili naa i gimaadeu ga hano ai? Koe ga duudagi naa doo bole i denga atangada alodahi? 
E aha, koe e dee ahe ange e hagaola mai gimaadeu, gi malangilangi ai oo dangada i oo hiidinga? 
Tagi Maolunga, koe gi abodonu mai gi gimaadeu, gai hagaola ina gimaadeu. 
Au e hagallongo muna a de Maadua, Tagi Maolunga e tala; ia e hagatoo donu ange gi ono dangada de nnoho paba, go ono dangada dabu, aagai gilaadeu gi dee aahe ange gi hai hegau i de llodo ssenga. 
Ni muna abodonu, dana hagaola e dee mmao gee donu i gilaadeu e maatagu i de ia, gi dagodo ai de mahamaha o Tagi Maolunga i honga taadeu henua. 
De aloha ma de hai hegau i de muna abodonu gu hedae ange; gai de heohi ma de baba gu hagadau oso. 
De hai hegau i de mee abodonu e hanage i henua i lalo, gai de heohi e galo iho i de langi. 
Tagi Maolunga e gaamai de mee danuaa, gai demaadeu gelegele e hhua lagolago naa. 
De heohi e hano i ono mada i mua, e hagadabena ai dono haiava e seesee ai. 
