﻿Psalm.
63.
Se Psalm nii David, i de masavaa oona ne noho ai i de vao o Judah De Maadua, go koe dogu Maadua, au e hagaduu ngae e ssala goe; dogu hagasaalunga e lodo mmao i de goe; dogu angaanga e buliaamou mmao i de goe, i de henua mmasa ma de hagadaalea, go de mommee e deai vai iai. 
Au ne gidee goe i doo mommee dabu, ma de tilo doo sauaa aama doo mahamaha. 
Go hiidinga doo abodonu e danuaa ange i de mouli; au e hagamahamaha goe i dogu ngudu. 
Au e tuhi goe i taulooloa dogu mouli, au e haalo luoogu lima gi lunga e hagahi ai doo ingoo. 
Au e bosu naa i de gai mee moomuna; au e daahili naa ga hagadegi goe. 
Au e manadua goe i dogu dagodo i ogu moenga; au e hagamaumau oo dagodo i de masavaa dagitilo i denga boo. 
I hiidinga go koe dogu bale, au e daahili naa ma de malangilangi i lalo de malu o luoo bakau. 
Au e hagapigi adu gi de goe; gai doo lima madau e daohi au. 
Gilaadeu e llodo e kave dogu mouli, e odi naa i de hulo gi tagelo o henua i lalo. 
Gilaadeu e daia naa ga maakau i de gadilaasa, gai olaadeu angaanga e gaina naa i denga manu aada. 
Aagai de hodooligi e malangilangi i de Maadua; dangada alodahi e hagatoo donu i de ingoo o de Maadua e tuhi naa ia, gai de gau hadu muna e pono naa olaadeu ngudu. 
