﻿Psalm.
62.
Ange gi tagi o taahili; e hua i de leo o Jeduthun. Se Psalm nii David Go de Maadua donu huu aagu e tali ange; gai go ia donu e hagaola ina mai au. 
Go ia donu huu dogu baba makaga ma dogu hagaola; go ia dogu mommee buibui makaga; au e dee ngalungalue donu. 
Dee hee maa taulooloa doodou hebagi ange e daa dahi dangada? Ia e bei de buibui gu singa laa, ma de buibui gu daudau iho laa gi lalo. 
Gilaadeu gu nnoho e aau gee ia mai i dono duulanga maolunga; gilaadeu e malangilangi i denga muna hhadu. Gilaadeu e hagamanuuia dangada i alaadeu muna, aagai olaadeu lodo e hagamalaia gilaadeu. Selah 
Dogu hagasaalunga, go de Maadua donu huu aagu e tali, gai go ia dagu tali hagalodolodo. 
Go ia dogu baba makaga ma dogu hagaola, go ia dogu mommee buibui makaga; au e dee ngalungalue donu. 
Dogu hagaola ma dogu hagadubu go de Maadua e gaamai; go ia dogu baba makaga, ma dogu mommee mmuni. 
Ogu dangada, goodou hagadonusia ia i masavaa alodahi; daalaa ange gi de ia mee i oodou lodo; go hiidinga go de Maadua taadeu buibui. Selah 
De gau maolalo e bei dagodo o dahi damaa madangi; de gau maolunga e bei dagodo o de mee hagasenga. Gilaadeu e bei denga mee maamaane i honga mee hagahidi; gilaadeu alodahi e maamaane ange i dahi damaa madangi. 
Aude hagadonusia denga goloa e hai gi de mahi, aude tali hagalodolodo ange gi denga goloa gaiaa; koe gi dee nnoo ange gi oo goloa, e dee galemu donu de lagolago oo goloa. 
De Maadua gu tala muna i dahi hanonga; gai au gu langona ana muna i de lua hanonga: bolo koe, de Maadua, e mmahi mmao, 
gai koe, de Ia Aamua, e lodo aloha mmao. Koe e sui ange mee a tangada gu hai gi bei dagodo o ana hegau. 
