﻿Psalm.
46.
Ange gi tagi o taahili. Se Psalm nii de aamuli o Korah. E hua madali de Alamoth Go de Maadua taadeu buibui ma odaadeu mahi, gai se ia e balea mai i de masavaa hai ngadaa. 
Deelaa ai, gimaadeu e dee maatagu donu, e dee galemu donu de ngalue o de henua, gai denga mounga e tili ange gi lo te moana, 
gai ga hagalongaa naa donu ma de beabeau tai, gai denga mounga e ngalungaalue i de hagahonu age o tai. Selah 
E dahi saalingaa vai e sali mai ma e hagamalangilangi de aduhale o de Maadua, go de mommee dabu e noho ai laa de Ia Maolunga Mmao laa. 
De Maadua e noho i kilaa, de aduhale laa e dee maua naa donu gi baguu; gai de Maadua e bale ange de aduhale laa i de ao de mee. 
Denga huaahenua gu hellumi, denga nohoanga hodooligi gu baakuu; gai henua i lalo e vaivai i dono masavaa e basa ai. 
Tagi o denga hagabuulinga hebagi e madali gimaadeu; de Maadua o Jacob go demaadeu mommee buibui makaga. Selah 
Loomai mage diiloo hegau a Tagi Maolunga, ia gu hai gi ngadi dagodo henua i lalo. 
Ia e hai naa gi deai hebagi i henua i lalo alodahi; ia e hadihadi de mee hholu ma ono dao, ia e dudu denga hada hebagi i de ahi! 
“Goodou nnoho ma gi dee mmuu, gai goodou gi iloo bolo go au donu de Maadua. Denga huaahenua e hagaamua naa donu au, henua i lalo e hagaamua naa donu au.” 
Tagi o denga hagabuulinga hebagi e madali gimaadeu; de Maadua o Jacob go demaadeu mommee buibui makaga. Selah 
