﻿Psalm.
29.
Se Psalm nii David De gau de langi, goodou gaavange gi Tagi Maolunga de tuhi i dono mahamaha ma dono mmahi. 
Gaavange de tuhi gi de ingoo mahamaha o Tagi Maolunga, gai daumaha ange gi Tagi Maolunga i malo dabu. 
De leo o Tagi Maolunga i honga denga vai; de leo o de Maadua o de mahamaha e bei denga hatuli, Tagi Maolunga i honga vai lagolago. 
De leo o Tagi Maolunga e mmahi mmao, de leo o Tagi Maolunga e maolunga. 
De leo o Tagi Maolunga e hadihadi denga cedar; Tagi Maolunga e hadihadi iho denga cedar o Lebanon. 
Ia e hai Lebanon gi lellele saele bei de kaau gauligi, gai Sirion e bei dahi kaau gauligi e aada laa. 
De leo o Tagi Maolunga e hagalabalaba denga uila. 
De leo o Tagi Maolunga e hagangalungalue de vao, Tagi Maolunga e hagangalungalue de vao go Kadesh. 
De leo o Tagi Maolunga e hai gi haanau denga dia, ma de aau gee lau o manu ssomo i lodo mee muimui. Gai dangada alodahi i lo tono temple gi hagataba, “Ia e mahamaha!” 
Tagi Maolunga e noho i honga vai o tolona; Tagi Maolunga gu hodooligi ga hano ai. 
Tagi Maolunga e hagammahi ono dangada; Tagi Maolunga e hagamanuuia ono dangada i de nnoho paba. 
