﻿Psalm.
24.
Se Psalm nii David Henua i lalo ma mee alodahi iai nii Tagi Maolunga, ma honga henua ma dangada alodahi e nnoho ai; 
i hiidinga go ia ne haia de mee nei i honga tai, ma de hagaduu i honga denga saalingaa vai. 
Goai e maua i de hanage gi de mounga o Tagi Maolunga? Gai goai e maua i de duu i dono mommee dabu? 
Go tangada e gilimalali luoono lima ma ono lodo; ia e dee daumaha ange gi dahi diinonga i ono lodo, aabe e hagatoo donu i dahi mee hhadu. 
Tangada bee nei e kave naa de manuuia mai i daho Tagi Maolunga, gai de Maadua dono hagaola e tala naa bolo ia e heohi. 
Aanei dagodo o de atangada o dangada e saalaa ia, go gilaadeu e saalaa luu mada o de Maadua o Jacob. Selah 
Denga haitoga o de aduhale, maahuge mai; denga abaaba madagidagi, maahuge mai, gai de Hodooligi o de mahamaha ga ulu mai. 
Goai de Hodooligi o de mahamaha nei? Go Tagi Maolunga mmahi ma de sauaa laa, go Tagi Maolunga e mmahi laa i de hebagi. 
Denga haitoga o de aduhale, maahuge mai; denga abaaba madagidagi, maahuge mai, gai de Hodooligi o de mahamaha ga ulu mai. 
Goai de Hodooligi o de mahamaha nei? Go Tagi o denga hagabuulinga hebagi, go ia de Hodooligi o de mahamaha! Selah 
